The Old Testament of the Holy Bible

Genesis 1

1 A tira Pathienin hnuoi le vàn a'n umtir lai chun, 2 khawvel chu ruongâm mumal la nei loa ruok el a ni a, tui inthûk tak chu inthimin a bawm a, tui chunga chun Pathien Thlaraua a'n lèng vel a. 3 Pathienin, "Var hung um raw se" a ta, chuongchun var a hung um a. 4 Pathienin var chu a en a, tha a ti hle a, var le inthim chu a the hrang a. 5 Pathienin var chu 'sùn' a'n bùk a, thim chu 'zàn' a'n bùk a. Chuongchun, zàn tieng a um a, zîng tieng a um bok a, chu chu a ni khatna a nih. 6 Chun Pathienin, "Tui le tui inkârah boruok zâu tak, vàn inkûm kul um sien la, tui le tui chu thè raw se" a ta. 7 Chuongchun, Pathienin boruok zâu tak a'n umtir a, vànkhup hnuoia tui le vànkhup chunga tui chu a thè a, chuong ang chun a hung um a. 8 Pathienin vànkhup zâu tak chu 'vàn' a'n bùk a. Chuongchun, zàn tieng a um a, zing tieng a um bok a, chu chu a ni hnina a nih. 9 Chun Pathienin, "Vànkhup hnuoia tui po po chu hmun khatah intling khawm sien, khawmuol hung inlang raw se" a ta. Chuong ang chun a hung um a. 10 Pathienin khawmuol chu 'hnuoi' a'n bùk a, tui intling khawm chu 'tuifinriet' a'n bûk bok a. Pathienin a en a, tha a ti hle a. 11 Chun, Pathienin, "Hnuoiin thlai hring insuo sien la, anni ding ang senga mal neia ra chi hlo le thlai dâm, anni ding ang senga mu neia rà chi thei kung dâm, insuo raw hai se" a ta. Chuong ang chun a hung um a. 12 Chuongchun hnuoiin thlai hring insuoin, anni ding ang senga mal neia rà chi thlai dâm, anni ding ang senga mu neia rà chi thei kung hai dâm chu hnuoiin a hung insuo a. Pathienin a en a, tha a ti hle a. 13 Chuongchun, zàn tieng a um a, zîng tieng a um bok a, chu chu a ni thumna a nih. 14 Chun Pathienin, "Sùn le zàn thètu dingin vànkhup zâu takah elvartu um hai sien la, chuonghai chu hun bi hai, ni hai le kum hai inchikna ni hai sien la, 15 vàn zâuah hnuoi elvartu dingin um raw hai se" a ta, chuong ang chun a hung um a. 16 Pathienin var ropui pahnih, a var lem chu sùn roreltu ding le a var naw lem chu zàn roreltu dingin, a siem a, arasi dâm a siem bok a. 17 Chuonghai chu hnuoi elvartu ding dâm, 18 sùn le zàn chunga roreltu ding dâm le var le thim thètu ding dàmin Pathienin vànah a sie a. Pathienin a en a, tha a ti hle a. 19 Chuongchun, zàn tieng a um a, zing tieng a um bok a, chu chu a ni lina a nih. 20 Chun Pathienin, "Tuiin thilhring insuo teu sien la, hnuoi chung boruok incham duoiah vate ruol vuong nuk nuk raw hai se" a ta. 21 Chuongchun, Pathienin tuipuia chêng thilhring lien tak tak le tuia chêng thilhring chi tin inzi mur mur elhai chu an ni um dàn ding ang sengin a'n umtir a, thla neia vuong vate chi tinrêng khom an ni um dàn ding ang sengin a'n umtir bok a. Pathienin a en a, tha a ti hle a. 22 Pathienin, "Chi tam tak thlain hung pung unla, tuifinriet hi hung hluo sip unla, vate khom hnuoiah hung pung raw hai se" tiin mal a sawm a. 23 Chuongchun, zàn tieng a um a, zîng tieng a um bok a, chu chu a ni ngana a nih. 24 Chun, Pathienin, "Anni chi um dàn ding ang senga siem thilhringhai, hnuoia tla chi ran hai, bokvâka invâk thilhring chi tinrêng hai le ramsa hai chu hnuoiin hung insuo raw se" a ta. Chuong ang chun a hung um a. 25 Chuongchun, Pathienin ram sahai chu anni chi um dàn ding ang sengin, ranhai chu anni chi um dàn ding ang sengin, hnuoia bokvâka invâk chihai po po chu anni chi um dàn ding ang sengin a siem a. Pathienin a en a, tha a ti hle a. 26 Chun, Pathienin, "Eini angin, eini angpuiin mihriem siem ei tiu, anni chu tuifinrieta ngáhai chunga dâm, chungleng vatehai chunga dâm, hnuoi chung po poa ranhai le ram sahai chunga dâm le hnuoi chunga bokvâka invâk po pohai chunga dâm thu inneitir ei tiu" a ta. 27 Chuongchun Pathienin ama angpuiin mihriem a siem a, Pathien angpuiin a nih pasal le nuhmei a siem. 28 Pathienin anni chu mal a sawm a: "Chi tam tak thlaa pungin, hnuoi hi hung hluo sip unla, in thu hnuoiah sie ro. Tuifinrieta ngáhai chunga dâm, chungleng vatehai chunga dâm le hnuoi chunga invâk thilhring po po chunga dâm thu nei bok ro" a ta. 29 Chun, Pathienin, "Ngai ta u, in fâk dingin hnuoia thlaihai, mal neia ra chihai le thing, mu neia ra chi taphothai chu ka pêk cheu. 30 Chun, hnuoia sa tinrêng, chunglêng va tinrêng, hnuoia bokvâka invâk thilhring tinrêng le hringna nei tinrêng kuomah an bu dingin hna hring tinrêng ka pêk a nih" a ta. Chuong ang tak chun a hung ni a. 31 Pathienin a thilsiem tinrênghai chu a en a, ngai ta, tha a ti takzet a. Chuongchun, zàn tieng a um a, zîng tieng a um bok a, chu chu a ni rukna a nih.

Genesis 2

1 Chuongchun, hnuoi le vàn le thil iengkim chu siem zo a ni ta a. 2 Pathienin a thilsiem sin a zo fel tah leiin a ni sarina ni chun a chawl a. 3 A thil inumtir le siem sin po po a chawlsan tàk leiin Pathien chun ni sarina chu mal a sawm a, a'n ser thienghlim a. 4 Chu chu hnuoi le vàn hung um dàn tobul chanchin chu a nih. 5 Hnuoi le vàn siem a ni lai chun, hnuoia hin hna hring hrim hrim a la um naw a, thlai hrim hrim a la to bok nawh. LALPA Pathienin hnuoi chungah ruo a la'n sùrtir naw a, hnuoi inlettu ding mihriem an la um bok nawh. 6 Amiruokchu, hnuoia inthokin tui hù a hung suok a, chu chun hnuoi chu a sukhnawng a. 7 Chun, LALPA Pathien chun hnuoia pilvutin mihriem a siem a, a hnârah hringna thuok a'n thuok khum a, mihriem chu mihring a hung ni ta a. 8 LALPA Pathienin sak tieng Edena chun huon a siem a, chu taka chun a mihriem siem chu a sie a. 9 Chu huona chun LALPA Pathienin thing mawi tak tak le rà inhnik tak tak a'n totir a, huon lailung taka chun hringna thing le a sie le a tha hriet theina thing a sie bok a. 10 Huon sukhnawngtu dingin Edena chun vadung a luong a, chu taka inthok chun vadung paliin a pêng dar a. 11 Vadung pakhatna chu Pison a na, rangkachak tamna Havila ramah a luong kuol a. 12 Chu rama rangkachak chu rangkachak tha chi a na, lunghlu bedolak le berul khom a um a. 13 Vadung pahnina chu Gihon a na, chu chun Kus ram a luong tlang a. 14 Vadung pathumna chu Tigris a na, chu chu Asuria suo tieng a luong a. Vadung palina chu Eufratis a nih. 15 LALPA Pathien chun mihriem chu a thuoi a, Eden Huona sinthawtu ding le huon enkoltu dingin a sie a. 16 LALPA Pathien chun mihriem kuomah, "Hi huona thei rahai hi a ieng khom i fâk thei a, 17 sie le tha hrietna thei ra ruok hi chu i fâk ding a ni nawh, i fâk chun thi ngei ngei i tih" tiin thu a pèk a. 18 LALPA Pathien chun, "Ama chaua pasal a um hi a tha nawh, a thangpuitu ding koppui ditum siempêk ka tih" a ta. 19 LALPA Pathien chun pilin ram sa tinrêng le chunglêng vatehai chu a siem a, an hming lo sakpêk dingin Adam kuomah a thuoi a, thilhring tinrênghai chun hming a lo sakpêk ang peiin an hung put song tah a. 20 Chuongchun, Adam chun ran po po hai, chunglêng vate tinrêng le ram sa tinrênghai hming chu a sakpêk ta vong a nih. Amiruokchu, Adam ta dingin koppui ding awm hrim an um si nawh. 21 Chuongchun, LALPA Pathienin Adam chu imu indên takin a'n intir a, a in lai chun a nâkru laia pakhat chu a lâk suok a, chu hmun chu a taksain a sukbit nawk a. 22 Adam nâkru a lâka inthok chun LALPA Pathienin nuhmei a siem a, Adam kuomah a thuoi a. 23 Adam chun, "Hi zet hi chu ka ru ang ru nei, ka taksa ang taksa put a nih. Pasala inthoka lâk suok a ni leiin 'Nuhmei' ti nîng a tih" a ta. 24 Hi lei hin pasalin a nu le pa màksanin a nuhmei chel a ta, b taksa pum khat hung ni tàng an tih. 25 Chun, Adam le a nuhmei chu saruokin an um a, sienkhom an inzak nawh.

Genesis 3

1 LALPA Pathienin ramsa a siem po pohai lai rûl chu a var vervêk tak a. Rûl chun nuhmei kuomah, "Pathienin, 'Huona thing rahai hi in fâk a thieng nawh' a ti chie maw?" a ta. 2 Nuhmei chun rûl kuomah, "Ti lo e. Huona thing rahai hi kan fâk thei annawm; 3 huon lailunga thing ra ruok hi chu Pathienin, 'In fâk ding a ni naw a, tawk khom in tawk ding a ni bok nawh, chuong naw chun thing in tih' a ti a nih" a ta. 4 Rûl chun nuhmei kuomah, "Thi teu hlak inti'm ie! 5 In fâk pha in mit hung inhong a ta, a sie a tha hrein Pathien ang in hung ni ding ti Pathienin a hriet lei a ni chu" a ta. 6 Nuhmei chun thing ra chu thei tuihnai, inhnik tak, var theina dinga fâk châkum hlie hliea a hmu leiin a then a lo a, a fâk a, a kuoma um a pasal khom chu a pêk a, a fâk ve a. 7 An pahni chun an mit a hung inhong a, saruok an nih ti an hung inhriet a, theichang hna an thui khawm a, anni silfèn dingin an siem a. 8 Zàn tieng ni nèma huona LALPA Pathien leng ri Adam le a nuhmeiin an hriet chun huona thing bukah LALPA Pathien chu an inbìkrûksan a. 9 LALPA Pathien ruok chun, "Khaw la'm i um tah a?" tiin Adam chu a ko a. 10 Ama chun, "Huonah i ri ka hriet a, saruok ka ni leiin ka ti a, chuleiin ka'n bi a nih" a ta. 11 Pathien chun, "Saruok i nih ti tuin am a hril che a? Fa dêr lo dinga thu ka pêk che thing ra kha i fâk am a ni?" a ta. 12 Adam chun, "Ka umpui dinga i mi pèk nuhmei khan thing ra chu a mi pèk a, ka fâk annawm" a ta. 13 LALPA Pathien chun nuhmei kuomah, "Ieng top am a na i thaw ta hi?" a ta. Nuhmei chun, "Rûlin a mi dawha a, ka fâk el a nih" a ta. 14 Chun, LALPA Pathien chun rûl kuomah, "Hieng thil hi i thaw leiin, ran po po le ram sa tinrênghai lai tongsie phur chungchuong i tih. Bokkhupin intawl i ta, i dam sûngin pilvut hap i tih. 15 Nuhmei leh inhmèlmâktir ka ti che a, i thla le a thlahai chen khom indotir ka ta; ama pa chun i lu la vaw hawp a ta, a kekhongah chuk ve thung i tih" a ta. 16 Nuhmei kuoma chun, "I nau nei nasa takin sukharsâng ka ta, inrim taka na tuorin nau nei i tih. Chuong sa khom chun i thlâkhla chu i pasal nîng i ta, i chungah thu nei a tih" a ta. 17 Adam kuoma chun, "I nuhmei thu i ngàithlàk a, fâk lo dinga ka ti che thei ra chu i fâk leiin, nangma leiin hnuoi hi tongsephurin a um tah a nih; i dam sûngin i sin inrim ra chu fa tang i ta; 18 hnuoiin hling le buor insuong a ta, i huon thlai chu fa tang i tih. 19 I hung suokna pila bok i kîr nawk hma khat chun hmaia thlan tui luong zoi zoiin fâk zong i ta; pila inthoka siem i ni leiin pila bok kîr nawk i tih" a ta. 20 Adam chun a nuhmei chu mihring po po nu la ni ding a ni leiin a hmingah Evi a sak a. 21 Pathien chun Adam le a nuhmei chu savun korfuol a siempèk a, a'n hàktir a. 22 Chun, LALPA Pathienin, "Ngai ta u, mihriem chu eini ang boka sie le tha hrie a hung ni ta leiin, hringna thing ra chu a kuta loa fain, chatuonin hring pal hlauh rawi a tih" a ta. 23 Chuongchun, LALPA Pathien chun ama a lâk suokna hnuoi chu inlet dingin Eden huona inthok chun a hnot suok a. 24 Mihriem a hnot suok hnung chun hringna thing panna lampui vêngtu dingin Eden huon sak tieng chun cherubhai le mei kawlhnâm inhlap ton zor zor chu a sie a.

Genesis 4

1 Adam chun a nuhmei Evi chu a pawl a, nau a pâi a, "LALPA zàrin nau pasal ka nei tah" a ta, a hmingah Kaina a sak a. 2 A hnungah Abel a hung nei nawk a. Abel chu beram vèngtu a na, Kaina chu lo neitu a nih. 3 Iemani chen hnungah Kaina chun LALPA kuoma inhlàn dingin a lo tharsuok thenkhat a hung chawi a. 4 Abel khomin a beram ruol laia pieng hmasa tak le thau tak chu a hung chawi bok a. LALPA chun Abel le a thil inhlàn chu a lawm a, 5 Kaina le a thil inhlàn ruok chu a lawm nawh. Chuongchun, Kaina lung chu a sen hle a, a hmel a'n tûr ngul el a. 6 LALPA chun Kaina kuomah, "Ieng dinga i lung a sen am a na? Ieng dinga i hmel a'n tûr am? 7 Thil indik i thaw chun, lawm i hlaw naw ding am a ni? Thil indik lo i thaw ruok chun suolin i kot bulah a'n chân zing che a nih; a dit tak chu nangma hi i ni a, sienkhom i thuhnè ding a nih, " a ta. 8 Chun, Kaina chun a sang Abel kuomah, "Loah fèng ei tih" a ta. Loa an um lai chun Kaina chu a sang chungah a tuong a, a that el ta a. 9 LALPA chun Kaina kuomah, "Khaw la'm i sang Abel a um tah a?" a ta. Ama chun, "Ka hriet lê! Ka unaupa vèngtu am ka nih?" a ta. 10 LALPA chun, "Ieng thil top am i thaw an ta le? Ngai ta, i sang thisen chun hnuoia inthokin a mi hung ko a nih. 11 Tu hin i kuta inthoka far thla i sang thisen lo dongtu leihnuoia inthokin tongsephur i ni tah. 12 Hnuoi inlet la khom, i ta dingin a hàngna insuopêk ta naw ni che. Hnuoia hin chanhai takin vâkvài tâng i tih" a ta. 13 Kaina chun LALPA kuomah, "I mi hremna hi a na êm a, tuor zo naw ning. 14 Ngai ta, voisun hin hi rama inthok hin nangin i mi hnot suok a, i hmu phâk loah umin, hnuoia hin chanhai takin ka'n vâkvài ta ding a na, chuleiin a mi hmutu chun mi that el an tih" a ta. 15 LALPA chun a kuomah, "That lo e! Kaina thattu taphot chu a lêt saria thungrul nîng a tih" a ta. Tu khomin an hmua an that nawna dingin Kainaa chun LALPAN inchikna a siepèk a. 16 Chuongchun, Kaina chu Pathien ângsûnga inthok chun a suok a, Eden suo tieng Nod ramah umhmun a khuor ta a. 17 Kaina chun a nuhmei a pawl a, nau a pai a, Enok a nei a. Chuong lai chun Kaina'n khuo a'n din a, a naupa hming chawiin Enok a'n bûk a. 18 Enok chun Irad a thla a; Irad chun Mehujael, Mehujael chun Methusael, Methusael chun Lamek. 19 Lamek chun nuhmei pahni a nei a, pakhat hming chu Ada a na, a dang hming chu Zila a nih. 20 Ada chun Jabal a hring a, Jabal thlahai chu puon inah khawsaa ran vai hlak mi an nih. 21 Jabal unaupa hming chu Jubal a na, ama chu tingtang le theihle tumtu pawlhai thlatu a nih. 22 Zila chun nau pasal dang, a hming Tubal-Kaina a nei a, ama chu dâr le thîr hmangruo tinrêng suttuhai thlatu a nih. Tubal-Kaina farnu chu Naama a nih. 23 Lamek chun a nuhmeihai kuomah, "Ada le Zila, mi lo ngaithla ro. Lamek nuhmeihai, ka thu lo ngaithla ro. Ami'n hliemtu tlangval chu ka that, Mi'n hliemtu tlangval ngei chu; 24 Kaina thattu a lêt saria rul a ni chun, Lamek thattu chu voi sawmsari pasarih" a ta. 25 Adam chun a nuhmei a pawl nawk a, nau pasal a hring a, "Kainan Abel a that hnungin, a aia chi thlatu ding Pathienin a mi pêk a nih" a ta, a hmingah Set a sak a. 26 Set khomin nau pasal a nei a, a hmingah Enos a sak a. Chuong lai chun mihaiin LALPA hming an hung lam tan ta a.

Genesis 5

1 Hi hi zieka Adam thlahai suina chu a nih. Pathienin mihriem a siem khan Adam thlahai chu Ama angpui ngeiin a siem a. 2 Pasal le nuhmei a siem a, anni chu mal a sawm a. Siema an um chun an hmingah 'Mihring' tiin a'n bùk a. 3 Adam chun kum za le sawmthum a niin ama ang, ama angpui ngei nau pasal a hung nei a, a hmingah Set a sak a. 4 Set a pieng hnung hin Adam chu kum zariet a la dam a, nau nuhmei le nau pasal dang khom a nei nawk a. 5 Adam chu kum zakuo le sawmthum a dam hnungin a thi a. 6 Set chun kum za le panga a niin nau pasal Enos a nei a. 7 Enos pieng hnungin Set chu kum zariet le pasarih a la dam a, nau nuhmei le nau pasal dang khom a nei nawk a. 8 Kum zakuo le sawmpahnih a dam hnungin Set chu a thi a. 9 Enos chun kum sawmkuo a niin nau pasal Kenan a nei a. 10 Kenan pieng hnungin Enos chu kum zariet le sawmpanga a la dam a, nau nuhmei le nau pasal dang khom a la nei tawl a. 11 Kum zakuo le panga a dam hnungin Enos chu a thi a. 12 Kenan chun kum sawmsari a niin nau pasal Mehalalel a nei a. 13 Mehalalel pieng hnungin Kenan chu kum zariet le sawmli a la dam a, nau nuhmei le nau pasal dang khom a nei nawk a. 14 Kum zakuo le sawm a dam hnungin Kenan chu a thi a. 15 Mahalalel chun kum sawmruk le panga mi a niin nau pasal Jared a nei a. 16 Jared pieng hnungin Mahalalel chu kum zariet le sawmthum a la dam a, nau nuhmei le nau pasal dang khom a la nei nawk a. 17 Kum zariet le sawmkuo le panga a dam hnungin Mahalalel chu a thi a. 18 Jared chun kum za le sawmruk le pahni a ni kumin nau pasal Enok a nei a. 19 Enok pieng hnungin kum zariet a la dam a, nau nuhmei le nau pasal khom a nei nawk a. 20 Kum zakuo le sawmruk le pahnih a dam hnungin Jared chu a thi a. 21 Enok chun kum sawmruk le panga a niin nau pasal Methusel a nei a. 22 Methusel pieng hnungin Enok chu kum zathum LALPA leh an intlon a, nau nuhmei le nau pasal dang khom a nei nawk a. 23 A dam kum po po chu kum zathum le sawmruk le panga a nih. 24 Enok chu Pathien leh an intlon hlak a; chun, a um ta naw a, Pathienin a lâk hmang tah a nih. 25 Methusel chun kum za le sawmriet le pasarih a niin nau pasal Lamek a nei a. 26 Lamek pieng hnungin kum zasari le sawmriet le pahnih a la dam a, nau nuhmei le nau pasal dang khom a la nei nawk a. 27 Kum zakuo le sawmruk le pakuo a dam hnungin Methusel chu a thi a. 28 Lamek chun kum za le sawmriet le pahnih a niin nau pasal a nei a. 29 LALPA tongsie inphur hnuoia ei kut sinthawna le inrimna laka inthokin ama hin mi sawk zângkhài tâng a tih a ta, a naupa hmingah Nova a sak a. 30 Nova pieng hnungin Lamek chu kum zanga le sawmkuo le panga a la dam a, nau nuhmei le nau pasal dang khom a nei nawk a. 31 Kum zasari le sawmsari le pasarih a dam hnungin Lamek chu a thi a. 32 Nova chun kum zangaa upa a niin, nau pasal Sema, Hama le Jafet a nei a.

Genesis 6

1 Hnuoiah mihriem an hung pung pei a, nau nuhmei an hung hau ta hle a. 2 Pathien naupahai chun mihriem naunuhai chu hmel tha an ti a, an dit dit nuhmeiin an nei a. 3 Chuongchun Pathienin, "Thi thei mihriem le ka Thlarau inhron kumkhuo zing thei naw nih; tuta inthok chu kum za le sawmhni bâk dam ta naw ni hai" a ta. 4 Chuong lai le chu hnunga khom, Pathien naupahaiin mihriem naunuhai chu pawla an lakah nau an nei hun lai chun milien, Nefelim an tihai chu hnuoiah an um a. Chuonghai chu tiena mi hrat khawkhèng le hmingthang hai kha an nih. 5 LALPA chun hnuoia mihriem suol nasat takzie le an ngaituonan ieng lai khom suol tieng a awnzie chu a hmu a. 6 Hnuoia mihriem a lo siem chu poi a ti a, a lungril a na hle a. 7 Chuongchun LALPA chun, "Mihriem hai, ramsa hai, hnuoia invâk le intawl thilhring hai le chunglêng vate ka siem hai hi nuoi bo el ka tih, ka lo siem tawl kha poi ka ti a nih" a ta. 8 Nova ruok chun LALPA mit a tlung a. 9 Hi hi Nova chanchin chu a nih. Nova chu mi fel tak, a dam ruolpuihai laia dem kai lo, Pathien le intlon hlak mi a nih. 10 Nova chun nau pasal pathum- Sema, Hama le Jafet- a nei a. 11 Hnuoi hi Pathien mithmuin a porche zo ta a, inpawngnêknain a sip a. 12 A hluotu mihriemhai um dàn porche leia hnuoi hang siet nasat takzie chu Pathienin a hmu zing a. 13 Chuongchun Pathienin Nova kuomah, "Mihriem po po hi ka sukchimit ding a nih, anni leiin hnuoi hi inpawngnêknain a sip zo ta si a. Anni ruolin a hnuoi chopin a nih ka suksiet ding chu. 14 Chuleiin, i ta dingin fâr thingin long siem la, chu taka chun pindan dâm siem la, a sûng tieng le puo tieng chu alkatarain zût phui vong rawh. 15 I bawl dàn ding chu hieng ang hin nîng a tih: long dung seizie chu meter za le sawmthum le pathum, a khang meter sawmhni le pahnih, a'n sàngzie meter sawm le pathum a ni ding a nih. 16 A chung khum siem i ta, a sîp tak chu centimeter sawmli le pali vela lien a ni ding a nih. Long sûng tienga inthoka hong theiin tukver siem i ta; chun a sawng hnuoihnung, a sawng lailung le a sawng chung i siem bok ding a nih. 17 Vànkhup hnuoia thuoka hring po po sukbohmang dingin hnuoia hin tui ka'n lêttir ding a nih; hnuoia thil um tinrêng hi se vong a tih. 18 Nang le ka thuthlung ruok chu suknghet zuol ka ta, nang le i nuhmei, i kuoma um i nauhai le i mohai khom longah lût vèng an tih. 19 Thilhring tinrêng laia mi an him theina dingin, a pui le a chal, a kop kim peiin longa chun i thuoi lût ding a nih. 20 Vate chi tinrêng, sa chi tinrêng, hnuoia invak thilhring chi tinrêng hai chu an him theina dingin a pui le a chal inkop peiin longa chun i thuoi lût ding a nih. 21 Nang le anni tlàk khop fâk ding chi tinrêng longah i sêk khawm bok ding a nih" a ta. 22 Pathien thupêk ang takin Nova chun iengkim a thaw a.

Genesis 7

1 LALPA chun Nova kuomah, "Nang le i sûnghai leh longah lût ta ro; nang chauh hi tuta thang le suonhai lai hin ka mithmuah mi fel um sun i ni si a. 2 Sa thieng tinrêng laia mi, a pui a chal inkop tuok sari peiin, sa thieng naw laia mi, a pui le a chal inkop tuok khat peiin, 3 chunglêng vate chi tinrêng laia mi, a pui le a chal inkop tuok sari peiin, hnuoiah chi thlaa an pung theina dingin, thuoi lût rawh. 4 Tuta inthoka ni sari zoah ni sawmli le zân sawmli sûng hnuoiah ruo insûrtir ka ta, ka thilhring siem tinrênghai hi hnuoia inthokin ka sukbo ding a nih" a ta. 5 Nova chun Pathienin thu a pêk ang charin a thaw a. 6 Hnuoia tui a lèt lai hin Nova chu kum zaruka upa a nih. 7 Tui a lèt ding leiin Nova le a nuhmei chu an naupahai le an nuhmeihai leh longa chun an lût a. 8 Sa thieng le thieng naw, chunglêng vate le hnuoia bokvâka invâk chi tinrênghai chu, a pui le a chal inkop peiin, 9 Pathien thupêk angin Nova ruolin longa chun an lût a. 10 Ni sari hnunga chun hnuoiah tui a hung lèt ta a. 11 Nova kum zaruk a ni kum, a thla hnina, ni sawm le ni sari ni ngei el chun, lipui inthûk kuonghai chu an hung tè ta hum hum a, vân tukverhai khom a hung inhong bok a. 12 Ni sawmli le zân sawmli zet hnuoiah ruopui vânawn a sûr a. 13 Chu ni ngei el chu a nih Nova le a nuhmei le an naupa pathum Sema, Hama le Jafet hai le an nuhmeihai po longa an lût ni chu. 14 Ram sa chi tinrêng, ran sa chi tinrêng, hnuoia bokvâka invâk chi tinrêng, chunglêng vate chi tinrêng le thla neia vuong hlak chi tinrêng hai chu an lût bok a. 15 Thuok laa hring po po chu nupa tuok peiin Nova kuomah longa chun an lùt a nih. 16 Nova kuoma Pathienin thu a pèk angin, longa lût taksa put hringna nei tinrênghai chu nupa tuok vong an nih. Chun, LALPA chun long chu a khârpêk ta a. 17 Ni sawmli sûng chu hnuoiah tui a lèt a, tui chu a hung lien tuol tuol a, long chu a tawm kâng a. 18 Tui chu a lien insâng pei a, hnuoi chungah a'n cham puou a, long chu tui chunga chun a'n làng a. 19 Tui chu a lien insâng êm leiin vànkhup hnuoia tlâng po po a chîm pil vong a; 20 meter sari nèka inthûkin tlâng insânghai khom a chîm pil a nih. 21 Hnuoi chunga khawsa thilhring po po- vate hai, ran ruol hai, ram sa hai, bokvâka invâk chi po po le mihriem po po chu an chimit vong a. 22 Hnàra thuok laa hring, khawmuola chêng po po khom an thi fai vong bok a. 23 Chuongchun, hnuoi chunga thilhring tinrêng um hai, mihriem hai, rannung hai, bokvâka invâk chi po po le chunglêng vate hai po po chu sukbohmangin an um a, Nova le longa a kuoma umhai chauh chu hlain an um tah a nih. 24 Tui chun ni za le sawmnga sûng hnuoi a chîm a.

Genesis 8

1 Pathien ruok chun Nova le longa um ram sa tinrêng le ran po po hai chu a hriet zing a. Pathien chun hnuoi chungah thli a'n hràngtir a, tui chu a hung kang tan a; 2 lipui kuonghai le vân tukverhai chu a hung inkhàr a, raw sùr khom a hung chàt ta a. 3 Tui chu damten a hung kang tiel tiel a, ni za le sawmnga hnunga chun tui chu a hung tlawm ta hle a, 4 a thla sarina ni sawm le ni sari chun long chu Ararat tlângah a'n nghat a. 5 Thla sawmnaa chun tui chu a hung kang pei a, thla sawmna ni khat ni chun tlâng sîphai khom a hung inlang ta a. 6 Ni sawmli hnungah Nova chun long tukver a siem kha a hong a, 7 vaak pakhat a'n vuong suoktir a, tui lèt a kang zo hmakhat chu a vuong kuol a vuong kuol a. 8 Chun, tuiin khawmuol a kangsan ta le ta naw enna dingin vathu a'n vuong suoktir a. 9 Khawmuol chu tuiin a la chîm vong leiin vathu chun fûkna ding a hriet naw a, long tieng a hung vuong kîr a, Nova chun a kut a lo daw a, a fu a, longa chun a làk lût nawk a. 10 Ni sari a nghâk a, vathu chu longa inthokin a'n vuong suoktir nawk a. 11 Vathu chu zàn tieng a hung vuong kîr a, ngai ta, oliv hna thlam thar hlol chu a hmûrah a hung put a! Chu phing leh hnuoi chungah tui a tlawm tah ti Nova chun a hriet ta a. 12 Ni sari dang a nghâk nawk a, vathu chu a'n vuong suoktir nawk a, hi tum hin chu a hung kîr nawk ta nawh. 13 Nova chu kum zaruk le kum khat a ni kum, a thla khatna ni khatnaa chun tui chu hnuoi chunga inthokin a kang ta a, chuongchun long inkhumna chu a hawk a, a hang ngha vel a, hnuoi chu a lo inhil ta huou a. 14 A thla hnina ni sawmhni le ni saria chun hnuoi chu a hul chieng ta a. 15 LALPA chun Nova kuomah, 16 Longa inthokin i nuhmei le i naupahai le an nuhmeihai leh suok ta ro. 17 I kuoma um, taksa put thilhring tinrêng- vate hai, rannung hai, hnuoia bokvâka invâk chi po po hai khom hung thuoi suok rawh, hnuoia hin tê hung nei a, chi tam taka an inthla pung theina dingin a ta. 18 Chuongchun, Nova chu a suok a, a naupahai, a nuhmei le a mohai khom an hung suok a; 19 sa tinrêng hai, rannung tinrêng hai, vate chi tinrêng hai, hnuoi chunga invâk thei taphot hai chu a chí chìin longa inthok chun an hung suok bok a. 20 Chu zoah Nova chun LALPA ta dingin maichàm a siem a, sa thieng le vate thieng laia mi a lâk seng a, maichàmah pumraw thilhlânah a'n hlàn a. 21 LALPA chun pumraw rimtui chu a lo hriet a, a lungrilin, "Hnuoi hi mihriem leiin tongsie inphur nawk ta ngai naw ning, mihriem lungril ngaituona chu a chîntea inthokin a suol si a; tuta ka hrem ang hin thilhring danghai khom hrem nawk ta bok naw ning. 22 Hnuoi hi a um sûng chun, Thlai chi thlak hun le sîk hun, Sik le sa, nipui le thlasik, Sùn le zan bo ngai naw nih, " a ta.

Genesis 9

1 Pathienin Nova le a nauhai chu mal a sawm a, "Chi tam tak thlaa hung pungin, hnuoi hi hluo sip ro. 2 Hnuoia sa tinrêng hai, chunglêng vate chi tinreng hai, hnuoia bokvâka invâk chi tinrêng hai le tuifinrieta nga chi tinrêng hai chun nangni tiin inzàng an ti cheu; anni chu in kutah ka pêk vong tah. 3 In fâk dingin thlai hring ka pêk cheu a, thil hring tinrêng le hringna nei po pohai khom fa thei in tih. 4 Amiruokchu, sa hring chu a thisen pumin in fâk ding a ni nawh. 5 Chun, in hringna thisen insuotu chu ramsa an ni amanih mihriem an ni amanih an chungah phuba la ngei ngei ka tih. 6 Tu khom mihriem thisen insuotu chu mihriem vêkin a thisen insuo vèng a tih; mihriem chu Pathien angpuia siem a ni si a. 7 Chi tam tak thlain hung pung unla, nau tam tak neiin hnuoi hung dâp suok ro" tiin. 8 Chun, Pathienin Nova le a umpui a nauhai kuoma chun, 9 Tu hin ngai ro, nangni le in thla pei hai kuoma khom keima ngeiin thu ka thlung nghet a nih. 10 Chu chu in kuoma um le longa inthoka in hung suokpui thilhring tinrêng hai, vate hai, ran hai, ram sa tinrêng le hi hnuoia thilhring chi tinrênghai laka khom ka thlung a nih. 11 In kuoma ka thuthlung ka vong zing ding chu hi hi a nih: Hring tinrêng nuoi bo dingin tui lêt nawk ta ngai naw ni a; hnuoi hi sukse dingin tui lêt nawk ta bok naw nih. 12 Chun, kei le nangni le thilhring tinrêng inkâra ka kumkhaw thuthlung inchikna chu hi hi a nih: 13 Sûma sumrisâng ka'n zàmtir hi kei le hnuoi inkâra ka thuthlung inchikna chu a nih. 14 Hnuoi chungah sûm ka hung tir chânga sumrisâng a hung inzâm zàtin, 15 kei le nangni le hring tinrêng kuoma ka thuthlung chu hre zing ka ta, hring tinrêng sukbohmang dingin tui lêt nawk ta ngai naw nih. 16 Sûmah sumrisâng a hung inzâm zàtin thlîr hlak ka ta, nang le hnuoia hring tinrêng inkâra ka kumkhaw thuthlung chu hre zing ka tih. 17 Chu chu nang le hnuoia hring tinrêng inkâra ka thuthlung inchikna chu a nih" a ti nawk a. 18 Longa inthoka hung suok Nova naupahai chu Sema, Hama le Jafet hai an nih. Hama chu Kanan mihai thlatu a nih. 19 Hieng Nova naupa pathum le an thlahai chun hnuoi pumpui hi an hung dàp suok tah a nih. 20 Lo nei mi Nova chun grep huon a siem a. 21 A uoiin siem chu iemani zàt a dawn a, a'n rui a, a puon ina chun saruokin a zâl a. 22 Kanan mihai thlatu Hama chun saruoka zâl a pa chu a phawk a, tuola um a unau pahnihai chu a hril a. 23 Sema le Jafet ruok chun puon an lâk a, liengkoa inzawnin hnungtolin an lût a, an pa zâl suol chu an inkhum a, hnungsona kîr nawk an ni leiin a zàl suol chu an hmu nawh. 24 A uoiin inrui a hung har chun a nau pasal tlum takin a thaw dàn chu Nova'n a hung hriet ta a. 25 Chuongchun, "Kanan chu tongsephurin um sien, A unauhai bawi hung ni raw se"a ta. 26 Chun, hieng ang khom hin a hril bok a:"LALPA, Sema Pathien chu inpâkin um sien, Kanan chu a bawiah um raw se. 27 Pathienin Jafet biel chu suklien sien, Sema puon inah chèng sien la, Kanan chu a bawi ni raw se, "tiin. 28 Nova chu tui lêt hnungin kum zathum le sawmnga a la dam a. 29 Chuongchun, Nova dam sûng po po chu kum zakuo le sawmnga a nih; chun, a thi ta a.

Genesis 10

1 Hienghai hi Nova naupa Semahai, Hama hai le Jafet hai, tui lêt hnunga an inthla sawng pei dàn chanchin chu a nih. 2 Jafet nauhai chu Gomer hai, Magog hai, Madai hai, Javan hai, Tubal hai, Mesek hai le Tiras hai an nih. 3 Gomer nauhai chu Askenaz hai, Rifat hai le Togarma hai an nih. 4 Javan nauhai chu Elisa hai, Tarsis hai, Kitim hai le Rodanimc hai an nih. 5 Hienghai hih tuipuia fâk zong mi, chi bing binga tong bing seng neia hmun hrang hranga khawsahai chu an nih. 6 Hama thlahai chu Kusa hai, Mizraim hai, Putad hai le Kanan hai an nih. 7 Kusa thlahai chu Seba hai, Havila hai, Sabta hai, Raama hai le Sapteka hai an nih. Raama thlahai chu Seba le Dedan an nih. 8 Kusa naupa chu Nimrod a na, ama chu khawvela râl hrât khawkhêng a hung ni a. 9 LALPA mit tlung, ramvàk hrât tak a ni leiin, "Nimrod anga ramvachalin LALPAN siem raw se che" an lo ti hlak a nih. 10 A'n lal tanna khawpuihai chu Sinar phaia um Babel khuo dâm, Erek khuo dâm, Akad khuo dâm le Kalne khuo dâm a nih. 11 Chu rama inthok chun a suok a, Asuria ramah a lût a, Ninevi khuo dâm, Rehobot-Ir khuo dâm, Kala khuo dâm, 12 Ninevi le Kala khaw inkâra um Resen khuo dâm a'n din a, Resen chu khaw ropui tak a nih. 13 Chun, Mizraim thlahai chu Lud hai, Anam hai, Lehad hai, Naftu hai, 14 Pathru hai, Kaslu hai (Filistinhai hung suokna) le Kaftor hai an nih. 15 Kanan chun nau lutirah Sidon a nei a, chun Hit hai, 16 Jebu hai, Amor hai, Girgas hai 17 Hiv hai, Arki hai, Sin hai, 18 Arvad hai, Zemar hai le Hamat hai a thla bok a. Chu hnung chun Kanan hnamhai chu an indar zau pei a. 19 Kananhai ramri huop sùng chu Zidon khuoa inthoka Gerar pan zawngin Gaza khuo chenin; Sodom le Gomora le Adma le Zeboiim pan zawngin Lasa khuo chen a nih. 20 Chuonghai chu Hama thlahai an na, anni chi le tong ang peia hnama insiemin ram an del a. 21 Eberhai thlatu Jafet u Sema khomin nau a nei teu a. 22 Sema nauhai chu Elam hai, Asur hai, Arpaksad hai, Lud hai le Aram hai an nih. 23 Aram naupahai chu Uz hai, Hul hai, Gether hai le Mesek (Masa) hai an nih. 24 Arpaksad chun naupa Sela a nei a, Sela chun Eber a thla a. 25 Eberin naupa pahnih a nei a. Pakhat chu a dam laiin khawvel mi an inthe leiin a hmingah Peleg an sak a, a unaupa hming chu Joktan a nih. 26 Joktan chu Almodad hai, Selep hai, Hazarmavet hai, Jera hai, 27 Hadoram hai, Uzal hai, Dikla hai, 28 Obal hai, Abimael hai, Seba hai, 29 Ofir hai, Havila hai le Jobab hai thlatu a na, chuonghai po po chu a nauhai an nih. 30 An chêngna chu sak tieng tlângram, Mesaa inthoka Sefar chen a nih. 31 Chuonghai chu Sema thlahai an nih; mani chi chi, mani ram ramah a hnam hnamin an um a, mani tong seng an hmang. 32 Chuonghai chu an chihnam ang peia Nova thlahai chu an nih; hnam danghai khom tui lêt hnunga an laka pienga hung indar an nih.

Genesis 11

1 Hnuoia mi po poin tong pakhat chauh an nei a, chu chu an hmang seng a. 2 Sak tieng an intawl pei lai chun Sinar ramah phaizawl an hmu a, chu taka chun umhmun an khuor a. 3 Chun, "Thaw ro, têklei siem ei ta, chang takin rawng ei tiu" an inti tawl a. Chuongchun, lung aiah têklei an hmang a, a châr nghetna dingin pil inhnàk an hmang a. 4 Chu zoa chun, "Thaw ro, ei khawpui ding indin ei ta, vàn tonga insângin bawl ei ta, ei hming sukthang ei tiu; chuong naw chun hnuoi hmun tinah indar zo rawi ei tih" an ta. 5 LALPA chu mihriemhai khawpui rel le an in insâng bawl chu en dingin a zu tum a. 6 LALPA chun, "Ngai ta u, mihai hi hnam khat, tong khat hmang an ni si a, tu hman hin an thaw tanna chauh a la ni hih; hieng hi a ni chun an tum rêng rèng thaw thei naw nei naw ni hai. 7 Thaw ro, zu fêng ei ta, tong an inhriet paw nawna dingin an tong zu sukhranpêk ei tiu" a ta. 8 Chuongchun, LALPAN anni chu chu taka inthok chun hnuoi hmun tinah a sukdar a, an khawpui rel chu an tawpsan ta a. 9 Chuleiin chu hmun chu 'Babel' an ti a nih, chu hmuna chun khawvela tong po po inhre thei lo dinga LALPAN an tong a sukhranpêk leiin. Chu taka inthok chun LALPAN hnuoi hmun tinah a sukdar a. 10 Hieng hi Sema thla peihai chanchin chu an nih. Tui lèt hnung kum hninaa Sema chun kum za a tlingin naupa Arpaksad a nei a. 11 Arpaksad pieng hnungin Sema chu kum zanga a la dam a, naupa le naunu dang khom a la nei a. 12 Kum sawmthum le kum nga a niin Arpaksad chun naupa Sela a nei a. 13 Sela pieng hnungin Arpaksad chu kum zali le kum thum a la dam a, naupa le naunu dang khom a la nei a. 14 Kum sawmthum a niin Sela chun naupa Eber a nei a. 15 Eber pieng hnungin kum zali le kum thum a la dam a, naupa le naunu dang khom a la nei a. 16 Kum sawmthum le kum li a niin Eber chun naupa Peleg a nei a. 17 Peleg pieng hnungin kum zali le kum sawmthum a la dam a, naupa le naunu dang khom a la nei a. 18 Kum sawmthum a niin Peleg chun naupa Reua a nei a. 19 Reua a pieng hnungin Peleg chu kum zahni le kum kuo a la dam a, naupa le naunu dang khom a la nei a. 20 Kum sawmthum le kum hni a niin Reua chun naupa Serug a nei a. 21 Serug pieng hnungin Reua chu kum zahni le kum sari a la dam a, naupa le naunu dang khom a la nei a. 22 Kum sawmthum a niin Serug chun naupa Nahor a nei a. 23 Nahor pieng hnungin Serug chu kum zahni a la dam a, naupa le naunu dang khom a la nei a. 24 Kum sawmhni le kum kuo a niin Nahor chun naupa Tera a nei a. 25 Tera pieng hnungin Nahor chu kum za le sawm le pakuo a la dam a, naupa le naunu dang khom a la nei a. 26 Chun, kum sawmsari a niin Tera chun naupa Abram hai, Nahor hai, Haran hai a nei a. 27 Hienghai hi Tera thlahai chu an nih. Tera chun naupa Abram hai, Nahor hai, Haran hai a nei a; chun, Haranin naupa Lota a nei a. 28 Haran chu a piengna Kaldai ram Ur khuoah a pa Tera thi hmain a thi a. 29 Abram le Nahor chun nuhmei an nei a, Abram nuhmei hming chu Sarai a na, Nahor nuhmei chu Haran naunu Milka a nih. Haran chu Milka le Iska thlatu a nih. 30 Sarai chu a ching a, nau hrim a nei nawh. 31 Tera chun a naupa Abram hai, a tupa Lota hai, a mo, a naupa Abram nuhmei Sarai hai chu a thuoi a, Kanan rama fe dingin Kaldai ram Ur khuo chu a suoksan a, Haran khuo an hung tlung a, chu taka chun umhmun an khuor a. 32 Tera chu kum zahni le panga a dam a, Haran khuoa chun a thi tah a nih.

Genesis 12

1 Chun, LALPAN Abram kuomah, "I ram le i laichinhai le i pa in suoksan la, ram ka la kawkhmu ding che tieng chu pan rawh. 2 Hnam ropui takin siem ka ti che a, malsawm ka ti che a, i hming sukropui ka ta, malsawmna nîng i tih. 3 Malsawmtu che chu malsawm ka ta, tongsie inphurtu che chu tongsie inphur ka ta; nangma zârin hnam tin malsawmin um an tih" a ta. 4 LALPAN a kuoma a hril angin Abram chu a'n thok suok a, Lota khomin a zui ve a. Haran a suoksan chun Abram chu kum sawmsari le kum nga mi a nih. 5 Abram chun a nuhmei Sarai le a sang naupa Lota hai, a sum le pai khawl khawm po po le Haran khuoa a mi sorhai chu a thuoi a, Kanan ram panin an suok a. 6 Kanan ram an tlung chun, Abram chu Sekem hmuna Morea saisaw thing bul chen a fe pei a. Chuong hun lai chun chu hmuna chun Kanan mihai an um a. 7 Chun, LALPA chu Abram kuomah a hung inlàr a "Hi ram hi i thlahai kuomah la pêng ka tih" tiin a hril a. Chu taka a kuoma inlâr LALPA ta dingin Abram chun maichàm a siem a. 8 Chu hmuna inthok chun Bethel sak tieng tlângah an inson a, chu taka chun puon in a kei a. Thlang tieng chun Bethel a um a, a sak tieng chun Ai khuo. Hi hmuna hin maichàm a siem nawk a, LALPA hming a lam a. 9 Chun, Abram chu Negeve tieng panin a fe ta pei a. 10 Chun, chu rama chun tàm a tla a. Tàm chu a nasa êm leiin Aigupta rama um hri dingin Abram chu a fe thla a. 11 Aigupta an lût tawm chun a nuhmei Sarai kuomah, "Ngai ta, nu hmel tha tak i nih ti ka hriet a. 12 Aigupta mihaiin an hmu pha che chu, 'Hi hi a nuhmei a nih' tîng an ta, kei chu mi that an ta, nang chu hlàng an ti che. 13 I zâra him taka ka um theina ding le ka hringna ka chàn nawna dingin, 'A farnu ka nih' ti pei rawh" a ta. 14 Abramin Aigupta ram a tlung chun Aigupta mihaiin a nuhmei chu hmel tha an ti hle a. 15 Faraw hnuoia thoktuhaiin an hmu chun Faraw chu an hrilhmu a. Chuongchun, nuhmei chu Faraw inah an thuoi a. 16 Ama lei chun Abram chu an duot hle a, beram hai, bawngchal hai, sabengtung chal le a pui hai, bawipa le bawinu hai le sanghawngsei hai a nei pha ta a. 17 Nisienlakhom, Abram nuhmei Sarai lei chun LALPAN Faraw le a sûngkuohai chu hripuiin a soisak a. 18 Chuongchun, Faraw chun Abram chu a ko a, "Ka chunga i thilthaw hi ieng am an ta le? I nuhmei a nih ti ieng dinga i mi hril naw am a na? 19 Ieng dinga 'Ka farnu a nih' i ti? Chu lei chun annawm nuhmei dinga ka thuoi chu. Tu hin i nuhmei hi thuoi la, fe dai rawh" a ta. 20 Faraw chun a mihai chu Abram chunga an thaw dàn ding thu a pêk a, a nuhmei le a thil neihai po po le chun an inthla liem ta a.

Genesis 13

1 Abram chun a nuhmei le a thil nei po po leh Aigupta ram a suoksan a, Negev tieng a pan a, Lota chun a zui pei a. 2 Abram chun ranruol le sum le pai tangkaruo le rangkachakhai a hau hman ta hle a. 3 Negev-a inthok chun hmun hrang hrangah bûk khuorin, Bethel chen a fe a, chu chu Bethel le Ai khaw inkâra kha hmaa puon in a keina hmun le maichàm a siemna hmun kha a nih. 4 Chu taka chun Abram chun LALPA hming a lam a. 5 Abram le inzui Lota khomin beram ruol le bawng ruol neiin, puon in a kei ve a. 6 Amiruokchu, an pahnia khawsakna dingin ramin a keng ta naw a, an burip ta êm leiin an khawsa hmunkhat thei ta hlol naw a. 7 Chu lai ram chu Kanan mihai le Periz mihai chêngna hmun a nih. Abram ran puhai le Lota ran puhai inkârah inhalna a hung suok a. 8 Chuongchun, Abramin Lota kuomah, "Lunginsiettakin, nangma le keima inkàr le i ran chingtuhai le ka ran chingtuhai inkârah insel inhal um naw raw se, unau ei ni si a. 9 Ram a um dei duoi an naw am a ni? Lunginsiettakin ka kuoma inthok hin inmuolvom el ta rawh. Nang voi tieng i fe leh kei chang tieng fèng ka ta, chang tieng i fe leh kei voi tieng fe el lem ka tih" a ta. 10 Lota chu Zoar khuo tieng thlîrin a ngha vel a, Jordan phaizawl chu LALPA huon ang le Aigupta ram ang ela ram hnawng tha a nih ti a hriet a, LALPAN Sodom le Gomora a suksiet hma kha a ni si a. 11 Chuongchun, Lota chun Jordan phaizawl chu a thlang a, sak tieng panga chun a'n son a, an um hran ta a. 12 Abram chu Kananhai rama chun a um ta zing a, Lota chu Jordan phaizawla khuoa hai chun a chêng a, inson peiin Sodom khaw bulah umhmun a khuor a. 13 Sodom khaw mihai chu an rilo hle a, Pathien lakah nasa takin an suol a. 14 Lota fe hnungin LALPA chun Abram kuomah, "I umnaa inthok khan sak le thlang le sim le hmar tieng mit inlèn rawh. 15 Ram i hmu po po hi nangma le i thlahai kutah kumkhuoa dingin ka pêk ding che a nih. 16 I thlahai chu hnuoia pilvut anga tamin ka siem ding a nih. Tu khomin pilvut a tiem sèng chun i thlahai chu tiem sèng chau a tih. 17 Tho la, ram hi a dung a khangin fang suok rawh, ka pêk ding che a ni si a" a ta. 18 Chuongchun, Abram chu insonin, Hebron khuoa Mamre saisaw thing lien tak bula chun umhmun a khuor a, chu taka chun LALPA ta dingin maichàm a siem a.

Genesis 14

1 Chuong hun laia mi Sinar lal Amrafel hai, Elasar lal Ariok hai, Elam lal Kedorlaomer hai le Goiim lal Tidal hai thang khawm le 2 Sodom lal Bera hai, Gomora lal Birsa hai, Adma lal Sinab hai, Zeboiim lal Semeber hai le Bela (chu chu Zoar) lal hai thang khawm chu an indo a. 3 A nuhnung lem pawlhai chun Sidim ruom, Tuifinriet Al ruomah thang hmun an khaw a; 4 anni rawi hi kum sawm le kum hni zet Kedorlaomer lal hnuoiah an lo um ta hlak a, a kum sawm le kum thumnaa chun an hel tah a nih. 5 Kum sawm le kum linaa chun Kedorlaomer le a'n thloppui lalhai chun Asterot Karnaim khuoa Refai mihai, Ham khuoa Zuzim-hai, Save Kiriathaim khuoa Emim-hai, 6 Seir tlânga inthoka thlaler bula khaw um Elo Parana chena inzâr Hor mihai chu an hung rûn a. 7 Chu taka inthok chun En Mispat (Kades an ti bok) tieng an kîr a, Amalekhai ram po po le Hazazor Tamara um Amor mihai chu an hne vong a. 8 Chuongchun, Sodom lal, Gomora lal, Admah lal, Zeboiim lal, Bela (Zoar) lal hai chu an inthok suok a, Sidim ruoma chun anni chu bei dingin thang an lo khaw a; 9 Elam lal Kedorlaomer hai, Goiim lal Tidal hai, Sinar lal Amrafel hai le Elasar lal Ariok hai, lal palihai chu lal panga le chun an inbei ta a. 10 Sidim ruom chu alkatara khura sip a na; Sodom le Gomora khaw lalhai chu an tlânsie a, chu taka chun an tla a, a tla mahlahai chu tlânga chun an tlân hmang a. 11 Chuongchun, lal palihai chun Sodom le Gomora mihai sum nei po po le an bu le bal nei po po chu an lâk a, an kîr ta a. 12 Abram sangpa naupa Lota chu Sodom khuoa um a ni leiin a thil nei po po leh an man sa a, an thuoi a. 13 Mi pakhat tlân suok chun Hebrai mi Abram chu a hril a; ama chu Amor mi, Mamre saisaw thing bula um a nih. Mamre chu Eskol le Anera hai unau a na, anni chu Abram le thang tlàng an nih. 14 Abramin a naupa sala an thuoi ti a hriet charin ama mi ngot, a ina seilien, indo inchûk thiem ta sa zathum le sawm pariet chu a thuoi a, Dan khuo chenin an hnot zui a. 15 Zàna chun Abramin anni chu bei dingin a mihai chu a sem dar a, an hne a, Damaska hmar tienga um Hoba khuo chenin an hnot thlûr a. 16 An ràllàk sumhai po po chu a làk kîr nawk vong a, a naupa Lota le a thil neihai bàkah, nuhmei ruol le mi dang an manhai khom an thuoi kîr nawk a. 17 Kedorlaomer le a tienga thang lalhai tukdol zoa Abram a hung kîr tieng chun Sodom lalin Save ruomah a lo hmuok a (Save ruom chu 'Lal ruom' tina a nih. ) 18 Chun, Salem khaw lal Melkisedek khomin bei le uoiin chawiin a lo hmuok bok a; ama chu Pathien Chunghnungtak thiempu a nih. 19 Ama chun Abram chu mal a sawm a, "Hnuoi le vân siemtu Pathien Chunghnungtak chun Abram chu malsawm sien, 20 I hmêlmahai inhnetirtu che Chunghnungtak Pathien chu inpâkin um raw se" a ta. Abram chun a râllâk iengkima sawma pakhat chu a pêk a. 21 Chun, Sodom lal chun Abram kuomah, "Ka mihai po hi mi pe suok la, râllâk sum hi chu nangin chang vong el rawh" a ta. 22 Abram ruok chun Sodom khaw lal kuomah, "I thil nei ieng khom, pat zâi khat khom, pheikhok hrui hlek khom la lo dingin hnuoi le vân siemtu LALPA Pathien Chunghnungtak kuomah thu ka lo tiem tah a nih. 23 Chuong naw chun, 'Abram chu ka sukhausak annawm' ti hlauh rawi i tih. 24 Ka fepui ka mihai fâk ral tah chu a ral tah ni sien, a dang chu ieng khom la naw ning; ka thu inkoppui Anera mi hai, Eskol mi hai le Mamre mi hai ruok chun an chan seng la raw hai se" a ta.

Genesis 15

1 Chu hnung chun Abram chu zèlin a um a, LALPAN a kuomah, "Abram, ti naw, kei hi i phaw ka nih; lukhawng i dong ding khom a ropui a nih" a hung ti a. 2 Abram ruok chun, "Aw LALPA Chunghnungtak, nau bo ka na, ka ro khawmtu ding hlak chu Damaska khuoa mi Eliezar a ni dai si a, iem a na i mi pêk thei chu?" a ta. 3 Abram vèkin, "Ngai ta, chi i mi'n thlatir si naw a, ka ina inthoka pieng bawi hi ka ro hluotu ding a ni el tah si hi!" a ti nawk a. 4 Chuongchun, LALPA thu chu a hung tlung a, "Kha mi kha i ro hluotu ding a ni nawh. I rîla ra chauh naw chun i ro hluo naw ni hai"tiin. 5 Chun, Abram chu tuolah a thuoi suok a, "Van tieng khi en la, arasi khi i tiem sèng hrim am hang tiem ta leh" a ta. Ama vêkin, "I thlahai chu khieng zât khi la nîng an tih" a ta. 6 Abram chun LALPA chu a ring a, chu chu a felnaah a pompèk a. 7 Chun, "Kei hi LALPA, hi ram hi pe ding che le inhluotir ding chea Kaldaihai khuo Ur-a inthoka ko suoktu che kha ka nih" a ti bok a. 8 Abram chun, "Aw LALPA Chunghnungtak, ka hluo ding ti iengtin am ka hriet ding?" a ta. 9 LALPA chun a kuomah, "Bawng la, kèl le beram chal, kum thum mi seng le vàthu le pàrva tuoi hung chawi rawh" a ta. 10 Chuonghai chu a hung lâk a, ran po chu a laiah a khoi seng a, phel tin chu inhmatuokin a sie vong a, vatehai ruok chu a khoi ve nawh. 11 Mulukolhai chun fâk tumin saruong chu an zuk baw a, Abram chun a lo hawl zâm pei a. 12 Ni a tlàk dier dier lai chun Abram chu indên takin a lo in ta dêr a, thim sà tak le tibaium takin ama chu a hung zàr khum a. 13 Chuongchun, LALPAN Abram kuomah, "I thlahai chu mi ramah la mikhuol an ta, mi bawia umin kum zali sûng suknomnat tuor an tih ti hre rawh. 14 Amiruokchu, rong an bawlpêk hnamhai chungthu chu la rêl ka ta, chu zoah an rosum nei tam tak leh la hung suok dok an tih. 15 Nang ruok chu i thlatuhai kuomah thlamuong takin fèng i ta, ngal fîma damin vui liem an ti che. 16 Suon linaah hi hmuna hin i thlahai chu hung kîr nawk chauh an tih; Amorhai suolna chu a la kin hri si nawh, " a ta. 17 Ni tlâk hnunga khuo a hung inthim chun meiphu khu lui lui le meiser chok puot puot chu saruong khoi phel inkâra chun an inlon zut zut a. 18 Chu ni chun LALPAN Abram kuomah thu a thlung a: "Aigupta vadunga inthoka vadungpui Eufretis inkâr ram hi i thlahai ka pèk, 19 Ken mi hai, Keniz mi hai, Kadmon mi hai, 20 Hit mi hai, Periz mi hai, Refaim mi hai, 21 Amor mi hai, Kanan mi hai le Girgas mi hai ram po po khom" tiin.

Genesis 16

1 Abram nuhmei Sarai chun nau hrim a neipèk nawh. Sarai chun Aigupta mi bawinu a nei a, a hming chu Hagar a nih. 2 Sarai chun Abram kuomah, "LALPAN nau a mi'n neitir phal si naw a, ka bawinu hi pawl el la, ama laka inthokin nau ka nei miel thei rawi mawh" a ta. Sarai thu chu Abramin a remtipui a. 3 Chuongchun, Kanan ramah kum sawm an um hnungin Sarai chun a bawinu, Aigupta mi chu a thuoi a, a pasal Abram kuomah chun nuhmeia nei dingin a pêk a. 4 Hagar chu a lo pawl a, a hung inrai a, sienkhom a'n rai ti a hriet charin Hagar chun a pi chu a hmusit tan el ta a. 5 Sarai chun Abram kuomah, "Ka thil tuor hi a maw i phur a nih. Ka bawinu ka pêk che a, a'n rai ti a hriet charin a mi hmusit tan el ta si hi. LALPA chun nang le keia chungthu hung rêl raw se" a ta. 6 Abram ruok chun Sarai kuomah, "Ngai ta, i bawinu chu i kuta um annawm, tha i ti dàn ang angin a chungah thaw ta la" a ta. Sarai chun nasa taka a sukrimsik leiin Hagar chu a tlàn hmang a. 7 LALPA vàntirko chun thlalera Sur khuo panna lampuia tuikhur kawla chun a lo hmu a. 8 Vantirko chun a kuomah, "Hagar, Sarai bawinu, khaw laia inthoka hung suok a, khaw laia fe ding am i na? a ta. Ama chun, "Ka pi Sarai kuoma inthokin ka tlàn hmang a nih" a ta. 9 LALPA vàntirko chun a kuomah, "I pi kuomah kîr nawk la, a thu thuin um rawh, " a ta. 10 Vàntirko vêk chun, "I thlahai chu tiem sèng lo khop hiela tamin sukpung ka tih. 11 Ngai ta, nau i pai ta a, nau pasal nei i ta, LALPAN i rinum tuorzie hi a hriet tah leiin a hmingah Ismael i sak ding a nih. 12 Ama chu ram sabengtung ang el nîng a ta, mi tin do a ta, mi tinin ama chu do bok an ta, a unauhai po po leh intai zingin khawsàng a tih" a ti bok a. 13 Hagar chun "Pathien ka hmu si a, damin a mi la hlà zing el chu a na maw!" a ta, a betu LALPA chu "El-roi"f tiin a'n bûk a. 14 Chu lei chun tuikul hminga khom 'Beer-lahai-roi'g ti inbûk a na, chu chu Kades le Bered khaw inkârah a um. 15 Hagar chun Abram chu nau pasal a neipèk a, Abram chun a naupa hmingah 'Ismael' a sak a. 16 Hagarin Ismael a neipèk lai hin Abram chu kum sawmriet le kum ruka upa a ni tah.

Genesis 17

1 Abram chu kum sawmkuo le pakuo mi a niin a kuomah LALPA a hung inlàr a, "Kei hi Iengkim Pathien chu ka nih; ka ditzawng angin kalchawi la, soisel boin um rawh. 2 Nangma le keima inkâra ka thlung chu suknghet ka ta, nasa takin sukpung ka ti che, " a ta. 3 Abram chu hmaia hnuoi sikin a bokkhup a, Pathienin a biek pei a, 4 "Hi hi i kuoma ka thuthlung chu a nih: Hnam tam tak thlatu hung nîng i tih. 5 I hming khom Abram ni ta naw ni a, 'Abraham' ni lem tàng a tih, hnam tam tak paah ka siem ta che leiin. 6 I thlahai nasa takin sukpung ka ta, nangmaa inthokin hnam tam tak indin ka ta, nangmaa inthokin lalhai hung suok an tih. 7 Nang le i thlahai ta dinga in Pathien ni dinga thu ka thlung hi, nang le i thlahai le an thlahai, suon la hung um pei ding hai ta ding khoma ka kumkhaw thuthlung dingin ka suknghet. 8 Tuta mikhuol anga i chàmna Kanan ram po po hi nang le i thla peihai kumkhaw ro dingin pêng ka ta, an Pathien ni pei ka tih" a ta. 9 Pathien chun Abraham kuomah thu a hril pei a, "Nang khomin ka thuthlung i zawm ding a nih; nang le i thlahai le an thla peihai khomin an zawm ding a nih. 10 Nang le i thla peihaiin ka thuthlung in zawm ding chu hi hi a nih: nangni laia pasal taphot chun ser in intantir ding a nih. 11 Ser in tan chu nangma le keima inkàra thuthlung inchikna nîng a tih. 12 I thlahai taphotin, an pienga inthoka ni rietnaah ser an intantir ding a nih; 13 i thlahai kher naw khom, i ina pieng amanih, hmun danga inthoka suma i'n chawk amanih pasal taphot chun ser in intantir ding a nih; chuong ang chun, ka thuthlung chu kumkhaw thuthlung dingin in taksaah put tang in tih. 14 Chun, nangni lai ser tan lo an um hrim hrim chun ka thuthlung an bawsiet leiin nangni laia inthokin hnawl hmang ro" a ta. 15 Pathien chun Abraham kuomah hieng hin a hril bok a, "I nuhmei Sarai khom Sarai tia ko ni ta loin, Sari ti hming put lem tàng a tih. 16 Malsawm ka ta, amaa inthokin nau pasal pe ngei ka ti che. Malsawm ka ta, hnamhai thlatu nîng a ta, amaa inthokin lal tam tak hung suok an tih" tiin. 17 Abraham chu hnuoi sikin a bokkhup a, a'n nui a, "Kum za miin maw nau pasal a hang a nei el ding chu! Kum sawmkuo mi Sari'n maw nau a nei el ding chu!" a ti lungril a. 18 Abraham chun Pathien kuomah, "Ismael hin i ditsakna changin dam pei phot sien la" a ta. 19 Pathien chun, "Chang e, amiruokchu i nuhmei Sari'n nau pasal neipèk a ti che, a hmingah Isak i sak ding a nih. Ka thuthlung chu kumkhaw thuthlung dingin ama le a thlahai kuomah suknghet ka tih. 20 Ismael chungthua i thil hni khom ka ngàithlâkpèk che. Ama chu malsawm ka ta, chi thla hauin nasa takin a thlahai hung pung an ta, lal sawmpahni thlatu nîng a ta, hnam ropui takin siem ka tih. 21 Ka thuthlung ruok chu kum nawk tu ang hun vêla Sari naupa hung pieng ding Isak kuoma chun thlung ka tih" a ta. 22 Abraham a biek zo chun Pathien chun a kai tungsan a. 23 Abraham chun a naupa Ismael le a ina pieng po po le suma inchawk, an sûngkuoa mi pasal po po chu a thuoi a, Pathienin a kuoma a hril angin chu ni lâ là chun an ser vun hmor a tanpèk a. 24 Ser a tan hin Abraham chu kum sawmkuo le pakuo mi a ni ta a, 25 a naupa Ismael chu kum sawm le pathum mi a nih. 26 Chu ni ngei chun a nih Abraham le a naupa Ismael chu sertan an hung ni chu. 27 Abraham insûnga chêng pasal po po, a ina pieng le hmun danga inthoka suma a'n chawk pasal po po khom ama ruolin sertan an hung ni ta vong a nih.

Genesis 18

1 Sùn lum lai tak Mamre saisaw thing bula a puon in kotkhara Abraham a thung lai chun a kuomah Pathien a hung inlàr a. 2 A hang dàk chun a bul ela mi pathum ngîr a hmu a. A hmu charin a puon in kotkhâra inthok chun anni chu lawm lût dingin a tho a, hnuoi sikin chibai a lo bûk a. 3 "Puhai, ditsakna dong tlâka in mi hmu chun in siehlaw hi fe pèl lul naw ro. 4 Tui tlawmte bèk hung la hai sien, in kehai sawpin thing buk hnuoia hin chawl hadam ro. 5 In siehlaw kuom in hung tlung ta rau rau si hin chu, fâk ding iemani bèk va lang ka ta, insukhar unla, chu zoah in inzin nawk pei ding annawm" a ta. Anni chun, "A tha ie, i ti ang chun ni raw se" an ta. 6 Chuongchun, Abraham chu a puon inah a lùt nghal a, Sari kuoma chun, "Inhmaw takin beiphit indip tak tekhawng thum la suok la, hmet la, beipèr siem rawh" a ta. 7 Chu zoah a ran ruol umnaah a va tlân a, bawng tuoi tha tak el a va kei a, a siehlaw kuomah a pêk a, ama chun inrang takin a hung buotsai a. 8 Chun, bawngnene khal, bawngnene le bawng tuoi sa an buotsai chu chawiin an hmaa chun a va sie a. An fâk lai chun thing buk hnuoia chun anni bulah ngirin a nghâk zing a. 9 Chun, anni chun a kuomah, "I nuhmei Sari khaw lai am a um a?" tiin an indon a. Ama chun, "Puon ina son" a ta. 10 LALPA chun a kuomah, "Kum nawk hi hun hi a tlung pha i kuomah hung nawk ngei ngei ka ta, i nuhmei Sarin nau pasal nei a tih" a ta. A hnunga puon in kotkhâr bula chun Sari'n a lo ngàithlâk zing a. 11 Abraham le Sari chu upa tak an ni ta a, Sarin nau a von thei hun khom a pel dai tah. 12 "Ka chuoi hnung dai le ka lalpa hlak a upat ta hle hnungin, hi lawmna hi tu hin ka chang thei ding maw?" tiin lungrilin a ngaituo a, arûkin a'n nui a. 13 Chu phing leh LALPAN Abraham kuomah, "Iengti dàna Sarin, 'Kei ka tar tâk vei leh nau ka nei tak tak ding maw?' tia a'n nui am a na? 14 LALPA ta dingin thaw harsa a um am a ni? A hun takah kum nawk leh hung nawk ka ta, Sarin nau pasal lo nei tàng a tih" a ta. 15 Sari chun ti takin, "Ka'n nui nawh" tiin a thang a. Ama chun, "I'n nui ngei kha teh" a ta. 16 Mihai chu chu taka inthok chun an suok a, Sodom khuo tieng an zuk thlîr a, Abraham khomin anni chu inthla dingin a zui a. 17 Chun, LALPA chun, "Ka thil thaw tum hi Abraham laka hin ka ip ding am a ni aw? 18 Abraham hi hnam ropui tak le thil thaw thei tak a la hung ni ngei ding a na, ama leiin hnuoia hnam tin malsawmin an la um ding a ni si a. 19 Ip naw ning. A kuoma LALPA thuthlung chu hlena a um theina dinga ama sûngkuo le a suon la hung pei dinghaiin thil fel tak le indik taka thawa LALPA lampui an hraw theina dinga thu petu dingin ama hi ka thlang a nih, " a ta. 20 Chuongchun, LALPA chun "Sodom le Gomora suolzie thu le an thilthaw râpthlâkzie ka naah a hung tlung a, 21 a'n dik tak tak am ti en fie dingin fe thlàng ka tih" a ta. 22 Chuongchun, mihai chu Sodom khuo panin an inher liem a, Abraham ruok chu LALPA hmaah a la ngîr zing a. 23 Abraham chun a va hnai a, "Mi felhai chu mi suolhai lai i sukbohmang ve el ding am a ni? 24 Khaw sûnga chun mi fel sawmnga bèk an um el thei a, chuong mi fel sawmngahai lei chun khuo chu hla loin i sukbohmang el ding maw? 25 Mi felhai chu mi rilohai leh sukbohmang a, mi felhai le mi rilohai thuhmun ronga en chu nang êm chun iIthaw awm si nawh. Hnuoi chung po poa Rorêltu chun fel takin a thaw lem naw ding maw?" a ta. 26 LALPA chun, "Sodom khaw sûngah mi fel sawmnga khom ka hmu chun anni leiin a khaw pumpui chu hlà el ka tih" a ta. 27 Abraham chun, "Ngai ta, kei pilvut le meivâp el hin ka biek pop ta laklaw che a; 28 mi fel chu pangain sawmnga an tling naw khom a ni el thei a, pangaa an tling naw leiin a khaw pumpui chu i sukbohmang el ding maw?" a ta. 29 Ama chun "Sawmli an um khomin sukbohmang naw nîng" a ta. 30 Abraham chun, "Aw LALPA, lungsen naw la, hang hril nawk ka tih. Chu taka chun mi fel sawmthum chauh i hmu khom a ni el thei a" a ta. Ama chun, "Sawmthum khom ka hmu chun sukbohmang naw ning" a ta. 31 Abraham chun, "Ngai ta, LALPA, ka biek pop ta si che hin chu, chu taka chun mi fel sawmhni chauh i hmu khom a ni el thei a" a ta. Ama chun, "Mi fel sawmhni lei khomin sukbohmang naw ning" a ta. 32 Abraham chun, "Aw LALPA, i lung sen naw hràm sien, voi khat chauh hang hril nawk ka tih: chu taka chun mi fel sawm chauh i hmu el thei a" a ta. Ama chun, "Sawm lei khomin sukbohmang naw ning" a ta. 33 Chuongchun, Abraham le an inbiek zo chun LALPA chu a fe a, Abraham khom a umna tieng a kîr nawk a.

Genesis 19

1 Vântirko pahnihai chun zàn tieng Sodom khuo an tlung a, Lota chu Sodom kotsuoa chun a lo inthung a. An hung a hmuin lo lawm lùt dingin Lota chu a tho a, bawka hnuoi sikin chibai a lo bùk a. 2 "Puhai, lunginsiet takin in siehlaw ina hin lût phot unla, riek unla, in kehai sawp unla, zing inhma taka thoin in fe nawk ding annawm" a ta. Anni ruok chun, "Ni lo e, khawlaiah riek lem kan tih" an ta. 3 Ama chun nasa taka a ngèn leiin a ina chun an lùt a, ruoi a buotsai a, chawl thang lo beiphèk a siem bok a, an fâk ta a. 4 Nisienlakhom, an zàl hmain a khaw mi, Sodom mihai chu a chin a lien vêng tina mi inhawr khawmin in chu an hung inhuol a. 5 Lota chu an ko khêk a, "Voizàna i ina tlung pasalhai kha khaw la'm an um a? Hung thuoi suok tawl rawh, kan lo pawl theina dingin" an ta. 6 Lota chun kot a hong a, a va suok a, kot chu a khâr nawk a. 7 "Ka unauhai, lunginsiet takin chuong khopa rilo chun um naw hràm ro. 8 Ngai ta u, tu la pawl ngai lo nau nuhmei pahni ka nei a, hung thuoi suok ka ta, tha in ti angin an chungah thaw lem ro; ka mikhuolhai ruok hi chu mi tawkpêk naw ro, ka in luma ka huol himna hnuoia um an ni si a" a ta. 9 Anni rawi chun, "Intawl hmang rawh. Nanga pa hrep hi, pêm mei meiin kan chungah thu nei i tum vei a ni? I mikhuolhai nèkin i tuor sà lem a tih" an ta. Lota chu an hung nor hlèng a, kotkhâr chu sut siet an tum a. 10 Nisienlakhom ina mihai chun an hei ban a, Lota chu in sùngah an hnûk lût a, kot chu an kal tlat a. 11 Kotkhâr bula umhai chu a chin a lienin an mit an sukdelpêk vong a, kotkhâr chu an hmu thei ta naw a. 12 Chun, mihai chun Lota kuomah, "Hieng i ina mihai ti lo, hi khuoa hin sûngkuo dang i nei am? I mâkpa hai, i naunu le naupa hai le khaw sûnga mi laichin hnai i nei taphot chu hi khuoa inthok hin thuoi suok tawl rawh. 13 LALPA hmaah an riva a se ta êm leiin hi khuo hi kan sukbohmang ding a na, chu ding chun LALPAN a mi tir a nih" an ta. 14 Chuongchun, Lota chu a fe suok a, a naunuhai nei dinga a mâkpa huolhai kuoma chun, "Tho unla, hi khuoa inthok hin suok ro, LALPAN hi khuo hi a sukbohmang ding a nih" tiin a va hril a. A mâkpa huolhai hlak chun a fiemthu an sawn lem si. 15 Khawfîngchat vela chun vàntirkohaiin Lota kuomah, "Tho la, i nuhmei le hi taka i naunu pahni umhai hi inrang takin thuoi suok rawh, chuong naw chun hi khaw hremnaah hin bohmang ve hlauh rawi in tih" tiin an hmaw a. 16 A la muongchang êm leiin vàntirkohai chun ama le a nuhmei le naunuhai chu an kuta chelin khaw puo tieng chun an kei suok a, LALPAN anni chu a lunginsiet si a. 17 Khaw puo an tlung charin, vàntirko pakhat chun, "Tu hin in hringna dingin tlân ro. Hnung tieng ngha naw unla, phaizawlah chawl hrim hrim naw unla, tlânga son tlân tung ro. Chuong naw chun bohmang pal in tih" a ta. 18 Nisienlakhom Lota chun, " Pu, chuong ang chu tlung naw hràm raw se. 19 Ngai ta, i siehlaw hin i mit a tlung a, ka hringna hla dingin i zangaina lien tak chu ka chungah i'n langtir a. Sienkhom, tlâng chu tlân tlung zo naw ning, lampuiah sietnan mi nang a ta, thi tho ka tih. 20 Saw va saw tlànna phâk chauh khuo a um a, khaw chikte a nih. Chu khaw chiktea chun mi'n tlàntir lem la, him ka tih" a ta. 21 Vantirko chun, "Ni e, chu i hni khom chu phalpêk ka ti che. Chu khuo i hril chu sukbohmang sa ve naw el ka tih. 22 Sienkhom, inhmaw takin tlân rawh, chu khuo i tlung hma po chun kut ka kei a ngai si a" a ta. Chu lei chun chu khaw hminga chun Zoarh ti an inbûk a nih. 23 Lota'n Zoar khuo a tlung chun nisa a suok ta a. 24 LALPA chun Sodom le Gomora khaw chunga chun vâna LALPA kuoma inthokin mei le kât a'n sûrtir chur chur a, 25 chu khuohai le phaizawl po poa mi chênghai le hnuoia thil to taphot chu a kang hmang ta vong a. 26 Lota nuhmei ruok chu a nghakîr leiin chi lungah a'n chang tah a nih. 27 Abraham chu zîngkar inhma takin LALPA hmaa a ngìrna hmuna khan a hang fe a, 28 Sodom le Gomora khuo tieng le phaizawl chu a zuk thlîr a, meikhu intûr ngul el, rawtuina meikhu ang ela khu tung ngùt ngùt chu a zuk hmu a. 29 Pathienin phaizawla khuohai a suksiet khan Abraham chu a hriet zing a. Lota chêngna khuo a sukram lai khom khan Lota chu bohmangnaa inthokin a san suokpêk a nih. 30 Lota chu Zoar khuoah a um ngam naw leiin a naunu pahnihai leh Zoar màksanin tlângah an kai a, chu taka chun pûkah an um a. 31 Ni khat chu a naunu upa lem chun a sang kuomah, "Ei pa hi a upa ta a, hnuoi hmun tina an thaw dàn anga mi pawltu ding hlak ei kawl le kiengah pasal dang an um dèr bok si naw a. 32 Ei pa hi uoiin hrâi rui ei ta, ei sûngkuo a mang nawna dingin ei pa hi inpawlpui ei tih" a ta. 33 Chu zân chun an pa chu uoiin an hrài rui a, a upa lem chu a lût a, a zàlpui a; ama chun a hung zàl lai a hriet naw a, a tho nawk lai khom a hriet bok nawh. 34 A zînga chun a upa lemin a sang kuomah, "Voizàn khan ei pa kuomah ka zâl a; voizàn khom hin uoiin indawntir nawk ei ta; chun nang lût la, ei pa chi thla mang loa ei siem theina dingin a kuomah va zâl ve rawh" a ta. 35 Chu zân khom chun an pa chu uoiin an hrài rui a, a naupang lem chun a pa chu a va zàlpui a. Ama chun a hung zàl lai le a tho nawk lai a hriet chuong bok nawh. 36 Chuongchun, Lota naunu pahnihai chun an pa lakah nau an hung pâi ve ve tah a. 37 A upa lem chun nau pasal a nei a, a hmingah Moabi an sak a, ama chu tu laia Moab-hai thlàtu a nih. 38 A naupang lem khomin nau pasal a nei a, a hmingah Ben-Amij an sak a, ama chu Amon-hai thlàtu a nih.

Genesis 20

1 Chu taka inthokin Abraham chu Negev tieng a'n son a, Kades le Sur inkârah umhmun a khuor a. 2 Gerar-ah iemani chen a um laiin Abrahamin Sari chu "Ka farnu a nih" a ti leiin Gerar lal Abimelek chun a nuhmei dingin Sari chu a va'n thuoitir a. 3 Nisienkhom, zâna chun Abimelek mangah Pathien a hung a, "Ngai ta, i nuhmei thuoi lei hin thi ngei i tih, mi nuhmei a ni si a" a ta. 4 Abimelek chun ama nu chu a la tawk hman naw a, "LALPA, poi tawk lo mihai i sukhlum ding maw? 5 Ama ngei khomin ka kuomah, 'Ka farnu a nih' a ti naw am a ni? Chun, amanu ngei khomin, 'Ka tapa a nih' a ti bok si a. Sie le tha hrietna inthieng tak le kut fài takin hi thil hi ka thaw a nih" a ta. 6 A manga bok chun Pathienin, "A nih, lungril inthieng tak puta i thaw a nih ti ka hriet leiin, kei khomin ka chunga thil suol i thaw ding chu ka khap che a, chu leiin i tawk ka phal naw a nih. 7 Tu hin mi nuhmei kha pe kîr la, ama chu zawlnei a na, tongtaipêk a ti che a, hung dam i tih; i pêk kîr naw ruok chun nang le i thil nei po po leh thi ngei i tih" a ta. 8 Zîngkar chun Abimelekin a khawnbawlhai po po a ko khawm a, a chunga thil hung tlung chu a hril a, an ti tawl hle a. 9 Chu zoah Abimelek chun Abraham chu a'n ko lùttir a, a kuomah, "Ka chungah ieng thil top am a na i thaw hi? 10 I poi ieng am ka tawk a, hienga kei le ka lalram chungah thiemnawna râpthlâk tak i hung intlun ta hi? Thil thaw lo ding tawp ka chungah i thaw a nih. Iem a na hienga i thawna san?" a ta. 11 Abraham chun, "Hi hmuna hin Pathien tina nei mi an um ka ring naw leiin, ka nuhmei lei hin mi that an tih ti ka tithawng lei a nih. 12 Chu bâkah, ka farnu a ni hrim a, pa hmun khat, sienkhom nu tum kan na, ka nuhmei a hung ni ta pei a. 13 Ka pa ina inthoka Pathienin a mi'n vâkvàitir lai khan a kuomah, 'I mi hmangaizie i'n langtir dàn ding chu hieng ang hin a nih: ei tlungna hmun taphotah 'Ka tapa a nih, ti pei rawh' ka ti ta sa hrim a nih" a ta. 14 Abimelek chun beram hai, bawng hai, bawinu le bawipa hai a hung thuoi a, Abraham a pêk a, a nuhmei Sari khom a pêk kîr bok a. 15 Abimelek chun, "En ta, ka ram chu a um dei duoi annawm, i ditna hmun hmunah um rawh" a ta. 16 Chun, Sari kuoma chun, "I tapa hi tangka sângkhatk ka pêk tah a, i kuoma um po po hai hrieta i chunga thawsuolna laka thupha chawina a na, i chungthu a fel nawk vong tah" a ta. 17 Chuongchun, Abraham chu Pathien kuomah a tongtai a, Pathienin Abimelek le a nuhmei le an bawinuhai po po chu a sukdam a, nau nei thei dingin a hung siem nawk ta vong a. 18 A san chu, Abraham nuhmei Sari leiin LALPA chun Abimelek sûngkuo sul po po a lo khârpèk vong hman lei a nih.

Genesis 21

1 A hril tah angin LALPA chun Sari chungah zangaina insuoin, a thu tiem tah angin a chungah a thaw a. 2 Sari chun nau a pai a, Pathienin a kuoma a hril hun taka chun tar hnungin Abraham chu nau pasal a neipèk a. 3 Sarin a neipèk a nau pasal hmingah chun Abraham chun 'Isak' a sak a. 4 A naupa Isak chu ni riet a tling charin, Pathienin thu a pêk angin a ser a tanpêk a. 5 A naupa Isak a pieng chun Abraham chu kum zaa upa a ni tah. 6 Sari chun, "Pathienin a mi suknui a, hi thu hre taphot chun mi'n nuipui vêng an tih" a ta. 7 A hril pei a, " 'Sari'n naute la pom a tih' ti tuin am Abraham kuomah an hril telul ding? Sienkhom a tar hnungin nau pasal ka neipêk ta hi!" a ta. 8 Naute chu a hung inthang lien a, nene nèk an inbàntir ni chun Abrahamin ruoi ropui tak a the a. 9 Aigupta mi Hagar naupa, Abraham ta dinga a neipêk chun a nuisaw lai chu Sari'n a hmu a, 10 Abraham kuomah, "Hi bawinu le a naupa hi hnot suok rawh; hi bawinu naupa hin ka naupa ro hluopui thei naw nih" a ta. 11 A naupa chungchàng thu chun Abraham chu nasa takin a sukbeidong a. 12 Sienkhom, Pathienin, "Naupang chungchàng thu le iI bawinu chungthu hin i lung sukrim naw raw se. Sari ti ang ang chu zawm rawh, a san chu Isaka inthokin i thlahai chu an sui ding a ni si a. 13 Bawinu naupa khom hi hnam ropui takah siem ka tih, i thlaa mi a ni tlat leiin" a ta. 14 A tûk zîngkar chun inhma takin Abraham chu a tho a, beipèr le savun tuiûm, tui thun sip chu Hagar a pêk a, a liengkoa chun a'n chuonpêk a, naupang le chun a tir suok tah a. Chuongchun an fe a, Beersheba thlalera chun an invâk an invâk a. 15 Tuiûma tui an dawn zo chun, naupang chu hlo buk hnuoiah a sie a. 16 Iemani chena hla, thal kâp phàk vela chun a thung chot a, lungrilin, "Ka naupa thi ding chu ka en ngam lul nawh" a ta, inhniek hlop hlopin a tap a. 17 Pathienin naupang tap ri chu a hriet a. Pathien vàntirko chun vâna inthokin Hagar chu a zuk biek a, "Hagar, iem i chang an ta le? Ti naw, saw taka naupang zâl tap ri chu Pathienin a hriet. 18 Tho la, naupang saw kei tho la, i kutin chel rawh, hnam ropui takin ka la siem ding a nih" a ta. 19 Chu phing leh Pathienin a mit a hongpêk a, tuikul a hmu a, a va pan a, tuiûma chun tui chu a thun sip a, naupang chu a'n dawntir a. 20 Pathienin naupang chu a umpui a, a hung seilien pei a, thlalerah a um hlak a, thal kâp thiem mi a hung ni ta a. 21 Paran thlalera an um lai chun a nuin Aigupta mi nuhmeiah a'n neitir a. 22 Chuong lai chun Abimelek le a sipai hotu Fikol chun Abraham kuomah, " I thilthaw iengkimah Pathienin a umpui che a. 23 Kei le ka nauhai le ka thlahai chu thukhêla indawrpui dêr lo dingin tu hin Pathien hmaah inkhàm meuin thu mi tiem rawh. I chunga lunginsietna ka'n langtir ang bokin, mikhuol anga i chêngna ram hi lunginsiet ve dingin thu intiemkam bok rawh" an ta. 24 Abraham chun, "Awleh, ka'n khàm" a ta. 25 Chun, Abimelek siehlawhaiin tuikul an pawnglâk leia a lungni nawna thu chu Abrahamin Abimelek kuomah a hril a. 26 Abimelek chun, " Chu chu tû thaw amanih ti ka hriet dêr nawh. Hi thil hi a hmain i mi hril ngai si naw a, tu hi ka hriet voi khatna a nih" a ta. 27 Chuongchun, Abraham chun beram le bawng ruol a hung thuoi a, Abimelek kuomah a pêk a, an pahni chun thu an thlung ta a. 28 Abraham chun a beram ruol laia beramte, a la ngot pasari a sie hrang a. 29 Abimelek chun Abraham kuomah, "Beram te, a la ngot pasari a hrana i sie hi ieng lei am a na?" a ta. 30 Abraham chun, "Hi tuikul hi keima cho ngei a nih ti i mi hrietpuina dingin hieng beram te, a la ngot pasarihai hi ka kuta inthokin i lâk ding a nih" a ta. 31 Chu thil lei chun chu hmun chu Beer-sheba an inbûk a nih, an pahniin chu hmuna chun inkhâma thu an thlung leiin. 32 Beer-shebaa thu an thlung zo chun, Abimelek le sipai hotu Fikol chu Filistinhai ramah an kîr nawk a. 33 Beer-shebaa chun Abrahamin tamaril thing a phun a, LALPA, Chatuon Pathien hming chu a lam a. 34 Abraham chu Filistinhai ramah sawt tak a um a.

Genesis 22

1 Chuong thil hnunga chun Pathienin Abraham a fie a. A kuomah, "Abraham" a ta, ama chun, "Hi taka hin ka um" a ta. 2 Chuongchun, Pathienin, "I naupa, i naupa nei sun Isak, i hmangai kha thuoi la, Moria bielah fepui la, chu taka tlâng pakhat ka kawkhmu chea chun pumraw inthawinaah inhlàn rawh" a ta. 3 Abraham chu zîng inhma takin a tho a, a sabengtung a siem fel a, a siehlaw pahni le a naupa Isak chu a thuoi a. Pumraw inthawinaa hmang ding thing an ngà hnung chun Pathienin a hril tlâng tieng chu an pan a. 4 Ni thumnaa chun Abraham chu a hang dâk a, an fena hmun ding chu ràlah a hei hmu a. 5 A siehlawhai kuoma chun, "Kei le naupang chauh saw tlânga son va fèng kan ta, nangnin sabengtung leh hi taka hin mi lo nghàk ro. Pathien chawibiek kan ta, chu zoah hung kîr nawk kan tih" a ta. 6 Abraham chun pumraw inthawinaa hmang ding thing têl chu a lâk a, a naupa Isak chu a'n puttir a, ama chun mei le chemte a chawi a, an pahni chun an fe ta a. 7 Isak chun a pa Abraham chu a biek a, "Pa" a ta. Ama chun, "Iem, ka naupa?" a ta. Isak chun, "Hi, mei le thing chu a um a, sienkhom pumraw thilhlân ding beram te chu khaw lai am a um?" a ta. 8 Abraham chun, "Ka naupa, Ama kuoma pumraw thilhlân ding chu Pathienin mi hung pe el a tih" a ta. An pahni chun an fe ta pei a. 9 Pathienin a hrilna hmun an tlung chun Abrahamin maichàm a siem a, a chungah thing a sep khawm a. A naupa Isak chu a khuop a, maichàma thing chunga chun a'n zàltir a. 10 Abraham chun a chemte a ban a, a naupa sun hlum dingin kut a hlàng a. 11 Sienkhom, LALPA vàntirko chun vâna inthokin "Abraham, Abraham" tiin a zuk ko a. Ama chun, "Hi taka hin ka um" a ta. 12 Vântirko chun "Naupang chungah khan kut thlâk naw la, a chungah ieng khom thaw naw rawh. I naupa, i naupa nei sun ngei ngei khom mi pêk i'n ro naw leiin Pathien i ti takzet ti tu hin ka hriet tah" a ta. 13 Abraham chu a hang dàk a, ngai ta, beram chal, chîmbuka a kia intâng chu a hmu a. A va pan a, beram chal chu a man a, a naupa aiin pumraw thilhlânah a hmang a. 14 Chuleiin, hi hmun hi Abraham chun 'Jehova-jire' (LALPA Phuhrûkna Tlâng) tiin a'n bûk a. Tu lai chen khom hin, "LALPA tlânga chun aman phuhrûk a tih" an ti hlak a nih. 15 LALPA vàntirko chun vâna inthokin Abraham chu a hung ko nawk a, 16 "I naupa, i naupa nei sun ngei ngei khom inro loa hi thil hi i thaw leiin kei, LALPA ngei hin ka hming sâlin thu ka'n khàm a nih. 17 Mal sawm ngèi ngéi ka ti che a, vâna arasi le tuifinriet kama tieuvut anga tamin i thlahai la sukpung ka ta, i thlahai chun anni dotuhai khawpui chu la hluong an tih. 18 Ka thu i awi leiin, i thlahai hmangin hnuoia hnam tinin malsawmna la chang an tih" a ta. 19 Chuongchun, Abraham chun a rawihai chu a zuk fin nawk a, Beer-sheba panin an suok a, Beer-shebaa chun Abraham chu a um ta zing a. 20 Chu hnung iemani chena chun Abraham kuomah, "Milka khomin i sang Nahor kha nau pasal iemani zàt a neipek" tiin miin an hung hril a. 21 A upa tak chu Uza a na, a sanghai chu Buza hai, Aram pa Kemuel hai, 22 Cheseda hai, Hazo hai, Pilda hai, Jidlaf hai le Bethuel hai an nih 23 Bethuel chu Rebeka pa a nih. Milka chun chuong naupa pariet chu Abraham sangpa Nahor a neipèk a nih. 24 A hmei, a hming Reuma khomin naupa Teba hai, Gaham hai, Tahas hai le Maaka hai a neipèk bok.

Genesis 23

1 Sari chu kum za le sawmhni le pasari a dam a. 2 Kanan rama Kiriat Arba (Hebron an ti bok) a chun a thi a, Abraham chu Sari sûn ding le tà dingin a hung a. 3 Abraham chu a nuhmei ruong bula inthok chun a tho suok a, Hit mihaim chu a biek a. 4 "Kei chu nangni laia hung inpèm thar, mikhuol el ka ni a. Ka mithi ruong hi ka phûmna ding thlân hmun mi'n chawktir ro" a ta. 5 Hit mihai chun Abraham kuomah, 6 "Pu, mi ngaithla hràm rawh. Nang chu keini lai lal ropui tak i ni a, kan thlânmuola hai hin i ditna hmun hmunah i mithi chu phûm el ta la; i mithi i phumna dingin keini lai tù khomin kan thlân hmun pêk che kan inro nawh" an ta. 7 Chuongchun, Abraham chu a tho a, Hit mihai chu kûnin chibai a bûk a, an kuomah, 8 "Ka mithi ka phùm in mi phalpêk chun, ka thu hi mi ngâithlapêk unla, ka aiin Zohar naupa Efron kuomah mi ngênpèk unla, 9 a lo monga a ram Makpela pûk chu mi'n chawktir hràm raw se. Nangni laia thlân hmun man in sak zât ang anga mi'n chawktir dingin mi hnipèk ro" a ta. 10 Hit mi Efron chu a chipuihai lai chun a lo thung ve zing a. A chipuihai le khaw kul kotkhâr bula hung inkhawmhai hrieta ngei chun Abraham kuomah, 11 "Ni lo e, pu, mi ngaithla la, ka chipuihai mithmua ngei hin lo chu ka pêk che a, a sûnga pûk um khom chu ka pêk bok che; i mithi chu phûm el rawh" a ta. 12 A ram mihai hmaa chun kûnin Abraham chun chibai a bûk nawk tawl a, 13 an rênga hriet phàka inringin Efron kuoma chun, "Lunginsiet takin mi ngaithla la, a ram man chu pêng ka tih. Mi pompèk hràm raw khai, ka mithi ka phùm theina dingin" a ta. 14 Efron chun Abraham kuomah, 15 "Pu, mi ngaithla la, ram man chu tangkaruo shekel zali a nih. Amiruokchu, nangma le keima inkârah chu chu ieng khop tham am a na? I mithi chu phûm el rawh" a ta. 16 Abraham chun Efron ram man sak zât chu pêk a remti a, Hit mihai hmaa chun a man zât dinga tuk tangkaruo chu a'n bûktir a, sumdawnghaiin bùkna an hmang ang dungzuia shekel zali a na, chu chu Efron kuomah a pêk a. 17 Chuongchun, Efron ram, Mamre kawla Makpela pûk le lo le a ramri sûnga thing um po po chu, 18 kul kotkhâr bula hung inkhawm Hit mihai hmaa ngei chun dân ang takin Abraham taa sie nghet a ni ta a. 19 Chu hnung chun Abrahamin a nuhmei Sari chu hi Kanan ram, Hebron khuoa Makpela pûk, Mamre bul ela uma chun a phûm a; 20 chu lo le pûk chu Hit mihai chun thlân hmun dingin Abraham chu dân ang takin an inhlàn tah a nih.

Genesis 24

1 Abraham chu tar tak a ni ta a, kong iengkimah LALPAN mal a sawm a. 2 A insùnga a siehlaw lu tak, a thil nei po po chunga thuneitu kuoma chun, "I kut kha ka malpui hnuoia hin rol rawh. 3 LALPA, vân Pathien le hnuoi Pathien hming sàlin, ka chêngna Kanan mi nunghàkhai hi nuhmeia ka naupa inneitir lo ding le 4 kan ram tieng, ka laibunghai lai fe a, kan rama mi ngei chu nuhmeia ka naupa Isak hi inneitir dingin thu ka'n khâmtir ding che a nih, " a ta. 5 Siehlaw chun a kuomah, "Nuhmei chun hi ram tieng hin mi zui nuom ta naw sien, i naupa chu i pieng le murna ramah chun ka thuoi kîr nawk ding am a ni?" tiin a'n don a. 6 Abraham chun, "Ka naupa chu i thuoi kîr ding a ni nawh ti hre rawh. 7 LALPA, vân Pathien, ka piengna ram le ka pa ina inthoka mi thuoi suoktu, mi be a, thu mi tiemtu chun mani meu inkhâmin hi ram hi ka thlahai a la rochung ding thu a thlung ta leiin, chu taka inthoka ka naupa nuhmei ding chu i hmupèk ngei theina dingin Ama ngeiin a vàntirko i hmaah tir a tih. 8 Nuhmei chun a hung zui nuom naw che a ni chun hi inkhâmnaa inthok hin nang chu fihlim i tih. Ieng po khom ni sien, ka naupa chu chu taka chun i thuoi kîr ding a ni nawh" a ta. 9 Chuongchun, siehlaw chun a kut chu a pu Abraham malpui hnuoia chun a rol a, chu chungthua chun a kuomah a'n khâm ta a. 10 Siehlaw chun a pu sanghawngsei sawm a thuoi a, a pu thil nei tha tam tak a chawi sa bok a, Aram Naharaim (Mesopotamia hmar thlang) a Nahor khuo panin a'n thok suok a. 11 A tlung chun zàn tieng, nuhmei ruol tuichawia an fe hunah khawhnawma tuikul sîra chun a sanghawngseihai chu dingthathuonin a'n boktir a. 12 Chuongchun, a tongtai a, "Aw LALPA, ka pu Abraham Pathien, lunginsiet takin voisun hin mi'n hlawtlingtir la, ka pu Abraham chungah i lunginsietna inlangtir rawh. 13 En ta, hi tuikul bula hin ka ngîr a, a khaw nunghàkhai chu tui chawi dingin an hung suok mèk a nih. 14 Hieng ang hin thu ka rot nuom a: nunghàk tu kuoma khom, 'Lunginsiettakin i tui bèla tui kha mi'n dawntir raw khai' ka ti phaa amain, 'Dawn rawh, i sanghawngseihai dawn ding khom pêng ka tih' titu taphot chu, chu nunghàk ngei chu i siehlaw Isak ta dinga i ruot chu ni raw se. Chu chun ka pu chungah lunginsietna i'n langtir a nih ti hrieng ka tih" a ta. 15 A tongtai khom a zo hmain, a liengkoah tui bèl inchuonin Rebek chu tuikhur panin a hung a. Ama chu Abraham sangpa Nahor le a nuhmei Milka naupa Bethuel naunu a nih. 16 Nunghàk hmèl tha tak el, nunghàk thienglâm, pasal tu khomin an la pawl lo a nih. Tuikhura chun a tum a, a tui bel chu a thàl sip a, a hung suok nawk a. 17 Siehlaw chun inrang takin a zu pan a, "Lunginsiet takin i tui bela tui kha tlawmte mi'n dawntir raw khai" a ta. 18 Ama chun, "Pu, dawn rawh" a ti ruol chun a tui bel chu a chawi thlâk a, a'n dawntir a. 19 A'n dawntir hnung chun, "I sanghawngseihai ta ding khom an dawn khop hma khat chu chawi pei ka tih" a ta. 20 Taikuonga chun tui chu a sung thlâk vat a, tuikhur tieng a tlân thla a, sanghawngsei po po dawn khop a chawipêk a. 21 A'n zinna san chu LALPAN a'n hlawtlingtir le tir naw hriet tumin siehlaw chun tong loin ama chu chîk takin a enthlâk zing a. 22 A sanghawngseihaiin tui an dawn khop charin, siehlaw chun rangkachak hnarkuol, gram nga le a chenve bûk le rangkachak bânbun pahnih, gram za le sawm vela rik chu a phor suok a. 23 Ama chun, "Tu naunu am i na? I pa inah riekna ding a um thei di'm ti mi hril thei i tim?" tiin a'n don a. 24 Nunghâk chun, "Milka le Nahor hai naupa Bethuel naunu ka nih. 25 Kan inah bupawl le ran bu kan hau a, zâna i riekna ding hmun khom kan nei" a ta. 26 Chuongchun, siehlaw chun kûnin LALPA a chawibiek a, 27 "LALPA, ka pu Abraham Pathien chu inpâkin um raw se, ka pu chunga a lunginsietna le ringumna chu a bânsan ngai si nawh. Kei ngei khom hi LALPAN ka'n zinnaah mi thuoiin, ka pu unauhai inah a mi thuoi tlung a ni hi" a ta. 28 Chun, nunghàk chu a tlân a, chuong thil chu a nu sûngkuohai chu a va hril a. 29 Rebek chun tapa a nei a, a hming chu Laban a nih. Chuongchun, Laban chu tuikhura umpa chu hmu ding chun a tlân suok a. 30 A farnu Rebek hnârkuol le bânbun bun chu hmu a, a thil hrilhai chu a hriet phing leh a petu chu hmu dingin a fe a, tuikhur bulah a sanghawngseihai lai a lo ngîr a. 31 Laban chun, "Nang, LALPA malsawmna dongtu, hung rawh. Ieng dinga hi taka hin i ngîr zing am? I riekna ding le i sanghawngseihai umna ding hmun ka buotsai diem tah" a ta. 32 Chuongchun mi chu ina chun a lût a, sanghawngseihai thil phur chu Laban chun a lâk thlàk a. Sanghawngseihai fâk dingin bupawl le ranbu an hung lâk a, mi le a hung puihai ke sawpna dingin tui an hung lâk bok a. 33 Fâk ding an hung chawi a, sienkhom ama chun, " Ka hungna san ka hril hma chun fa thei naw ning" a ta. Laban chun, "Chuong an leh hang hril ta la" a ta. 34 Ama chun, "Kei hi Abraham siehlaw ka nih. 35 LALPA chun nasa takin ka pu mal a sawm a, mi lien tak a hung ni ta a. LALPA chun beram ruol hai, bawng ruol hai, tangka le rangkachak hai, bawinu le bawipa hai, sanghawngsei le sabengtung hai a pêk bok a. 36 Ka pu nuhmei Sari chun tar hnungin ka pu ta dingin nau pasal a neipèk a, ama kuoma chun a nei po po a pêk vong a. 37 Ka pu chun, 'Ka umna ram Kanan mi nunghàk laia mi hi nuhmeiah ka naupa i'n neitir ding a ni nawh. 38 Ka in tieng, ka laibunghai kuomah fe la, ka naupa nuhmei ding chu i va thuoipêk ding a nih' tiin thu a mi'n khâmtir a. 39 Kei chun ka pu kuomah, 'Nuhmei chun a mi zui nuom kher naw el thei a' ka ta. 40 Ama chun, 'Ka'n tlonpui hlak LALPA chun a vàntirko chu i kuomah hung tir a ta, i'n zinnaa chun inhlawtlingtir a ti che a, chuongchun ka naupa ta dingin ka laichinhai le ka sûnghai laia mi nuhmei i hawnpêk ding a nih. 41 Ka laichinhai kuom ngei i tlung pha leh ka kuoma thu i'n khâmna laka inthokin fihlim i ta; nunghàk an pêk naw che khomin ka kuoma i'n khâmna laka inthok chun fihlim tho tho i tih' tiin. 42 "Chuongchun, voisuna tuikhur ka hung tlung khan, 'Aw LALPA, ka pu Abraham Pathien, ka hungna san hi i mi'n hlawtlingtir ding chun, 43 en ta, tuikhur bulah ka ngîr hi, nunghàk tu khom tui chawia hung kuomah, 'Lunginsiet takin i tui bèla tui kha tlawmte mi'n dawntir rawh aw' ka ti pha a, 44 'Dawn rawh, i sanghawngseihai dawn ding khom zu chawi ka tih' titu taphot chu ka pu naupa nuhmei dinga Pathien ruot ni raw se" tiin ka tongtai a. 45 "Ka lungril ka hril zo hmain, ngai ta, Rebek hi liengkoa tui bèl inchuonin a hung suok a, tuikhurah a tum thla a, tui a zu chawi a. Kei chun, "Lunginsiet takin dawn ding mi pe rawh" ka ta. 46 Inrang takin a tui bèl chu a hung dom thlâk a, 'Dawn rawh, i sanghawngseihai dawn ding khom zu chawi pei ka tih' a ta. Chuongchun, ka dawn a, ka sanghawngseihai khom tui a pêk seng a. 47 "Kei chun, 'Tu nau am i na?' tiin ka'n don a. Ama chun, 'Nahor naupa, Milkain a thlapèk Bethuel naunu ka nih' a ta. Chuongchun, a hnârah hnârkuol ka'n bùktir a, bânbun kan buntir bok a. 48 Chu zoah kûnin LALPA ka chawibiek a, LALPA, ka pu Abraham Pathien, ka pu sangpa naunu hi ka pu naupain nuhmeia a nei theina dinga lampui indika mi thuoitu chu ka'n pâk bok a. 49 Tu hin ka pu chungah lunginsietna le zangaina in inentir thei ding chun mi hril unla, a thei naw ding khomin mi hril bok unla, ka nghatna tieng ding hre thei ka tih" a ta. 50 Laban le Bethuel chun, "Hi thil hi Pathiena inthoka suok a na, a khaw tieng pang pang khom keini hril thei a um nawh. 51 Hi, Rebek chu i hmaah a um annawm; thuoi la, fepui la, LALPAN rem a ruot tah angin iI pu naupa nuhmeiah um raw se" tiin an don a. 52 An thu chu a hriet charin Abraham siehlaw chu hnuoi sikin a kûn a, LALPA chu a chawibiek a. 53 Chun, ama chun tangkaruo le rangkachaka siem incheina thuomhnawhai le silfènhai chu a phor suok a, Rebek chu a pêk a; a tapa le a nu khom chu thilpêk hlu tak tak a pêk bok a. 54 Chu zoa chun ama le a hung zuituhai chun fain an dawn a, an riek ta a. 55 Zîng an tho chun siehlaw chun, "Ka pu kuom tieng mi'n fetir ta ro leh" a ta. A tapa le a nu chun, "Tawinu hi ni sawm vêl bêk kan kuomah la um sien, chu zoah i thuoi ding annawm" an ta. 56 Ama ruok chun, "LALPAN ka'n zinna a mi sukhlawtlingpêk ta rau rau si hin chu, mi sukhnu naw hràm unla, ka pu kuom tieng kîr dingin mi'n fetir el ro khai" a ta. 57 Anni chun, "Chuong a ni leh, Tawinu chu ko kan ta, indon kan tih" an ta. 58 Rebek chu an ko a, "Hi mi le hin i fe nuom am?" tiin an indon a, ama chun "Nuom e" a ta. 59 Chuongchun, an farnu Rebek le a dontu le Abraham siehlaw le a rawihai chu an infetir a. 60 Rebek chu mal an sawm a, "Kan farnu, a sâng ngota sâng tam nu hung ni la, i thlahai chu an hmèlmahai kul kotkhâr neitu hung ni raw hai se" tiin. 61 Chuongchun Rebek chu a tho a, a bawinuhai leh sanghawngsei chungah an chuong a, mi chu an zui ta a. Chuong ang chun siehlaw chun Rebek chu thuoiin a fe tah a nih. 62 Isak chu Beer-lahai-roia inthoka hung a na, chu chu sim ram Negev-a um a nih. 63 Zân tieng hin phûlah fienriel dingin Isak chu a lèng suok a. A hang ngha vel chun, ngai ta, sanghawngsei ruol hung chu a hmu a. 64 Chun, Rebek chu a hang dàk suok a, Isak chu a hmu charin sanghawngsei chunga inthokin a tum thla a. 65 "Phûla mi hmuok dinga hung saw tu am a na?" tiin siehlaw chu a'n don a. Siehlaw chun, "Ka pu a ni saw" a ta. Rebek chun hmai inkhumna puon a lâk a, a hmai a'n khum a. 66 Siehlaw chun a thilthaw dàn po po chu Isak a hril a. 67 Isak chun a nu Sari puon inah Rebek chu a thuoi lût a, a nei a, a nuhmei a hung ni ta a. Isak chun a hmangai êm êm a, a nu a sûnna chunga khom hnêmin a hung um tah a nih.

Genesis 25

1 Ahraham chun nuhmei dang a nei nawk a, a hming chu Ketura a nih. 2 Ama chun Zimran hai, Joksan hai, Medan hai, Midian hai, Isbak hai le Suah hai a thla a. 3 Joksan chun naupa Seba le Dedan a nei a. Dedan naupahai chu Asur hai, Letus hai, Leum hai an nih. 4 Midian naupahai chu Efa hai, Efer hai, Hanok hai, Abida le Elda hai an nih. Hienghai po po hi Ketura nauhai chu an nih. 5 Abraham chun a nei po po Isak a pêk a. 6 A hmei naupahai ruok chu a dam lai ngeiin thilpêk a pêk seng a, Isaka inthoka indangtirin, khawsak ram tieng a'n fetir vong a. 7 Abraham dam sùng chu kum za le sawmsari le panga a nih. 8 Tar kûna damin a thi a, a chipuihai kuomah thuoiin a um ta a. 9 Hit mi Zohar naupa Efron loa Makpela pûk, Mamre bula chun a naupa Isak le Ismael chun an phûm a, 10 chu hmun chu Abrahamin Hit mihaia inthoka a'n chawk a na, chu taka chun a nuhmei Sari leh an phum a nih. 11 Abraham thi hnung chun a naupa Isak chu Pathienin mal a sawm a; chuong lai chun Isak chu Beer Lahai Roi khaw kawla chèng a nih. 12 Hi hi Sari bawinu, Aigupta mi Hagarin Abraham ta dinga naupa a neipèk Ismael thlahai chanchin suina chu a nih. 13 An pieng huna an hminghai an inchik dàn chun Ismael thlahai chu: Ismael nau lutîr chu Nebaiot a na, a nauhai chu Kedar hai, Adbel hai, Mibsam hai, 14 Misma hai, Duma hai, Masa hai, 15 Hadad hai, Tema hai, Jetur hai, Nafis hai le Kedema hai an nih. 16 Hienghai hi Ismael nau pasal sawm le pahnihai chu an na, an chèngna le an ram del ang peiin anni chi bing sengah lalna an chang seng a nih. 17 Ismael chu kum za le sawmthum le pasari a dam hnungin a thi a, a chipuihai kuomah thuoiin a um ta a. 18 A thlahai chu Aigupta ramri bul Sura inthoka Asuria pan zawnga Havila chen an inzar a, an unauhai po po leh intai zing zingin an khawsa a. 19 Hi hi Abraham naupa Isak chanchin chu a nih. Isak chu Abraham naupa a nih. 20 Isak chun kum sawmli a niin Laban farnu Rebek chu nuhmeiah a nei a, ama chu Mesopotamia hmar thlang Padan Arama um, Aram mi a hming Bethuel naunu a nih. 21 A nuhmei chu a ching leiin Isak chun a nuhmei aiawin LALPA kuomah a hnipêk a, LALPAN a tongtaina chu a don a, Rebek chun nau a hung pai ta a. 22 A nau paihai chu a sûnga chun an insuol nasa leiin "Iem an ta a ka chunga thil tlung hi?" a ta, LALPA rawn dingin a fe a. 23 LALPA chun a kuomah, "I sulah hnam hni an insieng a, I sûngah hnam hni chu inthèng an ta, Hnam pakhat chu hrât lem a ta, A u chun a sang rong bawl a tih"tiin a hril a. 24 A nau nei a hung hun chun a sula chun nau inphîr an lo um a. 25 A hung suok hmasa lem chu sen tul el, a pang chu puon inhmul anga inhmul dum el a na, a hmingah 'Esau' an sak a. 26 Chu zoah, a upa Esaun kekhong chu a kuta chelin a sang chu a hung suok a, a hmingah 'Jakob'o an sak a. Rebekin anni pahni a nei hin Isak chu kum sawmruk mi a ni tah. 27 Naupanghai chu an hung seilien a, Esau chu thal kâp thiem le ram suok mi a na; Jakob ruok chu pa dei dap el, in tieng ngaisak mi a nih. 28 Ram sa du mi Isak chun Esau chu a ngaina a, Rebek ruok chun Jakob a ngaina thung a. 29 Voi khat chu Jakobin thil a lo suong hruoi a, Esau ramvàk chu tàmsawlin a hung tlung a. 30 Jakob kuomah, "I thil sen suong kha mi hang infâktir vat ta, ka tamsawl a ni hih" a ta. Chu lei chun a nih Edom ti hming a put phà chu. 31 Jakob ruok chun, "Nau lutîr i ninain inchaw rawh" a ta. 32 Esau chun, " En ta, ka thi têp an ta hi! Nau lutîr nina chu ka ta dingin a hmangna iem a um a?" a ta. 33 Sienkhom Jakob chun, "Inkhâmin thu mi tiem hmasa phot rawh" a ta. Chuongchun, Jakob kuoma chun inkhâmin nau lutîr a nina chu a zor ta a. 34 Chu phing leh Jakob chun bei le a be sen suong hruoi chu a pêk a. Chuongchun, a fâk a, a dawn a, a tho a, a fe ta a. Chuong ang chun Esau chun nau lutîr a nina chu a ngainèp a nih.

Genesis 26

1 Abraham dam laia tàm nasa tak a tlàk hnungin chu rama chun tàm dang a tla nawk a, Isak chu Gerar-a Filistinhai lal Abimelek kuoma chun a fe a. 2 LALPA chu Isak kuomah a hung inlàr a, "Aigupta ramah fe naw rawh; i umna hmun dinga ka tia chun um rawh. 3 Hi rama hin um hri phot la, i kuomah um ka ta, mal sawm ka ti che. Nangma le i thlahai kuomah hi ram po po hi pêng ka ta, i pa Abraham kuoma ka'n khàmna chu suknghet ka tih. 4 Vâna arasi anga tamin i thlahai chu sukpung ka ta, hi ram po po hi pêng ka ta, i thlahaia inthokin hnam tin malsawmin la um an tih; 5 a san chu, Abrahamin ka thu a awi a, ka ti ang ang ka thupêkhai, ka thu ruothai le ka dànhai a zawm leiin" a ta. 6 Chuongchun Isak chun Gerar-ah umhmun a khuor a. 7 Chu rama mihaiin a nuhmei chanchin an indon chun, "Ka nuhmei a nih" ti sien, a hmel a tha si a, a ram mihai chun Rebek leiin an that inlauna a nei a, "Ka nuhmei a nih" ti ngam loin "Ka farnu a nih" a ta. 8 Hun sawt fe chu hmuna a um hnung chun, Isakin a nuhmei Rebek a sai lai chu Filistinhai lal Abimelek chun a tukvera inthokin a zuk hmu a. 9 Abimelek chun Isak chu a'n kotir a, a kuomah, "I nuhmei a ni chieng si a, ieng dinga 'Ka farnu a nih' i ti am a na?" a ta. Isak chun, "Ama leia ka hringna chân palh ka'n lau lei a nih" a ta. 10 Abimelek chun, "Kan chunga i thilthaw hi iem an ta a? Keini laia mi tu el khom hin lo zâlpui palh ta sien, kan rênga chungah thiem nawna i hung intlungtir pha ding an son naw!" tiin a suosal a. 11 Chuongchun, Abimelek chun, "Tukhom hi mi hi amanih a nuhmei hi amanih poi tawk taphot chu sukhlum ngei ngei ding a nih" tiin mihai po po chu thu a pêk a. 12 Chu rama chun Isakin lo a siem ve a, Pathienin mal a sawm leiin a kum khatnaah a lêt zain a hlawk a. 13 A hung neinung a, a'n thang tuol tuol a, mi hausa tak a hung ni ta a. 14 Beram ruol le ran ruol le siehlaw tam tak a hung nei a, Filistinhaiin an hung thîk ta hle a. 15 A pa Abraham dam laia a siehlawhaiin tuikul an cho po po chu Filistinhai chun pil vur khumin an khàrpêk ta vong a. 16 Abimelek chun Isak kuomah, "Hi hmuna inthok hin inson ta rawh, keini nèkin i che thei lem dai ta si a" a ta. 17 Chuongchun, chu taka inthok chun Isak chu Gerar phaizawlah a'n son thla a, chu taka chun umhmun a khuor a. 18 A pa Abraham dam laia tuikul a'n chotir, a thi hnunga Filistinhaiin an khàrpêk vong tahai chu Isak chun a hong nawk a, kha hmaa a pain a kona hming seng kha a'n puttir nawk vong a. 19 Ruoma chun Isak siehlawhaiin tuikhur ding an cho a, tui hnâr inthieng an cho suok a. 20 Sienkhom, Gerar khuoa ranpuhai chun, "Tui hi kan ta a nih" tiin Isak ranpuhai chu an hung inchùpui a; chuonga an hung inchùpui lei chun a tuikul hmingah 'Esek'p ti a'n bûk a. 21 Tuikul dang an cho nawk a, chu khom chu inchùpui tuma an hung insèlpui nawk leiin a hmingah 'Sitna'q a'n bùk a. 22 Chu taka inthok chun an inson a, tuikul dang an cho nawk a, chu ruok chu an hung inchùpui ta naw a. Chuongchun, "Tu hin chu LALPAN ei ta dingin hmun a mi pêk ta a, hi hmuna hin inthla pung tâng ei tih" a ta, a hmingah 'Rehobot'r a'n bûk a. 23 Chu taka inthok chun Beersheba a zuon tung a. 24 Chu zân chun a kuomah LALPA a hung inlàr a, "Kei hi i pa Abraham Pathien chu ka nih. Ti naw, i kuomah ka um annawm. Ka siehlaw Abraham leiin malsawm ka ti che a, i thlahai sukpung ka tih" a ta. 25 Chu taka chun maichàm a siem a, LALPA hming a lam a. Chun, chu hmuna chun puon in a kei a, a siehlawhaiin tuikul thar an cho nawk a. 26 Chu lai chun Gerar-a inthokin Abimelek a hung a, a mi rawn tak Ahuzat le a sipai kawmandar Fikol hai chu a hung thuoi a. 27 Isak chun, "In mi tai a, in mi tir suok ka ni si a, ieng leia ka kuomah in hung nawk?" a ta. 28 Anni chun, "I kuomah LALPA a um ti chieng takin kan hmu a. Kan inbiek tlàng a, nang le keini inkârah intiemna thuthlung nei ngei tûlin kan hriet a. 29 LALPA malsawmna dongtu i ni ta si a, i poi tawk loa i chungah that inchu a, muong taka kan infetir ang che khan, keini chunga khom sietna ding ieng khom i thaw nawna dingin inkhâm meuin thuthlung siem ei tiu" an ta. 30 Isak chun ruoi a buotsaipêk a, fain an dawn a. 31 A tûk zîngkar inhma takin thu chu inkhâmin an thlung a. Chu zoah Isak chun muong takin an kîrtir nawk a. 32 Chu ni chun Isak siehlaw chu tuikul an cho thu hril dingin a hung a, "Tui kan cho suok ie!" a ta. 33 Isak chun tuikul hmingah 'Seba's a'n bûk a, chu khuo chun voisun ni chen hin Beersheba ti hming a la put zing a nih. 34 Esau chun kum sawmli a niin Hit mi Beri naunu Judit le Hit mi bok Elon naunu Basemot hai chu nuhmeiin a nei a. 35 Anni hi Isak le Rebek lung sukrimtu tak an nih.

Genesis 27

1 Isak chu a hung upa ta hle a, khuo hmu thei lo khopa a mit a hung inthim hnung chun a naupa Esau chu a ko a. "Ka naupa" a ta, ama chun, "Iem a na?" a ta. 2 Ama chun a kuomah, "Ngai ta, ka tar ta hle a, ka thi ni ding ka hriet si naw a. 3 Tu hin i hriemhrei, thal bawm le thal ngul chawi la, va ramsuok la, sa mi va kâppèk rawh. 4 Chu chu ka du dàn ang taka inhnikin suong la, ka fâk dingin hung chawi rawh, ka thi hmaa mal ka sawm theina ding chein" a ta. 5 Isakin a naupa Esau a biek lai chu Rebek chun a lo ngâithlàk a. 6 Ramvaka Esau a suok char chun Rebek chun a naupa Jakob kuomah, "I pain i u kuoma thu a hril ka lo hriet a. 7 'Va ramsuok la, sa mi va kâppèk la, ka hme ding inhnik deuin suong rawh, ka thi hma ngeia LALPA hmaa mal ka sawmpèk theina ding chein' a ti a nih. 8 Chuleiin, tu hin ka naupa, thu ka pêk ding che hi fimkhur takin ngaithla la, ka ti angin va thaw rawh. 9 I pain a du dàn ang taka inhnika hme ka siem theina dingin, tu hin ran ruol lai va fe la, kèl tuoi tha tak pahni mi va lapèk rawh" a ta. 10 Chu zoah i pa thi hmaa mal a sawm theina ding chein a fâk dingin a kuomah chawi rawh" a ta. 11 Jakob chun a nu Rebek kuomah, "Nu, ka u Esau chu pa hmul hau a na, kei hlak chu hmul nei lo ka na. 12 Ka pain mi tuoi hlau sien iem ni tàng a ta? Ka hlêm tum angin ngai a ta, malsawmna nèkin tongsie a mi'n phur lem thei a nih" a ta. 13 A nu chun, " Ka naupa, tongsie chu ka chungah tla raw se. Ka ti ang tak chun thaw rawh; fe la, va la rawh" a ta. 14 Chuongchun a fe a, a va lak a, a nu kuomah a hung chawi a, a pain a du dàn ang taka inhnikin a suongpèk a. 15 Chu zoah Rebek chun ina a kol, a nau upa lem Esau thuomhnaw laia a tha tak hai chu a hung lâk suok a, a naupa naupang lem Jakob chu a'n hâktir a. 16 A bân le a rînga pangti namna lai po chu kèl vunin a tuompêk a. 17 Hme inhnik tak le bei a siem chu a naupa Jakob kuoma chun a pêk a. 18 Jakob chu a pa kuomah a fe a, "Pa" a ta. Ama chun " Iem a na? Ka naupa a tu lem am i ni leh?" a ta. 19 Jakob chun a pa kuomah, "I nau lutir Esau ka nih. I mi tir ang tak khan ka thaw a; tu hin tho inkâng la, mal i mi sawm theina dingin, ka sa kâp sà hi hang fa ta, " a ta. 20 Sienkhom Isak chun a naupa kuomah, "Ka naupa, iengtizie am an ta a, i va hung thaw inrang êm êm ngei de?" a ta. Ama chun, "LALPA i Pathien chun a mi'n hlawtlingtir lei a nih" a ta. 21 Isak chun Jakob kuomah, "Ka naupa, mi hung hnai rawh, lo tuoi ka ti che, chu chun ka naupa Esau i ni ngei le ngei naw hre thei ka tih" a ta. 22 Jakob chun a pa a va hnai a, a lo them a, "A rawl chu Jakob rawl a na, a kut hlak Esau kut a ni si hi!" a ta. 23 A kut chu Esau kut anga an hmul thum si leiin a hriet thei naw a, chuongchun mal a sawm a. 24 "Ka naupa Esau chu i ni chie de maw?" a ta, Jakob chun "Ni e" a ta. 25 Ama chun, "Ka naupa, i sa kâp sa a then chu mi hung pe la, mal khom sawm nghal ka ti che" a ta. Jakob chun a hung pêk a, a fâk a; uoiin a hung pêk bok a, a dawn a. 26 A pa Isak chun, "Ka naupa, mi hung hnai la, mi fawp rawh" a ta. 27 A va hnai a, a fawp a, Isakin a silfèn rim a hang hriet chun mal a sawmpek a, Aw khai, ka naupa rim chu, LALPA malsawm ram rim ang a nih. 28 Pathienin vân daidaw le, Hnuoi thatna hmun pe sien che, Bu le uoiin vûr teu che raw se. 29 Hnamhan i rong bawl hai sien, I hmaah kun raw hai se. I unauhai chungah inlêng la, I nu nauhan chibai bûk che raw se. Tongsie inphurtu che taphot chu, Tongsie phurin um hai sien la, Malsawmtu che taphot chu, Malsawmin um raw hai se"tiin. 30 Isakin mal a sawm zoa Jakobin a pa a màksan chauh ti chun a unaupa Esau ramvàk khom chu a hung tlung a. 31 Ama khomin hme inhnik tak a buotsai a, a pa kuoma chun a hung chawi a. "Pa tho kàng la, ka sa hung kâppèk che hi hang fa ta, mal i mi sawm theina dingin" a ta. 32 A pa Isak chun, "Nang tum i na?" a ta. Ama chun, "I naupa ka nih, i nau lutîr Esau" a ta. 33 Isak chu nasa takin a'n thin a, "I hung tlung hmaa a sa kâp sa ka kuomah hung chawia ka fâk le mal ka sawmpèk ta kha tu am a na? A nih, ama chu malsawmin um ta tho tho a tih" a ta. 34 Esauin a pa thu hril a hriet chun inring tak le lung na takin a tap a, a pa kuoma chun, "Pa, kei khom hi mal mi sawm ve hrâm rawh" a ta. 35 A pa chun, "I sangpa'n a mi hung hlêm a, i malsawmna a lâkpèk vong ta che" a ta. 36 Esau chun, "Jakob hin chu a hming a va hang put fûk kher de maw! Tum hni zet a mi dawhàna a ni tah. Ka nau lutîr nina a mi làkpèk a, tu hin ka malsawmna dong ding a mi huipèk nawk vong a! Malsawmna ka ta dingin hlà hrim i nei ta naw a ni maw, pa?" a ta. 37 Isak chun, "Ama chu i lalah ka siem ta a, a unau danghai po po khom a siehlaw dingin ka pêk vong ta a; bu le uoiin tieng ka vûr ta bok a. Ka naupa, i ta dingin iem a na ka thawpêk thei ta ding che chu?" a ta. 38 Esau chun a pa kuomah, "Pa, malsawmna pakhat chau a ni maw i lo nei? Pa, kei khom mal mi sawm ve hram rawh" a ta. Esau chu inring takin a tap a. 39 A pa Isak chun a don a, " I chêngna hmun chu, Pil hâng um nawna nîng a ta, Vân daidaw tla ngai naw nih. 40 Kawlhnâmin hring i ta, I sang rong bawl i tih. I nghok pha leh a ringkol chu, I thin thlâk hun la um a tih"tiin. 41 A pain mal a lo sawmpèk leiin Jakob chungah Esau chu a lungsen êm êm a, "Ka pa ka sûn ni chun ka sangpa Jakob hi ka that ngei ngei ding a nih" a ta. 42 Esau thu hril Rebekin a lo hriet chun Jakob chu a ko a, a kuomah, "I u Esau inhnèmna chu sukhlum ché a nih. 43 Tuhin ka naupa, ka hril ang hin thaw rawh: inrang takin ka tapa Laban kuom tieng Haran-ah tlân hmang rawh. 44 I u lungsen a dam hma po chu chu taka chun hang um rawh. 45 I chunga i u lungsen a dam a, a chunga i thilthawhai a theinghil pha leh hung hril ka ti che a, chu pha chun hung kîr chauh rawh. Ieng tin am ni khat thilthuah inpafain ka chân ding cheu a na?" a ta. 46 Rebek chun Isak kuomah, "Hieng Hit nuhmeihai lei hin dam khom ka nghok tah. Jakob khomin hi rama nunghàk, Hit nunghàkhai laia mi hi nuhmeiah a nei nawk vai lem chun, ka ta dingin dam hi a sawtna ieng am um a ta?" a ta.

Genesis 28

1 Chuongchun, Isakin Jakob chu a ko a, mal a sawm a, thu a pêk bok a. "Kanan rama nunghàkhai hi nuhmeiah i nei ding a ni nawh. 2 Padan Aram-a i nu pa Bethuel in tieng fè vat rawh. Chu taka chun i nu tapa Laban naunuhai laia mi nuhmeiah hang nei rawh. 3 Hung pung a, hnam tam taka in hung insiem theina dingin Iengkim Pathien chun mal sawm che raw se. 4 Abraham kuoma Pathienin ram a pêk, mikhuol anga tuta i chêngna ram hi in hung hluo theina dingin, nang le i thlahai chu Abraham malsawmna dong kha indongtir bok cheu raw se" a ta. 5 Chuongchun, Isak chun Jakob chu an suoktir a, Padan-Arama Jakob le Esau nu Rebek tapa Laban, Aram mi Bethuel naupa kuoma chun a fe ta a. 6 Isakin Padan Aram tieng nuhmei zong dinga Jakob a tir khan mal a sawmpèk laiin, "Kanan nunghàk nuhmeiah i nei ding a ni nawh" tiin a hril a, 7 a nu le pa thu chu awiin Jakob chu Padan Aram tieng a fe tah ti Esauin a hriet chun, 8 Kanan nuhmeihai chu a pa Isakin a lo nghok hle a nih ti a hung hriet ta a. 9 Chuleiin, Esau chu Abraham naupa Ismael kuomah a fe a, naunu Malahalat, Nebaiot farnu chu nuhmeiah a va nei bel a. 10 Jakob chun Haran khuo panin Beersheba a suoksan a. 11 Hmun pakhat a tlung chun, nisa a tla ta leiin a riek a. Lung pakhat a lâk a, lukhamah a hmang a, zâl hmun a rem a. 12 Mang a nei a, vâna inthoka hnuoi chena kailawn indaw thlaa a suk a tunga Pathien vàntirko ruol inlon zut zut lai chu a hmu a. 13 Kailawn sîpa ngîr LALPA chun a kuomah, "Kei hi LALPA, i pu Abraham le i pa Isak Pathien chu ka nih. Nang le i thlahai kutah i zàlna ram hi la pèng ka ti che a, 14 i thlahai chu hnuoia pilvut anga tam la nîng an ta, sim le hmar, sak le thlangah la um dar an tih. Nang le i thlahai hmangin hnam tin malsawmin la um an tih. 15 I kuomah ka um a, i fèna taphotah vêng zing ka ti che a, hi rama hin thuoi kîr nawk ka ti che. Ka thu tiemhai hi ka hlen hma khat chun thlathlam naw ning che" a ta. 16 A hang thang har chun a lungrilin, "Hi hmuna hin LALPA a um takzet el! Ka lo hriet nawa mei mei a nih" a ta. 17 Chuongchun, ti takin, "Hi hmun hi inza a va um ngei de! Hi hmun hi Pathien tempul a na, hi hmun hi vân kotsuo a nih" a ta. 18 Jakob chun zîng hmângin a lung lukham chu a lâk a, a phun a, a sîpah hriek a buok a. 19 Chu hmun hminga chun 'Bethel' a'n bûk a, a hmaa chu khuo hming chu Luz a nih. 20 Jakob chun, "Pathien ka kuomah a um takzet a, ka'n zinna lampuiah a mi vêng a, fâk le dawn le sil le fèn a mi pêk a, 21 ka pa in tieng him taka ka kîr nawk phot chun LALPA chu ka Pathien nîng a ta, 22 hi ka lungphun hi Pathien in nîng a ta, i thil mi pêk po po laia sawma pakhat chu pe ngei ngei ka ti che" tiin thu a tiem a.

Genesis 29

1 Jakob chu a fe pei a, khawsak mihai ram chu a tlung a. 2 A hang en a, lo laia tuikul bula chun beram ruol hmun thuma bok lai a hmu a, chu tuikula tui chu beram ruol chun an tlàn hlak a nih. Tuikul sînna lung chu a lien hle a. 3 Beram ruol an inlawi kim pha leh ranpuhai chun tuikul sînna lung chu an nam son a, beramhai chu tui an pêk zo pha leh an sîn nawk hlak a. 4 Jakob chun, "Unauhai, khaw lai khaw mi am in ni a?" tiin beram vêngtuhai a'n don a. Anni chun, "Haran khaw mi kan nih" an ta. 5 Ama chun, "Nahort naupa Laban in hriet hlak am?" a ta. Anni chun, "Kan hriet" an ta. 6 Jakob chun, "A dam lai a ni maw?" a ta. Anni chun "Dam e, saw, a naunu Rachel khomin a beram a hung khal saw" an ta. 7 Ama chun, "En ta u, nisa a la'n sàng si a, tu hi ran ruol khal khawm hun khom a la ni lèm. Tui pe unla, an tlatna hmunah va'n tlattir nawk ro" a ta. 8 Anni chun, "A thei nawh. Beram ruol po po an khal khawm vong hnungah tuikul sînna lung hi dom son an ta, chu hnungah kan beramhai chu tui kan indawntir thei chauh hlak a nih" an ta. 9 An inbiek lai zing chun Rachel chu a pa beram ruol le chun a hung tlung a, ama chun beram a vèng hlak hrim a nih. 10 Jakobin a nu tapa Laban naunu Rachel le a beram ruol a hmu chun a va pan a, tuikul sînna lungkhàr chu a tawl son a, a pu Laban beramhai chu tui a'n dawntir a. 11 Chu zoah Jakob chun Rachel chu a fawp a, inring takin a tap a. 12 Rachel kuoma chun a pa farnu Rebek naupa a ni thu chu Jakob chun a hril a. A hriet charin Rachel chu a tlân a, a pa a va hril a. 13 A farnu naupa chanchin Labanin a hriet charin a hmuok dingin a suok nghal a. A kuo a, a fawp a, inah a thuoi a, Jakob chun a pu chu chanchin iengkim a hril a. 14 Laban chun, "Ka taksa le thisena mi ngei i ni chuh" a ta. 15 Jakob chu Laban kuoma thla khat a um hnungin Laban chun, "Ka tupa i ni lei elin a thlawnin ka ta dingin i thaw ding maw? I hlaw zât dinga i ti chu mi hril rawh" a ta. 16 Laban chun nau nunghàk pahni a nei a, a upa lem chu Lea a na, a naupang lem chu Rachel a nih. 17 Lea mit chu a pawl riei a, Rachel ruok chu a duongkài a tha a, a hmêl a tha bok a. 18 Jakob chun Rachel chu a ngaizawng a, chuongchun a pu kuomah, "I naunu naupang lem Rachel hi nei dingin kum sari i rong bawlpêk ka ti che" a ta. 19 Laban chun, "Mi dang kuoma ka pêk nèkin i kuoma ka pêk chu a tha lem hrim a nih, ka kuomah um zing el rawh" a ta. 20 Chuongchun, Rachel hlaw dingin Jakob chun a pu rong chu kum sari a bawl a, sienkhom Rachel chu a ngaizawng êm leiin ni sawt naw te ang chauin a hriet. 21 Jakob chun Laban kuomah, "Ka nuhmei chu ka pawl theina dingin mi pe ta raw leh, ka hun tiem chu ka hlen ta si a" a ta. 22 Laban chun ruoi thein a khaw mi po po chu a ko khawm a. 23 Sienkhom zân a hung ni chun a naunu upa lem Lea chu a thuoi a, Jakob kuomah a pêk a, a lo zâlpui a. 24 Laban chun a naunu thangpuitu dingin a siehlawnu Zilpa chu a pêk bok a. 25 Zîngkhuo a hung var hlak chun, ngai ta, Lea a lo ni lem dai el! Chuongchun, Jakob chun, "I mi soisak dàn hi iem an ta a? Rachel nei dinga inhlaw ka ni naw maw? Ieng leia i mi dawha am a na?" tiin Laban chu a suosal a. 26 Laban chun, "A upa lemin a nei hmaa a naupang lem inneitir hi kan ram dân a ni nawh. 27 Hi inneina hi kâr khat hang suo phot inla, chu zoah kum sari dang ka rong i bawl ding aiah a sang khom pêng ka ti che" a ta. 28 Chuong ang chun Jakob chun a thaw a, ni sari a tlingtla chun Laban chun a naunu Rachel khom chu a nuhmei dingin a pêk a, 29 a siehlawnu Bilha chu Rachel thangpuitu dingin a pêk sa bok a. 30 Jakob chun Rachel khom chu a pawl a, Lea nèkin Rachel chu a hmangai lem a. Chuongchun, Laban rong chu kum sari dang a bawl nawk a. 31 Lea chun hmangai a hlaw nawh ti LALPAN a hmu a, a sul chu a hongpêk a; Rachel ruok chu a ching thung a. 32 Lea chun nau a pai a, naupa a nei a, "LALPAN ka rinum tuor a hmu lei a ni hi, tu hin chu ka pasalin mi hmangai tàng a tih" a ta, a hmingah Reuben a sak a. 33 Chun, nau a pai nawk a, naupa a nei nawk a, "LALPA chun hmangai ka hlaw nawh ti a hriet a, hi khom hi a mi pêk a nih" a ta, a naupa hmingah Simeon a sak a. 34 Nau a hung pai nawk a, naupa bok a hung nei nawk chun, "Tuhin chu naupa pathum zet ka neipêk tah a, ka pasal khomin mi ngaisak tàng a tih" a ta, a hmingah Levi a sak a. 35 Nau a hung pai nawk chun, naupa bok a nei a, "Tuta tum chu LALPA inpâk ka tih" a ta, a naupa hmingah Juda a sak a. Chu hnung chun nau a nei ta nawh.

Genesis 30

1 Rachel chun nau hrim Jakob chu a neipêk ve naw leiin a unu chu a thîk a, Jakob kuoma chun, "Nau mi pe rawh, chuong naw chun thing ka tih" a ta. 2 Jakob chu Rachel chungah a lungsen a, "Nau nei loa siemtu che Pathien aiawtua i mi ngai a ni?" a ta. 3 Rachel chun, "En ta, ka bawinu Bilha hi, ama hmanga sûngkuo ka siem ve theina dinga nau mi neipêk dingin ama hi pawl rawh" a ta. 4 Chuongchun, a bawinu Bilha chu a hmei dingin a pêk a, Jakob chun a lo pawl a, 5 nau a hung pai a, nau pasal a neipêk a. 6 Rachel chun, "Pathienin ka hnina ngâithlain a mi'n thiem a, naupa a mi pêk tah a ni hi" a ta, chu lei chun a hmingah Dan a sak a. 7 Rachel bawinu Bilha chun nau a pai nawk a, Jakob chu naupa a neipêk nawk a. 8 Rachel chun, "Ka unu leh nasa takin kan inbuon a, hnèna ka chang an ta hi" a ta, a hmingah Naftali a sak a. 9 Lea chun nau dang a pai el ta naw leiin a bawinu Zilpa chu a thuoi a, a hmei dingin Jakob a pêk a. 10 Lea bawinu Zilpa chun Jakob chu naupa a neipêk a. 11 Lea chun, "A va hang vângneithlàk de aw!" a ta, a hmingah Gad a sak a. 12 Lea bawinu Zilpa chun naupa dang a neipêk nawk a. 13 Lea chun, "Ka va hang lawm ngei de aw! Nuhai chun hamtha mi tingot an tih" a ta, a hmingah Aser a sak a. 14 Busîk hun lai hin Reuben chu phùlah a fe a, zawlaidi a va hmu a, a nu Lea kuomah a hung chawi a. Rachel chun Lea kuomah, "I naupa zawlaidi kha a then mi sem ve rawh" a ta. 15 Ama chun, "Ka pasal i mi'n chù thlàkpêk hi i la dittawk naw rop maw? Ka naupa zawlaidi chenin i mi'n chù thlàkpêk nawk pei ding maw?" a ta. Rachel chun, "Chuong an leh i naupa zawlaidi aiah voizàn chu riekpui a ti che" a ta. 16 Phùla inthoka Jakob hung inlawi chu Lea chun a lo va tuok a, "I mi riekpui ding a nih, i naupa zawlaidia ka haw ta sa che i nih" a ta. Chu zân chun a zâlpui a. 17 LALPA chun Lea hnina chu a ngâithlàk a, nau a pai a, Jakob chu naupa pangana a neipêk a. 18 Lea chun, "Ka bawinu ka pasal kuoma ka'n hawtir leiin LALPA chun hlaw a mi pêk a ni hi" a ta, a hmingah Isakar a sak a. 19 Lea chun nau a pai nawk a, Jakob chu naupa parukna a neipêk a. 20 Lea chun, "Pathien chun thilpêk hlu tak a mi pèk a, tu hin chu naupa paruk zet ka neipêk ta leiin ka pasal khomin mi'n zà tàng a tih" a ta, a hmingah Zebulun a sak a. 21 Chu hnunga chun nau nuhmei a nei nawk a, a hmingah Dina a sak a. 22 Pathien chun Rachel chu a hriet zing a, a hnina chu a ngâithlàk a, a sul a hongpêk a. 23 Nau a hung pai a, nau pasal a nei a, "Ka muolphona Pathienin a mi lâk hmangpêk tah" a ta. 24 Chun, "LALPAN nau pasal dang khom mi pe sa raw se" a ta, a nau hmingah Josefa a sak a. 25 Rachelin Josefa a nei hnung chun Jakobin Laban kuomah, " Ka in le ramah ka kìr nawk theina dingin mi'n fetir ta raw khai. 26 I rong ka bawlna san ka nuhmeihai le ka nauhai mi pe suokin mi'n fetir ta rawh, I rong ka bawlpêk dàn che hlak i hriet fai vong a" a ta. 27 Laban chun, "I mit ka tlung a ni chun, mi la umpêk hrâm rawh. Ka aisâna inthokin nangma leiin LALPAN mal a mi sawm a nih ti ka hmu suok a. 28 Hlaw i tuk zât hril la, pêng ka ti che" a ta. 29 Jakob chun, "Ka sinthaw dàn le i ran ka sukpung dàn i hriet vong a. 30 Ka hung hma khan ran tlawm te chauh i nei a, tu hin chu an pung rawn ta hle a; sin ka thawna tieng photah LALPAN mal a sawm che a. Anleh, ieng tik am ka sûngkuo ta dingin ka thaw suok ve ta ding chu?" a ta. 31 Laban chun, "Ieng am ka pêk ding che?" a ta. Jakob chun, "Ieng khom mi pe naw rawh. Amiruokchu, hi thil hi i thaw chun i ranhai vêngin la enkol zui pei ka tih. 32 Voisun i ran ruol po po tiem ka ta, beram laia mi a rângin a tiel taphot, beramte laia mi a rong dum taphot, kèl laia mi a rângin a tiel taphot la suok vong ka ta, chu chu ka hlaw ni raw se. 33 Ka hlaw i mi pêk hunah ka ringumzie chu hunin hung puong el a tih. Ka kèl lai a rânga tiel ve lo amani, ka beram lai a dum ni lo i hmu taphot chu ka'n rùkah ngai rawh" a ta. 34 Laban chun, "Ka remti, i ti ang tak chun ni raw se" a ta. 35 Chu ni lâ là chun kelchal râng taphot le kelpui ràng taphot le beram dum taphot chu Labanin a lâk suok vong a, a naupahai enkolna hnuoiah a sie a, 36 ama le Jakob inkâr ni thum lam zeta hlaa chun a'n umtir a, Jakob chun Laban ran ruol chu a enkol zui pei a. 37 Jakob chun hriengzau thing, ruon thing le inse thing hring tuoi a sât a, a hawng a khok râng tuk a, a ràngna po chu a pho lang a. 38 Ranin tui an dawnna taikuong po poa chun tui an hung dawn phaa an hmu ngei dingin thing tuoi, a hawng khok rànghai chu a sie a. 39 Ran an hur huna tui dawna an hung pha leh an inpawl a, an inrài hlak a. Thing tuoi khek ràng zawna inràihai chun te râng amanih tiel amanih an nei zie a. 40 Jakob-in Laban beram a vênghai lai chun a râng iemani zât an hung um ta a. Laban ran dumhai an inpawl ding pha Jakob chun a râng umna tieng a'n nghattir a. Chuong ang chun ama ran ruol chu a sukpung a, Laban ran ruolhai leh sie kop loin a sie hrang pei a. 41 Ran ruol laia a hràt bikhai chu an inrài hunah thing tuoi hawng khok ràng hmaa an inrài theina dingin Jakob chun ranin an hmu ngei dingin taikuonga chun thing tuoihai chu a sie hlak a. 42 Ran hrisel lo hmaa ruok chu thing tuoi chu a sie ngai nawh. Chuong ang chun ran chakvak nawhai chu Laban ta an ni pei a, a hrisel po chu Jakob ta an ni pei thung a. 43 Jakob chu nasa takin a hung hausa a, ran ruol tam tak a nei a, bawinu le bawipa le sanghawngsei le sabengtung khom tam tak a hung nei ta a nih.

Genesis 31

1 Laban nauhaiin, "Jakobin ei pa nei po po a lâkpêk a, a hausakna po po hi ei pa taa inthok vong a nih" an ti ri chu Jakobin a hriet a. 2 Labanin a en dàn khom a hmaa ang kha a ni ta nawh ti a hriet bok a. 3 Chun, LALPA chun Jakob a biek a, "I thlatuhai ram le i laichinhai umna tieng kîr nawk ta rawh, i kuomah um zing ka tih" a ta. 4 Chuongchun, Jakob chun Rachel le Lea chu a ran ruol tlatna phûla chun hung dingin a'n cha a. 5 An kuomah, "In pain a mi en dan hi kha hma ang kha a ni ta naw a, sienkhom ka pa Pathien chu ka kuomah a um zing a nih. 6 In pa ta dingin ka theitawpin sin ka thaw ti in hriet a, 7 sienkhom a mi hlêm a mi hlêm a, ka hlaw khom voi sawm hiel a thlâk danglam ta a; ka poi a tawk ruok chu Pathienin a phal nawh. 8 'A ze tiel le râng tik tekhai hi i hlaw ding a nih' a ti leh ran po po chun chuong ang chi ngot chu te an nei a. 'A ze rânghai hi i hlaw ding a nih' a ti leh ran po poin chuong ang ngot chu te an nei a. 9 Chuong ang chun Pathienin in pa ranhai chu lâkpêkin kei a mi pèk a nih. 10 "Voi khat chu ran inrai tan hun hin mang ka nei a. Ka hang ngha vel a, kelpui zawltu kelchal po po chu a ze tiel amanih a râng amani vong an lo ni a. 11 Ka manga chun Pathien vàntirkoin, 'Jakob' tiin a mi ko a, kei chun, 'Iem a na?' ka ta. 12 Ama chun, 'Dak suok la, hei en ta, a chal, a pui zawltu po po saw a tiel amanih a râng vong an ni saw. Labanin a soisak dàn che hi ka hmu vong a nih. 13 Bethela lung i phun tum, sahriek nâla thu i tiemna, kha Bethel Pathien ngei kha kei hi ka nih. Tu hin hi hmun hi suoksan la, i pieng le murna ram tieng kîr nawk ta rawh' a ta" tiin. 14 Rachel le Lea chun, "Kan pa ro chungchangah ro inkhawm ding kan la nei rop am a ni? 15 Ama chun mikhuol ang chauin a mi ngai tah an naw am a ni? A mi zor chauh khom ni loin, kan man khom a fâk zo vong tah. 16 Kan paa inthoka Pathienin rosum a lâkpêk po po hi keini le kan nauhai chanvo hrim a nih. Chuleiin, Pathienin thaw dinga a hril ang che chun thaw rawh" an ta. 17 Chuongchun, a nuhmei le nauhai chu sanghawngsei chunga chun a'n chuongtir a, 18 Kanan rama a pa Isak kuom tieng pan dingin a ran ruol po po le Padan Aram-a rosum a khawl khawm po po chu somin Jakob chu a'n thok suok ta a. 19 Beram hmul vawa Laban a fe laiin Rachelin a pa ina a pathienhai chu a lo inrùk a. 20 Chu bâkah Jakobin Aram mi Laban chu hlèmin, a hriet loin a'n relsan bok a. 21 Chuongchun, a nei po po le chun tlânin, Eufretis vadung chu a kân a, Gilead tlâng tieng a pan tah vang vang a. 22 A ni thum nia chun Jakob inrel hmang thu chu Laban an hril a. 23 Chuongchun, a unauhai chu a thuoi a, ni sari a hnot hnungin Gilead tlângrama chun a hnot phâk a. 24 Chun, Aram mi Laban kuoma chun mangah Pathien a hung a, "A sie a tha ieng khom Jakob kuoma hril lo dingin fimkhur rawh" tiin a hril a. 25 Gilead tlângrama Labanin Jakob a hnot phâk chun Jakobin puon in a lo kei tah a; Laban le a unauhai khomin chu taka chun puon in an kei ve nghal a. 26 Laban chun Jakob kuomah, "Iem a na i thaw ta hi? I mi hlèm a, râllâk ang elin ka naunuhai i fen hmang a. 27 Ieng tiziea mi hlèm a, a rûk a râla i'n rel hmang rêng rêng? Khuong leh dar leh tingtang rem a, hlim taka hla saka ka'n thla theina ding chein ieng dinga i mi hril naw? 28 Ka tuhai le ka naunuhai fawpa ka'n thla liem i phal bok nawh. Thil invêtthlàk tak i thaw a nih. 29 Sukse thei che ka ni a; amiruokchu i pa Pathien chun voizan khan mangah, "A sie a tha ieng khom Jakob kuoma hril lo dingin fimkhur rawh" tiin a mi hril a. 30 I pa in tieng ngaia kîr nawk i nuom a ni khomin, ieng dinga ka pathien lemhai i mi'n rùkpêk am a na?" a ta. 31 Jakob chun Laban kuomah, "I naunuhai mi la luipêk i tih ti ka'n lau lungril lei a nih. 32 Amiruokchu, i pathien koltu chu i hmu suok phot chun ama chu dam naw nih. Ei unauhai hmu hoia ngei hin nang ngeiin i thil ka kol a um le um naw dap la, a um chun la nghal rawh" a ta. Jakob chun pathien lemhai chu Rachelin a'n rûk a nih ti a hriet si nawh. 33 Chuongchun, Laban chun Jakob puon in, Lea puon in le an siehlawnuhai puon in pahni chu a dap a, ieng khom a hmu si nawh. Lea puon ina inthoka a hung suok chun Rachel puon inah a lût a. 34 Rachel chun a thil inrûkhai chu a sanghawngsei zângdam lai a lo thup hman a, a thung de tlat a. 35 Rachel chun a pa kuomah, "Ka tho thei naw leiin ka lalpa chu lungsen naw raw se, thi ka pal lai a ni lei a nih" a ta. A tlok vonga chu a pathien lemhai chu a hmu si nawh. 36 Jakob lung chu a sen hle a, Laban chu a hal a. "Iem ka thaw suol a um a? Iem ka thaw suol hrima i mi hung hnot a na? 37 Tu khan ka thuomhnaw po po i tlok kim vong tah a, i ina thil pakhat bèk i hmu hrim hrim a ni? I hmu leh i unauhai hmaa hin hung sie la, nang le ei inkâr thu hi rel raw hai se. 38 I kuomah kum sawmhni tâl top ka um ta a. I beram le kel haiin té an insiet ngai naw a, i beram ruol laia beram chal pakhat khom ka la hmè ngai nawh. 39 Sahuoi kei chen hnung sa ka hung lâkpèk ngai naw che; a'n hmang ai chu keiin ka tuor pei hlak. Zàn amanih sùn amania ran an inrùk hrim hrim i mi'n thungtir vong hlak kha. 40 Hieng hi ka um dàn a nih: sùnah ni intêngin a mi em chàr a, zânah khaw deiin a mi sawm kon a, imu hrim ka hmu ngai nawh. 41 I ina kum sawmhni ka um sûng khan chu chu ka ngîrhmun a nih. I naunu pahni hlaw dingin i rong kum sawm le kum li ka bawl a, i ran hlaw dingin kum ruk i rong ka bawl nawk a. Chu sûng chun ka hlaw voi sawm zet i thlâk danglam a. 42 Ka pi le puhai Pathien, Abraham Pathien le Isak inza Pathien chu ka kuomah um naw lem sien chu, kut ruokin mi'n suoktir ngei ngei i tih. LALPA chun ka rinum tuorzie le ka thokrimzie a hmu a, voizàn khan a hal che a ni chu" a ta. 43 Laban chun Jakob kuomah, "Nuhmeihai hi ka nauhai an na, an nauhai hi ka nauhai an na, ran ruolhai hi ka ran ruol an na, i hmu po pohai hi keima ta vong a nih. Sienkhom voisun hin ka naunuhai le an nauhai chunga iem keiin thaw thei ka nei ta a? 44 Thaw rawh, keima le nangma hin thu thlung ei ta, chu chu eini pahni inkâra thu hrepuitu sàkhi ni raw se" a ta. 45 Chuongchun Jakob chun lung a lâk a, lungphun dingin a phun a. 46 Jakob chun a unauhai kuomah, "Lung thak khawm ro" a ta, an lung làkhai chu an intieng bùm a, a bula chun bu an fâk a. 47 Laban chun lung intieng khawm chu 'Jegar Sahadutha' tiin a'n bùk a, Jakob ruok chun 'Galeed' tiin a'n bùk ve thung a. 48 Laban chun, "Hi lung intieng khawm hi voisun hin keima le nangma inkâra thu hrepuitu sàkhi a nih" a ta, chu chu Galeed hming a putna san a nih. 49 'Mizpah' ti a ni bok. A san chu Labanin, "LALPA chun ei inthe hnung khomin mi vêng ton raw se. 50 Ka naunuhai i sukrimsi a, ka naunuhai ni lo nuhmei dang i nei chun, tu khom ei kuomah an um naw khom ni sien, nangma le keima inkâra thu hrepuitu chu Pathien a nih ti hre zing rawh" a ti leiin. 51 Laban bok chun Jakob kuomah, "Keima le nangma inkâra thu hrepuitu dinga ka lung intieng khawm le ka lungphun hai hi en rawh. 52 I poi tawk dingin hi lung intieng le lungphun hai hi hung khêl ngai nawng ka ta, ka poi tawk dingin nang khomin i hung khêl ding a ni bok nawh ti hrepuitu an nih. 53 Abraham Pathien, Nahor Pathien le an thlatuhai Pathien chu eini inkâra rorêltu ni raw se" a ta. Chuongchun, Jakob chun a pa Isak Inza hming chun thu a'n khâm a. 54 Chu tlânga chun Jakobin inthawina a'n hlàn a, a unauhai chu thlàithlèng a kîlpui a. An fâk khop chun chu hmuna chun an riek a. 55 Zîng inhma takin Laban chun a tuhai le a naunuhai chu a fawp a, mal a sawm a, chu zoah a in tieng panin a kîr nawk ta a.

Genesis 32

1 Jakob khom chu a fe pei a, Pathien vântirkohai leh an intuok a. 2 Jakobin anni a hmu chun, "Hi hmun hi Pathien chêngna hmun a nih" a ta, a hmingah Mahanaim a'n bûk a. 3 Jakob chun a u Esau umna Seir ram, Edom mihai rama chun a hmaah zuolko a'n fetir a. 4 Zuolkohai kuoma chun, "Ka lalpa Esau kuomah hieng hin in hril ding a nih: I siehlaw Jakobin hieng hin a tih: Laban kuomah mikhuolin tu chen hin ka um ta zing a. 5 Bawngchal hai, sabengtung hai, beram le kèl hai, bawinu le bawipa hai ka nei tawl a. Chuongchun, i mit tlunga ka um theina dingin ka lalpa hril dingin mi ka hung tir a nih' a tih" tiin thu a'n cha a. 6 Zuolkohai an hung kîr chun Jakob kuomah, "I u Esau kuom kan va tlung a, a hmuok ding chein mi zali leh a hung ding a nih" an ta. 7 Nasa taka ti le lungzingin Jakob chun a rawihai chu pawl hniin a thè dar a, chuong ang bokin beram ruol le bawng ruol le sanghawngsei hai khom chu a the a. 8 Esauin pawl khat a hung bei hlau chun pawl dang chu an tlân suok hmana ding ti lungril neia a thaw a nih. 9 Jakob chu a tongtai a, "Ka pu Abraham Pathien, ka pa Isak Pathien aw LALPA, 'I ram tieng le i laichinhai lai kîr nawk ta la, sukhmuingil ka ti che' mi titu, 10 ka phu ruol lo lunginsietna le ringumna chu i siehlaw chunga hin i'n langtir a. Ka hmol le chauh hi Jordan vadung hi ka kân a, tu ruok hin chu hon hnia the khop zet kan lo ni tah. 11 Lunginsiettakin ka u kuta inthok, Esau kuta inthokin mi san him rawh, nunau chopa a mi hung bei ka ti a nih. 12 Nangin, 'Siem hmuingil ka ti che a, in thlahai chu tuifinrieta tieu vut tiem seng lo khopa tamin la siem ka tih' i ti si a" tiin. 13 Chu zân chun chu hmuna chun a riek a, a u Esau kuoma a pêk ding a ran ruol laia mi chu a thlang suok a. 14 Chuonghai chu kèlpui zahni le kèlchal sawmhni, berampui zahni le beramchal sawmhni, 15 sanghawngseipui sawmthum le an te thuoi lai seng, bawngpui sawmli le bawngchal sawm, sabengtungpui sawmhni le sabengtungchal sawm an nih. 16 Chuonghai chu a hran sengin a siehlawhai kutah a'n koltir a. A siehlawhai kuoma chun, "Ka hmaah fe unla, kâr nei peiin inzui ro" a ta. 17 Chun, a hmatawng taka thang kuoma chun, "Ka u Esau leh in intuok pha, 'Tu mihai am in na? Khaw tieng pan ding am in na? In hmaa in somhai hi tu ta am an na?" tia a'n don che chun, 18 "I siehlaw Jakob ta an nih; pu Esau, i ta dinga thilpêk a thon che a ni hi; ama khom kan hnunga son a hung' ti rawh" tiin thu a pèk a. 19 Chun, a dottu le a dot nawk le ran ruol khaltu po po kuoma chun, "Esau in hmu pha chuong ang chun ti seng ro; 20 chun, 'I siehlaw Jakob khom kan hnunga son a hung' ti ngei bok ro" tiin thu a pèk seng a. Ama chun, "Ka hmaa fe thilpèk ka thon hin tlon lungawi zet ka ta, ka hmu pha leh mi lo lawm a tih" a ti lungril a nih. 21 Chuongchun, a thilpèkhai chu ama hmain a'n fetir a, ama ruok chu, chu zân chun a rawihai lai a riek a. 22 Chu zân chun a tho a, a nuhmei pahnihai le a siehlawnu pahnihai chu a nau sawm le pakhathai leh a thuoi a, Jabok vadung chu a kaipui a. 23 Anni an kaitir hnung chun an thuomhnaw nei po po khom a'n tawl kaitir vong bok a. 24 Chun, ama khât chauin a um ta a, mi pakhatin khawfingchat chen a buon ngat ngat a. 25 A hnè nawh ti a hrietin a malpui ru inchuktuona lai chu a hmetpèk a, an inbuon lai chun Jakob malpui ru inchuktuona lai chu a hung inpelsol a. 26 Ama chun, "Mi'n thla ta rawh, khawfing khom a chat ding a ni tah hi" a ta. Jakob chun, "Mal i mi sawm zet naw chun inthla naw ning che" a ta. 27 Ama chun, "I hming iem a na?" a ta, Jakob chun, "Ka hming chu Jakob a nih" a ta. 28 Ama chun, "I hming chu Jakob ni ta loin Israelu ni lem tang a tih; Pathien le mihriem i buon a, i hne ta si a" a ta. 29 Jakob chun, "Lunginsiet takin i hming mi hril thei i tim?" a ta. Ama chun, "Ieng leia ka hming i mi'n don?" a ta. Chu taka chun mal a sawm ta a. 30 Chuongchun, Jakob chun, "Hmai intuoin Pathien ka hmu a, ka hringna a hla si a" tiin chu hmun hminga chun Penielv a'n bûk a. 31 Peniel a fe pêl lai chun zîng nisa suokin a hung khaw a, a malpui lei chun a'n bài a. 32 Chuleiin, tu chen hin Israel thlahai chun malpui ru inchuktuona a êl thá lai hi an fâk ngai nawh, Jakob malpui inchuktuona laia a êl thá chu a hmetpèk leiin.

Genesis 33

1 Jakob chu a hang dâk a, ngai ta, mi zali ruol le hung Esau chu a hmu a, chuongchun a nauhai chu Lea le Rachel le a siehlawnu pahnihai kuomah a sem dar a. 2 Siehlawnuhai le an nauhai chu a hmatawng takah a sie a, a dotah Lea le a nauhai a sie a, a nuhnung takah Rachel le Josefa a sie a. 3 Ama chun hma a thuoi a, a u bul a tlung tawm chun hnuoi sikin voi sari chibai a bûk a. 4 Esau chu ama lawm dingin a tlân a, a rînga kuoin a fawp a, an pahni chun an tap a. 5 Chun, Esau chu a hang ngha a, nuhmei le naupang hai a hmu chun, "I kuoma umhai hi tu hai am an na?" a ta. Jakob chun, "Hi naupanghai hi Pathienin lunginsieta i siehlaw a pêkhai chu an ni hi" a ta. 6 Chuongchun, siehlawnu pahni le an nauhai chun an hung hnai a, kûnin chibai an bûk a. 7 A dotah Lea le a nauhai chu an hung a, kûnin chibai an bûk a. A hnuhnung takah Josefa le Rachel khom an hung a, kûnin chibai an bûk a. 8 Esau chun, "Ran ruol ka'n tuokpui zozai kha ieng i tina am an ta le?" a ta. Jakob chun, "Ka lalpa, i mit ka tlung theina dinga ka ti a nih" a ta. 9 Esau chun, "Kei khomin ka hau annawm, ka sangpa, i tahai chu nangin kol lem rawh" a ta. 10 Jakob chun, "Ni lo e. I mit ka tlung a ni chun, lunginsiet takin ka thilpêkhài che kha mi pompêk lul rawh. Lawm taka mi lo pom a, i hmèl ka hang hmu hi Pathien hmèl hmu tlukah kan ngai a nih. 11 Ka chungah Pathien a tha a, ka mamaw po po ka nei a, chuleiin ka thilpêk hi lunginsiet takin pom hrâm rawh" a ta. Jakobin a ngenngawl tlat leiin Esau chun a pom ta a. 12 Chun, Esau chun, "Thaw ro, fèng ei tiu, intlon ei tih" a ta. 13 Sienkhom Jakob chun, "Ka lalpan a hriet angin, naupanghai hi an la dawng a, berampuihai le bawngpuihai hi te thuoi lai an na, ni khat chauh fe hrâtpui khomin ran ruol hi thi vong thei an nih. 14 Chuleiin, ka lalpa hi a siehlaw hmaah lo fe sien, kei chu Seir tlânga ka lalpa kuom ka tlung hma khat chun ka ran som le naupanghai fe thei tawk ang peiin, damten hungpui tawl ka tih" a ta. 15 Esau chun, "Chuong a ni leh ka mihai a then bek hi màksanpèk ka ti che" a ta. Jakob chun, "Iem a tûl a? Ka lalpa mit ka tlung phot leh a huntawk" a ta. 16 Chu ni chun Esau chu Seir tieng a kîr nawk a. 17 Jakob ruok chu Sukot-ah a fe a, chu taka chun ama ta dingin riebûk a bawl a, a ranhai ta dingin bûk a bawl bok a. Chuleiin, chu hmun hminga chun Sukotw an ti a nih. 18 Chuongchun, Padan-Arama inthoka hung Jakob chun him takin Kanan rama Sekem khawpui chu a hung tlung a, a khaw kawla chun puon in keiin a um a. 19 Puon in a keina hmun chu Sekem pa Hamor nauhaia inthokin tangka zain a'n chawk a 20 Chu taka chun maichàm a siem a, a hminga chun El Elohe Israelx a'n bûk a.

Genesis 34

1 Lea naunu Dina, Jakob a neipek chu a rama nuhmeihai hmu dingin a lêng suok a. 2 Chu rama lal, Hiv mi Hamor naupa Sekem chun a lo hmu a, a thuoi a, a suol lui a. 3 Jakob naunu Dina chun a lungril a lâk tlat a, ama chu a hmangai a, tongkam innèm takin a biek a. 4 Sekem chun a pa Hamor kuomah, "Ka nuhmei dingin hi nunghàk hi mi bepèk ro" a ta. 5 Sekemin a naunu a sukporche ti Jakobin a hriet chun a nauhai chu ran chinga phûla an um lai a na, an hung inlawi hma khat chun Jakob chu a to zing a. 6 Chun, Sekem pa Hamor chu Jakob be dingin a hung a. 7 Jakob naupahai khomin chanchin an hriet charin phula inthok chun an hung inlawi a. Sekemin thil thaw lo top ding thaw a, Jakob naunu pawngsuol a, Israel sûngkuo lakah thil inzakum thlàk a thaw lei chun an lung nain a sen êm êm a. 8 Sienkhom Hamor chun, "Ka naupa Sekem lungril chu i naunu chungah a fu tlat si a. Lunginsiet takin a nuhmei dingin inneitir el ro khai. 9 Keini leh innei tuong ei ta, in naunuhai mi'n neitir unla, ka naunuhai khom nei bok unla. 10 Keini lai umhmun khuor unla, ram hi in ta dingin a'n hong vong a nih. Khawsa unla, sumdawng unla, in le lo indin ro" a ta. 11 Sekem khomin nunghàk pa le a tâhai kuoma chun, "Mi ditsak unla, in ti ang ang chu pêng ka ti cheu. 12 In nunghàk hi nuhmeiah in mi'n neitir phot chun man le muol le thilpèkhai chu ieng zâta tam khom ngèn unla, pèng ka tih" a ta. 13 An farnu Dina sukporchetu Sekem le a pa Hamor chu Jakob nauhai chun dawha takin an lo dawr a, 14 "Chu chu thaw thei ni naw nih. Sertan lohai kuoma kan farnu pêk chu keini ta dingin hmingsietna a nih. 15 Kan remti thei dàn um sun chu pasal po poin keini ang boka ser in tan a nih. 16 Chuonga in thaw phot chun kan farnuhai inneitir kan ti cheu a, in farnuhai nei bok kan tih. Nangni lai umhmun khuor vèng kan ta, hnam khatin um ei tih. 17 Amiruokchu, ser in intantir nuom naw chun, kan farnu hi thuoi kan ta, fe el kan tih" an ta. 18 An thu chun Hamor le a naupa Sekem chu a suklawm a. 19 Chuongchun, chu tlangvàl, a pa sûngkuoa inza phur tak chun Jakob naunu chu a dit hle leiin chu an thil ngiet chu sawt riel loin a thaw nghal a. 20 Chun, Hamor le a naupa Sekem chu an khaw kul kotkhâra chun a khaw mihai chu inbiekpui dingin an fe a. 21 "Hienghai hi eini leh inrem takin an um a. An ta ding khoma hmun a la'n dai si leiin ei ramah chêngin sumdawng hai sien, an naunuhai saw nuhmeiin nei inla, ei naunuhai hi nuhmeiin inneitir bok ei tiu. 22 Amiruokchu, chi khata ei khawsak an mi remtipui thei dàn um sun chu anni ang boka pasal poin ser ei tan ve a nih. 23 An beram ruolhai, an thil neihai le an ran danghai po po khom ei ta a ni vong thei naw am a ni? An thu hi ei remtipui chun ei kuomah an um ding a nih" an ta. 24 Chuongchun, khawpui kul kotkhâr bula fe khawmhai chun Hamor le a naupa Sekem thu chu zawmin, kul kotkhâra suok taphothai chun ser an intantir ta vong a. 25 Chun, a ni thum hnungah nat an la tuor zing lai chun Jakob naupahai pahnih, Dina tahai Simeon le Levi chun kawlhnâm chawiin arûkin khuo chu an bei a, pasal po po chu an that fai vong a. 26 Hamor le a naupa Sekem khom chu kawlhnâmin an sât hlum a, Dina chu Sekem ina inthokin an thuoi suok a. 27 Jakob naupa danghai chu an mi thathai chunga chun tuongin, an farnu an sukkhawhlo lei chun khuo chu an rok a. 28 An beram ruol hai, an bawng ruol hai, an sabengtunghai, khuo le loa an thil neihai, 29 an hausaknahai, an naupanghai le an nuhmeihai chu an man a, an thil nei po po chu an lâkpèk a. 30 Jakob chun Simeon le Levi kuomah, "Hi rama chêng Kanan mihai le Periz mihai theida in mi'n phurtir a, ei tlawm si a, inthuruola an mi hung bei chun kei le ka sûngkuo hi an hung inram dêr ding a nih" a ta. 31 Anni chun, "Kan farnu hi nawchizor angin an soisak ding maw?" an ta.

Genesis 35

1 Pathien chun Jakob kuomah, "Bethel chen hang fe la, chu taka chun umhmun khuor rawh. I u Esau kuoma inthoka i tlân siet laia i kuoma hung inlàr Pathien ta dingin maichàm siem rawh" a ta. 2 Jakob chun a sûngkuohai le a kuoma um po po hai kuoma chun, "Hnam dang pathien in kolhai po po dehawn vong unla, insukthienghlim unla, in silfènhai thlâk ro. 3 Chun, hung unla, Bethel chen hang fèng ei ta, ka lungzîng nia mi dontu le ka fèna taphota mi umpuitu Pathien ta dingin maichàm siem ka tih" a ta. 4 Chuongchun, ram dang pathien lem an kol po po le an nabehai chu Jakob kuomah an hung chawi a, ama chun Sekema thingsaisuo bula chun a phûm a. 5 Chuongchun an fe suok a, an sè vela khuo po po chunga chun Pathienin thlabàrna hri a'n lèngtir leiin tu khomin anni chu an hnot zui ngam nawh. 6 Jakob le a kuoma umhai po po chun Bethel chu an tlung a, 7 chu taka chun maichàm a siem a; a u Esau kuoma inthoka a tlàn siet laia a kuoma Pathien a hung inpuongna hmun a ni leiin chu hmun hminga chun El Bethely a'n bûk a. 8 Chu hmuna chun Rebek dontu Debora chu a thi a, Bethela saisuo thing hnuoiah an phûm a, a hmun hminga chun Alon Bakutchz a'n bûk a. 9 Padan Arama inthoka Jakob a hung kìr hin a kuomah Pathien a'n làr nawk a, mal a sawm a. 10 A kuomah, "I hming Jakob a na chu Jakob ti ta loin Israel ti lem tàng an ti che" a ta, chuongchun hmingah 'Israel' a hung put tah a nih. 11 Pathien chun a kuomah, "Kei hi Iengkimthawthei Pathien chu ka nih. Suon tieng hmuingilin i thlahai hung pung raw hai se. Hnampui le hnam chi hrang hrang nangmaa inthokin hung suok an ta, lalhai khom hung suok bok an tih. 12 Abraham le Isak kuoma ka pêk ram chu nang khom ka pêk che a, hi ram hi i thlahai kuoma khom pèng ka tih" a ta. 13 A biekna hmuna inthok chun Pathien chu a kai tung a. 14 Pathienin a biekna hmuna chun Jakobin lung a phun a, lunga chun dawn thilhlàn uoin a buok a, sahriek a'n far khum bok a. 15 Pathienin a biekna hmun chu Jakobin 'Bethel' a'n bûk a. 16 Bethela inthok chun hmun dang an zuon pei a. Efrat an tlung hma hla feah Rachel chun nau hase a'n voi a, a na inrim hle a. 17 Harsa taka san a pêk lai chun a nau domtuin, "Lungngai der naw rawh, naupa i nei nawk a ni hih" a ta. 18 A thlarau an thla hma, a hrang chat lai chun a nau hmingah Ben Onia a sak a. A pa ruok chun Benjaminb a sak ve thung a. 19 Rachel chu a thi a, Efrat panna lampuia chun an phûm a (Efrat chu Bethlehem a nih). 20 A thlàn chunga chun Jakobin lung a phun a, voisun ni chen hin chu lungphun chu Rachel thlàn inchikna a nih. 21 Israel chu a fe pei a, Migdal Eder khela chun puon in a kei a. 22 Hi hmuna Israel a um lai hin a hmei Bilha chu Reubenin a zàlpui a, chu chu Israel khomin a hriet. 23 Jakob chun naupa sawmpahni a nei a, chuonghai chu: Lea naupahai chu Jakob nau lutir Reuben le Simeon, Levi, Juda, Isakar le Zebulun hai an nih. 24 Rachel naupahai chu Josefa le Benjamin an nih. 25 Rachel siehlawnu Bilha naupahai chu Dan le Naftali an nih. 26 Lea siehlawnu Zilpa naupahai chu Gad le Aser hai an nih. Hienghai hi Jakob naupahai, Padan Arama pienghai chu an nih. 27 Jakob chun a pa umna Kiriat Arba (Hebron an ti bok) bula um Mamre hmun, a pu Abraham le a pa Isak hai umna chu a hung tlung a. 28 Isak chu kum za le sawmriet a dam a. 29 Chu zoah a thlarau a'n thla a, tar kûna dam a, upa taka a thi chun a chipuihai kuoma thuoiin a um ve ta a, a nauhai Esau le Jakob chun an vùi a.

Genesis 36

1 Esau, Edom tia ko bok thlahai chanchin chu hieng ang hi a nih. 2 Esau chun Kanan mihai nuhmeiah a nei a, chuonghai chu Hit mi Elon naunu Ada hai, Hiv mi Zibeon tunu, Ana naunu Oholibama hai, 3 Ismail naunu Basemat, Nebaiotc farnu hai an nih. 4 Ada chun Esau chu naupa Elifaz a neipèk a, Besamat chun naupa Reuel a neipèk a, 5 Oholibamah chun naupa Jeus, Jalam le Kora hai a neipèk bok a. Hieng hai hi Esau naupahai, Kanan rama pienghai chu an nih. 6 Esau chun a nuhmeihai, a naupahai le a naunuhai, a ina mihai po po le a ran ruolhai le ran dang a nei po po hai, Kanan rama rosum a khawm po po hai chu somin, a sang Jakob umnaa inthoka ram hla reia chun a'n son a. 7 An thil neihai chu a tam ta êm leiin umhmun khat zing thei an ni ta naw a, an ranhai tlatna dingin ram an indai ta bok nawh. 8 Chuongchun, Esau (Edom an ti bok) chun Seir tlângramah hmun a khuor tah a nih. 9 Seir tlângrama khawsa Esau, Edom mihai thlatu chanchin chu hieng ang hi a nih. 10 Esau naupahai chu, a nuhmei Ada lakah Alifaz a nei a, Basemat lakah Reuel a nei bok a. 11 Elifaz naupahai chu Teman, Omar, Zefo, Gatam le Kenaz an nih. 12 Esau naupa Elifaz chun hmei a nei a, a hming chu Timna a na, ama chun naupa Amalek a neipèk a. Chuonghai chu Esau le a nuhmei Ada tupahai chu an nih. 13 Reuel naupahai chu Nahat, Zera, Sama le Miza an nih. Anni chu Esau le Basemat tuhai an nih. 14 Esau nuhmei Oholibama, Ana naunu le Zibeon tunu chun Esau chu naupa pathum Jeus, Jalam le Kora a neipèk a. 15 Esau thla, lala um hai chu a nau lutîr Elifaz naupa Teman hai, Omar hai, Zefo hai, Kenaz hai, 16 Kora hai, Gatam hai le Amalek hai an nih. Hieng lalhai hi Edom rama mi Elifaz thlahai an na, Esau nuhmei Ada tuhai a nih. 17 Esau naupa Reuel naupahai lala um chu Nahat, Zera, Sama le Miza an nih. Hieng lalhai hi Edom rama mi Reuel thlahai an na, Esau nuhmei Basemat tuhai an nih. 18 Esau le a nuhmei Oholibama laka pieng, lala umhai chu Jeus, Jalam le Kora an nih. Hieng lalhai hi Esau nuhmei Oholibama, Ana naunu thlahai an nih. 19 Chuonghai po chu Esau (Edom an ti bok) naupahai le lala umhai chu an nih. 20 Chun, hienghai hi Hor mi Seir nau pasal, a rama chenghai chu an nih: Lotan, Sobal, Zibeon, Ana, 21 Dison, Ezer le Disan. Edom mi Seir nau pasalhai hi Hor lalhai chu an nih. 22 Lotan naupahai chu Hori le Homam an nih. Lotan farnu chu Timna a nih. 23 Sobal naupahai chu Alvan, Manahat, Ebal, Sefo le Onam an nih. 24 Zibeon naupahai chu Aia le Ana an nih. Ana hi a nih thlalera a pa Zebeon sabengtunghai a vèng laia tuikhur lum hmu suoktu kha. 25 Ana nauhai chu a naupa Dison le a naunu Oholibama an nih. 26 Dison naupahai chu Hemdan, Esban, Ithran le Keran an nih. 27 Ezer naupahai chu Bilhan, Zavan le Akan an nih. 28 Disan naupahai chu Uz le Aran an nih. 29 Hienghai hi Hor lalhai chu an nih: Lotan, Sobal, Zibeon, Ana, 30 Dison, Ezer le Disan. Chuong Hor lalhai chun Sier ramah an chi bing ang peiin lalna biel bìk an nei seng a nih. 31 Israelhaiin lal an nei hmaa Edom rama lalhai chu hienghai hi an nih: 32 Beor naupa Bela chu Edom ramah lalin a um a, a khawpui hming chu Dinhaba a nih. 33 Bela a thi chun Bozraa mi Zera naupa Jobab chun lalna a hung hluo a. 34 Jobab a thi chun Temani rama mi Husham chun a hung thlâk a. 35 Husam a thi chun Moab rama Midianhai hnetu Bedad naupa Hadad chun a hung thlàk nawk a. A khawpui chu Avit a nih. 36 Hadad a thi chun Masreka mi Samla chun a hung thlàk a. 37 Samla a thi chun tuipuid kama khuo Rehobot-a inthoka hung Saul chun a hung thlàk nawk a. 38 Saul a thi chun Akbor naupa Baal-Hananin a hung thlàk a. 39 Akbor naupa Baal-Hanan a thi chun Hadad-in a hung thlàk a. A khawpui hming chu Pau a nih. Hadad nuhmei hming chu Mehetabel a na, ama chu Me- Zahab naunu Matred naunu a nih. 40 Hienghai hi an pahnam, an tlâng hluo le an hming put dàn ang peia Esau thlaa mi lala thunghai chu an nih: Timna, Alva, Jethet, 41 Oholibama, Ela, Pinon, 42 Kenaz, Teman, , Mibzar, 43 Magdiel le Iram. Chuonghai chu an tlâng hluo ang dungzui peia Edom rama lalhai chu an nih. Edom mihai hnampa chu Esau a nih.

Genesis 37

1 Jakob chun a pa chêngna Kanan ramah umhmun a khuor a. 2 Hi hi Jakob thlahai chanchin chu a nih. Josefa chu tleirawl kum sawmpasari mi a ni laiin a pa hmei Bilha le Zilpa nauhai ran chingnaah a thangpui hlak a, a unauhai um dàn tha lo chu a pa kuomah a'n tlun hlak a. 3 Josefa chu a tar tieng nau a ni leiin Israel chun a unau danghai nêkin a hmangai lem a, korfuol mawi taka chei a siempèk a. 4 An pain a unau danghai nèkin a duot bìk ti an hung hriet chun an theida ta hle a, tong tha hrimin an biek thei ta naw a. 5 Josefa chun mang a nei a, a unauhai kuomah a hril leh an theida zuol sau a. 6 An kuomah hieng hin a hril a, " Ka mang hi hang ngàithla ta u. 7 Loah bu ei lo ât a, ka buphal têl chu a tho thut a, a ngîr chang a, in buphalhai chun an hung inhuol a, kûnin chibai an bûk a" a ta. 8 A unauhai chun a kuomah, "Nang telul hin kan chungah ro i rèl ding maw? Nang telul hin kan chungah thu nei i ta maw?" an ta. A mang a hril tawl lei chun nasa takin an theida zuol a. 9 Chun, Josefa chun mang a nei nawk a, a unauhai kuoma chun, "Mi ngàithla ro khai. Mang dang ka nei nawk a, tuta tuma ruok chu nisa le thla le arasi sawmpakhatin kûnin chibai an mi bûk chu tie!" a ta. 10 A pa le a unauhai kuoma a mang a hril chun a pain a zil a, "Ieng mang am a na i nei ta hi? I nu le kei le i unauhai hi hungin, hnuoiah bokkhupin chibai kan bûk telul ding che maw?" a ta. 11 A unauhai chun an thîk a, a pa ruok chun chu thil chu lungrilin a vong zing a. 12 A unauhai chu Sekem kawl tieng an pa ran ruol chu intlattir dingin an fe a. 13 Chun, Israel chun Josefa kuomah, "I unauhaiin Sekem khaw kawlah ran ruol an ching ti i hriet a. Hung rawh, chu hmuna chun ka tir ding che a nih" a ta. Ama chun, "Mi tir ta la" a ta. 14 A pa chun, "Fe la, i unauhai le ran ruol iem an chang ti va en chieng la, chanchin mi hung hril nawk rawh" a ta. Chuongchun, Hebron ruoma inthok chun a tir suok a, ama chun Sekem khuo a va tlung a. 15 Phula a'n vâk a'n vâk lai chu mi tuin amanih a hmu a, "Ieng am i zong leh?" tiin a'n don a. 16 Ama chun, "Ka unauhai ka zong a nih. Ran ruol an intlattirna hmun mi hril thei i tim?" a ta. 17 Mi chun, "Hi taka inthok hin an inson ta a, 'Dothan-ah fèng ei tiu' an ti ri ka hriet" a ta. Josefa chun a uhai chu a zong pei a, Dothan khaw kawlah a va hmu a. 18 Anni chun hla taka inthokin an lo hmu a, an kawl hnai a tlung hmaa that dingin thu an lo phan rûk a. 19 "Saw, mang neipa a hung ta saw!" an inti tuo a. 20 "Thaw ro, that ei ta, khurah pei ei ta, sahuoiin a se hlum a nih ting ei ta. Chu chun a mang kha iem a chang hrim ti hre el ei tih" an ta. 21 Reubenin an thu phier rûk a hriet chun an kuta inthoka san suok a nuom a, "That chu that êm nawng ei tiu" a ta. 22 An kuta inthoka san suok a, an pa kuoma thuoi kîr nawk thei dàn ding dapin Reuben chun, "Thisen chu insuo naw ro; thlalera khura hin thlâk unla, kut êm chu a chungah thlâk naw ro" a ta. 23 Josefan a unauhai kuom a hung tlung chun a korfuol hàk lai mawi taka chei chu an hlippêk a, 24 an thuoi a, tui um ta nawna khura chun an thlâk a. 25 Bu faa an inthung lai chun an hang ngha a, Ismael mi sumdawng ruol, sanghawngseia thuomhnaw phur, Gilead tlâng tienga inthoka hunghai chu an hmu a. An sanghawngseihai chun mawsola dâm, hriek rimtui dâm, murrah dâm an phur teu a, chuonghai chu Aiguptaa zor dinga fe mèk an nih. 26 Chun, Juda chun a unauhai kuomah, "Ei unaupa ei that a, a thisen ei insuo thu ei ip chu iem a na ei hlawkpui ding? 27 Thaw ro, a chungah kut thlâk loin, Ismael mihai kuoma hin zor lem ei tiu. Ieng po khom hril inla, ei unaupa, ei taksa le thisen put a ni tlat a" a ta. A unauhai chun an remti a. 28 Chuongchun, Midian mi sumdawnghai an hung chun Josefa chu khura inthok chun an lâk suok a, tangka shekel sawmhniin Ismael mihai kuta chun an zor a, anni chun Aigupta tieng an thuoi a. 29 Chun, Reubenin khur a hung en nawk chun Josefa chu a hmu ta naw a, chuongchun a silfènhai chu a pot thler a. 30 A sanghai kuoma chun a hung kîr a, "Ei sangpa a um ta nawh. Iem ka law ta ding a na?" a ta. 31 Chun, Josefa korfuol chu an lâk a, kêl an that a, a thisena chun an inchie a. 32 Korfuol chei chu an pa kuomah an chawi a, "Hi ringot hi kan hmu a, i naupa korfuol a ni le ni naw en chieng rawh" an ta. 33 Ama chun a hriet nghal a, "Ka naupa korfuol a ni ngei hi; sahuoiin a fâk zo an ta chu! Josefa chu sahuoiin a kei chen chieng a nih" a ta. 34 Chuongchun, Jakob chun a silfèn a pot thlêr a, saiip silin ni tam tak a sûn a. 35 A naupahai le naunuhai chu hnem dingin an hung pung khawm a, sienkhom hnèm ruol a ni nawh. "Lusun pumin thlân tieng ka naupa kuomah ka liem ding a ni hih" a ta. A pa chun a sùn takmeu a nih. 36 Chuong chu a ni laiin, Josefa chu Midianhai chun Aigupta lal Faraw vèngtu sipai hotu Potifar kuomah an zor sawng a.

Genesis 38

1 Chuong hun lai chun Juda chun a unauhai màksanin a fe thlàk a, Adulam mi Hira chu a zu bêl a. 2 Chu taka chun Kanan mi Sua naunu a hmu a, nuhmeiin a nei a, a pawl a, 3 nau a hung pai a, naupa a nei a, a hmingah Er a sak a. 4 Nau a pai nawk a, naupa bok a nei a, a hmingah Onan a sak a. 5 Nau pasal dang khom a nei nawk a, a hmingah Sela a sak a. Ama hi Kezib khuoa Juda a um laia pieng a nih. 6 Juda chun a nau lutîr Er chu nuhmeiah Tamar an ti chu a'n neitir a. 7 Sienkhom Juda nau lutîr Er chu LALPA mithmuah mi rilo tak a ni leiin LALPAN a sukhlum a. 8 Juda chun a naupa Onan kuomah, "I u nuhmei hi pawl la, pasalin mani unauhai chunga an thaw ding chu hlen la, i u ta dingin chi thlàpèk rawh" a ta. 9 Onan chun a chi thlàpèk ding chu ama thla a ni naw ding ti a hriet leiin, a u nuhmei a pawl zâtin a chi chu hnuoiah a sukthlâk hlak a. 10 A thilthaw dàn chu LALPA mitah thil rilo a ni leiin ama khom chu LALPAN a sukhlum a. 11 Juda chun a monu Tamar kuomah, "Ka naupa Sela a puitling chenin i pa in tieng pasal nei loin lo va um phot rawh" a ta. A naupa chu a unau danghai ang boka a thi ve a lungrilin a'n lau thawng lei a nih. Chuongchun, Tamar chu a pa in tieng chun a va um ta a. 12 Hun sawt fe hnungah Juda nuhmei, Sua naunu chu a thi a. A lusun a hung rè chun Juda chu a beram hmul vawtuhai kan dingin Timna khuoah a fe a, a ruolpa Adulam mi Hira chun a fepui a. 13 Chun, mihaiin Tamar kuoma chun, "I tarpu chu a beram hmul vaw dingin Timna a pan" tiin an va hril a. 14 Chuongchun ama chun a pasal a sûnna silfèn chu a hlip a, hmai inkhumna puon chun a lu a'n khum a, Timna khaw lampuia Enaim kul kotkhâr bula chun a lo inthung a; Sela chu a puitling taa chu a nuhmei dingin ama nu chu a tarpu chun a pêk si nawh ti a hriet vong si a. 15 Juda'n amanu a hmu chun a hmai an khum tlat leiin nawchizor a sawn a. 16 A monu a nih ti hre dêr loin lam sîra nuhmei chu a va pan a, "Hung rawh, zâlpui ka ti che" a ta. Ama chun, "I mi zâlpui manah iem mi pèng i ta?" a ta. 17 Juda chun, "Ka ran ruol laia mi kêl tuoi hung thon ka ti che" a ta. Ama chun, "Chu chu i hung thon hmaa hrèn ding dakham iemani bèk i mi pèk naw ding?" a ta. 18 Juda chun, "Dakham iem ka siepèk ding che?" a ta. Ama chun, "I hming namna suoi le a khaidiet le i hmol chawi kha" a ta. Chuonghai chu a pêk a, a zâlpui a, a laka chun nau a pai ta a. 19 Chun, amanu chu a tho a, a hmai inkhumna puon chu a hlîp a, a hmeithaina silfèn chu a'n bel nawk ta a. 20 A dakham sie chu nuhmei kuta inthoka la kîr dingin a ruolpa Adulam mi chu kel tuoi keiin a'n fetir a, sienkhom amanu chu a hmu zo ta nawh. 21 "Enaim-a lampui sira inthung, tempul nawchizor kha khaw lai am a um ta a?" tiin chu laia mihai chu a'n don a, anni chun, "Hieng lai hin tempul nawchizor tu khom an um nawh" an ta. 22 Chuongchun, Juda kuomah a kîr nawk a, a kuomah, "Ka va hmu zo dêr nawh. A hmuna mihaiin, 'Hieng lai hin tempul nawchizor tu khom an um nawh' an ti bok si" a ta. 23 Juda chun, "A hrên po kha kol song el raw se, chuong naw chun mi nuizatbur ei hlaw thei ding a nih, kel tuoi ka thona hlak chu ama i va hmu zo tlat si naw a" a ta. 24 Thla thum vel a liem hnung chun Juda kuomah, "I mo Tamar khan tlangvàl a ngai a, sawn a pai nghe nghe a nih" tiin an hung hril a. Juda chun, "Thuoi suok inla, raw hlum ro" a ta. 25 An thuoi suok lai chun Tamarin, "Hieng thilhai neitu laka nau hi ka pai a nih" tiin a tarpupa kuoma chun mi tirin thu a thon a. Chun ama vèkin, "Lunginsiet takin hieng suoi le a paina khaidiet le hmol hi tu ta am a na ti en chieng hrim ro khai" tiin thu a'n cha bok a. 26 Chuong thilhai chu a ta ngei a nih ti Juda chun a hriet nghal a, "Ama chu kei nèkin a fel lem a ni hi; ka naupa Sela hlak ka'n neitir ta si naw a" a ta. Juda chun ama chu a pawl nawk ta hrim hrim nawh. 27 A nau nei a hung hun chun, a sulah inphîr an um a. 28 Nau hase an voi lai chun pakhat chun a kut a hung rol suok a, nau domtu chun, "Hi hi a suok hmasa lem a ni hi" tiin a kutin a chel a, patsen a'n buntir a. 29 A kut a kei lût nawk chun a unaupa chu a hung suok a. Nau domtu chun, "Hieng hi maw i hung nèr thleng dân chu!" a ta, a hmingah Pereze a sak a. 30 Chu zoah a kut rînga patsen an inbuntir a unaupa chu a hung suok a, a hmingah Zeraf a sak a.

Genesis 39

1 Josefa chu Aigupta ramah an thuoi thlâk a, Faraw hnuoia vèngtu sipai pawl kapten Potifar chun a hung thuoitu Ismael mihai kuta inthok chun a lo inchawk a. 2 LALPA chu Josefa kuomah a um a, a hung hmuingil a, a pu Aigupta mi ina chun a um a. 3 Josefa kuomah LALPA a um a, a thilthaw taphot a'n hlawtlingtir a nih ti a pu chun a hung hriet ta a. 4 Josefa chun a pu mit a tlung a, ama thangpuituah a ruot a, a insûng enkoltu tak a hung ni a, a nei po po chu a kutah a sie vong a. 5 A insûng le a nei po po enkoltua a siema inthok chun LALPAN Aigupta mi insûng chu Josefa leiin mal a sawm a, in tieng le ram tienga Potifar thil nei po po chu malsawmin a um a. 6 Chuongchun, a nei po po chu Josefa enkolna kutah a sie ta vong a, a kuoma thil umhai rèng rèng chu a hrietpui der naw a, a bu fâk ding chauh naw chu thil dang a ngaisak a tul ta nawh. 7 Josefa chu pa sa tha tak le hmèl tha tak el a na. A pu nuhmei chun a lo hriet sek a, "Mi zâlpui rawh" a ta. 8 Ama ruok chun a nuom naw a, a pu nuhmei kuoma chun, "Keima enkolna hnuoia um a ni sûng chun hi insûnga hin thil iem a um a um nawh ti ka pu chun a lungkham naw a, a nei iengkim ka kutah a sie top a. 9 Hi ina hin keima nèka lien tu khom an um nawh. Ka pu hin a nuhmei nangma ti chauh naw chu ieng khom ka lakah inro a nei nawh. Chuong chu a ni leiin, iengtin am hieng ang thil rilo hi thawin Pathien lakah suol ka thaw ding a na?" a ta. 10 Josefa chu ni tin be hlak sienkhom a zâlpui nuom naw chauh ni loin a hnaia um khom a nuom nawh. 11 Ni khat chu in sûngah sin thaw dingin a lût a, in sûnga chun siehlaw tu khom an um naw a. 12 A pi chun a korfuolah a lo man a, "Mi zàlpui rawh" a ta, sienkhom a'n tàl suok a, a korfuol chu a pi kuta chun a màksan a, a suok ta dai a. 13 A kutah a korfuol màksana ina inthoka a tlân suok a hmu chun, 14 a siehlawhai chu a ko a, "En ro, hi Hebrai mi an hung thuoi lût hin mi sukmuolpho a tum a nih. Mi zâlpui tumin a hung a, sienkhom ka khêk a. 15 Santu ding koa ka khêk charin ka bulah a korfuol màksanin ina inthokin a tlân suok a nih" a ta. 16 A pasal a hung hma po chun korfuol chu a bulah a sie zing a. 17 A hung chun a kuomah "Hebrai mi ei siehlaw ding i hung thuoi khan mi sukmuolpho tumin ka kuomah a hung lût a. 18 Sienkhom thangpuitu koa ka khêk leiin a korfuol màksanin, ina inthokin a tlân suok a nih" tiin a lo hril a. 19 A nuhmeiin, 'Chuong ang chu i siehlaw mi soisak dàn chu a nih' a ti ri Josefa puin a hriet chun a lung an ling phut a. 20 Josefa chu lalhai an khumna hlak tàng ina chun a thuoi a, chu taka chun a khum ta a. 21 Nisienlakhom, intângna ina Josefa an tàng lai chun a kuomah Pathien a um a, a chungah ngil a nei a, tâng vêngtu ditsakna a'n changtir a. 22 Tâng vêngtu chun mi intàng po po chunga hotuah a sie a, an thilthaw iengkimah mawphurna a'n hlân a. 23 A kuomah LALPA a um a, a thaw taphotah hlawtlingna a pêk pei lei chun, a kuta dandea um hrim hrim thilah lung in vèngtu chu a'n rol ngai nawh.

Genesis 40

1 Iemani chen hnunga chun Aigupta lal ina lal dawn ding uoiin petu le a bei siemtu hai chun an pu lung an suk-awi naw a. 2 Faraw lungsen chun a sinthawtu pahni, a uoiin petu le a bei siemtu hai chu ama vèngtu sipai kapten ina chun a'n tàngtir a, 3 chu intàngna in chu a nih Josefa khom an khumna chu. 4 An pahni chun Josefa enkolna hnuoiah tàng vêngtu chun a sie a. 5 Iemani chen an intàng hnungin Faraw ina uoin semtu le bei siemtu hai chun zânah a ruolin mang, umzie hrang nei ve ve, an nei a. 6 Zîngkâr Josefan anni pahni a hmu chun an hmèl a ngui ve ve ti a hriet a. 7 Chuongchun, Faraw sinthawtuhai, a pu ina ama le an khumhai kuoma chun, "Iem a ta voisun chu in hmèl a va ngui ngei de?" a ta. 8 Anni chun, "Mang kan nei ve ve a, sienkhom a mi hrilfiepèk ding an um si nawh" an ta. Josefa chun, "Mang hrilfie theina chu Pathien ta a ni naw am a ni? In mang chu mi hang hril ta u" a ta. 9 Chuongchun, uoiin semtu hotu tak chun a mang chu Josefa kuomah a hril a. "Ka mangin ka hmaah grep hrui a lo um a, 10 chu grep chun kaupêng pathum a nei a. A kumum zo chun a hung pâr nghal a, bawr tina chun grep hmin a ra tuor el a. 11 Ka kutin Faraw no chu ka lo chawi a, grep chu ka lo a, noa chun ka sawr a, Faraw kutah ka lo pêk a" a ta. 12 Josefa chun, "I mang umzie chu hi hi a nih. Grep kaupêng pathum chu ni thum tina a nih. 13 Tuta inthokah ni thumah Faraw chun i lu chawisàng a ta, i nina ngaiah hlângkài nawk a ti che a, a hmaa a uoiin petu i ni laia i thaw hlak ang khan a kutah uoiin i pèk nawk ding a nih. 14 Amiruokchu, chan that i chang nawk pha leh mi hung hre zing la, lunginsietna ka chungah hung inlangtir la, ka chungthu hi Faraw hril la, hi tàng ina inthok hin mi hung thuoi suok rawh. 15 Hebraihai rama inthokin hi rama hin ka nuom thu ni loa thuoi thlàkin ka um a, hi rip sûnga an mi khumna khop ding poi ieng khom ka tawk nawh" a ta. 16 Bei siemtuhai hotu chun a hrilfiena chu tha a ti hle a. Josefa kuoma chun, "Kei khomin mang ka nei a. Ka lu-ah bei bawm pathum ka lo sìpsuon a. 17 A chung taka chun Faraw ta ding bei inhnik tak tak a um a, sienkhom vatehan ka sipsuon lai zing chun an hung tlàn zo ta vong a" a ta. 18 Josefa chun, "I mang umzie chu hi hi a nih. Bei bawm pathum chu ni thum tina a nih. 19 Ni thum sûngin Faraw-in i lu khai kâng a ta, thing lèrah khai hlum a ti che a, vatehaiin i ruong tlàn an tih" a ta. 20 A ni thumna chu Faraw pieng champha a na, a hnuoia thoktuhai po po ta dingin ruoi ropui tak a the a. Uoiin semtuhai hotu le bei siemtuhai hotu chungthu chu a thoktuhai hmaa a sukfel a, 21 uoiin semtu chu a nina pàngngàiah a hlângkai a, Faraw kuta uoiin petuah a hung thang nawk a; 22 bei siemtuhai hotu ruok chu Josefan a hrilfie tah ang khan a hung tlung indik a, a khai hlum tah a nih. 23 Amiruokchu, uoiin semtuhai hotu chun Josefa thu incha chu hre zui loin a theinghil el ta a!

Genesis 41

1 Kum hni zet a'n voi hnungin Faraw chun mang a nei a. Nile vadung pangah a lo ngîr a. 2 Vadunga inthokin bawngpui pasari, thau le tlor tha tak el chu an hung suok a, phairuong lai chun an tla khawm a. 3 Chu hnunga chun, Nile vadunga inthok bokin bawngpui dang pasari, ber tak tak le kor tak tak an hung suok a, vakama bawngpui tlahai bula chun an ngîr a. 4 Bawngpui ber le kor tak tak hai chun bawngpui nàm tha le thau tak tak hai chu an fàk zo ta vong a. Chuongchun, Faraw chu a thanghar ta a. 5 A hang in nawk chun mang dang a nei a. Bu kung khata hin bu vui sari, inhrol le tha tak tak, an hung suok a. 6 Chu hnunga chun bu vui chikté tè pasari, khawsak thliin a mût tawl bor bor el hai chu an hung suok nawk a. 7 Bu vui chikté tèhai chun vui sari lien tak tak hai chu an lem zo el ta a. Faraw a hang thanghar chun a mang a lo ni hlau a. 8 A tûk zîngkâr chun a lungril chu a mangang a, Aigupta ram sûnga mitvai-dawithiem hai le mi var po po chu a ko khawm a, a mang chu a hril tawl a, sienkhom a hrilfiepèk thei an um si nawh. 9 Chu phing leh uoiin semtu hotu chun Faraw kuomah, "Voisun hin ka bâksamna ka hriet suok ie. 10 A siehlawhai chunga Faraw a lungsen tum khan kei le bei siemtu hotu chu vèngtu sipai kapten inah an mi'n tàngtir a. 11 Kan pahni chun zân khat chu a ruolin mang kan nei ve ve a, kan mang chun umzie hrang a nei ve ve bok a. 12 Kan intàngnaa chun Hebrai tlangval, vêngtu sipai kapten siehlaw a'n tàng ve a. Kan mang chu kan hril a, a kawk umzie ang charin ami hrilfiepèk ve ve a. 13 A hrilfie ang char chun thil a hung tlung a, kei chu ka ngirhmun pangngaiah hlângkaiin ka um a, pakhat chu khai hlumin a um" a ta. 14 Chuongchun, Faraw chun Josefa chu a'n kotir nghal a, ripa inthok chun an hung thuoi suok a, a hmul a mèt fai a, a silfènhai a'n thlâk a, Faraw hmaah a hung a. 15 Faraw chun Josefa kuomah, "Mang ka nei a, a hrilfie thei an um si naw a. Sienkhom, nang chun mang an hril che chu i hrilfie thei pei ti thu ka lo hriet a" a ta. 16 Josefa chun, "Kei chun ka thaw thei nawh, sienkhom Pathienin Faraw beisei donna chu pêng a tih" a ta. 17 Faraw chun Josefa kuomah, "Ka mangin Nile vadung kamah ka lo ngîr a. 18 Vadunga inthok chun bawngpui tlor tha le thau tak tak pasari hi an hung suok a, phairuong lai chun an tla khawm a. 19 Anni hnunga chun bawngpui dang pasari, a rù khât ringot el, ber tak tak le kor tak tak an hung suok a, chuong ang hrima bawngpui ber chu Aigupta ramah ka la hmu ngai nawh. 20 Bawngpui korhai chun bawngpui thau, a hung suok hmasahai chu, an fâk vong a. 21 An fâk zo hnung khom chun an fâk a nih ti tu khomin hre naw ni hai, a tira ang bok khan an la ber tawl zing a nih. Chu zoa chun ka thanghar a. 22 "Ka mang nawka chun bu kung khata inthokin vui sari, inhrol le tha tak tak, an hung vui suok a. 23 Chu hnunga chun vui sari dang chikté tè, sak thliin a mut tawl bor bor, rop riep el hi, an hung suok a. 24 Bu vui pisihai chun bu vui thahai chu an dol zo vong a. Hi thu hi ka mitvai-dawithiemhai ka hril a, sienkhom tu khomin an mi hrilfiepèk thei si nawh" a ta. 25 Josefa chun Faraw kuomah, "Faraw mang hi thil thuhmun a na, Pathienin thil a thaw tep thu Faraw kuomah a puong a ni chu. 26 Bawngpui tha pasari chu kum sari, buvui tha pasari chu kum sari tina ve ve a nih; a mang umzie chu thuhmun char a nih. 27 Bawngpui kor le ber pasari hung suokhai chu kum sari tina a na, hmang tlàk lo bu vui sari, sak thliin a em tawlhai chu kum sari tina tho a nih. Tàm tlâk ding kum sari tina a nih. 28 "Faraw kuoma ka hril tah ang khan, Pathienin thil a thaw ding lai tèp chu Faraw a'n hriettir a ni hi. 29 Aigupta ram sûng po poa hin kum sari sûng a tontawin bu tam a ta, 30 chu chu tàm kum sariin zui a tih. Chu sûng chun Aigupta hausakna po po chu mihaiin theinghil vong khopin tàm chun a ram pum nuoi tlaran a tih. 31 A zuitu tàmpui mitsim chu a nasa êm leiin Aigupta ram hnienghnârna po po khom theinghil vong an tih. 32 Mang pahnia Faraw kuoma inhriettir a nina san chu Pathienin a thilthaw ding chu a sukthlùk fel diem ta a, a thaw vak ta ding a ni lei a nih. 33 "Tu hin Farawin thil chinchàng hre thiem le mivar zong suok sien, Aigupta ram chunga hin hotuah ruot raw se. 34 Bu suok tam hun kum sari sûng po poa mi hmun ngaa thea hmun khat pei khon khawmtu dingin hotu ruot raw se. 35 Kum that kuma bu suok po po chu Faraw thupèkin la khawm hai sien, chu chu khawpuia hai kudamah sie khawl raw hai se. 36 Tàmin a ram a sukram vong nawna dingin, Aigupta rama kum sari tàm a tlàk sûnga ring dingin vong tha raw hai se" a ta. 37 A thu rot chu Faraw le a sinthawtuhai po po chun tha awmin an hriet seng a. 38 Faraw chun, "Pathien thlarau kol mi, hi mipa ang hi mi ei hmu zo ding am a ni?" tiin a mihai chu a'n don a. 39 Chun, Faraw chun Josefa kuomah, "Hieng po po hi Pathienin an hriettir che a ni leiin, nangma anga chinchàng hre thei le mivar tu khom an um nawh. 40 Chuleiin, ka lal ina hin a hotu tak nîng i ta, ka khuo le tuihai hi i thu ang peiin um an ta, lalthungphaa thung ka nina chauh hi i nèka kan lal lemna sun chu a nih" a ta. 41 Faraw chun Josefa kuomah, "Tuhin Aigupta ram po po chunga hotuah ka sie che" a ta. 42 Faraw chun a hming namna suoi kutsebi chu a kuta inthokin a phawi dok a, Josefa chu a'n buntir a, puon zâi inhmia siem silfènhai chu a'n beltir a, a rînga chun rangkachak thi a'n hlìtir bok a. 43 Ama dottu a ni angin ama chuongna dottu tawlailira chun an chuongtir a, a hmaa fehai chun "Dingthathuon ro" tiin an khêk pei a. Chuong ang chun Aigupta ram po po chunga hotuah a siem ta a. 44 Faraw chun Josefa kuomah, "Kei hi Faraw ka nia chu nangma thu naw chun Aigupta ram sûng po poa hin tu khomin an kut le ke inlet thei naw ni hai" a ta. 45 Faraw chun Josefa hmingah Zafenat Panea a'n bûk a, a nuhmei dingin On khuo (Heliopolis an ti bok) a thiempu Potifar naunu Asenat chu a pêk a. Chun, Josefa chu a suok a, Aigupta ram po po a fang suok a. 46 Aigupta ram lal Faraw hnuoia sin a thaw tan hin Josefa chu kum sawmthum mi a ni ta a. Josefa chu Faraw kuoma inthok chun a suok a, Aigupta ram po po a fang a. 47 Kum that kum, kum sari sûng chun a ramin bu a thar suok rawn hle a. 48 Kum sari sûnga an tharhai po po chu Josefan a lâk khawm vong a, khawpuia hai chun a hlu lût a. Khawpui tina a siehai chu a se vela an bu tharsuokhai an nih. 49 Chuong ang chun, tuipuia tieuvut anga tam bu a sung khawm a, a tawp tieng lem chu tiem sèng a ni ta naw leiin inchik khom an inchik ta nawh. 50 Tàm a tlàk hmain a nuhmei Asenat, On khuoa thiempu Potifar naunu chun Josefa chu naupa pahni a neipek a. 51 Josefa chun, "Pathienin ka rimsik tuor po po le ka pa sûngkuo chen khom a mi'n theinghiltir ta si a" a ta, a nau lutîr hmingah Manaseg a sak a. 52 A nau pahnina hminga chun, "Pathienin rinum ka tuorna rama hin chi a mi'n thla pungtir ta si a" a ta, Efraimh a sak a. 53 Aigupta rama kum that kum, kum sari chu a hung invoi a, 54 Josefan a hril lawk angin tàm kum, kum sari chu a hung intan a. Ram dang po poa khom tàm a tla vong a, Aiguptaa ruok chu hmun tinah fâk ding a la um a. 55 Aigupta ram khom an hung tam ve ta a, Faraw kuomah fâk ding ngenin mipui chu an khêk a. Faraw chun Aigupta mi po po hai kuomah, "Josefa kuomah fe unla, a hril cheu taphot chu thaw ro" a ta. 56 A ram phêka an hung tàm phing leh Josefa chun a bu inhai chu a hong a, Aigupta mihai kuoma chun a zor a. Tàm chu Aigupta ram pumah a hrâng nasa hle a. 57 Khawvelah tàm chu a nasat êm leiin ram tina mihai chu Josefa kuoma inthoka pûr inchawi dingin Aigupta ram an hung pan a.

Genesis 42

1 Aigupta ramah bu a um ti Jakobin a hriet chun a nauhai kuomah, "Iem a ta meichok en ringota in inthung zing tawl? 2 Aiguptaah bu a um ti ka lo hriet a. Thi loa ei dam khawsuok theina dingin zu fe unla, pûr zu'n chaw ro" a ta. 3 Chuongchun, Jakob naupa sawmhai chu pûr inchaw dingin Aigupta ramah an zu fe a. 4 Josefa sang Benjamin ruok chu siet a zu tuok pal Jakob chun a ti leiin a uhai le chun a'n fetir ve naw a. 5 Kanan rama khom tàm a tla vong leiin, mi dang pûr inchawa fehai lai chun Israel nauhai khom an thang ve a. 6 Chuong lai chun Josefa chu Aigupta rama làrsap le a ram mihai po po kuoma bu zor suoktu a nih. A unauhai an hung tlung chun bokkhupa hnuoi sikin chibai an bûk a. 7 Josefan a uhai a hmu chun a hriet nghal tawl a, sienkhom hnam dang anga insiem tehlemin, "Khaw laia inthoka hung cheu" tiin vîn takin a lo biek tawl a. 8 Josefa chun a unauhai a lo hriet tawla chu anni ruok chun ama chu an hriet nawh. 9 Kha hmaa anni chungthua a mang dâm kha a hriet suok rum rum a. An kuoma chun, "Nangni hi enthlatu in nih. Kan ram kan vêng that nawna lai hmun en dinga hung in ni hi" a ta. 10 Anni chun, "Ni lo e, pu, i siehlawhai hi pûr inchaw dinga hung kan nih. 11 Mi pakhat nau vong kan nih. I siehlawhai hi mi indik tak kan na, enthlatu kan ni nawh" an ta. 12 Ama chun, "In ni kha. Kan ram hi kan vèng that le that naw enthla dinga hung in nih" a ta. 13 Anni chun, "I siehlawhai hi unau pasal sawmpahni kan na, Kanana um mi pakhat nau vong kan nih. A tlum tak chu kan pa kuomah a um a, pakhat ruok chu a um ta nawh" an ta. 14 Josefa chun, "Enthlatu in nih ka ti kha in ni ngei hi. 15 Hieng ang hin fie nîng in tih: in mi tlum tak chu hi taka hin a hung naw chun hi hmuna inthok hin suok naw ti niu ti Faraw hringna salin ka hril cheu a nih. 16 In thu an dik le indik naw fiena dingin, nangni laia pakhat tir inla, in mi tlum tak chu hung thuoi raw se; a dang po chu lung inah intâng hri phot in tih. Chuong naw chun Faraw hringna salin. 'Enthlatu in ni ngei hi' ka ti ding cheu a nih" a ta. 17 An rêng chun ni thum a'n tàngtir tawl a. 18 A ni thum ni chun Josefa'n an kuomah, "Hieng hin thaw inla, hring in tih, Pathien chu ka ti si a. 19 Mi indik in ni chun, in unaupa pakhat hi lung inah um sien, a dang po chun in sûngkuo tâmhai ta ding bu phurin kîr nawk ro. 20 Amiruokchu, in mi tlum tak chu hung thuoi unla, chuongchun in thu chu chieng a ta, in thi naw ding annawm" a ta. Chuong ang chun an thaw a. 21 Chun, anni chun, "Ei unaupa chunga ei thilthaw leia hrem ei ni chieng khop el. A hringna hla dinga a mi ngèn tawk tawk laia a lungril beidongzie kha hmu zingin ei ngàithlàk nuom si naw a. Chuleiin, hi mangangna hin a mi tlâkbuok a nih" an inti tuo a. 22 Reuben chun, " 'Naupang chungah thilsuol thaw naw ro' ka ti rêng cheu an naw maw? Sienkhom, in mi ngàithlàk nuom si nawh. Tuhin a thisen maw chu ei tuor ding a ni hrim a nih" a ta. 23 Josefa chun tong inlettu hmanga a lo biek tawl leiin an thu chu a lo hriet vong ti chu an hriet si nawh. 24 Chuongchun, anni chu naw tieng a nghatsan a, a tap a, sienkhom a hung ngha kîr nawk a, anni chu a biek a. Anni laia mi Simeon chu an thuoitir a, an hmua ngei chun a khuop a. 25 Josefa chun an iphai chu bu thun sip tal a, an tangka hung chawi seng chu an ip sunga seng thunpêk a, lampuia an fâk le dawn ding pe bok dingin thu a pêk a, chuong ang tak chun an thawpêk a. 26 Chuongchun, an ip seng chu sabengtung an inphurtir a, an suok dok ta a. 27 Chun, anni laia pakhat chun zâna an rieknaa chun a sabengtung chu bu pe dingin a ip a hong a, a tangka chu a ipa chun a hmu ta tlat el a! 28 A unauhai kuomah, "Ka tangka kha an mi pèkkir a ni hi tie, ka ip baua hin a lo um tlat el!" a ta. An lung a kak rak a, inthin dur durin, "Ei chunga Pathien thilthaw dàn hi iengtizie am a ni ta aw?" an ta, an inen tuo a. 29 Kanan rama um an pa Jakob kuom an tlung chun thil um dàn iengkim chu an hril a. 30 "Chu rama hotu chun vîn deuin a mi biek a, an ram enthlatua fe angin a mi ngai a. 31 Keini chun, 'Mi indik tak kan nih, enthlatu kan ni awzawng nawh. 32 Unau sawm le pahni kan na, mi pakhat nau vong kan na, pakhat chu a um ta naw a, kan mi tlum tak chu tu hin Kanan ramah kan pa kuomah a um a nih' kan ta. 33 An ram hotu chun, 'Mi indik tak in ni le ni naw chu hieng hin hre thei ka tih: in unau pakhat ka kuomah màksan unla, in sûngkuo tâmhai ta dingin bu phur unla, fe ta ro. 34 Chun, in tlum tak chu ka kuomah hung thuoi ro. Chu chun enthlatu ni loin mi indik tak in nizie hre thei ka ta, in unaupa chu pe kîr nawk ka ti cheu a, hi rama hin sum khom dawng thei in tih' tiin a mi ti a" an ta. 35 An ip an hang bun ruok lai chun, an ip senga chun an tangka fûn seng chu a lo um tlat el a! Chu chu an pa rawia an hmu chun an thla a phâng ta êm êm a. 36 An pa Jakob chun, "Nangni hi ka nauhai mi'n chàntirtu in ni hi. Josefa ka chân ta a, Simeon ka chân ta bok a, tu hin Benjam chen khom thuoi hmang in la tum ta deu deu a. Hieng hlol hi a ni maw ka chunga thil tlung dàn chu!" a ta. 37 Reuben chun a pa kuomah, "I kuomah ka hung thuoi kîr nawk naw chun ka naupa pahnihai hi that el rawh. Ka mawphurnaah sie la, i kuomah hung thuoi kîr nawk ngei ngei ka tih" a ta. 38 Ama chun, "Ka naupa hi nangni leh fe thla ve naw nih. A u a thi ta a, ama chauh hi a ni ta a, in fena lampuiah tuoksuol in zu tuok pal hlauh chun ka lu kelsam to ta hi lungngaiin thlânah in inliemtir ding a nih" a ta.

Genesis 43

1 Chu rama chun tàm a la tla nasa hle a. 2 Aiguptaa inthoka an bu hung phur an fâk zo chun an pa'n, "Fe nawk ta unla, bu tlawma zawng zu'n chaw nawk ro" a ta. 3 Juda chun, "Chu pa chun, 'In sangpa in hung thuoi sa ve naw chun ka hmèl hmu ta naw ti niu' tia ursun taka a mi hril sa a nih. 4 Kan sangpa hi keini leh i'n fetir chun zu fèng kan ta, bu chu zu'n chaw nawk kan tih. 5 A fe i phal si naw chun, zu fe nawng kan tih, a san chu mi khan, 'In sangpa in hung thuoi ve naw chun ka hmèl hmu ta naw ti niu' a ti ta sa a ni leiin" a ta. 6 Israel chun, "Ieng leia sang dang in la nei thu dâm chu hril kher kher a, ka chungah buoina in intlungtir am a na?" a ta. 7 Anni chun, "Aman chîk takin kan chanchin le ei insûng chanchin a mi'n don a. 'In pa teh a la dam am? Unau dang in nei am?' dam a ta. A thil indon chu mawl takin kan hril el a nih. 'In unaupa chu hung thuoi thla ro' a mi ti ding ieng tin am kan hriet kher ding?" an ta. 8 Juda chun a pa Israel kuomah, "Naupang hi kei leh mi'n fetir la, nang le keini le kan nauhai hi thi loa ei dam theina dingin inthok suok nghal kan tih. 9 A him dàn ding chungthuah kei hi maw mi'n phurtir vong rawh. Hi taka hin i hmaah ka hung thuoi kîr nawk naw vai chun, ka dam sûngin a maw iengkim chu phur vong ka tih. 10 Tu khom hin, fe intak naw inla chu voi hni zet tlung hman ding ei ni tah" a ta. 11 An pa Israel chun an kuomah, "Chuong a ni tlat si chun, hieng hin thaw ro. In ipa khan hi rama thil tha thenkhat thinghnai damdawi dâm, khuoizu dâm, mawsawla le murra dâm, makhâk mu dâm, ruon mu dâm tlawma zawng bèk a kuoma thilpêk dingin chawi ro. 12 Tangka khom in chawi lêt hni chawi ro, in ipa an lo thun kha in pêk kîr a tul ding a ni leiin, an thaw palh a ni el thei a. 13 In sangpa khom thuoi unla, a kuomah zu fe nawk vat ro. 14 In unaupa leh Benjamin leh in hung kîr nawk a phalna dingin, LALPA Iengkimthawthei chun chu mi chu in chungah lunginsietna inneitir raw se. Kei ruok chu, lu ka sùn leh ka sùn ding a ni ma el" a ta. 15 Chuongchun, anni chun thilpêk le tangka a lêt hni an chawi a, Benjamin an thuoi a, inhmaw takin Aigupta tieng an pan thlàk a, Josefa hmaa chun an inlang nawk ta a. 16 Anni leh Benjamin a hmu charin Josefa chun a in enkoltu kuomah, "Hienghai hi ka inah thuoi la, ran that la, buotsai rawh; sùnah ka kuomah bu an fâk ding a nih" a ta. 17 Ama chun Josefa thupêk angin a thaw a, a ina chun anni chu a thuoi lût a. 18 Josefa ina an thuoi lût lei chun anni chu an thlaphâng a. "Ei fe hmasaka ei ipa tangka an lo sie leia hi taka an mi thuoi lût a ni awm hi. Ama hin mi bei a, mi hne a, suokah mi man a, ei sabengtunghai lâk a tum nîng a tih" tiin an ngaituo a. 19 Chuongchun, Josefa in enkoltu chu an va hnai a, a in kotkhâr bula chun an va biek a, 20 "Pu, kan hung hmasak khan bu inchaw ding chaua hung thla kan na. 21 Sienkhom, zâna kan rieknaah kan ip kan hang hong leh kan tangka fun chawi seng kha, a rik dàn khom a ngai char seng chu, kan ip bauah a lo um a. Chuleiin, tangka chu kan hung chawi kîr nawk a nih. 22 Chun, bu kan inchawkna ding khom tangka a hranin ka hung chawi bok a. Kan ipa tangka kha tu sie am a nih ti kan hriet nawh" an ta. 23 Ama chun, "A poi nawh. Ti dêr naw ro. In Pathien, in pa Pathien chun in ipah rosum a pêk cheu a ni chu; in tangka kha ka hmu si a" a ta. Chun, Simeon chu an kuomah a hung thuoi a. 24 Chuongchun, anni chu Josefa inah a thuoi a, ke sawpna ding tui a pêk a, an sabengtunghai khom chu bu a pêk bok a. 25 Suna Josefa a hung phaa an thilpêk dinghai chu an siem lawk a, chu taka chun bu an fâk ding ti an hriet si a. 26 Inah Josefa a hung chun an thilpêkhai chu an inhlàn a, hnuoi sikin chibai an bûk a. 27 Anni rawi chu iem an chang ti an don hnungin, "In pa tar tak in hril kha iem a chang a? A la dam zing de maw?" a ta. 28 Anni chun, "I siehlaw kan pa chu a la dam zing a, a la tha ie" an ta. Inza takin a hmaah an kûn a, chibai an bûk nawk a. 29 Chun, Josefa chu a hang dâk a, a sang Benjamin, a nu naupa chu a hmu a, "Kha maw in mi tlum tak, a chanchin in mi hril kha?" a ta. Ama bok chun, "Ka naupa, Pathienin lunginsiet raw se che" a ta. 30 A sang a hang hmu chun lungriemin a thlâk nasa êm leiin insùm harsa a ta, tapna hmun zongin a pindanah a tlân lût a, chu taka chun a va tap suok ta a. 31 A hmai a phi zo chun a hung suok a, insûm hrâm hrâmin, "Bu thur ta ro leh" a ta. 32 Ama ta dingin a tumin, anni rawi ta dingin a tumin, Aigupta mi a fâkpuihai ta dingin a tumin thlaithleng an hung siem a. Aigupta mihai chun Hebrai mihai chu bu thlêng hmunkhatah an kilpui ngai nawh, chuong ang thil thaw chu Aigupta mihai ta dingin thil thieng lo a nih. 33 Anni rawi chu an upat indotin, nau lutîr le a tlum tak chen indot thlapin Josefa hmaa chun an thung tlar a, makti takin an inen tuo a. 34 An thleng ding seng chu Josefa chun an semtir a, Benjamin thlênga chun mi dang lêt nga topa tam an thurpêk a. Chuongchun, uoiin dawnin hlim takin ama le chun ruoi chu an kîl tlâng ta a. .

Genesis 44

1 Josefa chun a in enkoltu kuomah, "Khanghai ip kha an phur zo tawka rikin bu thun sip la, an tangka seng kha an ip sûngah sie nawk seng rawh. 2 Chun, ka no, tangkaraw no kha a naupang tak ip bauah a bu lai thun sa rawh" a ta. A hril ang tak chun a thaw a. 3 Zing khuo a var char chun anni chu an sabengtung leh an infetir a. 4 Chun, khuoa inthoka an suok chu, an la phâk hlat hmain, Josefa chun a in enkoltu kuomah, "Tho la, khanghai kha va hnot rawh. I hnot phâk pha leh an kuomah, 'Ieng leia thil tha thil tha loa in rul am a na? 5 Kha kha ka pu uoiin dawnna le a âisânna no a ni naw am a ni? In thilthaw hi thil tha lo tak a nih' va ti rawh" a ta. 6 A va hnot phâk chun chuong thu chu an kuomah a hril a. 7 Anni chun a kuomah, "Pu, iengtizie am a na hieng thu i hril hi? I siehlawhai hin chuong ang thil chu kan thaw awm naw êm el. 8 Kan ip baua tangka kan hmuhai khom kha Kanan rama inthokin i kuomah kan hung chawi kîr nawk a ni kha. Ieng tin am i pu ina tangka amanih rangkachak amanih chu kan inrûk ding? 9 I siehlawhai lai hin tu khom i hmùna taphot chu thi mol raw se, keini khom kan pu suokah um el kan tih" an ta. 10 Ama chun, "Awleh, inti ang chun ni raw se. Amiruokchu, ka hmuna taphot chu kan suokah a um ding a nih; a dang ruok chu fihlîm vong in tih" a ta. 11 Chuongchun, an ip seng chu hnuoiah an chawi thlâk a, an hong a. 12 Ama chun a upa taka tanin a naupang tak chen ip chu a dap a, no chu Benjamin ipa chun a hmu ta a. 13 Chu phing leh an silfènhai an pot thlêr a, an ip seng chu an sabengtung seng an inphurtir a, khawpui tieng chun an kîr nawk a. 14 Juda le a unauhai an hung tlung chun Josefa chu inah a la um zing a, a unauhai chu an hung a, a hmaa chun hnuoi sikin an bokkhup a. 15 Josefa chun an kuomah, "Ieng am a na in thaw ta hi? Kei chun aisanin thil ka hmu suok thei vong ti in hriet naw am a ni?" a ta. 16 Juda chun, "Pu, ieng am hril tàng kan ta? Ieng tin am kan inhril veng ta ding? I siehlawhai suolna chu Pathienin a hung phor suok tah a ni hi. Tu hin i suok vong kan ni ta hi, kei le a kuta no an hmùna khom hi" a ta. 17 Josefa chun, "Chuong ang chun thaw naw ning, a kuta no an hmùna chauh hi ka suokah um a tih. A dang po chu thlamuong takin in pa kuom tieng kîr nawk ta ro" a ta. 18 Chu phing leh Juda chun a va pan hnai a, "Pu, lunginsiet takin i siehlaw hin i hmaah thu bau khat bêk a hril phalpèk hràm rawh. Faraw leh intluk hiel ni la khom, i siehlaw chunga hin lungsen naw hràm rawh. 19 Ka lalpa chun i siehlaw kuoma hin, 'Pa le unau dam in nei am?' tiin i mi'n don a. 20 Keini chun, 'Nei e. Pa, pu tar tak le a tar tieng nau, a naupang tak kan nei a, chu u chu a thi ta a, a nu nauhai laia a dam um sun a na, a pa chun ama chu a hmangai khop el' kan ti a. 21 "Chun, nangin i siehlawhai kuomah, 'Ama chu ka mit ngeia ka hmu theina dingin hung thuoi thla ro' i ti a. 22 Chun, pu, keinin i kuomah, 'Kan sangpa chun a pa màksan thei naw nih, a màksan chun a pa chu thi el a tih' kan ta. 23 Sienkhom, nang chun i siehlawhai kuomah, 'In sangpa in hung thuoi naw chun ka hmêl hmu thei ta naw ti niu' i ta. 24 I siehlaw, ka pa kuom kan hang tlung chun aw pu, i hril ang tak khan kan hril a. 25 Chun, kan pa chun, 'Zu fe nawk ta unla, bu iemani zât zu'n chaw nawk ro' a ta. 26 Keini chun, 'Zu fe thei ta nawng kan tih. Kan mi tlum tak hi a hung ruok chun zu fèng kan ta, a hung naw ruok chun chu mi hmèl chu kan hmu thei ta naw ding a nih' kan ta. 27 "Chun, i siehlaw ka pa chun, 'Ka nuhmeiin nau pahnih a mi neipèk ti in hriet a. 28 Pakhat chu ka kuoma inthokin a fe suok a, pot chen vongin a um ni ngei a tih ka ta, chu taka inthok chun ama chu ka hmu ta ngai naw a. 29 Ama khom hi ka kuoma inthoka in thuoi suok a, tuoksuol a zu tuok palh chun ka lu, kelsam to ta hi lungngaiin thlânah in inliemtir ding a nih' a ta. 30 "Chuleiin, bawipu hi kan kuoma thang ve loa i siehlaw, ka pa kuom kan hang tlung chun, a hringna chu bawipu le hin an inzom tlat si leiin, 31 bawipu a thang nawh ti a hriet charin thing a ta, i siehlawhai hin i siehlaw kan pa, lua kelsam to ta chu lungngaiin thlànah kan inliemtir ding a nih. 32 I siehlaw hin, 'I kuomah ka hung thuoi nawk naw chun a maw chu kumkhuoin phur ka tih' tiin ka pa lakah bawipu chungthua mawphurtu takah ka lo insiem ta a. 33 Chuleiin, lunginsiettakin i siehlaw hi bawipu aiah i suokah mi'n umtir la, bawipu hi a uhai leh inkîrtir nawk hràm rawh. 34 Bawipu thang lo chun ka pa kuom tieng ieng tin am kîr nawk thei ka ta? Thei naw nih. Rinumnan ka pa a tlàk buok ding chu lunginsiet takin mi'n hmutir lul naw rawh" a ta.

Genesis 45

1 Josefa chu a kawla ngîrhai po po hmaa chun a'n sûm zo ta naw a, "Ka kuoma inthok hin mi po po insuoktir vong ro" tiin a khêk suok a. Chuongchun, a unauhai kuoma Josefa a'n puong lai chun mi dang tu khom an um nawh. 2 A tap inring êm leiin Aigupta mihai chun a tap ri chu an hriet phàk a, Faraw sûnghai khomin an lo hriet bok a. 3 Josefa chun a unauhai kuomah, "Josefa kha ka nih; ka pa chu a la dam maw?" a ta. Nisienlakhom a unauhai chun an don thei nawh, a bula um chu an ti hawp leiin. 4 Josefa chun a unauhai kuomah, "Mi hung hnai ro" a ta. An va hnai chun an kuomah, "In unaupa Josefa, Aigupta tienga in zor ngei kha ka nih. 5 Nisienlakhom, hieng tienga in mi lo zor lei khan lungngai naw unla, mani intheida pha bok naw ro; mihai hringna sandam dingin Pathienin in hmaah a mi lo tir hmasa a nih. 6 Hi rama hin kum hni sûng tàm a tla ta a, kum nga dang la hung ding sûng hin tu khomin lo keiin sîk naw ni hai. 7 Hnuoi chunga in chi thla um sunhai humhal ding le in hringna ropui taka san suoktu ni dingin Pathienin nangni hmain a mi lo tir hmasa a nih. 8 "Chuleiin, hi taka mi'n fetirtu chu nangni ni loin Pathien a ni lem. Ama chun Faraw paa dâm, a insûng po po chunga hotu nina dâm le Aigupta ram po po chunga rorêltuah dâm a mi sie a. 9 Tuhin inrang takin ka pa kuomah hang fe unla, a kuomah, 'I naupa Josefa chun hieng hin a tih: Pathienin Aigupta ram po poa hotuah a mi siem a. Sawt riel loin ka kuomah hung thla rawh. 10 Gosen ramah um i ta, ka bula ngei i um ding a nih, nang le i nauhai le i tuhai, an beram ruol le bawng ruolhai le i nei po po leh. 11 Chu taka chun keiman chawm ka ti che. Tàm hun ding kum nga a la um si a. Chuong naw chun nang le i sûngkuo le i thil nei po po leh inkhawng da zo vong rawi in tih' tiin. 12 "Nangni ngei le ka sangpa Benjamin khoma a mi hmu angin, kei ngei kha ka nih tuta nangni betu cheu hi. 13 Aigupta rama chawimawina ka dong po po le in thil hmuhai po po hi ka pa kuomah hang hril ro. Chun, inrang takin ka pa kha hung thuoi thla ro" a ta. 14 Chuongchun, a sang Benjamin chu a kuo a, a tap a, Benjamin khomin tap pumin a u chu a kuo bok a. 15 A unau danghai po po chu a fawp a, an rêngin an tap a. Chu hnunga chun a unauhai chun thukhawchang an hrilpui a. 16 Josefa unauhai an hung thu chu Faraw ina khom an lo hriet a, Faraw le a rongbawltuhai chu a suklawm hle a. 17 Faraw chun Josefa kuomah, "Hieng hin i unauhai chu hril rawh: In ranhai bu phur ding siem unla, Kanan ram tieng kîr nawk nghal unla, 18 in pa le in sûngkuohai leh hung kîr nawk nghal ro. Aigupta rama ram thatna tak pêng ka ti cheu a, a ram hnienghnârna in tlân ding a nih' ti rawh. 19 Chun, hieng anga hril tawl dingin thu ka pêk bok che: Hieng hin thaw ro. In nuhmei le in nauhai chuongna dingin Aiguptaa inthokin tawlailir chawi unla, in pa hang thuoi thla ro. 20 In thil neihai khom hung ngaisak naw ro, Aigupta rama thil tha po po chu in ta vong a ni si a', tiin. 21 Chuongchun, Israel nauhai chun chuong ang chun an thaw a. Farawin thu a pêk angin, Josefa chun tawlailir le lampuia an fâk ding a pêk a. 22 An rêngin silfèn thar a pêk seng a, Benjamin ruok chu silfèn thar panga le tangka shekel zathum a pêk a. 23 A pa kuoma chun thilpèk hieng hi a thon bok a: Aiguptaa an thil hlu neihai phurtu sabengtungchal sawm le bu le lampuia an fâk ding bei le khorsaw dang phurtu sabengtungpui sawm. 24 Chu zoah a unauhai chu a'n fetir a, an kuomah, "Lampuiah insel inhal awi lo" a ta. 25 Chuongchun, Aigupta rama inthok chun an pa Jakob umna Kanan rama chun an hang fe a. 26 Anni chun an pa kuomah, "Josefa kha a la dam zing a, Aigupta ram po po chunga rorêltu a ni tah!" tiin an hril a. Jakob chu a mit sul a, an thu hril chu a awi nawh. 27 An kuoma Josefa thu hril po po an hril vong hnung le tawlailira a thil hung thonhai a hang hmu hnung chun an pa Jakob lungril chu a har ta huoi a. 28 Israel chun, "Tu hin chu ka naupa Josefa a la dam ngei a nih ti ka hmin zân! Ka thi hmain fêng ka ta, zu hmung ka tih"a ta.

Genesis 46

1 Israel chu a nei po po leh a suok a, Beersheba a zuk tlung chun a pa Isak Pathien kuomah inthawina a'n hlàn a. 2 Zâna chun Jakob chu zèla umin Pathienin a biek a, "Jakob, Jakob' tiin a ko a, Ama chun, "Hi taka hin ka um" a ta. 3 Pathien chun, "Kei hi Pathien, i pa Pathien chu ka nih. Aigupta rama zu fe ti naw rawh. Chu taka chun hnam ropui takin siem ka ti che. 4 Aigupta rama chun i kuomah fe vèng ka ta, thuoi tung nawk ngei ngei ka ti che. Josefa ngeiin i thi pha leh dom hlum a ti che" a ta. 5 Jakob chu Beersheba-a inthok chun a suok a. Ama le nu le nauhai chuongna dinga Faraw tawlailir hung thona chun anni rawi po chu Israel nauhai chun an inchuongir a. 6 An ran ruolhai le Kanan rama an thil lam suok po po hai chu somin, Jakob le a thlahai chun Aigupta chu an tlung a. 7 Chuongchun, a naupa le a naunu hai, a tupahai le tunuhai le an thlahai po po chu Aigupta rama chun a lûtpui tawl tah a nih. 8 Hienghai hi Israel thlahai (Jakob le a naupahai), Aiguptaa luthai hming chu a nih: 9 Jakob nau lutîr Reuben naupahai chu Hanok hai, Palu hai, Hezron hai le Karmi hai an nih. 10 Simeon naupahai chu Jemuel hai, Jamin hai, Ohad hai, Jakin hai, Zohar hai le Kanan nuhmei laka a nei Saul hai an nih. 11 Levi naupahai chu Gerson hai, Kohat hai le Merari hai an nih. 12 Juda naupahai chu Er hai, Onan hai, Sela hai, Perez hai le Zera hai an na, Er le Onan chu Kanan ramah an thi a. Perez naupahai chu Hezron le Hamul an nih. 13 Isakar nau pasalhai chu Tola hai, Pua (Puva) hai, Jasub (Joba) hai le Simron hai an nih. 14 Zebulun naupahai chu Sered hai, Elon hai le Jaleel hai an nih. 15 Chuonghai po po chu a naunu Dina bâka Lea naupahai, Padan Arama a um laia Jakob a neipèkhai chu an na, an rêngin sawmthum pathum an nih. 16 Gad naupahai chu Zefon (Zifion) hai, Hagi hai, Suni hai, Ezbon hai, Eri hai, Arodi hai le Areli hai an nih. 17 Aser naupahai chu Imna hai, Isva hai, Ishi hai le Beria hai an nih. An farnu chu Sera a nih. Beria naupahai chu Heber le Malkiel an nih. 18 Chuonghai po chu Labanin a naunu Lea a pêk Zilpain naupa Jakob a neipèkhai chu an na, an rêngin mi sawmparuk an nih. 19 Jakob nuhmei Rachel naupahai chu Josefa le Benjamin an nih. 20 Josefa chun Aigupta ramah naupa Manase le Efraim a nei a, chuonghai chu On khuoa thiempu Potifar naunu Asenat-in Josefa a neipèkhai chu an nih. 21 Benjamin naupahai chu Bela hai, Beker hai, Asbel hai, Gera hai, Naman hai, Ehi hai, Rosa hai, Mupim hai, Hupim hai le Arda hai an nih. 22 Chuonghai chu Rachelin Jakob a neipekhai chu an na, an rêngin sawmpali an nih. 23 Dan naupa chu Husim a nih. 24 Naftali naupahai chu Jaziel hai, Guni hai, Jezer hai le Silem hai an nih. 25 Chuonghai po chu Labanin a naunu Rachel kuoma a pêk Bilha-in naupa Jakob a neipèkhai chu an na, an rêngin pasari an nih. 26 Jakob naupahai po, an nuhmeihai tiem sa loin, Jakob le Aiguptaa lût, a thâlbea suok po po chu an rêngin sawmruk paruk an nih. 27 Aigupta rama pieng Josefa naupa pahnihai le tiem chun Aiguptaa Jakob sûngkuo fe po chu an rêngin sawmsari an nih. 28 Gosen biel tienga fe dàn ding lam zongtu dingin Jakob chun Juda chu Josefa kuomah a tir hmasa a, chuongchun Gosen ram an tlung ta a. 29 Josefa chun a sakor tawlailir a buotsai a, a pa hmuok dingin Gosen a pan a. Josefa a tlung a, a pa a hang hmu chun a kuo a, sawt fe an tap a. 30 Israel chun Josefa kuomah, "Keima ngeiin i la dam zing ti ka hmu ta a, tu hin chu thi kan huom tah" a ta. 31 Chun, Josefa chun a unauhai le a pa sûngkuohai kuomah, "Faraw kuomah hang fêng ka ta, hieng hin hang hril ka tih: 'Ka unauhai le ka pa sûngkuohai kha tu hin Kanan rama inthokin an hung tlung ta a, 32 anni chu ran vàitu an ni leiin an beram ruol le bawng ruol le an nei po po khom an hung sawm thlâk vong a nih' tiin. 33 Chun, Farawin a ko cheu a, 'Ieng sin am in thaw hlak a?' ti a'n don pha cheu chun, 'I siehlawhai hi kan thlatuhaia inthok ta khan kan naupang têta inthoka tu chen hin ran vàitu kan nih' ti ro, chuongchun Gosen ramah inumtir a ti cheu. Beram vêngtuhai rêng rêng chu Augupta mihai tirdak zawng tak an ni si a" a ta. 34 (A um nawh)

Genesis 47

1 Josefa chu Faraw kuomah a a hang fe a, "Ka pa le ka unauhai chu an beram ruol, bawng ruol le an thil nei po po leh Kanan rama inthokin an hung tlung thla ta a, tu hin Gosen ramah an um" tiin a hril a. 2 A unauhai laia mi panga a thlang suokhai chu Faraw hmaah a hung thuoi a. 3 Faraw chun, "Ieng sin am in thaw hlak a?" tiin anni chu a lo indon a. 4 Anni chun, "I siehlawhai hi kan pi le pua inthok ta khan ran vai mi kan nih. Kanan ramah tàm a tla nasa a, i siehlawhai ran ruol fâk ding a um ta naw a, hi taka hin iemani chen um hri dinga hung thla kan nih. Lunginsiet takin i siehlawhai hi Gosen rama umhmun khuor mi phalpèk rawh" tiin an ngèn a. 5 Faraw chun Josefa kuomah, "Hi, i pa le i unauhai i kuomah an hung ta a. 6 Aigupta ram hlak chu i hmaah a'n zar dèi duoi a. I pa le i unauhai chu ram thatna hmun i nuomna lai laiah hmun inkhuortir ta la. Gosen ramah umhmun khuor raw hai se. Chun, anni lai mi thilthaw thei tak hriet i nei chun ka ran ruol chungah hotuin sie rawh" a ta. 7 Chun, Josefa chun a pa Jakob chu Faraw kuomah a hung thuoi lût a. Jakob chun Faraw chu mal a sawm a. 8 Faraw chun, "Kum ieng zât am i ni ta a? a ta. 9 Jakob chun, "Ka khuolzinna hi kum za le sawmthum a ni ve ta a. Ka kum la tlawmin, ka thlàtuhai inzin kum la zât naw sienkhom a rimsikthlâk a nih" a ta. 10 Jakob chun Faraw chu mal a sawm a, a kuoma inthok chun a fe suok a. 11 Chuongchun, Josefa chun a pa le a unauhai chu hmun an khuortir a, Faraw thupèk angin a ram thatna lai tak, Ramases biela chun in le lo hmun a pêk a. 12 Josefa chun a pa le a unauhai le a pa sûngkuo hai chu an tam dàn dungzuiin fâk ding a pêk bok a. 13 Tàmpui mitsim lei chun a ram pumah fâk ding hrim hrim a um ta naw a, Aigupta ram le Kanan ram khom a hung chàu se zo ta a. 14 Josefa chun Aigupta ram le Kanan rama sum um po po chu bu a'n chawktirna mana chun a rût khawm ta vong a, chuonghai chu Faraw inah a sung lût pei a. 15 Aigupta mipui le Kanan mipuiin an sum nei an fâk zo vong hnung chun Josefa kuomah an hung a, "Fâk ding mi pe raw khai. I mithmua kan thi i phal ding am a ni? Kan tangka hlak kan hmang zo vong ta si a" an ta. 16 Josefa chun, "Chuonga tangka in nei ta si naw chun in ranhaiin bu chu hung thleng el ro" a ta. 17 Chuongchun, an ran ruolhai chu Josefa kuomah an hung thuoi a, ama chun an sakor hai, beram le kêl hai, bawng ruol le sabengtung hai chu buin a lo thlengpèk pei a. An ranhai man chun kum khat chu an tlingtla thei ta hrâm a. 18 Kum a hung invoi a, a kum nawk chun Josefa kuomah an hung nawk a, a kuomah, "Kan sum po po hlak kan inkhawng da zo ta a, kan ranhai hlak i chang vong ta bok si a, kan taksa le kan lohai chauh naw chu ieng khom nei hrim kan nei ta nawh ti hi kan pu hmaah ip kan tum nawh. 19 I mithmua ngei keini le kan ram hi kan bohmang el di'm a ni? Keini ngei hi kan ram chopin buin mi'n chaw la, keini le kan ram hi Faraw bawiah um el kan tih. Thi loa kan hring suok theina ding le ram hi a chieurieu nawna dingin bu chi ding mi pe hrâm rawh" an ta. 20 Chuongchun Josefa chun Aiguptaa ram po po chu Faraw ta dingin a'n chawk ta vong a. Tàm chu a nasa êm leiin Aigupta mihai chun an lohai chu an zor ta seng a, ram chu Faraw ta a hung ni ta vong a, 21 Aigupta ram dung le khanga umhai po po chu Josefa chun Faraw bawiah a sie ta vong a nih. 22 Thiempuhai lo ruok chu a'n chawk ve nawh, a san chu anni hin Farawa inthokin chatlak loin thangpuina an dong a, chu chu an fâk khop a tling a, chuleiin ram an zor ve nawh. 23 Josefa chun mipuihai kuomah, "Tuhin nangni le in ramhai chu Faraw ta dingin kan chawk ta cheu leiin bu chi chu hung la unla, loah ching ro. 24 In sîk pha leh hmun ngaa thea hmun khat Faraw ta dingin sung ro. Hmun ngaa hmun li chu in bu chi ding dâm le nangni le in sûngkuohai le naupanghai fâk ding nîng a tih" a ta. 25 Anni chun, "Nangin kan hringna i san him ta si a. Kan pu hin mi ditsak sien, Faraw bawia chun um el kan tih" an ta. 26 Chuongchun, Faraw kuomah lo tharsuok hmun ngaa thea hmun khat sung ding ti dàn Josefa siem chu Aigupta ramin tu chen hin dànah a la nei zing a; thiempuhai ram chauh a nih Faraw ta ni lo chu. 27 Israel rawihai chun Aigupta rama Gosen biela chun umhmun an khuor a, chu taka chun in le lo nei sap peiin an hung hmuingil a, nasa takin an pung a. 28 Jakob chu Aigupta ramah kum sawm le kum sarih a um hman a, a dam sung po chu kum zakhat le sawmli le pasari a nih. 29 Israel chu a thi a hung hnai a, Josefa a ko a, "I mit ka tlung a ni chun i kut kha ka malpui hnuoiah rol la, lunginsietna le ringumna ka chungah inentir dingin thu mi tiem rawh. Aigupta rama hin mi phum lul naw rawh. 30 Ami thlatuhai kuoma ka chawl pha chun Aigupta rama inthok hin mi zawn suok la, anni an phùmna hmuna ngei chun mi phùm ve rawh" a ta. Josefa chun, "I hril ang tak chun thaw ngei ka tih" a ta. 31 Ama chun, "Inkhâm ngeiin thu mi tiem rawh" a ta, chuongchun a kuoma chun a'n khàm a. Israel chun a funghrol hmawra innam kangin Pathien a chawibiek a.

Genesis 48

1 Hun iemani chen hnunga chun Josef kuomah, "I pa a damnaw ie" tiin an hung hril a. Chuongchun, a naupahai, Manase le Efraim chu a thuoi a. 2 Jakob kuomah, "I naupa Josefa a hung" tiin an va hril a. Israel chun a tha nei sun sangin khuma chun a thung inkàng a. 3 Jakob chun Josefa kuomah, "Pathien Iengkimthawthei chu Kanan ram Luz khuoah ka kuomah a hung inlàr a, mal a mi sawm a, 4 'Chi tam tak inthlatir ka ti che a, sukpung ka ti che a, hnam chi hrang hrangin siem ka ti che a, hi ram hi i thlahai kumkhaw ro dingin pêng ka tih' a ta. 5 "Tu hin i naupa pahnihai, Aigupta rama ka hung thlâk hmaa i neihai kha ka rochana ngai ding an nih. Efraim le Manase hi, Reuben le Simeon ang bokin, ka ta nîng an tih. 6 Hi hnunga nau i neihai ruok chu i ta nîng an ta, ram an rochung dinga chun an uhai hming intawmpui an tih. 7 Padana inthoka ka hung kîr lai khan vangduoithlâk takin Rachel chu Kanan ramah, lam lailakah, Efrat khuo kan la hlat fè laiin a thi a. Efrat (Bethlehem an ti bok) panna lampuia chun ka vui liem tah a nih" a ta. 8 Israelin Josefa naupahai a hmu chun, "Tuhai am an na?" a ta. 9 Josefa chun, "Pathienin a mi pêk naupanghai an nih" tiin a pa chu a hril a. A pa chun, "Hung thuoi hnai tawl rawh, mal ka lo sawm theina dingin" a ta. 10 A upa ta leiin Israel mit chu a chàu ta a, a hmu thei ruon ruon chau a. Josefa chun a nauhai chu a hung thuoi hnai a, Jakob chun a lo kuo a, a fawp tawl a. 11 Israel chun Josefa kuomah, "I hmèl hmu nawk hi ka'n ring ta naw hrim hrim a, sienkhom tu hin i nauhai hmel chen khom Pathienin a mi'n hmutir tah a ni hi" a ta. 12 Josefa chun a nauhai chu a pa kap kâra inthok chun a kei suok a, bawka hnuoi sikin chibai a bûk a. 13 A nauhai pahni bâna chun a kei a, Efraim chu a kut chang tienga chelin Israel kut voi tieng panga chun a kei a, Manase chu a kut voi tienga chelin Israel kut chang tieng panga chun a kei a, a hung thuoi hnai a. 14 Chun, Israel chun a ban kawkal a, a kut chang tieng chu a naupang lem Efraim lu chunga chun a'n nghat a, a kut voi tieng chu a nau lutîr Manase chunga chun a'n nghat a. 15 Chuongchun, Josefa chu mal a sawm a: "Mi thlatu Abraham le Isak haiin a hmaa kal an chawina hlak Pathien, ka pienga inthoka tu chena mi vêngtu Berampu, ka Pathien, 16 siet theina po po laka inthoka mi'n tlansuoktu Vàntirko chun naupanghai hi malsawm raw se. Chun, ka hming le ami thlatu Abraham le Isak hming chu hmingah put hai sien, hnuoia hin nasa takin hung pung raw hai se" tiin. 17 Chun, a pain a kut chang tieng Efraim lu sipa a'n nghat lai Josefan a hmu chun a lungni naw a, Efraim lu sîpa a kut innghat lai chu Manase lu sipa son tumin a dom kang a. 18 A pa kuomah, "Pa, i sie suol a nih. Hi hi annawm ka nau lutîr chu. A chungah i kut chang tieng innghat lem rawh" a ta. 19 A pa chun a nuom naw a, a kuomah, "Ka hriet, ka naupa, ka hriet. Ama khom hi hnama hril khop la hung nîng a ta, la ropui a tih. Amiruokchu, a sang hi ropui lem a ta, a thlahai khom hnam tam tak la hung nîng an tih, " a ta. 20 Chu ni chun mal a sawm tawl a: "Nangni hmingin Israel chun hi malsawmna hi a puong a nih: Efraim le Manase angin Pathienin inumtir raw se cheu" tiin. Chuong ang chun Efraim chu Manase hmaah a sie a nih . 21 Israel chun Josefa kuomah, "Ngai ta, ka thi têp ta a, sienkhom Pathienin umpui a ti cheu a, in thlatuhai rama chun thuoi kîr nawk a ti cheu. 22 Nang chu i unauhai chunga um i ni leiin an chan nêka tam pe chuong ka ti che a, Amor mihai kuta inthoka kawlhnâm le thala ka lâk tlâng dung kha nei i tih" a ta.

Genesis 49

1 Chun, Jakob chun a naupahai chu a ko khawm a, an kuomah, "Thil la hung tlung dinghai ka hril theina ding cheuin hung inkhawm ro. 2 Nangni Jakob nauhai, hung inkhawm unla, ngàithla ro. In pa Israel thu hi ngàithla ro. 3 "Reuben, nang hi ka nau lutîr, Ka thilthawtheina, ka hrâtna ra hmasa tak, Hmingthang le thilthawtheia mi khûm thei i nih. 4 Amiruokchu, tui anga so but i ni leiin, Mihai khûm ta ngai naw ti nih. I pa khumpuiah i kai a, Ka zâlna khum ngei el chuI mi sukporchepèk si a. 5 "Simeon le Levi hai unau kawlhnâm chu, Nunrawngna hriemhrei a nih. 6 An inrawn khawmnaah fe nawng ka ta, An inkhawmnaah thang ngai naw ning. An lungsen pha mi an that a, Bawngchal zaper an sat tan a; 7 An lungsenna intûr tak chu, Tongsie phurin um raw se; An lungturûk rawng tak el chu, Tongsie phurin um bok raw se. Jakoba chun the dar ka ta, Israela chun sukdar ka tih. 8 "Juda, nang chu i unauhaiin, Inpâk hlak an ti che; I kut chun i hmèlmahai rîngah, Inrêktir hlak a ti che a, I pa naupahai po po chu, I hmaah hung kùn an tih. 9 Aw Juda, sakeibaknei te ang i nih, Ka naupa, i sa ve lai i hung kîr; Sakeibaknei sa inchàn angin i bok a, Keipui bok lai ang elin, Tuin am an suktho ngam ding che? 10 Lal hmol chu Juda laka inthokin, Làk hmang ni ngai naw nih; A neitu tak a hung inlang pha a, Hnam tinin a thu an awi chenin, Juda ke kara rorelna hmol chu, Làk hmang ni ngai naw nih. 11 A sabengtung chu grep hruiah thlung a ta, A sakor tuoi chu a ditna kau takah thlung a tih. A silfênhai uoiin-in sawp a ta, A korfuol chu grep senin sawp a tih. 12 A mit chu uoiin nèkin dum lem a ta, A ha chu bawngnene nekin vâr a tih. 13 "Zebulun chu tuipui kamah um a ta, Long chawlna vakam nîng a ta, A ramri chu Sidon chen inzâr a tih. 14 "Isakar chu sabengtung zângru chang tak, Ip pahni kâra bok ang a nih. 15 Chawl chu thain a hriet a, A ram inhoizie khom a hriet bok. Sienkhom rikphur dingin liengko a daw a, Mi sor luiin a hung um tah. 16 "Dan chun a mihai chungahIsrael hnam a nina anginIndik takin ro rêl a tih. 17 Dan chu lam sira rulpui, Lampuia rulriel ang el, A chunga chuong bin let khop a. Sakor kea chuk hlaktu ang a nih. 18 "I sansuokna ka nghâk zing, LALPA. 19 "Gad chu râlin hung bei an ta, Ama chun hnot thlûr tawl a tih. 20 "Aser hi a fàk thâng a ta, Lal fàk chi anga thil inhnik, Amain siem suok a tih. 21 "Naftali chu sazukpui insuo, Té nal tak tak nei hlak ang a nih. 22 "Josefa chu grep ra nuom ang, Tuikhur bula ra kûr thluk ang, Banga inzâm kai dul ang a nih. 23 Theidain thalpui leh an bei a, An kàp a, a hnaw tom a; 24 Sienkhom a thalngul a khau zing a, A bân thä a hrât zing bok, Jakob Mi hrâtkhawkhèng kut le, Israel Lungpui le Berampu lei chun; 25 I pa Pathien, thangpuitu che, Iengkimthawthei malsawmtu che, Vân malsawmna vur hlaktu che, Lipui rila malsawmna petu cheNene le sul malsawmna petu che leiin. 26 I pa malsawmpèkna che hi, A ropui lem tlâng hlunhai nèkin, Tlângpui hnienghnârna nêk daiin. Chuong po po malsawmnahai chu, Josefa lu sîpa chun innghat raw se, A unauhai laia lal a ni si a. 27 "Benjamin chu satene hnukrawl ang, Zîng kârin a sa se a fàk a, Zân tieng a râllâk a sem hlak"tiin. 28 Chuonghai po po chu Israel hnam sawm le hnam hnihai chu an na, an nina ang pei le inmila an pain an chungthu hrila mal a sawmpèk dàn chu a nih. 29 Chun, an kuoma hieng thuchahai hi a pêk a: "Ka chipuihai kuomah thuoiin ka um vak ding a ni ta a. 30 Hit mi Efron loa pûk, Kanan rama Mamre zawna Makpela pùk, Abrahamin Hit mi Efron kuoma inthoka inphûmna dinga a lo chopa a'n chawka chun mi phûm ro. 31 Chu taka chun Abraham le a nuhmei Sari an phûm a; Isak le a nuhmei Rebek an phûm a, Leah an phûm bok a. 32 Lo le a sûnga pûk um chu Hit mihaia inthoka a'n chawk a nih" a ta. 33 A nauhai kuoma thu a'n cha zo chun a ke chu khumah a hlâng kai a, a thlarau an thla a, a chipuihai kuoma chun thuoiin a um ve ta a.

Genesis 50

1 Josefa chun a pa chu a baw a, a tah a, a fawp a fawp a. 2 Chu zoah a pa Israel chu thu thei lo dinga buotsai dingin damdawi thiemhai chu thu a pêk a. 3 Chuongchun, damdawi thiemhai chun thu thei lo dingin an siem a, a siemna dingin ni sawmli zet a aw a nih. Aigupta mihai chun ni sawmsari sûng ama chu an sûn a. 4 Chun, an sûn hun a tawp chun Josefan Faraw sûngkuohai chu a biek a, "In mit ka tlung chun hi thu hi Faraw kuomah mi hrilpèk ro: 5 'Ka pain, ngai ta, ka thi ding a ni ta a, Kanan rama thlân ka cho saah, chu taka ngei chun mi hung phûm rawh' tiin thu a mi'n khâmtir a. Chuleiin, lunginsiet takin ka pa hi mi hang invùitir la, hung kîr nawk nghal ka tih' tiin hril ro" a ta. 6 Faraw chun, "I pain thu an khàmtir ang che chun hang fe la, i pa chu hang vûi rawh" a ta. 7 Chuongchun, Josefa chu a pa vûi dingin a hang fe a. Faraw siehlaw po po, a sûnghai laia an upahai le Aigupta rama mi poimaw hai le 8 Josefa sûngkuo po po le a unauhai le a pa sûngkuohai chun an zui a, an naupang nawihai, an beram ruolhai le bawng ruolhai chauh chu Gosen ramah an màksan a. 9 Sakor tawlailir le sakor chung chuong mi tam tak an thuoi bok a. An rèng chun tam tak an nih. 10 Jordan vadung kawla Atad hrizawl an tlung chun nasa taka sûnin an tap a, chu taka chun Josefan a pa sûnna inser chu ni sari sûng a hmang a. 11 Aigupta mihaiin Atad hrizawla chuonga ursûn taka mithi sûnna an nei chu Kanan mihaiin an hmu a, chu hmun hminga chun Abel Mizraim an inbûk a, chu chu Jordan vadung bul ela um a nih. 12 Jakob nauhai chun an pa thucha ang charin an thaw a. 13 A ruong chu Kanan ram an zawn tlung a, Abrahamin inphumna dinga hmun, Hit mi Efrona inthoka a lo chopa a'n chawk, Mamre zawna Makpela pûka chun an phûm tah a nih. 14 Chun, Josefan a pa a vûi zo chun ama le a unauhai le a pa vûi dinga ama le fehai po po le chun Aigupta tieng an kîr nawk ta a. 15 Josefa unauhai chun an pa a thi phing leh, "A chunga ei thilthaw that naw po po lakah Josefan ei chungah phuba la naw nih ti iengtin am ei hril thei?" an ta. 16 Chuongchun a kuoma hril dingin thu an incha a, "I pa dam lai khan hieng ang hin i kuoma hril dingin thu a mi'n cha a: 17 'I chunga i unauhai bawsietna le suolna le an soisak rimsikna po po che kha ngaidam dingin ka ngên che' ti hi. Chuleiin, tu hin i pa Pathien siehlawhai suolna hi ngaidam lul rawh" tiin. Chu thu Josefa an va hril chun a tap a. 18 Chun, a unauhai chu an hung a, a hmaah bokkhupin, "I suokhai kan ni hi" an ta. 19 Josefa chun an kuomah, "Ti naw ro. Pathien aiawtu am ka ni? 20 Nangni chun mi suksiet in tum a. Pathien ruok chun thil tha tieng hlen a, voisun ni anga hringna tam tak sansuok hi a lo tum lem a nih. 21 Chuong chu a ni leiin, ti naw ro, nangni le in nauhai chu chawm pei ka ti cheu" tiin, bau innêm taka bein a lo thlamuong tawl a. 22 Josefa chu a pa sûngkuohai leh Aigupta ramah a um a, kum za le sawm a dam a, 23 a tuhai, Efraim nauhai khom khûp thum zet a hmu hman a. Manase naupa Makir nauhai khom Josefa mal chunga pieng an nih. 24 Chun, Josefa chun a unauhai kuomah, "Ka thi ding an ta a, nisienlakhom Pathienin hung kan ngei ngei a ti cheu a, hi rama inthok hin thuoi suokin, Abraham hai, Isak hai le Jakob hai kuoma thu inkhâm meua a pèk ram tiema chun thuoi tung nawk a ti cheu" a ta. 25 Josefa bok chun, "Pathienin hung kan ngei ngei a ti cheu a, chu pha chun ka ruhai hi hi taka inthok hin in hawn tung ding a nih" tiin Israel thlahai chu thu a'n khâmtir a. 26 Chuongchun, Josefa chu kum za la sawm mi a niin a thi a, a ruong chu hmon thei lo dingin an siem a, Aiguptaa chun kuongah an sie a.

Exodus 1

1 Hienghai hi Jakobin Aigupta rama a lûtpui Israel naupahai hming le an sûngkuo bing senghai chu a nih: 2 Reuben, Simeon, Levi le Juda; 3 Isakar, Zebulun le Benjamin; 4 Dan le Naftali; Gad le Aser. 5 Jakob thlahai chu an rêngin sawmsaria an ni a, Josefa ruok chu Aiguptaa lo um ta sa a nih. 6 Josefa le a unauhai le anni hun laia suon po po chu an thi vong ta a. 7 Israel thlahai chun chi tam tak thlain nasa takin an hung pung a, Gosen ram chu an hung sip el ta a. 8 Aigupta rama chun Josefa hre ngai lo lal thar a hung inlal a. 9 A mipuihai kuoma chun, "En ta u, Israelhai hi, eini ta dingin an tam taluo tah. 10 Thaw ro, anni hi dawha thiemin soisak ei tiu, chuong naw chun hung tam zuol pei an ta, indo a um pha ei hmelmahai leh thang kop an ta, ei rama inthokin tlàn suok hlauh rawi an tih" a ta. 11 Chuongchun, anni suknomna dingin an chungah siehlaw vêngtuhai an sie a, Faraw hmang dingin Pithom le Ramases-ah thawluinain kudàm an inbawltir a. 12 Amiruokchu, an soisak rimsik po leh pung zuola an indar nasa ting leiin, Aigupta mihai chun Israel mihai chu an hung ti ta hle a, 13 an sor inrim nasa tul tul a. 14 Sin hàutak, lung chàrna le têklei siema inrim taka sorin, lo sin rinum tinrèng inthawtirin, an nun a rimsik thei dàn patawpin Aigupta mihai chun rawng takin an sor a. 15 Aigupta lal chun Hebrai mihai nau domtu Sifra le Pua hai kuoma chun, 16 "Hebrai mihai nau in dom pha leh, pasal a ni chun that unla, nuhmei a ni leh hla ro" tiin thu a pêk a. 17 Nau domtuhai chun Pathien an ti leiin Aigupta lalin a hril ang chu zawm loin nau pasalhai chu an indamtir vong lem a. 18 Aigupta lal chun nau domtuhai chu a'n kotir a, "Hieng hi ieng leia thawa nau pasalhai chu in indamtir pei am a na?" tiin a'n don a, 19 Nau domtuhai chun Faraw kuomah, "Pu, Hebrai nuhmeihai chu Aigupta nuhmei ang an ni ve naw a, an thothàng a tha leiin nau domtu tlung hmain nau an lo nei hman dêr ta hlak a nih" an ta. 20 Nau domtuhai chunga chun Pathienin ngil a nei a, chuongchun Israel mihai chu pungin an hung tam zuol pei ta lem a. 21 Nau domtuhai chun Pathien an ti leiin sûngkuo neiin an hung pung ve a. 22 Chun, Faraw chun a mihai po po kuomah, "Hebrai mi nau pasal hung pieng hlim taphot chu Nile vadungah pei un la, nau nuhmei ruok chu hlâ ro" tiin thupêk a'n suo a.

Exodus 2

1 Chun, Levi sûngkuoa mi pakhatin Levi chia mi bok nuhmeiah a nei a. 2 A hung inrài a, nau pasal a nei a, nau lawmum tak a nih ti a hmu chun thla thum zet a thup a. 3 A thup zing thei ta naw phing leh phairuongin bawm a siem a, alkatarain a zût phûi vong a, chu taka chun naute chu a'n zàltir a, Nile vakam hnaia phairuong lai chun a sie a. 4 Naute chunga chun iem a hung tlung hrim ti hmu tumin a unu chu hla feah a ngîr a. 5 Chun, Faraw naunu chu vadunga insil dingin a zu fe a, a tirtawnhai chun vadung kamah kein an zui a. Phairuong lai chun bawm a zuk hmu a, a siehlawnu chu a zu'n lâktir a. 6 A hang hong chun naute a hmu a. Naute chu a tap a, a lunginsiet ta êm êm a, "Hi hi Hebrai naute a ni hi tie!" a ta. 7 A unu chun Faraw naunu kuomah, "Hi naute don pêktu ding che hi Hebrai nuhmei ka va zongpèk ding che?" a ta. 8 Ama chun, "Va zong ta la" a ta. Nuhmeite chu a fe a, naute nu chu a hung thuoi a. 9 Faraw naunu chun a kuomah, "Hi naute hi fepui la, mi donpèk la, i don man hlaw pêng ka ti che" a ta. Chuongchun, nuhmei chun naute chu a lâk a, a don ta a. 10 Naute chu a hung inthang lien a, Faraw naunu kuoma chun a thuoi a, a naupain a um ta a. "Tuia inthoka ka lâk suok a ni leiin' a ta, a hmingah Mosie a sak a. 11 Mosie chu a hung puitling hnungin ni khat chu a mihai umna hmunah a fe a, inrim taka sin an thaw lai chu a thlîr a. Aigupta mi pakhatin a unau Hebrai mi a vuok lai chu a hmu a. 12 A ngha vêl a, mi dang a hmu naw phing leh Aigupta mi chu a vuok hlum a, phaiphina chun a phûm hmang a. 13 A zînga chun a suok nawk a, Hebrai mi le Hebrai mi insuol lai a hmu a, a thaw indik naw pa lem kuoma chun, "Ieng dinga i Hebrai chanpui i vuok am a na?" a ta. 14 Chu mi chun, "Tuin am kan chunga thuneitu le rorêltu dingin a ruot che a? Aigupta mi i that ang boka mi that ve iI tum a ni?" a ta. Mosie chun a lungrilin, "Ka thilthaw kha tlângin an hriet tah a ni awm de aw!" a ta, a ti thawng ta hle a. 15 Chu riva chu Faraw khomin a lo hriet a, Mosie chu that a tum a, sienkhom Mosie chu Faraw kuoma inthokin a tlân hmang a, Midian ram a tlung a, tuikul sìrah a'n thung a. 16 Chun hieng hi a na, Midian rama thiempu chun nau nuhmei pasari a nei a, anni chun an pa beram ruol chu tui pe dingin tuikula chun an hung a, taikuonga chun tui an sung sip a. 17 Beram vêngtu dang an hung a, anni chu an hung hnot zam a, sienkhom Mosie chun anni chu a lo san a, an beramhai chu tui a'n dawntir a. 18 Nunghàkhaiin an pa Reuel kuom an tlung chun, "Iem a ta voisun chu in va hung inlawi inhma ngei de?" a lo ta. 19 Anni chun, "Aigupta mi pakhatin beram vêngtuhai lakah a mi san suok a. Tui dâm a mi thâlpêk a, beram ruol khom tui a pêka a nih" an ta. 20 Ama chun, "An leh ama chu khaw la'm a um ta le? Iengtiziea in hung màksan el am a na? Va ko inla, bu dâm hung fa raw se" a ta. 21 Mosie chun chu pa kuoma um chu a remti a, ama chun a naunu Zipora chu nuhmeia nei dingin Mosie a pêk a. 22 Zipora chun nau pasal a nei a, Mosie chun, "Mi rama pêm ka lo ni ta hi" a ta a hmingah Gersom a sak a. 23 Chun, sawt fe hnunga chun Aigupta lal chu a thi a. Israelhai saltàng inrùm ri le thangpuitu ngaia an khêk ri chun Pathien kuom a hang tlung a. 24 Pathienin an inrùm ri chu a lo hriet a, Abraham le Isak le Jakob kuoma a thuthlung chu a hriet zing a. 25 Pathienin Israel thlahai chu a zuk thlîr a, a zuk ngaisak a.

Exodus 3

1 Mosie chun Midian rama thiempu, a tarpupa Jethro beram ruol chu a vèng a; chun, râl tieng thlaler ram hla tak chen a beramhai khalin, Horeb, b Pathien tlâng chu a zu tlung a. 2 Chu taka chun chîmbukah meichokin LALPA vàntirko a kuomah a hung inlàr a. Kàng si loa chîmbuk chok chu Mosien a hmu zing a. 3 Chuongchun a lungrilin, "Chîmbuk saw a chok a, a kâng bok si naw a, a va mak de! Va en chieng hrim ka tih" a ta. 4 En chieng dinga a fe lai chu Pathienin a hmu a, chîmbuka inthok chun, "Mosie, Mosie" tiin Pathien chun a ko a. Mosie chun, "Hi taka hin ka um" a ta. 5 Pathien chun, "Kha bâk kha hung hnai sap ta naw rawh. I pheikhok kha hlîp rawh, i ngîrna kha hmun thienghlim a nih" a ta. 6 Chun, Pathien vêkin, "Kei hi i thlatuhai Pathien, Abraham Pathien, Isak Pathien le Jakob Pathien chu ka nih" a ta. Chu phing leh Mosie chun a hmai a hup a, Pathien chu a en ngam naw a. 7 LALPA chun, "Aigupta rama ka mihai rimsikzie ka hmu zing a, sal vêngtuhai kut an tuor leia an inrùm ri ka lo hriet a, an tuorna ka hriet zing a nih. 8 Chuleiin, Aiguptahai kuta inthoka anni chu san him ding le chu rama inthoka thuoi suok a, Kanan mihai, Hit mihai, Amor mihai, Periz mihai, Hiv mihai le Jebu mihai umna, ram tha le thawveng, nenetui le khuoizu luongna rama chun thuoi lût dingin, ka hung tum a nih. 9 Tu hin Israelhai inrûm ri chun ka kuom a tlung zing a, Aigupta mihaiin an suknomnat dàn khom ka hmu zing. 10 Thaw rawh, tu hin Aigupta rama inthoka ka mi Israelhai thuoi suok dingin Faraw kuomah ka tir ding che a nih" a ta. 11 Mosie chun Pathien kuomah, "Faraw kuomah fe a, Aigupta rama inthoka Israelhai thuoi suoktu ding chun kei hi tu am ka ni leh?" a ta. 12 Pathien chun, "Ka umpui ding che annawm. Keima tir ngei i nizie i ta dinga inchikna chu hi hi nîng a tih: Aigupta rama inthoka ka mihai i hung thuoi suok pha chun, hi tlânga ngei hin Pathien chu chawibiek in tih"a ta. 13 Mosie chun Pathien kuomah, "Israelhai kuoma chun zu fe ta lang, an kuomah 'In thlatuhai Pathien chun in kuomah a mi tir a nih' zu ti ta lang, anni rawiin, "A hming ieng am a na?' lo ti sien, iem a na ka hril ding?" a ta. 14 Pathien chun Mosie kuomah, "KEIMA CHU KA NIH. c Israelhai kuoma chun, 'KEIMA chun in kuomah a mi tir a nih' i ti ding a nih" a ta. 15 Chun, Pathien vèk chun Mosie kuomah, "Nangin Israelhai kuoma chun, 'LALPA, in thlatuhai Pathien, Abraham Pathien, Isak Pathien le Jakob Pathien chun in kuomah a mi hung tir a nih' i ti ding a nih. Hi hi kumkhuoa ka hming chu a nih, suon po po chena in mi hriet zingna ding hming chuh. 16 Fe la, Israel upahai ko khawm la, an kuomah, 'LALPA, in thlatuhai Pathien, Abraham Pathien, Isak Pathien, Jakob Pathien chu ka kuomah a hung inlàr a, hieng hin a tih: Ka hung kan cheu a, Aigupta rama an soisak dàn cheu khom ka hmu vong. 17 Aiguptaa sukrinuma in umnaa inthoka thuoi suokin, Kanan mihai, Hit mihai, Amor mihai, Periz mihai, Hiv mihai le Jebu mihai umna ram, nenetui le khuoizu luongna rama chun thuoi lût ka ti cheu ti ka tiem ta sa a nih' tiin hril rawh. 18 "Chuongchun, i thu lo ngaithlàng an tih. Chun, nang le Israel upahai chu lal kuomah fe unla, a kuomah, 'LALPA, Hebraihai Pathienin a mi hung kan a, chuleiin, thlaler ni thum lamah LALPA kan Pathien kuoma kan va'n thawi theina dingin, lunginsiet takin fe mi phalpêk rawh' ti ro. 19 Chun, kut hrât takin a'n thaw luitir a ni ngot naw chun Aigupta lal chun infetir phal mei mei naw ni cheu ti ka hriet. 20 Chuongchun, keiin ka kut phar suok ka ta, anni laia thil mak ka la thaw ding po po chun Aigupta chu hrem ka ta, chu zoa chun insuoktir a ti cheu. 21 "Chun, hi mihai hi Aigupta mihai inlunginsiettir ka ta, in suok pha khom kut ruokin suok naw ti niu. 22 Nuhmei taphotin a tuolbawmnu le a ina um nuhmei kuomah tangkaruo le rangkachaka siem incheina thilhai le silfènhai hni sien, chuonghai chun in naunu le in naupa hai inthuomtir ro. Chuong ang chun Aigupta mihai chu in rok ding annawm" a ta.

Exodus 4

1 Mosie chun, "Mi ringhlela ka thu ngàithla loin, 'I kuomah LALPA inlâr naw nih' mi tihai sien, iem a na ka law ding?" a ta. 2 Pathienin a kuomah, "I kuta i chawi kha iem a na?" a ta, ama chun "Hmol" a ta. 3 LALPA chun, "Hnuoiah pei rawh" a ta. A pei thlâk charin rûlin a'n chang a, Mosie chu a tlânsie a. 4 LALPA chun a kuomah, "I kutin ban la, a meia khan man rawh" a ta, a ban a, a hei man chun a hmolah a hung inchang nawk a. 5 LALPA chun, "Hi hi LALPA, an thlatuhai Pathien, Abraham Pathien, Isak Pathien le Jakob Pathien chu i kuomah a hung inlâr ngeizie an ring theina ding a nih" a ta. 6 Chun, LALPA chun, "I kutin i korfuol mansa kha hang pur rawh" a ta. Mosie chun a pur a, a hang lâk suok chun, ngai ta, a kut chu vur anga varin a lo inphàr ta vong a. 7 LALPA chun, "Tu khan i kutin i mansa pur nawk rawh" a ta. Mosie chun a pur a, a hang lâk suok chun a kut chu a pang vun dang ang charin a hung um nawk el ta a. 8 LALPA chun Mosie kuomah, "Inchikna thilmak i thaw voi khatna hi an awi naw a, i thu an ngàithlàk naw a ni khomin a voi hnina hi chu awi tàng an tih. 9 Hi inchikna thil mak pahni hi pom lo a, i thu an la ngàithlak naw rop a ni chun, Nile vadung tui zu thâl la, chu chu hnuoi chârah bun thla la, tui chu thisenah hung inchang el a tih" a ta. 10 Mosie chun LALPA kuomah, "Aw LALPA, kei hi chu kha hma le i siehlaw i biek hnung khom hin, mi bau themthiem ka ni ngai naw a, pa dangawk le muong taka thu hril mi ka ni si a" a ta. 11 LALPA chun a kuomah, "Mihriem bau hi tu pêk am a na? Tong thei lo le naseta siemtu chu tu am a na? Tu am a na mit sukvara sukdel theitu? Kei, LALPA hi ka ni naw am a ni? 12 Tu hin fe el rawh, tong dàn zirtir ka ti che a, i hril dinghai chu hril pei ka ti che" a ta. 13 Mosie chun, "Aw LALPA, hi thilthaw ding hin chu mi dang tir lem el ta la" a ta. 14 LALPA chu Mosie chungah a lungsen a, a kuomah, "I unaupa Aron, Levi chia mi hi teh? Ama hi chu a bau a themthiem ti ka hriet. Nangma hmu ding chein a hung nghe nghe a, a hmu pha che chu a lungril lawm a tih. 15 Ama chu inbiekpui la, a bauah thú hi tù rawh; in pahnia in tong dàn ding le thaw ding chu hril pei ka ti cheu. 16 Ama chu mipuihai kuoma i thu hril sawngtu, i ta dinga bau nîng a ta, nang chu ama ta dingin Pathien ang nîng i tih. 17 Amiruokchu, inchikna thil mak i thawna dingin hi hmol hi chawi rawh" a ta. 18 Mosie chu a tarpupa Jethro kuomah a kîr nawk a, a kuomah, "Aigupta rama ka mihai zu kan a, a dama muol an la um am ti en dinga ka fe mi phalpêk rawh" a ta. Jethro chun, "Ni e, thlamuong takin fe rawh" a ta. 19 Chun, Midian rama chun LALPAN Mosie kuomah, "Aigupta ramah kîr nawk ta la, a that tumtu che po po kha an thi ram vong tah" a ta. 20 Chuongchun, Mosie chun a nuhmei le a naupahai chu sabengtung chungah a'n chuongtir a, Aigupta panin an inthok suok a. Chun, a kutin Pathien hmol chu a chawi a. 21 LALPA chun Mosie kuomah, "Aigupta ram i tlung pha chun inchikna thil mak thaw theina ka pêk che hi Faraw hmaah i thaw ding a nih. Sienkhom a lungril sukkhaupèk ka ta, mihai chu insuoktir phal el naw nih. 22 Chu pha chun Faraw kuomah hieng hin hril rawh: 'Hi hi LALPA thu chu a nih: Israel hi ka nau lutîr a na, 23 ka naupa chun ka rong a bawl theina dingin insuoktir rawh khai, ka ti a, i'n suoktir phal naw vei a, chuleiin i naupa, i nau lutîr chu sukhlum ka tih, a tih' ti rawh" a ta. 24 Chun, lampuia an riekna hmuna chun LALPAN Mosie chu a zu sir a, a sukhlum hman vang a. 25 Ziporra chun lung sìr ngei a lâk a, a naupa ser vun chu a tan thlàk a, chu chun Mosie ke chu intawktirin, "Nang hi ka ta dingin pasal, thisen insuo hmang i lo ni ngei luo hi tie!" a ta 26 Chuongchun, LALPA chun a tawk ta naw a (Hi taka 'thisen insuo hmang pasal' a ti hin sertan thu a hril a nih). 27 LALPA chun Aron kuomah, "Mosie tuok dingin thlalerah fe rawh" a ta. Chuongchun, Mosie chu Pathien tlângah a'n tuokpui a, a fawp a. 28 Mosie chun LALPAN a tir thu po po le inchikna thil mak a'n thawtir dàn ding po po chu Aron a hril vong a. 29 Mosie le Aron chun Israel upahai po po chu an ko khawm a, 30 LALPAN Mosie kuoma thu a hrilhai po po chu Aron chun a hril sawng nawk vong a, inchikna thil makhai a thaw bok a, mipui chun an awi ta a. 31 LALPAN Israel thlahai ngaisak a, an rinum tuor nasatzie a hmu tah ti an hriet chun kûnin ama chu an chawibiek a.

Exodus 5

1 Chu hnunga chun Mosie le Aron chu Faraw kuomah an fe a, "LALPA Israelhai Pathienin hieng hin a tih: 'Ka mihai hi thlalera ka kuoma kût an hmang theina dingin infetir rawh' tiin" an ta. 2 Faraw chun, "A thu awi a, Israelhai kan suoktir ngotna san ding LALPA chu tu am a na? Chu LALPA chu ka hriet ngai nawh; Israelhai khom insuoktir bok naw ning" a ta. 3 Anni chun, "Hebraihai Pathien chun a mi hung kan a. Tu hin hi taka inthoka ni thum lama hla thlalerah fe a, LALPA kan Pathien kuoma kan inthawi theina dingin lunginsiet takin mi'n fetir rawh, chuong naw chun hripui amanih kawlhnâm amanih hung inlèngtir rawi a tih" an ta. 4 Aigupta lal ruok chun, "Mosie le Aron, ieng dinga an sin thaw buoi laia hieng mipuihai hi thuoi hmang phèt in tum am a na? In sin seng va thaw tok tok ro" a ta. 5 Faraw bok chun, "En ta u, a ram mipui hi an tam ta hle a, an sin in hung sukchai nasatzie hih!" a ta. 6 Chu ni lâ là chun sinthaw vêngtuhai le an hotuhai kuoma chun, 7 "Tuta inthok chu kha hma ang khan têklei siemna dingin bupawl pe ta naw ro, anni ngeiin inzong chop raw hai se. 8 A hmaa an siem zât tho siem dingin tuk unla, suktlawm chuong naw ro. An tha a bo a, chu leia 'Kan Pathien kuomah fein va'n thawi kan tih' tia inphin an ni hi. 9 Pasalhai sin sukrik zuol unla, khel thu an ngaisak hman nawna dingin chawl loin sin inthawtir ro" a ta. 10 Chu ni ngei chun sinthaw vêngtuhai le an hotuhai chun, "Faraw thupèk angin, tuta inthok chu bupawl pêk ni ta naw ti niu. 11 Nangnin bupawl chu in hmu theina ang anga inthokin la khawm ro. In sina tuk zât chu suktlawm ni bok naw nih" tiin mipui chu an hril a. 12 Chuongchun, mipui chu Aigupta ram hmun tinah bupawl aia hmang ding bu kung bul la khawm dingin an fe dar ta chum chum a. 13 Sinthaw vêngtuhai chun, "Bupawl in dong laia in thaw suok zât bok kha ni tin in thaw suok ding a nih" tiin an nor zing bok a. 14 Chun, sinthaw vêngtuhaiin Israel mi hotua an ruothai chu, "Iengtiziea zani le voisun hin kha hma ang boka têklei in siem zât dinga bituk chu in la siem zo naw?" tiin an vuok a. 15 Chuongchun, Israelhai hotuhai chu Faraw kuomah an fe a, "I siehlawhai hi ieng dinga hieng lawm lawma i mi soisak am a na? 16 I siehlawhai hi bupawl hrim hrim i pêk ta naw a, i mihai hlak chun, 'Têklei siem ro' tiin an mi nor zing bok si. I siehlawhai hin an mi vuok a, sienkhom a thaw indik nawtu chu i mihai an ni lem sia" tiin an beidong thu an va'n tlun a. 17 Ama ruok chun, "In tha a bo annawm, mi thabo ruol in nih. In thabo lei annawm, 'LALPA kuomah va'n thawi kan tih' in ti hi. 18 Chuleiin, fe unla, in sin va thaw ro. Bupawl pêk ni ta nawng in ta, sienkhom têklei siem zât dinga an bituk cheu chu in siem zo hrim hrim ding a nih" a ta. 19 Ni tina têklei siem zât dinga an bituk chu suktlawm a ni chuong naw ding thu Israel hotuhaiin an hriet chun an chan sietzie chu an hmu suok a. 20 Faraw ina inthoka an hung suok chun lampuia ngîr Mosie le Aron chu an hmu a, an kuomah, 21 "Faraw le a siehlawhai mithmuah tirdakum in mi'n kaitir a, an mi thatna dingin kawlhnâm an kutah in sie leiin LALPA chun nangni enin in chungthu rêl raw se, " an ta. 22 Chun, Mosie chu LALPA tieng a ngha a, "Aw LALPA, hi mihai chunga hin ieng leia buoina i siempèk am a na? Hi ding lei hin a ni maw i mi tir chu? 23 Faraw kuoma i hminga thu ka va hril nia inthokin hi mihai chunga hin harsatna a'n tluntir a, i mihai hlak chu i hung san bok si nawh" a ta.

Exodus 6

1 LALPA chun Mosie kuomah, "Tu hin Faraw chunga ka thaw dàn ding chu hmu tâng iitih: ka kut hrât leiin anni chu insuoktir a ta, ka kut hrât leiin anni chu a rama inthokin hnot suok a tih" a ta. 2 Pathien vèk chun Mosie kuomah, "Kei hi LALPA chu ka nih. 3 Abraham le Isak le Jakob kuomah Iengkim Pathien ka nina angin ka'n lâr a, amiruokchu LALPA hming hin an kuomah keima ka la'n hriettir ngai nawh. 4 Mikhuol anga an khawsakna Kanan ram chu pe dingin anni chu thu ka thlung a. 5 Chu bâkah, Aigupta sala intâng Israelhai inrum ri ka hriet a, ka thuthlung khom ka hriet zing. 6 ''Chuleiin, Israelhai kuomah hi thu hi hril rawh: 'Kei hi LALPA chu ka nih. Aiguptahai bawi nina ringkol rik tak in bâtnaa inthokin san suok ka ti cheu a, an bawia inthokin insuoktir ka ti cheu a, bân phar meua ropui rêlin intlan suok ka ti cheu. 7 Ka mihai nîng in ta, kei in Pathien nîng ka tih. Chu pha chun keima hi LALPA in Pathien, Aiguptahai bawi ringkola inthoka thuoi suoktu cheu ka nizie hung hre tàng in tih. 8 Abraham le Isak le Jakob kuoma bân phar meua pêk ka tiem rama chun thuoi lût ka ti cheu a, chu ram chu in rochanah pêng ka ti cheu. Kei hi LALPA chu ka nih' tiin hril tawl rawh" a ta. 9 Chu thu chu Israelhai kuomah Mosien a hril a, sienkhom an lungril zuoina lei le rimsi taka an intàngna lei chun a thu hril chu an ngàithlàk nuom nawh. 10 Chun, LALPA chun Mosie kuomah, 11 " Va fe la, Aigupta lal Faraw kuoma chun a rama inthoka Israelhai insuoktir dingin hril rawh" a ta. 12 Sienkhom Mosie chun LALPA kuomah, "Israelhai hmana ka thu an ngàithlàk nuom naw chun, kei mi dang inawk thu hril hi Faraw chun ieng leiin am a lo ngàithlàk ding?" a ta. 13 Chun, LALPAN Mosie le Aron chu a biek a, "Aigupta rama inthoka Israelhai thuoi suok dingin thu ka pêk ta cheu a nih ti thu chu Israel mipuihai le Aigupta lal chu hril ta ro" a ta. 14 Hienghai hi Israel pahnam tin luhai chu an nih: Israel nau lutîr Reuben naupahai chu Hanok hai, Pallu hai, Hezron hai le Karmi hai an na, anni hi Reuben chi-hnamhai chu an nih. 15 Simeon naupahai chu Jemuel hai, Jamin hai, Ohad hai, Jakin hai, Zohar hai le Kanan nuhmei laka a naupa Shaul hai an nih. Hienghai hi Simeon chi-hnamhai an nih. 16 An inchik dana Levi naupahai chu Gerson hai, Kohat hai le Merari hai an nih. Levi chu kum za le sawmthum pasari a dam. 17 Gerson naupahai chu Libni hai le Simei hai an nih. 18 Kohat naupahai chu Amram hai, Izhar hai, Hebron hai le Uziel hai an nih. Kohat chu kum za le sawmthum pathum a dam. 19 Merari naupahai chu Mali le Musi hai an nih. Chuonghai po chu an chanchin inchiknaa Levi pahnamhai chu an nih. 20 Amram chun a pa farnu Jokebed chu nuhmeiin a nei a, a naupahai chu Aron le Mosie an nih. Amram chu kum za le sawmthum pasari a dam. 21 Izar naupahai chu Kora hai, Nefek hai le Zikri hai an nih. 22 Uziel naupahai chu Misa hai, Elzafan hai le Sithri hai an nih. 23 Aron chun Aminadab naunu, Nason zuorpuinu Eliseba chu nuhmeiin a nei a, ama chun naupa Nadab hai, Abihu hai, Eleazar hai le Ithamar hai a neipèk a. 24 Kora naupahai chu Asir hai, Elkana hai le Abiasaf hai an na, chuonghai chu Kora chi-hnamhai chu an nih. 25 Aron naupa Eleazar chun Putiel naunu chu nuhmeiin a nei a, naupa Finehas a neipèk a. Chuonghai chu Levi sungkuoa pahnam pei luhai chu an nih. 26 Aron le Mosie kuoma ngei hin a nih LALPAN, "Aigupta rama inthokin Israel thlahai hi an chi-hnam inthe dàn ang peiin thuoi suok rawh" tia a lo hril chu. 27 Anni pahni chu an nih Aigupta lal Faraw va bie a, Israel thlahai chu Aigupta rama inthoka insuoktir dinga va nortu chu. Chu thil thawtuhai chu Mosie le Aron hai ngei chu an nih. 28 Chun, Aigupta rama LALPAN Mosie a biek ni chun LALPAN, 29 "Kei hi LALPA chu ka nih. Aigupta lal Faraw kuoma chun ka hril po pohai che hi intlun rawh" tiin Mosie chu a hril a. 30 Mosie chun LALPA kuomah, "Kei hi pa dang inawk ka na, keima thuhril telul hi Farawin ieng tin am a ngàithlàk ding a na?" a ta.

Exodus 7

1 LALPA chun Mosie kuomah, "Ngai ta, Faraw ta dingin Pathien ang hielin ka siem che a, i unaupa Aron chu i zawlnei nîng a tih. 2 Hril dinga thu ka pêk taphot che chu puong suok i ta, i unaupa Aron chun Faraw kuomah a rama inthoka Israelhai po po insuoktir dingin hril raw se. 3 Amiruokchu, Faraw lungril sukkhauh ka ta, Aigupta ramah inchikna thil mak sukpung ka ta, sienkhom ngàithla naw ni che. 4 Chu pha chun Aigupta chungah kut thlâk ka ta, ropui rêlin ka mi Israelhai chu thuoi suok ka tih. 5 Aigupta chungah kut inlèn a, Israelhai ka thuoi suok pha chun kei hi LALPA chu ka nih ti hre tàng an tih" a ta. 6 Mosie le Aron chun LALPA thupêk ang charin an thaw a. 7 Faraw kuoma thu an hril lai hin Mosie chu kum sawmriet mi a ni ta a, Aron chu kum sawmriet pathum mi a ni tah. 8 LALPA chun Mosie kuomah, 9 "Farawin, 'Thil mak thaw ro' a ti pha leh nangin Aron kuomah, 'I hmol kha la la, Faraw hmaah pei la, rûlin inchang a tih' tiin hril rawh" a ta. 10 Chuongchun, Mosie le Aron chu Faraw kuomah an fe a, LALPA thupêk ang char chun an thaw a. Aron chun Faraw le a thoktuhai hmaah a hmol chu a pei a, rûlin a hung inchang a. 11 Faraw khomin a mi varhai, dawithiemhai le mitdawivai thiemhai chu a ko ve a, anni khomin an mitdawivai thiem rùk chu hmangin chuong ang chun an thaw ve a. 12 An hmol chu an hang pei seng a, rûlin an inchang ta vong a. Amiruokchu, Aron hmol chun hmol dang po po chu a lem vong a. 13 Chuong sa khom chun Faraw chun a lungril a sukkhau zing a, LALPAN a hril ang khan, an thu a ngàithlàk nuom nawh. 14 LALPA chun Mosie kuomah, "Faraw lungril a la khau zing a, mihai chu a la'n suoktir phal nawh. 15 Zîngkar leh Faraw tui insilna ding hmuna chun fe la, ama chu hmu dingin Nile vadung kamah lo nghâk la, rûla inchang thei i hmol kha chawi bok rawh. 16 Chun a kuomah hieng ang hin hril rawh: 'LALPA, Hebrai mihai Pathien chun hi thu hi i kuoma hril dingin a mi tir a nih: thlalera an mi chawibiek theina dingin ka mihai hi infetir rawh ka tia chu tu chen hin i la bengkhon nuom nawh. 17 Chuleiin, LALPA chun hieng hin a tih: Hi hin LALPA ka nizie chu hrieng in tih: Ngai ta, ka kuta ka chawi hmol hin Nile vadung chu vuong ka ta, thisenin inchang a tih. 18 Nile vadunga ngahai chu thing an ta, a vadung chu thu vong a ta, a tui chu Aigupta mihaiin dawn naw ni hai' tiin hril rawh a mi tih" a ta. 19 Chun, LALPAN Mosie kuomah, "Hieng hin Aron kuomah hril rawh: i hmol kha kutin chawi la, Aiguptaa vadungpui hai, vadungte hai, tui lam hai, dil hai le tui intling khawmna taphot chungah inlet la, tui po po chu thisenah inchang a tih. Aigupta ram po po chu thisenin sip a ta, thing kuong le lung bêla tui um po po khom thisenah inchang a tih' tiin hril rawh" a ta. 20 Mosie le Aron chun LALPA thupêk ang charin an thaw a, hmol chu a hang inlet a, Faraw le a thoktuhai po po hmua ngei chun tui chu a vuok a, chuongchun vadunga tui po po chu thisenin a hung inchang ta vong a. 21 Vadunga nga chu an thi vong a, vadung chu a thu vut vut a, Aigupta mihai chun tui chu an dawn nuom ta naw a, thisen hlak chu Aigupta ram sûng po poah a um vong el si a. 22 Aigupta rama mitdawivaihai khomin an thiemna rùk hmangin chuong ang chun an hang thaw ve a, chu chun Faraw lungril a sukkhau a, LALPAN a hril tah ang khan, an thu le hla a ngàithlàk nuom chuong nawh. 23 Ngàithla nèk hmanin Faraw chu a in tieng a fe a, lungkham khom a lungkham zui nawh. 24 Vadung tui chu an dawn thei si naw leiin Aigupta mi po po chun tui dawn ding zongin Nile vadung kam vel chu an cho ta sup sup a. 25 Pathienin Nile vadung a vuoka inthokin ni sari zet a ni ta a.

Exodus 8

1 Chun, LALPAN Mosie kuomah, "Faraw kuomah fe la, hieng hin hril rawh: 'Ka mihai infetir rawh, an mi chawibiek theina dingin. 2 An suok ding i phal naw chun a ram pumah utok intàmtir ka tih. 3 Nile vadung hi utokin sip an ta, i lal ina chen hungin, i riekna pindana hai, i khum chunga hai, i thoktuhai le i mipuihai ina hai, in thuk sùnga hai, bei tlang in hmetna thlênga hai hung lût sup sup an ta, 4 nang le i mipuihai le i thoktuhai panga chen khom invak sup sup an tih' tiin" a ta. 5 Chun, Pathienin Mosie kuomah, "Aron kuomah hieng hin hril rawh, 'I kutah hmol chawiin, vadung le tui lam le dil chunga hai i hmol chu inlet la, Aigupta ram chungah utok hung intàm raw se'ti rawh" a ta. 6 Chuongchun Aron chun Aiguptaa tui chunga hai chun a ban a phar a, utok an hung suok a, a ram phêkin an hung intàm a. 7 Sienkhom, an mitdawivaihai chun an thiemna rùk hmangin chuong ang chun an thaw ve a, hnuoi chunga chun utok an hung insuoktir ve a. 8 Faraw chun Mosie le Aron chu a'n kotir a, an kuomah, "Kei le ka mipuihai laia inthoka utok hi la hmang dingin LALPA kuomah mi hnipêk unla, in mipuihai chu LALPA kuoma inthawina inhlàn dingin infètir ka tih" a ta. 9 Mosie chun Faraw kuomah, "Nile vadunga um lai ti lo po po, nang le i thoktuhai le i mipuihai laia inthoka utok la hmang dinga i ta dinga ngênna ka neipèk hun ding che chu nangman hung ruot rawh" a ta. 10 Faraw chun, "Zingah ni raw se" a ta. Mosie chun, "I ti ang chun ni raw se, LALPA kan Pathien ang hi an um nawh ti i hriet theina dingin. 11 Utokhai chun nang le i in, i thoktuhai le i mihai in chu suoksan vong an ta, Nile vadunga chauh um tàng an tih" a ta. 12 Mosie le Aronin Faraw an màksan hnungin Mosie chun Faraw chunga utok a'n tamtir chungthuah LALPA a ko a. 13 LALPA chun Mosie ngên angin a thawpêk a, in le tuol lai le rama utokhai chu an thi ta vong a. 14 Utok thi chu an deng vùm hnèr hnûr a, a ram phêkin a thu vut vut a. 15 Chuonga an hung re nawk ta phing leh Faraw chun a lungril a sukkhau a, LALPA lo hril tah ang khan, an thu chu a ngàithlàk nuom ta naw a. 16 Chun, LALPA chun Mosie kuomah, "Hieng hin Aron hril rawh" 'I hmol kha inlet la, pilvut vaw la, Aigupta ram po poa pilvut chu hrikind hung inchang a tih" a ta. 17 Chuong ang chun a thaw a, Aronin a hmol a hang inlet a, hnuoia pilvut a vuok charin Aigupta rama pilvut po po chu hrikin an hung inchang a, sa le mihriem hai chu an hung baw a. 18 An mitdawivaithiemhai chun an thiemna rûk hmanga thaw ve an tum a, an hlawsam dèr a. Hrik chun sa le mihriem hai chu an bawm a. 19 Mitdawivaithiemhai chun Faraw kuomah, "Hi hi Pathien kut a nih"e an ta. Sienkhom, Faraw lungril chu sukkhauin a um a, LALPA hril tah angin, an thu chu a ngàithlàk nuom chuong nawh. 20 LALPA chun Mosie kuomah, "Zîngkàr inhma takin tho la, insil dinga Faraw a fe lai va nangching la, hi thu hi va hril rawh: Hieng hin LALPA chun a hril: 'Ka mihai infetir rawh, an mi chawibiek theina dingin'. 21 Ka mihai i'n suoktir naw chun nang le i thoktuhai le i mihai inah tho hon hung tir ka ta, Aigupta mihai in po po chu thoin sip an ta, an chêngna ram po po khom thoin sip an tih. 22 Chu ni chun ka mihai umna Goshen ramah tho hrim hrim an um ve nawna dingin anni chu thlier hrang ka ta, chuongchun LALPA chu ka nih ti hung hre thei in tih. 23 Chun, ka mihai le i mihai chu thlier hrang ka tih. Hi inchikna thil mak hi zîngah hung tlung a tih' tiin hril rawh" a ta. 24 Chuong ang char chun LALPAN a thaw a, Faraw in le a thoktuhai ina chun tho an hung vuong lût ta hum hum el a, Aigupta ram hmun tin el chu thoin an suksiet a. 25 Chuongchun, Faraw chun Mosie le Aron chu a'n kotir a, "Fe unla, hi rama hin in Pathien kuoma chun va'n thawi el ro" a ta. 26 Mosie chun, "Chu chu thil fel ni naw nih. LALPA kan Pathien kuoma kan inthawina chu Aigupta mihai tirdak zawng nîng a tih. An tirdak zawng a lo ni chun, lungin an mi deng naw ding maw? 27 Ama thupêk angin, LALPA kan Pathien kuoma inthawi ding chun hi taka inthoka ni thum lam thlalerah kan fe a ngai a nih" a ta. 28 Faraw chun, "LALPA in Pathien kuoma inthawi dingin thlalerah infetir ka ti cheu, amiruokchu fe hla naw ro. Tu hin mi tongtaipêk raw leh" a ta. 29 Mosie chun, "Ka suoksan char che hin LALPA kuomah ngèn ka ta, zìnga hin Faraw le a thoktuhai le a mipuihai chu thoin inkiengsan an tih. Amiruokchu, LALPA kuoma inthawia an fe ding chu phal nawk lo a, dawhaa inhlèm nawk ta lo ding a ni thua hin Faraw hi chieng phot sien" a ta. 30 Chuongchun, Mosie chun Faraw chu a màksan a, Pathien kuomah a tongtai a. 31 LALPA chun Mosie ngên ang takin a thawpêk a, Faraw le a thoktuhai le a mipuihai kuoma inthokin tho tlimpui chu a hawl hmang a, pakhat hlekte khom an um ta nawh. 32 Chu tum khom chun Faraw chun a lungril a sukkhau a, mihai chu an suoktir phal nawh.

Exodus 9

1 Chun, LALPA chun Mosie kuomah, "Faraw kuomah fe la, hieng hin hril rawh: 'LALPA, Hebraihai Pathien chun hieng hin a tih: Ka mihai hi infetir rawh, an mi chawibiek theina dingin. 2 Infetir loa i chel tàng tawl zing chun Pathien kutin ran pûl hri râpthlâk tak el chu ran tlatna hmuna in sakorhai, 3 sabengtunghai, sanghawngseihai, bawng le beram le kêl ruolhai chungah inlèngtir a tih. 4 Amiruokchu, LALPAN Aiguptahai ran ruol le Israel mihai ran ruol chu the hrang a ta, Israelhai ran vai hrim hrim thi ve naw ni hai' tiin" a ta. 5 LALPAN a thaw hun ding chu tukin, "Zìngah LALPAN hi rama hin chuong ang chun thawng a tih" a ti bok a. 6 A zìnga chun chuong ang chun LALPAN a thaw a, Aigupta mihai ran po po chu an pûl ta vong a, Israel thlahai ran ruok chu pakhat khom an thi ve nawh. 7 Chun, Faraw chun en fie dingin mi a tir a, Israel mihai ran chu pakhat khom an thi ve nawh ti an hmu a. Chuong sa khom chun a lungril a sukkhau a, mihai chu an suoktir nuom nawh. 8 Chun, LALPA chun Mosie le Aron kuomah, "Thuka mi inting iemani zat chawi inla, Faraw hma bulah Mosien boruokah vawr raw se. 9 Chu chu a ram po po chungah vut dip khuin inchang a ta, chu chun Aigupta rama mi le sa po po chu khuoihli huoisuol invoitir a tih" a ta. 10 Chuongchun, thuka inting chu an chawi a, Faraw hmaah ngîrin Mosie chun boruokah a vawr a, mi le sa po poin khuoihli huoisuol an invoi a. 11 Mitdawivaithiemhai chun Aigupta mihai invoi ang bok khuoihli chu an invoi ve leiin Mosie chu an cho hne ta naw a. 12 Amiruokchu LALPAN Faraw lungril chu a sukkhau a, Mosie kuoma a lo hril lawk tah ang hrimin, Faraw chun Mosie le Aron thu chu a ngàithlàk nuom chuong nawh. 13 Chun, LALPAN Mosie kuomah, "Zîngkar inhma takin tho la, Faraw va hlù khum la, a kuomah, 'LALPA, Hebraihai Pathien chun hieng hin a tih: Ka mihai infètir rawh, an mi chawibiek theina dingin. 14 Chuong a ni naw chun, tuta tum hin chu nang le i thoktuhai le i mihai chungah hripui tak tak ka hung inlêngtir ding a nih, keima ang hrim hi hnuoia hin an um nawh ti in hriet theina dingin. 15 Tu khom hin ka kut phar a, hri hung inlêngtir a, nang le i mipuihai chu hnuoia inthoka sukram vong thei cheu ka nih. 16 Ka thilthawtheizie inentir ding che le khawvel po poa ka hming puong darna dinga ka hlà mei mei che a nih. 17 Ka mihai chungah insukngêngin i la'n suoktir nuom naw zing a. 18 Chuleiin, tu ang hun zînga hin Aigupta ram a pienga inthoka tu chen khoma la tla ngai lo rielpui ka'n tlàktir ding a nih. 19 I ran ruol nei po po le rama i thil nei po po chu a bûkah khum dingin thu pe rawh, mi le sa rêng rèng tuola umhai chu rielin a dêng hlum vong ding a ni si a' ti rawh" tiin. 20 Faraw thoktuhai laia LALPA thu poisatuhai chun an ranhai le an suokhai chu inhmaw takin an in sûngah an hawl lût tawl a. 21 LALPA thu poisa nawtuhai ruok chun an ranhai le suokhai chu ran tlatna hmunah an inumtir a. 22 LALPA chun Mosie kuomah, "Aigupta ram po poa mihriem le sa le loa thlai tinrèng chungah riel a tlàk theina dingin vân tieng i kut phar rawh" a ta. 23 Mosie chun a hmol chu vân tieng a hang inlet a, LALPAN vàninrum ri le riel a zuktir a, kawl inlepin hnuoi a kâp zor zor a. Chuongchun, Aigupta ram chunga chun LALPAN riel a'n tlàktir ta chur chur el a. 24 Riel a tlàk ruolin a suk a tungin kawl a'n lep ton zok zok a. Aigupta ram a pienga inthokin chuong ang lawma thli sie chu a la hrang ngai nawh. 25 Riel chun Aigupta ram puma loa thil um po po le sa le mihriemhai khom a dêng hlum vong a, loa thlaihai le thinghai khom a dêng kol vong a. 26 Riel a tlàk ve nawna chu Israelhai umna Gosen ram chauh a nih. 27 Chun, Faraw chun Mosie le Aron chu a'n kotir a, "Tuta tum hin chu thilsuol ka thaw a nih. LALPA a'n dik a, kei le ka mihai ruok chu kan suol a nih. 28 Hun ta êm êm raw se. Vân inrûm le riel bona dingin LALPA kuomah hni unla, chu chun insuoktir ka ti cheu, sawt um ta naw ti niu" a ta. 29 Mosie chun, "Khawpui hi ka suoksan pha leh kut pharin LALPA kuomah tongtai ka tih. Vàninrum hi bo a ta, riel tla ta bok naw ni a, chu chun hnuoi hi LALPA ta a nizie hrieng in tih. 30 Amiruokchu, nang le i rawihai hin LALPA Pathien tìna hlek khom in la nei naw rop ti ka hriet" a ta. 31 Pat le barli a dêng siet vong a, barli chu a vui lai a na, pat chu a pâr lai a nih. 32 Huit le vai butun ruok chu an la to naw leiin a dêng siet ve nawh. 33 Mosie chun Faraw a màksan a, khawpuia inthok chun a fe suok a. LALPA tieng a kut a phar a, vàninrum le riel chu a tawp a, ruo khom a sûr zom ta nawh. 34 Farawin ruo le riel le vàninrum a tawp tah ti a hmu chun a suol a pu nawk a, ama le a rawihai chun lungril an sukkhau a. 35 Chuongchun, LALPAN Mosie kuoma a lo hril tah ang khan, Faraw chun a lungril a sukkhau a, Israelhai chu an suoktir nuom nawh.

Exodus 10

1 Chun, LALPA chun Mosie kuomah, "Faraw kuomah fe la, LALPA chu ka nih ti in hrietna dinga inchikna thil mak tam tak ka thaw theina ding le chuong inchiknahai chu thaw a, 2 khau taka Aigupta mihai ka soisak thuhai chu in nauhai le in tu le tehai kuoma in inzawt theina dingin, Faraw le a thoktuhai lungril ka sukkhau a nih" a ta. 3 Chuongchun, Mosie le Aron chu Faraw kuomah an fe a, "LALPA, Hebraihai Pathien chun hieng ang hin a hril: 'Ka hmaah ieng chen top am inngâitlawm nuom loa i um ding chu? Ka mihai hi insuoktir rawh, an mi chawibiek theina dingin. 4 Ka mihai i'n suoktir phal naw chun zînga hin in ramah khàu honpui ka hung intàmtir ding a nih. 5 Hnuoi hi inlang thei lo khopin dâp sip an ta, rielin a dêng hlum bàk thil tlawmte inla neihai le rama thing hna la um sunhai chu fa ram vong an tih. 6 Nang le i thoktuhai le i mihai inah sip vong an ta, chuong ang chu i pi le pu huna hi ram in hluo nia inthoka an la tong ngai lo thil nîng a tih' a tih" tiin an hril a. Mosie chu a nghakìr a, Faraw chu a suoksan ta a. 7 Faraw thoktuhai chun a kuomah, "Ieng chen top am hi pa hi ei ta dingin châng a'n chang ding a na? Hienghai hin LALPA an Pathien chu an chawibiek theina dingin infètir el rawh. Aigupta ram hi sukramin a um zo tah ti i la hriet naw a ni maw?" an ta. 8 Chuongchun, Mosie le Aron chu Faraw kuomah an hung thuoi nawk a, an kuomah, "Fe unla, LALPA in Pathien chu va chawibiek ro. Amiruokchu, tuhai am an na a fe ding chu?" a ta. 9 Mosie chun a don a, "LALPA kuoma kût hmang ding kan ni leiin kan rêngin a chin a lien, kan naunu le naupahai le kan ran ruol po po leh fêng kan tih" a ta. 10 Faraw chun, "Nunau le in ran ruol le ka'n fetir ding cheu a ni chun, LALPA Pathien chun umpui mol raw se cheu! Thil suol thaw tum in ni hlak chu a chieng bal sia le! 11 Chuong chu ni thei naw nih. In ngèn tah angin, pasal po fe unla, LALPA chu va chawibiek ro" a ta. Mosie le Aron chu Faraw kuoma inthok chun an hnot suok a. 12 Chun, LALPA chun Mosie kuomah, "I kut kha Aigupta chungah phar rawh, a ram phêka khâu honpui hung intàm a, rielin a dêng siet bâk a rama thlai po po an fâk ram vong theina dingin" a ta. 13 Chuongchun, Mosie'n a hmol chu Aigupta ram chunga chun a hang inlet a. LALPA chun sunnithlâk le zânkhawvarin chu rama chun sak thli a'n hràngtir a. A tûk zînga chun thliin khauhai chu a hung lèn lût hum hum a; 14 khauhai chun Aigupta an rûn a, a ram sûng hmun tinah an fu a, an tam êm êm el a. Chuong ang lawma khàu intâm nasa chu a hmain hriet a la ni ngai naw a, hriet ni nawk ta ngai bok naw nih. 15 Hnuoi an tuom sip vong leiin a ram phèkin a'n thim khup el a. Riel dêng siet bâk chu a rama thlai tinrêng le thei ra po po chu an fâk ram a, Aigupta ram chu thil inder hrim hrim hmu ding um loin a kol rît a. 16 Faraw chun inrang takin Mosie le Aron chu a'n kotir a, an kuomah, "LALPA in Pathien le nangni lakah thil suol ka thaw a. 17 Tu hin ka suolna hi mi ngâidam nawk hrâm inla, LALPA in Pathien kuomah hi hripui tium hi la hmang dingin mi ngènpêk ro" a ta. 18 Mosie chun Faraw chu a fesan a, LALPA kuomah a tongtai a. 19 LALPA chun sak thli chu thlang thlipui hrât takin a'n changtir a, khauhai chu Tuipui Senah a lèn lût vong a, Aigupta ramah khàu hlek khat khom a màksan nawh. 20 Amiruokchu, LALPAN Faraw lungril chu a sukkhauh leiin Israelhai chu a'n suoktir phal chuong nawh. 21 Chun, LALPA chun Mosie kuomah, "Vân tieng khin i kut hang phar rawh, Aigupta rama hin ieng lai khoma an la hriet ngai lo thimpui a hung inzir theina dingin" a ta. 22 Chuongchun, Mosie chun vân tieng kut a hang phar a, ni thum sûng zet Aigupta ram chu thimpuiin a'n khum a. 23 Tu khom an inhmu thei naw a, mani umna hmuna inthokin ni thum sûng chu an invàk suok thei bok nawh. Israelhai umna ruok chu a var vong thung a. 24 Faraw chun Mosie chu a'n kotir a, a kuomah, "Fe unla, LALPA in Pathien chu va chawibiek ro. Nunau khom an rêngin thuoi unla, in ran ruolhai ruok chu màksan ro" a ta. 25 Mosie chun, "LALPA kan Pathien kuoma kan inthawi theina dingin pumraw inthawinaa kan hmang dinghai chu chawi i mi phalpèk ding annawm. 26 Kan ran ruolhai chu keini leh an fe ngei ding a na, an tin hlek khom màksan ni naw nih. LALPA kan Pathien kan chawibieknaah a then hi kan hmang a ngai a, a hmun kan tlung hma chun ieng thil am hmangin LALPA chu kan chawibiek ding ti kan hriet si nawh" a ta. 27 Faraw lungril chu LALPAN a sukkhau tlat leiin anni chu a'n suoktir phal chuong nawh. 28 Faraw chun Mosie kuomah, "Ka hmu phâk loah fe hmang dai rawh! Ka hmaah hung inlang ta lo hrim hrim dingin fimkhur rawh. I hmel ka hmu nawk ni chu i thi ni ding nîng a tih" a ta. 29 Mosie chun, "I ti ang tak chun ni raw se. I hmaah hung inlang nawk ta ngai naw ning" a ta.

Exodus 11

1 LALPA chun Mosie kuomah, "Faraw le Aigupta chungah hripui dang ka la hung inlèngtir ding a nih. Chu zoa chun infètir a ti cheu a, a'n fètir pha cheu chu a hnotin a nih a hnot suok ding cheu. 2 Mihai kha hril la, a nuhmei a pasalin an tuolbawmhai kuomah tangkaruo le rangkachaka siem incheina thilhai chu hni raw hai se, " a ta. 3 Mihai chu LALPAN Aigupta mihai lunginsiet a'n hlawtir a; chun Mosie chu Aigupta rama Faraw thoktuhai le a mipuihaiin nasa takin an ngaisâng bok a. 4 Mosie chun, "Hieng ang hin LALPA chun a hril: 'Zân ril velah Aigupta ram sir suok ka tih. 5 Aigupta rama nau pasal pieng hmasa tak taphot, Faraw nau lutîr, lalthungphaa inthung laia inthoka bu rawtna lunga thok bawinu nau lutîr chen khom thi'ng an ta, ran chen khom a chal pieng hmasa tak chu thi vong bok an tih. 6 Aigupta ram chu tap inrûm riin sip a ta, chuong ang hrim hrim chu a hmain a la um ngai naw a, um nawk ta ngai bok naw nih. 7 Israelhai lai ruok chu uiin mi amanih ran amanih an inbau ri tak ngiel khom hriet ni naw nih. Chu pha chun LALPAN Aigupta mi le Israel mihai chu a thlier ngei a nih ti hre tàng in tih. 8 I thoktuhai po po hi ka kuomah hungin ka hmaah la bokkhup an ta, 'Fe ta rawh, nang le a zuituhai po po le hin' tiin mi la hung ngên an ta, chu pha chun suok ka tih" a ta. Chuongchun, Faraw kuoma inthok chun lungsen takin a suok a. 9 LALPA chun Mosie kuomah, "Aigupta ramah thil mak tam lem ka thawna dingin Faraw chun i thu ngàithlàpèk naw ni che" a ta. 10 Mosie le Aron chun chuong thil makhai chu Faraw hmaah thaw hai sien khom LALPAN Faraw lungril a sukkhau tlat leiin a rama inthokin Israelhai chu a'n suoktir nuom si nawh.

Exodus 12

1 Chun, LALPAN Aiguptaa chun Mosie le Aron a biek a, "Tuta thla hi in ta dingin thla hmasa tak nîng a ta, 2 kum khat sûnga thla in tiem tanna nîng a tih. 3 Hi thla ni sawmnaa hin sûngkuo tinin mani sûngkuo ta ding seng beram tuoi pakhat la chit dingin Israel thlahai po po hril rawh. 4 Chun, beram tuoi thatna khop ni loa tlawm sûngkuo an um chun an tuolbawmhai leh an sûngkuo tamzie ang peiin beram pakhat intlàng raw hai se. Mi tin fâk khop tawk ang peia hisapin beram tuoi that ding zât chu ruot ro. 5 Ran tuoi in thlang dinghai chu kum khata upa, hmel hem lo nîng a ta, kel amani beram amani laia mi a ni ding a nih. 6 Chu thla ni sawm le ni lina chen chu kol inta, chu zàn tieng thimbut chun Israel sûngkuo tinin in that seng ding a nih. 7 A thisen iemani zât làng in ta, chu chu a sa in fàkna in kotkhâr bieng chung le sîr ve veah in tàt ding a nih. 8 Chu zân lá là chun a sa chu meiah em hminin, chol thang lo bei le thlai hna kha leh in fâk ding a nih. 9 A selin fa naw unla, tuiin suong naw unla, a lu le a ke le a sûng thang vongin in em hmin ding a nih. 10 A zînga ding ieng khom hla naw ro; a tûk chena fâk bâng la um chu meiah raw hmang ro. 11 Chun, hieng ang hin in fâk ding a nih: thuom inbel sa diema pheikhok bunin, hmol chawiin, inhmaw takin fa ro, LALPA fekàn kût a ni si a. 12 "Chu zân ngei chun Aigupta ram fang ka ta, mihriem le sa, nau lutîr po po chu sukhlum ka ta, Aigupta rama pathienhai po po chu an chungthu rèlpêk ka tih; kei hi LALPA chu ka ni si a. 13 Thisen chu in ta dingin in umna inchikna nîng a ta, thisen ka hmuna taphot chu fe kân pei ka tih. Aigupta ka hrem ni chun nangni sukse thei hri rêng rèng inlèng ve naw nih. 14 "Hi ni hi theinghil loa in inser hlak ding ni, thang la hung thar peihai khomin LALPA ta dinga kût hmanga an inser kumkhuo ding chu a nih. 15 Ni sari sûng chu chol thang lo bei in fâk ding a nih. A ni hmasa takah chol hrim hrim ina inthokin in inthiel fai vong ding a nih. Tu khom hi ni sari sûnga chol thang bei fàtu chu Israel sûngkuo laia inthokin in thlauthlàk ding a nih. 16 A ni hmasa tak le a tawpna takah inkhawmna hun ser in nei ding a nih. Hi ni hin mani fâk siem ti chauh naw chu sin dang hrim hrim in thaw ding a ni nawh. 17 "Chol Thang lo Bei Kût hi in inser ding a nih, chu ni ngei chun Israel mipuihai chu Aigupta rama inthokin ka thuoi suok a nih. Thangthar peihai khomin dâna neiin hi ni hi an inser hlak ding a nih ti hi kumkhaw thupêk a nih. 18 A thla hmasa tak ni sawm pali zân tienga inthoka ni sawmhni pakhat zân tieng chen chol thang lo bei in fâk ding a nih. 19 Ni sari sûng chu in inah chol hrim hrim a um ding a ni nawh. A rama pieng le mikhuol tukhom chol thang bei fâtu chu Israel sûngkuo laia inthokin in thlauthlàk ding a nih. 20 Chol thanga siem ieng khom fa naw ro. Khaw lai khom um inla, chol thang lo bei in fâk ding a nih' tiin hril rawh" a ta. 21 Mosie chun Israel upahai chu a ko khawm vong a, an kuomah, "Fe vat unla, in sûngkuo tin ta ding beram tuoi va thlang unla, Fekân Kûta ding beramte chu that ro. 22 Husop kau thliek unla, maihùna beramte thisena chun phum unla, in kotkhâr chung le bieng ve veah thisen chu tât seng ro. A tûk khuo a var hma chun tu khom mani ina inthokin suok naw ro 23 LALPAN Aigupta mihai hrem dinga a ram a hung fang pha, in kotkhâr chung le bieng intona thisen kai chu hmung a ta, fe kân a ta, sukhlumtu chu nangni sukhlum dinga a hung lût phal naw nih. 24 "Ka thupêkhai hi nang le i thlahaiin in hung zawm kumkhuo ding a nih. 25 LALPAN pêk a tiem cheu ram in lût pha khom hi ni hi inser hlak ro. 26 In nauhaiin, "Hi ni in inser hin ieng am in ta dingin umzie a nei a?" tia an indon pha che chun, 27 'Hi hi LALPA Fekân leia inthawina a nih, ama chun Aigupta mihai a sukhlum lai khan kan inhai fekânin ami hlà a, Aigupta rama Israel nauhai in chu a hung fe kân pei lei a nih' tiin in hril tawl ding a nih" tiin. Chu zoah mipui chun kûnin Pathien an chawibiek a. 28 Mosie le Aron kuoma LALPAN thu a pêk ang charin Israelhai chun an thaw a. 29 Zân rila chun LALPAN Aigupta rama nau lutîr po po, lalthungphaa inthung Faraw naupaa inthoka rip sûnga intâng nau lutîrhai le ran pieng hmasa tak po po chenin a sukhlum ta vong a. 30 Faraw chu a thoktuhai po po le Aigupta mi po po le chun zânah an tho a, Aigupta chu lusun tap riin a sip a, mithi um nawna in hrim a um si nawh. 31 Faraw chun Mosie le Aron chu a zân a zânin a'n kotir a, an kuomah, "Tho unla, nangni le Israel thlahai po po hi ka mipuihai laia inthok hin suok ro. In mi hni ang khan fe unla, LALPA chu va chawibiek ro. 32 In ti ang khan, in ran ruolhai khom thuoi unla, fe ta ro. Chun, mal mi sawm bok ro" a ta. 33 Aigupta mihai chun Israelhai kuomah, "In suok vat naw chun kan thi fai zo hman ding a nih" tiin an ram suoksan inhmaw dingin an nor a. . 34 Chuongchun, mihai chun an bei hmet lai khom chu chol pol hman loin, an hmetna thlêng le chun puonin an fûn a, liengkoah an inchuon a. 35 Mosien a hril tawl ang khan Israelhai chun Aigupta mihai chu tangkaruo le rangkachaka siem incheina thilhai le silfènhai chu an hni a. 36 LALPA chun anni chu Aigupta mihai lunginsiet a'n phurtir a, an hní hnì an pêk a; chuong ang chun Aigupta mihai thil chu an rokpèk tah a nih. 37 Israel thlahai chun Ramases khuoa inthokin Sukoth an tlung a, naupang tiem loin, puitling, kea lawn ringot khom nuoi ruk lai an nih. 38 Anni ruol chun hnam dang mi tam tak an fe ve a, beram ruol le bawng ruol an som teu bok a. 39 Aiguptaa inthoka chol thang lo bei hmet sa an chawihai chun chol thang lo bei an siem a. An bei hmeta chol an pol hman nawna san chu inhmaw taka hnaw suoka an um lei a nih, an fâk ding buotsaina hun takngiel khom an nei hman si nawh. 40 Aigupta rama Israel thlahai an um sûng chu kum zali le sawmthum a nih. 41 Kum zali le sawmthum an voi ni charin LALPA mihai chun Aigupta ram chu an suoksan ta vong a nih. 42 Chu zân, Aiguptaa inthoka a thuoi suok zân chun LALPAN a vêng zing tawl angin, hi zân hi inserin, Israel mi po po chun, suon la hung pei ding chena khom, LALPA chawimawi dingin an meng khawvar ve ding a nih. 43 LALPA chun Mosie le Aron kuomah, "Fekân Kût in hmang dàn ding chu hieng ang hin a nih: Hnam dang mihan kût sa hi an fâk ve ding a ni nawh. 44 Amiruokchu, tangkaa bawi in inchawk tah, ser in tanpèk tahai ruok chun fa thei an ta, 45 mikhuol lènglak le sinthawa mi in sorhai ruok chun fa thei naw ni hai. 46 In insûng ngeiah in fâk ding a nih; puo tieng chawi the phal a ni naw a, a ru in suktliek ding a ni bok nawh. 47 Israelhai po poin chu ni chu an inser ding a nih. 48 Nangni laia chêng ram dang miin LALPA Fekân Kût hmang ve an nuom chun an sûngkuoa pasal poin ser an intantir ding a nih; chuonga an thaw chun a rama pieng ang thoin thang ve thei an tih. Sertan lo tu khomin kût sa an fâk ding a ni nawh. 49 Chu dàn chun a rama pieng le ram dang mi, nangni laia khawsahai khom a huop vong a nih" a ta. 50 LALPAN Mosie le Aron a hril ang takin Israel thlahai po po chun an thaw a. 51 Chu ni chun LALPAN Israel thlahai chu Aigupta rama inthokin a thuoi suok tah vong a nih.

Exodus 13

1 LALPA chun Mosie kuomah, 2 "Mihriem a ni leh nau pasal, ran a ni leh a chal pieng hmasa tak chu ka kuomah hung inhlan pei rawh; Israel thlahai laia mi sul nêr hmasa tak chu ka ta a nih" a ta. 3 Chun, Mosie chun mipuihai kuomah, "Voisun, bawia in intàngna laka LALPA kut hrâta Aigupta rama inthoka a thuoi suokna cheu ni hi in inser hlak ding a nih. Hi ni hin chol thanga siem bei hrim hrim in fâk ding a ni nawh. 4 Voisun, Abib thlaa hin in suok a ni hih. 5 Kanan mihai, Hit mihai, Amor mihai, Hiv mihai le Jebu mihai ram hluo, khuoizu le nenetui luongna, in thlatuhai kuoma inkhâm meua pêk a tiem ramah LALPAN a thuoi tlung pha cheu chun hi ni hi tuta thlaa hin in inser hlak ding a nih. 6 Ni sari sûng chu chol thang lo bei in fâk ding a nih. A ni sarina chu LALPA ta dinga kût a ni ding a nih. 7 Ni sari sûng chun chol thang lo bei in fâk ding a nih. Chol thanga siem thil hrim hrim nangni lai a um ding a ni nawh. In umna taphotah chol a um ding a ni bok nawh. 8 Chu ni chun in nauhai kuomah, 'Aigupta rama inthoka kan suok lai khan LALPAN thil a mi thawpèk leiin hi ni hi kan inser a nih' tiin in hril ding a nih. 9 LALPA dàn chu in bauah a um zing theina dingin, hi thil inser hi in kutzie ang le in chalmit inkâra inchikna angah ngai ro. LALPA kut hrâtin Aiguptaa inthokin a thuoi suok ta si cheu a. 10 Hi dàn thu hi zawmin kum tin kût hi a hun takah in hmang zie hlak ding a nih. 11 "Chun, in pi le puhai kuoma inkhâm meua pêk a tiem Kanan ramah LALPAN thuoi lûta a tiem ram a pêk pha cheu chun, 12 in rila ra hmasa tak pasal taphot chu LALPA kuomah in inhlàn ding a nih. In ran laia a chal pieng hmasa tak khom LALPA kuomah in inhlan bok ding a nih. 13 Sabengtung chal pieng hmasa tak chu beramtein in intlan ding a nih. In intlan nuom naw chun a ring in suktliek ding a nih. In nau lutîr pasal taphot chu in intlan bok ding a nih. 14 "Chun, hi hnung peiah i nauhaiin, 'Hi thil umzie hi iem a na?' tia an hung indon pha che chun a kuomah, 'LALPA kut hrâtin bawia kan intàngna Aigupta rama inthokin a mi thuoi suok a. 15 Lulul taka Farawin mi chàr dè a tum tlat laiin, LALPAN Aigupta rama nau lutîr po po, a mihriem a sain, a sukhlum vong a. Chuleiin ran laia a chal pieng hmasa tak phot LALPA kuomah inhlân a, kan naupasal pieng hmasa tak phot kan intlan hlak chu nih. 16 Chu chu i kutzie le i chalmit inkâra inchikna ang el khan LALPA kut hrâtin Aiguptaa inthoka a mi thuoi suokzie inchikna a nih' tiin hril hlak rawh" a ta. 17 Farawin mihai a'n suo khan Filistinhai ram tieng chu lam hnaina lem ni sienkhom Pathienin chu tieng chun a thuoi nawh. Pathienin "Indona an tuok pal chun insîr an ta, Aigupta ram tieng kîr nawk hlauh rawi an tih" a ti lei a nih. 18 Chuongchun, mipuihai chu Tuipui Sen tieng panin thlaler lamah Pathienin a thuoi a, indo dinga inrâlring zingin Aigupta rama inthokin Israel thlahai chu an inthok suok tah a nih. 19 Josefan, "Pathienin a la hung kan nawk ngei ngei ding cheu a na, ka ruhai chu hi taka inthok hin in zawn tung ding a nih" tia Israel thlahai a'n cha anga thaw dinga thu inkhâm meua a lo intiemtir tah angin, Mosie chun Josefa ruhai chu a hawn tung a. 20 Sukot-a inthok chun an fe pei a, thlaler tontira khuo Ethama chun riebûk an khuor a. 21 Sùn le zàna an inzin theina dingin LALPA chun sùnah sûm lawnin an hma a thuoi a, zânah mei lawnin an lampui a el var bok a. 22 An hma thuoitu sùna sûm lawn le zâna mei lawn chun mipui chu a fesan ngai hrim hrim nawh.

Exodus 14

1 Chun, LALPA chun Mosie kuomah, 2 "Israelhai hi kîr nawk dingin hril la, Migdol le Tuipui inkâra Pi-hahiroth kawl, Baâl Zefon ep chie tuipui kama chun riek raw hai se. 3 Faraw chun lungrilin, 'Israelhai chu thlaler huol vel ram palailakah chi-ai takin an intàng an tah' ting a ta. 4 Keiin Faraw lungril chu sukkhauh ka ta, hung hnot a ti cheu a, Faraw le a sipaihai hmangin keiin chawimawina chang ka ta, Aigupta mihai chun LALPA chu ka nizie hung hre tàng an tih" a ta. Israelhai chun a hril ang tak chun an thaw a. 5 Israelhai an tlân suok vong tah ti Aigupta lal an hril chun, Faraw le a thoktuhai chun an lungril an thlàk a, "Ieng am a na ei thaw ta hi? Israelhai ei insuoktir ringot hi, tuin am ei rong bawl tàng a ta?" an ta. 6 Chuongchun Faraw chun a tawlailir a'n buotsaitir a, a sipaihai chu a thuoi a. 7 Aigupta mihai tawlailir bàkah a tawlailir laia a tha tak vong zaruk le tawlailir khal thiem thlanghai le chun an hnot a. 8 Ngam taka suok Israelhai chu hnot zui dingin LALPAN Aigupta lal Faraw lungril chu a sukkhauh a nih. 9 Faraw sakor tawlailir le a khaltuhai le Aigupta sipaihai chun Israelhai chu Baâl Zefon ep Pi-hahiroth bul tuipui kama an riek lai chu an va hnot phàk a. 10 Farawin a hung hnot lai chun mipui chu an hang ngha a, Aigupta mihaiin an hung hnot phâk el ding a nih ti an hmu chun, thlabârin LALPA an ko khèk a. 11 Mosie kuomah, "Aigupta rama khan thlàn ding a um naw leia thlalera hin thi dinga i mi thuoi a lo ni maw? Ieng leia hienga mi thaw dinga Aigupta rama inthoka i mi thuoi suok? 12 Aigupta rama khom khan, 'Mi chokbuoi ta naw rawh. Keini chun Aigupta mihai rong hi bawl el kan tih' tiin kan hril che an naw maw? Thlalera thi hlol nêkin Aigupta mihai rong kha lo bawl inla a tha lem awm vei leh!" an ta. 13 Mosie chun mipui chu zâp deiin, "Ti naw ro. Ngîr nghet unla, voisuna LALPAN sansuokna a hung intlunpèk ding cheu hi thlîr ringot ro. Voisuna Aigupta mi in hmuhai hi hmu nawk ta ngai naw ti niu. 14 LALPAN dopèk a ti cheu; ngàingam takin um tok tok ringot ro" a ta. 15 LALPA chun Mosie kuomah, "Ieng dinga i mi ko khêk am a na? Israelhai kha hma tieng pan pei dingin hril rawh. 16 I hmol kha chawi la, tuipui chungah inlet la, hnuoi chàra Israelhaiin tuipui hi an kàn theina dingin, tuipui hi inthe raw se. 17 Aigupta mihaiin an hnot zui theina ding cheuin an lungril sukkhauh ka ta, Faraw le a sipaihai, a sakor tawlailirhai le a sakor chungchuong mihai lakah chawimawina hmùng ka tih. 18 Faraw le a sakor tawlailirhai le a sakor chungchuong mihai laka chawimawina ka hmu pha leh Aigupta mihai chun LALPA chu ka nizie hre tàng an tih" a ta. 19 Israelhai hmaa fe Pathien vântirko chu an hnung tieng a'n son a, sum lawn khom chu an hmaa inthoka insonin an hnung dàlah a thang a, 20 Aigupta mihai le Israel mihai inkâra chun a hung tla a. Zân khuoin sum lawn chun Israelhai umna tieng chu a el var a, Aigupta mihai umna tieng chu a hlie thim leiin zânkhuoin an hung pan hnai thei nawh. 21 Chun, Mosien tuipui chunga chun kut a phar a, LALPAN zânkhuoin khaw sak thli hrât takin tuipui chu a'n nam kîrtir a, tuipui chu a hung intan a, tuipui tuong chu hnuoi chàrah a hung inchang el tah a. 22 An chang tieng le voi tieng bang anga tui ngîr khup kâra chun Israelhai chun tuipui chu hnuoi chàrah an fe kai a. 23 Aigupta mihai chun hnot peiin, Faraw sakor hai, a tawlailirhai le a sakor chungchuong mihai chun tuipuiah an hnot lût a. 24 Khawfingchat vela chun LALPAN mei le sum lawn chunga inthokin Aigupta mihai chu a zuk en a, a sukbuoi ta nuoi nuoi a. 25 An tawlailir kehai a sukthlongpêk a, an fe dukdak thei ta naw a. Aigupta mihai chun, "Israelhai tieng LALPA a thang a, a mi do a ni hi! Inrang takin kîrsan ei tiu" an ta. 26 LALPA chun Mosie kuomah, "Aigupta mihai hi an tawlailir le an sakor chungchuonghai leh tuiin a chim pil tawlna dingin i kut kha tuipui chungah phar rawh" a ta. 27 Mosie chun tuipui chungah kut a phar a, khuo a var charin tuipui chu a pangngaiin a hung inmat nawk a. 28 Aigupta mihai chun tlàn suok an tum a, sienkhom LALPAN tuipuiah a'n lèn lûttir ta vong a. Tuipui a hung a luong inmat nawk chun, tawlailir le sakor chungchuonghai po po le tuipuia Israelhai hnot lûttu Faraw sipaihai po po chu a chim pil ta vong a, pakhat khom an suok nawh. 29 Israelhai ruok chun hnuoi chàrah tuipui chu an fe thleng a, an voi le changah tui bang insi khup chu a ngîr a. 30 Chu ni chun Israelhai chu LALPAN Aigupta mihai kuta inthokin a sansuok a, tuipui kama Aigupta mi thihai ruong zâl thluk chu an hmu a. 31 Aigupta mihai chunga LALPA thilthaw ropui tak chu Israelhai chun an hmu a, mipuiin LALPA chu an ti a, LALPA le a siehlaw Mosie chu ringsanah an nei ta a.

Exodus 15

1 Chuongchun, Mosie le Israelhai chun LALPA chawimawiin hi hla hi an sak a:"LALPA inpâkna hla sak ka tih, Ropui takin a hne ta si a; Sakor le a chunga chuonghai chu, Tuipuiah a pei thlâk tah. 2 LALPA chu ka hrâtna le ka hla, Mi sandamtu a hung ni tah. Ama chu ka Pathien a na, Ama chu inpâk ka ta, Ka thlatuhai Pathien a na, Ama chu chawimawi ka tih. 3 LALPA chu râlhrât a na, A hming khom LALPA a nih. 4 Faraw tawlailirhai leA sipaihai po po chu, Tuipuiah a pei thlâk tah. A hotu suongtawlolhai, Tuipui Senah an pil vong. 5 Tuiin a chìm pil vong a, Lungtum thlâk ang vang vangin, Li rilah an pil hmang tah. 6 LALPA, i kut chang tieng chu, Thilthawtheinan a sip a, LALPA, i kut chang tieng chun, Hmelmahai i pot nawi vong. 7 I lalna ropui tak chun, Nangma khingtuhai che chu, I pei thlâk tawl ta vong a, I lungsenna puok dar chun, Anni chu bu pawl angin, A kàng hmang vong ta si a. 8 I hnâr i hang hnawt meu chun, Tui a hung intieng thûr a, Tuifawn insawk lai hai khom, Bang angin an ngîr khup a, Lipui rila tuihai khom, An inkhal zo tah a nih. 9 Hmelma chun chapo takin, 'Hnot thlûrin hnot khûm ka ta, Ka râllâkhai chu semin, Ka du tawkin chèn ka ta, Ka kawlhnâm chu phawi suokin, Ka kut ngeiin anni chu, Sukbohmang ka tih' a tih. 10 Sienkhom thuoka i mût chun, Tuipuiin a chim pil tawl a, Tuia suon tum thlâk angin, Tuipuiah an pil vang vang. 11 Aw LALPA, nang ang hrim hi, Tu pathien am an um a?Thienghlimna tienga ropui, Ropuina tienga râpum, Thil mak ropui tak thaw hlak, Tu hrim am um tàng an ta? 12 I kut chang tieng i phar a, Hnuoiin a lem zo tawl tah. 13 I hmangaina chuoi lo chun, I'n tlansahai i thuoi a, I hmun thienghlim tlung chenin, I hrâtnan thuoi pei i tih. 14 Hnam danghan an hriet pha chun, Tiin inthin hawp an ta, Filistin mihai khom chu, Thlaphangnan man tawl a ta, 15 Edom lalhai chi-aiin, Moab hotuhai khom chu, Inthinnan man tawl a ta; Kanan rama chênghai khom, Intui ral zo vong an tih. 16 Titna le thlaphangnaha'n, Anni chu tlâkbuok a ta, I bân tha hrât an hmuin, Lung angin inchang an tih, Aw LALPA, i mihaiin, I'n chawk sa i mihaiin, Chu hmun an fe thleng chenin. 17 Anni chu hung thuoi lûtin, I ro hluo tlânga ngei chun, Anni chu la phun i ta, Chu hmun chu chêngna dinga, Aw LALPA i siem a na, A hmun thienghlim khom LALPA, I kuta i'n din a nih. 18 LALPA chun ro rêl a tih, Chatuon a'nthok chatuon chenin"tiin. 19 Faraw sakor hai, tawlailir hai le sakor chungchuong hai chu tuipuia an lût zoin LALPAN tui chu a hung inluong kîrtir a, Israelhai ruok chun hnuoi chârah tuipui chu an fe thleng a nih. 20 Chun, zawlnei Miriam, Aron farnu chun khuongte a chawi a, a hnunga chun nuhmei po poin khuongte chawiin an zui a, an làm a. 21 Miriam chun hi hla hi a sakpèk a: "LALPA inpâkna hla sak ka tih, Ropui takin a hne ta si; Sakor le a chunga chuonghai, Tuipuiah a pei thlâk tah"tiin. 22 Mosie chun Israelhai chu Tuipui Sena inthok chun Sur thlalerah a thuoi a, ni thum zet an inzin sûngin tui hrim an hmu nawh. 23 Mara hmun an hung tlung a, tui chu a kha leiin an dawn thei naw a, chu leia chu hmun chu Mara ti an inbùk a nih. 24 Mipui chun Mosie kuomah, "Iem a na ei dawn ta ding?" tiin a chunga chun an chier a. 25 Mosie chun LALPA a ko a, ama chun thing pakhat hi a kawkhmu a, chu chu tuiah a zuk dêng lût a, tui chu a hung inhnik ta a. Chu hmuna chun LALPAN thupêk le dânhai a siempêk a, anni chu a fie bok a. 26 "LALPA in Pathien rawl fimkhur taka ngâithla a, a mit hmua thil indik thaw a, a thupêkhai le a dânhai in poisa chun, Aigupta mihai chunga hremna hri ka'n lèngtir ang kha nangni chunga chu inlèngtir ve naw ning; kei hi LALPA, a sukdamtu cheu chu ka ni si a" a ta. 27 Chun, tui hnar sawm le pahni le tûm thing sawmsari umna Elim chu an tlung a, chu hmuna chun tuikhur bulah an riek a.

Exodus 16

1 Israel mipui po po chu Elim hmuna inthok chun an suok a, Aigupta ram an suoksana inthoka thla hnina ni sawm le pangaa chun Elim le Sinai inkâra um, Sin thlaler chu an tlung a. 2 Israel mipui chu thlalera chun Mosie le Aron chungah an chier a. 3 Israelhai chun an kuomah, "Aigupta ramah sa bêl bulah thung a, du tawka bei ei tlàn lai khan LALPA kutah lo thi ta lem inla a that awm vei leh, hi thlaler hmuna hin pungkhawmhai po po hi phingtâma thi dingin in mi thuoi suok a lo ni hi tie!" an ta. 4 Chuongchun LALPAN Mosie kuomah, "In fâk ding vâna inthokin bu ka'n sûrtir ding a nih. Mitinin an ni khat tlâk pei chauh rût raw hai se. Chuong ang chun ka thupêk an zawm le zawm naw hang fie tawl ka tih. 5 A ni ruknaa ruok chu an ni hni tlak rûtin an siem ding a nih" a ta. 6 Mosie le Aron chun Israelhai kuomah, "Aiguptaa inthoka thuoi suoktu cheu hi LALPA a nizie zàn tieng hin hrieng in tih. 7 Chun, zîng tieng leh LALPA ropuizie hmung in tih, a chunga in chierna thu chu a hriet ta si a. Keini hi ieng telul am kan na, in mi chier khum chu?" an ta. 8 Mosie chun, "LALPAN zàn tieng sa le zîng tieng bu a pêk cheu in hmu pha chun a thawtu chu LALPA a nih ti hre tàng in tih, a laka in chierna kha a lo hriet ta si a. Keini hi tu am kan ni a? Keini laka chier ni loin Pathien laka chier in ni lem" a ta. 9 Chun, Mosie chun Aron kuomah, "Israel pungkhawmhai kuomah, 'LALPA hmaah hung ro, in chierna kha a hriet ta si a' tiin hril rawh" a ta. 10 Aronin Israel mipuihai kuoma thu a hril lai chun, thlaler tieng an hei thlîr a, LALPA ropuina chu sûmah a hung inlang a. 11 Chun, LALPAN Mosie chu a biek a, 12 "Israelhai chierna kha ka lo hriet; an kuomah, 'Zànbuah sa fàng in ta, a tûka ruok chu tlai takin bu fa tâng in tih. Chuongchun, kei hi LALPA in Pathien chu ka nih ti hrieng in tih' a tih tiin hril rawh" a ta. 13 Zàn tieng chun an riekbûk tuom khopin vamim an hung vuong lût ta hum hum a; zîngkar chun an riebûk vela chun daidaw a lo tla dup el a. 14 Daidaw a hang hul chun thlaler hnuoi chunga chun thil biel inpèr chik té tè, daidaw khal ang el chu a bang uoi el a. 15 Chu chu Israelhaiin an hmu chun, "Hi hi iem a na?"f an ta, iem a nih ti an hriet si nawh. Mosie chun an kuomah, "In fâk dinga LALPA bei pêk cheu a ni hi. 16 Hi hi LALPA thupêk chu a nih: Mi tinin mani mamaw tawk peiin in rût khawm ding a nih. In puon ina chêng mi pakhat pei ta dingin litar hni pei in rùt ding a nih" a ta. 17 A hril ang chun Israelhai chun an thaw a, a rût teuh an um a, tlawmte rùt an um bok a. 18 Noa an inkhi pha a rût tamin a hau bìk naw a, a rût tlawmin a chang tlawm chuong bìk bok nawh. Mi tinin mani khop tawk seng an rût a. 19 Chun, Mosien an kuomah, "Tu khomin a zînga fâk dingin khêk naw ro" a ta. 20 Amiruokchu, thenkhatin an poisa naw a, a zînga dingin an sie a, sienkhom a lo innge vong a, a rim a se êm êm a, chuleiin an chungah Mosie lung a sen hle a. 21 Tûk tin mani fâk khop tawk chauh an rût ta seng a, nisa a hung insâng pha leh a'n tui ral vong hlak. 22 A ni ruk nia ruok chu a lêt hnia tam, mi pakhatah litar li pei an rût a, chu chu khawtlâng hotuhai chun Mosie kuomah an hung ripawt a. 23 Ama chun an kuomah, "Hi hi LALPA thupêk chu a nih: 'Zînga chu LALPA Chawlni thienghlim, Sabat a ni leiin chawlna ni ding a nih. Chuleiin, beia zeu nuomin zeu unla, a suonga suong nuomin suong ro. In fâk mahla chu zînga dingin hla ro" a ta. 24 Mosie hril ang chun a zînga ding khom an hla a, sienkhom a thûm naw a, a'n nge bok nawh. 25 Mosie chun an kuomah, "Voisun chu hi hi fa ro. Voisun hi LALPA ta dingin Sabat a na, tuolah rùt ding um naw nih. 26 Ni ruk sûngin tûk tin rût in ta, a ni sari ni ruok chu Sabat a ni leiin rût ding ieng khom um naw nih" a ta. 27 A ni sari ni chun mi thenkhat chu rût dingin an suok a, amiruokchu rùt ding an hmu nawh. 28 Chun, LALPA chun Mosie kuomah, "Ieng chen am ka thupêk le ka dânhai hi poisa loin in um ding a na? 29 En ta, LALPA chun chawlni a pêk cheu a, chuleiin a ni ruk niah ni hni ring bu a pêk cheu a nih. Mi tin in umnaah um tok tok unla, a ni sarinaa chu tukhom suok dok naw ro" a ta. 30 Chuongchun, mipuihai chu a ni sarinaa chun an chawl a. 31 Israel sûngkuohai chun chu thil chu manna tiin an ko a. Maruoi mu anga vâr sar el a na, hang fâk chun beipèra khuoizu nàl ang a nih. 32 Mosie chun an kuomah, "Hi hi LALPA thupêk chu a nih: Manna omer khat la unla, suon la hung thar pei dinghai khoma Aigupta rama inthoka ka thuoi suok lai cheua thlalera fâk ding bu ka pêk cheu hi an hriet zing theina dingin, sie tha ro" a ta. 33 Mosie chun Aron kuomah, "Bel chawi la, a sûngah manna litar hni thun rawh. Chu chu Pathien hmaah suon la hung thar pei ding chena vong dingin LALPA hmaah sie rawh" a ta. 34 LALPAN Mosie kuoma thu a pêk angin, manna chu vong zing dingin Aron chun Thuthlungna hmaa chun a sie a. 35 Israelhai chun mihriem chêngna ram, Kanan ramri bul an tlung chenin manna chu kum sawmli sûng an ring a nih. 36 Chuong laia bu inkhinaa an hmang tak chu efa a na, chu chu litar sawmhni tluk a nih.

Exodus 17

1 Israelhai chu Sin thlalera inthok chun LALPA thupêk angin hmun dang dangah an inson pei a, Refidim-ah riebûk an khuor a, sienkhom chu taka chun mipui dawn ding tui a um si nawh. 2 Mipuihai chun Mosie kuomah, "Dawn ding tui mi pe rawh" an ta. Mosie chun an kuomah, "Ieng dinga kei in mi mawsiet am a na? Ieng dinga LALPA in fie?" a ta. 3 Mipui hlak chu an dang a châr si leiin Mosie chungah an chier a, "Ieng dinga keini le kan nauhai le kan ran ruolhai hi thlalera dangchâra thi ding hin Aigupta rama inthokin i mi thuoi suok am a na?" tiin an suosal a. 4 Chuongchun, Mosie chun LALPA a ko a, "Hi mihai hi ieng am ka law ding a na? Lungin an mi dêng têp a ni ta si a" a ta. 5 LALPA chun Mosie kuomah, "Mipuihai hmaah Israel upahai kha thuoi la, Nile vadung i vuokna hmol kha chawi bok la, fe rawh. 6 Horeb-a lungpui chunga son i hmaah lo ngîr ka ta, lungpui chu vaw la, mipui dawn ding tui hung suok el a tih" a ta. Chuong ang chun Israel upahai mit hmuah Mosie chun a thaw a. 7 Chu hmun hminga chun Massa le Meribag a'n bùk a, Israelhaiin ama chu inhalpui a, "LALPA chu eini lai a um tak tak meu am um tak tak naw" tia an fie lei a nih. 8 Refidima an um lai chun Amalek mihaiin Israelhai chu an hung bei a. 9 Mosie chun Josua kuomah, "Eini laia mi iemani zât thlang suok la, Amalekhai chu va bei ro. Zîngah tlâng sîpa khin Pathien hmol hi chawiin lo ngîr ka tih" a ta. 10 Mosie thupêk angin Josua chun Amalek mihai chu a va do a, Mosie le Aron le Hur chu tlâng sîpa chun an kai tung a. 11 Mosien bân a phar sûng po chun Israelhaiin an hne a, a bân a lâk thlàk pha leh Amalek mihai chu an hràt ve thung a. 12 Mosie bàn a hung kham chun lung an va lâk a, chu chunga chun a thung a, a bân chu a phar zing theina dingin Aron le Hur chun a bân khing tieng ve vea thangin nisa tlàk chenin an dompui a. 13 Chuong ang chun Josuain Amalek sipaihai chu kawlhnâm hmangin a tukdol tah a nih. 14 Chun, LALPA chun Mosie kuomah, "Hi thu hi hriet zing dingin lekhabuah ziek thla la, Amalek mihai hi vân hnuoi mi tu khom hriet ta lo dingin ka nuoi bo ding a nih ti Josua ngei khom hril rawh" a ta. 15 Chu hmuna chun Mosien maichàm a siem a, a hmingah Jehova Nissih a'n bûk a. 16 Ama vèkin, "LALPA lalthungpha tieng kut ka phar ta si a. LALPA chun suona inthoka suon nawk peiah Amalek mihai chu do tâng a tih" a ta.

Exodus 18

1 Mosie tarpu Jethro, Midianhai thiempu chun Mosie le a mi Israelhai chunga Pathienin thil a thawpèk le Aigupta rama inthoka a hung thuoi suok dàn chanchin po po chu a lo hriet ve a. 2 Mosien a nuhmei Zipora le a naupahai pahnih a tir kîr khan a tarpu Jethro chun a lo umpui a. 3 Mosie chun a naupa upa lem hmingah Gersom a sak a, chu chu 'Ram dangah mikhuol ka lo ni tah' tina a nih. 4 Chun, a naupa dang hmingah Eliezar a sak a, chu chu "Ka thlatuhai Pathien chu mi thangpuitu a na, Faraw kawlhnâma inthoka mi sansuoktu a nih' tina a nih. 5 Mosie tarpu Jethro chun Mosie nuhmei le naupahai chu thlalera Pathien tlâng kawla Mosie riebûk khuorna hmuna chun a hung thuoi a. 6 Jethro chun Mosie kuomah, "Kei, i tarpu hi i nuhmei le nauhai thuoiin ka hung ding a nih" tiin thu a thon lawk a. 7 Mosie chun a tarpu chu a lo va hmuok a, kûnin chibai a bûk a, a fawp a. An inchibai hnung chun puon inah an lût a. 8 Mosie chun Israelhai leia Faraw le Aigupta mihai chunga LALPA thilthaw dàn chanchin le an inzinna lampuia harsatna an tuokhai le LALPAN a san suok pei dànhai iengkim chu a tarpu chu a hril vong a. 9 LALPAN Aiguptahai kuta inthoka Israelhai a sansuok dàn le an ta dinga thil tha a thawpêk dàn chanchin lawmum po po chu a hrietin Jethro chu a lawm hle a. 10 Jethro chun, "Aigupta mihai le Faraw kuta inthoka sanhimtu cheu le Aiguptahai thu hnuoia inthoka Israelhai sansuoktu LALPA chu inpâkin um raw se. 11 Tu hin LALPA chu pathien dang po po nêka ropui lem a nih ti ka hriet tah, chuong thilhai chu chapo taka Israelhai nghaisatuhai chunga a thaw a ni si a" a ta. 12 Mosie tarpu Jethro chun Pathien kuomah pumraw thilhlàn le inthawina dang dang a'n hlân a. Aron le Israel upahai po po chu Pathien hmaa Mosie tarpu inthawina ruoi chu kîl dingin an hung a. 13 A zînga chun Mosie chu mipuihai ro rêlpêk dingin a thung a, zîng tienga inthoka zàn tieng chenin mipuiin an ngîr ngha tuou el a. 14 Chuonga mipuihai ta dinga thil a thaw po po a tarpuin a hmu chun, "Mipuihai hi iem a na i thawpèk tak chu? Ieng leia nang chauh rorêltua thang a, zîng tienga inthoka zàn tieng chen mipuiin an ngîr huol che am a na? " a ta. 15 Mosie chun, "Mipuihai hi Pathien rawn dinga ka kuoma hung an nih. 16 Thubuoi an nei pha leh ka kuomah an hung intlun a, an thu ka lo rèlpèk a, Pathien thupèk le dànhai ka lo hril tawl bok a" a ta. 17 Mosie tarpu chun, "I thilthaw dàn hi a tha nawh. 18 Nang le a hung pantuhai che in insukchàu mei mei lem ding a nih. Hi sin hi i ta dingin a rik taluo a, makhàt chaua hang tlin ruol a ni nawh. 19 Ka thu hi ngâithla la, rem ruotpui ka ti che a, Pathienin malsawm a ti che. Nang chu Pathien hmaa mipui aiawtuah thang la, an thubuoihai chu Pathien kuomah intlun rawh. 20 Thupèk le dànhai chu inchûktir i ta, an um dàn ding le an thaw dàn dinghai chu i kawkhmu pei ding a nih. 21 Amiruokchu, anni laia mi hmang tlâk, Pathien ti mi, mi ringum, hlawkna indik lo theida mihai chu thlang suok la, chuonghai chu sâng ruol, za ruol, sawmnga ruol le sawm ruol chunga dâm hotuah ruot rawh. 22 Chuonghai chun ieng lai khomin mihai ro chu rèlpèk hai sien, thu lien tham deu chauh i kuomah hung put lût hai sien, thu chîn tham chu anniin rêl vong raw hai se. Chu chun i phur nasa takin hung zâng a tih, an phurpui ding che a ni leiin. 23 Chuong anga i thaw a, Pathien khomin thaw dinga a ti a ni chun, hung tlin thei tàng i ta, mipuihai khom lungawi takin mani in tieng inlawi thei tàng an tih" a ta. 24 Mosie chun a tarpu thu chu a ngâithlâk a, a hril ang takin iengkim a thaw a. 25 Israelhai laia mi hmang tlâkhai chu a thlang khawm a, mipuihai hotua dâm, thoktuhai hotua dâm, a sâng ruol, zanga ruol, za ruol, sawmnga ruol le sawm ruol chunga dâm hotuah a sie a. 26 Chuonghai chun ieng lai khomin mipuihai chu ro an rêlpèk a, thu lien tham deuh chu Mosie kuomah an hung intlun a, thu chîn tham ruok chu anniin an rêl ta vong a. 27 Mosie chun a tarpu Jethro chu a vàn thla a, a ram tieng panin a kîr nawk tah a.

Exodus 19

1 Israelhaiin Aigupta an suoksana inthoka a thla thumna ni tak chun Sinai thlaler an tlung a. 2 Refidima inthoka Sinai thlaler chu hung tlung an nih. Sinai tlâng ep thlalerah Israelhai chun riebûk an khuor a. 3 Chu zoah Mosie chu Pathien hmu dingin tlângah a hang lawn a, tlânga inthok chun LALPAN a hung biek a, "Jakob sûngkuohai be la, Israelhai kuomah hi thu hi puong rawh: 4 'Nangni ngeiin Aigupta chunga ka thilthawhai in hmu tah a, mupuiin a thla zâra a te a chawi anga chawiin, ka ta dingin ka thuoi suok cheu a nih. 5 Tu hin ka thu a rênga zawma ka thuthlunghai in vong zing phot chun hnam po po laia ka ro hlu bik nîng in tih. Khawvel pumpui hi ka ta a ni lai zingin, 6 nangni chu ka ta dinga lalram thiempu le hnam ser hran nîng in tih' ti hi Israelhai kuoma i hril ding chu a nih" a ta. 7 Chuongchun, Mosie chu a kîr nawk a, Israel upahai chu a ko khawm a, LALPAN thu a pêkhai po po chu an kuomah a hril vong a. 8 Mipui chun lunginruol takin, "LALPA hril taphot chu thaw pei kan tih" an ti duol duol a. Mipui donna chu Mosien LALPA a hril sawng a. 9 Chun, LALPA chun Mosie kuomah, "Nang le ei inbiek lai ngei mipuiin hre a, an ring tlat theina ding chein sûm sa tak lai i kuomah ka hung inlang ding a nih" a ta. Mosie chun mipuihai donna chu LALPA a hril sawng a. 10 Chun, LALPA chun Mosie kuomah, "Mipuihai kuomah va fe la, voisun le zînga hin insukthienghlimin an puonhai sawp fai hai sien, 11 a ni thumna nia dingin lo inring raw hai se, chu ni chun LALPA chu mipui hmua ngei Sinai tlângah a hung tum ding a ni si a. 12 A tlâng sir vela um mipuihai fe theina chin ding ramri khang la, tukhom tlânga kai lo ding le tlâng thut khom tawk lo dinga fimkhur dingin hril rawh. Tu khom tlâng hang tawk taphot chu sukhlum ni ngei ngei an tih. 13 Tu khomin kuta tawk loin, lunga dèng hlum amani thala kap hlum nîng an tih. Sa khom ni sien, mihriem khom ni sien, indamtir lo ding a nih. Beram ki an mût ruoi ruoi pha le chauh mipuiin tlâng chu an hung tlung ding a nih" a ta. 14 Tlânga inthoka Mosie a fe thlâk hnung chun mipuihai chu a'n hlàn thienghlim a, an puonhai an sawptir bok a. 15 Chun, an kuomah, "A ni thumnaa dingin inbuotsai ro. Nuhmei le pasal khom inpawl naw ro" a ta. 16 A ni thumna tûka chun vân a hung inrùm dur dur a, kawl a hung inlep zuk zuk a, tlâng sîp chu sûm sa takin a hung tuom a, tawtawrawt an ri ruoi ruoi a, riebûka um mipuihai chu an inthin hawp a. 17 An riebûka inthok chun mipuihai chu Pathien inhmupui dingin Mosien a thuoi suok a, tlâng thuta chun an ngîr a. 18 LALPA chu Sinai tlânga chun meiin a hung tum a, tlâng chu meikhuin a tuom a. Rawtuina meikhu ang elin tlânga inthok chun meikhu intûr ngul el chu a suok hlut hlut a, a tlâng chu a'n thin bup bup a, 19 tawtawrawt ri chu a'n ring zuol deu deu bok a. Mosie chun thu a hang hril a, Pathien chun rawlin a hung don a. 20 LALPA chu Sinai tlâng sîpah a hung tum a, Mosie chu hung dingin a ko a, chuongchun a kai tung a. 21 LALPA chun a kuomah, "Tum thla la, LALPA hmèl hmu tuma mipuiin an hung paw thleng lui nawna ding le tam tak an thi pha nawna dinga fîmkhur dingin zu hril rawh. 22 LALPA hung pantu thiempuhai khom an inhlân thienghlim ding a nih, chuong naw chun an chungah LALPA tuong hlauh rawi a tih" a ta. 23 Mosie chun LALPA kuomah, "Mipuihai chun Sinai tlâng hung kai naw ni hai. Nangma ngeiin, 'A tlâng vela hin ramri khangpèk la, chu sûng chu hmun thienghlimah sie rawh' tia i mi lo hrilthi ta lei khan" a ta. 24 LALPA chun Mosie kuomah, "Fe thla la, Aron kha hung thuoi rawh. Thiempu danghai chun LALPA kuoma hung dingin hung nêr lui naw raw hai se, chuong naw chun an chungah LALPA tuong rawi a tih" a ta. 25 Chuongchun, Mosie chu mipuihai kuoma chun a zu fe a, chuong thu chu a zu hril tawl a.

Exodus 20

1 Pathien chun hieng thu po po hi a hril a: 2 "Kei hi bawia in intàngna Aigupta rama inthoka thuoi suoktu cheu LALPA in Pathien chu ka nih. 3 "Keima naw chu Pathien dang nei naw rawh. 4 "I ta dingin milem siem naw rawh, chung tieng vâna mi amanih, hnuoi tieng hnuoia mi amanih, tui sûnga mi amanih lem i siem ding a ni nawh. 5 Chuong thil hmaa chun kûnin i chawibiek ding a ni nawh. Kei, LALPA i Pathien hi Pathien thîkthu sie, pahai thil suol thaw leia an nauhai hrem hlak, mi theidatuhai chu an thlahai suon thum suon li chen khom hrem hlak le 6 mi hmangaia ka thupèk zawmtuhai ruok chu suon sâng tam tak chen chunga khom hmangaina inlangtir hlaktu chu ka nih. 7 "LALPA Pathien hming sàlin khel hril naw rawh; LALPA chun a hming hmang suoltu chu hrem loin insuo naw nih. 8 "Sabat hi thienghlim taka inser ding a nih ti hre zing rawh. 9 Ni ruk sûng chu thokrimin sin thawng i ta, 10 ni sarina ruok chu LALPA i Pathien chawlni a nih. Chu ni chun sin ieng khom i thaw ding a ni nawh, nangni le i naupa le naunu, i suoknu le suokpa, i ranhai le i ina chêng ram dang mihai khomin. 11 Ni ruk sûngin LALPAN hnuoi le vânhai, tuifinriet le a sûnga um po pohai a siem a, a ni sarinaa ruok chu a chawl si a. Chuleiin, LALPAN chawlni chu mal a sawm a, a sukthienghlim a nih. 12 "I nu le pa chawimawi rawh, chuongchun LALPA i Pathienin a pêk che rama hin dam sawt i tih. 13 "Tuol that naw rawh. 14 "Uire naw rawh. 15 "Inru naw rawh. 16 "I vènghai khelin hêk naw rawh. 17 "I vènghai in le lo inhnar naw rawh. I tuolbawm nuhmei amanih, a siehlawnu le siehlawpa amanih, a bawngchal le sabengtung amanih le a thil nei dang hrim hrim inhnar bok naw rawh" tiin. 18 Mipuihai chun vâninrum dâm, kawlinlep dâm, tawtawrawt ri dâm hre a, tlâng kâng khu lui lui dâm an hmu chun thlabârin an inthin a. 19 Hla taka ngîrin Mosie kuomah, "Nangman kan kuomah thu hril lem ta la, lo ngàithlâng kan tih. Pathien ruok chun kan kuomah hril ta naw hrâm raw se, kan thi el thei ding a nih" an ta. 20 Mosie chun an kuomah, "Ti naw ro. Pathien tina nei a, thil suol in thaw nawna dingin Pathienin a hung fie cheu a ni hi" a ta. 21 Pathien umna sûm sà tak tieng pana Mosie a fe lai chun mipui chu hla takah an ngîr a. 22 LALPA chun Mosie kuomah, "Vâna inthoka ka hung biek che ti Israelhai chun an hriet a, an kuomah hieng hin hril rawh: 23 Keima ti lo pathien dang hrim hrim in nei ding a ni nawh; tangkaruo le rangkachaka siem pathien lem khom in ta dingin siem bok naw ro. 24 "Pilin ka ta dingin maichâm siem unla, in beramhai, in kèlhai le in bawnghai chu pumraw thilhlàn le inremna inthawina dingin inhlàn ro. Khaw lai khom ka hming ka'n hriettirna taphota chun in kuomah hung ka ta, mal sawm ka ti cheu. 25 Chun, lung hmanga maichâm in siem pha leh lung ser hmangin siem naw ro, hriemhrei in hmang chun sukporche rawi in tih. 26 Ka maichâm kailawnah kai tung naw ro, in saruokna inlang pal rawi a tih.

Exodus 21

1 "Chun, hienghai hi ro an rêl dàn ding i siepèk dinghai chu a nih: 2 Bawi dinga Hebrai mi in inchawk chun kum ruk sûng in rong bawl a ta, a kum sarinaa ruok chu intlan loin zalen thei a tih. 3 Ama chaua hung lût a ni chun ama chauin suok a ta, a nuhmei le hung lût an ni ruok chun a nuhmei khom a suok sa ve ding a nih. 4 A puin nuhmei a lo inneitir a ni chun, a nuhmei le a nauhai chu a pu ta nîng an ta, ama chauh suok thei a tih. 5 "Amiruokchu bawi chun, 'Ka pu le ka nuhmei le nauhai hi ka hmangai êm leiin ka suok nuom nawh' a ti chun, 6 a pu chun rorêltu hmaah thuoi a ta, kotkhâr amanih kotkhâr bieng bulah thîr zumin a na verpêk a ta, a dam sûngin a pu bawi ni tâng a tih. 7 "Tu khomin bawi dinga a naunu a zor chun, bawipa angin ama chu suok el thei naw nih. 8 A pu chun ama hmang dinga a thlang a lo ni a, a pu chu a suklawm bok si naw chun, mi dang intlan suoktir a ta, sienkhom a pu chun mi dang kuomah zor thei naw nih. 9 A naupa nuhmei dinga a huol a lo ni chun a naunu ang charin a en ding a nih. 10 A naupan nuhmei dang a neisan a ni khomin, fâk le dawn le sil le fên a pêk bâkah a nuhmei a nina chanvo chu a hlippèk ding a ni nawh. 11 Chuong thil pathumhai chu a thawpèk si naw chun, intlanna sum pe loin, zalenin suok thei a tih. 12 "Tu khomin mi a vuok hlum chun ama khom sukhlum ve ngei ngei ding a nih. 13 Chun, tum rèng lei ni loa Pathienin a'n tlungtir a ni ruok chun, a tlàn lûtna ding hmun keiman ruotpèk ka tih. 14 Amiruokchu, phierrûk a, tum rêng leia a that a ni chun ka maichâma inthokin thuoi hmang unla, sukhlum ro. 15 "Tu khom mani nu le pa vawtu chu sukhlum ngei ro. 16 Tu khom mihriem inrua zortu amanih, a la kol zing laia man amanih a ni chun ama chu sukhlum ngei ro. 17 Tu khom mani nu le pa tongsie inphurtu chu sukhlum ngei ro. 18 "Chun, mi an inhal a, pakhatin lunga dêngin amanih kuttum a thlâk a, thi ruok chu thi êm loa khum beta a um chun, 19 hliema um kha a hung tho inkàng a, funghrol thuna tuol a suok thei pha leh a vawtu kha insuo ding a nih; amiruokchu hliem tuortu hun inhmang hu zât rul a ta, a dam var chena inenkolnaa seng po po tum bok a tih. 20 "Tu khomin a bawipa amanih a bawinu amanih hmola a vuok hlum chun ama chu hrem ngei ding a nih; 21 sienkhom bawi chu ni khat ni hni hnunga a hung tho inkàng nawk ruok chun hrem lo ding a nih, bawi chu ama thil nei laia mi a ni si a. 22 "Pasal insuolin nuhmei inrai lai lo tawk sa palin nau insiet pha sien, hliem na naw sienkhom, a pasalin a ngèn zât le rorêltuin a remti ang zât chu a sukhliemtu chu inchawitir ding a nih. 23 A hliem na a ni ruok chun hringna aiah hringna, 24 mit aiah mit, ha aiah ha, kut aiah kut, ke aiah ke, 25 raw aiah raw, hliem aiah hliem, vuok aiah vuokin in thung lêt ding a nih. 26 "Tu khomin a bawinu amanih bawipa amanih mitah vawin lo sukse pal sien, a mit siet aia zângna domna dingin bawi chu a'n suo zalen ding a nih. 27 A bawinu amanih bawipa amanih ha a lok tlam chun, a ha tlam aia zângna domna dingin a bawi chu a'n suo zalen ding a nih. 28 "Bawngchalin nuhmei amanih pasal amanih a sikhlum chun, chu bawngchal chu in dênghlum ngei ding a nih; a sa khom fa naw ro. Bawngchal neitu ruok chu hrem lo ding a nih. 29 Bawngchal chu a hma khoma mi sik hmang a ni a, a neitu khomin chu chu a hriet a, sienkhom a khum nuom chuong si naw leia nuhmei amanih pasal amanih a lo sikhlum a ni ruok chun, a bawngchal chu dênghlum ding a na, a neitu khom sukhlum bok ding a nih. 30 Amiruokchu, intlan dinga intukna a um chun hringna aiah an tuk zât taphot chu pêka intlan thei nîng a tih. 31 Mi naupa amanih naunu amanih khom lo sikhlum sien, hi dàn ang boka rèl ding a nih. 32 Bawinu amanih bawipa amanih a lo sikhlum a ni ruok chun bawi neitu kuomah tangka shekel sawmthum pêng an ta, a bawngchal ruok chu lunga dêng hlum ding a nih. 33 "Chun, miin a khur nei sìn lo amanih, a khur cho nel nawk loa a um leia bawngchal amanih sabengtung amanih a lo tla hlum chun, 34 khur neitu chun rul a ta, ran neitu kuomah zângna domna tangka pêng a ta, ama chun ran ruong chu inhlawm a tih. 35 "Chun, mi pakhat bawngchalin mi dang bawngchal lo sikhlum sien, bawngchal la dam chu zor an ta, a man le bawngchal thi ruong chu inzât charin insem an tih. 36 Amiruokchu, bawngchal la dam chu a hma khoma mi sik hmang a na, a neituin a khum nuom si naw lei a ni chun a neitu chun bawngchal chu pêng a ta, bawngchal thi ruong chu aman chang thung a tih.

Exodus 22

1 "Miin bawngchal amanih beram amanih inru a, that a, a zor chun, bawngchal pakhat aiin bawngchal panga le beram pakhat aiin beram pali chawi a tih. 2 "Miin a in roktu chu a rok laia a vuok hlum chun, a vawtu chunga chun thisen phuba lâk ding a ni nawh; 3 amiruokchu, nisa suok hnunga a vuok hlum a ni ruok chun a thisen lakah maw phur a tih. Rûkru chun a thil inrûk chu thung kîr a ta, pêk ding a nei naw ruok chun a thil inrûk thungna dingin ama chu zor ding a nih. 4 Ran inrûtu kutah bawngchal amanih, sabengtung amanih, beram amanih a hringa man a ni chun a lêt hniin rul a tih. 5 Tu khomin a lo amanih grep huon amaniah ran a'n tlattir a, ranhai chu invâka mi loah an lût chun a lo le a grep huon thatna lai takin a rul ding a nih. 6 "Miin mei insuo a, lo hnawm inkàng zaptir a, mi buphal amanih, bu kung amani le lo po po a kâng siet chun, mei insuotu chun a rul ngei ding a nih. 7 "Tu khomin a tuolbawm kutah a sum le pai le thil neihai inkol thattir sien, chu chu a koltu ina inthokin inhmang ta sien, rûkru chu man a ni phot chun a lêt hniin a rul ding a nih. 8 Rûkru chu man a ni si naw chun, a koltu chu rorêltu hmaah inlangin, ama thaw a ni le ni naw inchieng raw se. 9 Bawng amanih, sabengtung amanih, beram amanih le silfèn le thil dang inhmang thuah hrim hrim, tu khomin 'Hi hi chu ka ta a nih' a ti chun an pahni thubuoi chu rorêltu hmaah an intlun ding a nih. Rorêltuin thiem naw a'n changtir taphot chun a tuolbawmpa laka chun a lêt hni chawi a tih. 10 "Tu khomin a sabengtung amanih, bawngchal amanih, beram amanih le ran dang ieng khom a tuolbawm kutah inkol thattir sien, ran chu thi le hliem le suomin lo um sien, a thawtu tu khomin hmu si naw hai sien, 11 a koltu chun ran chu a tawk nawzie inchiengna dingin a tuolbawm hrieta ngei Pathien hmaah inkhàmna a nei ding a nih. Chu chu ran neitu chun pom a ta, a koltu chun a rul a ngai ta nawh. 12 Amiruokchu, an inrûkpêk a ni ruok chun a koltu chun a rul ding a nih. 13 Sain a se a ni chun, a sa hlek hung chawi sien, sa se ran ai chu a rul ngai naw nih. 14 "Tu khomin a tuolbawm ran a hmang haw a, a neitu um naw laia ran chu a hliem amanih a thi chun, a hmang hawtu chun rul a tih. 15 A neitu um lai a ni ruok chun rul a ngai nawh. Ran chu a man chawia haw a ni ruok chun a haw man chauh chawi a tih. 16 "Pasalin nunghàk thienglâm, nuhmei dinga mi la huol lo chu thlêma a zâlpui chun, man le muol pein nuhmeiah a nei ngei ding a nih. 17 A pain a naunu chu inneitir a phal tlat naw khomin nuhmeia a lo siem tah leiin a man chu a pêk tho tho ding a nih. 18 "Nuhmei dawithiem hrim hrim chu damin hlà naw ro. 19 "Tu khom ran rìmtu taphot chu sukhlum ro. 20 "Tu khom LALPA ti chauh lo pathien dang kuoma inthawi hrim hrim chu sukbohmang ding a nih. 21 "Ram dang mi tukhom thaw sein neksawr naw ro, nangni khom Aigupta ramah mikhuol in ni hlak kha. 22 "Hmeithai amanih fahra amanih hai chu neksawr naw ro. 23 In soisak tha naw vai chun mi hung zuolko an ta, an rawl lo ngâithlàng ka ta, 24 ka lung sen phut a ta, kawlhnâmin hung sukhlum rawi ka ti cheu a, in nuhmeihai chu hmeithai hung nîng an ta, in nauhai khom fahra hung nîng an tih 25 "Nangni laia um ka mi, mi retheihai kuomah sum in inpûktir pha an bat angah ngai naw unla, a pung phùt bok naw ro. 26 I tuolbawm silpuon chu bandaa i lo hrènpèk a ni khomin nisa tlâk ruolin pe kîr nawk rawh; 27 a silpuon nei sun a na, a taksa suklumna dinga a silpuon a ni leiin ieng am silin zâl tàng a ta? A mi hung ko vai chun lo ngàithla ngei ka ta, kei hlak chu mi lunginsiet thei tak ka ni bok si a. 28 "Pathien hrilse naw la, i mihai chunga rorêltu chu tongsie inphur bok naw rawh. 29 I thlai thar hmasa tak le uoiin thar i sawr hmasa tak chu i hung inhlân ding a nih. I naupa upa tak chu i mi pêk ding a nih. 30 Chuong ang bokin i bawng le beramhai khom i thaw ve ding a nih. Ni sari chu a pui kuomah um a ta, a ni riet ni-ah i mi pêk ding a nih. 31 Chun, ka mi thienghlimhai in ni ding a nih. Chuleiin, ram sa se sa hrim hrim in fâk ding a ni nawh; ui kuomah in pêk lem ding a nih.

Exodus 23

1 "Thuthang indik lo in hril dar ding a ni nawh. Mi rilo thangpuitu dingin thuhretu riloah in insiem ding a ni nawh. 2 Thil suol thaw tum mipui lai inzêl ve naw ro. Thubuoi hrilnaah mipui tieng awn zawnga thangin thudik chu in sukbuongbar ding a ni nawh. 3 Mi rethei khom a thubuoiah in tan bîk ding a ni bok nawh. 4 "In hmelma bawngchal amanih a sabengtung amanih invâk hmang in hmu chun a kuomah in khal kîrpèk nawk ngei ngei ding a nih. 5 Nangni theidatu cheu sabengtung chu a phurin a del de lai in hmu chun, ieng angin thangpui rin inla khom, thangpui loin in màksan ding a ni nawh. 6 "In mi, rethei tak takhai thubuoi chu, indik naw takin in rêlpèk ding a ni nawh. 7 Khêla inhêknaah thang ve naw unla, poi tawk lo le mi indikhai sukhlumtuah thang naw ro, mi rilo chu ka'n suo naw ding a ni si a. 8 "Thamna la naw ro, thamna chun a hmutuhai mit a sukdel a, mi indikhai thu khom a hèm kawi hlak. 9 "Ram dang mihai nêksawr naw ro, nangni khom Aigupta rama mikhuola in um lai khan mikhuol ni umzie in hriet chieng ta si a. 10 "Kum ruk sûng chu in loah bu tuin a ra sik la, 11 a kum sarinaa ruok chu inlet lo le hmang loin sie ro; chu taka inthok chun mi retheihaiin fa ve thei an ta, an lâk mahla po chu ramsahaiin tlàn bok an tih. Chuong ang bokin in grep huonhai le in oliv huonhai chu thaw ro. 12 Ni ruk sûng in sin thaw unla, ni sarinaa chun chawl ro. Chuongchun in bawngchalhai le in sabengtunghai khom chawl thei vèng an ta, in insûnga pieng in bawihai le hnam dang mihai khom chawl hadam ve thei an tih. 13 In kuoma ka hril po po hi ngaiven unla, pathien dang hming hrim hrim lam naw unla, in baua inthok khomin mihaiin hre naw hrim hrim raw hai se. 14 "Kum khatah voi thum ka ta dingin kût hmang ro. 15 Chol thang lo bei kût hmang unla, thu ka pêk tah ang cheu khan, ni sari sûng chu chol thang lo bei ring ro. Hi hi Abib thla sûnga ni ruotah khan hmang unla, chu thla chu Aigupta rama inthoka in suokna thla a ni kha. Chun, ka hmaah tu khom kut ruokin in hung inlang ding a ni nawh. 16 "Loa in bu tharsuok hmasa takin Busîk Kùt hmang ro. Chun, kum tawp pawl tlâkah in lo tharsuok in hlu lût vong pha leh Pawl Kût hmang ro. 17 Kum khatah pasal po po Chunghnung tak LALPA hmaah voi thum an hung inlang ding a nih. 18 "Chol thanga siem thil hrim hrim leh ka kuomah inthawina thisen inhlân naw ro. Chun, kûta thil hlâna hmang thau rêng rêng chu a tûk zing chenin sie ngai naw ro. 19 "In lo tharsuok hmasa tak laia a tha tak vong chu LALPA in Pathien kuomah hung chawi ro. Kel tuoi sa chu a pui nenetuiin suong ngai naw ro. 20 "En ta, in lampuia vêng zing ding cheu le hmun ka buotsaia thuoi tlungtu ding cheuin ka vântirko in hmaah ka hung tir ding a nih. 21 Ama chu ngaiven unla, a thu ngàithla ro. A lakah hel naw ro, ama chun ka hming a put leiin in helna chu a ngaidam awm si naw cheu. 22 Amiruokchu, a thu in pom a, a hril taphot in thaw pei chun, in hmèlmahai hmèlma nîng ka ta, in dohai dotu ni bok ka tih. 23 Ka vântirko chun in hma thuoi pei a ta, Amor hai, Hit hai, Periz hai, Kanan hai, Hiv hai le Jebu hai umnaa chun thuoi a ti cheu a, anni chu ka la sukbohmang dai ding a nih. 24 An pathienhai hmaah kûnin chawibiek naw unla, an thil chìnghai chu chìng bok naw ro. Anni chu inram vong unla, an lung biekhai chu suknawi vong ro. 25 LALPA in Pathien rong chauh bawl unla, fâk le dawnah sukhnienghnar ka ti cheu a, nangni laia inthokin natna hri la hmang ka ta, 26 nau insiet amani le ching amani nangni lai um naw ni ti niu a, in dam kum khom a tluontlingin suksei ka tih. 27 "In hmaah ka tiumna infètir ka ta, tu hnam khom in hmasuon taphot chu sukchi-ai ka ta, in hmèlmahai po po chu in hmaah intlânsiettir ka tih. 28 In fèna ding lampuia inthoka Hiv hai, Kanan hai le Hit hai hnot suoktu dingin in hmaah khuoivânriel tir ka tih. 29 Amiruokchu, kum khat sûng chun hnot suok vong el naw ning, chuong naw chun a ram chu rausan vong an ta, in ta dinga ram sa tium hung tam taluong an tih. 30 A ram pum la thei khopa in hung pung hun chenin ahmatiemin in hmaa mihai hnot suokpêk pei ka ti cheu. 31 "In ramri ding chu Tuipui Sena inthoka Filistinhai Tuipuii chen le thlalera inthoka Tuipui chen khangpêk ka ti cheu a, chu rama umhai chu nangni kutah pêng ka ta, anni chu hnot suok in tih. 32 Anni amani le an pathienhai amani leh thu in thlung ding a ni nawh. In ram sûngah an um ding a ni bok nawh, chuong naw chun ka chungah hin suol inthawtir pal an ti cheu; in ta dinga châng tium chu an pathienhai chawibiek a nih' tiin" a ta. 33 (A um nawh)

Exodus 24

1 Chun, ama chun Mosie kuomah, "Nang le Aron le Nadab le Abihu le Israel upa sawmsarihai kha ka kuomah hung tung unla, rala inthokin mi hung chawibiek ro. 2 Mosie chauin LALPA hung pan hnai sien, mi dang chun hung hnai naw ro. Mipui khom ama leh hung naw raw hai se" a ta. 3 Mosie chu a zu fe a, LALPA thu le rorêl dànhai po po chu mipui a zu hril a, anni chun lunginruol takin, "LALPA hril taphot chu thaw pei kan tih" an ta. 4 Mosie chun LALPA hril po po chu a ziek thlàk vong a. A zînga chun inhma takin a tho a, tlâng thuta chun maichâm a siem a, Israel hnam sawm le hnam hni aiawin lung sawmpahni a phun a. 5 Chu zoa chun Israel tlangvalhai chu pumraw thilhlàn nei dingin a tir a, inremna thilhlàna dingin LALPA kuomah bawngchal tuoiin an inthawi a. 6 Mosie chun ran thisen zâtve chu a lâk a, maihùnah a sie a, thisen zâtve dang chu maichâmah a the a. 7 Chun, Thuthlungna Bu chu a lâk a, mipui hrietah a tiem a, anni chun, "LALPA hril taphot chu thaw pei kan ta, zawm pei kan tih" an ti duol duol a. 8 Mosie chun thisen chu a chawi a, mipui chu thèin, "Ngai ta u, hi thuthlungna bua Pathienin in kuoma thu a lo thlung tah po po thuthlungna thisen chu a ni hih" a ta. 9 Mosie le Aron, Nadab le Abihu le Israel upa sawmsarihai chu an kai tung a, 10 Israelhai Pathien chu an hmu a, a ke innghatna chu lungmantam safir rem khawm ang, vân anga inthieng a nih. 11 Sienkhom Israel hotuhai chunga chun Pathienin a kut a'n let nawh; Pathien chu an hang hmu a, fain an dawn tlàng a. 12 LALPA chun Mosie kuomah, "Tlânga khin ka kuomah hung kai la, chu taka chun lo um la, mipuihai zirtirna dinga an ta dinga lungphêka dân le thupêk ka ziekhai chu lo pêng ka ti che" a ta. 13 Mosie chu a kaiza vêngtu Joshua leh a'n thok suok a, Pathien tlânga chun a hang fe a. 14 Upahai kuoma chun, "Kan hung kîr nawk hma khat chu hi taka hin mi lo nghâk zing ro. Nangni lai Aron le Hur an um a, thubuoi nei taphot an kuomah fe raw hai se" a ta. 15 Mosien tlâng a tlung chun tlâng chu sûmin a baw a, 16 LALPA ropuina chu Sinai tlângah a um a, sûmin tlâng chu ni ruk a bawm khum a, a ni sarina chun suma inthokin LALPAN Mosie chu a hung ko a. 17 Israelhai hmu dàn chun, LALPA ropuina chu tlâng sîpa kâng hmang thei mei ang el a nih. 18 Mosie chu sûm zìnga chun a va lût a, tlânga chun a hang lawn a, ni sawmli le zân sawmli a hang um a.

Exodus 25

1 Chun, LALPAN Mosie chu a biek a, 2 "Israelhai kuomah hril la, ka kuomah thilhlàn hung chawi raw hai se. Lungrila an phal ang ang thilpêk an hung chawihai chu ka ta dingin i lo lâk khawm ding a nih. 3 Thilpêk i lâk khawm dinghai chu hienghai hi nîng a tih: rangkachak dâm, tangkaruo dâm le dâr dâm; 4 patzài dumpawl, senduk le senlâr dâm, puon zài inhmi dâm, kèl hmul dâm, 5 beramchal vun, rong sena nam dâm, tui bawngvunj dâm, sitim thingk dâm, 6 khawnvara sit ding oliv hriek dâm, hriek nàl phaa pol chi mawsawla dâm le rimtui raw ding dâm, 7 Efod le awmbela bel ding onik lung le lunghlu dang dang hai chu an nih. 8 Chun, anni laia ka chêng ve theina ding in thienghlim mi bawlpêk rawh. 9 A ruongam ka'n entir ang che khan biekbûk chu bawlin a sûnga hmangruo ding po po khom i siem ding a nih. 10 "Chun, sitim thingin bawm insiemtir la, a dung chu centimeter za le sawmpakhat, a khang chu centimeter sawmruk le paruk le a'n sâng tieng centimeter sawmruk le paruk nîng a tih. 11 A sûng le puo tieng rangkachak hlîr hlakin inluon khum vong la, a tlâng po po chu rangkachakin i kawm bok ding a nih. 12 Rangkachak kuol pali siem la, a ke thutah khing tieng pahnih, a dang tieng pahnih, inbûk rawh. 13 Sitim thing bokin a zawnna ding zawnfung siem la, chu chu rangkachak tuiin inluon rawh. 14 Bawm zawnna ding zawnfunghai chu rangkachak kuola chun a khing a khingin rol lût ve ve rawh. 15 Rangkachak kuola zawnfung i rol lût chu um zing a ta, lâk suok ta lo ding a nih. 16 Chun, bawm sûnga chun lungphêka Thuthlung inziek ka la pêk ding che chu i sie ding a nih. 17 "Rangkachak hlîrin zangàina thungpha, l a dung centimeter za le sawm, a khang centimeter sawmruk le paruka lien i siem ding a nih. 18 Chun, zangàina thungpha sin hmor intona inthut ding rangkachak cherub lim, a suta sut ngei i siem ding a nih. 19 A sin hmor khing tieng chun cherub lim pakhat sie la, a khing tieng chun pakhat dang sie bok la, zangàina thungpha leh an inmat ding a nih. 20 Cherubhai chu inhmatonin zangaina thungpha tieng nghâng an ta, an thlain zangàina thungpha chu zâr khum an tih. 21 Bawm chunga chun zangàina thungpha chu innghat i ta, bawm sûnga chun Thuthlung ka la pêk ding che chu i sie ding a nih. 22 Chu taka chun intuokpui hlak ka ti che a, thuthlung bawm chunga cherub pahni inkâra zangàina thungpha chunga inthok chun Israel mihai kuoma thu ka pêk ding taphot chu pe hlak ka ti che. 23 "Chun, sitim thingin dawkân siem la, a dung chu centimeter sawmriet le pariet, a khang chu centimeter sawmli le pali le an sângzie chu centimeter sawmruk le paruk a ni ding a nih. 24 Chu chu rangkachak hlîr tuiin inluon vong la, a tlâng chu rangkachakin kawm rawh. 25 Milimeter sawmsari panga tieta lienin a kawm siem i ta, chu chu rangkachakin i kawm ding a nih. 26 Rangkachak naval pali siem i ta, chuonghai chu dawkân ke pali kil tina chun inbûk rawh. 27 A zawnfung rol lûtna dingin rangkachak navalhai chu dawkân kawm sîra inbûk ding a nih. 28 Sitim thingin dawkân zawnna ding zawnfung siem la, rangkachak tuiin inluon rawh. 29 Chu taka ding chun rangkachak hlîra siem thlèng dâm, no dâm, uoiin thilhlàn bun thlâkna ding no tung le maihùn dâm i sie ding a nih. 30 Dawkàn chunga chun ieng lai khomin ka hmaah hlànbeim i sie rop ding a nih. 31 Chun, rangkachak hlîrin khawnvar siena i siem ding a nih. A ngul le bulthut chu a sera ser ding a na, a lu tienga a kumùm le a pâr vul lai limhai leh ser inzom vong ding a nih. 32 A ngula inthok chun kau ruk, sîr khatah kau thum, sîr khing tieng kau thum a pêng suok ding a nih. 33 A zâr tinah ruon pâr kûmùm lai le a pàr lai lim pathum um a ta, a kau nawka chun chuong ang bok chu um a tih. Chuong ang chun khawnvar siena pêng paruk chu i siem ding a nih. 34 Khawnvar siena ngula chun ruon kûmùm ang pàr vul lai lim pali a um ding a nih. 35 A zâr chung le hnuoi inkârah pâr kumum pakhat pei a um ding a nih. 36 A kumum le pârhai po po le a ngul le thut hai chu rangkachak hlîr tlang sakhata inthoka ser ding a nih. 37 Chu taka sie ding chu khawnvar pasari siem i ta, i sit pha leh a vel chu a elvar vong ding a nih. 38 Khawnvar phita chep ruolna le hmangruo danghai khom rangkachak hlîra siem ding a nih. 39 Khawnvar siena le a hmangruo ding po po siemna dingin rangkachak hlîr hlak talenn khat i hmang ding a nih. 40 Tlânga a ruongam kan entir ang che khan iengkim i siem ding a nih ti hre rawh.

Exodus 26

1 "Chun, puonhlap thlè sawm hmangin biekbûk siem la, chuong puonhlaphai chu patzâi inhmi thlur kop, a dumpawl, a senduk le sendâng inpola siem, puon khawng thiemhaiin cherub lim thiem taka an zep chei a ni ding a nih. 2 Puonhlap po po chu a sei tieng meter sawmpahni, a khang tieng meter hni seng, a ni ding a nih. 3 Puonhlap panga chu thui zom phot la, chu zoah panga dang chu thui zom nawk rawh. 4 Puonhlap thui zom hmasak sîr hmora chun a naval ding a dum pawlin siem la, chuong ang bokin a dang i thui zoma khom chu siem bok rawh. 5 Puonhlap pakhata chun a naval sawmnga siem la, a danga khom chun sawmnga siem bok la, a navalhai chu an inep tuo vong ding a nih. 6 Chu zoah rangkachakin a chep dèna ding sawmnga siem la, a chepdèna chun a naval tinah chep de la, biekbûk chu pindan pakhat a hung ni ding a nih. 7 Chun, biekbûk chung inkhumna dingin kêl hmula inthoka khawng puonhlap thle sawmpakhat i siem ding a nih. 8 Puonhlap chu a sei tieng meter sawmpathum, a khang tieng meter hni nîng a ta, thle tin chu an intiet vong ding a nih. 9 Puonhlap panga chu phêk khata dingin thui zom la, puonhlap paruk chu phêk danga dingin thui zom bok rawh. Puon in kot tieng chun puonhlap paruk thui zom chu zar la, a sîr tak chu thlep ding a nih. 10 Puonhlap pakhat hmor tieng tlànga chun a naval sawmnga siem la, chuong ang bokin puonhlap danga chun siem bok rawh. 11 Chun, an inkei bât tonna ding dâr kom sawmnga siem la, a naval tin ve veah puonhlap pahnihai chu dar kom chun kom de la, biekbûk chu pindan pakhat hung nîng a tih. 12 A chung inkhumna sahmul puon chenve lor chu biekbûk chawr tieng inkhâi thla raw se. 13 Chun, a chung sîr tuoka puonhlap, centimeter sawmngaa lor ve ve khom chu inkhâi thla el raw se. 14 Chun, beramchal vun, rong sena nam chun puon in chung chu inkhum i ta, chu chunga chun tui bawng vunin i la'n khum nawk ding a nih. 15 "Biekbûk banga intung ding sitim thing phêk tlûn tak rem khawm rawh. 16 Phêk tin chu a dung meter lia insâng le a khang centimeter sawmruk le paruka hlaiin i rem ding a nih. 17 Phêk tin chu phêk dang leh phui taka an inman nghet theina dingin phêk tinah mantu pahni i siem vong ding a nih. A bang phêk po po chu chuong ang vonga siem ding a nih. 18 Biekbûk sim songa dingin phêk sawmhni siem i ta, 19 a mongpha ding tangkaruo phêk sawmli siem bok la, bang phêk khat pei chu a mongpha pahni peiah innghat a tih. 20 Biekbûk hmar songa ding khomin phêk sawmhni siemla, 21 a mong phaa hmang ding tangkaruo phêk sawmli siem bok la, bang phêk khat pei chu a mong pha pahni peiah innghat a tih. 22 Biekbûk chawr, thlang tienga dingin phêk ruk siem la, 23 phêk hni chu a kila thang ding a nih. 24 A kila phêk hni hi a thuta inthoka a lêr chen kil zom thlap ding a nih. 25 Chuong ang chun, phêk riet um a ta, tangkaruoa siem a mong pha sawmparuk um bok a ta, a mong pha pahni pei chu bang phêk pakhat peia hmang ding a nih. 26 "Chun, sitim thing tluonin bangru ding sawmpanga siem la, biekbûk bang khing tienga bang phêk rem tlara chun bangru panga bel la, 27 a khing tieng khom panga bel bok la, biekbûk chawr thlang tienga bang phêk rem tlara chun panga bok bel rawh. 28 A bangru lailung taka mi, bang chenvea insânga bel chun biekbûk chu a vêl tuokin a man khawm ding a nih. 29 Bang phêk po po chu rangkachak tuiin inluon khum vong la, a bangru man khawmna dingin rangkachak naval siem la, a bangru po po chu rangkachak tui inluon vong bok rawh. 30 Tlânga a ruongâm ka'n entir che ang charin biekbûk chu i bawl ding a nih. 31 "Biekbûk sûng pindana zar ding chu patzâi inhmi thlur kop, a dumpawl, a senduk le senlâr inpola khawng, puon khawng thiemhaiin cherub lim thiem taka an zep chei a ni ding a nih. 32 Sitim thing ban pali, rangkachak tuia inluon le tangkaruo phêk pali thuta phuna chun rangkachak navalah puonzâr chu khàiin i zar ding a nih. 33 Puonzâr chu i zar zo pha leh Thuthlung Bawm chu a sûng tieng sie lût i ta, puonzâr chun Hmun Thienghlim le Hmun Thienghlim tak chu a daidan ding a nih. 34 Hmun Thienghlim taka chun Thuthlung Bawm le a sintu Zangàina Thungpha chu sie rawh. 35 Puonzâr puo tienga dawkân kha hmar tieng sie la, khawnvar innghatna kha sim tieng sie rawh. 36 "Biekbûk lûtna kotkhàra zar ding chu patzâi inhmi thlûr kop, a dumpawl, a senduk le a senlâr inpola khawng, puon khawng thiemhai kutsuok a ni ding a nih. 37 Puonzâr khaina dingin sitim thing ban panga, rangkachak tuia inluon vong chu phun la, puonzâr chu rangkachak navala chun khai rawh. Ban panga thuta hmang ding dâr phêk panga sung bok rawh.

Exodus 27

1 "Sitim thingin maichâm kil li nei, a dung le khang meter hni le centimeter hni ve vea sei le lien le meter khat le centimeter thuma insâng chu siem rawh. 2 Maichâm kil tinah a kî siem la, maichâm le a kihai chu thing sakhat inzom vong ding a na, dâr tuiin inluon khum vong bok rawh. 3 A hmangruo, vut luokna ding vutluo le vut siena ding belhai, thil thènaa hmang ding maihùnhai, sa thurna ding thîrkuthai le hme suongna bêlhai chu dâra siem vong a ni ding a nih. 4 Chun, maichâma dingin dâr lèn siem i ta, a lèn chung tieng sîr lia chun a khaina kuol i siem bok ding a nih. 5 Chu thîr lèn inphan chu maichâm zawl hnuoi, a chenvea insânga chun i sie ding a nih. 6 Maichâm zawnna ding sitim thing tuoi siem la, dâr tuiin inluon khum la, 7 zawn phaa a zawnfung rol lûtna dingin maichâm sîr khing ve vea chun a khei kuol siem tawl bok rawh. 8 Maichâm chu thingphêk bangin inkhum i ta, a lai chu a kawrongin i sie ding a nih. Tlânga a ruongâm ka'n hmutir che ang char khan i siem ding a nih. 9 "Biekbûk tuolzawl chu puon zâi inhmi thlùra khawng puonzârin inhuon i ta, sim tienga mi chu meter sawmli le palia sei nîng a ta, 10 puonzâr khaina ding chu ban sawmhni le ban inthutna ding dâr phêk sawmhni siem i ta, puonzâr bângna tluon le a thlung nghetna hmangruo po po chu tangkaruoa siem a ni vong ding a nih. 11 Hmar song tieng khom meter sawmli le palia sei nîng a ta, ban sawmhni le ban inthutna ding dâr phêk sawmhni le puonzâr bângna tluon le a thlung nghetna hmangruo po po chu i siem bok ding a nih. 12 "Thlang tieng tuol zawla chun meter sawmhni le pahnia sei puon zar ding a na, ban sawm le a thut sawm um bok a tih. 13 Suo tieng, nisa suokna tienga inhuonna puonzâr khom meter sawmhni le pahnia sei a ni ding a nih. 14 A lûtna sîr khata chun meter ruk le centimeter ruka sei puonzâr le ban pathum le a thut pathum um a ta, 15 khing tieng khom meter ruk le centimeter ruka sei bok puonzâr le ban pathum le a thut pathum a um bok ding a nih. 16 "Tuol kot tieng khom ban pali le a thut pali siem i ta, a puonzâr dingin meter kuoa sei, pat zâi inhmi thlùr kopa khawng, a dum pawl, a sen duk le a sen lâr inpol, puon khawng thiemhai kutsuok chu i khâi bok ding a nih. 17 Tuolzawl inhuonna ban po po chu tangkaraw tluonin zom vong i ta, puonzâr bàngna kuoi po po chu tangkaruoa siem nîng a ta, a ban thut chu dâr vong a ni ding a nih. 18 A tuol zawl seizie chu a dung meter sawmli le pali le a khang meter sawmhni le pahni nîng a ta, pat zâi thlura siem puonzâr, meter hni le centimeter hnia insângin inhuon i ta, a ban thut chu dâr vonga siem a ni ding a nih. 19 Biekbûka hmangruo hmanghai po po le puon in sûng le a tuol zawla puonzâr kei nghetna hmangruo po po chu dâra siem vong a ni ding a nih. 20 "Khawnvar chu zân tin sit chok a ni zing theina dingin oliv hriek an sawr laia thlit fim hlak chu hung chawi dingin Israelhai chu thu pe rawh. 21 Biekbûka Thuthlung Bawm siena puonzâr puo tieng, Intuokna Puon ina chun Aron le a nauhaiin zân tienga inthoka zîng tieng chenin LALPA hmaah khawnvar chu an insit chok zing ding a nih. Hi hi suon la hung thar pei dinga khom Israelhai laia an thaw dinga kumkhaw thupêk chu nîng a tih.

Exodus 28

1 "I u Aron chu a naupa Nadab hai, Abihu hai, Eleazar hai le Ithamar hai le chun ko la, ka ta dinga thiempu ni dingin Israel mihai laia inthokin ser hrang rawh. 2 I u Aron chun inza phur a, ngaisâng a hlaw theina dingin silfèn thienghlim siempêk bok rawh. 3 Aronin ka rong a bawl theina dinga inhlàn thienghlim a ni huna a hàk ding silfèn thienghlim thuipêk dingin hieng tieng thila varna le chemkalna ka pêkhai kha hril rawh. 4 Silfèn an siem dinghai chu awma inbel chi awmbel, thiempu dàr bàt zakuo, o korfuol, korchung chei infuol, kawng inrêk le bân bûl, lukhum le kawngzem a nih. Hieng silfèn thienghlimhai hi i unaupa Aron le a naupahaiin thiempu rong an mi bawlpèk theina dingin an siempèk ding a nih. 5 Chu siemna ding chun rangkachak zâi dâm, patzâi dum pawl, sen duk le sen lâr dâm le puon zâi inhmi thlùr kop an hmang ding a nih. 6 "Thiempu dàr bàt zakuo Efod chu rangkachak zâi, patzâi dum pawl, sen duk le sen lâr le pat zâi inhmi tak thlùr kop hmanga mi themthiemhaiin an riruong ang taka khawng ding a nih. 7 Hnung tieng le hma tieng dàr khing tieng khing tieng huopa hâk thei dinga a sîr ve vea tingmit a ni ding a nih. 8 A dàr zemna hruol chu chuong ang boka thiem taka siem, rangkachak zâi dâm, pat zâi dum pawl, sen duk le sen lâr le pat zâi inhmi thlùr kopa siem ding a na, tluon inzom a ni ngei ding a nih. 9 "Onik lung pahni la khawm la, chu taka chun Israel thlahai hming ker rawh. 10 An hming ziek dàn ding chu an pienga an upat dàn indotin nîng a ta, lung pakhatah hming paruk, a dangah hming paruk a chuong ding a nih. 11 Lunghlu ker thiemin suoi namna ding mawi taka a ker ang elin Israel nauhai hming chu inkertir la, chu lunghai chu rangkachak zâiin phier khum la, 12 Israel thlahai hriet zingna lung dingin a dàrbak ve vea chun khit de rawh. Aron chun an hminghai chu LALPA hmaa hriet zingna dingin a liengkoah a phur ta ding a nih. 13 Chun, lungmantam phumna dingin rangkachak zâi phier la, 14 rangkachak hlîr hlaka siem khaidiet pahnih her thlop la, chu chu lung phumna rangkachak zâi phiera chun inbûk rawh. 15 Mi themthiem tak kutsuok anga thiemin, rorelna awmbel siem rawh. Thiempu dàr bàt ang bokin rangkachak zâi le patzâi dum pawl, sen duk le sen lâr le puon zâi inhmi le thlùr kopin siem rawh. 16 Kil li nei, a dung centimeter sawmhni le pahnih, a khang centimeter sawmhni le pahnih nîng a ta, chu chu a thuoa thlep theia siem ding a nih. 17 A chunga chun lunghlu tlar li bel rawh. A tlar hmasa taka chun rubi, topaz le beril lung um a ta, 18 a tlar hninaah torkuis, safir le emeral lung um a ta, 19 a tlar thumnaah jasin, agate le amethi lung um a ta, 20 a tlar linaa chun krisoli, onik le jaspi lung a um ding a nih. Chu lunghai chu rangkachak zâiin zem khum ro. 21 Lung po chu sawmpahni nîng a ta, lung tin chun Israel thlahai hming put seng an ta, lung tin chu Israel hnam sawmpahnihai suoi namna lung ang nîng a tih. 22 "Awmbela ding rangkachak hlîr zâi her thlopin hruol rawh. 23 Rangkachak naval pahni siem la, chuonghai chu awmbel chung tieng sîr ve vea chun inbûk rawh. 24 Rangkachak khaidiet her thlop chu awmbel sîr ve vea rangkachak naval pahnia chun thlung rawh. 25 Chun, rangkachak khaidiet her thlop pahni hmor khing tieng ve ve chu thiempu zakuo hma tieng dàrbaka rangkachak zâia phier khum lung pahni le chun inbûk zom rawh. 26 "Rangkachak naval dang pahni siem la, chuonghai chu awmbel kil khing tieng, thiempu dàr bât zakuo dep, a sûng tieng chun inbûk rawh. 27 Chun, rangkachak naval dang siem la, chuonghai chu thiempu dàr bât zakuo hma tienga thiempu zakuo dàrzem chung char, a sîr hmora chun inbûk rawh. 28 Thiempu zakuoa naval le awmbela navala chun pat dumpawl hruolin khit mat la, chuonga i thaw chun awmbel chu thiempu zakuoa inthok chun inphaw hawk thei naw nih. 29 "Kei LALPA hin Israel thlahai chu ka hriet zing theina dingin Hmun Thienghlima ka hmaa Aron a hung lût zâtin an hming chuongna rorêlna awmbel chu a lung zawn takah a hàk zie hlak ding a nih. 30 Chun, rorêlna awmbela chun Urim le Thummimp khom inthangtir ve rawh, LALPA hmaa Aron a hung inlang zàta a lungrila an um ve theina dingin. Chuong ang chun, LALPA hmaa a'n lang zàtin Israelhai rorêlna chu a lung zawnah Aron chun a put zing ding a nih. 31 "Efod hnuoia hàk ding thiempu incheina korfuol chu puon dumpawl hlang hlaka siem ding a nih. 32 A lai taka chun lu thunna ding chep awng la, a awng rei chu a'n ek nawna dingin zakuo tlâng an kîm angin kîm vong rawh. 33 Korfuol hmor vêl tuoka khai dingin pat zâi dum pawl, sen duk le sen lâr hmangin theibufai lim siem la, a kâr inthlâk peiah rangkachak telnêng khai rawh. 34 Korfuol hmor tlang vêl tuokin theibufai lim le rangkachak telnêng chu inkârthlâkin a um ding a nih. 35 LALPA hmaa rongbawl dinga Aronin Hmun Thienghlim a lût ri le chu taka inthoka a suok nawk ri chu hriet thei dingin a korfuol chu a hàk zie ding a nih, a thi pha nawna dingin. 36 "Chun, rangkachak hlîr hlak phèk siem la, chu taka chun suoi namna kutsebia an ker ang elin, LALPA PUOL ti ker rawh. 37 Chu phèk chu thiempu lukawm hma tieng bel la, patzâi hruol dumpawlin khit de rawh. 38 Chu chu Aron chalbawk zawna chun um a ta, Israelhaiin thilpêk thienghlim LALPA ta dinga an inhlàn pha, an thilpêk inhlàna an suol tlâk tum chu ieng khom ni sien, Aron chun phurpêk pei a ta, LALPA hmaa pom tlâka an um theina dingin Aronin a chalbawkah a bel zing ding a nih. 39 Aron hàk ding korchung le a lukawm ding chu patzâi inhmi taka inthoka khawng le siem a ni ding a nih. A cheizemq khom patzâi inhmia khawng le mawi taka chei a ni bok ding a nih. 40 Aron nauhai khomin mi inza le ngaisâng an phur theina dingin, korfuol le cheizem le lukawm siempêk rawh. 41 Hieng silfènhai hi i u Aron le a nauhai inhâktir la, ka ta dinga rongbawltu thiempu ni dinga hriek nàlin namnghet la, ser hrangin inhlân rawh. 42 "An saruok inkhumna dingin kawnga inthoka malpui chen huop kekorte siempêk rawh. 43 Chu chu Aron le a nauhaiin Intuokna Puon in an lût pha le Hmun Thienghlima rong bawl dinga maichâm bula an fe pha an bun zie hlak ding a nih, inlang pala an thipui nawna dingin. Hi hi Aron le a thlahai ta dinga kumkhaw thupêk chu a nih.

Exodus 29

1 "Chun, thiempu sin thawa ka rong an bawl theina dingin anni chu hieng ang hin inhlàn thienghlim rawh: Hmèl hemna nei lo bawngchal tuoi pakhat le beramchal tuoi pahni hung kei la, 2 chol thang lo beiphit indip takin bei siem la, sahriek le bei hmet polin kek siem la, beiper inphàn siem bok la, a chungah thau nàl rawh. 3 Chuonghai chu bawmah thun la, bawngchal le beram chal pahni keiin chu chu hung chawi rawh. 4 Chu zoah Aron le a nauhai chu Intuokna Puon in kotah hung thuoi la, dân angin tuiin insiltir rawh. 5 Thiempu silfèn chu hung chawi la, korchung, korfuol, efod le awmbel hai chu Aron inhàktir la, thiem taka ta cheizem chun a kawng hrên nghet rawh. 6 Chun, 'LALPA PUOL' ti inbelna lukawm chu inkawmtir rawh. 7 Hriek nàl chi hung la la, a luah buok rawh. 8 A nauhai khom hung thuoi la, korfuol inhàktir tawl la, 9 lukawm inkawmtir bok rawh. Chu zoah Aron le a nauhai chu cheizem inzemtir la, namnghet la, thiempu ni kumkhuo tàng an tih. Chuong ang chun Aron le a nauhai chu i namnghet ding a nih. 10 "Bawngchal chu Intuokna Puon in kota chun hung kei la, Aron le a nauhaiin bawng lu chungah kut innghat raw hai se. 11 Intuokna Puon in tuola chun LALPA hmaah bawngchal chu that rawh. 12 Bawngchal thisen chu iemani zàt la la, i kutpàr hmorin maichâm kia chun thisen chu infar la, a dang chu maichâm ke thuta chun bun thla vong rawh. 13 Bawngchal phing sûnga a thau po po, a thin le a kal tuomtu duor le thau po po chu ât thla la, maichâma chun raw rawh. 14 Bawngchal sa le a vun le a êk ruok chu dâi puo tieng i raw hmang ding a nih, chu chu suol ta dinga inhlàn a ni si a. 15 "Beramchal pakhat chu hung kei la, Aron le a nauhaiin beramchal lu chungah kut innghat raw hai se. 16 That la, a thisen chu la la, maichâm chunga chun a vêlin thè rawh. 17 Beramchal chu chan nawi vong la, a sûng le a kehai chu sawp fai la, a lu le a sa dang le chun sie khawm rawh. 18 Chun, beram sa po po chu maichâma chun raw rawh, LALPA kuoma pumraw thilhlàn, LALPA ta dinga meia inhlàn, rim inhnik chu a ni si a. 19 "Beramchal dang khom chu hung kei la, Aron le a nauhaiin beramchal lu chungah kut innghat raw hai se. 20 That la, a thisen iemani zât la la, Aron le a nauhai chang tieng natila dâm, chang tieng kutpui le chang tieng kepuia dâm chun tât la, chu zoah maichâm chunga chun a vêlin thè rawh. 21 Thisen iemani zàt le hriek iemani zàt la la, Aron le a nauhai silfèna chun thè la, ama le a nauhai chu inhlàn thienghlim hung ni tàng an tih. 22 Chun, beram thau, a mei bul thau tak le a sûng thau le a thin le kal tuomna duor le a thau po po le a chang tieng mal chu la la, chu chu namnghetna beram nîng a tih. 23 Bawma chol thang lo bei, LALPA ta dinga inhlàna inthoka mi, hrieka zèu beiphek le kêk le beiper inphàn chu la bok rawh. 24 Chuonghai chu LALPA hmaa thèn thilhlâna dingin thên la, Aron le a naupahai kuta chun inhlàn rawh. 25 Chu zoah an kuta inthokin la kîr la, pumraw thilhlàn danghai leh LALPA hmaa rim inhnika inchang dingin meiah inhlàn rawh. 26 Aron namnghetna dinga beramchal inhlàn ir chu la la, LALPA hmaa thèn thilhlàn dingin thèn la, chu zoa chun a sa chu i chanpuol hung ni tàng a tih. 27 "Thiempu namnghetnaa thilhlàn, beramchal ir le a mal, ka kuoma thèn thilhlàna inhlàn thienghlim chu thiempu Aron le a naupahai chanpuol ding a nih. 28 Ka mihaiin inremna inthawina thilhlàn ka kuoma an hung inhlàn ir le a mal chu thiempuhai chanpuol ni rop a tih ti hi Israelhai laka ka thu ruot chu a nih. 29 Aron silfèn thienghlimhai chu a thlahaiin rochung pei an ta, chu taka inthok chun thiempua hriek nàl le namnghet hung ni pei an tih. 30 Thiempua Aron hung thlâktu a naupa chun Hmun Thienghlima rong bawl dinga Intuokna Puon ina a hung pha leh ni sari sûng a hâk ding a nih. 31 "Thiempu namnghetnaa inhlàn beramchal sa chu hmun thienghlima chun suong rawh. 32 Intuokna Puon in kota chun beramchal sa le bawma beihai chu Aron le a naupahaiin an fâk ding a nih. 33 Chuong inremna thilthawna, anni namnghetna le inhlàn thienghlimna dinga pumraw thilhlànhai chu anni chun fâng an ta, amiruokchu sa ser a ni leiin mi dang chun fa thei naw ni hai. 34 Chun, a zîng chena namnghetna sa le bei fàk bâng la umhai chu meia raw hmang ding a nih; sa ser a ni leiin fâk ding a ni nawh. 35 Chuongchun, thu ka pêk tah po po che ang hin Aron le a naupahai chunga chun thaw la, ni sari sûng inser thienghlim raw hai se. 36 Chun, ni tin suol thawina dinga inremna thilhlànah bawngchal hung inhlàn la, inremna siemin maichâm sukfai la, hriek nàlin sukthienghlim rawh. 37 Maichâma inthienna dinga inremna thilhlàn chu ni sari sûng thawin sukthienghlim la, chuongchun maichâm chu thil thienghlim tak hung nîng a ta, maichâm tawk taphot khom hung thienghlim pei an tih. 38 "Maichâma chun ni tin pel loin beram tuoi pahnih, kum khat a upa in hung inhlàn zie ding a nih. 39 Beram tuoi pakhat chu zîng tieng inhlàn unla, beram tuoi dang chu zân tieng inhlàn ro. 40 Zîng tienga beram in inhlàn ruol chun beiphit indip tak kilogram khat, oliv hriek, a sawra sawr litar khat le chokpol le dawn thilhlànah uoiin litar khat in hung inhlàn sa ding a nih. 41 Zân tieng thimbuta in inhlàn pha khom zîng tienga in thaw ang charin thaw ro. Chu chu LALPA ta dinga meia thil inhlàn le rim inhnik chu a nih. 42 Hi hi in thlahai chena Intuokna Puon in kot bula LALPA hmaa pumraw inthawi in inhlân rop dân ding chu a nih; chu taka chun ka mihai hmu dingin hung ka ta, inbiekpui hlak ka ti cheu. 43 Chu hmuna chun Israel mipuihai inhmupui ka ta, chu hmun chu ka ropuina varin sukthienghlim ka tih. 44 Puon in le maichâm chu sukthienghlim ka ta, Aron le a naupahai chu ka rongbawltu thiempu dingin ser hrang tawl ka tih. 45 Israel mipuihai lai chêng ka ta, an Pathien nîng ka tih. Anni lai ka chêng theina dinga Aiguptaa inthoka thuoi suoktu LALPA an Pathien chu ka nih ti hrieng an tih, LALPA an Pathien chu ka ni si a. 46 (A um nawh)

Exodus 30

1 "Rimtui rawna ding sitim thingin maichâm siem rawh. 2 Maichâm chu a dung centimeter sawmli le panga, a khang centimeter sâwmli le panga, kil li nei nîng a ta, a'n sângzie chu centimeter sawmkuo nîng a tih. A kihai chu maichâm le sakhat, inzom vong a ni ding a nih. 3 A chung le a sîr po po le a kihai chu rangkachak hlîrin inluon khum la, a ko tlâng sîr tuokin rangkachak bel vong rawh. 4 A zawnfung rolna dingin a tlâng sîr hnuoi tieng puo ve veah rangkachak naval inbûk la, khing tieng khom chuong ang bok chun inbûk rawh. 5 A zawnfung ding khom sitim thingin siem la, rangkachakin inluon khum rawh. 6 Thuthlung Bawm chunga Zangàina Thungpha, ka'n tuokpuina hlak ding che khêla puonzâr dot chara chun maichâm chu innghat rawh. 7 "Tûk tin Aron-in khawnvar a buotsai pha leh rimtui a raw zie ding a nih. 8 Zân tieng thimbuta khawnvar a sit zâtin rimtui raw bok a ta, chuong ang chun thang la hung um peia khom LALPA ta dingin in raw pei hlak ding a nih. 9 Hi maichâma hin rimtui dang amanih, pumraw inthawina amanih, bu le bâl thilhlàn amanih le dawn ding thilhlàn amanih in inhlàn ngai ding a ni nawh. 10 Maichâm inthienna dingin, inremna dinga suol thawina thisen chu kum tin Aron-in maichâm ki-ah a nâl zie ding a nih. Chu chu kumkhuoin kum tin voi khat in thaw zie ding a nih; maichâm chu LALPA ta dinga thil thienghlim tak a ni si a. 11 LALPA chun Mosie kuomah, 12 "Intiempui laia hripuia in thi nawna dingin, Israel mi tiem laia thang taphot chun an tiem hunah LALPA kuomah hringna intlanna man an pêk seng ding a nih. Chuonga an thaw chun in intiem pha hripui inlêng naw nih. 13 Intiempuia thang taphotin a pêk zât dinga tuk, tempula an pêk hlak zât shekel zàtve an pêk seng ding a nih (shekel khat chu gerah sawmhnia rik a nih); chu chu LALPA puola dinga thilhlàn a nih. 14 Tiem laia thang kum sawmhni le a chung tieng po chun LALPA kuomah hi thilhlàn hi an pêk seng ding a nih. 15 Hringna intlanna dinga shekel zàtve an pêk nèka tam chu mi hausain a pêk ding a ni naw a, chu nèka tlawm khom chu mi retheiin a pêk ding a ni bok nawh. 16 Intlanna sum in hmu chu Intuokna Puon in enkolna dingin hmang ro. In hringna intlanna thil hi LALPAN Israelhai a hriet zingna sik a nih" tiin a hril a. 17 Chun, LALPA chun Mosie kuomah, 18 "Insawpna dingin dâr maihùn siem la, a thut khom dâr bokin siem la, chu chu Intuokna Puon in le maichâm inkârah inthut la, chu taka chun tui sie rawh. 19 Chu tui chu Aron le a naupahaiin kut le ke sawpnain hmang an tih. 20 Intuokna Puon ina an lût ding zàtin, an thi nawna dingin, tui chun an insawp ngei ding a nih. Chun, pumraw thilhlàn LALPA hmaa meia an inhlàn ding zàtin, an thi nawna dingin, an kut le ke an sawp zie bok ding a nih. 21 Suon la hung um pei dinga khom hi hi Aron le a thlahai kuoma kumkhaw thupêk a nih" a ta. 22 Chun, LALPA chun Mosie kuomah, 23 "Rimtui inhnik tak laia mi, murra tui kilo ruka rik, thingzungthak rim inhnik kilo thum, mafu rimtui kilo thum, 24 thingzungthak kau hawng kilo ruk le oliv hriek litar li, biekbûka shekel hmang lai anga bùk chu hung chawi rawh. 25 Chuonghai chu rimtui siem thiemin thiem taka a chokpol angin chokpol la, hriek nàla hmang dingin hriek thienghlimah siem rawh. 26 Chu rimtui chu hienghai hi nàl rawh: Intuokna Puon in hai, Thuthlung Bawm hai, 27 dawkàn le a hmangruo hai, khawnvar siena le a hmangruo hai, rimtui rawna maichâm hai, 28 pumraw inthawina maichâm le a bûr le bêl hai le maihùn le a thut hai chu. 29 Thienghlim tak an hung ni theina dingin i sukthienghlim ding a nih; chuong thilhai tawk taphot chu hung thienghlim an tih. 30 "Chun, hriek chu Aron le a naupahai khom nàl la, thiempu sin thawa ka rong an bawl theina dingin, sukthienghlim tawl rawh. 31 Israelhai kuomah hieng hin hril rawh: 'Hi hriek hi suon la hung um pei dinghai ta ding khoma hriek thienghlim chu a nih. 32 Mi naran nàl naw unla, a siem dân hmangin siem bok naw ro. Hriek thienghlim a ni angin hriek thienghlimah ngai ro. 33 Tu khom hieng ang hriek rimtui hi siem a, thiempu ni ve lo a nàl chun ama chu nangni laia inthokin tuithlàr ro' tiin hril rawh" a ta. 34 Chun, Pathienin Mosie kuomah, "Rim inhnik gom hnai dâm, onika dâm le galbanum thing hnai dâm le beraw fîm tak chu inzât vongin hung la la, 35 rimtui siem thiemin a siem angin, chuonghai chu chokpolin rimtui inhnik tak siem rawh. Chu rimtui chu machia saw thieng, fîm tak le thienghlim tak a ni ding a nih. 36 A then rawt dip la, Intuokna Puon ina Thuthlung Bawm hma, ka'n tuokpuina ding chea chun thè rawh. Chu chu i ta dingin thil thienghlim tak a ni ding a nih. 37 Hi rimtui siem dân hmang hin i ta ding khomin rimtui siem ngai naw la, LALPA ta dinga thil thienghlimah ngai rawh. 38 Nangni lai tu khomin hieng ang rimtui hi mani hmang dinga siemtu chu a chipuihai laia inthoka tuithlàr ding a nih" a ta.

Exodus 31

1 LALPA chun Mosie kuomah, 2 "Ngai ta, Juda hnama mi Hura naupa Uri, chu pa naupa Bezalel chu ka thlang suok a. 3 Themthiemna dâm, theina dâm le thil hrang hrang siem thiem dinga chemkalna dâm nei dingin Pathien Thlarauin ka sung sip a nih. 4 Rangkachak le tangkaruo le dàr hmanga thil mawi taka siem thiemna dâm, 5 lungmantam ser le bel mawi dàn hai, thing them le ker thiemna dâm le kong tinrênga themthiemna dâm ka pêk a nih. 6 Chu bâkah, ama thangpuitu dingin Dan hnama mi Ahisamak naupa Oholiab chu ka ruot a; thu ka pêk che anga iengkim an siem theina dingin thoktu danghai khom kut themthiemna ka pêk vong a nih. 7 An siem dinghai chu Intuokna Puon in dâm, Thuthlung Bawm dâm, a chunga um ding Zangàina Thungpha dâm, Biekbûk hmangruohai po po dâm, 8 dawkàn le a hmangruo po po dâm, rangkachak hlir hlaka siem khawnvar siena le a hmangruo po po dâm, rimtui rawna maichâm dâm, 9 pumraw inhlànna maichâm le a hmangruo bûr le bêl hai dâm, maihùn le a thut dâm, 10 Aron le a nauhaiin thiempu sin thawa ka rong an bawl huna an inthuomna ding silfèn thienghlim dâm, 11 thiempu namnghetnaa nàl ding hriek dâm le Hmun Thienghlima raw ding rimtui dâm a nih. Thu ka pêk che ang char khan an siem ding a nih, " a ta. 12 LALPA chun Mosie kuomah, 13 "Israelhai kuomah hieng ang hin hril rawh: 'Ka Sabat hi in inser ding a nih. In Pathien, a sukthienghlimtu cheu chu ka ni ngeizie in hrietna dinga nangni le in thla la hung pei dinghai le keima inkâra inchikna a nih. 14 Chuleiin, Sabat hi inser ro, in ta dinga ni thienghlim a ni si a. Tu khom a bawsetu taphot chu sukhlum ngèi ngèi ding a nih. Hi nia tu khom sin thaw lui taphot chu a mihai laia inthoka tuithlàr ding a nih. 15 Ni ruk sûng in sin thawng in ta, ni sari ni ruok chu Sabat chawl, LALPA ta dinga ni thienghlim a nih. Tu khom Sabat nia sin thaw chu sukhlum ngèi ding a nih. 16 Israel nauhai chun Sabat chu kumkhuoa kan thuthlungna a nih ti hrein an inser ngei ding a nih. 17 Keima le Israel nauhai inkàra kumkhaw inchikna nîng a tih, ni ruk sûngin LALPAN hnuoi le vânhai a siem a, a ni sarina nia chun a sinthawa inthokin a chawl si a' tiin hril bok rawh" a ta. 18 Chuongchun, Sinai tlânga LALPAN Mosie a biek zo chun Thuthlung lungphèk pahni, Pathien kut ngeia ziek lungphèkhai chu Mosie kuomah a pêk a.

Exodus 32

1 Mosie chu tlânga inthoka a hung thlàk intak ta êma mipuiin an hriet lei chun Aron kuomah an fe khawm a, "Thaw ta, kan hma thuoitu dingin pathien lem mi siempèk rawh. Hi Mosie, Aigupta rama inthoka mi thuoi suoktu hlak hi iem a chang tah ti kan hriet si nawh" an ta. 2 Aron chun an kuomah, "In nuhmeihai, in naupahai le naunuhai be lai rangkachak nabe kha hung chawi khawm ro" a ta. 3 Mipuihai chun rangkachak nabe an be lai chu hlîpin Aron kuoma chun an hung chawi a. 4 An pêkhai po chu a lâk khawm a, hmangruo ieng ieng amani hmangin bawngte lem angin a sung a. Mihai chun, "Aw Israelhai, hi hi Aigupta rama inthoka thuoi suoktu cheu pathien chu a ni hi" an ta. 5 Chu chu Aronin a hriet chun bawngte lem hmaa chun maichâm a siem a, "Zînga hin LALPA ta dingin kût nei ei tih" tiin tlâng a'n samtir a. 6 A tûk zìnga chun inhma takin an tho a, pumraw thilhlàn an inhlàn a, inremna thilhlànhai an hung pêk bok a. Chu zoah mipui chu fa le dawn dingin an inthung khawm a, hlimhlop chèn dingin an tho nawk a. 7 LALPA chun Mosie kuomah, "Fe thla vat rawh khai, Aigupta rama inthoka i hung thuoi suokhai kha an insukporche zo ta khu! 8 Ka thupêkhai sawt naw teah nghatsanin bawngte lem an insiem a, an biek a, a kuomah an inthawi a, 'Aw, Israelhai, hi hi Aigupta rama inthoka thuoi suoktu cheu pathien chu a nih' an ti chu!" a ta. 9 LALPA bok chun Mosie kuomah, "Hieng mihai hi ka enthlâk zing a, en ta, hnam lulul tak an lo ni hi tie! 10 Lo inrol naw la, ka lungsen inlingin hang kâng hmang vong tawl ka tih. Chu zoah nang ruok chu hnam ropui takin siem ka ti che" a ta. 11 Mosie ruok chun LALPA Pathien ditsakna ngenin, "Aw LALPA, i thilthawtheina ropui tak le kut hrâta Aigupta rama inthoka i hung thuoi suokhai chunga hin ieng leiin am i lung i sukling ding a na? 12 Ieng leiin am Aigupta mihaiin, 'Thil tum tha lo neiin, thlalera sukhlum vong ding le khawvela inthoka sukchimit vong dingin a thuoi suok tawl a nih' an mi hung tizui ding? I lungsen inkei dei la, i mihai chungah sietna intlun lo hrâm dingin inhnûk kîr raw khai. 13 I siehlaw Abraham hai, Isak hai, Israel hai kuoma, 'Arasi zât khin in thlahai la sukpung ka ta, hi ram pêk ka lo tiem tah chu in thlahai la pe bok ka ta, kumkhuoin hluo tàng in tih' tia i hming sâla i lo intiemnahai kha hre zing raw khai" tiin a ngên rak a. 14 LALPA chun a hnina chu pomin, a mihai chunga sietna intlun dinga a vauna laka chun a'n hnûk kîr a. 15 Thuthlung lungphêk pahnih, a hma tieng le hnung tienga thu inker sip chu a kuta chawiin Mosie chu tlânga inthokin a hung thla a. 16 Lungphêkhai chu Pathien kutsuok a na, a chunga thu inkerhai chu Pathien ziek ngei a nih. 17 Chun, Josua chun mipui khêk ri a hrietin Mosie kuomah, " Chu! riebûk tienga ri ka hriet chu indo ri a va ang de!" a ta. 18 Mosie chun, "Chu chu hnetu khêk ri a ni naw a, tlawmhai khêk ri a ni bok nawh; hla sak ri a nih ka hriet lem chu" a ta. 19 Mosien riebûk a hung pan lai chun bawngte lem le an làm mup mup lai chu a hmu a, a lungsen chu an ling thut a, a lungphêk chawihai chu a pei thlâk a, tlâng bula chun a koi dar ta vong a. 20 Bawngte lem an siem chu a lâk a, meiah a raw a, a rawt nawi vong a, tui chungah a phul a, chu chu Israelhai a'n dawntir a. 21 Mosie chun Aron kuomah, "Hienghai hin i chungah iem thil lawm am an thaw a, hienga thil suol nasa tak el an chunga i'n tlungtir hi?" a ta. 22 Aron chun, "Ka lalpa, ka chungah lung suksen naw rawh. Hieng mihai hi suol tieng awn tlat mi an nih ti i hriet annawm. 23 Ka kuomah an hung a, 'Kan hma thuoitu ding pathienhai mi siempêk rawh. Hi Mosie, Aigupta rama inthoka mi thuoi suoktu hlak hi a chanchin kan hriet ta si naw a' an hung ti a. 24 Kei chun, 'Rangkachak incheina nei taphotin hlip raw hai se' ka ta. Rangkachak chu an hung chawi a, meiah ka rawtui a, bawngte lem hi a hung suok el a nih" a ta. 25 An nuom dân dàna mipui intàl vel chu Mosien a hmu a, an hmèlmahai nuizatbûr inchang khopin Aronin a lo intàltir tawl a nih ti a hriet a. 26 Chuongchun, riebûk lûtna kota chun Mosie chu a ngîr a, "Tukhom LALPA kuom tienga thang taphot chu ka kuom tieng hin hung ro" a ta. Levi thlahai po chu a bula chun an hung vong a. 27 Mosie chun an kuomah, "LALPA, Israelhai Pathien chun hi hi a hril a nih: 'Mi tinin in kawlhnâm pai unla, riebûk kota inthoka a tawp chen a suk a tungin fang inla, mi tinin in unauhai khom, in ruolhai khom, in tuolbawmhai khom that pei ro' a ti a nih" a ta. 28 Levi thlahai chun Mosie ti ang chun an thaw a, chu ni chun mi sângthum vel an that a. 29 Mosie chun an kuomah, "Voisun hin in nauhai ngei le in unauhai ngei khom in do ngam leiin LALPA ta dinga sie hrang in ni ta a, voisun hin mal a sawm cheu a nih" a ta. 30 A zînga chun Mosien mipui kuomah, "Thil suol nasa tak el in lo thaw ta a, sienkhom tuhin LALPA kuomah hang fèng ka tih, in suolna lakah inremna ka siem thei takduoiin" a ta. 31 Chuongchun, Mosie chu LALPA kuomah a hang fe nawk a, "Hienghai rawi suol thaw hi a râpthlâk a nih. Anni ta dingin rangkachak pathien an insiem a. 32 Sienkhom tu hin lunginsiet takin an suol ngaidam hrâm raw khai. I ngaidam thei lul naw chun kei hi i mihai hming ziekna lekhabua inthokin mi thai bo dai el lem rawh" a ta. 33 LALPA chun Mosie kuomah, "Ka chunga thil suol thawtuhai hming chauh ka lekhabua inthokin thai bo ka tih. 34 Tu hin fe la, fena ding ka hril ta che hmuna khan mipuihai chu thuoi phot la, ka vântirkoin iI hma thuoi pei a tih. Amiruokchu, ka hrem ding pha chu an suolna ngeia chun hrem ka tih" a ta. 35 Chuongchun, Aron siem bawngte chunga an thil thaw lei chun mipuihai chu LALPAN hripuiin a hrem tawl tah a.

Exodus 33

1 Chun, LALPA chun Mosie kuomah, "Nang le Aigupta rama inthoka i hung thuoi suokhai khan hi hmun hi suoksanin, Abraham le Isak le Jakob kuoma 'In thlahai ta dingin ka la pêk ding a nih' tia inkhâm meua ka lo tiem ram tieng chu pan tung ro. 2 In hmaah ka vântirko tir ka ta, Kanan mihai, Amor mihai, Hit mihai, Periz mihai, Hiv mihai le Jebu mihai chu lo hnot suok a tih. 3 Khuoizu le nenetui luongna ram chu pan tung unla, sienkhom hnam lulul tak in ni leiin nangni lai fe ve naw ning, lampuiah sukbohmang tawl rawi ka ti cheu" a ta. 4 Chu thu chu mipuiin an hrietin an bei a dong hle a, an tap a, tukhomin incheina thil an inbel nawh. 5 LALPA chun Mosie kuomah, "Hieng thu hi Israelhai kuomah hril rawh: 'Hnam lulul tak in nih. Chom khat khom ka'n tlonpui cheu chun ka sukbohmang pal el thei cheu a nih. Tu hin in incheina thil po po hlîp thla vong unla, ieng am ka law ding cheu la sukfel ka tih' tiin" a ta. 6 Chuongchun, Horeb tlânga chun Israelhai chun an incheina thil po po chu an hlîp thlàk ta vong a nih. 7 Mosie chun puon in chu a som pei a, riebûk an khuorna taphotah an riebûka inthoka hla feah a zar a, chu chu 'Intuokna Puon in' tiin a'n bûk a, LALPA rawn nuom taphothai chun puon in chu an pan hlak a. 8 Puon ina lût dinga Mosie suok an hmu pha leh mi po poin mani puon in kot senga inthokin a lût chenin an thlir thup hlak a. 9 Puon ina Mosie lût charin sûm ngir chu a hung tum a, puon in kotkhâra chun a ngîr a, Mosie kuomah LALPA chun thu a hril hlak a. 10 Intuokna Puon in kotkhâra sûm ngîr an hmu pha leh mi po po chun mani riebûk kot senga inthokin kûnin an chawibiek hlak a. 11 Ruolcham biek ang elin LALPA chun Mosie chu inhmatonin a biek hlak. Chu zoah Mosie chu a puon inah a hung kîr nawk hlak a, ama thangpuitu tlangval Joshua, Nuna naupa ruok chun puon in chu a màksan ve ngai nawh. 12 Mosie chun LALPA kuomah, "Ngai ta, nangin ka kuomah 'Hienghai hi thuoi suok rawh' i ti a, sienkhom tuin am a mi fepui ding ti i mi hril bok si nawh. Nang chun, 'Hminga ko nal khopa ka hriet che a na, ka mit khom i tlung ti ka hriet bok' i ti a. 13 Chuonga i mit dàm ka lo tlung takzet a ni chun, nangma hre a, i mit ka tlung zing theina dingin i konglam mi zirtir rawh. Hi hnam hi i mihai ngei an nih ti hre zing rawh, " a ta. 14 LALPA chun, "Ka umpuina chun som zing a ti cheu a, hadamna pêng ka ti cheu" a ta. 15 Mosie chun, "I mi som zing naw ding chun hi taka inthok hin m'n fe suoktir lul naw rawh. 16 Nangin i mi fepui si naw chun kei le ka mihai chungah i lawm a nih ti tuin am hre thei an ta? I mi fepui ruok chun hnuoi hmun tina chênghaiin i mihai hi kan danglam bikzie hrieng an tih" a ta. 17 LALPA chun Mosie kuomah, "Ka mit i tlung lei le hminga ka ko hiel i ni leiin i thil mi hni chu thawng ka tih" a ta. 18 Mosie chun, "I hmel mi'n hmutir hram ta la" a ta. 19 LALPA chun, "Ka thatna po po i hmaah inlangtir ka ta, i hmaa ngei kei LALPA hin ka hming puong hlak ka tih. Ka nuom taphot lunginsiet ka ta, ka nuom taphot chungah za ngâi ka tih. 20 Ka hmêl ruok chu hmu thei naw ti nih, ka hmêl hmua dam zing thei an um awm si nawh" a ta. 21 LALPA bok chun, "En ta, ka bula hin i ngîr theina ding lungpui a um a, chu taka chun lo ngîr rawh. 22 Ropui taka ka hung pha leh lungpui kak kâra hin lo um la, ka fe khel hma khat che ka kutin hlieng ka ti che a, 23 ka liem pha ka kut chu la son ka ta, ka hnung tieng chauh hmu thei i ta, ka hmel ruok chu hmu thei naw ti nih" ta.

Exodus 34

1 Chun, LALPAN Mosie kuomah, "A hmaa ang bok kha lung phêk pahni ser la, lung phêk i sukkoi taa thu inziek kha ziekpêk nawk ka ti che. 2 Zîngah zîng tieng siem zo la, Sinai tlângah hung la, tlâng sîpah ka hmaah hung inlang rawh. 3 Tu khomin an zui ding che a ni naw a, tlângah tu khom an inlang ding a ni bok nawh; beram ruol le bawng ruol khom tlâng bula chu tla naw raw hai se, " a ta. 4 Chuongchun, Mosie chun a hmaa ang bokin lung phêk pahni a ser a, LALPAN thu a pêk angin, lung phêk pahni chu a kuta chawiin zîng inhma takin Sinai tlângah a kai a. 5 LALPA chu sùmah a hung tum a, Mosie bula chun a ngîr a, LALPA a nizie a hril a. 6 A hma tienga Mosie a fe pèl lai chun, "Kei hi LALPA, mi lainattu le lunginsiettu, lung inuoi, hmangaina le ringumnaa sip LALPA Pathien, 7 sâng tam tak chunga hmangaina inlangtirtu le an rîtlona hai, helna hai le suolna hai ngaidam hlaktu, amiruokchu thiem loa ruothai chu insuo ngai lo le an pahai suolna leia an nauhai le an nauhai nauhai, suon thum suon lina chen khom hrem hlaktu chu ka nih" tiin a puong a. 8 Mosie chun inrang taka bokkhupin a chawibiek a. 9 "Aw LALPA, tuhin i mit ka tlung takzet a ni chun, LALPA chun mi fepui hrâm raw se. Hnam lulul tak chu an ni ngei el, sienkhom kan rîtlona le suolnahai chu ngaidam la, i ro hluotuah mi pom lul rawh" a ta. 10 LALPA chun, "Ngai ta, nang leh thu ka thlung ding a nih. Khawvel po poa tu hnam chunga khom la thaw ngai lo thil mak chu i mihai hmaah ka thaw ding a nih. I ta dinga thil râpum tak ka thaw ding chu in kawl vela umhai po poin la hmung an tih. 11 Voisuna thu ka pêk che hi zawm rawh. Amor mihai, Kanan mihai, Hit mihai, Periz mihai, Hiv mihai le Jebu mihai chu i hmaa inthokin hnot suok ka tih. 12 I fena ding rama chêng hnamhai leh thuthlung siem lo dingin fimkhur rawh, chuong naw chun nangni lai châng inchang an tih. 13 An maichâmhai sukchim vong unla, an lungphunhai vaw koi vong unla, an pathiennu Asera lem po po phûr thlu vong ro. 14 Pathien dang hrim hrim be naw ro, in LALPA a hming Thîka hi Pathien thîkthusie a ni si a. 15 "A ram mihai leh thuthlung siem lo dingin fîmkhur ro; an pathienhai kuomah inzorar an inhlàn pha chun nangni khom fiel vêng an ti cheu a, an inthawina sa fa ve hlauh rawi in tih. 16 In naupahaiin an naunuhai an nei chun, an pathienhai kuoma an inzor pha in naupahai khom an thil chîng chu thaw ve dingin thuoi lût ve pal rawi an tih. 17 "In ta dingin sung chop pathien insiem naw ro. 18 "Chol thang lo Bei Kùt in hmang hlak ding a nih. Thu ka pêk ta cheu ang khan, ni sari sûng chu chol thang loa siem bei chauh in fâk ding a nih. Hi kût hi Abib thlaa a hun ruota ngei in hmang ding a nih. Abib thla chu Aigupta in suoksan thla kha a nih. 19 "Sul kêu hong hmasa tak chu ka chan a nih, in ran vai, beram ruol le bawng ruol laia a chal pieng hmasa takhai khom. 20 Sabengtung pieng hmasa tak chu beramtein intlan unla, in intlan naw chun a nghawng suktliek ro. In nau pasal pieng hmasa tak chu in intlan ding a nih. Ka hmaah tu khom kut ruokin an hung inlang ding a ni nawh. 21 "Ni ruk sûng sin thaw unla, a ni sarinaa ruok chu chawl ro. Lo kei hun le bu sîk huna khom chawl hlak ro. 22 Bu in tharsuok hmasa takin Chawlkar Kût hmang unla, in buhai in hlu lût vong pha leh Pawl Kût hmang bok ro. 23 "I mihai laia pasal po po chu LALPA, Israel Pathien hmaah kum tin voi thum an hung inlang zie ding a nih. 24 In hmaa hnam danghai chu hnot suok ka ta, in ram zauh lien pei ka ta, LALPA in Pathien hmaa inlang dinga kum khatah voi thum in hang fe changin tu khomin in ram chu hung lâk tum naw ni hai. 25 "Ka kuoma thisen in hung inhlàn pha leh, chol thanga siem thil ieng khom inhlàn sa naw unla, Fekân Kùt inthawina sa khom a zînga chen in sie ding a ni nawh. 26 "In lo tharsuok laia a tha tak ngot chu LALPA in Pathien inah in hung chawi ding a nih. Kelte sa chu a pui nenetuiin in suong ding a ni nawh, " a ta. 27 LALPA bok chun Mosie kuomah, "Hieng thuhai hi ziek thla diem rawh, hieng thuhai dungzui hin a nih nang le Israel kuomah thu ka thlung chu nih" a ta. 28 Mosie chu LALPA bulah bu fa lo le tui dawn loin ni sawmli le zân sawmli a um a, a lung phêk chawia chun thuthlungna thu, Thupêk Sawm chu a lo ziekpêk a. 29 Tlânga inthoka thuthlung inziekna lung phêk pahni chawia Mosie a hung kìr chun, LALPA leh an inbiek leia hmêl èng a put chu a hriet dêr nawh. 30 Aron le Israelhaiin Mosie hmel èng an hmu chun an pan hnai ngam naw a. 31 Sienkhom, Mosie chun anni chu a ko a, Aron le khawtlâng hotuhai chun an hung hnai a, a lo inbiekpui a. 32 Chu zoah Israel mipuihai khom chun an hung pan hnai a, LALPAN Sinai tlânga thu a pêkhai po po chu a lo pèk sawng a. 33 Anni a biek zoin Mosie chun a hmai chu hmaidierin a'n khum a. 34 Amiruokchu, LALPA be dinga Puon ina a lût sûng po a hmai inkhumna chu a hlîp hlak. A hung suok pha leh LALPA thupêkhai chu Israelhai kuomah a hung hril a, 35 mipuiin a hmêl èng an hmu hlak a. Chu zoah LALPA inbepui dinga a lût nawk hma po chu hmaidier a khum nawk hlak.

Exodus 35

1 Mosie chun Israel thla sûngkuohai po po chu a ko khawm a, an kuomah, "Hieng hi in thaw dinga LALPA thupêk chu a nih. 2 Ni ruk sûng sin thawnain hmang in ta, a ni sarina ruok chu in ta dinga ni ser, LALPA chawl ni Sabat a nih. Tu khom hi nia sin thaw lui chu sukhlum ding a nih. 3 Sabat ni chun in chêngna hmunah hrim hrim mei in inkhùk ding a ni nawh, " a ta. 4 Mosie chun Israel thla pungkhawmhai kuomah, "Hi hi LALPA thupêk chu a nih: 5 'In thil neia inthokin LALPA ta dingin thilpêk hung pe ro. Mani phal ang ang hung chawi ro: rangkachak dâm, tangkaruo dâm, dâr dâm; 6 pat zâi dumpawl, senduk le senlâr dâm, puon zâi inhmi dâm, kèl hmul dâm; 7 beram vun, rong sena nam dâm le tui bawng vun dâm; sitim thing dâm; 8 khawnvara sit ding oliv hriek dâm; hriek nàl phaa pol chi mawsawla le rimtui raw ding dâm; 9 thiempu zakuo dâr bak le awmbela bel ding onik lung le lunghlu dang dang dâm. 10 "Nangni laia kut themthiem po po hung unla, LALPA hril dân angin hieng po po hi hung siem raw hai se: 11 biekbûk le puon in le a'n khumna ding dâm, a man nghetna ding dâm, a bang ding thing phêk dâm, a bangru dâm, a ban dâm, a ban thut dâm; 12 thuthlung bawm le a zawnfung le a chunga zangàina thungpha le a hlietu ding puonzâr dâm; 13 dawkàn le a zawnfung le a hmangruo po po le hlànbei dâm; 14 khawnvar siena le a hmangruohai, khawnvar le a tuia hmang ding hriek dâm; 15 rimtui rawna maichâm le a zawnfung dâm, hriek nàla hmang ding hriek rimtui le rimtui raw ding dâm; biekbûk lûtna kota zar ding puonzâr dâm; 16 pumraw inthawina maichâm le dâr lên inphanhai, a zawnfung le bûr le bêlhai dâm; dâr maihùn le a thut dâm; 17 tuolpûka zar ding puonzâr le a banhai le a thuthai dâm; tuolpûk kota zar ding puonzâr dâm; 18 biekbûk puon in le a tuolpûk puon in kil dèna hmangruohai le hruihai dâm; 19 hmun thienghlima rongbawlnaa hmang ding silfèn mawi tak taka khawnghai, thiempuhaiin rong an bawl huna hàk ding thiempu Aron silfèn thienghlim le a naupahai silfèn dinghai dâm" a ta. 20 Israel thla pungkhawmhai chu an tìn dar ta a. 21 Lungrila pêk nuomna neihai chun Intuokna Puon in le chu taka rongbawlna hmangruo ding le silfèn thienghlim siemna dinghai chu LALPA hmaah an hung chawi a. 22 An phal ang taphot chu a nuhmei a pasalin rangkachak bânbun dâm, nabe dâm, suoi namna kutsebi dâm, thi dâm le incheina belmawi tinrêng dâm le rangkachak tlang dâm hung pein, LALPA hmaah thên thilhlànahs an hung inhlàn a. 23 Chun, pat zâi dumpawl, senduk le senlâr dâm, puon zâi inhmi dâm, kèl hmul dâm, beram vun, rong sena nam dâm, tui bawng vun dâm le an nei taphot chu, an hung chawi khawm bok a. 24 Tangkaruo le dâr pe nuomhai chun LALPA kuomah an hung pêk a, sitim thing neihai chun an nei ang ang chu an hung chawi bok a. 25 Pat them thiem nuhmei po poin pat an kher a, chuong an pat kher a dumpawl, a senduk le a senlâr dâm, pat zâi inhmi dâm chu an hung chawi a. 26 Kèl hmul kher thiem nuhmeihai chun phùr takin an kher a. 27 An hotuhai chun thiempu zakuo le a awmbela hmang dingin onik lung le lunghlu dang dang an hung thaw khawm a. 28 Mawsawla le khawnvara sit ding oliv hriek dâm, hriek nàla hmang ding hriek rimtui le raw ding rimtui dâm an hung chawi bok a. 29 Chuong ang chun, LALPAN Mosie kuoma siem ding le thaw dinga a ti taphothai siemna dingin Israel mi, a nuhmei a pasalin mani lungril puok suok ang peiin LALPA kuomah thilpêk an hung chawi khawm a nih. 30 Chun, Mosie chun Israelhai kuomah, "Ngai ta u, Juda hnama mi Hur naupa Uria, chu naupa Bezalel chu LALPAN a thlang a, 31 ama chu chemkalna, theina le hrietna nei ding le kong tinrênga kut themthiemna nei dingin Pathien Thlarauin a sung sip a, 32 rangkachak le tangkaruo le dâr hmanga mawi taka thil siem dân ding riruong thiemna dâm, 33 thiem taka lungmantam kera mawi taka zep thiemna dâm, mawi taka thing chei thiemna hai le ze mawi hrang hrang siem thiemna hai dâmin a'n thuom a nih. 34 Ama le Dan hnama mi Oholiab, Ahisamak naupa chu mi danghai zirtir thiem theina a pêk bok a. 35 Anni chu thil tinrêng thiem taka siem thiemna dâm, thaw ding thiem taka riruong lawk theina dâm, pat zâi dumpawl, senduk le senlâr le puon zâi inhmi hmanga ze mawi taka khawng thiemna le thui thiemna dâm nei dingin lungril varnain a sung sip a.

Exodus 36

1 "Chuong ang chun, LALPAN thu a pêk ang tak chu zuia a hmun thienghlim an bawl theina dingin Bezalel le Oholiab le mi danghai chu themthiemna le theina le a thaw dàn ding hriet theina chu LALPAN a pêk a nih" tiin a hril a. 2 Mosie chun Bezalel le Oholiab le mi themthiem ruol, LALPAN theina a pêk le phûr taka thaw dinga inpe nuom taphothai chu a ko khawm a. 3 Biekbûk bawlna dinga Israelhaiin thilpêk an hung pêk khawm po po chu themthiemhai kutah Mosie chun a pêk suok a. Chun, tûk tinin mipuihai chun anni lungril puok suokin thilpêk an hung inhlàn sap pei bok a. 4 Chuongchun, biekbûk bawla sinthaw themthiemhai chun an sinthaw lai chu màksanin Mosie kuomah an fe a, 5 a kuomah, "LALPAN thu a pêk anga bawl zo vong theina khop nèka tam hiel mipuiin thilpêk an hung chawi khawm tah" tiin an va hril a. 6 Chu phing leh Mosie chun, "Tu khom a nuhmei a pasalin biekbûk bawlna ding thilpêk hung chawi ta naw ro" tiin an riebûka chun tlâng a'n samtir a. 7 An mamaw nèka tam hiel biekbûk bawlna ding hmangruo an nga tàk leiin hung pe sap ta lo dingin an indangkîr a nih. 8 Sinthawhai laia mi themthiemhai chun biekbûk puonzâr ding thlè sawm, pat thlûr dumpawl, senduk le senlâra khawng, puon khawng thiemhaiin cherubim lim thiem taka an zep chu an siem a. 9 Puonzâr tin chu a dung meter sawmpahnia sei le a khang meter hnia lien vong a nih. 10 Puonzâr thle nga chu an thui zom a, a dang thlè nga khom chu an thui zom bok a. 11 Puonzâr zom khat hmor tlânga chun a naval ding a dumpawlin an siema, chuong ang bokin zom danga khom chun an siem bok a. 12 Puonzâr zom khata chun a naval sawmnga a um a, zom danga khom chun sawmnga an um bok a, a navalhai chu inep tuo vonga siem a nih. 13 Chu zoah rangkachakin a chep dèna ding sawmnga an siem a, a chepna chun a naval tinah an chep de a, biekbûk chu pindan pakhat a hung ni ta a. 14 Chun, biekbûk chung inkhumna dingin kel hmul puonzâr sawmpakhat an siem a. 15 Puonzâr thlè tin chu a dung meter sawmpathuma sei le a khang meter hni senga lien a na, puonzâr thlè sawmpakhat chu an inchen vong a nih. 16 Puonzâr thlè nga chu an thui zom a, puonzâr thlè ruk dang khom chu an thui zom bok a. 17 Puonzâr zom khat hmor tieng tlànga chun a naval sawmnga an siema, chuong ang bokin puonzâr zom danga khom chun an siem bok a. 18 Chun, dârin a chep dèna ding sawmnga an siem a, a naval tin ve veah puonzâr pahnihai chu an chep de a, biekbûk chu pindan pakhat a hung ni ta a. 19 Chun, beramchal vun, rong sena nam chun puon in chung chu an inkhum a, chu chunga chun tui bawng vunin an inkhum nawk a. 20 "Biekbûk banga intung dingin sitim thing phêk tlûn tak a rem khawm a. 21 Thing phêk an remhai chu a dung meter lia insâng, a khang centimeter sawmruk paruka hlai seng a nih. 22 Bang phêk tin sîr ve ve chu a bulthuta inphun thei dingin a hmor sir ve ve sak zum vong a nih. Chuong anga a hmor sakzum pahni chu phêk tinah an siem vong a. 23 Biekbûk sim songa chun bang phêk sawmhni an phun a, 24 a thuta hmang ding tangkaruoin bulthut sawmli an siem a, bang phêk tinah bulthut pahni pei a um a, chu taka chun bang phêk tinah a sir hmor sakzum pahni chu an phun a. 25 Biekbûk hmar songa ding khomin bang phêk sawmhni an siem a, 26 a bulthut ding tangkaruoin sawmli an siem bok a, bang phêk tinah bulthut pahni pei a um, chu taka chun a bang phêk hmor sakzum chu an phun a. 27 A sîr kil, biekbuk thlang tienga dingin bang phêk paruk an siem a, 28 a kila dingin bang phêk pahni an siem bok a. 29 Hi a sîr kila thang bang phêk pahni hi a thuta inthoka a lêr chena kil kop a nih. 30 Chuongchun, bang phêk pariet inphunna ding a bulthut sawmparuk chu tangkaruoin an siem a, a bulthut pahni pei chu bang phêk pakhat peiah an hmang a nih. 31 "Chun, a bangru ding sitim thing tluonin tlar nga an siem a, 32 chu chu sir tinah tlar nga an inbûk a. 33 A bangru lailung tak chun biekbûk bang sir tuok chun a man khawm a. 34 Bang phêk po po chu rangkachak tuia inluon vong a nih. A bangru rolna ding rangkachak naval an siem bok a. A bangru po po chu rangkachak tuia inluon vong a ni bok. 35 "Biekbûk puonzâr ding chu patzâi inhmi thlur kop, a dumpawl, a senduk le senlâr inpola siem, puon khawng thiemhaiin cherub lim thiem taka an zep a nih. 36 A zarna dingin sitim thing ban pali, rangkachak tuia inluon chu an siem a, a thut dingin tangkaruo phêk pali an siem a, puon zâr khaina ding rangkachak kuol an siem bok a 37 Biekbûk lûtna kotkhàra zar dingin patzâi inhmi thlur kop, a dumpawl, a senduk le a senlar inpola khawng, puon khawng thiemhai kutsuok an siem a, 38 puonzâr khaina dingin sitim thing ban panga le a khaina kuol, rangkachak tuia inluon vong chu an siem a. Ban panga thuta hmang ding dâr phêk panga an siem bok a.

Exodus 37

1 Bezalel chun sitim thingin Thuthlung Bawm a siem a, a dung chu meter khat le centimeter sawma sei, a khang chu centimeter sawmruk le paruka lien le a'n sângzie chu centimeter sawmruk le paruk a nih. 2 A sûng tieng le puo tieng chu rangkachak hlîr tuia inluon suok vong a na, a tlâng chu a vela rangkachaka kawm vong a nih. 3 A zawnfung rol lûtna dingin rangkachak naval pali a sung a, bawm sîr khing tieng khing tieng chun pahni ve ve a'n bûk a. 4 A zawnfung dingin sitim thing tluon pahni a siem a, rangkachak tuiin a'n luon khum a. 5 A zawnfunghai chu a khing a khinga rangkachak naval a'n bûka chun a rol lût ve ve a. 6 Rangkachak hlîrin zangàina thungpha sìn, a dung meter khat le centimeter sawma sei, a khang centimeter sawmruk le paruka lien a siem bok a. 7 A sìn hmawr tieng ve vea chun rangkachaka siem cherub lim, a sera ser chu a'n ngìrtir a. 8 A hmawr khing tieng chun cherub pakhat a ngìr a, a khing tieng hmorah pakhat dang a ngìr bok a, an ke chu zangàina thungpha sìn leh sakhata inzom a nih. 9 Cherubhai chun thla an zâr a, an thla chun Thuthlung Bawm sìn chu a zâr khum a. Inhmatonin an ngìr a, zangàina thungpha sìn chu an bi ve ve bok a. 10 Chun, sitim thingin dawkàn a siem a, a dung centimeter sawmriet le parieta sei, a khang centimeter sawmli le palia lien, a'n sângzie centimeter sawmruk le paruk a nih. 11 Chu chu rangkachak hlîrin a'n luon khum vong a, a tlâng chu rangkachakin a kawm vong bok a. 12 Millimeter sawmsari le pangaa lienin a kawm a siem a, chu chu rangkachakin a tlâng kawm vong a. 13 A zawnfung rolna ding rangkachak naval pali a sung a, 14 dawkàn kawm sîra chun a'n bûk a. 15 A zawnfung chu sitim thingin an siem a, rangkachak tuiin a'n luon a. 16 Chu taka hmang ding chun rangkachak hlîrin thleng dâm, berbu dâm le uoiin thilhlàn bun thlàkna ding no tung dâm an siem a. 17 Chun, rangkachak hlîrin khawnvar siena a siem a, a ngul le a bulthut chu a sera ser ngot a na, a lu bawk hai, pâr kumùm lai le vul lai lim hai le chun rangkachak tlang khata inthoka ser zom vong a nih. 18 A ngula inthok chun kau rukin a pêng suok a, sîr khatah kau thum, sîr khing tieng kau thum indotin a um thlie a. 19 A kau hmawr sîp, a lu chu ruon pâr lim, no rei parh ang a na, a kuonga chun ruon pâr kumum lai le pâr lai lim pathum a um a; chuong ang bok chun khing tieng kaua khom chun a um bok a. 20 Khawnvar siena ngul sîpa chun a lu bawk a um a, chu hnuoia chun a kumum lim le a pâr vul parh lai lim pali a um a. 21 Chuonghai chu zâr chunghnung le hnuoihnung pêngna inkâr ngula um a nih. 22 A kumum le kauhai chu a ngul le a thut leh rangkachak hlîra ser zom vong a nih. 23 Chun, chu taka sie ding chu khawnvar pasari a siem a, khawnvar phita chep ruolna le hmangruo danghai khom rangkachak hlîra siem vong a nih. 24 Khawnvar siena le a hmangruo po po siemnain rangkachak hlîr hlak kilogram sawmngat vel a hmang zo a nih. 25 Sitim thingin rimtui rawna maichâm kil li nei, a dung centimeter sawmli le panga, a khang centimeter sawmli le panga bok, centimeter sawmkuoa insâng a siem bok a, a kila a kihai le chun sakhata inzom vong a nih. 26 A chung le a sîr po po le a kihai chu rangkachak hlîr tuiin a'n luon a, a ko tlâng sir tuokin rangkachakin an kawm vong bok a. 27 A zawnfung rolna ding a tlâng sîr hnuoi puo tieng ve veah rangkachak naval a'n bûk a. 28 A zawnfung khom sitim thingin a siem a, rangkachak tui an inluon khum a. 29 Chun, hriek nàl chi, hriek thienghlim le raw chi rimtui inhnik tak el chu rimtui siem thiemhaiin an siem bok a.

Exodus 38

1 Sitim thingin maichâm kil li nei, a dung meter hni le centimeter hni, a khang meter hni le centimeter hni le a'n sângzie meter khat le centimeter thum a siem a. 2 Maichâm kil tinah a kî a siem a, maichâm le a kihai chu an inzom vong a, dâr tuiin a'n luon vong bok a. 3 Maichâm hmangruo bûr le bêl po po, vutluo le vut siena bêl hai, thil thènaa hmang maihûn hai, sa thurna thir haihaw hai le hme suongna bêl hai chu dâra siem vong a nih. 4 Maichâm chung zawl le a hnuoi inkâr lailunga zar ding dâr lèn a siem a. 5 Dâr lên inbûkna sîr ve vea chun a zawnfung rolna ding dâr naval a sung chu a'n bûk a. 6 Sitim thingin maichâm zawnfung a siem a, dâr tui a'n luon a, 7 zawnfung chu maichâm sîr khing ve vea navala chun a rol lût a. Maichâm chu thingphêkin a'n huon a, a lai chu a kawrongin an sie a. 8 Intuokna Puon in lûtna bula rongbawltu nuhmei ruol dârthlalang thaw khawma inthok chun dâr maihùn le a thut an siem bok a. 9 Chu zoah biekbûk inhuon sûngah tuol zawl a siem a, sim tienga mi chu meter sawmli le palia sei a na, puon zâi inhmia khawng puonzâr a zar a. 10 Ban sawmhni le ban inthutna ding dâr phêk sawmhni a siem a, ban tina chun tangkaruoa siem puonzâr bàngna kuoi le thlung nghetna a um a. 11 Hmar song tieng khom chu meter sawmli le palia sei a na, ban sawmhni le ban inthutna ding dâr phêk sawmhni bok a um a, ban tina chun tangkaruoa siem puonzâr bângna kuoi le a thlung nghetna a um seng bok a. 12 Thlang tieng tuolpûk chu meter sawmhni le pahnia lien a na, puonzâr an zar a, ban sawm le a thut sawm a um a, ban tinah tangkaruoa siem puonzâr bângna kuoi le a thlung nghetna a um vong a. 13 Suo tieng, nisa suokna tieng khom chu meter sawmhni le pahnia lien a nih. 14 Meter ruk le centimeter ruka sei puonzâr le ban pathum le a thut pathum chu a lûtna sîr khing tieng chun a um a, 15 khing tieng panga khom chun meter ruk le centimeter ruka sei bok puonzâr le ban pathum le a thut pathum a um bok. 16 Tuol kot huol vela an zar puonzârhai chu pat zâi inhmi thlùr kopa mawi taka khawng a nih. 17 A ban thuthai chu dâra siem a na, a bana a kuoi le a thlung nghetna po po chu tangkaruoa siem a na, a ban sîp hmawr po po chu tangkaruoa inluon khum a na, tuol zawl ban po po chu tangkaruoa tuom mawi vong a nih. 18 A tuolzawl lûtna kota puonzâr chu pat zâi inhmi tak thlùr, a dum pawl, a sen duk le a sen lâr inpola khawng, puon khawng thiemhai kutsuok a na, meter kuoa sei le a tuolpûk puonzâr ang boka meter hnia insâng a nih. 19 Ban pali le dâra siem thut pali a nei a, a bana a kuoina le a thlung nghetna po po chu tangkaruoa siem vong a na, ban sîp hmawr po po chu tangkaruoa inluon vong a nih. 20 Biekbûk puon in le a tuol inhuonnaa a kil dèna po po chu dâra siem vong a nih. 21 Hienghai hi biekbûk, thuthlung biekbûk bawlnaa an hmangruo hmang zât, Mosie thupêk anga thiempu Aron naupa Ithamar inrawina hnuoia Levi chihaiin an inchikhai chu a nih. 22 Juda hnama mi Hur naupa Uria, chu naupa Bezalel chun LALPAN siem dinga Mosie kuoma thu a pêk po po chu a siem vong a. 23 Ama le thok chu Dan hnama mi Ahisamak naupa Oholiab, thil ziek thiem, kut themthiem, pat dumpawl, senduk le senlâr le pat zai inhmi tak hmanga puon khawng thiem a nih. 24 Hmun thienghlim bawlna dinga thèn thilhlâna rangkachak an pêk po po chu hmun thienghlima bûkna an hmang angin kilogram sângkhat a nih. 25 Intiemnaa thang tahai poin tangkaruo an pêk zât chu kilogram sângthum le zali le sawmthum a nih. 26 Chu chu, kum sawmhnia inthoka a chung tieng tiem po pasal nuoi ruk sângthum le zanga le sawmnga haiin hmun thienghlima shekel an pêk zât le inhen char a nih. 27 Biekbûk ban le puonzâr ban thuta hmang dinga tangkaruo an sung po po zât chu kilogram sângthum le zali a na, a thut pakhat peiah kilogram sawmthum le pali a lût a nih. 28 A bana thil bângna le ban hmawr inluonna le a zem nghetnaa tangkaruo Bezalal-in a hmang po po chu kilogram sawmthum a nih. 29 Thèn thilhlàna dâr an inhlàn po po chu kilogram sânghni zali le sawmhni panga a nih . 30 Chuonghai chu Intuokna Puon in ban thuta dâm, dâr maichâm le dâr lên inphan le a bûr le bêl po po siemnaa dâm, 31 biekbûk tuol zawl inhuonna ban thuta dâm, a kot ban thuta dâm, biekbûk puon in le a tuol zawla puonzârhai kil dêna dàma hmang a nih.

Exodus 39

1 Chun, Mosie kuoma LALPA thupêk angin, pat dumpawl, senduk le senlâr hmangin hmun thienghlima rongbawltu thiempuhai silfèn ding mawi takin an siem a, Aron ta dingin silfèn thienghlim an siem bok a. 2 Efod chu pat zâi inhmi thlùr kop, a dumpawl, senduk le senlâr hmangin an siem a. 3 Rangkachak chu inphân takin an sut pèr a, pat dumpawl, senduk le senlâr le zep dingin inhmi takin an chik thler sang a. 4 Dàrbak pahnih an siem a, efod kila chun a hmor chu an tingmit a, chu chun a man nghet a nih. 5 Kawnga efod hrên dena ding, efod ang chie an siem a, Mosie kuoma LALPA hril angin, chu chu efod le khawng inzom a nih. 6 Chu taka chun onik lung pahnihai chu rangkachaka a phûmna khuor an siema chun an phûm lût a, a chunga chun lunghlu ker thiemin suoi namna ding mawi taka a ker angin Jakob nauhai hming sawmpahni chu an ker a. 7 Mosie kuoma LALPA hril ang takin, chu lung chu Israel nauhai hriet zingna lungah efod dàrbaka chun rangkachak zâiin an phan de a nih. 8 Mi themthiem tak kutsuok anga thiemin, efod ang bokin rangkachak zâi le patzâi inhmi thlùr kop, a dumpawl, a senduk le a senlâr hmangin awmbel an siem a. 9 Awmbel chu a dung le khang centimeter sawmhni le pahni ve ve, a thuoa thlep phaa kil li nei a nih. 10 Chu taka chun lungmantam tlar li an zep a. A tlar hmasa taka chun rubi, topaz le beril lung a um a, 11 a tlar hninaah torkuis, safir le emeral lung a um a, 12 a tlar thumnaah jasin, agate le amethi lung a um a, 13 a tlar linaa chun krisoli, onik le jaspi lung a um. Chu lunghai chu rangkachak zâiin an zem khum a. 14 Lung po chu sawmpahni a na, lung tina chun Israel thlahai hming an ker seng a, lung tin chu Israel hnam sawmpahnihai suoi namna lung ang a nih. 15 Awmbel khit dena dingin rangkachak hlîr zâi chu her thlopin an hruol bok a. 16 Lungmantam phumna rangkachak khuor pahni an siem le rangkachak naval pahni an siem chu awmbel kil chung tieng an inbûk ve ve a. 17 Rangkachak khaidiet her thlop chu awmbel sîr ve vea rangkachak navala chun an thlung a. 18 A hmor khing tieng chu lungmantam phûmna rangkachak khuor pahni le chun an thlung zom a; awmbel thlungna chu efod dârbak hma tienga inthlung a nih. 19 Rangkachak naval dang pahni an siem a, awmbel kil hnuoi tieng, a sûng tieng, efod depah an inbûk a. 20 Chun, rangkachak naval dang pahni an siem bok a, chuonghai chu efod dàrbak bul tieng inbelna laia kawnghren chungah an inbûk a. 21 Mosie kuoma LALPA hril ang takin, awmbel chu inphaw hawk loa kawnghren chunga a kop thlap theina dingin awmbela rangkachak naval le efod-a rangkachak naval chu pat dumpawlin an sui mat a. 22 Efod hnuoia hâk ding korfuol an siem chu puonkhawngtuhaiin a dumpawl hlaka pat an khawng a nih. 23 A lai taka chun lu thunna ding an chep awng a, a rei inek nawna dingin am kîm vong a. 24 Zakaw fuol hmor tlânga chun pat zâi dumpawl, senduk le senlâr hmanga siem theibufai lim a vel tuokin an bel a. 25 Rangkachak hlîrin telneng an siem a, theibufai lim le rangkachak telnênghai chu inkarthlakin an khai a. 26 Chu thuom, a hmor tlânga telneng le theibufai lim inkârthlàka khai chu Mosie kuoma LALPA thupêk anga biekbûka rongbawlnaa hâk dinga siem a nih. 27 Puonkhawng thiem ruoiin, Aron le a nauhai ta dingin pat zâi inhmia inthoka khawng puon hmangin korfuol an siem a, 28 lukawm dâm, dierkhim dâm le kekor ding dâm khom an siem bok a. 29 Mosie kuoma LALPA hril ang takin thil thui thiemhaiin patzâi inhmi thlùr kopa an khawng a dumpawl, senduk le senlâr hmangin, mawi takin cheizemu an siem bok a. 30 Chun, rangkachak hlîrin chala hrên ding rangkachak phêk an siem a, chu taka chun suoi namnaa an ker ang elin, LALPA PUOL ti an ker a. 31 Mosie kuoma LALPA hril ang takin thiempu lukawm hma tieng chun pat hruol dumpawlin an khit de a. 32 Chuongchun, Intuokna Puon in biekbûk bawlna ding sin po po chu zo fel a lo ni ta a. Mosie kuoma LALPA thupêk ang charin Israelhai chun an thaw a. 33 Chu zoah biekbûk ding chu Mosie kuomah an hung tol a: puon in le a hmangruo po po, a cheina hmangruo hai, a chep nghetna hai, a bang phêk hai, a bangru hai, a ban hai, a ban thut hai; 34 a chung khum ding beramchal vun, rong sena an nam hai, tui bawng vun hai, daidanna puonzâr hai; 35 Thuthlung Bawm le a zawnfung hai le zangàina thungpha hai; 36 dawkàn le a hmangruo po po le hlànbei hai; 37 rangkachak hlîra siem khawnvar siena le khawnvar sie tlar ding hai le a hmangruohai, khawnvar tuia hmang ding hriek hai; 38 rangkachak maichâm hai, hriek nàla hmang ding hriek rimtui hai, rimtui raw ding hai, puon in lûtna kota zar ding puonzâr hai; 39 dâr maichâm le dâr lên inphan hai, a zawnfung hai, dâra siem bûr le bêl hai, maihùn le a thut hai; 40 biekbûk tuolzawla zar ding puonzâr hai, a ban le thut hai, tuolpûk lûtna kota zar ding puonzâr hai, tuolpuka puonzâr keina hrui le a kildena hai, biekbûk cheina hmangruo po po hai; 41 hmun thienghlima rongbawlna ding silfèn mawi taka khawng hai, thiempu Aron le naupahaiin thiempu rong an bawl huna an hàk ding silfèn thienghlim hai dâm a nih. 42 Chuong thilhai chu Mosie kuoma LALPA thupèk ang charin Israelhai chun an siem a. 43 Mosie chun a lo endik a, LALPA hril ang charin an thaw ti a hmu a. Chuongchun, anni chu Mosien mal a sawm a.

Exodus 40

1 LALPA chun Mosie kuomah, 2 "A thla khatna ni khatnaah Intuokna Puon in biekbûk chu inngîr rawh. 3 A sûngah Thuthlung Bawm chu sie la, puonzârin hlie khum rawh. 4 Dawkàn la lût la, a umna ding taka chun sie rawh. Khawnvar siena la lût bok la, a khawnvarhai inbûk rawh. 5 Rimtui rawna rangkachak maichâm chu Thuthlung Bawm hmaah sie la, biekbûk lûtna kotah puonzâr zar rawh. 6 "Biekbûk lûtna kot hmaiah pumraw inhlànna maichâm chu innghat la, 7 maihùn chu Intuokna puon in le maichâm inkarah sie la, tui sie bok rawh. 8 Biekbûk tuolpûk ding a vêlin rem la, tuolpûk lûtna kota chun puonzâr zar rawh. 9 "Hriek nàl chi chawi la, biekbûk le a sûnga um po po chu hriek nàl la, a cheina thilhai chenin inhlan thienghlim vong la, chuongchun hung thienghlim a tih. 10 Chu zoah pumraw inhlànna maichâm le a bûr le bêl po po nàl la, maichâm chu inhlàn thienghlim la, chuongchun hung thienghlim a tih. 11 Maihùn le a thut chu hriek nàl la, inhlàn thienghlim rawh. 12 "Aron le a naupahai chu Intuokna Puon in kotah hung thuoi la, dân angin tui insil raw hai se. 13 Chu zoah Aron chu silfèn thienghlim inhâktir la, hriek nàl la, thiempu nia ka rong a bawl theina dingin inhlàn thienghlim rawh. 14 A naupahai hung thuoi la, korfuol inhâktir tawl rawh. 15 Chuongchun, thiempu sin chu thaw a, ka ta dinga rong an bawl theina dingin, an pa hriek i nàl ang bok khan anni khom hriek nàl ve rawh. Hriek nàl an ni hnung chun an thlahai chen khom thiempu hung ni zui pei tâng an tih" tiin a hril a. 16 Mosie chun LALPA thupêk angin iengkim a thaw a. 17 Chuongchun, Aigupta an suoksana inthoka kum hnina thla hmasa tak le ni hmasa taka chun biekbûk ding chu bawl zo a ni ta a. 18 Mosie chun biekbûk bulthut chu a rem hmasa phot a, a bang phêkhai chu a'n tung a, a bangruhai chu a rol a, a banhai chu a phun a. 19 LALPA thupêk angin, biekbûk chung chu puonin a zar khum a, a chungkhum a'n thuo bok a. 20 Chun, Thuthlungna lungphêk pahni chu a lâk a, Thuthlung Bawma chun a sie a, a zawnfunghai chu a rol lût a, a chunga chun zangàina thungpha chu a sie a. 21 Thuthlung Bawm chu biekbûka chun a hung chawi lût a, LALPA thupêk angin puonzâr a zar khum a, Thuthlung Bawm chu an hlietir a. 22 Mosie chun dawkân chu Intuokna Puon in sûng, biekbûk hmar tieng, puonzâr puo tieng chun a sie a. 23 LALPA thupêk angin dawkàn chunga chun LALPA hmaah hlànbei a sie a. 24 Khawnvar siena chu Intuokna Puon in sûng, biekbûk sim tieng, dawkàn epa chun a sie a. 25 LALPA thupêk ang takin khawnvarhai chu LALPA hmaa chun a sie a. 26 Mosie chun rangkachak maichâm chu Intuokna Puon in sûng, puonzâr hmaa chun a sie a. 27 LALPA thupêk angin maichâm chunga chun rimtui a raw a. 28 Chun, biekbûk lûtna kota chun puonzâr a zar a. 29 Pumraw inhlànna maichâm chu Intuokna puon in biekbûk kot bula chun a sie a, LALPA thupêk angin a chunga chun pumraw thilhlàn le fâk ding thilhlàn chu a'n hlàn a. 30 Maihùn chu Intuokna Puon in le maichâm inkârah a sie a, insawpna ding tui a sie bok a, 31 chu chu Mosie le Aron le a naupahaiin kut le ke sawpna dingin an hmang a. 32 Mosie kuoma LALPA thupêk angin, Intuokna Puon in an lût ding zât le maichâm bula an fe ding zâtin an insawp hlak. 33 Chu zoah Mosien biekbûk le maichâm vela chun tuolzawl a siem a, tuolzawl lûtna kota chun puonzâr a zar a. Chuong ang chun Mosie chun a sin chu a zo ta a. 34 Chu zoah, Intuokna Puon in chu sûmin a hung tuom ta mup a, biekbûk chu LALPA ropuinain a hung hluo sip a. 35 Chuonga sûm a zîng mup lei le LALPA ropuinain biekbûk chu a hluo sip leiin Intuokna puon in sûnga chun Mosie khom a lût thei ta naw a. 36 Israelhai inzin sùng po po chun, sûmin biekbûk a'n kiengsan pha chauh an riebûka inthokin an inson suok hlak. 37 Sûmin a baw sùng chu an fe son ngai nawh. 38 Thlalera Israelhai inzin sùng po po an mithmu ngeiah LALPA sùm chu sùnah biekbûk chungah inzàmin, zânah zânkhuoin meichokin a um hlak.

Leviticus 1

1 LALPA chun Mosie a ko a, Intuokna puon ina inthokin a biek a. 2 "Israelhai kuomah hi thu hi hril rawh: 'Nangni lai tu khomin LALPA kuomah thil inhlàn ding in hung chawi chun beram amanih bawng ruol laia mi amanih hung inhlàn ro. 3 " 'Pumraw inthawinaa inhlàn chu bawng a ni chun a chal tuoi, hmèl hem lo a ni ngei ding a nih. LALPA ta dinga pom tlàk a ni theina dingin Intuokna Puon in kot bulah hung inhlàn raw se. 4 Pumraw inthawinaa thilhlàn ran lu chunga chun kut innghat a ta, a ta dinga inremna siemtu dingin pompêk nîng a tih. 5 LALPA hmaah bawngchal tuoi chu that a ta, thiempu Aron naupahai chun a thisen lâng an ta, Intuokna puon in kota maichâm chu thisen chun thèng an tih. 6 Pumraw thilhlàn bawng chu a vun inhlip a ta, chan nawi a tih. 7 Thiempu Aron naupahai chun maichâmah mei sêm an ta, thing ti ding khom ngaituo bok an tih. 8 Chu zoah Aron naupa thiempuhai chun a sa le a lu le a thauhai chu maichâma mei choka chun buk an tih. 9 Thiempu chun a sûng le a kehai chu tuiin sawp fai a ta, maichâmah rawng a tih. Chu chu mei hmanga pumraw thilhlàn, LALPA ta dinga rim inhnik chu a nih. 10 "Pumraw thilhlàn dinga a hung chawi chu a ran ruol laia mi beram amanih kel amanih a ni chun, a chal, hmèl hem lo a ni ding a nih. 11 Maichâm hmar tieng panga chun LALPA hmaah that a ta, Aron naupa thiempuhai chun ran thisen chu maichâm sîr tinah a velin thè khum an tih. 12 Chun, a sa chu chan a ta, a lu le a thauhai leh maichâm chunga chun thiempuin sieng a ta, 13 a sûng le a kehai chu tuiin sawp fai a ta, chuonghai chu thiempuin hung chawi a ta, a rêngin maichâmah rawng a tih. Chu chu mei hmanga pumraw thilhlàn, LALPA ta dinga rim inhnik chu a nih. 14 " 'Chun, LALPA ta dinga pumraw thilhlàn chu vate a ni chun, vathu tuoi amanih parva tuoi amanih a ni ding a nih. 15 Thiempu chun maichâmah hung chawi a ta, vate rîng chu her bong a ta, maichâmah rawng a ta, a thisen chu maichâm sîra chun infar kangtir a tih. 16 A ong le a hmul chu vut siena maichâm sak tieng chun peihawn a tih. 17 A thlaah manin pot fai a ta, pot nawi si loin maichâma meichoka chun rawng a tih. Chu chu mei hmanga pumraw thilhlàn, LALPA ta dinga rim inhnik chu a nih.

Leviticus 2

1 " 'Tu khomin bu le bâl thilhlàn LALPA kuomah an inhlàn pha chun beiphit indip tak an inhlàn ding a nih. Beiphita chun hriek bur a ta, beraw pol bok a ta, 2 chu zoah thiempuhai, Aron naupahai kuoma chun chawi a tih. Thiempu chun beiphit le hriek le beraw chokpol chu vei khat lâng a ta, hriet zingna thilhlànah maichâma chun rawng a ta, chu chu mei hmanga thil inhlàn, LALPA ta dinga rim inhnik chu a nih. 3 Inhlàn bâng po chu Aron le a nauhai ta ding nîng a ta, chu chu LALPA ta dinga meia thilhlàn laia a thienghlim tak a nih. 4 " 'Bu le bâl thilhlànah thuka ur bei in inhlàn ding chun chol thang lo beiphit indip tak, sahriek le hmet amanih, chol thang loa siem beipêr, a chunga hriek nàl amanih a ni ngei ding a nih. 5 I bei inhlàn ding chu thlènga ur a ni chun, beiphit indip tak le hriek chokpola siem, chol thang lo a ni ding a nih. 6 Bei chu suknawi la, hriek buok khum rawh, bu le bâl thilhlàn a ni si a. 7 I bu le bâl thilhlàn chu bêla suong a ni chun, beiphit indip tak le hriek chokpola siem a ni ding a nih. 8 Bu le bâl thilhlànhai chu LALPA hmaah hung chawi la, thiempu kutah pe la, ama chun maichâmah hung chawi a tih. 9 Thilhlàna inthok chun hriet zingna thilhlàn dingin thiempu chun vei khat lâng a ta, meiah rawng a ta, chu chu mei hmanga thil inhlàn, LALPA ta dinga rim inhnik chu a nih. 10 Inhlàn bâng po chu Aron le a nauhai ta ding nîng a ta, chu chu LALPA ta dinga meia thilhlàn laia a thienghlim tak a nih. 11 " 'Bu le bâl thilhlàn i hung chawi hrim hrim chu chol thang lo a ni vong ding a nih; chol amanih khuoizu amanih hrim hrim pumraw inthawina meiah i raw sa ding a ni nawh. 12 LALPA kuoma ra hmasa thilhlàn i hung chawihai chu rim inhnik dingin maichâmah i sie ding a ni nawh. 13 Bu le bâl thilhlâna inhlàn hrim hrim chu machi i saw vong ding a nih. Bu le bâl thilhlânah machi a thang ngei ding a nih, machi chu Pathien le in inkâra thuthlung inentirna a ni leiin i thil inhlàn po poah theinghil loin i saw vong ding a nih. 14 " 'I bu tharsuok hmasa tak LALPA kuoma i hung inhlàn ding chun, bu vui lâk hlim, meia zeu tawl le sukphit chu inhlàn rawh. 15 A chungah hriek bur la, beraw rimtui sie rawh, bu le bâl thilhlân a ni si a. 16 Thiempu chun bu sukphit le hriek chu beraw le chun LALPA kuoma bu le bâl hriet zingna thilhlânah inhlàn a ta, chu chu mei hmanga thil inhlân, LALPA ta dinga rim inhnik chu a nih.

Leviticus 3

1 " 'Chun, a thil inhlàn chu inremna inthawina ding a ni chun bawng ruol laia mi, a pui amanih a chal amanih hmèl hem lo chu LALPA hmaah a'n hlàn ding a nih. 2 A thil inhlàn lu chunga chun kut innghat a ta, Intuokna Puon in kot bulah that a ta, thiempuhai, Aron naupahaiin a thisen chu maichâm sîr vel tinah an thè ding a nih. 3 Chun, inremna inthawina thilhlâna inthok chun LALPA ta dingin hienghai hi meia inhlàn dingin a lâk ding a nih: 4 a kawsùng thau le a rîl bawmtu thau po po, a kal pahni le a diem nem lai tuomtu thauhai le a thin tuomtu a duorda po po leh. 5 Aron nauhaiin maichâma thing choka chun pumraw thilhlânah an raw ding a nih. Chu chu meia thilhlân, LALPA ta dinga rim inhnik chu a nih. 6 " 'Inremna inthawina dinga LALPA kuoma a thil inhlàn chu beram ruol laia mi a ni chun, a pui amanih a chal amanih khom ni sien, hmèl hem lo a ni ding a nih. 7 Beramte a'n hlàn a ni chun LALPA hmaah a hung kei ding a nih. 8 A beramte inhlàn lu chunga chun kut innghat a ta, Intuokna Puon in kotah that a ta, Aron naupahaiin a thisen chu maichâm sîr vel tinah an thè ding a nih. 9 Chun, inremna inthawina thilhlâna inthok chun LALPA ta dinga meia inhlàn dingin a thau dâm, a mei thau, a bul rawta inthoka tan dâm, a kawsûng le a rîl bawmtu thau po po dâm, 10 a kal pahnihai le a diemnema thau po po le a thin tuomtu duorda po po chu a kal chopin phor suok a ta, 11 chuonghai chu thiempuin maichâmah rawng a ta, chu chu LALPA ta dinga meia thilhlàn a nih. 12 " 'Kèl an inhlàn a ni chun LALPA hmaah hung kei a ta, 13 kèl lua chun kut innghat a ta, Intuokna Puon in kotah that a ta, Aron naupahaiin a thisen chu maichâm sîr vel tinah an thè ding a nih. 14 LALPA kuoma meia inhlàn dingin a kawsùng thau le a rîl bawmtu thau po po, 15 a kal pahni le a diemnem chen bawmtu thau po po le a thin tuomtu a duorda po po leh phor suok a ta, 16 chuonghai chu thiempu chun bu le bâl thilhlâna dingin maichâmah LALPA lo lawm dingin a raw ding a nih. A thau po po chu LALPA chanpuol a nih. 17 " 'Thau le thisen hrim hrim fâk lo ding ti thu hi khaw lai khom khawsa unla, in thla peihai ta ding chen khoma ka thupêk ngîr zing chu a nih' tiin hril rawh" a ta.

Leviticus 4

1 LALPA chun Mosie a biek a: 2 "Israelhai kuomah hieng hin hril rawh: 'Tu khomin tum rèng lei ni loa thil suol a thaw a, LALPA thupêkin thaw lo dinga a khap chu a lo bawsiet palh amanih, 3 hriek nàl tah thiempuin mipui chunga thiem naw intlungtir thei thil suol a lo thaw amanih a ni chun, bawngchal tuoi hmèl hem lo chu LALPA kuomah a suol thawina dingin hung inhlàn raw se. 4 Intuokna Puon in kotah bawngchal chu LALPA hmaah hung kei a ta, bawng lu chunga chun kut innghat a ta, LALPA hmaah bawng chu a that ding a nih. 5 Hriek nàl thiempu chun bawng thisen iemani zât chu lâng a ta, Intuokna Puon ina chun hung chawi a ta, 6 a kutpâr hmor chu thisenah zuk phûm a ta, thisen chu hmun thienghlim puonzâr bula chun LALPA hmaah voi sari a thè ding a nih. 7 Chu zoah thiempu chun LALPA hmaah Intuokna Puon ina rimtui rawna maichâm kia hai chun thisen chu tlawmte tât a ta, bawng thisen dang po chu Intuokna Puon in kota pumraw inthawina maichâm bula chun a bun thlâk vong ding a nih. 8 Suol thawinaa inhlàn bawngchal thau po po chu lâng a ta, a kawsùng thau le a rîl bawmtu thau po po, 9 a kalhai le a diemnem laia thau po po, a thin tuomtu duorda leh a kal pumin lâng a ta, 10 inremna inthawinaa bawng thau a lâk suok ang bokin thawng a ta, thiempu chun pumraw inthawina maichâma chun chuonghai chu rawng a tih. 11 Amiruokchu, bawng vun le a taksa po po, a lu le a kehai, a phingpui le a êk hai chu 12 khawhnawm hmun fai, vut an peina hmuna chun chawi a ta, vut chunga meipuia chun raw hmang a tih. 13 " 'Israelhaiin an tum lei rèng khom ni loa an hnam puma thil suol thaw a, LALPA thupêkin thaw lo dinga a khap chu an lo bawsiet palh chun, an thil suol thaw chu an hnam inpuiin an hrietpui naw khom ni sien, thiem naw an chang a nih. 14 Chu an thil suol thaw chu an hriet pha leh an inpui chun suol thawina dingin Intuokna Puon in hmaa chun bawngchal tuoi an hung kei ding a nih. 15 LALPA hmaah Israel upahai chun bawngchal luah kut innghat an ta, bawngchal chu LALPA hmaah an that ding a nih. 16 Hriek nàl thiempu chun bawng thisen iemani zât chu Intuokna Puon inah chawi lût a ta, 17 a kutpàr hmor chu thisena chun zuk phûm a ta, thisen chu hmun thienghlima puonzâr bula chun LALPA hmaah voi sari a thè ding a nih. 18 Chu zoah thiempu chun Intuokna Puon ina rimtui rawna maichâm kihaia chun thisen chu LALPA hmaah tât a ta, bawng thisen dang po chu Intuokna Puon in kota pumraw inthawina maichâm bula chun a bun thlàk vong ding a nih. 19 A thau po po chu la suok a ta, maichâma chun rawng a ta, 20 suol thawinaa bawngchal inhlàn a thaw ang charin a dang khom thaw veng a tih. Chuong anga thiempuin an suol thawina thilhlân a'n hlànpêk hnung chun, ngaidam hung ni tâng an tih. 21 Chu zoah bawngchal ruong chu khawhnawmah chawi a ta, bawngchal hmasa a raw angin rawng a tih. Hi hi khawtlâng ta dinga suol thawina chu a nih. 22 " 'Rorêltuin tum rèng lei ni loa suol a thaw palh a, LALPA a Pathien thupêkin thaw lo dinga a khap thil chu a lo bawsiet chun, thiem naw a chang a nih. 23 A thil suol thaw chu inhriettir a ni charin kèlchal hmèl hem lo chu thilhlânah a hung kei ding a nih. 24 Kèl lua chun kut innghat a ta, LALPA hmaa pumraw thilhlàn an thatna hmuna chun a that ding a nih. Chu chu suol thawina thilhlân a nih. 25 Thiempu chun a kutpâr hmor chu kèl thisenah zuk phum a ta, thisen chu pumraw inthawina maichâm kia hai chun tât a ta, a dang po chu pumraw inthawina maichâm bula chun bun thla vong a tih. 26 Inremna inthawina thilhlâna a thauhai a raw ang khan thiempu chun a thau po po chu rawng a tih. Chuong anga thiempuin a suol thawina a'n hlànpêk hnung chun a suol chu ngaidam hung ni tàng a tih. 27 " 'Vàntlâng laia mi tu khomin tum rèng lei ni loa thil suol a thaw palh a, LALPA thupêkin thaw lo dinga a khap chu a lo bawsiet chun, thiem naw a chang a nih. 28 A thil suol thaw chu inhriettir a ni charin a suol thawina dinga inhlàn dingin kèl la tuoi hmèl hem lo a hung kei ding a nih. 29 Suol thawinaa thilhlân lu chunga chun kut innghat a ta, pumraw inthawina hmuna chun a that ding a nih. 30 Chu zoah thiempun kel thisena chun a kutpâr hmor zuk phum a ta, maichâm kia hai chun tât a ta, a dang po chu maichâm bula chun bun thlâng a tih. 31 A thau po chu inremna inthawinaa an thaw angin at thlâng a ta, maichâma chun LALPA ta dinga rim inhnik dingin rawng a tih. Chuong anga thiempuin a suol thawina ding a'n hlànpèk hnung chun ama chu ngaidam nîng a tih. 32 " 'A suol inthawina thilhlâna beramte a hung chawi a ni chun a la tuoi hmèl hem lo a ni ding a nih. 33 Beramte lu chunga chun kut innghat a ta, pumraw thilhlànhai an thatna hmuna chun suol thawina dingin that a tih. 34 Chu zoah thiempu chun a kutpâr hmor chu ran thisena chun phûm a ta, pumraw inthawina maichâm kia hai chun thisen chu tât a ta, a dang po chu maichâm bula chun bun thlâng a tih. 35 Inremna thilhlâna beramte thau an lâk ang bokin a thau chu thiempuin lâng a ta, LALPA kuoma meia thilhlânah maichâm chunga chun rawng a tih. Chuonga thiempuin inremna inthawi a'n hlànpèk hnung chun ama chu ngaidam nîng a tih.

Leviticus 5

1 " 'Tu khom a thil hriet amani le a hmu amani chu rorêlna hmaa puong dinga ti a ni hnung khoma a hril nuom naw leia thil suol a thaw chun, a suol maw chu phur a tih. 2 " 'Tu khomin thil thieng lo hrim hrim, sa thieng lo ram sa amanih ran sa thi ruong amanih, hnuoi chunga invâk chi sa thieng lo amanih a tawk palh chun, a hriet naw leia a tawk khom ni sien, a hung inthieng ta naw a, thiem naw a chang a nih. 3 " 'Tu khomin mi sukporche thei mihriema inthoka suok inthieng nawna lai a tawk chun, a hriet naw leia a tawk khom ni sien, tawk a thieng nawh ti a hriet chara inthokin hung inthieng ta naw nghal a tih. 4 " 'Tu khomin thil tha amanih thil tha lo amanih thaw dinga inngaituo chieng loa thu a'n khàm zung zung chun, chu chu thu intiemkamnaa fimkhur lo taka a hril amanih, an naw leh a umzie a hriet naw leia a thaw a ni khomin, a hung hriet suok ni chun thiem naw chang a tih. 5 " 'Hieng thila hai hin mi tu khomin thiem naw a chang chun, thil suol a thaw dàn inpuong sien la, 6 a suol thaw manah ran ruol laia mi beram amanih kèl la tuoi amanih LALPA kuoma suol thawina thilhlân hung chawi sien la, thiempuin inremna inthawi lo thawpèk a ta, ngaidamin um a tih. 7 " 'Beram tuoi a chawi thei naw chun vàthu pahni amani pàrva pahni amanih a suol man dingin LALPA kuomah hung chawi sien la, pakhat chu suol thawina thilhlân nîng a ta, a dang chu pumraw inthawina thilhlân nîng a tih. 8 Thiempu kuomah hung chawi sien la, suol thawina thilhlân chu lo thaw hmasàng a tih. Pàrva chu a ringah her tliek a ta, sienkhom her bong loin, 9 a thisen iemani zât chu suol thawina thilhlâna dingin maichâm sîr velah thèng a ta, a thisen dang po chu maichâm bula chun infar kangtir a tih. Hi hi suol thawina thilhlân chu a nih. 10 Thiempuin pàrva dang chu a dân ang takin pumraw thilhlânah hmangin, a thil suol thaw lakah inremna inthawi lo thawpêk a ta, ngaidamin um a tih. 11 " 'Amiruokchu, vathu pahni amanih pàrva pahni amanih chu a neiin a tlin hlol naw a ni chun a suol man dinga thilhlânah suol thawina dingin beiphit indip tak, efa hmun sawma thea hmun khat hung chawi raw se. Suol thawina thilhlân a ni leiin hriek amanih beraw amanih a thang sa ding a ni nawh. 12 Thiempu kuomah hung chawi a ta, ama chun hriet zingna dingin vei khat lâng a ta, LALPA ta dinga meia thilhlânah maichâm chunga chun a raw ding a nih; chu chu suol thawina a ni si a. 13 Chuong ang chun thiempuin a thil suol thaw laka inremna inthawina chu lo thawpèk a ta, ngaidamin um a tih. A dang la um po chu, bu le bâl thilhlân angin, thiempu chanpuol ding a nih' ti rawh" a ta. 14 Chun, LALPAN Mosie chu a biek a, 15 "Mi tu khomin tum lei ni loa thil a bawsiet a, LALPA dân thienghlim lakah a lo suol palh chun, a suol manah beram ruol laia mi beram chal, hmèl hem lo chu LALPA hmaah hung kei a ta, a bawsiet inkhumna ding hu tawk, hmun thienghlima an shekel hmang ang tangkaruo iemani zât a hung chawi bok ding a nih. Hi hi bawsiet inthawina thilhlân a nih. 16 Thil thienghlim chunga a lo sukdik naw hai chu rul a ta, hmun ngaa thea hmun khat pe belsàng a ta, chu chu thiempu kuomah inhlàn a ta, thiempu chun bawsiet inthawina beram chal chu inhlànin inremna siempêk a ta, ngaidamin um a tih. 17 " 'Tu khomin thil suol a thaw a, LALPA thupêkin thaw lo dinga a khap chu a lo bawsiet chun, a hriet naw leia a thaw khom ni sien, thiem naw chang hrim hrim a ta, a suol maw chu phur a tih. 18 Bawsiet inthawina thilhlâna dingin beram ruol laia mi beram chal, hmèl hem lo chu thiempu kuomah hung kei a ta, a bawsiet man tlâkna ding hù zât sum hung chawi bok a tih. Chuong ang chun thiempuin inremna inthawi inhlànpèk a ta, tum rèng lei ni loa a thaw suol palhai chu ngaidam nîng a tih. 19 Hi hi LALPA thu a bawsietna leia thiem naw a changna laka bawsiet inthawina thilhlân chu a nih" tiin.

Leviticus 6

1 Chun, LALPA chun Mosie a biek a, 2 "Tu khomin LALPA lakah thil suol thaw a, ringum lo taka um a, tuolbawmhaiin a kuoma thil an dànde amanih le inkoltir chungthu amanih, thil inhmang thu amaniah mi hlèm a, 3 mi thil inhmang hmu sia hmu lo anga inhril a, khêla inkhàm a, mihaiin suol an thaw hlak hrim hrim laia a ieng khom a thaw chun, 4 suol a thaw leia thiem naw a chang pha leh mi thil a'n rûk le lâklui po pohai, miin thil an inkoltir po pohai, mi thil inhmang a hmuhai, 5 an naw leh khêla a'n khâmna thil po pohai chu a pèkkîr vong ding a nih. A kima a rul vong bâkah hmun ngaa thea hmun khat hù chu a chuongin a pèk belsa ding a nih; thiem naw inthawina thilhlân a'n hlàn ni chun a neituhai kuomah a pèkkîr vong ding a nih. 6 A bawsiet man tlâkna dingin LALPA hmaah thiempu kuomah thiem naw thilhlân dingin beram ruol laia mi beram chal, hmèl hem lo hung kei a ta, a bawsietna man hu zât sum hung chawi bok a tih. 7 Chuong ang chun thiempu chun LALPA kuomah inremna inthawina inhlànpèk a ta, thiem naw changna dinga a thilthaw po po lakah ngaidamin um a tih. 8 Chun, LALPA chun Mosie a biek a, 9 "Aron le a naupahai kuomah hi thupêk hi hril rawh: 'Hieng hi pumraw thilhlân phaa an inthawi dân ding chu a nih: pumraw thilhlân chu maichâm chunga a rawnaa chun zânkhuoin, a tùk zîng chenin a um ding a na, zânkhuoin maichâma mei chu a mit ding a ni nawh. 10 Thiempu chun puon zâi inhmia siem silfèn inbel a ta, a taksa inkhumtu dingin puon zâi inhmia siem kekor hnuoi bun bok a ta, pumraw thilhlân kang vâphai chu inthiel a ta, maichâm sîra chun sieng a tih. 11 Chu zoah a silfènhai inthlâk a ta, silfèn dangin inthuom a ta, a vâphai chu khawhnawm hmun faiah fepui a tih. 12 Maichâm mei chu chok zing a ta, a mit ngai ding a ni nawh. Zîng tinin thiempu chun thing buk sàng a ta, pumraw thilhlân chu sie fel a ta, inremna thilhlâna a sa thau chu a raw ding a nih. 13 Maichâma mei chu maichâmah chok zing a ta, a mit ding a ni nawh. 14 " 'Chun, bu le bâl thilhlân thaw dàn ding chu hieng ang hi a nih: Aron naupahai chun maichâm bulah, LALPA hmaah an hung chawi ding a nih. 15 Thiempu chun beiphit indip taka mi chu vei khat lâng a ta, hriek le beraw chu la bok a ta, chuonghai chu LALPA suklawmtu, hriet zingna rimtui dingin maichâmah a raw ding a nih. 16 An inhlàn bànghai chu Aron le a naupahaiin hmun thienghlimah chol thang loin fâng an ta, Intuokna Puon in tuol zawla chun an fâk ding a nih. 17 Chol thangin bei in ur ding a ni nawh. Meia ka kuoma thil an inhlàn laia anni chanpuol dinga ka pêk a nih. Chu chu suol thawina le bawsiet thawina anga thil thienghlim tak a nih. 18 Aron thla pasal po poin fa thei an tih. Chu chu LALPA ta dinga pumraw thilhlân chungthua a thla peihai chena an kumkhaw chan chu a nih. A tawk taphot chu ser thieng ni pei an tih' tiin thu pe rawh" a ta. 19 Chun, LALPA chun Mosie a biek a, 20 "Aron le a naupahai hriek i nàl phaa LALPA kuoma an thilhlân inhlàn ding chu hi hi a nih: beiphit indip tak, kilogram khat nîng a ta, a zîng tieng a zâtve, zân tieng a zâtve an inhlàn ding a nih. 21 Hriek leh thlêng kûmah hmet unla, inhmet zoi hne pha leh hung chawi unla, a phêk chikté tea khoiin bu le bâl thilhlân, LALPA ta dinga rim inhnikah in inhlàn ding a nih. 22 A naupahai laia mi, hriek nàl tah, thiempua a la hung thlâktu ding chun buotsai a tih. LALPA chanpuol a ni leiin raw fai vong ding a nih. 23 Thiempuin bu le bâl thilhlân a'n hlàn rêng rèng chu raw fai vong ding a na, fâk dêr lo ding a nih" tiin. 24 Chun, LALPA chun Mosie a biek a, 25 "Aron le a naupahai kuomah hieng hin hril rawh: 'Hi hi suol thawi dàn ding chu a nih: pumraw thilhlân in thatna hmunah suol thawina ran khom LALPA hmaah in that ding a nih; chu chu thil thienghlim tak a nih. 26 Suol thawina inhlàntu thiempu chun Hmun thienghlim, Intuokna Puon in kot zawlah inthawina sa chu fâng a tih. 27 A sa tawk taphot chu hung thienghlim an tih; a thisenin silfèn a khiengna taphot khom hmun thienghlima ngei sawp thlâk ding a nih. 28 A sa suongna chu pil bêl a ni chun sukkoi ding a na, dâr bêl a ni ruok chun nawt fai a, tuia intlêng fai ding a nih. 29 Thiempu sûngkuoa mi pasal taphotin a sa chu fa thei an tih; thil thienghlim tak a ni si a. 30 Amiruokchu, suol thawina dinga ran inhlàn, inremna siemna dinga hmun thienghlim, Intuokna Puon ina a thisen an hung lâk lût ruok chu a sa fâk ding a ni nawh; raw hmang ding a nih.

Leviticus 7

1 " Hieng ang hi bawsiet thawi dàn ding chu a nih, chu chu thil thienghlim tak a nih. 2 Pumraw thilhlân an thatna hlak hmuna chun bawsietna thilhlân khom that ding a na, a thisen chu maichâm sîr tinah thè ding a nih. 3 A thauhai po po, a mei thau dâm, a ril bawm thau dâm, 4 a kal pahnihai le a diemnem vela thau dâm, a kalhai le lâk sa ding a thin tuomtu thau po po hai chu inhlàn vong ding a nih. 5 Chuonghai chu thiempuin LALPA ta dinga meia thilhlânah maichâma chun a raw ding a nih, chu chu bawsiet thawina a ni si a. 6 Thiempu sûngkuoa mi pasal taphotin a sa fa thei an ta, sienkhom hmun thienghlimah an fâk ding a nih, thil thienghlim tak a ni si a. 7 "Bawsiet thawina chu suol thawina leh a thaw dân thuhmun a nih. Chu taka inremna siemtu thiempu chun inthawinaa thilhlân chu chang a tih. 8 Mi tu khom ta dinga pumraw inthawina inhlànpêktu thiempu chun a vun chu chang bok a tih. 9 Bu le bâl thilhlân, thuka ur hmin amanih, bêla suong hmin amanih le thlêngdâra ur hmin amanih chu a'n hlàntu thiempu chanpuol a na, 10 bu le bâl thilhlân, hriek le chokpola hmet amanih le beiphit hulhal hrim hrim chu Aron naupahaiin an insem tlàng ding a nih. 11 "LALPA kuoma inremna inthawia thil inhlàn dàn ding chu hieng ang hin nîng a tih. 12 Lawmthu hrilna inthawi a ni chun lawmna thilhlân leh hrieka hmet chol thang lo bei amanih, chol thang lo beiper inphân tak amanih, beiphit le hriek chokpola hnè taka hmet amani chu a'n hlàn sa ding a nih. 13 Lawmthu hrilna inthawia thilhlâna hin chol thanga siem bei ur hmin tlang khat a'n hlàn sa bok ding a nih. 14 Hieng thilhlàn tina pakhat seng chu LALPA ta dingin thèn thilhlànah inhlàn a ta, chu chu inremna thilhlàna thisen thètu thiempu chun chang a tih. 15 Lawmna chunga inremna thilhlân sa hi inhlàn ni ngei ngeia fâk ding a nih; a zîng chena dingin ieng khom khêk ding a ni nawh. 16 "Amiruokchu, a thilhlân inthawi chu thu tiemna ding amanih, mani nuom thua thil inhlàn amanih a ni ruok chun, inthawina sa chu a nia fâk mahla chu a zînga chen la fa thei a tih. 17 A ni thum ni chena inthawina sa fâk bâng la um ruok chu raw ral vong ding a nih. 18 Inremna thilhlân sa chu a ni thum ni chena a fâk chun a inthawina chu pom ni naw ni a; a'n hlàntu thil inhlàn chu thil inhlàna ngai ni bok naw nih, thil porche a ni si a. A fatu tu khomin a maw chu phur a tih. 19 "Chun, inthawina sa chun ser le sàng thila porchea ngai thil hrim hrim a tawk chun fâk ding a ni naw a, raw hmang ding a nih. Inthawina sa dang chu a fa thei dinga ngaihai chauin an fâk ding a nih. 20 Mi porche tu khomin inremna inthawinaa LALPA chanpuol sa a fâk chun, ama chu a chipuihai laia inthoka tuithlâr ding a nih. 21 Mi tu khomin thil porche, mihriema thil porche amanih, sa porche amanih, tirdakum thil porche hrim hrim a tawk a, inremna inthawinaa LALPA chanpuol sa a fâk chun ama chu a mihai laia inthoka tuithlàr ding a nih. 22 LALPA chun Mosie a biek a, 23 " 'Bawng thau amanih, beram thau amanih le kèl thau amanih chu in fâk ding a ni nawh. 24 A thia hmu sa le sahuoi se hlum sa thau hrim hrim khom chu thil dangah hmang thei in ta, fâk ruok chu in fâk ding a ni nawh. 25 Tu khom LALPA kuoma meia inhlàn ding sa thau fatu chu a mihai laia inthoka tuithlàr ding a nih. 26 Khaw lai hmuna khom um inla, vate amanih sa amanih thisen hrim hrim in fâk ding a ni nawh. 27 Tu khomin thisen a fâk chun a mihai laia inthoka tuithlàr ding a nih' tiin Israelhai kuomah hril rawh, " a ta. 28 LALPA chun Mosie kuomah, 29 "Tu khom LALPA ta dinga inremna inthawina thilhlân hung chawitu chun a thil hung chawi laia mi a then chu LALPA kuomah a'n hlàn ding a nih. 30 LALPA ta dinga mei hmanga thil inhlàn chu a kutin hung chawi a ta, a thàu chu a ir pumin hung chawi bok a ta, a ir chu thèn thilhlâna dingin LALPA hmaah a thèn ding a nih. 31 A thau po chu maichâmah thiempuin rawng a ta, a ir ruok chu Aron le a naupahai chanpuol a nih. 32 Inremna thilhlâna a chang tieng mal chu thèn thilhlànah thiempu kuomah in pêk ding a nih. 33 Aron naupa, inremna thilhlâna thisen le thau inhlàntu chun a chang tieng mal chu a chang ding a nih. 34 Israelhaiin inremna thilhlân an inhlàn chànga a ir le a chang tieng mal ka kuoma thèna an hung inhlàn po po chu Aron le a naupahai chanpuol ni rop dingin ka pêk suok a nih ti hi Israelhai kuomah hril rawh" a ta. 35 LALPA ta dinga meia thilhlânhai hi LALPA thiempu nia a rong bawl dinga Aron le a naupahai inhlàn an nia inthoka an chanpuol dinga ruot chu a nih. 36 Hriek nàl an nia inthoka suon la hung um pei dinghai kuoma khom, chu chu an chanpuola Israelhaiin an pêk rop dinga Pathien thupêk a nih. 37 Chuongchun, hieng hi pumraw thilhlân dâm, bu le bâl thilhlân dâm, suol thawina thilhlân dâm, bawsiet thawina thilhlân dâm, ser hrangna thilhlân dâm le inremna thilhlân dàma in inthawi dàn ding chu a na, 38 chuonghai chu Sinai thlalera LALPAN Mosie kuoma thihlân hung chawi dinga Israelhai a hril tuma a thupêkhai chu an nih.

Leviticus 8

1 Chun, LALPA chun Mosie kuomah, 2 Aron le a naupahai hung thuoi la, an silfènhai, hriek nàl dinghai, suol thawina ding bawngchal pakhat le beram chal pahni le chol thang lo bei siena ding bawmhai chu hung chawi la, 3 Intuokna Puon in kot bula chun Israel mihai po po chu hung ko khawm rawh" a ta. 4 LALPA thupêk ang takin Mosie chun a thaw a, Intuokna Puon in hmaa chun mipui chu an hung inkhawm a. 5 Mosie chun pungkhawmhai kuomah, "Hi hi thaw dinga LALPAN thu a pêk chu a nih" a ta. 6 Mosie chun Aron le a naupahai chu a hung thuoi a, tui a'n siltir tawl a. 7 Aron chu zakuo a'n hàktir a, cheizemin a'n zemtir a, korfuol a'n hàktir a, a chunga chun thiempu zakuo chu a bel a, mawi taka khawng thiempu zakuo hrênna cheizem chun a hrèn de a. 8 A chunga chun thiempu awmbel Efod chu a bel a, chu taka chun Urim le Thummim a zep a. 9 LALPAN thu a pêk angin, Mosie chun Aron chu lu a'n kawmtir a, a lukawm hma tieng chun rangkachak phêk thienghlim chu a bel bok a. 10 Chun, Mosie chun hriek nàl chi chu a lâk a, biekbûk le a sûnga iengkim chu hriek a nàl a, a'n hlàn thienghlim a. 11 Maichâm chunga chun hriek iemani zât chu voi sari a thè a, maichâm le a bûr le bêl po po le maihùn le a thut chu hriek a nâl vong a, a'n hlàn thienghlim bok a. 12 Hriek iemani zât chu Aron luah a buok a, a ser hrang a. 13 Chu zoah Aron naupahai chu a hung thuoi a, zakuo a'n hàktir a, cheizem a'n zemtir a, lu an kawmtir a, a kuoma LALPAN a hril ang peiin a thaw a. 14 Chu zoah suol thawina ding bawngchal chu a hung kei a, Aron le a naupahai chun a luah kut an innghat a. 15 Mosie chun bawngchal chu a that a, a thisen iemani zât a lâk a, maichâm sukthiengna dingin ran thisen chu maichâm ki tina chun a kutpârin a tât a. Thisen dang po chu maichâm bulah chun a bun thlàk a. Chuong anga intlanna siemin a'n hlàn thienghlim a nih. 16 Mosie chun a kawsùng thau po po, a thin tuomtu duordahai le a kalhai le a bawmtu thauhai chu a lâk bok a, maichâma chun a raw a. 17 Bawng vun le a taksa le a êkhai ruok chu, LALPAN Mosie kuoma thu a pêk angin, khawhnawmah a raw a. 18 Chu zoah pumraw inthawina thilhlâna dingin beram chal a hung kei a, Aron le a naupahai chun a lu chunga chun kut an innghat a. 19 Mosie chun beram chal chu a that a, a thisen chun maichâm chu a velin a thè a. 20 Beram chu a chan nawi a, a lu le a thau leh a chan nawi po po chu a raw a. 21 A kawsùng le a kehai chu tuiin a sawp fai a, LALPAN Mosie kuoma thu a pêk angin, beram chu maichâma chun pumraw thilhlànah a rêngin a raw vong a; chu chu LALPA ta dinga meia thilhlân, rim inhnik chu a nih. 22 Beram chal dang, ser thiengna beram chal chu a hung kei nawk a, Aron le a nau pasalhai chun a lu chungah kut an innghat a. 23 Mosie chun a that a, a thisen chu a lâk a, Aron chang tieng natil le a chang tieng kutpui le kepuia hai chun a tât a. 24 Mosie chun Aron naupahai chu a hung thuoi a, an chang tieng natil le kutpui le kepui senga chun thisen chu a tât bok a. Maichâm sîr vel tina chun thisen chu a thè a. 25 A thau po po, a mei thau dâm, a kawsùng thau po po dâm, a thin tuomtu duorda dâm, a kalhai le a tuomtu thau le a chang tieng mal chu a lâk a. 26 LALPA hmaa bei bawm, chol thang lo bei sienaa inthok chun hriek le siem bei le beiper inphân a lâk a, chuonghai chu a thauhai le a chang tieng mal chunga chun a sie a. 27 Hienghai po po hi Aron le a naupahai kutah a'n hlàn a, LALPA hmaa chun thèn thilhlân dingin a thèn a. 28 Chu zoah an kuta inthokin Mosien a lâk nawk a, pumraw thilhlân chungah maichâma chun a raw a; chu chu LALPA ta dinga meia thilhlân, ser thiengna rim inhnik chu a nih. 29 Mosie chun ser thiengna beram chal ir chu a lâk a, LALPAN thu Mosie a pêk angin, LALPA hmaa thèn thilhlâna dingin a thèn a, chu ser thiengnaa thilhlân beramchal chu Mosie chan a nih. 30 Chun, Mosie chun hriek nâl chi le maichâma ran thisen chu a lâk a, Aron le a silfènhai le a naupahai le an silfènhai chu a thè a. Chuong ang chun Aron le a silfènhai le a naupahai le an silfènhai chu a'n hlàn thienghlim a nih. 31 Mosie chun Aron le a naupahai kuomah, "A sa chu Intuokna Puon in kotah suong unla, thupêka 'Aron le a naupahai chun fâng an tih' ti ang khan, ser hrangna thilhlân bawma bei leh chun, chu taka chun fa ro. 32 Sa le bei fâk bânghai chu in raw ding a nih. 33 In inser hrang hunin ni sari a aw ding a ni leiin, a hun a kim hma ni sari sûng chun Intuokna Puon in suoksan naw ro. 34 Inremna siempèk ding cheua LALPAN thu a mi pêk chu voisun hin ei thaw a nih. 35 Intuokna Puon in kotkhâr bula chun ni sari sûng, sun le zân um zing in ta, in thi nawna dingin LALPA thupêk chu in zawm ding a nih, chuong anga thu pêk chu ka ni si a" a ta. 36 Chuongchun, LALPAN Mosie hmanga thaw dinga thu a pêk po po chu Aron le a naupahai chun an thaw a.

Leviticus 9

1 A ni riet ni chun Mosien Aron le a naupahai le Israel upahai chu a ko khawm a. 2 Aron kuoma chun, "Suol thawina thilhlâna dingin bawngchal tuoi le pumraw inthawina thilhlâna dingin beramchal, hmèl hem lo ve ve chu LALPA hmaah hung inhlàn rawh. 3 Chun, Israelhai kuomah hieng hin hril rawh: 'Suol thawina thilhlâna dingin kèlchal, pumraw inthawina thilhlâna dingin bawngte le beramte hmèl hem lo, kum khata upa ve ve dâm, 4 inremna inthawina thilhlâna dingin bawngchal le beramchal hai chu hriek le chokpol bu le bâl inthawina thilhlânhai le chun LALPA hmaa inhlàn dingin hung la ro. Voisun hin in kuomah LALPA a hung inlang ding a nih' tiin hril rawh" a ta. 5 Mosien thaw dinga thu a pêk thilhai chu Intuokna Puon in hmaa chun an hung chawi a, pungkhawm po po chun an va hnai a, LALPA hmaa chun an ngîr a. 6 Mosie chun an kuomah, "LALPA ropuina chu nangni lai a hung inlang theina dingin hi hi a nih LALPAN thaw dinga thu a pèk cheu kha" a ta. 7 Mosie chun Aron kuomah, "Maichâm hung hnai la, LALPA thupêk angin i suol thawina thilhlân le pumraw inthawina thilhlân chu inhlàn la, nang le mipui ta dingin inremna siem la; chun, mipuihai thilhlàn chu inhlàn la, an ta dingin inremna siem rawh" a ta. 8 Aron chun maichâm a va hnai a, ama puola suol thawina bawngchal tuoi chu a that a. 9 Ran thisen chu a naupahaiin an hung pêk a, thisena chun a kutpàr hmor a phûm a, maichâm kia hai chun a tât a, thisen chu maichâm bula chun a bun thlàk a; 10 LALPAN Mosie thu a pêk ang khan, suol thawina thau hai, a kal hai, a thin tuomtu duorda hai chu maichâma chun a raw a. 11 A sa le a vun ruok chu khawhnawmah a raw a. 12 Chu zoah pumraw thilhlân chu a that a. A nauhai chun ran thisen chu an hung pêk a, maichâm sir vel tinah a the a. 13 Pumraw thilhlân chu a tlang tlangin an hung pêk a, a lu le chun maichâmah a raw a. 14 A kawsùng le a kehai chu tuiin a sawp a, maichâma pumraw thilhlân chunga chun a buk a. 15 Chun, Aron chun mipuihai thilhlàn ding chu a hung kei a. Mipuihai suol thawina kèl chu a that a, a hmaa mi ang bok khan, suol thawina dingin a'n hlàn a. 16 Pumraw thilhlân chu a hung chawi a, a dàn ang takin a'n hlàn a. 17 Bu le bâl thilhlân khom chu a hung chawi a, vei khat a lâk a, zing tienga pumraw thilhlân bàka chun, a raw a. 18 Chun, mipui puola inremna inthawina thilhlân bawngchal le beramchal chu a that bok a, Aron naupahai chun a thisen chu an hung pèk a, maichâm chu a vêlin a the a. 19 Bawngchal thau le beramchal thau hai, a mei bul thau tak hai, a rîl thau hai, a kal hai, a thin tuomtu duorda hai chu an hung pêk bok a, 20 a thauhai chu a ir chunga chun a sie a, Aron chun maichâmah a raw a. 21 Mosien thu a pêk angin, a ir le a chang tieng mal chu thèn thilhlàna dingin Aron chun LALPA hmaah a thên a. 22 Chu zoah Aron chun mipui tieng bân a phar a, mal a sawm tawl a. Suol thawina, pumraw inthawina le inremna inthawina thilhlânhai a'n hlàn zo chun a hung tum a. 23 Mosie le Aron chu Intuokna Puon ina chun an lût a, an hung suok nawk chun mipuihai chu mal an sawm a, LALPA ropuina chu mipuihai hmaa chun a hung inlang a. 24 Chun, LALPA hmaa inthok chun mei a hung suok a, mei chun pumraw thilhlânhai le thauhai chu maichâma chun a kâng hmang ta vong a. Chuong thil po po mipuiin an hmu chun lawmin an khèk a, an bokkhup a.

Leviticus 10

1 Chun, Aron naupa Nadab le Abihu hai chun an mei lâkna berbu chu chawiin meiling an làk a, chu taka chun rimtui an phul a, thupêk ang naw zawngin LALPA hmaah mei thienghlim lo an inhlàn a. 2 Chuongchun, LALPA hmaa inthok chun meichok a hung suok a, anni chu a lem hmang a, LALPA hmaa chun an thi a. 3 Mosie chun Aron kuomah, "LALPAN thu a hril khan hi hi a nih a hril:'A mi hung hnaituhai kuomah, Thienghlimin inlang ka ta; Mipui po po hmaa chun, Chawimawiin um ka tih'tiin" a ta. Aron chu a to tok tok a. 4 Mosie chun Aron pate Uziel naupa Misael le Elzafan hai chu a ko a, an kuomah, "Hung hnai unla, in unauhai hi hmun thienghlim kota inthok hin khaw puo tieng zawn suok ro" a ta. 5 Chuongchun an hung hnai a, Mosie thupêk angin, an silfèn pumin khawhnawm tieng an zawn suok a. 6 Chun, Mosie chun Aron le a nauhai Eleazar le Ithamar kuomah, "In lu sukthurin, in silfènhai kei thlêr naw ro, chuonga in thaw vai chun thîng in ta, mi po po chungah LALPA lung sen rawi a tih. LALPAN meia a sukhlumhai ruok chu in unauhai le Israel sûngkuohaiin sûn raw hai se. 7 Intuokna Puon in hi suoksan hrim hrim naw ro, in suoksan chun thîng in tih, LALPA hriek nàl tasa in ni si a" a ta. Chuongchun, Mosie thu ang chun an thaw a. 8 Chun, LALPAN Aron chu a biek a, 9 "Nang le i nauhaiin Intuokna Puon ina in lûtin uoiin le zu hrim hrim in dawn ding a ni nawh; in dawn chun thîng in tih. Hi hi in thlahai pei ta ding khoma kumkhaw dàn chu a nih. 10 Thil thienghlim le thil naran le thil porche le thil inthieng in thlier hrang ding a nih. 11 Mosie hmanga a puong Israelhai ta dinga LALPA thusuok po pohai kha in inchûktir ding a nih" a ta. 12 Mosie chun Aron le a naupahai dama la um Eleazar le Ithamar kuoma chun, " LALPA ta dinga meia thilhlâna mi, bu le bâl thilhlâna làk bâng, chol thang loa siem chu maichâm bula chun fa ro, thil thienghlim tak a ni si a. 13 LALPA ta dinga meia thilhlâna mi chu i chanpuol le i naupahai chanpuol a ni leiin hmun thienghlimah in fâk ding a nih; chuong ang chun thu pêk ka nih. 14 Chun, a ir thèn le a chang tieng mal thèn chu nang le i naupahai le naunuhaiin hmun faiah in fâk ding a nih, Israel thlahai inremna thilhlàn inthawia inthoka i chanpuol le i naupahai chanpuola ruot a ni si a. 15 A mal thèn le a ir thèn chu LALPA hmaa thèn thilhlàna thèn dingin meia thilhlán thau leh an hung chawi ding a nih. Chu chu nang le i naupahai leh kumkhuoa in chanpuol ding a nih, LALPA thupêk ang khan" a ta. 16 Chun, Mosie chun suol thawinaa kèl inhlàn chu a zong a, an lo raw hmang ta dèr si leiin Aron naupa la dam Eleazar le Ithamar hai chunga chun a lung a sen a, 17 "Ieng leia suol thawina chu hmun thienghlimah in fâk naw am a na? Thil thienghlim tak, mipuihai thiem naw changna phur a, LALPA hmaa inremna siempêkna dinga a pêk cheu a ni si a. 18 A thisen chu Hmun Thienghlima lâk lût a ni naw leiin, thu ka pêk ta cheu ang khan, kèl sa chu hmun thienghlima chun in fâk ngei ngei ding annawm" a ta. 19 Aron chun Mosie kuomah, "Voisun khan an suol inthawina le pumraw inthawina LALPA kuomah an inhlân a, chuong sà hman chun hieng ang thil hi ka chungah a tlung a. Voisuna suol thawina sa hi lo fa ta lang lem chu, ka chungah LALPA a lawm ding am a ni?" a ta. 20 Mosien chu chu a hrietin a lung a awi ta a.

Leviticus 11

1 LALPA chun Mosie le Aron a biek a, 2 "Israel thlahai kuomah hieng hin hril ro: 'Khawmuola chêng sa po pohai laia in ta dinga fâk thienghai chu hieng hi an nih: 3 Sa laia a ke tin inkàk suok taphot le an thil fâk inir suok, a soia soi chi taphot chu fa thei in tih. 4 Amiruokchu, a soia thil soi chi chauh amanih, ke tin inkâk suok amani chauh an ni chun, chuonghai sa chu in fâk ding a ni nawh. Sanghawngsei chun a soiin soi sienkhom a ke tin an kàk naw leiin in ta dinga sa thieng lo a nih. 5 Sangawia chun a'n ir suok a soiin a soia chu a ke tin a'n kâk naw leiin, in ta dinga sa thieng lo a nih. 6 Zupui chun a soiin a soi vea chu a tin a'n kâk naw leiin in ta dinga sa thieng lo a nih. 7 Vok chu a tin a'n kâk suoka chu a soia soi chi a ni naw leiin in ta dinga sa thieng lo a nih. 8 Hieng sahai hi an fâk ding a ni naw a, a ruong khom an tawk ding a ni bok nawh, in ta dinga sa thieng lo an nih. 9 " 'Tuipui le vadung tuia chênghai laia pàngpar nei le phuhlip nei taphot chu fa thei in tih. 10 Sienkhom tuipui le vadung tuia chêng pàngpar le phuhlip nei lo thilhring hrim hrim, a'n hlieua inhlieu chi le tuia chèng thilhring dang tinrênghai chu in thangindei ding a nih. 11 In tirdak ding a na, a sa in fâk ding a ni naw a, a ruong khom thil porcheah in ngai ding a nih. 12 Tuia chèng pàngpar le phuhlip nei naw taphot chu in thangindei ding a nih. 13 " 'Hieng vatehai hi tirdakin an sa in fâk ding a ni nawh: muvànlai dâm, mupui dâm, lungdûp dâm, 14 mu sen dâm, mu dum dâm, ngawihup chi hrim hrim; 15 va-ak chi hrim hrim dâm; 16 va ngal sâng chi dâm, vabak dâm, tuifinrieta chèng chi vate hai, mute chi hrim hrim dâm, 17 hrângkir dâm, simbu dâm, chingpirinu dâm, 18 tui vakawl dâm, tuivalong dâm, tuivaarngo dâm, 19 kanghlài chi hrang hrang dâm, vakhawhri dâm le bâk dâm. 20 Thilhring ke pali nei, vuong thei hrim hrim chu in ta dingin thil tirdakum a nih. 21 Amiruokchu, ke palia lawn, vuong thei bok si thilhring, inchawm thei dinga an ke le mala inzomna nei chu fa thei in tih. 22 Chuonghai lai chun khàu chi hrim hrim, khàunurieng chi hrim hrim, khuongbài le khàuthikthi chi hrim hrim dâm fa thei in tih. 23 Amiruokchu, thla nei, ke pali nei, a lawna lawn chi hrim hrim chu in ta dingin tirdakum a ni vong. 24 " 'Hienghai lei hin porcheah in insiem thei a, tu khom an ruong tawk taphot chu zân tieng chenin tirdakum kai a tih. 25 Tu khom hieng ang ruong inkhawmtu chun a silfènhai sawp a ta, zân tieng chenin tirdakum kai a tih. 26 " 'Ran tin inkàk, sienkhom inkâk suok zo si lo le thil a soia soi naw chi po po chu in ta dinga thil tirdakum vong a na, tu khom chuong ang tawk taphot chu a porche a nih. 27 Chun, ke pali nei laia mi ke bawra lawn taphot chu in ta dingin thil tirdakum a nih, tu khom chuong ang tawk taphot chu tirdakum kai an tih. 28 A ruong inkhawmtu taphotin an silfènhai an sawp ding a nih; zân tieng chen tirdakum kai an tih, in ta dinga thil tirdakum a ni si a. 29 " 'Chun, hnuoia bokvâk chi po po laia in ta dinga thil tirdakumhai chu hieng hi a nih: bûi dâm, simtîr dâm, tangkawng chi hrim hrim dâm, 30 sokkhe dâm, laitang dâm, cholru dâm, hnapkawng dâm le laiking chi hrang hrang. 31 Hienghai hi bokvâka fe chi, in ta dinga thil tirdakumhai chu an na, tu khomin a thi tah ruong an tawk chun zân tieng chenin tirdakum kai an tih. 32 A thi ruongin a tawk taphot hmangruo chu thing amanih, puon amanih, savun amanih le saiip puon amania siem khom ni sien, tirdakum kai a tih. A tawkna hmun chu tuiin sawp unla, zân tieng chen tirdakum kai a ta, chu zoah hung inthieng nawk a tih. 33 Pil bêlah a tla hlum chun a sûnga thil um po po leh a sukporche vong leiin a bêl chu vuok koi ding a nih. 34 Chuong ang tui chu bu le hme suongna tui amanih le dawn ding tui amani-ah a thang chun tirdakum a kai vong a nih. 35 Chuong ang thilhring thi a tlàkna hmun taphot chu a sukporche leiin a tlàkna thuk amanih bêl amanih chu vuok koi ding a nih. Thil porche a ni leiin tirdakuma ngai ding a nih. 36 Amiruokchu tuikhur amanih, tui bêl amanih chu a sukporche naw a, a ruong tawktu taphot ruok chu tirdakum kai an tih. 37 A thi ruong chu thlâi chi thlâk ding lai a lo tla palh chun sukporche naw nih. 38 Tuia thlâi chi inchie hnunga a tla ruok chun thlâi chia chun tirdakum kai a tih. 39 " 'In fâk thei chi ran hrim hrim khom a pûl a ni chun, a ruong tawk taphot chu zân tieng chen tirdakum kai a tih. 40 A sa fatu taphot chun a silfènhai sawp sien la, zân tieng chen tirdakum kai a tih. A ruong latu khomin a silfènhai a sawp ding a nih; zân tieng chen tirdakum kai a tih. 41 " 'Chun, hnuoi chunga a boka bokvâk chi hrim hrim chu tirdakum an ni vong a, an sa fâk lo ding a nih. 42 Intela intawl chi le ke palia invâk chi amanih, ke tam tak nei chi amanih, hnuoi chunga a boka bokvâk chi hrim hrim chu in fâk ding a ni nawh, thil tirdakum a nih. 43 A boka bokvâk chi hrim hrimin in insukporche ding a ni nawh. Chuong thil chu hmangin insukporche naw unla, hung sukporche bok naw raw se cheu. 44 Kei hi LALPA in Pathien chu ka ni si a; insukthienghlim unla, thienghlim takin um ro, kei ka thienghlim si a. Hnuoia invâk chi ieng thil khomin insukporche naw ro. 45 In Pathien ni dinga Aigupta rama inthoka thuoi tungtu cheu LALPA chu ka ni si a; kei ka thienghlim leiin nangni khom in thienghlim ding a nih. 46 " 'Hieng hi sa le vate le thilhring tinrêng tuia chèng chi le hnuoia a boka bokvâk chi hai chungthua dàn thu chu a nih. 47 A thienghlim le porchè le thilhring fâk chi le fâk lo chi hai chu in thlier hrang ding a nih' tiin" a ta.

Leviticus 12

1 Chun, LALPA chun Mosie kuomah, "Israel thlahai kuomah hieng hin hril rawh: 2 'Nuhmeiin nau a pai a, nau pasal a nei chun, thla a pal laia nuhmei a porche ang bokin, ni sari sûng chu a porchè a nih. 3 A ni rietnaah naute ser vun hmor chu tan ding a nih. 4 Chu zoah thi a pal leia inthienna dingin ni sawmthum pathum sûng a la nghâk ding a nih. A inthienna ni a kim hma chun thil thienghlim hrim hrim a tawk ding a ni naw a, hmun thienghlimah a lût ding a ni bok nawh. 5 Nau nuhmei a nei ruok chun, thla a pal laia nuhmei a porchè ang bokin, kâr hni sûng chu a porchè a nih. Chu zoah thi a pal leia inthienna dingin ni sawmruk le paruk a la nghâk ding a nih. 6 " 'Nau pasal amanih nuhmei amanih a nei leia inthienna ni a kim pha leh pumraw inthawina dingin kum khata upa beram tuoi le suol thawina dingin pàrva amanih vàthu tuoi amanih chu Intuokna Puon in kotah thiempu kuomah a hung chawi ding a nih. 7 Thiempu chun LALPA hmaah inhlànin inremna siempêk a ta, thi a palna lakah hung inthieng tàng a tih. Chu chu nau pasal amanih nuhmei amanih hringtu nu ta dinga dàn chu a nih. 8 Chun, beram tuoi a nei zo si naw chun vàthu amanih pàrva tuok khat amanih a chawi ding a nih. Pakhat chu pumraw thilhlâna hmang ding, a dang chu suol thawinaa hmang ding nîng a ta, thiempuin inremna siempêk a ta, hung inthieng tàng a tih' tiin hril rawh" a ta.

Leviticus 13

1 LALPA chun Mosie le Aron a biek a, 2 "Mi tu khom a vun a hung invùng a, a puor a, a hung vàr a, inkai thei vuna phâr hri um nia a'n lang chun Aron kuomah an naw leh a nauhai laia thiempu a tu el khom kuomah thuoi raw se. 3 Thiempu chun a vun puorna lai chu lo en a ta, hri umna laia hmul chu a vâr a, a puorna chu a mithi vun nêka inthûk nia a'n lang chun, inkai thei vun hri a nih. Thiempuin a en fel lai chun ama chu tirdakum kai a ni thu a puong ding a nih. 4 " 'A vun puorna lai chu vâr sienkhom a mithi vun nêka inthûka inlang lo a, a hmul khom a vâr bok naw chun hri invoitu chu thiempuin ni sari khum hrang a tih. 5 Ni sarinaah en nawk a ta, a ngai zingin a hmu a, a hri chu a'n zàm dar naw chun ni sari dang la khum hrang nawk a tih. 6 Ni sarinaa chun thiempuin en nawk a ta, a puorna chu a hung kiem a, a vunah a'n vàk dar naw chun, pang puor naran a ni leiin, ama chu a'n thieng ti thiempuin puong a tih. Ama chun a silfènhai sawp sien la, hung inthieng tàng a tih. 7 Amiruokchu, inthienna dinga thiempu a'n entir hnunga a vun hri chu a hung indar chun, thiempu kuomah a vàn entir nawk ding a nih. 8 Thiempu chun lo en nawk a ta, a vunah a kai dar chun inkai thei hri invoi a na, ama chu tirdakum kai a nih. 9 " 'Tu khom hri invoi chun thiempu kuomah fein a'n entir ding a nih. 10 Thiempu chun a vun puorna lai chu a hung vàr le vàr naw, a hmul chu a hung vàr le vàr naw le a vunah vûng thar a um le um naw lo en a ta, phâr benvon invoi a ni chun thiempuin tirdakum kaiah puong a tih. 11 Tirdakum kai a ni dèr ta leiin khum hran ding a ni ta nawh. 12 " 'A vun hri chu a pang po poah indar a, thiempu hmu thei chinah, a lua inthoka a ke chen a tuom ta chun, 13 thiempu chun en fel a ta, a pang po po a tuom suok vong tah chun ama chu a'n thieng tah ti a puong ding a nih. A puma a'n khek vàr ta leiin a'n thieng a nih. 14 A vun a hung inraw thar nawk ruok chun tirdakum a kai a nih. 15 Vun inraw thar chu tirdakum, phâr hri kai a ni leiin thiempuin a vun inraw thar a hmu charin tirdakum kaiah a puong ding a nih. 16 A vun inraw thar chu a hung danglam a, a hung vâr ruok chun thiempu kuomah fe raw se. 17 Thiempu chun lo en a ta, a vun inraw chu a hung vàr chun hri invoitu chu tirdakum kai loah puong a ta, hung inthieng a tih. 18 " 'Chun, pangah khuoihli a suok a, a hung dam a, 19 a khuoihli umna dâng hlûpin amanih dâng sen deuin amanih a hung invùng chun thiempu hmaah inlang raw se. 20 Thiempu chun lo en a ta, a hri chun a mithi vun nêka inthûkah bu a khuor nia a hriet a, a hmul a hung vâr bok chun ama chu tirdakum kaiah a puong ding a nih. Chu chu inkai thei phâr hri, khuoihli sera hung tuong suok a nih. 21 Amiruokchu, thiempuin a en fel a, hmul vàr a um naw a, a zung chu mithi vun nêka inthûk lo a ni a, a vùng chu a tiem ta bok chun, thiempuin ama chu ni sari sûng khum hrang a tih. 22 Vunah a'n zàm dar chun, thiempuin tirdakum kaiah a puong ding a nih, hri invoi a ni si a. 23 A umna inson lo a, a'n vàk dar naw chun khuoihli ser tina a na, thiempuin tirdakum kai loah a puong ding a nih. 24 " 'Tu khom a vun a kàng a, a kàng inlawng lai chun a dâng sen deu amanih, a vâr amanih a hung puor suok chun thiempuin lo en a ta, 25 a puorna lai tak chu a vâr a, a mithi vun nêka inthûka a'n lang chun phâr a na, a kàngnaa inthok chun a hung inphâr suok a nih. Thiempu chun tirdakum kaiah a puong ding a nih, phâr hri invoi a ni si a. 26 Amiruokchu, thiempuin a lo en a, a hung inbawkna hmuna khan a hmul vàr a um naw a, a mithi vun nêka inthûk lo a ni a, a puor chu a tiem ta bok chun, thiempuin ni sari sûng khum hrang a tih. 27 Chun, ni sari hnungah thiempuiin lo en nawk a ta, a vunah an zàm dar chun, thiempuin tirdakum kai a nih ti puong a tih, hri a ni si a. 28 A puor chu a umna pangngaiah a um zing a, vunah invâk dar lo a, a tiem ta bok chun, mei kang leia puor a ni leiin thiempuin tirdakum kai loah puong raw se, mei kàng ser chauh a ni si a. 29 " 'Chun, nuhmei amanih pasal amaniin a lu amanih a khâk amaniah pânna a nei chun, 30 thiempuin a pânna chu en fel a ta, a zung chu a mithi vun nèka inthùk lemin a'n lang a, chu taka chun a hmul eng chîn tak a um chun thiempuin tirdakum kaiah a puong ding a nih. Chu chu lu thak, pupangliek a na, lu le khâk hmula hri um a nih. 31 Thiempuin pupangliek hri chu a en a, a zung chu a mithi vun nêka inthûk loa inlang a, a hmul dum a um naw chun thiempuin ama chu ni sari sûng khum hrang a ta, 32 ni sari zoah thiempuin en nawk a ta, pupangliek chu a'n dar naw a, a hmul eng a um naw a, a hri zung chu a mithi vun nêka inthûk loa a'n lang chun, 33 a'n buotna lai ti chauh naw chu mèt kol ding a nih, chu zoah thiempuin ni sari dang khum hrang nawk a tih. 34 Ni sari hnungah thiempu chun pupangliek chu en nawk a ta, a vunah indar lo a, a zung chu a mithi vun nêka inthûk lema a'n lang naw chun, thiempuin ama chu tirdakum kai loah a puong ding a nih. Ama chun a silfènhai sawp sien la, hung inthieng tàng a tih. 35 Inthienga puong a ni hnungin a lu thak hri chu a'n dar chun thiempuin en nawk a ta, 36 a lu thak hri chu a'n zàm dar chun thiempuin a hmul eng zong buoi ngai ta loin ama chu tirdakum kaiah a puong nghal ding a nih. 37 Amiruokchu, a hmu danin a'n dar naw a, a'n thakna hmunah sam dum a hung mawng chun phâr chu a dam tah a, a'n thieng a, thiempuin tirdakum kai loah a puong ding a nih. 38 " 'Nuhmei amanih pasal amanih vun a puor a, a vâr kak chun thiempu kuomah inentir sien la, 39 a vâr dal deu chun a vun puor naran, tium lo a na, ama chu a'n thieng a nih. 40 " 'Pasal sam a til a, a lu a kol chun a'n thieng a nih. 41 A bawk sam a til a, a chal a'n lang vong chun a'n thieng a nih. 42 Amiruokchu, a chal kol amani a lu kol amania thil sen vâr a hung puor suok chun a lu le chal vunah phâr hri a hung suok a na, 43 thiempuin ama chu en fel a ta, a lu le a chala puor chu a vär sen har chun, ama chu phâr a ni a, 44 tirdakum a kai ti thiempuin puong a tih, a luah phâr hri a um lei chun. 45 " 'Chuong ang natna inkai thei phâr hri neitu chun silfèn tiek hâk a ta, a sam hla thur a ta, a hmai chenve, a khâk tieng chu tuom a ta, "Phâr ka nih, phâr ka nih" tiin a khêk ding a nih. 46 Phârin a bawm sùng chu tirdakum a nih. Khawhnawmah a um hran ding a nih. 47 Sil le fèn ieng khom, sahmul amanih patpuon tha chi amanih, 48 patpuon khawng amanih, sahmul phier amanih, savun le savuna inthoka siem thil rêng rêng amanih a hung hmuor a, 49 chuong khawng le phier le savuna inthoka siem thilhai hrim hrim chu a rong a hung sen amanih a hung hring chun a hmuor hrikin a fâk a na, thiempu kuoma inentir ding a nih. 50 Thil hmuor chu thiempuin en fel a ta, a hmuor po chu ni sari sûng sie hrang a tih. 51 Ni saria chun en nawk a ta, a hmuor hri chu silfèn a khawnga khawng dâm, phiera phier dâm, sahmula dâm, puon zâi inhmia dâm, savun siem chi hrim hrima dâm a kài zap chun, chu hri chu phâr nghet tak chi a na, tirdakum a nih. 52 Silfèn chu khawng amanih, phier manih, sahmul amanih, patpuon innêm amanih, savuna siem chi hrim hrim amanih khom ni sien, phâr hri kaina taphot chu raw hmang vong ding a nih. 53 Chun, thiempuin a lo en a, silfèn khawng amanih, phier amanih, savuna siem chi hrim hrim amaniah phâr hri chu a kài zap naw chun, 54 a hmuorna lai chu thiempuin insawptir a ta, ni sari sie hrang nawk a tih. 55 A hmuorna lai sawp hnung chun thiempuin en fie nawk a ta, a hmuor chu a bo chuong naw chun, hmun dangah kài zap naw sien khom, thil tirdakum a ni leiin meia raw ding a nih. 56 Chun, thiempuin a en fie a, a hmuorna lai chu sawp hnunga a hung da ta khomin, puon amanih, savun amanih le a phiera phier chi rêng rènga a hmuorna lai chu ât thlâk ding a nih. 57 Amiruokchu, silfèn khawng amanih phier amanih le savuna siem ienga khom a hmuor a hung inlang nawk chun, meia raw hmang ding a nih. 58 Chun, silfen khawng amanih, phier amanih, savuna siem ieng khom i sawp a, a hmuor a bo chun sawp nawk ding a nih, chuongchun hung inthieng tàng a tih. 59 Hi hi silfèn, sahmul amanih patpuon, a khawnga khawng amanih, a phiera phier amani le savuna siem hrim hrim amania a hmuor hri um chu a tirdakum le tirdakum lo puong dàn ding thua dânhai chu an nih" tiin.

Leviticus 14

1 Chun, LALPA chun Mosie a biek a, 2 " 'Hi hi inthien dinga thiempu kuoma phâr in thuoi phaa in thaw dàn ding chu a nih: 3 thiempu chu khaw daiah fèng a ta, phâr chu en a ta, a phâr hri a hung dam ta chun, 4 thiempu chun inthiena um ding kuoma chun vate hring lai pahni le sidar thing le pat zâi sen le husawp kau hung chawi dingin thu pêng a tih. 5 Thiempu chun vate pakhat chu pil bêla tui sung thar hlol chunga chun that dingin thu pêng a ta. 6 Chu zoah, tui chunga vate thisena chun vate hring lai chu sidar thing le pat zâi sen le husawp le chun thiempuin phum a ta, 7 phâra inthoka inthiena um lu chunga chun voi sari thèng a ta, a thienghlim thu puong a ta, vate hring chu ramah insuong a tih. 8 " 'Inthiena um ding chun a silfènhai sawp a ta, a sam vaw kol a ta, tui insil a ta, chuongchun hung inthieng tâng a tih. Chu hnungah riebûkah hung lût thei a ta, sienkhom a puon in tuolah ni sari a riek phot ding a nih. 9 A ni sarinaa chun a sam a vaw kol vong ding a nih: a lu vaw kol a ta, a khâkhmul le a mitko hmul le a hmul dang po po khom a vaw nâm rît ding a nih. A silfènhai sawp a ta, tuiin insil fài a ta, hung inthieng tâng a tih. 10 " 'A ni riet ni chun beram chal tuoi pahni le beram la tuoi pakhat, kum khata upa, hmèl hem lo le beiphit indip tak, kilogram thum, hrieka hmet le hriek litar hmun thuma thea hmun khat a hung chawi ding a nih. 11 Intuokna Puon in kota chun a'n thieng tah ti puongtu thiempu chun inthiena um ding le a thilhlànhai chu LALPA hmaah sieng a tih. 12 " 'Chu zoah thiempu chun beram chal tuoi pakhat le oliv hriek litar hmun thuma thea hmun khat chu suol thawina dingin inhlàn a ta, thèn thilhlànin LALPA hmaa chun thèn a tih. 13 Pumraw inthawina le suol thawina thilhlàn an thatna hmun thienghlima chun beram chal tuoi chu an that ding a nih. Suol thawina chu thiempu chanpuol a ni ang bokin bawsiet inthawina khom chu thiempu chanpuol a nih; thil thienghlim tak a ni si a. 14 Bawsiet inthawina thisen chu thiempu chun lâng a ta, inthien ding chang tieng natila dâm, kutpui le kepuia dâm thiempu chun tât a tih. 15 Hriek no khata inthok chun thiempu chun hriek lâng a ta, ama kutpha voi tienga chun sung a ta, 16 a kut chang tieng hmor chu a kutpha voi tienga hrieka chun phûm a ta, hriek chu LALPA hmaah a kutpàr chang tieng chun voi sari thèng a ta, 17 a voi tieng kuta hriek la um chun inthien ding chang tieng natil, kutpui le kepuia bawsiet inthawina thisen chunga chun tât a tih. 18 Chun, thiempu chun a kuta hriek la um po chun inthien ding lu chu nàl a ta, LALPA hmaah inremna siempêk a tih. 19 " 'Chu zoah thiempu chun suolthawina chu inhlàn a ta, a thienghlim nawna leia inthiena um ding ta ding chun inremna siempêk a ta, pumraw thilhlân chu that a tih. 20 Pumraw thilhlân le bu le bâl thilhlân chu maichâma chun thiempuin inhlàn a ta, inremna siempêk a ta, hung inthieng tâng a tih. 21 " 'A rethei leia chuong ang chu a thaw zo naw a ni chun, beram chal tuoi pakhat, bawsiet inthawina chu inremna siempêkna dinga thèn inhlàn dingin beiphit indip tak, kilogram khat, hriek le hmet pol le oliv hriek litar hmun thuma thea hmun khat chawi a ta, 22 vàthu tuok khat amanih pàrva tuoi tuok khat amanih, a nei thei lem lem chawi bok a ta, pakhat chu suol thawina ding nîng a ta, pakhat dang chu pumraw thilhlâna ding nîng a tih. 23 " 'A ni riet ni chun a inthienna thil ding chu thiempu kuomah Intuokna Puon in kotkhàr bula chun LALPA hmaah a hung chawi ding a nih. 24 Thiempu chun bawsiet inthawina beramte chu hriek no khat leh lâng a ta, thèn thilhlânah thiempu chun LALPA hmaah thên a tih. 25 Bawsiet inthawinaa beramte chu that a ta, a thisen chu thiempuin lâng a ta, inthien ding chang tieng natila dâm, kutpui le kepuia dâm chun tât a tih. 26 Hriek no khata inthok chun thiempu chun hriek lâng a ta, ama kutpha voi tieng chun sung a ta, 27 a kut chang tieng hmor chu a kutpha voi tienga hrieka chun phûm a ta, hriek chu LALPA hmaah a kutpàr chang tieng chun voi sari thèng a ta, 28 a voi tieng kuta hriek la um chu inthien ding chang tieng natil, kutpui le kepuia bawsiet inthawina thisen a nâlna chunga chun tât a tih. 29 Chun, thiempu chun a kuta hriek la um po chun inthien ding lu chu nàlin, LALPA hmaah inremna siempêk a tih. 30 Chun, vàthu amanih pàrva amanih a nei thei lem lem chu a'n hlàn ding a nih. 31 Pakhat chu suol thawina ding nîng a ta, pakhat dang chu pumraw thilhlâna ding nîng a ta, chu chu bu le bâl thilhlân leh inhlànin, inthiena um ding chu thiempuin LALPA hmaah inremna siempêk a tih. 32 Hi hi phâr hri invoi inthienna dinga a tlin zo naw hai ta dinga dàn chu a nih" tiin. 33 Chun, LALPA chun Mosie le Aron a biek a, 34 "Hluo dinga ka pêk cheu Kanan ram in hluo hunah, chu rama chun inah hmuor hri inkai ol tak el ka sie a nih. 35 A in neitu chun thiempu kuomah fein, 'Ka inah phâr hri ni awm tak ka hmu a' tiin hril raw se. 36 Hri en dinga thiempu a lût hmain in sûnga thil ieng khom tirdakuma a puong sa nawna dingin in chu sukruok vong dingin thiempu chun thu pêng a ta, an sukruok vong pha leh en fie dingin thiempu chu lût a tih. 37 Thiempu chun banga thil hmuor chu en dik a ta, a hmuorna hmun chu indêp bik met a, a rong chu a hring amanih a sen deu a, a hri chun bang zûtna thuo nêka inthûkah zung a thlâk nia a hriet chun, 38 in chu thiempu chun suoksan a ta, ni sari sûng in chu khâr a tih. 39 Ni saria chun thiempu chun in chu hung en nawk a ta, thil hmuor chu bangah a'n zàm dar a ni chun, 40 a hri bawmna lung bang chu invuok thlàktir a ta, lung chu khawhnawm hmun tirdakuma pei dingin thu pêng a tih. 41 In sûng tieng bang zûtna po po chu in khok thlàktir vong a ta, an khok thlàk po chu khawhnawm hmun tirdakumah inpeitir bok a tih. 42 Lung thar lâng an ta, chuonghai chun thlâk an ta, pil thar lâng an ta, a puo chu zût an tih. 43 " 'Lung bang an lâk hmang hnung le a thara an thlâk hnung le a thara a bang an zût hnung khoma a hmuor a hung inlang nawk a ni chun, 44 thiempu chu fein en fel nawk a ta, thil hmuor chu inah a hung inzàm dar nawk a ni chun phâr hri tium a na, in chu tirdakum a nih. 45 A in chu thiek fai vong a, a lung, a thing le a chàrna po po chu khaw puo tieng lâk suok a, hmun tirdakuma pei ding a nih. 46 " 'Tu khom chu in an khâr sûnga lût hrim hrim chu zân tieng chen tirdakum kai a tih. 47 Chu ina riek le bu fa taphotin an puonhai an sawp ding a nih. 48 " 'Amiruokchu, thiempuin a hung en nawk a, a bang zûtnaah hmuor hri a hung inlang ta naw chun hmuor hri chu a bo tah tina a na, chu in chu a'n thieng tah ti thiempuin puong a tih. 49 Inthienna dingin vate hring lai pahni le sidar thing le pat zâi sen le husawp kau a hung chawi ding a nih. 50 Thiempu chun vate pakhat chu pil bêla tui sung thar hlol chunga chun that a ta. 51 Chu zoah, tui chunga vate a that thisena chun vate hring lai chu sidar thing le pat zâi sen le husawp le chun thiempuin phum a ta, in chu voi sari thèng a tih. 52 Vate thisen, tui thar, vate hring, sidar thing, husawp le pat sen làr chun in chu inthien a ta, 53 chu zoah vate hring chu khaw puo tieng ramah insuong a ta, chuong anga inremna a siempêk hnung chun in chu hung inthieng tâng a tih. 54 " 'Hienghai hi inkai thei phâr hri chi tinrêng le pupangliek chungchanga dam, 55 silfèn le ina phâr hri kai chungchanga dâm, 56 thil invùng, thil hmuor le thil puor chungchanga dâm le 57 thil a porche le porche naw kawkhmuna dàn chu a nih" tiin.

Leviticus 15

1 LALPA chun Mosie le Aron a biek a, 2 "Israelhai kuomah hi thu hi hril ro: Pasal tukhomin a taksaah thil pût suok a nei chun, chu thil pût chu thil porche a nih. 3 A taksaa inthokin a pût zing amanih a chât tah amanih a ni khomin, ama chu tirdakum a'n kaitir a nih. Thil pûtin mi a sukporche dàn chu hieng hi a nih: 4 " 'Thil pût nei zàlna khum chu a sukporche a, a thungna taphot khom a sukporche bok a nih. 5 A khum tawk taphot chun tuiin an puon sawpin an insil ding a nih; zân tieng chen porche kai an tih. 6 Tu khom thil pût nei inthungna tawk taphot chun tuiin an puon sawpin an insil ding a nih; zân tieng chen porche kài an tih. 7 " 'Tu khomin thil pût neitu a tawk chun tuiin a puon sawpin a'n sil ding a nih; zân tieng chen porche kài a tih. 8 " 'Thil pût nei tu khomin mi porche lo khom chil a sakkhum chun, chu mi chun a puonhai sawpin a'n sil ding a nih; zân tieng chen porche kài a tih. 9 " 'Iengkim a chuongnaa a thungna taphot chu a porche a, 10 a thung de ieng khomin a tawk taphot chu zân tieng chen porche kài a tih. Chuong thilhai la khawmtu chun a puonhai sawpin tui a'n sil ngei ngei ding a nih; zân tieng chen porche kài a tih. 11 " 'Thil pût neituin tuia a kut sawp fai loa mi a tawk taphot chun a puonhai sawpin tuiin a'n sil ding a nih; zân tieng chen porche kài a tih. 12 " 'Pil bêl a tawk a ni chun vuok koi ding a na, thinga siem a ni ruok chun tuia intleu fai vong ding a nih. 13 " 'Chun, thil pût neitu chu a thil pûta inthoka a hung fài chun inthienna dingin ni sari sûng inbituk a ta, a puonhai sawp a ta, vadung tuiah insil a ta, hung inthieng a tih. 14 A ni rietnaa vàthu an naw leh pàrva pahni LALPA hmaah hung chawiin Intuokna Puon in kota chun hung a ta, thiempu hung pêng a ta. 15 Thiempu chun pakhat chu suol thawinan inhlàn a ta, pakhat dang chu pumraw thilhlânah hmang a tih. Chuong ang chun mi chu a thil pûtna laka chun LALPA hmaah inremna siempêk a tih. 16 " 'Pasal chi a pût chun a pumin insil a ta, zân tieng chen porche kài a tih. 17 Puon amani savun amania chi hlek kai hrim hrim chu tuia sawp fai vong ding a nih. 18 Pasalin nuhmei a zâlpuia a chi a pût chun an pahniin insil fai an ta, zân tieng chen porche kâi an tih. 19 " 'Nuhmeiin a dàn pangngai anga thi a nei chun, thla a pal zâta a porche sûng chu ni sari nîng a ta, tu khom a tawk taphot chu zân tieng chen porche kâi a tih. 20 A thla pal sùnga a zàlna taphot chu porche kâi a ta, a thungna taphot khom porche kâi bok a tih. 21 A khum tawk taphot chun a puonhai sawpin tuiin insil sien la, zân tieng chen porche kâi a tih. 22 A thungna tawk taphot chun a puonhai sawpin tuiin insil fài sien, zân tieng chen porche kâi a tih. 23 Khum amanih ieng khom a thungna taphot tawktu chu zân tieng chen porche kâi a tih. 24 Pasalin a zâlpui a, a thla pal thiin a tawk chun ni sari sûng porche kâi a ta, a zalna khum taphot chu porche kâi bok a tih. 25 " 'A thla pal hun lai ni loa nuhmeiin thi sawt tak a nei amani le a thla pal hun sùng nêka sawt a nei amani chun thla a pal lai ang bokin a porche a nih. 26 A zàlna khum taphot amani le a'n thungna taphot chu thla a pal hun lai ang bokin porche kâi vong a tih. 27 A tawk taphot chun a puonhai sawpin tuiin insil fai sien, zân tieng chen porche kâi a tih. 28 " 'A thi a tawp pha leh ni sari sùng inthienna dingin inbituk sien, chu hnung chun hung inthieng tàng a tih. 29 A ni rietna chun thiempu kuomah vàthu an naw leh pàrva pahnih chawiin Intuokna Puon in kotah a hung ding a nih. 30 Thiempu chun pakhat chu suol thawinaah inhlàn a ta, a pakhat dang chu pumraw inthawina thilhlànah inhlân a tih. Chuong ang chun thisen a palna laka chun LALPA hmaah thiempuin inremna siempêk a tih. 31 " 'Israelhai chun anni laia ka chêngna biekbûk an sukporche nawna ding le chu leia an thi pha nawna dingin, anni sukporche thei thil laka inthokin i vong fihlim tawl ding a nih. 32 " 'Hieng hi pasala inthoka thil pût amanih chi pûtin amanih mi a sukporche thei dàn thua dâm, thla kipa nuhmei thi nei lai le a nuhmei a pasala inthoka thil pûtin a sukporche dàn thua dâm le pasalin nuhmei porche lai a zâlpui thua dânhai chu an nih" tiin. 33 (A um nawh)

Leviticus 16

1 Aron naupa pahniin LALPA an va hnaia an thi pha hnung khan LALPA chun Mosie a biek a. 2 LALPA chun Mosie kuomah "I unaupa Aron hril la, puonzâr sûng, Hmun Thienghlim taka thuthlung bawm chunga zangaina thungphaa chun sûmin ka hung inlâr ding a ni leiin, a nuom hun hunah hung lût naw raw se, chuong naw chun thi rawi a tih 3 "Aronin hmun thienghlim sûng a hung lût dàn ding chu hieng ang hin a nih: suol thawina ding bawngchal tuoi le pumraw thilhlàna ding beram chal a hung chawi ding a nih. 4 Puon zâi inhmia siem zakuo thienghlim chu hâk a ta, a saruok inkhumna ding puon zâi inhmia siem kekorte bun a ta, cheizemin a kawng hrèn a ta, puon lukawm kawm bok a tih. Hieng hi silfèn thienghlim a ni a, a hàk hmain tui a'n sil hmasa zet ding a nih. 5 Israel sûngkuoa inthokin an suol thawina dingin kelchal pahni le pumraw thilhlâna dingin beram pakhat a lâk ding a nih. 6 "Aron chun ama puola suol thawina dingin bawngchal hung inhlàn a ta, ama le a sûnghai ta dingin inremna siempêk a tih. 7 Chu zoah kèl pahni hung keiin Intuokna Puon ina chun LALPA hmaah hung thuoi a ta. 8 Chun, kèl pahni chungchànga chun thum vawr a ta, pakhat chu LALPA chanpuol nîng a ta, pakhat chu suol phurtub chanpuol nîng a tih. 9 Aron chun LALPA chanpuol kèl chu lâng a ta, suol thawinain inhlàn a tih. 10 Suol phurtu chanpuola tlu kèl ruok chu LALPA hmaah a hringin hung thuoi a ta, inremna siemna dinga thlalera suol phur hmangtu dingin a hringa insuo ding a nih. 11 "Aron chun ama puola suol thawina bawngchal chu hung kei a ta, ama le a sûnghai ta dingin inremna thilhlânah inhlàn a ta, ama suol thawina bawngchal chu that a tih. 12 LALPA hmaa maichâma inthokin mei lâkna berbua chun meiling a sipin lâng a ta, rimtui inhnik tak rawt dip thûm hni leh puonzâr sûng tieng chun lûtpui a ta, 13 a thi nawna dingin, rimtui chu LALPA hmaah meia chun phul a ta, rimtui khu inzâm chun Thuthlung Bawm chunga zangaina thungpha chu tuom vel a tih. 14 Bawngchal thisen iemani zât chu lâng a ta, a kutpâr hmorin zangaina thungpha hma tieng chu thèng a ta; chu zoah a kutpâr hmor bokin a then chu zangaina thungpha chunga chun voi sari thèng a tih. 15 "Chu zoa chun mipui ta dinga suol thawina thilhlânah kèl chu that a ta, a thisen chu puonzâr sûng tieng chun chawi a ta, bawngchal thisen a thaw dàn ang khan thawng a ta, zangaina thungpha chunga le a hma tieng chun thêng a tih. 16 Chuong ang chun Israel thlahai inthieng nawna le helna leiin, an suolna chu ieng po khom ni sien, Hmun Thienghlim ta dingin inremna siem a ta; chuong ang bokin an inthieng nawna huol vela um Intuokna Puon in ta ding khomin inremna a siem bok ding a nih. 17 Ama le a sûngkuo le Israel hnam pumpui ta dinga inremna siem dinga Hmun Thienghlima Aron a lût lai le a hung suok nawk hmakhat chun Intuokna Puon inah tukhom an um ding a ni nawh. 18 LALPA hmaah maichâma chun hung a ta, chu taka ding chun inremna siem a ta, bawngchal thisen le kèl thisen iemani zàt chu lain maichâm ki tina chun a vêlin tât a tih. 19 Chun, a kutpâr hmorin thisen chu voi sari thèng a ta, inthien a ta, Israel thlahai chu an inthieng nawna laka inthok chun sukthienghlim a tih. 20 "Chun, Hmun Thienghlim le Intuokna puon in le maichâm ta dinga inremna a siem zo chun kèl hring chu hung kei a ta, 21 a lu chunga chun a kut khing hnia innghatin, Israelhai rîtlona, helna le suolna po po chu insam a ta, kèl lu chunga chun innghat vong a ta, kel chu mawphurtu dinga ruot diem ta sa mi pakhat kuta chun pein thlaler tieng infetir a tih. 22 Kèl chun an suolna po po chu thlaler hmun reah phur a ta, chu taka chun insuo hmang a tih. 23 "Chu zoah Aron chu Intuokna puon inah lût a ta, Hmun Thienghlim a lût laia a silfèn inbelhai kha hlîp a ta, chu taka chun màksan a tih. 24 Hmun Thienghlima chun insil a ta, a silfèn pangngai inbel nawk a ta, hung suok a ta, ama puola pumraw thilhlân le mipui puola pumraw thilhlân chu inhlàn a ta, ama le mipui ta dingin inremna chu siem a tih. 25 Chun, suol thawinaa thau chu maichâmah raw bok a tih. 26 "Chun, suol phurtu kèl inthlaa fe khan a silfènhai sawpa tui a'n sil zo hnungin riebûkah a hung lût chauh ding a nih. 27 Inremna siemna dinga Hmun Thienghlima an thisen Aronin a chawi lût, suol thawina bawngchal le suol thawina kèl ruok chu khawhnawma fepui ding a na, a vun hai, a sa hai le a êk hai chu raw ding a nih. 28 A rawtu chun a silfènhai sawp a ta, insil a ta, chu hnungah riebûk tieng hung inlawi thei a tih. 29 "Chun, hi hi in kumkhaw dàn ding chu a nih: Thla sarina ni sawma chun ieng khom faa dawn loin, nangni le a ram mi rèng amanih le ram dang mi nangni laia khawsahai khomin sin in thaw ding a ni nawh. 30 Hi ni hin nangni sukthienghlimna dingin in ta dingin inremna siem a ni ding a na, chuongchun LALPA hmaah in suolna po po laka chun hung thienghlim in tih. 31 In ta dingin Sabat, chawl tok tokna ni a na, ieng khom tawk naw ro, chu chu kumkhaw dàn ding a nih. 32 Thiempu, a pa aia thiempu ni dinga hriek nâl le namnghet chun inremna siem a ta, puon zâi inhmia siem silfèn thienghlim chu inbel a ta, 33 Hmun Thienghlim puola dingin inremna siem a ta; Intuokna Puon in le maichâm puola dingin inremna siem a ta, thiempu le mipuihai puola dingin inremna siem bok a tih. 34 An suolna po po leia Israelhai ta dinga kum tin inremna voi khat siem zie ding ti hi kumkhaw thupêk a nih" a ta. LALPAN thu a pêk angin Mosie chun an thaw a.

Leviticus 17

1 LALPA chun Mosie kuomah, 2 "Aron le a naupahai le Israel thlahai po po kuomah hieng hin hril rawh: 'Hi hi LALPA thupêk chu a nih: 3 Israel mi tukhom bawngchal amanih, beram le kèl amanih riebûk sûng le a puo tieng amania that a, 4 LALPA biekbûk hmaa LALPA ta dinga thilhlân Intuokna Puon in kota hung la naw taphot chu thisen insuo leia thiem naw changa ngai nîng a ta, thisen insuotu a ni leiin a mipuihai laia inthoka tuithlàr a ni ngei ding a nih. 5 Chuong chu a ni leiin, tuta tuolpâra Israelhaiin inthawina an inhlàn hlak po po hi LALPA hmaah an hung inhlân vong ta ding a nih. Intuokna Puon in kotah thiempu kuomah, LALPA hmaah hung chawi an ta, inremna thilhlânah an hung inhlàn ding a nih. 6 Thiempu chun Intuokna Puon in kot bula maichâm chu ran thisen chun thêng a ta, a thau chu LALPA ta dinga rimtui inhnik dingin rawng a tih. 7 An uirena hlak kèl lemhai kuoma chun an inthawi ding a ni ta nawh' ti hi an thla peihai ding khoma an kumkhaw dàn ding chu a nih" tiin. 8 " Chun, hieng hin hril tawl rawh: 'Israel mi amanih nangni laia hnam dang mi chênghai tu khomin pumraw inthawi an inhlàn a, 9 Intuokna Puon in kot bula LALPA hmaah an hung inhlân si naw chun, chu mi chu a chipuihai laia inthoka tuithlàr a ni ngei ding a nih. 10 " 'Israel mi tu khom le anni laia chèng ram dang mi tu khom thisen fatu laka chun ka hmai sukthim ka ta, a chipuihai intuithlârtir ka tih. 11 Thilhring hringna chu a thisenah a um si a, maichâma in ta dinga inremna siemna dinga ka pêk cheu a nih; hringna ta dinga inremna siemna chu thisen a ni si a. 12 Chu lei chun a nih Israelhai kuomah, 'Tu khomin thisen in fâk ding a ni nawh, nangni laia chêng ram dang mi khomin an fâk ding a ni bok nawh' tia ka hril chu. 13 " 'Israel mi tu khom le nangni laia chêng le ram dang mi tu khomin fâk dinga ram sa amanih vate a pêl chun a thisen chu hnuoiah infar kangtir vong a ta, chu chu pilin a vur khum ding a nih, 14 thilhring tin hringna chu a thisen a ni si a. Chu lei chun annawm Israelhai kuomah, 'Thilhring taphot thisen in fâk ding a ni nawh, thilhring hringna chu a thisen a ni si a; a fa taphot chu tuithlàr ding a nih' ka ti chu. 15 " 'A rama pieng amanih ram dang mi tu khom, sa thi sa amanih le sahuoiin an pot chen neng tahnung sa a fâk chun a puon sawpin insil a ta, zân tieng chen porche kâi a ta, chu zoah hung inthieng a tih. A puon sawp loa a'n sil bok naw chun a maw chu phur a tih' tiin " a ta. 16 (A um nawh)

Leviticus 18

1 LALPA chun Mosie kuomah, 2 "Israel thlahai inbiekpui la, an kuomah hieng hin hril rawh: 'LALPA in Pathien chu ka nih. 3 In umna hlak Aigupta rama mihai thaw dàn angin thaw ve naw unla, ka thuoina ding cheu Kanan rama mihai thaw dàn angin thaw bok naw ro. An thil chìnghai chu chìng ve naw ro. 4 Ka dânhai zawm unla, ka thupêkhai fimkhur takin zui ro. Kei hi LALPA in Pathien chu ka nih. 5 Ka thupêk le ka dânhai vong ro, a zawmtu taphot chun hringpui a tih. LALPA chu ka ni si a. 6 " 'Tu khomin sûngkuo inhnaipuihai pawl dingin in thlêm ding a ni nawh. LALPA chu ka ni hi. 7 " 'I nu pawlin i pa hming sukpawi naw rawh. I nu a ni leiin i pawl ding a ni nawh. 8 " 'I pa nuhmei i pawl ding a ni nawh, i pawl chun a hming sukpawi i tih. 9 " 'I farnu amanih, i pa naunu amanih, i nu naunu amanih, in hmunkhata pieng amanih hmun danga pieng amani khom i pawl ding a ni nawh. 10 " 'I naupa naunu amanih i naunu naunu amanih i pawl ding a ni nawh, nang le nang insukpawina a nih. 11 " 'I pa nuhmei naunu, i pa thàlbea inthoka suok chu i farnu a ni leiin i pawl ding a ni nawh. 12 " 'I pa farnu i pawl ding a ni nawh, i pa laichin hnai a ni leiin. 13 " 'I nu zuorpuinu i pawl ding a ni nawh, i nu laichin hnai a ni leiin. 14 " 'I pa unaupa nuhmei chu pawl naw rawh, i nute a ni si a. 15 " 'I mo i pawl ding a ni nawh. I naupa nuhmei a ni leiin i tawk ding a ni nawh. 16 " 'I unaupa nuhmei i pawl ding a ni nawh, i pawl chun i unaupa sukpawi i tih. 17 " 'Nufa kopin i pawl ding a ni nawh. A naupa naunu khom, a naunu naunu khom i pawl ding a ni nawh, inlaichin hnai vong an ni leiin. Chuong thil thaw chu ritlona a nih. 18 " 'I nuhmei dam lai zingin a zuorpuinu nuhmeiah nei naw rawh. 19 " 'Nuhmeiin a dàn pangngaia thla a pal laiin pawl naw rawh, a porche lai a nih. 20 " 'I tuolbawm nuhmei pawlin insukporche naw rawh. 21 " 'I nauhai tu khom Molekc kuoma inhlàn dinga pein Pathien hming i sukpawi ding a ni nawh. Kei hi LALPA chu ka nih. 22 " 'Pasalin nuhmei a pawl angin pasal a pawl ding a ni nawh; chu chu thil tirdakum a nih. 23 " 'Ran rìmin insukporche naw rawh. Nuhmei khom ran le inpawl dingin a'n pèk ding a ni nawh; chu chu piengsuolna a nih. 24 " 'Chuong thila hai chun in insukporche ding a ni nawh, in hmaa ka hnot suok ding hnamhai hi chuong anga lo insukporche vong chu an nih. 25 A ram chenin an sukporche a, an suolna leiin ram chu ka hrem a, a sûnga chenghai a luok suok tawl el a nih. 26 Nangni chun ka dàn le thupêkhai in vong ding a nih. A rama pieng le ram dang mi nangni laia chènghai khomin hieng ang thil tirdakum hi an thaw ding a ni nawh. 27 Chuonghai po po chu in hmaa chènghai khan an lo thaw hlak a, a ram phêkin an sukporche tah a nih. 28 Nangni khomin in sukporche chun a hmaa chènghai ang bokin a ram chun luok suok vêng a ti cheu. 29 "Nangni lai tu khom chuong ang tirdakum thaw an um ve chun a chipuihai laia inthoka tuithlàr nîng a tih. 30 Chuleiin, hieng thil tirdakum, in hmaa an chìng ang chu in chìng ve nawna ding le chuonga chun in insukporche nawna dingin ka thupêkhai hi in zawm ding a nih. Kei hi LALPA in Pathien chu ka ni si a' tiin" a ta.

Leviticus 19

1 LALPA chun Mosie kuomah, 2 "Israel thlahai po po ko khawm la, an kuomah hieng hin hril rawh: 'In thienghlim ding a nih, kei LALPA in Pathien hi ka thienghlim si a. 3 " 'Mani nu le pa in inza seng ding a nih. Ka chawlni Sabat in inser ding a nih. Kei hi LALPA in Pathien chu ka nih. 4 Milem tieng ngha naw unla, in biek ding milem sung naw ro. Kei hi LALPA in Pathien chu ka nih. 5 " 'LALPA ta dinga inremna thilhlân in inhlàn pha leh a pom tlâk ni dingin inhlàn ro. 6 In inhlàn ni le a zînga chena fâk ding a na, ni thum nia a bâng la um chu raw hmang ro. 7 Ni thum nia mi in fâk chun a porche tah leiin in thil inhlân chu pom naw ning. 8 A fatu taphot chun LALPA thienghlimna an sukporche leiin a maw phur an ta, an chipuihai lai tuithlàr nîng an tih. 9 " 'Chun, in loa bu in sìk pha lo hnawm rawta mi chen chen la naw unla, sìk hmai inkhawm dingin fe bok naw ro. 10 In grèp huonah lo hmai grèp zong naw unla, a ra til khom rût bok naw unla, mi retheihai le ram dang mihai ta dingin hlà lem ro. Kei hi LALPA in Pathien chu ka nih. 11 " 'Inru naw ro. Khêl hril naw ro. Inhlèmtuo naw ro. 12 " 'Ka hming sâla indik lo taka inkhâmin i Pathien hming sukpawi naw rawh. Kei hi LALPA chu ka nih. 13 " 'I vênghai thil lâkpèkin rok naw rawh. Inhlawfa hlaw zân khat khom hrênpèk naw rawh. 14 " 'Naset chu tongsie inphur naw la, mitdel hmaah dàlkham sie naw la, i Pathien ti lem rawh. Kei hi LALPA chu ka nih. 15 " 'Fel takin i vênghai thu rëlpèk la, mi rethei thlier naw la, mi lien ditsak bik naw la, i vênghai chungah indik takin ro rêl rawh. 16 " 'I mihai lai indem sietna thu thè dar naw rawh. I tuolbawm hringna ta dinga tium ieng khom thaw ngai bok naw rawh. Kei hi LALPA chu ka nih. 17 " 'I unau theida rûk naw rawh. Tlang taka zilin in inkâr thu sukfel la, a thiem nawnaah chan nei ve naw rawh. 18 " 'Phuba lâk ding zong naw la, i mihai tu khom theida naw la, nangma i'n hmangai angin i vênghai hmangai rawh. Kei hi LALPA chu ka nih. 19 " 'Ka thupêkhai vong rawh. I ran chu ran chi hrang hrang leh inzawltir naw rawh. Lo pakhatah thlai chi hrang ching hmun khat naw rawh. Thil hrang chi hni inpola khawng thuom hâk naw rawh. 20 " 'Tu khom bawi nunghàk, miin hmei dinga a huol, sienkhom a man la pe tlâk si lo amanih le insuo zalen la ni lo chu pasalin lo inngaipui sien, bawi el a la ni leiin sukhlum loa a awm tawka hrem ding an nih. 21 LALPA kuoma bawsiet inthawina dingin Intuokna Puon in kotah pasal chun beramchal a hung kei ding a nih. 22 A bawsiet inthawina beram chu LALPA hmaah a suol ngaidamna dingin thiempu chun inhlânin inremna siempêk a ta, a suol chu ngaidam nîng a tih. 23 " 'Chun, ram chu hluoa thing in phun pha khom, a ra hmasa chu fâk thieng loah sie ro. Kum thum sûng chu a ra fâk thieng loa ngaiin in fâk ding a ni nawh. 24 A kum linaa a ra po po chu ra thienghlim, LALPA inpâkna thilhlàna ngai nîng a tih. 25 A kum nganaa a ra ruok chu fa thei tâng in tih. Hieng anga in thaw chun in tharsuok hung pung a tih. Kei hi LALPA, in Pathien chu ka nih. 26 " 'Sa hrim hrim a thisen chopin fa naw ro. Dawi le aisan thaw ngai naw ro. 27 " 'Bek sam in vaw ding a ni naw a, khâkhmul hmawr in tan ruol ding a ni bok nawh. 28 " 'Mithi leiin in taksa in inàt pop ding a ni naw a, in vunah lem in inchuk tiel ding a ni bok nawh. 29 " 'I naunu chu tempul nawchizorad siemin sukporche naw rawh, chuong naw chun a ramin nawchizor hung inchang an ta, rîtlona sip rawi a tih. 30 " 'Sabat inser unla, ka biekbûk inza ro. Kei hi LALPA chu ka nih. 31 " 'Rau ko thiemhai le dawithiemhai pan naw ro, sukporchèng an ti cheu. Kei hi LALPA in Pathien chu ka nih. 32 " 'Upahai hmaah ngîr unla, tarhai inza unla, Pathien chu ti ro. Kei hi LALPA chu ka nih. 33 " 'Ram dang mi in rama chênghai chu sukrimsi naw ro. 34 Nangni laia ram dang mi chêng chu a rama pieng ang charin en ro. In inhmangai ang takin ama khom hmangai ve ro, nangni khom Aigupta rama khan ram dang mi in ni ve kha. Kei hi LALPA in Pathien chu ka nih. 35 " 'Thil seizie, rikzie le tamzie inkhìna le bùkna indik lo hmang ngai naw ro. 36 Inkhìna le bùkna indik, efa tekhawng le hin no indik tak hmang hlak ro. Kei hi LALPA in Pathien, Aiguptaa inthoka thuoi suoktu cheu ka ni hi. 37 " 'Ka thupêkhai vongin ka dàn po pohai zawm ro. Kei hi LALPA chu ka nih' tiin" a ta.

Leviticus 20

1 LALPAN Mosie a biek a, 2 "Israel thlahai kuomah hieng thu hi hril rawh: 'Tu khom Israel thla laia mi amanih, ram dang mi Israel rama khawsa amanih, mani rîla ra naupang, Moleke kuoma petu taphot chu sukhlum ngei ding a na, hi rama mihai hin lungin an dêng hlum ding a nih. 3 Molek kuomah mani nau pe a, ka hmun thienghlim sukporche a, ka hming sukpawitu chunga chun kei khomin ka hmai suktûr ka ta, a chipuihai laia inthokin sukbohmang ka tih. 4 Chun, hi rama mihaiin chuonga mani rila ra Molek kuoma petu thil thaw chu hmu naw ang ziezànga um a, an sukhlum naw chun, 5 chu mi le a sûnghai chunga khom chun ka hmai suktûr ka ta, a chipuihai lakah sàt thlâng ka ta, ama ang boka Molek kuoma inzortu po po chunga chun thaw bok ka tih. 6 " 'Rau ko thiemhai le dawithiemhai pan a, anni laka inzortu chunga chun ka hmai intûr a ta, a chipuihai laka inthokin sukbohmang ka tih. 7 " 'Chuleiin, inhlân thienghlim unla, thienghlim takin um ro, LALPA in Pathien chu ka ni si a. 8 Ka thupêkhai vongin zawm ro. In LALPA, sukthienghlimtu cheu chu ka ni si a. 9 " 'Tu khom mani nu le pa tongsie inphurtu chu sukhlum ngei ding a nih. A nu amani a pa amani tongsie inphurtu a na, a thisen maw chu ama lu chungah tlâng a tih. 10 " 'Tu khomin mi dang nuhmei, a tuolbawmpa nuhmei a uiretpui chun, a uirepa le a uirenu chu an pahnia sukhlum ding an nih. 11 " 'Tu khomin a pa nuhmei a zâlpui chun a pa a sukmuolpho a nih. Uirehai chu sukhlum ve ve ding an nih; an thisen maw chu an lu chungah tlâng a tih. 12 " 'Tu khomin a monu a zàlpui chun an pahnia sukhlum ding a nih. An thilthaw chu thil letling a na, an thisen maw chu an lu chungah tlâng a tih. 13 " 'Pasalin nuhmei anga pasal dang a zâlpui chun an pahniin thil tirdakum an thaw a nih. An pahniin sukhlum ve ve ding a nih; an thisen maw chu an lu chungah tlâng a tih. 14 " 'Miin nufa nuhmeia a nei kop chun ritlona nasa tak a thaw a na, chuong ang ritlona chu nangni lai a um nawna dingin, an rênga rawhlum ding an nih. 15 " 'Pasalin ran a rìm chun ama chu sukhlum ding a na, ran khom chu that bok ding a nih. 16 " 'Nuhmeiin inpawlpui dinga ran a pan chun nuhmei le ran chu an pahniin that ro. Sukhlum ngei ngei ding an nih; an thisen maw chu an lu chungah tlâng a tih. 17 " 'Miin a farnu, - a pa naunu amanih a nu naunu amani khom ni sien, -nuhmeia neia a zâlpui chun thil inzakumthlak tak a ni leiin a chipuihai laia inthoka hnot suok ding a nih. A farnu a sukmuolphona maw chu phur a tih. 18 " 'Tu khomin nuhmeiin thla a pal laia zâlpuia a pawl chun, a thla palna hnàr chu hlîm a, a nuhmei khomin a lo hawkpêk a ni leiin an pahniin an chipuihai laia inthoka hnot suok ding an nih. 19 " 'I pa farnu amanih, i nu zuorpuinu amanih i zâlpui ding a ni nawh, laichin hnai sukmuolphona a na, a maw chu in pahniin phur in tih. 20 " 'Miin a pate nuhmei a zâlpui chun a pate a sukmuolpho a nih. An pahniin a maw phur an ta, nau boin thîng an tih. 21 " 'Miin a unaupa nuhmei a neipêk chun, thil tirdakum thawin a unaupa a sukmuolpho a nih. An pahniin nau boin thîng an tih. 22 " 'Ka thuoina ding cheu ram, in chêngna ding chun a'n luok suok nawna ding cheuin ka thupêkhai vongin ka dânhai zawm ro. 23 In hmaa ka hnot suok ding hnamhai chîng dàn angin hung khawsa ve naw ro. Hieng thil hi an thaw leiin a nih ka tirdak tawl chu. 24 Nangni kuoma ruok chu, 'An ram chu la chang in ta, nenetui le khuoizu luongna ram chu in rochung dingin la pêng ka ti cheu' ka ti lem a ni kha. Kei hi LALPA in Pathien, hnam danghai laka ser hrangtu cheu chu ka nih. 25 Chuleiin, sa thieng le thieng lo, vate thieng le thieng lo in thlier hrang thiem ding a nih. Sa amanih, vate amanih le hnuoia invâk taphot laia thieng loa ka siehaiin an sukporche ding cheu a ni nawh. 26 Ka ta dingin in thienghlim ding a nih, kei LALPA hi ka thienghlim si a; ka ta dinga hnam danghai laka ka ser hrang in nih. 27 "Nangni laia mi, a nuhmei a pasalin, rau ko thiem le dawithiem po po chu sukhlum vong ro. Lungin in dêng hlum ding a nih. An thisen maw chu an lu chungah um a tih' ti bok rawh" tiin.

Leviticus 21

1 Chun, LALPAN Mosie kuomah, "Aron naupa thiempuhai chu hril la, an kuomah, 'In chipuihai laia mithi leiin thiempu tu khom insukporche naw raw se; 2 mani sûng bul, nu le pa, naupa le naunu hai, unau hai, 3 farnu umpui, pasal la nei lo hai thi lei ruok chun insukporche thei a tih. 4 Tarpuhai tienga mâkpa a nina leiin insukporche naw raw se. 5 " 'Thiempu hrim hrimin lu an vaw kol ding a ni naw a, khâkhmul an tan ding a ni naw a, taksa an in-ât pop ding a ni bok nawh. 6 An Pathien ta dingin mi thienghlim an ni ding a na, an Pathien hming an sukpawi ding a ni nawh. Pathien ta dinga meia thilhlân, Pathien ta dinga fâk ding inhlàntu an ni leiin an thienghlim ding a nih. 7 " 'Nuhmei nawchizor amanih, hming se ta hnung le mi mâk ta hnung chu an nei ding a ni nawh, thiempuhai chu an Pathien ta dinga mi thienghlim an ni si a. 8 I Pathien ta dinga fâk ding inhlântu an ni leiin mi thienghlimah ngai rawh. I ta dinga mi thienghlim an ni ding a nih; kei, LALPA, sukthienghlimtu che hi ka thienghlim si a. 9 Thiempu naunu tukhom nawchizora insukporche a um chun a pa a sukporche a na, meia raw hlum ding a nih. 10 " 'A unauhai laia thiempu laltak, a lua hriek nâla um tah, thiempu silfèn inbel dinga ser hrang ta chun a sam a sukthur ding a ni naw a, a silfènhai a kei thler ding a ni bok nawh. 11 Mithi ruong umnaa hrim hrim a lût ding a ni nawh. A nu le pahai khom ni sien, a'n sukporche ding a ni nawh. 12 Pathien mi dinga hriek nâla ser hrang a ni leiin hmun thienghlim a suoksan ding a ni naw a, Pathien hmun thienghlim a sukporche ding a ni bok nawh. Kei hi LALPA chu ka nih. 13 " 'Nuhmei dingin nunghâk thienglâm a nei ding a nih. 14 Hmeithai amanih, màk hnung amanih, hming se ta hnung amanih, nawchizor amanih a nei ding a ni nawh, ama chipui ngei, nunghâk thienglâm a nei ding a nih. 15 Chuonga a thaw chun a chipuihai laia a thlahai chu sukporche naw nih. Kei hi LALPA, ama sukthienghlimtu chu ka ni si a' tiin hril rawh" a ta. 16 Chun, LALPAN Mosie a biek a, 17 "Aron kuomah hieng hin hril rawh: Suon la hung um pei dinga khom, i thlahai laia piengsuolna nei tu khomin Pathien kuoma fâk ding inhlàn dingin hung hnai naw raw se. 18 Piengsuolna nei tukhomin an hung hnai ding a ni nawh; mit del hai, ke bai hai, hmai inhèk amanih piengsuol hai, 19 kut zeng hai, ke zeng hai, 20 zâng bawng hai, mi thehre hai, mit tha lo hai, pânna hnai pùt hai, til mu koi hai chun an mi hung hnai ding a ni nawh. 21 Thiempu Aron thlahai laia mi pieng indik lo tu khomin ka hmaa thil inhlàn dingin an mi hung pan hnai ding a ni nawh. Piengsuolna nei a ni leiin a Pathien kuoma fâk ding inhlàn dingin a hung hnai ding a ni nawh. 22 Amiruokchu, chuong mihai chun Pathien ta dinga thil inhlàn thienghlim le thiempu chanvo thil thienghlimhai chu fa ve thei chauh an tih. 23 Chiengkuong nawna nei an ni leiin puonzar sûng amanih maichâm hnai amania ruok chu fe thei naw ni hai, ka hmun thienghlim sukporche pal rawi an tih. Kei hi LALPA, anni sukthienghlimtu chu ka ni si a, ' ti rawh" tiin. 24 Chuong ang chun Mosie chun Aron le a naupahai le Israel thlahai po po kuomah a hril a.

Leviticus 22

1 Chun, LALPAN Mosie a biek a, 2 "Aron le a naupahai hril la, Israel mihaiin ka hmaa thil ser an hung inhlànhai chu ursun takin lo dong hai sien la, ka hming thienghlim sukmuolpho naw raw hai se. Kei hi LALPA chu ka nih. 3 Hieng hin hril rawh: suon la hung pei ding chen khomin, in thlahai tu 169 4 " 'Aron thla tukhomin inkai thei vun hri amanih a taksaa thil pùt amanih a nei chun, a porchenaa inthoka a'n thieng hma khat chu thil thienghlim inhlànhai chu fa thei naw nih. Mithi ruongin a tawk thilhai a tawk lei dâm, chi a put suok lei dâm, 5 tawk thieng lo hnuoia thil invàk chi hrim hrim a tawk lei dâm, mi sukporche thei hrim hrim, ieng ang porchena khom ni sien, a tawk lei dàmin a porche thei. 6 Chuong ang thil tawktu taphot chu zân tieng chenin tirdakum kai a tih. Tuia a'n sil fai hma khat chun thil thienghlim inhlànhai chu a ieng khom a fâk ding a ni nawh. 7 Nisa tlâk pha hung inthieng tâng a ta, chu hnunga chun thil thienghlim laia mi chu fa thei tâng a tih, a chanpuol dinga ruot a ni leiin. 8 Sa thi sa amanih le sahuoi se hlum sa amanih a fâk leiin a'n sukporche ding a ni nawh. Kei hi LALPA chu ka nih. 9 " 'Thiempuhai chun ka thupêkhai chu an zawm ding a nih, an zawm naw chun thiem nawna phurin, an poisak nawna chu thipui rawi an tih. Kei hi LALPA, anni sukthienghlimtu chu ka ni si a. 10 " 'Thiempu sûngkuo ni ve lo le a mikhuol amanih inhlawfa a lâkhai amani khomin thil thienghlim chu an fâk ding a ni nawh. 11 Amiruokchu, suma thiempuin bawi a'n chawk amani le a ina pieng bawihai chun a bu chu fa thei an tih. 12 Thiempu naunuin thiempu ni lo pasala a nei chun thèn thilhlân, thil thienghlim laia mi chu a fâk ding a ni nawh. 13 Sienkhom, thiempu naunu chu nau nei hman loa a hmeithai amanih, an naw leh màk a ni a, a pa inah a naupang lai ang boka khawsa dinga a hung kîr nawk a ni chun, a hung kîr nia inthokin fa thei a tih. Mi dang chun an fâk a thieng nawh. 14 " 'Thiempu thla ni loin hre loa thil thienghlim a lo fâk pal a ni chun thiempu chu rul vong a ta, hmun ngaa thea hmun khat pe belsàng a tih. 15 Israelhaiin thil thienghlim LALPA kuoma an hung inhlàn chu fa a, thiem nawna an chungah intlungtir a, an thung nawk a ngai nawna dingin, thil thienghlim an inhlàn chu thiempuin sukporche ngai naw raw se. 16 Kei hi LALPA, anni sukthienghlimtu chu ka ni si a' ti rawh" a ta. 17 LALPA chun Mosie kuomah, 18 "Aron le a naupahai le Israel thlahai po po chu be la, hieng ang hin hril rawh: 'Israel sûngkuo laia mi amanih, Israelhai laia um ram dang mi amanih tu khomin LALPA ta dinga pumraw inthawina thilhlân in inhlàn hunah, thutiemna amanih mani nuom thua thilhlân amanih a ni khomin, 19 in thilhlân chu nangni aia pom tlâk a ni theina dingin bawngchal amanih, kèlchal amanih hemna nei lo chu in inhlàn ding a nih. 20 Hmèl hemna nei hrim hrim hung inhlàn naw ro, in inhlàn chun nangni aia pompêk ni naw ti niu. 21 Tu khom thutiem bîk hlenna ding amani le mani nuom thu lei amania inremna thilhlân inhlàn ding chun, a thil inhlàn chu ama aia pom a ni theina dingin, bawngchal amanih, beramchal amanih, kèlchal amanih hmèl hem lo hung inhlân raw se. 22 Ran mitdel amanih, inhliemna nei le sil-ong amanih, inphârna le pânna nei lai amanih chu inhlân naw ro. Chuong ang hrim hrim chu LALPA ta dinga meia pumraw thilhlânah in hmang ding a ni nawh. 23 Mani nuom thua thilhlâna chu bawngchal amanih beramchal amanih a pieng infu rak lo khom in inhlàn thei a, amiruokchu thutiem hlenna thilhlâna ding chun chu chu pom ni naw nih. 24 A tilmu inhliem amanih, vuok nawi amanih, sut koi amanih le làk amanih ran chu LALPA kuomah in inhlàn ding a ni nawh. Chuong ang chu in rama hin in thaw ding a ni nawh. 25 Chun, chuong ang ran chu in Pathien fâk ding thilhlâna dingin ram dang mi laka inthok khomin in pom ding a ni nawh. Piengsuolna le hmèl hemna nei an ni leiin nangni aia pom ni thei naw nih' tiin hril rawh" a ta. 26 LALPA chun Mosie kuomah, 27 "Bawng amanih, beram amanih, kèlchal amanih a hung piengin a pui bulah ni sari a um ding a nih. A ni rietnaa inthok chun LALPA ta dinga meia thilhlâna pom thei ni tâng a tih. 28 Bawngpui amanih berampui amanih le a te chu ni khatah a ruolin in that ding a ni nawh. 29 "Chun, lawmthu hrila LALPA kuoma in inthawi pha a pom tlâk ni dingin inthawi ro. 30 A ni lã laah in fâk ding a nih; a zînga ding ieng khom hlà naw ro. Kei hi LALPA chu ka nih. 31 "Ka thupêkhai hi vongin zawm ro. LALPA chu ka ni si a. 32 Ka hming sukpawi naw ro. Israel thlahaiin mi thienghlimah an mi pom ding a nih. Kei hi nangni sukthienghlimtu LALPA chu ka na, 33 in Pathien ni dinga Aiguptaa inthoka thuoi suoktu cheu chu ka nih. LALPA chu ka nih" tiin a hril a.

Leviticus 23

1 Chun, LALPA chun Mosie kuomah, 2 "Israelhai be la, hieng ang hin hril rawh: Hienghai hi kût ka ruothai, LALPA ta dinga kût ruothai, inkhawmpui thienghlima in puong ding hai chu an nih: 3 " 'Ni ruk sûng sin thawng in ta, ni sarina chu Sabat a ni a, in chawl ding a nih. Sabat hi LALPA puol a ni a, in umna taphotah sin ieng khom thaw loa inkhawmin in inser ding a nih. 4 " 'Hienghai hi LALPA kùt, a hunbi ang taka inkhawmpui thienghlim in puong hlak hun ding chu a nih. 5 Thla hmasa tak ni sawm le pali, nisa tlâka inthokin LALPA Fekan Kùt chu intan a tih. 6 Chu thla, ni sawm le panga chun LALPA Chol thang lo bei kùt chu intan a ta, ni sari sûng chu chol thang loa siem bei in fâk ding a nih. 7 A ni hmasa taka chun inkhawmpui thienghlim nei in ta, sin hrim hrim in thaw ding a ni nawh. 8 Ni sari sûng chun meia pumraw thilhlân inthawina LALPA kuomah in inhlàn ding a nih. Ni sari-a chun inkhawmpui thienghlim nei unla, sin hrim hrim thaw naw ro' tiin" a ta. 9 LALPA chun Mosie kuomah, 10 "Israelhai be la, hieng ang hin hril rawh: 'Ram ka pêk cheu in tlung pha, in lo tharsuok bu in sìk hmasa taka buphal tèl khat chu thiempu kuomah hung chawi ro. 11 Buphal chu LALPA hmaah nangni aiawin thiempu chun thên a ta, lo pompêk a ti cheu. Sabat ni a ni chun a zîngah thén a tih. 12 Buphal thèn ni chun beramchal tuoi, kum khat mi le hmèl hem lo chu pumraw thilhlânah LALPA kuomah in inhlàn ding a nih. 13 Chu taka bu le bâl thilhlâna chun beiphit indip kilogram hni, hriek le hmet le dawn ding uoiin thilhlân liter khat thangsain LALPA ta dinga rim inhnik, meia thilhlânah inhlàn ro. 14 In Pathien hmaa thilhlân in hung chawi hma chun beia siemin amanih, a zeua zeuin amanih le a vuia chipin amanih in fâk ding a ni nawh. Khaw lai hmuna khom um inla, hi hi in thlahai chena in kumkhaw dàn ding chu a nih. 15 " 'Sabat zo zînga thèn thilhlàna buphal in inhlàn nia inthoka tiema a chawlkâr sarinaah Pawl Kût in hmang ding a nih. 16 Chu sabat voi sarina zo tûk, ni sawmnga ni chun in bu thar chu LALPA kuomah hung inhlân ro. 17 Khaw lai hmuna khom um inla, beiphit indip kilogram hnia inthoka chol thanga siem le ur bei tlang hlûm hni chu thar hmasa tak thèn thilhlâna dingin LALPA kuomah hung inhlàn ro. 18 Bei le hin beramchal tuoi pasari, kum khata upa le hmèl hemna nei lo le bawngchal tuoi pakhat le beramchal pahnih hung inhlàn ro. Chuong thilhlânhai le bu le bal thilhlân le dawn ding thilhlânhai chu LALPA ta dinga pumraw thilhlân, LALPA ta dinga meia thilhlân rim inhnik tak chu nîng a tih. 19 Chun, suol inthawina dingin kèlchal pakhat inhlàn unla, inremna inthawina thilhlânah beramchal tuoi pahnih, kum khata upa ve ve, in inhlàn ding a nih. 20 Thiempu chun beram pahni le thar hmasa thilhlân bei tlang hlûm hni chu LALPA hmaah thèn a tih. Chuonghai chu thiempu chanpuol, LALPA ta dinga thilhlân thienghlim a nih. 21 Chu ni chun inkhawmpui thienghlim hmang in ta, sin hrim hrim in thaw ding a ni nawh. Hi hi in umna taphota in thlahai chen khoma in kumkhaw dàn ding chu a nih. 22 " 'Chun, in loa bu in sìk pha hnawm sîra mi chen chen sîk naw unla, sìk hmai bu to khom zong bok naw un la, mi retheihai le ram dang mihai ta dingin hlà lem ro. Kei hi LALPA in Pathien chu ka nih' ti rawh" tiin. 23 Chun, LALPAN Mosie kuomah, 24 "Israelhai kuomah hi hi hril rawh: Thla sarina ni khat ni chu chawl in ta, tawtawrawt mûta puongin inkhawmpui thienghlim in nei ding a nih. 25 Sin hrim hrim in thaw ding a ni nawh. LALPA ta dinga meia thilhlân in inhlàn ding a nih' tiin" a ta. 26 LALPA chun Mosie a biek a, 27 "Thla sarina ni sawm ni chu Inremna Ni a nih. Inkhawmpui thienghlim nei unla, iengkim insûm vong unla, LALPA kuomah meia thilhlân inhlàn ro. 28 Hi ni hin sin hrim hrim in thaw ding a ni nawh, Inremna Ni, LALPA in Pathien hmaa in ta dinga inremna siemna ni a ni si a. 29 Hi nia tukhom mani insûmf lo chu a chipuihaia inthoka tuithlàr nîng a tih. 30 Hi nia sin thaw hrim hrim chu a chipuihai laia inthokin sukbohmang ka tih. 31 Sin hrim hrim in thaw ding a ni nawh. Khaw lai hmuna khom um inla, hi hi kumkhuoa in zawm ding thupêk a nih. 32 Sabat chu chawlna ni a ni a, iengkimah an insûm vong ding a nih. Hi thla, ni kuo hin zân tieng nisa tlâka inthoka a zîng zân tieng nisa tlâk chen sabat hi in inser ding a nih' tiin" a ta. 33 Chun, LALPA chun Mosie a biek a, 34 " 'Israel thlahai kuomah hieng hin hril rawh: 'Thla sarina ni sawm le ni nga ni hin LALPA Bawkte Kùt chu intan a ta, ni sari sùng awng a tih. 35 A ni hmasa tak chu inkhawmpui thienghlim a na, sin hrim hrim in thaw ding a ni nawh. 36 Ni sari sùng chun LALPA kuomah meia thilhlân inhlàn unla, a ni rietna chu in ta dingin inkhawmpui thienghlim nîng a ta, meia thilhlân LALPA kuomah in inhlàn ding a nih. Inkhawmpui tumtiek ni a na, sin hrim hrim in thaw ding a ni nawh. 37 " 'Chuong chu LALPA kùt ruot bi senga meia thilhlân- pumraw thilhlân dâm, bu le bâl thilhlân dâm, inthawina le dawn ding thilhlân dâm- LALPA kuoma in hung chawina dinga inkhawmpui thienghlim in siem dinghai chu an nih. 38 Hieng thilhlânhai hi LALPA Sabat nia thilpêk dâm, thilthlawnpêk dâm, thu tiemna leia thilpêk dâm le mani nuom thua LALPA kuoma in inhlânhai bàka in thaw ding chu a nih. 39 " 'Chuongchun, thla sarina ni sawm le ni nga nia in loa thlaihai in sik zo pha leh LALPA kût chu ni sari sûng hmang in ta, a ni khatna chu chawl hadamna ni nîng a ta, a ni rietna khom chawl hadamna ni ni bok a tih. 40 A ni khat ni chun thei ra in du chi dâm, túm kâu dâm, sawlhna dâm, phahram kau dâm la khawm in ta, LALPA in Pathien hmaah ni sari sùng chu in hlim ding a nih. 41 Hi kût hi LALPA ta dingin kum tin ni sari sùng in hmang hlak ding a nih. Hi hi in thla pei dinghai chena kumkhaw dàn ding chu a nih; thla sarinaah in nei hlak ding a nih. 42 Sawlbûkah ni sari um in ta, Israel rama pieng hrim hrim chu sawlbûkah an um vong ding a nih. 43 Chuongchun, in thlahai chun Aigupta rama inthoka Israel thlahai ka thuoi suok lai khan sawlbûkah kan umtir ti hung hre thei an tih. Kei hi LALPA, in Pathien chu ka nih' ti rawh" tiin. 44 Chuong ang chun, LALPA kût hunbi ruothai chu Israel thlahai kuomah Mosien a puong tah a nih.

Leviticus 24

1 LALPAN Mosie a biek a, 2 "Khawnvar sit var a ni zing theina dingin, oliv hriek fîm tak, khawnvara insit dinga sawr ngei chu i kuoma hung chawi dingin Israel nauhai hril rawh. 3 Intuokna Puon ina Thuthlung Bawm hmaa puonzâr puoa chun LALPA hmaah khawnvarhai chu sit var a ni zing theina dingin zân tienga inthoka zîng tieng chenin Aronin enkai a tih. Hi hi thang la hung thar pei dinga khom in kumkhaw dàn chu a nih. 4 LALPA hmaa um rangkachak hlîra siem khawnvar siena le khawnvarhai chu a enkai zing ding a nih. 5 "Chun, beiphit indip tak kilogram sawmpahni la la, bei thawp sawmpahni ur la, bei pakhat siemnaah beiphit kilogram khat pei hmang rawh. 6 LALPA hmaa rangkachak dawkân chunga chun bei chu tlar hniin rem la, tlar khatah bei paruk pei intieng rawh. 7 Bei tlar hni chung ve vea chun beraw fîm tak, LALPA hmaa meia thilhlân anga bei khom chu inhlàn a nizie hrietzingna aiah sie rawh. 8 Hi bei hi chawlni zâtin Israel thlahai aiawin LALPA hmaah sie zie hlak ding a nih, chu chu kumkhaw thuthlung a nih. 9 LALPA ta dinga meia thilhlân thienghlim tak laia Aron le a naupahai chanpuol a ni leiin, hmun thienghlimah an fâk ding a nih" tiin. 10 Mi pakhat, a nu Israel mi, a pa Aigupta mi chu Israel mi pakhat leh riebûk tuolah an insuol a. 11 Israel nu naupa chun tongsie inphura Pathien hming a hrilsiet leiin ama chu Mosie kuomah an hung thuoi a. A nu hming chu Selomit a na, Dan chi-hnama mi Dibri naunu a nih. 12 LALPA thusuok an nghâk sûng po chu ripah an khum a. 13 Chun, LALPA chun Mosie kuomah, 14 "Tongsie inphurtu kha riebûk puo tieng thuoi suok ro. A hril hretu po poin a chungah kut thlâk an ta, pung khawm po poin lungin dèng raw hai se. 15 Israelhai kuomah hi thu hi hril rawh: Tu khom tongsie a Pathien inphurtu chun a maw phur a ta, 16 LALPA hming tongsie inphurtu chu sukhlum ngei ding a nih. Pungkhawmhaiin lungin dèng hlum raw se. A rama pieng amanih ram dang mi amanih tu khom Pathien hming hrilsetu taphot chu sukhlum ding a nih. 17 " 'Tu khomin mihriem hringna a lâk chun ama chu sukhlum ding a nih. 18 Mi dang ran sukhlumtu chun ran dangin a rul ding a nih, hringna chu hringnain. 19 Tu khomin a tuolbawmhai a sukhliem chun, a hliem dàn chu ieng ang khom ni sien, a thaw dàn ang chara a chunga thaw ve ding a nih: 20 ru tliek aiah ru tliek, mit aiah mit, ha aia ha. Mi a sukhliem chun ama khom sukhliem ve ding a nih. 21 Tu khom ran sukhlumtu chun ranin thung a ta, mihriem hringna latu ruok chu sukhlum ding a nih. 22 A ram mi le hnam dang mihai ta ding khomin dàn thuhmun in nei ding a nih. Kei hi LALPA in Pathien chu ka nih' tiin" a ta. 23 Chuongchun, Mosie chun Israelhai chu a biek a, tongsie inphurtu chu khawhnawmah an thuoi a, lungin an dèng hlum a. LALPAN Mosie kuoma thu a pêk ang peiin Israelhai chun an thaw a.

Leviticus 25

1 Chun, LALPA chun Sinai tlângah Mosie a biek a, 2 "Israel thlahai kuomah hieng hin hril rawh: 'Ram ka pêk ding cheu in tlung pha leh, a ram khomin LALPA chawlni chu a'n ser ve ding a nih. 3 Kum ruk sûng loah bu le thlai ching in ta, kum ruk sûng in huona grêp kunghai chu tana der thar insuotirin a ra sîk in ta, 4 a kum sarinaa ruok chu LALPA chawlni inserin ram chu a chawl ve ding a nih. In loah ieng khom chîng naw ro, in grep kunghai khom thum bok naw ro. 5 Amaa hung to bu le thlai le in enkol lo grep ra chu sîk naw ro. Ram chu kum khat a chawl ding a nih. 6 Ram chu inchawltir inla khom in siehlawhai ta ding dâm, hlawfa in sorhai ta ding dâm, hnam dang in umpuihai ta ding dâm le nangni ta dingin fâk ding chu um tho a tih. 7 In ran ruolhai le in rama sahai ta ding khomin fâk ding um tho bok a tih. " 8 "Chun, chawl kum lêt sari chu tiem in ta, kum sari hmun sari chu kum sawmli pakuo nîng a tih. 9 Chu zoa a thla sarina ni sawmna, Inremna Ni chun a ram hmun tinah mi tir unla, inring takin tawtawrawt mût raw se. 10 A kum sawmngana chu inser unla, a ram sûng po po le a mi chênghai po po kuomah zalenna puong ro. In ta dingin Jubili nîng a ta, mi tinin mani ta ngai nei nawk in ta, mi tinin mani sûngkuo in le lo hluo nawk in tih. 11 Kum sawmngana chu in ta dingin Jubili nîng a ta, in ramah ieng khom chîng naw unla, amaa to bu le bâl chu sîk naw unla, in enkol lo grèp ra chu lo bok naw ro. 12 Jubili a ni a, in ta dingin kum thienghlim a ni ding a nih; loa inthoka fâk fawm dinga in làk thar hlol chauh fa ro. 13 Jubili Kum hin mi tinin mani in le lo in chang kìr nawk vong ding a nih. 14 " 'A ram mihai kuomah ram in zor amanih in inchawk amanih a ni chun a tú tù khom insukdawng naw ro. 15 Jubili-a inthokin kum ieng zât am a ni tah ti hisapin ram chu i khuo le vênga inthokin inchaw rawh. Ram zortu che chun kum ieng zât am a tharsuok sîkna ding i la nei ti hisapin ram chu a zor ding che a nih. 16 Sîkna hun ding kum a la tam chun ram man chu sak to a ta, sîkna hun ding kum a tlawm ta chun sak hnuoi a tih, a zor tak che kha a ram ni loin a tharsuok i chang ding chu a ni lem si a. 17 Chuleiin, a tû tù khomin Pathien tiin insukdawng naw ro. Kei hi LALPA, in Pathien chu ka ni si a. 18 " 'Ka thupêkhai zui unla, ka dânhai zawm ro, chuongchun, chu rama chun muong takin khawsàng in tih. 19 Ram chun ra insuopêk a ti cheu a, hnienghnâr takin tlàn in ta, muong takin um in tih. 20 'A kum sarinaah lohma nei loa sîk ding ei nei bok naw chun ieng am fa tàng ei ta?' in ti khom a ni el thei. 21 A kum ruknaah nasa takin malsawmna hung tir ka ta, kum thum fâk khop tharsuok in tih. 22 A kum rietnaa bu in hung chìnga inthoka a kum kuonaa a ra insîk chenin bu hlui chu ring in tih. 23 " 'Kumkhuoa dingin ram chu tu kuoma khom zor naw ro; ram neitu chu keima ka ni a, nangni chu mikhuol, ka ram sântu chauh in nih. 24 In ram hluo po po chu intlan theiin in siem vong ding a nih. 25 I unaupa chu hung retheiin a ram a then lo zor sien, a laichin hnai takin a unaupa ram zor chu a hung intlan nawk ding a nih. 26 Amiruokchu, miin intlanpêktu ding a nei naw a, intlan thei dinga a hung neinung chun, 27 a zora inthoka a'n chawk nawk chen inkâra a hlutna chu sût suok a ta, a pung le chun a man chu a'n chawtu kuoma chun pe kîr a ta, a ram chu chang nawk thei a tih. 28 Intlanna ding sum a nei naw chun Jubili kum chenin nghâk a tih. Jubili kum chun ram chu pêk kîr nîng a ta, chang nawk a tih. 29 " 'Chun, kula inhuon khuoah miin a in a zor chun kum khat sûngin intlan nawk thei a tih. 30 Kum khat sûnga intlan a ni naw chun a'n chawtu le a thlahaiin nei song an ta, Jubili kuma khom pêk kîr ni ta naw nih. 31 Kula inhuon lo khuo ruok chu ram anga ngai a ni leiin a neitu bulin intlan thei a ta, Jubili kuma pêk kîr nawk tho ding a nih. 32 " 'Levi chihai chun an chanpuol khuoa inhai ruok chu ieng huna khom intlan nawk thei an tih. 33 Levi chihai in le an khuo chu Israelhai laia an chanpuol hrim a ni leiin, intlan loa um, an in le an khuo chu Jubili kumah pêk kîr ding a nih. 34 An khaw kawl vela lo hmunhai ruok chu kumkhuoa an chanpuol a ni leiin zor thei a ni nawh. 35 " 'Chun, i unau a hung rethei a, a hung inenkol thei ta naw chun, nangni laia a khawsak zing theina dingin, khuolzin amanih ram dang mi in thangpui hlak angin, ama chu somdawl ro. 36 In unau chu in kuoma a khawsak zing theina dingin, a lakah thil ieng khom a pung la naw ro; Pathien ti lem rawh. 37 A pung umin sum in inpûktir ding a ni naw a, a hlawk umin fâk ding in inpùktir ding a ni bok nawh. 38 Kei hi LALPA in Pathien, Kanan ram pe ding cheu le in Pathien ni dinga Aigupta rama inthoka thuoi suoktu cheu chu ka nih. 39 " 'Chun, i hnam chanpui a hung rethei a, a hung bèl che chun bawi angin i sor ding a ni nawh. 40 Inhlawfa ang le i kuoma mikhuol khawsa ve angin inumtir i ta, Jubili kum chen i ta dingin sin thawng a tih. 41 Chu zoah ama le a nauhai chu insuong i ta, a chipuihai lai le a pi le pu in le loa chun kîr nawk a tih. 42 Israelhai chu ka siehlaw, Aiguptaa inthoka ka hung thuoi suok an ni leiin, bawia zor thei an ni nawh. 43 An chungah rawng takin ro i rêl ding a ni nawh, Pathien i ti lem ding a nih. 44 " 'Bawinu le bawipaa in nei dinghai chu in kawl vela hnam dang mihai an nih; annia inthokin bawi inchaw thei in tih. 45 Chun, nangni laia khawsa ram dang mi le in rama pieng an sûngkuo laia mihai khom inchaw thei in ta, chuonghai chu in mi le sa nîng an tih. 46 In le lo in inrochungtir angin anni chu in thlahai kuomah inrochungtir thei in ta, an dam sûngin bawiah siem thei in ta, amiruokchu in unau Israel thlahai chunga ruok chu rawng takin ro in rêl ding a ni nawh. 47 " 'Nangni laia hung khawsa ram dang mi amanih mikhuol amanih chu a hung hausa a, i unau chu a hung pasie a, in laia chèng ram dang mi amanih, a sûngkuohai amanih kuomah i unau a'n zor a ni chun, 48 a'n zor hnung khomin intlan suok theina a nei a, a laichinhaiin intlan thei an tih. 49 A pa unauhai le an nauhaiin amanih intlan thei an tih. A hung neinung chun ama le ama intlan thei a tih. 50 A'n chawtupa leh inchawk a nia inthoka Jubili kum nawk chen ding sût suok raw se. A'n tlanna man zât ding chu inhlawfaa ruoi angin a hlaw zât ding sût suokpèk a, chu chu a thaw zât kum anga hisâp ding a nih. 51 Kum tam tak a la bâk chun a'n tlanna man chu an inchawkna man nèka tam dai a pêk ngai a tih. 52 Jubili tlung hma kum tlawmte a bâk ta chun, chu chu sût suok a, intlanna man chu pêk ding a nih. 53 Kum khat bi ang peia inhlawfaa ruoi anga thaw ding a na; a sortu chun rawng taka a soisak in phal ding a ni nawh. 54 Chuong ang zawnga intlan a ni naw khomin, Jubili kumah ama le a sûnghai chu suok an tih. 55 Israel thlahai chu ka siehlawhai an ni si a. Aigupta rama inthoka ka thuoi suok, ka siehlawhai an nih. Kei hi LALPA, in Pathien chu ka nih.

Leviticus 26

1 " 'Milem in siem ding a ni nawh. Biek ding lung milem kerin a ram sûngah in ta dingin in phun ding a ni naw a, a hmaah in kùn ding a ni bok nawh. Kei hi LALPA, in Pathien chu ka nih. 2 " 'Ka chawlni Sabat inser unla, ka hmun thienghlim inza ro. Kei hi LALPA chu ka nih. 3 Ka thusuokhai in zui a, ka thupêkhai fîmkhur taka in zawm chun, 4 a hunbi takah ruo hung insûrtir ka ta, hnuoiin thlai insuong a ta, rama thinghaiin ra insuo bok an tih. 5 In bu vuok hun le grep lo hun inpha hman a ta, grêp in lo hun le thlai chi in thlâk hun inpha hman nawk a ta, in du du hnienghnâr takin chèn in ta, in ramah him takin khawsàng in tih. 6 " 'Hi ram hi ralmuong takin siem ka ta, tu khom ti ding nei loin imu intuong in ta, ram sa tiumhai hnot zâm vong ka ta, a ramah kawlhnâm inlèng naw nih. 7 In hmèlmahai chu hnot thlùr in ta, kawlhnâmin sât hlum in tih. 8 Mi pangain za ruol hnot lêng in ta, za ruolin sîng ruol hnot lêng bok in ta, kawlhnâmin in ke bulah sât thal rem rum in tih. 9 " 'Ditsak ka ti cheu a, chi tam tak inthlàtirin sukpung ka ti cheu a, in laka ka thuthlung chu vong zing ka tih. 10 Bu thar huna khom kum hmasaa bu la nei zing in ta, a thar hlu lûtna dingin bu hlui chu thak suok in tih. 11 Nangni lai ka biekbûk innghat ka ta, lung ten nawng ka ti cheu. 12 Intlonpui ka ti cheu a, in Pathien nîng ka ta, ka mihai nîng in tih. 13 Kei hi LALPA in Pathien, Aiguptahai bawia in um zing nawna dinga Aigupta rama inthoka thuoi suoktu cheu chu ka nih. In ringkol bun ka suktliekpêk cheu a, inzaum takin ka'n lawn martir ta chêu a ni hi. 14 " 'Amiruokchu, ka thu in ngaithlâk naw a, ka thupêkhai in zawm naw a, 15 ka thuruothai in hnawl a, ka dànhai in theida a, ka thupêkhai in thaw naw a, ka thuthlung in bawsiet chun, 16 in chungah hi hi keiin thawng ka tih: thlaphangnain innang chingtir thut ka ti chêu a, ngor hri le khawsik inlêngtir ka ta, chu chun in mit sukthimin in hringna fa châu a tih. Thlai chi a thlawnin thlâk in ta, in hmèlmahaiin fa zo pei an tih. 17 Hmèl tlâi inhmutir nawng ka ti cheu a, in hmèlmahaiin hnèng an ti chêu a, a theidatuhai chèu chun in chungah ro rêl an ta, tu hnot lo khomin tlân sieng in tih. 18 " 'Hieng po po in chunga a tlung hnung khoma in mi la ngàithlàk naw rop chun, in suolna leiin a lêt sariin hrem ka ti cheu. 19 In uongthuongna le lululna chu suksieng ka ta, vân khi kapathîr angin inchangtir ka ta, hnuoi hi dâr thîr angin inchangtir bok ka tih. 20 Thá a thlawnin sêng in ta, hnuoiin thlai insuopêk naw ni cheu a, a rama thinghaiin ra insuopêk bok naw ni cheu. 21 " 'Ka thu ngaithla nuom loa ka lakah in hel zing chun, in suolna le inphuin, hremna chu a lèt sariin sukpung ka tih. 22 Ram sa kolhai hung tir ka ta, in nautehai inchu hmangpèk an ti cheu a, in ranhai fa tlaran an ta, nasa taka in kiem leiin in lampuihai chu hrawtu um loin thing bor bor a tih. 23 " 'Chuong sa khoma ka thununna chèu chu pom loa ka lakah in hel zui pei chun, 24 kei khom nangni lakah hel ka ta, in suolna leiin a lèt sariin hrem ka ti chêu. 25 Thuthlung in bawsietna phuba la dingin in chungah kawlhnâm hung tir ka ta, in khuo senga in intom khawm pha leh nangni lai hripui hung tir ka ta, hmèlma kuta pèkin um in tih. 26 Bei in lâkna lampui ka hrukpêk pha chèu chu, thuk pakhatah nuhmei sawmin rong bawl in ta, insem diet diet in ta, in chan seng in fâk zo hnung khomin la tâm zing in tih. 27 " 'Hieng sa khoma in mi la ngaithlâk naw rop a, ka lakah in hel zing chun, 28 in chungah ka lungsen tuong a ta, in suolna leiin kei ngeiin a lèt sariin hrem ka ti cheu. 29 In naupahai le naunuhai sa fâng in tih. 30 In hmun insânghai suksieng ka ta, rimtui rawna maichâm sukchim ka ta, hringna nei lo milem in biekhai chungah in mithi ruonghai chu vùm thûrin pei khawm ka ta, theida bok ka ti cheu. 31 In khawpuihai chu sukram ka ta, in hmun thienghlim chu tlu sop a ta, rim inhnik in inhlàn khomin lawmna hrim nei naw ning. 32 In ram chu suktlaran ka ta, chu taka um in hmèlmahai chun pangzat hiel an tih. 33 Hnam tin lai sukdar ka ti cheu a, ka kawlhnâm vilik ka ta, hnot thlùr ka ti cheu. In ram chu tlaran vong a ta, in khawpuihai chu tlu ram a tih. 34 In hmèlmahai rama in um sûng po chun in ram chu hluo loin tlaran a ta, hadam takin chawl tok tok a tih. 35 Hluotu nei loa a tlàkran sûng chun in hluo laia chawlni khom chawl thei loa um ram khan chawlni hmang ve tàng a tih. 36 " 'Chun, nangni laia mi la dam sunhai khom an hmèlmahai ramah thlaphâng dor dorin siem ka ta, thliin thing hna a mut lêng ri ringot khom tlânsietpui an ta, indonaa mi hnot thlûr ang elin hnottu um si loin tlân sieng an ta, inpal thlu phung an tih. 37 Hnottu um si loin anni le anni inpal thlu pheng phung an ta, in hmèlmahai lo dang dingin hràtna hrim nei naw ti niu. 38 Hnam dang mihai lai bohmang in ta, in hmèlmahai ram chun dol hmang a ti cheu. 39 A dam sun la umhai chu hmèlmahai ramah an suolna leiin ral tiel tiel an ta, an pahai suolna leiin la riral an tih. 40 " 'Sienkhom, an thlahaiin an suolna le an pahai suolna, ka lakah hela an mi'n phatsanna laka an suolna chu, la hung inpuong an tih. 41 Chuong anga an suolna lei chun kei ngei khom anni lakah ka lungril a hel a, an hmèlmahai ramah ka'n tàngtir pha hiel a nih. A tawpah, an lungril ser tan lo chu hung inphahnuoi a, an suolna leia hrem tuor an nih ti an pom pha chun, 42 Jakob kuoma ka thuthlung, Isak kuoma ka thuthlung le Abraham kuoma ka thuthlung chu hre zing ka ta, ka mihai kuoma ram pêk ka tiem khom chu sukthar nawk ka tih. 43 Chu hma chun a rama inthokin anni chu inthiel fai phot a ngai, an rausan sûnga a ram chu hadam taka a chawl theina dingin. Ka dânhai hnawla ka thuruothai an theida leiin an suol man chu a kimin an hmu phot ding a ni hrim a nih. 44 Sienkhom, an siet pha dêr khopin hmèlma ramah intângtir nawng ka ta, an kuoma ka thuthlung chu sût pha hiel khopin anni chu hnawlin theida nawng ka tih. Kei hi LALPA, an Pathien chu ka ni si a. 45 An Pathien ka ni theina dinga hnam danghai mithmua ngei Aigupta rama inthoka anni thuoi suoktu chu ka ni leiin, anni zârin an pi le puhai kuoma ka thuthlung chu hre zing ka tih. Kei hi LALPA chu ka ni si a' tiin hril rawh" a ta. 46 Chuonghai chu Sinai tlânga Mosie hmanga ama le Israel thlahai inkâra LALPAN a siem thuruothai, dânhai le thupêkhai chu an nih.

Leviticus 27

1 LALPA chun Mosie kuomah, 2 "Israelhai be la, hieng thu hi hril rawh: Tu khomin LALPA ta dinga mi pe dinga abîka intiemkamna nei a, a man hu ding a pêk chun, 3 pasal kum sawmhni le sawmruk inkâr mi man chu hmun thienghlima shekel an hmang anga hisâpin tangkaruo shekel sawmnga nîng a ta, 4 nuhmei a ni chun shekel sawmthum a ni ding a nih. 5 Kum nga le kum sawmhni inkâr mi a ni chun pasal chu shekel sawmhni nîng a ta, nuhmei chu shekel sawm nîng a tih. 6 Thla khat mi le kum nga mi inkâr a ni chun pasal man chu tangkaruo shekel nga nîng a ta, nuhmei man chu tangkaruo shekel thum nîng a tih. 7 Pasal kum sawmruk chung tieng mi a ni chun a man chu shekel sawm le panga nîng a ta, nuhmei a ni chun shekel sawm nîng a tih. 8 Thu intiemkamna neitu kha a rethei leia a man dinga tuk zât a pêk thei naw a ni chun a mihriem inhlàn ding chu thiempu kuomah fepui a ta, thiempu chun a man a pêk thei zât angin lo tuk a tih. 9 " 'An tiemkamna chu LALPA kuoma inhlàn dinga pom tlâk ran a ni chun, chuong ang ran, LALPA kuoma inhlàn dinga a pêk chu ran thienghlim a hung ni tah. 10 Chu ran chu ran thain amanih ran tha loin amanih a thlâk ding a ni nawh. Ran pakhat chu ran danga thlâk a ni khomin ran pahnihai chu ran thienghlim an ni vè vè a nih. 11 Inhlàn dinga a tiem ran chu Pathien kuoma inhlàn tlâk lo ran a ni chun thiempu kuomah a hung pêk ding a nih. 12 Thiempu chun ran chu inhlàn tlâk a ni le ni naw lo en fel a ta, aman a ti ang ang chu ni pei a tih. 13 Amiruokchu, ran chu intlan nawk ding a ni chun ran hlutna thiempu bituk hmun ngaa thea hmun khat chu pe belsain intlan thei a tih. 14 " 'Chun, miin a in LALPA ta dinga a'n hlàn chun, a in that le that naw dàn zirin thiempuin a hlutzie tuk a ta, a tuk ang ang chu a hlutna nîng a tih. 15 A petuin in chu intlan nawk a nuom chun a hlutna hmun ngaa thea hmun khat pe belsain intlan a ta, in chu a ta ni nawk a tih. 16 " 'Miin an sûngkuo ram iemani ruol LALPA ta dinga a'n hlàn chun, a lo hlutna chu bu chi an thlâk zâta inthoka sùt suok ding a nih. Barli chi kilogram sawmhni an tùna hmun hlutzie chu tangkaruo shekel sawmnga pei nîng a tih. 17 A lo chu Jubili kuma inhlàn a ni chun a tìra a hlutna an tuk chu pangngai zing a tih. 18 Jubili kum hnunga inhlàn a ni ruok chun Jubili kum nawk chena a hlutna chu thiempuin sût suok a ta, a ruot dàn angin a hlutna chu suktlawm nîng a tih. 19 Lo petuin intlan nawk a nuom chun a man hmun ngaa thea hmun khat pe belsain intlan a ta, a ta hung ni nawk a tih. 20 Lo chu intlan nuom lo a, mi dang kuoma a zor chun, intlan kîr thei ni ta naw nih. 21 Jubili kum pha khom LALPA puol dinga inhlàn tah lo thienghlim hung ni tâng a ta, thiempuhai ta ni tâng a tih. 22 " 'Miin an sûngkuo rama mi ni lo ram inchaw a, LALPA ta dinga a'n hlàn chun, 23 thiempu'n a ram hlutna chu Jubili hung tlung ding kum chena hisapin sût suok a ta, a'n hlàn ni chun a man zât dinga ruot chu ram petu chun Pathien ta dinga thilpêk thienghlimah a pêk ding a nih. 24 Jubili a tlung pha chun a'n chawkna pa kuomah ram chu pe kîr nawk a tih. 25 Thil man zât sûtnaa hmang ding chu hmun thienghlima shekel an hmang anga hisap vong ding a na, chuong ang dungzui chun shekel khat chu gera sawmhni a nih. 26 " 'Tu khomin ran pieng hmasa tak an inhlàn ding a ni nawh, ran pieng hmasa tak chu bawngchal amanih beram chal amanih khom ni sien an inhlàn ding a ni nawh, ran lutîr chu LALPA chanpuol ni ta sa, LALPA ta a ni si a. 27 Ran thienghlim lo a ni chun thiempuin a man zât LALPA ta dinga a tuk angin a neitu chun intlan a ta, a man hmun ngaa thea hmun khat pe belsa bok a tih. Intlan a ni naw chun thiempuin a man zàt a ruot anga zor ding a nih. 28 " 'Mi tu khomin LALPA ta dinga a thil nei a pêk suok tah mihriem amanih, ran amanih le sûngkuo ram amanih hrim hrim chu zor le intlan nawk ding a ni nawh, LALPA kuoma inhlàn taphot chu thil thienghlim tak a ni si a. 29 Mihriem khom ni sien, chuong anga pêk suok taphot chu intlan loa sukhlum ding a nih. 30 " 'A rama inthoka suok hrim hrim sawmapakhat po po, bu le bâl amanih thing ra amanih khom LALPA chanpuol a na, LALPA ta dinga thil thienghlim a nih. 31 Tu khomin a sawmapakhat a'n tlan chun hmun ngaa thea hmun khat hù a bel sa ding a nih. 32 Bawng ruol le beram ruol laia mi, berampu hmol hnuoia um sawma pakhat pei chu LALPA ta dinga ran thienghlim a nih. 33 A sie a tha thlier ding a ni naw a, thlàkthlèng ding a ni bok nawh. A thlèng lui a ni khomin a ran thlèng le a aiawtu kha an thienghlim ta vè vè leiin intlan thei a ni ta nawh' ti rawh" a ta. 34 Hieng thupêkhai hi Sinai tlânga Mosie kuoma Israelhai ta dinga LALPA pêk a nih.

Numbers 1

1 Aigupta rama inthoka Israelhai an suok hnung a kum hnina le thla hnina ni hmasa taka chun Sinai Thlalera Intuokna Puon ina chun LALPAN Mosie a biek a. 2 "Israelhai po po chu an chi hnam, an sûngkuo le an hming indot dàn ang peiin tiem rawh. 3 Israel mi po po, kum sawmhnia inthoka a chung tieng, sipaia thang thei pasal po chu nang le Aronin a pawl pawlin tiem vong ro. 4 Pahnam tina sûngkuo lukhàitu peiin an thangpui ding che a nih. 5 A thangpuituhai ding che hming chu: Reuben hnama inthokin Sedeur naupa Elizur; 6 Simeon hnama inthokin Zurishadai naupa Selumiel; 7 Juda hnama inthokin Aminadab naupa Nashon; 8 Isakar hnama inthoin Zuar naupa Nethanel; 9 Zebulun hnama inthokin Helon naupa Eliab; 10 Josefa thla, Efraim hnama inthokin Amihud naupa Elisama le Manase hnama inthokin Pedazur naupa Gamaliel; 11 Benjamin hnama inthokin Giddeoni naupa Abidan; 12 Dan hnama inthokin Amisadai naupa Ahiezer; 13 Aser hnama inthokin Okran naupa Pagiel; 14 Gad hnama inthokin Deuel naupa Eliasaf; 15 Naftali hnama inthokin Enan naupa Ahira nîng an tih. 16 Hienghai hi mipuihai laia inthoka thlang, an pi le puhai hnam thuoituhai, Israel pahnam tina an lukhàituhai chu an nih. 17 Hieng an hming hril tahai hi Mosie le Aron chun an thuoi a, 18 a thla hnina ni khat ni chun mipui an ko khawm vong a, a pahnam hnamin, a sûngkuo kuoin, an hming indot dàn ang peiin kum sawmhnia inthoka a chung tieng po hming chu an ziek lût a, 19 LALPAN Mosie kuoma thu a pêk angin Sinai thlalera chun an tiem vong a. 20 Israel nau lutir Reuben thlaa inthoka pasal kum sawmhni le a chung tieng, râldo thei chin chu an pahnam le sûngkuo rikawta an inchik dàn angin, an hming indot ang peiin an ziek lût a, 21 Reuben hnama mi chu sîngli le sângruk le zanga an nih. 22 Simeon thlaa inthoka pasal kum sawmhni le a chung tieng, râldo thei chin hai chu an pahnam le sûngkuo rikawta an inchik dàn angin, an hming indot peiin an ziek lût a, 23 Simeon hnama mi po chu sîngnga le sângkuo le zathum an nih. 24 Gad thlaa inthoka pasal kum sawmhni le a chung tieng, râldo thei chin hai chu an pahnam le sûngkuo rikawta an inchik dàn angin, an hming indot peiin an ziek lût a, 25 Gad hnama mi po chu sîngli le sângnga le zaruk le sawmnga an nih. 26 Juda thlaa inthoka pasal kum sawmhni le a chung tieng, râldo thei chin hai chu an pahnam le sûngkuo rikawta an inchik dàn angin, an hming indot peiin an ziek lût a, 27 Juda hnama mi po chu sîngsari le sângli le zaruk an nih. 28 Isakar thlaa inthoka pasal kum sawmhni le a chung tieng, râldo thei chin hai chu an pahnam le sûngkuo rikawta an inchik dàn angin, an hming indot peiin an ziek lût a, 29 Isakar hnama mi po chu sîngnga le sângli le zali an nih. 30 Zebulun thlaa inthoka pasal kum sawmhni le a chung tieng, râldo thei chin hai chu an pahnam le sûngkuo rikawta an inchik dàn angin, an hming indot peiin an ziek lût a, 31 Zebulun hnama mi po chu sîngnga le sângsari le zali an nih. 32 Josefa nauhaia inthokin: Efraim thlaa inthoka pasal kum sawmhni le a chung tieng, râldo thei chin hai chu an pahnam le sûngkuo rikawta an inchik dàn angin, an hming indot peiin an ziek lût a, 33 Efraim hnama mi po chu sîngli le zanga an nih. 34 Manase thlaa inthoka pasal kum sawmhni le a chung tieng, râldo thei chin hai chu an pahnam le sûngkuo rikawta an inchik dàn angin, an hming indot peiin an ziek lût a, 35 Manase hnama mi po chu sîngthum le sânghni le zahnih an nih. 36 Benjamin thlaa inthoka pasal kum sawmhni le a chung tieng, râldo thei chin hai chu an pahnam le sûngkuo rikawta an inchik dàn angin, an hming indot peiin an ziek lût a, 37 Benjamin hnama mi po chu sîngthum le sângnga le zali an nih. 38 Dan thlaa inthoka pasal kum sawmhni le a chung tieng, râldo thei chin hai chu an pahnam le sûngkuo rikawta an inchik dàn angin, an hming indot peiin an ziek lût a, 39 Dan hnama mi po chu sîngruk le sânghni le zasarih an nih. 40 Aser thlaa inthoka pasal kum sawmhni le a chung tieng, râldo thei chin hai chu an pahnam le sûngkuo rikawta an inchik dàn angin, an hming indot peiin an ziek lût a, 41 Aser hnama mi po chu sîngli le sângkhat le zanga an nih. 42 Naftali thlaa inthoka pasal kum sawmhni le a chung tieng, râldo thei chin hai chu an pahnam le sûngkuo rikawta an inchik dàn angin, an hming indot peiin an ziek lût a, 43 Naftali hnama mi po chu sîngnga le sângthum le zali an nih. 44 Chuonghai po chu an nih Mosie le Aron le Israel thlahai pahnam tin thuoitu lu sawmpahnihaiin an tiem chu. 45 Israel thla sûngkuo tina mi, râldo thei pasal, kum sawmhni le a chung tieng, Israel sipaia thang thei po chu an tiem vong a, 46 an rêngin nuoiruk le sângthum le zanga le sawmnga an nih. 47 Levi hnama sûngkuohai ruok chu tiem sa an ni ve nawh. 48 LALPAN Mosie kuomah, 49 "Levi hnam chu Israel pahnamhai lai tiem sa ve naw rawh. 50 Levi chihai chu Thuthlung biekbûk le a sûnga hmangruo le thil um po po enkoltu dingin ruot tawl lem rawh. Biekbûk le a hmangruo po po zawn hlak an ta, enkol an ta, biekbûk chu um nghâng an tih. 51 An inson ding zàtin biekbûk chu Levihai chun thiek an ta, an zar nawk ding pha leh Levihai bokin zar nawk an ta, mi dang hung inrol taphot chu sukhlum nîng an tih. 52 Chun, Israel thlahai chun mani hnam puonzâr inkhaina hmun sengah, an tam dàn ang peiin, a pawl pawlin puon in kei an tih. 53 Israelhai chungah lungsenna a tlâk nawna dingin Levihai chun Thuthlungna biekbûk huol velin puon in kei an ta, an vêng ding a nih" tiin a lo hril ta si a. 54 Israelhai chun LALPAN Mosie kuoma a hril ang tak chun an thaw a.

Numbers 2

1 LALPAN Mosie le Aron chu a biek a: 2 "Israel thlahai chun Intuokna Puon ina inthoka iemani chena hlaah mani sûngkuo inchikna puonzâr seng târin, an pawl thaw dàn ang sengin puon in an kei ding a nih. 3 "Sak tieng, nisa suokna tieng chun Juda pawlin an pahnam inchikna seng târin puon in kei an ta, an thuoitu chu Aminadab naupa Nason nîng a ta 4 an tam zât chu sîngsari le sângli le zaruk a nih. 5 Anni dotah Isakar pahnamin puon in kei an ta, an thuoitu chu Zuar naupa Nethanel nîng a ta, 6 an tam zât chu sîngnga le sângli le zali a nih. 7 A dotah Zebulun pahnam nîng an ta, an thuoitu chu Helon naupa Eliab nîng a ta, 8 an tam zât chu sîngnga le sângsari le zali a nih. 9 Juda pahnam inrawina hnuoia um po chu, pawl the dàn dungzuiin, nuoikhat le sîngriet le sângruk le zali an nih. Anni hin hma thuoi an tih. 10 "Sim tieng pangah mani pahnam inchikna seng târin Reuben pawlhai chu um an ta, an thuoitu chu Sedeur naupa Elizur nîng a ta, 11 an tam zât chu sîngli le sângruk le zanga a nih. 12 A dotah Simeon pahnam um an ta, an thuoitu chu Zurisadai naupa Selumiel nîng a ta, 13 an tam zât chu sîngnga le sângkuo le zathum a nih. 14 Anni dotah Gad pahnam um an ta, an thuoitu chu Deuel naupa Eliasaf nîng a ta, 15 an tam zât chu sîngli le sângnga le zaruk le sawmnga a nih. 16 Reuben pahnam inrawina hnuoia um po chu an pawl thè dàn dungzuiin, nuoi khat le sîngnga le sângkhat le zali le sawmnga an nih. Anni po hi pawl hninaa suok ding an nih. 17 "Chu zoah Intuokna Puon in le Levi pawlhai chu a laiah thangin suok an ta, riebûka an inkul dàn indot ang peiin, mani pawl seng inchikna puonzâr khaiin, suok an tih. 18 "Thlang tieng panga chun mani pahnam inchikna seng târin Efraim pawlhai chu um an ta, an thuoitu chu Amihud naupa Elisama nîng a ta, 19 an tam zât chu sîngli le zanga a nih. 20 Anni dotah Manase pahnam um an ta, an thuoitu chu Pedazur naupa Gamaliel nîng a ta, 21 an tam zât chu sîngthum le sânghni le zahni a nih. 22 A dotah Benjamin pahnam um an ta, an thuoitu chu Gideoni naupa Abidan nîng a ta, 23 an tam zât chu singthum le sângnga le zali a nih. 24 Efraim pahnam inrawina hnuoia um po chu, an pawl the dàn dungzuiin, nuoikhat le sângriet le zakhat an nih. Anni pawl thumnaa suok dinghai chu an nih. 25 "Hmar tieng panga chun Dan pawla mihai anni inchikna seng târin um an tih. Dan pawl thuoitu chu Amisadai naupa Ahiezer nîng a ta, 26 an tam zât chu sîngruk le sânghni le zasari a nih. 27 A dotah Aser pahnam um an ta, an thuoitu chu Okran naupa Pagiel nîng a ta, 28 an tam zât chu sîngli le sângkhat le zanga a nih. 29 Anni dotah Naftali pahnam um an ta, an thuoitu chu Enan naupa Ahira nîng a ta, 30 an tam zât chu sîngnga le sângthum le zali a nih. 31 Dan pahnam inrawina hnuoia um po chu, an pawl the dàn dungzuiin, nuoi khat le sîngnga le sângsari le zaruk a nih. Anni hi mani pahnam puonzâr seng khaia a nuhnung taka suok ding an nih. " 32 Riebûka um Israel thlahai, pahnam tina mi an tiem zât chu nuoi ruk le sângthum le zanga le sawmnga a nih. 33 LALPAN Mosie thu a pêk ang khan, Levi chia mihai chu Israel thlahai laia tiem sa an ni ve nawh. 34 Chuong ang chun Israel thlahai chun an thaw a, LALPAN Mosie thu a pêk ang peiin, mani pawl inchikna puonzâr târna sengah pawl tinin puon in an kei a, chuong ang chun a chî chiin, a sûngkuo kuoin an intawl suok hlak a nih.

Numbers 3

1 Sinai tlânga LALPAN Mosie a biek laia Aron le Mosie sûngkuo chanchin chu hieng ang hi a nih: 2 Aron naupahai hming chu an upat dàn indotin Nadab, Abihu, Eleazar le Ithamar an nih. 3 Chuonghai chu thiempu sin thaw dinga hriek nâla ser hran an nih. 4 Amiruokchu, Nadab le Abihu hai chun Sinai tlângah mei thieng lo hmangin LALPA hmaah rimtui an inhlàn leiin, chi thla nei hman loin LALPA hmaah sukhlumin an um a, Eleazar le Ithamar chauin an pa Aron dam laiin thiempu sin an thaw a nih. 5 Chun, LALPA chun Mosie kuomah, 6 "Levi thlahai chu thiempu Aron kuomah thuoi la, a rong an bawl theina dingin a kuomah inumtir rawh. 7 Anni chun biekbûkah rong bawlin, Intuokna Puon ina chun thiempu le mipuihai rong chu bawl raw hai se. 8 Intuokna Puon ina hmangruo po po enkol an ta, Israel mihai an hung pha anni puola biekbûka rongbawl sin chu thawng an tih. 9 Levi chihai chu Israelhai laia Aron le a naupahai sor ding lieu lieua ka pêk suok an nih. 10 Aron le a naupahai chauh thiempu sin thaw dingin ruot rawh; mi dang tukhom hmun thienghlim hung hnai chu sukhlum nîng an tih" tiin. 11 Chun, LALPAN Mosie a biek a, 12 "Levihai hi Israel thlahai laia nuhmei sul keu hmasa takhai aia keima ngeiin ka ta dinga ka làk an nih. Levihai chu ka chanpuol an nih. 13 Nau lutîr po po ka chan an nih. Aigupta rama nau lutîr po po ka sukhlum ni khan Israelhai laia nau lutîr po po chu, a mihriem le a ranin, ka puol dingin ka hla a, anni chu ka ta ding an nih. Kei hi LALPA chu ka nih" tiin. 14 Chun, LALPAN Sinai thlalerah Mosie a biek a, 15 "Levi thlahai chu an sûngkuo kuo le an chi-hnam hnamin tiem rawh. Pasal taphot chu thla khata inthoka a chung tieng po tiem vong rawh" a ta. 16 Chuongchun, LALPAN thu a pêk angin Mosie chun a tiem tawl a. 17 Levi naupahai hming chu Gerson, Kohat le Merari a nih. 18 Gerson thlahai hming chu Libni le Simei a nih. 19 Kohat thlahai hming chu Amram, Izar, Hebron le Uziel a nih. 20 Merari thlahai hming chu Mahli le Mushi a nih. Chuonghai chu an sûngkuo inchik dàn ang peia Levi thlahai chu an nih. 21 Gerson chu Libnihai le Simeihai thlatu a na, hienghai hi a thlahai chu an nih. 22 Thla khata inthoka a chung tieng pasal an tiem po zât chu sângsari le zanga a nih. 23 Gerson thlahai chun biekbûk thlang tieng puon in an kei ding a nih. 24 Gerson thlahai inrawitu chu Lael naupa Eliasaf a nih. 25 Gerson nauhaiin Intuokna Puon ina an enkol ding chu biekbûk le puon in nîng a ta, a chung dâm, intuokna puon in kota puonzâr dâm, 26 biekbûk tuol zawla puonzâr dâm, biekbûk huoltu tuol zawl hang lûtna dinga puonzâr dâm, maichâm vela mi puonzâr dâm, chu taka hmang ding hruihruol po po le chun enkol an tih. 27 Kohat thlahai chu Amramit hnamhai, Izharit hnamhai, Hebron hnamhai le Uziel hnamhai an nih. 28 Thla khata upa china inthoka a chung tieng pasal po po chu sângriet le zaruka an nih. Kohat thlahai chu hmun thienghlim enkoltu ding an nih. 29 Anni chun biekbûk sim tieng pangah puon in kei an tih. 30 Kohat thlahai inrawitu chu Uziel naupa Elizafan a nih. 31 Anni enkol ding chu Thuthlung Bawm hai, dawkàn hai, khawnvar siena hai, maichâm hai, hmun thienghlima rongbawlna bûr le bêl po po hai, puonzâr hai le rongbawlnaa hmang chi thil hrim hrim hai chu an nih. 32 Levihai hotu lu tak chu thiempu Aron naupa Eleazar a nih. Ama chu hmun thienghlim enkoltuhai po po inrawitu dinga ruot a nih. 33 Merari thlahai le Merari hnam thla sawngtuhai chu Mahli hnam le Mushi hnam hai an nih. 34 Thla khata upa china inthoka a chung tieng pasal po po chu sângruk le zahni an nih. 35 Merari thlahai inrawitu chu Abihail naupa Zuriel a nih. Biekbûk hmar tieng pangah puon in kei an tih. 36 Merari thlahai enkol dinga ruot chu biekbûk ban rem khawm dâm, a bangruhai dâm, a banhai dâm, a ban thut ker kuokhai dâm, chuong thilhai le inzom hmangruo po pohai dâm, 37 a tuol kot inhuonna banhai dâm, ban thut ker kuokhai dâm, a kil dena le a hrui hai dâm a nih. 38 Biekbûk sak tieng intuokna puon in hmai, ni suokna tieng panga chun Mosie le Aron le an nauhaiin puon in kei an tih. Israelhai aiawa hmun thienghlim enkol chu an mawphurna a nih. Mi dang tukhomin biekbûk a va hnai chun sukhlum nîng a tih" tiin. 39 LALPA thupêka Mosie le Aronin Levi thlahai, an pahnam ang peia an tiemhai chu, thla khata upa chin le a chung tieng pasal po po chu sînghni le sânghni an nih. 40 Chun, LALPAN Mosie kuomah, "Israelhai laia nau pasal pieng hmasa tak po po, thla khata upa china inthoka a chung tieng po tiem vong la, an hming inchik rawh. 41 Israel thla nau lutîr po po aiah Levihai chu ka chanpuol an nih; Israelhai ran lutîr po po aiah Levihai ran chu ka chanpuol bok an nih. Kei hi LALPA chu ka nih" a ta. 42 Mosie chun LALPA thupêk angin Israelhai laia pasal nau lutîr po po chu a tiem a. 43 An hming indot ang peia thla khata upa china inthoka a chung tieng pasal nau lutîr po po chu sînghni le sânghni le zahni le sawmsari le pathum an nih. 44 Chun, LALPAN Mosie kuomah, 45 "Israelhai laia pasal nau lutîr po po aiah Levihai chu la la, an ran lutîr aiah Levihai ran la bok rawh; Levihai chu ka ta ding an ni si a. Kei hi LALPA chu ka nih. 46 Chun, Levihai nèkin Israelhai nau lutîrhai chu zahni le sawmsari le pathuma an tam lem leiin, a chuong po chu suma intlan ding a na, 47 mi pakhat peiah hmun thienghlima an shekel hmang ang shekel nga pei i lâk ding a nih; shekel khat chu gera sawmhni a nih. 48 Chuonghai intlanna sum chu la la, Aron le a nauhai kuomah pe rawh" a ta. 49 Chuongchun, Mosie chun Levihaiin an intlan bàk a chuong la um po intlanna sum chu a lâk khawm a; 50 Israel thla nau lutîr poa inthok chun hmun thienghlima shekel an hmang ang shekel sângkhat le zathum le sawmruk le panga a lâk khawm a. 51 LALPAN thu a pêk angin Mosie chun tlanna sum chu Aron le a naupahai a pêk a.

Numbers 4

1 LALPA chun Mosie le Aron a biek a, 2 "Levi nau pasalhai laia mi Kohat thlahai le an sûngkuohai chu tiem ro. 3 Intuokna Puon ina rongbawla thang tlâk pasal kum sawmthum le sawmnga inkàr mi po po chu tiem vong ro. 4 "Kohat thlahai sin tak chu Intuokna Puon in, hmun thienghlimtaka thilhai enkol a nih. 5 Riebûk an inson ding pha Aron le a naupahai chu Intuokna Puon inah lût an ta, hmun thienghlim puonzâr chu hlîp thlâng an ta, chu chun Thuthlung Bawm chu inkhum an ta, 6 chu chunga chun tui bawng vunin inkhum an ta, chu chunga chun puon dumpawlin inkhum nawk an ta, a zawnfung inbûk an tih. 7 "Chun, hlanbei siena dawkàn chunga chun puon dumpawl phàng an ta, chu chunga chun thlênghai, haihawhai, berbuhai, dawn thilhlân bun suokna no tung ring rêk le ieng lai khoma sie zing hlak hlànbei chu sieng an ta. 8 Chu chunga chun puon senlârin inkhum an ta, chu chu tui bawng vunin inkhum nawk an ta, a zawnfung inbûk an tih. 9 "Chun, khawnvar siena le a khawnvarhai, a phità chep ruolna chaichehai, a váp siena thlênghai le khawnvar tuia hmang oliv hriek siena bûr po po chu puon dumpawlin inkhum an tih. 10 Chuonghai le a bebawm hmangruo danghai chu tui bawng vunin tuom an ta, a zawnna chunga chun an sie ding a nih. 11 "Rangkachak maichâm chu puon dumpawlin inkhum an ta, chu chunga chun tui bawng vunin inkhum nawk an ta, a zawnfung inbûk an tih. 12 "Hmun thienghlima hmang rongbawlna hmangruo po po chu lâng an ta, puon dumpawlin fùn an ta, tui bawng vunin tuom nawk an ta, a zawnna chunga chun sieng an tih. 13 "Dâr maichâma vut po po an inthiel fai zoah puon sendukin inkhum an ta, 14 chu zoah maichâm rongbawlnaa an hmang bûr le bêl po po, mei làkna berbu dâm, sa thurna thirkut dâm, vutluo dâm le maihùn dâm thangsain, maichâm chunga chun sieng an ta, a chunga chun tui bawng vunin inkhum an ta, a zawnfung inbûk an tih. 15 "Aron le a naupahaiin hmangruo thienghlimhai le thil thienghlimhai po po an inkhum vong hnungin, an riebûk an inson ding pha, Kohat nauhai chun zawn dingin an hung inthok ding a nih. Thil thienghlim ruok chu an tawk ding a ni nawh, an tawk chun thîng an tih. Intuokna Puon ina thil um po po zawn chu Kohat thlahai chanpuol ding a nih. 16 "Thiempu Aron naupa Eleazar thaw ding chu khawnvara sit ding oliv hriek dâm, rim inhnik dâm, bu le bâl thilhlâna hmang ding hmangruo dâm le hriek nâl ding dâm ngaituo a nih. Biekbûk le a sûnga um po po, a cheina le hmangruohai po po enkol chu a mawphurna nîng a tih" tiin. 17 Chun, LALPA chun Mosie le Aron kuomah, 18 "Kohathai hi Levi thlaa inthoka thè thlâk an ni nawna dingin fimkhur ro. 19 Thil thienghlim tak hung hnaia an thi pha nawna dingin hieng ang hin thawpêk ro: Aron le a naupahai chu biekbûkah lûtin mi tin sin thaw ding le chanpuol ding seng chu ruotpêk raw hai se. 20 Amiruokchu, Kohathai chu a sûngah lûtin thil thienghlimhai an en vel ding a ni nawh, sawt naw te khom an lût chun thîng an tih" tiin. 21 LALPAN Mosie a biek a, 22 "Gerson thlahai le sûngkuohai khom tiem rawh. 23 Intuokna Puon ina rongbawla thang thei pasal kum sawmthum le sawmnga inkâr mihai chu tiem vong rawh. 24 Gerson thlahai sin puol chu thil phur a nih. 25 Biekbûk puonzârhai, intuokna puon inhai, a'n khumna hai, a chung inkhumna tui bawng vunhai, Intuokna Puon in kotkhâra puonzâr hai, 26 tuol inhuonna kotkhâra puonzâr hai, biekbûk le maichâm bula puonzâr hai, a hruihai le hmangruo dang po po chu phur an ta, thaw ding tùl taphot chu thawng an tih. 27 Thil phur amanih le thil dang Gerson thlahaiin an thaw hrim hrim chu Aron le a nau pasalhai inrawina hnuoiah thawng an ta, an sin ding neu neu chen ruotpêk dingin thu i'n neitir ding a nih. 28 Chuong chu Intuokna puon ina Gerson thlahai thaw ding chu a nih; an thaw ding chu thiempu Aron naupa Ithamarin rêlpêk a tih. 29 "Merari thlahai le sûngkuohai khom tiem rawh. 30 Intuokna Puon ina rongbawla thang thei pasal kum sawmthum le sawmnga inkâr mihai chu tiem vong rawh. 31 Intuokna Puon ina an sin ding le chanpuol ding chu thil phur, biekbûk ban rem khawm hai, a bangru hai, a ban hai, a ban thut ker kuok hai, 32 a tuol inhuonna vela ban hai, a ban thut ker kuok hai, a kildena hai, a hruihruol hai le a hmangruo dang po po phur chu a nih. An phur ding seng i ruotpêk thlap ding a nih. 33 Hi hi Merari thlahaiin thiempu Aron naupa Ithamar inrawina hnuoia Intuokna puon ina rong an bawl dàn ding le an sin ding chu a nih. 34 Mosie le Aron le khawtlâng hotuhai chun Kohat chi le kuong le sûngkuohai chu an tiem a. 35 Intuokna Puon ina sin thaw tlàk, pasal kum sawmthum le sawmnga inkâr an tiem po po hming chu an ziek thlâk a, 36 an ziek lûthai po chu sânghni le zasari le sawmnga an nih. 37 Chuonghai chu Kohat thlahai, Intuokna Puon ina sinthaw, LALPAN Mosie thu a pêk anga Mosie le Aronin an tiem po zât chu a nih. 38 Gerson thlahai, Intuokna Puon ina sin thaw dinghai khom chu an chi le kuong le sûngkuo ang peiin an tiem a. 39 Pasal kum sawmthum le sawmnga inkâr po an tiem a, 40 an chi le kuong le sûngkuo ang peia an tiem po chu sânghni le zaruk le sawmthum an nih. 41 Chuonghai chu Gerson thlahai, Intuokna Puon ina sinthaw, LALPAN Mosie thu a pêk anga Mosie le Aronin an tiem po zât chu an nih. 42 Merari thlahai, Intuokna Puon ina sin thaw dinghai khom chu an chi le kuong le sûngkuo ang peiin an tiem a. 43 Pasal kum sawmthum le sawmnga inkâr po an tiem a, 44 an chi le kuong le sûngkuo ang peia an tiemhai chu sângthum le zahnih an nih. 45 Chuonghai chu Merari thlahai, Intuokna Puon ina sinthaw, LALPAN Mosie thu a pêk anga Mosie le Aronin an tiem po zât chu an nih. 46 Chuong ang chun Mosie le Aron le Israelhai hotuhai chun Levi thlahai chu an chi le kuong le sûngkuo kuoin an tiem vong a. 47 Intuokna Puon ina sin thaw ding le puon in phurtu dinga hung pasal kum sawmthum le sawmnga inkâra upa an tiem po chu, 48 mi sângriet le zanga le sawmriet an nih. 49 Mosie hmanga LALPA thupêk angin, mi tin sin thaw ding le phur ding chu ruotpêk a na, LALPAN Mosie kuoma thu a pêk anga tiem vong an ni bok.

Numbers 5

1 Chun, LALPAN Mosie kuomah, 2 "Inkai thei vun hri nei amanih, taksaa inthoka thil pût nei hrim hrim amanih, mithi ruong tawk leia insukporche po po chu riebûka inthoka tir suok vong dingin Israelhai chu thu pe rawh. 3 Anni laia ka chèngna hmun chu an sukporche nawna dingin, a nuhmei a pasalin dai puo tieng i tir hmang vong ding a nih" a ta. 4 Mosie kuoma LALPAN thu a pêk ang tak chun Israelhai chun an thaw a, riebûk puo tieng chun an tir hmang ta vong a. 5 LALPA chun Mosie a biek a, 6 "Israelhai kuomah hieng ang hin hril rawh: LALPA thu bawsein, pasal amanih nuhmei amanih tu khomin mi chungah thil poi a thaw chun thiem naw chang a ta, 7 suol a thaw lei chun thupha chawi a ta, a suol thaw man chu a kimin rul a ta, a suol thawna tuortu chu hmun ngaa thea hmun khat pe belsàng a tih. 8 Amiruokchu, suol man intêltu ding chu a thi a, sûngkuo inhnaipui a nei si naw chun, suol rulna man chu thiempu chanpuola dingin LALPA kuoma pêk ding a nih. Hi hi inremna dinga suol thawinaa beram chal inhlàn bâka pèk ding a nih. 9 Israel thlahaiin chuong ang thilthlawnpêk thienghlim thiempu kuoma an hung chawi taphot chu thiempu chan nîng a tih. 10 Thiempu tinin thilhlân an dong seng chu an chan nîng a tih" a ta. 11 LALPA chun Mosie a biek a, 12 "Israelhai kuomah hieng ang hin hril rawh: nuhmei tu khom a pasal lakah ringum loin a um a, 13 mi dangin an zâlpui ti a pasal lakah a thup a, a chetsuol lai chie hmutu an um naw a, a uiret laia man a ni bok naw a, 14 sienkhom a pasal chu thîkna lungrilin a sip a, a nuhmei chu a ringhlel a, a nuhmei chu a lo chesuol bok si amanih, an naw leh chesuol naw sienla khom a pasal chun thîkthu siet leia a ringhlel tlat si chun, 15 a nuhmei aiawin thìk thilhlàna ding barli beiphit kilogram khat chawiin a nuhmei chu thiempu kuomah thuoi a tih. Beiphita chun hriek a buok ding a ni naw a, rim inhnik a pol sa ding a ni bok nawh; chu chu nuhmei ringhlel umhai leia thilhlân, hriet zingna thilhlân, thiem nawna man suokna dinga thilhlân a ni si a. 16 "Thiempu chun nuhmei chu hung thuoi a ta, LALPA hmaah inngìrtir a ta; 17 pil bêlin tui thienghlim chawi a ta, tuia chun biekbûk tuonga pilvut chu hamin phul a tih. 18 Thiempuin nuhmei chu LALPA hmaah inngìrtir a ta, a samtom insûttirin a sam chu a thlaiin put a ta, a kuta chun fiena beiphit, thîk thawina thilhlân chu inchawitir a ta, ama chun tui sie, tongsie inphurtirna tui chu chawi a tih. 19 Thiempu chun nuhmei chu inkhâmtirin a kuomah, "Tu khomin an zàlpui naw che a, i pasal thu hnuoia i um sûngin tirdakum tieng i pèt hmang naw chun tongsie phurtu tui siea inthok hin fihlim i tih. 20 Amiruokchu, i pasal thu hnuoia i um laiin i pêt hmang a, i pasal ni lo mi dang zàlpuia i lo insukporche a ni chun, 21 LALPAN i malpui inkârb inhmontirin i phing inpuomtir sien, i mihai inhnawltirin an tongsie inphurtir rawh se che. 22 Hi tui sie, tongsie phur hi i rilah lûtin i phing sukpuom sien, i malpui inkâr sukhmon raw se" tîng a ta, nuhmei chun "Amen, Amen" a ti ding a nih. 23 "Thiempu chun tongsiehai chu savun lekhaziela chun ziek thlâng a ta, tui siea chun intleu fai a ta, 24 nuhmei chu tongsie inphurna tui sie chu indawntir a ta, tongsie intluntu tui chu a phìngah lût a ta, nasa takin a phìng suknâng a tih. 25 Thiempu chun thîk thilhlân beiphit chu nuhmei kuta inthok chun lâng a ta, LALPA hmaah beiphit thilhlân chu thèn a ta, maichâma chun fepui a tih. 26 Thiempu chun hrietzingna thilhlân beiphit chu vei khat lâng a ta, maichâma chun rawng a ta, chu zoah nuhmei chu tui sie indawntir a tih. 27 Tui a'n dawntir zo chun, nuhmei chu insukporchea a pasal lakah a lo uire a ni chun, tongsie intluntu tui sie chu a sûngah lût a ta, nasa takin a phìng hung nâng a ta, a phing chu hung invûng a ta, a malpui inkâr chu hung hmon thla vong a ta, a chipuihai tongsie phurtu hung nîng a tih. 28 Amiruokchu, nuhmei chu a porche naw chun thiem nawna laka chun fihlim a ta, nau la nei thei pei a tih. 29 "Hi hi nuhmei tu khom a pèt hmang a, a pasal lakah a'n sukporche phaa inthîkna chungchànga dàn chu a nih. 30 Pasalin thikthusiet lei hrim hrima mi dang laka a nuhmei a ringhlel a ni chun a nuhmei chu Pathien hmaah thuoi sien la, thiempu chun hieng dânhai ang hin a chungah thil a lo thaw ding a nih. 31 Chuong anga a thaw chun, pasal chu thiem naw chang theina laka chun fihlim a ta, nuhmei chun a suol maw chu phur a tih" tiin.

Numbers 6

1 LALPA chun Mosie kuomah, 2 "Israelhai kuomah hieng ang hin hril rawh: 'Tu khom pasal amanih nuhmei amanih intiemkamna bîk nei, LALPA ta dinga inser hrang dinga Nazarc thutiem nei lai chun inrui thei uoiin le zu dang hrim hrim a nghei ding a nih; 3 uoiin amanih thil danga inthoka siem zu thur hrim hrim amani le grêp ra tui khom a dawn ding a ni naw a, grêp ra tharlâm amanih le grêp ra inhro tawl amanih khom a fâk ding a ni nawh. 4 Nazarin thutiem neia a'n ser hrang lai chun grêp huona mi hrim hrim, a mu le a hawng takngiel khom a fâk ding a ni nawh. 5 " 'Thu tiema a'n ser hrang sùng chun a luah hmul vawna hrim hrim a hmang ding a ni nawh. LALPA ta dinga a'n ser hrang sùng hun a kim hma chun insie hrang a ta, a sam a hlà ding a nih. 6 LALPA ta dinga a'n ser hran sùng po chun mithi ruong a hnai ding a ni nawh. 7 A nu le pa le a unauhai le farnuhai thi khomin a'n sukporche ding a ni nawh, Pathien ta dinga a'n ser hrangna chun a phuor leiin. 8 A'n ser hran sùng po chun LALPA ta dinga ser thienghlim a nih. 9 " 'A bula mi an thi pal thut a, a'n ser hrangna a lu a sukporche chun, an thien ni, a nisarinaa chun a lu chu a vaw ding a nih. 10 A ni rietnaa chun Intuokna Puon in kotah vàthu amanih pàrva tuoi amanih tuok khat thiempu kuomah a hung chawi ding a nih. 11 Pakhat chu suol thawina dingin thiempu chun inhlàn a ta, pakhat chu mithi ruong leia suol a thawna laka inremna siempêk dingin pumraw thilhlânah inhlàn a tih. Chu ni ngei chun a lu chu a'n hlàn thienghlim ding a nih. 12 Thiem naw inthawina dingin beram chal tuoi, kum khat mi hung chawiin a'n ser hrangna chu LALPA kuomah thaw tha nawk a ta, a hmaa a'n ser hranna kha sukporche a ni tàk leiin tiem sa ve ni ta naw nih. 13 " 'A'n ser hrangna ni a kim phaa Nazar mi chunga thaw dàn ding chu hieng hi a nih: Intuokna Puon in kotah thuoi ding a nih. 14 LALPA ta dingin beramchal kum khat mi soisel bo chu pumraw thilhlânah, beram la tuoi kum khat mi soisel bo chu suol thawina thilhlânah, beramchal soisel bo pakhat chu inremna inthawina thilhlânah inhlàn a ta, 15 chuonghai chu bu le bâl le dawn thilhlân- chol thang lo bei dâm, beiphit indip tak le hriek chokpola siem kêk dâm le beiper hriek nàl bawm khat le chun- a ruolin a'n hlàn ding a nih. 16 " 'Thiempu chun chuonghai chu LALPA hmaah inhlànin, suol thawina thilhlân le pumraw thilhlân chu inhlàn a tih. 17 Bawma chol thang lo bei le chun beramchal chu inremna inthawina thilhlâna dingin LALPA kuomah thiempu chun inhlàn a ta; chun, bu le bâl thilhlân le dawn thilhlân khom chu inhlàn sa bok a tih. 18 Nazar mi chun Intuokna Puon in kotah a lu invawtir a ta, a'n ser hrangna sam chu lâng a ta, inremna inthawina thilhlâna dingin meia chun rawng a tih. 19 " 'Nazar miin a'n ser hrangna lu an vawtir zo chun thiempu chun a kutah beram dàr, suong hmin sa le bawma chol thang lo bei le beiper chu inchawitir a tih. 20 Chu zoah thiempu chun LALPA hmaa thèn thilhlâna dingin thên a ta, chu chu thil thienghlim, thiempu chanpuol nîng a tih, thèn thilhlân a irawm le a mal le chun. Chu zoa chun Nazar mi chun uoiin dawn thei tàng a tih. 21 Hi hi inser hrang a nuom dàn anga Nazar thutiem thaw dàn le LALPA hmaa a thil inhlàn dàn ding chu a nih, ama nuom thua thil a'n hlànhai chu tiem sa loin. Intiemkamna a nei taphot chu Nazar dàn angin a hlen ding a nih' tiin hril tawl rawh" a ta. 22 Chun, LALPA chun Mosie a biek a, 23 "Aron le a naupahai hril la, 'Hieng ang hi Israelhai mal in sawm hlak dàn ding chu a nih: 24 'LALPAN malsawmin vêng chêu raw se; 25 In chungah LALPA hmèl hlim sien, Lunginsiet chêu raw se; 26 Nangni tieng LALPA ngha sien, Thlamuongna pe chêu raw se'tiin. 27 Chuong ang chun Israelhai chungah ka hming insam an ta, keiin anni chu malsawm ka tih, " a ta.

Numbers 7

1 Mosien biekbûk a'n ngìr zo chun a cheina hmangruo po po leh hriek nâlin a'n hlân thienghlim a. Maichâm le a bungbêl po po khom hriek nàlin a'n hlân thienghlim bok a. 2 Chu zoah Israel hnam thuoituhai, pahnam tin tiemnaa thuoitua an hmanghai chu an hung a, thilhlân an hung chawi seng a. 3 An thilhlânhai chu tawlailir chung khum nei paruk le bawngchal sawm le pahnih a nih. Thuoitu pahniin tawlailir pakhat pei an thaw intawm a, thuoitu tinin bawngchal pakhat pei an hung tuok a, chuonghai chu biekbûk kota chun LALPA kuomah an hung inhlàn a. 4 LALPA chun Mosie kuomah, 5 "Hieng thilpêkhai hi Intuokna Puon ina hmang dingin lo pom rawh. Levihai kuomah an sin zira an mamaw ang peiin sem rawh" a ta. 6 Mosie chun tawlailir paruk le bawngchalhai chu a lâk a, Levihai kuomah a pêk a. 7 An sina an mamaw ang peiin Gersonhai chu tawlailir pahni le bawngchal pali a pêk a, 8 an sina an mamaw ang dungzuiin Merarihai chu tawlailir pali le bawngchal pariet a pêk bok a. An rêng chun thiempu Aron naupa Ithamar inrawina hnuoia sinthaw vong an nih. 9 Kohathai ruok chu hmun thienghlima thil put le zawn chu an mawphurna a ni leiin Mosie chun a pêk ve tawl nawh. 10 Mosien maichâm chu hriek nâla a'n thien zo chun maichâm inhlàn thienghlim lawmna dinga thuoituhaiin thilhlàn an hung chawihai chu maichâm bulah an hung inhlàn a. 11 LALPA chun Mosie kuomah, "Chi-hnam tina luhai sengin an thilpêkhai chu ahmatiemin ni khatah pakhat peiin an hung inhlàn ding a nih" a ta. 12 A ni khat nia thilhlân hung chawi hmasa tak chu Juda hnama mi Aminadab naupa Nason a nih. 13 A thil inhlànhai chu tangkaruo thlêng pakhat, hmun thienghlima hmang shekel za le sawmthuma rik le tui amanih thisen amanih thènaa hmang chi tangkaruo maihùn pakhat, shekel sawmsari tluka rik, bu le bâl thilhlâna hmang hlak, hriek le pol beiphit indip taka sung sip hmar ve ve dâm; 14 shekel sawma rik rangkachak berbu, raw ding rim inhnika sung sip dâm; 15 pumraw inthawia hmang ding bawng chal tuoi pakhat, beram chal pakhat le kum khata upa beram tuoi pakhat; 16 suol inthawina ding kêl chal pakhat; 17 inremna inthawina ding bawng chal pahni, beram chal panga, kêl chal panga le kum khata upa beram tuoi panga dâm a nih. Chuonghai chu Aminadab naupa Nason thil inhlànhai chu a nih. 18 A ni hninaa thilhlân hung chawitu chu Isakar hnama mi Zuar naupa Nathanel a nih. 19 A thil inhlànhai chu tangkaruo thlêng pakhat, hmun thienghlima hmang shekel za le sawmthuma rik le tui amanih thisen amanih thènaa hmang chi tangkaruo maihùn pakhat, shekel sawmsari tluka rik, bu le bâl thilhlâna hmang hlak hriek le pol beiphit indip taka a pahnia sung sip hmar ve ve dâm; 20 shekel sawma rik rangkachak berbu, raw ding rim inhnika sung sip dâm; 21 pumraw inthawia hmang ding bawng chal tuoi pakhat, beram chal pakhat le kum khata upa beram tuoi pakhat; 22 suol inthawina dingin kêl chal pakhat; 23 inremna inthawina dingin bawng chal pahni, beram chal panga, kêl chal panga le kum khata upa beram tuoi panga dâm a nih. Chuonghai chu Zuar naupa Nethanel thil inhlànhai chu a nih. 24 A ni thumnaa thilhlan hung chawitu chu Zebulun hnama mi Helon naupa Eliab a nih. 25 A thil inhlânhai chu tangkaruo thlêng pakhat, hmun thienghlima hmang shekel za le sawmthuma rik le tui amanih thisen amanih thènaa hmang chi tangkaruo maihùn pakhat, shekel sawmsari tluka rik, bu le bâl thilhlâna hmang hlak hriek le pol beiphit indip taka a pahnia sung sip hmar ve ve dâm; 26 shekel sawma rik rangkachak berbu, raw ding rim inhnika sung sip dâm; 27 pumraw inthawia hmang ding bawng chal tuoi pakhat, beram chal pakhat le kum khata upa beram tuoi pakhat; 28 suol inthawina dingin kêl chal pakhat; 29 inremna inthawina dingin bawng chal pahni, beram chal panga, kêl chal panga le kum khata upa beram tuoi panga dâm a nih. Chuonghai chu Helon naupa Eliab thil inhlànhai chu a nih. 30 A ni linaa thilhlân hung chawitu chu Reuben hnama mi Elizur naupa Sedeur a nih. 31 A thil inhlânhai chu tangkaruo thlêng pakhat, hmun thienghlima hmang shekel za le sawmthuma rik le tui amanih thisen amanih thènaa hmang chi tangkaruo maihùn pakhat, shekel sawmsari tluka rik, bu le bâl thilhlâna hmang hlak hriek le pol beiphit indip taka a pahnia sung sip hmar ve ve dâm; 32 shekel sawma rik rangkachak berbu, raw ding rim inhnika sip dâm; 33 pumraw inthawia hmang ding bawng chal tuoi pakhat, beram chal pakhat le kum khata upa beram tuoi pakhat dâm; 34 suol inthawina dingin kêl chal pakhat; 35 inremna inthawina dingin bawng chal pahni, beram chal panga, kêl chal panga le kum khata upa beram tuoi panga dâm a nih. Chuonghai chu Elizur naupa Sedeur thil inhlànhai chu a nih. 36 A ni nganaa thilhlân hung chawitu chu Simeon hnama mi Selumiel naupa Zurisadai a nih. 37 A thil inhlànhai chu tangkaruo thlêng pakhat, hmun thienghlima hmang shekel za le sawmthuma rik le tui amanih thisen amanih thènaa hmang chi tangkawruo maihùn pakhat, shekel sawmsari tluka rik, bu le bâl thilhlâna hmang hlak hriek le pol beiphit indip taka a pahnia sung sip hmar ve ve dâm; 38 shekel sawma rik rangkachak berbu, raw ding rim inhnika sip dâm; 39 pumraw inthawia hmang ding bawng chal tuoi pakhat, beram chal pakhat le kum khata upa beram tuoi pakhat; 40 suol inthawina dingin kêl chal pakhat; 41 inremna inthawina dingin bawng chal pahni, beram chal panga, kêl chal panga le kum khata upa beram tuoi panga dâm a nih. Chuonghai chu Selumiel naupa Zurisadai thil inhlànhai chu a nih. 42 A ni ruknaa thilhlân hung chawitu chu Gad hnama mi Eliasaf naupa Deuel a nih. 43 A thil inhlànhai chu tangkaruo thlêng pakhat, hmun thienghlima hmang shekel za le sawmthuma rik le tui amanih thisen amanih thènaa hmang chi tangkaruo maihùn pakhat, shekel sawmsari tluka rik, bu le bâl thilhlâna hmang hlak hriek le pol beiphit indip taka a pahnia sung sip hmar ve ve dâm; 44 shekel sawma rik rangkachak berbu, raw ding rim inhnika sung sip dâm; 45 pumraw inthawia hmang ding bawng chal tuoi pakhat, beram chal pakhat le kum khata upa beram tuoi pakhat; 46 suol inthawina dingin kêl chal pakhat; 47 inremna inthawina dingin bawngchal pahni, beramchal panga, kêl chal panga le kum khata upa beram tuoi panga dâm a nih. Chuonghai chu Eliasaf naupa Deuel thil inhlànhai chu a nih. 48 A ni sarinaa thilhlân hung chawitu chu Efraim hnama mi Amihud naupa Elisama a nih. 49 A thil inhlànhai chu tangkaruo thlêng pakhat, hmun thienghlima hmang shekel za le sawmthuma rik le tui amanih thisen amanih thènaa hmang chi tangkaruo maihùn pakhat, shekel sawmsari tluka rik, bu le bâl thilhlâna hmang hlak hriek le pol beiphit indip taka a pahnia sung sip hmar ve ve dâm; 50 shekel sawma rik rangkachak berbu, raw ding rim inhnika sung sip dâm; 51 pumraw inthawia hmang ding bawng chal tuoi pakhat, beram chal pakhat le kum khata upa beram tuoi pakhat; 52 suol inthawina dingin kêl chal pakhat; 53 inremna inthawina dingin bawng chal pahni, beram chal panga, kêl chal panga le kum khata upa beram tuoi panga dâm a nih. Chuonghai chu Amihud naupa Elisama thil inhlànhai chu a nih. 54 A ni rietnaa thilhlân hung chawitu chu Manase hnama mi Pedahzur naupa Gamaliel a nih. 55 A thil inhlànhai chu tangkaruo thlêng pakhat, hmun thienghlima hmang shekel za le sawmthuma rik le tui amanih thisen amanih thènaa hmang chi tangkaruo maihùn pakhat, shekel sawmsari tluka rik, bu le bâl thilhlâna hmang hlak hriek le pol beiphit indip taka a pahnia sung sip hmar ve ve dâm; 56 shekel sawma rik rangkachak berbu, raw ding rim inhnika sip dâm; 57 pumraw inthawia hmang ding bawng chal tuoi pakhat, beram chal pakhat le kum khata upa beram tuoi pakha; 58 suol inthawina dingin kêl chal pakhat; 59 inremna inthawina dingin bawng chal pahni, beram chal panga, kêl chal panga le kum khata upa beram tuoi panga dâm a nih. Chuonghai chu Pedahzur naupa Gamaliel thil inhlànhai chu a nih. 60 A ni kuona thilhlân hung chawitu chu Benjamin hnama mi Gideoni naupa Abidan a nih. 61 A thil inhlànhai chu tangkaruo thlêng pakhat, hmun thienghlima hmang shekel za le sawmthuma rik le tui amanih thisen amanih thènaa hmang chi tangkaruo maihùn pakhat, shekel sawmsari tluka rik, bu le bâl thilhlâna hmang hlak hriek le pol beiphit indip taka a pahnia sung sip hmar ve ve dâm; 62 shekel sawma rik rangkachak berbu, raw ding rim inhnika sip dâm; 63 pumraw inthawia hmang ding bawng chal tuoi pakhat, beram chal pakhat le kum khata upa beram tuoi pakhat; 64 suol inthawina dingin kêl chal pakhat; 65 inremna inthawina dingin bawng chal pahni, beram chal panga, kêl chal panga le kum khata upa beram tuoi panga dâm a nih. Chuonghai chu Gideoni naupa Abidan thil inhlànhai chu a nih. 66 A ni sawmnaa thilhlân hung chawitu chu Dan hnama mi Amisadai naupa Ahiezer a nih. 67 A thil inhlànhai chu tangkaruo thlêng pakhat, hmun thienghlima hmang shekel za le sawmthuma rik le tui amanih thisen amanih thènaa hmang chi tangkaruo maihùn pakhat, shekel sawmsari tluka rik, bu le bâl thilhlâna hmang hlak hriek le pol beiphit indip taka a pahnia sung sip hmar ve ve dâm; 68 shekel sawma rik rangkachak berbu, raw ding rim inhnika sip dâm; 69 pumraw inthawia hmang ding bawng chal tuoi pakhat, beram chal pakhat le kum khata upa beram tuoi pakhat; 70 suol inthawina dingin kêl chal pakhat; 71 inremna inthawina dingin bawng chal pahni, beram chal panga, kêl chal panga le kum khata upa beram tuoi panga dâm a nih. Chuonghai chu Amisadai naupa Ahiezer thil inhlànhai chu a nih. 72 A ni sawmpakhatnaa thilhlân hung chawitu chu Aser hnama mi Okran naupa Pagiel a nih. 73 A thil inhlànhai chu tangkaruo thlêng pakhat, hmun thienghlima hmang shekel za le sawmthuma rik le tui amanih thisen amanih thènaa hmang chi tangkaruo maihùn pakhat, shekel sawmsari tluka rik, bu le bâl thilhlâna hmang hlak, hriek le pol beiphit indip taka a pahnia sung sip hmar ve ve dâm; 74 shekel sawma rik rangkachak berbu, raw ding rim inhnika sip dâm; 75 pumraw inthawia hmang ding bawng chal tuoi pakhat, beram chal pakhat le kum khata upa beram tuoi pakhat; 76 suol inthawina dingin kêl chal pakhat; 77 inremna inthawina dingin bawng chal pahni, beram chal panga, kêl chal panga le kum khata upa beram tuoi panga dâm a nih. Chuonghai chu Okran naupa Pagiel thil inhlànhai chu a nih. 78 A ni sawmpahninaa thilhlân hung chawitu chu Naftali hnama mi Enan naupa Ahira a nih. 79 A thil inhlànhai chu tangkaruo thlêng pakhat, hmun thienghlima hmang shekel za le sawmthuma rik le tui amanih thisen amanih thènaa hmang chi tangkaruo maihùn pakhat, shekel sawmsari tluka rik, bu le bâl thilhlâna hmang hlak hriek le pol beiphit indip taka a pahnia sung sip hmar ve ve dâm; 80 shekel sawma rik rangkachak berbu, raw ding rim inhnika sip dâm; 81 pumraw inthawia hmang ding bawng chal tuoi pakhat, beram chal pakhat le kum khata upa beram tuoi pakhat; 82 suol inthawina dingin kêl chal pakhat; 83 inremna inthawina dingin bawng chal pahni, beram chal panga, kêl chal panga le kum khata upa beram tuoi panga dâm a nih. Chuonghai chu Enan naupa Ahira thil inhlànhai chu a nih. 84 Hriek nàla maichâm an inhlàn lawmnaa Israel pahnam tin luhai thil inhlânhai chu hieng hi a nih: tangkaruo thlêng sawmpahni, tangkaruo maihùn sawmpahni le rangkachak berbu sawmpahni a nih. 85 Tangkaruo thlêng pakhat pei rikzie chu shekel za le sawmthum a na, tangkaruo berbu pakhat rikzie chu shekel sawmsari a nih. Hmun thienghlima hmang shekel anga inkhi chun tangkaruo thlêng le berbu po po rikzie chu shekel sânghni le zalid a nih. 86 Hmun thienghlima hmang shekel anga inkhi chun rim inhnik thun sip rangkachak berbu sawmpahni rikzie chu shekel za le sawmhnie a nih. 87 Bu le bâl thilhlân khom thang sain, pumraw inthawinaa ran an inhlàn po chu bawng chal tuoi sawm le pahni, beram chal sawm le pahni, kum khata upa beram tuoi sawm le pahni a nih. Suol thawinaa ran an inhlàn po po chu kel chal sawm le pahni a nih. 88 Inremna thilhlâna ran an inhlàn po po chu bawng chal sawmhni le pali, beram chal sawmruk, kêl chal sawmruk, kum khata upa beram tuoi sawmruk a nih. Chuonghai chu hriek nâla maichâm an inhlân nia an thuoituhai thilpêkhai chu a nih. 89 Chuongchun, Intuokna Puon ina LALPA be dinga Mosie a lût chun Thuthlung bawm chunga zangaina thungphaa cherubhai inkâra inthok chun rawlin a hung biek ti a hriet a, a'n biekpui a.

Numbers 8

1 Chun, LALPAN Mosie a biek a, 2 "Aron inbiekpui la, a kuomah, 'Khawnvar pasarihai hi a'n sit pha chun khawnvar siena hma zawn tieng an el var ding a nih' tiin hril rawh" a ta. 3 Aron chun chuong ang tak chun a thaw a, Mosie kuoma Pathienin thu a pêk angin, khawnvarhai chu khawnvar siena hma zawn tieng a'n nghattir vong a. 4 Khawnvar siena chu a thuta inthoka a lèra a pâr lim chenin rangkachaka siem, LALPAN a lem Mosie a'n entir anga ser le sut a nih. 5 LALPA chun Mosie kuomah, 6 "Levihai hi Israel thlahai laia inthokin la hrang la, inser thieng tawl rawh. 7 Ser thiengna dingin hieng hin thaw rawh: an chungah inthienna tui thè khum la, an pumin invaw faitir vong la, an silfènhai insawptir la, insukthieng raw se. 8 Bawngchal tuoi pakhat le bu le bâl thilhlâna dingin beiphit indip tak, hriek le pol chu hung inlâktir la, suol thawina dingin bawng chal tuoi pakhat hung inkeitir bok rawh. 9 Levihai chu Intuokna Puon in kotah hung thuoi tawl la, Israel thlahai po po khom hung ko khawm rawh. 10 Levihai chu LALPA hmaah hung thuoi la, Israelhaiin an lu chungah kut innghat raw hai se. 11 Levihai chun LALPA rong an bawl theina dingin anni chu LALPA hmaa Israelhai thèn thilhlâna dingin Aronin inhlàn tawl raw se. 12 "Bawngchal luah Levihaiin kut an innghat hnung chun, pakhat chu suol thawina dingin, a pakhat dang chu Levihai ta dinga inremna siemna dinga pumraw thilhlânah LALPA kuomah inhlàn rawh. 13 Levihai chu Aron le a naupahai hmaah inngîrtir la, LALPA kuoma thèn thilhlânah inhlàn tawl rawh. 14 Chuong ang chun Levihai chu Israel mihaia inthokin ser hrang i ta, anni chu ka chanpuol nîng an tih. 15 "Levihai chu sukthieng a, thèn thilhlàna i'n hlàn zo pha leh Intuokna Puon inah hungin ka rong an bawl ding a nih. 16 Israel thlahai laia ka chan lieu lieua ruot an ni si a; Israel thlahai laia nau lutîr, sul keu hmasa tak, ka chanpuolhai aiawa ka lâkhai chu an nih. 17 Israel rama nau lutîr po po chu, mihriem ni sien, ran ni sien, ka ta an nih. Aigupta mihai ka sukhlum lai khan ka chanpuola ka ruot an ni tah. 18 Israel nau lutîr po po aiin Levihai hi ka lâk a nih. 19 Israel thlahai aiawa Inbiekna Puon ina rong bawl ding le Israel thlahaiin hmun thienghlim an hung hnai khoma anni lai hri a'n lèng nawna dinga inremna siemna dingin Israel thlahai laia inthokin Levihai hi Aron le a naupahai kuomah ka pêk a nih" tiin. 20 LALPAN thu Mosie a pêk ang takin Mosie le Aron le Israel thla pung khawm po po chun Levihai chunga chun an thaw a. 21 Levihai chun insukthiengin, an puonhai an sawp a; anni inthienna dinga inremna inthawina siempêkin, thèn thilhlân angin Aron chun anni chu LALPA hmaah a'n hlàn a. 22 Chu hnung chun Levihai chu Aron le a naupahai inrawina hnuoia rong bawl dingin Intuokna Puon in sûnga chun an lût a. LALPAN Mosie kuoma a hril ang thlapin Levihai chunga chun an thaw a. 23 LALPA chun Mosie kuomah, 24 "Hi hi Levihai chungthua hmang ding chu a nih: kum sawmhni panga an tling pha Intuokna Puon inah sin an thaw seng ding a nih. 25 Kum sawmnga an tling pha an chawl ding a nih. 26 Intuokna Puon ina sinthaw an chipuihai chu thangpui thei an ta, anni puol ruok chun rong an bawl ding a ni ta nawh. Hieng ang hin Levihai sin le mawphurna chu i rèlpêk ding a nih" a ta.

Numbers 9

1 Aigupta ram an suoksana inthoka kum hnina thla hmasa taka chun Sinai thlalerah LALPAN Mosie a biek a, 2 "Israel thlahai chu a hunbi takah Fekân Kùt inhmangtir rawh. 3 A hunbi takah, hi thla ni sawm le ni lina zân tieng hin nei in ta, chu taka thaw dàn dinga bituk po po ang chun in thaw ding a nih" tiin a hril a. 4 Chuong anga Fekân Kùt hmang ding chun Mosien Israel thlahai chu a hril a, 5 a ti angin Sinai thlalera chun thla hmasa tak ni sawm le ni lina thimbut chun an hmang a, LALPAN Mosie kuoma thu a pêk ang takin Israel thlahai chun an thaw a. 6 Anni lai chun mi thenkhat, chu nia mithi ruong an nei leia inthieng lo le hmang thei lo an um a. Anni chu Mosie le Aron kuomah an hung a, 7 "Mithi ruong leia inthieng lo kan ni a, amiruokchu Israel thlahaiin a hunbi taka LALPA kuoma thilhlân an inhlàn huna kan inhlàn ve ding ieng leiin am in mi khappèk ding a na?" an ta. 8 Mosie chun, "Nangni chungthua LALPA thupêk ka hmu hmakhat chu lo nghâk ro" a ta. 9 Chun, LALPA chun Mosie kuomah, 10 "Israelhai kuomah hieng hin hril rawh: Nangni le in thlahai lai tu khom mithi leia inthieng lo amanih, khuol inzin amanih an um hlauh chun Fekân Kùt hi an hmang ve hrim hrim ding a nih. 11 Thla hnina, ni sawm le ni li thimbutah hmang an ta, beram sa chu chol thang lo bei le hna hring kha leh an fâk ding a nih. 12 A zînga dingin ieng khom an sie ding a ni naw a, a ru an suktliek ding a ni bok nawh. Fekân Kùt an hmang pha leh a hmang dàn ding ang takin an thaw ding a nih. 13 Tu khom mithi ruong leia inthieng lo le khuol inzin lei ni si loa Fekân Kùta thang ve lo a um chun, LALPA kuoma a hunbi taka thil inhlàn ding chu a'n hlàn ve naw leiin ama chun a maw chu phur a ta, a chipuihai laia inthoka tuithlàr nîng a tih. 14 "Nangni laia khawsa ram dang miin LALPA Fekân Kùt hi hmang ve a nuom chun a hmang dàn ding ang takin hmang ve raw se. A rama pieng le ram dang mihai ta ding khomin dàn thuhmun in nei ding a nih" tiin. 15 Biekbûk, Thuthlung Puon in an inngîr ni chun, sûmin a hung tuom mup a, biekbûk chunga chun mei chok angin zântienga inthokin zîngkar chen a um a. 16 Chuong ang chun a um a, sûm chun a tuom zing a, zâna chun mei chok angin a'n lang a. 17 Sûmin puon in chu a'n kiengsan pha leh Israel thlahai chu an inthok suok a, sûm chu a ngîrna hmun taphotah umhmun an khuor a. 18 LALPA thupêk ang peiin Israelhai chu an inthok suok a, a thupêk ang peiin umhmun an khuor a, biekbûk chunga sûm a um sûng po chu riebûk an son ngai nawh. 19 Biekbûk chunga sawt tak sûm a um chang khomin, Israelhai chun LALPA thupêk chu zawmin an fe son ngai nawh. 20 A châng chun sûm chu biekbûk chungah ni sawt nawte a um a, LALPA thuin hmun an khuor a, chu zoah a thupêk angin an inson nawk pei a. 21 A châng chun sûm chu zântienga inthoka a tûk zîngkâr chen chauh a um a, zîngkar a'n kieng pha an inthok suok nawk a. Sun ni sien, zân ni sien, sûm chu an kieng pha leh an inthok suok el a nih. 22 Sûm chu biekbûk chungah ni hni dâm, thla khat dâm le kum khat dâm a um chun an châm zing a, a'n kieng pha an inthok suok chauh hlak. 23 LALPAN Mosie hmanga thu a pêk ang taka LALPA thu chu zawmin, LALPA thupêk angin hmun an khuor a, LALPA thupêk angin an inthok suok hlak a nih.

Numbers 10

1 Chun, LALPA chun Mosie a biek a, 2 "Mipuihai ko khawmna ding le riebûk inson ding phaa. inhriettirnaa hmang dingin tangkaruoin tawtawrawt pahni insuttir rawh. 3 Chu chu an mùt kop chun mipui po po i kuomah Intuokna Puon in kot bulah an hung tlân khawm vong ding a nih. 4 Pakhat chauh an mùt chun, Israel pahnam tina lukhaituhai chauh i hmaah an hung khawm ding a nih. 5 Chun, râlkhêl ri anga an mùt chun suo tienga um hai chu an suok ding a nih. 6 Râl khêl ri anga an mùt voi hninaah sim tienga umhai an suok ding a nih. Râlkhêl ri chu inthok suok ding ti hrilna a nih. 7 Mipui ko khawmna dinga in mùt pha ruok chu râlkhêl ri angin mût naw ro. 8 "Aron le a thla thiempuhai hi tawtawrawt mûttu ding chu an nih. Hi hi nangni le in thlahai chena in kumkhaw thaw dàn ding chu a nih. 9 In rama in hmèlma, neksawrtuhai cheu do dinga in suok ding pha leh râlkhêl mùtin tawtawrawt in mùt ding a nih. Chuong anga in thaw chun LALPA in Pathienin hre zing a ti cheu a, hmèlmahai lakah san suok a ti cheu. 10 Chun, in hlim ni, a hunbia in kùt châng le thla thar lawmna in nei châng dâm le pumraw thilhlân le inremna thilhlân in thaw chângin in mùt hlak bok ding a nih. Chu chu in Pathien hmaa hriet in ni zingna ding a nih. Kei hi LALPA, in Pathien chu ka nih. 11 Kum hnina, thla hnina, ni sawmhninaa chun sûm chu Thuthlung biekbûk chunga inthokin a'n kàng tung a. 12 Chuongchun, Israel thlahai chu Sinai thlalera inthokin an inthok suok a, hmun hrang hrang an fe pel hnungin, sûm chu Paran thlalerah a ngîr a. 13 Hi hi Mosie hmanga LALPA thupêka an inthok suok hmasakna tak a nih. 14 A hmasa takin Juda thlahai chu an hnam inchikna puonzâr chawiin an suok a, anni inrawitu chu Aminadab naupa Nason a nih. 15 Isakar thlahai inrawitu chu Zuara naupa Nethanel a nih. 16 Zebulun thlahai inrawitu chu Helon naupa Eliab a nih. 17 Biekbûk chu an thiek a, a zawntu Gersonhai le Merarihai chun zawnin an inthok suok a. 18 Anni zoah Reuben thlahai chu an hnam inchikna puonzâr khaiin an inthok suok a, anni inrawitu chu Sedeur naupa Elizur a nih. 19 Simeon thlahai inrawitu chu Zurisadai naupa Selumiel a na, 20 Gad thlahai inrawitu chu Deuel naupa Elisaf a nih. 21 Chu zoah Kohathaiin thil thienghlimhai chu phurin an inthok suok a. An hung tlung tawl hmaa biekbûk chu lo inngìr ding a nih. 22 Anni hnungah Efraim thlahai chu an hnam inchikna puonzâr khaiin an inthok suok a, anni inrawitu chu Amihud naupa Elisama a nih. 23 Manase hnam inrawitu chu Pedazur naupa Gamaliel a na, 24 Benjamin thlahai inrawitu chu Gideoni naupa Abidan a nih. 25 Dan thlahai chun an hnam inchikna puonzâr khaiin mi po po hnung dàlah an thang a, anni inrawitu chu Amisadai naupa Ahiezer a nih. 26 Aser thlahai inrawitu chu Okran naupa Pagiel a na, 27 Naftali thlahai inrawitu chu Enan naupa Ahira a nih. 28 Hi hi Israel thlahai an fe suok phaa indot peia an insom suok dàn chu a nih. 29 Mosie tarpu Midian mi Reuel naupa Hobab kuoma chun Mosien, " 'Pêng ka ti cheu' tia LALPAN a hrilna ram tieng pan chun kan fe ding a nih. Nangni khom hung ve unla, in chungah tha takin thawng kan tih, LALPA chun thil tha Israelhai chungah a tiem si a" a ta. 30 Ama chun, "Hung da el ka tih. Ka ram tieng, ka mihai kuom tieng kîr nawk ka tih" a ta. 31 Mosie chun, "Mi fesan lul naw rawh. Thlalera riebûk khuorna ding i hriet lem a, keini ta dingin mit i ni ringot a nih. 32 Kan kuomah i hung ve chun LALPAN thil tha a mi pêk taphot chu ei intlàng ding annawm" a ta. 33 Chuong ang chun, LALPA tlânga inthok chun an suok a, ni thum an inzin a. LALPA Thuthlung bawm chun an ta dinga chawlna hmun remchang zongin ni thum an hma a thuoi a. 34 An riebûka inthoka an suok chun sunah LALPA sûm chu an chungah a'n zâr a. 35 Thuthlung bawm chu a suok ding zâtin Mosien, "Aw LALPA, hung tho la, I hmêlmahai chu hnot dar la, I râlhai chu i hmaah tlân se raw hai se"a ta. 36 A chawl ding zâtin, "Aw LALPA hung kîr nawk rawh, I mi Israel sâng tam tak lai hin"a ti zie bok a nih.

Numbers 11

1 Mipui chu an harsatna chungthuah LALPA hrietin an chier a, chu chu LALPAN a hriet chun a lung a'n ling a, LALPA lungsenna mei chu anni lai a hung chok a, an riebûk hnawm vel chu a kàng ta dur dur a. 2 Mipui chun Mosie an ko khèk a, LALPA kuomah a tongtai a, mei chu a hung rêm ta a. 3 Anni lai LALPA lungsenna mei chu a chok leiin chu hmun hminga chun Tabera an inbùk a. 4 Anni laia hnam dang thang ve peihai chun sa an chàk leiin, Israelhai khom chun, "Tuin am sa fâk ding a mi pêk ding a na? 5 Nuom nuoma Aigupta rama ngasa ei hme hlak lai hun kha ei hriet zing a, fanghma dâm, vaifanghma dâm, purun bàl dâm, purun dâm le purun vâr dâm ei hme hlak lai hun kha. 6 Tu ruok hin chu bu chàkna hlak a rê dèr a, manna chauh naw hlak chu hmu khur ei nei ta si nawh!" tiin an inhrawt ve a. 7 Manna chu maruoi mu anga vâr sar el, thing hnai anga entlang thei a nih. 8 Mihai chun an va rùt khawm a, a rawt nawinaah an rawt nawi naw leh sumah an suk nawi a, bêlah an suong a, bei dâmin an siem a, a'n hnik dàn chu oliv hrieka bei zeu ang a nih. 9 An riebûk hmuna zâna daidaw a tlâk pha manna chu a tla sa ve hlak a nih. 10 A sûng sûngin an puon in kotah an chier sup sup ri chu Mosien a lo hriet a. An chungah nasa takin LALPA a lungsen ti a hrietin Mosie chu a lungzing hle a. 11 LALPA kuomah, "Hi buoina hi ieng leia i siehlaw chungah i hung intlun am a na? I lawm naw zawng ieng am ka thaw a, hienga mipuihai phurrik po po ka chungah i'n nghat el hi? 12 Hieng mipuihai hi ka hring tawl am an ni? An pi le puhai kuoma inkhàm meua pêk i tiem rama chun nuin nautesen a pom anga pom tlung tawl dingin ieng dinga i mi ti am a na? 13 Hieng mipuihai fâk ding hi khaw laia inthokin am sa chu hmu tàng ka ta? 'Sa mi pe rawh' tia an mi'n hrawt khum ri hlak hi a rê top si nawh. 14 Keima ringot chun hieng mihai hi ka phur zo naw a nih, ka chung a rik taluo. 15 Hieng hi i mi thaw dàn ding a ni chun tu hin mi sukhlum nghal el rawh; i mit ka tlung a ni ruok chun, ka sietna ding mi'n hmasuontir lul naw rawh" a ta. 16 LALPA chun Mosie kuomah, "Israel mipuihai hotu le enkoltu nia i ngai upa sawmsari ko khawm la, Intuokna Puon inah ka hmaa nang le ngìr tlâng dingin hung thuoi tawl rawh. 17 Hung tum ka ta, inbiekpui ka ti che a, nangmaa um Thlarau kha lain an chungah Thlarau chu sie vêng ka ta, mipui phurrik chu nangma chaua phur ta loin anni chun phurpui tâng an ti che. 18 "Mipuihai chu hieng ang hin hril rawh: 'Zîngah sa in fâk ding a na, chu huna ding chun inser thienghlim ro. 'Sa fâk ding tuin am mi pe tàng a ta? Aigupta rama khan ei hnienghnâr vei leh!' tia in inhrawt ri kha LALPAN a hriet tah. Sa chu LALPAN pêng a ti cheu a, fa mol in tih. 19 Ni khat ni hni sûng chauh amanih, ni nga amanih, ni sawm amanih le ni sawmhni amanih sûng chauh fa loin, 20 thla khat pumhlum top, ngei rak khop le luok suok rak khopin fâng in tih, nangni laia um LALPA chu hnawl a, 'Ieng leia Aigupta kha ei suoksan am a na?' tia a hmaah in inhrawt leiin' ti rawh" a ta. 21 Mosie chun a kuomah, "Hi taka ka mi thuoihai hi mani kea fe thei ngot khom nuoi ruk an na, 'Thla khat pumhlum fâk ding sa pêng ka ti cheu' i ta, 22 bawng ruol le beram ruol khom hi that vong inla, an fâk khop a ni ding am a ni? Tuipuia nga khom man ta vong inla, an khopkham a tling ding maw?" a ta. 23 LALPA chun Mosie kuomah, "LALPA bàn a tawi taluo a ni? Ka hril anga i chunga a tlung le tlung naw la hmung i tih" a ta. 24 Chuongchun Mosie chu a suok a, LALPA thu chu mipuihai a hril a. Upa sawmsarihai chu a ko khawm a, Puon In chu a'n ngìr huoltir a. 25 LALPA chu sûmah a hung tum a, Mosie chu a biek a, amaa Thlarau a sie chu lain upa sawmsarihai chunga chun chu Thlarau chu a sie a, an chunga Thlarau a hung um charin zawlnei angin thu an hril duol duol a, sienkhom chuong ang chun a hnungin an thaw nawk ta ngai nawh. f 26 Upahai laia tiem sa, Eldad le Medad hai ruok chu Puon Inah fe ve loin an riebûkah an um a, chuong sa khom chun thlarau chu an chungah a um ve a, riebûka chun thu an hril ve mol mol a. 27 Chuongchun, tlangval pakhat chu a tlân a, Mosie kuomah, "Eldad le Medad-in riebûkah thu an hril mol mol el" tiin a va hril a. 28 Nun naupa Josua, a tleirawl laia inthoka Mosie kaiza vêngtua thang tah chun, "Pu Mosie, khap tawl rawh" a ta. 29 Mosie chun, "Keima leiin thîkthu i lo suksiet vieu a ni maw? LALPA chun a thlarau mi po po pe sien, zawlnei ni vong hai sien ka ti nak lai a!" a ta. 30 Chuongchun, Mosie le Israel upahai chu riebûk tieng an kîr nawk a. 31 Chun, LALPA chun thli a'n hrângtir a, tuipuia inthokin vamim ruol chu a hung fen khawm a, meter khat vel chauha insânga vuongin an riebûk le a sir vel, ni khat lam dàpin an hung tum a. 32 Chu ni le a zân le a zînga chen chun mipui chu fe suokin vamim chu an man khawm a, a man tlawm tak khomin kilogram sâng chuong a rùt a, riebûk vela chun an inhro thluk a. 33 Sa chu an fâk lai zing, an la fâk zo hma chun LALPA lung a hung inling a, mipuihai chu hripui na takin a hrem a. 34 Sa inrawp leia thihai chu chu taka chun an phûm leiin a hmun hmingah Kibrot Hatava an inbûk a. 35 Kibrot Hatavaa inthok chun Hazerot an pan a, chu taka chun an châm a.

Numbers 12

1 Mosie chun Kush mi nuhmeia a nei leiin Miriam le Aron chun Mosie chu an hrilsiet a. 2 "Mosie kuoma chauh maw LALPAN thu a hril bîk chu? Keini kuoma khom a hril naw am a ni?" an ta. Chu chu LALPAN a lo hriet a. 3 Mosie chu pa inngaitlawm tak el, hnuoi chunga mi po po laia zâidam chungchuong a ni a. 4 LALPA chun Mosie le Aron le Miriam kuomah, "Hung suok unla Intuokna Puon inah mi hung hmu ro" a ti ta thut el a. Chuongchun, an pathum chun an va fe a. 5 LALPA chu sûm ngîrin a hung tum a, Puon in kotkhàra chun a ngîr a, Aron le Miriam chu a ko a, an pahni chun an hung suok a. 6 An kuoma chun, "Ka thu hi ngaithla ro. Nangni lai LALPA zawlnei an um chun a kuomah inlârin keima ka'n hriettir a, mangah ka biek hlak a. 7 Ka siehlaw Mosie kuoma ruok chu chuong ang chun ka thaw ngai nawh. Ama chu ka mi Israelhai chungah a ringum a nih. 8 Ama chu inhmatonin ka biek hlak a, thu khir hmang loin tlang takin ka biek hlak. Ama chu LALPA ruongam khom hmu ta sa a nih. Chuleiin, ka siehlaw Mosie hi ieng leia in soisel ngam am a na?" a lo ti a. 9 LALPA chu an chungah a lung a sen hle a, a fesan tawl tah a. 10 Chun, Puon in chunga sûm a'n kieng chun, ngai ta, Miriam chu vûr anga vârin a lo inphàr ta vong a. Ama tieng Aron a hang ngha chun a'n phâr vong tah ti a hmu a. 11 Chuongchun Aron chun Mosie kuomah, "Aw pu, invêtthlak taka suol kan lo thaw maw kha kan chungah intlàktir lul naw rawh. 12 A nu sula inthoka naute hlamzuia hung pieng, a taksa chenve zûr zo tah ang èm chun inumtir lul naw rawh" a ta. 13 Mosie chun LALPA a ko a, "Aw Pathien, sukdam hrâm raw khai" tiin a ngèn a. 14 LALPA chun Mosie kuomah, "A pain a naunu hmaia chil a sâkkhum ngot khom ni sari sûng chu inzak a phur a ni naw am a ni? Khawhnawmah ni sari sie hmang inla, chu hnung chun riebûkah la lût nawk thei in tih" a ta. 15 Chuongchun, Miriam chu riebûk puo tieng ni sari sûng an sie a, an thuoi lût nawk hma chun mipui chu an inson nawh. 16 Chu hnunga chun mipuiin Hazerot chu an suoksan a, Paran thlalèrah riebûk an khuor a.

Numbers 13

1 LALPA chun Mosie kuomah, 2 "Israelhai kuoma ka pêk ding Kanan ram chu hang en thlithlai dingin pahnam tin inrawituhai laia mi pakhat seng thlang suokin tir rawh" a ta. 3 LALPA thupêk angin Mosie chun Paran thlalera inthokin Israel pahnam tin inrawituhai chu a tir a. 4 A tirhai hming chu: Reuben hnama inthokin Zakur naupa Samua; 5 Simeon hnama inthokin Hori naupa Safat; 6 Juda hnama inthokin Jefune naupa Kaleb; 7 Isakar hnama inthokin Josefa naupa Igal; 8 Efraim hnama inthokin Nuna naupa Hosea; 9 Benjamin hnama inthokin Rafu naupa Palti; 10 Zebulun hnama inthokin Sodi naupa Gadiel; 11 Manase hnam (Josefa hnam) a inthokin Susi naupa Gadi; 12 Dan hnama inthokin Gemali naupa Amiel; 13 Aser hnama inthokin Mikael naupa Sethur; 14 Naftali hnama inthokin Vofsi naupa Nabi; 15 le Gad hnama inthokin Maki naupa Geuel an nih. 16 Hienghai hi ram thithlai dinga Mosien a tirhai chu an nih. Mosie chun Nuna naupa Hosea chu Josua tiin a ko. 17 Mosien Kanan ram thlithlai dinga a tirhai kuoma chun, "Negev fe tlanga hmar tieng panin, tlângrama khin kai tung ro. 18 A ram hmêlhmang dâm, a rama chênghai tam le tam nawzie le hrât le hrât nawzie dâm, 19 an ram hluo that le that nawzie dâm, an chêngna khuohai chu kula inhuon a ni le ni naw dâm, 20 a ram leilung hnawng dàn, hnuoi a hâng that le that nawzie dâm, ram a ngaw am a pawn ti dâm hang thlithlai ro. A ram tharsuok thei hung hawn tum ngei ngei ro" tiin thu a'n cha a. Chu hun chu grêp ra hmasa a hmin tan hun a nih. 21 Chuongchun, Zin thlalera inthok chun an pan tung a, Hamath kawn bul Rehob chen an thlithlai a. 22 Negev fe thlengin Hebron an tlung a, chu chu milien Anak thlaa mi Abiman hai, Sesai hai le Talmai hai chêngna khuo a nih. Hebron khuo hi Aigupta rama Zoan khuo an indin hma kum saria an indin tah a nih. 23 Eskol ruom an tlung chun grep ra bawr khat, a kau pumin an sat bong a, chu chu theibufai le theichang ra leh mi pahniin an zawn a, an hawn a. 24 Chu ruom hminga Eskol an inbûkna san chu Israelhaiin grep ra bawr an lo lei a nih. 25 Ni sawmli zet a ram an fang hnung chun an hung kîr nawk a. 26 Paran thlalera Kades hmun, Mosie le Aron le Israel mipuihai umnaa an hung kîr nawk chun an rênga pungkhawm hmaah an thil hmuhai chu an ripawt a, a ram suok theihai chu an inentir a. 27 Hieng hin Mosie kuomah an hril a: "I mi tirna ram chu kan hang thlithlai ngei a, nenetui le khuoizu luongna ram a lo ni takzet el! Hi hi a ram suok thei ra chu a nih. 28 A mi chênghai ruok chu kawlhrawng tak el an na, an khawpuihai chu kula inhuon a na, a lien tawl hle bok a. Anak thlahai chen khom kan hang hmu a. 29 Amalek mihai chu Negev-ah an um a; Hit hai, Jebu hai le Amor hai chun tlângram an del a; Kanan mihai chu tuipui kam hnai le Jordan vadung hrûlah an chêng" tiin. 30 Kaleb chun Mosie hmaa mipui chier mur mur chu a zâp dei a, "Inthok suok ei ta, a ram chu hang làng ei tiu, ei ngam tawl ngei ding a ni si a" a ta. 31 Nisienlakhom a fepuihai ruok chun, "Anni chu eini hang tèr ruol ding an ni nawh, eini nêka hrât lem dai an nih" an ta. 32 Israelhai lai chun an ram hang en thlithlai thu chu tha naw takin an hril dar a, "Kan ram hang en thlithlai chun a rama chênghai a fâk zo pei a nih. Mi kan hmuhai chu mi lien tak tak vong an nih. 33 Mi lien Anak thla, Nefelimhai khom kan hang hmu a, anni laka chu khau ang chauin kan inhmu a, anni khomin khau ang chauin an mi hmu bok" tiin.

Numbers 14

1 Chu zân chun beidongin mipui chu an tap a. 2 Mosie le Aron chungah chierin, "Aigupta rama khan lo thi ta law law chu ni inla tha lem ding bah! An naw le bek thlalera khan lo thi ta lem inla ni ding! 3 Kawlhnâma thi el dingin ieng leia Pathienin hi rama hin a mi thuoi a na? Ei nuhmei le nauhai hi râlin mi lâkpèk an ta, ei ta dingin Aigupta rama kîr nawk a tha lem dai a nih. 4 Thuoitu ding thlang ei ta, Aigupta tieng kîr nawk ei tiu" an ta, an inrawn tuo a. 5 Mosie le Aron chu chu taka Israel mipui pungkhawmhai hmaa chun an bokkhup a. 6 Ram thlithlaia fehai laia thang Nuna naupa Josua le Jefune naupa Kaleb chun an silfèn an pot thlèr a, 7 Israel mipui pungkhawmhai kuoma chun, "Kan ram hang fang le thlithlai chu ram tha tawp a nih. 8 Ei chungah LALPA a lawm chun, chu ram, nenetui le khuoizu luongna rama chun mi thuoi tlung a ta, ei ta dingin mi pêng a tih. 9 LALPA chunga hin hel naw phot ei tiu. A ram mihai chu ti dêr naw ro, ei la dol zo vong tawl ding a nih. Humtu an nei nawh, eini kuoma ruok chu LALPA a um. Ti tawl dêr naw ro" tiin an hril a. 10 Nisienlakhom, pungkhawmhai chun lunga dêng an rot a. Chu phing leh Intuokna Puon in chunga chun pungkhawm po po hmaah LALPA ropuina chu a hung inlang a. 11 LALPA chun Mosie kuomah, "Ieng chen top am hi mihai hin an mi hmusit chei ding a na? Anni lai inchikna thil mak khâng zozai ka thaw hnung khom khan, ieng chen top am an mi la ring nuom naw zing ding a na? 12 Anni rawi hi hripuiin sukhlum vong ka ta, nang ruok chu anni nêka hnam ropui le lien lemin siem ka ti che" a ta. 13 Mosie chun LALPA kuomah, "I thilthawtheina hmanga hi mihai hi Aiguptaa inthoka i thuoi suok an ni leiin chuong ang thu chu Aigupta mihaiin lo hre pal an ta, 14 hi rama mihai kuoma hin hril sawng rawi an tih! Aw LALPA, anni chun hieng mihai lai hin i um ti an hriet tah a, nang chu aw LALPA, hmaisana meuh an hmu ta che a, i sûm chu an chungah i zârpek hlak a, sùnah sûm ngirin, zânah meiin an hma i thuoi hlak si a. 15 Voi khat thil thua i sukhlum vong chun, hnam danghaiin an chanchin hung hrieng an ta, 16 'LALPA chun intiemkam meua ram pêk a tiema chun a thuoi tlung thei ta naw leiin thlalèrah a sukhlum vong el a nih' an ti ding annawm! 17 A hmaa i lo puong ta hlak angin tu hi LALPA hrâtna suklang hun a nih. 18 Nangma ngeiin, 'LALPA chu lung inuoi tak, hmangainaa sip, mi suolhai le helhai khom ngaidam hlaktu, amiruokchu pahai suolna leia an nauhai le an nauhai nauhai, suon thum suon lina chen khom hrem hlaktu chu a nih' tiin i lo puong ta a. 19 Tuhin LALPA, i hmangaina nasa tak ang ngei le Aigupta ram an suoksana inthoka tu chena i ngaidam rop tah hlak ang khan hieng mipuihai suolna hi ngaidam lul rawh" tiin a ngèn a. 20 LALPA chun, "I hni ang chun ka ngaidam. 21 Amiruokchu, kei hi hring zing ka ni ang boka ka ropuina hnuoi pumah a sip zing sùng chun, 22 tu khom ka ropuina le inchikna thil mak Aigupta ram le thlalera ka thawhai hmu ta si a, ka thu awi nuom loa voi sawm zet mi fietuhai hrim hrim chun, 23 an pi le puhai kuoma inkhâm meua pêk ka tiem ram chu hmu top naw ni hai; anni laia mi ngainêptu hrim hrim khomin hmu bok naw ni hai. 24 Ka siehlaw Kaleb ruok hin chu ngaituona danglam puta lungril po poa a mi zui leiin, a ram va sira chun thuoi lût ka ta, a thlahaiin rochung an tih. 25 Amalek mihai le Kanan mihai chu ruomah an um leiin, zinga hin hnung tieng kîr nawk unla, Tuipui Sen hrùla fe thlaler panna lam tieng chun inthok suok ro" a ta. 26 Chun, LALPAN Mosie le Aron a biek a, 27 "Hieng mi rilo pung khawmhai, ka chunga chier hmanghai laka hin ieng chen am zâi ka daw ding a na? 28 An kuomah, ka hringna sâlin ka hril a nih, ka hriet ngeia in hril ang takin in chungah thawng ka tih. 29 Nangni laia intiema thang tah, kum sawmhni le a chung tieng, ka chunga chier po po ruong chu thlalera hin zâl a tih. 30 Jefune naupa Kaleb le Nuna naupa Josua ti chauh naw chun, bân phar meua in umna hmun dinga ka tiem ram chu tu khomin lût naw ti niu. 31 'Râlin an mi manpèk ding chauh' tia in hril in nauhai ruok chu thuoi lût ka ta, in hnawl hnung ram chu la chên an tih. 32 Nangni ruok chu in ruongin thlalèr nghâk a tih. 33 Thlalèra in ruonghai a riral vong hma khat chu, in ringum nawna ra chu tuorin, in nauhai chu kum sawmli sûng beram chingin hi thlalèra hin invâk invâk an tih. 34 Ram in va thlithlai ni, ni sawmli sûng chu ni khat aiah kum khat peia tiemin kum sawmli sûng chu in suol leiin tuor in ta, keima hnawla thang umzie hi iem a na ti hung hrieng in tih. 35 Kei LALPA hin chu chu ka hril a, hieng mi rilo pung khawmhai, kei mi dodâl dinga inhawr khawmhai chunga hin chuong thilhai chu thaw ngèi ngèi ka tih. Hi thlalera hin an tawpna chu tlung a ta; hi hmuna hin thîng an tih" a ta. 36 Chuongchun, ram thlithlai dinga Mosie mi tirh hung kîr nawk hai, 37 a ram chanchin ripawt tha naw taka thè dara mipui pungkhawmhai laia chierna intluntuhai po po chu LALPA hmaah hriin a man hlum vong a. 38 Ram thlithlai dinga fehai laia Nuna naupa Josua le Jefune naupa Kaleb ruok chu an thi ve nawh. 39 Chuong thu chu Israel thlahai po po kuomah Mosien a hril a, lungngaiin an inrùm a. 40 A zînga chun inhma takin an tho a, tlâng ram tieng pan an tum a, "Kan suol takzet a nih. LALPA tiem rama chun tuhin fêng kan tih" an ta. 41 Mosie ruok chun, "Ieng leia LALPA thupêk poisa loa fe in tum am a na? Hlawtling naw ti niu. 42 In kuomah LALPA a um naw leiin, in hmèlmahai lo that el ding chauh chun fe ting naw ro. 43 Amalekhai le Kanan mihai le khin indo in ta, LALPAN a nghatsan ta si cheu leiin in kuomah um naw nih, an kawlhnâma thi mei mei ding chauh in nih" a ta. 44 Nisienlakhom, anni ngairuotna hmangin tlâng tieng an pan lui a, LALPA Thuthlung bawm le Mosie ruok chun riebûk chu an suoksan nawh. 45 Chuongchun tlânga um Amalekhai le Kanan mihai chu an hung chim thla a, an lo bei a, an lo sât thal rem rum a, Horma chen an hnot thlùr tawl a.

Numbers 15

1 Chun, LALPAN Mosie a 2 "Israelhai inbiekpui la, hieng hin hril rawh: 'In umna ding ram ka pêk cheu in tlung pha chun, 3 LALPA kuoma meia thilhlân, pumraw thilhlân amanih, thutiem hlen dinga inthawina amanih, mani nuom thua thilhlân amanih, in kût hunbi pha amania bawngchal amanih, beram le kèl chal amanih in inhlàn taphot chu LALPA ta dinga rim inhnik a nih. 4 LALPA kuoma thilhlân inhlàntu taphotin bu le bâl thilhlâna hmang, beiphit indip kilogram khat, oliv hriek litar khat le hmet chu an inhlàn sa ding a nih. 5 Chun, pumraw thilhlân amanih, inthawina thilhlân amania beramte in inhlàn pha leh dawn ding thilhlânah uoiin litar khat in inhlàn sa bok ding a nih. 6 Bu le bâl thilhlàna beramchal in inhlàn chun beiphit dip kilogram hni, oliv hriek litar chenve le hmet pol chu inhlàn in ta, 7 uoin litar khat leh in inhlàn sa bok ding a nih. Hieng thilhlânhai hi LALPA ta dinga rim inhnik a nih. 8 Chun, pumraw thilhlân amanih, thutiem hlenna dinga inthawina amanih le LALPA kuoma inremna thilhlân amani-ah bawngchal in inhlàn chun, 9 bu le bâl thilhlâna dingin beiphit dip kilogram thum le oliv hriek litar hni hmet pol chu inhlàn in ta, 10 uoin litar hni in inhlàn sa bok ding a nih. Hi inthawina hi LALPA ta dinga rim inhnik a nih. 11 Bawngchal amanih, beramchal amanih, beramchal tuoi amanih kèlchal tuoi amanih in inhlàn pha chuong ang chun thaw hlak ro. 12 Ran pakhat nèka tam in inhlàn pha leh ran pakhat in inhlàna thil dang in hmang sa zât char kha ran in inhlàn sa zât ang peiin thaw sa ve pei ro. 13 "Chu rama pieng po po chun hieng ang pei hin LALPA ta dinga rim inhnik, meia thilhlân chu an thaw ding a nih. 14 Thang la hung thar pei chen khomin, ram dang mi amanih le nangni laia chêng ve tu khomin LALPA ta dinga rim inhnik, meia thilhlân an thaw pha chun nangni thaw ang charin an thaw ve ding a nih. 15 In thlahai chena ding khomin, mipuihai le in kuoma hnam dang umhai ta ding khomin dàn thuhmun in nei ding a nih; hnam danghai khom LALPA hmaa chu nangni leh angkhat vong an ni ding a nih. 16 Nangni ta ding le in kuoma um hnam danghai ta dingin dàn le thupêk hmun khat chauh a um ding a nih' tiin hril rawh" a ta. 17 Chun, LALPA chun Mosie a biek a, 18 "Israelhai inbiekpui la, hieng hin hril rawh: 'Ka thuoina ding cheu ram in hang tlung a, 19 a ram suok bu in fâk pha leh, a then chu LALPA kuoma thèn thilhlânah in inhlàn ding a nih. 20 Bei tlang in hmet hmasa tak laia mi tlang khat chu hrizawla bu, thèn thilhlâna in inhlàn angin bei tlang chu thênin in inhlàn ding a nih. 21 Hi hi thang la hung thar pei dinghai huna chen khom bei in hmet hmasa tak chu LALPA kuomah thèn thilhlâna dingin in inhlàn hlak ding a nih. 22 " 'LALPAN Mosie hmanga dàn a pêkhai chu tum rêng lei ni loin an bawsiet thei a. 23 Chun, hun la hung um peiah Mosie hmanga LALPA thupêkhai chu Israel mipuiin an lo zawm kim vong naw thei bok a. 24 Chuong thil chu mipuiin an hriet naw leia an bawsiet a ni chun, pumraw thilhlânah bawngchal tuoi, LALPA ta dinga rim inhnik chu inhlàn an ta, chu ruol chun a dàn ang takin bu le bâl thilhlân le dawn ding thilhlân inhlàn an ta, suol thawina dingin kèlchal inhlàn bok an tih. 25 Chun, thiempuin Israel thla pungkhawm po po ta dingin inremna siem a ta, an thaw palh a ni lei le LALPA ta dinga meia thilhlân le an bawsietna aia suol thawina chu inhlàn a ni tàk leiin, ngaidam nîng an tih. 26 Israel thla pungkhawmhai po po le an kuoma um ram dang mihai khom ngaidam ni vong an tih, an rênga an thaw palh a ni leiin. 27 " 'Miin hre loa suol a thaw palh a ni chun, suol thawina dingin kèl la tuoi kum khata upa a hung inhlàn ding a nih. 28 Hre loa LALPA hmaa suol thawtu ta ding chun thiempuin inremna siempêk a ta, ngaidam nîng a tih. 29 Hre loa suol thawtu chungthua dàn chu Israel thla, a rama pieng le ram dang mi, anni laia chêng ta dingin a'n ang vong a nih. 30 Hre zing sia tu khom suol lui chu, a rama pieng le ram dang mi khom ni sien, LALPA hming hrilsetu a ni leiin, chu mi chu a mihai laia inthoka tuithlàr ding a nih. 31 Chu mi chun LALPA thu chu a hmusit leiin a thupêkhai chu a bawsiet a na, tuithlàr ngei ngei ding a nih, a suol maw chu phur a tih' ti rawh" a ta. 32 Thlalèra Israelhai an um lai chun mi pakhatin Sabat nia thing a lâk khawm lai an hmu a. 33 Thing a lâk khawm lai hmutuhai chun Mosie le Aron le pungkhawmhai hmaah an hung thuoi a. 34 Ieng anga thaw di'm a nih ti hriet a la ni hma chun ripah an khum a. 35 Chun, LALPAN Mosie kuomah, "Chu mi chu sukhlum ding a nih. Khawhnawmah mipuiin lungin an dêng hlum ding a nih" a ta. 36 LALPAN thu Mosie a pêk angin mipui chun khawhnawmah an thuoi a, lungin an dêng hlum a. 37 LALPA chun Mosie kuomah 38 "Israelhai chu hieng ang hin hril rawh: 'In thla la hung pei dinghai chen khomin, silfèn hmawr kuolin pebuk siem un la, pebuk tin chu pat dumpawla siem ding a nih. 39 Pebuk chu in en zâtin, LALPA thupêkhai chu hre zing a, zawm a, in lungril chàk zawng le mit lâk zawng tienga inhmang loa khawsa ding in nizie inhriet suoktir hlak a ti cheu. 40 Chuonga in thaw chun ka thupêkhai po po zawm nachâng hrieng in ta, in Pathien ta dingin invong thienghlim thei in tih. 41 Kei hi LALPA in Pathien, Aigupta rama inthoka in Pathien ni dinga thuoi suoktu cheu, LALPA in Pathien chu ka nih' tiin" a ta.

Numbers 16

1 Levi naupa Kohat, Kohat naupa Izar, Izar naupa Kora le Reuben pahnama mi Eliab naupahai pahni- Dathan le Abiram le Pelet naupa Ona hai chu insukngèngin, 2 Mosie lakah an hel a. Anni chu Israelhai laia vàntlâng kaunsila an mi thlang, thuoitu challang zahni sawmngain an lo thlop bok a. 3 Anni pawl po chu Mosie le Aron inkhingpui dingin an hung inthok a, an kuomah, "In insukngèng taluo! Mipuihai khom hi an thienghlim ve vong a nih. LALPA khom an kuomah a um. Chuong chu ni siin, ieng dinga LALPA mipui pungkhawmhai nèkin in insie chunghnung lem am a na?" an ta. 4 Chu chu Mosien a hang hriet chun a bokkhup a. 5 Kora le a pawlhai kuoma chun, "Zìngah zîngkâr leh tu am ama mi, tu am a thienghlim ti LALPAN hung sukchieng a tih. Ama mi chu ama hnaia hung dingin ko a ta, a bulah inumtir a tih. 6 Kora, nang le i hnung zuituhai thaw ding chu hi hi a nih: mei lâkna berbu hung chawi ro; 7 chu taka chun meiling sie unla, LALPA hmaah rimtui raw ro. LALPAN tu am a thlang chu hre el ei tih. Nangni Levi thlahai hi an nawm insukngèng taluo chu!" a ta. 8 Mosie chun Kora kuoma khom, "Nangni Levi thlahai, ngàithla ro. 9 Israelhai Pathien chun LALPA biekbûka rong bawl a, mipuihai hmaah ngîra an rong bawl dingin Israel mipuihai laia inthokin a ser hrang cheu a, a bulah a sie cheu hi in ta dingin huntawk in la ti naw rop a ni maw? 10 Nangni le in chipui Levihai chu ama bul hnaiah a'n umtir cheu leiin tuhin thiempu nina chen khom inchu thlâk in tum a ni maw? 11 Nang le i hnungzuituhai po po hi LALPA dodal zawnga inthuruol in nih. Aron hi tu am a na, hienga a chunga in chier hi?" a ta. 12 Mosie chun Eliaba nauhai, Dathan le Abiram chu a'n kotir a Anni chun, "Hung naw ning ungah. 13 Nenetui le khuoizu luongna rama inthoka thlalèra mi that vong dinga i mi thuoi khom hi huntawk i la ti naw a ni maw? Tu hin kan chungah insuklal i tum nawk nghal a! 14 Chu chauh chu a ni le, nenetui le khuoizu luongna ramah i mi thuoi naw a, lo le grêp huon hai kan rochung ding i mi pêk bok nawh. Hieng mihai mit hi i khel dokpèk vong tum a ni? Keini chu hung naw top kan tih" an ta. 15 Mosie lung chu a sen hle a, LALPA kuomah, "An thil inhlàn lo pom naw rawh. Anni laka inthokin ieng khom ka lâk nawh, sabengtung takngiel khom; tu poi khom ka tawk bok nawh" a ta. 16 Mosie chun Kora kuomah, "Nang le i hnung zuituhai chu Aron leh zìngah zîng tieng LALPA hmaah in hung inlang ding a nih. 17 Mi tinin mei lâkna berbu hung chawi seng ro, a rêngin zahni sawmnga a ni kha, chu taka chun rimtui phul unla, LALPA hmaah hung chawi ro. Nang le Aron khomin in mei lâkna chu in hung chawi ding a nih" a ta. 18 Mi tin chu mani mei lâkna seng chawiin, rimtui phulin, Intuokna Puon in kota chun Mosie le Aron leh an va ngîr a. 19 Intuokna Puon in kota anni khingtu Kora le a hnung zuituhai po po an hung inkhawm chun LALPA ropuina chu pungkhawm po po hmaah a hung inlang a. 20 LALPA chun Mosie le Aron kuomah, 21 "Pungkhawmhai laia inthok hin insie kieng ro, thawk le khata ka sukhlum vong theina dingin" a ta. 22 Mosie le Aron ruok chu an bokkhup a, "Aw Pathien, nang chu mihriem hringna po po hnàr i na, mi pakhat suolna leiin pungkhawm po po chungah i lung a sen el di'm a nih?" an ta. 23 Chu phing leh LALPA chun Mosie kuomah, 24 "Pungkhawmhai hi hril la, Kora le Dathan le Abiram hai umna riebûkhai chu inkiengsan vong raw hai se" a ta. 25 Mosie chu a tho a, Dathan le Abiram hai riebûk panin a fe a, Israel upahai chun an zui a. 26 Chun, pungkhawmhai kuoma chun, "Hieng misuolhai puon ina inthok hin suok vong ro. An thil ieng khom tawk naw ro, an suolna chun fen hmang ve hlauh rawi a ti cheu" tiin a hril a. 27 Chuongchun, Kora le Dathan le Abiram hai puon ina inthok chun an suok ta sup sup a. Dathan le Abiram khom chu an hung suok a, an puon in kotkhâra chun an nuhmeihai, an nauhai le nautehai leh chun an ngîr a. 28 Mosie chun, "Keima lungril puok suoka ka thaw a ni nawzie le hieng thil hi thaw dingin LALPAN a mi tir a nih ti hi thila hin hrieng in tih. 29 Hieng mihai hi mi thi dàn pangngaiin an thi a, mi po po thil tuok anga an chunga hung tlung ve a ni chun Pathienin a mi tir naw ning a tih. 30 Amiruokchu, LALPAN thil thar danglam tak thaw a, hnuoiin a bau ka a, anni le an thil nei po po lem zo a, a hringa Seola an lût ruok chun, hieng mihai hin LALPA an lo ngainêp a nih ti hrieng in tih" a ta. 31 Chuong thil chu a hril zo charin, an umna hnuoi chu a hung kak a, 32 hnuoi chun a bau a ka a, Kora le a sûngkuo le an thil nei po po chu a lem ta vong a. 33 Chuongchun, an thil nei po po le chun a hringin Seolah an lût a; hnuoi chun a bau a'n chip khum a, pungkhawmhai laia inthok chun an boral tah a nih. 34 An khêk ri an hrietin, an kawl vela Israelhai chun, "Eini khom hnuoiin mi lem ve palh a tih" tiin an tlân dar chum chum a. 35 Chun, LALPAA inthokin mei a hung suok a, rimtui inhlàntu mi zahni le sawmnga chu a kâng hlum ta vong a. 36 LALPA chun Mosie kuomah, 37 "Meilinghai kha hla deu hlekah thai dar la, thiempu Aron naupa Eleazar khan kâng hlumhai mei lâknahai kha rût khawm raw se, thil thienghlim an ni si a. 38 Anni ngei hringna chunga suolhai meilâkna a ni kha. Meilâknahai chu sut phek la, maichâm chung inkhum thuona dingin ser rawh; LALPA kuoma inhlàn ta sa an ni leiin thil thienghlim a hung ni tah. Hi hi Israelhai ta dinga inchikna nîng a tih" a ta. 39 Thiempu Eleazar chun kâng hluma um hai mei lâkna dâr berbu chu a lâk khawm a, maichâm inthuona dingin a phêkin a'n suttir a, 40 LALPAN Mosie a hril ang takin a thaw a. Hi hi Aron thlahai chauh naw chu LALPA hmaah rimtui raw dingin an hung ding a ni nawh ti inhriettirna ding a nih, chuong naw chun Kora le a hnung zuituhai ang hung nîng an tih. 41 A zînga chun, "LALPA mihai in that" tiin Israel mipuihai chu Mosie le Aron chungah an chier a. 42 Mosie le Aron khinga mipui inhawr khawmhaiin Intuokna Puon in tieng an nghat lai chun sûmin Intuokna Puon in chu a hung bawm a, LALPA ropuina a hung inlang a. 43 Mosie le Aron chu Intuokna Puon in kota chun an fe a. 44 LALPA chun Mosie kuomah, 45 "Thawk le khata ka sukhlum vong theina dingin pungkhawmhai laia inthok hin inthier hmang ro" a ta. Anni chu an bokkhup a. 46 Chun, Mosie chun Aron kuomah, "I mei lâkna kha chawi la, rimtui sie la, maichâma mei la bok la, inrang takin mipui tieng pan la, an ta dingin inremna siempêk rawh. LALPA lungsenna a hung suok a, hripui a'n lèng tan a nih" a ta. 47 Aron chun Mosie hril angin a thaw a, mipui lai chun a tlân lût a. Hripui chu a'n lèng tan tah a, sienkhom Aron chun rimtui rawin an ta dingin inremna a siempêk a. 48 A thi le a damhai inkâra chun a ngîr a, hripui chu a'n kieng ta a. 49 Chuong sa khom chun, Kora leia thihai bâkah mi sîngkhat le sângli le zasari chu hripui chun a that hman a nih. 50 Hripui chu a'n kieng ta leiin Aron chu Mosie kuomah Intuokna Puon in kota chun a kîr nawk a.

Numbers 17

1 LALPA chun Mosie kuomah, 2 "Israelhai inbiekpui la, an sûngkuoa pahnam tin thuoitua inthokin hmol sawmpahni la khawm la, hmola chun a neitu seng hming ziek rawh. 3 Levi hmolah Aron hming ziek la, pahnam tin ta dingin hmol pakhat pei a ni ding a nih. 4 Intuokna Puon ina ka'n tuokpuina hlak che Thuthlung Bawm hmaah hmolhai chu intung rawh. 5 Ka mi thlang hmol chu hung inder a ta, Israelhaiin an chier khum rop che hi keiin ka sukrè ding a nih" a ta. 6 Mosie chun Israelhai chu a'n biekpui a, an thuoituhai chun hmol sawmpahni an pêk a, hmol pakhat chu pahnam lu peia ding a na, Aron hmol khom chu an hmol lai chun an inthangtir a. 7 Mosie chun hmolhai chu Thuthlung Puon ina chun LALPA hmaah a sie a. 8 Zîngkar chun Mosie chu Thuthlung puon ina chun a va fe a, Levi sûngkuo aiawtu Aron hmol chu a lo inder chauh khom ni loin a kumum a, a pàr a, ruon a lo ra a. 9 LALPA kuoma inthokin hmolhai chu Israel pungkhawm po po hmaa chun Mosien a hung chawi suok a, an en a, mani hmol seng chu an làk nawk a. 10 LALPA chun Mosie kuomah, "Thuthlung Bawm hmaah Aron hmol kha va sie nawk rawh. Hieng helhmang nauhai hi ka chunga an chier sukrèna ding le an thi pha nawna dinga inhriettirtu dingin sie zing rawh" a ta. 11 LALPA thupêk angin Mosie chun a thaw a. 12 Israelhai chun Mosie kuomah, "Chuong a ni chun kan thi ngei ding a ni chu! Mi boral kan ni ta a, kan se letdèr an tah! 13 LALPA biekbûk hung hnai met hman an thi vong chun, kan thi ram dêr el awm de!" an ta.

Numbers 18

1 LALPA chun Aron kuomah, "Nang le i naupahai le Levi chihai hin hmun thienghlima bawsietna maw chu phur in ta, thiempuhai bawsietna maw ruok chu nang le i naupahai chauin phur an tih. 2 Nang le i naupahaiin Thuthlung Puon in hmaa rong in bawl phaa in bula khawsaa thangpuitu ding cheu in pi le pu hnama mi Levi chia mihai chu hung thuoi rawh. 3 I hnuoiah thok an ta, Puon ina mawphurna sin po po thawng an ta, sienkhom hmun thienghlima hmangruo le maichâm ruok chu an tawk ding a ni nawh, anni le nang in thi nawna dingin. 4 Nang leh inthlopin, Puon in enkol tieng sin po poah maw phur an ta, an sin chu anni ngeiin ching fel an ta, mi dang mi naranin an hung thangpui ding chèu a ni nawh. 5 "Israelhai chungah ka lungsen thut nawk ta nawna dingin nangin hmun thienghlim le maichâm enkol sinah maw i phur ding a nih. 6 Keima ngeiin i Levi chanpuihai hi Israelhai laia inthoka la suokin Intuokna Puon ina rong bawl dingin ka'n ser thienghlim a, i ta dinga ka thilthlawnpêk an nih. 7 Chun, maichâm le puonzâr sûng tienga thiempu rongbawlna chu nang le i naupahai chauin in thaw ding a nih. Thiempu nina sin hi a thlawna ka pêk che a nih. Mi dang tu khom hmun thienghlim hung hnaitu chu sukhlum nîng an tih" a ta. 8 Chun, LALPAN Aron a biek a, "Ngai ta, ka kuoma thilhlân an hung chawi po po enkoltuah kei ngeiin ka ruot che a; Israelhaiin thil inthieng an hung inhlàn po po chu nang le i naupahai kumkhuo chanpuola dingin ka pêk cheu. 9 Maichâma meia raw ve lo thilhlân thienghlim tak, bu le bâl thilhlân hai, suol thawina thilhlân hai le thiem naw inthawina thilhlân hai chu nang le i naupahai chanpuol a nih. 10 Thil thienghlim tak a na, fa ro; pasal poin an fâk ding a nih. Thil thienghlimah in ngai ding a nih. 11 "Hi khom hi in chanpuol a nih: thèn thilhlâna Israelhaiin thilpêk an hung inhlànhai laia sie hranga um po po chu nang le i naupahai le naunuhai chanpuol ni rop dingin ka pêk cheu a, in sûngkuoa inthieng nawna kai lo poin fa thei in tih. 12 "LALPA kuoma Israelhaiin an tharsuok ra hmasa tak an hung inhlàna inthoka oliv hriek tha tak, uoiin thar inhnik tak le bu le bâl tha tak hai po po chu ka pêk cheu. 13 A ram tharsuok hmasa tak LALPA kuoma an hung chawi po po chu in chan ding a nih. In sûngkuoa inthieng nawna kai lo poin fa thei in tih. 14 "Israel rama thil hrim hrim LALPA kuoma an hung inhlàn chu i chan a nih. 15 LALPA ta dinga an pêk, sul kêu hmasa tak taphot chu, mihriem ni sien, ran ni sien, i chan a nih. Amiruokchu, nau pasal pieng hmasa tak le ran thienghlim lo tè pieng hmasa tak phot chu i'n tlan ngei ding a nih. 16 Thla khat a tling pha intlanna man tuk zât, hmun thienghlima hmang tangkaruo shekel ngain i'n tlan ding a nih. Shekel khat chu gera sawmhni a nih. 17 Amiruokchu bawngchal le beramchal le kèlchal pieng hmasa tak chu ran thienghlim an ni leiin i'n tlan ding a ni nawh; an thisen chun maichâm thè la, an thau chu meia thilhlânah raw rawh, chu chu LALPA ta dinga rim inhnik a ni si a. 18 An sahai chu i chan ding a nih, thèn thilhlâna inhlàn, a irawm le a chang tieng malhai chu i chanpuol a ni ang bok khan. 19 Israelhaiin thil thienghlim LALPA kuoma an inhlânhai po po laia sie hrang po chu nang le i naupahai le i naunuhai chanpuol rop dingin ka pêk che. LALPA hmaa nang le i thlahai ta dinga kumkhuoa machi thluthlungg a nih, " a ta. 20 LALPA chun Aron kuomah, "An rama hin rochan nei naw ti nih; anni lai chan nei bok naw ti nih. Israelhai laia i chanvo le rochan chu keima hi ka nih. 21 "Intuokna Puon in an enkol sawl manah Israelhai sawmapakhat po po chu Levihai chan dingin ka pêk a nih. 22 Tuta inthok chu Israel thlahaiin Intuokna Puon in hi an hung hnai ding a ni ta nawh, chuong naw chun an suol maw phurin thi hlau rawi an tih. 23 Intuokna Puon ina rongbawl sin chu Levihaiin thaw tàng an ta, bawsietna maw iengkim chu phur tàng an tih. Hi hi in thlahai chen khoma ka kumkhaw thupêk chu a nih. Israelhaia inthokin rochan nei naw ni hai. 24 Chu aia an rochana ka ruotpêk chu LALPA kuoma Israelhai sawmapakhat inhlân po po chu a nih. Chu lei chun a nih, 'Israelhai lai rochan nei naw ni hai' ka lo ti hrim kha" a ta. 25 LALPA chun Mosie a biek a, 26 "Levihai inbiekpui la, an kuomah hieng hin hril rawh: 'In rochan dinga Israelhai sawmapakhat ka pêk cheu chu an laka inthoka in dong pha chun, chu sawmapakhata inthoka sawmapakhat chu LALPA ta dingin in inhlàn ding a nih. 27 In thil inhlàn chu hrizawla bu thar hmasa tak le uoiin sawrna khura uoiin suok thar hmasa tak anga ngai nîng a tih. 28 Chuong anga Israelhai laka sawmapakhat in dong po poa mi chu LALPA ta dingin in inhlàn ve pei ding a nih. Chu thilhlàna LALPA chanpuol po chu Aron in pêk ding a nih. 29 In thil dong laia a tha tak le thienghlim tak pei chu LALPA chan dingin inhlàn ro'. 30 " 'Chun, Levihai kuomah hieng hin hril bok rawh: In thil nei laia a tha tak in inhlàn chu hrizawl le uoiin sawrna khura inthoka hung suok anga ngai nîng a tih' tiin. 31 A dang po chu Intuokna Puon in enkol sin in thaw hlaw a na, in sûnghai leh in nuomna naah fa thei in tih. 32 A tha tak LALPA kuomah in inhlàn tah chun hieng thila hin thiem naw chang ngai naw ti niu a, Israelhai thilhlàn thienghlim chu sukporche ngai nawng in ta, thi naw bok in tih" tiin.

Numbers 19

1 LALPA chun Mosie le Aron a biek a, 2 "Hi hi LALPA thupêk anga dânin a mamaw chu a nih: bawng la sen, hmèl hem lo le la sor ngai der lo chu i kuoma hung kei dingin Israelhai hril rawh. 3 Bawng chu thiempu Eleazar kutah pe la, riebûk puo tieng inkeitir sien la, chu taka chun ama hmu ngeiah that raw hai se. 4 Thiempu Eleazar chun a kut pàr chang tieng bawng thisena chun zuk phûm a ta, Intuokna Puon in hma tieng nghain voi sari a thè ding a nih. 5 A hmu lai ngeiin bawng la chu a vun hai, a taksa hai, a thisen hai le a ek hai pumin raw vong an tih. 6 Thiempu chun sidar thing dâm, hussop dâm le sahmul senlâr dâm chawi a ta, bawng la sen an rawna meia chun buk a tih. 7 Chu zoah thiempu chun a silfènhai sawpin tui insil fai a ta, riebûkah hung kîr thei tâng a ta, amiruokchu zân tieng chen inthieng nawna kai a tih. 8 A rawtu chun a silfènhai sawpin tui insil a ta, zân tieng chen inthieng nawna kai a tih. 9 "Inthieng nawna kai lo mi pakhatin bawng la sen vâp chu inthiel a ta, khawhnawm hmun faiah a pei ding a nih. Hi meivàp hi tuia inthienna an nei phaa hmang dingin Israel thlahai chun an sie tha ding a nih; chu chu suol sukfaina a nih. 10 Chun, bawng la sen vâp inkhawmtu chun a silfènhai sawp a ta, zân tieng chen inthieng nawna kai a tih. Hi hi Israel thlahai le anni laia um ram dang mihai ta dinga kumkhaw dàn ding chu a nih. 11 "Tu ruong khom ni sien, mithi ruong tawk taphot chu ni sari sûng porche kai a tih. 12 A ni thumna le ni sarinaah inthienna tuiin inthèng a ta, chu chun hung inthieng tâng a tih. Ni thumna le ni sarinaah a'n thien naw chun porche kai zing a tih. 13 Tu khomin tu ruong khom a them a, a'n thien si naw chun LALPA biekbûk a sukporche a nih. Chuong ang mi chu Israel mihai laia inthoka tuithlàr ding a nih. Inthienna tui chu thè khum a ni naw leiin mi porche a na, a porchèna chu amaah a kop zing a nih. 14 "Puon inah mi a lo thi chun, hi hi in thaw dàn ding chu a nih: tu khom puon ina hung lût le chu taka um po po chu ni sari sûng porche kai an tih. 15 Chun, bûr le bèl, sìn nei lo po po khom porche kai vong bok a tih. 16 "Tuola kawlhnâma mi that ruong amanih, thi pangngaia thi ruong amanih le mihriem ru amanih le thlàn amanih tawk rêng rèng chu ni sari sûng porche kai a tih. 17 "Chuonga porchèna kai chu hieng anga inthien fai ding a nih: Bêl ring rêkah tui thar thun a, suol thawina bawng la vâp kha bêla tuia chun phul ding a nih. 18 Mi inthieng pakhatin hussop lain tuia chun phûm sien, puon in le a sûnga hmangruo po po le a sûnga umhai chu thè raw se. Mihriem rû amanih, thlân amanih, mi an that amanih le thi pangngaia thi amanih ruong tawkhai chu thè khum bok raw se. 19 Mi inthieng chun mi porche chu a ni thumna le ni sarinaah tui chu thè khum a ta, a ni sarina chun hung inthieng a tih. A silfènhai sawp a ta, insil a ta, zân tieng chun hung inthieng tâng a tih. 20 Sienkhom, mi porche, inthien si lo chun, LALPA hmun thienghlim a sukporche leiin a mihai laia inthoka tuithlàr ding a nih. Inthienna tui chu thè khum a ni naw leiin a porche a nih. 21 Hi hi an ta dinga kumkhaw dàn ding chu a nih. "Inthienna tui thètu khom chun a silfènhai a sawp ding a nih. Chun, inthienna tui tawk taphot chu zân tieng chen porche kai a tih. 22 Mi porchein a tawk taphot chu a hung porche a, chu porche tawk taphot chu zân tieng chen porchèng a tih" tiin.

Numbers 20

1 Israel thlahai po po chu a thla khatnaa chun Zin thlaler an hung tlung a, Kadesh-ah umhmun an khuor a. Chu taka chun Miriam a thi a, an phùm a. 2 Dawn ding tui a um naw leiin mipui pungkhawm chun Mosie le Aron chu an hung inhuol a. 3 Mipuihai chun, "LALPA hmaa kan unauhai an thi lai khan Pathienin mi lo sukhlum ve law law sien ni ding bah! 4 Ieng leia LALPA mihai hi an ran ruol le thlalèra thi el dinga i thuoi am a na? 5 Ieng leia Aigupta rama inthok khan hieng ang ram tha lo taka hin i mi thuoi lût tawl am a na? Bu le bâl, theichang, grêp le theibufai hai hlak hmu ding um hrim hrim lo, tui dawn ding hlek khom um bok si lo!" tiin Mosie chu an suosal hrep a. 6 Mosie le Aron chu mipui laia inthokin an suok a, Intuokna Puon in kota chun an fe a, an bokkhup a, an kuomah LALPA ropuina chu a hung inlang a. 7 LALPA chun Mosie kuomah, 8 "I hmol chawi la, nang le i unaupa Aronin mipui ko khawm ro. An mit hmu ngèiah saw lungpui son tui insuo dingin hril rawh. Pungkhawmhai le an ran ruolhai dawn ding saw lungpuia inthok son tui i lâk suok ding a nih" a ta. 9 Chuongchun, thu pèka a um angin, Mosie chun a hmol chu LALPA hmaa inthokin a lâk suok a. 10 Ama le Aron chun mipui chu lungpui bula chun an ko khawm a. Mosie chun an kuomah, "Helhmanghai, ngai thla ro, hi lungpuia inthok hin tui kan hung lâk suokpèk ding cheu am a ni?" a ta. 11 Chun, Mosie chun a bân a hlàng a, a hmolin lung chu voi hnih a vuok a, tui a hung inkhaw suok huou huou a, pungkhawmhai le an ranhai chun an tlàn a. 12 LALPA ruok chun Mosie le Aron kuomah, "In mi ring zo tawk naw a, ka thienghlimna phua Israelhai mit hmua in mi chawimawi naw leiin, hieng pungkhawmhai hi ka pêk rama chun thuoi naw ti niu" a ta. 13 Hi hi a nih Meribah tui, Israelhaiin LALPA inhalpui a, anni laia a thienghlimzie a hung tàrlangna hmun chu. 14 Mosie chun Kadesh-a inthokin Edom lal kuomah palai tirin thu a thon a: "I unau Israelhai chunga harsatna hung tlung po po chu in lo hriet vong ta thei. 15 Kan pi le puhai chu Aigupta ramah an tla thla a, chu taka chun kum tam tak kan khawsa a. Keini le kan thlatuhai chu Aigupta mihaiin an mi soisak rimsi hle a. 16 Amiruokchu LALPA kan ko a, a mi ngàithlàk a, a vàntirko a hung tir a, Aigupta rama inthokin a mi thuoi suok tah a nih. Tu hin in ram bul el, Kadesh-ah kan um a. 17 Lunginsiet takin in ram hraw tlang mi phalpèk ro. Lo amanih, grêp huon amanih hraw nawng kan ta, in tuikhura tui dawn bok nawng kan tih. Lal lamlienah fèng kan ta, in ram kan fe thleng hma khat chu voi tieng amanih chang tieng amanih pet nawng kan tih" tiin. 18 Nisienlakhom, Edom lal chun, "Fe thleng thei naw ti niu; in fe thleng tum chun nangni bei dingin kawlhnâm leh hung inthok kan tih" tiin a don a. 19 Israelhai chun, "Lamlienpui chauh hrawng kan ta, keini le kan ranhaiin in tui an dawn chun a man pe vong kan ti cheu. Kea hraw thleng chau a nih kan hni, thil dang ieng khom kan hni sa nawh" an ta. 20 Ama ruok chun, "Hraw thleng lo ding" a ti tlat a. Edom chu a sipai tam tak le hrât tak leh anni bei ding chun a hung inthok a. 21 Chuonga Edomin an ram hraw thleng a phal naw lei chun Israelhai chun an kîrsan a. 22 Israel thla, mipui po po chun Kadesh suoksanin Hor tlâng an tlung a. 23 Edom ramri bul Hor tlânga chun LALPAN Mosie a biek a, 24 "Aron hi a chipuihai kuomah thuoi a ni ding a ni tah. In pahnia Meriba tuikhura ka thupêk laka in hel leiin Israelhai ka pêk rama chun lût thei naw nih. 25 Aron le a naupa Eleazar ko la, Hor tlângah fepui rawh. 26 Aron silfèn kha hlippèk la, a naupa Eleazar inhâktir rawh, Aron chu a chipuihai kuoma thuoi a ni ta ding a ni si a; tlânga chun thing a tih" a ta. 27 LALPA thupêk ang takin Mosie chun a thaw a. Mipui hmuah Hor tlâng chu an kai a. 28 Mosie chun Aron thiempu silfèn chu a hlippèk a, a naupa Eleazar chu a'n hâktir a. Aron chu tlâng sïpa chun a thi a, Mosie le Eleazar chu an hung kîr nawk a. 29 Aron thi thu mipuiin an hriet chun Israel sûngkuo po poin ni sawmthum an sùn a.

Numbers 21

1 Kanan mi Arad lal, Negev-a um chun Israelhai chu Atarim panin an hung ti a hrietin a lo bei a, a then a lo man a. 2 Israelhai chun LALPA kuomah "Hienghai hi kan kutah i mi pêk phot chun, an khawpuihai hi sukram vong kan tih" tiin thu an intiem a. 3 Israelhai hnìna chu LALPAN a ngàithlàk a, Kanan mihai chu an kutah a pêk a, anni le an khuohai chu an sukram vong a, chu hmun hminga chun Hormai an inbûk a. 4 Hor tlânga inthok chun Edom ram hêlin Tuipui Sen tieng an kîr nawk a, a lam chu a'n kuol leiin mipuiin an nghok ta hle a. 5 Mipui chu Pathien le Mosie lakah an chier a, "Thlalèra thi dingin ieng dinga Aigupta rama inthokin i mi thuoi suok am a na? Bei hlak um lo! Tui khom um bok lo! Hi bu luoksuokum vet khom hi kan hnàm zo tah!" an ta. 6 Chu phing leh, LALPAN rûl, mi chukna chihai chu mipuihai lai chun a tir a, Israelhai chu an chuk hlum teu a. 7 Mipuihai chu Mosie kuomah an hung a, "LALPA le nangma kal zawnga kan lo tong kha thil suol kan thaw a nih. Rûl mi la hmangpèk dingin LALPA hni rawh" an ta, Mosie chun mipui ta dingin a hnipèk a. 8 LALPA chun Mosie kuomah, "Rûl lim siem la, ban lêrah khai rawh, rûl chuk tu khomin a en chun dam a tih" a ta. 9 Chuongchun, Mosien dâr rûl a siem a, ban lêrah a khai a, rûl chuk tu khom dar rûl en taphot chu an dam pei a. 10 Israel thlahai chu an fe pei a, Obot-ah umhmun an khuor a. 11 Obot-a inthok chun an suok nawk a, ni suokna tieng, Moab thlaler bul, Iye Abarim-a chun umhmun an khuor nawk a. 12 Chu taka inthoka fe peiin Zered Ruom-ah umhmun an khuor a. 13 Chu taka inthok chun an suok nawk a, Arnon vadung kamah umhmun an khuor a, chu chu Amor ram chena inzar, thlalèr hmora um a nih. Arnon vadung hi Moab ramria um, Moab le Amorhai inkâra ramri vadung a nih. 14 Chu lei chun a nih LALPA Indona Bu-a chun, "Sufaah Waheb ruom inthûk a um, Arnon vadung ruom le chun, 15 A ruom pangpèr insawn thla chun, Moab ramria Ar khuo a sun"tiin a'n ziek. 16 Chu taka inthok chun Beer panin an fe pei a. Hi hmun hi a nih LALPAN Mosie kuoma, "Mipuihai ko khawm la, tui ka pêk ding a nih" a tina hmun chu. 17 Chuongchun, Israelhai chun hi hla hi an sak a:"Aw tuikhur, hung inchik suok la, Zâiin awi kan ti che; 18 Lalhai cho suok tuikhur chu, Mipui thuoituhai ngeiin, Lal hmol le funghrola an cho"tiin. Thlalèra inthok chun Matana an pan a, 19 Matanaa inthokin Nahaliel, Nahaliela inthokin Bamot, 20 Bamot-a inthokin thlaler inlangna Pisga tlâng hnuoia um Moab phaizawl chu an tlung a. 21 Israelhai chun Amor lal Sihon kuomah, 22 "I ram mi'n hraw tlangtir raw khai. Lo amanih grep huon amanih hraw nawng kan ta, i tuikhura tui dawn bok nawng kan tih. I ram kan fe thleng hma khat chun lal lamlienah fe pei kan tih" tiin mi an tir a. 23 Sienkhom Sihon chun Israelhai hraw thleng chu a phalpèk nawh. A sipai po po a khawm a, Israelhai bei ding chun thlalerah a tir a, Jahaz an tlung chun Israelhai leh an inbei a. 24 Israelhai chun kawlhnâm leh an lo bei a, a ram chu Arnon vadunga inthoka Jabok vadung chen, kula inhuon Amon mihai le an ramri bul chen chun an lâk vong a. 25 Israelhai chun Amor mihai khuo po po, Hesbon le a se vela khuo po po khom chu an lâk vong bok a, an hluo a. 26 Hesbon chu Amor lal Sihon khawpui a nih. Ama chu kha hmaa Moab lal do a, Arnon vadung chena a ram po po lapèktu a nih. 27 Hieng ang hin hlain an lo phuok a, "Hesbonah hung unla, Sihon lal khawpui chu, Indin thar nawk ei tiu. 28 Hesbon a'nthok mei a suok, Sihon khawpuia mei chu, Moab-a Ar khuo a lem zo, Arnon hmun sànga lênghai. 29 Aw Moab, i chung a pik, Khemo nauhaij, in se let dèr!In pathien chun vâkvai dingin, In nau pasalhai a siem a, In nau nuhmeihai khom chu, Amor lal Sihon kuomahSala man din a pêk suok. 30 Sienkhom keinin kan tukdol, Hesbon kan suksiet dêr a, Dibon chen kan sukram a, Nofa chen kan sukchimit, Medebe chen khom thang sain"tiin. 31 Chuong ang chun Amor-hai rama chun Israelhai chu an um a. 32 Chun, Mosie chun Jazer khuo enthla dingin mi a tir a, chu khuo chu an làk a, chu taka um Amorhai chu an hnot suok a. 33 Chu zoah an kîr a, Basan tieng an pan tung a, Basan lal Oga chu a sipai po po leh Edrei hmunah anni chu lo bei dingin a hung inthok suok a. 34 LALPA chun Mosie kuomah, "Ti dêr naw rawh. Ama le a sipaihai le a ram chu i kutah ka pêk tah. Hesbona Amor lal Sihon chunga i thaw angin a chunga khom thaw ve rawh" a ta. 35 Chuongchun, ama le a nauhai le a sipaihai chu tu khom hla nei dêr loin an that fai vong a, a ram chu an hluopèk tah a.

Numbers 22

1 Chuongchun, Israelhai chu fe peiin Jeriko zawn, Jordan suo tieng râl Moab phairuoma chun umhmun an khuor a. 2 Chun, Zipor naupa Balakin Amor mihai chunga Israelhai thilthaw po po chu a lo hriet a. 3 Israelhai chu an tam si leiin Moab mihai chu an thlabâr hle a, a ram pumin an mangang takzet a. 4 Chuongchun, Moab-hai chun Midian upahai kuomah, "Hi honpui hin bawngin hlo an pet zo angin ei sevela mi po po hi an pet zo vong ding a nih" an ta. Chuong hun laia Moab lal chu Zipor naupa Balak a nih. 5 Ama chun Eufretis Tuipui kama a pi le puhai ram Pethora um, Beor naupa Balaam kuoma chun mi tirin hieng ang hin thu a'n cha a: "Aiguptaa inthoka hung suok mipuiin a ram an hung dàp sip a, ka depah an um a. 6 Ka ngam ruol an ni bok si naw leiin tu hin nang hung la, hnea a rama inthoka ka hnot suok tawl theina dingin, tongsie hung inphur tawl rawh. Nangin mal i sawmhai chu malsawmin an um a, tongsie i'n phurhai chu tongsie phurin an um ti ka hriet si a" tiin. 7 Moab upahai le Midian upahai chu aien man ding chawiin an suok a, Balaam kuom chu an va tlung a, Balak thucha chu an hril a. 8 Ama chun an kuomah, "Voizàn chu hi taka hin riek phot unla, LALPAN a mi hril dàn ang angin in kuomah thu hung inhriettir nawk ka ti cheu" a ta, chuongchun Moab milienhai chu a inah chun an riek a. 9 Balaam kuoma chun Pathien a hung a, "Hieng mihai hi tu hai am an na?" a ta. 10 Balaam chun, "Moab lal, Zipor naupa Balakin thu a hung incha a, 'Aiguptaa inthoka hung suok mipuiin a ram an dàp sip el a, ka depah an um a. 11 Ka ngam ruol an ni bok si naw leiin tu hin nang hung la, hnea a rama inthoka ka hnot suok tawl theina dingin, tongsie hung inphur tawl rawh' a ti a nih" a ta. 12 Sienkhom Pathien chun Balaam kuomah, "Anni chu zui naw rawh. Chuonghai chu tongsie i'n phur ding a ni nawh; mal ka sawmhai an nih" a ta. 13 Zîng kàr a hung tho chun Balaamin Moab mi lienhai kuomah, "In ram tieng kîr nawk ta ro, nangni le fe chu LALPAN a remti nawh" a ta. 14 Chuongchun, Maob mi lienhai chu Balak kuom tieng an kîr nawk a, "Balaamin a mi zui nuom nawh" tiin an hril a. 15 Balak chun mi lien tam lem, a hmaa fehai neka ropui lem a tir nawk a. 16 Anni chu Balaam kuomah an hung a, "Zipor naupa Balakin hieng ang hin thu a mi'n cha: Ka kuoma i hung hi ieng khomin dâl naw raw se; 17 lawmman tam tak pèng ka ti che a, i hril ang ang chu thawng ka tih. Hung la, hieng mihai hi ka ta dingin tongsie hung inphur hràm rawh khai' tiin" an ta. 18 Sienkhom Balaam chun an kuomah, "Balakin tangkaruo le rangkachaka sip a lal in mi pe ding khom ni sien, LALPA Pathien thupèk bàk chu ieng khom ka thaw thei nawh. 19 A hung hmasahai ang bok khan voi zàn ka inah riek unla, LALPAN thil dang iem hril ding a mi nei la nghâk ka tih" a ta. 20 Zàna chun Balaam kuomah Pathien a hung a, "Hieng mihai hi nangma koa hung an ni leiin zui tawl la, sienkhom ka hril che chauh thaw rawh" a ta. 21 Chuongchun zîngkàr a tho chun a sabengtung a buotsai a, Moab mi lienhai chu a zui ta a. 22 A fe phing leh Pathien lung a sen a, lo dang dingin LALPA vântirko chu lampuiah a lo ngîr a. Balaam chu a sabengtung chungah a chuong a, a siehlaw pahniin an zui a. 23 Kawlhnâm chawia lampuia LALPA vântirko ngîr sabengtungin a hmu chun lam sirah a pêt a, ram hnuoiah a fe a, Balaam chun lampuia khal kai nawk tumin sabengtung chu a vuok a. 24 Chun, LALPA vântirko chu grêp huon pal le pal inkâr inchêp taka hin a lo ngîr nawk a. 25 Sabengtung chun LALPA vântirko chu a hmu a, pal chu a va hneng a, Balaam ke chu pal leh a hneng de a, chuongchun a vuok nawk ta a. 26 LALPA vântirko chu a khêl deuah an tawl son a, hmun inchêp lai tak, chang tieng voi tieng pêtna ding a um nawna hmuna chun a lo ngîr a. 27 Sabengtung chun LALPA vântirko chu a hmu a, a bok a, Balaam lungsen chun a hmolin a zei zot zot a. 28 Chuphing leh, LALPAN sabengtung bâu chu a hong a, Balaam kuomah, "Ieng am i chungah ka thaw suol a, voi thum zet i mi vuok el chu?" a ta. 29 Balaam chun sabengtung kuomah, "Mi invêt angin i mi soisak a ni hi! Ka kuta kawlhnâm chawi ni lang chu tu hin zuk that nghal ka ti che" a ta. 30 Sabengtung chun, "Voisun ni chena nuom nuoma i chuongna hlak i sabengtung ka ni naw am a ni? Hieng hi i chungah thaw ka chîng hlak am a ni?" a ta, ama chun, "Chîng ngai lo e, " a ta. 31 Chu phing leh LALPAN Balaam mit chu a hongpèk a, lampuia kawlhnâm chawia ngìr LALPA vântirko chu a hmu a, chuongchun a kûn a, hnuoi sikin a bokkhup a. 32 LALPA vântirko chun a kuomah, "Ieng dinga voi thum top el i sabengtung i vuok? I fena hi ka nâk kal zawng a ni leiin dang ding chein ka hung a nih. 33 Sabengtung chun a mi hmu a, ka hmaa inthokin voi thum a pêt a ni kha. Pêt naw sien chu that tàng ka ti che a, sabengtung ruok chu hlàng ka tih, " a ta. 34 Balaam chun LALPA vântirko kuomah, "Ka lo suol a nih. Mi dang dingin lamah i ngîr ti ka hriet naw lei a nih. I lawm naw zawng a ni chun kîr nawk el ka tih" a ta. 35 LALPA vântirko chun Balaam kuomah, "Hieng mihai hi zui la, amiruokchu ka hril che chauh hril suok rawh, " a ta. Chuongchun, Balaam chun Balak mi lienhai chu a zui ta a. 36 Balaam a hung ti Balakin a hriet chun an ramri hmawr, Arnon vadung kama Moab khuoa chun hmuok dingin a'n thok suok a. 37 Balak chun Balaam kuomah, "Inhmaw takin ka ko che an naw maw? Ieng dinga i hung el naw? Lawmman pe thei lo ding che am ka ni?" a ta. 38 Balaam chun, "Hi, tu hin ka hung annawm. Ka nuom nuom hril thei am ka ni? LALPAN ka baua a sie chauh ka hril ding a nih" a ta. 39 Chuongchun, Balaam chu Balak leh Kiriat Huzot-ah an fe a. 40 Balak chu bawng le beramin a'n thawi a, Balaam le a kuoma umhai chu a then a pêk a. 41 A zînga chun Balakin Balaam chu Bamot Baal-ah a hang fepui a, chutaka inthok chun Israel mihai a then chu a zuk hmu phàk a.

Numbers 23

1 Balaam chun Balak kuomah, "Hi taka hin maichâm pasari mi bawlpèk la, bawngchal pasari le beramchal pasari mi buotsaipèk bok rawh" a ta. 2 Balak chun Balaam hril ang chun a thaw a, an pahni chun maichâm pakhat peiah bawngchal le beramchal an inhlàn a. 3 Balaam chun Balak kuomah, "I thilhlân bula hin lo ngîr zing la, kei chu va fe hrang ka ta, mi be dingin LALPA a hung el thei a, ka kuoma a puong taphot chu hril ka ti che" a ta. Chuongchun, tlâng kol vungah a hang fe a. 4 Pathienin Balaam chu a lo inhmupui a. Balaam chun, "Maichâm pasari ka buotsai a, maichâm tinah bawngchal le beramchal ka'n hlàn a nih, " a ta. 5 LALPA chun Balaam bauah thu a sie a, a kuomah, "Kîr nawk ta la, hi thucha hi Balak kuomah hril rawh, " a ta. 6 Chuongchun a kîr nawk a, maichâm sîra chun ama le Moab mi lienhai po po chu an lo ngîr a. 7 Balaam chun hrillawkna thu chu a puong suok ta a:Aramk a'nthok Balakin a mi hung thuoi, Sak tlâng rama Moab lal chun; 'Hung la, Jakob sûngkuohai chuKa ta din tongsie inphur la, Israel chu hnawl hmang rawh' tiin. 8 LALPAN tongsie a'n phur naw chu, Ieng tin am inphur thei ka ta?LALPAN a hnawl si lo hai chu, Ieng tin am hnawl thei ka ta? 9 Lung tolawta inthokin ka hmu phâk a, Tlâng sîpa inthokin ka thlîr tawl:A hlanga um ding hnam an na, Hnam dang ang an ni ve nawh; 10 Jakob thla pilvut zât hiel chu, Tuin am tiem zo thei an ta?Israelhai hmun lia thea hmun khat khom, Tu in am inchik zo sèng an ta?Mi fel thiin mi'n thitir rawh, An tawpna anga tawp ve ka nuom!"tiin. 11 Balak chun Balaam kuomah, "I mi thaw dàn hi ieng tizie am an ta a? Ka hmèlmahai tongsie inphur dingin ka hung inthuoitir che a, chuong chu thaw ta nèkin mal i sawm ta hlauh lem a!" a ta. 12 Balaam chun, "LALPAN ka baua thu a sie chu ka hril suok naw dim a ni?" tiin a don a. 13 Chun, Balak chun a kuomah, "Hmun dangah fêng ei ta, chu taka inthok chun hmu thei tawl i tih. An umna chin po po hmu thei i ta, an rêng chun hmu vong kher naw ti nih. Chu taka inthok chun tongsie i mi'n phurpêk ding a nih" a ta. 14 Chuongchun, Pisga tlâng sîpa khaw thlîrna Zofima chun a thuoi a, chu taka chun maichâm pasari a siem a, maichâm tina chun bawngchal le beramchal a'n hlàn seng a. 15 Balaam chun Balak kuomah, "Saw laia LALPA ka va biek karin i thilhlân bula hin lo um rawh" a ta. 16 LALPA chun Balaam chu a'n hmupui a, a bauah thu a sie a, "Kîr nawk ta la, Balak kuomah hi thucha hi hril rawh, " a ta. 17 Chuongchun a kîr nawk a, maichâm sìra chun ama le Moab mi lienhai po po chu an lo ngîr a. Balak chun, "LALPA chun iem a hril che leh?" a ta. 18 Chuongchun, a hrillawkna chu a puong ta a:"Balak, tho la, ngàithla rawh, Zipor naupa, ka thu ngai rawh; 19 Pathien chu mihriem ang a, Khêl hril hlak mi a ni nawh; Mihriem nauhai anga lungril, Thlâk el hlak mi a ni bok nawh. Hril sia thaw ngai lo a ni?Thu tiem hlen ngai lo a ni? 20 Malsawmpèk di'n thu ka hmu a, Mal a sawm ta sa hrim an na, Keiin chu chu ka sût thei nawh. 21 Jakob ta din sietna ka hmu nawh, Israel ta din buoina ka hmu nawh; LALPA an Pathienin a umpui a, Anni lai Lal rawl an ri zing; 22 Pathienin Aiguptaa inthokin, Anni chu a hung thuoi suok a, Ramsiel anga thâ hrât an nih; 23 Jakob chu dawi hne ruol lo, Israel chu ái ieng ang khoma, Hang ngam ruol ding a ni nawh. Jakob le Israel chungthua chu, "Pathienin a va thawpek nasa de!", Ti hi mihai hril tak nîng a tih. 24 Keipui angin mipui an tho, Keichal angin an hung tho suok; An sa se a fâk zo hma chun, A thisen a liek kawl hma chun, Chawlin bok nawk ngai naw nih"tiin. 25 Balak chun Balaam kuomah, "Tongsie i'n phur dêr naw a ni khomin mal chu a te hlek khom sawmpèk lul naw rawh" a ta. 26 Balaam chun, "LALPA hril ang ang chu ka thaw ding a nih ti ka hril ta che a ni naw am a ni?" tiin a don a. 27 Chun, Balak chun Balaam kuomah, "Hung rawh, hmun dangah thuoi nawk ka ti che, chu taka inthok chun tongsie i mi'n phurpèk Pathienin a remti hlauh tàkah" a ta. 28 Balak chun thlaler zuk thlir theina tlâng Peor tlâng sîpa chun Balaam chu a thuoi a. 29 Balaam chun, "Maichâm pasari mi siempêk la, bawngchal pasari le beramchal pasari mi buotsaipêk bok rawh" a ta. 30 Balak chun Balaam ti ang chun a thaw a, maichâm tina chun bawngchal pakhat le beramchal pakhat a'n hlàn a.

Numbers 24

1 Israelhai malsawmpèk chu LALPA lawmzawng a nih ti Balaamin a hriet chun kha hma ang khan aien dingin a fe hrang nuom ta naw a, thlaler tieng a ngha a, 2 a pahnam a pahnama riebûk khuor Israelhai chu a hmu a. Pathien thlarau chu a chungah a hung tlung a, 3 hi thu hi a hril ta a:"Beor naupa Balaam thu, Mita chieng taka hmu theitu thu, 4 Pathien thu hretu thu, Iengkimthawthei inlàrna hmutu, A hmaa bokkhup a, A mit hung inhong tah thu chu: 5 "Aw Jakob, i puon inhai a mawiin, Aw Israel, i chêngna hmunhai a mawi! 6 "Ruom angin an inzâr duoi a, Va kama huon ang a na, LALPA phun aloi thing ang, Va kama sidar thing ang a nih. 7 Vân ruotui dong thàng a ta, Ram hnawngah thlai chi thlâk an tih. "An lal chu Agagl nêkin ropui a ta, An lalram chu hmingthang a tih. 8 "Aigupta rama inthokin, Pathienin a hung thuoi suok a, Ramsiel anga tha hrât an nih. Dotu hnam danghai dol hmangin, An ruhai vaw hawp an ta, An thalin kâp tlang an tih. 9 Keichal anga bok inzielin, Keipui angin bok zâl an ta, Tu'n am kei tho ngam an ta?Nangni malsawmtu cheu chu, Malsawmin um hai sien la, Tongsie inphurtu cheu chu, Tongsie phurin um raw se"tiin. 10 Chu zet chun Balaam chunga chun Balak lungsenna chu a chok a. A kut chu nuoiin, "Ka hmèlmahai tongsie inphur dingin ka'n chà suok che a, voi thum rau mal i sawm ta a. 11 Tu hin suok nghal la, i in tieng fe dai rawh. Lawmman tam tak pêk che ka tum vei leh LALPAN i lawmman hmu ding a dâl si che a" a ta. 12 Balaam chun Balak kuomah, "I mi hung tirhai kha ka lo hril a ni naw am a ni? 13 'Balakin tangkaruo le rangkachaka sip a lal in khom mi pe ding ni sien, LALPAN thu a mi pêk bâk chu keima chun ieng khom, a sie a tha, ka thaw thei nawh, LALPA mi hril chauh ka puong thei a nih' ti ka lo hril tawl kha. 14 Tu hin ka mihai kuom tieng ka kîr nawk ding a ni ta a, sienkhom la hung vak rawh, hieng mihai hin tuta hnunga i mihai chunga an thaw dàn ding la hang hril ka ti che" a ta. 15 Chuongchun, Balaam chun hieng thu hi a hril a:"Beor naupa Balaam thu, Mita chieng taka hmu theitu thu, 16 Pathien thuhai hretu thu, Iengkimthawthei inlàrna hmutu, A hmaa bokkhup a, A mit hung inhong tah thu chu: 17 "La hung ding mi chu ka hmu a, La hnai si lo mi chu ka hmuh. Jakob a'nthok arasi hung suok a ta, Israel a'nthokin lal hmol suok a tih. Moab lu bûr chu vaw hawp a ta, Setha nauhai lu ru po po khom. 18 Edom chu tukdol a ta, A hmelma Seir chu hnêng a tih. Israel ruok chu hrât pei a tih. 19 Jakob a'nthok roreltu hung a ta, Khuoa thi mahlahai nuoi bo a tih"tiin. 20 Chu zoah Balaam chun Amalek a hmu a, a thu chu a puong a:"Amalek chu hnam hmasa tak a na, Sienkhom a tawpah hung sieng a tih"tiin. 21 Chu zoah Ken mihai a hmu a, a thu chu a puong a:"I chêngna hmun a him, Lungpuiah bu i sep; 22 Sienkhom Kenhai chu suksiet nîng in ta, Asuria-haiin salah thuoi an ti cheu"tiin. 23 Chu zoah hi thu hi a hril nawk a:"Chuong chu Pathienin a thaw pha, Tu am dam zo tâng an ta? 24 Kittim a'nthok long hung an ta, Asur le Eber tukdol an ta, Anni khom tlu se vong an tih"tiin. 25 Chun, Balaam chu a tho a, a in tieng a kîr nawk a, Balak khom chun a fena ding tieng a pan ve ta a.

Numbers 25

1 Sitim ruoma Israelhai an um laiin chu taka um Moab nuhmeihai chu an pawl a. 2 Chuong nuhmeihai chun an pathien kuoma inthawinaa dâm an fiel a, inthawina sa chu fain an pathien hmaa chun an kûn ve a. 3 Peor-a an Baal chu Israelhai khomin an biek ve tah leiin an chungah LALPA lungsen chu a so hle a. 4 LALPA chun Mosie kuomah, "Hieng hotuhai po po hi thuoi tawl la, LALPA lungsenna tibaium tak el chu Israelhai chunga inthoka a'n kieng theina dingin sûn varah LALPA hmaah sukhlum vong rawh" a ta. 5 Mosie chun Israel rorêltuhai kuomah, "Peor-a Baal biea thang in mihai seng chu in sukhlum ding a nih" a ta. 6 Chuonga Intuokna Puon in bula Mosie le Israel pungkhawmhai po po an tap lai chun an mit hmua ngei Israel mi pakhat hin a insûngah Midian nuhmei a hung thuoi lût a. 7 Aron naupa Eleazar naupa Finehas chun a hmuin inkhawmnaa inthokin a suok a, fei a lâk a, 8 Israel pa chu a puon inah a zui lût a, Midian nu le chun an pahniin feiin a sun tlang a, Israelhai chunga hremna chu a rè ta a. 9 Chu hremna hripui chun mi sînghni le sângli a that hman a nih. 10 LALPA chun Mosie kuomah, 11 "Thiempu Aron naupa Eleazar naupa Finehas chun Israelhai laka ka thîkthu a siet anga a thîkthu a suksiet leiin Israelhai chunga ka lungsen chu a re ta a, ka thîkthu lungsen leiin Israelhai chu sukbohmang ta naw ning. 12 Chuleiin, ngai ta, keima le inremna thuthlung chu ama leh thlung ka tih ti hril rawh. 13 Pathien inzaumna hum dinga thîkthu sukse a, Israel thlahai ta dinga inremna a siem leiin, ka thuthlung hi ama le a thlahai kumkhaw thiempu nina thuthlung nîng a tih', ti rawh" tiin. 14 Israel mi, Midian nuhmei le an that hming chu Simeon sûngkuoa mi Salu naupa Zimri a nih. 15 Midian nuhmei an that hming chu Zura naunu Kozbi a na, Zura chu Midian pahnam pakhat laia lal a nih. 16 LALPA chun Mosie kuomah, 17 "Midianhai chu hmèlma angin en la, sukbohmang rawh. 18 Peor-a khan dawhaa thawin an hlèm cheu a, an farnu, Midian mi lien naunu Kozbi, hripui a hung tlunga thata um khom kha, Peor-a thil tlung nghong suok a nih" a ta.

Numbers 26

1 Hripui inkieng hnung chun LALPAN Mosie le thiempu Aron naupa Eleazar hai chu a biek a, 2 "Israel thlahai po po, râl do thei chin kum sawmhni le a chung tieng po chu a pahnam hnamin tiem vong ro" a ta. 3 Chuongchun, Mosie le Eleazar chun Jeriko zawn, Jordan kam, Moab phaiah anni rawi chu an inbiekpui a, 4 "LALPAN thu Mosie a pêk angin, mipuihai chu kum sawmhni le a chung tieng po tiem vong ro" an ta. 5 Israel nau lutîr Reuben naupahai chu: Hanok sûngkuo thlâtu chu Hanok; Palu sûngkuo thlâtu chu Palu; 6 Hezron sûngkuo thlâtu chu Hezron le Karmi sûngkuo thlâtu chu Karmi a nih. 7 Hienghai hi Reuben pahnama mi po an na, tiem po chu sîngli le sângthum le zasari le sawmthum an nih. 8 Palu chun Eliab a thla a, 9 Eliab naupahai chu Nemuel, Dathan le Abiram an nih. Dathan le Abiram hai hi khawtlâng thuoitu, Kora hnung zuia Mosie le Aron beitu le LALPA laka helhai kha an nih. 10 Hnuoiin a bau a ka a, anni chu Kora leh a dol hmang a, Kora hnungzuitu zahni sawmnga khom meia lem hmangin an um kha. Anni chu inchikna ding an lo ni tah. 11 Kora nauhai ruok chu an thi ram ve nawh. 12 Simeon thla pahnamhai chu: Nemuel sûngkuo thlâtu chu Nemuel; Jamin sûngkuo thlâtu chu Jamin; Jakin sûngkuo thlâtu chu Jakin; 13 Zera sûngkuo thlâtu chu Zera le Saul sûngkuo thlâtu chu Saul a nih. 14 Simeon pahnama mi po zât chu an rêngin sînghni le sânghni le zahnih an nih. 15 Gad thla pahnamhai chu: Zefon sûngkuo thlâtu chu Zefon; Hagi sûngkuo thlâtu chu Hagi; Suni sûngkuo thlâtu chu Suni; 16 Ozni sûngkuo thlâtu chu Ozni; Eri sûngkuo thlâtu chu Eri; 17 Arodi sûngkuo thlâtu chu Arodi; le Areli sûngkuo thlâtu chu Areli a nih. 18 Hienghai hi Gad thlàhài chu an na, an rêngin sîngli le zanga an nih. 19 Juda naupahai chu Er le Onan an na, Kanan-ah an thi a. 20 Juda thlaa mi pahnamhai chu: Sela sûngkuo thlâtu chu Sela; Perez sûngkuo thlâtu chu Perez; Zera sûngkuo thlâtu chu Zera a nih. 21 Perez thlàhài chu: Hezron sûngkuo thlâtu chu Hezron le Hamul sûngkuo thlâtu chu Hazmul a nih. 22 Hienghai hi Juda thlàhài an na, an rêngin sîngsari le sângruk le zanga an nih. 23 Isakar thla pahnamhai chu: Tola sûngkuo thlâtu chu Tola; Pua sûngkuo thlâtu chu Pua; 24 Jasub sûngkuo thlâtu chu Jasub; le Simron sûngkuo thlâtu chu Simron a nih. 25 Hienghai hi Isakar thlahai chu an na, an rêngin sîngruk le sângli le zathum an nih. 26 Zebulun thla pahnamhai chu: Sered sûngkuo thlâtu chu Sered; Elon sûngkuo thlâtu chu Elon; le Jahleel sûngkuo thlâtu chu Jahleel a nih. 27 Hienghai hi Zebulun thlàhài chu an na, an rêngin sîngruk le zanga an nih. 28 Josefa thlahai chu an pahnam ang dungzuiin Manase le Efraim an nih. 29 Manase thlahai chu: Makir sûngkuo thlâtu chu Makir, Makir naupa Gilead sûngkuo thlâtu chu Gilead a nih. 30 Gilead thlàhài chu: Iezer sûngkuo thlâtu chu Iezer; Helek sûngkuo thlâtu chu Helek; 31 Asriel sûngkuo thlâtu chu Asriel; Sekem sûngkuo thlâtu chu Sekem; 32 Semida sûngkuo thlâtu chu Semida; Hefer sûngkuo thlâtu chu Hefer a nih. 33 Hefer naupa Zelofehad chun nau pasal nei loin nau nuhmei chauh a nei a, chuonghai chu Mahla, Noa, Hogla, Milka le Tirza an nih. 34 Hienghai hi Manase thlàhài chu an na, an rêngin sîngnga le sânghni le zasari an nih. 35 Efraim thla pahnamhai chu: Suthela sûngkuo thlâtu chu Suthela; Beker sûngkuo thlâtu chu Beker; le Tahan sûngkuo thlâtu chu Tahan a nih. 36 Suthela thlâhai chu: Eran sûngkuo thlâtu Eran. 37 Hienghai hi Efraim thlàhài chu an na, an rêngin sîngthum le sânghni le zanga an nih. Chuonghai po po chu Josefa thlà, pahnam hrang hrang hai chu an nih. 38 Benjamin thla pahnamhai chu: Bela sûngkuo thlâtu chu Bela; Asbel sûngkuo thlâtu chu Asbel; Ahiram sûngkuo thlâtu chu Ahiram; 39 Supham sûngkuo thlâtu chu Supham; le Hupham sûngkuo thlâtu chu Hupham a nih. 40 Bela thlâa mi Arda chun Arda sûngkuo a thlâ a, Naaman chun Naaman sûngkuo a thlâ. 41 Hienghai hi Benjamin thlàhài chu an na, an rêngin sîngli le sângnga le zaruk an nih. 42 Dan thla pahnam chu: Suham sûngkuo thlâtu chu Suham a nih. 43 Dàn thla, Suham pahnama mi chu an rêngin sîngruk le sângli le zali an nih. 44 Aser thla pahnamhai chu: Imna sûngkuo thlâtu Imna; Isvi sûngkuo thlâtu Isvi; le Beria sûngkuo thlâtu Beria a nih. 45 Beria thlaa inthokin, Heber sûngkuo thlâtu Heber le Malkiel sûngkuo thlâtu Malkiel an hung suok a. 46 Aser chun nau nuhmei pakhat a hming Sera a nei. 47 Hienghai hi Aser thlàhài chu an na, an rêngin sîngnga le sângthum le zali an nih. 48 Naftali thlahai chu, an sûngkuo angin, Jazel sûngkuo thlâtu chu Jazel; Guni sûngkuo thlâtu chu Guni; 49 Jezer sûngkuo thlâtu chu Jezer; Silem sûngkuo thlâtu chu Silem a nih. 50 Hienghai hi Naftali thlàhài chu an na, an rêngin sîngli le sângnga le zali an nih. 51 Israel thla pasal an tiemhai po po zât chu nuoi ruk le sângkhat le zasari le sawmthum an nih. 52 Chun, LALPAN Mosie a biek a, 53 Hienghai hi an tam dàn zirin ram sempèk rawh. 54 A tam deuh ram pe lien deuh la, a tlawm deu pe tlawm la, intiemna ang dungzuiin ram chu sem rawh. 55 Amiruokchu, thumvawrin, an pipu pahnam hming ang peiin ram chu chang an tih. 56 Ram chu a chin a lien thumvawr dàn ang peia sem ding a nih. 57 Hienghai hi an pahnam ang peia an tiem Levi thlàhài chu an nih: Gerson sûngkuo thlâtu chu Gerson; Kohat sûngkuo thlâtu chu Kohat; Merari sûngkuo thlâtu chu Merari a nih. 58 Hienghai khom hi Levi pahnamhai an nih: Libni, Hebron, Mali, Musi le Kora hai. (Kohat chu Amram pu a nih. 59 Amram nuhmei chu Jokebed, Levi thlaa mi, Aiguptaa Levi sûngkuoa inthoka pieng a nih. Amram chun naupa Aron le Mosie le naunu Miriam a nei a. 60 Aron chu Nadab, Abihu, Eleazar le Ithamar hai pa a nih. 61 Nadab le Abihu ruok chu LALPA hmaa mei hmang lo ding chi an inhlân lai khan an thi. ) 62 Levi thla, pasal thla khata upa chin le a chung tieng an tiem po chu sînghni le sângthum an nih. Anni hi ram sem chang ve ding laia mi an ni naw leiin Israelhai an tiem ruolin an tiem ve naw a nih. 63 Hienghai hi Jeriko zawn, Jordan kam, Moab phaia Mosie le thiempu Eleazarin Israel thla an tiemhai chu a nih. 64 Mosie le Aronin Sinai thlalèra Israel thla an tiemhai laia mi kha pakhat khom an um ta nawh. 65 LALPAN, "Thlalèrah an thi ngei ngei ding a nih" a lo ti ta si a. Jefune naupa Kaleb le Nuna naupa Josua ti naw chu tu khom a dam an um ta nawh.

Numbers 27

1 Josefa naupa Manase thla Makira naupa Gilead, chu naupa Hefer, Hefer naupa Zelofehad nau nuhmeihai chu Mahla, Noa, Hogla, Milka le Tirza an nih. 2 Intuokna Puon in kot tieng hungin Mosie le thiempu Eleazar le pungkhawmhai hmaa chun an ngîr a, 3 "Kan pa hi thlalèrah a thi a. LALPA khinga inthuruol, Kora hnung zuitu pawl lai khan a thang ve naw a, ama thil suol thaw leia nau pasal nei loa thi a nih. 4 Nau pasal a nei naw lei elin kan pa hming chu ieng leiin am a thlàhài lai a bo el ding a na? Kan pa unauhai lai chanvo mi pe ve rawh" an ta. 5 An thu chu Mosien LALPA hmaah a'n tlun a. 6 LALPA chun Mosie a biek a, 7 "Zelofehad naunuhai hril hi a'n dik a nih. An pa unauhai lai chanvo i siem ngei ding a nih. An pa chanvo chu i pêk ding a nih. 8 Chun, Israel thlàhài kuomah, 'Nau pasal nei loa mi a thi chun a ro chu a naunuhai in pêk ding a nih. 9 Naunu a nei naw chun a ro chu a unauhai in pêk ding a nih. 10 Unau a nei naw chun a ro chu a pa unauhai in pêk ding a nih. 11 Chun a pain unau a nei naw chun a ro chu a laibung hnai tak pèng in ta, ama chun ro chu inkhawm a tih. LALPAN thu Mosie a pêk angin, hi thu hi Israelhai ta dingin dàn thupêk nghet nîng a tih' tiin hril rawh" a ta. 12 Chun, LALPAN Mosie kuomah, "Abarim tlânga khin hang fe la, Israel thlahai ka pêk ding ram hang thlîr rawh. 13 I hang thlîr zo pha leh, i unaupa Aron ang bokin i chipuihai lai lawr khawm ni ve tâng i tih, 14 Zin thlalèra pungkhawmhai an chier lai khan ka thienghlimna phua mi chawimawi dinga thu ka pêk cheu chu in pahnia in bawsiet leiin" a ta. (Chu chu Zin thlalèr Kades-a Meriba tuia thil tlung kha a nih). 15 Chun, Mosie chun LALPA kuomah, 16 "Mi po po hringna hnàr LALPA Pathien chun Israel pungkhawmhai thuoitu ding mi ruot raw se. 17 Ama chun an hma thuoiin an hnung dâl hlak sienla, LALPA mipuihai chu vêngtu nei lo beram ang an ni nawna dingin" a ta. 18 Chuongchun, LALPA chun Mosie kuomah, "Nuna naupa, thlarau nei mi chu thuoi la, a chungah kut innghat rawh. 19 Thiempu Eleazar le pungkhawmhai hmaah inngirtir la, an mithmua ngei thuoituah la lût rawh. 20 Israel pungkhawm po poin a thu an awi theina dingin i thuneina sem bok rawh. 21 Urim le Thummimm hmanga Pathien rawn chu thiempu Eleazar thaw ding a na, a thu ngâichângin Josua chun Israel pungkhawmhai fe son hun ding le riebûk khuorna ding hmun hril hlak a tih" a ta. 22 Mosie chun LALPA hril angin a thaw a, Josua chu a thuoi a, thiempu Eleazar le pungkhawm po po hmaa chun a'n ngirtir a. 23 Mosie hmanga LALPA hril angin, a chungah a kut a'n nghat a, a aiawtu dingin a ruota.

Numbers 28

1 Chun, LALPAN Mosie a biek a, 2 "Israel thlahai kuomah thu pe la, a hun ruot takah ka kuoma thilhlân, meia thilhlân le bu le bâl thilhlân, ka ta dinga riminhnik chu an inhlàn hlak ding a nih. 3 Hieng hin hril rawh: Hi hi LALPA kuoma meia pumraw thilhlân in inhlàn ding chu a nih: ni tinin beramchal tuoi, kum khata upa le hmèl hem lo pahni a ni ding a nih. 4 Zîng tieng pakhat inhlàn unla, zân tieng pakhat inhlàn ro. 5 Bu le bâl thilhlân, beiphit indip tak kilogram khat, hriek a sawra sawr litar khat le hmet pol le chun in inhlàn hmun khat ding a nih. 6 Hi hi LALPA ta dinga meia thilhlân, a ta dinga rim inhnik, Sinai tlânga inthoka an lo thaw tan tah chu a nih. 7 Dawn ding thilhlân chu beram pakhat peiah litar khat a ni ding a nih. Uoiin tak chin chu hmun thienghlimah LALPA hmaah in bun suok ding a nih. 8 Zân tienga beram in inhlân chu zîng tienga in thaw ang bokin, dawn thilhlân leh inhlàn ro. Hi hi meia thilhlân, LALPA ta dinga rim inhnik chu a nih. 9 " 'Sabat pha beram tuoi pahnih, kum khata upa le hmèl hem lo inhlàn un la, bu le bâl thilhlâna dingin beiphit indip tak, oliv hriek le hmet pol kilogram hni le dawn thilhlân chu inhlàn sa bok ro. 10 Ni tina pumraw thilhlân le dawn thilhlân bâkah hi hi Sabat zâta pumraw thilhlân in inhlàn ding chu a nih. 11 " 'Thla thar ni hmasa takah LALPA kuoma pumraw thilhlânah bawngchal tuoi pahnih, beramchal pakhat le beramchal tuoi pasarih, kum khata upa le hmèl hem lo inhlàn ro. 12 Bawngchal pakhat peiah bu le bâl thilhlâna dingin beiphit kilogram thum, 13 beram pakhat peiah kilogram hni le beramchal tuoi pakhat peiah kilogram khat inhlàn ro. Hi hi pumraw thilhlân, LALPA ta dinga meia thilhlân, rim inhnik chu a nih. 14 Bawngchal pakhat peiah dawn thilhlân uoiin litar hni, beramchal pakhat peiah uoiin litar khat le a chenve le beramchal tuoi pakhat peiah uoiin litar khat a ni ding a nih. Hi hi thla thar ni khat zâta pumraw thilhlân in inhlàn dàn ding chu a nih. 15 Pumraw thilhlân le dawn thilhlân pàngngai bâkah, LALPA kuoma suol thawina thilhlânah kèlchal pakhat in inhlàn bok ding a nih. 16 Thla hmasa tak ni sawm le ni liah LALPA Fekân Kùt in hmang ding a nih. 17 Chu thla ni sawm le ni nga ni chu ruoi the ni nîng a ta, ni sari sûng chu chol thang lo bei chauh fa ro. 18 A ni khat ni chun inkhawmpui thienghlim nei unla, ieng sin khom in thaw ding a ni nawh. 19 LALPA kuoma pumraw thilhlân, meia thilhlânah bawngchal tuoi pahnih, beramchal pakhat le beramchal tuoi pasarih, kum khata upa le hmèl hem lo chu inhlàn ro. 20 Bawngchal pakhat peiah bu le bal thilhlâna dingin beiphit, oliv hriek le hmet pol, kilogram thum, beramchal pakhat peiah beiphit kilogram hni, 21 beramchal tuoi pakhat peiah kilogram khat inhlàn ro. 22 Mipuihai ta dinga inremna siempêkna dingin, suol thawina thilhlânah kèlchal pakhat inhlàn bok ro. 23 Hi hi zîng tienga pumraw thilhlân pàngngai in inhlàn bakah buotsai ro. 24 Hieng ang hin LALPA ta dinga rim inhnik, bu le bâl thilhlân chu ni tin, ni sa ri sûng in inhlàn ding a nih; chu chu pumraw thilhlân le dawn thilhlân in thaw pàngngai bâka in buotsai ding chu a nih. 25 A ni sarinaa chun inkhawmpui thienghlim nei unla, sin ieng khom in thaw ding a ni nawh. 26 Chun, in tharsuok hmasa tak in inhlàn hun, Hapta Kùta in bu thar suokhai in inhlàn ni chun inkhawmpui thienghlim nei unla, ieng sin khom thaw naw ro. 27 Pumraw thilhlâna dingin bawngchal tuoi pahnih, beramchal pakhat le beramchal tuoi pasarih, kum khata upa le hmèl hem lo chu LALPA ta dinga rim inhnikah inhlàn ro. 28 Bawngchal pakhat peiah bu le bâl thilhlâna dingin beiphit, oliv hriek le hmet pol kilogram thum, beram pakhat peiah beiphit kilogram hni, 29 beramchal tuoi pakhat peiah beiphit kilogram khat, inhlàn ro. 30 In ta dinga inremna siemna dingin kèlchal pakhat suol thawina dingin inhlàn sà ro. 31 Hienghai hi pumraw thilhlân le bu le bâl thilhlân pàngngai hrim bâkah dawn thilhlân leh inhlàn dingin buotsai ro. In ran inhlànhai chu hmèl hem lo a ni ngei ding a nih.

Numbers 29

1 " 'Thla sarina, ni khat ni chun sin thaw loa umni khâmin inkhawmpui thienghlim nei in ta, chu ni chu in ta dinga tawtawrawt mùt ni a nih. 2 LALPA ta dingin pumraw thilhlân, rim inhnik buotsai unla, bawngchal tuoi pakhat, beramchal pakhat le beramchal tuoi pasarih, kum khata upa le hmèl hem lo chu inhlàn ro. 3 Bawngchal pakhat peiah bu le bâl thilhlâna dingin beiphit, oliv hriek le hmet pol kilogram thum, beramchala dingin beiphit kilogram hni pei, 4 beramchal tuoi pakhat peia dingin beiphit kilogram khat pei inhlàn ro. 5 In ta dinga inremna siemna dingin kèlchal pakhat inhlàn sà bok ro. 6 Hieng thilhlânhai hi thla tin le ni tina pumraw thilhlân dâm, bu le bâl thilhlân dâm le dawn thilhlân, thaw dàn ding tuk ta sa hai bàka thilhlân chu a nih. Meia LALPA ta dinga thilhlân, rim inhnik chu a nih. 7 " 'Thla sarina ni sawma chun inkhawmpui thienghlim nei ro. Ieng khom fain dawn naw unla, sin thaw bok naw ro. 8 LALPA ta dinga rim inhnik, pumraw thilhlânah bawngchal tuoi pakhat, beramchal pakhat le beramchal tuoi kum khat mi pasari, an rênga hmèl hem lo chu, inhlàn ro. 9 Bu le bâl thilhlâna dingin beiphit indip tak, oliv hriek le hmet pol chu bawngchal pakhatah kilogram thum, beramchal pakhatah kilogram hni, 10 beramchal tuoi pakhat peiah kilogram khat inhlàn ro. 11 Inremna dinga suol thawina thilhlân, pumraw thilhlân, bu le bâl thilhlân le dawn thilhlân pangngai hrim bâkah suol thawina dingin kèlchal pakhat inhlàn sa bok ro. 12 " 'Thla sarina ni sawm le ni ngana chun inkhawmpui thienghlim nei unla, sin ieng khom thaw naw ro. LALPA ta dingin ni sari sûng kùt in hmang ding a nih. 13 LALPA ta dinga rim inhnik, pumraw thilhlânah bawngchal tuoi sawmpathum, beramchal pahni le beramchal tuoi kum khat mi sawm le pali, an rênga hmêl hem lo chu inhlàn ro. 14 Bawngchal tuoi pakhat peia dingin bu le bâl thilhlâna ding, oliv hriek le hmet pol, beiphit indip tak kilogram thum, beramchal pakhat peiah kilogram hni le 15 beramchal tuoi pakhat peiah kilogram khat buotsai ro. 16 Inremna dinga suol thawina thilhlân, pumraw thilhlân, bu le bâl thilhlân le dawn thilhlân pangngai hrim bâkah suol thawina dingin kèlchal pakhat inhlàn sa bok ro. 17 " 'A ni hninaa dingin bawngchal tuoi sawmpahni, beramchal pahni le beramchal tuoi, kum khata upa sawmpali, an rênga hmêl hem lo vong chu inhlàn ro. 18 Bawngchal le beramchal le beramchal tuoi pakhat peia bu le bâl thilhlân le dawn thilhlâna inhlàn ding bituk zât ang pei chu buotsai ro. 19 Inremna dinga suol thawina thilhlân, pumraw thilhlân, bu le bâl thilhlân le dawn thilhlân pangngai hrim bâkah suol thawina dingin kèlchal pakhat inhlàn sa bok ro. 20 " 'A ni thumna dingin bawngchal tuoi sawmpakhat, beramchal pahni le beramchal tuoi, kum khata upa sawm le pali, an rènga hmêl hem lo vong chu inhlàn ro. 21 Bawngchal le beramchal le beramchal tuoi pakhat peia bu le bâl thilhlân le dawn thilhlâna inhlàn ding bituk zât ang pei chu buotsai ro. 22 Inremna dinga suol thawina thilhlân, pumraw thilhlân, bu le bâl thilhlân le dawn thilhlân pangngai hrim bâkah suol thawina dingin kèlchal pakhat inhlàn sa bok ro. 23 " 'A ni linaa dingin bawngchal tuoi sawm, beramchal pahni le beramchal tuoi, kum khata upa sawm le pali, an rênga hmêl hem lo vong chu inhlàn ro. 24 Bawngchal le beramchal le beramchal tuoi pakhat peia bu le bâl thilhlân le dawn thilhlâna inhlàn ding bituk zât ang pei chu buotsai ro. 25 Inremna dinga suol thawina thilhlân, pumraw thilhlân, bu le bâl thilhlân le dawn thilhlân pangngai hrim bâkah suol thawina dingin kèlchal pakhat inhlàn sa bok ro. 26 " 'A ni nganaa dingin bawngchal tuoi pakuo, beramchal pahni le beramchal tuoi, kum khata upa sawm le pali, an rênga hmêl hem lo vong chu inhlàn ro. 27 Bawngchal le beramchal le beramchal tuoi pakhat peia bu le bâl thilhlân le dawn thilhlâna inhlàn ding bituk zât ang pei chu buotsai ro. 28 Inremna dinga suol thawina thilhlân, pumraw thilhlân, bu le bâl thilhlân le dawn thilhlân pangngai hrim bâkah suol thawina dingin kèlchal pakhat inhlàn sa bok ro. 29 " 'A ni ruknaa dingin bawngchal tuoi pariet, beramchal pahni le beramchal tuoi, kum khata upa sawm le pali, an rênga hmêl hem lo vong chu inhlàn ro. 30 Bawngchal le beramchal le beramchal tuoi pakhat peia bu le bâl thilhlân le dawn thilhlâna inhlàn ding bituk zât ang pei chu buotsai ro. 31 Inremna dinga suol thawina thilhlân, pumraw thilhlân, bu le bâl thilhlân le dawn thilhlân pangngai hrim bâkah suol thawina dingin kèlchal pakhat inhlàn sa bok ro. 32 " 'A ni sarinaa dingin bawngchal tuoi pasari, beramchal pahni le beramchal tuoi, kum khata upa sawm le pali, an rênga hmêl hem lo vong chu inhlàn ro. 33 Bawngchal le beramchal le beramchal tuoi pakhat peia bu le bâl thilhlân le dawn thilhlâna inhlàn ding bituk zât ang pei chu buotsai ro. 34 Inremna dinga suol thawina thilhlân, pumraw thilhlân, bu le bâl thilhlân le dawn thilhlân pangngai hrim bâkah suol thawina dingin kèlchal pakhat inhlàn sà bok ro. 35 " 'A ni rietnaa chun umni khamin inkhawmpui thienghlim nei unla, sin ieng khom thaw naw ro. 36 LALPA ta dinga meia thilhlân le rim inhnik, pumraw thilhlâna dingin bawngchal pakhat, beramchal pakhat le beramchal tuoi pasarih, kum khata upa le an rênga hmêl hem lo vong chu inhlàn ro. 37 Bawngchal le beramchal le beramchal tuoi pakhat peia bu le bâl thilhlân le dawn thilhlâna inhlàn ding bituk zât ang pei chu buotsai ro. 38 Inremna dinga suol thawina thilhlân, pumraw thilhlân, bu le bâl thilhlân le dawn thilhlân pangngai hrim bâkah suol thawina dingin kèlchal pakhat inhlàn sà bok ro. 39 Hienghai hi mania thu in intiemkamna hlenna dinga thil in inhlàn le mani puok suoka thilpêk inhlânhai bâka a hunbi neia kût in hmang phaa pumraw thilhlân, bu le bâl thilhlân, dawn thilhlân le inremna inthawina thilhlân in buotsai dàn ding chu a nih' ti rawh" tiin. 40 LALPAN a kuoma thu a pêk po po chu Mosie chun Israelhai a hril a.

Numbers 30

1 Mosie chun Israel pahnam tin thuoituhai kuomah, "Hi hi LALPA thupêk chu a nih: 2 Miin LALPA kuomah thu intiemkamna a nei chun a thu sût loin a tiem ta po po chu a hlen ngèi ding a nih. 3 "A pa ina la khawsa nunghâkin LALPA kuomah thu intiemkamna a nei a, 4 a pain a'n tiemkamna chu a hriet a, ieng khom a hril si naw chun, a thu intiemkamna chu a hlen ngèi ding a nih. 5 A pain a hriet hnunga a phal naw a ni ruok chun a thu intiemkamnaa inthok chun fihlim a ta, a pain a phal naw leiin LALPAN ngaidam a tih. 6 "Thu intiemkamna a nei zing lai ngaituo chîk loa pasal a nei a, 7 a pasalin a hriet nia ieng khom a hril naw chun, a thu intiemkamna chu a hlen ngèi ding a nih. 8 Amiruokchu, a pasalin a hriet nia a phal naw a ni chun dawn sei loa thu a lo intiemkamnaa inthok chun fihlim a ta, LALPAN ngaidam a tih. 9 Hmeithai amanih, màk tuok amanih hai chun an thu intiemkamna chu an hlen ngèi ding a nih. 10 A pasal le in khata um nuhmeiin thu tiem amanih intiemkamna amanih a nei a, 11 a pasalin a hriet hnunga ieng khom a hril si naw chun, a thu intiemkamna chu a hlen ngèi ding a nih. 12 Amiruokchu, a pasalin a hriet nia a thiek chun a thu intiemkamna chu sùt ni tâng a tih, a pasalin a sûtpêk leiin LALPAN ngaidam a tih. 13 A thu intiemkamna hrim hrim chu a pasalin a remtipui thei a, a sûtpêk thei bok. 14 Amiruokchu, a pasalin a hriet a, ieng khom a hril naw chun a thu intiemkamna ang chun a thaw ngei ding a nih; a hriet nia inthoka a tosan leiin a namnghetpui tìna a nih. 15 A pasalin a hriet hnunga a sûtpêk a ni ruok chun a pasal chun a maw chu phur a tih, " a ta. 16 Chuonghai chu nuhmei pasal nei lo, pahai ina la um amanih, pasal nei laiin amanih intiemkamna an nei chungthua thaw dàn ding LALPAN Mosie a pêkhai chu an nih.

Numbers 31

1 Chun, LALPAN Mosie kuomah, 2 "Midianhai chungah Israelhai phuba la rawh; chu zoa chun i chipuihai laia lawr ni tâng i tih" a ta. 3 Chuongchun, Mosie chun mipuihai kuomah, "Midianhai doa an chunga LALPA phuba chu la dingin nangni laia mi inrâlthuom raw hai se. 4 Israel pahnam tina inthokin sipai sângkhat seng indonaa chun in fe ding a nih" a ta. 5 Chuongchun, pahnam tina inthokin mi sângkhat pei fe dingin mi sîng le sânghni an thlang suok a. 6 Pahnam tina mi sângkhat pei thlang suokhai chu thiempu Eleazar naupa Finehas inrawina hnuoiah indo ding chun Mosien a tir a, hmun thienghlima bûr le bèl le thu pêknaa mùt ding tawtawrawt an chawi bok a. 7 LALPAN Mosie kuoma thu a pêk angin Midianhai chu an bei a, pasal po po an that vong a. 8 An thathai lai chun Midian lal panga-Evi hai, Rekem hai, Zura hai, Hura hai le Reba hai khom an thang. Beor naupa Balaam khom kawlhnâmin an sât hlum a. 9 Midian mi nu le nau an manhai chu salah an thuoi a, an bawng hai, beram hai le thuomhnaw hai chu râllâk sumah an lâk a. 10 Midianhai khuo po po le an riebûkhai chu an raw fai vong a. 11 An râllâkhai po po chu, mihriem leh ran leh, an hung hawn vong a. 12 Jeriko zawn, Jordan vadung kam, Moab phaia an riebûka um Mosie le Eleazar le Israel pungkhawmhai kuomah an râl manhai le râllâk sum po po chu an hung hawn a. 13 Mosie le thiempu Eleazar le khawtlâng thuoituhai chun kotsuoah an lo tuok a. 14 Indonaa inthoka hung kîr an hotuhai, za chunga hotuhai le sâng chunga hotuhai chunga chun Mosie lung chu a sen hle a. 15 "Nuhmei po po damin in hlâ vong a ni maw? 16 Hienghai hi Balaam thu zawma LALPA laka inthoka Israelhai kei hertu le Peor-a thil tlung leia mipuihai chunga LALPA hremna intlungtirtu kha an nih ti in hriet naw maw? 17 Tuhin pasalte po le pasal pawl tah nuhmei po po chu that vong unla, 18 pasal la pawl lo nuhmeihai ruok chu in ta dingin hlà ro. 19 Tu khom mi that taphot le mithi ruong tawk taphot chu riebûk puo tieng, khawhnawmah ni sari sûng riek ro. A ni thumna le ni sarinaah nangni le in sal manhai chu inthien tawl ro. 20 In silfènhai le savun amanih kèl hmul amani le thinga siem hrim hrim chu in inthien fai ding a nih" a ta. 21 Chun, thiempu Eleazar chun indoa thang sipaihai kuomah, "Hi hi LALPAN Mosie kuoma thu a pêk dàn chu a nih: 22 Rangkachak hai, tangkaruo hai, dâr hai, thîr hai, rangva hai le suon hai dâm, 23 meia rawa se el thei lo thil taphot chu meiah raw unla, hung thienghlim a tih. Ieng thil khom ni sien, tlêngfaina tuia sukthienghlim ding a nih. Meia raw lo chi po chu tuiah in phum ding a nih. 24 Chun, a ni sari niin in puonhai sawp in ta, hung inthieng in ta, chu zoah riebûkah hung lût thei tâng in tih" a ta. 25 LALPAN Mosie a biek a, 26 "Nang le thiempu Eleazar le Israel pahnam luhaiin râllâk sum le mihriem le ran an hawn po po chu tiem vong ro. 27 Râllâk sumhai chu indonaa thang sipaihai le khawtlang mipuihai lai sem ro. 28 Indonaa fe sipaihai chana inthok chun mihriem hai, bawng hai, sabengtung hai, beram hai, kèlhai chu zanga peia pakhat LALPA kuoma pêk dingin sie hran rawh. 29 LALPA ta dinga ser hran po chu thèn thilhlânah thiempu Eleazar kuomah pe rawh. 30 Chun, a zâtve dang, Israel pungkhawmhai chana inthok chun mihriem hai, bawng hai, sabengtung hai, beram hai, kèl hai le ran dang ieng khom sawmnga peiah pakhat sie hran la, chu chu LALPA biekbûk enkoltu Levihai kuomah pe rawh" a ta. 31 LALPAN thu Mosie a pêk ang chun Mosie le Eleazar chun an thaw a. 32 Sipaihaiin anni puola an thil lâk tiem sa lo an hung hawn po chu beram nuoi ruk le sîngsari le sângnga, 33 bawng sîngsari le sânghni, 34 sabengtung sîngruk le sângkhat, 35 le nuhmei naupang, pasal la pawl ngai lo sîngthum le sânghni an nih. 36 A zâtve, indonaa fehai chan chu beram nuoithum le sîngthum le sângsari le zanga a nih. 37 LALPA ta dinga pêk zât chu zaruk le sawmsari le panga nih. 38 Bawng chu sîngthum le sângruk a na, chu taka inthoka LALPA kuoma pêk zât chu sawmsari le pahnih a nih. 39 Sabengtung sîngthum le zangaa inthoka LALPA kuoma pêk zât chu sawmruk pakhat a nih. 40 Nuhmei naupang sîngkhat le sângruka inthoka LALPA kuoma pêk zât chu sawmthum le pahnih a nih. 41 LALPAN Mosie kuoma thu a pêk angin, LALPA ta dinga ser hran po chu Mosien thiempu Eleazar kuomah a pêk a. 42 Râl doa fehai chan an sem hnunga Israel mipui chan la um zât chu, 43 beram nuoi thum le sîngthum le sângsari le zanga, 44 bawng sîngthum le sângruk, 45 sabengtung sîngthum le zanga, 46 mihriem sîngkhat le sângruk a nih. 47 Israelhai chana inthok chun mihriem le ran sawmngaah pakhat pei a lâk a, LALPA thupêk angin, LALPA biekbûk enkoltu Levihai a pêk a. 48 Chun, sipai hotuhai, za chunga hotu le sâng chunga hotuhai chu Mosie kuomah an fe a, 49 a kuomah, "I siehlawhaiin i hnuoia sipaihai kan tiem a, pakhat khom inhmang an um nawh. 50 Chuleiin, LALPAN kan nun a mi vêng himpêk manah chan kan dong senga inthokin rangkachak incheina thil kebun hai, bânbun hai, suoi namna kutsebi hai, nabe hai le thi hai chu LALPA kuoma keini ta dinga inremna thilhlân dingin kan hung chawi a nih" an ta. 51 Mosie le thiempu Eleazar chun rangkachaka siem incheina thuom po po chu an lo dong a. 52 Sâng chunga hotu le za chunga hotuhaiin LALPA kuoma thèn thilhlâna rangkachak an inhlàn po chu kilogram zahni vêl bùk a nih. 53 Sipai naranhai ruok chun mani puola an lâk seng chu an nei a. 54 Mosie le thiempu Eleazar chun sâng chunga hotu le za chunga hotuhai rangkachak hung chawi an lo donghai chu LALPAN a mi Israel thlahai a hriet zingna dingin Intuokna Puon ina chun an sie a.

Numbers 32

1 Reuben le Gad-a thlahai chun ran ruol an hau leiin Jazer le Gilead ram vel chu ran vaina dingin tha an ti hle a. 2 Chuongchun, Mosie le thiempu Eleazar le khawtlâng hotuhai kuoma chun an hung a, 3 "Israel mipuihai hmaa LALPA mi hnepêk ram Atarot hai, Dibon hai, Jazer hai, Nimra hai, Hesbon hai, Eleale hai, Sebam hai, 4 Nebo hai le Beon hai hi ran vaina hmun dinga tha tak a na, i siehlawhai hin ran ruol kan hau bok si a, 5 rem i ti zawng a ni chun Jordan vadung kân ve loin hi ram hi kan hluo dingin rochanah mi pe el rawh" an ta. 6 Mosie chun Gad-a thlahai le Reuben thlahai kuoma chun, "Hi hmuna hin nangni thungin, in unauhaiin râl an tawn bîk ding maw? 7 Ieng dinga LALPAN ram a pêka Israelhai lût lo dinga an lungril in sukzâm tum am a na? 8 Kadesh Barnea inthoka ram thlithlai dinga mi ka tir tum khan hieng ang bok hin in puhai khan an thaw a. 9 Eskol phairuom an hang tlung a. a ram an thlîr phing leh LALPAN ram a pêka an lût nawna dingin Israelhai lungril an sukzâm a. 10 Chu ni chun LALPA lungsen a tuong a, 11 'Lungril taka an mi zui naw leiin, Aigupta rama inthoka ka thuoi suok, mi kum sawmhni chung tieng chun tu khomin Abraham hai, Isak hai le Jakob hai kuoma pêk ka tiem ram chu hmu naw ni hai, 12 lungril taka mi zuitu Keniz mi Jefune naupa Kaleb le Nun-a naupa Josua ti chauh naw chun' tiin an khâm hiel a. 13 LALPA lungsen chu Israel chungah an ling leiin, a mit hmua suol thawtu suon po po chu an bohmang vong hma khat chu thlalèrah kum sawmli top a'n vàk kuoltir el a nih. 14 "En ta u, nangni mi suol thlahai, tuhin in pahai ang charin in hung um nawk a, Israel chunga LALPA lungsenna sukzuoltu in nih. 15 LALPA in zui nuom ta naw tak tak a ni chun hieng mipuihai hi thlalèrah màksan nawk a ta, an sietna intluntu in ni ding a nih" a ta. 16 Anni chun an hung pan hnai a, "Kan ranhai ta dingin ran huong le kan nuhmei le nauhai ta dingin khuo siempêk phot kan nuom a. 17 Keini ruok chu Israelhaiin an umna hmun ding an tlung chen râlthuom leh an hma nora tawn dingin kan inpei a nih. Chuong a ni zing lai chun kan nuhmei le nauhai chu a ram mihai laka an him theina dingin kula inhuon khuoah umhai sien kan ti a nih. 18 Israel thlahaiin an ram rochung ding an hluo vong hmakhat chun kan in tieng kìrsan nawng kan tih. 19 Kan rochung ding ram chu Jordan suo tieng ram a ni leiin, Jordan thlang tienga kan chanvo ram chu rochung ve nawng kan tih" an ta. 20 Mosie chun an kuomah, "Chuonga in ti a ni phot chun, LALPA hmaa ngei hin râl tawn dingin inrâlthuom ro. 21 In râldo mihai po poin Jordan râl hi kâi an ta, LALPA thuoina hnuoiah hmèlmahai bei a, tukdol a, an ram LALPAN a lâkpêk chenin râl in do ding a nih. 22 Chu zoa chun LALPA chunga le in hnampui Israelhai chunga in thaw ding chu in hlen tah leiin hung kîr nawk thei in tih. Chu pha chun Jordan sak tieng ram hi in ram chanpuolah LALPAN pompêk a ti cheu. 23 Amiruokchu, in thu tiem in hlen naw ruok chun, LALPA chunga suol nîng in ta, in suol leiin hrem ngei ngei a ti cheu ti hre tlat ro. 24 In nu le nauhai umna ding kula inhuon khuohai indin unla, in ran ruolhai umna dingin ran huong bawl bok unla, amiruokchu in thu tiem chu hlen ngei ngei ro" a ta. 25 Gad-a mihai le Reuben mihai chun Mosie kuomah, "I siehlaw kan ni a, kan pu thupêk ang chun thawng kan tih. 26 Kan nuhmeihai le nauhai, kan bawng ruol le kan beram ruol hai ruok chu Gilead ram khuoa hai hin lo um an ta, 27 i siehlawhai ruok hi chu, indo dinga inrâlthuom po po chun, kan pu hril ang khan, LALPA hmaah Jordan râl va kâi kan tih" tiin an hril a. 28 Chuongchun, Mosie chun an chungthuah thiempu Eleazar le Nuna naupa Josua le Israel pahnam luhai chu thu a pêk a: 29 "Gad-a thlahai le Reuben thlahai, indo dinga inrâlthuom po po hin LALPA hmaah Jordan vadung hi an kâipui cheu a, ram chu an hnepui cheu chun Gilead ram hi an rochan dingin in pêk ding a nih. 30 Amiruokchu, inrâlthuomhai hin an kâipui si naw cheu chun, Kanan rama an chanvo ding hmuna chun an um ding a nih" a ta. 31 Gad-a thlahai le Reuben thlahai chun, "I siehlawhai hin LALPAN a hril ang chun thawng kan tih. 32 Inrâlthuomin, LALPA hmaah Jordan vadung râl kâiin, Kanan ram lût kan ta, sienkhom kan ram hluo ding chu Jordan vadung sak tieng hi la ni zing a tih" an ta. 33 Chuongchun, Mosie chun Gad-a thlahai le Reuben thlahai le Josefa naupa Manase thla hnam zatvehai chu Amor lal Sihon ram hai le Basan lal Oga ram hai, chuonghai ram sûnga khuo po po le an se vela ramhai chenin a pêk a. 34 Gad-a thlahai chun Dibon hai, Atarot hai, Aroer hai, 35 Atrot Stofan hai, Jazer hai, Jogbea hai, 36 Bet Nimra hai le Bet Haran khuohai chu an indin tha a, kulin an inhuon vong a, an ran ruolhai siena dingin ran huong an bawl a. 37 Reuben thlahai chun Hesbon hai, Eleale hai, Kiriathaim hai, 38 a hming an thlâk Nebo le Baal hai, le Sibma khuohai chu an indin tha a, an khaw siemhai chu hming hrang hrang an inbûk a. 39 Manase naupa Makir thlahai chu Gilead-ah an fe a, an lâk a, chu taka um Amor mihai chu an hnot suok vong a. 40 Chuongchun, Mosien Gilead ram chu Manase thla Makirhai chu a pêk a, chu taka chun an um a. 41 Chun, Manase naupa vèk Jaira chu an thok suok a, a se vela khuohai chu a va lâk a, hming thar Havot Jair a'n bùk a. 42 Noba khom a'n thok suok a, Kenat le a se vela khuohai chu a lâk a, ama hming chawiin Noba a'n bùk a.

Numbers 33

1 Mosie le Aron inrawia Aigupta rama inthoka a pawl pawla an suok hnunga an fe pei dàn chu hieng ang hin a nih. 2 LALPA thupêk anga an fena pei Mosie rikawt dàn chu hieng ang hin a nih: 3 Israelhai chu Ramases-a inthokin thla hmasa tak ni sawm le pangana, Fekân Kùt zo chun Aigupta mihai mit hmua ngei ngampa takin an suok a. 4 LALPAN an nau lutîr pasal po po a sukhlumpêk chu an vui lai le an pathienhai khom LALPAN a hrem tum kha a nih. 5 Israelhai chun Ramases suoksanin Sukot-ah an inkul a. 6 Sukot an suoksan a, thlaler tontir Ethamah an inkul nawk a. 7 Etham suoksanin, Baal Zefon sak, Pi Hahirot tieng inher kîrin Migdol bulah an inkul a. 8 Pi Hahirot suoksanin, Tuipui an kan a, thlalèrah an lût a, Etham thlalèrah ni thum an fe hnungin Mara hmunah an inkul a. 9 Mara suoksanin tuihnàr sawm le pahni le tûm thing sawmsari umna Elim an tlung a, chu taka chun an inkul a. 10 Elima inthok chun an suok a, Tuipui Sen bulah an inkul a. 11 Tuipui Sen chu suoksanin Sin thlalèrah an inkul nawk a. 12 Sin thlalèr an suoksan hnung chun Dofka-ah an inkul a. 13 Dofka suoksanin Alus-ah an inkul a. 14 Alus suoksanin mipui dawn ding tui a um nawna hmun Refedim-ah an inkul a. 15 Refedim suoksanin Sinai thlalèrah an inkul a. 16 Sinai thlalèr suoksanin Kibrot Hatava-ah an inkul a. 17 Kibrot Hatava suoksanin Hazerot-ah an inkul a. 18 Pi Hazerot suoksanin Ritmaah an inkul a. 19 Ritma suoksanin Rimon Perez-ah an inkul a. 20 Rimon Perez suoksanin Libna-ah an inkul a. 21 Libna suoksanin Risa-ah an inkul a. 22 Risa suoksanin Kehelatha-ah an inkul a. 23 Kehelatha suoksanin Sefer tlângah an inkul a. 24 Sefer tlâng suoksanin Harada-ah an inkul a. 25 Harada suoksanin Makhelot-ah an inkul a. 26 Makhelot suoksanin Tahat-ah an inkul a. 27 Tahat suoksanin Tera-ah an inkul a. 28 Tera suoksanin Mitka-ah an inkul a. 29 Mitka suoksanin Hasmon-ah an inkul a. 30 Hasmon suoksanin Moserot-ah an inkul a. 31 Moserot suoksanin Bene Jakan-ah an inkul a. 32 Bene Jakan suoksanin Hor Hagidgad-ah an inkul a. 33 Hor Hagidgad suoksanin Jotbatha-ah an inkul a. 34 Jotbatha suoksanin Abrona-ah an inkul a. 35 Abrona suoksanin Ezion-geber ah an inkul a. 36 Ezion-geber suoksanin Zin thlalèr, Kades an ti boka chun an inkul a. 37 Kades-a inthok chun Edom ram depa um Hor tlâng an tlung a, chu taka chun umhmun an khuor a. 38 Thiempu Aron chu LALPA thupêkin Hor tlânga chun a hang fe a, Aigupta rama inthoka Israel thlahai an suoka inthoka kum sawmlina, thla ngana ni khat ni chun chu taka chun a thi a. 39 Hor tlânga a thi chun Aron chu kum za le sawmhni le pathum a nih. 40 Kanan ram sim tienga um Arad lal, Kanan mi khomin Israelhai hung chu a lo hriet a. 41 Hor tlâng chu suoksanin Zalmona-ah an inkul a. 42 Zalmona chu suoksanin Punon-ah an inkul a. 43 Punon chu suoksanin Obot-ah an inkul a. 44 Obot chu suoksanin Moab ramria Iye Abarim-ah an inkul a. 45 Iye Abarim chu suoksanin Dibon Gad-ah an inkul a. 46 Dibon Gad suoksanin Almon Diblathaim-ah an inkul a. 47 Almon Diblathaim suoksanin Nebo kawl Abarim tlângah an inkul a. 48 Abarim tlâng suoksanin Jeriko zawn Jordan kam Moab phaiah an inkul a. 49 Jordan kam Bet Jesimota inthoka Abel Sitim chen chun an inzar a. 50 Jeriko zawn Jordan kam Moab phaia chun LALPAN Mosie a biek a, 51 "Israelhai inbiekpui la, hi thu hi hril rawh: Jordan vadung kâna Kanan ram in lût pha chun, 52 chu rama um po po chu hnot suok unla, milem an ker po po le pathien lim an sung po po sukse vong un la, an hmun sànghai khom thiekpêk vong ro. 53 Ram chu hluo unla, umhmun khuor ro, in hluo dinga ka pêk cheu a nih. 54 In chi-hnam ang peiin thum vawrin ram chu insem ro. A sûng ruol deuin chang lien hai sien, a sûng tlawm deuin chang tlawm hai sien, thum vawra a tlùkna tieng pei chu an chanpuol nîng a ta, an pi le pua inthoka an chi-hnam ang peiin in sem ding a nih. 55 " 'A rama lo umhai chu hnot suok loa in inumtir chun, chuong mihai chu in mit kheitu le in nàk suntu hlingah la hung inchang an ta, in umna rama buoina siempêktu cheu la hung nîng an tih. 56 Chu pha chun anni chunga thaw ka tum rûk chu nangni chungah thawng ka tih' ti rawh" a ta.

Numbers 34

1 LALPA chun Mosie kuomah, 2 "Israelhai chu thu pe la, hieng hin hril rawh: 'LALPAN rochana a pêk cheu Kanan ram in hluo pha chu hieng ang hi a ramri ding chu nîng a tih: 3 Sim tieng ramri chu Zin thlalera inthokin Edom ramri zulah fêng a tih. Sak tienga a'n tanna chu Tuipui Thi sim tawpa inthokin nîng a tih. 4 Chu taka inthok chun sim tieng pan a ta, Ainuvet Kawn tanin, Zin thlalèrah, Kadesh Barnea chen fêng a tih. Chu taka inthok chun hmar thlang tieng inherin, Hazar Addar hrawin, Azmon chen fêng a ta, 5 chu taka inthok chun inher a ta, Aigupta Ruom zui a ta, Mediterranean Tuipui-ah tawp a tih 6 " 'Thlang tieng ramri chu Mediterranean Tuipui kam nîng a tih. Chu chu tlâk tienga in ramri ding chu a nih. 7 " 'Hmar tieng ramri chu Mediterranean Tuipuia inthokin Hor tlâng chen fêng a ta 8 chu taka inthok chun Hamat Kawna hrawng a ta, Zedad tieng fe pei a ta, 9 Zifron tieng pan a ta, Hazar Enan-ah tawp a tih. Chu chu hmar tienga in ramri ding chu a nih. 10 " 'Sak tieng ramri chu Hazar Enan-a inthokin Stefam chen nîng a tih. 11 Chu taka inthok chun Ain sak tienga um Ribla-ah tum thlang a ta, Galili Dil suo tieng kam pang pêrah fêng a ta, 12 Jordan vadung zui pei a ta, Tuipui Thi-ah tawp a tih. Chuonghai chu sak le thlang, sim le hmara in ramri ding chu a nih' ti rawh" a ta. 13 Mosie chun Israelhai chu thu a pêk a, "Ram in rochung ding chu thum vawrin insem ro. Hnam kuo le a chenve kuoma sem dingin LALPAN thu a pêk a nih, 14 Reuben pahnam, Gad pahnam le Manase pahnam chenve chun an chanvo ding chu an hluo ta si a. 15 Hieng hnam hni le a chenve hai hin ni suokna tieng Jeriko zawn Jordan râl sak tienga an ram hluo ding chu an chang dêr tah a nih" a ta. 16 LALPA chun Mosie kuomah, 17 "Ram hluo ding thèpêktu ding cheu chu thiempu Eleazar le Nun-a naupa Josua nîng an tih. 18 Pahnam tin luhai chu a sempuitu dingin ruot rawh. 19 Chuonghai hming chu: Juda hnama inthokin Jefune naupa Kaleb; 20 Simeon hnama inthokin Amihud naupa Semuel; 21 Benjamin hnama inthokin Kislon naupa Elidad; 22 Dan hnama inthokin Jogli naupa Bukki; 23 Josefa naupa Manase hnama inthokin Efod naupa Haniel; 24 Josefa naupa Efraim hnama inthokin Shiftan naupa Kemuel; 25 Zebulun hnama inthokin Parnak naupa Elizafan; 26 Isakar hnama inthokin Azan naupa Paltiel; 27 Aser hnama inthokin Selomi naupa Ahihud; 28 Naftali hnama inthokin Amihud naupa Pedahel" tiin. 29 Chuonghai chu Kanan rama Israelhai ram hluo ding sem dinga LALPAN thu a pêkhai chu an nih.

Numbers 35

1 Jeriko zawn Jordan kam Moab phaia chun LALPAN Mosie kuomah, 2 "Israelhai chu thu pe la, an rama chun Levihai umna ding khuo siempêk raw hai se. Khaw kawl vel ram chu ran tlatna dingin pe bok ro. 3 Chuongchun, umna ding khuo nei vêng an ta, an bawng le beram le ran ruol danghaiin tlatna hmun ding nei bok an tih. 4 Khaw kawla ran tlatna hmun in pêk ding chu kula inthoka inkhia meter zali le sawmngaa hlaah a ni ding a nih. 5 Kul puo tienga inthokin inkhi unla, sak tieng meter zakuo, thlang tieng meter zakuo, sim tieng meter zakuo le hmar tieng meter zakuo nîng a ta, a lai takah khuo um a tih. Hi hmun hi a khaw ta dinga ran tlatna hmun ding nîng a tih. 6 "Levihai in pêk ding laia khuo paruk chu tuol thathai tlân lûtna ding, inhumhimna khuoah in siem ding a nih. Chu bâk chu khaw sawmli le khaw hni in pêk bok ding a nih. 7 Levihai in pêk ding khuo po po chu khaw sawmli le pariet nîng a ta, a khawhnawm leh in pêk bok ding a nih. 8 Israelhai ram hluoa mi Levihai umna ding khuo in pêk dàn ding chu, in ram nei ang dungzuiin nîng a ta, a nei lien deuin pe lien in ta, a nei tlawm deuin pe chin in tih" a ta. 9 Chun, LALPA chun Mosie kuomah, 10 "Israelhai inbiekpui la, hieng hin hril rawh: 'Jordan vadung kâna Kanan ram in lût pha leh, 11 pàngpala tuol thattuhai tlân lût theina dingin inhumhimna khuo iemani zât siem ro. 12 Pungkhawm hmaa a chungthu rêlpêk dinga a ngîr hmaa tuolthattu chu a thi nawna dingin, chuong khuohai chu phubalatuhai laka in tuoltlânna ding nîng a tih. 13 Chuong khuo paruk in pêkhai chu in ta dinga inhumhimna khuo nîng a tih. 14 Jordan sak tieng hin chuong ang inhumhimna khuo chu pathum siem un la, Kanan ram tieng pathum siem bok ro. 15 Hieng khuo parukhai hi Israelhai le hnam danghai le an kuoma chènghai ta dinga inhumhimna khuo nîng a ta, chu taka chun tu khom pàngpala mi that taphot tuoltlân thei an tih. 16 " 'Tu khomin thîrin mi a vuok a, a thi chun tuolthat a na, ama chu sukhlum ngèi ding a nih. 17 Tu khomin a kutin lungtum a chawi a, mi a suk a, a thi chun tuolthat a na, ama chu sukhlum ngèi ding a nih. 18 Tu khomin a kutin mi that theina thing tum a chawi a, mi a zei a, a thi chun tuolthat a na, ama chu sukhlum ngèi ding a nih. 19 Phubalatu chun tuolthattu chu a hmu pha leh sukhlum nghal a tih. 20 Mi tu khomin theidana leia mi a nam rak amanih, thil iengin amanih tum hrima a dèng a, a thi chun, 21 an naw leh an innghirnghona leia kuttuma a chum hlum chun, a sukhlumtu chu sukhlum ngèi ding a nih, tuolthat a ni leiin. Phubalatu chun a hmu hun hunah sukhlum a tih. 22 " 'Intheidana um loa mi dang a nam thut amanih, tum lei ni loa thila mi a dèng amanih a ni ruok chun, 23 an naw leh hmu loa lung inthlâkkhum leia mi a lo thi chun, a hmèlma a ni naw lei le a poi tawk tum khom a ni bok naw leiin, 24 pungkhawmhaiin a sukhlumtu le thisen phuba latu chungthu chu hieng dânhai ang hin an rèl ding a nih. 25 Pungkhawmhai chun thisen phuba latu lakah tuolthattu chu hum an ta, a tuoltlanna khuoa chun inumtir nawk an ta, hriek thienghlim nâl thiempu laltak ni lai a thi hma khat chu taka chun a um ding a nih. 26 " 'Amiruokchu, tuolthattu chu a tuoltlànna khuo ramri puoah a fe a, 27 thisen phuba latuin a hmu a, a that chun tuolthat ni naw nih. 28 Thiempu lal a thi hma khat chu a tuoltlânnaah tuolthattu chu a um zing ding a nih; thiempu a thi hnung ruok chun a umna hmunah a kîr nawk ding a nih. 29 " 'Hieng dânhai hi khaw lai khom um inla, in thlahai chena ro in inrêl dàn ding chu a nih. 30 Tu khomin tuol a that chun, hrepuituhai baua inthoka thu suokin ama chu sukhlum ngèi ding a nih; amiruokchu, hrepuitu pakhat chauh bausuok thu chu mi sukhlumna dingin a huntawk nawh. 31 Tuolthattu chu thi tlâk a ni leiin suma intlan suok ding a ni nawh; sukhlum ngèi ngèi ding a nih. 32 Inhumhimna khuoa tuoltlân chu chuong hun laia thiempu lal a thi hma chun a umna khaw hluia kîr nawk dinga intlan suok phal a ni nawh. 33 " 'In umna ram chu sukporche naw ro. Thisen insuona chun ram a sukporche. Thisen insuo leia sukporche ram chu thisen insuotu thisen chauh naw chun sukthieng thei a ni nawh. 34 In umna ram, ka chêngna hmun hi sukporche naw ro, kei hi LALPA, Israelhai laia chêng chu ka ni si a' tiin hril rawh" a ta.

Numbers 36

1 Josefa thlaa mi, Manase naupa Makir, Makir naupa Gilead thlaa mi sûngkuo luhai chu an hung a, Mosie le Israel pahnam luhai hmaa chun thu an hril a: 2 "LALPA chun Israelhai ram hluo ding chu thum vawra sem dingin kan pu thu a pêk a; chun, LALPA chun kan pu chu kan unaupa Zelofehad hluo ding ram chu a naunuhai pe dingin thu a pêk bok a. 3 Tuhin, Israel sûngkuoa mi pahnam dang pasalah lo nei ta hai sien, an pi le pu rama an rochan chu an pasal va neihai kutah a lût ding a na. Chuong a ni chun, kan pahnam ta dinga pêk ram chu a kiem ding tina a nih. 4 Israelhai ta dinga Jubili Kum a hung tlung pha leh, pasal an va neina hnamhai ramah kan ram chu kop tâng a ta, kan thlatuhai ram chu làk hmang a hung ni ding a nih' tiin. 5 Chuongchun, LALPA thu angin Mosie chun Israelhai chu thu a pêk a: "Josefa thlahai thu hung hril hi a'n dik a nih. 6 Hi hi Zelofehad naunuhai chungthua LALPA thupêk chu a nih: an pahnam sûnga mi an ni phot chun tu khom pasala an nei a thieng. 7 Israel thlahai ram chu pahnam pakhata inthokin pahnam dang kutah son ding a ni naw a, Israel pahnam tinin an pi le pua inthoka an rochung ram chu an kol seng ding a nih. 8 Israel thlahai laia rohluotu ding nuhmei taphot chun, Israel thlahaiin an pi le pu ram an hluo seng theina dingin, a pa hnampui laia mi ngei pasalah a nei ding a nih. 9 Ram hrim hrim pahnam pakhata inthokin pahnam dangah son ding a ni naw a, Israel pahnam tinin an rochung ram chu an kol ding a nih" tiin. 10 LALPAN thu a pêk angin Zelofehad naunuhai chun an thaw a. 11 Zelofehad naunu Mahla hai, Tirza hai, Hogla hai, Milka hai le Noa hai chun an pa unauhai naupahai chu pasalah an nei seng a. 12 An pasalhai chu Josefa naupa Manase naupahai an na, an ram chu an pa hnama chun a um zing tah a nih. 13 Hienghai hi LALPAN Mosie hmanga Jeriko zawn, Jordan ràl, Moab phaia Israelhai kuoma thupêk le dàn a pêkhai chu an nih.

Deuteronomy 1

1 Hieng thuhai hi Jordan sak tieng, Paran le Tofel, Laban, Hazerot le Dizahab inkâr, Sufa ruom depa um Araba thlalera Israel mihai po po an um laia an kuoma Mosie hril a nih. 2 Seir tlâng hrawa fe chun Horeb le Kadesh Barnea inkâr chu ni sawm le ni khat lam a nih. 3 Kum sawmlina, thla sawm le pakhatna ni hmasa tak chun LALPAN Israelhai chungthua hril ding thu a pêk po po chu an kuomah Mosien a hril a. 4 Chu chu Hesbon-a um Amorhai lal Sihon a hnè hnung le Astarot-a um Basanhai lal Og chu Edrei hmuna a hnè hnung a nih. 5 Jordan sak tieng Moab ramah hi dân hi Mosien a puong tan a nih: 6 "LALPA ei Pathien chun Horeb tlângah hieng ang hin a mi hril a nih: 'Hi tlânga hin in chàm sawt thawkkhat tah. 7 In riebùkhai thiek unla, Amor mihai umna tlângram tieng inson suok unla, Araba le a se vel tlângrama hai, thlang tieng tlâng thut phaizawla hai, sim tieng panga hai, Kanan mihai chèngna tuipui kama hai, Lebanon tlâng khèl Eufretis Vadungpui chenin fe ro. 8 Ngai ta u, hi ram hi ka pêk ta chêu a nih. In thlatu Abraham hai, Isak hai, Jakob hai le an thla la hung pei dinghai kuoma inkhâm meua LALPAN a pèk chêu rama chun lût unla, hluo ta ro' tiin 9 "Chun, chuong lai chun in kuomah, 'Keima ngot chun ka phur zo ta naw chêu a nih. 10 LALPA in Pathien chun a sukpung chêu a, vàna arasi zât anga tam in lo ni ta hi. 11 LALPA, in thlatuhai Pathien chun tuta nêka a lêt sângin sukpung sienla chêu, a tiem angin malsawm raw se chêu. 12 Amiruokchu, iengtin am keima chauh chun in harsatnahai, phurrikhai le in kàra thubuoihai chu phur zo tàng ka ta? 13 In hnam chita inthokin mi var, thil chinchàng hrie le inzà phurhai chu thlang suok unla, in chunga rorêltuah sie tawl ka tih' tiin ka biek chêu a. 14 Chun, nangnin, 'I thilthaw tum chu kan ta dingin a tha ngot el' tiin in mi don a. 15 "Chuong ang chun in hnam chita mi challang, mi var le inzaum in hung thlang suokhai chu sâng chunga hai, za chunga hai, sawmnga chunga hai, sawm chunga hai rorêltu dinga siein, in hnam lukhàitu dinghai khom ka ruotpêk chêu a. 16 In rorêltuhai kuomah, 'In mihai laia thubuoi um hrim hrim chu ngun takin ngàithlapèk unla, Israel unau le unau inkâr thu amanih, Israel mi le nangni laia hnam dang umhai inkâr thu amanih chu indik takin, thlei bik nei loin rêlpèk ro. 17 Ditsak bik nei naw unla, mi chîn mi lien a tu el khom thuhmûn vonga enin an thu rêlpêk ro. Tu khom tithawng naw ro, in thu rêl thlûk chu Pathiena inthok a ni si a. In ta dinga rèl khir taluohai ruok chu ka kuomah hung put lût unla, keiman lo rêl ka tih' tiin thu ka pêk a. 18 Chu lai chun in thaw ding danghai khom ka hril ta chêu kha. 19 "Chu zoah, LALPAN thu a mi pèk angin Horeb tlânga inthokin ei suok a, in hmu tah thlalèr ram lien tak le tium tak chu fe thlengin Amor mihai chèngna tlângram tieng panin, Kadesh Barnea ei tlung a. 20 Chun, in kuomah, 'LALPA ei Pathienin a mi pêk Amorhai chèngna tlângram chu in hung tlung ta hi. 21 Ngai ta u, LALPA in Pathien chun hi ram hi a pêk tah chêu a nih. LALPA, in thlàtuhai Pathienin a hril angin, hang fe unla, ram chu hang hluo ro. Ti naw unla, zâm bok naw ro' tiin ka hril chêu a. 22 Chu phing leh inrêngin ka kuomah in hung a, 'A ram hang thlithlai a, lampui ei hraw ding le khuo ei sir ding hai chanchin hung ripawt nawktu ding enthlatu tir hmasang ei tiu' in ti a. 23 In thil rot chu thaa ka hriet leiin nangni laia mi sawm le pahnih, pahnam tina mi pakhat pei, ka thlang suok a. 24 Anni chu an suok a, tlângrama chun an kài a, Eskol ruom chen an tlung a, an thlithlai vong a. 25 A ram suok thei iemani zât hung hawn thlain, 'LALPA ei Pathienin ram a mi pêk chu ram tha tak a nih' tiin an hung ripawt a. 26 "Nisienlakhom, kai tung nuom loin, LALPA in Pathien thupêk laka chun in hel a. 27 In puon ina hai chun, 'LALPAN a mi theida a, mi sukbohmang tumin Amorhai kuta pêk dingin Aigupta rama inthokin a mi thuoi suok a nih. 28 Ieng leiin am ie ei pan tung ding? Ei unauhai hlak chun, 'A rama chênghai chu eini nêk daiin an lien a, an insàng lem a, an khuohai a lien a, vàn tongin kul an nei a, mi lien Anak thlahai khom kan hmuh', an ti nawk nghal a, lungril an sukzâm vong annawm' tiin in chier a. 29 "Chun, kei chun in kuomah, 'Thlabàr naw unla, anni chu ti bok naw ro. 30 In hmathuoitu LALPA in Pathien chun, Aigupta rama in mit hmua ngei a thawpêk chêu ang khan, anni chu dopêk a ti chêu. 31 Pain a naupa a puok ang elin LALPA chun thlalèra khom, hi hmun hi in tlung chenin, a puok chêu ti in hmu ta kha' ka ti a. 32 Sienkhom, chuong saa in hmaah fe a, in riekna hmun ding zongpêk a, zânah meichokin, sûnah sùmin in hma thuoi a, 33 in lampui ding a kawkhmu chêu khom chun, LALPA in Pathien chu in la ring chuong nawh. 34 "In thil hrilhai LALPAN a hriet chun a lung a sen a, 35 "Hi suon suol taka mi tu khom hin in pi le puhai kuoma inkhâm meua pèk ka tiem ram chu hmu naw ni hai, 36 Jefune naupa Kaleb ti chauh naw chun. Ama chun hmung a ta, a sir ram chu ama le a thlahai kuomah pêng ka tih, lungril po poa LALPA a zui leiin" tiin a'n khàm a. 37 Nangni leiin ka chunga khom LALPA chu a lungsen a, 'Nang khom lût bik naw ti nih. 38 I kaiza vêngtu Nuna naupa Josua ruok chu lût a tih. Ama hi infui phûr rawh, Israelhai thuoiin a la'n hluotir ding a ni si a. 39 Naupang chiktê te, râllâka an lâk el dinga in hrilhai, tuta a sie a tha la hre thei lohai hi chu rama chun lût an ta, anni chu pêng ka ta, hluong an tih. 40 Inrêng hin kîr nawk unla, Tuipui Sen tieng panin thlalèrah fe ro' tiin a hril a. 41 "Chun, nangnin, 'LALPA chungah thilsuol kan lo thaw tah a nih. LALPA kan Pathienin thu a pèk angin kai tung kan ta, hang bei kan tih' tiin in mi don a. Chuongchun, mi tinin râlthuom in inbel a, tlângram pan tung chu olsam hle dingin in ngai a. 42 Sienkhom, LALPA chun ka kuomah, 'Fe naw raw hai se, hang do bok naw raw hai se, nangni lai ka um naw ding a ni si a. 'In hmèlmahaiin lo intlawm an ti chêu' tiin an kuomah hril rawh' a mi ti a. 43 Chu thu chu ka hril chêu a, in pom nuom naw a, LALPA thupêk chu kalin, awm-êu takin tlânga chun in hang fe lui a. 44 Chu tlâng hluotu Amorhai chun an lo bei chêu a, khuoi hon angin Seir tlânga inthokin Horma chenin an hnot thlùr chêu a. 45 In hung kîr a, LALPA hmaah in tap a, sienkhom LALPA chun in tap rawl chu a ûksak naw a, a na a sit bok nawh. 46 Chuongchun, Kadesh-ah ni tam tak, in um pha a ni kha.

Deuteronomy 2

1 "Chuongchun kan inher kîr a, 2 Chun, LALPA chun a mi biek a, 3 'Hi tlâng hi in hèl suok rawn ta a, hmar tieng pan ta ro. 4 Hieng ang hin mipuihai chu thu pe rawh: Seir tlânga um Esau thla, in unauhai ram chu in pal tlang ding a na, an ti ding chêu a ni leiin fimkhur hle ro. 5 Indo dingin cho naw ro, an ram chu kepha tiet khom ka pêk naw ding chêu a nih. Seir tlângram hi Esau chanpuola ka pêk a ni tah. 6 In fàk le dawn khom a man tangkaruoin in pèk ding a nih. 7 LALPA in Pathien chun in kut sinthaw mal a sawm a, thlalèr ram zau tak in pal tlang lai khomin a enkai zing chêu a. Kum sawmli sûng hin LALPA in Pathien chun a umpui chêu a, tlàksam ieng khom in nei nawh, ' tiin. 8 Chuong ang chun Elat le Ezion-geber a inthokin Araba lam chu hrawin ei unauhai, Seir tlânga um Esau thlahai ram chu kan pal tlang a, Moab thlalèr panin kan fe a. 9 "Chun, LALPAN ka kuomah, 'Moab-hai kha sukbuoi naw unla, indo dingin cho bok naw ro, an ram hlek khom ka pêk naw ding chêu a nih. Ar khuo chu Lota thlahai chanpuola ka pèk a ni tah' a ta. 10 (Chu hmuna chun a hmain Anak-hai ang boka mi lien le dung insàng Emim an tihai chu tam tak an um hlak a. 11 Anni chu Anak-hai ang boka Refa tia ko ni hai sienkhom Moab mihai chun Emim tiin an ko a nih. 12 Chun, tuta hma chun Seir tlânga hin Hor-hai an um hlak a, sienkhom Esau thlahaiin an hlu suok a, an tukdol hnung chun an hmun chu an hluo tah a nih, LALPAN Israelhai chanpuola ram a pèk an thaw ang khan. ) 13 "Chun, LALPAN ka kuomah, 'Tho unla, Zered varuom chu kân ro' a ta, chuongchun Zered varuom chu kan fe kai a. 14 Kadesh-barnea kan suoksana inthoka Zered vadung kan kân chen inkâra hin kum sawmthum pariet a tlâ a nih. Chu sûng chun, an kuoma LALPA a'n khàm angin, chu suona mi laia râl kâp thei chin chu an mang fai thak a nih. 15 Mipui laia inthoka sukchimit an ni vong hma khat chu LALPA kut chun a khing tlat tawl si a. 16 "Râl kâp thei chin an thi zo vong hnung chun 17 LALPAN a mi biek a, 18 'Voisun hin Moab ram chu Ar khuoah in fe thleng ding a nih. 19 Amon-hai umna in va paw pha khom sukbuoi naw unla, indo dingin cho bok naw ro. Amon-hai ram chu Lota thlahai chanpuola ka pêk tah leiin an ram chu a hlekte khom in chanpuola dingin pe nawng ka ti chêu' a ta. 20 "(Chu hmun khom chu a hmaa chêng hlak Refahai rama ngai a na, sienkhom Amon-hai chun anni chu Zamzumhai tiin an ko. 21 Mi lien tak, tam tak el, Anak-hai ang boka dung insâng tak tak an nih. Anni rawi chu LALPAN a sukbohmang a, an umna chu Amon-haiin an hung hluo tah a nih. 22 Chuong ang bok chun LALPAN Seir tlânga um Esau thlahai ta ding khomin a thawpèk a, Hor-hai chu a sukbohmang a, anni hmuna chun voisun chen hin an chèng tah a nih. 23 Khaw hrang hranga chènga Gaza chena inzar Av-hai khom Kret thlierkâra inthoka hung Kaptorhaia chun an sukboral a, an ram chu a hluopèk tah a nih. ) 24 "Chun, LALPAN ka kuomah 'Tuhin suok unla, Arnon Ruom fe thleng ro. Amon mi, Hesbona lal Sihon le a ram chu i kutah ka pêk suok tah. Hluo tan inla, indopui ro. 25 Voisuna inthok hin vànkhup hnuoia hnam tin tisimah siem ka ti che a, i chanchin an hriet ringot khomin thlabâr le beidongin inthin hawp an tih' a ta. 26 "Chuongchun, Kedemot thlalèra inthokin Hesbon lal Sihon kuomah inremna thu inchawtirin palai ka tir a, 27 "I ram kan hraw tlang mi phalpêk raw khai. Lamlien peiah fèng kan ta, chang tieng amanih voi tieng amanih pêt nawng kan tih. 28 Kan bu fâk ding le tui dawn ding mi'n chawktir la, a manah tangkaruo pêng kan ti che. 29 Jordan kâna LALPA kan Pathien ram mi pèk kan lùt hma chenin, Seir tlânga um Esau thlahai le Ar khuoa um Moab mihaiin kan chunga an thaw ang bokin, nang khomin kea i ram kan hraw tlang mi phalpêk hrâm rawh" tiin. 30 Sienkhom, Hesbon lal Sihon chun a ram kan hraw ding chu a phal nawh. LALPA in Pathien chun tuta a ram ei hluo lai zing hi in kuta a pèk theina dingin a thlarau suklululin a lungril a sukkhaupèk a nih. 31 LALPA chun ka kuomah, 'Ngai ta, Sihon le a ram chu ka'n hlan tan mek ta che a, tuhin a ram chu la la, hluo tan pei ta ro' tiin a mi hril a. 32 Chuongchun, Sihon le a mihai po po chu mi bei dingin Jahaz-ah an hung a. 33 LALPA ei Pathien chun ama chu kan kutah a pêk a, ama le a naupahai le a sipaihai po po chu kan that vong a. 34 Chu tum chun a khuo po po chu kan làk a, kan suksiet vong a, a mi chènghai tu khom damin kan hlà nawh. 35 An ranruolhai le khuo kan làknaa kan râllàkhai ruok chu kan puola dingin kan hawn a. 36 Arnon ruom sìra Aroer le a ruom panga khaw umhaia inthoka Gilead chenin kan ngam lo khuo hrim a um nawh. LALPA ei Pathien chun a mi pêk vong a nih. 37 Amiruokchu, LALPA ei Pathien thupêk angin, Amon mihai ram chu ei tawk sa ve naw chauh a ni khah, Jabok vadung kama khuohai le tlângrama khuohai khom.

Deuteronomy 3

1 "Chu zoah kan inson a, Basan kan pan tung a, Basan lal Oga chu a sipai po po leh Edrei hmunah mi bei dingin a hung inthok suok a. 2 LALPA chun ka kuomah, "Ama chu ti dêr naw rawh, a sipai po po le a ram leh i kutah ka pêk diem tah a nih. Hesbona Amor lal Sihon chunga i thaw ang bok khan a chunga khom thaw ve rawh" a ta. 3 "Chuong ang chun LALPA ei Pathien chun Basan lal Oga le a sipai po po chu kan kutah a mi pêk a, hlà nei loin kan that vong a. 4 Chu tum chun Basan lal Oga ram, Argob biel po po le khuo sawmrukhai chu làk naw kan nei nawh. 5 Hieng khuo po po hi kul bang insâng tak taka inhuon le kul kotkhâr le a kalna nghet tak tak nei vong an na, kula inhuon lo khuo khom tam tak a um bok a. 6 Hesbona Sihon lal chunga kan thaw ang bokin kan sukbohmang vong a, an khuohai le a sùnga cheng mihriem po po, nuhmei le naupang chenin, kan inram fai vong a nih. 7 An ran ruolhai le khuoa mi kan ràllàk thilhai ruok chu kan puola dingin kan lâk a. 8 "Chu tum chun hieng Amor lal pahnihai ram, Jordan vadung sak tienga mi hi Arnon ruoma inthoka Hermon tlâng chen kan làk a. 9 (Hermon chu Zidonhai chun Sirion an ta, Amorhai chun Senir an tih). 10 Tlâng zam pheia khuo po po, Gilead chenin, Basan ram po po, Basan lal Oga khuo Saleka le Edrei chenin kan lâk vong bok a. 11 (Basan lal Oga chu mi lien Refahai laia la dam um sun a na, a khum chu thira siem, a dung meter 4 12 "Chu tuma kan ram làkhai, Arnon ruom sìra Aroer hmar tienga inthoka Gilead tlàng zâtve chu, a ram sûnga khuo um po po leh Reuben hnam le Gad hnam hai ka pêk a. 13 Gilead tlâng zâtve dang le Oga inlalna ram Basan po po chu Manase hnam zâtve kuomah ka pêk a. (Basana Argob biel po po hi Refahai ram tia hriet a ni hlak. 14 Manase thlaa mi Jair chun Argob biel po po, Gesur-hai le Makat-hai ramri chen a chang a, chu ram chu a hming chawia koin, Basan chu tu chen hin Havot-Jair ti a la nih. 15 Gilead chu Makir ka pêk a. 16 Reuben hnam le Gad hnamhai ruok chu Gilead-a inthoka Arnon ruom chen ka pêk a. A ruom lailung chu sim tienga an ramri a na, hmar tieng panga chu Amonhai leh Jabok vadungah an inramri a. 17 Thlang tieng ramri chu Jordan vadung, hmar tieng chu Kineret Dil, sim tieng tawp chu Araba Tuipui (Chi Tuipui)c le sak tieng chu Pisga tlâng thut chen a nih. 18 "Chu tum chun in kuomah, 'LALPA in Pathienin hi ram hi in hluo dinga a pêk chêu a ni ngei el. Amiruokchu, râl do thei chin taphot chun râlthuom inbelin, in unau Israelhai hmaah Jordan vadung hi in kàn ding a nih. 19 Nangni ang boka in unauhai khom LALPAN ralmuonga a siem hma po le Jordan thlang tienga LALPA in Pathienin ram a pèk chêu chu an hluo chenin, in nuhmeihai, in nauhai le in ranruolhai chu khuo ka pèk ta cheua chun lo um raw hai se, ran khom in hau ta hle ti ka hriet si a. 20 Chu zoah, in chanpuola ka pèk chêu rama hin in hung kìr nawk ding a nih' tiin thu ka pêk chêu a ni kha. 21 "Chun, chuong lai bok chun Josua kuomah, 'LALPA i Pathienin lal pahnihai chunga a thaw dânhai kha mit ngeiin i hmu a. I fena dinga lalhai chunga khom khang ang bok khan LALPAN thaw pei a tih. 22 Anni chu ti naw rawh, LALPA i Pathien ngei chun dopêk a ti che' tiin thu ka pêk a. 23 "Chu tum bok chun, 'Aw LALPA Chunghnungtak, i ropuizie le i kut hrâtzie chu i siehlaw kuoma hin i'n entir tan mèk tah a. 24 Thil ropui tak i thaw anga thaw ve thei hnuoi le vànah pathien dang tu hrim am an um a? 25 Chu ram tha, Jordan râl ram le tlâng ram mawi tak el chu Lebanon chena hmu ve dingin min kàitir ve lul rawh khai' tiin LALPA chu ka ngên a. 26 Nisienlakhom, nangni leiin LALPA chu ka chungah a lung a sen a, a mi ngàithlàk nuom nawh. LALPA chun ka kuomah, 'A hun tah. Hi chungthua hin chu mi be nawk ta ngai hrim hrim naw rawh. 27 Pisga tlâng sîpah hang kài la, sim le hmar le sak le thlang tieng mit inlènin, a ram chu hang thlìr vel rawh, Jordan ruok chu kân naw ti nih. 28 Amiruokchu, Josua hi thu pe la, infui tha la, sukhrât rawh; hieng mipuihai hi ama'n thuoi kai a ta, i hang hmu ding ram chu inhluotir a tih' a ta. 29 Chuongchun, Beth Peor bul ruoma chun umhmun kan khuor a.

Deuteronomy 4

1 "Aw Israelhai, dàn le thupêk ka zirtir ding hai chêu hi tu hin ngàithla ro. LALPA, in thlatuhai Pathienin ram a pêk chêu chu hring le dama in hluo theina dingin ka hrilhai hi zawm ro. 2 Thu ka pêk bâk chêu hi belsa naw unla, pei bok naw unla, ka pêk chêu ang tak hin LALPA in Pathien thupêkhai chu vong tlat ro. 3 Baal-peor-a LALPA thilthaw kha in mit ngeiin in hmu a, LALPA in Pathien chun Peor hmunah nangni laia Baal betu po po a sukhlum vong a; 4 sienkhom nangni laia LALPA in Pathien cheltu taphot chu hring le damin tu chen hin in la um hih. 5 "Ngai ro, lûta in va hluo ding rama khom in zawm pei dingin LALPA ka Pathienin thu a mi pêk ang takin a dàn le thupêkhai chu ka zirtir chêu a nih. 6 Fimkhur takin zawm unla, chu chu hnam dangha'n an hriet ve hunah, 'Hi hnam hi hnam var tak le thil hre mi tak an lo ni hih' ting an ta, in varzie le changkâng bìkzie hung hrieng an tih. 7 Ei ko châng phota mi don hlak LALPA ei Pathien anga an ko chânga ngaisak hlak pathien nei ve hnam ropui dang tu am an um a? 8 Tuta in hmaa ka siepêk chêu dàn le thupêkhai anga dàn fel nei hi hnam ropui dang tu am an um ve a? 9 "Mit ngeia in thil hmuhai kha theinghil lo ding le in dam sûnga in lungrila a bo nawna dingin, ngun taka mani invêngin, fimkhur ro. In nauhai le in tuhai zirtir ro. 10 Horeb tlânga LALPA in Pathien hmaa in ngîr tuma LALPAN ka kuomah, "Ka hmaa hin mipuihai chu ko khawm la, a ram leilunga an chêng sûng poa mi ti dàn an inchûk theina ding le an nauhai an zirtir dingin ka thuhai lo inhriettir ka tih" a ti ni khom kha hre zing ro. 11 In hung hnai a, tlâng thutah in ngîr a, sûm dum le thim sa mup kârah tlâng chu vàn tongin a chok puot puot a. 12 Chu zoah LALPA chun meichoka inthokin a hung biek chêu a. A thu hril chu in hriet a, a hmèl put dàn awm ruok chu in hmu naw a, rawl chauh in hriet a nih. 13 A Thupêk Sawm, in zawm dinga dân a pêk, lungphêk pahnia a ziek chu, a hung puong a. 14 Chu tum chun Jordan kâna ram inhluo phaa in zawm ding dàn le thupêkhai chu zirtir ding cheuin thu a mi pêk a ni kha. 15 "Horeb tlânga meichoka inthoka LALPAN a biek chêu khan a ruongâm ieng khom in hmu naw kha. Chuleiin fimkhur hle ro, 16 chuong naw chun hung porchein, in ta dingin milem dâm siem fawmin, thil lem, pasal amanih nuhmei amanih lem dâm, 17 an naw leh hnuoia chêng ransa amanih lem dâm, boruoka vuong vate amanih lem dâm, 18 hnuoia bokvâka invâk chi le tuia chêng nga amanih lem dâm siem rawi in tih. 19 Chun, vàn tieng in hang en a, vàn mawitu nisa hai, thlahai le arasihai in hmuin, chuonghai chun hîpin, an hmaa kûn châkna nei naw unla, LALPAN vàn khup hnuoia hnam tin ta dinga a ruot thilhai chu be naw ro. 20 Nangni chu, tuta in ni ang hrim hin a mihai, a rohluotu ni dinga LALPAN rawtuina meia inthoka a lâk suok, Aigupta rama inthoka a thuoi suokhai in nih. 21 "Kei ruok chu nangni leiin LALPA in Pathienin in hluo dinga ram a pêk ding chêu, ram tha taka chun fe ve dingin Jordan vadung ka kài ve a phal tlat naw a nih. 22 Kei chu Jordan kâi ve loin hi lai rama hin thîng ka ta, nangni ruok chun kân in ta, chu ram tha chu hluong in tih. 23 LALPA in Pathienin thuthlung in kuoma a thlunghai kha theinghil lo dingin fimkhur ro. LALPA in Pathienin a khap angin, ieng lem khom in biek dingin nangni ta dingin pathien lem siem naw ro. 24 LALPA in Pathien chu mei anga mi kàng hmang thei, Pathien thîkthusie tak a ni si a. 25 "Tu le tehai nei a, chu rama sawt tak in chêng hnung dàmin hung porche a, milem siem a, LALPA in Pathien mithmuah suol thaw a, a lungsenna in cho phawk dàm a ni chun, 26 Jordan kâna in va hluo ding rama inthok chun bohmang vak in tih ti in chungchâng thua mi hrepuitu dingin tu hin hnuoi le vàn ka fiel a nih; chêng sawt naw ti niu a, matheiloin sukbohmang nîng in tih. 27 LALPA chun hnam tin lai sukdar a ti chêu a, LALPAN a hnot darna chêu hnamhai lai chun mi tlawmte chauh dam khawsuok in tih. 28 Chu taka chun thing le lunga mihriem siem pathien lem, hmu thei lo, hre thei lo, fa thei lo le rim khom hre thei lo hai chu bieng in tih. 29 Amiruokchu, chu taka inthok khom chun LALPA in Pathien chu zong a, in lungril po po le in thlarau po poa in dap chun hmu nawk in tih. 30 Buoina in tuok a, chuong thilhai in chungah a tlung pha chun, a tawpah LALPA in Pathien tieng hung kîr nawkin a thu zawm tâng in tih. 31 LALPA in Pathien chu zangai thei tak Pathien a ni a, thlathlam naw ni chêu a, sukbohmang bok naw ni chêu a, inkhâm meua in pi le puhai kuoma thu a thlung chu theinghil ngai bok naw nih. 32 "Tiena tlânga in um hma dai, Pathienin hnuoia mihriem a siem lai kha ngaituoin, kawlkawdong chen khom dap unla, hieng ang thil ropui hi a tlung ta hlak hrim hrim am? Hieng ang thil hi miin an hriet ta hlak am? 33 Pathienin meichoka inthoka a biek mi, la dam si, nangni ang hi mi an um ta hlak am? 34 Fiena dâm, inchikna le thil mak dâm, indona dâm hmang a, kut hrât tak phar a, in mithmu ngeia LALPA in Pathienin Aiguptaa thil ropui le râpum tak a thawpèk chêu anga hnam dang kuta inthoka mani ngeia a hnamhai la suok ngam pathien dang an um hlak am? 35 "LALPA chu Pathien a nizie in hriet theina dingin hieng thilhai hi in kuoma suklangin a um a nih; ama naw chu Pathien dang hrim an um si nawh. 36 A thunun theina ding cheuin vàna inthokin a rawl a'n hriettir chêu a. Hnuoi chungah a meipui a'n hmutir chêu a, meia inthokin a rawl in ngàithlàk a. 37 In thlatuhai a hmangai a, anni hnunga an thlahai chu a thlang leiin, Aigupta rama inthokin ama'n umpuiin, a thilthawtheina ropui tak chun a thuoi suok chêu a, 38 nangni nèka hnam ropui lem le hrât lemhai ramah thuoiin, in rochung dinga a pêk theina ding cheuin, anni chu a hnot suokpêk chêu a, tuta ang hi in hung ni tah a nih. 39 "Chuleiin, tu hin in lungrilah vongin, hnuoi le vànah LALPA chu Pathien a nizie pom ro. Pathien dang hrim an um nawh. 40 Nangni le in thlahai ta dinga tha a ni lei le LALPA in Pathienin kumkhuoa dinga ram a pêk cheua hin in chêng sawt theina dingin, tuta a dàn le thupêk ka pêkhai chêu hi in zawm ding a nih. " 41 Theidana le tum lawk rêng lei ni loa tu khom mani tuolbawm that paltu tuol tlànna dingin Jordan ràl, ni suokna tieng chun Mosien khuo pathum a ruot a, 42 chu khuo a ienga khom a tlân lût hman chun him a tih. 43 Chuong khuohai chu Reuben hnam puol delh, thlalera tlâng zawla um Bezer khuo dâm, Gad hnam puol delh Gilead tlânga Ramot khuo dâm le Manase hnam puol delh Basan biela Golan khuo dâm a nih. 44 Hi hi Israelhai kuoma Mosie dàn pèk chu a nih. 45 Hienghai hi thil bituk dâm, thupêk dâm le dàn dâm, Aiguptaa inthoka an hung suok hnung, 46 Jordan sak tieng Beth Peor ep ruoma an um laia Mosien a pèk a nih. Hi lai ram hi Amor mi, Hesbon khuoa um lal Sihon ram a nih. Ama chu Mosie le Israel thlahaiin Aigupta an suoksan hnungin an hung hne a, a ram chu an hluopèk a. 47 Chuong ang bokin Jordan sak tienga um Basan lal Oga ram khom an hluopêk bok a. 48 An ram làkin a huop chin chu Arnon ruom sîra khuo Aroer a inthoka hmar tienga Sirion tlâng, Hermon tlâng an ti bok chen a nih. 49 Chun, Jordan ràl sak tieng chu Araba ram po po a na, sim tieng chu Pisgah pangpêr hnuoia Tuipui Thi chenin a nih.

Deuteronomy 5

1 Chun, Mosien Israelhai po po a ko khawm a, an kuomah, "Aw Israel mihai, ngaithla ro, hieng thupêk le dànhai hi nangni hrietin voisun hin ka puong a nih. Inchûk unla, zawm ngei ngei ro. 2 LALPA ei Pathien chun Horeb tlànga khan thû a mi thlungpui a. 3 Ei thlatuhai kuomah ni loin, eini, voisuna hring le dama la umhai kuoma ngei hin a nih thû a thlung chu. 4 LALPA chun hmai intonin tlânga khan meichoka inthokin a biek chèu a. 5 Kha tum khan meichok chu in ti leiin tlângah in lawn ngam naw a, LALPA le nangni inkârah kei ka ngîr a, LALPA thu chu in kuomah ka puong a ni kha. Hieng hin a hril a: 6 'Keima hi LALPA i Pathien, Aigupta rama bawia inthoka thuoi suoktu cheu chu ka nih. 7 "Keima naw Pathien dang hrim hrim nei naw rawh. 8 "I ta dingin milem insiem naw rawh, chung tieng vâna mi amanih, hnuoi tieng leihnuoia mi amanih, tui sùnga um amanih, a ieng angpui khom, i siem ding a ni nawh. 9 Chuonghai hmaa chun i kûn ding a ni naw a, i chawibiek ding a ni bok nawh. Kei, LALPA hi i Pathien, thîkthusie, pahai khawhlona leia nauhai hrem hlak, mi theidatuhai chu suon thumna le suon lina chen khom hrem hlaktu le, 10 mi hmangai a, ka thupêk zawmtuhai ruok chu an thla, a sânga sâng chen chunga lunginsietna inlangtir hlaktu chu ka nih. 11 "LALPA i Pathien hming hmang thäi naw rawh. LALPA chun a hming hmang pawlawttu chu thiem naw inchangtir loin a'n suo awm si nawh. d 12 "LALPA i Pathien thupèk chê angin, thienghlim takin sabat inser rawh. 13 Ni ruk sûng thokin i sin po po thaw la, 14 ni sarina ruok chu LALPA i Pathien sabat ni a ni leiin, chu ni chun sin hrim hrim i thaw ding a ni nawh; i naupa le naunu hai, i bawipa le bawinu hai, i bawngchal le sabengtung hai, i ran hai hrim hrim le in khaw sunga chêng hnam dang mi hai khomin an thaw ding a ni nawh; nangma ang bokin i bawipahai le bawinuhai khom an chawl ve ding a nih. 15 Nangni khom Aigupta rama khan bawi in ni a, chu taka inthok chun LALPA in Pathien hin a kut hràt khawkhêng pharin a thuoi suok chêu a nih ti hre zing rawh. Chuleiin, LALPA in Pathien chun sabat ni hi inser dingin thu a pêk chêu a nih. 16 "LALPA i Pathien thupêk che ang khan, i nu le pa chawimawi rawh, chuongchun dam sawt i ta, LALPA i Pathien pêk che rama hin hmûingìl i tih. 17 "Tuol that naw rawh. 18 "Uire naw rawh. 19 "Inru naw rawh. 20 "I vênghai laka hrepuitu derah insiem naw rawh. e 21 "I tuolbawm nuhmei inhnar naw la, a in le ram amanih, a bawipa le bawinu amanih, a bawngchal le sabengtung amanih le a thil nei ieng khom inhnar naw rawh" tiin. 22 "Hieng thupêkhai hi tlânga sûm le thim sa mup kâra meichoka inthoka rawl inring taka in rênga pungkhawmhai laia a puong a na, thil dang a belsa nawh. Chuonghai chu lungphëk pahniah a ziek a, a mi pëk a nih. 23 "Tlâng kâng puot puot laia thima inthoka rawl in hriet khan in hnam lukhâituhai le upahai chun an mi hung hnai a. 24 Anni chun, 'Ngai ta, LALPA ei Pathien chun a ropuizie le inlalzie a hung inlangtir a, meia inthoka a rawl chu kan hriet a. Pathienin a biek mihriem khom a la dam thei ti voisun hin kan hmu tah. 25 Tuhin ieng leiin am kan thi ding? Amiruokchu, LALPA kan Pathien rawl kan hriet zing chun hi mei râpthlâk tak hin mi lemin thi el kan tih. 26 Meia inthoka suok Pathien hring rawl kan hriet ang hriea thi thei mihriem ni si la dam zing tu am an um a? 27 Nangin va hnai la, LALPA kan Pathien hril po po chu va ngaithla lem raw khai. LALPA kan Pathienin i kuoma a hril po po chu nangin kan kuomah hril sawng i ta, lo ngaithlang kan ta, zawm kan tih' an ti a. 28 "Ka kuoma in thu hril chu LALPA chun a lo hriet a, ama chun ka kuomah, 'Mipuihaiin i kuoma an hril kha ka lo hriet a, an thu hrilhai po po kha tha ka tih. 29 Chuong ang lungril chu puta mi tiin, ka thupêkhai po po zawm rop nihai sien chu aw, anni le an nauhai khom kumkhuoin an hmûingìl awm vei leh! 30 Fe la, 'In puon ina hai kîr nawk ta ro' va ti rawh. 31 Nang ruok chu ka bulah ngîr la, an hluo ding ram ka pèka an zawm ding thu i zirtir ding po po, ka thupêkhai, ka thusuok hai le ka dàn hai chu hril ka ti che' a ti a. 32 Chuleiin, LALPA in Pathien thupêk cheu chu fimkhur takin zawm ro; chang tieng amanih voi tieng amanih pêtsan naw ro. 33 In hluo ding rama chun hmûingîl taka khawsa a, sawt tak in hluo theina dingin LALPA in Pathien thupêk ang takin kal chawi ro.

Deuteronomy 6

1 "Jordan vadung kâna in va hluo ding rama in kai phaa nangni le in nauhai le in tùhaiin LALPA in Pathien chu ti a, 2 in damsùng poa a dânhai le thupêkhai chu zawm a, chu hmuna in chêng sawt theina dinga LALPA in Pathienin nangni zirtir dinga a mi pêk, a thupêk hai, thusuok hai le dànhai chu hieng hi a nih. 3 Chuleiin, aw Israel, i thatpui ding le LALPA, i pi le puhai Pathienin thu a tiem anga nenetui le khuoizu luongna rama nasa taka i hung pung theina dingin, ngâithla la, fimkhur takin zawm rawh. 4 "Aw Israel mihai, ngâithla ro. LALPA ei Pathien chauh hi LALPA chu a nih. 5 LALPA in Pathien chu in lungril po poin, in thlarau po poin, in hràtna po poin in hmangai ding a nih. 6 Voisuna thupêk ka pêk chêu hi lungrilah in vong zing ding a nih. 7 In nauhai taima takin zirtir unla, ina in um chàng amanih, lama in lawn lai amanih, in zàl le tho pha amani khomin hril zing hlak ro. 8 Inchikna dingin bânah zem unla, in chalah hrên bok ro. 9 Chun, in in kotkhàr bienga hai le in tuolkotah hai ziek bok ro. 10 "LALPA in Pathienin in pu Abraham hai, Isak hai le Jakob hai kuoma inkhâm meua pêk a tiem chêu ram, in indin khom ni dêr lo khawpui hnienghnâr tak tak hai, 11 in sèng thang dêr loa thil tha tinrênga sung sip in hai, in chìng ni dêr lo grêp huon le oliv huon hai, in cho ni dêr lo tuikul hai umnaa a thuoi lût chêu hunah, fa le dawna in tlai pha chun, 12 bawia in intàngna ram Aiguptaa inthoka thuoi suoktu chêu LALPA chu theinghil lo dingin fimkhur ro. 13 LALPA in Pathien chu ti unla, a rong chauh bawl unla, a hming sâlin thu tiem hlak ro. 14 Pathien dang, in kawl le kienga pathienhai chu in biek ding a ni nawh. 15 Nangni laia um LALPA in Pathien hi Pathien thîkthusie a na, in chungah a lungsen chok a ta, hnuoi chunga inthokin sukbohmang hlauh rawi a ti chêu. 16 Masaa in fie ang khan LALPA in Pathien chu fie naw ro. 17 LALPA in Pathien thupêkhai le a thil bituk le thusuokhai chu fimkhur takin vong tlat ro. 18 LALPA mithmua fel le tha chu thaw unla, in ta dingin thâng a ta, in puhai kuoma inkhàm meua LALPA tiem ram thaa chun lûtin hluo thei in ta, 19 LALPAN a hril angin, in mithmu ngeiah in hmèlmahai chu hnot suok a tih. 20 "Chun, in nauhaiin, 'LALPA ei Pathien thupêk, a thil bitukhai, thusuokhai le dânhai chu a umzie iem a na?' tia nakie an la hung indon pha chêu, 21 nangnin in nauhai kuomah, 'Aigupta rama chu Faraw bawi kan ni a, sienkhom LALPA kut hràtin a mi thuoi suok a. 22 Kan mithmua ngei inchikna le thil mak nasa tak le râpthlak tak tak, Aigupta ram chunga le Faraw le a sûngkuohai po po chungah LALPAN a'n entir a. 23 Keini ruok chu kan pi le puhai kuoma inkhâm meua pêk a tiem rama chun mi thuoi lût dingin Aigupta rama inthokin a mi thuoi suok a. 24 Chuongchun, voisuna ei um anga hring le dama uma ei hnienghnâr pei theina dingin, LALPA chun hieng thupêkhai hi zawm a, LALPA ei Pathien chu ti dingin thu a mi pêk a nih. 25 Thu a mi pêk anga a dânhai po po fimkhur taka ei zawm chun, chu chu ei dingchangna ding a nih' tiin in hril ding a nih.

Deuteronomy 7

1 "LALPA in Pathienin in hluo ding rama a thuoi lût pha chêu, in hmaa nangni nêka lien lem le hrât lem hnam pasari, Hit hai, Girgas hai, Amor hai, Kanan hai, Periz hai, Hiv hai le Jebu hai a hnot suok pha le 2 anni chu LALPA in Pathienin in kutah pe a, in hne hun pha chun, in inram vong tawl ding a nih. Inremna thuthlung siempui naw unla, zangaina inhmutir bok naw ro. 3 Nuhmei pasalah in inneipui ding a ni naw a, an naunuhai chu in naupahai, in naupahai chu an naunuhai in inneitir ding a ni nawh. 4 Chuong naw chun, in naupahaiin an mi zui lai hi pathien dang be dingin thuoi kawi an ta, LALPA lungsenna chu in chungah inling a ta, a sukbohmang nghal el ding chêu a nih. 5 An chungah hieng hin in thaw ding a nih: an maichâmhai sukchim unla, an lung biekhai vaw koi unla, an pathiennu Aseraf lem thinghai chu phûr unla, an milem siem fawn hai chu raw hmang vong ro. 6 LALPA in Pathien ta dinga hnam thienghlim in ni si a. Hnuoi chunga hnam po po laia a ro puol bik hnam dinga LALPA in Pathienin a thlang chêu in nih. 7 "Hnam dang nêka in tam lem leia LALPAN ngainaa a thlang chêu a ni nawh; hnam po po laia a tlawm tak in nih. 8 LALPAN a hmangai chêu lei le in pi le puhai kuoma inkhâm meua thu a lo tiem tah chu hlen a nuom lei lemin LALPA kut hrâtin bawia in intângna ram Aigupta lal Faraw kuta inthokin a'n tlan suok chêu a nih. 9 Chuleiin, LALPA in Pathien hi Pathien a nih ti hre ro; Pathien ringum, ama hmangaia a thupêkhai zawmtu chunga chu suon sâng chen khoma a hmangaina thuthlung vong zing hlak le, 10 a theidatuhai ruok chu chop le chila thungrula sukbohmang hlaktu a nih; ama theidatuhai chu sawt riel loin, chop le chilin thungrul a tih. 11 Chuleiin, voisuna ka pêk chêu thupêk hai, thusuok hai le dàn hai hi fimkhur takin zawm ro. 12 "Hieng dânhai hi ngaisak a, fimkhur taka in zawm chun, in pi le puhai kuoma inkhâm meua a tiem ang khan, LALPA in Pathien chun nangni laka a hmangaina thuthlung chu vong zing a tih. 13 Hmangai a ti chêu a, malsawm a ti chêu a, sukpung a ti chêu. In pi le puhai kuoma inkhâm meua pêk a tiem rama chun in rila ra hai, in lo tharsuok bu le bâl le in uoiin thar le oliv hriek thar hai, in bawng tehai le beram tehai chu malsawm a tih. 14 Hnam dang po po nêkin malsawmna dong nasàng in ta, a nuhmei a pasalin a ching um naw ti niu a, in ranhai khom te thuoi lo um naw ni hai. 15 LALPA chun hri po po la hmangpêk a ti chêu a, Aigupta rama hri pangzatum ang kha nangni chungah inlêngtir naw ni a, nangni theidatuhai chungah inlèngtir lem a tih. 16 LALPA in Pathienin in kuta hnam a pêk ding chêu po po hi in sukchimit vong ding a nih. Lunginsiet naw unla, an pathienhai rong bawl naw ro; in ta dingin châng a ni ding a ni si a. 17 "In lungrilin, 'Hieng hnamhai hi eini nêkin an hrât lem si a, ieng tin am ei hnot suok ding a na?' in ti khom a ni thei. 18 Anni chu ti naw ro: Faraw le Aigupta po po chunga LALPA in Pathienin a thaw kha hre zing ro. 19 Fiena nasa tak dâm, inchikna mak dâm, thil mak dâm hmang a, kut hrât chu phara LALPA in Pathienin a lâk suok dàn chêu mit ngeia hmutu in ni kha. LALPA in Pathien chun hnam dang in tihai chungah khang ang bok khan a thaw ve ding a nih. 20 Chu bâkah, a thi mahla, inbi hmanghai khom bel hlum vong dingin LALPA in Pathien chun anni lai khuoivànriel tir a tih. 21 Anni chu ti naw ro, nangni laia thang, LALPA in Pathien chu Pathien ropui le râpum a ni si a. 22 Chuong hnamhai chu LALPA in Pathien chun a zâiin hnot suokpêk a ti chêu. Voi khat thilthuin inram vong naw ro, chuonga in thaw chun in vêlah ramsa hung pung taluong an tih. 23 LALPA in Pathien chun anni chu pêng a ti chêu a, an chimit chenin sukchi-ai tawl a tih. 24 An lalhai in kutah pêng a ti chêu a, an hming chu vânkhup hnuoia inthokin thai bo in ta, insukbohmang vong chenin dang theitu chêu tu khom um naw ni hai. 25 Pathien lem an siem fawmhai chu in raw vong ding a nih. Chu taka tangkaruo amanih rangkachak amanih chu inhnar naw unla, in ta dingin in lâk ding a ni bok nawh. Chuong naw chun inawk pal rawi in tih, LALPA in Pathien ngaia thil tirdakum a ni si a. 26 In inah thil tirdakum la lûtin chu thil ang boka sietna tuok ve dingin in insiem ding a ni nawh; namen loa tenin in theida ding a nih, sietna tuok dinga ruot sa a ni si a.

Deuteronomy 8

1 "Dam taka um a, hung pung pei a, in pi le puhai kuoma inkhâm meua LALPAN pêk a tiem ram chu lûta in hluo theina dingin voisuna thupêk ka pêk chêu hi fimkhur takin zawm ro. 2 A thupêkhai in vong ding le ding naw hrietna dinga kum sawmli hiel LALPA in Pathienin in lungril fie ding le suktlawm dinga thlalèra a thuoina po po chêu kha hre zing ro. 3 Mihriem hi bei chauin a hring naw a, Pathien baua thu tin suokin a hring lem a nih ti a'n hriettir theina ding cheuin a suktlawm chêu a, in tàm a phal a, chun in hriet ngai lo, in pi le puhai khoma an la hriet ngai lo manna chun a chawm chêu a nih. 4 Chu kum sawmli sûng chun in silfènhai a tiek naw a, in ke khom a'n vûng bok nawh. 5 Pain nau a thunun angin LALPA in Pathien chun a thunun chêu a nih ti hi lungrilin hre zing ro. 6 "LALPA in Pathien thupêkhai zawmin, a lampui hrawin, ama chu inza ro. 7 LALPA in Pathien chun ram tha tak, tlânga inthoka hung luong vadungte hai, tuikhur hai, tlâng le phaia luong dem dem tuihnàr umna; 8 bu hai, barli hai, grep hai, theichang hai, theibufai hai, hriek nei oliv hai le khuoizu tamna ram; 9 chat loa bei in tlànna ding, ieng khom in tlâksam nawna ding ram, a lunghai chu thîr le a tlânga inthoka dâr in cho suok theina ding rama chun a thuoi lût ding chêu a ni si a. 10 "In fàk a, in tlai hle pha, ram tha tak a pêk lei chêuin LALPA in Pathien chu inpâk ro. 11 Voisuna ka pêk chêu a thupêkhai, thusuokhai le dânhai hi zawm loin LALPA in Pathien chu theinghil pal hlau rawi in tih, fimkhur ro 12 Chuong naw chun fa a, tlai a, in tha tak bawla in hluo huna dâm, 13 in bawng ruol le beram ruolhai, in tangka le rangkachakhai le in thil nei po po a hung pung pha chun, 14 in lungril hung chapoin, bawia in intàngna Aigupta rama inthoka thuoi suoktu chêu LALPA in Pathien chu theinghil el in tih. 15 Ama chun thlalèr zau tak le tium tak, ram tawl le tui um nawna hmun, mi chuk na tak rûl tûr nei mi le mi sè na tak khawmuol kaikuonghai tamna hmuna chun a thuoi tlang tah chêu a; lungpui sakhata inthokin tui a sun suokpêk chêu a, 16 in pi le puhaiin an la hriet ngai lo manna chun chawmin, fiein a suktlawm chêu a nih, tuta hnunga in thatna dingin. 17 Nangni chun, 'Ka hausakna hi keima theina le kut hrâtnaa ka hlaw suok a nih' in ti lungril khom a ni el thei. 18 Nisienlakhom, sum le pai lam suok theina petu chêu le voisun chena in pi le puhai kuoma inkhâm meua a thuthlung suknghettu chu LALPA in Pathien a ni lem ti hre zing ro. 19 LALPA in Pathien chu in theinghil a, pathien danghai zui a, an rong bawla in biek vai chun bohmang ngei ngei in tih ti voisun hin ka hril lawk chêu a nih. 20 In hmaa hnam danghai LALPAN a suksiet ang khan, LALPA in Pathien thupêk in zawm naw chun sukbohmangin um vêng in tih.

Deuteronomy 9

1 "Aw Israelhai, ngàithla ro. Nangni nêka hnam lien lem le hrât lem, an khawpuihai khom vân tonga kula inhuon chu va hlu suok dingin Jordan vadung in kân el ding a ni ta hi! 2 Anni chu Anak thlahai, mi lien le dung insâng tak tak an nih ti in hriet ta a, 'Tuin am Anak thlahai chu an ngam thei ding?' in ti hlak kha. 3 Nisienlakhom, meichok anga lem zo theitu, voisuna in hmaa fe ding hi LALPA in Pathien a nih ti hre chieng ro. Ama chun anni chu sukbohmang a ta, in hmaa ngei tukdol tawl a tih. In kuoma LALPAN a tiem tah angin, anni chu hnot suok in ta, sukchimit nghal in tih. 4 "LALPA in Pathienin a hnotsuokpêk pha chêu in lungrilin, 'Kan felna leiin hi ram hi hluo dingin LALPAN a mi thuoi lût a nih' ti naw ro. Hieng hnamhai hi an rîtlona leiin LALPAN a hnot suok ding a nih. 5 In fel lei le in ringum leia ram chu hluo ding in ni naw a, hieng hnamhai hi an suol êm leiin le in pi le pu Abraham hai, Isak hai, Jakob hai kuoma inkhâm meua LALPAN a lo tiem tah chu hlen dingin LALPA in Pathienin anni chu a hnot suokpêk ding chêu a ni lem. 6 Hi ram tha tak hi hluo dinga LALPAN a pêk chêu hi in fel lei a ni nawh ti hre ro; hnam lulul tak in ni si a. 7 "Thlalèra LALPA in Pathien lung in suksenzie kha theinghil ngai naw ro. Aigupta in suoksana inthoka hi hmun in tlung chen hin LALPA laka hel in hmang hle a nih. 8 Horeb tlânga khan nangni sukhlum pha khop hielin LALPA lung in suksen a nih. 9 Lungphêk, in kuoma LALPAN thu a thlungna lungphêk chu la dinga tlânga ka hang fe lai khan ni sawmli le zân sawmli ka hang thang a, chu sûng chun bei ka fâk naw a, tui ka dawn bok nawh. 10 LALPA chun lungphêk pahni, Pathien kutpâra ziek chu a mi pêk a. Chu lungphêka chun in pungkhawm nia tlânga inthoka LALPAN in kuoma thu a hril po po kha a chuong a. 11 "Ni sawmli le zân sawmli hnunga chun lungphêk pahnih, thuthlungna lungphêkhai chu LALPAN a mi pêk a. 12 LALPA chun ka kuomah, 'Tho la, hi taka inthok hin fe thla nghal rawh. Aiguptaa inthoka i thuoi suok, i mihai chu an insukporche zo ta khu. Zawm dinga thu ka pêk lampui chu an pêtsan ta pang a, milem siem fawn an insiem ta khu' a ta. 13 Chun, LALPA chun ka kuomah, 'Hi mihai hi ka en vang vang a, hnam lulul an lo ni takzet hi tie! 14 Mi'n kiengsan la, anni sukbohmang ding le vânkhup hnuoia inthoka an hming thai bo dingin ka law law hang law tawl ka tih. Nang ruok chu anni nêka hnam hrât lem le tam lemin siem ka ti che' a ta. 15 "Chuongchun, tlânga inthok chun lungphêk pahni chu kuta chawiin ka kîr thla a, tlâng chu a chok puot puot a. 16 Ka hei thlîr chun, ngai ta u, LALPA in Pathien lakah in lo suol ta a, milem, bawng tuoi lem siem fawn chu in lo insiem a, LALPAN lampui hraw dinga thu a pêk chêu chu in lo pètsan ta pang ti ka hmu a. 17 Chuongchun, kut khing hnia ka chawi lungphêk chu ka pei thlàk a, in mithmua ngei a koi dar ta vong a. 18 "Chun, ni sawmli le zân sawmli LALPA hmaah kûnin ka bokkhup nawk a. LALPA lung suksen a, a mithmua thil suol in thaw po po lei chun bu ka fâk naw a, tui ka dawn bok nawh. 19 LALPA lungsen inling chu ka ti a, sukbohmang vong chêu khopin a lung insuksen bok si a. Sienkhom, chu tum khom chun LALPA chun a mi ngàithlàk nawk a. 20 Sukbohmang nuom khopin Aron chunga khom LALPA lung chu a sen a, sienkhom chu lai chun Aron ta ding khomin ka hnipêk a. 21 Chun, in thil suol thaw, bawng tuoi lem in siem chu ka lâk a, ka raw a, hnuoiah ka suknawi a, pilvut angin ka rawt dip a, a dip chu tlânga inthoka hung luong tuia chun ka dehawn a. 22 "Chun, Tabera le Masa le Kibrot-hatava hmuna hai LALPA in suklungsen bok a. 23 Kadesh-barnea hmunah LALPAN, 'Ram ka pêk chêu chu hang hluo ta ro' tia a tir lai chêu khan LALPA in Pathien thupêk chu helsanin, ama chu in ring naw a, a rawl in ngàithlàk bok nawh. 24 Ka hriet tir cheua inthok khan LALPA chunga hel hmang mi in ni hrim a. 25 Chuongchun, LALPAN, 'Ka sukbohmang tawl ding a nih' a ti lei chêu khan LALPA hmaah ka kûn a, ni sawmili le zân sawmli zet ka bokkhup a ni kha. 26 LALPA kuoma chun, 'Aw Chunghnungtak LALPA, thilthawtheina ropui taka i kut hrâta Aigupta rama inthoka i'n tlan suok, i mihai le i rochanhai hi sukbohmang lul naw raw khai. 27 I siehlaw Abraham hai, Isak hai, Jakob hai kha hre zing la, hi mihai lululzie dâm, ritlozie dâm le suolzie dâm ruok hi chu hmu khûm lul rawh. 28 Chuong naw chun i mi hung thuoi suokna rama mihaiin, 'LALPAN a ram tiema chun a thuoi lût thei naw leiin le a theida tawl leiin thlalerah that dingin a thuoi suok tawl a nih' ti pal rawi an tih. 29 I thilthawtheina ropui tak le i bân phara i thuoi suok, i mihai le i rochanhai an ni mieu si a' tiin ka ngên a.

Deuteronomy 10

1 "Chuong lai chun LALPAN ka kuomah, 'A hmaa ang bok kha lungphêk pahni ser la, tlângah ka kuomah hung tung rawh. Chun, thingin bawm siem bok rawh. 2 Lungphêk i dêng koia thu chuonghai kha lungphêka chun lo ziek ka ta, bawma chun i sie ding a nih" a ta. 3 "Chuongchun, sitim thingin bawm ka siem a, a hmaa ang char lungphêk pahnih ka ser bok a, lungphêk pahni chu chawiin tlânga chun ka hang fe a. 4 Lungphêka chun a hmaa a ziek ang, in pungkhawm nia tlânga meichoka inthoka LALPAN in kuoma a hril thupêk sawm chu a ziek a, chu chu LALPAN a mi pêk a. 5 Tlânga inthok chun ka kîr thla a, bawm ka siema chun lungphêk chu ka sie a, LALPAN thu a mi pêk angin chu taka chun a um ta zing a. 6 "(Israel thlahai chu Jakan nauhai tuikula inthokin Mosera-ah an fe a, chu taka chun Aron chu a thi a, chu hmuna chun an vui a, a naupa Eleazar chun a ai hung awin thiempu sin a thaw a. 7 Chu taka inthok chun Gudgoda-ah an fe a, chu taka inthok chun tui tamna hmun Jokbat-ah an inson pei a. 8 Chuong lai chun Levi hnam chu LALPA thuthlung bawm zawntu ding le voisun ni chena an thaw anga a hmaah ngîr a, a rongbawltu ding le a hminga malsawmpêktu ni dingin LALPAN a sie hrang a. 9 Chuleiin, Levi hnamhai chun an unauhai lai chanvo le rochan an nei ve naw a, an kuoma LALPAN a hril tah angin, LALPA chu an rochan a nih. ) 10 "Chun, a hmaa ang bok khan tlânga chun ni sawmli le zân sawmli ka thang a, chu tum khom chun LALPAN ka thu a ngàithlàk a, LALPA chun a sukbohmang ta naw chêu a ni kha. 11 LALPA chun, "Tho la, mipuihai hma zu thuoi rawh, an pi le puhai kuoma anni ka pêk dinga inkhâm meua ka tiem ram chu lûta an hluo theina dingin" a ta. 12 "Aw leh, aw Israel thlahai, nangni laka LALPA Pathienin a phût chu ieng dang ni loin, LALPA in Pathien chu ti a, a lampui po po hraw a, ama hmangai a, in lungril po po le in thlarau po poa LALPA in Pathien rong chu bawl a, 13 in thatna dinga voisuna ka pêk chêu LALPA thupêk le thusuokhai po po zawm chu a nih. 14 Vânhai, vân chung insâng tak hai le hnuoi le a sûnga um po po hi LALPA in Pathien ta vong a nih. 15 Chuong sa khom chun in pi le puhai kha ngainain a hmangai a, nangni an thlahai hi, voisuna in ni ang hin, hnam dang po po nêka a thlanghai chu in nih. 16 Chuleiin, lungril ser vun tan unla, lulul zing ta naw ro. 17 LALPA in Pathien chu pathienhai Pathien, lalhai Lal, Pathien ropui tak, hrât tak le râpum tak, tu khom ditsak bîk nei lo, thamna khom la ngai lo a ni si a. 18 Pa nei lohai le hmeithaihai chungthu fel takin a rêlpêk hlak a, ram dang mihai chu hmangaiin fâk ding le silfènhai a pêk hlak. 19 Chuleiin, ram dang mihai chu in hmangai ve ding a nih, nangni khom Aigupta rama khan ram dang mi in ni ve kha. 20 LALPA in Pathien chu ti unla, a rong chu bawl ro. Ama chu chel nghet tlat unla, a hming sâlin thu tiem hlak ro. 21 Ama chu in inpâk ding tak chu a nih; ama chu in Pathien, in mithmu ngeia thil ropui le râpum tak thawpêk hlaktu chêu chu a ni si a. 22 Aigupta rama fe thla in pi le puhai kha mi sawmsari chauh an ni a, tu ruok hin chu LALPA in Pathien chun vâna arasi anga tamin a sukpung tah chêu a nih.

Deuteronomy 11

1 "Chuleiin, LALPA in Pathien chu hmangaiin, thaw dinga a tuk hai, a thusuok hai, a dàn hai le a thupêk hai chu vong tlat ro. 2 Voisuna in nauhai hi LALPA in Pathien thununna hmua tonhriettu an ni nawh. Khanga a ropuizie hai, a bân tha hrâtzie hai, bân a pharzie hai; 3 Aigupta ram sûnga Aigupta lal Faraw le a ram sûng po poa inchiknahai le thil dang dang a thawzie hai; 4 Aigupta sipaihai le an sakor le an tawlailir hai chunga a thawzie le an hnot lai cheua Tuipui Sen tuia vur khuma tu chena LALPAN a sukbohmangzie hai kha theinghil ngai naw ro. 5 Hi hmun in tlung hma poa thlalera in chunga a thilthaw dânhai, 6 Reuben naupa Eliaba naupa Dathan le Abhiram hai chunga a thaw dàn hai, hnuoiin a bau a ka a, Israel mihai hmu lai ngeia anni sûngkuo chauh le an puon in le an ran nei po po a lem vong dàn hai hmutuhai kha in nauhai hi an ni nawh. 7 Chuong anga thil ropui LALPAN a thaw dânhai mit ngeia hmutu chu nangni hi in nih. 8 "Hung hràt a, in pan ram chu lûta in hluo theina ding le nenetui le khuoizu luongna ram, 9 LALPAN inkhâm meua in pi le puhai le an thlahai pêk a tiem rama chun in chêng sawt theina dingin tuta thu ka pêk chêu, thupêk po po hi in zawm ding a nih. 10 In hluo ding ram chu in hung suokna Aiguptaa thlai chi in thlâk a, thlai huon anga harsa taka ke ngot hmanga tuia in chawm hlak ang kha a ni nawh; 11 in va hluo ding ram chu tlâng le phairuom umna, vân ruotui dong ram a nih. 12 Chu ram chu LALPA in Pathien ram duot a na; kum bula inthoka kum tawp chenin LALPA in Pathien mit a fu zing hlak. 13 "Chuongchun, voisuna thupêk ka pêk chêu hi fimkhur taka zawm a, LALPA in Pathien chu in lungril po po le in thlarau po poa hmangai a, a rong in bawl chun, 14 a hunbi takah thâl ruo le favang ruo hung tir a ta, bu le bâl le uoiin le oliv hriek inthar in ta, 15 in ranhai tlàn ding in ramah hlo pêng a ti chêu a, fain tlai in tih. 16 "Fimkhur ro, chuong naw chun zawr hmanga umin pêt hmang in ta, pathien dang bein an hmaah kûn hlauh rawi in tih. 17 Chuonga in thaw chun, in chungah LALPA lungsen a ta, vân khâr a ta, ruo sûr naw ni a, hnuoiin ra insuo naw ni a, LALPA pêk chêu ram tha taka inthok hin bohmang nghal in tih. 18 "Chuleiin, hieng ka thuhai hi in lungril le ngaituonaah khum unla, inchikna dingin in bânah zem unla, in chalah hrên bok ro. 19 Chuong chu ina in inthung lai amanih, lama in lawn lai amanih, in zâl lai amanih le in tho hun amani-ah in nauhai zirtir hlak ro. 20 Chun, in kotkhâr bienga hai le in tuolkota hai ziek ro. 21 Chuongchun, LALPAN in pi le puhai kuoma inkhâm meua pêk a tiem rama chun in dam sûng ni le in nauhai dam sûng ni chu hnuoi chunga vân a um sûng ni angin sei a tih. 22 "LALPA in Pathien chu hmangai a, a lampui po po hraw a, ama chel tlat dinga thahnemngai taka hieng ka pêk chêu thupêk po po hi in zawm phot chun, 23 LALPAN hieng hnam po po hi hnot suokpêk a ti chêu a, nangni nêka ropui lem le thil thaw thei lem hnamhai ram chu hluong in tih. 24 In kephaa in sir taphot chu in ta nîng a ta, in ram chu thlalera inthoka Lebanon chen le Eufretis vadunga inthoka thlang tieng Mediterranean tuipui chen inzâr a tih. 25 Tu khomin cho hne naw ni hai chêu a, in fena taphotah LALPA in Pathien chun, thu a tiem tah angin, a ram pumah nangni pangzatna le tina inlèngtir a tih. 26 "Ngai ta u, voisun hin in hmaah malsawmna le tongsie ka sie: 27 voisuna ka pêk chêu, LALPA in Pathien thupêkhai hi in zawm chun, malsawmna; 28 LALPA in Pathien thupêkhai zawm lo a, in hriet ngai lo pathien danghai be dinga a thupêkhai in pêtsan ruok chun, tongsie. 29 Chun, in hluo ding rama LALPA in Pathienin a thuoi lût pha chêu, malsawmna chu Gerizim tlânga inthokin puong unla, tongsie chu Ebal tlânga inthokin inphur ro. 30 Hieng tlâng pahnihai hi Jordan ruoma chêng Kanan mihai rama mi, Jordan vadung tlâk tienga um an nih. Chu chu Gilgal khaw kawla More saisaw thinga inthoka thlang tieng pang hla lo tea um a nih. 31 "LALPA in Pathienin a pêk chêu ram chu lûta hluo dingin Jordan vadung in kân tèp a ni tah. 32 Chu ram chu hluoa in khawsa pha chun, voisuna in hmaa ka sie thupêkhai le dânhai po po hi in zawm ngei ngei ding a nih.

Deuteronomy 12

1 "LALPA, in thlatuhai Pathienin a pêk chêu ram chu hluo a, a ram leilunga in um sùnga fimkhur taka in zawm dinga thupêk le dàn a pêkhai chêu chu hieng hi a nih. 2 Hnam in va hlu suok dinghaiin an pathienhai an biekna hmun hrim hrim, tlâng sânga hai, muola hai le thing buk hnuoia mihai chu in suksiet vong ding a nih. 3 An maichâmhai sukchim unla, an lung biekhai vaw koi vong unla, an pathiennu Asera lem thinghai chu raw vong unla, an pathien lem siem fawnhai sât bong vong unla, chuong hmuna inthok chun an hminghai nuoi bo vong ro. 4 "Anni biek dàn angin LALPA in Pathien chu in biek ve ding a ni nawh. 5 LALPA in Pathienin in hnam po po laia a hming umna ding hmun a la ruot ding chu zong lem unla, chu hmuna chun in fe ding a nih. 6 Chu taka chun in pumraw thilhlânhai, in inthawinahai, in sawma pakhathai, kûta thèn thilhlânhai, intiemkamna thilpêkhai, in nuom thua thilhlânhai, in bawng ruol le beram ruol laia pieng hmasa takhai in hung inhlàn ding a nih. 7 Chu taka chun malsawmtu chêu LALPA in Pathien hmaah nangni le in sûngkuoin in kut inrim ra chu fain hlim takin in um ding a nih. 8 "Mi tinin mani tha tizawng ang senga tuta ei thaw ang hin in thaw ding a ni nawh, 9 LALPA Pathienin a pêk chêu chawlna ram chu tlungin in la rochung hri si nawh. 10 Sienkhom, Jordan hi kânin, LALPAN rochana a pêk chêu ram chu la hluong in ta, him taka in um theina dingin in vela hmèlma po po lakah chawlna la pêng a ti chêu. 11 Chu pha chun, LALPA in Pathienin a hming innghatna dinga a ruot hmuna chun in hung chawi dinga thu ka pêk pumraw thilhlânhai, in inthawinahai, in sawma pakhathai, kûta thèn thilhlânhai, in thil nei tha tha laia LALPA kuoma pêk dinga in intiemhai chu hung chawi ro. 12 Chu taka chun nangni le in naupa le naunuhai, in bawipa le bawinuhai, nangni laia rochan le ram huol ding nei ve lo Levi hnamhai le chun LALPA in Pathien hmaah hlim takin um in tih. 13 Nuomna hmun hmunah pumraw thilhlân chu inhlàn lo dingin fimkhur ro; 14 nangni laia hnam khat ram chanpuola LALPA hmun thlang le ruota chauh in pumraw thilhlânhai chu inhlàn in ta, chu taka chun thu ka pêk po po chêu hi in thaw ding a nih. 15 "Amiruokchu, LALPA in Pathienin malsawmna a pêk chêu ang peiin, khaw lai khuoa khom in ranhai chu that thei in ta, sazuk le sakhi sa in fâk angin, a thieng le thieng naw khomin in nuom zât zât fa thei in tih. 16 Sienkhom, a thisen chu fa naw ro; tui angin hnuoiah in bun thlâk ding a nih. 17 Sawma pakhat in pêk bu le bâl hai, uoiin thar hai, hriek hai, in bawng ruol le beram ruol laia pieng hmasa tak hai, in thutiema mi hai, in nuom thua thil in inhlân hai le kût phaa in inhlàn, thèn thilhlân hai chu in inah fa thei naw ti niu. 18 LALPA in Pathienin a ruot hmuna chun LALPA in Pathien hmaah nangni le in naupa le naunu hai, in bawipa le bawinu hai le in khuoa um Levi-hai leh in fâk lem ding a nih. In kut sinthaw tinrêng chungah LALPA in Pathien hmaah in hlim ding a nih. 19 In rama in chêng sûng phot chun Levi-hai hi ngaithà lo dingin fimkhur ro. 20 "LALPA in Pathienin thu a tiem ang cheua in ram a zauh lien pha chu, sa in ngaia in fâk chàk pha leh in du zât zât fa thei in tih. 21 LALPA in Pathienin a hming innghatna hmuna a la ruot ding chu a hla taluo a ni chun, thu ka pêk chêu ang khan, in bawng ruol le beram ruol laia mi chu in khaw hmunah that thei in ta, in nuom zât zât fa thei in tih. 22 Sazuk le sakhi sa in fâk angin, a thieng le thieng naw khomin fa thei in tih. 23 Sienkhom thisen ruok chu fa lo dingin fimkhur ro, hringna chu thisenah a um a, a hringna pumin sa chu in fâk ding a ni nawh. 24 In fâk ding a ni dèr nawh; tui angin hnuoiah bun thla lem ro. 25 Fa naw ro, chuongchun nangni le in nauhai ta dingin thâng a ta, LALPA mithmua thil indik thaw ni bok in tih. 26 "Thil thienghlim le inhlàn dinga in tiemhai chauh chu chawiin LALPA hmun ruota chun fe ro. 27 In pumraw thilhlànhai chu LALPA in Pathien maichâmah, a taksa le a thisen leh, inhlàn ro; in inthawina thisen chu maichâm sîra chun bun thla unla, a sa ruok chu fa thei in tih. 28 Thu ka pêk po po chêu hi fimkhur takin zawm ro, chuongchun LALPA in Pathien mithmuah thil indik thaw nîng in ta, nangni le in hnunga in nauhai ta dingin thang a tih. 29 "In va rûn le hlu suok ding hnam danghai chu LALPAN sukbopêk a ti chêu a, ram chu hluoin umhmun khuor in tih. 30 Amiruokchu, in hnot suok hnung le hluo hnung, in hmaa sukborala an um hnungin, 'Hieng hnamhai hin ieng tin am an pathien rong an bawl aw? An thaw angin eini khomin thaw vêng ei tiu' ti ve lo dingin fimkhur ro, chuong naw chun inawk pal rawi in tih. 31 Anni biek dàn angin LALPA in Pathien chu in biek ve ding a ni nawh. Anni chun an pathienhai an bieknaah LALPA theida zawng thil tirdakum tinrêng an thaw a, an naupa le naunuhai ngei khom an pathienhai ta dingin meiah inhlànin an raw hlak a nih. 32 "Thaw dinga thu ka pekhai chêu angin in thaw ding a nih; in belsa ding a ni naw a, in pei ding a ni bok nawh.

Deuteronomy 13

1 "Nangni lai zawlnei amanih mang neitu amanih a hung suok a, inchikna le thil mak a puong a, 2 inchikna le thil mak a puong chu a hung tlung a, 'Thaw ro, an pathienhai hi zui ei ta, be vêng ei tiu' tia in la hriet ngai lo pathien dang zui dinga a ti chêu chun, 3 chu zawlnei amanih mang neitu thu chu in zawm ding a ni nawh. Lungril po po le thlarau po poa in hmangai le hmangai naw ti hrietna dinga LALPA in Pathienin a fiena chêu a nih. 4 LALPA in Pathien chauh hi a nih in zui ding le inza ding chu. A thupêkhai vongin zawm unla, a rong bawl unla, chel nghet tlat ro. 5 Chu zawlnei amanih mang neitu amanih chun Aigupta rama inthoka thuoi suok a, bawia in intângna rama inthoka intlan suoktu LALPA in Pathien lakah inheltir a, LALPA in Pathienin hraw dinga thu a pêk chêu lampuia inthoka kei pêt chêu a tum leiin ama chu in sukhlum ding a nih. Chuong ang mi chu nangni laia inthokin inthiel fai ro. 6 "Chun, i unaupa amanih, i naupa amanih, i naunu amanih, i nuhmei pom lai amanih, 7 i ruol tha bul amanih ngei khomin in thlatuhai la biek ngai lo pathien dang, in kawl le kienga umhai amanih le ram kil le kapa chênghai pathien biek amanih chu be dingin arûkin a zawr che khomin, 8 zawr thlûkin i um ding a ni naw a, a thu i ngaithlâk ding a ni bok nawh. Ama chu zangaina inhmutir naw la, hlà naw la, hliekhu bok naw rawh. 9 I sukhlum ngei ngei ding a nih. Nangin sukhlum dingin kut thlâk hmasàng i ta, chu zoah mipuiin. 10 Bawia in intângna ram Aiguptaa inthoka thuoi suoktu chêu LALPA in Pathien lampuia inthoka kei pèt chêu a tum leiin, lungin in dêng hlum ding a nih. 11 Chuongchun, Israel mi po poin hrieng an ta, ting an ta, nangni lai chuong ang thil suol hrim hrim thaw chu sim an tih. 12 "LALPA in Pathienin in chêngna dinga a pêk chêu laia khuo pakhata inthokin thuthang in hriet a, 13 anni laia mi rilo thenkhat hung suokin, in la hriet ngai lo pathien dang be dingin mihai an thuoi hmang ti an hung hril charin, 14 chîk taka indon chiengin zong suok ro. Thuthang chu a'n dik a, hieng ang thil tirdakum hi nangni lai an lo thaw ngei ti in hriet chieng pha leh, 15 chu khuoa umhai chu, mihriem le an ran ruol po po leh, kawlhnâmin matheiloin sukhlum vong ro. 16 A khaw sûnga in râllâk po po chu khaw lailungah dêng bum unla, a khuo le râllâk thil po po chu LALPA in Pathien kuoma pumraw thlihlânah raw fai vong ro. Kumkhuoa indin thar nawk ta ngai lo dingin ram song a tih. 17 Chuong anga hnawl fithla thil hrim hrim chu in lâk ding a ni nawh, chuong chun LALPAN a lungsenna chu kei kîr a tih. 18 LALPA in Pathien thu chu awi a, voisuna ka pêk chêu a thupêk po po zawm a, a mithmuah thil indik in thaw chun zangaina inhmutirin lunginsiet a ti chêu a, in pi le puhai kuoma inkhâm meua a tiem tah angin, sukpung bok a ti chêu.

Deuteronomy 14

1 "LALPA in Pathien nauhai in ni leiin mithi sûn chànga mani insun pop le lu vaw kol an thaw hlak angin thaw ve naw ro. 2 LALPA in Pathien ta dinga hnam thienghlim, hnuoi chunga hnam po pohai laia a ro chan bîk hnam dinga a thlang chêu in nih. 3 "Thil porche hrim hrim fa naw ro. 4 In fâk thei ding sahai chu bawng, beram, kèl, 5 sakhi, sazuk, sasen, sathar, ram kèl, ram lawi le ram beram a nih. 6 Sa tinrêng, tin inkàk suok le an thil fâk a soia soi nawi chi taphot chu fa thei in tih. 7 Amiruokchu, tin inkàk suok le an thil fâk a soia soi chi hieng sanghawngsei, mazupui le sangawi hai ruok hi chu fa naw ro. An thil fâk a soia soi chi, sienkhom tin inkàk si lohai chu in ta dinga sa porche a nih. 8 Chun, vok hi a tin inkàk a nia chu a thil fâk a soi naw leiin in ta dinga sa porche a na, a sa in fâk ding a ni naw a, a ruong khom in tawk ding a ni bok nawh. 9 "Tuia chêng, pângpar le phuhlip nei taphot chu fa thei in tih, 10 pângpar le phuhlip nei naw taphot chu fa thei naw ti niu, in ta dinga porche a nih. 11 "Vate thienghlim taphot chu fa thei in tih. 12 Hienghai ruok hi chu in fâk ding a ni nawh: mupui hai, lungdup hai, mu-arla hai, 13 mulukol hai, ngawihup hai, mute chi hrim hrim hai, 14 vaak chi hrim hrim hai, 15 vangalsâng hai, vabak hai, tuifinrieta vate hai, mu chi tinrêng hai, 16 hrângkir hai, simbuk hai, chingpirinu hai, simbuksielki hai, 17 tuivalong hai, vadunga mu chi hrim hrim, 18 kànghlai, dila vate chi hrim hrim, vakhawhri le bâk. 19 Thilhring, thla neia a hona vuong chi hrim hrim chu in ta dinga thil porche a nih. 20 Sienkhom, thla nei, a thienghlim taphot ruok chu fa thei in tih. 21 "Sa tlaw hrim hrim fa naw ro. In kuoma um ram dang mi fâk ding ruok chun pe thei in ta, hnam dang mihai kuomah zor thei bok in tih. Nangni ruok chu LALPA in Pathien ta dinga hnam thienghlim in nih. Kèlte chu a pui nenetuiin suong naw ro. 22 "Kum tina in lo tharsuok sawma pakhat chu in sie hran ngei ngei ding a nih. 23 LALPA in Pathien inza dàn in hriet rop theina dingin, bu le bâl, uoiin le oliv hriek in tharsuokhai le in beram le bawng ruol laia pieng hmasa takhai chu LALPAN a hming innghatna dinga a thlang hmuna chun in fâk hlak ding a nih. 24 LALPA in Pathienin mal a sawm hun chêu a, LALPA in Pathienin a hming innghatna dinga a la ruot ding chu a hla taluo leia in sawma pakhathai chu in chawi thei naw a ni ruok chun, 25 tangka sumah inchangtir unla, chu chu chawiin LALPA in Pathien hmun ruota chun fe ro. 26 Sum chun in chàk zawng zawng bawng amanih, beram amanih, uoiin amanih le zu amanih inchaw unla, chu taka chun nangni le in sûngkuohai chun LALPA in Pathien hmaah fain dawn in la, hlim takin um ro. 27 Nangni laia um Levihai chu ngaithà der naw ro, anni puola rochan nei an ni ve si nawh. 28 "Kum thum a'n voi zàtin chu kuma in tharsuok po poa sawma pakhat chu la khawm vong unla, in khuo hmun pakhatah hlu khawm ro. 29 Chuongchun, in khuoa um Levi-hai, nangni laia chanvo le rochan nei ve lohai le ram dang mihai le pa nei lohai le hmeithaihai chun khop takin hung fa ve thei an ta, LALPA in Pathienin in kut sinthaw po poah malsawm a ti chêu.

Deuteronomy 15

1 "Kum sari invoi zàtin in leibatuhai leibat chu in ngaidam ding a nih. 2 In ngaidam dàn ding chu hieng ang hin a nih: leibatu nei taphotin a chipui Israel mi laka a sum inpûktir chu a ngaidam ding a nih. LALPA ngaidamna chu puong a ni tah leiin tu khomin a unau le a chipui Israel mi leibat chu a thìn ding a ni ta nawh. 3 Hnam dang mihai leibat ruok chu thin lui thei in ta, sienkhom in unauhai leibat chu in ngaidam ding a nih. 4 LALPA in Pathien thu chu fîp taka awi a, voisuna ka pêk chêu a dânhai hi fimkhur taka in zawm chun, 5 LALPA in Pathienin in rochana a pêk chêu rama hin nasa takin malsawm a ti chêu a, mi rethei hrim hrim um naw top in tih. 6 A tiem tah angin LALPA in Pathien chun malsawmna vur a ti chêu a, hnam danghai inpûktir in ta, nangni chun pûk ve naw ti niu. Hnam tam tak chungah ro rêl in ta, in chunga ruok chu tu khomin ro rêl naw ni hai. 7 "Chun, LALPA in Pathienin ram a pêk cheua in umna khaw lai khuoa khom in unauhai lai mi rethei an um chun an chungah lungril sukngar naw unla, kom bok naw ro. 8 Chuong nêk hmanin an lakah inphalin, an tlâksam taphot chu phal takin inpûktir ro. 9 'Ngaidamna kum, kum sarina chu a hnai tah' tia i unau tlasam chu hazat a, a mamaw phuhrûkpêk nuom nawna lungril rilo put lo dingin fimkhur ro; chuong naw chun in chungchâng thuah LALPA ko a ta, thiem naw changna suol thawtu ni pal hlauh rawi in tih. 10 Inphal takin, inrona lungril nei dêr loin pe ro; chuonga in thaw chun in kut sinthaw taphotah LALPA in Pathienin malsawm a ti chêu. 11 Chu rama chun mi rethei an um naw lai um naw nih. Chuleiin, in ram sûnga in unau mi retheihai le tlasamhai lakah tiktlai dingin thu ka pêk chêu a nih. 12 "In Hebrai chanpui, pasal amanih nuhmei amanih ama le ama in kuomah a hung inzor a, kum ruk in rong a bawl ta chun a kum sarinaah in insuo zalèn ding a nih. 13 In insuoktir pha leh kutbenthekin insuoktir naw ro. 14 In ran ruol laia ran dâm, in hrizawla bu dâm le in grep sawrna khura uoiin dâm, LALPA in Pathienin mal a sawm dàn chêu ang peiin, phal takin pe ve ro. 15 Aigupta rama khan bawi in ni a, LALPA in Pathien chun a'n tlan suok chêu a nih ti theinghil ngai naw ro. Chu lei chun a nih voisuna hienga thu ka pêk chêu chu. 16 "Amiruokchu, nangni le in sûngkuo a ngainat lei le in inngei tlâng leia in kuomah, 'Suoksan naw nîng chêu' a ti tlat chun, 17 thirzum làng in ta, kotkhâr sana chun a na ver in ta, dam sûnga in bawi ni tâng a tih. In bawinu chunga khom chuong ang chun in thaw ve ding a nih. 18 "Bawi insuo hi rin ngai naw ro, kum ruk sûnga inhlawfaa in ruoi siehlaw lêt hnia tam sin a thawpêk ta chêu a nih. Chun, LALPA in Pathienin in thilthaw iengkimah malsawm a ti chêu. 19 "In bawng ruol le beram ruol laia a chal pieng hmasa tak taphot chu LALPA in Pathien chanpuola dingin sie hrang ro. In bawngchal pieng hmasa tak chu in sor ding a ni nawh; in beramchal pieng hmasa tak hmul khom in vaw ding a ni bok nawh. 20 LALPA in Pathien hmaah kum tinin LALPAN hmun a la ruot dinga chun, nangni le in sûnghai leh, in fâk hlak ding a nih. 21 Hmèl hemna nei a ke inbai dâm, mit indel dâm le soisel kai thei hrim hrim chu LALPA in Pathien kuoma inthawinain in hmang ding a ni nawh. 22 Chuong ang chu mani inah in fâk ding a nih. Inthieng le thieng naw khomin sazuk le sakhi sa angin fa thei vong an tih. 23 A thisen ruok chu in fâk ding a ni nawh; tui angin hnuoiah in bun thlâk ding a nih.

Deuteronomy 16

1 "Abib thla chu thla serah hmang unla, hi thla hin zânah Aiguptaa inthokin a thuoi suok chêu leiin LALPA in Pathien Fekan Kût chu hmang hlak ro. 2 LALPAN a hming innghatna hmun a la ruot dinga chun LALPA in Pathien Fekan Kûta inthawinaah in beram ruol le bawng ruol laia mihai chu inhlàn ro. 3 Chol thang bei leh in fâk ding a ni nawh. Aigupta rama inthoka inhmaw taka in suok ni kha in dam sûnga in hriet zing theina dingin ni sari sûng chu chol thang lo bei, tuorna bei in fàk ding a nih. 4 Ni sari sûng chu in ram sûngah tu khomin chol an kol ding a ni nawh. A ni hmasa tak zân tienga rana in inthawina sa chu a zîng tieng chen in hlà ding a ni bok nawh. 5 "Fekan Kûta inthawina chu LALPA in Pathienin a hming innghatna hmun a la ruot dinga chauh naw chu in umna khaw lai hmuna khom in inhlàn ding a ni nawh. 6 Chu taka chun Aigupta in suoksan ni champha zân tieng nisa tlàkin Fekan Kût inthawina chu in inhlàn ding a nih. 7 LALPAN hmun a ruota chun raw hmin unla, fa un la, zîngkar in puon inah inlawi nawk ro. 8 Ni ruk sûng chu chol thang lo bei in fâk ding a nih. A ni sarina chu LALPA in Pathien ta dinga inkhawmpui thienghlim nîng a ta, sin in thaw ding a ni nawh. 9 "Bu in lâk tan nia inthoka chawlkàr sarina chu inchik ro. 10 Chu ni chun LALPA in Pathienin mal a sawm dàn chêu ang peia in tharsuok laia mi chu mani pêk nuom tawk ang seng inhlânin LALPA in Pathien ta dingin chawlkâr kût in nei ding a nih. 11 LALPA in Pathienin a hming innghatna hmun a la ruot dinga chun nangni le in naupahai le in naunuhai, in bawipa le in bawinu hai, in umnaa um Levi hai, nangni laia um ram dang mihai, pa nei lohai le hmeithaihai leh LALPA in Pathien hmaah hlim takin um ro. 12 Aigupta rama khan bawi in nih ti hre zing unla, hieng thupêkhai hi fimkhur takin zui ro. 13 "In hrizawl le grep sawrna khura in tharsuok po po in hlù lût vong pha leh ni sari sûng Bawkte Kùt hmang ro. 14 Nangni le in naupahai le in naunuhai, in bawipa le in bawinuhai, in umnaa um Levi hai, nangni laia um ram dang mihai, pa nei lohai le hmeithaihai leh Kût ni chun hlim takin um ro. 15 LALPAN hmun a la ruot ding hmuna chun LALPA in Pathien ta dingin ni sari in kût ding a nih. LALPA in Pathien chun in tharsuok po po le in kut sinthawna po poah malsawm a ti chêu a, in lawmna khom kim a tih. 16 "Nangni laia pasal po po chu LALPA in Pathienin hmun a ruota chun ama hmaah kum tin voi thum in inlang ding a nih; chu chu chol thang lo bei kùta hai, chawlkàr kûta hai le bawkte kûta hai nîng a tih. Chun, LALPA hmaah tu khom kut ruokin in inlang ding a ni nawh. 17 LALPA in Pathienin malsawmna an dongtir chêu ang peiin mi tinin mani thei ang tawk an pêk seng ding a nih. 18 "LALPA in Pathienin a pêk chêu khaw tina chun in hnam ang peiin rorêltu le hotu insiem unla, chuonghai chun mipui ro fel takin an rêlpêk ding a nih. 19 Indik lo takin ro an rêlpêk ding a ni naw a, ditsak bîk an nei ding a ni bok nawh. Thamna hrim hrim la naw ro; thamna chun mi varhai mit a sukdel a, mi indikhai thu khom a kei her hlak. 20 LALPA in Pathien ram pêk chêu hi dama in hluo theina dingin indikna le felna chauh in zawm ding a nih. 21 "LALPA in Pathien maichâm in la siem ding bula chun Asera lem thing in phun ding a ni nawh. 22 LALPA in Pathien theida zawng lung milem in phun ding a ni bok nawh.

Deuteronomy 17

1 "Bawngchal amanih beram amanih hmèl hemna le that nawna nei hrim hrimin LALPA in Pathien kuomah in inthawi ding a ni nawh, chu chu LALPA ta dingin thil tirdakum a nih. 2 "LALPA in Pathienin a pêk chêu in umna khaw lai khuoa khom nuhmei amanih pasal amanih tu khom Pathien thuthlung bawsetu, LALPA mithmua suol thawtu, 3 ka thupêk kala pathien danghai betu le an rongbawltu le nisa amanih, thla amanih, vâna arasi amanih betu an um ti an hril chêu chun ngun takin indon chieng ro. 4 Chuong ang thil tirdakum thaw chu Israel ramah an um ngei ti in hriet chieng chun, 5 thil suol thawtu pasal amanih nuhmei amanih chu kul kotkhàr puo tieng thuoi suok unla, lungin dêng hlum ro. 6 Hretu pahni amanih pathum baua inthoka thu inchieng hnunga sukhlum ding a na, hretu pakhat bau chaua inthok chun tu khom sukhlum ding a ni nawh. 7 A hretuhai chun sukhlum ding chungah kut thlâk hmasàng an ta, chu zoah mipuiin. Chuong ang chun nangni laia inthokin suol chu in inthiel fai ding a nih. 8 "Thisen insuo thua dâm, inkhingna thua dâm le invuokna thua dâm nangni rêl dinga thu khir taluoa in hriet taphot chu LALPA in Pathienin hmun a la ruot dinga chun fepui ro. 9 Thiempu Levihai le rorêltuhai kuomah fe unla, rawn unla, anni chun thu sukthlùk dàn ding lo kawkhmùng an ti chêu. 10 LALPAN hmun a la ruot dinga an thu tlûkna ang chu zuiin, an kawkhmu dàn chêu ang chun fimkhur takin thaw ro. 11 Thu sukthlûk dàn an lo zirtir chêu le rorêl dàn an lo hril chêu ang tak chun thaw unla, chang tieng amanih voi tieng amanih pêtsan naw ro. 12 LALPA in Pathien hmaa rongbawl hlak thiempuhai le rorêltuhai inza nawtu chu in sukhlum ding a nih. Israelhai laia inthokin suol chu inthiel fai ro. 13 Chu chu mi po poin hrieng an ta, ting an ta, inza naw ngam naw ni hai. 14 "LALPA in Pathienin a pêk chêu ram chu tlung a, hluo a, in va um pha, 'Ei kawl le kienga hnamhai ang bokin lal nei vêng ei tiu' in ti huna chun, 15 LALPA in Pathienin a thlang ngei chu lalah in nei ding a nih. Nangni unau laia mi a ni ngei ding a nih. In unau Israel mi ni lo, hnam dang chu nangni optu dingin in sie ding a ni nawh. 16 Chu bâkah, lal chun ama ta dingin sakor tam tak a nei ding a ni naw a, sakor zu la dingin Aigupta ramah mi a tir kîr ding a ni bok nawh. LALPA chun in kuomah, 'Tuta inthokin chu hmuna chun in kîr nawk ding a ni ta nawh' a ti sa a ni kha. 17 Nuhmei tam tak a nei ding a ni bok nawh, chuong naw chun a lungril thuoi pêtin um rawi a tih. Tangkaruo le rangkachak a khawl khawm teu ding a ni bok nawh. 18 "Lalah a thung pha chun hieng dânhai hi Levi chi thiempuhai kuoma inthoka lain a kut ngeiin lekhabu zielah a ziek thlâk ding a nih. 19 Chu chu kol a ta, a dam sûng po a tiem hlak ding a nih, LALPA a Pathien chu ti a, hieng dânhai le thupêkhai hi fimkhur taka zui a, 20 a unauhai nèka thaa inngai bik lo a, dàn hi voi tieng chang tieng a pêtsan nawna dingin. Chuongchun ama le a thlahai chun Israel lalramah sawt tak ro rêl an tih.

Deuteronomy 18

1 "Thiempu Levi-hai, Levi hnama mi po po chun Israelhai lai chanpuol amanih rochan amanih an nei ding a ni nawh; Pathien kuoma meia thilhlânhai chu ring an tih, chu chu an rochan a ni si a. 2 An unauhai lai rochan nei naw ni hai; LALPAN an kuoma a hril tah angin, LALPA chu an rochan a nih. 3 "Inthawina inhlàntu mipuihai laka thiempu chanpuol chu hieng hi a nih: bawngchal khom, beram khom a dàr, a bekbawr ve ve le a sûng po. 4 In bu le bâl, uoiin le hriek in thar suok hmasa tak dâm le in beram laia a hmul in vaw hmasa tak dâm chu in pêk bok ding a nih. 5 LALPA in Pathienin LALPA hminga rongbawla um kumkhuo dingin in hnam po po laia anni le an thlahai chu a thlang an ni si a. 6 "Levi mi tu khomin in umna Israel rama ieng khuo khom suoksan a, LALPAN a la ruot ding hmunah châk taka a hung inpèm chun, 7 chu taka LALPA hmaa rongbawla um a unauhai, a Levi chanpuihai ang bokin LALPA a Pathien hmingin rong a bawl ding a nih. 8 An sûngkuo thil nei a zor man chu hmu sienkhom, thiempu danghai chanpuol dong ang chu dong ve tho a tih. 9 "Chun, LALPA Pathienin a pêk chêu ram in lût pha chun, chu taka hnamhaiin thil tirdakum an thaw hlak chu in thaw ve ding a ni nawh. 10 Mani naupa amanih naunu amanih meia inhlàntu dâm, aien ching le thumvawr ching dâm, mitvaidawi thiem dâm, dawithiem dâm, 11 dawi vêttu dâm, ramhuoi zawl ruoitu dâm, rau ko thiem dâm le mithi inbiekpui ching mihai chu nangni lai an um ding a ni nawh. 12 Hieng thil thawtu taphot chu LALPAN a tirdak a, hieng ang chìng dàn tirdakum an chìng leiin LALPA in Pathien chun hieng hnamhai hi in hmaah a hnot suokpêk ding chêu a nih. 13 LALPA in Pathien hmaah soisel bo in ni ding a nih. 14 "In hlu suok ding hnamhai chun aien thiem le thumvawr chìnghai thu an ngàithlàk hlak a, nangni ruok chun chuong anga in thaw ve chu LALPA in Pathienin a phal nawh. 15 LALPA in Pathien chun nangni laia inthokin keima ang bok zawlnei a hung tirpêk ding chêu a nih, a thu lo ngàithla ro. 16 Horeb tlânga mipui in pungkhawm ni khan, 'LALPA kan Pathien rawl chu min hriettir ta naw la, hi mei râpthlâk tak hi mi'n hmutir ta naw rawh, thi rawi kan tih' tiin LALPA in Pathien chu in ngèn a ni kha. 17 LALPA chun ka kuomah, 'An thu hril chu a tha. 18 An unauhai laia inthokin nangma ang zawlnei indinpêk ka tih. A bauah ka thu sieng ka ta, hril dinga thu ka pêk taphot chu ama chun anni chu hril a tih. 19 Ka hminga hriltu zawlnei baua thu ka siehai ringnawtu chu a chungthu keiman ngaituong ka tih. 20 Amiruokchu, ka hminga hril dinga thu ka pêk ni lo hriltu zawlnei amani le pathien dang hminga hriltu zawlnei taphot chu in sukhlum ding a nih' a ta. 21 "Tuhin lungrilin, 'Ieng tin am thu chu LALPA hril a ni le ni naw ti kan hriet thei ding?' tiin in indon a ni thei. 22 Zawlneiin LALPA hmingin thu a hril a, a thil hril chu a hung tlung naw a, a hlawtling naw bok chun, chu chu a nih LALPA hril naw thu chu. Chu zawlnei chun ringvànga a hril mei mei a nih. Ama chu in ti ding a ni nawh.

Deuteronomy 19

1 "LALPA in Pathienin a pêk chêu rama um hnamhai chu sukbohmang a, nangnin anni chu hnot suok a, an khuo le in le lohai in hluo pha chun, 2 LALPA in Pathienin in rochung dinga a pêk chêu ram chu biel thumah the unla, 3 biel tina hmun laili taka chun nangni ta dingin khuo pakhat seng ruot unla, tuolthathai an tlàn lût theina dingin lampui siem bok ro. 4 "Chu taka tlân lûta him thei tuolthathai chu tum rêng lei le a hmaa theidana um loa mani tuolbawm that palhai chu an nih. 5 Entirnan, mi pakhat chu a tuolbawm leh thing phûr dingin ramah an fe a, thing tuk dinga hreipui a hlàng laiin a hrei chu a tlong a, a tuolbawm chu a dêng hlum pal tah ang dâm hi a nih. Chu pa chu inhumhimna khuo laia pakhata chun tlân lût a ta, him a tih. 6 Chuong naw chun phuba latu lungsen inling chun hnot a ta, inhumhimna khuo chu pakhat chauh a lo ni chun, a hlat leiin hnot phâk a ta, that pal hlauh rawi a tih, a hmaa intheidana nei loa a that a ni leiin thi awm a ni si nawh. 7 Chu lei chun a nih nangni ta dinga inhumhimna khuo pathum ruot bîk dinga thu ka pêk chu. 8 "Chun, LALPA in Pathienin in pi le puhai kuoma inkhâm meua thu a lo tiem tah anga in ram hluo chu zauhpêk a, a ram pum a pêk pha chêu chun, 9 LALPA in Pathien chu hmangai a, a lampui hraw rop dinga voisuna thu ka pêk chêu hi fimkhur taka in zawm zing chun, hi khuo pathum bâka hin khaw dang pathum in ta dingin in la siem bel ding a nih. 10 LALPAN rochung dinga a pêk chêu ram sûnga hin poi tawk lo thisen in insuo nawna ding le chuong ang thisen maw chu in chungah a tlâk nawna dingin ka hril chêu ang hin in thaw ding a nih. 11 "Amiruokchu, miin a tuolbawm theida a, inchàn rûk a, bei a, that a, inhumhimna khuo laia pakhata hin a tlân lût chun, 12 a khaw upahai chun ama chu ko an ta, khuoa inthok chun thon kîr an ta, sukhlum dingin thisen phuba latu ding kuta chun an inhlàn ding a nih. 13 In lunginsiet ding a ni nawh. Poi tawk lo thisen insuotu maw chu in chungah a tlâk nawna dingin, chuong ang mi chu Israel rama inthokin inthiel fai unla, in ta dingin thang a tih. 14 LALPA in Pathienin hluo ding le rochung dinga a pêk chêu rama chun a hmaa hluotuhaiin an lo phun tah in tuolbawm ramri lung chu in son ding a ni nawh. 15 Tu khom suol thaw le mi poi tawka intum leia thubuoi nei chu hrepuitu pakhat baua inthok ringot chun thiem naw in inchangtir ding a ni nawh. Hrepuitu pahni amanih pathum amanih baua inthoka thuin in suknghet chauh ding a nih. 16 Hrepuituah mi sietna ding zongtu a thang a ni chun, hêka um le hrepuitu chu an pahniin LALPA hmaah inlangin, 17 chuong hun laia thiempu le rorêltuhai hmaa chun an ngîr ding a nih. 18 Rorêltuhai chun ngun takin dawp an ta, thu hretua ngîr chu hretu der a ni a, a unau chu khèla a'n tum a ni chun, a unau chunga thaw a tum char chu ama chungah in thaw ding a nih. 19 Chuong anga thawin nangni laia inthokin suol chu inthiel fai ro. 20 Mi danghaiin chu chu hrein ting an ta, tuta hnungah nangni lai chuong ang thil suol chu thaw ta ngai naw ni hai. 21 In lunginsiet ding a ni nawh: hringna aiah hringna, mit aiah mit, ha aiah ha, kut aiah kut, ke aiah ke a ni ding a nih.

Deuteronomy 20

1 "In hmèlmahai leh indo dinga in suok huna an sakor hai, tawlailir hai le nangni nêk daia tam an sipai hai in hmu pha chun ti naw ro, Aigupta rama inthoka thuoi suoktu chêu LALPA in Pathien chu in kuomah a um ding a ni si a. 2 In indo tawmin sipaihai hmaah thiempu hung a ta, in kuomah, 3 'Aw, Israelhai, ngàithla ro, tuhin in hmèlmahai leh in indo ding a nih. Ti naw unla, zâm naw ro; an hmaah thlabârin chî-ai naw ro. 4 In hmèlmahai dopêk ding chêu le hnèna inchangtir ding cheua nangni kuoma um chu LALPA in Pathien a ni si a' tiin an hril ding a nih. 5 "Chun, hotuhai chun in mihai kuomah, 'In thar bawla la inhlân hman lo in um am? A inah kîr nawk raw se, nakie thi pal a ta, mi dangin a in chu inhlân hlauh rawi an tih. 6 Chun, grep huon siema a ra la sor hman lo in um am? A inah kîr nawk raw se, nakie thi pal a ta, mi dangin sor hlauh rawi an tih. 7 Nuhmei ding huola la nei hman lo in um am? A inah kîr nawk raw se, nakie indonaah thi pal a ta, mi dangin nei hlauh rawi an tih' tiin in hril ding a nih. 8 Chun, hotuhai bokin, 'A ti le a zàm in um am? A inah kîr nawk raw se, ama ang bokin a unauhai khom lo lungphâng rawi an tih' ti ro. 9 Hotuhaiin an sipaihai kuoma thu an hril zo pha leh, sipaihai inrawitu ding kawmandar an thlang ding a nih. 10 "Khuo rûn dinga in va hnai pha chun, a khaw mihai kuomah inrem in nuom thu hril hmasa phot ro. 11 Inrem an lo nuoma an lo inpêk chun, chu taka mi po po chu sinthawah sor in ta, in rong an bawl ding a nih. 12 Inrem nuom loa an lo do chêu chun, a khuo chu inhuol ro. 13 In kutah LALPAN a pêk pha chêu chun, a sûnga um pasal po po chu that fai vong ro. 14 Nuhmei le naupanghai, ran ruol le an thil nei dang in râllâkhai chu nangni puola dingin hawn thei in ta, LALPA in Pathienin in hmèlmahai thil râllâka a pêkhai chêu chu hmang thei in tih. 15 Chuong ang chun in umnaa inthoka ram hla, in kawl hnaia um hnam danghai ta ni lo khuohai chu in thaw ding a nih. 16 "Amiruokchu, LALPA in Pathienin rochana a pêk chêu ram sûnga khuoa hai ruok chu inthuok thei taphot chu hla nei naw ro. 17 LALPA in Pathienin thu a pêk ang cheuin, sukchimit vong tawl ro. Chuong hnamhai chu Hit hai, Amor hai, Kanan hai, Periz hai, Hiv hai le Jebu hai an nih. 18 Chuong naw chun an pathien biek dàn tirdakum tak chu zui ve dingin zirtìr an ti chêu a, LALPA in Pathien lakah thil suol thaw rawi in tih. 19 "Chun, hun sawt tak khuo in inhuol a, la dingin nasa takin in indo a ni khomin a khuoa thinghai chu phûr thlu naw ro, a ra in la sor ding a ni leiin phûr naw ro. Tuola thinghai chu ieng leiin am in inhuol ve ding? 20 A ra fâk thei lo thinghai ruok chu khuo in lâk chena kul inhuon khumnaa hmang dingin phûr thei in tih.

Deuteronomy 21

1 "LALPA in Pathienin hluo dinga a pêk chêu rama chun khawhnawmah tu amanih sukhlumin um sien, a philtu hriet ni si naw sien, 2 in upahai le rorêltuhai hung an ta, an philna hmuna inthokin a vela khuohai hlatzie chu inkhìng an ta, 3 a ruong zâlnaa inthoka khaw hnai taka upahai chun bawng la tuoi, la sor ngai lo le ringkol la bât ngai lo chu hung kei an ta, 4 loa inlet ngai lo le thlai la chingna ngai lo, tui luongna ruoma chun kei thlâng an ta, chu taka chun a rîng an tan ding a nih. 5 Chun, LALPA in Pathienin a rongbawltu, LALPA hminga malsawmtu le thubuoi le invuok thuhai rêltu dinga a ruot, Levi naupasal thiempuhai chun hung pan hnai an ta, 6 a ruong umnaa inthoka khaw hnai taka upahai chun ruoma bawng la rîng an tan chunga chun an kut sawpin, 7 "Kan kutin hi thisen hi kan insuo naw a, kan mit khomin thaw a ni lai a hmu bok nawh. 8 Aw LALPA, i'n tlan suok kan mi Israelhai ta dinga inremna kan hung siem hi lo pom la, poi tawk lo thisen insuona laka a maw chu kan mipuihai chungah intlâktir lul naw rawh" tiin hril an ta, thisen insuona laka chun ngaidam nîng an tih. 9 Chuonga LALPA mithmua thil indik in thaw chun poi tawk lo thisen maw chu in chunga inthokin inthiel fai in tih. 10 "In hmèlmahai in va do a, LALPA in Pathienin in kutah a pêk chêu a, 11 sala in thuoi nuhmeihai lai chun hmèl tha in tizawng le nuhmei dinga in ditzawng in hmu chun, 12 in inah thuoi unla, an lu vawpèk unla, an kut tin tan raw hai se. 13 An sal thuom chu hlip an ta, in ina um an ni ta leiin, thla khat sûng an nu le pahai sûn an ta, chu hnungah pawl thei in ta, an pasal nîng in ta, in nuhmei ni bok an tih. 14 Sienkhom, in lung tlûk zawng an lo ni naw chun an nuomna naa fe in phalpêk ding a nih. Sumin in zor ding a ni nawh, in sukhmingsiet ta si a. 15 "Miin nuhmei pahni nei sien, pakhat chu ditin pakhat chu theida sien, a dit le a theida chun nau pasal neipêk ve ve hai sien, a nau lutîr chu a theida nau chu ni sien, 16 a ro chu a naupahai a'n khawmtir hunah a dit tak naupa chu a theida naupa nêka upa lemah a siem ding a ni nawh. 17 A theida chu a nau lutîr, a ro po poa chan hni khawmtuah a sie ding a nih. A nau lutîr chu a pa hrâtna ra hmasa tak a na, nau lutîr nina chu a chanpuol a nih. 18 "Miin nau pasal lulul le hel hmang tak nei sien, a nu le pa thu awi loin an thununna pom nuom naw sien, 19 a nu le pa chun chelin, an khaw kul kotkhâr bula upahai kuoma chun an hung thuoi ding a nih. 20 An khaw upahai kuoma chun, "Kan naupa hi mi lulul tak le hel hmang tak a ni a, kan thu khom a awi nuom naw a, inthè chek hmang le zu inrui hmang a nih" an ti ding a nih. 21 Chuongchun, khuoa mi po po chun lungin an dêng hlum ding a nih. Nangni laia inthokin suol chu in inthiel fai ding a nih. Chu chu Israel mi po poin hrieng an ta, ting an tih. 22 "Tu khom thina khop thil suol thawtu chu sukhlum a ni a, thinglèrah in khai a ni chun a ruong chu thinga chun zânkhuoin a um ding a ni nawh. 23 A thi ni lá làin in phûm ding a nih, tu khom thinga khai chu Pathien tongsie phur a ni si a. LALPA in Pathienin in rochung dinga a pêk chêu ram hi in sukporche ding a ni nawh.

Deuteronomy 22

1 "I unaupa bawngchal amanih beram amanih invâk hmang i hmu chun ngaitha loin a inah thuoi kirpêk ngei ngei rawh. 2 I unau chu i kawl hnaia um a ni naw amanih, a neitu chu i hriet naw amanih a ni chun, i in tieng thuoi la, lo kol la, a hung zong pha i lo pêk nawk ding a nih. 3 A sabengtung le a silfèn le a thil inhmang hrim hrim khom ngàitha loin chuong ang chun i thaw ding a nih. 4 I unau sabengtung amanih bawngchal amanih lama tlu i hmu chun ngàitha loin kei thopui nawk rawh. 5 "Nuhmeiin pasal thuomhnaw an inbel ding a ni naw a, pasal khomin nuhmei thuomhnaw an inbel ding a ni bok nawh. Tu khom chuong anga thawtu chu LALPA in Pathienin a tirdak a nih. 6 "Lam sîr hnuoi amanih thinglèr amaniah vate bu i hmu a, a puiin a tui amanih a te amanih a op lai a ni chun a pui chu a tê leh la ngai naw rawh. 7 A tê chu la thei i ta, a pui ruok chu i'n suo ngei ding a nih, chu chu i ta dingin thang a ta, dam sawt bok iItih. 8 "In thar in bawl pha a chunga inthoka mi an tlâk nawna ding le thisen suokna in a ni nawna dingin a chung chu palin inhuon ro. 9 Chun, in grep huonah thil chi hni ching pol naw ro, chuong naw chun in thil ching tharsuok le in grep ra chu sukporchein um rawi a tih. 10 Lo keinaah bawngchal le sabengtung hmang kop naw ro. 11 Sahmul le pat khawng pol silfèn inbel ngai naw ro. 12 In silfèn tlâng hmun liah pebuk in siem ding a nih. 13 "Miin nuhmei a nei a, a pawl hnungin a dit naw a, 14 'Hi nuhmei hi ka nei a, ka pawl a, nunghàk thienglàm a nina ka hmu nawh' tia muolpho taka a sukpawi chun, 15 nunghàk nu le pahaiin kul kotkhâra khaw upahai kuomah nunghàk thienglàm a nizie an hung suklang ding a nih. 16 Nunghàk pa chun upahai kuomah, 'Hi pa hi ka naunu ka'n neitir a, sienkhom a dit nawk naw a. 17 Tu hin, 'I naunu hi nunghàk thienglàm a nina ka hmu nawh' tiin muolpho takin a siem a, sienkhom ka naunu hi nunghàk thienglàm a nizie fiena chu hieng hi a nih' tiin an puonpha chu upahai hmaa chun phar an ta, 18 upahai chun ama chu hrem an ta, 19 Israel nunghàk thienglàm a sukhmingsiet leiin tangka shekel za inchawitir an ta, a nunghàk nu le pa chu pêng an ta, a nuhmei ni zing a ta, a dam sûngin ma thei naw nih. 20 "Amiruokchu, chu mi thu chu a'n dik a, nunghàk chu nunghàk thienglàm a nizie fiena a um naw chun, 21 a pa in kotah hung thuoi suok an ta, a khuoa pasalhai chun lungin dêng hlum an tih, a pa ina a um laia nawchizor anga khawsa a, Israelhai ramah thil inzakumthlàk tak a thaw leiin. Nangni laia inthokin suol chu in inthiel fai ding a nih. 22 "Pasal tu khomin mi nuhmei a zâlpui chun an pahniin in sukhlum ngei ding a nih. Israel rama inthokin suol chu in inthiel fai ding a nih. 23 "Miin khuoah nunghàk thienglàm, mi nuhmei huol lai intuokpuia a lo zâlpui chun, 24 an pahniin khaw kul kotkhàrah thuoi in ta, in dêng hlum ngei ding a nih- nuhmei chu khuoa um ni siin santu koa a khêk naw leiin le pasal chun mi dang nuhmei a sukhmingsiet leiin. Nangni laia inthokin suol chu in inthiel fai ding a nih. 25 "Amiruokchu, miin ramhnuoiah mi nunghàk huol sa a'n tuokpui a, a pawngsuol chun, a pawngsuoltu pasal chu sukhlum ding a nih. 26 Nunghàk chun thina khop suol a thaw naw leiin ieng khom law naw ro. Hieng ang thil hi mani tuolbawmhai beia that ang a nih. 27 Mi chun nunghàk chu ramhnuoiah a va tong fûk a, nunghàk chu a khêk a, sienkhom santu ding a hmu si naw lei a nih. 28 "Miin nunghàk thienglàm, mi la huol lo a hmu a, a suol lui an hmu chun, 29 a zàlpuitu chun a nunghàk pa chu tangkaruo shekel sawmnga a pêk ding a nih. A nunghàk chu a sukhmingsiet ta leiin a nei ngei ding a nih; a dam sûngin ma thei naw nih. 30 "Tu khomin mani pahai nuhmei zâlpuiin a pa khum a sukporchè ding a ni nawh.

Deuteronomy 23

1 "Tu khom tilmu koi le mi tilrè chu LALPA mihai pungkhawmnaah an thang ve ding a ni nawh. 2 Sawn le an thlahai, suon sawmna chen khom LALPA mihai pungkhawmnaah an thang ve ding a ni bok nawh. 3 "Amon mi amanih Moab mihai le an thlahai amanih chu, suon sawmna chenin, LALPA mihai pungkhawmnaah an thang ve ding a ni nawh. 4 Aigupta rama inthoka in hung suok khan anni chun bei le tui chawia hung hmuok chêu nêk hmanin, Aram Naharaim ram Pethor khuoa Beor naupa Balaam chu tongsie inphur ding cheuin an ruoi lem a ni kha. 5 Amiruokchu, LALPA in Pathien chun Balaam chu a ngaithlak nuom naw a, LALPA in Pathien chun a hmangai chêu leiin a tongsie inphur ding chêu chu in ta dinga malsawmnaah LALPA in Pathien chun a'n changtir ta vong lem a nih. 6 In dam sûng phot chu anni leh inruol thatna thuthlung in siem ding a ni nawh. 7 "Edom-hai chu in lungten ding a ni nawh, in unauhai an ni si a. Aigupta mihai khom in lungten ding a ni nawh, an ramah mikhuolin in zu um ta si a. 8 An thlahai chu suon thumnaa inthokin LALPA mihai pungkhawmnaa chun thang ve thei an tih. 9 "In hmèlmahai bei dinga in va rieknaah thil thieng lo hrim hrim lakah in inthier fihlim ding a nih. 10 Nangni laia tu khom zâna amaa inthoka thil pût leia inthieng nawna kai a um chun riebûka inthokin suok a ta, tuolah a um ding a nih. 11 Zân tieng insil fai a ta, nisa a tlâk pha leh riebûkah hung kîr nawk thei a tih. 12 "Inzun le inhnawmna ding riebûk puo tieng hmun bîk ruot ro. 13 Hnuoi chona ding hmangruo nei unla, khur cho unla, in zun le êk chu vur nawk ro. 14 LALPA in Pathien chun nangni hum ding le in hmèlmahai laka san him dinga in riebûk a fang zing leiin, nangni lai thil tirdakum hmua a zàmsan nawna ding cheuin, in riebûk vong thienghlim ro. 15 "Suok tu khomin a pu tlânsana nangni a hung bèl chêu chun, a pu kuomah in pêk kîr nawk ding a ni nawh. 16 A umna khuo dinga a thlang le a um nuomna in ina chun nangni lai inumtir ro. In suknomna ding a ni nawh. 17 "Israel mi nuhmei nawchizor an um ding a ni nawh; Israel mi pasal inzor an um ding a ni bok nawh. 18 Nuhmei amanih pasalg amanih inzorna man chu in thutiem tlâkna dingin LALPA in Pathien inah in hung chawi lût ding a ni nawh, a ieng ieng khom chu LALPA in Pathien ngaiin tirdakum a nih. 19 "A pung umin in unauhai in inpùktir ding a ni nawh, poisa amanih, bu amanih le a pung uma inpùktir thei thil hrim hrim khom. 20 Ram dang mihai chu a pung umin inpùktir thei in ta, in unau Israelhai ruok chu a pung umin in inpùktir ding a ni nawh. Chuongchun, in hluo ding rama chun LALPA in Pathienin in kut sinthaw iengkimah malsawm a ti chêu. 21 "LALPA in Pathien kuomah thutiem in nei chun sawt riel loin pe tlâk vat ro, LALPA in Pathien chun hung thîn ngei a ti chêu a, suola thiem naw chang rawi in tih. 22 Thutiem kongah in insùm ruok chun suola thiem naw chang naw ti niu. 23 Baua in hril suok taphot chu in hlen ngei ding a nih, in bau ngeia LALPA in Pathien kuoma in nuom thua in intiem a ni si a. 24 "I tuolbawm grep huonah i fein i dit tawkin a ra fa thei i ta, sienkhom i bawmah ra khat khom i pâi ding a ni nawh. 25 I tuolbawm loah i fe chun, a buvui thliek thei i ta, amiruokchu a bu ngîr lai chu kawitein i ât ding a ni nawh.

Deuteronomy 24

1 "Miin nuhmei a nei a, a nungchang mawihnai loa a hriet leia a chungah a lungni naw chun, inmâkna lekha ziekpêk a ta, pêng a ta, an in tieng inkîrtir a tih. 2 A ina inthoka a suok hnung chun mi dang nei thei a tih. 3 A pasal hnuhnung lem chun a dit naw a, inmâkna lekha a pêk a, a ina inthoka a'n suoktir amanih, an naw leh a pasal chu a thi a ni khomin, 4 a matu, a pasal hmasa, a mâk leia sukporchetu khan nei nawk thei ta naw nih. Nei nawk chu LALPA ngaia tirdakum a nih. LALPA in Pathienin hluo dinga a pêk chêu rama hin suol in phur lût ding a ni nawh. 5 "Nuhmei nei thar chu indonaah in infetir ding a ni naw a, mawphurna dang khom in pêk ding a ni bok nawh. Kum khat sûng chu in tieng a nuom ang angin a nuhmei leh hlim takin a um ding a nih. 6 "Bat aia dàkhamah bu rawtna lung amanih, a chung tienga a rawtna lung amanih in hrènpek ding a ni nawh, chu chu mi hringna hrènpêk ang a nih. 7 "Tu khomin a unau Israel chanpui inru a, sal anga a soisak amanih le a zor hmu suok a ni chun, a'n rutu chu sukhlum ngei ding a nih. Nangni laia inthokin suol chu inthiel fai ro. 8 "Vun natna hri hrim hrim chungchàngah, Levi mi thiempuhaiin an zirtir chêu ang tak khan, fimkhur takin thaw ro. An kuoma thu ka pêk ang tak kha fimkhur takin zawm ro. 9 Aigupta rama inthoka in hung suok hnunga lam laka LALPA in Pathienin Miriam chunga a thaw kha hre zing ro. 10 "I tuolbawm kuomah thil i'n pûktirin a aia dàkhama hrèn dinga a thil inhlàn chu la dingin a inah i lût ding a ni nawh. 11 Tuolah lo nghàk la, i thil pûktu chun a dàkham chu i kutah hung pe lem raw se. 12 Mi rethei a ni chun a dàkham chu zân chen in hrènpêk ding a ni nawh. 13 A silpuon chu sila a in theina dingin, a dàkham chu nisa tlâk pha leh pe kîr nawk ngei ngei ro. Chuongchun, ama chu in chungah lawm a ta, LALPA in Pathien mithmuah thil fel thaw nîng in tih. 14 "Inhlawfaa in ruoi mi rethei le tlasam chu, in hnam chanpui Israel mi a ni amanih, in khuoa um ram dang mi a ni amanih khomin in nèksawr ding a ni nawh. 15 A thaw nia a hlaw chu nisa tlâk hma ngeiin pe ro, mi rethei a ni leiin a hlawa innghat a nih. Chuong naw chun in chungthuah LALPA ko a ta, suola thiem naw chang ni hlau rawi in tih. 16 "Pahai chu an nauhai leiin in sukhlum ding a ni naw a, nauhai khom an pahai leiin in sukhlum ding a ni bok nawh; mi tin mani suolna seng leia sukhlum an ni ding a nih. 17 "Ram dang mihai le fahrahai ro chu indik lo takin in rèlpêk ding a ni nawh; hmeithai silpuon khom dàkhamah in hrènpêk ding a ni bok nawh. 18 Nangni khom Aigupta bawiah in um a, chu taka inthok chun LALPA in Pathienin a'n tlan suok chêu a nih ti hre zing ro. Chuleiin hieng hi thaw dingin thu ka pêk chêu a nih. 19 In loa bu in sìk pha, in sìk hmaihai chu inkhawm dingin kîr nawk ta naw ro, ram dang mihai, fahrahai le hmeithaihai ta dingin hlà ro. Chuongchun, LALPA in Pathienin in kut sinthaw po poah malsawm a ti chêu. 20 In oliv ra in vuok til pha, a zâra til mahlahai chu vaw til dingin fe nawk ta naw unla, ram dang mihai, fahrahai le hmeithaihai ta dingin hlà ro. 21 In huona grep ra in lo pha a to in zong ding a ni nawh; ram dang mihai, fahrahai le hmeithaihai ta dingin hlà ro. Aigupta rama bawi in ni lai kha hre zing ro. Chuleiin, hieng hi thaw dingin thu ka pêk chêu a nih. 22 (A um nawh)

Deuteronomy 25

1 "Mi an inkhing chun rorêlnaah fêng an ta, rorêltuhaiin lo rêlpêk an ta, mi fel chu thiem inchangtir an ta, mi suol chu thiem naw an inchangtir ding a nih. 2 Mi suolin vuok a phu chun rorêltuin inzâltir a ta, a hmaah invuoktir a ta, a suol dàn zirin an vuok zât ding bi chu thliek a tih. 3 Amiruokchu voi sawmli nèka tam a'n vuoktir ding a ni nawh. Voi sawmli chuong vuok a ni chun, in mithmuah in unaupa chu muolpho a tih. 4 "Bawngchalin bu a chil laiin a hmûr khuop naw ro. 5 "Urêng an um khawm a, nau pasal nei loin anni laia mi chu thi ta sien, a thipa nuhmei chu mi dang, puo tieng miin an nei ding a ni nawh. A pasal unauhaiin rochung an ta, nuhmeiah nei an ta, an unaupa thaw ding chu a chunga chun thawng an tih. 6 Nau pasal a neipêk hmasa tak chun Israel laia a hming a bo nawna dingin a unau thi tah hming chu a put ding a nih. 7 Sienkhom, ama chun a unaupa nuhmei chu a nei nuom naw chun, a unaupa nuhmei chu kul kotkhàr bula upahai kuomah fêng a ta, "Ka pasal unaupain Israelhai lai a unaupa hming inumtir zing a nuom naw leiin a unaupa thaw ding chu ka chungah a thaw nuom nawh" a ti ding a nih. 8 A khaw upahai chun ama chu ko an ta, inbiekpui an tih. 9 Ama chun, "Ka nei nuom nawh" tia a thang tlat chun a unaupa nuhmei chun upahai hmaah hang pan a ta, 'A unaupa sûngkuo indin nuom nawtu chunga chun hieng anga thaw ni pei raw se' tiin a pheikhok hlippêk a ta, a hmaiah chil sâkkhum a tih. 10 Chu pa le a thlahai chu 'Sûngkuo pheikhok hlippêk' ti hming inputtir nîng an tih. 11 "Mi insuol hai sien, a pakhat lem nuhmei chun a pasal san suok dingin an suolpuipa sera chun man sien, 12 chu nu kut chu in tanpêk ding a nih. In lunginsiet ding a ni nawh. 13 "In mansaah bùkna thuhmun ni si, a rik dàn inang lo, pakhat a rik lem, pakhat a zâng lem in nei ding a ni nawh. 14 Inkhina thuhmun ni si, a lien lem le a chin lem um bok si khom in inah in kol ding a ni nawh. 15 Bûklung indik le fel le inkhina indik le fel in nei ding a nih, chuongchun LALPA in Pathienin a pêk chêu rama hin dam sawt in tih. 16 LALPA in Pathien chun chuong anga thawtu ni lo, indik lo taka mi dawrtu chu a tirdak a nih. 17 "Aigupta rama inthoka in hung suok laia Amalek mihaiin lampuia an lo thaw dàn chêu kha hre zing ro. 18 Sawl le chaua in inzin lai khan lampuiah an lo lambun chêu a, Pathien tina nei hlek loin a hnufuol po an sât hlum a ni kha. 19 Chuongchun, LALPA in Pathienin hluo ding le rochung ding ram a pêka in dorâlhai laka muongna a pêk pha chêu chun, Amalekhai hi vânkhup hnuoia tu hriet hlaw ta lo dingin sukchimit ro. Chu chu theinghil dèr naw ro!

Deuteronomy 26

1 "In rochung dinga LALPA in Pathienin a pêk chêu ram chu lût a, hluo a, in va um pha chun, 2 LALPA in Pathienin a pêk chêu in ram leilung ra suok hmasa tak seng chu hung chawi in ta, bawmah sieng in ta, LALPA in Pathienin a hming innghatna dinga a la ruot ding hmuna chun in fepui ding a nih. 3 Chuong hun laia thiempu kuoma chun fêng in ta, a kuomah, 'LALPAN kan pi le puhai kuoma inkhâm meua pêk a tiem rama chun kan hung tlung tah ti LALPA i Pathien hmaah ka puong a nih" tiin in hril ding a nih. 4 Thiempu chun in kuta inthokin bawm chu lâng a ta, LALPA in Pathien maichâm bula chun inthut a tih. 5 Chun, nangnin LALPA in Pathien hmaa chun, "Kan pu chu Aram mih, mi vâkvai a na, Aigupta ramah a fe thla a, a zu um a, mi tlawmte chauh an la nih. Chu taka chun hnam ropui tak, thilthawthei tak le tam tak an hung ni ta a. 6 Aigupta mihai chun an mi suknomna a, an mi sukrethei a, sin harsá sa an mi'n thawtir a. 7 Chuongchun, LALPA, kan pi le puhai Pathien chu kan ko a, LALPA chun kan rawl a lo ngaithlâk a, kan retheizie hai, kan rimsikzie hai le an mi neksawr nasatzie hai chu a hriet a. 8 LALPA chun Aigupta rama inthokin kut hrât tak hmangin, bân pharin, thil râpum tak tak le inchikna le thil mak tak hai thawin a mi thuoi suok a, 9 hi hmuna hin a mi thuoi lût a, hi ram, nenetui le khuoizu luongna ram hi a mi pêk a. 10 Chuleiin, aw LALPA, i mi pêk kan ram leilung tharsuok hmasa tak seng chu kan hung chawi a nih' in va ti ding a nih. Chun, LALPA in Pathien hmaa chun in bawmhai chu inthut unla, a hmaah kûn ro. 11 Nangni le Levi mihai le nangni laia ram dang mi umhai le in sûngkuohai kuomah thil tha tinrêng LALPA in Pathienin a pêk lei chêuin hlim takin in um ding a nih. 12 "Chun, a kum thumna, in thil tharsuok po po sawma pakhat in pêk dinghai chu in sie fel pha leh in khuoa Levi mihai, ram dang mihai, fahrahai le hmeithaihai chun faa an tlai theina dingin, in pêk ding a nih. 13 LALPA in Pathien hmaah, "I thu mi pêk angin ka ina inthokin thilpêk thienghlim chu ka lâk suok a, Levi mi hai, ram dang mihai, fahrahai le hmeithaihai ka pêk a, i thupêk po po pètsan ka nei naw a, pakhat tè khom theinghil ka nei nawh. 14 Ka lusun lai khomin ka tharsuok inhlàna mi chu ka pur ngai naw a, inthieng nawna ka kai laiin ka tawk ngai naw a, mithi puola ding khomin ka'n hlàn bok nawh. LALPA ka Pathien thu chu ka zawm a, a thu mi pêk po po ang chun ka thaw a nih. 15 I chêngna hmun thienghlim, vâna inthokin mi zuk thlîr la, i mi Israelhai le kan pi le puhai kuoma inkhâm meua pêk i tiem ram, nenetui le khuoizu luongna ram hi mal hung sawm rawh' in ti ding a nih. 16 "LALPA in Pathien chun hieng a thupêkhai le dânhai hi fimkhur taka zawm dingin voisun hin thu a pêk chêu a; chuleiin, in lungril po po le in thlarau po poa pomin in zawm ding a nih. 17 Nangni khomin LALPA chu in Pathien a nizie, a lampuihai hraw a, a thupêk hai, thusuok hai le dân hai zawm a, a thu in awi dingzie chu voisun hin in puong a. 18 A mihai, a tiem tah anga a ro puol bik hnam le a thupêkhai zawmtu ding in nizie voisun hin LALPAN a puong a nih. 19 A tiem tah anga hnam dang po po chung daia inpâk le hmingthang le chawimawi hlaw ding le LALPA in Pathien mi thienghlimhai ni dingin a thlang chêu ti a puong bok a nih.

Deuteronomy 27

1 "Chun, Mosien Israel upahai leh, mipuihai kuomah, "Voisuna thupêk ka pêkhai chêu hi zawm ro. 2 Jordan vadung in kàn nia LALPA in Pathienin a pêk chêu ram in lût pha chun, lung lien tak tak phun inla, lung chàrnain chàr khum ro. 3 LALPA in Pathienin in pi le puhai kuoma pêk a tiem chêu ram, nenetui le khuoizu luongna rama in lût pha chun hieng dàn thuhai hi lung phêka hai chun ziek thla ro. 4 Jordan vadung in kàn pha chun, voisuna thu ka pêk ang chêu hin, Ebal tlângah lunghai hi phun unla, lung chàrnain zût khum ro. 5 Chu taka chun LALPA in Pathien ta dingin lungin maichâm siem ro. A siemna dingin thîr hmangruo hrim hrim hmang naw ro. 6 LALPA in Pathien maichâm chu ram lung hmangin siem unla, LALPA in Pathien kuomah pumraw inthawina inhlàn ro. 7 Inremna thilhlàn inhlàn bok unla, chu taka chun fain LALPA in Pathien hmaah hlim takin in um ding a nih. 8 Chun, lungphuna hai chun hieng dàn thu po po hi fie takin in ziek ding a nih" tiin thu a pêk a. 9 Mosie chun, thiempu Levi-hai le chun, Israel mi po po chu a biek a, "Aw Israel mihai, ngun takin ngàithla ro. Voisun hin LALPA in Pathien mihai in hung ni ta a. 10 Chuleiin, LALPA in Pathien thu chu awi unla, voisuna thupêk le dàn ka pêkhai chêu hi zawm ro" a ta. 11 Chu ni chun Mosien mipuihai chu thu a pêk a: 12 "Jordan vadung in kàn pha leh mipuihai malsawm dingin Gerizim tlângah hieng hnamhai hi an ngîr ding a nih: Simeon, Levi, Juda, Isakar, Josefa le Benjamin. 13 Chun, tongsie inphur dingin hieng hnamhai hi Ebal tlângah an ngîr ding a nih: Reuben, Gad, Aser, Zebulun, Dan le Napthali. 14 "Levihai chun rawl inring takin mipuihai kuomah hieng thuhai hi an insam ding a nih: 15 "Kut themthiemna hmanga LALPA ta dinga tirdakum milem kertu le sungtu le chu chu arûka betu taphot chu tongsie phurin um raw se" tîng an ta, mipui po po chun "Amen" an lo ti ding a nih. 16 "A nu le pa inza nawtu taphot chu tongsie phurin um raw se" tîng an ta, mipui po po chun "Amen" an lo ti ding a nih. 17 "A tuolbawm ramri sontu taphot chu tongsie phurin um raw se" tîng an ta, mipui po po chun "Amen" an lo ti ding a nih. 18 "Lampuia inthoka lampui loa mitdel thuoi pêngtu taphot chu tongsie phurin um raw se" tîng an ta, mipui po po chun "Amen" an lo ti ding a nih. 19 "Ram dang mihai, fahra hai le hmeithai hai ro indik lo taka rêlpêktu taphot chu tongsie phurin um raw se" tîng an ta, mipui po po chun "Amen" an lo ti ding a nih. 20 "A pa khum inza loa a pa nuhmei zàlpuitu taphot chu tongsie phurin um raw se" tîng an ta, mipui po po chun "Amen" an lo ti ding a nih. 21 "Ran ieng khom rìmtu taphot chu tongsie phurin um raw se" tîng an ta, mipui po po chun "Amen" an lo ti ding a nih. 22 "A farnu amanih, a pa naunu amanih, a nu naunu amanih zàlpuitu taphot chu tongsie phurin um raw se" tîng an ta, mipui po po chun "Amen" an lo ti ding a nih. 23 "A tarpinu zàlpuitu taphot chu tongsie phurin um raw se" tîng an ta, mipui po po chun "Amen" an lo ti ding a nih. 24 "Arûka tuolbawm thattu taphot chu tongsie phurin um raw se" tîng an ta, mipui po po chun "Amen" an lo ti ding a nih. 25 "Poi tawk lo mi thatna dinga thamna latu taphot chu tongsie phurin um raw se" tîng an ta, mipui po po chun "Amen" an lo ti ding a nih. 26 "Hi dàn thuhai chel nghet nawtu taphot chu tongsie phurin um raw se" tîng an ta, mipui po po chun "Amen" an lo ti ding a nih.

Deuteronomy 28

1 "LALPA in Pathien thu chu awi a, voisuna ka pêk chêu a thupêk po po hi in zawm chun, LALPA in Pathienin hnam po po laia chunghnung takah hlâng kai a ti chêu. 2 LALPA in Pathien thu in zawm chun hieng malsawmnahai hi in chungah vùr a ta, chu chun zui pei a ti chêu: 3 " In tieng le ram tieng malsawm a ti chêu. 4 "In rîla ra malsawm a tih, in lo ra suok le in ran ruolhai, in bawngte le beramte hai leh. 5 "In bawm le bei in hmetna thlênghai malsawm a tih. 6 "In fe le hung, in suok le lût malsawm a tih. 7 "Nangni dotu, in hmèlmahai LALPAN hnèpêk a ti chêu a, bei ding cheua sîr khata inthoka hung inthokhai chu sîr sariah tlân dar an tih. 8 "In bu in le in kut sinthawna iengkimah LALPAN malsawmna hung tir a ta; ram a pêk cheua chun LALPA in Pathienin malsawm a ti chêu. 9 "In kuoma inkhâm meua a lo intiem tah angin, LALPA in Pathien thupêkhai in zawm a, a lampuihai in hraw phot chun, LALPA chun ama ta dinga hnam thienghlimah suknghet a ti chêu. 10 Chuongchun, khawvel hnam tinin LALPA hminga kohai in nih ti hrieng an ta, tîng an ti chêu. 11 Inkhâm meua pêk chêu a tiem rama chun hnienghnàrna tinrêngin vùr a ti chêu a, in rîla rahai, in ran ruolhai le in lo ra suokhai malsawm a tih. 12 "LALPA chun a hun taka in ram chawmtu ding ruotui pe ding chêu le in kut sinthawhai po po malsawm dingin vâna a hausakna zèngpui chu hung hongpêk a ti chêu a; chuongchun, hnam tam tak inpûktir in ta, nangni ruok chun pûk ve naw ti niu. 13 LALPA in Pathien thupêkhai ngaisak a, voisuna thu ka pêkhai chêu hi fimkhur taka in zawm chun, a mei ni loin a luah LALPAN siem a ti chêu a, a mong dàp ni loin a chunghnung takah thang rop in tih. 14 Pathien danghai be ding le an rong bawl dingin voisuna ka thupêkhai chêu hi chang tieng amanih voi tieng amanih in pètsan ding a ni nawh. 15 "Amiruokchu, LALPA in Pathien thu in awi naw a, voisuna ka pêk chêu a thupêkhai le dânhai hi fimkhur taka in zawm naw chun hieng tongsiehai hi in chungah hung tlungin nangchîng a ti chêu: 16 "In tieng le ram tieng tongsie phur in tih. 17 "In bawm le bei in hmetna thlênghaiin tongsie phur an tih. 18 "In rîla ra chun tongsie phur a tih, in lo ra suok le in ran ruolhai, in bawngte le beramte hai leh. 19 "In fe le hung, in suok le lùtin tongsie phur in tih. 20 "LALPA chun in chungah tongsie le in kut sinthaw taphotah buoina le inhalna hung tir a ta, thil suol thawa in mi hnung son leiin suksietin um thut in tih. 21 Hluo dinga in lûtna rama inthoka sukbohmang in ni hma khat chu LALPAN hri inlêngtir a tih. 22 LALPAN ngorna dâm, khawsik le invùngna dâm, lum khawkhèng le tawlna dâm, tlolna le hmonna hri damin hrem a ti chêu a, in bohmang hma khat chu zui pei a ti chêu. 23 In chunga vân chu dâr angin inchang a ta, hnuoi chu kapathir angin inchang a tih. 24 In rama ruotui chu LALPAN pilvut dipah inchangtir a ta, in bohmang hma khat vâna inthokin in chungah pilvut insûrtir a tih. 25 "LALPAN in hmèlmahai lakah suktlawm a ti chêu a, anni chu sîr khatah inthokin bei in ta, sîr sariah tlânsieng in ta, khawvel ram tinah mi pangzat nîng in tih. 26 In ruong chu chunglèng vatehai le ramsahaiin tlàn hut hut an ta, a hawl zàmtu ding tu khom um naw ni hai. 27 Sukdam thei lo Aiguptaa khuoihli le pang inbawkna dâm, pânna huoisuol le inthak dâmin LALPAN hrem a ti chêu. 28 Invêtna dâm, mitdelna dâm le lungril buoina dâmin LALPAN hrem a ti chêu a; 29 Sùn changa khom thimthama mitdel inmai angin inmai in ta, in thaw taphotah hlawsam in ta, ni tin ni tina neksawr le rokin um in ta, santu ding hrim nei naw ti niu. 30 "Nei dinga nuhmei in huol chu mi dangin chang an ta, zàlpui an tih. In bawl in ta, sienkhom hluo naw ti niu. Grep huon siem in ta, a ra sor hman naw ti niu. 31 In mithmua ngei in bawngchal that an ta, a sa hlek khom chang ve phâk naw ti niu. In sabengtung lâkpêk an ti chêu a, hmu kîr nawk ta naw ti niu. In beramhai chu in hmèlmahai kuomah pêng an ta, tu khomin san suok naw ni hai. 32 In nau pasalhai le nau nuhmeihai chu hnam danghai pêng an ta, ni tin tina in thlirnain in mit chau zo a ta, thaw thei ieng khom nei si naw ti niu. 33 In ram ra suok le in sin inrim rahai chu in hriet ngai lohaiin tlàn an ta, ni tin tinin neksawr chauh hlawng in tih. 34 Chuong in thil hmuhai chun sukvêt zo a ti chêu. 35 Sukdam thei lo khuoihli na chiin in khùp le ke bawm a ta, in kekhonga inthoka in lu sîp chenin tuom a tih. 36 "Nangni le in lal chopin in pi le puhaiin an hriet ngai lo hnamhai kuomah LALPA chun thuoi a ti chêu a, chu taka chun pathien dang, thing le lunga siem chu bieng in tih. 37 LALPAN a thuoi hmangna ding chêu hnamhai pangzat le hal kawng le endong nîng in tih. 38 In loah thlai chi thlâk teuh in ta, sîka muol ruok chu nei naw ti niu, khauin fa zo an tih. 39 Grêp phun in ta, enkol in ta, sienkhom a uoiin dawn naw ti niu a, grêp khom lo bok naw ti niu, a nge-in an fâk zo ding a ni si a. 40 In ram hmun tinah oliv huon nei inla khom a hriek sawr naw ti niu, oliv rahai chu an hlamtil zo ding a ni si a. 41 Naunu le naupa nei in ta, sienkhom nangni ta ni naw ni hai, salah an thuoi tawl ding a ni si a. 42 In thei kung po po le in thlai tharsuok chu khau honhai chan nîng a tih. 43 "Ram dang mi, nangni laia umhai chu insâng tuol tuol an ta, nangni chu inhnuoi tiel tiel in tih. 44 Inpûktir an ti chêu a, nangni ruok chun inpûktir ve naw ti niu. Anni chu a lu nîng an ta, nangni chu a mei nîng in tih. 45 Hieng tongsie po po hi in chungah hung tlung a tih. LALPA in Pathien thu in awi naw a, a thupêkhai in zawm naw leiin a sukbohmang hma khat chêu anni chun hnot thlûrin nangchîng an ti chêu. 46 Chuong thilhai chu nangni le in thlahai ta dinga kumkhuoa inchikna le thil mak nîng a tih. 47 In hnienghnâr hunah LALPA in Pathien rong chu hlim tak le lawm taka in bawl naw leiin, 48 phingtâm le dangchâr, saruok le rethei mong tolin LALPA hung tirh in hmèlmahai rong chu bawl in tih. A sukbohmang chêu hma khat chu in rîngah thîr kol inbâttir a ti chêu. 49 "LALPA chun ram hla tak, hnuoi tawpa inthokin nangni bei dingin hnam dang, an tong khom in hriet ngai nawhai chu hung tir a ta, mupui inbir thla angin hung thâm an ti chêu; 50 anni chu upa inzàna le naupang lunginsietna nei lo, hnam kolsen tak an nih. 51 In ram vong hma khat chenin in ranhai le in ram tharsuokhai fâng an ta, bu le bâl le uoiin le hriek le in bawng le beram inte tharhai chu hlà hrim nei naw ni hai. 52 In ring zo êm êm in khuo inhuonna kul bang insânghai chu a chim vong chenin LALPA in Pathienin a pêk chêu ram sûnga khuo po po chu inhuol an tih. 53 "In hmèlmahaiin dangchêpa an inhuol lai cheua in rimsik tuor leiin, LALPA in Pathienin a pêk chêu in rîla ra, in naupahai le naunuhai sa chu fâng in tih. 54 Nangni laia pa zaidam tak le inzaum tak khomin a unau amanih, a nuhmei dit tak le a la umpui a nauhai takngiel khom lunginsiet naw nih. 55 In hmèlmahaiin nasa taka in khuohai dangchêpa an inhuol leiin, a nauhai sa chu a thil nei sun a na, tu khom sem phal naw nih. 56 Hmèlmahaiin kul kotkhàr an inhuol a, an dangchêp tlat leia iengkim in tlâksam tâk lei chun, nangni laia nu zaidam le derdêp, a um inno leia a kepha khoma hnuoi la sir ngai lo khomin chuong ang tho chun um vêng a ta, a nauhai sa chu a rûka fâk a nuom leiin, a pasal dit tak dâm, a naunuhai le naupahai dâm chu huphur a ta, 57 a naute pieng hlim sa le a hlamzui naute bawm chenin arûkin fâng a tih. 58 "LALPA in Pathien hming ropui tak le râpum tak chu inza lo a, a dàn thu, zieka umhai hi fimkhur taka in zawm naw chun, 59 LALPAN nangni le in thlahai chungah hri mak tak tak le na tak tak dâm, sietna inkieng el thei lo ding dâm, natna khir tak, dam mei mei thei lo ding dâm chu inlèngtir a tih. 60 In ti hle hlak Aiguptaa hrihai kha in chungah inlèngtir a ta, inthla naw ni chêu. 61 Sukbohmang in ni chenin, hi Dàn Bu-a chuong lo natna le sietna mak tak tak hai khom inlêngtir bok a tih. 62 LALPA in Pathien thu chu inzawm naw leiin, vâna arasi zât ni hlak kha tlawmte chauh hung ni tàng in tih. 63 LALPA chun sukhnienghnâr le sukpung chêu a nuom ang bokin suksiet le sukbohmang chêu khom hung nuom tàng a ta, lûta in va hluo ding rama inthok chun son hmang a ti chêu. 64 "Chuongchun, LALPA chun kawlkila inthoka kawlkil khing tieng tawp chenin chi tin lai sukdar a ti chêu a, chu taka chun thing le lung, in pi le puhai khoma an hriet ngai lo pathien danghai chu bein an rong bawl in tih. 65 Chuong hnamhai lai chun hadamna hrim hrim hmu naw ti niu a, in ke ta dingin chawlna hmun hrim um naw ni a, chu taka chun lungrila lungkhamna dâm, khawsawt leia mit chauna dâm le lungril nguina dâm pe lem a ti chêu. 66 Ieng lai khom ti dor dorin, sùn le zân thlaphângnaa sipin, iem in chang ding ti hrim hre loin, khawsàng in tih. 67 In lungrila titna lei le in mita in thil hmuhai lei chun, zîng tieng po leh, 'Zân tieng ni ta sien aw!' tîng in ta, zân tieng po leh 'Zîng tieng ni ta sien!' tîng in tih. 68 Kîr nawk ta ngai lo dinga ka ti chêu Aigupta rama chun longin LALPAN tir kîr a ti chêu. Chu taka chun in hmèlmahai bawipa le bawinu ni dingin inzor in ta, sienkhom tu khomin inchaw nuom naw ni hai chêu.

Deuteronomy 29

1 LALPAN Israelhai kuoma Horeb tlânga thu thlung dinga Mosie thu a pêk bàka Moab rama thu thlung dinga a pêkhai chu hieng hi a nih. 2 Mosie chun Israel mihai po po chu a ko khawm a, an kuomah, "Aigupta rama Faraw chunga hai, 3 a mihai po po chunga le a ram po po chunga LALPAN fiena râpthlâk tak tak hai, inchikna mak tak tak le thil mak ropui tak tak a thawhai po po kha mit ngeiin in hmu a. 4 Amiruokchu, voisun ni chen hin LALPAN hriet thiemna lungril dâm, hmu fie theina mit dâm le hriet theina nakawr dâm a la pêk naw chêu. 5 Kum sawmli hiel thlalèra ka thuoi sûng chêu khan in silfènhai in hàk chul naw a, in pheikhokhai khom in la bun tiek bok nawh. 6 Bei in fâk naw a, uoiin amanih zu dang khom in dawn nawh. Hieng hi LALPA chu in Pathien a nizie in hrietna dinga ka thaw a nih. 7 "Chun, hi hmun in hung tlung hin Hesbona lal Sihon le Basana lal Oga hai chu mi do dingin an hung inthok a, anni chu ei lo hne a. 8 An ram chu ei lâkpêk a, Reuben hnam le Gad hnam le Manase hnam zatve hluo dingin ei pêk a. 9 Chuleiin, in thilthaw po poa in hmuingil theina dingin thuthlung ka pêkhai chêu hi pom unla, zawm ro. 10 "Voisun hin in rêngin, in hnam thuoitu luhai, upahai le hotuhai dam, 11 nu le nau, ram dang mi in umpuihai, thing phùrtu le tui chawituhai dàm chenin LALPA in Pathien hmaah in hung a. 12 LALPA in Pathienin in kuoma inkhâm meua a namnghet, thuthlung a siema chun lût dingin voisun hin hi taka hin in hung ngîr a; 13 in thlatu Abraham hai, Isak hai, Jakob hai kuoma le nangni kuoma a lo tiem tah anga in Pathien a ni theina dingin, ama mi ni dingin a suknghet chêu a nih. 14 Hi inkhâmna le thuthlungna hi in kuoma chauh ka pêk nawh; 15 voisuna LALPA ei Pathien hmaa ngîrhai le tuta ei kuoma la um ve lohai kuoma khom ka pêk a nih. 16 "Aigupta rama ei khawsak dàn le hnam danghai pal tlanga hi hmuna ei hung dânhai chu nangni ngeiin in hriet. 17 Anni rawi thil kol tirdakum, thing le lung le tangkaruo le rangkachaka siem milemhai khom in hmu ta kha. 18 Voisuna nangni laia mi pasal amanih, nuhmei amanih, sûngkuo amanih le hnam amanih tu khom chuong hnamhai pathien chu be dinga LALPA in Pathien nghatsan in um nawna dingin fimkhur ro; chuong anga tûr kha pai chun nangni lai zung an kei nawna dingin fimkhur bok ro. 19 "Voisuna inkhâmna thu ngaithlatuhai lai hin, lulul taka mani lampui hraw zing sia iengkim tluong dinga lungrila ngaitu an um nawna dingin fimkhur ro. Chu chun ram hnawng le ram tawl chungah sietna intlun a tih. i 20 Chuong ang mi chu LALPAN ngaidam naw ni a, a lungthîkna sosâng chun hlieu a ta, hi lekhabua chuong tongsie po po chu a chungah tlâng a ta, a hming chu vânkhup hnuoia inthokin LALPAN thai bo a tih. 21 Hi Dàn Bua chuong tongsie inphurna thuthlung po po dungzuiin, ama chu Israel hnamhai laia inthokin LALPAN thlur bing a ta, sietnain inhnottir bok a tih. 22 "In hnunga la hung zuitu in nauhai le hla taka inthoka hung ram dang mihai chun sietnain hi ram a tlâkbuok dàn le hri le hraia LALPAN a hrem dânhai chu la hmung an tih. 23 A ram pum chu chi raw chang le kât ang el, ieng khom chìng thei lona, ieng khom mawng thei lona, hlobet takngiel khom a mawng nawna ramah inchang a tih. LALPA lungsen sosânga a suksiet Sodom le Gomora le Adma le Zeboiim hai ang chie nîng a tih. 24 Hnam tinin, 'Ieng leia hi ram hi hieng lawm lawma LALPAN a thaw el am a na? Hieng lawm lawma ieng leia a lungsen a sosâng am a na?' la tîng an tih. 25 Chuongchun, mihaiin, 'Aigupta rama inthoka a thuoi suok laia a thuthlung, an pi le pua inthoka LALPA an Pathien thuthlung chu nghatsana, 26 pathien dang, an hriet ngai lo pathienhai, aman a ruot ni lohai rong chu bawla an biek lei a nih. 27 Chuleiin, hi lekhabua chuong tongsie po po chu hi ram chunga intlungtir dingin LALPA lungsen chu a chok a nih. 28 A lungsen nasa tak leiin LALPA chun anni chu an rama inthokin a pot suok vong a, ram dangah a dêng lût tawl a nih, tuta an um ang hin' la tîng an tih. 29 "Thil inthuphai chu LALPA ei Pathien ta a na, thil puong suoka umhai ruok chu, hieng dàn thuhai po po hi ei zawm theina dingin, kumkhuoa eini le ei thlahai ta a nih.

Deuteronomy 30

1 "In hmaah thlang ding malsawmna le tongsie ka sie tah a. LALPA in Pathienin hnam danghai lai a hnot dar pha chêu, tuta dit thlangna ka pêk chêu hi in hriet suok hun la um a tih. 2 Nangni le in thlahaiin LALPA in Pathien kuom tieng hung kîr nawk a, voisuna thupêk ka pêkhai hi lungril po po le thlarau po poa in zawm chun, 3 LALPA in Pathien chun in vangneinaj hung tungding nawk a ta, lunginsiet a ti chêu a, hnam tin laia a hnot darna cheua inthokin hung thuoi khawm nawk a ti chêu. 4 Hnuoi kilkhawra a hnot suok in um khomin, chu taka inthok chun LALPA in Pathien chun rût khawmin hung thuoi kîr nawk a ti chêu. 5 LALPA in Pathien chun in pi le puhai hluo ram ngeia chun thuoi lût a ti chêu a, chu ram chu hluo nawk in ta, in pi le puhai nèka hmuingil lem le tam lemin siem a ti chêu. 6 Chun, in khawsak theina ding le in lungril po po le in thlarau po poa in hmangai theina dingin, LALPA in Pathien chun in lungril le in thlahai lungril ser chu tanpêk a ti chêu. 7 Chun, hieng tongsie po po hi LALPA in Pathien chun a theidatu le suknomnatu chêu in hmèlmahai chungah bun lêt a tih. 8 Chuongchun, LALPA chu pom nawkin, voisuna ka pêk chêu thupêkhai hi hung hraw nawk in tih. 9 LALPA in Pathien chun in kut sinthaw tinrênga hai, in rila ra hai, in ran vai chunga hai le in lo thlai suok tinrêngah a tontawin sukpung a ti chêu. 10 Hi Dàn bua chuong a thupêkhai le a dânhai zawm dinga LALPA in Pathien kuom tienga lungril po po le thlarau po poa in kir chun in pi le puhai chunga a lawm ang bok khan in chungah LALPA lawm nawk a ta, sukhnienghnâr a ti chêu. 11 "Voisuna ka thupêkhai chêu hi in ta dinga thil harsa taluo amani le in tlin phâk lo thil a um nawh. 12 'Kan hrieta kan zawm theina dingin tu am vâna hang lawnin mi hang lapêk a ta?' ti dingin vâna um a ni si nawh. 13 'Kan hrieta kan zawm theina dingin tu am tuifinriet ràla fein mi va lapêk a ta?' ti dingin tuifinriet ràla um khom a ni bok nawh. 14 Chuong nêk hmanin, thu chun a hnai hle chêu a, in baua le in lungrilah a um a nih. 15 "Ngai ta u, tuhin in hmaah hringna le hmuingilna le thina le sietna ka sie a ni hi. 16 LALPA in Pathien hmangai ding dâm, a lampui hraw ding dâm le a rorêlhai pom ding dàma thu ka pêkhai chêu hi in zawm chun hring le damin um in ta, hung pung in ta, in va hluo ding rama chun LALPA in Pathienin malsawm a ti chêu. 17 Amiruokchu, in lungril naw tieng ngha a, thu awi lo a, thuoi hmanga um a, pathien danghai bea an rong in bawl chun, 18 bohmang ngei ngei in tih ti tuhin ka hril chêu a nih. Jordan vadung kân a, hluo dinga in lûtna rama chun dam sawt naw ti niu. 19 In hmaa hringna le thina, malsawmna le tongsie ka sie hi tuhin in chungchang thua hrepuitu dingin hnuoi le vân ka ko a nih. Tuhin, hringna chu thlang ro, nangni le in thlahai khom an hring theina ding le 20 LALPA in Pathien chu hmangai a, a rawl ngaithla a, in chel nghet tlat theina dingin. LALPA chu in hringna a ni leiin, in pu Abraham hai, Isak hai, Jakob hai kuoma inkhâm meua pêk a tiem rama chun kum sawt tak indamtir a ti chêu" a ta.

Deuteronomy 31

1 Chun, Mosie chu a va suok a, Israel mi po po kuoma chun hieng thu hi a hril a: 2 "Tuhin kum za le sawmhnih ka lo ni ta a, LALPAN ka kuomah, 'Hi Jordan vadung hi kân naw ti nih' a mi ti a, ka thuoi pei thei ta naw ding chêu a nih. 3 LALPA in Pathien chun in hma thuoi a ta, hieng hnamhai hi sukbohmang a ta, an ram chu in hluo ding a nih. Chun, LALPAN a lo hril tah angin, Josua hin inrawi a ti chêu. 4 LALPAN Amorhai lal Sihon le Oga le an ramhai a sukbohmang ang khan anni chunga khom thaw veng a tih. 5 LALPAN anni chu in kutah pêng a ti chêu a, thupêk ka pêk chêu ang tak khan an chungah in thaw ding a nih. 6 Hrât tak le huoisen takin um ro. Ti naw unla, anni leiin thlabâr bok naw ro, a fepuitu chêu chu LALPA a ni si a; ama chun màksan ngai naw ni chêu a, zàmsan ngai bok naw ni chêu" tiin. 7 Chun, Mosien Josua a ko a, Israel mihai po po hmua chun a kuomah, "Hrât tak le huoisen takin um rawh, an pi le pua inthoka LALPAN inkhâm meua pêk a tiem rama chun hi mihai hi i fepui ding a na, an rochan seng chu i'n hluotir ding a nih. 8 I hmathuoitu chu LALPA nîng a ta, umpui zing a ti che; ama chun màksan ngai naw ni che a, zàmsan ngai bok naw ni che. Ti naw la, zâm dèr naw rawh" a ta. 9 Chun, Mosie chun dàn chu a ziek thlâk a, LALPA thuthlung bawm zawntu Levi naupa thiempuhai le Israel upahai chu a pêk a. 10 Mosie chun an kuomah, "Kum sari dan pei, bat ngaidamna kum, Bawkte Kùt hunah, 11 hmun a la ruot dinga Israel mi po po LALPA in Pathien hmaa in hung inlang pha leh hi dàn hi an hriet ngeiah in tiem hlak ding a nih. 12 Dàn chu ngaithla a, LALPA in Pathien ti dàn inchûk a, a dânhai fimkhur taka an zawm theina dingin mipuihai chu a nuhmei a pasalin, in naupang tehai le in umpui ram dang mihai khom dàn thu chu ngaithla dingin ko khawm ro. 13 Jordan vadung kâna in va hluo ding rama in um sûng po poa LALPA in Pathien ti dàn an inchùk theina dingin, a la hre ngai lo an nauhai khomin an ngaithlâk ngei ding a nih" a ta. 14 Chun, LALPA chun Mosie kuomah, "Ngai ta, i thi hun a hnai ta a, Josua ko la, Intuokna Puon inah hung unla, ama ka ruot thu lo hril ka tih" a ta. Chuongchun, Mosie le Josua chu an fe a, Intuokna Puon ina chun an va'n lang a. 15 LALPA chu puon ina chun sûm ngìrin a hung inlâr a, puon in kotkhàr lu chunga chun a ngîr a. 16 LALPA chun Mosie kuomah, "Ngai ta, i pi le puhai kuomah i chawl innghil ding a ni ta a, hienghai ruok hi chu an lûtna rama ram dang mihai pathien kuoma chun inzor an ta, mi nghatsan an ta, an kuoma ka thuthlung chu bawsieng an tih. 17 Chu pha chun an chungah ka lung sen a ta, zàmsan ka ta, an lakah ka hmèl thup ka ta, suksietin um an tih. Sietna le harsatna tinrêngin tlâk buok tawl a ta, chu pha chun, 'Eini lai ei Pathien a um ta naw leiin hieng sietnahai hi ei chungah a hung tlung a ni naw maw?' ting an tih. 18 Chu pha chun rilo taka pathien dang tieng an mi nghatsan leiin anni lakah ka hmèl thup ngei ngei ka tih. 19 "Chuleiin, hi hla hi an ta dingin ziek thla la, Israelhai inchûktir la, anni laka ka thu hrepuitu dingin insaktir tawl hlak rawh. 20 An pi le puhai kuoma inkhâm meua ka tiem, nenetui le khuoizua luong rama chun, khop le tlaia uma an hung hnienghnâr phing leh kei mi hnawla ka thuthlunghai bawsiein, hnam dang pathien tieng nghain la bieng an tih. 21 Sietna le harsatna tam takin a tlâk buok pha, hi hla hi an thlahaiin an la hriet zing ding a ni leiin, an ngîrhmun inhriet suoktirtu la nîng a tih. Inkhâm meua pêk ka tiem rama ka hung thuoi lût hma khom hin an lungril puthmang chu ka hriet ta sa hrim a nih" a ta. 22 Chuongchun, chu ni lá là chun Mosien hla chu a ziek suok a, Israelhai chu a'n chûktir a. 23 LALPA chun Nuna naupa Josua kuomah, "Hrât tak le huoisen takin um rawh, inkhâm meua ka tiem rama chun Israelhai hi i thuoi lût ding a nih; chun, i kuomah um pei ka tih" tiin a hril a. 24 Chuong dàn thuhai chu a bula inthoka a tawp chen lekhabua Mosien a ziek zo hnung chun, 25 thuthlung bawm zawntu Levihai kuomah, 26 "Hi Dân Bu hi la unla, in chungchang thua hrepuitu dingin LALPA in Pathien thuthlung bawm bulah sie ro. 27 Hel in hmangzie le in lululzie ka hriet a, ka la dam lai le in kuoma ka la um zing lai hmanin LALPA chungah in hel rop hlak a, ka thi hnung lem chun ieng ang topin am in zuolkai ding maw! 28 An hriet ngeia hieng thu hi ka hril theina dingin, in hnam thuoitu luhai le in hotuhai chu ka hmaah hung ko khawm unla, in chungchâng thu mi hrepuitu dingin hnuoi le vân ko ka tih. 29 Ka thi hnungin nasa takin hung tla sieng in ta, ka thupêkhai hi hung nghatsan in ta; LALPA mithmuah thil suol thawin, in kut ngeia in siem thilhai chun chophawkin suklungsen in ta, sietnain tlâkbuok a ti chêu" a ta. 30 Chuongchun, Israel mi pungkhawmhai po po hmaah, an na ngeia an hriet dingin, hieng hla thuhai hi a bula inthoka a tawp chenin Mosie chun a'n sam a:

Deuteronomy 32

1 Aw vânhai, na lo sit ro, Thu ka hril ding a ni hi; Ka tongkam suok thuhai hi, Leilungin ngaithla raw se. 2 Ka thu inchûktirhai chu, Khuongruo angin sûr sien la, Ka thu hril dinghai khom chu, Vân dàidaw angin tla raw se, Hlobet le thlai hring chawm dingaRuo phisi sûr seng seng ang hin. 3 LALPA hming chu puong ka tih, Ropuina chu Pathien pe ro! 4 Ama chu Lungpui a na, A kutsuok a tha famkim a, A lampui tin a'n dik vong. Ama chu Pathien ringum, Thil tha naw hrim thaw ngai lo, Mi ngîl le indik a nih. 5 Sienkhom a mihai ni tlâk loin, A lakah in ringum naw a, In lungril lût-inle le kawiin, Suon bengtla lo in inchang si. 6 Aw, mi invêt le ngolhai, Hieng hin maw LALPA in rul?A hringtu le siemtu chêu, In Pa ngei kha a ni naw maw? 7 Tienthu hluihai kha suiin, In pi le puhai kha ngaituo ro; In pahai le upahai kuomah, Thil chinchâng indon unla, Iengkim hril chieng an ti chêu: 8 Chunghnungtakin hringmihaiA thè dar hun lai dâm leIsrael hnam tam zàt ang peia, An ramri a khampèk lai kha. 9 LALPAN a chanpuol dingin, Jakob thlahai a thlang a nih. 10 Thlalèr thli sie hrangnaah, An vâkvai lai a hmu a; Hliekhuin a enkol a, Mit nauleng angin a vèng, 11 Muvânlaiin a buzawl a, A tèhai vuong inchûktir a, A thla zàr chungah sie a, A vuongpui hlak ang elin. 12 LALPA chauh an thuoitu a nih, Hnam dang pathien an thang ve nawh. 13 Tlângramah an chuongtir a, A ram tharsuokin a chawm a:Lungpui kàra khuoizu dàmin, Lungthîla to oliv hriek dàmin, 14 An ran ruola inthoka suokBawngnene le a khal dàmin, Beram tuoi thau tak tak dàmin, Basan bawngchal le kèl dàmin, Bu le uoiin inhnik tak dàmin, A chawmlien tawl a ni kha. 15 Jakobin chu chu tlànin, Jesurunk chu a hung thàu a, Hel châkin a ke a per a, Mit pawnga inhnaw thauin, A Pathien a nghatsan a, A Sandamtu, Lungpui chu, A hung ngainèp tah a nih. 16 Hnam dang pathien an biek a, A thîkthu an chok tho a, An thil tirdakum thaw chun, A lungsen an cho suok a. 17 Pathien kuomah ni loin, An hriet ngai dèr lo pathien, Vai hnunga an hriet thar chauh, An pi le puhaiin an ti ngai lo, Ramhuoi kuomah an inthawi a. 18 Anni hringtu Lungpui chu, An hung ngaisak ta naw a, Anni siemtu Pathien chu, An hung theinghil ta si a. 19 LALPAN chu chu a hmu a, Thîkin a lung a na hle a, A naunu le naupahai chu, A lungsenin a hnawl a. 20 "Ka hmèl inhmutir naw nîng, Iem an chang hrim en ka tih; Suon bengtla lo tak an na, Ringumna hrim an pài nawh. 21 Pathien ni lo hrim hrimhai, Annin an mi'n thìktir a, An siem fawn milemhai chun, Ka lungsen an chok tho a; Chuleiin keima khomin, Thîk khop tling lo hnamhai chu, Anni inthîktir ka ta, Hnam invêthai chu hmangin, Anni chu cho phawk ka tih. 22 Ka lungsenna chu chokin, Seol mong chen kàng a ta, Hnuoi le a tharsuokhai khom, Meichokin lem hmang a ta, Tlâng thut chen kàng ral a tih. 23 Sietnain vur tawl ka ta, Ka thalin kâp zing ka tih. 24 Tàmpui mitsìm tir ka ta, Lum le hripui tiumin, Anni chu lem zo a ta, Anni sukhlumtu dingin, Ramsa ha ngei tir ka ta, Rûl tûr nei tir bok ka tih. 25 Kotthlerah thal inlêngin, Suon nei loin thîng an ta, Insùngah thlabàrnain, Ro la hung rêlkhum a ta, Nunghâk, tlangval le naute, Tar chenin bohmang an tih. 26 Anni chu hnot dar vong a, Mihriemhai hriet ta lo dinga, Nuoi bo ding ka tia chu, 27 Hmèlmahai nuizatbur a, An um ding ka'n lâu bok si:Hmèlmahan hre thiem lo a, "Kan kuta kan hnè a nih, LALPA thaw vong a ni nawh"An ti pal ding ka vêng si. 28 Varna nei lo hnam an na, Hrietthiemna hrim an nei nawh. 29 Varin hre thiemhai sien chu, An la tawp dàn ding hai khom, Dawn thiem el ding an ni bah! 30 An Lungpuiin zor naw sien, LALPAN hnawl tawl ni naw sien, Ieng tin am mi pakhatin, Sâng khat hnot zâm thei an ta?Ieng tin am mi pahniin, Tiem sèng lo hnot zâm an ta? 31 Hmèlmahan an lungpui chu, Ei Lungpui ang a ni nawzie, An hriet chieng em em a nih. 32 Sodom le Gomora anga suol, Grep kha, tûr nei ang an nih. 33 An uoiin khom rûl tûr ang, Chongkor tûr hrât ang a nih. 34 LALPAN an thilthaw a hriet a, Phuba laa a hrem hun ding, Remchâng a zong zing a nih. 35 "Phuba làk hi ka chan a na, Anni chu thungrul ka ta, A hun a hung tlung pha chun, An sir la'n phet vong a tih. An sietna ni a hnai ta a, Sietnan hung nang vak a tih. " 36 A mihai ro chu LALPAN, A hung rèlpêk ding a nih, A siehlaw chan hung chau a, Bawi le bawi naw tu el khom, Thi bâng an tlawmzie a hmuin, A bawihai lunginsiet a ta, Amàn hung san suok a tih. 37 "Khaw lai am an pathienhai, An ringsan lungpuihai chu? 38 An inthawina thau fatu, Uoiin thilhlàn an pêkhai, Lo dawn zo vongtuhai chu?Nangni thangpuitu dingin, Tu hin hung tho hai sien la, In bêlbul di'n hmang ro chu! 39 "Kei chu keima ngei ka nih, Pathien dang hrim an um nawh, Ti hi hung hre ta ro khai; Ka that a, ka sukhlum a, Ka'n hliem a, ka sukdam a; Chu chu ka kuta inthoka, Inchu thla thei an um nawh. 40 Vân tieng ka kut phar suokin, Ka hringna sâlin ka hril: 41 Ka kawlhnâm ngei tât tlè a, Indik tak a ro ka rêl pha leh, Hmèlmahai chungah phuba, Ka la lâk ngèi ding a na, Mi theida hlaktuhai chu, Ka la thungrul ding a nih. 42 Ka thalhai chu thisenin, Ka la hrai rui ding a na, Ka kawlhnâm khomin taksa, A la lem ding a ni si:Thathai le manhai thisen, Hmèlma hotuhai lu chu"Tiin LALPA chun a hril. 43 Aw, nangni hnam tinrênghai, A mipuihai leh hlim ro; A siehlawhai thisen phuba, A lâk ding a ni si a; A dotuhai chunga chun, Phuba a lâk ding a na, A ram le a mihai suol chu, A ngaidam ding a ni si. 44 Mosie le Nuna naupa Josua chun chuong hla thu po po chu mipui hriet ngèiah an insam a. 45 Israelhai po po hrietah Mosien a'n sam zo hnung chun, 46 "Voisuna hla thu in kuoma khûn taka ka'n samhai hi lungrilin vong tlat unla, hieng dânhai hi fimkhur taka zawm dingin in nauhai chu thu pe ro. 47 Thu mei mei a ni nawh, in hringna a nih. Jordan vadung kâna in va hluo ding rama chun, hieng thil lei hin dam sawt in tih" a ta. 48 Chun, chu ni vèk chun LALPAN Mosie a biek a, 49 "Moab ram Jeriko zawna Abarim tlâng dunga Nebo tlânga chun hang kai la, Israel thlahai hluo dinga ka pêk Kanan ram chu hang thlîr rawh. 50 Hor tlângah i unaupa Aron a thi a, a chipuihai kuoma thuoi a ni ang bok khan iIlawn kaina tlânga chun thîng i ta, i chipuihai kuomah thuoi ni tâng i tih. 51 Zin thlalèr Kadesh hmuna Meriba tuia khan Israel thlahai hmaah in pahniin in mi ring zo naw a, Israelhai lai ka thienghlimna in kengkaw zo naw lei khan a nih. 52 Chuleiin, Israel thlahai kuoma ka pêk ram chu ràla inthokin hmung i ta, lût ruok chu lût ve naw ti nih" tiin.

Deuteronomy 33

1 Hi hi a thi hmaa Pathien mi Mosien Israelhai mal a sawmna chu a nih. 2 Hieng ang hin a sawm a:"Sinai tlânga inthokinLALPA chu a hung suok a, Seir tlângah ni zung angin, Ei chungah a hung inzàm a, Paran tlânga inthokin, Ama chu a êng suok a. Sim tieng tlâng pangpèra chun, Vântirko sâng tam takin, Ama chu an hung zui a. 3 A mihai hmangaitu a na, A mi thienghlimhai a hum a, A ke bulah an hung kûn a, A bau suok thuhai chu an dong: 4 Mosien Dàn thu a mi pêkhai, Jakob sûngkuohai ro hlu chu. 5 Jeshurun chunga lal a na, Mipui thuoitu luhai leIsrael hnam chunga chun. 6 "Reuben chu dam khawsuok sien, Thi mang loin dam raw se, A mihai tlawm hle sien khom. " 7 Juda hnam chungthua chun:"LALPA, Juda khêk ri ngaithla la, A mihai kuomah thuoi lût la, A kut nangin sukhrâtpêk la, A hmèlmahai dopui rawh. " 8 Levi hnam chungthua chun:" I Thummim chu Levi pe la, I Uriml chu i laka ringum kuomah:Massa hmuna khan i fie a, Meriba tuiah i fie ta bok kha. 9 A nu le pa le unauhai nêkin, I chungah a ringum lem a, I thupêkhai a zawm a, I thuthlung a vong tlat a 10 I dânhai zawm pei dingin, Israel nauhai an zirtir a, I maichâmah rimtui inhlànin, Pumraw inthawina a'n hlàn. 11 Aw LALPA, a kut malsawmin, An thilthaw taphotah lawm la; An hmèlmahai tha sat tan rawh, Ngîr suok ta ngai der lo dingin. " 12 Benjamin hnam chungthua chun:"LALPA ditsak hlaw mi chu, A bulah him takin chêng a ta, Chung Pathienin sunnithlâkin, Ama chu hliekhùng a ta, A ruongah himin inbeitir a tih. " 13 Josefa hnam chungthua chun:" A ram chu LALPAN malsawm sien, Vân daidawin chawm sien la, Hnuoi rila inthoka suok tuiin; 14 Nisain a pêk ra hlu tak hai, Thla tin tharsuok thil hluhaiin; 15 Tlâng hlunha'n ra hlu insuoin, Muol hlunha'n an hnienghnârna, Hung insuopêk hai sien la; 16 Leilung pêk thei thil tha famkim, Chîmbuk choka um ditsakna chu, A unauhai laia thuoitu challang, Josefa chu hung ni raw se. 17 Bawngchal lutîr angin a mawi a, A ki chu ramsiel ki hreu ang a na; Manase mi a sânga tiem, Efraim mi sângsawmhai chu, A ki zumhai chu an na, Chu chun hnamhai a phir tlang a, Kawl kil tawp chenin a sik lèng. " 18 Zebulun hnam chungthua chun:"Tuipuia a sumdawngnaah, Zebulun chu hlim raw se; In tienga Isakar hausakna chu, Hung pung zuol pei raw se. 19 An tlàngah hnamhai ko an ta, Inthawina indik inhlàn an ta, Tuifinriet hausakna tlàn an tih, A kama ro phumrûkhai leh. " 20 Gad hnam chungthua chun:" Gad-hai ram inzauhpêktu, Pathien chu inpâkin um raw se; Gad chu sakeibaknei ang a na, Bân le luah a ham thlèr a; 21 Ram thatna tak a thlang a, Rorêltu chanvo a chang a, Mipui luhai an inkhawm pha, Israelhai kuoma dân thupêkhai, LALPA rorêlna fel a kengkaw. " 22 Dan hnam chungthua chun:"Dan chu Basan rama inthokaSakeibaknei tuoi anga, Hung inchawmsuok chu a nih. " 23 Naftali hnam chungthua chun:"Aw Naftali, ditsakna hlawtu, LALPA malsawmnaa sip, Sim le thlang rochungtu i nih. " 24 Aser hnam chungthua chun:"Nau laia malsawmna vochuom, Dongtu chu Aser a na, A unauhai ditsak hlaw sien, Oliv hriek hau hle raw se. 25 A khuo kotpui kalnahai chu, Thîr le dâra siem vong ni sien, A dam sûng dai zât po chu, A tha khom hrât zing a tih. " 26 Aw Jeshurun, i Pathien ang, Pathien dang hrim an um nawh, Vân sum chungah ropui takin, Thangpui ding che'n a hung inthok. 27 Chatuon Pathienin a hum che, A chatuon bànin a dom zing che. "Sukbohmang ro" tia khêkin, I hmèlmahai a hnot suok a. 28 Vânin daidaw a'n tlâktirna, Bu le uoiin thar tamna ramah, Israel chu chêng him a ta, Jakob tuikhur chu him a tih. 29 Aw Israel, i va hamtha ngei de!Nang anga LALPA sandam hnam, Tu hnam am an um hlak a?Ama chu i phaw le thangpuitu che, I kawlhnâm ropui a nih. I hmèlmahai chu i hmaah, Hungin hung intuklût an ta, An hmun sânghai chîl pher i tih" a ta.

Deuteronomy 34

1 Mosie chu Moab phaia inthokin Jeriko zawn Nebo tlânga Pisga sîpa chun a hang kai a, chu taka chun ram chu Gilead-a inthoka Dan chen LALPAN a'n entir vong a: 2 Naftali le Efraim ram po po, Manase le Judai ram po po, a thlang tieng tuifinriet chen; 3 sim tieng Negev ram po po le Tûm khawpui Jeriko phai ruom, Zoar chenin. 4 Chu zoah LALPAN, "Hi ram hi a nih Abraham hai, Isak hai, Jakob hai kuoma, 'In thlahai la pêng ka tih' tia inkhâm meua ka lo tiem chu. I mit ngeiin ka'n hmutir ta che a, sienkhom nang ruok chu chu taka chun lût naw ti nih" a ta. 5 Pathien siehlaw Mosie chu LALPA thu angin chu hmun Moab rama chun a thi a. 6 Beth-peor zawn Moab rama ruomah a phûm a, sienkhom voisun ni chen hin a thlàn umna tu khomin an hriet nawh. 7 A thi chun Mosie chu kum za le sawmhni a ni ta a, sienkhom a mit a la chàu naw a, a tha khom a la chuoi bok nawh. 8 Israel thlahai chun Moab phaiah ni sawmthum sûng, tapa sùnna hun a tawp chenin, Mosie chu an ta a. 9 Chun, Nuna naupa Josua chu Mosien a ai awtu dinga a namnghêt a ni leiin thlarau varnain a sip a, Israelhai chun a thu an ngaithlàk a, LALPAN thu Mosie a pêk ang pei chun an thaw a. 10 , LALPAN hmaisana a biek Mosie ang hi Israaelhai lai zawlnei tu khom an suok ta nawh. 11 Aigupta lal Faraw le a thuoihruoihai mithmua le an ram sûnga Mosie hmanga inchikna le thil mak tam tak a thaw anga thaw dingin LALPAN zawlnei dang tu khom a hmang ngai nawh. 12 Israelhai mithmua thil ropui le râpum tak tak Mosien a thaw anga thaw zawlnei dang an um bok nawh.

Joshua 1

1 LALPA siehlaw Mosie thi hnungin, LALPA chun Mosie kaiza vêngtu Nuna naupa Josua kuomah, 2 "Ka siehlaw Mosie chu a thi ta a. Tuhin Israel mi po po hi ka pêk ding rama fe dingin inpuocha hai sien, Jordan vadung kânpui rawh. 3 Mosie kuoma ka hril tah ang khan, kea in sirna taphot chu pe vong ka ti chêu. 4 In ram chu Lebanon thlalera inthoka vadungpui Eufretis chena Hit mihai ram po po le thlang tieng Tuipui Liena chen nìng a tih. 5 I dam sûng tu khomin hne thei nawng an ti che. Mosie kuoma ka um ang khan i kuoma khom um ka ta, thlathlam ngai nawng ka ti che a, zàmsan ngai bok nawng ka ti che. 6 Hrât tak le huoisen takin hma tawn la, in pi le puhai kuoma inkhâm meua pêk ka tiem rama chun hieng mihai hi thuoi lût la, inhluotir rawh. 7 Hrât tak le huoisen takin hma la rawh. In fena taphotah in dingchang theina dingin ka siehlaw Mosie pêk chêu dàn po po kha fîmkhur takin zawm unla, chang tieng amanih voi tieng amanih pêtsan naw ro. 8 Hi Dàn Bu hi tiem zing hlak la, zieka um iengkim chu fîmkhur taka i zawm theina dingin a sûn a zânin dawnkhawl hlak rawh. Chuongchun, kong iengkimah hmuingilin hung hlawtling i tih. 9 Hrât tak le huoisen taka um dinga ka ti che kha hre zing la, thlabâr naw la, zâm bok naw rawh, kei LALPA hin i fèna taphotah umpui zing ka ti che" a ta. 10 Chuongchun, Josua chun Israel mipui thuoituhai chu thu a pêk a, 11 "Riebûk fang unla, mipuihai kuomah, 'In rawsot chawi ding inpei ro, tuta inthoka ni thumnaah hi taka inthok hin Jordan vadung kân ei ta, LALPA in Pathienin in ta dinga a pêk chêu ram chu lûtin ei va hluo ding a nih' tiin hril ro" a ta. 12 Reuben hnam hai, Gad hnam hai le Manase hnam zâtve hai kuoma ruok chu Josua chun, 13 "LALPA Pathienin nangni chêngna dinga Jordan vadung sak tieng ram a pêk chêu thu LALPA siehlaw Mosien a hril chêu kha hre zing ro. 14 Nunau le ran ruolhai chu Jordan vadung sak tienga Mosien ram a pêk cheua hin lo um an ta, nangni laia râl do thei chinhai ruok chu inrâlthuomin, in unauhai hmaah Jordan vadung hi in lo kai hmasa ding a nih. 15 Nangni ang boka anni khom LALPAN chawlna hmun pe a, LALPA in Pathienin a pêk ram an hluo ve hma khat chun in unauhai chu in thangpui ding a nih. Chu zoa chun LALPA siehlaw Mosie pêk chêu Jordan vadung râl sak tieng, nisa suokna tieng chun hung kîr nawk in ta, in la hluo ding a nih" tiin a hril a. 16 Anni chun Josua kuomah, "Thu i mi pêk taphot chu thaw pei kan ta, fe dinga i mi tirna taphota khom fe pei kan tih. 17 Kong iengkima Mosie thu kan zawm pei hlak ang khan, i thu khom zawm pei kan tih. LALPA i Pathien chu Mosie kuoma a um hlak ang khan i kuoma khom um ve phot el raw se. 18 Tu khom i thu kal a, i hril ieng khom zawm nuom lo chu sukhlumin um a tih. Hrât tak le huoisen takin hma la sau sauh rawh" tiin an hril a.

Joshua 2

1 Nuna naupa Josua chun, "Fe unla, a ram va thlithlai ro, abîkin Jeriko khuo saw" tiin a rûkin Sitima inthokin enthlatu mi pahnih a tir a. Chuongchun, an fe a, nawchizor pakhat, a hming Rahab inah an lût a, chu taka chun an tlung a. 2 Miin, "Ngai ta, voizân khan a ram enthla dingin Israel thlahai an hung a nih" tiin Jeriko lal chu an hril a. 3 Jeriko lal chun Rahab kuomah mi a tir a, "I ina hung tlung mikhuolhai kha hung thuoi rawh, a ram pumpui enthla dinga hung an nih" tiin thu a'n cha a. 4 Nuhmei chun mi pahnihai chu a thuoi a, a thup a. Lal mi tirhai kuoma chun, "A ni ngei, an hung annawm, ana chu khaw laia inthoka hung am an nih ti ka hriet nawh. 5 Thimbut, khaw kul kotkhâr an khâr hun lai vel khan mihai chu an suok nawk a, khaw tieng am an pan ti ka hriet naw a, hnot vat inla chu in la hnot phâk el thei" a ta. 6 Amiruokchu, anni chu in chungah a thuoi a, zìza kuong a buk khawmna hnuoia chun a thup a. 7 Jordan vadung kai chena hnot dinga a khaw mihai an suok charin kul kotkhâr chu an khàr a. 8 Enthlatuhai chu an zàl hmain in chunga chun an kuomah a hang fe a. 9 Chuong mihai kuoma chun, "Hi ram hi LALPAN a pêk ta chêu ti ka hriet a, nangni tînain a mi man tawl a, hi rama chênghai hi nangni tiin kan intui zop el a nih. 10 Aigupta rama inthoka in hung suoka in ta dinga LALPAN Tuipui Sen a sukkangpêk dàn chêu le Jordan suo tienga Amorhai lal pahnih, Sihon le Oga hai in sukbohmang dàn hai kha kan lo hriet vong a. 11 In chanchin kan lo hrietin kan lungril a'n tui zop a, nangni leia lungril zâm naw hrim hrim an um nawh: LALPA in Pathien chu chung tieng vâna le hnuoi tieng leihnuoia Pathien a ni si a. 12 Chuleiin, in chunga lunginsietna ka'n entir chêu ang bok hin nangni khomin ka sûngkuohai chungah lunginsietna inentir ve unla, 13 ka nu le ka pahai, ka tâhai le ka zuorpuihai le an thil nei taphothai chu hla a, kan hringna hi mi humpêk dingin LALPA hming sâlin lunginsiet takin ka kuomah inkhâm unla, inchikna chieng tak mi màksanpèk ro" a ta. 14 Mihai chun a kuomah, "Kan thilthaw hi i hril suok naw phot chun in thi aiin thîng kan ta, LALPAN ram hi a mi pêk pha khom lunginsiet kan ti che a, i chungah ringum takin thawng kan tih" an ta. 15 Chuongchun, a in chu khawpui inhuonna kul chunga um a ni leiin, anni chu tukvera inthokin hruihruolin a thlâk thla a. 16 An kuoma chun, "A hnottuhai chêu khan an hmu pal hlauh nawna ding cheuin tlâng tieng pan unla, chu taka chun ni thum vel, an hung kîr nawk hma po chu, inbi hmang unla, chu hnung chun in kìr nawk ding a nih" tiin thu a'n cha a. 17 Mihai chun a kuomah, "Inkhâma thu i mi'n tiemtir ringot hin chu mi khuop el thei naw nih. 18 Hi rama kan hung lût pha leh, i mi khai thlâkna tukvera hin hi pat sen hi lo khai la, i nu le pahai, i tahai le zuorpuihai le i sûngkuohai po po khom hi ina hin i lo thuoi lût vong ngai a tih. 19 Tu khom, hi ina inthoka tuola suok thisen maw chu kan chungah tla thei naw nih. Nang le hi ina i kuoma umhai laka ruok chu tu khomin kut an thlâk chun a thisen maw chu keinin phur kan tih. 20 Chun, kan thilthaw hi i hril suok vai chun inkhâma thu kan intiemnaa hin maw kan phur thei bok nawh" an ta. 21 Ama chun, "In thu ang peiin ni raw se" a ta. Chuongchun, anni chu a'n fètir a, an suok a, tukvera chun puon sen chu a khit de a. 22 Anni chu an fe a, tlâng chu an va tlung a, chu taka chun ni thum sûng, anni hnottuhai an kîr nawk hma po chu, an inbi a; anni hnottuhai chun lampui intluonin an zong an zong a, sienkhom an hmu zo si nawh. 23 Chu zoah mi pahnihai chu tlânga inthok chun an kîr thla a, Jordan vadung an kàn a, Nuna naupa Josua kuom an tlung a, an chunga thil tlung po po chu an hril vong a. 24 Josua kuoma chun, "LALPAN ram chu ei kutah a lo pêk takzet el; eini leiin a ram mipuihai chu thlabârin an intui zop el a nih" an ta.

Joshua 3

1 Zîngkàr inhma takin Josua le Israel thlahai po po chu Sitim-a inthokin an inthok suok a, Jordan vadung an tlung a, an kàn hmain chu taka chun an riek a. 2 Ni thum hnunga chun hotuhaiin riebûk chu an fang vel a, 3 "Thiempu Levi thlahaiin LALPA in Pathien Thuthlung Bawm zawna an suok in hmu pha leh in umnaa inthoka insonin anni chu in zui ding a nih. 4 Hi lampui hi a hmain in la hraw ngai naw leiin anni chun lampui kawkhmung an ti chêu. Amiruokchu, nangni le Thuthlung Bawm inkârah kilometer khat vel a um ding a nih; in va hnai taluo ding a ni nawh" tiin an hril a. 5 Josua chun mipui kuomah, "Insukthienghlim ro, zînga hin eini lai thil mak tak el LALPAN a thaw ding a nih" a ta. 6 Chun, thiempuhai kuoma chun, "Thuthlung Bawm chu zawn unla, mipui hmaah fe ro" a ti bok a. Chuongchun, bawm chu an zawn a, mipui hma an thuoi a. 7 LALPA chun Josua kuomah, "Mosie kuoma ka um hlak ang khan i kuoma khom ka um ding a nih ti an hriet theina dingin voisun hin Israel mi po po mithmua ngei ka chawimawi tan ding che a nih. 8 Thuthlung Bawm zawntu thiempuhai chu Jordan vadung kamah tui chu pala ngîr dingin hril rawh" a ta. 9 Josua chun Israelhai kuomah, "Hi taka hin hung unla, LALPA in Pathien thuhai chu hung ngaithla ro. 10 Nangni lai Pathien hring chu a um zing a, in hmaah Kanan mihai, Hit mihai, Hiv mihai, Periz mihai, Girgas hai, Amor hai le Jebu hai chu matheiloin a hnot suok ding a nih ti hi thila inthok hin hre thei in tih. 11 Ngai ta u, khawvel po po LALPA Thuthlung Bawm chun in hma thuoiin hi Jordan vadung hi a kân hmasa ding a nih. 12 Tuhin, Israel hnam tina mi sawm le pahni thlang suok ro. 13 LALPA, khawvel po po LALPA thuthlung bawm zawntu thiempuhaiin Jordan vadung tui an pal tan charin Jordan vadung luong chu inchat a ta, a hnar tienga inthoka tui hung luong po po chu vùm thûra intiengin ngîr a tih" a ta. 14 Chun, Jordan vadung kân dinga puon ina inthoka mipui an suok chun Thuthlung Bawm zawntu thiempuhai chu mipui hmaa chun an fe a. 15 Hi hun hi busîk hun, Jordan vadung kuong a liem zur zur hun lai a nih. Bawm zawntuhai chun Jordan vadung chu an tlung a, bawm zawntu thiempuhai kein vakama tui a tawk charin, 16 a hnar tienga inthoka tui hung luong chu a tawp a, hla fea Zarethan sevela um khuo pakhat Adam an ti hmuna chun tumbu ang elin tui chu an tieng thûr a, Tuipui Thi tienga luong thla ding chu a kangchat a, Jeriko khaw zawn taka chun mipui chun vadung chu an kai a. 17 Hnuoi chàra Israel mipuiin vadung an kân vong chenin, LALPA Thuthlung Bawm zawntu thiempuhai chu Jordan vadung lailunga chun an ngîr a.

Joshua 4

1 A hnam pumpuiin Jordan an kàn hnung chun LALPAN Josua kuomah, 2 "Mipuihai laia inthokin mi sawmpahni, hnam tina inthokin mi pakhat pei, thlang suok la, 3 thiempuhai ngîrna Jordan vadung lailung taka inthokin lung sawmpahni la hai sien, chu chu hung put hai sien, voizàna in riekna ding hmunah i kuomah hung sie raw hai se" tiin thu a pêk a. 4 Chuongchun, Josua chun Israel thlahai laia mi sawm le pahni, hnam tina inthoka a thlanghai chu a ko a. 5 Josua chun an kuomah, "LALPA in Pathien bawm hmaah fein Jordan vadung lailunga lung, Israel pahnam zât, lung pakhat seng put suok ro. 6 Tuta hnunga in nauhaiin, 'Hieng lunghai hi ieng tina am a na?' tia an la hung indon pha chêu leh in ta dinga inchikna tha tak la nîng a tih. 7 Chu pha chun in nauhai kuomah, 'LALPA Thuthlung Bawm hmaah Jordan tui a kang chat lei a nih; Jordan an kàn laiin tui chu a hung kang chat annawm. Hieng lunghai hi Israel thlahaiin chu thil chu kumkhuoa an hriet zingna dinga an bùm a nih' tiin in la hril ding a nih" a ta. 8 Josua hril ang chun Israel thlahai chun an thaw a, vadung lài taka inthok chun Israel pahnam zât lung sawm le pahni chu an put suok a, an riekna hmuna chun an sie a. 9 Chun, Thuthlung Bawm zawntu thiempuhai ngîrna lài tak, Jordan vadung lailunga chun Josuan lung sawm le pahni a phun a, chuonghai chu tu chen hin a la um zing. 10 Mosien Josua a hril ang le LALPAN thaw dinga thu Josua a pêk po po anga mipuiin iengkim an thaw zo vong chenin, bawm zawntu thiempuhai chu Jordan vadung lailunga chun an ngîr a, mipui chu inhmaw takin Jordan vadung chu an kai ta vong a. 11 An kai vong hnung chun LALPA bawm le a zawntu thiempuhai khom mipuihai mithmuah an kai ve ta a. 12 Reuben thla hai, Gad thla hai le Manase hnam laia a zâtve hai chun râlthuom chawiin, Mosien an kuoma a lo hril tah ang khan, mipui hmaah an lo kài a. 13 Indo dinga inrâlthuom ngot mi sîngli laiin indo dingin Jeriko phai chu LALPA hmaah an tlung a. 14 Chu ni chun Israel thlahai po po mithmuah LALPAN Josua chu a chawimawi a; Mosie ang bokin a dam sûng inzain an ngaisâng a. 15 Chun, LALPAN Josua kuomah, 16 "Thuthlung Bawm zawntu thiempuhai kha Jordan vadunga inthoka hung suok dingin thu pe rawh" a ta. 17 Josua chun, "Jordan vadunga inthok khan hung suok ta ro leh" tiin thiempuhai chu thu a pêk a. 18 LALPA Thuthlung Bawm chu zawnin thiempuhai chu vadunga inthokin an hung suok a, an suok charin Jordan vadung tui chu a pangngaiin a kuong liem zur zurin a hung luong nawk a. 19 Thla khatna ni sawma chun Jordan vadunga inthokin an suok a, Jeriko sak tieng Gilgal-ah umhmun an khuor a. 20 Jordan vadunga inthoka an hung put lung sawm le pahni chu Gilgala chun Josua-in a phun a. 21 Israel thlahai kuoma chun, "Nakie hunah in thlahaiin an pahai kuomah, 'Hieng lunghai hi ieng tina am a na?' tia an la hung indon pha chêu chun, 22 'Israel thlahaiin Jordan vadung hi hnuoi chârah an fe kài lei a nih' tiin in la hril ding a nih. 23 LALPA in Pathien chun Tuipui Sen kan kàn hma khata kan hmaa a lo sukkangchat ang khan Jordan vadung khom hi in kai hma khat chu in hmaah LALPA in Pathien chun a sukkangchat a nih. 24 Hnuoia hnam po poin LALPA kut hrâtzie an hriet theina ding le LALPA in Pathien chu in ti zing theina dingin hieng hi a thaw a nih" a ta.

Joshua 5

1 Israel thlahaiin Jordan vadung an kàn zo hma poa LALPAN Jordan vadung tui a dangchat ti thu Jordan vadung thlang tienga um Amor lalhai po po le tuifinriet kama um Kanan lalhai po poin an hriet chun an lungril a tui zop a, Israelhai hang do ngamna lungril put hrim hrim an um ta nawh. 2 Chuong lai chun LALPAN Josua kuomah, "Lungthìrin chemte siem la, Israel thlahai chu a tum hninaa dingin an ser vun tanpêk nawk rawh" a ta. 3 Chuongchun, Josua chun lungin chemte a siem a, Gibeat Haralot-ahb Israel thlahai ser chu a tanpêk a. 4 Ser a tanpêkna san chu hi hi a nih: Aiguptaa inthoka hung suok, râl do thei chin po po chu Aigupta an suoksan hnung khan thlalèr lamlakah an thi zo deu vong tah a. 5 Aigupta rama inthoka hung suok po po kha chu sertan sa vong an na; amiruokchu, Aigupta an suoksan hnunga thlalèr lamlaka pieng po po ruok chu sertan lo vong an nih. 6 LALPA rawl an ngaithlak nuom naw leia Aiguptaa inthoka suok râl do thei chin sukbohmanga an um vong chen khan, Israel thlahai chu thlalerah kum sawmli top an invâk an invâk a. Inkhâm meua an thlatuhai kuoma a lo tiem tah nenetui le khuoizu luongna ram chu an hmu ve LALPAN a phal si nawh. 7 Chuongchun, an thlahai, anni aiaw dinga a'n dinhai chu lamlaka chun ser tan lo an la ni zing leiin chuonghai ser chu Josua in a tanpêk a nih. 8 Mi po poin ser an tan hnung chun, an dam hma khat an riebûk pangngaia chun an châm zing a. 9 LALPA chun Josua kuomah, "Voisun hin Aiguptahai hmusitna chêu hi nangnia inthokin ka lâk hmang tah a nih" a ta, chuleiin, chu hmun chu voisun chen hin Gilgal tia ko a la ni zing. 10 Chu thla ni sawm le palina zân tieng chun Jeriko phai Gilgala an umna hmuna chun Israel thlahaiin Fekân Kùt an hmang a. 11 Fekân Kût tumtiek tuk là lá chun a ram tharsuok ngei bu, chol thang lo bei le beipèr an fâk tan a. 12 A ram suok bu an fâk tûka inthok chun manna a tla ta naw a, Israel thlahai chun manna an dong ta ngai bok nawh. Chu kuma inthok chun Kanan ram bu le bâl chu an ring ta lem a nih. 13 Josua chu Jeriko khaw bula a um laiin a hang ngha a, ngai ta, a hmaa chun mi pakhat, kawlhnâm phawi saa ngîr a hmu a. Josua chun a pan hnai a, a kuomah, "Keini tienga thang i ni, kan hmèlmahai tienga thang lem?" tiin a'n don a. 14 Ama chun, "Ni lo e, LALPA sipaihai hotua hung ka nih" a ta. Josua chun hnuoiah bokkhupin chibai a bûk a, a kuomah, "Ka lalpan a siehlaw kuoma hin ieng am hril ding a nei a na?" a ta. 15 LALPA sipaihai hotu chun Josua kuomah, "I kea inthokin i pheikhok kha hlîp rawh; i ngîrna kha hmun thienghlim a nih" a ta. Chuongchun, Josua chun a hlîp a.

Joshua 6

1 Israelhai leiin Jeriko khuo chu an khâr tlat a, tu khom a lût le suok an um nawh. 2 Chun, LALPAN Josua kuomah, "En ta, Jeriko khuo le an lal le an râl do mihai hi i kutah ka pêk tah. 3 A khuo hi râl kâp mi po po leh voi khat hêl suok phot rawh. Chuong ang chun ni ruk sûng i thaw ding a nih. 4 Thuthlung Bawm hmaah beramchal ki tawtawrawt chawi thiempu pasari infetir rawh. A ni sarina chun thiempuhaiin tawtawrawt mût an ta, khawpui chu voi sari in hêl suok ding a nih. 5 Thuok seia tawtawrawt an mùt ruoi ruoi ri in hriet pha leh mipuihai chu inkhêktir dur dur la, khawpui kul chu chim thla rup a ta, mipui chu mani hma zawn sengah an kai tung ding a nih" a ta. 6 Chuongchun, Nuna naupa Josua chun thiempuhai chu a ko a, an kuomah "LALPA Thuthlung Bawm kha zawn unla, a hmaah tawtawrawt chawi thiempu pasari fe raw hai se" a ta. 7 Mipuihai kuoma chun, "Hma tieng pan peiin khawpui chu hêl suok ro. Râlthuom chawihai kha LALPA Bawm hmaah a hmatawngah fe raw hai se" tiin thu a pêk a. 8 Mipuihai kuoma Josuan thu a hril zo chun LALPA hmaa beram ki tawtawrawt pasari chawi thiempuhai chun an tawtawrawt chawi chu mûtin an inthok suok a, LALPA Thuthlung Bawm zawntuhai chun an zui a. 9 Tawtawrawt mût thiempuhai hmaa chun râlthuom chawi pawl chun hma an thuoi a, vêngtuhai chun hnung dalin Bawm chu an som a. 10 Chun, Josua chun mipuihai kuomah, "Khêk naw unla, in rawl khom suksâng naw ro. Khêk ro ka ti pha le chauh in khêk ding a nih" a ta. 11 Chuongchun, LALPA Thuthlung Bawm chun khawpui voi khat a'n hèl suoktir a, chu zo chun mipuihai chu an riebûk tieng an kìr a, chu taka chun an riek a. 12 Zîngkàr inhma takin Josua chu a tho a, thiempuhai chun LALPA Thuthlung Bawm chu an zawn a. 13 Chun, tawtawrawt pasari chawi thiempu pasarihai chun tawtawrawt mûtin LALPA Bawm hmaah an fe a, a hmatawngah râlthuom chawi râl do mihai chu an thang a, a hnungdâltuhai chun Bawm chu an som a, thiempuhai chun fe malamin tawtawrawt an mût zing a. 14 A ni hnina khom chun khawpui chu voi khat an hêl suok a, riebûka chun an hung kîr nawk a; chuong ang ngot chun ni ruk sûng an thaw a. 15 A ni sari ni chun vartienah an tho a, a hmaa an thaw ang bokin khawpui chu an hêl suok a, amiruokchu hi ni hin voi sari zet an hêl suok a nih. 16 Voi sari an hêlna dinga thiempuhaiin tawtawrawt an hang mût ruoi ruoi phing leh Josua chun mipuihai kuomah, "Khêk ta ro leh! Hi khawpui hi LALPAN a mi pêk ta si a. 17 Khawpui le a sûnga thil um po po hi LALPA ta dinga inhlân fai thak ding a nih. Nawchizor Rahab le a in sûnga a kuoma um po pohai ruok chu, enthlatu ei tirhai kha a lo thup leiin, hlàa hum ding a nih. 18 Amiruokchu, hluihlawnc thila chun inthier fihlim ro, chuong naw chun a ieng khom lo la pal in ta, in chungah sietna intlun rawi in tih. Chuonga in thaw chun Israelhai riebûk hi sietna phur tlâkah siem in ta, buoina hung intlun in tih. 19 Tangkaruo le rangkachakhai le dâr le thîra siem hmangruo le thil danghai po po chu LALPA chanpuol a ni leiin, LALPA thil siekhawmna ina sie ding a nih" a ta. 20 Chuongchun, tawtawrawt a hung inri chun mipui chu an khèk dur dur a. Tawtawrawt inri ruoi ruoi a, mipui an khêk dur dur lai chun Jeriko kul bang chu a hung chim a, mipui chu mani hma zawn sengah an kai tung a, khawpui chu an làk ta a. 21 A khawpui chu LALPA ta dingin an inhlàn a, khawpuia chêng hringna nei taphot nuhmei pasal, a chîn a lien, bawngchalhai, beramhai le sabengtunghai chenin, an sukhlum vong a. 22 Josua chun ram enthla dinga mi a tir pahnihai kuoma chun, "Nawchizor ina chun fe unla, a kuoma thu in intiem tah angin, chu nuhmei chu a nei po po leh va thuoi suok ro" a ta. 23 Enthlatu tlangvàlhai chu an va lût a, Rahab chu a nu le pa, a tâhai leh, a nei po po le chun an va thuoi suok a, a laichin unauhai po po khom chu an thuoi suok bok a, Israelhai riebûk puo tieng an inumtir a. 24 Khawpui chu a sûnga thil um po po leh an raw fai vong a; tangkaruo le rangkachakhai, dâr le thîra siem bûr le bèlhai chauh chu LALPA thil siekhawmna inah an sie a. 25 Amiruokchu, Jeriko khuo enthlatu dinga a mi tirhai lo thuptu nawchizor Rahab le a nei po po le a sûnghai ruok chu Josua chun a hlà vong a, Israelhai lai tu chen hin an khawsa ta zing a nih. 26 Chuong lai chun Josuan, "Jeriko khuo indin thar nawk tumtu taphot chun LALPA tongsie phur a ta, a nau lutîr chânin a lungphum chu phûm a ta, a nau tlum tak chânin a kul kotkhârhai chu indin a tih" tiin vangsietna thu chu a'n sam a. 27 LALPA chun Josua chu a umpui a, a ram pumah a hming a hung inthang ta hle a.

Joshua 7

1 Amiruokchu, Israel thlahai lai chun hluihlawn thilah ringum lo taka khawsa an lo um a. Juda hnama mi Zera naupa Zabdi (Zimri), chu naupa Karmi, chu naupa Akan chun hluihlawn thil a lâk leiin LALPA lung chu Israelhai chungah a sen hle a. 2 Chun, Josua chun Jeriko khuoa inthokin Bethel suo tienga Beth-aven depa um Ai khuoa chun mi a tir a, an kuomah, "Hang fe unla, ram hang enthla ro" a ta. Mihai chu an hang fe a, Ai khuo chu an hang thlithlai a. 3 An hung kîr nawk chun Josua kuomah, "Ai khuo bei ding chun mi po po fe ngai kher naw nih. A la dingin mi sânghni sângthum vel tir la, mi tlawmte chauh an na, mi po po suksawl kher ngai naw nih" an ta. 4 Chuongchun, mi sângthum vel chauh chu taka chun an hang fe a, sienkhom Ai khuohai chun an lo intlawm dêr a; 5 mi sawmthum le paruk an lo that a, an khaw kul kotkhàra inthokin an lung làkna khur Sebarim chen an hung hnot a, an liem thlâkna tênbarama chun an that tawl a. Chu chun mipui a sukzàm a, tui angin an lungril a suktui a. 6 Chuongchun, Josua chun a silfèn a pot thler a, LALPA Bawm hmaa chun hnuoi sikin zân tieng chen a bokkhup a, Israel upahai khom chun a thaw anga thaw vein, an luah pilvut an inphul a. 7 Josua chun, "E khai, LALPA Chunghnungtak, Amor-hai kuta pêka sukhlum el dingin ieng leia hi mipuihai hi Jordan vadung i thuoi kai am a na? Jordan vadung ràla khan lungawi takin um tok tok inlang ni ta lem ding kha! 8 Aw LALPA, hmèlmahai hnota Israelhai an tlànse el ta hi, iem hril tàng ka ta? 9 Kanan mihai le hieng laia chêng hnamhai hin hung hrieng an ta, mi hung inhuol an ta, hnuoia inthok hin kan hming an nuoi bo vong el ding a ni hi. Chuong chu a ni si chun, i hming ropui tak hi ieng am i law ta ding a na?" a ta. 10 LALPA chun Josua kuomah, "Tho rawh. Ieng dinga khânga i bokkhup zing am? 11 Israelhai hin thil suol an thaw a nih. An vong zing dinga thu ka pêk, ka thuthlung chu an bawsiet a. Thil hluihlawn laia mi an làk a, an inrûk a, khêl an hril a, an thil neihai lai an zep rùk a nih. 12 Chu lei chu annawm Israelhaiin an hmèlmahai an ngam naw chu. Siet tuok tlâka hluihlawna an insiem leiin annawm an tlànsiet a, an hmèlmahaiin an hnot thlûr chu. Thil hluihlawnhai chu nangni laia inthoka in sukbo phot naw chun nangni lai ka um ta naw ding a nih. 13 Fe la, mipuihai chu inhlàn thienghlim phot rawh. Hieng ang hin hril tawl rawh: 'Zînga dingin insukthienghlim ro khai. LALPA, Israelhai Pathienin, Aw Israelhai, nangni lai hin hluihlawn thil a um a nih. Nangni laia inthoka hluihlawn thil hi in lâk hmang hma khat chu in hmèlmahai hne thei naw ti niu. 14 Chuongchun, zînga hin a chî chiin in hung inlang ding a nih. LALPAN a pom hnamhai chu a pahnam hnamin hung an ta, LALPAN a pom pahnam chu a sûngkuo kuoin hung an ta, LALPAN a pom sûngkuo chu a pasal a pasalin an hung inlang ding a nih. 15 Tu khomin hluihlawn thil a kol hmu suok a ni chun, LALPA thuthlung a bawsiet lei le Israelhai lai thil suol invêt thlâk tak a thaw leiin, a thil nei po po leh meia raw hmang ding a nih' a ti a nih' tiin hril tawl rawh" a ta. 16 A tuk zîngkar inhma takin Josua chu a tho a, Israel hnamhai chu a chî chiin a hmaah an hung inlang a, Juda chihai chu man an lo ni ta a. 17 Juda pahnamhai chu an hung inlangtir a, Zera pahnam chu an lo man a. Zera pahnamhai chu a sûngkuo kuoin an hung inlangtir a, Zimri sûngkuo chu man an ni a. 18 Zimri sûngkuoa mi chu a mal malin an hung inlangtir a, Juda hnama mi Zera naupa Zimri, chu naupa Karmi, chu naupa Akan chu man a lo ni ta a. 19 Josua chun Akan kuomah, "Ka naupa, LALPA, Israelhai Pathien kuoma chun ropuina inkhumtirin ama chu chawimawi rawh. I thilthaw chu mi hril la, ka lakah ieng khom ip naw rawh" a ta. 20 Akan chun, "LALPA, Israelhai Pathien chungah thil suol ka thaw hrim a nih. Ka thaw dân chu hieng ang hin a nih. 21 Ei râllâk lai khan Babulonad mi korfuol mawi tak le tangkaruo kilogram hni vel le rangkachak tlang kilogram chanve vel bûk ka hmu a, ka'n hnar êm a, ka lâk el a nih. Ka puon ina hnuoi sûngah ka thup a, tangka khom chu hnuoia chun a um" a ta. 22 Josua chun mi a tir a, puon in tieng chun an tlàn a, a puon ina chun a lo thup ngei a, a hnuoiah tangkaruo khom a um a. 23 Chuong thilhai chu puon ina inthok chun an hung làk a, Josua le Israel mi po po hmaa chun an hung chawi a, LALPA hmaa chun an sie a. 24 Josua le Israelhai chun Zera naupa Akan chu tangka hai, korfuol hai, rangkachak tlang hai, a naupa le naunuhai, a bawngchalhai, a sabengtunghai, a beramhai, a puon in le a thil nei po po le chun Akor ruomah an thuoi a. 25 Josua chun, "Ieng ti leia hi buoina hi kan chungah i hung intlun am a na? Voisun hin i chunga khom buoina LALPAN a hung intlun ve ding a nih" a ta. Israel mipui chun Akan le a sûnghai chu lungin an dêng hlum a, an thil nei popo leh meiin an raw a. 26 Akan chu vûm hnûrin lung an indel khum a, Pathien lungsenna nasa tak chu a' kei kîr nawk tah a nih. Hi hmun hi tu chen hin Akor Ruom ti a la ni zing.

Joshua 8

1 Chun, LALPAN Josua kuomah, "Ti naw la, zâm bok naw rawh. Tho la, i sipai po po thuoi la, Ai khuoah hang fe rawh; ngai ta, Ai khaw lal le a mihai le a khuo le ram chu i kutah ka pêk ta che. 2 Jeriko le an lal chunga i thaw ang bok khan Ai khuo le an lal chunga khom i thaw ve ding a nih. Râllâk le ranhai chauh nangni puola dingin la thei in tih. Chun, a rûka khawpui inchàntu ding a hnung tieng mi sie rawh" a ta. 3 Chuongchun, Josua le a sipaihai po po chu Ai khuo bei ding chun an inthok suok a. A mi huoisen laia mi sîng thum a thlang suok a, zâna chun a tir suok a. 4 An kuoma chun, "Fimkhur takin ngaithla ro. Khawpui bei dingin a khaw hnung tieng a rûkin in inchàn ding a nih. Khawpuia inthokin um hla taluo naw ro. Inrêngin inring zingin um ro. 5 Kei le ka kuoma um po poin khawpui chu hung hnai kan ta, a hma anga mi bei dinga an hung suok charin an hmaah tlânsieng kan ta. 6 'A hmaa ang bok khan ei hmaah an tlànse nawk ta rèk ie' tiin mi hung hnot an ta, kan thlem suok thei chen chen thlem suok kan ta. 7 Kan tlànse pha leh in inchàn rûknaa inthokin hung suok in ta, khawpui chu in làk ding a nih. 8 Khawpui in lâk charin raw nghal ro. LALPAN thu a pêk ang chêu khan thaw ro. Chuong ang tak chun thaw ro, thu ka pêk ta chêu hi" a ta. 9 Josua chun anni chu a'n fetir a, Ai khaw thlang tieng, Bethel le an inkâra chun an inhuol rûk a; chu zân chun Josua ruok chu mipuihai lai puon inah a riek a. 10 Zîngkàr inhma takin Josua chun a mihai chu a khawm a, ama le Israelhai hotuhai chu Ai khuo panin mipui hmaah an inthok suok a. 11 A kuoma um râl do mihai po po khom Ai khuo panin an inthok suok a, a khaw bul an hang tlung a, hmar tieng tlângah thanghmun an khuor a, Ai khuo le an inkâra chun ruom a um a. 12 Ai khuo thlang tieng, Bethel le inkâra inchantu dingin mi sâng nga a sie a. 13 Hmar tienga inthoka bei pawl ding sipaihai thanghmun le thlang tieng panga inthoka arûka inchantu dinghai thanghmun a rêl fel vong hnungin, chu zân chun Josua chu ruoma chun a fe a. 14 Ai khaw lalin a hmu chun ama le khawpuia a mihai chu zîngkàr inhma takin an tho a, a hmun ruot Araba zawna chun Israelhai chu bei dingin an inthok suok a; khawpui hnung tieng chun ama bei dingin an inchàn ti a hriet si nawh. 15 Josua le Israel mihai po po chu a tlawm lem ni awm takin thlalèr tieng an tlàn ta hum hum el a. 16 Khawpuia umhai po po chu anni hnot dingin an inko khawm a, Josua chu an hnot a, khawpuia inthok chun a thlem suok tawl ta a. 17 Ai khuo le Bethel khuoa mihai chu Israelhai hnotin an inthok suok vong leiin an khawpui chu khàr loin an màksan el ta a. 18 Chu phing leh LALPAN Josua kuomah, "I kuta fei i chawi khan Ai khuo tieng tin rawh; i kutah hi khawpui hi ka pêk ding che a nih" a ta. Chuongchun, Josua chun a feiin Ai khuo tieng chu a hei tin a. 19 Arûka inchàntuhai kha an hung suok nghal a, a kut a phar charin an tlàn a, khawpuia chun an lût a, an làk a, an raw ta nghal a. 20 Ai khaw mihaiin an hnung tieng an hei thlir chun khawpui kàng khu vân tienga fe tung ngùt ngùt el chu an hmu a, khaw tieng tieng khom hang tlàn theina an nei ta nawh- thlalèr tienga an hnothai khan a hnottuhai chu an hung hnot lêt ve thung ta bok si. 21 Arûka inchàntuhaiin khawpui chu an lâk tah ti Josua le a mihaiin an hmu chun Ai khuoa mihai bei ding chun an inlêt kîr a. 22 Khawpui latu pawl chu khuoa inthokin bei dingin an hung suok bok a, Israelhai chun an kârche a, khing tieng khing tieng an dang chep leiin pakhat khom hlà le insuo an nei nawh. 23 Ai khaw lal chu a hringin an man a, Josua kuomah an thuoi a. 24 Ai khaw mi, phûla um le thlalèr tienga anni hung hnottuhai po po khom chu kawlhnâma an that fai vong hnungin, Israelhai chu Ai khuoa la um hai that dingin an lût a. 25 Chu nia Ai khaw mi an that po po chu, a nuhmei a pasalin, sîngkhat le sânghni an nih. 26 A fei inletna kutin Ai khuohai po po a rawt ram dêr hma khat chu Josua chun a kut a'n thla nuom si nawh. 27 LALPAN thu Josua a pêk angin, chu khawpuia ranhai le râllâkhai ruok chu anni puola dingin Israelhai chun an làk a. 28 Josua chun Ai khuo chu a raw a, kumkhuoa hmunhnok bûm khawmna muol le voisun ni chena hmun rausanah a'n changtir tah a nih. 29 Ai khaw lal chu zân tieng chenin thinglèrah a khai a, nisa tlak tawmin thlinglèra inthok chun an lâk thlak a, khawpui kul kotkhàr bula chun a ruong chu an pei a, a chunga chun lung an intieng vûm thûr a, chu chu tu chen hin a la um. 30 LALPA siehlaw Mosiein ziek ngeia a Dàn Bua Israel thlahai kuoma thu a pêk angin, Josua chun lung ser lo le thîr ha be la tuor ngai der lo ngot hmangin Ebal tlânga chun LALPA, Israelhai Pathien ta dingin maichâm a siem a. 31 Chu maichâma chun LALPA ta dingin pumraw thilhlân le inremna thilhlânhai inhlànin a'n thawi a. 32 Chu taka chun Israel thlahai hma ngeiah, Josua chun Mosien dàn chu lunga chun a ziek sawng a. 33 Malsawmpêk anni ding phaa an thaw dàn ding LALPA siehlaw Mosien a lo hril tah angin, Israel thlahai po po chu an upa hai, hotu hai, rorêltu hai le anni laia um hnam dang mihai leh chun thiempu Levihai zawn LALPA Thuthlung Bawm tieng nghain, khing tieng khing chun an ngîr a, a zâtve chun Gerizim tlâng an hmason a, a zâtve dang chun Ebal tlâng an hmason bok a 34 An ngîr fel hnung chun Dàn bua thu po po, malsawmna thu hai, tongsie dong ding thu hai Josua chun a tiem suok a. 35 Mosie thupêk po po chu Israel mi pungkhawm po po le nuhmei le naupang chikté tè le anni laia hnam dang chênghai chen hrietah Josua chun tiem hmai a nei hrim hrim nawh.

Joshua 9

1 Hieng thilhai hi Jordan vadung thlang tienga lalhai po po, tlâng le phai le tuifinriet zau tak kam tluona chêng, Lebanon chena inzar phei Hit hai, Amor hai, Kanan mihai, Periz hai, Hiv hai le Jebu haiin an lo hriet chun, 2 inthuruola Josua le Israelhai chu do hrawn tumin an pung khawm a. 3 Nisienlakhom, Josuan Jeriko khuo le Ai khuo a thaw dàn Gibeon mihaiin an lo hriet chun, 4 dawha hmangin an che thung a. Palai anga insiemin, an ip hlui tak tak hai le savuna siem uoiin pêng hlui tak tak, inek phen phun le phawk ta hai chu sabengtung an hung inphurtir luoi a; 5 pheikhok hlui tak le inphawk tek tuk an bun a, zakuo tiek neng nung an hàk a; bei tawl ngar vun el, a then chu hmuor ta dam fâk dingin an chawi a. 6 Chuong ang chun Gilgala an inkulnaa chun Josua kuomah an fe a, ama le Israelhai kuoma chun, "Ram hla taka inthoka hung kan na, thu mi thlungpui ro" an ta. 7 Israel mihai chun Hiv mihai kuoma chun, "Kan kawl hnaia um khom in lo ni el thei a, nangni leh iengtin am thuthlung siem thei kan ta?" an ta. 8 Anni chun Josua kuomah, "In siehlawhai kan ni hih" an ta. Josua chun, "Tuhai am in na, khaw laia inthoka hung am in na?" tiin a'n don a. 9 Anni chun, "LALPA in Pathien hi a hming a'n thang êm leiin i siehlawhai hi ram hla taka inthoka hung kan nih. A chanchin an hrilhai kan lo hriet ve hlak a: Aigupta rama a thilthawhai po po dâm, 10 Jordan suo tienga Amorhai lal pahnih- Hesbona lal Sihon le Basan ram lal, Ashtarot khuoa um Oga hai chunga a thilthaw po po hai kha kan lo hriet si a. 11 Chun, kan upahai le kan rama chênghai po poin, 'Lampuia in fâk ding chawi unla, anni chu va'n biekpui unla, an kuomah, 'In siehlaw kan ni hi; kan kuomah thu thlung ro' ti dingin thurawn an mi pêk a. 12 Hi bei hi in kuom tieng hung dinga kan suok tûka lum hlota kan fûn a na, tu hin chu a khong ta hle a, a ap rak an tah. 13 Hieng uoiin chawina savun pênghai dâm hi uoiin kan thun chun savun thar a la ni a, tu ruok hin chu a kak tuor el ta hi. Kan inzin sawt leiin kan silfènhai le pheikhokhai khom a tiek zo tah a nih" an ta. 14 Israel mihai chun fâk ding an chawihai chu an en vela chu ieng khom an chungchâng thuah LALPA an rawn nawh. 15 Chuongchun, Josua chun inremna thuthlung a siempui a, chu chu pungkhawm hotuhai chun inkhâm meuin an pompui a. 16 Remna thuthlung an siempuia inthoka ni thuma chun Gibeon-hai chu an kawl hnai tea um an nih ti Israelhai chun an hriet suok ta a. 17 Israel thlahai chu an fe pei a, ni thum niin an khawpuihai an tlung a. An khawpuihai chu Gibeon dâm, Kefira dâm, Berot dâm le Kiriat-Jearim dâm a nih. 18 LALPA, Israelhai Pathien hminga pungkhawm hotuhaiin an kuoma inkhâm meua thu an lo thlung ta leiin, anni chu Israelhaiin an bei ve nawh. Hi lei hin pungkhawmhai chu an hotuhai chungah nasa takin an chier a. 19 Sienkhom an hotuhai chun an kuomah, "LALPA, Israel Pathien sâlin an kuomah kan lo inkhâm ta si a, chuleiin anni chu ei tawk a thieng nawh. 20 An kuomah ei lo inkhâm ta si leiin ei thu ei bawsiet chun ei chungah lungsenna tlung rawi a tih, hieng ang hin an chungah thawng ei ta, hlà tawl el ei tih. 21 Hlà tawl ei ta, sienkhom pungkhawm po po thing phurtu le tui chawituah hmang ei tiu" an ta, chuongchun hotuhai thu lo intiemkamna chu an zawm ta a. 22 Josua chun Gibeon-hai chu a ko a, an kuomah, "Keini hnaia chêng ve ni zing si a ieng dinga ram hla taka hung anga inhrila in mi hlêm am a na? 23 Chu lei chun tongsie phur in hung ni ta a, kan Pathien ina thing ti ding phurtu le tui chawituah thangin kan bawiah um zing in tih" tiin a hril tawl a. 24 Anni chun Josua kuomah, "LALPA in Pathien chun hi ram hi a pêk chêu a, a sûnga chênghai po po sukhlum vong dingin a siehlaw Mosien thu a pêk ti khom kan ring a. Chuongchun, hma in hung sawn pei dàn kan hrietin, in mi that kan inlau a, hieng hin kan hung thaw el a nih. 25 Ngai ta, tu hin i kuta um kan ni a, i ngaia tha le indika i hriet ang chun kan chunga hin thaw pei rawh" an ta. 26 Chuongchun, anni chu a hum a, Israelhan an that a khap a. 27 Chu nia inthok chun Gibeonhai chu pungkhawmhai le LALPAN a la ruot ding hmuna LALPA maichâm ta dinga thing phurtu le tui chawituah a ruot a, voisun ni chenin chu sin chu an thaw ta pei a nih.

Joshua 10

1 Josuan Ai khuo a lâk a, a suksiet vong thu le Jeriko khuo le an lal chunga a thaw ang boka Ai khaw lal chunga khom a thaw thu dâm, Gibeon khuoa mihaiin Israelhai chu inremna an siempui a, anni lai an chêng ve tah ti thu dâm Jerusalem khaw lal Adoni Zedek-in a lo hriet a. 2 Chu thu lei chun ama le a mipuihai chu nasa takin an ti a. Gibeon chu khaw poimaw le lal khawpui a na, Ai khuo nêkin a lien lem a, a sûnga chênghai chu râldo thiem vong an ni si a. 3 Jerusalem lal Adoni Zedek chun Hebron khaw lal Hoham hai, Jarmut khaw lal Piram hai, Lakis khaw lal Jafia hai le Eglon khaw lal Debir hai chu inpunin, 4 "Gibeon khuoin Josua le Israel thlahai inremna a siempui leiin hung unla, va bei hron ei tiu" tiin a'n chà khawm a. 5 Chuongchun, Amor mihai lal panga- Jerusalem lal, Hebron lal, Jarmut lal, Lakis lal le Eglon lal- hai chu an pung khawm a, an sipaihai po po leh an inthok suok a, Gibeon khaw epah thanghmun an khaw a, an bei ta mup mup el a. 6 Gibeon-hai chun Gilgala an riekhmuna um Josua kuoma chun mi an tir a, "Tlâng rama chêng Amor lal po po inthuruolin mi bei hron dingin an hung pung khawm a nih. I siehlawhai hi hung thlathlam naw la, inrang takin hung la, mi hung san suok rawh, san kan ngai a ni hi" tiin thu an thon a. 7 Chuongchun, Josua le a kuoma um râl kâp mi le pasaltha po po chu Gilgala inthok chun an inthok suok a. 8 LALPA chun Josua kuomah, "Ti tawl der naw rawh; anni chu i kutah ka pêk ta che. Anni lai tu khom a ngam ding che an um nawh" a ta. 9 Zân khuoa Gilgala inthoka fein Josua chun a hang bei thut a. 10 Israelhai hmaa chun anni rawi chu LALPAN a sukchi-ai a, an buoi ta nuoi nuoi a, Gibeon-a chun Israelhaiin hnena ropui tak an chang a, Bet Horon panna lam tunga chun Azeka le Makeda chen an hnot a, lampui intluonin an sât hlum pei a. 11 Chun, hieng hi a na, Israelhai hmaa tlànsiehai chu Bet Horon-a inthoka Azek khuo panna tieng an liem thlâk laiin an chungah vâna inthokin LALPAN riel lien tak tak a'n sûrtir a, riel dèng hlum chu Israelhaiin kawlhnâma an sât hlum nêkin an tam lem. 12 LALPAN Israelhai kuta Amor mihai a pêk ni chun, Israelhai po po hmaah Josua chun LALPA kuomah, "Aw, turnipui, Gibeon chungah ngîr zing la, Aw, sorthlapui, Aijalon Ruom chungah ngîr zing rawh"tiin thu a'n sam a. 13 Chuongchun, Israelhaiin an hmèlmahai chunga phuba an lâk zo hma khat chun nisa chu ni khat pum hlum inson loin vân laizawlah a ngîr zing a. Chu thu chu Jasar Bu-ah an ziek naw am a ni? 14 Chuong ang ni, LALPAN mihriem rawl a ngâithlàk ni ang hrim hrim chu a hma khomin, a hnung khomin, a la um ngai nawh. Israelhai chu LALPAN a dopui takzet si a. 15 Chuongchun, Josua chu Israelhai po po leh an riekhmun Gilgala chun a kîr nawk ta a. 16 Chun, lal pangahai chu an tlân hmang a, Makeda pûkah an inbi a. 17 Makeda pûkah lal pangahai an inbi ti an hriet chun Josua an hung hril a. 18 Ama chun, "Pûk baua chun lung lien tak tak inhlum lût unla, a vèngtu ding mi sie nghal bok ro. 19 Nangni ruok chu um ve naw ro. In hmèlmahai chu hnot pei unla, an hnung tienga inthokin bei unla, an khuoah inlûttir hrim hrim naw ro. Anni chu LALPA in Pathienin in kuta a pêk ta sa a nih" a ta. 20 Josua le Israelhai chun anni chu an suksiet vong a, an khaw kula tlân tlung hman mi tlawmte ti chau naw chu an that fai vong a nih. 21 Chuongchun, an sipai po po chu Josua rawia an inkulna Makeda riekhmuna chun him takin an hung kîr a, tu khom Israelhai kal zawnga bau phong ngam hrim an um ta nawh. 22 Josua chun, "Pûk bau kha hong unla, lal pangahai kha ka kuomah hung thuoi ro" a ta. 23 Pûka inthokin lal panga- Jerusalem lal, Hebron lal, Jarmut lal, Lakis lal le Eglon lal- hai chu an hung thuoi suok a. 24 Josua kuomah an hung thuoi chun Israel thlahai po po chu a ko khawm a, ama le hung sipai kawmandarhai kuoma chun, "Hung unla, hieng lalhai rìng hi hung sir de ro" a ta. Chuongchun an hung hnai a, an rìnga chun an sir de a. 25 Josua chun, "Ti naw unla, zâm bok naw ro. Hrât tak le huoisen takin um ro. Hieng ang bok hin hmèlma indo dinghai chunga khom LALPAN a thaw pei ding a nih" a ta. 26 Chu zoa chun Josuan lalhai chu a sât hlum vong a, thing kung panga lêrah an ruong chu zân tieng chen a'n khàitir a. 27 Josua thupêk angin, an ruong chu ni tlâk tawmin an lâk thlâk a, an inbikrûkna pûka chun an pei lût a, pûk bàu chu lung lien tak takin an sìn khum a, chu chu tu chen khom hin a la um. 28 Chu ni chun Josuan Makeda khuo chu a lâk a, an lal chopin kawlhnâmin a sât hlum a, iengkim a suksiet vong a, pakhat khom a hringa hlà a nei nawh. Jeriko lal chunga a thaw ang bokin Makeda lal chunga khom a thaw a nih. 29 Josua chun Israelhai po po leh Makeda khuoa inthokin Libna khuo a va bei a, 30 chu khuo chu LALPAN an lal chopin Israelhai kuta chun a pêk nawk a. Josua chun chu khuo le a sûnga um po po chu kawlhnâmin a that vong a, a sûnga um tu khom hlà hrim hrim an nei nawh. Jeriko lal chunga a thaw ang bokin chu khaw lal chunga khom chun a thaw a nih. 31 Josua le a kuoma um Israelhai po po chun Libnaa inthokin Lakis khuo tieng an pan a, thanghmun an khaw a, an bei a. 32 Lakis khuo khom chu LALPAN Israelhai kutah a pêk a, a ni hninain an làk a, chu khuo le a sûnga um po po chu kawlhnâmin an sukhlum vong a, Libna khaw chunga an thaw ang bok khan an thaw ve a nih. 33 Chun, Gezer khaw lal Horam chu Lakis khuo thangpui dingin a hang fe a, ama le a rawihai chu pakhat khom hlà nei dêr loin Josua chun a lo that vong a. 34 Josua le a kuoma um Israelhai po po chun Lakis khuoa inthokin Eglon khuo tieng an pan a, thanghmun an khaw a, an bei a. 35 Chu ni chun chu khuo chu an làk a, chu ni vêk chun khuo chu an sàm a, a sûnga um po po chu an sukhlum vong a, Lakis khaw chunga an thaw ang bok khan an thaw ve a nih. 36 Josua le a kuoma um Israelhai po po chu Eglon-a inthokin Hebron an kai tung a, an bei a. 37 A khawpui chu an làk a, a sûnga um po po le an khawper po po chu kawlhnâmin an bei a, an lal chopin an sukhlum vong a. Eglon an thaw ang bokin a khuo le a sûnga umhai chu an inram fai thak a nih. 38 Chu zoah Josua le a kuoma um Israel thlahai po po chu kîr lêtin Debir khuo an bei a. 39 A khuo chu an làk a, an khawperhai khom, a sûnga um po po leh, kawlhnâmin an bei a, an lal chopin an that vong a, pakhat khom hlà an nei nawh. Hebron khaw chunga an thaw ang khan Debir khuo le an lal chungah khom an thaw a nih, Libna khuo le an lalhai chunga an thaw ang bok khan. 40 Chuongchun, Josua chun chuong lai biel po po chu, tlâng ram hai, sim tieng ram hai, tlâk tieng tlâng thuta um phai ram hai le tlâng pangpêra um khuohai le an lalhai po po thang sain, a tukdol vong a, tu khom dama a hlà an um nawh. LALPA, Israelhai Pathienin thu a pêk angin, a'n thuok thei taphot chu a that fai thak a nih. 41 Kades-barnea inthoka Gaza chenin, Gosen ram po po le Gibeon chenin a tukdol vong a. 42 Tum khata hieng lalhai po po hi Josuan hnea an ramhai a lâk vong theina san chu LALPA, Israelhai Pathienin Israelhai chu a dopui lei a nih. 43 Chuongchun, Josua le a kuoma um Israelhai po po chu an riekhmun Gilgal tieng chun an kîr nawk ta vong a.

Joshua 11

1 Hazor khaw lal Jabin-in chu chu a lo hrietin Madon khaw lal Jobab dâm, Simron khaw lal dâm, Aksaf khaw lal dâm, 2 hmar tieng tlâng rama lal, Kinneret sim tienga Araba lal dâm, khawthlang tieng tlâng thuta lalhai dâm, Kinneret sim tieng Arabaa lal dâm, tlâk tienga tlâng thuta umhai le Dor khaw zoa lalhai dâm, 3 sak tieng le thlang tienga um Kanan mihai dâm, tlâng rama um Amor hai, Hit hai, Periz hai, Jebu hai dâm, Mizpa biel Hermon tlâng hnuoia um Hiv hai kuomah mi a tir a. 4 An sipai po po, tam tak el, tuifinriet kama tieu zât zet el chu sakor le tawlailir tam tak leh an hung inthok ta rup el a. 5 Chuong lalhai po po chu an intuok khawm a, Israelhai chu bei dingin Merom tuihmunahe an inkul a. 6 LALPA chun Josua kuomah, "Ti tawl dèr naw rawh. Zîngah tuta huna hin that dingin Israel kutah ka pêk suok tawl ding a nih. An sakor zaper thà sat unla, an tawlailir raw vong bok ro" a ta. 7 Chuongchun, Josua le râl kâp mi po po chun Merom tuihmunah an bei thut a. 8 LALPA chun Israelhai kutah a pêk a, an hne a, Sidon khaw lien lem chen dâm, Misrefot Maim chen dâm le suo tieng pangah Mizpa Ruom chen an hnot a, pakhat khom hlà nei dêr loin an that vong a. 9 LALPAN thaw dinga Josua a hril angin, an sakor zaper thàhai an satpêk a, an tawlailirhai an rawpêk bok a. 10 Chuong lai chun Josua chu a kîr nawk a, Hazor khuo a lâk a, an lal chu kawlhnâmin a that a. Hazor chu chuong lai vel rama khaw poimaw tak a nih. 11 A sûnga chêng po po chu kawlhnâmin a that vong a. A'n thuok thei taphot chu hlà nei loa a rawt chimit zoin Hazor khuo chu a raw a. 12 Josua chun chu biela lal khuohai chu a lâk a, an lalhai a man khawm a, kawlhnâmin a sukhlum vong a. LALPA siehlaw Mosien thu a pêk angin, a sukchimit tawl vong a nih. 13 Chuong chu a ni lai zingin, Hazor khuo ti chauh naw chu, muolpawnga khuo an lo indin ta sa hai ruok chu pakhat khom an raw nawh. 14 Chuong khawpuia inthoka an râllâk le ranhai chu Israelhaiin an puola dingin an lâk a, mihriem ruok chu an sukbohmang vong hma khat chu kawlhnâmin an that pei a, a'n thuok taphot chu hlà an nei nawh. 15 LALPAN a siehlaw Mosie thu a pêk angin, Mosie khomin Josua chu thu a pêk a, chu chu Josua-in a hlen a nih; LALPAN Mosie kuoma thu a pêk po po chu hlen naw hrim a nei nawh. 16 Chuongchun, Josua chun hieng ram po po hi a làk a: sim tieng ram po po, Gosen ram po po, tlâk tieng panga tlâng thut po po, Araba le Israelhai tlângram po po, 17 Seir tlâng hang zomtu Halak tlânga inthoka Hermon tlâng hnuoi, Lebanon phairuoma um Baal Gad chenin a lâk a, an lalhai po po a man a, a vuok thlûk a, a that a. 18 Chuong lalhai chu Josuan hun sawt tak a'n dopui tawl a nih. 19 Gibeon khuoa um Hiv mihai ti chauh naw chu Israelhai le inremna siem khuo hrim hrim an um naw a, indoa a lâk vong a nih. 20 LALPAN Mosie thu a lo pêk tah ang khan, anni rawi chu lunginsietna nei dêr loa suksea a sukchimit tawl vongna dingin, LALPA ngei chun an lungril a sukkhau a, Israelhai chu a'n dotir a nih. 21 Chuong lai hun bok chun Josua chu a'n thok suok a, Hebron dâm, Debir dâm, Anab dâm, Judai tlângram dâm le Israel tlâng rama um Anakhai chu an khawpuihai leh a sukchimit vong a. 22 Chuongchun, Gaza, Gath le Asdod khuoa a dam sun tlawmte la um ti naw chu Israelhai ramah Anakhai tu khom an um ta nawh. 23 LALPAN Mosie kuoma a hril ang khan, Josua chun a ram pumpui a lâk a, Israelhai chu an hnam inthe dàn ang peiin an rochan dingin a pêk a, a ram chu a hung ralmuong ta a.

Joshua 12

1 Ni suokna tienga Jordan ràl ram, Arnon Ruoma inthoka Hermon tlâng chen le sak tieng panga Araba ram chena lalhai, Israel thlahaiin an tukdol tah le an ram an lâkpêkhai chu hienghai hi an nih: 2 Amor mi Hesbona lal Sihon ramin a huop chin chu Arnon ruom sira um Aroer khuoa inthoka Arnon ruom lailunga khaw um le chu taka inthoka Amonhai ramri Jabok vadung chen a na, chu chun Gilead ram chenve a huop sa a. 3 Chun, Jordan varuom, Galili dila inthoka sim tieng Tuipui Thi sak tieng Bet Jesimot chen le Pisga sim tieng tlâng pangpêr po po a huop sa bok a nih. 4 Basan lal Oga khom an hne a. Ama chu Refaim hnam tlawmte la um sun laia mi a na, Astarot-a inthoka Edrei chena lal a nih. 5 A lalramin a huop sahai chu Hermon tlâng hai, Salka khuo hai, Basan ram po po, Gesur-hai le Maaka-hai ramri chen le Gilead ram zatve, Sihon ramri chen a nih. 6 LALPA siehlaw Mosie le Israelhaiin chuong lalhai chu an hne a, LALPA siehlaw Mosie chun an ram chu Reuben hnam le Gad hnam le Manase hnam zatvehai rochanah a sem a. 7 Jordan vadung ràl thlang tienga Josua le Israelhaiin an tukdolhai chu Baal Gad-a inthoka Lebanon phairuom chen, chu taka inthoka Seir tlâng hang suntu Halak tlâng chen a nih. Chuong ramhai chu Israel hnamhai inthe dàn ang peiin Josua chun an rochanah a sem tawl a. 8 Tlâng ram po po, tlâk tieng tlâng thut po po, Araba hai, tlâng pangpêr hai, thlalèr hai, sim tieng ramhai po poa Hit mihai, Amor mihai, Kanan mihai, Periz mihai, Hiv mihai le Jebu mihai lal um zât le an khaw hluohai chu: 9 Jeriko lal pakhat le Bethel bula Ai khaw lal pakhat; 10 Jerusalem lal pakhat, Hebron lal pakhat; 11 Jarmut lal pakhat, Lakis lal pakhat; 12 Eglon lal pakhat, Gezer lal pakhat; 13 Debir lal pakhat, Geder lal pakhat; 14 Horma lal pakhat, Arad lal pakhat; 15 Libna lal pakhat, Adulam lal pakhat; 16 Makeda lal pakhat, Bethel lal pakhat; 17 Tapua lal pakhat, Hefer lal pakhat; 18 Afek lal pakhat, Lasaron lal pakhat; 19 Madon lal pakhat, Hazor lal pakhat; 20 Simron Meron lal pakhat, Aksaf lal pakhat; 21 Tanak lal pakhat, Megido lal pakhat; 22 Kedes lal pakhat, Karmel tlânga Jokneam lal pakhat, 23 Dor zo tlâng lal pakhat, Gilgala Goyim lal pakhat le 24 Tirza lal pakhat an na, an rêngin lal sawmthum le pakhat an nih.

Joshua 13

1 Josua chu a hung upa a, a kum a tam ta hle hnung chun LALPAN a kuomah, "I lo upa ta a, ram lâk ding hlak chu a la tam hle si. 2 Hieng ramhai hi a nih la lâk lohai chu: Filistin ram po po le Gesur-hai ram po po; 3 sim tienga Avithai ram po po (Aigupta ramria um Sihor vadunga inthoka hmar tieng panga Ekron ramri chen hi Kanan mihai rama ngai a na, Filistin mi lal pangahai chu Gaza, Ashdod, Askelon, Gat le Ekron-ah an um a); 4 Kanan mihai ram bok, Sidon mihai umna Meara-a inthoka Amorhai ramri Afek chen; le 5 Gebalhai chêngna biel; sak tieng Lebanon ram, Hermon tlâng hnuoi Baal Gad-a inthoka Hamat Kawn chen. 6 Lebanona inthoka Misrefot-maim chenin, tlâng rama chêng po po le Sidon mi po pohai chu Israel thlahai hmaa hin hnot suok ka ta, thu ka pêk che ang khan, Israelhai rochanah siempêk ngei ngei rawh. 7 Chuong ang chun, hi ram hi hnam kuo hai le Manase hnam zâtvehai rochanah sempêk rawh" a ta. 8 Reuben hnam le Gad hnam le Manase hnam zâtve chun Jordan sak tieng ram, LALPA siehlaw Mosien a pêk chu, an lo chang ta a. 9 Chu ram chu Arnon Ruom sîra um Aroer khuoa inthoka ruom lailung taka khawpui le Medeba phai ram po po, Dibon chen; 10 Amorhai lal Hesbon khuoa lal Sihon khawpui po po, Amon thlahai ramri chen; 11 Gilead ram le Gesurhai le Makathai ramri chen le Hermon tlâng po po, Basan ram po po, Salka khuo chen; 12 Astarot le Edrei khuoa lala inthung Basan ram lal Oga ram po po, Refaim hnam la um sunhai Mosien beia a lo hnot suok tawlna ram chenin a nih. 13 Amiruokchu, Gesurhai le Makathai chu Israel thlahai chun an hnot suok naw a, Israel thlahai lai tu chen hin an la chêng ta zing lem a nih. 14 Rochan ding a pêk ve naw chu Levi hnamhai chauh an nih; an kuoma a lo hril tah ang khan anni rochan chu LALPA, Israelhai Pathien ta dinga meia thilhlânhai chu a ni lem si a. 15 Reuben thlahai chu an sûngkuo ang peiin Mosien ram a lo pêk ta a. 16 An ram chun Arnon Ruom sîra um Aroer khuoa inthoka ruom lailunga khawpui le Medeba phaizawl po po, 17 Hesbon le chu phai rama khawpui po po Dibon hai, Bamot Baal hai, Bet Baal Meon hai; 18 Jahaz hai, Kedemot hai, Mefat hai, 19 Kiriathaim hai, Sibma hai, ruom khoa um Zeret Shahar hai; 20 Behpeor hai, Pisga tlâng pangpèr hai, Bet-jesimot hai; 21 tlâng zawla khawpui po po hai, Amor mi, Hesbona lal Sihon lalram po po khom a huom a nih. Sihon chu Mosien a hne a, chu ruol chun chuong lai rama Sihon lo thangpuitu Midian lal Evi hai, Rekem hai, Zur hai, Hur hai le Reba hai chu a tukdol vong bok a nih. 22 Chuong lal a thathai bâka chun Israelhai chun Beor naupa Balaam, aienthiem chu kawlhnâmin an that sa bok a. 23 Chuongchun, Reuben thlahai ramri chin chu Jordan le a kam po po chu a nih. Hieng khawpuihai le khawtehai hi Reuben thlahai ta dinga an sûngkuo zir ang peia rochana an ruot chu a nih. 24 Gad thlahai chu an sûngkuo zir ang peiin Mosien ram a lo pêk a. 25 An ramri chu Jazer khuo le Gilead rama khawpui po po le Amon thlahai ram zâtve, Raba khaw depa um Aroer khuo chen; 26 Hesbona inthoka Ramat-mitzpe le Betonim chen; Mahanaim-a inthoka Debir ramri chen; 27 ruom tieng chu Bet-haram hai, Bet-nimra hai, Sukot hai, Zafon hai, Hesbona lal Sihon ram la sem lo, Jordan sak tienga a ram, Galili dil chen chu a nih. 28 Hienghai hi, a khawpui le a khawtehai po po leh, Gad thlahai ta dinga an sûngkuo zir peia an rochan dinga an ruot chu a nih. 29 Mosien Manase hnam zâtve, Manase thlahai laia a zâtve ta dinga an sûngkuo zir ang peia ram a lo pêk chu hieng ang hin a nih. 30 An ramri chu Mahanaim-a inthokin Basan ram po po, Basan ram lal Oga ram po po le Basan rama Jair khawpui khaw sawmruk leh; 31 Gilead ram zâtve le Basan ram lal Oga rama Astarot Edrei khuo hai leh; chuong chu Manase naupa Makira thla, Makira naupahai a zâtvehai ta dinga an sûngkuo zir ang peia an rochana ruot chu a nih. 32 Hienghai hi a nih Moab phai, Jeriko zawn, Jordan râl sak tieng Mosien an rochan dinga a lo sem chu. 33 Levi chihai ruok chu Mosien rochan ding a pêk ve nawh. An kuoma a lo hril tah ang khan, LALPA Israel Pathien chu an rochan a ni lem.

Joshua 14

1 Thiempu Eleazar le Nuna naupa Josua le Israel pahnam tina luhaiin Israel thlahai kuoma an rochan dinga Kanan ram an sempêk dàn chu hieng ang hin a nih. 2 Mosie kuoma LALPAN thu a lo pêk tah angin, hnam kuohai rochan ding seng chu thum vawrin an sem a. 3 Mosie chun hnam hni le hnam zâtve ta dingin Jordan suo tiengah rochan a lo pêk ta a, Levi chihai ruok chu anni lai chun rochan ding a pêk ve nawh. 4 Josefa nauhai chu hnam hniin an hung um ta a, chu chu Manase le Efraim an nih. Khawpuia umhmun khuorna ding le khaw kawla an ran tlatna ding hmun ti chauh naw chu Levi chihai chun rochan an nei ve nawh. 5 LALPAN thu Mosie a pêk ang tak khan Israel thlahai chun ram chu an insem a nih. 6 Chun, Juda thlahai chu Gilgal khuoah Josua kuomah an fe a. Keniz mi, Jefune naupa Kaleb chun a kuomah, "Kades-Barnea LALPAN Pathien mi Mosie kuoma eini pahni chungchang a hril kha i hriet a. 7 LALPA siehlaw Mosien Kades-barnea inthoka ram enthla dinga a mi tir khan kum sawmli mi ka ni ta a, ka lungril char chu a kuomah ka hril a. 8 Amiruokchu, ka fepui ka unau danghai khan mipui lungril an sukzam a, kei ruok chun LALPA ka Pathien chu lungril takin ka pom tlat a. 9 Kha ni khan inkhâm meuin Mosie chun ka kuomah, 'LALPA ka Pathien chu lungril taka i zui leiin, i kea i sir ram taphot chu kumkhuoa nang le i nauhai rochan ni ngei ngei a tih' tiin a mi hril a. 10 "Ngai ta, hi thu hi Mosie kuoma a hril hnungin, thlalèra Israelhai an invàk sûng po po khan LALPA chun thu a tiem angin, kum sawmli le panga damin a mi la hla a, tu hin kum sawmriet pangaa upa ka lo ni ta hi. 11 Chuong sa khom chun, Mosien a mi tir suok ni ang khan voisun khom hin ka la hrât zing a, râl beia suok ding khomin kha hma ang bok khan thahrui ka la nei zing a nih. 12 Kha nia LALPAN pêk a mi tiem, hi tlângram hi tu hin mi pe ta la. Nang khoma kha tuma i hriet ang ngei khan, an khawpuihai chu Anakhai chêngna, kul ropui taka inhuon khup a ni kha. Amiruokchu, aman a ti angin, LALPA thangpuinain anni chu hnot suok ka tih" a ta. 13 Josua chun Jefune naupa Kaleb chu mal a sawm a, Hebron khuo chu a rochanah a pêk a. 14 Chuongchun, Keniz mi Jefune naupa Kaleb chun LALPA, Israel Pathien chu lungril taka a zui tlat leiin, chu nia inthok chun Hebron khuo chu a rochan a hung ni tah a nih. 15 Hebron chu Anak mihai laia mi ropui tak Arba hming chawiin Kiriat Arba ti a ni hlak. Chu taka inthok chun a ram chu indona laka inthokin a hung ralmuong ta a.

Joshua 15

1 An sûngkuo zir ang peia Juda thlahai chanpuola ruot chu Edom ramri chen le sim tawp rawta Zin thlalêr chen a nih. 2 Sim tienga an ramri chin chu Tuipui Thi sim tienga litengsawl a na, 3 chu taka inthok chun Ainuvet Kawn (Akrabim) ah a tan tung a, Zin thlalèrah fe peiin Kades-barnea sim tieng a va tan a. Chu zoah Hezron fe thlengin Addar-ah a kai a, Karka a hêl kuol a. 4 Chu zoa chun Azmon tieng fein Aigupta ruomah a lût a, tuifinrietah a tawp a ni. Chu chu sim tienga an ramri chin ding chu a nih. 5 Sak tieng ramri chu Jordan vadung suo, Tuipui Thi chen a nih. 6 Hmar tieng ramri chu Jordan vadung suoa intanin Bet Hogla-ah a kai tung a, Bet Araba hmar tieng a pan pei a, Reuben naupa Bohan lungphun tieng a kai tung a, 7 Akor ruoma inthokin Debirah a fe tung a, hmar tieng inherin Gilgalah a lût a, chu chu sim tieng panga ruom Adumim Kawn epa um a nih. Chu taka inthoka fe peiin Ensemes tuikhurah a tan a, Enrogelah a suok a. 8 Ramri chu Hinom ruomah fe tungin Jebu-hai ram sìr sim tieng, Jerusalem chu fe thlengin a kai tung a, Hinom thlang tieng ruom bula um tlâng sîpa chun a kai a, hmar tieng Refaim ruom tawp chen a fe a. 9 Tlâng sîpa inthok chun ramri chu Neftoa tuikhurah a fe thla a, Efron tlânga khawpuihai a va paw a, chu taka inthok chun Bala (Kiriat Jearim) tieng a kawi thla a. 10 Chu zoah tlâk tieng inherin Bala-a inthokin Seir tlâng a pan a, Jearim tlâng (Kesalon) hmar tieng pangpêr hrawin, Bet Semes ah a fe thlâk a, Timna a tan tlang a. 11 Chu taka inthok chun Ekron hmar tieng pangpêr chu hrawin Sikeron tieng a'n her a, Bala tlâng a hraw a, Jabneel a tlung a, tuifinrietah a tawp. 12 Thlang tieng ramri chu Mediterranean Tuipui kam zar zar a nih. Chuong ang chu an sûngkuo zir ang peia Juda thlahai ramri huom sûng chu a nih. 13 A kuoma LALPAN thu a pêk angin, Josua chun Jefune naupa Kaleb chu Juda thlahai lai chun chanpuol a siempêk a, chu chu Kiriat Arba, Hebron an ti bok chu a nih. Arba chu Anak pu a nih. 14 Kaleb chun Anak naupasal pathum Sesai, Ahiman le Talmai hai chu Hebrona inthokin a hnot suok a. 15 Chu taka inthok chun Debir khuo, kha hmaa Kiriat Sefer tia an ko hlaka mihai chu a rûn a. 16 Kaleb chun, "Hi khuo latu tu chu ka naunu Aksa inneitir ka tih" a ta. 17 Kaleb unaupa Kenaz, chu naupa Otniel chun a lâk a, Kaleb chun a naunu Aksa chu a'n neitir ta a. 18 Otniel inah Aksa a hung inlawi chun, a pa kuoma ram hni dingin a pasal chu a'n fui a. A sabengtung chunga inthoka Aksa a hung tum chun Kaleb-in, "Iem ka thawpêk ding che?" tiin a lo indon a. 19 Ama chun, "I ditsakna vochuom ka hni a nih. Sim tieng ram i mi pêk ta si hin chu tuikhur khom mi pe sa ve rawh" a ta. Chuongchun, tuikhur chuon chung le tuikhur chuon hnuoi chu a pêk sa a. 20 An sûngkuo zir ang peia Juda thlahai rochan chu hieng ang hin a nih: 21 Edom ramri hrùl, sim tawp monga Juda hnamhai khawpui chang chu Kabzel, Eder, Jagur, 22 Kina, Dimona, Adada, 23 Kedes, Hazor, Itnan, 24 Zip, Telem, Bealot, 25 Hazor Hadata, Keriot Hezron (chu chu Hazor), 26 Amam, Sema, Molada, 27 Hazar Gada, Hesmon, Bet Pelet, 28 Hazar Shual, Beerseba, Biziothia, 29 Bala, Iim, Ezem, 30 Eltolad, Kesil, Horma, 31 Ziklak, Madmana, Sansana, 32 Lebaot, Silhim, Ain le Rimon, a rêngin khaw sawmhni pakuo le an khawperhai an nih. 33 Thlang tieng tlâng thuta khuohai chu: Estaol, Zora, Asna, 34 Zanoa, En Ganim, Tapua, Enam, 35 Jarmut, Adulam, Soko, Azeka, 36 Saraim, Adithaim le Gedera (Gederothaim), khaw lien sawm le pali le an khawperhai; 37 Zenan, Hadasha, Migdal, Gad, 38 Dilean, Mizpa, Joktheel, 39 Lakis, Bozkat, Eglon, 40 Kabon, Lahmas, Kitlis, 41 Gederot, Beth Dagon, Naama le Makeda, khaw lien sawm le paruk le an khawperhai; 42 Libna, Ether, Asan, 43 Ipta, Asna, Nezib, 44 Keila, Akzib le Maresa, khaw lien pakuo le an khawperhai; 45 Ekron le a sevela lobuk le khawper hai: 46 Ekron thlang tieng chu Asdod hnaia mi po po le an khawper hai; 47 Asdod khaw sevela lobuk le khawper hai; Gaza le a sevela lobuk le khawper hai, Aigupta Ruom chen le Mediterranean Tuipui kam chenin a nih. 48 Chun, tlâng ram tieng chu Samir, Jatir, Soko, 49 Dana, Kiriat Sana (chu chu Debir), 50 Anab, Estemo, Anim, 51 Gosen, Holon, le Gilo, khaw lien sawm pakhat le an khawperhai; 52 Arab, Duma, Esan, 53 Janim, Bet Tapua, Afeka, 54 Humta, Kiriat Arba (chu chu Hebron) le Zior, khaw lien pakuo le an khawperhai; 55 Maon, Karmel, Zip, Jutta, 56 Jezreel, Jokdeam, Zanoa, 57 Kain, Gibea le Timna, khaw lien sawm le an khawperhai; 58 Halhul, Bet Zur, Gedor, 59 Marat, Beth Anot le Eltekon, khaw lien paruk le an khawperhai; 60 Kiriat Baal (chu chu Kiriat Jearim) le Raba, khaw lien pahni le an khawperhai a nih. 61 Thlalèr tieng chu Bet Araba, Midin, Sekaka, 62 Nibsan, Chi Khawpui le En Gedi, khaw lien paruk le an khawperhai a nih. 63 Juda hnamhai chun Jerusalema um Jebuhai chu an hlu suok vong naw a, tu chen hin Jebuhai chu Judahai leh an la chêng hmunkhat zing a nih.

Joshua 16

1 Josefa thlahai chanpuol chu Jeriko zawn, Jordan vadunga inthoka thlalèr hnai tieng, sak tieng Jeriko tuihmunah a suok a, Jerikoa inthok chun tlâng ramah Bethel (chu chu Luz) chenin a kai tung a, 2 Bethela inthok chun Atarot-a Ark-hai ram a fe thleng a, 3 chu taka inthok chun Jaflet-hai ram tieng panin thlang tieng an her thla a, Bet Horon chuonhnuoi chen a fe a, chu zoah Gezer tieng a fe a, tuifinrietah a suok a. 4 Chu po chu Manase le Efraim, Josefa thlahai chanpuol chu a nih. 5 An sûngkuo zir peia Efraim thlahai ramri chu hieng ang hi a nih: sak tienga an chanpuol ramri chu Astarot Adar-a inthokin Bet Horon chuonchungah, 6 tuifinriet chen a fe a. Chu taka inthok chun Mikmethat hmar tieng fein, Tanat Silo panin sak tieng an her a, Janoa chu a tan tlang a. 7 Janoat-a inthok chun Atarot le Naara-ah a fe thlak a, Jeriko a hraw a, Jordan vadungah a suok a. 8 Tapua-a inthokin ramri chu thlang tieng Kana vadung ruom a zui a, tuifinrietah a suok a. Chu chu an sûngkuo zir ang peia Efraim thlahai chanpuol ram chu a nih. 9 Chun, Manase thlahai chanpuol sûnga Efraim thlahai chanpuol dinga ruot hrang khawpuihai le an khawperhai khom chu a thang sa bok a nih. 10 Chun, Gezer-a um Kanan mihai chu an hnot suok vong naw leiin, tu chen hin Kanan mihai chu sinthawa sor lui dingin Efraim mihai lai an la um a nih.

Joshua 17

1 Manase thlahai chanpuol chu hieng hi a nih. Manase chu Josefa nau lutîr a na, Manase nau lutîr chu Makir a na, Gilead mihai thlatu bul a nih. Makir chu mi râl hrât a ni leiin Gilead le Basan ram a nei a. 2 A chanpuol chu Manase thlahaiin an insem a, chuonghai chu Abiezer, Helek, Asriel, Sekem, Hefer le Semida hai an nih. Anni hi Josefa naupa Manase thla pasalhai chu an nih. 3 Manase naupa chu Makir, Makir naupa chu Gilead, Gilead naupa chu Hefer an nih. Hefer naupa Zelofehad chun nau nuhmei ngot a nei a, chuonghai chu Mahla, Noa, Hogla, Milka le Tirza an nih. 4 Anni chu thiempu Eleazar le Nuna naupa Josua le hotuhai kuoma chun an fe a, "Kan unauhai lai rochan mi pe ve dingin LALPA chun Mosie thu a pêk a nih" an ta. Chuongchun, LALPA thupêk angin Josua chun anni chu an pa unauhai lai chun chanpuol a pêk ve ta a. 5 Jordan râla mi Gilead le Basan ram bâka Manase thlahai chan chu biel sawm a nih; 6 pasal ang boka an naunuhaiin chanpuol an nei ve leiin Gilead ram chu Manase thla danghai chun an chang tah a nih. 7 Manase thlahai ramri chu Aserhai ramria inthoka Mikmetha le Sekem sak tieng inkâr a nih. Chu zoah Entapua chènghai huom sa dingin sim tieng a fe a. 8 Tapua sevela ram chu Manase thlahaiin an chang a, ramria um Tapua khawpui ruok chu Efraim thlahai ta a nih. 9 Ramri chu Kana vadungteah a fe thlâk a. Vadungte sim tienga khuohai chu Manase rama um ni sienkhom Efraim thlahaiin an chang a. Manase-hai ramri chu vadungte hmar tieng fein Mediterranean Tuipuiah a suok a. 10 Sim tieng Efraim-hai an um a, hmar tieng Manase-hai an um a, thlang tienga an ramri chu tuifinriet a nih. Aser hnamhai chu hmar thlangah an um a, Isakar hnamhai chu hmar sak tieng an um bok a. 11 Isakar le Aser ram hluo sûnga um Bet Shan le Ibleam le an sevela khuohai le Dor, Endor, Tanak, Megido le an se vela khuohai chu Manase thlahaiin an chang a. 12 Nisienlakhom, Kanan mihai chun um lui an tum tlat leiin Manase thlahai chun chuong khawpuia umhai chu an hnot suok thei naw a. 13 Israel thlahai an hung hrât hnung ruok chun anni rawi chu sinthawa sor dingin an inumtir a, an hnot suok fai vong ta nawh. 14 Chun, Josefa thlahai chun Josua kuomah, "Keini hnam hi LALPAN nasa takin mal a mi sawm a, kan tam tak êm êm vei leh, ieng tiziea rochung ding chanpuol khat le hmun khat chauh i mi ruotpêk bîk am a na?" an ta. 15 Josua chun an kuomah, "Chuonga in tam a, Efraim tlâng ram hi in ta dinga an chèp taluo a ni chun Periz-hai le Refaim-hai ram ngaw dâm khi umna dingin hang thiek ro chu" a ta. 16 Josefa thlahai chun, "Tlâng ram hi a'n chêp taluo deu a nih, phaia Kanan mi chênghai hlak chun thîr tawlailir an nei a, Beth-sean khawpuia umhai le Jezreel phai ruom le a sevel khuohai chun thîr tawlailir an nei fur bîk a nih" an ta. 17 Josua chun Josefa sûngkuo, Manase le Efraim thlahai kuoma chun, "In tam hle a, hrât khom in hrât bok a, chan khat ringot chu nei naw ti niu. 18 Tlângram khi in ta ding nîng a ta, ram ngawpui khom ni sien thiek unla, in thiek phâk chin chin chu in ta nîng a tih. Kanan mihai chun thîr tawlailir neiin hrât hle hai sienkhom, in la hnot suok vong ding annawm" a ta.

Joshua 18

1 Israel thlahai po po chu an rêngin Silo khuoah an intuokkhawm a, chu taka chun Intuokna Puon in an zar a. 2 A ram chu an thu hnuoiah um ta sienkhom Israel thlahai laia hnam sarihai chun an chanpuol an la chang hri nawh. 3 Josua chun Israelhai kuomah, "LALPA in pi le puhai Pathienin a pêk ta chêu ram hi ieng chen am hluo loin in la nghâk ding a na? 4 Hnam tina mi pathum seng hung thlang suok unla, a ram va fang vel dingin tir suok ka ta, an ram hluo ding seng chanchin hung ziek an ta, chu zoah ka kuomah hung kîr nawk an tih. 5 A ram chu hmun sariah thè phot in ta, Juda thlahai chu sim tienga an chanpuolah um an ta, Josefa sûngkuohai chu hmar tienga an chanpuolah um an tih. 6 Ram chu hmun sariah thè unla, chu chu ziekin mi hung pe unla, hi taka hin LALPA ei Pathien hmaah thum lo vawrpêk ka ti chêu. 7 Levihai ruok chun nangni lai chan an nei ve naw a, LALPA thiempu nina sin hi an chanpuol a nih. Chun, Gad thlahai, Reuben thlahai le Manase hnam zâtve hai ruok chu Jordan râl sak tieng LALPA siehlaw Mosien an chanpuol seng a lo pêk ta kha" a ta. 8 Ram entu le a um dàn ziek thlatu dinghai an inthok suok lai chun Josuan, "Fe unla, ram chu va en chieng unla, a um dàn ziek thlain ka kuomah hung kîr nawk unla, Silo hmuna hin LALPA hmaah thum lo vawrpêk ka ti chêu" tiin thu a'n cha a. 9 Mihai chu an fe a, ram chu an va fang a, hmun sariah an the a, lekhabuah a khuo po po chu an ziek thlâk a, an riebûk Silo-ah chun an hung kîr nawk a. 10 Silo-a chun Josuan LALPA hmaah thum a lo vawrpêk a, chu taka chun an hnam inthe dàn ang peiin ram chu a sem a. 11 An sûngkuo zir ang peia ram sem dinga thum an vawr chu Benjamin thlahai chungah a tla hmasa tak a, an ramri chin chu Juda thlahai le Josefa thlahai inkâr a nih. 12 Hmar tieng panga an ramri chu Jordan vadungah a'n tan a, ramri chu Jeriko sîr hmar tieng a fe tung a, chu taka inthok chun thlang tieng panin tlâng ramah a fe tung pei a, ramri tawpna chu Bet-aven thlalèr a nih. 13 Chu taka inthok chun Luz (Bethel) sim tieng pangpèrah a fe a, chu taka inthok chun Bet Horon tlâng chuonhnuoia um Atarot Adar tlângah a fe thlâk a. 14 Bet Horon sim tieng tlâng bula inthokin thlang tieng pangah sim tieng panin a fe kuol a, Juda thlahai khawpui Kiriat-Baal (Kiriat-jearim) ah a tawp a, chu chu thlang tienga an ramri chu a nih. 15 Sim tieng ramri chu Kiriat Jearim thlang tieng kotsuoa inthokin a'n tan a, Neftoa tuikhurah a hung suok a. 16 Ramri chu Refaim Ruom hmar tieng, Ben Hinom ruom ep tlâng thuta chun a liem thla a, Jebuhai khawpui sim tieng pangpèr zuiin Hinom ruomah a fe thlâk a, En Rogel a zu sun a. 17 Chu taka inthok chun hmar tieng a kawi a, En Semes tieng a fe a, Adumim Kawn epa um Gelilot chen a tlung a, chu taka inthok chun Reuben naupa Bohan Lungphun a zuk sun a. 18 Bet Araba hmar tieng pangpèr zuiin Araba-ah a fe thlâk a. 19 Chu taka inthok chun Bet Hogla hmar tieng pangpèr a zui thlâk a, sim tienga Jordan vadung suo, Tuipui Thi hmar tieng litengsawlah a tawp a. Hi hi sim tieng ramri chu a nih. 20 Sak tieng panga ramri chu Jordan vadung a nih. Chuonghai chu an sûngkuo zir ang peia Benjamin thlahai chanpuol kil tina huoltu ramri chu a nih. 21 Benjamin thlahaiin an sûngkuo zir ang peia khuo an hluohai chu Jeriko, Bet-holga, Emek-keziz, 22 Bet-Araba, Zemaraim, Bethel; 23 Avim, Para, Ofra, 24 Kefar-Amoni, Ofni le Geba, khaw sawmpahni le an khawperhai; 25 Gibeon, Rama le Berot, 26 Mizpa, Kefira le Moza, 27 Rekem, Irpel le Tarala, 28 Zela, Haelep le Jebuhai khawpui (Jerusalem), Gibea le Kiriat, khawpui sawmpali le an khawperhai an nih. Chuonghai chu Benjamin sûngkuo ta dinga rochan chu a nih.

Joshua 19

1 An thum vawr voi hnina chu Simeon thlahai le sûngkuohai chungah a tla a. An chanpuol chu Judahai ram sûngah a thang a. 2 Chuonghai chu Beersheba (Sheba), Molada, 3 Hazar Shual, Bala, Ezem, 4 Eltolad, Bethul, Horma, 5 Ziklak, Bet Markabot, Hazar Susan, 6 Bet Lebaot le Saruhen, khaw sawmpathum le an khawperhai dam; 7 Ain, Rimon, Ether le Asan, khaw li le an khawperhai le 8 hieng khuohai sevela khawpui po po, sim tieng rama Balat-Ber chenin. Chuonghai chu an sûngkuo zir peia Simeon thlahai chanpuol chu a nih. 9 Simeon thlahai chanpuol chu Juda thlahai chana mi a nih, an mamaw bâka lien an rochung leiin. Chuongchun, Simeon thlahai chun Judahai chan sûnga mi chanpuol chu an dong a nih. 10 Thum vawr voi thumna chu Zebulun hnam le sûngkuohai chungah a tla a. An chanpuol ramri chu Sarid chen a nih. 11 Thlang tieng panin Marala a pan a, Dabeset a sir a, Jokneam kawla varuom chen a tlung a. 12 Sarid-a inthokin sak tieng, nisa suokna tieng a'n her a, Kislot Tabor ram a tlung a, Daberat le Jafia chen a fe a. 13 Chu taka inthok chun sak tieng pan peiin Gat Hefer le Et Kazin-ah a fe a, Rimon-ah a hung suok a, Nea tieng a pan a. 14 Chu taka inthok chun ramri chu Hanathon hmar tieng panin an her kuol a, Ifta El ruomah a tawp a. 15 Hi bâka hin Katat, Nahalal, Simron, Idala le Bethlehem khuohai khom a thang sa. A rêngin khuo sawmpahni le an khawperhai an nih. 16 Chuonghai chu Zebulun hnam le sûngkuohai chanpuol khuohai le an khawperhai chu a nih. 17 Thum vawr voi lina chu Isakar hnam le sûngkuohai chungah a tla a. 18 An ramri chin chu Jezrel, Kesulot, Sunem; 19 Hafaraim, Sion, Anaharat, 20 Rabit, Kision, Ebez; 21 Remet, Enganim, Enhada le Bet Pazez a nih. 22 A ramri chun Tabor, Sahazuma le Bet Semes a tawk a, Jordan vadungah a tawp a, arêngin khaw sawmparuk le an khawperhai an nih. 23 Chuong khawpuihai le an khawperhai chu Isakar hnam le sûngkuohai chanpuol chu a nih. 24 Thum vawr voi ngana chu Aser hnam le sûngkuohai chungah a tla a. 25 An ram huop chin chu Helkat, Hali, Beten, Aksaf, 26 Alamelek, Amad le Misal an nih. Thlang tieng ramri chun Karmel le Sihor Libnat a zu tlung a. 27 Chu taka inthok chun sak tieng Bet Dagon tieng inherin Zebulun le Ifta El ruom fe thlengin hmar tieng Bet Emek le Neiel tieng a fe a, voi tieng pangah Kabul a fe thleng a. 28 Fe peiin Abdon, Rehob, Hamon le Kana sirin Sidon Lien chen a fe a. 29 Chu taka inthok chun ramri chu Rama tieng a'n her kîr a, kula inhuon Tura khuo a sir a, Hosa tieng a'n her a, Akzib bielah Mediterranean Tuipui a sun a, 30 Uma, Afek le Rehob a sir bok a. Arengin khaw sawmhni le pahni le an khawperhai an nih. 31 Chuonghai chu Aser hnam le sûngkuohai chanpuol khuohai le an khawperhai chu a nih. 32 Thum vawr voi rukna chu Nafthali hnam le sûngkuohai chungah a tla a. 33 An ramri chu Helep-a inthokin Zananmim-a saisaw thingkung lienah, Adaminekeb le Jamnia fe thlenga Nakum chen va tlungin, Jordan vadungah a tawp a. 34 Chu taka inthok chun ramri chu thlang tieng inherin Aznot Tabor-ah a fe a, chu taka inthok chun Hukok chen a fe a. Sim tieng Zebulun leh an inri a, thlang tieng Aser leh an inri a, sak tieng Jordan leh an inri bok. 35 Kula inhuon khuohai chu Zidim, Zer, Hamat, Rakat, Kineret, 36 Adama, Rama, Hazor, 37 Kedes, Edrei, En Hazor, 38 Iron, Migdal El, Horem, Bet Anat le Bet Semes a nih. An khaw hluo chu arêngin khuo sawmpakuo le an khawperhai a nih. 39 Chuonghai chu Nafthali hnam le sûngkuohai chanpuol khuohai le an khawperhai chu a nih. 40 Thum vawr voi sarina chu Dan hnam le sûngkuohai chungah a tla a. 41 An chanpuol ram huop sùng chu Zorah, Eshtaol, Ir Semes, 42 Salabin, Aijalon, Ithla, 43 Elon, Timna, Ekron, 44 Elteke, Gibethon, Balat, 45 Jehud, Bene Berak, Gath Rimon, 46 Mejarkon le Rakon bakah Jopa khuo sevela ram po po a nih. 47 Dan thlahai hin nuom elin an ram chu an hluo thei naw leiin Lesem khuo an hang rûn a, an lâk a, kawlhnâma an sukbohmang hnung chun an hluo a, an pu Dan hming chawiin Lesem chu Dan an inbûk a. 48 Chuonghai chu Dan hnam le sûngkuohai chanpuol khuohai le an khawperhai chu a nih. 49 Chuongchun, an chanpuol seng ding chu insema an ramri ding an thè fel hnung chun Israel thlahai chun Nuna naupa Josua chu anni lai chanpuol an pêk ve a. 50 LALPA thupêk angin, Efraimhai tlâng rama a khaw dit Timnat Sera chu an pêk a, chu taka chun khawpui a siem a, a um ta a. 51 Chuonghai po chu a nih Silo hmuna LALPA hmaa Intuokna Puon in kotah thum vawr a, thiempu Eleazar hai, Nuna naupa Josua hai le Israel thlahai laia hotuhaiin ram an lo sem dân chu. Chuong ang chun ram insem chu an zo tah a nih.

Joshua 20

1 Chun, LALPA chun Josua a biek a, 2 "Mosie hmanga ka hril ta chêu ang khan, tu khom tum lawk lei ni loa tuol that palh chu thisen phuba la tumtu laka a him theina dingin, 3 a tuol tlânna ding khawpui ruotpêk dingin Israelhai chu hril rawh. 4 Chuong khawpui laia a ienga khom chun tlân a ta, khawpui lûtna kotkhàrah va ngîr a ta, chu taka khaw upahai hrieta chun a chanchin intlun a ta, anni chun khaw sûngah thuoi lût an ta, anni lai a chêng ve theina dingin a umna ding ruotpêk an tih. 5 Thisen phubalatu dingin a hung hnot a ni khomin a kutah an lo pêk ding a ni nawh, a tuolbawm chu a hmaa theidana nei loa pangpala a that a ni leiin. 6 Mipui rorêltuhai hmaa ngîra a chungthu rèl a ni hma le chuong laia chu khuoa thiempu chu a thi hma khat chun, chu khuoa chun a um zing ding a nih. Chu zoah a hung tlân suoksan khuoa chun ama ina ngei kîr nawk thei a tih ti hril rawh" a ta. 7 Chuongchun, Galili biel tlângrama Naftali-hai khuo Kedes dâm, tlâng rama Efraim-hai khuo Sekem dâm, tlâng rama Juda-hai khuo Kiriat Arba (Hebron) dâm chu an ruot a. 8 Jordan râl sak tieng chun Reuben-hai biela thlalèr tlâng zawla um Bezer dâm, Gilead biela Gad-hai khuo Ramot dâm le Basan biela Manase-hai khuo Golan dâm chu an ruot bok a. 9 Israel thlahai laia mi amanih anni laia um hnam dang mi amanih tu khom tum reng lei ni loa pangpala tuol thattu chu rorêltuhaiin a chungthu an rêl hma khat thisen phubalatu laka a him theina dingin, chuong khuo ruota hai chun a tuol tlàn thei a nih.

Joshua 21

1 Thiempu Eleazar le Nuna naupa Josua le Israel thlahai laia hnam tin luhai kuoma chun Levi chia mi sûngkuo luhai chu an fe a. 2 Kanan rama Silo khuoah chun, "LALPAN Mosie hmangin kan umna ding khawpuihai le kan ran tlatna ding dai vela hlobet hmunhai mi pe dingin thu a lo pêk a nih" tiin an va hril a. 3 Chuongchun, LALPA thupêk angin, Israel thlahai chun an chanpuola inthokin hieng khuohai le a dâi vêlhai chu Levi chihai an pêk a: 4 A sûngkuo kuoa insemna dinga an thum vawr chu Kohat chungah a tla hmasa tak a. Levi hnama mi thiempu Aron thlahai chu Juda hnam le Simeon hnam le Benjamin hnam hai chanpuola mi khaw sawm le khaw thum an pêk a. 5 Kohat thla a danghai po chun Efraim hnam, Dan hnam le Manase hnam zâtve chanpuola inthokin khaw sawm an chang a. 6 Gerson thlahai chun Isakar hnam, Aser hnam, Nafthali hnam le Basana Manase hnam zâtve hai chanpuola mi khaw sawm le khaw thum an chang a. 7 Merari thlaa sûngkuohaiin Reuben, Gad le Zebulun hnamhai chanpuola inthokin khaw sawm le khaw hnih an chang a. 8 LALPAN thu Mosie a pêk tah angin, chuong khuohai le a sevela ran tlatna hmunhai chu Israel thlahaiin an chanpuola inthokin Levi hnamhai ta dingin an lo pêk a nih. 9 An thum vawr chu Levi chi, Kohat hnama mi Aron thlahai chunga chun a tla hmasa tak leiin, 10 hieng khuohai hi Juda hnam le Simeon hnam chanpuola inthokin an pêk a: 11 Judai tlângrama Anak pu Arba hming chawi khuo Kiriat Arba (Hebron an ti bok) le a dâi vel chu an pêk a. 12 A khaw sevèla lo hmunhai le khawperhai ruok chu Jefune naupa Kaleb rochan dingin an pêk a. 13 Aron thla thiempuhai chu tuol that palhai tlânna dinga inhumhimna khuo an ruot Hebron khuo bâkah Libna, 14 Jatir, Estemoa, 15 Holon, Debir, 16 Ain, Jita le Bet Semes khuohai le ran tlatna ding a dai vel, a rêngin khaw kuo chu Juda le Simeon thlahai chanpuola inthokin an pêk a nih. 17 Benjamin hnam chanpuola inthokin khaw li- Gibeon, Geba, 18 Anathot le Almon- hai chu ran tlatna hmun leh an pêk bok a. 19 Aron thla thiempuhai ta dinga khuo le a dai vela ran tlatna hmun an pêk po po chu khaw sawm le khaw thum a nih. 20 Levi chi, Kohat thla danghai po chu Efraim hnam chanpuola inthokin khuo an pêk a. 21 Chuonghai chu Efraim tlângrama tuol thathai tlànna dinga inhumhimna khuoa ruot Sekem, Gezer, 22 Kibzaim le Bet Horon khuohai le a dâi vêl ran tlatna hmun, arêngin khaw li a nih. 23 Chun, Dan hnama inthokin Elteke, Gibethon, 24 Aijalon le Gat Rimon, khaw li le a dâi vêla ran tlatna hmun an pêk bok a. 25 Manase hnam zâtvea inthokin Tanak le Gat Rimon, khaw hni le a dai vela ran tlatna hmun chu an pêk bok a nih. 26 Hieng khaw sawm le a dai vela ran tlatna hmunhai chu Kohat thla danghai ta dinga pêk a nih. 27 Levi chia mi Gerson hnamhai chu Manase hnam zâtvea inthokin tuol thathai tlànna dinga inhumhimna khuo an ruot Basan rama Golan khuo le Be Estara, khaw hnihai le a dai vel ran tlatna hmun chu an pêk a. 28 Isakar hnama inthokin Kishion, Daberat, 29 Jarmut le En Ganim, khaw li le a dai vela ran tlatna hmun chu an pêk a. 30 Aser hnama inthokin Misal, Abdon, 31 Helka le Rehob, khaw li le a dai vela ran tlatna hmun chu an pêk a. 32 Naftali hnama inthokin Galili biela inthoka tuol thathai tlânna ding inhumhimna khuo an ruot Kedes bakah Hamot Dor le Kartan, khaw thum le a dai vela ran tlatna hmun chu an pêk bok a. 33 Gerson hnam kuoma khuo le a dai vela ran tlatna hmun an pêk zât po chu khaw sawm le khaw thum a nih. 34 Levi chia mi Merari thlahai ta dinga an pêk po chu: Zebulun hnama inthokin Jokneam, Karta, 35 Dimna le Nahalal, khaw li le a dai vela ran tlatna hmun hai; 36 Reuben hnama inthokin Bezer, Jahaz, 37 Kedemot le Mephat, khaw li le a dai vela ran tlatna hmun hai; 38 Gad hnama inthokin Gilead biela tuol thathai tlânna dinga inhumhimna khuo an ruot Ramot, Mahanaim, 39 Hesbon le Jazer, khaw li le a dai vela ran tlatna hmun hai chu a nih. 40 Chuonghai chu Levi chia mi Merari thlahai chang chu a na, a rêngin khaw sawm le khaw hni a nih. 41 Israel thlahai ram sûnga Levi chihaiin khuo le a dai vela ran tlatna hmun an hluo po po chu khaw sawmli le khaw riet a nih. 42 Hieng khaw tina hin, a khaw lai khuoa khom, a dai velah ran tlatna hmun a um vong a nih. 43 Chuongchun, an pi le pua inthoka Israel thlahai kuoma LALPAN inkhâm meua pêk a tiem ram chu an hluo a, umhmun an khuor ta a. 44 LALPAN an thlatuhai kuoma inkhâm meua a lo tiem tah angin, hmun tinah muongna a pêk a, an hmèlmahai chu an kutah a pêk leiin anni hmaa thang thei tu khom an um nawh. 45 LALPAN Israel sûngkuo ta dinga thil tha a lo tiemhai po po chu a thlawn hrim um loin a hung tlung kim vong a nih.

Joshua 22

1 Josua chun Reuben hnam, Gad hnam le Manase hnam zâtve hai chu a ko a, 2 an kuomah, "LALPA siehlaw Mosien thu a pêk taphot chu in zawm pei a, ka thupêkhai khom in zawm pei a, 3 hun sawt taka inthok khan voisun ni chen hin in unauhai thlathlam loin LALPA in Pathienin thaw dinga a ti chêu chu in hlen pei a. 4 Tu hin LALPA in Pathienin a lo tiem tah angin, in unauhai khomin muongna an lo chang ve tah leiin LALPA siehlaw Mosien Jordan râla in chanpuol dinga ram a lo pêk tah cheua chun in puon in tieng kîr nawk ta ro. 5 Amiruokchu, LALPA in Pathien chu hmangai a, a lampui po po hraw a, a thupêkhai chu zawm a, ama chu chel tlat a, lungril po po le thlarau po poa a rong in bawl zing theina dingin LALPA siehlaw Mosien dàn thu a pêkhai chêu kha fimkhur takin kengkaw tlat ro" a ta. 6 Josuan anni chu mal a sawm a, a'n fetir a, an in tieng an kîr nawk ta a. 7 Manase hnam zâtve chanpuol chu Basan ramah Mosien ram a lo pêk tah a, an chanpuol zâtve dang chu Jordan râl thlang tieng an unauhai lai Josuan ram a pêk a. 8 In tieng a'n kîrtir tawm chun Josuan, "In puon in tieng ran ruol tam tak leh, tangkaruo le rangkachak, dâr le thîr le silfèn tam tak leh hnienghnâr takin kîr nawk ta unla, in hmèlmahai laka in râllâkhai hi in unauhai leh insem tlâng ro" tiin malsawmnain a'n thla a. 9 Chuongchun, Reuben thla hai, Gad thla hai le Manase hnam zâtve hai chun Israel thlahai chu Kanan rama Silo khuoa chun màksanin, Mosie kuoma LALPA thupêk angina an ram chan Gilead ram tieng chun an kîr nawk ta a. 10 Kanan ram Jordan thlang tienga um Gelilot hmun an hung tlung chun, Reuben thla hai, Gad thla hai le Manase hnam zâtve hai chun vadung kamah maichâm ropui le langsàr tak el an siem a. 11 Kanan ram bul tak, Jordan thlang tieng, Israel thlahai rama um Gelilot hmunah Reuben thla hai, Gad thla hai le Manase hnam zâtve haiin maichâm an siem ti thu chu Israel mi danghai kuoma chun an hung hril a. 12 Israel pung khawmhaiin an lo an hriet chun, anni chu do dingin Silo khuoah an hung tlân khawm a. 13 Thiempu Eleazar naupa Finehas chu Israel thlahai chun Reuben thla hai, Gad thla hai le Manase hnam zâtve hai umna Gilead rama chun an tir a. 14 Ama ruol chun Israel hnam tina lu tak nina chel seng mi sawm an tir sa bok a. 15 Reuben thla hai, Gad thla hai le Manase hnam zâtve hai kuomah Gilead rama chun an fe a, an kuomah, 16 "LALPA mi pungkhawmhai po poin, 'Hieng el hin ieng tin am Israel Pathien laka in ringna chu a'n phet ding a na? Iengtin am LALPA chu nghatsana helin, nangni ta dingin maichâm chu in insiem el a na? 17 Peor-a an thil suol thaw hman kha a huntawk ta vei leh! LALPA mihai chungah hripui an leng hiela chu, tu chen khom hin kha taka ei bawsietna kha ei la tlèng fai zo naw a ni si a. 18 Tu hin LALPA chu in nghatsan nawk an ta naw maw? Voisun hin LALPA lakah in hel chun, zînga hin Israel sûngkuo chungah lungsen a tih. 19 In ram hluo hi a porche a ni chun, LALPA ram sûng, LALPA biekbûk umnaah hung um unla, ram chu ei intlâng el ding a nih. Amiruokchu, LALPA kan Pathien maichâm ti lo maichâm dang hrim hrim siem zawngin LALPA lakah hel naw unla, keini lakah hel bok naw ro. 20 Zera naupa Akan-in hluihlawn thila thupêk a bawsiet lei khan Israel mipui po po chungah lungsenna a tla a ni naw maw? A suolna kha ama chauin a thipui naw kha' an ti a nih" tiin an hril a. 21 Reuben thla hai, Gad thla hai le Manase hnam zâtve hai chun Israel hnam tin luhai kuoma chun, 22 "LALPA ropui chu LALPA Pathien a nih. LALPA ropui, LALPA Pathien chun a hriet. Israelhai khomin hre raw hai se. Hi kan thilthaw hi LALPA laka helna le bawsietna a ni chun, voisun hin mi hlà dêr naw ro. 23 LALPA nghatsan tuma keini ta dinga pumraw inthawina amanih, bu le bâl thilhlân amanih le inremna thilhlân inhlànna dinga maichâm kan insiem a ni chun LALPA ngeiin kan chungthu ngaituo raw se. 24 A nih, mi hlà teu naw raw se! Nakie hin in thlahaiin kan thlahai kuomah, 'Nangni hin LALPA, Israelhai Pathien hi in hmang phâk vena ding iem a um a? 25 Nangni Reuben thlahai le Gad thlahai, LALPAN nangni le keini ramri dingin Jordan hi a siem a na, LALPAA hin chanpuol in nei ve hrim hrim nawh' la hung ti hlauh rawi an ta, kan thlahai chu LALPA ti nachang hre loin siem pal an tih ti inlauna leia fimkhur thu hlaah hi thil hi kan thaw a nih. 26 Hi maichâm kan siem hi pumraw thilhlân inhlànna ding amanih le inthawina ding amania kan siem a ni nawh. 27 Chuong nêk hmanin, nangni le keini chun LALPA chu a hmun thienghlima ngei chawibiekin, pumraw thilhlân le inthawina thilhlânhai chu ei inhlàn lem hlak a nizie eini le ei thlahai inkâra inchikna dinga kan thaw a nih. Chuongchun, nakie hunah in thlahaiin kan thlahai kuomah, 'LALPA-ah chan ieng khom in nei ve nawh' an la hung ti nawna ding a nih. 28 Hi thil hi a hung tlung pal hlauh a ni khomin, kan thlahai chun, 'En ta u, ei thlatuhai khan LALPA maichâm ang ang an siem hi. Hi maichâm hi pumraw thil inhlànna ding le inthawina inhlànna dinga an siem a ni nawh; nangni le keini inkâra hrepuitu dinga an siem a nih' an la hung ti thei ding thil ngaituoa kan thaw a ni lem. 29 LALPA chungah helin, LALPA chu voisun hin nghatsan nawng kan ta, a biekbûk hmaa LALPA ei Pathien maichâm ti ngot naw chu pumraw thilhlân le inthawina thilhlân dang dang hai inhlànna dingin maichâm dang siem naw top kan tih" an ta. 30 Thiempu Finehas le a hungpui Israel hnam tin luhaiin Reuben thla hai, Gad thla hai le Manase thla chanve hai thukhawchang an hriet chun an lawm hle a. 31 Thiempu Eleazar naupa Finehas chun Reuben thla hai, Gad thla hai le Manase thla hai kuoma chun, "LALPA lakah in lo hel nawzie le LALPA chu voisun hin ei kuomah a um ti ka hriet ta a, LALPA khomin Israelhai a hrem naw ding a ni chuh" a ta. 32 An inbiek zo chun thiempu Eleazar naupa Finehas le hotuhai chu Reuben le Gad thla hai umna Gilead-a inthok chun Kanan ram tieng an kîr nawk a, Israelhai kuomah an thu hawn chu an ripawt a. 33 An ripawt an hriet chun an lawm hle a, Pathien an inpâk a, Reuben le Gad thla hai umna hang rùn a, sukchimit vong ding ti thu hrim an hril ri ta nawh. 34 Reuben le Gad thlahai chun maichâm hmingah Ed an inbûk a, chu chu 'LALPA chu Pathien a nizie eini inkâra hrepuitu a nih' tìna a nih.

Joshua 23

1 LALPAN Israelhai chu an kawl le kienga hmèlmahai laka inthoka sawt rei muongna a pêk hnung chun Josua khom hung upain a tar ta hle a. 2 Josua chun Israel upa hai, thuoitu hai, rorêltu hai le hotu hai chu a ko khawm a, an kuomah, "Ka upa tain ka kum khom a lo tam ta hle a. 3 LALPA in Pathienin hieng laia hnamhai chunga nangni leia a thaw dânhai kha in hmu a, LALPA in Pathien chun ama ngeiin a dopêk chêu a ni kha. 4 Sak tieng Jordan vadung le thlang tieng Tuipui Lien chen inkâra chêng hnam ei hne tahai le ei la tukdol lohai umna ram chenin in ram chanpuola dingin ka ruot fel vong tah kha hre zing ro. 5 Anni chu in hmaa inthokin LALPA in Pathien ngei chun hnot suok vong a ta, in mithmu ngeiah nam dok tawl a ta, LALPA in Pathienin a tiem chêu ang khan an ram chu hluong in tih. 6 "Chuleiin, hrât takin um unla, Mosie dàn lekhabua chuong po po hi voi tieng amanih chang tieng amanih in pêtsan nawna dingin fimkhur takin zawm ro. 7 Nangni laia hnam la umhai leh hin inpolsop naw ro; an pathien hminghai lam naw unla, an pathien hming salin inkhâm naw unla, an rong bawl naw unla, an hmaah bokkhup bok naw ro. 8 Tuta chena in um ang hin, LALPA chu chel nghet tlat ro. 9 LALPA chun in hmaa hnam ropui le hrât tak tak hai a hnotsuokpêk chêu a, nangni hmaa thang thei voisun ni chen hin tu khom an um nawh. 10 A tiem tah angin LALPA chun in hmèlmahai a dopui chêu leiin nangni laia mi pakhat khomin a sâng tel in hnot zâm el a ni khah. 11 Chuleiin, LALPA in Pathien hi hmangai dingin fimkhur ro. 12 "Amiruokchu, LALPA chu in nghatsan a, hieng hnam tam tak, nangni laia la umhai leh hin inkeizap a, nuhmei pasala in innei tuo a, in inkoppui vai chun, 13 LALPA in Pathienin in hmaah hieng hnamhai hi hnotsuokpêk ta naw ni chêu ti hre chieng ro. LALPA in Pathienin a pêk chêu ram tha taka inthoka a sukchimit vong hma khat chu anni chu in ta dinga bil le châng, in ruongzâng ta dinga vuokna hmol, le in mit ta dinga hling hung ni lem an tih ti chieng takin hre ro. 14 "Tu hin leilung dàn angin kei chu ka liem ve ding a ni tah. LALPA in Pathienin in chungchâng thua thil tha a tiemhai po po a tlung kim naw pakhat khom a um nawh ti lungril le ngaituona po poin in hriet. A tiem taphot chu a hung tlung kim vong a, pakhat khom inkhêl a um nawh. 15 Amiruokchu, LALPA in Pathienin thil tha a tiemhai po po a hung tlung kim tah ang bok hin, LALPA in Pathienin hi ram tha tak a pêk cheua inthoka a sukbohmang vong hma khat chêu chun LALPAN thil tha lo in chunga hung tlung thei a hrilhai po po chêu khom kha la hung intlungtir a tih. 16 LALPA in Pathienin a thuthlung zawm dinga thu a pêk chêu chu bawse a, ama chu fesan a, pathien danghai rong bawl a, an hmaah in kûn vai chun, LALPA lungsenna chu in chungah inling a ta, ram tha tak a pêk cheua inthok hin sukbohmang nghal a ti chêu" a ta.

Joshua 24

1 Josua chun Israel hnam po po chu Sekemah a ko khawm a, Israel upahai, thuoituhai, rorêltuhai le hotuhai chu a'n kotir vong a, Pathien hmaa chun an hung inlang a. 2 Josua chun mi po po kuomah, "Hieng hin LALPA, Israel Pathien chun a hril: 'Tiena tlânga in thlatuhai, Abraham le Nahor pa Tera chen kha, Vadungpui khêl tieng an um a, pathien dang an biek hlak a. 3 Amiruokchu, in pu Abraham chu a umna Vadungpui khêla inthokin ka thuoi suok a, Kanan ram sûng po po-ah ka thuoi a, chi thla tam tak ka pêk a, Isak khom ka pêk a ni kha. 4 Isak-a inthokin Jakob le Esau ka pêk nawk a. Seir tlângram chu Esau chanpuol dingin ka pêk a, Jakob le a nauhai ruok chu Aigupta ramah an fe thla a. 5 "'Chun, Mosie le Aron ka tir a, Aigupta ram chu thil mak thawa ka hrem zo hnungin ka thuoi suok chêu a. 6 Aigupta rama inthoka ka thuoi suok chêu hnungin tuipui in va tlung a, Aigupta mihai chun in thlatuhai chu tawlailir le sakor chung chuong mihai leh Tuipui Sen chenin an hung hnot a. 7 Anni chun thangpuitu dingin LALPA an ko a, Aigupta mihai le nangni inkâra chun thimpui ka'n tlâktir a; chun, anni chu tuipuiin ka'n tuomtir a, a chim pil ta vong a. Aigupta mihai chunga ka thaw po po chu mit ngeiin in hmu vong a ni kha. Chu zoah thlalerah hun sawt tak in khawsa a. 8 " 'Chun, Jordan sak tienga um Amor mihai ramah ka thuoi tlung chêu a. An lo do chêu a, sienkhom in kutah ka pêk tawl a. In mithmua ngei ka sukbohmang tawl a, an ram ka lakpêk a. 9 Moab lal Zipor naupa Balak-in a do ding lai chêu khan tongsie inphurtu ding cheuin Beor naupa Balaam chu a ko a. 10 Amiruokchu, Balaam thu chu ka ngaithlâkpêk naw a, nangni mal a sawm ta lem hlauh chêu a, a kuta inthokin ka sansuok chêu a ni kha. 11 "'Chu zoah Jordan in kàn a, Jeriko in hung tlung a. Jeriko khuohai chun an lo do chêu a, chuong ang bokin Amor mi hai, Periz mi hai, Kanan mi hai, Hit mi hai, Girgas mi hai, Hiv mi hai le Jebu mi hai chun an do chêu a, sienkhom in kutah ka pêk tawl vong a. 12 In hmaah khuoingal hon ka tir a, in hmaah anni chu an lo hnot hmang a, Amor lal pahnihai ngei khom kha, in kawlhnâm le in thalngul leia zâm an ni nawh. 13 Chuongchun, in thaw sawl thak lo ram le nangni bawl ni dêr lo khawpuihai ka pêk chêu a, chu taka chun in um a; in chìng sawl khom ni lo grêp huon le oliv huona mi in fâk a ni hi' tiin. 14 Josua chun a hril pei a. "Chuleiin, LALPA chu ti unla, titakzet le indik takin a rong bawl unla, in thlatuhaiin Vadungpui râl le Aiguptaa an biek hlak pathienhai kha pei hawn vong unla, LALPA rong chauh bawl ro. 15 LALPA rongbawl hi tha lo awma hrie in um a ni chun, tu rong am in bawl ding, Vadung râla in pi le puhaiin an rong an bawl hlak pathienhai rong am, annawleh tuta in umna Amorhai rama an pathienhai rong lem am in bawl ding ti voisun hin thlang ro. Kei le ka sûnghai ruok hin chu LALPA rong a nih kan bawl ding" a ta. 16 Mipui chun, "LALPA Pathien màksana pathien danghai rong kan bawl chu thil hnai lo a nih. 17 LALPA kan Pathien ngei chu annawm keini le kan thlatuhai Aigupta bawia inthoka mi thuoi suok a, kan mithmu ngeia thilmak nasa tak thaw a, kan inzin sûng po po le lampuia hnam tam tak kan pal tlanghai laka khom mi huolhimtu chu. 18 LALPA chun kan hmaah hnam po po, chu rama um Amor-hai ngei khom chu, a hnot suok vong a nih. Chuleiin, keini khomin LALPA rong a nih kan bawl ding; ama chu kan Pathien a ni si a" tiin an don a. 19 Josua chun mipui kuomah, "LALPA rong chu in bawl thei ngùt dim maw! Ama chu Pathien thienghlim a na; ama chu Pathien thîkthu sie a nih. In helna le in suolnahai ngaidam naw nih. 20 LALPA chu nghatsan a, ram dang mi pathienhai rong in bawl vai chun, in chunga a that zing lai hin hung ngha lêt thut a ta, in chungah sietna intlunin sukbohmang a ti chêu" a ta. 21 Mipuihai ruok chun Josua kuomah, "Ni lo e, LALPA rong a nih kan bawl ding chu" an ta. 22 Josua chun, "LALPA rongbawl inthlang lem thua hrepuitu chu nangni ngei hi in nih" a ta. Mipui chun, "Ni e, hrepuitu kan nih" tiin an don a. 23 Josua chun, "Chuong a ni leh tu hin ram dang mi pathien umhai po po chu inthiel fai vong unla, LALPA, Israel Pathien kuoma chun in lungrilhai pe ro" a ta. 24 Mipuihai chun, "LALPA kan Pathien rong bawl kan ta, a thu zawm pei kan tih" an ta. 25 Chu ni chun mipuihai ta dingin Josua chun thuthlung a siem a, Sekema chun an zawm ding thupêk le dânhai chu a pêk a. 26 Hieng thupêkhai hi Josua chun Pathien Dânbu-ah a ziek thlâk a. Chun, lung lien tak a lâk a, LALPA hmun thienghlim bul saisaw kung hnuoia chun a phun a. 27 Mipui kuoma chun, "En ta u, hi lung hi ei thu mi hrepuitu ni raw se. LALPAN ei kuoma thu a hril po po kha hi lung hin a hriet vong a. LALPA lakah in ringum naw chun hi lung hi nangni kâra hrepuitua ngîr ding chu a nih" a ta. 28 Chu zoah Josua chun mipuihai chu anni chanpuol ram sengah a'n kîrtir a. 29 Chu hnunga chun Nuna naupa Josua, LALPA siehlaw chu kum za le sawm mi niin a thi a. 30 Gaza tlâng hmar tieng pang, Efraim tlâng rama ama chanpuol ramri sûng Timnat-sera hmuna chun an phùm a. 31 Josua dam sûng po le ama nêka dam sawt upahai, Israelhai ta dinga iengkim LALPAN a thawpêk dàn tonhriettuhai an la dam sûng po chun Israelhai chun LALPA rong an bawl hlak a. 32 Chun, Israel thlahaiin Aigupta rama inthoka Josefa ru an hung hawn tung chu Sekem khuoa hmun, Sekem pa Hamor nauhaia inthoka Jakobin tangka zaa ram a'n chawka chun an phùm a, chu hmun chu Josefa thlahai rochanin a hung um ta a nih. 33 Aron naupa Eleazar khom chu a thi a, Efraim tlâng rama ama puola hmun an pêk, a naupa Finehas rochung tlânga chun an phum a.

Judges 1

1 Josua thi hnung chun Israelhaiin LALPA kuomah, "Kan ta dinga Kanan mihai do dinga inthok hmasatu tak ding chu tu hnam am nîng a ta?" tiin an indon a. 2 LALPA chun, "Juda thlahai inthok suok hmasa tak raw se, a kutah ram chu ka pèk tah" a ta. 3 Juda thlahai chun an unau Simeon thlahai kuomah, "LALPAN a mi pèk rama chun Kanan mihai mi hang dopui unla, nangni khom in ram chanpuola um mihai chu dopui vèng kan ti cheu" an ta, chuongchun Simeon thlahai chun an fepui a. 4 Judahai chun an hang do a, Kanan mihai le Periz mihai chu LALPAN an kutah a pèk a, Bezek khuoah mi sîng khat an that a. 5 Kanan mihai le Periz mihai chu an tukdol lai chun Adoni-Bezek khom an hang hmu a, an bei a, 6 a tlân suok a, sienkhom an hnot zui a, an man a, a kutpui le kepui an tanpèk a. 7 Adoni-Bezek chun, "Lal sawmsari kutpui le kepui ka tanpèkhaiin ka dawkân hnuoiah ka bu mal tla an rût hlak a, ka thaw ang charin Pathienin a mi thungrul ve a ni tah hi" a ta. Ama chu Jerusalemah an thuoi a, chu taka chun a thi a. 8 Juda thlahai chun Jerusalem an hang bei a, an lâk a, khawpui chu kawlhnâmin an sàm a, an raw bok a. 9 Chu hnung chun tlâng ram le sim tieng le tlâk tieng pang tlâng thuta um Kanan mihai chu bei dingin Juda thlahai chu an fe thla a. 10 Hebron (Kiriat Arba an ti hlak bok) a Kanan mihai chu an va bei a, Sesai hai, Ahiman hai le Talmai hai chu an that a. 11 Chu taka inthok chun Debir khuo, kha hmaa Kiriat Sefer an ti hlak chu an va rûn a. 12 Kaleb chun, "Kiriat Sefer beia latú tù chu ka naunu a nuhmei dingin pêng ka tih" a ta. 13 Kaleb sangpa Kenaz naupa Othniel chun a lâk a, Kaleb chun a naunu Aksa chu nuhmeiah an neitir a. 14 Ni khat chu a pasal Othniel kuomah Aksa chu a hung a, a pa kuoma ram hni bel dingin a pasal chun a lo infui a. Chun, a sabengtung chunga inthoka Aksa a hung tum chun Kaleb-in, "Iem ka thawpèk thei ding che?" tiin a lo indon a. 15 Ama chun, "Thil hni che ka nuom a nih. Sim tieng ram i mi pèk ta si hin chu tuikhur khom hi mi pe sa law law rawh" a ta. Kaleb chun tuikhur chuonchung le tuikhur chuonhnuoi chu a pèk a. 16 Ken mi Mosie tarpupa thlahai chu Tûm khawpuia inthok chun Juda thlahai leh sim tienga Judai ram thlaler, Arad kawla chun an inson tung a. 17 Chun, Juda thlahai chu an unau Simeon thlahai leh an inthok suok a, Zefat khuoa um Kanan mihai chu an hang bei a, an khawpui an suksiet vong a. Chuleiin chu khawpui hminga chun Hormaa an inbûk a. 18 Juda thlahai chun Gaza le Askelon le Ekron khawpui, mania rambung nei seng chu an lâk bok a. 19 LALPA chu Judahai kuomah a um a, tlângrama chênghai chu an hnot hmang vong a, phairuoma chênghai ruok chun thîr tawlailir an nei leiin an hnot suok thei nawh. 20 Mosien thu a lo tiem tah angin, Hebron khuo chu Kaleb an pêk a, chu taka mi Anak naupa pathumhai chu a hnot suok a. 21 Benjamin thlahai ruok chun Jerusalem hluotu Jebu-hai chu an hnot suok naw leiin, Jebu-hai le Benjamin thlahai chu tu chen hin Jerusalemah an la chêng hmunkhat ta zing a nih. 22 Josefa sûngkuohai khom Bethel bei dingin an inthok suok a, anni chu LALPAN a umpui a. 23 Josefa sûngkuohai chun enthlatu ding Bethela chun mi an tir a (Bethel hming hmasa chu Luz a nih). 24 Enthlatuhai chun khaw sûnga inthoka hung suok mi pakhat hi an hmu a, a kuomah, "Khawpui sûng lûtna mi hril la, i chungah tha takin thawng kan tih" an ta. 25 Khawpui sûng lûtna chu a hril a, chuongchun kawlhnâmin khuo chu an bei a, chu mipa le a sûnghai ti chauh naw chu tu khom damin an hlà nawh. 26 Chu mipa chu Hit-hai ramah a lût a, khuo a siem a, a khaw hmingah 'Luz' a'n bûk a, tu chen hin chu hming chu a la put a nih. 27 Khuo hieng Bet San hai, Tanak hai, Dor hai, Ibleam hai, Megido hai le an khawpera chèng Kanan mihai chun a ramah um lui an tum tlat leiin Manase hnamhai chun an hnot suok tawl nawh. 28 Israelhai an hung hrât hnung khomin Kanan mihai chu sinthawa sor dingin an inumtir a, an hnot suok fai vong ta nawh. 29 Efraim hnamhai chun Gezer khuoa Kanan mihai chu an hnot suok naw a, Gezer khuoa chun anni lai an chèng ve ta lem a nih. 30 Zebulun hnamhai khomin Kitron le Nahalol khuoa Kanan mihai chu an hnot suok bik bok nawh; Kanan mihai chu sinthawa sor dingin anni lai an um ta zing a nih. 31 Aser hnamhai chun hieng Ako, Sidon, Ahlab, Akzib, Helba, Afek le Rehob khuoa umhai chu an hnot suok nawh; 32 hieng lei hin Aser hnamhai chu Kanan mihai lai an um ta lem a nih. 33 Naftalia hnamhai chun Bet-semes khuo le Bet-anat khuoa umhai chu an hnot suok nawh; chu rama um Kanan mihai lai chun an chèng ve a, Bet-Semes le Bet-Anat khuoa umhai chu sinthawa sorah an hmang ta lem a nih. 34 Amor mihai chun Dan hnamhai chu tlângram tieng an hnot tom vong a, phairuom tienga an hung tlâk thlàk an phal nawh. 35 Heres tlâng le Aijalon le Salbim khuoa hai chun Amor mihai chun thang an khaw nghet tlat a; amiruokchu Josefa sûngkuo an hung hrât pei hnung chun sinthawa sor dingin an hung hmang tah a nih. 36 Amorhai ramri chu Ainuvet Kawn (Akrabbim) a inthoka Sela le a khêl ram chen a nih.

Judges 2

1 LALPA vântirko chu Gilgal khuoa inthokin Bokim khuoah a hang fe a, an kuomah, " Aigupta rama inthokin ka thuoi suok cheu a, in pi le puhai kuoma inkhâm meua pêk ka tiem rama chun ka thuoi lût cheu a. Ka hril tah ang khan, in kuoma ka thuthlung kha bawse naw top ka tih. 2 Hi rama umhai leh hin thuthlung siem lo ding le an maichâmhai sukchimpèk vong dingin thu ka pêk cheu a, sienkhom ka thupêk in zawm nawh. Ieng leia hieng thil hi in thaw am a na? 3 Chuleiin, tuta inthok hin anni chu hnot suokpèk ta nawng ka ti cheu. In nàka suntu hling hung nîng an ta, an pathienhai chu in ta dingin châng nîng an tih" a ta. 4 LALPA vântirkoin chuong thuhai a hril zo chun Israel mipui chu inring takin an tap a. 5 Chu hmun hminga chun 'Bokim'b an inbûk a. Chu hmuna chun LALPA kuomah inthawina an inhlàn a. 6 Josuan mipuihai an tìntir hnung chun Israel thlahai chu mi tin mani chanpuol seng ram chu hluo dingin an fe dar a. 7 Josua dam sûng po le ama nèka dam sawt upahai, Israelhai ta dinga iengkim LALPAN a thawpêk dàn hretuhai an la dam sûng po chun mipuihai chun LALPA rong an bawl hlak a. 8 Nuna naupa Josua, LALPA siehlaw chu kum za le kum sawm miin a thi a. 9 Gaza tlâng hmar tieng pang Efraim tlâng rama chun ama chanpuol ramri sûng Timnat-Heres khuoah an phûm a. 10 Chuong suonhai po po khom chu an thlatuhai kuomah an fe zo ta a; chuonghai hnunga chun LALPA hre lo le Israelhai ta dinga a thilthawhai hre bok lo suon dang an hung um a. 11 Israel thlahai chun LALPA mithmuah thil suol an thaw a, Baal rong chu an bawl el ta a. 12 LALPA, an thlatuhai Pathien, Aigupta rama inthoka thuoi suoktu kha an nghatsan a, pathien dang, an kawl le kienga umhai pathien laia mi chu an zui a, chibai an bûk a. 13 LALPA chu nghatsan a, Baal le Astoretc hai rong an bawl leiin Pathien lungsenna chu an chok tho a. 14 Chuongchun, LALPA chu Israelhai chungah a lungsen a, anni rok hlaktu kuta chun pe suokin, an kawl le kienga um, an hmèlmahai kuoma chun a zor a, an hmèlmahai chu an ngam thei ta naw a. 15 LALPAN inkhâm meua a lo hril tah angin, râl do dinga an fèna taphotah LALPA kut chu anni chunga chun a se tieng zawngin a tla pei a, namen loin an beidong a. 16 Chuongchun, LALPAN rorêltuhai a ruotpêk a, chuonghai chun roktuhai kuta inthokin an hung san suok a. 17 Chuong sa khom chun rorèltuhai thu chu zawm nuom loin, pathien danghai lakah an uire a, anni chu an biek lem a, an thlatuhaiin LALPA thupêk an pom le zawm hlak ang khan thaw loin inrang takin an pètsan tah a nih. 18 An ta dinga rorêltu LALPAN a siempêk taphot kuoma chun LALPA chu a um a, nêksawrtu le sukrimsituhai hnuoia an inrûm pha leh LALPAN a lunginsiet tawl tlat si leiin, rorêltu dam sûng po chun an hmèlmahai kuta inthokin a san suok pei hlak a. 19 Amiruokchu, rorèltu a thi pha leh mipui an hnungtol nawk a, an thlatuhai nèka nasa lemin pathien danghai rong bawlin chibai an bûk a, an thil suol thaw chîng le lulul chu an ma chuong bok nawh. 20 Chuleiin, LALPA lung chu Israelhai chungah a sen ta hle a, "Hi hnamhai hin an thlatuhai kuoma thu ka pêk, ka thuthlung chu an bawsiet a, ka thu khom an ngâithlàk ta naw leiin, 21 keikhomin tuta inthok chu Josua thi hmaa ka hnot suok tah hnamhai ti bâk kha chu hnot suokpêk ta naw nîng. 22 Hieng Israel thlahai hin an thlàtuhaiin LALPA dàn an hraw ang khan an hraw ve ding le ding naw fiena dingin anni chu hmang tawl lem ka tih" a ta. 23 Chuleiin LALPAN chuong hnamhai chu Josua kutah pea hnot suok vong nghal el loin, a ramah a la'n umtir zing tawl a nih.

Judges 3

1 Kanan rama um Israelhai laia mi râl la do ngai dèr lohai fiena dingin LALPAN hnam thenkhat a rama chun a'n umtir a. 2 Israel thla suon thar, tuta hmaa indo dàn ieng khom la hre ngai dèr lohaiin râl bei dàn an inchûk theina ding chaua anni chu a'n umtir an nih. 3 Chuonghai chu Filistinhai lal panga hai, Kanan mihai po po, Sidon mi hai le Lebanon tlâng ram Baal-Hermon tlânga inthoka Hamat kawn chena inzar Hiv mihai chu an nih. 4 LALPAN Mosie hmanga an thlàtuhai kuoma thu a lo pèkhai kha Israelhaiin an zawm ding le ding naw hrietna ding le fiena dinga a'n umtir a nih. 5 Israel thlahai chu Hit mihai, Amor mihai, Periz mihai, Hiv mihai le Jebu mihai lai chun an um a. 6 Chuongchun, an innei pol a, an pathienhai rong an bawl a. 7 Israel thlahai chun LALPA mithmuah thil suol an thaw a, LALPA an Pathien chu an theinghil a, Baal le Astoret hai rong an bawl a. 8 Chuongchun, LALPA chu Israelhai chungah a lungsen ta hle a, anni chu Mesopotamia hmar thlang tieng ram lal Kushan-Risathaim kutah a zor a, a hnuoia chun kum riet an um a. 9 Israel thlahai chun LALPA an ko charin LALPA chun Israel thlahai chu sandamtu a hung siempêk a, chu mi chun a hung sandam a, ama chu Kaleb sangpa Kenaz naupa Othniel a nih. 10 LALPA thlarau chu a chungah a hung tlung a, Israelhai ro a rêlpêk a, râl bei dingin a'n thok suok a, LALPAN Mesopotamia ram lal Kusan-Rishathaim chu a kutah a pèk a, a hne a. 11 Chuongchun, ram chu Othniel a thi chenin kum sawmli sùng a ralmuong tah a nih. 12 Israel thlahai chun LALPA mithmuah thil suol an thaw nawk a. Chuonga thil suol an thaw lei chun LALPAN Moab lal Eglon chu anni nèka hrâtin a sie a. 13 Ama chun Amon mihai le Amalek mihai chu a'n pun khawm a, Israel thlahai chu an bei a, Tûm khawpuid chu an hluo a. 14 Israelhai chu Moab lal Eglon thu hnuoiah kum sawm le kum riet an um a. 15 Israel thlahai chun LALPA an ko nawk a, sandamtu dingin LALPAN Benjamin hnama mi Gera naupa Ehud, voikawlong chu a siempèk a, ama chu Israel thlahai chun Moab lal Eglon kuoma pêk ding sie an inchawitir a. 16 Ehud chun kawlhnâm ngei ton, tong chen vela sei a sut a, chu chu a malpui chang tieng puon hnuoiah a taivon sa a. 17 Moab lal Eglon chu sie a pêk a, ama chu mi thau tak el a nih. 18 Sie a pêk zo chun sie chawituhai leh an kîr nawk nghal a. 19 Sienkhom, ama ruok chu Gilgal khaw bula pathien lem lung an kerna hmuna inthok chun a kîr nawk a, "E khai, lalpa, thurûk hril ding che ka nei a nih" a ta. Lal chun, "To thiep ro khai" a ta, a bula ngîr po po chun an suoksan ta vong a. 20 Nipui chànga a chawl hadamna pindan chunghnunga ama khât chaua thung lal chu a va pan hnai a, "Pathienin i kuoma hril ding thu a mi'n cha a nih" a ta, lal chu a thungnaa inthok chun a hung tho a. 21 Ehud chun a kut voi tiengin a malpui chang tienga a kawlhnâm pai chu a phawi a, lal phinga chun a sun rak a. 22 A chemha chen a tlum a, a kawlhnâm chu a thau chun a hnaw ping a, kawlhnâm chu a phawi suok naw leiin a hnung tieng chen a dawt tlang a. 23 Ehud chu a suok a, pindan kot chu a khâr a, a kal tlat a. 24 A suok hnung chun a siehlawhai chu an hung a, pindan chu a lo inkal leiin thlan sukdeina pindanah lal chu a van thier ni dingin an ring a. 25 Sawt tak an nghâk hnung khoma pindan kotkhâr chu a hong ta si naw leiin chabi an lâk a, an hong a, an lalpa chu tuongah thi sain a lo inhlum dèr el a. 26 Chuonga an nghâk sùng chun Ehud chu a lo tlân hmang a, lung milem an serna hmun chu a pêl a, Seira-ah a tlân lût a. 27 Chu hmun a tlung phing leh, Efraim tlâng rama chun a tawtawrawt a mût a, Israel thlahai chu tlânga inthokin a kuomah an hung thla a, aman hma a thuoi a. 28 "Mi zui ro, in hmèlma Moab mihai chu LALPAN in kutah a pêk an tah" a ta, chuongchun an zui thlàk a, Moab panna Jordan kai chu an lâk vong a, tu khom an inkâitir phal nawh. 29 Chu ni chun Moab mi, mi hrât le awmkhau ngot khom sîngkhat vel an that a, tu khom a tlân suok hrim an um nawh. 30 Chu nia inthok chun Moab-hai chu Israelhai lakah an tlawm ta a, a ram khom kum sawmriet sung ralmuongin a um tah a nih. 31 Ehud zoa chun Anat naupa Samgar a hung inlang a, ama chun bawng hawlna thîr zum ringotin Filisitin mi zaruk a sun hlum a. Ama khom hi Israelhai san suoktu a nih.

Judges 4

1 Ehud thi hnungin Israel thlahai chun LALPA mithmuah thil suol an thaw nawk ta a. 2 Chuongchun, LALPA chun Hazora Kanan lal Jabin kutah anni chu a zor a. A sipai kawmandar chu Sisera a na, ama chu Haroset Hagoyim-a um a nih. 3 Ama chun thîr tawlailir zakuo a nei a, kum sawmhni sûng top Israel thlahai chu rawng taka a nêksawr leiin thangpuitu dingin LALPA an ko a. 4 Chuong laia Israelhai thuoitu chu Lapidot nuhmei, zawlnei Debora a nih. 5 Ama chun Rama le Bethel khaw inkàra Debora Tûm thing hmuna chun rorêlna hmun a'n din a, chu taka chun Israel thlahai chu a kuomah an ro inrêltir dingin an fe hlak a. 6 Ama chun Kedes-Naftali rama inthokin Abinoam naupa Barak chu a'n cha a, "LALPA, Israelhai Pathienin, 'Naftali thlahai le Zebulun thlahai laia mi sîng khat thuoi la, Tabor tlângah hang fe rawh. 7 Kison vadungah Jabin sipai kawmandar Sisera chu a tawlailir le a rawihai leh hung tir lût ka tih; chun anni chu ka pêk che' a ti a nih"tiin. 8 Barak chun a kuomah, "I mi fepui ding a ni chun fèng ka ta, i mi fepui naw ding a ni ruok chun fe naw nîng" a ta. 9 Debora chun, "A tha annawm, fepui mol ka ti che. Amiruokchu, i thilthaw vel dàn lei hin, hming thatna chu chang naw ti nih, LALPA chun Sisera chu nuhmei kutah a pêk lem ding a ni si a" a ta. Chuongchun, Debora chu Barak leh Kedesh-ah a fe a. 10 Chu taka chun Zebulun thlahai le Naftali thlahai chu an incha khawm a, mi sîng khat thuoiin Barak chu a'n thok suok a, Debora khom a fe ve a. 11 Chun, Ken mi Heber chu Ken mi bok, Mosie tarpupa Hobab thlahai laia inthokin a lo um hrang a, Kedes khaw kawl Zananima saisuo thing bula chun puon in a va kei a. 12 Abinoama naupa Barak chu Tabor tlângah a kâi ti Sisera an hril chun, 13 a thîr tawlailir zakuo le a kuoma um, Haroset Hagoyim-a um a sipaihai popo chu Kison vadunga chun a thuoi khawm a. 14 Chu phing leh Debora chun Barak kuomah, "Khai leh, inthok suok ta raw leh. Voisun hi LALPAN i kuta Sisera a pêk ni che a ni hi. I hmathuoitu chu LALPA a ni naw am a ni?" a ta. Chuongchun, Barak chu Tabor tlânga inthok chun a tum thla a, mi sîng khatin an zui a. 15 Barakin hma a nor phei lai chun Sisera tawlailirhai le a sipaihai po po chu LALPAN kawlhnâmin a tukdol vong a, Sisera chu a tawlailira inthokin a tum a, kein a tlân hmang ta dai a. 16 Barak chun tawlailirhai le sipaihai chu Jentailhai ram Haroset Hagoyim chen a hnot a, Sisera sipai po po chu kawlhnâmin a that a, dama hlà pakhat khom a nei nawh. 17 Sisera ruok chu Ken mi, Heber nuhmei Jael puon ina chun a tlân lût a. Hazor lal Jabin le Ken mi Heber sûnghai chu inrem zinga um an nih. 18 Jael chu Sisera hmuok dingin a hung suok a, a kuomah, "Ka lalpa, hung lût rawh, ti der naw rawh" a ta. Chuongchun, puon in sûnga chun a zui lût a, ama chun puon a'n khum a. 19 Sisera chun, "Lunginsiet takin tui mi hung pe raw khai, ka dang a châr êm el" a ta. Ama chun bawngnene siena bawm a hong a, a'n dawntir a, puon an khum nawk a. 20 Sisera chun, "Puon in kotkhàra khan ngîr la, 'Hi taka hin mi an um am?' tia an hung indon che chun, 'An um nawh' lo ti pei rawh" a ta. 21 Nisienlakhom, Heber nuhmei Jael chun puon in thlungna hèmkil hmol zum le tubo chu a lâk a, damtein a pan phei a, sawl êm êma a in lai chu a bekah hèmkil zum chun a hem tlang a, hnuoiah a hem bùr a, a thi ta a. 22 Barak chun Sisera chu a hung hnot pei a, lo hmuok dingin Jael chu a va suok a, a kuomah, "Hung raw khai, i mi zawngpa chu lo inhmutir ka ti che" a ta. Chuongchun a zui lût a, Sisera chu a bekah hèmkil inbûr ngura a thi saa lo zâl chu a hmu a. 23 Chu ni chun Israel thlahai chun Kanan lal Jabin chungah hnena an chang a. 24 Kanan lal Jabin chu an suksiet dèr hma khat chu Israelhai chun thâ an inthla hrim hrim nawh.

Judges 5

1 Chuongchun, chu ni chun Debora le Abinoam naupa Barak chun hi hla hi an sak a: 2 "LALPA chu inpâkin um raw se!Israel hotuhaiin hma an thuoi a, Inhawk takin mipuiin an zui. 3 "Lalhai, lo ngaithla unla, Hotuhai, in na lo sit ro; LALPA chu zâiin chawi ka ta, LALPA, Israel Pathien kuomah, Rimawi ka rem ding a nih. 4 "Aw LALPA, Seir tlâng pêl a, Edoma inthok i hung suok ni khan, Hnuoi chu inthinin, vân a tè a, Sumin ruo an sûrtir chur chur. 5 Sinaia khan LALPA hmaah, Tlânghai chu an inthin dur dur, LALPA, Israel Pathien hmaah. 6 "Anat naupa Samgar dam laiin, Jael dam lai ni ngeia chun, Lamlienhai chu rausana umin, Khuolzinhan lam kawi an hraw. 7 Israel rama khuohai chu, Hluo loin an ram zo a, An ram zo, an ram zo ie, Kei Debora ka chêt hma chun, Kei Israel ram nu ngei hi, Ka hung chêt ve hmà khat chu. 8 Pathien dang an biek charin, Kotsuoah râlin an hung nang. Israel mi sâng sawmli lai, Fei le phaw chawi an um nawh. 9 Israel thuoiituhai ka lainat ngei, Tlawmngaia zuituhai khom chu:LALPA chu inpâkin um raw se. 10 "Sabengtung vâr chunga chuong, Thungna innema inthunghai le, Nangni kea lawn pawl khomin, 11 Thal kâptuhai ri hriet phâk lona, Tuikhura an zâihla sak ri chu, In rêngin lo ngaithla ro khai:LALPA thil fel thaw thu inzawtin, Israel rama LALPA mi huoisenhan, Hnena an chang thu an hril a ni chu!"Chuongchun LALPA mipuihai chu, Kotsuoah inhawr khawmin, 12 "Debora har rawh, har rawh!Zâi hla remin hma thuoi rawh; Aw nang Barak, Abinoam naupa, Hung thoin hma hung thuoi la, Manhai chu salah thuoi rawh"Tiin an khêk dur dur a. 13 "Mi dang la um pohai chu, An thuoituhai leh an hung thla, Mi hrât tak mi beipui dingin, LALPA mihai an hung chim thla. 14 Amalek zungzàmhai chu, Efraim-a inthokin an hung a, Benjamin mihan an hung zui. Makir-a inthokin hotuhai an hung, Zebulun-a inthokin ziektuhai. 15 Isakar hotuhan Debora an zui, Isakar a hung, Barak khom a hung, Varuomah an zui thla pei. "Reuben khawzawla ruok chu, Lung awp inkâiin an um. 16 Ieng dinga ramriekhai lai, Ran chingtuhai rawl ringot, Ngaithla dinga in um am?A nih, Reuben biela mihai chu, Lungawp inkâiin an um. 17 "Jordan râl Gilead bielah, Gad hnamhai an um tok tok; Dan-hai hlakin long an nghâk a, An riebûk tuipui kamah, Aser-hai an inthung tok tok. 18 "Zebulun hnamhai ruok chun, Thi huomin thang an lâk a, Naftali-hai khomin thi an huom, An chêngna phul hmun sàngah. 19 "Lalhai an hung, an indopui, Tanak hmun Megido tuikhurah, Kanan lalhai leh an indo, Sienkhom tangka le râllâk, Ieng khom hawn kîr an nei nawh. 20 Vâna arasihai chenin, An lampuia inthok chun, Sisera chu an hung do a. 21 Vadung hlun Kison ngei chun, Anni chu a lèn hmang tah. Aw ka thlarau, hma tieng panin, Hrât takin kal chawi pei rawh! 22 Chu zoah sakor tlàn ri chu, A thûmin a thûm dur dur a, Sakor hrâthai an tlân puot puot. 23 Vântirko chun hieng hin a hril:Meroze chu tongsie inphur ro, A sûnga chènghai po po khom, LALPA chu thangpui lo a, LALPAN mi hrât a beinaah, A hung inthok nuom naw leiin. 24 "Puon ina chêng nu po po lai, Ken mi Heber nuhmei Jael chu, Nu vângnei chungchuong a nih. 25 Sisera'n tui a hni a, Bawngnene a lo pêk a, Mi tha no ngei ela chun, Bawngnene khal a lo pêk. 26 Puon in hèmkil a lâk a, Chang tieng tubo a chawi a, Sisera lu a hem hawp a, A bekah a hem tlang pùr. 27 A ke bulah a bok ruop a, Chu chun thiin an hlum ruou. 28 "A nu'n zawngdaikal awngah, Sisera hung kîr ding a lo thlîr a, 'Iem a ta a tawlailir a hung kîr intak?Ieng leia a muongchang am a na?'Tiin a'n don vel ruoi a. 29 Anni laia nu var tak chun, Ama zawna siem bok chu, Hril nonin a lo don a: 30 'Râllâk sum insem khop ding, Nunghâk pahni bêk hawn ding, Sisera râllâk ding puon ze mawi, Rong chi hrang hranga chei, Rîng bât ding puon zep mawi, An hmu naw lei amani ding maw?' 31 "Chuong ang tak chun aw LALPA, I hmèlma po po chu ram raw se!Nangma hmangaituhai ruok chu, Ropui taka hung suok hlak, Zîng nisa angin var raw se!"tiin. Chuongchun, a ram chu kum sawmli sûng râlmuongin a um a.

Judges 6

1 Chuongchun, Israel thlahai chun LALPA mithmuah thil suol an lo thaw nawk ta a, LALPA chun Midianhai kutah kum sari a pêk suok a. 2 Midianhaiin an suknomnat nasa êm leiin Israelhai chun tlâng kak kâra hai, pûka hai le kula hai chun hmun an khuor a. 3 Israelhaiin thlai an chìng charin Midianhai amanih, Amalekhai amanih le sak tieng mi tuhai amaniin an hung rûn zie a. 4 An rama chun an inkul a, Gaza chenin an thlaihai an suksiet a, Israel rama thil to rêng rêng le an beram hai, bawng hai le sabengtung hai chenin hlà hrim an nei nawh. 5 An ran ruol le puon inhai leh khàu hon ang elin an hung phul a, anni le an sanghawngseihai chu tiem sèng ruol khom an ni nawh; a ram chu sukram dingin an hung rûn hlak a nih. 6 Chuonga Midianhaiin an sukrethei êm leiin Israelhai chun thangpuitu dingin LALPA an ko a. 7 Midianhai leia Israelhaiin LALPA an ko nawk chun an kuomah zawlnei a hung tir a. 8 Zawlnei chun, "LALPA, Israelhai Pathien chun hieng hin a tih: 'Aigupta bawia inthokin ka thuoi suok cheu a, 9 Aiguptahai kuta inthok hnûk thlain, a nêksawrtu cheu po po kuta inthoka san suokin, anni chu in hmaah ka hnot suok a, an ram ka pêk cheu a. 10 'Kei hi LALPA in Pathien chu ka na, hieng in umna ram neitu Amor mihai pathien hi be naw ro' ka ti a, sienkhom ka thu in pom si nawh' a tih" tiin a hril a. 11 Chun, LALPA vântirko chu Ofra khuoah a fe a, Abiezar mi, Joasa saisuo thing bula chun a thung a, Joasa naupa Gideon chun Midianhai hmu thei lo dingin grep sawrna khura chun bu a lo chìl a. 12 LALPA vântirko chu a kuomah a hung inlàr a, "Nang mi hrât le huoisen, LALPA chu i kuomah a um" a ta. 13 Gideon chun, "Aw pu, LALPA kan kuomah a um si chun, iengtiziea hienga kan chunga thil a tlung si am a na? Kan thlatuhai khan LALPAN Aiguptaa inthokin a mi thuoi suok thu an hril chânga a thil mak thaw an mi hril zozàihai kha khaw lam iem a chang zo an ta a? Tu hin chu LALPAN a mi nghatsan dèr ta a, Midianhai kutah a mi pêk an ta hi" a ta. 14 LALPA chu ama tieng a hung ngha a, a kuomah, "I hrâtna hin fe la, Israelhai chu Midianhai kuta inthokin va san suok rawh. Ka tir che an naw maw?" a ta. 15 Gideon chun, "Ieng tin am Israelhai chu sandam thei telul ka ta? Kan sûngkuo hi Manase thlahai lai khom a che thei naw tak kan ni a, kei hlak hi ka unauhai laia a chîn tak ka ni nawk bok si" a ta. 16 LALPA chun, "I kuomah ka um ding annawm; Midianhai chu a ruolin hem thlu vong i tih" a ta. 17 Gideon chun, "I mit ka tlung ta rau rau si hin chu, a mi betu hi nang ngei i nih ti hrietna ding inchikna mi pe rawh. 18 I hmaa ka thil inhlân ding chawia ka hung kîr hma khat chu hi taka hin lunginsiet takin mi lo la umpêk zing rawh" a ta. LALPA chun, "I hung kîr nawk hma khat chu lo nghâk ka ti che" a ta. 19 Gideon chu inah a lût a, kèl te le beiphit kilogram sawm, chol thang loin a hung buotsai a. A sa chu leipupah a sie a, sa tui hâng chu bela hung chawiin, saisuo thing hnuoia chun a hung inhlàn a. 20 Vântirko chun a kuomah, "Sa le chol thang lo bei kha la la, hi lung chunga hin sie la, a tui hâng ruok kha chu bun thla rawh" a ta. 21 Chuong ang chun a thaw a. LALPA vântirko chun a hmol chawi lai hmorin sa le chol thang lo bei chu a hang tawk a, lunga inthok chun mei a hung suok a, sa le chol thang lo bei chu a kâng ral ta vong a. Chun, LALPA vântirko chu a bo ta dai a. 22 LALPA vântirko a nih ti Gideon-in a hung hriet chun, "Aw, LALPA Chunghnungtak, hlak chu hmaisana ngei LALPA vântirko ka hmu a lo ni zinga!" a ta. 23 LALPA chun a kuomah, "Thlamuong takin um rawh. Ti naw rawh; thi naw ti nih" a ta. 24 Chu hmuna chun Gideon-in LALPA ta dingin maichâm a siem a, Jehova Shalom a'n bûk a, chu chu tu chen hin Abiezar mihai khuo Ofra-ah a la um zing. 25 Chu zân vèk chun LALPAN a kuomah, "I pa bawngchal le bawngchal dang kum sari mi chu kei la, i pa Baal maichâm sukchim vong la, a sîra Asera lem thing hi phûr thlu bok rawh. 26 Hi hmun sânga hin LALPA i Pathien ta dingin maichâm nghet tak indin la, Asera lem thing i phûr thlùk kha hmangin bawngchal pahnina chu pumraw thilhlânah inhlàn rawh" a ta. 27 Gideon chun a siehlaw sawm thuoiin LALPAN a hril ang tak chun a thaw a. A sûnghai le a khaw mihai chu a ti leiin sûna nèkin zânah a thaw lem a. 28 A khaw mihai zîng tieng an hung tho chun, Baal maichâm chu sukchimin a lo um a, a bula Asera lem thing khom phûr thlûkin a um bok a, maichâm bawl thar hlol chunga chun bawngchal pahnina chu inhlànin an hmu a. 29 "Tu thaw tak am an ta ding maw?" an inti sup sup a. Fîmkhur taka an hang dap vel hnung chun, "Joas naupa Gideon thaw a lo ni zing annawm!" an ti ta a. 30 A khaw mihai chun Joas kuomah, "I naupa hung thuoi suok rawh. Baal maichâm a sukchim a, a bula Asera lem thing a phûr thlûk leiin a thi ngei ding a nih" an ta. 31 Joas chun ama hung khingtuhai po po kuoma chun, "Baal chu in tan ding a ni maw? Ama chu in hum tum a ni? Tu khom a tantu taphot chu zîng tieng la la hin sukhlum ding a nih. Baal chu pathien a ni takzet chun, a maichâm sukchimtu chu aman khing raw se" a ta. 32 'Baal-in khing raw se' a ti leiin chu ni chun Gideon hming lemah 'Jerub-Baal' tiin an inbûk a, Baal maichâm a suksiet leiin. 33 Chun, Midian hai, Amalek hai le khaw sak tieng mihai chu thangruolin Jordan an hung kàn a, Jezreel phairuomah an inkul a. 34 LALPA Thlarau chu Gideon chungah a hung tlung a, a hnung zuitu ding Abiezar mihai ko khawmna dingin tawtawrawt a hang mût a. 35 Manase-hai kuomah mi an intlàntir a, anni khom chun an hung pan khawm a. Aser-hai, Zebulun-hai le Naftali-hai khom a'n cha khawm a, anni khomin an hung fin a. 36 Gideon chun Pathien kuomah, "I hril tah anga ka kuta Israelhai hi i sandam ding a ni chun, 37 ngai ta, hrizawlah beram hmul sieng ka ta, beram hmula chun daidaw a lo um a, a vela hnuoi po po chu a hul vong si chun, i hril angin, keima kut hmangin Israelhai hi i sandam ding a nih ti hre thei ka tih" a ta. 38 Chuong ang chun a lo um ngei a, zîngkàr inhma takin a tho a, beram hmul a hang sawr chun tui no khat zet a sawr suok el ta a. 39 Chun, Gideon chun Pathien kuomah, "Ka chungah lungsen naw rawh. Voi khat bêk hang hril nawk ka tih. Lunginsiet takin voi khat chau bèk beram hmulin mi la'n fietir nawk rawh. Tuta tum hin chu beram hmul chauh hul sien, hnuoi chu daidawin hu dup thung raw se" a ta. 40 Chuong ang tak chun Pathienin chu zân chun a hung thaw a, beram hmul chauh chu a lo hul a, hnuoi chung chu daidawin a hu dup ta thung a.

Judges 7

1 Zîngkàr chun Jerub-Baal (chu chu Gideon) le a mihai chu Harod tuikhur bula chun an inkul a. Midianhai chu an umnaa inthoka hmar tieng ruom More tlâng thuta chun an inkul ve a. 2 LALPA chun Gideon kuomah, "I kuta Midianhai ka pêk ding che a ni si chun mi i hau taluo. Chuong naw chun Israelhaiin, 'Keini kut ngeia insandam kan nih' mi tikhum hlauh rawi an tih. 3 Chuleiin, mipuihai hriet ngeiah, 'Tu khom ti le inthin taphot chu Gilead tlânga inthok hin kîr nawk raw hai se' tiin puong rawh" a ta. Chuongchun, mi sîng hni le sâng hnih an kîr a, sîng khat an la um a. 4 Sienkhom, LALPA chun Gideon kuomah, "Mi an la tam taluo rop. Vadungah thuoi thla vong la, keiin thlierpêk ka ti che. Keiin, i kuoma hung ding ka ti po hung an ta, hung lo ding ka ti po kîr nawk raw se" a ta. 5 Gideon chun a mihai chu vadungah a thuoi thlâk a. Chu taka chun LALPAN, ui anga leia tui a lieka liek taphot chu sie hran la; kûna thingthia tui dît taphot hai chu sie hrang bok rawh" a ta. 6 Kut phaa mi tui a lieka liek mi zathum an um a, mi dang po chu kûna thingthia tui dît vong an nih. 7 Chuongchun, LALPAN Gideon kuomah, "Mi zathum, kuta tui luoka liekhai po kha hmangin ka sandam ding cheu a na, Midianhai hi i kutah ka pêk ding a nih. Mi dang po po chu an in tieng inkîrtir nawk vong rawh" a ta. 8 Gideon chun Israel mi zathum ti chauh naw chu an in tieng a tirkîr vong a, tawtawrawt le fâk ding an chawihai ruok chu mi zathum chun an kol a. Midianhai chu an hnuoi ruoma chun an inkul a. 9 Chu zân chun LALPAN Gideon kuomah, "Tho la, an inkulna hmunah tum thla rawh, anni chu i kutah ka pêk ding a nih. 10 Amiruokchu, zu fe i ti chun i siehlaw Pura le hin an inkulnaa chun zu fe phot unla; 11 chuongchun an thu hril hrieng i ta, chu chun i kut sukhrât a ta, an inkulna chu zu bei ngam nghal i tih" a ta. Chuongchun, a siehlaw Pura le chun an inkulna tontira râl vênghai umna chu an zuk tlung a. 12 Midian hai, Amalek hai le khaw sak mihai chu ruoma chun khau intam ang topin an lo um khup el a, an sanghawngsei ringot khom tiem sèng lo tuipui kama tieu anga tam an nih. 13 Gideon a zuk tlung lai chun mi pakhat hin a ruolpa chu a mang a lo hril a: "Ngai ta, mang ka lo nei a, barli bei tlang hi Midianhai kula hin a hung inhlum thla a, puon inah a'n hlum lût a, a del chim a, a del pêr vong el a" a ta. 14 A ruolpa chun, "Chu chu Israel mi Joas naupa Gideon kawlhnâm naw chu thil dang ni naw nih. Pathienin Midianhai le an sipaihai po po hi a kutah a pêk tah a ni chuh" a ta. 15 Mang le a hrilfiena thu Gideon-in a hriet chun Pathien a chawibiek a. Israelhai inkulna hmun tieng chun a kîr nawk a, "Tho ro le khai, LALPAN Midian sipaihai chu in kutah a pêk tah a nih" a ta. 16 Chuongchun, mi za thum chu pawl thumin a siem a, an rêng chun tawtawrawt le bêl ruok, a sûnga meiser sie sa chu a pêk seng a. 17 Ama chun an kuomah, "Mi en unla, ka thaw ang ang hin in thaw ve pei ding a nih. Kul hmatawng tak ka tlung pha leh, ka thaw ang angin hung thaw seng ro. 18 Kei le ka kuoma um po poin tawtawrawt kan mût pha leh, kil tina inthok khomin tawtawrawt lo mût ve unla, 'LALPA ta ding le Gideon ta dingin' tiin khêk seng ro" a ta. 19 Gideon le a kuoma um mi zahai chun zân ril hma thet, diuti an inthlàk zo charin an kul tlâng chu an tlung a, an tawtawrawt chu an mût a, an bel chawi chu an vuok koi a. 20 An pawl danghai khom chun tawtawrawt an mût a, an bèl chawi chu an vuok koi a, voi tiengin meiser an chawi a, chang tiengin tawtawrawt an chawi a, "LALPA le Gideon kawlhnâm" tiin an khèk dur dur a. 21 Hmêlmahai bûk huol tuok chun mani hmun sengah an ngîr a, Midianhai chu thlabàra khêkin an tlànsie hum hum a. 22 Tawtawrawt za thum chu an hang mût tuor tuor a, kul sûnga umhai chu LALPAN anni le anni kawlhnâmin a'n sattir a. Sipaihai chu Zerera tieng Bet-Sita chena tlân an um a, Tabat bula Abel Mehola ramri chen tlân tlung an um bok a. 23 Israel thlâ Naftali hai, Asera hai le Manase hai chu an biel senga inthok chun Midianhai hnot dingin an hung pung khawm a. 24 Gideon chun Efraim tlâng ram po poah, "Hung thla unla, Midianhai hi hung bei unla, Jordan vadung le Beth-bara va dung an kàn ding lo inchàn ro" tiin thu a thon a, mi a'n tlântir a. Chuongchun, Efraimhai chu an hung pung khawm a, Bet-Bara chenin Jordan vadung suka an lo inchân a. 25 Midian lal pahnih, Oreb le Zeeb chu an man a, Oreb chu Oreb lung hmunah an that a, Zeeb chu Zeeb grèp sawrna khurah an that bok a. Midianhai chu an hnot a, Oreb le Zeeb lu an lâk chu Jordan vadung râla um Gideon kuoma chun an hung chawi a.

Judges 8

1 Chun, Efraim-hai chun Gideon kuomah, "Iengtiziea hienga hi i mi thaw am a na? Midianhai i do ding khan ieng dinga i mi ko ve naw am a na?" an ta, an suosal nasa hle a. 2 Ama chun, "Nangni thilthaw le hrilkhi chun ka thilthaw ve hi ieng khom a ni nawh. Abiezar-hai grèp hmin lo lai nèkin Efraim-hai grèp lo hmai chu a tha lem dai an naw maw? 3 LALPA chun Midianhai lal Oreb le Zeeb hai chu in kutah a'n hlàn a. Nangni leh iem tekhi tlâk ka nih?" a ta. Chu phing leh an lungsen chu a rè tah a. 4 Gideon le a kuoma mi za thumhai chun Jordan vadung an zuk tlung a, an kàn a, chàu ta hle hai sienkhom Midianhai chu an hnot pei a. 5 Sukot khuoa mihai kuoma chun, "Ka sipaihai lunginsiet takin beipèr pe ro khai. An chau ta hlea chu Midianhai lal Zeba le Zalmuna hai chu ka la hnotpui pei tum si a" a ta. 6 Sukota khaw hotuhai ruok chun, "Zeba le Zalmuna hai chu i kuta um an ni ta'm a ni? Ieng leiin am i sipaihai chu bei kan pêk ding?" an ta. 7 Gideon chun, "Aw leh, chu lei tak chun, LALPAN Zeba le Zalmuna hai ka kuta a mi pêk pha chu thlalèr hling le dai hlinghai chun in taksa la sun thlèr neng nung ka tih" a ta. 8 Chu taka inthok chun Peniel-ah a hang fe a, a hni ngai bok chu a hang hni a, sienkhom Sukot mihai ang bokin an lo don a. 9 Chuongchun, Penielhai kuoma chun, "Hnena changa ka hung kîr nawk pha leh hi kul hi hung sukchim ka tih" tiin a hril bok a. 10 Zeba le Zalmuna chu Karkor-ah an sipai sîngkhat le sângnga leh an inkul a, chuonghai chu khaw sak sipai hunghai laia la dam um sun chu an nih, kawlhnâm chawi mi nuoi khat le sîng hni chu an thi ta si a. 11 Noba le Jogbeha sak tienga um ran vêngtuhai hraw hlak lam hluia chun fein, Gideon chun inring lawk dêr loa lo um sipaihai chu a hang bei thut a. 12 Midianhai lal pahnih, Zeba le Zalmuna hai chu an tlànsie a, sienkhom a hnot a, a man ve ve a, an sipaihai po po chu a tukdol vong a. 13 Joas naupa Gideon chu indonaa inthok chun Heres kawnah a hung kîr thla a. 14 Sukot mi tlangval pakhat chu a man a, thu an don a, Sukot khuoa an hotuhai le upahai hming chu an ziektir vong a, an rêngin sawmsari le pasari an nih. 15 Chun, Sukot mihai kuoma chun a hang fe a, "Zeba le Zalmuna hi en ta u, hieng mihai hi annawm, 'Zeba le Zalmuna hai i kuta um ta ang ziezànga i mi chauhai beipèr kan hang pêkna san ding kan hriet nawh!' tia in mi ti-elna hai kha!" a ta. 16 A khaw upahai chu a man a, Sukot mihai mithmuah thlalèr hling le dai hlingin a hrem a. 17 Chun, Peniel khaw kul chu a sukchim a, a khaw mihai chu a that a. 18 Gideon chun Zeba le Zalmuna kuomah, "Tabor tlânga in mi thathai kha mi ieng ang mi am an ni a?" tiin a'n don a. Anni chun, "Nangma ang char, lal nau hmèl put vong an nih" an ta. 19 Gideon chun, "Khanghai kha ka unauhai, ka nu sula inthoka pieng ve ngei an ni kha. An hringna lo hlà chu ni unla, LALPA hring zing hmingin, in hringna ka hlà ve awm vei leh!" a ta. 20 A nau upa tak Jether kuoma chun, "That tawl raw leh" a ta. Jether chu naupang a la ni leiin a ti a, a kawlhnâm a phawi ngam naw a. 21 Zeba le Zalmuna chun, "Nang kha hung la, mi hung that ta la; pa le pa chu ei inbei ding annawm" an ta. Gideon chu a tho a, Zeba le Zalmuna chu a that a, an sanghawngsei nghawngor khom a lâkpèk a. 22 Chuongchun, mihai chun Gideon kuomah, "Midianhai lakah i mi san suok leiin kan chungah nangin ro rêl ta rawh, i nauhai le i tuhai chen khom rorêltuah um raw hai se" an ta. 23 Gideon ruok chun, "In chungah ro rêl naw nîng, ka nauhai khomin rêl naw ni hai; LALPAN in chungah ro rêl lem a tih" a ta. 24 Gideon bokin an kuomah, "Thil pakhat ruok chu hni cheu ka nuom: mi tinin in râllâk nabe mi pe seng ro" a ta. (Ismael thlahai chun rangkachak nabe be an ching hrim a nih. ) 25 Anni chun, "Pe mol kan ti che" an ta, puon an pha a, mi tinin an râllâk nabe chu an dêng khawm ta seng a. 26 Rangkachak nabe a hni an pêk khawm po po rikzie chu kilogram sawmhni vang a na, chu taka chun Midian lalhaiin incheina man tam an be le or hai, khaidiet an hli hai, puon senduk an silhai, sanghawngsei rînga an inortirhai chu tiem sa lo a nih. 27 Chuong rangkachaka inthok chun Gideon-in thiempu zakuo Efod a siem a, a umna khuo Ofra-ah a sie a, chu chu Israel mihai chun an biek a, an Pathien lakah uire phanain an hmang a, Gideon le a sûngkuohai ta dinga châng a hung inchang ta a. 28 Chuong ang chun Midianhai chu Israel thlahai hmaah tukdolin an um a, an lu an ling nawk thei ta ngai nawh. Gideon dam sûng chun ram chu kum sawm li sûng ralmuongin a um a. 29 Chun, Joas naupa Gideon chu a ina um dingin a kîr nawk a. 30 Nuhmei a hau leiin nau pasal khom sawmsari a nei a. 31 A hmei, Sekema um khomin nau pasal a nei a, a hming chu Abimelek a nih. 32 Joas naupa Gideon chu tar kuna damin a thi a, chuongchun Abiezar mihai khuo Ofra-a chun a pa Joas thlànah an phum ve ta a. 33 Gideon a thi charin Israel thlahai chu Baal lakah uirein, Baal-Berit chu pathienah an biek el ta a. 34 Israel thlahai chun sîr tina um an hmèlmahai po po laka san suoktu LALPA an Pathien chu an hriet zui ta naw a, 35 Israelhai ta dinga theitawp suoa thil tha po po thawtu Jerub-Baal sûngkuohai chunga khom ngilneina an insuo zui chuong tah bok nawh.

Judges 9

1 Jerub-Baal naupa Abimelek chu Sekem khuoa a nu tahai kuomah a fe a, a puhai sûngkuo po po kuomah chun, 2 "Sekem mihai kuomah, 'Jerub-Baal nauhai po po mi sawmsarihaiin in chunga ro an rêl am tha in ti lem an naw leh mi pakhat chauin?' ti indon ro. Kei hi in thisen inzompui ka nih ti hre zing bok ro" a ta. 3 A nu tahai chun Sekem khuoa mi po po hrietah chuong thu chu an hril a, "Ama hi kan unaupa a nih" an ti lei chun Abimelek chu zui nuomna lungril an hung put ta a. 4 Baal-Berit tempula inthokin tangka shekel sawmsari an pêk a, chu chun mi hmangna bo le tawrot tak tak a ruoi a, chuonghai chun a hnung an zui a. 5 Chun, Ofra khuoa a pa inah a fe a, Jerub-Baal nauhai, ama unauhai ngei sawmsari chu lung pakhat chungah a that vong a. An mi tlum tak Jotham ruok chu a lo inbi hmang leiin a him a. 6 Chuongchun, Sekem khuo le Beth Milo khuoa mi po po chu Sekem lungphun bula saisuo thing lien hnuoia chun an hung a, Abimelek chu lalah an siem a. 7 Chu thu Jothamin a lo hriet chun Gerizim tlâng sîpah a hang ngîr a, rawl inring taka khêkin, "Nangni Sekem khuoa mihai, ka thu hi ngaithla unla, Pathienin nangni thu khom ngaithlàng a tih. 8 Voi khat chu lal thlang tumin thing po po an pung khawm a. Oliv thing kuoma chun, 'Kan lalah nang thang rawh' an ta. 9 Oliv thing chun, 'Pathien le mihriemhai ka chawimawi thei phàna tak ka thau hi suoksanin thing chunga lalah ka um ding maw?" a lo tipèk a. 10 Thinghai chun theichang kuomah, 'An leh, nang hung la, kan lalah hung thang el rawh' an ta. 11 Theichang chun, 'Ka ra thlum tak le inhnik tak hi suoksanin thing chunga lalah ka um ding maw?" a lo ti pêk nawk a. 12 Thinghai chun grèp kung kuomah, 'Chuong an leh nang hung la, kan lalah hung thang el rawh' an ta. 13 Grèp kung chun, 'Pathienhai le mihriemhai suklawmtu ka uoiin hi suoksanin thing chunga lalah ka thang ding maw?' a lo tipèk nawk pei a. 14 A tawpah thinghai chun hling kuomah, 'Hung la, kan lalah hung thang el rawh' an ta. 15 Hling chun, 'Lala hriek nàl in mi nuom takzet chun ka buk hnuoia hin hung ro, in ni naw ruok chun ka buk hlinga inthokin mei hung suok a ta, chu chun Lebanon sidar thing chen khom kâng fai vong a tih' a ta. 16 "Tu hin ka thu hi ngaithla ro. Lal dinga Abimelek in thlang khan indik tak le ti tak zeta in thaw a ni? In chunga Gideon-in a thawpêk cheu ang phuin, ama hriet zingna le inzàna dingin a naupa Jerub-Baal le a sûngkuohai chungah ieng am in thaw ve a? 17 Midianhai kuta inthoka san suok ding cheuin ka pa khan a hringna chàn huomin in ta dingin a lo bei a nih ti hre zing ro. 18 Voisun ruok hin chu ka pa sûngkuohai chungah helin, lungphêk pakhat chungah a nau pasal sawmsarihai chu that sienkhom, in unaupa a ni lei ringotin a bawinu naupa Abimelek chu Sekem khaw mihai chunga lalah in lo siem ta hi. 19 Tuta Gideon le a sûngkuohai chunga in thaw hi indik tak le titakzeta in thaw a ni chun, Abimelek chunga hin in lung awi sien, ama khom nangni chungah a lung awi raw se. 20 Chuong chu a ni si naw chun, Abimeleka inthoka mei suok chun Sekem le Bet Milo mihai po po hi kâng hmang sien, chu chu a ni si naw leh Sekem le Bet Milo mihaia inthoka mei suok chun Abimelek chu kâng hmang ve thung raw se" a ta. 21 Jotham chun a unaupa Abimelek chu a ti leiin Beer-ah a tlân a, chu taka chun a um ta zing a. 22 Abimelek chu Israelhai chungah kum thum a'n lal a. 23 Pathienin Abimelek le Sekem khaw mihai inkârah thlarau suol a'n tlâktir a, a khaw mihai chu Abimelek chungah dawhain an che a. 24 Jerub-Baal nauhai sawmsari rawng taka Abimelekin a that leia a chunga le a unauhai that dinga a kut lo sukhrâttu Sekem khaw mihai chungah phuba lâk a ni theina dinga chuong thilhai chu Pathienin a thaw a nih. 25 Chuongchun, ama khingtu Sekem khaw mihai chun mi a hung taphot lambuna lo suomtu dingin tlâng sîpa chun mi an sie a, chu thu chu Abimelek kuomah an hril a. 26 Ebed naupa Gaal chu a unauhai leh an hung inthok a, Sekem khuoah an lût a, Sekem khaw mihai chun an lo inhnempui hle a. 27 Chun, grèp huonah an fe a, an lo a, an chîl a, an pathien tempula chun kût an hmang a. 28 Faa an dawn lai chun Ebed naupa Gaal chun, "Tu am a na Abimelek in ti chu? Sekem khom chu tu am a na, chuonga a hnuoia ei hang kûn el ding chu? Jerub-Baal naupa an naw maw? Zebul hi a kaiza vêngtu a ni naw am a ni? Sekem pa Hamor mihai rong bawl lem ro. Ieng leiin am Abimelek rong chu ei bawl ding? 29 Hieng mihai hi ka thu hnuoia um ni hai sien chu aw, Abimelek kuomah, 'I sipai po po leh hung inthok rawh' ting ka ta, ka lo intlawm vong el ding a ni si a" a ta. 30 A khaw rorêltua um Zebul-in Ebed naupa Gaal thu hril a lo hriet chun a lung a sen hle a. 31 Arûkin Abimelek kuomah mi a tir a, "Ebed naupa Gaal le a unauhai chu Sekemah an hung a, a khaw mihai i laka helpui tumin an infuipor a nih. 32 Chuleiin, i mihai leh a zân a zànin hung unla, phûlah lo inchàn ro. 33 Zîng tieng nisa suok charin khuo chu hung bei unla, Gaal le a mihaiin do ding chea an hung suok pha leh i nuom ang angin lo thaw tawl rawh" tiin thu a'n cha a. 34 Chuongchun, Abimelek le a sipai po po chu a zân a zànin an hung inthok a, pawl lia inthein Sekema chun arûkin thanghmun an khaw a. 35 An lo inchàn rûkna hmuna inthoka Abimelek le a sipaihai an hung suok lai tak chun Ebed naupa Gaal chu a fe suok a, khawpui lûtna kotpuia chun a ngîr a. 36 Gaal-in anni rawi a hmu chun Zebul kuomah, "En ta, tlâng sîpa inthokin mipui an hung chim thla a ni saw" a ta. Zebul chun, "Tlâng hlim saw mihriem i sawn mei mei a ni chu" a ta. 37 Gaal chun, "En hman rawh, ram lailung taka inthokin mipui an hung suok saw! Pawl khat lem chu ai en thiem ruol, saisuo bul tienga inthokin an hung saw" a ta. 38 Zebul chun a kuomah, "Kha hmaa, 'Tu'm a na Abimelek, a rong kan bawl ding chu?' tia i'n hrosa pùng púng kha iem umzie a nei a? Hienghai hi nuizat bûra i hmanghai kha an ni naw am a ni? Suok la, va'n beipui tawl raw leh" a ta. 39 Chuongchun, Gaal chun Sekem mipuihai chu a ko suok a, Abimelek le chun an inbei ta a. 40 Abimelek chun Gaal chu khawpui kot bul chen chun a hung hnot a, mi tam tak hliemin an tlu a. 41 Abimelek chu Aruma khuoah a'n kul a, Zebul chun Gaal le a unauhai chu Sekema inthok chun a hnot suok a. 42 A zînga chun Sekem mipui chu phûlah an fe a, chu thu chu Abimelek an hril a. 43 A mihai a thuoi a, pawl thumin a the a, phûla chun arûkin a'n chântir a. Mipui an hung suok a hmu chun an lo bei a. 44 Abimelek le a pawlhai chu a hmatawnga thangin khawpui lûtna kotpui chen chun an hung hnot a, pawl hni danghai chun phûla hunghai chu an lo bei a, an lo that tawl a. 45 Abimelekin khawpui chu sunnithlàkin a bei a, a lâk a, a sûnga mihai chu a that a, khawpui chu a suksiet vong a, chi a phulkhum a. 46 Sekem kula um po poin chu thu an lo hriet chun El-Berit tempula kulbingah an tlàn lût vong a. 47 Chu taka chun an inbeng khawm ti Abimelekin a lo hriet a. 48 Chuongchun, a mihai le chun Zalmon tlâng a kai a, hrei a chawi a, thing kau a sât thlàk a, a put a. A mihai kuoma chun, "Inhmaw ro, ka thaw ang hin thing kau sât unla, put seng ro" a ta. 49 A mihai po po chun thingkau an sât thlak a, an put seng a, a hnung chu an zui a, kulbing vela chun an thing kau put chu an bum khawm a, an raw a, Sekem kula um po po chu an raw hlum a, nuhmei le pasal an rêngin sâng khat lai an nih. 50 Chu zoah Abimelek chu Thebez khuoah a fe a, a'n huol a, a lâk a. 51 A khaw sûnga chun kulbing a um a, chu taka chun a khaw mi po po, a nuhmei a pasalin, an tlàn lût a, kot an inkal khum a, kulbing sânga chun an lawn kai a. 52 Abimelek chun kulbing sâng chu a hang bei a. 53 Kulbing chu raw dinga a kotpui tieng a pan lai chun nuhmei pakhatin a lu chungah bu rawtna lung a zuk thlàk a, a lu a dèng koi a. 54 Râlthuom chawitu tlangval chu a ko nghal a, "I kawlhnâm kha phawi la, mi sun hlum rawh, 'Nuhmeiin a that a nih' an mi ti nawna dingin" tiin thu a pêk a. Tlangval chun a sun tlang pop a, a thi ta a. 55 Israelhaiin Abimelek a thi tah ti an hmu chun mani in tieng an kîr ta seng a. 56 Abimelekin a unauhai sawmsari thata a pa chungah ritlona a'n suona lakah chuong ang chun Pathienin a thungrul a nih. 57 Sekem mihai khom an rìtlona po po leiin Pathienin a thungrul a, Jerub-Baal naupa Jotham tongsie inphur chu an chungah a hung tla tah a nih.

Judges 10

1 Abimelek hnunga chun Israelhai san suok dingin Isakar hnama mi Dodo naupa Pua, Pua naupa Tola chu a hung suok a, Efraim tlângram Samir khuoah a um a. 2 Kum sawmhni le kum thum Israelhai chungah ro a rêl hnungin a thi a, Samir khuoah an phûm a. 3 Chu hnung chun Gilead mi Jaira a hung suok a, kum sawmhni le kum hni sûng Israel chungah ro a rêl a. 4 Ama chun nau pasal sawm thum, sabengtung tuoi sawm thum chunga chuong hlak mi a nei a, Gilead rama khaw sawm thum chungah ro an rêl a, chuonghai chu tu chen hin Havot-Jair (Jaira khuo) ti an la ni vong. 5 Jaira chu a thi a, Kamon khuoah an phûm a. 6 Israel thlahai chun LALPA mithmuah thil suol an lo thaw nawk ta a. LALPA chu nghatsana a rong bawl ta loin, Baal dâm, Astoret dâm, Aramhai pathien dâm, Sidonhai pathien dâm, Moabhai pathien dâm, Amonhai pathien dâm, Filistinhai pathien rong dâm chu an bawl ta lem a. 7 Chuleiin, an chungah Pathien a lungsen hle a, Filistin-hai le Amon-hai kutah a zor a. 8 Chu kum chun an hung hnè bàn a, an sirsop nasa hle a. Kum sawm le kum riet sûng chu Jordan râl Gilead biel Amor mihai rama chèng Israel thlahai po po chu an nêksawr a. 9 Chun, Amon-hai chun thlang tienga um Juda hai, Benjamin hai le Efraim sûngkuohai chu do dingin Jordan an kàn a, Israelhai chu nasa takin an lungzing a. 10 Chu phing leh Israel thlahai chun, "Kan Pathien kan lo nghatsan a, Baal rong dâm kan lo bawl tàk leiin i chungah thil suol kan lo thaw a nih" tiin LALPA an ko a. 11 LALPA chun Israel thlahai kuomah, "Aigupta mi hai, Amor mi hai, Amon mi hai, Filistin mi hai, 12 Sidon mi hai, Amalek mi hai, le Moan mi haiin an nêksawr cheua in mi ko khan an kuta inthokin ka san suok hlak naw cheu am a ni? 13 Sienkhom mi nghatsanin pathien danghai rong in bawl a, chuleiin, san suok ta nawng ka ti cheu. 14 In thlang lem pathienhai kuoma chun fe unla, anni chu ko khêk ta unla! In lungzing pha leh annin hung san suok cheu raw hai se chu!" a ta. 15 Nisienlakhom, Israel thlahai chun LALPA kuomah, "Thil suol kan lo thaw tah a na, kan chungah tha i ti ang angin thaw la, amiruokchu tu hin chu mi san suok lul rawh" tiin an ngên tâl a. 16 Chuongchun, hnam dang pathien an kolhai po po chu an sie hmang vong a, Pathien rong an bawl a, Israelhai rimsikna chu a tosan sawt thei nawh. 17 Chuonga Amon mihai inràlthuoma Gilead rama an inkul lai chun Israel thlahai khom pung khawmin Mizpa-ah an inkul a. 18 Chun, Gilead rama an hotuhai chu an inrawn khawm a, "Amon mihai bei hmasatu tak chu Gilead rama umhai lu takah um raw se" an ta.

Judges 11

1 Gilead mi Jeftha chu mi hrât tak le huoisen tak a na, a pa hming chu Gilead a na, a nu chu nawchizor a nih. 2 Gilead nuhmei chun nau pasal dang khom a nei a, an hung puitling chun Jeftha kuomah, "Nang chu mi dang nau i ni leiin kan pa ro thuah chan nei ve naw ti nih" an ta, ina inthokin an hnot suok a. 3 Chuongchun, Jeftha chu a unauhai kuoma inthok chun a suok a, Tob ramah umhmun a khuor a, chu taka chun mi tawrot ruol rawia neiin, a hnung an zui a. 4 Chun, hieng hi a hung ni a. 5 A hnunga Amon mihai le Israel thlahai an hung indo phing leh Gilead upahai chu Tob rama chun Jeftha kuomah an fe a, 6 "Hung la, Amon mihai ei do theina dingin, mi hung inrawi rawh" tiin an ko a. 7 Jeftha chun an kuomah, "In mi theida a, ka pa ina inthokin in mi hnot suok a ni naw maw? Iengti dàna tuta buoina in tuok phinga ka kuoma in hung?" a ta. 8 Gilead upahai chun a kuomah, "Ieng po khom lo ni ta sien, chu lei tak chun i kuomah tu hin kan hung tlu lût a ni hi. Amonhai mi beipui dingin hung la, Gilead rama chênghai po po hotuah siem kan ti che" an ta. 9 Jeftha chun, "Amon mihai do dingin mi thuoi kîr ni ta inla, LALPAN anni chu ka kutah mi pe ta ang sien, hotuah in mi siem takzet ding maw?" a ta. 10 Gilead-a upahai chun, "LALPA chu eini inkâra hrepuitu a nih, i thu ang angin thaw ngei ngei kan tih" an ta. 11 Chuongchun, Jeftha chun Gilead upahai chu a zui a, mipuihai chun an lu tak le an chunga kawmandar-ah an siem a; Jeftha chun an inkâra thu po po chu Mizpa khuoa chun LALPA hmaah iengkim a hril non nawk vong a. 12 Chu zoa chun Amon lal kuomah, "I theida zawng iem kan thaw a, kan ram bei dinga i hung inthok el hi?" tia indon dingin Jeftha chun palai a tir a. 13 Amon lal chun Jeftha palai kuomah, "Aiguptaa inthoka Israel thlahai an hung tung lai khan Arnon vadunga inthoka Jabok vadung le Jordan vadung chena mi ka ram an mi lâkpèk lei a nih. Chu chu ieng khom hril buoi ta loin hung pe kîr nawk raw hai se" tiin thu a lo incha a. 14 Jeftha chun Amon lal kuomah palai a tir nawk a, hi thu hi a thon a: 15 "Hieng hin Jeftha chun a hril: 'Israel thlahaiin Moab-hai ram amanih, Amon-hai ram amanih an lâkpèk nawh. 16 Aigupta rama inthoka an hung suok khan Tuipui Sen le thlaler ram pal tlangin Kadesh chen an hung a. 17 Chu taka inthok chun Edom lal kuomah, 'I ram hraw tlang mi phalpèk rawh' tia hni dingin palai an tir a, sienkhom Edom lal chun a lo ngaithlâk nuom naw a. Moab lal kuoma khom palai an tir a, sienkhom a remti naw a. Chu lei chun Israelhai chu Kadesh-ah an um ta zing a. 18 " 'Chu zoah thlalèr ram chu fe thlengin, Edom le Moab ram chu an hêl kuol a, Moab ram sak tieng an fe a, Arnon vadung râl tieng umhmun an khuor a. Moab ram an lût hrim hrim nawh, Arnon vadung chu Moab ramri bul a ni chauh a nih. 19 " 'Chu taka inthok chun Amor lal, Hesbon khuoa um Sihon kuomah, 'Kan ram tieng kan pan theina dingin i ram kan hraw tlang mi phalpèk hram rawh' tiin palai an tir a. 20 Sihon chun a ram hraw tlang dingin Israelhai chu a ringhla leiin a mihai po po a khawm a, Jahaz-ah an inkul a, Israelhai an lo bei a. 21 " 'LALPA, Israel Pathien chun Sihon le a mihai po po chu Israelhai kutah a pêk a, an hne a, chu rama um Amor mihai ram po po chu an lâk vong a, 22 Arnon vadunga inthoka Jabok vadung chen le thlalèra inthoka Jordan vadung chenin an nei ta vong a ni kha. 23 " 'LALPA, Israelhai Pathien chun ama mi Israelhai hmaah Amorhai chu a hnot suok a ni leiin, nangin lâkpèk theina ding thu iem i nei a? 24 In pathien Kemos-in i puol dinga a ruotpêk che chu i nei el naw ding maw? Chuong ang bok chun, LALPA kan Pathienin a mi pêk chu kan hluo ding a nih. 25 Moab lal Zipor naupa Balak nèkin i hrât lem am a ni? Ama chun Israelhai chokbuoiin a do hlak am a ni? 26 Hesbon le a khawper hai, Aroer le a khawper hai, Arnon ramri depa khuoa hai kum zathum zet Israelhai an um lai khan ieng dinga la kîr loa lo la um zing am i na? 27 Chuleiin, i poi ieng khom ka tawk nawh; nangin mi bei i nuom leiin ka poi i tawk lem a ni hi. LALPA, Roreltu chun tuhin Israelhai le Amon thlahai kâra thu chu ngaituo raw se' a tih" tiin. 28 Nisienlakhom, Amon lal chun Jeftha thucha chu a lo ngaithlâk nuom nawh. 29 Chun, LALPA Thlarau chu Jeftha chungah a hung tlung a. Gilead le Manase-hai ram chu kânin, Gilead-a Mizpa chu a fe thleng a, chu taka inthok chun Amon mihai chu bei dingin hma a nor pei a. 30 Jeftha chun LALPA kuomah, "Amon thlahai hi ka kutah i mi pêk takzet chun, 31 Amonhai laka hnena changa in tieng kan lawi nia ka in kotkhàra inthoka hung suok hmasa tak chu LALPA ta ding nîng a ta, LALPA ta dinga pumraw thilhlânah inhlàn ka tih" tiin thu a'n khâm a. 32 Jeftha chun Amon mihai chu a do a, LALPAN anni chu a kutah a pêk a. 33 Aroer-a inthoka Minit vel chen le Abel Keramim chenin, khaw sawmhni a sukram vong a, Israelhai chun Amon mihai chu an tukdol ta dêr a. 34 Jeftha chun a khuo Mizpa a hung tlung a. Chun, ngai ta, a naunu chun khuongte leh lâmin a lo hmuok a! Ama chu a nau nei sun a na, ama chauh naw chu nau pasal amanih nau nuhmei amani dang a nei nawh. 35 A naunu a hei hmu chun a silfèn a keithlèr a, "E khai, Bawinu, i mi sukbeidongin i mi va hang sukrimsi ngei de aw! LALPA kuomah ka lo inkhâm ta laklaw a, sût nawk thei ka ni ta bok si nawh" a ti vong vong a. 36 A naunu chun, "Pa, LALPA kuomah bau i lo phong ta si chun, LALPAN i hmèlma Amon mihai chunga phuba a lâkpèk ta bok si che leiin, i baua thu suok angin iengkim ka chungah i thaw ding annawm. 37 Amiruokchu, thil pakhat char mi phalpèk rawh. Thla hni sûng tlângrama khin keimain hang rol hmang ka ta, ka ruolhai leh ka nunghâkna hi hang sûn kan tih, pasal nei ngai lo ding ka ni si a" a ta. 38 A pa chun, "Fe mol rawh" a ta. Thla hni sûng thang dingin a'n fetir a, an suok a, ama le a ruolhai chun a nunghâkna chu an hang sûn a. 39 Thla hni zoah a pa kuom tieng a hung kîr nawk a, a lo inkhâm tah ang chun a chungah a pa chun a thaw a. Nunghâk thienglàm a nih. 40 Hi taka inthok hin Israel nunghâkhai chun kum tin ni li sûng fe suoka Gilead mi Jeftha naunu sùn chu thaw dânah an lo nei tah a nih.

Judges 12

1 Efraimhai chu an pung khawm a, Jordan vadung chu Zafon-ah an kài phei a, Jeftha kuoma chun, "Ieng dinga Amon thlahai bei dinga i hung phei lai khan i kuoma hung ve dinga i mi fiel naw hrim hrim am a na? I in leh kan raw ding che a nih" an ta. 2 Jeftha chun, "Kei le ka mipuihaiin Amonhai hi thei tawp suoin kan do a, nangni khom kan incha cheu a, sienkhom an kuta inthokin tu khomin in mi hung san suok nawh. 3 In mi hung san naw ding a nih ti ka hmu chieng phing leh thi ngamin ka thang a, Amon thlahai bei dingin ramri kânin ka hung a, LALPAN an chungah hnena a mi pêk a nih. Chu chu ni siin, ieng dinga mi bei dinga voisun hin in hung inthok am a na?" a ta. 4 Chuongchun, Jeftha chun Gilead mihai chu a khawm a, Efraimhai chu a bei a. Efraimhai chun Gilead mihai chu, "Nangni Gilead ruol, Efraim le Manase hnama inthoka tlân hmang ruol mei mei" an ti hlak leiin Gilead mihai chun Efraim mihai chu an that teu el a. 5 Gilead mihai chun Efraimhai ram dep Jordan vadung kaia mi hung taphot chu an lo man a. Efraim mi tlân hmanghai chun, "Hung kai kan ti aw" an ti zàtin, "Efraim mi in ni am?" an lo ti pei a. Anni chun, "Kan ni nawh" an ti leh, 6 "An leh, 'Shibboleth' hang ti ta" an ta, anni chun an lam chieng thiem naw leiin 'Sibolet' an ti nawk hlak a. A lam thiem naw po chu an lo man a, Jordan vadung kaia chun an that pei a. Chu tum chun Efraim mi sîngli le sânghni an that a. 7 Jeftha chun Israelhai chungah kum ruk ro a rêl a. Chuongchun, Gilead mi Jeftha chu a thi a, Gilead rama khaw pakhatah an phûm a. 8 Jeftha thi hnungin Bethlehem khaw mi Ibzan chun Israelhai chu a hung inrawi a. 9 Ama chun naupa sawmthum le naunu sawmthum a nei a. A naunuhai chu anni pahnam sûnga mi ni lo pasalah a'n neitir vong a, a naupahai khom chu anni pahnam sûnga mi ni lo vong nuhmeiah a'n neitir vong bok a. Ibzan chun Israelhai chu kum sari a thuoi a. 10 Ibzan chu a thi a, Bethlehemah an phûm a. 11 Ama hnungin Zebulun mi Elon chun Israelhai chu kum sawm a thuoi nawk a. 12 A thi chun Zebulun ram Aijalon-ah an phûm a. 13 Ama hnung chun Pirathon khuoa mi Hilel naupa Abdon chun Israelhai a hung thuoi nawk a. 14 Ama chun naupa sawmli le tupa sawmthum, sabengtung tuoi sawmsari chunga chuong hlak, a nei a, Israelhai chungah kum riet ro a rêl a. 15 Pirathon mi, Hilel naupa Abdon chu a thi a, Efraim ram, Amalek mihai tlângrama Pirathon khuoa chun an phûm a.

Judges 13

1 Israel thlahai chun LALPA mithmuin thil suol an lo thaw nawk ta a, LALPAN Filistinhai kutah kum sawmli a'n umtir a. 2 Chun, Zora khuoah Dan hnama mi pakhat a um a, a hming chu Manoa a nih. A nuhmei chu a ching leiin nau boin an um zing a. 3 LALPA vântirko chu nuhmei kuoma chun a hung inlàr a, a kuomah, "Ngai ta, i ching a, nau i la pai ngai naw a, sienkhom inrai i ta, nau pasal nei i tih. 4 Chuleiin, fìmkhur raw khai. Uoiin le zu hrim hrim dawn naw la, fâk thieng lo thil hrim hrim fa bok naw rawh. 5 A nih, inrai i ta, nau pasal i nei ding a ni si a. A lua chun sam vawna hmangruo hrim hrim i hmang ding a ni nawh, chu naupang chu sula a um laia inthoka Pathien ta dinga ser hrang Nazarit mif a ni ding a ni si a; ama chun Filistinhai kuta inthoka Israelhai san suokna chu hung tan a tih" a ta. 6 Chuongchun, nuhmei chun a pasal kuomah, "Pathien mi, mi pakhat ka kuomah a hung a, a hmèl chu vântirko hmèl anga inzaum a na, a hungna hmun ka'n don naw a, a hming khom a mi hril bok nawh. 7 Ama chun ka kuomah, 'Ngai ta, inrai i ta, nau pasal nei i tih. Uoiin le zu hrim hrim dawn naw la, fâk thieng lo hrim hrim fa bok naw rawh. Naupang chu sula a um laia inthoka Pathien ta dinga ser hrang Nazarit mi a ni ding a ni si a' tiin a mi hril a" a ta. 8 Manoa chu LALPA kuomah a tongtai a, "Aw LALPA, lunginsiet takin Pathien mi i hung tir kha ka kuomah hung tir nawk la, naupang hung pieng ding chu ieng tin am kan enkol ding ti mi hung inchûktir raw se" tiin a hni a. 9 Manoa thil hni chu Pathienin a lo ngaithlâk a, a nuhmei chu phûla a thung laiin a kuomah Pathien vântirko a hung inlàr nawk a, a pasal Manoa ruok chu a kuomah a um ve naw a. 10 Nuhmei chu inhmaw takin a tlân a, a pasal a va hril a, "Ngai ta, ni khat laia ka kuoma inlâr kha a hung inlàr nawk ta ie" a ta. 11 Manoa chu a tho a, a nuhmei chu a zui a, chu mi kuom chu a va tlung a, a kuomah, "Nang hi i ni maw nuhmei kuoma thu hriltu chu?" a ta. Ama chun, "Ni e" a ta. 12 Manoa chun, "I thu anga a hung tlung pha, naupang zawm ding le thaw ding thilhai chu iem ni tàng a ta?" tiin a'n don a. 13 LALPA vântirko chun, "I nuhmei kuoma ka hril ta po po ang khan thaw raw se. 14 Grèp hruia inthoka suok hrim hrim a fâk ding a ni naw a, uoiin amani zu amani le fàk thieng lo hrim hrim dawnin a fâk ding a ni bok nawh. Thu ka pêk ta po po kha vong tha raw se" a ta. 15 Chun, Manoa chun LALPA vântirko kuomah, "Lunginsiet takin i ta dinga kèl tuoi ka buotsai zo chenin mi la um pêk hràm la tiin ka thlo che a nih" a ta. 16 LALPA vântirko chun, "In mi la thlo tàng a ni khomin i bu chu fa naw nîng. Pumraw thilhlân i buotsai tum a ni chun LALPA kuomah inhlàn lem rawh" a ta (Manoa chun LALPA vântirko a nih ti a hriet si nawh). 17 Manoa chun, LALPA vântirko kuoma chun, "I thuhrilhai hi a hung tlung kim pha kan chawimawi theina ding chein i hming mi hril thei i tim?" a ta. 18 LALPA vântirko chun, "Ieng dinga ka hming i mi'n don am a na? I hriet thiem phâk ruol ding a ni nawh" a ta. 19 Manoa chun kèl tuoi chu a lâk a, bu le bâl thilhlân leh lungpui chunga chun LALPA ta dingin a'n hlàn a. Vântirko chun thil mak tak a thaw a, Manoa le a nuhmei chun an thlir zing a. 20 Maichâma inthoka meichok vân tienga a fe tung lai chun LALPA vântirko chu meichoka chun a kai tung a. Manoa le a nuhmeiin chu chu an hmuin hnuoiah an bokkhup a. 21 LALPA vântirko chu a hung inlang nawk ta naw phing leh Manoa le a nuhmei chun LALPA vântirko a nih ti an hriet chauh a nih. 22 Manoa chun a nuhmei kuomah, "Pathien ei hmu ta si a, ei thi ngei ngei ding a nih" a ta. 23 A nuhmei chun, "LALPAN a mi sukhlum ding ni sien, ei pumraw thilhlàn le bu le bâl thilhlànhai kha pom naw ni a, hieng thil po po hi mi'n hmutirin mi hril bok naw nih" a ta. 24 Nuhmei chun nau pasal a nei a, a hmingah Samson an sak a. Naupang chu a hung seilien a, LALPAN mal a sawm a. 25 Chun, Zora le Estaol inkâra um Mahane-Dan hmuna chun ama chu LALPA Thlarauin a hung chok tho tan ta a.

Judges 14

1 Samson chu Timna khuoah a zu fe a, Filistin nunghâk pakhat a zu hmu a. 2 In tieng a hung inlawi chun a nu le pa kuomah, "Timna khuoah Filistin nunghâk pakhat ka hmu a, ka nuhmei dingin zu thuoi ro" a ta. 3 A nu le pa chun, "Ei sûngkuo le ei chipuihai lai hin i lung kuoi zawng nunghâk i hmu dêr naw am a ni, chuonga ser tan lo Filistinhai lai nuhmei ding i zu zong el ta chu?" an ta. Samson chun, "Mi thuoipêk el ro, ka'n koppui thei chi ding tak a nih" a ta. 4 (Chuong laia Israelhai chunga rorêltu chu Filistinhai an na, anni le an intauh thei dàn remchàng chu zonga chu thil chu LALPAN a thaw a nih ti chu a nu le pain an hriet si nawh. ) 5 Chuongchun, Samson chu a nu le pa leh Timna khuoah an zu fe a. Timnaa grèp huon an tlung tawmin sakeibaknei vânglaiin a lo inrûm khum thut a. 6 Samson chunga chun LALPA Thlarau thilthawtheina a hung tlung a, hriemhrei ieng khom chawi naw sienkhom, kut lawng ringotin sakeibaknei chu kèl te ang elin a pot nawi a, sienkhom a thilthaw chu a nu le pa a hril nawh. 7 Chun, an zu tlung a, nunghâk chu Samsonin a'n biekpui a, a dit hle a. 8 Iemani chen hnungah nunghâk chu nei dingin an zu fe nawk a, sakeibaknei ruong chu en dingin Samson chu a pêt vak a, a ruonga chun khuoiin bu an lo sep a, khuoizu khom a lo um a. 9 Khuoizu chu a lâk a, a fe nawk a, lawn malamin a fâk pei a, a nu le pa a hnot phâk chun anni khom a then a pêk a, an fàk a, sienkhom sakeibaknei ruonga inthoka khuoizu chu a làk a nih ti a hril tawl nawh. 10 Chun, a pa chun nunghâk chu a zu hmu a, chu taka chun Samsonin ruoi a the a, chu chu moneitu tlangvàlhai thaw dàn hlak hrim a nih. 11 Samson an hmu charin a tawiawmtu ding mi sawmthum an hung thuoipêk nghal a. 12 Chun, Samson chun an kuomah, "Tu hin thu khirh ka'n don ding cheu a nih. Ruoi the hun ni sari sûnga a donna in mi hril thei chun puon zâi inhmi thle sawmthum le silfên sawmthum pêng ka ti cheu. 13 A donna in mi hril thei naw chun puon thle sawmthum le silfên sawmthum in mi pêk ding a nih" a ta. Anni chun, "Thu khirh chu mi hang hril ta la, lo ngaithlàng kan tih" an ta. 14 Ama chun, " A fatua inthoka fâk ding suok, Hrât taka inthoka thil thlum suok"a ta. Ni thum sûngin an don thei nawh. 15 A ni linaa chun Samson nuhmei kuomah, "Hi thu khirh hi mi hrilfie dingin i pasal hi thlût rawh, chuong naw chun nang le i pahai sûngkuo hi kan raw hlum el ding cheu a nih. Mi rok dingin a ni maw hi taka hin in mi fiel?" an ta. 16 Samson nuhmei chun tap pumin a zuot a, "I mi lo theida hle a ni hi tie! I mi lo hmangai tak tak naw top hih. Ka chipuihai hlak thu khirh i'n don a, kei hlak a hrilfiena khom i mi hril si nawh" a ta. Ama chun, "La to ta, ka nu le pa khom la hril loin nang ka hril ding che maw?" a ta. 17 Ruoi the hun ni sari sûng chun a hmaah tapin a thlût ngat ngat leiin a ni sarina chun a hril ta a, ama chun thu khirh umzie chu a chipuihai kuomah a hril sawng a. 18 A ni sarina nisa tlâk hma chun a khaw mihai chun a kuomah, "Khuoizu nêka thlum lem iem a na? Sakeibaknei neka hrât lem iem a na?" an ta. Samson chun an kuomah, "Ka bawng la hi hnuoi inletah sor naw inla chu, Ka thu khirh hre suok teu naw ti niu"a tipêk tawl a. 19 Chun, LALPA Thlarau chu Samson chungah thilthawtheinain a hung inlang a. Askelon-ah a fe thlâk a, mi sawmthum a that a, an thuom a hlippêk a, thu khirh hrilfietuhai kuoma chun silfênhai chu a pêk a, lungsen êrin a pa in tieng chun a kîr nawk ta a. 20 Samson nuhmei chu inneinaa Samsonin thiena a hmang kuomah an lo pêk lem el ta a.

Judges 15

1 Chu hnung, bu sîk hun lai hin Samson chun kêl tuoi keiin a nuhmei zu kan dingin a fe a. "Ka nuhmei pindanah ka lût ding a nih" a ta, sienkhom a tarpu chun a phal naw a. 2 "I theida hle nia ka hriet leiin i ruolpa ka lo pêk el an tah. A sangnu hi ama nêkin a hmèl a tha lem naw maw? A aiin nei lem el rawh" a ta. 3 Samson chun an kuomah, "Tuta tum hin chu Filistinhai poi tawk khom ni lang mi dem thei ta naw ni hai" a ta. 4 Chuongchun a suok a, sihal zathum a va man khawm a, a kop peiin an mei a suizom a, meiser a siem a, an meia chun a khit de a. 5 Meiser chu a raw chok a, sihalhai chu bu hmunah a'n suo a, buphal le bu la ngîrhai chu, an oliv huon le grèp huon chenin, a kâng ta dur dur a. 6 "Tu thaw am a na?" ti Filistinhaiin an indon chun, "Timna khuoa mi pakhat mâkpa Samson thaw a nih; a tarpuin a nuhmei a lâkpêk a, a ruolpa a lo pêk lei a nih" an ta. Filistinhai chun an pafain an hang raw hlum a. 7 Samson chun an kuomah, "Hienga in thaw si hin chu phuba ka lâk hma chun chawl naw nîng" a ta 8 Anni chu a bei a, a that teu a, a fe thlâk a, Etam lungpuia pûka chun a um a. 9 Filistinhai chu an inthok tung a, Judai rama chun an hang inkul a, Lehi hmun chen an inzar phei a. 10 Judai rama mihai chun, "Ieng leia keini mi bei dinga in hung inthok am a na?" an ta. Anni chun, "Samson man dinga hung inthok kan nih; kan chunga a thaw ang chara thaw ve kan tum a nih" an ta. 11 Chu phing leh Juda mi sângthum chu Etam lungpuia chun an zu fe a, Samson kuomah, "Filistinhai hi eini chunga rorêltu an nih ti i hriet naw maw? Kan chungah ieng top am a na i thaw ta hi?" an ta. Ama chun, "Ka chunga an thaw ang charin an chungah ka thaw ve a ni kha" a ta. 12 Anni chun, "Khuop a, Filistinhai kuta inhlàn ding chein kan hung a nih" an ta. Samson chun, "Nangni chun mi sukhlum lo dingin ka kuomah inkhâm phot ro" a ta. 13 Anni chun, "Sukhlum lo e, sienkhom khuop kan ti che a, an kutah kan pêk ding che a nih, that chu that teu nawng kan ti che" an ta. Chuongchun, hruol thar pahniin an khuop a, lungpui kaw kàra inthok chun an hung thuoi suok a. 14 Lehi hmun an tlung chun Filistinhaiin an lo tuok a, an khèk dur dur a. LALPA Thlarau chu Samson chungah thilthawtheinain a hung tlung a, a bân an zemna hrui hruol chu ziza zâi, meia raw angin a kuta inthok chun a hung til thla tak tak a. 15 Sabengtung khâk ru tharlam a hmu a, a lâk a, chu chun mi sângkhat a vuok hlum a. 16 Samson chun, "Sabengtung khâk ru hmangin, Sabengtungin ka siem tawl a, Sabengtung khâk ru hmangin, Mi sângkhat ka vuok hlum"a ta. 17 A hril zo chun sabengtung ru chu a dehawn a; chu hmun chu Ramat Lehi (Khâk ru Tlâng) tiin an inbûk a. 18 Samson chu a dang a châr êm leiin, "Nangin i siehlaw kut hi hmangin ropui takin i mi san suok a. Tu hin dangchâra thiin sertan lohai kutah ka lût el dim a ni?" tiin LALPA a ko a. 19 Lehi hmuna khur chu a hung kak phut a, chu taka chun tui a hung inchik suok a. Samson chun a dawn a, a tha ngai putin a hung har nawk ta a. Chu tui hnar hmun chu En Hakore an inbûk a, Lehi hmunah a la um zing. 20 Filistinhai vânglaiin Samson chun Israelhai chu kum sawmhni a thuoi a nih.

Judges 16

1 Samson chu Gaza khuoah a fe a, nawchizor a hmu a, a kuomah zân khat riek dingin a lût a. 2 "Hi taka hin Samson a hung" tiin Gaza mihai chu an hril a. Chuongchun, an inhuol a, khawpui kul kotpui bula chun zân khuoin an inchàn a. "Khawfingchatah ei that ding a nih" an ta, to tokin an inchàn thup a. 3 Samson chu zân ril chenin a zâl a, chu zoah a tho a, khawpui kul kotpui ban pahni chu a chel a, a kotkhâr le a kalna pumin a phawi dok a, a put a, Hebron zawn tlâng sîp chen a put tung a. 4 Chu hnung iemani chena chun Sorek ruoma nunghâk pakhat a hming Delila chu a ngaizawng a. 5 Filistinhai rorêltuhai chu nunghâk kuomah an fe a, "Ama hi thahne a, khuopa kan soisak theina dingin a hràtna rùk hriet tumin zawr la, tangka shekel sângkhat le zakhat seng pêng kan ti che" an ta. 6 Chuongchun, Delila chun Samson kuomah, "I hrât vieuna san thurûk mi hril rawh. Ieng tin am soisak dingin khuop thei kan ti che a?" tiin a'n don a. 7 Samson chun, "Hrui tharlam pasari, la tawl loin mi khuop unla, mi dang ang bokin hung hrât naw el ka tih" a ta. 8 Filistinhai rorêltuhai chun hrui thar hlok, la vuoi lo chu an hung chawi a, chu chun a khuop a. 9 Pindan sûng rila chun inchàn rûktu ding mi a sie a. "Samson tho rawh, Filistinhaiin an hung bei ding che a nih" a ta. Amiruokchu, meiin hrui zâi a kàng chat ang elin a khuopna hruihai chu a'n tan hmok hmok el a. A hrâtna san chu hriet suok a ni nawh. 10 Delila chun Samson kuomah, "I mi hlèm a, nuizat bûrah i mi siem a nih. Tu hin ieng anga khuop thei di'm i na ti mi hril ta raw leh" a ta. 11 Ama chun, "Hruol thar la hmang ngai dèr loin nghet takin mi zem la, mi dang ang bokin che thei naw el ka tih" a ta. 12 Chuongchun, Delila chun hruol thar a lâk a, chu chun a zem bur a. Pindan sûng rila inchàn rûktuhai hrieta chun, "Samson tho rawh, Filistinhaiin an hung bei ding che a nih" a ta. Sienkhom, a kuta khuopna hruol chu patzâi ang elin a'n tan hmier hmier a. 13 Delila chun Samson kuomah, "Tu chen hin mi hlemin nuizat bûrah i mi la siem zing a nih. Khuop thei i ni dàn mi hril ta raw leh" a ta. Samson chun, "Ka sam hi hmun saria phierin puon khawngnaa pat zâi leh zep sain ta khum inla a ni el annawm" a ta. 14 A sam chu puon kola chun tomkilin nghet takin a kil de a. Chu zoah, "Samson, Filisitnhaiin an hung bei tum che" tiin a ko a. A hung thanghar a, puonbu kil dena le a puonbu chop chun a kei thlong ta vong a. 15 Delila chun Samson kuomah, "Ieng khom mi hril nuom si loin ieng tin am 'Ka hmangai che' dam i mi ti chu? Hi hi voi thum zet nuizat bûra i mi siemna a ni ta a, i hràtna rùk san hlak i mi hril nuom top bok si nawh" a ta. 16 A nghok hlum vang chenin sûn le zân a mor ngat ngat a. 17 Chuongchun, iengkim a hril ta a. "Ka lua hin bakchep hrim hrim hmang a la ni ngai naw a, ka nu sula ka um laia inthoka Pathien ta dinga ser hrang Nazarit mia siem ka ni a, ka sam hi vaw ta inla chu ka hrâtna hi bo vong a ta, mi dang ang boka hrât naw hung nîng ka tih" a ta. 18 Iengkim a hril ta vong ti Delila'n a hriet chun Filistinhai rorêltuhai chu, "Iengkim a mi hril ta leiin hung nawk phot el ro" tiin a'n cha a. Filistinhai rorêltuhai chu sum chawiin an hung a. 19 Delila chun Samson chu a malpui inkhamtirin a'n intir a, mi pakhat a ko a, a sam phier sari chu a'n chep thlâktir vong a, a thuin a hung siem thei tan a, a hrâtna chun a zamsan ta si. 20 Ama chun, "Samson, Filistinhaiin an hung bei tum che" a ta, a in lai chu a hung har a, "Ni dang ang bokin intâl suok nawk el ka tih" tiin a'n ngaituo a, sienkhom LALPAN a màksan tah ti hrim a hriet si nawh. 21 Chuongchun, Filistinhai chun an man a, a mit an khel dok a, Gaza tieng an thuoi thlâk a, dâr kol an inbuntir a, lung ina chun bu an inrawttir a. 22 Sienkhom, a lu an vaw kol hnung chun a sam chu a hung inthang tan nawk a. 23 Filistinhai rorèltuhai chu an pathien Dagong kuoma inthawina ropui tak inhlân ding le insukhlim dingin an pung khawm a, "Ei Pathienin ei hmèlma Samson ei kutah a mi pêk tah annawm" an ta. 24 Mipuiin an hang hmu chun, "Kan pathienin kan hmèlmapa, Kan ram mi sukrampêktu, Kan mihai tam tak suomtu chu, Kan kutah a mi pêk ta si"tiin an pathien chu an inpàk a. 25 An hung phùr zuol deu hnung chun, "Ennuom dingin Samson hung thuoi suok ro" tiin an khêk a. Samson chu an ko suok a, ban le ban inkârah an inngìrtir a, ennuomah an siem a. 26 Samson chun a kuta keitu siehlaw kuomah, "Hi in dotu banpui hi ka them phâk theinaah mi sie rawh, banpuia ka'n nghai theina dingin" a ta. 27 Chu tempula chun nuhmei le pasalin an sip hmur a, Filistinhai laia mi lien po po khom an kim hle a; Samson ennuoma thlîrtu chu a sawng chunga ngot khom nuhmei le pasal mi sângthum lai an um. 28 Samson chun LALPA a ko a, "Aw LALPA Chunghnungtak, lunginsiet takin mi hre zing la, aw Pathien, ka mit khing hni phuba hi Filistinhai chungah tum khata ka lâk vong theina dingin voi khat bêk mi hung sukhrât nawk rawh" tiin a tongtai a. 29 Samson chun a lailunga tempul dotu sûtpui pahni chu a hang them a, a kut chang tieng chun sûtpui pakhat, a kut voi tiengin sûtpui dang chu a nam a. 30 Samson chun, "Filistinhai hi hang thi chil ka tih" a ta, a theina po poin a nam a, a sûnga rorêltuhai le mipuihai chunga chun tempul chu a hung chim thla ta hum hum a. A dam laia a sukhlum nèkin a thi chilhai chu an tam lem. 31 A unauhai le a pa sûnghai po po chu a ruong la dingin an hung thlàk a, an làk a, an zawn tung a, Zora le Eshtaol inkâra a pa Manoa an phûmna hmuna chun an phùm a. Kum sawmhni sûng Israelhai a thuoi a nih.

Judges 17

1 Efraim tlâng rama inthoka hung mi pakhat a um a, a hming chu Mika a nih. 2 Ama chun a nu kuomah "Tangka shekel sângkhat le zakhat an inrukpêk che a, nang khomin ka hriet ngeiah tongsie i'n phur a. Kha tangka kha keiin ka kol a, ka lâk a ni kha" a ta. A nu chun, "Ka naupa, LALPAN mal sawm che raw se" a ta. 3 A nu kuoma tangka sângkhat le zakhat a hung pêkkîr ni chun a nuin, "Hi tangka hi keima kut ngeiin ka naupa puola milem siemna ding le milema sung dingin LALPA kuomah ka'n hlàn a; chuleiin, ka pêkkîr nawk ding che a nih" a ta. 4 Chuong ang chun tangka chu a nu kuomah a pêk a, a nu chun tangka shekel zahni chu a lâk a, tangkaruo sertu kuomah a pêk a, ama chun milemah a lo siem a, milemah a sung bok a, Mika inah a sie a. 5 Mika chun pathien in a bawl a, chu taka chun Efod le milem a siemhai chu a sie a, a naupa pakhat chu thiempuah a sie bok a. 6 Chuong lai chun Israel ramah lal an la um naw a, mi tinin mani tha tizawng zawngin an thaw seng a. 7 Judai ram Bethlehemah Levi chia mi tlangvàl pakhat, Judahai laia khawsa hlak a um a. 8 Ama chun umna ding hmun dang zongin Bethlehem a suoksan a. Chuonga a'n vâknaa chun Efraim tlângrama Mika in chu a va tlung a. 9 Mika chun, "Khaw laia inthoka hung am i na?" a ta, ama chun "Judai ram Bethlehema inthoka hung Levi chia mi ka na, umna ding ka zong a nih" a ta. 10 Mika chun, "Ka kuomah um ve el la, ka pa le thiempuah thang la, i fâk le dawn le i silfênhai ka tum bâkah kum khatah tangka shekel sawm pêng ka ti che" a ta. 11 Levi chia mi tlangval chun a remti a, chuongchun a naupahai laia pakhat ve angin a um ta a. 12 Mika chun Levi chia mi chu thiempuah a sie a, a inah a'n umtir ta a. 13 Mika chun a kuomah, "Tu zet hin chu Levi chia mi ngei thiempu ka nei ta a, LALPAN mi sukhmuingil a tih" a ta.

Judges 18

1 Chuong lai chun Israel ramah lal an la um naw a. Chun, Dan hnamin Israel thlahai laia an chanpuol ding ram chu an la rochung ve naw leiin ram hluo ding an zong zing a. 2 Danhai chun Zora le Estaol-a inthokin ram enthla ding le thlithlài dingin pahnam tin aiawa mi pasaltha panga an tir suok a, an kuomah, "Ram va thlithlài ro" tiin an hril a. Anni chu Efraim tlâng rama Mika ina chun an fe a, zân khat an riek a. 3 Mika in an tlung tawm chun Levi tlangvàl rawl ri chu an hriet a, ina chun an lût a, "Tuin am hi taka hin a hung thuoi che a? Hi hmuna hin iem i thaw a? Ieng leia hi taka um am i na?" tiin an indon a. 4 Ama chun a chunga Mika thil thawpêkhai chu hrilin, "A thiempua a mi ruoi a nih" a ta. 5 Anni chun, "Chuong a ni leh, kan inzinna hi kan tluong ding le ding naw Pathien mi rawnpêk rawh" an ta. 6 Ama chun, "Thlamuong takin fe ro. In fena ding chu LALPAN a hrietpui cheu" a ta. 7 Mi pangahai chu an suok a, Laish khuo an tlung a, chuong mihai chu Sidon mihai ang bokin, tu khom inringhla lo le thlamuong taka khawsa an nih ti an hmu a. An ramin tlâksam a nei naw a, anni khom an hnienghnâr hle a. 8 Chuongchun, Zora le Estaol khuoa an unauhai kuom tieng chun an kîr nawk a, an unauhai chun "In ram thlithlai chu ieng ang am a na?" tiin an lo indon a. 9 Anni chun, "Thaw ro, hang bei ei tiu. A ram chu kan hang hmu ngei a, a tha khop el. Hi taka inthung mum el loin inrang takin inthok suok unla, a ram chu hang la ro. 10 In hang tlung pha chun ralmuong taka um mihai le LALPAN a pêk ta cheu ram lien tak chu hang hmung in ta; tlâksam hrim an nei nawna ram a nih" an ta. 11 Chuongchun, Zora le Estaol khuoa inthok chun Dan hnama mi râlthuom chawi mi zaruk an suok a. 12 An kai tung a, Judai ram Kiriat-Jearim khaw kawlah umhmun an khuor a, chu chu tu chen hin Mahane Dan ti a la ni zing. 13 Chu taka inthok chun Efraim tlâng ramah an kai tung a, Mika in chu an tlung a. 14 Enthlatu Laish khuoa hang fe mi pangahai chun an unauhai kuomah, "Hi laia in pakhata hin efod dâm, pathien hrang hrang milem dâm, milem ker dâm a sunga sung dâm a um ti in hriet am? Chuleiin, ieng tin am thaw inla tha in ring a?" an ta. 15 Chu hmuna inthok chun an kawi a, Levi chia mi tlangvàl umna Mika in chu an va tlung a, a chanchin dâm an indon a. 16 Dan thlaa mi râlthuom chawi mi zaruk ruol chu kul kotkhâr bulah an ngîr a. 17 Kul kotkhâr bula thiempu le râlthuom chawihai an ngîr lai chun ram enthlaa fe mi pangahai chu in sûngah an lût a, milem ker dâm, efod dâm, pathien lem dang dang le milem sung chop dâm chu an lâk a. 18 Chuonga Mika inah lût a, a milem ker chop hai, efod hai, milem dang dang le milem sung chop hai an lâk lai thiempuin a hmu chun, "Ieng am a na in thaw ta kha?" a ta. 19 Anni chun, "To la, lo tong ve naw rawh. Kan kuomah hung ve la, kan pa le thiempuah um rawh. I ta dingin insûng pakhat chaua thiempua um am Israel laia hnam khat thiempua um a tha lem?" an ta. 20 Chu phing leh thiempu chu a lawm hle a. Efod le chu ina pathien lemhai le milem ker hai chu a chawi a, anni lai chun a thang ve ta a. 21 Chuongchun an naupang chik te te hai, an ranhai le an thil neihai chu hmasomin an fe suok a. 22 Mika ina inthoka hla fe an phâk hnung chun Mika tuolbawmhai chu an pung khawm a, Dan thlahai chu an va hnot phâk a. 23 Dan thlahai chu an hei ko khêk a, anni chu an hung ngha kîr a. Mika kuoma chun, "Ieng lungril am i put a, kan mihai inbei dinga i hang ko khêk ngam hrim hrim chu?" an ta. 24 Ama chun, "Ka pathien siemhai in lâk a, ka thiempu in fepui dai a, ieng am nei ka nei ta a? Ieng ti kongin am 'Ieng lungril am i puta? dam chu in mi ti hrim hrim chu?" a ta. 25 Dana thlahai chun a kuomah, "Keini lai hin tong mei mei naw raw khai, chuong naw chun mi lungturûk kut tuor hlauh rawi i ta, i sûnghai leh in hringna chân pha rawi in tih" an ta. 26 Dana thlahai chu an fe a, Mika chun hang bei ngam ruol nia a hriet naw leiin in tieng a kîr nawk ta a. 27 Mika milem siemhai le a thiempu chu an fepui a, Laish khuo, ralmuong taka umhai kuom chu an hang tlung a, kawlhnâmin an that a, an khuo chu an rawpêk a. 28 Sidona inthokin a hlat êm leiin hung san suoktu ding tu khom an nei naw a, an se velah sûngkuo laina hnai tu khom an nei bok si nawh. An khawpui chu Bet Rehob bul ruoma um a nih. 29 Dan thlahai chun khuo chu an bawl tha a, an hluo a. Israel naupa, an thlatu Dan hming chawiin Laish khawpui chu Dan tiin an inbûk a. 30 Dan thlahai chun milem siem chop chu anni ta dingin an indin a, Mosie naupa Gersom naupa Jonathan le a naupahai chu, ram chu miin an lâk hma khat chun, Dan chihai thiempuah an um ta a. 31 Chuongchun, Mika siem chop milem chu chu taka chun a um zing a, Intuokna Puon in, Pathien in ruok chu Silo khuoah a um zing a.

Judges 19

1 Israel rama lal an la um naw laiin Levi chia mi pakhat, Efraim tlâng ram kilkhawra um chun Judai ram Bethlehema mi hmei a nei a. 2 A hmei chun a uiresan a, a pa in Judai ram Bethlehemah a tlânsan a, chu taka chun thla li zet a um ta a. 3 Thuoi kîr nawk dinga thlêm tumin a pasal chu a'n thok suok a, a siehlaw le sabengtung pahni a thuoi a. A hmei chun a pa inah a lo thuoi lût a, a pain a hmu chun a lo lawm hle a. 4 A hmei pa, a tarpu chun a kuoma châm dingin a thlo a, a ina chun riekin ni thum sûng fain an dawn tlâng a. 5 A ni lina tûk chun inhma takin an tho a, fe tumin an insiem a, sienkhom a tarpu chun a mâkpa kuomah, "Fain la'n sukhar phot unla, chu zoah in fe ding annawm" a ta. 6 An pahni chun thungin, fain an dawn tlâng a. Chu zoah a tarpu chun, "Voi zân chu la riek unla, la chawl hadam ro" a ta. 7 Suok tumin a hang thoa chu a tarpuin cham nawk dinga a thlo tlat leiin chu zân chun an la riek nawk a. 8 A ni ngana tùka fe tuma a hang inthok khom chûn a tarpu chun, "La hang insukhar phot unla, zân tieng ni nemah suok lem ro" a ta. Chuongchun, an pahni chun bu an fâk tlâng nawk ta a. 9 Chu pa chu a hmei le a siehlaw leh a hang inthok suok lai chun, a tarpu chun, "En ta, khuo an hnu el ding an ta a, voi zân chu la riek nawk phot el ro, nisa khom a tla ding a ni ta hi. La châm inla, hlim takin um ro. Zîng inhma takin tho in ta, in fe el ding annawm" a ta. 10 Sienkhom, zân dang la hang riek nawk chu a nuom naw leiin Jebuhai khuo Jerusalem tieng panin a hmei leh thuomhnaw phurtu sabengtunghai le chun a suok a. 11 Jebuhai khawpui Jerusalem kawl an tlung chun nisa a tla têp ta a. A siehlaw chun, "Thaw ro, Jebuhai khawpuia hin lût ei ta, riek el ei tiu" tiin a rot a. 12 A pu chun, "Ni lo e, Israel mihai umna ni lo, hnam dang mi khawpuia chun lût lul lo e; Gibea khuo tieng pan pei lem ei tiu 13 Thaw ro, Gibea an naw leh Rama khuo ban tumin fe pei ei ta, a pakhat lem lemah ei riek ding a nih" a ta. 14 Chuongchun, an fe pei a, Benjaminhai khuo Gilbea kawl an tlung chun nisa a tla a. 15 Chu taka chun riek dingin an lût a, khawpui tuolzawla chun an inthung a, sienkhom an ina riek dinga fiel tu khom an um nawh. 16 Chu zân tieng chun Efraim tlâng rama inthoka hung, Benjaminhai khuo Gibea hung khawsa putar pakhat lo fe chu a hung inlawi a. 17 A hang ngha vel chun khawpui tuolzawla khuolzin inthung a hmu a, "Khaw laia inthoka hung am in na? Khaw tienga fe ding am in ni a?" tiin putar chun a'n don a. 18 Mikhuol chun, "Judai ram Bethlehema inthoka Efraim tlâng ram kilkhawr, kan umna pana inzin kan nih. Judai ram Bethlehemah ka zu'n zin a, tuhin LALPA ina fe tum kan na, tu khom a mi'n tlungtu kan hmu naw a nih. 19 Kan sabengtunghai fâk ding bupawl le ran bu kan nei a, kei le i bawinu le i siehlaw tlangval fâk ding le dawn ding bu le uoiin a um bok a, chuong tieng zawnga chu ieng khom tlâksam kan nei nawh" a ta. 20 Putar chun, "Thlamuong takin um ro, in mamaw po po chu keiman tum vong ka tih; khawlaia ruok chu riek lul naw ro" a ta. 21 Chuongchun, a inah a thuoi lût a, an sabengtunghai chu bu a pêk a; a mikhuolhai ke a sawppêk a, fain an dawn a. 22 Chuonga hlim le lawm taka an um lai chun a khuoa mi lût-inle le suol turuhaih chun a in chu an hung inhuol a, a kotkhâr chu an hung chum dot dot a, putar kuoma chun, "I mikhuolpa kha hung thuoi suok rawh, kan lo pawl theina dingin" an ta. 23 In neitupa chu a va suok a, an kuomah, "Ruolhai, chuong chu ni lo e, chuong ang êm chun suol lul lo e. Hi mi hi ka mikhuol a na, hieng anga thil inzakum thlâk chu thaw lul naw ro. 24 Ngai ta u, hi taka hin ka naunu nunghâk le ka mikhuolpa hmei an um a, anni chu hung thuoi suok ka ta, hmang inla, in ti ang angin thaw ro. Hi pa chunga ruok hin chu chuong ang thil inzakum chu thaw lul naw ro" a ta. 25 Nisienlakhom, mi suolhai chun a thu chu an ngaithlâkpèk nuom nawh. Chu phing leh mi chun a hmei chu mihai kuoma chun a thuoi a, an lo pawl a, khawvar hma khat chu zânkhuoin an soisak hrep a, khuo a var charin an fesan a. 26 Khuo a var phing leh nuhmei chu an infetir a, a hotupa tlungna in kotkhâr bula chun a thalin a tlu thlor a, khaw var hnung chenin a zâl ta zing a. 27 A hotupa zîng tho chun fe suok dingin kot a hang hong a, kot bula chun a hmei chu zangthala tlu let dèrin a hmu a. 28 Ama chun, "Tho raw leh, fe nawk tàng ei tih" a ta, sienkhom a hung don ta hrim hrim nawh. Chuongchun, a sabengtung chunga chun a hlang kai a, a tho a, a khuo tieng pan chun a suok ta a. 29 In a tlung chun chemte a lâk a, a hmei chu a kut le ke a tan bong vong a, hmun sawm le hmun hniin a chan nawi a, Israel ram po poa chun a thon dar a. 30 A hmu taphot chun, "Israel thlahai Aigupta rama inthoka an hung suoka inthokin hieng anga thil thaw hrim hrim hi hmu le hriet a la ni ngai nawh. Ngaituo unla, inrawn tlâng unla, iem kan thaw ding mi hril ro" an ti vong a.

Judges 20

1 Chuongchun, Israel thlahai po po chu inthuruolin an inthok suok a, Dan khuoa inthoka Beer-Seba khuo chen le Gilead rama mi po po chu Mizpa khuoa chun LALPA hmaah an hung pung khawm a. 2 Israel thlahai laia chihnam po po le an lukhâituhai chu Pathien mihai inkhawmnaa chun an thang a, râlthuom chawi sipai ngot khom nuoi li an nih. 3 (Benjaminhai chun Mizpa-ah Israel thlahai an pung khawm ti an lo hriet a. ) Israel thlahai chun, "Ieng leia hieng ang ritlona hi hung um am a na ti mi hril rawh" tiin thu bulbâl an indon a. 4 A nuhmei an thatpêk, Levi chia mi chun, "Benjamin chihai umna Gibea-ah riek dingin ka hmei leh kan va lût a. 5 Gibea mihai chun an mi hung bei a, zânah an mi hung inhuol a, mi that an tum a, ka hmei chu an pawngsuol hrep a, a thi ta a. 6 Ka hmei ruong chu ka hung phur a, a taksa chu ka chan nawi a, Israel thlahai ram hluo po poah ka thon dar a nih, Israel rama hin thil tirdakum le inzakum thlâk tak chu an lo thaw ta si a. 7 Nangni Israel thlahai hin in rêngin ngaituo unla, in ngaidân le remti dàn chu hrilin thu tlûkna siem ro" a ta. 8 Mipuihai chun thukhat chelin, "Tu khom mani in tieng inlawi nawng ei ta, tu khomin mani khuo tieng kîr bok nawng ei tiu. 9 Gibea-hai ei thaw dàn ding chu hieng hi nìng a tih: Thum vawr ei ta, chuong ang pei chun thawng ei tih. 10 Israelhai chunga thil indik lo tak an thaw ang peia thaw ve dinga Gibea khuoa Benjaminhai ei hang beinaa mipui fâk ding buoipuitu ding mi zaah sawm, mi sângah za, mi sîngah sâng thlang suok ei tiu" an ta. 11 Chuongchun, Israel thlahai po po chu thukhat chelin khawpui bei ding chun an insèk khawm a. 12 Israel thlahai chun Benjamin hnam umna taphotah mi an tir a, "Nangni lai hieng anga tuolthatna râpthlâk tak a hung um el ta hi ieng tizie am a na? 13 Gibea khuoa mi rilohai chu kan sukhlum dingin kan kutah hung pe suok unla, Israel rama inthokin chuong ang ritlona chu inthiel fai kan tih" an ta. Amiruokchu, Benjamin hnamhai chun an unau Israel thlahai thu chu an bengkhon nuom nawh. 14 Chuongchun, Benjamin thlahai chu Israel thlahai do dingin an khawpuihaia inthok chun Gibea khuoah an lût ta hum hum a. 15 Gibea mi huoisen thlang suok za sari bâkah an chêngna khuohaia inthokin kawlhnâm chawi râl do mi sînghni le sângruk chu Benjamin thlahai chun an khawm nghal a. 16 Chuonghai lai chun voikawlong thlang suok bìk ngat mi zasari an thang a, an rêng chun saihli per thiem, sam zâi tiet khom per thel lo vong an nih. 17 Israel mihai chu, Benjamin mihai tiem sa loin, kawlhnâm chawi, indo mi ngot khom nuoi li an nih. 18 Israel mihai chu Bethel-ah an hang fe a, Benjamin thlahai chu bei dingin a tu hnam am fe hmasàng an ta ti thu indonin Pathien an rawn a, LALPA chun "Judahai fe hmasa raw se" a ta. 19 A zînga chun Israel mihai chu an tho a, Gibea khuo huolin an inkul a. 20 Israel thlahai chu Benjamin thlahai bei ding chun an suok a, thanghmun an khaw a. 21 Benjamin thlahai chu Gibea-a inthok chun an hung suok a, chu ni chun Israel mihai chu sînghni le sânghni an lo that a. 22 Sienkhom, Israel thlahai chu an infui phûr a, an bei tan nia an beina hmuna inthok bok chun bei dingin thang an khaw nawk a. 23 Israel mihai chu an hang fe a, LALPA hmaah zân tieng chen an tap a, "Kan unau Benjaminhai do dingin kan inthok dok nawk ding am a ni?" tiin an hang rawn a, LALPA chun "Hang bei nawk ro" a ta 24 A ni hnina chun Israel mihai chun Benjamin thlahai chu an hang pan hnai a. 25 Benjamin thlahai chun bei dingin Gibea khuoa inthokin an hung suok ve a, Israel thlahai laia mi sîngkhat le sângriet, kawlhnâm chawi mi ngot chu, an that nawk a. 26 Chuongchun, Israel thlahai le mipui po po chu Bethelah an hang fe a, LALPA hmaah an inthung a, an tap a, zân tieng chen bu an nghei a, LALPA kuomah pumraw thilhlân le inremna thilhlâna inthawina an hang nei a. 27 Israelhai chun LALPA chu an rawn a (Chuong lai chun LALPA Thuthlung Bawm chu chu hmuna chun a um a, 28 Aron naupa Eleazar, Eleazar naupa Finehas chun rong a bawl a). Finehas chun, "Kan unau Benjamin thlahai chu kan hang bei nawk ding am a ni? an naw leh kan tawpsan lem ding?" tiin LALPA chu a'n don a. LALPA chun, "Hang bei nawk inla, zînga chu in kutah pe tâng ka tih" a ta. 29 Chun, Israelhai chun Gibea khaw kawla arûka inchàntu ding mi an sie a. 30 Israel mihai chu Benjamin thlahai bei dingin a ni thum ni chun an inthok suok nawk a, a hma ang bokin thanghmun an khaw a. 31 Lo bei dingin Benjamin thlahai chu khawpuia inthokin an hung suok a, ni dang ang bokin mihai chu beiin an lo that a, Bethel khaw pan tungna le Gibea khaw panna lama phula chun mi sawmthum an that a. 32 Benjamin thlahai chun, "A hmaa ang bok khan ei intlawm nawk tah ie" an ta. Chuonga an hril lai chun Israel thlahaiin, "Intawl kîr ei ta, khawpuia inthokin lamlien tieng zawr dok ei tiu" an ta. 33 Israelhai po po chu an umna hmuna inthokin an intawl kîr a, Baal Tamar-ah thang an khaw a; chu phing leh a rûka lo inchàntuhai kha an inchànna hmun Gibea thlang tienga inthokin an hung suok a. 34 Israel mihai laia mi huoisen thlang khawm sîngkhatin Gibea khawpui chu an bei thut a, an indo nasa êm leiin Benjamin thlahai chun an tlawm têp a nih ti hmèl khom an hriet chang nawh. 35 Israel mihai hmaa chun LALPAN Benjamin thlahai chu a sukhlum teu a, chu nia Israel mihaiin Benjamin thla an that po po chu kawlhnâm chawi ngot khom sînghni le sângnga le zakhat an nih. 36 Benjamin thlahai chun an tlawm tah ti an inhmai nawh. An hmaa Israelhai an hnung tol kha Gibea bula inchàntu an lo sie rùkhai an ring lei a ni si a. 37 A rûka inchàntuhai chun Gibea chu an bei thut a, an inzar dar a, a khaw pumpui chu kawlhnâmin an suosàm a 38 A rûka inchàntuhai khan mei an inkhûk chara Israel mi danghai khan hung nor lêt dinga inremsiem an na, 39 mei an inkhûk charin an hung bei lêt tah a nih. Benjaminhai chun Israelhai chu beiin, mi sawmthum vel lai an that hman leiin, "A hmaa ang bokin ei hne nawk an tah" an ti hman hrim a. 40 Nisienlakhom, khawpuia inthoka mei khu a hung suok phing leh Benjaminhai chu an hang ngha kîr a, khawpui pumpui khu chun vân tieng a pan tung ngut ngut el a. 41 Chu phing leh Israelhai chun an hung hnot kîr a, Benjaminhai chu an thlabâr hle a, sietnàn a tlâk buok a nih ti an inhmai nawh. 42 Israelhai hmaa chun thlaler tieng panin an tlân sie a, sienkhom tlân hmang ngaina a um naw a, khawpuia inthoka hung hnottuhai khan chu taka chun an sukhlum a. 43 Benjamin mihai chu an inhuol a, an hnot a, ni suokna tienga chawlna hmun, Gibea dep tieng chun an hnot phàk a. 44 Benjamin mihai chu mi sîngkhat le sângriet an that a, chuonghai chu mi hrât le huoisen vong an nih. 45 Anni rawi chu an intawl pei a, thlalèr tieng Rimon lungpui tieng chun an tlànsie a, mi sângnga chu lamlien dungah an that a, Gidom chenin an hnot ngat ngat a, mi sânghni an that a. 46 Chu ni chun Benjamin mi kawlhnâm chawi ngot khom sînghni le sângnga an that a, an rêng chun mi hrât le huoisen vong an nih. 47 Mi zaruk ruok chu thlaler tieng Rimon lungpuiah an tlânsie a, Rimon lungpuia chun thla li an um a. 48 Israelhai chu Benjamin mihai chungah an tuong nawk a, an khawpui sûnga mi an hmu taphot chu, an ranhai chenin kawlhnâmin an sât hlum pei a, chu bakah khuo an hmu taphot chu an raw pei bok a nih.

Judges 21

1 Israel mihai chun Mizpa khuoah, "Benjaminhai nuhmei dingin tu khomin mani naunuhai pêk lo hrim hrim ding" tiin thu an inkhâm a. 2 Chun, mipui chu Bethelah an fe a, Pathien hmaah zân tieng chen an inthung a, inring takin an tap a. 3 "Aw LALPA, Israelhai Pathien, iengti leia Israelhai lai hieng thil hi a hung um a, voisun hin Israel thlahai hi hnam khat an kim ta naw am a na?" ti chu an tap hla a nih. 4 A zînga chun mipuihai chu inhma takin an tho a, chu taka chun maichâm an siem a, pumraw thilhlân le inremna thilhlân an inhlàn a. 5 Chun, Israel thlahai chun, "Israel thlahai pungkhawmnaa LALPA hmaa hung inlang ve lohai chu tuhai am nîng an ta?" tiin an indon a. Kha hma khan Mizpa khuoah LALPA hmaa hung inlang naw taphot chu sukhlum ngei ding tia khûn taka thu an lo inkham ta tlat si lei a nih. 6 Israelhai chu an unau Benjaminhai chungchânga chun an insìr a, "Voisun hi Israel hnamhai lai hnam khat chu sâtthlâk an ni ta si a, 7 a la um sunhai ta dingin an nuhmei ding ieng tin am ei ngaituo ta ding a na? Ei naunuhai hlak nuhmeia inneitir dêr lo dingin thu ei lo inkhâm ta bok si a" an ta. 8 Chun, anni chun, "Israel thlahai Mizpaa an pungkhawmnaa LALPA hmaa hung inlang ve lohai chu tuhai am nîng an ta?" ti an hang indon chun Jabes Gilead-a mihai chu pungkhawmnaah an hung inlang nawh ti an hmu suok a. 9 Mipui an hang intiem chun Jabes Gilead-a mihai an thang ve nawh ti an hmu suok chauh a nih. 10 Pungkhawmhai chun mi huoisen thlang khawm ngot sîngkhat le sânghni an tir a, "Fe unla, Jabes-Gilead rama umhai chu nuhmei le naupang chikte chenin kawlhnâmin va sât hlum vong ro. 11 An thaw dàn ding thu an pêk chu hieng ang hi a nih: pasal po po le nuhmei, pasal zalpui taphot chu sukhlum vong ding. 12 Chun, Jabes-Gilead hmuna chun pasal la pawl ngai dêr lo nunghâk zali an hmu a, chuonghai chu an umna Silo khuoah an hung thuoi a, chu chu Kanan ram a nih. 13 Chun, pungkhawmhai po po chun mi an tir a Rimon lungpuia chun Benjaminhai chu an va'n biekpui a, inremna thu an puong a. 14 Chu phing leh Jabes-Gilead rama nunghâk an manhai chu an pèk a, chu sa khom chun an la'n dai naw a. 15 Israel hnam lai LALPAN indaidanna a siem tak leiin mipuihai chu Benjaminhai chungchang thua chun an insìr a nih. 16 Pungkhawm laia upahai chun, "A la damhai nuhmei ding hi ieng tin am thaw tâng ei ta, Benjaminhai laia an nuhmeihai hlak chu sukbohmang an ni ta si a? 17 Benjamin hnam hi sukmanga a um nawna dingin Benjamin thla la um sunhai hi ieng tin am thla ei inneitir thei ding a na? 18 Ei naunuhai hlak nuhmeiah ei inneitir thei si naw a" an ta. Israel thlahai chun, tu khom Benjaminhai nuhmei dinga mani naunu inneitir taphot chu tongsie phur dingin an lo inkhàm ta si a. 19 Chun, anni bok chun, "Ngai ta u, Bethel hmar tieng, Bethela inthoka Sekem tieng fena lamlien sak tienga Lebon sim tienga um Silo khuoah kum tin LALPA ta dingin kût a um hlak kha. 20 Benjamin thlahai kuoma chun, 'Va fe unla, grèp hmunah lo inchàn unla, 21 lo en zing unla, lâmnaa thang dinga Silo khuoa nunghâkhai an hung suok pha leh grèp huona inthokin hung suok unla, Silo nunghâkhai chu mani nuhmei ding seng man unla, Benjaminhai ram tieng fepui ro. 22 An pahai amanih an tàhai amanih an hung pha leh an kuomah, 'Lunginsiet ro khai. Indonaa khan an nuhmei ding ei lo manpêk si naw a, nangni hlakin in lo pêk bok si nawh, lo pe ni inla chu, thiem naw in hlaw ding a ni bok si a' kan lo ti ding a nih" tiin thu an pêk a. 23 Benjamin thlahai chun chuong ang chun an thaw a, lâma hunghai chu anni zât seng nuhmei dingin an man a, an fe hmangpui a, an ram tieng an thuoi a, an khawpuihai cheiin an hluo nawk a. 24 Chu taka inthok chun Israel thlahai chu mani chi chi le mani hnam hnamin an intêl hrang a, anni ram sengah an kîr nawk ta a. 25 Chuong lai chun Israelhai lai lal an la um naw a, mi tinin mani tha ti zawng zawngin an thaw el a nih.

Ruth 1

1 Rorêltuhaiin ro an rêl laiin a ramah tàm a tla a. Judai ram Bethlehema inthokin mi pakhat chu a nuhmei le a naupa pahnihai thuoiin Moab ramah iemani chen um dingin a fe a. 2 Pasal hming chu Elimelek a na, a nuhmei hming chu Naomi a na, a naupa pahnihai chu Mahlon le Kilion an na, Judai ram Bethlehema Efrat mi an nih. Moab rama chun an fe a, chu taka chun an um ta zing a. 3 Naomi pasal Elimelek chu a thi a, a naupa pahnihai le chauh an um ta a. 4 A naupahai chun Moab mi nuhmeiin an nei a, pakhat hming chu Orpa a na, pakhat hming chu Ruthi a nih. Chu taka chun kum sawm vel an um hman a. 5 Chun, Mahlon le Kilion khom chu an thi ve ve a, Naomi chu pasal bo le nau bo a hung ni ta a. 6 LALPAN a mihai hung kanin fâk ding a pêk nawk tah ti Moab rama inthoka a lo hriet chun, Naomi le a mohai chu in tienga kîr nawk dingin an insiem a. 7 A mo pahnihai leh an umna chu suoksanin Judai ram panin an suok a. 8 A nakie deu chun Naomi'n a mo pahnihai kuomah, "In nuhai in tieng ve ve panin kîr nawk ta ro. Ka chunga le in pasal thi tahai chunga lunginsietna in inlangtir ang bok khan LALPA khomin in chungah ngilnei takin thaw ve raw se. 9 LALPA chun hadam taka in khawsakna ding pasal dang pe cheu raw se" a ta. Chuongchun, inthena dingin an infawp ngawi ngawi a, inring takin an tap a. 10 An pahni chun, "Fe nawng kan tih, i kìrna ding i chipuihai kuoma chun hung ve lem kan tih" an ta. 11 Naomi ruok chun, "Ka naunuhai, kîr lem el ro. Ieng leiin am in mi zui ding a na? In pasal ding nau dang ka la pai thei ding am a ni? 12 Ka naunuhai, kìr el lem ro, pasal dang nei dingin ka upa taluo tah. Ka ta dinga beiseium khom lo ni ta hrim sien, voizân hin pasal neiin nau khom lo nei ni ta lang, 13 an puitling chenin pasal nei loin in nghâk el ding maw? Ni lo e, ka naunuhai, chu chu ni thei naw nih. LALPA kut ka chunga tla hi nangni chan nèkin a kha lem a nih" a ta. 14 Chuongchun an tap nawk rak a. Orpa chun a tarpi chu inthena dingin a fawp a, Ruthi ruok chun a kuo tlat a. 15 Naomi chun, "Ngai ta, i mo chanpui chu a chihai kuom tieng le a pathienhai kuom tieng a kîr nawk a, nang khom ama ruolin kîr nawk el rawh" a ta. 16 Ruthi ruok chun, "Nangma the ding che le nang zui loa kîr ding chun mi ti ta lul naw raw khai. I fena taphotah hung ka ta, i riekna taphotah riek ka ta, i chihai chu ka chihai nîng an ta, i Pathien chu ka Pathien nîng a tih. 17 I thinaa chun thing ka ta, chu taka chun an mi phum ve el ding a nih. Nang le kei hi thina chauh naw thil dangin a mi the ding chun, ieng anga nasa khomin LALPAN a law law mi law el raw se" a ta. 18 Ruthi chun zui a tum tlat ti Naomi'n a hriet phing leh a ti zui ta naw a. 19 Chuongchun, an pahni chun Bethlehem an tlung chenin an fe pei a. Bethlehem an tlung chun anni leiin a khawnawtin an phul a, nuhmeihai chun, "Hi hi Naomi kha a ni naw maw?" an ti sup sup a. 20 Ama chun, "Naomi mi ti ta naw ro, Mara mi ti ta lem ro, LALPA chun ka hringnun hi kha takin a siem ta si a. 21 Sûng kimin ka fe suok a, kut ruokin LALPAN a mi hung thuoi kîr a. LALPA chun a mi sukrinum a, Iengkimthawthei chun ka chungah vangduoina a'n tlâktir a, ieng leiin am Naomi in mi la ti zing ding?" a ta. 22 Chuong ang chun Naomi chu Moab rama inthokin a mo Ruthi, Moab mi le chun barli an sìk tan laiin Bethlehemah a hung tlung tah a nih.

Ruth 2

1 Naomi chun a pasal sûnghai, Elimelek thlaa mi, pa neinung tak el laichin pakhat a nei a, a hming chu Boaza a nih. 2 Chun, Moab mi Ruthi chun Naomi kuomah, "Loah fèng ka ta, mi lo lunginsiettu tuhai bu lâk hmai va zong ka tih" a ta. Naomi chun, " Fe ta la, ka naunu" a ta. 3 Chuongchun a fe a, Elimelek thlaa mi Boaza loa ngei chun a va fe fûk hlauh el a, bu sîktuhai lâk hmai chu an hnunga chun a rût khawm a. 4 Chu lai tak chun Bethlehema inthokin Boaza chu a hung tlung a, "LALPA chu in kuomah um raw se" tiin bu sîktuhai chu a chibai a. Anni chun, "LALPAN mal sawm che raw se" tiin an bûk lèt a. 5 Boaza chun sinthawhai inrawitu kuoma chun, "Hi nu hi khaw lai nunghâk am a na?" a ta. 6 Ama chun, "Moab mi Naomi le hung an nih. 7 'In bu lâk hmai mi'n khawmtir ro. Buphal an lâk khawm zona hmun hmunah hung dap pei ka tih' a ta, a fe a, deihlimah sawt naw te a chawl met ti lo chu zîng tienga inthok khan tu chen hin ngûk takin a thaw ngar ngar a nih" a ta. 8 Boaza chun Ruthi kuomah, "Ka naunu, ngai ta, mi dang loa chu bu hnung zongin fe naw la, hi loa inthok hin inson naw la, ka siehlaw nunghâkhai hnung hi zui zing rawh. 9 An bu sîk hi en zing la, nunghâkhai hnunga hin sui pei la, tlangvàlhai hin ieng khom law lo ding chein thu ka pêk hieu an tah. I dang a châr pha leh tui bela tlangvàlhai tui chawi sa hi i dawn hlak ding a nih" a ta. 10 Ruthi chu a kûn a, hnuoi sikin a bokkhup a, a kuomah, "Kei hi hnam dang mi ni bok si, nangin mi ngaiven nuom a, i mit tlunga i mi sie el hi ieng tizie am a na?" a ta. 11 Boaza chun, "I pasal thia inthoka i pi chunga i thilthaw po pohai le i nu le pa le i piengna ram mâksana kha hmaa i mi hriet ngai lohai kuoma chêng dinga i hung dàn thu po po miin an mi hril a. 12 LALPAN i thilthaw po po chu rul sien la che, a thla hnuoi i hung bèl, LALPA, Israelhai Pathien chun i that man chu pe teu raw se che" a ta. 13 Ruthi chun, "Pu, i ditsak hlaw zinga um ka nuom. I siehlaw laia pakhat tluk khom hi ka ni naw lai zingin, i siehlaw hi ngilnei taka bein i sukthlamuong si a" a ta. 14 Sunbu fâk huna chun Baoza'n a kuomah, "Hung la, bei hung fa la, uoiin thûra hin inchie ve rawh" a ta. Bu sîktuhai le an ot tlâng lai chun beipèr a pêk a, a khop tawk a fâk hnung khom chun fâk seng lo a la um ta rop a. 15 Bu hnung zong dinga a tho hnung chun Boaza chun a mihai kuomah, "Buphal inkhawmtuhai laia a'n khawm ve khomin hal naw ro 16 Chun, buphal têla mihai khom pot suokin mâksanpêk unla, inkhawm pei sien, hal naw ro" tiin thu a pêk a. 17 Chuongchun, loa bu lâk hmai chu zân tieng chenin a zong a, a lâk khawmhai chu a vuok a, kilogram sawm lai a tling a. 18 Bu chu in tieng a phur a, a tarpi chun a bu zong khawm chu a lo hmu a, chun suna a bei fâk bâng chu a phor a, a pêk a. 19 A tarpi chun, "Voisun khan tuhai lo am bu hnung i zong a? A lo ngaisaktu che chu malsawmin um raw se" a ta. Ama chun a lo fèna chu a hril a, "Voisuna ka fèna lo neitupa hming chu Boaza a nih" a ta. 20 Naomi chun a monu kuomah, "LALPA, la dam lai le thi ta hai chunga a lunginsietna chuoi loa inlangtirtu chun ama chu mal sawm raw se" a ta. Naomi bok chun, "Chu mi chu kan sûngkuo inhnaipui, kan laibung bul a nih" a ta. 21 Moab mi Ruthi chun, "A lo ni ngei chu tie! 'Ka buhai an sìk zo hma khat ka sinthawtuhai lai hin thang ve zing rawh' a mi ti nghe nghe a nih" a ta. 22 Naomi chun a monu Ruthi kuomah, "Ka naunu, lo danga chu an lo tawk pal el thei che leiin, a siehlaw nunghâkhai lai chun um la, i ta dingin thang a tih" a ta. 23 Chuongchun, barli le huit an sìk zo chenin Boaza siehlaw nunghâkhai lai chauh chun bu hnung zongin a fe hlak a, a tarpi kuoma chun a um a.

Ruth 3

1 Ni khat chu a tarpi Naomi chun Ruthi kuomah, "Ka naunu, i ta dinga tha khawsakna ding zongpêk che hi ka thaw ding a ni naw am a ni? 2 Kan laibungpa Boaza, a siehlawhai laia sin i va thawna kha a um an naw maw? Ngai ta, zâna hin a hrizawlah barli a zâp fai ding a nih. 3 Insil fai la, rimtui innàl la, i thuom tha tak hâk la, hrizawla chun zu fe la, faa a dawn zo hma chun i um a nih ti inhriettir naw rawh. 4 A zâl pha leh a zàlna hmun chu inchik la, a ke tienga puon chu hawk la, a ke bula chun zâl la, i thaw ding chu lo hril a ti che" a ta. 5 Ruthi chun, "I ti ang tak chun thawng ka tih" a ta. 6 Chuongchun, hrizawla chun a fe a, a tarpi hril ang charin iengkim a thaw a. 7 Faa a dawn zo chun Boaza chu a hlim hle a, bu vùm sira chun a zâl ta a. Ruthi chun damten a va pan a, a ke tienga puon chu a hawk a, a zâl ve ta a. 8 Zân thangah Boaza chu thil iengin amanih a chok har a. A hang inher chun a ke bulah nuhmei a lo zâl zing el a. 9 Ama chun "Tu'm i na?" a ta. Nuhmei chun, "I siehlaw Ruthi ka nih. Mi'n tlantu ding laichin bul i ni leiin i siehlaw hi i puon mi'n zawnpui ve rawh" a ta. 10 Ama chun, "Ka naunu, LALPAN mal sawm che raw se. Mi rethei amanih hausa amanih tlangvàl i zui naw leia a hmaa i mi suklawmna nèk daiin voizàna ngilneina i hung inlangtir hin a mi suklawm a nih. 11 Chuleiin, ka naunu, ti naw rawh, i hni po po chu thawpêk ka ti che. Hi khuoa mi po po hin nu inzaum tak i nih ti an hriet. 12 Amiruokchu, i laichin hnai ni lang khom, keima nêka laichin hnai lem intlantu ding che a um a, zînga hin a'n tlan nuom che leh a tha nîng a ta, intlan a ti che a. 13 A'n tlan nuom naw che a ni ruok chun, LALPA hring zing hmingin thu ka tiem che a, keiin intlan ngei ngei ka ti che. Zîng tieng chenin hi taka hin zâl rawh" a ta. 14 Chuongchun, a ke bula chun zîng tieng chen a zâl a, sienkhom tu khomin an hriet thei hmain a tho a, "Hrizawla hin nuhmei a hung ti tu khomin hre naw raw hai se" a ta. 15 Boaza chun, "I silpuon kha hlîp la, hung daw rawh" a ta, barli kilogram sawmhni ding lai a sungpèk a, a'n phurtir a, khuo tieng chun a kîr ta a. 16 In a tlung chun a tarpiin, "Ka naunu, iem i zu chang a?" a lo ta. Ama chun a chunga thil a lo thaw dàn po po chu a hril a. 17 "Hi, kilogram sawmhni ding lai barli a mi pêk a, 'I tarpi kuomah kut ruokin i kîr ding a ni nawh' a mi ti a nih" a ta. 18 A tarpi chun, "Ka naunu, ieng tin am thil a hung um ding i hriet hma chun nghâk ringot el rawh; voisun hin chu thil chu a sukfel hma chun chu pa chu a to mei mei teu awm si nawh" a ta.

Ruth 4

1 Chuongchun, Boaza chu kul kotkhàra chun a hang fe a, chu taka chun a thung a, a laichin bul, a chungchang thu a hril kha a hung a, Boaza chun, "E khai, unaupa, hi taka hin hung la, la hung inthung vak rawh" a ta. Chuongchun a hung a, a hung inthung a. 2 Boaza chun a khaw upa mi sawm a hung thuoihai kuoma chun, "Hi taka hin inthung ei tiu khai" a ta, a ti ang chun an inthung a. 3 Chun, a laichin hnai, an sûngkuo ro intlantu ding kuoma chun, "Naomi kha Moab rama inthokin a hung kîr nawk a, ei unaupa Elimelek ram kha zor a tum a. 4 Chuleiin, hi taka inthunghai le upahai mithmua ngei hin ram chu inchaw rawh. I'n tlan nuom chun intlan la, i'n tlan nuom naw chun ka hrietah mi hril rawh. Nang naw chu tu khom intlantu ding awm an um naw a, kei hi i dota intlantu ding chu ka nih ti inhriettir che tûlin ka hriet" a ta. Ama chun, "Intlan ka tih" a ta. 5 Boaza chun, "Naomi-a inthoka ram i'n chawk nia inthokin pasal chân tah, Moab mi Ruthi laka mithi hming re loa a ro hluotu ding an um pei theina dingin ama chu i'n tlan sa bok ding a nih" a ta. 6 A laichin bul chun, "Keima ta ding chun intlan thei naw ning, ka'n tlan chun keima ro hluotu ding tieng sukkhawhlo rawi ka tih. Intlantu ka nina ai chu nangin chang el rawh, kei chun intlan thei naw ning" a ta. 7 In le lo le ro an inchawk le intlan chànga neitu nina hming inthleng felna dinga tiena inthoka Israelhai thaw dàn chu, a zortuin pheikhok a hlîp a, a changtu kutah a pêk a, chu chu an thil inchawk le inthleng an namnghet dàn a nih. 8 Chuong ang chun a laichin bul chun Boaza kuomah, "Nangman i ta dingin intlan el lem rawh" a ta, a pheikhok chu a hlip a, a pêk a. 9 Boaza chun upahai le mipui po po hmaah, "Voisun hin in rêngin Elimelek thil nei po po le Kilion le Mahlon thil nei po po Naomi kuta inthoka ka'n chawk a nih ti a mi hrepuituhai in nih. 10 Chu chauh chu ni loin, mithi chu a hming re loa rohluotu siempêk ding le mithi chu a unauhai lai le a umna hmun kul kotkhàra a hming a bo nawna dingin, Moab nuhmei Ruthi, Mahlon nuhmei chu ka nuhmei dingin ka'n chawk bok a, chu chu voisun hin nangni hi mi hrepuitu in nih" a ta. 11 Chun, kul kotkhàra mipui po po le upahai chun, "Hrepuitu kan nih. Rachel le Lea, Israel sûngkuo indintu pahnihai ang bok khan i ina nuhmei hung lût chu LALPAN siem ve sien la, Ephrat-a hin ngîrhmun neiin, Bethlehema hin hmingthang takin hung um raw se. 12 LALPAN hi nunghâk laka chi thla a la'n dinpêk ding che lei hin i sûngkuo chu Tamar-in Juda laka a hring Perez ang kha hung ni raw se" an ta. 13 Chuongchun, Boaza chun Ruthi chu a thuoi a, a nuhmei a hung ni ta a, LALPAN nau a'n paitir a, nau pasal a nei a. 14 Nuhmeihai chun Noami kuomah, "Voisun ni chena laichin hnai sansuoktu tlasam loa inumtirtu che LALPA chu inpâkin um sien la, Israelhai lai hin i tupa chu a hming hung inthang raw se. 15 Ama chu i hringna tungdingtu ding le i tar tienga chawmtu che hung ni bok raw se. I mo, nangma hmangaitu che, nau pasal pasari nèka i ta dinga hlu lem chun, ama chu a hringpêk ta si che a" an ta. 16 Naomi chun naute chu a lâk a, a mal chungah a pom a, a enkol a. 17 An tuolbawm nuhmeihai chun, "Naomi'n nau pasal a nei" an ta, a hmingah Obed an sak a. Ama chu Davida pa Jessai thlatu a nih. 18 Perez sûngkuo inthla sawng dân chu: Perez-in Hezron a hring a; 19 Hezron chun Rama a hring a; Rama chun Aminadab a hring a; 20 Aminadab chun Nason a hring a; Nason chun Salmon a hring a; 21 Salmon chun Boaza a hring a; Boaza chun Obed a hring a, 22 Obed chun Jesai a hring a; Jesai chu Davida pa a nih.

1 Samuel 1

1 Efraim tlâng ram Ramathaim- zofim khuoah mi pakhat a hming Elkana a um a, ama chu Jehoram naupa a na, ama chu Elihu naupa a na, ama chu Tohu naupa a na, ama chu Efraim mi Zufa naupa a nih. 2 Elkana chun nuhmei pahni a nei a, pakhat chu Hana a na, pakhat chu Penina a nih. Penina chun nau a nei a, Hana ruok chun a nei ve nawh. 3 Iengkim LALPA chawibiek ding le a hmaa inthawina inhlàn dingin Elkana chu an khuoa inthokin Silo khuoah kum tinin a hang fe zie hlak a, chu taka chun thiempu Eli naupa Hofni le Finehas hai chun thiempu sin an thaw a. 4 Inthawina an inhlàn ding pha Elkana chun a nuhmei Penina le a naupa le naunu hai chan ding seng sa iemani zât a sem hlak a. 5 Hana ruok chu a hmangai a, LALPAN a sul a khâr hri bok leh, chan hni a siempèk bîk zie hlak a. 6 LALPAN a sul a khâr lei chun a khingpuinu chun a lung khei zawng ding tak thawin a suklungsen hlak a. 7 Kum tin kum tin elin LALPA ina Hana a fe zâtin a khingpuinu chun elsènin a suktap a, bu a nghei pha hiel hlak a. 8 Elkana chun, "Hana, ieng dinga i tap am? Iem a ta bu i fâk naw? Iem a ta i lung a hnuol? Naupa sawm nêk khomin i ta dingin ka hlu lem naw maw?" tiin a thlêm hlak a. 9 Tum khat chu Silo-a an fàk an dawn zoin Hana chu a tho a. Chuong lai chun thiempu Eli chu LALPA tempul kotkhàr ban bula thungnaah a'n thung a. 10 Beidong le lungril na taka tap hlop hlop pumin Hana chu LALPA kuomah a tongtai a. 11 LALPA kuomah, "Iengkim LALPA, i bawinu rinum tuor hi zuk thlîr la, hre zing rawh. I bawinu hi theinghil loa nau pasal i pêk chun, a dam sûng po po LALPA ta dingin pe suok ka ta, a lu khom vaw ni ngai hrim hrim naw nih" tiin inkhàm meuin thu a tiem a. 12 Chuonga a tongtai mel mel laia a hmùr inphu chu thiempu Eli chun a lo thlîr zing a. 13 Hana chu lungril takin a tongtai a, ri nei si loin a hmùr a'n phu sep sep a. 14 Eli chun zu inrui sawnin, "Ieng chen am inruiin i um zing ding a na? I uoiin sie hmang raw khai" a ta. 15 Hana chun, "K'an rui naw ie, Pu, nu lungril rimsi tawpkhawk ka ni hi. Zu amanih uoiin amanih ka dawn nawh; LALPA hmaah ka lungril ka phor suok lem a nih. 16 I siehlaw hi nuhmei rilo angah mi sie naw rawh; ka lungrila sip liem ka lungngaina le beidongna hai ka phor suok lem a nih" tiin a don a. 17 Eli chun, "Lungmuong takin fe ta rawh, LALPA, Israelhai Pathien chun i hni ang tak chu hung pe raw se che" a ta. 18 Ama chun, "I bawinu hin i mit tlung ngei raw se" a ta. Chuongchun, nuhmei chu a fe a, bu a fâk a, lungngai hmèl a put zing ta naw a. 19 A zînga chun inhma takin an tho a, LALPA an chawibiek a, an khuo Rama tieng an kîr nawk a. Elkana chun a nuhmei a pawl a, LALPAN ama nu chu a hriet zing a. 20 Chuongchun, Hana chun nau a pai a, nau pasal a nei a, "LALPA kuoma ka hni suok a nih" a ta, a hmingah Samuel a sak a. 21 Chun, LALPA hmaa kum tina pumraw inthawina an nei hlak ang le a thu intiemkamna hlen dingin a sûnghai thuoiin Elkana chu Silo-ah a hang fe a. 22 Hi tum hin Hana ruok chu a hang fe ve nawh. A pasal kuomah, "Naupang hin nene a nghei pha le chauh ama thuoiin LALPA hmaah hang inhlàn ka ta, chu taka chun ama chu um zing tâng a tih" a ta. 23 A pasal Elkana chun, "Tha i ti ang tak chun thaw rawh. Nene nêk i'n bàntir chenin hi taka hin um rawh; LALPAN i thu chu sukpuitlingpêk ngei raw se che" a ta. Chuongchun, naupangin nene nêk a bàn hma khat chu Hana chu inah a um a, a naupa chu a enkol a. 24 Nene nêk a bàn chun naupang dawng tak la ni sien khom a nu Hana chun bawngchal kum thum mi keiin, beiphit kilogram sawm le uoiin savun pèng khat chawi bokin Silo khuoa LALPA inah a fepui a. 25 Bawngchal chu an that a, naupang chu Eli kuomah an thuoi a. 26 Nuhmei chun, "Pu, i hringna sâlin ka hril, kei hi i bula hi hmuna ngîra LALPA kuoma tongtai nu ngei kha ka nih. 27 Hi naupang hi hniin ka tongtai a, ka hni ang takin LALPAN a mi pêk a. 28 Tuhin keikhomin LALPA kuomah naupang hi ka hung inhlàn a, a dam sûnga LALPA ta dinga pêk suok a nih" a ta. Chu taka chun Samuel chu LALPA rongbawlin a um ta a.

1 Samuel 2

1 Chun, Hana chu hieng hin a tongtai a:"LALPA-ah ka lungril a hlim a, LALPAN ka ki a chawisâng a, Hmèlmahai lakah ka uong thei ta a, A sandamnaa chun ka lawm a nih. 2 LALPA anga thienghlim an um nawh, Nangma ang tu khom an um nawh, Ei Pathien ang Lungpui an um nawh. 3 Uongthuong takin tong zing naw la, Tong chaltlai hmang ta naw rawh, Iengkim hretu chu LALPA Pathien a nih, Mi tin thilthaw a bûk vong hlak. 4 Râlhrâthai thalngul a suktliek a, Mi hrât nawhai chu a sukhrât a, 5 Khophai chu bu zongin an inhlaw a, Phingtâmhai tlai takin an um a; Nu chingin nau 'sal sari a hring a, Nau hau nuin a sùn hmang zo tah. 6 LALPAN a sukhlum a, a sukhring a, Thlânah a hnûk lût a, a kei tho a; 7 A sukpasie a, a sukhausa bok a, A suktlawm a, a chawisâng bok a. 8 Pasie chu pilvuta inthok a lâk suok a, Rethei chu êk dûra inthok a chawisâng a; Ama chu milien lai a'n thangtir a, Chawimawina lalthungpha a'n hluotir. Leilung nghatsan chu LALPA ta a na, A chungah khawvel hi a'n nghat a. 9 A mi thienghlimhai kè a vêngpèk a, Mi rilohai chu thimah a hmet dei. Tha hrât hi dingchangna a ni nawh, 10 LALPA dotu chu inchek vong an ta, Vân a'nthokin inrûm khum a ta, LALPAN kawl kil chen ro rêl a tih. A ruot lal chu sukhrât a ta, A hriek nâl ki chu chawimawi a tih"tiin. 11 Chun, Elkana chu a chêngna khuo Rama tieng a kîr nawk a, naupang chun thiempu Eli hnuoiah LALPA rong a bawl a. 12 Eli naupahai chu an rilo hle a, LALPA inzàna hrim an nei nawh. 13 Mipuihai laka an lo thaw dàn chu, miin inthawina inhlàn a, a sa an suong lai chun thiempu siehlaw chu sa thurna thir kut zum thum nei chawiin hung a ta, 14 sa suongna bêl bau lien amanih, bêl dawt nei amanih, bêl khei nei amanih le bêl ieng chi khom ni sien zuk sun a ta, sa a lâk suok suok chu thiempu ta dingin a lâk hlak a. Silo-a LALPA kuoma thil inhlàna hung Israelhai po po chungah chuong ang chun an lo thaw hlak a. 15 Chu bâkah, a thauhai an raw hmain thiempu siehlaw chu inthawina inhlàntu kuomah hungin, "Thiempu em hmin ding sa mi hung pe rawh, i sa suong hi fa naw nih, a sel chau a nih a dit" tiin a hung hril a. 16 Chun, inthawituin, "A thau hi hang raw phot ei ta, a dang chu i dit zât zât i lâk ding a nih" a ti pha leh siehlaw chun, "Ni lo e, i mi pêk nghal ding a nih. I mi pêk naw chun ka lâk lui tho ding a nih" a ti hlak a. 17 Hienga LALPA kuoma thilhlàn inza naw taka an lo thaw hlak lei hin tlangvàlhai suolna chu LALPA mithmua chun thil theidaum tak a nih. 18 Amiruokchu, Samuel chu naupang te khom ni sien, puon zâi inhmia siem thiempu zakuo efod chu hâkin LALPA hmaah rong a bawl a. 19 Chu bâka chun a nuin zakuo fuol a thuipèk a, kum tin pumraw inthawina inhlàn dinga a pasal le Silo-a an fe zâtin a chawipèk hlak a. 20 Eli chun Elkana le a nuhmei chu mal a sawm a, "LALPA ta dinga thilhlân in inhlàn hi a'n hlàntu nuhmei thlaa inthokin LALPAN rul cheu raw se" a ta, chuongchun in tieng an kîr nawk ta a. 21 LALPA chun Hana chu a kan a, nau a pai a, naupa pathum le naunu pahni a nei a. Chun, naupang Samuel chu LALPA hmaa chun a hung seilien pei a. 22 Eli chu a hung upa ta hle a, Israel mihai po po chunga a nauhai thilthaw po po le Intuokna Puon in kotkhâr bula rongbawltu nuhmeihai an zàlpui hlak thu dâm chu a hriet a. 23 Chuongchun, an kuomah, "Ieng leia hieng ang thil hi in thaw am a na? Hieng mihai po po baua inthok hin in thil rilo thawhai ka lo hriet vong a nih. 24 Hieng ding hi a ni nawh, ka nauhai! Pathien mihai laia in chanchin an hril thang hi a tha naw tieng vong a nih. 25 Mi pakhat chungah mi dangin thil suol a thaw chun Pathienin an chungthu a rêl thei a, amiruokchu, LALPA chungah miin thil suol a thaw ruok chun tuin am a chungthu hrilpêk tàng a ta?" a ta. Chuong sa khom chun a nauhai chun an pa zilhauna chu an poisa chuong nawh, LALPA chun sukhlum dingin a lo ruot tawl ta si a. 26 Naupang Samuel ruok chu a hung inthang lien deu deu a, Pathien le mihriemhai ditsak a hlaw a. 27 Chun, Eli kuomah Pathien mi a hung a, a kuomah, "LALPA chun hieng ang hin a tih: 'Aigupta rama Faraw bawia in um lai khan in thlatuhai kuomah ka hung inlàr hlak a ni naw am a ni? 28 In thlatu chu Israel hnam po po laia inthoka ka thlang suok, ka maichâmah fe a, rimtui raw a, ka hmaah thiempu zakuo hâk a, ka thiempu ni dinga ka ruot a ni naw am a ni? In thlatuhai chu Israel mihaiin meia pumraw thilhlân an inhlàn po po kha ka pêk a ni naw am a ni? 29 Ieng leiin am ka umnaa inhlàn dinga ka ruot ka kuoma inthawinahai le ka puola thilhlânhai chu chèksol a, kei nêka i nauhai chawimawi lem a, nangni insukthauna dinga ka mi Israelhai inthawinaa a sa tha tha in hmang am a na? 30 "Chuleiin, LALPA, Israelhai Pathien chun hieng hin a puong a nih: 'Keiin i sûnghai le i pa sûnghai chu kumkhuoin ka hmaah um an tih lo ti lang khom, nangni chu um top naw ti niu. Mi chawimawitu taphot chu chawimawi ka ta, mi hmusittu taphot chu hmusit ka tih. 31 Ngai ta, i hrâtna le i pa sûnghai hrâtna ka sât thlàk hun a hung tlung vak ding a na, in sûngkuoa mi tar kûna dam hrim hrim um naw ti niu. 32 Hi ka chèngna ina hin buoina tlung a ta, Israel mihai ruok chu malsawm ka ta, inhnarin la thlîr vong vong in ta, i insûnga ruok chu tar kûna dam tu khom um naw ni hai. 33 Chun, ka maichâma inthoka ka sukbohmang nawhai chu i mitthli suktlatu le i lungril suklungngaitu ding chaua hlà nîng an ta, i ina inthoka pieng taphot chu an vânglai takin thi pei an tih. 34 " 'Chun, i naupahai pahnih, Hofni le Finehas hai chunga thil hung tlung ding hi i ta dingin inchikna nîng a tih, an pahniin ni khat sûngin an thi ve ve ding a nih. 35 Ka lungril le ngaituona anga ka rongbawltu ding keiman thiempu ringum indin ka ta, a sûngkuo khom indin nghet ka ta, ka hriek nâl hmaa chun rong bawl zing tâng a tih. 36 Chun, hieng hi nîng a ta, i sûngkuo la dam sun po po chu tangka le bei hlek hniin invâk an ta, a hmaa chun kûn an ta, 'Fâk ding ka hmu theina dingin thiempu sin ieng amani bêk mi'n thawtir raw khai' tiin la hnîng an tih' a ti a nih" a ta.

1 Samuel 3

1 Naupang Samuelin Eli hnuoia LALPA rong a bawl lai chun LALPA thu a tlung inkhàt hle a, inlàrna khom a hung tlung zen zen nawh. 2 Chuong lai chun Eli mit chu a chàu tàk leiin khuo a hmu mumal thei ta naw a, a zâlna hmun pangngaia chun a zâl a. 3 LALPA tempula PathienThuthlung Bawm bula chun Samuel chu a zàl a. Chun, Pathien khawnvar khom an la that hman hmain, 4 LALPA chun Samuel a ko a. Samuel chun, "Hi taka hin ka um?" a ta. 5 Eli kuomah a va tlân vat a, "I mi ko maw? Hi taka hin ka um" a ta. Ama chun, "Ka ko naw che, va zâl nawk ta rawh" a ta. Chuongchun a fe a, a zâl nawk ta a. 6 LALPA chun Samuel chu a ko nawk a. Samuel chu a tho a, Eli kuomah a fe a, "I mi ko maw? Hi taka hin ka um" a ta. Eli chun, "Ka naupa, ka ko naw che. Fe la, va zâl nawk ta rawh" a ta. 7 Chuong lai chun Samuel chun LALPA a la hriet ve naw a, LALPA thu chu a kuoma puong a la ni bok nawh. 8 LALPA chun Samuel chu a ko nawk a, chu chu a ko voi thumna a nih. Samuel chu a tho a, Eli kuomah a fe a, "I mi ko maw? Hi taka hin ka um" a va ti nawk a. Chu phing leh naupang chu LALPAN a ko a nih ti Eli chun a hriet ta a. 9 Eli chun Samuel kuomah, "Fe la, va zâl nawk ta rawh. A ko nawk che chun, 'LALPA, thu chu hril rawh, i siehlaw hin a ngaithlàk ie' ti rawh" a ta. Samuel chu a khuma chun a va zâl nawk a. 10 LALPA chu a hung a, a bula chun a ngîr a, a hmaa ang bok khan, "Samuel, Samuel" tiin a ko nawk a. Samuel chun, "Thu chu hril rawh, i siehlaw hin a ngaithlâk ie" a ta. 11 LALPA chun Samuel kuomah, "Ngai ta, Israel rama a hre taphothai na khel ngei ngei ding thil ka thaw ding a nih. 12 Chu huna chun Eli kuoma a sûngkuo chungchâng thua thaw dinga ka thil hril po po chu a bula inthoka a tawp chenin ka hlen ding a nih. 13 A nauhaiin thil suol thaw a, Pathien an sukmuolphozie hre zing sia a khap naw leia an sûngkuo chungthu kumkhuoa dinga ka rêl chu ama khom ka hril tah. 14 'Eli sûngkuo bawsietna chu inthawina amanih thilhlân amania sukre thei ni ta naw nih' tiin ka lo inkhàm ta si a" a ta. 15 Samuel chu zîng tieng chen a in a, LALPA in kotkhârhai chu a hong a. Inlàrna a hmu chu Eliin hrieng a tih ti Samuel chun a tithawng hle a. 16 Amiruokchu, Eli chun a hung pan a, "Ka naupa Samuel" tiin a hung ko a. Samuel chun, "Hi taka hin ka um" a ta. 17 Eli chun, "Ieng thil am LALPA chun a hril che a? Ka lakah ieng khom ip naw rawh. I kuoma a hril po po chu ka lakah ip i nei chun i chungah Pathienin a nat thei ang tawpin thaw raw se" a ta. 18 Chuongchun, Samuel chun iengkim chu ip nei dêr loin a hril a. Eli chun, "LALPA a na, tha a ti ang peiin thaw raw se" a ta. 19 Samuel chu a hung inthang lien pei a, a kuomah LALPA a um a, a hril hrim hrim chu a sukdik pei a. 20 Dan-a inthoka Beersheba chena Israel mihai po po chun Samuel chu LALPA zawlnei indik a ni takzet ti an hung hriet tah vong a. 21 LALPA chu Silo-a chun a'n làr zui pei a, Samuel kuomah a thu a puong hlak a. Samuel thu chu Israel mihai po po lai a hung inthang suok ta a.

1 Samuel 4

1 Chuong lai chun Israelhai chu Filistin mihai do dingin an inthok suok a, Israelhai chu Ebenezer-ah an inkul a, Filistinhai chu Afek-ah an inkul bok a. 2 Filistinhai chun Israelhai chu an hung bei a, an hne a, indona hmuna chun mi sângli lai an that a. 3 An inkulnaa Israel sipaihai an hung kîr chun an upahaiin, "Ieng leiin am voisun hin Filistinhai hmaah LALPAN a mi suktlawm am nîng a ta? Thaw ro, eini leh fe a, ei hmèlmahai kuta inthoka mi san suoktu dingin Silo-a inthokin LALPA Thuthlung Bawm hang làng ei tiu khai, " an ta. 4 Chuongchun, Silo-ah mi an tir a, chu taka cherubim chunga inthung Iengkim LALPA Thuthlung Bawm chu an va làk a, Eli naupa Hofni le Finehas hai khomin bawm chu an hung zui ve a. 5 An inkulna hmuna Thuthlung Bawm a hung tlung chun hnuoi nghor hning hiel khopin Israelhai chu an khêk dur dur a. 6 An khêk ri Filistinhaiin an lo hriet chun, "Hebrai mihai inkulnaa an khêk dur dur chu ieng tizie am an ta le? an ta. An inkulnaah LALPA Thuthlung Bawm a hung tlung ti an hriet chun an ti hle a. 7 "An inkulnaah Pathien a hung a ni chu! Ei chung a pik ie! Kha hma khan hieng thil hi a la um ngai nawh. 8 Ei chung a pik ie! Chuong ang Pathien kut hrâta inthok chun tuin am mi san suok tàng a ta? Chuong ang Pathienhai chu an nih thlalèra hri chi tinrênga Aigupta mihai sukhlumtu kha! 9 Aw nangni Filistin mihai, huoisen takin um ro. Insukpasal ro, chuong naw chun in thu hnuoia an um ang bok khan an thu hnuoiah um ve rawi in tih. Insukpasal unla, bei pei ro" an ta. 10 Chuongchun, Filistin mihai chun an hung bei a, Israelhai chu an intlawm a, an inkulna tieng an tlânsie a, an that teu a, Israel sipai sîngthum an thi a. 11 Chun, Pathien Bawm chu an lâkpèk a, Eli naupahai Hofni le Finehas chu an that bok a. 12 Chu ni chun Benjamin thlaa mi pakhat chu a zakuo inek nung le a luah pilvut kai nuoiin indona hmuna inthok chun Silo a tlân tlung a. 13 A va tlung chun Eli chun lam sîra a thungnaa inthokin a lo thlîr zing a, a lungrila a tithawngpui tak chu Pathien bawm a nih. Khuo a hung tlung a, chanchin a hang hril chun a khuoin an khêk ta chèl chûl el a. 14 An khêk ri Eli-in a lo hriet chun, "Ieng leia an khêk chêl chûl am a na?" a ta. Chu mi chun inhmaw takin Eli kuom tieng a pan a, thil chinchàng chu a va hril a. 15 Eli chu kum sawmkuo pariet mi a ni ta a, a mitin khuo a hmu dukdak thei ta nawh. 16 A kuoma chun, "Indona hmuna inthoka hung ka na, voisun ni ngeia hung tlânsie ka nih" a ta. Eli chun, "Ka naupa, ieng tin am thil a um a?" a ta. 17 Chanchin hung intluntu chun, "Filistinhai hmaah Israelhai an tlânsie a, mi tam tak an thi a, i nauhai Hofni le Finehas khom an thi a, Pathien Bawm khom an lâkpèk" a ta. 18 Pathien Bawm thu a hril charin kotkhàr bula thungnaa inthung Eli chu a thalin a tlu a, a ring a del tliek a, a thi ta a; ama chu a tar tain a'n thazo ta si nawh. Israelhai chungah kum sawmli ro a rêl hman a nih. 19 Chun, a mo, Finehas nuhmei chun nau a pai a, a nau nei hun a hnai ta hle a. Pathien Bawm an lâkpèk thu le a tarpu le a pasal thi thu a hang hriet chun a nau hase a'n tan nghal a, nau a nei a, a na chu a tuor zo ta naw a. 20 A chat thla tawmin nau domtu nuhmei chun, "Beidong naw rawh, nau pasal i nei ta hi" a ta. Nisienlakhom, a don ta naw a, a ngaisak ta bok nawh. 21 Thuthlung Bawm an lâkpèk a, a tarpu le a pasal an thi ta bok lei chun, "Ropuinain Israel a suoksan tah" tiin nau domtu chun naute hmingah Ikabod a sak a. 22 Ama chun, "Thuthlung Bawm an lâkpèk leiin ropuina chun Israel a suoksan tah" a ti a nih.

1 Samuel 5

1 Filistinhai chun Pathien Bawm chu an lâk a, Ebenezer-a inthokin Asdod khuoah an fepui a. 2 Bawm chu an pathien Dagon tempulah an zawn lût a, Dagon lem sîra chun an sie a. 3 A zing inhma taka Asdod khuohai an tho chun LALPA Bawm hmaa chun Dagon chu a hmaia hnuoi sikin a lo tlu dèr a. Dagon chu an làk a, a umna pàngngàia bok an sie nawk a. 4 A zìngah an tho chun Dagon chu LALPA Bawm hmaa a hmaia hnuoi sika zâl chu an hmu nawk a. A lu le a bânhai chu a tliek vong a, a bonghai chu kotkhàr bulah an inhlum rum a, a pum chauh chu a um ta a. 5 Hi lei hin Dagon thiempuhai le Dagon be dinga Asdod tempula hung tukhomin tu chen hin tempul kotkhàr bul chu an la sir ngam nawh. 6 Asdod le a se vela umhai chungah LALPA kut chu nasa takin a tla a, an chungah sietna a tlung a, pânsie an invoi a. a 7 Asdod khuoa mihaiin chuong thil chu an hmuin, "Israelhai Pathien Bawm chu eini kuomah um zing naw raw se, ei chunga le ei pathien chunga a kut thlàk a na êm el" an ta. 8 Chuongchun, Filistin lalhai po po chu an ko khawm a, "Israelhai Pathien Bawm chu ieng tin am thaw tàng ei ta?" an ta. Anni chun, "Israelhai Pathien Bawm chu Gath khuoah va fepui ro" tiin an lo hril a, chuongchun Pathien Bawm chu an fepui ta a. 9 Gath khuoa Bawm an son hnung chun LALPA kut chu a khawpui chungah a tla a, thlabàrin an chi-ai a. A khaw mihai chu a chin a lienin pânsiein a hrem a. 10 Chuongchun, Pathien Bawm chu Ekron tieng an thon a. Pathien Bawmin Ekron khuo a lût tawm chun, "Ei ni le ei mipuihai sukhlumtu dingin Israelhai Pathien Bawm an hung zawn kîr ie" tiin an khèk a. 11 Chuongchun, Filistin lalhai po po chu an ko khawm a, an kuomah, "Keini le kan mihai a mi sukhlum nawna dingin Israelhai Pathien Bawm hi thon hmang unla, a umna ngaia bok kîr nawk raw se" an ta. 12 LALPA kut chu a rik hle a, thi inlauna chun a khawnawtin a sukthlabàr a. A thi nawhai khomin pânsie an tuor a, khawpuia an inrûm ri chun vân a tong a.

1 Samuel 6

1 LALPA bawm chu Filistinhai ramah thla sari a um a. 2 Filistinhai chun an thiempuhai le ai en thiemhai an ko a, "LALPA Bawm hi iem ei law ding a na? Ieng tin am ei thon kîr ding a na ti mi hril ro" tiin an indon a. 3 Anni chun, "Israelhai bawm hi in thon kîr ding khomin a ruok chun infètir naw ro. A kuomah bawsiet inthawina inhlàn unla, chuongchun sukdamin um in ta, nangnia inthoka kut a làkson nawna san khom hung hrieng in tih" an ta. 4 Filistinhai chun, "Ieng ang bawsiet inthawina am inhlàn ei ta?" an ta. Anni chun, "Ràngkachakin khuoihli lem panga le mazute lem panga siem unla, Filistin lal tinin pakhat seng inhlàn ro, in rênga chunga hri inlêng le in lalhai chunga hri inlêng chu thuhmun a ni si a. 5 Chuleiin, khuoihli lem le in ram suksetu mazute lem chu siem unla, Israelhai Pathien chu chawimawi ro, a kut chu in chunga le in pathienhai chungah a sukzàng nuom el rawi mawh! 6 Faraw le Aigupta mihaiin lungril an sukkhauh ang khan ieng dinga in lungril in sukkhauh am? Anni chungah na taka a thaw lei khan Israelhai chu insuoin an infètir chauh a ni naw am a ni? 7 Chuleiin, tu hin tawlailir thar buotsai unla, bawngpui pahni, a nene sawr lai, ringkol la bât ngai dêr lo chu buotsai unla, tawlailir chu inkeitir unla, an tehai chu hung thuoi kîr unla, thlung ro. 8 LALPA Bawm chu la unla, tawlailira chun sie unla, bawsiet inthawina dinga in inhlàn ràngkachak thil hluhai chu thingremah khumin a sîrah sie unla, infètir unla, inthla el ro. 9 Ramri tieng pana Beth-semes tieng tawlailir a fe chun ei chunga thil tlung tha lo tak hi ama thaw nîng a ta, a fe naw chun a mi hremtu chu ama kut ni loin, eini chunga tla ve hrim hrim a nih ti hrieng ei tih" an ta. 10 Chuong ang tak chun an thaw a, bawngpui, a nene sawr lai pahni an va kei a, tawlailir chu an inkeitir a, an tehai chu in tieng an khum a. 11 Chun, LALPA Bawm chu tawlailira chun an sie a, rangkachak mazute lem le khuoihli lem siena thingrem chu an sie bok a. 12 Bawngpuihai chun Beth-semes an pan ngat ngat a, inbu pei pumin lampui chu an hraw a, voi tieng amanih chang tieng amani khom an pèt nawh. Filistin lalhai chun Beth-semes ramri chenin an zui a. 13 Beth-semes khuoa mihai chun ruoma hin bu an lo sìk a, an hang ngha a, Bawm chu an hmu a, an lawm hle a. 14 Tawlailir chu Beth-semes khuoa Josua loa chun a lût a, lungpui lien tak umna lai chun a ngîr ta zing a. Chun, tawlailir thing chu an chèk nawi a, bawngpuihai chu LALPA ta dinga pumraw inthawinaah an inhlàn a. 15 Levihai chun LALPA Bawm le rangkachak thil lem umna thingrem chu an lâk thlàk a, lungpui chunga chun an sie a. Chu ni vèk chun Beth-semes khuoa mihai chun pumraw thilhlân le inthawinahai chu LALPA kuomah an inhlàn a. 16 Chun, Filistin lal pangahai chun chuong thil chu an hmu hnungin a ni lá làin Ekron tieng an kîr nawk ta a. 17 Filistin mihaiin bawsiet inthawina dinga rangkachaka siem khuoihli lem an inhlân zât chu hieng ang hin a nih: Asdod khaw puolin pakhat, Gaza khaw puolin pakhat, Askelon khaw puolin pakhat, Gath khaw puolin pakhat le Ekron khaw puolin pakhat seng a nih. 18 Rangkachaka siem mazute lem an inhlàn zât chu Filistin lal pangahai khuo, kula inhuon le an khawperhai po po zât a nih. LALPA Bawm an innghatna lungpui chu Beth-semes khuo Josua loah tu chen hin inchikna dingin a la um zing a nih. 19 Amiruokchu, LALPA Bawm sûng an en leiin Beth-semes khuoa mihai chu Pathienin a hrem a, mi sawmsarib a sukhlum a. LALPA kut thlàk nat leia thihai chu mipuiin an sûn a. 20 Beth-semes khaw mihai chun "Hi Pathien thienghlim LALPA hmaa hin tu am ngîr theiin, ei kuoma inthok hin tu kuom tieng am pan tung nawk a ta?" an ta. 21 Chuongchun, Kiriath-jearim khuoa mihai kuoma chun, "Filistin mihaiin LALPA Bawm an hung sie nawk ta a, hung thla unla, in kuom tieng la tung ro khai" tia hril dingin mi an tir a.

1 Samuel 7

1 Chuongchun, Kiriath-Jearim khuoa mihai chu an hung a, LALPA Bawm chu an làk tung a, tlânga Abinadab ina chun an chawi a, a naupa Eleazar chu LALPA Bawm enkoltu dingin an inhlàn thienghlim a. 2 LALPA Bawm chu kum sawmhni zet Kiriath-Jearimah a um a, chu sûng chun Israelhai chu LALPA tieng an lung an lèng nawk ta a. 3 Samuel chun Israel sûngkuo po po kuomah, "In lungril po poa LALPA tienga hung ngha in ni tak tak chun, ram dang pathienhai le Astoret lemhai chu sie hmang dai unla, in lungril LALPA ta dingin buotsai unla, ama rong chauh bawl ro, chuongchun Filistinhai kuta inthok hin san suok a ti cheu" tiin a hril a. 4 Israel mihai chun Baal le Astoret hai lem chu an sie hmang a, LALPA rong chauh chu an bawl ta a. 5 Samuel chun, "Israel mihai po po Mizpa-ah ko khawm vong ro, LALPA kuomah tongtaipêk ka ti cheu" a ta. 6 Mizpa-a chun an fè khawm a, tui an chawi a, LALPA hmaah an bun thlàk a. Chu ni chun bu an nghei a, "LALPA lakah thil suol kan lo thaw a nih" tiin an inpuong a. Mizpaa inthok chun Samuelin Israelhai ro a rêlpèk a. 7 Mizpaah Israelhai an pung khawm ti Filistinhaiin an lo hriet chun anni chu bei dingin Filistin lalhai chu an inthok tung a. Filistinhai hung thu Israelhaiin an lo hriet chun an ti hle a. 8 Samuel kuomah, "Filistinhai kuta inthoka a mi san suok theina dingin LALPA chu ma loin ko zing rawh" an ta. 9 Samuel chun beramte, nene ne lai a lâk a, LALPA kuomah pumraw inthawina dingin a'n hlàn a. Israelhai aiawin Samuel chun LALPA a ko a, LALPA chun a hung don a. 10 Samuelin pumraw thilhlân a'n hlàn lai chun Filistinhai chun Israelhai chu bei dingin an hung nangching têp ta a. Nisienlakhom, chu ni chun LALPAN vâninrumin Filistinhai chu a hrawk a, nasa takin a sukchi-ai a, Israel mihai chun an intlawm ta dèr a. 11 Israelhai chu Mizpaa inthok chun an suok a, Filistinhai chu Beth Kar chuonhnuoi chen an hnot a, lampui intluonin an that a. 12 Samuel chun lung a lâk a, Mizpa le Sen inkâra chun a phun a, "Hi chen rauh hi LALPAN a mi thangpui a nih" tiin a hmun hmingah Ebenezer a'n bûk a. 13 Chuongchun, Filistinhai chu tukdolin an um a, Israel ram chu an rûn nawk ta ngai nawh. Samuel dam sûng po po chu LALPA kutin Filistinhai a dang tlat a nih. 14 Filistinhaiin Israelhai an lâkpèk khuo po po chu, Ekron-a inthoka Gath chenin, Israelhai kutah an pêk kîr nawk vong a, an sevel ram po po chu Filistinhai kuta inthokin Israelhaiin an san suok a, Israel mihai le Amor mihai inkârah inremna a hung um ta a. 15 Samuel chun a dam sûngin Israel mihai ro a rêl a. 16 Kum tinin Bethel le Gilgal le Mizpa khuohai chu a kan vèl hlak a, a fena naah Israelhai ro a rêl pei a. 17 Amiruokchu, ama in umna Rama khuoah a kîr nawk zie a, chu taka inthok khom chun Israelhai ro a rêl a, LALPA ta dingin maichâm a siem a.

1 Samuel 8

1 Samuel chu a hung upa ta a, a naupahai chu Israelhai chunga rorêltuah a sie a. 2 A upa tak hming chu Joel a na, a dottu hming chu Abija a na, Beershebaa inthokin ro an rèl a. 3 Nisienlakhom, a nauhai chun a um dàn la ve loin sum le pai an hnot a, thamna an làk a, indik lo takin ro an rèl a. 4 Chuongchun, Israel upahai po po chu an inkhawm a, Rama khuoah Samuel kuoma chun an fe a, 5 a kuomah, "Ngai ta, i hung upa ta hle a, i naupahai hlak chun i um dàn an lâk ve si naw a, hnam dang po pohai thaw dàn angin kan chunga rorêltu dingin lal mi ruotpêk rawh" an ta. 6 "Rorêltu dingin lal mi ruotpêk rawh" an ti lei chun Samuel chu a lawm naw hle a, LALPA kuomah a tongtai a. 7 LALPA chun a kuomah, "Mipuiin i kuoma an hril po po chu ngaithla rawh. Nangma an dit naw lei che a ni naw a, an chunga rorêltu dingin keima an mi dit naw lei lem a nih. 8 Aigupta rama inthoka ka thuoi suok nia inthok tah khan tu chen hin mi nghatsan le pathien dang rong mi bawlsan an ching a, chuong ang chun i chunga khom an thaw ve a ni hih. 9 Chuleiin, an thu ngaithla la, amiruokchu, an chunga lalhaiin an la hung thaw dàn dinghai chu ngun takin hril lawk tawl rawh" a ta. 10 Samuel chun LALPA thu po po chu lal hnitu mipuihai chu a hril vong a. 11 An kuoma chun, "In chunga rorêltu lal a la hung chêt dàn ding chu hieng ang hin nîng a tih: A tawlailir le a sakorhai enkoltu dingin in naupahai lâkpèk a ti cheu a, a tawlailir hmaa chun tlân an tih. 12 A then chu mi sâng chunga kawmandar dâm le sawmnga chunga kawmandar dàmin sieng a ta, a thenin a hnuoi inletin a bu sîk an ta, a then râlthuom siemtu le a tawlailir hmangruo siemtuah hmang tawl a tih. 13 In naunuhai chu rimtui siemtua dâm, bu suongtua dâm, bei siemtua dâm hmang a tih. 14 Chun, in in le lohai, in grèp huonhai le in oliv huonhai a thá thà lâkpèk a ti cheu a, a siehlawhai pêng a tih. 15 In bu tharsuok le in uoin tharsuok sawma pakhat lâng a ta, a thoktuhai kuomah pêng a tih. 16 In bawipa le bawinuhai le in ran ruol laia a tha tak ngot le in sabengtunghai chu ama hmang dingin lapêk a ti cheu. 17 In beram ruol laia mi sawma pakhat lâng a ta, nangni ngei a siehlawah thang in tih. 18 Chu ni chu a tlung pha leh in lal thlang laka inthoka thawvengna hniin inrûm in ta, chu huna chun LALPAN donsak naw ni cheu" a ta. 19 Nisienlakhom, mipuihai chun Samuel thu chu an ngaithlak nuom naw a, "Ni lo e, kan chunga lal ding kan dit a nih. 20 Chuongchun, hnam danghai ang hung ni vêng ei ta, ei lal chun ro mi rêlpèk a ta, hma thuoiin ei ràlhai mi dopèk a tih" an ta. 21 Samuel chun an hril po po chu a hriet a, LALPA hmaa chun a hril sawng pei a. 22 LALPA chun, "An thu ngaithla la, lal pe tawl rawh" a ta. Samuel chun Israel mihai kuomah, "Mi tin mani khuo sengah kîr nawk ta ro" a ta.

1 Samuel 9

1 Benjamin hnama mi pa challang tak el a um a, a hming chu Kisa a na, ama chu Abiel naupa a na, ama chu Zeror naupa a na, ama chu Bekora naupa a na, ama chu Afia naupa a nih. 2 Kisa chun naupa a nei a, a hming chu Saula a nih. Ama chu tlangvàl duongkai tha tak el a na, ama tluk hrim Israelhai lai an um naw a, a dung khomin mi a khûm vong a nih. 3 Saula pa Kisa chun a sabengtung ruol an tla hmang leiin a naupa Saula kuomah, "Siehlawhai laia pakhat hi thuoi la, ei sabengtunghai va zong rawh" a ta. 4 Chuongchun, Efraim tlângram le Salisa le a se vel chen an dap vong a, sienkhom an hmu zo naw a. Salim bielah an zong nawk a, sienkhom an hmu nawh. Chu zoah Benjaminhai ramah an zong nawk a, sienkhom an hmu zo chuong nawh. 5 Zufa biel an tlung chun Saulan a siehlaw kuomah, "Thaw rawh, kîr nawk tâng ei tih. Chuong naw chun ka pa'n a sabengtunghai nèk hmanin eini mi lo ngaituo lem rawi a tih" a ta. 6 A siehlaw chun, "Ngai ta, hi khuoa hin Pathien mi a um a, mi inzaum tak a na, a hril taphot chu a hung tlung indik ngei ngei hlak a nih. Thaw ta, a umnaa chun fêng ei ta, ei fèna ding tieng khom mi hril thei rawi naw nim" a ta. 7 Saula chun a siehlaw kuomah, "An leh, ei fe ding chun iem a na ei chawipèk hrim hrim ding? Ei bu chawi hlak ei fâk zo ta si. Pathien mi kuoma thilpêk chawi ding ei nei dêr naw a nih. Iem nei ei nei hrim hrim a?" a ta. 8 Siehlaw chun, "Tangka shekel hmun lia thea hmun khat chu ka la kol a, chu chu ei fèna ding a mi hril manah Pathien mi chu pe el ei tih" a ta. 9 (Kha hma khan chu Israel mihai laia miin Pathien rawn an nuom changin, "Thaw ro, hmutheitu kuomah fèng ei tiu" an ti hlak a; tu laia 'zawlnei' an ti hlak hi 'hmutheitu' an ti hlak a nih. ) 10 Saula chun a siehlaw kuomah, "A tha hlauh a ni chu, fêng ei tih" a ta. Chuongchun, Pathien mi umna khuo tieng pan chun an inthok suok a. 11 Khuo an pan tung lai chun tui chawia hung nunghàk ruol an hmu a, "Hi taka hin hmutheitu a um?" tiin an indon a. 12 Anni chun, "Um e. In hma ela khan a fe. Inhmaw unla, hmun sângah mipuiin inthawina an nei ding a ni leiin kan khuoah voisun hin a hung vak a nih. 13 Khuo in lût charin, hmun sânga bu fâka a fe hmain ama chu hmu el in tih. An inthawina malsawmna hriltu ding a ni leiin, a tlung hma chun tu khomin bu fa naw ni hai, chu zoah fielhai chun bu an fâk chauh hlak a nih. Chuleiin, fe unla, hang nang el in tih" an ta. 14 Chuongchun, khuo chu an pan tung a, an lût chun hmun sânga fe ding Samuel chu an hang nang a. 15 Saula hung hma ni khata chun LALPAN Samuel kuomah hieng ang hin thu a puong a: 16 "Hieng tik huna hin zingah Benjamin rama inthokin tlangvàl pakhat i kuomah hung tir ka ta, ka mi Israelhai chunga hotu dingin hriek lo nâl rawh. Ama chun Filistinhai kuta inthokin ka mihai san suok a tih. An khèk ri chun ka kuom a hung tlung tah leiin anni chu ka ngaisak a nih" tiin. 17 Samuelin Saula a hmu char chun LALPAN a kuomah, "En ta, i kuoma ka hril pa kha; ama hin ka mihai chungah ro rèl a tih" a ta. 18 Chuongchun, Saula chun kul kotkhàra ngîr Samuel chu a va hnai a, "Hmutheitu in chu khaw lai am a um ti mi hril raw khai" a ta. 19 Samuel chun, "Keima hi hmutheitu chu ka nih. Ka hmaah fein hmun sâng tieng khi pan la, voisun hin ka kuomah bu i fâk ding a nih. Zîngah infetir chauh ka ti che a, i thil hriet nuom po po khom hril vong ka ti che. 20 I sabengtung, ni thum inhmang tah khom chu lungkham naw rawh, an hmu tah. Israelhai mamaw tak tu am a na? Nang le i pa sûnghai hi in ni naw am a ni?" a ta. 21 Saula chun, "Israel pahnamhai laia hnam chîn tak Benjamin hnama mi ka ni a, Benjamin pahnam sûnga khom a chîn tak kan nih. Iengti leia hieng thil hi ka kuomah i hril am a na?" a ta. 22 Samuel chun Saula le a siehlaw chu a thuoi a, mikhuol pindana chun a thuoi lût a, an mi fiel sawmthumhai lai chun thungna poimaw takah a'n thungtir a. 23 Samuel chun bu suongtu kuomah, "Sie hran dinga ka pêk che satlang kha tu hin hung la rawh" a ta. 24 Thlai suongtu chun a mal le an thil buotsai danghai chu a hung lâk a, Saula hmaa chun a sie a, Samuel chun, "En ta, hi huna i ta dinga sa ka lo sie hranpêk che chu a nih. Ka mikhuolhai ruol hin kìlin fa rawh" a ta. Chu ni chun Saula chu Samuel leh thlaithlèng an kìl tlâng ta a. 25 Inthawina hmun sânga inthoka khuoa an fe thlâk hnung chun Samuelin Saula chu in chung zawlah a'n biekpui a. 26 Zîngkàr inhma takin an tho a, Samuel chun Saula chu in chung zawlah a ko tung a, "In siem zo la, infetir tâng ka ti che" a ta. Saula a'n siem zo chun Samuel leh an suok tlàng a. 27 Kotsuo an tlung chun Samuelin Saula kuomah, "Siehlaw hi ei hmaa lo fe dingin hril rawh. Nang ruok chu hi taka hin la ngîr phot la, Pathiena inthoka ka thu dong chu ka hril ding che a nih" a ta, siehlaw chu a lo fe hmasa a.

1 Samuel 10

1 Samuel chun a hriek bûr chu a phor a, hriek chu Saula luah a bur a, a fawp a, "LALPA chun a rochan Israelhai chunga rorêltu dingin hriek a nàl che. 2 Voisuna i mi suoksan hnung hin Benjamin ramria Rachel thlân bul Zelza-ah mi pahni intuokpui i ta, anni chun i kuomah, 'Sabengtung i zonghai kha an hmu ta a, i pa chun sabengtung ngaituo ta loin nang mol a ngaituo che a, 'Ka naupa chu ieng am a chang an ta maw?' a ti a ti el a nih' tiin hril an ti che. 3 "Chun, chu taka inthok chun fe pei i ta, Tabor saisuo thing va tlung i ta, chu taka chun mi pathum, Bethela Pathien be dinga fehai chu intuokpui i ta, pakhat chun kèlte pathum kei a ta, pakhat chun beipêr pathum chawi a ta, pakhat chun uoiin pêng chawi a tih. 4 Chibai bûk an ti che a, beipêr pahni chu pêng an ti che a, chu chu la rawh. 5 Chu zoah Filistin sipaihai umna Pathien tlâng Gibea chu va tlung i ta, chu taka chun perkhuong dâm, khuongte dâm, theihle dâm, tingtang dâm chawia zawlnei ruol, hmun sânga inthoka hung thlahai chu intuokpui i ta, thu hril duol duol an tih. 6 Chun, LALPA thlarau i chungah nasa takin hung tlung a ta, nang khom an thu hrilnaa chun thang vèng i ta, mi danglam daiah hung inchang i tih. 7 Hieng inchiknahai hi i chungah a hung tlung pha leh thil hung um dàn zir ang peiin i thaw ding a nih, Pathien i kuomah a um si a. 8 Chun, ka fe hmain Gilgalah lo zu fe hmasa la, keikhom pumraw inthawina le inremna inthawinahai inhlàn dingin hung thla vèng ka ta, ka hung tlung phaa i thaw ding ka hung hril hma che chu ni sari sûng mi lo nghak rawh" a ta. 9 Samuel a màksan ding tawmin Pathienin Saula chu lungril thar a pêk a, chuong inchiknahai po po chu, chu ni chun a chungah a hung tlung vong a. 10 Gibea an tlung chun zawlnei ruolin an lo hmuok a, Pathien Thlarau chu a chungah thilthawtheinain a hung tlung a, an thu hrilnaa chun a thang ve ta a. 11 A hmaa ama lo hretuhaiin zawlneihai ruola thu a hang puong ve an hmu chun, "Kisa naupa chungah ieng top am a tlung an ta le? Saula chen khom zawlneiah a lo thang an ta maw?" tiin an indon tuo a. 12 A umna khuoa mi pakhat chun, "Hieng zawlneihai khom hi an pahai chu iem an ni bik a? a lo ti a. Chu taka inthok chun, "Saula chen khom zawlneiin a thang an ta?" ti chu infiemna tongkam takah an hung hmang pha tah a nih. 13 Chun, zawlnei anga thu a hril zoin Saula chu hmun sângah a fe a. 14 Saula pate chun Saula le a siehlaw kuomah, "Khaw lai am in fe a?" tiin a lo indon a. Ama chun, "Sabengtung zongin kan fe a, kan hmu naw phing leh Samuel kuomah kan fe a nih" a ta. 15 A pate chun, "Samuel chun i kuomah iem a lo hril che, mi hang hril ta" a ta. 16 Saula chun a pate kuomah, "Sabengtunghai chu an hmu tah ti a mi hril" a ta, inlalna thu ruok chu ieng khom a pate kuoma chun a hril sa nawh. 17 Samuel chun Israel mipuihai chu Mizpaah LALPA hmaah a ko khawm a. 18 Israel thlahai kuoma chun, "LALPA, Israelhai Pathien chun hieng ang hin a tih: 'Israelhai chu Aigupta rama inthokin ka thuoi suok a, Aigupta mihai kuta inthok le a suknomnatu po pohai laka inthokin ka san suok a; 19 nisienlakhom voisun hin an mangangna le rinumna po poa inthoka sanhimtu an Pathien chu an mi dit naw a, ka kuomah, 'Ni lo e, lal mi siempêk rawh' an ti a. Chuleiin, tu hin Israel hnam po po le pahnam po po chu LALPA hmaah hung inlang ro" a ta. 20 Chuongchun, Samuel chun Israel mi po po chu a hung inlangtir a, Benjamin hnam chu thlang a lo ni ta a. 21 Benjamin chihai chu an sûngkuoin an hung inlang a, Matri sûngkuoa mi, Kisa naupa Saula chu thlang a lo ni ta a, sienkhom ama an hang zong a, an hmu naw a. 22 Chuongchun LALPA kuoma chun, "Ama chu a la hung inlang naw zing am a ni?" tiin an indon a, LALPA chun, "Ngai ta u, a thuomhnaw lai an birûk a ni kha" a ta. 23 Chuongchun an tlàn a, an va thuoi suok a, mipui lai a hang ngîr chun anni lai a dung a'n sâng tak a. 24 Samuel chun mipui kuomah, "LALPA mi ruot hi in hmu am? Mi po po lai ama ang hrim an um nawh" a ta. Mipui chun, "Pathienin laltak chu humhim raw se" tiin an khèk a. 25 Samuel chun lal hnuoia an invong dàn dinghai chu mipui a zirtir a, lekhabuah a ziek thlàk a, LALPA hmaa chun a sie tha a. Chu zoah mipui chu mani in sengah a'n tìntir tawl ta a. 26 Saula khom Gibea khuoa a inah a kîr a, Pathienin an lungril a them tah mi huoisenhai chun an zui a. 27 Buoina siem châk mi rilo thenkhat ruok chun, "Ieng tin am hi mi hin a mi san suok ding a na?" tiin an deusaw a, thilpêk ieng khom an pêk nuom nawh. Saula ruok chu a to zing a.

1 Samuel 11

1 Amon mi Nahas chun Gilead rama Jabes khuo rûn tumin a hang inhuol a. Jabes mi po po chun Nahas kuomah, "Keini leh thuthlung siem la, i thu hnuoiah um kan tih" an ta. 2 Amon mi Nahas ruok chun, "Hieng ang hin in kuomah thuthlung siem thei ka tih: in mit chang tieng khel dok vong ka ta, Israelhai po po sukhmèlhem ka tih" a ta. 3 Jabes khuoa upahai chun a kuomah, "Israel ram po poah mi kan tir theina dingin ni sari sûng mi la ngai rawh. Mi sandam thei ding tu khom an um naw chun i kutah hung inpe lût kan tih" an ta. 4 An mi tirhai chu Saula umna Gibea khuoah an fe a, an thil ngiet an hang ripawt chun mipui chu an tap khêk chûl el a. 5 Chuong lai chun Saula chu loa inthokin bawngchal khalin a hung a, "Iem a ta mipui an tap chu?" a ta. Jabes khuoa mihai thu hril chu an hril sawng a. 6 Saulan chu thu a hriet char chun a chungah Pathien Thlarau thilthawtheina a hung tlung a, a lung a sen hle a. 7 Bawngchal tuok khat a that a, an sa a chan nawi vong a, Israel ram po poa chun a'n semtir a, "Tu khom Saula le Samuel hung zui nuom naw taphot chu hieng ang hin an bawngchal thaw ve nîng a tih"tiin. Chuongchun, LALPA tìna chu mipuihai lai chun a'n lêng a, thu khat chelin an inthok suok a. 8 Bezek hmunah Saulan anni chu a tiem a, Israel mihai chu nuoithum an na, Juda mihai chu sîngthum an nih. 9 Chun, an mi hung tirhai kuoma chun, "Jabes mihai kuomah hieng hin hril ro: 'Zînga hin sûnchang hmain san suok nîng in tih' tiin" a ta. An mi tirhai chu an kìr a, Jabes mihai chu an hril a, an lawm hle a. 10 Anni chun Amon mihai kuomah, "Zînga hin kan hung inpêk ding a na, in nuom ang angin kan chungah thaw ro" an ta. 11 A zînga chun Saulan a mihai chu pawl thumin a the a, khawfingchatah an inkulna hmuna chun a va hlù khum a, Amon mihai chu sûnchang lai chen an that a, an that mahlahai chu an tlàn dar vong a, a kopa um hrim hrim an um nawh. 12 Mipuihai chun Samuel kuomah, "Tuhai am an na, 'Kan chungah Saulan ro a rèl telul ding maw' tituhai kha? Chuong mihai chu hung thuoi suok unla, lo sukhlum kan tih" an ta. 13 Saula chun, "Voisun hi LALPAN Israelhai a san suok ni a na, voisun kher hin chu tu khom sukhlum lo ding a nih" a ta. 14 Chun, Samuel chun mipuihai kuomah, "Thaw ro, Gilgalah fêng ei ta, ram chu indin thar nawk ei tiu khai" a ta. 15 Chuongchun, mi po po chu Gilgalah an fe a, Saula chu LALPA hmaah lalin an siem nghet ta a. Chu taka chun inremna inthawina LALPA hmaah an inhlàn a, Saula le Israelhai chun lawmna ropui tak an siem a.

1 Samuel 12

1 Samuel chun Israel mi po po kuomah, "Ngai ta u, ka kuoma in thu hril po po ka ngaithlâk a, lal ding khom ka siempêk ta cheu a. 2 Tu hin chu thuoitu lal in lo nei ta hi. Kei ruok chu ka lo upa tain ka luah kèl sam a to ta a, ka naupahai in kuomah an um hi. Ka tleirawla inthokin voi sûn chen hin in thuoitu ka lo ni hlak a. 3 Tu hin in hmaah ka ngîr a. LALPA le a hriek nâl hmaa hin mi hang fie hrim ta um khai. Tu bawngchal am lapêkin, tu sabengtung am ka lâkpêk hlak a? Tu am hlèmin, tu am ka sukduda hlak a? Thlei bîk nei dingin tu laka inthokin am thamna ka lâk hlak a? Hieng thilhai hi ka lo thaw pal a um chun rul nawk vong ka ti cheu" a ta. 4 Mipui chun, "I mi hlêm ngai naw a, i mi sukduda ngai bok nawh. Tu kuta inthok khomin ieng khom i lâk ngai nawh" an ta. 5 Samuel chun an kuomah, "Ka kutin thil awm lo ka thaw ngai nawzie voisuna mi hrepuitu chu LALPA a na, a hriek nàl lal khom hi a ni bok" a ta. Mipui chun, " Ni e, LALPA chu hrepuitu a nih" an ta. 6 Samuel chun mipui kuomah, "Mosie le Aron ruottu le Aigupta rama inthoka in pi le puhai thuoi suoktu chu LALPA a nih. 7 Chuleiin, LALPA hmaa hin ngaithla thap unla, LALPAN in chunga le in pi le puhai chunga thil fel taka a lo thaw dânhai chieng takin hang suipui ka ti cheu. 8 Aigupta rama Jakob a lût hnung khan, in pi le puhai chun LALPA an ko a, LALPA chun Mosie le Aron a tir a, anni chun in pi le puhai chu Aigupta rama inthokin an thuoi suok a, hi hmuna hin a'n umtir a. 9 Nisienlakhom, LALPA Pathien chu an theinghil a, ama chun Hazor sipai hotu Sisera kuta le Filistin mihai kuta le Moab lal kutah a zor a, anni chun an do a. 10 Chu phing leh thangpuitu dingin LALPA an ko a, 'LALPA chu kan nghatsan a, Baal-hai le Astoret-hai rong kan bawl leiin kan lo suol a nih. Nisienlakhom, kan hmèlmahai kuta inthokin mi san suok ta la, chuongchun i rong bawl tâng kan tih' an ta. 11 "Chun, LALPA chun Jerubaal dàm, Barak dàm, Jeftha dàm le Samuel haic dàm a tir a, in hmèlma khing tieng khing tienga inthokin a san suok cheu a, him takin in um a. 12 Amiruokchu, LALPA Pathien chu in lal a ni zing si laiin Amonhai lal Nahas chu nangni do dingin a hung ti in hriet charin ka kuomah, 'A ni naw ie, lalin mi op lem raw se' in ti a. 13 Chuong ang chun tu hin in lal thlang le dit chu en ro, en ro, LALPA chun lal a siempèk ta cheu a ni hih. 14 LALPA chu ti a, a rong chu bawl a, a thu zawm a, a thupêkhai lakah hel lo a, nangni le in chunga rorêltu lal leh LALPA Pathien zuitu in ni chun thâng a ta, 15 amiruokchu, LALPA rawl ngaithla lo a, LALPA thupêk in helsan ruok chun in pi le puhaiin LALPA kut an tuor ang bokin nangni khomin tuor vêng in tih. 16 Chuleiin, ngaithla ngun ro, LALPAN in mithmua thil ropui tak a thaw ding hi lo en ro. 17 Voisun hin bu an sìk a ni naw am a ni? Vân inrûmtir ding le ruo insûrtir dingin LALPA ko ka ta, chuongchun lal in hni thua hin thil suol in thaw nasatzie hrein hmung in tih" a ta. 18 Chuongchun, Samuel chun LALPA a ko a, chu ni chun LALPAN vân a'n rûmtir a, ruo an sûrtir bok a, mipui chun LALPA le Samuel chu an ti ta êm êm a. 19 Mipui chun Samuel kuomah, "Kan thi nawna dingin LALPA i Pathien kuomah i siehlawhai hi mi tongtaipêk rawh, lal kan hni hin kan suolna chu a belsa zuol si a" an ta. 20 Samuel chun mipui kuomah, "Ti naw ro, thil tha lo tak chu in thaw ngei a, sienkhom LALPA chu pêt hmangsan naw unla, in lungril po poin LALPA rong chu bawl ro. 21 Hmangna bo milem bieksan naw ro. Chuonghai chun thil tha intlun naw ni cheu a, san suok thei bok naw ni hai cheu, hmangna bo thil an ni tlat a. 22 A hming ropui tak leiin LALPAN a mihai chu hnawl naw nih, a mihaia siem cheu hi LALPA lawmzawng tak a ni si a. 23 Keima chungthua chu, nangni ta dinga tongtaipêk bànsanin LALPA lakah thil suol thaw ngai naw top ka ta, lampui tha le indik kawkhmu pei lem ka ti cheu. 24 LALPA chu ti phot unla, in lungril po poin titakzetin a rong bawl unla, in ta dinga thil ropui a thawhai hi ngaituo ro. 25 Amiruokchu, suol taka thil in la thaw rop chun, nangni le in lal chopin phit hmang a ti cheu" a ta.

1 Samuel 13

1 Saula chu kum sawmthum le kum hni a niin a'n lal tan a, Israelhai chungah kum sawmli le kum hni a'n lal a. 2 Saula chun Israelhai laia inthokin mi sângthum a thlang suok a, sânghni chu Mikmas le Bethel tlângramah Saula kuomah an um a, sângkhat chu Benjamin ram Gibea khuoah Jonathan kuomah an um a, a dang po po chu an in tieng a tirkîr vong a. 3 Jonathan chun Geba-a Filistinhai râlvêng bûk a bei a, chu chu Filistinhai chun an lo hriet a. Chuongchun, Saulan, "Hebrai mihai po poin lo hre ro" tiin a ram pumah tawtawrawt an mûttir a. 4 Israel mi po po chun, "Saula'n Filistinhai râlvêng bûk a bei a, Filistinhai theida a phur" ti thu chu an lo hriet ta a, mipuihai chu Saula kuomah Gilgala chun an ko khawm a. 5 Filistinhai chu Israelhai bei dingin an inchà khawm a, tawlailir sîngthum, sakor chung chuong mi sângruk le sipaihai chu tuifinriet kama tieu zât zeta tam an nih. Chuongchun, an kai tung a, Beth-aven sak tieng Mikmas-ah an inkul a. 6 Chuonga an sipaihai hnawchèpa an um ti Israelhaiin an hriet chun pûka hai, chîmbuka hai, lungpui kâra hai, khura hai le tuikula hai an inbi a. 7 Hebrai mi thenkhat lem chu Jordan vadung kânin Gad le Gilead rama hai an tlàn a. Saula ruok chu Gilgalah a la um zing a, a sipaihai hlak chu tiin an inthin hawp a. 8 Samuel ni ruot angin Saula chun ni sari sûng Gilgala chun a lo nghâk a, sienkhom Samuel chu Gilgalah a hung ta si naw leiin mipui chun an tlân darsan ta a. 9 Saula chun, "Pumraw thilhlân le inremna thilhlân dinghai chu ka kuomah hung chawi ro" a ta, pumraw inthawina chu a'n hlàn a. 10 Saulan an hlàn zo charin Samuel a hung tlung a, Saula chun a va hmuok a. 11 Samuel chun, "Ieng thil am i lo thaw ta le?" a ta. Saula chun, "Mipui an tin dar ka hmu a, nang hlak i ni ruot niah i hung tlung ta bok si naw a, Filistin mihai hlak Mikmas-ah an pung khawm lui lui bok si leh, 12 chuongchun kan ngaituo a, 'Filistinhaiin Gilgalah an mi hung bei tèp ta si a, LALPA ditsakna ka la hni bok si nawh' ka ta; chuleiin, pumraw thilhlân chu thaw lo thei loah ka ngai leiin ka lo inhlàn el a nih" a ta. 13 Samuel chun Saula kuomah, "I thilthaw hi thil invêtthlàk a nih. LALPA i Pathienin thu a pêk che chu i zawm naw a nih; zawm chu ni la, LALPA chun Israelhai chungah i lalna hi kumkhuoin a suknghet awm vei leh. 14 Tu ruok hin chu i lalna hin dai sawt naw nih; LALPA thupêk chu i zawm naw leiin, LALPA chun ama lungril ang put mi a zong a, a mihai chunga rorêltu dingin a ruot tah a nih" a ta. 15 Samuel chun Gilgal a mâksan a, Benjamin ram Gibea khuoa chun a hang fe a. Saula chun a kuoma umhai chu a tiem a, mi zaruk vel an nih. 16 Saula le a naupa Jonathan le an kuoma umhai chu Benjamin rama Gibea khuoa chun an um a, Filistinhai chu Mikmas-ah an inkul a. 17 Filistin tienga inthoka hung rûntu pawl chu hmun thumah an inthe a. Pawl khat chun Shual bula Ofra tieng chu an pan a, 18 pawl khat chun Beth Horon tieng an pan a, pawl khat chun thlalèr dep Zeboim ruom tieng ep ramri lam tieng chu an hraw a. 19 Filistinhaiin, "Hebrai mihai hin kawlhnâm le fei dâm siem rawi an tih" an ti leiin Israel ram pumah thîrsu hrim hrim an um nawh. 20 Chuleiin, Israel mihai chun an làngkawn hai, lungràl hai, hreipui hai le kawite hai an tàt ngei ding pha Filistinhai umnaah an zu fe hlak a. 21 Làngkawn le lungràl tàt ngeina man chu shekel hmun thuma thea hmun hni a na, thîr kut le hreipui le ran hawlna thîr zum tàt ngeina man chu shekel hmun thuma hmun khat a nih. 22 Chuong chu a ni leiin, an indo ni chun Saula le Jonathan ti chauh naw chu an kuoma mi umhai chu kawlhnâm amanih fei amanih nei hrim hrim an um nawh. 23 Chun, Filistinhai chun an sipai pawl khat chu Mikmas kawn tienga lo inchàntu dingin an tir a.

1 Samuel 14

1 Ni khat chu Saula naupa Jonathanin râlthuom chawi tlangvàl kuomah, "Thaw ta, râl khing tienga Filistinhai râlvèngtu sipaihai umnaa son va fèng ei tih" a ta, sienkhom a pa ruok chu a hril nawh. 2 Saula chu Gibea kotsuoa Migron theibufai kung hnuoia chun a um a, a kuoma um chu mi zaruk lai an nih. 3 Chuonghai laia pakhat chu Ahija a na, thiempu thuom efod a hâk a. Ama chu Siloa LALPA thiempu Eli naupa Finehas naupa Ahitub unaupa Ikabod naupa a nih. Chun, Jonathan chu a fe ti tu khomin an hriet bok nawh. 4 Filistinhai râlvèng bûk panna, Jonathan fe tumna chu kawn, khing tieng khing tienga lungtolawt chep de a na, pakhat chu Bozez an ta, pakhat chu Seneh an tih. 5 Lung tolawt pakhat chu Mikmas zawn, hmar tieng panga um a na, a dang pakhat chu Geba ep sim tienga um a nih. 6 Jonathan chun râlthuom chawitu tlangvàl kuomah, "Thaw rawh, LALPAN thil a mi thawpêk tâkduoiin ser tan lo ruol sipaihai umnaa son va fêng ei tih, LALPA ta ding chun a tlawm amanih a tam amanih ieng khom a thei naw a um chuong si naw a" a ta. 7 A râlthuom chawitu chun, "I lungril ang char chu thaw rawh, lungril le thlarauin ka thlop che a nih" a ta. 8 Jonathan chun, "Chuong an leh hung rawh, an umna tieng son va kai ei ta, mi lo thlîr raw hai se. 9 Annin, 'Kan hung hma chun lo nghâk phot ro' an tih leh kai loin ei umnaa chun um ei ta. 10 Amiruokchu, "Hung kai ro" an ti leh kai ei ta, chu chu LALPAN anni chu ei kutah a pêk a nih ti inchikna nîng a tih" a ta. 11 Chuongchun, an pahni chun Filistin diuti-hai hmua chun an va'n lang a. Filistinhai chun, "En tu, Hebrai mihai chu an inbîkna kuoa inthokin an hung invâk suok ie" an ta. 12 Vêngtuhai chun Joanathan le râlthuom chawitu kuoma chun, "Hung tung ro, lo zil met kan ti cheu" an ta. Jonathan chun a râlthuom chawitu kuomah, "Ka hnunga hin mi hung zui rawh, LALPAN Israelhai kutah a pêk tawl tah a ni chu" a ta. 13 Jonathan chu a kut le kea thangin a'n ban tung a, a hnunga chun a râlthuom chawitu chun a zui a. Jonathan hmaa chun Filistinhai chu an tlu zot zot a, a râlthuom chawitu chun a hnungah a hung that pei a. 14 Chu an bei voi khatnaa chun Jonathan le a râlthuom chawitu chun sangngam khat biel velah mi sawmhni an that a nih. 15 Chuongchun, Filistin sipai po po, an riebùka inkulhai, phula umhai, a hmatawnga umhai le rûntu pawlhai chu chî-âinain a man a, hnuoi chu an hning dur dur a. Chu chî-âina chu Pathien hung tir a nih. 16 Benjamin ram Gibea Saula râlvêng bûka inthoka an hang en chun sîr tinah sipai an tè dar hum hum a, an buoi nuoi nuoi el a. 17 A bula umhai kuoma chun Saulan, "Tu hin hang intiem unla, tuhai am a kim naw hang en ta u" a ta. An hang intiem chun Jonathan le a râlthuom chawitu chu an lo um ve naw a. 18 Saula chun Ahija kuomah, "Pathien Bawm chu hang la raw khai" a ta. Chuong lai chun Pathien Bawm chu Israel thlahai kuoma um a nih. 19 Chun, Saulan thiempu a biek lai mêk chun Filistinhai riekhmun tienga buoi mur murna chu a hung zuol deu deu pei a. Saula chun thiempu kuomah, "La thaw naw phot el rawh" a ta. 20 Chuongchun, Saula le a kuoma um po pohai chu an tlân khawm a, indonaa chun an fe ta a. Filistin mihai chu namen loin an buoi a, anni le anni kawlhnâmin an insàt a. 21 Kha hmaa Filistinhai tienga thang le an inkulnaa hang fe Hebrai mihai khom chu Saula le Jonathan tienga thang Israel mihai kuoma chun an hung pakai a. 22 Efraim tlâng rama Israel mi inbihaiin Filistinhai tlânsiet thu an hriet chun indoah an hung thang ve a, an hnot zui ta ngat ngat a. 23 Chuongchun, chu ni chun LALPAN Israelhai chu a san suok a, Beth-aven tlung rakin an bei a. 24 Chu ni chun, "Ka hmèlmahai chunga phuba ka lâk hma le khaw inthim hmaa bu fa taphot chu tongse phurin um raw se" tia Saula a'n kham leiin Israel mihai chu an beidong hle a, sipai tu khom bu fa an um nawh. 25 Sipai po po chun ramhnuoi an va tlung a, hnuoia chun khuoizu a lo um a. 26 Mipui chun ramhnuoia khuoizu lo luong chu an hmu a, sienkhom tu khomin an liek nawh, inkhàmna chu an ti leiin. 27 Jonathan ruok chun a pa inkhàmnain mipuihai chu a khuop ti a hriet naw a, a hmol chawi lai hmawr zum chun khuoithlâr chu a zuk sun a, a liek a, a mit meng a hung fie ta a. 28 Chu phing leh sipai pakhat chun, "I pa chun mi tu khom voisuna bu fa taphot chu tongsie phur dingin a mi khuop tlat a, chu leia mipui an tamsawl a ni hi" a ta. 29 Jonathan chun, "Ka pa hin mi a sukbeidong lem chauh a nih. En ta u, khuoizu tlawmte ka hang intem leiin ka mitmeng khom a hung fie ta hi. 30 Mipuiin an râllâk thil an hmu taphot an du duin fa hai sienla lem chu voisun hin ei va thaw tha nasa zuol awm de! Tuta nêk dai hin Filistinhai ei that rawn lem naw ding maw?" a ta. 31 Chu ni chun Mikmas-a inthokin Aijalon chenin Filistin mihai chu an bei a, mipuihai chu an chàu ta hle a. 32 Chuongchun, mipuihai chun an râllâkhai chu a bawin an baw a, beramhai, bawnghai le bawng tuoihai chu an man a, tuola chun an that a, a thisen pumin an fâk a. 33 Chun, mi thenkhatin, "Ngai ta, mipuihai chun sá chu a thisen puma an fâk leiin LALPA chungah thil suol an thaw tah" tiin Saula chu an hril a. Saula chun, "Thuthlung in bawsiet a nih. Ka bula hin lung lien tak mi hung inhlumpêk ro" a ta. 34 Saula bok chun, "Mipuihai lai fe unla, 'Mi tinin a bawng le beram chu a thisen puma faa LALPA chunga thil suol thaw loin, ka kuoma hung kei hai sien la, hi taka hin that raw hai se' a tih tiin va hril ro" a ta. Chu zân chun mi tinin mani bawngchal seng an hung kei a, chu taka chun an that a. 35 Saula chun LALPA ta dingin maichâm a siem a, chu chu LALPA ta dinga maichâm a siem hmasakna tak a nih. 36 Saula chun, "Zânah inthok suok ei ta, zîng khaw var chenin Filistinhai zu rok ei ta, tu khom a hringin hlà hrim hrim nawng ei tiu" a ta. Anni chun, "Tha i ti dàn ang takin thaw rawh" an ta. Thiempu ruok chun, "Pathien la hang rawn hmasa phot ei tih" a ta. 37 Saula chun Pathien kuomah, "Filistinhai chu ka zu bei dim a ni? Israelhai kutah anni chu pêng i ti?" tiin a'n don a, sienkhom chu ni chun Pathienin a don nawh. 38 Chun, Saula chun Israelhai kuomah, "Nangni sipai hotuhai, ka kuoma hin hung unla, voisun hin ieng suol am ei thaw ti zong suok ei tiu. 39 Israelhai hnena petu LALPA hring zing hmingin thu ka tiem a, ka naupa Jonathan chungah a tla khomin, a thi ngei ding a nih" a ta, tu khomin ieng khom an hril nawh. 40 Chu zoah Saula chun Israelhai kuomah, "Nangni po kha tieng khan ngîr unla, kei le ka naupa Jonathan hi tieng hin ngîr kan tih" a ta. Mihai chun, "Tha i ti dàn ang takin thaw rawh" an ta. 41 Chuongchun, LALPA Israelhai Pathien kuoma chun Saulan, "A'n dik tak chu hung suklang rawh" tiin a tongtai a. Saula le Jonathan inkâra thumvawr chu a tlu a, mipui chu an fihlim ta vong a. 42 Saula chun, "Kei le ka naupa Jonathan inkâra dingin thum chu vawr ro" a ta, Jonathan chungah a tlu a. 43 Saula chun Jonathan kuomah, "Iem a na i thaw mi hril raw khai" a ta. Jonathan chun, "Ka hmol chawi hmora mi khuoizu tlawmte chu ka'n tem ngei kha tie. Chu lei chun ka thi ding maw?" a ta. 44 Saula chun, "Jonathan, i thi naw chun Pathienin a nuom ang taka nasain mi soisak raw se" a ta. 45 Mipui chun Saula kuomah, "Israelhai sansuokna ropui tak hung intluntu Jonathan hi a thi ding maw? Ni thei teu naw nih. LALPA hring zing hming sâlin kan hril, a sam zâi pakhat khom hnuoiah tla naw nih; voisuna a thilthaw hi Pathienin a thangpui lei a nih" an ta, mipui chun Jonathan chu thi lo dingin an sanhim ta a. 46 Chuongchun, Saulan Filistin mihai a hnot chu a kîrsan a, an ram tieng an insaseng tawl ta a. 47 Israelhai chunga lal a hung nia inthokin Saula chun sîr tinah hmèlma Moab mihai, Amon mihai, Edom mihai, Zoba lalhai le Filistin mihai chu a do a, a nghatna tieng tieng chun a hne tawl pei a. 48 Huoisen taka doin Amalek mihai chu a hne a, Israelhai chu anni rok hlaktuhai kuta inthokin a san suok tah a nih. 49 Saula naupahai chu Jonathan, Ishvi le Malki-Shua an nih. A naunu pahnihai chu, a upa lem hming Merab a na, a naupang lem hming chu Mikal a nih. 50 Saula nuhmei chu Ahimaz naunu Ahinoam a nih. Saula sipaia kawmandar chu Nera naupa Abner a na, Nera chu Saula pa unaupa a nih. 51 Saula pa Kisa le Abner pa Nera chu Abiel nauhai an nih. 52 Saula dam sùng po po chu Filistinhai leh nasa takin an indo hlak a; Saula chun mi hrât le huoisen a hmu taphot chu a hnuoia thok dingin a lâk pei a.

1 Samuel 15

1 Samuel chun Saula kuomah, "Israelhai lal ni dinga hriek nâl ding chea LALPA hung tir kha ka na, tu hin LALPA thu chu ngaithla rawh. 2 Iengkim LALPA chun hieng hin a hril: Aigupta rama inthoka Israelhai an hung laia Amalek mihaiin lo lambuna an soisak lei khan ka hrem tawl ding a nih. 3 Tuhin Amalekhai bei dingin fe la, an thil nei hrim hrim hlà nei dêr loin sukbohmang vong rawh. Tu khom hlà nei naw la, a nuhmei a pasal, naupang le naute, bawng le beram le sanghawngsei le sabengtung hai chu that ram vong rawh" a ta. 4 Chuongchun, Saula chun mipui chu a ko khawm a, Telaim khuoa chun a tiem a, Israel mi nuoi hni le Juda mi sîngkhat an nih. 5 Saula chun Amalek mihai khuo chu a zu tlung a, ruom kârah an lo lambun a. 6 Saula chun Ken mihai kuomah, "Hung suok unla, Amalek mihai laia inthokin inthier fihlim ro, chuong naw chun sukhlum ve pal rawi ka ti cheu. Nangni chun Israel thlahai Aigupta rama inthoka an hung suok lai khan in lo lunginsiet si a" a ta. Chuongchun, Ken mihai chu Amalek mihai laia inthok chun an inthier fihlim a. 7 Chu zoah Saula chun Amalek mihai chu Havilaa inthoka Aigupta sak tienga Sur chenin a bei a. 8 Amalekhai lal Agag chu a hringin a man a, a mihai chu kawlhnâmin a that ram vong a. 9 Amiruokchu, Saula le a mihai chun Agag chu an hla a, beram le bawng tha tha, bawngchal tuoi le beram thau tha tha le thil tha an ti hrim hrim chu an sukhlum naw a, a tha naw an ti le a ongrop hai ruok chu an sukhlum vong a. 10 Chuongchun, LALPA thu chu Samuel kuomah a hung tlung a, 11 "Saula hin a mi nghatsan a, ka thupêk anga a thaw naw leiin lala ka lo ruot hi ka'n sìr a nih" a ta. Samuel chu a lungzîng hle a, zânkhuoin LALPA a ko a. 12 A zînga chun inhma takin Samuel chu a tho a, Saula hmuok dingin a suok a. Sienkhom, "Saula chu Karmel tlângah a fe a, chu taka chun ama hriet zingna lung a phun a, chun, a kîr nawk a, a fe pei a, Gilgalah a fe thlàk" tiin Samuel chu an lo hril a. 13 Samuel-in Saula kuom a tlung chun Saulan, "LALPAN malsawm che raw se. LALPA thupêk angin ka thaw tah" a ta. 14 Samuel chun, "Chuong beram inbe ri ka naa hung lût le bawng inbu ri ka hriethai chu ieng thil am an ta a?" a ta. 15 Saula chun, "Sipaihaiin Amalek mihai ta an hung lâkpêk a ni chu. LALPA i Pathien kuoma inthawina dingin sipaihaiin beram tha tha le bawngchal tha tha an hla a, a dang po chu kan sukhlum vong a nih" a ta. 16 Samuel chun Saula kuomah, "La to ta, LALPAN voizàna ka kuoma thu a hril chu hang hril ka ti che" a ta. Saula chun, "Mi hril raw khai" a ta. 17 Samuel chun, "Nangma ngaia ieng khop lo i ni zing lai khan Israel hnamhai lu taka sie i ni naw maw? LALPA chun Israelhai chunga lal dingin hriek a nâl che a. 18 LALPA chun a tir suok che a, 'Fe la, mi suolhai, Amalek mihai chu sukhlum vong rawh, an bohmang dêr hma khat chu bei pei rawh' a ti che a. 19 Iengti leia LALPA thu chu inza loa i um am a na? Ieng leia râllâk thil chu baw huom huom a, LALPA mithmuah thil suol i thaw am a na?" a ta. 20 Saula chun, "LALPA thu chu ka zawm annawm. LALPA mi tirnaa chun ka fe a. Amalek mihai chu ka sukhlum vong a, an lal Agag ka hung hawn a. 21 Râllâk thil, sukbohmang el ding laia beram le bawng tha tha chu Gilgala LALPA i Pathien kuoma inthawina dingin sipaihaiin an hung hawn bok a nih" a ta. 22 Samuel chun Saula kuomah, "LALPA chun a thupêk zawm ang tlukin pumraw thilhlânhai le inthawinahai hi a lawm am a ni? Inthawina nêkin thu awi a tha lem a, beramchal thau nêkin a thu poisak a tha lem. 23 Helna hi aien thiemna suol ang a na, lululna hi milem biekna suol ang a nih. LALPA thu chu i hnawl leiin, ama khomin lal dingin a hnawl ta che a nih" a ta. 24 Chun, Saula chun Samuel kuomah, "Thil suol ka lo thaw a nih. LALPA thupêk le i thu mi pêkhai chu ka lo bawsiet a nih. Mipuihai chu ka ti a, anni tieng ka lo thlè a nih. 25 Chuongchun, ka suol ngaidam la, LALPA ka chawibiek theina dingin mi fepui nawk hram raw khai" tiin a ngen a. 26 Samuel chun, "Fepui naw top ka ti che. LALPA thu chu i hnawl a, Israelhai chunga lalah LALPA khomin a hnawl ta che a nih" a ta. 27 Chuongchun, fe dinga Samuel a hang inher lai chu Saulan a zakaw fuol hmorah a man a, a zakuo chu a'n thler a. 28 Samuel chun, "Voisuna inthok hin Israel lalram chu LALPAN a lâkpèk ta che a, i nêka tha lem i tuolbawmhai laia mi pakhat a pêk tah. 29 Ama Israel Ropuina chun khêl a hril ngai naw a, a lamlêt ngai bok nawh; Ama chu mihriem anga lungril thlâk dingin mihriem a ni ve si nawh" a ta. 30 Saula chun, "Ka lo suol a nih. Amiruokchu, lunginsiet takin Israel upahai le mipuihai hmaa hin mi chawimawi la, LALPA i Pathien chu ka chawibiek theina dingin mi fepui hram raw khai" a ta. 31 Chuongchun, Samuel chun Saula chu a kîrpui a. Saula chun LALPA chu a chawibiek a. 32 Chu zoah Samuel chun, "Amalekhai lal Agag chu ka kuomah hung thuoi ro" a ta. Agag chun thina chu a pumpel taa inngaiin, ngaingam takin Samuel kuoma chun a hung a. 33 Sienkhom, Samuel chun, "I kawlhnâmin nuhmeihai nau nei loa i siem ang bokin i nu khom nuhmei laia nau nei lo ni ve tâng a tih" a ta, Gilgala LALPA maichâm hmaa chun Agag chu a sât hlum a. 34 Chun, Samuel chu Rama khuoah a fe a, Saula ruok chun a in umna Gibea tieng a pan tung a. 35 Saula chan chu Samuel chun tuorpui hle sienkhom a thi chenin Saula chu a hmu nawk ta ngai nawh. Israelhai lala Saula a lo siem leiin LALPA chu a'n sîr hle si a.

1 Samuel 16

1 LALPA chun Samuel kuomah, "Ka mi Israelhai lal dinga ka hnawl ta hnung Saula hi ieng chen am i sûn ding a na? I hriek bûr fungkiah hriek thun sip la, fe rawh. Bethlehem khuoa Jesai kuomah ka tir ding che a nih. A naupahai laia mi lal dingin ka ruot tah" a ta. 2 Samuel chun, "Iengtin am fe thei ka ta? Saulan a lo hriet chun a mi that el ding a nih" a ta. LALPA chun, "Bawngla tuoi kei la, 'LALPA kuoma inthawi dinga hung ka nih' ti rawh. 3 Chun, inthawinaa chun Jessai chu ko la, i thaw ding hril ka ti che. Mi ka kawkhmu ding che chu hriek i mi nâlpêk ding a nih" a ta. 4 Samuel chun LALPA hril angin a thaw a. Bethlehem a tlung chun a khaw upahaiin inthin pumin an lo hmuok a, "A tha tienga hung am i ni?" tiin an indon a. 5 Samuel chun, "A tha tienga hung ni e, LALPA kuoma inthawi dinga hung ka nih. Insukthieng unla, inthawinaah hung ro" a ta. Chun, Jesai le a naupahai chu a sukthieng a, inthawinaa hung thang dingin a fiel a. 6 An hung tlung chun Samuelin Eliab chu a hmu a, a lungrilin, "LALPA hriek nâl ding chu LALPA hmaa um hi a ni ngei el" a ta. 7 Sienkhom, LALPA chun Samuel kuomah, "A hmel tieng amanih, a dung insâng tieng amaniah en naw rawh, ama hi chu ka dit nawh. LALPA chun mihriem en dàn angin a en ve nawh; mihriem chun puo tieng inlang dàn an en hlak a, LALPA ruok chun lungril tieng a en lem hlak a nih" a ta. 8 Chun, Jesai chun Abinadab a ko a, Samuel hmaa chun a hungpui a. Ama chun, "Hi khom hi LALPA thlang a la ni nawh" a ta. 9 Jesai chun Sama a hung thuoi a, Samuel chun, "Hi khom hi LALPA thlang a la ni naw rop" a ta. 10 Chuongchun, Jesai chun a nau pasarihai chu Samuel hmaah a hung inlangtir a, Samuel chun Jesai kuomah, "Hienghai khom hi LALPA thlang an la ni nawh. " a ta. 11 Samuel chun Jesai kuomah, "Hitaka hin i naupahai an kim vong a ni?" a ta, ama chun, "A naupang tak a la um nawh, beram a vêng a nih" a ta. Samuel chun Jesai kuomah, "Va'n kotir raw khai. A hung tlung hma khat chu ei tan thei naw ding a nih" a ta. 12 Chuongchun, a va'n kotir a, an hung thuoi a. Ama chu sàr veng vong, hmèl tha tak le mit meng mawi tak a nih. LALPA chun Samuel kuomah, "Ama hi a nih; tho la, hriek va nâl rawh" a ta. 13 Samuel chun a hriek thunna fungki chu a lâk a, a unauhai mithmua ngei chun hriek a nàl a, chu nia inthok chun Davida chungah LALPA Thlarau chu thilthawtheina leh a hung tlung a. Samuel chu a tho a, Rama khuoah a fe ta a. 14 LALPA thlarau chun Saula chu a suoksan a, LALPA tirh ramhuoiin ama chu a soisak a. 15 Saula siehlawhai chun a kuomah, "En ta, Pathien tir ramhuoiin a soisak che a ni hi. 16 Kan pu hin a siehlawhai hi tingtang tum thiem zong dingin thu mi pe sien, ama chun Pathien tir ramhuoiin a hung hluo pha che tingtang chu tum a ta, hung tha el i tih" an ta. 17 Saula chun a siehlawhai kuomah, "Chuonga tum thiem chu zong inla, ka kuomah hung thuoi ro" a ta. 18 A siehlaw laia pakhat chun, "Bethlehema Jesai naupa tingtang tum thiem ka hmu ta a. Ama chu mi huoisen, râldo thiem, thu hril thiem le hmel tha tak a na, a kuomah LALPA khom a um" a ta. 19 Chuongchun, Saula chun Jesai kuomah mi a tir a, "Beram vêngtu i naupa kha ka kuomah hung tir rawh" tiin thu a'n cha a. 20 Jesai chun sabengtung a buotsai a, bei le uoiin peng khat a'n phurtir a, kèl tuoi a hung lâk bok a, chuonghai chu inchawitirin a naupa David chu Saula kuomah a tir a. 21 Davida chun Saula kuom chu a va tlung a, a hmaa chun a ngîr a, ama chun a lo ngaina hle a, a râlthuom chawituhai laia pakhatah a hmang a. 22 Saula chun Jesai kuomah, "I naupa Davida hi ka kuomah um raw se. Ka mit a tlung hle a nih" ti thu hril dingin mi a tir a. 23 Pathien tir ramhuoiin Saula chu a hung soisak zàtin Davida chun tingtang a lâk a, a tum a, Saula chu a hung har a, a tha nawk a, ramhuoi chun a suoksan hlak.

1 Samuel 17

1 Filistin mihai chun indo dingin an sipaihai an khawm a, Judai rama Soko khuoah an pung khawm a, Soko le Azeka inkâra Efes Damim-a chun thanghmun an khaw a. 2 Saula le Israel mihai khom an pung khawm a, Ela ruomah thanghmun an khaw a, Filistinhai lo dang dingin an inzar phar a. 3 Filistinhai chun tlâng pakhat an hluo a, Israelhai chun tlâng dang an hluo a, an inkâra chun ruom a um a. 4 Gath khaw mi a hming Goliat chu Filistinhai inkulnaa inthok chun Israelhai chu cho dingin a hung suok a. A dung chu meter thum deuthawa insâng a nih. 5 Dâr awmphaw kilogram sawmnga pasaria rik a hâk a, dâr lukhum a khum bok a. 6 Dâr ngal phaw a ngala chun a bun a, a ruongzàng tieng chun dâr fei a pai a. 7 A fei ngul chu puonkhawngna themtlâng tiet a na, a fei lu zum chu kilogram saria rik a nih. A phaw chawitu chu a hmaah a fe a. 8 Goliat chu a ngîr a, Israel sipaihai chu a khêk khum a, "Indo dinga ieng leia in mi hung ep am a na? Kei hi Filistin mi ka ni naw maw? Nangni khom Saula siehlawhai in ni naw maw? Nangni laia pakhat thlang suok unla, a mi bei dingin hung thla raw se. 9 A mi hnea a mi sukhlum chun in siehlawah um kan ta, keiin ka ngama ka sukhlum ruok chun kan siehlawah um in ta, kan rong bawl in tih" tiin. 10 Filistin mi bok chun, "Voisun hin Israel sipai po po ka cho cheu. Mi pakhat hung thlang suok unla, lo inbei kan tih" a ta. 11 Filistinpa rawl an hriet chun Saula le a sipaihai chu zamzalin an inthin hawp a. 12 Chun, David chu Efrat mi Jesai naupa, Judai rama Bethlehem khaw mi a nih. Jesai chun nau pasal pariet a nei a, Saula hun lai chun upa tak le tar tak a ni tah. 13 Jesai naupahai laia a upa tieng pathum chun indonaah Saula an zui a, chuonghai chu an upat dàn indotin Eliab hai, Abinadab hai le Sama hai an nih. 14 Davida chu an unau laia naupang tak a na, Saula zuituhai chu a upa tieng pathum an nih. 15 Davida chu Saula kuoma inthokin Bethlehema a pa beram enkol dingin a fe zing zing hlak a. 16 Ni sawmli sûng zet el chu Filistinpa chu zîng tieng le zân tieng zâtin a hung suok a, Israelhai chu a cho hlak a. 17 Ni khat chu Jesai chun a naupa Davida kuomah, "Bufai zeu tawl kilogram sawm le bei tluon sawm hi chawi la, i unauhai inkulna hmunah va tlânpui vat raw khai. 18 Chun bawngnene khal tlang sawm hi an pawla sângkhat chunga kawmandar ta dingin chawipêk bok la, i unauhai iem an chang hung indon la, an chanchin hung hawnkîr rawh. 19 Saula le anni le Israel mi po po chu Filistin mihai beiin Ela ruomah an um a nih" a ta. 20 Zîngkàr inhma takin Davida chun a ran ruolhai chu berampuhai kuomah mâksanin a pa Jesaiin thu a pêk ang chu phurin a uhai inkulna tieng panin a suok a. Râl bei dinga sipaihai an inthok mêk lai le an khêk dur dur lai chun an inkulna chu a va tlung a. 21 Israelhai le Filistinhai chu inbei dingin an lo inzar phei a, sipai le sipai chu an lo inep thup el a. 22 Davida chun a thil chawi chu fâk ding enkoltuhai kuta chun a sie a, sipaihai umna tieng chun a tlân a, a uhai chu chibai a bûk a. 23 Chun, a unauhai a biek lai chun Filistinhai mi suongtawlol Goliat, Gath khuoa mi chu sipai pawlhai laia inthokin a hung inchawm suok a, a chona thu pangngai bok a hril nawk a, chu chu Davidan a lo hriet a. 24 Israel mihaiin chu pa an hmu chun ti êm êmin an tlânsie a. 25 Israel mihai chun, "Kha mihriem hung suok kha in hmu am? Israel mihai cho dinga hung suok a ni kha. Tu khom ama that thei taphot chu lalin nasa takin sum tieng sukhausang a ta, a naunu pêng a ta, a pa sûngkuohai chun Israel rama hin leiman le sie ieng khom chawi ve naw ni hai" an ta. 26 Davida chun a bula ngîrhai kuomah, "Hi Filistinpa thattu le Israelhai hmingsietna sukrètu chunga chun ieng am ie an thaw ding chu? Hi sertan lo Filistinpa hi tu am a na, Pathien hring sipaihai a hang cho ngam vei chu?" a ta. 27 Anni chun, "A sukhlumtu taphot chu kan hril tah ang khan a chungah thaw nîng a tih" an ti nawk a. 28 Davida u a upa takin mihai kuoma a sang thuhril a lo hriet chun Davida chungah nasa takin a lung a sen a, "Ieng dinga hi taka hung thla ve che? Thlalèra beram tlawmte kha tu am i'n vêngtir a na? I chapozie le i lungril rîtlozie ka hriet. Indo en ding dâmin maw i hung mei mei chu?" a ta. 29 Davida chun, "Iem a na ka thaw suol? Ka tong khom in khap a ni?" a ta. 30 Chuongchun, mi dang kuom tieng a ngha a, a hril ngai bok chu a hril nawk a, mihai chun a hmaa an don ang bok khan an don nawk a. 31 Davida thu hril lo hretuhai chun Saula kuomah an hril sawng a, Saula chun a ko a. 32 Davida chun Saula kuomah, "Hi pa lei hin tu khomin lung sukhnuol naw raw hai se; i siehlaw hi fêng ka ta, keiin va bei ka tih" a ta. 33 Saula chun, "Hi Filistinpa bei ding hin nang êm chu fe lo e. Tleirawl chauh i la ni a, ama ruok chu a tleirawla inthoka indo mi a ni si a" a ta. 34 Sienkhom Davida chun Saula kuomah, "I siehlaw hin ka pa beram ka vêng hlak a. Sakeibaknei amanih savom amanih an hung a, beram ruol laia beram te an lâk chang a um hlak. 35 Chuonghai chu ka hnot a, ka bei a, an baua inthokin ka san suok hlak a; chun, mi bei dinga an hung inthok changin an bâk hmulah ka man a, ka bei a, ka that hlak a nih. 36 I siehlaw hin sakeibaknei le savomhai khom ka that ta hlak. Chuong ang bok chun sertan lo Filistinpa khom hi ka soisak ding a nih, Pathien hring sipaihai dâm a hang cho ngam vei chu. 37 Sakeibaknei kutbawr le savom kutbawra inthoka mi sansuoktu LALPA chun hi Filisitinpa kuta inthok khom hin mi sansuok ngei a tih" a ta. Saula chun, "Chuong an leh fe raw leh, LALPAN umpui a ti che" a ta. 38 Ama thuomin Saula chun Davida chu a'n thuomtir a, dâr lukhum a'n khumtir a, awmphaw a'n hâktir bok a. 39 Davida chun a thuom chungah kawlhnâm a pai a, hang fe a tum a, chuong ang chun a la thaw ngai si naw leiin Davida chun Saula kuomah, "Ka la thaw thang naw leiin hieng hin chu fe thei naw nîng" a ta, a hlîp nawk a. 40 Chuongchun, a hmol chu a chawi a, vadungtea lung inmum tha panga a rût a, a beram vêngna mansaa chun a pai a, a kuta virvom chawiin Filistinpa chu a pan ta a. 41 Filistinpa chu a hung phei a, Davida chu a hung pan hnai a, a phaw chawitu chu a hmaa chun a fe a. 42 Filistinpa chu a hang ngha a, Davida a hmu chun a tham naw hle a, sâr veng vong, mit meng mawi tak le tleirawl el a ni si a. 43 Davida kuoma chun, "Ui am ka ni, hmol le i mi hung pan chu?" a ta. Filistinpa chun an pathienhai hming salin Davida chu tongsie a'n phur a. 44 "Hi taka hin hung rawh, i taksa kha chunglêng vatehai le ram sahai lo infâktir ka tih" a ta. 45 Davida chun Filistinpa kuomah, "Nang chu kawlhnâm dâm, fei dâm, feite dâm chawiin mi bei dingin i hung a, kei ruok chu i cho pùng púng Iengkim LALPA, Israel sipaihai Pathien hmingin ka hung bei che a nih. 46 Voisun hin nang hi ka kutah LALPAN a mi pêk ding a na, hnêng ka ti che a, i rîng tan ka tih. Filistin sipaihai ruong chu voisun hin chunglêng vatehai le ram sahai ka'n fâktir ding a nih. Chuongchun, hnuoi chunga mi po po hin Israelhai lai Pathien a um ti hre thei an tih. 47 Chun, LALPA chun kawlhnâm le feiin a sandam nawh ti pungkhawm po po hin hre thei bok an tih. Indona chu LALPA indona a ni si a; Ama chun kan kutah nangni rawi hi a mi pêk ding a nih" a ta. 48 Bei dinga Filistinpain a hung pan hnai lai chun Davida chu inrang takin sipaihai umna tieng chun lo bei dingin a tlân phei a. 49 Davida chun a mansa a pur a, lungte a phor a, a virvom chun Filistinpa chaldâr takah a dêng a, a chalah lung chu a tlum a, a khupbokin a tlu ta ruoi ruoi el a. 50 Chuongchun, Davida chun Filistinpa chu saihli le lungtein a ngam a, kawlhnâm thang dêr loin a per thlûk a, a that ta a. 51 Davida chu a tlân a, Filistinpa bula chun a va ngîr a, a kawlhnâm chu a paia inthokin a lâk suok a, chu chun a that a, a lu chu a tan a. Filistinhaiin an mi hrât khawkhèng a thi ti an hriet chun an tlânsie a. 52 Israel mihai le Juda mihai chu an tho a, an khêk dur dur a, Filistin mihai chu Gath chen le Ekron kul kotkhàr chen an hnot a. Filistin mi an thathai chu Saraim lampui intluonin, Gath-a inthoka Ekron chenin an inthal pheng phung a. 53 Israelhaiin Filistin mihai an hnot chu an hung kîr a, an riebûk chu an rok a. 54 Davida chun Filistinpa lu chu a lâk a, Jerusalemah a fepui a, a râlthuom ruok chu a puon inah a sie a. 55 Filistinpa bei dinga Davida a fe lai Saulan a hmu khan a sipai kawmandar Abner kuomah, "Abner, hi tleirawl hi tu naupa am a na?" a ta, Abner chun, "I hringna sâlin ka hril, aw lalpa, ka hriet dêr nawh" a ta 56 Lal chun, "Hi naupang hi tu naupa am a na ti indon suok rawh" a ta. 57 Filistinpa a that zo hung kîr tieng Davida chu Abnerin Saula kuomah a thuoi a, Filistinpa lu chu a la chawi zing a. 58 Saula chun, "Tu naupa am i na, tlangvàl?" a ta. Davida chun, "Bethlehema mi, i siehlaw Jesai naupa ka nih" a ta.

1 Samuel 18

1 Davidan Saula kuoma thu a hril zo chun Jonathan lungril chu Davida chungah a fu ta hmak a, ama a'n hmangai ang topin a hmangai a. 2 Chu nia inthok chun Saula chun Davida chu a pa in tieng infètir phal ta loin ama inah a'n umtir nghal a. 3 Jonathan chun David chu lungril taka a ngaina leiin dam sûnga ruol tha ni dingin zawlin a man a. 4 A zakuo fuol hâk lai chu a hlîp a, Davida a pêk a, a thuom le a kawlhnâm le a thalngul le a kawngchûn chenin a pêk sa a. 5 Saulan thil thaw dinga a tirna taphotah hlawtling taka a hlen pei leiin Davida chu a sipaihai lai ngîrhmun insâng takah Saula chun a hlângkai a. Chu chun mipui po po le Saula thoktuhai chen khom a suklawm a. 6 Davidan Filistinpa a that hnunga mihai an hung kîr chun, Israel khaw tinah nuhmeihai chu hla saka lâmin khuong le dâr le tum rîk thei tinrêng leh hlim takin Lal Saula hmuok dingin an hung suok a. 7 Nuhmeihai chun làm pumin, Saulan a sânga sâng a that a, Davidan a sînga sing a thattiin an insam a. 8 An hla sak chun hmai sen rak khopin Saula lung a suksen el a. "Davida chu a sînga sîng thatah an ngai a, kei chu a sânga sâng chauh thatah an mi ngai a na, a ram ti ngot naw chu chang naw muol ieng am a nei ta a?" tiin a ngaituo a. 9 Chu nia inthok chun Saula chun David chu a thîk ta êm êm a. 10 A zînga chun Pathien tir thlarau suolin Saula chu nasa takin a hung soisak a, ni danga a thaw dàn pangngaiin Davidan tingtang a tum lai chun thu a hril buon buon a. 11 Saula chun fei a chawi a, "Banga son Davida hang khaw dè chor ka tih" tiin a khaw a, Davida chun voi hnih a'n tawl kiengsan hman a. 12 Davida kuomah LALPA a um a, ama hlak a màksan ta si leiin Saula chun Davida chu a ti a nih. 13 Chuleiin, Davida chu a son hmang a, sipai sâng chunga kawmandar-ah a sie a, an ràl beinaah Davida chun hma a thuoi a. 14 A kuomah LALPA a um leiin a thilthaw taphotah nasa takin a hmuingil a. 15 A hlawtlingzie Saulan a hriet chun ama chu a ti nawkzuol a. 16 Israelhai le Judahai po po ruok chun râl beinaa an hma thuoitu a ni leiin Davida chu an ngaina hle a. 17 Chun, Saula chun Davida kuomah, "Ka naunu upa lem Merab hi i nuhmei dingin ka pêk che. Huoisen takin ka rong bawl phot la, LALPA indonaa hin thang la nasa rawh" a ta. Saula chun a lungrilin, "Kei chun a chungah kut thlâk naw ning. Filistinhaiin thaw lem raw se" a ti a. 18 Davida chun Saula kuomah, "Lal mâkpa ni dingin kei hi tu am ka na, ka sûnghai le kan pahnam hi Israelhai lai khom ieng am an ni a?" a ta. 19 Amiruokchu, Saula naunu Merab le Davida innei hun a hung tlung chun Meholat mi Adriel nuhmei dingin Saula chun a pêk lem ta dai a! 20 Saula naunu Mikal chun Davida a ngaizawng a, chu thu chu Saula kuomah an hril a, a lawm hle a. 21 Saula chun a lungrilin, "A'n awkna ding châng le Filistin mihaiin a chunga kut an thlâkna remchâng a ni tàkduoiin ka naunu chu pêng ka tih" a ta. Chuleiin, Saula chun Davida kuomah, "Voisun hin ka mâkpa ni theina remchâng i nei nawk tah" a ta. 22 Saula chun a siehlawhai kuomah, "Arûkin Davida inbiekpui unla, 'Ngai ta, lal chu i chungah a lawm hle a, a siehlawhai po po khomin an hmangai che a, chuleiin lal mâkpaah um rawh' ti ro" a ta. 23 Chuong thu chu siehlawhai chun Davida an hril sawng a. Davida ruok chun, "Lal mâkpa ni hi thil tenaua in ngai am a ni? Kei chu mi rethei le tu hriet hlaw lo ka ni hi" a ta. 24 Saula siehlawhaiin Davida thu hril an ripawt chun Saulan, 25 "Davida kuomah hi thu hi va hril ro: 'Lal chun hmèlma chunga phuba lâkna dingin Filistinhai ser vun hmawr zakhat ti naw chu a naunu man dingin ieng khom a dit nawh' ti ro" a ta. Filistinhai kuta Davida inthitir dàn ding chu chuong ang chun Saulan a phier rûk a nih. 26 Saula siehlawhaiin chuong ang thu Davida an hril chun, lal mâkpa a hang ni el ding chu a lawm hle a. 27 Ni tiem a bo hmain Davida le a mihai chu an inthok suok a, Filistin mi zahni an that a, an ser vun hmawr chu a hung chawi a, lal mâkpa a ni theina dingin lal chu kim takin a pêk a, Saula chun a naunu Mikal chu nuhmeiah a'n neitir ta a. 28 Saula chun Davida kuomah Pathien a um ti le a naunu Mikal chun a hmangai ti a hung hmu chieng ta a. 29 Chu taka inthok chun Saula chun Davida chu a ti nawkzuol a, a dam sûnga a hmèlma a hung ni ta a. 30 Filistin sipai kawmandarhai chun an hung indopui zing a, an hung do zàtin Davida chu Saula kawmandar danghai nêkin a hlawtling lem zie a, a hming chu a hung inthang ta êm êm a.

1 Samuel 19

1 Saula chun a naupa Jonathan le a siehlawhai po po chu Davida that dingin a hril a. 2 Jonathan ruok chun Davida chu a ngaina êm leiin a kuomah, "Ka pa Saula hin sukhlum dàn che remchâng a zong leiin zînga inthok chu fîmkhur la, inbi hmang la, chu taka chun um zing rawh. 3 Fe suok ka ta, i umna phùlah ka pa ngîrpuiin inbiekpui ka ta, ka thil hriet chu hung hril nawk ka ti che" a ta. 4 Jonathan chun a pa Saula hmaah Davida chu inpâkin, "Lal chun a siehlaw Davida chungah poi tawk lul naw raw se, i poi ieng khom a tawk naw a, i ta dinga thil tha tak vong a nih a thaw lem hlak chu. 5 Thi huomin Filistinpa a bei a, LALPAN Israelhai po po ta dingin ropui takin a'n hnètir a, chu chu nang khomin i hmu a, i lawm hle kha. Chuleiin, poi tawk lo chungah ieng leiin am thil suol thawin, a san um loin Davida chu i that ding a na?" a ta. 6 Saula chun Jonathan thu hril chu a pom a, "LALPA hringna sâlin ka hril, Davida chu sukhlum ni naw top a tih" tiin thu a'n khàm a. 7 Jonathan chun Davida chu a ko a, chuong thil po po chu a hril a. Jonathan chun Davida chu Saula kuomah a thuoi a, a hma ang bokin a kuomah a um nawk ta a. 8 Indo a hung um nawk a, Davida chu a'n thok suok a, Filistin mihai chu nasa takin a va bei a, a that teu a, a hmaa chun an tlânsie dur dur a. 9 Chun, Saula chu a ina fei chawia a'n thung laiin LALPA tirh ramhuoiin a hung soisak a. 10 Davidan tingtang a tumpêk lai chun Saulan bang le thil khop tumin a fei chun a khaw a, sienkhom Davida chu a lo inhèm hman a, banga chun fei chu a khaw bur ngur el a. Davida chu a tlân suok a, chu zân chun a him ta a. 11 Saula chun Davida chu a in tieng inchàna zîngkàra that dingin mi a tir a. Davida nuhmei Mikal chun, "Voizân hin i hringna hum dinga i tlân naw chun zînga chu that ngei an ti che" a ta. 12 Mikal chun Davida chu tukver tieng an rel suoktir a, a tlân hmang a, a him ta a. 13 Mikal chun milem a lâk a, khuma chun a'n zâl a, puon a'n siltir a, a lu tieng chu kel hmulin a'n khum a. 14 Davida man dinga Saula mi tirhai an hung tlung chun Mikalin "A damnaw a nih" a lo ta. 15 Saula chun Davida en dingin a mihai chu a tir nawk a, an kuomah, "A khum pumin hung zawn unla, lo that ka tih" a ta. 16 Sienkhom, khum pindana a mi tirhai an lût chun khuma milem zâl, a lu tieng kèl hmula inkhum chu an hmu ta a. 17 Saula chun Mikal kuomah, "Ieng dinga mi dawhaa ka hmèlma i'n suoktir am a na?" a ta. Mikal chun, " 'I mi'n rel suoktir naw chun ka that ding che a nih' a mi ti tlat annawm" a ta. 18 Him taka Davida a tlân suok hnung chun Rama khuoah Samuel kuomah a fe a, a chunga Saula thilthaw dàn po po chu a hril a. Davida le Samuel chu Naioth-ahd an fe a, chu taka chun an um a. 19 Saulan Naioth-ah Davida a um ti a hung hriet chun man dingin mi a tir a. 20 Samuel rawia zawlnei ruolin thu hrila an insawi duol duol lai chu an va hmu a, Saula mihai chunga khom Pathien Thlarau a hung tlung a, insawi duol duolin thu an hril ve ta a. 21 Chu chu Saula an hril chun mi tam lem a tir a, anni khom chun thu an va hril ve ta duol duol a. Saula chun a voi thumnaah mi a tir nawk a, anni khom chun thu an va hril duol duol tho a. 22 A tawpah Saula ngei chu Rama khuo panin a'n thok suok a, Seku hmuna tuikul lien tak chu a va tlung a, "Samuel le Davida khaw lai am an um a?" tiin a'n don a, mihai chun, "Rama khuoa Naioth-ah an um" an ta. 23 Saula chunga khom Pathien Thlarau a hung tlung ve a, a fe pei a, Rama khuoa Naioth a tlung chenin thu a hril malam pei a. 24 Saula chun a silfên a hlîp a, Samuel hmaa chun thu a hril ve ta muol muol a, chu ni le zânkhuo chun saruokin a zâl a. Chu lei chun, "Saula khom zawlnei lai a thang ve an ta?" ti tongkam hi a hung suok a nih.

1 Samuel 20

1 Davida chu Rama khuo Naioth- a inthokin a tlân hmang a, Jonathan kuomah a fe a, a kuomah, "Iem a na ka thaw suol? I pa poi ieng am ka tawk a, hienga mi that a tum hi?" a ta. 2 Jonathan chun, "That naw top a ti che. Thi naw ti nih. Ngai ta, ka pa hin thil lien amanih thil chin amani khom mi hril loin ieng khom a thaw ngai nawh. Ieng leiin am hi thu hi ka lakah a ip ding? Ip naw top a tih" a ta. 3 Davida chun, "I pa chun i mi ditsakzie hi a hriet chieng a. 'Hi thil hi chu Jonathanin hre naw raw se, a sukbeidong awm êm el' a ti lungril khom a ni el thei. Chuong chu a ni lai zingin, nangma le keima inkâra tla thei chu thina chau hi a nih ti Pathien hringna le i hringna salin ka hril" a ta. 4 Jonathan chun, "Thaw dinga i mi ti taphot chu i ta dingin thawng ka tih" a ta. 5 Davida chun, "Ngai ta, zîng hi thla thar lawmna hun a ni ta a, lal kuoma ruoi ka kîl ngei a ngai a, sienkhom ni thum ni zân tieng chenin phùl tieng inbiru dingin fe lem el ka tih. 6 I pain ka um naw hi a hriet suok leh, 'Davida chun a khuo Bethlehema fe vak dingin a mi hni a, an sûngkuo ta dinga kum tina inthawina an nei hun a ni leiin' lo ti rawh. 7 'A tha chu' a ti leh i siehlaw hi a him nîng a ta, sienkhom a lung a sen ruok chun ka poi tawk a tum tlat a nih ti hre chieng thei i tih. 8 I siehlaw chunga hin ngilneina insuo rawh, nang le zawla inman dingin LALPA hmaah thu ei thlung ta si a. Bawsiet ka nei a ni chun nangin mi that el rawh. Ieng leiin am i pa kuta chun i mi pêk suok ding?" a ta. 9 Jonathan chun, "Chu chu thaw ngai naw ning. Ka pain i chungah poi tawk a tum ti ka hriet phot chun ka hril naw ding che am a ni?" a ta. 10 Davida chun Jonathan kuomah, "I pain bùl deuin lo don sienla che, tuin am mi hril tâng a ta?" a ta. 11 Jonathan chun, "Hung ta, phûla son va fe vak ei tih" a ta, an fe ta a. 12 Jonathan chun Davida kuomah, "LALPA Israelhai Pathien chu hrepuitu ni raw se. Hieng ang huna hin zîngah an naw leh zîng nawk hin ka pa lo dawp ka ta, a ditsak che chun hung hril ngei ka ti che. 13 I poi tawk a la tum tlat a, chu chu ka hril naw che amanih, him taka ka'n suoktir che amanih a ni naw chun, LALPAN Jonathan hi ieng anga na khomin a law lawin law raw se. LALPA chu i kuomah um raw se, ka pa kuoma a um hlak ang bokin. 14 Ka dam sûng phot chun LALPA lunginsietna chuoi lo chu ka chungah inlangtir zing la, 15 ka thi khomin ka sûngkuohai chungah i lunginsietna chu tawp naw sien la, LALPAN Davida hmèlmahai po po hnuoi chunga inthoka a sukbohmang vong chen khomin tawp naw raw se" a ta. 16 Chuongchun, Jonathan chun, "LALPAN Davida hmèlmahai chu zong suok raw se" tiin Davida sûngkuo le chun thu a thlung a. 17 Jonathan chun Davida chu a hringna tluka a hmangai leiin Davida khoma ama chu hmangai zing dingin thu a'n tiemkamtir nawk a. 18 Jonathan chun Davida kuomah, "Zîng hi thla thar ni a ni ta a, i thungna a ruok ding a ni leiin i um naw chu inhriet hlèng a tih. 19 Zîng nawk zân tieng hin kha hmaa buoina intan hlima i'n bikrûkna hmuna khan hung la, Ezel lungpui bula bok khan mi lo nghâk rawh. 20 Inthemthiem ni awm takin thal pathum a sîra khan hung kâp ka ta. 21 Chun, naupang kuomah, "Ka thalhai kha va zong rawh" tiin tir ka ta. "En ta, thal chu i hnung tieng khan a um, la la, hung chawi rawh" ka ti chun, LALPA hringna sâlin ka hril, a muongum a, i ta dingin ti ding a um nawh tina nîng a tih. 22 Amiruokchu, naupang kuomah, "En ta, thalhai chu i khêl tieng son a um" ka ti chun fe hmang nghal rawh; LALPAN a'n fe hmangtir che nìng a tih. 23 Chun, hi hi hre zing rawh, nang le keiin hi chungchanga ei thu hril mi hrepuitu chu LALPA ni kumkhuong a tih" a ta. 24 Chuongchun, Davida chu phùla chun a'n bi a, thla thar ruoi kîl hun a hung tlung chun lal chu kîl dingin a'n thung a. 25 Lal chu ni danga a thungna pangngai bang hnaia chun a thung a, Jonathan chu a hma zawna chun a thung a, Saula dotah Abner a thung a, Davida thungna chu a ruok a. 26 Amiruokchu, chu ni chun Saulan ieng khom a hril nawh. "A chungah thil ieng amani a tlung leia thienghlim lo nîng a tih, ni ngei ngei a tih" a ti lungril a. 27 Amiruokchu, a ni hnina khom chun Davida hmun chu a la ruok ta zing leiin Saula chun a naupa Jonathan kuomah, "Ieng leia Jesai naupa hi zani le voisun khom ruoi kîl dinga a hung ve naw am a na?" a ta. 28 Jonathan chun, "Davidan Bethlehema fe phalna nasa takin a mi hni a. 29 'Mi'n fètir hram rawh khai. Kan khuoah kan sûngkuoin inthawina kan nei ding a na, ka uhaiin hung ngei dingin an mi'n cha a nih. I mit tlunga ka um a ni phot chun ka unauhai hmu dingin mi'n fètir hrâm raw khai' a ta. Chu leia lal dawkâna hung kil ve thei lo a nih" a ta. 30 Saula lungsen chu Jonathan chunga chun a'n tèk a, "Nang, nuhmei kawmaw le lulul naupa, Jesai naupa chu i muolphona ding le a hringtu che i nu muolphona dingin i thlang ti ka hriet nawa i bawl a ni? 31 Jesai naupa dam sùng chun nang le i lalram chu suknghet ni ngai naw nih. Chuleiin, inkotir nghal la, ka kuomah hung thuoi ro, a thi ngei ding a nih" a ta. 32 Jonathan chun a pa Saula chu a don a, "Ieng leiin am sukhlum a ni ding? Iem a thaw suol hrim a?" a ta. 33 Saula chun khaw tumin a fei chu a hlàng ûr a, chu taka inthok chun Davida chu that a lo tum tak tak a nih ti Jonathan chun a hriet ta a. 34 Lungsen takin dawkâna inthok chun Jonathan chu a tho a, a pain muolpho taka Davida a soisak lei chun poi a ti a, chu thla ni hninaa chun ruoi chu a kîl ve ta nawh. 35 Zîngkàr chun Jonathan chu Davida hmu dingin phùla chun a fe a, naupang a thuoi a. 36 Naupang kuoma chun, "Tlân la, ka thal kâphai hi va zong raw khai" a ta. A tlân charin thal chu ama khela chun a kâp a. 37 Naupangin Jonathan thal kâp thlâkna hmun a va tlung chun Jonathanin, "Thal chu i khela mi saw an naw maw?" a ta. 38 Chun, Jonathan bokin, "Hung tlân nawk nghal rawh. Inhmaw la, muong naw rawh" a ta, naupang chun thal chu a rût khawm a, a pu kuom tieng chun a hung tlàn a. 39 (Naupang chun chu thil chu ieng khom a hriet ve nawh, Jonathan le Davida chauin an hriet a nih). 40 Jonathan chun a hriemhreihai chu naupang kuomah a pêk a, "Chawi la, in tieng lo kîr nawk ta rawh" a ta. 41 Naupang a fe hnung chun Davida chu lungpui sim tieng panga inthok chun a hung suok a, Jonathan hmaah bawka hnuoi sikin voi thum a bokkhup a, an infawp a, an tap a, Davida chu a tap nasa zuol bîk a. 42 Jonathan chun Davida kuomah, "Thlamuong takin fe ta rawh. 'LALPA chu nang le ei inkâr le ka thlahai le i thlahai inkâra kumkhuoa hrepuitu a nih' tiin LALPA hmingin inruolthatna thu ei intiemkam ta kha" a ta. Chuongchun, Davida chu a fe a, Jonathan khom chu khuo tieng a kîr nawk ta a.

1 Samuel 21

1 Davida chu Nob khuoa thiempu Abimelek kuomah a fe a. Abimelek chun inthin pumin a lo hmuok a, "An leh, makhât chaua hung i ni? Tu khom fepui i nei naw maw?" a ta. 2 Davida chun thiempu Abimelek kuomah, "Lalin thil iemani thaw ding a mi dânde a, 'I thil thaw ding le ka thupêk che hi mi dang tu khomin hre naw raw se' a ti a nih. Ka mihai le kan inhmuna hmun ding ruok chu ka hril tawl tah. 3 Tu hin i kutah iem kol i nei a? Bei tluon nga mi pe la, an naw khoma i nei thei ang zât zât chu" a ta. 4 Thiempu chun Davida kuomah, "Bei pangngai chu kol ka nei dêr nawh. Bei thienghlim hlânbei ruok chu ka nei, tlangvàlhai chu nuhmei laka an thienghlim phot chun" a ta. 5 Davida chun, "Kan suok naran chang khomin nuhmei lakah kan inthier fihlim hlak hrim hrim a. Tu lem hin chu thil poimaw bîk thaw dinga suok kan ni leiin thienghlim nawkzuol ngei an tih" a ta. 6 Chuongchun, thiempu chun hlânbei chu a pêk a; chu taka chun hlânbei, LALPA hmaa inthoka an lâk nia bei tharlâma an thlâk zie hlak ti chauh naw chu bei dang a um nawh. 7 Chun, chu ni chun Saula siehlaw laia mi pakhat, a hming Doeg, Edom mi, Saula beram enkoltuhai laia lu tak chu LALPA hmaa thil hlen ding a nei leiin chu taka chun a lo um ve a. 8 Davida chun Abimelek kuomah, "Fei amanih kawlhnâm amanih i kol naw maw? Lalin inhmaw thuta a mi tir a ni leiin ka kawlhnâm le hriemhrei dang ieng khom ka hung chawi hman naw a nih" a ta. 9 Thiempu chun, "Ela ruoma i that, Filistin mi Goliat kawlhnâm kha thiempu zakuo hnunga khan puona tuomin a um kha. Chu chu i lâk nuom chun la la, chu naw chu a dang a um nawh" a ta. Davida chun, "Chu bâk bâk chu iem, mi hung pe raw khai" a ta. 10 Davidan Saula chu a ti leiin chu ni lâ la chun Gath lal Akis kuomah a tlân a. 11 Akis siehlawhai chun, "Ama hi a ram lal Davida kha a va hoi de! 'Saulan a sânga sâng a that, Davidan a sînga sîng a that'tia làm puma a chungchang thu hlaa an sak dur dur kha a ni naw maw?" an ta. 12 Davida chun chuong thu chu a lungrilin a pai zing a, Gath lal Akis chu a tì ta hle a. 13 Chuongchun, an rênga hmaa chun a um dàn a sukdanglam a, invêt nungchang a'n sìr a, kotkhàrhai a thai tiel a, a khâkhmulah a zer huom a'n fartir duon duon a. 14 Akis chun a siehlawhai kuomah, "En ta u, invêt a nih ti hre zing sia ieng dinga ka kuomah in hung thuoi am a na? Mi invêt ka tlâksam leia ka hmaa a'n vètzie inentir dinga in hung thuoi a ni? Hi mi hi ka inah hung chuong lût hrep naw raw se" a ta. 15 (A um nawh)

1 Samuel 22

1 Davida chun Gath khuo chu a suoksan a, Adulam pûkah a fe a, chu taka chun a um ti a sûnghaiin an lo hriet chun zu kan dingin an fe thla a. 2 Mi beidong le leibat neihai le lungawi nawna neihai chu a bula chun an hung fuon khawm a, an hotuah a um a, mi zali lai hiel an hung tling ta a. 3 Chu taka inthok chun Davida chu Moab ram Mizpa-ah a fe a, Moab lal kuoma chun, "Pathienin thil a mi thawpêk ding ka hriet hma po chu ka nu le pahai hi i kuomah lo um raw hai se aw?" a ta. 4 Chuongchun Moab lal kuoma chun anni chu a mâksan a, kulbìnga Davida a um sûng po chu chu taka chun an lo um a. 5 Chun, thiempu Gad chun Davida kuomah, "Kulbìnga hin um zing loin Judai ramah fe rawh" a ta. Chuongchun, Davida chu a suok a, Heret ramngawah a lût a. 6 Saula chun Davida le a mihai chu an hmu suok tah ti thu a lo hriet a. Ama chu Gibea tlâng tamariske thing buk hnuoiah fei chawiin a thung a, a rawihai chun an ngîr huol a. 7 Saula chun an kuomah, "Nangni Benjamin mihai, ngaithla ro. Jesai naupain lo le grèp huonhai a pêk ding cheu a ni? Sipai sângkhat chunga kawmandar le zakhat chunga kawmandarin a sie tawl ding cheu am a ni? 8 Chu lei chu a ni, hienga ka chunga thil in phier rûk hi? Ka naupain Jesai naupa thu a thlungpui khom khan tu khomin in mi hril nawh. Tu khom a mi'n voi in um naw a, voisùna a thaw ang hin kei mi'n chàn rûk dinga ka naupain ka siehlaw a'n fui por thu khom tu khomin in mi hril bok nawh" a ta. 9 Saula bula ngîr Edom mi Doeg chun a lo don a, "Jesai naupa chu Nob khuoah Ahitub naupa Abimelek kuoma a hung ka hmu a. 10 Thiempu Abimelek chun LALPA a rawnpêk a, fâk ding a pêk bok a, Filistin mi Goliat kawlhnâm a pêk bok" a ta. 11 Chu phing leh lal chun Ahitub naupa thiempu Abimelek le a pa sûngkuo, Nob khuoa thiempu sinthaw po po chu a ko a, lal kuoma chun an rêngin an hung a. 12 Saula chun, "Ahitub naupa, tu hin ngaithla rawh" a ta. Ama chun, "Ni e, ka lalpa" a ta. 13 Saula chun, "Bei le kawlhnâm dâm pe a, LALPA dâm rawnpêk a, voisuna a thaw anga mi do ding le mi'n chàn rûk dinga ieng leia nang le Jesai naupa hin thu in phier rûk am a na?" a ta. 14 Abimelek chun lal kuomah, "Lal mâkpa, a vêngtuhai che chunga kaptena i sie, i sûngkuohai laia mi inzaum tak Davida anga i ta dinga ringum hi i siehlawhai po po lai hin tu am an um a? 15 Tuta tum chauh hi Pathien ka biek rawnpêk tanna a ni am a ni? Ni lo e! Lal chun i siehlaw amanih a pa sûngkuohai rèng rèng amanih mi'n tum naw raw se; i siehlaw hin nangni inkâr thu po po hi ieng khom ka hriet ve dèr nawh" a ta. 16 Nisienlakhom lal chun, "Abimelek, i thi ngei ngei ding a nih, nang le i pa sûngkuohai po po leh" a ta. 17 A bula ngîr vêngtu sipaihai kuoma chun, "Ngha kîr unla, hieng thiempuhai hin Davida an san a, a tlân hmang ti hre zing sia an mi hril naw leiin, that vong ro" tiin thu a pêk a. Amiruokchu, lal siehlawhai chun LALPA thiempuhai chunga chun kut an thlâk nuom nawh. 18 Chu phing leh lal chun Doeg chu thu a pêk a, "Ngha kîr la, hieng thiempuhai hi bei rawh" a ta. Edom mi Doeg chu a ngha kîr a, thiempuhai chu a bei a, thiempu zakuo hâk mi sawmriet le panga a that a. 19 Chun, thiempuhai khuo Nob chu kawlhnâmin a bei a, a nuhmei a pasalin, naupang le nene ne lai chenin, bawng le sabengtung le beramhai leh a sât hlum a. 20 Sienkhom Ahitub naupa Abimelek naupahai laia pakhat, a hming Abiathar chu a tlân suok hman a, Davida kuomah a tlân a. 21 Abiathar chun LALPA thiempuhai Saulan a that thu chu Davida a hril a. 22 Davida chun, "Kha nia Edom mi Deog lo um ve khan Saula a hril ngei ngei ding ti ka hriet sâ hrim a nih. I pa sûngkuohai po po chu keima leia thi an nih. 23 Nang chu ka kuomah um la, ti dêr naw rawh; nangma that tumtu che chun kei khom mi that a tum a nih. Ka kuomah i um chun him i tih" a ta.

1 Samuel 23

1 Chun, Davida kuomah, "Filistinhaiin Keila khuo an rûn a, an hrizawla buhai khom an lâkpèk vong a nih" tiin an hung hril a. 2 Davida chun Pathien a rawn a, "Inthok suokin Filistinhai chu ka zu bei ding am a ni?" tiin a'n don a. LALPA chun, "Filistin mihai chu zu bei la, Keila khuo chu zu san suok rawh" a ta. 3 Davida mihai ruok chun a kuomah, "Ngai ta, hienga Judai rama ei um hman hin ei ti a na, Keila khuoah zu fe a, Filistin sipaihai ei zu bei nawk lem lem chu a va tium nasa zuol awm de!" an ta. 4 Davida chun LALPA a rawn nawk a. LALPA chun, "Tho la, Keila-ah fe thla rawh, Filistin mihai chu i kutah pêng ka ti che" a ta. 5 Chuongchun, Davida le a mihai chu Keilaa chun an fe thla a, Filistin mihai chu an zu bei a, an ranhai an lâkpèk a, an that teu a. Chuong ang chun Keila khuoa mihai chu Davidan a humhim a nih. 6 Keila khuoa Davida kuoma Abimelek naupa Abiathar a hung tlân chun thiempu zakuo a hung chawi a. 7 Chun, Keila khuoah Davida a fe ti Saula an hril chun, "Pathienin ka kutah a pêk tah a ni chu; kul kotkhâr le a kalna nei khuoah lûtin Davida chun ama le ama a'n khum tâng an ta chu" a ta. 8 Chuongchun, Saula chun Keila khuoa Davida le a mihai inhuol dingin a sipaihai chu a ko khawm a. 9 Saulan a chunga thil tha lo thaw dingin a phan rûk ti Davidan a lo hriet chun thiempu Abiathar kuomah, "Thiempu zakuo kha hung la rawh" a ta. 10 Davida chun Pathien kuomah, " Aw LALPA, Israelhai Pathien, Saula chun keima leiin khuo sukse dingin Keila-ah hung a tum ti thu ka lo hriet a. 11 Keila khuoa mihai hin kei le ka mihai hi Saula kutah mi pêng an ti'm? I siehlawin ka lo hriet dàn angin Saula chu a hung ding am a ni? Aw LALPA, Israelhai Pathien, lunginsiet takin i siehlaw hi mi hril rawh" a ta. LALPA chun, "Hung a tih" a ta. 12 Davida chun, "Keila khuoa mihai hin kei le ka mihai hi Saula kutah mi pêng an tim?" a ta. LALPA chun, "Pêng an ti che" a ta. 13 Chuongchun, Davida le a mi zaruk vel chu an tho a, Keila khuoa inthokin an suok a, a remchangna tieng hmun hmunah an insaseng pei a. Keila khuoa inthokin Davida a tlân suok tah ti Saula an hril chun an inthok suok ding chu an thulh ta a. 14 Davida chu Zif thlalèr tlângrama kulbînga chun a um a. Ni tin tinin Saula chun Davida chu a zong a, sienkhom Pathienin a kutah a pêk nawh. 15 Zif thlalèra Hores hmuna a um laiin ama that tumin Saula a hung inthok ti Davidan a lo hriet a. 16 Chun, Saula naupa Jonathan chu Hores-a chun Davida kuomah a fe a, Pathiena innghat dingin a kut a sukhrâtpek a. 17 A kuomah, "Ti dêr naw rawh, ka pa Saulan i chungah kut thlâk naw nih. Israelhai chungah lalin um i ta, kei i dottu nîng ka tih. Ka pa Saula khomin chu chu a hriet vong a nih" a ta. 18 An pahni chun LALPA hmaah thu an thlung a. Chuongchun, Jonathan chu in tieng a kîr nawk a, Davida chu Hores-ah a um ta zing a. 19 Zif mihai chu Gibea um Saula kuoma chun an fe a, "Davida chu keini lai, Jesimon sim tieng Hakila muola Hores kulbìngah a'n bi zing a ni naw am a ni? 20 Chuleiin aw lalpa, i nuom hun hunah hung thla la, lalpa kuta ama pêk chu kan mawphurna ni raw se" an ta. 21 Saula chun, "In mi ngaituona leiin LALPAN malsawm cheu raw se. 22 Kîr nawk ta unla, a sulhnung le ama hung hmutuhai chu va dilsût zuol ro. Dawha nei taka che hlak a nih ti miin an mi hril a. 23 Inbîknaa a hmang hlak hmun po po sui suok unla, thu chieng tak leh ka kuomah hung nawk ro. Chu pha leh nangni ruolin hung ka ta, hi rama um hi a ni phot chun Juda mi sâng tam tak lai khom zong suok ka tih" a ta. 24 Chuongchun, anni chu an suok a, Saula inthok suok hmain Zif tieng an kîr nawk a, sienkhom Davida le a mihai chu Jesimon sim tieng Arabaa Maon thlalèra chun an lo inson ta a. 25 Saula le a mihai chu Davida zong suok dingin an inthok a, chu chu Davida an hril a, Maon thlalèra lungpui bèl dingin a fe thlâk a. Saulan a lo hriet chun Maon thlalèra chun Davida chu a hnot a. 26 Saula chu tlâng pang khing tieng chun a fe a, Davida le a mihai chu tlâng let liem tieng an fe a. Saula tiin Davida chu inhmaw takin a tlân a; Saula le a mihai hlak chun Davida le a mihai chu man tumin an inhuol vel a. 27 Chuong lai tak chun Saula kuomah zuolko a hung a, "Inhmaw takin hung rawh, Filistin mihaiin ei ram an hung bei a nih" tiin a hung ko a. 28 Saula'n Davida a hnot lai chu a kîrsan a, Filistin mihai bei ding chun a fe ta lem a. Chuleiin, hi hmun hi Sela Hamalekot tiin an ko tah a nih. 29 Chu taka inthok chun Davida chu a fe tung a, Engedi kulbìnga chun a'n bi a.

1 Samuel 24

1 Filistin mihai a va hnot zàm hnunga Saula a hung kîr chun, "Davida chu Engedi thlalèrah a um" tiin an hril a. 2 Saula chun Israelhai po po laia mi sângthum a thlang suokhai chu thuoiin, sakèlhai tlatna ram lungkawhrot hmun tieng chun Davida zong dingin a'n thok suok a. 3 Lampuia chun beram riek khawmna pûk pakhat hi a va tlung a, Saula chu inthier dingin a va lût a. Davida le a mihai chu pûk ril tieng chun an um a. 4 Mihai chun, "Voisun ni hi a nih LALPAN i kuoma, 'I nuom ang anga i law dingin i hmèlma chu i kutah pêng ka ti che' tia a hril che kha" an ta. Chuongchun Davida chu a tho a, a rûkin Saula silpuon hmor chu a va ât thlàk a. 5 A hnunga chun Saula silpuon hmor a at thlàk chu a lungrilin an thiem naw hle a. 6 A mihai kuoma chun, "LALPA hriek nâl, ka lalpa chunga hieng ang thil ka thaw amani le a chunga kut ka thlâk chu LALPAN mi phalpêk naw hram raw se, ama chu LALPA hriek nâl ta sa a ni tlat si a" a ta. 7 Chuong ang thu chu hrilin Davida chun a mihai chu a zil a, Saula an bei chu a khap a. Chuongchun, Saula chun pûk chu a suoksan a, a fe ta a. 8 Davida khom pûka inthok chun a hung suok a, "Ka pu, ka lalpa" tiin Saula chu a ko zui a. Saula a hang ngha kîr a, Davida chun hnuoi sikin chibai a bûk a. 9 Davida chun Saula kuomah, "Ngai ta, 'Davida chun i sietna a zong a nih' tia mihaiin i kuoma an hril chu ieng dinga i awi hlak am a na? 10 Ngai ta, voisun hin hi pûka hin LALPAN ka kutah a'n hlànzie che i mit ngeiin i hmu a; thenkhat chun sukhlum ding chein an mi ti a, sienkhom kei chun, 'Ka lalpa chungah kut thlâk naw ning, LALPA hriek nâl a ni leiin' ka ta, i hringna ka hla a. 11 Chu chau chu a ni nawh. Pa, en ta, i silpuon hmawr hlek khom ka chawi zing hi. I silpuon hmawr at thla thei sia ka that naw chea inthok khan ka kuta hin thil tha naw le bawsietna a um nawh ti le nangin ka hringna lâk tumin mi zong mi zong la khom, i chungah ka suol ve nawh ti hre ngei ngei raw khai. 12 Nang le ei inkâr thu hi LALPAN rêl sien la, LALPA chun ka poi i tawkna chunga phuba chu mi la pêk sien la, kei chun i chungah kut thlâk naw hrim hrim ka tih. 13 Tienlai thuvar chun, 'Misuola inthokin thil suol a suok hlak' a lo ti a, chuleiin i chungah kut thlâk naw ning. 14 Israel lal chu tu zong dinga inthok suok am a na? Tu am a na i hnot thlûr hi? Ui thi hnung maw? Ui hrik maw? 15 Eini inkâra rorêltu chu LALPA ni raw se. Ka chungthu hi ngaituoin thiem mi'n chang sien, i kuta inthok hin mi san suok raw se" a ta. 16 Davidan a hril zo chun Saulan, "Ka naupa Davida, chu chu i rawl ngei chu a ni maw?" a ta, inring takin a tap a. 17 Saula bok chun, "Keima nêk daiin i fel lem. Nang chun tha takin i mi thaw a, kei ruok chun tha lo takin ka thaw che a nih. 18 Voisun i kutah keima hi LALPAN pe zing si chea i mi sukhlum nawa inthok hin ka chunga i thatzie i suklang a nih. 19 Miin a hmèlma hmu sien la, him rongin a'n suo ding maw? Voisuna i mi thaw thatna chungah LALPAN thil thain rul che raw se. 20 Ngai ta, lal i la hung ni ngei dingzie le Israel lalram khom i kut hnuoiah suknghet a ni dingzie ka hriet. 21 Chuleiin, ka thlahai le ka pa sûngkuoa inthoka ka hming sukbo lo dingin LALPA hmingin ka kuomah inkhâm meuin thu intiemkam rawh" a ta. 22 Chuongchun, Davida chun Saula kuomah thu a'n tiemkam a. Saula chu a in tieng a kîr a, Davida le a mihai chu kulbìnga chun an kai a.

1 Samuel 25

1 Samuel chu a thi a, Israel mihai po po chu an pung khawm a, an sùn a, a umna Rama khuoa chun an phûm a. Chu zoah Davida chu Maonf thlalèr tieng a'n son thla a. 2 Maon khuoa chun mi hausa pakhat a um a, a'n bèngbelna tak chu Karmel tlâng a na, chu taka chun beram sângthum le kel sâng khat a vai a, a beram hmul vawin Karmel tlângah a um a. 3 A hming chu Nabal a na, a nuhmei hming chu Abigail a nih. Nu var tak le hmel tha tak a na, a pasal ruok chu pa biek intak le tikkom, Kaleb thlaa mi a nih. 4 Thlalèra Davida a um lai chun Nabal chu Karmel tlângah a beram hmul vawin a fe ti a hriet a. 5 Chuongchun tlângvàl sawm a tir a, an kuomah, "Karmel tlânga khin Nabal kuomah hang fe unla, ka hmingin chibai hang bûk ro. 6 Chun, a kuomah, 'I chunga le i sûnghai chunga le i nei po po chungah dam sawtna le thlamuongna tlung raw se. 7 Beram hmul vawin hi taka hin i um ti Davidan a hriet a, i beram vêngtuhai hi kan kuoma khawsa hlak an nizie dâm, an poi ieng khom kan tawk ngai nawzie dâm le Karmel tlânga an um sùngin thil ieng khom an inhmang ngai nawzie dâm lo hre ve la ti a nuom a. 8 Chu chu i beram vêngtuhai indon la, anni ngeiin hril an ti che. Hi, ruoi the ni takin kan hung tlung a, kan tlangvàlhai hi lo ditsak la, i nei ang ang chu i siehlawhai le i naupa Davida lo pe ve rawh tiin a mi'n cha a nih' tiin hril ro" a ta. 9 Davida rawihai an tlung chun Davida hmingin a thucha chu Nabal kuomah an hril a, a donna chu an nghâk a. 10 Iemani chen hnunga chun Davida rawihai kuoma chun Nabalin, "Tu'm a na Davida chu? Jesai naupa chu tu am a na? Tu lai hin an puhai tlân hmangsan siehlaw an tam khop el. 11 Ka beihai, ka tuihai le ka beram hmul vawtuhai ta dinga ran ka that sa chu tu am an nih ti khom hriet lohai kuomah ka pêk lul ding maw?" a ta. 12 Tlangvàlhai chu an kîr nawk a, chuong thu po po chu Davida an hril a. 13 Davida chun a mihai kuomah, "In kawlhnâm pai seng ro" a ta, an pai a, Davida khomin a pai a, mi zali laiin Davida chu an zui tung a, mi zahni chu thuomhnaw vêng dingin an sie a. 14 Nabal siehlaw laia pakhat chun Nabal nuhmei Abigail kuomah, "Thlalèra inthokin chibai bûk dingin Davidan ka pu kuomah mi a hung tir a, sienkhom ka puin a lo ràu tawl a. 15 Nisienlakhom, hieng mihai hi kan chungah an tha êm êm a, phûla kan um tlàng sùng po poin kan poi an tawk ngai naw a, kan thil ieng khom a'n hmang ngai bok nawh. 16 Anni bula beram kan vêng sûng po poin sûn le zânin kan ta dinga kulpui an ni ringot a nih. 17 Tu hin ka pu le a sûngkuohai chunga sietna hung tlung ding hi dawn la, iem i thaw thei in ngaituo rawh. Ama hlak hi tu khom biek thei lo khopa mi rilo a ni si a" a ta. 18 Abigail chun inhmaw takin bei tlang zahnih, uoiin pêng pahnih, fâk el theia inpei sa diem beram pum nga, bu em tang kilogram sawm le pasari, grèp em tawl bawr zakhat le theichang em tawl phêk zahni chu a lâk khawm a, sabengtung a'n phurtir a. 19 Siehlaw tlangvàl kuoma chun, "Ka hmaah fe pei unla, hung zui ka ti cheu" a ta, sienkhom a pasal Nabal ruok chu a hril nawh. 20 A sabengtungah chuonga tlâng kâr leisekot a hraw lai chun Davida le a mihai chun an hung pan thlàk a, an intuok ta a. 21 Davida chun, "Ieng khom a'n hmang nawna dingin hi pa thil nei po po hi a thlawn mei meiin ka lo vêngpèk a ni takluo ngei hi tie! Thil tha chu thil tha loin a mi thungrul ta si a. 22 Zîngah zîngkàr chena a ta po po laia mi pasal naupang pakhat té khom ka hlá vai chun Pathienin Davida hi a nuom ang angin law sien la, chu nêka nasa khomin thaw raw se" a lo ti zo hlim hlol a nih. 23 Abigailin Davida a hmu chun a sabengtunga inthokin inrang takin a tum a, bawka hnuoi sikin chibai a bûk a. 24 Chun, a ke bula chun a bokkhup a, "Ka lalpa, keima ngèiin thiem naw arbawm chu phur el ka tih. I siehlaw hin thu a hril ding phalpêk la, i siehlawnu thu hril hi lo ngaithlapêk hrâm rawh. 25 Ka lalpa hin mi rilo Nabal thu chu ienga khom ngai naw hram raw se, ama chu a hming ang char put zo, mi Invêt a na, thil invêtthlak a thaw hlak hrim a nih. Kei i siehlawnu hin ka pu hung tirh tlangvàlhai chu ka lo hmu ve naw lei a nih. 26 Thisen insuo lo ding le i kuta phuba la lo dinga siemtu che chu LALPA a nih. Tu hin LALPA hringna le i hringna sâlin ka hril, i hmèlmahai le i that nawna ding zongtuhai po po chu Nabal anga hrem ni raw hai se. 27 Pu, i ta dinga i siehlawin thilpêk a hung chawi hi nangma hung zuitu tlangvàlhai kuomah pêk ni raw se. 28 I siehlawnu hin thaw suol a nei a ni chun lunginsiet takin ngaidam rawh. LALPA indona chu i bei leiin ama chun i lalna chu suknghet a ta, i dam sùngin i chungah thil tha lo hrim hrim a tlung hmu naw ti nih. 29 I hringna lâk tuma hnottu che um hai sienkhom, miin a rohlu a vêng him tlat angin LALPA i Pathien chun ka pu hringna chu vêng himpêk a tih. I hmèlmahai ruok chu miin saihlia saihlum a per hmang angin per hmang a tih. 30 LALPA chun a tiem anga i chunga thil tha po po intlungtir a, Israelhai lala a siem pha che chun, 31 ka pu hin a san um loa thisen insuo lo a, phuba i lâk bok naw lei hin lungrila poitina le insîrnain hnot zui naw ni che. LALPAN ka pu chunga thil tha a thaw pha chun i siehlawnu hi hung hre zing rawh aw" a ta. 32 Davida chun Abigail kuomah, "Voisuna mi hmuok dinga tirtu che LALPA, Israelhai Pathien chu inpâkin um raw se. 33 Phuba la a, mi ka that ding voisuna mi'n pumpeltirtu i remhrietna chu malsawmin um bok raw se. 34 I chunga kut ka thlâk ding vêngtu chu LALPA a nih. Nangin mi lo hmuok vat naw la chu, LALPA Israelhai Pathien hringna sâlin ka hril, zînga khawvar chen hin Nabal mihai chu naupang pakhat te khom hla nei naw top ka tih" a ta. 35 Chuongchun, Davida chun a thil hung chawipêkhai chu a lâk a, "Thlamuong takin i in tieng kîr nawk ta rawh. I thu ka ngaithlàk a, i hnina khom ka pompêk ta che" a ta. 36 Abigail chu Nabal kuomah a hang fe a, a ina chun lal ruoi the ang elin ruoi a lo the a, an rui leiin a hlim hle a, chuleiin zîng khawvar hma chun ieng khom a hril nawh. 37 Zîngkàra Nabal uoiin inrui a hung har chun a nuhmeiin thil chinchang chu a hril a, a lung an chek dar a, a pumin a zeng ta vong a. 38 Ni sawm vel hnunga chun LALPAN Nabal chungah kut a thlâk a, a thi ta a. 39 Davidan Nabal thi thu a hriet chun, "Nabalin hmusit taka a mi thawna laka phuba mi lapêk a, a siehlawin thil tha lo a thaw ding laka cheltu LALPA chu inpâkin um raw se. Nabal thil tha naw thaw chu ama lu chunga ngei LALPAN a'n tlâktir a ni chuh" a ta. Chun, Abigail chu a nuhmei dinga va be dingin Davida chun mi a tir a. 40 Davida siehlawhaiin Karmel tlânga Abigail kuom an tlung chun, "Davidan a nuhmei dinga thuoi ding chein a mi tir a nih" tiin ama chu an va biek a. 41 Ama chu a tho a, a bawka hnuoi sikin chibai a bûk a, "In siehlawnu hi in rong bawl ding le ka pu ke sawp dinga siehlaw ka ni ie" a ta. 42 Abigail chu a tho vat a, sabengtung chungah a chuong a, a hnung zuitu nunghâk pangahai le chun Davida mi hung tirhai chu a zui a, Davida nuhmeiah a um ta a. 43 Davida chun Jezrel-a mi Ahinaomi chu a lo nei ta bok a, a nuhmeiah an um ve ve ta a. 44 Saula naunu Mikal, Davida nuhmei ruok chu a pain Galim khuoa mi Laisa naupa Palti a lo inneitir tah hrim a nih.

1 Samuel 26

1 Zif mihai chu Saula umna Gibea-ah an fe a, "Davida chu Jesimon epa Havila muolah a'n bi a ni naw am a ni?" an ta. 2 Chuongchun, Saula chun a mi thlang thieu sângthum thuoiin Davida zong dingin Zif thlalèra chun a fe thlâk a 3 Saula chun Jesimon ep Havila muola lampui sîra chun thanghmun a khuor a, Davida ruok chu thlalèrah a'n kul thung a. 4 Ama zongin Saula a hung ti Davidan a hriet chun enthlatu mi a tir a, a hung tak tak ti an hriet chieng ta a. 5 Chuongchun, Davida chu a tho a, Saula thanghmun khuornaa chun a fe a. Saula le a sipai kawmandar Nera naupa Abner zâlna chu a hmu a, Saula chu an riebûk sûnga chun a zâl a, a vèlin sipaiin an inhuol a. 6 Davida chun Hit mi Abimelek le Zeruia naupa Abisai, Joab unaupa kuoma chun, "Saula umna riebûka zu fe dingin a tu lemin am in mi zui ding?" a ta. Abisai chun, "Keiin zui ka ti che" a ta. 7 Zâna chun Davida le Abisai chu sipaihai riebûka chun an zu fe a, Saula chu riebûk sùngrila chun a lo zâl a, a lu thluon tieng chun a fei chu hnuoiah a sun bûr a. Abner le a mihai chu a vela chun ama inhuol tuokin an zâl bok a. 8 Abisai chun Davida kuomah, "Voisun hin Pathienin i hmèlma chu i kutah a pêk che a ni hi. Chuleiin, fei hin hnuoi leh hang sun dèng ka ti aw, voi hni ka sun ngai naw nih" a ta. 9 Davida chun Abisai kuomah, " That naw rawh. LALPA hriek nâl chunga kut thlâk tu am thiem chang an um hlak a? 10 LALPA hringna sâlin ka hril hi, LALPA chun a chungah kut thlâk a tih, a thlâk naw khoma a thi ni la hung tlung el a tih. Chu chu a ni naw le khom indonaah fêng a ta, la thi el a tih. 11 LALPA hriek nâl chunga kut thlâk chu LALPAN mi phal lul naw raw se. A lu thluona fei le tuiûm kha chu la la, fesan ei tih" a ta. 12 Saula lu thluona a fei le a tuium chu Davida chun a lâk a, an fesan a. LALPAN imu inhnik taka a'n intir tawl leiin tu khomin an hmu naw a, tu khom an thang har bok nawh. 13 Davida chu râl khing tieng a kai a, tlâng sîpah a ngîr a, an inkàr chu hla rei a ni tah. 14 Chu taka inthok chun sipaihai le Nera naupa Abner chu a ko khêk a, "Abner, i mi hung don naw ding am a ni?" a ta. Abner chun, "Tu am i na lal hang ko tho ngam hrim hrim chu?" a ta. 15 Davida chun Abner kuomah, "Pasal i ni naw maw? I ni tak tak naw am a ni? Israelhai lai hin nangma ang tu am an um a? Iengtiziea i pu i vêng tha naw am a na? Lal, i pu chu that dingin tuhai amanih an hung kha. 16 I thaw indik naw top a nih. LALPA hringna sâlin ka hril hi, LALPA hriek nâl i pu i vêng tha naw leiin nang le i sipaihai kha thi tlâk in nih. Hang ngha vel la, lal lu thluona fei le a tuiûm kha khaw lai am an um ta a?" a ta. 17 Saula chun Davida rawl a nih ti a hriet a, "David, ka naupa, chu chu i rawl ngei an naw maw?" a ta. Davida chun, "Aw lal le ka pu, ka rawl ni e. 18 Iengtiziea ka pu hin a siehlaw hi a hnot thlûr am a na? Ieng thil am ka thaw suol a, thiem naw changna ding ieng poi am ka tawk rêng rèng a? 19 Tu hin ka lalpa, ka pu hin a siehlaw thu hi ngaithla raw se. Mi do dinga i lungril chokthotu chu LALPA a ni chun thilhlân chu pom hràm sien la, mihriem nauhai an ni ruok chun LALPA hmaah tongsie phurin um raw hai se. 'Fe la, pathien danghai rong va bawl rawh' tiin, LALPA rochung rama ka chanvo hluo ve thei lo dingin an mi hnot suok a ni hi. 20 Tu hin LALPA um nawna ram leilung hla taka hin ka thisen infartir lul naw ro. Tlânga varung pèl dinga mi a ramsuok ang elin, Israel lal meu uihrik zong dingin a'n thok suok a ni hi" a ta. 21 Saula chun, "Thil suol ka lo thaw a nih. Ka naupa David, hung kîr rawh. Voisun hin ka hringna chu i hlutsak leiin i sietna ding ieng khom thaw tum ta naw ning. Invêt angin ka lo khawsa chieng khop el, nasa takin ka thaw suol a nih" a ta. 22 Davida chun, "Hi, lal fei chu ka kol hi, in tlangvàl laia pakhatin hung la raw se. 23 LALPA chun mi tin an fel le an ringum man a pêk hlak a. LALPA chun ka kutah voisun hin a'n hlan che a, sienkhom LALPA hriek nâl chungah kei chun kut thlâk naw ning. 24 Voisuna i hringna ka ngaihlut ang bok hin LALPAN ka hringna ngaihlu sien, buoina po po lakah mi san suok raw se" a ta. 25 Saula chun Davida kuomah, "Ka naupa David, malsawmin um raw khai; thil ropui tak tak la thawng i ta, hnèna chu chang ngei i tih" a ta. Chuongchun, Davida chu a fe a, Saula khom a in tieng a kîr nawk ta a.

1 Samuel 27

1 Davida chun a lungrilin, "Ieng ni amani chu Saula kuta hin ka la thi ngei awm hi. Ka ta dinga thaw ding tha tak chu Filistinhai rama tlân lût a nih. Chu chun, Israel ram po poa Saulan a mi zong hi tawpsan a ta, a kuta inthokin suok thei ka tih" tiin a'n ngaituo a. 2 Chuongchun, a mi zaruk thuoiin Davida chu Maok naupa Akis, Gath lal kuoma chun a fe a. 3 Davida le a mihai chu Gath-a chun Akis kuomah an khawsa a. Mi tinin an sûngkuohai an thuoi a, Davida khomin a nuhmeihai pahni, Jezrel-a mi Ahinoam le Karmela mi Abigail, Nabal nuhmei thisan chu a thuoi a. 4 Gath khuoah Davida a tlân ti Saulan a hriet chun a zong nawk ta naw a. 5 Davida chun Akis kuomah, "I mit ka tlung a ni chun, i rama khaw pakhata hin ka umna ding mi ruotpêk la, chu taka chun um kan tih. I siehlaw hi ieng dingin am lal khuoah i kuomah a um zing ding a na?" a ta. 6 Lal Akis chun chu ni lâ là chun Ziklag khuo a pêk a, chuleiin voisun chen hin Ziklag chu Judai ram lalhai ta a la ni ta zing a nih. 7 Davida chu Filistinhai rama chun kum khat le thla li a um a. 8 Chun, Davida le a mihai chun Gesur mi hai, Girzi mi hai le Amalek mi hai chu an hang rùn a; chuong hnamhai chu Sur panna lampuia Telam chen le Aigupta ram chena inzâr an nih. 9 Davidan a rûnna hmuna hrim hrim chun a nuhmei a pasalin tu khom a dama hla a nei naw a, an beram le bawnghai, an sabengtung le sanghawngseihai le an silfênhai ruok chu a lâk a, Akis kuomah a kîr nawk hlak a. 10 Akis chun, "Voisun khaw tieng am i rùn a?" a ta. Davida chun, "Sim tienga um Judai ram dâm, Jerahmeel-hai ram dâm le Ken mihai ram dâm" a ta. 11 "Hieng ang hin Davida chun a thaw hlak hrim a nih" titu ding an um pal nawna ding tiin Davida chun tu khom dama hlà a nei naw hlak hrim a nih. Filistinhai rama a um sûng po po chun chuong ang chu a thaw dàn a nih. 12 Akis chun Davida hril chu awiin, "A mihai theida a phur nasa ta êm leiin kumkhuoin ka siehlawah a um ding a ni hi" a ti lungril a.

1 Samuel 28

1 Chuong lai chun Filistinhai chun Israelhai do dingin an sipaihai an khawm a. Akis chun Davida kuomah, "Nang le i mihai hi ka kuomah in hung ve ngei ding a nih ti hre ro" a ta. 2 Davida chun, "Ni e, chu pha chun nang ngeiin i siehlaw hin iem a thaw thei ti hrieng i tih" a ta. Akis chun, "A tha chu, mi vêngtuah sie kumkhuong ka ti che" a ta. 3 Samuel chu a thi ta a, Israel mi po poin an sûn a, ama khuo Rama-ah an vui a. Saula chun rau inzawlpui neihai le aienthiemhai chu a rama inthokin a hnot suok vong ta a. 4 Filistin mihai chu an pung khawm a, Sunema chun an hung a, an inkul a, Saula chun Israelhai po po chu a khawm a Gilboa chun an inkul ve a. 5 Saulan Filistin sipaihai a hmu chun a ti hle a, a lungril chu thlabarnain a sip a. 6 Saula chun LALPA a rawn a, sienkhom mang amani, Urim amani le zawlnei amani hmangin donna hrim hrim a hmu nawh. 7 Chuongchun a siehlawhai kuomah, "A kuomah fea ka rawn ding aienthiem nuhmei mi zongpêk ro" a ta. A siehlawhai chun, "Endor khuoah nuhmei aienthiem a um" an ta. 8 Chuongchun, Saula chu silfèn dang inbelin a'n siem danglam a, mi dang pahnih thuoiin nuhmei kuoma chun a fe a, "A hming ka hril taphot rau chu mi kopêk rawh" a ta. 9 Sienkhom nuhmei chun, "Ngai ta, Saula thilthaw i hriet a, a rama inthokin aienthiem le dawithiemhai a sukbo vong ta a. Ka thina dingin ieng dinga chang i kam am a na?" a ta. 10 Saula chun LALPA hming sâlin, "LALPA hringna sâlin ka hril, hi thil lei hin i chungah hremna tlung naw nih" a ta, a kuomah inkhâmin thu a tiem a. 11 Chu phing leh nuhmei chun, "Tu am kopêk lang che i nuom a?" a ta, ama chun "Samuel mi ko pêk rawh" a ta. 12 Nuhmeiin Samuel a hmu chun a khêk rak a, Saula kuoma chun, "Ieng dinga i mi hlem? Saula i ni zing si a" a ta. 13 Lal chun a kuomah, "Ti dêr naw rawh. Iem i hmu a?" a ta. Nuhmei chun, "Hnuoia inthoka thlarau hung suok ka hmuh" a ta. 14 Saula chun, "Ieng ang hmèl am a put a?" a ta, nuhmei chun, "Putar tak hi a hung suok a, korfuol a hâk" a ta. Saula chun Samuel a nih ti a hriet nghal a, hmaia hnuoi sikin chibai a bûk a. 15 Samuel chun Saula kuomah, "Ieng leia hienga ko suoka i mi sukbuoi am a na?" a ta. Saula chun, "Ka bei a dong êma a nih. Filistinhaiin an mi hung do a, Pathien hlakin a mi nghatsan ta bok si a. Zawlnei amanih mang amanih hmang khoma a mi don ta naw hrim hrim. Chuleiin, ka thaw ding indon ding chein ka ko el che a nih" a ta. 16 Samuel chun, "Chuonga LALPAN a nghatsan ta che a, i hmèlma a lo ni tah ti hre zing siin ieng leia thu i min don am a na? 17 Keima hmanga a hril che ang khan LALPA chun i chungah a thaw a ni ta chu. LALPA chun i kuta inthokin ram chu a lâkpêk ta che a, i tuolbawm Davida ngei chu a pêk tah a nih. 18 LALPA thu i awi naw a, Amalek mihai chunga nasa taka a lungsenna chu i hlenpêk naw leiin tu hin i chungah hieng hin a thaw an ta hi. 19 Chu naw khom chu, LALPAN nangma le Israelhai po po chu Filistinhai kutah pêng a ta, zînga hin nang le i naupa leh ka kuomah hung um tâng in tih. LALPA chun Israel sipai khom Filistinhai kutah pêng a tih" a ta. 20 Samuel thu hril lei chun Saula chu a ti ta êm êm a, hnuoiah a tlu let dêr a, sûnnithlak le zânkhawvàra bu fa ta lo a ni bok a, tha le zung hrim a nei nawh. 21 Nuhmei chu Saula kuomah a hung a, nasa taka lungngaiin a hmu a, a kuomah, "Ngai ta, i siehlawnu hin i thu ka awi a, ka hringna chàn huomin thaw dinga i mi hril chu ka thaw a. 22 Lunginsiet takin i siehlawnu thu hi awi ve thung la, bu tlawmte bèk siempêk ka ti che a, i fe phaa thahrui i nei theina dingin fa hrâm rawh" a ta. 23 Sienkhom a nuom naw a, "Fa naw ning" a ti tlat a. A mi thuoihai le nuhmei chun an ngên tlat leiin an thu chu a awi ta a. Chuongchun, hnuoia inthok chun a hung tho a, khuma chun a'n thung a. 24 Nuhmei chun bawng tuoi thau tak a nei a, inrang takin a va that a, beiphit a lâk a, a hmet a, chol thang lo bei a siem a, 25 Saula le a siehlawhai hmaa chun a sie a, an fâk ta a. Chuongchun an tho a, chu zân chun an fe ta a.

1 Samuel 29

1 Filistinhai chun an sipaihai po po chu Afek-ah an ko khawm a, Israelhai chun Jezrel-a tuikhur bulah thanghmun an khaw a. 2 Filistin lalhai chun an rawihai a za ruol le a sâng têl tèla an the darhai chu somin an fe zut zut a, Davida le a mihai chu Akis leh a hnung dâlah an thang a. 3 Filistin kawmandarhai chun, "Hieng Hebrai mihai hin iem a na an hung thaw ve?" an ta. Akis chun, "Hi hi Davida, Israel lal Saula hnuoia ofisar a ni naw am a ni? Saula mâksana ka kuoma a hung tlûk lût nia inthoka voisun ni chen hin, kum khat nêka tam rau ka kuomah a um ta a, a tlâk nawna hrim hrim ka la hmu nawh" a ta. 4 Sienkhom Filistin lalhai chu a chungah an lung a sen a, "Chu pa chu i hmun ruotpêka khan inkîrtir rawh, indonaa chu ei kuomah hung naw raw se, indonaah ei hmèlma tieng thang pal hlau rawi a tih. Eini mihai lu lâng a ta, a pu leh inrem nawk hlauh sing an ta. 5 Hi Davida hi a ni naw maw, làm pum a, Saulan a sânga sâng a that, Davidan a sînga sîng a that"tia a chungchang thu hlaa an sak hlak kha?" an ta. 6 Akis chun David chu a ko a, "LALPA hringna sâlin ka hril, mi ringum i ni a, ka sipaia thang dingin ka dit êm êm che a. Ka kuoma i hung nia inthoka voisun ni chen hin i tlâk nawna hrim hrim ka la hmu naw a, sienkhom lalhaiin an pom tlat naw che a nih. 7 Chuleiin, Filistinhai lalhai suklungninaw nêkin lungawi takin kîr lem el rawh" a ta. 8 Davida chun, "An leh iem a na ka thaw suol chu? Ka hung nia inthoka voisun chen hin i siehlaw laka hin thil indik lo i hmu hrim hrim am a ni? Ieng leiin am ka pu, lal hmèlma do dingin ka fe ve thei naw ding?" a ta. 9 Akis chun, "Ka mita chu Pathien vântirko angin i tha a, amiruokchu Filistin kawmandarhaiin, 'Indonaa chu eini lai hung thei naw nih' an ti tlat a nih. 10 Chuleiin, i kuoma hung ve, i pu siehlawhai le hin zîngkàr inhma takin tho unla, khuo a var hlimin kîr nawk ro" a ta. 11 Chuongchun, Davida le a mihai chu Filistin rama kîr nawk dingin zîng inhma takin an tho a, Filistinhai chun Jezrel an pan tung a.

1 Samuel 30

1 Ni thum hnunga Davida le a mihaiin Ziklag an tlung chun Amalekhaiin Negev le Ziklag khuo chu an lo rûn dèr ta a, an raw a, 2 nuhmeihai le chu khuoa um taphot chu a chîn a lienin salah an man a, tu khom that loin an thuoi vong a. 3 Davida le a mihaiin an umna khuo an va tlung chun a lo kâng fai ta a, an nuhmeihai le an naupahai le naunuhai chu salah an lo man fai vong a. 4 Davida le a mihai chu inring takin, chaua an rawl a suok thei naw hiel chenin, an tap a. 5 Davida nuhmei pahnih, Jezrel-a mi Ahinoam le Karmela Nabal nuhmei thisan Abigail-hai khom chu an thuoi a. 6 A mihai chun lunga dêng hiel an nuom el leiin Davida chu a beidong hle a, mi tin chu an naupahai le naunuhai lei chun an lung a na hle si a. Davida ruok chu LALPA a Pathienah a'n sukhrât a. 7 Davida chun Abimelek naupa thiempu Abiathar kuomah, "Thiempu zakuo Efod kha hung la raw khai" a ta, Abiathar chun a hung lâk a. 8 Davida chun "Mi hung rùntuhai hi hnot lang hnot phâk ka tim?" tiin LALPA chu a'n don a. LALPA chun, "Hnot rawh, hnot phâk ngei ngei i ta, san suok tawl ngei ngei bok i tih" a ta. 9 Chuongchun, Davida le mi zarukhai chun an hnot a, Besor Ruom inthûk an tlung chun a then an mâksan a. 10 Mi zahni pawl chu an chau ta êm leiin Besor Ruom chu an kàn pei ta naw a, sienkhom Davida le mi zali chun an hnot ta ngar ngar a. 11 Phûla hin Aigupta mi an hmu a, David kuomah an hung thuoi a, fâk ding bei le dawn ding tui an pêk a, 12 theichang tawl fûn khat le grèp em tawl bawr hnih an pêk bok a, chuonghai a hang fâk chun a hung har nawk a, ni thum le zân thum bu fa ta lo le tui dawn ta lo a ni si a. 13 Davida chun a kuomah, "Tu am i na? Khaw laia inthoka hung am i na?" tiin an don a. Ama chun, "Aigupta tlangvàl, Amalek siehlaw ka nih. Ni thum a ni ta a, ka damnaw leiin ka puin a mi mâksan el a nih. 14 Kereth sim tieng le Judahai chan sim tieng kan rûn a, Kaleb sim tieng kan rûn bok a, Ziklag khuo khom kan raw" a ta. 15 Davida chun, "Chuonghai umnaa chun mi thuoi thei i tim?" a ta. Ama chun, "Mi that lo ding le ka pu kuta mi pe kîr nawk lo dingin Pathien hming sâlin ka kuomah thu intiemkam phot la, chuonghai umnaa chun thuoi ka ti che" a ta. 16 A zuk thuoi tlung chun, ngai ta, Filistin ram le Judai rama inthoka râllâk tam tak an hawn leiin ruoi an lo the mup mup a, an lo um dar nuoi el a. 17 Davida chun thimbuta inthoka a zîng zân tieng chenin a bei ngat ngat a, sanghawngsei chunga chuong tlangval zali tlân suokhai ti naw chu a that fai vong a. 18 Amalekhai râllâk po po chu a lâk kîr nawk a, a nuhmei pahnihai chu a san suok bok a. 19 Chuongchun, a chîn a lien, an naupahai le an naunuhai, an râllâkhai le an thil lâkhai po po chu kim takin Davida chun a hung hawn kîr nawk vong a. 20 Davida chun beram ruol le an ran ruol po po chu a lâk a, a rawihai chu a'n somtir a, "Hienghai hi Davida râllâk a nih" tiin an insam pei a. 21 An chàu leia mi zahni a mâksanna Besor Ruom an tlung chun ama le a fepuihai hmuok dingin an hung suok a, Davidan a chibai tawl a. 22 Sienkhom Davida zuituhai laia mi suolhai le buoina siem chinghai po chun, "An hung ve si naw leiin râllâk ei va lâk kîrhai hi an chang ve ding a ni nawh. Amiruokchu, mi tinin an nuhmei le nauhai seng ruok chu an thuoi phalpêk ei tih" an ta. 23 Davida chun an kuomah, "Unauhai, LALPAN a mi pêk thilhai chu chuong ang chun in thaw ding a ni nawh. Ama chun mi humin, mi dotuhai chu ei kutah a pêk a. 24 Hi thila hin tuin am in thu chu a pom ding? Indonaa zu fehai chan ang tho chu thuomhnaw vêngtuhai khomin inang sengin an chang ve ding annawm" a ta. 25 Chu nia inthok chun tu chen hin Israelhai ta dinga thupêk le dânah an hmang tah a nih. 26 Davidan Ziklag a hung tlung chun râllâk thenkhat chu a ruolhai, Juda upahai kuoma chun, "Hi, LALPA hmèlmahai laka râllâk thilpêk chu kan hung hlè ve cheu a nih" tiin a thon tawl a. 27 Chu thilpêk lo dongtuhai chu Bethel-a um hai, Ramot sim tienga um hai, Jatira-a um hai, 28 Aroer-a um hai, Sifmot-a um hai, Estemo-a um hai, 29 Rakala um hai, Jehramel mi hai Ken mi hai, 30 Horma-a um hai, Bor Asan-a um hai, Athaka um hai, 31 Hebron-a umhai le Davida le a mihai chettlatna hlak hmun po poa umhai an nih.

1 Samuel 31

1 Filistinhai chun Israelhai chu an bei a, Israelhai chu an tlânsie a, Gilboa tlângah mi tam tak an that a. 2 Filistinhai chun Saula le a nauhai chu an hnot ngat ngat a, a naupa hai pathum Jonathan, Abinadab le Malki-Shua chu an that a. 3 Saula chu an bei nasa hle a, thal kâp mihai chun an hnot phâk a, na takin an inhliem a. 4 Saula chun a râlthuom chawitu kuomah, "I kawlhnâm phawi la, mi sun tlang rawh; chuong naw chun hieng sertan lohai hi hung an ta, mi hung sun an ta, nuizat siemnaah mi hmang pal rawi an tih" a ta, sienkhom a râlthuom chawitu pang chu a'n za leiin a thaw ngam naw a. Chuleiin, Saula chun a kawlhnâm a lâk a, a baw a. 5 A râlthuom chawituin Saula a thi tah ti a hmu chun ama khomin a kawlhnâm a baw a, a thi ve ta a. 6 Chuongchun, Saula le a naupa hai pathum le a râlthuom chawitu le a mihai po po chu ni khat thilthuah an thi ta vong a nih. 7 Saula le a naupahai an thi vong thu le Israel sipaihai an tlân sie ti ruom râl khing tienga Israel umhai le Jordan râla umhaiin an lo hriet chun an khuohai suoksanin an tlân sie a, Filistinhai chu an hung a, an khuohai chu an hluo ta a. 8 A zîngah Filistinhaiin an râl thathai thuom hlippêk dinga an va fe chun Saula le a nau pasal pathumhai chu Gilboa tlângah thiin an va hmu a. 9 Chun, a lu chu an tan a, a râlthuom chu an hlip a, a chanchin chu an milem biekna tempul le mihai kuoma hril dar dingin an thon dar a. 10 A râlthuom chu an pathiennu Astoret tempulah an sie a, a ruong chu Betsan kul bangah an târ a. 11 Chun, Jabes Gilead-a umhaiin Filistin mihaiin Saula an thaw dàn an lo hriet chun, 12 a zân a zànin an mi huoisen po po chu Betsan panin an inthok suok a, Saula ruong le a naupahai ruong chu Betsan kul banga inthok chun an lâk thlàk a, Jabes-ah an hung hawn a, chu taka chun an raw a. 13 Chun, an ruhai chu an rût khawm a, Jabes-a tamarisk thing hnuoiah an phûm a, ni sari sûng bu ngheiin an sûn a.

2 Samuel 1

1 Saula thi hnung, Amalekhaihnea Davida hung inlawi tieng chun Ziklag khuoah ni hnih a châm a. 2 A ni thum ni chun Saula inkulnaa inthokin mi pakhat, silfèn inek neng nung le sama pilvut kai luoi hi Davida kuomah a hung a, bokkhupin chibai a bûk a. 3 Davida chun a kuomah, "Khaw laia inthoka hung am i na?"a ta, ama chun, "Israelhai inkulnaa inthoka hung tlân suok ka nih" a ta. 4 Davida chun, "Ieng tin am thil a um mi hril rawh khai" a ta. Ama chun, "Indonaah mihai chu an tlânsie a, tam tak an thi bok a. Saula le a naupa Jonathan khom an thi" a ta. 5 Chanchin hung hawntu tlangvàl kuoma chun Davidan, "Ieng tin am Saula le a naupa Jonathan hai an thi ti i hriet thei a?" a ta. 6 Tlangvàl chun, "Gilboa tlângah ka um ve a, Saula chu a fei innghaia um ka hmu a, sakor tawlailir le a chunga chuonghai chun an hung nangching têp ta a. 7 A ngha vel chun a mi hmu a, a mi hung ko a, kei chun "Ieng am ka thawpêk thei che?" tiin ka'n don a. 8 Ama chun, "Tu am i na?" a mi ti a, "Amalek mi ka nih" ka ta. 9 Ama chun, "Hung la, mi hung that raw leh; hi, thi hmun suolin ka um a, ka la dam ting bok si a" a ta. 10 "Chuongchun a bula chun ka ngîr a, chuonga inlet dêr tah chu a ni lei le a dam zo chuong ta naw ding ti ka hriet leiin ka that a, a lua lallukhum le a kuta a bânbun chu ka lâk a, i kuomah ka hung chawi a nih, pu" a ta. 11 Davida le a mihai chun an silfên an potthlèr a. 12 Kawlhnâma thi Saula le a naupa Jonathan hai, LALPA mihai le Israel sûngkuohai chu an sûn a, an ta a, zân tieng chen bu an nghei a. 13 Davida chun chanchin hung hawntu tlangvàl kuomah, "Khaw taka inthoka hung am i na?" a ta, ama chun, "Ram dang mi ka na, ka pa chu Amalek mi a nih" tiin a don a. 14 Davida chun a kuomah, "Ieng dinga Pathien hriek nâl sukbohmang dinga a chungah kut i thlâk ngam am a na?" a ta. 15 Chuongchun tlangvàl pakhat a ko a, "Va hnai la, va that rawh" a ta, a va sât hlum ta a. 16 Davida chun, "I thisen insuo maw chu nangma lu chung ngeiah um raw se, nangma bau ngeiin, 'LALPA hriek nàl chu ka that' i ti si a" a ta. 17 Davida chun Saula le a naupa Jonathan hai chu sûnin a ta a 18 a tap hla chu thal kâp hla ti a na, Juda mi po po inchûktir dingin thu a pêk a, chu thu chu Jasar Lekhabuah ziek a nih: 19 Aw Israel, i thuoitu ropuihai, I tlâng chungah fam khuo changin, Mihrânghai sam ang an zàl ie! 20 Gath khuohai chu hril naw ro, Askelon kotthlèrah puong naw ro; Filistin minuhaiin lo lawm palin, Sertan lo hrailèng lànuhaiin, Hlim zâi vawr pal rawi an tih. 21 Aw nangni Gilboa tlânghai, In chungah daidaw tla naw sien, Khuongruo sûr bok naw sien la, Loin thilhlân ding hrim hrim, Bu le bâl insuo naw raw se; Chu taka chun mi lien phaw, Muolpho takin an peihawn a, Saula phaw chun hriek nàl leChûl tlerh hrim a hlaw ta nawh. 22 Thathai thisena tlai lo le, Mi hrâthai thàu fa khop loin, Jonathan thal a lêt ngai naw a, Saula kawlhnâm a lêt ngai nawh. 23 Saula le Jonathan nun kha, A ditumin a va hang mawi ngei!An thi chenin an inkop zing; Muvànlai nèkin an tuonrang a, Sakeibaknei nêkin an hrât lem. 24 Nangni Israel naunuhai, Saula sûnin tà ta ro khai, Puon sendâng mawia thuomtu cheu, In silfênhai rangkachakaCheipêktu cheu a ni si. 25 Indoa hrât khawkhènghai, An hang tlu el chu a nâ maw!I tlâng sângah Jonathan chu, Fam changin a zâl tah ie. 26 Ka unaupa aw Jonathan, Ka va hang sûn ngei che de aw!Ka va hang ngaina ngei che de!I mi hmangai dàn kha a mak, Nghâknu hmangaina a khûm. 27 Mihrâng an hang tlu el chu, Râlthuom bo ang ei ni ie!

2 Samuel 2

1 Chu hnunga chun Davidan LALPA a rawn a, "Judai ram khuo pakhata khin ka hang fe ding am a ni?" a ta, LALPA chun. "Hang fe rawh" a ta. Davida chun, "Khaw lai khuo am ka fe ding?" a ta, LALPA chun, "Hebron khuoah" a ta. 2 Chuongchun, Davida chun a nuhmeihai pahnih, Jezrel-a mi Ahinoam le Karmel-a Nabal nuhmei thisan Abigail hai chu thuoiin a hang fe a. 3 Davida chun a kuoma um a mihai chu an sûngkuo seng leh a thuoi bok a, Hebron le a sevel khuoa hai chun umhmun an khuor a. 4 Chun, Judai rama mihai chu Hebron-ah an fe a, Juda sûngkuohai chunga lal dingin Davida chu hriek an nàl a. Anni chun Saula phûmtuhai chu Jabes-Gilead mihai an ni thu Davida chu an hril bok a. 5 Davida chun Jabes-Gilead mihai kuomah mi a tir a, "In pu, Saula chungah lunginsietna suklanga in lo phùm leiin LALPA chun malsawm cheu raw se. 6 LALPA chun in chungah ngilneina le ringumna inlangtir sien la, hieng thil in lo thaw lei hin kei khomin inngilneina man chu rul ka ti cheu. 7 Tu hin hrât tak le huoisen takin um ro, in pu Saula chu a thi ta a, kei hi Juda pahnamhaiin an chunga lal ni dingin hriek an mi nàl tah bok a nih" tiin thu a thon a. 8 Chuong lai zing chun Nera naupa Abner, Saula kawmandar chun Saula naupa Isboset chu Mahanaim-ah a hung thuoi a, 9 Gilead hai, Asur (Aser) hai, Jezrel hai, Efraim hai le Israelhai po po chungah lalin a siem a. 10 Ro a rêl tan kum chun Saula naupa Isboset chu kum sawmli mi a ni a, kum hni sûng ro a rèl hman a. Juda sûngkuohai ruok chun Davida chu an zui lem a. 11 Juda chihai chunga Hebrona inthoka Davidan ro a rêl sûng chu kum sari le thla ruk a nih. 12 Nera naupa Abner le Saula naupa Isboset mihai chun Mahanaim mâksanin Gibeon-ah an fe a. 13 Zeruia naupa Joab le Davida mihai khom an inthok suok ve a, Gibeon tuikhurah an intuok a, pawl khat chu ràl khing tieng an um a, pawl dang chu tuikhur ràl khing tieng. 14 Abner chun Joab kuomah, "Tlangvàlhai inzât ve vein thlang suok inla, ei hmaa hin inbei raw hai se chu" a ta. 15 Chuongchun, Benjamin chia mi, Saula naupa Isboset mihai sawmpahni le Davida mihai sawmpahni chu an hung ngîr suok a. 16 Mani bitum seng lu-ah an inman a, an bitum seng nâkah kawlhnâmin an insun a, an tlu ruol ta vong a. Chuleichun hi hmun hminga hin Helkat Hazurima an inbûk a, chu chu Gibeon-a um a nih. 17 Chu ni chun an inbei nasa hle a, Abner rawihai chu Davida rawihai chun an intlawm a. 18 Chu inbeinaa chun Zeruia naupa hai pathum Joab hai, Abisai hai le Asahel hai chu an thang a. Asahel chu sazukpui ang ela ngal hrât a nih. 19 Asahel chun Abner chu voi tieng le chang tieng khom pêt dêr loin a hnot thlur ngat ngat a. 20 Chun, Abner chu a ngha kîr a, "Nang i ni maw Asahel?" a ta, ama chun "Ni chieng e" a ta. 21 Abner chun, " I voi tieng amanih chang tieng amanih mi pêtsan la, tlangvàl pakhat kha man la, a râlthuom kha lâkpêk rawh" a ta, sienkhom Asahel chun pêt nuom loin a hnot ngar ngar a. 22 Abner chun, "Mi hung hnot ta naw rawh. Ieng leiin am ka that ding che? Ieng tin am i u Joab hmel ka hmu ngam ta ding?" a ta. 23 Asahel chun a hnot lui pei tlat si leiin Abner chun a fei mong tiengin Asahel phinga chun a hnung tieng chen dawk pùrin a sun tlang a, chu hmuna chun a tlu a, a thi ta nghal a. Asahel thina hmun hung tlung taphot chu an ngîr chat pei a. 24 Joab le Abisai ruok chun Abner chu an hnot pei a, Gibeon thlalèr panna Gia sak tienga Ama muol an tlung chun nisa a tla ta a. 25 Benjamin thlahai chun Abner chu an hung pan khawm a, an intel khawm nawk a, tlâng sipa chun thanghmun an khaw a. 26 Abner chun Joab kuomah, "Kawlhnâmin ei insâm zing el ding am a ni? Hi hin a tawpah intheidana chauh naw chu ieng khom a'n tlun naw ding a nih ti i hriet naw am a ni? Ieng tik am i mihai hi an unauhai hnot ta lo dingin thu i pêk ding a na?" a ta. 27 Joab chun, "Pathien hringna sâlin ka hril hi, ieng khom hril loin um la chu ka mihaiin an unauhai chu zing khawvar chenin an hnot ding a nih" a ta. 28 Joab chun tawtawrawt a mût a, mihai chu an ngîr thup a, Israelhai chu an hnot zui ta nawh. 29 Chu zân chun Abner le a mihai chun Araba pal tlangin zân khawvar an fe a, Jordan vadung an kàn a, Bithron fe thlengin Mahanaim an tlung a. 30 Joab-in Abner a hnot khom chu a hung kîr a, mipui a hang ko khawm vong chun Davida rawihai sawm le pakuo le Asahel chu an kim ta naw a. 31 Davida rawihai ruok chun Benjamin mihai le Abner mihai chu zathum le sawmruk an that a. 32 Chuongchun, Asahel ruong chu an làk a, Bethlehema a pa thlànah an phûm a. Chun, Joab le a mihai chu zânkhuoa fein zing khawvarah Hebron an tlung a.

2 Samuel 3

1 Saula sûnghai le Davida sûnghai chu sawt tak an indo a, Davida chu a hung hrât tiel tiel a, Saula sûnghai ruok chu an hung chau tiel tiel thung a. 2 Hebron khuoa Davida naupa pienghai po laia a hmasa tak chu Jezrela mi Ahinoam laka a hring Amnon a nih; 3 a pahnina Kileab chu Karmela Nabal nuhmei thisan Abigaila inthok a nih; a pathumna Absalom chu Gesur lal Talmai naunu Maka laka mi a nih; 4 a palina chu Adonija, Hagit laka mi a nih; a pangana chu Sefatia a na, Abitala laka mi a nih; 5 a parukna chu Ithream a na, Davida nuhmei Egla laka mi a nih. Chuonghai chu Davida naupahai, Hebrona pieng an nih. 6 Saula sûngkuohai le Davida sûngkuohai an indo sûngin Abner chu Saula sûngkuohai lakah a tlatlum hman hle a. 7 Saula chun hmei a nei a, ama chu Aia naunu Rizpa a nih. Chun, Isboset chun Abner kuomah, "Ieng dinga ka pa hmei i zàlpui am a na?" tiin a suosal a. 8 Isboset tong chun Abner chu a suklungsen hle a, "Judahai uicho ang mei meia i mi ngai a ni? Voisun chen hin i pa Saula sûnghai le a unauhai le a ruolhai chungah ringum takin ka um a, Davida kuta khom ka pêk naw che a ni kha. Chuong sa khom chun tu hin hi nuhmei laka suolah i mi'n tum hi. 9 Dan-a inthoka Beersheba chen Saula sûngkuoa inthoka ram chu lâkpêk a, 10 LALPAN Davida lalthungpha indin dinga inkhâm meua thu a lo tiem tah anga ka sukpuitling naw vai chun Pathienin Abner hi a law lawin law sien la, chu nêka nasa dai khom chun thaw raw se" a ta. 11 Isboset chun Abner chu a ti leiin a don ngam hrim hrim nawh. 12 Abner chun a aiin Davida kuomah mi a tir a, "Hi ram hi tu ta am a na? Ka kuomah thu thlung la, Israel ram po po i kuta hui lût vong dingin thangpui ka ti che" tiin thu a thon a. 13 Davida chun, "A tha, thu thlung ka tih. Amiruokchu, hi thil pakhat hi ka ngiet a, i hung pha leh, Saula naunu Mikal kha i hung thuoi naw chun ka hmèl hmu thei naw ti nih" a ta. 14 Chu zoah Davida chun Isboset kuomah, "Filistin mihai ser vun zakhata ka'n chawk sa ka nuhmei Mikal kha mi hung pe kîr rawh" tiin mi a tir a. 15 Isboset thupêkin Mikal chu a pasal Paltiel, Laish naupa kuoma inthokin an va thuoi a. 16 A pasal chun tap zing pumin Bahurim chen a hung zui a, Abnerin "Kîr ta rawh" a ti leiin a in tieng a kîr nawk ta a. 17 Abner chun Israel upahai chu a biek a, "Kha hma khan Davida chu in lalah in dit hlak a. 18 Tu hin in lalah siem ro. LALPA chun Davida kuomah, 'Ka siehlaw Davida kutin ka mi Israelhai chu Filistin mihai kuta inthok le an hmèlmahai po po kuta inthokin san suok ka tih' tiin thu a tiem a nih" a ta. 19 Abner bok chun Benjamin mihai hriet ngeiah chu thu chu a hril nawk a. Chu zoah Israel mihai le Benjamin sûngkuo po poin thaw dinga an dithai chu Davida hriet ngeia hril dingin Abner chu Hebron-ah a fe a. 20 Abner le a mi thuoi sawmhni ruolin Davida inhmupui dinga Hebron an hung tlung chun Davidan ruoi a buotsaipèk a. 21 Abner chun Davida kuomah, "Kîr nawk nghal ka ta, Israel mihai po poin i kuoma thu an thlung theina ding le i duthusam ang taka an chunga ro i rêl theina dingin, ka lalpa kuoma hung inkhawm dingin va huoihot tawl ka tih" a ta. Davida chun a'n fêtir a, thlamuong takin a kîr nawk ta a. 22 An fe charin mi rûna fe Davida mihai le Joab chu an hung tlung a, râllâk sum tam tak an hung hawn a. Abner ruok chu Hebrona Davida kuoma chun a lo um ta naw a, Davidan thlamuong takin a lo inkîrtir ta a. 23 Joab le a sipai thuoihai an hung tlung chun, "Nera naupa Abner chu lal kuomah a hung a, lal chun thlamuong takin a lo infêtir nawk tah" tiin Joab chu an lo hril a. 24 Chuongchun Joab chu lal kuomah a fe a, "I thil lo thaw hi iengtizie am a na? En ta, Abner chu i kuomah a hung a. Ieng leia i lo infêtir am a na? Tu hlak hin a fe dai ta bok si a! 25 Nera naupa Abner chu tu am a nih ti i hriet; dawha ding che le i chàng dàn iengkim chîk a, i thilthaw taphot hriet suok tuma hung a ni chu" a ta. 26 Davida kuoma inthoka Joab a hung suok chun Abner hnot dingin mi a tir nghal a, Sira tuikula inthokin an hung thuoi kîr nawk a, sienkhom chu chu Davidan a hriet ve nawh. 27 Abnerin Hebron a hung tlung chun Joab-in kul kotkhàra chun be ru dingin a thuoi hrang a, a unaupa Asahel thisen thungrulna dingin a phingah a sun a, a thi ta a. 28 Chu thu chu a hnung deuah Davidan a lo hriet chun, "Nera naupa Abner thisen insuona thua hin kei le ka ram chu LALPA hmaah kumkhuoin fihlim kan tih. 29 A thisen maw chu Joab lu chunga le a pa sûnghai po po chungah tla raw se. Joab sûnghai lai pânna huoisuol nei dâm, vun hri chi hrang hrang invoi dâm, funghrol ringsana khawsa dâm, kawlhnâma thi dâm le suongsama um bo naw raw hai se" a ta. 30 [Joab le a unaupa Abisai haiin Abner an that san chu Gibeon hmuna indonaah an unaupa Asahel a that lei a nih. ] 31 Davida chun a hlâng chu zuiin, Joab le a bula um mi po po kuomah, "In puonhai pot thlêr unla, saiip puon sil unla, Abner hi sûn ro" a ta. 32 Abner chu Hebron-a chun an phûm a. Abner thlàna chun rawlpui insuo meuin lal chu a tap a, mipui po po khom an tap a. 33 Lal chun Abner sùnna thu a'n sam a:Mi invêt thi ang elin, Abner chu a thi a ni maw? 34 I kut khuop a ni naw a, Keah kol i bun bok nawh. Mi rilohai hmaa míAn tlùk anga tlu i nih tiin. Chuongchun, mi po po chu an tap nawk a. 35 Chun, a lusùn lai chun iemani bêk fa dingin mi po poin Davida chu an hung ngên a. Davida ruok chun, "Nisa tlàk hmaa bei amani le thil dang ieng khom ka fâk hlek chun Pathienin a law lawin mi law sien la, chu nêka nasa khom chun mi thaw raw se" tiin a'n khàm a. 36 Chu chu mi po poin an hrietin an lawm hle a; lal thilthaw taphot chun mipuihai chu a suklawm a nih. 37 Chu nia inthoka chun Nera naupa Abner an thatna chungchangah lal chu a thang ve nawh ti mi po poin an hung hriet ta a. 38 Chun, lal chun a mihai kuomah, "Voisun hin Israelhai mi lien le mi ropui tak a thi ti in hriet naw maw? 39 Lala hriek nàl ni lang khom voisun hin kei chu ka la hrât tawk naw leiin Zeruia nauhai hi tuorhlaumin an pawng taluo a nih. Thil suol thawtu chu a suolzie ang peiin LALPAN thungrul raw se" a ta.

2 Samuel 4

1 Saula naupa Isboset chun Hebrona Abner thi thu a lo hrietin a lungril a zâm êm êm a, Israel mihai po po khom an thlaphàng a. 2 Chun, Saula naupa chun mi rûntu pawla hotu pahni a nei a, an hming chu Baana le Rekab an nih. Anni chu Benjamin thla Beerot mi Rimon naupahai an nih (Beerot chu Benjamin rama ngai a nih. 3 Beerot mihai chu Gitaim-ah an tlàn a, tu chen hin chu taka chun an la um zing. ) 4 Chun, Saula naupa Jonathan chun naupa kebai a nei a. Jezreel-a inthoka Saula le Jonathan thi thu an lo hriet chun kum nga mi chauh a la ni a, a enkoltu chun a pom a, a tlànpui a, a'n hmaw taluona lamah a'n thlâk pal a, a ke a hung inbai pha ta a. A hming chu Mefiboset a nih. 5 Chun, Beerot mi Rimon naupa Rekab le Baana hai chu Isboset in panin an fe a, ni sat vànglai tak, a sùn chawl lai chun a in chu an tlung a. 6 Bu la ding ni awm takin in sûng ril tieng an lût a, a phingah an sun a, Rekab le a unaupa Baana chu an inrel hmang ta a. 7 A khuma a lo zâl lai chun a nih inah an lût chu. An sun hlum hnung chun a lu chu an lâk a, an chawi a, Araba pal tlangin zânkhuoin an fe a. 8 Hebrona chun Isboset lu chu Davida kuomah an hung chawi a, a kuomah, "Hi i hmèlma, i hringna la tumtu, Saula naupa Isboset lu chu a nih. LALPA chun ka lalpa phuba chu voisun hin Saula le a thlahai lakah a lâkpêk tah a nih" an ta. 9 Davida chun Berot mi Rimon naupa Rekab le a unaupa Baana kuoma chun, "Ka mangangna po poa mi sansuoktu LALPA hringna salin ka hril, 10 chanchin tha hung hawna inngaiin, 'Ngai ta, Saula chu a thi tah' tiin mi pakhatin a mi hung hril a, ama chu ka man a, Ziklag-ah ka that a; chu chu a chanchin tha hung intlun mana ka pêk a nih. 11 Mi fel, ama in sûng luma um, a khum laizawl ngeia mi suolin an that thisen man chu in lakah phut nawkzuolin, hi hnuoia inthok hin ka va hang sukbo chieng ding cheu de aw!" a ta. 12 Chuongchun, Davida chun a tlangvàlhai chu thu a pêk a, anni chu an that a, an kut le ke an tanpêk a, Hebrona dîl kama chun an khai a. Isboset lu ruok chu an làk a, Hebron-a Abner thlàna chun an phûm a.

2 Samuel 5

1 Israel pahnamhai po po chu Hebron-ah Davida kuomah an hung a, a kuomah "Ngai ta, i thisen inzompuihai kan ni hi. 2 Kha hmaa kan chunga Saula an lal lai khom khan râl beinaa mi thuoitu tak chu nangma i ni hlak a, LALPA chun i kuomah, 'Ka mi Israelhai thuoi i ta, an lalah i um ding a nih' a ti che a ni kha" an ta. 3 Israel upahai po poin Hebron-ah Lal Davida kuom an hung tlung chun anni chu LALPA hmaah thu a lo thlungpui a, Davida chu an lal dingin Hebrona chun hriek an nâl a. 4 Lal a hung ni chun Davida chu kum sawmthum mi a ni ta a, kum sawmli ro a rêl a. 5 Hebrona inthokin Judai ramah kum sari le thla ruk a'n lal a, Jerusalema inthokin Israel ram po po le Judai ramah kum sawmthum le kum thum a'n lal bok a nih. 6 Chun, lal le a mihai chu Jerusalem hluotu Jebuhai do dingin an inthok suok a. Jebuhai chun Davida kuomah, "Hi taka hin lût naw top i tih, mitdel le kebaihai chauh khomin lo dang el an ti che" an ta. Anni chun an lungrilin, "Davida a lût thei teu awm naw êm el" an ti a nih. 7 Amiruokchu, Davida chun Zion kul chu a lâk miel a, chu chu Davida Khawpui chu a nih. 8 Chu ni chun Davidan a mihai kuomah "Nangni lai hin keima anga that nuom khopa Jebuhai theidatu in um ve am? Jebuhai hne ding chun tui hor kuoah lût inla, mitdel le kebaihai chu hlukhum ro" a ta. Chu lei tak chu annawm, 'Mitdel le kebaihai chu lal inah an lût ding a ni nawh' ti a ni ta zing hi. 9 Davida chun kul sûngah umhmun a khuor a, a hmingah Davida Khuo tiin a'n bùk a. A muol suo tienga kul thut dinga hnuoi an sung zawla inthoka tanin a vel tuokin khawpui a rem a. 10 Iengkim LALPA Pathienin a umpui leiin a hung ropui ta deu deu a. 11 Tura lal Hiram chun Davida kuomah mi a tir a, sidar thinghai a thon a, themthiemhai le lung ser thiemhai a tir bok a, Davida chu lal in a bawlpêk a. 12 LALPAN a mi Israelhai zàrin Israel mihai chungah lalin ama chu a suknghet a nih ti le a ram khom chu a chawisàng a nih ti Davidan a hriet a. 13 Hebron a suoksan hnungin Davida chun Jerusalemah nuhmei le hmei a nei belsa a, naupa le naunu khom a la nei sa a. 14 Chuong a nauhai chu Samua hai, Sobab hai, Nathan hai, Solomon hai, 15 Ibar hai, Elisua hai, Nefeg hai, Jafia hai, 16 Elisama hai, Eliada hai le Elifelet hai an nih. 17 Davida chu Israel mihai lal dingin hriek an nàl ti Filistinhaiin an hriet chun ama zong dingin burip takin an inthok tung a, Davidan chu chu a lo hrietin kulbingah a fe thlâk a. 18 Filistin mihai chu an hung tlung a, Refaim ruoma chun an inzar phei a. 19 Davida chun LALPA kuomah, "Fein Filistinhai chu ka bei di'm a ni? Anni chu ka kutah i pêk ding am a ni?" tiin a rawn a. LALPA chun, "Fe rawh, Filistinhai chu i kutah pe ngei ngei ka ti che" a ta. 20 Chuongchun, Davida chu Baal Perazim-ah a fe a, anni chu a hne a, "LALPAN ka hmèlmahai chu tuiting inthe ang elin ka hmaah a sukdar vong tah" a ta. Chuleiin, hi hmun hminga hin Baal Perazim a'n bùk a. 21 Chu taka chun Filistinhaiin an milemhai an tlânsan a, Davida le a mihai chun an làk a. 22 Filistin mihai chu an hung tung nawk a, Refaim ruoma chun an inzar nawk a. 23 Davida chun LALPA a rawn nawk a, ama chun, "Pan tung loin an hnung tieng inhuol la, thingtheihmi thing zawna khin hang bei rawh. 24 Thingtheihmi chunga ke pen ri thuop thuop i hriet charin inrang takin che nghal rawh, Filistin sipaihai do dingin i hmaah LALPA a fe tina a nih" a ta. 25 LALPA thupêk angin Davida chun a thaw a, Filistin mihai chu Gibeon-ab inthoka Gezer chenin a hne ta vong a.

2 Samuel 6

1 Davida chun Israelhai laia a mi thlang thieu sîngthum a ko khawm nawk a. 2 Judai ram Baala khuoa inthoka Pathien Thuthlung Bawm, cherubhai chunga lalthungphaa inthung Iengkim LALPA hming an inputtir chu zu la dingin a kuoma mi um po po le chun Davida chu a'n thok suok a. 3 Pathien Bawm chu tlânga Abinadab ina inthok chun an lâk suok a, tawlailir tharah an sie a, Abinadab naupahai Uza le Ahio chun tawlailir thar chu an khal a. 4 Pathien Bawm chu tawlailir chungah an sie a, Ahio chu a hmaa chun a fe a. 5 Davida le Israel sûngkuo po pohai chun LALPA hmaah thil inri thei chi hrang hrang tingtang dâm, perkhuong dâm, khuongte dâm, tawtawrawt bi nei dâm le dârbenthek dâm tumin, theitawpin an lawm a. 6 Nakon hrizawl an tlung chun bawngchal chu a petek leiin Uza chun Pathien Bawm chu a kutin a zuk chel a. 7 LALPA lung chu Uza chungah a sen thut a, a thilthaw indik naw leiin chu taka chun Pathienin a sukhlum a, Pathien Bawm bula chun a thi ta a. 8 Uza chunga LALPA a tuong leiin Davida lung chu a sen hle a, chu hmun chu Perez Uza a'n bûk a, tu chen hin a la put ta zing a nih. 9 Chu ni chun Davidan LALPA chu a ti a, "Iengtin am LALPA Bawm chu ka kuom a hung tlung thei ta ding maw?" a ta. 10 Davida Khawpuia ama kuoma LALPA Bawm son lût chu a nuom ta naw a, Git mi Obed-Edom in tieng chun a sie ta lem a. 11 LALPA Bawm chu Git mi Obed-Edom ina chun thla thum a um a, Obed-Edom le a sûngkuohai po po chu LALPAN mal a sawm a. 12 Pathien Bawm leia Obed-Edom sûngkuohai le an thil nei iengkim LALPAN mal a sawm nasatzie lal Davida an hril chun a fe thlâk a, Pathien Bawm chu Obed-Edom ina inthokin Davida Khawpuia chun hlim takin a hung lâk tung a. 13 Chun, LALPA Bawm zawntuhaiin pên ruk an pèn chun bawngchal le bawng tuoi thauin a'n thawi a. 14 Davida chun puon zâi inhmia siem thiempu zakuo a hâk a, theitawpin LALPA hmaa chun a lâm a. 15 LALPA Bawm an lâk tung lai chun Davida le Israel mihai po po chu an khêk dur dur a, tawtawrawt an mût ruoi ruoi bok a. 16 Davida khuoa LALPA Bawm a lût lai chun Saula naunu Mikal chun tukvera inthokin a lo thlir a, LALPA hmaa Davida inchawma a lâm vel chu a hmu a, a lo inzàpui hle a. 17 Chuongchun, LALPA Bawm chu an lâk lût a, a siena dinga Davidan puon in a buotsai sûnga a hmun dinga chun an sie a, Davida chun LALPA hmaah pumraw thilhlân le inremna thilhlân a'n hlàn a. 18 Pumraw thilhlân le inremna inthawi a'n hlàn zo chun Iengkim LALPA hmingin mipuihai chu mal a sawm a. 19 Israel mipui po po chu a nuhmei a pasalin bei tlang khat, sa tlang khat le grèp em tawl bawr khat a pêk seng a. 20 Chuongchun mi po po chu mani in tieng an inlawi ta seng a, Davida khom a sûnghai malsawm dingin an lawi ve ta a. Hmuok dingin Saula naunu Mikal chu a hung suok a, "Voisuna Israel lal chu a va ropui ngei de, mi ho tak, inzak nachang hre lo, saruoka um ang elin a siehlaw nunghàkhai hmuah saruokin a um kha tie!" a lo ti a. 21 Davida chun Mikal kuomah, "I pa le a sûnghai po po nêka mi thlang a, LALPA mi Israelhai chunga lala mi ruottu LALPA hmaa lâm ka ni lem; LALPA hmaah lawm ding ka ni hrim annawm. 22 Hieng nêk hmana inzapuium hin la um ka tih, keima ngei khom inzàpui ka tih; amiruokchu, chuong siehlaw nunghàk i hrilhai chawimawi chun um ka tih" a ta. 23 Chuongchun, Saula naunu Mikal chun a thi chenin nau a nei nawh.

2 Samuel 7

1 Lal chun a lal in a hluo hnung le a vêla a hmèlmahai po po laka LALPAN ralmuonga an umtir hnungin, 2 zawlnei Nathan kuomah, "Hi, kei chu sidar thinga bawl inah ka um a, sienkhom Pathien Bawm chu puon inah a la um zing si a" a ta. 3 Nathan chun lal kuomah, "I lungrila i ti ang tak chun thaw el rawh, i kuomah LALPA a um annawm" a ta. 4 Chu zân chun LALPA chun Nathan kuomah: 5 "Fe la, ka siehlaw Davida kuomah hieng hin hril rawh. 'LALPA chun hieng hin a tih: Nang hi ka umna ding in mi bawlpêktu ding chu i ni am a ni? 6 Israel thlahai Aigupta rama inthoka ka thuoi suoka inthoka tu chen hin inah ka um naw a, hmun hrang hrangah insonin puon inah ka um pei lem hlak. 7 Hmun hrang hranga ka fe kuolpui Israel thlahai le ka mi Israelhai enkoltu dinga ka ruot rorêltuhai kuoma khom, 'Iengti dana sidar thingin in in mi bawlpêk naw am a na?' tiin ka hril hlak amanih? 8 " Chuleiin, ka siehlaw Davida kuomah hieng hin hril rawh: Iengkim LALPA chun hieng hin a tih: I beram vèngna hmuna inthokin ka mi Israelhai chunga rorêltu dingin ka ko suok che a. 9 I fèna taphotah i kuomah ka um zing a, i hmaa hmèlma umhai ka hnepêk che a, tuhin hnuoia mi ropui takhai angin i hming ka sukropui ding a nih. 10 Ka mi Israelhai chu an um nghetna ding hmun pêng ka ta, tu sukbuoi ta lo dingin anni hmuna ngei chun anni chu phun ka tih. Tuta hma ang khan mi rilohaiin sukrimsi ta naw ni hai. 11 Ka mi Israelhai chunga rorêltu ka ruot hlim lai ang kha ni ta bok naw ni a, in hmèlmahai po po lakah inchawldamtir ka ti cheu. Kei LALPA hin in sûngkuo chu ka tungding ding a nih ti ka hril che. 12 I nihai a kin phaa i thlàtuhai kuoma i'n lawi ve pha chun nangma hung thlâktu ding che i rila ra ngei chu indin ka ta, a ram chu suknghet ka tih. 13 Ama chun ka hminga dingin in bawl a ta, a ram lalthungpha chu kumkhuoa dingin suknghet ka tih. 14 A pa nîng ka ta, ama chu ka naupa nîng a ta, thil suol a thaw chun pain hmol hmanga a naupa a thunun angin thunun ka tih. 15 Amiruokchu i hmaa ka hnawl Saula laka ka hmangaina ka lâk hmang ang khan ka hmangaina chu a lakah la kîr ngai naw ning. 16 I sûngkuo le i ram chu kumkhuoin suknghet ka ta, i lalthungpha khom kumkhuoin suknghet bok ka tih' " tiin. 17 Nathan chun inlârna thu po po chu a kip a kawiin Davida a hril a. 18 Chun, lal Davida chu LALPA puon inah a lût a, LALPA hmaah a thung a, a tongtai a: "Aw LALPA Pathien, kei hi tu am ka na, ka sûnghai khom ieng am an na, hieng chen chen i mi thuoi el hi? 19 Aw LALPA Pathien, chu khom chu i mithmuah huntawk la ti loin, i siehlaw thlahai chen khom suknghet i la tum ta pei a. Aw LALPA Pathien, hieng ang hi mihriem i thaw dàn pangngai khom a ni hrim am a ni? 20 Hieng bàk lawm lawm hi Davida hin i kuomah ieng am ngên sap ding a nei a? Aw LALPA Pathien, i siehlaw hi i hriet tlang vong si a. 21 I thu le i ditzawng angin hi thil ropui tak hi i thaw a, i siehlaw kuomah i'n hriettir a. 22 Aw LALPA Pathien, i va hang ropui ngei de aw! Kan hrieta chu nangma ang hi tu khom an um naw a, nang naw chu Pathien dang hrim an um nawh. 23 Aigupta rama inthoka an Pathienin a mihai ni dinga a san suok, thil mak le râpum tak tak thaw a, an hmaa hnam tinhai chu an pathien chopa a hnot suokpêk, khawvel pumpuia a hming a serna hnam, Israel hnam ang hi hnam dang tu am an um a? 24 Israelhai chu chatuona i mihai ni dingin i suknghet a, aw LALPA, nang chu an Pathien i hung ni tah. 25 "Chuongchun, aw LALPA Pathien, i siehlaw chungchàng thu le a sûnghai chungchàng thu chu i tiem tah ang khan kumkhuoa dingin suknghet la, i hril tah ang khan hlen rawh. 26 Chuongchun, mihaiin, 'Iengkim LALPA chu Israelhai Pathien a nih' ting an ta, i hming chu chatuonin ropui a ta, i siehlaw Davida sûngkuohai chu i hmaah suknghetin um an tih. 27 "Aw Iengkim LALPA, Israelhai Pathien, i siehlaw kuomah 'Sûngkuo indinpêk ka ti che' tiin i puong ta si leiin i siehlaw chun hi thu hi i kuomah a hung intlun ngam a nih. 28 Aw LALPA Pathien, nang chu Pathien i ni a, i thu chu innghatna tlâk a ni a, i siehlaw kuomah thil tha i tiem ta si a. 29 Chuleiin, i siehlaw sûnghai chu i hmaa kumkhuoa an um zing theina dingin lunginsiet takin malsawm rawh. Aw LALPA Pathien, i tiem tah angin, i siehlaw sûnghai hi i malsawmna zârin kumkhuoin malsawmin um ngei an tih" tiin.

2 Samuel 8

1 Chu hnunga chun Davidan Filistin mihai chu a bei a, a hne a, a tukdol tawl a, Metheg Amahc chu an kuta inthokin a lâkpêk a. 2 Davida chun Moab mihai khom a hne a. Anni chu hnuoiah hrui khangin tlar thumin an inzâltir a, tlar hnia mi po an sukhlum a, tlar khata mi po an indamtir a. Chuongchun Moab mihai chu sie khuoah a siem a, sie an hung chawi hlak a. 3 Zoba lal, Rehob naupa Hadadezer chu Eufretis vadung hrûla a lalna tungding nawk dingin a fe a, ama chu Davidan a lo bei bok a. 4 Davida chun Hadadezer sakor tawlailir sângkhat, tawlailir khaltu sângsari le a sipai sînghni a manpèk a, an sakor laia zakhat ti chauh lo chu an zaper tha a satpêk vong a. 5 Damaskaa inthoka Aramd mihai, Zobaa lal Hadadezer san dinga hunghai chu Davidan sînghni le sânghni a lo that bok a. 6 Aramhai khawpui Damaskaa chun optu sipai a sie a, Aramhai chu Davida lalna hnuoiah an um a, a kuomah sie an hung chawi hlak a. Davida chu a fena taphotah LALPAN hnena a'n changtir pei a. 7 Davida chun Hadadezer ofisarhai rangkachak phaw po po chu a lâk khawm a, Jerusalemah a hung chawi a. 8 Chun, Hadadezer op khuo Beta (Teba) le Berot-haia inthokin dâr tam tak a hung hawn bok a. 9 Chun, Hamat lal Tou-ine Hadadezer sipaihai po po Davidan a hne tah ti a lo hriet a. 10 Ama leh khom lo indo tah hlak Hadadezer a hne leia chibai bûk le lawmpui dingin Tou chun a naupa Joram chu tangkaruo bêl dâm, rangkachak bêl dâm le dâr bêl dâm inchawitirin Davida kuomah a tir a. 11 Chuong thilpêkhai chu hnam dang lal a hnehaia inthoka a râllâk tangkaruo le rangkachakhai a'n hlàn hlak ang bokin Davida chun LALPA kuomah a'n hlàn a. 12 Chuong ang râllâk a'n hlàn tahai chu Suria mihai ta dâm, Moab mihai ta dâm, Amon thlahai ta dâm, Filistin mihai ta dâm, Amalek mihai ta dâm, Zoba lal Rehob naupa Hadadezer hai laka a râllâk dâm a nih. 13 Chi Ruoma Edom mihaif sîngkhat le sângriet thata a hung kîr hnung chun Davida hming chu a hung inthang ta hle a. 14 Edom ram hmun tinah optu sipai a sie a, Edom ram chu sie ramah a siem a. Davida chu a fena taphotah LALPAN hnena a'n changtir pei a. 15 Davida chun Israel ram po po a op a, mipuihai chungah ro indik tak le fel takin a rèl a. 16 Zeruia naupa Joab chu sipai lu takah a thang a; Alihud naupa Jehosafat chu chanchin ziektu a ni a; 17 Ahitub naupa Zadok le Abiathar naupa Abimelek hai chu thiempu an ni a; Seraia chu ziektu a ni a; 18 Jehoiada naupa Benaia chu Keret mihai le Pelet mihai hotu a ni a; Davida nauhai chu lal kuoma thurawn petu an nih.

2 Samuel 9

1 Chun, Davida chun, "Jonathan 2 Saula sûnghai siehlaw pakhat, a hming chu Ziba a um a, ama chu Davida hmaa inlang dingin an ko a. Lal chun, "Nang hi Ziba chu i ni maw?" a ta, ama chun , "Ni e, kei i siehlaw hi" a ta. 3 Lal chun, "Pathien ditsakna ka'n entir theina dingin Saula sûngkuo laia mi a dam an la um am?" a ta. Ziba chun lal kuomah, "Pu um e, Jonathan naupa a la um a, sienkhom ke khing hnia inbai a nih" a ta. 4 Lal chun, "Khaw lai am a um?" a ta, Ziba chun, "Lo Debar khuoa Amiel naupa Makir inah a um" a ta. 5 Lal Davida chun ama chu Lo Debar-a Amiel naupa Makir ina inthok chun a va'n thuoitir a. 6 Saula naupa Jonathan naupa Mefiboset chu Davida kuomah a hung a, a hmaa chun inza takin a kûn a. Davida chun, "Mefiboset" a ta, ama chun, "I siehlaw hi ka um" a ta. 7 Davida chun, "Ti naw rawh, i pa zàrin ditsakna inentir ngei ngei ka ti che. I pu Saula ram po po inneitir nawk ka ti che a, ka dawkânah thlaithlèng i kîl rop ta ding a nih" a ta. 8 Mefiboset chu a kûn a, "I siehlaw hi ieng am a na, ui thi sa ang chauh keima ang i mi hang ngàisak nuom el chu?" a ta. 9 Chuongchun, lal chun Saula siehlaw Ziba chu a'n kotir a, a kuomah, "Saula thil po po le a sûngkuohai thil po po chu i pu naupa hi ka pêk vong a nih. 10 I pu naupa chun fâk a hmu theina dingin a ta dingin nang le i naupahai le i siehlawhaiin a lo inletpêk ro. I pu tupa Mefiboset chun ka dawkânah thlaithlèng ot zing tâng a tih" a ta. Ziba chu naupa sawmpanga le siehlaw sawmhni nei a ni tah. 11 Ziba chun lal kuomah, "Ka pu, lalin i siehlaw kuoma thaw dinga i pêk taphot chu i siehlaw hin thaw ngei ngei a tih" a ta. Chuongchun, Mefiboset chun lal naupahai angin lal dawkânah thlaithlèng a kîl ve ta a. 12 Chun, Mefiboset chun nau pasalte, a hming Mika a nei a, Ziba ina um po po chu Mefiboset siehlaw an nih. 13 Mefiboset chu Jerusalemah a um a, lal dawkànah thlaithlèng a kîl hlak a, ke khing hnia inbai a nih.

2 Samuel 10

1 Chuong thil hnunga chun Amonhai lal a thi a, a naupa Hanun chun a lalna chu a hung hluo a. 2 Davida chun, "A pain a mi lunginsiet ang bokin Nahas naupa Hanun chu lunginsiet vèng ka tih" a ta, a pa a sûnpuina thu hril dingin a aiaw mi a tir a. 3 Amon thlahai ram an va tlung chun Amon milùnhai chun Hanun kuomah, "Davida hin i pa a'n zà leia sûnpuina thu hril dinga mi a hung tir ni i ring am a ni? A pei thlâk theina ding chea i khuo thlithlai ding le enthla dinga a mihai a hung tir a ni naw maw?" an ta. 4 Chuongchun, Davida mi hung tirhai chu Hanun chun a man a, an khâkhmul khing tieng chauh a vaw kolpêk a, an silfênhai chu an mongtam chena insingin a tanpêk a, a'n kîrtir ta a. 5 Chuonga an lo sukmuolpho thu Davida an hril chun a tuok dingin mi a tir a. Lal chun, "In khâkhmul inthang sei hma khat chu Jeriko-ah um zing unla, chu zoah hung chauh ro" tiin thu a'n cha a. 6 Davida hnàrah thil rimsie an lo inchang tah ti Amon mihaiin an hung hriet chun Beth Rehob le Zobaa inthokin Aram mihai sînghni, lal Maaka mihai sângkhat le Toba mihai sîngkhat le sânghni an incha khawm a, an ruoi a. 7 Davidan chu chu a hrietin Joab le a râldo thiem po po chu a tir a. 8 Amon mihai chu an hung suok a, an kul kotkhâr bula chun thanghmun an khaw a, Zoba le Rehobaa inthoka hung Aramhai le Maaka mihai ruok chu a hranin phûlah an um a. 9 Joab chun a hma tieng le a hnung tieng an hung bei ding ti a hriet a, Israel sipaihai laia a huoisen fàl thal mi iemani zât chu Aram mihai bei dingin a thlang suok a. 10 A dang po chu a unaupa Abisai inrawina hnuoiah Amon thlahai bei dingin a sie a. 11 Joab chun, "Aram mihai kan ngam naw chun mi hung san unla, Amon thlahai in ngam naw leh hung san kan ti cheu. 12 Hrât takin um unla, ei mihai le ei Pathien khawpuihai sanin huoisen takin bei ei tiu. LALPAN tha a ti ang peiin thaw raw se" a ta. 13 Chuongchun, Joab le a rawihai chun Aram mihai chu an bei a, an hmaa chun an tlânse dur dur a. 14 Amon thlahaiin Aram mihai an tlânsiet thu an hriet chun anni khom Abisai hmaa chun an tlânsie a, khuoa chun an lût a. Joab chun Amon thlahai chu Jerusalem tieng a kirsan ta a. 15 Chun, Aram mihaiin Israelhai an ngam nawh ti an hmu chun an inpun khawm nawk a. 16 Hadadezer chun Eufretis vadungpui khela um Aram mihai chu a va'n thuoitir a, chuonghai chu Hadadezer sipai kawmandar Sobak inrawina hnuoiah Helam-ah an fe a. 17 Chu thu Davida an hril chun Israel mihai po po a khawm a, Jordan an kàn a, Helamah an fe a. Aram mihai chun Davida do dingin thanghmun an lo khaw a, an lo bei a. 18 Sienkhom, Israelhai hmaa chun an tlânse a, Davida chun an tawlailir khaltu mi zasari bâkah kea lawn pawl sipai sîngthum a that a, an kawmandar Sobak khom a that a, chu taka chun a thi ta a. 19 Hadadezer hnuoia lalhaiin Israelhai an ngam nawh ti an hmu chun Israelhai chu inremna an siempui a, an kut hnuoiah an um ta a. Chuongchun, Aramhai chun Amon thlahai chu an thangpui nawk ngam ta nawh.

2 Samuel 11

1 Thal lai, indoa lalhai an suok hlak huna chun Davidan a mihai le Israel sipaihai po po chu Joab rawiin a tir a, Amon mihai chu an va hne a, Raba khuo chu an inhuol a, Davida ruok chu Jerusalemah a um a. 2 Zân tieng voi khat chu ni nèma hin Davida chu a lal in chungah a'n vâk vel a, in chunga inthok chun nuhmei pakhat insil lai hi a hmu a, hmel tha a ti hle a. 3 Davida chun tu am a nih ti zong suok dingin mi a tir a. A mi tir chun, "Eliam naunu Bathsheba, Hit mi Uria nuhmei a nih" a ta. 4 Chu phing leh Davida chun mi a tir a, an hung thuoi a, a lo zàlpui a, (nuhmei inthieng nawnaa inthoka a'n sukthieng zo hlim a na), a in tieng a kîr nawk ta a. 5 Chun, nuhmei chu a hung inrai a, "Nau ka pai" tiin Davida chu a'n hriltir a. 6 Chun, Davida chun Joab kuomah, "Hit mi Uria kha ka kuomah hung tir rawh" tiin a'n cha a, Joab chun Uria chu Davida kuomah a tir a. 7 Uria a hung tlung chun Davidan Joab le sipaihai chu iem an chang a, indona iengtin am a fe pei ti thuhai a lo indon a. 8 Chun, David chun Uria kuomah, "I inah fe la, i ke va sawp rawh"g a ta. Uria chu lal ina inthok chun a suok a, lal chun thilpêk a thon zui nghal a. 9 Amiruokchu, Uria chu lal in kotkhâr bula chun a pu siehlawhai lai a riek a, a in tieng chun a fe nawh. 10 Uria chu a in tieng a'n lawi nawh ti Davida an hril chun Uria kuomah, "Hla taka inthoka hung i ni nawm am a ni? Iem a ta i in tieng inlawi loa i um?" a ta. 11 Uria chun Davida kuomah, "Pathien Bawm le Israelhai le Judahai chu bûkah an um a; ka hotupa Joab le ka pu mihai chu ramah an inkul a, kei ka inah inlawiin, faa dawnin, ka nuhmei kuomah ka zâl bik ding maw? I hringna le i thlarau hringna sâlin ka hril, chu chu thaw naw top ka tih" a ta. 12 Davida chun Uria kuomah, "Voisun khom hi takah la châm la, zîngah i fe chauh ding a nih" a ta, chu ni le a zîng chun Jerusalemah a la châm a. 13 Chun, Davida chun Uria chu a ko a, a hmaa chun fain a dawn a, a'n ruitir ta dèr a. Zân tieng chun a in tieng inlawi loin a pu siehlawhai lai riek dingin a suok ta a. 14 A zînga chun Davidan Joab ta ding lekhathon a ziek a, Uria chu a'n chawitir a. 15 Chu lekhathona chun Davidan, "Uria hi râl zuolna lai tak a hmatawngah inthangtir la, an lo that ngei dingin hnung intawlsan ro" tiin a ziek a. 16 Joab-in khuo a'n huol lai chun an râlhai tienga mi huoisen sen umna nia a hrieta chun Uria chu a'n thangtir a. 17 Khaw sûnga mihai chu Joab mihai do dingin an hung suok a, an bei a, Davida mihai ngei khom an thi a, Hit mi Uria khom chu a thi a. 18 Joab chun indo chanchin chu a kimin Davida kuomah a thon a. 19 A mi tir kuoma chun, "Indo chanchin i ripawt zo pha lal a lungsen thut a, 20 'Iengti dàna chuong anga hnaia chun in va bei am a na? Kula inthokin an lo kap ding cheu ti khom in hriet naw maw? 21 Jerubeset naupa Abimelek kha tuin am a that kha? Nuhmeiin bu rawtna lung sin kula inthokin a lu chungah a zuk thlâk a, Thebez-ah khan a thi a ni naw am a ni? Iengti dàna kul bul ela chun in fe am a na?" a ti chun, "I siehlaw Hit mi Uria khom a thi ve' ti rawh" tiin a hril a. 22 Chuongchun, a mi tir chu a fe a, a tlung chun Davida kuomah Joab-in hril dinga a ti po po chu a hril a. 23 A mi tir chun Davida kuomah, "Mihai chun an mi hung nor phei a, phula chun an mi hung bei a, keinin an khaw lûtna kotkhâr tlung rakin kan nor kîr a. 24 Thal kâptuhai chun i siehlawhai chu kula inthokin an lo kap a, lal siehlaw thenkhat an thi a, Hit mi Uria khom kha a thi ve a nih" a ta. 25 Davida chun zuolko kuomah, "Joab kuoma chun, 'Hi hin i lung sukhnuol naw raw se. Kawlhnàm chun a tu el khom a thlei naw a, nasa nawk zuolin khuo chu bei unla, sukse vong ro' tiin infui phur rawh" a ta. 26 Uria nuhmeiin a pasal thi thu a hriet chun a sûn a. 27 A sûn hun sûng a hung pêl chun Davidan a in tieng a'n thuoitir a, nuhmeiin a nei a, naupa a neipek a. Nisienlakhom, Davida thilthaw chun LALPA a suklawm nawh.

2 Samuel 12

1 LALPA chun Davida kuomah Nathan a tir a. A hung chun a kuomah, "Khaw pakhata hin mi pahni an um a, pakhat chu mi hausa a na, pakhat chu mi rethei a nih. 2 Mi hausa chun beram ruol le bawng ruol a hau êm êm a. 3 Mi rethei ruok chun beram la chikte an chawk chauh chu a nei a, a vâi a, a nauhai leh a chawm tlei a, a fâk le dawn ang ang chu an intawm a, a ângsûngah a pom in a, a naunu ang hielin a cheibawl a. 4 Chun, mi hausa chun mikhuol a nei a, a beram ruol le bawng ruol laia mi chu thata thlaithlèng siempêk nêkin mi rethei beram la tuoi chu a lâkpêk a, a ina mikhuol hme ding chun a thatpêk a" a ta. 5 Chu mipa chunga chun Davida chu nasa takin a lung a sen a, Nathan kuomah, "LALPA hringna salin ka hril hi, chu thil thawtu chu thi tlâk a nih. 6 Hieng ang thil a thaw lei le lunginsietna a nei naw leiin a beram tuoi chu a lêt liin a rul ding a nih" a ta. 7 Nathan chun Davida kuomah, "Chu pa chu nang hi i nih. LALPA, Israelhai Pathien chun hieng hin a hril: 'Israelhai lal dingin hriek ka nàl che a, Saula kuta inthokin ka san suok che a. 8 I pu in le lohai ka pêk che a, a nuhmeihai chu i ângsùngah ka sie a. Israel sûnghai le Juda sûnghai khom ka pêk che a. Chuonghai chu a tlawm taluo i ti a ni chun a dang khom ka pek belsa ding che annawm. 9 Ieng dinga LALPA thu chu ngainêp a, a mithmuah thil tha lo i thaw am a na? Hit mi Uria chu kawlhnàmin i sukhlum a, a nuhmei i neipêk a. Amon mihai kawlhnàmin i that a nih. 10 I mi ngainêp a, Uria nuhmei chu i nuhmei dinga Uria i lâkpêk leiin tuta inthok hin i inah kawlhnàm inlêng tâng a tih' tiin. 11 "Hi hi LALPA thu chu a nih: 'Nangma sûngkuoa inthok ngeiin i chungah sietna hung intlungtir ka tih. I mithmua ngei i nuhmeihai chu lâkpêk ka ti che a, i tuolbawm kuomah pêng ka ta, i mithmua ngei sûn pachangah i nuhmeihai chu zâlpui a tih. 12 Nang chun a rûkin i thaw a, kei ruok chun Israelhai po po mithmua ngei sûn varah ka thaw ding a nih" a ta. 13 Davida chun Nathan kuomah, "LALPA lakah thil suol ka thaw a nih" a ta. Nathan chun, "LALPAN i suolna a lâk hmang ta a, thi naw ti nih. 14 Amiruokchu, hi thil i thaw hin Pathien hrilsietna remchâng tak LALPA hmèlmahai ta dingin i siempêk leiin, i laka pieng naupang chu thi ngei ngei a tih" a ta. Nathan chun a in tieng a fesan ta a. 15 In tieng Nathan a'n lawi hnung chun Uria nuhmeiin Davida a hringpèk naupa chunga chun LALPAN kut a thlâk a, a hung dam naw a. 16 Naupang ta dingin Davida chun a ngènpèk a. Bu a nghei a, a inah a lût a, zânkhuoin tuongah a zâl a. 17 A sûngkuoa upahai chun kei tho tumin an ngìr huol a, sienkhom a tho nuom naw a, an kuomah bu khom a fâk bok nawh. 18 A ni sarinaa chun naupang chu a thi a, Davida siehlawhai chun naupang thi thu Davida kuoma hril an rin a, "Ngai ta u, naupang dam lai hman khan a kuomah thu ei hril a, a ngàithlâk nuom naw a, tuhin naupang thi thu chu iengtin am ei hril ngam ta ding a na? Ama le ama iengtin amanih in thaw el a tih" an ta. 19 A siehlawhai inbiekrûk vel dâna inthokin Davida chun naupang chu a thi tah ti a hriet a, "Naupang chu a thi ta maw?" a ta, anni chun "A thi tah" an ta. 20 Chu phing leh Davida chu tuonga inthokin a tho a, a'n sil a, hriek a'n nàl a, a silfên a thlâk a, LALPA inah a fe a, Pathien chibai a bûk a, a in tieng a kîr nawk a, fâk ding a lam a, an hung thur a, a fâk a. 21 A siehlawhai chun a kuomah, "I thilthaw dàn hi iengtizie am a na? Naupang damnaw lai khan bu i nghei a, i tap a, sienkhom naupang a thi a, i tho a, bu dâm i fâk ta lem tlat si a!" an ta. 22 Ama chun, "Naupang damnaw lai khan bu ngheiin ka tap hrim kha. Ka lungrilin, 'LALPAN mi lunginsiet a ta, naupang chu a hung dam nawk el rawi mawh' ka ti lei a nih. 23 Tu ruok hin chu a thi ta a, ieng leiin am bu ka nghei ta ding? Ka ko kîr thei nawk ding am a ni? A kuomah kei chu la fêng ka ta, ama chu ka kuom tieng hung kîr ta naw nih" a ta. 24 Chun, Davida chun a nuhmei Bathsheba chu a thlamuon a, a kuomah a lût a, a zâlpui a, naupa a hring a, a hmingah Solomon a sak a, ama chu LALPAN a hmangai a. 25 LALPAN a hmangai leiin zawlnei Nathan kuomah a hminga Jedadia sakh dingin thu a pêk a. 26 Chuong lai chun Joab-in Amon thlahai khawpui Raba a rùn a, lal kul chu a lâk a. 27 Joab chun Davida kuomah mi a tir a, "Raba ka rùn a, an tui lâkna hmun ka lâk ta a. 28 Tu hin sipai dang po po hung khawm la, a khawpui hung inhuol inla, hung la rawh. Chuong naw chun keiin lâng ka ta, hming that hlaw hlau rawi ka tih" a ta. 29 Davida chun a mihai po po chu a khawm a, a'n inthok suok a, an va rùn a, an lâk ta a. 30 Amon thlahai milem biek Milkom an inkhumtir rangkachak lallukhum chu an lâk a, chu taka chun lunghlu khom a thang sa a, a rikzie chu kilogram sawmthum pali lai a nih. Chu chu Davida an inkhumtir a, khawpuia inthok chun râllâk sum tam tak an lâk bok a. 31 A khaw mipuihai chu an man a, thing àttu dâm, hnuoi inlettu dâm, thing phùrtu dâm le têklei siemtu dâmin a sor a. Chuong ang chun Amon thlahai khuo po poa chun Davidan a thaw a, a sipaihai po po leh Jerusalem tieng a kîr nawk ta a.

2 Samuel 13

1 Chuong hun lai chun Davida naupa Amnon chun Tamar a ngaizawng a. Tamar chu Davida naupa Absalom farnu a na, nunghàk hmel tha tak a nih. 2 Amnon chu a farnu Tamar lei chun damnaw khopin a beidong a; ama hlak chu nunghàk thienglâm a ni si a, a chunga thil iemani hang thaw chu a ta dingin thil thei lo tlukin a'n lang a. 3 Amnon chun ruol pakhat a hming Jonadab a nei a, ama chu Davida unaupa Simea naupa a na, mi dawha nei tak a nih. 4 Ama chun Amnon kuomah, "Ieng leia nang lal naupa ni si, a ni têla i hmai a zûr tiel tiel am a na? A san i mi hril nuom naw maw?" a ta. Amnon chun, "Ka unaupa Absalom farnu Tamar ka ngaizawng lei a nih" a ta. 5 Jonadab chun, "Va zâl la, damnaw tehlem thaw rawh. I pain a hung en pha che leh a kuomah, 'Ka farnu Tamar kha hung thei sien, bei fâk ding mi hung pe sien la, ka mithmua ngei fâk ding mi siempèk sien, a kuta mi ngei chu lo fâng ka tih' ti rawh" a ta. 6 Chuongchun, Amnon chu a zâl a, a damnaw tehlem a. Lalin a hung en chun a kuomah, "Lunginsiet takin ka farnu Tamar hung sien la, ka hmua ngei hin bei inhnik tak siem sien la, a kuta mi ngei chu lo fâng ka tih" a ta. 7 Davida chun Tamar kuomah, "I tapa Amnon in tieng fe la, fâk ding va siempèk raw khai" tia hril dingin lal ina chun mi a tir a. 8 Tamar chu a tapa Amnon ina chun a fe a, ama chu a lo zâl zing a. Tamar chun bei phit a lâk a, a hmet a, Amnon hmua chun beipèr a siem a, a ur a. 9 A urna thlènga chun bei chu a va pêk a, sienkhom a fâk nuom naw a. Amnon chun, "Mi po po hin mi suoksan vong raw hai se" a ta, an suoksan ta vong a. 10 Amnon chun Tamar kuomah, "I kuta mi ngei ka fâk theina dingin fâk ding chu pindana hin hung la raw leh" a ta. Tamar chun a beipèr siemhai chu a tapa pindana chun a chawi lût a. 11 Infâktir dinga a kawl hnaia a va fe chun a lo man a, a kuomah, "Ka farnu, hung zàl ve rawh" a ta. 12 Tamar chun, "Ni lo e, ka tapa. Mi tilui naw rawh. Chuong ang thil chu Israel rama hin thaw ding a ni nawh. Hieng ang thil rilo hi thaw naw rawh. 13 Kei hi iem chang ka ta? Vântlâng hmaah iengtin am ka ngha ngam ta ding? Nang khom iem i ni ding? Israelhai laia mi rilo le mi suola ngai hung nîng i tih. Chuleiin, lal be lem la, i mi nei chu sêl chuong naw nih" a ta. 14 Amiruokchu, a thu a ngâithlâk nuom naw a, amanu nèkin a thá a hrât lem si leiin a suollui a. 15 Chu zoa chun Amnon chun Tamar chu theida taktein a theida nawk si a, a ngaizawng laia a ngaizawngna nêk daiin a theidana chu a sosang lem a. Amnon chun, "Tho la, fe hmang dai rawh" a ta. 16 Tamar chun, "Chuong el ding chu ni lo e, hienga indik lo taka i mi'n fètir tum hi ka chunga i thaw nêk khan a tha naw lem hman a nih" a ta. Amiruokchu a thu hril chu a ngâithlâk nuom chuong nawh. 17 Amnon chun ama rongbawltu siehlaw chu a ko a, "Hi nuhmei hi ka kuoma inthokin insuoktir la, kot kal tlat rawh" a ta. 18 A siehlaw chun a'n suoktir a, kot chu a sûng tieng a kal a. Ama chun korfuol mawi taka chei a hâk a, chu chu lal naunu, nunghàk thienglâmhaiin an hâk hlak hrim a nih. 19 Tamar chun a lu-ah vut a phul a, a hâk lai korfuol chei chu a pot thlêr a, a kutin a hmai a hup a, inring taka tap pumin a suok a. 20 A tapa Absolom chun a kuomah, "I tapa Amnon chun a tawkpoi che a ni maw? Ka farnu, to hram hram rawh, i tapa a ni si a. Tuor na taluo naw rawh" a ta. Chuongchun, Tamar chu a tapa Absalom inah mal takin a'n khum hmang ta dai a. 21 Nisienlakhom, lal Davidan chuong thil po po a hang hriet chun a lung a sen hle a. 22 Absalom ruok chun Amnon kuomah a sie a tha ieng khom a hril nuom nawh. A farnu a sukhmingsiet lei chun Absalom chun Amnon chu a theida hle a. 23 Kum hni a'n voi hnungin Absalom chun a beram hmul vawtuhai umna, Efraim-hai ramri bul, Baal Hazor-a chun lal nauhai po po a fiel a. 24 Absalom chu lal kuomah a fe a, "Ngai ta, i siehlaw hin beram hmul a'n vawtir a, lal le a siehlawhai khom i siehlaw thil lawmnaa chun an hung ve thei hràm naw ding maw?" a ta. 25 Lal chun, "Ni lo e, ka naupa, kan rêng chun ni lo e, sukrik taluo rawi kan ti che" a ta. Absalom chun a ngen raka chu a nuom chuong naw a, sienkhom mal a sawm a. 26 Absalom chun, "Chuonga i ti a ni si chun ka unaupa Amnon bêk hi chu hung hràm raw se" a ta. Lal chun, "Ieng leiin am a hung bîk ding?" a ta. 27 Absalom chun a ngèn tlat leiin Amnon le lal nau danghai chu a'n fetir a. 28 Absalom chun a siehlawhai kuomah, "Ngai ro, Amnonin uoiin a'n ruia a hlim lai tak, 'Amnon kha vaw hlum ro' ka ti pha leh that ro. Ti dêr naw ro. Thu ka pêk cheu a ni naw am a ni? Hrât tak le huoisen takin um ro" tiin a hril tawl diem a. 29 Chuong ang chun Absalom siehlawhai chun Amnon chungah an thaw a. Chun, lal nau danghai po chu an tho a, an sabengtung chunga seng an chuong a, an tlân hmang ta a. 30 Lampuia an la thang zing lai chun Davida kuomah, "Absalomin i naupahai po po a that a, pakhat khom hlà a nei nawh" tiin an hril a. 31 Lal chu a tho a, a silfènhai a pot thlèr a, tuongah a zâl a; a siehlawhai po po khomin an silfènhai pot thlèrin a bula chun an ngîr a. 32 Sienkhom Davida unaupa Simea naupa Jonadab chun, "Ka pu chun lal nau tlangvàl po po a that vong ti an hril hi ring naw raw se, Amnon chauh a nih a thi. A farnu Tamar a suolluia inthok khan hieng ang hin thaw a tum hrim a nih. 33 Chuleiin pu, lal chun lal naupahai po po an thi vong ti thuthang hi ring naw raw se, Amnon chauh a nih a thi chu" a ta. 34 Absalom ruok chu a tlân hmang a. Chuong lai chun lal vêngtu tlangvàl chu a hang ngha vêl a, a ngîrna thlang tieng tlâng pang lampuia mi tam tak hung thla chu a hmu a, lal kuoma chun a zu fe a, "Horanaim tieng tlâng panga mi tam tak hung thla ka hmu" tiin a hril a. 35 Jonadab chun lal kuomah, "En ta la, i siehlawin a hril ang char khan lal nauhai chu an hung tlung ta hi" a ta. 36 A hril zo charin lal nauhai chu an hung lût a, inring takin an tap a, lal khom chu a siehlawhai le chun lung na takin an tap a. 37 Absalom chu Gesur lal Amihud naupa Talmai kuoma chun a fe a. Davida chun a naupa chu ni tin a sùn a. 38 Gesura Absalom tlân hmang chu kum thum a va um a. 39 Lal chun Amnon pùr a do zo phing leh Absalom hmu a châk êm êm a.

2 Samuel 14

1 Lalin Absalom a ngai êm êm 2 Chuongchun Tekoa khuoa um nuhmei var tak el chu va thuoi dingin mi a tir a, a kuomah an hung thuoi a. Nuhmei kuoma chun, "Mithi pûr do angin insiem la, lusûn thuom inbel la, ieng khom innàl naw la, nuhmei, ni tam tak mithi pûr do tah angin um rawh. 3 Chun, lal kuomah fe la, ka hril ang che hin va hril rawh" a ta, a hril ding thu chu Joab chun a'n bâ diem a. 4 Tekoa khuoa nuhmei chu lal kuomah a fe a, bawka hnuoi sikin inza takin chibai a bûk a, "Aw lalpa, mi thangpui rawh" a ta. 5 Lal chun, "Iem a na i harsatna?" a ta. Ama chun, "Hmeithai el ka ni a, ka pasal a thi ta a. 6 I bawinu hin naupa pahni a nei a, an pahni chun an lo fènaah an insuol a, theltu ding tu khom an um si naw a, pakhat chun pakhat lem chu a sukhlum a. 7 Tuhin an pahnam po poin i bawinu hi an do hron a, 'A unaupa thattu chu a unaupa a that leia kan that ve theina dingin mi hung pe suok rawh, rohluotu ding chu sukbohmang nghâl kan tih' tiin an mi nor a. Ka'n hnemna meiling nei sun an sukchimit chun, hi hnuoia hin thla nei lo le hming nei loin ka pasal an siem el ding a nih" a ta. 8 Lal chun nuhmei kuomah, "I in tieng kîr nawk ta la, i chungchang thua chun thupêk insuong ka tih" a ta. 9 Tekoa khuoa nuhmei chun, "Aw lalpa, bawsietna maw chu ka chunga le ka pa sûnghai chungah tla sien la, lal le a lalthungpha chun a maw phur naw raw se" a ta. 10 Lal chun, "Tu khomin ieng khom an hril chun, ama chu ka kuomah hung thuoi la, sukbuoi nawk ta naw ni che" a ta. 11 Ama chun, "Ka naupa hi an sukbohmang nawna dingin, thisen phuba la tumtuhai laka vêng him dingin lal chun LALPA Pathien kuomah dawvan mi kàipèk raw se" a ta. Lal chun, "LALPA hringna salin ka hril hi, i naupa chu a samzai pakhat khom hnuoia hin tla naw nih" a ta. 12 Nuhmei chun, "I siehlaw hin ka lalpa, lal kuoma hin thu bau khat chauh hang hril nawk hràm raw se aw" a ta. Lal chun, "Hril ta la" a ta. 13 Nuhmei chun, "An leh ieng leiin am Pathien mihai kal zawnga hieng anga lalin thil poi a thaw? A naupa tlân hmang hung kîr ding a phal si naw chun tuta a thu hril chun lal chu ama le ama thiemnaw changin a'n siem a ni naw maw? 14 Hnuoia tui sukbuok ta hnung rût nawk thei lo anga thi vong ding chu ei ni ngei a. Pathien khomin mithi ta hnung chu a hung thuoi kîr nawk ta ngai nawh. Amiruokchu, lal chun mi tlân hmang chu a hung thuoi kîr nawk thei annawm. 15 Chun, lalpa, ka pu kuoma thu hril dinga ka hung khom hi mihai ka ti lei a nih. Ka lungrilin, 'Lal kuomah hril phot ka ta, lal chun a bawinu hnina chu a lo inhlawtlingtir khiet el thei a. 16 Chun, ka thu mi ngaithlapêkin, LALPA ro mi pêk, kei le ka naupain hluo thei lo dinga mi sukbohmang tumtu lakah a mi san suok el rawi mawh' ka ti a. 17 Chuongchun, i bawinu ta ding hin ka lalpa, ka pu thu chu thlamuongum tak ni sien la, a sie a tha hmu fie thei dingin ka lalpa, ka pu chu Pathien vântirko ang a ni si a. LALPA Pathien chu i kuomah um raw se" a ta. 18 Lal chun nuhmei kuomah, "Thu ka'n don taphot che chu ka lakah ieng khom ip naw raw aw" a ta. Nuhmei chun, "Ka lalpa, ka pu chun hang hril sien tie" a ta. 19 Lal chun, "Hieng thua hin Joab-in thangna a nei hrim hrim am?" a ta. Nuhmei chun, "Ka lalpa, ka pu, i hringna salin ka hril, ka lalpa, ka puin a hril tah chu tu khomin chang tieng amanih voi tieng amanih pumpel thei naw ni hai; a nih, i siehlaw Joab chun a mi tir a, hieng thu po po hi ama mi'n bâ vong a nih. 20 Thil um dàn sukdanglam dingin i siehlaw Joab chun hieng thil hi a thaw a nih. Hi rama thil tlung po po hre fie vong thei dingin Pathien vântirko angin ka pu hi i var si a" a ta. 21 Chun, lal chun Joab kuomah, "A tha chu, thawng ka tih. Tlangvàl Absalom chu va thuoi kîr rawh" a ta. 22 Joab chun hmaia hnuoi sika bokkhupin chibai a bûk a, lal chu mal a sawm a, "Aw lalpa, ka pu, lalpa chun a siehlaw hnina chu a'n hlawtlingtir leiin voisun hin i siehlaw hin i mit ka tlung ti ka hriet tah" a ta. 23 Chuongchun, Joab chu a tho a, Gesur-a chun a fe a, Absalom chu Jerusalemah a hung thuoi a. 24 Lal chun, "Ama in tieng fe sien la, ka hmèl ruok chu hung hmu naw raw se" a ti leiin Absalom chun a in tieng a pan a, lal hmèl chu a hmu ta naw a. 25 Israel mihai po po lai Absalom anga hmèl thata inpâk hlaw tu khom an um naw a, a ke hmawra inthoka a lu sîp chenin soiselna ding hrim a um nawh. 26 A sam a tha êm leiin a rik a, a'n khâttawkin lu a vaw a, a vaw zâtin a sam chu a bûk a, lal bûkna hmanga bûkin kilogram hni a tling hlak. 27 Absalom chun naupa pathum le naunu hmèl tha tak el pakhat Tamar a nei a. 28 Absalom chu lal hmèl hmu loin kum hni zet Jerusalemah a um a. 29 Chun, lal kuoma tir dingin Joab a'n cha a, sienkhom a hung nuom naw a. An cha non a, a la hung chuong naw a. 30 Chu phing leh a siehlawhai kuomah, "Joab lo chu ka lo kawla um a na, barli a chîng a, va rawpêk vong ro" a ta, Absalom siehlawhai chun lo chu an va raw a. 31 Chuongchun, Joab chu a tho a, Absalom inah a fe a, "Ieng leiin am i siehlawhaiin ka lo an raw?" a ta. 32 Absalom chun, "Ngai rawh, ieng leiin am Gesura inthokin ka hung a na? Chu taka chun um zing lang ka ta dingin tha lem ding" tia lal kuoma hril dingin tir che ka nuom a, ka'n cha che a; chuleiin lal hmèl chu mi'n hmutir rawh, bawsiet ka nei chun mi sukhlum el raw se" a ta. 33 Chuongchun, Joab chu lal kuoma chun a fe a, chu thu chu a hril a. Lal chun Absalom chu a ko a, a fe a, a hmaah bawka hnuoi sikin a bokkhup a, lal chun Absalom chu a fawp a.

2 Samuel 15

1 Chuong thil hnunga chun Absalomin ama hmang dingin tawlailir le a hnûktu sakorhai le a zuitu mi sawmnga a buotsai a. 2 Zîng inhma takin a tho a, khawpui lûtna kul kotkhâr bulah a ngîr a, lal kuoma thubuoi hril dinga hung taphot chu a lo ko a, "Khaw lai khuoa inthoka hung am i na?" a lo ti seng a. "I siehlaw hi Israel hnamhai laia mi ka ni ve" an ti pei a. 3 Chu zoah Absalom chun, "Ngai ta, i thu chu a'n dikin a tha ngei a, sienkhom a ngaituotu ding lalin a ruot si naw a ni hi tie!" a lo ti pei a. 4 Absalom bok chun, "Kei dâm hi rorêltuin a mi ruot chu ni sien, thubuoi le thupoi nei taphot chu ka kuomah hung an ta, indik takin ka lo rêlpêk el ding a ni vei leh" a ti zie bok a. 5 Chun, tu khom a hmaah kûna hung hnai taphot chu a kutin a lo ban a, a kuo a, a lo fawp pei a. 6 Lal kuoma thu intlun dinga hung taphot chuong anga a lo thaw pei leiin Absalom chun Israel mihai lungril a hîp ta hle a. 7 Chun, kum lii a hung invoi hnung chun Absalomin lal kuomah, "LALPA kuoma ka thu intiemkamna hlen dingin Hebron khuoah mi'n fetir rawh. 8 Suriaj ram Gesur-a i siehlaw a um lai khan, 'LALPAN Jerusalemah a mi thuoi kîr nawk chun Hebron-ah inthawina inhlàn ka tih' tiin a lo intiem ta si a" a ta. 9 Lal chun, "Thlamuong takin fe rawh" a ta, Hebrona chun a fe ta a. 10 Absalom chun, "Tawtawrawt ri in hriet charin, 'Absalom chu Hebronah lal a nih' ti ro" tia hril dingin Israel mihai po po lai a rûkin mi a tir a. 11 Jerusalema inthoka mi zahni a fielhai chun Absalom chu an zui a, anni chun thil chinchàng ieng khom an hriet ve nawh. 12 Absalomin inthawina a'n hlan lai chun Gilon mi Ahitofel, Davida khawnbawl chu a umna Gilo-a inthokin a'n cha a. A thil phierrûk chu hung hrât peiin a zuitu chu an hung pung ta tuol tuol a. 13 Chun, Davida kuomah mi a hung a, "Israel mihai lungril chu Absalom tieng a thle vong tah" tiin a hung hril a. 14 Davida chun Jerusalema a thoktuhai po po kuomah, "Tho unla, tlân suok ei tiu, Absalomin tu khom mi hlà naw nih. Inrang taka ei suok a ngai. Chuong naw chun mi hung nang hman dingin a suok nghal ring a um a, ei chungah sietna intlunin, kawlhnàmin a khaw phêk hin mi hung sâm rawi a tih" a ta. 15 Lal thoktuhai chun a kuomah, "I siehlawhai hin lalin a ti ang ang chu thaw dingin kan inpei zing a nih" an ta. 16 Chun, lal chu a suok a, a sûnghai po poin an zui a, lal in enkoltu dingin a hmeihai sawm a mâksan a. 17 Lal a hang suok chun mipuiin an zui a, iemani chena hlaa chun an chawl hri phot a. 18 A mihai po po le Keret mihai le Pelet mihai chun an fe pel a, Git mi zaruk ruol, Gath-a inthoka hung zuituhai chu lal hmaa chun an fe a. 19 Lal chun Git mi Itai kuomah, "Ieng leiin am nang hi i hung ve ding? Kîr nawk la, lal Absalom kuoma chun um rawh, nang chu mikhuol, ram dang mi châmbâng i ni hi. 20 Zani ta hung tlung chauh kha i na, voisun hin a suk a tunga mi zui dingin ka phût ve ding che am a ni? Kei ngei khomin ka fena ding chin hrim ka hriet nawh. Kîr nawk la, i mihai hi thuoi rawh. Lunginsietna le ringumna chu i chungah um raw se" a ta. 21 Sienkhom, Itai chun lal kuomah, "LALPA hringna le ka lal hringna sâlin ka hril hi, lal, ka pu hi i umna taphotah thi le thi, dam le dam, i siehlawin um zing a tih" a ta. 22 Davida chun Itai kuomah, "An leh, hma thuoi unla, fe pei ei tiu" a ta. Chuongchun, Git mi Itai le a mihai le sûngkuo an thuoihai chun hma tieng an pan pei a. 23 An liem lai chun a ram phêkin inring takin an ta a. Lal khomin Kidron vadung chu a kân a, thlalèr lam tieng panin mipui chun an zui a. 24 Thiempu Zadok khom anni lai a thang a, a kuoma fe ve Levihai po po chun Pathien Bawm an zawn a. Chun, Pathien Bawm chu an innghat a, thiempu Abiathar chun mipuiin khawpui an suoksan zo vong chenin inthawina a'n hlàn a. 25 Lal chun Zadok kuomah, "Pathien Bawm hi khawpui sûngah zawn kîr nawk ro, Pathien mit ka tlung chun mi thuoi kîr nawk a ta, Pathien Bawm le a umna chu mi'n hmutir nawk a tih. 26 Amiruokchu, 'Nangmaah lawmna hrim ka nei nawh' a ti ruok chun ka chungah a nuom ang anga thaw dingin ka'n pei zing a nih" a ta. 27 Chun, lalin thiempu Zadok kuoma bok chun, "Nang chu zawlnei i nih an naw maw? I naupa Ahimaaz le Abiathar naupa Jonathan hi thuoi la, thlamuong takin khawpui tieng kîr nawk ta ro. Nang le Abiatharin i naupa pahnihai hi thuoi ro. 28 Kei chu chanchin in mi hung inhriettir nawk hma po chu thlalera vadung kaia hin lo um ka tih" a ta. 29 Chuongchun, Zadok le Abiathar chun Pathien Bawm chu Jerusalemah an kîrpui nawk a, chu taka chun a um a. 30 Chuongchun, Davida chun tap malam pei pumin Oliv tlâng chu a pan tung a, a lu a'n khum a, ke lawngin a fe a. Ama le fe mipui po po khom chun lu an inkhum a, an tap malam pei a. 31 Chun, "Absalom thu phierrûkpuitu chu Ahitofel a nih" tiin Davida chu an hung hril a. Chuongchun, Davida chu a tongtai a, "Aw LALPA, Ahitofel thu phierpui chu invêtthlâkah inchangtir dingin ka ngèn che" a ta. 32 Davidan tlâng sîp, Pathien an biekna hmun a hang lawn kai chun Ark mi a hming Husai, a zakuo potthlèr chu hâka, a luah pilvut kai nung el chun a lo tuok a. 33 Davida chun a kuomah, "Ka kuomah i hung chun ka ta dingin phurrik nîng i tih. 34 Jerusalemah i kîr nawk ruok chun Absalom kuomah, 'Aw lalpa, i siehlaw nîng ka tih. Kha hma khan i pa siehlaw ka ni hlak a, tu hin chu i siehlaw ni lem tâng ka tih' ti la, Ahitofel thu phierpui po po sukhrûttu nîng i tih. 35 Chu taka chun i kuomah thiempu Zadok le Abiathar khom an um ve ding a na, lal ina thu suok i hriet po po chu anni kuomah i hril hlak ding annawm. 36 Ngai ta, an naupahai pahni, Zadok naupa Ahimaza le Abiathar naupa Jonathan hai khom an kuomah an um kha. I thil hriet taphot chu mi'n hriettir dingin anni chu i hung tir hlak ding a nih" a ta. 37 Chuongchun, Davida ruol tha Husai chu Absalomin Jerusalem a lût lai chun khawpuiah a hung lût ve ta a.

2 Samuel 16

1 Davidan tlâng sîp a pel hnung hla rak loa chun Mefiboset siehlaw Ziba chun hmu tumin a lo nghâk a. Ama chun bei tluon zahni, grep bawr em tawl phêk zakhat, theichang em tawl phêk zakhat le uoiin pêng khat phur sabengtung iemani zât a thuoi a. 2 Lal chun Ziba kuomah, "Hieng hi ieng dinga i hung chawi am?" a ta. Ziba chun, "Sabengtunghai hi lal sûngkuohai chuongna ding a na, bei tluon le theihai hi tlangvàlhai fâk ding a na, uoiin hi thlalèra chau taphothai dawn ding a nih" a ta. 3 Davida chun, "An leh, i pu tupa kha teh khawla'm iem a chang ta a?" a ta. Ziba chun, "Jerusalemah a um; 'Voisun hin Israel sûngkuoin ka pu ram an mi pêkkîr nawk ding a nih' ti a beisei tlat an nawm" a ta. 4 Lal chun Ziba kuomah, "Mefiboset thil nei po po chu tu hin i ta a ni tah" a ta. Ziba chun, "Inza takin chibai ka bûk che, aw ka lalpa le ka pu, i mit tlunga um pei ka nuom" a ta. 5 Lal Davidan Bahurim a tlung chun Saula sûnghai laia mi, Gera naupa a hming Simei chu a hung suok a, tongsie a'n phur bor bor a. 6 A vêngtuhai chu voi le changah umhai sienkhom Davida le a thoktuhai chu lungtein a dêng a. 7 Simei chun tongsie inphurin, "Fe hmang dai rawh! Fe hmang dai rawh, nang thisen insuo hmang le mi rilopa! 8 A lalna i hlu suok Saula sûnghai thisen phuba chu LALPAN i chungah a hung bun lêt che a, LALPA chun ram chu i naupa Absalom kuomah a pêk tah a ni kha. Thisen insuo hmang mi i ni leiin i sietna i kei dok a ni khah" a ta. 9 Zeruia naupa Abisai chun lal kuomah, "Iengti dana hi ui thi sa hin ka lalpa hi tongsie a'n phur ngam am a na? Fêng ka ta, a lu va tan bong ka tih" a ta. 10 Sienkhom, lal chun, "Nangni Zeruia nauhai le kei hin inangna iem ei nei a? LALPAN, 'Davida saw tongsie inphur rawh' a ti leia a mi'n phur a lo ni lem chun, nang le keiin, 'Ieng leia hieng thil hi i thaw am a na?' ei ti thei ding am a ni?" a ta. 11 Chun, Davida bokin Abisai le a thoktuhai kuomah, "Ka naupa ngei ngei, ka taksa le thisen put ngei hmanin ka hringna lâk a tum chun, hi Benjaminpa lem hin chu nasa nawkzuola mi soisak a tum naw ding am a ni? Tosan ro, LALPAN thaw dinga a hril leia tongsie a mi'n phur a ni chu. 12 Voisuna tongsie a mi'n phur leia ka rinum tuor hi LALPAN hmung a ta, a tha tiengin a mi rul nawk lem el thei bok a nih" a ta. 13 Chuongchun, Davida le a mihai chu an fe pei a, ràl khing tlâng panga chun Simei khom chu a fe a, fe malamin tongsie a'n phur ngat ngat a, lungtein a dêng a, lung thil dàmin a thê bok a. 14 Lal le a kuoma umhai po po chun chau hnêpin Jordan an tlung a, chu taka chun an chawl hadam a. 15 Chuong lai chun Absalom le a zuitu Israel mihai chun Jerusalem an lût a, anni lai chun Ahitofel khom a thang a. 16 Chun, Davida ruolpa Ark mi Husai chu Absalom kuomah a fe a, "Lal chu dam sawt raw se, Lal chu dam sawt raw se" tiin chibai a bûk a 17 Absalom chun Husai kuomah, "Hieng ang hi a ni maw i ruolpa i lunginsiet dàn chu? Iengti dàna i ruolpa kuomah i fe ve naw?" a ta. 18 Husai chun Absalom kuomah, "Fe ve naw ning. LALPA le hieng mipuihai le Israel mihai po poin an thlang thu thuin um ka ta, a kuomah um lem ka tih. 19 Chu bakah, tu rong am a na ka bawl ding? A naupa rong chu ka bawl ding a ni naw am a ni? I pa rong ka bawl ang char khan i rong khom bawl ka tih" a ta. 20 Absalom chun Ahitofel kuomah, "Iengtin am ei thaw ta ding a na? Thurawn mi pe raw leh" a ta. 21 Ahitofel chun, "Lal in nghâktu dinga i pain hmei a mâksanhai hi zâlpui rawh. Chuongchun, Israel mihai po poin i lakah i pa hnàr a kîr ti hung hrieng an ta, i tienga thanghai kut sukhrât sot i tih" a ta. 22 Chuongchun, Absalom ta dingin in chunga chun puon in an kei a, Israelhai po po mithmua chun a pa hmeihai chu a zâlpui ta a. 23 Chuong lai chun Ahitofel thurawn pêk taphot chu Pathien thu ang hiela an ngai a nih. Chuong ang chun Davida le Absalom khomin Ahitofel thu chu an ngai ve a nih.

2 Samuel 17

1 Chuong naw khom chu Ahitofel chun Absalom kuomah thurawn pein, "Mi sîngkhat le sânghni thlang suok ka ta, voizan hin Davida hnot dingin inthok suok ka tih. 2 A chàu lai le a hrât naw lai tak va nangching ka ta, va sukthlabâr ka ta, a kuoma mi um po po tlân hmang an ta, lal chu va that ka tih. 3 I mi zongpa a thi phot chun mipuihai chu tawk poi loin i kuomah hung thuoi kîr nawk el ka tih" a ta. 4 A thil phan chu Absalom le Israel upahai chun tha an ti tlâng a. 5 Sienkhom Absalom chun, "Ark mi Husai khom kha hung ko ro, iem a hril hang ngàithla vèng ei tih" a ta. 6 Husai a hung chun Absalomin, "Ahitofelin hi thurawn hi a mi pêk a. A rot ang hin ei thaw ding? I ngàidân hang hril ve ta" a ta. 7 Husai chun Absalom kuomah, "Tuta tuma Ahitofel thurawn pêk che hi chu a tha nawh. 8 I pa le a mihai hi i hriet a, mi râl hrâng, kolsen tak, phûla savom huoi, a tê lâkpêk ang el an nih. Chu bâkah i pa chu râl bei thiem a na, zânah a sipaihai lai riek teu naw nih. 9 Tu khom hin pûk amanih khaw lai amaniah inbîng a tih. In sipaihai a hung bei hmasa vai chun, a ri hre taphot hril ding chu, 'Absalom zuituhai an that teu' ti ni el a tih. 10 Chuong a ni chun, in sipai huoisen tak hai, sakeibaknei lungril ang put mihai meu khom an lungril zâm a ta, Israel mi po po hlak chun i pa chu sipai huoi tak a ni thu le a kuoma umhai chu sipai huoisen tak tak an nih ti an hriet vong si a. 11 "Ka thurawn pêk ve chu hi hi a nih: Dan-a inthoka Beersheba inkâra Israel mihai po po, tuipui kama tieu zât zeta tamhai chu khawm phot la, indonaah nangma ngeiin hma thuoi rawh. 12 Chuongchun, khaw lai hmuna khom ei tuok fûkna taphotah, hnuoia daidaw tla ang elin, a tuomin tuom khum ei ta, ama le a kuoma umhai po po chu tu khom hla hrim nei nawng ei tiu. 13 Chu el bâkah, khuoah a lût chun, Israel mi po poin hruihruol chawiin chu khuoa chun lût ei ta, a khaw pumin ieng hlek khom màksan lo khopin vadungah hnûk thla vong ei tih" a ta. 14 Chuongchun, Absalom le Israel mi po po chun, "Ark mi Husai remruot chu Ahitofel remruot nêkin a tha lem" an ti a. LALPA chun Absalom chungah sietna an tlun theina dingin Ahitofel thurawn tha tak chu a'n hnawltir a nih. 15 Chuongchun, Husai chun thiempu Zadok le Abiathar kuomah, "Chuong ang khang ang chun Ahitofelin Absalom le Israel upahai rem a ruotpui a, chun, keiin chuong ang khang ang chun rem ka ruotpui bok a. 16 Chuleiin, 'Voisun chu thlalèra vadung kaia dâm riek ta loin kân ngei ngei ro, chuong naw chun lal le a kuoma um po po chu sukbohmang hlau rawi an tih' tiin Davida va'n hriltir vat ro khai" a ta. 17 Jonathan le Ahimaz chu En Rogel-ah an um a. Khawpuia an hung lût tu khomin an hmu chu a tha si naw leiin, an kuomah siehlaw nunghàk tira va'n hriltira, anni chun Davida va hril sawng dingin rem an ruot a. 18 Amiruokchu, tlanglakte pakhatin anni chu a lo hmu a, Absalom a hril a. An pahni chun an tlân hmang nghal a, Bahurim-a mi pakhat, tuola tuikul nei inah an fe a, tuikula chun an lût a. 19 Nuhmei chun tuikul sinin a sìn khum a, a chunga chun bu a em a, tu khom hriet thei a ni nawh. 20 Absaloma siehlawhai chu ina nuhmei kuoma chun an fe a, "Ahimaaz le Jonathan hai kha khaw lai am an um?" tiin an indon a, ama chun "Vadung an kân tah" a ta, an va zong a, sienkhom an hmu zo naw a, Jerusalem tieng an kîr nawk ta a. 21 An liem phing leh tuikula inthokin an hung suok a, lal Davida chu an va hril a, a kuomah, "Suok unla, vadung kân inhmaw ro; hieng ang hin Ahitofel chun thu a phierrûk a nih" an ta. 22 Chuongchun, Davida le a mihai po po chu an suok a, Jordan vadung chu an kân a, khuo a hung var chun a kân lo pakhat khom an um ta nawh. 23 Ahitofel chun a remruot ang an zawm nawh ti a hrietin a sabengtung a buotsai a, a suok a, an khuo tieng a fe a, a sûnghai khawsak dàn ding a rêl fel vong a, a'n awk hlum a, a pa thlàna chun an phûm a. 24 Davida chun Mahanaim a va tlung a, Absalom le Israel mihai po po khomin Jordan chu an kân a. 25 Absalom chun Joab aiin Amasa chu sipai kawmandarah a sie a. Amasa pa chu Jether, Israel mi a na, a nuhmei chu Abigail a nih. Abigail chu Nahas naunu a na, a zuorpuinu chu Joab nu Zerui a nih. 26 Absalom zuitu Israel mihai chun Gilead ramah thanghmun an va khuor a. 27 Davidan Mahanaim a hung tlung chun Amon thlahai khuo Rabaa mi Nahas naupa Sobi le Lo Debara mi Amiel naupa Makir le Rogelima inthoka hung Gilead mi Barzilai hai chun, 28 "Mipuihai chu thlalerah phingtam dangchârin an chau zo tah" an ti leiin puonthuo dâm, thlêng dâm, maihùn dâm, pil bêl dâm, bu dâm, barli dâm, beiphit dâm, zeupuok dâm, bê dam, dailuo dâm, 29 bawngnene dâm, dahi dâm, beram dâm, bawngnene khal tlang dâm Davida le a mihai ta dingin an hung chawipêk a.

2 Samuel 18

1 Davida chun a mihai chu a khawm a, sipai sâng chunga kawmandar le za chunga kawmandar ding a ruot a. 2 Davida chun a mihai chu a tir suok a, hmun thuma thea hmun khat chu Joab-in a'n rawi a, hmun thuma thea hmun khat chu Zeruia naupa Joab unaupa Abisai-in a'n rawi a, hmun thuma thea hmun khat dang chu Git mi Itai-in a'n rawi a. Lal chun mipuihai kuomah, "Keima ngeiin ka fepui ding cheu a nih" a ta. 3 Nisienlakhom, mipuihai chun, "Fe ve lo e khai. Keini hi chu tlân hmang khom ni inlang, mi ûksak rak naw ni hai. A chenve khom lo thi ta inlang, ieng rakah ngai bok naw ni hai. Nang ruok chu keini lêt sînga hlu lem i nih. Chuleiin, khawpuia inthoka i mi lo thangpui hi a tha lem" an ta. 4 Lal chun, "Tha in ti dàn ang tak chu thaw pei ka tih" a ta. Chuongchun, lal chu kul kotkhâr bula chun a ngîr a, mipui chu a za têl tèl le sâng têl tèlin an suok zut zut a. 5 Chun, lal chun Joab le Abisai le Itai hai kuomah, "Keima leiin tlangvàl Absalom chu indoi takin va thaw ro" tiin thu a pêk a. Absalom chungchang thua lalin thu a pêk chu mipui khomin an hriet seng a. 6 Chuongchun, sipaihai chu Israel mihai do dingin indona hmun tieng an pan a, an indona chu Efraim ram ngawpui a nih. 7 Chu taka chun Davida mihaiin Israel mihai chu an hne a, sînghni zet an that a. 8 Chuong lai ram phêka inbei chu an ni leiin kawlhnàma thi nêk hmanin ram ngawpuia thi chu an tam lem. 9 Absalomin Davida mihai a tuok thut chun a sabengtung chungah a chuong a, sabengtung chun saisuo thing buk hnuoiah a tlân lûtpui a, a lu chu thing kaua chun a'n tàng a, hnuoi tawk lo vân tawk loin a'n khai a, a sabengtung hlak chu a tlân pei a. 10 Tuin amanih a hmu a, Joab kuomah, "Ngai ta, saisuo buka Absalom inkhai lai ka hmu" tiin a hril a. 11 Joab chun a hriltu kuomah, "Hmu sia ieng leia sukhlum a, hnuoiah i kei thlâk naw? Chuongchun thaw la chu, tangka sawm le ka kawngchun hi ka pêk ding che a ni bah!" a ta. 12 Mi chun a don a, "Tangka sâng bûk khom mi pe ding ni la, lal naupa chungah kut thlâk naw ning. Kan hrieta ngei nang le Abisai le Itai kuomah, 'Keima leiin tlangvàl Absalom kha tu khomin tawk na naw raw se' tiin thu khom a pêk cheu a ni kha. 13 Lal lakah ieng khom thup thei a ni si naw leiin, a lakah ringum loa a naupa thatin ka hringna sukderthawng ta lang, ka lakah nang i'n thierfihlim nawk dai awm si a" a ta. 14 Joab chun, "I zâi nghâkin um zing thei naw ning" a ta, fei pathum a lâk a, saisuo buka intâng, dama la um zing Absalom lunga chun a sun a. 15 Joab râlthuom chawitu mi sawmin Absalom chu an hung inhuol a, an sun hlum ta a. 16 Chu phing leh Joab chun tawtawrawt a mût a, Israelhai hnottu mipui chu an hung kîr a, an hnot zui pei Joab-in a khap ta si a. 17 Chun, Absalom ruong chu an lâk a, ramngawa khur lien taka chun an dêng lût a, a chungah lung an dêng bum thùr a. Israelhai khom chu mani in tieng seng panin an tlân hmang ta vong a. 18 Absalom chun a dam laiin, "Nau pasal khom ka nei ve si naw leiin ka hming a thi nawna dingin" tiin Lal Ruomah dam lai lung a lo intieng khawm dêr ta a, a lung dêng bùm chu ama hming chawiin voisun chen hin 'Absalom hriet zingna lung bûm' ti a la ni zing. 19 Chun, Zadok naupa Ahimaaz chun, "LALPA chun a hmèlma kuta inthokin a san suok tah ti lal hril dingin tlân ka tih" a ta. 20 Joab chun, "Chu thu chu voisun ni khera nanga tlânpui ding a ni nawh. Ni dangah va hril de ti nih. Lal naupa chu a thi tah leiin voisun chu chanchin ieng khom va hril naw rawh" a ta. 21 Joab chun Kus mik kuomah, "Fe la, i thil hmu hi lal kuomah va hril raw leh" a ta. Kus mi chun Joab chu kûnin chibai a bûk a, a tlân ta nghal a. 22 Chun, Zadok naupa Ahimaz chun Joab kuomah, "Ieng khom hung tlung ding ni sien, Kus mi kha va hnot zui rêng rèng ka tih" a ta. Joab chun, "Ka naupa, lawmman hmuna chi chanchin hawn ding i nei si naw a, ieng leiin am i tlân ve ding?" a ta. 23 Ama chun, "Ieng khom ni sien, tlân ve ka nuom a nih" a ta. Chu phing leh Joab chun, "An leh, tlân ve el rawh"a ta. Ahimaaz chu phaizawl tieng lamah a tlân a, Kus mi chu a lekhêl a. 24 Chun, kul kotkhàr puo tieng le sûng tieng inkâra Davida a'n thung lai chun râlvêngtu chu kul bang sawng chunga chun a hang kai a. A hei ngha vel chun mi pakhat hung tlân nal nal a hmu a. 25 Râlvêngtu chun lal chu a zuk ko a, a thil hmu chu a zuk hril a. Lal chun, "Ama chaua hung a ni chun chanchin lawmum hawn ngei a tih" a ta, ama chun a hung pan hnai tiel tiel a. 26 Chu zo elah râlvêngtu chun mi dang hung tlân a hmu nawk a, kotkhàr vêngtu a zuk ko khêk a, "En ta, ama chaua hung tlàn mi dang ka hmu nawk" a ta. Lal chun, "Ama khomin chanchin lawmum hung hawn ngei a tih" a ta. 27 Râlvêngtu chun, "A hung tlàn hmasa lem saw Zadok naupa Ahimaz hoi ka ti kher el" a ta. Lal chun, "Ama chu mi tha a na, chanchin lawmum a hung hawn hlak a nih" a ta. 28 Chu zo ela chun Ahimaz chu a hung khêk a, lal kuoma chun "Iengkim a tha ie!" a ta. Lal hmaah hnuoi sikin a bokkhup a, a kuomah, "LALPA i Pathien chu chawimawiin um raw se. Lal, ka pu khingtu le a chunga kut thlâk tumtuhai chungah LALPAN hnena a'n changtir che" a ta. 29 Lal chun, "Tlangvàl Absalom a dam de maw?" tiin a'n don a. Ahimaz chun, "I siehlaw Joab-in kei i siehlaw a mi tir lai khan an buoi mur mur ka hmu a, sienkhom ieng chie am a nih ti ka hriet nawh" a ta. 30 Lal chun, "Ka sîra hin hung ngîr phot rawh" a ta, a sîra chun a va ngîr a. 31 Chuong lai chun Kus mi chu a hung tlung ve a, lal kuomah, "Lalpa, ka pu ta dingin chanchin lawmum ka hung intlun ie; i chunga helhai po po phuba chu voisun hin LALPAN a lâkpêk ta che a nih" a ta. 32 Lal chun, "Tlangvàl Absalom chu a dam de maw?" a ta. Kus mi chun, "Lalpa, ka pu hmèlmahai le i sietna zongtuhai po po chu, chu tlangvàl ang chun um vong raw hai se" a ta. 33 Chuongchun, lal chu a beidong hle a. Kul kotkhàr chunga a pindan tieng chun a kai tung a, a tap a, a fe malam chun, "Aw, ka naupa Absalom! Ka naupa, ka naupa Absalom, i aiin thi lem chu ni lang maw! Aw, Absalom, ka naupa, ka naupa!" tiin a ta a.

2 Samuel 19

1 Chun, Joab kuomah, "Lalin Absalom a sùn a, a tap a tap el a nih" ti an hung hril a. 2 "Lalin a naupa lu a sûn" ti sipai po poin an lo hriet chun, chu nia an hnèna chu lu sûnna ni-ah a hung inchang ta lem a. 3 Indonaa tlân hmanghaiin inzak taka khuo an lût ang elin chu ni chun indoa fe hung kîrhai chun dei zotin khawpui an hung lût a. 4 Lal chun a hmai a hup a, "Aw ka naupa Absalom! Aw Absalom ka naupa, ka naupa!" tiin inring takin a tap a. 5 Chun, Joab chu lal inah a fe a, a kuomah, "Voisun hin nang le i naunu le naupahai le i nuhmeihai le i hmeihai hringna sansuoktu, i mihai po po i sukhmaimawk a nih. 6 A theidatu che i hmangai a, a hmangaituhai che i theida a. I kawmandarhai le i mi le sahai hi i ta dingin ieng khom an lo ni nawzie voisun hin i târ lang chieng hle a nih. Mi dang po thi hai sien khom Absalom a dam phot chun i hlim tho dingzie ka hmu tah. 7 Tu hin tho la, va suok la, i mihai va chokphur rawh. LALPA sâlin ka hril hi, i va fe suok naw chun voizân hin mi pakhat khom i kuoma um hmu ta naw ti nih. Chu chu i tleirawl laia inthoka tu chena i chunga vangduoina hung tlung po po laia a zuolkai tak nîng a tih" a ta. 8 Chuongchun, lal chu a tho a, kul kotkhâra chun a'n thung a, "Ngai ta u, lal chu kul kotkhârah a'n thung" tiin mihai an hril dar a, an rêngin lal hmaa chun an hung a. Israelhai ruok chu an in tieng seng an tlân kîr nawk ta a. 9 Hmun tinah Israel thlahai lai nasa takin an insêl a, "Lal chun ei hmèlmahai laka inthokin a mi sanhim a, ama chu Filistinhai kuta inthoka mi sansuoktu a nih. Sienkhom tu hin Absalom leiin a tlân hmang ta a. 10 Ei chunga lal dinga hriek ei nâl Absalom hlak chu indonaah a thi ta bok si a. Iengti leia lal ko kîr thu hi bau khat khom in hril puok naw am a na?" an ti sup sup a. 11 Lal Davida chun thiempu Zadok le Abiathar hai kuomah thu a thon a, "Juda upahai kuomah hieng hin hril ro: 'Israel mihaiin lal thuoi kîr ding thu an hril chun lal kuom a tlung ta si a, ieng dinga nangni hi a in tienga lal thuoi kîr ding thua a vuoicha taka thang in tum am a na? 12 Nangni hi ka unauhai, ka taksa le thisen inzompui ni bok si a, ieng leiin am lal thuoi kîr thuah a awisawt tak ni in tum?' tiin. 13 Chun, Amasa kuomah, "Ka thisen inzompui i ni naw am a ni? Tuta inthoka Joab aia ka sipai kawmandarah ka siem naw che a ni chun Pathienin a law law mi law sien la, chu nêka nasa khom chun mi thaw raw se' a tih va ti rawh" tiin mi a tir a. 14 Chu thu chun Judahai lungril a hne a, lungril hmunkhat an hung put ta a. Lal kuoma chun, "I mihai po po le khan hung kîr nawk ta ro" ti dingin mi an tir a. 15 Chuongchun, lal chu a hung kîr nawk a, Jordan vadung a hung tlung a. Lo hmuok a, lal chu Jordan vadunga thuoi kai dingin Judahai chu Gilgalah an hung a. 16 Bahurim khaw mi, Benjamin hnama mi Gera naupa Simei khom chu Juda mihai le chun Lal Davida hmuok dingin inhmaw takin a hung thla ve a. 17 Simei chun Benjamin mi sângkhat le Saula sûnghai siehlaw Ziba le a naupa sawm le panga le a siehlaw sawmhni a hung thuoi a, Jordan kama lal umna tieng chu inhmaw takin an pan a. 18 Lal sûngkuohai thuoi kai ding le lalin a ti ang ang thaw dingin râl khing tieng kaia chun an kài a. 19 Gera naupa Simeiin Jordan râl a kai chun lal hmaah a bokkhup a, a kuomah, "Ka lalpa chun thiem naw changah mi sie naw hram raw se. Ka lalpa, ka puin Jerusalem a suoksan nia i siehlaw thil thaw suol kha mi hre pêk zing loin, lal chun a lungrilah pai zing naw sien. 20 I siehlaw hin thil suol ka thaw ti ka hriet a, chuleiin voisun hin Josefa sûngkuo laia ka lalpa, ka pu hmuok dinga hung thla hmasa tak ka ni nghe nghe a nih" a ta. 21 Chun, Zeruia naupa Abisai chun, "LALPA hriek nâl tongsie inphurtu a ni leiin Simei hi sukhlum ding a ni naw am a ni?" a ta. 22 Davida chun, "Nangni Zeruia naupahai, nangni mi lo hrietpêk ding ieng am a um a? Voisun hin a mi dotuhai in ni naw am a ni? Voisun hin Israelhai laia mi hrim hrim sukhlum ding an ni am a ni? Voisun hin Israel mihai chunga lal ka ni hi ka hriet naw am a ni?" a ta. 23 Chun, lal chun, "Simei, thi naw top i tih" tiin a kuomah thu a'n khàm a. 24 Chun, Saula tupa Mefiboset khom chu lal hmuok dingin a hung thla ve a. Ama chun lal a fe suok nia inthoka him taka a hung kîr nawk ni chenin a kehai a tuoi nam naw a, a hner hmul a vaw naw a, a silfên khom a sawp bok nawh. 25 Jerusalema inthoka lal hmuok dinga a hung thla chun lalin, "Mefiboset, ka kuomah ieng dinga i hung ve naw?" a ta. 26 Ama chun, "Aw lalpa, ka pu, i siehlaw hi kebai ka ni leiin ka sabengtung chungah chuongin lal chu zui dinga inngai ka ni a, sienkhom ka siehlaw Zibain a mi hlêm a. 27 Ka lalpa, ka pu kuomah i siehlaw hi a hêk bok a, sienkhom ka pu hi Pathien vântirko ang a ni leiin tha i ti ang angin thaw rawh. 28 Ka pu Saula thlahai po po chu ka lalpa, ka pu hmaa hin sukhlum vong ding an ni lai zingin i siehlaw hi thlâithlèng i otpuihai lai i mi'n thangtir a. Chuleiin, lal kuoma hin thil dang phût ngam ziezàng ding awm ka la ni rop am a ni?" a ta. 29 Lal chun a kuomah "Hril tam iem a ngai a? Nang le Zibain ram chu insem dingin thu ka pêk cheu" a ta. 30 Mefiboset chun lal kuomah, "Amain nei vong raw se; lalpa, ka pu chu him takin a hung tlung ta si a" a ta. 31 Gilead mi Barzilai khom lal chu Jordan thuoi kaia a panna ding tienga inthla liem dingin Rogelama inthokin a hung thla a. 32 Barzilai chu upa tak, kum sawmriet mi zet a ni ta a. Mahanaim-a lal a um sùngin a fâk dinghai a lo tum a, mi neinung tak a nih. 33 Lal chun Barzilai kuomah, "Ka kuomah Jerusalem tieng hung kai ve la, ka chawm ding che annawm" a ta. 34 Barzilai chun lal kuomah, "Ieng chen am dam ding ka la ni a, Jerusalema lal kuoma ka hang fe vena ding chu? 35 Tu hin kum sawmriet ka ni ta a, a sie a tha thlier dukdak thei khom ka ni ta'm a ni? I siehlaw hin a fâk a dawn inhnik le inhnik naw khom ka hriet hrang ta'm a ni? Pasal le nuhmei hla sak khom hre thei am ka la ni? Ieng leiin am i siehlaw hi ka lalpa phurrik belsatuah ka thang ding a na? 36 I siehlaw hin lal ruola Jordan kai ve ka tum chauh a nih. Ieng dingin am lal chun chuong ang lawmin that man a mi rul kher ding? 37 Lunginsiet takin i siehlaw hi mi'n kîrtir nawk la, ka nu le pa thlân umna keini khuo ngeiah thi vêng ka tih. Amiruokchu, en ta i siehlaw Kimham hi, lalpa, ka pu kuomah fe ve sien, a chungah tha i ti ang peiin thaw raw khai" a ta. 38 Lal chun, "Kimham chu ka kuomah kai vêng a ta, tha i ti ang peiin a chungah thawng ka ta, thil ieng khom a mi hni taphot chu thawpêk pei ka tih" a ta. 39 Chuongchun, mi po po chun Jordan râl an kai a, chu zoah lal khom chu a kai ve a, Barzilai chu a fawp a, mal a sawm a, ama hmun tieng a kîr nawk ta a. 40 Lal chu Gilgalah a kai a, Kimham chu a kuomah a kai ve a. Juda sipaihai po po le Israel sipai a zâtve chun lal chu an thuoi a. 41 Sawt nawte hnunga chun Israel mi po po chu lal kuomah an fe a, a kuomah, "Iem a ta kan unau Judahai hin an pumbil bîk che a, lal le a sûnghai le Davida mihai po po khom Jordan ràlah an thuoi kai sa vong am a na?" an ta. 42 Chun, Juda mihai chun Israel mihai kuomah, "Lal chu kan inhnaipui a ni lei a nih. Ieng leia hi thila hin in lung a sen am a na? Lal thil nei hi ringa khawsa am kan ni? Keini ta dingin lal thil nei ieng am lâk kan nei ta hlak a?" an ta. 43 Israel mihai chun Juda mihai kuomah, "Lal laka kan chan hi chan sawm a na, chu bâkah Davida hi nangni nêka hauh thei lem dai kan nih. Ieng leia hmusit taka in mi thaw am a na? Lal thuoi kîr nawk thu hi a rot hmasa lemtu kan ni naw am a ni kha?" an ta. Juda mihai hlak chu Israel mihai nêka tong inrum lemah an thang a.

2 Samuel 20

1 Chun, chu taka chun Benjamin hnama mi Bikri naupa a hming Seba, buoina siem ching mi a um a. Ama chun tawtawrawt a mût a, "Davida lakah chan ei nei dêr nawh, Jesai naupa lakah thangna ei nei ve nawh, aw Israel mihai, in in tieng inlawi vong ro" tiin a khêk a. 2 Chuongchun, Israel mihai po po chun Davida an zâmsan a, Bikri naupa seba chu an zui ta hum hum a. Juda mihai ruok chun Jordana inthoka Jerusalem chenin an lal chu an thlathlam nawh. 3 Davidan a lal in a tlung chun in enkol dinga a mâksan a hmei sawmhai chu a thuoi a, vêngtu hnuoiah a khum a, an fâk le dawn a tumpêk a, sienkhom a zâlpui ta naw a, hmeithai anga khawsain an thi chenin a khum hrang tawl tah a nih. 4 Chun, lal chun Amasa kuomah, "Juda mihai ko khawm la, ni thum sûngin nang leh hi taka hin hung inlang ro" a ta. 5 Amasa chu Judahai ko khawm dingin a fe a, sienkhom lalin hun a ruotpêk nêkin a thang sawt a. 6 Davida chun Abisai kuomah, "Bikri naupa Seba hin Absalom nêkin ei poi a tawk nasa lem ding a nih. Chuleiin, i pu mihai hi thuoi la, hnot ro khai; chuong naw chun kul nei khuoa dâm lût hman a ta, ei kuta inthokin suok hlauh rawi a tih" a ta. 7 Chuongchun Joab rawihai, Keret mihai, Pelet mihai le an mi hrâthai po po chu Abisai inrawina hnuoiah Bikri naupa Seba hnot dingin Jerusalema inthokin an inthok suok a. 8 Gibeon lungpui umna an va tlung chun Amasa-in anni chu a lo hmuok a. Chun, Joab chun a râlthuom a hâk a, a chungah kawlhnàm, a pâi chopin a kawngchunah a pai a, a hang lawn chun a kawlhnàm chu a pâia inthokin a hung indok a. 9 Joab chun Amasa kuomah, "Unaupa, i dam de maw?" a ta. Joab chun Amasa chu fawp dingin a kut chang tiengin a khâkhmulah a chel a. 10 Amasa chun Joab kawlhnâm chawi chu a lo ringhla naw a, Joab chun a phingah a sun a, a rîl a hung dawk thla pûr a, sun non ngai loin a thi ta nghal a. Chu zoah Joab le a unaupa Abisai chun Bikri naupa Seba chu an hnot a. 11 Chun, an bula ngîr Joab rawihai laia tlangvàl pakhat chun, "Joab tieng le Davida tienga thang taphot chun Joab zui pei ro" a ta. 12 Lam lailung takah ama thisena inbuol Amasa hmu taphot chu an chawl chat pei ti chu tlangvàl chun a hmu leiin a ruong chu lamliena inthokin phûlah a hnûk phei a, puon a'n khum a. 13 Lamliena inthoka Amasa ruong a son hnung chun Bikri naupa Seba hnot dingin mi po po chun Joab chu an zui ta a. 14 Seba chun Abel le Bet Maaka chena um Israel hnam tinhai ram chu a sir bakah Bikri mihai biel khom a sir a, chuongchun mihai chu an hung pung khawm a, ama chu an zui ta a. 15 Joab sipaihai chu an hung a, Seba chu Bet Maaka-ah an inhuol a. Kul bang hrulah a vêl tuokin hnuoi an dêng pawng a, kul chu sukchim tumin an sut bur bur a. 16 Khuoa inthok chun nuhmei var pakhat hi a hung khêk a, "Joab kha hung ko unla, a kuomah thu lo hril ka tih" a ta. 17 A kuom chu a va pan hnai a, nuhmei chun, "Joab i ni maw?" a ta, ama chun, "Ni e" a ta. Ama chun, "I bawinu thu hril hi ngaithla rawh" a ta, Joab chun, "Ka ngaithlâk annawm" a ta. 18 Nuhmei chun, "Tien lai chun, 'Abel khuoah thurawn va la rawh' an ti hlak a, chuong ang chun thu an sukthlûk hlak. 19 Keini hi Israel mihai laia inremna dit pawl le ringum pawl kan ni a, nang ruok chun Israelhai khaw hlun hi suksiet i tum a ni hi. LALPA ro chu ieng dinga sukram i tum am a na?" a ta. 20 Joab chun, "Chuong ang chu a ni awzawng nawh, sukram amanih suksiet amanih kan tum naw hrim hrim. 21 Chuong ang tieng chu a ni nawh. Efraim tlângrama mi Bikri naupa Seba chun lal dodalin, Davida lakah kut a lek a, ama chu mi pe suok unla, in khuo hi suoksan el kan tih" a ta. Chu nuhmei chun Joab kuomah, "Ngai ta, a lu chu kula hin hung dêng thlapêk kan ti che" a ta. 22 Chuongchun, nuhmei chun a varna hmangin mipui hai kuoma chun a fe a, Bikri naupa Seba lu chu an tan a, Joab umna tieng chun an dêng thlâk a. Chuongchun, tawtawrawt a mût a, mani in tieng seng panin khuoa inthok chun an suok dar ta a. Joab chu lal kuom tieng Jerusalemah a kîr nawk ta a. 23 Joab chu Israel sipai po po chunga hotu a na; Jehoiada naupa Benaia chu Kerethai le Pelethai hotu a na; 24 Adoniram chu sinthawa an sor luihai hotu a na; Ahilud naupa Jehosafat chu chanchin inchiktu le ziektu a na; 25 Seva chu ziektu a na; Zadok le Abiathar chu thiempu an na; 26 Jair mi Ira chu Davida thiempu a nih.

2 Samuel 21

1 Davida inlal laiin a zawnin kum thum tam a tla a. Davida chun LALPA a rawn a, LALPA chun "Saula lei le a sûnghai thisen insuo lei a nih, Gibeon mihai an that si a" a ta. 2 Lal chun Gibeon mihai chu a ko a, a'n biekpui a. (Gibeon mihai chu Israel thlahai ni loin Amor mi la um sunhai an ni lem a, Israel thlahai chun anni chu hum dingin thu an lo inkhàm ta a, sienkhom Israelhai le Judahai ta dinga thahnem a ngai luotah Saula chun sukchimit a tum tawl a nih). 3 Davida chun Gibeon mihai kuomah, "Ieng am ka thawpêk thei ding cheu? LALPA rohai chu mal in sawm theina dingin ieng ang inremna am ka siempêk ding cheu a na?" a ta. 4 Gibeon mihai chun, "Saula le a sûnghaia inthok hin tangkaruo le rangkachak kan ngiet thei naw a, Israel mihai sukhlum theina kan nei bok nawh" an ta. Davida chun, "Ieng am ka thawpêk cheu in nuom a? a ta. 5 Anni chun lal kuomah, "Mi suksetu le Israel ram sûnga hrim hrim um lo dinga mi sukchimit tuma phiertu chu hieng hin thaw la, 6 a naupa pasarihai chu mi pe suok la, LALPA mi ruot Saula umna Gibea khuoah LALPA hmaah khai hlum kan tih" an ta. Lal chun, "Pêng ka ti cheu" a ta. 7 Davida le Saula naupa Jonathanin LALPA hmaa thu an lo intiemkam leiin lal chun Jonathan naupa Mefiboset hringna ruok chu a hla a. 8 Lal chun Aia naunu Rizpa-in naupa pahni Saula a hringpêk Armonia le Mefiboset hai le Meholat mi Barzilai naupa Adriel laka Saula naunu Mikal-in naupa panga a hringpêk hai chu a thuoi a, 9 Gibeon-hai kutah a pêk a, anni chun LALPA hmaah tlânga chun an khai hlum a. Chuongchun, an pasari chun hmun khatah an thi vong a, chu chu bu sîk hun, barli an sîk tan hun vel a nih. 10 Chun, Aia naunu Rizpa, Saula hmei chun saiip a lâk a, bu an sîk huna inthoka ruotui tlâk hun chenin an ruong inkhaina hmun lungpuia chun a umna dingin a zar a, an ruong chu ieng khomin tawk lo dingin sûnah vatehai lakah a vêng a, zânah ramsahai lakah. 11 Chun, Aia naunu Rizpa, Saula hmei thilthaw chu Davida an hril a. 12 Chuongchun, Davida chu a fe a, Jabes Gilead-a inthokin Saula le Jonathan ruro chu a hang inkhawm a (Filistin mihaiin Gilboa tlânga Saula an that hnungin an ruong chu Bet Shan kotthlèrah an khai a, chu taka inthok chun Jabes Gilead mihaiin a rûkin an hang lâk a nih). 13 Davida chun chutaka inthok chun Saula le Jonathan ruro chu a hung chawi a, chu hmuna an thathai po po ru, phum loa umhai chu a'n khawm vong bok a. 14 Saula ru le a nauhai ru chu Benjamin rama Zela khuoa a pa Kisa thlânah an phûm a, lalin thaw dinga a ti ang peiin an thaw a. Chu taka inthok chun a ram chungah Pathien a lungawi ta a. 15 Filistin mihai le Israel mihai chu an hung indo nawk a. Davida chu a mihai leh Filistinhai bei dingin a fe thlâk a, sienkhom a hung chau ta hle a. 16 Chun, Ishbi Benob, mi lien Rafa thlahai laia mi pakhat, a dâr fei hmor zum ringot khom kilogram thum le a chenvea rik chawi le kawlhnàm thar pai chun Davida that a tum a. 17 Nisienlakhom, Zeruia naupa Abisai chun a san a, Filistin mi chu a bei a, a that ta a. A mihai chun Davida kuomah, "Israelhai khawnvar a mit nawna dingin indonaa chu kan kuomah hung thla ve ta dêr naw ti nih" tiin a chungah an inkhàm a. 18 Chuong hun vel lai bok chun Gob khuoah Filistinhai leh an indo a, Husat mi Sibekai chun mi lien naupahai laia mi Safa, Rafa thlaa mi chu a that a. 19 Hmun danga Filistinhai le indonaah Jare Oregim naupa Elbanan, Bethlehem mi chun Goliat unaupal a that bok a, a fei ngul chu puonkhawngna themtlâng tiet a nih. 20 Chun, Gath khuoah indona a um nawk a, chu taka chun pa dung insâng tak el, a kut khing hni ve veah kutpàr paruk le a ke khing hniah kepàr paruk ve ve, a rênga sawmhni le pali nei hi a um a, ama khom chu mi lien laka pieng a nih. 21 Ama chun Israel mihai chu a va deusaw a, Davida unau Simei naupa Jonathan chun a lo that a. 22 Chuong mi palihai chu Gath khuoa mi lien Rafa laka pieng an na, Davida le a mihai kutah an thi ta vong a nih.

2 Samuel 22

1 A hmèlmahai po po kuta inthok le Saula kuta inthoka LALPAN a san suok leiin Davida chun LALPA kuomah hi hla hi a sak a: 2 LALPA chu ka suonglungpui, Ka kulpui le sanhimtu, 3 Ka Pathien, ka suonglungpui, Ka'n bîkna hmun le ka phaw, Mi'n tlantu ki hrêu a nih. Ama chu ka kulpui nghet, Ka'n bîkna le ka himna, Pawngnèktuhai laka inthok, Mi san himtu chu a nih. 4 Inpâk tlàk LALPA ka ko a, Hmèlma lakah a mi humhim. 5 Thina tuifawnin a mi'n huol, Sietna tuiin a mi chim vel; 6 Thlân hruolhruiin a mi vèt a, Ka hmasuon thina châng a nih. 7 Lungzingin LALPA ka ko a, Ka Pathien thangpuina ka ngèn; A tempula inthokin a hriet, Ka tap riin a na a tlung. 8 Hnuoi inhnîngin a'n thin a, Tlâng thuthai chen an inhnìng a, A lungsen leia inhnîng a nih. 9 A hnârah meikhu a suok a, A baua chun kânghmang thei mei, Chokin a'n hlap puot puot a. 10 Vân kei kûrin a hung tum a, Sûm dum chungah a ngîr a, 11 Cherub chungah a chuong a, Thli chu thla zara hmangin, Hrât takin a hung vuong a. 12 Tuomtuah thim a hmang a, Sum tui pai inthim khup chu. 13 Ama vara inthok chun, Kawl a hung inphe zuoi zuoi. 14 LALPAN vânriel inrûmtirin, Chunghnungtak rawl a thangkhawk. 15 A thal chu a hang kâp a, Hmèlmahai an tlân dar a, Têk a'n tlâktir dum dum a, Anni chu a hne zo tah. 16 Aw LALPA, hnâr hnit meu a, I hang hrawk tawl takzet chun, Va tuonghai inlang rawtin, An hung kang zo ta vong a, Hnuoi thuthai khom a'n lang tah. 17 Chunga inthok mi zuk banin, A kutin a mi chel a, Li-a inthok a mi lâk suok; 18 Hmèlma hrât le doral hrânghai, Ka cho ruol lo kuta inthokin, A mi san suok tah a nih. 19 Siet tuok lai mi bei sienkhom, Mi santu chu LALPA a nih. 20 Hmun thawvengah a mi'n nghat a, Ka chungah a lawm leiin, A mi san suok tah a nih. 21 Ka'n dikna phuin lawmman, LALPAN a mi siempêk a, Ka kut a fai ang phuin, Ama chun a mi rul hlak. 22 LALPA ditzawng ka vong a, Pathien invâk hmangsanin, A kal zawng ka thaw ngai nawh. 23 Ka hmaah a dàn ka sie, A thu ka bawsiet ngai nawh. 24 A hmaa dem kai lo din, Suol lakah ka'n thier fihlim. 25 Ka'n dikna ang phu peiin, A mit hmuah poi ieng khom, Ka tawk ve ngai naw leiin, LALPAN lawmman a mi pêk. 26 Ringum lakah i ringum, Mi fel lakah i fel fai, 27 Thienghlim lakah i thienghlim, Mi kawi lakah i khir bok. 28 Inngaitlawmhai i san a, Meng sânghai i suktlawm hlak. 29 Ka khawnvar i nih, Aw LALPA, LALPA chun keimaa thim chu, A mi sukvarpêk hlak si. 30 I thang chun râl nêr ka ta, Ka Pathien zarin an kul, Lawn kaiin lapêk ka tih. 31 Pathien lampui a tha kim, LALPA thutiem a'n khêl nawh, A bêltu ta di'n phaw a nih. 32 LALPA naw Pathien tu am, Ei Pathien naw tu hrim am, Lungpui bêl tlâk an um a? 33 Hrâtna thaa mi'n thuom a, Ka lampui suktluongtu chu, Pathien hi a ni si a. 34 Sazuk zaper anga hrât, Zaper tha hrât mi pein, Hmun sâng lêrah him takin, A mi'n tlattir hlak si a. 35 Ka kut râl do a'n thiemtir, Dâr thalngul ka kuoi kûr thei. 36 Sandamna phawn mi pein, I kut changa mi chelin, I'n phà hnuoina lei chauin, Ropui ka hlaw phà hlak si. 37 Ka lam hraw i mi zaupêk, Ka sir a'n tlêu nawna din. 38 Ka hmèlmahai ka hnot khêl, Ka'n ram hma chun ka kîr nawh. 39 Ka vuok thluk tawl, an op song, Ka bulah an tlu thal phung. 40 Râldo hrât di'n mi'n thuomin, Ka râlhai ka ke bulah, I'n bokkhuptir tawl si a. 41 Ka râlhai i mi'n hnottir a, Ka hmèlmahai ka tukdol tah. 42 Santu koin an khêk chûl, Tu khom hlak an um si nawh; LALPA an ko, a don nawh. 43 Thli lên thei pilvut angin, Anni chu ka rawt nawi a, Kotthlèra chirhak angin, Ka sir sop tawl tah a nih. 44 Mihai lakah mi humin, Hnamhai luah i mi siem a, Ka hriet ngai lo hnam chen khom, Ka khuo le tui an hung ni tah. 45 Ka thu hrea zawm nghalin, Bokkhupin ram dang mihai, Ka hmaah an hung kûn a, 46 An lungril a zâm vong a, Kul a'nthok inthin pumin, An hung suok ta thâm thâm a. 47 LALPA chu a hring zing ie!Ka Lungpui chu inpâk ro!Ka Sandamtu Pathien chun, Chawimawina chu chang raw se. 48 Phuba lapêktu Pathien, Ka hnuoia hnamhai sietu, 49 Hmèlma laka mi humtu, Ka hmèlmahai chunga chun, Nangman i mi hlângkai a, Mi nunrawnghai laka chunNangin i mi san suok tah. 50 Chuleiin, hnam tin lai hin, LALPA i hming chawimawiin, I'n pâkna hla sak ka tih. 51 A lal chu hnèna ropui, Ama chun a'n changtir a, A hmangaina chuoi lo chu, A hriek nâl Davida leA suon le pàrhai chungah, Kumkhuo'n inlangtir a tih.

2 Samuel 23

1 Hienghai hi lal Davida thuhril nuhnung tak chu a nih: Jesai naupa Davida, Chunghnungtakin a chawimawi, Jakob Pathienin hriek a nâl, Israelhai laia zâipu chun hieng hin a hril: 2 "LALPA Thlarau chun a thu, Keima hmangin a hung hril a, A thu chu ka leiah a um. 3 Israelhai Pathien chun a hril, Israelhai Lungpui ngei chun:'Mi chungah indik taka thaw a, Pathien ti puma ro rêl hlaktu chu, 4 Sûm um lo zîng khaw thieng a, Ni var mawi suok ang hi a na, Raw sûr zo khaw inthieng a, Thlai hung har sieu ang a nih. 5 "Ka sûngkuo hi Pathien lakah, Chuong ang chu a ni naw am a ni?Chatuonin thu mi thlungpuiin, Iengkim sukfelin a suknghet a. Mi sandamin ka duthusam, Tinrêng a mi pêk naw dim a ni? 6 Mi suolhai ruok chu hling angin, Hnawma peihawnin um an ta, Kuta lâk khawm thei an ni nawh; 7 Hling tawktu chun thir hriemhrei le Chem sei ngei a hmang lem a, A hmunah an raw hmang hlak". 8 Hienghai hi Davida sipai huoisen le hmingthanghai chu an nih: Takemon mi Jose-Basebet chu sipai hotu lien pathum laia a lu tak a nih. Ama hin tum khata inbeinaah a fei ringotin mi zariet a that. 9 Ama dottu chu Aho mi, Dodai naupa Eleazar a nih. Ni khat chu indo dingin Filistinhai an pung khawm a, an hung cho a, Israel mihai an fe hmang vong tum a ni si leiin Davida le sipai pathum chauin an lo bei a, chuonghai laia pakhat chu a nih. 10 Ama chu a tho a, a kut a kham taluo leia a kawlhnàm a hlàng thei ta naw chenin Filistinhai chu a that ngat ngat a, chu ni chun LALPAN nasa takin a ngampêk a; Israel sipaihai chu a hnungin râllâk sum inchu ding ringotin Eleazar kuoma chun an hung kir nawk a nih. 11 Chu dottu chu Harar mi Age naupa Sama a nih. Lehi khuoa dailuo bilah Filistinhai an pung khawm a, Israel mipuihai chu an tlânsie a. 12 Nisienlakhom, ama chu chu hmuna chun a ngîr a, a vêng tlat a, Filistinhai chu a that ngat ngat a, LALPAN nasa takin a'n ngamtir a. 13 Busik hun lai hin sipai huoisen sawmthum thlang suok laia pathum chu Davida kuomah Adulam pûkah an fe a, Filistin mihai chu Refaim Ruomah an inkul a. 14 Chuong lai chun Davida chu kulah a um a, Filistin sipai pawl khat chu Bethlehemah an inkul a. 15 Davida chun tui a châk êm êm el a, "Bethlehema tuikul tui, kul kotkhâr bula um kha dawn dinga mi chawipêk ding um hai sien la chu aw" a ti vong vong a. 16 Sipai huoisen pathumhai chun Filistin sipaihai riebûk chu tawn tlangin, kul kotkhàr bula um Bethlehem tuikula tui chu an hang chawi a, Davida kuomah an fepui a, sienkhom dawn loin LALPA ta dingin a bun thlâk ta lem a. 17 "Aw LALPA, hi hi chu thaw naw top ka tih; thi huoma fehai thisen chu ka dawn ding am a ni?" a ta, chu lei chun a dawn nuom naw a nih. Chuong thilhai chu mi huoisen pathumhai chun an thaw a nih. 18 Zeruia naupa Joab unaupa Abisai chu mi huoisen sawmthum laia hotu tak a nih. Ama chun a feiin mi zathum a bei a, a sunhlum vong a, anni sawmthum lai chun hming that a hlaw chungchuong a. 19 Anni sawmthumlai chun chawimawi a phu bîk hrim a ni naw am a ni? Amiruokchu, mi huoisen pathum an tihaii lai chun tiem sa a ni ve nawh. 20 Kabzeel mi huoisen naupa Jehoiada naupa Benaia, thil nasa tak tak thawtu chun Moab mi huoisen pahni a that a, chu zoah a fe thlâk a, vur tlàk hun lai hin pûka intom sakeibaknei a that nawk a. 21 Chun, Aigupta mi lien tak el a that bok a. Aigupta pa chun fei a chawi a, Benaia chun hmol chau chawiin a zu pan a, a fei chu a lâkpêk a, ama fei ngei chun Aigupta mi lien chu a sunhlum a. 22 Chuong ang thil chu Jehoiada naupa Benaia chun a thaw leiin mi huoisen sawmthumhai lai chun hming that a hlaw a. 23 Mi sawmthumhai nêk chun chawimawi chungchuong a ni hrim a, sienkhom mi huoisen tak pathumhai lai chu tiem sa a kai phâk ve nawh. Davidan ama vêngtuhai hotuah a sie a. 24 Mi huoisen sawmthum laia thanghai chu: Joab unaupa Asahel hai, Bethlehem khuoa mi Dado naupa Elhanan hai, 25 Harod mi Sama hai, Harod mi Elika hai, 26 Pal mi Helez hai, Teko mi Ikes naupa Ira hai, 27 Anathot mi Abiezer hai, Husat mi Mebunai hai, 28 Aho mi Zalmon hai, Netofat mi Maharai hai, 29 Netofat mi Baana naupa Heled hai, Benjamin mi Gilead-a inthoka hung Ribai naupa Ithai hai, 30 Pirathon mi Benaia hai, Gaash varuoma mi Hidai hai, 31 Arbat mi Abi-Albon hai, Barhum mi Azmavet hai, 32 Salbon mi Eliaba, Jasena nauhai laia mi Jonathan hai, 33 Harar mi Sama hai, Harar mi bok Sarar naupa Ahiam hai, 34 Maakat mi Ahasbai naupa Elifelet hai, Gilon mi Ahitofel naupa Eliam hai, 35 Karmel mi Hezro hai, Arba mi Parai hai, 36 Zoba khuoa mi Nathan naupa Igal hai, Gad mi Bania hai, Hagri (Hagadi) naupa hai, 37 Amon mi Zelek dàm, Zeruia naupa Joab râlthuom chawitu Beerot mi Naharai hai, 38 Jatir mi Ira le Gareb hai, Hit mi Uria hai an nih. Hienghai hi sipai huoisen hmingthang an na, an rêngin sawmthum le pasari an nih. 39 (A um nawh)

2 Samuel 24

1 Chun, LALPA lungsenna chu Israelhai chungah a hung tuong nawk thut a. An chunga buoina intlungtir dingin Davida lungril a chok tho a, "Fe la, Israelhai le Juda mihai tiem vong rawh" a ta. 2 Chuongchun, lal chun Joab le sipai kawmandarhai kuomah, "Fe unla, Dan-a inthoka Beersheba chen inkâra Israel mi râl do thei chin ieng zât am an um ti ka hriet theina dingin va tiem vong ro" a ta. 3 Joab chun lal kuomah, "LALPA i Pathien chun i mipuihai a lêt zain sukpung sien la, chu chu lalin a mit ngeiin hmu hman raw se. Amiruokchu, ieng leiin am ka pu, lal hin hieng thil hi i thaw chàk a na?" a ta. 4 Joab le sipai kawmandarhai thu nêkin lal thu chu a hrât lem si leiin Israelhai tiem dingin lal chu an suoksan ta a. 5 Jordan ràl an kâi a, Gad-hai ram tieng panna, ruom lailunga khuo Aroer sim tieng chun an inkul a, Gad ram chu fe thlengin Jazer chen an fe a. 6 Chun, Gilead ram le Tahtim Hodshio bielah an fe nawk a, chu taka inthoka fe peiin Sidon vèla Dan Jan an tlung a. 7 Chun, Tura kul an va tlung a, Hiv-hai le Kanan mihai khuo po po an sir a, chu zoah Judai ram sim tieng Beersheba-ah an fe a. 8 Judai ram po po an fang suok hnung chun, thla kuo le ni sawmhni hnungah, Jerusalemah an hung kîr nawk a. 9 Joab chun mihriem an tiem zât chu lal kuomah a ripawt a, kawlhnàm chawia râl do thei chin Israel rama mi chu nuoi riet an ni a, Judai rama mi chu nuoi nga an nih. 10 A mihai a tiem zo hnungin Davida chun lungrila inthiemnawna nasa tak a hung nei ta a. LALPA kuomah "Ka thilthawa hin nasa takin ka suol a nih. Tuhin aw LALPA, i siehlaw thiemnaw changna hi la hmangpêk hrâm dingin ka ngên che. Thil invètthlâk tak ka lo thaw a nih" a ta. 11 A zînga chun Davida tho hmain LALPA thu chu Davida zawlnei, zawlnei Gad kuomah a hung tlung a: 12 "Fe la, hieng ang hin Davida hril rawh: 'Hi hi LALPA thu chu a nih: thil kong thum thlang ding ka pêk che laia mi hi i chunga tlung dingin pakhat thlang rawh' a tih" tiin. 13 Chuongchun, zawlnei Gad chu Davida kuomah a fe a, a hril a, "I rama hin kum sarip tàm intlâktir am, thla thum sûng i hmèlmahai hnot lènga um am, an naw leh i rama ni thum sûng hripui inlêngtir, a ieng am i thlang a? Tu hin inngaituo la, a mi tirtu kuoma ka hril ding thu tlûkna siem la, mi hril rawh" a ta. 14 Davida chun Gad kuomah, "Ka bei a va hang dong ngei de! LALPA kutah tlu lût phot ei tiu, zangaina a hau si a. Mihriem kuta chu mi pe lût naw hram rawh" a ta. 15 Chuongchun, chu tûka inthoka ni thum sûng chu Israel mihai chungah LALPAN hripui a'n lèngtir a, Dan le Beersheba inkârah mi sîngsari an thi a. 16 Chun, vântirkoin sukse dinga Jerusalem tieng bân a phar lai chun, an siet tuok ding laka chun LALPA lung a na em leiin kut a'n hnûkkîrtir a, mipuihai hremtu vântirko kuoma chun, "A hun tah! I kut kei kîr ta rawh" a ta. Chu lai chun LALPA vântirko chu Jebu mi Arauna hrizawla ngîr a nih. 17 Davidan mi sukhlumtu vântirko a hmu chun LALPA kuomah, "Thilsuol thawtu chu keima hi ka na, ka thaw indik naw a nih. Mi danghai hi chu beram ang mei mei an nih. Iem suol thaw an nei hrim a? I kut chu kei le ka sûnghai chunga hin thlâk lem rawh" a ta. 18 Chu ni chun zawlnei Gad chu Davida kuomah a fe a, "Fe tung la, Jebu mi Arauna hrizawlah LALPA ta dingin maichâm hang siem rawh" a ta. 19 Chuongchun, LALPAN Gad hmanga thu a pêk angin, Davida chu a fe tung a. 20 Chun, Arauna chu a ngha vel a, ama tieng pana hung lal le a mihai chu a hmu a, a suok a, a hmaah hnuoi sika bokkhupin lal chu chibai a bûk a, 21 Arauna chun, "Ieng leiin am ka lalpa, ka pu chu a siehlaw kuomah a hung el am an ta le? a ta. Davida chun, "Mipuihai laka hri a'n kieng theina dinga LALPA ta dinga maichâm siemna ding i hrizawl inchaw dinga hung ka nih" a ta. 22 Arauna chun Davida kuomah, "Ka pu, ka lal chun awm a ti ang ang chu la sien, inthawina chu inhlàn raw se. En ta, pumraw thilhlâna ding bawngchal le thing ti ding hrizawl dâp thingphêk le bawng ringkolhai khom a um annawm. 23 Aw lalpa, Arauna chun hieng po po hi lal a pêk vong a nih" a ta. Chun, Arauna bok chun lal kuomah, "LALPA i Pathien chun lo pom che raw se" a ta. 24 Sienkhom lal chun Arauna kuomah, "Ni lo e, a man pêk ngeiin ka'n chawk ding a nih. Ieng khom sèng loin LALPA ka Pathien hmaah pumraw thilhlân inhlàn naw top ka tih" a ta. Chuongchun, hrizawl le bawngchalhai chu tangkaruo shekel sawmnga pein Davida chun a'n chawk a. 25 Chu taka chun Davidan LALPA ta dingin maichâm a siem a, pumraw thilhlân le inremna thilhlân a'n hlàn a. Chuongchun, LALPA chu a ram chungah a lungawi a, Israel rama inthokin hri inlêng chu a'n kieng ta a.

1 Kings 1

1 Lal Davida a hung upat hnung le tar tieng chun puon an inthuo teu khomin a pang a lum thei chuong dêr naw a. 2 A siehlawhai chun, "Lal enkoltu ding le dontu ding nunghak thienglàm zongpêk ei tiu khai. Ama'n zâlpui sien la, ei pu pang chu hung lum el a tih" an ta. 3 Chuongchun, Israel ram sûng po poa chun nunghàk hmèl tha an zong a, Sunam mi nunghak hmèl tha deu el Abishag an hmu a, lal kuomah an hung thuoi a. 4 Nunghàk hmèl tha tak el a na, lal chu a enkol a, a um ngha a, sienkhom lal chun a pawl nawh. 5 Chun, Hagit laka Davida naupa Adonija chun, "Kei hi lala um ding tak chu ka nih" a ta, a hmang dingin tawlailir le sakorhai a buotsai a, a hmaa tlântu ding mi sawmnga a ruot bok a. 6 A pa chun, "Ieng leia hieng thil hi i thaw am a na?" tiin a lo inrol chuong nawh. Ama chu Absalom sang, a dottu char, tlangvàl hmèl tha tak a nih. 7 Adonija chun Zeruia naupa Joab le thiempu Abiathar hai chu a rawn a, ama tieng an thang a. 8 Sienkhom thiempu Zadok hai, Jehoiada naupa Benaia hai, zawlnei Nathan hai, Simei hai, Rei hai le Davida vêngtu mi huoisenhai ruok chun Adonija chu an zui nuom ve nawh. 9 Adonija chun beram le bawng, a ran chawm thauhai chu En Rogel bula um Zohelet lungpuia chun a that a, inthawina a'n hlàn a, chu taka chun lal nau, a unauhai po po le Judai rama lal khawnbawlhai po po chu a fiel khawm a, 10 sienkhom zawlnei Nathan hai, Benaia hai, lal vêngtu mi huoisenhai le a unaupa Solomon hai ruok chu a fiel ve nawh. 11 Chun, zawlnei Nathan chun Solomon nu Bathseba kuomah, "Ei pu Davida hriet loin Hagit naupa Adonija chu lalin a um tah ti i lo hriet ve am? 12 Tu hin nangma him dàn ding le i naupa Solomon him thei dàn ding chu hril ka ti che. 13 Lal kuomah lût la, a kuomah, 'Aw lalpa, ka pu, i naupa Solomon hi i hnunga lal hung ni ngei ding le i lalthungpha hung hluo ngei dingin i bawinu kuomah inkhâm meuin thu i tiem tah a ni naw am a ni? Iem a ta tu hin Adonija chu lalah a um el ta hi?' va ti rawh. 14 Lal i biek lai zingin kei khom hung lût vèng ka ta, i thu hril chu hung namnghet ka tih" a ta. 15 Bathseba chu lal pindana chun a va lût a, lal chu a lo tar kuong el ta a, Sunam nunghak Abishag chun a rong a lo bawl a. 16 Bathseba chun dingthathuonin lal chu chibai a bûk a, lal chun, "Ieng am i dit a?" a ta. 17 Ama chun, "Ka lalpa, nangma ngeiin i siehlaw kuoma hin LALPA i Pathien sâlin, 'I naupa Solomon chu ka hnungah lal hung nîng a ta, ka lalthungpha hung hluong a tih' tiin inkhâm meuin thu i tiem a. 18 Ngai ta, tu hlak hin Adonija chu lalah a hung um ta a, chu chu ka pu, ka lalpa hin i la hriet si nawh. 19 Ran tam tak, bawng le beram thau tak tak inhlànin, lal naupahai po po le thiempu Abiathar le i sipai kawmandar Joab hai a fiel a, i siehlaw Solomon ruok chu a fiel sa ve nawh. 20 Ka pu, ka lalpa hnunga hin lalthungphaah tu am hung inthung a ta ti i puong hun ding chu Israelhaiin an nghâk thup el a nih. 21 Chuong naw chun hieng hi hung nîng a ta, ka lalpa hi a pi le puhai kuoma a chawl ve pha chun, kei le ka naupa Solomon hi thil suol thawtuah an mi ngai el ding a nih" a ta. 22 Chuonga lal a biek lai zing chun zawlnei Nathan chu a hung lût a. 23 "En ta, zawlnei Nathan khom a hung ve ie" tiin lal chu an hril a. Lal kuom a va tlung chun lal hmaah hnuoi sikin a bokkhup a. 24 Nathan chun, "Aw lalpa, ka pu, 'Ka hnungah Adonija hi lalin thung a tih i ti am a ni? 25 Voisun hin a fe thlàk a, ran thau thau, beram le bawng tuoi a that teu a, lal naupahai po po, sipai lalhai le thiempu Abiathar hai a fiel a, fain an dawn tlàng a, 'Pathienin Adonija huolhim raw se' tiin an khêk ruol a nih. 26 Amiruokchu, i siehlaw ngei ngei kei le thiempu Zadok hai, Jehoiada naupa Benaia hai le i siehlaw Solomon hai ruok chu a mi fiel ve nawh. 27 Hi hi lalpa ka pu thua a thaw a ni si chun lalpa ka pu hin a hnunga lalthungphaa thung ding chu a tu tak hi'm a na ti i siehlawhai hi a lo hril ve naw a ni maw?" a ta. 28 Chu phing leh lal Davida chun, "Bathseba kha hung ko lût ro" a ta. Chuongchun, a hung lût a, lal hmaa chun a ngîr a. 29 Lal chun, "Buoina po poa inthoka ka hringna san suoktu LALPA hringna sâlin ka hril a, 30 LALPA Israelhai Pathien hming sâla, 'I naupa Solomon hi ka hnungah lal la ni ngei a ta, ka hmunah lalthungphaa hin la'n thung a tih' tia thu ka'n khàm ang khan voisun ngei hin ka hlen suok ding a nih" a ta. 31 Bathseba chun hnuoi sika bokkhupin lal chu chibai a bûk a, "Ka pu le ka lal Davida hi kumkhuoin dam zing raw se" a ta. 32 Lal Davida chun, "Thiempu Zadok le zawlnei Nathan le Jehoiada naupa Benaia hai kha hung ko lût ro" a ta, a hmaa chun an hung a. 33 Lal chun an kuomah, "In pu khawnbawlhai thuoi unla, ka naupa Solomon hi ka sabengtung chunga ngei inchuongtir unla, Gihon-ah zu fepui ro. 34 Chu taka chun thiempu Zadok le zawlnei Nathan haiin Israelhai lal dingin hriek nâl hai sien la; chun, tawtawrawt mût unla, 'Lal Solomon dam sawt raw se' tiin khêk ro. 35 Ama chu hung zui tung inla, ka lalthungphaa hin inthungtir unla, ka aiin ro rêl raw se. Israelhai le Judahai chunga rorêltu dingin ka ruot a nih" a ta. 36 Jehoiada naupa Benaia chun, "Amen! Ka pu, ka lalpa thu chu LALPA a Pathien khomin pom ngei raw se. 37 LALPA chu ka pu, ka lalpa kuomah a um hlak ang bokin Solomon kuoma khom um sien la, ka pu, lal Davida lalthungpha nêka ropui lemin a lalthungpha chu siem raw se" a ta. 38 Chuongchun, thiempu Zadok hai, zawlnei Nathan hai, Jehoiada naupa Benaia hai, Keret mihai le Pelet mihai chu an zu fe a, Solomon chu Davida sabengtung chungah an inchuongtir a, Gihon-a chun an thuoi a. 39 Thiempu Zadok chun hriek siena fungki chu hmun thienghlima puon ina inthok chun a làk suok a, Solomon chu hriek a nàl a. Chun, tawtawrawt an mût a, mi po po chun, "Lal Solomon dam sawt raw se" tiin an khêk a. 40 Mipuihai chun ama chu an zui tung a, nasa taka lawmin theihlehai an mût a, an ri chun hnuoi a nghor nghing a. 41 Adonija le a mi fielhaiin ruoi an kîl zo tawm chun ri an hriet a. Joab-in tawtawrawt ri a hriet chun, "Khawpui sûnga ri so veng vung chu iem an ta leh?" a ta. 42 A hril lai zingin thiempu Abiathar naupa Jonathan chu a hung tlung a. Adonija chun, "E khai, hung lût rawh. Nang ang mi fel chun chanchin lawmum hung hawn ngei i tih" a ta. 43 Jonathan chun, "Ka hawn naw top el. Ei pu, lal Davidan lalah Solomon a sie tah annawm. 44 Solomon zui dingin thiempu Zadok hai, zawlnei Nathan hai, Jehoiada naupa Benaia hai, Keret mihai leh Pelet mihai chu a tir a, lal sabengtung chungah an inchuongtir a, 45 thiempu Zadok le zawlnei Nathanin Gihon hmunah lal dingin hriek an nàl a, chu taka inthok chun hlim takin an hung kîr a, an hlim ri chun khawpui a thangkhawk a, chu ri chu a nih in ri hriet chu. 46 Chun, Solomon chu tu hin a ram lalthungphaah a thung ta bok. 47 Lal khawnbawlhai chun Davida chu an hung lawmpui a, 'I Pathienin i hming nêkin Solomon hming chu suktha lem sien la, i lalthungpha nêkin a lalthungpha chu ropui lemin siem raw se' an ti a. Ei pu lal Davida khomin a khumah kûnin Pathien a chawibiek a, 48 'LALPA, Israelhai Pathien, ka lalthungphaa inthung ding mi ka hmu phâk ngeia voisuna hung ruottu chu inpâkin um raw se' a ti a nih" a ta. 49 Chu thu chu an hrietin Adonija mi fielhai po po chu an ti ta hle a, an tho a, an zàm dar ta vong a. 50 Adonija chun Solomon a ti leiin a tho a, maichâm ki a va chel a. 51 Chun, lal Solomon kuomah, "Adonija chu a ti taluo a, 'Lal Solomon chun a siehlaw hi kawlhnàma sukhlum lo dingin inkhâm meuin voisun hin thu tiem raw se' tiin maichâm ki a chel el a nih" tiin an va hril a. 52 Solomon chun, "Mi ringum a nih ti a'n langtir phot chun a sam zâi khat khom hnuoiah tla naw nih; amiruokchu, a suol ti hriet suok a ni ruok chun thìng a tih" a ta. 53 Chuongchun, Solomon chun mi a tir a, maichâma inthokin an hung thuoi thlâk a, lal Solomon chu chibai a bûk a, Solomon chun, "I in tieng inlawi ta rawh" a ta.

1 Kings 2

1 A thi a hung hnai chun Davidan a naupa Solomon kuomah thuro a sie a: 2 "Leilunga chêng po po khawsak dàn angin ka fe ve hun a hung tlung têp ta a. Hrât takin um la, patling takin khawsa la, 3 LALPA i Pathienin lampui hraw ngei dinga a ruothai chu hraw la, i thilthaw iengkima le i fena taphotah i hmuingil theina dingin Mosie Dàna chuong thupêk le dânhai chu vong tlat rawh. 4 Chuonga i khawsa chun LALPAN ka kuoma, 'Ka hmaah fimkhur taka i thlahai an khawsa a, lungril le thlaraua ringum taka ka lampui an hraw chun, Israelhai lalthungphaa inthung ding mi invai ngai naw ti nih' tia a lo tiem chu LALPAN vong zing a tih. 5 "Zeruia naupa Joab-in keima chunga le Israel sipaihai kawmandar, Nera naupa Abner le Jether naupa Amasa chunga a thaw dânhai kha nang khomin i hriet a. Indo lai ang elin muongleiah anni chu a that a, ama kawngchun le kekokah an thisen a'n kaitir ta vong a nih. 6 I rem hriet dàn ang peiin ama chu hung thaw la, amiruokchu a luah kel sam to rak khopin thlamuong takin thlân muolah inliemtir naw rawh. 7 "Gilead mi Barzila nauhai chunga ruok chu lunginsietna inlangtir la, i dawkâna thlaithlêng kîltuhai lai inthangtir rawh. I unaupa Absalom laka ka râltlân laia mi tan tlattu an nih. 8 "Chun, Bahurima inthoka hung Benjamin mi, Gera naupa Simei, Mahanaim-a ka fe tuma tongsie tinrêng mi'n phurtu kha nangni lai hin a um a nih ti hre zing rawh. Jordana a mi hung hmuok tumin LALPA hmingin, 'Ka kawlhnàm chun that naw ning chengah' tiin thu ka'n khàm a. 9 Tu ruok hin chu, thiem changin insuo naw rawh. Pa var tak i ni leiin a chunga i thaw ding chu hre el i tih. A lu tuok chu thisen leh thlânah vui liem rawh" a ta. 10 Chun, Davida chu a thlatuhai kuomah a chawl a, Davida Khawpuia chun an phûm a. 11 Israelhai chungah kum sawmli ro a rèl a, Hebrona inthokin kum sari le Jerusalema inthokin kum sawmthum le kum thum. 12 Chuongchun, Solomon chu a pa Davida lalthungphaa chun a thung a, a lalna chu det taka suknghetin a hung um ta pei a. 13 Chun, Hagit naupa Adonija chu Solomon nu Bathseba kuomah a fe a, Bathseba chun, "A tha tienga hung am i ni?" a ta, ama chun, "A tha tienga hung ni e" a ta. 14 Ama bok chun, "I kuomah hril ding ka nei a nih" a ta, Bathseba chun "Hril ta la" a ta. 15 Ama chun, "I hriet tah angin ram hi ka ta a ni tah zet a, Israelhai po po khomin keima hi lal dinga an mi beisei zing ka ni a, sienkhom thil a hung inthlâk thut a, ram chu ka unaupa kutah a um nawk ta a, LALPAN a pêk a nih. 16 Tu hin thil pakhat chauh hni che ka nuom a, chu chu mi'n hlawsamtir lul naw rawh" a ta. Ama chun, "Hni ta la" a ta. 17 Adonija chun, "Lunginsiet takin Lal Solomon mi hnipêk la, Sunam nunghak Abishag hi ka nuhmei dingin mi pe raw se. Nanga hni chu sêl ngam naw nih" a ta. 18 Bathseba chun, "Ni e, lal kuomah hung hrilpêk ka ti che" a ta. 19 Bathseba chu Adonija thil hni hrilpêk dingin lal Solomon kuoma chun a fe a. Lal chun lo lawm lût dingin a ngîr a, a hmaa chun a kûn a, a lalthungpha chu a nu bulah a'n son hnaitir a, a thung a, a chang tieng chun a nu chu a'n thungtir a. 20 Ama chun lal kuomah, "Thil chikte hni ding che ka nei a, mi'n hlawsamtir lul naw rawh" a ta. Lal chun a kuomah, "Hni ta la, nu, hnawl naw top ka tih" a ta. 21 Ama chun, "Sunam nunghak Abishag hi i unaupa Adonija nuhmei dingin inneitir rawh" a ta. 22 Lal Solomon chun a nu kuomah, "Ieng dinga Sunam nunghak Abishag chu Adonija ta dinga i hnipêk am an ta a? Chuong ang thil i hnipêk ta rau rau si chun ram khom hi hnipêk law law ta la, ka upa a ni hi teh- ama le thiempu Abiathar le Zeruia naupa Joab hai ta ding chen khomin tie!" a ta. 23 Chun, LALPA hming sâlin Solomon chu a'n khàm a, "Hi a thil hni hi Adonijain a thipui naw chun Pathienin a law lawin mi law sien, chu nêka nasa khom chun mi thaw raw se. 24 Tu hin ka pa Davida lalthungpha nghet taka mi'n hluotirtu le a tiem tah anga kan sûngkuo lal sûngkuoa mi'n dinpêktu LALPA hringna chu sâlin ka hril, Adonija chu voisun ngei ngei hin sukhlum nîng a tih" tiin. 25 Chuongchun, lal Solomon chun Jehoiada naupa Benaia chu a tir a, ama chun Adonija chu a va bei a, a that a. 26 Thiempu Abiathar kuoma chun lalin, "Anathot khuoa i in le lo umna tieng kîr dai rawh. Thi tlâk i nia chu ka pa Davida hmaah LALPA Pathien Bawm i lo zawn tah hlak leiin le ka pa rinum tuorna po poah i lo tuor ve ta hlak leiin, tu hin chu la sukhlum nawng ka ti che" a ta. 27 Chuongchun, LALPAN Silo khuoa Eli sùngkuo chungchâng thu a hril kha a hung tlung kim a, Solomon chun Abiathar chu thiempu a ninaa inthokin a bàn a. 28 Joab-in chu thu chu a lo hrietin, Absalom tieng thang naw sien khom Adonija phierpuitu a ni leiin, LALPA puon inah a tlân lût a, maichâm ki a chel a. 29 LALPA puon inah tlân lût a, Joab-in maichâm ki a chel thu chu Solomon an hril a. Solomon chun Jehoiada naupa Benaia chu a ko a, "Fe la, va sât hlum rawh" a ta. 30 Chuongchun, Benaia chu LALPA puon ina chun a lût a, Joab kuomah, "Lalin hung suok rawh a ti che a nih" a ta. Ama chun, "Suok lo e, hi taka hin thi el ka tih" a ta. Joab-in a lo don dàn chu Benaia chun lal kuomah a ripawt a. 31 Lal chun Benaia chu thu a pêk a, "A ti ang tak chun thaw rawh. Sât hlum la, phûm hmang rawh, a san um dêr loa Joab-in thisen a'n suona maw laka inthoka kei le ka pa sûnghai hi i sukfihlim theina dingin. 32 Ama nêka fel lem le tha lem mi pahnih, Israelhai sipai hotu Nera naupa Abner le Judahai sipai hotu Jether naupa Amasa hai kha ka pa hriet loin a lo bei a, kawlhnàmin a that a. 33 LALPAN an thisen maw chu Joab lu chunga le a thlahai lu chungah kumkhuoin inphurtir sien la, Davida le a thlahai, a sûngkuohai le a lalthungpha chungah LALPA thlamuongna chu kumkhuoin um zing raw se" a ta. 34 Chuongchun, Jehoiada naupa Benaia chu a hang fe a, Joab chu a bei a, a that a, thlalèra ama rama chun an phùm a. 35 Chun, lal chun Joab hmunah Jehoiada naupa Benaia chu sipai kawmandarah a sie a; Abiathar hmunah Zadok chu thiempuah a sie bok a. 36 Chun, lalin Simei chu a'n kotir a, a kuomah, "Jerusalema hin i in ding bawl la, chu taka inthok chun khaw lai khom suok naw rawh. 37 I suok ni, Kidron vadung i kàn ni lâ làin thi ngei ngei i tih ti hre rawh; i thisen maw chu nangma lu chunga ngei um a tih" a ta. 38 Simei chun lal kuomah, "A'n dik annawm; lalpa, ka puin a hril ang chun i siehlaw hin thaw pei a tih" a ta. 39 Simei chu Jerusalemah sawt fe a um a. Kum thum a hung invoi chun Simei suokhai laia pahni chu Gath khaw lal Maaka naupa Akis kuomah an tlàn hmang a. Simei kuoma chun, "I suokhai chu Gath khuoah an um" ti an hung hril a. 40 Chu phing leh a sabengtung chungah a chuong a, a suokhai zong dingin Gath khuoa Akis kuoma chun a fe a, a suokhai chu Gath-a inthok chun a hung thuoi kîr nawk a. 41 Simei chu Jerusalema inthokin Gath khuoah a fe a, a hung kîr nawk tah ti thu chu Solomon an hril a. 42 Lal chun Simei chu a'n kotir a, a kuomah, "Jerusalem i suoksan ni, hmun danga i suok ni lâ làin i thi ngei ngei ding a nih tiin LALPA hming sâlin thu ka'n khàmtir che a ni naw am a ni? Nang khomin ka kuomah, 'I hril hi a tha, zawm ngei ka tih' i ti kha. 43 Ieng leia LALPA kuoma i'n khàmna chu zawm loa thu ka pêk che chu i poisa naw am a na? 44 Ka pa Davida chunga ritlona i'n suo po po kha i lungrilah i la hriet vong a. Tuhin i suolna kha LALPAN a thungrul ding che a nih. 45 Lal Solomon ruok chu malsawmin um a ta, Davida lalthungpha chu LALPA hmaah kumkhuoin suknghet nîng a tih" a ta. 46 Lal chun Jehoiada naupa Benaia chu thu a pêk a, a suok a, Simei chu a bei a, a that ta a. Chuongchun, ram chu Solomon kutah suknghetin a um ta a.

1 Kings 3

1 Solomon chun Aigupta lal Faraw leh inkungkeina siemin Faraw naunu chu nuhmeiah a nei a, a lal in ding le LALPA tempul a bawl mêk lai chu an zo hma le kula Jerusalem a'n huon zo hma po chun a nuhmei chu Davida khawpuiah a sie a. 2 LALPA hminga tempul bawl a ni hri si naw leiin mipuihai chun hmun sânga hai inthawina an inhlàn hlak a. 3 Solomon khom hmun sângaa hai inthawiin rimtui inhlàn ve hlak sienkhom LALPA a hmangaizie chu a pa Davida thuruothai zawmin a'n entir a. 4 Chun, lal chu inthawina inhlàn dingin Gibeon-ah a fe a, chu chu an hmun sâng po po laia poimaw tak a nih. Chu taka chun Solomonin pumraw thilhlân sângkhat zet maichâma chun a'n hlàn a. 5 Gibeon khuoa chun zânah a mangin a kuomah LALPA a hung inlàr a, Pathien chun, "I dit dit mi hni la, pêng ka ti che" a ta. 6 Solomon chun, "I siehlaw, ka pa Davida kha i lakah ringum le fel takin a um a, lungril ngîl tak a put leiin a chungah lunginsietna nasa tak i'n langtir a. I lunginsietna ropui tak chu inlangtir peiin voisun hin a lalthungpha chu a naupa i hung inhluotir pei a. 7 Tu hin aw LALPA, ka Pathien, i siehlaw hi ka pa Davida hmunah lalah i siem taa chu naupangte chauh ka la ni a, ka mawphurna hlen suok dàn ding khom ka la hriet nawh. 8 I mi thlanghai tam tak, ieng zâta tam am an nih ti khom hriet lohai chunga hin i siehlaw hi lalah i mi sie a. 9 Chuleiin, i mihai ro ka rêl thiem theina dingin varna lungril le a sie a tha ka thlier thiem theina dingin hrietthiemna lungril i siehlaw hi mi pe rawh. Chuong naw chun i mi hieng zozaihai ro hi tu in am rêl zo an ta?" a ta. 10 Solomon thil hni chun LALPA a suklawm a. 11 Chuongchun, a kuomah, " I ta dinga dam sawtna dâm, hausakna dâm le i hmèlmahai thina ding dâm hni loa rorêl thiemna i hni leiin, 12 i hni ang tak chun thawng ka ta, varna le hriet thiem theina lungril pêng ka ti che a, nangma ang hrim tu khom an la um ngai naw ang bokin tu khom um nawk ta ngai naw ni hai. 13 Chu bâka chun i mi hni sa lo hausakna le hmingthangna khom pe sa bok ka ti che a, i dam sûngin a tluk phak che lal tu khom um naw ni hai. 14 I pa Davidan ka lampui hrawa ka thu a zawm ang boka i khawsa ve chun dam sawtna khom pêng ka ti che" a ta. 15 Chun, Solomon chu a thang har a, a mang a nih ti a hriet suok a. Chuongchun, Jerusalemah a kîr nawk a, LALPA Thuthlung Bawm hmaa chun a ngîr a, pumraw inthawina le inremna inthawina thilhlânhai chu a'n hlàn a, chu zoah a khawnbawlhai po po ta dingin ruoi a the a. 16 Thubuoi nei nawchizor pahni hi lal hmaah an hung ngîr a. 17 Pakhat lem chun, "Ka lalpa, hi nu leh hin in khata um hlak kan ni a, chu ina kan um lai chun nau ka nei a. 18 Ka nau a pienga inthoka ni thumnaa chun ama khomin nau a nei ve a. Keini pahni chauh naw chu kan inah mi dang tu khom an um nawh. 19 Hi nu nau hi zânah a thi a, a del hlum a ni nghe nghe a. 20 Zân rilah a tho a, i siehlawnu in lai chun ka bula zâl ka nau chu a lâk a, a zàlpui a, a nau thisa chu ka bulah a hung inzàltir a. 21 Zîngkar ka nau chu nene hang pêk ka tum a, a thi sa a lo ni zing a. Zing khawvarah ka hang en chieng chun ka nau kha a lo ni ta dèr da'l a" a ta. 22 Pakhat lem chun, "Ni hlak a tim ie! A dam lem hi ka naupa a na, a thi lem kha i naupa a nih" a ta. A hmasa lem chun, "A teu naw êm el! A thi hi i naupa a na, a dam hi ka naupa a nih" a ta, lal hmaa chun an insèl ta rak el a. 23 Lal chun, "Hi nu hin 'A dam hi ka nau a na, a thi lem hi i nau a nih' a ta, kha nu khan, 'A thi hi i nau a na, a dam hi ka nau a nih' a ti tlat bok si a. 24 Chuleiin, kawlhnàm hung la ro" a ta, an hung lâk a. 25 Lal chun, "Naute kha a laiah tan bong unla, a chenve chu pakhat kha pe unla, a chenve dang chu pakhat kha pe ro" a ta. 26 Naute dam nu chun a nau chu a lunginsiet êm êm a, lal kuomah, "Pu, lunginsiet takin naute hi ama kha pe el ro. That lul naw ro" a ta. Pakhat lem chun, "A tu khomin chang bîk nawng kan tih. Tan bong ro" a ta. 27 Chu phing leh lal chun, "Naute dam lai kha a hmasa lem kha pe ro, ama ngei kha a nu chu a ni kha" a ta. 28 Israel mihai po poin lal thurem dàn an hang hriet chun maktiin an inza hle a, ro indik taka rêl thiem dingin Pathienin varna a pêk a nih ti an hriet a.

1 Kings 4

1 Solomon chu Israelhai po po chungah lalin a hung um ta a. 2 Hienghai hi hotu lien a hnuoia thokhai chu an nih: Zadok naupa Azaria chu thiempu a nih; 3 Sisa naupa Elihoref le Ahija chu lekha ziektu; Ahilud naupa Jehosafat chu chanchin rikawttu; 4 Jehoiada naupa Benaia chu sipai kawmandar lu tak; Zadok le Abiathar hai chu thiempu; 5 Nathan naupa Azaria chu biel hotuhai inrawitu; Nathan naupa bok Zabud chu lal thiempu le lal mi rawn; 6 Ahisar chu lal in enkoltu; Abda naupa Adoniram chu sinthawa sor luihai hotu a nih. 7 Solomon chun Israel ram pumpui chu biel sawm le pahniin a the a, biel tinah enkoltu lârsâp a sie seng a, chuonghai chun lal le a sûngkuohai fâk ding an ngaituo a, kum khata larsap tin mawphurna chu lal le a sûngkuohai thla khat tlàk ding hung tum seng a nih. 8 Chuong larsaphai hming chu: Efraim tlângramah Ben-Hur; 9 Makaz hai, Salbim hai, Beth Semes hai le Elon Bethanan khuo haiah Ben–Deker; 10 Arubot bielah (Sukot le Heber khom huom sain) Ben-Hesed; 11 Nafot Dor bielah Solomon naunu Tafat pasal Ben-Ahinadab; 12 Tanak khuo, Megido khuo, Jezreel phai monga Zarethan khaw bula um Bet Shan biel po po, Bet Shana inthoka Jokmeam râla um Abel Mehola khuo chenin Ahilud naupa Baana; 13 Gilead biela Ramo khuoah Ben-Geber (ama chun Manase naupa, Gilead biela Jair lobuk po po hai, Basan rama Argob biel po po le kula inhuon, kul kotkhâra dâr tluon hmang khaw ropui tak tak sawmruk chu a chang sa a nih); 14 Mahanaim bielah Ido naupa Ahinadab; 15 Naftali bielah Solomon naunu Basemat pasal Ahimaz; 16 Aser le Alot bielah Husai naupa Baana; 17 Isakar bielah Parua naupa Jehosafat; 18 Benjamin bielah Ela naupa Simei; 19 Gilead biel (Amorhai lal Sihon le Basanhai lal Oga ram po poah) Uria naupa Geber a nih. Hienghai po po bâka hin a ram pum chunga hotu pakhat a la um bok. 20 Judahai le Israelhai chu tuifinriet kama phaiphin anga tam an hung ni ta a, an fâkin an dawn a, hlim takin an khawsa a. 21 Solomon chun Eufretis vadunga inthoka Filistinhai ram chen le Aigupta ramri chena ram po po chungah ro a rêl a. Chuong ram po pohai chun Solomon kuomah sie an hung chawi hlak a, a dam sùng po po chu a khuo le tui an nih. 22 Solomon ni khat khorsaw chu beiphit indip tak kilogram sângnga le beiphit pangngai kilogram sîngkhat; 23 bawngchal, ina chawm thau sawm, bawngchal hlobeta chawm thau sawmhni, beram le kèl zakhat; chu bâka chun sakhi, sangai, sakhi chal le ar thau tak tak hai leh. 24 Solomon chu Eufretis vadung thlang tieng ram po po, Tipsaa inthoka Gaza chena lal a na, a se vela ramhai po po leh inrem takin an khawsa a. 25 Solomon dam sung po chu Dan-a inthoka Beersheba khuo chena inzar Judahai le Israelhai chu mani grèp huon le theichang kung bula muong taka khawsa an nih. 26 Solomon chun tawlailir hnûktu sakor siena in sâng li le sakor sîngkhat le sânghni a nei a. 27 Biel tina lârsâphai chun an thaw hun dinga ruot thla sengah Solomon ta ding le a dawkâna kiltuhai po po fâk ding chu khorsaw an hung pêk seng a, pêk kim lo an nei ngai nawh. 28 Chun, mi tinin an thaw zât dinga bituk ang pei chu a siena dinga ruot hmuna chun sakor tawlailir hnûktu sakorhai le sakor danghai fâk dingin barli le bupawl an hung sie bok hlak a. 29 Pathienin Solomon chu varna le sungril mit varna inthûk tak le thil hriet thiem theina zau tak, tuifinriet kama tiem seng lo tieuvut anga tam a pêk a. 30 Solomon varna chun khawsak mihai varna po po le Aigupta mihai varna po po khom a khûm vong a. 31 Mi po po nêkin a var a, Ezra mi Ethan le Mahol nauhai Heman hai, Kalkol hai le Darda hai nêk khomin a var lem a, a hming chu an se vela hnam po po lai a'n thang ta hle a. 32 Thuvar sângthum a hril a, hla sângkhat le panga a phuok bok a. 33 Thing le ruo le hna nei chi hrim hrim chanchin, Lebanon tlânga sidar thinga inthoka kul banga hung to suok husop chanchin dâm chenin a hriet hne hle a; sa le vate chanchin dâm, bokvâka invâk chihai chanchin dâm le nga chanchin dâm mi a hril hlak a. 34 Khawvela lalhai, Solomon varzie chanchin hre phak taphot chun a varna thu ngaithla dingin a kuomah mi an hung tir a.

1 Kings 5

1 Tura lal Hiram chun Solomon chu a pa Davida thlâktua lala hriek nâl a ni tah ti a lo hriet chun, Davida le inngaina taka lo khawsa hlak a ni leiin Solomon kuoma chun palai a tir a. 2 Solomon chun Hiram kuomah hieng ang hin thu a thon kîr a: 3 "Ka pa Davida kha a sè vel kil tina mihai leh indoa a buoi leiin le a ke hnuoia a hmèlmahai LALPAN a sie vong hma khat chun LALPA a Pathien hming chawitu ding tempul a bawl thei nawh ti i hriet a. 4 Tu ruok hin chu LALPA ka Pathienin sîr tinah muongna a mi pêk a, hmèlma amanih le siet tuok amanih khom a um ta nawh. 5 Chun, LALPAN ka pa Davida kuoma, "I aia lala ka sie ding i naupa chun ka hminga ding tempul chu hung bawl a tih' tia a lo hril tah angin, LALPA ka Pathien ta ding tempul bawl ka tum a. 6 Chuleiin, Lebanon tlânga mi sidar thinghai kha mi phûrpêk dingin thu pe la, ka mihai chu i mihai lai thang vêng an ta, i mihai hlaw chu i ti ang zât zàt pêng ka tih. Sidon mihai ang tluka thing phûr thiem ve ka mihai lai tu khom an um nawh ti i hriet si a" tiin. 7 Hiramin Solomon thucha a lo hriet chun a lawm hle a, "Hi hnam ropui tak chunga rorêltu ding nau var Davida kuoma petu LALPA chu voisun hin inpâkin um raw se" a ta. 8 Chuongchun, Hiram chun Solomon kuomah, "I thu mi hung incha kha ka lo hriet a, sidar thing le far thing chu i mamaw ang ang hung pêng ka ti che. 9 Ka mihaiin Lebanon tlânga inthokin tuipuiah hung tol thlâng an ta, thakna ding hmun i tinaah pûmin hung intol thlâktir ka ta, chu taka chun sût an ta, i lo lâk pei ding a nih. Nang khomin ka sûngkuohai hi fâk ding pein ka insûng mamaw i lo phuhrùk ve ding ni naw nim" tiin thu a thon a. 10 Chuong ang chun sidar thing le far thing chu Solomon mamaw ang peiin Hiram chun a pêk a. 11 Solomon khomin Hiram le a sûngkuohai fâk dingin huit beiphit metric tonb sânghni le oliv hriek tha chi litar nuoi li a thon a, chu chu kum tina Solomonin Hiram a pêk hlak dàn chu a nih. 12 LALPAN a tiem angin Solomon chu varna a pêk a. Hiram le Solomon chun inlaichinna tha tak neiin an inkârah inremna thu an thlung a. 13 Lal Solomon chun Israel ram sûngah sinthawa sor lui mi sîngthum a nei a. 14 Chuonghai chu thla khat peia inthlâk dingin tum khatah mi sîngkhat pei Lebanon-ah a tir a, thla khat zoah an hung kir a, thla hni sûng anni in tieng an um a. Chuonga sinthawa sor luihai inrawituhai hotu chu Adoniram a nih. 15 Solomon chun thil phurtu mi sîngsari le lung sertu mi sîngriet tlânga chun a nei a. 16 Chuonghai bâka chun sinthawhai inrawia an sinthaw keihruoitu mi sângthum le zathum a nei bok a. 17 Lal thupêkin lung lâknaa inthokin lung tha le lien tak tak, a chunga lung an serhai remna ding le tempul thuta hmang dingin an hung lâk a. 18 Solomon le Hiram mistirihai le Gebal mihai chun lunghai chu serin, thinghai chu an ât a, tempul bawlna dingin an buotsai a.

1 Kings 6

1 Israel thlahaiin Aigupta ram an suoksana inthoka kum zali le kum sawmrietna, Israelhai chunga Solomon a hung inlala inthoka kum lina le a thla hnina, Ziv thlaa chun LALPA tempul chu Solomonin a bawl tan a. 2 Solomonin LALPA tempul a bawl chu a dung meter sawmhni pasaria sei, a khang meter kuoa lien, a'n sângzie meter sawmpathum le centimeter nga a nih. 3 Tempul tuolpûk bathlâr chu hmun thienghlim tieta sei, a khang meter kuoa lien a na, tempul kota inthok chun meter li le a chenve a sor dawk a. 4 Tempul banga chun tukver, a puo tieng para a sûng tieng inzui chi, a siem a. 5 Tempul puo tieng, a hnung tieng le a sîr ve vea chun a huol tuokin tempul bang ringsanin pindan sawng thum, sawng tin inkâr chu meter hni le centimeter hnia insângin a bawl a. 6 A sawng hnuoi tak pindan chu meter hni le centimeter hnia lien a na, a sawng lailung chu meter hni le centimeter saria lien a na, a sawng chung tak chu meter thum le centimeter khata lien a nih. Tempul banga a kalkhang rol ngai loa sawng tin chu a hnuoi banga innghat thei dingin sawng tina tempul bang chu a hnuoia mi nêkin a chunga mi chu inphan lem hreta siem a nih. 7 Tempul an bawl lai chun lunghai chu lung làkna hmuna ser sa vong hmang a ni leiin an bawl sûngin tubo vuok ri dâm, hreia thil tuk ri dâm le hriemhrei ri hrim hrim tempul hmuna chun hriet ding a um nawh. 8 A hnuoi tak pindan lûtna chu tempul sim tieng sìrah a um a. A sawnga lawn kaina dingin kailawn inher kuol a um a, chuong ang bokin a sawng chunghnung tak kaina khom chu siem a nih. 9 Chuong ang chun tempul chu a bawl zo a, a chungah sidar kalkhang khangin chu chunga chun sidar thingphêk a dàng a. 10 Tempul bang ringsana bawl pindan sawng po po chu meter hni le centimeter hni senga insânga bawl a na, sawng tinah sidar kalkhang a hmang vong a. 11 Chun, LALPA thu chu Solomon kuomah a hung tlung a, 12 "Tempul chu i lo bawl zo ta a, ka thusuokhai zui a, ka thupêk le dânhai zawma i kengkaw tlat chun, nangma hmangin Davida kuoma ka thu tiem chu sukpuitling ka tih. 13 Israelhai lai chêng ka ta, ka mi Israelhai chu thlathlam ngai naw ning" a ta. 14 Chuong ang chun Solomonin tempul chu a bawl zo ta a. 15 Tempul sûng tieng bang inthuona dingin sidar thingphêk a hmang a, a tuonga inthoka a siling chenin thingphêk a bel vong a, a tuongah fâr thingphêk a pha a. 16 A chawr tieng kil tak meter kuo-a sei chu a tuonga inthoka a siling chenin sidar thingphêkin a ping a, chu chu tempul sûnga Hmun Thienghlimtak chu a nih. 17 Hmun Thienghlimtak lût hmaa pindan chu meter sawmpariet-a sei a nih. 18 Chu pindan sûng tieng po po chu sidar thingphêka inthuo khum vong a na, chu taka chun ûm lim le par vul lai lim a ker a; lung hrim hrim inlang lo dinga arênga sidar thingphêka inkhum vong a nih. 19 Chun, LALPA Thuthlung Bawm siena dingin tempul sûngrila chun pindan a buotsai a. 20 Chu pindan chu a dung meter kuo, a khang meter kuo le a'n sângzie meter kuo a na, rangkachak hlîrin a'n luon khum vong a, chu taka sidar thinga siem maichâm khom chu a'n luon khum bok a. 21 Chuong ang chun tempul sûng tieng po po chu rangkachak hlîr hlakin Solomon chun a'n luon khum vong a, pindan sûngril tak lûtna kotkhâra chun rangkachak khaidiet a thlung a, kotkhâr khom chu rangkachak hlîra inluon khum vong a nih. 22 Tempul sûng tieng cheina hrim hrim le Hmun Thienghlimtaka maichâm khom chu rangkachaka inluon khum vong a nih. 23 Pindan sûngrila chun oliv thinga siem cherub pahnih, meter li le centimeter li ve vea insâng a sie a. 24 Cherub thla khing khat chu meter hni le centimeter hnia sei a na, a thla khing tieng khom meter hni le centimeter hnia sei bok a na, a thla ki hmawr ve ve inkâr chu meter li le centimeter li a nih. 25 Cherub pahnina khom chu meter li le centimeter lia sei bok a na, cherubhai chu an insângzie le lienzie thuhmun char a nih. 26 Cherubhai chu meter li le centimeter lia insâng ve ve an nih. 27 Cherubhai chu pindan sûngril tak, Hmun Thienghlimtaka chun an sie a, thla an zàr a, pakhat thla chun bang khing tieng a va tawk a, cherub pakhat dang thla khomin bang khing tieng chu a va tawk bok a, chu pindan lailung taka chun an thla ki ve ve chu an intawk a. 28 Cherubhai chu rangkachak tuia inluon an nih. 29 Chun, a sûng tieng le puo tieng banga chun a vêl tuokin cherub dâm, tûm thing dâm le pâr vul lai lim dâm a ker a. 30 Sûng tieng le puo tienga tempul tuong po po chu rangkachak tuiin a'n luon a. 31 Chun, Hmun Thienghlim tak lûtna dingin kotkhâr tuok hni oliv thingin a siem a, kotkhâr bieng chu kil nga nei a nih. 32 Oliv thing kotkhâr pahnia chun cherub hai, tûm thing hai le pâr vul lai lim a ker a, chuonghai chu rangkachak sut phêkin a tuom khum vong a. 33 Tempul sûng lûtna kotkhâr kawm chu kil li nei, kil tin inchen vong, oliv thinga siem a nih. 34 Chun, fâr thing hmangin kotkhâr pahni a siem a, kotkhâr tin chu thing phêk hnia siem, kopzaa zom, kei thlep thei a nih. 35 Chuong kotkhâra chun cherub dâm, tûm thing dâm le pâr vul lai lim dâm a ker a, chuonghai chu rangkachak sut phêkin inruol takin a tuom khum a. 36 Tempul hmaa chun kotzawl sùngril lem a siem a, lung insersuon thuo thum le sidar thingphêk thuo khatin a'n huon a. 37 LALPA Tempul thut chu a kum lina, Ziv thla chun an rem zo a. 38 A kum sawm le kum khatna, thla rietna Bul thlaah tempul chu a rel dàn ding ang takin iengkim chu zo fel a ni ta a. Kum sari zet a bawl a nih.

1 Kings 7

1 Ama in ruok chu Solomonin kum sawm le kum thum sûngin a bawl zo chau a. 2 A lal in, 'Lebanon Ramngaw Run' tia a ko chu a dung meter sawmli pali, a khang meter sawmhni pahni le a'n sângzie meter sawmpathum le centimeter nga a na; sidar thing ban tlar thumc a phun chunga chun sidar thing tlungpûm, ât le nawt nâm chu a ban zawn peiah a khang a. 3 Tlar khatah tlungpûm sawm le panga pei a um a, a rêngin tlungpûm sawmli le panga a na, chu chunga chun sidar thingphêk a dàng a. 4 A bang tieng tlar ve vea chun insang takah tukver pathum seng inhma tonin a hong a. 5 Kotkhâr le tukver bienghai chu kil li neia siem vong a na, a banga tukver pathumhai chu a khing tieng tlara tukver pathumhai le inep tuo vong a nih. 6 Ban neiin hulhliepd a siem a, a dung chu meter sawmhni pahnia sei le a khang meter sawmpathum le centimeter nga a lien a nih. A do kàngtu banhai chu a tlarin a phun a, ban le bang inkarah a lûtna ding kailawm a siem a, ban khel chu dithlafarfèmin a hung inkhum a. 7 Chun, rorelna pindan a siem a, chu taka chun lalthungpha a sie a, chu chu rorêlna hmun a nih. A tuonga inthoka siling chen sidar thingphêk a bel khum vong bok a. 8 Chuong ang char chu chu taka inthoka iemani chena hlaah ama umna dingin in a bawl a. Chuong ang bok chu a nuhmei Faraw naunu umna dingin in a bawl bok a. 9 Chuonghai po po chu in inhuonna tuol kot lien taka inthok le a in thuta inthoka dithlafarfèm chenin lung man tam chi, a huntawk ang chara ser, a sûng tieng le a puo tieng hmorhai khom a âtnaa inruol hmara ât vonga bawl a nih. 10 A in thut lungphumhai chu lung tha le lien tak tak, a then meter thum le centimeter nga, a then meter lia sei a nih. 11 Chu chunga chun lung tha tak tak, a huntawk ding ang chara ser le sidar thing tluon a rem a. 12 LALPA tempul kota tuolpûk le in bathlàrhai ang bokin in inhuon sûng tuol zawl lien tak chu lung insersuon thuo thum le sidar thingphêk thuo khata inhuon a nih. 13 Lal Solomon chun Tura khuoa mi Huram a va'n thuoitir a. 14 Ama chu Naftali hnama mi hmeithai naupa a na, a pa chu Tura mi, dâr sut le ser thiem a nih. Huram chu dâr sut le ser tienga chemkal le thiem tak el a ni a, lal Solomon kuoma chun a hung a, a sin ding a ruot po po chu a thawpêk a. 15 Huram chun dâr ban meter rieta insâng le meter nga le centimeter thum biela lien pahni a sung a. 16 Dâr ban sîpa inthut ding a lu kheipar, dâr bokin meter hni le centimeter hnia insâng ve ve pahnih a sûng bok a. 17 Chu lu kheipara chun khaidiet inher thlop chit chet lim pasari a um a. 18 Khaidiet inher thlophai chu theibufai lim tlar hniin an huol tir a, chu chun ban lu kheipar chu a cheimawi a, chuong ang chun a pakhat dang khom chu a siem a. 19 Hulhliep ban sîpa dâr lu kheipar a siemhai chu lili pâr lim anga mawi vong a na, meter khat le centimeter rieta insâng a nih. 20 Chun, dâr ban pahni sîpa a lu kheipara khaidiet inher thlop chunga chun theibufai lim zahni a vel tuokin a sie bok a. 21 Chuong dâr banhai chu tempul hulhliepa chun a phun a, sim tienga ban chu Jakine a'n bûk a, hmar tienga ban chu Boaz a'n bûk bok a. 22 A ban sîpa a lu kheiparhai chu lili pâr ang an nih. Chuongchun, ban siem sin chu zo a ni ta a. 23 Chun, dâr tuizêng lien tak el, meter hni le centimeter hnia insâng, hol tlanga meter li le centimeter lia lien, a rei kuol chu meter sawmpathum le centimeter hnia lien, a sung a. 24 A rei kuol hnuoi chara chun tuiûmf lem zathumin tlar hniin a vel tuokin a'n huoltir a, chuonghai chu tuizêng le a ruola sung nghal vong a nih. 25 Tuizêng chu bawngchal lim sawmpahni chunga innghat a na, bawngchalhai chu pathumin hmar tieng, pathumin sim tieng, pathumin sak tieng, pathumin thlang tieng an ngha a, tui zèng chu an chunga chun a'n thut a, an mei chun sûng tieng a ngha a. 26 Tuizèng bang sazie chu millimeter sawmsari le panga a na, a rei chu lili pâr ang le no rei iner ang a na, tui litar sîngli keng a nih. 27 Chun, dâr bokin nor lir thei bawm sawm a siem a, pakhat pei chu meter khat le centimeter rieta sei, meter khat le centimeter rieta lien le meter khat le centimeter thuma insâng a nih. 28 Bawm tin chu kil li neia siem a nih. 29 A kawm banga chun sakeibaknei lim dâm, bawngchal lim dâm le cherub lim dâm a ker a. Sakeibaknei le bawngchal limhai chung le hnuoia chun pâr thi lim, a suta sut a um a. 30 Bawm thut kil lia chun dâr tawlailir ke pali le a kei virtu dâr kalkhang a um a. Bawm sûng kil tinah dâr maihùn innghatna a um a, chu innghat ban palihai chu pâr thi lim hriela siem, a sunga sung vong a nih. 31 Bawm sina chun a kuolin tuibêl siena ding a um seng a. A chung tieng chun tuibêl chu centimeter sawmli pangain a hung lor suok a, a hnuoi tieng chu centimeter sawmpariet a tlum thung a. A vêl chun mi lim ker a um a. A kawm innghatna ruok chu inkuol loin kil li neia siem a nih. 32 A ke palihai chu dâra siem, centimeter sawmruk paruka insâng, a bawm bang hnuoia inbûk a na, a ke inbûkna kalhai le tawlailir bawm chu sung kop vong a nih. 33 A kè chu tawlailir kè ang a na, a kal hai, a ke kuol tlâng hai, a kuol do nghettu hai le a laivir po po chu thîra sung vong a nih. 34 Chun, a bawm kil lia chun bawm le inzomina a dotu thut a um seng a. 35 A tlâng vêttu centimeter sawmhni pahnia sei thil kuol a um a. A dotu banhai chu a bawm banghai leh sung zom vong a nih. 36 A dona le a bawm banga hai chun hmun ruokna taphotah cherub lim dâm, sakeibaknei lim dâm le tûm thing lim dâm a sie sip vong a, thil lim chuong nawna a tlânghai chu pâr thi lim inher chietin a chei a. 37 Chuong ang chun nor lir thei bawm sawm a siem a, an inang vong a, an intiet vong bok. 38 Chun, insawpna ding dâr maihùn sawm a siem bok a. Maihùn tin chu hol tlanga meter khat le centimeter rieta lien, litar zariet inleng vong a nih. 39 Tempul sim tieng chun thil thut panga a sie a, hmar tieng chun panga a sie bok a; tui zêng ruok chu sim sak kilah a'n thut a. 40 Huram chun insawpna bèl dâm, suodur dâm le berbu dâm khom a siem bok a. Chuongchun, 41 dâr banpui pahni dâm; ban lu bawk, no rei anga inkûm dâm; ban lu bawka khaidiet lem tlar hni a kuola um hai dâm; 42 ban lu bawka theibufai lem zali, ban tinah tlar hnih, tlar tin zakhata a rem kuol hai dâm; 43 nor lir thei bawm sawm le maihùn sawm dâm; 44 dâr tuizêng le a thut bawngchal sawmpahni dâm; 45 bêl dâm, suodûr dâm le berbu dâm chu a nih. Huramin LALPA tempula hmang dinga lal Solomon a siempêkhai po po hi dâr tle chi vonga siem a nih. 46 Hieng thilhai hi Jordan phaizawl Sukot le Zarethan inkâra bêl hemna hmuna lalin a'n sungtir a nih. 47 A tam tham êm leiin hienghai hi Solomon chun bûk chuong loin a sie a, chuleiin a dâr bûk zât rikzie hriet a ni nawh. 48 Solomon chun LALPA tempula hmang ding hmangruo dang khom tam tak a'n siemtir a, chuonghai chu: rangkachak maichâm hai; hlànbei siena rangkachak dawkân hai; 49 Hmun Thienghlim hmaa sie ding khawnvar siena sawm, chang tieng panga le voi tieng panga, rangkachak hlang hlaka a ser hai; rangkachak pârte lim hai, khawnvar hai le chaiche hai; 50 rangkachak maihùn hai, khawnvar phita chep ruolna hai, berbu hai, thlêng hai, mei lâkna hai; Hmun Thienghlimtak pindan kotkhâr le hmun thienghlim kotkhâra inbûk rangkachak kopza po po hai dâm chu a nih. 51 Solomonin LALPA tempula dinga hmangruo an siemtir po po chu zo a ni ta a. Chuongchun, a pa Davida lo inhlân tah tangkaruo le rangkachak le bûr le bêlhai chu a lâk a, LALPA tempula rosum siekhawmnaa chun a sie a.

1 Kings 8

1 Davida khawpui, Zion-a inthoka LALPA Thuthlung Bawm chu Tempula son dinga hung zawn tung dingin Solomon chun Israel upahai, pahnam tina luhai le sûngkuo tina luhai chu a kuoma hung inlang dingin Jerusalemah a ko khawm a. 2 Israel mi po po chu thla sarina, Ethanim thlaa kûta chun Solomon kuomah an hung inkhawm a. 3 Israel upahai an hung tlung chun thiempuhai chun Bawm chu an zawn a. 4 LALPA Bawm an zawn ruol chun Intuokna Puon in le a hmangruo le bûr le bêl po po chu thiempuhai le Levi chia mihai chun an zawn sa bok a. 5 Lal Solomon le a kuoma Israel mi pungkhawm po po chu Bawm hmaa chun an fe a, beram le bawng tam tak, a zât inchik sèng lo le tiem sèng lo chun an inthawi a. 6 Thiempuhai chun LALPA Thuthlung Bawm chu a umna ding, tempul sûngril, Hmun Thienghlim Taka chun an lâk lût a, cherub thla zàr hnuoia chun an sie a. 7 Cherubhai chun Thuthlung Bawm chungah thla an zàr a, an thla chun Bawm le a zawnfung chen chu a zâr khum a. 8 A zawnfung hmawr chu Hmun Thieng Tak kotkhâra inthokin hmu thei a na, puo tienga inthok ruok chun hmu phâk a ni nawh; chuong ang chun tu chen hin a la um zing. 9 Aigupta rama inthoka an suok hnunga LALPAN Horeb tlânga Israel thlahai kuoma thu a thlung laia Mosien LALPA Thuthlung inziekna lungphêk pahni a sie chauh naw chu Bawm sûnga chun ieng dang khom a um nawh. 10 Chun, thiempuhaiin Hmun Thienghlim Tak an suoksan charin LALPA in chu sûmin a hung inkhum ta mup a. 11 Sûm lei chun thiempuhaiin rong khom an bawl thei ta naw hiel a, LALPA ropuinain Tempul chu a sip si a. 12 Solomon chun, "LALPA chun sûm sà mupah hung chêng ka tih i lo ti ta hrim a. 13 A nih, kumkhuoa i chêngna ding, i ta dingin Tempul mawi tak el ka bawlpêk ta che ie" a ta. 14 A hmaa chun Israel mi pungkhawmhai po po chu an ngîr a. Solomon chun anni tieng a ngha a, mal a sawm tawl a: 15 "LALPA, Israelhai Pathienin bau ngeia ka pa Davida kuoma thu a lo tiem tah chu ama kut ngeia a hung hlen suok tah leiin ama chu inpâkin um raw se. 16 Ama chu, 'Aiguptaa inthoka ka mi Israelhai ka thuoi suoka inthok khan Israel hnamhai khuo laia a ieng khom hi ka hming umna ding Tempul bawlna dingin ka la thlang ngai naw a, amiruokchu ka mi Israelhai chunga rorêltu dingin Davida hi ka thlang a nih' titu kha a nih. 17 Ka pa Davida khan Israel Pathien, LALPA hminga ding Tempul bawl a lo tum hlak a. 18 Sienkhom ka pa kuomah LALPAN, 'Ka hminga ding Tempul bawl nuomna lungril i nei hi i thaw tha ngot el. 19 Amiruokchu, nang chu ka Tempul bawltu ding i ni nawh, i naupa, i thàlbea inthoka suok ngei chu ka hminga ding Tempul bawltu ding chu a nih' tiin a lo hril a. 20 LALPAN a thutiem chu a hung suknghet a, a tiem tah ang ngeiin kei chun ka pa Davida chu ka hung thlàk a, tu hin Israelhai lalthungphaah ka hung inthung ta a, LALPA Pathien, Israelhai Pathien hminga ding Tempul chu ka lo bawl ta ngei bok a. 21 Chu taka chun Thuthlung Bawm siena ding hmun ka ruot a, chu Thuthlung Bawma chun LALPAN Aigupta rama inthoka ei pi le puhai a thuoi suok hnunga an kuoma thu a thlung, LALPA thuthlung inziekna lungphêk chu a um a nih" a ta. 22 Solomon chu Israel mi pungkhawm po po hmuah LALPA maichâm hmaa chun a ngîr a, vân tieng banin kut a phar a, 23 a tongtai a: "Aw LALPA, Israelhai Pathien, lungril po poa i lampui hrawtu i siehlawhai kuoma i hmangaina thuthlung vong tlattu, nangma ang hi chung tieng vâna le hnuoi tieng leihnuoiah Pathien dang hrim an um nawh. 24 Ka pa, i siehlaw Davida kuoma bau ngeia thu i tiem chu i hung hlen a, chu chu voisuna kan hmu hi a nih. 25 "Tu hin aw LALPA, Israelhai Pathien, ka pa Davida kuoma, 'Ka mithmua i um dàn anga i thlahai khom ka mithmua fimkhur taka an um ve phot chun, Israel lalthungpha hluotu ding mi chu invai ngai naw ti nih' tia thu i lo tiem kha vong ngei dingin ka ngèn che. 26 Aw Israelhai Pathien, ka pa Davida kuoma thu i tiem kha hung intlungtir ngei rawh. 27 "Amiruokchu, nang Pathien meu chu hnuoi mihai lai i chêng nuom tak tak ding am a ni? Vânhai, vân insâng tak hmanin an dawl zo naw che a na, hi ka Tempul bawla lem hin chu i va hang inleng naw nasa zuol awm de aw! 28 Chuong sa khom chun aw LALPA Pathien, zangaina hnia i siehlaw tongtaina hi lo ngaisak la, voisuna i hma ngeia tongtaia i siehlaw hung kona che hi lo ngàithlapêk hràm rawh. 29 'Chu taka chun ka hming chu um a tih' i lo tina hmun tieng hi ngha a, i siehlaw hung tongtaina chu i lo ngàithlàk theina dingin, hi Tempula hin sûn le zânin mit inlèn zing hlak rawh. 30 Hi hmun tieng hi nghaa i siehlaw le i mi Israelhai dawvàn hung kaina chu lo ngàithlapêk rawh. I chêngna vâna inthok chun lo ngaithla la, i hriet pha leh lo ngaidam hlak rawh. 31 "Mi tu khomin a tuolbawm poi a tawk a, inkhàm hiel a lo ngai a, hi Tempula i maichâm hmaa thu inkhâm dinga a hung pha chun, 32 vâna inthokin lo ngàithla la, che nghal la, i siehlawhai chungah ro hung rèl la, a thiem naw lem lu chunga chun a thil suol thawna maw chu intlâktir la, poi tawk nawtu chu thiem inchangtir la, a thiemzie chu namnghet rawh. 33 "Nangma lakah an suol leia hmèlmahaiin i mi Israelhai an hnè changin, nangma tieng hung ngha a, i hming lam a, hi Tempula hin ngaidam an hung inhni pha chun, 34 vâna inthokin lo ngàithla la, i mi Israelhai suolna chu ngaidampèk la, an pi le puhai kuoma ram i pèka chun thuoi kîr nawk rawh. 35 "I mihaiin i lakah thil suol an thaw leia vânin ruo hrim a'n sûrtir ta naw changin, hi hmun tieng hi nghaa hung tongtai a, i hming lam a, i hrem leia an suolhai an sim pha chun, 36 vâna inthokin lo ngàithla la, i siehlaw, i mi Israelhai suolna chu lo ngaidam la, an khawsak dàn ding lampui indik kawkhmu la, i mihai rochana i pêk rama chun ruo hung insûrtir rawh. 37 "A ramah tàm tla a, hripui dâm, inlawngna dâm le hmonna hri dam inlèng a, khauthikthi le tuktulung dâm intâm a, an khuo khaw lai khom hmèlmahaiin inhuol a, sietna le hri le hrài ieng khoma a tlàk buok chàngin, 38 i Tempul tieng kut hung phar a, hrem an tuor dàn chit chu mani lungril sengah pai a, i mi Israelhai laia mi tu khomin i kuomah tongtaia hnina an hung intlun chàng chun, 39 i chêngna vâna inthokin lo ngàithla la, ngaidam la, che la, an ngaituona seng i hriet leiin an nina ang peiin thaw rawh, nangma chauh hi mihriem po po lungril hretu i ni si a. 40 Chuongchun, kan pi le puhai kuoma ram i pêka hin an um sûng chun ieng lai khomin nangma ti nachàng hung hre pha tâng an tih. 41 "Ram dang mi, i mi Israel mi ni ve lo, sienkhom i hming leia ram hla taka inthoka hung pantuhai che khom, 42 (i hming ropui tak le kut hrât tak phara i thawpêkzie hi mihaiin an la hung hriet pei ding a ni si leiin) Tempul tieng nghaa an hung tongtai pha chun, 43 i chêngna vâna inthokin lo ngaithla la, ram dang mi thil hni ang chu lo thawpêk la, chuongchun i mi Israelhai ang bokin khawvela hnam tinin i hming hung hrea tiin, hi ka Tempul bawl hin i hming a put ngeizie hung hre thei an tih. 44 "I mihaiin hmèlmahai an bei pha, i tirna hmun chu khaw tieng khom ni sien, i khawpui thlang le i hminga ding Tempul ka bawlna hmun tieng hi nghaa LALPA kuoma an hung tongtai chun, 45 i chêngna vâna inthokin an tongtaina le hnina chu lo ngàithlapêk la, an hnina chu lo pompêk rawh. 46 "I lakah thil suol an thaw a, (tu khom suol lo an um bok si naw a), an chungah i lung a sen a, hmèlma kutah i pèk a, an ram tieng, hnâi tè amanih hla tak amaniah sala an thuoi pha, 47 sala an thuoina hmunah hung inngaituo suok a, insîr a, an intàngna rama inthokin hung ngèn a, 'Thil suol kan lo thaw a, poi kan lo tawk a, rilo takin kan lo khawsa a nih' an ti pha, 48 an hmèlmahai, sala thuoituhai rama inthoka lungril le thlaraua nangma tieng hung ngha kîr a, an pi le puhai i pêk ram tieng, i khawpui thlang le i hming dinga ka bawl Tempul tieng hi nghaa an hung tongtai pha chun, 49 i chêngna vâna inthokin an tongtaina le hnina chu lo ngàithlapêk la, an hnina chu lo pompêk la, 50 i mipuihai thil suol thaw chu lo ngaidam la, an poi tawkna po po chu ngaidam la, sala mantuhai chu inlunginsiettir rawh; 51 i mi, i rochanhai, Aigupta rama inthoka rawtuina pûma inthoka i hung thuoi suokhai an ni si a. 52 "I siehlaw hnina le i mi Israelhai hnina lakah i mit insim ngai naw la, an hung ko pha che lo ngàithlapêk hràm rawh. 53 Aw LALPA Pathien, Aigupta rama inthoka kan pi le puhai i thuoi suok laia i siehlaw Mosie hmanga i puong tah ang khan, i rochan dinga khawvel hnam po po laia i ser hrang bîk an ni si a" tiin. 54 LALPA kuoma a tongtaina le hnina po po Solomonin a'n sam zo chun vân tieng kut phara a dingthathuonna LALPA maichàm hmaa inthok chun a tho a. 55 Chuongchun a ngîr a, rawl inring takin Israel mi pungkhawm po po chu mal a sawm a: 56 "A thutiem anga chawldamna Israelhai petu LALPA chu inpâkin um raw se. A siehlaw Mosie hmanga thil tha a lo tiem po po chu pakhat khom a'n khèl nawh. 57 Ei thlatuhai kuoma LALPA Pathien a um hlak ang bokin ei kuoma khom um sien la, mi thlathlam loin mi màksan ngai bok naw raw se. 58 Ei thlatuhai kuoma thu a pêk hai, ruot hai le dàn hai chu zawm a, lungril po poa a lampuihai ei hraw theina dingin ei lungrilhai chu ama tieng innghattir raw se. 59 Ni tina ei mamaw ang peia a siehlaw chungthu le a mi Israelhai chungthua kut a rol theina dingin LALPA kuoma hnina ka'n tlunhai po po hi sûn le zânin LALPA ei Pathien kuoma chun châm zing raw se. 60 Chuongchun, hnuoia mi po poin LALPA chu Pathien a nizie le ama naw chu tu khom an um nawzie hung hre thei tâng an tih. 61 Amiruokchu, voisun ang hin a thuruothai le thupêkhai chu nunpuia zawm tlat dingin in lungrilhai chu LALPA ei Pathienah a kop tlat ding a nih" tiin. 62 Lal le Israel mihai po po chun LALPA hmaah inthawina an inhlàn a. 63 Solomon chun LALPA kuomah inremna inthawinain bawngchal sînghni le sânghni le beram nuoi khat le sînghni a'n hlân a. Chuong ang chun lal le Israel mihai po po chun LALPA tempul chu an inhlàn a nih. 64 LALPA hmaa dâr maichâm chu pumraw thilhlân dâm, bu le bâl thilhlân dâm le inremna thilhlâna a thauhai inhlànna dingin a chin taluo leiin, chu ni ma chun LALPA tempul hma zawna tuolpûk lailung chu lalin a'n hlàn thienghlim a, chu taka chun pumraw thilhlânhai, bu le bâl thilhlânhai le inremna thilhlâna a thauhai chu a'n hlàn a. 65 Chu tum chun Solomon le Israel mipui pungkhawm, Hamath kotsuoa inthoka Aigupta ruom chena mi fe khawmhai chun kût chu an hmang a. LALPA ei Pathien hmaah ni sari an hmang phot a, ni sari dang an hmang zom nawk a, a rêngin ni sawm le ni li sûng zet an kût tlàng a. 66 A tumtiek tûk chun mipui chu lalin a'n tintir a. Mipui chun lal chu mal an sawm a, LALPAN a siehlaw Davida le a mi Israelhai chunga a thatna chuong ang zozai a'n langtir lei chun lungril hlim tak le lawm takin an in tieng an kîr tawl ta a.

1 Kings 9

1 Solomonin LALPA tempul le ama in a nuom dàn ang taka a bawl zo hnung chun, 2 kha hmaa Gibeon-a LALPA a hung inlàr ang khan Solomon kuomah a hung inlàr nawk a. 3 LALPA chun a kuomah, "Ka kuoma tongtaia i hung hni kha ka lo ngaithlâk a, hi i Tempul bawl hi kumkhuoa ka hming umna dingin ka sukthienghlim ta a, chu taka chun ka mit le ka lungril fu zing hlak a tih. 4 "Nang khom i pa Davida anga lungril ringum tak le ngîl tak puta ka hmaah i khawsa ve a, ka thupêkhai po po zui a, ka thusuokhai le dânhai po po i zawm chun, 5 i pa Davida kuoma, 'Israelhai lalthungpha hluotu ding mi invai ngai naw ti nih' tia ka lo tiem tah angin, Israelhai chungah i lalthungpha chu kumkhuoin suknghet ka tih. 6 "Amiruokchu, nang le i nauhaiin in mi nghatsan a, ka thupêkhai le thusuokhai zawm lo a, pathien dang rong bawla in biek chun, 7 ka pêk tah hi rama inthok hin Israelhai chu sukbo ka ta, ka hminga dinga ka sukthienghlim tah hi Tempul hi hnawl bok ka tih. Chu pha chun Israelhai chu hnam tin laia mi nuizatbûr le hmusit hung nîng an tih. 8 Tu hin hi Tempul hi ropui hlein inlang sienkhom, a fe pèl taphotin maktia deusawin, 'Iengti lawm lawma LALPA an Pathienin hienga a ram le Tempul hi a thaw el am nîng a ta?' la ting an tih. 9 Mihai chun, 'Aigupta rama inthoka an pi le puhai thuoi suoktu LALPA an Pathien chu an nghatsan a, pathien dang an chel a, an biek a, an rong an bawl leiin hieng sietna po po hi an chungah LALPAN a hung intlungtir a nih' tiin la don an tih" a ta. 10 Solomonin kum sawmhni sûngin LALPA Tempul le lal in chu a bawl zo a. 11 Chu sûnga sidar thing hai, far thing hai le rangkachak a mamaw zât po po chu Tura lal Hiramin a tumpêk vong leiin Solomon chun Galili biela khaw sawmhni a pêk a. 12 Solomonin khuo a pêkhai chu en dingin Hiram chu Turaa inthokin a'n thok suok a, a hmu chun a lung a awi naw hle a. 13 Hiram chun Solomon kuomah, "Ka unaupa, khuo i mi pêkhai hi ieng ang khuo am an ni ta le?" a ta, a khuohai chu 'Kabulg ram' tiin a'n bùk a, chu hming chu tu chen hin a la put zing a nih. 14 Chun, Hiram chun lal Solomon chu rangkachak kilogram sângli dang a thon nawk a. 15 Solomonin sinthawa a sor luihai chu LALPA Tempul le ama lal in le a in thuthai bawltu ding dâm, Jerusalem kul dâm, Hazor khuo dâm, Megido khuo dâm le Gezer khuo dâm bawl tha dinga a sor an nih. 16 Gezer khuo chu Aigupta lal Faraw-in a hmain a rûn a, a lâk a, a raw a, Kanan mi chênghai po po a that vong a, chu zoah a naunu, Solomon nuhmei a'n somtir a nih. 17 Solomon chun Gezer khuo chu a'n din thar nawk a. Beth Horon thlang hnung lem dâm, 18 Baalat khuo le Israel ram thlalèra Tamar khuo dâm, 19 thil a siekhawmna khuohai, tawlailir le sakor a siena khuohai, Jerusalem le Lebanon le a op ram sûnga bawl dinga a ti po po chu a bawl bok a. 20 Chun, Israel mi ni ve lo, Amor mi hai, Hit mi hai, Periz mi hai, Hiv mi hai le Jebu mi la um sun hai, 21 chuong mihai thla, Israel mihaiin an sukchimit thieng lohai chu an nih Solomonin a sor luihai chu, tu lai chena an thaw dàn ang hin. 22 Israel mihai ruok chu Solomonin suokah a siem ve naw a, sipaia dâm, sorkar thoktua dâm, ofisar-a dâm, kaptena dâm, a sakor tawlailir le sakor chung chuong mi kawmandara dâm a hmang thung a. 23 Chuonghai chu Solomonin in bawl prawzek-hai chunga hotu bik le sinthawhai vêngtu mi zanga le sawmnga a ruoihai chu an nih. 24 Davida khawpuia inthoka Solomonin a bawlpèk ina Faraw naunu a hung inson hnung chun a inthuthai khom chu a siem tha a. 25 Solomon chun kum tinin LALPA ta dinga maichâm a siema chun pumraw thilhlân le inremna thilhlânhai chu voi thum inhlànin, LALPA hmaa chun rimtui rawin a'n thawi zie a, tempul dânin a phûthai chu a hraw kim hlak. 26 Lal Solomon chun Edom rama Elath bul, Agaba litengsawla um Ezion Geber-a chun long ruol a'n siemtir a. 27 Hiram chun a longpu ruol, tuinfinrieta che thanghai chu longa Solomon siehlawhai chu thangpui dingin a tir a. 28 Chuonghai chu Ofir-ah an fe a, rangkachak kilogram sîngkhat le sângli chuong an hung hawn a, Solomon an hung pêk a.

1 Kings 10

1 Solomon hming inthangzie le LALPA hming le an inkungkeina chanchin Seba lalnuin a lo hriet chun thu khir tak taka fie tumin a'n thok suok a. 2 Hnungzuitu tam tak le sanghawngsei tam tak thuoiin Jerusalemah a hang fe a, rimtui le rangkachak le lunghlu tam tak a phur teuh bok a. Solomon kuom a tlung chun lungrila indon nuom a nei po po chu phorin a'n don a. 3 A thu indon taphot chu lal Solomon chun a don vong a, hriet naw le hrilfie harsa ti hrim a nei nawh. 4 Seba lalnu chun Solomon varzie chu a hriet a, a in bawl ropuizie hai a hmu a; 5 Solomon dawkâna fâk ding an hung siehai dâm, a khawnbawl thung khup el hai dâm, rongbawltuhai le an inchei dàn mawizie hai dâm, uoiin semtuhai dâm le Tempula pumraw inthawinaa thil a'n hlân tamzie hai dâm Seba lalnuin a hmu chun maktiin a ngaina a hriet naw hiel a. 6 Lal kuoma chun, "I thilthawhai le i varzie hai ka rama inthoka ka lo hriet kha a lo indik khop el. 7 Keima hunga mit ngeia ka hmu hma chun ka lo awi ngai naw a, a chenve khom an mi lo hril naw lem a ni hi tie! Varna le hausaknaah an hung hril nêk daiin i lo insâng lem a nih. 8 I mihai hi ieng ang lawma hamtha am an na! I bula chêng, i varna thu ngaithla roptu i siehlawhai hi an va hang hamtha ngei de aw! 9 LALPA i Pathien, a lawmtu che le lalthungphaa sietu che chu inpâkin um raw se. LALPAN kumkhuoin Israelhai a hmangai leiin fel taka an rorêltu dingin a sie che a ni hi" a ta. 10 Chuongchun, lal kuomah thilpêk rangkachak kilogram sângli le rimtui le lunghlu tam tak a pêk a. Seba lalnuin rimtui Solomon a pêk ang zozaia tam chu tukhomin an pêk nawk ta ngai nawh. 11 (Hiram long ruol Ofira rangkachak tam tak phura fehai chun almuk thing tam tak le lunghlu an hung phur teu bok a. 12 Lal chun almuk thinghai chu LALPA Tempul le ama lal in thut do nghetna dingin a hmang bâkah rimawi tumtuhai hmang ding tingtang le perkhuong siemnain a hmang bok a. Chuong ang zozâia tam almuk thing chu a hnungin an lâk lût ta ngai naw a, an hmu ta ngai bok nawh. ) 13 Lal Solomon chun Seba lalnu dit le hni taphot chu a thawpêk bâkah a lal ina rosum tam tak a pêk bok a, chuongchun a rawihai leh ama ram tieng a kîr nawk ta a. 14 Kum tina Solomon kuta rangkachak lût zât chu kilogram sînghni le sângthum a nih. 15 Chu bâka chun sumdawngtu le thil zortuhai le Arab lalhai le a ram optuhaia inthokin sie le leiman a hmu teuh bok a. 16 Lal Solomon chun rangkachak sut phêkin phaw lien tak tak zahni a siem a, phaw pakhat peiah rangkachak kilogram thum le gram sawmnga vel an hmang a. 17 Chun, rangkachak sut phêk bokin phaw chin lem zathum a siem bok a, phaw pakhat peiah rangkachak kilogram khat le gram sawmsari an hmang a. Chuonghai chu a lal in 'Lebanon Ngawpui Rûn' a chun a sie a. 18 Chun, lal chun saiha ngotin lalthungpha ropui tak a siem bok a, chu chu rangkachak tuia inluon vong a nih. 19 Lalthungpha kai tungna chu kailawn paruk a um a, lalthungpha hnung tieng chu a'n kuol pup a, thungna sîr ve vea chun kut innghatna bân a um a, chu sîr ve vea chun sakeibaknei lem an ngîr a. 20 Kailawn paruka chun sakeibaknei lem sawmpahnih, kailawn sir tinah pakhat pei an ngîr a, chuong ang chu khaw lai rama khom an la siem ngai nawh. 21 Lal Solomon no po po chu rangkachaka siem vong a na, Lebanon Ngawpui Rûna a bûr le bêlhai chu rangkachak hlîr hlaka siem vong a nih. Solomon dam lai chun tangkaruo chu ieng thama ngai a ni naw leiin a bûr le bêlhai chu tangkaruoa siem hrim hrim a um nawh. 22 Lal chun tuifinrieta Hiram long ruol le inzin hlak sumdawng long ruol a nei a, chuonghai chun kum thum dan peiah rangkachak dâm, tangkaruo dâm, saiha dâm, zawng le ngau lien chi dâm an hung phur hlak a. 23 Hausakna le varnaah Solomon chun khawvela lal dang po po a khûm vong a. 24 Pathienin a lungrila varna thu a siepèk chu ngaithla dingin khawvela mi po poin Solomon chu an hung pan huoi huoi hlak a. 25 Chun, kum tinin a kuoma hung taphotin thilpêk tangkaruo le rangkachaka siem thil dâm, silfèn dâm, râlthuom dâm, rimtui dâm, sakor dâm le sabengtung dâm an hung chawi hlak a. 26 Solomon chun tawlailir sângkhat le zali le sakor sîngkhat le sânghni a nei a, chuonghai chu tawlailir siena khuoa hai le Jerusalemah ama kuomah a sie a. 27 Lal chun Jerusalemah thil a hau êm leiin tangkaruo dâm chu lungte angina a tam a, sidar thing khom tlâng thuta theichang bil ang hielin a tam bok. 28 Solomon sakorhai chu Musri le Kilikih rama inthoka a lâk deu vong a nih. Chu taka inthok chun lal sumdawnghaiin a honin an inchawk hlak a, 29 tawlailirhai chu Aigupta rama inthokin pakhat peiah tangkaruo shekel zaruk le sakor chu tangkaruo shekel za sawmnga peiin an inchawk a. Chun, Hit mihai le Aram lalhai kuomah an zor sawng bok a.

1 Kings 11

1 Solomon chun Faraw naunu chauh naw khom nuhmei dang tam tak Moab mi dâm, Amon mi dâm, Edom mi dâm, Sidon mi dâm, Hit mi dâm a hmangai a. 2 Chuong hnamhai chu an nih LALPAN Israelhai kuoma, "Anni leh innei pol naw ro, an pathien tieng innghattir ngei ngei an ti cheu" tia a lo hril chu. Chuong sa khom chun Solomon chun nghet takin a hmangai tawl tlat si a. 3 Lal naunu ringot khom nuhmei zasari a nei a, hmei zathum a nei bok a, a nuhmeihai chun a lungril an thuoi kawipêk ta a. 4 A hung upat hnung chun Solomon lungril chu a nuhmeihaiin pathien dang tieng an inpêttir a, a pa Davidan lungril po po LALPA Pathien tieng a pêk ang khan a pêk ve ta naw a. 5 Sidonhai biek pathiennu Astoret dâm le Amonhai pathien tirdakum Moleki dâm a zui ve el ta a. 6 Solomon chun LALPA mithmuin thil suol a lo thaw ta a, a pa Davidan LALPA a zui angin a zui pumhlum zo ta nawh. 7 Chuongchun, Jerusalem suo tieng muolah Solomon chun Moab-hai pathien tirdakum Kemos ta ding le Amon-hai pathien tirdakum Molek ta dingin hmun sàngj a siem a. 8 Chuong ang bokin hnam dang mi a nuhmeihai ta ding sengin an pathienhai kuoma inthawina le rimtui inhlànna ding hmun sàng a siempêk bok a. 9 LALPA Israelhai Pathien, a kuoma voi hni zet hung inlàr tah chu Solomonin a lungrila a nghatsan tàk leiin a chungah LALPA a lungsen hle a. 10 Pathien danghai zui lo dingin khap sienkhom Solomon chun LALPA thupêk chu a zawm si nawh. 11 Chuongchun LALPAN Solomon kuomah, "Hieng hi i khawsak dàn a lo ni ta a, ka thuthlung le thuruothai zawm dinga thu ka pêkhai che chu i zawm nuom si naw leiin i kuta inthokin i lalram hi lapêk ka ti che a, i hnuoia mi pakhat kuomah pêng ka tih. 12 Amiruokchu, i pa Davida zârin, chuong thil chu i dam lai êm chun thaw naw ning, i naupa kuta inthokin la hmang lem ka tih. 13 I pa Davida zàr le ka khawpui thlang Jerusalem zàrin, a ram pumpui chu lapêk vong loin hnam khat chu la pe hrâm ka tih" a ta. 14 Chuongchun, Edom mi Hadad, Edom lal sûngkuoa inthoka hung suok chu Solomon hmèlmaah LALPA chun a hung indin suok a. 15 Chu hma chun, Davidan Edom mihai a do laiin an mithihai phûm dinga hang fe a sipai kawmandar Joab chun Edom mihai chu a that vong a, 16 Edom rama pasal po po an that vong hmà khat chu Joab le Israel mihai chu thla ruk zet Edom ramah an inkul a nih. 17 Chu lai chun Hadad chu naupang te chauh a la ni a, a pa hnuoia sinthawtuhai leh Aigupta ramah an tlàn a. 18 Midian rama inthokin an suok a, Paran-ah an fe a, Parana inthok chun mi thuoiin Aigupta an pan a, Aigupta lal Faraw chun in le ram pein, fâk ding a lo ngaituopèk a. 19 Hadad chun Faraw mit a tlung êm leiin a nuhmei, lalnu Tapenes sangnu chu nuhmeiah a'n neitir a. 20 Tapenes sangnu chun naupa a hming Genubat a neipèk a, Tapenes chun a enkol a, Faraw nauhai lai chun a khawsa ve ta a. 21 Lal Davida chu a thlatuhai lai a chawl tah ti le a sipai kawmandar Joab khom a thi tah ti Aigupta rama inthoka Hadad-in a lo hriet chun Faraw kuomah, "Ka rama ka kîr nawk theina dingin ka suok mi phalpèk rawh" a ta. 22 Faraw chun a kuomah, "Ka kuoma i um hin iem tlâksam i nei a, chuonga i ram tienga kîr nawk i nuom el chu?" a ta. Hadad chun, "Tlâksam lem chu ieng khom ka nei nawh, sienkhom mi'n fetir hrim hrim raw khai" a ta. 23 Chun, Eliada naupa Rezon, a pu Zoba lal Hadadezer kuoma inthoka tlân hmang chu Pathienin Solomon hmèlmaah a hung indin bok a. 24 Davidan Zoba sipaihai a that lai khan ama chun mi a khawm a, chuong helpawlhai thuoitua chun a thang a, Damaska khuoah an fe a, an hne a, ama chu lalin a um a. 25 Hadad-in buoina a siem bâkah Solomon dam sûng po po chun Rezon chu Israelhai hmèlma a ni zing a, Aram-ah lalin a um a, Israelhai a theida hle a. 26 Chun, Nebat naupa Jeroboam khom Solomon lakah a hel a. Ama chu Efraim mi, Zeredaa inthoka hung, Solomon thoktu laia pakhat a na, a nu Zarua chu hmeithai a nih. 27 Solomon laka a hel dàn chanchin khom hieng ang hin a nih: Solomon chun lal in innghatna thut zawl do nghettu ding a siem bâkah a pa Davida khawpuia kul inhuonna bang se lai po po chu a thol tha a. 28 Jeroboam chu mi huoisen hmingthang a na, tlangvàl taima tak a nih ti Solomonin a hmu chun Josefa sûngkuoa sinthawa sor luihai po po chunga hotuah a sie a. 29 Chuong hun lai chun Jeroboam chu Jerusalema inthokin a suok a, Silo khuoa zawlnei Ahija, silfèn thara inthuom chun lam lakah a lo hmu a, an pahni chauin ram hnuoia chun an um a. 30 Ahija chun a hâk lai silfèn thar hlok chu phel sawm le phel hniin a pot thlêr a. 31 Ama chun Jeroboam kuomah, "Phel sawm hi la rawh. LALPA Israelhai Pathien chun hieng hin a hril: 'Ngai rawh, lalram hi Solomon kuta inthokin ka lâk hmang ding a na, hnam sawm chu ka pêk ding che a nih. 32 Amiruokchu, ka siehlaw Davida le Israel thla po pohai khawpui laia ka khawpui thlang bîk Jerusalem zârin hnam khat chu la chang a tih. 33 Ama chun a mi nghatsan a, Sidonhai pathiennu Astoret dâm, Moab-hai pathien Kemos dâm, Amon thlahai pathien Molek dâm a biek a, a pa Davida anga khawsa loin, ka lampui a hraw naw a, ka mithmuah thil indik lo a thaw a, ka thupêkhai le ka dânhai a zawm bok nawh. 34 'Sienkhom, a pa Davida, ka siehlaw le ka thlang, ka thupêkhai le thuruothai zawmtu zârin a ram pumpui ruok chu Solomon kuta inthokin lâkpêk nawng ka ta, a dam sûng bêk chu lalah inumtir ka tih. 35 A naupa kuta inthokin lalram chu lapêk ka ta, hnam sawmhai chu ka pêk ding che a nih. 36 Amiruokchu, ka hming umna dinga ka thlang Jerusalema hin ka siehlaw Davida thlahaiin rorêltu an nei zing theina dingin a naupa kuomah hnam khat chu la pe hrâm ka tih. 37 'Nang ruok hi chu ka ruot che a, i nuom dàn ang takin ro rêl i ta, Israelhai chungah lal nîng i tih. 38 Thu ka pêkhai che po po anga thaw a, ka lampui hraw a, ka siehlaw Davidan a thaw anga ka thuruothai le thupêkhai kengkaw a, ka mithmuah thil indik i thaw phot chun i kuomah um ka ta, Davida ka'n din nghet ang bok khan i sûngkuo indin nghet ka ta, Israelhai hi pêng ka ti che. 39 Hi lei hin Davida thlahai chu suktlawm ka ta, sienkhom kumkhuo chun ni naw nih' a tih" tiin. 40 Chuongchun, Solomon chun Jeroboam chu that a tum a, sienkhom Aigupta lal Sisak kuomah a tlân a, chu taka chun Solomon thi hma khat chu a um ta zing a. 41 Solomon inlal sûnga thil tlunghai, a thilthaw po po le a varna thuhai chu Solomon chanchin inziekna buah a chuong. 42 Solomon chun Jerusalema inthokin Israelhai chungah kum sawmli ro a rêl a. 43 Chuongchun, Solomon chu a thlatuhai kuomah a chawl a, a pa Davida khawpuia chun an phûm a, a naupa Rehoboam chun lalna chu a hung hluo ta a.

1 Kings 12

1 Rehoboam chu Sekem khuoah a fe a, Israel mihai po po khom chu lala siem dingin chu taka chun an fe ve a. 2 Nebat naupa Jeroboam, lal Solomon leia Aigupta rama tlân hmang chun chu ri chu a lo hriet a, Aigupta rama inthokin a kîr nawk a. 3 Israel mi pungkhawmhai po po chun Jeroboam chu an ko a, ama rawiin Rehoboam kuomah an fe a, 4 "I pa khan kan phur a sukrik taluo a, inrim taka a mi sorna le ringkol rik tak a min phurtir hi tuhin mi sukzângpèk la, i rong bawl kan tih" an ta. 5 Rehoboam chun, "Kîr nawk ta inla, ni thum hnungah hung nawk ro" a ta. Chuongchun, mipuihai chu an fe hmang ta a. 6 Lal Rehoboam chun a pa Solomon dam sùng po poa a hnuoia sinthaw hlak upahai chu a rawn a, "Hieng mipuihai hi iengti anga don dingin am in ngai a?" a ta. 7 Anni chun, "Voisun hin an siehlawah um a, an rong bawl a, tha taka i don tawl phot chun kumkhuoin i siehlawah um an tih" an ta. 8 Sienkhom, upahai remruotpui chu Rehoboam chun pom loin, ama ruoltlâkpui tlangvàl ruol, a bula khawsa hlakhai chu a rawn lem a. 9 An kuomah, "Iem in ngaidân ve chu? Mipuihaiin, 'I pa ringkol min phurtir hi mi sukzângpèk deu rawh' an ti hi iengtin am ei don ding a na?" a ta. 10 A ruolchamhai chun, "Hieng mipuihai kuoma hin, 'I pa ringkol mi'n phurtir hi mi sukzângpèk rawh' tia hung hriltuhai kuomah hieng hin hril rawh: 'Ka kutte hi ka pa kawng nêkin a lien lem. 11 Ka pa khan phur rik tak a'n phurtir cheu a, kei chun in phur chu ka sukrik zuol ding a nih. Ka pa khan vuokna hruolin a hrîk hlak cheu a, kei ruok chun khawmuol kaikuongin ka hrîk ding cheu a nih' tiin hril rawh" an ta. 12 Lalin, "Ni thum hnungah hung nawk ro" a ti angin ni thum hnungah Jeroboam le mipuihai po po chu Rehoboam kuomah an hung nawk a. 13 Lal chun upahai thurawn a lâk naw leiin mipuihai chu inrum takin a lo biek a. 14 Tlangvàlhai remruotpui angin, "Ka pa khan in phur a lo sukrik a, kei chun ka sukrik zuol ding a nih. Ka pa khan vuokna hruolin a hrîk hlak cheu a, kei ruok chun khawmuol kaikuongin ka hrîk ding cheu a nih" a ta. 15 Chuong ang chun mipuihai thu chu lal chun a ngâithlàk nuom nawh; chu thil hung tlung chu LALPAN Silo mi Ahija hmanga Nebat naupa Jeroboam kuoma a lo hril tah chu sukdikna dinga LALPA thilthaw a nih. 16 Lal chun an thu a ngâithlàk nuom dèr nawh ti Israelhaiin an hriet hnung chun lal kuomah, "Davida lakah iem chanvo kan nei hrim a?Jessai naupa lakah rochan iem kan nei ve a? Aw Israelhai, in puon in tieng kîr nawk ta ro. Aw Davida, i sûngkuo chu nangin enkol ta rawh" an ta. Chuongchun, Israelhai chu in tieng an kìr ta rip a. 17 Judai ram khuoa um Israelhai ruok chu Rehoboam inlalna hnuoiah an la um zing a. 18 Lal Rehoboam chun sinthawa sor luihai inrawitu Adoniram chu a tir a, Israelhai chun lungin an lo dêng hlum a. Lal Rehoboam ruok chu a tawlailirah a lût hman hràm a, Jerusalem tieng a tlân sie a. 19 Chuongchun, Israelhai chu Davida sûngkuo lakah tu chen hin an hel tah a nih. 20 Israel mihai chun Jeroboam a hung kîr nawk tah ti an hriet chun, an pungkhawmnaa hung dingin an ko a, Israelhai chunga lalah an siem a. Juda hnam chauh naw chu Davida sûngkuo tienga thang an um ta nawh. 21 Rehoboamin Jerusalem a hung tlung chun Israel sûngkuohai chu do a, Solomon naupa Rehoboam ta dinga la lêt nawk dingin Juda hnama mi le Benjamin hnama mihai laia mi huoisen thlang bîk mi nuoi khat le sîng riet a khawm a. 22 Amiruokchu Pathien mi Semai kuomah Pathien thu a hung tlung a, 23 "Judai ram lal Solomon naupa Rehoboam kuoma le Juda le Benjamin sûngkuo po pohai kuoma le mi danghai kuoma khom, 24 LALPAN hieng ang hin a hril: Hang fe naw ro, Israel thla, in unauhai chu hang do der naw ro, mani in tieng fe vong ro. Hi thil hi keima thaw a nih' tiin hril tawl rawh" a ta. Chuongchun LALPA thu chu an awi a, LALPA ti ang chun an kîr ta vong a. 25 Chuongchun, Jeroboam chun Efraim tlângrama Sekem khuo chu kulin a'n huon a, chu taka chun sawt naw te a um a. Chu taka inthok chun a suok nawk a, Peniel khuo chu kulin an huon nawk a. 26 Jeroboam chun a lûngrilin, "Tuhin lalram hi Davida sûngkuoa kîr nawk el theia um a nih. 27 Hienghai hi inthawi dinga LALPA Tempula an hang fe pha chun an lalpa, Judai ram lal Rehoboam tieng an lungril thle nawk a ta, kei mi that an ta, lal Rehoboam tieng pakai nawk el an tih" tiin a'n ngaituo a. 28 Chuongchun, lal chun mi a rawn a, rangkachak bawngte lim pahni a siem a, an kuomah, "In ta dinga Jerusalema hang fe chu a hautak taluo. Aw Israelhai, en ta u, Aigupta rama inthoka thuoi suoktu cheu in pathienhai hi" a ta. 29 Pakhat chu Bethelah a sie a, a dang chu Dan-ah a sie bok a. 30 Chu chu thil suol inthawtirtu a hung ni ta a, mipuihai chun a pahnia be dingin Bethel le Dan chen chen khom an fe el ta si. 31 Jeroboam chun hmun sàngah in dâm a bawl a, Levi thlaa mi ni lo vântlâng laia mi a nuom nuom thiempuah a siem a. 32 Judai rama kût an hmang hlak ang bokin a thla rietna, ni sawm le ni ngana chu Jeroboam chun kût niah a ruot a, maichâma chun inthawina a'n hlàn a. Chu chu Bethelah a thaw a, a bawngte lem siem kuoma chun inthawina a'n hlân a, hmun sànga ding thiempu a ruothai chu Bethela chun a sie bok a. 33 Amain a nuom anga a ruot thla ngei, thla rietna, ni sawm le ni nganaah Bethela maichâm a siema chun a hang inthawi a. Chuong ang chun, Israel thlahai ta dinga kût ruotin, maichâma chun thilpêk a hang inhlàn a nih.

1 Kings 13

1 Maichâma Jeroboamin inthawina inhlàn dinga a ngîr lai chun LALPA thuin Judai rama inthokin Bethela chun Pathien mi a hung a. 2 LALPA thuin maichâm chu a'n riem khum a, "Aw maichâm, maichâm, LALPA chun, 'Ngai ta, Davida sûngkuoa inthokin naupa a hming Josia hung pieng a ta, i chunga rimtui raw hlaktuhai le hmun sànga thiempuhai hi i chunga ngei hin inthawina dingin la hung hmang a ta, i chunga hin mihriem ruhai an la hung raw ding a nih' a tih" tiin. 3 Chun, chu ni vêk chun inchikna a pêk a: "Hi hi inchikna dinga LALPA thu puong chu a nih: maichâm hi koi phok a ta, a chunga meivâp hi inbaw vong a tih" a ta. 4 Pathien miin Bethela maichâm a'n riem khum lai ri lal Jeroboamin a hriet chun "Man ro" a ta, maichâma inthok chun kutin a hang ban a. Man tuma a banna bàn chu a'n kon nghal a, a lâk kîr thei ta naw a. 5 Maichâm chu a'n phel phok a, LALPA thua Pathien miin inchikna a pêk ang khan, meivâp chu an baw ta vong a. 6 Chun, lal chun Pathien mi kuomah, "Ka bân hi a hung that nawk theina dingin LALPA i Pathien kuomah tongtaiin mi hnipêk rawh" a ta. Chuongchun, Pathien mi chun a hnipêk a, lal kut chu a hmaa ang bokin a hung pangngai nawk ta a. 7 Lal chun Pathien mi kuomah, "Ka in tieng ka kuomah hung la, bu dâm fa la, thilpêk khom pêng ka ti che" a ta. 8 Pathien mi chun lal kuomah, "I thil nei po po zâtve mi pe ding ni la khom i inah hung naw ning. Hi hmuna hin bu fain tui dawn bok naw ning. 9 LALPA chun, 'Ieng khom fain i dawn ding a ni naw a, i hungna lampui hrawin i hung kîr nawk ding a ni bok nawh' tiin thu a mi pêk a nih" a ta. 10 Chuongchun, Bethela a hungna lampui chu hraw ta loin lam dangah a kîr a. 11 Chun, Bethela chun zawlnei putar pakhat hi a um a, a nauhai chun chu nia Bethela Pathien mi thilthaw po po le lal kuoma a hril chu a kuomah an hril sawng a. 12 An pa chun, "Khaw tieng lam am a hraw a?" a ta, a nauhai chun Judai rama inthoka hung Pathien mi kîrna tieng lam chu an kawkhmu a. 13 A nauhai kuoma chun, "Sabengtung mi buotsaipêk ro" a ta, an buotsai a, sabengtung chunga chun a chuong a. 14 Pathien mi chu a hnot zui a, saisaw thing hnuoia a lo chawl lai chu a hnot phâk a, a kuomah, "Judai rama inthoka hung Pathien mi chu i ni maw?" a ta, ama chun "Ni e" a ta. 15 Zawlnei chun, "Ka inah hung la, bu dâm hung fa raw khai" a ta. 16 Pathien mi chun, "Kîrin nang ka zui thei naw che a, hi hmuna hin fain ka dawn thei bok nawh. 17 LALPA thu chun, 'Chu taka chun bu fain tui i dawn ding a ni naw a, i va fena lam pangngaia chun i hung kîr nawk ding a ni bok nawh' tia hril ka ni si a" a ta. 18 Zawlnei putar chun, "Nangma ang boka zawlnei ka ni ve hi. Vântirkoin ka kuomah 'Faa a dawn theina dingin i in tieng hung thuoi kîr nawk rawh' tiin LALPA thu chu a mi hril a nih" tiin thukhêl a hril a. 19 Chuongchun, Pathien mi chu a in tieng a kîrpui a, a ina chun fain a dawn a. 20 Chuonga dawkân kîla an thung lai chun a thuoi kîrtu zawlnei putar kuoma chun LALPA thu a hung tlung a. 21 Judai rama inthoka hung Pathien mi kuoma chun inring takin, "LALPA thu a hung tlung a, 'LALPA thu chu i kal a, LALPA i Pathien thupêk che chu i zawm naw a, 22 i hung kîr nawk a, faa dawn dêr lo dinga a tina che hmuna ngei chun bu faa tui i dawn leiin, i ruong chu i thlatuhai zâlna hmunah phum ni ve naw nih' tiin a hril a nih" a ta. 23 Chun, LALPA miin faa a dawn zo chun a hung thuoi kîrtu zawlnei chun sabengtung a buotsaipèk a. 24 A hang fe chu lam lakah sakeibaknei leh an intuok a, a lo se hlum a, a ruong chu lampuia chun a thalin a zâl a, a ruong sîr khing tieng chun sabengtung chu a ngîr a, khing tieng panga chun sakeibaknei chu a ngîr ve zing bok a. 25 Chun, chu lam hung hraw mi thenkhatin lampuia ruong zâl le a bula sakeibaknei ngîr zing an hmu thu chu zawlnei putar umna khuoa mihai chu an va hril a. 26 Lam laka va thuoi kîrtu zawlneiin chu thu a lo hriet chun, "Pathien mi, LALPA thu awi nuom nawtu kha a ni chu. LALPA thuin a hril angin, LALPAN sakeibaknei kutah a pêk a, a lo thàm a, a se hlum a ni chu" a ta. 27 A nauhai kuoma chun, "Sabengtung mi buotsaipêk ro" a ta, an buotsaipêk a. 28 Chuongchun, a fe a, lam laia a thala ruong zâl le a bula sakeibaknei le sabengtung ngîr zing chu a va hmu a, sakeibaknei chun ruong chu a la fâk naw a, sabengtung khom chu ieng khom a law bok nawh. 29 Chuongchun, zawlnei chun Pathien mi ruong chu a'n hlawm a, sabengtung chunga chun a hlàng kai a, a kîrpui a, zawlnei putar khuoa chun sûn ding le vûi dingin a lûtpui a. 30 Chun, ruong chu ama thlânah a'n zâltir a, "A va poi ngei de aw, ka unaupa" tiin a ta a. 31 A vui hnung chun a nauhai kuomah, "Ka thi pha chu Pathien mi zâlnaa hin mi hung phûm ve un la, a ru bula hin ka ruhai hung inzâltir ve ro. 32 Pathien thua Bethela maichâm le Samari ram khawpui hmun sànga in po pohai a'n riem khumna thu kha a hung tlung indik ngei ngei ding a ni si a" a ta. 33 Chuong thil po po hnunga khom chun Jeroboam chun a um dàn suolhai chu a la bànsan chuong naw a, hmun sànga thiempu dingin vântlâng mi a nuom nuom a la ser hrang ta zing a. 34 Chu chu Jeroboam sûngkuo suolna, an tlûkna siemtu le khawvela inthoka sukbohmangtu chu a nih.

1 Kings 14

1 Chuong lai chun Jeroboam naupa Abhija chu a hung damnaw ta a. 2 Jeroboam chun a nuhmei kuomah, "Inthok la, Jeroboam nuhmei i nih ti an hriet thei nawna dingin inchei danglam la, Silo-ah fe rawh. Chu taka chun zawlnei Ahija a um a, ama chu hi mihai chunga lala ka la hung um ding thu mi hriltu kha a nih. 3 Bei tluon sawm le kêk iemani zât le khuoizu bûr khat chawi la, a kuomah va fe la, naupang um dàn ding chu lo hril a ti che" a ta. 4 A hril angin Jeroboam nuhmei chun a thaw a, Silo-a Ahija inah a fe a. A upat leiin Ahija mit chu a'n thim ta a, khuo a hmu thei ta nawh. 5 Amiruokchu, LALPAN Ahija kuomah, "Jeroboam nuhmei chu a naupa damnaw chungthu indon ding chein a hung mêk a, chu chu kha kha tiin i lo hril ding a nih. A hung pha chun mi dang ni awm takin hung insiem a tih" a ta. 6 Chun, Ahija chun kotkhâra a hung pèn lut lai ri a hriet charin, "Nang Jeroboam nuhmei, hung lût raw khai. Ieng dinga mi dang anga i'n siem am a na? Chanchin tha naw tak hril ding chea tir ka nih. 7 Kîr nawk ta la, Jeroboam kuoma chun "LALPA, Israelhai Pathien chun hieng hin a tih: 'Mipuihai laia inthokin ka chawisâng che a, ka mi Israelhai chungah hotuah ka siem che a, 8 Davida sûngkuohai ram ka lâkpêk a, chu chu ka pêk che a, sienkhom nang ruok chu ka siehlaw Davida angin i um ve nawh; ama ruok chun ka thupêkhai a zawm a, ka mithmuah thil tha chauh thaw a tum a, a lungril po poin a mi zui hlak. 9 Nang ruok chun i hmaa mihai po po nêkin thil suol i thaw nasa lem a, lungsen dinga mi cho phawkin, hnam dang pathienhai lem thîrin i siem a, hnung tieng i mi nghatsan a. 10 'Chuleiin, Jeroboam sûngkuoah sietna hung intlungtir ka ta. Jeroboama inthoka nau pasal pieng taphot chu, bawia um amanih zalena um amani khom, sukram vong ka ta, miin êk tawng a raw fai vong hma khata a raw angin Jeroboama sûngkuo chu raw fai vong ka tih. 11 Jeroboam sûngkuoa mi, khawpuia thi taphot chu uiin fâng an ta, ram hnuoia thi taphot chu chunglêng vatehaiin tlàn an tih. Chu chu LALPA thu a nih' tiin hril rawh. 12 "Chuongchun, tho la, i in tieng kîr nawk el ta rawh. Khawpui sûng i kein i sir charin naupang chu thîng a tih. 13 Ama chu Israelhai po poin sûn an ta, vui an tih, Jeroboam sûngkuo lai ama chauh chu thlàna phûm hlaw ding um sun chu a nih. Jeroboam sûngkuo lai hin ama chunga chauh hin thatna iemani LALPA Israelhai Pathien chun a hmu a nih. 14 "Voisun lá là hin Jeroboam sûngkuo sukbohmangtu ding LALPAN ama ta dingin Israelhai lal ding hung indin suok a tih. Voisun ngei hin tie! Tak tak maw? Ni e, tu ngei el hin tie! 15 LALPAN Israel chu vuong a ta, va kama phairuong ang elin inhning an tih. LALPA chu suklungsen a, pathiennu Aser lem thinghai siema an phun leiin, an puhai a lo pêk tah, hi ram tha taka inthok hin Israelhai chu pot suok fai vong a ta, Eufretis Vadungpui ràla chen la sukdar vong a tih. 16 Jeroboamin thil suol a thawhai lei le Israelhai khom thil suol a'n thawtir leiin, Israelhai chu nghatsan a tih" a ta. 17 Chuongchun, Jeroboam nuhmei chu a tho a, a suok a, Tirza khuo tieng a pan a, an sumphuk a tlung charin naupang chu a thi a. 18 LALPAN a siehlaw zawlnei Ahija hmanga a hril tah angin an phûm a, Israelhai po poin an sûn a. 19 Jeroboam inlal laia thil tlung dang hai, a râl bei thu dâm le a rorêl dânhai chu Israel lalhai chanchin inziekna lekhabuah a chuong. 20 Kum sawmhni le kum hni sûng ro a rêl hnungin a thlatuhai kuomah a chawl a, a naupa Nadab chun a lalna chu a hung hluo a. 21 Solomon naupa Rehoboam chu Judai ramah lalin a um a, a hung inlal chun kum sawmli le kum khat mi a na, LALPAN a hming umna dinga Israel hnamhai khuo po po laia a thlang khawpui Jerusalema chun kum sawm le pasari a'n lal a, a nu hming chu Naami a na, Amon mi a nih. 22 Judahai chun LALPA mithmuah thil suol an thaw a, an thlatuhai po po khûma an suol lei chun a thîkthu an chok tho a. 23 Hmun sàng siemin, muol bawk insângna deu taphot le thingbuk inzâr thatna taphotah lung ser le pathiennu Asera lem thinghai chu an phun a. 24 A ram sûnga chun pasal inzorna bûk dâm siemin, Israel thlahai hmaa LALPAN a hnot suok tah hnamhai ang bokin thil tirdakum tinrêng an thaw ve a. 25 Lal Rehoboam inlala inthoka kum nganaah Aigupta lal Sisak chun Jerusalem a hung rûn a. 26 LALPA tempula rosum le lal ina rosumhai chu a lâk fai vong a, Solomon siem rangkachak phawhai po po khom a lâk sa bok a. 27 Lal Rehoboam chun a aiin dâr phaw a siem a, lal in kot vêngtu kawmandarhai chu a'n koltir a. 28 LALPA tempulah lal a fe pha leh vêngtuhai chun dâr phaw chu an chawi a, an hung kîr pha leh vêngtuhai pindana a siena hmuna chun an thak kîr nawk hlak a. 29 Rehoboam inlal sûnga thil tlung danghai le a thilthaw po po chu Juda lalhai inlal lai chanchin ziekna lekhabuah a chuong. 30 Rehoboam le Jeroboam chu indo zing zinga khawsa an nih. 31 Chun, Rehoboam chu a thlatuhai kuoma chun a chawl a, Davida khawpuiah a thlatuhai lai an phûm a. A nu hming chu Naama a na, Amon mi a nih. A naupa Abija chun a lalna chu a hung hluo a.

1 Kings 15

1 Nebat naupa Jeroboam inlala inthoka kum sawm le kum rieta chun Abijak chu Judahai chunga lalah a hung um tan a. 2 Jerusalemah kum thum a'n lal a, a nu hming chu Maaka a na, Absalom naunu a nih. 3 A pa ang bokin thil suol a thaw ve a; a pu Davidan a lungril a pêk zo angin a lungril chu LALPA a Pathien tieng a pêk zo ve nawh. 4 Sienkhom Davida zârin LALPA a Pathien chun Jerusalema rorêltu ding pein, ama hung thlâktu ding naupa a'n dinpêk a, Jerusalem khuo a'n din nghet bok a. 5 Hit mi Uria chunga thil suol a thaw ti chauh naw chu Davida chun LALPA thupêkhai a bawsiet ngai naw a, LALPA mithmuah thil tha a thaw hlak. 6 Abija dam sûngin Rehoboam le Jeroboam chu an indo zing a. 7 Abija inlal sunga thil tlung danghai le a thilthawhai chu Juda lalhai inlal lai chanchin inziekna lekhabuah a chuong. Abija le Jeroboam chu an indo hlak a. 8 Chun, Abija chu a thlatuhai kuomah a chawl a, Davida khawpuia chun an phûm a, a naupa Asa chun a lalna chu a hung hluo a. 9 Israelhai lal Jeroboam inlala inthoka kum sawmhninaah Asa chu Judahai lalah a hung um tan a. 10 Kum sawmli le kum khat Jerusalemah a'n lal a, a pi hming chu Maaka a na, Absalom naunu a nih. 11 Asa chun a pu Davida ang bokin LALPA mithmuah thil fel a thaw hlak a. 12 Pasal inzorhai chu a rama inthokin a hnot suok a, a pa le puhai milem siem po po chu a pei hmang vong bok a. 13 A pi Maaka chen khom pathiennu Asera lem tirdakum tak a'n siemtir leiin lalnu nu a ninaa inthokin a bàn a, a thing milem insiemtirhai chu a phûr thlûk a, Kidron vadungah a raw a. 14 An hmun sànghai chu thiekpêk naw sienkhom a dam sûngin a lungril po po chu LALPA tieng a ngha tlat a. 15 A pain a lo inhlàn tah le ama ngeiin a lo inhlàn tah tangkaruo le rangkachak le thil danghai chu LALPA tempulah a lâk lût a. 16 Juda lal Asa le Israel lal Baasa chu an inlal sûng po an indo hlak a. 17 Israel lal Baasa chun Judahai a hang bei a, Judahai lal Asa rama inthoka tu khom hung lûta an suok thei nawna dingin Rama khuo chu kulin an huontir a. 18 Chun, Asa chun LALPA tempula mi le ama lal ina mi tangkaruo le rangkachak um po po chu a lâk suok a, a siehlawhai kutah a'n chawitir a, Damaska khuoa um Aram lal, Hezion naupa Tabrimon naupa Ben Hadad kuomah a tir a. 19 A kuoma chun, "I pa le ka pahai an indo hlak leiin nang le kei inkârah inremna thuthlung siem ei tih. En ta, tangkaruo le rangkachak thilpêk khom ka hung thon hi. Israel lal Baasa hi ka rama inthoka a'n hnûk dokna ding chun ama le in inkâra thuthlung i lo siem tah kha tu hin sût el rawh" tiin thu a thon a. 20 Ben Hadad chun Lal Asa thu chu a remti a, chuongchun Israel khuohai chu bei dingin a sipai kawmandarhai a tir a, Ijon khuo dâm, Dan khuo dâm, Abel Beth Maaka khuo dâm, Kinneret biel po po le Naftalia ram po po chu an bei a. 21 Chu thu chu Baasa-in a hriet charin Rama khuo kula a'n huon lai chu a tawpsan a, Tirza tieng a kîr nawk ta a. 22 Chu phing leh Lal Asa chun Judai ram po poah thu a thon vel a, Baasa-in Rama khuo inhuonna dinga thing le lung a hmanghai chu tu khom a awl um loin an thak ta mur mur a, chuonghai chu Lal Asa chun Mizpa khuo le Benjamin rama Geba khuo siemna dingin a hmang a. 23 Lal Asa inlal laia thil tlung danghai le a thilthawhai po po le a khaw siemhai chanchin chu Juda lalhai chanchin inziekna lekhabuah a chuong. Sienkhom a tar tieng chun a keah hri tha lo a hung invoi a. 24 Asa chu a thlatuhai kuomah a chawl a, Davida khawpuiah a thlatuhai lai an phum a. A naupa Jehosafat chun a lalna chu a hung hluo a. 25 Jereboam naupa Nadab chu Juda lal Asa inlal kum hninaah Israel lalin a hung um a, Israelhai chungah kum hnih a'n lal a. 26 LALPA mithmuah thil tha lo tak a thaw hlak a, a pa lam hraw chu a hraw ve a, Israelhai chu thil suol a'n thawtir ve a. 27 Chun, Isakar sûngkuo laia mi Ahija naupa Baasa chun a phier rûk a, Nadab le Israelhai po poin Filistinhai khuo Gibethon an inhuol lai chun Nadab chu a that a. 28 Juda lal Asa inlal kum thumnaa Baasa-in Nadab a that chun a hmunah lalin a um nghal a. 29 Lal a hung ni charin Jeroboam sûngkuo po po chu a that ram vong a. LALPAN a siehlaw Silo khaw mi Ahija hmanga a lo hril tah ang khan, Jeroboam sûngkuoa mi a'n thuok thei taphot chu hlà hrim a nei nawh. 30 Jeroboam thil suol thaw chun Israelhai chu a thuoi suol a, chu chun LALPA, Israelhai Pathien a suklungsen a nih. 31 Nadab inlal sûnga thil tlung danghai le a thilthawhai po po chu Israel lalhai inlal lai chanchin inziekna lekhabuah a chuong. 32 Juda lal Asa le Israel lal Baasa chu an inlal sûng po an indo a nih. 33 Judahai lal Asa inlala inthoka kum thumnaa chun Ahija naupa Baasa chu Tirza khuoah Israelhai chungah an lal tan a, kum sawmhni le kum li a'n lal a. 34 LALPA mithmuin thil tha lo tak a thaw hlak a, Jeroboam ang boka Israelhai chu suolna lampuia thuoitu le thil suol inthawtirtu a nih.

1 Kings 16

1 Baasa chungthua LALPA thu chu Hanani naupa Jehu kuomah a hung tlung a: 2 "Pilvuta inthokin ka lâk suok che a, ka mi Israelhai thuoituah ka sie che a, sienkhom Jeroboam lam hraw bok chu i hraw ve a, ka mi Israelhai chu thil suol i'n thawtir a, an suolnahai chun ka lungsenna i chok tho a. 3 Tu hin Baasa le a insûng hi ka lem hmang têp a, Nebat naupa Jeroboam le a sûnghai ang khan ka siem ve tawl ding a nih. 4 Baasa sûngkuo laia mi khaw sûnga thi ta phot chu an ruong uiin fâng an ta, ram hnuoia thi taphot chu chunglêng vatehaiin tlàn an tih' a ta. 5 Baasa inlal sûnga thil tlung danghai, a thilthawhai le thil hlen suokhai chu Israel lalhai chanchin inziekna lekhabuah a chuong. 6 Baasa chu a thlatuhai kuomah a chawl a, Tirza khuoah an phûm a. A naupa Ela chun a lalna chu a hung hluo a. 7 Jeroboam ang bokin Baasa chun LALPA mithmuah suol tinrêng thaw a, a thil suol thawhai chun LALPA a suklungsen a. Chun, Jeroboam sûngkuohai a that vong bok leiin Baasa le a sûnghai chungthuah LALPA thu chu zawlnei Hanani naupa Jehu hmangin a hung tlung a nih. 8 Juda lal Asa inlala inthoka kum sawmhni le kum ruknaa chun Baasa naupa Ela chu Tirza khuoah Israelhai lalin a hung um a, kum hni sûng a'n lal a. 9 A thoktu laia pakhat, a tawlailir zàtve chunga hotua a siem Zimri chun a phier rûk a. Chuong lai chun Ela chu Tirza khuoah a um a. 10 Tirzaa a lal in enkoltu Arza inah zu a lo inrui laiin, Juda lal Asa inlal kum sawmhni le kum saria chun Zimri chu a va lût a, a bei a, a that a, a lalna chu a hluo ta a. 11 Zimri chun lalthungpha a hluo charin Baasa sûnghai po po chu a that vong a, a laichinhai le ruol thahai laia pasal taphot chu tu khom hlà hrim a nei nawh. 12 Baasa sûngkuo chungthua LALPA thu zawlnei Jehu hmanga a hril tah angin Zimri chun a that vong a. 13 Baasa le a naupa Ela chun milem hmang lo bea Israelhai khom an thuoi suol leiin LALPA Israelhai Pathien lungsenna an chok tho a nih. 14 Ela inlal sûnga thil tlunghai le a thilthaw iengkim chu Israel lalhai inlal lai chanchin inziekna lekhabuah a chuong. 15 Juda lal Asa inlala inthoka kum sawmhni le kum saria chun Zimri chu Tirza khuoah ni sari sûng a'n lal a. Chuong lai chun sipaihai chu Filistinhai khuo, Gibethon bula chun an inkul a. 16 Zimriin phier rûka lal a that thu an inkulna hmuna inthoka Israelhaiin an hriet chun chu ni lá là chun an kawmandar Omri chu an riebûka chun Israel lal dingin an puong a. 17 Chuongchun, Omri le a kuoma um Israel mi po po chun Gibethon an suoksan a, Tirza an pan tung a, an inhuol a. 18 Khuo chu an lâk ngei ding a nih ti Zimriin a hriet chun lal in kulbîngah a tlân lût a, in chu a raw a, a kâng hlum ta a. 19 LALPA mithmuah thil suol thaw a, a suol thaw lei le Jeroboam lampui a hraw ve leia Israelhai thil suol a'n thawtir leiin chuong ang chun a thi a nih. 20 Zimri inlal sûnga thil tlung danghai le a thil phier rûk thuhai chu Israel lalhai inlal lai chanchin inziekna lekhabuah a chuong. 21 Chuongchun, Israel mipuihai chu pawl hniin an inthe a, a zâtve chun Ginat naupa Tibni chu lala siem tumin an zui a, a zâtvein Omri chu an zui a. 22 Sienkhom, Omri zuituhai chun Ginat naupa Tibni zuituhai chu an hne a, Tibni chu an that a, Omri chu a hung inlal a. 23 Juda lal Asa inlala inthoka kum sawmthum le kum khatnaa chun Omri chu Israelhai chunga chun a'n lal tan a, kum sawm le kum hnih a'n lal a, Tirza khuoa a'n lal sûng chu kum ruk a nih. 24 Chun, Semer kuoma inthokin Samariaa tlâng tangkaruo kilogram sawmsariin a'n chawk a, chu chu kulin a'n huon a, khawpui a siem a, a khaw hmingah a tlâng neitu hmasa Semer hming chawiin Samaria a'n puttir a. 25 Omri chun LALPA mithmuin thil tha lo tak a thaw hlak a, a hmaa mihai po po nêkin thil suol a thaw nasa bik a. 26 Nebat naupa Jeroboam thaw dàn po po a lâk a, Israelhai chu hmangna bo milem inbiektirin, an thil suol thaw chun LALPA Israelhai Pathien chu an suklungsen hle a. 27 Omri inlal sûnga thil tlung danghai le a thilthaw le hlen suok hai chu Israel lalhai inlal lai chanchin inziekna lekhabuah a chuong. 28 Omri chu a thlatuhai kuomah a chawl a, Samaria-ah an phûm a. A naupa Ahab chun a lalna chu a hung hluo a. 29 Juda lal Asa inlala inthoka kum sawmthum le kum rietnaah Omri naupa Ahab chu Israelhai chungah a hung inlal tan a, Samaria khuoa inthokin kum sawmhni le kum hni Israelhai lalah a um a. 30 Omri naupa Ahab chu a hmaa mihai po po nêkin LALPA mihmuin thil fel lo tak a thaw hlak a. 31 Nebat naupa Jeroboam suolna ang thaw vetuhai chu iengma loa ngai ni awm takin Sidon lal Ethbaal naunu Jezebel chu nuhmeiah a nei a, Baal rong bawlsanin a biek ve el ta a. 32 Samari khuoah Baal in a bawl a, chu taka chun maichâm a siem a. 33 Chun, pathiennu Asera lemhai chu a siem a, a hmaa Israelhai lal po po nêk khomin LALPA, Israelhai Pathien lungsenna chu a cho suok nasa lem a nih. 34 Ahab inlal laiin Bethel mi Hiel chun Jeriko a bawl tha a. LALPAN Nuna naupa Josua hmanga a lo hril tah angin, a lungphum chu a nau lutîr Abiram chânin a phûm a, a kul kotkhârhai chu a nau tlum tak Segub chânin a'n din bok a.

1 Kings 17

1 Gilead rama Tisbe khaw mi Elija chun Ahab kuomah, "LALPA, a rong ka bawl, Israelhai Pathien hringna sâlin ka hril, kum iemani zât chu ka thu loin daidaw tla naw ni a, ruo sûr bok naw nih" a ta. 2 Chun, LALPA thu chu Elija kuomah a hung tlung a, 3 "Hi taka inthok hin suok la, khaw sak tieng pan la, Jordan sak tienga um Kerit varuoma chun inbi hmang rawh. 4 Chu vadung tui chu tlàn i ta, a chawmtu ding che vaàkhai khom thu ka pêk tah" tiin. 5 Chuongchun, hrila a um ang tak chun a thaw a, Jordan sak tienga um Kerit varuoma chun a fe a, chu taka chun a um a. 6 Vaàkhai chun zîng le zân bei le sa an hung thak a, vadung tui chu a tlàn a. 7 A ramah ruo a sûr ta naw leiin iemani chen hnungah vadung tui chu a hung kang ta a. 8 Chun, LALPA thu chu a kuomah a hung tlung a, 9 "Tho la, Sidon rama Zarefat-ah fe la, chu taka chun um rawh. A chawmtu ding che hmeithai khom thu ka pêk tah" tiin. 10 Chuongchun a tho a, Zarefat khuoa chun a fe a, kul kotkhâr a va tlung chun hmeithai pakhat hin thing a lo fom a. Elija chun a ko a, a kuomah, "Ka dawn ding bêlin tui tlawmte mi hung lapêk thei i ti?" a ta. 11 Tui la dinga a fe lai chun, "Bei tlawmte bèk mi hung chawipèk bok rawh aw" a ta. 12 Hmeithai chun, "LALPA i Pathien hringna sâlin ka hril, bei chu ka nei dèr naw a, ka nei ve sun chu bêla beiphit vei khat le ûma sahriek tlawmte chauh a nih. Chu chu kei le ka naupa fâk dinga siem dingin thing ka hung fom vak a nih. Chu chu fâng kan ta, thi chu kan hmabâk a ni el tah" a ta. 13 Elija chun a kuomah, "Ti dêr naw rawh. Fe la, i ti ang tak chun va thaw rawh. Amiruokchu, beiphit le sahriek tlawmte i nei chun bei chikte mi siempèk hmasa phot la, hung chawi rawh, chu zoah i naupa le in ta ding chu i siem ding a nih. 14 LALPA, Israelhai Pathien chun 'Hi rama LALPAN ruo a hung insûrtir hma khat chun beiphit vei khat umna bêl chu phai naw ni a, sahriek tlawmte siena ûm chu kang bok naw nih' a ti a nih" a ta. 15 Chuongchun a fe a, Elija hril ang tak chun a thaw a, ni tina ama le a sûngkuo le Elija fâk khop chu a um zing a. 16 Elijain LALPA thu a hril ang khan, beiphit siena bêl chu a phai chuong naw a, sahriek ûm khom chu a kang chuong bok nawh. 17 Iemani chen hnunga chun in neitunu naupa chu a damnaw a, a natna chu a zuol deu deu a, a tawpah a thuok a tawp ta a. 18 Ama chun Elija kuomah, "Aw Pathien mi, nangin kei i mi khingna san ding iem a um a? Ka suolna mi'n hriet nontir ding le ka naupa mi thatpêk dinga hung i lo ni maw?" a ta. 19 Elija chun, "I naupa kha mi hang pe ta" a ta, a pom lai chu a lâk a, a umna pindan tieng chun a pom tung a, a khumah a'n zàl a. 20 Chun, LALPA a ko a, "Aw, LALPA ka Pathien, ka chêngna hmeithai chunga hin vangduoina intlungtirin a naupa hi ieng dinga i hung inthitir el am a na?" a ta. 21 Naupang chunga chun voi thum a bok a, tap pumin LALPA a ko a, "Aw LALPA, ka Pathien, lunginsiet takin hi naupang hringna hi hung pekîr nawk hràm rawh' a ta. 22 LALPA chun Elija hnina chu a lo ngàithlàkpêk a, naupang hringna chu amaah a hung kîr nawk a, a hung har ta a. 23 Elija chun naupang chu a pom a, pindana inthok chun a tumpui a, a nu kuoma chun, "En ta, i naupa hi a hung dam nawk tah ie" a ta, a pêk a. 24 Nuhmei chun Elija kuomah, "Tu zet hin chu Pathien mi i nizie le i baua LALPA thu i puong chu thutak a ni takzetzie ka hriet tah" a ta.

1 Kings 18

1 Chun, iemani chen hnung, a kum thumnaa chun LALPA thu chu Elija kuomah a hung tlung a, "Fe la, Ahab hmaah va'n lang la, chu zoah ruo hung insûrtir ka tih" tiin a hril a. 2 Chuongchun, Elija chu Ahab hmaah a va'n lang a. Samari rama chun tàm chu a hrâng hle a. 3 Ahab chun LALPA ti mi tak Obadia, a lal in enkoltua a hmang chu a ko a. 4 Jezebelin LALPA zawlneihai a rawt lai khomin Obadia hin zawlnei zakhat zet chu pûk pahniah sawmnga ve vea thupin fâk le dawn pein a chawm tawl a nih. 5 Ahab chun Obadia kuomah, "Ei ranhai that ngai loa ei sakorhai le sabengtunghai tlatna ding hna hring umna hmun a um tak duoiin a ram sûnga tui hnâr le vadung umna taphot fang rawh" a ta. 6 Chuongchun, an ram fang ding chu an insem a, Ahab chu amain a suok a, a fe nawna tieng chun Obadia chu a fe a. 7 Chuonga Obadia a fe lai chu Elija leh an intuok a. Obadia chun a la hriet a, a hmaa chun hnuoi sikin a bokkhup a, "Ka pu Elija kha i ni chie si maw?" a ta. 8 Ama chun, "Ni e. Fe la, i pu kuomah, 'Saw taka son Elija a um' tiin va hril rawh" a ta. 9 Obadia chun, "I siehlaw hi Ahab kuta thi dinga i hang pêk el chu, iem ka thaw suol a um a? 10 LALPA i Pathien hringna sâlin ka hril hi, ka pu hin nangma zong dinga mi a tir nawna hnam le ram a um nawh. Tu hnam le ram khomin i um naw thu an hril pha leh an hmu zo naw takzet che thu inkhàm meuin a'n samtir zie a nih. 11 Tu hin, 'Elija chu hi taka hin a um' ti hril dingin i mi tir si hi. 12 Ka mâksan pha che LALPA Thlarauin khaw tieng am a thuoi ding che ti ka hriet nawh. I um ti Ahab va hril lang, a hmu zo si naw che chun mi that a tih. I siehlaw hi tleirawl ka ni laia inthoka LALPA chawibiektu ka ni bok si a. 13 Jezebelin zawlneihai a rawt laia ka thilthaw kha ka pu hin i hriet naw a ni maw? Pûk pahniah LALPA zawlnei zakhat, pûk pakhatah sawmnga ve vein ka thup a, fâk le dawnin ka chawm tawl a ni kha. 14 Amiruokchu, tu hin ka pu kuomah fe a, 'Elija hi taka hin a um' ti hril dingin i mi tir si hih. Mi that ngei ngei a tih" a ta. 15 Elija chun, "A rong ka bawl Iengkim LALPA hringna sâlin ka hril hi, voisun hin Ahab ka hmu ngei ngei ding a nih" a ta. 16 Chuongchun Obadia chu Ahab be dingin a fe a, a va hril a, Ahab chu Elija hmu dingin a hung a. 17 Elija a hmu chun, "Nanga pa hi i ni maw Israelhai sukbuoitu chu?" a ta. 18 Elija chun, "Israelhai ta dingin buoina ieng khom ka siem nawh. Nang le i pa in ni lem. LALPA thupêkhai chu bânsanin Baal in zui ta lem a. 19 Israel mihai po po chu Karmel tlânga mi hung hmu dingin ko khawm tawl rawh. Baala zawlnei zali le sawmnga ruol le Jezebel dawkâna thlaithlèng kîl hlak Asera zawlnei zali ruol khom kha hung ko khawm vong rawh" a ta. 20 Chuongchun, Ahab chun Israel thlahai po po kuomah mi a tir a, zawlneihai le chun Karmel tlângah a ko khawm a. 21 Elija chun mipuihai chu a va hnai a, "Lungawp inkàiin ieng chen top am in um ding a na? LALPA hi Pathien a ni chun zui unla, Baal hi Pathien a ni chun zui ro" a ta. Mipui chun ieng khom an hril nawh. 22 Elija chun an kuomah, "Kei chauh hi LALPA zawlneihai laia la um sun chu ka ni ta a, Baal ruok chun zawlnei zali le sawmnga a nei. 23 Bawngchal pahni hung kei unla, anni chan dingin bawngchal pakhat thlang hai sien, chan nawi hai sien, thing chungah sie hai sien, mei ruok chu a hnuoiah sêm loin. Kei khomin bawngchal dang chu buotsai ka ta, thing chungah sieng ka ta, sienkhom a hnuoiah mei sêm loin. 24 Chu zoah in pathien hming lam unla, kei khomin ka LALPA hming chu lam ka ta, ei kona meia hung dontu taphot chu Pathien ni raw se" a ta. Mipui chun, "I hril chu a tha" an ta. 25 Elija chun Baal zawlneihai kuomah, "Bawngchal pakhat lem lem hi nangni puola ding thlang unla, buotsai unla, in tam bìk êm leiin nangnin tan hmasa ro. In pathien hming ko unla, sienkhom a hnuoiah mei sêm naw ro" a ta. 26 Chuongchun an chanpuol bawngchal chu an lâk a, an buotsai a. Chu zoah Baal hming chu zîng tienga inthoka chawhnung tieng chen chun an ko an ko a. 'Aw Baal, mi hung don rawh" tiin an khêk a. Sienkhom riva hrim hrim a um naw a, dontu tu khom an um nawh. Maichâm an siem chu an lâm huol an lâm huol a. 27 Sûnchanga chun Elija'n anni chu ti-elin, "Khêk inring deu ro khai! In pathien chu a ni chie sia maw! A'n ngaituo vung vung amanih, a buoi amanih, a'n zin hmang amanih khom ni rawi naw nim. An naw leh a in a, kei tho a ngai khom ni ta bâng a tih" a ta. 28 Chuongchun, an khêk inring zuol sau a, an chìng dàn pangngaiin inthi pheng phungin kawlhnàmin an inât a, feiin an insun pop a. 29 Nisa a hung inher a, zân tieng inthawi hun ding chenin thu insamin an insawi duol duol a, sienkhom donna riva hrim a um naw a, dontu an um naw a, ûksaktu an um bok nawh. 30 Chu phing leh Elija chun mipuihai kuomah, "Mi hung hnai ro khai" a ta, mipui chun an va hnai a. LALPA maichâm an sukchim ta hnung chu a siem tha a. 31 Chun, "I hming chu Israel ni tâng a tih" tia LALPA thu lo dongtu Jakob naupahai hnam zât lung sawm le pahni Elija chun a lâk a. 32 Chu lunghai chun LALPA maichâm a siem a, maichâm sîr tuokin tui litar sawmpali vel inlengna ding a cho huol a. 33 Thing chu a hang rem fel a, bawngchal chu a chan nawi a, thing chunga chun a sie a. "Bêl paliah tui sung sip unla, pumraw thilhlân le thing hi hung buok khum ro" a ta. 34 Chun, "Hung bur nawk ro" a ta, an bur khum nawk a. "A voi thumna dingin hung bur nawk ro" a ta, an bur khum nawk a. 35 Tui chu maichâm vela chun a luong dum dum a, a khur cho huola chun a'n tling sip dul a. 36 Zân tieng inthawi huna chun Elijan maichâm a va pan hnai a, "Aw LALPA, Abraham Pathien, Isak le Israel Pathien, voisun hin Israelhai Pathien i nizie le kei i siehlaw hin hieng thil po po hi nangma thupêka ka thaw a nih ti hung inhriettir tawl rawh. 37 Aw LALPA, mi hung don rawh. Hieng mipuihai hin nang LALPA hi Pathien i nizie hre a, an lungril inlamlêt a, sima i kuom tieng an hung kîr theina dingin aw LALPA, mi hung don ngei rawh" a ta. 38 Chuongchun, LALPA mei chu a hung tla a, pumraw thilhlân hai, thing hai, lung hai, le pilvuthai chu a kang hmang a, khur cho huola tui khom chu a hîp kang ta vong a. 39 Mipuiin chuong thil po po an hmu chun an bokkhup a, "LALPA hi Pathien chu a lo nih, LALPA hi Pathien chu a lo nih" tiin an khêk a. 40 Elija chun an kuomah, "Baal zawlneihai hi man unla, pakhat khom insuo naw ro" a ta. Chuongchun an man a, Kison ruomah an thuoi thlâk a, an that tawl ta a. 41 Chun, Elijan Ahab kuomah, "Fe tung la, fain dawn ta rawh, ruopui vanawn sûr ding ri a hung chu" a ta. 42 Ahab chu a fe a, fain a dawn a; Elija ruok chu Karmel tlâng sìpah a kai a, hnuoi sikin a kûn a, a kap kârah a lu a thun a. 43 A siehlaw kuoma chun, "Fe tung la, tuipui tieng hei thlir ta" a ta. A ti ang chun a hang kai a, a hei thlir vel a, "Ieng khom a um nawh" a ta. Chuong ang chun voi sari zet Elija chun, "Hang en nawk rawh" tiin a tir non a. 44 A voi sarinaa chun, "Tuipuia inthokin mihriem kuttum tiet sûm a hung suok ka hmuh" a ta. Ama chun, "Ahab kuomah hang fe la, 'I tawlailir buotsai la, fe thla ta rawh, ruoin nang rawi a ti che' ti rawh" a ta. 45 Sawt naw tea chun vân chu sûmin a hung duk ta kul a, thli a hung inthok a, ruopui vânawn a hung sûr a, Ahab chu a tawlailirah chuongin Jezreel khuo tieng a pan a. 46 LALPA thilthawtheina chu Elija chungah a um a, a zakuo fuol chu a kawngah zemin, Ahab hmaa chun Jezreel chenin a tlân khal a.

1 Kings 19

1 Elija thilthaw po po le kawlhnàma zawlneihai po po a'n thattir thu chu Ahab-in Jezebel kuomah a hril vong a 2 Jezebel chun Elija kuomah mi a tir a, "Khang i thathai laia pakhat ang bok khan zînga hin ka siem ve naw che chun pathienhaiin an law law mi law hai sien, chuong nêka nasa hman chun mi thaw raw hai se" tiin thu a thon a. 3 Elija chun a ti leiin a hringna hum dingin a tlân ta nghal a. Judai rama Beersheba a tlung chun a siehlaw chu a mâksan a, 4 ama ruok chu chu taka inthoka ni khat lam thlalèrah a fe a. Hmunphi thing bul a tlung chun a buk hnuoiah a thung a, "LALPA ka tuor tawk tah. Ka hringna hi la el ta rawh. Ka thlatuhai nêkin ka tha chuong bîk bok si nawh" tiin thi nuomin a tongtai a. 5 Thing buk hnuoia chun a zâl a, a in ta a. Inrang takin vântirkoin a hung not har a, "Tho la, fa rawh" a ta. 6 A hang ngha vel a, a lu thluona chun tuiûm le meilinga em hmin diem beiper a hmu a. Chuongchun a fâk a, a zâl a, a in nawk ta a. 7 Chun, LALPA vântirko chu a hung nawk a, "Tho la, fa rawh, i fena ding ban zo naw rawi i tih" a ta. 8 Chuongchun a tho a, fain a dawn a, a bu fâk lei chun tha a hung nei a, Pathien tlâng Horeb a tlung chenin ni sawmli le zân sawmli a fe a. 9 A tlung chun pûk pakhat a hmu a, riek dingin a lût a. Chu taka chun Pathienin a biek a, "Elija, hi taka hin iem a na i thaw?" a ta. 10 Ama chun, "Iengkim LALPA Pathien ta dingin nasa takin thahnem ka ngâi hlak a. Israelhaiin i thuthlung an hnawl a, i maichâmhai an sukchim a, i zawlneihai chu kawlhnàmin an that a. Kei chauh hi ka ni ta a, keikhom hi mi that an tum zing a nih" a ta. 11 LALPA chun a kuomah, "Pûka inthok khan hung suok la, tlânga khin LALPA hmaah hang ngîr rawh, LALPA chun a hung fe pèl ding a nih" a ta. Chu zo chun thlipui na takin tlâng chu a hung mût phel a, LALPA hmaa chun lungpuihai chu a mût koi pheng phung a, sienkhom thlia chun LALPA chu a um nawh. Thlipui a hrâng zo chun simkhawlei a hung inhnìng dur dur a, sienkhom simkhawleia chun LALPA chu a um nawh. 12 Simkhawlei a hung inhning zo chun mei a hung suok puot puot a, sienkhom meia chun LALPA chu a um nawh. Mei a hung suok zo chun rawl dam diei a hung suok a. 13 Chu chu Elijan a hriet chun a korfuolin a hmai a hup a, a suok a, pûk kota chun a ngîr a. Rawl chun a kuomah, "Elija, hi taka hin ieng thawa um am i na?" a hung ti a. 14 Elija chun, "LALPA Iengkim Pathien ta dingin nasa takin thahnem ka ngâi hlak a. Israelhaiin i thuthlung an hnawl a, i maichâmhai an sukchim a, i zawlneihai chu kawlhnàmin an that a. Kei chauh hi ka ni ta, kei khom hi mi that an tum zing a nih" a ta. 15 LALPA chun a kuomah, "I hungna lampui tieng khan kîr nawk la, Damaska thlalèrah fe rawh. I tlung pha leh Aram lal dingin Hazael chu hriek nâl rawh. 16 Chun, Nimsi naupa Jehu chu Israel lalah hriek nàl la, Abel Mohala inthoka hung Safat naupa Elisa chu zawlneia nangma thlâktu dingin hriek nàl bok rawh. 17 Hazael kawlhnàm pumpel taphot chu Jehu-in that a ta, Jehu kawlhnàm pumpel taphot chu Elisa-in hung that a tih. 18 Chuong sa khom chun, Baal hmaa la kûn ngai lo le Baal la fawp ve ngai lo mi sângsari ka ta dingin ka huol zing a nih" a ta. 19 Chuongchun, chu taka inthok chun a suok a, Safat naupa Elisa chu a va zong suok a. Bawngchal tuok sawmpahni sorin lo a lo kei a, ama ngeiin bawngchal tuok sawmpahni chu a khal a nih. Elija chu a kuomah a fe a, a silpuon a va'n hâktir a. 20 Elisa chun a bawngchal sorhai chu a mâksan a, Elija chu a zui a. "Ka nu le pa fawpin vàn thla zet ka ta, chu zoah hung zui ka ti che" a ta. Elija chun, "Va chibai rawh, ka khap rêng rêng che le'm" a ta. 21 Elisa chu a kîr nawk a, a bawng sorhai chu a hung thuoi a, a that a, bawng sorna hmangruohai chun sa chu a suong a, mipuihai kuomah a sem a, an fâk tlàng a. Chu zoa chun a suok a, Elija chu a zui a, a rong a bawlpêk a.

1 Kings 20

1 Aram lal Ben-Hadad chun a sipai po po a khawm a, lal sawmthum le pahnihai chun an sakorhai le tawlailirhai leh an zui a, Samaria chu an inhuol a, an bei a. 2 Israel lal Ahab kuomah mi tirin thu a thon a, "Hi hi Ben-Hadad thu chu a nih: 3 I tangkaruo le rangkachak po po le i nuhmei le nauhai laia a tha tha chu ka ta a nih" tiin. 4 Israel lal chun, "Aw laltak, ka pu, i hril ang chun a ni hrim annawm, keima le ka nei po po chu i ta a nih" tiin a lo don a. 5 Chun, Ben-Hadad mi tirhai chu an hung nawk a, a kuomah, "Hi hi Ben-Hadad thu chu a nih: 'I tangkaruo le rangkachakhai le i nuhmeihai le nauhai ka lâkpêk ding che thuah mi ka hung tir ta a. 6 Amiruokchu, zîngah hieng tik hun vela hin nang le iIthoktuhai po po in dap dingin ka thoktuhai ka hung tir ding a nih. In ro hlu po po hung lâkpêk an ti cheu a, tol hmang an tih' a ti a nih" tiin an hril a. 7 Israel lal chun a rama upahai po po chu a ko khawm a, an kuomah, "En ta u, hi mi hin thil tha lo thaw a hang tum nasat dàn hi! Ka nuhmeihai le nauhai le ka tangkaruohai le rangkachakhai a hung ngèn khan ka lo sèl khom a ni bok si naw a" a ta. 8 Upahai le mipui po po chun, "Lo ûksak naw la, a thil ngiethai chu lo remtipui bok naw rawh" an ta. 9 Chuongchun, Ben-Hadad mi tirhai kuoma chun, "Ka lalpa, lal kuoma chun hieng ang hin hril ro: 'I thil ngiet hmasa po kha chu i siehlaw hin thaw ngei a ta, tuta i hung ngiet ruok hi chu thaw thei naw nih' tiin" a ta. A donna chu hawnin Ben-Hadad kuomah an kîr nawk a. 10 Chun, Ben-Hadad chun Ahab kuomah "Vei khat peia ka mihai kuoma sem ding Samaria-a hin pilvut ka hla vai chun, pathienhaiin an law law mi law hai sien, chuong nêka nasa khom chun mi thaw raw hai se" tiin mi a tir nawk a. 11 Israel lal chun, " 'Sipai huoisenhai chu indo hma ni loin indo zo hnungah a nih an uong chauh hlak chu' tiin hung hril ro" a ta. 12 Ama le lalhaiin riebûka zu an dawn laiin chu thu chu Ben-Hadad chun a lo hriet a, a mihai kuoma chun, "Va bei ro leh" a ta, khawpui chu bei dingin an insiem ta a. 13 Chuong lai chun Israel lal Ahab kuomah zawlnei a hung a, "Hieng hin LALPAN a hril: 'Saw zozài sipai ruol saw i hmu am? Voisun hin sawnghai po po saw i kutah ka pêk ding a nih, chuongchun, LALPA chu ka nih ti hre tâng i tih' tiin" a ta. 14 Ahab chun, "Tuhaiin am an bei ding?" a ta. Zawlnei chun, "'Biel tin optuhaihai hnuoia sipai thlang khawmhaiin' ti hi LALPA thu suok chu a nih" a ta. Lal chun, "Tuin am hma a thuoi ding?" a ta. Zawlnei chun, "Nangin tie" a ta. 15 Ahab chun biel tin optuhai hnuoia sipai thlanghai chu a ko khawm a, an rêngin zahni le sawmthum le pahni an nih. Chu zoah Israel thlahai po po chu a khawm a, an rêngin sângsari an nih. 16 Sûnchang lai an inthok suok a, Ben-Hadad le a thangruolpui lal sawmthum le pahnihai chu an riebûkah zu an lo dawn rui a. 17 Biel tin optuhai thlang khawm sipai thothàng thahai chun hma an tawn a, hma lawk dinga Ben-Hadad mi tirhai chun an lo hmu a, "Samari khuoa inthokin mi an hung suok" tiin an hril a. 18 Ama chun, "Inrem nuoma hung an ni leh a hringin lo man unla, indo dinga hung an ni leh a hringin lo man bok ro" a ta. 19 Biel optuhai thlang khawm sipaihai chu khawpuia inthok chun an suok a, an hnungah sipai nawlpui chun an zui a. 20 Mi tinin an bitum seng chu an that a, chuongchun Aram mihai chu an tlânsie a, Israelhai chun an hnot a. Aram lal Ben-Hadad ruok chu sakor chungah chuongin, sakor chung chuong mi iemani zât leh a tlân suok a. 21 Israelhai lal chun hma a nor pei a, sakorhai le tawlailirhai chu an bei a, Aram mi tam tak an that a. 22 Chu hnunga chun Israel lal kuoma chun zawlnei a hung a, a kuomah, "Kum nawk thâl hunah Aram lalin a hung do nawk ding che a ni leiin sipai la bel sauh sauh unla, thaw tûlhai chu thaw ngei ro" a ta. 23 Chun, Aram lal hotuhai chun lal kuomah, "An pathienhai chu tlângram pathien an ni leiin eini nêkin an hrât lem a nih. Phaizawlah inbeipui inla, mi ngam naw ni hai. 24 Chun, hi hi thaw ngei rawh: lalhai hi an rêngin thlâk vong la, anni hmunah ram optuhai sie la, 25 sipaihai sakor le tawlailir i chân zât char kha indin thar nawk la, phaizawlah inbeipui ei ta anni nêk chun hrât lem ngei ei tih" an ta. An thu chu a pom a, an ti ang tak chun a thaw a. 26 A kum nawk thâlah Ben-Hadad chun Aram mihai chu a khawm a, Israelhai do dingin Afek chen a hang tlung a. 27 Israel thlahai chu an pung khawm a, fâk ding an sêk khawm a, lo bei dingin an inthok a. Aramhai epa chun Israelhai chu hmun hniah thanghmun an khuor a. Aramhai le hrilkhi chun Israelhai chu kèlte tlawmte bok khawm ang chauh an nih. Aramhai chu a ram phêkin an inzâr sip mup a. 28 Chun, Pathien zawlnei pakhat hi Israel lal kuomah a hung a, "LALPA chun hieng hin a hril: 'Aram mihaiin LALPA hi phaizawl pathien ni loa tlângram pathien ni dinga an ngai leiin, hieng zozài sipaihai hi i kutah pêng ka ta, kei hi LALPA chu ka nih ti hung hrieng i tih' tiin" a ta. 29 Ni sari sûng chu an inep tuo a, a ni sari ni chun an inbei ta a, Israel thlahai chun Aram mihai chu ni khat thilthuah nuoi khat an that a. 30 That bânghai ruok chu Afek khaw sûngah an tlàn lût a, mi sînghni le sângsari chu kul chimin a del hlum a. Ben-Hadad chu khawpui sûngah a tlân lût a, pindan rilah a'n bi a. 31 A rawihai chun a kuomah, "Ngai ta, Israel sûngkuoa lalhai hi zàngài thei tak mi an nih ti kan hriet a. Saiip dierkeiin, hruola rîng inkhitin Israel lal kuoma va fêng ei ta, ei hringna a hlà nuom el rawi mawh" an ta. 32 Chuongchun, saiip dierkei a, rîngah hruol bâtin Israel lal kuoma chun an fe a, a kuomah, "I siehlaw Ben-Hadadin, 'Lunginsiet takin mi hlà hrâm raw se' a tih" an ta. Ama chun, "A la dam a ni maw? Ka unaupa annawm" a ta. 33 Chuong mihai chun ngai tha takin, a lungril taka a hril sawnin, "Ni e, i unaupa Ben-Hadad ni e" an ta. Ama chun, "Va fe unla, hung thuoi ro" a ta. Ben-Hadad chu a hung suok a, a kuomah a hung a, tawlailirah a lo inchuongtir a. 34 Ben-Hadad chun a kuomah, "Ka pain i pa laka inthoka khuo a lo lâkhai kha pe kîr nawk vong ka ti che a; ka pain Samaria dawrpui hmun a siem ang bok khan nang khomin Damaska khawpuiah dawrpui hmun i siem ve ding annawm" a ta. Ahab chun, "Chuong anga thu i thlung phot chun infètir ka ti che" a ta. Chuongchun, a kuomah thu a thlung a, a'n fètir ta a. 35 Chun, zawlnei naupahai laia pakhat hin LALPA thuin a ruolpa kuomah, "Mi hang vaw raw khai" a ta, sienkhom a vuok nuom naw a. 36 Zawlnei chun a kuomah, "LALPA thu i awi naw leiin i mi liemsan charin sakeibakneiin lo sèng a ti che" a ta. A fe suok charin sakeibaknei a'n tuokpui a, a lo se hlum ta a. 37 Zawlnei chun mi dang a hmu a, a kuomah, "Lunginsiet takin mi hang vaw ta leh" a ta, mi chun a vuok a, a vuok sil ta a. 38 Chuongchun, zawlnei chu a fe a, lampuia chun lal a lo inchàn a, a mit chauh inlangin hmai a tuom a. 39 Lal a hung tlung chun a lo ko a, "I siehlaw hi indona runpui hmunah a fe a, mi pakhat hi a râl man thuoiin a hung a, ka kuomah, "Hi mi hi lo vêng rawh, a tlân hmang hlauh chun a hringna aiah i hringna chân i ta, chuong a ni naw chun tangkaruo sângthum chawi i tih' a ta. 40 Chun, i siehlaw hi a khing khinga ka buoi vel sûngin chu mi chu a lo bo ta dai a" a ta. Israel lal chun, "I chungthu chu nangin i rêl zo dêr tah annawm" a ta. 41 Chu phing leh zawlnei chun a hmai tuomna chu a hawk a, lal chun zawlneihai laia mi a nih ti a hriet ta a. 42 Zawlnei chun lal kuomah, "LALPAN hieng ang hin a tih: 'Thi ngei dinga ka ti ta sa chu i'n suoktir leiin a hringna aiah i hringna, a mihai aiah i mihai chân i tih" a ta. 43 Hmai thûm le lungdongin, Israel lal chu Samaria tieng a kîr ta a.

1 Kings 21

1 Chuong thil hnunga chun Jezreel mi Nabot grèp huon le inzomin thil a hung tlung a. Chu grèp huon chu Jezreel khuoa Samaria lal Ahab in bul ela um a nih. 2 Ni khat chu Ahab chun Nabot kuomah, "I huon hi ka in bul ela um a ni leiin thlai huona ka siem theina dingin mi'n changtir rawh khai. A aiah grèp huon tha lem pêng ka ti che a, suma i lâk nuom chun a man ang hu i sak taphot chu pêng ka ti che" a ta. 3 Sienkhom Nabot chun, "Ka puhai ro ka pêk che chu LALPA khomin phal naw raw se" a ta. 4 Jezreel mi Nabotin, "Ka puhaia inthoka ka rochung ram chu pe thei nawng ka ti che" a ti lei chun Ahab chu hmai thûm le lungsenin inah a'n lawi a, inhmùr bûtin khumah a zâl a, bu khom a fâk nuom naw a. 5 A nuhmei Jezebel chu a va lût a, "Ieng tiziea chuong ang khopa lungril naa, bu khom fa ta lo hiel am i na? a ta. 6 Ama chun, "Jezreel mi Nabot ka biek a, 'I grèp huon hi mi'n chawktir rawh. I nuom lem chun a aiin grèp huon dang pêng ka ti che' ka ti a. Ama chun, 'Ka grèp huon chu pe thei nawng ka ti che' tiin a mi don a" a ta. 7 A nuhmei Jezebel chun, "Tu hin Israelhai chunga lal i ni naw maw? Tho la, bu fa la, hlim takin um rawh. Jezreel mi Nabot huon chu keiin pêng ka ti che" a ta. 8 Chuongchun, Ahab hmingin lekha a ziek a, a suoi a nam a, Nabot umna khuoa upahai le mi lûnhai kuoma chun a thon a. 9 Chu lekhaa chun, "Bu nghei thu lo puong unla, mipuihai lai Nabot chu a hmatawngah inthungtir ro. 10 A hmaah ama ep charah mi suol turu pahnih inthungtir unla, chuonghai chun mipui hmaah, 'Pathien le lal a hril siet' tiin hêk raw hai se. Chu zoah, thuoi suok unla, dêng hlum ro" tiin a ziek a. 11 Nabot umna khuoa upahai le mi lûnhai chun Jezebel ti ang chun an thaw a. 12 Bu nghei ni an puong a, Nabot chu mipui hmatawnga chun an inthungtir a. 13 Chun, mi suol turu pahnihai chu an hung a, ama epa chun an inthung a, mipui hmaa chun, "Nabot hin Pathien le lal a hrilsiet' tiin an hêk a. Chuongchun, khaw puo tieng an thuoi a, lungin an dêng hlum a. 14 Chun, Jezebel kuomah, "Nabot chu lungin an dêng hlum tah" tia hril dingin mi an tir a. 15 Nabot chu lungin an dêng hlum tah ti Jezebelin a hriet chun Ahab kuomah, "Tho la, Jezreel mi Nabot grèp huon, a'n chawktir phal naw che chu nei ta raw leh; Nabot chu a dam ta nawh, a thi tah" a ta. 16 Ahab-in Nabot a thi tah ti a hriet chun a tho a, Nabot grèp huon chu nei dingin a fe thlàk ta a. 17 Chun, LALPA thu chu Tisbe mi Elija kuomah a hung tlung a: 18 "Samaria-a Israelhai lal Ahab inbepui dingin fe thla rawh. Tu hin Nabot grèp huonah a um a, nei tuma chu taka fe thla chu a nih. 19 A kuomah, 'LALPAN hieng ang hin a tih: Ama chu thatin a huon i neipêk a ni naw am a ni?' ti rawh. Chun, a kuoma bok, 'LALPAN hieng ang hin a tih: Uiin Nabot thisen an liekna hmuna ngei hin i thisen khom hi an la liek ve ding a nih' ti rawh" tiin. 20 Chun, Ahab chun Elija kuomah, "Ka hmèlmapa, i mi hung hmu ta khong khong maw!" a ta. Elija chun, "Ka hung hmu ta ngei che, LALPA mithmuah suol thaw dingin i lo inzor ta tlat si a. 21 Ngai ta, i chunga hin sietna intlungtir ka ta, sukbohmang dai ka ti che a, Ahab-a inthok hin nau pasal taphot chu, bawi ni sien ni naw sien la, sukbohmang vong ka tih. 22 Nangin i mi suklungsen lei le Israelhai chu thil suol i'n thawtir leiin Nebat naupa Jeroboam sûnghai le Ahija naupa Baasa sûnghai ang elin i sûnghai siem ka tih' tiin. 23 Chun, Jezebel chungthu khom hieng hin LALPAN a hril: 'Jezreel khaw kul bulah Jezebel hi uiin la fâng an tih. 24 Ahab sûngkuoa mi khawpuia thi taphot chu uiin fâng an ta, ram hnuoia thi taphot chu chunglêng vatehaiin tlàn an tih' tiin" a ta. 25 (A nuhmei infuipor leia LALPA mithmua thil tha lo thaw dinga inzor Ahab ang hrim hrim hi tu khom an la um ngai nawh. 26 LALPAN Israel thlahai hmaa a hnot suokpêk Amor mihai ang bokin, rìtlo theipatawpa riloin milem a biek a nih) 27 Chuong ang thu Ahab-in a hriet chun a silfènhai a pot thlêr a, saiip a sil a, bu a nghei a, saiip silin a zâl a, zainêm takin a um a. 28 Chun, LALPA thu chu Tisbe mi Elija kuomah a hung tlung a, 29 "Ka hmaa Ahab inngàitlawmzie hi i hmu am? Ka hmaa a'n phà hnuoi êm leiin ama huna chu sietna intlungtir loin, a naupa hunah intlungtir lem ka tih" a ta.

1 Kings 22

1 Kum thum sûng Aramhai le Israelhai chu indo loin an um a. 2 A kum thumnaa chun Juda lal Jehosafat chu Israelhai lal hmu dingin a zu fe a. 3 Israel lal chun a khawnbawlhai kuomah, "Gilead biela Ramot khuo hi eini ta a nih ti hre zing sia ieng leia Aram lal kuta inthoka lapêk loa ei um am a na?" a ta. 4 Chuongchun, Jehosafat kuomah, "Gilead biela Ramot khuo i mi hang beipui nuom ve naw maw?" a ta. Jehosafat chun Israel lal kuomah, "Kei le nang, ka mihai le i mihai le ka sakorhai le i sakorhai chu thang hmunkhat vong ei ni annawm" a ta. 5 Chun, Jehosafat chun Israel lal kuomah, "LALPA thu dâm la nghâk phot la tie" a ta. 6 Chuongchun, Israel lal chun zawlnei zali lai a ko khawm a, an kuomah, "Gilead biela Ramot khuo ka hang bei ding am bei naw ding?" tiin a'n don a. Anni chun, "Hang bei rawh, LALPAN i kutah pêng a ti che" an ta. 7 Sienkhom, Jehosafat chun, "Hi taka hin LALPA zawlnei tu amani bêk hang rawn ding an um naw maw?" a ta. 8 Israel lal chun, "LALPA mi rawnpêk ding zawlnei pakhat Imla naupa Mikaia chu a um annawm. Amiruokchu ama hi ka mi theida zawng tak el a na, ka chungchàng thu hi a se tieng ngot naw chu a tha tieng a la hril ngai hrim hrim nawh" a ta. Jehosafat chun, "Lalin chuong chun ti naw hràm raw se" a ta. 9 Lal chun a thoktuhai laia mi pakhat a ko a, "Imla naupa Mikaia hang ko vat rawh" a ta. 10 Israel lal le Juda lal Jehosafat chu Samaria kul kotkhâr bula hrizawla chun lal thuom inbelin, an lalthungpha ve vea chun an inthung a, zawlnei dang po po chun an hmaah thu an hril a. 11 Chun, Kenana naupa Zedekia chun thîrin siel ki a siem a, "Hieng ang hin LALPAN a hril: 'Hi ki hin Aram mihai chu an bohmang chenin phir tlang i tih' tiin" a ta. 12 Chuong ang bokin zawlnei po po chun, "Ramot-ah hang fe la, hang hlawtling rawh khai, LALPAN lal kuomah a pêk ding a nih" tiin an hril seng bok a. 13 Chun, Mikaia ko dinga an tir chun a kuomah, "Ngai ta, zawlneihai po po chun inkhuongruol takin lal chu hlawtling ngei dingin an hril a nih. Nang khomin anni ang chun ngai ve la, a tha tiengin hrilpêk ve raw khai" a ta. 14 Sienkhom Mikaia chun, "LALPA hringna sâlin ka hril hi, LALPAN a mi hril chauh chu hril thei ka tih" a ta. 15 An hung tlung chun lalin a kuomah, "Mikaia, Gilead biela Ramot khuo ka hang bei ding am bei lo ding?" a ta. Ama chun, "Bei la, hlawtling i tih, LALPAN lal kutah a pêk ding a ni si a" a ta. 16 Lal chun, "Voi ieng zât top am LALPA hminga thutak chauh mi hril dingin thu ka'n khâmtir ta che a?" a ta. 17 Mikaia chun, "Israelhai chu vêngtu nei lo beram anga tlânga indar vong ka hmu a; LALPAN, 'Hienghai hin hotu an nei ta naw a, mi tin mani in tieng thlamuong takin inlawi diel raw hai se' a ti a nih" a ta. 18 Chun, Israel lal chun Jehosafat kuomah, "Ka chungthua chu a se tieng naw chu a tha tieng hrim hrim a hril ngai nawh ti ka hril ta che kha" a ta. 19 Mikaia chun a hril zom pei a, "Chuleiin, LALPA thu hi ngàithla rawh. LALPA chu a lalthungphaa inthung a, a chang tieng le voi tienga vân mipui ngîr khup lai chu ka hmu a. 20 Chun, LALPAN, 'Ahab hi Gilead rama Ramot khuoah hang fe a, râl kuta thi dingin tuin am thlêm thlu thei a ta?' a ti a. Pakhatin hieng hin a ti a, mi dangin chuong ang chun an ti bok a. 21 Chun, thlarau pakhat hi a hung suok a, LALPA hmaah a ngîr a, 'Keiin thlêm thlu thei ka tih' a ta. 22 Chun, LALPAN a kuomah, 'Iengtin am?' a ta. Ama chun, 'Zu fêng ka ta, zawlnei po po hmûrah thlarau khêlhlipah inchang ka tih' a ta. LALPA chun, 'Thlêm hne ngei i ta, hlawtling bok i tih. Fe la, chuong ang tak chun zu thaw rawh' a ta. 23 Chuongchun, ngai ta, LALPA chun hieng i zawlneihai po po hmûra hin thlarau khêlhlip a sie a, siet tuok dingin i chungthu LALPA chun a rêl tah a nih" a ta. 24 Kenana naupa Zedekia chun a hung hnai a, "Iengtik lai khan am LALPA thlarau chun i kuoma thu puong lem dingin iengtik khan am ie kei a mi suoksan chu?" tiin Mikaia biengah a ben a. 25 Mikaia chun, "Lo ngai zing rawh, pindan rila inbi dinga i fe ni pha leh la hrieng i tih" a ta. 26 Israel lal chun, "Mikaia hi khawpui optu Amon le lal naupa Joash kuomah thuoi unla, 27 hieng hin an kuomah, 'Hieng ang hin lal chun a tih: Hi mi hi lung inah khum unla, him taka ka hung kîr nawk hma khat chu bei le tui chauh lo pe ro' a tih" tiin thu a pêk a. 28 Mikaia chun, "Dama i hung kîr nawk a ni hrim chun LALPAN keima hmangin thu a hril nawh tina nîng a tih" a ta. Chun, ama vêkin, "Nangni mipuihai, in rêngin ka hril hi inchik rân ro" a ta. 29 Chuongchun, Israel lal le Juda lal Jehosafat chu Gilead biela Ramot khuo rûn dingin an inthok suok a. 30 Israel lal chun Jehosafat kuomah, "Insiem danglam ka ta, indonaa chun hang thang vèng ka tih. Nang ruok chu i lal puon hin inchei zing rawh" a ta. Chuongchun, Israel lal chu a'n siem danglam a, indonaa chun a hang thang ve ta a. 31 Aram lal chun tawlailir khaltu hotu sawmthum le pahnihai kuoma chun, "Israel lal ti chauh naw chu mi chîn amanih mi lien amanih tu khom bei naw ro" tiin thu a pêk a. 32 Chun, tawlailir khaltu hotuhaiin Jehosafat an hmu chun, "Israel lal a ni ngei hi" tiin bei tumin an inhuol a, Jehosafat chu a hung khêk suok ta a. 33 Tawlailira chuong hotuhai chun Israel lal a ni nawh ti an hriet phing leh an hnot lai chu an kîrsan ta a. 34 Chun, mi pakhat hin tum bik khom nei loin a thalngul a kuoi a, Israel lal chu a awmphaw inzomna kar takah a kâp a. Ama chun a tawlailir khaltu kuomah, "Tawlailir kha kei her la, sipaihai laia inthok hin mi tlân suokpui rawh, hliem na tak ka tuok a nih" a ta. 35 Chu nia an indo chu an inbei nasa hle a. Lal chu a tawlailir chunga chun Aramhai tieng nghain a thung a, zân tieng chun a thi a, a hliemnaa inthoka thisen far chu tawlailir sûnga chun a luong nguoi nguoi a. 36 Ni tlâk tawm chun sipaihai kuomah, "Mi tin mani khuo le ram tieng kîr nawk vong ta ro" tiin tlâng an insam a. 37 Chuongchun, lal chu a thi a, Samaria-a chun an hung phur a, chu taka chun an phûm a. 38 A tawlailir chu Samaria dila nawchizor ruol insilna hlak kama chun an sawp a, LALPA thu hrila a um ang ngei khan a thihai chu uiin an liek a. 39 Ahab inlal laia thil tlunghai le a thilthaw dang po po, saiha hmanga lal in a bawl le khaw kul a siemhai po po chu Israel lalhai inlal lai chanchin inziekna lekhabuah a chuong. 40 Chuongchun, Ahab chu a thlatuhai kuomah a chawl a, a naupa Ahazia chun a lalna chu a hung hluo a. 41 Israel lal Ahab inlala inthoka kum linaah Asa naupa Jehosafat chu Judahai chungah a hung inlal tan a. 42 A hung inlal chun kum sawmthum le kum nga mi a na, Jerusalemah kum sawmhni le kum nga ro a rèl a. A nu hming chu Azuba a na, Silhi naunu a nih. 43 A pa Asa lampui hraw po po chu a hung hraw ve a, pènsan dèr loin LALPA mithmuah thil tha a thaw hlak. Hmun sânghai ruok chu a sukbo naw a, mihaiin chuonga hai chun inthawiin rimtui an la'n hlàn zing hlak. 44 Jehosafat chun Israel lal leh inremna a siem a. 45 Jehosafat inlal laia thil tlung danghai le a thil hlen suokhai le hnèna a changhai chu Juda lalhai inlal lai chanchin inziekna lekhabuah a chuong. 46 A pa Asa inlal hnung khoma la um zing, pasal inzorna in po po chu a khâr a. 47 A'n lal lai hin Edom ramah lal an um naw a, Juda lalin a ruot, lal aiawtuin ro a rèl a. 48 Jehosafat chun Ofir-a rangkachak phur dingin sumdawng long ruol a siem a, sienkhom Ezion Geber-ah long siet an tuok leiin an fe ta nawh. 49 Chuong lai chun Ahab naupa Ahazia chun Jehosafat kuomah, "Ka mihai hi i mihai leh fe raw hai se" a tia chu Jehosafatin a remti nawh. 50 Jehosafat chu a thlatuhai lai a chawl a, Davida khawpuiah an phûm a; a naupa Jehoram chun a lalna chu a hung hluo a. 51 Juda lal Jehosafat inlala inthoka kum sawmpasarinaa chun Ahab naupa Ahazia chu Samaria khuoah Israelhai chungah a hung inlal tan a, kum hni a'n lal a. 52 Ama chun LALPA mithmuah thil tha lo a thaw hlak a, a nu le a pa lam hraw dâm, Nebat naupa Jeroboam, Israelhai thil suol inthawtirtu lam hraw dâm chu a zui ve a. 53 A pa thaw ang taphot a thaw ve a, Baal rong a bawl a, a biek hlak a, LALPA, Israelhai Pathien chu a suklungsen hle a.

2 Kings 1

1 Ahab thi hnungin Israelhai chungah Moab mihai an hel a. 2 Ahazia chu Samaria-a a pindan chunghnung tukver zawngdaikal awnga chun a tla a, a'n tet sil leiin mi a tir a, "Fe unla, ka natna hi ka dam suokpui ding le ding naw Ekron khuoa an pathien Baal-Zebub va rawn ro" tiin thu a'n cha a. 3 Nisienlakhom, LALPA vântirkoin Tisbe mi Elija kuomah, "Tho la, Samari khaw lal mi tirhai lo be dingin hang fe la, an kuomah, 'Israel rama hin Pathien a um ta naw leia Ekron khaw pathien Baal-Zebub rawn dinga fe in ni? 4 Hi lei hin LALPAN hi hi a ti a nih: i khuma inthok khan tho kàng ta loin thi ngei ngei i tih' tiin hril rawh" a ta. 5 A mi tirhai an hung kîr chun lalin, "Ieng tiziea in hung kîr nawk am a na?" a ta. 6 Anni chun, "Mi pakhat mi be dingin a hung a, kan kuomah, "Fe nawk ta unla, lal kuoma chun LALPAN hieng hin a tih: Israel rama hin Pathien a um ta naw leia Ekron khaw pathien Baal-Zebub rawn dinga fe in ni? Hi lei hin LALPAN, 'I khuma inthok khan tho kàng ta loin thi ngei ngei i tih' a ti a nih" an ta. 7 Lal chun, "Nangni be dinga hung, chuong ang thu hriltu cheu chu mi ieng ang am a na?" a ta. 8 Anni chun, "Sahmulin a'n thuom a, savun kawngchùn a chûn bok" an ta. Lal chun, "Tisbe mi, Elija a ni chu" a ta. 9 Chuongchun, lal chun Elija kuomah a sipai kapten chu mi sawmnga thuoiin a tir a. Tlâng sîpa inthung Elija kuoma chun kapten chu a hang fe a, "Nang Pathien mi, lalin hung thla nghal raw se a ti che a nih" a ta. 10 Elija chun, "Pathien mi ka ni takzet chun vâna inthokin mei hung tla sienla, nang le i rawihai sawmnga le khan kâng hlum vong raw se cheu" a ta. Chuongchun, vâna inthokin mei a hung tla a, kapten le a rawihai sawmnga chu a kâng hlum ta vong a. 11 Lal chun kapten dang, mi sawmnga bok thuoi chu a tir nawk a. Kapten chun Elija kuomah, "Nang Pathien mi, lalin hung thla nghal raw se' a ti che a nih" a ta. 12 Elija chun, "Pathien mi ka ni takzet chun vâna inthokin mei hung tla sienla, nang le i rawihai sawmnga kha kâng hlum vong raw se cheu" a ta. Chuongchun, vâna inthokin Pathien mei a hung tla a, kapten le a rawihai sawmnga chu a kâng hlum ta vong a. 13 Lal chun a voi thumnaah sipai kapten dang, mi sawmnga bok thuoiin a tir nawk a. Kapten chu a hang fe a, Elija hmaa chun dingthathuonin, "Pathien mi, lunginsiet takin ka hringna le hieng i siehlaw mi sawmngahai hringna hi mi hlutpêk hrâm rawh. 14 En ta, vâna inthoka mei hung tla chun ka hmaa kapten pahnihai le an rawihai a kâng hlum zo vong a ni kha. Tu ruok hin chu ka hringna hi mi hlutpêk hrâm rawh" a ta. 15 LALPA vântirko chun Elija kuomah, "Ama ruol hin fe thla rawh, ti dêr naw rawh" a ta. Chuongchun, Elija chu a tho a, ama ruol chun lal kuomah a zu fe a. 16 Lal kuoma chun, "LALPAN hi hi a ti a nih: Israel rama hin rawn ding Pathien a um ta naw leia Ekron khaw pathien Baal-Zebub rawn dinga mi i tir a ni? Hi lei hin LALPAN, 'I khuma inthok khan tho kàng ta loin thi ngei ngei i tih' a ti a nih" a ta. 17 Chuongchun, Elija hril Pathien thu ang chun a thi ta a. Ahazia chun naupa a nei naw leiin a unaupa Joram chu ama hmunah, Juda lal Jehosafat naupa Jehoram inlal kum hninaa chun a hung inlal ta a. 18 Ahazia inlal laia thil tlunghai le a thilthawhai chu Israel lalhai inlal lai chanchin inziekna lekhabuah a chuong a ni naw am a ni?

2 Kings 2

1 LALPAN thawngaleivira vân tieng Elija a lâk tawm chun Elija le Elisa chu Gilgal panin an fe a. 2 Elija chun Elisa kuomah, "Hi taka hin lo um rawh, LALPAN Bethelah a mi tir a nih" a ta. Elisa ruok chun, "LALPA hringna le i hringna sâlin ka hril hi, um hmangsan nawng ka ti che" a ta. Chuongchun, Bethelah an zu fe tlàng a. 3 Bethela zawlnei ruol chu Elisa kuomah an hung a, "Voisun hin i pu hi LALPAN a lâk ding a nih ti i hriet am?" an ta. Elisa chun, "Hre e, sienkhom hril puok naw ro" a ta. 4 Chun, Elija chun, "Elisa, hi taka hin lo um rawh, LALPAN Jeriko khuoah a mi tir a nih" a ta. Elisa ruok chun, "LALPA hringna le i hringna sâlin ka hril hi, um hmangsan nawng ka ti che" a ta. Chuongchun, Jerikoa chun an zu fe tlàng a. 5 Jerikoa zawlnei ruol chu Elisa kuomah an hung a, "Voisun hin i pu hi LALPAN a lâk ding a nih ti i hriet am?" an ta. Elisa chun, "Hre e, sienkhom hril puok naw ro" a ta. 6 Chun, Elija chun Elisa kuomah, "Hi taka hin lo um la, LALPAN Jordan vadungah a mi tir a nih" a ta. Elisa ruok chun, "LALPA hringna le i hringna sâlin ka hril hi, um hmangsan nawng ka ti che" a ta. Chuongchun, an pahni chun Jordan panin kein an fe tlàng a. 7 Jordan kama Elija le Elisa ngîrna ep taka chun hla deu hlekah zawlnei ruol sawmnga an ngîr ve a. 8 Elija chun a silpuon chu a hlîp a, a ziel tom a, tui chu a vuok a, khing tieng khing tieng a hung inthe a, an pahni chun hnuoi chàrah an fe kai a. 9 An kai hnung chun Elija chun Elisa kuomah, "I kuoma inthoka lâk hmanga ka um hma hin ieng am thawpêk lang che i nuom a? a ta. Elisa chun, "I thlarau chang lêt hni hi chang ka nuom" a ta. 10 Elija chun, "Thil khir tak i hni a, amiruokchu lâk hmanga ka um lai i mi hmu chun chang i ta, i mi hmu naw chun chang naw ti nih" a ta. 11 Chuonga titi pum zinga an fe lai chun mei tawlailir le mei sakor an hung inlang thut a, an inkàrah tlain a hung sukthe a, Elija chu thawngaleivirin vânah a kâi a. 12 Chu chu Elisa chun a hmu zing a, "Pa, pa, aw Israelhai santu ropui, i fe an ta maw?" tiin a ko zui a. Elisa chun ama chu a hmu ta si nawh. Chu phing leh a silpuon chu a pot thlêr a. 13 Elija silpuon hung tla chu a lâk a, a kîr a, Jordan vadung kama chun a ngîr a. 14 Elija silpuon hung tla chun tui chu a vuok a, "LALPA, Elija Pathien kha khaw lai am a um ta a?" a ta. Tui a zuk vuok chun khing tieng khing tieng a hung inthe a, Elisa chu a kai ta a. 15 Jerikoa inthoka hung zawlnei hon, lo thlîr zingtuhai chun, "Elija thlarau chu Elisa chungah a chêng ta ngei leh!" an ta. Ama chu be dingin an va hnai a, hnuoi sikin chibai an bûk a. 16 Anni chun a kuomah, "I siehlawhai hin pa ngal hrât tak tak mi sawmnga kan nei a, i pu zong dingin tir tawl raw khai. LALPA thlarauin thuoi a ta, khaw lai tlâng amanih ruom amaniah a'n thum nawk el khom a ni thei a nih" an ta. Elisa chun, "Tir lo e, tir dêr naw ro" a ta. 17 Amiruokchu, hang sèl pei inzakum khopa an nor lui tlat leiin "Tir el ro" a ta. Chuongchun, mi sawmnga an tir a, ni thum an zong a, an hmu zo naw a. 18 Jeriko tieng Elisa kuomah an hung kîr chun, "Fe naw ro ka ti rèng cheu an naw maw?" a ti a. 19 Chu khuoa mihai chun Elisa kuomah, "En ta, pu, i hmu ang hin hi khuo hi a lawilèn inhoi hle sienkhom kan tui tlàn hi a tha naw a, thlai khom a suok tha thei naw a nih" an ta. 20 Ama chun, "Tuiûm thar hung la unla, chi thun ro" a ta, chuongchun an hung lâk a. 21 Tuikhurah a va fe a, chi a phul a, mihai kuoma chun, "LALPA chun hieng hin a tih: 'Tui hi ka sukthieng tah. Tuta inthok chu a thipui um ta naw ni hai a, a ram tharsuok khom hlawk tàng a tih' a ti a nih" a ta. 22 Elisa hril ang chun, voisun chen hin a tui chu a hrisel ta zing a nih. 23 Chu taka inthok chun Elisa chu Bethelah a fe a. Lampuia a thang lai chun khuoa inthokin tleirawl ruol an hung suok a, "Fe tung rawh, lukawkpa, Fe tung rawh, lukawkpa" tiin an lo nuisaw a. 24 A ngha kîr a, anni chu a hmu a, LALPA hmingin tongsie a'n phur a. Chu phing leh ram hnuoia inthokin savom pahni an hung suok a, anni laia naupang sawmli le pahni chu an hung pot chen neng a. 25 Chun, Karmel tlângah a fe a, chu taka inthok chun Samaria khuoah a kîr nawk ta a.

2 Kings 3

1 Juda lal Jehosafat inlala inthoka kum sawm le kum rietah Ahab naupa Joram chu Samaria khuoah Israelhai lalin a hung um a, kum sawm le kum hnih ro a rèl a. 2 Ama chun LALPA mithmuah thil suol a thaw hlaka chu a nu le pa ang êm chun a thaw ve nawh. A pain Baal lung a lo phun chu a pei hmang a. 3 Sienkhom, Nebat naupa Jeroboam suolnaa chun a kop ve a, Israelhai thil suol a'n thawtir a, chu lampui chu a mâksan ta nawh. 4 Moab lal Mesa chu beram vai mi a na, Israel lal kuomah sie chawinain beramte nuoi khat le beram nuoi khat hmul a pêk hlak a. 5 Amiruokchu Ahab thi hnungin Moab lal chu Israel lal lakah a hel a. 6 Chuong lai chun lal Joram chu Israelhai po po khawm dingin Samaria-a inthokin a suok a. 7 Chun, Juda lal Jehosafat kuomah, "Moab lal ka lakah a hel leiin i mi hang beipui thei naw di'm a nih?" tiin mi a tir a. Ama chun, "Hang beipui thei e. Nang le kei, ka mihai le i mihai le ka sakorhai le i sakorhai chu thang hmunkhat vong ei ni annawm" a ta. 8 Chun, ama bok chun, "Khaw tieng panga inthokin am hang bei ding i ti a?" a ta, Joram chun, "Edom thlalèr tienga inthokin" a ta. 9 Chuongchun, Israel lal chu Juda lal le Edom lal leh an inthok suok a, ni sari sûng an fe kuol hnung chun anni le an ranhai dawn ding tui an nei ta naw a. 10 Israel lal chun, "Iem ei chang top ding an ta leh! Lal pathumhai hi Moabhai kuta inhlàn dingin LALPAN a mi ko khawm am an ta ding maw?" a ta. 11 Jehosafat ruok chun, "Ama hmanga Pathien ei rawn theina dingin hi taka hin LALPA zawlnei pakhat khom an um naw a ni maw?" a ta. Israel lal hnuoia ofisar pakhat chun, "Safat naupa Elisa a um. Ama chu Elija kut tuia buokpêk hlaktu kha a nih" a ta. 12 Jehosafat chun, "A kuomah LALPA thu a um chu" a ta. Chuongchun, Israel lal le Jehosafat le Edom lal chu ama hmu dingin an fe thla a. 13 Elisa chun Israel lal kuomah, "Nang le kei iem inmatna ei nei a? I pa zawlneihai le i nu zawlneihai kuoma fe lem rawh" a ta. Israel lal chun, "Fe lo e. Lal pathum hi Moab-hai kuta pêk dingin LALPAN a mi thuoi khawm a nih" a ta. 14 Elisa chun, "A rong ka bawl Iengkim LALPA hringna sâlin ka hril, nangni laia hung thang Juda lal Jehosafat hmel inza ni naw lang chu en khom en nawng ka ti che a, ngaisak bok nawng ka ti che. 15 Chuong a ni ta si leh tingtang tum thiem hung ko ro" a ta. Tingtang tum thiemin a hang tum chun LALPA kut chu a chungah a hung tlung a. 16 Ama chun, "Hi hi LALPA thu chu a nih: 'Hi ruoma hin khur cho teu ro. 17 Thli ri amanih ruo sûr ri amanih hre naw ti niu a, sienkhom hi ruom hi tuiin hung sip a ta, nangni le in ran haiin dawn ro. 18 Chu chu LALPA ngaia chu thil chìn tham a nih. Moab-hai khom in kutah ka pêk bok ding a nih. 19 Kul nei khuo po po le khawpui deu hlek po chu sukse vong unla, an thing thahai phûr vong unla, an tuikhurhai hruk ping unla, lo tha lai po po chu lungin dêng se vong ro' tiin" a ta. 20 A zînga inthawina thilhlân hun vel lai chun, ngai ta, Edom ram tienga inthokin tui a hung luong ta huou huou a, a ram chu tuiin a sip ta a. 21 Anni bei dingin lalhai an hung inthok ti Moab-haiin an hriet chun râldo thei chin po po chu an ko khawm a, ramri-a chun thang an lo khaw a. 22 Zîng inhma takin Moabhai chu an tho a, an hma zawna tui nisain a zuk el chu thisen anga sen kûkin an hmu a. 23 Anni chun, "Thisen a ni saw. Lalhai chu anni le anni an indo a, an inthat tawl a ni ngei saw. Thaw ro, Moabhai, râllâk sum va'n khawm ei tiu" an ta. 24 Israelhai inkulna hmun an hung tlung chun Israelhai chu an che thut a, an lo bei a, an hnot zàm a, an ram chu an rûn a, Moab mihai chu an that a. 25 An khawpuihai chu an suksiet a, lo thatna hmun taphot chu lungin an dêng siet a, lung an dêng bum hnêr hnûr a. An tuikulhai chu an hruk bit vong a, thing tha taphot chu an phûr a. Khuo an sukchim lo um sun chu Kir Hareset chauh a na, chu khom chu saihli chawi pawlin an inhuol a, an per hrep a. 26 Moab lal chun a ngam tawl naw ding a nih ti a hrietin Edom tienga baw tlang tumin kawlhnàm chawi mi zasari ruol a thuoi suok a, amiruokchu an hlawsam a. 27 Chu phing leh a naupa upa tak, a ro hluotu ding chu a thuoi a, kul tlânga chun pumraw inthawinaiin a'n hlàn a. Israelhaiin chu chu an hmuin râpthlâk an ti a, a an intawl kîr a, an ram tieng an kîr nawk ta a.

2 Kings 4

1 Zawlnei ruol laia pakhat nuhmei chun Elisa kuomah, "I siehlaw ka pasal chu a lo thi ta a, ama chu Pathien ti mi a nih ti i hriet. Tu hin a leibatna pa chun ka naupahai pahni chu bawia nei dingin a hung thuoi tum a nih" tiin a beidongna thu chu a hung intlun a. 2 Elisa chun, "Iem ka thawpêk thei ding che a na? Inah iem i nei mi hril rawh" a ta. Ama chun, "I bawinu hin sahriek bûr khat chauh naw chu ieng khom nei ka nei nawh" a ta. 3 Elisa chun, "Fe la, i tuolbawmhai bêl ruok po po haw khawm la, tlawmte chauh haw naw rawh. 4 Chun, i inah lût la, i nauhai leh kot inkal khum unla, chuong bêl ruok po poa chun sahriek chu sung sip unla, a sip po a tumin sie pei ro" a ta. 5 Hmeithai chu a inah a'n lawi a, a nauhai leh kot an inkal khum a. Bêlhai chu a kuomah an hung chawi a, a lo sung sip pei a. 6 Bêl a sung sip vong hnung chun a nauhai kuomah, "Bel hung la sa ro" a ta. Anni chun, "Bêl dang a um ta nawh" an ta, sahriek chu a kang ta a. 7 Chun anni chun Pathien mi chu an va hril a, ama chun, "Sahriek chu va zor unla, i leibat chu va rul la, a chuong po chu i nauhai le in khawsakna dingin hmang ro" a ta. 8 Ni khat chu Elisa chu Sunam khuoah a'n zin a, chu taka chun nuhmei neinung tak el a um a, bu fa dingin a lo fiel a. Chuong ang chun, a fe le hungah chu ina chun chawlin bu a fâk hlak a. 9 Chu nuhmei chun a pasal kuomah, "Ei in hung sir vet pa hi Pathien mi a nih ti ka hriet. 10 A mi hung sir changa a riekna dingin in sawnga khin a pindan ding siempêk ei ta, khum dâm, dawkan dâm, thungna dâm le khawnvar siena dâm siepêk ei tih" a ta. 11 Ni khat chu Elisa a hung nawk a, a pindana chun a kai tung a, a zâl a. 12 A siehlaw Gehazi kuoma chun, "Sunam nu kha hung ko ta" a ta, a va ko a, a hmaa chun a hung ngîr a. 13 Ama chun a siehlaw kuomah, "Hieng hin hril rawh: 'Hieng khopa buoi hin i mi lo enkol a, thawpêk thei che iem kan nei a? Lal kuoma dâm sipai kawmandar kuoma dâm iem ka hnipêk ding cheu?' tiin" a ta. Ama chun, "Ka chipuihai laia in neia khawsa ka ni annawm" a ta. 14 Elisa chun a siehlaw kuomah, "Chuong a ni si chun iem ei thawpêk ding aw?" a ta. A siehlaw chun, "Nau pasal nei lo a na, a pasal hlak chu a tar ta bok si a" a ta. 15 Elisa chun, "Va ko nawk rawh" a ta, ama chu kotkhâr bieng chelin a hung ngîr a. 16 Elisa chun a kuomah, "Tu ang hun a hung tlung pha leh nau pasal pom tâng i tih" a ta. Ama chun, "Ni lo pu, nang Pathien mi chun i siehlawnu hi hlêm der lul naw rawh" a ta. 17 Chun, nuhmei chu a hung inrai a, Elisan a kuoma a hril ang ngei khan chu hun vela chun nau pasal a nei ta a. 18 Naute chu a hung sei lien pei a. Ni khat chu busîktuhai kana fe a pa chu a zui ve a. 19 A pa kuomah, "Ka lu, ka lu" a ta. A siehlaw kuoma chun, "Pom la, a nu kuomah va thak rawh" a ta. 20 Siehlaw chun a nu kuomah a pom phei a, sûnchang lai chen a nu mal chungah a'n thung a, a thi el ta a. 21 A naupa chu Pathien mi pindana chun a pom tung a, a khum chungah a'n zàl a, kot a khâr a, a suok ta a. 22 A pasal chu a ko a, "Pathien mi kuomah fea ka hung kîr nawk nghal theina dingin siehlaw pakhat le sabengtung mi buotsaipêk rawh" a ta. 23 A pasal chun, "Voisun khera iem a kuoma fe a tûl a na? Thla thar ni khom a ni naw a, Sabat khom a ni bok si nawh" a ta. Ama chun, "A poi chuong lem" a ta. 24 Chuongchun, sabengtung chungah a chuong a, a siehlaw kuomah, "Hma thuoi la, fe pei la, thu ka pêk che a ni naw chun muongchang dêr naw rawh" a ta. 25 Chuonga fe peiin Pathien mi umna Karmel tlâng chu a tlung a. Ràla inthokin Pathien mi chun a lo hmu a, a siehlaw Gehazi kuomah, "En ta, Sunama nuhmei kha a ni tlat el! 26 Tlân la, lo va tuok la, 'I dam maw? I pasal a dam maw? I naupa a dam maw?' lo ti rawh khai" a ta. Ama chun, "Dam e" a ta. 27 Chun, tlânga Pathien mi kuom a hang tlung chun a keah a chel a. Gehazi chun ama chu va nam kieng a tum a, sienkhom Pathien mi chun, "Tosan rawh. Beidongna nasa takin a tlâk buok a ni hi. Chu chu LALPAN ka lakah a thup hri a, a mi la hril hri naw a nih" a ta. 28 Ama chun, "Pu, nau pasal ka hni che am a ni? 'Ka beisei suksângin mi hlèm der lul naw rawh' ka ti lem che a ni naw maw?" a ta. 29 Elisa chun Gehazi kuomah, "I silpuon kha i kawngah zêl la, ka hmol hi chawi la, tlân nghal rawh. Lampuiah tu khom chibai naw la, an chibai che khomin bûk ve kher naw la, ka hmol hi naupang hmaiah innghat rawh" a ta. 30 Sienkhom, chu naupang nu chun, "LALPA hringna le i hringna sâlin ka hril, "Inthla naw top ka ti che" a ta, a tho a, a zui ta a. 31 Chun, Gehazi chun hma a lo khal a, naupang hmaia chun hmol chu a sie a, sienkhom ieng ri khom a suok naw a, a châng bok nawh. Chuongchun, Gehazi chu a tlàn kîr nawk a, "Naupang chu a la thanghar chuong nawh" tiin Elisa chu a hril a. 32 Elisan in a hung tlung chun naupang chu ama khumah thiin an lo inzàl a. 33 A lût a, kot a'n khâr khum a, LALPA kuomah a tongtai a. 34 Chun, khumah a kài a, naupang chu hmûr le hmûr, mit le mit, kut le kut inchuktuoin a chungah a bok a. Chuonga a chunga a hang bok chun naupang pang chu a hung lum tan ta a. 35 Elisa chu a tho a, pindana chun an vâk vèl a, khuma chun a kài a, naupang chunga chun a bok nawk a. Chuongchun, naupang chu voi sari a hung insim a, a mit a hung meng ta a. 36 Elisa chun Gehazi chu a ko a, "Sunam nu kha hung ko rawh" a ta. A ko a, a hung lût chun, "I naupa hi pom ta raw leh" a lo ta. 37 Amanu chu a ke bulah a bokkhup a, chu zoah a naupa chu a pom a, a suokpui ta a. 38 Elisa chu Gilgal tieng a kîr nawk a, chu lai rama chun tàm a tla nasa hle a. Zawlnei ruolin an hung inhmupui a, a siehlaw kuoma chun, "Bel lien tak khan bu hruoi suongpêk rawh" a ta. 39 Chun, mi pakhat hi ram tieng hmeruo zongin a fe a, ram hrui a hmu a, ûm ra chu a silpuon sipin a hung fûn a, a khoi a, iem a nih ti hre lo chun bu hruoia chun a thlâk a. 40 Bu hruoi chu an hang thur a, an fâk tan chun, "Aw Pathien mi, bêl sûnga hin thina a um" tiin an khêk chûl a, an fâk thei naw a. 41 Elisa chun, "Beiphit hung la ro" a ta. Bêla chun beiphit chu a phul a, "Hi mihai fâk ding hin thur ta ro leh" a ta, bêl sûnga chun tium ieng khom a um ta naw a. 42 Chun, Baal Salisaa inthokin mi pakhat a hung a, Pathien mi ta dingin bu thar hmasa taka inthoka siem barli beipèr sawmhni le bu thar vui iemani zât a hung chawi a. Elisa chun, "Mipui fâk dingin sem ro" a ta. 43 A siehlaw chun, "Ieng tin am hieng zât chauh hi mi za zet fâk ding chun ka sem ngam ding?" a ta. Elisa ruok chun, "Mipui fâk dingin sem ro. Hieng hin LALPA chun a hril: 'Fa seng an ta, an fâk bang khom iemani zât um a tih' tiin" a ta. 44 Chuongchun a hang sem a, an fâk seng a, LALPA hril ang khan, an fâk mahla iemani zât a la chuong a nih.

2 Kings 5

1 Aram lal sipai kawmandar Naaman a um a. Ama hmangin LALPAN Aramhai chu hnena a'n changtir hlak leiin a pu mita chu mi ropui tak le ngaisàngum tak a nih. Ama chu sipai huoisen a na, amiruokchu phâr a nih. 2 Aram mihai chu a pawl pawla an ramsuoknaah voi khat chu Israel rama inthokin nuhmei te pakhat hi salah an hung hawn a, Naaman nuhmei rong a bawl hlak a. 3 A pi kuoma chun, "Ka pu hin Samaria-a um zawlnei pakhat va hmu sien ka va ti de aw! A phâr hi a lo sukdam el ding a ni si a" a ta. 4 Naaman chu a pu kuomah a fe a, Israel rama inthoka nuhmei naupang an hung thuoiin a hrilhai chu a pu a hril a. 5 Aram lal chun, "Zu fe raw khai, Israel lal kuomah lekhathon ziek ka tih" a ta. Chuongchun tangkaruo chêng sîngthum, rangkachak chêng sângruk le inthlâkna ding thuomhnaw man tam tuok sawm chawiin a'n thok suok a. 6 Israel lal ta dinga a lekha chawia chun, "Hi lekha hi chawiin ka kawmandar Namaan chu a phâr i lo sukdampêk dingin i kuomah ka hung tir a nih" ti a chuong a. 7 Israel lalin chu lekha a hang tiem zo chun a lal puon a kei thlèr a, "Kei hi Pathien am ka ni? Mi sukhluma sukhring thei am ka ni? Ieng dinga hi mi hin phâr sukdam dinga ka kuoma a hung tir am a na? Ngai ta u, ka chunga buoina siem tuma remchâng a zong dàn hi!" a ta. 8 Israel lalin a puon a kei thlèr thu Pathien mi Elisan a lo hriet chun thu a thon a, "Ieng dinga i puon i pot thlêr am a na? Chu mi chu ka kuomah hung tir la, Israel rama hin zawlnei a um ti hre el a tih" tiin. 9 Chuongchun, Naaman chu a sakor le tawlailirhai leh a fe a, Elisa in kota chun a chawl a. 10 Elisa chun, "Jordan vadungah voi sari inphûm la, i vunhai chu hung pangngai nawk a ta, hung dam inthieng el i tih" ti hril dingin mi a tir a. 11 Naaman chu lungsen takin a kîr nawk ta a. "Ngai ta u, ama ngei hung suok a ta, ka hmaah ngîr a ta, LALPA Pathien hming lam a ta, ka'n phàrna hmun hmuna chun a kut thin a ta, ka phàr chu sukdam dingin ka lo beisei a na. 12 Damaskaa vadung Abana le Pharpar hai chu Israel rama vadung po po nêka thienghlim lem an ni naw am a ni? Chuong vadunga hai chun insilin ka'n sukthienghlim thei naw am a ni?" a ta. Chuongchun, lungsen takin a kîr nawk a. 13 Chun, Naaman siehlaw chun a va hnai a, "Pa, zawlnei khan thil khir tak inthawtir ding che ni sien, i thaw el naw ding maw? 'Va'n sil la, va'n sukthienghlim rawh' i kuoma a ti kha thaw ding lem awm a ni naw maw?" a ta. 14 Chuongchun, a tum a, Pathien mi ti ang chun voi sari a zuk inphûm a, a pangti chu naute vun ang elin a hung um a, a hung inthieng ta a. 15 Naaman chu a rawihai leh Pathien mi in tieng chun a kîr nawk a, a hmaah a ngîr a, a kuomah, "Israel rama chauh naw chu khawvel hmun dangah Pathien a um nawh ti tu hin ka hriet tah. Tuhin i siehlaw thilpêk hi mi pompêk hrâm rawh" a ta. 16 Elisa ruok chun, "A rong ka bawl LALPA hringna sâlin ka hril, ieng khom la naw ning" a ta. Naamanin a ngên raka chu a lâk nuom chuong nawh. 17 Naaman chun, "Chuong chu a ni si leh i siehlaw hi sabengtung pahni phur tawk bêk pil mi pe raw khai; tuta inthok chu i siehlaw hin LALPA kuoma chauh naw chu pumraw thilhlân le inthawina hrim hrim pathien dang kuomah inhlân ta naw ningah. 18 Hi thil pakhata chauh hin LALPAN i siehlaw hi ngaithiem raw se: Aramhai pathien Rimon be dinga ka pu a fe chângin a hnung ka zui a ngai a Rimon tempula ka puin ka kut ringsana kûna chibai a bûk pha ka kûn ve a ngài hlak a, chu chungthua kher chun, i siehlaw hi LALPAN ngàidam raw se" a ta. 19 Elisa chun, "Thlamuong takin fe rawh" tiin a'n thla a, a kuoma inthok chun a suok ta a. 20 An la phâk hlat hmain Elisa siehlaw Gehazi chun, "Ka pu hin Aram mi Naaman thil hung chawihai la hlek loin a'n fetir nawk el a, LALPA hringna sâlin ka hril hi, va hnot ka ta, iemani zât bêk chu va lapêk ka tih" a ta. 21 Chuongchun. Gehazi chun Naaman chu a hnot zui a. A kuom tienga hung tlân mi tu amanih Naamanin a hmu chun lo be dingin a tum a, "Thil tha tieng thu chu ni awm tak maw?" a ta. 22 Ama chun, "Ni e, thil tha tieng thu a nih. Ka puin, 'Efraim tlângrama inthokin zawlnei pahniin an mi hung sir thut a, anni chu tangkaruo chêng sângthum le inthlâkna ding silfên pahni pe raw khai' tia hril dingin a mi tir a nih" a ta. 23 Naaman chun "Sângruk hi la lem hrâm raw khai" a ti tàl a. Chuongchun, tangkaruo sângruk chu inthlâkna ding silfên pahni le chun ip hniah a thun a, a siehlaw pahnihai chu a'n phurtir a, Gehazi hmaa chun an fe a. 24 Tlâng an tlung chun Gehazin ip hnihai chu a lâk a, inah a sie hre a. Chuongchun, mi pahnihai chu a tir kîr nawk ta a. 25 Gehazi chu inah a lût a, a pu hmaa chun a ngîr a. Elisa chun, "Gehazi, khaw laia fe che?" a ta, ama chun, "I siehlaw hi khaw lai khom ka fe nawh" a ta. 26 Sienkhom Elisa chun, "A be ding chea tawlailira inthoka mi a hung tum lai khan ka thlarau chu i kuomah a fe pei a ni naw am a ni? Tu hi tangka hai, silfên hai, oliv huon hai, grep huon hai, bawinu hai le bawipa hai làk hun am a ni? 27 Naamana phàr chu nang le i thlahai chungah kumkhuoin kop lem tâng a tih" a ta. Gehazi chu Elisa kuoma inthok chun a suok a, vûr anga varin a taksa chu a hung inphàr ta vong a.

2 Kings 6

1 Zawlnei ruol chun Elisa kuomah, "Ngai ta, i bula kan inthung khawmna hmun hi kan intar taluo a nih. 2 Jordan vadungah zu fêng kan ta, thing zu put kan ta, kan inthung khawmna ding chu taka chun in bawl kan ti aw?" an ta. Ama chun, "Zu fe ro" a ta. 3 Anni laia pakhat chun, "I siehlawhai lai hin nang khom hung ve ta la" a ta, ama chun "Hung vèng ka ti chu" a ta. 4 Chuongchun, anni le chun a fe ve a. Jordan vadung an tlung chun thing an phûr a. 5 Mi pakhatin thing a tuk lai chu a hreipui ha a tlong a, tuiah a tla a. Ama chun, "Pu, a va poi de aw! Mi hrei ka haw a ni nawk nghal si a" a ta. 6 Pathien mi chun, "Khaw lai am a na a tlâkna?" a ta, ama chun a tlâkna lai chu a kawkhmu a. Elisa chun thing kau a sât a, tuia chun a khaw lût a, hrei ha chu a hung inlàng suok ta a. 7 Elisa chun, "La raw leh" a ta, a hei ban a, a lâk a. 8 Chun, Aram lalin Israelhai a'n dopui a. A ofisarhai a rawn hnung chun, "Chu hmun kha hmuna chun inchàn ei tiu" a ta. 9 Pathien mi chun Israel lal kuomah, "Chuong hmuna fe chu fimkhur ro, Aram mihai an hung ding a nih" tiin mi a tir hlak a. 10 Israel lal chun Pathien miin a hrilna hmun chu a va'n thlithlaitir pei hlak a. An hung zàtin Elisa chun lal chu a lo hril lawk pei leiin chuong hmuna hai chun an inhum thei pei a. 11 Chu chun Aram lal chu a suklungsen hle a. A ofisarhai chu a ko a, "Eini lai hin a tu tak hi'm a na Israel lal tienga thang rûk, in mi hril thei naw maw?" tiin a'n don a. 12 Anni laia ofisar pakhat chun, "Aw ka lal le ka pu, a thang rûk tu khom kan um nawh. Israel rama um Zawlnei Elisa a ni lem. I khum pindan sûngrila i hrilhai chen khom hi Israel lal kuomah a ripawt vong a nih" a ta. 13 Lal chun, "Mi tira ka man theina dingin fe unla, a umna va zong suok ro" a ta. Anni chun, "Dothan khuoah a um" tiin an hung ripawt a. 14 Chuongchun, sakor le tawlailir le sipai tam tak a tir a, zânah an va fe a, khuo chu an inhuol a. 15 Pathien mi siehlaw chu zîng inhma takin a tho a, tuolah a va dâk a, sipaihaiin sakor leh tawlailir leh khuo an lo inhuol khup chu a hmu a. "E khai, pu, ieng tin am ei thaw ta ding a na?" a ti chûl a. 16 Zawlnei chun, "Ti naw ta la. Anni tienga thang nêkin eini tienga thang an tam lem dai annawm" a ta. 17 Elisa chu a tongtai a, "LALPA, a hmu theina dingin a mit hung sukvarpêk rawh" a ta. LALPA chun siehlaw mit chu a sukvarpêk a, Elisa umna vel tlânga mei tawlailir le sakor sip hmur el chu a hmu ve thei ta a. 18 Ama tieng pana hmèlmahai an hung thlâk lai chun LALPA kuomah Elisa a tongtai a, "Hienghai hi an mit sukdel rawh" a ta, Elisa hni ang chun an mit a sukdel ta vong a. 19 Elisa chun, "Hi chu lampui a ni nawh, hi chu khuo a ni nawh. Mi zui pei unla, in mi zong kuoma chun thuoi ka ti cheu" a ta, Samaria khawpuia chun a thuoi lût vong a. 20 Khawpui an lût hnung chun Elisan, "LALPA, an hmu theina dingin an mit sukvarpêk rawh" a ta. Chuongchun, an mit chu LALPAN a hongpêk a, an hang ngha vel chun Samaria khawpui sûngah an lo um ta dêr el a. 21 Israel lalin anni rawi a hmu chun Elisa kuomah, "Pa, kan that tawl el ding?" a ti chûl a. 22 Elisa chun, "That lo e. Kawlhnàm le thalngul hmanga sala in manhai khom in that ngai lem. Bu le dawn ding pe la, fain dawn hai sien, an pu kuomah kîr nawk raw hai se" a ta. 23 Chuongchun, fâk ding hnienghnàr takin an buotsaipêk a, faa an dawn zo chun an infètir ta vong a, an pu kuomah an kîr nawk a. Aram lal sipaihai chun Israel ram an rûn nawk ta ngai nawh. 24 Chu hnung chun Aram lal Ben-Hadad chun a sipai po po a khawm a, Samaria khawpui chu an hang inhuol a. 25 An inhuol bet tlat leiin Samaria chu an tàm nasa êm êm a, sabengtung lu hi tangkaruo shekel sawmrietin an zor a, vathu êk khom gram zahniah tangkaruo shekel ngain an zor hiel a nih. 26 Chun, kul tlânga Israel lal a fe lai chu nuhmei pakhatin, "Aw laltak, ka pu, mi thangpui rawh" tiin a ngèn a. 27 Ama chun, "LALPAN a thangpui che a ni ngot naw chun kei chun iengtin am ka thangpui ding che a na? Hrizawla inthokin maw? Grèp sawrna khura inthokin maw? 28 Iem a na i harsatna chu?" a ta. Nuhmei chun, "Hi nu hin, 'Voisuna ei fâk dingin i nau thaw la, zîngah ka nau ei fâk dingin thaw vêng ka tih' a ta. 29 Chuongchun, ka naupa chu kan suong a, kan fâk ta a. A tûka chun a kuomah, 'I naupa hung thaw ve ta raw leh' ka ta, sienkhom a thup hmang dai si a" a ta. 30 Lalin chu chu a hrietin a lal thuom a pot thlèr a. Kul tlânga a fe lai chu mipuiin an en thup a, a zakuo hnuoia chun saiip a lo hâk zing a. 31 Ama chun, "Safat naupa Elisa rìng voisuna tan a ni naw chun LALPAN a law law mi law sien, chu nêka nasa khom chun mi thaw raw se" a ta. 32 Elisa chu a inah a um a, upa ruolin an pan a. Lalin hma lawka a tirhai an hung tlung hma chun upahai kuomah, "Hi tuolthattupa hin ka lu la dingin mi a hung tir ti in hriet ve naw maw? Ngai ta u, mi tirhai an hung tlung pha leh kotkhâra khan lo dang tlat ro. A hnunga ke pên ri khom chu a pu ke pèn ri a ni nghe nghe ta naw maw?" a ta. 33 Chuonga a biek tawl lai zing chun mi tirhai chu an hung tlung thla a. Lal chun, "Hi sietna hi LALPAA inthok a nih. Ieng leiin am LALPA chu ka nghâk zing ding a na?" a ta.

2 Kings 7

1 Elisa chun, "LALPA thu hi ngàithla rawh. LALPA chun, 'Zîngah hieng ang hun vela hin Samaria khaw kul kotkhâr bulah beiphit indip tha tak kilogram thumah shekel khat pei le barli beiphit indip tha tak kilogram rukah shekel khat peiin zor an tih' tiin a hril" a ta. 2 Lalin a ringsan tak sipai hotu chun Pathien mi kuomah, "LALPAN a vân tukver a hong ding ni ta hrim sienkhom, chuong ang chu thil thei a ni hliek ding am a ni?" a ta. Elisa chun, "I mit ngeiin hmung i ta, fâk ruok chu fa ve naw ti nih" a ta. 3 Kul kotkhâr bula chun phàr pali an um a. Anni chun, "Ieng leiin am hi taka hin thi nghâkin ei inthung zing ding a na? 4 Khaw sûngah lût inla hlak khawpui an tàm leiin ei va thi tho awm si a. Hi taka hin thung zing inla hlak ei thi tho bok ding a na. Thaw ro, Aram sipaihai tieng tlu lût rok el ei tiu. An mi hlà leh dam ei ta, an mi that leh ei thi a ni el ding annawm" tiin an inbiek a. 5 Chuongchun, Aram sipaihai inkulna hmuna fe ding chun thimbutin an inthok suok a. Aram sipaihai riebûk tontir an va tlung chun tu khom an lo um ta naw a. 6 Aram sipaihai chu LALPAN tawlailir ri dâm, sakor ke pen ri dâm, sipai tam tak ri dâm a'n hriettir leiin, "Ngai ta u, Israel lal hin Hit lalhai le Aigupta lalhai ruoiin a mi hung bei an ta hi" an ta. 7 Chuongchun, an tho a, thimbutin an tlân se ta a, an puon in hai, sakor hai, sabengtung hai le an riebûk chu a ngai charin an mâksan a, an hringna humhim dingin an tlânse ta vong a. 8 Phàrhaiin riebûk tontir an va tlung chun puon in pakhatah an lût a, fain an dawn a, chu taka tangkaruo dâm, rangkachak dâm le silfên dâm chu an làk a, an va thup hmang a. Chun, an hung kîr nawk a, puon in dangah an lût nawk a, chu taka thil umhai khom chu an làk a, an va thup hmang nawk a. 9 Nakie deu chun, "Eini thilthaw dàn hi a'n dik naw top a nih. Voisun hin chanchin lawmum a tlung a, eini chauh a hretu ei ni a, hril loa khawvar chen ei nghâk chun hrem tuok ei tih. Chuleiin, thaw ro, fêng ei ta, lal sûngkuohai va hril ei tiu" tiin an inbiek a. 10 Chuongchun, khaw kul kotkhâr vêngtu chu an va ko khêk a, "Aramhai riebûkah kan va fe a, tu khom an um ta dêr naw a, mihriem ri hrim hrim khom a um naw a, an sakorhai le sabengtunghai chu an inthlung a, an puon inhai khom a ngai ngaiin a la um zing a nih" tiin an hril a. 11 Chu thu chu kotkhâr vêngtuhai chun an khêkpui a, lal in sûnga mihai chu an va hril a. 12 Lal chu zâna chun a tho a, a khawnbawlhai kuomah, "Aramhai mi thaw dàn hi hril ka ti cheu. Ei tàmzie hi an hriet a, chuleiin, 'Khawpuia inthoka an hung suok pha a hringin lo man ei ta, khaw sûngah ei lût ding a nih' tiin rama inbirûk dingin an riebûk an suoksan a ni chu" a ta. 13 A khawnbawl laia pakhat chun, "Ieng le khaw leh, hi khawpuia chênghai hi a thi tahai chan ang bok chang hmabâk vong ei ni hi. Chuleiin, khawpuia sakor um sun panga hi thuoiin tuhai amanih tir inla, ieng thil am a tlunga ti enfie hrim hrim ei tiu khai" a ta. 14 Chuongchun, sakor tawlailir pahni le a hnûktu ding sakorhai chu an buotsai a, Aram sipaihai hnot dingin an tir a. Lal chun tawlailir khaltuhai kuomah, "Fe unla, ieng thil am a tlung va en fie ro" tiin thu a pêk a. 15 Anni chun Jordan vadung chen an va hnot a, an inhmaw taluo leia Aram sipaihaiin an silfên le thuomhnaw an peihai chu lampui intluonin a um zel zul a. An mi tirhai chu an hung kîr a, thil umzie chu lal an hril a. 16 Chuongchun, mipui chu an inthok suok a, Aramhai riebûk chu an va rok ta mur mur a. LALPA thu ang ngeiin, beiphit dip kilogram thum chu shekel khat pei le barli beiphit kilogram ruk chu shekel khat peiin an zor a. 17 Chun ofisar, lalin ringsan taka a hmang kha kotkhâr vêngtuin lal chun a ruot a. Pathien mi ina lal a hung thlâk laia a lo hril tah ang khan, mipui inzi nuoi nuoi chun ama chu an chìl hlum dèr el a. 18 Lal kuoma Pathien miin "Zîngah hieng ang hun vela hin Samaria khaw kul kotkhâr bula hin beiphit indip tha tak chu kilogram thumah shekel khat pei le barli beiphit indip tha tak chu kilogram rukah shekel khat peiin zor an tih' tia a hril ang charin a hung tlung a nih. 19 Chu ofisar chun Pathien mi kuomah, "LALPAN a vân tukver a hong ding ni ta hrim sienkhom, chuong ang chu thil thei a ni hliek ding am a ni?" a ti a nih. Pathien mi chun, "I mit ngeiin hmung i ta, fâk ruok chu fa ve naw ti nih" a ti a. 20 Chu char chu a chungah a hung tlung a, kotkhâra chun mipuiin an chìl nuoi nuoi a, a thi ta dèr el a.

2 Kings 8

1 Elisa chun a naupa thi hnung a sukdampêk nuhmei kuoma chun, "Tho la, nang le i sûnghai leh in um theina hmun hmunah lo va um hri phot ro, LALPAN hi rama hin kum sari tàm a'n tlâktir ding a nih" a ta. 2 Pathien mi hril ang chun nuhmei chun a thaw a, ama le a sûnghai chu Filistinhai ramah kum sari an va um a. 3 Kum sari hnungin nuhmei chu Filistinhai rama inthokin a hung kîr a, a in le lo pekîr dinga hni dingin lal kuomah a hung a. 4 Chu lai chu lalin Pathien mi siehlaw Gehazi kuoma, "Elisan thil ropui a thawhai po po chu mi hril rawh" tia a lo indon lai tak a nih. 5 Nuhmei naupa thi hnung Elisan a sukhring nawk thu Gehaziin a lo hril lai taka chu nuhmei ngei lal kuomah a hung a hmu chun, "Aw laltak, ka pu, hi nuhmei naupa hi annawm Elisan a sukhring nawk chu! Hi a naupa ngei hi annawm a sukhring nawk chu" a ta. 6 Lal chun nuhmei chu a chanchin a'n don a, ama chun a hril a. Chun, a thil hni chungchànga chun lal chun a thoktu pakhat kuomah, "A ta po po le a lo tharsuok po po chenin, hi ram a suoksana inthoka a hung kîr nawk chen sûnga mi chu pe kîr vong rawh" a ta. 7 Elisa chu Damaska khuoah a fe a, Aram lal Ben Hadad chu a lo damnaw a, Pathien mi a hung thu chu an hril a. 8 Ama chun Hazael kuomah, "Thilpêk chawi la, Pathien mi chu va hmu rawh. Ka natna hi ka dam suok thei ding am ti ama hmangin LALPA mi lo rawnpêk rawh" a ta. 9 Hazael chu Elisa hmu dingin a fe a, Damaskaa an thil nei tha tinrêng, sanghawngsei sawmli phur tawk a chawi a, a hmaa chun a va ngîr a, "I naupa Ben Hadad, Aram lalin, 'Ka damnaw hi ka tha suok nawk ding?' ti indon dingin i kuomah a mi tir a nih" a ta. 10 Elisa chun, "Fe la, a kuomah, 'Hung tha suok ngei i tih' ti va hril rawh. Chun, a thi ngei ding thu khom LALPAN a mi hril a nih" a ta. 11 Hazael chu vîng hiel khopin Elisha chun mit la son dêr loin a en a. Chu zoah Pathien mi chu a tap ta a. 12 Hazael chun, "Pu, ieng dinga i tap am?" a ta. Elisa chun, "Israelhai poi i la tawk nasat dingzie ka hmu tlang vong lei a nih. An kulhai rawpêk i ta, an tlangvàlhai kawlhnàmin that i ta, an naupanghai chu hnuoi vuoknan hmang i ta, nuhmei nau pai lai hai phing chen phir thlêr i tih" a ta. 13 Hazael chun, "Kei i siehlaw uicho mei mei hin chuong ang thil nasa chu ieng tin am a thaw thei ding?" a ta. Elisa chun, "Aram lal i la hung ni dingzie LALPAN a mi'n hmutir a nih" a ta. 14 Chuongchun, Elisa kuoma inthok chun a suok a, a pu kuom tieng chun a fe a. A pu Ben Hadad chun, "Elisan ieng tin am a lo hril che a?" a ta, ama chun, " 'Tha suok nawk mol a tih' tiin a mi hril a nih" a ta. 15 Sienkhom a zîngah Hazael chun puon sa tak hi tuiah a'n chie a, chu chun Ben Hadad chu a hmaiah a hup hlum a, a lalna chu a hung hluo ta a. 16 Israel lal Ahaba naupa Joram a'n lala inthoka kum ngana, Juda lala Jehosafat a thang lai chun a naupa Jehoram chun a lalna chu a hung hluo a. 17 Juda lal a hung ni chun kum sawmthum le kum hni mi a na, Jerusalemah kum riet ro a rêl a. 18 Ahab sûnghai ang bokin, Israel lalhai lampui hraw chu a hung hraw ve a, Ahab naunu chu nuhmeiah a nei a, LALPA mithmuah thil tha lo tak a thaw hlak a. 19 Amiruokchu, a siehlaw Davida leiin LALPAN Judai ram chu a suksiet nuom naw a, kumkhuoa Davida le a thlahai ta dinga rorêltu inneitir zing chu a lo tiem ta si a. 20 Jehoram hun lai chun Edom mihai chu Judahai lakah an hel a, lal an insiem chop a. 21 Chuongchun, Jehoram chu a tawlailir po po leh Zair khuoah a va fe a. Edomhai chun a tawlailir kawmandarhai leh an inhuol vong a, sienkhom zâna chun an tawn tlang a, an suok thei hram a, a sipaihai chu an in tieng seng an tlân dar ta vong a. 22 Edomhai chu tu chen hin Judahai lakah an la hel ta zing a nih. Chuong lai bok chun Libna khuo khom an lo hel ve a. 23 Jehoram inlal laia thil tlung danghai le a thilthawhai chu Juda lalhai inlal lai chanchin inziekna lekhabuah a chuong. 24 Jehoram chu a thlatuhai kuomah a chawl a, Davida khawpuiah an phûm a, a hmuna chun a naupa Ahazia chu lalin a hung um ta a. 25 Israel lal Ahab naupa Joram inlal kum sawm le pahninaa chun Juda lal Jehoram naupa Ahazia chu a hung inlal tan a. 26 Ahazia-in ro a rêl tan chun kum sawmhni le kum hni mi a na, Jerusalemah kum khat ro a rêl a. A nu hming chu Athalia a na, Israel lal Omri tunu a nih. 27 Ahazia chu Ahab sûngkuohai mâkpa a ni ang hrimin an lampui hraw chu a hraw ve a, LALPA mithmuah thil tha lo tak a thaw hlak a. 28 Ahab naupa Joramin Gilead biel Ramot khuoa Aram lal Hazael a hang beinaa chun Ahazia chu a thang ve a, Aramhai chun Joram chu an lo inhliem a. 29 Aram lal Hazael a beinaah Joram chu Aram haiin Ramot khuoa an lo inhliem tàk lei chun insukdam dingin Jezreel-ah a kîr nawk a. Chuongchun, Jehoram naupa Juda lal Ahazia chu Ahab naupa Joram hliem chu kan dingin Jezreel khuoah a zu fe a.

2 Kings 9

1 Zawlnei Elisa chun zawlnei ruol laia pakhat chu a ko a, a kuomah, "Dier kei la, hi hriek bûr hi chawi la, Gilead biela Ramot khuoah va fe rawh. 2 I tlung pha leh Nimsi naupa Jehosafat naupa Jehu indon suok la, i hmu pha leh a ruolhai laia inthokin ko bing la, pindan sûngah lùtpui rawh. 3 Chun, hriek bûr hi la la, a lu chungah hriek bur la, "LALPAN hieng hin a hril: 'Israel lal ni dingin hriek ka nàl che' tiin. Chu zoah kot hong la, muongchang loin hung tlàn kir nawk vang vang rawh" a ta. 4 Chuongchun, zawlnei tlangvàl chu Gilead biela Ramot khuoa chun a fe a. 5 A tlung chun sipai ofisar ruol thung khawm a hmu a. "Kawmandar, i kuomah thucha hril ding che ka nei" a ta. Jehu chun, "A tu tak hi'm ie?" a ta, ama chun "Nangma kuomah" a ta. 6 Jehu chu a tho a, pindanah an lût a, zawlnei chun a luah hriek a bur a, "LALPA, Israel Pathienin hieng hin a tih: LALPA mipui, Israelhai chunga lal dingin hriek ka nàl che. 7 Ka siehlaw zawlneihai thisen le LALPA siehlawhai po po thisen phuba chu Jezebel laka ka lâk theina dingin i pu Ahab sûnghai chu i sukbohmang vong ding a nih. 8 Ahab sûngkuo chu an ram ngei ding a nih. Israel rama mi Ahab thla pasal taphot chu, bawi le bawi naw khom, ka sukbohmang vong ding a nih. 9 Ahab sûngkuohai chu Nebat naupa Jeroboam sûngkuohai le Ahija naupa Baasa sûngkuohai ang bokin siem ka tih. 10 Chun, Jezebel ruong chu Jezreel khaw kul bulah uiin fâng an ta, phûmtu ding hrim um naw ni hai' tiin" a ta. Chuongchun, kot a hong a, a tlân suok ta nghal a. 11 A ruolhai kuoma Jehu a hung nawk chun an ni laia pakhat chun, "Iengkim a tha de maw? Ieng leia kha mi invètpa kha i kuomah a hung tlat am a na?" a ta. Jehu chun, "Ama kha in hriet mi a na, a thu hril ding awm in hriet tho annawm" a ta. 12 Anni chun, "Hre teu hlak kan tim ie! Mi hang hril ta" an ta. Jehu chun, "Hi hi a thu mi hril chu a nih: 'LALPAN hieng hin a tih: Israelhai chunga lalah hriek ka nâl che' tiin" a ta. 13 Chuongchun, inrang takin an silpuonhai an hlip a, kailawn chunga chun an pha a, tawtawrawt an mût a, "Jehu lal a ni tah" tiin an khèk a. 14 Nimsi naupa Jehosafat naupa Jehu chun Joram chu a phier tan ta a (Chu chu Joram le Israel mi po poin Aram lal Hazael laka Gilead biela Ramot khuo an vêng lai a nih. 15 Lal Joram ruok chu Aram lal Hazael leh an indonaah Aram mihaiin an inhliem a, insukdam dinga Jezreel khuoa a kîr nawk hun lai a nih). Jehu chun a ruolhai kuomah, "Keima tienga thang in ni chun mi tu khomin hi thu hi Jezreel khuoa an zu hril nawna dingin Ramot khuo insuoktir naw hrim hrim ro" a ta. 16 Chuongchun Jehu chu tawlailirah a chuong a, Jezreel khuoah a fe a. Chu taka chun Joram chu nat khuma zâl a na, Juda lal Ahazia khom ama en dingin a zu fe a. 17 Jezreel kula ralvêngtuin Jehu le a sipaihai hung thlâk lai a hmu chun, "Sipai tuhai amanih hung thla ka hmuh" a ta. Joram chun, "Sakor chung chuong mi ko la, anni hmuok dingin tir la, 'A tha tieng thu am a ni?' tiin va'n don raw se" a ta. 18 Chuongchun, sakor chung chuong pakhat chu anni hmuok dingin a fe a, "Lalin, 'A tha tieng thila hung am in ni?' ti indon dingin a mi tir a nih" a ta. Jehu chun, "Chu chu nanga hriet ding ieng am a um a? Ka hnunga hin mi zui rawh" a ta. Ralvêngtu chun, " Ka mi tir chu a va tlung ngei a, sienkhom a hung kîr nawk ta nawh" a ta. 19 Mi dang an tir nawk a, ama chun Jehu chu thu ngai bok a'n don nawk a. Jehu chun, "Chu chu nanga hriet ding ieng am a um a? Ka hnunga hin mi zui rawh" a ti nawk a. 20 Ralvêngtu chun, "Ka mi tir chu a va tlung ve ngei a, sienkhom a hung kîr chuong bik nawh. An thuoitu tawlailir khal dàn saw Nimsi naupa Jehu khal dàn a hoi khop el, mi invêt ang elin a khal hlak a nih" a ta. 21 Joram chun, "Ka tawlailir hung buotsai ro" tiin thu a pêk a, an hung buotsai zo chun anni tawlailir ve veah Israel lal Joram le Juda lal Ahazia chu Jehu hmuok dingin an suok a, Jezreel mi Nabot huonah an intuok a. 22 Joramin Jehu a hmu chun, "A tha tieng thil am a ni, Jehu?" a ta. Ama chun, "I nu Jezebelin milem biek le dawi a chìng nasat sùng hin that tieng thil iengtin am a um thei ding a na?" a ta. 23 Joram chun a tawlailir chu a kei her a, a tlân a, Ahazia kuomah, "Inhlemna a nih, Ahazia" a ta. 24 Chu phing leh Jehu chun a thalngul a kuoi a, Joram dâr inchuktuonaah a kâp a, thal chun a lungah a dawt tlang a, tawlailira chun a op ta rop el a. 25 Jehu chun tawlailir tienga inrawitu Bidkar kuomah, "Va hnûk thla la, Jezreel mi Nabot huona ngei khan pei hawn rawh. Kha hmaa nang le kei, a pa Ahab tawlailir hnunga ei fe tum khan LALPAN hi thu hi a lo hril lawk tah a nih ti i hriet zing ka ring. 26 LALPAN, 'Zani khan Nabot le a naupahai thisen suok ka hmu ngei annawm' a ti kha. Chun, LALPA bokin, 'Hi hmuna ngei hin ka thungrul ding che a nih' a ti bok. Chuongchun, LALPA thu ang chun a ruong saw va la la, hi hmuna ngei hin dehawn rawh" a ta. 27 Juda lal Ahazia-in chuong thilhai a hmu chun Bet Hagan tieng a tlân tung a. Jehu chun a hnot a, "Ama khom kha that nghal ro" tiin a khêk a. Ibleam kawl, Gur panna tungah a tawlailira chuong chu a'n inhliem a, sienkhom Megido tieng a tlân hmang a, chu taka chun a thi a. 28 A siehlawhai chun tawlailirin Jerusalem tieng an phur tung a, Davida khawpuia a thlàna chun a thlatuhai lai an phûm a. 29 Ahazia chu Ahab naupa Joram inlala inthoka kum sawm le pakhatnaah Judahai chunga hung inlal tan a nih. 30 Chu zoah Jehu chu Jezreel khuoah a fe a. Jezebelin a lo hriet chun a mithai a lo nàl a, a sam dâm a lo chei a, tukverah a dâk a. 31 Kul kotkhâra Jehu a lût lai chun, "Mani puhai thattu Zimri, a tha tieng thu am a ni?" a lo ta. 32 Anni umna tukver tieng chu a hang en a, "Tu am ka tienga thang? Tu am?" a ta. Mi tilre pahni pathum vel an hung dâk suok a. 33 Ama chun, "Kha nu kha hung thè thla ro" a ta, an hung thè thlâk a, a thisen inkhieng chun bang le sakorhai chu a per khum nuoi a, ama chu an lo chîl a. 34 Jehu chu a lût a, fain a dawn a. "Tongsephurnu kha lo va ngaiven unla, lal naunu a ni si a, va phûm ro" a ta. 35 Phûm dinga an va fe chun a luru dâm, a ke bawr dâm le kutpha bawr dâm chauh naw chu hmu ding a um ta naw a. 36 An hung kìr a, Jehu an va hril a, ama chun, "Hi hi LALPAN a siehlaw Tisbe mi Elija hmanga, 'Jezreel hmuna ngei hin uihaiin Jezebel ruong chu la fâng an tih. 37 Jezreel hmuna ngei hin Jezebel taksa chu êk tawng angin, 'Hi hi Jezebel a nih' ti tu khom hriet thei lo dingin la'n dar a tih' ti thu a hril kha a ni hi" a ta.

2 Kings 10

1 Samaria khuoah Ahab naupahai sawmsari an um a. Jehu chun lekha a ziek a, Samaria khawpuia upahai, hotuhai le Ahab nauhai lo enkol tleituhai kuomah a thon seng a. 2 , A lekhaa chun, "In pu naupahai enkoltu niin, tawlailirhai le sakorhai neiin, kula inhuon khuoah chêngin, râlthuom koltu in ni bok a. 3 Hi lekha hi in hmu charin in pu naupahai laia fel tak le tlâk tak dinga in ngai chu a pa lalthungphaah inthungtir unla, in pu ta ding chun dopui ro" tiin. 4 Nisienlakhom, anni chu an ti ta êm êm a, "Lal pahni hmana an ngam naw chu einin iengtin am ei ngam lul ding a na?" an ta. 5 Chuongchun, lal in enkoltu, khawpui optu, upahai le naupanghai enkol tleituhai chun, "I siehlawhai kan ni a, thaw dinga i mi hril taphot chu thaw pei kan tih. Tu khom lalah siem nawng kan tih. Nangin tha i ti ang angin thaw lem rawh" ti thu chu Jehu kuoma hril dingin mi an tir a. 6 Chu phing leh Jehu chun lekha a thon nawk a, "Keima tienga thang in ni a, ka thu in zawm takzet ding a ni chun, in pu naupa in kolhai seng lu hung la un la, zingah hieng tik huna hin ka kuomah Jezreel-ah hung ro" tiin. Lal naupa sawmsarihai chu khawpuia mi lien ruol, anni enkol tleituhai kuoma um an nih. 7 Lekha an hmu chun lal nauhai chu an man a, sawmsari chu an that a, an luhai chu bawmràngah an sie a, Jezreelah Jehu kuomah an thon a. 8 Zuolko a hung tlung chun Jehu kuomah, "Lal naupahai lu chu an hung lâk tah" tiin a hril a. Ama chun, "Kul kotkhâr bulah hmun hniah intieng khawm unla, zîngkàr chen um raw se" a ta. 9 A tûk zîngkàr chun Jehu chu a va suok a, mipui hmaa chun a ngîr a, an kuomah, "Poi intawk nawh. Kei ruok chun ka pu ka phierrûk a, ka that a. An leh, hienghai po po hi tu that am ni tâng an ta? 10 Ahab sûngkuo chungthua LALPA thu hrim hrim mal khat khom inkhêl a um nawh ti tu hin hre ta ro. A siehlaw Elija hmanga LALPAN thu a hril kha a hung intlungtir tah a ni hi" a ta. 11 Jehu chun Jezreel khuoa Ahab sûngkuo la um po po, ama hnuoia lu tak nina chelhai, a ruol thahai le a thiempuhai po po chu a that ram a, tu khom hlà hrim a nei nawh. 12 Chun, Jehu chu a'n thok suok a, Samaria tieng a fe a. 13 Lampuia berampuhai beram hmul vawna Beth Eked a va tlung chun Juda lal Ahazia unauhai laia a then a hmu a. Ama chun, "Tuhai am in na?" a ta, anni chun, "Ahazia unauhai kan nih. Lal nauhai le lalnu Jezebel zu chibai dinga hung kan nih" an ta. 14 Jehu chun, "A hringin man tawl ro" a ta, a hringin an man a, beram hmul vawnaa tuikhur bul khura chun an that a, an rêngin sawmli le pahni an na, pakhat khom damin an hlà nawh. 15 Chu taka inthoka a suok chun ama hmuok dinga hung Rekab naupa Jehonadab chu a'n tuokpui a. Jehu chun chibai a bûk a, a kuomah, "I chunga lungril indik ka put ang hin ka chungah i put ve am?" a ta, Jehonadab chun, "Put ve e" a ta. Jehu chun, "Chuong an leh i kut kha mi hang pe ta" a ta, a hang pêk a, tawlailira chun a kei kai a. 16 Jehu chun, "Ka kuomah hung la, LALPA ta dinga thahnem ka ngaizie hung hmu ve hrim hrim rawh" a ta. Chuongchun, a tawlailira chun an chuongtir a. 17 Samaria a tlung chun Ahab sûngkuohai Samariaa la um sunhai chu a that vong a; Elija hmanga LALPA thu ang ngeiin a sukchimit tawl tah a nih. 18 Jehu chun mipui po po chu a ko khawm a, an kuomah, "Ahab khan Baal rong hi a bawl met chauh a na, Jehu hin chu uor takin a bawl ding a nih. 19 Chuleiin, Baal zawlneihai po po, a betuhai po po le an thiempuhai po po ka kuoma hin hung ko khawm ro. Baal ta dingin inthawina ropui ka'n hlan ding a ni leiin tu khom a kim naw um naw raw hai se. A hung naw an um chun damin suok naw ni hai" a ta. Jehu chun Baal betuhai chu sukhlum tuma dawhaa a thaw tawl a nih. 20 Jehu chun, "Baal hmingin kûtpui siem ro" a ta, chu chu nasa takin an hril thang a. 21 Israel ram po poah an hril dar a, Baal betuhai po po chu an hung a, a thang naw hrim hrim an um nawh. Baal tempula chun an lût a, kotkhâra inthokin a chawr tieng chen an inthung sip hmur a. 22 Jehu chun tempula silfên enkoltuhai kuomah, "Baal rongbawltu po po bât ding puon hung lapêk ro" a ta, an hung lâk a. 23 Jehu chu Rekab naupa Jehonadab leh Baal tempula chun a lût a. Jehu chun Baal betuhai kuomah, "Hi taka hin Baal betu ni lo, LALPA betu lo um ve pal rawi an tih, zong unla, en fel ro" a ta. 24 Chuongchun, inthawina le pumraw thilhlân inhlàn dingin an lût a. Jehu chun puo tieng mi sawmriet a lo sie rûk ta hrim a. An kuomah, "Hieng in kuta ka pêk cheu hi tu khom in insuo vai chun, a'n suotu chun a'n suo aiin a hringna chân a tih" a ta. 25 Pumraw thilhlân an inhlàn zoin Jehu chun vêngtu sipaihai le an hotuhai kuomah, "Va lût unla, va that ro; tu khom insuo dêr naw ro" a ta, kawlhnâmin an sât hlum ta vong a. Vêngtu sipaihai le an hotuhai chun an ruong chu an dêng suok a, chu zoah Baal tempul sûngrila chun an lût a. 26 A sûngrila Baal lim thingtum an phun chu an hung lâk suok a, an raw a. 27 Baal lim lung an phunhai chu an vuok nawi vong a, Baal tempul chu an sukchim a, tu chen hin mihaiin inhnawmna hmunah an la hmang zing a nih. 28 Chuong ang chun Jehu-in Israel rama inthokin Baal biekna chu a sukbo a nih. 29 Sienkhom, Jehu chun Nebat naupa Jeroboam suolna, Bethel le Dan khuoa rangkachak bawngte lem biek chu a bân chuong naw a, chu thil lei chun Israelhai chu thilsuol an thawtir zing tho. 30 LALPA chun Jehu kuomah, "Ka mit tlung taka thil i thaw lei le ka dit dàn anga Ahab sûnghai chunga i thaw leiin i naupahai chu suon lina chenin Israel lalthungphaah inthung an tih" a ta. 31 Amiruokchu, Jehu chun LALPA, Israelhai Pathien dàn chu a lungril po poin a zawm naw a, Jeroboamin Israelhai thil suol a'n thawtir anga inthawtir chu a bânsan chuong nawh. 32 Chuong lai chun LALPAN Israel ram chu a sukchin tan ta a. 33 Aram lal Hazael chun Israel ram Jordan vadung sak tieng po po, sim tieng Arnon vadunga Aroer khuo chenin a hne vong a, chu chun Gilead le Basan biel, Gad hnam, Reuben hnam le Manase hnamhai chêngna a huom vong a nih. 34 Jehu inlal laia thil tlung danghai le a thilthaw le a hlen suokhai chu Israel lalhai inlal lai chanchin inziekna lekhabuah a chuong. 35 Jehu chu a thlatuhai kuomah a chawl a, Samaria-ah an phûm a, a naupa Jehoahaz chun a lalna chu a hung hluo a. 36 Samaria-a inthoka Israelhai chunga Jehu inlal sûng chu kum sawmhni le kum riet a nih.

2 Kings 11

1 Ahazia nu Athalia-in a naupa thi thu a lo hriet chun, lal naupahai po po chu that vong dingin thu a pêk a. 2 Ahazia naupa Joash ruok chu Israel lal Joram naunu Jehoseba, Ahazia farnu chun that dinga ruot lal naupahai laia inthok chun a lâk hmang a, Athalia hmu thei lo dingin khum pindanah a enkoltu leh a thup a, that a ni ta naw a. 3 Athalia-in ram rorêlna a chel sûng, kum ruk chu LALPA Tempul sûngah a enkoltu leh an inbi hmang a. 4 A kum sarinaa chun Tempula thiempu Jehoiada chun lal vêngtu hai Keret mihai le lal in vêngtu hai laia sipai zakhat pawl pei inrawitu kawmandarhai chu LALPA Tempul sûnga ama inhmupui dingin a'n kotir a, LALPA Tempula chun inkhàm meua thu a thlungpui hnung chun lal naupa chu a'n hmutir tawl a. 5 An kuomah, "Sabat nia diutia in hung pha leh hmun thuma thea hmun khatin lal in vêng in ta; 6 hmun thuma thea hmun khatin kula Sur Kotkhâr vêng in ta; hmun thuma thea hmun khat dang chu kul kotkhâr vêngtuhai hnungah in diuti ding a nih. 7 Pawl hni dang, Sabat nia diuti ve lo poin lal ta dingin LALPA Tempul hi in vêng ding a nih. 8 Mi tinin hriemhrei chawiin lal chu sîr tinah vêng in ta, tu khom in vêng himna huol sûnga hung lût hrim hrim chu that pei ro. Lal lût le suok chu in zui pei ding a nih" tiin thu a pêk a. 9 Sipai za pawl peia kawmandarhai chun thiempu Jehoiada hril ang tak chun an thaw a, mani rawihai po, Sabat nia diuti ding pawl le awl ding pawl chu an thuoi a, thiempu Jehoiada kuomah an fe a. 10 LALPA Tempula um Davida feihai le phawhai chu kawmandarhai a pêk a. 11 Vêngtu sipaihai chun hriemhrei chawi sengin, Tempul sim tieng panga inthoka hmar tieng chenin, maichâm le Tempul hrûla chun lal chu an ngîr huol mup a. 12 Chuongchun, Jehoiada chun lal naupa chu a hung thuoi suok a, lallukhum a'n khumtir a, lalhaiin thuthlung le dàn le thupêk an kengkaw ding hai inziekna bu chu a pêk a, lalah a puong a, hriek a nàl a, mipuihai chun kut an ben dur dur a, "Lal chu dam sawt raw se" tiin an khèk a. 13 Vêngtu sipaihai le mipuihai ri Athalia-in a lo hriet chun LALPA Tempula mipuihai lai chun a va fe a. 14 Chun, a hang en a, lal chu dàn angin ban hrûlah a lo ngîr a, sipai kawmandarhai le tawtawrawt mûttuhai chu lal bula chun an ngìr a, chu rama mihai chu an hlim êm êm a, tawtawrawt an mût an mût a. Athalia chun a puonhai a pot thlêr a, "Phierrûkna! Phierrûkna!" tiin a khêk a. 15 Thiempu Jehoiada chun ama chu man dingin kawmandarhai chu thu a pêk a, "LALPA Tempula em chu that lo ding" a lo ti ta leiin, an kuomah, "Sipaihai kâra khan hung thuoi suok unla, a zuitu taphot chu that ro" a ta. 16 Lal in huonga sakor lûtna kot a tlung chun an man a, chu taka chun an that a. 17 Mipuihai chu LALPA mihai an hung nina dingin Jehoiada chun LALPA le lal le mipuihai inkârah thuthlung a siem a, lal le mipuihai inkârah a siem bok a. 18 A ram mipuihai po po chu Baal tempulah an fe a, an sukchim a, maichâmhai le milemhai chu an vuok nawi vong a, Baal thiempu Matan chu maichâm hmaah an that a. Thiempu Jehoiada chun LALPA Tempul vêngtu dingin vêngtu sipai a sie a. 19 Chuongchun, sipai kawmandar hai, Kerit mi hai le vêngtu sipai hai chu a thuoi a, LALPA Tempula inthokin lal chu an thuoi thlàk a, vêngtu sipaihai lûtna kota chun lûtin lal inah an fe a, lal chu a lalthungphaah an inthungtir ta a. 20 Chuongchun, chu rama mi po po chu an lawm a, Athalia chu lal inah kawlhnàma an that ta leiin khawpuia chun buoina a re ta a. 21 Ro a hung rêl tan chun Joash chu kum sari mi a nih.

2 Kings 12

1 Israel lal Jehu inlala inthoka kum sarinaah Juda lal Joash chu a hung inlal tan a, Jerusalemah kum sawmli a'n lal a, a nu hming chu Zibia a na, Beersheba khaw mi a nih. 2 Thiempu Jehoiada inchûktirna hnuoia a um sûng po chun LALPA mithmuah Joash chun thil indik a thaw hlak a. 3 Hmun sânghai ruok chu a la sukbo chuong naw a, mihai inthawiin rimtui an la raw zing a. 4 Joash chun thiempuhai kuomah, "LALPA Tempula mi thil hung chawi le inhlàn-thutiem hlenna dâm, intiemnaa thang phâk chin chawi dinga bituk dâm, mani lung puok dàn ang peia pêk-hai po po chu la khawm vong ro. 5 Thiempu tinin rong an bawlpêkhai thil hung chawi lo lâk khawm chu an mawphurna seng ni sien la, chuong an lâk khawmhai chu hmangin Tempul sietna lai po hi siem tha raw hai se" a ta. 6 Amiruokchu, Joash chu kum sawmhni le kum thum a'n lal hnung khomin thiempuhai chun Tempul siem that sin chu an la thaw naw zing a. 7 Chuleiin, Joash chun thiempu Jehoiada le thiempu danghai chu a ko khawm a, an kuomah, "Ieng leia tempul riper sin hi in la thaw naw zing am a na? Tempul siemnaa hmang dingin tuta inthoka tangka in lâk khawm taphot chu hung inhlàn pei ta ro" a ta. 8 Thiempuhai chun mihaia inthoka tangka khon ta lo ding le anniin tempul riper sin khom la ta lo dingin an remti a. 9 Chuongchun thiempu Jehoiada chun thingrem bawm a hung lâk a, a sìn chu an ver pop a, LALPA Tempul lûtna chang tieng, maichâm bula chun an inthut a, LALPA Tempula tangka an hung chawi po po chu kotkhâr vêngtu thiempu chun thingrem sûngah a lo thlâk pei a. 10 Bawma chun tangka a tam ti an hriet pha leh lal lekha ziektu le thiempu laltak chu an fe a, an tiem a, ipah an thun a. 11 Hmang zât ding an sukfel hnung chun tangka chu Tempul bawlhai inrawitua ruothai kuomah an pêk suok a, 12 anni chun LALPA Tempul bawla thoktuhai, mistirihai, lung sertuhai le cho suoktuhai hlawah dâm, LALPA Tempul sietna lai siemna ding thing le lung ser sa inchawkna ding dâm le Tempul siemna dinga an mamaw taphot inchawkna dâmin an hmang a. 13 LALPA Tempula sum hung lûthai chu LALPA Tempula thlèng dâm, khawnvar phita chepna dâm, maihùn dâm, tawtawrawt dâm, rangkachak amanih tangkaruo bûr le bèlhai dâm siemnaah hmang ta loin, 14 Tempul siemtuhai hlawah an hmang lem ta a. 15 Ringum tak le indik taka an thaw hlak leiin an sum hmangnahai chu en fel zui dinga zieka inchik ngai ieng khom a um nawh. 16 Bawsiet inthawina thilhlân le suol inthawinaa thilhlân tangkahai ruok chu thiempu chan a ni leiin LALPA Tempulah an hung chawi lût ve nawh. 17 Hieng hun lai vel hin Aram lal Hazael chun Gath khuo a hang bei a, a lâk a, chu zoah Jerusalem bei dingin fe pei a tum a. 18 Amiruokchu, Joash chun Juda lal a pu Jehosafat hai, Jehoram hai le Ahazia hai le ama ngeiin a lo inhlàn tah thil ser po po chu LALPA tempula mi le lal ina ro siekhawmnaa mi rangkachak um po po chu a lâk suok vong a, Aram lal Hazael chu a thon a, chuongchun Jerusalem chu rûn ta loin a'n hnûk kîr tah a nih. 19 Joash inlal sûnga thil tlung dang po po le a thilthawhai chanchin chu Juda lalhai inlal lai chanchin inziekna lekhabuah a chuong. 20 A mihaiin an phierrûk a, Sila pan sukna, Jerusalem sak tienga hnuoi an vur ruol chunga in an bawlna hmuna chun an that a. 21 Thoktu a thattuhai chu Simeat naupa Jozakar le Somer naupa Jehozabad an nih. Chuongchun a thi a, a thlatuhai lai Davida khawpuia chun an phûm a, a naupa Amazia chun a lalna chu a hung hluo ta a.

2 Kings 13

1 Juda lal Ahazia naupa Joash inlala inthoka kum sawmhni pathumnaa chun Jehu naupa Jehoahaz chu Samaria khawpuiah Israelhai lalin a hung inthung a, kum sawm le pasari ro a rêl a. 2 LALPA mithmuah thil suol a thaw hlak a, Nebat naupa Jeroboam suolna kha chîng vein, Israelhai chu thil suol a'n thawtir a, chu lampui chu a mâksan ta nawh. 3 Chuong lei chun LALPA lung chu Israel chungah a chok a, hun sawt tak sûng chu Aram lal Hazael le a naupa Ben Hadad thuhnuoiah a pêk tawl tah a nih. 4 Chun, Jehoahaz chun LALPA ditsakna a ngên rak a, Aram lalin Israelhai a sukrimsik nasatzie chu LALPAN a hmu leiin a thu chu a lo ngaithlàkpêk a. 5 LALPA chun sansuoktu a pêk a, Aramhai thuneina hnuoia inthok chun an intàl suok a, kha hma ang bok khan Israelhai chu mani inah an khawsa nawk ta a. 6 Amiruokchu, Israelhai thil suol inthawtirtu Jeroboam sûngkuohai suolna kha an mâksan chuong naw a, an la sunzom zing a, Asera lim thinghai khom Samaria khawpuia chun a la ngîr zing tho a. 7 Jehoahaz chun sakor chungchuong mi sawmnga le tawlailir sawm le sipai sîngkhat ti chauh naw chu sipai a nei zo ta naw a, Aram lalin a dang po po chu a sukram vong a, hrizawla pilvut ang elin a chil pher tah a nih. 8 Jehoahaz inlal sûnga thil tlung danghai le a thilthawhai chu Israel lalhai inlal laia an chanchin inziekna lekhabuah a chuong. 9 Jehoahaz chu a thlatuhai kuomah a chawl a, Samaria-ah an phûm a, a naupa Jehoash chun a lalna chu a hung hluo a. 10 Juda lal Joash inlala inthoka kum sawmthum le pasarinaa chun Jehoahaz naupa Jehoash chu Samaria khawpuiah Israelhai lalin a hung inthung a, kum sawmparuk a'n lal a. 11 LALPA mithmuah thil suol tak a thaw a. Israelhai thil suol inthawtirtu Nebat naupa Jeroboam suolnahai chu bansan nêkin a chîng zui pei lem a. 12 Jehoash inlal sûnga thil tlung danghai, a thilthawhai le a hlen suokhai le Juda lal Amazia le an indo thuhai chu Israel lalhai inlal lai chanchin inziekna lekhabuah a chuong. 13 Jehoash chu a thlatuhai kuomah a chawl a, Samaria khawpuiah Israel lalhai lai an phûm a. A naupa Jeroboam pahnina chun a lalna chu a hung hluo ta a. 14 Elisa chu thi suolin a damnaw a. Israel lal Jehoash chun a zu kan a, "Pa, pa, Israel vêngtu ropui" tia insamin a ta a. 15 Elisa chun, "Thalngul le thal iemani zât hung la rawh" a ta, a hung làk a. 16 Elisa chun Israel lal kuomah, "Thalngul kha chel rawh" a ta, a hang chel chun a kut chungah Elisa chun kut a'n nghat a. 17 "Sak tieng tukver kha hong rawh" a ta, lal chun a hong a. Elisa chun, "Kâp raw leh" a ta, a kâp a. "LALPA hnèna thal, Aramhai chunga LALPA hnèna thal a nih. Afek hmunah Aramhai chu boral dêr khopin i hnè ding a nih" tiin a puong a. 18 Chun, "Thalhai kha hung la rawh" a ti nawk a, lal chun a lâk a. "Hnuoi sun rawh" a ta, voi thum a sun a. 19 Pathien mi chu lal chungah a lung a sen a, "Voi nga voi ruk lai sun la chu Aramhai tukdolin i sukram vong tawl ding a ni vei leh. Voi thum chauh i sun leiin voi thum chauh hnêng i tih" a ta. 20 Elisa chu a thi a, an phûm ta a. Kum a hung invoi chun Moab-haiin an ram chu thâlah an hung rûn a. 21 Mi pakhat an phûm ding lai tak rûntu pawl chu an hmu thut a, a ruong chu Elisa thlàna chun an thlâk a. A ruongin Elisa ruhai a zuk tawk chun mithi chu a hung hring nawk a, a ngîr el ta a. 22 Aram lal Hazael chun Jehoahaz inlal sûng po po chun Israelhai chu a sukrimsi hle a. 23 Nisienlakhom, Abraham hai, Isak hai le Jakob hai kuoma a thuthlung leiin LALPAN anni chu a hmangai a, a làinat a, a ngàisak a. Tu chen hin anni chu sukbohmang a nuom naw a, a kuoma inthokin a pei hmang nuom bok nawh. 24 Aram lal Hazael chu a thi a, a naupa Ben Hadad chun a lalna a hung hluo a. 25 Jehoahaz naupa Jehoash chun Hazael naupa Ben Hadadin a pa Jehoahaz a rûna khuo a lâkpêk tahai kha a lâk nawk vong a. Joash chun voi thum a hne a, Israel khuohai chu a lâk nawk vong a nih.

2 Kings 14

1 Israel lal Jehoahaz naupa Jehoash inlala inthoka kum hninaa chun Joash naupa Amazia chu Juda lalah a hung inthung a. 2 Lal a ni chun kum sawmhni le panga mi a nih. Jerusalemah kum sawmhni le pakuo lalin a thung a, a nu hming chu Jehoaddin a na, Jerusalem khaw mi a nih. 3 Pathien mithmuah thil tha a thaw a, a pu Davida ruok chu a tluk zo nawh. Iengkimah a pa Joash thaw dàn a zui a. 4 Amiruokchu, hmun sânga bawlhmunhai chu a la sukbo chuong naw a, Israelhaiin chu taka chun inthawina le rimtui an la'n hlân zing tho. 5 A ram chu a suknghet phing leh a pa thattuhai chu a that ve thung a. 6 Amiruokchu, Mosie Dàn bua "Nauhai leiin pahai chu sukhlum ding a ni naw a, pahai leiin nauhai sukhlum ding a ni bok nawh, mi tin mani suol leiin an thi ding a nih" tia LALPA thupêk ang dungzuiin, chuong tuolthattuhai nauhai ruok chu a that ve nawh. 7 Ama hin Chi Ruomah Edomhai mi sîngkhat a that a, an khawpui Sela a lâk a, Joktheel tiin a thlâk a, chu hming chu tu chen hin a la put zing. 8 Amazia chun Israel lal Jehu naupa Jehoahaz naupa Jehoash kuomah a mi a tir a, "Hung la, pa le pa chu inhmasonin inbei ei tih" tiin chona thu a thon a. 9 Israel lal Jehoash ruok chun Juda lal Amazia kuomah, "Lebanon tlânga hlingin Lebanon tlânga sidar thing kuomah, 'I naunu kha ka naupa nuhmeiah inneitir raw khai' tiin thu a'n cha a. Chun, ram sa huoi hi a hung a, hling chu a hung chìl thlûk a. 10 Nang hin Edom i zu hne lei sekin i lungril a chapo a ni hi tie! Hnèna i chang kha suongin lungawi takin inah intom tok tok rawh. Nangma chopa Juda ram sietna ding ieng leia buoina chok suok i tum tâl tâl am a na?" tiin a lo don a. 11 Amiruokchu, Amazia chun a lo bengkhon nuom naw leiin Israel lal Jehoash chu a hang fe a, Juda lal Amazia le chun Juda ram Bet Semes-ah hmai intuoin an inbei a. 12 Juda lal chu Israel lal lakah a tlawm a, mi tin chu mani in tieng an tlân kìr ta vong a. 13 Israel lal Jehoash chun Juda lal Ahazia naupa Joash naupa Amazia chu Bet Semes-a chun a man a, Jerusalemah a kai tung a, Jerusalem kul chu Efraim Kotkhàra inthoka a kil chen, meter zahni vela sei chu, a sukchim a. 14 Chun, LALPA Tempul le lal ina ro an siekhawmnaa mi rangkachak le tangka le bûr le bèl um taphot chu a lâk vong a, hrèn tâng ding mi iemani zât a manhai leh an khawpui Samaria tieng a kîr nawk ta a. 15 Jehoash inlal sûnga thil tlung danghai le a thilthawhai le a hlen suokhai, Juda lal Amazia le an indo chanchinhai chu Israel lalhai inlal lai chanchin inziekna lekhabuah a chuong. 16 Jehoash chu a thlatuhai kuomah a chawl a, Samaria khawpuia chun Israel lalhai lai an phûm a. A lalna chu a naupa Jeroboam pahnina chun a hung hluo ta a. 17 Juda lal Joash naupa Amazia chu Israel lal Jehoahaz naupa Jehoash thi hnungin kum sawm le kum nga a la dam a. 18 Amazia inlal laia thil tlung danghai chu Juda lalhai inlal lai chanchin inziekna lekhabuah a chuong. 19 Jerusalemah ama chu an phier rûk a, Lakis-ah a tlân a, sienkhom a hmelmahai chun an hnot zui a, chu taka chun an that a. 20 A ruong chu sakorin an hung phur a, a thlatuhai lai Davida khawpuiah an phûm a. 21 Judai ram mihai chun Amazia naupa Azaria, kum sawm le kum ruk mi chu, an thuoi a, lalah an siem a. 22 A thlatuhai kuoma Amazia a chawl hnungin Azaria chun Elath khuo chu Judai ramah a lâk lût nawk a, a siem tha a. 23 Juda lal Joash naupa Amazia inlala inthoka kum sawm le panganaa chun Israel lal Jehoash naupa Jeroboam pahnina chu Samaria-ah Israel lalin a hung inthung a, kum sawmli le pakhat ro a rèl a. 24 LALPA mithmuah thil suol tinrêng a thaw a, Israelhai thil suol inthawtirtu Nebat naupa Jeroboam suolna po po chu inkiengsan hrim a nei nawh. 25 LALPA, Israelhai Pathienin a siehlaw, Gath Hefer mi, Amitai naupa zawlnei Jona hmanga a lo hril tah angin, Hamath kawna inthoka Tuipui Thi chen chu Israel ramah a hui lût nawk a. 26 Israel mi tu khom, bawi khom bawi naw khomin rinumna nasa tak an tuor chu LALPAN a hmu a, thangpuitu tukhom an um si nawh. 27 LALPA chun Israel hming chu vân hnuoiah nuoi bo dèr a tum naw leiin, sansuoktu dingin Jehoash naupa Jeroboam pahnina kut a hung hmang a nih. 28 Jeroboam pahnina inlal sûnga thil tlung danghai, a thilthawhai, a râl bei thuhai, Israel ta lo ni ta hlak, Hamat kawna inthoka Damaska chen Israel rama a hui lût nawk chanchinhai chu Israel lalhai inlal lai chanchin inziekna lekhabuah a chuong. 29 Jeroboam pahnina chu a thlatuhai kuomah a chawl a, a lalna chu a naupa Zekaria-in a hung hluo ta a.

2 Kings 15

1 Israel lal Jeroboam pahnina inlala inthoka kum sawmhni le pasarinaa chun Juda lal Amazia naupa Azaria chu lalin a hung inthung a. 2 A hung inlal chun kum sawm le kum ruk mi a na, Jerusalemah kum sawmnga le kum hni ro a rêl a. A nu chu Jerusalem mi, a hming chu Jekoli a nih. 3 A pa Amazia ang bokin LALPA mithmuah thil indik a thaw a. 4 Amiruokchu, hmun sànga bawlhmunhai chu a la sukbo chuong naw a, Israelhaiin chu taka chun inthawina le rimtui an la'n hlân zing tho. 5 LALPAN lal Azaria chu a thi chenin phàr hriin a hrem a, in hranah a um a, a naupa Jotham chun a aiin lal in chu a enkol a, a ram mihai chu ro a rêlpêk a. 6 Azaria inlal laia thil tlung danghai le a thilthawhai chu Juda lalhai inlal lai chanchin inziekna lekhabuah a chuong. 7 Azaria chu a thlahai kuomah a chawl a, Davida khawpuia chun an phûm a, a naupa Jotham chun a lalna chu a hung hluo ta a. 8 Juda lal Azaria inlala inthoka kum sawmthum le parietnaa chun Jeroboam pahnina naupa Zekaria chu Samaria-ah Israel lalin a hung inthung a, thla ruk a'n lal a. 9 A pa ang bokin LALPA mithmuah thil suol a thaw a. Israelhai thil suol inthawtirtu Nebat naupa Jeroboam lampui hraw chu an kiengsan nawh. 10 Jabesh naupa Salum chun Zekaria chu a phier rûk a, mipui hmaah a bei a, a that a, a hmunah lalin a hung um a. 11 Zekaria inlal sûnga thil tlung danghai chu Israel lalhai inlal lai chanchin inziekna lekhabuah a chuong. 12 Chuongchun Jehu kuoma LALPAN, "I thlahai chu suon lina chenin Israel lalthungphaah inthung an tih" tia a lo hril chu a hung tlung kim tah a nih. 13 Juda lal Uzia inlala inthoka kum sawmthum le pakuonaa chun Jabesh naupa Salum chu Israel lalah a hung inthung a, Samaria-a inthokin thla khat a'n lal a. 14 Chun, Gadi naupa Menahem chu Tirza khuoa inthokin Samaria-ah a fe a, Salum chu a that a, a hmunah lalin a hung um ta a. 15 Salum inlal sûnga thil tlung danghai le a thil phier rûkhai chanchin chu Israel lalhai inlal lai chanchin inziekna lekhabuah a chuong. 16 Chuong lai chun Menahem chu Tirzaa inthokin a suok a, Tipsa khuoin kot an lo hongpêk nuom naw leiin a khuo le a se vel po po chu a bei a, a suksiet vong a, nuhmei inrai lai phing chenin a phir thlèr vong a. 17 Juda lal Azaria inlala inthoka kum sawmthum le pakuonaa chun Gadi naupa Menahem chu Israel lalah a hung inthung a, Samaria khuoah kum sawm ro a rêl a. 18 LALPA mithmuah thil suol a thaw a, Israelhai thil suol inthawtirtu Nebat naupa Jeroboam lampui hraw chu a'n lal sûng po poin a pêtsan nawh. 19 Assuria lal Pul, Tiglat-Pilesar an ti bok chun ram chu a hung rûn a, Menahem chun a rama ama lalna a suknghet theina dinga thangpuitu dingin tangkaruo kilogram sîngthum le sângli pein a lo tlon a. 20 Tangka a pêk chu Menahemin Israel rama mi hausa pakhat peiah tangka shekel sawmnga seng phùt luia a'n thawtir a nih. Chuongchun, Asuria lal chu a ramah sawt um loin a kîr nawk ta a. 21 Menahem inlal sûnga thil tlung danghai le a thilthawhai po po chu Israel lalhai inlal lai chanchin inziekna lekhabuah a chuong. 22 Menahem chu a thlatuhai kuomah a chawl a, a naupa Pekahia chun a lalna chu a hung hluo ta a. 23 Juda lal Azaria inlala inthoka kum sawmnganaa chun Menahem naupa Pekahia chu Israel lalah a hung inthung a, Samari khuoa inthokin kum hni ro a rêl a. 24 Pekahia chun LALPA mithmuah thil suol a thaw a, Israelhai thil suol inthawtirtu Nebat naupa Jeroboam suolna chu a'n kiengsan ngai nawh. 25 A sipai hotuhai laia pakhat, Remalia naupa Peka chun ama chu a phier rûk a, Gilead mi sawmnga thuoiin Samaria-a lal in kul sûngah Pekahia chu Argob le Arie hai leh a that a, Peka chu lalin a hung um ta a. 26 Pekahia inlal laia thil tlung dang le a thilthawhai po po chu Israel lalhai inlal lai chanchin inziekna lekhabuah a chuong. 27 Juda lal Azaria inlala inthoka kum sawmnga le pahninaa chun Remalia naupa Peka chu Samaria-ah Israel lalin a hung inthung a, kum sawmhni ro a rêl a. 28 Ama chun LALPA mithmuah thil suol a thaw a, Israelhai thil suol inthawtirtu Nebat naupa Jeroboam suolna chu a'n kiengsan ngai nawh. 29 Israel lal Peka inlal lai chun Assuria lal Tiglat-Pilesar chun Ijon hai, Abel Beth Maaka hai, Janoa hai, Kedes hai le Hazor khuohai po po dâm, Gilead le Galili biel le Naftalia ram chenin a lâk vong a, a ram mihai chu Assuria ramah salin a thuoi a. 30 Juda lal Uzia naupa Jotham inlal kum sawmhninaa chun Ela naupa Hose chun Remalia naupa Peka chu a phier rûk a, a bei a, a that a, a lalna chu a hung hluo ta a. 31 Peka inlal sûnga thil tlung danghai le a thilthawhai po po chu Israel lalhai inlal lai chanchin inziekna lekhabuah a chuong. 32 Israel lal Remalia naupa Peka inlala inthoka kum hninaa chun Uzia naupa Jotham chu Juda lalah a hung inthung a. 33 A hung inlal chun kum sawmhni le panga mi a na, Jerusalemah kum sawm le kum ruk a'n lal a. A nu hming chu Jerusa a na, Zadok naunu a nih. 34 A pa Uzia ang bokin LALPA mithmuah thil tha a thaw a. 35 Amiruokchu, hmun sànga bawlhmunhai chu a la sukbo chuong naw a, Israelhaiin chu taka chun inthawina le rimtui an la'n hlân zing tho. Jotham chun LALPA Tempul lûtna korkhâr sakhnung lem chu a siem tha a. 36 Jotham inlal laia thil tlung danghai le a thilthawhai po po chu Juda lalhai inlal laia an chanchin inziekna lekhabuah a chuong. 37 Chuong lai hun chun Aram lal Rezin le Remalia naupa Peka chu Judahai bei dingin LALPAN a tir tan ta a. 38 Chun, Jotham chu a thlatuhai lai a chawl a, a pi le puhai lai Davida khawpuia chun an phùm a, a naupa Ahaz chun a lalna chu a hung hluo ta a.

2 Kings 16

1 Israel lal Remalia naupa Peka inlala inthoka kum sawm le pasarinaa chun Juda lal Jotham naupa Ahaz chu a hung inlal tan a. 2 Lal a ni hin Ahaz chu kum sawmhni mi a na, Jerusalemah kum sawm le kum ruk a'n lal a. A pu Davida angin LALPA a Pathien mithmuah thil tha a thaw ve nawh. 3 Israel lalhai lampui hraw hlak chu a hraw ve a, LALPAN Israel thlahai hmaa a hnot suok hnam danghai thil chìng tirdakum tak el chu a thaw a, a naupa ngei khom meiah a'n hlân hiel a. 4 Hmun sànga bawlhmuna dâm, muol sîpa dâm le thing buk zar lien tin hnuoia dam inthawiin rimtui a'n hlàn hlak a. 5 Chun, Aram lal Rezin le Israel lal Remalia naupa Peka chu Jerusalem bei dingin an hang fe a, Ahaz chu an inhuol a, sienkhom an hnè thei naw a. 6 Chuong hun lai chun Aram lal Rezin chun Elath khuo chu Aram ta dingin a lâk nawk a, Elath-a inthokin Judahai a hnot suok a, Edom mihai a thun lût a, tu chen hin an la hluo ta zing a nih. 7 Ahaz chun Asuria lal Tiglat-Pileser kuomah, "I siehlaw le i hnuoia lala um ka na, mi bei dinga hung Aram lal le Israel lalhai kuta inthok hin mi hung san suok rawh" tia hril dingin mi a tir a. 8 Ahaz chun Assuria lal kuoma pêk dingin LALPA Tempul le lal ina ro siekhawmnaa tangkaruo le rangkachak um taphot chu a lâk suok a, a thon bok a. 9 Asuria lal chun a ngênna chu a lo remti a, Damaska a rûn a, a lâk a, a khuoa chênghai po po chu Kir ramah salin a thuoi a, Rezin chu a that bok a. 10 Lal Ahaz chu Asuria lal Tiglat-Pileser be dingin Damaska khuoah a fe a. Damaska khuoa chun maichâm a hmu a, a lim le an siem dàn ang chie chu enton dingin thiempu Uria kuomah a thon a. 11 Damaskaa inthoka Ahaz a hung kîr hmain thiempu Uria chun maichâm chu lal Ahaz-in a ruongàm a thon ang char chun a lo siem zo hman a. 12 Damaskaa inthoka lal a hung kîr chun maichâm chu a hmu a, a va pan a, maichâma chun a kai a. 13 Maichâma chun pumraw thilhlân dâm, bu le bâl thilhlân dâm, dawn thilhlân dâm le inremna inthawina thilhlân dâm inhlànin thisen a the a. 14 LALPA hmaa dâr maichâm, LALPA tempul tuol le a maichâm siem thar inkâra um chu a lâk son a, a maichâm siem thar hmar tieng chun a sie a. 15 Lal Ahaz chun thiempu Uria kuomah, "Hi maichâm lien taka hin zîng tienga pumraw thilhlân le zân tienga bu le bâl thilhlân dâm, lal ta dinga pumraw thilhlân le bu le bâl thilhlân dâm, a ram mipui ta dinga pumraw thilhlân dâm, bu le bâl thilhlân dâm le dawn thilhlân dâm chu inhlàn la, pumraw thilhlân le inthawinaa thilhlân thisenhai po po chu maichâma chun thè rawh. Dâr maichâm ruok hi chu aiennaa ka hmang ding maichâm nîng a tih" tiin a hril a. 16 Thiempu Uria chun Lal Ahaz thupêk ang tak chun a thaw a. 17 Lal Ahaz chun dâr maichâm sîr tuok inkhumna bang chu a hawk thlâk a, maihùnhai chu a tolnaa inthok chun a lâk son vong a. Dâra siem bawngchal chunga inthut tuizèng chu a lâk thlâk a, lung rem chungah a'n thut a. 18 Tempula Sabat ni poa a chung an zâr hlak chu a lâk hmang a, Assuria lal dit dàn angin, lal ina inthoka tempula lal lûtna kot khom chu a khâr bok a. 19 Lal Ahaz inlal laia thil tlung danghai le a thilthaw danghai chu Juda lalhai inlal laia an chanchin inziekna lekhabuah a chuong. 20 Ahaz chu a thlatuhai kuomah a chawl a, anni lai chun Davida khawpuiah an phùm a, a naupa Hezekia chun a lalna chu a hung hluo ta a.

2 Kings 17

1 Juda lal Ahaz inlala inthoka kum sawm le pahninaa chun Ela naupa Hosea chu Samaria khawpuiah Israel lalin a hung inthung a, kum kuo ro a rêl a. 2 LALPA mithmuin thil tha lo tak a thaw a, amiruokchu a hmaa lalhai ang èma nasa chun a thaw ve nawh. 3 Asuria lal Salmaneser-in a hung rûn a, sie khuoah a siem a, a kuomah sie a chawi hlak a. 4 Hosea chun a phier rûk a, Aigupta lal So kuomah mi a tir a, chu thu chu Asuria lalin a lo hriet bâkah kum tina a chawi hlak sie chu a hung pêk ta bok naw leiin Hosea chu Salmaneser chun a man a, lung inah a khum a. 5 Asuria lal chun a ram pumpui chu a hung rûn a, Samaria khawpuiah a hang fe a, kum thum zet a'n huol a. 6 Hosea inlala inthoka kum kuonaa chun Asuria lal chun Samaria khawpui chu a lâk a, Israelhai chu Assuria ram tieng salin a thuoi a, Hala rama dâm, Gozan rama Habor vadung phaia hai le Medes-hai khuoa dâm a'n umtir a. 7 Hienga Israelhai an hung umna san chu Aigupta lal Faraw kut hnuoia inthoka hung thuoi suoktu LALPA an Pathien chungah thil suol thaw a, 8 pathien danghai be a, an hmaa LALPAN a hnot suok hnam danghai khawsak dàn anga khawsa a, Israel lalhai ngeiin thil tha lo an hung chìng suok lei a nih. 9 Israelhai chun LALPA an Pathien theida zawng thil tha lo arûkin an thaw a; ralvêng bûk insàng le kula inhuon khuo taphotah an ta dingin hmun sàng an siem a. 10 Tlâng sàng tin le thing buk inzâr lien taphot hnuoiah lung milem le Asera lim hai an inngìr khep khup a. 11 An hmaa LALPAN a hnot suok hnam danghai ang bokin hmun sânga bawlhmun taphotah rimtui an inhlàn a. Chuong ang thil rilo chu an thaw leiiin LALPA lungsenna an cho suok a. 12 LALPAN, "Hieng thil hi thaw ve naw ro" ti sienkhom milem an biek a. 13 LALPA chun, "In um dàn suolhai mâksanin, zawm dinga ka siehlaw zawlneihai hmanga in pi le puhai ka pêk Dânhai po po le ka thupêkhai le thu suokhai chu zawm ro" tiin Israelhai le Judahai chu zawlnei tin le thil hmutheituhai chu hmangin LALPAN a hril hlak a. 14 Chuong sa khom chun an ngaithlâk nuom naw a, LALPA an Pathien ring zo nuom loin, an pi le puhai ang bokin, lulul an insuo ve a. 15 A thupêkhai le an pi le pua inthoka a thu lo thlunghai le an kuoma thu a lo inhriettirhai chu an hnawl a. Milem hmangna bo an zui a, mi hmangna boah an insiem a. LALPAN, "Anni ang chun thaw ve naw ro" lo ti sienkhom an kawl le kienga hnam danghai thaw dàn an làk a. 16 LALPA an Pathien thupêk po po nghatsanin milem pahni, bawngte lem an sung a, Asera lem thing an siem a, vâna ni le thla le arasihai an biek a, Baal bein a rong an bawl bok a. 17 An naupahai le naunuhai chu meiah an inhlàn a. Aien le dawi an chìng a, LALPA lungsenna cho phawk dingin a mithmuah thil suol thawin an inzor a. 18 Chuleiin, LALPA chu Israelhai chungah a lung a sen ta êm êm a, a mithmu phâk loah a son hmang dai a, Juda hnam chauh naw chu a um an um ta nawh. 19 Judahai khom chun LALPA an Pathien thupêk chu an zawm naw a, Israelhai thil chìng bok chu an hung chìng ve a. 20 LALPAN Israel thlahai hrim hrim chu a hnawl a, a hrem a, a mithmu phâk loa a son bo dai hma khat chun roktuhai kutah a pêk suok ta a. 21 Davida sûngkuoa inthoka Israel a lâk hmang chun an lal dingin Nebat naupa Jeroboam chu an siem a, Jeroboam chun Israelhai chu LALPA zui lo dinga zawr hmangin, suol nasa tak a'n thawtir a. 22 LALPAN a siehlaw zawlneihai po po hmanga a lo hril lawk tah anga a mithmu phâk loa a son bo dai tawl hma khat chu Israelhai chun Jeroboam suolna chu an thlathlam ngai nawh. 23 Chuongchun, Israelhai chu an rama inthokin Asuria ramah salin an thuoi a, tu chen hin an la um a nih. 24 Asuria lal chun Babulon, Kutha, Ava, Hamat le Sefarvaim khuoa mihai chu Samaria rama Israel thlahai hmun le hma hluo sip dingin a'n cha khawm a, Samaria ram chu an hung hluo a, an khuoa hai chun umhmun an khuor a. 25 An um hlim chun LALPA an chawibiek naw leiin ama chun anni lai sakeibaknei ruol a tir a, a then an se hlum a. 26 Chuongchun, Assuria lal kuomah, "Samaria ram hluo dinga i hung son hnamhai hin hieng lai ram Pathien biek dàn hi an hriet ve naw leiin ama chun anni lai sakeibaknei ruol a tir a, hieng lai ram Pathien biek dàn hre lohai chu an se hlum tawl a nih" tiin ripawt an thon a. 27 Asuria lal chun, "Samaria-a inthoka sala inthuoihai laia thiempu pakhat kha thuoi kîr unla, nangni lai um ve sien, chu ram Pathien biek dàn chu zirtir raw se cheu" tiin thu a pêk a. 28 Chuongchun, Samaria rama inthoka an thuoi laia thiempu pakhat chu Bethel khuoah a va um a, an thaw dàn ding a zirtir a. 29 Amiruokchu, hnam tinin khaw hrang hrangah anni puol senga ding pathien an siem a, Samaria mihaiin hmun sànga biekbûk an lo bawlhaia chun an sie a. 30 Babulona mihai chun Sukot Benot lim an biek a, Kuthahaiin Nergal lim an biek a, Hamat mihai chun Asima lim an biek a. 31 Avi mihai chun Nibhaz lim le Tartak lim an biek a, Sefarvit-hai chu Sefarvaimhai pathien Andramelek le Anamalek kuomah inthawiin an nauhai meiah an inhlàn hlak a. 32 LALPA an chawibieka chu hmun sànga an bawlhmuna hai anni aia inthawina inhlântu dingin thiempu an nuom nuom an ruot hlak a. 33 LALPA an chawibieka chu an hungna rama an chìng dàn ang sengin an pathienhai rong an la bawl zing tho. 34 Tu chen hin an chîng dàn pangngai an la thlâkthleng nawh. LALPA chawibiek an ni nawh, LALPAN Jakob, 'Israel' ti hminga a ko thlahai kuoma dàn le thu a pêkhai chu an zawm si naw leiin. 35 LALPAN Israelhai kuoma thu a thlung khan, "Pathien danghai be naw unla, an hmaah kûnin, an rong bawl naw unla, an kuomah inthawina inhlàn bok naw ro. 36 Kei LALPA, thilthawtheina nasa tak leh bân phar meua Aigupta rama inthoka thuoi suoktu cheu hi a nih in biek ding chu. A hmaa chun kun unla, a kuomah inthawina inhlàn ro. 37 In ta dinga ziek a thuruot hai, rorêl hai, dàn hai le thupêk hai chu fimkhur takin zawm hlak ro. Pathien danghai chawibiek naw ro. 38 Nangni le thuthlung ka siem kha theinghil naw unla, pathien danghai chawibiek naw ro. 39 LALPA in Pathien chauh chawibiek ro; ama chu in hmèlmahai kuta inthoka sansuoktu ding cheu chu a ni si a" tiin a lo hril a. 40 Amiruokchu, iengti kong khomin a thu chu an pom nuom chuong naw a, kha hmaa an ching dàn pangngai kha an la sunzom zing tho. 41 Chuongchun, hieng mihai hin LALPA be hai sienkhom an milemhai rong an la bawl zui zing bok a. Tu chen hin an tu le tehai chen khomin an pi le puhai thaw dàn angin an la thaw zing a nih.

2 Kings 18

1 Israel lal, Ela naupa Hosea inlala inthoka kum thumnaa chun Ahaz naupa Hezekia chu Juda lalin a hung inthung a. 2 Lal a hung ni chun kum sawmhni panga mi a na, Jerusalemah kum sawmhni le kum kuo a'n lal a. A nu hming chu Abija a na, Zekaria naunu a nih. 3 A pu Davida thilthaw dàn anga thaw vein, LALPA mithmuah thil tha a thaw hlak a. 4 Hmun sànga an bawlhmunhai chu a pei hmang a, an lungphunhai chu a vuok nawi a, Asera lem thinghai chu a phûr a. Chuong lai hun chen chun Mosie dâr rul siem Nehustan an tia chun Israelhaiin rimtui an la raw hlak leiin a vuok nawi vong a. 5 Hezekia chun LALPA, Israelhai Pathienah ringna a'n nghat a. Juda lalhai lai ama ang hrim a hma khomin, a hnung khomin an um ta nawh. 6 Nghet takin LALPA a chel tlat a, a zui zing a, LALPAN Mosie kuoma thu a pêkhai chu a zawm tlat bok a. 7 LALPA chun a umpui zing a, a thilthaw tinrêngah a hlawtling a. Assuria lal lakah a hel a, a thu a awi zing nuom ta nawh. 8 Râl vêng bûk le kul nei khuo Filistinhai ram chin po po chu Gaza chenin a hne vong a. 9 Lal Hezekia inlala inthoka kum lina, Israel lal Ela naupa Hosea inlala inthoka kum sarinaa chun Asuria lal Salmaneser chun Samaria khawpui chu a hung bei a, a'n huol a. 10 Kum thum an inhuol hnungin Asuria-hai chun an làk a. Samaria an lâk kum hi Israel lal Hosea inlala inthoka kum kuona a nih. 11 Asuria lal chun Israel mihai chu salah a thuoi a, Hala rama dâm, Gozan rama Habor vadung phaia dâm le Medes-hai khuoa dâm a'n umtir a. 12 LALPA an Pathien thu zawm loa a thuthlung, a siehlaw Mosie hmanga LALPAN thu a pêk po pohai chu an bawsiet leiin hieng thil hi an chungah a hung tlung a nih. LALPA thupêkhai chu an ngaithlàk nuom naw a, an thaw nuom bok nawh. 13 Hezekia inlala inthoka kum sawm le palinaa chun Asuria lal Senakerib chun Judai rama khuo, kula inhuonhai chu a hung bei a, a lâk a. 14 Juda lal Hezekia chun Lakis khuoa Asuria lal kuomah, "Ka lo suksuol a nih. Inhnûk kîr la, ka laka i thil ngiet po po chu pêng ka ti che" tiin thu a thon a. Asuria lal chun Juda lal Hezekia chu tangkaruo kilogram sîngkhat le rangkachak kilogram sângkhat chawi dingin a tuk a. 15 Hezekia chun LALPA Tempul le lal ina ro siekhawmnaa an nei po po chu a pêk a. 16 Hi tum hin Juda lal Hezekia chun LALPA Tempul kotkhâr le kotkhâr bieng tuomna rangkachakhai chen khom a khok fai vong a, Assuria lal a pêk a nih. 17 Asuria lal chun a sipai hotu lien tak tak pathum Tartan hai, Rabsari hai le Rabsakeb hai chu sipai tam tak leh Lakis-a inthokin Jerusalema lal Hezekia bei dingin a tir a. Jerusalem an tlung chun an tui lâkna kor chuonchunga tui kul, Puonsawptuhai Hmun panna lampuia chun an chawl a. 18 Chu taka inthok chun lal chu an hang ko a, lal in enkoltu lu tak Hilkia naupa Eliakim hai, lekha ziektu Sebna hai, chanchin ziektu Asaf naupa Joa hai chu an hung suok a. 19 Rabsake chun an kuomah, "Lal Hezekia kuomah hieng hin hril ro: 'Lal ropui tak Asuria lal chun hieng hin a tih: I ringsan, i'n nghatna hi ieng am a na? 20 Indonaa dingin remruot thiem le sipai hrât tak tak kan nei dâm i ti a, sienkhom kawk boa inpawt mei mei ang a nih. A tu am ringsanin ka lakah i hel ngam hrim hrim a na? 21 Tu hin ngai rawh, luong hmol por tah, kut chu ât thi thei, innghai chun mi sukhliem thei Aigupta ang mei mei chauh hi ka'n hnèmpui dâm i ti maw! Aigupta lal Faraw inhnèmpuituhai chan chu chuong ang char chu ni vong a tih. 22 Tu hin, 'Kan ringsan chu LALPA kan Pathien a nih' i ti dàm a ni chun, Judahai le Jerusalem mihai kuoma Hezekia'n, 'Jerusalema maichâm hmaa chauh hin in biek ding a nih' a ti leia hmun sànga a bawlhmun le maichâmhai po po a dehawnpêkpa kha a ni naw maw? 23 "Chuongchun, ka pu Asuria lal kuomah hung la, indawrpui rawh: a chunga chuong ding mi i hmu indai phot chun sakor sânghnih khom pêng ka ti che. 24 Aigupta mihai tawlailir le sakor chung chuonghai i ringsan ringota chu ka pu mihai laia hotu chîn tak khom hi i dang kîr zo ding am a ni? 25 Chu bakah, LALPA thu thang loin hi hmun hi bei le hne dinga hung am ka ni? LALPA ngei chun hi ram hi hang beia sukse dingin a mi hril a nih' tiin" a ta. 26 Hilkia naupa Eliakim le Sebna le Joa chun Rabsake kuomah, "Lunginsiet takin Aramik tongin mi hrilpêk rawh, i siehlawhai hin kan hriet thei tho si a; kul chunga umhai hrieta chu Hebrai tong chun mi be ta naw hram rawh" an ta. 27 Rabsake chun, "Ka pu chun in pu kuoma le nangni kuoma chauh hieng thu hi hril dingin a mi tir am a ni? Kul chunga thunghai, nangni le anni mani êk faa mani zun la dawn dinghai kuoma khom a mi tir naw am a ni?" a ta. 28 Chuongchun, Rabsake chu a ngîr a, Hebrai tongin inring takin a khêk a, "Lal ropui tak Asuria lal thu hi lo ngàithla ro. 29 Lal chun hieng hin a tih: 'Hezekia hlèm bawlin um naw ro, ama chun ka kuta inthokin a san suok thei naw cheu. 30 Hezekia chun, 'LALPAN mi san suok ngei a ta, hi khawpui hi Asuria lal kutah pêk ni naw nih' tiin LALPA chu ring dingin thu hne naw raw se cheu. 31 Hezekia thu ngai naw ro. Asuria lal chun hieng hin a tih: Mi'n rempui unla, ka kuomah hung inpe ro. Chuongchun, mi tinin mani huona grèp le theichang fain, mani tuibêl ngeia tui chu dawn zing thei in tih. 32 Chu chu nangni ram ang boka ram hnienghnâr, bu le uoiin thar tamna ram, bei le grèp tamna ram, oliv le khuoizu tamna rama ka thuoi hma cheua in khawsak dàn ding chu a nih. Thi nêkin hring thlang lem ro. Hezekian, 'LALPAN mi san him a tih' tia a thlêm cheu khomin a thu la naw ro. 33 Tu hnam pathienin am hi ram hi Asuria lal kuta inthokin a san suok ti in hriet ta hlak a? 34 Hamat le Arpad hai pathien kha khaw lai am an um zo ta a? Sefarvaim hai, Hena hai le Ivva hai pathienhai khom kha khaw lai am an um zo ta a? Samaria chu ka kuta inthokin an san him am a ni? 35 A tu ram pathienin am hi ram hi ka kuta inthokin an san suok thei ta hlak a? LALPA chun ka kuta inthokin Jerusalem khuo hi a san suok telul ding maw?' tiin" a ta. 36 Lal Hezekiain, "Anni chu don dêr naw ro" tia thu a pêk angin mihai chun ieng khom an hril nawh. 37 Chuongchun, Hilkia naupa Eliakim, lal in enkoltu lu tak le lekha ziektu Sebna le chanchin ziektu Asaf naupa Joa hai chu Hezekia kuomah an fe a, an puonhai an pot thlêr a, Rabsake thu hrilhai chu an hril sawng a.

2 Kings 19

1 Hezekian chu chu a lo hrietin a silfênhai a pot thlêr a, saiip a'n bel a, LALPA tempulah a lût a. 2 Lal in enkoltu lu Eliakim le lekha ziektu Sebna le thiempu upahai chu saiip inbelin Amoz naupa zawlnei Isai kuomah a tir a. 3 Anni chun a kuomah, "Hezekia-in hieng hin a tih: 'Voisun hi beidongna ni, invauna ni le hmaimawkna ni a na; naute pieng a hun ta sia a hring suokna dingin a nuin tha sang ding a nei ta si naw ang hi kan nih. 4 A pu Asuria lalin Pathien hring hrilsie dinga a tir Rabsake thu hrilhai po po chu LALPA i Pathien chun hre ngei a ta, a thu hriethai lei chun ama chu LALPAN la hal ve rawi nawnim. Chuleiin, hlaa la um sunhai ta dingin tongtaipêk rawh' tiin" a ta. 5 Hezekia mi tirhai chun Isai kuom an hung tlung a. 6 Isai chun an kuomah, "In pu chu hieng ang hin hril ro: 'LALPA chun hieng hin a tih: I thu hriet, Asuria lal hnuoia thoktuhai mi hrilsietna chu ti dêr naw rawh. 7 Ngai ta, a sûnga chun thlarau sieng ka ta, thuthang a hriet charin a ram tieng kîr nawk a ta, chu taka chun kawlhnàmin inthattir ka tih, a tih' tiin" a ta. 8 Rabsake chun Asuria lalin Lakis a suoksan ti a hrietin an hnûk kîr a, Libna khuo a lo bei lai chu a va hmu a. 9 Chuong lai bok chun Aigupta lal Kushc mi Tirhaka chu ama rûn dingin a hung ti Asuria lal Senakerib chun thu a dong leiin Hezekia kuomah mi a tir a, 10 "Hieng ang hin Juda lal Hezekia kuoma chun hril ro: 'I ring Pathien chun 'Jerusalem hi Asuria lal kutah pêk ni naw nih' tiin hlêm naw raw se che. 11 Asuria lalhaiin ram po po sukse vonga an chunga kut an thlâk dàn khom i hriet chieng kha. 12 An leh, nang hi san him ni bik dinga inngai i ni? Ka pi le puhaiin Gozan hai, Haran hai, Rezef hai le Tel Assar-a um Eden mihai an sukbohmang lai khan in hnam pathienhai chun an san suok a ni? 13 Hamat lal hai, Arpad lal hai, Sefarvaim khaw lal hai, Hena lal hai le Iva lal hai kha tu hin khaw lai am an um zo ta a?' tiin" thu a'n phurtir a. 14 Chu lekha a hmu chun Hezekian a hang tiem a, LALPA Tempulah a tlân lût a, LALPA hmaah lekha chu a phar a. 15 LALPA kuoma chun, "Aw LALPA, Israelhai Pathien, cherubhai inkâra lalthungphaa inthung, nang chauh hi hi hnuoia lalram po po chunga Pathien i nih. Hnuoi le vân hi nangma siem a nih. 16 Aw LALPA, i na lo dawin mi ngàithla hram rawh; aw LALPA, i mit mengin mi hung en ta; Senakerib-in Pathien hring a hrilsietna thu hi lo ngàithla hràm rawh. 17 "A nih, aw LALPA, Senakeribin hnam le ramhai a sukram nasatzie hi thudik a nih. 18 An pathienhai chu meiah a pei a, a suksiet a, chuonghai chu pathien an ni naw hrim a, mihriem kuta siem thing le lung mei mei an nih. 19 Chuleiin aw LALPA kan Pathien, nangma chauh hi LALPA Pathien i nizie hnuoia lalram po po hin an hriet theina dingin, a kuta inthokin mi hung san suok ngei rawh" tiin a tongtai a. 20 Chun, Amoz naupa Isai chun Hezekia kuomah, "LALPA, Israel Pathien chun hieng hin a tih: 'Asuria le Senakerib chungthua i tongtaina kha ka lo hriet. 21 A chungchang thua LALPA kalna thu chu hi hi a nih:" 'Zion nunghàk thienglâm chun, Hmusitin a nuizat che, Jerusalem naunu chun, I tlân siet lai a hmuin, A lu a thin khum che a nih. 22 Tu lak am i rawl suksàng a, Vauna le hrilsietna sàk suok a, Mit i hang meng sâng vèl chu?Israel Mi Thienghlim chungah. 23 I mi tirhai chu hmangin, LALPA chu i vau khawng a, 'Ka tawlailir tam tak leh, Tlâng sângah ka hung kai a, Lebanon tlâng sìp ka chuon a, An sidar thing insâng takhai, An far thing thá thàhai le chun, Ka nuom nuomin ka phûr a, An ram ril le ngaw thatna, Lût nawna hrim ka nei nawh. 24 Ram dangah tuikhur choin, An ram tuihai ka tlàn a; Aigupta vadungte po po, Kein ka pal kangpêk vong'Tiin i hril hlak a ni kha. 25 " 'Tiena tlânga inthokaKeiman ka lo ruot ta sa, Ka ruohmang ta sa lei a, Thil hung tlung a nizie hai, Khaw kula lungremhai khom, I sukchim hnèr hnûrzie hai, I hriet fûk naw a ni maw? 26 Tha nei lo mipuihai chu, Chi-aiin an muolpho a, Phûla hlo hna ang an na, Hna zîk dawng ang an ni a, In chunga hlo a hung mawng, A'n thang lien hmaa nisa'n, A em vuoi ang hi an nih. 27 " 'I chêngna hmun ka hriet a, I fe le hung ka hriet vong, Ka chunga i lungsen khom. 28 Ka chungah lung suksen a, Tong uong i mi thaw khum chu, Ka na'n a lo hriet leiin, I hnâr le i baua chun, Ka thîr bar inbûk ka ta, I hungna lama bok chun, In kîrtir nawk ka ti che'tiin" a ta. 29 Chun, Isai chun Hezekia kuomah, "I ta ding chun hienghai hi, Inchikna ding nîng a tih:Tu kum bu tuolto ring in ta, Kum nawk ring bok in tih. Kum thumnaah bu tuin, A ra khom sîk tang in ta, Grèp huonhai siem unla, A ra suokhai chu tlàn ro. 30 Hlaa la um Juda sûngkuo chun, Hnuoi tieng zung hung kei an ta, A lêr tieng ra insuong an tih. 31 Jerusalema inthokin, Hlaa umhai hung suok an ta, Zion tlânga inthokin, A dam sunhai hung suok an tih. Iengkim LALPA thahnemngaina zàrin, Chuong ang chun hlen suok a tih. 32 "Chuleiin, Assuria lal chungthua chun LALPAN hieng ang hin a hril:'Hi khawpui hi lût naw ni a, Thal khomin kâp bok naw nih. Phaw leh hung inlang naw ni a, Inhuolna ding hlàn daw naw nih. 33 A hungna lamah kîr nawk a ta, Hi khawpui hi lût naw nih, Ti hi LALPA thu suok a nih. 34 Keima zâr le ka siehlaw Davida zârin, Hi khawpui hi huol him ka tih'tiin" a ta. 35 Chu zân chun LALPA vântirko chu a'n thok suok a, Asuria-hai riebûka chun mi nuoi khat le sîngriet le sângnga a sukhlum a. Zîng tieng an hang tho chun mithi ruong ngot an lo ni el ta a. 36 Chuongchun Asuria lal Senakerib chun an riebûk chu a suoksan a, Ninevi khuoah a um a. 37 Chun, tempula an pathien Nisrok a biek laiin a nauhai pahnih, Adramalek le Sarezer chun kawlhnàmin an hung sât hlum a, Ararat ramah an tlàn lût a, a naupa Esarhadon chun a lalna chu a hung hluo ta a.

2 Kings 20

1 Chuong hun lai chun Hezekia chu thi ngamin a na a. Chun, Amoz naupa zawlnei Isai chun a hung kan a, a kuomah, "LALPA chun hieng hin a tih: 'Dam suok loin i thi ding a na, i sûngkuo um dàn ding rel fel rawh' tiin" a ta. 2 Hezekia chu bang tieng a ngha a, LALPA kuomah, 3 "Aw LALPA, i hmaah ringum tak le inpe fai thakin kal ka chawi hlakzie le i mithmua thil tha ka thaw hlakzie kha mi hrepêk zing rawh" tiin a tongtai a, namen loin a tap a. 4 Isai chun lal chu a mâksan a, sienkhom lal tuolzawl a khèl hma chun LALPA thu a hung tlung a, 5 "Kîr nawk la, ka mihai thuoitu Hezekia kuomah hieng hin hril rawh: 'LALPA, i pu Davida Pathien chun hieng hin a tih: I tongtaina kha ka lo hriet a, i mitthli tlâk khom ka hmu a. Ngai ta, sukdam ka ti che a, ni thum niah LALPA Tempulah fe pei nawk tâng i tih. 6 Chun, i dam sùng kum khom kum sawm le kum ngain suksei ka ta, nang le hi khawpui hi Asuria lal lakah san him ka ta, keima zâr le ka siehlaw Davida zârin hi khawpui hi huol him bok ka tih, a tih' tiin" a ta. 7 Chun, Isai chun a kuomah, "Theichang hmet hnàk kha hung la ro" a ta, a khuoihlia chun a bel a, a hung dam nawk ta a. 8 Chun, Hezekia chun Isai kuomah, "LALPAN mi sukdam a ta, LALPA Tempulah ni thum niin ka hang kai nawk ta ding a nih ti inchikna iem nîng a ta?" a ta. 9 Isai chun, "LALPAN a sukdam ngei ding che a nih ti i ta dinga LALPA laka inchikna chu hi hi nîng a tih: hlim chu sirbi sawm chen intawl tung am i nuom, an naw leh sirbi sawm chen intawl kîr lem?" a ta. 10 Hezekia chun, "Sirbi sawm chen intawl tung chu thil olsam a na, sirbi sawm chen intawl kîr lem raw se" a ta. 11 Chuongchun, zawlnei Isai chun LALPA a hang ko a, LALPA chun lal Ahaz sirbi siema hlim chu sirbi sawm a'n tawl kîrtir a. 12 Chuong lai chun Babulon lal Baladan naupa Merodak Baladan chun Hezekia damnaw thu a lo hriet leiin lekhathon le thilpêk inchawitirin mi a tir a. 13 Hezekia chun anni chu a lo lawm a, a thil hlu siena po po dâm, tangka le rangkachak dâm, rimtui dâm, hriek hlu tak dâm, râlthuom a siena dâm le a ina ro um po po chu a'n entir a; a ina mi le a ram sûnga thil inentir naw hrim a nei nawh. 14 Chun, zawlnei Isai chu Hezekia kuomah a fe a, "Hienghai hin iem an hril a, khaw laia inthoka hung am an na?" tiin a'n don a. Hezekia chun, "Ram hla tak, Babulona inthoka hung an nih" a ta. 15 Zawlnei chun, "I ina hin ieng ieng am an hmu ta a?" a ta. Hezekia chun, "Ka in sûnga thil um po po hi an hmu vong ta a, ka ro laia mi inentir naw hrim hrim a um nawh" a ta. 16 Isai chun Hezekia kuomah, "LALPA thu hi lo ngàithla raw khai. 17 'Ngai ta, i in sûnga um po po le voisun chena i pi le puhai ro khawl khawmhai chu Babulon tienga an fepui ni la hung tlung a ta, ieng khom mâksan hrim nei naw ni hai' LALPAN a tih. 18 'Chun, i thlahai, nangma taksa le thisen put ngei la hung pieng dinghai laia mi ngei khom la thuoi hmang an ta, Babulon lal ina an sor mi tilrehai lai la thang vêng an tih' a tih" a ta. 19 Hezekia chun Isai kuomah, "LALPA thu i hril hi a tha" a ta. Ama bokin, "Ka dam sûng muongna le himna a um phot chun" a la ti nawk nghal a! 20 Hezekia inlal sùnga thil tlung danghai, a thilthawhai po po, khawpuia tui lâkna kor siema tui a lâk lût dânhai po po chu Juda lalhai inlal lai chanchin inziekna lekhabuah a chuong. 21 Hezekia chu a thlatuhai kuomah a chawl a, a naupa Manase chun a lalna chu a hung hluo ta a.

2 Kings 21

1 Lal a hung ni chun Manase chu kum sawm le pahni mi chauh a la ni a, Jerusalemah kum sawmnga le kum nga ro a rêl a. A nu hming chu Hefziba a nih. 2 Israelhai hmaa LALPAN hnam a hnot suokhai thil chìng tirdakum takhai chu thaw vein LALPA mithmuah thil tha lo takhai a thaw hlak a. 3 A pa Hezekia-in a thiek ta hnung hmun sànga an bawlhmunhai chu a'n din thar nawk a; Israel lal Ahab thaw dàn angin Baal ta dingin maichâm a siem a, pathiennu Asera lim thing a siem a, vâna ni le thla le arasihai a biek a, an rong a bawl a. 4 LALPAN, "Jerusalemah ka hming inumtir ka tih" a tina hmuna chun maichâm hrang hrang a siem a. 5 LALPA tempul inhuonna sùng tuol zawl pahnia chun vâna um po po ta dingin maichâm a siem a. 6 A naupa ngei chu meia inthawinaah inhlânin, dawithiem a hmang a, aisan thiemhai a ruoi a, rau ko thiem le be thiemhai a rawn hlak a. Chuong ang chun thil suol tak el thawin LALPA suklungsen dingin a cho phawk hlak a. 7 LALPAN Davida le Solomon kuoma, "Hi Tempul le Israel hnamhai hmun po po laia ka thlang suok Jerusalema hin kumkhuoin ka hming inumtir ka ta, 8 ka thupêk po po le ka siehlaw Mosie-in Dàn a pêkhai po po kha an zawm phot chun, an pi le puhai ka pêk tah rama inthok hin Israelhai ke chu inpên suoktir ta naw ning" a lo ti ta sa hmuna ngei chun Asera lim thing kerhai chu a sie a. 9 Mipuihai chun LALPA thu an zawm naw a, Manase chun a thuoi hmang tawl a, Israelhai hmaa LALPAN a hnot suok hnamhai nêk hmana nasain thil tha lo an thaw a. 10 Chun, LALPAN a siehlaw zawlneihai hmangin thu a hril a: 11 "Juda lal Manase hin hieng thil suol tirdakum tak hi a thaw a. A hmaa Amor mihai nêk hmanin thil suol a thaw nasa lem a, milem bieknaah Judahai a thuoi lût a. 12 Chuleiin, LALPA, Israelhai Pathien chun hieng hin a tih: 'Ngai ta u, a hre taphot na khawk rum rum khopin Jerusalem le Judai ram chungah sietna ka hung intlungtir ding a nih. 13 Samaria ka hremna ang le Israel lal Ahab le a sûngkuohai chunga ka thaw ang charin Jerusalem chunga khom thaw vêng ka ta, miin thlêng a hrûk faia a'n khup angin, Jerusalem chu hrût fai ka ta, inkhup ka tih. 14 Ka rochana ka la hlà sunhai khom zâmsan ka ta, an hmèlmahai kutah pe suok ka tih. 15 Aiguptaa inthoka an pi le puhai ka thuoi suoka inthokin voisun ni chen hin ka mithmuah thil suol an thaw a, ka lung suksen dinga an mi cho phawk leiin an hmèlmahai po poin rok an ta, suom an tih' tiin" a ta. 16 Chu bâkah, Manase chun thil suol tak tak thawin, Judahai chu milem a'n biektir el chauh khom ni loin, poi tawk lo mi a that rawn êm êm a, Jerusalem khaw dung le le vaiah an thisen a luong nguoi nguoi a nih. 17 Manase inlal laia thil tlung danghai, a thilthawhai le a suol thawhai chu Juda lalhai inlal lai chanchin inziekna lekhabuah a chuong. 18 Manase chu a thlatuhai kuomah a chawl a, a lal ina huon, Uza huona chun an phûm a, a naupa Amon chun a lalna chu a hung hluo ta a. 19 Lal a hung ni chun Amon chu kum sawmhni le kum hni mi a nih; Jerusalemah kum hnih a'n lal a, a nu hming chu Mesulemet a na, Jotba khuoa Haruz naunu a nih. 20 A pa Manase ang bokin LALPA mithmuah thil suol a thaw a. 21 A pa lampui hraw po po a hraw ve a, milemhai bein an rong a bawl a. 22 LALPA, a thlatuhai Pathien chu a mâksan a, LALPA lampui hrim a hraw nawh. 23 A thoktuhaiin Amon chu an phier rûk a, lal inah an that a. 24 Chu zoah mipuiin lal Amon phiertu po chu an that vong a, a naupa Josia chu ama hmunah lalah an sie a. 25 Amon inlal sûnga thil tlung danghai le a thilthawhai po po chu Juda lalhai inlal lai chanchin inziekna lekhabuah a chuong. 26 Ama thlân Uza huona chun an phûm a, a naupa Josia chun a lalna chu a hung hluo ta a.

2 Kings 22

1 Lal a hung ni chun Josia chu kum riet mi a ni a, Jerusalemah kum sawmthum le kum khat ro a rèl a. A nu hming chu Jedida a na, Bozkat khaw mi, Adaia naunu a nih. 2 LALPA mithmuah thil tha a thaw a, a pu Davida lampui po po a hraw a, voi tieng amanih chang tieng amanih a pêtsan nawh. 3 Josia inlala inthoka kum sawm le parietnaah Mesulam naupa Azalia naupa Safan, lekha ziektu chu lalin LALPA Tempula chun a tir a. 4 "Thiempu laltak Hilkia kuomah hang fe la, mihaiin LALPA Tempula tangka an hung chawi, kotkhâr vêngtuin a lo lâk khawmhai chu lo tiem fel dingin hang hril rawh. 5 Tangka chu LALPA Tempul ripêra thoktuhai inrawitu kuomah inhlàn hai sien, 6 LALPA Tempul ripêrtu karpentar hai, in bawltu mistiri hai le lung sertuhai hlaw bâkah Tempul bawlnaa hmang ding thing le lung ser sa inchawkna dingin hmang raw hai se. 7 Tangka an pêk suok chu indik taka an hmang hlak leiin an hmang dàn en zui dinga an inchik khom ngai chuong lèm naw nih" a ta. 8 Chun, thiempu laltak Hilkia chun lekha ziektu Safan kuomah, "LALPA Tempulah Dàn Bu ka hmu suok tlat el!" a ta. Dàn bu chu Safan a pêk a, a tiem a. 9 Lekha ziektu Safan chun lal kuomah, "I mihai chun Tempula tangka um po chu an lâk suok a, LALPA Tempul bawltuhai le inrawituhai kuomah an pêk tah" a ta. 10 Chun, lekha ziektu Safan bok chun, "Thiempu Hilkia-in lekhabu a mi lo pêk annawm" tiin lal chu a hril a, lal hmaa chun a hang tiem a. 11 Lalin Dàn lekhabu thuhai a hang hriet chun a lal puon a pot thlêr a. 12 Thiempu Hilkia hai, Safan naupa Ahikam hai, Mikaia naupa Akbor hai, lekha ziektu Safan le lal enkoltu Asaia hai kuoma chun thu a pêk a: 13 "Fe unla, hi lekhabu hmu suoka um sûnga thu chuong, keima le mipui le Judahai po po inchûk dinghai chu LALPA mi va rawnpêk ro. Hi lekhabu thuhai hi ei pi le puhai khan an lo zawm naw leiin ei chunga LALPA lungsenna chu a'n ling ta hle a nih; eini chungthua zieka umhai angin an lo khawsa si naw a" a ta. 14 Chuongchun, thiempu Hilkia hai, Ahikam hai, Akbor hai, Safan hai le Asaia hai chu lal silfên enkoltu Harhas naupa Tikva naupa Salum nuhmei, zawlnei Hulda, Jerusalem vèng thara um kuoma chun an fe a, an va biek a. 15 Ama chun an kuomah, "LALPA, Israel Pathien chun hieng hin a tih, 'Ka kuoma hung tirtu cheu chu hieng hin hril ro: 16 LALPAN hieng hin a tih: 'Ngai ta u, lalin a tiem lekhabua inziek dàn ang tak khan, hi hmun le a sûnga chênghai chunga hin sietna ka hung intlungtir ding a nih. 17 Mi nghatsan a, pathien danghai kuomah rimtui inhlàn a, an kut ngeia an siem milemhai chun ka lungsenna an cho suok leiin, ka lungsenna chu hi hmun laka hin chok a ta, mit el thei naw nih' tiin. 18 LALPA indon dinga hung tirtu cheu Juda lal kuoma chun hieng hin hril ro: 'I thu hriet chungchang thua LALPA, Israelhai Pathien hril chu hi hi a nih: 19 Hi hmun le a sûnga chênghai hi tongsephur le sukdara an um ding thu i lo hrietin i lungril i suknêm a, LALPA hmaah i'n ngaitlawm a, i puonhai pot thlêr a, ka hmaah i tap leiin, keikhomin i thu chu ka lo ngàithlâk a nih, LALPAN a tih. 20 Chuleiin, i thlatuhai kuomah thuoi ka ti che a, thlamuong taka vui liemin um i ta, hi hmuna sietna ka hung intlungtir dinghai po po chu i mitin hmu ve naw ti nih' tiin" a ta. Chuongchun, chu thu chu lal kuomah an hung hawn a.

2 Kings 23

1 Chuongchun, lal chun Judai ram le Jerusalema upahai po po chu a ko khawm a. 2 Judai rama mi po po, Jerusalema mi po po, thiempuhai le zawlneihai le mipui, a chîn taka inthoka a lien tak chen chu thuoiin LALPA Tempulah a fepui a, LALPA Tempula an lekhabu hmu suok thuthlung bua chuong thuhai chu an hriet ngeiah a tiem suok a. 3 Lal chu ban hrûlah a ngîr a, chu lekhabua chuong thuthlung chu namnghet nawk ding le chu thu anga lungril po po le thlarau po poa LALPA zui ding le a thupêk hai, a thu inhriettir hai le a thuruot hai chu zawm dingin LALPA hmaah thu a thlung thar a, mipui po po khomin thuthlung chu zui dingin an intiemkam a. 4 Lal chun thiempu laltak Hilkia le a dottu thiempuhai le kotkhâr vêngtuhai chu LALPA Tempul sûnga Baal hai, Asera hai le vâna thil umhai po po biekna dinga siem mi lim le bûr le bèlhai chu la suok vong dingin thu a pêk a, Jerusalem khaw kawl, Kidron phùla chun an raw hmang a, a vâphai chu Bethelah an fepui a. 5 Juda lalhaiin Judai ram khaw hrang hrang le Jerusalem le a se vel hmun sànga milem betuhai ta dinga rimtui inhlàntu dinga thiempu an ruothai po po le Baal hmaa dâm, ni le thla le arasi le vâna thil umhai po po kuoma dâm rimtui inhlàntu thiempuhai po po chu a sukbohmang vong a. 6 LALPA Tempula Asera lim thing chu Kidron vadungah a lâk thlàk a, an raw a, an rawt dip vong a, a diphai chu vântlâng thlânmuolah an the dar a. 7 Tempula nuhmeiin Asera ta dinga puon an khawngna, a nuhmei a pasala inzor ruol um khawmna inhai chu a thiekpèk bok a. 8 Judai ram Geba le Beersheba inkâr khaw hrang hranga thiempuhai po po chu a thuoi khawm a, rimtui an inhlànna hmun sànga bawlhmun po po chu a suksiet vong a. Khawpui lûtna kotsuo voi tienga khawpui optu Josua-in kotkhâr a bawl bula sakel huoi an biekna hmun sànghai po po chu a sukchim vong bok a. 9 Chuong hmun sànga thiempuhai chun Jerusalema LALPA maichâmah rong bawl ve thei naw hai sienkhom, thiempuhai lai chol thang lo bei an fâk ve hlak a nih. 10 Molek kuoma meia inthawinaa an naupa le naunu hai an inhlàn ta nawna dingin Ben Hinom ruoma an inthawina hmun Tofet chu a suksiet a. 11 Juda lalhaiin nisa kuoma inhlân ding sakor an pêkhai chu LALPA Tempul lûtnaa kotkhâr bula lal in vêngtu Nathanmelek pindana inthoka hla lo teah a son hmang a, an nisa pathien an keina tawlailirhai chu a raw bok a. 12 Chun, Ahaz insawng chung zawla Juda lalhai maichâm siemhai le Manase-in LALPA Tempul inhuonna sûng kot zawl hmun hnia maichâm a siemhai chu lal chun a sukchim a, a vuok nawi vong a, a nawihai chu Kidron vadungah a pei a. 13 Chun, Jerusalem sak tienga Sietna Muol sim tienga Sidonhai pathiennu tirdakum Astoret ta ding dâm, Moab-hai pathien tirdakum Kemos ta ding dâm, Amon-hai pathien tirdakum Molek ta ding dâma Israel lal Solomon-in hmun sàng a siemhai po po chu a sukchim a. 14 Josia chun an lungphunhai chu a vuok koi vong a, Asera lim thinghai chu a phûr thlùk a, chuong bawlhmunhai po poa chun mihriem ru a sie a. 15 Israelhai thil suol inthawtirtu Nebat naupa Jeroboamin Bethela maichâm le hmun sàng a siemhai chen chun a sukchim a, a raw a, a rawt nawi vong a, Asera lim thinghai khom chu a raw a. 16 Chun, Josia chu a hang ngha vel a, tlânga thlânhai chu a hmu a, thlâna ruhai chu a va'n lâktir a, chuong ang thu chu Pathien miin a lo hril lawk ang ngeiin, maichâma chun ruhai chu a raw a, a suksiet a. 17 Lal chun, "Saw saw tu lungphun am a na?" tin a'n don a. A khaw mihai chun, "Pathien mi, Judai rama inthoka hung, Bethela maichâm chunga i thaw tah hi a hung tlung ding thu lo hril lawktu a nih" an ta. 18 Lal chun, "Sawng son um raw se. Tu khomin a ruhai la son naw raw se" a ta. Chuongchun, a ruhai chu Samaria inthoka zawlnei hung ruhai le chun ieng khom an thaw ve nawh. 19 Bethela a thaw ang chiein Israel lalhaiin LALPA suklungsena an bawl Samaria ram khuo po poa hmun sànghai le an bawlhmun po po chu Josia chun a thiek vong a. 20 Chun, hmun sànga thiempuhai po po chu maichâm chungah a that a, mihriem ruhai chu a raw a, Jerusalem tieng a kîr nawk ta a. 21 Lal chun mi po po kuomah, "Hi thuthlung bua chuong ang hin LALPA in Pathien ta dingin Fekân Kût hmang ro" tiin thu a pèk a. 22 Israelhai chunga rorêltuhaiin ro an rèla inthok le Israel lalhai le Juda lalhai inlal sûngin chuong ang chun Fekân Kût an la hmang ropui ngai nawh. 23 Lal Josia inlala inthoka kum sawm le parietnaa chun Fekân Kût chu Jerusalemah LALPA ta dingin an nei nawk ta chauh a nih. 24 LALPA tempula thiempu Hilkia hmu suok lekhabua dàn thuin a phùt ang takin Josia chun rau ko thiem le dawi thiemhai le in tina an pathien limhai, milemhai le thil tirdakum po po chu Judai ram le Jerusalema inthokin a sukbo vong a. 25 Mosie dàn anga lungril po po, thlarau po po le hrâtna po poa LALPA rong Josia anga bawltu hi a hma khomin a hnung khomin lal an um ngai nawh. 26 Chuong sa khom chun Manase-in LALPA a lo suklungsenna po po leiin Judahai chunga a lungsenna chu a la rè chuong nawh. 27 Chuongchun, LALPAN, "Israel ka son bo ang bokin Judahai khom hi ka hmu phàk loah la son bo vêng ka tih, hi khuo, ka thlang Jerusalem ngei el, 'Chutaka chun ka hming chu um a tih' ka ti le Tempul ngei khom hi hnawl ka tih" a la ti zing a nih. 28 Josia inlal sûnga thil tlung danghai le a thilthaw po po chu Juda lalhai inlal lai chanchin inziekna lekhabuah a chuong. 29 Josia inlal lai hin Aigupta lal Faraw Neko chu Asuria lal thangpui dingin Eufretis vadung chen a hang fe a. Lal Josia chun lo bei dingin a'n thok suok a, Neko leh an inbei a, Josia chu Megido-ah a lo that a. 30 Josia siehlawhai chun a ruong chu Megido-a inthokin Jerusalem tieng tawlailirin an phur tung a, ama thlâna chun an phûm a. A ram mipuihai chun Josia naupa Jehoahaz chu an thuoi a, hriek an nàl a, a pa lalna chu a hung hluo ta a. 31 Lal a hung ni chun Jehoahaz chu kum sawmhni le kum thum mi a na, Jerusalemah thla thum a'n lal a, a nu hming chu Hamutal, Libnaa inthoka hung, Jeremia naunu a nih. 32 A puhai ang bokin LALPA mithmuah thil suol a thaw a. 33 Jerusalema inthoka a'n lal thei nawna dingin Faraw Neko chun Hamat ram Ribla-ah khaidietin a thlung a, a ram chu tangkaruo kilogram sângthum le zali le rangkachak kilogram sawmthum le pali a'n chawitir a. 34 Faraw Neko chun Josia naupa Eliakim chu a pa Josia aiin a'n laltir a, a hming chu Jehoiakim tiin a thlàkpêk a. Jehoahaz ruok chu Aigupta ramah a thuoi a, chu taka chun a thi ta a. 35 Jehoiakim chun Faraw Neko tuk zât tangkaruo le rangkachak a pêk a, chu chu a pêk theina dingin a ram mihaia inthok chun an neinung dàn zirin sie an chawitir a, tangkaruo le rangkachak an chawi zât ding a tuk a. 36 Jehoiakim an lal chun kum sawmhni le kum nga mi a na, Jerusalemah kum sawm le kum khat a'n lal a, a nu hming chu Zebida a na, Ruma khaw mi Pedaia naunu a nih. 37 Chun, a pi le puhai thaw dàn angin, LALPA mithmuah thil suol a thaw hlak a.

2 Kings 24

1 Jehoiakim inlal lai chun Nebukadnezzar, Babulon lalin a hung rûn a, Jehoiakim chu sie khuoah a siem a, sienkhom kum thum a um hnung chun a lungril a thlâk a, Nebukadnezzar laka chun a hel a. 2 LALPA chun ama do dingin Babulon hai, Aram hai, Moab hai le Amon hai chu a tir suok a. LALPA thu, a siehlaw zawlneihai a lo inpuongtir tah anga Judai ram chu sukse dingin a tir tawl a nih. 3 Manase thil suol thaw po po lei le Jerusalemah poi tawk lo mi a that teuh leiin LALPAN a ngaidam nuom naw a, 4 a hmu phâk loa anni chu son hmang dingin hieng thil hi Judahai chungah LALPA thupêkin a'n tlungtir a nih. 5 Jehoiakim inlal laia thil tlung dang le a thilthawhai chu Juda lalhai inlal laia an chanchin inziekna lekhabuah a chuong. 6 Jehoiakim chu a thlatuhai kuomah a chawl a, a naupa Jehoiachin chun a lalna chu a hung hluo ta a. 7 Babulon lalin Eufretis vadunga inthoka Aigupta ruom chen chu a ramah a siem vong leiin Aigupta lal chu a rama inthokin mi rûn dingin a'n thok suok nawk ta ngai nawh. 8 Jehoiachin a hung inlal chun kum sawm le pariet mi a na, Jerusalemah thla thum a'n lal a, a nu hming chu Nehusta a na, Jerusalem mi, Elnathan naunu a nih. 9 A pa thaw dàn ang bokin LALPA mithmuah thil suol a thaw hlak a. 10 Chuong lai chun Nebukadnezzar mihai chu Jerusalemah an hang fe a, khuo chu an inhuol a. 11 An inhuol lai chun Nebukadnezzar chu Jerusalema chun a hang fe a. 12 Juda lal Jehoiachin chu a nu hai, a mi hai, a thoktu hai, a khawnbawl hai le rongbawltu hai leh a kuoma chun an hung inpèk a. Babulon lal inlala inthoka kum rietnaa chun Jehoiachin chu a man a. 13 LALPAN a lo hril tah angin, Jerusalema LALPA Tempula rosum po po le lal ina thil hlu po po chu a lâk a, LALPA Tempula Israel lal Solomonin rangkachak bûr le bêl a siem po po chu a hawn vong a. 14 Jerusalema mi po po, mi lien po po, mi hrât le huoisen po po le kut themthiem le thil siem thiemhai po po chu mi sîngkhat zet salah a thuoi a. A rama mi rethei mong khawnhai chauh an mâksan a nih. 15 Nebukadnezzar chun Jehoiachin chu Babulon tieng a thuoi a, a nu hai, a nuhmei hai, a thoktuhai le mi challang po po chu a thuoi sa bok a. 16 Sipaia thang tlâk mi sângsari le kut themthiem le thil siem thiem mi sângkhat zet a thuoi a nih. 17 Jehoiachin pate Matania chu a aiin lalah a sie a, a hming chu Zedekia tiin a thlâkpèk a. 18 Zedekia a hung inlal chun kum sawmhni le pakhat mi a na, Jerusalemah kum sawm le kum khat a'n lal a, a nu hming chu Hamutal a na, Libna khaw mi Jeremia naunu a nih. 19 Jehoiakim thaw dàn po po chîng vein, LALPA mithmuah thil suol a thaw hlak a. 20 LALPA lungsenna leiin Jerusalem le Judahai chungah hieng po po hi a hung tlung a, a tawpah a hmu phâk loah a hnawl hmang tawl ta a. Chuongchun, Zedekia chu Babulon lal chunga chun a hel ta a.

2 Kings 25

1 Zedekia inlala inthoka kum kuona, thla sawm le ni sawma chun Babulon lal Nebukadnezzar chun a sipai po po thuoiin Jerusalem a hang bei a, umhmun an khuor a, dâi an inhuon khum vong a. 2 Zedekia inlala inthoka kum sawm le pakhatna chenin khuo chu an inhuol a. 3 Thla lina, ni kuo ni chun khuo chu an tàm ta êm êm a, fâk ding hrim hrim a um ta naw a. 4 Chuongchun, khawpui inhuonna bang chu an ver pop a, Babulon sipaihaiin khuo chu inhuol vong hai sienkhom, zâna chun sipai po po chu lal huon bul, kul bang inthuo inkâra chun an inrel suok vong a, Araba tieng panin an fe a. 5 Amiruokchu, Babulon sipaihai chun an hnot zui a, lal chu Jeriko phaiah an hnot phâk a, a sipaihai chu an tlân dar ta vong a. 6 Chuongchun, lal chu an man a Babulon lal kuomah Ribla khuoah an thuoi a, a chungchang an rêl a. 7 Zedekia mithmu ngeiah a nauhai chu an that a, ama chu a mit pahniin an khel dok a, dâr kol an inbuntir a, Babulon tieng an fepui ta a. 8 Babulon lal Nebukadnezzar inlala inthoka kum kuona, thla ngana ni sari ni chun lal vêngtu kawmandar Nebuzaradan chu Jerusalemah a lût a. 9 LALPA tempul le lal in le Jerusalema in po po chu a raw a, in poimaw po po chu raw fai lo a nei nawh. 10 Babulon sipai po po chun lal vêngtu kawmandar inrawina hnuoiah Jerusalem inhuonna kul bang chu an sukchim vong a. 11 Khawpui sûnga mi la umhai chu Nebuzaradan chun salah a thuoi vong a. 12 A rama mi rethei mong khawnhai ruok chu vêngtu pawl kawmandar chun grèp huon enkoltu ding le loa sinthawa sor dingin a mâksan a. 13 Chun, LALPA Tempula dâr ban hai le dâr tuizêng le a'n thutnahai chu Babulon mihai chun an sukkoi vong a, dâr chu Babulon tieng an hawn a. 14 Chun, bêl hai, vutluo hai, khawnvar phita chep ruolna hai, haihaw hai le dâr bûr le bèl po po, rongbawlna dinga an hmanghai chu, an lâk a. 15 Chun, mei lâkna hai, maihûn hai le tangkaruo le rangkachaka siem hrim hrim chu lal vêngtu kawmandar chun a lâk vong a. 16 Solomonin LALPA Tempula dinga a'n siemtir dâr ban pahni le dâr tuizeng le a'n thutna hai chu hang bûk ruol khom a ni nawh. 17 Ban pahni chu intiet char a na, meter rieta insang ve ve a na, a sîpa chun dâra sung a kheibawk a um ve ve a, chu dâr sung kheibawk insângzie chu meter 1 18 Vêngtu pawl kawmandar chun thiempu laltak Seraia le a dottu Zefania le kotkhâr vêngtu pathumhai chu salah a thuoi a. 19 Khawpuia la um zinghai lai chun sipai hotu hai, lal khawnbawl panga hai, lal ina lekha ziektu hai, sipai dinga mi latuhai laia hotu le a rawihai mi sawmruk chu khaw sûnga chun an man bok a. 20 Vêngtu pawl hotu Nebuzaradan chun anni chu thuoi a, Babulon lal kuomah Ribla khuoa chun a thuoi a. 21 Hamat ram, Riblaa chun lal chun a'n sukhlumtir vong a. Chuong ang chun, Judahai chu an rama inthoka hla takah sala thuoiin an lo um tah a nih. 22 Nebukadnezzar chun Judai rama an mâksanhai optu dingin Safan naupa Ahikam naupa Gedalia chu a ruot a. 23 Chuongchun, sipai pawl hotu po po le an rawihaiin Babulon lalin optuah Gedalia a sie ti an hriet chun Mizpa khuoah Gedalia kuomah an hung a, chuonghai chu Nethania naupa Ismael hai, Karea naupa Johanan hai, Netofat mi Tanhumet naupa Seraia hai, Makat naupa Jazania hai le an mihai an nih. 24 Gedalia chun chuong mihai le an rawihai kuoma chun inkhâm meuin, "Babulon sorkar mi lienhai hi ti naw ro. Hi rama hin chêng unla, Babulon lal hnuoiah um unla, in ta dingin thàng a tih" tiin a lo thlamuong tawl a. 25 Amiruokchu, thla sarinaa chun lal thlaa mi, Elisama naupa Nethania naupa Ismael chun mi sawm Mizpa-ah a thuoi a, Gedalia chu a that a, a bula um Juda mi le Babulon mi umhai chu a that vong a. 26 Chu phing leh mi po po chu a chin a lienin, sipai hotuhai leh Babulon mihai chu an ti leiin Aigupta ramah an tlàn ta vong a. 27 Babulon sala Juda lal Jehoiachin intânga inthoka kum sawmthum le pasarina, thla sawm le thla hnina, ni sawmhni le ni sari ni chun Evil Merodak chu Babulon lalah a hung um a, Jehoiachin chu tâng ina inthokin a thuoi suok a. 28 Ngilnei takin a biek a, Babulona a kuoma um lalhai nêka inzaumin a sie a. 29 Jehoiachin chun a saltângna zakuo chu a hlîp a, a dam sûng po chun lal bulah thlaithlêng a kîl ve ta a. 30 Jehoiachin dam sung po chun ni tina ama inenkolna tawk somdawlna lal chun a pêk hlak.

1 Chronicles 1

1 Adamin Seth a thla a, Seth-inEnos, Enos-in Kenan, 2 Kenanin Mahalalel, Mahalalelin Jared, 3 Jared-in Enok, Enokin Methusela, Methusela-in Lamek, Lamekin Nova a thla a, 4 Nova naupahai chu Sema, Hama le Jafet an nih. 5 Jafet naupahai chu Gomer, Magog, Madai, Javan, Tubal, Mesek le Tiras hai an nih. 6 Gomer naupahai chu Askenaz, Difat (Rifat) le Togarma an nih. 7 Javan naupahai chu Elisa, Tarsis, Kitim le Rodanim an nih. 8 Hama naupahai chu Kusa, Mizraim, Puta le Kanan an nih. 9 Kusa naupahai chu Seba, Havila, Sabta, Raama le Sabteka an nih. Raama naupahai chu Seba le Dedan an nih. 10 Kusa chu khawvela indoa hrât khawkhêng Nimrod thlatu a nih. 11 Mizraim naupahai chu Luda, Anam, Lehab, Naftu, 12 Pathrus, Filistinhai thlatu Kaslu le Kaftor an nih. 13 Kanan naupahai chu, a nau lutîr Sidon le Hit, 14 Jebu, Amor, Gisgas, 15 Hiv, Arka, Sina, 16 Arvad, Zemar le Hamat hai an nih. 17 Sema naupahai chu Elam, Asur, Arpaksad, Luda le Aram an nih. Aram naupahai chu Uza, Hula, Gether le Mesek an nih. 18 Arpaksad chun Sela a hring a, Sela chun Eber a hring a. 19 Eber naupa pahnihai laia pakhat chu a dam laia mihriemhai an in the dar leiin a hmingah Peleg an sak a, a sang hming chu Joktan a nih. 20 Joktan naupahai chu Almodad, Selep, Hazarmavet, Jera, 21 Hadoram, Uzal, Dikla, 22 Obal, Abimael, Seba, 23 Ofir, Havila le Jobab an nih. Chuonghai po chu Joktan naupahai vong an nih. 24 Semaa inthoka Abram (Abraham) chena an inthla sawng dàn chu: Sema, Arpaksad, Sela, 25 Eber, Peleg, Reu, 26 Serug, Nahor, Tera le 27 Abram (Abraham) an nih. 28 Abraham naupahai chu Isak le Ismael an nih. 29 Ismael naupahai, hnam sawmpahni thlatuhai chu a nau lutîr Nabaiot le Kedar, Abdeel, Mibsam, 30 Mishma, Duma, Masa, Hadah, Tema, 31 Jetur, Nafis le Kedema an nih. 32 Abraham hmei Ketura naupahai chu Zimran, Joksan, Medan, Midian, Isbak le Sua an nih. Joksan nau pasalhai chu Seba le Dedan an nih. 33 Midian naupahai chu Efa, Efer, Hanok, Abida le Elda a nih. Chuonghai po chu Ketura thlahai chu an nih. 34 Abraham chu Isak pa a na, Isak naupahai chu Esau le Jakob an nih. 35 Esau naupahai chu Elifaz, Reuel, Jeush, Jalam le Kora an nih. 36 Elifaz naupahai chu Teman, Omar, Zefi, Gatam le Kenaz an na; a nuhmei Timnaa inthokin Amalek a nih. 37 Reuel naupahai chu Nahat, Zera, Sama le Miza an nih. 38 Seir naupahai chu Lotan, Sobal, Zibeon, Ana, Dison, Ezer le Disan an nih. 39 Lotan naupahai chu Hori le Homam an nih. Timna chu Lotan farnu a nih. 40 Sobal naupahai chu Alvan, Manahat, Ebal, Sefi le Onam an nih. Zibeon naupahai chu Aia le Ana an nih. 41 Ana naupa chu Dison a nih. Dison naupahai chu Hemdan, Esban, Ithran le Keran an nih. 42 Ezer naupahai chu Bilhan, Zavan le Akan an nih. Disan naupahai chu Uza le Aran an nih. 43 Israela thlahai an inlal hmaa Edom rama lalhai chu hienghai hi an nih: Beor naupa Bela a na, a khawpui hming chu Dinhaba a nih. 44 Bela a thi chun Bozraa inthoka hung Zera naupa Jobab chun a lalna chu a hung hluo a. 45 Jobab a thi chun Temanhai rama inthoka hung Husam chun a lalna chu a hung hluo a. 46 Husam a thi chun Bedad naupa Hadad, Moab rama Midianhai hnetu chun a hung thlàk a, a khawpui hming chu Avit a nih. 47 Hadad a thi chun Masreka mi Samla chun a hung thlàk a. 48 Samla a thi chun tuipui kama Rehobot khaw mi Saul chun a hung thlàk a. 49 Saul a thi chun Akbor naupa Baal-Hanan chun a lalna chu a hung hluo a. 50 Baal-Hanan a thi chun Hadad-in a hung thlàk a, a khawpui hming chu Pau (Pai) a na, a nuhmei hming chu Me-Zahab naunu Matred naunu Mehetabel a nih. 51 Chun, Hadad khom chu a thi a. Edom rama hnam lukhàituhai chu Timna, Alva, Jethet, 52 Oholibama, Ela, Pinon, 53 Kenaz, Teman, Mibzar, 54 Magdiel le Iram hai an nih.

1 Chronicles 2

1 Hienghai hi Israel naupahai chu an nih: Reuben, Simeon, Levi, Juda, Isakar, Zebulun, 2 Dan, Josefa, Benjamin, Naftalia, Gad le Aser. 3 Juda chun naupa panga a nei a. A nuhmei Batsua, Kanan mia inthokin pathum Er, Onan le Sela an nih. A upa tak Er chu LALPA mithmuah a suol êm leiin a sukhlum a. 4 A monu Tamar-in Juda lakah nau inphir, Perez le le Zera a neipèk a. 5 Perez naupahai chu Hezron le Hamul an nih. 6 Zera naupahai chu Zimri, Etan, Heman, Kalkol le Darda (Dara), an rêngin panga an nih. 7 Karmi naupa chu Akar (Akan), lâk thieng loa khap thil hluihlawn a lâk leia Israelhai sukbuoitu kha a nih. 8 Ethan naupa chu Azaria a nih. 9 Hezron naupahai chu Jerameel, Rama le Kaleb (Kelubai) an nih. 10 Rama inthoka Jesai chena an inthla sawng dàn chu: Rama'n Aminadab a hring a, Aminadab-in Juda thlahai laia thuoitu langsar Nason a hring a, 11 Nason-in Salmon (Salma), Salmon-in Boaza a hring a, 12 Boaza-in Obed, Obed-in Jesai a hring. 13 Jesai naupahai laia a nau lutîr chu Eliab a na, a pahnina Abinadab, a pathumna Simea, 14 a palina Nethanel, a pangana Radai, 15 a parukna Ozem le a pasarina Davida a nih. 16 A naunuhai chu Zeruia le Abigail an nih. Zeruia chun naupa pathum Abisai, Joab le Asahel a hring a. 17 Abigail chun Amasa a hring a, Amasa pa chu Ismael mi Jether a nih. 18 Hezron naupa Kaleb chun nuhmei pahnih, Azuba le Jeriot a nei a, Azuba naupahai chu Jeser, Sobab le Ardon an nih. 19 Azuba a thi chun Kaleb-in nuhmeiin Efratha a nei a, ama chun Hura a hringpèk a. 20 Hura chun Uri a hring a, Uri chu Bezalel pa a nih. 21 Chu hnunga chun Gilead pa Makir naunu chu Hezron-in kum sawmruk a ni hnungin a pawl a, nuhmeiah a nei a, Segub a hringpèk a. 22 Segub chu Gilead rama khuo sawmhni le khaw thum neitu Jair pa a nih. 23 (Nisienlakhom, Gesur le Aram haiin Jair-a khuo Havot Jair le Kenat le a se vel khuo sawmruk chu an lâkpêk a. ) Chuonghai po po chu Gilead pa Makir thlahai chu an nih. 24 Kaleb-Efratha khuoa Hezron a thi hnungin a nuhmei Abija chun Asur a hringpèk a, ama chu Tekoa pa a nih. 25 Hezron nau lutir Jerameel naupahai chu: a nau lutîr Rama bâkah Buna, Oren, Ozem le Ahija an nih. 26 Jerameel chun nuhmei dang a hming Atara a nei a, ama chu Onam nu a nih. 27 Jerameel nau lutîr Rama naupahai chu Maaz, Jamin le Eker an nih. 28 Onam naupahai chu Samai le Jada an nih. Samai naupahai chu Nadab le Abisur an nih. 29 Abisur nuhmei hming chu Abihail a na, ama chun Aban le Molid a hringpèk a. 30 Nadab naupahai chu Seled le Apaim an na, Seled chu suonmongin a thi a. 31 Apaim naupa Isi chu Sesan pa a na, Sesan chu Ahlai pa a nih. 32 Samai unaupa Jada naupahai chu Jether le Jonathan an na, Jether chu suonmongin a thi a. 33 Jonathan naupahai chu Pelet le Zaza an nih. Chuonghai chu Jerameel thlahai chu an nih. 34 Sesan chun naunu chauh a nei a. Aigupta mi siehlaw, a hming Jarha a nei a. 35 Sesan chun a naunu chu Jarha a'n neitir a, naupa Atai a hringpèk a. 36 Atai chu Nathan pa a na, Nathan chu Zabad pa a na, 37 Zabad chu Eflal pa a na, Eflal chu Obed pa a nih. 38 Obed chu Jehu pa a na, Jehu chu Azaria pa a nih. 39 Azaria chu Helez pa a na, Helez chu Eleasa pa a nih. 40 Eleasa chu Sismai pa a na, Sismai chu Salum pa a nih. 41 Salum chu Jekamia pa a na, Jekamia chu Elisama pa a nih. 42 Jerameel unaupa Kaleb naupahai chu: A nau lutîr Mesa chun Zip a hring a, Zip chun Maresa a hring a, Maresa chun Hebron a hring a. 43 Hebron naupahai chu Kora, Tapua, Rekem le Sema an nih. 44 Sema chu Raham pa a na, Raham chu Jorkeam pa a nih. Rekem chu Samai pa a nih. 45 Samai naupa chu Moan a na, ama chu Beth Zur pa a nih. 46 Kaleb hmei Efa chun Haran, Moza le Gazez a hringpèk a. Haran naupa hming khom Gazez bok a nih. 47 Jadai naupahai chu Regem, Jotham, Gesan, Pelet, Efa leh Saaf an nih. 48 Kaleb hmei dang Maaka chun naupa Seber le Tirhana a hringpèk a. 49 Ama chun Saaf khom a hring bok a. A hnungah nau pahnih, Madmana khuo indintu Saaf le Makbena le Gilbea khuo indintu Seva hai chu a hringpèk bok a. Kaleb naunu chu Aksa a nih. 50 Chuonghai chu Kaleb thlahai chu an nih. Efratha nau lutîr Hura thlahai chu: Kiriat Jearim pa Sobal, 51 Bethlehem pa Salma le Beth Gader pa Haref an nih. 52 Kiriat Jearim-hai thlatu Sobal chun Haroe-hai, Manahat hnam zàtve a thla a. 53 Kirait Jearim hnamhai chu Ithri hai, Put hai, Sumat hai, Misra hai an nih. Hienghaia inthok hin Zorat-hai le Estaol-hai an hung suok a nih. 54 Salma thlahai chu Bethlehem hai, Netofat hai, Atrot Beth Joab hai, Manahat hai zàtve le Zor mi hai, 55 lekha ziektu Sofer hnam, Jabez-a um Tirat hai, Simeat hai, Sukat hai an nih. Chuonghai chu Rekab thlahai laia mi Hamat thla Ken mihai chu an nih.

1 Chronicles 3

1 Hienghai hi Davida naupahai, 2 pathumna chu Geshur lal Talmai naunu Maaka laka mi Absalom a na; palina chu Hagit laka mi Adonija a na; 3 pangana chu Abital laka mi Sefatia a na; parukna chu a nuhmei Egla laka mi Ithream a nih. 4 Hieng parukhai hi kum sari le thla ruk Hebron khuoa Davida inlal laia pienghai chu an nih. Kum sawmthum le kum thum Jerusalema Davida a'n lal sûnga a naupa pienghai chu Samua (Simea), Sobab, Nathan le Solomon an nih. 5 Hieng palihai hi Amiel naunu Bathsheba laka pienghai chu an nih. 6 Hienghai bâka hin naupa pakuo Ibar, Elisua, Elifelet, 7 Noga, Nefeg, Jafia, 8 Elisama, Eliada le Elifelet hai a nei bok. 9 Chuonghai chu a hmei nauhai tiem sa loa Davida naupahai chu an nih. An farnu chu Tamar a nih. 10 Solomon naupa chu Rehoboam a na, chu naupa chu Abija a na, chu naupa chu Asa a na, chu naupa chu Jehosafat a na, 11 chu naupa chu Jehoram (Joram) a na, chu naupa chu Ahazia a na, chu naupa chu Joash a na, 12 chu naupa chu Amazia a na, chu naupa chu Azaria a na, chu naupa chu Jotham a na, 13 chu naupa chu Ahaz a na, chu naupa chu Hezekia a na, chu naupa chu Manase a na, 14 chu naupa chu Amon a na, chu naupa chu Josia a nih. 15 Josia naupahai chu a upa tak Johanan, a dottu Jehoiakim, a pathumna Zedekia le a palina Salum an nih. 16 Jehoiakim naupahai chu Jehoiachin (Jekonia) le Zedekia an nih. 17 Babulon sala intâng Jehoiachin (Jekonia) naupahai pasari chu Seatiel, 18 Malkiram, Pedaia, Senazar, Jekamia, Hosama le Nedabia an nih. 19 Pedaia naupahai chu Zerubabel le Simei an nih. Zerubabel naupahai chu Mesulam le Hanania an na, an farnu chu Selomit a nih. 20 A naupa dang pangahai chu Hasuba, Ohel, Berekia, Hasadia le Jusab-Hesed an nih. 21 Hanania naupahai chu Pelatia le Jesaia an nih. Jesaia chu Refaia pa a na, ama chu Arnan pa a na, ama chu Obadia pa a na, ama chu Sekania pa a nih. 22 Sekania naupa Semaia naupahai chu Hatus, Igal, Baria, Nearia le Safat an nih. 23 Nearia naupahai chu Elioenai, Hizkia le Azrikam an nih. 24 Elioenei naupahai chu Hodavia, Eliasib, Pelaia, Akub, Johanan, Delaia le Anani an nih.

1 Chronicles 4

1 Juda naupahai chu Perez, Hezron, Karmi, Hura le Sobal hai an nih. 2 Sobal naupa Reaia chu Jahat pa a na, ama chu Ahumai le Lahad pa a nih. Anni hi Zorat hnam an nih. 3 Efrata nau hmasa chu Hura a na, ama chu Bethlehem indintu a nih. Hura chun naupa pathum Etam, Penuel le Ezer a nei a. Etam chun naupa pathum Jezreel, Isma le Idbas a nei a, an farnu hming chu Hazelelponi a nih. 4 Penuel chu Gedor khuo indintu a na, Ezer chu Husa khuo indintu a nih. 5 Tekoa pa Asur chun nuhmei pahnih, Hela le Nara a nei a. 6 Nara chun Ahuzam, Hefer, Temeni le Hahastari hai a hringpèk a. 7 Hela chun Zeret, Zohar, Etnan 8 le Koz a hringpèk. Koz chu Anub le Hazobeba pa le Harum naupa Aharhel hai thlatu a nih. 9 Jabez chu a unauhai laia inza phur tak a nih. A nu chun, "Rimsi taka ka hring a nih" a ta, a hmingah Jabez a sak a. 10 Jabez chun, "Aw, nangin mal mi sawmin ka ram mi zaupêk la ka va hang ti ngei! Mi sukna thei suol laka ka him theina dingin, ka chungah i kut innghatin mi vêng him rawh" tiin Israelhai Pathien chu a ko a. Pathienin a hnina chu a'n hlawtlingtir a. 11 Suha unaupa Kelub chu Mehir pa a na, ama chu Eston pa a nih. 12 Eston chu Beth Rafa, Pasea le Tehina pa a nih. Tehina chu Ir Nahas pa a nih. Anni hi Rekaa chêng an nih. 13 Kenaz naupahai chu Otniel le Seraia an nih. Otniel naupahai chu Hathat le Meonothai an na, 14 Meonothai chu Ofra pa a nih. Seraia chu Gerahasim-hai thlatu Joab pa a nih. Gerahasimhai chu kut themthiem mi an nih. 15 Jefune naupa Kaleb naupahai chu Iru, Ela le Naam an nih. Ela naupa chu Kenaz a nih. 16 Jehalelel naupahai chu Zip, Zifa, Tiria le Asarel an nih. 17 Ezra naupahai chu Jether, Mered, Efer le Jalon an nih. Mered nuhmeihai laia pakhat chun Miriam, Samai le Isba hai a hring a, Isba chu Estemoa thlatu a nih. 18 Mered nuhmei Juda mi chun Gedor pa Jered hai, Soko pa Heber hai le Zanoa pa Jekuthiel hai a hring a. Mered nuhmei, Aigupta mi a hming Bithia a na, Aigupta lal sûngkuoa mi a nih. 19 Chun, Hodia chun Naham farnu nuhmeiah a nei a, a naupahai chu Garm-hai thlatu Keila le Makathai thlatu Estemoa hai an nih. 20 Simon naupahai chu Amnon, Rina, Ben-Hanan le Tilon an nih. Isi thlahai chu Zohet le Ben Zohet an nih. 21 Juda naupa Sela naupahai chu Leka pa Er dâm, Maresa pa Lada dâm, Bet Asbea puon zâi inhmi khawngtu pawlhai dâm, 22 Kozeba khuoa chênghai thlatu Jokim dâm, Moab le Jasubi Lehem chunga rorêltu Joash le Saraf hai chu an nih. (Hieng chanchinhai hi tiena tlânga mi a nih). 23 Chuonghai chu bêl hemtu, lalin a sin thawtu dinga Nataim le Geder khuoa a'n umtir an nih. 24 Simeon naupahai chu Nemuel, Jamin, Jarib, Zera le Saul hai an nih. 25 Saul naupa chu Salum a na, Salum naupa chu Mibsam a na, Mibsam naupa chu Misma a nih. 26 Misma naupa chu Hamuel a na, Hamuel naupa chu Zakur a na, Zakur naupa chu Simei a nih. 27 Simei chun naupa sawm le paruk a nei a, naunu paruk a nei bok a, a unauhai ruok chun nau an hau ve naw a, Juda thlahai angin an thlahai khom an pung ve nawh. 28 Anni chu Beersheba, Molada, Hazar Sual, 29 Bilha, Ezem, Tolad, 30 Bethuel, Horma, Ziklag, 31 Bet Markabot, Hazar Susim, Bet Biri le Saraim khuoa hai an khawsa a, Davida inlal hun chenin chuong khuohai chu anni puola khuo an hluohai chu an nih. 32 An khaw se vela khuo panga Etam, Ain, Rimon, Token, Asan le 33 an kawl vela khawtehai chu Balat chenin an inzar a. Chuonghai chu an inbèngbelna hmun a na, an thlatuhai indota suina lekha khom an kol a. 34 Chuonghai chu Mesobad hai, Jamlek hai, Amazia naupa Josa hai, 35 Joel hai, Josibia naupa Jehu hai (Jehu pa chu Asiel naupa Seraia a nih), 36 Elioenai hai, Jakoba hai, Jesohaia hai, Asaia hai, Adiel hai, Jesimiel hai, Benaia hai, 37 le Sifi naupa Ziza hai an nih. Sifa pa chu Alon, chu pa chu Jedaia, chu pa chu Simri, chu pa chu Semaia a nih. 38 Hieng an hming inchuona umhai hi pahnam tina lukhàituhai an na, an sûngkuo chu nasa takin an hung pung a. 39 Chuongchun, Gedor (Gerar) kotsuo, ruom sak tieng pang chenin an ran ruolhai tlatna ding zongin an fe suok a. 40 Ran tlatna hmun tha, ram zau tak, muongum tak le re dup el chu an hmu a. Chu hmuna chun a hmain Hama thlahai an lo um hlak a. 41 Amiruokchu Juda lal Hezekia inlal laiin Simeon thlahaiin an hung rûn a, Hama thlahai le Meuna thlahai chu an bei a, an hlu suok vong a, an hmun chu an hluo songpèk a. 42 Chun, Isi naupahai Pelatia, Neraria, Refaia le Uziel hai inrawina hnuoiah Simeon thla mi zanga ruolin Seir tlângram an rûn a. 43 Amalek mi a tlân hmang naw po chu an that vong a, tu chen hin an hluo ta zing a nih.

1 Chronicles 5

1 Israel nau lutir Reuben chu nau lutîr ni sienkhom a pa nuhmei zalpuia a khum a surporchea inthokin a nau lutîr nina chu Josefa nauhai kuomah pêk a ni tak leiin thlatuhai chanchin upat dàn indota suinaah a piengvo anga sie a ni ta nawh. 2 Juda thlahai hin an unauhai khûm hai sienkhom nau lutîr nina chu Josefa chan a nih. 3 Israel nau lutîr Reuben naupahai chu Hanok, Palu, Hezron le Karmi hai an nih. 4 Joel thlahai chu, a naupa Semaia, chu naupa Gog, chu naupa Simei, 5 chu naupa Mika, chu naupa Reaia, chu naupa Baal, 6 chu naupa Beera, Asuria lal Tiglat Pileser-in sala a thuoi chu a nih. Bera chu Reuben hnama an thuoitu a nih. 7 An thlatuhai hnam sui dâna Reuben hnama sûngkuo tin lukhàituhai chu lal Zeiel, Zekaria, 8 Azaz naupa Bela, chu naupa Sema, chu naupa Joel hai an nih. Anni chu Aroera inthoka Nebo le Baal Meon hmun chen an inzar a. 9 Gilead-a chun an ranhai an hung pung nasat leiin sak tieng chu Eufretis vadunga inthoka thlalèr lûtna chen an hang inzar phei a. 10 Saula inlal laiin Hagar-hai leh an indo a, an hne a, Gilead sak tienga an chêngna biel po po chu an hluopêk tah a nih. 11 Gad hnamhai chu anni ep Basan ramah Saleka chenin an um a. 12 An thuoitu lu tak chu Joel a na, a dottu chu Safam a na, a danghai chu Basana mi Janai le Safat an nih. 13 An laibunghai chu an sûngkuo luhai peia tiemin Mikael, Mesulam, Seba, Jorai, Jakan, Zia le Eber, an rêngin pasari an nih. 14 Hienghai hi Huri naupa Abihail naupahai an nih: ama chu Jaroa naupa a na, ama chu Gilead naupa a na, ama chu Mikael naupa a na, ama chu Jesisahi naupa a na, ama chu Jahdo naupa a na, ama chu Buza naupa a nih. 15 Ahi chu Abdiel naupa a na, ama chu Guni naupa a na, an sûngkuoa lukhàitu tak a nih. 16 Gad hnamhai chu Gilead-a dâm, Basan le a se vel khuoa hai le Saron phaia ran tlatna hmun tha chenin an inzar a. 17 Hieng chanchinhai po po hi Juda lal Jotham le Israel lal Jeroboam inlal laia thlatuhai chanchin suinaah ziek a nih. 18 Reuben hnam, Gad hnam le Manase hnam zâtve laia mi huoisen thlang khawm, phaw le kawlhnàm hmang thiem le thal kâp thiem sipai an nei zât chu mi sîngli le sângli le zasari le sawmruk an nih. 19 Hagar mihai, Jetur mihai, Nefis mihai le Nodab mihai leh an indo a. 20 Indonaa chun thangpuiin an um a, indo lai chun thangpuitu dinga Pathien an ko leiin ama chun Hagar mihai le an inkoppuihai po po chu an kutah a pêk a. Ama an ring leiin an tongtaina chu a don a nih. 21 Hagar mihai ran an manpêk zât chu sânghawngsei sîngnga, beram nuoi hni le sîngnga, sabengtung sânghni a na, mihriem nuoi khat an man sa bok a. 22 Chu indonaa chun Pathienin a thangpui leiin an hmèlmahai chu tam tak an that a nih. Sala thuoi an ni chenin chu ram chu an hluo ta zing a. 23 Manase thla hnam zâtvehai chu tam tak an ni ta a, Basana inthoka Baal Hermon le Senir (Hermon tlâng) chenin an um dar pei a. 24 Hienghai hi an sûngkuo lukhàituhai chu an nih: Efer, Isi, Eliel, Azriel, Jeremia, Hodavia le Jahdiel. Chuonghai chu mi huoisen le hrât khawkhêng, mi hmingthang, pahnam tina thuoitu luhai chu an nih. 25 Amiruokchu an pi le puhai chu Pathien lakah an ringum naw a, an hmaa Pathienin a sukbohmang hnamhai umna rama an pathienhai chu bein an inzor a. 26 Chuongchun, Israelhai Pathien chun Asuria lal Pul (Tiglath-Pileser) lungril chu a chok tho a, Reuben thlahai, Gad thlahai le Manase thla hnam zâtve hai chu salah a man a, Hala, Habor, Hara le Gozan vadung ruoma chun a'n umtir a, tu chen hin an la um ta zing a nih.

1 Chronicles 6

1 Levi naupahai chu Gerson, Kohat le Merari an nih. 2 Kohat naupahai chu Amran, Izar, Hebron le Uziel an nih. 3 Amran nauhai chu Aron, Mosie le Miriam an nih. Aron naupahai chu Nadab, Abihu, Eleazar le Ithamar an nih. 4 Eleazar chu Finehas pa a na, Finehas chu Abisua pa a nih. 5 Abisua chu Buki pa a na, Buki chu Uzi pa a nih. 6 Uzi chu Zerahia pa a na, Zerahia chu Meraiot pa a nih. 7 Meraiot chu Amaria pa a na, Amaria chu Ahitub pa a nih. 8 Ahitub chu Zadok pa a na, Zadok chu Ahimaz pa a nih. 9 Ahimaz chu Azaria pa a na, Azaria chu Johanan pa a nih. 10 Johanan chu Jerusalema Solomon tempul bawla thiempu sinthaw Azaria pa a nih. 11 Azaria chu Amaria pa a na, Amaria chu Ahitub pa a nih. 12 Ahitub chu Zadok pa a na, Zadok chu Salum pa a nih. 13 Salum chu Hilkia pa a na , Hilkia chu Azaria pa a nih. 14 Azaria chu Seraia pa a na, Seraia chu Jehozadak pa a nih. 15 Jehozadak chu LALPAN Nebukadnezzar kutaa Judai ram le Jerusalem khuoa mihai a pêk lai khan salah an thuoi ve a. 16 Hienghai hi Levi naupahai chu Gerson, Kohat le Merari an nih. 17 Gerson naupahai chu Libni le Simei an nih. 18 Kohat naupahai chu Amram, Izar, Hebron le Uziel an nih. 19 Merari naupahai chu Mahli le Mushi an nih. Chuonghai chu an pahaia inthoka an sui dàn anga Levi hnamhai chu an nih. 20 Gerson thlahai chu: Gerson naupa chu Libni, chu naupa chu Jehat, chu naupa chu Zima, 21 chu naupa chu Joah, chu naupa chu Ido, chu naupa chu Zera, chu naupa chu Jeatheral a nih. 22 Kohat thlahai chu: Kohat naupa chu Aminnadab, chu naupa chu Kora, chu naupa chu Asir, 23 chu naupa chu Elkana, chu naupa chu Ebiasaf, chu naupa chu Asir, 24 chu naupa chu Tahat, chu naupa chu Uriel, chu naupa chu Uzia, chu naupa chu Saul a nih. 25 Elkana thlahai chu: Amasai le Ahimot an nih. 26 Ahimot naupa Elkana a na, chu naupa chu Zofai, chu naupa chu Nahat, 27 chu naupa chu Eliab, chu naupa chu Jeroham, chu naupa chu Elkana, chu naupa chu Samuel a nih. 28 Samuel naupahai chu a nau lutîr Joel le a dottu Abija an nih. 29 Merari naupa chu Mahli a na, chu naupa chu Libni, chu naupa chu Simei, chu naupa chu Uza, 30 chu naupa chu Simea, chu naupa chu Hagia, chu naupa chu Asaia a nih. 31 Hienghai hi LALPA ina Thuthlung Bawm an sie hnunga rimawi remtu dinga Davidan a ruothai chu an nih. 32 Solomonin Jerusalema LALPA tempul a bawl hma po chun anni hin biekbûka Intuokna Puon in hmaah rimawi an rem hlak. Anni rongbawl dàn dinga ruota um angin rong an bawl hlak. 33 Hienghai hi an nauhai le chu taka rongbawltuhai chu an nih: Zâipawl pakhat thuoitu lu tak chu Heman a nih. Ama chu Joel naupa a na, ama chu Samuel naupa, 34 ama chu Elkana naupa, ama chu Jeroham naupa, ama chu Eliel naupa, ama chu Toa naupa, 35 ama chu Zup naupa, ama chu Elkana naupa, ama chu Mahat naupa, ama chu Amasai naupa, 36 ama chu Elkana naupa, ama chu Joel naupa, ama chu Azaria naupa, ama chu Zefania naupa, 37 ama chu Tahat naupa, ama chu Asir naupa, ama chu Ebiasaf naupa, ama chu Kora naupa, 38 ama chu Izar naupa, ama chu Kohat naupa, ama chu Levi naupa, ama chu Israel naupa a nih. 39 Heman chang tienga thang zâipawl thuoitu dang chu Asaf a na, ama chu Berekia naupa a na, ama chu Simea naupa, 40 ama chu Mikael naupa, ama chu Baaseia (Maaseia) naupa a na, ama chu Makija naupa a na, 41 ama chu Etni naupa a na, ama chu Zera naupa a na, ama chu Adaia naupa a na, 42 ama chu Ethan naupa a na, ama chu Zima naupa a na, ama chu Simei naupa a na, 43 ama chu Jahat naupa a na, ama chu Gerson naupa a na, ama chu Levi naupa a nih. 44 Heman voi tienga thang zâipawl thuoitu chu Merari hnama mi Ethan a nih. Ethan chu Kishi naupa a na, ama chu Abdi naupa a na, ama chu Maluk naupa a na, 45 ama chu Hasabia naupa a na, ama chu Amazia naupa a na, ama chu Hilkia naupa a na, 46 ama chu Amzi naupa a na, ama chu Bani naupa a na, ama chu Semer naupa a na, 47 ama chu Mahli naupa a na, ama chu Musi naupa a na, ama chu Merari naupa a na, ama chu Levi naupa a nih. 48 An unau dang Levi hnama mihai chu Pathien biekna hmuna sin dang po po thaw dinga dànde an nih. 49 Aron le a thlahai ruok chun Pathien siehlaw Mosien thu a lo pêk tah angin, Hmun Thienghlim taka rongbawlna sin po po chu an chang a, maichâmah pumraw thilhlân le inthawina rimtui inhlànin Israelhai ta dingin inremna an siem hlak. 50 Hienghai hi Aron thlahai chu an nih: Aron naupa chu Eleazar a na, chu naupa chu Finehas a na, chu naupa chu Abisua a na, 51 chu naupa chu Buki a na, chu naupa chu Uzi a na, chu naupa chu Zerahia a na, 52 chu naupa chu Meraiot a na, chu naupa chu Amaria a na, chu naupa chu Ahitub a na, 53 chu naupa chu Zadok a na, chu naupa chu Ahimaz a nih. 54 Hienghai hi Levi chihaiin hmun an khuorna dinga a ram sûnga hmun an ruotpèk dàn chu a nih: Aron naupa Kohat hnama mihai chu thumvawra thlang hmasatu ding an ennaah a hmasa tak an ni angin, 55 Judai rama Hebron le a dai vela ran tlatna hmunhai chu an pêk a. 56 A khaw huop china lohai le khawper po po ruok chu Jefune naupa Kaleb an pêk a. 57 Chuongchun, Aron thlahai chana an pêkhai chu: Hebron (inhumhimna khuo), Libna, Jatir, Estemoa, 58 Hilen, Debir, 59 Asan, Juta le Bet Semes le an se vela ran tlatna hmunhai chu a nih. 60 Benjamin hnamhai chana inthokin Gibeon, Geba, Alemet le Anathot khuohai le a dâi vela ran tlatna hmunhai chu an pêk bok a. Kohat hnam kuoma an pêk po chu khaw sawm le khaw thum a nih. 61 Hieng bâka hin Kohat thlahai chu Manase hnam zâtve chanpuola inthokin khaw sawm an pêk bok. 62 Gerson thlahai chu a chi hnam hnamin Isakar hnam chanpuol, Aser hnam chanpuol, Naftalia hnam chanpuol le Basan rama Manase hnam zâtve chanpuola inthokin khuo sawm le pathum an pêk a. 63 Merari thlahai chu a chi hnam hnamin Reuben hnam chanpuol, Gad hnam chanpuol le Zebulun hnam chanpuola inthokin khuo sawm le pahnih an pêk a. 64 Chuong ang chun Israel thlahai chun Levi chia mihai chu chuong khuohai le ran tlatna hmunhai chu an pêk a nih. 65 Juda hnam, Simeon hnam le Benjamin hnamhai khomin an chanpuola inthokin a hmaa khawpui hming hril tahai kha an pêk a. 66 Efraim hnamhai chanpuola inthokin Kohat thlaa hnam thenkhatin khuo iemani zât an chang bok a. 67 Efraim tlâng rama inthokin inhumhimna khawpui Sekem le a dâi vêl le Gezer, 68 Jokmeam, Bet Horon, 69 Aijalon le Gat Rimon khuohai le an ran tlatna hmunhai chu an pêk bok. 70 Manase hnam zâtve chanpuola inthokin Israelhai chun Kohat thlaa mi hmun la chang ve lohai chu Aner le Bileam khuohai le an ran tlatna hmunhai chu an pêk bok a. 71 Gerson hnamhai an pêk po chu: Manase hnam zâtve chanpuola inthokin Basan rama Golan le Astarot khuohai le an ran tlatna hmunhai; 72 Isakar hnam chanpuola inthokin Kedes, Daberat, 73 Ramot le Anem khuohai le an ran tlatna hmunhai; 74 Aser hnam chanpuola inthokin Masal, Abdon, 75 Hukok le Rehob khuohai le an ran tlatna hmunhai; 76 le Naftalia hnam chanpuola inthokin Galili biela Kedesh, Hamon le Kiriathaim khuohai le an ran tlatna hmunhai a nih. 77 Levi chia mi hmun la chang lo Merari hnamhai an pêk po chu: Zebulun hnam chanpuola inthokin Jokneam, Karta, Rimono le Tabor khuohai le an ran tlatna hmunhai; 78 Jordan râl, Jeriko sak tienga Reuben hnamhai chanpuola inthokin thlaler rama Bezer, Jaza, 79 Kedemot le Mephat khuohai le an ran tlatna hmunhai; 80 Gad hnam chanpuola inthokin Gilead rama Ramot, Mahanaim, 81 Hesbon le Jazer khuohai le an ran tlatna hmunhai a nih.

1 Chronicles 7

1 Isakar naupahai chu Tola, Pua, Jasub le Simron, an rêngin pali an nih. 2 Tola naupahai chu Uzi, Refaia, Jeriel, Jamai, Ibsam le Samuel an na, chuonghai chu pahnam tin lukhàituhai an nih. Davida inlal laia Tola thlahai laia indo mi hming an inchik po chu mi sînghni le sânghni le zaruk an nih. 3 Chun, Uzi naupa chu Izrahia a na, Izrahia naupahai chu Mikael, Obadia, Joel le Isia an na, an rêngin pahnam lukhaitua thang vong an nih. 4 Nuhmei tam tak le nau tam tak an nei leiin an sûngkuo intiemnaa indoa thang thei chin po chu mi sîngthum le sângruk an nih. 5 Chun, Isakar hnam pumpui intiemnaa indoa ramtang thei chin an tiem po chu sîngriet le sângsari an nih. 6 Benjamin naupahai chu Bela, Beker le Jediael an nih. 7 Bela naupahai chu Ezbon, Uzi, Uziel, Jerimot le Iri, an rêngin panga an na, sûngkuo lukhaitu vong an nih. An thlahai tiemnaa indoa ramtang thei an tiem po chu sînghni le sânghni le sawmthum an nih. 8 Beker naupahai chu Zemira, Joash, Eliezer, Elioenai, Omri, Jeremot, Abija, Anathot le Alemet an nih. An rêngin Beker naupahai vong an nih. 9 An thlahai tiemnaa sûngkuo lukhàituhai an nih. An rênga râl doa ramtang thei mi an tiem po chu sînghni le zahnih an nih. 10 Jediael naupa chu Bilhan a na, Bilhan naupahai chu Leush, Benjamin, Ehud, Kenana, Zethan, Tarsis le Ahisahar an nih. 11 Hieng Jediael thlahai hi sûngkuoa lukhàitu vong an nih. An sûngkuoa râl doa ramtang thei zât chu sîngkhat le sângsari le zahni an nih. 12 Anni hnam laia Supim le Hupim hai chu Ira thlahai an na, Husimhai chu Aher thlahai an nih. 13 Naftalia naupahai chu Jaziel, Guni, Jezer le Sillum (Salum) an na, chuonghai chu Jakob hmei Bilha thlahai an nih. 14 Manase thlahai chu: Asriel chu a hmei Aram mi thlaa mi a nih. Hi hmei hin Gilead pa Makir a hring a, 15 Makir chun Hupim le Supim mi nuhmeiah a nei a. A farnu hming chu Maaka a nih. A thla dang chu Zelofehad a na, ama chun nau nuhmei chauh a nei. 16 Makir nuhmei Maaka chun nau pasal a hming Peres a nei a. A unaupa hming chu Seres a na, a naupahai chu Ulam le Rakem an nih. 17 Ulam naupa chu Bedan a nih. Chuonghai chu Manase thla Makir naupa Gilead naupahai chu an nih. 18 Chun, a farnu Hamoleket chun Ishod, Abiezer le Mala a hring a. 19 Semida naupahai chu Ahian, Sekem, Likhi le Aniam an nih. 20 Efraim naupa chu Suthela a na, ama naupa chu Bered a na, chu naupa chu Tahat a na, chu naupa chu Eleada a na, chu naupa chu Tahat a na, 21 chu naupa chu Zahad a na, chu naupa chu Suthela a nih. A nau danghai Ezer le Elead chu Gath khuoa mihai ran ruol inrûk an tumnaah a ram mihaiin an lo that a. 22 An pa Efraim chun ni tam tak a sûn a, a unauhai chun an hung ràl a. 23 Chun, a nuhmei chu a pawl a, nau a pai a, nau pasal a hring a, a insùng vangduoinan a tlâk buok lei chun a hmingah Beria a sak a. 24 A naunu hming chu Seera a na, ama chu Beth Horon khuo chuonchung le chuonhnuoi le Uzen Seera khuohai indintu a nih. 25 Efraim chun naupa dang a hming Refa a nei a, chu naupa chu Resef a na, chu naupa chu Tela a na, chu naupa chu Tahan a na, 26 chu naupa chu Ladan a na, chu naupa chu Amihud a na, chu naupa chu Elisama a na, 27 chu naupa chu Nuna a na, chu naupa chu Josua a nih. 28 An chanpuol ram le umhmun an khuornahai chu Bethel le a khawperhai, sak tieng Naaran, thlang tieng Gezer le a khawperhai, Sekem le a khawperhai le Ayya le a khawperhai chenin. 29 Manase-hai ramri bula khuohai chu Beth San, Tamanak, Megido le Dor le an khawperhai an nih. Israel naupa Josefa thlahai chu hieng khuoa hai hin an um a nih. 30 Aser naupahai chu Imna, Isva, Isvi le Beria an na, an farnu chu Sera a nih. 31 Beria naupasahi chu Heber le Malkiel an na, Malkiel naupa chu Birzait a nih. 32 Heber naupahai chu Jaflet, Somer le Hotham an na, an farnu chu Sua a nih. 33 Jaflet naupahai chu Pasak, Bimhal le Asvat an nih. 34 Somer naupahai chu Ahi, Roga, Huba le Aram an nih. 35 A unaupa Helem naupahai chu Zofa, Imna, Seles le Amal an nih. 36 Zofa naupahai chu Sua, Harnefer, Sual, Beri, Imra, 37 Bezer, Hoda, Sama, Silsa, Ithran (Jether) le Beera an nih. 38 Jether naupahai chu Jefune, Pispa le Ara an nih. 39 Ula naupahai chu Ara, Haniel le Rizia an nih. 40 Hieng Aser thlahai hi pahnam tina lukhàituhai, thlang fâl, mi huoisen le thuoitu challanghai chu an nih. An thlahai, râl doa ramtang thei an tiemhai po chu sînghni le sângruk an nih.

1 Chronicles 8

1 Benjamin nau lutîr chu Bela a na, a pahnina Asbel, a pathumna Ahara, 2 a palina Noha le a pangana Rafa a nih. 3 Bela naupahai chu Adar, Gera, Abihud, 4 Abisua, Naaman, Ahoa, 5 Gera, Sefufan le Huram an nih. 6 Ehud thlahai, 7 Gebaa umhai laia sûngkuo tin lukhaituhai le Mahanat-a sala an thuoihai chu Naaman, Ahija, le Gera an na, Gera chu sala thuoitu a na, naupa Uza le Ahihud hai a hring a. 8 Saharaim chun Moab-a a um laiin a nuhmei Husim le Baara hai a mâk a, 9 Hodes a nei a, ama le chun naupa Jobab, Zibia, Mesa, Malkam, 10 Jeuz, Sakia le Mirma, an rêngin pasari a nei a. 11 Husim lakah Abitub le Elpaal a nei bok a. 12 Elpaal naupahai chu Eber, Misam, Semed an na, Semed chu Ono khuo le Lod khuo le an khawperhai indintu a nih. 13 Beria le Sema chu Aijalona an sûngkuohai lukhàitu le Gath khuoa mihai hnot suoktu an nih. 14 Beria naupahai chu Ahio, Sasak, Jeremot, 15 Zebadia, Arad, Eder, 16 Mikael, Ispa le Joha an nih. 17 Elpaal naupahai chu Zebadia, Mesulam, Hizki, Heber, 18 Ismerai, Islia le Jobab an nih. 19 Simei naupahai chu Jakim, Jikri, Zabdi, 20 Elienai, Zilethai, Eliel, 21 Adaia, Beraia le Simrat an nih. 22 Sasak naupahai chu Ispan, Eber, Eliel, 23 Abdon, Zikri, Hanan, 24 Hanania, Elam, Anthothija, 25 Ifdeia le Penuel an nih. 26 Jeroham naupahai chu Samserai, Seharia, Athalia, 27 Jaaresia, Elija le Zikri an nih. 28 Hienghai hi an sûngkuo chanchin inziek dana an lukhàituhai an na, Jerusalema um an nih. 29 Gibeon khuoa chun Gibeon pa Jeiel a um a, a nuhmei hming chu Maaka a na, 30 an naupa upa tak chu Abdon a na, a danghai chu Zura, Kisa, Baal, Nera, Nadab, 31 Gedor, Ahio, Zeker, 32 le Miklot an na, Miklot chu Simea pa a nih. Anni khom Jerusalema an sûngkuohai laia um an nih. 33 Nera chu Kisa pa a na, ama chu Saula pa a na, ama chu Jonathan pa a na, ama chu Malki-Sua, Abinadab le Esh-Baal (Is-Boset) hai pa a nih. 34 Jonathan naupa chu Meri-Baal (Mefiboset) a na, ama chu Mika pa a nih. 35 Mika naupahai chu Pithon, Melek, Tarea le Ahaz an nih. 36 Ahaz naupa chu Jehoada a na, chu naupahai chu Alemet, Azmavet le Zimri an na, Zimri naupa chu Moza a na, 37 ama naupa chu Binea a na, ama naupa chu Rafa a na, ama naupa chu Eleasa a na, ama naupa chu Azel a nih. 38 Azel naupa parukhai chu Azrikam, Bokeru, Ismael, Searia, Obadia, le Hanan an nih. Chuonghai po po chu Azel naupahai an nih. 39 A unaupa Esek naupahai chu, a upa tak Ulam, a pahnina Jeush, a pathumna Elifelet a nih. 40 Ulam nauhai chu mi huoisen, thal kâp thiem an nih. Anni chun tu le te tam tak, an rêngin za le sawmnga, an nei. Chuonghai po chu Benjamin thlahai chu an nih.

1 Chronicles 9

1 Israel lalhai chanchin zieknaah 2 An chanpuol khuo hung hluo tan nawktuhai chu Israelhai laia a then le thiempuhai, Levi chihai le tempula sinthawhai an nih. 3 Jerusalema Juda thla, Benjamin thla, Efraim le Manase thla umhai chu: 4 Amihud naupa Uthai, chu naupa Omri, chu naupa Bani an na, anni chu Juda naupa Perez thlahai an nih. 5 Silon thlahai laia um chu a nau upa tak Asaia le a naupahai an nih. 6 Zera thlahai laia um chu Jeuel a nih. Juda thla Jerusalema um po chu an rêngin zaruk le sawmkuo an nih. 7 Benjamin hnam hrang hrang Jerusalema umhai chu Mesulam naupa Salu hai sùng: Mesulam pa chu Hodavia a na, ama pa chu Hasenua a nih; 8 Jeroham naupa Ibneia sûnghai; Uzi naupa, Mikri tupa Ela le a sûnghai; Sefatia naupa Mesulam sûnghai: Sefatia pa chu Reuel a na, Reuel pa chu Ibnija a nih. 9 An sûngkuo thlatuhai suina dungzuia Jerusalema Benjamin thla um po chu zakuo le sawmnga paruk an na, chuonghai chu sûngkuo tina lukhàitu vong an nih. 10 Jerusalema um thiempuhai chu: Jedaia hai; Jehoiarib hai; Jakin hai; 11 Pathien in enkoltu Hilkia naupa Azaria hai: Hilkia chu Mesulam naupa a na, ama chu Zadok naupa a na, ama chu Meraiot naupa a na, ama chu Ahitub naupa a nih; 12 Jeroham naupa Adaia hai: Jehoram chu Pasur naupa a na, ama chu Malkija naupa a nih; Adiel naupa Maasai hai: ama chu Jazera naupa a na, ama chu Mesulam naupa a na, ama chu Mesilemit naupa, a na, ama chu Imer naupa a nih. 13 Thiempu, sûngkuo tin lukhàitu zât chu sângkhat le zasari le sawmruk an nih. Anni rawi chu mi thei tak tak vong an ni a, Pathien ina rongbawl sin chu an mawphurna a nih. 14 Levihai laia Jerusalema umhai chu: Hasub naupa Semaia: Hasub chu Azrikam naupa a na, Azrikam chu Merari hnama Hasabia naupa a nih; 15 Bakbakar hai, Heresh hai, Galal hai le Mika naupa Matania hai: Mika chu Zikri naupa, Zikri chu Asaf naupa a nih; 16 Semaia naupa Obadia hai: Semaia chu Galal naupa, ama chu Jeduthun naupa a nih; Asa naupa Berekia hai: Asa chu Elkana naupa a na, Netofat-hai khuoa um hlak a nih. 17 Kotkhâr vêngtuhai chu Salum hai, Akub hai, Talmon hai, Ahiman le a unauhai an na, an hotupa chu Salum an nih. 18 Anni chu tu lai chena suo tieng lal kotsuo nghâktu an na, Levihai riebûk tienga um hlak an nih. 19 Salum chu Kore naupa a na, ama chu Ebiasaf naupa a na, ama chu Kora naupa a nih. Ama le a kotkhâr vêngpui Kora thlahai chun an pi le puhaiin LALPA biekbûk kot an vêng hlak ang bokin, Intuokna Puon in kot vêng chu an mawphurna a nih. 20 Tuta hma chun Eleazar naupa Finehas chu kotkhâr vêngtuhai hotu a ni hlak a, a kuomah LALPA a um a. 21 Meselemia naupa Zekaria chu Intuokna Puon in kota vêngtu a nih. 22 Chuong kotkhâr vêngtu dinga thlang po po chu mi zahni le sawmpahnih an nih. Davida le zawlnei Samuelin an thaw ding senga an lo ruothai chu an umna khuo senga an thlahai tiemna lekhabuah ziek a nih. 23 Anni le an nauhai chu LALPA biekbûk kotkhâr vêngtuhai an nih. 24 A kil li, sak le thlang le sim le hmara kotkhâra hai chun vêngtuhai chu an um hlak a. 25 Chun, khuoa um an unauhai chun tum khatah ni sari pei an sin chu an hung thangpui hlak. 26 Vêngtu hotu palihai chu Levi chia mi an na, mawphurna insâng tak an chel a, tempul sûnga thil po po le rosum siena pindanhai enkoltu an nih. 27 Enkoltu sin thaw an ni lei le tûk tina kot hong chu an sin a ni leiin Pathien in bula chun an riek hlak. 28 A thenin rongbawlna bûr le bèl an enkol a, an lâk suok le sie lût zâtin an tiem a. 29 A then chu in cheina hmangruo hai, hmun thienghlima bûr le bèl hai po po, beiphit hai, uoiin hai, hriek hai, beraw le rimtui hai enkoltu dinga ruot an nih. 30 Thiempu a thenin rimtui an siem hlak a. 31 Kora thla, Saluma naupa upa tak, Levi mi Mathithia mawphurna chu inhlàn ding bei siem a nih. 32 Chun, Kohat thlaa mi a then chu Sabat zàta hlânbei sie ding buotsaitu le sietu an nih. 33 Hla saktuhai le rimawi tumtu, Levi sûngkuoa lukhàituhai chu sun le zana thok zing an ni leiin tempulah an riek a, rongbawlna sin danga khom an inawl vong a. 34 Chuonghai chu Levi sûngkuoa lukhàituhai, an hnam chanchin inzieknaa lu nina cheltu, Jerusalema umhai chu an nih. 35 Gibeonhai thlatu Jeiel chu Gibeon-ah a um a, a nuhmei hming chu Maaki a nih. 36 A nau lutîr chu Abdon a na, a danghai chu Zura, Kisa, Baal, Nera, Nadab, 37 Gedor, Ahio, Zekaria le Miklot an nih. 38 Miklot chu Simeam pa a na, an laibunghai bulah Jerusalemah a um a. 39 Nera chu Kisa pa a na, Kisa chu Saula pa a na, Saula chu Jonathan, Malki-Sua, Abinadab le Esh-Baal (Ish-Boset) hai pa a nih. 40 Jonathan naupa Merib-Baal (Mefiboset) chu Mika pa a nih. 41 Mika naupahai chu Pithon, Melek, Tahrea le Ahaz an nih. 42 Ahaz chu Jada pa a na, Jada chu Alemet, Azmavet le Zimri pa a na, Zimri chu Moza pa a nih. 43 Moza chu Binea pa, Binea chu Refaia pa, Refaia chu Eleasa pa, Eleasa chu Azel pa a nih. 44 Azel nau parukhai chu Azrikam, Bokeru, Ismael, Searia, Obadia le Hanan an nih. Chuonghai chu Azel naupahai chu an nih.

1 Chronicles 10

1 Filistinhai chun Israelhai chu an bei a, an hmaah Israelhai an tlânsie a, Gilboa tlânga chun tam tak an that a. 2 Filistinhai chun Saula le a nauhai chu an hnot ngat ngat a, Jonathan le Abinadab le Malki-Sua hai chu an that a. 3 Saula thangna hmun lai chun an inbei nasa hle a, thal kâptuhai chun an hung hnot phâk a, an inhliem a. 4 Saula chun a râlthuom chawitu kuomah, "I kawlhnàm kha phawi la, mi hung sun tlang rawh, hieng sertan lohai hin mi uongkhum pal rawi an tih" a ta. Sienkhom, a râlthuom chawitu chun a sun ngam naw leiin Saula chun a kawlhnàm chu a lâk a, a baw ta a. 5 A râlthuom chawitu chun Saula a thi ti a hriet chun a kawlhnàm chu a baw ve a, a thi ve ta a. 6 Chuongchun, Saula le a nau pathumhai chu an thi a, an thi ruolin an lalna khom a mang ta nghal a nih. 7 Ruoma um Israelhai chun sipai an tlânsiet thu le Saula le a nauhai an thi thu an hriet charin an khuohai suoksanin an tlân dar chum chum a. Filistinhai chu an hung a, an va hluo ta a. 8 A zînga chun Filistinhai chu an râl thathai râlthuom va rok dingin an fe a, Gilboa tlânga Saula le a naupahai ruong chu an va hmu a. 9 Saula lu chu an lâk a, an râlthuom chu an hlîppek a, an lâk a, an chanchin chu an pathien lem biekhai le mipuihai kuoma puong dar dingin Filistin ram pumpuiah zuolko an intlântir a. 10 Saula râlthuom chu an pathien tempulah an sie a, a lu chu an Dagon tempula chun an tàr a. 11 Filistinhaiin Saula an soisak dàn po po Gilead biela Jabes khaw mihaiin an lo hriet chun, 12 an mi huoisen po po chu an inthok suok a, Saula ruong le a naupahai ruong chu an va lâk a, Jabes-ah an hung hawn a, an ruhai chu Jabes-a saisuo kung lien bulah an phûm a, ni sari sûnin bu an nghei a. 13 Saula chu LALPA lakah a ringum naw a, LALPA thu a zawm nuom naw a, 14 thuoitu dinga LALPA rawn nêkin ramhuoi zawl, rau ko thiem le aisan thiemhai chen a rawn lem leiin LALPAN a sukhlum a, a ram khom Jesai naupa Davida kuomah a pêk lem tah a nih.

1 Chronicles 11

1 Israel pahnam po po chu Hebron-ah Davida kuomah an hung a, a kuomah "Ngai ta, i taksa le thisen inzompui kan ni hi. 2 Kha hmaa kan chunga Saula inlal lai khom khan kan ràl beinaa Israelhai thuoitu tak chu nangma i ni hlak a. LALPA chun i kuomah, 'Ka mi Israelhai thuoi i ta, an lalah i um ding a nih' a ti che a ni kha" an ta. 3 Israel upahai po po chu Hebron-ah Davida kuomah an hung a, LALPA hmaah anni chu thu a lo thlungpui a, LALPAN Samuel hmanga a lo tiem tah angin Davida chu Israel lal dingin Hebrona chun hriek an nàl a. 4 Israelhai po po chu thuoiin Jebuhai khawpui Jerusalem bei dingin Davida chu a suok a. 5 Jebuhai chun, "Hi taka hin hung lût thei teu naw nih" an ti a. Amiruokchu, Davida chun Zion kul chu a lâk a, chu kul umna muol chu 'Davida Khawpui' ti a hung ni ta a. 6 Davida chun, "Jebuhai bei dinga hma thuoitu chu kawmandar lu takah ruot ka tih" a ta. Zeruia naupa Joab chu a hang fe hmasa tak a, kawmandar lu takah a sie ta a. 7 Davida chun kulah umhmun a khuor phot a, chu lei chun Davida Khawpui tiin an ko a nih. 8 Suo tieng muola kul thut ding hnuoi an sung zawla inthoka intanin kul vel tuok chu Davidan a siem tha a, Joab-in khawpui sûng chu a siem tha a. 9 Iengkim LALPA chun a umpui leiin Davida chu a hung ropui ta deu deu a. 10 Hienghai hi Davida sipai huoisen, Israelhai po po leh thang tlânga, LALPAN a lo tiem tah anga a ram pum huopa a lalna indinpuitu, 11 a kuoma um mi hrât khawkhênghai chu an nih: Hakmon mi Jasobeam chu sipai hotu lien pathumhai laia a lu tak, tum khata inbeinaa fei ringota mi zathum thattu a nih. 12 A dottu chu Aho mi, Dodai naupa Eleazar, hotu lien pathumhai laia pakhat chu a nih. 13 Indo dinga Pas Damim-a Filistinhai an inhawr khaw tumin Davida a zui a. Chu hmun chu barli bil a na, Israelhai chu an tlânse el ta a. 14 Ama le a rawihai chun lo lai thanghmun an khaw a, an vêng tlat a, Filistinhai chu an lo that pei a, LALPAN hnena ropui tak a pèk a. 15 Mi huoisen sawmthum thlang suok laia pathumhai chu Davida kuomah Adulam pûkah an fe a, Filistin mihai chu Refa-hai umna ruomah an lo inkul a. 16 Chuong lai chun Davida chu kulah a um a, Filistin sipai pawl khat chu Bethlehemah an inkul a. 17 Davida chun tui a châk êm êm a, "Bethlehema tuikul tui, kul kotkhâr bula um kha mi chawipèk thei um hlauh hai sien chu maw!" a ti vong vong a. 18 Mi huoisen pathumin Filistinhai chu an tawn tlang a, kul kotkhâr bula um Bethlehem tuikula tui chu an hang chawi a, Davida kuomah an fepui a. Sienkhom Davida chun dawn loin LALPA ta dingin a bun thlâk ta lem a. 19 "Aw LALPA, hi hi chu thaw naw top ka tih; thi huoma fehai thisen chu ka dawn ding am a ni?" a ta. An hringna meu thâpa an hung chawi a ni leiin Davida chun a dawn naw a nih. Chuong ang chu mi ropui pathumhai huoisen dàn chu a nih. 20 Joab unaupa Abisai chu 'Pasaltha Sawmthum'a an tihai laia hotu tak a nih. Ama chun feiin mi zathum a bei a, a sun hlum vong a, hming that a hlaw hle a. 21 Chuongchun, a lêt hnia kaisângna dongin 'Pasaltha Sawmthum' an ti laia hotu tak a hung ni ta a, sienkhom 'Pasaltha Pathum' an tihai lai ruok chu a thang sa ve nawh. 22 Kebzel khaw pasaltha Jehoiada naupa Benaia chu mi huoisen tak a na, thil nasa tak tak a thaw a. Moab mi huoisen pahni a that zoin a fe thlàk a, vûr tlâk hun lai hin khurah sakeibaknei a zu that nawk a. 23 Chun, Aigupta mi lien tak el, a dung meter hni le centimeter thuma insâng chu a that bok a. Aigupta pa chun fei, a ngul khom puon khawngna themtlâng tiet hi a chawi a, Benaia chun hmol chauh chawiin a zu pan a, a fei chu a lâkpèk a, ama fei ngei chun Aigupta mi lien chu a sun hlum a. 24 Chuong ang thil chu 'Pasaltha Sawmthum' laia mi Jehoiada naupa Benaia chun a thaw leiin a hming a tha hle a. 25 Sienkhom 'Pasaltha Pathumhai' lai ruok chu a thang phâk nawh. Davida chun ama vêngtuhai laia hotuah a sie a. 26 Mi huoisen hmingthang danghai chu Asahel, Joab unaupa; Dodo naupa, Bethlehema mi Elhanan; 27 Haror mi Samot; Pelon mi Helez; 28 Tekoa mi Ikes naupa Ira; Anathot mi Abiezer; 29 Husait mi Sibekai; Aho mi Ilai; 30 Netofat mi Maharai le Baana naupa Heled; 31 Benjamin hnama mi Gibea inthoka hung, Ribai naupa Ithai; Pirathon mi Benaia; 32 Gaash ruom khokroka mi Hurai; Arbat mi Abiel; 33 Baharum mi Azmavet; Salbon mi Eliaba; 34 Gizon mi Hasem naupahai le Harar mi Sagee naupa Jonathan; 35 Harar mi Sachar naupa Ahiam; Ur naupa Elifal; 36 Mekerat mi Hefer; Pelon mi Ahija; 37 Karmel mi Hezro; Ezbai naupa Naarai; 38 Nathan unaupa Joel; Hagri naupa Mibar; 39 Amon mi Zelek; Berot mi Naharai, Zeruia naupa Joab râlthuom chawitu; 40 Jatir mi Ira le Gareb; 41 Hit mi Uria; Ahlai naupa Zabad; 42 Siza naupa Adina, Reuben hnam laia hotu le rawi mi sawmthum nei; 43 Maaka naupa Hanan; Mithan naupa Jehosafat; 44 Astera mi Uzia; Aroer khaw mi Hotham nauhai Sama le Jeiel; 45 Tiz khaw mi Simri nauhai Jediael le Joha; 46 Mahava mi Eliel; Elnam nauhai Jeribai le Josavia; Moab mi Itma; 47 Zoba mi Eliel, Obed le Jasiel hai an nih.

1 Chronicles 12

1 Kisa naupa Saula leia Ziglag khuoa Davida a râltlân lai chun Saula chipuihai laia mi ringum le huoisen iemani zât Davida thangpui dingin an hung a. 2 Voi tieng le chang tieng inang charin thal an kâp thiem a, virvom an dêng thiem bok a. 3 An hotu takhai chu Ahiezer le Joash an na, Gibea inthoka hung, Sema nauhai an nih. An sipaihai chu Azmavet nau pahni Jeziel le Pelet hai; Anathot mi Beraka le Jehu hai; 4 Gibeon mi Ismaia, Pasaltha Sawmthum pawl laia an mi huoisen le thuoitu hai; Gedera mi Jeremia, Jahaziel, Johanan le Jozabad hai; 5 Harup mi Eluzai, Jerimot, Bealia, Semaria le Sefatia hai; 6 Kora pahnama mi Elkana, Isia, Azarel, Joezer le Jasobeam hai; 7 Gedor mi Jeroham naupa Joela le Zebadia hai an nih. 8 Gad mihai laia thenkhat chu thlalèr kula Davida a um laiin ama tieng an hung pakai a. Anni chu mi huoisen, indo thiem, phaw le fei hmang thiem le sakeibaknei hmèl ang put, tlânga sazuk tuoi anga zuonzâng an nih. 9 An hotu tak chu Ezer a na, a pahnina Obadia, a pathumna Eliab, 10 a palina Mismana, a pangana Jeremia, 11 a parukna Atai, a pasarina Eliel, 12 a parietna Johanan, a pakuona Elzabad, 13 a sawmna Jeremia le a sawmpakhatna Makbanai a nih. 14 Chuong Gad mihai chu sipai hotu an na, anni laia hrât naw tak khomin mi za a hen a, a hrât tak chun mi sângkhat a hen a nih. 15 Anni hi a nih thla khatnaa Jordan vadung kuong a liem zur zur lai khom pal kai a, ruom sak le thlanga chênghai hnot dartu chu. 16 Benjaminhai le Judahai laia thenkhat chu kulah Davida kuomah an fe a. 17 Davida chun anni chu a lo hmuok a, "A tha tienga mi thangpui dinga ka kuoma hung in ni chun lungril takin ka lawm lût cheu a, amiruokchu, in chungah ieng khom poi ka tawk naw sa khoma ka hmèlmahai mi'n mantir tuma hung in ni chun, ei pi le puhai Pathien chun inchikin hrem cheu raw se" a ta. 18 Chuongchun, 'Pasaltha Sawmthum' hai hotu Amisai chunga chun thlarau a hung tlung a, "I mihai kan nih, aw Davida!I tienga thang kan nih, aw Jesai naupa!Hlawtling la, hlawtling ngei rawh, A thangpuituhai che khom hlawtling sien, In Pathienin thangpui cheu raw se"a ta. Chuongchun, Davida chun anni chu a lawm lût a, sipai pawl hotuah a sie tawl a. 19 Saula do dinga Filistinhai an inthok laiin Davida khom anni tieng a thang ve a, Manase-hai laia mi thenkhat chu Davida tieng an hung pakai bok a. (Amiruokchu, Davida le a mihai chun Filistinhai chu an thangpui ta nawh. Filistin hotuhai an inrawn hnung chun, "A pu Saula tieng pakai a ta, ei lu chân hlau rawi ei tih" an ti a, an hnar kîr tah a nih. ) 20 Ziklag-a Davida a fe laia a kuom tienga Manase mi hung pakaihai chu Adnan, Jozabad, Jediael, Mikael, Jozabad, Elihu le Zilethai hai an na, sipai sângkhat chung peia hotu vong an nih. 21 Rûkrâla che pawlin Davida an hung bei laia lo dopuitu mi huoisen an na, a sipai hotu vong an nih. 22 Pathien sipaihai ang tluka ropui sipai an din chenin ni tinin Davida tienga thang ding mi an hung inpe a, sipai tam tak a nei ta a. 23 LALPA thu anga Saula nêka Davida chu lala siem dinga Hebron khuoa inrâlthuom sa ngot Davida kuoma hung zât chu: 24 Juda thla, phaw le fei chawia indo dinga inrâlthuom mi sângruk le zariet; 25 Simeon thlaa mi huoisen, indo dinga inrâlthuom mi sângsari le zakhat; 26 Levi thlaa mi sângli le zaruk; 27 Aron thlahai thuoitu Jehoiada le a rawihai mi sângthum le zasari; 28 tlangvàl huoisen Zadok le a sûngkuo laia mi, sipai hotu sawmhni le pahnih; 29 Benjamin thla, Saula chipuihai mi sângthum (Benjamin hnama mi tam lem chu Saula tantu an la ni zing); 30 Efraim thlaa mi, mi hrât le huoisen, an sûngkuo laia mi hmingthang ngot sînghni le zariet; 31 Manase hnam zâtve laia mi, lala Davida siem dinga an tir suok sîngkhat le sângriet; 32 Isakar thlaa mi, thil chinchang hrie le Israelhaiin iem a na an thaw ding ti hre chieng, hotu zahni le an thu hnuoia um an sûngkuohai po po leh; 33 Zebulun thlahai, hriemhrei tinrêng hmanga indo thiem, Davida laka ringum taka um, thangpui dinga inrâlring zing mi sîngnga; 34 Naftalia thlaa mi ofisar sângkhat le phaw le fei chawi sipai sîngthum le sângsari; 35 Dan thlaa mi, indo dinga inpei sa sînghni sângriet le zaruk; 36 Aser thlaa mi, indo thiem le indo dinga inrâlring zing sîngli; 37 Jordan vadung sak tienga chêng Reuben hnam, Gad hnam le Manase hnam zâtvea inthokin inrâlthuom sa nuoikhat le sînghni an nih. 38 Chuonghai po po chu râldo dinga mani nuom thua inpe, Davida chu Israel ram pumpuia lala siem ngei dinga Hebrona hung an nih. Chun, Israel hnam dang po po khom Davida chu lala siem dingin an khuongruol vong a. 39 Davida kuoma chun ni thum faa dawnin an um a, chuonghai chu an unauhaiin an buotsaipèk vong a nih. 40 Chu bâkah, an unau hmun hlaa inthoka hung Isakar hai, Zebulun hai le Naftalia hai chun sabengtung dâm, sanghawngsei dâm, sakor dâm le bawngchal dâm hung thuoiin fâk ding tam tak bei dâm, theichang pèr dâm, grèp ra em tawl dâm, uoiin dâm, hriek dâm an hung phur a, that ding bawngchal le beram an hung kei teu bok a, Israel ram chu lawmnain a sip a.

1 Chronicles 13

1 Davida chun mi sângkhat chunga kawmandarhai le zakhat chunga kawmandar tinhai chu a'n rawnpui a. 2 Chu zoah Israel pungkhawmhai po po kuomah, "Tha in ti zawng a ni a, LALPA ei Pathien remti zawng a ni bok chun, Israel ram po poa ei unau la hung ve lohai le an kuoma um thiempuhai le Levi chihai, an khuo le ran tlatna hmuna chênghai po po chu hung ve dingin fiel ei tiu khai. 3 Ei Pathien Bawm hi la kîr nawk tâng ei tiu, Saula inlal sûng po khan ei ngaiven dêr si naw a" a ta. 4 Pungkhawmhai po po chun thil indik niin an hriet a, an remti a. 5 Chuongchun, Davida chun Aigupta vadung Sihora inthoka Hamat khaw lûtna chena Israel mi um po po chu Kiriat-Jearima inthoka Pathien Bawm chu Jerusalema la tung dingin a ko khawm vong a. 6 Davida le mi po po chu Judai rama Baala khuo, Kiriat Jearim an tia chun cherubim thla zâr kâra inthut LALPA hming chuongna Pathien Thuthlung Bawm chu la dingin an hang fe a. 7 Pathien Bawm chu Abinadab ina inthokin tawlailir tharin an fepui a, Uza le Ahio-in tawlailir chu an khal a. 8 Davida le Israel mi po po chun hla sakin, tingtang hai, perkhuong hai, khuong hai, dârbenthek hai, tawtawrawt hai tumin, Pathien hmaah an làm suou suou el a. 9 Chun, Kidon hrizawl an hang tlung chun bawnghai chu an inpal leiin Bawm chu chel nghet tumin Uza chun a zuk ban a. 10 Chu phing leh LALPA lung chu Uza chungah a sen thut a, Bawm a chel lei chun a sukhlum a, chu hmuna chun Pathien hmaah a thi ta a. 11 Uza chunga LALPAN kut a thlâk lei chun Davida lung chu a sen hle a, chu hmun chu tu chen hin Perez Uza ti a la ni zing. 12 Chu ni chun Davida chun Pathien a ti hle a, "Hieng hi a ni si chun, iengtin am Pathien Bawm chu ka hawn ngam ding a na?" a ta. 13 Chuleiin, Davida chun Thuthlung Bawm chu Davida khawpuiah hawn ta loin, Git mi Obed-Edom inah a sie ta lem a. 14 Obed-Edom ina chun Pathien Bawm chu thla thum a um a, a sûngkuo le a thil nei po po chu iengkimah LALPAN mal a sawm a.

1 Chronicles 14

1 Tura lal Hiram chun 2 LALPAN Israelhai chunga lala a suknghetzie le a mi Israelhai zâra a ram chu a chawisàng a nizie Davida chun a hriet a. 3 Jerusalema chun Davidan nuhmei a nei bel a, naupa le naunuhai a nei sa bok a. 4 Jerusalema inthoka a nau pienghai chu Samua, Sobab, Nathan, Solomon, 5 Ibar, Elisua, Elpelet, 6 Noga, Nefeg, Jafia, 7 Elisama, Beliada (Eliada) le Elifelet hai an nih. 8 Filistin mihaiin Davida chu Israel mi po po lalah hriek an nàl tah ti an hriet chun zong dingin an sipai po po leh an inthok suok a, sienkhom Davidan a lo hriet lawk leiin anni chu lo bei dingin a'n thok suok ve a. 9 Filistinhai chu an hung a, Refaim Ruom an hung rûn a. 10 Davida chun "Fe suokin Filistinhai chu ka do ding am a ni? Anni chu ka kutah i mi pêk ding am a nih?" tiin Pathien a rawn a. LALPA chun, "Hang fe rawh, anni chu i kutah pêng ka ti che" a ta. 11 Chuongchun, Davida chu a mihai leh Baal-Perazim-ah a hang fe a, chu taka chun Filistinhai chu a hne a. Ama chun, "LALPAN ka kut hmangin, ka hmèlmahai chu tuiting inthe angin a vuok dar vong tah" a ta, chu hmun hminga chun Baal Perazim tiin a'n bûk a. 12 Filistinhai chun an pathien lemhai chu an tlânsan a, Davida chun raw hmang vong dingin thu a pêk a. 13 Sawt naw te hnungah Filistinhai chun Refaim ruom bok chu an hung rûn nawk a. 14 Davida chun Pathien a rawn nawk a, Pathien chun, "Hmason chot el loin inhuol tawl la, balsam thing kung zawna son bei tawl rawh. 15 Balsam lêra ke pên ri tlut tlut i hriet charin anni chu bei rawh. Filistin sipaihai bei dingin i hmaah Pathien a fe tina a nih" a ta. 16 Davida chun Pathienin a hril ang tak chun a thaw a, Filistin sipaihai chu Gibeon-a inthoka Gezer chen a hnot a, a that teu a. 17 Davida hming chu a hung inthang ta hle a, LALPA leiin ama chu hnam tinin an ti a.

1 Chronicles 15

1 Davida khawpuia Davidan ama in ding a bawl zo chun Pathien Bawm umna ding hmun a buotsai a, chu taka chun puon in a kei a. 2 Chun, David chun, "Pathien Bawm hi Levihai chauh naw chun tu khomin an zawn ding a ni nawh; Pathien Bawm hi kumkhuoa zawntu le a rongbawltu dinga LALPA thlang an ni si a" a ta. 3 Chuongchun, LALPA Bawm siena ding hmun a buotsaia Bawm chu zawn tung dingin Davida chun Israel mihai po po chu Jerusalemah a ko khawm a. 4 Aron thlahai le Levi thlaa mi a ko khawmhai chu: 5 Kohat thlaa inthokin an thuoitu Uriel le a sûngkuo mi za le sawmhni; 6 Merari thlaa inthokin an thuoitu Asaia le a sûngkuo mi zahni le sawmhnih; 7 Gerson thlaa inthokin an thuoitu Joel le a sûngkuo mi za le sawmthum; 8 Elizafan thlaa inthokin an thuoitu Semaia le a sûngkuo mi zahni; 9 Hebron thlaa inthokin an thuoitu Eliel le a sûngkuo mi sawmriet; 10 Uziel thlaa inthokin an thuoitu Aminadab le a sûngkuo mi za le sawmpahni an nih. 11 Chun, Davida chun thiempu Zadok le Abiathar hai le Levi chia mi Uriel, Asaia, Joel, Semaia, Eliel le Aminadab hai chu a ko a. 12 An kuoma chun, "Nangni hi Levi hnama lukhàituhai in na, Israelhai Pathien, LALPA Bawm chu a hmun ka buotsaia chun in zawn tung theina dingin, nangni le in unauhai leh insukthienghlim ro. 13 A tîr khom khan nangnin in zawn naw leiin eini chungah LALPA lung a sen a ni kha, amain thaw dàn ding a ti ang tak chu ei lo indon bok si naw a" a ta. 14 Chuongchun, Israelhai Pathien, LALPA Bawm chu zawn tung dingin thiempuhai le Levihai chu an inser thienghlim a. 15 LALPA thu anga Mosien thu a pêk dàn ang takin, thiempuhai chun Pathien Bawm chu liengkoah a zawnfung chu putin an zawn a. 16 Chun, hla sak mi, rimawi tum thiem mi, perkhuong hai, tingtang hai, dârbenthek hai leh hlim taka hla remtu ding an unauhai laia mi ruot dingin Levi hotuhai chu Davidan a hril a. 17 Chuongchun, Levihai chun Joel naupa Heman hai, a unauhai laia mi Berekia naupa Asaf hai, an unau Merari naupahai laia mi Kusai naupa Ethan hai chu an ruot a. 18 Anni le saktu dingin Zekaria, Jaaziel, Semiramot, Jehiel, Uni, Eliab, Benaia, Maaseia, Matithia, Elifelehu, Mikneia, kotkhâr vêngtu Obed-Edom le Jeiel hai chu an ruot bok a. 19 Rimawi tumtu Heman, Asaf le Ethan hai chu dârbenthek tumtu dingin an ruot; 20 Zekaria, Aziel, Semiramot, Jehiel, Uni, Eliab, Maaseia le Benaia hai chu perkhuong ki insâng chi tumtu dingin an ruot a, 21 Matithia, Elifelehu, Miknei, Obed-Edom, Jeiel le Azazia hai chu tingtang ri inhnuoi chi tumtu ding le hma thuoitu ding an nih. 22 Levihai lukhàitu tak Kenania chu hla sak thiem le hla saktuhai inrawitu a nih. 23 Berekia le Elkana hai chu Bawm siena kotkhâr vêngtua ruot an nih. 24 Thiempu Sebania, Josafat, Nethanel, Amasai, Zekaria, Benaia le Eliezar hai chu Pathien Bawm hmaa tawtawrawt mûttu ding an nih. Obed-Edom le Jehia hai chu Bawm siena kotkhâr vêngtu dinga ruot sa an nih. 25 Chuongchun, Davida le Israel upahai le sipai sângkhat pei kawmandar hai chu Obed-Edom ina um LALPA Bawm chu zuk la tung dingin hlim takin an fe a. 26 LALPA Thuthlung Bawm zawntu Levihai chu Pathienin a thangpui leiin, bawngchal pasari le beramchal pasariin an inthawi a. 27 Davida le Bawm zawntu Levihai le hla saktuhai le zàipawl thuoitu Kenania hai chu puon zâi inhmiin an inthuom a. Davida chun thiempu zakuo efod chu a hàk sa bok a. 28 Chuongchun, beram ki le tawtawrawt bi nei mût ruoi ruoiin, dârbenthek ben a, perkhuong le tingtang tumin, Israel mi po po chu hlim takin an khêk a, LALPA Thuthlung Bawm chu an zawn tung ta a. 29 Chun, hieng hi a na, LALPA Thuthlung Bawmin Davida khawpui a lût lai chun Saula naunu Mikal chun tukvera inthokin a lo thlîr a, lawma lal Davida lâm le inchawm a hei hmu chun a lungrilin a lo inzàpui hle a.

1 Chronicles 16

1 Pathien Bawm chu an hung làk a, a siena ding puon in Davidan a zar sûnga chun an sie a, pumraw thilhlân le inremna thilhlânhai chu Pathien kuomah an inhlàn a. 2 Davidan pumraw thilhlân le inremna thilhlânhai a'n hlàn zo chun LALPA hmingin mipuihai chu mal a sawm a. 3 Chu zoah Israelhai chu a nuhmei a pasalin bei tlang khat, sa tlang khat le grèp em tawl bawr khat pei a pêk seng a. 4 LALPA Bawm hmaah rong bawl a, LALPA Israel Pathien be a, a kuomah lawmthu hril a, inpâktu dingin Levihai laia thenkhat chu a ruot a. 5 An hotu tak chu Asaf a na, a dottu chu Zekaria a na, a danghai chu perkhuong le tingtang tumtu Jeiel, Semiramot, Jehiel, Matithia, Eliab, Benaia, Obed-Edom le Jeiel hai an nih. Asaf chu dârbenthek bentu a na, 6 thiempu Benaia le Jahaziel hai chu Pathien Thuthlung Bawm hmaa a'n khat tawka tawtawrawt mût hlaktu dinga ruot an nih. 7 Chuongchun, chu ni chun Asaf le a rawihai chu LALPA kuoma lawmthu hrilna hla sak dingin Davida chun a hmang tan tawl ta a: 8 LALPA kuomah lawmthu hrilin, A hming chu lam hlak unla, A thilthaw tinrênghai chu, Hnam tinrêng lai hril dar ro. 9 Zài hla saka inpâkin, A thilthaw ropuihai hril ro. 10 A hming thienghlim suong unla, LALPA zongtu lungril chu, Nasa takin hlim raw se. 11 LALPA chu zong rop unla, A hrâtna chu hni unla, Ama chu pan rop hlak ro. 12 Thil ropui a thawhai chu, Theinghil loin hre zing ro, Thilmak a thawhai po po, A rorêlhai po po khom. 13 A bawi Abraham suonhai, A thlang bìk Jakob thlahai, 14 Ama chu LALPA Pathien, Leihnuoi hmun kil tinrênga, Rorêltu a ni si a. 15 A thuthlunghai hrim hrim chu, Kumkhuoin a hriet zing a, Suon sâng tam tak ta dinga, A thupêkhai a hriet zing, 16 Abraham kuoma a thlung, Isak kuoma a tiem chu. 17 Chuong chu Jakob thlahai din, Dân hmangin a namnghet a, Israelhai ta dingin, Chatuon thuthlunga siemin, 18 "In chan le rochung dingin, Kanan ram pêng ka ti cheu"Tiin a lo tiem nghet a. 19 Mi tlawm te, ieng tham ni lo, Mikhuol el an ni lai khan, 20 Hnam tin laia vâkvaiin, Ram tinah an indar a. 21 Sienkhom hnam dang tu khomin, An neksawr a phal naw a, Anni leiin lalhai chu, Halin a zil tawl lem hlak: 22 "Ka hriek nâlhai tawk naw ro, Ka zawlneihai poi rêng rêng, In tawk ding an nawh" tiin. 23 Hnuoia chêng mi tinrênghai, LALPA kuomah hla sakin, A sandamna thu hrilin, Sunni tinin puong dar ro. 24 A ropuizie thu hrilin, Hnam tin lai puong dar unla, A thilmak thawhai khom chuMi tinrêng lai hril dar ro. 25 LALPA chu a ropui a, Inpâk tlâk takzet a na, Pathien dang po po nêkin, Ama ti tak ding a nih. 26 Hnam dang pathienhai ruok chu, Milem mei mei vong an na, LALPA chu vân siemtu a nih. 27 Ropuina le chawimawinan, Ama chu a'n huol vel a, Thilthawtheina le lawmnan, A Hmun Thienghlim chu a sip. 28 Hnam tin chi tina mihai, Ropuina le hrâtna hi, LALPA zàr a nih hrein, Chawimawina ama pe ro. 29 A hming ropuizie phuin, Chawimawina LALPA pein, A thienghlimna zàm velah, In thilpêkhai hung chawiin, LALPA chu hung chawibiek ro. 30 Leihnuoia chêng po pohai, A hmaa chun inthin ro!Hnuoi hi inhning lo dingin, Aman a rem nghet a nih. 31 Vânhai, hlim zài vawr unla, Hnuoiin lawm hla rem raw se; "LALPA chun ro a rêl ie"Ti raw hai se, hnam tin lai. 32 Tuifinriet le a sûnga Umhai khêk dur dur raw se. Ram le a sûnga umhai, Hlimin lawm seng raw hai se. 33 Ramngaw thinghai chen khomin, Lawm hla sakin khêk raw se. Hnuoi chungah ro rêl dingin, LALPA a hung mêk a nih. 34 LALPA chu a tha êm a, A kuomah lawmthu hril ro, Ngil a nei kumkhawtluongin. 35 "Aw LALPA kan Sandamtu, Hnam danghai lak a'nthokin, Nangman mi hung san suokin, Mi hung thuoi khawm tawl nawk rawh, I hming thienghlim inpâk a, Kan chawimawi theina ding che'n"Tiin nangni khêk suok ro. 36 LALPA, Israel Pathien chu, Chatuona inthok chatuon chenin, Inpâkin um pei raw se"tiin. Chuongchun, mi po chun "Amen, LALPA chu inpâkin um raw se" an lo ti a. 37 Chuongchun, Davida chun Asaf le a rawihai chu ni tina a tul le mamaw ang peia LALPA Thuthlung Bawm hmaa rongbawl zing dingin a sie a. 38 An rongbawlpui dingin Jeduthan naupa Obed-Edom le a rawihai mi sawmruk le pariet chu a sie bok a. Jeduthan le Hosa chu kotkhâr vêngtu an nih. 39 Thiempu Zadok le a thiempu chanpuihai chu Gibeon hmun sànga LALPA biekbûka rongbawl dingin Davida chun a sie a. 40 Anni chu LALPAN Israelhai kuoma Dàn a pêk ang thlapa zîng tieng le zân tienga LALPA biekbûka pumraw inthawina maichâma pumraw thilhlân inhlàn rop dinga ruot an nih. 41 Kumkhawtluonga LALPA hmangaina inpâktu dinga anni ruola an siehai chu Heman le Jeduthan le hming meu lama an thlang suokhai chu an nih. 42 Heman le Jeduthan hai chu tawtawrawt mûttu le dârbenthek bentu anni bâkah inpâkna hla thienghlim an sak changa rimawi tumtu an nih. Jeduthan naupahai chu kotkhâr vêngtu an nih. 43 Chuongchun, mi tin mani in tieng seng an kîr nawk a; Davida khom a sûnghai malsawm dingin a'n lawi ve ta a.

1 Chronicles 17

1 A lal ina Davida a um hnung chun zawlnei Nathan kuomah, "Hi taka hin kei sidar thing inah ka um a, LALPA Thuthlung Bawm hlak chu puon in elah a um si a" a ta. 2 Nathan chun Davida kuomah, "I ngaituo dàn ang tak chun thaw raw khai, LALPA chu i kuomah a um si a" a ta. 3 Chu zân chun Nathan kuomah LALPA thu a hung tlung a. 4 "Fe la, ka siehlaw Davida kuomah hieng ang hin hril rawh: 'LALPA chun hieng hin a hril: Nang chu ka umna ding in bawltu ding i ni nawh. 5 Aigupta rama inthoka Israelhai ka thuoi suoka inthok tu chen hin inah ka la um ngai naw a, puon in le biekbûkah ka um pei lem hlak a. 6 Israel mihai thuoia ka fepui lai khom khan thuoitua ka ruot tu khom sidar thinga Tempul mi bawlpêk dingin ka phût ngai nawh. 7 " 'Chuleiin, ka siehlaw Davida kuomah, 'Iengkim LALPAN hieng hin a tih: Beram tlatna hmuna beram i vêng lai chu ka mi Israelhai chunga lal dingin ka lâk suok che a. 8 I fena taphotah ka umpui che a, i hmèlmahai po po khom i hmaah ka tukdol vong ta a, tu hin khawvela lal hmingthang takin ka siem ding che a nih. 9 Ka mi Israelhai ta dingin hmun pêng ka ta, chu taka chun anni chu phun ka ta, anni puolin in nei tâng an ta, sukbuoi ni ta naw ni hai. A tîra inthoka mi rilohaiin an sawr de hlak ang khan sawr de ni ta naw ni hai. 10 Ka mi Israelhai chunga rorêltu ka ruothai chun a tîr phata inthokin an sawr de char char hlak a ni kha. Chun, i hmèlmahai po po suktlawm bok ka tih. Chu bâkah, LALPAN sûngkuo indinpêk a ti che ti ka hril che. 11 I nihai a kin phaa i thlatuhai kuoma i chawl pha khomin i thlahai ngei, i nauhai laia mi chu nangma thlâktu ding indinpêk ka ti che a, a lalram chu suknghet ka tih. 12 Ama chun in mi bawlpêk a ta, a lalthungpha chu kumkhuoin suknghet ka tih. 13 A pa nîng ka ta, ama chu ka naupa nîng a ta, ka hmangaina i hmaa inlal ka lâkpêk ang khan ama lakah ka hmangaina chu la hmang ngai hrim hrim naw ning. 14 Ka mihai le ka lalram enkoltu dingin kumkhuoin sieng ka ta, a lalthungpha chu kumkhuoin suknghet ka tih' a tih" tiin. 15 Chuong chun thu inhriettira a umhai chu Nathan chun Davida kuomah a hril vong a. 16 Chuongchun, lal Davida chu a lût a, LALPA hmaah a thung a, "Aw, LALPA Pathien, kei hi tu am ka ni a, ka sûnghai khom ieng am an ni hrim a, hieng chen chen i mi thuoi el hi? 17 Aw Pathien, hi khom hi i mithmua chu huntawk i la ti naw ang elin, i siehlaw sûngkuo la hung um dàn pei ding chen khom i hril a. Aw LALPA Pathien, mihriem laia chawimawi hlaw tak angin i mi cheibawl el chu a na maw! 18 "I siehlaw i chawimawina bâk hi ieng am Davida hin ngên ding dang ka la nei rop a? I siehlaw hi i hriet tlang vong si a. 19 Aw LALPA, i siehlaw thatna dingin i dit dàn ang takin hieng thil ropui tak hi thawin, i thutiem ropui tak chu i hung inhriettir ta a. 20 Kan hriet phàka chu aw LALPA, nangma ang hi tu khom an um naw a, nangma naw chu Pathien hrim hrim an um nawh. 21 Aigupta rama inthoka hming ser khopa i'n tlân suok, thil ropui tak tak le râpum tak tak thawa an hmaa hnamhai i hnot suokpêk i mi Israelhai anga an Pathien ngei inthok suoka a ta dinga a'n tlân suok hnam dang khawvela hin tu khom an um nawh. 22 I mi Israelhai chu i mihai ni kumkhuo dingin i siem ta a, aw LALPA an Pathien i hung ni tah ngei el. 23 "Chuongchun, tu hin aw LALPA, i siehlaw chungchâng thu le a sûnghai chungchâng thu i hril chu kumkhuoa dingin suknghet la, i tiem tah ang khan hlen ngei rawh. 24 I suknghet chun kumkhuoin i hming chawimawiin um a ta, mihaiin 'Iengkim LALPA, Israel chunga Pathien hi Israelhai Pathien a lo ni takzet el' ting an tih. Chuongchun, i siehlaw Davida sûngkuo chu i hmaah suknghetin um tâng an tih. 25 "Aw nang ka Pathien, i siehlaw kuomah sûngkuo i hung inngîrpèk ding thu i lo puong ta leiin i siehlaw hin i kuomah hieng thu hi ka hung hril ngam a nih. 26 Aw LALPA, nang chu Pathien i ni leiin hieng thil thahai hi thawpêk dingin i siehlaw hi thu i tiem a nih. 27 I mithmu ngeia i siehlaw sûnghai chu i hmaa kumkhuoa an um zing theina dingin lawm takin mal i lo sawm ta a; Aw LALPA, nangin mal i sawm tah chu kumkhuoin malsawmin um ngei a tih" tiin.

1 Chronicles 18

1 Chuong lai chun Davidan Filistinhai a bei a, a hne a, Gath le a se vel khuohai chu Filistinhai kuta inthokin a lâkpêk a. 2 Davida chun Moab-hai khom a hne a, a thu hnuoiah a sie a, sie an hung chawi hlak a. 3 Chu bâkah, Zoba lal Hadadezer chun Hamat-a inthoka Eufretis vadung hrûl hmar tieng chen nei tuma a bei leiin Davida chun a rûn a. 4 A tawlailir sângkhat, tawlailir khaltu mi sângsari le sipai sînghni a manpèk a. Sakor zakhat ti chauh naw chu an zaper tha a satpêk vong a. 5 Zoba lal Hadadezer san dinga Damaskaa inthoka hung Aram sipaihai chu Davidan sînghni le sânghni a lo that a. 6 Aramhai khawpui Damaskaa chun optu sipai a sie a, Aramhai chu a lalna hnuoiah an lût a, sie an hung chawi a. Davida chu a fena taphotah LALPAN hnèna a'n changtir pei a. 7 Davida chun Hadadezer ofisarhai rangkachak phaw po po chu a lâk khawm a, Jerusalemah a hung chawi a. 8 Chun, Hadadezer khuo Teba le Kun-a inthokin Davida chun dâr tam tak a hung hawn bok a, chuonga inthok chun a nih a hnungin Solomonin dâr tuizèng dâm, dâr ban pahni dâm le bûr le bèl tam tak a siem chu. 9 Hamat lal Tou-in Davidan Zoba lal Hadadezer sipai po po a hne tah ti a lo hriet a. 10 Ama le khoma lo indo tah hlak Hadadezer a hne lei chun chibai bûk le lawmpui dingin Tou chun a naupa Hadoram chu tangkaruo bêl dâm, rangkachak bêl dâm le dâr bêl dâm inchawitir teuin Davida kuomah a tir a. 11 Chuong thilpêkhai chu hnam dang lal a hne tah Edom hai, Moab hai, Amon hai, Filistin hai le Amalek haia inthoka a râllâkhai a'n hlàn hlak ang bokin LALPA kuomah a'n hlàn a. 12 Zeruia naupa Abisai chun Chi Ruomah Edom mi sîngkhat le sângriet a that a. 13 Edom rama chun optu sipai a sie a, Edom mi po po chu Davida thu hnuoiah an hung um ta a. Davida chu a fena taphotah LALPAN hnèna a'n changtir pei a. 14 Davida chu Israel ram po poa lal a hung ni ta a, mipuihai chungah ro indik tak le fel takin a rèl a. 15 Zeruia naupa Joab chu sipai lu tak a na; Alihud naupa Jehosafat chu chanchin ziektu a na; 16 Ahitub naupa Zadok le Abiathar naupa Ahimelek hai chu thiempu an na; Savsa (Seraia) chu ziektu a na; 17 Jehoiada naupa Benaia chu Keret mihai le Pelet mihai hotu a na; Davida naupahai chu lal kuoma thurawn petu an nih.

1 Chronicles 19

1 Chuong thil hnunga chun Amonhai lal Nahas chu a thi a, a naupa Hanun chun a lalna chu a hung hluo ta a. 2 Davida chun, "A pain a mi lunginsiet ang bokin Nahas naupa Hanun chu lunginsiet vêng ka tih" a ta, a pa a sunpuina thu hril dingin a aiaw mi a tir a. 3 Amon thlahai ram an va tlung chun Amon milunhai chun Hanun kuomah, "Davida hin i pa a'n za leia sunpuina thu hril dinga mi a hung tir ni i ring am a ni? A pei thlak theina ding chea i khuo thlithlai ding le enthla dinga a mihai a hung tir a ni naw maw?" an ta. 4 Chuongchun, Davida mi hung tirhai chu Hanun chun a man a, an khâkhmul a vaw kolpêk a, an silfênhai chu an mongtam chena insìngin a tanpêk a, a'n fetir ta a. 5 Chuonga muolphona an tuok thu Davida an hril chun a tuok dingin mi a tir a, anni chu an inzak hle a. Lal chun, "In khâkhmul inthang sei hma khat chu Jeriko-ah um zing unla, chu zoah hung chau ro" tiin thu a'n cha a. 6 Amon mihai chun Davida hnàrah thil rimsie an lo inchang tah ti an hung hriet chun Hanun le Amon mihai chun Aram Naharaim (Mesopotamia hmar thlang) le Aram Maaka le Zobaa inthoka tawlailir le tawlailir khaltuhai ruoina dingin tangkaruo kilogram sîngthum le sângli an thon a. 7 Tawlailir le a khaltu sîngthum le sânghni an ruoihai le Maaka lal le a sipaihai chu an hung a, Medeba bulah an inkul a, Amonhai khomin an khawpuihaia inthokin an mihai an khawm a, indo dingin an inthok suok a 8 Davidan chu chu a hrietin Joab le a mihai, râl do thiemhai po po chu a tir a. 9 Amon mihai chu an hung suok a, kul kotkhâr bula chun thanghmun an khaw a, lal dang hunghai ruok chu a hranin phûlah an um a. 10 Joab chun a hma tieng le a hnung tieng an hung bei ding ti a hriet leiin Israel sipaihai laia a huoisen fâl thal mi iemani zât Aram mihai bei dingin a thlang suok a. 11 A dang po chu a unaupa Abisai inrawina hnuoiah Amon thlahai bei dingin a sie a. 12 Joab chun, "Aram mihai kan ngam naw chun mi hung san unla, Amon thlahai in ngam naw leh hung san kan ti cheu. 13 Hrât takin um unla, ei mihai le ei Pathien khuohai sanin huoisen takin bei ei tiu. LALPAN tha a ti ang peiin thawng a tih" a ta. 14 Chuongchun, Joab le a rawihai chun Aram mihai chu an bei a, an hmaa chun an tlânse dur dur a. 15 Amon thlahaiin Aram mihai an tlânsie ti an hriet chun anni khom Abisai hmaa chun an tlânse ve ta a, khuoa chun an lût a. Joab chun Jerusalem tieng a kîrsan ta a. 16 Chun, Aram mihaiin Israelhai an ngam nawh ti an hmu chun mi an tir a, Eufretis vadung khela mi Aram mihai chu an inpung khawm nawk a, chuonghai chu Hadadezer sipai kawmandar Sobak chun a hung inrawi a. 17 Chu thu Davida an hril chun Israel mihai po po a khawm a, Jordan an kàn a, indo dingin thanghmun an lo khaw a, an lo bei a. 18 Israelhai hmaa chun an tlânse a, Davida chun an tawlailir khaltu mi sângsarib bâkah kea lawn pawl sipai sîngli a that a, an kawmandar Sobak khom a that bok a. 19 Hadadezer hnuoia lalhaiin Israelhai an ngam nawh ti an hmu chun Israelhai chu inremna an siempui a, an kut hnuoiah an um ta a. Chuongchun, Aramhai chun Amon thlahai chu an thangpui ngam nawk ta ngai nawh.

1 Chronicles 20

1 Thâl lai, lalhai indo dinga an suok lai chun Joab-in a sipaihai a thuoi a, Amonhai ram chu a suksiet a, Raba-ah a fe a, a'n huol a, Davida ruok chu Jerusalemah a um a. Joab chun Rabat chu a bei a, a suksiet vong a. 2 Davida chun an rangkachak lallukhum kilogram sawmthum le palia rik, lunghlua chei chu a lâk a, chu chu Davida an inkhumtir a, khawpuia inthok chun râllâk sum tam tak a lâk bok a. 3 A khaw mihai chu a man a, thing attua dâm, lei inlettua dâm le thing phûrtua dâm a sor a. Chuong ang chun Amon thlahai khuo po poah Davida chun a thaw a. Chu zoah Davida le a sipaihai chu Jerusalem tieng an kîr nawk ta a. 4 Chuong hun lai chun Filistinhai leh Gezer-ah an indo nawk a. Chu tum chun Husat mi Sibekai chun mi lien Rafahai thla laia mi Sipai (Safa) chu a that a, Filistinhai chu an tukdol ta a. 5 Chuong laia an indonaa bok chun Jair naupa Elhanan chun Git mi Goliat unaupa Lami, a fei ngul khom puonkhawngna themtleng tiet zet chu a that bok a. 6 Chun, Gath hmuna an indonaa chun Rafahai thlaa mi bok, pa lien tak el, kut khing hni ve vea kutpâr paruk ve ve le ke khing hnia kepâr paruk ve ve, arêngin sawmhni le pali nei, a um a. 7 Ama chun Israelhai a deusaw a, Simea naupa Jonathan, Davida unaupa chun a that a. 8 Chuonghai chu Gath-a Rafa thlahai an na, Davida le a mihai kutah an thi ta vong a nih.

1 Chronicles 21

1 Setanin Israelhai chu a bei a, Israelhai chu tiem dingin Davida lungril a chok tho a. 2 Chuongchun, Davida chun Joab kuomah, "Fe unla, Dan-a inthoka Beersheba chen inkâra Israel mi, râl do thei chin ieng zât am an um ti ka hriet theina dingin va tiem vong la, hung ripawt nawk rawh" a ta. 3 Joab chun lal kuomah, "LALPA i Pathien chun i mipuihai a lêt zain sukpung raw se. Ka pu le ka lal, chuonghai po po chu i khuo le tui an ni vong naw am a ni? Ieng leia ka pu, lal hin hieng thil hi a thaw châk am a na? Ieng leiin am Israelhai chungah thiemnaw changna chu a hung intlungtir ding a na?" a ta. 4 Joab le sipai kawmandarhai thu nêkin lal thu chu a hrât lem si leiin Israelhai tiem dingin lal chu a suoksan a, Israel ram po po a fang a, Jerusalemah a hung kîr nawk a. 5 Joab chun Israel mi râl do thei, kawlhnàm chawi chin zât a ripawt chu maktaduoi khat le nuoi khat le Judai rama mi, kawlhnàm chawi chin mi nuoili le sîngsari an nih. 6 Levihai le Benjaminhai ruok chu a tiem sa ve nawh, lal thupêk chu Joab theida zawng tak a ni si a. 7 A thilthaw chu Pathien mithmuah thil suol a ni leiin Israel mihai a hrem a. 8 Davida chun Pathien kuomah, "Thil suol nasa tak ka lo thaw a nih. Sienkhom i siehlaw thiemnaw changna hi ngaidam hram rawh. Thil invêtthlâk tak ka lo thaw si a" a ta. 9 LALPA chun Davida zawlnei Gad kuomah, 10 "Fe la, hieng ang hin Davida hril rawh: 'Hi hi LALPA thu chu a nih: thil kong thum thlang ding ka pêk che laia mi hi i chunga tlung dinga i nuom tak pakhat thlang rawh' a tih" tiin. 11 Chuongchun, Gad chu Davida kuomah a fe a, "LALPAN hieng hin a hril: 12 'I rama hin kum saric tàm intlâktir am, thla thum sûng i hmèlmahaiin chem tum le an hnot lênga um am, an naw leh i rama ni thum sûng LALPA kawlhnàm, hripui inlêngtir a, vântirkoin Israel ram hmun tin a suosam, a ieng am i thlang a? Tu hin inngaituo la, a mi tirtu kuoma ka hril ding thu tlûkna siem la, chu chu mi hril rawh" a ta. 13 Davida chun Gad kuomah, "Ka bei a va hang dong ngei de! LALPA kutah tlu lût phot el ka tih, zangaina a hau hle si a. Mihriem kuta chu mi pe lût naw hram rawh" a ta. 14 Chuongchun, Israel mihai chungah LALPAN hripui a'n lèngtir a, Israel mi sîngsari an thi a. 15 Chun, vântirkoin sukse dinga Jerusalem tieng bân a phar lai chun, an siet tuok ding laka chun LALPA lung a na leiin kut a'n hnûkkîrtir a, mipuihai hremtu vântirko kuoma chun, "A hun tah! I kut kei kîr ta rawh" a ta. Chu lai chun LALPA vântirko chu Jebu mi Arauna hrizawla ngîr a nih. 16 Davida chu a hang ngha a, hnuoi le vân inkâra vântirko ngîr, a kuta kawlhnàm chawi a, Jerusalem chunga inlet zing chu a hmu a. Chu phing leh saiip sila ngîr Davida le a upahai chu hnuoi sikin an bokkhup a. 17 Davida chun LALPA kuomah, "Râl do thei chin mi tiem dinga thupetu chu keima hi ka ni naw am a ni? Kei hi thilsuol thawa poi tawktu chu ka ni a, mi danghai hi chu beram ang mei mei an nih. Ieng am anni hin suol thaw an nei hrim a? Aw LALPA ka Pathien, i kut chu kei le ka sûnghai chunga hin thlâk lem la, hripui hi i mihai chungah inlêngtir zing ta naw raw khai" a ta. 18 Chuongchun, LALPA vântirko chun zawlnei Gad chu Davida kuomah a tir a, "Fe tung la, Jebu mi Arauna hrizawlah LALPA ta dingin maichâm hang siem rawh" tiin a hang hril a. 19 LALPA hminga Gad-in thu a pêk chu zawmin, Davida chu a fe tung a. 20 Chun, Arauna-in bu a chil lai chun a hang ngha a, LALPA vântirko a hmu a, a bula um a nauhai pali chu an inbi a. 21 Davida chun a va pan a, Arauna chun a hei hmu phing leh hrizawla inthok chun a hung suok a, a hmaah hnuoi sika bokkhupin lal chu chibai a bûk a. 22 Davida chun a kuomah, "Mipui chunga hripui inlêng hi a re theina dingin i hrizawla hin LALPA ta dingin maichâm siem ka tih, a man tlingin min chawktir raw khai" a ta. 23 Arauna chun Davida kuomah, "Ka pu, ka lal chun awm a ti ang ang chu la raw se. En ta, pumraw thilhlâna ding bawngchal le thing hmang ding hrizawl hmangruohai le bu le bâl thilhlâna hmang ding huit khom pêng ka ti che. Hieng po po hi keimàn tum vong ka tih" a ta. 24 Sienkhom lal chun Arauna kuomah, "Ni lo e, a man indik tak pêng ka ti che. LALPA ta dinga thilhlân dingin i ta a thlawnin la nawng ka tih; a man pe loin pumraw thilhlân khom inhlàn bok naw ning" a ta. 25 Chuongchun, hrizawl hmun inchawkna dingin Davida chun Arauna chu rangkachak tangkaruo shekel zarukd a pêk a. 26 Davida chun maichâm a siem a, pumraw thilhlân le inremna thilhlân hai chu inhlânin LALPA chu a ko a, LALPA chun vâna inthokin a hung don a, mei a zuk tir a, maichâma pumraw thilhlân chu a kang hmang ta a. 27 LALPA chun vântirko chu thu a pêk a, a kawlhnàm chu a paiah a thun nawk ta a. 28 Jebu mi Arauna hrizawla chun LALPAN a hung don ngei a nih ti Davida'n a hmu chun inthawinahai a'n hlàn a. 29 Chuong lai chun thlalèra Mosien LALPA biekbûk le pumraw inhlànna maichâm a siem chu Gibeon khuo hmun sànga la um a nih. 30 Sienkhom LALPA vântirko kawlhnàm tuor a'n lau leiin Pathien rawn dingin chu hmuna chun Davida a fe ngam naw a nih.

1 Chronicles 22

1 Davida chun, "LALPA in le Israelhai ta dinga pumraw inthawina maichâm chu hi hmuna ngei hin a um ding a nih" a ta. 2 Chuongchun, Davidan Israel rama hnam dang umhai chu a ko khawm a, LALPA in bawlna ding lung sertuah a sor tawl a. 3 A tuol inhuonna kotkhâra hmang ding thîrkil dâm, a man nghetna ding kopza dâm le hmangruo dang dang siemna dingin thîr tam tak le dâr tam tak, bûk seng lo hiel chu a pêk a. 4 Sidon le Tura mihaiin sidar thing tam tak an hung thon a, sidar thing a pêk suok zât khom inchik seng lo a nih. 5 Davida chun, "Ka naupa Solomon hi a la naupang a, chinchâng a la hriet tlawm a, LALPA in ding a bawl ding hlak chu hnam tin mithmua mawi ropui le hmingthang tak ding a ni si leiin châk ka lo buotsaipui lawk ding a nih" a ta, a thi hmain nasa takin a lo sêk khawm hman a nih. 6 A naupa Solomon chu a ko a, LALPA Israelhai Pathien ta ding Tempul bawlpêk dingin thu a pêk a. 7 Davida chun Solomon kuomah, "Ka naupa, LALPA ka Pathien hminga ding in bawl ka lo lungril hlak a. 8 Nisienlakhom, LALPA thu ka kuomah a hung tlung a, 'Indonaah i thang rawn a, thisen tam tak i lo insuo ta a. Hi hnuoia hin ka mithmuah thisen i'n suo rawn ta leiin ka hminga ding in bawl thei naw ti nih. 9 Ngai ta, inremna dit mi naupa a hming Solomon pêng ka ti che a, a hming hi 'muongna' ti a ni ang hrimin, a vêl rama a hmèlmahai po po lakah râlmuongna pêng ka ta, ama inlal sûngin inremna le muongna inlêng a tih. 10 Ama chun ka hminga ding in chu bawl a tih. Ka naupa nîng a ta, kei chu a pa nîng ka tih. Israelhai chunga a ram lalthungpha chu kumkhuoa dingin suknghet ka tih' tiin 11 "Tuhin ka naupa, LALPA chu i kuomah um sien la, hmuingil pei la, LALPA i Pathienin a in bawl dinga a ti che hi hung bawl hlawtling ngei rawh. 12 Israelhai chunga rorêltuah LALPAN a sie pha che leh varna le hriet thiemna pe sien la che, chuongchun LALPA i Pathien dàn chu zawm thei i tih. 13 Israelhai ta dinga thuruothai le Dânhai LALPAN Mosie a pêk kha i zawm phot chun hmuingil pei i tih. Hrât tak le huoi takin um rawh; ti naw la, zâm bok naw rawh. 14 "Inrim takin LALPA in bawlna dingin rangkachak kilogram maktaduoi thum le nuoi li le tangkaruo kilogram maktaduoi thum le nuoi li, dâr le thîr khom bûk seng lo le thing le lung châkhai ka lo lâk khawm ta a, sienkhom i la lâk sa ngai a tih. 15 Sinthawtu tam tak, thing âttu hai, lung sertu hai le mi themthiem, iengkima hmang thei i nei teu ta a, 16 rangkachak le tangkaruo, dâr le thîr ser thiem tak tak i nei teuh ta bok leiin bawl tan nghal el ta rawh, LALPA chu i kuomah um raw se" a ta. 17 Chuongchun, Davida chun Israel hnama lukhàituhai po po chu a naupa Solomon thangpui dingin thu a pêk a. 18 "LALPA in Pathien chu in kuomah a um a ni naw am a ni? Sîr tinah râlmuongna a pêk cheu a ni naw am a ni? Hi rama mihai hi ka kutah a hung inhlàn ta a, ram hi LALPA le a mipuihai thu hnuoia um a ni tah. 19 Chuongchun, LALPA in Pathien tieng nghain, lungril le thlarauin a rong bawl unla, LALPA Thuthlung Bawm le Pathien ta dinga hmangruo thienghlimhai chu LALPA hminga ding Tempul in bawla chun in lâk lût vak theina dingin Tempul bawl chu tan ta ro" a ta.

1 Chronicles 23

1 Davida chu sawt tak a dam a, a hung upat hle hnung chun a naupa Solomon chu Israelhai lalah a siem a. 2 Israel thlahai lukhàitu po po le thiempuhai le Levi thlahai chu a ko khawm a. 3 Kum sawmthum le a chung tieng Levi thlaa mi pasal an tiem po po chu sîngthum le sângriet an nih. 4 Chuong laia mi sînghni le sângli chu LALPA in bawltuhai inrawitu ding an na, sângrukhai chu hotu le rorêltu ding an nih. 5 Mi sângli chu kotkhâr vêngtu ding an na, sângli dang chu LALPA inpâkna dinga lalin rimawi hmangruo a pêkhai tumtu ding an nih. 6 Davida chun Levihai chu Gerson pawl, Kohat pawl le Merari pawlin a the tawl a. 7 Gerson naupahai chu Ladan le Simei an nih. 8 Ladan naupahai chu Jehiel, Zetham le Joel an nih. 9 Simei naupahai chu Selemot, Haziel le Haran an nih. Chuonghai chu Ladan sûngkuoa lukhàituhai an nih. 10 Chun, Simei naupahai chu Jahat, Ziza (Zina), Jeus le Beria an nih. Chuong mi palihai chu Simei naupahai an nih. 11 Jahat chu a upa tak a na, Ziza chu a pahnina a na, Jeus le Beria hai chun nau an hau naw leiin sin insem pha leh sûng khat angin an tiem hlak. 12 Kohat naupahai chu Amram, Izar, Hebron le Uziel, an rêngin pali an nih. 13 Amram naupahai chu Aron le Mosie an nih. Aron le a thlahai chu LALPA bieknaa rimtui rawtu, in thawina thilhlânhai inhlàna hmangruo thienghlim enkoltu le LALPA hminga mipuihai ta dinga malsawm hriltu dinga ser hrang an nih. 14 Pathien mi Mosie thlahai chu Levi chihai laia zêl sa an nih. 15 Mosie chun naupa Gersom le Eliezar a nei a. 16 Gersom naupahai laia upa tak chu Subael a nih. 17 Eliezar thlahai laia upa tak chu Rehabia a nih. Eliezer chun naupa dang a nei naw a, sienkhom Rehabia chun naupa tam tak a nei. 18 Izar naupahai laia upa tak chu Selomot a nih. 19 Hebron naupahai laia upa tak chu Jeria, a dottu Amaria, a pathumna Jahaziel le a palina Jekameam an nih. 20 Uziel naupahai chu a upa lem Mika a na, a naupang lem Isia a nih. 21 Merari naupahai chu Mahli le Musi an nih. Mahli naupahai chu Eleazar le Kisa an nih. 22 Eleazar chun naupa nei loin naunu chauh a nei a, an laichin Kisa naupain nuhmeiah a nei a. 23 Musi naupahai chu Mahli, Eder le Jerimot, an rêngin pathum an nih. 24 Chuonghai po chu Levi thla, an sûngkuo hming inziek dàn anga sûngkuo lukhàitu, LALPA ina rongbawla thang, kum sawmhni chin chung tieng an tiem pohai chu an nih. 25 Davida ngeiin, "LALPA Israel Pathien chun a mihai muongna pe a, ama chu kumkhuoa Jerusalema cheng dinga a hung tah leiin, 26 Levihai khomin biekbûk zawna, bûr le bêlhai an som pei ngai ta naw nih" a lo ti hrim a. 27 Davida thupêk nuhnung tak ang dungzuiin Levi chia mihai chu kum sawmhni an tlingin rongbawla ko thei dingin an hming ziek vong a nih. 28 Levihai sinthaw chu Pathien Tempula rongbawl, Aron nauhai thangpui dâm, Tempul tuolzawl le pindan sûnga thil serhai po po vong thienghlim le LALPA ina rongbawlna dang hrim hrima inhmang a nih. 29 Bei sie ding dâm, bu le bâl inhlàna hmang ding beiphit indip tak buotsai dâm, chol thang lo bei pèr amanih, bêla ur amanih zeu amanih dâm, indik thlapa thil bûk le inkhi dâm a nih. 30 Chun, tûk tin le zân tieng zâta LALPA kuoma lawmthu hril le ama inpâk dâm, 31 chawlnia dâm, thla thara dâm, hunbi nei kût hrang hranga an thaw dinga ruot ang peia LALPA kuoma pumraw thilhlan inhlàn rop dâm, 32 Intuokna Puon in enkol dâm, Hmun Thienghlima biekbûk enkol dâm, LALPA ina rongbawl, an unau Aron naupahaiin thaw ding an ruot ang pei thaw dâm chu an sin a nih.

1 Chronicles 24

1 Aron thlahai pawl hrang hranga an insiem dàn chu hieng ang hi a nih: Aron naupahai chu Nadab, Abihu, Eleazar le Ithamar an nih. 2 Nadab le Abihu chu thla nei loin an pa nêkin an thi hmasa lem a, Eleazar le Ithamar hai chun thiempu sin an thaw a. 3 Eleazar thlaa mi Zadok le Ithamar thlaa mi Ahimelek hai thangpuiin Davida chun an rongbawl dàn ding ang peiin a pawl pawlin a the dar a. 4 Ithamar thlahai nêk chun Eleazar thlaa mi chu sûngkuo lukhàitu an tam lem dai leiin, chuong ang dungzui chun an the a, Eleazar thlahai chu sûngkuo sawm le parukin an the a, Ithamar thlahai chu sûngkuo parietin an the bok a. 5 Eleazar le Ithamar thlahai lai chun tempula hotu le Pathien rongbawlna tienga hotu an um ve ve si leiin hlei nei bik um loa rong an bawl theina dingin an rongbawl dàn ding indotin thumvawrin an sem a. 6 Lal le thoktuhai le thiempu Zadok le Abiathar naupa Ahimelek hai hmaa chun thum chu Eleazar sûngkuo le Ithamar sûngkuo inkâra chun inkàrthlâkin an vawr a, Levi mi, lekha ziektu, Nethanel naupa Semai chun a lo ziek thlàk pei a. 7 An vawr hmasa tak chu Jehoiarib chungah a tlu a, a voi hnina chu Jedaia chungah, 8 a voi thumna Harim chungah, a voi lina Seorim chungah, 9 a voi ngana Malkija chungah, a voi rukna Mijamin chungah, 10 a voi sarina Hakoz chungah, a voi rietna Abija chungah, 11 a voi kuona Jesua chungah, a voi sawmna Sekania chungah, 12 a voi sawm le voi khatna Eliashib chungah, a voi sawm le voi hnina Jakim chungah, 13 a voi sawm le voi thumna Hupa chungah, a voi sawm le voi lina Jesebeab chungah, 14 a voi sawm le voi ngana Bilga chungah, a voi sawm le voi rukna Imer chungah, 15 a voi sawm le voi sarina Hezir chungah, a voi sawm le voi rietna Hapizez chungah, 16 a voi sawm le voi kuona Pethahia chungah, a voi sawmhnina Jehezkel chungah, 17 a voi sawmhni le voi khatna Jakin chungah, a voi sawmhni le voi hnina Gamul chungah, 18 a voi sawmhni le voi thumna Delaia chungah, a voi sawmhni le voi lina Maazia chungah a tlu a. 19 Chu chu LALPA, Israelhai Pathienin an pu Aron kuoma thu a lo pêk anga amain LALPA tempula rong an bawl dàn ding a lo ruot chu a nih. 20 Hienghai khom hi Levi chihai laia sûngkuo lukhàitu an nih: Amram nauhai lai Subael; Subael nauhai lai Jedeiah; 21 Rahabia nauhai lai Isia; 22 Izar-hai lai Selemot; Selemot nauhai lai Jahat; 23 Hebron naupahai lai a hmasa takah Jeria, a dotah Amaria, a pathumnaah Jahaziel, a palinaah Jekameam; 24 Uziel nauhai lai Mika; Mika nauhai lai Samir; 25 Mika unauhai lai Isia; Isia nauhai lai Zekaria; 26 Merari nauhai lai Mahli, Musi le Jazia; 27 Jazia nauhai lai Beno, Soham, Zakur le Ibri; 28 Mahli naupa Eleazar, nau pasal nei loa um; 29 Kisa nauhai lai Jerameel; 30 Musi nauhai lai Mahli, Eder le Jerimot. Chuonghai po chu Levi thlahai laia sûngkuo lukhàituhai chu an nih. 31 An unau, Aron thlahai thaw dàn angin an sûngkuo lukhàitu tak le a naupang tak chen khom rong an bawl dàn ding hrietna dingin thum an vawr hlak a, chu chu lal Davida hai, Zadok hai, Ahimelek hai, thiempuhai le Levi sûngkuoa lukhàituhai mithmuah an thaw hlak.

1 Chronicles 25

1 Tingtang hai, perkhuong hai dârbenthek hai tuma chawibiek rongbawlnaa inhmang bìk dingin Davida le a sipai kawmandarhai chun Asaf hai, Heman hai le Jeduthun hai naupahai chu an thlang suok a, chuonghai chu: 2 Asaf nauhaia inthokin Zakur, Josefa, Nethania le Asarela an nih. Lal inrawina hnuoia chawibiek rongbawlna nei hlak Asaf chu anni inrawitu a nih. 3 Jeduthun nauhai chu Gadalia, Zei, Jesaia, Simei, Hasabia le Matithia, an rêngin paruk an nih. LALPA kuomah lawmthu hrila, tingtang leh an inpâk huna chawibiek rongbawlna thuoitu an na, an pa Jeduthun chu anni inrawitu a nih. 4 Heman nauhai chu Bukia, Matania, Uziel, Subael le Jerimot; Hanania, Hanani, Eliatha, Gidalti le Romamti-Ezer; Josbekasa, Malothi, Hothir le Mahaziot an nih. 5 Hienghai po po hi lal zawlnei Heman naupahai an nih. Ama chu Pathienin chawisâng dinga a tiem a ni leiin naupa sawmpali le naunu pathum a pêk. 6 An rêng chun an pa rawiin dârbenthek le perkhuong le tingtang tuma hla le rimawi remin Pathien inah rong an bawl a. Asaf hai, Jeduthun hai le Heman hai ruok chu lalin a ruot an nih. 7 An tam tieng chu, an unauhai leh hla sak le rimawi tum inchûk lai mêk le a thiem ta sa po chu, zahni le sawmriet le pariet an nih. 8 A chin a lien, inchûk lai le zirtirtu khom ni hai sien, an sinthaw ding seng enna dingin thum an vawr a. 9 Thumvawr hmasa tak chu Asaf naupa Josefa chungah a tlu a, ama le a naupahai le a sûnghai chu sawm le pahnih an nih. A voi hnina chu Gedalia le a unauhai le naupahai sawm le pahnihai chungah; 10 a voi thumna chu Zakur le a unauhai le naupahai sawm le pahnihai chungah; 11 a voi lina chu Izri (Zeri) le a unauhai le naupahai sawm le pahnihai chungah; 12 a voi ngana chu Nethania le a unauhai le a naupahai sawm le pahnihai chungah; 13 a voi rukna chu Bukia le a unauhai le naupahai sawm le pahnihai chungah; 14 a voi sarina chu Jesarela le a unauhai le a naupahai sawm le pahnihai chungah; 15 a voi rietna chu Jesaia le a unauhai le naupahai sawm le pahnihai chungah; 16 a voi kuona chu Matania le a unauhai le a naupahai sawm le pahnihai chungah; 17 a voi sawmna chu Simei le a unauhai le naupahai sawm le pahnihai chungah; 18 a voi sawm le pakhatnaa chun Azarel le a unauhai le nauhai sawm le pahnihai chungah; 19 a voi sawm le voi hninaa chun Hashabia le a unauhai le nauhai sawm le pahnihai chungah; 20 a voi sawm le voi thumnaa chun Subael le a unauhai le naupahai sawm le pahnihai chungah; 21 a voi sawm le voi linaa chun Mathithia le a unauhai le naupahai sawm le pahnihai chungah; 22 a voi sawm le voi nganaa chun Jerimot le a unauhai le naupahai sawm le pahnihai chungah; 23 a voi sawm le voi ruknaa chun Hanania le a unauhai le naupahai sawm le pahnihai chungah; 24 a voi sawm le voi sarinaa chun Josbekasa le a unauhai le naupahai sawm le pahnihai chungah; 25 a voi sawm le voi rietnaa chun Hanani le a unauhai le naupahai sawm le pahnihai chungah; 26 a voi sawm le voi kuonaa chun Malothi le a unauhai le naupahai sawm le pahnihai chungah; 27 a voi sawmhninaa chun Eliatha le a unauhai le naupahai sawm le pahnihai chungah; 28 a voi sawmhni le voi khatnaa chun Hothir le a unauhai le naupahai sawm le pahnihai chungah; 29 a voi sawmhni le voi hninaa chun Gidalti le a unauhai le naupahai sawm le pahnihai chungah; 30 a voi sawmhni le voi thumnaa chun Mahaziot le a unhai le naupahai sawm le pahnihai chungah; 31 a voi sawmhni le voi linaa chun Romamti-Ezer le a unauhai le naupahai sawm le pahnihai chungah a tlu a.

1 Chronicles 26

1 Kotkhâr vêngtu pawlhai chu: Kora thlahaia inthoka mi chu Asaf naupahai laia pakhat Kore naupa Meselemia a nih. 2 Meselemia naupahai chu a upa tak Zekaria, a dottu Jediael, a pathumna Zebadia, a palina Jatniel, 3 a pangana Elam, a parukna Jehohanan le a pasarina Eliehoenai an nih. 4 Obed-Edom naupahai chu a upa tak Semaia, a dottu Jehozabad, a pathumna Joah, a palina Sakar, a pangana Nethanel, 5 a parukna Amiel, a pasarina Isakar le a parietna Peulethai an nih. Ama chu Pathienin mal a sawm a nih. 6 A naupa Semaia naupahai khom mi thei tak vong le anni sûngkuoa lukhàitu an nih. 7 Semaia naupahai chu Otni, Refael, Obed le Elzabad an na; a unauhai Elihu le Semakia khom mi thei tak an nih. 8 Chuonghai chu Obed-Edom thla, a naupahai le unauhai, rongbawlna konga mi hrât le thei tak tak, an rêngin mi sawmruk le pahni an nih. 9 Meselemia khomin naupa le unau sawm le pariet, mi thei tak tak vong a nei a. 10 Merari thlaa mi Hosa naupahai chu Simri (a upa tak a ni nawa chu a pain naulutîr nina a pêk a nih), 11 a dottu Hilkia, a pathumna Tabalia, a palina Zekaria hai an na, a naupahai le unauhai chu an rêngin sawmpathum an nih. 12 Chuong ang chu an lukhàituhai hmanga an unau danghaiin an thaw hlak ang boka LALPA tempula kotkhâr vêng sin chu thaw dinga vêngtu pawl an siemhai chu an nih. 13 A chin a lien, an sûngkuo zir ang peiin kotkhâr tina diuti ding chu thum an vawr a. 14 Thum an vawr chun suo tieng kotkhâr chu Meselemia chanah a tlu a. A naupa, rorêltu var tak Zekaria dingin thum an vawr nawk a, hmar tieng kotkhâr chu a chang a. 15 Sim tieng kotkhâr chu Obed-Edom chanah a tlu a, thil sie khawmna in kot chu a nauhai chanah a tlu bok a. 16 Thlang tieng kot le a chung tienga Saleket kotkhâr vêng chu Supim le Hosa chanah a tlu bok a. Vêngtuhai vèng sûng ding le an inthlâk hun ding chu an ruot vong a. 17 Suo tieng kotah ni tin Levihai paruk, hmar tieng pali, sim tieng pali, thil sie khawmna kudamah pahni ve ve, an diuti a. 18 Thlang tieng in inhuon sûnga dingin a lûtnaah mi pali, a huon sûngah mi pahni an diuti bok a. 19 Chuong ang chu a nih kotkhâr vêngtu pawla Kora thlahai le Merari thlahai an inthè dàn chu. 20 Chun, Pathien ina rosum siekhawmna le Pathien kuoma thil inhlânhai siekhawmna in chu an unau Levihai bokin an vêng a. 21 Chuonghai chu Ladan thlahai, Ladan sûngkuoa lukhàituhai, Gerson mi tia hriet Jehieli le a naupahai Zetham le Joel hai an nih. 22 LALPA tempula sum sie khawmna in vongtu an nih. 23 Aram mihai, Izar mihai, Hebron mihai le Uziel mi haia inthokin: 24 Mosie naupa Gersom naupa Subael chu sum tieng enkoltu lu tak a nih. 25 Chun, Gersom unaupa Eliezar naupa chu Rehabia a na, chu naupa chu Jesaia a na, chu naupa chu Joram a na, chu naupa chu Zikri a na, Zikri naupa chu Selomit a nih. 26 Selomit le a unauhai chu lal Davida le an sûngkuoa lukhàitu sipai sângkhat chunga le zakhat chunga kawmandar hai le kawmandar hrang hrang haiin râllâk sum hmun thienghlima an hung inhlân po po siekhawmna in enkoltu le vongtu an nih. 27 Râllâk sum thenkhat chu LALPA in siemna dinga an inhlàn a nih. 28 Zawlnei Samuel hai, Kisa naupa Saula hai, Nera naupa Abner hai, Zeruia naupa Joab hai le mi dang dangin an inhlàn ta po po enkoltu le vongtu chu Selomit le a unauhai an nih. 29 Izar mi Kenania le a naupahai chu tempul puo tieng sina inhmang, Israel ram sûnga hotu le rorêltuhai an nih. 30 Hebron mi Hasabia le a unauhai, mi huoisen sângkhat le zasarihai chu Jordan vadung thlang tieng ram optuah an sie a, sakhuo tieng thu le vântlâng thil ngaituo hlaktu dinga ruot an nih. 31 An sûngkuo chanchina a'n ziek dânin, Hebron mihai thuoitu tak chu Jeria a nih. Davida inlala inthoka kum sawmlinaah Hebron thlahai chanchin an sui suok a, Gilead biel Jazera khuoah mi hrât le huoisen an lo um teu el a. 32 Jeria chun unau, sûngkuo tina lukhàitu mi sînghni le sângsari zet a lo nei a, chuonghai chu Jordan vadung sak tieng Reuben hai, Gad hai le sak tienga Manase hnam zâtve hai ram sûnga sakhuo tieng thil le tuolsûng tieng thu rêltu dingin Davida'n a ruot a.

1 Chronicles 27

1 Hi hi Israel mi, sûngkuo tina lukhàitu, sipai sângkhat pei le zakhat peia kawmandar hai le an ofisar hai, lal Davida sipai divizona thang, kum tluona thla khat peia inthlâkhai zât inchikna chu a nih. Sipai divizon khata um chu mi sînghni le sângli an nih. 2 Divizon pakhatna, a thla khatnaa hotu chu Zabdiel naupa Jashobeam a nih. A divizona um zât chu mi sînghni le sângli an nih. 3 Ama chu Perez thlaa mi a na, thla khatnaa sipai hotu po po chunga hotu lien tak a nih. 4 Thla hninaa divizon hotu chu Aho mi Dodai a na, a hnuoia hotu chu Miklot a nih. A divizona um zât chu mi sînghni le sângli an nih. 5 Sipai divizon pathumna, a thla thumnaa kawmandar chu thiempu Jehoiada naupa Benaia a nih. Ama chu sipai lu tak a na, a divizona um zât chu mi sînghni le sângli an nih. 6 Hi Benaia hi a nih 'Pasaltha Sawmthum' laia mi huoisen, sawmthum chunga hotu nina cheltu kha. A divizon inrawitu chu a naupa Amizabad a nih. 7 Divizon palina, a thla linaa hotu tak chu Joab unaupa Asahel a na, ama thlâktu chu a naupa Zebadia a nih. A divizona um zât chu mi sînghni le sângli an nih. 8 Divizon pangana, a thla nganaa an kawmandar chu Izra mi Samhut a nih. A divizona um zât chu mi sînghni le sângli an nih. 9 Divizon parukna, a thla ruknaa hotu chu Teko mi Ikes naupa Ira a nih. A divizona um zât chu mi sînghni le sângli an nih. 10 Divizon pasarina, a thla sarinaa hotu chu Efraim thla Pelon mi Helez a nih. A divizona um zât chu mi sînghni le sângli an nih. 11 Divizon parietna, a thla rietnaa hotu chu Zera thla, Husat mi Sibekai a nih. A divizona um zât chu mi sînghni le sângli an nih. 12 Divizon pakuona, a thla kuonaa hotu chu Benjamin thla Anathot mi Abiezer a nih. A divizona um zât chu mi sînghni le sângli an nih. 13 Divizon sawmna, a thla sawmnaa hotu chu Zera thla Netofat mi Maharai a nih. A divizona um zât chu mi sînghni le sângli an nih. 14 Divizon sawmpakhatna, a thla sawm le thla khatnaa hotu chu Efraim thla Pirathon mi Benaia a nih. A divizona um zât chu mi sînghni le sângli an nih. 15 Divizon sawmpahnina, a thla sawm le thla hninaa hotu chu Netofat mi, Otniel sûngkuoa mi Heldai a nih. A divizona um zât chu mi sînghni le sângli an nih. 16 Israel hnam tin chunga an hotuhai chu: Reuben hnam hotu Zikri naupa Eliezar; Simeon hnam hotu Maaka naupa Sefatia; 17 Levi hnam hotu Kemuel naupa Hasabia le Aron thlahai hotu Zadok; 18 Juda hnam hotu Davida unaupa Elihu; Isakar hnam hotu Mikael naupa Omri; 19 Zebulun hnam hotu Obadia naupa Ismaia; Naftalia hnam hotu Azriel naupa Jerimot; 20 Efraim hnam hotu Azazia naupa Hosea; Manase hnam zâtve hotu Pedaia naupa Joel; 21 Gilead rama Manase hnam zâtve hotu Zekaria naupa Ido; Benjamin hnam hotu Abner naupa Jasiel; 22 Dan hnam hotu Jeroham naupa Azarel. Hienghai po hi Israel hnamhai chunga lukhàituhai chu an nih. 23 Israel thlahai chu vâna arasi anga tam an la ni dingzie LALPAN thu a tiem leiin, Davida chun kum sawmhni hnuoi tieng chu a tiem sa ve nawh. 24 Zeruia naupa Joab chun a hang tiem tan a, sienkhom intiem lei chun Pathien lungsenna Israel chungah a hung tla a, a tiem zo hman ta naw a, lal Davida inlal lai chanchin zieknaa khom a zât ziek a ni bok nawh. 25 Lal ina rosum le thil sie khawmna po po enkoltu chu Adiel naupa Azmavet a nih. Khawpui puo tieng biel hrang hrang le khawpui, khawte le ralvêngbûka an sie khawmhai po po enkoltu chu Uzia naupa Jonathan a nih. 26 Loa sinthawtuhai po po enkoltu chu Kelub naupa Ezri a nih. 27 Grèp huon po po enkoltu chu Ramat mi Simei a nih. Uoiin le a siena hmun po po enkoltu Sifmot mi Zabdi a nih. 28 Thlang tieng tlâng thuta oliv le theichang bilhai po po enkoltu chu Geder mi Baal-Hanan a nih. Oliv hriek siena po po enkoltu chu Joash a nih. 29 Saron phaia ran tlatna hmun po po enkaitu chu Saron mi Sitrai a nih. Ruoma ranhai enkaitu chu Adlai naupa Safat a nih. 30 Sanghawngsei po po enkoltu chu Ismael mi Obil a nih. Sabengtung po po enkoltu chu Meronot mi Jehdeia a nih. 31 Beram ruol enkaitu chu Hagar mi Jaziz a nih. Chuonghai po po chu lal Davida in le lo enkoltuhai chu an nih. 32 Davida pate, mi inril tak le lekha thiem tak Jonathan chu remruotpuitu a na, Hakmoni naupa Jehiel chu lal naupahai zirtirtu a nih. 33 Ahitofel chu lal mi rawn a na, Ark mi Husai chu lal ruol tha a nih. 34 Ahitofel chu Benaia naupa Jehoiada le Abiatharin an hung thlâk a. Joab chu lal sipaihai kawmandar a nih.

1 Chronicles 28

1 Davida chun Israel hotu po po-hnam tina upa hai, lal rongbawltu sipai divizon tina kawmandar hai, sipai sângkhat pei le zakhat pei chunga kawmandar hai, lal le a sûngkuohai in le lo le ran ruolhai enkoltu hai, lal ina thoktu po po hai, mi lien le indonaa mi huoisen le hrât khawkhênghai po po chu Jerusalemah a ko khawm a. 2 Lal Davida chu a ngîr a, "Ka unauhai le ka mihai, ka thu hi lo ngàithla ro. Kei chun LALPA Thuthlungna Bawm siena le ei Pathien ke innghatna ding in bawl ka lo lungril hlak a, in bawlna ding châk khom ka lâk ta a. 3 Nisienlakhom, Pathienin ka kuomah, 'Nang chu indo mi, thisen insuo mi i ni leiin ka hminga ding in chu bawl naw ti nih' a ti a. 4 "Amiruokchu, LALPA, Israel Pathienin ka pa sûngkuo po po laia inthokin Israel lala kumkhuoa um dingin a mi lo thlang ta a. Juda hnam chu lukhàitu dingin a thlang a. Chun, Juda hnam lai khom ka pa sûngkuo, ka pa naupahai laia inthokin Israelhai po po lalah a mi lo thlang suok ta bîk a. 5 LALPAN naupa tam tak a mi pêka chu ka naupahai po po laia inthokin Israel lala LALPA ram lalthungphaa inthung dingin ka naupa Solomon hi a lo thlang bok a. 6 Chuongchun, ka kuomah, "I naupa Solomonin ka in le ka tuolzawlhai chu indin a tih. Ka naupa dingin ka thlang ta a, chuongchun a pa nîng ka tih. 7 Tuta in zawm zing anga ka thupêkhai le ka rorêlhai a zawm zing phot chun, a ram chu kumkhuoa dingin suknghet ka tih' a ti a. 8 "Chuongchun, LALPA mihai, Israelhai po po mithmuah le ei Pathien hrieta hin LALPA in Pathien thupêk po po chu zawm ding le ngaiven dingin ka'n fui cheu a nih. Chuonga in thaw chun hi ram tha tak hi hluo zing in ta, in hnunga in thlahai pei kuomah kumkhuoin in rochung sawngtir pei in tih. 9 "Chun, nang ka naupa Solomon, i pa Pathien hi hre la, lungril tha famkim putin phûr takin a rong bawl hlak rawh. LALPA chun lungril a en hlak a, lungrila suongtuona po po khom a hriet vong a. Ama i zong chun hmung i ta, i nghatsan ruok chun kumkhuoin pei thlang a ti che. 10 Inngaituo raw khai; hmun thienghlim ding in bawl dingin LALPAN a ruot ta che a ni hi. Hrât takin um la, bawl ta raw leh" a ta. 11 Chuongchun Davida chun a naupa Solomon chu biek in hulhliep lem hai, a in lem hai, sum sie khawmna in lem hai, pindan chunghnung lem hai, a sûng pindan lem hai, zangaina thungpha lem hai, 12 a lungrila a suongtuona ang po po, LALPA in inhuonna tuolzawl lem hai, a vela pindan lem po po hai, Pathien ina sum sie khawmna ding in lem hai, thil ser thieng tah hai sie khawmna ding in lem hai chu a pêk a. 13 Chun, thiempuhai le Levihai a pawl pawla an umna ding lem hai, LALPA ina rong an bawlna hmun ding lem hai, LALPA ina rongbawlnaa hmang ding bûr le bêl lem hai, 14 rongbawlna kong hrang hranga hmang ding bûr le bêl chi tin, rangkachak le tangkaruo bûr le bêl le a siemnaa rangkachak le tangkaruo hmang zât ding hai, 15 a hmangna ding dungzui ang peia rangkachak le tangkaruo khawnvar siena ding lem le a khawnvarhai siemnaa rangkachak le tangkaruo hmang zât ding hai, 16 hlânbei siena ding dawkan lem hai, pakhat pei siemna dinga rangkachak le tangkaruo hmang zât ding hai, 17 sa thurna ding rangkachak hlîra siem thirkut hai, thil thèna thlêngkûm hai, notung hai, rangkachak hlîra siem thlêng hai, tangkaruo hlîra siem thlêng le berbu hai siemnaa hmang zât ding hai; 18 rangkachak hlîra siem, rimtui rawna maichâm ding dâm, rangkachak cherubhaiin LALPA Thuthlungna Bawm chunga thla zâra an vêng lai lem le a chuongna ding tawlailir siem dàn ding lem hai khom a pêk bok a. 19 Davida chun, "Hieng thil po po, ka chunga LALPA kut innghatin a ziekhai chu ka kol vong a, a ruohmanghai a kip a kawia hriet thiemna khom a mi pêk bok a nih" a ta. 20 Chun, Davidan a naupa Solomon kuomah, "Hrât tak le huoisen takin um la, in chu bawl ta rawh. Ti naw la, zâm bok naw rawh. LALPA Pathien, ka Pathien chun umpui a ti che. LALPA chun Tempul i bawl zo hma khat inthla naw ni che a, nghatsan ngai bok naw ni che. 21 Tempula thiempuhai le Levihai sinthaw ding seng khom ruot fel vong a ni ta a, ieng sina khom kong tinrênga kut themthiem thangpuitu ding che um zing an ta, hotuhai le mipui po po khomin i thupêk taphot chu zawm pei an tih" a ta.

1 Chronicles 29

1 Chun, lal Davidan mipui po po kuomah, "Pathien thlang suok ka naupa Solomon hi a la naupangin a tonhriet a la tlawm a. A thaw ding hi mihriem chêngna in ding ni loin Pathien ta dinga in a ni leiin a ropui si a. 2 Ka theitawpin ka Pathien tempul bawlna dingin châk ka lo lâk khawm a, rangkachak hmangna dingah rangkachak, tangkaruo hmangna dingah tangkaruo, dâr hmangna dingah dâr, thîr hmangna dingah thîr, thing hmangna dingah thing hmang dinghai khom ka lo buotsai ta a. Chun, a cheinaa zep ding onik lung hai, lunghlu dumpawl chi dâm, lungmawi rong chi hrang hrang dâm, lunghlu chi hrang hrang le sailungvar hai tam tak ka lâk khawm ta bok a. 3 Chu chau khom chu ni loin, ka Pathien Tempul hi ka'n voipui êm leiin, tuta ka buotsai ta sahai hi tiem loin, keima sum, rangkachak le tangkaruohai khom ka Pathien Tempula dingin ka pêk a. 4 Chuonghai chu a bang inluonnaa hmang ding dâm, 5 a hmangna kong hrang hranga kut themthiemhai hmang dingin Ofiraa inthoka rangkachak hlîr ka phur suok kilogram nuoi khat le tangkaruo hlîr kilogram nuoi hni le sîngli vel a nih. Tu hin, LALPA ta dinga phal taka pe ve nuom mi dang ei um am?" a ta. 6 Chuongchun, sûngkuoa lukhàitu hai, Israel hnam tina hotu hai, sipai sângkhat pei le zakhat pei chunga kawmandar hai le lal hnuoia thoktuhai chun phal takin an hung pêk a. 7 Pathien Tempul bawlna dinga an pêk po chu rangkachak kilogram nuoi khat le sîng sari nêka tam, tangkaruo kilogram nuoi thum le sîng li nêka tam, dâr kilogram nuoi ruk le sîng hni neka tam, thîr kilogram maktaduoi thum le nuoi li nêka tam a nih. 8 Lunghlu neihai chun LALPA tempula thilhlu sie khawmna enkoltu Gerson mi Jehiel kutah an pêk a. 9 Lungril hmun khat puta lawm taka LALPA an pêk leiin mipuihai chu an hlim êm êm a; lal Davida khom nasa takin a hlim a. 10 Mipui hung inkhawm po po hmaa chun Davida'n LALPA a'n pàk a:"Aw LALPA, kan pu Israel Pathien, Chatuona inthok chatuon chenin, Chawimawina chang kumkhuo rawh. 11 Ropuina le thilthawtheina hai, Chawimawina, lalna le mawina hai, Hnuoi le vâna thil iengkim hai, Nangma ta vong a nih, LALPA. Ram chu LALPA i ta a na, Iengkim chunga lêng i ni si a. 12 Hausakna le chawimawinahai, Nangmaa inthoka hung vong a na, Iengkim chunga roreltu i nih. Hrâtna le thilthawtheinahai, Chawisâng le sukhrât theina po po, Nangma kuta um vong a nih. 13 Chuleiin tu hin kan Pathien, I kuomah lawmthu hung hrilin, I hming ropui kan inpâk. 14 "Nisienlakhom, kei le ka mihai telulin hieng khopa tam i kuoma thilhlân phal taka kan hung pêk thei hi kan theina leia kan hung pêk ni loin, iengkim hi nangmaa inthoka kan dong vong a na, i kuta inthoka kan donghai chu kan hung pêk nawk el lem che a nih. 15 I mithmuah ram dang mi le mikhuol el kan ni a, kan pi le puhai khom an ni tho kha. Hnuoia kan ni tin nun hi hlim ang chauh a na, beisei ding hrim a um nawh. 16 Aw LALPA kan Pathien, i hming thienghlim ta dinga Tempul bawlna dinga kan hung pêkhai po po hi nangma kuta inthoka hung vong a na, i ta vong a nih. 17 Aw ka Pathien, nang chun lungril i fie hlak a, indikna i lawm ti ka hriet. Hieng thilhai po po hi phal takin ka hung pêk a, ka pêkna san khom a'n dik a nih. Hi taka um i mipuihaiin phal taka an pêk ka hmu hin ka lawm takzet a nih. 18 Aw LALPA, kan thlatu Abraham le Isak le Israel Pathien, phal taka pêk nuomna hi kumkhuoin i mihai lungrilah inneitir la, nangma tan zing dingin an lungrilhai vongpêk rawh. 19 Ka naupa Solomon hin i thupêk hai, i thu inhriettir hai le i dân hai po po zawm a, ka lo buotsai lawk tah i in ropui bawl dingin inpêkzona lungril inneitir rawh" a ta. 20 Chu zoah Davida chun pungkhawm po po kuomah, "LALPA in Pathien chu inpâk ro" a ta. Chuongchun, mipui po po chun LALPA, an pi le puhai Pathien chu an inpàk a, an kûn a, LALPA le lal hmaa chun an bokkhup a. 21 A zînga chun LALPA kuoma inthawina le pumraw thilhlâna dingin bawngchal sângkhat le beramchal sângkhat le beramte sângkhat le dawn ding thilhlânhai leh Israelhai po po ta dingin inthawina tam tak an inhlàn a. 22 Chu ni chun LALPA hmaah hlim taka fain an dawn tlâng a. Davida naupa Solomon chu lalah an namnghet nawk a, rorêltu dingin LALPA hmaah hriek an nàl a, Zadok chu thiempu dingin hriek an nàl bok a. 23 Chuongchun, Solomon chu LALPA lalthungphaa chun a pa Davida hmunah lalin a thung a, hmuingil takin a um a, Israelhai po poin a thu an zawm a. 24 Hotu po po le mi huoisen le hrât khawkhênghai le Davida naupahai po po chun lal Solomon hnuoia kûn dingin thu an intiemkam a. 25 Israel mihai po po hmuah LALPAN Solomon chu a chawisâng a, Israel rama a hmaa lalhai laia tu khom la chang phâk ngai lo lal nina ropui tak chu a'n changtir a. 26 Jesai naupa Davida chu Israelhai po po chunga lal a nih. 27 Israelhai chungah kum sawmli lalin a um a, Hebron khuoah kum sarih, Jerusalemah kum sawmthum le kum thum a'n lal a nih. 28 Upa tak, tar kûna nun hmangin, hausaknaa vur le chawimawi hlawin a thi a, a naupa Solomon chun a lalna chu a hung hluo ta a. 29 Davida inlal lai chanchin, a bula inthoka a tawp chenin, zawlnei Samuel lekhabua hai, zawlnei Nathan lekhabua hai, zawlnei Gad lekhabua hai a chuong a; 30 chu bâkah a'n lal laia chanchin le a thilthawtheizie po po le ama le Israelhai le a ram chunga thil tlunghai chu kimchang takin an ziek bok a nih.

2 Chronicles 1

1 Davida naupa Solomon kuoma chun LALPA a Pathien a um leiin a lalna chu a ram sûngah a suknghet a, nasa takin a sukropui a. 2 Solomon chun Israelhai po po, sipai sâng chunga kawmandarhai le za chunga kawmandarhai, rorêltuhai, Israel pahnam tina thuoituhai le sûngkuo tina lukhàituhai chu a ko khawm a. 3 Pungkhawmhai po po chu Gibeon hmun sàngah a thuoi tung a, chu taka chun LALPA siehlaw Mosiein thlalèra a siem biekbûk, Intuokna Puon in kha a la um a. 4 Pathien Bawm ruok chu Kiriat Jearim-a inthokin Jerusalemah an lâk tung ta a, a siena dinga Davida buotsai puon ina chun an sie a. 5 Amiruokchu, Hura naupa Uri naupa Bezalel siem dâr maichàm chu Gibeon-a biekbûk hmaa chun a la um zing leiin, Pathien rawn dingin Solomonin chu hmun chu a panpui tawl a nih. 6 Intuokna Puon in hmàia um dâr maichâma chun Solomon chu LALPA hmaah a hang fe a, maichâma chun pumraw thilhlân sângkhat a hang inhlàn a. 7 Chu zân chun Solomon kuomah Pathien a hung inlâr a, a kuomah, "I dit dit mi hni rawh, pêng ka ti che" a ta. 8 Solomon chun Pathien kuomah, "Ka pa Davida kuoma khan lunginsietna nasa tak i'n langtir a, ama hmunah lalin i mi lo sie ta a. 9 Aw LALPA Pathien, pilvut anga tam mipuihai chunga rorêltuah i mi sie ta si hin chu, ka pa Davida kuoma i thu tiem kha sukpuitling rawh. 10 Hi mihai hi ka thuoi theina dingin varna le hrietna mi pe rawh. Chuong naw chun i mi hieng zozaihai ro hi tuin am rêlpêk thei an ta?" a ta. 11 Pathien chun Solomon kuomah, "Hieng ang lungril hi put a, sum le pai dâm, hausakna dâm, chawimawina dâm le i hmèlmahai thina ding dâm hni lo a, dam sawtna hai khom hni bok lo a, an chunga lala ka siena che ka mihai ro i rêlpêk theina dinga varna le hrietna i mi hni lem leiin, 12 varna le hrietna ka pèk che bàkah i hma le i hnunga lal tu khomin an nei dër lo ding sum le pai hai, hausakna hai le chawimawina hai pe sa bok ka ti che" a ta. 13 Chuongchun, biekbûk umna Gibeon hmun sànga inthokin Solomon chu Jerusalem tieng a kîr nawk a, Israelhai chungah ro a rêl a. 14 Solomon chun sakor-tawlailir sângkhat le zali le indona sakor sîngkhat le sânghni a nei a, chuonghai chu tawlailir sie khawmna khawpui hrang hrangah a sie a, a then Jerusalemah a kol a. 15 A'n lal sùng hin Jerusalemah tangkaruo le rangkachak chu lung ang elin a bûm hnèr hnûr a; sidar thing khom phai thuta theichang bil ang hiela ngai thei khopin a hau a nih. 16 Solomon sakorhai chu Aigupta le Kilikia a inthokin lal aiawa sumdawnghai chun an inchawk suok hlak a. 17 Aigupta rama inthoka an inchawkhai chu tawlailir pakhat peiah tangkaruo shekel zaruk, sakor pakhat peiah tangruo shekel za le sawmnga an pêk a. Anni chun Hit lalhai le Aram lalhai kuomah an zor sawng hlak.

2 Chronicles 2

1 Solomon chun LALPA hminga ding tempul le ama ta ding lal in bawl dingin thupêk a'n suo a. 2 Thil phurtu mi sîngsari le tlânga lung sertu ding mi sîngriet le anni inrawitu ding mi sângthum le zaruk a ruot a. 3 Solomon chun Tura lal Hiram kuomah, "Ka pa Davidan a in a bawl laia sidar thing i lo thon hlak ang khan sidar thing mi hung thon ve raw khai. 4 LALPA ka Pathien hminga ding tempul bawl tan ka tum mèk a. Chu chu kei le ka mihai ta dinga hmun serh, LALPA hmaa rimtui rawna ding dâm, chatlak loa hlânbei kan sie zingna ding dâm, zîng le zân le Sabat le thla thar hun le LALPA kan Pathien hminga hunbi ruot kûthai kan hmang chànga pumraw thilhlân kan inhlân zingna ding chu a nih. Chu chu Israelhai thaw dinga kumkhaw thu ruot a ni si a. 5 "Ka tempul bawl ding chu ropui tak a nih, kan Pathien chu pathien danghai po po nêka râpthlàk le ropui lem a ni si a. 6 Sienkhom, vân zâu tak le insâng tak hmana a keng zo lo chu tuin am a tempul ding bawlpêk thei a ta? A hmaa inthawina thilhlânhai rawna ding chauh naw chu kei telul hin iengtin am a ta dingin tempul chu bawlpêk thei ka ta? 7 "Chuleiin, Judai ram le Jerusalema mi themthiem, ka pa Davidan a lo ruoi hlakhai le thok tlâng ding mi pakhat, rangkachak le tangkaruo, dâr le thîr them tienga chemkal, pat senduk le sen lâr le dumpawl nam thiem le thil ker thiem mi hung tirpêk raw khai. 8 Chun, Lebanon-a inthokin sidar thing, far thing le algum thing mi hung lapêk bok rawh, i mihai chu thing phûr thiem an nih ti ka hriet si a. 9 Tempul ka bawl ding chu lien tak le ropui tak a ni ding a ni leiin, thing ka mamaw tawk ka hmu theina dingin ka mihai chu i mihai lai thok ve raw hai se. 10 I siehlawhai le thing phûrtuhai chu huit beiphit kilogram maktaduoi hni, barli beiphit kilogram maktaduoi hni, uoiin litar nuoi li le oliv hriek litar nuoi li pêng ka tih" tiin lekha a thon a. 11 Tura lal Hiram chun, "LALPAN a mihai a hmangai leiin an lalah a siem che a. 12 Lal Davida kuoma nau var tak, lungvar nei le hriet thiemnaa inthuom, LALPA tempul le ama lal in bawltu ding petu LALPA, Israel Pathien, hnuoi le vân siemtu chu inpâkin um raw se. 13 Mi themthiem tak el Huram-Abi ka hung tir ding a nih. 14 A nu chu Dan hnama mi a na, a pa chu Tura mi a nih. Rangkachak le tangkaruo, dâr le thîr, lung le thing, pat senduk le senlâr le dumpawl le zâi inhmi tinrêng a ieng ieng khom them thiem a nih. Thil ker tienga chemkal le ieng ang ruongâm khom a lim an pêk taphot chu ker thiem vong a nih. I mistiri themthiem ruol le ka pu Davida ruoi mi themthiemhai leh thok tlâng raw hai se. 15 "Ka lalpain a siehlawhai hung thon dinga a tiem huit le barli hai, uoiin le oliv hriek hai chu hung thon sien la, 16 keinin Lebanona thing chu i dit zât zât lo phûr kan ta, tuifinrietah Jopa khaw kai chen hung tolpêk kan ti che a, chu taka inthokin nangin Jerusalem tieng i lo tol tung pei ding annawm" tiin donna lekha a thon a. 17 A pain intiemna a thaw ang khan Solomon khomin Israel rama ram dang mi um po po chu a tiem a, an rêngin mi nuoi khat sîngnga sângthum le zaruk an nih. 18 Chuonghai laia mi sîngsari chu thil phurtu ding, sîngriet chu tlânga lung sertu ding le sângthum zaruk chu sinthawhai inrawitu ding an nih.

2 Chronicles 3

1 Solomon chun Jerusalema Moria Muol, a pa Davida kuoma LALPA a hung inlàrna, Jebu mi Arauna hrizawl, Davidan hmun a lo buotsaia chun LALPA tempul chu a bawl a. 2 Lal a nia inthoka kum lina, thla hnina le ni hninaa chun a bawl tan a. 3 Pathien tempul thut dinga Solomon rem chu a dung meter sawmhni le pasari le a khang meter kuo a nih. 4 Tempul tuolpûk bathlàr chu tempul khang le intiet char, meter kuo a na, a'n sângzie chu meter sawmpathum le a chenve a nih. A sûng chu rangkachaka inluon vong a nih. 5 Chun, pindan lien lem banga chun far thing a hmang a, chu chu rangkachak hlîr hlakin a'n luon khum a, chu taka chun tûm thing le khaidiet lim a'n chuongtir a. 6 Tempul chu lunghlu chi hrang hrangin a cheimawi a; rangkachak khom Parvaim rangkachak ngot a hmang a. 7 Tempul kalkhanghai, banghai, kotkhâr le tuong hai chu rangkachaka inluon vong a na, a banga hai chun cherub lim a ker a. 8 Hmun Thienghlim Tak chu a dung le a khang meter kuo ve ve a na, a sûng chu rangkachak hlir hlaka inluon vong a na, chu taka ding chun rangkachak kilogram sînghni le sângkhat vel a hmang a. 9 A kilna khom rangkachak thîrkil vong a hmang a, thîrkil pakhat chu gram zanga le sawmsari peia rik a nih. Pindan siling po po khom rangkachak tuia inluon vong a nih. 10 Chun, Hmun Thienghlim Taka sie dingin cherub lim pahni a'n siemtir a, chuonghai chu rangkachaka inluon vong a nih. 11 Cherubhai chun thla an zâr a, meter kuo an zàr khum a. Cherub pakhat thla chu meter hni le centimeter hnia sei a na, a thla ki pakhat chun tempul bang a va sun phak a; a thla khing tieng khom chu meter hni le centimeter hnia sei bok a na, cherub pakhat thla ki chu a va hawl phak a. 12 Chuong ang bokin cherub dang thla khom chu meter hni le centimeter hnia sei a na, a thla ki pakhat chun tempul bang a va sun phak a, a thla khing tieng chu meter hni le centimeter hnia sei bok a na, cherub pakhat thla ki chu a va hawl phak a. 13 Chuong cherubhai chun meter kuo inkhumin thla an zàr a, kea ngîrin in sûng tieng an ngha ve ve a. 14 Hmun Thienghlim Tak lûtna puonzâr chu a dumpawl le senduk le sen lâr inpol, pat zâi inhmi taka khawng a na, chu taka chun cherub lem an zep chuoi a. 15 Chun, tempul hmaa phun ding dâr ban pahnih, meter riet ve vea insâng le a sîpa inchuon ding, a lu thut mum meter hni le centimeter hni ve vea insâng chu a siem bok a. 16 A lu thut mum khei par chu khaidiet inher thlopin a vêt kuol a, khaidieta chun theibufai lim zakhat a khai tlar bok a. 17 Chu dâr banhai chu tempul kota chun sim tieng pakhat, hmar tieng pakhat a phun a. Sim tienga ban chu Jakin a'n bûk a, hmar tienga mi chu Boaza a'n buk bok a.

2 Chronicles 4

1 Solomon chun dâr maichâm a dung meter kuo, a khang meter kuo, a'n sângzie meter li le a chenve a siem a. 2 Chun, dâr tuizêng kuol a sung a, chu chu a laiah hol tlanga meter li le a chenve le an sângzie meter hni le centimeter hni a nih. A rei kuol chu meter sawm le pathum le centimeter hnia lien a nih. 3 A rei hnuoi chara chun bawngchal lim, meter chenve dan peia intlarin, a vêt suok a. Chu bawngchal limhai chu tlar hniin a um a, tuizèng le sakhata sung vong a nih. 4 Tuizèng chu bawngchal sawmpahni chunga inthut a na, bawngchal pathumin hmar tieng, pathumin sim tieng, pathumin sak tieng, pathumin thlang tieng an ngha a. Bawngchalhai chunga chun tuizèng chu a'n nghat a, an rêngin hnung tieng an innghat tuo seng a. 5 Tuizèng bang chu millimeter sawmsari le panga vela sà a na, a rei chu no rei ang, lili pâr vul lai ang a nih. Tuizèng chu tui litar sîngli keng a nih. 6 Chu zoah insawpna ding maihùn sawm a siem a, panga chu sim tieng, panga dang chu hmar tieng, a sie a. Chuonghai chu pumraw thilhlânhai sawpna dingin an hmang a, tuizênga mi ruok chu thiempuhai insawpnaa hmang ding a nih. 7 Chun, a siem dàn dinga ruot ang takin rangkachak khawnvar siena ding sawm a siem a, tempula chun sim tieng panga, hmar tieng panga ve ve a sie a. 8 Dawkân sawm a siem a, tempula chun sim tieng panga, hmar tieng panga ve ve a sie a. Thil thèna ding rangkachak berbu zakhat a siem bok a. 9 Chun, thiempuhai umna ding tuolzawl a siem a, a puo tieng chun tuolzawl lien tak le a kotkhârpui chu a siem bok a, kotkhâr chu dâr tuiin a'n luon a. 10 Chun, tuizèng chu tempul sim sak tieng kila chun a sie a. 11 Bûr le bêl dâm, vutluo dâm le thil thèna berbu dâm a siem bok a. Chuongchun, Pathien tempula dinga lal Solomonin Huram an siemtir chu a zo ta a. 12 Chuong a siempèkhai chu: dâr ban pahnih; a ban sîpa thut mum ding a hmor inbawk pahnih; ban sîpa thut mum hmor inbawk pahnihai cheina ve ve hai; 13 ban sîpa thut mum hmor bawk khei para theibufai lim zali, tlar hnia a rem hai dâm; 14 maihûnhai le an innghatna thuthai; 15 tuizêng le a'n thutna bawngchal sawmpahnihai dâm; 16 bûr le bèl hai, suodur hai, sa thurna thîrkut hai le chuonghai le inzom thil danghai po po. Huram-Abiin LALPA tempula ding lal Solomon a siempêkhai po po chu dâr tle chi vonga siem a nih. 17 Lal chun Jordan phai Sukot le Zarethan inkâra pilbel khurah chuonghai popo chu a'n sûngtir vong a nih. 18 Hieng po po Solomonin a'n siemtirhai hi a tam tham êm leiin dâr an hmang zât khom bûk seng ruol lo a nih. 19 Solomonin tempul hmangruo dang a'n siemtirhai chu: rangkachak maichâm dâm, hlânbei siena dawkan dâm; 20 ruot anga Hmun Thienghlim hmaa sit ding rangkachak hlîr hlaka siem khawnvar siena hai le khawnvar sit ding dâm; 21 rangkachak hlîra siem pârte lim hai, khawnvar hai, chaiche hai, 22 khawnvar phita chep ruolna hai, thil thèna berbu hai, thlêng hai, mei lâkna hai dâm; Hmun Thienghlim Tak pindana kotkhârhai le a pindan puia kotkhârhai dâm a nih.

2 Chronicles 5

1 LALPA tempul ding Solomonin a bawl zo chun a pa Davidan thil a lo inhlàn ta po po tangkaruo le rangkachak le in cheina hmangruo po po chu a hung lâk a, LALPA tempula rosum sie khawmnaa chun a sie a. 2 Solomon chun Israel upahai, Israel thlahai laia hnam tin thuoituhai le sûngkuo tina lukhàituhai chu Davida Khawpui Zion-a inthoka LALPA Thuthlungna Bawm chu Tempul tienga zawn tung dingin Jerusalemah a'n chà khawm a. 3 Chuongchun, Israel mihai po po chu thla sarinaa kût lai chun lal kuomah an hung khawm a. 4 Israel upahai an hung tlung chun thiempu Levi-hai chun Thuthlung Bawm chu an zawn tung a, 5 Intuokna Puon in le a cheina le a hmangruo thienghlimhai po po khom chu an zawn tung bok a. 6 Lal Solomon le a kuoma Israel mi pungkhawmhai po po chu Thuthlung Bawm hmaa chun an hung a, beram le bawngchal tam tak, a zât khom inchik le tiem seng ruol lo chu inhlànin an inthawi a. 7 Chuongchun, thiempuhai chun LALPA Thuthlungna Bawm chu a umna ding Tempul sûngril, Hmun Thienghlim Taka chun an lâk lût a, cherubhai thla zâr hnuoia chun an sie a. 8 Cherubhai chun Thuthlung Bawm chungah thla zârin, bawm le a zawnfunghai chu an zàr khum a. 9 Bawm zawnfung chu a sei leiin a hmawr chu Hmun Thienghlim kota inthok khomin a'n lang phâk a, sienkhom hmun danga inthok ruok chun hmu thei a ni nawh; chuong ang chun tu chen hin a la um zing. 10 Bawm sûnga chun Aigupta rama inthoka Israelhai an hung suok hnunga Horeb tlânga LALPAN an kuoma thu a thlungna lung phêk pahni Mosien a sie chauh naw chu ieng dang khom a um nawh. 11 Chun, hmun thienghlima inthokin thiempuhai chu an hung suok a. Chu taka thiempu umhai chu ieng ang pawla mi khom ni hai sien, an insukthienghlim vong a. 12 Levi-hai laia rimawi tumtu le hla saktu Asaf hai, Heman hai, Jeduthan hai le an naupahai le sûngkuohai po po chu puon zâi inhmia khawng thuom inbelin, dârbenthek dâm, perkhuong dâm le tingtang dâm chawiin maichâm sak tieng pangah an ngîr a. Tawtawrawt mûttu thiempu za le sawmhni an thang sa bok a. 13 LALPA inpâkna le a kuoma lawmthu hrilna hla an sak le tawtawrawt an mût ri chu zài khatin a luong a. Chuongchun, tawtawrawt le dârbenthek le rimawi danghai leh rema, "Ama chu a tha si a, A ngilneinan kuomtluong a dai"tia rawl tawp insuoa LALPA inpâkna hla an sak lai chun LALPA tempul chu sûmin a hung baw sip ta mup a. 14 Sûm lei chun thiempuhaiin rong an bawl thei ta naw hiel a, Pathien tempul chu LALPA ropuinain a sip si a.

2 Chronicles 6

1 Solomon chun, "Aw LALPA, 'Sûm sà mupah chêng ka tih' i ti a. 2 Tu hin kumkhuoa i chêngna ding, i ta dingin tempul mawi tak ka bawlpêk ta che ie" a ta. 3 Chun, a ngha kîr a, a hmaa ngîr Israel mi pungkhawmhai po po chu mal a sawm a: 4 "LALPA, Israelhai Pathienin ama bau ngeia ka pa Davida kuoma thu a lo tiem tah chu ama kut ngeia a hung hlen suok tah leiin inpâkin um raw se. 5 Ama chun, 'Aigupta rama inthoka ka mihai ka thuoi suok nia inthok khan Israel hnamhai laia a ieng khuo khom hi ka hming umna ding Tempul bawlna dingin ka la thlang ngai naw a; ka mi Israelhai chunga lukhàitu ding tu khom ka la thlang ngai bok nawh. 6 Amiruokchu, ka hming umna dingin Jerusalem hi ka lo thlang ta a, ka mi Israelhai chunga rorêltu dingin Davida hi ka lo thlang ta bok a nih' tiin a lo hril a. 7 "Ka pa Davida chun LALPA Israelhai Pathien hminga ding Tempul bawl a lungril hlak a. 8 Amiruokchu LALPAN a kuomah, 'Ka hminga ding Tempul bawl nuomna lungril i nei hi i thaw tha ngot el. 9 Sienkhom, nang chu ka Tempul bawltu ding i ni nawh, i naupa, i thàlbea inthoka suok ngei chu ka hminga ding Tempul bawltu ding chu a nih' tiin a lo hril a. 10 Chun, LALPAN a thutiem chu a hung suknghet a, a tiem tah ang ngeiin kei chun ka pa Davida lalna ka hung hluo a, tu hin Israelhai lalthungphaah ka hung inthung ta a, LALPA Pathien, Israelhai Pathien hminga ding Tempul chu ka lo bawl ta ngei bok a. 11 Chu taka chun Israel thlahai kuoma a lo thlung, LALPA Thuthlungna Bawm chu ka sie tah a nih" a ta. 12 Chun, Israel mi pungkhawmhai chu hma sonin LALPA maichâm hmaa chun Solomon chu a ngîr a, kut a phar a. 13 Dâr dawkân, a dung meter hni le centimeter hnia sei le a khang meter hni le centimeter hnia lien, a'n sângzie meter khat le centimeter thum a siem a, Tempul tuolzawl laili taka a'n thut chunga chun a lawn kai a, Israel thla pungkhawm po po hmaah a dingthathuon a, vân tieng nghain bân a phar a. 14 Chuongchun hieng hin a tongtai a: "Aw LALPA, Israelhai Pathien, lungril po poa i lampui hrawtu i siehlawhai kuoma i hmangaina thuthlung vong tlattu, nangma ang hi chung tieng vâna le hnuoi tieng leihnuoiah Pathien dang hrim an um nawh. 15 Ka pa, i siehlaw Davida kuoma bau ngeia thu i tiem chu nangma kut ngeiin i hung hlen a, chu chu voisuna kan hmu hih a nih. 16 "Tu hin aw LALPA, Israelhai Pathien, ka pa Davida kuoma, 'Ka mithmua i um dân anga i thlahai khom ka mithmua fimkhur taka ka dân an zawm ve phot chun, Israel lalthungpha hluotu ding mi chu invai ngai naw ti nih' tia thu i lo tiem kha vong ngei dingin ka ngèn che. 17 Aw Israelhai Pathien, ka pa Davida kuoma thu i tiem kha hung hlen ngei rawh. 18 "Amiruokchu aw LALPA, hnuoia mihriemhai lai chu i chêng tak tak ding am a ni? Vân insâng tak hmanin a keng naw che a, hi ka Tempul bawla lem hin chu i va hang inleng naw nasa zuol awm de aw! 19 Chuong sa khom chun aw LALPA Pathien, zangaina hnia i siehlaw tongtaina hi lo ngaisak la, voisuna i hma ngeia tongtaia i siehlaw hung kona che hi lo ngàithlapèk hràm rawh. 20 'Chu taka chun ka hming chu um a tih' i lo tina hmun tieng hi ngha a, i siehlaw hung tongtaina chu i lo ngàithlâk theina dingin, hi tempula hin sùn le zânin mit inlèn zing hlak rawh. 21 Hi hmun tieng hi nghaa i siehlaw le i mi Israelhai kan hung tongtai pha chun mi lo ngàithlapèk rawh. A nih, i chèngna vâna inthok chun lo ngàithla la, i hriet pha leh kan suolnahai lo ngaidam hlak rawh. 22 "Mi tu khomin a tuolbawm poi a tawk a, hi Tempula i maichâm hmaa a thiem thu inkhâm meua a hung intlun pha chun, 23 vâna inthokin lo ngàithla la, che nghal la, i siehlawhai chungah ro hung rèl la, a thiem naw lem lu chunga chun a thil suol thawna maw chu intlâktir la, poi tawk nawtu chu thiem inchangtir la, a thiemzie chu namnghet rawh. 24 "Nangma lakah an suol leia hmèlmahaiin i mi Israelhai an hne chângin, nangma tieng hung ngha kîr a, i hming lam a, hi Tempula hin ngaidam an hung inhni pha chun, 25 vâna inthokin lo ngàithla la, i mi Israelhai suolna chu ngaidampèk la, an pi le puhai kuoma ram i pèka chun thuoi kîr nawk rawh. 26 "I mihaiin i lakah thil suol an thaw leia vanin ruo hrim a'n sùrtir ta naw changin, hi hmun tieng hi nghaa hung tongtai a, i hming lam a, i hrem leia an suolhai an sim pha chun, 27 vâna inthokin lo ngàithla la, i siehlaw, i mi Israelhai suolna chu lo ngaidam la, an khawsak dân ding lampui indik kawkhmu la, i mihai rochana i pêk rama hin ruo hung insùrtir rawh. 28 "A ramah tàm tla a, hripui dâm, inlawngna dâm le hmonna hri dâm inlèng a, khauthikthi le tuktulung dâm intâm a, hmèlmahan an khuohai inhuol a, sietna le hri le hrai ieng khoma a tlàk buok chângin, 29 i Tempul tieng kut hung phar a, hrem an tuor dân chit chu mani lungril sengah pai a, i mi Israelhai laia mi tu khomin i kuomah tongtaia hnina an hung intlun châng chun, 30 i chêngna vâna inthokin lo ngàithla la, ngaidam la, che la, an ngaituona seng i hriet leiin an nina ang peiin thaw rawh, nangma chauh hi mihriem po po lungril hretu i ni si a. 31 Chuongchun, kan pi le puhai kuoma ram i pêka hin an um sûng chun ieng lai khomin nangma ti nachâng hung nei pha tang an tih. 32 "Ram dang mi, i mi Israelhai ni ve lo, sienkhom i hming leia ram hla taka inthoka hung pantu che khom, (i hming ropui tak le kut hrât tak phara i thawpêkzie hi mihaiin an la hung hriet pei ding a ni si leiin) Tempul tieng nghaa an hung tongtai pha chun, 33 i chêngna vâna inthokin lo ngàithla la, ram dang mi thil hni chu lo thawpêk la, chuongchun i mi Israelhai ang boka khawvela hnam tinin i hming hung hrein, tiin, hi ka Tempul bawl hin i hming a put ngeizie hung hre thei an tih. 34 "I mihaiin hmèlmahai an bei pha, i tirna hmun chu khaw tieng khom ni sien, i khawpui thlang le i hminga ding Tempul ka bawlna hmun tieng hi nghaa LALPA kuoma an hung tongtai chun, 35 i chêngna vâna inthokin an tongtaina le hnina chu lo ngàithlapêk la, an hnina chu lo pompèk rawh. 36 "I lakah thil suol an thaw a, (tu khom suol lo an um bok si naw a), an chungah i lung a sen a, hmèlma kutah i pèk a, an ram tieng, hnâi tè amanih hla tak amaniah sala an thuoi pha, 37 sala an thuoina hmunah inngaituo suok a, insîr a, an intàngna rama inthokin hung ngèn a, 'Thil suol kan lo thaw a, poi kan lo tawk a, rilo takin kan lo khawsa a nih' an ti pha, 38 an hmèlmahai, sala thuoituhai rama inthoka lungril le thlaraua nangma tieng hung ngha kîr a, an pi le puhai i pêk ram tieng, i khawpui thlang le i hming dinga ka bawl Tempul tieng hi nghaa an hung tongtai pha chun, 39 i chêngna vâna inthokin an tongtaina le hnina chu lo ngàithlapèk la, an hnina chu lo pompèk la, i laka i mipuihai thil suol thaw chu lo ngaidam rawh. 40 "I siehlaw hnina le i mi Israelhai hnina lakah i mit insîm ngai naw la, hi hmuna inthoka an hung ko pha che chun lo ngàithlapèk hràm rawh. 41 Tuhin hung tho la LALPA Pathien, I thilthawtheina Thuthlung Bawm leh, I tempula hin hung chêng ta rawh. I thiempuhai chu LALPA Pathien, Sandamnain inthuom tawl la, An chunga i thatna leiin, I mi thienghlimhai chu hlim raw se. 42 I hriek nâl hi LALPA Pathien, Hnawl hmang ngai hrim hrim naw la, I siehlaw Davida kuomaI tiem hmangaina ropui kha, Theinghil ngai hrim hrim naw rawh"a ta.

2 Chronicles 7

1 Solomon tongtai zo chun vâna 2 LALPA ropuinain LALPA tempul a sip lei chun thiempuhai chu an lût thei naw a. 3 Israel thlahai po poin vâna inthoka mei hung tla le Tempul chunga LALPA ropuina inzâm an hmu chun tempul tuolzawl lungrema chun bawka hnuoi sikin an bokkhup a, "Ama chu a tha si a, A ngilneinan kumtluong a dai"tiin lawmthu an hril a, LALPA chu an chawibiek a. 4 Chuongchun, lal le mipuihai chun LALPA hmaah inthawinahai an inhlàn a. 5 Lal Solomon chun inthawinain bawngchal sînghni le sânghni le beram le kèl nuoikhat le sînghni a'n hlàn a. Chuong ang chun lal le mipuihaiin Pathien Tempul chu an inhlàn a nih. 6 Thiempuhai chu an hmun sengah an ngìr a, Levi-hai khom, "A hmangainan kumtluong a dai" tia LALPA an chawibiek chânga an tum hlak dinga Davidan LALPA rimawi hmangruo a'n siemtirhai chu chawiin an ngìr a. Levihai epa chun thiempuhaiin tawtawrawt an mût a, Israel mipui po po chu an ngîr thup a. 7 Dâr maichâm a siem chun pumraw thilhlân dâm, bu le bâl thilhlân dâm le sathau an inhlànhai chu a keng naw leiin Solomon chun LALPA tempul hmaa tuolzawl inhuon sûng khom chu a'n hlàn thienghlim a, chu taka chun pumraw thilhlân le inremna inthawina thilhlâna a thauhai chu an inhlàn a. 8 Chu tum chun Solomon le Israel mi po po, Hamat Kawna inthoka Aigupta Varuom chena mi pungkhawmhai chun ni sari sûng kût an hmang a. 9 A ni riet ni chun inkhawmna ropui tak an nei a, chuong ang chun ni sari sûng Tempul inhlàn lawmna an hmang bâkah ni sari dang kûtb an hmang bok a. 10 Chun, thla sarina ni sawmhni le ni thum ni chun mipui chu a'n tìntir a, LALPAN Davida le Solomon le a mi Israelhai chunga a thatna a'n langtir lei chun hlim tak le lawm takin mihai chu an in tieng an kìr nawk ta a. 11 Solomonin LALPA Tempul le ama in chu a nuom ang taka bawl zo a, LALPA Tempula ding le ama ina dinga thaw ding a lungrila a lo phan po pohai a hlen suok zo chun, 12 zânah Solomon kuomah LALPA a hung inlàr a, a kuomah "I tongtaina ka lo hriet a, hi hmun hi ka kuoma inthawina in hung inhlànna ding tempulah ka ruot tah. 13 Vânhai ka khâr leia hnuoiah ruo hrim a sûr naw chàng amanih, khau hon ka hung tir leia a ram an fâk ram châng amanih, ka mihai laia hripui ka hung inlêngtir châng amania, 14 ka hming puttu ka mihaiin inpha hnuoia ka kuomah an hung tongtai a, an mi zong a, an um dàn suolhai an nghatsan chun, vâna inthokin lo ngàithlang ka ta, an suolhai ngaidam ka ta, an ram chu thawi dam nawk ka tih. 15 Hi hmuna tongtaia in hung hnina laka chun ka mit phong ka ta, ka na sit bok ka tih. 16 Kumkhuoa ka hming umna dingin hi Tempul hi ka ruot a, ka sukthienglim ta a, chutaka chun ka mit le ka lungril fu zing hlak a tih. 17 "Nang khom i pa lungril ang put a, ringum tak le ngîl taka ka hmaah i khawsa ve a, ka thupêkhai po po zui a, ka thusuokhai le Dânhai po po i zawm ve chun, 18 i pa Davida kuoma. 'Israelhai lalthungpha hluotu ding chu mi invâi naw ti nih' ti a ka lo tiem tah angin, Israelhai chungah i lalthungpha chu kumkhuoin suknghet ka tih 19 "Amiruokchu, nangnin mi nghatsan a, ka thupêkhai le thusuokhai zawm lo a, pathien dang rong bawla in biek chun, 20 ka pêk tah hi rama inthok hin Israelhai chu phawi hmang ka ta, ka hminga dinga ka sukthienghlim tah hi Tempul hi hnawl bok ka ta, hnam tin nuizatbur le hmusit hung nîng a tih. 21 Tu hin hi Tempul hi ropui hlein inlang sienkhom, a fe pèl taphotin pangzatin, "Iengti lawm lawma hienga LALPA an Pathienin a thaw el am a na?" la ting an tih. 22 Mihai chun, 'Aigupta rama inthoka an pi le puhai thuoi suoktu LALPA an Pathien chu an nghatsan a, pathien dang an chel a, an biek a, an rong an bawl leiin hieng sietna po po hi an chungah LALPAN a hung intlungtir a nih' tiin la don an tih" a ta.

2 Chronicles 8

1 LALPA tempul le ama in ding kum sawmhni sûnga Solomonin a bawl zo hnung chun, 2 Hiramin khuo a pêkhai chu a bawl tha a, chuong khuoa hai chun Israelhai chu hmun a'n khuortir a. 3 Chu zoah Solomon chun Hamat Zoba a bei a, a lâk a. 4 Thlalèra khuo Tadmor chu a bawl tha a, Hamat biela hmangruo siekhawmna khuo po po khom a'n din tha bok a. 5 Beth Heron chuonchung le Beth Heron chuonhnuoia khuohai chu a bawl tha a, kul bang nei, kotkhâr le a kalna nei vongin a siem a. 6 Chuong ang bokin Baalat khuo le Jerusalem le Lebanon le a lalram sûng po poa hmangruo sie khawmna le sakor-tawlailir le indosakor sie khawmna khawpui po po hai chu a'n din thar vong bok a. 7 Israel mi ni lo hnam danghai, Israelhaiin sukbohmang loa an hlà Hit hai, Amor hai, Periz hai, Hiv hai le Jebu hai thlahai chu 8 Solomonin suoka neiin sinthawah a sor lui a, tu chen hin chuong ang chun an la um a. 9 Israel thlahai ruok chu Solomonin siehlaw anga sor ve loin, sipaia dâm, sipai hotua dâm, tawlailir le sakor chung chuong mihai hotua dâm a sie lem a. 10 Chuonghai chu mipuihai inrawitu, Solomon thoktu luhai an na, an rêngin zahni le sawmnga an nih. 11 Solomon chun "Ka nuhmei chu Israel lal Davida inah a um ding a ni nawh, LALPA Bawm lûtna hmun taphot chu hmun thienghlim a ni si a" a ta, Faraw naunu chu Davida Khawpuia inthokin ama puola a chêngna dinga a bawlpêk ina chun a thuoi tung a. 12 Solomon chun tempul hulhliep hmaa LALPA maichâm a siema chun inthawinahai a'n hlàn hlak a. 13 Mosie thupêk anga ni ser bîk Sabat hai, thla thar lawmna nia hai, kût bi nei huna hai, kum khata kût pathum- chol thang lo bei kûta dâm, chawlkar kûta dâm le bawkte kûta dâm pumraw thilhlân inhlàn dinga bitukhai chu a'n hlàn a. 14 A pa Davida lo ruot tah angin thiempu pawl le Levi pawlhai chu an chanpuol seng ni tina thaw tûl ang peia thaw ding, hlaa inpâkna thuoitu pawl dâm le ni tina an mamaw ang peia thiempuhai thangpuitu ding dâm a ruot a. Kotkhâr hrang hrang vêngtu ding a pawl pawlin a ruot bok a. Chuong anga an thaw ding seng chu Pathien mi Davidan a lo ruot sa diem a nih. 15 Lal Davidan thiempuhai le Levi-hai thaw ding le rosum siena an enkol dàn dinga thu a pêk iengkim chu a pêk ang thlapin an thaw vong a. 16 Solomonin bawl dàn dinga a riruong ang thlapin LALPA Tempul chu a thut an rema inthoka an zo fel chenin an bawl a, chuongchun LALPA Tempul chu zo fel a lo ni ta a. 17 Chu zoah Solomon chu Edom rama Agaba litengsawla um Ezion Geber le Elath a chun a fe a. 18 Chu taka chun Hiramin a longpuhai, tuinfinrieta che thang mihai chu long leh a tir a, Solomon siehlawhai leh Ofir-ah an fe a, chu taka mi chu rangkachak kilogram sîngkhat le sângrukc laia tam an va phur a, lal Solomon kuomah an inhlàn a.

2 Chronicles 9

1 Seba lalnuin Solomon hming inthangzie a lo hriet chun zawna khir tak taka fie dingin Jerusalemah a hang inzin a. Hnung zuitu tam tak leh, rimtui le rangkachak le lunghlu tam tak phurtu sanghawngsei ruol leh Solomon kuom a hang tlung a, a lungrila a pai po po chu phorin a titipui a. 2 A thil indon po po chu Solomonin a don vong a, hriet naw le hrilfie harsa ti hrim a nei nawh. 3 Solomon varzie dâm, a lal in bawl ropuizie dâm, 4 dawkana fâk ding an siehai dâm, a khawnbawl thung khup el hai dâm, rongbawltuhai le an inchei dàn hai dâm, uoiin semtuhai dâm le LALPA tempula pumraw thilhlân a'n hlànhai dâm Seba lalnu-in a hmu chun mak a ti hiel a. 5 Lal kuoma chun, "I thilthawhai le i varziehai ka rama inthoka ka lo hriet kha a lo indik khop el. 6 Keima hunga mit ngeia ka hmu hma chun ka lo awi ngai naw a, a chenve khom an mi lo hril naw lem a ni hi tie! Varna le hausaknaah an hung hril nèk daiin i lo insâng lem a nih. 7 I mihai hi ieng ang lawma hamtha am an na! I bula chêng, i varna thu ngàithla roptu i siehlawhai hi an va hang hamtha ngei de aw! 8 Nangma chunga lawmtu LALPA i Pathien ta dinga rorêltua a lalthungphaa sietu che chu inpâkin um raw se. LALPAN kumkhuoin Israelhai tungding a nuom leiin fel tak le indik taka an rorêltu dingin a sie che a ni hi" a ta. 9 Chuongchun, lal kuomah thilpêk rangkachak kilogram sângli le rimtui le lunghlu tam tak a pêk a. Seba lalnuin rimtui Solomon a pêk ang zozàia tam chu tu khomin an pêk nawk ta ngai nawh. 10 (Hiram long ruol Ofira rangkachak tam tak phura fehai chun almuk thing tam tak le lunghlu an hung phur teu bok a. 11 Lal chun almuk thinghai chu LALPA tempul kailawn le ama lal in kailawn siemnan a hmang bâkah rimawi tumtuhai hmang ding tingtang le perkhuong siemnain a hmang bok a. Chuong ang zozàia tam almuk thing chu a hnungin Judai ramah an hmu ta ngai nawh. ) 12 Lal Solomon chun Seba lalnu dit le hni taphot chu a thawpêk bâkah a lal ina rosum tam tak chu amanu hung chawi nêka tam a pêk bok a, chuongchun a rawihai leh ama ram tieng a kîr nawk ta a. 13 Kum tina Solomon kuta rangkachak lût zât chu kilogram sînghni le sângthum a nih. 14 Chu bâka chun sumdawnghai le dawrkaihaiin sie an pêk bâkah Arabiaa lalhai le a ram optuhaia inthokin sie le leiman a hmu teu bok a. 15 Lal Solomon chun rangkachak sut phêkin phaw lien zahni a siem a, phaw pakhat peiah rangkachak kilogram sari vèl an hmang a. 16 Chun, rangkachak sut phêk bokin phaw chin lem zathum a siem bok a, phaw pakhat peiah rangkachak kilogram hni an hmang a. Chuonghai chu a lal in 'Lebanon Ngawpui Rûn' a chun a sie a. 17 Chun, lal chun saiha ngotin lalthungpha ropui tak a siem a, chu chu rangkachak tuiin a'n luonkhum vong a. 18 Lalthungpha kai tungnaa chun kailawn paruk a um a, kailawn thut le inzomin rangkachak tlanga siem ke nghatsan a um a. Lalthungpha sîr ve vea chun kut innghatna chelbân a um a, chu sîr ve vea chun sakeibaknei pahnih an ngîr a. 19 Kailawn paruk sîr tona chun sakeibaknei sawmpahni, sîr tinah pakhat pei an ngîr a, chuong ang chu khaw lai rama khom an la siem ngai nawh. 20 Lal Solomon no po po chu rangkachaka siem vong a na, Lebanon Ngawpui Rûna a bûr le bêlhai chu rangkachak hlîr hlaka siem vong a nih. Solomon dam lai chun tangkaruo chu ieng thama ngai a ni naw leiin a bûr le bêlhai chu tangkaruoa siem hrim a um nawh. 21 Lal chun tuifinrietah sumdawng long ruol a nei a, chu chu Hiram longpuhaiin an khal a, chuonghai chun kum thum dan peiah rangkachak dâm, tangkaruo dâm, saiha dâm, zawng le ngau lien chi dâm an hung phur hlak a. 22 Hausakna le varnaah Solomon chun khawvela lal dang po po a khûm a. 23 Pathienin a lungrila varna thu a siepêkhai chu ngàithla dingin khawvela lal po poin Solomon chu an hung pan huoi huoi hlak a. 24 Chun, kum tinin a kuoma hung taphotin thilpêk tangkaruo le rangkachaka siem thil dâm, silfên dâm, râlthuom dâm, rimtui dâm, sakor dâm le sabengtung dâm an hung chawi hlak a. 25 Solomon chun sakor-tawlailir le sakor siena hmun sângli a nei a, indo sakor khom sîngkhat le sânghni a nei a, chuonghai chu tawlailir siena khuoa hai a sie a, a then Jerusalemah a kol a. 26 Solomon chu Eufretis vadunga inthoka Filistinhai ram chen le Aigupta ramri chena lalhai po po chunga lal tak a nih. 27 Lal chun Jerusalemah thil a hau êm leiin tangkaruo dâm chu lungte ang hiel le sidar thing khom tlâng thuta theichang bil ang hiela ngai khopin a siem a nih. 28 Solomon sakorhai chu Aigupta rama inthok le hmun hrang hranga inthoka a lâk a nih. 29 Solomon inlal laia thil tlung danghai chu a bula inthoka a tawp chenin zawlnei Nathan thu zieka hai, Silo mi Ahija hril lawkna thu inziekna bua hai, Nebat naupa Jeroboam chungthua zawlnei Ido-in inhriettirna a donghai inziekna bua hai a chuong. 30 Solomon chu Jerusalemah Israel mihai po po chungah kum sawmli a'n lal a. 31 A pi le puhai kuoma a chawl chun a pa Davida khuoah an phûm a, a naupa Rehoboam chun a lalna chu a hung hluo ta a.

2 Chronicles 10

1 Rehoboam chu Sekem khuoah a fe a, Israel mihai po po khom ama chu lala siem dingin chu taka chun an fe ve a. 2 Nebat naupa Jeroboam, lal Solomon leia Aigupta rama tlân hmang chun chu ri chu a lo hriet a, Aigupta rama inthokin a kîr nawk a. 3 Israel mi pungkhawmhai po po chun Jeroboam chu an ko a, ama rawiin Rehoboam kuomah palai an fe a, 4 "I pa khan kan phur a sukrik taluo a, tuhin inrim taka a mi sorna le ringkol rik tak a min phurtir hi mi sukzângpêk la, i rong bawl kan tih" an ta. 5 Rehoboam chun, "Kîr nawk ta unla, ni thum hnungah hung nawk ro" a ta, palaihai chu an suok a. 6 Lal Rehoboam chun a pa Solomon dam sûng po poa a hnuoia sinthaw hlak upahai chu a rawn a, "Hieng mihai hi iengti anga don dingin am in ngai a?" a ta. 7 Anni chun, "Voisun hin hieng mihai thu hi ngilnei tak le tha taka i lo dongsawng chun kumkhuoin i siehlawah um an tih" an ta. 8 Sienkhom, upahai remruotpui chu Rehoboam chun pom loin, ama ruoltlâkpui tlangvàl ruol, a bula khawsa hlakhai chu a rawn lem a. 9 An kuomah, "Iem in ngai ve dàn chu? Mipuihaiin, 'I pa ringkol mi'n phurtir hi mi sukzangpêk deu rawh' an ti hi iengtin am ei don ding a na?" a ta. 10 A ruolchamhai chun, " 'I pa ringkol min phurtir hi mi sukzângpêk rawh' tituhai kuoma chun, 'Ka kutte hi ka pa kawng nêkin a lien lem. 11 Ka pa khan phur rik tak a'n phurtir cheu a, kei chun in phur ka sukrik zuol ding a nih. Ka pa khan vuokna hruolin a hrîk hlak cheu a, kei ruok chun khawmuol kaikuongin ka hrîk ding cheu a nih' tiin hril rawh" an ta. 12 Lalin, "Ni thum hnungah hung nawk ro" a ti angin ni thum hnungah Jeroboam le Israelhai chu Rehoboam kuomah an hung nawk a. 13 Lal chun upahai thurawn a lâk naw leiin inrum takin a lo biek a. 14 Tlangvàlhai remruotpui angin, "Ka pa khan in phur a lo sukrik a, kei chun ka sukrik zuol ding a nih. Ka pa khan vuokna hruolin a hrîk hlak cheu a, kei ruok chun khawmuol kaikuongin ka hrîk ding cheu a nih" a ta. 15 Chuong ang chun mipuihai thu chu lal chun a ngàithlàk nuom nawh; chu thil hung tlung chu LALPAN Silo mi Ahija hmanga Nebat naupa Jeroboam kuoma a lo hril lawk tah chu sukdikna dinga LALPA thilthaw a ni si a. 16 Lal chun an thu a ngàithlâk nuom der nawh ti Israelhaiin an hrietin lal chu hieng ang hin an don a:"Davida lakah iem chanvo kan nei hrim a? Jesai naupa lakah rochan iem kan nei ve a? Aw Israelhai, in puon in tieng kîr nawk ta ro. Aw Davida, i sûngkuo chu nangin enkol ta rawh" tiin. Chuongchun, Israelhai chu in tieng an kìr ta rip a. 17 Judai rama um Israelhai chunga chauh Rehoboam chu lal a hung ni ta a. 18 Lal Rehoboam chun sinthawa mi sor luihai inrawitu Adoniram chu Israel pungkhawmhai kuomah a tir a, anni chun lungin an lo dèng hlum a. Lal Rehoboam ruok chu a tawlailirah a lût hman hràm a, Jerusalem tieng a tlân sie a. 19 Chuongchun, Israelhai chu Davida sûngkuo lakah tu chen hin an hel tah a nih.

2 Chronicles 11

1 Rehoboamin Jerusalem a hung tlung chun Israel sûngkuohai chu do ding le an ram del po chu a rama la kîr nawk dingin Juda hnama mi le Benjamin hnama mihai laia mi huoisen thlang bîk mi nuoi khat le sîng riet a khawm a. 2 Amiruokchu Pathien mi Semai kuomah LALPA thu a hung tlung a, 3 "Judai ram lal Solomon naupa Rehoboam kuoma le Juda le Benjamin sûngkuo po pohai kuomah, 4 LALPAN hieng ang hin a hril: 'Hang fe naw ro, Israel thlahai, in unauhai chu hang do hlek naw ro. Mani in tieng seng kîr nawk ro. Hi thil hi keima thaw a nih' tiin hril tawl rawh" a ta. Chuongchun LALPA thu chu an awi a, Jeroboam chu hang bei loin an kîr ta vong a. 5 Rehoboam chu Jerusalemah a um a, Judai ram vèng himna dingin a khuohai a siem tha a. 6 Chuonghai chu Bethlehem hai, Etam hai, Tekoa hai, 7 Bet Zur hai, Soko hai, Adulam hai, 8 Gath hai, Maresa hai, Zif hai, 9 Adoraim hai, Lakis hai, Azeka hai, 10 Zora hai, Aijalon hai le Hebron hai an na, Judai ram le Benjamin rama kul nei khuohai chu an nih. 11 Chuong kulhai chu a suknghet a, khaw tinah vêngtu kawmandar a sie vong a, fâk ding dâm, hriek dâm le uoiin dâm a sêk khawl a. 12 Khaw tinah râlthuom phaw le fei hai a sie a, khaw hrât takin a siem tawl a. Chuong ang chun Judai ram le Benjamin ram chu a ta a hung ni ta a. 13 Israel ram biel tina thiempuhai le Levihai chu Rehoboam tieng an thang a. 14 Jeroboam le a nauhaiin LALPA thiempu dingin an hnawl si leiin, Levihai chun an in le lo le ran tlatna hmunhai chu mâksanin Judai ram le Jerusalem an pan a. 15 Hmun sànga kèlchal le bawngte lem a siehai bieknaa hmang dingin Jeroboam chun ama thiempuhai chu a ruot lem a. 16 Chun, Israel hnamhai laia LALPA Israelhai Pathien tienga lungril thle taphot chun LALPA, an pi le puhai Pathien kuoma inthawi dingin Jerusalem tieng Levihai chu an zui bok a. 17 Chuonghai chun Solomon naupa Rehoboam chu tanin, Judai ram chu an suknghet a, kum thum sûng chu Davida le Solomon hai lampui hraw chu an hraw ve a. 18 Rehoboam chun Davida naupa Jerimot naunu Mahalat chu nuhmeiah a nei a. Mahalat nu chu Abihail a na, ama chu Jesai naupa Eliab naunu a nih. 19 Naupa pathum Jeush, Semaria le Zaham hai a hringpèk a. 20 Ama hnunga chun Absalom naunu Maakai a nei a, ama chun Abija, Ataia, Ziza le Selomit hai a hringpèk a. 21 Rehoboam chun Absalom naunu Maakai chu a nuhmei danghai le hmeihai po po nêkin a hmangai lem a. Rehoboam chun nuhmei sawm le pariet le hmei sawmruk a nei a, naupa sawmhni le pariet le naunu sawmruk a nei. 22 Chun, Rehoboam chun Maakai naupa Abija chu lala a siem theina dingin a unauhai laia chunghnung takah a sie a. 23 Var takin rem a ruot a, a naupahai chu Judai ram le Benjamin ram po poa kul nei khuoa hai chun mawphurna pein a'n um dartir a, fâk ding tam tak a pêk a, nuhmei tam tak a'n neitir tawl bok a.

2 Chronicles 12

1 Rehoboam chu a hung inlal nghet phing leh ama tienga thang Israelhai po po leh LALPA dàn an nghatsan ta a. 2 LALPA chungah an ringum naw leiin lal Rehoboam inlala inthoka kum nganaa chun Aigupta lal Sisak-in Jerusalem a hung rûn a. 3 Sisak chun sakor-tawlailir sâng le indo sakor sîngruk le Libya mi hai, Suki mihai le Kushd mihai, tiem seng loa tam chu Aiguptaa inthokin a hung thuoi a, 4 Judai rama kula inhuon khuohai chu a lâk a, Jerusalem chen a hang tlung a. 5 Rehoboam le Juda hnama lukhàituhai, Sisak an ti leia Jerusalema pungkhawmhai kuoma chun zawlnei Semaia a hang fe a, an kuomah, "LALPA chun hieng hin a hril: 'In mi nghatsan a, chuleiin kei khomin Sisak kutah ka mâksan ve ta cheu a nih' a tih" tiin a hril a. 6 Israel lal le an lukhàituhai chu inpha hnuoiin, "LALPA chu a'n dik a nih" an ta. 7 An inpha hnuoi ti LALPAN a hmu chun LALPA thu chu Semaia kuomah a hung tlung a, "An inpha hnuoi leiin anni chu sukse loin intlan suok vat tawl ka tih. Sisak hmangin Jerusalem chungah ka lungsenna bun thla ta naw ning. 8 Amiruokchu, ka rongbawl le hnuoi lalhai rongbawl indanglamzie an hriet theina dingin Sisak thu hnuoiah sie tawl ka tih" a ta. 9 Aigupta lal Sisak chun Jerusalem chu a bei a, LALPA tempul le lal ina rosum po po chu a lâk fai vong a, Solomon siem rangkachak phawhai po po khom a lâk bok a. 10 Lal Rehoboam chun a aiin dâr phaw a siem a, lal in kot vêngtu kawmandarhai chu a'n koltir a. 11 LALPA tempulah lal a fe pha leh vêngtuhai chun dâr phaw chu an chawi a, an hung kìr pha leh vêngtuhai pindana a siena hmuna chun an thak kîr nawk hlak a. 12 Rehoboam inpha hnuoi lei chun LALPAN a lungsenna a lâk kieng a, a suksiet vong ta naw a, Judai ram chu a tha tluong pei a. 13 Lal Rehoboam chu Jerusalemah inlal zom peiin a'n suknghet pei a. Kum sawmli le kum khat a ni kuma inlal tanin, LALPAN a hming umna dinga Israel hnam po pohai hmun laia a thlang bìk khuo Jerusalema chun kum sawm le kum sari a'n lal a, a nu hming chu Naama a na, Amon mi a nih. 14 LALPA tieng lungril a pêk naw leiin thil suol a thaw a. 15 Rehoboam inlal sûnga thil tlunghai, a bula inthoka a tawp chen chu zawlnei Semaia ziek le zawlnei Ido zieka inthla sawng dàn chanchin an suinaah a chuong. Rehoboam le Jeroboam chu an indo zing zing hlak a. 16 Chun, Rehoboam chu a pi le puhai kuomah a chawl a, Davida khuoah an phûm a, a naupa Abija-in a lalna chu a hung hluo ta a.

2 Chronicles 13

1 Israel lal Jeroboam inlala inthoka kum sawm le kum rieta chun Abija chu Judahai chunga lalah a hung um a. 2 Jerusalemah kum thum a'n lal a, a nu hming chu Maaka a na, Gibea khaw mi Uriel naunu a nih. Abija le Jeroboam chu an indo a. 3 Abija chun indo mi, sipai huoisen thlang khawm nuoi li leh a va bei a, Jeroboam chun mi hrât thlang khawm nuoi riet leh thang a lo khaw a. 4 Abija chu Efraim tlâng rama Zemaraim tlângah a ngîr a, "Aw Jeroboam le Israel mi po pohai, lo ngaithla ro. 5 LALPA, Israel Pathien chun Israel ram chu Davida le a thlahai kuomah machi thuthlunge thlungin kumkhuoa dingin a pêk tah ti in hriet naw am a ni? 6 Chuong sa khom chun Nebat naupa Jeroboam, Davida naupa Solomon siehlaw chu a pu chungah a lo hel el ta hi! 7 Solomon naupa Rehoboam chu naupang dawng a la ni lai le a la do hne tawl hmain ama kal zawngin Jeroboam chun mi hmangna bo ruol a'n pung khawm a. 8 Tu khom hin Davida thlahai kuta um LALPA ram chu do dingin in inpuocha a, sipai khom in hau hle a, Jeroboamin in pathien dinga a siempêk cheu bawngte lemhai khom in kuomah a um a. 9 LALPA thiempu, Aron nauhai le Levi-hai chu hnot suokin, ram dang mihai thaw danin thiempu in insiem chop a ni naw am a ni? Bawngchal tuoi le beramchal pasari chawia hung inhlàn taphothai chu pathien ni hrim hrim lohai thiempuah in lo siem thei pei a ni khah. 10 "Keini Pathien ruok chu LALPA a na, ama chu kan inphatsan naw a, LALPA rongbawltu thiempuhai khom Aron naupahai le anni thangpuitu Levihai an nih. 11 Ni tin zîng tieng le zân tieng pumraw thilhlân le rimtui thilhlân LALPA kuomah an inhlàn a; dawkân thienghlimah bei an sie diem a, zân tieng zàtin rangkachak khawnvar sienaa khawnvarhai chu an insit a. Keini chun LALPA kan Pathien thupêk chu kan zawm zing a, nangni ruok chun ama chu in nghatsan ta si a. 12 Ngai ta u, Pathien chu kan kuomah a um a, ama chu mi thuoitu a nih. A thiempuhai chun nangni dona dingin tawtawrawt mût an tih. Israel mihai, in pi le puhai Pathien LALPA chu kalin do naw ro, hmuingil naw top in tih" a ta. 13 Nisienlakhom Jeroboam chun an hnung tienga inchàntu sipai a sie a, ama chu Judahai hma tieng chun a um a. 14 Judahai an hang ngha kîr chun hnung tieng le hma tieng râlin an inhuol an hmu a, chuongchun LALPA chu koin thiempuhai chun tawtawrawt an mût a. 15 Judahai chu an khèk dur dur a, an khèk ruol chun Abija le Judahai hmaah Pathienin Jeroboam le Israel mihai po po chu a suktlawm a. 16 Judahai hmaa chun Israelhai chu an tlânsie a, Pathienin an kutah a pêk a. 17 Abija le a mihai chun an that teu a, Israel sipai tha tha nuoinga an that a nih. 18 Chu tum chun Israel mihai chu an tlawm a; LALPA, an pi le puhai Pathiena an innghat leiin Judahai chun hnèna an chang a nih. 19 Abija chun Jeroboam chu a hnot a, Bethel khuo hai, Jesana khuo hai, Efron khuo hai le an khawperhai chu a lâkpêk a. 20 Abija inlal sûngin Jeroboam chu a ngîr suok nawk ta nawh. LALPAN a hrem a, a thi a. 21 Abija ruok chu a hung hrât deu deu a. Nuhmei sawm le pali a nei a, naupa sawmhni le pahni le naunu sawm le paruk a nei a. 22 Abija chanchin danghai, a thilthawhai le a thil hrilhai chu zawlnei Iddo ziek chanchin inchiknaah a chuong.

2 Chronicles 14

1 Abija chu a pi le puhai kuomah a chawl a, Davida khawpuia chun an phûm a, a naupa Asa chun lalna chu a hung hluo a, a'n lal sûngin a ram chu kum sawm zet râlmuongin a um a. 2 Asa chun LALPA Pathien mithmuah thil tha le indik a thaw hlak a. 3 Ram dang pathienhai maichâm le hmun sànga bawlhmun po po chu a thiek a, an lung biekhai chu a vuok koi a, Asera lem thinghai chu a phûr thlûk vong a. 4 Judahai chu LALPA, an pi le puhai Pathien chu zong ding le a dàn le thupêkhai chu zawm dingin thu a pêk a. 5 Judai ram khaw tina hmun sànghai le rimtui inhlànna bawlhmunhai po po chu a thiek vong a, a'n lal sûngin a ram chu râlmuongin a um a. 6 Râl a muong leiin Judai rama chun kul nei khuohai an din a, LALPAN râlmuongna a pêk leiin chu sûng chun tu khomin an hung do nawh. 7 Ama chun Judahai kuomah, "Thaw ro, hieng khuohai hi indin ei tiu khai; kulin inhuon ei ta, râlvêng bûk sànghai bawl ei ta, kul kotkhâr le a kalnahai siem ei tiu. LALPA ei Pathien ditzawng ei zong leiin ram chu ei kutah a la um zing a, sîr tinah râlmuongna a mi pêk a nih" a ta. Chuongchun, khuohai chu an indin tha a, an hmuingil pei a. 8 Asa chun Juda mi, phaw le fei chawi sipai nuoithum a nei a; chun, Benjamin mi, phaw le thal hmang nuoihni le sîngriet a nei bok a, chuonghai chu mi hrât le huoisen vong an nih. 9 Chun, Kusf mi Zera chun sipai maktaduoi khat le sakor-tawlailir zathum thuoiin anni chu rûn dingin a hung inthok a, Maresa a hung tlung a. 10 Anni chu dang dingin Asa chu a'n thok suok a, Maresaa Zefatha ruoma chun thanghmun a khaw a. 11 Asa chun LALPA Pathien a ko a, "LALPA, nang chauh naw chu mi hrât tak laka mi hrât nawhai san theitu tu khom an um nawh. Aw LALPA kan Pathien, mi hung thangpui raw khai, nang chu kan innghatna i na, hieng sipai tam tak hi bei dingin i hmingin kan hung inthok suok a nih. Aw LALPA, nang chu kan Pathien i na, mihriemin ngam lul naw raw se che" tiin a tongtai a. 12 Chuongchun, LALPAN Asa le Judahai hmaa chun Kush mihai chu a bei a, an tlânse dur dur a. 13 Asa le a mihai chun Gerar chenin an hnot a, Kush mihai chu an that rawn êm leiin an thang zo ta naw a, LALPA le a sipaihai hmaa chun an tlawm ta dêr a. Judahai chun râllâk sum tam tak an lâk a. 14 Gerar le a se vela khuohai po po chu an suksietpêk a, LALPA tiumna chu an chungah bunin a um si a. Chuongchun, khuohai chu an rok a, râllâk tam tak an làk a. 15 Ranpuhai bûk khom an rok a, an ran ruol beram, kèl le sanghawngsei tam tak an thuoi a, Jerusalem tieng an kîr nawk ta a.

2 Chronicles 15

1 Oded naupa Azaria chungah Pathien thlarau a hung tlung a. 2 Asa hmuok dingin a suok a, a kuomah, "Asa le Juda mi po po le Benjamin mi po po hai, mi lo ngàithla ro. Amaa in um sûng po nangniah LALPA khom um a tih. In zong chun ama chu hmung in ta, in inphatsan chun inphatsan vêng a ti cheu. 3 Israelhai chu Pathien tak be loin hun sawt tak an khawsa a, zirtirtu ding thiempu an nei naw a, dàn khom an hriet bok nawh. 4 Amiruokchu, an beidongin LALPA, Israel Pathien tieng an ngha a, an zong a, ama chu an hmu a. 5 Chuong hun lai chun a ram chu buoina rûnpuiin a chîm leiin inzin suok ngamna khom a ni nawh. 6 Hnam le hnam, khuo le khuo an insuksiet rem rum a, an chungah beidongna chi tinrêng Pathienin a'n tlungtir a nih. 7 Nangni ruok chu hrât takin um unla, inthlada naw ro, in thilthaw ra chu in hmu ding a ni si a" a ta. 8 Chuong thuhai le zawlnei Oded naupa Azaria thu hrilhai Asa-in a hriet chun a sukhuoi pha a, Judai ram le Benjamin ram po po le Efraim tlângrama khuo an lâk po poa inthok chun thil tirdakum mi lemhai chu a'n thiel fai vong a. LALPA Tempul tuola maichâm chu a siem tha a. 9 LALPA chun a umpui ti an hrietin Israel rama inthokin mi tam takin an hung bel a. Asa chun Judai ram le Benjamin rama mihai le anni laia chêng Efraim le Manase le Simeon mihai chu a ko khawm a, 10 a hung inlala inthoka kum sawm le kum ngana, a thla thumnaa chun Jerusalemah an hung pung khawm a. 11 Chu ni chun an râllâk bawngchal zasari le beram le kèl sângsariin LALPA kuomah an inthawi a. 12 Lungril po po le thlarau po poa LALPA, an pi le puhai Pathien chu zong dingin thu an thlung a. 13 LALPA, Israelhai Pathien zong lo chu a chin a lien, nuhmei pasal tu khom sukhlum dingin thu an thlung bok a. 14 LALPA kuomah rawl inring taka khêkin, tawtawrawt le beram ki mûtin, intiemkamna thu chu an insam a. 15 Titakzeta intiemkamna thu an thlung tlang leiin Judai ram mihai chu an lawm hle a, thahnemngai takin LALPA chu an zong a, hmu khom an hmu hrim a, LALPA chun kil tinah hadamna a pêk a. 16 Lal Asa chun a pi Maaka khom chu Asera lem tirdakum tak thing an kertir leiin lalnu a nina a hlippêk a. Asa chun a milem siem chu a phûr thluk a, a sât nawi vong a, Kidron vadungah a raw a. 17 Israel rama inthokin hmun sànghai chu inthiel fai zo naw sienkhom Asa lungril chu a dam sûngin LALPA chungah a ringum a nih. 18 A pain Pathien kuoma a lo inhlân tah leh ama lo inhlân tah tangkaruo le rangkachak le bûr le bèlhai po po chu Pathien tempulah a lâk lût a. 19 Asa inlal hun kum sawmthum le kum nga sûngin indo hrim hrim a um nawk ta nawh.

2 Chronicles 16

1 Asa inlal kum sawmthum le kum ruknaah Israel lal Baasa-in a hang bei a, Juda lal Asa rama inthoka tu khom suoka an lût thei nawna dingin Rama khuo chu kulin an huontir a. 2 Chu phing leh Asa chun LALPA tempul le ama ina mi tangkaruo le rangkachak um po po chu a lâk suok a, Damaskaa Aram lal Ben-Hadad kuomah a thon a, 3 "Ka pa le i pa inkâra inremna thuthlung an siem ang bok khan nangma le keima inkâra khom thuthlung siem vêng ei tih. En ta, tangkaruo le rangkachak ka hung thon hi. Israel lal Baasa le in thuthlung lo siem tah kha sût la, ka rama inthokin a sipaihai hi hnûk dok raw se" tiin thu a thon a. 4 Ben-Hadad chun lal Asa thu chu a remtipui a, Israel rama khuohai rûn dingin a sipai kawmandarhai a tir a, Ijon khuo dâm, Dan khuo dâm, Abel Maim le Naftalia biela hmangruo sie khawmna khuo po po chu a bei a. 5 Chu thu chu Baasa-in a hriet charin Rama khuo an huon lai chu a tawpsan ta a. 6 Chuongchun, Asa chun Juda mihai po po chu a'n pun khawm a, a thuoi a, Baasa-in Rama kul siemna dinga thing le lung a lâk khawmhai po po chu an lâk vong a, chu chu Geba le Mizpa khuo siemna dingin an hmang ta a. 7 Chuong lai chun zawlnei Hanani chu Juda lal Asa kuomah a hung a, a kuomah, "LALPA i Pathienah innghat loa Aram lal i ring lem leiin Israel lal sipaihai chu i'n suo tah a ni kha. 8 Kush mihai le Libia mihai khan sipai le sakor-tawlailir le sakor chungchuong mi tam tak an nei a ni naw am a ni? Sienkhom, LALPA i ring leiin i kutah a pêk che a ni kha. 9 Ama tienga lungril pe vongtuhai chu sukhrât dingin hnuoi chung po poa hin LALPAN mit a'n lèn kuol zing hlak a nih. Thil invêtthlàk tak i thaw leiin tuta inthok chu indopui nei zing tâng i tih" a ta. 10 Asa chu zawlnei chunga chun a lungsen hle a, lung inah a khum ta hiel a. Chu taka inthok chun mi dang chunga khom rawng taka kut thlâk a hung ching ta a. 11 Asa chanchin a bula inthoka a tawp chen chu Juda le Israel lalhai chanchin inziekna bu-ah a chuong. 12 Kum sawmthum le kum kuo a'n lal kumin Asa kepâr chu nasa takin a hung na ta a, a na inrim hle a, sienkhom a natnaa chun LALPA rawn loin damdawi thiemhai a ruoi lem a. 13 Kum sawmli le kum khat a'n lal kumin Asa chu a thi a, a pi le puhai kuomah a chawl ve ta a. 14 Davida khawpuia ama thlân dinga a kera chun an phûm a. A kuonga chun rimtui siemtuhaiin rimtui chi hrang hrang an siemhai chu an thun teu a, chu chunga chun a ruong chu an inzàl a, inza inentirnain ama puolin meipui nasa tak an sep a.

2 Chronicles 17

1 A naupa Jehosafat chun a lalna chu a hung hluo a, Israelhai do thei dingin a ngîrhmun a suknghet a. 2 Judai rama kul nei khuo po poah vêngtu sipai a sie a, Judai ram le a pa Asa lo lâk Efraim rama khuoa hai chun sipai hmunpui a sie vong bok a. 3 Jehosafat chun a hung inlal tîr lai chun a thlatu Davida kalchawi dàn a zui a, Baal a biek naw leiin a kuomah LALPA a um a. 4 Israel lalhai chìng dàn zui ve loin an pi le puhai Pathien a zong a, a thupêkhai a zawm a. 5 Chuleiin, a ram chu ama enkolna hnuoiah LALPAN a suknghet a, Judai rama mi po poin thilpêk an hung pêk a, hausain a hung ropui ta hle a. 6 A lungril chu LALPA lampui tieng a thle a, Judai ram hmun sànga bawlhmun po po chu a thiek a, Ashera lem thinghai chu a phûr thlûk vong bok a. 7 A hung inlala inthoka kum thumnaa chun a thoktu Ben-Hail hai, Obadia hai, Zekaria hai, Nathanel hai le Mikaia hai chu Judai ram khuoa mihai inchûktir dingin a tir suok a; 8 chuonghai chu Levi chia mi Semaia hai, Nethania hai, Zebadia hai, Asahel hai, Semiramot hai, Jehonathan hai, Adonija hai, Tobija hai le Tob-Adonija hai bâkah thiempu Elisama le Jehoram haiin an zui a. 9 LALPA Dàn Bu chawiin Judai rama khaw tin an sir a, mihai an inchûktir a. 10 Judai ram vela ram dang po po chun LALPA an ti leiin tu khomin Jehosafat chu an do ngam nawh. 11 Filistin mi thenkhatin Jehosafat chu thilpêk an hung inhlàn a, a thenin sie dingin tangkaruo an hung chawi a; Arab mihai khomin ran ruol, beramchal sângsari le zasari le kèlchal sângsari le zasari an hung pêk bok a. 12 Jehosafat chu a hung ropui deu deu a, Judai rama chun kul le thil siekhawmna khuohai a bawl a, 13 Judai ram khuoa hai chun fâk ding a sèk khawm teu a. Jerusalemah râl do thiem mi a sie teu bok a. 14 A chi chiin mani chi hotu an nei a, Juda thlahai laia sipai sângkhat pei inrawituhai chunga kawmandarhai chu Adna a na, mi nuoithum chunga kawmandar a nih. 15 A dottu chu Jehohanan a na, sipai nuoihni le sîngriet chunga kawmandar a nih. 16 A pathumna chu LALPA rongbawltu dinga ama thu ngota inpe Zikri naupa Amasia a na, sipai nuoihni chunga kawmandar a nih. 17 Benjamin sûngkuoa inthok chun, sipai huoisen Eliada, thal le phaw chawi mi nuoihni chunga kawmandar le 18 Jehozabad, indo dinga inrâlthuom sa mi nuoikhat le sîngriet chunga kawmandar hai an nih. Hienghai hi Judai ram sûnga kul nei khaw hrang hranga sipai a siehai bâka lal kuoma umhai chu an nih. 19 (A um nawh)

2 Chronicles 18

1 Jehosafat chu hausaa a hung ropui ta hle hnung chun ama sûngkuoa mi le Israel lal Ahab sûngkuoa mi chu inneitir dingin rem a ruot a. 2 Kum iemani zât hnunga chun Israelhai lal Ahab hmu dingin Samaria-ah a zu fe a. Ahab chun beram le bawng tam tak a lo that a, Gilead biela Ramot khuo chu dopui dingin a lo fiel a. 3 Ama chun Jehosafat kuomah, "Gilead biela Ramot khuo i mi hang rûnpui nuom naw maw?" a ta. Jehosafat chun, "Kei le nang le ka mihai le i mihai chu thang hmunkhat ei ni a, râl chu ei bei tlâng ding annawm" a ta. 4 Chun, Jehosafat chun Israel lal kuomah, "LALPA thu dâm la nghâk phot la tie" a ta. 5 Chuongchun, Israel lal chun zawlnei zali a ko khawm a, an kuomah, "Gilead biela Ramot khuo ka hang bei ding am bei naw ding?" tiin a'n don tawl a. Anni chun, "Hang bei rawh, LALPAN i kutah pêng a ti che" an ta. 6 Sienkhom, Jehosafat chun, "Hi taka hin LALPA zawlnei tu amani bêk hang rawn ding an um naw maw?" a ta. 7 Israel lal chun, "LALPA mi rawnpêk ding zawlnei pakhat Imla naupa Mikaia chu a um annawm. Amiruokchu ama hi ka mi theida zawng tak el a na, ka chungchang thu hi a se tieng ngot naw chu a tha tieng a la hril ngai hrim hrim nawh" a ta. Jehosafat chun, "Lalin chuong chun ti naw hràm raw se" a ta. 8 Lal chun a thoktuhai laia mi pakhat a ko a, "Imla naupa Mikaia hang ko vat rawh" a ta. 9 Israel lal le Juda lal Jehosafat chu Samaria kul kotkhâr bula hrizawla chun lal thuom inbelin, an lalthungphaa ve vea chun an inthung a, zawlnei dang po po chun an hmaah thu an hril a. 10 Chun, Kenana naupa Zedekia chun thîrin siel ki lim a siem a, "Hieng ang hin LALPAN a hril: 'Hi ki hin Aram mihai chu an bohmang chenin phir tlang i tih' tiin" a ta. 11 Chuong ang bokin zawlnei po po chun, "Gilead biela Ramot-ah hang fe la, hang hlawtling rawh khai, LALPAN lal kuomah a pêk ding a nih" tiin an hril seng bok a. 12 Chun, Mikaia ko dinga an tir chun a kuomah, "Ngai ta, zawlneihai po po chun inkhuongruol takin lal chu hlawtling ngei dingin an hril a nih. Nang khomin anni ang chun ngai ve la, a tha tiengin hrilpêk ve raw khai" a ta. 13 Sienkhom Mikaia chun, "LALPA hringna sâlin ka hril hi, LALPAN a mi hril chauh chu hril thei ka tih" a ta. 14 A hung tlung chun lalin a kuomah, "Mikaia, Gilead biela Ramot ka hang bei ding am bei lo ding?" a ta. Ama chun, "Bei la, hlawtling i tih, LALPAN lal kutah a pêk ding a ni si a" a ta. 15 Lal chun, "Voi ieng zât top am LALPA hminga thutak chauh mi hril dingin thu ka'n khamtir ta che a?" a ta. 16 Mikaia chun, "Israelhai chu vêngtu nei lo beram anga tlânga indar vong ka hmu a; LALPAN, 'Hienghai hin hotu an nei ta naw a, mi tin mani in tieng thlamuong takin inlawi diel raw hai se' a ti a nih" a ta. 17 Chun, Israel lal chun Jehosafat kuomah, "Ka chungthua chu a se tieng zawng naw chu a tha tieng hrim hrim a hril ngai nawh ti ka hril ta hrim che kha" a ta. 18 Mikaia chun a hril zom pei a, "Chuleiin, LALPA thu hi ngàithla rawh. LALPA chu a lalthungphaa inthung a, a chang tieng le voi tienga vân mipui po po ngîr, ka hmu a. 19 Chun, LALPA chun, 'Ahab hi Gilead biela Ramot khuoa hang infetir a, râl kuta thi dingin tuin am thlêm thlu thei a ta?' a ti a. Pakhatin hieng hin a ti a, mi dangin chuong ang chun an ti bok a. 20 Chun, thlarau pakhat hi a hung suok a, LALPA hmaah a ngîr a, 'Keiin thlêm thlu thei ka tih' a ta. 21 Chun, LALPA chun a kuomah, 'Iengtin am?' a ta. Ama chun, 'Zu fêng ka ta, zawlnei po po hai hmûrah thlarau khelhlipah inchang ka tih' a ta. LALPA chun, 'Thlêm hne ngei i ta, hlawtling bok i tih. Fe la, chuong ang tak chun zu thaw rawh' a ta. 22 Chuongchun, ngai ta, LALPAN hieng i zawlneihai po po hmûra hin thlarau khelhlip a sie a, siet tuok dingin i chungthu hi LALPA chun a rêl tah a nih" a ta. 23 Kenana naupa Zedekia chun a hung hnai a, "LALPA thlarau chun i kuoma thu hril lem dingin kei hi iengtik am ie a mi suoksan chu?" tiin Mikaia biengah a ben a. 24 Mikaia chun, "Lo ngai zing rawh, pindan rila inbi dinga i fe ni pha leh la hrieng i tih" a ta. 25 Chun, Israel lal chun, "Mikaia hi khawpui optu Amon le lal naupa Joash kuomah thuoi unla, 26 an kuomah, 'Lal chun hieng hin a tih: Hi mi hi lung inah khum unla, ka hung kîr nawk hma khat chu bei le tui chauh lo pe ro' a tih" tiin thu a pêk a. 27 Mikaia chun, "Dama i hung kîr nawk a ni hrim chun LALPA chun keima hmangin thu a hril nawh tina nîng a tih" a ta. Chun, ama vêkin, "Nangni mipuihai, in rêngin ka hril hi inchik rân ro" a ta. 28 Chuongchun, Israel lal le Juda lal Jehosafat chu Gilead biela Ramot khuo bei dingin an suok a. 29 Israel lal chun Jehosafat kuomah, "Kan indo pha kei chu insiem danglam ka ta, nang ruok chun lal incheiin inchei zing rawh" a ta. Chuongchun, Israel lal chu a'n siem danglam a, indonaa chun a thang ve ta a. 30 Aram lal chun tawlailir khaltu hotu kuomah, "Israel lal chauh naw chu mi chîn amanih mi lien amanih tu khom bei naw ro" tiin thu a pêk a. 31 Tawlailir khaltuhaiin Jehosafat an hmu chun, "Israel lal a ni ngei hi" tiin bei tumin an inhuol a, Jehosafat chu inring takin a khêk a, LALPA Pathienin a hung don a, a hung beituhai chu a dang kirpêk a. 32 Tawlailir khal hotuhai chun Israel lal a ni nawh ti an hriet chun an kîrsan ta a. 33 Chun, mi pakhat hin tum bik khom nei loin a thalngul a kuoi a, Israel lal chu a awmphaw inzomna kâr takah a kâp a. Ama chun a tawlailir khaltu kuomah, "Tawlailir kha kei her la, sipaihai laia inthok hin mi tlân suokpui rawh, hliem na tak ka tuok a nih" a ta. 34 Chu nia an indo chu an inbei nasa hle a. Lal chu a tawlailir chunga chun Aram mihai tieng nghain a thung a, nisa tlâk ruol chun a thi ta a.

2 Chronicles 19

1 Jehosafat chu him takin Jerusalema a inah a kîr nawk ta a. 2 Zawlnei Hanani naupa Jehu chun a lo hmuok a, a kuomah, "Mi rilo thangpuiin, LALPA theidatu chu i'n thloppui ding maw? Hi lei hin LALPA lungsenna chu i chungah a fû a nih. 3 Amiruokchu, hi rama inthoka Asera lem thinghai inthiel fai a, LALPA chu i zong leiin thatna kong iemani chu i la nei hih" a ta. 4 Jehosafat chu Jerusalemah a um a, a mihai kanin Beershebaa inthokin Efraim tlângram chen a'n zin a, LALPA, an pi le puhai Pathien tieng a thuoi kîr tawl nawk a. 5 Khaw tinah, Judai rama kul nei khuo po poa chun rorêltuhai a sie a. 6 Rorêltuhai kuoma chun, "In thilthaw taphot ngun taka ngaituoin thaw hlak ro. Mihriem ta dinga ro rêl in ni naw a, LALPA aia rorêltu in ni lem. Ama chu ro in rèl pha in kuomah a um zing a nih. 7 Chuleiin, LALPA chu tiin, fimkhur takin ro rêl hlak ro, LALPA ei Pathiena chun indiknawna dâm, thlei bìk neina dâm le thamna fâk dâm a um si nawh" a ta. 8 Jehosafat chun Jerusalema khom LALPA dânhai kengkawtu ding le thubuoihai ching feltu dingin Levihai, thiempuhai le Israel sûngkuoa lukhàituhai laia thenkhat chu a ruot bok a, chuonghai chu Jerusalemah an um a. 9 An kuoma chun, "LALPA ti dêkin, ringum tak le lungril po poin a rong in bawl ding a nih. 10 In khuo le tui chanpuihai, khawpuia um mi tu khomin thubuoi an hung intlun a, tuolthat dâm le Dàn thupêk hai, thuruot hai le thusuok hai bawsietna chungthu dâma inkhing an ni chun LALPA chunga thil suol thaw lo dinga fimkhur dingin hril ro, chuong naw chun nangni le in unauhai chungah LALPA lungsenna hung tlung hlauh rawi a tih. Indik taka in thaw chun thiem naw chang ngai naw ti niu. 11 LALPA tieng thil hrim hrima hotu tak chu thiempu Amaria nîng a ta; lal tieng le inzom thil hrim hrima hotu tak chu Juda sûngkuoa lukhàitu, Ismael naupa Zebadia nîng a ta; Levihai chu rorêltuhai thusuok kengkawtu nîng an tih. Huoi takin thaw unla, indik taka thawtuhai kuoma chun LALPA chu um raw se" a ta.

2 Chronicles 20

1 Chu hnunga chun Moab mihai le Amon mihai chu Meunhai iemani zât leh inthukopin Jehosafat do dingin an inthok suok a. 2 Mi tuhaiin amanih Jehosafat kuomah, "Nangma do dingin Tuipui Thi râl Edom rama inthokin sipai tam tak an hung a, tu hin Hazazon Tamar-ah an um tah" tiin an hung hril a (chu hmun chu Engedi an ti bok hlak). 3 Jehosafat chu a ti hle a, LALPA thuoina hniin a tongtai a. A ram pumpuia bu nghei dingin thu a pêk bok a. 4 LALPA thuoina hni dingin Judai ram hmun tina inthokin Judahai chu Jerusalemah an hung tlân khawm a. 5 Jehosafat chu LALPA tempul inhuonna tuolzawl thara chun Judai rama inthok le Jerusalema inthoka hung mipui pungkhawmhai hmaa chun a ngîr a. 6 Chuongchun Pathien kuomah, "Aw LALPA, kan pi le puhai Pathien, vâna um Pathien chu i ni naw am a ni? Nang chu hnam le ram po po chunga rorêltu i nih. Thilthawtheina le hrâtna chu i kutah a um a, tu khom ngam ruol i ni nawh. 7 Aw kan Pathien, hi rama chênghai hi i mi Israelhai hmaah hnot suokpêkin, ruola i nei Abraham thlahai kuomah kumkhuoa dingin i pêk tah a ni naw am a ni? 8 Hi rama hin khawsain i hming umna ding hmun thienghlim khom an indin ta a. 9 Chun, i kuomah, 'Sietnain a mi tlâk buok a, kawlhnàma hremna amanih, hripui inlêng amanih, tàm tlâk amanih kan tuok pha hi Tempul, i hming umnaa hin i hmaah ngîrin hung ko kan ti che a, nangin mi lo ngàithlapêkin mi hung sandam rawh' tiin dawvan an lo kai ta kha. 10 "Chuongchun, ngai ta, tuhin Aiguptaa inthoka Israelhai an hung laia an rûn ding i phal naw leia sukbohmang loa an fesan Amon thla hai, Moab thla hai le Seir tlânga mihai khan an mi hung bei tum a ni hi. 11 En ta, an mi hang thungrul tum dàn hrim hrim hi! Kan rochan dinga ram i mi pêka inthoka mi hnot suok an tum a ni hi. 12 Aw kan Pathien, an chungthu i hung rèl naw ding am a ni? Mi chuong zozai mi bei dinga hung inthokhai chu hang do hne ziezàng ding kan ni nawh. Thaw ngaina hrim kan hriet naw a, nangma tieng kan hung ngha lem a ni hi" tiin a tongtai a. 13 Chun, Judahai po po chu nu le nau leh LALPA hmaa chun an ngîr a. 14 Chuongchun, mipui laia ngîr ve zing Jahaziel chungah LALPA thlarau a hung tlung a. Ama chu Zekaria naupa a na, ama chu Benaia naupa a na, ama chu Jeiel naupa a na, ama chu Matania naupa a na, ama chu Levi chia mi Asaf thla a nih. 15 Ama chun, "Lal Jehosafat le Judai ram le Jerusalema chênghai, lo ngàithla ro. LALPA chun hieng hin a tih: 'Ti naw unla, chuong sipai tam tak lei chun zâm bok naw ro. Indona chu nangni indona a ni naw a, Pathien indona a ni lem. 16 Zînga hin zu bei ro. Ziz kawna an hung kài tung lai nîng a ta, Jeruel thlalèra ruom tawp tieng zu hmung in tih. 17 Hi indonaa hin in chêt ve ngai naw nih. Thanghmun khaw unla, nghet takin ngîr unla, aw Juda mihai le Jerusalem mihai, LALPA sansuokna chu thlîr ringot el ro. Ti naw unla, zâm bok naw ro. Zîngah bei dingin inthok ro, LALPA chu nangni tieng a thang ding a ni si a" a ta. 18 Chuongchun, Jehosafat chu hmaia hnuoi sikin a kûn a, Juda mi po po le Jerusalem mi po po chun LALPA chawibiekin a hmaah an kûn a. 19 Kohat thla le Kora thla Levihai chu an ngîr a, rawl inring takin LALPA, Israel Pathien chu an inpàk a. 20 A zînga chun inhma takin an inthok suok a, Tekoa thlalèr an pan a. An suok ding chun Jehosafat chu a ngîr a, "Aw Juda mihai le Jerusalem mihai, ka thu hi lo ngàithla ro. LALPA in Pathien chu ring zo unla, sukdingchang a ti cheu; a zawlneihai chu ring zo unla, hmuingil in tih" a ta. 21 Mipuihai a'n fûi zo chun sipaihai hmaah fe a, lawn puma, "LALPA kuomah lawmthu hril ro, A ngilneinan kumtluong a dai"tia LALPA inpâkna hla sak a, a thienghlimna mawizie chawimawitu ding mi a ruot a. 22 Chuonga inpâkna hla an hang sak tan char chun Judai ram rûn dinga hung Moab hai, Amon hai le Seir tlânga mihai lo lambuntu ding LALPAN a sie a, chuongchun anni rawi chu intlawmin an um ta a. 23 Amon mihai le Moab mihai chun Seir tlânga um Edom mihai chu that chimit le sukbohmang vong tumin an bei rak el a; Edom mihai an that zo hnung chun anni le anni chu insukchimit tumin an inbei nawk rak a. 24 Judahaiin thlalèr zuk thlîr theina hmun an tlung chun sipai tam tak inkulna tieng chu an zuk thlîr a, hnuoiah an tlu thal phung a, dama tlân suok hrim an um nawh. 25 Chuongchun, Jehosafat le a rawihai chu râllâk thil inkhawm dingin an fe a, hmangruo le silfên le thil man tam, phur seng lo an lâk a, a tam êm leiin a sêk khawmna dingin ni thum top a lâk a nih. 26 A ni li ni chun Beraka ruomah an inkhawm a, LALPA an chawimawi a, chu lei chun voisun ni chen hin Beraka Ruomg tia ko a la ni zing. 27 Chu zoah Jehosafatin hma a thuoi a, LALPAN an hmèlmahai a hnèpèk leiin hlim takin Jerusalem tieng an kîr nawk ta a. 28 Chuongchun, perkhuong le tingtang rem a, tawtawrawt mûtin Jerusalem an lût a, LALPA Tempulah an fe a. 29 LALPAN Israel hmèlmahai a do ti an hang hriet chun ram tina mihai chun Pathien chu an ti ta hle a. 30 Sîr tinah Pathienin muongna a pêk leiin Jehosafat ram chu a ràlmuong ta hle a. 31 Chuongchun, Jehosafat chun Judai ram chungah ro a rêl a. A hung inlal chun kum sawmthum le kum nga mi a na, Jerusalemah kum sawmhni le kum nga a'n lal a. A nu hming chu Azuba a na, Silhi naunu a nih. 32 A pa Asa lampui hraw chu pensan loin a hraw ve a, LALPA mithmuah thil indik a thaw a. 33 Hmun sànghai ruok chu sukbo loin a la um zing a, mipuihai khomin an pi le puhai Pathien tieng lungril an la pêk bok nawh. 34 Jehosafat inlal sûnga thil tlung danghai chu a bula inthoka a tawp chenin Hanani naupa Jehu chanchin zieknaah a chuong a, chu chu Israel lalhai chanchin inziekna buah a chuong. 35 A hnungin, Juda lal Jehosafat chun ritlona leia thiem naw chang tah Israel lal Ahazia chu a'n thuruolpui a. 36 Sumdawng long ruol siem a remtipui a, chu chu Ezion Geber-ah an siem tlàng a. 37 An siem zo chun Maresa mi Dodavahu naupa Eliezer chun Jehosafat kuomah, "Ahazia leh in inkop leiin LALPA chun i thil siemhai hi suksepêk a ti che" a ta. An longhai chu a koi dar vong leiin sumdawng dingin an suok thei ta nawh.

2 Chronicles 21

1 Jehosaafat chu a pi le puhai kuomah a chawl a, anni lai Davida khawpuia chun an phûm a, a naupa Jehoram chun a lalna chu a hung hluo a. 2 Jehoram unauhai, Jehosafat naupahai chu Azaria, Jehiel, Zekaria, Azariahu, Mikael le Sefatia an nih. Chuonghai chu Judai rama Israel lalh Jehosafat naupahai chu an nih. 3 An pa chun a nauhai chu thilpêk tam tak, tangkaruo le rangkachak le thil hlu tam tak bâkah Judai rama kul nei khuo tam tak rochung sienkhom, ram ruok chu Jehoram kuomah nau upa tak a nina zarin a pêk a. 4 A pa ram chungah a lalna a suknghet phing leh a unauhai po po le Israel hnamhai laia lukhàitu tam tak chu kawlhnàmin a sukhlum vong a. 5 Jehoram chu kum sawmthum le kum hni a niin a'n lal tan a, Jerusalemah kum riet a'n lal a. 6 Israel lalhai ang bokin Ahab sûngkuohai lampui chu a hraw ve a, Ahab naunu chu nuhmeiah a nei a, LALPA mithmuah thil tha lo a thaw a. 7 Amiruokchu, LALPAN Davida kuoma ama le a thlahai chena kumkhuoa lal inneitir zing dinga a lo tiem tah leiin, Davida sûngkuo chu sukbohmang a nuom nawh. 8 Jehoram inlal laiin Edomhai chu Judahai lakah an hel a, lal an insiem chop a. 9 Jehoram chu a sipai hotuhai le a tawlailir po po leh anni chu bei dingin a suok a. Edomhai chun ama le a tawlailir hotuhai chu an inhuol vong a, sienkhom zânah a bei a, an tawn tlang a. 10 Tu chen hin Edomhai chu Judahai lakah an la hel ta zing a nih. Jehoram chun LALPA, a pi le puhai Pathien chu a nghatsan leiin, chuong hun lai bok chun Libna khuo khom an hel a. 11 Chun, Judai ram tlânga hai chun hmun sànghai a siem a, Jerusalem mihai chu inuirètirin, Judahai chu a thuoi suol a. 12 Jehoram chun zawlnei Elijaa inthokin lekhathon a hmu a: "LALPA, i pu Davida Pathien chun hieng hin a tih: 'I pa Jehosafat lampui i hraw naw a, Juda lal Asa lampui khom i hraw bok nawh. 13 Chu nêk hmanin Israel lalhai lampui i hraw lem a, Judahai le Jerusalema umhai chu Ahab sûngkuohai angin i'n uiretir a, nang nêka tha lem i pa sûngkuoa mi i unauhai i that a. 14 Chuleiin, tu hin i mipuihai, i naupahai le nuhmeihai le i thil nei po po chungah LALPA chun na takin kut a thlâk ding a nih. 15 I rîl po po a suok vong chenin rîl natna re thei lo invoi bok i tih" tiin. 16 Chun, LALPA chun Kush mihai vela um Filistinhai le Arabhai lungril chu Jehoram do dingin a chok tho a. 17 Chuongchun, Judai ram an hung bei a, an rûn a, lal ina thil tha po po chu, a naupahai le a nuhmeihai chenin, an lâk vong a, a nau mi tlum tak Jehoaza (Ahazia) chauh naw chu a naupahai lai tu khom mâksan an nei nawh. 18 Chu hnunga chun sukdam thei lo rîl natnain LALPAN a hrem a. 19 Chun, hieng ang hin a hung tlung a, a kum hninaa chun a natna leiin a rîl chu a suok vong a, na tak tuorin a thi a. A pa inzàna le sunnaa a mihaiin meipui an seppêk ang khan an seppêk ve nawh. 20 Kum sawmthum le kum hni a niin Jehoram chu a'n lal tan a, Jerusalemah kum riet a'n lal a. Inrotu nei loin a thi a, Davida khawpuiah an phûm a, lalhai thlàna ruok chu a ni nawh.

2 Chronicles 22

1 Kha hmaa Jerusalem hung rûntu Arab mihai le an inkoppuihaiin Jehoram naupahai laia an mi tlum tak Ahazia ti lo chu an that fai vong leiin, Jerusalem mihai chun Jehoram nau mi tlum tak Ahazia chu Judai ram lalah an siem a, a hung inlal tan ta a. 2 A hung inlal chun Ahazia chu kum sawmhni le kum hnii mi a na, Jerusalemah kum khat a'n lal a, a nu hming chu Athalia a na, Omri tunu a nih. 3 Ahazia khom chun Ahab sûngkuohai lampui chu a hraw ve a, thil suol thaw dinga keithuoitu chu a nu a nih. 4 Ahab sûngkuohai ang bokin LALPA mithmuah thil suol a thaw a, a pa thi hnungin Ahab sûngkuo danghai chu thurawn a lâkna le a chunga sietna intluntu an nih. 5 Gilead biel Ramot khuoa Aram lal Hazael do dinga Ahazia-in Israel lal Ahab naupa Joram a fepuina san khom anni thurawn a lâk lei a nih. Chu taka chun Joram chu Aram mihaiin an lo inhliem a. 6 Chuongchun, Aram lal Hazael a va donaa Ramot-a an lo inhliem chu insukdam dingin Jezreel-ah a hung kîr a. Chun, Juda lal Jehoram naupa Ahazia chu Ahab naupa Joram hliem kan dingin Jezreel-ah a zu fe a. 7 Ahazia-in Joram a zu kan lai chun a chungah Pathienin sietna a hung intlungtir a. Ahazia a hung tlung chun Ahab sûngkuo suksetu dinga LALPA hriek nâl Nimsi naupa Jehu chu tuok dingin Joram chun Ahazia chu a fepui a. 8 Jehu-in Ahab sûngkuo chunga kut a thlâk lai chun Joram damnaw en dinga fe Ahazia mihai- Juda hotuhai le Ahazia sûngkuohai chu a hmu a, a that vong a. 9 Chun, Ahazia chu an zong a, Samaria-a inbirûk chu an hmu a, an man a, Jehu kuomah an hung thuoi a, an that a. "A lungril po poa LALPA zong hlak Jehosafat naupa a ni si a" an ti leiin a phûmin an phûm a. Chuongchun, Ahazia sûngkuoa inthokin lal nina chel theia hrât mi an nei ta naw a. 10 Ahazia nu Athalia chun a naupa thi a hriet charin Juda sûngkuoa lalhai po po chu that chimit tumin hma a lâk a. 11 Ahazia naupa Joash ruok chu lal Jehoram naunu Jehoseba chun lal nau a that dinghai laia inthok chun a lâk hmang a, a dontunu leh a pindanah a thup a. Chuonga lal Jehoram naunu Jehoseba, Ahazia farnu le thiempu Jehoiada nuhmeiin Joash a thup lei chun Athalia-in a that ve thei ta naw a. 12 Athaliain ram rorêlna kum ruk a chel sûng po chun Pathien Tempulah anni kuomah a thup rûk a nih.

2 Chronicles 23

1 A kum sarinaah Jehoiada chun ngam takin, vêngtu zakhat pawl pei kawmandar Jeroham naupa Azaria hai, Jehohanan naupa Ishmael hai, Obed naupa Azaria hai, Maaseia naupa Adaia hai, Zikri naupa Elishaphat hai chu thu a thlungpui a. 2 Anni chu Judai ram khaw tinah an fe a, Levihai le Israel sûngkuoa lukhàituhai chu an ko khawm a, Jerusalemah an hung a. 3 Pungkhawm po po chun Pathien tempulah lal kuoma chun thu an thlung a. Thiempu Jehoiada chun an kuomah, "LALPA chun Davida thlahai chungchanga thu a lo tiem tah angin, lal naupa chu lalah a um ding a nih. 4 In thaw dàn ding chu hieng hi a nih: Sabat nia diutia hung nangni thiempuhai le Levihai chu hmun thuma thea hmun khatin kotpui in vêng ding a nih. 5 Hmun thuma thea hmun khat chu lal inah um in ta, hmun thuma thea hmun khat dang chun kul kotkhâr vêng in ta, mipui po po chu LALPA tempul inhuon sûng tuolah an um ding a nih. 6 Rongbawla um thiempuhai le Levihai chauh naw chu tu khom LALPA Tempulah an lût ding a ni nawh. Anni chu lût le suok thei dinga ser thienghlim an ni a, mi dang ruok chun an chan dinga LALPA ruot hmun seng chu an vêng ding a nih. 7 Levihai chu mani hriemhrei chawi sengin, inring sain lal bulah um an tih. Mi dang Tempula hung lût taphot chu in that pei ding a nih. Lal lût le suok chu in zui pei bok ding a nih" tiin thu a pêk a. 8 Levihai le Judahai po po chun thiempu Jehoiada hril ang tak chun an thaw a, mani rawihai po, Sabat nia diuti ding pawl le awl ding pawl chu an thuoi a, thiempu Jehoiada kuomah an fe a, thiempu Jehoiada chun diuti zo tahai khom chu a'n tintir nawh. 9 Chun, kawmandarhai kuoma chun LALPA tempula um Davida feihai le phaw lien le phaw chinhai chu a pêk a. 10 Vêngtu sipaihai chun hriemhrei chawi sengin, tempul sim tieng panga inthoka hmar tieng chenin, maichâm le tempul hrûla chun an ngîr huol mup a. 11 Jehoiada le a nauhai chun lal naupa Joash chu an hung thuoi suok a, lallukhum an inkhumtir a, lalhaiin thuthlung le Dàn le thupêk an kengkaw ding hai inziekna bu chu an pêk a, lalah an puong a, hriek an nâl a, "Lal chu dam sawt raw se" tiin an khèk a. 12 Vêngtu sipaihai le mipuihaiin lal chawimawia an inzi mur mur ri Athalia-in a lo hriet chun LALPA Tempula mipuihai lai chun a va fe a. 13 Chun, a hang en a, an thaw dàn anga kotkhâr ban hrûla lal ngîr chu a hmu a, sipai kawmandarhai le tawtawrawt mûttuhai chu lal bula chun an ngìr a, chu rama mihai chu an hlim êm êm a, tawtawrawt an mût an mût a, hla saktuhai chun rimawi tinrêng tumin inpâkna hla an sak a. Athalia chun a puonhai a pot thlèr a, "Phierrùkna! Phierrùkna!" tiin a khêk a. 14 Thiempu Jehoiada chun chu minu chu man dingin sipai za chunga kawmandarhai chu thu a pêk a, "LALPA ina chu that lo ding" a lo ti ta leiin, an kuomah, "Sipaihai kâra khan hung thuoi suok unla, a zuitu taphot chu that sa ro" a ta. 15 Lal in huonga sakor lûtna kot a tlung chun an man a, chu taka chun an that a. 16 Mipuihai chu LALPA mihai hung ni ngei dingin thiempu Jehoiada chun LALPA le lal le mipuihai inkârah thu a thlungpui a. 17 A ram mipuihai po po chu Baal an biekna tempulah an fe a, an sukchim a, maichâmhai le milemhai chu an vuok nawi vong a, Baal thiempu Matan chu maichâm hmaa chun an that a. 18 Mosie Dàn bua ziek anga hlim taka hla sak puma LALPA tempula pumraw thilhlân inhlàntu dinga Davida thupêk anga Levi chia mi thiempu an lo hmang hlakhai thlahai ngei chu LALPA tempul enkaitu dingin Jehoiada chun a sie tawl nawk a. 19 Thiempu Jehoiada chun LALPA Tempulah mi porche tu khom an lût nawna dingin LALPA Tempul kotkhâr vêngtu dingin vêngtu sipai a ruot bok a. 20 Chun, sipai kawmandar hai, khawnbawl hai, mipui chunga rorêltu hai le a ram mipuihai po po chu a thuoi a, LALPA Tempula inthokin lal chu an hung thuoi thlâk a, vêngtu sipaihai lûtna kot chuonchunga chun lûtin lal inah an fe a, lal chu a lalthungphaah an inthungtir ta a. 21 Chuongchun, chu rama mi po po chu an lawm a, Athalia chu lal inah kawlhnàma an that ta leiin khawpuia buoina chu a re ta a.

2 Chronicles 24

1 Joash hung inlal tan chun kum sari mi chauh a la ni a, Jerusalemah kum sawmli a'n lal a, a nu hming chu Zibia a na, Beersheba khaw mi a nih. 2 Thiempu Jehoiada inchûktirna hnuoia a um sûng po chun LALPA mithmuah Joash chun thil indik a thaw hlak a. 3 Chun, Jehoiada chun nuhmei pahnih a'n neitir a, naunu le naupa tam tak an hringpêk a. 4 Chu hnungah Joash chun LALPA Tempul siem that a nuom a. 5 Thiempuhai le Levihai chu a ko khawm a, an kuomah "Judai ram khaw tinah fe unla, LALPA Tempul bawl thatna dinga Israel mi tu khomin kum tina a pêk dinga bituk chu va la khawm ro. Tu hin thaw nghal ro" a ta. Sienkhom, Levihai chun an thaw nghal el chuong nawh. 6 Chuleiin, lal chun thiempu lal tak Jehoiada chu a ko a, a kuomah, "LALPA siehlaw Mosie le Israel pungkhawmhaiin Thuthlungna Puon in siemnaa hmang dinga Israel mi tu khomin an thaw zât ding bi an tuk kha Judai ram le Jerusalema mihai laka inthoka hung la khawm dingin ieng leia Levihai hi i tir suok naw am a na?" a ta. 7 Nu rilo Athalia nauhaiin Pathien Tempul chu rokin, hmangruo thienghlimhai chen khom Baal bieknaah an lo hmang zo ta si a. 8 Chuongchun, lal thupêkin thingrem bawm an siem a, LALPA Tempul lûtna kot puoa chun an sie a. 9 Thlalèra Pathien siehlaw Mosiein Israelhai thaw zât ding a bituk chu LALPA ta dinga hung pe dingin Judai ram po po le Jerusalema mihai kuoma chun lalin inhriettirna a thon dar a. 10 Thoktuhai le mipuihai chun lawm takin an hung pèk a, bawm chu a sip liem chenin thawlawm an hung thlâk rui rui a. 11 Bawm chu Levihaiin a enkoltu dinga ruot lal thoktuhai kuomah ni tin an hung chawi a, a sip pha leh lal lekha ziektu le thiempu lal tak hnuoia thoktuin bawma inthokin an lâk suok a, a bawm chu a umnaah an inthut nawk a. Chuong ang chun ni tin an thaw a, tangka tam tak an khawl khawm a. 12 Lal le thiempu Jehoiada chun LALPA Tempul enkoltuhai kuta chun an pêk suok a, LALPA in ripêrtu ding lung sertuhai le thing them thiemhai le dâr le thîr tienga mi themthiemhai an ruoi a. 13 Thoktuhai chun taima takin an thaw a, anni vilna hnuoiah sin tha takin an thaw a, Pathien Tempul chu a ngai chiein an siem tha a, an indin nghet nawk ta a. 14 An siem zo chun tangka la um po po chu lal le Jehoiada kuomah an hung chawi a, chu sum chun LALPA Tempula rongbawlnaa hmang ding bûr le bèlhai, pumraw inthawinaa hmang ding hmangruohai, rangkachak le tangkaruoa siem thlêng le hmangruo danghai chenin an siem a. Jehoiada dam sûng po chun LALPA tempula chun chatlak loin pumraw thilhlân chu an inhlàn zing hlak. 15 Jehoiada chu a hung upa ta hle a, tar kûna damin kum za le sawmthum a niin a thi a. 16 Israel rama Pathien ta ding le a Tempul ta dinga thil tha a thaw leiin Davida khawpuiah lalhai zâlnaa chun an phûm a. 17 Thiempu Jehoiada thi hnung chun Juda mi lienhai chu an hung a, lal kuomah dawvan an hung kai a, lal chun an thu chu a lo pom a. 18 Chuongchun, an pi le puhai Pathien Tempul chu nghatsanin Asera lem thinghai le milem danghai chu an biek a, an bawsietna lei chun Judai ram le Jerusalem chungah LALPA lungsenna a hung tlung a. 19 LALPA kuoma thuoi kîr nawk dingin an kuomah zawlneihai a tir a, an thiem nawzie an inhriettir a, sienkhom an ngàithlâk nuom chuong nawh. 20 Chun, thiempu Jehoiada naupa Zekaria chungah LALPA thlarau a hung tlung a. Ama chu mipui hmaah a ngîr a, an kuomah, "Pathienin hieng hin a tih: Ieng leia LALPA thupêk in bawsiet am a na? Hmuingil naw ti niu. LALPA chu in nghatsan leiin ama khomin a nghatsan ta cheu a nih" a ta. 21 Sienkhom ama chu an phier rûk a, lal thupêkin, LALPA Tempul inhuonna sûnga chun lungin an dèng hlum a. 22 Chuong ang chun lal Joash chun a chunga Jehoiada lunginsietna chu theinghilin a naupa chu a thatpêk a. Jehoiada chun a thi tawmin, "Hi hi LALPAN hmuin aman phuba chu la raw se" a ta. 23 Chu kum, kum tawp tieng chun Aram sipaihaiin Joash chu an hung rûn a, Judai ram le Jerusalemah an lût a, an mi lienhai po po an that a, an râllâk sum po po chu Damaska tieng an thon a. 24 Hung rûntu Aram sipaihai chu mi tlawmte ni hai sienkhom an nêka tam dai Juda sipaihai LALPAN an kutah a pêk a nih. LALPA, an pi le puhai Pathien chu Juda mihaiin an nghatsan leiin, chuong ang chun Joash chungah hremna a'n tlungtir a nih. 25 Joash chu na taka an inhliem hnungin Aramhai chun an kîrsan a. Thiempu Jehoiada naupa a that leiin Joash chu ama mihai ngeiin an phierrûk a, a khum laizawlah an that a, Davida khawpuiah an phûm a, sienkhom lalhai thlàna ruok chu a ni nawh. 26 A phiertuhai chu Amon mi nuhmei Simeat naupa Zabad le Moab mi nuhmei Simrit naupa Jehozabad an nih. 27 A naupahai chungchang thu dâm, a chunga hrillawkna tam tak hai dâm le Pathien Tempul siem that a ni dàn chanchin po po chu lalhai chanchin inziekna buah a chuong. A naupa Amazia chun a lalna chu a hung hluo a.

2 Chronicles 25

1 Amazia chu kum sawmhni le kum nga mi a niin lal a hung ni a, Jerusalemah kum sawmhni le pakuo ro a rêl a. A nu chu Jerusalem mi, a hming Jehoaddin a nih. 2 LALPA mithmuah thil tha a thaw a, a lungril ruok chu a pêk vong nawh. 3 A ramah a lalna a suknghet hnung chun a pa thattuhai chu a that ve a. 4 An nauhai ruok chu a that sa ve nawh; Mosie Dàn bua LALAPA thu, "Nauhai leiin pahai sukhlum ding an ni naw a, pahai leiin nauhai sukhlum ding an ni bok nawh, mi tin mani suol leiin an thi ding a nih" ti kha a zawm a nih. 5 Amazia chun Judahai chu a ko khawm a, Juda le Benjamin mi po po chu an sûngkuo dungzui peiin sângkhat chunga kawmandara dâm le zakhat chunga kawmandara dâm a'n umtir a, pasal kum sawmhni le chung tieng, fei le phaw chawia râl do thei chin chu mi nuoithum an nih. 6 Chu bâkah, Israel rama mi hrât le huoisena hril nuoi khat chu tangkaruo kilogram sângthum le zali sengin a ruoi bok a. 7 Nisienlakhom, a kuomah Pathien mi, mi pakhat a hung a, "Aw lalpa, Israel sipaihai hi thuoi sa naw rawh. Israel mihai lai LALPA a um ta naw a, Efraimhai lai khom a um ta bok nawh. 8 Fein huoisen takin va bei khom ni ta hrim la, i hmèlmahai hmaah Pathienin suktlawm tho a ti che, hne theitu le suktlawm theitu chu Pathien a ni si a" a ta. 9 Amazia chun Pathien mi kuomah, "An leh, Israel sipaihai ka ruoina tangkaruo zozai kha iem ka law ta ding a na?" a ta. Pathien mi chun, "LALPAN a nêka tam lem dai a pêk thei che" a ta. 10 Chuongchun, Amazia chun Efraimhai rama inthoka sipai hung po po chu an in tieng a tirkîr ta vong a. Anni chu Judahai chunga chun an lung a sen hle a, lungsen takin an kîr a. 11 Amazia chun zâm loin a sipaihai chu Chi Ruom tieng a panpui a, chu taka chun Seir mi sîngkhat an that a. 12 A hringin mi sîngkhat an man bok a, chuonghai chu rawl khoah an thuoi a, rawla chun an nam thlâk a, an tla dar pheng phung a. 13 Chuong lai chun Amazia-in sipai a tir kîrhai khan Judai rama khuohai, Samaria inthoka Bet Horon chenin an bei a, mi sângthum an that a, râllâk tam tak an hawn bok a. 14 Edomhai rûn zoa Amazia a hung kîr chun Seir mihai pathienhai chu a hung hawn a, a pathiena dingin a'n din a, chibai a bûk a, rimtui dâm a'n hlàn a. 15 Chu lei chun Amazia chungah LALPA lung a chok a, a kuomah zawlnei a tir a, ama chun, "Hieng hnam danghai pathien, i kuta inthoka a mihai khom san suok thei hlei lo chu ieng ding hrima i biek am a na?" a ta. 16 A hril lai zing chun lalin, "Lal kuoma thurawn petu dingin tuin am a siem che a? To vat rawh! Ieng leiin am i hringna i chàn ding?" a ta. Zawlnei chun, "Hienga i thaw lei le ka thu i ngàithlâk nuom naw leiin Pathienin sukbohmang che a tum a nih ti ka hriet" a ta, a to ta a. 17 Juda lal Amazia-in a remruotpuituhai a rawn hnungin Israel lal Jehu naupa Jehoahaz naupa Joash kuomah, "Hung la, pa le pa inhmatonin hang inbei ei tih" tiin chona thu a thon a. 18 Israel lal Joash chun Juda lal Amazia kuomah, "Lebanon tlânga hlingin Lebanon tlânga sidar thing kuomah, 'I naunu kha ka naupa nuhmeiah inneitir raw khai' tiin thu a'n cha a. Lebanon tlânga chun ram sa a hung a, hling chu an hung chîl thlûk ta dêr a. 19 Nang hin 'Ngai ta, Edom ka hnè bân dèr' tiin i uong a ni hi tie. I inah intom tok tok lem rawh. Ieng dinga nang le Judai ram chopa sietna ding chok suok i tum am a na?" tiin mi a tir ve a. 20 Nisienlakhom, Amazia chun a lo ngàithlâk nuom nawh; Edomhai pathien a biek leia Pathienin Judai ram chu a hmèlmahai kuta a pêk theina dinga a thaw a ni si a. 21 Chuongchun, Israel lal Joash chu a hang fe a, Juda lal Amazia le chun Judai ram Bet Semes khuoah hmaisanah an inbei ta ngei a. 22 Israelhai chan chu a tha lem leiin Judahai chu mi tin mani in tieng an tlân kîr ta vong a. 23 Israel lal Joash chun Juda lal, Ahazia naupa Joash, chu naupa Amazia chu Bet Semes-a chun a man a, Jerusalemah a thuoi a, Jerusalem kul chu Efraim kotkhâra inthoka kul bang meter zahni vela sei chu a sukchim a. 24 Obed-Edom enkolna hnuoia um LALPA Tempul kudama rangkachak le tangkaruo le bûr le bèl um po po le lal ina um po po chu a lâk a, mi hrên ding a man bok a, Samaria khuo tieng a kîr nawk ta a. 25 Juda lal Joash naupa Amazia chu Jehoahaz naupa Israel lal Jehoash thi hnungin kum sawm le kum nga a la dam a. 26 Amazia inlal laia thil tlung danghai chu, a bula inthoka a tawp chenin, Juda lalhai le Israel lalhai chanchin inziekna buah a chuong. 27 Amazia-in LALPA zui a bànsana inthokin Jerusalema chun that tuma phierrûk an um zing leiin a tawpa chu Lakis khuoah a tlân a, sienkhom a hmèlmahai chu an hnot zui a, chu taka chun an that a. 28 A ruong chu sakorin an inphur kîrtir a, a pi le puhai kuomah Davida khawpuiah an phûm ta a.

2 Chronicles 26

1 Judai rama mihai chun kum sawm le kum ruk mi Uzia chu an thuoi a, a pa Amazia aiin lalah an siem a. 2 Ama chun a pa Amazia thi hnungin Elath khuo chu a bawl tha a, Judai ramah a sie lût nawk a. 3 Uzia a hung inlal chun kum sawm le kum ruk mi a na, Jerusalemah kum sawmnga le kum hni ro a rêl a. A nu chu Jerusalem mi, a hming Jekolia a nih. 4 A pa Amazia thilthaw ang pei thaw vein LALPA mithmuah thil tha a thaw hlak a. 5 Zekaria dam sûng po chun Pathien ti dingin a zirtir a, Pathien a zong hlak a, LALPA a zong sûng po chun Pathienin a sukhmuingil pei a. 6 Uzia chun Filistinhai a rûn a, Gath kul hai, Jabne kul hai, Asdod kul hai a sukchim a. Asdod khaw kawla khuohai le Filistinhai rama khaw thenkhathai chu a'n din thar a. 7 Chun, Pathienin Filistinhai laka le Gur Baala um Arabhai le Meunhai laka chun a thangpui a. 8 Amon mihai chun Uzia kuomah sie an hung chawi hlak a. A hung hrât ta hle leiin Aigupta ram chenin a hming a hung inthang ta a. 9 Uzia chun Jerusalem kul bang kila kotkhâr le ruom tienga kotkhâr inkâra kul kawina tak bang hrula chun in insâng a bawl a, kul chu a'n huon thar a. 10 Thlalèra khom in insânghai a bawl a, ran tam tak a nei leiin tlâng thut le zawla hai chun tuikul tam tak a siem a. Lohma tieng ngaina mi tak a ni leiin tlângram le phairam thatna hmuna a lohai le grèp huona hai chun sinthawtu a sor teu a. 11 Uzia chun indo dinga inpei zing sipai tam tak a nei a, chuonghai chu lal thoktu Hanania inrawina hnuoiah an um a, lekha ziektu Jeiel le hotu Maaseia hai chun a pawl pawlin an inchik thlap a. 12 Sipaihai chunga chun kawmandar sânghni zaruk an um a. 13 Chuonghai hnuoia chun râldo thiem thalh mi nuoithum le sângsari le zanga, hmèlma laka lal ta dinga hrât taka dotu ding, an um a. 14 Uzia chun a sipai po pohai ta dingin phaw hai, fei hai, thîr lukhum hai, thalngul hai, virvoma hmang ding lungte mum hai a buotsai a. 15 Kulbing sànga hmang ding le kul kil tina inthoka thal kâpna ding le lung lien tak tak vor suokna ding khawlhai mi themthiemhai siem chu Jerusalemah a sie teu a. A hming chu ram tinah a hung inthang a, Pathienin a thangpui leia chuong khopa hung hrât chu a nih. 16 Nisienlakhom, a hung hrât hnung chun a hung chapo ta hle a, chu chu ama phûr thlutu a hung ni ta a. LALPA, a Pathien chungah thil suol a thaw a, maichâmah rimtui raw dingin LALPA tempulah a lût a. 17 Thiempu Azaria chun a zui a, mi huoi tak tak LALPA thiempu sawmriet an thang bok a. 18 Anni chun Lal Uzia chu hmaisanah an khap a, a kuomah, "Uzia, LALPA ta dinga rimtui raw hi nangma thaw ding a ni nawh, rimtui raw dinga ser hrang Aron thlaa mi thiempuhai thaw ding a ni lem. Hmun thienghlima inthok hin suok vat rawh. LALPA chungah thil suol i thaw a nih. LALPA Pathien laka chawimawi i hlawna ding khom a ni nawh" an ta. 19 Lal Uzia chu a lungsen a, rimtui rawna ding mei lâkna chu a chawi a. Chuonga thiempuhai chunga LALPA tempula maichâm hmaa a lungsen lai chun a bawkah a hung inphâr suok ta a. 20 Thiempu laltak Azaria le thiempu danghaiin an hang en chun a bawka phâr um chu an hmu a, inrang takin an hawl suok nghal a. LALPAN a hrem leiin ama ngei khomin fe suok a nuom ta hrim a. 21 Chuongchun, Uzia chu a thi chena a'n phàr leiin lal ina inthokin a suok a, in hranah a um a, LALPA Tempulah a lût thei ta naw bok a. A naupa Jotham chu a ram mipuihai chunga ama aia rorêltu le optuin lal inah a um ta a. 22 Uzia inlal sûnga thil tlung danghai chu a bula inthoka a tawp chenin Amoz naupa zawlnei Isaiin a ziek. 23 Uzia chu a pi le puhai kuomah a chawl a, mihaiin "Ama chu phâr a nih" an ti leiin a pi le puhai zâlna kawl hnaia lalhai thlân hmuna chun an phûm a. A naupa Jotham chun a lalna chu a hung hluo ta a.

2 Chronicles 27

1 Jotham a hung inlal chun kum sawmhni le kum nga mi a nih. Jerusalemah kum sawm le kum ruk lalin a um a; a nu chu Zadok naunu, a hming Jerusa a nih. 2 A pa Uzia-in a thaw ang bokin LALPA mithmuah thil tha a thaw hlak a, sienkhom a pa thaw angin LALPA Tempul sûnga ruok chu a lût lui ve nawh. Mipuihai ruok chun thil tirdakum thaw an la chîng zing a. 3 Chun, LALPA Tempula kotkhâr chunghnung lem chu a siem tha a, Ofel muola kul banghai chu nasa takin a'n din thar nawk a. 4 Judai ram tlâng pheia chun khuohai a'n din a, ramngaw hmuna hai chun kul le vêngbûk insànghai a bawl bok a. 5 Jotham chun Amon lal a do a, a hne a. Chu kum chun Amonhaiin tangkaruo kilogram sângthum zali, huit metric ton sângkhat le barli metric ton sângkhat an hung pèk a. Chuong zât bok chu a kum hnina le kum thumnaa khom an hung pèk bok a. 6 LALPA a Pathien hmaa ringum taka kal a chawi leiin Jotham chu a hung hrât ta deu deu a. 7 Jotham inlal sûnga thil tlung danghai, a râl do po po le a thilthaw danghai po po chu Israel le Juda lalhai chanchin inziekna buah a chuong. 8 Kum sawmhni le kum nga mi a niin a hung inlal a, Jerusalemah kum sawm le kum ruk a'n lal a. 9 Jotham chu a pi le puhai kuomah a chawl a, Davida khawpuia chun an phûm a, a naupa Ahaz chun a lalna chu a hung hluo ta a.

2 Chronicles 28

1 Ahaz chu kum sawmhni mi a niin a hung inlal a, kum sawm le kum ruk Jerusalemah a'n lal a. A thlatu Davidan LALPA mithmuah thil tha a thaw angin a thaw ve naw a. 2 Israel lalhai lampui a hraw lem a, a biek dingin Baal pathien, milem sung chop a siem a. 3 Ben Hinom ruomah inthawina rimtui a raw a, Israelhai hmaa LALPAN hnam a hnot suokhai thil chîng tirdakum tak chu zui vein a naupahai chen meiah a'n hlàn a. 4 Hmun sànga maichâma hai le tlâng sîp le thing buk inzâr thatna hnuoi taphotah inthawiin rimtui a raw hlak. 5 Chuleiin, LALPA a Pathienin ama chu Aram lal kutah a pêk a, an hung hne a, a mihai tam tak chu an man a, Damaska tieng salah an thuoi a. Israel lal kutah a pêk bok a, ama chun mi tam tak a that a, 6 Judahaiin LALPA, an pi le puhai Pathien chu an nghatsan tâk leiin, Remalia naupa Peka lem chun ni khat thilthuin Judai rama mi huoisen ngot mi nuoikhat le sînghni a that a. 7 Chun Efraim mi hrât Zikri chun lal naupa Maaseia hai, lal in enkoltu Azrikam hai le lal dottu Elkana hai chu a that a. 8 Israel sipaihai chun Judahai chu an unauhai ni hai sien khom nuhmei le naupang nuoi hni zet an man a, salah an thuoi a, râllâk tam tak an lâkpêk bok a, chuonghai chu Samaria-ah an hawn a. 9 Amiruokchu, chu taka chun LALPA zawlnei, a hming Oded a um a, Samaria hung tlung ding sipaihai chu tuok dingin a suok a. An kuomah, "Judahai chungah LALPA in Pathien lung a sen leiin in kutah anni chu a pêk cheu a. Sienkhom lungsena in suom ri khan vân a hang tlung a 10 Tu hin Judai ram le Jerusalem mihai chu a nuhmei a pasalin bawiah siem in tum pei a. LALPA in Pathien chungah thil suol in thaw a ni naw maw? 11 Tu hin ngàithla ro, in unauhai, sala in manhai hi inkîrtir nawk ro. LALPA lungsenna nasa tak in chungah a'n ling a nih" a ta. 12 Efraim-hai thuoitu thenkhat, Jehohanan naupa Azaria hai, Mesilemot naupa Berekia hai, Salum naupa Jehizkia hai le Hadlai naupa Amasa hai chun indonaa inthoka hung kîrhai chu hmaisanah an lo hal bok a. 13 An kuomah, "In sal manhai chu hi khuoa hin hung thuoi lût naw ro. LALPA lakah thil suol ei thaw dêr ta a, mi hrem nuom hiel khopin ei suklungsen a nih. Ei thil suol thaw tah bâkah la thaw sap pei in tum am a ni" an lo ti ve a. 14 Chuongchun, an hotuhai le mipui pungkhawmhai kutah sipaihai chun sala an hung thuoihai le râllâk sumhai chu an inhlân a. 15 An hming hril tah thuoituhai chu an hung tho a, tânghai chu an thuoi a, saruoka um po chu râllâk silfènhai chun an inthuomtir a, puon an pêk a, pheikhok an inbuntir a, fâk le dawn ding le inzûtna ding hriek an pêk a, a ongrophai chu sabengtung chungah an inchuongtir a, Tûm khuo Jerikoa an unauhai kuomah an zu thak a, Samaria tieng an hung kîr nawk a. 16 Hieng hun lai hin lal Ahaz chun ama thangpuitu dingin Asuria lal a fiel a. 17 Edomhai chun Judai ram an hung rûn nawk a, mihai chu salah an thuoi a. 18 Chuong lai zing chun Filistinhai khomin tlâng thuta khuohai le Judai ram sim tieng an hung rûn a, Beth Semes hai, Aijalon hai, Gederoh hai le Soko hai, Timna hai le Gimzo hai le an sè vela khuohai chu an hung bei a, an làk, an hluo a. 19 Juda lal Ahaz chun Judai ramah rîtlona sukhluor a, LALPA lakah a ringum naw hulhuol leiin LALPAN Judahai chu a suktlawm a nih. 20 Asuria lal Tiglat-Pileser khom a kuomah a hung a, sienkhom thangpui nêk hmanin a sukbuoi lem a. 21 Ahaz chun LALPA tempul le a lal ina inthok le a mi lienhaia inthokin rangkachak a lâk a, Asuria lal chu a pêk a, sienkhom a sawtpui chuong nawh. 22 Buoinain a nangching lai chun lal Ahaz chu LALPA lakah a suol zuol sauh lem a. 23 Ama hung dotu Damaska mihai pathien kuoma chun a'n thawi a, "Aram lal pathien chun anni a thangpui leiin keikhom a mi thangpui ve theina dingin a kuomah ka'n thawi a nih" dâm a ti a. Nisienlakhom, chu chu ama le Israel mi po po sietna a ni si a. 24 Ahaz chun Pathien Tempul cheinahai chu a lâk khawm a, a chawi hmang vong a. LALPA Tempul kothai chu a kal a, Jerusalem kotthlèr kil tinah maichâm a siem a. 25 Judai ram khaw tinah pathien danghai ta dinga rimtui inhlànna ding hmun sàng a siem a, a pi le puhai Pathien, LALPA chu a cho lungsen a. 26 Ahaz inlal laia thil tlung danghai le a khawsak dàn po po chu, a bula inthoka a tawp chenin, Juda le Israel lalhai chanchin inziekna buah a chuong. 27 Ahaz chu a pi le puhai kuomah a chawl a, Jerusalem khawpuiah an phûm a, Israel lalhai thlàna ruok chu a ni nawh. A naupa Hezekia chun a lalna chu a hung hluo ta a.

2 Chronicles 29

1 Hezekia chu kum sawmhni le panga a niin a hung inlal tan a, Jerusalemah kum sawmhni le pakuo a'n lal a. A nu chu Zekaria naunu, a hming Abija a nih. 2 Hezekia chun a thlatu Davida thaw dàn zuiin Pathien mithmuah thil indik a thaw a. 3 A'n lal tan kum thla khatnaa chun LALPA Tempul kotkhârhai chu a hong nawk a, a chei tha a. 4 Thiempuhai le Levihai chu a thuoi lût a, suo tieng tuolzawla chun a ko khawm a. 5 An kuomah, "Nangni Levihai, ka thu hi ngàithla ro. Tuhin nangni insukthienghlim phot unla, chu zoah LALPA, in pi le puhai Pathien Tempul hi inthien fai unla, Hmun Thienghlima inthokin thil porche po po inthiel fai vong ro. 6 Ei pi le puhai chu an lo ringum naw a, LALPA ei Pathien mithmuah thil suol an thaw a, ama an nghatsan a. LALPA chêngna hmun chu an hnungson a. 7 Tempul kotkhârhai chu an khâr a, khawnvarhai chu an sukmit a. Israelhai Pathien Hmun Thienghlima chun rimtui an raw ta naw a, pumraw thilhlân an inhlàn ta bok nawh. 8 Chuleiin, Judai ram le Jerusalem mihai chungah LALPA lungsenna chu a tla a, in mit ngeia in hmu ang hin, mi pangzat le makti le nuizatbur dingin a lo siem tah a nih. 9 Hieng lei hin an nawm ei pi le puhai kha kawlhnàma sàm thlukin an lo um a, an naupa le naunu le nuhmeihai chu mi salah an um chu nih. 10 A lungsen inling chu an kieng theina dingin, LALPA, Israelhai Pathien kuomah thuthlung thlung ka tum a nih. 11 Ka nauhai, LALPA chun a rongbawltu ni a, a hmaa ngîra a rong bawl ding le rimtui inhlân dinga a ruot cheu in ni leiin, tu hin chu a rong bawl unla, inthlada ta hrim hrim naw ro" a ta. 12 Chuongchun, Levihai chu an inthok suok a. Chuonghai chu, Kohat thlaa inthokin Amasai naupa Mahat le Azaria naupa Joel hai; Merari thlaa inthokin Abdi naupa Kisa le Jehalelel naupa Azaria hai; Gerhon thlaa inthokin Zima naupa Joah le Joah naupa Eden hai; 13 Elizafan thlaa inthokin Simri le Jeiel hai; Asaf thlaa inthokin Zekaria le Matania hai; 14 Heman thlaa inthokin Jehiel le Simei hai; Jeduthan thlaa inthokin Semaia le Uziel hai an nih. 15 Anni chun an unauhai an ko khawm a, an insukthienghlim a, LALPA thua lal thupêk angin LALPA Tempul chu sukfai dingin an lût a. 16 Thiempuhai chu LALPA Hmun Thienghlim inthiel fai dingin an lût a, LALPA Tempul sûnga thil thieng lo an hmu po po chu LALPA Tempul tuolzawla chun an hung lâk suok a, chu chu Levihaiin an lâk a, Kidron vadungah an fepui a. 17 Thla khatna ni khat nia inthienna sin an bei tan chu a ni rietnaa chun LALPA hulhliep chen an phâk hman a. Ni riet dang LALPA Tempul inthien chu an bei nawk a, thla khatna, ni sawm le ni ruk ni chun an zo fel ta a. 18 Chu zoa chun lal Hezekia kuomah an fe a, "LALPA Tempul chu kan inthien fai zo ta a, pumraw thilhlân inhlànna maichâm hai, chu taka hmang bûr le bèl po po hai, hlânbei siena dawkân hai le hmangruo dang po po khom. 19 Chun, Ahaz inlal laia depde taka thil a lâk hmang po po kan inchik vong a, kan inthien bok a, tu hin LALPA maichâm hmaah a um" an ta. 20 Hezekia chu zîng inhma takin a tho a, khawpuia mi lienhai chu a ko khawm a, LALPA Tempulah a hang fepui a. 21 Ram le Hmun Thienghlim le Judahai ta dinga suol thawina dingin bawngchal pasari, beramchal pasari, beramchal te pasari le kèlchal pasari an kei a, Aron thla thiempuhai kuoma chun LALPA maichâma inhlàn dingin a pêk a. 22 Bawngchalhai chu an that a, thiempuhai chun a thisen chu an lâk a, maichâm chu an the a. Beramchalhai khom chu an that a, a thisen chun maichâm chu an the a. Chun, beramtehai khom chu an that a, a thisen chun maichâm chu an the a. 23 Suol thawina ding kèlchalhai chu lal le pungkhawmhai hmaa chun an hung kei a, an chungah kut an innghat a. 24 Thiempuhai chun an that a, lalin Israel mihai po po ta dinga pumraw thilhlân le inremna thilhlân inhlàn dinga thu a pêk angin, kèl thisen chu Israel mi po po ta dinga inremna siemna dingin maichâma chun suol thawinaah an inhlàn a. 25 Chun, Davida le lal zawlnei Gada le zawlnei Nathan thupêk angin, LALPA tempula chun Levihai chu dârbenthek hai, perkhuong hai le tingtang hai tum dingin lal chun a sie a; chu chu a zawlneihai hmanga LALPA thupêk a nih. 26 Levihai chun Davida insiemtir rimawi hmangruohai chu chawiin inring zingin an ngîr a, thiempuhai chun tawtawrawt an chawi bok a. 27 Hezekia chun pumraw thilhlân chu inhlàn ta dingin thu a pêk a. An inhlàn tan chun tawtawrawt le Israel lal Davida insiemtir rimawihai leh remin LALPA hla chu an sak tan ve a. 28 Hla sak pawlin hla sak a, tawtawrawt mûttuhaiin an mût lai chun LALPA chawibiekin mipuihai chu an kûn a, chuong ang chun pumraw thilhlân chu an zo chenin an thaw a. 29 Inthawina thilhlânhai an inhlàn zo chun lal le a kuoma um po po chun dingthathuonin Pathien an chawibiek a. 30 Lal Hezekia le a thoktuhai chun Davida phuok le zawlnei Asaf phuok inpâkna hla hai chu sak dingin Levihai chu thu an pêk a. Chuongchun, hlim takin inpâkna hla chu an sak a, kûnin Pathien an chawibiek a. 31 Hezekia chun, "Tuhin LALPA kuomah nangni in inhlàn ta a. Hung hnai unla, LALPA tempulah inthawina le lawmthu hrilna thilhlân hung inhlàn ta ro khai" a ta. Mipuihai chun inthawina hai le lawmthu hrilna thilhlânhai an hung inhlàn a; a nuom taphotin pumraw thilhlân an hung inhlân bok a. 32 Mipuiin pumraw thilhlân an hung inhlàn zât chu bawngchal sawmsari le beramchal za le beramte zahni a na, chuonghai po po chu LALPA ta dinga pumraw thilhlân vong a nih. 33 Thilhlân po po chu bawngchal zaruk le beram sângthum a nih. 34 Amiruokchu, thiempu an indai naw leiin pumraw thilhlânhai chu a vun an inhlip seng naw a. Thiempu danghai an insukthienghlim hma po le an sin an zo hma po chu an unau Levihai chun an thangpui a (Levihai chu insukthieng thuah thiempuhai nêk hmanin an khermei lem si a). 35 Pumraw thilhlân chu a tam hle a, pumraw thilhlân le inkopa inhlàn hlak inremna thilhlâna ding thau hai, dawn ding thilhlâna ding uoiin hai khom chu a tam êm êm el a. Chuong ang chun LALPA Tempula rongbawlna chu an tan thar nawk a nih. 36 LALPA thangpuina zâra chuong po po hun sawt nawte sûnga an thaw thei leiin Hezekia le mipuihai chu an hlim êm êm a.

2 Chronicles 30

1 Hezekia chun Israel ram le Judai ram po poah mi a tir a, Efraim-hai le Manase-hai rama khom lekha a thon a, Jerusalema LALPA Tempulah hung a, LALPA, Israelhai Pathien Fekàn kût hung hmang dingin a fiel a. 2 Lal le a mi lienhai le Jerusalema pungkhawmhai po po chun a thla hninaa Fekàn kût hmang an rot a. 3 Chuong lai chun thiempua ser thienghlim an la tam tawk naw bâkah Jerusalemah mipui an la pung khawm tam tawk naw leiin a hun pangngaiah an la kût thei hri naw a. 4 Lal le pungkhawmhai chun an thil rot chu tha hlein an ngai a. 5 Chuleiin, Israel ram po poah, Beershebaa inthoka Dan chenin LALPA, Israelhai Pathien ta dinga Fekàn kût Jerusalema hung hmang dinga inhriettirna chu thon dar an rêl thlûk a. Dàn ang chun tam tak pungkhawma hmang ding a na, sienkhom chuong ang chun hmang a la ni hri nawh. 6 Chuongchun, lal thupêkin Israel ram le Judai ram hmun tinah lal le a mi lienhai lekhathon chu thu phurtuhaiin an tlânpui a. Chu lekhathona chun, "Nangni Israel thlahai, Asuria lalhai kuta inthoka tlân suok la dam sunhai tieng LALPA a hung ngha nawk theina dingin, LALPA, Abraham Pathien, Isak Pathien le Israel Pathien tieng hung ngha kîr nawk ro. 7 In pi le puhai le in unauhai chu LALPA, in pi le puhai Pathien chunga an ringum naw leia mihai pangzata a siemzie nangni ngeia in hmu ang hin nangni ruok chu um ve naw ro. 8 In pi le puhai ang khan lulul ve naw unla, LALPA kuomah tlu lût unla, kumkhuoa dinga a ser thienghlim, a hmun thienghlima chun hung ro. LALPA, in Pathien rong chu bawl ro, chuongchun in chunga a lungsenna nasa tak chu nangni lakah a lâk kieng ding a nih. 9 LALPA kuom tieng in hung kìr chun, in unauhai le in nauhai chu sala mantuhai inlungsiettir a ta, hi rama hin hung kîr nawk an tih; LALPA in Pathien chu ngilnei tak le zàngài thei tak a ni si a. Ama tieng in ngha phot chun nghatsan hrim hrim naw ni cheu" tiin. 10 Lekhathon tlànpuituhai chu khaw tinah, Efraim le Manase hai ram po poah, Zebulun ram chenin an fe a, sienkhom anni chun hmusitin an lo nuizat a. 11 Amiruokchu, Aser hai, Manase hai Zebulun hai laia thenkhat ruok chu inphahnuoiin, Jerusalemah an fe a. 12 Judai rama lem chu LALPA thu anga lal le mi lienhai thupêk chu hlen suok ngei dingin Pathien kut chu mipuihai chungah a um a, lungril hmun khat a'n puttir a. 13 A thla hninaa chun chol thang lo bei kût hmang dingin mipui tam tak Jerusalemah an pung khawm a. 14 Jerusalem khaw sûnga maichâm an lo siemhai po po chu an thiek vong a, rimtui rawna maichâmhai po po khom an suksiet a, Kidron vadungah an dehawn a. 15 A thla hnina ni sawm le ni linaa chun Fekân kûtna beramte chu an that a. Thiempuhai le Levihai khom an inzak em leiin an lo insukthienghlim ta a, pumraw thilhlânhai chu LALPA tempula chun an hung lâk lût a. 16 Pathien mi Mosie dâna a hril ang takin mani thawna ding hmun senga chun an um a, thiempuhai chun Levihai hung chawi thisen chu an the a. 17 Mipuihai lai chun ser le sâng thaw dinga insukthieng hman lo le chu leia LALPA kuoma Fekan kût beramte inhlàn thei lo an um a, chuonghai chu LALPA ta dinga inthienna dingin a thienghlim lohai puolin Levihai chun Fekân kûtna beramtehai chu an that a. 18 Efraim mihai, Manase mihai, Isakar mihai le Zebulun mihai laia tam tak chu insukthienghlim lo an ni a, sienkhom dàn lo angin fekân kûtna ruoi chu an fâk ve a. Anni ta ding chun Hezekia-in a hnipêk a, 19 "Tu khom lungril taka Pathien, an pi le puhai LALPA Pathien zongtu taphot chu Hmun Thienghlim dàn ang takin insukthienghlim naw hai sienkhom LALPA thatna chun ngaidam tawl raw se" tiin a tongtai a. 20 Hezekia tongtaina chu LALPAN a lo ngàithlâk a, mipuihai chu a sukdam a. 21 Jerusalema um Israelhai chun chol thang lo bei kût chu hlim takin ni sari sûng an hmang a; Levihai le thiempuhai chun LALPA chawimawina rimawi hmangruohai chu inring taka tumin ni tinin LALPA kuomah inpâkna hla an sak a. 22 Levihaiin thiem taka LALPA chawibiekna rong an bawlna chungthuah Hezekia chun Levihai chu a'n pâk tawl a. Chuong ang chun, LALPA an pi le puhai Pathien kuomah inremna thilhlânhai chu inhlàna LALPA chawimawiin, an chan seng faa dawnin, ni sari sûng kût ruoi an the a. 23 Pungkhawmhai po po chun ni sari dang kût sunzom an rot a, chuongchun ni sari dang chu hlim takin an kût nawk a. 24 Juda lal Hezekia chun an kûtna dingin mipuihai kuomah bawngchal sângkhat le beram sângsari a pêk a; mi lienhai khomin bawngchal sângkhat le beram le kèl sîngkhat an hung thaw bok a. Thiempu tam tak chu an lo insukthienghlim ta bok a. 25 Juda mipui po po chu, thiempuhai le Levihai leh, Israel rama inthoka hunghai le hnam dang, Israel rama inthoka hung le Judai rama umhai chu an hlim hle a. 26 Jerusalema mihai khom nasa takin an hlim a, Israel lal Davida naupa Solomon thi hnungah chuong ang hrim hrima hlimna chu Jerusalemah a la um ngai nawh. 27 Thiempuhai le Levihai chun ngîrin mipuihai chu mal an sawm a, Pathienin a lo ngàithlâk a, an tongtaina chun a chêngna Hmun Thienghlim vân chu a tlung si a.

2 Chronicles 31

1 Chuong po po chu an thaw zo hnungin chu taka um Israel mihai chu an inthok suok a, Judai ram po po le Benjamin ram le Efraim ram le Manase ram sûnga an lungserhai po po chu an vuok koi a, Asera lem thinghai chu an phûr a, hmun sànga an bawlhmun le maichâm po po chu an sukchim vong a. An suksiet vong hnung chun Israelhai chu anni khuo seng le an in le lo sengah an kîr nawk ta a. 2 Hezekia chun thiempuhai le Levihai chu an pawl inthe dàn le thaw ding chan an insem ang peia pumraw thilhlân le inremna thilhlân inhlàntu ding dâm, rongbawltu ding dâm, lawmthu hriltu ding dâm le LALPA chêngna in kotkhâra inpâkna hla saktu ding dâm a ruot a. 3 Lal chun ama ran ruola inthokin zîng le zàna pumraw thilhlân ding dâm, LALPA dânin a tuk anga Sabat ni dâm, thla thar lawm ni dâm le hunbi nei kût hmang chânga inhlân dinghai chu a tum a. 4 Thiempuhai le Levihai chu LALPA dâna an inpêk zo theina dingin an chanpuol dinghai chu pe dingin lal chun Jerusalema chênghai chu thu a pêk a. 5 Thupêk a suok charin Israel thlahai chun phal takin an bu le bâl tharsuok hai, uoiin hai, hriek hai, khuoizu hai le an lo tharsuok hmasa tak hai chu an hung pèk tuk tuk a; chun, an iengkima sawma pakhat chu an hung pêk bok a. 6 Israel mi le Juda mi, Judai rama chênghai chun an ranhai sawma pakhat le LALPA an Pathien chanpuola thilpêk an inhlàn thienghlim tahai laia sawma pakhat chu an hung chawi khawm a, an intieng khawm hnêr hnûr el a. 7 A thla thumnaa an lâk khawm tan kha a thla sarinaah an lâk khawm zo a. 8 Hezekia le a thoktuhaiin chuong thilpêk vùm thûr el an hang hmu chun LALPA an chawimawi a, Israel mipuihai chu an inpâk hle a. 9 Hezekia chun an thil sie khawm chungchang thu chu thiempuhai le Levihai chu a'n don a. 10 Zadok sûngkuoa mi thiempu laltak Azaria chun, "Mihaiin LALPA Tempula an thilpêk an hung chawia inthok hin chu fâk ding kan nei zing ta a, LALPAN a mipuihai mal a sawm a, hieng zozai hi fâk seng lo a la vûm thûr el a nih" a ta. 11 Chuongchun, LALPA Tempula chun a sie khawmna ding hmun siem dingin Hezekia chun thu a pêk a, chuong ang tak chun an thaw a. 12 Chu zoah indik takin an thilpêk hai, sawma pakhathai le Pathien puola thilpêk an inhlàn hai chu an hlù lût a. A enkoltu lu tak chu Levi mi Konania a na, a dottu chu a unaupa Simei a nih. 13 Konania le a unau Simei inrawina hnuoia thok dinga lal Hezekia le Pathien Tempula hotu Azaria haiin enkaitu mi an ruothai chu Jehiel hai, Azazia hai, Nahat hai, Asahel hai, Jeromot hai, Jozabad hai, Eliel hai, Iskamia hai, Mahat hai le Benaia hai an nih. 14 Levi mi Imna naupa Kore, sak tieng kotkhâr vêngtu chu mani nuom thua Pathien kuoma thil an hung inhlânhai lo dongtu le LALPA kuoma thawlawm le thilpêk an hung inhlânhai semtu a nih. 15 Thiempuhai umna khaw tina ringum taka lo thangpuituhai chu Eden hai, Miniamin hai, Jesua hai, Semaia hai, Amaria hai le Sekania hai an nih; anni chun an unauhai chu a pawl pawlin, a chin a lien kuomah an chanvo ding seng an sempêk hlak. 16 Chun, thlatu inzieknaa hming chuong pasal, kum thumj le a chung tieng mi, an pawl inthe dàn le mawphurna insem dàn ang dungzuia LALPA Tempula ni tina fe tûlhai ruok chu an inthangtir sa ve nawh. 17 Thiempuhai sinthaw dàn ding chu an chi inthla dàn ang dungzuiin an ruot a, Levihai ruok chu, kum sawmhni chung tieng po, an sinthaw dungzuiin, an thangna ding pawl an ruot a. 18 Thiempuhai chu an nuhmei hai, ieng anga naupang khom an naunu le naupa hai le an sûngkuoa thang mi danghai leh ringum taka an insukthienghlim zing leiin an sûngkuo inziekna anga tiem sa vong an nih. 19 Chun, Aron thla thiempuhai, khaw se vel phûla chênghai le khaw hrang hranga chêng le Levi thlahai hming inzieknaa chuong taphothai chanvo semtu ding mi ruot bîk an um bok a. 20 Chuong ang chun Judai ram po poah Hezekia chun a thaw a, LALPA a Pathien mithmuah tha le indik le ringum takin thil a thaw hlak a. 21 Pathien Tempula rongbawlna thua dâm, dàn le thupêkhai a zawmna konga dâm le Pathien a zongnaa dâm iengkim a lungril po poin a thaw a, a hmuingil pei a.

2 Chronicles 32

1 Chuonga ringum taka Hezekia-in thil a thaw hnung chun Asuria lal Senakerib-in Judai ram a hung rûn a, lâk tumin kul nei khuohai chu a'n huol a. 2 Jerusalem rûn dingin Senakerib a hung inthok ti Hezekia-in a hriet chun a mi lienhai le sipai hotuhai chu a rawn a, 3 khaw puo tienga tuikul po po chu khàr a rot a, anni chun an thangpui a. 4 Chuongchun, mi tam tak an pung khawm a, "Ieng leiin am Asuria lal chun tui tam tak a nei ding?" an ta, a rama luong lût vadungte tui hnar po po chu an dang chat vong a. 5 Chu zoah Hezekia chun inrim taka thokin kul bang chim tah po po chu a siem tha a, kulbing insânghai a'n din thar a, kul puo tieng kul dangin a'n huon thuo a, Davida khawpui thut chu a suknghet a, hriemhrei le phaw tam tak a siem bok a. 6 Chun, indonaa mipuihai inrawitu ding hotu a siem a, khawpui kotzawla chun a ko khawm a, 7 "Hrât tak le huoi takin um ro. Asuria lal le a sipai tam takhai chu ti naw unla, zâm bok naw ro, ama nêka thil thaw thei lem ei kuomah a um si a. 8 Ama kuoma chu mihriem bân chauh a um a, eini kuoma ruok chu mi thangpuitu ding le ei râl dotu ding LALPA ei Pathien a um a nih" tiin a thlamuong a. Juda lal Hezekia thu hril chun mipuihai chu a sukhuoi a. 9 Senakerib-in Lakis khuo a'n huol lai chun Jerusalema Juda lal Hezekia le Juda mipuihai po po kuomah a ofisarhai a tir a, hi thu hi a'n cha a: 10 "Asuria lal Senakerib chun hieng hin a tih: 'Jerusalem inhuol a ni ta hnung khoma in um zing ngamna san chu iem ni tâng a ta? 11 Hezekia-in, 'LALPA ei Pathien chun Asuria lal kuta inthokin mi san suok a tih' tia a hril cheu kha, phingtâm le dangchâra in thina dinga a hlèm bawlna cheu a ni kha. 12 Hezekia ngei hi hmun sânga maichâmhai sukchim a, Judai ram le Jerusalema mihai kuoma, 'Maichâm pakhatah Pathien bein, a chungah pumraw thilhlân in inhlàn ding a nih' titu kha a ni naw am a ni? 13 Ram danghai chunga kei le ka pi le puhaiin kan thaw dàn in la hriet naw a ni maw? Chuong hnamhai pathienhai chun ka kuta inthokin an ramhai chu an humpêk thei am a ni? 14 Ka pi le puhaiin an sukbohmang ta hnung a tu hnam pathien hin am ka kuta inthokin an san suok tah ti in hriet ta hlak a? In Pathien chun ieng tin am ka kuta inthokin a san suok thei bik ding cheu? 15 Hieng ang hin Hezekia chun hlèmin thuoi suol naw raw se cheu. Ama chu ring naw ro; tu hnam pathien le ieng ram pathien khom ka kuta inthok le ka pi le puhai kuta inthoka san suok thei an um nawh. In Pathien lem lem chun ka kuta inthokin san suok naw nawkzuol a ti cheu" tiin. 16 Senakerib mihai chun chu nêka nasa lem chun Pathien le a siehlaw Hezekia chu an biek sisaw a. 17 Chun, Asuria lal chun Israelhai LALPA Pathien hmusit zawngin, "Ram dang mi pathienhaiin ka kuta inthoka an mipuihai an san suok thei naw ang bokin, Hezekia Pathien khomin ka kuta inthokin san suok naw top a tih" tiin a ziek bok a. 18 Khawpui chu an lâk theina dinga Jerusalem mipuihai rîkrâp le sukthlabâr dingin kul chunga umhai chu Hebrai tongin an khêk khum a. 19 Jerusalem Pathien chu mihriem kuta siem, khawvela mi danghai pathien ang mei meiin an hril a. 20 Chuong ang thil lei chun, lal Hezekia le Amoz naupa zawlnei Isai chu vân tieng nghain an tongtai a. 21 Chuongchun, LALPAN vântirko a tir a, Asuria lal riekhmuna mi hrât huoisen po po le an hma thuoitu le hotuhai po po chu a sukhlum vong a, hmai thûmin a ram tieng a kîr nawk a. A pathien tempula a fe chu ama nauhai ngeiin kawlhnàmin an lo sàthlum a. 22 Chuong ang chun LALPAN Hezekia le Jerusalema mihai chu Asuria lal Senakerib kuta inthok le mi dang po po kuta inthokin a sanhim a, an kawl le kienga mihai lakah a vêng a. 23 Chun, mi tam takin LALPA ta dingin Jerusalemah thilpêk an hung chawi a, Juda lal Hezekia chu thil hlu tak tak an hung pèk a. Chu taka inthok chun nasa taka hnam tin ngaisâng a hung hlaw ta a. 24 Chuong lai chun Hezekia chu thi ngamin a na a, LALPA kuomah a tongtai a, a lo don a, inchikna mak a pêk a. 25 Nisienlakhom, Hezekia lungril chu a chapo a, a chunga zàngàina inhmutira a um angin a thaw ve naw leiin ama le Judai ram le Jerusalem chunga chun LALPA lung nasa takin a sen a. 26 Hezekia chun a lungril chapona chu a'n sìr a, chuong ang bokin Jerusalem mipuihai chun an insìr ve leiin Hezekia dam sûng chun LALPA lungsenna chu an chungah a tlung ta nawh. 27 Hezekia chun sum le pai a hung hau a, a hung ropui ta hle a, tangkaruo hai, rangkachak hai, lunghlu hai, rimtui hai, phawhai le thil hlu tam tak sie khawmna in a bawl a. 28 Bu le uoiin le hriek sie khawmna in a bawl bok a. Ran ruol tinrêng sie khawmna ding bûk le beram huong hai a bawl a. 29 Khuohai a siem a, bawng ruol le beram ruol tam tak a nei a, Pathienin hausakna nasa takin a vûr a. 30 Hezekia bok hin Gihon vadung chuonchung lem chu a khâr a, Davida khawpui thlang tieng pangah an luong thlâktir a. Chuongchun, Hezekia chu a thilthaw po poah a hmuingil pei a. 31 Amiruokchu, Babulon lalin a rama inchikna mak hung tlung chu indon dinga palai a hung tir chun, a lungrila thil um po po a hriet theina dinga fie dingin Pathienin a thlathlam a. 32 Hezekia inlal sûnga thil tlung danghai le a thilthaw thathai chu Amoz naupa Isai inlàrna bu, Juda lalhai le Israel lalhai chanchin inzieknaah a chuong. 33 Hezekia chu a pi le puhai kuomah a chawl a, Davida thlahai thlânmuola chun an phûm a. Juda mi po po le Jerusalema mihai po poin a thi ni chun ropui takin an sûn a. A naupa Manase chun a lalna chu a hung hluo ta a.

2 Chronicles 33

1 Manase a hung inlal chun kum sawm le pahni mi a ni a, Jerusalemah kum sawmnga le kum nga a'n lal a. 2 Israelhai hmaa LALPAN a hnot suok hnamhai chîng dàn tirdakum tak chu zuiin LALPA mithmuah thil suol a thaw a. 3 A pa Hezekia-in a sukchim hmun sànghai chu a'n din thar nawk a, Baal maichâmhai a bawl a, Ashera lem thinghai a phun a, vâna um po po khi a biek a, an rong a bawl a. 4 Chun, LALPAN "Jerusalem-ah kumkhuoin ka hming um a tih" a tina LALPA Tempula ngei chun pathien danghai maichâm a bawl a. 5 LALPA Tempul tuolzawl ve vea chun vâna um po po ta dingin maichâm a siem a. 6 Ben Hinom ruomah a naupahai meiah a'n hlàn a, aisan a chîng a, dawi a hmang a, ramhuoi zawlhai le rau ko thiem hai a rawn a, LALPA suklungsen dingin a mithmuah thil suol tam tak a thaw a. 7 Pathienin Davida le a naupa Solomon kuoma, "Hi tempul le Israel thlahai hmun laia ka thlang Jerusalema hin ka hming chu kumkhuoin inumtir ka ta, 8 Mosie hmanga thu ka pêk hai, dàn hai, thusuok hai le thuruot po po hai chu fimkhur taka an zawm phot chun, an pi le puhai ka pêk tah hi rama inthok hin Israelhai ke chu inpên suoktir ta naw ning" a lo tina Pathien tempula chun ama milem inkertir chu hung chawiin a sie a. 9 Manase chun Judahai le Jerusalema mihai chu thuoi suolin, LALPAN Israelhai hmaa a sukbohmang hnamhai nêka nasa lemin thil suol an thaw a. 10 Manase le a mihai kuoma chun LALPAN thu a hril hlaka chu an ngaisak nawh. 11 Chuleiin, LALPAN Asuria sipai kawmandarhai a tir a, Manase chu an man a, a hnârah khaidiet an inbuntir a, dâr kol an inbuntir bok a, Babulon tieng an thuoi a. 12 Beidong taka a um lai chun LALPA a Pathien ditsakna chu a zong a, a pi le puhai Pathien hmaa chun nasa takin a'n phàhnuoi a. 13 Chuonga tongtaia a hang hni chun LALPA lung a tawk a, a hnina chu LALPAN a ngàithlâk a, Jerusalemah a rama chun a thuoi kîr nawk a. Chu phing leh Manase chun LALPA chu Pathien a nizie a hung hriet ta a. 14 Chu hnung chun Davida khawpui inhuonna tuol bang, Gihon vadung thlang tieng ruoma inthoka Nga Kotkhâr lûtna chenin, a siem tha a, Ofel muol inhuol velin insâng takin a rem a. Chun, Judai rama kul umna khaw tinah sipai kawmandar a sie vong a. 15 Ram dang pathienhai le milemhai po po chu LALPA Tempula inthokin a'n thiel fai vong a, LALPA Tempul muol le Jerusalema maichâm a siemhai po po chu khuoa inthokin an pei hmang vong a. 16 LALPA maichâm a siem tha a, inremna thilhlân inthawina le lawmthu hrilna thilhlânhai a'n hlàn a, Judahai chu LALPA Israelhai Pathien rong bawl dingin a hril a. 17 Mipuihai chu hmun sànga an inthawi hlak chu an la thaw zing a, sienkhom LALPA an Pathien kuoma chauh a ni ta lem. 18 Manase inlal laia thil tlung danghai le Pathien kuoma a tongtai thu hai, LALPA, Israelhai Pathien hminga a kuoma zawlneiin thu a hrilhai chu Israel lalhai chanchin inziekna buah a chuong. 19 A tongtaina thu le a hninain Pathien lungril a tawk thu hai, a'n phàhnuoi hmaa a khawsak dàn hai, a suolna le ringum nawna hai, hmun sàng a bawlna hmun hai le Asera lem thing le a milem siem fawmhai a siena hmun po po chanchin chu Hozaiin a chanchin a ziekna buah a chuong. 20 Chuongchun, Manase chu a pi le puhai kuomah a chawl a, ama inah an phûm a, a naupa Amon chun a lalna chu a hung hluo ta a. 21 Amon chu kum sawmhni le kum hni a ni kumin a'n lal tan a, Jerusalemah kum hni a'n lal a. 22 A pa Manase thaw ang bokin LALPA mithmuah thil suol a thaw a, a pa Manase siem fawm milem po po kuomah a'n thawi a, an rong a bawl a, a suol zuol sauh lem a nih. 23 A pa Manase inphahnuoi ang khan LALPA hmaah a'n phahnuoi ve nawh. 24 Chun, a siehlawhaiin an phierrûk a, ama inah an that a. 25 Nisienlakhom. Amon phiertu po po chu mipuiin an that vong a, mipui chun a naupa Josia chu lalah an siem a.

2 Chronicles 34

1 Josia chu kum riet mi a niin a'n lal tan a, Jerusalemah kum sawmthum le kum khat a'n lal a. 2 LALPA mithmuah thil tha a thaw hlak a, a thlatu Davida lampui chu a hraw a, voi tieng amanih chang tieng amanih a pêtsan ngai nawh. 3 Kum riet a'n lal kum, naupang tak a la ni laia inthok hrimin a pu Davida Pathien chu a zong tan a, kum sawm le kum hni a'n lal kumin Judai ram le Jerusalema hmun sàng hai, Asera lem thinghai, milem siem fawm le sung fawm hai po po chu an thiel fai vong a. 4 Baal maichâmhai chu a mithmua ngei an sukchim a, a bula rimtui rawna maichâmhai chu a suksiet vong a, Asera lem thinghai chu a phûr a, milemhai le thil limhai po po chu a rawt nawi vong a, a nawihai chu chuong milem hmaa inthawituhai thlàn chunga chun a phul a. 5 An maichâmhai chunga chun thiempuhai ru a raw a, Judai ram le Jerusalem chu a'n thiel fai a. 6 Chuong ang chun Manase hai, Efraim hai, Simeon hai le Naftali hai chêngna khuohai le an kawl vela hmun rausan tahai chenin a thaw vong a. 7 Maichâmhai a sukchim a, Asera lem thinghai chu a phûr a, milem siem fawmhai chu a rawt nawi a, rimtui rawna maichâmhai chu a vuok koi vong a. Chuong ang chun Israel ram sûng po poah a thaw a, Jerusalem tieng a kîr nawk ta a. 8 Josia inlala inthoka kum sawm le parietnaa a ram le tempul an inthien fai tumin lal chun LALPA a Pathien tempul siem tha dingin Azalia naupa Safan hai, khawpui optu Maaseia hai le lekha ziektu Joahaz naupa Joa hai chu a tir a. 9 Thiempu Hilkia kuomah an fe a, kotkhâr vêngtu Levihaiin Manase mi hai, Efraim mi hai, Israel mi hlaa la um sun po po hai, Juda mi le Benjamin mi hai le Jerusalema chêng haiin Pathien tempula thawlawm an hung chawi an lo lâk khawmhai chu an lo pêk a. 10 Chu sum chu LALPA Tempul siem thatnaa inrawitu dinga ruothai kuoma chun an pêk sawng a, anni chun Tempul ripêrtuhai le cheituhai hlawah an pêk a. 11 Juda lalhaiin an lo intawptir tah Tempul siem thatna ding lung ser sa dâm, tlungpûm le kalkhanga hmang ding thing dâm inchawkna dingin themthiemhai le in bawltuhai kuomah an pêk a. 12 Mihai chun an sin ringum takin an thaw a. An hotuhai, sin rêlbawltu palihai chu Levi chia mi ngot, Merari thlaa mi Jahat le Obadia le Kohat thlaa mi Zekaria le Mesulam hai an nih. Hieng Levihai hi rimawi tum thiem vong an nih. 13 Levi danghai chu thil phurtuhai inrawitu dâm le sinthawhai thaw ding iengkim rêlbawltu dâm an na; Levi thenkhat chu lekha ziektu dâm, thil rikawttu dâm le kotkhâr vêngtu dâm an nih. 14 Chun, LALPA Tempula sum an sie khawmhai an phor lai chun thiempu Hilkia chun Mosie hmanga pêk LALPA Dàn bu chu a hmu suok a. 15 Hilkia chun lekha ziektu Safan kuomah, "LALPA Tempulah dàn bu kan hmu suok" a ta, Safan chu a pêk a. 16 Safan chun lekhabu chu lal kuomah a chawi a, a kuomah, "I siehlawhaiin thaw dinga i ruot po po chu an thaw a. 17 LALPA Tempula tangka um po chu an lak suok a, hotuhai le sinthawtuhai an pêk a. 18 Chun, thiempu Hilkia-in lekhabu a mi pêk" tiin lal chu a hril a. Safan chun lal hmaah lekhabu chu a hang tiem a. 19 Lalin Dàn thuhai a hang hriet chun a silpuon a pot thlêr a. 20 Lal chun Hilkia hai, Safan naupa Ahikam hai, Mika naupa Abdon hai, lekha ziektu Safan hai le lal siehlaw Asaia hai kuomah thu a pêk a: 21 "Fe unla, hi lekhabu in hmu suoka thu zieka umhai chungthua hin keima le Israel le Judai rama hlaa la um sunhai ta dingin LALPA mi va rawnpêk ro. Ei pi le puhaiin hi dàn bua inziek ang hin LALPA thu chu an lo zawm naw leiin ei chungah LALPA a lo lungsen nasa ta hle a nih" a ta. 22 Chuongchun, lalin a tirhai le Hilkia chu silfên enkoltu Hasra naupa Tokat, Tokat naupa Salum nuhmei, zawlneinu Hulda kuoma chun an fe a, chu chungthua chun an va rawn a. Ama chu Jerusalem biel hninaa um a nih. 23 Ama chun an kuomah, "LALPA Israel Pathien chun hieng hin a tih: 'Ka kuoma hung tirtu cheu kuoma chun hieng hin hril ro: 24 LALPA chun hieng hin a tih: Ngai ta u, hi hmun le a sûnga umhai chunga hin sietna intlungtir ka ta, Juda lal hmaa an tiem suok lekhabua chuong tongsie po pohai khom chu intlungtir ka tih. 25 Mi nghatsan a, pathien dang kuomah rimtui raw a, an kuta an siem fawm thilhaia ka lungsenna an cho phawk leiin, hi hmuna hin ka lungsenna chu bun thlâng ka ta, sukre ni naw nih. 26 LALPA thu indon dinga tirtu cheu Juda lal kuoma chun hieng hin hril ro: LALPA, Israelhai Pathien chun hieng hin a tih: 27 Chuong thu i hriethai chun i lungril an suknem a, hi hmun le a sûnga chênghai siet ding chungchang thu chu hre a, ka hmaah inphahnuoi a, i puon pot thlêra i tap leiin kei khomin i thu ka lo ngàithlâk a. 28 Ngai rawh, i pi le puhai kuomah thuoi ka ti che a, thlamuong taka vui liem nîng i ta, hi hmun le a sûnga chênghai chunga sietna ka hung intlun ding chu i mitin hmu ve naw ti nih' tiin hril ro" a ta. Chu thu chu lal kuomah an intlun a. 29 Chuongchun, lal chun mi a tir a, Judai ram le Jerusalema upahai po po chu a ko khawm a. 30 Judai rama mi po po, Jerusalema mi po po, thiempuhai le Levihai le mipui hai, a chin a lien chu LALPA Tempulah a hang fepui a, LALPA Tempula an hmu suok thuthlung bua thu po po chu an hriet ngeiah a tiem suok a. 31 Lal chu a ngîrna dinga ruot, ban hrûla chun a ngîr a, chu lekhabua chuong thuthlung thu chu suknghet dingin a lungril po po le thlarau po poin LALPA zui ding le a thupêk hai, thupuong hai le thuruot hai chu pom dingin LALPA hmaa chun thu a thlung a. 32 Chu zoah Jerusalema um po po le Benjamin mihai po po khom chu chuong ang taka um dingin intiemkamna a'n neitir a; Jerusalema umhai chun Pathien, an pi le puhai Pathien thuthlung ang chun an thaw a. 33 Josia chun Israel thlahai hluo ram sûnga inthokin milem tirdakumhai po po chu a'n thiel fai vong a, Israel rama umhai po po chu LALPA an Pathien rong a'n bawltir a. Ama dam sûng po chun LALPA, an pi le puhai Pathien chu pêtsan loin an zui a.

2 Chronicles 35

1 Josia chun Jerusalemah LALPA ta dingin Fekân Kût a buotsai a, Fekân kût beramte chu thla hmasa tak ni sawm le ni linaa chun a that a. 2 Thiempuhai sinthaw ding a ruotpek a, LALPA tempula rongbawl sin thaw dingin a'n fui a. 3 Israel mihai zirtirtu, Pathien ta dinga ser hrang Levihai kuoma chun, "Israel lal Davida naupa Solomon tempul bawla chun bawm thienghlim chu sie a ni tâk leiin hmun tina liengkoa zawn kuol a ngai ta naw a, chuleiin in hun chu LALPA in Pathien le a mi Israelhai rongbawlna dingin hmang lem ta ro. 4 In zui dinga Israel lal Davida le a naupa Solomon haiin an lo ziek angin, in sûngkuo inthe dàn ang peia tempula mawphurna an pêk cheu chu thaw dingin inbuotsai ro. 5 Hmun Thienghlima in umna ding senga chun ngîr unla, in lo ngaisak dinga ruot sûngkuohaiin tempula thilhlân an hung inhlàn chu lo thangpui ro. 6 Fekân kût beramte chu that unla, insukthienghlim unla, mi a hunghai chu thangpui dingin inbuotsai unla, Mosie hmanga LALPAN thu a pêkhai po po chu zawm ro" a ta. 7 Kûta hung mipuihai inhlàn dingin Josia chun ama ran ruol laia mi beramte le kèlte sîngthum le bawngchal sângthum a tumpêk a, chuonghai chu lal taa mi vong a nih. 8 Lal thoktu lienhai khomin phal takin mipuihai le thiempuhai le Levihai ta dingin an hung tumpêk bok a. Pathien Tempula hotu Hilkia hai, Zekaria hai le Jehiel hai khomin Fekân kûta inhlàn dingin thiempuhai chu beramte sânghni le zaruk le bawngchal zathum an tumpêk a. 9 Levihai hotu Konania le a unauhai Semaia le Nethanel hai le mi dang Hasabia hai, Jeiel le Jozabad hai khomin Fekân kûta Levihai inhlàn dingin beramte le kèlte sângnga le bawngchal zanga an tumpêk bok. 10 Chuongchun, rongbawlna chu an buotsai a, lal thupêk angin thiempuhai chu an hmun sengah an ngîr a, Levihai khom chu an pawl dàn ang peiin. 11 Chun, fekân kûtna ding ranhai chu an that a, thiempuhaiin thisen chu an the a, Levihai chun a vun an inhlip a. 12 Mosie lekhabua chuong angin, an sûngkuo inthe dàn ang peiin, LALPA kuoma inhlàn ding pumraw thilhlânhai chu an sie hrang a, chuong ang bok chun bawngchalhai khom chu an thaw a. 13 A dàn ang takin fekân kût beramte sa chu an em hmin a; an inhlàn thienghlimhai chu bêl hrang hrangah an suong a, mi po po fâk dingin inhmaw takin an thur suok a, an sem a. 14 Chu zoah Levihai chun anni le thiempuhai fâk ding an buotsai a. Aron thla thiempuhai chu pumraw thilhlân le thauhai rawin zân inthim chena an buoi leiin Levihai chun anni le Aron thla thiempuhai fâk ding chu an buotsai a nih. 15 Chun, Davida le Asaf le Heman le lal zawlnei Jeduthun hai thupêk angin hla saktu Asaf nauhai chu anni hmunah an ngìr a, kotkhâr vêngtuhai chu kotkhâr tinah an um a, an unau Levihaiin fâk ding an hung buotsaipêk hlak leiin an sin an fesan ngai nawh. 16 Chu ni chun fekân kûta rongbawlna ser le sâng chu an zo vong a, Lal Josia thupêk angin pumraw thilhlân po po chu LALPA maichâma chun an inhlàn a. 17 Jerusalema um Israel mi po poin Fekân kût le Chol thang lo bei kût chu ni sa ri sûng an hmang a. 18 Zawlnei Samuel hun laia inthokin chuong anga nasa chun Fekân kût an la hmang ngai nawh. Thiempuhai, Levihai, Jerusalema um po po le Judai ram le Israel rama mi po po thang tlâng vonga Josia-in fekân kût a hmangpui ang hin Israel lal tu khomin an la hmangpui ngai nawh. 19 Fekân kût hi Josia inlala inthoka kum sawm le parietnaah an hmang a nih. 20 Josia-in Tempul siem that a zo hnung chun Aigupta lal Neko chu Karkemis rûn dingin Eufretis vadung tieng panin a'n thok tung a, Josia chun lo bei dingin a sipaihai leh a'n thok suok a. 21 Lal Neko chun, "Nang Juda lal, kei le nang ieng leiin am ei inbei ding a na? Ka do lai hnam chau a nih ka bei nuom. Pathienin inhmaw taka fe dingin a mi ti a nih. Ka kuoma um Pathien kal zawngin che lul naw rawh, chuong naw chun sukbohmang a ti che" tia hril dingin palai a tir a. 22 Nisienlakhom, Pathienin a biek ngei Neko thu hril chu Josia chun ngàithlaa inhnûk kîr nekin a lal thuom chu inthlâkin a'n siem danglam a, Megido ruomah lo bei dingin a fe a. 23 Thal kâp mihaiin Josia chu an inhliem a. A mihai kuoma chun, "Hi taka inthok hin mi fe hmangpui ro, hliem na tak ka tuok a nih" a ta. 24 A siehlawhai chun a tawlailira inthokin an zawn suok a, tawlailir dangah an sie a, Jerusalem tieng an phur tung a, a thi a, a pi le puhai thlânah an phûm a, Juda mi po po le Jerusalema mi po po chun an sûn a. 25 Zawlnei Jeremia chun Josia sûnna hla a phuok a, hla saktuhaiin Jeremia tap hla hi tu chen khom hin an la sak hlak. Sûnna hla sak hi Israel ramah an hung chìng a, chuong hlahai chu Sûnna hla buah a chuong. 26 Josia inlal sûnga thil tlung dang le LALPA dàn po po zawm dinga a'n pèk zozie le a thilthaw thathai chu, 27 a bula inthoka a tawp chenin, Israel lalhai le Juda lalhai chanchin inzieknaah a chuong.

2 Chronicles 36

1 Chuongchun, chu rama mihai chun Josia naupa Jehoahaz chu an thuoi a, Jerusalemah a pa aiin lalah an siem a. 2 Jehoahaz inlal tan chun kum sawmhni le kum thum mi a na, Jerusalemah thla thum a'n lal a. 3 Aigupta lalin Jerusalema a lalna chu a hung bànpêk a, a ram chu tangkaruo kilogram sângthum zali le rangkachak kilogram sawmthum le pali chu sie-ah a'n chawitir a. 4 Neko chun Jehoahaz unaupa Eliakim chu Judai ram le Jerusalema lalah a siem a, a hming chu Jehoiakim tiin a thlâkpêk a. Chun, Neko chun a unaupa Jehoahaz chu Aigupta ramah a thuoi a. 5 Jehoiakim chu kum sawmhni le panga a niin a'n lal tan a, Jerusalemah kum sawm pakhat lalin a um a, LALPA Pathien mithmuah thil tha lo a thaw hlak a. 6 Babulon lal Nebukadnezzar chu ama bei dingin a hung inthok a, Babulona thuoi dingin kol a'n buntir a. 7 Nebukadnezzar chun LALPA tempula bûr le bèlhai khom Babulon tieng a chawi a, Babulon khuoa a pathien tempula chun a sie a. 8 Jehoiakim chanchin dang le thil tirdakum a thawhai le a khawsak dànhai chu Israel lal le Juda lalhai chanchin inziekna buah a chuong. A naupa Jehoiakin chun a lalna chu a hung hluo a. 9 Jehoiakin a hung inlal chun kum sawm le pariet mi a na, Jerusalemah thla thum le ni sawm a'n lal a, LALPA mithmuin thil tha lo a thaw hlak a. 10 Kum a hung invoi chun Nebukadnezzarin mi a hung tir a, LALPA tempula bûr le bèl tha tak tak leh Babulon tieng a'n thuoitir a, a unaupa Zedekia chu Judai ram le Jerusalema lalah a sie a. 11 Zedekia chu kum sawmhni le pakhat a niin a hung inlal a, Jerusalemah kum sawm pakhat a'n lal a. 12 LALPA a Pathien mithmuah thil tha lo a thaw hlak a, LALPAN a thu hriltua a hmang zawlnei Jeremia laka chun a'n phàhnuoi nuom nawh. 13 Chun, Pathien hmingin Lal Nebukadnezzar chungah ringum zing dingin intiemkam sienkhom a laka chun a hel a, lulul a'n suo a, LALPA Israelhai Pathien tieng ngha nuom loin a lungril a sukkhau a. 14 Chu bâkah, thiempuhai lukhàituhai po po le mipuihai chun Pathien hre lo mihai thaw dàn ang bokin thil tirdakum tinrêng thawin, Jerusalema tempul, LALPA ta dinga inhlàn thienghlim chu milem bieknaa hmangin an sukporche a. 15 LALPA, an pi le puhai Pathien chun mipuihai le a chèngna Tempul chu a lainat si leiin an kuomah zawlnei a tir a tir a. 16 Sienkhom, Pathien mi tirhai chu an lo nuizat a, an thuhai chu an lo ngainêp a, a mihai chunga LALPA lungsenna hung inthok chu suklungawi nawk ngaina hrim inkaw lo khopin zawlneihai chu an lo suknomna a nih. 17 Chuleiin, LALPA chun anni soisa dingin Babulon lal a hung tir a, Tempul sûnga chen khom an tlangvàlhai chu a that a, mipuihai chungah zàngàina nei dêr loin a che a, nunghàk le tlangvàl le upa le tar tu khom hlà bik nei loin kawlhnàmin a that a, Nebukadnezzar kutah Pathienin a pêk tawl vong si a. 18 Pathien Tempula bûr le bèl po po, a lien a chin, LALPA rosum an sie khawm po po hai le lal le mi lienhai sum sie khawm po po hai khom chu Babulon tieng a hawn vong a. 19 Chu zoah a sipaihai chun Pathien Tempul chu an raw a, Jerusalem kul banghai chu an sukchim a, lal inhai po po an raw fai vong a, thil hlu ieng khom suksiet loa mâksan an nei nawh. 20 That loa an hlà, tlawmte la dam um sunhai chu Babulon tieng Nebukadnezzar chun salah a thuoi a, chu taka chun ama le a pahai siehlawah, Persiahai hung lien chenin, an um ta a. 21 LALPAN zawlnei Jeremia hmanga a lo hril chu hung tlung kimin, zawlnei lo hril ang ngeiin, a tawpah a ram chu rausanin a um a, kum sawmsari sûng chu sabat chawl a hmang tah a nih. 22 Persia lal Kura inlal tan kumin zawlnei Jeremia baua LALPAN thu an hriltir chu a hung tlung kim theina dingin LALPAN lal Kura lungril a chok tho a, a ram po poa tlâng insampui dingin ziekin hi thu hi a puong a: 23 "Persia lal Kura chun hieng hin a tih: 'Hnuoia lalram po po hi LALPA, vân Pathien chun a mi pêk ta a. Judai ram Jerusalemah a Tempul bawl dingin a mi ruot bok a. Nangni laia LALPA mi taphot chu Israel ramah kîr nawk thei in tih. LALPA in Pathien chun umpui cheu raw se'" tiin.

Ezra 1

1 Persia lal Kura inlal kumina LALPAN a thu zawlnei Jeremia hmanga a lo hril tah chu a hung intlung kimtir a. A ram sûng po poa puong dar dingin hieng ang hin thupêk ziek ngeia insuo dingin LALPAN Persia lal Kura lungrilah sin a thaw a: 2 "Hi hi Persia lal Kura thusuok a nih: Hnuoia ram po po hi LALPA, vân Pathien chun a mi pêk ta a, Judai ram Jerusalemah a Tempul bawl dingin a mi ruot a. 3 Israelhai Pathien, Jerusalema um, LALPA Tempul chu bawl dingin ama mi nangni laia tu khom Judai ram Jerusalem tieng kîr thei in tih. Pathien chu in kuomah um raw se. 4 Chun, mi tu khom, khaw lai hmuna umhai khomin Jerusalema Pathien tempul bawlna dinga mani lung puok ang dungzuia thil an pêk bâkah saltâng dam khawsuok la um sunhai chu tangkaruo hai, rangkachak hai, hmangruo hai le ran hai pein thangpui raw hai se" tiin. 5 Chuongchun, Juda hnam le Benjamin hnama lukhàituhai, thiempuhai le Levihai le tu khom LALPAN an lungrila sin a thaw taphothai chu Jerusalema LALPA Tempul hang bawl dingin an inthok suok a. 6 An kawl le kienga mihai chun mani lung puoka an thaw bâkah tangkaruo le rangkachaka siem bûr le bêl dâm, an inzin sûnga an fâk le dawn ding dâm, ran dâm le thilpêk hlu tak tak dâm pein an thangpui a. 7 Chu bâkah, lal Kura chun kha hmaa Nebukadnezzarin Jerusalem LALPA Tempula inthoka bûr le bêl a lâk le hawn, a pathien ina a siehai chu a'n lâk suoktir a. 8 Lal Kura chun a sum enkoltu Mithredat chu tiem vong ding le Judai ram tienga kîr pawlhai thuoitu Sesbazar kuta inhlàn dingin thu a pêk a. 9 Chuonghai chu rangkachak thlêng sawmthum, tangruo thlêng sângkhat, tangkaruo berbu sawmhni pakuo, 10 rangkachak thlêngkûm sawmthum, tangkaruo thlêngkûm zali le sawmkhat le bûr le bèl chi hrang hrang sângkhat a nih. 11 Babulona inthoka saltânghai Jerusalema an hung kîr nawk tuma Sesbazar kuta rangkachak le tangkaruo bûr le bèl an hawn tung po po chu sângnga le zali a nih.

Ezra 2

1 Judai rama mi Babulon lal Nebukadnezzarin Babulon tienga sala a thuoi, Jerusalem le Judai rama mani khuo senga hung kîr nawkhai chu hienghai hi an nih. 2 An thuoihai chu Zerubabel, Jesua, Nehemia, Seraia, Reelaia, Mordekai, Bilsan, Mispar, Bigvai, Rehum, le Baana an nih. Israel mi hung kîrhai chu: 3 Paros thlahai sânghni zakhat sawmsari pahnih; 4 Sefatia thlahai zathum sawmsari pahnih; 5 Ara thlahai zasari sawmsari panga; 6 Pahat-Moab thlahai (Jesua le Joab thlahai) sânghni zariet sawmpahnih; 7 Elam thlahai sângkhat zahni sawmnga pali; 8 Zatu thlahai zakuo sawmli panga; 9 Zakai thlahai zasari sawmruk; 10 Bani thlahai zaruk sawmli pahnih; 11 Bebai thlahai zaruk sawmhni pathum; 12 Azgad thlahai sângkhat zahni sawmhni pahnih; 13 Adonikam thlahai zaruk sawmruk paruk; 14 Bigvai thlahai sânghni sawmnga paruk; 15 Adin thlahai zali sawmnga pali; 16 Ater thlahai (Hezekia thlahai) sawmkuo pariet; 17 Bezai thlahai zathum sawmhni pathum; 18 Jora thlahai za le sawmpahnih; 19 Hasum thlahai zahni sawmhni pathum; 20 Gibar thlahai sawmkuo panga; 21 Bethlehem mihai za sawmhni pathum; 22 Netofa thlahai sawmnga paruk; 23 Anathot thlahai za sawmhni pariet; 24 Azmavet thlahai sawmli pahnih; 25 Kiriat Jearim, Kefira le Beerot khuoa mihai zasari sawmli pathum; 26 Rama le Geba khuoa mihai zaruk sawmhni pakhat; 27 Mikmas khaw mihai za sawmhni le pahnih; 28 Bethel le Ai khaw mihai zahni sawmhni pathum; 29 Nebo khaw mihai sawmnga pahnih; 30 Magbish mihai za sawmnga paruk; 31 Elam mihai sângkhat zahni sawmnga pali; 32 Harim mihai zathum sawmhni; 33 Lod, Hadid le Ono khaw mihai zasari sawmhni panga; 34 Jeriko khaw mihai zathum sawmli panga; 35 Senaa khaw mihai sângthum zaruk sawmthum. 36 Jedaia thlahai (Jesua zungzàma mi) zakuo sawmsari pathum; 37 Imer thlahai sângkhat le sawmnga pahnih; 38 Pasur thlahai sângkhat zahni sawmli pasari; 39 Harim thlahai sângkhat le sawmpasarih. 40 Jesua le Kadmiel thlahai (Hodavia thlahai) sawmsari pali; 41 hla saktu Asaf thlahai za sawmhni pariet; 42 kotkhâr vêngtu Salum, Ater, Talmon, Akub, Hatita le Sobai thlahai za sawmthum pakuo. 43 Tempula thoktuhai thlahai chu: Ziha, Hasufa le Tabaot thlahai; 44 Keros, Siaha le Padon thlahai; 45 Lebanah, Hagaba le Akub thlahai; 46 Hagab, Salmai (Samlai) le Hanan thlahai; 47 Gidel, Gahar le Reaia thlahai; 48 Rezin, Nekoda le Gazam thlahai; 49 Uza, Pasea le Besai thlahai; 50 Asna, Meunim le Nefusim thlahai; 51 Bakbuk, Hakufa le Harhur thlahai; 52 Bazlut, Mehida le Harsha thlahai; 53 Barkos, Sisera le Tema thlahai; 54 Nezia le Hatifa thlahai an nih. 55 Lal Solomon siehlawhai thlahai chu Sotai, Soferet (Hasoferet) le Peruda thlahai; 56 Jaala, Darkon le Gidel thlahai; 57 Sefatia, Hatil, Pokeret-Hazebaim le Ami thlahai an nih. 58 Tempula thoktuhai le Solomon siehlawhai thlaa mi hung kîr po po chu an rêngin mi zathum sawmkuo pahnih an nih. 59 Telmela, Tel-harsa, Kerub, Adan le Imer khuohaia inthoka Jerusalema hung kîr an um bok a, amiruokchu Israel thla mi le sa an ni le ni naw sui thei a ni nawh. 60 Hi pawl hi Delaia, Tobia le Nekoda thlahai an na, an rêngin zaruk sawmnga pahnih an nih. 61 Chun, thiempu chihai laia mi Hobaia, Hakoz le Barzilai thlahai khom Jerusalemah an hung kîr bok a. Hi Barzilai hin Gilead mi Barzilai naunu chu nuhmeiah a nei a, a nuhmei tieng hming a put ta lem a nih. 62 Hieng thiempuhai hin an sûngkuo inthla sawng dàn inchikna lekhabu chu an sukhmang leiin thiempua pom an ni ta naw a. 63 Urim le Thummimb hmanga hieng thila LALPA rawn theitu thiempu an nei hma lem chun hienghai hin inthawina thilhlâna thiempu chanvo an fâk le dawn ding takngiel khom ram optuin a phalpêk ve nawh. 64 Judai rama hung kîr nawk po po chu an rêngin mi sîngli sânghni zathum sawmruk an nih. 65 Chu bâkah siehlaw nuhmei le pasal mi sângsari zathum sawmthum pasari le hla saktu nuhmei le pasal mi zahni an thang sa bok a. 66 Sakor zasari sawmthum paruk, sabengtung lien chi zahni sawmli panga, 67 sanghawngsei zali sawmthum panga le sabengtung chîn chi sângruk zasari sawmhni an nei bok a. 68 Jerusalema LALPA in an hang tlung chun a hmun pangngaia Pathien in chu bawl nawk dingin sûngkuoa lukhàitu thenkhat chun thilpêk an inhlàn a. 69 An tlin ang tawka thawlawma an pêk khawm zât chu rangkachak kilogram zanga, tangkaruo kilogram sânghni zariet le thiempu zakuo zahni a nih. 70 Chuongchun, thiempu hai, Levi-hai, kotkhâr vêngtuhai le tempula rongbawltuhai le vântlâng mipuihai laia thenkhat chu Jerusalem se vela chun an um a, Israel mi danghai po po chu Judai rama anni khuo sengah an inbêngbel nawk ta a.

Ezra 3

1 Mani khuo senga Israelhai an inbêngbel nawk hnungin, thla sarina favâng intan hlim chun inthuruol takin Jerusalemah an pung khawm a. 2 Jozadak naupa Jesua le a thiempu chanpuihai le Sealtiel naupa Zerubabel le a rongbawlpuihai chun Pathien mi Mosie Dàn bua inziek angin pumraw thilhlâna inthawina ding Israelhai Pathien ta dingin maichâm an siem a. 3 An kawl le kienga mihai chu ti hle hai sienkhom, maichâm chu a hmun pangngaiah an indin thar nawk a, zîng tieng le zân tieng pumraw thilhlân an inhlàn a. 4 Chun, Mosie dàn bua inziek angin, Bawkte Kût an hmang a, ni tina pumraw thilhlân inhlàn dinga bituk ang thlapin an inhlàn a. 5 Pumraw thilhlân bàkah thla thar lawmnaa thilhlânhai dâm, LALPA ta dinga kût ni an ruot an inser changa thilhlânhai dâm, mani lung puoka thilhlânhai dâm chu an inhlàn bok a. 6 LALPA Tempul lungphùm chu la phùm tan naw hai sienkhom, thla sarina ni khat nia inthok chun pumraw thilhlânhai chu an inhlàn tan nghal a nih. 7 Persia lal Kura'n phalna a pêk angin, lung sertu le themthiemhai an ruoi a, Tura le Sidon mihai chu Lebanona inthokin Jopa kaiah sidar thing an hung intoltir a, a manah bu le uoiin le hriek an pêk a. 8 Jerusalema Pathien in an tlunga inthoka a kum hnina le thla hninaa chun Sealtiel naupa Zerubabel hai, Jozadak naupa Jesua hai le an unau dang thiempuhai, Levi chia mihai le Jerusalema saltâng hung kîr po po chun tempul bawl chu an tan a, Levi chia mi, kum sawmhni le a chung tienga upa chinhai chu LALPA in bawla sinthawhai inrawitu dingin an ruot a. 9 Chuongchun, Jesua naupahai le a unauhai, Kadmiel le a naupahai, Hodavia thlahai chun LALPA tempula sinthawtuhai chu an inrawi a; Levi chia mi Henedad sûngkuohai chun an thangpui bok a. 10 In bawltuhaiin LALPA tempul lungphum an phûm zo chun, Israel lal Davida-in thaw dàn ding a lo ruot angin, thiempuhai chun thuom an inbel a, tawtawrawt mût dingin an umna ding hmunah an ngîr a, Levi chia mi Asaf thlahai khom LALPA inpâkna hla sak dingin dârbenthek leh an ngîr bok a. 11 Chuongchun lawmthu hrilin, "Ama chu a tha si a, A ngilneina chu kumtluongin, Israelhai chungah a um zing"tiin LALPA chu an inpâk a. LALPA in lungphûm an phûm tàk lei chun lawm taka LALPA inpâkin mipui chu an khèk dur dur a. 12 Nisienkhom thiempuhai, Levihai le sûngkuoa lukhàitu upa tieng, Tempul hmasa hmu phâkhaiin tempul thut an rem lai an hmu chun, mi tam tak hlima an khèk dur dur laiin, inring takin an lo tap ve thung a. Hlima an khèk ri le tap ri thlier hran thei lo khopa nasaa infawk khawm chu hla taka inthok khoma hriet phâk a nih. 13 (A um nawh)

Ezra 4

1 Saltâng hung kîrhaiin LALPA Israel Pathien ta ding Tempul an bawl tan nawk tah ti Judahai le Benjaminhai hmèlmahaiin an lo hriet a. 2 Chuongchun, Zerubabel le an sûngkuo lukhàituhai kuomah an fe a, an kuomah, "Keini khomin bawlpui vêng kan ti cheu, in Pathien biek hi keini khomin kan biek ve a, hi taka mi thuoitu Asuria lal Esar-hadon inlal laia inthok ta khan keini khom a kuomah kan inthawi hlak a nih" an ta. 3 Nisienlakhom, Zerubabel le Jesua le Israel sûngkuo lukhàituhai chun an kuomah, "LALPA kan Pathien ta ding Tempul kan bawlnaa hin in hung thang ve ngai naw nih. Persia lal Kura thupêk angin LALPA, Israel Pathien ta dinga Tempul chu keini ngeiin kan bawlpêk ding a nih" an ta. 4 Chu phing leh an kawl le kienga mihai chun Juda mihai chu suklunghnuol tumin an thang a, Tempul chu bawl lo dingin an inthi a. 5 Persia lal Kura inlal sûng po po le Daria inlal hun chenin anni kal zawngin an thang ru a, anni hêktu dingin hrilpuitu dâm a hranin an ruoi a, an thiltumhai chu sukhlamzui an tum tlat a. 6 Chu hnung chun, Lal Artazerzia inlal tan tir laiin Judai ram le Jerusalema umhai chu an hmèlmahai chun lal kuomah lekhathonin an hêk a. 7 Chu hnung khom chun Persia lal Artazerzia kuomah Bislam hai, Mithredat hai, Tabeel hai le an inkoppuihaiin Judahai an hêkna lekha, Aramik tonga inziek chu an thon a, chu chu Persia tongin lal chu an inletpêk a. 8 Chun, ram optu Rehum le lekha ziektu Simsai khomin Jerusalem mihai ngîrhmun chu Persia lal Artazerzia kuomah ripawt an thon bok a: 9 A thontuhai chu: Ram optu Rehum le a lekhaziektu Simsai le an inkoppui Erek le Babulon le Elam ram Susaa mi rorêltuhai le thoktuhai dâm, 10 mi ropui Asurbanipal (Osnappar)-in sala inthoka a hung insuo, Samaria khawpui le Eufretis vadung thlang tieng rama a'n chêngtirhai dâm chu an nih. 11 Lal Artazerzia kuomah hieng ang hin lekha an thon a: "Lal tak Artazerzia, i siehlaw Eufretis vadung thlang tienga mihaiin chibai kan bûk che. 12 I kuoma inthoka Juda mi hung tunghai kha Jerusalemah an hung a, hi khawpui suol tak le hel hmang hi indin thain, a lungphumhai an phûm tha ti lalin lo hre raw se. 13 Chu bâkah, hi khuo hi indin tha a, a kulhai siem zo a ni pha chun sie le leiman le an thil nei man hrim hrim chawi nuom ta naw ni hai a, lalin sum a chàn pha ding a nih ti lo hre bok raw se. 14 Lal chunga mawphurna latu kan ni leiin sukhmèlhema lal a um hmu hi keini ta dingin a fel naw leiin hi thu hi lal kuomah kan hung intlun a nih. 15 Chuleiin, hi khuo hi hel hmang khuo a nizie dâm, a ram le lal ta dinga buoina siemtu a ni hlakzie dâm le tiena tlânga inthoka hel zing zing a nizie dâm lalin a hriet theina dingin thil hlui siekhawmnaa a pi le puhai chanchin inziekna buhai chu indaptir raw se. Chuong thil leia hi khawpui hi suksiet a lo nih. 16 Hi khawpui hi indin that a ni a, a kulhai zo fel a ni pha chun Eufretis vadung thlang tieng hin lalin chan nei naw phàng i tih ti lal kan hung inhriettir a nih" tiin. 17 Lal chun donna a hung thon a: "Ram optu Rehum, lekha ziektu Simsai le an inthloppui, Samaria ram le Eufretis vadung thlang tienga umhai po po chibai ka bûk cheu. 18 In lekha hung thon kha ka hmaah fie takin an inlet a 19 Chuongchun, thu ka pêk a, an zong a, hi khuoa mihai hi tiena tlânga inthokin lal chungah an hel hlakzie dâm, chu taka chun buoina le helna a tlung hlakzie dâm kan hmu suok ta a. 20 Jerusalema khan lal thilthawthei tak, Eufretis vadung thlang tieng po poa rorêltu dâm an lo um ta hlak a, an kuomah sie chawiin, thilpêk hrang hrang an lo pêk ta hlak a. 21 Khang mihai khan thu ka pêk nawk hma khat chu khawpui siem that sin kha chawlsan phot dingin thupêk lo insuo ro. 22 Hi thil hi ngàitha hrim hrim naw ro. Lal ta dinga sietna ding thil hi ieng leiin am a zuolkai pei ei phal ding a na?" tiin. 23 Rehum le lekha ziektu Simsai le an inkoppuihaiin lal Artazerzia lekhathon an tiem zo chun inhmaw takin Jerusalema Judahai kuomah an fe nghal a, thawluinain an thilthaw lai chu an inchawltir a. 24 Chuongchun, Jerusalema Pathien in indin thar sin chu Persia lal Daria hung inlal kum hnina chenin an chawlsan ta hri a.

Ezra 5

1 Chuong lai chun zawlnei Hagai le Ido thlaa mi zawlnei Zekaria hai chun Judai ram le Jerusalema Juda umhai kuomah Israelhai Pathien hmingin thu an hril hlak a. 2 Sealtiel naupa Zerubabel le Jozadak (Jehozadak) naupa Jesua hai chun an thu chu zawmin, Jerusalema Pathien Tempul bawl chu an sunzom nawk ta a, an kuoma Pathien zawlnei pahni umhai chun an thangpui a. 3 Chu phing leh Eufretis thlang tieng ram optu Tatenai le Sethar-Bozenai le a thawpuihai chu Jerusalemah an hung a, "Hi tempul hi bawl tha ding le a kulhai indin thar nawk dingin tuin am thu a pêk cheu a?" an ta. 4 Chun, anni bok chun, "Hi in bawltuhai hi tuhai am an na?" tiin an indon bok a. 5 Sienkhom an Pathienin Juda upahai chu a vêng tlat leiin, lal Daria kuoma an chungthu an intlun sûng le a donna an hmu hma khat chu an in bawl chu an inchawltir chuong nawh. 6 Eufretis vadung râl thlang tieng ram optu Tatenai le Sethar-Bozenai le an sinthawpuihai chun Lal Daria kuomah lekha an thon a, 7 hieng ang hin an ripawt a: "Lal Daria, i chungah thlamuongna um raw se. 8 Judai ram biela Pathien ropui Tempul an bawlna hmun kan sir thu i kuomah kan hung ripawt a nih. Mawi taka lung ser nama bawl a na, a bang chunga chun thing nawt nam an khang a. Taima taka anni ngei inrawina hnuoia anni kut ngeia an bawl a na, hma khom a sawn hrât hle. 9 " 'Hi tempul hi bawl ding le a kulhai indin thar dingin tuin am thu a pêk cheu a na?' tiin an upahai kan indon a. 10 An hotuhai hming inchika i kuoma kan hung ripawt theina dingin an hminghai khom kan indon bok a. 11 Hi hi an mi donna chu a nih: 'Keini hi hnuoi le vân Pathien siehlawhai kan ni a, Israel lal ropui takin kum tam tak liem taa a lo bawl zo tah kha kan indin thar nawk el a nih. 12 Kan pi le puhaiin vâna Pathien an suklungsen leiin anni chu Kaldai mi Babulon lal Nebukadnezzar kutah a pêk a, ama chun hi tempul hi a suksiet a, mihai chu Babulon tieng salah a thuoi a. 13 Amiruokchu, Babulon lal Kura hung inlal tan kum chun Pathien in hi bawl tha nawk dingin Lal Kura chun thu a pêk a. 14 Nebukadnezzarin Jerusalema an Pathien ina inthoka rangkachak le tangkaruoa siem bûr le bèl a lâkhai, Babulona ama tempula a siehai chu lal Kura chun a lâk suok vong a. Chun, lal Kura chun mi pakhat a hming Sesbazar chu keini mi optu dingin a mi pêk a, a kuomah, 15 'Hieng bûr le bèlhai hi la lá, fe la, Jerusalema Tempulah sie la, Tempul chu a hmun ngaiah bawl nawk ni raw se' tiin. 16 "Chuongchun, Sesbazar chu a hung a, Jerusalema Pathien in lungphûm khom a hung phûm a. Chu nia inthoka voisun ni chen hin bawl zom a la ni zing a, sienkhom bawl zo a la ni nawh. 17 Chuleiin, lalin tha a ti zawng a ni chun Babulon lal ina thil hlui sie khawmnaah lal Kura'n Jerusalema Pathien in indin thar nawk dinga thupêk a lo insuo chu zong suok ni raw se. Chu hnungah hi chungthua thu tlûkna chu lalin mi hung hril raw se" tiin.

Ezra 6

1 Lal Daria chun Babulona ro hlu le thil hlui an sie khawmna in chu dap dingin thu a pêk a. 2 Media biela Ektabana kulbing sânga chun lekhabu ziel an hmu suok a, chu taka chun hieng hin a'n ziek a: 3 "Thufùn: Lal Kura inlal tan kuma Jerusalema Pathien Tempul chungchânga lal thupèk insuo chu: Judahaiin inthawina an inhlànna hlak hmuna bok Tempul chu bawl nawk ni sien la, a thut lungphûm khom a pangngai charah phûm nawk ni raw se. A in insângzie chu meter sawmhni le pasari nîng a ta, a khang chu meter sawmhni le pasari bok nîng a tih. 4 Lung chei thuo thum inkârthlâk peiah thingphêk rem pei ding a na, a bawlnaa sèngso chu lal sum ina inthoka pèk ding a nih. 5 Jerusalem Tempul, Pathien ina mi rangkachak le tangkaruoa siem bûr le bèlhai, Nebukadnezzarin Babulona a hawn po pohai chu a umna hmunah thak kîr nawk vong a, Pathien ina hlû lût nawk ding a nih" tiin. 6 Chuongchun, lal Daria chun hieng ang hin thu a thon a: "Eufretis vadung thlang tieng optu Tatenai le Sethar-Bozenai le nangni a biela thoktuhai, lo inthier fihlim ro. 7 Hi Pathien in an bawl nawknaa hin lo inrol naw ro. Judahai optu le Juda upahaiin Pathien in hi a hmun pangngaiah bawl tha nawk raw hai se. 8 Chun, hi thu hi ka pêk cheu: Juda upahaiin Pathien Tempul an bawl nawknaa hin lo thangpui unla, an sin a chai nawna dingin hieng mihai sèngso po po hi in biel sûng, Eufretis vadung thlang tienga sie le leiman in khon, lal sum ina inthoka pêk nghal vat pei ding a nih. 9 Vân Pathien kuoma pumraw thilhlâna hmang ding an mamaw taphot bawngchal tuoi hai, beramchal hai, beramte hai, bu le bâl hai, machi hai, uoiin hai le hriek hai chu, Jerusalema thiempuhaiin an hung hni ang peiin in lo pêk ngei ngei ding a nih. 10 Chuonga in thaw chun vân Pathien lawm zawng inthawina chu inhlàn thei an ta, lal le a naupahai dâm sawtna dingin tongtai thei bok an tih. 11 "Tu khom hi thupêk lo thlâk danglamtu chu a in chung insun pot dok unla, a hmor inzum unla, chu chun ama chu thil tlang unla, a in chu ek dûrah inchangtir ro. 12 Hi ka thupêk thlâk danglamtu amanih le Jerusalema Tempul sukse dinga kut lektu hnam le lalhai chu ama hming chêngna dinga hi hmun thlangtu Pathien chun sukbohmang vong raw se. Kei Daria hin in zawm thlap dingin hieng thupêkhai hi ka pêk a nih" tiin. 13 Lal Daria thupêk chu hlen suok dingin Eufretis vadung thlang tieng ram optu Tatenai le Sethar-Bozenai le a thawpuihai chun taima takin thang an lâk a. 14 Chuongchun, Juda upahai chun Tempul bawl chu an sunzom pei a, zawlnei Hagai le Iddo naupa zawlnei Zekaria hai thu hril chun nasa takin a sukphûr tawl a. Israelhai Pathien thupêk ang le Persia lal Kura le Daria le Artazerzia hai thupêk ang chun an bawl a, Tempul chu bawl zo a ni ta a. 15 Lal Daria inlala inthoka kum rukna, Adar thla ni thumahc Tempul chu an bawl zo vong hman a nih. 16 Chuongchun, Israel mipui hai, thiempu hai, Levi hai le mi dang saltâng hung kîrhai po po chun Pathien Tempul inhlànna chu hlim takin an hmang a. 17 Pathien Tempul an inhlàn ni chun bawngchal tuoi zakhat, beramchal zahni le beramte zali an inhlàn a. Israel hnam sawm le hnam hnihai suol thawina dingin kèlchal sawm le pahni an inhlàn bok a. 18 Mosie dân bua ziek angin, thiempuhai le Levi chihai chu Pathien Tempula an sin ding seng an siem felpèk a. 19 Chuongchun, thla khatna, ni sawm le ni linaahd saltâng hung kîrhai chun fekân kût an hmang a. 20 Thiempuhai le Levi chihai chun an rêngin inthienna an nei a, an hung inthieng ta a. Levihai chun saltâng hung kîrhai po po ta ding le thiempu danghai le anni ta dingin fekàn kût beramte chu an that a. 21 Israel thla, saltâng hung kìr nawkhai le hnam dang umhai, an thil chìng tirdakum laka inthier fihlima LALPA, Israelhai Pathien pomtuhai leh fekân ruoi chu an kil tlâng a. 22 LALPAN Asuria lale lungril chu anni tieng a'n thlêktir a, Pathien, Israelhai Pathien in an bawlnaah nasa takin a thangpui a. Chuonga LALPAN lawmnaa a sung sip tawl lei chun chol thang lo bei kût chu hlim takin ni sari sûng an hmang a.

Ezra 7

1 Kum tam tak hnung, Persia lal Artazerzia inlal laiin mi pakhat a hming Ezra a um a. Ama chu Seraia naupa a na, ama chu Azaria naupa a na, ama chu Hilkia naupa a na, 2 ama chu Salum naupa a na, ama chu Zadok naupa a na, ama chu Ahitub naupa a na, 3 ama chu Amaria naupa a na, ama chu Azaria naupa a na, ama chu Meraiot naupa a na, 4 ama chu Zerahia naupa a na, ama chu Uzi naupa a na, ama chu Buki naupa a na, 5 ama chu Abisua naupa a na, ama chu Finehas naupa a na, ama chu Eleazar naupa a na, ama chu thiempu lal Aron naupa a nih. 6 Hi Ezra hi lekha ziektu a na, LALPA, Israelhai Pathienin Mosie hmanga Israel mipuihai kuoma a pêk dânhai chu hre tak el a nih. Babulona inthokin Jerusalemah a hung a, LALPA a Pathienin a ditsak leiin lal chun a hni po po chu a pêk pei a. 7 Lal Artazerzia inlala inthoka kum sarinaah Israel mi iemani zât chu thiempu hai, Levi chia mi hai, hla saktu hai, kotkhâr vêngtu hai le tempula thoktu thenkhathai chu thuoiin Jerusalemah a hang fe a. 8 Chu kum thla khatna ni, Artazerzia inlala inthoka kum sarinaa chun Jerusalem a hang tlung a. 9 Babulona inthokin thla khatna ni khat niin a suok a, Pathienin ama chu a vêng pei a, thla ngana ni khat ni chun Jerusalem a tlung a. 10 Ezra chu LALPA Dàn inchûk le zawm tum tlat mi, a dânhai le thupêkhai chu Israelhai inchûktir dinga inpe zo mi a nih. 11 Chun, hi hi lal Artazerzia-in thiempu Ezra, lekha ziektu, Israelhai ta dinga LALPA thupêkhai le thuruothai hrietna tienga mi thiem kuoma lekha a thon chu a nih: 12 ​Lalhai lal Artazerzia-in thiempu Ezra, vân Pathien Dânhai zirtirtu chu chibai ka bûk. 13 "Tu hin ka ram sûnga Israel mi po po le thiempuhai le Levihai tu khom a nuom taphot chu nangma le fe thei dingin thu ka pêk. 14 I kuta i kol, in Pathien Dânhai chungthua Judai ram le Jerusalem ngîrhmun chu hang thlithlai dingin lal le a khawnbawl pasarihaiin kan tir che a nih. 15 Kei le ka khawnbawlhaiin mani lung puoka phal taka Israelhai Pathien, Jerusalema Tempul neitu ta dinga thilpêk an inhlàn tangkaruo le rangkachakhai hi chawi la, 16 Babulon rama inthoka i hmu thei zât taphot tangkaruo le rangkachakhai le mipuihai le thiempuhaiin Jerusalema an Pathien ta dinga mani lung puoka an inhlân thilpêk po po khom chu chawi bok rawh. 17 Hi sum hin bawngchal dâm, beramchal dâm, beramte dâm le fâk le dawn thilhlân dinghai chu inchaw nghal i ta, Jerusalema in Pathien Tempula maichâma chun i hang inhlàn ding a nih. 18 "Chun, tangkaruo le rangkachak hmang bânghai chu in Pathien dit zawng nia in hriet dân ang angin nang le i unau Judahaiin hmang ro. 19 In Pathien Tempula rongbawlnaa hmang ding bûr le bêlhai ruok kha chu a kimin Jerusalema in Pathien Tempula chun inhlàn rawh. 20 In Pathien Tempula dinga mamaw le chuong ang thila dinga sum in tûl zât zàt chu lal sum ina inthokin lo hmang pei rawh. 21 "Tu hin kei, lal Artazerzia ngeiin Eufretis vadung thlang tieng biela lal sumkoltu po po kuomah thiempu le vân Pathien dânhai zirtirtu Ezra-in a hni taphot chu lo pe pei dingin thu ka pêk a nih. 22 An pèk thei zât ding chu tangkaruo kilogram sângthum zali, huit kilogram sîngkhat, uoiin litar sânghni, hriek litar sânghni le machi chu tiem chin nei lo nîng a tih. 23 Vân Pathienin thaw dinga a ti taphot chu vân Pathien Tempula dingin thaw ngei ro. Ieng leiin am Pathien lungsenna chu lal le a naupahai ram chunga hin a tla ding a na? 24 Chun, thiempu hai, Levi hai, hla saktu hai, kotkhâr vêngtu hai le tempula rongbawltu hai le Pathien ina sinthawtu hrim hrim hai chu sie amanih, an thil nei man amanih le leiman ieng khom in inchawitir ding a ni nawh ti ka'n hriettir bok cheu. 25 "Chun, nang Ezra, Pathienin varna a pêk che kha hmangin, Eufretis vadung thlang tieng biela mipuihai chunga indik taka roreltu dingin in Pathien dàn hre mi hotu le rorêltu dinghai chu ruot la, a hre nawhai chu inchûktir rawh. 26 Tu khom in Pathien dàn le lal dàn zawm naw taphot chu sukhlum amanih, a rama inthoka hnot suok amanih, a thil neihai lâkpêk amanih le lung ina intângtir amanih a ni nghal ngei ngei ding a nih" tiin. 27 Hieng anga Jerusalema LALPA Tempul chawimawi nuomna lal lungrila inneitirtu LALPA, ei pi le puhai Pathien chu inpâkin um raw se. 28 Ama chun lal le a khawnbawlhai le a hnuoia thuneituhai po po hmaah a hmangaina chuoi ngai lo chu ka chungah inlangtirin a mi chawimawi a. LALPA ka Pathien zangàina kut chu ka chungah a um leiin a mi sukhuoi a, Israelhai laia lukhàitu deu deuhai chu ka ruola Jerusalem tienga kîr tung ve dingin ka hawr khawm thei tah a nih.

Ezra 8

1 Hieng hi Artazerzia inlal laia Babulona inthoka keima ruola hung sûngkuo lukhàituhai le an sûngkuo inziek dàn chu a nih: 2 Finehas thlaa mi Gersom; Ithamar thlaa mi Daniel; Davida thlahaia inthokin Hatus; 3 Sekania thlahai; Paros thlaa mi Zekaria le a hungpui pasal za le sawmnga; 4 Pahat-Moab thlaa mi Zerahia naupa Eliehoenai le a hungpui pasal zahni; 5 Zatu thlaa mi Jahaziel naupa Sekania le a hungpui pasal zathum; 6 Adin thlaa mi Jonathan naupa Ebed le a hungpui pasal sawmnga; 7 Elam thlaa mi Athalia naupa Jesaia le a hungpui pasal sawmsari; 8 Sefatia thlaa mi Mikael naupa Zebadia le a hungpui pasal sawmriet; 9 Joab thlaa mi Jehiel naupa Obadia le a hungpui pasal zahni le sawmpariet; 10 Bani thlaa mi Josifia naupa Selomit le a hungpui pasal za le sawmruk; 11 Bebai thlaa mi, Bebai naupa Zekaria le a hungpui pasal sawmhni le pariet; 12 Azgad thlaa mi Hakatan naupa Johanan le a hungpui pasal za le sawm; 13 Adonikam thlaa mi, a nuhnung tak Elifelet hai, Jeuel hai le Semaia hai le an hungpui pasal sawmruk; 14 Bigvai thlaa mi Uthai le Zakur le an hungpui pasal sawmsari an nih. 15 Chuonghai po chu Ahava khaw kawla tuilamah ka ko khawm a, chu hmuna chun ni thum kan riek a. Mipui le thiempu hunghai hming ziekna ka hang en chun Levi chia mi hrim hrim tu khom ka hmu naw a. 16 Chuleiin, anni laia lukhàitu Eliezar, Ariel, Semaia, Elnathan, Jarib, Elanathan, Nathan, Zekaria le Mesulam hai chu ka ko a, an mi thiem Joiarib le Elnathan hai khom ka ko sa bok a. 17 Anni chu Kasifiaa Levihai thuoitu Ido kuomah fe a, Jerusalema Pathien tempula rongbawltu ding a unauhai le an tempula thoktu laia mihai chu hung tir ve dinga hni dingin ka tir tawl a; ei Pathien ina thoktu ding mi an hung tir ve theina dinga Ido le a unauhai le Kasifia tempula thoktuhai kuoma an tong dàn ding chenin ka hril vong a. 18 Ei Pathien lunginsietna kut chu kan chungah a um leiin, mi pakhat a hming Serebia le a naupahai le unauhai mi sawm le pariet an hung tir a. Ama hi pa thei tak el, Mahli thlaa mi, Israel naupa Levi chia mi a nih. 19 Chun, Hasabia le Merari thlaa mi Jesai chu a unauhai le naupahai sawmhni leh an hung tir bok a. 20 Chu bâkah tempula thoktu mi zahni le sawmhni an thang sa a. Hieng tempula thoktuhai hi Levihai thangpuitu dinga Davida le a thoktuhaiin an lo ruot tahai kha an na, an rênga hming ziek lût vong a nih. 21 Ahava khaw kawla tuilam kama chun kan inzin sûng Pathienin keini le kan naupanghai mi thuoi a, kan thuomhnawhai mi vêngpêk a, him taka kan inzin theina dingin a hmaah kan inphahnuoi a, bu ngheiin kan tongtai a. 22 Lal kuomah, "Kan Pathien chun ama chawibiektu chu a hum hlak a, ama phatsantu chunga ruok chu a lungsenna a chok hlak" tia kan lo hril tah hlak si leiin, lampuia râl laka mi vêngtu ding sakor chungchuong sipaihai tir dinga hang hni chu inzakum ka ti ta bok si a. 23 Chu lei chun a nih bu ngheia Pathien kuoma mi hum dinga nasa taka kan tongtai chuh; kan hnina chu a mi hung don tah hrim a. 24 Chuongchun, hotu ding thiempu mi sawm le pahnih ka ruot hrang a, chuonghai chu Serebia le Hasabia le an unauhai sawm an nih. 25 Lal le a khawnbawlhai le mi lienhai le Israel mipuihaiin Pathien Tempul bawlna dinga tangkaruo hai, rangkachak hai le bûr le bèl hai an hung thaw khawm po po chu ka bûk a, an kutah ka'n hlàn a. 26 Ka bûk le an kuta ka'n hlân sawng zât po chu tangkaruo kilogram sînghni le sânghni; tangkaruo bûr le bèl zakhat, kilogram sawmsaria rik; rangkachak kilogram sângthum le zalia rik; 27 rangkachak thlêngkûm sawmhni, kilogram riet le a chenve vela rik; rangkachak tluka hlu, dâr bêl tle mawi taka siem pahnih a nih. 28 Chun, thiempuhai kuomah, "Nangni le hieng rosumhai hi LALPA ta dinga inhlàn thienghlim in ni ta a; tangkaruo le rangkachakhai hi LALPA, in pi le puhai Pathien ta dinga mihaiin mani lung puoka an hung inhlân vong a nih. 29 Jerusalema LALPA tempula hlù lût dinga thiempu lal hai, Levi chi hai le Israel upahai kuta a hlekte khom inhmang loa in inhlân hma po chu hieng rosumhai hi tha takin vêng ro" tiin ka hril a. 30 Chuongchun, thiempuhai le Levi chia mihai chun chuong rosumhai chu Jerusalema Pathien Tempula chawi dingin an lâk ta a. 31 Ahava tuilama inthokin Jerusalem panin thla khatna ni sawm le pahniah kan inthok suok a, Pathien lunginsietna kut chun a mi vêng a, hmèlmahai le lampuia suomhmanghai lakah a mi humhim a. 32 Chuong ang chun Jerusalem kan tlung a, ni thum sûng chu kan chawl hadam a. 33 Kan tlunga inthoka ni linaa chun tangkaruo hai, rangkachak hai, bûr le bèl hai chu Pathien inah kan bûk a, thiempu Uria naupa Meremot kutah kan inhlàn a; chu taka chun Finehas naupa thiempu Eleazar le Levi chia mi Jesua naupa Jozabad le Binui naupa Noadia hai khom an um a. 34 Iengkim kan tiem a, an bûk vong a, an bûk zàt chu ziekin an inchik thlap a. 35 Chu zoa chun saltâng hung kìr po po chun Israel Pathien hmaah pumraw thilhlân an inhlàn a. Israel hnam hming kipa dingin bawngchal sawm le pahnih, beramchal sawmkuo le paruk le beramte sawmsari le pasarih an inhlàn a. Suol inthawina dingin kèlchal sawm le pahnih an inhlân bok a. Hienghai po po hi LALPA kuoma pumraw thilhlân vong a nih. 36 Chun, lal thusuokhai chu Eufretis vadung thlang tieng biela ram optu le a rawihai kuoma chun an inentir a, anni chun thlopin, Tempul bawlna le Pathien chawibieknaah mipuihai chu an thangpui pei a.

Ezra 9

1 Chuong thil po po zoa chun an thuoituhai chu ka kuomah an hung a, " Israel mi tam tak chu, thiempuhai le Levihai chenin, hi rama chênghai laka hin an inthier fihlim chuong naw a, Kanan mi hai, Hit mi hai, Periz mi hai, Jebu mi hai, Amon mi hai, Moab mi hai, Aigupta mi hai le Amor mihai thil chìng tirdakum tak chu an thaw ve a. 2 Anni ngei le an nauhaiin hnam danghai chu nuhmeiah an nei a, ei chi thienghlim tak chu hi rama mihai chi leh an chok pol a, mi lien le mi lalhai chu hi bawsietna thila hin a zuolkai tak an nih" tiin an mi hung hril a. 3 Chu thu chu ka hriet phing leh ka silfênhai ka pot thlêr a, ka sam le ka khâkhmul ka vaw kol a, hrilhai takin ka thung tlok tlok a. 4 Saltâng hung kîr laia mi, LALPA Israel Pathien thu hrea ti le poisa taphot chu ka kuomah an hung tlân khawm a, zân tieng inthawi hun chenin a ngaina tak hre loin ka thung tlok tlok a. 5 Zân tieng inthawi huna chun thuomhnaw inek neng nunga lungngai taka inthung lai chu ka tho a, dingthathuona bân pharin LALPA ka Pathien kuomah ka tongtai a, 6 "Aw ka Pathien, ka hmai a va hang mawk tawpkhawk ngei de aw! Nangma tieng ka hung ngha ringot khom hi inzakum ka ti a nih. Aw Pathien, kan bawsietnahai chun a mi chìm pil a, kan thiem nawna chun vân a tong a nih. 7 Kan pi le puhaia inthok tah khan tu chen khom hin nasa takin kan suol a, kan suol lei tak chun kan lalhai le thiempuhai khom ram dang lalhai kawlhnàma that le sala thuoiin an um a, an rok a, an sukmuolpho a, voisun chena kan um dàn ang hin. 8 "Tu hin hun tawite sung chu zàngàina mi pein, LALPA kan Pathienin mi a tlawma zawng dama i mi la hlahai chu i Hmun Thienghlima hin i mi'n umtir a, kan mitmeng i sukhar a, kan saltângnaa inthokin i mi sawk zâng a. 9 Sala kan intâng lai khomin kan LALPA chun i mi thlathlam ngai naw a, Persia lal lunginsiet i mi'n hlawtir a. LALPA in chu indin thar nawk ding le a sietnahai siem tha dingin hringna thar i mi pêk a, Judai ram le Jerusalemah himna bangin i mi'n huol a. 10 " Tu hin aw kan Pathien, ieng am hril tâng kan ta le? I thupêkhai chu kan lo nghatsan ta si a. 11 I siehlaw zawlneihai hmanga, 'In va fena ding, in va hluo ding hmun chu a ram mihai suolnain a sukporche ta a, thil tirdakum an chîng chun a ram kil le kap a sukporche a. 12 Chuleiin, in naunuhai chu an naupahai nuhmei dingin inneitir naw unla, in naupahai khom an naunuhai pasalah inneitir bok naw ro. In hrât zing a, a ram tharsuok thahai tlàn a, a ram chu in thlahai kuoma kumkhuoa in inrochungtir theina dingin, ieng lai khomin anni chu inruol thatna thu thlungpui ngai naw ro' tia thu i lo pêk tah kha a ni si a. 13 "Kan chunga thil hung tlunghai hi kan thil suol thaw lei le kan thiem nawna nasa tak lei vong a nih. Chuong sa khom chun kan Pathien, kan suol ang phua mi hrem loin hieng zât hi damin i mi la hla ta rop a ni hi! 14 Hieng hi hre zing siin i thupêkhai bawse nawkin, thil tirdakum thawtuhai leh kan innei pol pei ding am a ni? A dam khawsuok um lo le hlà hrim nei loa mi sukram vong hiel khopin kan chungah i lung a sen naw dim a ni? 15 Aw LALPA, Israelhai Pathien, nang chu i fel a, voisun chen hin dama hlà sun chu i mi la nei a ni hi. Kan bawsietna leia i hmaa ngîr thei hrim hrim um naw inlang khom, kan thiem nawna pumin i hmaah kan hung a nih" ka ti a.

Ezra 10

1 Chuonga Pathien tempul tuolah bokkhup a, tap puma thupha chawi a, Ezra a tongtai lai chun Israel mipui tam tak, pasal le nuhmei le naupanghai chu a kuomah an hung pung khawm a, nasa takin an tap ve a. 2 Elam thlaa mi Jehiel naupa Sekania chun Ezra kuomah, "Hi rama hnam dang minuhai hi nuhmeiah kan lo nei leiin ei Pathien chungah thil suol kan lo thaw takzet a nih ti kan inpuong a. Amiruokchu, Israelhai lai ei la'n siem tha thei tho annawm. 3 Thaw ro, hnam dang mi nuhmeia ei neihai le an laka pieng po pohai chu the dingin Pathien kuomah thu thlung thar nawk ei tiu. I thurawn le ei Pathien thupêk inzatuhai thu angin thawng ei ta, Pathien dàn chu zawm ei tiu. 4 Tho raw khai, hi thil siem that dàn ding mi kawkhmu chu i mawphurna a nih. Huoi takin um la, thaw rawh, nangma tieng thang tlat kan tih" a ta. 5 Chu phing leh Ezra chu a tho a, thiempuhai le Levihai laia an hotu un deu deuhai le Israel mipui po po chu Sekania hril anga thaw dingin intiemkamna a'n neitir a. 6 Chu zoah Ezra chu LALPA Tempul tuola inthok chun a suok a, Eliasib naupa Jehohanan pindanah a fe a, chu taka a um sûng chun saltâng suokhai suolna leia lungngaiin ieng khom fain a dawn nawh. 7 Chuongchun, Judai ram po po le Jerusalema saltâng hung kìrhai po po chu Jerusalema hung inkhawm dingin a'n cha a, 8 tu khom ni thum sûnga hung inlang ve lo chu, mi lienhai le upahai thu rêl angin, a thil nei po po hrènpêk a, ama chu saltâng hung kîrhai laia inthoka hnot suok ding a ni thu chu a puong a. 9 Chuongchun, Juda le Benjamin thlahai rama um po po chu ni thum sûngin Jerusalemah an fe khawm ta vong a. Thla kuona ni sawmhninaaf chun an inkhawm a, mipui po po chu Pathien Tempul tuolzawla chun an thung khup a, an thu chai ding rik lei le ruo a sûr bok leiin an inthin hlop hlop a. 10 Thiempu Ezra chu a hung ngîr suok a, an kuomah, "Thil suol in lo thaw ta a, hnam dang minuhai chu nuhmeiah in nei a. Kha hma nêk hmana nasa nawkzuola thiemnaw chang ei lo ni tah. 11 LALPA, in pi le puhai Pathien hmaa chun in suolhai inpuong unla, a dit zawng angin thaw ta ro. A ram mihai le hieng hnam dang minuhai laka hin inthier fihlim ro" a ta. 12 Mipui po po chun rawl inring takin, "I hril indik ie! I ti ang tak chun thawng kan tih. 13 Amiruokchu hi taka ngîr mipuihai lai hin hnam dang nuhmeia nei tam tak kan um a, hi thil hi ni khat ni hni sûnga ching fel el thei ding a ni nawh. Tu hi raw sûr hun a ni bok si a, tuola hin sawt tak ngîr zing ngaina a um nawh. 14 Kan hotuhai hin keini aiawin thaw lem raw hai se. Hi chungthua eini laka ei Pathien lungsenna nasa tak chu a'n kieng theina dingin, hnam dang mi nuhmeia neihai po chu an khuo chita hotu le rorêltuhai leh hun ruotah hung inlang lem raw hai se" an ta. 15 Asahel naupa Jonathan le Tikva naupa Jahzeia hai chun chu rotna chu an kal a, Levi chia mi Mesulam le Sabethai hai khomin an remti nawh. 16 Chuongchun, saltâng hung kîrhai chun an rot dàn ang chun an thaw a, Ezra chun sûngkuo tin aiawtu ding hming suot meuin a thlang suok a, an chungchang ngaituo dinga hotu ruothai chun thla sawmna ni khatg ni chun an thok tan a. 17 A kum nawk thla khatna ni khatnah ni chun hnam dang mi nuhmeia neihai chungchang chu an sût fel hman a. 18 Hienghai hi thiempuhai laia hnam dang minu nuhmeia neihai chu an nih: Jehozadak naupa Jesua le a unauhai sûngkuoa inthokin Maaseia, Eliezer, Jarib le Gedalia an nih. 19 An nuhmeihai ma dingin thu an intiem a, an thiem nawna leiin beramchal pakhatin an inthawi seng a. 20 Chun, Imer sûngkuoa inthokin Hanani le Eliezer le Zebadia; 21 Harim sûngkuoa inthokin Maaseia, Elija, Semaia, Jehiel le Uzia; 22 Pasur sûngkuoa inthokin Elionai, Maaseia, Ismael, Nethanel, Jozabad le Elasa an nih. 23 Levi thlaa mi thiem naw changhai chu: Jozabad, Simei, Kelaia (Kelita tia an ko bok), Pathahia, Juda le Eliezer an nih. 24 Hla saktu thiem naw chang chu Eliashib a nih. Kotkhâr vêngtu laia thiem naw changhai chu Salum, Telem le Uri an nih. 25 Israel mi danghai laia thiem naw changhai chu: Paros sûngkuoa inthokin Ramia, Izia, Malkija, Mijamin, Eleazar le Benaia; 26 Elam sûngkuoa inthokin Matania, Zekaria, Jehiel, Abdi, Jeremot le Elija; 27 Zatu sûngkuoa inthokin Elioenei, Eliashib, Matania, Jeremot, Zabad le Aziza; 28 Bebai sûngkuoa inthokin Jehohanan, Hanania, Zabai le Athlai; 29 Bani sûngkuoa inthokin Mesulam, Maluk, Adaia, Jasub, Seal le Jeremot; 30 Pahat-moab sûngkuoa inthokin Adna, Kelal, Benaia, Maaseia, Matania, Bezalal, Binui le Manase; 31 Harim sûngkuoa inthokin Eliezar, Isija, Malkija, Semaia, Simeon, 32 Benjamin, Maluk le Semaria; 33 Hasum sûngkuoa inthokin Matenai, Matata, Zabad, Elifelet, Jeremai, Manase le Simei; 34 Bani sûngkuoa inthokin Maadai, Amram, Uel, 35 Benaia, Bedeia, Keluhi, 36 Vania, Meremot, Eliasib, 37 Matania, Matenai le Jaasu; 38 Binui sûngkuoa inthokin Simei, 39 Selemia, Nathan, Adaia, 40 Maknadebai, Sasai, Sarai; 41 Azarel, Selemia, Semaria, 42 Salum, Amaria le Josefa; 43 Nebo sûngkuoa inthokin Jeiel, Matithia, Zabad, Zebina, Jadai, Joel le Benaia an nih. 44 Hienghai po hi hnam dang minu nuhmeia neihai chu an na, a thenin anni lakah nau an nei bok.

Nehemiah 1

1 Hienghai hi Hakalia naupa Nehemia thuziek a nih:Lal Artazerzia inlala inthoka kum sawmhnina Kislev thlaaa chun lal khawpui Susa kula chun ka um a. 2 Judai rama inthoka hung kìr ka unauhai laia mi pakhat Hanani le mi thenkhatin an mi hung sir a. Jerusalem chanchin le Babulona saltâng, Juda unau kîr nawk hai chanchin dâm ka'n don a. 3 Anni chun, "Saltângnaa inthoka dam khawsuok, Judai rama kîr nawkhai ngîrhmun chu a se khop el. Buoina le inzakna namen lo an tuok a. Jerusalem kul chu a chim se vong ta a, a kotkhârhai khom a kâng siet vong tah" an ta. 4 Chuong ang thu ka hriet char chun ka thung a, ka tap a. Ni iemani zât bu ngheiin ka sûn a, vân Pathien hmaah ka tongtai a. 5 "Aw LALPA, vân Pathien, Pathien ropui le râpum, nangma hmangaia i thupêk zawmtuhai chunga i hmangaina thuthlung vong zing hlaktu, 6 ka tongtaina hi mi lo ngàithlapêk lul rawh. I mi Israelhai ta dinga sùn le zàna i kuoma i siehlaw ka hung tongtai hi mi zuk thlîr la, mi hung en hram rawh khai. I lakah nasa takin kan lo suol ta a, a nih, keima sûngkuo ngei khomin thil suol kan thaw ta a, thupha ka hung chawi a nih. 7 I lakah rilo takin kan lo khawsa a, i siehlaw Mosie hmanga i hril i thupêk hai, thusuok hai le dàn hai chu kan lo nghatsan ta si a. 8 "I siehlaw Mosie kuoma, 'Ka lakah in ringum naw chun hnam tin lai thè dar ka ti cheu a, 9 sienkhom in hung inlamlèt a, ka thupêkhai in zawm chun, kawl kil tawp chena hnot dara umhai khom ka hming chêngna dinga ka thlang hmuna chun thuoi khawm nawk vong ka ti cheu' tia i lo hril kha lunginsiet takin hre zing rawh. 10 Hienghai hi i mi le sa, thilthawtheina ropui tak le kut hrât taka i'n tlan suokhai kha an ni si a. 11 Aw LALPA, lunginsiet takin i siehlaw ka hung tongtaina le i hming inzaa hlimpuitu, i siehlawhai tongtaina hi lo ngàithla hràm rawh. Voisun là lá hin ditsakna ngên dinga hi lal hmaa i siehlaw ka ngîr ding hi mi'n hlawtlingtir hram rawh" tiin ka hni a. Chuong lai chun kei chu lal dawn ding zu no petub ka nih.

Nehemiah 2

1 Lal Artazerzia inlala inthoka kum sawmhnina Nisan thla, thâl intan hlim lai chun lal dawn ding uoiin an hung làk chu lal ka va pèk a. Kha hma khan lungngai hmèl ka put ngai naw a. 2 Lal chun ka kuomah, "Damnawna nei si loin i hmêl a va hang ngui ngei de! Thil dang rak ni naw nih, lungzingna i nei a ni hih" a ta, ka ti ta hle el a. 3 Amiruokchu lal kuomah, "Lal chu kumkhuoin dam zing raw se. Ka thlatuhai ruong zâlna khawpui a tlu ram zo a, a kotkhârhai khom a kàng ût vong ta si chun ieng leiin am hmèl hlim ka put thei ding a na?" ka ta. 4 Lal chun, "Iem a na i dit chu?" a ta, chuongchun vân Pathien kuomah ka tongtai a. 5 Chun, lal kuomah, "Lal remti zawng a ni a, i siehlaw hin lal mit a tlung a ni chun, Judai rama ka thlatuhai ruong zâlnaa ka fe mi phalpèk la, khuo chu hang indin thar nawk ka tih" ka ta. 6 Lalnu bula inthung lal chun, "Ieng chen am i thang ngai a ta? Ieng tik am hung kìr nawk thei i ta?" a ta. Lal chun lawm takin ka fe a mi phalpèk a, ka suok hun ding khom chu ka sukfel a. 7 Chu bâka chun lal kuomah, "Lal remti zawng a ni chun, Judai ram ka tlung chena him taka mi vêng dinga hrilna lekha Eufretis vadung thlang tieng biela rorêltuhai kuomah mi ziekpèk sien. 8 Chun, tempul vela kul kotkhârhai siemna ding le kulbîng bang rela hmang ding bâkah keima in bawlna dingin thing ka mamaw ding a ni leiin lal thing bil enkoltu Asaf kuomah thing mi pe dinga hrilna lekha mi ziekpèk bok sien ka nuom khop el" ka ta. LALPA ditsakna kut chu ka chungah a um leiin lal chun ka hni po po chu a mi phalpèk vong a. 9 Chuongchun, Eufretis vadung thlang tieng biel optuhai kuoma chun ka fe a, lal lekhahai chu ka pêk tawl a. Lal chun a mi fepui dingin sipai hotuhai le sakor chungchuong mi sipaihai a tir bok a. 10 Horon mi Sanbalat le Amon mi Tobia haiin Israel thlahai thangpui dinga ka hung tlung thu an hriet chun an lung a sen hle a. 11 Jerusalem ka hang tlung chun ni thum sûng ka chawl hri phot a. 12 Chu zoah mi tlawmte chauh thuoiin zânah ka suok dok a. Jerusalem ta dinga ka thaw ding Pathienin ka lungrila a mi'n hriettir thu chu tu khom ka hril naw a, ka chuongna sabengtung chauh naw chu ran sa dang thuoi ka nei bok nawh. 13 Ruom Kotpui tieng kotkhâra chun ka suok a, sihal tuikulc chu fe pelin, Hnawlhnok Kotpui tieng kan fe a, Jerusalem kul chim tahai le a kotkhâr kàng tahai chu kan en vèl a. 14 Chu taka inthoka hung kîrin, Tuikul Kotpui le Lal Dil umna kotkhâr chu kan hung pèl a, sienkhom kul chimin lam a dang leiin ka chuongna sabengtung chun a fe tlang thei ta naw a. 15 Chuongchun, zâna chun Kidron vadung ka hraw tung ta lem a, kul chu ka en vong a, Ruom Kotpui tieng bok chun kan hung kîr nawk a. 16 Khawpui optuhai chun khaw lai am ka fe a, ieng am ka thawa ti an hriet naw a, ka thil thaw tum chu Judahai, thiempu hai, thuoitu hai, thoktu hai le rorêltu hai, hmalatu ding takhai khom chu tu khom ka la hril nawh. 17 Chun, an kuomah, "Ei chan sietzie hi in hmu seng a. Jerusalem chu a tlu ram ta a, a kotkhârhai khom a kâng hmang vong tah ti in hriet. Thaw ro, ei hmai a mawk zing nawna dingin Jerusalem hi indin thar ei tiu khai" ka ta. 18 Pathien ditsakna kut ka chunga a um dàn le lal le kan inbiekna thuhai dâm chu ka hril tawl a. Anni chun, "Thaw ro, indin thar nawk ei tiu" an ti ve nghal a, sin tha thaw ding chun an pu tan ta a. 19 Horon mi Sanbalat hai, Amon mi thoktu Tobia hai le Arab mi Gesem haiin chu thu chu an hrietin an mi nuisaw a, nuizatburah mi hmangin, "Iem a na nangni rawiin in thaw ta hi? Lal lakah hel tum a ni?" tiin an mi biek sisaw a. 20 Kei chun, "Vân Pathien chun mi'n hlawtlingtir a tih. Keini hi a siehlawhai kan ni a, kul bang hi kan indin thar nawk ding a nih. Nangni rawi hin Jerusalemah chanvo ieng khom in nei ve naw a, thuneina amanih le neitu bul nina amanih ieng khom in nei hrim hrim bok nawh" tiin ka don tawl a.

Nehemiah 3

1 Chuongchun, thiempu lal Eliasib le a unau thiempuhai chu an inthok a, Beram Kotkhârpui chu an siem tan a, an inhlàn thienghlim a, a kotkhârhai an siem tha a, a kul bang khom Insâng Zakhatnaa inthoka Hananel Insâng chen an bawl pei a, an inhlàn thienghlim a. 2 A dot chara mi chu Jeriko mihaiin an bawl a, chu dota mi chu Imri naupa Zakur rawiin an bawl a. 3 Nga Kotkhârpui chu Hasena thlahaiin an siem tha a, a kotkhâr bienghai an inbûk a, a kotkhâr an inbûk a, a kalna le thîr tluon inbâtnahai an siem tha vong a. 4 A dota mi chu Hakoz naupa Uria naupa Meremot rawiin an siem tha a, a dota mi chu Mesezabel naupa Berekia naupa Mesulam rawiin an siem tha a, chu dota mi chu Baana naupa Zadok rawiin a siem tha a. 5 Chu khêla mi chu Tekoa khaw mihaiin an siem tha a, sienkhom an mi lienhai ruok chun an thangpui nuom ve nawh. 6 Khawhlui Kotkhârpui chu Pasea naupa Joiada le Besodeia naupa Mesulam hai rawiin an siem tha a, a kotkhâr bieng hai, a kotkhâr hai, a kalna le thîr tluon inbûkna hai chu an siem tha vong a. 7 Anni khêla mi chu Gibeon mi Melatia hai, Meronot mi Jadon hai le, Eufretis vadung thlang tieng biel optu hmunpui Gibeon le Mizpa khuoa mihaiin an siem tha a. 8 A dota mi chu rangkachak sertu laia mi Harhaia naupa Uziel rawiin an siem tha a, chu dota mi chu Hanania, rimtui siemtu laia mi rawiin an siem tha a. Chuong ang chun Jerusalem kul chu a Bang Sei chenin an bawl tha a. 9 Chun, anni dota mi chu Jerusalem biel chenve hotu Hura naupa Refaia rawiin an siem tha a. 10 Anni zawna mi chu Harumaf naupa Jedaia rawiin an siem tha a, chu khêla mi chu Hasabneia naupa Hatus rawiin an siem tha a. 11 Chu khêla mi chu Thuk Insâng chenin Harim naupa Malkija le Pahat-Moab naupa Hasub rawiin an siem tha a. 12 Chu khêla mi chu Jerusalem biel chenve optu Halohes naupa Salum le a naunuhaiin an siem tha a. 13 Ruom Kotkhârpui chu Hanun rawiin Zanoa khuoa chênghaiin an siem tha a. A kotkhâr bieng an rem tha vong a, a kotkhâr an inbûk a, a kalna le thîr tluon inbatnahai an thlâk vong a. Chun, Ruom Kotkhârpuia inthoka Hnawlhnok Kotkhârpui, meter zali sawmlia sei kul bang chu an bawl tha bok a. 14 Hnawlhnok Kotkhârpui chu Beth Hakerem biel optu Rekab naupa Malkija rawiin an siem tha a, a kotkhârhai a thlâk vong a, a kot kalna le thîr tluon inbâtnahai chu a siem tha vong bok a. 15 Mizpa biel optu Kol-Hoze naupa Salun rawiin Tuikul Kotkhârpui chu an siem tha a, a chung khum an siem a, kotkhârhai le a kalna le a thîr tluon inbâtnahai po po chu a tharin an thlâk vong a. Chun, Lal Huon bula Siloam Dil inhuonna banghai chu Davida khuoa inthok zuk pan thlâkna kailawn chenin a bawl tha vong a. 16 Chu khêla mi, Davida thlân epa tuiting le Mihrâng Rûn chenin Beth-Zur biel chenve optu Nehemia naupa Azbuk rawiin an bawl tha bok a. 17 A dota mi chu Levi chia mi Bani naupa Rehum inrawina hnuoiah an siem tha a. Chu khêla mi chu Keila biel chenve optu Hasabia chun ama biel hmingin a siem tha a. 18 A dota mi chu a unauhai, Keila biel chenve optu Henadad naupa Binui (Bavai) rawiin an siem tha a. 19 A dota mi chu Mizpaa rorêltu Jesua naupa Ezer chun kul kawinaa inthoka râlthuom siena hmun hang pan tungna zawn lai chen chu a bawl tha a. 20 A dota mi chu Zabai naupa Baruk chun thahnemngai takin kul kawinaa inthoka thiempu lal Eliasib in kotkhâr chenin a bawl tha a. 21 A dot chu Hakoz naupa, Uria naupa Meremot-in thiempu Eliasib kotkhâra inthoka a tawp chen chu a bawl tha bok a. 22 Chu khêla mi chu a sè vêla thiempuhaiin an bawl tha a. 23 Anni dota mi chu Benjamin le Hasub rawihaiin an bawl tha a, anni dota mi chu Anania naupa Maseia naupa Azaria rawiin ama in bul po chu an bawl tha a. 24 A dota mi chu Henadad naupa Binui chun Azaria ina inthoka a kul kil chen a bawl tha a, 25 Uzai naupa Palal chun kul kawi tanna epa lal in chuonchunga inthoka Insâng Lor zawn chen chu a bawl tha a. A dota mi chu Paros naupa Pedaia chun a bawl tha a. 26 Ofel muola um tempula thoktuhai chun sak tienga Tuikul Kotkhârpui zawn chen le insâng lor chenin an bawl tha a. 27 A dota mi chu Tekoa inthoka hunghaiin Insâng Lor danga inthoka Ofel muola kul bang chen an bawl tha bok a. 28 Sakor Kotkhârpui chung tieng chu thiempuhaiin mani in zawn seng an bawl tha a. 29 Anni dota chun Imer naupa Zadok rawiin ama in zawn po chu an bawl tha a. A dot chu Sak Kotkhârpui vêngtu Sekania naupa Semaia rawiin an bawl tha a. 30 A dot chu Selemia naupa Hanania le Zalaf naupahai laia parukna Hanun rawiin an bawl tha a. A dot chu Berekia naupa Mesulam rawiin ama in zawn po an bawl tha a. 31 A dot chu rangkachak sertu laia mi Malkija rawiin Enfiena Kotkhârpui zawna tempula sinthawtuhai le sumdawnghai umna chen le a kil pan tungna chen an bawl tha a. 32 A kil pan tungna le Beram Kotkhârpui inkâr po chu rangkachak sertu le sumdawnghaiin an bawl tha bok a.

Nehemiah 4

1 Kul kan bawl that thu Sanbalatin a hriet chun a lung a sen hle a, a lung chok chun Judahai a cheksol a. 2 A ruolhai le Samaria sipai ofisarhai kuoma chun, "Hieng Juda mi rethei le ongrop ruol hin ieng am thaw kuok nei dingin in ngai hrim hrim a na? An inthawi rawn lei ringotin ni khat thilthuin kul chu bawl zo dingin an inring am a ni? En hman ro, lung kàng char ta sa hmunhnok laia mi an rût khawm a, an bel nawk mei mei a ni hi" tiin a deusaw tawl a. 3 A bula ngîr Amon mi Tobia chun, "An lung remhai saw sihal khom lawn sien la, sir chim vong a tih" a lo ti ve a. 4 Chu phing leh ka tongtai a, "Aw kan Pathien, mi lo ngàithla rawh, nuizatburin an mi hmang a ni hi. An mi deusawnahai chu an lu chungah intlâktir la, anni ngei hi ram dang mihai inroktir la, an salah intângtir rawh. 5 An bawsietna hi ngàithà hrim hrim naw rawh. An suolnahai chu thai bo naw rawh, kul bawltuhai hmaa ngei suklungsen che tumin an cho phawk che a ni hi" tiin. 6 Chuong ang chun kul chu kan bawl tha pei a, a chenvea insângin kan zom suok vong chenin mipuihai chun lungril po poin thang an làk takzet a. 7 Jerusalem kul chu siem that a ni pei thu le a sietna lai khom hruk phui a ni tàk thu Sanbalat hai, Tobia hai, Arab mi hai, Amon mi hai le Asdod mi haiin an lo hriet chun an lung a sen hle a. 8 Anni chun Jerusalem hung bei a, buoina siem tumin ro an phier a. 9 Sienkhom kan Pathien kuomah kan tongtai a, anni laka invêngna dingin sùn le zànin vêngtu kan sie a. 10 Chuong lai zing chun Judahaiin, "Thoktuhai an chàu zo ta a, hmunhnok inthiel ding hlak chu a la tam bok si a, eini thâ ringot chun kul chu ei indin zo naw ding a ni hi" tiin an hung hril a. 11 Kan hmèlmahai hlak chun, "An hriet hma le an mi hmu hmain chìm nel ei ta, that fai rip ei ta, an sin chu a chawl a ni el" an lo ti zing bok a. 12 An kawl le kienga chêng Judahai chu kan kuomah hungin, "Sîr tina inthokin an hung bei ding cheu a nih" tiin voi sawm nêka tam rau an mi hung hril ta bok a. 13 Chuleiin, a kul inhnuoina lai tak, hmun uol-aua chun kul phènah mipuihai chu a sûng sûngin an kawlhnàm hai, an fei hai le an thalngul hai chawiin thanghmun ka'n khawtir a. 14 Kan ngîrhmun ka hang en vel hnung chun an hotuhai le mipuihai chu ka ko khawm a, an kuomah, "Ei hmèlmahai chu tì dêr naw ro. LALPA ropui tak le râpum tak chu hre zingin in unauhai, in naupahai le naunuhai, in nuhmeihai le in in le lohai hum dingin bei ro khai" tiin ka'n fui tawl a. 15 Kan hmèlmahai chun an thil phier kan lo hriet pei ti le an thiltum chu Pathienin a suktlol ti an hriet chun keini khom mani sin seng sunzom dingin kul tieng kan pan nawk a. 16 Chu taka inthok chun tlangvàl zâtvein sin an thaw a, a zâtve dang chun hriemhrei fei, phaw le thalngul chawiin awmphaw an inbel a. Chun, rorèltuhai chun kul bawl thatu Juda sûngkuo po po chu an tan tlat a. 17 Kul bawl thatna ding hmangruo phurtu le thaktuhai khomin kut khing khatin sin an thaw a, khing tiengin hriemhrei an chawi a, 18 kul bawltuhai po po khomin kawlhnàm an pai vong bok a. Tawtawrawt mûttuhai ruok chu ka kuomah an um a. 19 Chuongchun, mi lûnhai, rorêltuhai le mipuihai kuoma chun, "Sin a tamin ei indar sar a, ei sinthawna kâr a hla tawl si a. 20 Rikrum thilah, tawtawrawt ri in hrietna tieng tieng ka kuomah hung tlân khawm unla, ei Pathien chun mi dopêk a tih" ka ta. 21 Chuong ang chun a zâtvein fei chawiin, khawfingchata inthoka zân tieng arasi a'n lang chenin sin chu kan sunzom ngat ngat a. 22 Chuong lai bok chun mipuihai kuomah, "Zânah vêngtu sin le sûnnithlâka sin thaw dingin mi tin in siehlawhai leh Jerusalem sûngah hung riek lût vong ro" ka ti bok a. 23 Hi sûng hin kei le ka unau hai, ka mi hai le ka kuoma um vêngtu hai chun silfên kan hlip ngai naw a, tui chawi le insila kan fe chenind râlthuom kan chawi hlak.

Nehemiah 5

1 Chuong lai chun pasal ruol le an nuhmeihai chu ka kuomah an hung a, an unau Judahai chungah nasa takin an chier a. 2 A thenin, "Keini sûngkuo hi kan tam a, kan fâk khop inchawkna ding sum tam lem kan mamaw a nih" an ta. 3 A then ruok chun, "Tàm laia bu inchawkna dingin kan in le lo le grèp huonhai kan bànda zo vong tah" an hung ti a. 4 A then nawk chun, "Lal kuoma sie chawi ding sum kan pûk aiah kan lo le grèp huon hai dakhamah kan sie ta a. 5 Juda mi kan ni ve a, kan nauhai khom Juda dang nauhai ang bok an ni ve naw am a ni? Sienkhom, kan nauhai chu Juda mi bok bawia kan sie a lo ngai ta hiel a. Kan naunuhai a then lem chu bawiah an lût dèr tah. Kan lo le grèp huonhai hlak mi dangin an mi neipêk zo ta bok si, chet ngaina a um ta naw a nih" an hung ti a. 6 An chierna thu ka hriet chun ka lung a sen hle a. 7 An ngîrhmun chu ka ngaituo neu neu hnungin an mi lûnhai le rorêltuhai kuomah, "In unauhai a pung uma sum in inpûktir hin anni chu in sawrde a nih" tiin ka khak a. Chu chungchang ngaituo ding chun vântlang inkhawm ka ko a. 8 ​An kuomah " Hnam danghai kuoma inzor tah ei unau Judahai chu ei thei ang angina ei intlan hram hram hlak a. Tu hin nangnin in unauhai chu ei intlan nawk ngai dingin bawiah in siem nawk tum a ni hih" ka ta. An to chip a, tu khomin an mi don nawh. 9 Chuongchun, ka hril zom pei a, "In thilthaw hi thil indik a ni nawh. Ei hmèlma hnam danghai mi endong ding vêngna lei bêkin ei Pathien hi ei ti naw ding am a ni? 10 Keima ngei le ka unauhai le ka hnuoia sinthawtuhai hin a pung umin sum le bu dâm ei unauhai kuomah ei inpûktir hlak a, hi hi bânsan ei tiu khai. 11 Voisun ngei hin an in le lohai, an grep huonhai le oliv huonhai chu pe kîr nawk unla, sum le bu le uoiin le oliv hriek in lo inpûktira inthoka a pung po kha pe kîr nawk hram ro" ka ti bok a. 12 Anni chun, "Pe kîr nawk vong kan ta, an lakah ieng khom phût nawng kan ta, i ti ang tak chun thawng kan tih" an ta. Chu phing leh thiempuhai chu ka ko a, mi lûnhai le rorêltuhai chu thu an intiem tah anga thaw dingin intiemkamna ka'n neitir a. 13 Chun, ka zakuo fuol hmawr chu ka thin a, "In thu tiem anga in thaw naw a ni chun in in le loa inthokin Pathienin thin thla ve raw se cheu" ka ta. Pungkhawm po po chun, "Amen" an ta, LALPA an inpàk a. Mipuihai chun an thutiem angin an thaw a. 14 Chu bâkah Lal Artazerzia inlal kum sawhninaa inthoka kum sawmthum le kum hnina chen, a rêngin kum sawm le kum hni sûng chu Judai ram optu ka ni a, chu sûng chun keima le ka hnuoia thoktuhaiin kan chan ding lal busung voi khat khom kan làk ve nawh. 15 Keini hmaa ram optuhai chun mipuihai chung an sukrik thei hle a, an ni tin fâk ding bu le dawn ding uoiin an intumtir bâkah tangkaruo shekel sawmli an lâkpêk hlak a; an hnuoia thoktuhai chen mipui chungah an insuklal thei hle hlak. Sienkhom kei ruok chun Pathien ka tî leiin chuong ang chun ka thaw ve ngai nawh. 16 Chuong chu thaw nêk hmanin, kul bawlah ka'n hmang char char lem a, ram hlekte khom ka'n chawk naw a, ka hnuoia thoktuhai po po khom kul bawla inhmang tlat dingin ka ngiet a. 17 Chu bâka chun, kan kawl le kienga ram dang mikhuol ka donghai bâkah Judahai le rorêltuhai laia mi ka dawkana thlaithlêng kîl hlak za le sawmnga an um zing a. 18 Ni khata dinga kan khorsaw chu bawng pakhat le beram tha chi ngot paruk le âr tam tak a na, ni sawm dan zàtah uoiin chi hrang hrang kan mamaw teuh bok a. Amiruokchu, mipui an harsa êm leiin ram optu ka nina puola fâk le dawn ka dong dinghai chu ka phût ve ngai hrim hrim nawh. 19 Aw ka Pathien, hieng mihai ta dinga ka thaw po po hi ka thatna dingin mi hrepêk zing rawh.

Nehemiah 6

1 Kul kotkhârpuia kotkhârhai kan la'n bùk hman nawa chu kul chu a popna lai um der loin kan indin thar nawk tah ti Sanbalat hai, Tobia hai, Arab mi Gesem hai le kan hmèlma danghai chun an lo hriet a. 2 Chuongchun, Sanbalat le Gesem chun, "Hung la, Ono phaia khaw pakhatah intuok khawm ei tiu" tiin thu an hung incha a. Nisienkhom, ka chungah thil tha lo thaw tum an lo ni zing si a. 3 Kei chun, "Sin poimaw tak ka thaw lai a na, hung thla hman naw ning. In kuoma ka hung thlâk sûngin ieng leiin am ka kut a chawl el ding a na?" ti hril dingin an kuomah mi ka tir a. 4 Chuong ang chun voi li thu pangngai ngot an hung thon a, ka don hmasak ang charin ka don pei a. 5 A voi nganaa chun Sanbalat bokin lekhathon chàr lo hi a siehlaw a hung inchawitir a. 6 Chu lekhaa chun, "Gesem-in a fena taphotah nang le Judahaiin hel in tum leia kul in bawl that thu a hril thang nasatzie a mi hril a. A hril pei dàn chun, nang hi an lal ni i tum a ni awm a. 7 Chun, Jerusalemah, 'En tu, Judai ramah lal a um zing annawm' tia puongtu ding zawlnei khom i ruot tah ti thu a hril bok a. Hieng thu hin lal kuom a tlung ngei ding a nih ti hre zingin, hung la, thil umzie hril tlâng ei tih" ti thu hi a chuong a. 8 Chuongchun, a kuomah, "I hril ang hin thil a um nawh ti le i phuok fawm el a nizie chu nangma ngei a hretu i nih" tiin a donna ka thon a. 9 Mi hril ti vêl a, kan thilthaw mi'n thultir thei an inbeisei leia an thaw a ni si a. Chuongchun, Pathien kuomah ka kut mi sukhrâtpêk pei dingin ka tongtai a. 10 Chu hnung chun Mehetabel naupa Delaia naupa Semaia, suok invâk thei ta lo chu a inah ka va kan a. Ama chun, "LALPA Tempul sûngah inhmung ei ta, kot inkal khum tlat ei tih. Voizân hin nangma that tumin i hmèlmahai an hung ding a nih" a ta. 11 Kei chun, "Keima ang ngirhmuna ngîr si tu am a na tlânse ding chu? Keima ngîrhmun ang chel si hi himna zongin Tempulah a tlân lût ding maw? Chu chu thaw naw top ka tih" ka ta. 12 Ka hang hriet suok chun ama chu Pathien tir ni loin Tobia le Sanbalat-in an lo ruoi leia ka sietna dinga chuong thu chu a hril a lo ni zing a. 13 Mi sukzâm a, a thu mi'n zawmtir a, suol mi'n thawtir a, mi sukhmingsiet tuma an lo ruoi a nih. 14 Aw ka Pathien, Tobia le Sanbalat haiin thil suol an thaw po po hi hre zing la, zawlnei Noadia le ama nu ang boka zawlnei dang mi sukzâm tumtuhai po po khom hre zing tawl rawh. 15 Chuongchun, kan tana inthoka ni sawmnga le ni hnina, Elul thla ni sawmhni le pangana chun kul chu bawl zo a ni ta a. 16 Kan kawl le kienga kan hmèlmahai le hnam danghaiin an hriet chun an mi tì a, an zâm bok a, kan Pathien thangpuina leia kan hlen a nih ti an hriet vong si a. 17 Chu bâkah, ni sawmnga le ni hni sûng chun Judai rama thoktuhai le Tobia chu lekha an lo inthon tuo rawn hle a. 18 Tobia chu Ara naupa Sekania mâkpa a ni leiin ama chunga ringum dingin Juda mi tam takin thu an lo tiem ta a, chu bâka chun a naupa Jehohananin Berekia naupa Mesulam naunu chu nuhmeiah a nei bok a. 19 Tobia thilthaw thathai chu ka hrietah an hril an hril hlak a, ka hril iengkim chu a kuomah an hril sawng bok a. Chuleiin, Tobia chun mi sukzâm tumin inthìna lekha a mi hung thon hlak a nih.

Nehemiah 7

1 Kul kan indin zo a, kotkhârhai kan inbûk zo hnung chun kotkhâr vêngtu hai, hla saktu hai le Levi hai chu an thaw ding seng ka ruotpêk a. 2 Ka unaupa Hanani, mi ringum le Pathien tìna tienga mi tam lem khûm zo le kulbinga kawmandar Hanania hai chu Jerusalem optu dingin ka ruot a. 3 An kuomah, "Jerusalem kotpuihai hi zîng tieng nisa a hung inkàng hma chu hong naw unla, e zân tieng ni tlâk pha, kotkhâr vêngtuhai an la um lai zingin khâr unla, a kothai hi kal vong ro. Jerusalem mihai laia mi khaw vêngtu ruot unla, ngun takin vêng raw hai se. A then chu hmun ruot bîkah diuti hai sien, a then ruok chun mani in bul vel seng vêng raw hai se" tiin ka hril a. 4 Khawpui chu a lienin a la'n thawl a, mi chêng an la tlawm a, in tlu se tahai chu bawl loin a la um zing a. 5 Mi lûnhai, rorêltuhai le vântlâng mipuihai chu ko khawm a, mani sûngkuo senga ziek lût dingin Pathienin ka lungrilah a mi'n hriettir a. Judai rama hung kîr nawk hmasa takhai inthla dàn ziekna lekhabu ka hmu suok a, chu taka chun hieng ang hin an ziek a: 6 Sala Babulon lal Nebukadnezzarin a thuoihai laia an sal intângnaa inthoka suok, Jerusalem le Judai rama mani khuo senga kîr nawk a, chu rama chêng tahai le 7 an thuoituhai chu Zerubabel, Jesua, Nehemia, Azaria, Raamia, Nahamani, Mordekai, Bilsan, Misperet, Bikvai, Nehum le Baana hai an nih. Israel thla saltâng hung kîrhai chu, 8 Paros thlahai sânghni zakhat sawmsari pahnih; 9 Sefatia thlahai zathum sawmsari pahnih; 10 Ara thlahai zaruk sawmnga pahnih; 11 Pahat-Moab thlaa mi (Jesua le Joab zungzama mi) sânghni zariet sawm le pariet; 12 Elam thlahai sângkhat zahni sawmnga pali; 13 Zatu thlahai zariet sawmli panga; 14 Zakai thlahai zasari sawmruk; 15 Binui (Bani) thlahai zaruk sawmli pariet; 16 Bebai thlahai zaruk sawmhni pariet; 17 Azgad thlahai sânghni zathum sawmhni pahnih; 18 Adonikam thlahai zaruk sawmruk pasarih; 19 Bikvai thlahai sânghni sawmruk pasarih; 20 Adin thlahai zaruk sawmnga panga; 21 Ater thlahai (Hezekia zungzama mi) sawmkuo pariet; 22 Hasum thlahai zathum sawmhni pariet; 23 Bezai thlahai zathum sawmhni pali; 24 Harif (Jora) thlahai za sawmpahnih le 25 Gibeon (Gibar) thlahai sawmkuo panga. 26 Bethlehem mi hung kîr nawk hai: Netofa thlahai za sawmriet pariet; 27 Anathot thlahai za sawmhni pariet; 28 Bet Azmavet khaw mihai sawmli pahnih; 29 Kiriat Jearim, Kefira le Beerot khaw mihai zasari sawmli pathum; 30 Rama le Geba khaw mihai zaruk sawmhni pakhat; 31 Mikmas khaw mihai za sawmhni pahnih; 32 Bethel le Ai khaw mihai za sawmhni pathum; 33 Nebo khaw danga mihai sawmnga pahnih; 34 Elam khaw danga mihai sângkhat zahnih sawmnga pali; 35 Harim khaw mihai zathum sawmhnih; 36 Jeriko khaw mihai zathum sawmli panga; 37 Lod, Hadid le Ono khaw mihai zasari sawmhni pakhat; 38 Senaa khaw mihai sângthum zakuo sawmthum an nih. 39 Thiempu hung kîr nawkhai chu: Jedaia sûngkuoa mi (Jesua zungzâma inthok) zakuo sawmsari pathum; 40 Imer thlahai sângkhat sawmnga pahnih; 41 Pasur thlahai sângkhat zahnih sawmli pasarih; 42 Harim thlahai sângkhat sawm pasarih an nih. 43 Levi thlaa mi hung kîr nawkhai chu: Jesua le Kadmiel sûngkuoa mi (Hodavia thlahai) sawmsari pali; 44 Asaf sûngkuoa mi hla saktu pawl za sawmli pariet; 45 Kotkhâr vêngtu Salum, Ater, Talmon, Akub, Hatita le Sobai hai sûngkuoa mi za sawmthum pariet an nih. 46 Tempul siehlaw hung kîr nawkhai chu Ziha, Hasufa, Tabaot, 47 Keros, Siaha (Sia), Padon, 48 Lebana, Hagaba, Salmai, 49 Hanan, Gidel, Gahar, 50 Reaia, Rezin, Nekoda, 51 Gazam, Uzia le Pasea 52 Besai, Meunim, Nefusim (Nefusesim), 53 Bakbuk, Hakufa, Harhur, 54 Bazlut, Mehida, Harsha, 55 Barkos, Sisera, Tema, 56 Nezia le Hatifa hai an nih. 57 Lal Solomon siehlawhai thlaa mi hung kîr nawk chu Sotai, Soferet, Peruda (Perida), 58 Jala, Darkon, Gidel, 59 Sefatia, Hatil, Pokeret-hazebbaim le Ami (Amon) an nih. 60 Tempul siehlaw le Solomon siehlaw hung kîr nawkhai po chu an rêngin zathum sawmkuo pahnih an nih. 61 Hieng Tel Mela, Tel Harsa, Kerub, Adon le Imer khuohaia inthoka Jerusalema hung kîr an um a, sienkhom an sûngkuo chanchin inziekna lekha an hmu zo naw leiin Israel thlahai lai tiem sa thei an ni nawh. 62 Chuonghai chu Delaia, Tobia le Nekoda thlaa inthokin mi zaruk sawmli pahnih an na, 63 thiempu laia inthokin Hobaia, Hakoz le Barzilai thlahai an nih (Barzilai hin Gilead mi Barzilai sûngkuoa mi nuhmeiah a nei a, a nuhmeihai tieng hming a put ta lem a nih). 64 Hienghai hin an thlatuhai suina an zong hmu naw leiin thiempu sin thaw dingin thienghlim loa ngai an nih. 65 Urim le Thumim hmanga LALPA rawn thei thiempu an nei hma khat chu ram optu chun anni chu thiempuhai chan thil serhai chu an fâk ve khom a phal nawh. 66 Judai rama hung kîr po po chu mi sîngli sânghni zathum sawmruk an nih. 67 Chuonghai bâka chun nuhmei le pasal siehlaw sângsari zathum sawmthum pasarih le hla saktu za sawmli panga an hung bok a. 68 Ran an hung thuoi zât chu sakor zasari sawmthum paruk, sabengtung lien chi zahni sawmli panga, 69 sanghawngsei zali sawmthum panga le sabengtung chin chi sângruk zasari sawmhnih a nih. 70 Sûngkuo lukhàitu thenkhatin Tempul bawlna dingin thawlawm an hung pèk a. Ram optu chun thawlawmah rangkachak kilogram riet, rangkachak maihùn sawmnga le thiempu zakuo zanga le sawmthum a pêk a. 71 Hotu danghai chun rangkachak kilogram za le sawmruk le pariet le tangkaruo kilogram sângkhat le zahni le sawmnga an pêk a. 72 Sûngkuo lukhàitu iemani zâtin rangkachak kilogram za le sawmruk le pariet le tangkaruo kilogram za le sawmli le thiempu zakuo sawmruk le pasari an pêk bok a. 73 Chuongchun, thiempu hai, Levi hai, kotkhâr vêngtu hai, hla saktu hai, tempul siehlaw hai, mi dang thenkhat hai le Israel thla hai po po chu mani khuo sengah umhmun an bèngbel nawk ta a.

Nehemiah 8

1 Thla sarina, favang laihawlaf mani khuo senga Israelhai an inbèngbel hnung chun, mi po po chu zài khata luongin Tuikul Kotkhârpui bula tuolzawla chun an pungkhawm a. LALPAN Israelhai zawm dinga thu a pêk, Mosie Dàn bu chu hung laa tiem dingin lekha ziektu Ezra chu an ngèn a. 2 Chuongchun, thla sarina ni khat ni chun thiempu Ezra chun nu tling pa tling pungkhawmhai le a hre thiem thei chin awm po hmaa chun Dàn bu chu a hung chawi a. 3 Tuikul Kotkhârpui khêla tuolzawl tieng chu nghain, zîng tienga inthoka sûn chang chenin mi po po hriet theia inringin Dàn thu chu a tiem a, mipui chun ngun takin an ngàithlâk thup a. 4 Chu huna dinga tham an dawa chun lekha ziektu Ezra chu a ngîr a. A chang tieng chun Matithia hai, Sema hai, Anaia hai, Uria hai, Hilkia hai le Maaseia hai an ngîr a. A voi tieng chun Pedaia hai, Misael hai, Malkija hai, Hasum hai, Hasbadana hai, Zekaria hai le Mesulam hai an ngîr bok a. 5 Ezra chun mi po po hmuah lekhabu ziel chu a hang sût a. Mipui nêka insânga ngîr a ni leiin an hmu thei vong a, a sût lai chun mipui chu an ngîr vong a. 6 Ezra chun LALPA, Pathien ropui tak chu a'n pàk a, mipui po po chun bân pharin, "Amen, Amen" tiin an lo don a, hnuoi sika kûnin LALPA an chawibiek a. 7 Levi mi Jesua hai, Bani hai, Serebia hai, Jamin hai, Akub hai, Sabethai hai, Hodia hai, Maaseia hai, Kelita hai, Azaria hai, Jozabad hai, Hanan hai le Pelaia hai chun mipui ngîrhai chu dàn thu an hrilfie a. 8 Pathien Dàn bu chu an tiem a, tlar tin umzie chu an hriet thiem vong theina dingin an tiem non a, chieng takin an hrilfie pei a. 9 Dàn thu an hang hriet chun mipui chu an tap mur mur leiin ram optu Nehemia hai, thiempu le lekha ziektu Ezra hai le mipui inchûktirtu Levi hai chun mipui kuomah, "Voisun hi LALPA in Pathien ta dinga ni thienghlim a na, thla suksieta tap hun a ni nawh" an ta. 10 Nehemia chun, "Fe unla, ruoi inhnik hnik fain, dawn ding a thlum thlum dawn unla, ieng khom buotsai ve nawhai khom sem ve ro. Voisùn hi LALPA ta dinga ni thienghlim a nih. Lungngaiin um naw ro, LALPA lawmna chu in hrâtna a ni si a" a ta. 11 Levihai khomin mipui kuomah, "To unla, tap ta naw ro. Voisùn hi ni thienghlim a nih. Lungngai naw ro" tiin an lo zàp dei a. 12 Chuongchun, mihai chu in tieng an inlawi a, hlim taka fain an dawn a, mi danghai khom an nei ang ang chu an pêk a, an kuoma Dàn thu an tiem kha ngàithlaa an lo hriet leiin an lawm a nih. 13 Chun, chu thla ni hninaag chun sûngkuo tina lukhàituhai le thiempuhai le Levihai chu dàn thu inchûk dingin lekha ziektu Ezra kuomah an fe khawm a. 14 Dàn thu an inchûk a, thla sarinaa kût an hmang lai chun Israel thlahai chu sawlbûkah an um ding a nih ti LALPAN Mosie hmanga thu a pêk chu an hmu suok a. 15 "Tlângah hang fe unla, dânin a phût anga kût hmang sûnga umna ding sawlbûk bawlna ding oliv kau dâm, ruon kau dâm, inhmui kau dâm, tûm kau dâm le thingbûk kau dâm hang la ro" tia khuo po po le Jerusalema tlâng insamtir dinga thu a pêk dâm chu an tiem suok a. 16 Chuongchun, mipuihai chu an inthok suok a, an va làk a, mi po poin an in chunga dâm, an tuol kota dâm, Pathien Tempul kota dâm, Tuikul Kotkhârpui tuolzawla dâm, Efraim Kotkhârpui tuolzawl lien tak laia dâm sawlbûk an bawl fek fuk a. 17 Saltâng hung kîr po po chu kàr khat sûng sawlbûka chun an riek a, lawmnain an sip a. Nuna naupa Josua thia inthoka Israel thlahaiin Bawkte Kût chuong anga an hmang nawk hmasakna tak a nih. 18 Ni tinin ni sari an kût sûng po chun Pathien Dàn bua mi chu Ezra-in a tiem a. A ni rietna ni, kût tumtiek ni chun Mosie thupêk angin, inkhawmpui ursùn takin an nei a.

Nehemiah 9

1 Chu thla, ni sawmhni le pali ni chun Israel thlahai chu an pung khawm nawk a, bu ngheiin, saiip silin, luah pilvut an inphul a. 2 Israel thlahai po chu hnam danghai lakah an inthier hrang a, an suolnahai le an pi le puhai rìtlona lakah thupha an chawi a. 3 Mani umna sengah an ngìr a, dârkar thum vel inring takin LALPA an Pathien Dàn bu chu an tiem a, chu zoa dârkar thum sûng a hmatiemin thupha an chawi a, LALPA an Pathien chu an chawibiek a. 4 Levi mi thenkhat Jesua, Bani, Kadmiel, Sebania, Buni, Serebia, Bani le Kenani hai chu kailawnah an ngìr a, rawl inring takin LALPA an Pathien chu an ko a. 5 Chun, Levi chia mi bok Jesua, Kadmiel, Bani, Hasabneia, Serebia, Hodia, Sebania le Pathahia hai chun mipui kuomah, "Ngîr unla, chatuona inthoka chatuon chena LALPA in Pathien chu inpâk ro" tiin an khèk a. Chuongchun, Israel mipui chu hieng ang hin an tongtai a: "I hming ropui chu inpâkin um sien, chawimawina le inpâkna po po chungah lêng raw se. 6 Nang chauh hi LALPA i nih. Vânhai, vân insâng takhai le a sûnga um arasi po po le leihnuoi le a sûnga um po po le tuifinriet le a sûnga um po pohai chu nangin i siem a. Iengkim hi hringna i pêk a, vân lêng ruolin an chawibiek hlak che. 7 "Nang chu LALPA Pathien, Abram thlangtu, Kaldai ram Ur-a inthoka thuoi suoktu le a hminga Abraham saktu i nih. 8 A lungril chu i lakah ringumin i hriet a, Kanan hai, Hit hai, Amor hai, Periz hai, Jebu hai le Girgas hai ram chu a thlahai kuoma rochung dingin thu i thlungpui a, i fel leiin i thutiem chu i hlen ngei bok a. 9 "Aigupta rama kan pi le puhai rinum tuor chu i hmu a, Tuipui Sena an kona che rawl chu i ngàithlâk a. 10 Aigupta mihaiin hmusit taka an soisak i hmu zing leiin, Faraw le a siehlaw po pohai le a rama um po pohai chungah inchiknahai le thilmakhai i'n langtir a, chuong ang chun tu chen hin hming i siem a. 11 An hmaah tuipui chu i suktan a, hnuoi hulah an fe thleng a, a hung hnottuhai ruok chu lipuia lung thlâk ang elin tuipui inthûkah i pei hmang tawl a. 12 Sûnah sûm lawnin i thuoi a, zânah an fena lampui elvartu dingin mei lawnin i thuoi bok a. 13 "Sinai tlângah i hung tum a, vâna inthokin an kuomah thu i hril a. Rorêlna indik le fel, dàn indik le fel le thuruot le thupêk tha takhai chu i pêk a. 14 I chawlni thienghlim chu anni i'n hriettir a, i siehlaw Mosie hmangin thupêk hai, thuruot hai le dàn hai chu i pêk a. 15 An phingtàm pha vâna inthokin bu i pêk a, an dangchàr pha lungpuia inthokin tui i pêk bok a. Kut phar meua an kuoma pêk i tiem rama chun lûta rochung dingin i hril a. 16 "Sienkhom, kan pi le puhai chun chapo takin lulul an insuo a, i thupêk an zawm nuom nawh. 17 I thu an ngàithlâk nuom naw a, anni laia thilmak i thawpêkhai khom an hriet zing nuom ta nawh. Lulul takin an um a, an hel a, bawia an intângna tienga thuoi kîr nawktu dingin hotu an ruot ta lem a. Nisienlakhom, nang chu ngaidam dinga inpei zing Pathien, mi lunginsiet thei tak, lâinatna hau tak, lungsen mei mei lo le hmangainaa sip i ni a, 18 bawngtuoi lem siem a, 'Hi hi a nih Aigupta rama inthoka thuoi suoktu cheu in Pathien chu' tia tirdakum taka i hming an hril siet lai khom khan anni chu i thlathlam chuong nawh. 19 "I ngilneina nasa tak leiin anni chu thlalèra khan i thlathlam chuong naw a, an lampuia sùna thuoitu sûm lawn chun a mâksan naw a, zâna an lampui elvartu mei lawn chun a mâksan ngai bok nawh. 20 Anni inchûktirtu dingin i Thlarau tha tak chu i tir a, an phingtamin vâna inthoka manna pêk i thul naw a, an dangchàr khomin tui pêk i thul chuong bok nawh. 21 Kum sawmli sûng zet thlalèrah i chawm tawl a, ieng khom an tlasam naw a, an silfênhai a tiek naw a, an kehai a'n vung bok nawh. 22 "Lalramhai le hnam danghai chu an kutah i pêk a, ram hla le kilkhawr chenin an ram i zauhpêk a. Hesbon lal Sihon ramhai le Basan lal Oga ramhai chu an hluo a. 23 An thlahai chu vâna arasi anga tamin i sukpung a, an hluo dinga an pi le puhai kuoma i lo hril tah rama chun i thuoi lût a. 24 An thlahai chun ram chu an hluo a, nangin chu rama um Kanan mihai chu an hmaah i suktlawm a, an nuom nuoma thaw dingin an lalhai le chu rama umhai chu an kutah i pêk a. 25 Kul nei khuohai le ram tha tak tak hai chu an làk a, thil tha tinrênga sip inhai an hluo a, tuikhur cho sa hai, grèp huon hai, oliv huon hai le thei kung bil tam tak an hung nei a, tlai takin an infâk thau a, i thatna nasa tak chungah inhoi an chên a. 26 "Sienkhom thu an awi naw a, i lakah an hel a, i dânhai chu an hnung son a. Nangma tienga kîr nawk dinga ziltu zawlneihai chu an that a, nangma hrilsietna thil tirdakum tak tak an thaw a. 27 Chuongchun, suknomnatna tuor dingin an hmèlmahai kutah i pêk suok tawl a. Chuonga sawrdea an um phing leh nangma chu an hung ko che a, vâna inthokin i lo ngàithlâk a, i ngilneina nasa tak leiin sansuoktuhai i pêk a, an hmèlmahai kuta inthokin an san suok a. 28 "Amiruokchu, muongleia an um charin i mithmuah thil tha lo an thaw zui nawk nghal a. Chuongchun, an hmèlmahai hnuoia kûn dingin an kutah i pêk a. An hung ko pha che leh vâna inthokin i lo ngàithlâk a, voi tam tak i ngilneina leiin i san suok tawl hlak a. 29 "Chun, i Dânhai zawma hung kîr nawk dingin i zil hlak a, sienkhom chapo takin thil an thaw a, i thupêkhai an pom naw a, a zawmtuin a hringpui ngei ding i rorêlnahai chu kalin thil suol an thaw a, tuklul insuoin tukkhum an innghat che a, an insuklulul a, an ngàithlâk nuom nawh. 30 Kum tam tak chu an chungah i dawthei a, i Thlarau chun zawlneihai hmangin i zil ngat ngat a, an poisa chuong si naw leiin an tuolbawmhai kutah i pêk tawl a. 31 Sienkhom, i ngilneina nasa tak leiin anni chu i sukchimit phal naw a, i thlathlam song ngai bok nawh. 32 "Chuleiin, kan Pathien, Pathien ropui, iengkimthawthei le râpum, i thuthlung hlena lunginsietna suklang hlaktu chun keini chunga le kan lal hai, mi lien hai, thiempu hai, zawlnei hai, kan pi le pu hai le i mi hai po po chunga Asuria lalhai inlal laia inthoka tu chena rinumna hung tlung zozài hi thil chin thamah mi ngaipêk naw hram rawh. 33 Ieng khom ni sienla, kan chunga thil hung tlung po poa hin nang chu i fel a, indik takin thil i thaw a, keini ruok chun thil tha naw takin kan thaw hlak a nih. 34 Kan lal hai, kan mi lien hai, kan thiempu hai, kan pi le pu hai khomin i dàn an lo zawm naw a, i thupêk le i thu inhriettirhai le anni i zilnahai chu an lo pom bok nawh. 35 An chunga i hang that êm êm vei leh, an ram, ram lien tak le tha tak i pêka chun i rong an bawlpêk naw che a, an thil suol thaw an ma chuong bok nawh. 36 Ngai ta, tu ruok hin chu bawi kan lo ni ta a, kan pi le puhai tlàn dinga a ram tharsuok thil tha i pêk rama hin bawi kan lo ni tah. 37 Kan suol leia kan chunga lala i ruothai chun a ram tharsuokhai chu an hui vong a, kan taksa le kan ranhai chunga chen khom an nuom nuomin thu an nei a, kan bei a dong êm êm a nih. 38 "Chuong po po kan chunga thil hung tlunghai lei chun i kuomah ziek ngeiin thu khûn takin kan thlung a, chu chu kan mi lien hai, Levi chi hai le thiempu haiin suoi namin an mi hrietpui a nih" tiin.

Nehemiah 10

1 Mani suoi nama thuthlung namnghettuhai chu: Nehemia, ram optu, Hakalia naupa; thiempuhai laia inthokin Zedekia, 2 Seraia, Azaria, Jeremia, 3 Pasur, Amaria, Malkija, 4 Hatus, Sebania, Maluk, 5 Harim, Meremot, Obadia, 6 Daniel, Ginethon, Baruk, 7 Mesulam, Abija, Mijamin, 8 Maazia, Bilgai le Semaia, thiempu vong an nih. 9 Levi chia inthoka namnghettuhai chu Azania naupa Jesua, Henedad sûngkuoa mi Binui, le Kadmiel 10 le an Levi chanpui Sebania, Hodia, Kelita, Pelaia, Hanan, 11 Mika, Rehob, Hasabia, 12 Zakur, Serebia, Sebania, 13 Hodia, Bani le Beninu hai an nih. 14 Mipui tienga namnghettu hotuhai chu Paros, Pahat –Moab, Elam, Zatu, Bani, 15 Buni, Azgad, Bebai, 16 Adonija, Bigvai, Adin, 17 Ater, Hezekia, Azur, 18 Hodia, Hasum, Bezai, 19 Harif, Anathot, Nebai, 20 Magpias, Mesulam, Hezir 21 Mesezabel, Zadok, Jadua, 22 Pelatia, Hanan, Anaia, 23 Hosea, Hanania, Hasub, 24 Halohes, Pilha, Sobek, 25 Rehum, Hasabna, Maaseia, 26 Ahia, Hanan, Anan, 27 Maluk, Harim le Baana hai an nih. 28 Namnghettu mi danghai chu thiempuhai, Levihai, kotkhâr vêngtuhai, hla saktuhai, tempula siehlawhai le Pathien dàn zawm tuma an sè vela umhai laka insie hranghai le an nuhmeihai le chinchang hre thei tah an naupahai le naunuhai chu an nih. 29 Hienghai hin an unauhai le an mi lienhai thu chu chel tlatin, Pathien siehlaw Mosie pêk Pathien dàn zawm a, LALPA, kan Pathien thupêk po po le a rorêlnahai le thuruothai chu fimkhur taka zawm le vong dingin inkhâm meuin thu kan thlung a. 30 "Kan kawl le kienga chênghai chu kan naunuhai inneitir loa, kan naupahai ta ding khoma an naunuhai chu nei bok lo dinga inkhâmin thu kan intiem. 31 "Kan kawl le kienga mihaiin thuomhnaw amanih fâk ding thil amanih zor dinga Sabat ni le umni khâma ni kan inser chânga an hung phur hrim hrim chu inchawpêk lo dingin kan intiem. Chun, kum sarina zâtin lo thaw loa ram chu inawl ding le kan laka Juda mi leibat chu thai bo dingin inkhâmin thu kan intiem bok. 32 "LALPA in siemna dinga sum mamaw tawk a um theina dingin, kum tin shekel hmun thuma thea hmun khat pêk dinga thupêk um chu sukpuitling dingin mawphurna lâk kan intiem. 33 Chu thawlawm chun chatlak loa hlânbei sie ding dâm, bu le bâl inhlànna le pumraw thilhlàna ding dâm, Sabat ni le thla thar lawmna le kum tina kût hrang hrang hmangnaa ding dâm, thil thienghlim inhlànnaa ding dâm, Israel mihai ta dinga inremna siemna dinga suol thawinaa ding dâm le kan Pathien tempula thaw tûl dang po poa hmang ding mamawhai chu phuhrûk a tih. 34 "Dânin a phût anga LALPA kan Pathien maichâma tì ding kum tina a hun bi ruot ang thlapa kan Pathien tempula thing hung latu ding sûngkuohai hrietna dingin thiempuhai, Levihai le mipuihaia inthokin thum vawrin kan sukthlûk. 35 "Kan lo tharsuok bu le bâl le thlai thar hmasa tak le kan thing le thei kung ra hmasa takhai chu LALPA tempula hung chawi rop dingin kan intiem. 36 Kan naupa pieng hmasa takhai le kan ran pieng hmasa tak, kan bawng ruol le beram ruolhai laia pieng hmasa takhai chu dânin a phût anga LALPA ta dinga kan Pathien tempula rongbawltu thiempu kuoma hung inhlàn dingin kan intiem. 37 "Kan bei hmet hmasa tak hai, kan bu le bâl thilhlân hai, thing le thei chi tinrêng ra hmasa tak hai, uoiin thar le hriek thar hmasa tak hai laia a tha tak pei chu LALPA ina a siekhawmnaah thiempu kuomah hung chawi dingin kan intiem. Kan lo tharsuok sawma pakhat changtu ding le chu chu kan umna khaw tina la khawmtu dinga ruot Levihai kuoma chun kan lo tharsuok sawma pakhat hung chawi seng dingin kan intiem. 38 Levi chihaiin sawma pakhat an lâka inthoka sawma pakhat chu Aron thlaa mi thiempuhai ta dingin kan Pathien tempula ro siekhawmnaah an pêk ve hlak ding a nih. 39 Israel mihai le Levi chihaiin bu le bâl thilhlân dâm, uoiin thar dâm le oliv hriek thar dâm an inhlànhai chu tempulah hung chawi an ta, rongbawltu thiempu le kotkhâr vêngtu le hla saktuhai umna bula bûr le bêl siekhawmna kudama sie dingin an hung chawi seng ding a nih. "Kan Pathien in hi ngaithâ lo dingin kan rêngin kan intiem" tiin.

Nehemiah 11

1 Mipui thuoituhai chu Jerusalemah an um a. Khaw danga umhai po chu sûngkuo sawm peiah sûng khat khawpui thienghlim Jerusalema um ding le sawma pakuo chu an chêngna khuo senga um dingin thum an vawr a. 2 Jerusalema um dinga mania inpehai chun mipuiin an ngaisang hle a. 3 Hienghai hi chu biel danga hotuhai, Jerusalema hung insonhai chu an nih ( Judai rama khawpui le thingtlâng khuoa hai chun mani chanpuol hmun le ram sengah Israel mi iemani zât chu thiempu hai, Levi hai, tempul siehlaw hai le Solomon siehlaw thla hai chu an khawsa a, 4 Jerusalema hung lût nawk chu Judai ram le Benjamin thlahai rama mi deuh chauh an nih):Juda thlaa mihai chu Perez thlaa mi Mahalalel, chu naupa Sefatia, chu naupa Amaria, chu naupa Zekaria, chu naupa Athaia, chu naupa Uzia; 5 le Sela (Silon) sûngkuoa mi Zekaria, chu naupa Joiarib, chu naupa Adaia, chu naupa Hazaia, chu naupa Kol-Hoze, chu naupa Baruk le chu naupa Maaseia an nih. 6 Perez thlaa mi, Jerusalema um po po chu zali sawmruk pariet an nih. 7 Benjamin thlaa mihai chu Jesaia naupa Ithiel, chu naupa Maaseia, chu naupa Kolaia, chu naupa Pedaia, chu naupa Joed, chu naupa Mesulam le chu naupa Salu le 8 ama zuituhai Gabai le Salai an na, an rêngin pasal po zakuo sawmhni pariet an nih. 9 Zikri naupa Joel chu khawpuia hotu lu tak a na, Hasenua naupa Juda chu a dottu a nih. 10 Thiempuhai chu Joiarib naupa Jedaia hai; Jakin hai; 11 Pathien tempul enkoltu Ahitub naupa Meraiot, chu naupa Zadok, chu naupa Mesulam, chu naupa Hilkia, chu naupa Seraia hai; le 12 an unauhai, tempula rongbawltu po po chu an rêngin zariet sawmhni pahnih an nih. Chuonghai bâka chun Malkija naupa Pasur, chu naupa Zekaria, chu naupa Amzi, chu naupa Pelalia, chu naupa Jeroham, chu naupa Adaia le 13 a unauhai, sûngkuo tina lukhàituhai chu an rêngin zahni sawmli pahnih an nih. Chun, Imer naupa Mesilemot, chu naupa Ahzai, chu naupa Azarel, chu naupa Amasai 14 le an unau mi hrât le huoisen, an rêngin za sawmhni pariethai khom an thang sa bok a. An hotu tak chu Hagedolim naupa Zabdiel a nih. 15 Levihai laia mi chu Buni naupa Hasabia, chu naupa Azrikam, chu naupa Hasub, chu naupa Semaia hai dâm; 16 Pathien tempul puo tieng sin enkoltu Sabethai le Jozabad hai dâm; 17 Asaf naupa Zabdi, chu naupa Mika, chu naupa Matania, lawmthu hril inkhawma tongtaia hun hongtu hai dâm; Matania thangpuitu Bakbukia hai dâm; Jeduthun naupa Galal, chu naupa Samua, chu naupa Abda hai dâm an nih. 18 Khawpui thienghlima Levi mi um po po chu zahni sawmriet pali an nih. 19 Kotkhâr vêngtuhai chu Akub le Talmon le an thawpuihai, an rêngin za sawmsari pahnih an na, an sin tak chu kotkhâr vêng a nih. 20 Hienghai ti lo Israelhai le thiempuhai le Levihai chu Judai ram khaw hrang hranga anni chanpuol ram senga chun an um a. 21 Tempul siehlawhai chu Ofel muolah an um a, an hotuhai chu Ziha le Gishpa an nih. 22 Jerusalema Levihai hotu tak chu Mika naupa Matania, chu naupa Hasabia, chu naupa Bani, chu naupa Uzi a na, anni hi Perez thlaa mi, Pathien tempula hla saktu an nih. 23 Lalin an thaw dinga thu a pêk ang ang thaw chu ni tina an rongbawlna a nih. 24 Juda naupa Zera thlaa mi Mesezabel naupa Pethahia chu mipuihai chunga rorêlna iengkima lal aiawtu a nih. 25 Juda mi thenkhat chu Kiriat Arba le a khawpera hai dâm, Dibon le a khawpera hai dâm le Jekabzeel le a khawpera hai dâm an um a. 26 Chun, Jesuaa dâm, Moladaa dâm, Beth-peleta dâm, 27 Hazar-suala dâm, Beersheba le a khawpera hai dâm, 28 Ziglaka dâm, Mekona le a khawpera hai dâm, 29 En-Rimona dâm, Zoraa dâm, Jarmuta dâm, 30 le Adulam le a khawpera hai dâm an um bok a. Lakis le a sè vel rama dam le Azeka le a sè vel khuoa hai dam an um bok a. Chuong ang chun Beersebaa inthoka Hinom ruom chenin umhmun khuorin an inzàr phei a. 31 Chun, Gebaa Benjamin thlahai chu Mikmas hai, Aija hai le Bethel le a sè vel khuoa hai an um a. 32 Anathot hai, Nob hai, Anania hai, 33 Hazor hai, Rama hai, Gitaim hai, 34 Hadid hai, Zeboim hai, Nebalat hai, 35 Lod hai le Ono khuoa hai le themthiemhai chêngna ruoma dâm umhmun an khuor bok a. 36 Judai rama um Levihai laia thenkhat chu Benjamin hnamhai lai umhmun an inkhuortir bok.

Nehemiah 12

1 Sealtiel naupa Zerubabel le Jesua rawia saltâng hung kîr thiempuhai le Levihai chu hienghai hi an nih: Thiempuhai chu Seraia, Jeremia, Ezra, 2 Amaria, Maluk, Hatus, 3 Sekania, Rehum, Meremot, 4 Ido, Ginethon, Abhija, 5 Mijamin (Miniamin), Moadia, Bilga, 6 Semaia, Joiarib, Jedaia, 7 Salu, Amok, Hilkia le Jedaia hai an nih. Anni hi Jesua hun laia thiempuhai lukhàitu le an inthloppui hai chu an nih. 8 Levihai chu Jesua, Binui, Kadmiel, Serebia, Juda le lawm thu hrilna inkhawma hla saktuhai inrawitu Matania le a unauhai, 9 Bakbukia le Uni le an unauhai, inkhawmnaa anni epa ngîr hlakhai chu an nih. 10 Jesua chu Joiakim pa a na, Joiakim chu Eliasib pa a na, Eliasib chu Joiada pa a na, 11 Joiada chu Jonathan pa a na, Jonathan chu Jadua pa a nih. 12 Hienghai hi Joiakim dam laia thiempu sûngkuoa lukhàituhai chu an nih: Seraia sûngkuoah Meraia; Jeremia sûngkuoah Hanania; 13 Ezra sûngkuoah Mesulam; Amaria sûngkuoah Jehohanan; 14 Maluk sûngkuoah Jonathan; Sekania (Sebania) sûngkuoah Josefa; 15 Harim sûngkuoah Adna; Meremot (Meraiot) sûngkuoah Helkai; 16 Ido sûngkuoah Zekaria; Ginethon sûngkuoah Mesulam; 17 Abija sûngkuoah Zikri; Miniamin sûngkuoa le Moadia sûngkuoah Piltai; 18 Bilga sûngkuoah Samua; Semaia sûngkuoah Jehonathan; 19 Joiarib sûngkuoah Matenai; Jedaia sûngkuoah Uzi; 20 Salu sûngkuoah Kalai; Amok sûngkuoah Eber; 21 Hilkia sûngkuoah Hasabia; Jedaia sûngkuoah Nethanel hai an nih. 22 Thiempu laltak Eliashib hai, Joiada hai, Johanan hai le Jadua hai hun laia Levihai sûngkuoa lukhàituhai le thiempuhai chu Persia lal Daria inlal laiin fel takin rikawt an siem a. 23 Eliasib tupa Johanan dam lai huna inthok chauin Levi chihai chu an sûngkuoa lukhàituhai hming sui suoka ziek fel a nih. 24 Chu taka chuong Levi sûngkuoa lukhàituhai chu Hasabia hai, Serebia hai, Kadmiel naupa Jesua hai le an unauhai, Pathien mi Davida'n a lo ruot anga lawmthu hril inkhawma a pawl pawl indota tongtai le hla saktu dinga anni rawi epa ngîr hlak hai chu an nih. 25 Kotkhâr vêngtuhai laia kotpui bula rosum siekhawmna pindanhai vêngtu chu Matania hai, Bakbukia hai, Obadia hai, Mesulam hai, Talmon hai le Akub hai an nih. 26 Hienghai po po hi Jozadak naupa Jesua, chu naupa Joiakim hai, ram optu Nehemia hai le thiempu le lekha ziektu Ezra hai hun laia rongbawltuhai chu an nih. 27 Jerusalem kul thar inhlàn nia dârbenthek le perkhuong le tingtang rema lawmthu hrilna le inpâkna hlahai hlim taka saktu dingin a ram sûnga um Levi chia mihai po po chu an incha khawm a. 28 ​Levi chia hla sak mi, Jerusalem le a sèvela umhai le Netofat mihai khuo hrang hranga inthok chun an hung fuon khawm a. 29 A then chu Bet-gilgal le Geba le Azmavet vela inthokin an hung bok a. 30 A hmasa takin thiempuhai le Levihai chu an inhlàn thienghlim hmasa phot a, chu zoah mipuihai le kul kotpuihai le banghai chu an inhlàn thienghlim a. 31 Judai rama thuoituhai chu kul bang chung zawla chun ka thuoi a, inpâkna hla saktu ding pawl hni tam tham tak ve ve ka ruot a. Zâipawl pakhat chu kul bang chung zawla chun sim tieng Hnawlhnok Kotkhârpui tieng an pan a, 32 Hosaia le Judai ram thuoitu a zâtvein an zui a, 33 chuonghai lai chun Azaria hai, Ezra hai, Mesulam hai, 34 Juda hai, Benjamin hai, Semaia hai le Jeremia hai an thang a, 35 tawtawrawt mûttu thiempuhai khom an thang sa bok a. Anni hnunga chun Asaf thlaa mi Zakur, chu naupa Mikaia, chu naupa Matania, chu naupa Semaia, chu naupa Jonathan, chu naupa Zekaria chun a zui a. 36 Chu zoah Zekaria thokpui Semaia hai, Azarel hai, Milalai hai, Gilalai hai, Maai hai, Nethanel hai, Juda hai le Hanani hai chun hnung an dàl a. Lekha ziektu Ezra-in hma a thuoi a, Pathien mi Davidan rimawi hmangruo a lo ruot ang char chu an tum a. 37 Tuikul Kotkhârpuia inthok chun Davida khawpui tieng kailawnah an pan tung a, Davida in chu an fe khêl a, sak tienga Tuikul Kotkhârpuia chun an fe kuol a. 38 Anni intuokpui dingin zâipawl pahnina chu hmar tieng pangah an fe kuol a, kei le mipui a zâtvein kan zui a, kul bang chung zawlah Thuk Insâng fe thlengin Bang Sei chung zawl kan hraw a, 39 khawpui hlui kotsuoa Efraim Kotkhârpui chung zawlah, chu zoah Nga Kotkhârpui chung zawlah fein, Hananel Insâng fe pelin Za Insâng tieng kan pan a, fepeiin Beram Kotkhârpui kan pèl a, Kotkhâr vêngtuhai kotpui chen kan fe a. 40 Inpâkna hla saktu zaipawl pahnihai chun Pathien Tempul an pan a, an hmun dinga ruota chun an ngìr a, kei le roreltu a zâtve chun kan zui lût a. 41 Tawtawrawt chawi thiempu Eliakim hai, Maaseia hai, Miniamin hai, Mikaia hai, Elioenei hai, Zekaria hai le Hanania hai le 42 hla saktu Maaseia hai, Semaia hai, Eleazar hai, Uzi hai, Jehohanan hai, Malkija hai, Elam hai le Ezer hai khom chu an lût a, zâipawl thuoitu Jezrahia inrawina hnuoiah rimawi remin, inring tak le fie takin hlapawl an sak a. 43 Chu ni hlimuma chun inthawina tam tak an inhlàn a, Pathienin hlimna nasa tak a pêk a. Nuhmei le naupanghai khom a lawmnaa chun an thang a, Jerusalema an hlim ri chu hla taka inthok khomin hriet phâk a nih. 44 Chu ni chun thilpêk hai, lo tharsuok hmasa tak hai le sawma pakhat hai siekhawmna pindanhai enkoltu ding an ruot a, anni chun dânin a phût anga chuong thilhai chu loa inthoka thiempuhai le Levihai ta dinga la khawm dingin mawphurna an làk a, Judai ram mi po poin thiempuhai le Levihai rongbawlna chu an hlutpui si a. 45 Davida le a naupa Solomon thupêk angin, hla saktuhai le kotkhâr vêngtuhai khomin Pathien rong an bawl dàn ding le an insukthienghlim dàn ding chu an zawm a. 46 Pathien kuoma lawm thu hrilna le inpâkna hla an sak phaa zâipawl thuoitu an nei hlak chu kha hmaa Davida le Asaf hun lai daia an lo thaw tan tah a nih. 47 Zerubabel dam lai le Nehemia dam lai chen khom hla saktuhai, kotkhâr vêngtuhai le Levihai fâk ding chu mipuiin an hung tumpêk hlak a. Chun, Levihai chun an chana inthokin Aron thlaa mi thiempuhai chanvo ding chu an sie hrangpêk nawk hlak.

Nehemiah 13

1 Chu nia mipui po po hrieta Mosie lekhabu an tiem lai chun, Pathien mihai inkhawmnaah Amon mihai le Moab mihai chu an thang ve hrim hrim ding a ni nawh ti thu a chuong a. 2 Aigupta rama inthoka Israel thlahai an hung khan dawn ding le fâk ding chawia lo hmuok nêkin anni hin tongsie inphurtirtu dingin Balaam an ko a, sienkhom a letlingin Pathienin malsawmnaah a'n changtir lem hlauh a nih. 3 Chuongchun, dàn thu an ngaithlâk zo charin anni pol soptu hnam dang po po chu inkhawmnaa inthok chun an hnot suok ta vong a. 4 Hieng thil hi a tlung hma hin Pathien tempula thil siekhawmna kudàm enkoltu dingin thiempu Eliasib chu an ruot a. Eliasib le Tobia chu sawt tak an lo inpawl ngei ta hlak a. 5 Eliasib chun Tempula Levi hai, hla saktu hai le kotkhâr vêngtu hai chanvo dinga Mosien a lo ruot, thilpêk an hung inhlàn beiphit hai, rimtui hai, bûr le bèl hai, bu sawma pakhat hai, uoiin le hriek thar hai le thiempuhai chanvo dinga thèn thilhlân an hung inhlànhai po po an sie khawmnaa an hmang hlak pindan lien tak el chu Tobia a lo inhluotir a. 6 Chuong hun lai chun Jerusalemah ka um naw a, Babulon lal Artazerzia inlal kum sawmthum le kum hninaah lal kuomah ka kîr nawk a, a hnungah Jerusalema kîr nawk phalna ka hni chu a mi phalpêk a. 7 Jerusalem tieng ka hang kîr nawk chun Eliasib-in Pathien in pindan pakhata Tobia a lo inumtir chu ka hriet ve chauh a nih. 8 Ka lung a sen hle a, Tobia thuomhnaw po po chu a pindana inthok chun ka dêng suok a. 9 Chu pindan chu inthien fai dingin thu ka pêk a, Pathien Tempula bûr le bèlhai chu beiphit le rimtui thilhlânhai chu sie kîr nawk dingin thu ka pêk a. 10 Chun, Levihai chanpuola ruot thilpêkhai chu an pêk that naw leiin rongbawlna tienga mawphurtu zaipawlhai le Levi chia mihai chu mani in le lo tieng seng an kîr nawk deu vong tah ti ka hriet bok a. 11 Tempul an ngaisak naw leiin rorêltuhai chu ka hal a, Levi chihai le zâipawlhai chu Tempulah ka ko kîr a, an sin seng an thaw tan nawk ta a. 12 Juda mihai po po chun an bu hai, an uoiin thar hai le an hriek hai sawma pakhat chu tempulah an hung chawi nawk ta a. 13 Tempul kudàm enkoltu dingin thiempu Selemia hai, lekha ziektu Zadok hai le Levi chi Pedaia hai chu ka ruot a. Anni thangpuitu dingin Zakur naupa Hanan, Matania tupa chu ka ruot sa bok a. Hienghai hi mi ringuma inthang an na, an sinthaw ding chu an unauhai kuoma thil inruol taka sem a nih. 14 Aw ka Pathien, hi ka thilthaw thathai lei hin mi hre zing la, ka Pathien in ta dinga indik taka ka thawhai hi mi theinghilpêk naw rawh. 15 Sabat voi khat chu Judai rama mihaiin grèp sawrna khura grèp an chìl lai ka hmu a. A thenin buphal an hung chawi a, inphurtir dinga sabengtung chunga an siem lai dâm ka hmu bok a. Jerusalema zor dingin uoiin dâm, grep dâm, theichang dâm le an tharsuok chi hrang hrang dâm chu an hung phur a. Sabat nia thil an zor lei chun ka zil tawl a. 16 Tura khuoa inthoka zor ding nga le thuomhnaw hung tol pawl khom ka hmu a. Chuonghai chun Judai ram khaw hrang hrang chu hril lo, Jerusalema chen khom Sabat niin an hung zor hlak a nih. 17 Chuongchun, Juda hotuhai chu khakin, "Ieng leia hienga Sabat in sukporche am a na? 18 In pi le puhaiin hieng thil hi an lo thaw hlak leia Pathienin eini chunga le ei khawpui chunga buoina a hung intlungtir hi in la dit tawk naw am a ni? Hienga Sabat in sukporche hin Pathien lungsenna chu Israel mipuihai chungah nasa nawk zuolin in chok tho a nih" tiin ka zil tawl a. 19 Chuongchun, Zirtawp zân tieng Sabat intan an thim chara inthoka Inrinni zân tienga Sabat tawp chenin Jerusalem kul kotpui po po khâr vong dingin thu ka pêk a. Sabat niin thuomhnaw ieng khom Jerusalemah an hung phur lût nawna dingin kotpui tin chu ka mihai ka'n vêngtir a. 20 Voi khat voi hni chu Jerusalem velah thuomhnaw phurtuhai chu an hung inkul a. 21 Sienkhom an thaw indik nawzie inhriettirin, "Ieng dinga kul bulah in hung zân riek am a na? In thaw nawk vai chun in chungah kut kan thlâk ding a nih" tiin ka vau tawl a. Chu taka inthok chun Sabat ni hrim hrimin an hung nawk ta ngai nawh. 22 Levihai chu inser thieng a, Sabat thienghlimna vong dinga kul kotpuihai chu vêng tlat dingin thu ka pêk a. Aw ka Pathien, hi chungthua khom hin mi hre zing la, i hmangaina nasa tak zârin ka chunga hin zangaina inlangtir rawh. 23 Chuong hun lai bok chun Asdod nunghàk hai, Amon nunghàk hai le Moab nunghàk hai chu Juda mi tam takin nuhmeiah an nei ti ka hmu suok a. 24 ​An nauhai a zâtve chun Juda tong thiem loin Asdod tong an naw leh chuong laia hnam danghai tong chu an hmang lem a. 25 Anni chu ka khak tawl a, tongsie ka'n phur a, a then ka vuok a, an baksamah ka thâm a, an naunuhai in chuonghai naupahai chu pasala inneitir lo ding le an naupahai khomin chuonghai naunuhai chu inneitir lo dingin Pathien hming sâlin thu ka'n khàmtir tawl a. 26 Chun, an kuomah, "Israel lal Solomon ngei khom kha hieng anga innei pol thil lei hin thil suol a thaw a ni naw am a ni? Ama tluk hrim hnam danghai lai lal an um nawh. Pathienin a hmangai a, Israelhai chungah lalah a sie a ni kha. Sienkhom ama meu khom kha hnam dang nuhmeihaiin suolah an thuoi lût a nih. 27 Chuong ang chun nangni khomin thil rilo râpthlâk thaw vein, Pathien chungah ringum loin, ram dang mi nuhmeiah in nei ve ding am a ni?" ka ta. 28 Thiempu lal Eliasib naupa Joiada nauhai laia pakhat chun Bet Horon mi Sanbalat naunu chu nuhmeiah a nei a, chuleiin Jerusalema inthokin ka hnot suok a. 29 Aw ka Pathien, hieng mihai hin thiempu an nina leia an ngîrhmun chel chu an sukporche a, thiempuhai le Levi chihai le in thuthlung an bawsiet tawl dàn hi hre zing rawh. 30 Chuong ang chun hnam dang mihai le an inpolsopna po po lakah ka'n thien thienghlim tawl a, thiempuhai le Levi chihai chu an sin ding seng le an rongbawl dàn ding seng ka ruotpêk a. 31 A hun taka maichâma hmang ding thing an hung pêk ngei dàn ding le thiempuhaiin thlai thar hmasa tak an lâk khawm hun dinghai khom chu ka ruotpêk vong a. Aw ka Pathien, a tha tiengin mi hre zing rawh.

Esther 1

1 India rama inthoka Ethiopia chen inkàr biel za le sawmhni le pasari chunga Lal Zarziaa inlal lai chun hi thil hi a hung tlung a. 2 Chuong lai chun Susa khawpuia a kula inthokin a lalram chu a op a. 3 A hung inlala inthoka kum thumnaa chun lal nauhai le thoktu poimawhai ta dingin ruoi a buotsai a, Media le Persia rama sipai ofisar lien po po le biel tina mi lienhai le thoktu poimawhai chu a fiel kim vong a. 4 A hausakzie le a lalram ropuizie chu inentirin, thla ruk sûng zet chu chong an chèn a. 5 Ruoi tumtiek zo chun Susaa a lal in huon kotzawla chun a siehlawhai le thoktuhai, a chîn taka inthoka a lien tak chen ta dingin kâr khat sûng ruoipui lal chun a buotsai nawk a. 6 Kotzawl chu pat zâi inhmia mawi taka khawng puon vâr le dumpawlin a chei a, chuonghai chu sailungvâr bana a kei bàtna ding tangkaruo kuol an hlinga chun puon vâr le senduk hruiin an khai a. A tuolzawl tuonga chun sailungvâr sen le vâr inpol dâm, tuikeplung le lung man tam chi dâm a pha a, chu chunga chun rangkachak le tangkaruoa siem thungna dûp an rem khup a. 7 Chi hrang hranga siem rangkachak no mawi tak takin lal uoiin chu lal thupêk angin ren dêr loin an sem a. 8 Tu khom pe lui loa mi tin mani du ang tawk senga tam indawntir dingin uoiin semtuhai chu lalin a hril a. 9 Lalnu Vashti khomin Lal Zarzia ina chun nuhmeihai ta dingin ruoi a thè ve a. 10 A ni sari nia Lal Zarzia-in uoiin a'n rui deu hnung chun a rongbawltu mi tilre pasari Mehuman hai, Biztha hai, Harbona hai, Bigtha hai, Abagtha hai, Zethar hai le Karkas hai chu a ko a. 11 Lalnu Vashti hmèl thatzie chu a mi lienhai inhmutir a nuom leiin, a lallukhum khuma a hmaa hung thuoi dingin anni rawi chu a tir a, lalnu hmêl chu a tha hle si a. 12 A mi tirhai chun lal thupêk chu an va hril a, sienkhom Lalnu Vashti chu a fe nuom naw a, lal chu namen loin a lungsen a. 13 Lal chun a thaw dàn pangngaiin mi var, a hun laia thil chinchang le dàn hre mihai chu rawn dingin a ko khawm a. 14 Chuonghai chu Persia le Media ram sûnga a mi lien pasari Karsena hai, Sethar hai, Admatha hai, Tarsis hai, Meres hai, Marsena hai le Memukan hai an na, lal inhnaipui le a mi rawn takhai an nih. 15 Lal chun, "Pindan vêngtu mi tilrehai tira a dàn ang taka lalin hung dinga a kona chu lalnu Vashtiin a zawm naw leiin, dàn angin a chungah iem ei thaw ding a na?" tiin a'n don a. 16 Memukan chun lal le a mi lienhai kuomah, "Lalnu Vashti hin lal chunga chauh poi a tawk naw a, a ram pumpuia mi lien po po le Lal Zarzia khuo le tuihai po po poi khom a tawk a nih. 17 Lalnu Vashti thilthaw hi a rama nuhmei po poin hung hrieng an ta, 'Lal Zarzia-in a kuoma hung dingin Lalnu Vashti thu a pêka chu a fe nuom nawh' tiin hril sup sup an ta, an pasalhai hmusit phànain hmang an tih. 18 Voisuna Persia le Media rama mi lien nuhmei hunghai ngei khom hin, 'Lal Zarzia-in a nuhmei lalnu Vashti chu hung dingin thu a pêk a, sienkhom a hungpêk nuom nawh' ti an hriet charin ama thaw dàn zuiin an pasalhai hmusit tum vêng an ta, a ram pumah inzanawna le inhalnan chin tawk nei naw nih. 19 Chuleiin, lal remti zawng a ni chun, lalnu Vashti chu lal hmaa inlang thei ta lo dingin thupêk, sût nawk thei ta lo, Persia le Media ram dàn hmangin insuo sien ti hi kan thurawn pêk nuom chu a nih. Chun, lalin ama aiin a nêka tha lem lalnuah sie sien la. 20 A ram pumah lal thusuok puong dar a ni pha chun nuhmei tu khomin, a chin taka inthoka a lien tak chenin, an pasalhai thu hung poisa tâng an tih" a ta. 21 Chu thurawn chun lal le a mi lienhai chu a suklawm hle a, Memukan hril ang takin lal chun a thaw a. 22 A lalram sûng po po le biel tinah, a mi chênghai tong le hawrop chita ziekin, pasalin mani insûng sengah thu an nei ding a nih ti lal thupêk chu an thon dar ta chum chum a.

Esther 2

1 Lal lungsen a hung re hnung chun Vashti thilthaw le a chungthua thupêk a'n suo chu a ngaituo neu neu a. 2 Lal siehlaw, a rongbawltuhai chun a kuomah, "Lal ta dingin nunghàk thienglâm le hmèl tha zong kan tih. 3 Biel tina inthoka hung zongtu ding lalin mi ruot sien la, nunghàk hmèl thahai chu Susa khawpuia lal hmeihai siekhawmnaah hung thuoi hai sien, nuhmeihai enkoltu mi tilre Hegai hnuoiah sie ni hai sien, an intuoinâmna ding seng pêk ni raw hai se. 4 Chu zoah lal suklawmtu tak nunghàk chu Vashti aia lalnu ni raw se" an ta. An thurawn chu lal remti zawng tak a na, chuong ang chun a thaw ta nghal a. 5 Susaa lal umna kul sûnga chun Juda mi pakhat, a hming Mordekai a um a, ama chu Benjamin hnama mi Jaira naupa a na, Jaira pa chu Simei a na, Simei pa chu Kisa a nih. 6 Anni sûngkuo chu Babulon lal Nebukadnezzarin sala Juda lal Jekonia a thuoi ruola Jerusalema inthoka sala a thuoi sa ve an nih. 7 Mordekai chun a pate naunu, nunghàk nal le hmèl tha tak el, a hming Hadasa, Esther tia an ko bok chu a umpui a, a nu le pa an thi hnunga a naunu anga a lâk le a keitlei a nih. 8 Lal thuruot ang chun, Esther khom nunghàk tam tak lai Susaa lal hmeihai sie khawmnaa chun nuhmeihai vêngtu mi tilre Hegai enkolna hnuoia um dingin an thuoi ve a. 9 Hegai chun Esther chu fel a ti hle a, ditsak takin a enkol a, fâk ding tha bîk le intuoi namna dinghai chu a pêk nghal a, a rongbawltu dingin lal ina inthokin siehlaw nunghàk pasari a pêk bok a, lal hmeihai umnaa hmun tha taka chun a sie a. 10 Mordekaiin hril lo dinga a'n fùi leiin Esther chun a chi le hnam nina chu tu khom a hril nawh. 11 Esther chu ieng am a chang ti hre dingin ni tin lal hmeihai umna tuolzawla chun Mordekai chu a fe hlak a. 12 Lal Zarzia kuoma nunghàk tu khom thuoi a ni hmain thla sawm le thla hni sûng an chei nam hlak a, thla ruk sûng mura hriekin an zût a, thla ruk dang sûng rimtui le hriek tha chi hrang hrangin an zût nawk a. 13 Lal kuoma an fe ve hun a hung tlung pha, lal hmeihai umnaa inthoka lal ina hawn dinga an dit le an hni taphot chu an pêk hlak a. 14 Zâna chun lal pindanah an thuoi a, a zîngah mi tilre dang Saasgaz vêngna hnuoia um lal nuhmeihai umnaa chun an sie hlak a. Lal suklawmtu le lalin an hming lama a ko nawkhai chauh naw chu lal kuomah kîr nawk ta loin chu taka chun an dam sûngin an um ta hlak a nih. 15 Mordekai pate Abihail naunu, Mordekaiin a naunu dinga a umpui Esther chu lal kuoma a fe ve hun a hung tlung chun, lal hmeihai vêngtu mi tilre Hegaiin a tihai chauh naw chu thil dang ieng khom a thaw nawh. Esther chu a hmu taphot lung tlùk zawng mi a tling a. 16 Chuongchun, Tebet thla, thla sawmna,b Lal Zarzia inlala inthoka kum sarinaa chun Esther chu lal kuoma chun an thuoi a. 17 Nuhmei dang po po nêkin lal chun a hmangai a, nunghàk thienglãm dang po po nêkin a ditsak a, lallukhum a'n khumtir a, Vashti aiin lalnuah a siem ta a. 18 Lal chun a mi lienhai le thoktuhai ta dingin Esther hmingin ruoi ropui tak a the a, a ram pumah umni a'n khâmtir a, lal thaw dàn ding ang hrimin inphal takin a thilhai a sem a. 19 Nunghàk thienglãmhai an ko khawm voi hninaa chun Mordekai chu lal kota chun a'n thung a. 20 Esther chun ama keitleitu Mordekai thu a zawm hlak ang khan a la zawm zing a, a chi le hnam nina chu tu khom a la hril nawh. 21 Chun, lal kot bula Mordekai a'n thung lai chun lal pindan vêngtu laia mi pahnih, Bigthan le Teres hai chu Lal Zarzia chungah an lung a sen a, that tumin an phier rûk a. 22 Chu thu chu Mordekaiin a lo hriet rûk a, Esther a hril a, Esther chun Mordekai hmingin lal kuomah a hril a. 23 Chu thu an hang sui chieng chun thudik ngei a nih ti an hmu suok a, an pahni chun an khai hlum a. Chuong thuhai po po chu lal kuoma um lal chanchin ziekna buah a chuong.

Esther 3

1 Chuong thil hnunga chun Lal Zarzia chun Agag mi, Hamedatha naupa Haman chu a'n kaisângtir a, mi lienhai po po nêka insângah a hlângkai a. 2 Lal thupêk angin, lal ina thoktuhai po po chun Haman chu inzain, kûnin chibai an bùk hlak a. Nisienlakhom, Mordekai chun a hmaah kûnin chibai a bûk nuom nawh. 3 Lal ina thoktuhai po po chun Mordekai kuomah, "Ieng leia lal thupêk i bawsiet am a na?" tiin an indon a. 4 Chuong anga ni tina an hril khom chun a la zawm chuong naw rop leiin Mordekai um dàn chu a ngaimaw le ngaimaw naw fiena dingin Haman chu an hril a, chun Juda mi a ni thu an kuoma Modekaiin a hril khom chu an hril sa bok a. 5 Mordekaiin kûna chibai a bûk nuom naw thu Hamanin a hriet chun a lung a'n ling a. 6 Mordekai chung chauha kut hang thlâk chu hun tawkin a hriet naw a, Juda mi a ni thu an hril bok leiin Lal Zarzia lalram sûnga Juda um po pohai chu sukchimit vong dàn ding a zong a. 7 Lal Zarzia inlala inthoka kum sawm le kum hnina, thla khatna, Nishan thlac chun chèt hun ding ni le thla remchang dapin, aienna dingin thum an vawr an vawr a, thla sawm le thla hnina, Adard thla ni sawm le ni thumah a tla a. 8 Chuongchun, Haman chun Lal Zarzia kuomah, "I ram sûnga biel hrang hranga um dar hnam thenkhat an um a, an dânhai chu hnam danghai dàn leh an inang naw a, lal dân khom an zawm nuom bok naw a, chuong ang mihai inumtir zing chu lal ta dinga thil tha ni naw nih. 9 Lalin rem a ti chun chuong mihai chu sukhlum vong dingin thu insuo sien la, chu thil thawna ding chun lal sum sienaah tangkaruo kilogram nuoithum le sîngli hung pêng ka tih" a ta. 10 Lal chun a suoi namna kutsebi chu a phawi a, Judahai hmelma Agag mi, Hamedatha naupa Haman chu a pêk a. 11 Lal chun Haman kuomah, "Tangka chu nangman kol la, sienkhom chuong mihai chu i nuom ang angin thaw rawh" a ta. 12 Haman chun thla khatna ni sawm le ni thumahe lal lekha ziektuhai chu a ko a, a ram pumpuia biel tin optuhai le anni hnuoia thoktu le rorêltuhai po po kuoma puong dingin, biel tin tong le hawropin Lal Zarzia thusuok chu a'n ziektir a, lal kutsebi chun suoi a nam vong a. 13 Chuongchun, biel tinah mi an intlàntir a, lekha chu an thon dar chum chum a. Chu lekhaa chun Juda mi taphot, upa le naupang, nuhmei le nunauhai khom hlà nei dêr lova thla sawm le pahnina, Adar thla ni sawm le ni thum niaf suom a, that a, ni khat thil thua sukchimit vong ding le Judahai thil neihai po po rok ding ti thu chu a chuong a. 14 A ni tiem nia mihaiin an thaw ding seng thaw thei dinga an inpuocha theina dingin lal thusuok chu hmun tina hnam tin kuomah a kawpi sem dar ding ti a ni bok a. 15 Lal thupêk angin, a'n rang thei ang taka thusuok chu puong dar dingin tlangvàl ngal hrâthai chu an intlântir a, Susaa lal umna kula chun an puong bok a. Chu zoah lal le Haman chu zu dawn dingin an inthung a, Susa khawpui ruok chu namên loin a chi-ai a.

Esther 4

1 Mordekaiin chuong thilhai po po a hriet chun a puon a pot thlêr a, saiip a sil a, pilvut a'n bur khum a, inring tak le lung na taka tapin kotthlèr a fang a. 2 Saiip sil puma lal tuol inhuonna sung lût chu phal a ni si naw leiin a kot bul chen chun a fe a. 3 Lal thupêk a tlungna taphotah Judahai chu lungngaiin an kûr a, bu ngheiin an tap inrûm a, a thenin saiip an sil a, pilvut lai an intàl a. 4 Mordekai chanchin chu a siehlaw nunghàkhai le pindan vêngtu mi tilrehai chun Esther chu an hril a, nasa takin a lungngai a. A saiip sil lai chu hlippêk a, thuomhnaw inhâktir dingin silfên leh mi a tir a, sienkhom a lo lâk nuom naw a. 5 Chu phing leh Esther chun lal pindan vêngtu pakhat, ama vêngtu dinga ruot, mi tilre Hathak chu a ko a, ieng leia lungngai am a na ti thil chinchang indon chieng dingin Mordekai kuoma chun a tir a. 6 Lal in kot tuolzawl lien taka chun Hathak chun Modekai chu a va hmu a. 7 Mordekai chun a chunga thil tlunghai le Judahai po po suksietna dinga Hamanin lal sum ina tangkaruo pêk a tiem zâthai khom chu a hril vong a. 8 Esther inentir dingin, Susaa an puong dar Judahai sukchimit vongna dinga lal thusuok kawpi chu Mordekai chun a lo pêk a; chun, a kuomah thil chinchang hril fie ding le a mihai ta dinga zàngàina hnipêk dinga lal kuoma fe dinga Esther chu ngen dingin thu a'n cha bok a. 9 Hathak chun Modekai thu inchahai chu Esther kuomah a hril vong a. 10 Esther chun Mordekai kuoma hril ding thu a lo incha a: 11 "Lalin a ko ni loa lal pindan rila nuhmei amanih pasal amanih mi tu khom an lût chun that an ni ngei ding a nih ti dàn um chu biel tina ram optuhai le mipuihai hriet seng a nih. Lalin a rangkachak hmol anni tienga a lekhai ruok chu sukhlum an ni naw chauh a nih. Lalin a mi kona kha ni sawmthum zet a ni tah" tiin. 12 Esther thucha chu Mordekai kuomah an va hril a. 13 Mordekai chun Esther kuomah mi a tir nawk nghal a, "Lal inah i um lei elin Juda mihai po po pumpel thei lo chu pumpel thei bîk dingin inring naw rawh. 14 Hieng ang huna hin i to zing a ni chun, Judahai himna le sansuokna chu hmun danga inthokin a hung a ni khomin, nang le i pa sûnghai chu bohmang tho an tih. Lalnu ngîrhmun i lo chel hi hieng huna ding hin a ni naw am a ni?" tiin thu a'n cha a. 15 Esther chun Mordekai kuomah mi a tir nawk a, 16 "Fe la, Susaa Judahai po po ko khawm la, ka ta dingin bu lo nghei unla, ni thum le zân thum sûng chu sûn le zân ieng khom fain dawn naw unla, kei le ka nunghàkhai khomin lo nghei vêng kan tih. Chuong anga ei thaw hnung chun, dânin phal naw sienkhom lal kuomah lût ka ta, ka bohmang leh ka bohmang ni raw se" tiin thu an cha a. 17 Mordekai chu a fe a, Esther thu incha ang tak chun iengkim a thaw a.

Esther 5

1 Ni thum hnunga chun Esther chun lalnu thuom inbelin lal inthungna pindan kotkhâr zawna um lal in sûnga chun a lût a, lal chu a lalthungphaah kotkhâr tieng nghain a'n thung a. 2 Lal pindan tuol sûnga lalnu Esther ngîr lai chu a hmu a, a, a lawm lût a, ama tieng chun a rangkachak hmol chu a lek a, Esther chun a va hnai a, a hmor chu a tawk a. 3 Lal chun Esther kuomah, "Lalnu Esther, ieng am i dit a? Ka ram zâtve hiel khom pêng ka ti che" a ta. 4 Esther chun, "Lalin tha a ti zawng a ni chun, voisuna lal ta dinga ruoi ka buotsai hi kîl dingin lal le Haman mi hungpêk hràm raw hai se" a ta. 5 Lal chun a siehlawhai kuomah, "Esther fielna ang chun Haman chu ruoi kîl dingin hang ko vat ro" a ta. Chuongchun, lal le Haman chu Esther ruoi buotsai chu kîl dingin an fe a. 6 Uoiin an dawn lai chun lalin Esther kuomah, "Iem a na i thil hni chu le? Pêk ni ngei i tih. Ka ram zâtve hiel khom pêk nîng i tih" a ta. 7 Esther chun, "Hi hi lungril taka ka hni chu a nih: 8 lalin ditsak tlâkah a mi ngai a, ka thil hni chu lalin pêk a remti zawng a ni chun, lal le Haman ta dinga zînga ruoi ka buotsai chu mi hung kìl pêk nawk hrâm raw hai se. Chu pha chun lal thil mi'n don chu iengkim hril ka tih" a ta. 9 Chu ni chun Haman chu hlim takin a suok a. Sienkhom, lal in kota ngîr khom ngîr ve lo le che chàng loa lo inthung Mordekai a hmu chun a lung a chok a. 10 Amiruokchu, Haman chu a'n sùm hràm hrâm a, in tieng a'n lawi a, a ruolhai le a nuhmei Zeres chu a'n kotir nghal a. 11 Haman chun a hausakzie hai, nau a hauzie hai, lalin chawimawina a pêkzie hai le a hnuoia thoktuhai po po chunga a'n kaisângtirzie hai chu uong takin a hril tawl a. 12 Hril zom peiin, "Chu chauh chu an le! Lalnu Estherin lal ta dinga ruoi a buotsai kîl dinga mi dang a fiel sa chu keima chauh ka nih. Zînga khom hin lal leh ruoi kil dingin a mi fiel nawk a nih. 13 Nisienlakhom, lal in kota inthung, Juda pa Mordekai saw ka hmu sûng chun hieng thil po po hin a mi suklungawi zo nawh" a ta. 14 A nuhmei Zeres le a ruolhai po po chun a kuomah, "Chuong a ni leh khâihlumna ding meter sawmhni pahni le a chenvea insâng siem la, zîngah zîng tieng lal kuomah Mordekai chu inkhâihlumtir dingin va hni rawh. Chu hnungah zânbu kîl dingin lal leh fe la, hlim takin um rawh," an ta. An thil rot chun Haman chu a suklawm a, khâihlumna ding chu a'n siemtir ta a.

Esther 6

1 Chu zân chun lal chu a in thei naw leiin lal chanchin ziekna bu hung la dingin thu a pêk a, a hmaa chun an tiem a. 2 Kotkhâr vêngtu pahnih, Bigthana le Teres haiin Lal Zarzia that tuma an phier thu Mordekaiin lal kuoma a'n hriettir thu chu an hang hmu suok a. 3 Lal chun, "Hi thil lei hin Mordekaiin chawimawina le kaisângna ieng am a dong a?" a ta, lal rongbawltuhai chun, "Ieng khom thawpêk a ni nawh" an ta. 4 Lal chun, "Tu am a na, kot puoa um saw?" a ta. Chuong lai tak chun Haman chu khâihlumna a siema Mordekai khai hlum phalna chu lal hni dinga a pindan kota hung a nih. 5 A siehlawhai chun, "Kot puoa ngîr saw Haman a nih" an ta, lal chun "Hung inlûttir ro" a ta. 6 Haman a hung lût chun lalin, "Lalin chawimawi a nuom mi chu ieng am thawpêk inla tha'ng a ta?" a ta. Haman chun, "Keima nêka lalin a chawimawi nuom chu tu am an um ding a na?" a ti lungril a. 7 Chuongchun, lal kuomah, "Lalin a chawimawi nuom chu hieng ang hin thaw sien a tha ka ring: 8 lal inbel hlak lal thuom hai, a chuongna hlak sakor hai, lalin a khum hlak lallukhum hai hung lapêk hai sien, 9 lalin a chawimawi nuom inthuomna ding lal silfên le sakor chu lal hnuoia mi lienhai laia a lu lok tak kuomah inhlân ni sien, chawimawi ding chu inthuomtirin, sakor chungah inchuongtir sien, sakor chu keiin kotthlêr fangpui sien, 'Lalin a chawimawi nuom chunga chun hieng ang hin thaw a ni hlak'tiin puong pei raw se" a ta. 10 Lal chun Haman kuomah, "I hril ang chun lal puon le sakor chu va la vat la, lal in lûtna kot bula inthung, Juda mi Mordekai chunga chun va thaw rawh. I hrilhai po po kha thaw thelh nei dêr naw rawh" a ta. 11 Chuongchun, Haman chun lal puon chu a lâk a, sakor chu a kei a, Mordekai chu a'n thuomtir a, sakor chungah a'n chuongtir a, khawpui kotthlêra chun a hmaa fein sakor chu a kei a, "Lalin a chawimawi nuom chunga chun hieng ang hin thaw a ni hlak" tiin a puong pei a. 12 Chu hnunga chun Mordekai chu lal in kota chun a hung kîr nawk a, Haman ruok chu hmaimawk taka lu inkhumin, inhmaw takin a in tieng a'n lawi ve thung a. 13 Hamanin a nuhmei le a ruolhai kuomah a thil tuok a hril chun, "Sukhmaimawk tuma i bei Mordekai hi Juda mi a ni tlat a, i phierna hi hlawtling ngai naw ti nih. I kal zing chun sietpui i tih" an ta. 14 Chuonga an la tong zing lai chun lal pindan vêngtu mi tilrehai chu an hung tlung a, lalnu buotsai ruoi kîl dingin Haman chu an thuoi ta nghal a.

Esther 7

1 Chuongchun, lal le Haman chu Lalnu Esther ruoi buotsai chu kîl dingin an fe a. 2 Ni hninaa uoiin an dawn lai chun lalin Esther kuomah, "Lalnu Esther, iem a na i dit chu? Pêk ni ngei i tih. Ram zâtve hiel khom pêk nîng i tih" a ti nawk a. 3 Esther chun, "Lal mit ka tlung a, lal remti zawng a ni chun, ka hringna le ka mihai hringna mi hlàpêk hràm dingin ka hni che a nih. 4 Kei le ka chipuihai chu that a, suom a, sukbohmang vong dinga zor hmang kan ni ta a. A nuhmei a pasalin bawia zor hmang vong ding ti ringot ni inlang chu, lal meu hang sukbuoina tham a tling naw leiin, ieng khom hril naw ning" a ta. 5 Lal Zarzia chun, "Chuong ang thil chu tuin am a thaw ding a na? Chuong ang thil thaw ngamtu chu khaw lai mi am a na?" a ta. 6 Esther chun, "Mi dotu le hmèlmatu chu hi mi rilo Haman hi a nih" a ta. Chuongchun, lalnu le lalpa hmaa chun Haman chu tiin a hmèl a dâng a. 7 A uoiin dawn lai chu mâksanin lal chu lungsen takin a tho a, lal huonah a lût a. Haman chun a chungah lalin thil tha lo thaw a tum nia a hriet leiin lalnu Esther kuoma chun a hringna hlàpêk dingin a ngên a. 8 Huona inthoka ruoi kîlna pindana lal a hung kîr lai chun Haman beidong chu Esther inthungna thungpha chunga chun a tlu a. "Hi lal ina ka bula lalnu a um lai zing khom hin suol lui a tum a ni hiel awm de!" a ti nghur a. Chuonga lal a tong phing leh Haman hmai chu an inkhum a. 9 Lal pindan vêngtu mi tilrehai laia pakhat, lal rongbawltu Harbona chun, "Ngai ta u, lal ta dinga thu tha hriltu Mordekai khàihlumna dingin Hamanin a inah meter sawmhni pahni le a chenvea insâng inkhàihlumna a siem sa diem a um" a ta. Lal chun, "Chu taka chun ama hi khai hlum ro" a ta. 10 Chuongchun, Mordekai khàihlumna dinga a buotsaia chun Haman chu an khai hlum a, lal lungsen chu a hung dei ta a.

Esther 8

1 Chu ni chun Judahai hmèlma Haman in chu Lal Zarzia chun lalnu Esther a pêk a. Chun, Mordekai chu lal hmaah a hung a, Esther chun sûng khat an ni thu chu a lo hril ta a. 2 Lal chun Haman kuta inthoka a lâkpêk, lal suoi namna kutsebi chu a phawi a, Mordekai a pêk a. Esther chun Mordekai chu Haman in le lo chunga hotuah a sie a. 3 Chun, Esther chu mitthli tla puma lal ke bula bokin, Judahai laka thil tha lo Agag mi Hamanin a lo remruot chu sukbo dingin lal kuoma chun a ngên a. 4 Lal chun a rangkachak hmol chu Esther tieng chun a lek phei a, Esther chu a tho a, lal hmaa chun a ngîr a. 5 Lal kuoma chun, "Lalin tha a ti zawng a ni a, a mit ka tlung a, ka chungah a lung a awi chun, Agag mi Hamedatha naupa Haman remruota Judahai suksietna dinga lekha, lal rama biel po poa thon dara um chu thaw ta lo dinga hrilna lekha ziek ni thei sien ti ka ngèn a nih. 6 Ka chipuihai chunga sietna hung tlung ka hmu chu iengtin am tuor zo lul ka ta? Ka sûngkuohai sukmanga an um chu iengtin am ka tuor zo ding?" a ta. 7 Lal Zarzia chun Lalnu Esther le Juda mi Mordekai kuomah, "Hamanin Judahai chungah kut a thlâk leiin Haman in le lo chu Esther kuomah ka pêk a, ama khom ka'n khàihlumtir ta a. 8 Judahai kuoma lal hminga thon ding i dit dàn ang takin ziek la, lal suoi namin char rawh. Lal hminga ziek le lal kutsebia suoi nam le char ta chu sukdanglam thei a ni nawh" a ta. 9 Chuongchun, chu ni lâ là, thla thumna, Sivan thla, ni sawmhni le pathumnaa chun lal lekha ziektuhai chu Mordekai chun a ko a, a thupêk ang chun Judahai kuoma dâm, hotuhai kuoma dâm, India rama inthoka Ethiopia ram chena biel hrang hrang za le sawmhni le pasaria ram optuhai le mi lienhai kuoma thon ding ram bung tina chênghai tong le hawropin lekha an buotsai a. 10 Chu lekha chu Lal Zarzia hminga ziek a ni a, lal kutsebi suoi an nam a, lekha chu sakor an inphurtir a, ama vai ngat sakor lien le hrât chi chunga chuongin an tlànpui a. 11 Chu lekhaa chun lal chun khaw tina um Juda mihai chu pungkhawma lo invêng him dingin a ti a. Khaw lai rama mi khom anni bei dinga hung inthok taphot chu lo bei lèt a, nu le nauhai khom suom a, an thil neihai rok a phalpêk a. 12 Lal Zarzia lalrama ram bung po po sûngah chu thupêk chu Judahai that ni dinga ruot, thla sawm le thla hnina, Adar thla, ni sawm le ni thumna nia hmang ding a nih. 13 Chu nia hmèlmahai chunga phuba an lâk theina dinga inpei sa diema Judahai chu an lo um theina dingin ram bung tina chun thon dar a, mi po po kuoma puong dinga ti a nih. 14 Chuongchun, lal thupêk angin, lal dâk thaktuhai chun lal sakor lien le hrât chiah chuongin inhmaw takin an tlànpui a. Susa kul sûnga khom lal thupêk chu an puong dar a. 15 Mordekai chun lal thuom, a dumpawl le a vâr inbelin, rangkachak lallukhum ropui tak a khum a, pat zâi inhmia khawng korfuol senduk hâkin lal ina inthok chun a hung suok a, Susa khawpuia mihai chun hlim takin lawmna an siem a. 16 Judahai ta ding chun hlimna le lawmna ni, chawimawia an um ni, ni hlimum a nih. 17 Lal thupêk a tlungna ram bung le khawpuia um Juda mi taphot chun hlim takin lawmna ruoi an the a, umni an khâm a. Chuong ramhaia mi tam tak chu Juda-ah an inlet pha a, Judahai tìna chun a man tawl si a.

Esther 9

1 Judahai chunga lal thupêkhai sukpuitling ni dinga ruot, thla sawm le thla hnina, Adar thla, ni sawm le ni thumna ni chu a hung tlung a. Chu ni chun an hmèlmahaiin Judahai chu rawt chimit vong an inbeisei a, sienkhom a letling daiin thil a hung inher ta lem a. 2 Lal Zarzia ram bung hrang hranga chêng Judahai chu anni chunga kut thlâk theitu laka invêng him dingin khawpuia hai chun an tlân khawm a, tu khom a ngam an um naw a, mi po poin an tì ta lem a. 3 Ram bung tina mi lien hai, ram optu hai le thoktuhai chun Mordekai chu an ti leiin Judahai chu an thangpui a. 4 Mordekai chu lal ina chun ngîrhmun insâng taka hlângkai a ni leiin ram bung tinah a hming a'n thang a, a hung ropui ta deu deu a. 5 Ni ruot ni a hung tlung chun Judahai chu an nuom ang angin an che a, an hmèlmahai chu kawlhnâmin an sàm a, an that a, an sukbohmang a. 6 Susa kul sûnga ringot khom mi zanga an that a. 7 Anni hmèlmatu an thathai lai chun Parsandatha hai, Dalfon hai, Aspatha hai, 8 Poratha hai, Adalia hai, Aridatha hai, 9 Parmasta hai, Arisai hai, Aridai hai, Vaizatha hai le 10 Hamedatha naupa Haman naupahai sawm an thang sa a, sienkhom râllâk sum ruok chu an lâk nawh. 11 Chu ni zân tieng chun Susa kul sûnga mi an that zât chu lal kuomah an hril a. 12 Lal chun Lalnu Esther a ko a, "Judahaiin Susa kula ringot khom mi zanga an that a, Haman naupahai sawm an that vong bok a. Hi hmuna hman chuong ang a ni chun, ram bung hrang hranga lem chu an chêt nasat dàn ding chu hril loa hmâng a nih. Tu hin dit dang i nei chun mi hni rawh, pêng ka ti che. I hni taphot chu pêk nîng a tih" a ta. 13 Esther chun, "Lalin rem a ti chun, Susaa Judahai hin voi suna ang bok hin a zîngah la thaw hai sien la, Haman naupa sawmhai ruong chu khàihlumnaa chun khài kàng ni sien" a ta. 14 Lal chun chuong ang taka thaw dingin thupêk a'n suo a, Haman naupa sawmhai chu an khài kàng a. 15 Chun, Adar thla ni sawm le ni lia chun Susaa Judahai chu an pung khawm nawk a, an hmèlmahai mi zathum an that bel a, râllâk sum ruok chu an lâk nawh. 16 A ram sûnga Judahai po po khom chu an pung khawm a, insanhim dingin thang an khaw a, an hmèlmahai chu mi sîngsari le sângnga an that a, sienkhom râllâk sum ruok chu an lâk nawh. 17 Chuong ang chun a ram pumpuiah Adar thla ni sawm le ni thuma chun an thaw a, a zinga chun hnèna lawmin hlim takin ruoi an the a. 18 Susaa mihai ruok chun a ni hninaa chun an hmèlmahai chu an la that a, a ni thumnaa chun an chawl a, lawmna ruoi an siem a. 19 Chu lei chun, thingtlâng khuoa um Judahai chun hi ni hni sûng hin hlim taka ruoi thein umni an khâm a, fâk ding inpêk tonna niah an hung hmang ta pei a nih. 20 Chuong ang thil tlunghai chu Mordekai chun a ziek thlâk a, Lal Zarzia lalram bung tina a hla le hnaia um Juda mihai kuoma chun a thon dar a, 21 hi ni hnihai hi kum tina inser hlak dingin thu a'n cha a. 22 Hieng ni hnihai hi an hmèlmahai laka râlmuonga an hung um tàk ni, an lungngaina chu lawmnaah inchang a, an tapna chu innuinaa a hung inchang ni a ni leiin, hlim taka ruoihai the a, mi retheihai kuoma thilpêk nia hmang dingin thu a pèk a nih. 23 Chuongchun, an lo thaw tan tah ang le Mordekaiin lekhathona a hril ang chun kum tina inser zom pei dingin Judahai chun an remti a. 24 Judahai hmèlma Agag mi Hamedatha naupa Haman chun Judahai chu a sukbohmang hun ding ni le thla remchàng zongin thum a vawr a, chu thum vawra aisan chu 'purim' an tih. 25 Amiruokchu, a thil phierrûk chu lalin a hung hriet phing leh lal chun thupêk letling insuoin, Judahai chunga a thil phierrûk chu Haman chungah a'n tlâktir a, ama le a nauhai chu thingah an khài ta lem a. 26 An chunga thil tlung lei le Mordekai lekha insuo lei chun chu kût chu Purim, Aien Kût an hung ti tah a nih. 27 Anni le an thlahai pei khomin, Mordekai lekha insuo angin, hi ni hnihai hi kum tin a ram pumah umni khâma a hun taka mathei loa inser zie dingin Judahai chun an intiem a. 28 A ram sûng biel tin le khaw tina sûngkuo tinin hi ni hi hre zinga inserin, an thlahai le an suon la hung um peihai kuoma khom an inhlàn sawng pei ding a nih. Hieng nihai hi tawp loin Judahaiin an inser ding a na, an thlahai khomin hieng nia an chunga thil tlunghai chu an theinghil ngai ding a ni nawh. 29 Chuongchun, Abihail naunu Lalnu Esther le Juda mi Mordekai hai inkop chun lekha an thon bok a, chu taka chun Lalnu Esther-in Aien Kût hmang dàn ding thua Mordekai thupêk chu a namnghet a. 30 Chu bâka chun, Lal Zarzia lalram ram bung za le sawmhni le pasaria Juda mi chênghai po po kuomah him tak le thlamuong taka an um an ditpuina thu lekha an thon bok a. 31 Hieng lekhahai hin Juda mi Mordekai le Lalnu Esther thupêk anga kum tina a hun taka Aien Kût chu hmang ding a ni thu a namnghet a. Mipuiin anni ta ding le an thlahai ta dinga bu ngheia sunna ni an lo ruot ang bokin hi kût hi inser dinga mipuiin an lo ruot a nih. 32 Aien Kût hmang dàn ding chungchâng thu chu Esther thupêk insuoin a namnghet a, chu chu lekhabua ziek a nih.

Esther 10

1 Lal Zarzia chun a lalram pumpuia mihai le tuifinriet kama umhai khom sie a'n chawitir a. 2 A thilthawtheizie le a thilthaw ropuihai po po le Mordekai ropuizie chu kimchang takin Media le Persia lalhai inlal lai chanchin inziekna lekhabuah a chuong. 3 Juda mi Mordekai chu Lal Zarzia dottu a na, Judahai laia an mi ngaisàng, a chipuihai ta dinga thil tha thawtu le a hnam chanpuihai po po thatna ding hrilpui hlaktu a nih.

Job 1

1 Uz ramah mi pakhat a hming Joba a um a. Ama chu dem kai lo, mi indik famkim, Pathien ti mi le thil suol laka inthier fihlîm mi a nih. 2 Naupa pasari le naunu pathum a nei a. 3 Beram sângsari, sanghawngsei sângthum, bawngchal tuok zanga, sabengtung zanga le siehlaw tam tak a nei a, khawsak ram tienga mihai lai chu a neinung tak a nih. 4 A naupahai chun an pieng champhaah ruoi an thè hlak a, an farnuhai an fiel a, fain an dawn tlàng hlak a. 5 A chângin an ruoi thè chun ni iemani zàt a aw hlak a, a tumtiek pha leh Joba chun, "Ka nauhai hin thil suol thawin Pathien lo hril se pal hlauh rawi an tih" a ta, zîng inhma takin a tho a, an rêngin a ko khawm a, inthienna dingin an hming kipin pumraw inthawina a'n hlàn a, chu chu dàna neiin a thaw ngèi ngéi hlak. 6 Ni khat chu Pathien hmaah vântirkohaia an hung inlang a, anni lai chun Setan khom a hung thang ve a. 7 LALPA chun Setan kuomah, "Khaw tienga inthoka hung am i na?" a ta. Setan chun, "Suk le tunga ka'n vàk vèlna hnuoia inthokin" a ta. 8 LALPA chun Setan kuomah, "Ka siehlaw Joba hi i thlíthlài hlak am? Ama anga dem kai lo, indik famkim, Pathien tî mi le suol laka inthier fihlîm hi hnuoi chungah tu khom an um nawh" a ta. 9 Setan chun LALPA kuomah, "Ni e, Joba chun a san boa Pathien a tì ni lo a! 10 Ama le a sûngkuo le a thil neihai po po kil tinah nangin i huol himpèk a ni naw am a ni? A kut sinthaw mal i sawm a, a ram phêkah a beram le bawng ruolhai i sukpung a. 11 Tu hin a chungah kut inletin, a nei po po chungah i kut thlâk ta ngat la chu, hmâi sanah hril se ngèi ngéi a ti che" a ta. 12 LALPA chun Setan kuomah, "Chuong a ni leh hang fie hrim ta la. A nei po po chungah i nuom ang angin thaw la, ama tak ruok chu tawk poi naw rawh" a ta. Chuongchun, Setan chu Pathien kuoma inthok chun a suok ta a. 13 Ni khat chu Joba nauhaiin an upa tak inah ruoi an kîl a, fain an dawn tlàng a. 14 Chuong lai chun Joba inah zuolko a hung a, "I bawngchal ruolin lo kei a, a bulah i sabengtung ruol an tlat laiin, 15 Sabe mihaiin an mi hung rùn a, ranhai an lâk vong a, i siehlawhai khom an that a, keima chauh hi hung hril thei dinga tlân suok um sun chu ka nih" a ta. 16 A hril lai zing chun zuolko dang a hung tlung ve a, "Vàna inthokin Pathien mei a hung tla a, i beram ruol le berampuhai a kàng hlum vong a, keima chauh hi hung hril thei dinga tlân suok um sun chu ka nih" a hung ti nawk a. 17 A hril lâi zing chun zuolko pathumna chu a hung tlung a, "Mi rok pawl Kaldai mi pawl thum an hung a, i sanghawngseihai an lâk vong a, i siehlawhai an that a, keima chauh hi hung hril thei dinga tlân suok um sun chu ka nih" a ti a. 18 A hril lai zing chun zuolko dang a hung tlung a, "I naupahai le naunuhaiin an upa tak inah faa an dawn laiin, 19 thlalèra inthokin thlipui hrât takin sîr tinah an umna in chu a hung nuoi a, in chu a chim a, i nauhai a del hlum vong a, keima chauh hi hung hril thei dinga tlân suok um sun chu ka nih" a hung ti bok a. 20 Chuongchun, Joba chu a tho a, a puon a pot thlèr a, a lu a vaw kol a, Pathien hmaah hnuoiah a bokkhup a. 21 Joba chun, "Ka nu sûla inthokin, Saruokin ka hung pieng a, Saruok boka kîr ding ka nih; LALPAN iengkim a mi pèk a, LALPAN a lak nawk vong a, A hming chu inpâkin um raw se"a ta. 22 Chuong thil po poa chun Joba chun Pathien a mawsiet naw a, thil suol a thaw bok nawh.

Job 2

1 Ni khat dang chu Pathien hmaah vântirkohai an hung inlang nawk a, Setan khom chu LALPA hmaa inlang dingin anni lai chun a hung ve a. 2 LALPA chun Setan kuomah, "Khaw tienga inthoka hung am i na?" a ta. Setan chun, "Suk le tunga ka'n vàk vèlna hnuoia inthokin" a ta. 3 LALPA chun Setan kuomah, "Ka siehlaw Joba hi i thlithlâi hlak am? Ama anga dem kai lo, indik famkim, Pathien tî mi le suol laka inthier fihlîm hi hnuoi chungah tu khom an um nawh. A san boa suksie a, ka laka hel dinga i cho phawk hnung khomin a ringumna a la vong tlat a nih" a ta. 4 Setan chun, " 'Vun aia vun' ti a ni hlak rêng annawm. Mi tu khomin hringna ta ding chun nei po po khom pe phal ngèi naw ni hai! 5 Tu hin a chungah i kut thlâk la, a taksa le rù le chânghai ngei hang tawkpêk ngat rawh, i hmâisanah hril se nghàl a ti che" a ta. 6 LALPA chun Setan kuomah, "Chuong an leh, a tha, ama chu i kutah ka pêk che. A hringna ruok chu hlà rawh" a ta. 7 Chuongchun, Setan chu LALPA kuoma inthokin a suok a, Joba chu a lua inthoka a kepha chenin pânsie na takin a'n bawmtir a. 8 A pang huotna dingin bêl koi hàr a lâk a, vut lai a thung a. 9 A nuhmei chun a kuomah, "I ringumna chu chel tlat i la tum a ni? Pathien hril se la, thi law law la a ni el annawm" a ta. 10 Sienkhom, Joba chun a kuomah, "Nanga nu hi nuhmei intlaw, Pathien inzàna hrim nei lo tongin i tong a ni hi tie! Pathiena inthokin thil tha ei hmu ang bokin thil tha lo khom ei hmu sà ve naw ding am a ni? " a ta. Hieng po poa hin Joba chun thu indik lo a hril nawh. 11 Joba chunga thil tha lo a tlung thu a ruolhai Teman mi Elifaz hai, Suha mi Bildad hai le Naamat mi Zofar haiin an lo hriet chun tuorpui ding le thlamuong dingin an in senga inthokin a ruolin an hung pan khawm a. 12 Ràla inthoka an hei hmu chun Joba a nih ti khom an hriet el thei ta naw a. Inring takin an tap a, an puonhai an pot thlèr a, an luah pilvut an phul a. 13 A natna chu a'n rim èma an hriet leiin, to tokin ni sari le zân sari hnuoia chun an inthungpui a.

Job 3

1 Chu hnunga chun Joba chun a bàu a phong a, a piengna ni chu tongsie a'n phur a. 2 Joba chun hieng hin a hril a: 3 "Ka piengna ni chun tongsie phur raw se, 'Naupasal a pieng ie!' an ti zàn chun. 4 Chu ni chu thimah inchang sien, Chung Pathien khomin hre fu naw sien, Thimin bawm khum tlat raw se. 5 Thim le thina hlimin chang hai sien, Sûm inthimin bawm khum tlat sien, A var chu chìm nel zing raw se. 6 Chu zân chu thài hmangin um sien, Ni le thla le kum tiemnaa khom, Chuong ta hrim hrim naw raw se. 7 Chu zân chu inrieng song sien, Hlimna ri hrim hre ta naw raw se. 8 Tongsie inphur thiema mi hril, Leviathan khom chok tho thiemha'n, Chu nî chu tongsie inphur raw hai se. 9 A sikhawvar chu inthimpêk sien, Var chu nghâk thlawn dèr hai sien, Ni êng hrim hmu naw raw hai se. 10 Ka nu sûl mi lo khàrpèk lo a, Hieng ang buoina tuok dinga, A mi lo inpiengtir leiin, Chu zân chun tongsie phur raw se. 11 Sûla inthoka ka suok ni khan, Ieng leia ka lo hlamzui naw'm a na? 12 Ka nu'n mal chungah mi chawi a, Ieng leia nenetuia a mi chawm am? 13 Ka pieng khan lo hlamzui lang, Inin chawl hadam tâng ka tih. 14 Hnuoi lalhai le an khawnbawlhai, Hmun indin tlu ram hnunga chun, Zäl hmun rem tlâng tâng kan tih, 15 A nih, mi lien le lal hausahai, Rangkachak le tangkaruo a, An lal in sung siptuhai le chun. 16 Ieng leia ni êng hmu hman lo, Hlamzuia thi tahai ang el a, Phùm hmanga ka lo um naw? 17 Thlàna chun mi rilohaiin, Buoina an siem tah ngai naw a, Chàuhai an chawl hàdam tah. 18 Tânghai khom chawl hàdamin, Vêngtuhai vauh khawng rihai, Hriet ding hrim a um ta nawh. 19 Chu chun mi chîn mi lienhai, An rêngin an zàl tlàng a, Siehlawhai khom an pu lakah, An zalen fihlìm ta si. 20 "Ieng leia rinum tuor kuomah, Var pèka an um am a na?Ieng leia lungril beidong kuomah, Hringna pèka an um am a na? 21 Thi châka thi thei si lo, Ro phùm rûk nèka nasaa, Thìna daptuhai kuomah? 22 Thlan muol an liem ni khuoa Hlim le lawma siphai kuomah? 23 Pathienin an lampui hrukpêk a, Dâi a'n huon khumhai kuomah? 24 "Bu hrim hrim fa thei loin, Tapin ka'n hniek hlop hlop a, Ka beidong inrûm ri khom, Tui angin a'n baw hok hok. 25 Ka thil tuok inlâu rop chu, Ka chungah a hung tlung a, Ka thil pangzat rop hlak chun, A mi hung nangchìng ta si. 26 Hàdamna ka nei naw a, Ka um tok tok thei naw a, Chawl damna hrim hmu loin, Buoinain a mi nang vèl. "

Job 4

1 Chuongchun, Teman mi Elifaz 2 "I kuomah bàu khat hril lang, Mi ngâithlapèk pei i tim?Tu'm insûmin to zing thei an ta? 3 Mi tam tak i zirtir tah hlakzie, Kut zoihai i sukhràt hlakzie dâm kha, Hang ngaituo kîr hràm raw khai. 4 I bàu suokin tlu tahai i tungding a, Khûp zoihai i sukhràt hlak kha. 5 Tu hin buoinan a nang che a, I bei i sukdong nghàl a; A hang tlàk buok meu che chun, I chî-âi el ta si hi. 6 Pathien tì chu i'n nghatna tak, Nun ngîl hraw chu i beisei san, A ni lem naw ding am a ni? 7 "Hang inngaituo vang vang la, Poi tawk lo tu'm an bohmang hlak?Khaw lai am mi ngîlhai chu, Sàt thlâkin an um hlak a? 8 Ka hmu dàn chu hieng hi a nih:Suolna leilet inlettu le, Buoina chî tùtuhai chun, An tù râ charh an sìk hlak. 9 Pathien thuokin a mût hmang a, A lungsenin a kàng hmang hlak. 10 Sakeibaknei chu inrûmin, Inhûk dum dum hlak sien khom, A hä tlam hun a hung tlung hlak. 11 Sakeibaknei hrât tak el khom, Sè ding invaiin a boral a, A te thruoihai an indar hlak. 12 "A rûktein ka naa hin, Thuin a mi biekrûk a, 13 Zàn reah mihai in innghil lai, Zàn mang an intuo laiin, 14 Titna le inthinin a mi man a, Ka rù le châng a'n thin hlop hlop. 15 Ka hmaah thlarâuin a mi pèl a, Ka hmulthi an ding uoi uoi a. 16 Chuongchun ngîrin a chawl a, A hmêl awm ka siem thei naw a, Ka hmaah ruongthla chu a ngîr a, Rawl damte'n a mi biek a: 17 Hringmi lai hin Pathien nêka, Indik le ngîl an um thei am?Hringmi lai hin Siemtu nêkaThienghlim lem an um thei am? 18 A vàntirkohai hman ring lo a, Thaw suola intum lemtu chun, 19 Pil ina chêng mihriem lem chu, A va ring zo naw zuol awm de!Pilvut thuta innghat el a ni a, Bangthak nèka ongrop a nih. 20 Zîng le zàn kâr a boral a, Tú khaw ngaisak hlaw loin, Kumkhuoin a thâm ral a, 21 A puon in hrui sùt a ni pha, Var chuong loin a thi hlak.

Job 5

1 "I nuom leh hang ko hrim ta la, Tu'n am a don hrim ding che?Tu mi thienghlim kuom tieng am, I ngha hrim hrim ding a na? 2 Invêt chu lungsen zingin a thi a, Mi mawl khom thìk nei zingin a thi. 3 Invêt zung kei ka hmu ta a, Sienkhom hun sawtnawteah, A in chu tongse phurin a um si. 4 A nauhai an him naw a, Kul tuolah an chìl hlum a. Santu tu khom an nei nawh. 5 Hling le buor kâra a làk, Bu thar a hlù lùthai khom, Phingtâmha'n an fàk zo a, A hausaknahai khom chu, Dangchârhan an tlàn lem hlak. 6 Tuorna hi pila inthoka Hung to suok a ni naw a, Buoina khom hnuoia inthoka, Hung inder suok a ni nawh. 7 Mei sì a fe tung angin, Mihriem hi buoi dinga pieng a nih. 8 "I ngîrhmuna um ni lang, Kei chun Pathien zong ka ta, Ka chungthu khom a kuomah, Inkoltir lem dai ka tih. 9 Thil mak sui suok ruol lo le Tiem sèng ruol lo a thaw a. 10 Hnuoiah ruo a'n sùrtir a, Lohai tuiin a chawm a. 11 Mi hnuoihnunghai dom sangin, Lusûnhai hmun himah a sie kai. 12 Mi vervêkhai thil tum chu, A'n hlawsamtir hlak si a. 13 Vervêk dawha a man nghal a, An thil phier a suktlol vat hlak. 14 Sùn lai thimin a nang tawl a, Sùn changah an zàn inmai hlak. 15 Kawlhnâma an that el ding, Retheihai chu san suokin, Mi hrâthai kuta inthokin, Anni chu a pot thlàk a, 16 Beiseina a pêk tawl a, Rorêlna indik naw chun, A bàu a phong ngam ta nawh. 17 "LALPA zilna hlaw mi chu, Mi hamtha a va ni ngei!Iengkimthawthei thununna hi, Ngainêp ngai hrim hrim naw rawh. 18 A vuok sil leh a tuompèk a, A sukhliem leh a thawi dam hlak. 19 Sietna thuo ruka inthok khom, Ama chun a san suok hlak a, Thuo sari khom lo ni sien la, Suksiet ni ngai nawng i tih. 20 Tàm tlàkin thi nawng i ta, Indo pha kawlhnâm lakah, Aman san suok a ti che. 21 Hrilsietna kawlhnâm lakah, Aman humhim a ti che a, Sietna a hung tlung chàng khom, Tì ding hrim nei naw ti nih. 22 Sietna le tàmna hai chu, Nangin nuisan lem i ta, Hnuoia ram sakolhai khom, Tì ding hrim nei naw ti nih. 23 Lo le rama lunghai chenin, Inthuruolpui tàng i ta, Ram hnuoia sakolhai leh, Inremin um tàng in tih. 24 I puon in himzie hai dàm, Chu chun hung hre tâng i ta, I thil nei i tiem phâ khom, A kim lo hrim um naw nih. 25 I thlàhai tamzie ding khom, Chu chun hung hre tâng i ta, Hlobet ang hiela tamin, An hung pung ding a ni si. 26 A huna bu an sìk angin, Kum tling damin thlàn pan i tih. 27 Hi thu hi kan sui chìk ta a, A'n dik ngèizie khom kan hriet a, Ngâithla la, i nunah hmang rawh. "Joba donna

Job 6

1 Chuongchun, Joba chun hieng hin a don a: 2 "Ka lungzîngna le siettuokhai hi, Phahlaa bùk thei ni sien chu aw! 3 Tuipuia tieu nêkin rik lem a tih. Chuleiin ka tong hi a bùl a nih. 4 Iengkimthawthei thalhai chu, Ka sûnga hin an inbùr a, A tûr chun ka thlarau a fang a, Pathien tîbaiumnan a mi'n huol. 5 Ram sabengtung hlo pet lai, A'n hràm ngai hlak am a ni?Bawngchal khom bupawl chungah, A'n bu ngai hlak am a ni? 6 Hàngna nei lo thil fàk ding, Chi boin an fàk hlak maw?Artui vâra hin hàngna, A um hrim hrim am a ni? 7 Ka enin ka phingtàm a sukbo a, Ka ngaituon ka luok a suksuok. 8 "Aw, ka dit ang hni thei ni lang, Pathienin ka tî tak mi pe sien chu: 9 Pathienin mi rawt nawi sien, A kut hlângin mi sât nawi raw se. 10 Chuong ang khom chu lo ni sien la, Natna rè lo tuor zing lang khom, Inhnèmna ding ka nei tlat si:Mi Thienghlim thuhai hrim hrim, Pakhat khom ka'n phatsan nawh. 11 "Beiseina leh tuor thleng pei di'n, Hràtna ka nei hrim am a ni?Teirei taka tuor thleng dingin, Beisei ding ka neia maw? 12 Lung anga chang le sakhat, Hràtna ka nei hrim am a ni?Ka taksa hi dâr tum am a ni? 13 Hlawtlingna i mi làkpèk a, Mani hang inthangpui dingin, Theina ieng khom ka nei ta nawh. 14 "Chàua tlep tah ruolhai chu, Thangpui hlak a ni ngai a, Sienkhom Iengkimthawthei khom ti loin, Thiem naw in mi'n changtir a. 15 Vadungte hung lien thut a, A kuong luong liem ang el hin, Ka unauhai chu in um si a- 16 Vûr khal zopin vadungte kuong, Dum kula a hnaw liem ang hin. 17 Sienkhom thâl hun a tlung pha, Vadung chu a kang chat a, Thâl rumah a'n hil rawt hlak. 18 Sumdawnghan tui zong dingin, Vadung chu an pètsan a, Thlalèrah an thi zo a. 19 Tema le Seba a'nthoka hung, Sumdawnghai khomin tui chu, Beiseiin an hung pan a, 20 Tui hrim a hmu naw leiin, An beisei a tawp dêr a. 21 Chuong ang char chu in ni ve-Ka siet tuok in hung hmu a, Pangzat cheiin in mi chei hi. 22 Ieng tik am nangni kuomah, Thilpêk ka hni hlak hrim a?Ka ta dingin sum le pai, Sèng di'n ka hni hlak cheu maw? 23 Hmêlma laka mi san dingin, Ka hni hlak rêng rêng cheu maw?Tawrothai laka mi'n tlan dingin, Ka ngèn hlak cheu am a ni? 24 "Mi hril unla, chun to ka tih; Ka suksuolna mi kawkhmu ro. 25 Thudik chun a dèng na hle a, In thu chun kawk a nei nawh. 26 Ka beidong khèk in ngàithà chun, In thu hi pom tlâk a ni ding maw? 27 Fahrahai chunga chen khom, Sumdawngnan thum in vawr a, Ruolhai khom sumdawngnaa, Zor hmang hlaktuhai in ni kha. 28 Tu hin mi hang en hrim ta u, In hmaah khêl hril naw ning. 29 Nangnin thiem chang lo anga, In mi ngai hi bànsan unla, Hlei nei takin um ta naw ro. 30 Ka hmûrah ritlona hrim, A kai ti in hriet hlaka maw?Ka bàuin suol le thahai, Thlier thei lo dingin in ring maw?"

Job 7

1 "Hnuoi mihriemhai hin harsatna, Tawn ding an nei zing an naw maw?An ni tin chu inhlawfa ang elin, An hmang liem hlak an naw maw? 2 Deihlim ngai saltàng ang le, Hlaw lâk nghâkhla inhlawfa angin, 3 Tlâktlàina hrim nei dêr loin, Thla tam ka hmang ral ta a, Ka chan chu zàn rinum chauh a nih. 4 Zànah ka hang zâl pha leh, "Ieng tik am ka tho ding maw!" ka ta, Zàn khuo a sawt thei êm êm a, Khaw var zakin ka'n let ka'n let a. 5 Ka pang inlungin, hnâiin a sip a, A hung inhil a, a puok koi nawk hlak. 6 "Puonkhawngtu khawthei nêkin, Ka nihai hi an liem inrang lem a, Beisei boin a tawp nawk hlak. 7 Aw Pathien, ka hringnun hi, Thuok chauh a nih ti hre zing la, Ka mitin hlim ni hmu ta naw nih. 8 Tuta mi hmutu mit hin, Mi hmu zing ta naw ni a, I mit ka chungah a fûk laiin, Lo liem hmang dai tàng ka tih. 9 Sûm inkienga a thâm ral angin, Thlàna liem hnung an kìr ngai nawh. 10 An inah an kìr ta ngai naw a, An hmun khomin a hriet zing nawh. 11 "Chuleiin, ka bàu hi khâr naw ning: Lung na takin hril pei ka ta, Ka thlâ hi nuor ngawi ngawi a tih. 12 Kei hi Tuipui am ka ni, Kei hi Rulpui am ka ni, Hienga mi enthlatu i sie zing hi? 13 "Ka khumah zâl hâdam ka ta, Ka rinumn tuor po pohai hi, Ka in pha theinghil ka tih"Tia ka'n ngaituo laiin, 14 Nangin ka mang i suksiet a, Inlàrna thuin i mi'n thi a. 15 Hi taksa ina chêng zing nèk hin, Rèk hluma um ka thlang ta lem. 16 Ka nun ka tirdak put put a, Dam zing khom ka nuom ta nawh. Hun tawite ka la nei sùng hin, Mala um di'n mi fèsan rawh. 17 "Mihriem hi iem a ni hrim a, A chungah i lungril innghat tlat a, 18 Tûk tin ama chu kan zing a, Ieng lai khoma i fie hlak ni? 19 Ieng leia mi nghatsan lo a, Ka chil lem sûng ringot khom, I mi'n thla naw am a na? 20 Aw nang mihriemhai vèngtu, Ka suol pal a lo ni khomin, Ieng am a na ka thaw suol?Ieng leia i mi thlûr bïk am?Ieng leia i phur rik ka chang? 21 Ieng leia ka bawsietna chu, I ngaidam el naw am a na?Ieng leia ka khawhlona chu, I lâkhmang naw am a na?Pila kîr vak ding ka ni tah, Mi zong lâ khom um ta naw ning. "Bildad donna

Job 8

1 Suha mi Bildad chun hieng hin a dona: 2 "Ieng chen am hieng thu hi i hril ding? I thu hlak thlipui angin a na si. 3 Pathienin ro a rèl suol hlak maw?Iengkimthawtheiin thudik, A hèm kawi hlak hrim am a ni? 4 I nauhai a chungah an suol leiin, A hremna chu a'n tuortir el a nih. 5 Sienkhom Pathien chu zong a, Iengkimthawthei chu hni a, 6 Thienghlim le ngîla i um chun, I ta dingin hung tho suok a ta, I nìnaah tungding nawk a ti che. 7 Mawl taka intan ni la khom, I tawpna tieng hmûingìl a tih. 8 Thang hluihai kha indon la, An pipu tonhriet chu ngaiven rawh. 9 Zani ela pieng ei ni leiin, Thil ieng khom hriet ei nei naw a, Hnuoia ei um sùng hlak hi, Hlimthla ang chauh a ni si. 10 An hriethai hril an ti che a, Pipu varna thu zirtir an ti che. 11 Dûma naw phairuong a to hlak maw?Tui hulnaah phaiphêng a tha hlak maw? 12 An pâr zing lai, sàt hun hmain, Hlo dang rop hma'n an tlep thla hlak. 13 Pathien theinghiltu lampui chu, Chuong ang chu a ni vong a, Pathien nei lo beiseina chu, Chuong ang chun bohmang a tih. 14 A'n nghatna chu a derdêp a, A ringsan chu aium rîl ang a nih. 15 Aium rîl chu a'n nghài a, Nisienlakhom a'n tan nghàl a, A'n tùl a, a dawl zo si nawh. 16 Ni hmu le tui dong tha thing, Huona zung inzâm dar angin, Mi rilo chu a'n thang hlut a, 17 Lung hmuna hai a'n zàm dar a, Lung kuo kara hai a'n zàm lût a. 18 Sienkhom, a bul phawi a ni pha, A mawngna hmun ngei chun hnawlin, "Ka hmu ngai naw che" a ti el hlak. 19 Chu chu a tawpna chu a na, A hmunah a dang an hung to hlak. 20 "Pathien chun dem kai lohai, Tu khom a hnawl ngai naw a, Thil suol thawtuhai kut khom, A sukhràt ngai hrim hrim nawh. 21 I bàu chu innuinain, I hmùr chu hlimna hlain, La sung sip nawk ngèi a tih. 22 Nangma theidatuhai chu, Muolphona insiltir a ta, Mi suol puon in ngîr ta naw nih. "

Job 9

1 Chu zoah Joba chun hieng hin a don a: 2 "Ni e, chu chu a'n dik ti ka hriet. Sienkhom, Pathien hmaah hringmi, Tu am mi fel an um thei ding? 3 Ama sêl nuom khom ni sien, Voi sângah voi khat chauh khom, A don thei teuh awm si nawh. 4 A var dàn a chungchuong a, A tha hràtna a khawkhêng a, Tu am beia ngam ta hlak um? 5 An hriet loa tlânghai sonin, A lungsenin a thâi let a. 6 Hnuoi thutah a sawi hnìng a, A banhai an inhnìng dur dur. 7 Nisa kuomah thu a pêk a, Var hrim a'n suo ngam naw a, Arasi var a khârkhip vong. 8 Mäkhâtin vàn a kei phar a, Tuifawn chunga hai a lawn a. 9 Zângkhuo, sizucho le sirukhai, Sim tienga arasi bawrhai khom, Ama siem vong an ni si. 10 A thilthaw ropuizie chu, Sui phâk ruol a ni naw a, Thil mak a thaw rawnzie khom, Inchik sèng ruol a ni nawh. 11 Ngai ta, ka hmaah a mi pèl a, Sienkhom ka lo hmu naw a, A fé pei a, ka hriet si nawh. 12 A lâk a, tu am khap thei ding?A thaw san tu'm indon ngam ding? 13 "Pathien chun a lungsenna, A lâk kìr naw ding a nih; Rahabb le a thangpuituhai khom, A kein a sir sop tawl a ni kha. 14 Kei telul hin iengtin am, Ama chu don lèt thei ka ta?Ieng thuin am ka sêl thei ding? 15 Indik lang khom don naw ning, A zàngàina chauh hni lem ka tih. 16 Ka ko hung a ni khomin, Ka thu a làk ka ring chuong nawh. 17 Thlipui hmangin a mi nuoi a, San boin ka hliemna a belsa a. 18 Thuok ka làk a phal naw a, Rinumnain a mi sung sip a. 19 Thaa inbei ding ni sien, Ama chu hràtna neitu a na, Ro indik rèl tieng ni sienla, Ama chu tu am cho ngam ding? 20 Indik khom lo ni ta rèng lang, Ka bàuin thiem naw mi'n changtir a ta, Dem kai lo ni ta hrim lang khom, Mi riloah mi puong tho a tih. 21 "Dem kàina nei naw lang khom, Keima tieng inngaisak loin, Ka nun hi ka hnuolsuot a. 22 'Dem kâi le kâi lohai khom, Thuhmun vong an nih' ka ti a, A suksiet vé vè tlat bok si a. 23 Poi tawk lo an vuok hlumin, An rinum tuor a nuisaw a. 24 Mi rilo kutah ram a tlu lût a, Rorêltuhai mit a tuompèk si. hu chu ama thaw a ni naw chun, Tu dang thaw am ni tâng a ta? 25 "Ka nihai hi thangko nèkin, An liem inrang lem dai a, Hlim hmêl hmu loin an vuong hmang. 26 Long hrât tak angin an liem a, Mupui thla bir anga hrâtin. 27 "Ka lungninawna theinghilin, Lungngai nêka hlim hmêl putin, Um hrâm ka tih" ka ti châng khom, 28 Ka tuornahan an mi sukti, Mi suolah i mi ngâi si a. 29 Thiem naw chang sa ka ni si chun, Ieng leiin am ka sawl thlawn ding? 30 Vûrin insil fai khom ni lang, Sabonin ka kut sawp lang khom, 31 Chir dûmah mi nam phûm i ta, Ka silfèn chenin mi tirdak a tih. 32 Rorêltu hmaa inkhing dingin, Ama chu mihriem a ni si nawh. 33 Kan inkàrah kut hung rol a, Mi rem theitu ding um hai sien, 34 Ka laka inthokin a hmol, La hmang ding um hai sien chu, Ka thlabârna khom bo a tih. 35 Chu pha chun ama tì loin, Huoi takin tong ve tàng ka tih, Tuhin chu chu ka thaw thei nawh.

Job 10

1 "Ka nun hi ka nghok tah leiin, Ka thla nuor ngawi ngawi pumin, Insûm loin ka hril ding a nih. 2 Hieng hin ka nuor thusim chu, Pathien kuomah intlun ka tih:Thiem naw mi'n changtir el loin, I mi sàlna thu mi hril rawh. 3 Kei hi i kutsuok ni siin, Hmusitin i mi sawr de a, Mi suol remruot lawmpui lem hi, Inhoi i ti zawng a ni maw? 4 Mihriem mit ang hi put vein, An hmu angin i hmu ve am? 5 I ni chu mihriem ni ang, I kum khom anni kum ang, A lo ni ve am a ni? 6 Ka khawhlonahai chu dapin, Ieng leia ka suolnahai chu, Hmu tuma i melkâi zing am? 7 Ka suol nawzie ka hriet chieng a, Sienkhom i kuta inthoka, Mi la suok thei an um si nawh. 8 "I kuta indinin i mi siem a, Tu hin nang hung ngha lètin, I mi suksiet nawk el ding maw? 9 Pila inthokin i mi siem ti, Ieng lai khom theinghil naw rawh. Tuhin nangman pila bok, I mi'n kirtir nawk el ding maw? 10 Sûlah bawngnene angin, Nangin i mi bun thlàk a, Bawngnene khal ang elin, Nangin i mi hmet hlawm a, 11 Vun le taksaa mi tuomin, Rù le thâin i mi phier khawm. 12 Nangin hringna i mi pèk a, Lunginsietnan i mi vur a, I pathienna chun ka thlâ, Vêngin i enkâi zing hlak si. 13 Sienkhom, i lungrila i thup, I tum rûk chu hi hi a nih: 14 Ieng lai khom mi enthlàk a, Ka suol chun ngaidam lo ding. 15 Suol lang ka va dok awm de!Poi ka tawk naw sa hman hin, Ka hmâi khom dâk tha ngam loin, Inzaknan ka sip a ni hi. 16 Lo meng insàng lang lem chu, Keipui angin mi vèng i ta, I hràtnan mi rîkrâp i tih. 17 Ka chungah thu thar i rol pei a, I lungsenna a zuol deu deu a, A honpuiin an mi hung bei a nih. 18 "Ieng leia sûla inthok khan, I mi lo lâk suok hrim am a na?Tu khomin an mi hmu hma khan, Lo thi dai ta lang ni ding bah. 19 Lo pieng naw lang ni ding maw!Sûla inthok khan hlamzuiin, Thlànah lo liem lang ni ta ding! 20 Ka damlai ni hi a liem têp ta a, Tawite bèk ka hàdam theina dingin, Mi'n kiengsan hràm el raw khai, 21 Kîr nawk ta lona hmun thim, Thina deihlim ram ka pan hma hin. 22 Chu ram chu thim sa mup bawm, Buoina inlalna, thina hlim ram, Var khom thima a'n changna ram a nih. "

Job 11

1 Chun, Naamat mi Zofar chun hieng hin a don a: 2 "I thu vuok thlàk zozàihai chu, Don lo le let thlâk lo chî am a ni? 3 I tong tam lei elin mihaiin, Tosan ding chein i ring maw?Khânga mi i hang nuisaw khan, Hal tuok loa suok i'n ring maw? 4 'Ka ring dàn hi a fel fai a, I mithmuah ka thienghlim'Tiin Pathien kuomah i hril a. 5 Pathien chu hung tong suokin, Hung kalin kawk sienla che, Ka va hang ti ngei de aw! 6 A varna thurûk hril a ti che, Varna chun thuo tam a nei si a. Pathienin i suol phua nasain, A la hrem naw chê ti hre rawh. 7 "Pathien inthùkzie i paw zo ding?Iengkimthawthei thaw thei chin, I dap suok zo ding am a ni? 8 Vàn nêka insâng lem a na, Ieng tin am i thaw ta ding?Seol nêka inthûk lem a na, Ieng tin am i hriet phàk ta ding? 9 Hnuoi nêkin a sei lem a, Tuifinriet nêkin a lien lem bok. 10 Tàng inah hung khum sien che, I chungthu rêltu dingin, Rorêltuhai khawm sien la, Tuin am khap thei a ta? 11 Mi hmanglohai a hriet a, Khawhlona a hmu chàngin, A ngaithà ding am a ni? 12 Ram sabengtung hi mihriema A pieng hun a tlung hmâ khat, Mi hmanglo chun hrietthiemna, Nei phâk ngài hrim hrim naw nih. 13 "Sienkhom i lungril pe a, Ama tieng bân i phar chun, 14 I kuta suol chu pei hawn a, I puon ina a chèng i khap chun, 15 Hmai tim loin dâk suok i ta, Ti loin ngîr chang tàng i tih. 16 I buoinahai theinghil i ta, Tui luong ral angin ngai tâng i tih. 17 I nun sùnchang nêkin var a ta, Thim chu vartienah inchang a tih. 18 Beiseinaah i'n nghat ta leiin, I thla khom muong tâng a ta, A nih, hang ngha vêl i ta, Muongleiah chawl tâng i tih. 19 Tu khom ti ding nei ta loin, Zànmu intuo tâng i ta, I dopah mi hung lut tàng an tih. 20 Mi rilohai mit chu invâi a ta, Tlàn suokna lam hmu naw ni a, An nghâk tak chu thi nîng a tih. "

Job 12

1 Joba chun hieng hin a don a: 2 "Var chu in lo var ngei el ie!In thi ruolin in varna bo a tih. 3 Nangni anga var ve ka nih, Nangni nêkin ka nêu bik nawh. Hieng thil hi tu'm hre lo an um? 4 Kei, Pathien koa a donpa hih, Ruolhai nuizatbûr ka chang tah, Kei mi indik le dem kâi lo hih, Nuizatbûr ka lo inchang tah! 5 Mi khawsa thei deu hai chun, Vàngduoihai hi an hmusit a, Sir inphethai chanah an ngai. 6 Suomhmanghai puon in a him a, Mani kuta pathien lem chawitu, Pathien chotuhai khom an him. 7 "Sienkhom, ranhai hi indon unla, Inchûktir thei an ti cheu; Chunglèng vatehai indon unla, Hril thei êm êm an ti cheu; 8 Hnuoi khom hi inbiekpui unla, Inchûktir thei a ti cheu; Tuipuia ngahai indon unla, Puongin hril thei an ti cheu. 9 Hieng po pohai laia hin, LALPA kutin a thaw a nih, Ti hre lo tu'm um an ta? 10 Thilhring tinrêng hringna le Mihriem po po thuok khom hi, A kuta um vong a nih. 11 Nä chun thu a lo hriet fie a, Leiin fàk inhnikna a hriet. 12 Upahaiin varna a kol an naw?Dam sawtin hrietthiemna a'n tlun an naw? 13 Varna indik le thilthawtheina, Remhrietna le hrietthiemnahai, Pathien a inthok vong a nih. 14 A thiek tah indin thei a ni naw a, A khum tah insuo thei a ni nawh. 15 Tui a khâr pha khuo a'n thàl a, A'n suo phâ leh hnuoiah a lêt a. 16 Amaah hràtna le varna a um, Hlèmtu le hlèmhai khom a ta an nih. 17 Remruottuhai varna lapèkin, Rorêltuhai khom a sukvèt hlak. 18 Lalhai hrènchei hlippèkin, Hrènpereng a'n keitir a. 19 Saruoka thiempuhai thuoi hmangin, Mi hlun nghethai a phûr thlùk. 20 Mi rawn kâihai hmùr khârpèkin, Upahai rem hrietna a lâk hmang. 21 Lalhai chu hmusitna bur khumin, Mi hrâthai ràlthuom a lâk hmangpèk. 22 Thim inrilhai chu phor langin, Thim saah var a'n zàm lùttir. 23 Hnamhai suklien le suksein, Sukpungin a sukdar nawk hlak. 24 Ram thuoituhai lungvar la hmangin, Thlalèr lam boah a'n vàkvàitir. 25 Thim hnuoiah an inmai vèl a, Zu rui angin an pêm tlei tluoi. "

Job 13

1 "Ngai ta u, in thil hrilhai po po hi, Mita hmuin nain ka hriet a, A umziehai khom ka hriet thiem. 2 In hriet ang hi ka hriet ve a, Nangni nêkin ka nêu bik nawh. 3 Sienkhom kei ka nuom tak chu, Iengkimthawthei inbiekpui a, Pathien kuoma ka chungthu hril a nih. 4 Nangni chun khêlin in mi chirthe a, Hmangna bo daktor ang in nih. 5 To tok tok ni unla chu, Var in hlaw lem awm vei leh! 6 Ka thu hi lo ngàithla unla, Ka kam suokhai hi bengkhon ro. 7 Pathien âia rilo taka tongin, Thu khêlhlip in hril ding maw? 8 Ama tan zawnga thu hrilin, In hlei neizie in târ lang ding maw? 9 Man suok sien cheu a tha ding maw?Mihriem in hlèm hlak angin, Hlèm ve el thei in inring maw? 10 A rûka hlei in nei khomin, Ama chun kawk a ti cheu. 11 A ropuinan a râp naw ding cheu maw?A tibaiumnan a del naw ding cheu maw? 12 In thusim le thuvarhai hi, Vut lâk voi thuvar ang chauh a na, In thiem thu hril derdèpzie khom, Pil bel anga dawrawm a nih. 13 "Tongna ding mi'n ken unla, A ni ding ang ang ni raw se. 14 Ka taksa hi sè put ka ta, Ka kutah ka nun thâp ka tih. 15 Mi that ding khom ni sienla, Ama chu beisei tlat ka ta, A hmaah ka thiem thu hril ka tih. 16 Hi hin mi san him a tih:Pathien hre mi nawhai chu, A hmaah inlang ngam naw nih. 17 Ka hril hi ngâithla ngun ro, Ka thu hi in naah lût raw se. 18 Hril dingin ka'n buotsai ta a, Thiem chang ka tih ti ka hriet. 19 Tu am mi sêl ding an um a?Ka suolna hril thei an um chun, Thi chenin to song tàng ka tih. 20 "Hi thil pahnihai bèk hi, Aw Pathien mi phalpêk la, I hmêl hmu ngam tàng ka tih: 21 Ka laka inthok hin i kut, Hla takah mi la sonpèk la, I râpumnan mi sukthlabârin, Mi rîkràp ta naw hràm rawh. 22 Chun, mi ko la, don ka che a, An naw leh kei tong ka ta, Nangin mi hung don rawh. 23 Ka bawsiet le ka suol thawhai, Ieng ang hiela tam am a na?Ka bawsietna le suolnahai chu, Nangmain mi'n hriettir rawh. 24 Ieng leiin am i hmêl thup a, Hmêlmaa i mi ngài ding chu? 25 Thli mût lèng hnatawng el hi, I sukthlabâr zing ding maw?Bupawl inlèng ang mei mei hi, I hnot thlûr zing ding am a ni? 26 Ka chung thu na taka ziekin, Ka tleirawl lai suol mi'n phurtirin, 27 Ka keah kol i mi'n buntir a, Ka fena taphotah mi bìthlain, Ka hniekhnung i sui ngat ngat a. 28 Thil hmon angin ka zûr thla a, Hângthîm fâk siet silfèn angin.

Job 14

1 "Nuhmei hring mihriem nun hi, A hang tawi èm ém vei leh, Buoina ngota sip a nih. 2 Pâr ang a hung vul liet a, Sawtnawteah a chuoi a, Hlim intawl zing ang elin, A bo nawk nghal el hlak si. 3 Chuong ang chauh mi chunga chun, I mit infûktir zingin, A chungthu rêlpêk dingin, I hmaah i thuoi ding maw? 4 Tuin am porchea inthok, Thil thienghlim a lâk thei a?Tu khomin a thaw thei nawh. 5 Mihriem damsûng nihai hi, I ruotpèk sá diem a na, A kàn thei chin ding ramri, I khangpèk sá vong a nih. 6 A chawl hàdam theina di'n, Ama chu nghatsan ta rawh, Mi sor lai inhlawfa anga, A hun a tlingtlâk chenin. 7 "Thing chu phûr thlu inla khom, A zung inder thar nawkin, Dawn thar a'n suo thei leiin, Beisei ding a la um a. 8 Hnuoia a zung chu zûrin, A bul chen tawl tah sienkhom, 9 Tui rim a hung hriet charin, Hung inder suok nawk a ta, Dawn tuoi insuo nawk a tih. 10 Mihriem ruok chu a thi pha, Tlawm takin an inzàl a, A hnuk a hung chat charin, Khaw lai am a um ta a? 11 Tuifinrieta inthoka Tui hù a hung suok ang le, Khuo a hung inthàl pha a, Vadung a hung kang ang hin, 12 Mihriemhai chu an zàl a, An hung tho nawk ta si nawh, Vànhai an bo hmâkhat chun, Thang har nawk ta naw ni a, Kei har ni bok naw ni hai. 13 Thlànah mi thup hmang daiin, I lungsen a'n kieng hma po, Mi sie hmang la ka va ti ngei!A hun sùng ding mi ruotpèk la, Chu hun chu a tlingtla pha, Mi hung hre zui nawk chauh rawh. 14 Mihriem hi a thi pha leh, A hring nawk thei am a ni?Ka suok hun a tlung hmâkhat, Inrim takin nghâk fan fan ka tih. 15 Mi hung ko la, don ka ti che, I kut suok hi ngâina tàng i tih. 16 Chu pha chun ka kal chawi tin, Nangin mi tiempêk i ta, Ka suolna hnúhmá ruok chu, Mi suipêk ta nawng i ta, 17 Ka bawsietna po po khom, Ip sûngah mi khârpèkin, Ka suolna hliekhu tâng i tih. 18 "Tlânghai chima an ral angin, Lungpui son hmang an ni angin, 19 Tuiin lung a hrût hek angin, Tui lienin pil a lèn hmang angin, Mihriem beiseina i nuoi bo hlak. 20 Ama chu i hnè kumkhuo a, A hmuna inthokin i sukbo a, A thi phá leh a hmêl puthmang, Sukdanglamin i tir hmang hlak. 21 A nauhai an chawimawi a, Aman a hriet zui ta naw a, Suktlawma an um khomin, A hriet zui chuong ta bok nawh. 22 A taksa nâ chauh a hriet a, Mani chauh insûnin a'n rûm.

Job 15

1 Teman mi Elifaz chun hieng hin a don a: 2 "Mi var chun thu takbo hmangin, Mi a don hlak am a ni?A phìngpui chu sak thli lumin, A hnaw puom hlak am a ni? 3 Tongkam tlâktlài réng rèng lo, Hlutna nei lo thu hmangin, Thu a hril ding am a ni? 4 Pathien tìna hrim i nei naw a, A kuoma inhlàn i nuom dèr nawh. 5 I suolna chun i bàu a mor a, Mi vervêk lei hmangin i tong a. 6 I bâu ngèiin, keima bâu ni loin, Thiem naw a'n changtir che a, I hmûr ngèiin a hêk che a nih. 7 Pieng hmasa taka inngâi i ni? Tlânghai um hmain i pienga maw? 8 Pathien rorêlnaah i thang tah maw? Varna chu pumbil bìka inngâi i ni? 9 Kan hriet bàk iem i hriet bìk? Kan hmu bàk iem i hmu bìk a? 10 Lu-a kèlsam to tah upahai, Kan kuoma hin an um ve a, I pä nèka upa lem dâm an nih. 11 Pathien thlamuongna che le Zainêm taka a tìna che hi, Hun tawk i la ti naw rop a ni? 12 Ieng dinga i lungril ditzawngin, A thuoi hmang che am a na?Iengti leia i mit dàm phiel a, 13 Pathien lakah meng inrum a, Chuong thu dàm chu i hril a na? 14 "Mihriem an inthieng thei maw?Nuhmei hring mihriemhai lai, Mi fel an um theia maw? 15 Pathien chun angelhai khom, Ring tlâkah a ngài naw a, Vàn khom ama mithmuah, Inthieng tawk a ti naw chun, 16 Tirdakum le porchè ta sa, Tui anga suolna dawn hlaktu, Mihriem lem chu ti nawzuol a tih. 17 "Mi ngaithla la, hril ka ti che, Ka thil hmuhai hril ka ti che, 18 Pi le pua inthoka an donghai, Ip loa mi varhan an lo hril hlak chu. 19 Anni chauh chu ram a pêk a, Hnam danghai an thang ve nawh. 20 Mi rilo chu a dam sùngin, Natna tuorin a'n kon hlak a, Mi nunrawng khomin a chana ruot, Kumkhawtluongin a tuor hlak. 21 Titna ri a hriet zing hlak a, Muong huna mi ngâi lai khom, Roktuin an hung nang hlak. 22 Thim a suoksan ngam naw a, A hmabâk chu kawlhnâm a nih. 23 Mulukol bu inchang dingin, Ama chu a'n vàk vèl a, Inthimna chun a hung nang tahTi khom a hriet vong sá a nih. 24 Mangangna le lungngainahan, An sukthlabàr zing zing hlak a, Râl bei ding nei lal ang a nih. 25 Pathien chungah kut a'n let a, Iengkimthawthei chu a kal a, 26 A phaw lai pawng tieng hmasonin, Lulul takin a bei hlak si. 27 "A hmâi thâu puom chêr chûrin, A kawng inchuor hnûr sienkhom, 28 Khawpui ram hnung hluong a ta, In tawp ràusanah chêng a tih. 29 Hausa zom zing naw ni a, Sum le pàiin tìnsan an ta, A hausakna chu kawl kil tinah, Inzâr dar ta bok naw nih. 30 Thima inthok suok naw ni a, A kâuhai meiin hlieu tawl a ta, Pathien thuokin lèn hmang a tih. 31 Hausakna teploa innghatin, Mani inhlèm naw raw se, Ieng khom hlaw suok nei naw nih. 32 A thi hma'n a chan hmûng a ta, A kâuhai tawl bor bor an tih. 33 A ra hmin hmaa sawi til, Grêp kùng ang el nîng a ta, A pâr vul laia sawi til vong, Oliv thing ang el nîng a tih. 34 Pathien ngaisak lo mi chu tawl an ta, Thamna ngàinatu puon in chu, Meiin lem hmang vong a tih. 35 Buoina nâuin an pài a, Nauah suol an hring suok a, An sul rà chu inhlèmna a nih. "

Job 16

1 Chuongchun, Joba chun hieng hin a don a: 2 "Chuong thil chu ka hriet rawn tah. Hnèmtu nghokum in va ni ngei! 3 In thu sep kawi sei tak tak hin, Tawp zâi a rèl naw di'm a ni?Ieng hri am in invoi tawl a, Hienga in mi sel tlut tlut hi? 4 Ka ngîrhmuna um ni unla, Nangni ang boka tong vein, Thu mawi tak tak inzawtin, Lu ka lei khum ve thei cheu. 5 Sienkhom, chuong chu thaw loin, In tangkaipui ding chauh hrilin, In nat tuor hnèm tum lem ka tih. 6 "Amiruokchu ka hang tongin, Ka nat a rè chuong naw a, Ka to a, a rè chuong bok nawh. 7 Pathien in a mi sukchâu dèr a, Ka sûngkuo a sukram vong bok a. 8 A vun khât chauh ka ni ta a, Chu chun a mi sukhmèlhem a, Ka chèrna chu a mi khingtu niin, Hmâi sana mi kawktu a nih. 9 Pathienin a mi soisak a, Lungsenin a mi pot nawi a, A hâ a mi rawt khum a, Mi khingtu chun a mi mel rum. 10 Mihan bàu mi phong khumin, Hmusitin biengah an mi ben a, Mi do dingin an pung khawm. 11 Pathienin mi suol kutah mi'n hlànin, Mi rilohai kutah a mi pei lût a. 12 Hàdam taka ka um laiin, Aman a mi vuok dar a, Ka rîngah a mi rèk a, A mi pot nawi ta vong a. Ama chun mi thlûr bingin, 13 A thal kàptuhan mi'n huolin, Indoina hrim mi nei dêr loin, Ka kalhai a phor suok a, Hnuoiah ka mît a bun dok a. 14 Voi tam tak a mi chìl sop a, Ka chungah a nunrawng a nih. 15 "Ka vunah saiip ka thui de a, Pilvutah ka hmai ka phûm a. 16 Hmai sen rak khopin ka tap a, Ka mit vun a duk vong a. 17 Sienkhom, poi ka tawk naw a, Ka tongtaina khom a thienghlim. 18 "Aw hnuoi, ka thisen inkhum naw la, Ka tap ri khom chawl naw raw se. 19 Tu ngei el khom hin chieng takin, Ka thu hretu vànah a um a, Mi hrilpuitu vàn sângah a um. 20 Mi hrilpuitu chu ka ruol a na, cKa mitthli Pathien hmaah a sûr. 21 Miin a tuolbawm ta dinga thu, A hrilpui hlak ang el hin, Mihriem aiawin Pathien hmaah, Ama chun a hrilpui hlak. 22 "Kum sawt nawte hnungah, Kîr nawk ta ngai nawna lam chu, Ka hraw ta ding a ni si a.

Job 17

1 "Ka thlarau hi a koidar a, Ka nihai khom a kin ta a, Thlànin a mi nghâk ta zing a. 2 Chêksoltuhan an mi'n huol a, An mi diriem dànhai chu, Lung na takin ka thlîr zing. 3 "Aw Pathien nangma ngèiin, Ka ta dingin dakhamd sie rawh, Tu dangin am ka dakham ding, An mi siepèk ding a na? 4 Hrietthiemna nei lo ding a, An lungril i khârpèk ta si leiin, Hnèna inchangtir lul naw rawh. 5 Hlawkna hmuna ding lei ela, Mani ruolhai thlauthlatu chu, A nauhai mit la'n vài a tih. 6 "Pathienin mihai hmaah, Nuizatbûrin a mi siem a, Chil an mi sàkkhum hut hut a. 7 Lungngai leiin ka mit a'n thim a, Keima hlimthla ang hiel khopin, Ka taksa bung tin a zûr thla a. 8 Mi ngîlhai pang a sukza hle a, Pathien ngàisak lohai chungah, Poi tawk lohai hà khom a sukzà. 9 Mi felhai ruok chun an um dàn, Inthla ngai naw ni hai a, Kut fâihai hrât deu deu an tih. 10 "In rêngin hung kìr nawkin, Mi ruol bom nawk khom ni unla, Nangni rawi lai hin mi var, Tu khom hmu chuong naw ningah. 11 Ka nihai an liem mèk a, Ka thil tum a hlawsam zo a, Ka duthusam a thlawn zo tah. 12 Zàn hi sùn an inbûk a, Thim hnuoia ka'n lèng laiin, "Var a hnai tah" ti'n an mi hril. 13 Ka in beisei nei sun chu, Seol chauh lo ni tah sien, Thimah zàlhmun rem ta lang, 14 Thlan chu "Ka pä i nih" ti lang, Chokchawnal chu "Ka nü i nih, Ka farnù i nih" lo ti ta lang, 15 Ka beisei chu iem nîng a ta?Tu'n am ka beisei hrieng an ta? 16 Seol a zu tlung ding maw? Ka beiseina leh pilvutah, Kan liem thla diel el ding maw?"

Job 18

1 Suha mi Bildad chun hieng hin a don a: 2 "Ieng tik am i to ding a na? Hang inngaituo phot la, Chu zoah inbieng ei tih. 3 Ieng leia ran anga ngài kan ni?Ieng leia intlawa i mi hmu tawl? 4 Lungsena puok koi nang lei hin, Hnuoi hi ràusanin a um ding maw?Lungpui khom a hmuna inthokin, Son hmang a ni ding am a ni? 5 "Mi rilo khawnvar a sukmit a, A chok lai chu a her hlum hlak. 6 A puon ina var chu inthimin, A bula khawnvar chu a mit hlak. 7 A kal pên inrang chu a zuoi a, Ama remruotin a kei thlûk a. 8 Lèn chângah ke a rol lût a, Tlâkpûma chun a fen lût a. 9 A kerïngah a phì awk a, Lèn chânga chun a'n tàng a. 10 A awkna dingin a lampuiah, Châng kamin val an phùm rùk. 11 Sîr tinah titnan a'n huol a, Man tumin a hnot thlûr zing a. 12 Tàm leiin a thâ a hung chuoi a, A lampuiah sietna a'n khang a, 13 Pânin a vun a fâk siet a, Thina nau lutîrin a kefuhai. 14 A muongpui puon ina inthokin, Titna lal kutah a fen lût a. 15 A puon in a ruok vong a, A chèngna hmun kâtin a tuom a. 16 A zung tieng a hung tlol a, A kâuhai an hung vuoi a. 17 Hnuoiah tu hriet loin a bo a, A hming chawi kotthlêr a um nawh. 18 Vara inthoka thima hnaw lûtin, Hnuoia inthokin an hnot suok a. 19 A mihai an suonmong vong a, A ramah chithla a màksan nawh. 20 Khawthlang tienga chênghaiin, A chan chu an pangzat a, Sak tieng mihan an pangzat bok. 21 Mi rilohai chèngna hmun chu, Chuong ang chu a ni ngèi ngéi, Pathien hre lohai chèngna chu. "

Job 19

1 Joba chun hieng hin a don a: 2 "Ieng chen am mi nghâisain, Tong bàuin in mi sop ding a na? 3 Voi sawm zet in mi kawk ta a, Inzak hre dêr loin in mi bei a. 4 Ka thaw suol khom lo ni sien, Keima mawphurna a nih. 5 Ka chungah hin insuklien a, Ka muolphona remchânga laa, Ka suolna tàr lang tum in ni chun, 6 Ka chunga thawtu chu Pathien a na, A lènin a mi tuom ti hi hre ro. 7 "Ka poi an tawk" ti'n ka khêk a, Donna hrim ka hmu naw a, Thangpuitu ding ka ko khèk a, Indika rèlpêk ka ni chuong nawh. 8 Suok thei lo di'n ka lam a khâr a, Ka lampui thimin a'n bawmtir a. 9 Ka ropuina a mi hlippèk a, Ka lallukhum a lâk hmang a. 10 Ka siet lailet dèr chenin, Sîr tinah a mi pot chen a. Ka beiseina po po khom, Thing angin a mi phawipèk a. 11 A lungsenna chun a mi hlieu a, Hmêlma angin a mi en a. 12 A sipaihai a hung tir a, Kul dâi an mi bawl khum a, Ka puon in vèlah hmun an khuor. 13 "Ka unauhai a sukhel a, Ka hmêlhriethai po po khom, Hmêl hriet lo an inchang tah. 14 Ka laibunghan an mi zàmsan a, Ka ruolhan an mi thlauthlàk a. 15 Ka mikhuolhan an mi theinghil a, Ka siehlawnuha'n mikhuolah mi ngâiin, Ram dang mi angin an mi en a. 16 Ka siehlaw ka ko, a mi don nawh, Bàu ngêia ka ngên hràm khomin. 17 Ka nuhmeiin rimsie a mi ti a, Ka unauha'n an mi tirdak a. 18 Naupang chenin mi hmusitin, Ka hmêl hmuin an mi dèusaw. 19 Ka ruol bulhaiin an mi ten a, Ka hmangaihan hnung an mi'n nghat. 20 Vun le rù khât chauh ka ni ta a, Ka hanî chu ka la chang hràm a. e 21 "Aw ruolhai, mi lunginsiet ro, Pathien kutin a mi tawk a ni hi! 22 Ieng leia Pathien ang ziezànga, In mi hnot thlûr zing am a na?Taksaa ka tuorna po po hi, Hun tawk in la ti naw a ni maw? 23 "Aw, ka thuhai hi zieka umin, Lekhabuah chuong sien ka va nuom ngei! 24 Thîr le suon ziekfunga hmangin, Kumkhuoa din lungpuiah ker inla chu aw! 25 Ka Tlantuf chu a hring ti ka hriet a, A tawpah hnuoiah la ngîr a tih. 26 Ka vun hi a siet vong hnungin, Taksa ngeiin Pathien la hmung ka tih. 27 Keima ngèiin, ka mit ngèiin, Mi dang mit ni loin la hmung ka tih, Ka lungrilin a va nghâkhlà de aw! 28 " 'Iengtin am soisak ei ta?Ama hi buoina bul chu a nih'In mi ti khom a ni el thei. 29 Sienkhom kawlhnâm chu ti ro, Kawlhnâma inhremna hi, Pathien lungsen inlangna a nih. Chu hun chu a tlung pha chun, Rorêltu a um ti hung hre tâng in tih. "

Job 20

1 Naamat mi Zofar chun hieng ang hin a don a: 2 "Ka lung a khei tlat leiin, Chu chun don dingin a mi mor a. 3 Mi sukzaktu kawkna ri chu ka hrietin, Don dingin ka lungin a mi tur a nih. 4 Tiena tlânga inthok ta khan, Hnuoia mihriem an chènga inthokin, Hieng hi a nih ti i hriet chieng: 5 Mi rilo hlimna chu a tawi a, Pathien hre lo mi hlimna chun, Mit khap kâr chauh a daih, ti hi. 6 Vàn tongin ropui sien khom, A lûin sûm tong phak sien khom, 7 A êk angin kumkhuon bohmang a ta, Ama hmu hlaktuhai khomin, "Khaw lai am a um ta a?" tîng an tih. 8 Mang angin thâm ral a ta, Tu khomin hmu ta naw ni hai a, Zàn inlàrna angin ral a tih. 9 Mita hmutuin hmu ta naw ni a, A hmun khomin hre fu ta naw nih. 10 A nauhan mi retheihai kuomah, Ditsakna hniin dawvan kâi an ta, Ama kut ngeiin a hausakna chu, Retheihai kuomah pe kîr a tih. 11 Thalai tha hràt a ni lâi zingin, A rùhai leh pilvutah zâl a tih. 12 "A bàuah suol chu thlumin, A lei hnuoiah thup sien khom, 13 A bàua inthoka pei suok rinin, Hmuom zing khom ni sien la, 14 A phìng sùngah hung thûr a ta, Rûl tûrin inchang a tih. 15 Hausakna a dol tah po po, Hung luok suok nawk vong a ta, Pathienin inluok suoktir a tih. 16 Rûl tùr hrât chu dawk a ta, Rûlriel tùr chun that a tih. 17 Khuoizu le nenetuia luong, Vadunga chun chêng hlim naw nih. 18 A thawsuokhai chu pe kîr a ta, Hnuk tlainain hmang naw ni a, Sumdawngnaa a hlawkhai chu, Inhoi takin chèn ngai naw nih. 19 Pasiehai sir sopin a nghatsan a, Ama bawl khom ni hrim hrim lo, An inhai chu a làkpèk hlak si a. 20 "A duâmnan khop tik a nei naw a, Fàk mahla a hlà ngai naw a, 21 A dolin a dol thlàk zung zung a, A hausakna'n a tuor zo nawh. 22 A hausak vàng lai takin, Buoinain hung nang a ta, Retheina honpuiin bawm an tih. 23 A phìng a khop lai takin, Pathien lungsenna phuba chu, A chungah hung tlung a ta, Kut tum insùrtir a tih. 24 Thîr hriemhrei pumpel sien khom, Dâr thal chun kâp tlang a tih. 25 A hnunga thal chu phawi a ta, Dâr thal hmor zum tle tak el chu, A thina inthokin pot suok a tih. 26 A ro ding chu thim sà tak a na, Mùt lo meiin kàng hmang a ta, A ina a nei po po lem zo a tih. 27 Vànha'n a suolna puong an ta, Hnuoiin ama chu do a tih. 28 A ina a thil nei po po chu, Pathien lungsenna nia chun, Tui lienin lèn hmang a tih. 29 Chuong chu mi rilo chan dinga, Pathien ruot a ni si a. "

Job 21

1 Chu zoah Joba chun hieng hin a don a: 2 "Ka thu hi ngun takin ngâithla un la, Chu chu in mi thlamuongna ni raw se. 3 Thu mi'n hriltir ve hràm un la, Ka hril zo pha leh mi nuisaw lem ro. 4 "Mihriem chunga chier am ka ni?Ieng leiin am zâi chu ka ngài ding? 5 Makti takin mi en unla, In kutin in bàu hup ro. 6 Hi thil hi ka ngaituo chângin, Pangzatin ka pumin ka'n thin hlak. 7 Ieng leiin am mi rilohai hi, Dam sawtin an hmùingìl a na? 8 An vèla an tu le tehai chu, An mithmua ngei an suknghet a. 9 An inhai chu a râlmuong a, Titna lakah an fihlim a, An chungah Pathien hmol a tla nawh. 10 An bawngchalhan an thla pung a, An bawngpuihan tê an insiet ngai nawh. 11 Ran ruol angin nau an inpung a, Tuolah naupang an tuolchai a. 12 Perkhuong, tingtang, theihle remin, Hlim takin hla an sak a. 13 An dam sûnga hmùingìlin, Muong takin thlànah an liem a. 14 Chuong sa chun Pathien kuomah, "Màkhâtin mi fesan rawh. I lampui hriet kan chàk nawh. 15 Iengkimthawthei chu tu'm a na?Ieng leiin am a rong kan bawl ding?A kuomah kan tongtai chun, Hlawkna iengam kan hmu ding?" an tih. 16 Sienkhom, an hmùingìlna chu, An kutah um a ni si nawh. Mi rilohai remruotna lakah, Kei chu ka'n thier fihlîm dai hlak. 17 "Mi rilohai khawnvar chu, Sukmitpêkin a um rop a, Pathien lungsenin an chungah, Vàngduoina an tlungtir rop a, Chu chu an chana a ruot a nih. 18 Thli lèn hmang bupawl ang leThlipui lèn dar favâi ang el, An ni rop hlak naw am a ni? 19 'A rìtlona leiin Pathienin, A nauhai a hrem hlak' in tih. Ama chungah tla lem raw se chu, A hung inhriet suok theina dingin. 20 Mit ngeiin a siet tuok hmu sien, Iengkimthawthei lungsenna chu, Ama ngeiin dawn mol raw se. 21 A damsûng ni a kin pha chun, A màksan a sûngkuohai chu, Ieng leiin am a'n voi rak ding? 22 Insâng tak chung chen khoma, Rorêltu Pathien chu tuin am, Hrietna a zirtir thei ding? 23 Thenkhat chu an hràt lai hunaMuong le inhoi taka khawsa, 24 Taksa thâu inmûm puol el, An rù thlina hnaw sip chu, An vànglaiin an thi a. 25 Thenkhat chu rinum taka, Thil tha intem phak loa, Lungngaia thi an um bok. 26 Pilvutah an zàl tlàng a, A ngèin an bawm sip vé vè. 27 "In ngaituohai ka hriet vong, Ka sietna dinga in phierhai khom. 28 'Khaw lam mi rilopa chèngna, Mi ropui pa in chu?' in tih. 29 Khuolzin fe le hunghai chu, In indon ngai naw a ni?An hril chu in awi naw maw ? 30 'Vangduoina a hung tlungin, Mi suol chu hlàin a um a, Lungsen niah san suokin a um. ' 31 A khawsak dàn chungthua, Hmâisana kawk an um am?A thilthaw tahai lakah, Tuin am a thungrul a? 32 Thlànah ama chu an vùi a, A thlànah vêngtu an sie a. 33 Pil khom a chungah a lo tha. A hmaah tiem seng lo an fe ta a, A hnungah mi tinin an zui. 34 "Thu hmang lohai in mi hril hin, Iengtin am mi thlamuong in ta?In mi donna thu po po hin, Khêl naw chu fùn a nei nawh. "

Job 22

1 Teman mi Elifaz chun hieng hin a don a: 2 "Mihriem hi Pathien ta din a tangkai am? Mi var chu Pathienin hlawkpui a ti'm? 3 Mi fel ni la, Iengkimthawthei lawm a ti?Soisèl boin kal chawi la, iem hlawkpui a ta? 4 "Pathien i'n zá èm leiin ama chun, Khingin i chungah ro a hung rèl a ni? 5 I rîtlona hi a nasa hle an naw maw?I suolnan tawp chin a nei am a ni? 6 A san boin i unau lakah dàkham i phût a, Mi silfèn i hlîppèk a, saruokin i sie a. 7 Chàuhai tui i pêk nuom naw a, Phingtâmhai fàk dingin bu i'n ro a, 8 Ram chu mi thilthawtheihai ta leAnni chanpuol bik hrimah i ngài a. 9 Kut ruokin hmeithaihai i'n tintir a, Fahràhai kut i ul tliekpèk a. 10 Chuleiin chângin an huol vèl che a, Thlabârnan a nang thut chê a nih. 11 Chuleiin thimin a bawm khum che a, Tui fawnin a vûr khum chê a nih. 12 "Pathien chu vàn sângah a um. Arasi insàngzie le hlatzie khi i hmu? 13 Amiruokchu nangma chun, 'Pathienin iem a hriet phàk a?Thim sä tak kàr dana inthokin, Ieng tin am ro a rèl thei ding? 14 Ama chu sûm sä takin a tuom a, Chuleichun a mi hmu thei nawh. Hla takah, vàn kuol sûnga khin, An lon vèl a nih' i ti a. 15 "Mi suol hraw hlak lam hlun chu, I hraw ve ding am a ni ? 16 An vànglai làk hmangin an um a, An innghatna tuiin a lèn hmang tah. 17 Pathien kuoma, 'Mi fesan rawh, Iengkimthawtheiin ieng hrim am, Kan chungah a thaw thei a?'Tia hril hlaktuhai chu an nih. 18 Chuong sà chun thil tha tinrêngin, An inhai chu a sung sip hlak. Mi rilohai remruotna laka chun, Kei chu ka'n thier fihlîm dai a nih. 19 An siet hmuin mi felhai an lawm a, Poi tawk lohai chun an nuisan a, 20 'Ei hmêlmahai an se chieng ie, An hausakna meiin a lem zo tah' an tih. 21 "Pathien kuomah intuklût la, Ama chu inrempui rawh, Chuongchun hmuîngìl nawk i tih. 22 A kam thu suok chu awi la, A thuhai i lungrilah vong rawh. 23 Iengkimthawthei kuoma i kîr chun, Aman tungding a ti che, Fel nawna chu i puon ina inthoka, Hla takah i sie hmang phot chun. 24 I rohluhai chu pilvut lai pei la, Ofir rangkachak chu ruom inthùkah. 25 Iengkimthawthei chu i ta dingin, Rosum hlu tak hung nîng a tih. 26 Iengkimthawtheia chun lawm i ta, Pathien tieng hung ngha tàng i tih. 27 A kuomah tongtai i ta, Aman lo ngàithlàng a ti che a, I thutiemhai chu hlen i tih. 28 I ti ang angin thawpêk a ti che a, I lampuihai sunvar zing a tih. 29 Mihai an lunghnuol chânga, "Tungding raw khai" i ti pha chun, Beidonghai chu sandam a tih. 30 Poi tawkhai chen san suok a ta, I kut fàina zàrin suok an tih. "

Job 23

1 Joba chun hieng hin a don a: 2 "Voisun chen khom ka la nuor hle, Hieng ang khopa ka'n rùm khom hin, Ka lakah a kut rik a'n thlâ si nawh. 3 Ama hmu thei dàn ding hre lang, A chèngnaa fe ka va nuom ngei! 4 Ka chungthu a kuomah intlun ka ta, Ka bâu ngeiin thiem thu hril ka tih. 5 A mi don dàn hriet ka nuom a, A hril ka hriet thiem theina dingin. 6 A hràtna ropui chun mi khing a ti'm?Teu lo e! Mi lo ngàithla lem a tih. 7 A hmaah mi nun ngîlhai chun, Thiem thu a hril thei leiin, Ka chungthu rêltu kuta inthokin, Kumkhuon thiem chang tàng ka tih. 8 "Sienkhom sak tieng ka hang fe a, Chu taka chun a um naw a, Thlang tieng ka zu fe nawk a, Chu taka chun ka hmu bok nawh; 9 Hmar tieng khom ka hmu zo nawh, Ama chu a'n bi tlat a, Sim tieng ka va fe khomin, Ka hmu thei chuong bok si nawh. 10 Sienkhom, ka fenahai a hriet a, Aman a mi fie zo pha chun, Rangkachak hlîrah suok ka tih. 11 Ka kein a hniekhnung a hraw pei a, Khaw tieng khom a pêtsan nawh. 12 A thupêkhai ka pètsan naw a, Ka lungrilah ka khawl khawm a, Ka ni tin bu nêkin ka hlut lem. 13 Sienkhom, ama chu amaa ngîr a na, Tu'n am ama chu khing ngam an ta?A nuom dàn ang takin a thaw hlak. 14 Ka chunga a ruot angin a thaw a, Remruot dang khom a la nei teuh. 15 Chuleiin a hmaah ka thlabâr a, Ka ngaituo chângin ka'n thin hlak. 16 Pathienin ka lungril a suktlep a, Iengkimthawthei chun a mi sukthlabàr. 17 Thim sà takin a mi tuom vèl a, Sienkhom thimin a mi hup dei nawh.

Job 24

1 "Ieng leia Iengkimthawtheiin, Rorêlna hun a ruot naw am a na?Ama hretuhaiin chu nï chu, Ieng leia an nghàk thlawn am a na? 2 Ram ri son chîng mi an um a, Mi ran an inrùkhai an vài a. 3 Fahrahai sabengtung an khal hmang a, Dakhamah hmeithai bawngchal an hrèn. 4 Lampuiah tlasamhai an kapzùt a, Retheihai himna zongin an inbi. 5 Thlalèr ram sabengtung angin, Retheihai chun fâk ding dapin, hlalèrah an inmai fawm a, Nauhai an chawm tawk tawk a. 6 Mi bu làk hmaih dap khawmin, Mi rilohai grêp lo hmaih an zong a. 7 Zàn deiah puon bo le saruokin, Sil ding nei loin an zàl a. 8 Tlânga ruopuiin a nang pha leh, Phèn ding nei loin lungpui an bèl a. 9 Nene ne lai fahrahai chu, An nuhai tànga inthokin, Retheihai bat aiah làk dingin, An inchù thlàkpèk hlak si. 10 Silfèn boin, saruokin an lèng a, Tam ngawi ngawiin buphal an put a. 11 Oliv huonah hriek an her a, Dangchâr ngawi ngawi pumin, Uoiin sawrkhurah grêp an chìl a. 12 Hrangchat inrùmin khawpui a sip a, Hliem tuorhaiin santu ding an ko a, Pathien hlakin a ngàisak bok si nawh. 13 "Var laka hel pawl an um a, A lampui an hriet nuom naw a, A lampui an hraw nuom bok nawh. 14 Retheihai le tlasamhai that dingin, Tuolthattuhai thimbutin an tho a, Zànah rûkrù angin an invàk a. 15 Uirepa chun thimbut a nghâk a, 'Tu khomin mi hmu thei naw nih' a ta, Hmai kawrin a hmai a tuom a. 16 Zànah mi in an rok a, Sùnah an inkhàrkhum a, Var hrim hrim an ngài thei nawh. 17 Thim sá chu an zìng tieng a na, Thim tibaium chu an ruol thà a nih. 18 g "Tui huom inlâng ang an na, An ram hluo khom tongsephur a na, An grêp huonah tu khom an fe nawh. 19 Ni lumin vûr khal a em tui angin, Thlànin mi suolhai chu a lem hlak. 20 Sûlin a theinghil tawl a, An ngèin anni chu an tlàn a; Mi rilohan hriet zing an hlaw naw a, Thing kùng angin an tliek hlak. 21 Nau bo chinghai chungah an tuong a, Hmeithaihai an ngàisak nawh. 22 Sienkhom Pathien hrâtnain, Mi ropuihai a hnûk thlàk hlak. Ngîrhmun an suknghet khomin, Nun thlamuongna an nei nawh. 23 Muong awm taka inngâiin, In chawl hàdamtir sien khom, A enthlàk tawl zing a nih. 24 Sawt nawte chawisàngin an um a, Chu zoah an bohmang nawk a, Sukhnuoiin an hung um a, Lâk khawmin an um nawk hlak, Buvui an sìk khawm ang hin. 25 Tu am chu chu a ni nawh ti thei?Tu am ka'n dik nawh ti mi fie thei?"

Job 25

1 Suha mi Bildad chun hieng hin a don a: 2 "Lalna le tiumna chu Pathien ta a na, Vàn sângah inremna a'n umtir a. 3 A sipai ruol tiem sèng an ni?Tu chung am var a'n suo naw a? 4 Iengtin am Pathien hmaah, Mihriem chu a fel thei ding?Nuhmei hring si mihriem chu, Iengtin am a'n thieng thei ding? 5 A mita chu thlàpä khom khi, Var tawkah a ngai naw chun, Vàna arasihai khom khi, Inthieng tawka a ngai naw chun, 6 Thil ngë ang chauh mihriem chu, A va'n thieng naw zuol awm de!Mihriem naupa hi ieng khom lo, Thil ngë ang chauh hi a nih. "

Job 26

1 Joba chun hieng ang hin a don a: 2 "Hrât naw i thangpui dàn le, Bân zoi i hang san dân tak chu maw! 3 Mi mawl i hril var tum dàn chu, Ieng hrietna ril am a na i phù suok? 4 Hieng thu hi khaw laia i hriet am ie?Tu thlarauin am a'n hriltir che a na? 5 "Thi tahai bei chu a dong hle a, Tui hnuoi le a sûnga chênghai chuh. 6 Seol hi Pathien hmaah saruok a na, Abadon chun inkhumtu a nei nawh. 7 Hmar tieng boruok a zâr duoi a, Hnuoi chu boruokah a khài kàng a. 8 Sûm sà takin tui a fûn khawm a, Tui rik leiin sûm chu a tè nawh. 9 Thla lir lâi hmêl chu a tuom a, A chungah sûm a zàr khum a. i 10 Tui chungah kawlrî a khang a, Ramriah thim le var a hmang a. 11 A hal pha chun pangzatin, Vàn dotu banhai an inthin a. 12 A lungsenin tuipui a chok phul a, A varnain rûlpuij a rawt nawi a. 13 A thuokin vàn a mût thieng a, A kutin rûlpui tlàn lai a thil tlang a. 14 Hieng hi a thilthaw theizie pawhleu, A mi biekrûkna ang chauh a la ni a, A thilthawtheina inrûm ri lem chu, Tuin am hre thiem phâk an ta?"

Job 27

1 Joba chun a hril zom pei a: 2 "Ka thiem anga thiem mi'n changtir lo a, Ka thlarau suklungngàitu Pathien, Iengkimthawthei sâlin thu ka tiem: 3 Ka sûngah hringna a la chàm sùng, Ka hnârah Pathien thuok a chàm sùng chun, 4 Ka hmùrin rîtlona thu hril naw ni a, Ka leiin hlèmna thu hril bok naw nih. 5 Ka thì hmâ khat chu in indik ti, Pom ngai naw hrim hrim ka ta, Ka'n dikna hi inphat ngài naw ning. 6 Ka felna chu vong tlat ka ta, Inthlà ngâi hrim hrim naw ning; Ka dam sùng ka sie le tha hrietnain, Thiem naw mi'n chang ngai naw nih. 7 "Ka hmêlma chu mi rilo ang ni sien, Mi beitu chu mi suol ang ni raw se. 8 Pathien nei lo chu sàt thlâka uma, A hringna làkpêk a ni pha chun, Ieng am beisei ding a nei a? 9 Beidongna'n a nangchìng phâ, Pathienin a kona ngàithlâng a ti? 10 Iengkimthawtheia chun hlim a ti?Ieng lai khomin Pathien ko a ti? 11 "Pathien hrâtzie zirtir ka ti cheu a, Iengkimthawthei lampui chu ip naw ning. 12 Nangni ngèiin in hmu vong ta si a, Ieng dinga hmang lo in la hril zing am? 13 k"Pathienin mi rilo chana a ruot, Nêksawrtuin Iengkimthawthei laka A dong ding chu hi hi a nih: 14 Nau a hau leh kawlhnâm tuor rawn an ta, A thlaha'n bu fàk khop hmu naw ni hai. 15 A la dam sunhai chu hriin thîng an ta, An nuhmeihai khomin sûn naw ni hai. 16 Pilvut anga tangkaruo hûi khawmin, Pil angin silfèn dêng bûm hai sien khom, 17 Silfèn chu mi felhan nei an ta, A tangkaruo khawl khawmhai chu, Poi tawk lohaiin insem an tih. 18 A in bawl chu aium rîl ang chauh a na, Vêngtu thamte daw ang chauh a nih. 19 Mi rilo chu hausa takin a zâl a, Sienkhom zing a tho ruok chun, A hausakna chu um ta naw nih. 20 Thlaphângnan tui lien angin a chìm a, Thlipuiin zànah a fen hmang dai a. 21 Sak thliin a lèn hmang dai a, A umnaa inthokin a nuoi bo a. 22 Zà ngai dêr loin a nuoi a, A thilthawtheina hmaa chun, Pai chon chonin a tlânsie a. 23 Nuisawin kut a ben khum a, A hmuna inthok a len hmang hlak.

Job 28

1 "Tangkaruo cho suokna khur a um a, Rangkachak raw thiengna pùm a um. 2 Hnuoia inthokin thîr an lâk suok a, Lungthìra inthokin dâr an raw tui a. 3 Mihriemin kil tina thîr an zongnaah, Hmun thim ram pilril an baw èng a. 4 Mihriem chêng ngai nawna hmunah, Mi sir ngai nawnaah hnuoi an cho a, A khurah hruiin an inkhài thlàk a. 5 Bu le thlài suokna hnuoi sûng chu, Meia raw tui ang a nih. 6 Chu chun safir lung dàm a um a, A pilvut chu rangkachak phit a nih. 7 "Chu hmun inthup chu sa fa mi, Mupuihai khomin an hriet naw a, Mitin an la hmu ngai bok nawh. 8 Ramsa kol khomin an la sir naw a, Sakeibaknei khom an invàk ngai nawh. 9 Mihaiin lungthìrhai chu an cho a, Tlâng thuthai rawtin an phor let a. 10 Lungpui an ver tlang seng sung a, Ro thil tinrêng an hmu suok a. 11 Vadung hnârhai an zong suok a, Thil inthuphai chu an phor suok. 12 Sienkhom khaw laia inthokin am, Varna chu hmu thei ni tâng a ta?Hrietthiemna chu khaw la'm a chêng a? 13 Mihriemin a hlutzie an hriet phàk naw a, Hringmi ramah hmu ding a um nawh. 14 Lipuiin, "Ka kuomah a um nawh" a ta, Tuipuiin, "Ka kuomah a um bik nawh" a ti bok a. 15 Rangkachak hlîra inchawk thei a ni naw a, Tangkaruo ieng zât khomin a man zo nawh. 16 Ofir rangkachakin a man zo naw a, Onik lung le safir lung tha tak khomin. 17 Rangkachak le lunghlu nêkin a hlu lem a, Rangkachak incheina tinrêng nèk khomin. 18 Koral le jaspi lunghluin a man zo naw a, Varna chu lunghlu rubiin a man zo nawh. 19 Ethiopia topaz khomin a khan zo naw a, Rangkachak hlîr khomin a'n chawk zo nawh. 20 "Varna chu khaw taka inthoka hung?Hriet thiemna chu khaw lai am a chêng? 21 Thilhring po po hmu thei loa thup a na, Chunglèng vatêhai laka khom thup a nih. 22 Sietna le Thina ruok chun, "A umna ringvàngin kan hriet" an tih. 23 Pathien chauhin a lampui a hriet a, Ama chauhin a chèngna chu a hriet. 24 Ama chun hnuoi kil tin a hmu vong a, Vànkhup hnuoia thil tinrêng hi a hmu vong. 25 Thli kuoma hràtna a pèk lai khan, A'n khìnaa tui a'n khi suok lai khan, 26 Ruotui tlàk zàt dinghai leThlipui lampui ding a ruot lai khan, 27 Varna chu a en a, a hril vong a; A suknghet a, chîk takin a en fie a. 28 Mihriem kuoma a hril chu hi a nih:LALPA ti hi varna chu a ni takzet a, Suol nghatsan hi hriet thiemna a nih. "

Job 29

1 Joba chun a hril zom pei a: 2 "Aw, thla liem tahai kha ka va ngâi ngèi, Pathienin a mi huol him lai nihai kha! 3 A khawnvar ka lu chungah invartir a, A vara lam inthim ka hraw lai hun kha! 4 Ka vànglai nihai tak kha aw!Pathien leh inhnai taka inpawl a, Ka insùng mal a sawm lai nihai kha! 5 Iengkimthawtheiin mi umpui a, Ka bula ka nauhai an chèng lai hun kha! 6 Bawngnene kan sawr huou huou lai, Oliv hriek kan her put zur zur lai kha! 7 "Khawpui kot tuol zawlah fe a, Pungkhawm laia ka'n thung hun kha! 8 Tlangvàlhan ka hung an mi hmu a, Inzà takin lam an mi'n ken a, Upahai an tho a, an ngîr thup a. 9 Hotuhai inbiek laklaw lai chawlin, An kutin an bàu an hup a. 10 Mi lienhan rawl kî an sukhnuoi a, Dangah lei an inkoptir lai dàm kha! 11 A mi hre photin an mi'n pàk a, A mi hmu photin an mi chawimawi a: 12 San ngai mi retheihai san a, Fahrahai ka somdawl hlak leiin. 13 Hrang chat tephàn mal an mi sawm a, Hmeithaihai lungril suklawmin, Hlimin hla ka'n saktir a. 14 Felna chu ka silfèn inbel a na, Rorêl indik chu ka lukawm a nih. 15 Mitdelhai ta dingin an mit ka na, Kebâihai ta dingin an kè ka nih. 16 Tlasamhai pä tak ka na, Mikhuolhai santu ka nih. 17 Mi rilohai khàk ru ka vuok tliek a, An sèput laihai ka pot thlàk hlak. 18 "Hieng hin ka lo inngàituo hlak a:"Tieu zâta tam ka nihai hmangin, Ka in luma ngei thîng ka ta, 19 Ka zung hmun hnawngah inzâm lût a ta, Ka zârah zànkhuoin daidaw tlâng a ta, 20 Chawimawiin um zing ka ta, Ka hràtna thar zing a tih" tiin. 21 "Mihaiin ka thû an ngàithlàk a, To thapin ka thurawn an nghàk a. 22 Ka hril zoin an hril sap ngai naw a, Ka thurawnah an lung a awi hlak. 23 Raw sûr ding angin ka thû an nghàk a, A mal dong châkin bàu an lo ka a. 24 Ka'n nuipèk phä awi harsa an ta, Ka hmêl hlim an ta dingin a hlu si. 25 An lampui ding ka thlangpèk a, An hotuah kei ka'n thung a; A sipai ruol laia lal angin ka um a, Lusûnhai thlamuongtu ka ni hlak.

Job 30

1 "Tu ruok hin chu ka nêka naupanghan, An mi nuisaw el chu a ni ta hi!An pahai chu ka ran ruol vêngtuUihai laia um tlâka ka ngai lo an nih. 2 An thà sorna ding iem ka nei a?An hràtna a chàu se zo ta si a. 3 Tlasam le phingtâma zûr thlain, Thlalèr ram tawl le pilrilah, Zàn thimah an inmai vèl a, 4 Thing zung le der hai an pot a, Hmunphi thing zung dàm an ring a. 5 An mihai laia inthoka hnot suok, Rûkru anga an ràu khawng an nih. 6 Ruom thlavaiumah khawsain, Lungpui kak kàr le pûk an bèl a. 7 Chîmbukah ram sa anga inhrâmin, Zakthlài bukah an intom khawm a. 8 Mi hmangna bo le bengtla lo, A rama inthoka hnot suok an nih. 9 Tuhin an nauhan hla mi phuok elin, Fiem thawna takah an mi hmang a, 10 Tirdakin kâr an mi'n hlat a, Hmaia chil mi sak khum an rin nawh. 11 Pathienin ka thalngul hrui sût a, A mi sukrinum hnung ruok hin chu, Ka hmaah insùm kâr an nei nawh. 12 Pawl khatin chang tieng an mi bei a, Ka ke awkna ding châng an kam a, Ruongchâiche an mi thlàk khum a. 13 Ka lampui suksein an dangchat a, Thangpuitu ka nei nawh ti hrein, Ka siet theina ding taphot an thaw. 14 A awng lienna tieng an hung nor a, A chim sietna tieng an hung chim thla. 15 Thlaphàngnan a mi'n huol vèl a, Ka'n zàumna thli angin a liem a, Ka himna khom sûm ang a ral tah. 16 "Ka hringna hi a zûr tiel tiel a, Tuornain a mi thàm ni tin. 17 Zànkhuon ka rùin a mi rèt a, Natnan rè loin a mi rei ngut ngut. 18 A kut hràtin ka silfènah a thâm a, Ka zakuo rìngah a mi rèk de a. 19 Chihrakah a mi pei lût a, Pilvut le vut ang chauh ka ni tah. 20 "Aw Pathien, ka ko che a, Sienkhom i mi don naw a, Ka hung ngìr suok a, Sienkhom i mi en ringot a. 21 Ka chungah rawng takin i tuong a, Indoi loin ka chungah kut i thlâk a. 22 Thawngaleivirah mi dêng lûtin, Thliin i mi'n nuoi hmàttir a. 23 I mi sukhlum ding ti ka hriet, Hringmi po po tuok dinga ruot chu. 24 "San ngâia khêk beidong chungah, Mi an tuong ngai hrim hrim lèm! 25 Harsatna tuokhai tuorpuiin, Mi retheihài ta dingin ka thlâ, A lungngai hlak naw am a ni? 26 Thil tha ka beisei laiin, Thil tha naw a hung tlung a, Var ngâia ka Tlumte thlìr laiin, Inthim a hung tlung lem si. 27 Chawl loin ka sûng a sa a, Tuornain ni tin a mi hmason a. 28 Nisa em lei ni loin ka duk a, Pungkhawmhai hmaah ka ngîr a, Thangpuina hniin ka khêk a. 29 Sihal unaupa hung inchangin, Chingpirinu ruolpa ka lo ni tah. 30 Ka vun duk chu a hung inkhek a, Khawsikin ka pang a sa vut vut a. 31 Ka tingtangin lusûn hla a rem a, Ka theihlêin tap hla a'n zawt.

Job 31

1 "Nunghâk ngaimel lo dingin, Ka mit thû ka thlungpui a. 2 Chung Pathiena inthoka, Ka chan chu iem nîng a ta?Chunga Iengkimthawthei laka, Ka rochan chu iem nîng a ta? 3 Mi rilohai chan chu sietna, Suol thawtuhai chan ding khom, Vàngduoina a ni naw maw? 4 Ka lampuihai hmu fâi vongin, Ka kal pên tin a tiem naw am a ni? 5 "Thukhêl lampui ka lo hraw a, Hlèmna thu hnota ka tlân chun, 6 Pathienin mi bûk sien la, Poi ka tawk nawzie hre el a tih. 7 Lam indik ka lo pètsan a, Ka mitin ka lungril a thuoi a, Ka kut ka lo sukporchè chun, 8 Ka tù rà mi dangin fa sien la, Ka thlài chìng phawi vong raw se. 9 "Nuhmeiin ka lungril lêm hne a, Ka tuolbawm nuhmei ka beisei chun, 10 Ka nuhmeiin mi bü suk sien, Mi dangin zàlpui raw hai se. 11 Chu chu suol thlâk tak a na, Hrem ngèi ngéi hlak chi suol a nih. 12 Mi kàng hmang theitu mei a na, Ka nei po khom kàng ram a tih. 13 Ka siehlawpa le siehlawnu haiin, Ka chungah nuorna thu an hril a, Ka lo ngàisak naw a ni chun, 14 Pathien leh kan inhmason pha, Iengtin am thaw tâng ka ta?A hung indon chieng pha leh, Iengtin am hril tâng ka ta? 15 Sùla kei mi siemtu khan, Anni khom a siem naw maw?Nu phìng sûnga mi'n dintu chu, Thuhmun zing a ni naw maw? 16 "Pasiehai mamaw somdawl lo a, Hmeithaihai ka sukbeidong a, 17 Keima chauin bu ka fâk a, Fahrahai ka sem ve naw chun- 18 Ka chîntea inthokin, Pain nau a enkol angin, Fahrahai enkol tleiin, Hmeithaihai ka somdawl hlak- 19 Tu khom silfèn boa boral, Sil le bil nei lo rethei hmu a, 20 Ka beram hmula tuom lum lo a, Lungrilin a mi'n pak naw chun, 21 Rorêltuhai ka thuhnè lei a, Fahrahai chunga kut ka'n let chun, 22 Ka liengko hi ka dàrah khok sien, Ka bân hi a bulah tlam hmok raw se. 23 Pathien hremna chu pangzat a, A ropuina chu ka tî êm leiin, Chuong thil chu ka thaw ngam nawh. 24 "Rangkachak inhnèmnaa hmanga, Rangkachak hlîr kuoma chun, "Nang hi ka ringsan i nih" ka lo ti chun, 25 Ka hausak chu ka lawmna san ni a, Ka kuta sum inhnèmpui ka ni chun, 26 Nisa var ropui khi ngaisâng a, Thla var mawi tieng khi ngha a, 27 Ka lungril hi a rûktea hîp a, Kut phara ka lo biek a ni chun, 28 Ka suolnaa tiem sà ni raw se, Chung Pathien laka uirètna a ni si a. 29 "Ka hmêlma sietna chungah lawm a, A siet tuok ka hlimpui a lo ni chun- 30 Ama chu tongsie inphur dingin, Ka bàu hrim ka phong ngai nawh- 31 'Joba hrai tlai lo tu'm an um a?'Tia ka siehlawhan an hril naw chun- 32 Tuolah mikhuol ka'n riektir ngai naw a, Khuolzin ta din kot ka hong zing hlak- 33 Mihai anga ka suolna thup rûk a, Ka khawhlonahai ka ip rùk ve chun, 34 Mipuihai ka ti dor dor lei le, Ka chipuihai hmusit ka'n lau leia, To toka tuol suok ngam lo ka ni chun, 35 (Aw, bengkhontu nei lang chu maw!Ka chungthu chu ka hril zo ta a, Iengkimthawthei chun mi don raw se; Ka khingpui chun a mi hèkna thu chu, Ziek ngeiin târ lang raw se. 36 Chu thu chu ka liengkoah put ka ta, Lallukhum angin khum ka tih. 37 Ka kalchawi tin chu hril ka ta, Mi lien angin ama chu pan ka tih. 38 "Ka ramin mi dit loa a tap khèk a, Changkuong tin mitthli'n a sip a ni chun, 39 Man pe loa a tharsuokhai fa a, A sântuhai ka suknuor a lo ni chun, 40 Huit nèkin hling to lem sien la, Barli nêkin hlo intak to lem raw se. "Chuong ang chun Joba chun thu a khâr a.

Job 32

1 Joba chun fel a'n ti tlat leiin a ruolhai pathum chun an don lèt ta naw a. 2 Pathien inthiem nêka Joban ama a'n thiem tlat lei chun Barakel naupa Elihu, Buz mi, Rama sûngkuoa mi chu a chungah a lung a sen hle a. 3 A ruolhai pathumin Joba chu thiem naw inchang sia a thu kal thlâk ngaina an hriet si naw lei chun a lung a sen bok a. 4 Anni chu a nêka upa an ni si leiin Elihu chun hril ve loin a lo insùm a nih. 5 Hieng mi pathumhai hin donna ding an hriet ta nawh ti a hmuin Elihu lung chu a sen zuol a. 6 Chuongchun, Buz mi Barakel naupa Elihu chun a hril ve ta a:"Kei chu naupang, nangni chu upa in na, Chu lei tak chun ka'n tìm tlat a, Ka ngaidàn ka hril naw chêu a nih. 7 'A chal chang deuin hril hai sien la, Upahàn varna thu zirtir raw se' ka ta. 8 Sienkhom, hriet thiem theina petu chu, Mihriem sûnga chêng hlak thlarau, Iengkimthawthei thuok chu a nih. 9 Upahai chauh an var chuong naw a, Thudik an man phà chuong bok nawh. 10 Chuleiin, mi ngàithla ve unla, Ka hriet dàn hril vêng ka tih. 11 In thuhai ka lo ngàithlàk zing a, Hril ding invâia in inmai lai leIn thang dànhai ka lo chîk vong a. 12 Ngun takin ka ngàithlâk chêu a, Joba kal thla thei in um naw a, A thu let thla thei in um bok nawh. 13 'Eini khing ding chun a var taluo, Pathienin hril fie lem raw se'Tiin mi hril tum rok naw ro aw. 14 Joba thu hin a mi la kàp ve naw a, In kal dàn ang hin don ve naw ning. 15 "Tu hin don ngaina hrim hre loin, Hril ding cha dêrin in inthung a. 16 Kei khomin to tokin ka nghâk ding maw?Hril ding hre loin in ngîr inzum si a. 17 Kei khomin hril ding ka nei a, Ka hriethai hi ka hril ve ding a nih. 18 Hril ding ka hau êm êm a, Ka sûngrilah thlarauin a mi tur a; 19 A penga uoiin thar thun angin, Ka puok koi têp a ni ta hi! 20 Hril suokin insukthawl ka ta, Ka hmûr phongin don vèng ka tih. 21 Tu khom thlei bik nei naw ning, Tu khom inpâk der bok naw ning. 22 "Mi inpâk der thiem ka ni chun, Mi Siemtuin mi la hmang vak a tih.

Job 33

1 "Joba, tuhin ka thu hi ngàithla la, Ka hril taphot hi inchik dap rawh. 2 Ka bàu ka phong ding a na, Ka hril ding ka lei hmawrah a um. 3 Lungril ngîl takin hril ka ta, Ka hril ding hi thudik vong a nih. 4 Mi siemtu chu Pathien Thlarau a na, Hringna mi petu chu Iengkimthawthei a nih. 5 I mi don thei phot chun mi don la, Thang khaw la, mi hmason rawh. 6 Pathien hmaa chu nang ang boka, Pila inthoka làk suok ka ni ve. 7 Huphurin mi ti naw la, Ka kut thlàk khom na naw nih. 8 "Ka hrieta ngèi i hril takluo a, I thu hrilhai kha ka hriet chieng: 9 'Ka'n thieng a, poi ka tawk naw a, Bawsietna lakah ka fihlîm; 10 Sienkhom Pathienin suolah a mi ngai a, Hmêlma enin a mi en a, 11 Ka keah kol a mi'n buntir a, Ka fèna taphot a sui dap' i ti kha. 12 "Sienkhom hi hi ka hril che, Hi thua hin i hril indik nawh, Thi thei mihriemhai nèkin, Pathien chu a ropui lem. 13 'Mihriem thu a donsak nawh' tiin, Ieng leia ama i'n tum am i na? 14 Miin man phâk naw sien khom, Pathien chun kong hrang hrangin, Mihriem kuomah thu a hril hlak. 15 Khum laizawlah zànmu, Inhnik taka a tuo rem laiin, A zàn mangah a'n lâr a, 16 A na bulah a biekrùk a, Tium tlung dinghai hrillawkin, A sukthlabàr hlak a, 17 A thil suol thaw inlamlèttir a, Chapona lakah vêng him a, 18 Thlàna a liem ding chel kîr a, Kawlhnâma a boral nawna dingin. 19 A khumah natnain a thunun a, Chawl loin a ruha'n an chip a. 20 Bu dùna hrim hrim a nei naw a, Bu inhnikin a luok a suksuok a. 21 A taksa a hung zùr tiel tiel a, A rù khât chauh a hung ni ta a. 22 Thlàn ko tlâng a hung hnai a, Thina palaihai umna hmun chu. 23 "Mi chu a'n dikzie puongtu ding, Vàntirko sângkhat lai pakhat bêk, Hrilpuitu ding um chu ni sien, 24 A chungah ama chu zàngaiin, 'Thi loin insuo zalèn ta ro, A'n tlanna ding ka hmu tah' ti sien, 25 Naupang anga a pang dawngin, Tleirawl angin hung intuoi thar a tih. 26 A tongtaina Pathienin don a ta, Hlim takin lo lawm lùt a ta, Felna hmunah hlângkâi nawk a tih. 27 Chuongchun, mihai kuomah hungin, 'Suolin thil indik ka sukkhawhlo a, Sienkhom ka phù anga mi thung loin, 28 Ka nun varah inlèngtir dingin, Thlàna liem ding a mi san suok' Tiin hung hril a tih. 29 Hieng hi Pathienin mihriem chungah, Voi hni voi thum dâm chen a thaw hlak, 30 Thlàna liem ding sanhim a, Hringna vara a lèng theina dingin. 31 "Chuleiin Joba, hieng thil hi inchik la, Mi ngâithla la, hril zom pei ka ti che. 32 Hril ding i nei a ni chun hril la, Thiem i chang ngei ka ditpui chê leiin, I thuhai chu lo ngàithlàng ka tih. 33 I nei naw chun to tokin ngâithla la, Varna thu inchûktir ka ti che. "

Job 34

1 Elihu chun a hril zom pei a: 2 "Nangni mi varhai, ka thu hi ngàithla ro, Mi thiemhai, in na mi dawpêk ro. 3 Leiin thil inhnik a hriet angin, Nä khomin thu a lo thlier hlak. 4 Ei ta dinga thil indik hriet thei tum inla, Thil tha chu inchûk tlàng ei tiu. 5 "Joba chun, 'Poi ka tawk nawa chu, Pathienin thiem a mi'n changtir nawh. 6 Ka'n dika chu khêlhlipah a mi ngài a, Poi ka tawk ve nawa chu, Dam ruol loin a thalin a mi sun' a tih. 7 Dêusawna tui anga dawn mi, Joba ang hi tu am an um a? 8 Thil suol thawtuhai a'n koppui a, Mi rilohai a'n thuruolpui bok a. 9 'Pathien suklawm tum dàm hi, A hlawkna a um dèr nawh' a ta. 10 Nangni, lungvar neihai, ngâithla ro, Pathienin suol a thaw teu nawh, Iengkimthawtheiin a rèl suol ngai nawh. 11 An thilthaw ang peiin mi a thung a, An um dàn ang peiin a thaw hlak. 12 Pathienin suol a thaw ngai naw a, Iengkimthawtheiin a rèl suol ngai nawhTi tluka thudik dang a um nawh. 13 Hnuoi enkoltu dingin tu'n am a ruot a?Khawvel pumpui hi tu'n am a'n koltir a? 14 A thlarau a kuom tieng ko kîr a, A thuok a kuom tieng làk kîr nawk hi, A thil tum lo ni tah sienla chu, 15 Hringmihai hi thi ruol vong ei ta, Pilvutah kîr nawk vong ei tih. 16 "Hrietthiemna i nei chun ngâithla la, Ka hrilhai hi bengkhon rawh. 17 Thudik theidatun ro a rèl ding maw?Indik le Ropui chu i mawsiet ding maw? 18 Ama chu lalhai khom "Hmangna bo", Mi lienhai khom "Mi rilo ruol" titu a nih. 19 Lal sûngkuohai a ditsak bîk naw a, Rethei le hausahai a thlier bîk nawh, An rêngin a kutsuok an ni si a. 20 Zàn khat mitsìm tuokin an bo a, Tu kut thlàk khom ngâi dêr loin, Mi hrâthai chu làk hmangin an um hlak. 21 "Mihriemhai lampui tin a en zing a, An kal pên tin a hmu fâi vong. 22 A laka mi suol inbìkna dingin, Thim sä taluo hrim a um nawh. 23 Pathien hmaa rorêlnaa fe dingin, Tu khom hun a ruot lawkpèk nawh. 24 Tu rawn loin mi hrâthai a suksiet a, Anni hmunah mi dang a sie a. 25 An thilthaw a'n chik vong a, Zàn kârin a nuoi hmang hlak. 26 Mihai hmu ngeiah anni chu, An rìtlona leiin a hrem hlak, 27 Ama chu pèt hmangsan a, A dànhai an poisak naw leiin. 28 A na tlung khopin retheihai an suktap a, Rimsihai tap ri chu a lo hriet si a. 29 Ama chu to sien tu am dem thei ding?A hmêl thup sien tu am hmu thei ding?Mi mal le hnam chunga um a nih. 30 Pathien hre lo mihai rorèl a khap hlak, Mipui awktu châng an ni nawna dingin. 31 "Miin hieng hin Pathien kuomah, 'Thil suol ka lo thaw taa chu, Poi tawk nawk ta ngai naw ning; 32 Ka hmu lo chu mi zirtîr la, Ka lo suksuol a ni khomin, Thaw nawk ta ngai naw ningah'Tiin lo hril ni tah ang sien la, 33 I sim nuom tlat si naw chun, I hnìna ang charin rorêlna chu, Pathienin a hèm ding am a ni?Kei ni loin i thua innghat a nih. Chuleiin, i hriet chu hril raw leh. 34 "Thil hre mihai le mi varhai, Ka thu ngâituhan hieng hin an hril a: 35 'Joba hi ieng chinchàng hre loaNuoma tong mei mei a na, A thuah varna a kop nawh' tiin. 36 Mi rilo anga Joba a tong el hi, Fie fâi vong ni sien ka va ti ngei! 37 A suol bàkah a hel sa bok a; Ei mithmua ngei hmusit takin, Pathien chu kut a ben khum a, A hràng khum nghek a ni hi. "

Job 35

1 Elihu chun a hril zom pei a: 2 " 'Pathien hmaah ka fel a nih' i ti hi, Thil indikah i ngai am a ni? 3 Iem ka fel chu ka hlawkpui a?Thil suol lo thaw naw dâm ni lang, Iem ka ta din a tha chuong a?' i ti a. 4 "Nang le i kuoma um i ruolhai hi, Keiin hang don tawl ka ti cheu. 5 Vàn tieng dâk la, hang en ta, I chung daia sûmhai khi thlîr rawh. 6 I suol khan Ama a tawk buoi phàk maw?I bawsiet teu khan iem Ama a tawk buoi? 7 I fel kha Aman a hlawkpui duok a ni?Ieng am pèk ve thei i nei hrim hrim a? 8 I rìtlona chun nang ang mihriem a tawk a, I felna chun mi danghai a tawk thei. 9 "Nêksawrna hnuoia inrûmhai chun, Mi hrâthai kuta inthoka san an ngèn a. 10 Nisienlakhom mi tu khomin, 'Khaw la'm mi Siemtu a um, Zàna khom hlahai mi'n saktirtu, 11 Hnuoilènghai nèka mi zirtir rawntu, Chunglènghai nèka vara mi siemtu chu?'Tiin an indon ngai hrim hrim nawh. 12 An ko khomin a don tawl nawh, Mi rilohai lungril chapona leiin. 13 Samphuol mei meia an kona chu, Pathienin a ngàisak naw a, Iengkimthawtheiin a bengkhon nawh. 14 Ama chu hmu loa inhril sia, I chungthu rêl dinga i nghâk si chu, A va ngàisak naw zuol awm che de! 15 Lungsena a hrem el naw lei le Rìtlona chu a poisa el naw lei sekin, 16 Joban thu hmang lo a sâk suok a, Invêt angin a tong a tong a ni hi.

Job 36

1 Elihu chun a hril zom pei a: 2 "Mi la hang dawthei met la, Pathien aiawa hril ding ka hauzie, Hang inentir ka ti che. 3 Ka hrietna hi hla taka inthoka ka dong a na, Rorêlna chu mi Siemtu kutah ka sie a. 4 Thu khêl ka hril nawh ti ring rawh, Hrietnaa famkim i bulah ka um hi. 5 "Pathien hi thilthawthei tak a na, Tu khom a hmusit el naw a, Hrietthiemnaa hrât khawkhèng a nih. 6 Mi rilohai a hlà ngai naw a, Tuorhai indik takin ro a rèlpèk hlak. 7 Mi felhai a enkâi zing a, Lalthungphaah a'n thungtir a, Kumkhuoin a chawisàng hlak. 8 Nisienkhom kolhai bun a, Nêksawrna hruia khit an ni chun, 9 Chapo taka an bawsiet leiaTuor an nizie thu a hril hlak. 10 A zilna thu a'n ngàithlàktir a, An suol sim dingin thu a pêk hlak. 11 A thu awia a rong an bawl chun, Hmûingîl takin nun hmang an ta, An dam sûngin lungawi an tih. 12 An ngàithlàk nuom naw ruok chun, Kawlhnâma sukbohmangin um an ta, Hrietna tlasamin thîng an tih. 13 "Lungrila Pathien hre lo mihai chun, Lungsenna an khawl khawm hlak a, Khaidieta thlung an ni chàng khomin, Thangpuina hniin an khèk ngai nawh. 14 Tempul nawchizora inhmang ralin, An vànglai hunah an thi a. 15 Tuorhai ruok chu tuornaa inthokin, Ama chun a san suok a, Tuorna chun an nà a sukvar hlak. 16 "Sietna bàua inthoka zawr suokin, Hmun thawveng le zalènah a sie che a, Fàk tha thain i dawkàn a vûr sip a. 17 Tu ruok hin chu mi rilohai chana tlû, Rorêl pèkna chu i chungah a tla a, Rorêlna indikin a khit ta ché a nih. 18 Lungsenna chun deusawna tieng, Zawr thlu lo ding chêin fimkhur la, Thamna tamin kei pêt naw raw se che. 19 I hausakna le theina po poin, Mangangna lakah a hum ding che maw? 20 Zàn hun nghâkhla naw rawh, Mihai làk hmanga an um hun a nih. 21 Suola tlu lo dingin fimkhur rawh, Khawlona nuna i tlùk lùt leiin, Pathienin tuorna a hung tir a nih. 22 "Pathien chu a hràtnan a'n chawisàng a, Ama ang zirtirtu tu'm an um a? 23 Tuin am a lampui ding rêlpêkin, 'I thaw indik nawh, ' a ti thei ding? 24 Mihaiin zâia an chawimawi hlak, A sinthaw ropui chu chawimawi rawh. 25 Mi tinin chu chu an hmu a, Hla taka inthokin an thlîr hlak. 26 Pathien hang ropuizie hi, Ei va hriet phàk naw de aw!A kum zàt sui suok ruol a ni nawh. 27 "Tui mal far tin chu a hîp tung a, Tui hua thlit fîmin ruo a'n changtir a, 28 Vànin ruo chu a'n sùrtir a, Mihriem chungah a sûr chur chur a. 29 Sûm a'n zàm dartir dàn dàm le, Vàn a'n rùmtir dur dur dân dàm hi, Mihriem hriet phàk ruol a ni nawh. 30 En ta, kawl a'n leptir dàn dàm hi, Tuifinriet mong khom a el phàk. . 31 Chuong ang chun hnamhai a op a, Fàk ding tam tak a pêk hlak. 32 A kutin kawlphê chu a chel a, A tum tak fu dingin a dèng suok hlak. 33 Vàn inrûmin a chungchàng a hril a, Ranhai chenin thlipui hung chu, An lo puong lawk hlak a nih.

Job 37

1 "Hi lei hin ka lung a chawmchawrok a, A'n phu zok zok el a nih. 2 Pathien rawl ri chu ngàithla ta u, A bàusuok thûm dur dur el chu! 3 Vàn hnuoi kipah a tir suok a, Kawl kil chen a phe zuoi zuoi a. 4 Chu zoah a hung inrùm a, A rawl ropui chun a nghor vèl a, A rawl thangkhawkna hmunah, Kawl an phêttir zur zur hlak. 5 Pathien rawl rî chu a mak a, Ei hriet phàk lo thil ropui a thaw hlak. 6 Vûr kuomah, "Hnuoiah tla rawh" a ta, Ruo kuomah "Sûr chur chur rawh" a ti bok a, 7 Chu huna chun mi tin sin a'n chawltir a, A thilthawtheizie an hrietna dingin. 8 Ram sahan an riebûk an pan a, An bu zawlah an intom zing a. 9 A kuoa inthokin thlipui a hung inthok a, Thli chun dei a hung phur a. 10 Pathien thuokin vûr a sukkhal a, Tui cham duoi elhai chu an inkhal a. 11 Sûm chu tui hù a'n pàitir a, Sûma chun kawlphe a'n zàmtir a, 12 Ama thuin sûm an inziel tup tup a, Mihriem chêngna hnuoi hmun tinah, A ti taphothai chu an thaw a. 13 Sûm hmangin thenkhat a hrem a, A hmangaina le ditsakna inentirin, Hnuoi chungah ruo a'n sûrtir bok a. 14 "Joba, ka thu hi ngàithlain to la, Pathien thilthaw makhai hi ngàituo rawh. 15 Tu hin Pathienin sûm a thunun dànhai, Kawl a'n leptir dànhai i hriet ta maw? 16 Hrietna famkim neitu thilthaw mak, Sûm a'n kàngtir dànhai i hriet ta'm? 17 Sim thli hrâng loa khuo inup chur lai, I zakuo tuom chin an thlan hlup hlup khan, 18 Vàn chu darthlalang inling anga, Var a'n elkhaltir lei a ni khah. Chuong ang chun i thaw thei ding? 19 "A kuoma hril ding i ti chu hril raw leh, Ei inthim êm leiin ei hril thiem naw a ni hi. 20 Keiin hril ka tih ka ti ding am a ni?Mani insukbohmang chàk tu'm an um a? 21 Thliin vàn a mût fài hnungin, Nisa var khi tu am en zing ngam ding? 22 Pathien chu hmar tienga inthokin, Rangkachaka inthuomin a hung a, Mawina le ropuinain a tuom vèl. 23 Iengkimthawthei chuEi hriet suok ruol a ni nawh. Thilthawtheina le indiknaah a ropui a, Felnaah a hnienghnâr a, Mi a nêksawr ve nawh. 24 Chuleiin, mihaiin ama an inza a, Var intihai chu ienga khom a ngai nawh. "

Job 38

1 Chu zoa chun LALPAN Joba chu thawngaleivira inthokin a hung don a. Hieng hin a hril a: 2 "Tu am a na hrietna nei si loa, Ka thurawnhai thu ni loa sêlkaltu hi? 3 Pasal takin dier kei sîng la, Thu indon ka ti che a, Chu chu i mi sàng ding a nih. 4 "Hnuoi thut ka phùm lai khan, Nang khaw lai am i um a?I hriet thiem chun mi hril rawh. 5 Tuin am a lienzie a'n khi a?Tuin am a'n khìna hrui a kei zam a? 6 A thut chu khaw lai am a'n nghat a?A kil thut lung chu tuin am a phùm a? 7 Zîng arasihaiin zâi hla rem a, Vàntirkohail hlima an khèk lai khan, Nang khawlai am i um a? 8 "A sûla inthoka tuipui a tè lai khan, Tuin am kot a lo khàr khum a na? 9 Sûm chu a silfèn dingin ka siem a, Thim sa takin ka tuom khum a; 10 A chìm chin dinghai ka ruot a, A dangna le khàrna ding khom; 11 'Hi chen hi hung chìm thei i ta, Hi bâk hi chu phal ni naw nih, I tui fawn sànghai khomin, Hi chen chauh hi an chìm thei'Tiin ka hril a ni kha. 12 "Zîng tieng nisa hung suok ding le Khawfîng khom hung chat dingin, Thu i pêk ta hlak hrim hrim am? 13 Hnuoi phèk chu a kiah man a, Mi rilohai chu thin thla dingin, Thu i pêk ta hlak hrim hrim am? 14 Pilpok chunga suoi nam angin, Hnuoi chu a hung inlang chieng a, Silfèn rong hrang hranga chei angin, A hmêlhmang a hung inlang hlak. 15 Mi rilohai chu var pèk an ni naw a, Bân an phar a, suktliekin a um a. 16 "Tuipui hnàrhai chu sirin, Lipui rilhai i fang ta hlak am? 17 Thìna kotkhàr an inentir ta che?Thìna hlim kotkhàr i hmu ta hlak am? 18 Hnuoi lienzie i ngaituo ta hlak am?Hienghai hi i hriet chun mi hril rawh. 19 "Var chêngna in lampui i hriet am?Thim hi khaw laia chêng am a na? 20 An umna hmunah thuoi thei i ti?An in lampui i hriet am a ni? 21 Hre ngei i tih, i pieng ta si a, I kum khom a tam ve ta hi! 22 "Vûr siekhawmnaah i lût ta hlak am?Riel siekhawmna i hmu ta hlak am? 23 Buoi huna dinga ka sie khawl leIndo le inbei huna dinga ka khèk a nih. 24 Var suokna lampui khaw la'm a na?Sak thli hung suokna hmun khom teh? 25 "Ruopui vânawn sùr thlàkna di'n, Tuin am kor ruom a cho a?Têk tlàkna ding lam tuin am a siem? 26 Tu chêng nawna thlalèr ramah, Tuin am ruo a'n sùrtir a? 27 Hlobet hring intotir dingin, Ram se tawl le ràusan hmunhai, Tuin am a sukhnawng a na? 28 "Ruo hin pa a nei am a ni?Daidaw hi tuin am a hring a na? 29 Tu sûla inthokin am, Vûr khal a hung suok a na?Vàna inthoka zil hung tla hi, Tuin am a hring thlàk nîng a ta? 30 Tui khom lung angin a chang a, Tuipui inthûk chunghai an inkhal. 31 "Siruk khi i khit khawm thei am?Sizucho intlar khi i phel dar thei am? 32 Arasi bawrhai khi an hun bi takah, Hung inlang dingin thuoi thei i ti?Zângkhuo khi a te hruoihai leh, I hung thuoi thei ding am a ni? 33 Vànvêl inop dàn i hrieta maw?An invong dànhai chu hnuoiah, I hmang ve thei di'm a ni? 34 "Sûm khi hang khêk khum rak la, Ruopui vânawn i ko thlàk thei ding? 35 Têk chu a tlàkna dingah i tir thei ding?'Hi taka hin kan um' an hung ti ding? 36 Tuin am lungvar le hrietthiemna a pêk? 37 Tu am sûm tiem thei dinga varna nei?Tu am vàn tuibèl tong baw thei ding? 38 Ieng leiin am pilvut hi inhlomin, Pil tlanghai hi an inmat thei a na? 39 Keipui ta dinga fàk zongpèkin, Sakeibaknei phingtâm chawmin, 40 An pûka an bok lai lehîmbuka sè ding an inchàn laiin, I enkol thei tawl ding am a ni? 41 Vaàkte ruol phingtàm invâkin, Pathien koa an inchiek lai khan, Tuin am an puihai kuomah, An fàk ding a pêk tawl a na?

Job 39

1 "Tlânga sakèlhai intêt hun i hriet am?Zukpuiin tê a nei lai i hmu ta'm? 2 Thla ieng zât am an pài i tiem am?Tê an nei hun i hriet am? 3 An bok a, tê an nei a, An nauha sè a re a. 4 An tèhai chu ram palailèngah, Hrât takin an hung seilien a, An puihai màksanin an fe dar a, An hung kìr nawk ta ngai nawh. 5 Tuin am ram sabengtung hi, An insuo zalèn a na?A thlungna hruol tu'n am a sût? 6 A tlatna di'n ram ruok ka pêk a, Sì tamna ruomah ka'n chèngtir a. 7 Khawpui ri sie a ngai thei naw a, Khaltu khèk ri a hriet ngai nawh. 8 A tlatna chu tlângpui dung a na, Hna hring taphot a zong hlak. 9 "Ramsiel i vâi ngam thei ding?I ran bûkah a riek nuom ding? 10 Changkuongah langkawn bâtin, I ta dingin lo a kei ding? 11 A thâ a hrât ti lei ringotin, Ringsanah i hmang thei ding? 12 I buphalhai hung la khawma, Hrizawla thak khawm dingin, I dànde thei ding am a ni? 13 "Ostrikm thla zàp ri chu, Ieng angin hlimum sien khom, Kànghlâi thla chàng le hmul leh, Hang tekhi thei chì a ni nawh. 14 Hnuoiah a'n tui a, Pilvutin a vur lum a, 15 Miin hung sir koi an ta, Ram sain chil koi an tih, Ti hrim hrim a ngaituo nawh. 16 A têhai chu a tê naw ang topin, Indoi dêr loin a soisak a, A'n rim thlawn ding le ding naw, Ieng khom a ngaituo ve nawh, 17 Pathienin varna tlasamin a siem a, Hriet thiemna a pêk ve naw leiin. 18 Tlân dinga thla a phar ruok chun, Sakor le a chungchuonghai a tham nawh. 19 "Sakor hràtna hi i pèk a ni?A rîng hmul hi nangma chei a ni? 20 Khàu anga inchawm thei dingin, Nangin hràtna thahrui i pèk a ni?A hnâr hnawt ri tiumzie dàm hi? 21 A kein hnuoi a hang thài a, A thâ a hung inza zok zok a, Indona hmason dingin a suok a, 22 A ti naw a, a zâm bok naw a, Kawlhnâm lakah a'n tìm nawh. 23 A chunga thal bawm an ri rok rok a, Fei le thal a hung tle zuoi zuoi a. 24 A kein hnuoi a thâi nasa zuol a, Tawtawrawt ri a hriet pha chun, A ngîr tok tok thei ta ngai nawh. 25 Tawrawrawt ri a hriet chun, 'Khai leh!' tiin hnâr a hnawt a, Ràl hla taka inthokin, Indo rim a hriet thei a, Kawmandarhai khèk ri leHawhawa an innor rihai chu. 26 "Mute hi i varna leia thlà zârin, Sim tieng panin a vuong a ni? 27 Vàn sânga lêng muvanlai khi, I thupêk leia vuongin, Hmun sângah bu a sep a ni? 28 Rawl khoah chêngin a riek a, Lungtolawt kak kàrhai chu, A ta di'n kulpui nghet an nih. 29 Chutaka inthokin fàk ding, Zongin a melkai hlak a, Hla tak tak khom a hmu thei. 30 Thisenin a têhai chu a chawm a, Saruong umna photah a um hlak.

Job 40

1 ALPA chun Joba kuomah a hril zom pei a: 2 "Mawsiet ding zongtu chun, Iengkimthawthei a la cho pei a ni? 3 Joba chun LALPA chu a don a:"Ngai ta, kei tlâktlàina nei lo hin, 4 Iengtin am don ka ti che a?Ka bàu ka hup el a nih. 5 Voi khat ka hril taa chuh, Donna hrim ka hmu naw a, A nih, voi hni zet a ni ta lem, Ieng khom hril sap ta naw ning. " 6 LALPA chun thawngaleivira inthokin hieng ang hin Joba chu a hung don a: 7 "Pasal takin insèrù la, Thu indon ka ti che a, Chu chu i mi don ding a nih. 8 "Ka thurêlhai sukmuolphoin, Nangma thiem chang theina dingin, Thiem naw i mi'n changtir ding maw? 9 Pathien bân ang bân i nei maw?A rawl angin i'n rûm ve thei maw? 10 Chuong an leh insukropui la, Inzaumna le lalnaa inthuomin, Mawi takin hang inchei raw leh. 11 I lungsen sip liem chu hrîk thla la, Chapo taphot en la, suktlawm tawl rawh. 12 Mel rum tawl la, suktlawm la, Mi rilohai chu an ngîrhmuna inthokin, Phet thla la, sir sop neng rawh. 13 An rêngin pilvutah phûm la, Thlàn sûngah an hmài tuom rawh. 14 Chu pha chun i kut chang tiengin, Nang le nang i'n sanhim thei ti, Keima ngeiin hre tâng ka tih. 15 Nangma ang boka ka siem, "Behemotn hi en hman ta, Bawng anga hlohna ring mi a nih. 16 A kawng thà hang hràtzie le A phìng tihrol mukzie hi en rawh. 17 A mei chu sidar thing ang el a na, A mal thàhai chu an inphan tuk a. 18 A rùhai chu dâr tluon ang a na, A kefùhai khom thîr tluon ang a nih. 19 Ka thilsiemhai lai khom hin, A mak chungchuong vè a nih, Sienkhom kei chun ka ngam thei. 20 Tlângha'n a bu ding an insuo a, A vêl chu ram sahai tuolchaina a nih. 21 Dûma phairuong bil kâra umin, Lotus buk hnuoiah a bok a, 22 Lotus buk chun a zàr hlie a, A vêlah phahrâm a ngîr khup a. 23 Tui lien sàng a ti der nawh, Jordan kuong liem zur zur khom. 24 A'n ràlring lai tuin am manin, Khuopin, a hnâr verpêk thei an ta?

Job 41

1 "Ngakuoiin leviathano i kuoi dok zo ding?Hruolin a lei i khuop de thei ding? 2 A hnârah hruihruola thlungin, A orah ngakuoiin i thil tlang thei ding? 3 Ngilnei dingin a ngèn ding che?Hoihawm takin a biek ding che? 4 Kumkhuoa i rongbawltu ni dingin, A remti i ring hrim hrim am? 5 Vate anga vài ngamin, I naunu i'n tlàitir ngam ding? 6 Sumdawnghan an hung dot ding che?An dawrah an zor i ring am? 7 A vunah thal a'n bûr thei ding?A luah thal kibarin a kâp tlang ding? 8 A chungah kut i thlâk vai chun, Inbei nasa hlèng in ta, Thaw nawk ta ngai naw ti nih. 9 Hnè beisei chu thilthlawn a na, I hmu ruolin tlawm nghâl i tih. 10 Cho ngam khopa rorum an um nawh. Ka hmaa lem chu tu am ngîr ngam ding? 11 Thin nawk dinga tu am thil mi pe?Vàn hnuoia thil iengkim hi ka ta a nih. 12 "A fukè, hrâtzie le pien hmang khom, Hril hmai chi hrim a ni nawh. 13 Tuin am a vun thuo khok thei an ta?Tuin am a hmûrah thirbar inbûk an ta? 14 Tuin am a ha tibaiuma inhuol, A bàu chu pur ngam lul an ta? 15 A vun inpawthuo chu a phaw a na, 16 Boruok lût thei lo khopa phûi a na, 17 An inpawthuo thlap vong leiin, A karah thil a lût thei nawh. 18 A hang insim chu a var phût a, A mit chu kawl angin a sen rûm a, 19 A bauah meichok a suok hlut hlut a, Meisi angin an intèk uoi uoi a. 20 Phairuong tawl thinga hmang a, Sa bêlpui suong hlut hlut angin, A hnârah meikhu a suok lui lui a. 21 A thuokin meihol a mût ling a, A bàua inthokin meichok a suok a. 22 A rîngah a hràtna a um a, A fena photah mi a sukthlabàr a. 23 A taksa inhrolin a muk a, A thau innèmna lai a um nawh. 24 A awmbawr lung sakhat ang chu, Bu rawtna lung anga chang a nih. 25 A hung inthok suok meu chun, Pasalthahai khom an thlabàr a, A tawk hmain an tlàn se hlak. 26 Kawlhnâma sàt a poisa naw a, Fei le thal zum a poisa bok nawh. 27 Thîr chu bupawl angin a ngai a, Dâr chu thing hmon tah ang chauin. 28 Thalin a hnot zàm naw a, Virvoma dèng lem lem chu, Bu sia dèng ang lekah a ngai. 29 Hmol chu bupawl angin a ngai a, Fei khaw vungin a nui a sukza chauh. 30 A phìng vun tuomtu phuhlip chu, Bel koi hàr ngei tak ang vong a na, Chirdieka a fena sùlhnu chu, Bu chìlna khawla hrùt ang a nih. 31 Bêlpui intlok ang but butin, Li ril khom a suktlok but but a, Sahriek bùr thin ang elin, Tuipui khom a nok phul hlak. 32 A fèna hnúhmá a êng phût a, Tuipui huom chu a vâr sur hlak. 33 Ama anga titna hrim nei lo, Hnuoi chunga hin an um nawh. 34 Insuklien po po a hnuoi en vong a, Insuklulinghai lal a nih. "

Job 42

1 Chun, Joba chun LALPA chu a don a: 2 "Iengkim i thaw thei ti ka hriet a, I tum chu tu khomin an dàl thei nawh. 3 'Tu am a na hrietna nei si loa, Ka remruot lo kaltu hi?' tiin i'n don a. Ni e, kei ngei hi ka ni annawm, Ka hriet lo thilhai ka lo hril a nih, Ka hriet phàk lo thil ropui takhai chu. 4 Nangin, 'Mi lo ngàithla rawh, Tong ka ta, thu indon ka ti che a, Chu chu i mi sàng ding a nih' i ta. 5 Nä ringotin ka lo hriet hlak che a, Tu ruok hin chu mitin ka hmu ta che; 6 Chuleiin, keima hi ka'n tirdak a, Vut le pilvutah thungin ka sim"tiin. 7 LALPAN Joba kuoma chuong thu a hril zo chun Teman mi Elifaz kuomah, "Ka siehlaw Joba angin ka chungchàng thu indik taka in hril naw leiin i chunga le i ruolhai pahni chunga khan ka lung a sen hle a nih. 8 Chuleiin, tu hin bawngchal pasari le beram chal pasari keiin ka siehlaw Joba kuomah fe unla, in ta dingin pumraw inthawina thilhlàn chu va'n hlàn unla, ka siehlaw Joba chun tongtaipèk a ti chêu a, chu chu lo pom ka ta, in indik nawna angin in chungah thaw naw ning; ka siehlaw Joban a thaw angin ka chungchàng thu indik takin in hril nawa chu" a ta. 9 Chuongchun, Teman mi Elifaz le Suha mi Bildad le Naamat mi Zofar hai chu Joba kuomah an fe a, LALPAN thu a pèk ang tak chun an thaw a, LALPA chun Joba hnîna chu a lo pom a. 10 A ruolhai pathum ta dinga Joba a tongtai hnung chun LALPAN Joba chu a sukhmùingìl nawk a, a hmaa a nei lèt hni a pêk a. 11 Chuongchun, a unauhai le a farnuhai po po le kha hmaa a hmêlhriet po po hai kha an hung a, a inah ruoi an kîl tlàng a; LALPAN a chunga thil tha naw a'n tlungtirna chungah an tuorpui a, an thlamuong a, mi tinin tangkaruo kesitap khat seng le rangkachak kutsebi an pèk a. 12 Chuongchun, LALPAN Joba hun nuhnung tieng chu a hmasa nêka nasa lemin mal a sawm a, beram sîngkhat le sângli, sanghawngsei sângruk, bawngchal tuok sângkhat le sabengtungpui sângkhat a nei a. 13 Naupa pasari le naunu pathum a nei bok a. 14 A naunu upa tak hming chu Jemima a na, a pahnina chu Kezia a na, a pathumna chu Keren-Hapuka a nih. 15 Joba naunuhai anga hmêl tha a ram puma chun tu khom an um nawh. Joba chun a naunuhai chu an tàhai ang bokin rochan a siempêk vong a. 16 Chuong lai chun Joba chu kum za le sawmli a ni ta a, a naupahai le a tuhai khùp li chen a hmu hman a. Chuongchun, Joba chu ngal fîma damin, tar takin a thi ta a. 17 (A um nawh)

Psalms 1

1 Mi suolhai remruot zui ngai lo, Mi suolhai lampui hraw ngai lo, Hmusittu lai thung ngai lo chu, Mi hamthâ a va ni ngei de! 2 A lawmzawng LALPA dàn a na, Sûn le zànin a dawnkhawl hlak. 3 Tui luong zingna kama thing phun, A hun taka rà insuo hlak, A hnà vuoi ngai lo ang a nih. A thilthaw phot a hmûingîl hlak. 4 Mi suol ruok chu an ni vè nawh, Thli lên dar bu sî ang an nih. 5 Chuleiin rorêlna hmaah, Mi rilo dingchang naw ni a, Mi felhai inthung khawmnaah, Hmun chang ngai hrim hrim naw ni hai. 6 Mi fel kalchawina lam tin chu, LALPAN a vèngpèk zing hlak a, Mi rilo lampui hraw ruok chu, Bohmangnain a tawp hlak si.

Psalms 2

1 Ieng leia hnamha'n phier a, Hel dinga insingsa a, Mipuiha'n tep lo mei mei, An phan rùk hlak am a na? 2 LALPA le a hriek nàl chu, Hnuoi lalhai chun khing hronin, Rorêltuhai an pung khawm. 3 "An hrènthìr khêng koi ei ta, An khaidiet thin thlâng ei tih". Tiin an khêk thuop thuop a. 4 Vàna inthung LALPA chun, Anni chu a nuisaw a, 5 Lungsenin a zuk kawk a, Lung choka sukthlabârin, 6 " Ka tlâng thienghlim Zionah, Ka Lal thlang ka'n thungtir tah"Tiin a suosal tawl a. 7 LALPA thu chu puong ka tih:"Nang hi ka Naupa i nih, Voisun i Pâ ka ni tah. 8 I dit hni rawh, pêng ka che, Hnamhai i rochan an na, Kawl kil tawp chen khom i ta. 9 Thîrtiengin ro rêl i ta, Pil bêl ang dèng koi i tih"Tiin ka kuomah a hril. 10 Hnuoi lalhai, var suok unla, Rorêltuhai, fîmkhur ro. 11 Tììpuma LALPA rong bawlin, Inthin pumin a kè fawp ro. 12 Chuong naw chun lungsen a ta, Bohmangna tuok rawi in tih, Lungsen thut thei a ni si. A bèltu chu an hamtha.

Psalms 3

1 LALPA, ka hmèlma pung hrâtin, Mi dotu an va tam sawt ngei! 2 "Pathienin san teu naw ni che"Mi titu an va tam ngei de! 3 Lalpa, nang chu ka vêl tina, Mi hliekhùtu phaw chu i na; Ropuina i mi'n khumtir a, Ka lû hi i chawisâng hlak si. 4 Rawl tawpa LALPA ka ko chàng, A tlâng thienghlima inthokin, Ama chun a mi hung don hlak. 5 LALPAN a mi huolhim leiin, Zâlin zànmu ka'n tuo thei a, Harin ka tho nawk hlak a nih. 6 Sîr tina mi'n chàntu sâng tam, Hmêlmahai chu ka tî dêr nawh. 7 Aw LALPA, nang hung tho suok la, Aw ka Pathien, mi san suok rawh. Ka hmêlmahai khàkah hem la, Mi rilohai hà vaw tlam rawh! 8 Sansuoktu chu LALPA a nih. I mihai mal hung sawm pei rawh.

Psalms 4

1 Mi tantu, ka felna Pathien, Ka ko chêin mi hung don la, Beidong hunah mi thawi dam la, Zàngaiin ka hnìna ngai rawh. 2 Aw mihriemhai, ka'n zaumna, Ieng chen am in sukmuolpho ding?Thu teplo mei mei ngainain, Ieng chen top am khêl in hnot ding? 3 Pathien chun ama ta dingin, Ama ngaisak hlak mihai chu, A ser hrang hlak ti hi hre ro. Ka ko pha LALPAN a hriet hlak. 4 In lungsen chàng suol pha naw ro, In khum laizawlah to zingin, In lungrilin indap hlak ro. 5 Inthawina indik inhlànin, LALPA-ah ringna innghat ro. 6 "Thil tha kan dong theina dingin, LALPA, i hmêl êng mi'n hmu rawh"Tiin tam tak chun an hni hlak. 7 Bû le uoiin an thar tam kum Nêka nasain ka lungril, Hlimnain i hung sung sip a. 8 Ngài ngamin zànmu tuong ka ta, Nangma chauh hi i nih LALPA, Muongleia mi'n chèngtirtu chu.

Psalms 5

1 LALPA, i nâ mi dawpêkin, Kan rùm ri hi lo ngàithla rawh. 2 Ka Laltak le aw ka Pathien, Thangpui ngaiin ka ko che a, Ka hnìna lo ngàithla hràm rawh. 3 LALPA, zîngkâr ka ko che a, Ka thil hnìhai ka'n tlun hlak a, Beisei takin ka nghâk zing hlak. 4 Suol lawm Pathien i ni naw a, Mi rilo leh i chèng thei nawh. 5 I hmaah mi uongthuong tu khom, An inlang ngam ngai dêr naw a, Thil suol thawhai i theidà si. 6 Khêl hril chìnghai i sukram a, Thisen insuo le hlèmhmanghai, I tirdak zawng an nih, LALPA. 7 I hmangaina chuoi lo zârin, I inah hung inlawi ka ta; I tempul thienghlim tieng nghain, Inzà takin hung kùn ka tih. 8 LALPA, ka hmêlmahai leiin, I felnaah mi thuoi pei la, Ka tluonglam mi siem ngílpek rawh. 9 An bâu thu suok mal khat tè khom, Ring tlâk hrim hrim a um naw a, An lungril sietna'n a sip a, An hnuk chu thlàn inhong a na, An lei inpâk dernan a'n khap. 10 Aw Pathien, thiemnaw inchang la, An thil phier sietpui hai sien la, An bawsietna zozai lei hin, Anni chu pei suok dai tawl rawh, I lakah an hel tlat si a. 11 Nangma bêltu ruok chu him sien, Hlimna hla sak kumkhuo raw se. I humhimna thla zâr khum la, I hming dittuhai hlim an tih. 12 A nih, LALPA, mi felhai chuMathei loin mal i sawm a, I ditsakna chun phaw angin, Anni chu în huol vêl zing hlak.

Psalms 6

1 Lungsenin mi zil naw, LALPA, Lungpuom lai mi thunun naw rawh. 2 Aw LALPA, zà mi ngaipêk rawh, Chàuin ka ongrop a ni hi; Aw LALPA, mi hung sukdam rawh, Ka rù le châng a na zo tah. 3 Ka thlâ a beidong êm êm a, Ieng chen top am, ieng chen hiel am, I mi tosan ding chu LALPA? 4 Ngha kîrin mi hung san suok la, I hmangaina chuoi lo zârin, LALPA nangin mi sanhim rawh. 5 Fam tah hre zing chè an um nawh, Seolaa inthokin tu'n am, An inpàk hlak rêng rèng che a? 6 Ka'n rùmnain ka chàu zo tah, Ka mitthliin ka khum laizawl, Zàn tin a far hu vong hlak a. 7 Lungngaiin ka mit a'n thim zo, Hmêlma leiin a chàu zo tah. 8 Nangni suol thawtu po po hai, Hla takah min kiengsan dai ro. Ka tap ri LALPAN a hriet tah. 9 Ka hnìna LALPAN ngàithlain, Ka tongtaina LALPAN a pom. 10 Ka hmêlmahai chu inzakin, Maktiin chi-âi hlèng an ta, Hmâi mawk takin kîr nghal an tih.

Psalms 7

1 LALPA Pathien, ka hung bèl che, Mi hnottu lakah mi hum rawh; 2 Keipuiin a pot thlèr angin, Santu ding tu khom nei loin, Mi kei nawi vong pal rawi an tih. 3 LALPA Pathien, hieng hi thaw a, Ka kutin thil suol a tawk a, 4 Keima le inrema um mi, Suola ka thungrul a ni chun, San boa hmêlma ka rok chun, 5 Ka hmêlmahan mi hnot thlûrin, Mi hung hnot khûm dai hai sien la, Hnuoiah ka hringna sir hmâtin, Pilvut lai mi sop ziel raw se. 6 Lungsenin hung tho la, LALPA, Hmêlma lungsen intûrhai hi, Thoin mi zuk hrawkpêk tâm leh!Aw ka Pathien, nang hung tho la, An chungthu hi hung rêl ta rawh. 7 Mipui pung khawmhan i vêlin, Inhuol tlim hmur hai sien la che, Chung a'nthokin ro hung rêl rawh. 8 Mi tin rorêlpêktu LALPA, Ka felna phûin mi'n khi la, Aw Chunghnungtak, ka ringum phu'n, Ka chungthu hi mi rêlpêk rawh, 9 Felna Pathien, lungril hretu, Mi rilohai tawrotna hi, Nangman hung suktawppêk vong la, Mi felhai chu hung suknghet rawh. 10 Chung Pathien hi ka phaw a nih, Lungril ngîlhai a sandam hlak. 11 Rorêltu fel Pathien a na, Ni tin a lungsen a rè nawh. 12 Tu khom sim nuom naw ta dingin, A kawlhnâm tât ngei zing a ta, A thalngul kuoiin tin a tih. 13 Thìna hriemhrei a buotsai a, A thal chok thei khom a'n pei zing. 14 Suolnain nau a'n paitirhai, Buoina naua vontuhai chun, Beidongna an hring suok ngei hlak. 15 Tlâkhol inthûk tak chotu chu, A khur choah chun tlâng a ta, 16 A buoina siem chun vaw lêtin, A nunrawngnan ama lu bûr, A hung dêng lêt nawk hlak a nih. 17 A felna leiin LALPA chu, Inpâkin lawmthu hril ka ta; LALPA Chunghnungtak hming ngei chu, Inpâkin lawm hla sak ka tih.

Psalms 8

1 Aw LALPA, nang kan Laltak, I ropuinan vàn khûmin, Hnuoi pumah i hming a mawi! 2 Pom lai nautehai bàuah, I hràtzie i'n puongtir hlak; I chèngnan kul nghet i'n din, Doa phuba la tumtu, mêlmahai tukdolna din. b 3 I kut suok thangvân sânga, Sorthla siâr i'n nghathai, Thlîra ka dawnkhawl chàngin, 4 Hringmi hi ieng am a na, I hriet fuk lop lop el ni?Hriem nauhai khom iem an na, I ngaisak èm êm el ni? 5 Angel hnuoi thetah siein, Ropuina le chawimawina, Tonlairang i'n tontir a. 6 I kut suok po po chungahLalin anni i siem a, An ke hnuoiah i sie vong: 7 Beram le bawng ruol po poRamsa le chunglèng vâhai, 8 Tuipuia chêng nga tinrêng, Thilhring chi tinrênghai leh. 9 Aw LALPA, nang kan Laltak, Hnuoi pumah i hming a mawi!

Psalms 9

1 Ka lungril po poin LALPA, I kuomah lawmthu hril ka ta, I thilmak thawhai puong ka tih. 2 Nangmaah lawmin hlim ka ta, Aw Chunghnungtak, i hming chawiin, Zài hla remin inpâk ka che. 3 Ka hmêlmahai chu tlânsiein, I hmaah an insui hlum a, 4 Ka thangna tieng i mi tan a, I lalthungphaa inthungin, Indik takin ka thu i rèl. 5 Hnamhai chu zilin i kawk a, Mi suolhai i sukbohmang a, An hminghai chu kumkhuoa di'n, I thâi bopek tawl ta si a. 6 Kumkhawtluonga se song dingin, Hmêlmahai i sukbohmang a, An khawpuihai i sukram a, Tû hriet hlaw hrim an um ta nawh. 7 LALPA chu chatuon lal a na, Rorêlna thungpha a'n din nghet. 8 Felnan khawvel ro a rèl a, Indik le thlei bik nei loin, Mi tin chungah ro a rèl hlak. 9 Nêksawrhai ta din LALPA chu, An kulpui bêlbul tak a na, Harsat huna kulbing a nih. 10 I hming hretu ringsan i na, Nangma zongtu che chu, LALPA, I thlàthlam ngai hrim hrim si nawh. 11 Ziona thung LALPA ta din, Inpâkna hla chu sak unla, A thilthawhai chu inzawtin, Hnam tin kuomah chun puong dar ro. 12 Thisen phuba la hlaktu chun, Ngaivenin a hriet zing tawl a, Tuorhai tap ri a'n nghil ngai nawh. 13 Aw LALPA, mi lunginsiet la, Hmêlma kut ka tuor hi en ta!Thìna kho tlânga inthokin, LALPA, nangin mi san suok la, 14 Zion Naunud kotsuoa chun, Ka'n pâkna chè chu puong darin, I sansuokna chu lawm ka tih. 15 Hnamhai chu anni khur cho ngei, Tlâkholah chun an tla lût a, An lên châng kam rûk ngeia chun, An kèhai an tàng tah a nih. 16 A rorêlah LALPA a'n puong, Mi rilohai chu anni kam, Chânga ngei chun an inawk hlak. 17 Mi rilohai chu Seole tieng, Pathien ngaisak lo hnamhai leh, An rêngin kîr nawk diel an tih. 18 Retheihai thlathlam zing naw nih, Tuorhai beisei thlawn song naw nih. 19 Aw LALPA, nang hung tho suok la, Mihriemin hnèna chang naw sien, Hnamhai chungah ro hung rêl rawh. 20 LALPA, anni sukthlabâr la, Mihriem el an nizie thu hi, Hnam tin kuomah inhriettir rawh.

Psalms 10

1 Aw LALPA, iengtizie hrim a, Ka beidong mangang nia hin, Hla takah i'n bi hmang dai am? 2 Mi rilo chun chapo takin, Hrâtnawhai chu sâ ang pèlin, A châng kam rùkah a'n awktir. 3 A lungril châk zawng uongpuiin, Duâm taka hlawkna hnotin, Pathien hnawlin tongsie a'n phur. 4 Mi rilo chu a chapo a, Pathien hrim a zong ngai naw a, A lungrilah Pathien ta din, Hmun hrim hrim a'n ken ve ngai nawh. 5 A tum lam a hlawtling rop a, Chuleiin a uongthuong hle a; I dàn leh an inhnai naw a, A hmêlmahai a'n siet khum hlak. 6 "Ieng khomin mi sukchâng naw nih; Buoina ieng khom tuok ve loin, Hlim zing ka tih" a ti lungril. 7 Tongsie le khêl, inthìna hai, A bâuin a sâk suok zing a; A lei hnuoia chun suolnain, Buoina bupui chu a khuor a. 8 Khawhnawmah mi a'n chàn rùk a, A rûkin mi a pêl zing a, Poi tawk lohai chu a phil hlak. 9 Keipui angin a'n chàn rùk a, Santu nei lohai chu manin, A lèn sùngah a hnûk lùt hlak. 10 A manhai chu an op rop a, A hràtna chun a sop hné si. 11 A lungrilin hieng hin a tih:"Pathienin a hriet fùk ta nawh; A hmai a hup, a hmu teu nawh. " 12 LALPA, tho la, aw ka Pathien, I kut inlet khum hràm raw khai!Santu nei lohai nghil naw rawh. 13 Ieng leia mi rilohaiin, Pathien an deusaw am a na?"A maw mi'n phurtir teu naw nih", Ieng leia an ti lungril am? 14 Aw Pathien, nang chun i hmu a, Buoi mangang tuokhai i'n chik a, Thangpui dàn i ngaituo hlak. Tuorhai inhnèmna tak i nih, Fahràhai santu i ni si. 15 Mi suolhai bàn suktliekpêk la, An suolhai a rù inlangin, Nangin hung phor suokpêk vong rawh. 16 LALPA chu kumkhaw Lal a na, A ram a'nthokin hnamhai chu, An la bohmang vong ding a nih. 17 Nèksawrhai dit dàn chu LALPA, Nangin lo ngaithlapêk hràm la, Anni tieng nghaa nâ dawin, An lungril hung sukphûrpêk rawh. 18 Fahràhai le neksawrhai chu, Hnuoi mihriemhai lai tu khomin, An hrawk thlabâr ta nawna di'n, Nangman sanin hung huol him rawh.

Psalms 11

1 LALPA àngsûng ka bèl ta hi. "Vatê angin i tlâng tieng khin, Vuong hmang ve dai el ta rawh khai! 2 Mi suolhaiin thalngul an kuoi, A hruiah thal zum an inbûk, Thima inthoka kàp tumin, En rawh, mi ngîlhai an tin saw! 3 Thil niphung a'n lumlet zo tah, gMi dikhan iem an law thei ding!"Ieng dinga in ti am a na? 4 A tempul thienghlimah LALPA, A vàn lalthungphaah a'n thung; Hringmihai a zuk thlîr zing a, A mitin a hmu fai vong tawl. 5 Mi fel le mi rilohai khom, LALPAN a en fie tawl vong a, Nunrawngna ngaina mihai chu, A thlarauin a theida hlak. 6 Mi suolhai chungah mei le kât, Hung insùrtir chur chur a ta; Thli lum takin nuoi tawl a ta, Chu ngêi chu an chan ding a nih. 7 LALPA chu mi indik a na, Rorêlna dik a ngàihlu a, Mi ngîlhan a hmêl hmung an tih.

Psalms 12

1 ​Aw LALPA, mi thangpui rawh, Pathien ngaisak an bo zo; Hringmi zalênghai lai hin, Mi ringum an bo zo tah! 2 Khêlin an inhlèm tuo a, An inpàk derna hmùr chun, Inhlèmna thu ngot an hril. 3 LALPAN an hmùr ât thla sien, An lei chapo tak khom chu; 4 "Bau thiemah hnè bàn ei ta, Ei hmùr hlak ei thù a na, Tu'm ei chunga lêng?" an tih. 5 "An nèksawr rimsihai le Retheihai inrûm leiin, Tu'n kei hung inthok ka ta, Nghâisatuhai lak a'nthok, Hum ka tih"LALPAN a tih. h 6 Raw tuina khura tangka, Voi sari raw thieng angin. LALPA thutiem a tha hlìr. 7 Hieng ruoltharhai laka hin, LALPA, mi vêng kumkhuo rawh. 8 Suol an lawmna taphotah, Mi suol an invàk nuoi nuoi.

Psalms 13

1 Aw LALPA, ieng chen rau am, I mi thlàthlam ding a na?I mi theinghil song ding maw?Ka lakah ieng chen hiel am, I hmêl i thup ding a na? 2 Ieng chen top am rimsi a, Sùn-zàn lungril beidong a, Hmêlmahai lu ling khum a, Nangin i mi sie ding chu? 3 Aw LALPA, aw ka Pathien, Mi en la, mi hung don rawh, Varin ka mit hung khaw rawh, In hlum song pal rawi ka tih; 4 "Ka tukdol dèr tah" tiin, Ka hmêlma uong pal a ta, Ka tlu hlauh chun ka râlhai, Lawm sà chang pal rawi ka tih. 5 I hmangaina chul lo hi, Kei chu ka'n hnêmna a na, I sandamna chunga hin, Ka lungril a lawm a nih. 6 LALPA chu inpâk ka tih, Ka chungah a tha si a.

Psalms 14

1 Invêthai chun lungrilin, "Pathien a um nawh" an tih. Hlemhlèi takin an che a, Thil tirdakum an thaw a, Thil tha thaw hrim an um nawh. 2 LALPA chun vàna inthok, Ama zongtu mi var hrim, An um am ti hmu tumin, Hringmihai a zuk thlîr a. 3 Naw tieng an pêt hmang vong a, Hlemhlènain an sip a, Thil tha thaw an um naw a, Pakhat bêk khom an um nawh. 4 Ka mihai fàk ding po po, Fa zotu an nih ti hi, Hlemhlèhan an hriet naw maw?LALPA hming an lam ngai nawh. 5 Chuong anga khawsahai chu, Titnan chêngchil tawl a ta, Pathien ruok chu mi felhaiUm khawmnaah a um hlak. 6 Mi retheihai thil thaw lai, Thil rilo thaw chinghaiin, Chokbuoi tum hlak hai sien khom, An humtu Pathien a nih. 7 Israel sandamna chu, Zion a'nthok hung a ta, LALPAN a mihai ngirhmun, A sukhmûingìl huna chun, Jakob thla Israelhai chu, An va hlim nasa awm ngei!

Psalms 15

1 LALPA, tu'm i inah riek a, I tlâng thienghlima chêng ding chu? 2 Soisêl boa kal chawi hlaktu, Indik taka thil thaw hlaktu, Lungril taka thu dik hril mi. 3 Mi a dem ngai hrim hrim naw a, Tuolbawm poi a tawk ngai naw a, Ruolhai a hril siet ngai bok nawh. 4 Mi suolhai chu a endong a, LALPA tituhai a hlut a, A ta dinga poi khom ni sien, A thutiem chu a chel zing a, 5 Pung boin sum a'n pûktir a, Poi tawk lohai suksietna din, Thamna a lâk ngai hrim hrim nawh. Chuong ang mihai chu ieng lai khom, Inhnîng ngai hrim hrim naw ni hai.

Psalms 16

1 Aw Pathien, ka hung bèl che, Nangin mi lo humhim rawh. 2 "Ka Lalpa chu nang i nih, Nang chauh ka ta di'n i tha"Tiin LALPA ka hril a. 3 Hnuoia mithienghlimhai hi, An ropuiin ka lawm tawl. 4 Pathien dang hnottuhai chu, An lungngaina pung a tih. An thisen inhlàn ang chu, Inhlàn ve ngai nawng ka ta, An pathien hming lam naw ning. 5 LALPA, ka ro chanpuol ding, Ka no ding i mi ruotpêk a, Ka chan khom i suknghet tah. 6 Ram thâ i mi rochung a, Ramrî i mi khangpêk a, Ka chan a ditum takzet. 7 Rem iengkim mi ruotpèktu, LALPA chu inpâk ka tih; Zàna chen khom lungrilah, hû a mi zirtir hlak si. 8 Ieng lai khomin ka hmaah, LALPA a um zing hlak a, Ka chang tieng a um leiin, Inhnîng ngai hrim hrim naw ning. 9 Chuleiin ka lung lawmin, Ka thla a hlim êm êm bok, Ka taksa khom muong takin, Chawl hàdam thei tàng a tih. 10 Ka thlarau chu Seolah, Màksan phal ngai nawng i ta, I Mi Thienghlim chun hmon hmèl, A hmu ding phal naw ti nih. 11 Hringna lam i mi kawkhmu, I bulah lawmna a kim, I chang tieng chun inhoina, Chatuonin a um si a.

Psalms 17

1 LALPA, ka'n dikzie hrein, Ka hnìna rawl lo ngài tâm!Ka tongtaina ngàithla rawh, Hmùr khêlhlipa suok an nawh. 2 Ka thiemzie târlangna chu, Nangma a'nthok ngei ni sien, I mit ngèiin mi'n chieng rawh. 3 Zàna chen khom mi fiein, Ka lungril hi hung dap la, Mi enfie vong khom ni la, Ka suolna hmu naw ti nih-Ka hmùr inkhap suol naw nih. 4 Mihai thilthaw zui loin, I bau thu suok zawm lemin, Inpawngnêk ka chîng ve nawh. 5 I lampuiah kal chawiin, Ka sir khom a'n phet ngai nawh. 6 Aw LALPA, ka ko che hi, I mi don ding a'n leiin; Ka tieng i nâ hung dawin, Ka hnìna hi ngâithla rawh. 7 I hmangaina chul lo chu, Mak takin mi'n hmutir rawh, I chang tieng bèltuhai chu, Hmêlma lakah i hum hlak. 8 I mit naulêng ang elin, Nangin mi vêng him tlat la, I thla hnuoiah mi thup rawh- 9 Mi rilo, mi beituhai, Ka vêla mi'n huol khumtu, Dorâl tium laka chun. 10 Lunginsietna an nei nawh, An bàu suok a chapo bok; 11 Ka hnung an hung sui suok a, Tu hin an mi'n huol khum a, Mi thè thlûk dàn an melkai. 12 Sakeibaknei ang boka, Mi pot chen ve vong châkin, Keipui angin an mi'n chàn. 13 Aw LALPA, nang hung tho la, Hmasonin suktlawm tawl la, Mi rilohai laka hin, I kawlhnâm chun mi humin, Ka hringna hung san suok rawh. 14 Aw LALPA, ka hringnun hi, Hi khawvel dam sûng huna, Lawmman beiseihai lakah, Nangman hung san suok hràm rawh. I ditsak mihai ruok chu, An phìngpui hrâi tlai zing la; An nauhai hnienghnâr hai sien, An suonhai ta ding chenin, Hausakna khawl khawm raw se. 15 Kei ruok chun felna leiin, I hmêl chu la hmung ka ta; Nangma angna chu neia, Ka thanghar hun ve pha chun, Lungawi takzet tàng ka tih.

Psalms 18

1 Aw LALPA, ka hmangai che, Nang chu ka hràtna i nih. 2 LALPA chu ka suonglungpui, Ka kulpui, mi sanhimtu, Ka Pathien, ka lungpui bêl, Ka phaw le ka kulpui nghet, Mi humtu ki hrêuja nih; 3 Inpâk tlàk LALPA ka ko, Hmêlma lakah a mi hum. 4 Thìna hruiin a mi awk, Sietna tuiin a mi chìm, 5 Seol hruolin a mi vèt, Ka hmasuon chu thìna châng. 6 Lungzingin, LALPA ka ko, Pathien thangpui ka ngèn a, A tempul a'nthok a hriet, Ka rawl ri'n a nâ a tlung. 7 Hnuoi inhnîngin a'n thin a, Tlâng thuthai chen a'n hnîng a, A lungsen chok lei a nih. 8 A hnârah meikhu a suok, A bàuah kàng hmang thei mei, Meichok a'n hlap suok puot puot. 9 Vàn kei kûrin a hung tum, Sûm dum chungah a ngîr a. 10 Cherub chunga chun chuongin, Thlî chu thla zàra hmangin, Hrât takin a hung vuong a. 11 Tuomtuah thim a hmang a, Sûm tui pai a'n zàr khum a. 12 A hmaa var ropui chun, Sûmhai chu a khaw tlang a, Riel le mei a sûr chur chur. 13 LALPAN vàn riel a'n rùmtir, Chunghnungtak rawl a thangkhawk. 14 Thalin hmêlma a kâp dar, Têk a'n tlàktir dum dum a, Hmêlma an tlânse dur dur. 15 Aw LALPA, hnâr hnît meua, I hang hrawk tawl takzet chun, Va tuonghai inlang rawtin, An hung kang zo ta vong a, Hnuoi thuthai khom a'n lang tah. 16 Chung a'nthok mi zuk banin, A kutin a mi chel a, Li a'nthok a mi lâk suok; 17 Hmêlma hrât le dorâl hrâng, Ka cho ruol lo kut a'nthok, A mi san suok tah a nih. 18 Siet tuok lai mi bei sien khom, Mi santu LALPA a nih. 19 Hmun thawvengahk a mi'n nghat, Ka chungah a lawm leiin, A mi san suok tah a nih. 20 Ka'n dikna phùin lawmman, LALPAN a mi siempêk a, Ka kut a fài ang phùin, Ama chun a mi rùl hlak. 21 LALPA ditzawng ka vong a, Pathien invâk hmangsanin, A kal zawng ka thaw ngai nawh. 22 Ka hmaah a dàn ka sie, A thu ka bawsiet ngai nawh. 23 A hmaa dem kai lo di'n, Suol lakah ka'n thier fihlìm. 24 Ka'n dikna ang phû peiin, A mit hmuah poi ieng khom, Ka tawk ve ngai naw leiin, LALPAN lawmman a mi pèk. 25 Ringum lakah i ringum, Mi fel lakah i fel fài, 26 Thienghlim lakah i thienghlim, Mi kawi lakah i khir bok. 27 Inngaitlawmhai i san a, Meng sânghai i suktlawm hlak. 28 Aw LALPA, ka khawnvar hi, I mi sit chokpèk hlak a; a Pathien chun ka'n thimna, A mi sukvarpèk hlak si. 29 I thang chun râl nêr ka ta, Ka Pathien zàrin an kul, Lawn kaiin lapêk ka tih. 30 Pathien lampui a tha kim, LALPA thutiem a'n khêl nawh, A bèltu di'n phaw a nih. 31 LALPA naw Pathien tu am, Ei Pathien naw tu hrim am, Lungpui bèl tlàk an um a? 32 Hrâtna thaa mi'n thuom a, Ka lampui suktluongtu chu, Pathien hi a ni si a. 33 Sazuk zaper anga hrât, Zaper tha hrât mi pein, Hmun sâng lêrah him takin, A mi'n tlattir hlak si a. 34 Ka kut râl do a'n thiemtir, Dâr thalngul ka kuoi kûr thei. 35 Sandamna phawl mi pein, I kut chang tieng mi chelin, I'n phà hnuoina lei chauin, Ropui ka hlaw phà hlak si. 36 Ka kal pên i suksei a, Ka sir a'n tlêu bok si nawh. 37 Ka hmêlmahai ka hnot khêl, Ka'n ram hma chun ka kîr nawh. 38 Ka vuok thluk tawl, an op song, Ka bulah an inthal phung. 39 Râldo hrât di'n i mi'n thuom, Ka râlhai ka ke bulah, I'n bokkhuptir tawl si a. 40 Ka râlhai i mi'n hnottir, Ka hmêlmahai ka tukdol. 41 Santu koin an khêk chûl, Tu khom hlak an um si nawh; LALPA an ko, a don nawh. 42 Thli lên dar pilvut angin, Anni chu ka rawt nawi a, Kotthlêra chirhak angin, Ka peihawn tawl tah a nih. 43 Mihai lakah mi humin, Hnamhai luah i mi siem, Ka hriet ngai lo hnam chen khom, Ka khuo le tui an ni tah. 44 Ka thu hrea zawm nghâlin, Bokkhupin ram dang mihai, Ka hmaah an hung kùn a, 45 An lungril a zâm vong a, Kul a'nthok inthin pumin, An hung suok tah thâm thâm a. 46 LALPA chu a hring zing ie!Ka Lungpui chu inpâk ro!Ka Sandamtu Pathien chun, Chawimawina chu chang raw se. 47 Phuba lapêktu Pathien, Ka hnuoia hnamhai sietu, 48 Hmêlma laka mi humtu, Ka hmêlmahai chunga chun, Nangman i mi hlàngkài a, Mi nunrawnghai laka chunNangin i mi san suok tah. 49 Chuleiin, hnam tin lai hin, LALPA i hming chawimawiin, I'n pàkna hla sak ka tih. 50 A lal chu hnèna ropui, Ama chun a'n changtir a, A hmangaina chuoi lo chu, A hriek nâl Davida leA suon le pàrhai chungah, Kumkhuo'n inlangtir a tih.

Psalms 19

1 Vànhai khin Pathien ropuizie, Puongin an inhriettir hlak a, Boruok zâu tak khin a kutsuok, An tlâng insampui hlak a nih. 2 Sûnni tinin an puong suok a, Zàn tin a thiemzie an suklang; 3 Kam le thuin an hril naw a, An rawl hriet ding a um bok nawh. 4 Sienkhom an rawlin hnuoi a fang, An thùin kawl kil a dêng suok. Chung thangvàn sânga khin puonin, Ni ta dingin a zarpèk a. 5 Pindan a'nthok inhmaw tak a, Moneitu a hung suok ang le, Phûr taka mi hrât tlàn angin, 6 Sak kawlrawnah ni a suok a, Thlang kawlrawn panin a'n her a, A lumna hre lo an um nawh. 7 LALPA dàn chu a famkim a, Thlarau hringna a sukhar hlak. LALPA thusuok chu a chieng a, Mi mawlhai khom a sukvar hlak. 8 Lalpa zirtirna a'n dik a, Lungrilah hlimna a pêk hlak. Lalpa thupèk a êng mawi a, Lungril mithai a sunvar hlak. 9 LALPA tì chu a felfai a, A dai sawt hlak, kumtluong chenin. LALPA thusuok chu a'n dik a, Arêngin a fel indik hlak. 10 Rangkachak nêkin a hlu lem, A tha inhlîr tak nêk khomin. Khuoizu nêkin a thlum lem a, Khuoi thlâra far thla nêk khomin. 11 Chuong chu i siehlaw i kawk hmu, A zawmtu din lukhawng a tam. 12 Sienkhom mani thaw suolhai chu, Tuin am inman suok a ta?Suol palna lakah mi hum rawh. 13 Chapona lakah mi vêng la, Ka chungah thu inneitir naw. Chuongchun dem kai lo hung niin, Bawsietna nasa tak lakah, Hung fihlìm thei ve tàng ka tih. 14 LALPA, ka Lungpui le Tlantu, Ka kam thu suok tinrênghai leLungrila ka dawnkhawlhai chu, I hmaah pom tlâk ni raw se.

Psalms 20

1 Lungzing niin LALPAN don sien che, Jakob Pathien hmingin hum che raw se. 2 Hmun thienghlim a'nthok santu hung tirin, Zion a'nthok hung thangpui che raw se. 3 I thil inhlànin hriet zing hlaw sien la, I pumraw inthawi khom lo pom raw se. 4 I lungril ditzawnghai pe sien la che, I thil tumhai chu hung hmûingìl raw se. 5 Hnèna i chang pha, lawmin khêk kan ta, Pathien hmingin ei puonzâr khai kan tih. I hnì taphot LALPAN pe raw se che. 6 A hriek nàl chu LALPAN a hum ngei hlak, Ti hi tuhin chu ka hung hriet ve tah; A san suokna kut chang tieng ngei el chun, A vàn thienghlim a'nthokin a hung don. 7 Thenkhatin an tawlailir an ring a, Thenkhatin an sakor an ring a, Keini chun LALPA Pathien hming kan ring. 8 Chuong mihai chu la tlu thal dèr an ta, Keini ruok chu thoin ngîr nghet kan tih. 9 Aw LALPA, lal hi hung san him ngei rawh!Kan ko pha che leh mi hung don ngei rawh.

Psalms 21

1 I hràtna leiin LALPA, Lal chu a hlim êm êm a, Hnèna i'n khumtir leiin, A va hang lawm nasa ngei! 2 A ditzawng i pêk pei a, A hnî phot i sêl ngai nawh. 3 Malsawmna tama hmuokin, Rangkachak hlîr hlaka siem, Lallukhum i'n khumtir a. 4 Hringna a hnih, i lo pêk, -Kumkhuoa damna nawknghal! 5 Hnèna i'n changtir zàrin, A hung ropui ta hle a; Ropuina le chawimawina, Tonlairang i'n khumtir si. 6 Chatuon malsawmna vûrin, I hmêlin i suklawm hlak. 7 Lal hin LALPA a ring a, A Chunghnungtak hmangaina, Chul ngai hrim hrim lo zârin, Inhnîng ngai hrim hrim naw nih. 8 Hmêlmahai chu i kutin, An rêngin dap suok i ta, Chang tiengin man khawm i tih. 9 I hung pha thuk inlingahAnni chu pei lût i ta, I lungsenna chun LALPA, Anni chu lem zo a ta, Mei chun kâng hmang tawl a tih. 10 Hnuoi a'nthokin an thlahai, Sukchimitin um an ta, An tù le tèhai khom chu, Mihriem lai tiem naw ni hai. 11 I lakah suol thaw tumin, Phierrûk ieng ang hai sien khom, An tum hlawtling naw ni hai. 12 I thala i tin pha chun, Tukkhum sonin tlân an tih. 13 LALPA, i hràtna leiin, Nang chu chawi sângin um la, I thilthawtheina ropui, Inpâkin hla sak kan tih.

Psalms 22

1 Ka Pathien, aw ka Pathien, Ieng dinga i mi zamsan am?Thangpui ngaia ka'n rùm lai hin, Ieng leia mi'n hlat am i na? 2 Sùnah ka ko che, ka Pathien, Sienkhom i mi don naw a, Zànah ka to thei bok si nawh. 3 Nang chu Mi Thienghlim i na, I lalthungphaah i'n thung a, Israelhan an inpàk hlak che. 4 Kan pipuhan an ring che a, An ring lei che'n i san suok a, 5 An ko che a, i san him a; Nangmaah chun an innghat a, Muolphoin i siem ngai naw khah. 6 Kei ruok chu chokchawnal ang chauh, Mihriem laia khom zêl tlâk lo, Mi biek rawp le endong ka nih. 7 Mi hmu photin an mi nuisaw, An lu thin a, mi'n sietkhumin: 8 "LALPAA innghat mi a na, Aman hung san suok raw se chu; Ami ditzawng hlak mi annawm, Hung san suok raw se chu!" an tih. 9 Sûla inthok mi la suokin, Ka nu tânga kan bei angin, I tângah i mi'n beitir a, 10 Ka hung pieng thlàka inthokin, Nang chauh hi ka'n nghatna i na; Ka nu sûla inthok rêng khan, Nang chauh hi ka Pathien i nih. 11 Buoina a hnâi, mi'n hlat naw rawh, Santu tu dang khom ka nei nawh. 12 Bawngchal huoiin an mi'n huol vel, Basan bawngchal kol tak hai chun; 13 Sakeibaknei hnukrawl angin, Bâu sen huouin an mi'n ngur khum. 14 Tui bun thlâk ang ka ni tah a, Ka rù le châng a'n pelsol zo, Ka lungril hlak khuoihlu angin, Ka sûngah a'n tui ral zo tah. 15 Pil bêl koi hàr angin ka dangm, Inhilin a châr zo ta a, Ka dangah ka lei a kop a, Thìna vutah i mi'n buoltir. 16 Uichohan an mi kîl tuou a, Mi suol honin mi'n huol velin, Ka kut le kè an sun chor chor. 17 Rù khât ringot ka ni tah a, nDiriem takin an mi endong. 18 Ka silfènhai an insem a, Ka zakuo di'n thum an vawr ie. 19 LALPA, nang chun mi'n hlat naw la, Aw ka Hràtna, mi san dingin, Hung inthok inhmaw ta raw khai! 20 Kawlhnâm lakah mi hung san la, Aw ka hringna hlu tak el hi, Uichohai laka hin hum rawh. 21 Keipui bàu a'nthok mi hum la, Tumpâng ki zum a'nthok khomin. 22 Unauhai lai i hming hrilin, Pungkhawmnaah inpâk ka chê. 23 LALPA tituhai, inpàk ro, Jakob thlahai, chawimawi seng ro!Israel thlahai, inzà ro. 24 Sirdèna tuor a diriem nawh, Ama chu a tirdak bok nawh, A lakah a hmêl thup loin, Thangpui a ngênin a ngàithlak. 25 Pungkhawm ropuihai hmaa chun, Nangma inpâk ka ti che a, Nangma tîtuhai hmaa chun, Ka thutiemhai hlen bok ka tih. 26 Retheiha'n tlai takin fa sien, LALPA zongtuhan inpâk sien-An lungril dam kumkhuo raw se. 27 Hnuoi kil tinah LALPA hrein, A kuom tieng hung kîr nawk an ta, A hmaah hnam tinhai kûnin, Ama chu hung chawibiek an tih. 28 Lalna chu LALPA ta a na, Hnam tin chungah ro a rêl hlak. 29 Hnuoi hausakna tlântu po po, A hmaa chun hung kûn an ta, Inchawm hring zo ve lohai lePilvuta kîr el dinghai khom, A hmaah la kûn vong an tih. o 30 Thangtharhan a rong bawl an ta, An thlahai lai khom LALPA thu, La hung hril zui pei bok an ta, 31 A mihai a san suok dàn hi, Thang la thar peihai kuoma khom, Hrilin la hung um pei a tih, A thawpèk tawl takzet si a.

Psalms 23

1 Mi vêngtu berampup chu, Ka LALPA a ni leiin, Tlasam ngai hrim hrim naw ning. q 2 Hlo hnâ hring dup hmuna hai, A mi'n chawl hàdamtir a, 3 Tui cham dêl kamah thuoiin, Ka hringnun a tuoi thar hlak. Felna lampuia hai chun, A hming leiin a mi thuoi. 4 Thìna hlim ruom hraw lang khom, Thil tha lo hrim ti naw ning, Nang ka kuomah i um a, I hmol le i funghrol chun, An mi sukthlamuong si a. 5 Ka hmêlmahai hmû ngèiah, Ruoi i mi buotsaipêk a, Ka luah hriek i nàl a, Ka no i sung sip zing bok. 6 ​I thatna le hmangainan, Dam sûng mi zui ngei a ta, LALPA inah inlawiin, A chun chêng kumkhuong ka tih.

Psalms 24

1 Leihnuoi le a sûnga umhai, Khawvel le a sûnga chênghai, A rêngin Lalpa tà a nih. 2 Tuipui inthûk chungah remin, Tuipui tuongah chun a'n nghat a. 3 Lalpa tlàngahr tu am lawn a, A hmun thienghlima ngîr ding chu? 4 Kut fai le lungril thienghlim put, Mi lem bea kûn ve ngai lo, Khêla inkhâm ngai lo mi chu: 5 LALPA malsawmna dong a ta, A Sandamtu Pathien ngei chun, Thiem inchangtir ngei bok a tih. 6 Jakob Pathien, chuong mihai chu, I hmêl dittu le zongtu che, Suon le pârhai chu nîng an tih. 7 Ropuina Lal lût theina din, Aw kotkhârhai, inhong sângin, Kotkhâr hlunhai, inhong lien ro. 8 Tu am a na, Lal ropui chu?LALPA ropui le hrât khawkhêng, Hnètu LALPA ngei chu a nih. 9 Ropuina Lal lût theina din, Aw kotkhârhai, inhong unla, Korkhâr hlunhai, inhong sâng ro. 10 Tu am a na, Lal ropui chu?Iengkim LALPAs ngei chu a na, Ama chu Lal ropui a nih.

Psalms 25

1 Aw LALPA, i tieng ka hung nghà, 2 Aw ka Pathien, nang ka ring che. Ka muolpho el ding phal naw la, Hmêlma mi hnè bàn phal naw rawh. 3 A nih, nangma nghâktuhai chu, Tu khom muolpho ngai naw ni hai; Verther taka phatsantu chu, Sukmuolphoin um ngei an tih. 4 LALPA, i ditzawng mi hril la, I lampuihai mi kawkhmu rawh. 5 Ka Sandamtu Pathien i na, Nangin thuoiin mi'n chûktir la, Ka ni tin beisei nang i nih. 6 Tien a'nthoka i zàngaina, I hmangaina kha nghil naw rawh. 7 Ka tleirawl lai suol le helna, Mi hre zuipêk zing ta naw la; I hmangaina le thatnain, Mi hre zing lem hlak rawh LALPA. 8 LALPA chu a tha indik a, Chu lei tak chun mi suolhai khom, A lampuihai a kawkhmu hlak. 9 Mi mawlhai thutakah thuoiin, A lam indik a zirtir hlak. 10 LALPA thuthlung zawmtu ta di'n, LALPA lam tin chu hmangaina, Ringumna vonga sip a nih. 11 LALPA, ka suolna tam sienkhom, I hming leiin mi ngaidam rawh. 12 LALPA ti mi chu tum a na?A lampui dinga a ruot chu, Ama ngei chun kawkhmung a tih. 13 Thil tha tinrêng chu chên a ta, A thlaha'n ram rochung an tih. 14 Ama tituhai kuoma chun, LALPAN thurûk a hril hlak a, A thuthlung khom a'n hriettir hlak. 15 LALPA tieng chu ka thlîr zing a, Chângin ka kè a awk khom hi, Aman mi sûtpek ngèi a tih. 16 Lungsietin ka tieng hung ngha la, Khawsawtin kan rim takmeu si. 17 Ka lungzîngna hung sawkzàng la, Buoina a'nthok mi san suok rawh. 18 Ka rimsikzie mi dawnpêk la, Ka suolhai mi la hmangpèk rawh. 19 Ka hmêlma pung dàn hi en ta, An mi theida êm êm dàn hi! 20 Ka nun vêngin mi san suok rawh, Nangma ka bêl ta che leiin, Ka muolpho ding phal lul naw rawh. 21 Nangma nghâktu ka ni leiin, Indikna le ringumna chu, A mi huolhimtu ni raw se. 22 Israel hi, aw ka Pathien, Buoina po po lak a'nthokin, Nangman hung san him ngêi ngèi rawh.

Psalms 26

1 LALPA, kan dikzie puong el rawh, Soisel bo nun ka hraw si a; LALPAA ringna ka'n nghat hi, Ieng lai khomin a'n hnìng ngai nawh. 2 LALPA, fiein mi ensin la, Ka lungril ngaituona fie rawh. 3 I hmangaina chuoi ngai lo chu, Ka hma thuoitu a ni zing a, I thutakah kal ka chawi zing. 4 Hlèmtu lai ka thung ve ngai nawh, Lêmderhai ka pawl ngai bok nawh. 5 Thil suol thawa pungkhawmhai hi, Ka theidà zawng tak an ni a, Mi rilohai ka pawl ngai nawh. 6 Poi hrim ka tawk ngai nawh, LALPA, I maichàm bulah ka kûn a, 7 Zâihla remin lawmthu ka hril, I thilmak thawhai ka puong hlak. 8 LALPA i chèngna ka ngaihlu, I ropuina umna hmun chu. 9 Mi suolhai i lâkhmang ruolin, Ka thlarau la hmang ve naw la, Tuolthathai ruolin ka hringnun, Mi la hmangpêk ve naw hrâm rawh. 10 Suol thaw di'n an kut a'n za a, An kut chang tieng thamna'n a sip. 11 Kei chun soiselbo nun ka hraw, Lunginsietin mi san him rawh. 12 Ka ngìrna tuol zawlat hin, Nèlvaipui pungkhawmhai hmaah, LALPA i hming inpâk ka tih.

Psalms 27

1 LALPA chu ka var le sandamtu, A ni leiin tu'm tìng ka ta?LALPA chu ka hringnun kulpui, A ni leiin tu'm tìng ka ta? 2 Mi suolhan dol hmang mi tuma, Nasa taka an mi bei khan, A'n sui thlu le tlu se lem chu, Dotu hmêlmahai an ni lem. 3 Sipai ruolin min huol sienkhom, Ka lung phâng chuong hrim hrim naw nih; Mi do hron khom ni hai sien la, Ka ringzona inphet naw nih. 4 Thil pakhat LALPA ka hni a, hu chu a nih ka hnot tak chu:Ka dam sûng a inah chêng a, LALPA hmèl mawi tak chu thlîr a, A tempula ama pawl hi. 5 Beidong niin a riebûkah, Ama chun mi lo hum a ta, A biekbûk rilah mi thupin, Lungpui chungah mi'n chuon a tih. 6 Mi'n huoltu hmêlmahai chungah, Ama chun mi chawi sâng a ta, A biekbûkah lawm hla sakin, Inthawinahai inhlàn ka ta, LALPA inpâka hla sakin, A ta di'n rimawi rem ka tih. 7 LALPA, ka ko che, ngàithla la, Zà ngài hrâm la, mi hung don rawh. 8 "Ka hmêl hmù tum ro" i ti a, "LALPA, nang a nih ka zong tak", Tiin lungrilin ka hril a. 9 I hmêl ka lakah thup naw la, I siehlaw thangpuitu i na, Lungsenin mi nghatsan naw rawh. Aw ka Pathien le Sandamtu, Mi hnawlin mi mâksan naw rawh. 10 Nu le pa'n mi mâksan sienkhom, Ka LALPAN mi lo lawm a tih. 11 LALPA, i ditzawng mi hril la, Mi'n chàntu hmêlmahai leiin, Lam indikah mi thuoi pei rawh. 12 Ka hmêlmahai kut thak nùlnaDingin mi'n hlân phal lul naw rawh; Khêla mi beitu nunrawnghai, Ka chungah an tuong a ni hih! 13 Hringmi lêngna hi rama hin, LALPA thatna la hmùng ka tih, Ti hi ka ring nghet tlat a nih. 14 Insukhrâta LALPA nghâkin, Insan marin nghâk fan fan rawh.

Psalms 28

1 Ka Lungpui, LALPA, ka ko che, Keima tieng nâ suksêt naw rawh. I to zing chun ka chan ding chu, Khurpuiau tlàk ang nîng a tih. 2 I hmun thienghlim tieng chu nghain, I zàngaina le thangpuina, Ngènin ka bân ka hung phar a, Ka hnìna mi ngàithlapêk rawh. 3 Suol chìng mi rilohai ruolin, Mi la hmang sa vè naw hrâm rawh. Bau thain vênghai an biek a, An sietna an zong rûk zing si. 4 An suol ang phû peiin rul la, An phù ang tawk peiin hrem rawh. 5 LALPA thilthaw le a thilsiem, An ngainèp lui tlat si leiin, Anni chu sukse vong a ta, Tungding nawk hrim hrim ngai naw nih. 6 LALPA chu inpâk tlâk a nih, Lunginsietna ka hnìna rawl, A mi lo ngàithlâkpêk si a. 7 LALPA ka hràtna le phaw chu, Ka lungrilin a ring tlat a, A mi thangpui ngei hlak rêng a, Ka lungril hlimin a'n chawm a, A kuomah lawm hla sak ka tih. 8 LALPA chu a mihai hrâtna, A hriek nâl ta di'n humhimtu, Kulpui nghet chu a ni si a. 9 I mihai hi hung sandam la, I rochanhai mal hung sawm la, Vèng tawl la, enkol kumkhuo rawh.

Psalms 29

1 Nangni vàna mi ropuihai, vRopuina le hràtna hai chu, LALPA kuomah inhlàn unla, 2 LALPA hmingin a phû angin, Ropuina chu inhlàn unla, Thienghlimna thuoma inbelin, LALPA Pathien chu chawibiek ro. 3 Tui chungah LALPA rawl a'n lêng, Pathien ropuina a'n rùm a, Tuipui chungah a'n ri dur dur. 4 LALPA rawlin thil a thaw thei, LALPA rawl chu a ropui ngei! 5 A rawlin sidar a nghor tliek, Lebanona sidar thinghai, A nghor tliek rem rum el a nih. 6 Lebanon chu bawng té angin, Sirionw chu ramsiel té angin, A'n chawm khiengtir bap bap bok a. 7 LALPA rawlin kawl a'n leptir, 8 A rawlin thlalèr a nghor hnîng, Kadesh thlalèr a'n thin buk buk. 9 A rawlin saisuo a her tliek, xRamngaw thing hnà a nuoi til vong; A tempula chun "A ropui" Tiin ama chu an inpàk. 10 Tuilêt chunga LALPA a na, LALPA chu kumkhaw Lal a nih. 11 LALPAN a mihai sukhrât sien, LALPAN a mihai malsawmin, Remna le muongna pe raw se.

Psalms 30

1 Aw LALPA, chawimawi ka ti che, Thlàn khur a'nthok mi san suokin, Hmêlma diriem i mi phal nawh. 2 Aw ka LALPA le ka Pathien, Mi thangpui di'n ka ko che a, Nangin i mi lo sukdam tah. 3 ​Seol a'nthok mi la suokin, Khurpuia ka tlàk phal loin, Aw LALPA, i mi san suok tah. 4 LALPA hming thienghlim inpâkin, A mi thienghlimhai, hla sak ro. 5 A lungsenna a ré vat a, A ditsaknan dam sûng a dai. Zànah mitthlî hul naw sienkhom, Zîngkâr hlimnâ a tlung nawk hlak. 6 Ka hang hnienghnâr ve chang hin chu, "Inhnîng ngai naw ning" ka ti hlak. 7 LALPA, i lungsietna leiin, Tlâng angin i mi suknghet a; Sienkhom i hmêl i hang thup chun, Ka chí-âi nawk el hlak si a. 8 LALPA, nang i nih ka ko che, I zàngaina ka hnih, LALPA; 9 Siet tuokin thlànah lo zàl lang, I ta di'n hlawkna iem a um?Pilvutin inpâk thei a che'm?I ringumzie puong thei a ti'm? 10 LALPA, mi lo ngàithla hrâm la, Lungsietin mi san rawh, LALPA. 11 Ka tap hi làm inchangtirin, Ka saiip sil mi hlîppèkin, Hlimnain mi'n thuom lem rawh. 12 Chuongchun to zing loin lawm hla, Ka lungrilin rem tâng a ta; Aw LALPA, ka Pathien i nih, Inpâk kumkhuo tâng ka ti che.

Psalms 31

1 Aw LALPA, nang ka hung bèl che, Ka muolpho ding phal lul naw la, I ringum a, mi hum him rawh. 2 Ka tieng hin i nâ hung daw la, Mi san di'n hung inthok nghal rawh; Ka'n bîkna lungpui nang ni la, Mi sanhimtu kul nghet ni rawh. 3 Ka lungpui le ka kul i na, I hming leiin mi keithuoi rawh. 4 Nang ka'n bîkna i ni leiin, Ka awkna dinga an kam rûk, Chânga inthok chun mi'n suo rawh. 5 I kutah ka thlâ ka'n koltir, Aw LALPA le Pathien ringum, Nangin mi hung intlan suok rawh. 6 Tlâktlài lo mi lem betuhai, Ka theida zawng tak an ni a, Kei chu LALPA ringtu ka nih. 7 I ngilnei leiin hlim ka ta, Ka tuor inrimzie i hmu a, Ka lungril beidongzie i hriet. 8 Hmêlma kutah mi'n hlàn loin, Hmun thawvengah i mi'n thut si. y 9 Ka bei a dong a nih LALPA, Ka chunga hin zà hung ngai rawh. Lungngai leiin ka mit a'n vai, Ka taksa le lungrilhai khom, Beidongin an lo châu zo tah. 10 Lungngainan ka nun a tuom vèl, Inrùmnain hun ka hmang zo, Tuor rim leia ka thâ chàuin, Ka rù le châng a rop zo tah. 11 Ka hmêlmahai leiin kei chu, Vênghai nuizat bùr ka'n chang a, Ka hmêlhriethan an mi ti a, Tuolah an mi hmu châng khomin, Mi hêlin an mi'n relsan hlak. 12 Thi tah angin an mi'n nghil tah, Pil bêl koi dar ang chauh ka nih. 13 An mi dem siet dàn khom ka hriet, Sîr tinah titnan a mi'n huol; Ka chungah thu an phierrûk a, Mi sukhlum dàn ding an rêl hlak. 14 Sienkhom, ka ring che, aw LALPA, Ka Pathien i nih ti ka puong. 15 Ka hunhai i kutah a um, Ka hmêlma le mi'n huoltuhaiLakah nangin mi san him rawh. 16 I siehlaw chungah hmangainaHmêl mawi chu hung inlangtirin, Lunginsietin mi san him rawh. 17 LALPA, ka hung ko che a nih, Nangin mi sukmuolpho lul naw. Mi suolhai chu sukmuolpho la, Seolahz inliemtir diel rawh. 18 Chapo tak le hmusit takaMi indik tong khumtuhai leKhêl hril hmanghai hmûr khârpêk rawh. 19 Nangma tituhai ta dinga, Thatna i khawlkhawm zozai hi, A lo va tam nasa de aw!Chuonghai chu mihai hmû ngèiah, Nangma bêltuhai i vùr hlak 20 Mihaiin an phierrûk chângin, I ângsûngah i hum him a, Khêla an hril siet bor bor châng, I bûk sùngah i thup tlat hlak. 21 LALPA inpâkin um raw se, Khawpui anga an mi'n huol lai, A hmangaina mak chuoi lo chu, Ka chungah a'n langtir si a. 22 "I hmu loah an mi hnot suok", Thlabârin ka ti hman hiel a; Sienkhom, i thangpui ka hni chun, Nangin i mi lo ngaithlâk hlak. 23 Aw, nangni a mi thienghlimhai, LALPA Pathien chu hmangai ro, LALPAN mi ringum a huolhim, Chapohai a thungrul kim hlak. 24 LALPA nghâktu po pohai chu, Insukhrâtin insukhuoi ro.

Psalms 32

1 A bawsiethai ngaidama um, A suolhai thaiboa um chu, A va hang hamtha lawm lawm de! 2 Suol nei loa LALPAN a ngai, Hlêmna lungril nei lo mi chu, A va hang hamtha lawm lawm ngei! 3 Tong loa ka to tlat lai khan, aSûnnithlak ka'n rûmna leiin, Ka rù le châng a zûr zo tah. 4 Sûn-zàna i kut rik tuorin, Thâl rum angin ka tawl zo tah. 5 "Ka bawsiethai LALPA kuomah, Inpuong fai vong ka tih" ka ta; Ka suolnahai ip nei loin, I hmaah ka hung inpuong a, Chuongchun, ka suol i ngàidam tah. 6 Chuleiin, hmu thei i ni lai, Pathien ngaisak mi taphot chun, ongtaiin i hmaah kûn sien, Buoina tui a lien sàng pha khom, Anni chu chîm phâk ngai naw nih. 7 Nang chu ka'n bîkrûkna i na, Buoina lakah mi humhimin, Sansuokna hla'n i mi'n awi hlak. 8 "Kal chawi dàn inchûktir ka che, Rem ruotpuiin enkai ka che. 9 Hriet thiemna nei lo sakor le Sabengtung ang ni ve naw rawh. Thunun dingin thirbar a ngai, Chuong naw chun, i thu zawm naw nih. " 10 Mi rilohai tuor ding a sà; LALPA ringsantuhai ruok chu, A hmangaina chuoi ngai lo chun, Ieng lai khomin a huol vel hlak. 11 Aw mi felhai, LALPA-a chun, Lawm rop unla, hlim bok hlak ro; Lungril ngîl puttuhai po chun, Inring takin lawm hla sak ro.

Psalms 33

1 Mi indikhai, LALPA kuomahInpâkna hla hlimin sak ro; Mi ngîlhai ta din ama chu, Inpâk awm hrim a ni si a. 2 Tingtang leh LALPA inpâkin, Perkhuong hrui sawm nei leh rem ro. 3 A kuomah hla thar sak unla, Thiem tak le hlim takin rem ro. 4 LALPA thu chu a'n dik tak a, A thaw taphot ring a um vong. 5 Indik le fel a ngàina a, A hmangaina chuoi ngai lo chun, LALPAN hnuoi hi a sung sip a. 6 Vànhai khi LALPA thua siem, Iengkim a de taphot el khi, A tong bau suoka um an nih. 7 Tuipui tuihai a sung khawm a, Li inthûkah a sêk khawm hlak. 8 Hnuoi pumpuiin LALPA ti sien, Khawvela hnam po po haiin, Ama chu inzà raw hai se. 9 Thu a hril a, a hung um a, Thu a pêk a, a ngîr nghet hlak. 10 Hnamhai remruotna chu LALPAN Ieng khom loah a'n changtir a; Mihai thiltum khom a dâl hlak. 11 LALPA remruot chu chatuon dai, A tum khom suon tin dai a nih. 12 LALPA chu Pathiena nei hnam, Rochungtua a thlanghai chu, Hnam hamtha an va ni ngei de! 13 Vàn a'nthok LALPAN a thlìr a, Mihriem po po a hmu vong a, 14 A chèngna hmuna inthokin, Hnuoi mi po po a enkai a, 15 An rênga lungril siemtu chun, An thilthawhai a hriet fai vong. 16 Sipai nei rawn lei ringotin, Lal tu khom an him ngai naw a, Mi râlhrâng khom a hrât leiin, A him thei chuong ngai bik bok nawh. 17 Sakor chu insanhimna di'n, Ringsan tlâk a ni tak tak nawh; Ieng anga hrât khom ni sien la, A san him thei tak tak ngai nawh. 18 Ama inzaa titu leA hmangaina chuoi thei ngai lo, Beiseituhai po po chungah, LALPA mit chu a fu zing hlak; 19 Thìna a'nthok san suok ding le, Tâmpui laka indam dinga, Beiseina neihai chunga khom. 20 Beisei takin LALPA ei nghâk, Mi thangpuitu, ei phaw a nih. 21 Amaah ei lungril a lawm, A hming thienghlim ei ring leiin. 22 I hmangaina chuoi ngai lo chu, LALPA, kan chungah um sien la, Kan beisei tak nang i ni si.

Psalms 34

1 LALPA chu inpâk rop ka ta, Ka bâuin ama inpâkna, Ieng lai khomin sâm zing a tih. 2 LALPA chu ka thla'n a suong a, Rimsihan hrein lawm raw se. 3 LALPA chu mi chawimawipuiin, A hming chu inpâk tlàng ei tiu. 4 LALPA ka zong, a mi lo don, Titna a'nthok a mi san suok. 5 Ama entuhai rêng rèng chu, An hmèl a hung êng suok hlak a, Inzak hmèl hrim an put ngai nawh. 6 Hi mi rimsi hin a ko a, LALPA chun a lo ngàithlâk a, Buoina lakah a san suok tah. 7 Vântirkohan LALPA titu, An umngha a, an humhim hlak. 8 LALPA hang thatzie êm êm hi, Intemin hang hre ve hrim t'um; Ama bêltu chu a hamtha. 9 Mi thienghlimhai, LALPA ti ro, Ama tituhai hrim hrim chun, Tlàksam ieng khom an nei ngai nawh. 10 Sakeibaknei vânglai khom hi, Fâk ding tlasamin a châu thei; LALPA zongtu ruok chun thil tha, Ieng khom an tlasam ngai si nawh. 11 Ka nauhai, hungin ngàithla ro, LALPA tì dàn hril ka ti cheu. 12 Tu khom mani nun thlâkhla a, Ni tha hmua dam sawt nuom chun, 13 Suol lakah a lei vêng tha sien, A hmûrin khêl hril naw raw se. 14 Suol nghatsanin thil tha thaw ro, Inremna zongin hnot pei ro. 15 LALPAN mi felhai a hmu zing, An ko pha a ngàithlâk var hlak. 16 Thil suol thawtuhai laka chun, LALPA hmêl a'n tûr zing hlak a, Hnuoiah hriet zing ni naw ni hai. 17 Mi fel kona LALPAN a hriet, Buoina a'nthok a san suok hlak. 18 LALPAN lungdonghai a hnai a, Beidong letdèrhai a san hlak. 19 Mi fel chun buoina hau sienkhom, LALPAN a san suok pei hlak a. 20 A rù le chânghai a vêng a, Pakhat khom suktliek ni naw nih. 21 Mi suol chu suolin that a ta, Mi fel theidatu taphot chu, Thiem naw inchangtir nîng an tih. 22 ​LALPAN a siehlawhai a'n tlan, Ama bêltuhai tu khomin, Thiem naw chang ta ngai naw ni hai.

Psalms 35

1 LALPA, mi beituhai bei la, Mi dotuhai hi do ve rawh. 2 I phaw chawi a, awmphaw hâkin, Mi thangpui din hung inthok rawh. 3 Fei inlet a, kawlhnâm phawiin, Mi hnottuhai lo dang tlat la, "I sandamtu ka nih" tiin, Nangin ka thlâ hi hung huol rawh. 4 Mi that tumtuhai inzakin, Sukmuolphoin um hai sien la, Ka sietna ding phiertuhai chu, Chi-âiin tlânsie hai sien la, 5 Thli lên hmang bu sî ang elin, LALPA angelhan hawl hmang sien; 6 Thimtham le lampui innâlah, LALPA angelhan hnot raw se. 7 A san boin ka'n awkna din, Lên châng arûkin an kam a, Ka tlâkna di'n tlâkpùm an cho. 8 Sietnan hung nang thut tawl sienla, An châng kamah inawk hai sien, An tlâkpumah tla hlum raw se. 9 Chuongchun, LALPA-ah lawm ka ta, A sandamnaah hlim ka tih. 10 Ka lungrilin LALPA kuomah, "LALPA, nang ang tu'm an um a?An ngam lo mi hrâthai lakah, Mi retheihai i san suok a, Mi rimsi le pasiehai khomAn neihai rokpêktu lakah, I hum bok a" ti thei ka tih. 11 Hrepuitu der rawng tak an hung, Ka hriet lo thilah an mi sàl; 12 Ka thil tha thaw tahai po po, Suolin an mi thungrul vong a, Ka thlâ a va'n vâi ngei de aw! 13 Kei chun an damnaw chàng khomin, Saiip sila bu nghei hielin, Kûn zingin ka tongtaipêk hlak. 14 Ka hnìna don a ni naw pha, Ruol le paihai sûn ang el le, Mani nu ngei sûn ang hielin, Lungngaiin ka kûn tlok tlok hlak. 15 Anni ruok chu ka'n sui thlûk pha, Hlimin an inhawr khawm lem a, Mi bei hron di'n an pung khawm a; Hmèl hriet lo misuolhai chenin, Mi dem le suosam an ma nawh. 16 Zàpà nei loa mi nuisaw'n, Hâ an mi rawt khum suot suot a. 17 LALPA, ieng chen am anni hi, I en thei tawl zing ding a na?Ka hringna hi keipui angaSuosàmtu lakah san suok rawh. 18 Pungkhawm ropui tak hmaa chun, Lawmthu hril ngêi ka ti che a, Mipui lai inpâk ka ti chê. 19 Mi sukse tum hmêlmahai chun, Mi diriem ta naw raw hai se. San boa mi theidatuhan, Mit mi lir khum ta naw raw se. 20 Inremna thu an hril ngai nawh, Thukhêla khuo le tui thahai, Hêk siet dàn ngot an phan rûk hlak. 21 An bàu inza huoua phongin, "Eheu! Eheu! ei mit ngeiin, Ei hmu annawm!" ti'n an hril hlak. 22 Chu chu LALPA, i hmu zing a, Chuleiin, tosan tawl naw la, LALPA, nangin mi'n hlat naw rawh. 23 Tho la, mi san di'n inthok la, LALPA Pathien, mi dopêk rawh. 24 I felnain thiem mi'n chang la, An mi diriem phal lul naw rawh. 25 "Ei duthusam a tlung tah ie, Ei tukdol zo dêr an tah hi"An mi ti ding phal lul naw rawh. 26 Ka chan siet mi diriemtu chu, Inzakin chî-âi hai sien la; Mi uongkhumtu po po khomin, Muolphona puon sil raw hai se. 27 Ka thiem changna lawmtu ruok chu, Lawm le hlimin khêk suok hai sien, "A siehlaw chan thatna dittu, LALPA ropui sien" ti raw se. 28 Chuongchun, i'n dikzie hril ka ta, Sùnni tinin inpâk ka che.

Psalms 36

1 Mi rilo lungril sùnga chun, Bawsietnan a biekrûk hlak a; Pathien hang tina san ding rèng, A mitin a hmu hrim hrim nawh. 2 A mitah a'n hmu mawi leiin, A suolna chu hmu thei lo leTheida phâk ruol lo di'n a ngai. 3 A bau thu suok a rilo a, Inhlèmna thuin a sip a, Thil tha le var a thaw ta nawh. 4 A khum laizawla hai chen khom, Thil suol thaw ding a suongtuo a, Suol lampui hraw a tum tlat a, Suol theidàna hrim a nei nawh. 5 Aw LALPA, i hmangaina chun, Vànvêlhai khi a tong vong a, I ringumnan vàn dum a tong. 6 I felna chu tlâng ang lienin, I'n dikna lipui ang a'n thûk. Mihriem le ramsa tinrênghai, Aw LALPA, i humhal hlak si. 7 I hmangaina chuoi ngai lo chu, A hlutzie inkhì ruol an nawh!Mi lien mi chînhan i thla hnuoi, Bêl dingin an hung pan hlak che. 8 I ina i hnienghnârna chu, Tlai takin an hung tlân hlak a, Lawmna fiertui i'n dawntir hlak. 9 Nang chu hringna tuikhur i na, I varah hringna var kan dong. 10 Nangma hretuhai chunga chun, I hmangaina thla zâr khum la, Lungrila mi ngîlhai chungah, I felna inlangtir pei rawh. 11 Chapohai mi sir sop ding le, Mi rilohai mi vai lêng ding, Nangin phalpêk hrim hrim naw rawh. 12 En ta, mi suol ruol an tlu saw, An inthal dêr, an tho ta nawh!

Psalms 37

1 Thil suol thawtuhai leiin, I lung sukhnûr ngai naw la, Thil dik lo thawtuhai khom, Inhnarin thîk bok naw rawh. 2 Hlo angin vuoi vak an ta, Hnà hring ang rêm vak an tih. 3 LALPA ringa thaw thain, Hi rama hin khawsa la, A muong himna chu tlân rawh. 4 LALPA-ah hlimin lawm la, I dùsàm pêng a ti che. 5 I um dàn ding lampui chu, LALPA-a chun innghat la, Ama chu ring nghet tlat la, Hieng hin thawpêk a ti che: 6 I felzie zîng nî angin, Hung invar suoktir a ta, I ngîrhmun indikzie khom, Sùn chang angin var a tih. 7 LALPA hmaah to zingin, Ama chu nghâk fan fan rawh. Mi suol an hlawtling lei dâm, An suol phier an hlen lei dâm, I lung sukna dèr naw rawh. 8 Lungsenna hi bânsan la, Lungturûk insuo sim rawh; Insuklunghnûr nuom naw rawh, Suol tieng chauh mi a thuoi hlak. 9 Mi suol sàt thlâk nîng an ta, LALPA beiseituhai chun, Ram hi la rochung an tih. 10 Sawt naw te chauh hnunga chun, Mi suolhai bohmang an ta, Anni chu zong zong la khom, Hmu zo tawl ta naw ti nih. 11 Zainêmhan ram hluong an ta, Muong takin khawsâng an tih. 12 Mi suolhan mi fel an phier, Hâ an rawt khum suot suot hlak; 13 LALPAN mi suol a nuizat, An tawp a hnai ti a hriet. 14 Pasiehai sietna ding le, Mi ngîlhai sukhlumna di'n, Mi suolha'n kawlhnâm phawiin, An thalpui an kuoi kùr hlak. 15 Sienkhom an kawlhnàm ngei chun, Anni lung dawt tlang a ta, An thalhai tliek vong a tih. 16 Mi suol hausakna nèkin, Mi fel thil nei tlawmte chu, A thain a hlu lem si. 17 Mi suol thilthawna kut chu, Suktliekin la um a ta, LALPAN mi fel a tungding. 18 Dem kai ngai lo mihai chu, LALPAN a hriet kim vong a, Rochan nei kumkhuong an tih. 19 Hun khirah muolpho naw nih, Tâm kum khom an hnienghnàr hlak. 20 Mi suol chu an bohmang a: Mit khap kâr loa phûl mawi, Meia a zâm ral angin, LALPA hmêlmahai khom chu, Mei khu ang an zàm ral hlak. 21 Mi rilohan an pûk a, An rul nawk ta ngai naw a, Mi felhan tiktlai takin, A thlawnin an pèk lem hlak. 22 LALPAN mal a sawmhai chun, Ram hi hluo'n rochung an ta; Tongsie a'n phurhai ruok chu, Sàt thlâkin la um an tih. 23 LALPA ditzawng thawtu chu, A kalchawi a sukhrât hlak, 24 An sui châng khom tlu naw nih, LALPAN a chel nghet si a. 25 Naupang ka ni lai a'nthok, Ka tar kûn hun chen khom hin, LALPAN mi fel a thlàthlam, Ka la hmu hrim hrim naw a, An nauhai kutdaw lai khom, Ka la hmu hrim hrim bok nawh. 26 Thilpêkah an tik a tlâi, A thlawnin an inpûktir, An suon le pàrhai khomin, Malsawmna an dong pei hlak. 27 Suol bànin thil tha thaw la, Ram hi hluo kumkhuong i tih. 28 LALPAN indikna a lawm, A ta dinga ringumhai, A mâksan ngai hrim hrim nawh. Chatuonin hum tawl a ta, Mi rilo thlâhai ruok chu, Sàt thlâkin um vong an tih. 29 Mi felhan ram hluong an ta, Chu chun chêng kumkhuong an tih. 30 Mi felin thuvar an hril, An bau suok thu a'n lài hlak. 31 Lungrilah Pathien dânhai, Ieng lai khom an vong tlat a, An sir khom a'n phet ngai nawh. 32 Mi rilo chun that tumin, Mi fel a'n chàn rùk hlak a; 33 Sienkhom, mi rilo kutah, LALPAN a màksan ngai nawh; Rorêlnaah khom thiem naw, An inchangtir a phal nawh. 34 LALPA chu nghâk zing hlak la, A lampui chu hraw hlak rawh. Chuongchun chawi sâng a che a, Ram inrochungtir a che; Mi suolhai a sàt thlàk pha, Mit ngeiin la thlîr i tih. 35 Mi suol tawrot ka hmu a, Tuolto thing ang a'n buk hlûp. 36 Ka sir nawk, a um ta nawh, Ka zong vêl, ka hmu ta nawh. 37 Dem kai lohai ngaituo la, Mi ngîlhai nun bi chieng rawh; Inremna dittuhai chun, Suon le pâr an thlâ ngei hlak. 38 Bawsetuhai ram an ta, Suon tieng zîk bûl bok an tih. 39 Mi felhai sandamna chu, LALPA-a inthok a na, Ama chu harsat ni a, An bêlbul kul nghet a nih. 40 LALPA chun a thangpui a, Aman a san suok tawl a, Ama chu an bêl leiin, Mi suol lakah a san him.

Psalms 38

1 Aw LALPA, i lungsen pumin, Nangin mi zilhau ngai naw la, Lungpuom lai mi thunun naw rawh. 2 I thal chun a mi sun tlang a, I kut ka chungah a tla hi. 3 I lungsen leiin ka pum hin, Dam ni rêng rèng a hmu ta nawh; Ka suol leiin ka rù le châng, A sil na thèm thûm vong a nih. 4 Ka rîtlonan ka lu a bûk, Phur ruol loin a rik a nih. 5 Ka thilthaw indik naw leiin, Tirdakum khopin ka pânna, A mi huoisuolpêk a ni hi. 6 Na tuorin ka kûn tlok tlok a, Sùnnithlâk beidongin ka'n rûm. 7 Ka kawng bawr a sa vut vut a, Ka taksa bung tinrêng hai hi, A damna lai hrim a um nawh. 8 Ka châu a, ka zoi letdèr a, Lungril sahâlin ka'n rûm ie. 9 LALPA, ka lungkham i hriet vong, Ka beidong inthuok ri chenin. 10 Ka lungphu a chawmchawrok a, Thâ nei loin ka zoi dèr a, Ka mithai khom a'n thim zo tah. 11 Ka pân leiin ruol le paiin, Hnai khom an mi hnai nuom ta nawh; Ka khuo le vênghai chen khomin, Hla takah an min kiengsan tah. 12 Ka hringna la tumtuhai chun, Ka awkna dingin châng an kam, Mi suknat tumtuhai khomin, Ka siet tuok ding thu ngot hrilin, Sûnnithlakin an mi phier rûk. 13 Kei hlak chu nasêt ang elin, Ieng khom ka hriet ve ngai naw a, ihriem tong thei lo ang elin, Ka bau ka phong ve ngai bok nawh. 14 Mithi, ieng khom hre thei ta lo, Mi don dinga bau phong thei lo, Ang hlol el ka lo ni ta hih. 15 Nang chauh i nih ka nghâk, LALPA, Mi don ngei rawh, LALPA Pathien, 16 Ka tlûk leia hmêlma diriem, Mi uongkhum ding phal lul naw rawh. 17 Ka natnain a mi'n thla nawh, A tlu lêng lêng chauh ka ni hi. 18 Ka bawsietnahai ka'n puong a, Ka suol leiin poi ka ti hle. 19 San um loa mi theidatu, Ka râlhai hi an hrohrâng hle; Indik loa mi dotuhai, A tam khom an lo tam kher el. 20 Anni rawi hi annawm suola, Ka thil tha thawhai thungrultu; Thil tha ka bawzui pei leiin, An mi theida êm êm a nih. 21 Aw LALPA, mi thlàthlam naw la, Aw ka Pathien, mi'n hlat naw rawh. 22 Aw ka LALPA le Sandamtu, Mi san dingin hung inhmaw rawh.

Psalms 39

1 "Ka lam hraw en fimkhur ka ta, Suol lakah lei vèng thang ka ta, Mi rilohai an um sùng chun, Ka hmûr khuop tlat ka tih" ka ta. 2 Sienkhom thu tha hril dêr lo a, Bau phong loa ka um hlak chun, Ka lungzingna a pung zuol si. 3 Ka lungril hi a sahâl a, a dawnkhawl chàng a mi hlieu a, Ka bau ka phong el tah a nih. 4 LALPA, ka hringnun tawp hun ding, Hun ka la nei zât mi hril la, Ka nun tawizie mi'n hriettir rawh. 5 Ka dam sûng hlak kutpha bok chauh, Nangma ta di'n ieng khom an nawh, Dam sûng hi thuok chen chauh a nih. 6 Suk le tunga lawn mihriem hi, Hlim thla ang mei mei chauh a nih; Iengma lo thil a buoipui a, A neitu ding hre si loin, Rosum tinrêng a khawl khawm hlak. 7 LALPA, tu am beisei ka ta? Ka beisei chu nang chauh i nih. 8 Bawsietna lakah mi hum la, Mi invêthan nuizatbûra, An mi siem ding phal lul naw rawh. 9 I mi'n tuortir a ni leiin, Ka to tok a, bàu ka phong nawh. 10 I mi vuokna hruol la hmang la, I kut ka tuorna ka châu tah. 11 Mi suolhai zila thununin, An hausakna hângthîm angin, I'n fâk siettir zo hlak si a; Mihriem hi thuok ang chauh a nih. 12 LALPA, ka tongtai ngàithla la, Ka hnìna mi lo hrepêk la, Ka tap rì lo ngàithla hrâm rawh. Ka pi le puhai ang bokin, Kei khuolzin hin ka hung bêl che, Sawtnawte châm ding ka ni hi. 13 Liem hmanga ka bo song hma hin, Hlim taka ka um theina di'n, I hmêl inthim mi'n hmutir naw.

Psalms 40

1 LALPA chu ka nghâk fan fan a, Ka rawl hrein a hung ngha a; 2 A mi kei suok, khur thim a'nthok, Ka'n tàngna chirdûm a'nthok chun; Lungpui chungah a mi'n ngîrtir, Sirsan nghet tak a mi siempêk. 3 Ka bàuah hla thar a sie a, Ei Pathien inpâkna hla chu. Mi tam takin chu chu hmuin, Tiin LALPA chu ring an tih. 4 Mi chapohai tieng ngha lo a, Pathien lemhai khom hnawl hmang a, LALPA ringtu chu a hamtha. 5 LALPA Pathien, kan ta dingin, Thil mak tam tak i thaw hlak a; Kan ta dinga i remruothai, Tu khomin puong sèng naw ni hai; Tiemin hril suok ding ni inla, Puong sèng ngaina hrim a um nawh. 6 Inthawina le thil inhlànhai, I thil dit tak a ni naw a; Suol thawinaa ran inhlàn khom, I thil phût tak a ni bok nawh. I thu ka hriet theina dingin, Ka na i mi hongpêk lem si. 7 Chuongchun, "Ngai ta, tu hin ka hung, Dàn bua chun i zirtirna, Ka ta dingin a'n ziek si a, b 8 Aw ka Pathien, nangma ditzawngThaw hi ka va châk ngei de aw!I dànhai chu ka lungrilahA châm zing hlak" ti'n ka hril a. 9 I sansuokna thu lawmum chu, Pungkhawm ropui lai ka puong a; Ka bau ka'n chîp nawzie thu khom, LALPA nang ngei hretu i nih. 10 Ka ip ngai nawh, i felna thu, I ringumzie thu puong darin, I sandamna thu ka hril hlak. I hmangaina chuoi ngai lo le, I ringumna dul ngai lo chu, Pungkhawmhai lai ka ip ngai nawh. 11 Keima lakah i zàngaina, Inro naw rawh, aw ka LALPA; I hmangaina le ringumnan, Kumkhuoin mi huol him zing rawh. 12 Tiem sèng lo buoinan an mi'n huol, Ka bawsietna'n a mi chîm a, Khuo khom ka hmu thei ta si nawh; Ka sam zài nêkin a tam lem, Ka lung a va hang dong ngei aw! 13 Aw LALPA, lunginsiettakin, Hung vat la, mi hung san suok rawh. 14 Ka hringna la tumtuhai chu, Muolphoin chi-âi hai sien la, Ka sietna ding phiertuhai chu, Hmâimawkin tlân se raw hai se. 15 "Chei leh, Chei leh!" tia khêk a, Mi'n riem khumtuhai po po chu, Inzakin kûn tlok tlok raw se. 16 Nangma zongtu taphothai chu, Nangmaah chun hlimin lawm sien; I sandamna dittu poin, "LALPA chu a va ropui ngei!"Tiin lawm hla rem rop raw se. 17 Kei pasie le riengvâi tak hi, LALPAN a mi ngaituo hlak si; Mi thangpuitu le sansuoktu, Aw ka Pathien, muongchâng lul naw.

Psalms 41

1 Mi rimsihai invoitu chu, Mi hamtha a va ni ngei de!Harsatna hun a tlung pha chun, LALPAN a hung san suok ngei hlak. 2 Ama chu LALPAN hum a ta, A hringnun chu huol him a ta; A rama chun malsawm a ta, Hmêlma kutah pe ngai naw nih. 3 Nat khumah LALPAN vêng a ta, A natnahai sukdam a tih. 4 Kei chun, "LALPA, i chunga hin, Thilsuol nasa tak ka thaw a, Sienkhom ka chungah zà ngai la, Mi sandam rawh" ti'n ka ngên a. 5 Ka sietna zongtu hmêlmahan, "Iengtik top am thi hmang a ta?"Tiin an mi'n riem khum hlak a. 6 An mi hung kan ve châng khomin, An lungril naw pui an hril a, Thu se tieng ngot an dap khawm a, Tuol an suok pha an hril thang hlak. 7 Ka sietna ding ringot zongin, An inbekbor, ka hmêlmahai; A se thei tawpa ngaituoin, 8 "A natna hi a'n rik êm a, Tho kâng nawk ta naw nih" an tih. 9 Ka ruol hnai le ka mi ring zo, Ka thlèng mi otpuitu khomin, A kekhong a mi'n lek khum tah. c 10 Aw LALPA, lunginsiettakin, Nangin mi hung sukdam nawk la, Anni hi hang thungrul ka tih. 11 Ka hmêlmahai chu ka chungah, I'n lêngtir phal naw lei tak hin, Ka chungah i lawm ti ka hriet. 12 ​I mi chel ngìr, ka'n dik leiin, I kuoma kumkhuoa chêng di'n, I mi sie ta hrim a ni hi. 13 LALPA, Israel Pathien chu, Chatuon a'nthok chatuon chenin, Inpâkin um raw se Amen, Amen.

Psalms 42

1 Vadungte tui châka dangchâr, Sakhi a'n thuok hlop hlop angin, Aw Pathien nangma chu ngaiin, Ka hringnun a'n thuok hlop hlop a. 2 Pathien hring ngaiin ka thlarau, A dang a châr takmeu a nih. Iengtik am Pathien kuom tlungin, A hmêl chu hmu tâng ka ti maw? 3 Sùn-zàna ka bù chu mitthlî, Mihai hlak chun ni tin tinin, "Khaw lam ie, i Pathien chu teh?"Tiin an mi'n don sên bok si! 4 Hienga nun hlui ka phor changa, Ka la theinghil thei ngai naw chu:Pathien in pana hmâ thuoi a, Mipuiin mi zui dûl dûl a, Kût hmangtuha'n inpâkna hla, Hlima an sak lai hun dâm kha. 5 Aw ka thlâ, ieng dinga ngûi a, Aw ka lung, ieng dinga i dong?Pathienah beiseina nghat la, Ka Sandamtu le Pathien chu, Ka'n pàk hun um nawk ngei a tih. 6 Ka thlarau hi a ngûi tlep a, Jordan ram le Harmon tlâng hai, Mizar tlânga inthok dâmin, Ka hung hriet vàng váng che a nih. 7 Têntuikhaw inri hum humin, Lî an sotir but but angin, I tuilien infawn sânghai chun, An mi hung chìm pil ta si a. d 8 Sùnah LALPAN a hmangaina, Chuoi ngai lo chu a'n langtir a; Mi sukhringtu Pathien kuomaTongtaia inpâkna hlain, Zàna po leh a mi'n awi hlak. 9 Pathien, ka Lungpui kuoma chun, "Ieng dinga i mi mâksan am?Ieng dinga hmêlma kut tuor a, Ka'n rûm a na?" ti'n ka'n don a. 10 Ka hmêlma mi diriemna chu, Thipui khop hielin a na a; "Khaw lam ie, i Pathien chu teh?"Ti'n an mi'n don sèn bok si. 11 Aw ka thlâ, ieng dinga ngûi a, Aw ka lung, ieng dinga i dong?Pathienah beiseina nghat la, Ka Sandamtu le Pathien chu, Ka'n pâk hun um nawk ngei a tih.

Psalms 43

1 Aw ka Pathien, thiem mi'n chang la, Pathien hrim poisa lo hnam dang, Mi khingtuhai chu khing ve la, Mi rilo le mi hlêmhmanghaiLak a'nthokin mi san suok rawh. 2 Ka Pathien le ka kulpui nghet, Ieng dinga i mi pei thlàk am?Hmêlma kut thak nûlna tuor a, Ieng dinga ka'n rûm am a na? 3 I chèngna tlâng thienghlima chun, Thuoia mi tlungpuitu dingin, I var le thutak hung tir rawh. 4 Ka lawmna tak Pathien i nih. I maichàma chun fêng ka ta, Tingtang remin inpâk ka che, Aw Pathien, aw ka Pathien. 5 Aw ka thlâ, ieng dinga ngûi a, Aw ka lung, ieng dinga i dong?Pathienah beiseina nghat la, Ka Sandamtu le Pathien chu, Ka'n pâk hun tlung nawk ngei a tih.

Psalms 44

1 Tiena tlânga aw Pathien, Kan pi le puhai hun lai a, Thil i thawpêkhai chanchin chu, An mi hril hlak leiin kan hriet. 2 I kuta hnam dang hnot suokin, An hmunah anni i phun a; Hnam danghai chu i tukdol a, Pipuhai i phun nghet thung a. 3 Kawlhnâmin ram an làk naw a, Râlthuom leiin an hnê bok nawh; I kut hrât chang tieng chu phar a, I hmêl êng chu inhmutir a, I ditsak tawl êm lei a nih. 4 Nang chu Pathien, ka lal i nih, Nang ngei i nih Jakob mihaiKuoma hnèna thu tiemtu chu. 5 Nangma zârin hmêlmahai chu, Kan hnot zâm a, kan hnaw tom a. I hming leiin mi dotuhai, Kein kan sir hriel neng hlak si. 6 Ka thalngulah ka'n hnèm naw a, Kawlhnâmin a mi san him nawh. 7 Ka hmêlmahai chunga hnèna, Mi'n changtirtu chu nang i na, Mi dotu i sukmuolpho hlak. 8 Keinin kan uongpui ni tin chu, Pathien nang chauh i ni si a; Kumkhuon i hming inpâk kan tih. 9 Tuhin hnawlin i mi suktlawm, Kan sipai ruol lai hin nang chu, Thang khom i thang nuom ta si nawh. 10 Mi dotuhai hmaah nangin, I mi'n tlânsiettir dur dur a, Hmêlmahan an mi rok ta hi! 11 That ding beram anga ngaiin, Hnam tin lai i mi sukdar a; 12 I mihai tlawmte'n i zor a, An man hlak i sak to nuom nawh. 13 Tuolbawmhai mi endong hlawin, Kan vêla chênghai mi diriem, Nuizat bûr kan lo chang hiel tah. 14 Hnam danghai fiem pawlawt hlawin, An lu an mi thin khum hlak a. 15 Ni tin muolphoin kan um a, Kan hmài a mawk zing zing a nih: 16 Diriema mi haltuhai rawl, Kan chunga phuba la tumtu, Hmêlmahai mi vauna leiin. 17 Hieng hi kan chungah tlung sienkhom, Nang kan theinghil ngai naw che a, I thuthlung kan bawsiet ngai nawh. 18 I lakah kan lunghnûr naw a, I lampui kan pêtsan ngai nawh. 19 Nang ruok chun mi sir sop nengin, Sihalhai lawmah mi siemin, Thim sà takin i mi'n khum si. 20 Kan Pathien hming chu theinghil a, Hnam dang pathien bie kan ni chun, 21 Lungril hretu nang Pathien chun, I hmu tlang vong naw dim a ni? 22 Nangma leiin ni tin elin, Thina ko tlângah kan ngìr a; That ding beram ang hiela ngai, Kan lo ni tawl vong ta si a. 23 Lalpa, tho rawh, iem i zâl zing?Meng harin, hung tho suok hrâm la, Kumkhuon mi pei thla tawl naw rawh. 24 Ieng leia i hmêl i thup am?Soisakna kan tuor inrimzie, I mi theinghilpêk am an ta? 25 Pilvut sikin kan kûn zing a, Hnuoiah kan bok phêk zing a nih. 26 Mi thangpui di'n hung inthok la, I hmangaina chuoi lo zârin, Mi hung intlansuok tawl hrâm rawh.

Psalms 45

1 Lal kuomah hlâ ka'n zawt lai, Lungrilah thu mawi tak tak, A hung inlang uor uor a, Ka bau chu ziek thiem ziekfung Angin a hung inchang a. 2 Hringmi lai i tha chungchuong, I bàu zàngainan a sip, Chu lei tak chun Pathienin, Mal a sawm kumkhuo che hi. 3 Aw lal lien, i kawlhnâm kha, I kawnga khan hang pai la, Ropui takin inchei rawh. 4 Thutak le thuhnuoirolna, Indikna tana hum di'n, Hnèna changin hma tawn la, Mi makti huoi huoi khopin, I kut changin hnè pei rawh. 5 I thal inzum tak el chun, Hmêlmahai lung sun tlang sien, I ke bulah hnamhai chu, Tlu thal rem rum raw hai se. 6 Pathien pêk che i lalna hi, Kumkhuoin nei zing i ta, Indikna lal hmol ngei chu, I ram lal hmol nîng a tih. 7 Indikna chu i lawm a, Suol tieng i theida leiin, Pathien, i Pathien ngei chun, I ruolhai nêka nasa'n, Hlimna hriek a nâl ta che. 8 I silfènah beraw rim, Aloi rim le thingzungthak, Rimtui a'n nam rum rum a; Saihaa chei lal inah, Rimawiin an inawi che. 9 I bula chêng dinghai chu, Lal naunuhai vong an na, I chang tieng lalnu a ngîr, Ofir rangkachaka siem, Silfèn mawia inbelin. 10 Bawinu, ka thu hi ngai la, I nâ mi lo dawpêk rawh. I mihai chu theinghilin, I pâ in chen khom nghil rawh. 11 I hmêl thatnan lal lungril, A lo zèm hnê dêr tah a, Inzà rawh, i lal a nih. 12 Tura naunu chu hungin, Thilpêkf hung chawi bok a taHausahan i diksakna, Chang tumin tlon an ti che. 13 Lalnu chu a pindanah, Ropuiin a châm buong a; Rangka zàia siem thuom mawi, Korfuol a hâk a ni saw! 14 Chu thuom mawi chu inbelin, Lal kuoma chun an thuoi a, A zuitu nunghàk thienglâm, Tam tak leh i hma bulah, An hung thuoi tah a ni saw. 15 Hlim le lawma hung thuoiin, Lal inah an hung inlawi. 16 In nauhaiin an pahai, Ro chu hung hluo pei an ta, Ram tinah rorêltuin, I siem tawl bok ding a nih. 17 I hming hi suon po po lai, Hriet zing dingin siem ka ta, Chuongchun hnam tinin nang chu, Inpâk kumkhuong an ti che.

Psalms 46

1 Pathien chu ei humhimna, Ei hràtna tha hrui a na, Lungzîng ni ieng lai khom a, Mi thangpui vartu a nih. 2 Chuong ang chu a ni leiin, Leilung inthlâk danglamin, Tlânghai chu tuipui tuongah, Pil hmang vong khom lo ni sien, Ti ngai hrim hrim nawng ei tih. 3 Tui fawn chu so but butin, A'n rûm vèlin tlânghai chu, Nghor hnìng dur dur khom ni sien, Ti chuong ngai bok nawng ei tih. 4 Vadung pakhat a um a, A fintu vadungtêhan, Chunghnungtak chêngna thienghlim, Pathien khawpui an suklawm. 5 A sûngah Pathien a chêng, Inhnîng ngai hrim hrim naw nih; Zîng khawvara inthokin, Pathien chun thangpui a tih. 6 Hnamhai an buoi luoi luoi a, Lalramhai an tlu sie a; A bàu a hang phong meu chun, Hnuoi a zop thla el a nih. 7 Iengkimthawthei LALPA chu, Ei kuomah a um zing a, Jakob Pathien ngei el chu, Ei inhumhimna a nih. 8 LALPA thilthaw hung en tu, Hnuoi a sukram nasatzie! 9 Vàn khup hnuoi kawlkawdong chen, Indo a suktawp vong a, Thalngulhai a kuoi tliek a, Feihai a ulh bong vong a, Phawhai meiah a raw hmang. 10 "Ngai ngam takin um ro khai!g Pathien ka nizie hre ro:Hnam tin chunga rorêltu, Hnuoi chunga lal ka ni hih. " 11 Iengkimthawthei LALPA chu, Ei kuomah a um zing a, Jakob Pathien ngei el chu, Ei kulpui a ni si a.

Psalms 47

1 Hnam tinhai, in kut ben unla, Hlim taka Pathien chawimawiin, Inpâkna hla sakin khêk ro. 2 A Chunghnungtak LALPA chu, Ti a lo va hang um ngei de!Hnuoi chung po poa Lal a nih. 3 Ei hnuoia hnamhai tukdolin, Ei ke hnuoiah a sie tawl a; 4 Ei rochung ding a mi thlangpèk, A hmangai Jakob suong ram chu. 5 Hlimna khêk ri nasa tak lehLALPA Pathien a kai tung a, Tawtawrawt ri leh a kai tung; 6 Pathien inpâkin hla sak ro, Ei Lal inpâkin hla sak ro. 7 Hnuoi pum lal chu Pathien a na, Inpâkna hla mawi rempêk ro. 8 Hnam tin chungah ro a rèl a, Lalthungpha thienghlimah a thung. 9 Hnam tin lalhai an hung pungkhawm, Abraham Pathien mihai chu, Lalhai chu Pathien ta an na; Chawimawi a hlaw, ropui takin.

Psalms 48

1 Ei Pathien chèngna khawpui, Ama tlâng thienghlima chun, LALPA a va ropui ngei!Inpâk a phû chungchuong ie! 2 Zion kîm tlàng a mawi chuong, Khawvel lunglawmna a nih; Lal tak khawpui hmar tiengh chun, Zion tlâng chu a'n zam phei. 3 A kulah Pathien a chêng, Humtu a ni a'n langtir. 4 Lalhai an inhawr khawm a, Bei dingin an hung inthok; 5 Sienkhom a tlâng an hmu chun, Maktinain an sip a, Thlabârin an tlàn sie a. 6 Tha inthinin a man a, Nau hase tuor ang an nih. 7 Khawsak thli'n Tarsis long ruol, A nuoi angin i nuoi hmàt. 8 Kumtluonga LALPA huol him, Iengkim LALPA khawpui ngei, Pathien khawpui ei hriet kha, Mit ngeiin ei hmu ta hi! 9 Aw Pathien, i tempulah, I hmangaina chuoi lo chu, Suiin kan dawnkhawl hlak a. 10 I hming inthang ang bokin, I'n pâkna chun kawlkawdong, A lo dèng suok vong tah a; Indikna'n ro i rêl hlak. 11 Zion tlâng chu lawm hlê sien, Judai ram mi lawm raw se, Fel taka i rêl leiin. 12 Zion tlâng hi fang vèl la, Vèngbûk sânghai tiem vong la, 13 A kul bang, râlvêng bûkhai, Ruolthar hriet di'n inchik rawh. 14 Hi Pathien hi chatuona, Ei Pathien a ni si a, Kumkhuoin mi thuoi a tih.

Psalms 49

1 Mi tinrênghai, ngàithla unla, Khawvela chèng po pohaiin, In nà kha lo daw seng ro khai. 2 Mi chîn mi lien, hausa rethei, In rêngin lo ngàithla ro khai. 3 Varna thu kan zawt ding a na, Ka lungril ka phor suokhai chun, Hriet thiem theina pêng a ti cheu. 4 Thuvar tieng ka nâ dawng ka ta, Tingtang keiin thukhirhai chu, Ka hung hril fie ding a ni hih: 5 Hmêlma rilohai suolna chun, Sîr tinah mi'n huol vel sienkhom, Hun tha loah iem ting ka ta? 6 An hausak an inhnèmpui a, An hnienghnàr thu an uongpui hlak. 7 Tu khomin mi danghai hringna, Intlanpêk thei a ni naw a, Pathien kuomah intlanna man, Tu khomin an pek thei bok nawh. 8 Hringna man chu a to taluo, Ieng po khomin a'n tlan zo nawh, 9 Thlàn thima hmon ve lo ding a, Chatuona hring ding a ni chun. 10 Invêt le mawlhai ang bokin, Mi varhai khom an thi ve a, An hausakna mi dang ta di'n, An màksan hlak ti hi hre ro. 11 An ramin an hming hiel putin, Thang tam lo hluo ta hai sienkhom, An chang sun chu an thlàn a na, An kumkhaw in ni zing a tih. 12 Ieng anga neinung khom ni sien, Mihriem chun a dai sawt ngai nawh, Ramsa angin a bohmang hlak. 13 Mania innghattuhai chu, Chuong ang chu an chan a ni hlak, An thu khûkpuituhai chan khom. 14 Beram anga thi ding an na, An vèngtu chu Thina a nih. Thlân thimah liem thla nghal an ta, An taksa chu hmon hmang a ta, Mithi khuoa chun um an tih. i 15 Kei chu Seol kut a'nthokin, Pathienin mi'n tlan suok a ta, Aman mi lo lawm ngei a tih. 16 Mi an hlawk phâ inhnar naw rawh, An nei a pung thûr thûr khomin. 17 An thi phâ som nei naw ni hai, An thil neiin zui bok naw nih. 18 An dam lai hamtha inti'n, Mihai ngaisàng ni hai sienkhom, 19 Var um nawna thlàn inthimah, An pipuhai la fin an tih. 20 Hriet thiemna nei lo hausa chu, Ramsa anga boral a nih.

Psalms 50

1 LALPA Pathien Ropui tak chun, Ni suokna sak kawla inthok, A tlâkna thlang kawl rawn chen, Thu hrilin hnuoi hi a ko a. 2 Khaw mawi famkim Zion a'nthok, Pathien var chu a êng suok hlak. 3 Ei Pathien a hung, to naw nih, A hmaah mei a'n hlap puot puot, A vêlah thlipui a hrâng vêl. 4 Chung vàn a ko, hnuoi a ko bok, A mihai ro rêlpêk dingin. 5 "Ka kuoma inthawina hlàntu, Thu thlungtu serhranhai ko ro"Tiin kona thu a'n suo a. 6 Vàn khin a'n dikzie a puong a, Rorêltu chu Pathien a nih. 7 "Ka mihai, ka thu ngàithla ro, Aw Israel, khing ka ti che, Pathien, in Pathien chu ka nih. 8 Ka kawk naw cheu, in thilhlàn lei, In inthawina a hung tlung zing; 9 In bawngchalhai ka mamaw nawh, In ran huonga kèlchalhai khom. 10 Ram sa tinrêng ka ta a nih, Tlâng tina chêng ransahai khom; 11 Tlânga vate tin ka hriet vong, Thil hring po po ka ta a nih. 12 "Tâm khom ni lang hril naw ning cheu, Khawvel le a sûnga umhai, Keima ta vong an ni si a. 13 Bawngchal sahai dâm fa hlakin, Kêl thisen ka dawn hlaka mawh? 14 Pathien kuomah lawmthu hrilna, Inthawina inhlàn lem unla, Chunghnungtak kuoma in thu chu, In tiem angin hlen suok unla, 15 Harsat niah mi ko unla, Keiin san him ka ti cheu a, Nangnin kei mi chawimawi ve ro. " 16 Mi rilohai kuoma ruok chun, Pathienin hieng hin a hril a:"Ka dàn thuhai inzawt ding le, Ka thuthlunghai sâm hlak dingin, Tu'n am phalna a pêk cheu a? 17 Ka thucha3 18 Rûkru in inthuruolpui a, Uirè zawlpuon in zawnpui a. 19 Suol hrilna di'n bau in phong a, In lei khêl hrilna'n a'n khap a 20 In unauhai in hrilsiet a, In laizawnhai in hêk bok a. 21 Hieng po po hi in chîng hlak a, Sienkhom ka tosan zing cheu a; Nangni anga lungril put ve, In mi sawn hman hiel a ni kha. Tu hin hmaisana ngei kawkin, In thiem nawzie hril ka ti cheu. 22 "Pathien theinghil chînghai, ngai ro, Chuong naw chun pot chen ka ti cheu, Santu ding hrim nei naw ti niu: 23 Lawmthu hrilna inhlàntu chun, Keima a mi chawimawi a na, Lampui indik hrawtu khomin, Pathien sandamna hmung a tih. "

Psalms 51

1 I hmangaina chuoi lo zârin, Ka chungah zà ngai rawh, Pathien, Zàngàina i hauzie angin, Ka bawsietnahai thâi bo rawh. 2 Ka khawhlonahai sawp fai la, Suola inthok mi tlêng fai rawh. 3 Ka bawsietnahai ka hriet a, Ka suolna ka hmasom zing a. 4 I lakah thil suol ka thaw a, A nih, i mit hmua ngei chun, Thil suol ka lo thaw tah a nih. Ka chungthu i rêl indik ie, Demna ding hrim hrim i um nawh. 5 Ka nû sûnga ka'n sieng laiin, Suol sá hrima von ka ni a, Ngai ta, suol saa pieng ka nih. 6 Sûng ril tienga takna i dit, Chuleiin ka sûng ril takah, I varna thu mi zirtir rawh. 7 Husawpa thèin mi'n thien la, jChuongchun hung inthieng tâng ka ta, Mi sawp faiin mi tlèng fai la, Vûr nêkin hung vâr tâng ka tih. 8 Hlim le lawm ri mi'n hriettir la, Ka ru tliek khom hi hlim raw se. 9 Ka suol lakah i hmai hup la, Ka bawsietnahai thâi hmang rawh. 10 Lungril inthieng mi siempêk la, Ka sûngrilah thlarau nghet tak, Intuoi thartir nawk rawh, Pathien. 11 I lakah mi hnawl hmang naw la, I Thlarau Thienghlim ka lakah, Mi la hmangpêk ngai bok naw rawh. 12 Sandam hlimna mi pe nawkin, Thuawina thlarau mi pe la, Chu chun nangin mi suknghet rawh. 13 Bawsetuhai chu i lampui, Kawkhmung ka ta, lamlèt an tih. 14 Aw ka Pathien, mi sandamtu, Thisen insuo leia thiem naw, Ka changna laka inthokin, Mi san suok la ka va ti ngei!Chuongchun, i felna inpâkin, Rawl tawp insuo thei tàng ka tih. 15 LALPA, ka hmùr mi hongpêk la, I'n pâkna hla puong suok ka tih. 16 Inthawina i lawmzawng an nawh, Ni sien chu hung inthawi ka tih; Pumraw inthawi i lawm bok nawh. 17 Pathien lawmzawng inthawina chu, Lungril tet koi vong hi a nih; Lungrila insîr ngawi ngawihai, I hmusit ngai nawh, aw Pathien. 18 I ditzawng angin Zion chu, Hnienghnàrnan hung vur nawk ta la, Jerusalem kul banghai khom, Tungdingin indin thar nawk rawh. 19 Chuongchun, i lawmzawng inthawina, Indik tak chu inhlàn an ta, Pumraw inthawinan bawngchalhai, I maichàmah inhlân an tih.

Psalms 52

1 Aw mi ropui le hrât khawkhèng, Pathien mita inzapuium, Pathien laka suol i thaw chu, Ieng dinga i uongpui ni tin? 2 Mi sietna ding i phierrûk a, Thukhêl i phù suokna lei hi, Chem hriem tak anga ngei a nih. 3 Thà nêkin suol i lawm lem a, Thu dik nêkin khêl hril i chîng. 4 Aw nang hmùr khelhlip neitupa, Mi lung khei zawng hril i hrât de! 5 Pathienin pot thlâng a che a, Kumkhuoin sukram a ti che. I puon in a'nthok hnûk suokin, La pot chen neng a ti che a; Hringmi laia chêng thei lo di'n, A phawi hmang dai ding che a nih. 6 Mi indikha'n chu chu hmuin, Pangzatin nuisawng an ti che. 7 "En tu, en tu, hi mipa hi, Pathiena innghat nuom loa, Mani hausakna ringsan a, Mi sietnaa insuklien pa"Tiin khîksaw bok an ti che. 8 Kei chu Pathien ina olivHring inno tak ang hi ka na, Pathien hmangaina chul lo chu, Kumkhuoa ka ringsan a nih. 9 Thil i mi thawpêkhai leiin, Kumkhuoin inpâk ka ti che; I hming leiin beisei ka ta, I hming hi a va tha de aw!I mi thienghlimhai hmaa khom, Inpâkin chawimawi ka ti che.

Psalms 53

1 Mi invêthai chun lungrilin, "Pathien a um nawh" an ti hlak. Hlemhlè takin an khawsa a, Thil suol tirdakum an thaw a, Thil tha thaw hrim hrim an um nawh. 2 Pathien chun vàna inthokin, Mihriem nauhai lai chun mi var, Pathien zong le thil hre thiem hrim, An um am ti'n a zuk thlîr a. 3 An rêngin ama nghatsantu, Hlemhlènaa sip vong an na, Thil tha thaw hrim an um naw a, Pakhat bêk khom an um dêr nawh. 4 Hlemhlehan ka mihai fâk ding, An fâk rûk hmangpêk hlak ti hi, Ieng dinga an hriet nawm a na?Pathien hlak an zong dêr si nawh. 5 Ti ding a um nawnaa khom, Ti dor dorin intom an ta; Nangma dotuhai rù ro chu, Pathienin pei dar vong a ta, Pathienin a hnawl tah leiin, Muolphoin an hmài mawk a tih. 6 Israel sandamna ruok chu, Zion a'nthok hung suok a ta, Pathienin anni tungding a, A hung sukhmuingil nawk pha chun, Jakob thlahai chu hlim an ta, Israel khom lawm tâng a tih.

Psalms 54

1 I hmingin mi hum la Pathien, Ka thiemzie i theinan puong rawh. 2 Ka tongtai ngàithla la Pathien, Ka hnìna mi bengkhonpêk rawh. 3 Pathien poisakna hrim nei lo, Mi uongthuonghai chun mi beiin, Mi tawrothan that an mi tum. 4 Mi thangpuitu Pathien a na, Mi tungdingtu LALPA a nih. 5 Mi'n chân zingtu hmêlmahai chu, An suolna chun dêng kir tawl sien, I ringumnan sukbo tawl rawh. 6 Keima lungril puoksuok ngeiin, Inthawina hung inhlàn ka ta; LALPA, i hming a tha êm a, Inpâkin chawimawi ka ti che. 7 Harsatna tinrêng a'nthokin, Nangman i mi san suok leiin, Hmêlmahai chungah hnèna mit, Kan lo inlèn thei tah a nih.

Psalms 55

1 Aw Pathien, ka hnìna ngai la, Mênah mi thlâkpêk lul naw rawh; 2 Mi ngàivenin mi hung don rawh, Buoinan a mi chîm a ni hih. 3 Hmêlma rawlin a mi hàmzìng, Mi rilohan an mi mel rum; Buoina ka chungah an siem a, Lungsenin an mi hrâng khum ie. 4 Ka lung hi a'n lap dor dor a, Thi inlâu zingin ka um a. 5 Titna'n thaah a mi man a, Inlâuin ka'n thin dor dor a. 6 "Vàthû ang thla nei ve lang chu, Chawl hadamna hmun ding zongin, Hla takah vuong hmang tang ka ta, 7 A nih, ram hla takah vuongin, Thlalêrah umhmun khuor ka ta, 8 Thlipui le ruopui laka chun, Inbîkna ding hmun him zongin, Fe hmang inrang ka tih" ka ta. 9 Aw LALPA, mi rilohai hi, An ngaituona sukchî-ai la, An tong khom hung sukbuoipêk rawh, Inpawngnêkna le inbeina, Khawpuia hin a sip si a. 10 Sùn-zàn zomin an invàk a, Indemna le inhrilsietnan, A khawpui sûng hi a sip a. 11 Sietna sipaihai an hràng a, Inpawngnêkna le inhlèmnan, Kotthler an rielsan ta ngai nawh. 12 Hmêlmahan an mi nuisan chun, A tuor dàn tak a la um a; Dotuhan an mi'n huol vèl chun, Inbîkrùksan thei a ni bok. 13 Sienkhom nang i lo ni zing si, Keima ang ela ka ngai hlak, Ruolcham ang ela ka pawl ngei, 14 Ka titipui mel mel hlak le, Mipui ruola Pathien in tieng, Pana ka'n sompui hlak ngei kha! 15 Hmêlmahai chu an hun tlung hma'n, Thinan hung nang thut tawl sien la, A hringhràna Seol panin, Muol liem thla diel tawl raw hai se, Suol bu khuorna an ni si a. 16 Kei ruok chun Pathien ka ko a, LALPAN mi hung sandam a tih. 17 Zîng, sùn, zàn le ieng lai khomin, Ka'n rûm ri a tlung tung zing a, Ka rawl lo hre ngèi ngéi a tih. 18 Mi dotu tam hlè hai sien khom, Him takin mi san suok a tih. 19 Tiena inthoka rorêltu, Pathien chun mi lo ngàithlain, Anni chu hung suktlawm a tih; An inlamlèt nuom ngai naw a, Pathien tìna an nei bok nawh. 20 Ka'n koppui chun a ruol doin, Kan thuthlung chu a bawsiet a. 21 A kam suok thu chu a thlum a, Nisienkhom a sûngril takah, Indona lungril a put a; A bau hriek nêka tlor lem chu, Kawlhnàm ngei tak ang a ni si. 22 I lungkhamna po po hai chu, LALPA chungah innghat vong la, Aman sawk zàngkhài a ti che, Mi felhai tlùk phal ngai naw nih. 23 Mi rilohai chu aw Pathien, Khuorkhurûmah pei tawl i ta, Thisen insuo hmang mihai leKhêla inhlêm chîng mihai chu, An dam chenve khom dam naw nih. Kei ruok chu nangmaah ka'n nghat.

Psalms 56

1 Aw Pathien, mi lunginsiet la, Miha'n pêlin an mi hnot thlûr, An mi vé zing, sùnnithlâkin. 2 Sùnni tina mi vètuhan, Uongthuong takin an mi bei a, A tam khom an va hang tam ngei! 3 Tia ka thla a phàng chângin, Nangmaah inhnèm hlak ka tih. 4 A thu ka suong Pathien ngei chu, Ka ring Pathien a ni leiin, Tiin thlaphâng ngai naw ningah; Hringmin iem mi law thei an ta? 5 Ni tin ka tong an lâkkawi a, Ka sietna ding an phier zing a; 6 Kil tinah an mi'n chàn rük a, Ka chàng dân po an enthlâk a, Mi that châkin an kut a'n zà. 7 Hieng mihai hi ieng kong khomin, Aw Pathien, hla tawl dêr naw la, I lungsenin tukdol tawl rawh. 8 Ka'n rûm ri hi inchik vong la, Ka mitthli luonghai daw khawl rawh. kIengkim i'n chik vong an naw maw? 9 Ka ko phá chè, ka hmêlmahai, Tukkhum sonin tlân sieng an ta, Chu pha chun ka kuom tieng Pathien, A thang ngei ti hre tâng ka tih. 10 Kei chun Pathien thu ka suong a, Kei chun LALPA thu ka suong a, 11 Pathien ka ringsan tlat leiin, Tiin thlaphâng ngai naw ningah. Hringmin iem mi law thei an ta? 12 Ka thutiemhai kha aw Pathien, Hlenin lawmthu hril inthawina, I kuomah hung inhlàn ka tih. 13 Pathien hmaah, hringna varah, Dâr ang ka lèng ve theina din, Thìna lakah mi san suokin, Ka'n sui thlùk ding i mi vèng hlak.

Psalms 57

1 Aw Pathien, mi lunginsiet la, Ka chunga hin zà hung ngai rawh. Ka thlâ inbìkna nang i na, Sietna thlipui a'n kieng hma chun, I thla hnuoi hi bèl zing ka tih. 2 A Chunghnungtak Pathien ka ko, Ka ta dinga a tum tinrêng, Inhlentir hlaktu Pathien chu. 3 Vàn a'nthokin mi don a ta, Ama chun mi hung sanhimin, Mi pèltuhai hung ràu a ta, A lungsietna le ringumna, Pathienin inlangtir a tih. 4 Sakeibaknei anga ti-um, Mi fa nuomhai lai ka um a; An hà chu thal le fei zum ang, An lei kawlhnâm ngei ang a nih. 5 Aw Pathien, vànhai khèla khom, Nang chu ropui takin lêng la, I ropuinan hnuoi sip raw se. 6 Ka awkna di'n lèn châng an kam, Beidongin ka kûn tlok tlok a; Ka lampuiah tlâkkhur an cho, Sienkhom anni an tla tah lem. 7 Aw Pathien, ka ring tlat che a, Inphet loa nang ring tlatin, Rimawi remin inpâk ka che. 8 Aw ka thlâ, nang hung tho har la, Tingtang le rimawi hai tumin, Khawfîng hi hang ko chat ka tih. 9 Hnam ze tin lai hin aw LALPANangma inpâk ka ti che a, Mipui lai khom zâia chawiin, I'n pâkna hla hung sak ka tih. 10 I hmangainan vàn a khêl a, I ringumnan vàn sûm a pèl. 11 Aw Pathien, vànhai khèla khin, Ropui takin nang chu lêng la, I ropuinan hnuoi sip raw se.

Psalms 58

1 Rorêltuhai, thu indik, In hril hlak chie de a maw?Mihai chungthu in rèlin, Indik takin in rêl maw? 2 Lungrilin thil tha naw ngot, Thaw dàn ding in suongtuo a, Tharum hmanga kut thlâkna, Hnuoiah a pung a ni hi! 3 Mi suolhai chu sul a'nthok, Pêt hmang sa hrim an ni a, An pieng a'nthok khêl tieng ngot, Awn tlat nuom mi an ni bok. 4 Rûl tûr ang tûr an pài a, Chongkor nasêt ang an na, 5 A khâwitu chu ieng anga, Rûl dawi thiem khom ni sien la, A dawina hlà le rí chu, Rûl chun a hriet thei si nawh. 6 Aw Pathien, an hàhai chu, Nangin vaw tlampèk vong la, Aw LALPA, keipui ruol hi, An uihà khel dokpèk rawh. 7 Tui angin luong ral hai sien, Hlobet anga sir hmâtin, Chîl hlumin um raw hai se. l 8 Hnapkawng angin thi rawp sien, Ni êng hmu hman loa thi, Naute hlamzui ang elin. 9 An hriet naw kâr hling angin, Lungsenin sâm fai an ta, Mi suol chu an thi an dam, Phît hmangin la um an tih. m 10 An phuba làk a ni phâ, An thisen an pal phâ chun, Mi indikhai hlim an tih. 11 "Mi fel chun matheiloin, Lawmman an la hmu pei a, Hnuoiah rorêltu Pathien, A lo um takzet" tiin, Mihaiin la hril an tih.

Psalms 59

1 Aw Pathien, hmêlma lakah, Nangin mi hung san suok la, Mi dotuhai laka chun, Nangin mi hung hum him rawh. 2 Suol thawtuhai laka chun, Nangin mi hung san suok la, Thisen inruihai lakah, Nangin mi hung sandam rawh. 3 Aw LALPA, ka bawsiet leKa thaw suol lei ni loin, That tumin an mi'n chân a, Mi tawrot ruol an pung khawm. 4 Ieng thaw suol lo ni lang khom, Bei tumin an mi'n huol zing. Mi san dingin hung tho la, Ka chan harsatzie en tam! 5 Aw LALPA, Iengkim Pathien, Israel Pathien, hung thoin, Hnam danghai hi hrem tawl la, Dawhaa thil suol phiertu, Tu khom hlà nei dêr naw rawh. 6 Zàn tieng an inhawr khawm a, Ui anga mi inngurin, Khaw dung khaw vâi an fang a. 7 Mi an bauh nasatzie hi, Hang ngàithla ve hrim hrim ta!An kam suok chu kawlhnâm ngei, Inchemhârnan a sip a, "Tu'm a mi ngàithla an um?"An la ti nawk ta deu deu! 8 LALPA, anni chu nangin, Hung nuizat tawl hlêng i ta, Hnam tin nuizatbûr i tih. 9 Aw ka Hràtna, thlîr ka chê, Ka Pathien, ka kulpui nghet, 10 Ka hmangai Pathien i nih. Aman ka hma thuoi a ta, Mi hmusit hlaktuhai chu, Mi'n nuisawtir ngei a tih. 11 Aw LALPA, ka phaw i nih. Nangin anni that naw rawh, Chuong naw chun ka mihaiin, Anni theinghil rawi an tih; Invâkvaitir tawl lem la, I hrâtnan suktlawm tawl rawh. 12 An bàu suolin a sip a, An hmûr thu suok tinrêng khom; An chapo sietpui raw se, Tong sie inphur le khêlhril, An hmang êm êm hlak si a. 13 Lungsenin sukbohmang la, Ram dèrin sukchimit rawh. Chuongchun, Jakob Pathienin, Ro a rêl a nih ti hi, Kawl kil chen inthang raw se. 14 Zàn tieng an inhawr khawm a, Ui anga mi inngurin, Khaw dung khaw vâi an fang a. 15 Fàk ding an dap vêl ruoi a, Khop tawk an ngà naw lem chun, Zàn khuoin an inbauh hlak. 16 Kei ruok chun i hràtzie hi, Hrilin inpâk ka che a, I hmangaina chuoi lo chuZîng hmângin inpâk ka tih; Mangang nia ka'n bîkna, Ka kulpui i ni si a. 17 Ka Hràtna, nang chawimawiin, Hlâin inpâk ka ti che. Mi hmangaitu ka Pathien, Ka kulpui i ni si a.

Psalms 60

1 Aw Pathien, nangman hnawlin, I mi phîn dar vong ta si!I lung chu sen hlê sien khom, Tu hin mi tungding nawk rawh! 2 Ram i hang sawi hnîng meu chun, I sukphel ta pheng phung a, A kaknahai thol phûi rawh, A tlu el ding a ni hih. 3 Hun khirh, tuor harsa tak chu, I mihai i'n tuortir a; Pai chon chon khopa nasa'n, Uoiin i mi hrâi rui a. 4 Nangma tituhai ruok chu, Thal kâp phâk loa hlaah, Puonzâr i'n khaitir lem si. 5 ​Thangpuiin mi san suok la, pI hmangaihai himna din, I kut chang tieng hung phar rawh. 6 A hmun thienghlim a'nthokin, Hieng hin Pathienin a hril:"Ka mihan hnèna changin, Sekem khuo sem dar ka ta, Sukot ruom thè dar ka tih. 7 Gilead le Manase ram, A rêngin ka ta a na, Efraim ram ka thîr lukhum, Judai ram chu ka lal hmol, 8 Moab ram chu ka maihùn; Edom ram ka ta a nih, Ka pheikhok ka dêng lûtna. Filistinhai chu hnènaHlado ka'n sam khum der tah". 9 Kula inhuon khawpuiah, Tu'n am mi thuoi tâng a ta?Edom ramah tuin am, Thuoiin mi fepui a ta? 10 Aw Pathien, i mi hnawl maw?Kan sipai ruol lai, Pathien, I thang nuom ta naw a ni? 11 Hmêlma lakah mi san rawh, Mihriemhai thangpuina chu, Ienga khom a tlâktlài nawh. 12 Pathien zârin huoi taka, Beiin hnèna chang kan ta, Kan ràlhai chîl pher a tih.

Psalms 61

1 Aw Pathien, ka kona ngai la, Ka tongtaina lo ngàithla ta'm! 2 Lungzînga ka chàu tlep chângin, Hnuoi tawp a'nthok ka ko che a, Keima nêka insâng lem daih, Lungpuia chun mi hlângkâi rawh. 3 Hmêlma laka ka'n bîkna tak, Ka kulbing sàng i ni si a. 4 I thla zàr hnuoi himna bèl a, I puon inah kumkhawtluonga, Chèng song ka va hang châk de aw! 5 Aw Pathien, ka thutiem hrein, I hming tituhai rochan chu, I mi'n changtir ve tah a nih. 6 Lal dam chen ding sukseipêk la, Tu mong benin indamtir rawh. 7 I hmaa chun kumkhawtluongin, Aw Pathien, inlal zing sien la, I hmangaina le ringumnan, Ama chu vêngin huol him rawh. 8 I hming inpâk kumkhuong ka ta, Ka thutiem hlen ni tin ka tih.

Psalms 62

1 Ka thlâin ka Pathien chauh, To zingin a nghâk fan fan, Ama a'nthok chun a nih, Ka sandamna khom a hung. 2 Ama chauh chu ka lungpui, Ka sandamna kul a na, Inhnîng ngai hrim hrim naw ning. 3 Bang inawn le pal tlu têpAnga ongrop ta hnung hi, Nangnin nor chim ngèi tumin, Ieng chen am in mi bei ding? 4 A ngîrhmun insâng a'nthok, Kei thlâk tumin in bei a; Khêl hi in lawmzawng a na, In tongkam suok a thlum hle, In lungril ruok chun tongsie, In mi'n phur lem hlak si a. 5 Ka thlain ka Pathien chauh, To zingin a nghâk fan fan, Ama a'nthok chun a nih, Ka beiseina khom a hung. 6 Ama chauh chu ka lungpui, Ka sandamna kul a na, Inhning ngai hrim hrim naw ning. 7 Mi'n tlantu le chawimawitu, Pathiena chauh ka'n nghat a, Ka bêl lai lungpui nghet chu, Pathien chau hi a ni si. 8 A mihaiin ama chu, Ieng lai khom ring tlat unla, Ama tieng lungril hong ro, Ei bêl Pathien a ni si. 9 Mi hnuoihnunghai po po hi, Thuok ang chauh an ni vong a; Mi chunghnunghai hlak khom hi, Khêl tlang fùn khawm ang an nih; Bùkin rikna an nei nawh, Thuok nèk khomin an zàng lem. 10 Mi thil lâk lui chîng naw la, Inrûk thil ngaisâng naw rawh; Hung hausa thûr thûr la khom, Lungril innghatnan hmang naw. 11 Pathienin a hril pakhat, Voi hni zet ka hriet tah chu:Thilthawtheina po po hi, Pathien kuta um a nih. 12 Hmangaina khom hi LALPA, Nangma ta chauh a lo nih. Mi tin an thilthaw anga, Rul hlaktu i ni si a.

Psalms 63

1 Aw Pathien, ka Pathien i na, Nangma ka zong ngar ngar che a, Ram tawl, ram sie, tui vàngnaah, Ka thlarau hi nangma ngaiin, A dang a châr takmeuh si a; Ka taksa'n a ngai che a nih. 2 I hmun thienghlimah ka hung a, I hràtzie le i ropuizie, Ka hung thlìr vong vong a nih. 3 I hmangaina chuoi ngai lo chu, Hringna nêka a hlut leiin, Ka hmûrin chawimawi ka ti che. 4 Ka dam sûngin chawnbân vawrin, I hming hi inpâk pei ka tih. 5 Bu hnienghnâr tak tlàn ang elin, Ka thlarau hi a tlai hle a, Ka hmùr khom lawm hlaa sipin, Ka bàuin ka'n pâk che a nih. 6 Khum laizawlah ka nghil naw che, Zànkhuon i thu ka dawnkhawl hlak. 7 Mi thangpuitu chu nang i na, I thla hnuoiah hlim zài ka vawr. 8 Ka thlâin a'n tûl zing che a, I kut chang tiengin i mi kuo. 9 Ka hringna la tumtuhai chu, Khuorkhurûmah la tlâng an ta, 10 Kawlhnâma sât hlum nîng an ta, Sihalin an sa tlân an tih. 11 Lal chu Pathienah hlim a ta, Pathien hming lamtuhai poin, Ama chu la chawimawi an ta, Mi khêlhliphai bau ruok hi chu, Khârpêkin la um ngei a tih.

Psalms 64

1 Aw Pathien, mi ngàithla rawh, Nuor thusim ka hung inzawt. Hmêlma tibaium lakah, Ka hringna mi humpêk rawh. 2 Phierrutu mi rilohai, Thil tha naw thaw tumtuhai, Mi suol pungkhawm laka chun, Nangman humin mi thup rawh. 3 An lei chem anga ngei chun, Tong kha tak an hlap suok a, Thal angin mi an tin a. 4 Poi tawk lo kàp hlum tumin, A rûkin an inchân a; An kâp thut, kut an kei nawh. 5 Suol thaw an tum ngar ngar a, Châng kam rùk an rêl zing a, "Tu nam a hmu ding?" an tih. 6 Thil tha lo an phan zing a, "Tu hriet suok ruol lo thaw dàn, Tha tak kan hmu suok" an tih. Mihriem ngàituona rûk hi, A lo va vervêk ngei de! 7 Pathien chun a thal ngeiin, Anni chu kâp thung a ta, Thawk-le-khatin sieng an ta, 8 An bàua thu suok ngei chun, Anni chu hung dèng kîrin, Sietna hung intlun a ta, A hmu photin lu thinin, Anni chu diriem an tih. 9 Mi tinrêng thlabâr an ta, Pathien thilthaw chu puongin, A thilthaw ngàituong an tih. 10 LALPA-ah mi fel hlim sien, Inhumhimnan hmang sien la, Lungrila mi ngîlhai chun, Ama chu chawimawi raw se.

Psalms 65

1 Aw Pathien, Zion tlângaInpâk i phû hlie hlie a; I kuoma kan thutiem chu, Hlen ni la um ngei a tih. 2 Kan tongtaina ngâithlatu, Mi tinin pan an ti che. 3 Suolnan a mi chîm laiin, Kan bawsiethai i ngâidam. 4 I bula chêng ve dinga, I thlanghai chu an hamtha, I tempul thienghlima mi, I hnienghnârna chu tlânin, Kan tlai ding a ni si a! 5 Aw mi Sandamtu Pathien, Râpthlâk le indik taka, Thil thawin i mi don a, Kawl kil le tuipui tawp chen, Beisei innghatna i nih. 6 I hràtnan tlânghai i'n din, Thilthawtheinan i sip a, 7 Tuipui inrûm ri hum hum, Tuifawn insawk hlup hlup hai, Mipui so mur mur hai khom, Nang chun i sukrê vong thei. 8 Hnuoi hmun tawpa chênghai khom, I thilthaw'n a râp tawl a; Ni a suok le tlâk hunah, Lawmna hlâ a thangkhawk hlak. 9 Hnuoi i kan, tuiin i chawm, Rip takin i sukhnienghnâr; Pathien vadung tinhai chu, Tuiin i sung sip vong a, I tiem anga bu le bâl, Mihan an hau theina di'n. 10 Hnuoi rît thlûr tin sukhnawngin, A tlânghai i sukruol a, Ruotuiin i sukhnip a, Thlài thar i'n thanglientir hlak. 11 Kum tawpah a tontawin, Bu le bâl i'n thartir a, I tawlailir tina chun, Bu i sung vûm hnêr hnûr a. 12 Thlalèr ram tawlah hlo hnâ, Inthangin a zîng dum dur, Muol tin chu lawmnan i'n thuom. 13 Hlo hring duphai chu tlânin, Ran ruol an tla dup dup a, Phai zawlah bu a tlim hmur, Lawm hla sak ri a'n zâm vel.

Psalms 66

1 Leihnuoia chêng po pohai, Hlima Pathien inpâkin, 2 A hming ropui chawimawiin, Lawm hlâ sakin khêk suok ro! 3 "I thilthaw a ropui ngei!I hrât khawkhêng êm leiin, I hmaah i hmêlmahai, Tiin an inthin hawp a. 4 Hnuoi mi po po bokkhupin, I hmaah an hung kùn a, Î'n pâkna hlà an sak a, I hming an chawimawi, " tiin, Pathien kuoma chun hril ro. 5 En ta û, hringmi laia Pathien thilthaw zozài hi, A va hang ràpthlâk de aw! 6 Tuipui inthûk takhai chu, Hnuoi chârah a'n changtir a, Kein tuipui an kân a, A chungah ei hlim hlè kha. 7 A hràtnan ro a rêl zing, Hnamhai a enthlâk zing a, Helhai huongtau naw raw se. 8 Hnamhai, Pathien inpâk ro, A'n pâkna ri thang khawk sien; 9 Hringdamin a mi'n umtir, Ei tlûk ding a mi vêng hlak. 10 Aw Pathien, nangma ngeiin, Meia tangka fie angin, I mi fie fai tah kèl a. 11 Chângah i mi'n awktir a, Phur rik tak i mi'n phurtir. 12 Kan chungah mi an chuong a, Mei le tui lien kan pal tlang; Nisienkhom hmun thawvengah, Nangin i mi thuoi lût tah. 13 I tempulah hung ka ta, Pumraw inthawi inhlànin, Ka thutiem hlen ngei ka tih- 14 Lungzîng laia ka tiem kha, Ka hril angin hlen ka tih. 15 Ran thâu thâu inhlàn ka ta, Beram chal inhlàn ka ta, Bawngchal khom inhlàn ka ta, Kèlchal inhlàn bok ka tih. 16 Pathien. tituhai hungin, Ka thu hi hung ngàithla ro; Ka chunga a thilthawhai, Iengkim lo hril ka ti cheu. 17 Bauin ama ka ko a, Ka lei a'n pâknan a sip. 18 Suol lawm rûk mi ni lang chu, LALPAN mi ngaithla naw nih; 19 Pathien chun a mi ngaithlâk, Ka hnìna a lo bengkhon. 20 Ka tongtaina hnawl lo a, A hmangaina tawp ngai lo, La kîr ngai lo Pathien chu, Inpâkin um zing raw se.

Psalms 67

1 Pathien ei chungah ngilneiin, Malsawmnan mi hung vur sien la, A hmêl ei chungah êng raw se: 2 I ditzawng khawvelin hre a, Hnam tin lai hin i sandamna, An hung hriet seng theina dingin. 3 Aw Pathien, mihan chawimawiin, Hnam tinin inpâk che raw se. 4 Hnam tinin lawm hla rem raw se:Hnam tin chungah indik takin, Nangin ro i rèlpèk hlak a, Hnuoia hnam tin i keihruoi hlak. 5 Aw Pathien, mihan inpâkin, Hnam tinin chawimawi che raw se. 6 Hnuoiin thlai thar insuong a ta, Pathien, ei Pathien ngei el chun, Malsawmnan mi hung vûr a tih. 7 Pathien chun mal mi sawm a tih, Hnuoi tawp kawlkawdong chen khomin, Ama chu ti seng raw hai se.

Psalms 68

1 Pathien chu hung inthok dok sien, A hmêlmahai hung phìn dar sien, A hmaah tlân dar raw hai se. 2 Thliin meikhu a lèn angin, Nangin hung lèn hmang vong tawl la, Meia khuoihlu em tui angin, Misuolhai chu Pathien hmaah, Intui ral vê vong raw hai se. 3 Mi felhai chu hlim hai sien la, Pathien hmaah lawm hai sien la, Hlim le lawmin um raw hai se. 4 Pathien kuomah zâi hlâ sakin, A hming chawimawiin inpâk ro, Sûm chunga lêng chu chawimawi ro, A hming chu LALPA a ni si, A hmaa chun hlimin lawm ro. 5 Hmun thienghlima chêng Pathien chu, Fahràhai ta di'n pâ a na, Hmeithaihai ngaituotu a nih. 6 Mi vâkvàihai chu Pathienin, Chèngna in a buotsaipêk a, Intânghai chu a thuoi suok a, Hamthatnain a vur tawl aHel hmanghai chun ram tawl an hluo. 7 Aw Pathien, i mihai thuoi a, Hmun se ram i hrawpui lai khan, 8 Sinai tlângah, Pathien hmaah, Israel Pathien hmaa chun, Simkhawlei a'n hnìng dur dur a, Vànin ruo a'n bawtir huk huk. 9 Aw Pathien, ruopui vânawn hiel, Nangin i hang insùrtir chun, I ram pêk tawl hawp ta hnung chu, Hnawng ramah i hung siem thar a. 10 I miha'n umhmun an khuor a, I hnienghnàrna chun aw Pathien, Retheihai i hung somdawl hlak. 11 LALPA chun thû chu a pêk a, Nuhmei ruolin an puong dar a:q 12 "Lal le an sipai ruolhai chu, An tlàn se hum hum el" tiin. In nghàktu nuhmei ruolhaiin, Râllâk sumhai an insem a, An inkulna hmun ngeia chun, 13 Ran huonga riekhai chen khomin, Vàthu lim, tangkaruoa siem, A thla ki rangka-dârtui luon, An chang tawl ve phâk hiel a nih. 14 Iengkim Pathien El Shaddaiin, Lalhai a hang phìn dar zet chu, Zalmon-ar vûr tla ang a nih 15 Aw Basans tlâng mawi le ropui, Tlâng sîp insi khup el hai chu, 16 Ama rorêlna hmun ding leKumkhuoa a chêngna dinga, Pathienin a thlang tlâng a na, Ieng leia in thîk am a na? 17 A tawlailir a sînga sîng, A sânga sâng tam tak leh chun, A hmun thienghlima thung dinginSinai thlalèra inthokin, LALPA Pathien chu a hung ie. 18 A hmun insàngah a kâi a, A sal manhai a thuoi dum dum; Mihai thilpêk a lo dong a, Hel hmanghai khomin an hung pêk; Chu tlânga chun LALPA Pathien, A hung chêng zing theina dingin. 19 Ni tina phur mi sawk hlaktu, Ei LALPA le ei Sandamtu, Pathien inpâkin um raw se. 20 Pathien chu ei Pathien a na, Aman a mi san him hlak a; Thìna laka mi hum thei chu, Laltak ei LALPA chauh a nih. 21 Pathien chun a hmêlmahai lu, Matheiloin vaw koi a ta, Suol chîng mi lu inbukhai chu. 22 "Basan a'nthok hung thuoi ka ta; Tuipui li tuong a'nthok khomin. 23 An thisen chu la pal in ta, In uihaiin an dit tawkin, La liek an tih" LALPAN a tih. 24 I hmun thienghlim tieng chu pan a, I hung tung lai khan aw Pathien, Mipuiin an thlîr thup che a, Ka Lal Pathien i fe lai chu. 25 Zâipawlhaiin hma an thuoi a, Rimawi remtuhan an zui a, A laia chun nunghâk ruolin, Dârbenthek an ben thek thek a. 26 " Pungkhawm lai Pathien inpâk ro, Israelhai pungkhawmnaah, LALPA chu inpâk ro" an tih. 27 An mi tlum tak Benjamin hnam, A hma tawnga chun an thang a, Juda hnama lal nauhaiin, An hnungah an zui dùl dûl a, Jebulun le Naftali hnam, Lalhai chun an hung zui bok a. 28 Aw Pathien, kha hmaa thilmak, I mi thawpêk hlak ang bok khan, I thilthawtheina ngei el kha, Mi hung suklangpêk nawk hràm rawh. 29 Jerusalema i tempulLeiin i kuomah thilpêkhaiLalhan hung inhlàn an ti che. 30 Phairuong hmuna sa hrâng tlahai, Bawng tuoi laia bawngchal huoi ang, Hnam tla khawmhai khu zuk zil rawh, Sie làkna ngot zongtuhai hi, I kein hung sirde tawl la, Indo châk dop dop hnamhai hi, Nangin hung phîn dar vong tawl rawh. t 31 Chuongchun Aigupta a'nthokin, Ram palaihai hung tir an ta, Kusu ram khom Pathien hmaah, La hung intuklût ngei a tih. 32 Aw, hi khawvela lalramhai, Pathien kuomah zâihlâ sakin, LALPA inpâkna hla sak ro. 33 Ama chu tiena tlânga um, Vàn insâng chunga chuong a na, Inring takin a khêk, ngai ro. 34 Pathien thilthawtheizie puong ro, Israel chunga lal a na, A hràtna chu vànah a um. 35 A hmun thienghlima um Pathien, Israelhai Pathien ngei chu, A lo va tìum ngei de aw!Hràtna le thilthawtheina chu, A mihai kuomah a pêk hlak. Pathien inpâkin um raw se!

Psalms 69

1 Aw Pathien, mi san suok rawh, Ka rîng chen ka pil ta a, 2 Chirdûma hin ka'n tàng a, Sir san ding hrim a um nawh. Tui inthûk tieng ka pil tah, Tui fawnin a mi tuom vel. 3 Thangpuitu ka konaah, Ka lo chàu zo dêr ta a, Ka dang khom a'n hil zo a, Pathien ka thlìrna lamah, Ka mit khom a'n thim zo tah. 4 San boa mi theidatu, Ka sam zài nêkin an tam; Khêla mi sukse tumtu, An tamin an hrâng hle a, Ka'n rûk naw khom thawluinan, An mi'n thung kîrtir a nih. 5 Ka'n vêtzie i hriet, LALPA, Ka thiem nawzie i lakah, Ieng khom thup ka nei dèr nawh. 6 Aw Lalpa, Iengkim LALPA, Nangma beiseituhai chu, Keima leiin tu el khom, Sukzakin um naw raw se. Aw, Israelhai Pathien, Nangma hung zongtuhai chu, Keima leiin tu el khom, Muolphoin um naw raw se. 7 I leiin hmusit ka tuor, Meng ngaina ka hriet ta nawh. 8 Ka unauhai laka khom, Mikhuol ka lo ni tah a, Ka nu nauhai laka khom, Ram dang mi ka lo chang tah. 9 I in ta dinga thahnem, Ka ngàinan a mi lem zo, Chêksoltu chèksolna che, Ka chungah a tla ta si. 10 Tapa bu ka nghei chângin, Mi'n an mi hmusit zui a, 11 Saiip ka sil chàng khomin, Fiem pawlawtnan an mi hmang. 12 Kotkhâra inthunghai chun, Hmusitin an mi nuisaw; Zu ruihan nuizatburah, An mi lo hmang bok si leh. 13 Aw LALPA, kei ruok hi chu, I lungawi lai huna hin, I kuom tieng ka hung tongtai; I hmangaina chuoi lo chun, San him di'n mi hung don rawh. 14 Chirdûm a'nthok mi hum la, Ka pil hmang ding phal naw rawh; Mi theidàtu lak a'nthok, Nangin mi hung san suok la, Li inthûk a'nthok khomin. 15 Tui lien mi'n chîmtir naw la, Li rilin mi lem naw sien, Thlànin mi dol naw raw se. 16 I hmangaina le thatnan, Mi hung don ngei la LALPA, Zàngaina i hau leiin, Ka tieng hin hung ngha hrâm rawh. 17 I siehlaw lakah i hmêl, Thup naw la, mi don vat rawh, Ka bei a dong a ni hi! 18 Hung hnaiin mi san suok la, Hmêlma lakah mi'n tlan rawh. 19 An mi hmusit dàn i hriet, An mi sukhmaimawk dàn khom, Ka hmêlmahai i hriet vong. 20 An mi hang hmusit dàn hin, Ka lung a sukse hle a, Chan lam boin ka um a; Mi làinat ka beisei a, Sienkhom an um dêr naw a, Thlahuoltu ding ka hmu nawh. 21 Ka bu-ah tûr an pol a, Ka dangchâr hnèmna dingin, Zu thûr an mi pêk lem si. 22 An ruoi chu châng inchang sien, Inremna ruoi an kîl khom, Bilah inchangpèk raw se. 23 An mithai sukdelpêk la, Khuo hrim hmu thei naw hai sien, An zâng inkûl song raw se. 24 I lungsen bun khum tawl la, Lungpuomin nang chîng tawl rawh. 25 An chêngna ram vong sien la, An in rausan chang raw se. 26 Vuok tuorhai an soisak a, Hliem tuorhai natzie dâm chu, An titi inhnik a nih. 27 I hremna ding sukpung la, I sandamnaah chan rêng, Inneitir hrim hrim naw rawh. 28 Hringna bua inthokin, An hming chu thâi bo dai la, Mi felhai hming chuongnaah, An hming chuong ve naw raw se. 29 Kei na tuorin ka'n rûm hi, I sandamnan aw Pathien, Nangin mi humhim tlat rawh. 30 Pathien hming zâia chawiin, Lawmthu leh inpâk ka tih. 31 Chu chu Lalpa hmaa chun, Ran inhlàn nêkin a hlû, Bawngchal lien inhlàn nêkin. 32 Nêksawrhan hmu'n lawm an ta, Nangni, Pathien zongtuhaiLungril khom tuoi thar a tih. 33 LALPAN retheihai a hriet, Saltànghai a'n zàpui nawh. 34 Hnuoi le vànin inpâk ro, Tuipui le a sûnga mi, Thilhring chêng po po khomin. 35 LALPAN Zion hum a ta, Judai rama khuohai khom, Hung tungding nawk vong a ta, A mihai chun hluong an ta, Ram chu rochung tâng an tih. 36 A siehlaw suonha'n ram chu, Hung rochung sawng pei an ta, A hming ngainatuhai chu, Chu rama chun chêng an tih.

Psalms 70

1 Aw LALPA, v lunginsiettakin, Hung vat la, mi hung san suok rawh. 2 Ka hringna la tumtuhai chu, Muolphoin chî-ài hai sien la, Ka sietna ding phiertuhai chu, Hmâimawkin tlân se raw hai se. 3 "Chei leh, Chei leh!" tia khêk a, Mi'n riem khumtuhai po po chu, Inzakin kûn tlok tlok raw se. 4 Nangma zongtu taphothai chu, Nangmaah hlimin lawm hai sien; I sandamna dittu poin, "LALPA chu a va ropui ngei!"Tiin lawm hla rem rop raw se. 5 Kei pasie le riengvai tak hi, LALPAN a mi ngaituo hlak si; Mi thangpuitu le sansuoktu, Aw ka Pathien, muongchâng lul naw.

Psalms 71

1 Aw LALPA nang ka hung bêl che, Ka muolpho ding phal lul naw rawh. 2 I felnain mi san suok la, I nâ ka tieng hin hung daw la, Nangin mi hung san him ngei rawh. 3 Ka'n bìkna lungpui nang ni la, Ka tlùk lùt rop theina ding chu; Mi san him dingin thû pe rawh, Ka lungpui le kul i ni si. 4 Mi rilohai kut a'nthok le Mi suol rawng takhai kut a'nthok, Mi san suok rawh, aw ka Pathien. 5 LALPA, nang chu ka beiseina, Tleirawl a'nthok ka'n nghatna tak, 6 Ka pieng a'nthok ka ringsan tak, Ka nu phîng sûnga inthoka, Mi la suoktu chu nang i na, Inpâk kumkhuo tàng ka ti che. 7 Vangduoina phurtuw ang hielaMi tam tak ngai khom lo ni lang, Nang ka'n bîkna kul nghet i nih. 8 Ieng lai khomin i ropuina, Chawimawiin ka'n pâk ni tin hlak. 9 Upat hunah mi hnawl naw la, Ka tha zûr pha mi mâksan naw. 10 Ka hmêlmahan an mi tawng zing, Phil tuma mi'n chàntuhai chu, Mi sukse din an inrawn khawm. 11 "Pathien khomin a zâmsan tah, Hnot thlûr ei ta, man tâng ei tiu, Santu a nei ta nawh" an tih. 12 Aw Pathien, mi'n hlat ngai naw la, Mi san din hung vat rawh, Pathien. 13 Mi beituhai chu muolphoin, Sukbohmang ni vong hai sien la, Ka sietna ding zongtuhai chu, Inzakin hmâimawk raw hai se. 14 Kei chun beisei zing ka che a, Inpâk zuol deu deu ka ti che. 15 Hrein sui suok zo naw lang khom, I felna le sandamna thu, Ni tin hrilin puong pei ka tih. 16 I thilthaw ropuizie puongin, Hril dar ka tih LALPA Pathien, Ï'n dikzie chauh hi hril ka tih. 17 Ka tleirawl laia inthokin, Aw Pathien i mi zirtir a, Tu chen khom hin i thilmak thaw, Ka la hril ngat ngat hlak a nih. 18 Luah kêl sam to ta sienkhom, Mi maksân naw rawh, aw Pathien; I ropuizie le thilthawhai, Thang la thar pei dinghai kuomaKa hril hmâ chun mi umpui rawh. 19 Aw Pathien, thil ropui thawtu, I felnain vànhai a tong, Nangma ang tu'm an um hrim a? 20 Buoina tam mi'n tuortir la khom, Ka nun hi sukhar nawk i ta, Khur inthûk taka inthokin, Mi hung la suok nawk ngèi i tih. 21 Mi chawisâng nawk zuol sauh i ta, Mi hung thlamuong nawk ngèi i tih. 22 Aw ka Pathien, i ringumna, Tingtang keiin inpâk ka tih. Aw, Israelhai Mithienghlim, Tingtang leh inpâk ka ti che. 23 I'n pàkna hlà ka sak hunah, Ka hmùr hlimin khêk suok a tih, I mi'n tlan sa ka ni si a. 24 I thilthaw indikziehai chu, Sùnnithlâkin hril dar ka taMi sukse tumtuhai hlak chu, Muolphoin an chi-âi ta si.

Psalms 72

1 I rorêl thiemna chu Pathien, Lal hi hung inrochungtir la, Lal naupasal kuoma ngei hin, I'n dikna inrochungtir rawh. 2 I mihai chungah fel taka, Ro a hung rêl theina ding le, Mi retheihai chungthua khom, Indik taka rêl thei dingin. 3 I mihai ta dingin tlânghan, Malsawmna insuo hai sien la, Muolhan felna ra insuo sien! 4 Mi rimsihai humtu ni a, Tlasamhai phuhrûktu niin, Nêksawrtuhai sir dè raw se. 5 Ni le thla khi an var sûng phot, Thang la hung thar pei huna khom, Ama chu inlal zing sien la. 6 Hlo sàm fai hlim chunga raw sùr, Hnuoi chàra inbaw huk huk a, Ruopui vânawn sûr ang ni sien. 7 An lal sûngin mi indikhai, Hung inthanglien tuol tuol hai sien, Thlà khin a var a'n suo sûng chun, Malsawmna pung tuol tuol raw se. 8 A lalram chun tuipui a'nthok, Tuipui dang râl chen huop sien la, Khawsak tuipuia inthokin, Thlang kawlrawn chen zu huop raw se. x 9 Thlalêra chêng hnam tinhaiin, Chibai hung bûk tawl hai sien la, A hmêlmahan hnuoi liek raw se. 10 Tarsis le thlierkâr hrang hrang a, Lalhai chun dawvàn hung kaiin, Thilpêk hung inhlàn hai sien la, Seba le Saba lalhaiin, Thilpêk hung inhlàn raw hai se. 11 Lalhai a hmaah kûn hai sien, Hnam tinin a rong bawl raw se. 12 Thangpui ngaia kotuhai chu, Thangpuiin hung somdawl tawl a ta, Santu nei lohai san a tih. 13 Rethei châuhai lunginsietin, Thì theina lakah hum a ta, 14 Nêksawrtu le pawngnêktuhaiLaka inthok san suok a tih, A mita chu an hlu si a. 15 Ama chu ngal fîmin dam sien, Seba rama rangkachakhai, A kuomah hung pe raw hai se. A ta din tongtai zing hai sien, Ni tinin mal sawmpêk raw se. 16 Ram puma chun a tontawin, Bu le thlài thar suok teu sien la; Muol tinah bu fawn dûl dûlin, Lebanon tlânga bu angaHlawkin ra hung insuo hai sien, Ram hlo hnâ inno dur angin, Hung inthang hlut hlut raw hai se. y 17 A hming chu kumkhawtluong khomin, Rè ni um ngai hrim hrim naw nih, Nisa khi a var sûng phot chun, A hming inthang zuol pei sien la, Hnam tinin a zâr zo hai sien, 'Mi hamthâ a nih' ti raw se. 18 LALPA Pathien chu inpâk ro, Israel Pathien chu inpâk ro, Ama chauh hi a ni si a, Hieng thil makhai thaw hlaktu chu. 19 A hming ropui chu inpâkin, Kumkhawtluongin chawimawi unla, A ropuinan hnuoi pumpui hi, Hung sip raw se. Amen, Amen. 20 ​Hi hi Jessai naupa DavidaTongtai tawpna chu a ni tah.

Psalms 73

1 Israela chungah Pathien a tha, Lungrila thienghlimhai chungah. 2 Kei chu ka'n sui thlûk vàng chàng dâm, Ka sir inphet vàng chàng a um; 3 Mi rilo vângnei ka hmu chàng Mi chapohai ka'n hnar hlè hlak. 4 Nat hlak nei ve rêng rèng lo hai, An thàuin an inmûm kung a; 5 Mi angin an buoi inrim nawh, Mi tuor ang an tuor ve bok nawh. 6 Uong hi an thi hlî tak a na, Nunrawngnain an inthuom a. 7 Mit pawng hiel rak khopa thâuin, Uong dàn tawk chin lèm an nei nawh. 8 Mi an nuisaw, an hrilsiet bok, Mi chungdelin an vau tom a. 9 An bâuin vàn an hauh ngam a, An leiin hnuoi an pumbil bok. 10 Chu lei chun miha'n an huor a, An hril taphot an awi pei hlak. 11 "Iengtin am Pathienin a hriet?Chunghnungtakin hriet a nei maw?"Tiin an hril vel hlak si a. 12 Mi rilohai um dàn tak chu:Ngàingam muta, hausak thûr thûr. 13 Ka'n vong thienghlim thlawn el am aw-Thil poi ka tawk naw sa khom a, 14 Sùnnithlâka suknat tuor a, Tûk tin zilna ka tuor el hi? 15 Chuonga lo ti vè chu ni lang, I naua tiem tlâk ni naw ning. 16 Hieng hi hriet thiem ka hang tum a, Sienkhom a lo harsa hlè si. 17 Pathien hmun thienghlim ka lût chin, An tawp dàn ding ka hmu chieng tah. 18 Hmun innàlah i sie tawl a, Sietna khurah i thlâk tawl a, 19 Mit khap kàr loin sieng an ta, Ràpthlâk takin bohmang an tih. 20 Thanghar hnunga mang ang elin, I tho har pha chun aw LALPA, Hlim thla ang hnawl hmang tawl i tih. 21 Ka lungril a beidong chàng a, Ka thlarau hmèl a'n tûr lai chun, 22 Invêt phulin lung ka mawl a, I ta di'n sakol ang ka nih. 23 Sienkhom, i bul ka'n chû tlat a, Ka kut chang tieng i mi chel hlak. 24 Mi'n fuiin i mi keihruoi a, Nakie phâ i ropuinaah, I mi thuoi lût ding a ni si. 25 Nang naw tu am vànah ka nei?Hnuoia khom hin nangma naw chu, Tu khom thlàkhlà dang ka nei nawh. 26 Ka taksa, lungril a chàu thei, Sienkhom ka lungril sukhrâttuLungpui nghet chu Pathien a na, Chatuona ka chanpuol a nih. 27 Nangma hlattu bohmang an ta, A'n phattu chè sukbo i tih. 28 Ka ta di'n Pathien hnai a tha. LALPA Pathien chu bèlbulaHmang dingin ka lo thlang ta a, A thilmak thawhai hril ka tih.

Psalms 74

1 Aw Pathien, iengtizie a, I mi'n kiengsan dai a na?I beramhai laka hin, I lung a'n ling zing ding maw? 2 Tiena tlânga inthoka, I mi ni dinga i'n chawk, I rochan, i'n tlan hnam hi, I chèngna Zion tlâng leh, Nghil loin hung hre zing rawh. 3 Siet rûnpui a tlungna tieng, Kîrin hung sir nawk hràm la, Hmêlmahan i hmun thienghlim, Iengkim an suksiet zo tah! 4 I hmun thienghlim sûnga khan, Doral haw haw dur durin, An puonzàr a'n khài fek fuk. 5 Ramngaw vât ding ang elin, Hreipui an inlet fur a, 6 A cheina thing ker mawihai, Hreiin an tuk siet mur mur. 7 I hmun thienghlim an raw ram, I chêngna an sukporche. 8 "Hnè chimit ei tiu" an ta, Kan rama Pathien bieknaHmun taphot an raw ram pei. 9 Inchikna mak a'n lang nawh, bZawlnei an um ta bok nawh; Hienga kan um chen ding hi, Tu khom a hrie kan um nawh. 10 Aw Pathien, hmêlma dêusaw'n, Ieng chen am i um ding chu?I hming an dêu song ding maw? 11 Ieng dinga i kut kei a, I kut i hma sui zing am?Phar la, sukbohmang tawl rawh. 12 Aw Pathien, tien a'nthokin, Nangma chauh ka Lal i na, Hnuoi sandamtu chu i nih. 13 I thilthawtheina hmangin, Tuipui khom i vuok tan a, Rûlpui lù i vuok koi a; 14 Leviathanc lù vaw koiin, Thlalêra chênghaid fàk din, A sâ khom i pêk tawl kha. 15 Tui hnârhai i sun suok a, Vadungtehai i siem a, Tui hnàr kum hlun i khâr bok. 16 Sùn le zàn i ta a na, Ëntu ni le thla i siem. 17 Hnuoiah ramri i kham a, Nipui le thlasik i ruot. 18 Aw LALPA, hmêlmahaiin, An deusaw dànhai che le, Mi intlaw ruolin i hming, An hril siet nasat dàn hi, Theinghil ngai hrim hrim naw rawh. 19 Sakolhai kut thak nûlnan, I vàthue pe suok naw la, I mi, retheihai chan hi, Innghil songpèk naw hràm rawh. 20 I thuthlung kha hre zing rawh, Hmun inthimna kil tinah, Nunrawngna a hrâng vêl a, 21 Nêksawrna tuortuhai hi, Muolphoin kîr naw hai sien, Pasiehai le tlasamhan, I hming inpâk raw hai se. 22 Aw Pathien, hung inthok la, I nìna hung suklang rawh. Mi intlawhan sùnnithlák, An dêusaw che hre zing rawh. 23 Hmêlma rihâu chu ngai ta, An zuol tul tul a ni chu.

Psalms 75

1 LALPA, lawmthu kan hril che, I hming hi a'n ri zing a, Chuleiin lawmthu kan hril; I thilthaw ropuizie hi, Mihaiin an hril luoi luoi. 2 Nang chun hieng hin i hril a:"A hun ding ka ruota chun, Indik takin rêl ka ta, 3 Hnuoi le a sûnga chênghai, Insawiin inhnîng sienkhom, A'n nghatna ban phuntu le Chel nghettu chu kei ka nih. 4 Chapohai, insuong naw'n la, Mi suolhai, lu ling naw ro, 5 In ki'n vàn lei khum naw'n la, Rîng sukfânin tong naw ro". 6 Sak tieng, thlang tieng amanih, Thlalêr a'nthok amanih, Chawisàngna hi a hung nawh. 7 Rorêltu Pathien a na, A nuom nuom a suktlawm a, A nuom nuom a chawisàng hlak. 8 LALPA lungsenna no a, Uoiin chi tin chokpol chu, Phul bût bûtin a um a; Chu chu la bun thlàng a ta, Hnuoia mi rilohaiin, A hlek chen liek kawng an tih. 9 Kei ruok chun Jakob Pathien, Kumkhuoin inpâk ka tih. 10 Mi suol kì chu tan a ta, Mi fel kì chawisâng a tih.

Psalms 76

1 Judai ramin Pathien an hriet, Israel ramah a hming a'n thang. 2 A puon in Salemah a um, A chêngna chu Zion a nih. 3 Chutaka chun hmêlma thalhlawn, An phawsiel le an kawlhnàmhai, An ràlthuom a suksietpêk vong. 4 I ropuiin i êng phût el!Râl i thatna tlàng a'nthoka, I hung kîr ni khan i ropui!f 5 An pasaltha, mi roktuhai, Saruokin an inthal phung a, An ràl do thiemhai tu el khom, Kut lek thei hrim an um ta nawh. 6 Jakob Pathien, i hal meu chun, Sakor le a chunga chuonghai, An che chàng thei hrim hrim si nawh. 7 A nih, i râpum hrim a nih, I lungsen phà i hma bulah, Tu am ngîr ngam ding um an ta? 8 Vàn a'nthoka thu i puong khan, Hnuoi chu tiin a to tok a- 9 Hnuoia sirdèhai san dinga, Rorêl dinga i'n thok ni khan. 10 Mihriem lungsen a na po leh, Nangma inpâkna zuol a ta; I lungsen tuor muolsuohai chun, Nang bèlin inpâk an ti che. g 11 LALPA in Pathien hmaa chun, In thu tiemhai hlen ngei unla; In kawl vêla chêng po pohan, Tìdingpa kuoma chun hungin, Thilpêk hung inhlàn raw hai se. 12 Ama chun lalhai lungril khom, A sukdul thei vong tlat leiin, Khawvel lalhan an tì a nih.

Psalms 77

1 Rawl tawp suoin Pathien ka ko, Mi ngàithla di'n ka ko inring. 2 Ka beidong pha LALPA ka zong; Bân kham ding khom dawn lêk loin, Zankhawvàrin ka phar suok a, Sienkhom ka thla a muong thei nawh. 3 Pathien ngaituoin ka'n rùm a, Chàu hnêp khopin ka dawnkhawl hlak. 4 Ka'n sîm met khom i phal naw a, Beidongin ka tong thei ta nawh. 5 Hun liem tahai ka dawn kîr a, Kum sûl tam liem ta hnunghai kha; 6 Zànah khûn taka dap vêlin, Lungrilin zawna ka'n don a: 7 "LALPA chun mi hnawl kumkhuoin, A mi ditsak naw song ding maw? 8 Ami hmangaina rè songin, A thutiem a'n khêltir ding maw? 9 Zàngai nachang theinghil songin, Lungsen leiin a lainatna, A khârkhip song el di'm a ni?" 10 Chuongchun, hi hi ka ti hiel a:"Chunghnungtak kut a chawl el hi, Kei ka beidongna tak a nih. " 11 Kei chun LALPA, i thilthawhai, Tien a'nthoka i thilmak thaw, Tinrênghai chu hre zing ka tih. 12 I thilthawhai dawnkhawl ka tih, Thil ropui tak i thawhai chu, Suiin ngaituo rop hlak ka tih. 13 Aw Pathien, i lampui a thà; hEi Pathien anga ropui hi, Pathien dang hrim an um ngai nawh. 14 Thilmak thawtu Pathien i na, I hrâtzie hnam tin i'n entir; 15 I bân tha hrâtin i'n tlan suok, I mi, Jakob-Josef thlahai. 16 Aw Pathien, tuihai chen khomin, An hmu chêin an thlabàr a, Li inthûkhai an inthin hàwp. 17 Sûmin ruo a'n sûrtir chur chur, Khawk dur durin vàn a'n rûm a, Kawl inlepin a phe zuk zuk. 18 Sûmpui inziel mup mup a'nthok, Têk a hung tla ri dur dur a, Kawlphe'n khawvel a dêt suok a, Hnuoi inthinin a'n sawi bup bup. 19 Tuipui chu i lampui a na, Tui inthûkhai i fe thleng hlak, Sienkhom i hniek an hmu ngai nawh. 20 Mosie le Aron kut hmangin, I mihai chu ran ruol angin, I thuoi dùl dùl hlak a ni kha.

Psalms 78

1 Ka mihai, ka thu ngàithlain, Ka tong bausuok hi ngaiven ro. 2 Tekhinthu hmangin hril ka ta, Tienlai thu inthup puong ka tih- 3 Ei ngàithlâk le hriet tahnunghai, Pipuhan an mi hril hlak kha. 4 An nauhai kuomah ip loin, Thang la thar pei ding kuoma khom, LALPA ropuizie le hràtzie, Thilmak a thaw hlakhai thu chu, An hriet di'n hril sawng pei ei tiu. 5 A thu Jakob-ah suknghetin, Israelhai Dàn a pêk a, An thlàhai hril sawng pei dingin, Ei pipuhai thu a rosie: 6 Thangtharhaiin chu chu hre a, Thang la pieng lohai chen khoma, An nauhai an hril sawng pei di'n; 7 Pathienah beiseina nghat a, Pathien thilthawhai nghil lo a, A dàn an zawm peina dingin; 8 An pipuhai anga lulul, Hel hmang le lungril nghet lo tak, Pathien laka ringum lo mi, An hung ni ve nawna dingin. 9 Thal le thang Efraim mihai chu, Indonaa chun an tlàn sie; 10 Pathien thuthlung an zawm naw a, A dàn angin an um nuom nawh. 11 A thilthawhai an theinghil a, Thilmak a thawpèk hlakhai chu. 12 Aigupta ram Zoan phàiah, An pipuhai mithmu ngèiah, Thilmak tam tak a thawpêk hlak. 13 Tuipui suktanin a thuoi kai, Tui chu bang angin a'n ngìrtir. 14 Sûna po sûmin a thuoi a, Zànah meichok varin a thuoi. 15 Thlalêrah lungpui vaw koiin, Tuipui anga tam tui a pêk. 16 Lungpui kaka tui hung suok chu, Vadung angin a luong dum dum. 17 Chuong sà khom chun, thlalêra khan, Chunghnungtak lakah an hel si. 18 Pathien fie phêt tum lungrilin, An chàkzawng fàk ding an ngèn a; 19 "Thlalêrah Pathienin ruoipui, Ieng tin am thè teu hlak a ta!"Tiin Pathien an deusaw a. 20 "Lungpuiah tui vaw suok sienkhom, A mihai hi bei le sâin, A chawm thei rok ding maw?" an tih. 21 LALPAN a hriet, a lung an ling, Jakob chungah mei an tlàktir, Israel chungah a lungsen. 22 Pathien chu an ring zo naw a, A san suok thei an ring bok nawh. 23 Sienkhom vàn khi thu a pêk a, Vàn kotkharhai chu a hong a; 24 Fàk ding mana a'n sùrtir a, Vàn bu chun a chawm tawl tah a. 25 Vàntirko bu chu an fâk a, Hnienghnâr takin a chawm tawl a. 26 Sak thli chu hung inhràngtirin, Sim thli khom a hung tir bok a. 27 Pilvut angin sâ a'n sùrtir, Vakam tieu zât ang hiela tam, Vatê hon a hung pêk tawl a. 28 An bùk tuolah an hung tla a, An chèngna puon in vèla chun. 29 Dit tawka tlaiin an fàk a, An châk tak a pêk a ni si. 30 Sienkhom, sâ an la rêt zing lai, An bauah an la hmuom laiin, 31 An chungah Pathien a lungsen; An mi hràthai a thatpêk a, Israel tlangvàl tam tak chu, An lo bohmang zo tah a nih. 32 Chuong sà khom chun an suol lui pei, A thilmak thaw an hmua chu, Ama an ring nuom chuong si nawh. 33 Chuleiin, an dam sûng nihai, Thuok angin a suktawppèk a, Thlabârin dam sûng an hmang zo. 34 A that tawl pha, Pathien zongin, Sima thahnem hung ngai nawkin, Ama tieng an ngha nuom chau a. 35 An himna Lungpui chu Pathien, Chunghnungtak chu anni Tlantu, A nizie an hriet suok nawk hlak. 36 Sienkhom, hmûrin an inpâk der, An leiin khêl an hril bok si. 37 An lungril chu a nghet naw a, A thuthlungah an ringum nawh. 38 Chuong sa khom chun ngil a nei a, An bawsietnahai ngaidamin, Anni a sukbohmang nuom nawh. A lungsen a'n sùm hràm hrâm a, A lungpuom a kei dei lem hlak. 39 Thlî hrâng anga liem nawk el hlak, Mihriem el an nih ti a hriet. 40 Thlalêra khan an hel rop a, Voi tam a lungril an sukna. 41 Pathien an fie an fie hlak a, Israelhai Mithienghlim chu, An chophawk zìng zíng hlak a nih. 42 A thilthawtheizie an theinghil-Hmêlma kuta a san suok dâm, 43 Aiguptaa Zoan phàia, Thilmak ropui tak a thaw dâm; 44 An vadung tuihai thisen a, A'n chang leia tui dawn ding hrim, Hre loa an um lai hai dâm; 45 Tlip inlêngin sè hrep tawl a, Ram pumah utok intâm a, Thil nasa tak an suksiet dâm; 46 Tuktulungin thlài inram a, Khàuin bu an fâk zo thu dâm; 47 Rielin an grèphai dêng sie a, Zilin theichanghai hmet hlum a, 48 Rielin an bawng ruol dêng hlum a, Têkin ran ruol a dèng hlum dâm. 49 Sukramtu vàntirko hmangin, A lungsenna intûr ngul chu, An chunga chun a bun thlâk a. 50 A lungsen hrîkthlàkna dingin, Thìna laka hum tawl loin, Hripui a'n lêngtir tah a nih. 51 Aiguptaa nau lutir po, Hama ina vànglai nauhai, An rêngin a sukhlum vong a. 52 A mihai chu beram angin, Thlalêrah a thuoi suok vong a; 53 Muongleiah a thuoi tlung tawl a, Titna hrim hrim an hriet phâk nawh; An hmêlmahai ruok chu tuiin, A chim pil tawl vong tah a nih. 54 A kut ngeia a làk tlângram, Ram Thienghlim ramri bula chun, Anni chu a hung thuoi tlung a. 55 Hnam danghai chu a hlù suok a, Israelhai a'n hluotir a, An chan seng ram a sempêk a. 56 Sienkhom Pathien an fie nawk a, Chunghnungtak lakah an hel a, A dànhai khom an zawm nuom nawh. 57 An pi le puhai dungthûlin, Vervêk takin an nghatsan a, Thal ngul kawi anga kawi an nih. 58 Hmun sâng siemin an chophawk a, A lung khei zawng milem an sie. 59 Pathienin chuong chu a hmuin, Namên loin a lungsen a, Israel a hnawl fithla a. 60 Mihriem laia a chèngna hlak, Siloi hmun thienghlim a ràusan. 61 A hràtna le a ropuizie, Inlangtirna Thuthlung Bawm chu, Hmêlma kutah a'n mantir a. 62 A lungsen chun a rochanhai, Kawlhnâmin a'n sàmtir tawl a; 63 Tlangvàlhai meiin a lem zo, Nunghâkin pasal an invài. 64 Thiempuhai khom an sàt hlum a, An hmeithaihan an tà ngam nawh. 65 Mi hrât zu rui thophang angin, LALPA chu a hung tho suok a. 66 Hmêlmahai chu a tukdol a, Kumkhuon a sukmuolpho tawl a. 67 Josefa thlahai a hnawl a, jEfraim hnam khom a thlang bok nawh. 68 Juda hnam chu a thlang lem a, A lungdum tak Zion tlâng leh. 69 Vàn sânga a hmun thienghlim ang, Chu chun a tempul a bawl aKumkhaw dai dinga siem nghetin, Hnuoi angin a suknghet tah a. 70 A beràm vèng lai la suokin, A siehlaw David a thlang a; 71 Beramte hruoi a enkol lai, A rochan Israel hnamhai, Jakob thlahai keitleitu di'n, Ruotin a lo um tah a nih. 72 Ringum takin a enkol a, Rem hre takin a keithuoi a.

Psalms 79

1 Aw Pathien, i rochung ram hi, Hnam danghaiin an hung rûn a, I tempul thienghlim sukporche'n, Jerusalem an sukchim vong. 2 Chunglèng vatehai tlàn dingin, I siehlawhai ruong an mâksan; I mi thienghlimhai ruong ngei khom, Ramsahai tlàn di'n an mâksan. 3 Jerusalem khawlaia chun, An thisen tui ang a luong a, Vuitu ding tu khom an um nawh. 4 Kan tuolbawmhai diriem hlawin, Kan vèla chênghai hmusit leAn nuizatbûr kan chang ta hi. 5 LALPA, i lunginsenna hi, Ieng chen am a aw ding a na?I lung a sen song di'm a ni? 6 Nangma hre lo hnamhai chungah, I hming an lam nawna ramah, I lungsenna bun thla lem rawh. 7 Jakob sûnghai an that zo a, An khuohai an sukram zo tah. 8 Kan pipuhai suolna maw chu, Kan chungah intlâktir naw la, I ngilneizie suklang vat rawh, Kan chan a châu ta êm el hi. 9 I hming ropuina di'n, Pathien, Mi thangpui rawh, aw Sandamtu; I hming leiin mi san suok la, Kan suolnahai mi ngaidam rawh. 10 Hnam danghaiin iengti lei a, "An Pathien chu khaw lam a um?"An mi ti vet el am a na?I siehlawhai thisen phuba, I lâk ngei ti hnam dang kuomah, Kan hmû ngèiah inlangtir rawh. 11 Lung in intânghai inrûm ri, I kuomah hung tlung ngei sien la, Thi dinga an rêl tahai chu, I bân tha hràtin san suok rawh. 12 Aw LALPA, kan vêla chêngha'n, An cheksolna che phuba chu, A let sariin rul ngei rawh. 13 Chuongchun, keini i tahai hin, I rama tlâ i beramhan, Lawmthu hril kumkhuo tàng kan ta, Suon a'nthoka suon nawk peiin, I'n pâkna thu puong pei kan tih.

Psalms 80

1 Aw, Israel vêngtu Berampu, Ran anga Josefa thuoitu, I nâ mi lo dawpek hrâm rawh. Nang Cherubhai chunga inthung, I hmêl êng hung inlangtir la, 2 Efraim hai le Benjamin hai, Manase hai chunga ngei hin, I hràtzie chu hung suklangin, Hungin keini mi san suok rawh. 3 Aw Pathien, mi tungding nawk la, Sandama kan um theina din, I hmêl êng mawi mi'n hmutir rawh. 4 Aw kan LALPA, Iengkim Pathien, Ieng chen am i mihai hnìna, I lung insensan ding a na? 5 Mitthli buîn i'n ringtir a, Nopuiin mitthli i'n dawntir. 6 Tuolbawmha'n an mi chèksol a, Hmêlma nuisaw kan inchang tah. 7 Iengkim Pathien, mi tungdingin, Sandama kan um theina din, I hmêl êng mawi mi'n hmutir rawh, 8 Aigupta rama inthokin, Grèp hruik bul chu i phawi dok a, Hnam dang umhai chu hnot suokin, Anni hmuna chun i phun a; 9 A bul vêl chu i'n thiel fai a, Nghet takin zung a hung thlàk a, A ram phêkin a'n zâr duoi a. 10 Tlânghai chu a zàr hliep dup a, Sidar lien tak takhai lêrah, A kauhai a'n zâm kùr luoi a. 11 Thlang tuipuil chen inzâm tlungin, Sak vadungpuim a'n zâm kai a. 12 Ieng leia a huon dai thiek a, Mi inlonhai lo thei dinga, Grèp chu i siem el am a na? 13 Sanghal ruolin an phir tan a, Thilhring tinrêngin an fàk siet. 14 Iengkim LALPA, hung ngha kîr la, Vàn a'nthokin mi zuk en la, I grèp kung hi hung ngaisak rawh. 15 I kut ngeia, i ta dingaI phun le suknghet kha a nih. 16 I grêp hruihai chu sât bongin, Meiah peiin an raw ta hi; I hmêl inthim inhmùtirin, Anni chu hung hal hlum tawl rawh. 17 I chang tienga mihriem naupa, I ta ding lieua i sukhràtChungah i kut hung innghat rawh. 18 Chuongchun nghatsan ta nawng kan che, Nangin mi hung sukhar tawl la, I hming kan hung lam ding annawm. 19 Aw kan LALPA, Iengkim Pathien, Mi hung tungding tawl nawk hrâm la, Sandama kan um theina din, I hmêl êng mawi mi'n hmutir rawh.

Psalms 81

1 Mi sukhrâttu ei Pathien chu, Hlima inpâkin hla sak ro. Jakob Pathien chu inpâkin, Inring takin zaihla rem ro. 2 Inpâkna hlahai sak unla, Dârbenthek le khuongte benin, Perkhuong tingtang rimawi rem ro. 3 Thla thar dêt pha a lawmnain, Beram ki mût ri hlak unla, A ârkâi zàn, Kût vànglaiin, A lawmnan mût ring bok hlak ro, 4 Israelhai thaw hlak dinga, Jakob Pathien thupêk a nih. 5 Aigupta ram a fang vel lai, Ei hriet ngai dêr lo rawl hmang a, Josefa thlahai zawm ding a, A thupêk chu a ni si a. 6 "In rikphurhai ka lâkhmang a, In leikhawr dom ka pei bok a. 7 Lungzîngin in mi hung ko a, Keiin ka lo san suok cheu a, Ka hung don cheu, ka'n bîkna hmun, Vàn inrum kàra inthok chun; Meriba tuiah ka fie cheu. 8 "Aw ka mihai, ka thu ngai roKa zil mol mol cheu a ni hi, Aw Israel, ngai la ka ti ngei! 9 Ram dang pathien be naw unla, Hnam dang pathien hmaa hrim hrim, Ieng lai khomin kûn ngai naw ro. 10 Aigupta a'nthok thuoisuoktu, LALPA in Pathien chu ka na, In bâu ka ro, chawm ka ti cheu. 11 "Sienkhom ka mihai chun ka rawl, An ngàithlàk nuom ta si naw a; Israel chu ka hmaa hin, A hung tlu lùt nuom ta dêr nawh. 12 An lùlul nasa êm leiin, An thu'n ka'n tlattir tah a nih. 13 "Ka mihaiin ka thû ngaiin, Israelhan ka lampui hi, Hung hraw nawk chu ni hai sien la, 14 An dohai chungah kut rolin, Ka hnèpêk nghal ding a ni bah! 15 LALPA theidàtu hrim hrim chu, A hmaah ti'n inkon an ta, Chatuonin hremna tuok an tih. 16 Nangni ruok chu, bù lai poaBu tha tak le lungpui khuoizu'n, Hung chawmin hrâi tlai ka ti cheu".

Psalms 82

1 Pathien chu pungkhawm ropui lai, Rorêlna inpuiah thungin, Pathienhain chungah ro a rêl: 2 Indik naw taka ro rêlin, Ieng chen top am mi suolhai chu, In ditsak zui pei ding a na? 3 Fahrà retheihai san unla, Mi pasiehai le nêkchèphaiChanvo chu humpêk tlat hlak ro. 4 Chàu le tlasamhai san unla, Mi rilohai lakah hum ro. 5 "Ieng khom an hriet tawl dêr naw a, Hrietthiemna ieng khom an nei nawh. Thimtham hnuoiah an inmai a, Khawvel innghatna lungphumhai, An hnìng dur dur el a ni hi. 6 "Chuongchun hieng hin ka hril tawl a:'Nangni hi pathienhai in na, Chunghnungtak nauhai chu in nih. 7 Nisienlakhom, mihriem angin, Nangni khom la thi vêng in ta, Lalhai angin tlawm vêng in tih'". 8 Aw Pathien, nang hung tho suok la, Hnuoi chunga hin ro hung rêl rawh, Hnam po po i ta an ni si.

Psalms 83

1 Aw Pathien, to zing naw la, Aw Pathien, rè tok tok naw. 2 I hmêlmahai inhrosain, An lu an lei but but el hi! 3 I mihai chu vervêk tak a, An bei dàn ding an phan rûk a; I ditsakhai chu an phierrûk. 4 "Hung ro, an hnam nuoi bo ei tiu, Israel hnam bo song raw se"Tiin an inhawr khawm a nih. 5 Thangruolin thu an phierrûk a, Do ding che'n an inthukop a- 6 Edom mihai, Ismail thla hai, Moab mihai, Hagar thlahai. 7 Gebal, Amon, Amalek hai, Filistin le Tura mihai, 8 Lota thlahai chu san dingaHung inthok Asuria mihai. 9 Midian mihai i thaw ang khan, Anni khom hi hung thaw ve rawh, Kison ruoma Sisera leJabin hai i thaw ang el khan, 10 Endor khuoa i sukhlumhai, An ruong chu hmunhnok ang ela, Hnuoia peihawn a ni ang khan. 11 Oreb le Zeba hai angin, An mi lienhai chu hung siem la, Zeba le Zalmon hai angin, An lalhai chu hung siem bok rawh. 12 "Pathien ram dit lai ngei el chu, Hluo suokpêk ei tiu" an ti si. 13 Aw ka Pathien, anni rawi chu, Kokbong angin hung lèn hmang la, Bu si inlêng ang chang raw se. 14 Meiin rampui a lem angin, Mei chokin tlâng a kàng angin, 15 Thlisiein inhnottir tawl la, Thlipuiin nuoi hrep tawl raw se. 16 An hmài inzaknan inkhum la, LALPA, i hming lam tàng an tih. 17 Inzakin muolpho rop hai sien, Hming se nengin bohmang raw se. 18 I hming JEHOVAH hi zong sien, Nang chauh hi khawvel pumpuia, A Chunghnungtak i nizie hi, Hung hre vê tawl tah raw hai se.

Psalms 84

1 Iengkim LALPA, i chèngna chu, A va hang mawi chuong ngei de aw! 2 LALPA, i tuolzawl hi ngaiin, Ka thlâ hi a'n uoi ngawi ngawi a, Pathien hring chu ngaia kûrin, Ka taksa le lungril a'n rûm. 3 Iengkim LALPA, ka Laltak leKa Pathien maichàm vêla chun, A tuihai op kêuna dingin, Chongzong hmanin bû a nei a, Pelêu khomin bû a sep hlak. 4 I in luma chêngtuhai chu, An va hang hamtha lawm lawm de!An inpàk tawp thei ngai naw che. 5 I hràtnaa innghattuhai, Lungrila Zion tieng pana, Biekzintuhai chu an hamtha! 6 Bakao varuom hraw hai sien khom, Tuihnâr hmunah a'n changtir a, Favang ruotui a'n tling puou hlak. 7 An kalchawi a zâng tul tul hlak, Zion tlânga Pathien hmaa, An rênga an inlang chenin. 8 Iengkim LALPA, ka hnìna hi, Nangman mi lo ngàithlapêk la, Jakob Pathien, i na dawin, Ka hnìna lo ngàithla hrâm rawh. 9 Kan phaw Pathien, mi zuk en ta, I hriek nàl hi hung ditsak rawh. 10 I tuolzawla ni khat chêng chu, Hmun danga ni sâng chèng nêkin, Nasa takin a tha lem a; Mi suol ina khawsak nêkin, Pathien ina kot vêngtu ni, Kei chun ka thlang lem dai a nih. 11 LALPA chu ka nisâ le phaw, Ditsakna le chawimawina hai, Mi vûr rop hlaktu chu a nih. Lam indik hrawtu ta dingin, LALPAN thil tha a'n ro ngai nawh. 12 Iengkim LALPA, nangma chunga, Innghattu chu a hamtha hlak.

Psalms 85

1 Aw LALPA i ditsakna chu, I ramah hung inlangtirin, Jakob i sukhmuingil nawk tah. 2 I mihai suolna ngàidamin, An suolhai i'n khum hmang a. 3 I lungsen chu inkei deiin, I lungpuomna i lâkkìr tah. 4 Mi Sandamtu aw kan Pathien, Nangin mi hung tungding nawk la, Kan chunga i lung ni nawna, Mi hung la hmangpêk hrâm rawh khai! 5 Kan chunga chauh lungsen loin, Suon hung pei dinghai chunga khom, I lungsen a rè naw ding maw? 6 I mihai hi nangma chungah, Kan hung hlim nawk theina dingin, I mi chokhar nawk naw ding maw? 7 I hmangaina chuoi ngai lo chu, Kan chungah inlangtir nawkin, Mi hung sandam rawh, aw LALPA. 8 LALPA Pathienin ieng thû am, A hril ka ngàithlâk ding a nih:Suola an kîr nawk naw phot chun, A mihai le mi thienghlimhai, Lungrila pantuhai kuomah, Inremna thuthlung a tiem a; p 9 Ei rama hin a ropuina, A hung chêng zing theina dingin, A tîtuhai chu ieng lai khom, Sandam dingin a'n pei zing hlak. 10 Hmangaina le ringumna haiHung luong khawm diel diel tâng an ta; Indikna le inremna haiInkuoin infawp ton an tih. 11 A ram leilungah ringumna, A tharin indawn suok a ta, Indikna chu vàna inthok, Hung inzàm thla ngei bok a tih. 12 LALPAN thil tha'n mi vûr a ta, Ei ram tharsuok hnienghnâr a tih. 13 Indikna chun hmâ thuoi a ta, A lampui ding buotsai a tih.

Psalms 86

1 Aw LALPA, i na lo daw la, Ka kona chè mi hung don rawh, Rethei le pasie ka ni hih! 2 I ta dingin ka hung inpèk, Ka hringna mi vêng himpèk rawh. Nangma ringtu, i siehlaw hi, Nangin mi hung san him ngei rawh, Nang ka Pathien i ni si a. 3 Aw LALPA, mi lunginsiet rawh, Sùnnithlâkin ka ko chê hi. 4 I siehlaw hi mi sukhlim la, LALPA i kuom tieng ka hung nghà. 5 LALPA, i va tha ngei de aw, Ngaidam dingin i'n pei zing a, Nangma lamtu taphot chungah, I hmangaina a chuoi ngai nawh. 6 LALPA, ka tongtai ngàithla la, Zàngaina ngêna ka ko hi, Mi lo ngàithlapêk hrâm rawh khai. 7 Beidonga ka ko chàng chein, Nangin i mi don hlak si a. 8 Aw LALPA, pathienhai lai hin, Nang ang tu khom an um dêr nawh; I thaw ang thaw thei an um nawh. 9 I siem hnam tinrêng hai chun, I hmaah hunga chawibiekin, LALPA i hming chawimawi an tih. 10 Nang chu i ropui takzet a, Thil mak tam tak i thaw hlak a, Nang chauh hi Pathien chu i nih. 11 LALPA, i dàn mi'n chûktir la, I thutakah kal chawi ka tih; I hming ka tî zing theina di'n, Lungril sakhat mi'n puttir rawh. 12 Ka lungril po poin LALPA, Inpâk ka che, aw ka Pathien, Kumkhuon i hming chawimawi ka tih. 13 I mi hmangaina a'n thûk a, Seola liem thla el ding kha, Nangin ka thlâ i san suok tah. 14 Aw Pathien, mi uongthuonghai leNangma poisa lo nunrawnghan, Beiin mi that an tum a nih. 15 Sienkhom LALPA, nangma ruok chu, Mi ngilnei le hmêl tlâi êm èm, Lung inuoi le hmangaina hauh, Pathien ringum tak el i nih. 16 Zàngaiin ka tieng hung ngha la, I siehlaw hi hung sukhrât la, I siehlaw nu nau hi san rawh. 17 Ka hmêlmahai hmu hoia ngei, Ka chunga hin that insuo la, Inzakin an hmài thûm raw se. LALPA nang chu mi thangpuia, Mi thlamuongtu i ni si a.

Psalms 87

1 Ama tlâng thienghlima ngèi chun, LALPAN a khawpui a'n din a, 2 Jakob thlahai khuo po nêkin, LALPAN Zion a ngàina lem. 3 Pathien khawpui, i chanchin hi, An va hang hril ropui ngei de! 4 "Ziona pieng ngei a ni hih"Tia an hril ka hriet lai chun, Aiguptaq le Babulon hai, Filistin hai le Tura hai, Ethiopia hai khom an thang sa. 5 Zion chungthuah mihaiin, "Hi khom, kha khom kha a pieng a", Tiin la hung hril vèl an ta; Chunghnungtakin namnghet a ta, 6 LALPA hming ziekna bû ngèiah, "Hi taka pieng" ti'n ziek a tih. 7 Hla phuoktuhai le lâm mihan, "Ka iengkim hnâr Zion a nih"Tia sakin la lâm an tih.

Psalms 88

1 Mi sandamtu LALPA Pathien, Sùn-zànin nang ka ko che hi, 2 Ka tongtaina i kuom tlung sien, Ka hnìna lo ngàithla hrâm rawh. 3 Ka thlâ hi buoinan a chîm a, Thlàn koa ngîr ang kan tah hi. 4 Thlàn khura liem dinghai laia, Tiem sa ka lo ni ta hiel a, Thâ hlekte khom ka nei ta nawh. 5 Mithi laia an mâksan tah, Thlàna zâl ruonghai ang ka nih. Chuonghai chu i hriet ta naw a, I lakah sàt thlâk an ni tah. 6 Thlàn mong dàpah i mi sie a, Hmun inthim sà tawpkhawka chun. 7 I lungsennan mi del dein, A sosâng chun a mi chìm vèl. 8 Ka ruol thahai i mi làkpèk, Anni pangzat mi'n hlawtirin, Che thei loin i mi khuokhir. 9 Lungngaiin ka mit a'n vâi a, Nangma tieng ka kut hung pharin, Ni tin ka ko che aw LALPA. 10 Mithihai ta dingin thil mak, I thawpèk hlak rêng am a ni?Mithi tahnung hung tho nawkin, An inpâk chê i ringa maw? 11 I hmangaina thlànah hrilin, I ringumna sietna khurah, Puongin a um rêng rèng hlak maw? 12 I thilmak thawhai hmun thimah, Hmu thei a ni hlak am a ni?Hriet zing hlaw ta lohai ramah, I'n dikzie an hriet phàk ding maw? 13 LALPA kei chun ka ko che hi, Tuk tin ka hnìna a hung tlung. 14 Ieng dinga kei mi pei thla a, LALPA i hmêl i thup a na? 15 Ka tleirawl a'nthok tuor tanin, Ka thi vàng váng châng a tam a; I tibaiumnan mi manin, Beidong takin ka um hlak kha. 16 I lungsennan a mi nuoi a, Ka tìna che'n ka châu se tah. 17 Tui angin an mi chìm ni tin, Ka vêlin an mi'n huol khum hlak. 18 Ka ruol bul le ka lainahai, I mi làk hmangpêk dai si a, Thim hi ka ruol nei sun an tah.

Psalms 89

1 LALPA hmangaina ropui chu, Kumkhawtluongin inpâk ka ta, Suon po po lai i ringumzie, Ka bâu ngeiin puong dar ka tih. 2 I hmangainan kumtluong a daih, I ringumna vàn ang a nghet. 3 "Ka mi thlang kuomah thu ka thlung, Ka siehlaw Davida kuomah: 4 'I thlahai lal ni pei an ta, An suonhai khom inlal peiin, Lalna hluo pei an tih' tiin". 5 Vànvêla hai khin aw LALPA, I ropuina an inpâk a, Mi thienghlimhai pungkhawmnaah, I ringumzie an inpàk hlak. 6 Thangvànah nangma tluk LALPA, Tu dang hrim am an um thei a?Vàn mihai lai khin nangma tluk, Tu dang hrim am an um thei ding? 7 Vàn mi thienghlim thungkhawmhai lai, Pathien hi ti a um tak a, Ama kîl vêltu po po lai, LALPA a mak râpum tak bok. 8 LALPA Iengkim Pathien ang hi, Mi tu dang am an um hrim a?LALPA, nang chu i ropui a, I ringumnan a'n huol vèl che. 9 Tuipui hrâng buon buon chunga khom, Nang chu rorêltu i ni a, Tui fawn sâng khom i hal rè hlak. 10 Mithi ruong zâl ang top elin, Nangin Rahabr i sir sop a, I bân tha hrâtin hmêlmahai, I vai dar chum chum tawl si a. 11 Vànhai i ta, hnuoi khom i ta, Khawvel le a sûnga umhai, Nangma siem vong an ni si a. 12 Sim le hmar khom i siem an na, Tabor le Harmon tlâng khomin, Nangma chawimawina hla an sak. 13 I bân thâ a hrât êm êm a, I voi tieng thà a hrât hle a, I chang tieng thâ a hrât nawkzuol. 14 Indikna le rorêlna fel, I lalthungpha lungphum an na; Hmangaina le ringumna chu, I hmatawnga i hmang an nih. 15 LALPA, nangma chawimawi nachang, Hretuhai chu an ham a tha, I hmêl ênga lêng hlaktu chu. 16 I hming lawmin an hlim ni tin, I felna chungah an lawm hlak. 17 An ropuina-hrâtna i na, I ditsakna an dong leiin, Kan kì khom a mawi a ni hi! 18 Kan phaw hi LALPA ta a na, Kan lal khom Israel Mi ThienghlimTâ ngèi el chu a lo ni si. 19 I mi ringumhai chu zêlin, Kha hma khan thu i lo hril a: "Pasaltha chu hràtnan ka'n thuom, Nêlvai laia ka thlang suok bìk, Tlangvâl ngèi chu ka chawi sàng tah. 20 Ka siehlaw David ka hmu suok, Ka hriek thienghlim chu ka nàl a; 21 Ka hrâtnan inthuom zing ka ta, Ka kutin sukhrât zing ka tih. 22 Hmêlma hnuoiah kûn naw ni a, Mi suolhan nêksawr bok naw nih. 23 A hmêlmahai hnèpêk ka ta, A hmaah vaw thlu tawl ka tih. 24 Ka ngilneina le ringumna, A kuoma chun um zing a ta, Ka hming leiin a kî khom chu, Chawi sângin la um pei a tih. 25 Tuipui chungah thû nei a ta, Vadungpui chen inlal a tih. s 26 Ama chun, 'Ka Pa, ka Pathien, Ka Lungpui le ka SandamtuI nih' tiin mi ko a tih. 27 Ka nau lutìrah siem ka ta, Hnuoia lal po pohai lai hin, Chawimawi hlaw tak la nîng a tih. 28 Ama chu hmangai zing ka ta, Ka thuthlung hi inkhêl naw nih. 29 A thlàhai inlal pei an ta, Vànhai um sûng chun a ramin, Kin ni hrim hrim nei ngai naw nih. 30 "A nauhan ka Dàn hi hnawl a, Ka thu suokhai an zawm naw a, 31 Ka thupêkhai an ngâinêp a, Ka dàn pêkhai an zawm naw chun, 32 An suolna leiin hrem ka ta, An bawsietna leia hrîkin, Vuokna hmolin hlap tawl ka tih. 33 Sienkhom ka hmangaina ruok chu, A lakah la kîr ngai nawng ka ta, Ka ringumna kei kîr naw ning. 34 Ka thuthlung sût ngai nawng ka ta, Ka bâu suok inphat ngai naw ning. 35 'Davida hlêm ngai naw ningah'Tiin ka hming thienghlim sâlin, A tawp chen dingin ka'n tiem a: 36 A thlahai mang ngai naw ni a, A lalna nisa ang tloin, Ka hmaa hin nghet zing a tih. 37 Chung sorthla khi a um sûng chun, A ram a kin ngai naw dingzie, Hrepuitu dik ni zing a tih. 38 Sienkhom, i hriek nâl chu hnawlin, A chungah i lung a sen a. 39 I siehlaw kuoma i thuthlung, Sûtin a lallukhum khum chu, Hnuoiah i pei hawnpêk si a. 40 A kul banghai i thiekpèk a, A kulbinghai i sukchim vong. 41 A hung taphotin an rok a, An sevêl ramhai nuizatbùr, A lo inchang el ta si hi. 42 Dotuhai kut i sukhràt a, Hmêlma lawmsà an inchang tah. 43 A kawlhnâm i sukmawlpêk a, Indonaah i san ta nawh. 44 A ropuina chu lapêkin, A lalthungpha khom hnuoi chàrah, Nangin i pei thalpêk dêr a. 45 A tlangvàl sûng khom kei tawiin, Inzakna puon i'n siltir si. 46 Ieng chen rau am ie aw LALPA, I hmêl i mi thuppèk ding chu?I lungsen hi meichok angin, Ieng chen am a'n hlap ding a na? 47 Ka nun tawizie mi dawnpêk rawh. Tep lo mei meia mihriemhai, I mi hang siem el hi chu aw! 48 Mihriem pieng tah a tu hrim am, Thi lo ding an um ta hlak a?Tu am Seol pumpel thei ding? 49 LALPA, i hmangaina hmasak, David kuoma ringum ding a, I'n tiemna kha iem an ta le? 50 I siehlaw an nuisaw dàn hi, Hung theinghil lul naw rawh LALPA, Hnam danghai endong le hmusit, Ka tuor inrim dàn po po khom. 51 I hriek nâl hi hmêlmahaiin, A fèna photah aw LALPA, Hmusitin an cheksol a nih. 52 LALPA kuomah kumkhawtluongin, Inpâkna chu um zing raw se. Amen, Amen.

Psalms 90

1 LALPA, nang chu suon po po a, Kan chèng himna in chu i nih. 2 Tlânghai i hung indin suok hma, Hnuoi le khawvel i siem hma daih, Chatuon a'nthok chatuon chenin, Nang chu kan Pathien i ni si. 3 "Kîr ro, hriem nauhai" i ti phâ, Pilvutah kan kìr nawk diel hlak. 4 I ngaia chun kum sângkhat khom, Zani liem tah ang chauh a na, Zân vêng khat ang chauh a ni si. 5 Tui lien angin i lèn hmang a, Thang khat insìm ang chauh a na, Zîngkàra hlo mawng ang a nih; 6 A'n thang lien a, a hung pàr a, Zàn tieng vuoiin a rêm nawk hlak. 7 I lungsenin a mi hlieu a, I lung chokin a mi thlabàr. 8 Kan bawsiethai i hmu vong a, Kan suol thaw rûkhai chen khomin. 9 I lunginsenna hnuoia chun, Kan ni tin nun hi a liem a, Beidong inthuok bong hak ang hin, Dam lai ni hi kan hmang zo hlak. t 10 Kan dam sûng chu kum sawmsarih, Hrisel leiin kum sawmriet khom; Dam sawt chu rimsik tuor sawtna, Lungngai sawtna chauh a ni si. Inrangtakin a liem hmang a, Kan vuong hmang nawk diel hlak a nih. 11 I lungsen natzie hre phâk a, I tium anga ti nachâng, Hre phâk tù hrim am an um a? 12 Kan dam lai nihai tiem dan dik, uNangman mi hung inchûktir rawh, Lung var kan nei phàna dingin. 13 Aw LALPA, hung ngha kîr ta rawh. Ieng chen am i mi tosan ding?I siehlaw hi lunginsiet rawh. 14 I hmangaina chuoi ngai lo chun, Zîngkâr hin mi hung hrâi tlai rawh, Kan ni tinhai chu hlim taka, Kan intawi liem theina dingin. 15 Rinumna le thil tha nawhai, I mi'n tuortir hun chen hû bèk, Hlimnain mi'n chènchiltir rawh. 16 I siehlawhai mithmua ngei, I thilthawhai inentir la, An suon le pàrhai kuoma khom, I ropuizie hi puong lang rawh. 17 LALPA Pathien ditsakna chu, Kan chungah vûrin um sien la, Kan kut sinthaw hung suknghetin, Kan kut hi mal hung sawm raw se.

Psalms 91

1 Chunghnungtak thla hnuoia khawsa, Iengkimthawthei bula chêngtu'n, 2 "Ama chu ka'n bîkna kulpui, Ka ring Pathien ngei chu a nih"Tiin LALPA thu puong ka tih. 3 Châng a'nthokin san suok a chê, Hripui tium lak a'nthokin. 4 I chung zawnah thla zâr a ta, A thla hnuoiah inbîng i ta, A ringumna chu i phaw leI kul dài lo ni tâng a tih. 5 Zàn thim râpum ti nawng i tih, Sùna thal inlêng velhai khom; 6 Zàna vètu che hrilênghai, Sûn changa hripui lêng lakah, Sietna ieng khom ti naw ti nih. 7 I voi tieng a sâng têl tluin, I chang tieng sîng têl tlu sienkhom, Tawk ve naw hrim hrim a ti che. 8 Mi rilohai a hrem dàn chu, I mit ngeiin la thlír i tih. 9 Chunghnungtak rûnpuiah chêng a, Ka bêl LALPA i bêl ve chun, 10 Thil tha loin nang nawng a che, Sietnan tlâkbuok bok naw ni che. 11 Vântirkohai thu pêng a ta, I lam tinah vêng an ti che; 12 Kutin chawi kâng an ti che a, Lungah i kè sui naw ti nih. 13 Sakeibaknei le rûlriel hai, I kèin la sir dêng i ta, Sakeibaknei vânglai ngei chu, Rûlpui leh la sir dèng i tih. 14 LALPA chun hieng ang hin a tih:"Aman a mi hmangai leiin, Ama chu san suok ngei ka ta, Ka hming a pom tlat hlak leiin, Ama chu humhal tlat ka tih. 15 Mi ko a ta, lo don ka ta, Harsatnaah umpui ka ta, San suok ka ta, chawimawi ka tih. 16 Dam sawtnan suklungawi ka ta, Ka sandamna chu hmûng a tih. "

Psalms 92

1 LALPA inpâk hi a tha, Chunghnungtak hming chawimawi a, Zâi le rimawi rem dâm hi. 2 Tûk tin a ngilneinahai, Zàn tin a ringumziehai, 3 Tingtang hrui sawm neihai lePerkhuong rimawi hrang hrang a, Inpâk le puong an hoi ngei! 4 Aw LALPA, i thilthawin, A mi sukhlim êm êm a, I kutsuokhai ka hmuin, Lawmin hlim zâi ka vawr hlak. 5 I kutsuokhai aw LALPA, An va ropui lawm lawm de!I ngaituo a va'n thûk ngei! 6 Intlawin an hriet phàk nawh, Invêtin an man phàk nawh. 7 Mi suolhai chu hlo ang a, Hung inthang duong hlut hlutin, Vul chuoiin pâr hlak sienkhom, Bohmang song ding an ni si. 8 Sienkhom, nang chu aw LALPA, Kumkhuon chawi sâng i ni zing. 9 I hmêlmahai chu LALPA, Chieng takin bohmang an ta; Thil suol thawtu po po khom, Nangin sukdar vong i tih. 10 Tumpâng ki mawi ang elin, Ka kî hi i cheimawi a, Hriek tha i mi nâl bok a. 11 Ka hmêlmahai tlawm lai khom, Ka mitin a hmu zing a, Mi beituhai siet thu khom, Ka nâin a lo hriet zing. 12 Mi thahai chu tûm thing ang, Hung inthang hlut hlut an ta, Lebanon tlânga sidarThing angin inthang an tih. 13 LALPA ina phunhai chu, A tuolah inzâr an ta, Hung inno hlut hlut an tih. 14 An upa hle hnung khomin, Kûr thlek thlukin ràng an ta, Hring inno nghuol zing an tih. 15 LALPA chu mi ngîl a na, Ka'n bîkna Lungpui a na, Amaah rîtlona hrim, A um ngai nawh ti thu hi, Puongin hril dar hlak an tih.

Psalms 93

1 Ropui taka incheiin, Hrâtna thuoma inbelin, LALPA chun ro a rêl a, Inhning thei dèr lo dingin, Khawvel hi a rem nghet a. 2 Tiena tlânga inthokin, I lalthungpha i'n din a, Nang chu chatuon mi i nih. 3 Aw LALPA, tuifinriet chu, Hung infawn ri hlup hlupin, An inhlap thlèr puot puot a. 4 Tuifawn insok rihai leAn inhlap dar ri nêkin, Vàn sànga um LALPA chu, A ropui lem dai si a. 5 Aw LALPA i thusuok chu, Kumkhawtluongin a nghet a, I chèngna sukmawitu chu, I thienghlimna hi a nih.

Psalms 94

1 Phuba latu, aw LALPA, Phuba latu, aw Pathien, Hung inlang ta rawh, Pathien! 2 Leihnuoi chunga Rorêltu, Hung thoin ro hung rêl la, An phù tawk ang hû peiin, Chapohai hi thungrul rawh. 3 Aw LALPA, mi suolhai hi, Ieng chen rau am hlàng i ta, Ieng chen hiel am an hlim ding? 4 Chapo takin an tong a, Thil suol thaw chîngtuhai hin, Uong chin tawk hrim an nei nawh. 5 Aw LALPA, mi suolhai hin, I mihai an sir sop a, I rochanhai an nèksawr. 6 Hmeithai le ram dang mihai, An nuom nuomin an phil a, Fahràhai an that pei bok. 7 "LALPA chun hmu hlak a tim!Israelhai Pathien chun, A ngaisak nawh" ti'n an hril. 8 Mi intlawhai, ngaituo ro, Ieng tik am var suok in ta? 9 Nakawr siemtun hre loin, A um in ring réng rèng maw?Mit siemtun hmu thei loin, A um in ring réng rèng a? 10 Hnam thununtu'n hrem loin, An suo in ring réng rèng maw?Mihriem zirtirtu meu chun, Hrietna a tlasam ding maw? 11 LALPAN mihriem ngaituohai, Iengkim a hriet fai vong a, Ieng mà lo el a ni khom, A hriet chieng èm ém a nih. 12 Aw LALPA, i thununhai, I dàn i zirtirhai chu, An va hang hamtha de aw! 13 Mi suolhai tlâkna ding khur, Tlâkhol an cho lai chen khom, Buoina laka inthokin, Chawl hadamna i pêk hlak. 14 A rochan le a mihai, LALPAN thlàthlam nawng a ta, Mâksan tawl ngai bok naw nih. 15 Mi fel kutah rorêlna, Inhlàn kîr ni nawk a ta, Lungrila mi ngîl poin, Chu chu tawmpui seng an tih. 16 Mi suolhai chu do dingin, Tu am hung pen suok a ta?Mi rilohai laka chun, Tu'nam mi hum ngam a ta? 17 LALPA chu mi thangpuitu, Lo ni hlauh naw sienla chu, Fam khuoah chêng tàng ka tih. 18 "Ka sir an phet" ti charin, LALPA, nang chun hmangainan, I mi chel ngîr nawk hlak a. 19 Ka beidong lungzîng laiin, Hnêmin i mi sukhlim hlak. 20 Mi chunga phurrik siemtu, Rorêlna indik naw chu, Nang leh an inkop thei nawh. 21 Mi fel chu an bei hron a, Poi tawk lo chu thi dingin, Thiem naw an inchangtir hlak. 22 Sienkhom LALPA Pathien chu, Ka kulpui le lungpui bèl, Ka'n humhimna a ni si. 23 Aman an suolnahai chu, La hung thungrul ngei a ta, An rîtlonahai leiin, Anni chu nuoi hmât a ta, LALPA ei Pathien ngei chun, Anni chu nuoi bo a tih.

Psalms 95

1 Hung ro, LALPA chawimawiin, Hlim takin hla sak ei tiu; Ei sandamna Lungpui chu, Inpâkin khêk suok ei tiu. 2 Lawmthu hrilin a hmaah, Hlimin hung inkhawm unla, Inpâkna rimawi remin, Hlim takin chawimawi ei tiu. 3 LALPA chu Pathien ropui, Pathienhai po po chunga, Laltak chu a ni si a. 4 Hnuoi pilrilv le tlâng insàng, A kuta um vong a nih. 5 Tuipui hi a tâ a na, Aman a siem vong a na, Khawmuol khom a tâ a na, Aman a'n din vong a nih. 6 Hung unla, chibai bûkin, Mi Siemtu LALPA hmaah, Dingthathuona bokkhupin, Ama chu chawibiek ei tiu. 7 Ama ei Pathien a na, Eini khom a rama tla, A enkol beram ei nih. Voisun a rawl in hriet chun, 8 Meribaa ang el khan, In lungril sukngar naw ro, Mesa thlalêra ang khan. 9 Chu chun in thlàtuhaiin, Ka thil thawpêk hmu zingin, Ensinin an mi fie a. 10 Kum sawmli sûng zet el chu, An chungah ka lungsen a, "An lungril a fè suol a, Ka ditzawng khom an hriet nawh"Tiin ka lo hril hlak a. 11 Lungsenin tong kân khàm a, "Pèk ka tiem chawlna ram chu, Lût thei naw ti niu" tiin.

Psalms 96

1 Hla thar LALPA rempêkin, A'n pàkna hla chu sak ro, Hnuoi hmun tinah zâi remin, LALPA inpâkin sak ro. 2 LALPA kuomah hla sakin, A hming chu inpâk unla, A sandamna thu hrilin, Sûnni tinin puong dar ro. 3 A ropuizie thu hrilin, Hnam tin lai puong dar unla, A thilmak thawhai khom chuMi tinrêng lai hril dar ro. 4 LALPA chu a ropui a, Inpâk tlak takzet a nih. Pathien dang po po nêkin, Ama tì tak ding a nih. 5 Hnam danghai pathienhai chu, Mi lem mei mei an ni a, Sienkhom ei LALPA ruok chu, Vànhai siemtu a ni si. 6 A hmaah ropuina leChawimawina chu a som a, Thilthawtheina le mawinan, A hmun thienghlim chu an nghâk. 7 Hnam tin chi tina mihai, Ropuina le hràtna hi, LALPA zàr a nih hrein, Chawimawina ama pe ro. 8 A hming ropuizie phûin, Chawimawina LALPA pein, In thilpêkhai hung chawiin, A tuolzawla chun hung ro. 9 ​Thienghlimna thuom inbelin, LALPA hung chawibiek unla, Hnuoia chênghai po po khom, A hmaah inthin raw se. 10 "LALPA chun ro a rêl ie. Hnuoi hi inhnîng lo dingin, Aman a rem nghet tlat a. Mi tin chungah fel takin, Ro a rêl ding a ni si"Tiin hnam tin hril vel ro. 11 Vànhai, hlim zâi vawr unla, Hnuoiin lawm hla rem raw se; Tuifinriet le a sûngaUmhai khêk dur dur raw se. 12 Ram le a sûnga umhai, Hlimin lawm seng raw hai se, Ramngaw thinghai chen khomin, Lawm hla sakin khêk raw se. 13 Hnuoi chungah ro rêl dingin, LALPA a hung mèk a nih; Khawvel chungah fel takin, Ro chu hung rêlpêk a ta, Indik takin mi tinrêng, An chungthu rêlpêk a tih.

Psalms 97

1 LALPA chun ro a rêl ie, Hnuoi hi lawmin hlim sien la, Thlierkârhai khom hlim raw se. 2 Sûm le thim mupin a'n tuom, A lalthungpha nghatsan chu, Rorêlna indik a nih. 3 A hmaa meichok lawn chun, A hmêlmahai a lem zo. 4 A kawlphe'n khawvel a ên, Hnuoiin a hmuh, a'n thin hawp. 5 Tlânghai chu khuoihlu angin, LALPA hmaah an zop thla, Hnuoi hmun tin LALPA hmaah. 6 Vànhan a felna an puong, Khawvela hnam po poin, A ropuizie chu an hmuh. 7 Milem betu po po leMilim hmang lo suongtuhai, Inzak takin a siem tawl. Ama be ro, pathienhai! 8 Zion-in a hriet, a lawm, Judai ram khaw tinhaiin, I rorèlna thu hrein, An hlim nasa ngei, LALPA! 9 LALPA, hnuoi chung po poa, A Chunghnungtak nang i na, Pathien danghai i khûm vong. 10 Suol theidatu taphot chun, LALPA chu a lawm hlak a, wA mi thienghlimhai vêngin, Mi suol lakah a hum hlak. 11 Mi indikhai chunga chun, Ni êng mawi a'n zâmtir a, Lungrila mi ngîl ta di'n, Lawmna êng a'n zâmtir hlak. 12 Aw, nangni mi indikhai, LALPAA chun lawm unla, A hming thienghlim inpâk ro.

Psalms 98

1 LALPA kuomah hla thar sak ro, Thil ropuihai a mi thawpêk; A kut chang tieng bân thienghlimin, Sandamna a hung intlun a. 2 LALPAN hnam tinrênghai kuomah, A sandamna a'n hriettir a, A'n dikzie khom a puong lang bok. 3 Israel sûngkuo ta dinga, A hmangaina le ringumna, A theinghil ngai hrim hrim naw a, Hnuoi kil tawpa chênghai khomin, Pathien sandamna chu an hmuh. 4 Leihnuoia chênghai po poin, LALPA inpâka khêk suokin, Rimawi remin lawm hla sak ro. 5 Tingtang keia rimawi remin, Zâiin LALPA chu inpâk ro. 6 Tawtawrawt le beram ki hai, Mûtin Laltak LALPA hmaah, Lawmna hla remin khêk suok ro. 7 Tuipui le a sûnga chênghai, Insawkin khêk dur dur hai sien, Khawvel le a sûnga chênghan, Chuong ang chun thaw ve raw hai se. 8 Vadunghan kut ben hai sien la, Tlânghan lawm hla sak ruol raw se. 9 LALPA a hung, hnuoi ro rêl din, A hmaah lawm hla rem raw se; Khawvel chungah indik takin, Ro a hung rèl ding a ni si.

Psalms 99

1 LALPA chun ro a rêl ie, Hnam tin inthin raw hai se; Cherubim chungah a thung, xLeihnuoi khom inhnîng raw se. 2 Zion-ah LALPA a ropui, Hnam tin chungah an chawimawi. 3 A hming ropui le râpum, Chawimawiin inpàk raw se. Mi thienghlim a ni si a. 4 Aw Lal Ropui le Indik, Iengkim chokruoltu i nih; Jakob sûngkuohai chungah, Indik taka ro rêlin, I felzie i'n langtir tah. 5 LALPA Pathien chawimawiin, A ke bulah chawibiek ro!Mi Thienghlim a ni si a. 6 Mosie le Aron hai chu, A thiempuhai an ni a; A hming lamtuhai lai chun, A thang ve Samuel khom; LALPA hming chu an lam a, Aman a lo don pei hlak. 7 Sûm ngîr a'nthok a biek a, A thusuok le thupêkhai, Anni chun an vong tha hlak. 8 Aw LALPA le kan Pathien, Anni chu i don hlak a; An thilsuol thawhai laka, Phuba latu ni la khom, Israelhai ta dingin, Ngaidamtu Pathien i nih. 9 LALPA Pathien chawimawi ro, A tlâng thienghlimah be ro, Ei biek LALPA Pathien hi, Mi Thienghlim a ni si a.

Psalms 100

1 Hnuoi hmun tinah, inring takin, LALPA kuomah lawm hla rem ro. 2 Lawmin LALPA chawibiek unla, Zâi vawrin a hmaah hung ro. 3 LALPA hi Pathien a nizie, A siem le a ta ei nizie, A rama tlâ, a beram ruol, Ei ni ngeizie hi hre fie ro. 4 Lawmthu hrila a kot lûtin, A tuolzawla chun hung unla, A kuoma chun lawmthu hrilin, A hming inpâkin chawimawi ro. 5 LALPA chu a va tha de aw!A hmangaina chuoi ngai lo chu, Kumkhuoin a pângngai zing a, A ringumnan suon tin a dai.

Psalms 101

1 I hmangaina le indikna, Inpâkin zâi hla sak ka ta, LALPA, zâiin inpâk ka che. 2 Soisel boa nung thei dingin, Fîmkhur takin kal chawi ka tih. Iengtik am mi hung kan i ta?Dem kai lo lungril chu putin, Ka insûngah khawsâng ka ta; 3 Thil tha naw tieng pangah hrim hrim, Ka mit inlèn ngai naw ningah. Ringduophai thilthaw hrim hrim chu, Ka theida zawng tak a ni a, An mi'n koppui ka phal bok nawh. 4 Mi lungril kawihai hrim hrimin, An mi hung hnaih ka nuom naw a, Thil suol leh inkop thei naw ning. 5 A rûka vênghai dem chîng chu, An bauhai khârpek hmak ka ta; Meng sâng le lungril chapohai, Ka ngai thei zawng mi an ni nawh. 6 Ram sûnga mi ringumhai chu, Ditsak takin cheibawl ka ta, Ka kuomah inchêngtir ka ta, Soisel boa kalchawihai chu, Ka rongbawltuin hmang ka tih. 7 Tu khom mi hlêm hmang hrim hrim chu, Ka insûngah chêng naw ni hai; Tu khom khêlhril hmang hrim hrim chu, Ka bula um phal bok naw ning. 8 A ram sûnga mi suolhai chu, Tûk tinin hmet dei tawl ka ta, LALPA khawpuia inthokin, Suol thaw chìnghai hnot suok ka tih.

Psalms 102

1 LALPA, ka tongtai ngàithla la, Ka hnìna'n i kuom tlung raw se. 2 Beidong taka ka um lai hin, Ka lakah i hmêl thup naw rawh. Keima tieng i nâ hung daw la, Ka koin mi hung don nghal rawh. 3 Ka dam sûng nihai hi damten, Meikhu ang an inzâm ral a, Thuka thingthu hring kàng angin, Ka rù le chânghai an inùt. 4 Hlobet sir hmât vuoi hnung angin, Ka lung a koi inhmât vong a, Fâk le dawn ka zong pei tah nawh. 5 Ka beidong inrùmna leiin, A rù khât chauh ka lo ni tah. 6 Thlalèr tuivalongy ang ka na, Khaw ram simbuk ang el ka nih. 7 In chung sîpa chongzong fu fâlAngin ka ngha vêl lep lep a. 8 Hmêlma'n ni tin mi deusawin, Ka hming inriem khumnan an hmang. 9 Bu-a ka ring chu vut a na, Ka dawn khom mitthli pol a nih. 10 I lungsen so insàng leiin, Khai dokin sirah i mi hnawl. 11 Ka hringnun hi zàn tieng hlim thla, Ral nawk el hlak ang hi a na, Hlo hnâ angin ka vuoi zo tah. 12 Nang chu LALPA, chatuon chenin, Lalthungphaah in thung leiin, Ruolthar hung pei dinghai lai khom, I hming rè ngai hrim hrim naw nih. 13 Thoin Zion lunginsiet la, Ditsak hun a ni takzet a, Hun bituk khom a tlung ta hi. 14 I siehlawhan a lung bang chen, An ngainain an lungdum a; A pilvut chen an lunginsiet. 15 Hnamhan LALPA hming ti sien la, Hnuoia lalhai po po khomin, A ropuina chu ti raw se. 16 LALPAN Zion tungding a ta, Ropuina leh inlang a tih. 17 Vâkvàihai tongtaina LALPAN, Donin ngaisakpêk tàng a ta, An thil hnì lo hmusit naw nih. 18 Thang la hung thar peihai ta di'n, Hieng thuhai hi inchik tha la, Suon la hung pieng pei dinghaiin, LALPA an inpàk theina din. 19 A hmun insàng vàn a'nthokin LALPAN hnuoi a zuk thlîr hlak a, 20 Tânghai inrûm ri ngàithlain, Thi dinga ruothai a san suok. 21 Chuongchun mihan LALPA hming chu, Zionah hril dar tàng an ta, Jerusalem khawzawla chun, A hming hung chawimawi bok an ta, 22 Ram tina mi hung pung khawmin, LALPA chu hung chawibiek an tih. 23 Ka vànglai thà sukkulchoin, Ka nihai khom a suktawi a. 24 Chuongchun, hieng ang hin ka ti a:Aw ka Pathien, ka vànglai hin, Mi la hmang ve naw hrâm raw khai; I kum chun thang tin a dai si. 25 A tirin hnuoi thut i phûm a, Vànhai khom i kutsuok an nih. 26 Sienkhom la thàmral vong an ta, Nang ruok chu um kumkhuong i ta; Puon angin la chul vong an ta, Silfên angin la hnawl i ta, An rêngin la bohmang an tih. 27 Nang ruok chu i pângngai zing a, I kumin kin ni nei naw nih. 28 Kan thlahai chu i ângsûngah, Him takin chêng muong tang an ta, An suonhai khom i ângsûngah, Siem nghetin hung um pei an tih.

Psalms 103

1 Aw ka thlâ, LALPA inpâk la, Ka sûnga umhai po poin, A hming thienghlim inpâk raw se. 2 Aw ka thlâ, LALPA inpâk la, Hamthatna a mi pêkhai hi, Theinghil pal ngai hrim hrim naw rawh. 3 Ei suol po po a ngàidam a, Ei natnahai khom a sukdam. 4 Khur a'nthoka mi'n tlan suokin, Lunginsietna a mi'n khumtir. 5 Thil tha tinrênga mi chawmin, Mupuiz angin a mi tuoithar. 6 Thilthawah LALPA a'n dik a, Nêksawrna tuortuhai ta din, Indik takin ro a rêl hlak. 7 A ditzawng Mosie a hril a, Israel mihai kuoma chun, A thilthawtheizie a'n entir. 8 LALPA chu ngilnei le hmêl tlai, A lung khom sen mei mei ngai lo, Hmangaina chuoi ngai lo a nih. 9 Mi a kawk mei mei ngai naw a, A lungsen a pâi zing ngai nawh. 10 Ei suol anga mi thung loin, Ei bawsietna ang phû khomin, A mi thungrul ve ngai bok nawh. 11 Hnuoi nèka vàn an sàng ang hin, Ama tîtuhai chunga chun, A lungsietna chu a'n sâng a. 12 Sak le thlang an inhlat ang hin, Ei bawsietnahai hla takah, A mi sie hmangpêk dai a nih. 13 Pâin nau a lungsiet angin, Ama tîtuhai chunga chun, LALPAN lunginsietna a hauh. 14 Ei pienhmang hi a hriet chieng a, Pilvut el ei nih ti a hriet. 15 Mihriem hi hlobet ang a na, Ram hlo angin a hung pâr a; 16 Thli hung hrângin a lèn hmang a, Tu hriet khom a hlaw ta ngai nawh. 17 Ama tîtuhai chunga chun, LALPA a ngilnei kumkhuo a, A felna khom an tu suon chen, A danglam nawh, a pangngai zing, 18 A thuthlung vong zingtuhai leA thupêk zawmtuhai ta di'n. 19 Vàn sânga khin a lalthungpha, LALPA chun a hang innghat a, Iengkim chungah ro a rêl ie. 20 Nangni a vàntirko hrâthai, A thu le ditzawng zawmtuhai, , LALPA chawimawiin inpâk ro. 21 A rongbawltu vàn mipuihai, A ditzawng thil thaw hlaktuhai, LALPA inpâkin chawimawi ro. 22 A thu hnuoia um po po leA kutsuok thilsiem tinrêngin, LALPA inpâkin chawimawi ro. Aw ka thlâ, LALPA inpâk rawh.

Psalms 104

1 Aw ka thlâ, LALPA inpâk rawh. LALPA Pathien, i ropui ngei!Ropui takin lal thuom i'n bel. 2 Var chu silfènin i hmang a, Vàn khom puon angin i zâr a. 3 A chung sànga tlungpûmhai chu, Chung tieng tuipuiaha i kham a, Tawlailirin sûm i hmang a, Thli thla zàr chungah i chuong a, 4 Thlî hi i tir palai an na, Vàn meichok i siehlaw an nih. 5 Che lo dingin hnuoi i'n nghat a, 6 Puon angin liin i'n khum a, Tlâng sîp khom tuiin a chîm vong. 7 I zuk hal chun a tlànsie, I rawl hrein a tlàn hmang a; 8 Tlânga hai chun a luong liem a, A umna ding ngeia i ruot, Ruomah a luong lût hum hum a. 9 Hnuoi a chìm pil nawk nawna din, A ramri ding i khangpèk a. 10 Tuihnâr le vadung i siem a, Tlâng kârah an luong dem dem a. 11 Ramsa tinrêngin an tlàn a; Ram sabengtungin an dawn a. 12 A kama chun chunglèng vâhai, Riebûk remin an khawsa a, Thing zàra chun zâi an vawr a. 13 I chêngna hmun sâng a'nthokin, Tlângah khuongruo i'n sûrtir a, Malsawmnan hnuoi hi i vûr a, 14 Ran pet din hlo i'n thangtir a, Mihriem chîng di'n thlai a to a, Hnuoiin fâk ding i'n suotir a: 15 Lung suklawmtu uoiin an thar, Hmâi nàmna dingin hriek an thar, An tlàn khop bu le bâl an thar. 16 Lebanon tlânga sidar thing, LALPA thing phunhai chun chawmtu, Tui dittawkin an dong zing a. 17 A bukah vaten bû an sep, Tuivaarngohai ta dingin, A zâr chu an riebûk a nih. 18 Tlâng sâng chu sakêlhai chèngna, Lung kuo kàr chu sangawib ta din, Inbìkrûkna hmun a ni si. 19 Thlà chu hun bi hriltu a na, Ni khom a hunah a tla hlak. 20 Khuo a'n thim a, zàn a hung na, Ramsa tinrêng an hung suok a, 21 Sakeibaknei vânglaihai chu, Sa sè ding zonga inrûmin, Pathien kuomah fâk ding an ngên. 22 Ni a suok pha inbi hmangin, An pûkah an inrel hmang a. 23 Sin thaw din mihriem an hung suok, Zàn tieng chenin sin an thaw hlak. 24 LALPA, varnaa i'n din suok, I kutsuok an va hang tam ngei!I thilsiemhan leilung an dàp. 25 Tuifinriet saw an cham duoi el!Thilhring tiem seng lo an chêng a, Chikté tè dâm, lien tak tak dâm. 26 Long an insûlpêl zut zut a, I thilsiem leviathanc ngei khom, A'n lêng ve zuoi zuoi el a nih. 27 An rêng elin a hun tak a, Bû i pêk ding chu an nghàk a. 28 I pêk pèkhai an lâk khawm a, I kut a'nthok thil tha tinrêng, Khop le tlai takin an dong hlak. 29 I hmêl i thup hmang pha ruok chu, Thlaphângin an chì-ài hlak a, An thuok i suktawp phá phà leh, Famin vutpilah an kîr hlak. 30 I Thlarau i hung tir pha leh, Siemin an hung um nawk hlak a, Hnuoi hmêl hmang khom i tuoi thar hlak 31 Chatuonin LALPA ropui sien, A thilsiemah hlim bok raw se. 32 Hnuoi a mel chun an thin hlak a, Tlâng a tawk leh a kàng hmang hlak. 33 LALPA kuomah zâi hla remin, Ka dam sûngin chawimawi ka ta; Ka Pathien chu zâia chawiin, Ka dam sûngin inpâk ka tih. 34 Ka dawnkhawl hi a lawm chang sien, LALPA-a chun ka lawm si a. 35 Mi suolhai chu hnuoi a'nthokin, Lem hmangin um vong hai sien la, Mi rilohai ram vong raw se!Aw ka thlâ, LALPA inpâk la, LALPA chawimawiin inpâk rawh.

Psalms 105

1 LALPA chu lawmthu hril ro, A hming chu lam hlak unla, A thilthaw tinrênghai chu, Hnam tin kuomah hril dar ro. 2 A kuomah zâihlâ remin, A'n pàkna hla sak unla, A thilthaw ropui hril ro. 3 A hming thienghlim suong unla, LALPA zongtu lungril chu, Nasa takin hlim raw se. 4 LALPA hrâtna chu zongin, Ama chu pan rop hlak ro. 5 Thil ropui a thawhai chu, Theinghil loin hre zing ro, Thilmak a thawhai po po, A rorêlhai po po khom. 6 A bawi Abraham suonhai, A thlang bik Jakob thlahai, 7 Ama chu LALPA Pathien, Hnuoi pum rorêltu a nih. 8 A thuthlunghai hrim hrim chu, Kumkhuoin a hriet zing a, Suon sâng tam tak ta dinga, A thupèkhai a hriet zing, 9 Abraham kuoma a thlung, Isak kuoma a tiem chu. 10 Chuong chu Jakob thlahai di'n, Dàn hmangin a namnghet a, Israelhai ta dingin, Chatuon thuthlunga siemin, 11 "In chan le rochung dingin, Kanan ram pêng ka ti cheu"Tiin a lo tiem nghet a. 12 Mi tlawm tê, ieng tham ni lo, Mikhuol el an ni lai khan, 13 Hnam tin lai invâkvàiin, Ram tinah an indar a. 14 Sienkhom hnam dang tu khomin, An nèksawr a phal naw a, Anni leiin lalhai chu, Halin a zil tawl lem hlak: 15 "Ka hriek nâlhai tawk naw ro, Ka zawlneihai poi rêng rèng, In tawk ding an nawh" tiin. 16 Ram pumah tâm a'n tlâktir, An buhai a suksiet vong; 17 An hmaah mi a tir a, Sala an zor Josef kha. 18 A kol bunna kè hliemin, A rîngah khaidiet an thlung- 19 A hril lawk ang hung tlung a, LALPA thu indikzie chu, Chieng taka an fie chenin. 20 Lal chun mi tirin a'n suo, Hnamhai lal chun an suoktir. 21 A ram hotuah siemin, A nei po po chunga chun, Thuneituah a sie a, - 22 Mi lienhai a nuom nuom a, Thunun le zirtir ding le, A khawnbawl milûnhai chuVarna thu inchûktir di'n. 23 Chu zoah Israel chu, Aiguptaah a hung a, Hamd ramah mikhuol angin, Jakob chu a chêng tah a. 24 LALPA chun nasa takin, A mihai a'n pungtir a; Anni lo ertuhai chu, An hung tam del el tah a. 25 A ram mihai lungrilah, Anni a'n theidàtir a, A siehlawhai chu phierin, Vervêk takin an soisak. 26 A siehlaw Mosie a tir, A mi thlang Aron leh chun. 27 Aigupta mihai kuomah, Pathien inchikna thilmak, Tam tak an inentir a. 28 A thu an awi naw leiin, Thim khuo a'n zingtir mup a, A ram pum a'n thim vong a. 29 An tui thisen a'n changtir, An ngàhai a sukhlum zo. 30 Ram pumah û a'n tâmtir, Lal ina chen an intàm. 31 Thu a pêk, tho an intâm, A ram chu tlipin an sip. 32 Ruo aiah riel a'n sûrtir, Têk a tla dur dur bok a. 33 Grèp le theichang a dêng siet, Thing hnàhai a dèng kol vong. 34 Thu a pêk, khâu an intâm, Tiem seng lo khâu an hung pung. 35 Thing hnà an fàk kol vong a, An thlaihai khom an fâk vong. 36 A ram nau lutir po po, Vânglai nauhai a'n thitir. 37 Tangka, rangkachak phurin, Israelhai a thuoi suok, Inpal thlu khom an um nawh. 38 An suok leiin Aigupta, Nasa takin a lawm a, Anni chu an pangzat si. 39 Sùnah sûm hlim a zâr khum, Zànah èntu mei a pêk. 40 Sâ an ngèn, vamim a pêk, Vàn buin a chawm tawl a. 41 Lungpuiah tui a vuok suok, Thlalêrah a luong dem dem. 42 A bawi Abraham kuoma A thutiem chu a hriet zing. 43 A mi thlanghai a thuoi suok, Hlim le lawmin an khêk a. 44 Hnam danghai ram a pêk a, Mi danghai inrim rà chu, Anni an rochungtir a, - 45 A thupêkhai chu vong a, A dàn an zawm theina di'n. LALPA chu inpâk seng ro. e

Psalms 106

1 Haleluia!LALPA chu a tha êm a, A kuomah lawmthu hril ro, Ngil a nei kumkhawtluongin. 2 LALPA thilthaw ropuizie, Tuin am hril zo theiin, Inpâk tawk thei um an ta? 3 Rorêlna dik kengkawtu, Thil indik thaw roptu chu, Mi hamtha a va ni ngei! 4 I mihai chungah LALPA, Ditsakna i'n suo pha chun, Mi hung hre vê zing rawh aw; Anni i san suok hunah, Kei khom mi'n thangtir ve rawh; 5 I thlanghai hmuingìlna chu, Ka chang ve theina ding dâm, I hnam thlanghai hlimna chu, Ka hlimpui vèna ding le, I rochanhai leh hlim zâi, Kan vawr tlàng theina dingin. 6 Kan pipuhai ang bokin, Thilsuol kan lo thaw ve a, Indik lo taka thawin, Rilo takin kan um hlak. 7 Aiguptaa an chêng lai, I thilmak thaw pipuhan, Mênah an lo thlàk hlak a, I ngilneina innghilin, Tuipui Sen kama ngei khan, Chunghnungtak lakah an hel. 8 Sienkhom a theina mak chu, An hung hriet theina dingin, A hming leiin anni chu, A san suok ta tho a nih. 9 Tuipui Sen chu a hal a, Chuongchun a hung kang chat a, A mihai chu hnuoi chârahVa râl chu a thuoi kai a. 10 Dotuhai kut a'nthokin, A mihai a san suok a, Hmêlmahai kut an'thokin, A mihai chu a'n tlan suok. 11 Tui chun hmêlma a lem zo, Pakhat khom an tlàn suok nawh. 12 A thutiem an ring tah a, A'n pâknan zâi hla an vawr. 13 Sienkhom a thilthawhai chu, Kâr loin an nghil nawk a, A remruot an nghàk pei nawh. 14 Thlalêrah an inrâwp a, Pathien chu an fie tah a. 15 An thil hnì chu a pêk a, Sietna hri a tir bok a. 16 Chuongchun an puon in a'nthok, Mosie le ser hran Aron, An hung thìk ta èm êm a. 17 Hnuoi chu a hung kak phut a, Dathan chu a lem nghal a; Abiram le a rawihai, An pil hmang ve ta vong a. 18 An lai mei a hung suok a, Mi suolhai a kàng hlum vong. 19 Horeb tlàngah bawng tuoi lem, Sungin chu chu an biek a. 20 An Pathien ropuina chu, Hlo pet hlak bawng ang chauin, An inchangtir tah a nih. 21 Aigupta rama thil mak, Ropui tak tak thawpêktu, An Sandamtu Pathien chu, An lo theinghil el tah a, 22 Aigupta rama thil mak, Tam tak a thawpèkhai le, Tuipui Sena thil râpthlàk, A thawpêkhai chen khomin. 23 A mi thlang Mosie ngei chun, A lungsen sukrè dingin, An kârah bân phar meuin, Lo ngènpêk naw sien la chu, Sukbohmang vong a tum kha. 24 A thutiem chu ring loin, Ram ditum an ngainèp a. 25 An puon inah an chier a, LALPA thu an awi nuom nawh. 26 Kut phar meua intiemin:"Thlalêrah tlu hlum in ta, 27 In thlàhai chu hnam dang lai, Inchek dartir vong ka ta, Ram tinah chêng dar an tih"Tiin a'n khàm ta hiel a. 28 Peor-ah Baal an biek, Mi lem pathien biekna thil, Inthawina sa an fàk a. 29 An thil rilo thawhai chun, Pathien an suklungsen a, Hripui a'n lèngtir tah a. 30 Sienkhom Finehasf ngîr a, Kut a hung rol tàk leiin, Hripui chu a rè tah a. 31 Chu thil chu kumkhawtluongaThangtharhai hriet pei dingin, A felnaa ngai a nih. 32 Meriba tuiah LALPALung chu an suksen nawk a, Anni leiin Mosie khom, Nasa takin a buoi a. 33 A lung a sen êm leiin, Thu hnung ding khom dawn loin, A tong pha tah hiel a nih. 34 LALPAN a ram mihai chu, Sukhlum di'n thu a pêk a, Sienkhom an sukhlum nuom nawh. 35 Chuonghai leh chun inneiin, An hnam chìng dàn an zui a. 36 An mi lemhai be vein, An chânga chun an awk a. 37 An naupa le naunu hai, Ramhuoi kuoma inthawinaDingin an inhlàn ve a. 38 Poi tawk lo thisen insuo, An hung chîng tan ve leiin, Kanan mi lemhai kuomah, An naunu naupa thisenInhlànin an inthawi a; An thisen chun a ram chu, An sukporchè tah a nih. 39 An thil thaw chun anni chu, A sukporchè zo vong a; Nawchizor an inchang tah. 40 A mihai chungah LALPA, A lunginsen êm êm a; An rochanhai chen khom chu, A tirdak ta uoi uoi a. 41 Hnam dang kutah a pêk a, An hmêlmahan an chungah, Ro an rêl khum tah a nih. 42 Hmêlmahaiin sirdein, An thuhnuoiah an sie a. 43 Voi tam san suok tawl sien khom, Hel hrim an ma chuong naw a, Suolah an inhmang zo lem. 44 Sienkhom an beidong meu chun, An kona a ngaisak a; 45 Anni leiin a thuthlung, A hriet zing, a nghil ngai nawh, Ngilneina a hau leiin, A ngaisak tawl nawk hlak a, 46 Sala mantuhai chen khom, Anni a'n lungsiettir hlak. 47 Aw LALPA le kan Pathien, Nangin mi hung san suok la, Hnam dang laia inthokin, Nangin mi thuoi khawm nawk la, I hming thienghlim inpâk a, Kan chawimawi theina ding che'n. 48 LALPA, Israel Pathien chu, Kumkhuon inpâkin um sien, Mi tinin "Amen" raw se. Haleluia.

Psalms 107

1 LALPA chu a tha êm a, A kuomah lawmthu hril ro, Ngil a nei kumkhuo si a. 2 Hmelma laka inthoka, LALPAN a'n tlan suokhai chun, Chu chu ti rop raw hai se, 3 Sak, thlang, g sim le hmar rama, Mi a hung thuoi khawmhai chun. 4 A then chu thlalêr ram sie, Hmun reah an invâk a, Hmun khuorna ding khawpui chu, A pàwna lam an hmu nawh. 5 Phingtâm le dangchâr tuorin, Châuin an tlep ngawi ngawi a. 6 Harsatna an tuok pha leh, LALPA koin an khêk a, An beidongna a'nthokin, Aman a lo san suok hlak. 7 Lampui indikah a thuoi a, An chêngna ding khawpui chu, An tlung thei tawl tah a nih. 8 Hmangaina chuoi lo LALPA, Mihriem ta dinga thilmak, Tam tak thawpêktu kuomah, Lawmthu intlun raw hai se. 9 Dangchârhai a sukkhop a, Phingtâmhai fâk ding thain, A hrai tlai tawl hlak si a. 10 Thenkhat chu inthim hnuoiah, Beidonga rinum tuorin, An inthung, thîr kol bunin, 11 Pathien thu lakah hel a, Chunghnungtak remruotpêk chu, Hmusita an hnawl leiin. 12 Sin rinum del dè hnuoiah, An lung a dong kor kor a, Santu nei loin an tlu. 13 Harsatna an tuok pha leh, LALPA koin an khêk a, An beidongnaa inthok, Aman a lo san suok hlak. 14 Thim le thìna hlim a'nthok, Aman a lâk suok tawl a, An khaidiethai a suktan. 15 Hmangaina chuoi lo LALPA, Mihriem ta dinga thilmak, Tam tak thawpêktu kuomah, Lawmthu intlun raw hai se. 16 Dâr thîr kot a suksiet a, A kalna thîr a sukbong. 17 Invêthai nat san tak chu, Hel kong an hraw lei a na, An tuor hlakna san tak khom, An bawsietna lei a nih. 18 Fàk ding tinrêng an hnàm a, Thlàn ko tieng an pan hnài hlak. 19 Harsatna an tuok pha lehLALPA koin an khêk a, An beidongnaa inthok, Aman a lo san suok hlak. 20 Thu a pêk, a sukdam a, Thlàn a'nthok a san suok hlak. 21 Hmangaina chuoi lo LALPA, Mihriem ta dinga thilmak, Tam tak thawpêktu kuomah, Lawmthu intlun raw hai se. 22 A kuomah lawmthu hrilin, Inthawina inhlàn hai sien, Lawmna hla mawi chu remin, A thilthaw hril raw hai se. 23 Thenkhat longa inzinin, Tuipuiah fâk an zong a. 24 LALPA thilthaw an hmu a, Tui inthûk taka thilmak, A thawhai po po khom chu. 25 Thu a pêk, thlipui a hrâng, Tuipui a sukfawn hlup hlup. 26 Vàn tieng an invor tung a, Li tieng an bir nawk vung vung, A pangzatum êm leiin, Thlabârin an chì-ài hlak. 27 Zu rui lam lawn pai angin, An thle ton an thle ton a, Thaw ngaina hrim an hriet nawh. 28 Harsatna an tuok pha leh, LALPA koin an khêk a, An beidongnaa inthok, Aman a lo san suok hlak. 29 Thlipui chu a suktawp a, Tui fawn khom an rè chip a. 30 A rè chun an hlim hle a, An pan tum tak long chawlnaHmuna chun a thuoi tlung hlak. 31 Hmangaina chuoi lo LALPA, Mihriem ta dinga thilmak, Tam tak thawpêktu kuomah, Lawmthu intlun raw hai se. 32 Mipui pung khawmna hmunah, Ama chu chawimawi unla, Upa ruol thung khawmnaah, Ama chu inpâk hlak ro. 33 Vadung khom thlalèr hmunah, Ama chun a'n changtir a; Tui hnâr umna ram hnawng khom, Ram tawlah a'n changtir bok. 34 A chêngtuhai suol leiin, Pil hâng khom hmangna um lo, Hnuoi alah a'n changtir hlak. 35 Thlalèr ram khom tui tamnaHmunah a'n changtir hlak a; Ram tawl khom tui hnâr tamna, Ram hnawngah a'n changtir hlak. 36 Chu taka chun chêng dingin, Phingtâmhai a hung thuoi a, Umhmun an khuornaa chun, Khawpui an hung indin a. 37 Thlai chîngin grèp an phun a, A ra kûr têr tuor el a. 38 Mal a sawm, an pung tuol tuol, An ranhai kiem a phal nawh. 39 Nêksawrna, sietna leiin, An hung kiem ta tiel tiel a, Lungngaiin an kûn tlok tlok. 40 Sienkhom milienhai chunga, Hmusitna bun thlatu chun, Lam um lo thlalèr rama, Invâkvaitirtu ngei chun, 41 An tuornaa inthokin, San ngaihai a chawi kâng a, Ran ruol angin an sûngkuo, An hung pung nawk tah a nih. 42 Mi indikhan an hmu chun, An hlim ta êm êm el a, Mi suolhai ruok chun an bau, An inchîp hmak ve thung a. 43 Mi var chun hieng thuhai hi, Inzain poisa sien la, LALPA ngilneina ropui, Ngaituoin sût chieng raw se.

Psalms 108

1 Aw Pathien, ka ring tlat che, Inphet loa ring tlatin, Rimawiin inpâk ka che. 2 Aw ka thlâ, hung tho har la, Tingtang rimawi chu tumin, Khawfing hang ko chat ka tih. 3 Hnam tin lai hin aw LALPANang inpâk ka ti che a, Mipui lai zâia chawiin, I'n pâkna hla sak ka tih. 4 I hmangainan vàn a khûm, I ringumnan sûm a pêl. 5 Aw Pathien, vànhai khèlah, Ropui takin nang lêng la, I ropuinan hnuoi ram hi, Arêngin hung sip raw se. 6 Thangpuiin mi san suok la, iI hmangaihai himna di'n, I kut chang tieng hung phar rawh. 7 A hmun thienghlim a'nthokin, Hieng hin Pathienin a hril:"Ka mihan hnèna changin, Sekem khuo sem dar ka ta, Sukot ruom thè dar ka tih. 8 Gilead le Manase ram, A rêngin ka ta a na, Efraim ram ka thîr lukhum, Judai ram chu ka lal hmol, 9 Moab ram chu ka maihûn; Edom ram ka ta a nih, Ka pheikhok ka dêng lûtna. Filistinhai chu hnènaHlado ka'n sam khum dêr tah". 10 Kula inhuon khawpuiah, Tu'n am mi thuoi tâng a ta?Edom ramah tuin am, Thuoiin mi fepui a ta? 11 Aw Pathien, i mi hnawl maw?Kan sipai ruol lai, Pathien, I thang nuom ta naw a ni? 12 Hmêlma lakah mi san rawh, Mihriemhai thangpuina chu, Ienga khom a tlâktlài nawh. 13 Pathien zârin huoi taka, Beiin hnèna chang kan ta, Kan ràlhai chîl pher a tih.

Psalms 109

1 Ka'n pâk rop hlak aw Pathien, Mi tosan zing lul naw rawh. 2 Mi rilo le hlêm hmanghan, An mi hril siet luoi luoi a, Khêlin an mi bei a nih. 3 Theidàna thu'n an mi'n huol, A san boin an mi bei. 4 Hmangaiin ka tongtaipêk, Annin an mi do lêt si. 5 Thatna, suolin an mi rul, Hmangaina, theidànain. 6 Anni chun hieng hin an tih:"A chungthu rêlpêk dingin, Rorêltu mi suol ruot la, Hêktu a chang tieng ngîr sien. 7 A chungthu an rêl pha leh, Thiem naw inchangtir ngei sien, A tongtainahai ngei khom, Suola ngai ni vong raw se. 8 A nun suktawiin um sien, A hotu nìna chân sien, 9 A nauhai fahra hai sien, A nuhmei hmeithai raw se. 10 A nauhai chu chavaiin, Kutdawin invâk hai sien, An in se tawp a'nthok chun, Hnot suokin um raw hai se. 11 Bata inpûktirtu chun, A nei po làkpêk sien la, A sin inrim rahai khom, Ram dang mihan chèn raw se. 12 Tu khomin lainat naw sien, A thìsan a nauhai chu, Lunginsiet naw raw hai se. 13 A thlàhai mang vong hai sien, Thangthar la hung ding lai khom, An hming nuoi bo ni raw se. 14 "A pipu bawsietnahai, LALPAN inchik vong sien la, A nu suolnahai khom chu, Thai hmang ni ngai naw raw se. 15 An suolnahai po po chu, LALPAN inchik zing sien la, Hi hnuoia hin tu khom hriet, Hlaw lo di'n thai bo raw se. 16 Ngilneina chàng a hriet nawh, Rethei, pasie, beidonghai, An thî chenin a hnot thlùr. 17 Tong sie inphur a chîng chu, Ama chungah tla raw se. Mi a ditsak ngai naw a, Ditsakna chang naw raw se. 18 Tong sie a silfên a na, Tui angin a chîm vêl a, Hriek angin a rù a fang. 19 A korfuol a'n zem angin, Ama chu zem khum sien la, Kawngchûn angin khit raw se. " 20 Mi hêktuhai chu LALPAN, Chuong ang chun thungrul sien la, Mi hrilsetuhai chan khom, Chuong ang pei chun ni raw se. 21 Aw LALPA le ka Pathien, I hming leiin mi duot la, I hmangaina chuoi lo chun, Mi hung san suok ngei ngei rawh. 22 Retheiin ka tlasam a, Ka lungril sûng a hliem a. 23 Zàn tieng ni hlim ang ralin, Khau ang thin thlâkin ka um. 24 Bu nghei leiin ka khûphai, An lo ongrop zo tah a, Chêrin kan hriel neng el tah. 25 Mi nuizat bûr ka ni a, Mi hmu photin lu an thin. 26 LALPA Pathien mi san rawh. I hmangaina chuoi lo chun, Nangin mi hung san suok rawh. 27 I thaw a ni ngeizie khom, Hung inhriettir rawh, LALPA. 28 Tongsie mi'n phur hai sien khom, Nangin mal mi sawm i tih. Mi dotuhai muolpho sien, I siehlaw hi hlim a tih. 29 Mi sukpawi tumtuhai chun, Inzakna puon sil an tih. 30 Ka bâuin nasa takin, LALPA sukropui ka ta, Mipui lai inpâk ka tih. 31 Aman mi pasie a tan, Thiem naw inchangtir tumtu, Lakah a mi san suok hlak.

Psalms 110

1 LALPAN ka Lalpa kuomah, "Ka chang tieng hin hung thung rawh, I hmêlmahai po po chuI ke sirsana ka siemHmâkhat chun" tiin a hril. 2 LALPAN i lal hmol ropui, Zion a'nthok sukseiin, I hmêlma zîng khup lai chun, Nangin ro hung rêl i tih. 3 I hmêlmahai bei dinga, Tlâng thienghlim i pan ni chun, Tlawmngaiin i tlangvàlhai, Hung inpe tuk tuk an ta, Zîng daidaw tla khawm angin, Thalai hung inkhawm an tih. j 4 "Melkisedek ang chi a, Chatuon Thiempu nang i nih"Ti'n LALPAN thu a tiem a, A thu chu sût ngai naw nih. 5 I chang tieng LALPA a um, A lunginsen nia chun, Lalhai chu nuoi hawp a tih. 6 Hnamhai chungthu rêl a ta, Mi ruong chu dêng bûm a ta, Hnuoia lalhai po po chu, Hnèin intlawm vong a tih. 7 Lam sîra fiertui luong chu, Dawnin har thar nawk a tih.

Psalms 111

1 Haleluia, Mi ngîlhai inkhawmnaah, Mipui pungkhawmna hmunah, LALPA chu ka theitawpin, Inpâkin chawimawi ka tih. 2 LALPA thilthaw ropuizie, Ama lawmtu taphot chun, Ngàituon an sui chîk rop hlak. 3 A thilthawhai a ropui, A mawiin inzà a um, A felnan chatuon a dai. 4 Thilmak a thaw nasan khom, Ei hriet a dit lei a nih. LALPA chu mi tlâi a na, Lungsietnaa sip a nih. 5 Ama tituhai kuomah, Fâk ding iengkim a pêk a, A thuthlung kumkhuon a hriet. 6 A thil thaw theiziehai chu, A mihai an entir a, Hnam dang ram an rochungtir. 7 A thilthawhai hrim hrim chu, A ringumin a'n dik a, A thupêk ringtlâk a nih. 8 Kumkhawtluongin a nghet a, Ringumna le indikna, Hmanga pêk an ni si a. 9 A mihai a hung intlan, Kumkhuoin thu a thlung nghet; A hming thienghlim a râpum. 10 LALPA ti chu varna bul, l A thu zawmtu taphot chu, Hriet thiemna tha a pêk hlak. Chawimawina chu kumkhuoin, Ama ta a ni si a.

Psalms 112

1 Haleluia!LALPA tìtu chu a hamtha, A thupêkhai lawm hlak mi chu. 2 A thlàhai chu hi hnuoia hin, Mi ropui tak hung nîng an ta, Mi nun ngîl thlahai hrim hrim chun, Malsawmna hung dong pei an tih. 3 An sûngkuo chu neinung an ta, A felnan chatuon a dai si. 4 Mi nun ngil ta din thima khom, Khaw var mawi a hung suok hlak a, Mi tlâi, ngilnei le indik ta din. 5 Phal taka inpûktir hlaktu, Indik taka hringnun khaltuTa din thil tha hung tlung a tih. 6 Mi indik chu a'n hnìng ngai nawh, Kumkhawtluongin hriet hlawng a tih. 7 Thu sie dong a'n lau ngai naw a, A lungril a zâm ngai bok nawh, LALPA-ah a'n suknghet leiin. 8 A lungril a det indo a, Zâmna hrim hrim nei ngai naw nih; A tawpah a hmêlmahai chu, Intlawmin hnuoisie vong a tih. 9 A thilpêkhai a sem dar a, Pasiehai kuomah a pêk a, A felna chun chatuon a dai, A lu chawi sângin um a tih. 10 Mi riloin a hang hmu chun, A lung chu khei êm êm a ta, A ha rawtin bohmang a ta; Mi rilohai beiseina chu, Ieng khom loin a thâmral hlak.

Psalms 113

1 Haleluia. Aw nangni LALPA siehlawhai, LALPA hming chu inpâk seng ro. 2 Tuta inthok chatuon chenin, LALPA hming chawimawiin um sien, 3 Sak kawl a'nthok thlang kawl chenin, A hming inpâkin um raw se. 4 LALPA chu hnam po po nêka, Chunghnung lem daia lêng a na, A ropuinan vànhai a khêl. 5 LALPA ei Pathien ang hrim a, Hmun sâng lalthungphaah thung a, 6 Vànhai le hnuoi zuk en ding a, Kûna inphahnuoi tu'm an um? 7 Retheihai chu pilvut a'nthok, A lâk suok a, a tungding hlak; Pasiehai khom vut buol a'nthok, Kei thoin a dom kâng bok a; 8 Milienhai lai a'n thungtir a, A nih, milienhai laia chun. 9 Chinghai din sûngkuo a'n dinpêk, Hlimin hrai lêng an chawitir hlak. Haleluia.

Psalms 114

1 Israelhan Aigupta ram suoksana, Jakob suonhan mi ram an suoksan khan, 2 Judai ram chu Pathien hmun thienghlim leIsrael ram chu a lalram a hung nih. 3 Tuipuiin a hmu chun a tlânsie a, Jordan vadung khom chu a luong kîr a; 4 Tlânghai beramchal ang an inchawm a, Muolhai beramte angin tuol an chai. 5 Aw tuipui, ieng leia i tlân sie am?Aw Jordan, ieng leia i luong kîr am? 6 Tlânghai, ieng da beram ang inchawma, Muolhai, beramte ang in tuolchai am? 7 Aw leihnuoi, LALPA hmaah inthin la, Jakob Pathien hmaa chun inthin rawh. 8 Suonglungpui chu dîlah a'n changtir a, Lungthìr khom tuihnârah a'n changtir bok.

Psalms 115

1 Aw LALPA, keini ni loin, I hming chauh hi ropui raw se, Ngilneia i ringum leiin. 2 "An Pathien chu khaw la'm a um?" Ieng leia hnam danghan an ti? 3 Kan Pathien chu vànah a um, A dit angin thil a thaw hlak. 4 Anni rawi milem biek ruok chu, Tangka le rangkachak hmang a, Mihriem kuta siem vong an nih. 5 Bau an nei ve, an tong thei nawh, Mit khom an nei, an hmu thei nawh. 6 Nakawr an nei, an hriet thei nawh, Hnâr an nei ve, rim an hriet nawh. 7 Kut an nei a, an tawk thei nawh, Kè an nei a, an lawn thei nawh, An hnukah ri a suok thei nawh. 8 Milem siemtuhai chu milem, An thil siem leh an indang nawh; Milem betuhai khom milem, An lem biek leh angkhat an nih. 9 Aw Israel sûng le kuohai, LALPA-ah ringna innghat ro, Thangpuitu le phaw a ni si. 10 Aw nangni Aron sûng le kuohai, LALPA-ah ringna innghat ro, Thangpuitu le phaw a ni si. 11 Aw nangni ama tituhai, LALPA-ah ringna innghat ro, Thangpuitu le phaw a ni si. 12 LALPA chun a mi hriet zing a, Mal mi hung sawm ngei ngei a tih:Israelhai malsawm a ta, Aron thlahai malsawm a ta, 13 LALPA tituhai hrim hrim chu, A chîn a lien malsawm a tih. 14 LALPA chun sukpung sien la cheu, Nangni le in suon le pârhai; 15 Hnuoi le vàn siemtu LALPA chun, Malsawmnain vur cheu raw se. 16 Vànhai khi LALPA ta an na, Hnuoi hi mihriem a pèk a nih. 17 To songnaa liem mithihan, LALPA an inpàk thei naw a; 18 Tuta inthok chatuon chenin, Einin LALPA inpâk ei tiu. Haleluia.

Psalms 116

1 LALPA chu ka hmangai a nih, A zàngaina ka hnìna rawl, A mi lo ngàithlâkpèk leiin. 2 Ka kona a ngàithlâk leiin, Ka dam sûngin pan zing ka tih. 3 Thina chângin a min huol vel, Thlàn thim lungngainan mi tuomin, Beidong buoina'n a mi chîm vel. 4 Chuongchun, LALPA hming chu ka lam, "LALPA, mi san suok rawh" tiin. 5 Pathien chu mi tlâi le indik, Lunginsietnaa sip a nih. 6 LALPAN inngàitlawmhai a hum, Ka tla hnuoi pha a mi san suok. 7 Aw ka thlâ, muong takin um rawh, I chungah LALPA a tha si. 8 Aw LALPA, nangin ka thlarau, Thina a'nthok i'n tlan suok a, Ka mitthlihai i hrûk hul a, Ka'n sui thlûk ding i vêng bok a, 9 Mihring ramah, LALPA hmaah, Dâr ang ka lêng thei tah a nih. 10 "Ka rimsi ngei!" ka ti lai khomAma chu ka ring tlat hlak a. 11 "Mi po po khêlhlip vong an nih", Ka ti hlak bok, ka chî-ài pha. 12 LALPA thatna zozai el hi, Ieng tin am rul kîr thei ka ta? 13 Sandamna no-mawi chu domin, LALPA hming lamin khêk ka tih. 14 LALPA kuoma ka thu tiem chu, A mihai hmaah hlen ka tih. 15 A mi thienghlimhai fam chang hi, LALPA mitah thil hlu a nih. 16 Aw LALPA, kei chu i siehlaw, I siehlawnu naupa ka na, Phuorna lakah i mi'n suo tah. 17 Lawmthu hril inthawina hlànin, LALPA hming chu lam zing ka ta, 18 LALPA kuoma ka thu tiem chu, A mihai hmaah hlen ka tih, 19 LALPA sumtuol zawla ngei chun, Jerusalem khaw zawl ngeiah. Haleluia.

Psalms 117

1 Hnam po po hai, LALPA chu inpâk ro; Mi tinrênghai, Ama chu chawimawi ro. 2 A mi hmangaina a ropui, LALPA ringumna chu kumkhuon, A pangngai zing a ni si a. LALPA chu inpâk ro.

Psalms 118

1 LALPA kuomah lawmthu hril ro, Ama chu a tha êm si a, A hmangainan kumtluong a dai. 2 "A hmangainan kumtluong a dai", Israel miha'n ti raw se. 3 "A hmangainan kumtluong a dai, " Aron thlahaiin ti raw se. 4 "A hmangainan kumtluong a dai, "LALPA tituhan ti raw se. 5 Ka beidongin LALPA ka ko, LALPA chun a mi hung don a, A mi'n suo tah, hmun thawvengah. 6 LALPA ka kuom tieng a thang a, Titna hrim hrim nei naw ningah, Hringmi'n iem mi law thei an ta? 7 LALPA ka kuom tieng a thang a, Mi thangpuitu ama a na, Mi dotuhai diriem takin, Hlado la'n sam khum ngei ka tih. 8 Mihriem ringsana nei nêkin, LALPA-a innghat a tha lem. 9 Lalhai ringsana nei nêkin, LALPA-a innghat a tha lem. 10 Hnam po poin an mi'n huol a, LALPA hmingin ka hnot dar vong. 11 Sîr tinah an mi'n huol tuou a, LALPA hmingin ka hnot dar vong. 12 Khuoi hon angin an mi tuom a, Hling buk kàng angin an ral a, LALPA hmingin ka hnot dar vong. 13 Tlu vângin an mi hneng lêng a, Sienkhom LALPAN a mi thangpui. 14 LALPA chu ka hrâtna le hla, Ka sandamtu a ni si a. 15 Mi felhai puon in vêla chun, Hnèna lawm ri a thangkhawk a:"LALPA kut chang tiengin thilmak, Ropui tak el a mi thawpek! 16 LALPAN a kut chang tieng a hlâng, LALPA kut chang tiengin thilmak, Tam tak a thaw!" tiin an khêk. 17 Fam chang loa hringkhuo changin, LALPA thilthaw puong pei ka tih. 18 LALPAN a mi thunun na hle, Ka thî êm ruok chu a phal nawh. 19 Felna kotkhârhai mi'n hong rawh, Chu chun lûtin, LALPA kuomah, Lawmthu ka hril theina dingin. 20 Hi hi LALPA kotkhâr a nih, Mi indikhai lût thei an tih. 21 I mi don leiin ka'n pâk che, Ka sandamna chu nang i nih. 22 In bawltuhai lung hnawl ngei chu, A kil thut poimaw tak a nih. 23 Chu chu LALPA thilthaw a na, Ei hmuin ropui ei ti hle. 24 Voisun hi LALPA ruot a na, A chungah hlimin lawm ei tiu. 25 LALPA, nangin mi sandam la, Aw LALPA, mi'n hlawtlingtir rawh. 26 LALPA hminga hung a hamtha, LALPA in an'thok mal kan sawm. 27 LALPA chu Pathien a ni si, A var ei chungah a hung êng. Sawl hnà chawiin, maichàm chenin, Kût hmangtu ruolin fêng ei tiu. n 28 Nang ka Pathien i ni leiin, I kuomah lawmthu hril ka ta, Nang ka Pathien i ni leiin, Chawimawina inhlàn ka ti che. 29 LALPA kuomah lawmthu hril ro, Ama chu a tha êm si a, A ngilneinan kumtluong a dai.

Psalms 119

1 Soiselbohai chu an hamtha, LALPA dàn lam hrawtuhai chu. 2 A thu zawmtuhai an hamtha, Lungril taka zongtuhai chu. 3 Thil indik lo an thaw ngai nawh, A lamah kal an chawi leiin. 4 I thuruothai chu i mi pèk, Zawm ngêi dinga i tìhai chu. 5 I dànhai chu ringum takaZawmtu ni thei ve lang chu maw! 6 I thupêkhaiah ka'n bûr chun, Muolpho ngai hrim hrim naw ningah. 7 I dàn felziehai ka'n chùk pha, Lungril ngilin inpâk ka che. 8 I dàn thuhai zawm pei ka tih, Mi zàmsan ngai hrim hrim naw rawh. 9 Tleirawlhan ieng tin takin amAn nun vong thienghlim thei an ta?I thu angin khawsa hai sien. 10 Lungril takin ka zong che a, I thu ka pêtsan phal naw rawh. 11 I chungah suksuol lo dingin, I thu lungrilah ka khawl khawm. 12 Inpâkna chu chang la LALPA, I dàn thuhai mi'n chûktir rawh. 13 I kam suok dànhai po po kha, Bauin ka'n sam non ngat ngat hlak. 14 Mihan sum hau an lawm anginI dàn thu zawm hi ka hlimpui. 15 I dânhai chu ka dawnkhawl a, I lampuihai khom ka sui hlak. 16 I thu suok ka lawmzawng a na, I thu ngàithâ ngai naw ningah. 17 I siehlaw chunga hin tha la, I thu zawma ka hringna din. 18 Ka mit mi hung sukvarpêk la, I dàn makzie hmu thei ka tih. 19 Hnuoia hin khuolzin chauh ka na, Ka lakah i thupêk thup naw. 20 Ieng lai khomin ka thlarau hi, An vêl ruoi, i dàn hriet châkin. 21 I zil hlak chapo, tongsephur, I dàn poisa nawtuhai chu. 22 I thupêkhai ka zawm leiin, Mî hmusit le cheksolnahaiLaka inthok mi siekieng rawh. 23 Lalhan ka sietna zong sienkhom, I siehlaw hin i dànhai chu, Ngaituoin dawnkhawl zing a tih. 24 I dàn thuhai ka hlimpui a, Ka ta di'n remruottu an nih. 25 Pilvutah ka'n tâl zing el a, I thû angin mi sukhar rawh. 26 Ka um dàn ka'n zawt, i mi don, I dàn thuhai mi'n chûktir rawh. 27 I thu zirtir ka hriet thiem chun, I thilmak thaw dawnkhawl ka tih. 28 Ka thlâ lungngaiin a châu a, I thû angin mi sukhrât rawh. 29 Lam dik lo ka hraw phal naw la, Zàngaiin i dàn mi hril rawh. 30 Thutak lampui ka thlang tah a, I dànah ka lungril ka'n nghat. 31 I dàn thuhai ka chel nghet a, LALPA, mi sukmuolpho lul naw. 32 I thupêk ang takin ka tlân, Ka hrietthiemna khom i sukpung. 33 LALPA, i dànhai mi hril rawh, Ka zawm kim vong theina dingin. 34 I dàn ka zawm theina dingin, Hriet thiemna lungvar mi pe la, Lungril po poin zawm ka tih. 35 I thupêkhai mi'n zawmtir la, Chu chu ka lawmzawng tak a nih. 36 I dàn thu tieng mi'n nghattir rawh, Mani tânghma tieng ni loin. 37 Thil hmang lo tieng thlir lo dingin, Ka mithai mi'n lâkkîrtir la, I thu angin ka nun vong rawh. p 38 Nangma tituhai i tiem kha, qI siehlaw kawla hin hlen rawh. 39 Hming siet kan lâuna la hmang rawh, I dànhai chu a tha si a. 40 I dàn thuhai ka ngàina a, I felnan ka hringnun hum rawh. 41 I ngilneina chuoi ngai lo leI lo tiem tah sandamna chu, Aw LALPA hung inlangtir rawh. 42 Mi elsèntu don lêt ka tih, I thu ka ringsan tak a nih. 43 Thudik tak mi'n hriltir pei la, I dàn kan nghatna a ni si. 44 I dànhai chu zawm pei ka tih, Chatuon, chatuon, chatuon chenin. 45 I dàn thu zongtu kan leiin, Zalen takin lêng tâng ka tih. 46 Lalhai hmaah i dàn thuhai, Puongin inhriettir hlak ka ta, Muolpho ngai hrim hrim naw ningah. 47 I thupêk zawm inhoi ka tih, Ka thil châk zawng tak a ni si. 48 I thupêk inza'n ka ngaina, I dànhai ka dawnkhawl rop hlak. 49 I siehlaw kuoma i thu tiem, Ka beisei innghatna chu nghil naw. 50 Ka nun vong him i'n tiemna chu, Tuor laia ka'n hnèmna a nih. 51 Chapohan an mi deusaw zing, Sienkhom i dàn ka pètsan nawh. 52 Tiena i dàn thupêkhai chu, LALPA ka hriet, ka thlamuongpui. 53 I dàn poisa lo mi suolhai, Ka hmu chàng ka lung a sen hlak. 54 Ka'n lawina ieng rùn sûnga khom, I dànhai hi ka hlâ a nih. 55 Zànah i hming ka'n nghil ngai nawh, I dànhai ka zawm zing, LALPA. 56 I dàn thuhai ka zawm leiin, Malsawmna ka dong a ni hih. 57 LALPA, nang ka chanpuol i na, I thu zawm dingin ka'n tiem tah. 58 I lawmzawng theitawpin ka zong, I tiem hmêl hlim mi'n hmutir rawh. 59 Ka um dànhai ka ngaituo a, I dàn zawm dingin kal ka pên. 60 I thupêkhai muongchang loa, Zawm nghâl dingin thang ka lâk tah. 61 Mi suolhan mi khuop de sienkhom, I dàn thuhai ka'n nghil ngai nawh. 62 I dànhai chu a'n dik leiin, I kuomah lawmthu hril dingin, Ka zuong tho hlak, thangrila khom. 63 Nangma tituhai ruol ka na, I dàn thu zawmtuhai po leh. 64 I hmangainan hnuoi i'n khum a, LALPA, i dàn mi zirtir rawh. 65 LALPA, i siehlaw chunga hin, I thu angin i thaw tha hlak. 66 I thupêkhai ka ring leiin, Varna le hrietna mi tù rawh. 67 Ka tuor hma khan ka'n vak hmang hlak, Tu hin chu i thu ka zawm tah. 68 Nang chu i tha, i thilthaw khom, I dànhai chu mi'n chûktir rawh. 69 Chapohan khêlin an mi bei, Sienkhom i dàn ka zawm tâl hlak. 70 An lungril ngarin a chawlol, Kei chun i dàn ka hlimpui si. 71 Ka tuor hi ka ta din a tha, I dànhai hriet phana'n ka hmang. 72 Rangkachak, tangkaruo sâng tam, Nêkin i thu a hlu lem si. 73 I kuta siemin i mi'n din, I thupêk ka'n chûk theina di'n, Hrietthiemna lungril mi pe rawh. 74 Nangma titu'n mi hmu'n hlim sien, I thu ka beisei tlat leiin. 75 I dàn a'n dik ka hriet LALPA, I ringum leia tuor ka nih. 76 I siehlaw thu i tiem ang khan, I hmangainan mi thlamuong sien, 77 I zàngainan mi'n hringtir la, I dàn ka lawmzawng a ni si. 78 Khêla mi hêktu chapohai, Sukmuolphoin um hai sien la, Kei chun i thû dawnkhawl ka tih. 79 Nangma titu chun i dànhai, Hre di'n ka tieng hung ngha raw se. 80 I dàn zawm thuah fai var lang, Muolphona tuok ngai naw ningah. 81 I mi sandamna chu ngâiin, Ka thlâ hi a'n uoi ngawi ngawi a, Sienkhom i thu ka beisei tlat. 82 I thu tiem ka thlìrna lamah, Ka mit khom a'n vai zo tah a, "Ieng tik am i mi thlamuong ding?"Tiin ka'n don ka'n don hlak a. 83 Savun ip tâwng, inting kai hnung, Ang chauh lo inchang tah lang khom, I dànhai ka theinghil ngai nawh. 84 Mi sukdudatuhai chungthu, Ieng tik top am rêlpêk i ta?Ieng chen top am i siehlaw hi, I la'n nghàktir pei ding a na? 85 Chapohai chun i dàn kalin, Ka tlâkna ding khur an cho hi. 86 I thupêk po po ring a um; Anni chun khêlin an mi bei, Nangin mi hung thangpui vat rawh. 87 Hnuoi a'nthok an mi'n ram hman vàng, Sienkhom i dàn thu ka'n thlà nawh. 88 I zàngaina'n ka nun hum la, I thuhai chu zawm pei ka tih. 89 Aw LALPA vàn sânga hai khin, I thu chu um kumkhuong a tih. 90 I ringumna a pangngai zing, Suon la hung pei dinghai lai khom; Hnuoi i'n ngîr nghet, a um ta zing. 91 I dànhai khom an la ngîr zing, Iengkim hi i siehlaw an nih. 92 I dànhai hlimpui ni naw lang, Rinum tuorin fam tâng ka tih. 93 I dàn thuhai nghil thei naw ning, Chuonghai hmang chun ka nun i hum. 94 I tâ ka nih, mi sandam rawh, I dàn thuhai zongtu ka nih. 95 Mi riloha'n mi that tumin, Mi'n chàn rûk zing hai sienlakhom, I dàn thuhai ka ngaituo hlak. 96 Thil famkima ngaihai khomin, Tawp chin an nei vong ti ka hriet, I thupêk ruok chun a nei nawh. 97 Aw, i dàn ka va ngàina ngei!Ni tin ka dawnkhawl hlak a nih. 98 Ka vong tlat hlak, i thupêk chun, Hmêlma nêkin a mi sukvar. 99 Mi'n chûktirtu nêkin ka'n thûk, I thuhai ka dawnkhawl leiin. 100 Upahai nêkin ka hriet ril, I dàn thuhai ka zawm leiin. 101 I dàn thu ka zawm theina din, Suol lampui hrim ka sir ngai nawh. 102 I dàn thu ka pêtsan ngai nawh, Nangin i mi'n chûktir leiin. 103 Ka bauah i thu a'n hnik ie, Khuoizu hnîng nêkin a thlum lem. 104 I thu'n hriet thiemna a mi pèk, Suol kong hrim hrim ka theidâ vong. 105 I thû hi ka kè di'n khawnvar, Ka lampui elvartu a nih. 106 I dàn indik chu zawm dingin, Thu intiemin ka namnghet a. 107 LALPA, ka tuor nasa ta êm, I thû angin mi sukhar rawh. 108 LALPA, ka'n pâkna che pom la, I dàn thuhai mi'n chûktir rawh. 109 Ka nuna mawphurtu ka na, rI Dànhai theinghil nawng ka tih. 110 Mi suolha'n châng an mi kam khum, Sienkhom i thû ka pètsan nawh. 111 I thû ka kumkhaw ro a na, Ka lungril sukhlimtu a nih. 112 A tawp chena i dàn zawm din, Ka lungril khom ka siem fel tah. 113 Lungril thieng neihai ka theida, I Dàn ruok chu ka ngaina hle. 114 Nang ka'n bîkna le phaw i na, I thû, ka beisei innghatna. 115 Suol thawtuhai, mi zamsan ro, LALPA thu ka zawm ding a nih. 116 I thû angin, mi vong hring la, Ka beisei hi sukmuolpho naw. 117 Mi chel nghet la, chun him ka ta, I dànhai ngàihlu zing ka tih. 118 I dàn pêtsantuhai i hnawl, An hlèmna iengma lo i'n chan. 119 Hnuoia mi rilohai po po chu, Thîr èk angin i ngai vong a, Chuleiin i dàn hi ka lawm. 120 Ka tì lei che'n ka thâ a'n thin, I dànhai hi râpthlàk ka tih. 121 Nêksawrtu kutah mi'n hlàn naw, Thil dik le fel ka thaw leiin. 122 I siehlaw hi ngaisak tha la, Chapohai mi nèk chèp phal naw. 123 I tiem sandamna chu nghâk a, I hlen hun ding ka thlîrnaah, Ka mithai khom a chau zo tah, 124 I siehlaw hi lunginsiet la, I dàn thùhai mi'n chûktir rawh. 125 I siehlaw ka ni tlat leiin, I dànhai ka hriet theina din, Hriet thiemna inril mi pe rawh. 126 Aw LALPA, i chèt a hun tah, I Dàn an bawsiet zing a nih. 127 Rangkachak inhlîr nêk khomin, I dàn thupèk ka ngaina lem. 128 I dàn thu ka zawm vong leiin, Suol kong hrim hrim ka theida vong. 129 I thusuokhai a mak ropui, Chuleichun ka zawm hlak a nih. 130 I thu luong suok chu var a na, Hrietthiemna mi mawlhai a pêk. s 131 I thupêkhai chu hriet châkin, Ka bàu kain ka'n thuok hlop hlop. 132 I hming ngàinatuhai chunga, I thawpêk rop hlak ang ngei khan, Zàngàiin ka tieng hung ngha rawh. 133 I thu angin mi kei thuoi la, Suolin a mi hnè phal naw rawh. 134 I thu ka zawm theina dingin, Nêksawrtu lakah mi hum rawh. 135 I siehlaw chungah i hmêl êng, Mawi tak chu inlangtir hlak la, I dàn thuhai mi'n chûktir rawh. 136 I dàn an zawm nuom naw leiin, Ka mitthli hi a luong rop hlak. 137 Aw LALPA nang chu i'n dik a, I rorêlhai khom a'n dik ie. 138 I thu inhriettir a'n dik a, Ring tlâk a ni takmeu a nih. 139 Râlhan i thu an nghil leiin, Thahnemngàina'n a mi lem zo. 140 I thu tiem chun fie a dawl a, I siehlawn a ngàina a nih. 141 Chînin hmusitum ni lang khom, I dàn thu ka theinghil ngài nawh. 142 I'n dikna pàngngài zing a ta, I dàn khom indik zing a tih. 143 Harsat beidongnan a mi nang, Sienkhom i thu'n a mi suklawm. 144 I dànhai a'n dik kumkhuo a, I thu ka hringpui theina di'n, Hrietthiemna nangin mi pe rawh. 145 Lungril po poin ka ko che, Aw LALPA, nangin mi don rawh. Chuongchun, i dànhai zawm ka tih. 146 Ka ko che hi, mi sanhim rawh, Chuongchun, i dànhai zawm ka tih. 147 Vartien hma'n thoin ka ko che, I thuah beiseina ka'n nghat. 148 I thu ka dawnkhawl theina di'n, Zàn khuoin ka mit ka'n sîm nawh. 149 I hmangaina chuoi ngai lo chun, Ka kona hi lo ngàithla la, LALPA, i thu rèl dàn angin, Ka hringnun hi mi humpêk rawh. 150 Thil suol rottuhan an mi hnai, Anni chun i dàn an hlat si. 151 Nang ka bulah i um LALPA, I thupêkhai a'n dik a nih. 152 Tiena tlânga inthok ta khan, I dànhai chu chatuona di'n, I suknghet ti ka lo hriet tah. 153 Ka tuor en la, mi hung san rawh, I dànhai ka'n nghil ngai si nawh. 154 Mi hrilpuiin, mi'n tlan suok la, I tiem angin ka nun hum rawh. 155 Mi suol sandam chu a hnâi nawh, I dàn thu an zong naw leiin. 156 I zàngàina a lien, LALPA, I dàn angin mi'n hringtir rawh. 157 Mi soisatu hmêlma an hrâng, Sienkhom i dàn ka pêtsan nawh. 158 Phatsantuhai ka hmuh, ka ten, I dàn thu an zawm ngài si nawh. 159 I thu ka ngàinatzie dawn la, I hmangaina chuoi lo zarin, LALPA, ka hringnun vong him rawh. 160 I thu laimu thutak a na, I dàn po po a'n dik kumkhuo. 161 Lalhan khêlin an mi bei a, Sienkhom i thu hi ka'n zâ tak. 162 Rosum tam tak changtu angin, I thu hi ka hlimpui a nih. 163 Khêl ka tirdak, ka theida bok, I dân ruok chu ka ngàina hle. 164 Ni tin voi sari ka'n pàk che, I dàn thu a'n dik êm leiin. 165 I dàn dittu an thlamuong hlak, Ieng khomin a sukthlûk thei nawh. 166 LALPA i sandam ka nghâk zing, I thupèkhai khom ka zawm bok. 167 I dànhai hi ka zawm pei a, Ka ngàina êm êm hlak a nih. 168 I dàn thuhai po po ka zawm, Ka um dànhai i hriet vong si. 169 LALPA, ka rawl i kuom tlung sien, I tiem hrietthiemna mi pe rawh. 170 Ka hnìna hin i kuom tlung sien, I tiem angin mi san suok rawh. 171 I dàn i mi zirtir leiin, Ka hmûr inpâknan luong liem sien, 172 I thupêkhai a'n dik leiin, Ka leiin i thu inpâk sien, 173 I dàn thuhai ka thlang leiin, Mi vêng di'n i kut inpei sien. 174 LALPA, i sandamna ka ngài, I dàn hi ka hlimna a nih. 175 Nang inpâk ding chauin dam lang, I dànhai chun mi suknghet rawh. 176 Beram angin ka'n vàk hmang a, I siehlaw hi hung zong suok rawh, I thupêk ka'n nghil ngai si nawh.

Psalms 120

1 Ka beidong ni'n LALPA ka ko, Aman a mi hung don ngei hlak. 2 Khêlhlip le hlèmhmanghai lakah, LALPA, nangin mi san him rawh. 3 Aw nangni mi hlèmhmang ruolhai, Iengtin am a soisak ding cheu, Ieng am a law tawl hrim ding cheu? 4 Râl thal zum le thingthu hringin, A hrem tawl ding cheu a ni si. 5 Mesekah ka chêng, ka vàngduoi, Kedar puon ina ka châm khom!t 6 Inremna ditnawtuhai lai, Ka lo chàm sawt taluo a nih. 7 Inremna dit mi ka ni a, Sienkhom inremna ka hril chàng, Indo an puochà lem hlak si.

Psalms 121

1 Tlâng tieng khin mit ka'n lèn a, Khaw tieng panga inthokin am, Mi thangpuitu ding hung a ta? 2 Thangpuina chu vànhnuoi siemtu, LALPA-a inthokin a hung. 3 I sir inphet ding phal naw nih, A vêngtu che a in ngai nawh; 4 A nih, Israelhai vêngtu chu, A in innghil ngai hrim hrim nawh. 5 LALPA chun a vêng zing che a, I chang tieng hliekhutu a nih. u 6 Ni intêngin em nawng a che, Thla varin sukbuoi nawng a che. 7 Siet theina laka inthokin, LALPAN i nun vêng him a tih. 8 I suok i lût LALPAN a vèng, Tuta le chatuon chen khomin.

Psalms 122

1 "LALPA in sângah kai ei tiu"Tia an mi fiel pha ka hlim. 2 Jerusalem, i kul sûngah, Kè ngeiin kan ngîr ve ta hi! 3 Jerusalem chu khawpui nghet, Bubit taka indin a na; 4 Chu chun hnamhai khuoi ang an kai, LALPA hnam Israelhai chu, Dàn thu a pêk tawl ang ngei a, LALPA hming hang inpàk dingin. 5 Chu chun a nih David thlaha'n, Rorêlna thungpha an indin. 6 Jerusalem khawpui ta di'n, Remna le muongna hnipêk ro:"A dittu che chu hmuingil sien; 7 I sûngah remna inlêng sien, I kulbing sûng muong raw se" ti'n. 8 Ka unau le ruolhai leiin, "I sûngah muongna tlung raw se"Kei khomin ka lo ti ve a. 9 LALPA Pathien chèngna a na, I thatna ding zong pei ka tih.

Psalms 123

1 Aw vàn lalthungphaa inthung, I kuom tieng mit ka hung inlèn. 2 A pu kut nghâk bawipa ang le, A pi kut nghâk bawinu angin, Zàngàina a'n langtir hma khat, LALPA Pathien kan thlîr zing hlak. 3 LALPA, kan chungah zàngài la, Zà hung ngài la, hung ngài mol rawh, Mi hmusit kan tuor rawn ta hi! 4 Nuomtawlhai mi hmusitna le, Chapohai mi diriemna hi, Kan tuor nghok ta bêk bêk a nih.

Psalms 124

1 "LALPA ei tieng thang ni naw sien"Israelhaiin ti raw se, 2 "LALPA ei tieng thang ni naw sien, Mihaiin an mi bei lai khan, 3 An lungsen so insâng lai khan, A hringin mi lem tâng an ta; 4 Tui lienin mi la vong a ta, Mi lèn hmang tawl vong tâng a ta, 5 Mi chìm pil tawl vong tâng a tih. 6 LALPA inpâkin um raw se, An mi pèt nawi vong a phal nawh. 7 Chângkamtu chânga awk vate Angin aman a mi'n suo a; Châng chu aman a suksiet a, Ei intâl suok thei tah a nih. 8 Hnuoi le vàn Siemtu LALPA chun, A hming leiin a mi san hlak.

Psalms 125

1 LALPA-a innghattu chu, Zion tlâng sukhning ruol lo, Kumkhaw dai ang chu an nih. 2 Jerusalem khawpui chu, Tlângin a'n huol vèl angin, LALPA chun a mihai chu, Tuta le chatuon chenin, An huol vel zing hlak a nih. 3 Mi indikhai rama chun, Mi suol inlal zing naw nih, Mi indikhai chun thil suol, An thaw vè nawna dingin. 4 Aw LALPA, mi thahai leLungril ngîlhai chunga chun, Thil tha thawpêk rop hlak rawh. 5 Suol lam hrawtuhai ruok chu, Mi suolhai ruolin LALPAN, La hnot suok tawl vong a tih. Israelhai chunga chun, Inremna inlêng raw se.

Psalms 126

1 Sala intânghai LALPAN Ziona a thuoi kîr khan, Mang amani ei ti hiel! 2 Kan bàu innuiin a sip, Kan lei inpâkna hlain. "LALPA chun an ta dingin, Thil ropui tak a thawpêk"Tiin hnam tin lai an hril. 3 LALPA chun ei ta dingin, Thil ropui tak a thaw a, Ei hlim bêk bêk a ni hi. 4 Negev thlalèr ram tawl a, Vadung tui luong ang elin. Aw LALPA, kan vângneinaNangin hung tungding nawk rawh. 5 Mitthli puma tùtuhan, Hlimna hla leh sîk an ta, 6 Tap puma chi thlâk dinga, Fe suoktuhai chu hlimin, Buphal leh hung kîr an tih.

Psalms 127

1 LALPAN in a bawl naw chun, A bawltuhai an sawl thlawn. LALPAN khuo a vèng naw chun, A vêngtuhai an meng thlawn. 2 Zîng inhma taka tho a, Zàn thangah zâl hman chau a, Fàk ding zonga inrim hi, A thlawna sawlna a nih. A hmangaihai chu zànmu, Inhoi takin a'n tuotir. 3 Nauhai hi LALPA a'nthok, Ei rochan donghai an na, Rîla rà naupanghai hi, Ei lawmman donghai an nih. 4 Vànglai nau pasalhai chu, Mi râl hrât kuta a chawi, Thal ang hi an ni si a. 5 Thal bawm sip chuong ang nei chu, Mi hamtha tak a ni a, ul kotkhârah hmêlmahai, Â'n bichilpui pha khomin, Muolpho ngai hrim hrim naw nih.

Psalms 128

1 LALPA tìtu chu a hamtha, A lampuia kalchawitu chu. 2 I kut inrim ra tlàn i ta, Hlim i ta, hmuingîl bok i tih. 3 I nuhmei chu i in sûngah, Grèp rà nuom tak ang nîng a ta, I nauhai khom oliv tuoi ang, Thlèngpui kîl khup khop nîng an tih. 4 LALPA tìtu chu chuong ang chun, Malsawmin a um hlak si a. 5 Zion a'nthok LALPAN mal tin, I dam sûngin sawm che raw se, Jerusalem hmuingîlna chu, I dam sûng po po chang ve la, 6 Tu mong benin hringkhuo hmang rawh. Israelhai lai rem leng raw se.

Psalms 129

1 Israel chun hieng hin ti sien-Ka tleirawl lai a'nthokin, An mi va sukrimsi de! 2 An mi soisak hlea chu, An mi tukdol thei si nawh. 3 Leilettu changkuong angin, Ka hnungzâng an rîtna chu, A ser an thlùr seng sung a. 4 LALPA ruok chu a'n dik a, Mi suolhai mi khuopna hruol, Sât tanin a mi'n suo a. 5 Zion theidatuhai chu, Muolphoin kîr raw hai se. 6 A'n thang lien hmaa vuoi hlak, In chunga hlo to ang hin, An rêngin um vong raw se. 7 Chuong ang chu bu sîktuin, A sîk khawm ngai dèr naw a, Buphal intêltu khomin, An intêl sà ngai bok nawh. 8 A bula inlonhaiin, "LALPAN malsawm sienla cheu, A hmingin mal kan sawm cheu"Ti ngai hrim hrim naw raw se.

Psalms 130

1 Beidongna khur inthûk taka, Inthokin LALPA ka ko che. 2 LALPA, ka hnìna rawl ngai la, I nâ mi lo dawpêk hrâm rawh. 3 LALPA, kan suol i'n chik pei chun, Tu'n am thiem chang thei tâng an ta? 4 Nangmaah ngàidamna a um, Mihan an tì theina ding che'n. 5 Ka thla'n LALPA a nghâk zing a, A thu chu ka'n hnêmna a nih. 6 Ka thla'n LALPA a nghâk zing a, Ràlvêngtuhan zîng khawvar kàr, An nghàkhlà nêkin ka nghâkhlà. 7 Aw Israelhai, in beisei chu, LALPA-a chauh innghat unla, LALPA-ah hmangaina a um, Amaah tlanna kim a um. 8 Ama ngeiin Israelhai, An suol lakah intlan a tih.

Psalms 131

1 Aw LALPA, ka lungril hin, Uongthuongna hrim a nei nawh, Ka mit meng khom a'n sâng nawh. Thil lien tham ka'n voi ta nawh, Ka phû ve lo thilhai chu. 2 Ka thlâ hadamin a chawl, Nene tlai tah pom lai nau, Nu tânga inbei angin, Ka thlâ ka'n chawl damtir tah. 3 Aw nangni Israelhai, Tuta le kumkhawtluongin, LALPA chu beisei tlat ro.

Psalms 132

1 Davida hre zing rawh, LALPA, A rinum tuorhai po po khom. 2 LALPA kuomah thu a'n khâm a, Jakob Mi Hrât ngei kuoma khan: 3 "Ka inah inlawi nawng ka ta, Ka khuma khom kai bok naw ning; 4 Ka mit hrim insim nawng ka ta, Zànmu khom tuo hrim hrim naw ning, 5 Jakob Mi Hrât LALPA chèngna Hmun ding ka hmu hmâkhat chu" ti'n. 6 Ngai ta, Efrata-ah kan hriet a, Jaâr phûlah kan va hmu tah. v 7 "A umnaah chun fèng ei ta, A ke bulah chawibiek ei tiu!". 8 Aw LALPA, tuhin hung tho la, I chawlna dinga chun hung rawh, I thilthawtheina Bawm le chun. 9 I thiempuhaiin silfènah, Indikna thuom inbel hai sien, I mi thienghlimhai chun lawmin, Hlimna hla mawi rem raw hai se. 10 I siehlaw Davida zàrin, I hriek nàl hi hnawl lul naw rawh. 11 David kuomah LALPA a'n khâm, A thu chu sût ta ngai naw nih:"I thlàhai laia pakhatin, I lalthungpha hung hluong a tih- 12 I nauhan ka thuthlung le dàn, Ka'n chûktirhai an zawm phot chun; An nauhan hung hluo pei an ta, Kumkhuon inlal an tih" a tih. 13 LALPAN Zion tlâng a thlang a, A chêngna hmun di'n a dit a: 14 "Hi hi ka kumkhaw chawlna ding, Chèng zingna dinga ka dit chu. 15 Fâk le dawnah malsawm ka ta, Pasiehai khom hrâi tlai ka tih. 16 A thiempuhai chun silfènah, Sandamna thuom inbel an ta, A mi thienghlimhai chun lawmin, Hlimna hla mawi chu rem an tih. 17 Chutaka chun Davida ta di'n, Kí hung indawn suoktir ka ta, Ka hriek nâl ta dingin khawnvar, wChu taka chun inthut ka tih. 18 A hmêlmahai chu sukzakin, Muolphonan inthuomtir ka ta, Ama khum lallukhum ruok chu, Suktlepêk zing ka tih" a tih.

Psalms 133

1 Ngaita, lung inruol taka, Unau chêng khawm diel diel hi, A thain a va'n hoi de! 2 Thlunglua hriek rimtui nàl, Khâkhmula luong thla ngiei ngiei, Aron khâkhmula luong thla, A korfuol rîng chena luongThla ang elin a hlu a; 3 Hermon daidaw ZionaTla hlak ang el hi a nih!Chutaka chun malsawmna, LALPAN a'n tlungtir hlak a, Kumkhuoa hringna ding chu.

Psalms 134

1 LALPA ina siehlawhai, Zàna a rongbawltuhai, Hungin LALPA inpâk ro. 2 A chèngna hmun thienghlimah, In chawnban vawr sieu sieuin, LALPA chu inpâk seng ro. 3 Vànhnuoi Siemtu LALPA chun, Zion tlânga inthokin, Malsawmnan vur cheu raw se.

Psalms 135

1 Haleluia. LALPA hming chu inpâk ro, LALPA siehlawhai po chun, Ama chu inpâk seng ro. 2 LALPA ina rongbawltu, A in huonga chêngtuhai, LALPA chu inpâk seng ro. 3 LALPA chu inpâk seng ro, LALPA chu a tha si a. A hming chu zâiin chawi ro, Chu chu an hoi hle si a. 4 LALPAN ama ta dingin, Jakob chu a thlang tah a, A ro hlu di'n Israel chu, A lo nei bîk tah a nih. 5 LALPA ropuizie ka hriet, LALPA a ropui chungchuong, Pathien dang po po nêkin. 6 Vànhai le hi leihnuoia, Tuipui le tuifinrietah, LALPAN a nuom nuom a thaw. 7 Kawl kilah sûm a'n suoktir, Kawl inleptir zor zorin, Khuongruopui a'n sùrtir a, Thli a'n suo, a bawm a'nthok. 8 Aiguptaa sâ le hriem, An naulutîr an thìtir. 9 Aiguptaa Faraw leA siehlawhai hremna di'n, Inchikna thil mak tam tak, Anni lai a'n tlungtir a. 10 Hnam tam tak a suksiet a, Lal lien tam tak a that bok- 11 Amonhai lal Sihon dâm, Basanhai lal Oga dâm, Kanana lal po po khom. 12 A mi Israelhai chu, An ramhai an rochungtir. 13 Aw LALPA, kumkhawtluongin, I hming hi dài ngai naw nih; Suon la hung dinghai khomin, LALPA, i hming hrieng an tih. 14 LALPA chun a mihai chu, Thiem la'n changtir vong a tih, A siehlawhai chunga chun, Zàngàina a hau si a. 15 Hnam danghai milem biek chu, Tangkaruo le rangkachakHmanga mihriem siem an nih. 16 Bàu an nei, an tong thei nawh, Mit an nei, an hmu thei nawh. 17 Nâ an nei, an hriet thei nawh, An bàuah thuok a suok nawh. 18 Milem siemtu chu milem, An thil siem ang char an nih; Milem betu khom milem, An lem biek leh angkhat char. 19 Nangni Israel sûngkuohai, LALPA chu inpâk seng ro, Nangni Aron sûngkuohai, LALPA chu inpâk seng ro. 20 Nangni Levi sûngkuohai, LALPA chu inpâk seng ro, Nangni LALPA tituhai, LALPA chu inpâk seng ro; Zion tlànga inthokin, LALPA chu inpâk un la, Jerusalema chênghai, LALPA chu inpâk seng ro. Haleluia. 21 (A um nawh)

Psalms 136

1 LALPA a that êm leiin, A kuomah lawmthu hril ro. Ngil a nei kumkhuo si a. 2 Pathienhai pathien a nih, A kuomah lawmthu hril ro. Ngil a nei kumkhuo si a. 3 Lal po pohai Lal a nih, A kuomah lawmthu hril ro, Ngil a nei kumkhuo si a. 4 Thil mak thawtu um sun chun, Ngil a nei kumkhuo si a. 5 Varnaa vàn siemtu chun, Ngil a nei kumkhuo si a. 6 Tui chunga hnuoi phàtu chun, Ngil a nei kumkhuo si a. 7 Var ropui tak siemtu chun, Ngil a nei kumkhuo si a. 8 Sûn lala ni siemtu chun, Ngil a nei kumkhuo si a. 9 Chung sorthla le si-ar hai, Zàn èngtua siemtu chun, Ngil a nei kumkhuo si a. 10 Aigupta nau lutîrhai, An rènga sukhlumtu chun, Ngil a nei kumkhuo si a. 11 Anni kuta inthokaIsrael thuoisuoktu chun, Ngil a nei kumkhuo si a. 12 Kut hrât phara humtu chun, Ngil a nei kumkhuo si a. 13 Tuipui Sen vaw tantu chun, Ngil a nei kumkhuo si a. 14 Chu tuipuia inthokaIsraelhai thuoikaitu chun, Ngil a nei kumkhuo si a. 15 Faraw le a sipaihai, Tuipui inlemtirtu chun, Ngil a nei kumkhuo si a. 16 Thlalèr ramhai fe thleng a, A mihai thuoisuoktu chun, Ngil a nei kumkhuo si a. 17 Lal lienhai tukdoltu chun, Ngil a nei kumkhuo si a. 18 Lal hrât tam tak thattu chun, Ngil a nei kumkhuo si a. 19 Amor lal Sihon thattu'n, Ngil a nei kumkhuo si a. 20 Basan lal Oga thattu'n, Ngil a nei kumkhuo si a. 21 An ram inrochungtirtu'n, Ngil a nei kumkhuo si a. 22 A siehlaw Israel kuomaChuong ang rochan petu chun, Ngil a nei kumkhuo si a. 23 Ei ngîrhmun a siet laia, Mi theinghil ngai nawtu chun, Ngil a nei kumkhuo si a. 24 Hmêlma laka mi humtu'n, Ngil a nei kumkhuo si a. 25 Hring tin fâk ding petu chun, Ngil a nei kumkhuo si a. 26 Chung thangvàna Pathien chu, A kuomah lawmthu hril ro, Ngil a nei kumkhuo si a.

Psalms 137

1 Babulon va kamah hai, Chu chun inthungin kan tap, Zion kan dawn kìr chângin. 2 Phahrâm zâr thing lêra hai, Kan tingtang bing ang kan khài. 3 ​Sala mi mantuhai chun, "In Zion hla pakhat bêk, Mi sakpêk ro" ti'n an ngên; Mi nêksawrtuhan hlim zâi, Vawr dingin an mi phût bok. 4 Ieng tin am singkhuol ramah, LALPA hlà sak lul kan ta? 5 Aw Salem, ka nghil che chun, Ka kut chang hin a thil thiem, Arêngin theinghil raw se, 6 Ka lo theinghil pal che a, Jerusalem nêka hlut, Thil dang ka nei ngai hrim chun, Ka lei ka dangah kop sien. x 7 Jerusalem siet ni a, "Sukchim ro, sukchim vong ro, A lungphum chen sukchim ro"Tia Edomhai khêk kha, Theinghil ngai naw rawh, LALPA. 8 Siet hmasuon zing, Babulon, Ka chunga i thaw anga, Rultu che chu a hlim awm! 9 I nautehai làkpêk a, Lung vuoknaa hmangtu chu, A va hlim nasa awm de!

Psalms 138

1 Ka lungril po poin LALPA, Lawmthu ka hung hril chê a nih. Hnam dang pathienhai hmaa khom, Nangma inpâkin hla ka sak. 2 I tempul thienghlim tieng nghain, Hung chawibiek rop ka ti che a, I zàngàina le ringumnaLeiin i hming inpâk ka tih, Iengkim chungah i thu le hming, Nangin i chawi sâng ta si a. 3 Ka ko chein, i mi don a, Mi sukhuoiin i mi sukhràt. 4 Hnuoi lalhai po poin LALPA, angma chu inpâk an ti che, I bàu suok an hriet ta leiin. 5 LALPAN thil a thaw dânhai chu, Inpâkin zâi rem raw hai se, LALPA chu a ropui si a. 6 LALPA chu ropui hle sienkhom, Mi hnuoihnunghai a ngàisak a, Mi chapo ruok chu a'n chik vong, Ràl hla taka inthok khomin. 7 Buoina kàra ka'n lèng lai khom, Ka hringnun i humhim hlak a, mêlma lungsen hung inthok chu, I kut pharin i vai kieng a, I kut chang tiengin i mi san. 8 LALPA, i ngilnei kumkhuo a, I kut sinthawhai hi LALPA, Tawpsan loin sunzom pei rawh. Ka ta dinga LALPA ruot chu, Amain hung hlen suok a tih.

Psalms 139

1 Aw LALPA, nang chun ngun takaMi dap suokin i mi hriet vong. 2 Ka thung ka ngîrhai i hriet a, Ràl hla taka inthok khomin, Ka ngàituohai i hmu tlang vong. 3 Ka fèna le ka chawlna hai, Nangin iengkim i hmu vong a, Ka um dàn po po i hriet chieng. 4 Ka hril hma khomin aw LALPA, Ka hril ding po po i hriet vong. 5 Ka hma thuoiin ka hnung i dâl, I kutin i mi hum tlat hlak. 6 I mi hriet chîk dàn makzie hi, Ka ta di'n sui suok ruol an nawh. 7 I Thlarau kuoma inthokin, Khaw lai am fe hmang thei ka ta?I hmu phàk loah khaw lai am, Tlân hmang thei hrim hrim ka ta le? 8 Vànah lawn lang, nang i um a, Seolah zâlna zu rem lang, Chu taka khom chun i um si. 9 Zîng thla putin inlêng lang khom, Tuipui kilah hmun khuor lang khom, 10 I kutin mi lo thuoi i ta, I chang tieng chun mi chel i tih. 11 "Inthimin mi thup tlat a ta, Ka vêla varhai chu zànin, Inchang a tih" ti ding ni lang, 12 Thim chu i ta di'n thim an nawh, Zàn hi sûn angin a var a, Thim le var hi i ta dingin, Thil thuhmun char an ni si a. 13 Ka taksa bung tin i siem a, Ka nu sûlah i mi rem khawm. 14 Mak tak le râpum taka siem, Ka ni leiin lawmthu ka hril, I thilthaw makzie ka hriet chieng. 15 Arûka siem ka ni lai a, Hnuoi rila i mi rem khawm lai, Ka rùrêl iengkim i lakah, Thup hrim hrim a um dèr naw kha. 16 Ka ruongâm la kim lohai chu, I mitin i hmu fai vong a, Ka nihai an tan hma daiin, Ka dam sûng hun dinga ruot chuI lekhabuah a chuong vong. 17 Aw Pathien, i ngàituona chu, Ka ta dingin a va hlu de!A rêng lem chun, a ropuiin, A va hang nasa awm de aw! 18 Tiem ding ni lang, a tam tieng chuPhaiphin nêkin tam dai a tih. Tiem zo ding chun, i dam kum zât, Keikhom ka dam ve ngai a tih. y 19 Mi rilohai hi aw Pathien, Sukbohmang tawl la ka ti de!Nangni thisen insuo hmanghai, Hla takah mi zamsan dai ro. 20 Suol takin an hril siet che a, Dotuhan i hming an hmang suol. 21 A theidàtu che chu LALPA, Ka theidà ve naw am a ni?I chunga helhai chu LALPA, Ka tirdak tawl naw am a ni? 22 Theidà takte'n ka theida a, Hmêlmaah ka ruot tawl a nih. 23 Aw Pathien, mi dap fai kêl la, Ka lungril hi hre tlang vong rawh. Ka ngàituona po po fie la, Nangin iengkim hre fai vong rawh. 24 Keimaa hin rîtlona hrim, A um le um naw en chieng la, Chatuon lampuiah mi thuoi rawh.

Psalms 140

1 Mi suol lak a'nthok LALPA, Nangin mi hung san suok la, Mi nun rawnghai laka chun, Nangin mi hung humhim rawh. 2 An lungrilin ieng lai khom, Thil suol thaw an tum zing a, Ni tin buoina an chok suok. 3 An lei rûl lei ang a ngei, An hmûr rûl tûrin a sip. 4 Mi suol lak a'nthok LALPA, Nangman vêngin mi hum la, Mi sukthlu tum nunrawnghaiLaka inthok mi hum rawh. 5 Chapohan mi awk tumin, A rûkin châng an kam a, Ka khàn hrawah lên zarin, Lampui tluonin châng an kam. 6 "Ka Pathien chu nang i nih"Tiin LALPA ka hril a. Aw LALPA, zàngàina hni'n, Ka ko che, mi ngàithla rawh. 7 Aw ka Lal le ka Pathien, Sandamtu hrât le ka phaw, Dorâl laka mi humtu- 8 Mi suolhai duthusam chu, Inhlawtling tir naw LALPA; An tum i'n hlawtlingtir chun, Chapo pal hlauh rawi an tih. 9 Mi'n huoltuhai lu chungah, An mi vauna chu tla sien; 10 An chungah meiling sûrin, Khuorkhurûmah tla sien la, Hung suok nawk ta naw raw se. 11 Mi sietna hriltuhai chu, Hnuoia hin hlawtling naw sien, Nunrawnghai chu sietnain, Hnotin nang chîng tawl raw se. 12 Mi retheihai chu LALPAN, A tan rop hlak ti ka hriet, Pasiehai ta dingin ro, Indik takin a rêl hlak. 13 Mi indikhai chun lawmin, I hming inpâk ngei an ta, Mi nun ngîlhai i bulah, Chêngin khawsa hlak an tih.

Psalms 141

1 Aw LALPA, ka ko che hi, Ka kuom tieng hung inhmaw la, Ka kona rawl ngàithla rawh. 2 I hmaah ka tongtaina, Rimtui inhnik chang sien la, Ka kut phar hi zàn tiengaThilhlân angin lo pom rawh. 3 Aw LALPA, ka bàu vêng la, Ka hmûr inkhap khom vêng rawh. 4 Ka lungril hin suolna tieng, Awn lo dingin vêng tlat la; Mi suolhai lai inzêl a, Suol thaw dingin phal naw la; Mi suolhai ruoi thênaah, Ka kîl ve phal bok naw rawh. 5 Mi fel le mi indik chun, Vawin mi thunun raw se; Mi rilo ruok chun hriek khom, An mi nàl ka nuom dêr nawh, An thil thawhai chu do a, Tongtai zingtu ka ni si. 6 Rawlah an rorèltuhai, Nam thlâka an um pha chun, LALPA thu lo indikzie, Mi rilohan hrieng an tih. 7 Leilettun lei an let a, Pil a hrût dar phung ang hin, An rùhai thlàn ko tlângah, La'n chek dar nuoi vèng a tih. z 8 Aw ka LALPA le Pathien, Nang chauh ka en zing che a, Nangma ka hung bêl che a, Saruokin mi mâksan naw. 9 Ka awkna dinga an kam, Mi suolhai châng a'nthok chun, Nangin mi hung vêng him rawh. 10 Keiin ka pumpel laiin, Mi suolhai chu an chângah, Inawk vong lem raw hai se.

Psalms 142

1 LALPA ka ko, inring takin, Rawl tawp suoin, LALPA kuomah, A zàngàina chu ka hni a. 2 Ka nuorna a hmaah ka'n tlun, Ka buoina khom ka'n tlun bok a. 3 Ka thlarau a hung ngûi pha khom, Nangin ka um dàn ding i hriet. Ka lampui hraw dinga hai chun, Hmêlmahan châng an kam rûk a. 4 Ka chang tieng ka hei ngha vêl a, a Mi ngàisaktu hrim an um nawh. Bêl ding tu khom ka hmu naw a, Mi ngàiven tu khom an um nawh. 5 "Nang chauh hi i nih ka'n bîkna, Hring khawvela ka chanpuol chu"Tiin aw LALPA ka ko che. 6 Ka kona rawl lo ngàithla la, Thangpui ka ngài takmeu a nih. Mi hnot thlûrtuhai laka chun, Nangman mi hung san suok ngei rawh, Keima nêkin an hrât si a. 7 I hming ka chawimawi theina di'n, Tàng in a'nthok mi thuoi suok la, Ka chungah i that êm leiin, Mi felhan mi ngîr huol an tih.

Psalms 143

1 LALPA, ka tongtai ngàithla la, I ringum leiin ka hnina, I na sitin ngàithla hrâm la, I'n dik leiin mi hung don rawh. 2 I siehlaw chungah rorêlna, Potchat inhmawpêk naw hràm rawh, I hmaah hringmi tu el khom, Thiem chang thei ding an um si nawh. 3 Hmêlmain a mi pêl zing a, Thè thluin a mi sop ziel a, Tiena tlânga fam tah angin, Hmun thim a mi'n nghâktir a nih. 4 Chuleiin ka thlâ a ngui a, Ka lungril a chi-âi a nih. 5 Hun liem ta hnung ka thlîr kîr a, I thilthawhai sui neu neuin, I kutsuokhai ka dawnkhawl hlak. 6 I tieng ka kut ka hung phar a, Hnuoi chàr, tui ngaia dang inhilAngin ka thla hin a ngai che. 7 Aw LALPA mi hung don vat rawh, Ka thlá a chau hâwp a ni hi!Ka lakah i hmêl thup naw rawh, Chuong an naw chun khuorkhurumaTla ang el ka ni ding a nih. 8 I hmangaina chuoi ngai lo chu, Tûk tinin mi'n hriet nontir la, Ka ringsan tak chu nang i na, Ka lam hraw ding mi kawkhmu rawh, Ka thlá i tieng a hung ngha hi. 9 Ka hmêlmahai kut a'nthokin, LALPA, nangin mi san suok la, Nang chu ka'n bîkna i ni si. 10 I ditzawng thaw mi'n chûktir la, Nang chu ka Pathien i ni si. I thlarau ditum tak el chun, Lam tluong zâlah mi thuoi pei rawh. 11 I hming leiin aw ka LALPA, Ka hringnun hi mi humpêk la, I felnain buoina tinrêngA'nthok nangin mi san suok rawh. 12 I hmangaina chuoi ngai lo chun, Ka hmêlmahai vaw dei vong la, Mi dotuhai sukchimit rawh, Nangma siehlaw ka ni si a.

Psalms 144

1 Ka Lungpui LALPA inpâk ro, Indo dàn a mi'n chûktir a, Râl tawn dàn a mi'n chûktir bok. 2 Ka Pathien dit, ka kulpui nghet, Ka kulbing sâng, ka'n humhimna, Ka phaw le ka himna a na, Hnam danghai le ka mihai khom, Ka thuhnuoia sietu a nih. 3 Mihriem hi iem a na LALPA, I ngaituo êm êm hlak a na?Mihriem naupa khom iem a na, Hieng ang khopa i'n voi el hi? 4 Mihriem hi thuok ang chauh a na, A dam sûng khom hlim thlâ anga, Ral nawk el hlak ang hi a nih. 5 Aw LALPA, vànhai kei kûr la, Nang khom hnuoiah hung tum thla la, Tlânghai them la, khu lui lui sien, 6 Têkin hmêlmahai dêng dar la, I thal kâp la, tlân se raw se. 7 Vàn sânga inthok zuk ban la, Tuipui inthûka inthokin, Mi la suokin mi san him rawh, Hnam danghai kuta inthokin. 8 Chuong mihai chu an khêlhlip a, Inhlêmnan kut chang tieng an phar. b 9 Tingtang hrui sawm rimawi remin, I ta din hla thar sak ka tih; 10 Lalhai kuomah hnènâ i pêk, I siehlaw Davida ngei khom, Kawlhnâm ngei a'nthok i san him. 11 Hnam danghai kuta inthokin, Mi san suokin mi hum him rawh. Chuong mihai chu an khêlhlip a, Inhlêmnan kut chang tieng an phar. 12 Kan naupahai tleirawl hunah, Thing tuoi ang inthang duong hai sien, Kan naunuhai khom lal in ban, Mawi taka ker ang ni raw se. 13 Kan bu inhai chu vûm hnûrin, Thlai rà tinrêngin sip sien la, Kan rama kan beramhai khom, A sâng a sîngin pung hai sien, 14 Kan bawngchalhai thau tha raw se. Hlamzuia pieng um naw hai sien, Kan kotthlêrah beidong khèk ri, Hriet ni naw hrim hrim bok raw se. 15 Chuong anga malsawmna dongtu, Hnamhai chu an va hamtha de!Pathien, LALPA-a neitu chu, Hnam vângnei le hamtha an nih.

Psalms 145

1 Chawimawi ka che, ka Lal Pathien, Kumkhuon i hming inpâk ka tih. 2 Ni tinin inpâk ka ti che, Kumkhuon i hming chawimawi ka tih. 3 LALPA chu a ropui êm a, Inpâk chungchuong ding hrim a nih, A ropuizie sui phâk an nawh. 4 Thang tinin i thilthawhai chu, Ruoltharhai hril sawng pei an ta, I thaw ropuizie puong an tih. 5 I mawi ropuizie hril an ta, Keikhom i thilthaw makziehai, Sûtin dawnkhawl ve hlak ka tih. 6 I thaw ropui le râpumzie, Mihaiin puong dar tawl an ta, I ropuizie hril vêng ka tih. 7 Thatna i hauzie chu lawmin, Hlim takin tlâng làmpui an ta, I'n dikzie hi khêkpui an tih. 8 LALPA chu lainatna hau tak, Mi ngilnei le lung inuoi tak, Hmangaina tawp lo nei a nih. 9 Mi tin chungah LALPA a tha, A thilsiem po po hai khom hi, An rêngin a lunginsiet vong. 10 Aw LALPA i thilsiemhaiin, Lawmthu hrilin, inpâk an che, I mi thienghlim po po khomin, Inpâkin chawimawi an ti che! 11 I lalram ropuizie hrilin, I thilthawtheizie puong an tih. 12 I thilthaw ropuiziehai chu, Mihai kuomah puong dar an ta, I ram ropuizie hril an tih. 13 I ram chu kumhlun ram a na, I lalram khomin suon tin a daih. A thutiemah LALPA a ringum, A thilsiem chungah ngil a nei. 14 Tluhai chu LALPAN a tungding, Indom kûnhai chu a kei har. 15 Nangma thlîrtuhai po po chu, A hun takah fâk ding i pek. 16 I kut phara i hang hrài chun, Hring tinrênghai an tlai seng hlak. 17 Kong iengkimah LALPA a'n dik, A thaw taphotah ngil a nei. 18 Ama kotu taphot kuomah, LALPA chu a hnâi zing hlak a, Titakzeta kotu kuomah. 19 Ama tituhai ditzawng chu, A sukhlawtlingpêk ngei hlak a, An rawl hrein a san him hlak. 20 Ama hmangaituhai po chu, LALPAN a vêng him tlat hlak a, Mi suolhai chu sukbo a tih. 21 LALPA inpâkna thuhai chu, Ka bàuin puong suok hlak a ta, Thilsiem tinin a hming thienghlim, Kumkhuoin inpâk raw hai se.

Psalms 146

1 Haleluia, Aw ka hringna, LALPA chu inpâk rawh. 2 Ka dam sûng po LALPA inpâk ka ta, Ka damlai ni hi a tlàk hmâ khat chu, Ka Pathien chawimawiin hla sak ka tih. 3 Lalhai chungah ringna innghat naw rawh, Hringmihaiin an sandam thei naw che. 4 An thuok tawp phâ pilah an kîr nawk a; An thil tum khom iengma lo a chang hlak. 5 Jakob Pathien, thangpuitua nei a, LALPA a Pathien chunga beiseina, Innghat hlaktu chu mi hamtha a nih. 6 Ama chun hnuoi le vànhai a siem a, Tuifinriet le a sûnga umhai leh. A thu chu kumkhawtluongin a vong hlak. 7 Nêksawrhai thu fel taka rêlpêkin, Phingtâmhai kuomah fâk ding a pêk hlak. LALPAN intânghai po po khom a'n suo. 8 LALPAN mitdelhai mit a sukvarpêk. LALPAN lungngaia kûnhai a kei har. LALPAN mi indikhai chu a hmangai. 9 LALPAN mikhuolhai chu a vèng hlak a, Fahra le hmeithai hai a somdawl a, Mi suolhai lampui ruok chu a khârpek. 10 LALPA chu kumkhuoin inlal a tih, Aw Zion, suon tina i Pathien chu. Haleluia.

Psalms 147

1 Haleluia. Zâia Pathien chawimawi a va tha de!Inpâk a phu, chawimawi an hoi bok si. 2 LALPAN Jerusalem a'n din thar a, Israel tlân darhai a thuoi khawm a. 3 Lungril na ngawi ngawihai a thawi dam a, An hliemhai chu puonin a tuompêk hlak. 4 Arasi um zàt a hriet fai vong a, An rêngin an hmingin a ko seng a. 5 Ei LALPA chu a ropui êm êm a, Thilthawtheina mak takin a sip a, A hrietthiemnan tawpintai a nei nawh. 6 LALPAN inngàitlawmhai a chawisâng a, Mi suolhai chu hnuoiah a thè thlûk hlak. 7 Lawm hla sakin LALPA inpâk unla, Tingtang leh ei Pathien chu chawimawi ro. 8 Vànah sûm a zar, khuongruo an sûrtir, Tlânga hai hlo hna hring an mawngtir a, Mihriemhai fàk ding thlai hringhai chenin. d 9 Ramsahai pet ding hlo hnâ a pêk a, Vaâk te phingtâm inhrâm chen a chawm. 10 Sakor tha hràtna a ngaisâng naw a, Mihriem tha hràtna a ngaisâng bok nawh. 11 LALPA chun ama tituhai a lawm, A ngilneina beisei tlattuhai chu. 12 Aw Jerusalem, LALPA chawisâng la, Aw Zion, i Pathien chu inpâk rawh. 13 I kul kot kalna thîr tluon a sukdet, A sûnga chêng i mihai mal a sawm. 14 I ramrihai khom a sukrâlmuong a, Bu inhnik tak elin a chawm tlai che. 15 A thupêkhai hnuoi chungah a puong a, A thupêkhai chu an tlânpui nghal a. 16 Sahmul pha angin vûr a'n tlâktir, Vut anga paw uoiin zil an tlâktir. 17 Lungte angin riel an tlâktir chur chur, Thli dei hrâng chu tunam tuor zo an ta? 18 Thu a pêk a, vûr chu an tui ral a, Thli an hràngtir a, tui chu a luong a. 19 Jakob kuomah a thû chu a puong a, A dàn thusuokhai chu Israel kuomah. 20 Chu chu hnam danghai lai a thaw ngai nawh, A thurêlhai khom an hriet ngai bok nawh. Haleluia.

Psalms 148

1 Haleluia. Vàn a'nthok LALPA inpâk unla, Chung tieng khin ama chu inpâk ro. 2 Angelhai, ama inpâk unla, Vàn mihai, ama chu inpâk ro. 3 Ni le thla hai, ama inpâk ro, Si-âr lênghai, ama inpâk ro. 4 Chung vàn sânghai, ama inpâk ro, Chung vàn tuihai, ama inpâk ro. e 5 LALPA hming chu inpâk raw hai se, Thu a pêk a, siemin an um a. 6 An hmun sengah kumkhuon a'n nghat a, Ramri hlunhai a khangpêk vong si. 7 Leihnuoi a'nthok LALPA inpâk ro:Tuifinrieta thilhring tinrênghai, 8 Kawlphê le riel, vûr le sûmpui hai, Thlipui tium, a thu awituhai, 9 Muol le tlâng, thei kung le sidar hai, 10 Ramsa kol le ran sa tinrêng hai, Thilhring chîn le chung lèng vatê hai, 11 Hnuoi lalhai le hnam chi tinrênghai, Rêngtehai le hnuoi rorêltuhai, 12 Nunghâk tlangvâl, naupang le tar hai, 13 LALPA hming inpàk seng raw hai se, A hming chau hi a mawi chungchuong a, A ropuinan hnuoi le vàn a khûm. 14 A mihai ta di'n kíf a'n din a, A mi thienghlimhai a chawimawi a, A lungdit Israel mihai ngei chu. Haleluia.

Psalms 149

1 Haleluia. LALPA chawimawiin hla thar sak ro, Mi thienghlim inkhawmah inpâk ro. 2 A Siemtu chungah Israel hlim sien, Zion nauhan an Lal lawm raw se. 3 Lâmin a hming inpâk hai sien la, Khuong le tingtang leh inpâk raw se. 4 A mihai chungah LALPA a lawm, Inngàitlawmhai chu a sandam hlak. 5 Hi chawimawina chunga hin lawmin, Mi thienghlimhan khum laizawla chen, Hlim takin zâi hla sak raw hai se. 6 Inring taka Pathien inpâkin, An kutah kawlhnâm ngei ton chawiin, 7 Hnam danghai chungah phuba la sien, Mihai chu thununin hrem tawl sien, 8 An lalhai chu khaidieta khitin, An hotuhai kol inbuntirin, 9 An chungthu rêl tah chu hlen raw se-A mi thienghlimhai ropuina di'n. Haleluia.

Psalms 150

1 Haleluia. A chèngna hmun thienghlimah, Pathien chu inpâk unla, A vàn sâng ropuia khin, Ama chu inpâk seng ro. 2 A thilthaw ropui leiin, Ama chu inpâk unla, A ropui chungchuong leiin, Ama chu inpâk seng ro. 3 Tawtawrawt leh inpâkin, Perkhuong tingtang leh remin, Ama chu inpâk seng ro. 4 Khuongtê bena hrâng lâmin, Ama chu inpâk unla, Tingtang le theihlê tumin, Ama chu inpâk seng ro. 5 Dârbenthek ben thek thekin, Dârbenthek tuvû chi leh, Ama chu inpâk seng ro. 6 Iengkim a'n thuok taphotin, LALPA chu inpâk raw se. Haleluia.

Proverbs 1

1 Israel lal Davida naupa Solomon thuvarhai chu: 2 Varna le inchûktirna tha dong theina ding le thu inril hriet thiem theina ding dâm, 3 Var taka khawsak dàn dâm, indik tak le thlei bîk nei loa ro rêl thiem theina ding dâm, 4 Mi mawlhai sukvar a, hrietna le fîmkhur taka remruot thiemna thalaihai pe ding dâm, 5 Mi varhan ngàithla a, hrietna an sukpungna ding dâm, hrietthiemna nei mihaiin thuoitua an hmang theina ding dâm, 6 Thuvar hai, tekhinthu hai, mi varhai thu le hla khirh hai an hriet thiem theina ding dâmin. 7 LALPA ti hi hrietna tobul a nih, Mi invêthai ruok chun varna le inchûktirna chu an hmusit hlak. 8 Ka naupa, i pa zirtirnahai che hi ngàithla la, I nu inchûktirna khom nghatsan naw rawh. 9 I lu cheimawitu tonlairang nîng a ta, I rîng mawitu thî ni bok a tih. 10 Ka naupa, mi suolhai zawr thlûkin um naw rawh. 11 "Hung rawh, thisen insuo dingin, Anni chu inchân ei ta, Poi tawk lohai chu lambun ei ta, 12 Thlàn ang elin anni rawi chu, A hring pumin dol vong ei tih, Khuorkhurûma tlahai ang elin; 13 Ro hlu tam tak hmûng ei ta, Ei thil rokhaiin ei inhai sungsip ei tiu; 14 Keini tieng hin hung thang la, Poisa bawm intâwm ei tiu"Tia an zâwr chê khomin, 15 Ka naupa, anni lai thang ve naw la, An lampui hraw ve naw rawh. 16 Thil suol hnotin ke an pên a, Thisen insuo dingin an kut a tuonrang. 17 Vatêhai hmù lai zing a, Lèn châng kam chu a hlawk nawh. 18 Chuong mihaiin an inchân chu, Anni thisen bok a na, Mani inlambun an nih. 19 Hlawkna indik lo hnottuhai chu, Chuong ang chu an tawpna a nih, A neituhai hringna ngêi a làkpèk hlak. 20 Kotthlêr le tuolzawla hai, Varna chun tlâng a'n sam a; 21 Kotthlêr lûn lai a khêk a, Khawpui kotsuoah thu a hril: 22 "Mi mawlhai, ieng chen top am, In la mawl zing ding a na?angni varna deusawtuhai, Ieng chen am in deusaw ding? 23 Ka zilna cheu ngàithla unla chu, Ka lungril nangni tieng hongin, Ka thu ka hril ding cheu a ni bah! 24 Kuta hûiin ka ko cheu a, In mi ûksak nuom si nawh. 25 Ka thurawn la nuom lo a, Ka zilna in pom naw leiin, 26 Siet in tuok pha leh innui ka ta, Vàngduoinan a tlâkbuok pha cheu, Ka nuisaw ve ding cheu a nih; 27 A nih, thlipui anga a nuoi pha cheu, Thawngaleivir anga a làk pha cheu, Lungngai buoinan a chìm pha cheu, 28 Mi ko in ta, don naw ning cheu; Mi zong in ta, mi hmu naw ti niu. 29 Hrietna chu in theida a, LALPA in ti nuom naw a, 30 Ka thurawnhai pom nuom lo a, Ka zilnahai in hmusit leiin, 31 In nun rà chu fa tâng in ta, In remruot chun insukkhop in tih. 32 Mi mawlhan an mawl invaina, An la thipui ding a na, Invêthan an ngai sukngamna, An la sietpui bok ding a nih. 33 Ka thu ngàitu chu him a ta, Sietna hrim hrim ti ve loin, Lungmuong takin khawsâng a tih.

Proverbs 2

1 Ka naupa, ka thuhai hi pom la, 2 Varna tieng i na daw la, Hre thiem dingin i lungril pe rawh. 3 Thu ril hriet theina chu zong la, Hriet thiem theina hni hlak rawh. 4 Tangkaruo anga zonga, Ro phùm rûk anga i dap chun, 5 LALPA ti nachang hung hre-in, Pathien hrietna man suok i tih. 6 Varna petu chu LALPA a na, Hrietna le hmu fûk theina chu, Amaa inthoka suok a nih. 7 Mi ngîlhai ta dingin hlawtlingna, A lo sêk khawmpêk hlak a, Indik taka kalchawituhai ta din, Ama chu an phaw a ni bok. 8 Mi indikhai kalchawi a vèngpêk a, Ama ringtuhai lampui a hum hlak. 9 Chuongchun, thil fel, indik le inlai, Lampui tha tinrêng hung hrieng i tih. 10 Varna chu i lungrilah hung lût a ta, Hrietna chun i nun sukinhoi a tih. 11 Fimkhur thiemnan enkai a ti che a, Hrietthiemna chun vêng a ti che. 12 Mi rilohai lampuia inthok le Thu teplo hril hmanghaia inthokin, Varna chun san suok a ti che. 13 Anni chun lam ngìl pètsanin, Lampui inthimah an lùt a; 14 Thil tha naw thaw an hlimpui a, Suol hèm kawia um an lawm bok. 15 An lampuihai a kikawi a, Suol tieng awn tlat mi an nih. 16 Kam thluma lawithlèmtu che, Nuhmei suol lakah vêng a ti che; 17 Pathien hmaa a thu tiem ngainêp a, A vàng lai koppui lêrsantu a nih. 18 A in tieng pan chu thìna a na, A lampui chun mithi khuo a sun. 19 A in pantuhai chu tu khom, An hung kîr nawk tah ngai naw a, Hringna lam an paw ta ngai nawh. 20 Mi thahai lampui chu hraw la, Mi felhai lampuiah kal chawi rawh. 21 Mi ngîlhai chun ram hluong an ta, Dem kai lohai chu chêng zing an tih. 22 Mi rilohai chu sàt thlâk nîng an ta, Phatsantuhai chu phawi hmang nîng an tih.

Proverbs 3

1 Ka naupa, ka zirtirna hi theinghil naw la, Ka thupêkhai i lungrilin vong tlat rawh. 2 Chuongchun sawt tak dam i ta, Vàngneina vûrin um i tih. 3 Hmangaina le ringumnahai, Inthlà ngai hrim hrim naw la, I rîngah hlì zing hlak la, I lungril phêkah ziek rawh. 4 ​Pathien le mihriemhai lakah, Ditsakna le hming tha hlawng i tih. 5 I lungril po poin LALPA ring la, I hrietnaah innghat naw rawh. 6 I thilthaw taphotah ama hre la, I lampui suktluongpêk a ti che. 7 Mani var inti ngai naw la, LALPA tì la, suol màksan rawh. 8 I taksa'n hrisel phang a ta, I rùhai khom sukhràt a tih. 9 I thil neiin LALPA chawimawi la, I tharsuok hmasahai po po khomin; 10 Chuongchun, i bu in sung vûm a ta, I dawnbèl uoiin tharin sung sip a tih. 11 LALPA thununna chè chu, Ka naupa, ngainêp naw la, A zilna chè khom theidà naw rawh. 12 Pain a nau dit a thunun angin, LALPAN a hmangaihai a zil hlak. 13 Varna hmu phâktu chu a hamtha, Hrietthiemna nei phâktu khom. 14 Tangkaruo nei nêkin a hlawk a, Rangkachak nêk daiin a hlu lem. 15 Lunghlu rubi nèkin a hlu lem a, Duthusàm ieng khomin a tluk nawh. 16 A chang tieng dam sawtna a um, A voi tieng hausakna le ropuina. 17 A lampuihai chu a hlimum a, Thlamuongna lampui vong a nih. 18 A cheltu din hringna thing a na, A pomtu taphot hamthâng an tih. 19 LALPA chun varna hmangin, Leihnuoi bulthut a phûm a, Hrietna hmangin vànvèl a'n din. 20 A hrietnan li inthûkhai a sukthe a, Sûm hmangin daidaw a'n tlâktir. 21 Bûk thiemna le fimkhur thiemna, Ka naupa, vong tlat hlak la, I hmu phâk loah inthlà naw rawh. 22 I nun sukhringtu nîng a ta, I rîng cheimawitu ni bok a tih. 23 Nghet takin kal chawi i ta, I sir inphet ngai naw nih. 24 Ti loin zâl hmun rem i ta, Imu inhnik takin in i tih. 25 Mi suolhan sietna an tuok ang, Tuok ve thut inlau naw rawh. 26 LALPAN vêng tlat a ti che a, I ke chânga awk phal naw nih. 27 I thaw thei thil a ni phot chun, Mamawhai pêk di'n i thil tha nei, Inro ngai hrim hrim naw rawh. 28 Nuoma i pèk thei zing si, "Zîngah hung la, pêng ka ti che"I tuolbawm kuomah ti naw rawh. 29 Ngàingam taka i bula um, I tuolbawm phier rûk naw rawh. 30 I poi ieng khom tawk lohai chu, A san boin hêk ngai naw rawh. 31 Mi nunrawng inhnar naw la, A lampui hraw ngai naw rawh. 32 LALPAN mi lûtinle a theida a, Mi ngîlhai ruok chu a ringzo. 33 Mi rilo sûngkuo chungah, LALPA tongsie a fu a, Mi fel sûngkuo chunga ruok chu, Malsawmna a vur lem hlak. 34 Chapohai chu a hmusit a, Inngàitlawmhai zàngàina a pêk. 35 Mi varin chawimawina rochung a ta, Mi invêtin muolphona chang a tih.

Proverbs 4

1 Ka nauhai, in pa zirtirna hi ngàithla unla, Hre thiem dingin ngaiven tha ro. 2 Inchûktirna tha ka pêk cheu hi, Ka zirtirna nghatsan naw ro. 3 Ka pa inah tlanglakte ka ni lai, Ka nu nau mal duot ka nih. 4 Hieng hin ka pa'n a mi zirtir a:"Lungrilin ka thuhai hi vong zing la, Ka thupêkhai zawm la, hringpui i tih. 5 Varna nei la, hrietthiemna nei rawh; Ka thuhai hi theinghil naw la, Pètsan ngai hrim hrim naw rawh. 6 Varna nghatsan ngai naw la, Humhim a ti che a; Ngàina rop hlak la, Vêng zing a ti che. 7 Varna nei hi a poimaw tak a, Chuleiin, varna nei rawh; Thil dang ieng po nêk khomin, Hrietthiemna lungvar chu thlang rawh. 8 Ngàihlu la, chawisâng a ti che, Pom la, chawimawi a ti chê. 9 Tonlairang intontir a ti che a, Lallukhum ropui inkhumtir a ti chê. 10 Ka naupa, ka thu ngàithla la, Ka thu hril che hi pom tlat la, Chuongchun dam sawt phàng i tih. 11 Varna lampui ka kawkhmu che a, Lam ngîlah ka thuoi che hi. 12 I pheikhài sukzâng a ta, Tlân rak la khom tlu naw ti nih. 13 Ka zirtirna hi chel tlat la, Inthlàdà ngai dèr naw rawh; Vong tlat rawh, i hringna a nih. 14 Mi rilohai lampui sir naw la, Mi suolhai lampui hraw naw rawh. 15 Pumpel la, hraw naw rawh, Nghatsan la, i lam hrawa chun fe rawh. 16 Suol thaw lo chun an in thei naw a, Mi an sukthlûk hmâ khat chu, An imu hrim a suok thei nawh. 17 Rîtlona hi an bu ring a na, Nunrawngna hi an uoiin a nih. 18 Mi felhai lampui ruok chu, Zîng ni zung ang hi a na, A hung êng zuol deu deu a, Nisa a hung suok ang hi a nih. 19 Mi suolhai lampui ruok chu, Thim sà tak ang hi a na, An insuina khom an hriet nawh. 20 Ka naupa, ka hril hi ngàiven la, Ka thuhai hi ngàithla ngun rawh. 21 Hmû phâk loah inthlà naw la, I lungrilah vong tlat hlak rawh. 22 A hmutu ta di'n hringna a na, A taksa ta di'n hriselna a nih. 23 Thil dang po po nêk khomin, I lungril vêng fimkhur rawh, Hringna hnâr a ni si a. 24 Tong chaltlài hmang ngai naw la, Thu porchè hril bànsan rawh. 25 Hma tieng tlûn takin en la, I hma zawn bi ngar ngar rawh. 26 I lampui ding en ngun la, I kalchawi khom tluong a tih. 27 Voi tieng chang tieng pêt naw la, Suol lakah i kè vêng tha rawh.

Proverbs 5

1 Ka naupa, ka varna thu hi ngàiven la, Thu ril ka hril hi ngàithla rawh, 2 Fîmkhur thiem theina nei a, I hmûrin hrietna a vong theina dingin. 3 Uire nu hmûrah khuoizu a far a, Sahriek nêkin a dang a'n nàl lem. 4 Sienkhom, a tawp tieng ruok chu, Sairam khâkin a tong a kha a, Kawlhnâm ngeituo angin a ngei. 5 Thìna tieng panin ke a pên a, A lampui chun thlàn khur a sun. 6 Hringna lam hraw a tum naw a, Lam kikawi indik lo a hraw a, Ama hlak chun a hriet si nawh. 7 Chuong chun tu hin ka naupahai, Ka hril cheu hi ngàithla unla, Ka hril cheu hi pêtsan naw ro. 8 A kawl hnaiah fe naw unla, A tuol kot khom va hnai naw ro. 9 In hrâtna tak chu mi dang pein, Nunrawng kutah thi pal rawi in tih; 10 Mi dangin in hausakna tlân an ta, Mi insûng ta dinga inrim ni rawi in tih. 11 In taksa le thá zûr hnungah, In thi tawm ruoiin inrûm in ta, 12 " Thununna ngài thei lo a, Zilna ka lo hnawl el kha aw! 13 Mi zirtirtuhai thu zawm lo a, An zirtirna ka ngàithlàk naw leiin, 14 Vàntlâng pungkhawmhai hmaah, Ka se let dèr an ta hih" la tîng in tih. 15 I tuibêla tui ngei chu tlàn rawh, I tuikula tui tharlâm ngei chu. 16 I tuikhur chu kotthlêrah luong suokin, Tuol zawlah a luong dar ding maw? 17 I tuikhur chu nangma tlân ding chauh ni sien, Mi dang leh intawm naw ro. 18 I tuikhur chu malsawmin um sien, I vânglai nu-thâia chun hlim rawh. 19 Zukpui sen anga ditum, Zuk latuoi anga nal chun, A tângah inbei tlaitir rop sien che, A hmangainan hîp tâng zing che raw se. 20 Ieng leiin am nang ka naupa, Uirenu zùnah intângin, Lawithlèmnu tàngah i'n bei ding a na? 21 Mihriem khawsak dàn po po hi, LALPA chun a hmu fai vong a, A lampuihai a enthlithlai hlak. 22 Mi rilohai chu an suolnan a awk a, An suolna hruolin a vêt tàng hlak. 23 In thununna tlasamin thîng a ta, An invèt bilingna chun fen hmang a tih. Fîmkhur ngàina dang

Proverbs 6

1 Thu intiemkamI tuolbawm aia tuor intiem a, Hmêlhriet lo leiba rulpêk dinga, Dakhama i lo insiem a ni chun, 2 I bau ngeiin i lo inhril awk a, I thu suoka i lo inkhit a ni chun, 3 I tuolbawm kutah i awk hrein, I hung intàl suok theina dingin, Ka naupa, hieng hin thaw rawh:Fe la, a kuomah inphàhnuoi la, I thû i sùt phalpèk hràm dingin, I tuolbawm chu thlût ngat ngat rawh. 4 I mit insîm hrim hrim naw la, I mit vun insîntir naw rawh. 5 Sapêltu hmaa sakhi a tlân suok ang le, Vate vètu laka vate a vuong suok angin, Nang khom intâl suok ngei ngei rawh. 6 Nang thabo, phaivàng kuomah fe la, An um dànhai ngàituo la, var rawh. 7 Lal le hotu an nei naw a, Rorêltu khom an nei bok nawh. 8 Nipuiah fâk ding an zong khawm a, Busîk hunah bu an sèk khawm hlak. 9 Mi thabo, ieng chen am i zâl ding?I zâl chu ieng tik a'm i tho ding? 10 'La hang zâl met ka tih, La hang inhnâr met ka tih, Kut hmasuiin, hadam takin, La'n zam met ka tih' i ti sûng khan, 11 Pasietna chun rûkru angin, Hung nang thut a ti che a, Tlâksamna khomin râl angin, Hung nangchîng thut a ti che. 12 Mi hmangna bo le khawlo chun, Thu vuongva a'n virpui a, 13 A mitin mi a siei khum a, A kèin mi a zàizir a. A kut chalin a khîk kuol a. 14 A lungril a lûtinle a, Suol thaw ding ringot a phan a, Innghirnghona a chok suok hlak. 15 Sietnain hung nang thut a ta, Siem that ruol lo sietnain, Thawk le khatah nang rup a tih. 16 Thil paruk LALPAN a theida a, Thil pasari a ten èm êm bok: 17 Mit chapohai, khêl hril hmang hai, Poi tawk lo mi that chîng hai, 18 Suol thaw ding phierrûk chîng hai, Suol thaw dinga ngal hrât hai, 19 Hrepuitu der, khel hril hè hai, Unau kâra innghirnghona tutu hai. 20 Ka naupa, i pa thupêkhai zawm la, I nu zirtirna che nghatsan naw rawh. 21 I lungrilah vong kumkhuo la, I rîngah zem tlat hlak rawh. 22 I kalchawinaah thuoi a ti che a, I in chàngin vêng a ti che a, I har pha leh inbiekpui a ti che. 23 Hieng thupêkhai hi khawnvar a na, Hi zirtirna hi var a nih. Inthunun dinga inzilna hi, Hringna lampui a nih. 24 Nuhmei khawlohai lakah leNu suol kam thlum lakah vèng a ti che. 25 A pangti mawina inhnar naw la, A mitin kuoi thlu naw raw se che. 26 Beiin nawchizor a'n chawk thei a, Uirenu ruok chun i hringna a pêl a nih. 27 Zakuo kàng loin meiling, Tuin am a pom thei a? 28 Kè kàng loin meiling chungah, Mi a lawn thei hlak am a ni? 29 Mi nuhmeihai suolpuitu chu, Chuong ang char chu a ni a, Hrem loin suok ngai naw nih. 30 Tâm leia thil inrutu chun, Endong a hlaw ngai naw a, 31 Man suok a ni phâ ruok chu, A lêt sariin rul a tih, A nei po hù khom lo ni sien. 32 Mi nuhmei uirepuitu chu, Hrietna tlasam mi a na, A nun a suksiet a nih. 33 Hliem le hming siet tuor a ta, Dam sûngin muolpho a ta; 34 Thîknan a pasal lung sukling a ta, Phuba a làk pha leh zà ngai naw nih. 35 Suma intlâk nuom naw ni a, Ieng zât pêk khomin lungawi naw nih.

Proverbs 7

1 Ka naupa, ka thuhai hi vong tlat la, Ka thupêkhai hi khawl khawm rawh. 2 Ka thupêkhai zawm la, hring i tih. I mit naulêng ang topin, Ka zirtirna hi hum tlat rawh. 3 I kutpâra hai zem tlat la, I lungril phêkah ziek rawh. 4 Varna chu, "Ka farnu i nih" ti la, Hrietthiemna chu laibungah nei rawh. 5 Uirenu lakah hum a ti che a, Lawithlêmnu lakah vêng a ti che. 6 Ka tukver zawngdaikal awngahTuol tieng saw ka hei thlìr a, 7 Mi mawl ruol lai tlangvâl pakhat, Lungvar tlasam hi ka hmu a. 8 Chu nu chèngna kotthlêr chu hrawin, A in tieng chu a pan a; 9 Unau hmêl hai lai hi a na, Thimin a hung nang mêk a. 10 Nawchizor thuoma inchei, Lungril vervêk tak put mi, Nuhmeiin a'n tuokpui a. 11 Nu zakmaw huoisâr a na, Inah a'n khum ngai naw a, 12 Kotthlêr le tuolzawla dâm, Kil tinah mi a'n chàn hlak. 13 Tlangvâl chu kuoin a fawp a, Hmai intìmna hrim nei loin, Tlangnêl takin a kuomah, 14 "Voisun inthawina ka'n hlân a, Ka thu tiem khom ka hlen tah. 15 Chuleiin, nang hmu dingin, Ka hung a, ka zong che a, Ka hmu ta che a ni hi! 16 Aigupta patzâia khawng, Khumpha mawi tak ka pha a, 17 Beraw, aloi, thingzungthak, Rimtuiin khum ka chûl a; 18 Hung rawh, zîng khaw var chenin, Hmangaina tuitling dawnin, Hmangaina nun chèn ei tih. 19 Ka pasal inah a um naw a, Ram hla taka inzin a nih. 20 Tangka ip sip a chawi a, Thla lir hma chu hung naw nih" a ta. 21 A kam thlumin a lêm hne a, A kam nâlin a zawl thlûk a. 22 Chuongchun a zui ta nghal a:That dinga bawngchal an kei angin, Sakhiin châng a sir chim a, 23 Thalin a lung a dawt tlang a, Vaten a thipui ding hre dêr loaChâng a baw ang el hi a nih. 24 Tu hin ngai ro, ka nauhai, Ka thu suok hi bengkhon ro. 25 Nuhmei tieng chun ngha naw unla, A lampui tieng invâk lût naw ro. 26 Mi tam tak a suksiet tah a, Sukhlum khom a hau ta hle. 27 A in chu Seol panna lam a na, Chu chun thìna pindan a sun.

Proverbs 8

1 Varnan tlâng a'n sam naw maw? Hrietna a khêk suok naw maw? 2 Lam sîr kho tlânga hai le Lam thuoma hai a ngîr a, 3 Khawpui kotsuo bula hai, A lûtna kotpuia hai chun, Inring takin a khêk suok a: 4 "Aw nangni mihriemhai hi, Ka ko khêk cheu a ni hi; In hriet dinga ka hril a nih. 5 Mi mawlhai, fîmkhur inchûk unla, Mi invêthaiin, hrietthiemna nei ro. 6 Ngai ro, thil tha hril ding cheu ka nei, Thu dik hril dingin bau ka phong. 7 Ka bauin thu dik a hril a, Ka hmùrin rîtlona a tirdak. 8 Ka bau suok thu a'n dik a, Thu kawi letling hrim a um nawh. 9 A hre thiemtu ta dingin, Thu indik a ni vong a, Hrietna neitu ta dingin, Soisel boa fie a nih. 10 Tangka nêkin ka zirtirna thlang la, Rangkachak ditum tak nêk khomin, Hrietna chu thlang lem hlak rawh. 11 Lunghlu nêkin varna a hlu lem a, Duthusam ieng khomin a tluk nawh. 12 "Kei, varna hin rem ka hriet a, Hrietna le fîmkhur thiemna ka kol. 13 LALPA ti dàn chu suol theida a nih. Uongthuong, chapo, nun suol, Tong chaltlaihai ka theidâ vong. 14 Remruot le rorêl ka thiem a, Hrietna le thilthawtheina ka nei. 15 Keima leiin lalhan ro an rêl a, Rorêltuhan dàn indik an siem. 16 Keima leiin rênghaiin ro an rêl a, Hnuoia rorêltu milûn po po khomin. 17 Mi ngàinatu chu ka ngàina a, Mi zongtu chun an mi hmu hlak. 18 Hausakna le inzaumna neitu ka na, Hlawtlingna le hmûingîlna tlo chu; 19 Ka rà suok in dong ding chu, Rangkachak hlîr nêkin a tha lem a, Tangkaruo tha tak nêkin a hlu lem. 20 Felna lampui chu ka hraw a, Rorêlna indik lamtluong ngei chu. 21 Mi ngàinatu chu hausaknan ka vûr a, A robawm ka sung sip hnûr hlak. 22 "LALPAN a mi siem hmasa tak a, A thilsiemhai hmaa siem ka nih. 23 Chatuona inthoka indin ka nih, Leilung insieng hmaa inthok ta khan. 24 Tuifinriet um hmain ka pieng a, Tui hnàrhai an pût hma daiin, 25 Tlânghai an ngîr suok hma dai le, Muolhai indin an ni hma dai tah khan; 26 Leilung pieng hma, ramhai pieng hma, Pilvuthai pieng hma dai khan; 27 Vàn a rem khawm lai ka um ta a, Tui inthûk tak huoltu ramri dingaKawlkil a khangpêk lai khom khan; 28 Vàn sângah sûm a zâr lai leLi mong thut a rem nghet lai khan; 29 A ruot chin bàk chîm lo ding a, Tuipui ramri ding a khangpêk lai leHnuoi innghatna a siem lai khan. 30 Chuong lai chun themthiem angin, A bulah ka um zing hlak a, A bulah ka chêng hlak leiin, Ni tinin hlimin ka sip hlak; 31 A khawvel siem ka hlimpui a, Hringmihai hi a nih ka lawm. 32 "Ka nauhai, tuhin ka thu ngai ro, Ka thu zawmtu chu an hamtha. 33 Ka zirtirna hi ngàithla un la, Var pha unla, ngàithà naw ro. 34 Ka tuol kotah mi nghâk zing a, Ka kotkhâr bulah chêng zing a, Ka thu ngàithlatu chu an hamtha. 35 Mi hmutu chun hringna an nei a, LALPA ditsak an hlaw ngei bok. 36 Mi hmu theltuhai ruok chun, Anni le anni an insuksiet a na, Keima mi theidatu phot chun, Thìna an ngàizawng a nih. "

Proverbs 9

1 Varna chun in a bawl a, Lung ser ban pasari a phun a, 2 A lawmnan ran a that a, Dawn ding uoiin a buotsai a, Ruoi chu a pei fel diem tah. 3 A rongbawltu nunghâkhai chu, Khaw sûnga chun infetirin, Tuolpârah tlâng a'n samtir a: 4 "Mi mawlhai, hi tieng hung ro, 5 Ka ruoi buotsai hung kîl unla, Ka uoiin siem hi hung dawn ro. 6 In mawlnahai hnungson unla, Hring le damin um inla, Hrietthiemna lam chu hraw ro. 7 "Tu khom hmusittu ziltu chun, Khîksawna a tuok lêt hlak a, Tu khom mi rilo kawktu chun, Kawk lêt hrep a tuok ngei hlak. 8 Hmusittu chu kawk naw rawh, Theidà phàna'n hmang a ti che; Mi var i zilhau ruok chun, Ngàinat phànan hmang a ti che. 9 Mi var i zirtir a ni chun, Var zuol phànan hmang a ta, Mi indik i zirtir khomin, Hriet tam phànan hmang a tih. 10 "LALPA ti chu varna tobul a na, Mi Thienghlim hriet chu hrietthiemna a nih. 11 Chu chun sukdamsawt a ti che a, I dam sûng kum suksei a tih. 12 Chu varna chu i nei chun, I varna chu hlawkpui i ta, Hmusittu i ni ruok chun, I hmusit man tuor ngei i tih. 13 Nuhmei Invêt rìhàu a na, A mawlin hriet muol a nei nawh. 14 A kota inthung biel a chîng, Tuol pâra inthung a chîng bok. 15 Lama invâk taphothai chu, Ko khêkin a lo zawr hlak. 16 Ningkhong hre lohai kuomah, " Mi mawlhai, hi hin hung ro. 17 A rûka tui dawn a thlum bîk a, A rûka bei fâk a'n hnik bîk bok"Tiin a lo hûi tawl hlak a. 18 Sienkhom a pantuhai chu, Seol khurpuia tla ta sa, Mithi ruol um khawm an nih, Ti an hriet tawl dèr si nawh.

Proverbs 10

1 Nau varin a pâ a suklawm a, Nau invêtin a nû a sukbeidong. 2 Indik loa hmu hausakna chun, Hlutna ieng khom a nei nawh; Indik taka thilthaw ruok chun, Thi ding khom a san suok hlak. 3 Mi felhai phingtâm ding chu, LALPAN a phal ngai naw a, Mi rilohai duthusam khom, A hlawtling a phal bok nawh. 4 Mi thabo chu rethei a ta, Mi taima chu hausàng a tih. 5 Nau var chun nipui hunah, Fâk ding a sêk khawm hlak a, Busîk huna zàl hlak ruok chu, Nau inzapuium a nih. 6 Mi indik lu chunga chun, Malsawmna vûrin a um hlak a, Mi rilo bau suok ruok chu, Nunrawngna thuin a sip. 7 Mi indik hriet zui zing chu, Malsawmna a ni hlak a, Mi rilo hming ve ruok chu, A thu hmon vong hlak a nih. 8 Lungrila varna neitu chun, Thupêkhai a zawm hlak a, Mi invêt bau tam ruok chu, Sietna leh an intuok hlak. 9 Mi fel kalchawi a nghet a, Lam suol hrawtuhai ruok chu, Man suokin an um ngei hlak. 10 Mi mit rak hin lung a khei, Tlang taka kawktu ruok chun, Inremna a siem lem hlak. 11 Mi indik bau suok hai chu, Hringna tuikhur an inchang a, Mi rilo bau suok ruok chu, Nunrawngna thuin a sip. 12 Intheidàna hrim hrim chun, Innghirnghona a hring a, Hmangaina chun tlàk nawna, Iengkim a hmu khûm lem hlak. 13 Lungril mit varna neihai chun, Thu var an sâk suok hlak a; Hrietthiemna nei lo ruongzâng chu, Vuokna hmol le inmat a nih. 14 Mi varin hrietna an khawl khawm a, Invêt chun sietna ding an hril hlak. 15 Mi neinunghai kulpui chu, An hausakna a ni hlak a; Mi retheihai sietpui ruok chu, An pasietna a ni hlak. 16 Mi fel hlaw suok chu hringna a na, Mi suol hlaw suok chu hremna a nih. 17 Inthununna poisatu chun, Hringna lampui a hraw a, A ngài thei nawtu ruok chun, A pêt hmangsan lem a nih. 18 Theidàna iptu chun hmûr khêlhlip a nei a, Hrilsietna thè dartu chu mi invêt a nih. 19 Ei tong rawn taluo pha chun, Khêl khom a thang sa tèi hlak; Mi var chun tong a'n sûm hlak. 20 Mi indikhai bau suok chu, Tangkaruo tha inhlîr ang a na, Mi rilohai lungril ruok chun, Hlutna ieng khom a nei nawh. 21 Mi indik bau suok thu chun, Mi tam tak a chawm tlai hlak a, Mi invêt chu varna tlasamin a thi. 22 LALPA malsawmnan mi a sukhausa a, Harsatna a thang sâ ve ngai nawh. 23 Mi invêt chun suol thaw inhoi a ta, Mi var ruok chun varna a hlimpui. 24 Mi rilo chun a ti tak intuokpui a ta, Mi fel chun a duthusam hmûng a tih. 25 Thlipui a hung hràng pha chun, Mi rilohai an nuoi bo hlak a, Mi indikhai chu an nghet tlat hlak. 26 Thilthaw dinga mi thabo tir chu, Uoiin thûrin hâ a suktim ang le, Meikhu'n mit a sukthîp ang a nih. 27 LALPA ti chu dam sawtna a na, Mi suol damsûng ruok chu a tawi hlak. 28 Mi fel tuok ding chu hlimna a na, Mi rilohai hmabàk chu boralna a nih. 29 LALPA lampuia kalchawi hi, Mi fel ta di'n himna kulpui a na, Thil tha naw thawtuhai ruok chun, Sietna chauh an hmasuon hlak. 30 Mi fel chu ngîr nghet tlat an ta, Mi suol chun ram hi hluo zing naw nih. 31 Mi fel bau chun varna a phù suok a, Lei khêlhlip ruok chu ât tan nîng a tih. 32 Mi fel bauin pom tlâk thu a hril a, Mi suol bàu chun thu letling a hril hlak.

Proverbs 11

1 Bùkna indik lo hi LALPA theida zawng a na, Bùk lung indik hmang hi a lawmzawng a nih. 2 Chapona chu muolphonan a zui a, Inngàitlawmna chu varnan a zui hlak. 3 Mi indikhai chu an ringumna'n a thuoi a, Mi depdehai chu an vervêknan a awk hlak. 4 Lungsenna nia dingin, Hausak ieng khomin thû a phur nawh, Sienkhom indikna ruok chun, Thìnaa inthokin a san suok hlak. 5 Mi indikhai chu an indiknain, An lampui a suktluong hlak a, Sienkhom mi rilohai ruok chu, An rîtlonain a bûk thlûk hlak. 6 Mi ngîlhai chu an indikna'n a san him a, Mi depdehai chu châkna suolah an inawk hlak. 7 Mi rilo chu a thi ruolin, A beiseina khom a boral nghal a, Thaw thei dinga a hisaphai khom, Iengmà lo an hung inchang hlak. 8 Mi fel chu buoina laka humin a um a, Mi rilo chungah buoina chu a tla hlak. 9 Pathien ngàisak lo mi chun a bauin, A tuolbawmhai a suksiet hlak a; Mi fel ruok chun hrietna hmangin, Sietna chu a pumpel hlak. 10 Mi felhai an hmûingìl pha, A khaw nawtin an hlim hlak a; Mi rilohai an thi pha leh, Lawmna ri a so vêl hlak. 11 Mi indik malsawmna dong chun, A khaw pumpui a chawimawi a, Mi rilo bâu suok ruok chun, A khaw nawtin a dêng siet hlak. 12 Tuolbawmhai deusawtu chun, Varna a tlasam a nih, Hrietthiemna neitu ruok chun, A bâu a vèng tha lem hlak. 13 Bau tamin thurûk a ip thei naw a, Mi ringum ruok chun a vong tlat hlak. 14 Inthuoina tha um nawnaah, Ram le hnam a tlu se hlak a, Remruot thiem an tamnaa chu, Hnèna an chang ngei ngei hlak. 15 Mi dakhama insietu chun tuor a ta, Inthier fihlîmtu ruok chu him a tih. 16 Nuhmei felin inzà a phur a, Nu lepchie chu inzapui a um. Mi zomthaw chu a hung pasie a, Mi hrât chu a hung hausa hlak. a 17 Mi ngilneiin a ngilneina a sor a, Mi tawrotin ama buoina a siem hlak. 18 Mi rilo chun hlaw indik lo a lak a, Felna tùtu chun lukhawng a dong hlak. 19 Felna chel tlattu chu hring a ta, Suolna hnot tlattu chu thing a tih. 20 LALPAN lungril kawi a theida a, Soisel boa khawsahai ruok chu a lawm. 21 Mi rilo chun hrem pumpel naw top a ta, Mi fel ruok chu san suokin um a tih. 22 Fîmkhur nachang hre lo nu hmel tha chu, Vok hnâra rangkachak kuol inbuntir ang a nih. 23 Mi fel ditzawng chu thil thain a tawp a, Mi rilo beisei chu lungsennain a tawp. 24 Phal taka pèk chu a tam lem hmùna a na, Mamaw bâk kompui chu tlâkranna a nih. 25 Mi tiktlài chu hmuingil a ta, Tuia chawmtu chu tuia chawm ve nîng a tih. 26 Hlawkna hnot leia bu inrotu chu, Mihaiin tongsie inphur an ta, A pe suok nuomtu ruok chu, Malsawmna vùrin um a tih. 27 Thil tha zongtu chun ditsakna a dong a, Thil suol zongtu chun thil suol a tong hlak. 28 Hausaknaa innghattu chu tlùng a ta, Mi fel chu hna hring angin inthang no a tih. 29 Sûngkuo chokbuoitu chun thli chauh sîk a ta, Mi invêt chu mi var siehlawah thang a tih. 30 Felna ra chu hringna a na, Nunrawng chu thina a nih. b 31 Mi felin hnuoiah lawmman a dong chun, Pathien hre lo le mi rilo lem chun, Hremna a va hang tuor chieng awm de!

Proverbs 12

1 Thununna ngàinatu chun hrietna a ngàina a, Zilhauna theidatu ruok chu mi intlaw a nih. 2 Mi tha chun LALPA ditsak a hlaw a, Suol phiertu chu thiem naw a'n changtir hlak. 3 Rîtlonain mi a siem nghet ngai naw a, Mi fel ruok chu sukhning ruol a ni nawh. 4 Nu tha chu a pasal lallukhum a na, Nu inzapuium chu a rù ngè ang a nih. 5 Mi felhai thil rèl chu a'n dik hlak a, Mi rilohai thurawn pêk chu a khêlhlip. 6 Mi suol bauin that ding mi a'n chân a, Mi indik kam suok chun a san suok hlak. 7 Mi rilohai chu pei hmangin an um dai a, Mi fel sûngkuo ruok chu an ngîr nghet hlak. 8 Mi var chun inpâk a hlaw a, Lungril kawi chun endong a hlaw. 9 Insukliena fâk ding nei si lo nèk chun, Hriet hlaw loa siehlaw nei si ni a tha lem. 10 Mi fel chun a ranhai chen a lunginsiet a, Mi rilo zangàina ruok chu a nunrawng hlak. 11 Mani lo enkoltu chun bu le bâl hau a ta, Suongtuona hnottu chun varna a tlasam a nih. 12 Mi rilo chun mi suol thil rok a'n hnar a, Mi fel ruok chun zung a kei nghet hlak. 13 Mi suol chu a kam tlêuah a tlu a, Mi fel chun buoina a pumpel hlak. 14 Bau thiemin a bau suok ra tha a sîk a, A kut sawl man khom a hmu ngei hlak. 15 Mi invêt chun indikin a'n ngai tlat a, Mi var chun thurawn a ngàichang hlak. 16 Mi invêtin lungsen a suklang nghal a, Mi var chun theida naw sak sak a thaw hlak. 17 Mi ringum chun thudik a hril hlak a, Hrepuitu der chun thukhêl a hril hlak. 18 Tong tlahol chun kawlhnâm angin a sun a, Mi var bau suok ruok chun lung a thawi dam. 19 Thu tak hrilna bau chun kumtluong a dai a, Lei khêlhlip chun mit khap kâr chauh a daih. 20 Suol phantu lungrilah hlêmna thu a um a, Remna zongtuhai lungrilah hlimna a um. 21 Sietnan mi felhai a tlâk buok ngai naw a, Mi suolhai chun buoina an tuok rop hlak. 22 Hmùr khêlhlip chu LALPAN a theida a, Mi indikhai ruok chu a ngàina hlak. 23 Mi fîmkhur chun a hrietzie a thup a, Mi invêt chun a'n vètzie a puong suok hlak. 24 Mi taima chun rorêlna chel a ta, Mi thabo chu suoka sorin um a tih. 25 Lungkham nei hin a mi sukngui a, Thu tha ruok chun a mi sukhlim. 26 Mi fel chu a ruolhai keidingtu a na, Mi rilo chun a thuoi suol lem hlak. 27 Mi thaboin sa raw ding a kâp ngai naw a, Mi taima ruok chun thil hlû a khawm teu hlak. 28 Felna lampuia chun hringna a um a, Chu lampuia chun thìna a um nawh.

Proverbs 13

1 Nau var chun a pa thununna a poisa a, Hmusittu chun zilhauna a ngai thei nawh. 2 Mi thahan bau that man thil tha an tlàn a, Mi suol ruok chun rawng taka chêt a châk. 3 Bâu vêng thatu chun a nun a vêng tha a, Mi hmùr tam chun sietna a tuok hlak. 4 Mi thabo chu a vir em em a, Sienkhom fâk ding a nei si nawh; Mi taima ruok chu a tlai zing. 5 Mi indik chun thu khêl a theida a, Mi suol chun muolphona le inzakna a'n tlun. 6 Felna chun mi ringumhai lampui a vèng a, Rîtlona chun mi suol a suot thlâk hlak. 7 Hausaa inngai, ieng khom nei lo an um a, Retheia inngai, hausa hlê si an um bok. 8 Mi hausa chu a sumin a'n tlan suok thei a, Mi rethei chun inlâupui ding a nei ve nawh. 9 Mi fel chu mei angin a êng a, Mi rilo chu khawnvar sukmit ang a nih. 10 Chapona chun inhalna a chok suok a, Thurawn lâk hi thil varthlàk a nih. 11 Hmùna indik loa hausa thut chu, A riral nawk tiel tiel hlak a, Harsa taka thaw suoktu ruok chu, Damten a pung tiel tiel hlak. 12 Beisei tlung inhnûk hin lung a sukna a, Duthusàm tlung ruok chu hringna thing a nih. 13 Zirtirna hnawltu chun tuor a ta, Thupêk zawmtu chun lawmman hmung a tih. 14 Mi var zirtirna chu hringna tuikhur a na, Thìna châng pumpelna a nih. 15 Hrietthiemna tha nei chu ditsak hlawna a na, Mi depdê lampui ruok chu a kholkham. 16 Mi fimkhur chun hrietna hmangin thil a thaw a, Mi invêt ruok chun a'n vêtzie a phor lang hlak. 17 Thangko rilo chun buoina a chok suok a, Palai ringum chun damna thu a'n tlun hlak. 18 Thununna ngaithàtu chu retheiin muolpho a ta, A poisatu chu chawimawiin um a tih. 19 Duthusàm hmu hin lungril a sukhlim a, Sienkhom, invêtin suol nghatsan an theida. 20 Mi var pawltu chu a hung var ve a, Mi invêt le inpawl chu sietna a nih. 21 Vângduoinan mi suol a hnot zui a, Mi fel lawmman ruok chu hnienghnàrna a nih. 22 Mi tha chun a tûhai ro ding chen a mâksan a, Mi suol hausakna chu mi fel ta dinga khawl a lo nih. 23 Mi rethei loah bu a suok teu a ni thei, Sienkhom rorêlna indik naw leiin a chân vong thei. 24 Hmol hmang nawtu chun a nau a theida a na, Nau hmangaitu ruok chun a thunun ngei hlak. 25 Mi felhai chun dutawka fâk ding an nei a, Mi rilo phîng ruok chu a tâm hlak.

Proverbs 14

1 Nuhmei var chun sûngkuo a tungding a, Nu invêt chun a kut ngeiin a thiek hlak. 2 Indik taka kalchawitu chun LALPA a ti a, Rîtlona lampui hrawtu ruok chun a hmusit hlak. 3 Mi invêt chun vuok tuorna ding a hril suok a, Mi var ruok chun a himna ding a hril lem hlak. 4 Bawngchal um nawnaa chun bu in a ruok a, Bawngchal thain bu sîk ding a thaw suok teu hlak. 5 Hrepuitu ringum chun khêl a hril ngai naw a, Hrepuitu der ruok chun khêl a phuokfawm hlak. 6 Hmusittu chun varna a zong a, a hmu naw a, Lungril mit varna neitu ta din hmu a olsam hle si. 7 Mi invêt lakah inthier fihlim rawh, A hmûra inthokin varna thu dong naw ti nih. 8 Mi varhai chun an fèna ding lam an hriet a, Mi invêthai invêt chil ruok chu mani inhlèm a nih. 9 Mi invêthan suol nghatsantuhai an hmusit a, Mi varhai ruok chun an lawmpui lem hlak. 10 Mani chauhin ei lungngaina ei hriet a, Ei lawmna khom mi dangin an mi'n tawmpui thei nawh. 11 Mi rilo sûngkuo chu suksietin um a ta, Mi indik sûngkuo ruok chu hmuingil a tih. 12 Mihriemin lam indik nia a ngai a um a, Sienkhom thìna lampui a lo ni zing thei. 13 Innui lai khomin lung a na thei a, Hlimna khom lungngainan a tawp thei. 14 Mi suol chun a suol man intêl a ta, Mi tha chun a thaw that man hmung a tih. 15 Mi mawl chun mi hril taphot a awi hlak a, Mi var chun a kal pên tin a bì chieng hlak. 16 Mi var chu a fîmkhur a, suol a hnawl a, Mi invêt chu a'n sukhuoi a, a che rok rok hlak. 17 Lung inrom chun thil invêtthlâk a thaw hlak a, Dawhaa thil phantu chun theidà a hlaw hlak. 18 Mi mawlhai chu invêtnan an inthuom a, Mi var chun hrietna tonlairang an ton hlak. 19 Mi suolhai chu mi tha hmaah kûn an ta, Mi rilohai chu mi fel kot bulah kûn an tih. 20 Pasiehai chu tuolbawmhai khomin an hnawl a, Mi hausahai ruok chun ruol an hau êm êm. 21 Tuolbawmhai hmusittu chu mi suol a na, Retheihai somdawltu chu mi hamtha a nih. 22 Thil suol rottu chun thil suol a thaw a, Thil tha zongtu chun mi ring le lainat a hlaw. 23 Thokrimna chun hlawkna an tlun a, Hril ringota tlâk tum chu tlâkranna a nih. 24 Mi var chu hausaknaa vurin a um a, Mi invêt chun invêtna chauh a hli hlak. 25 Hrepuitu indik chun mi a san suok a, Hrepuitu der ruok chun mi a hlêm hlak. 26 LALPA titu chun kulpui nghet a nei a, A nauhaiin inhumhimnan an hmang hlak. 27 LALPA ti chu hringna tuikhur a na, Thìna chânga inthoka himna a nih. 28 Mipui hau hi lal ropuina a na, Khuo le tui nei lo lal chu a se dêr hlak. 29 Lung infuol chun hrietthiemna ril a nei a, Lung inrom chun a'n vètzie a phor lang hlak. 30 Lungril hadam chu taksa sukhriseltu a na, Thîkthu siet chu ru sukhmontu a nih. 31 Retheihai neksawrtu chun anni Siemtu a hmusit a, An chunga ngilneitu chun anni Siemtu a chawimawi. 32 Mi rilo chu a suolna'n a bûk thlûk a, Mi fel chu thi chenin a ringumnan a hum hlak. 33 Hrietthiemna nei mi chun lungvar a nei a, Mi invêt ruok chun thuvar a hriet thei nawh. 34 Indiknain hnam a chawi sâng a, Suol chu hnam tin sukmuolphotu a nih. 35 Siehlaw var chungah lal a lawm a, A sukmuolphotu chungah a lungsen hlak.

Proverbs 15

1 Donna innèm chun lungsen a thawi dam a, Invìn ruok chun lungsen a chok tho. 2 Mi var bâu chun varna thu a hril hlak a, Mi invêt lei chun thu invêt a per suok hlak. 3 LALPA mit chu hmun tinah a fu a, Mi rilo le mi tha khom a enthlàk zing. 4 Bâu innem chu hringna thing a na, Lei lûtinlè chun lungril a sukngui. 5 Mi invêt chun nu le pa keithuoina a ngàinêp a, Mi var ruok chun an zirtirna chu a poisa hlak. 6 Mi fel inah rosum tam tak a um a, Mi rilo sum lam chun buoina a'n tlun hlak. 7 Mi var hmûr chun hrietna a thè dar hlak a, Mi invêt chun thaw vèna lungril a nei nawh. 8 Mi rilo inthawina chu LALPAN a tirdak a, Mi tha tongtaina chu a lawmzawng a nih. 9 Mi rilo lampui chu LALPAN a tirdak a, Felna lampui hrawtu chu a ngàina hlak. 10 Lam indik pêtsantu chu na taka thunun a ni hlak a, Zilhauna theidatu chu a bohmang hlak. 11 Seol le Abadon hre tlangtu LALPA chun, Mihriem lungril lem chu a hriet chieng awm de aw! 12 Hmusittu chun zilhauna a ngai thei naw a, Mi varhai khom a biekrawn ngai nawh. 13 Lungril hlimin hmêl hlim a siem a, Lungril nain thlarau a sukngùi. 14 Sungril mit varna neitu chun hrietna a zong a, Mi invêt ruok chun khêl ringot buin a ring hlak. 15 Rethei nun chu a rimsikthlâk a, Lungril hlim ruok chun ruoi a thê zing a nih. 16 Hausa hnûra buoina nei nêk chun, Tlawmte neia LALPA ti a tha lem. 17 Intheida puma bawng tuoi thau sâ fâk nêkin, Inhmangai taka thlài hna ring a tha lem. 18 Mi lungromin inhalna a chok suok a, Mi lunguoiin inhalna a sukrè hlak. 19 Mi thabo lampui chu hlingin a bawm a, Mi indik lampui ruok chu a tluong zâl. 20 Nau var chun a pâ a suklawm a, Nau invêt ruok chun a nû a hmusit hlak. 21 Hrietna tlasam chun a'n vêtna a hlimpui a, Hrietna neitu ruok chun lam ngîl a hraw hlak. 22 Remruot lawk loa thil thaw chu a tlol nuom a, Rem hrie an tam ruok chun a hlawtling hlak. 23 Donna indik pêk hi tu khomin an lawm a, A hun taka dong hi a va hang lawmum de! 24 Mi var chun Seol a zuk fin nawna dingin, Chung tieng a pan tung ngat ngat hlak. 25 LALPAN mi chapo in chu a nam thlûk a, Hmeithai chêngna ramri ruok chu a humpêk. 26 Mi rilo ngàituona chu LALPAN a tirdak a, Mi thienghlimhai ngàituona chun a suklawm. 27 Hlêpnaa hnukrawl chu sûngkuo buoina a na, Thamna theida ruok chu sûngkuo hringna a nih. 28 Mi fel chun thu don dàn ding a bûktuo a, Mi invêt ruok chun thu tha lo a sâk suok hlak. 29 LALPA chu mi rilo hnaiah a um ngai naw a, Mi fel tongtaina ruok chu a ngàithlâk hlak. 30 Hmêl hlimin mi a suklawm a, Thu lawmumin rù le châng a sukhrisel. 31 Nun siem tha thei zilna ngàithlatu chu, Mi varhai lai chêng vêng a tih. 32 Inthununna ngàithâtu chun ama a'n ngàinêp a, Zilna poisatu chun hrietthiemna a chang hlak. 33 LALPA ti chu var inchûkna a na, Inngaitlawm chu chawimawi hlawna a nih.

Proverbs 16

1 Mihriem lungrilin thil a riruong a, Sukpuitlingtu ruok chu LALPA a nih. 2 Mihriem chun a lampui indikin a hriet hlak a, Sienkhom, lungril inkhìtu chu LALPA a nih. 3 I thilthaw iengkim chu LALPA inkoltir la, I thil tumhai chu hung hlawtling a tih. 4 LALPAN iengkim hi san neia a siem a na, Mi rilohai khom hi sietna nia ding an nih. 5 Lungril chapohai chu LALPAN a tirdak a, Hremna pumpel naw top an tih ti hre chieng rawh. 6 Hmangaina le ringumnain bawsietna a tlêng fai a, LALPA tina leiin miin suol a pumpel hlak. 7 A um dâna LALPA suklawmtu chun, A hmêlmahai khom inrem takin a umpui thei. 8 Fel lo taka sum tam tak nei nêk chun, Fel taka tlawmte nei a tha lem. 9 Mihriemin a lampui ding a duong hlak a, A kalchawi thuoitu ruok chu LALPA a nih. 10 Chung tieng thu anga ro rêl hlaktu lal chun, A kam suokin ro rêl suol ngai naw nih. 11 Bùkna le inkhìna indik chu LALPA ta a na, Ip rikna po po khom ama siem vong a nih. 12 Thil suol thaw hi lalhan an tirdak a, Indikna lei chauhin an lalna a nghet a nih. 13 Lalhan thu indik hril hi an lawm a, Thu dik hril mi chu an hlutsak hlak. 14 Lal lungsen chu thìna zuolko a na, Mi var chun a lo thlêm lungawi thei. 15 Lal hmêl a hlim chu nun a sukhoi a, A ditsakna chu thâl sûm tui pai ang a nih. 16 Varna hi rangkachak nêkin a tha lem a, Hrietna hi tangkaruo nêkin a hlu lem. 17 Mi indik lampui chu suol leh an inpaw naw a, Fimkhur taka kalchawitu chun a nun a hum hlak. 18 Chapona chu sietnain a zui a, Lungril indùna chu tlûknain a zui. 19 Mi chapo le râl lâk sum insem nêk chun, Inngaitlawm taka pasiehai laia khawsak a tha lem. 20 Zirtirna thu poisatu chu a hmûingìl hlak a, LALPA-a innghattu chu a hamtha hlak. 21 Lungvar nei chu sûngril mit varna nei mi an na, Tongkam thlum chun mi hnè theina a sukpung. 22 Varna nei hi hringna tui hnâr a na, Invêtna hi mi invêthai hremna a nih. 23 Mi var lungril chun a bâu chàng a thuoi a, A thu hril khom a awium bîk hlak. 24 Tongkam thlum chu a thlâra khuoizu ang a na, Lungril a sukhlim a, rù le châng a sukhrisel. 25 Mihriem ngaia lampui indik nia inlang, A tawpah thìna intlun lem hlak si a um. 26 Sinthawtu chu a phing khopna dingin a'n rim a, A phingtâmna chun sin a'n thawtir a nih. 27 Mi rilo chun suol thaw ding a phier hlak a, A kam suok chu meichok inhlap ang a nih. 28 Mi kawi chun innghirnghona a chok suok a, A kawi zawnga thu kher mi chun ruol bul khom a sukthè hlak. 29 Tharum thaw mi chun tuolbawmhai a sukhmu a, Lampui tha loah a thuoi tawl hlak. 30 Mi mitsîr chîng chun thil suol a phan hlak a, Hner pet chîng chun suol tieng a awn hlak. 31 Lu tuok hi ropuina lallukhum ang a na, Fel taka kalchawihai dong hlak chu a nih. 32 Mi râlhrâng nêkin mi zaidawthei ni a tha lem a, Khawpui latu nêkin lungsen kei dei thei mi ni a tha lem. 33 Mal chungah thum ei vawr hlak a, Thu tawpna ruok chu LALPA a'n thok vong a nih.

Proverbs 17

1 Sûngkuo inhal puma ruoipui thè nêkinInngei taka bu thing ring a tha lem. 2 Muolpho taka khawsatu nau chungah, Siehlaw var chun ro rêl a ta, Unau laia mi angin pâ ro chang vèng a tih. 3 Tangkaruo le rangkachak chu thukah, Meia an raw thienghlim hlak angin, LALPAN mihriem lungril a fie hlak. 4 Mi rilo chun hmûr khêlhlip a ngàithlak a, Mi khêlhlip chun hrilsietna thu a bengkhon hlak. 5 Pasiehai hmusittu chun anni Siemtu a hmusit a, Mi sietna diriemtu chun hremna pumpel top naw nih. 6 Tû le tèhai hi upahai lallukhum an na, Nauhai ropuina chu an nu le pahai an nih. 7 Thu hril thiem le mi invêt an inhmè naw a, Rorêltu bâu le khêl an inhmè naw nawkzuol. 8 Thamna hi a petu chun dawi angin a ngai a, A lekna tieng tieng hlawtlingin a ngai hlak. 9 Mi khingtu ngaidam hi ngainat hlawna a na, Bàu suktam ruok chu ruol sukthèna a nih. 10 Mi invêt voi za vuok nêkin, Lungvar nei voi khat zil a hlawk lem. 11 Mi suol chun hel dàn ngot a zong a, A kuomah thuneitu nunrawng tir an tih. 12 Invêtin thil invèt a thaw lai tong nèkin, A te lâkpêk savom le intuok a tha lem. 13 Suola thatna thungrultu insûng chu, Thil tha loin chèng chil a tih. 14 Inhal hi tuiting inthè ang a na, A buoi zuol hmain inhal ma rawh. 15 Mi suol thiem inchangtir a, Mi tha thiem naw inchangtir hi, LALPAN a tirdak ve ve a nih. 16 Mi invêt kuta sum um chu iem a tangkaina?Lungril boin varna a'n chawk thei ding maw? 17 Ruol chun ieng lai khom a mi hmangai zing a, Laibunghai chu mangang huna dinga pieng an nih. 18 Mi leibat mawphurtua insiem a, Tuolbawm ta dinga dakhama thang chu, Thil invètthlâk tak a nih. 19 Inhal chîng mi chun suol a ngàina a, Kotkhâr insâng bawltu chun sietna a fiel a nih. c 20 Lungril kawi chu a hmuingil ngai naw a, Lei khêlhlip chu buoinaah a tlu lût hlak. 21 Nau invêt chu lungngàina intluntu a na, A chungah a pâin lawmna hrim a nei nawh. 22 Lungril hlim hi damdawi tha tak a na, Lungril ngui chun rù le châng a suktawl. 23 Mi rilo chun arûkin thamna a lâk a, Indik takin ro a rèl thei nawh. 24 Lungvar nei chun varna a hnot zing a, Mi invêt chun kil le kapah mit a'n lên hlak. 25 Nau invêt chun a pâ a sukbeidong a, A hringtu a nû lung a sukrim hlak. 26 Poi tawk lo mi lei inchawitir a'n dik naw a, An ringum leia milien hrem a'n dik bok nawh. 27 Hrietna nei mi chu a tong fîmkhur a, Hrietthiemna nei mi chu a dei dap hlak. 28 Mi invêt khom a to chun var a hlaw a, A lei a vêng lem chun mi vara ngài a ni hlak.

Proverbs 18

1 Mal tla mi chun mani hma chauh a siel a, Thurawn tha khom a tai vong hlak. 2 Mi invêt chun hrietna a ngaina naw a, A ngaidân khûkpui chauh a hlimpui hlak. 3 Rîtlona chu muolphonan a zui hlak a, Muolphona khom inzaknain a zui hlak. 4 Mihriem bâu suok chu li inthûk ang a na, Varna tuikhur chu tui luong hok hok ang a nih. 5 Mi rilo chunga hlei nei a tha naw ang bokin, Poi tawk lo thiem naw inchangtir a tha nawh. 6 Mi invêt hmûr chun inhalna a chok dok a, A bâu suok chun vuok a'n tuortir hlak. 7 Mi invêt chun a bâu a sietpui a, A hmûr chu a ta dinga châng a nih. 8 Inrêl hi bu inhnik tak ang a na, A dolin ei dol thlàk zot zot hlak. 9 Sinthawa inthlàdà mi chu, Suksetu leh unau bul an nih. 10 LALPA hming chu kulbing nghet a na, Mi fel chu a tlân lût a, a him hlak. 11 Mi neinunghai kulpui chu an hausakna a na, Lung bang insâng tak angin an inngai hlak 12 Lungril chapo chu sietna leh an intlon a, Inngaitlawm chu chawimawinan a som hlak. 13 Ngàithlâk hmaa mi don chu, Thil invêtthlàk le muolphona a nih. 14 Nat khom mi'n tuortir theitu chu lungril a na, Lungril hliem chu tuin am tuor thei tâng a ta? 15 Lungvar nei chun hrietna a khawl khawm a, Mi var nâ chun hrietna a zong hlak. 16 Thilpêk chun a petu hma a sukkawpèk a, Milien khom olsam taka paw theina a nih. 17 Mi dang hunga an hung khing lêt hma chun, Thiem thu hril hmasatu chu indikin a'n lang hlak. 18 Thum vawrin inkhingna a rem a, Inkhing bur bur khom a kei thè hlak. 19 Unau suknuor chu kul nghet nêkin hnè an tak lem a, Inhal chu thîr tluona kul kotkhâr kalh ang a nih. 20 I bau suok dungzuiin khop i ta, I hmûr suok rà zirin tlai i tih. 21 Lei hin damna le thì theina a pâi a, I hmang dàn angin a ra sîk i tih. 22 Nuhmeia nei ding zong hmutu chu thil tha hmu a na, LALPA ditsakna a dong hlak. 23 Mi rethei chun rienginko takin thu a hril a, Mi hausa ruok chun chaltlai takin a lo vîn hlak. 24 Ruol tha dai sawt lo um hai sien khom, Unau nêka inhnaipui lem ruol an um hlak.

Proverbs 19

1 Mi invêt le mi khêlhlip ni nêkin, Mi rethei, dem kai loa kal chawitu ni a tha lem. 2 Hrietna nei si loa phûr hlut a tha nawh, Pawng inhmawa kalchawi chu a'n suithlûk hlak. 3 Mihriemin a'n vêtna a sietpui pha, Pathien chungah a lungsen hlak. 4 Hausakna hi ruol hauna a na, Retheina chun ruol a sukthè. 5 Hrepuitu der chun hrem tuor ngei a ta, Khêl hril chîng khomin pumpel bok naw nih. 6 Mi tiktlâihaiin tlontu an hau a, Mi thilphalhan ruol an hau hlak. 7 Mi rethei chu a sûnghai hmana an nghok chun, A ruolhai lem chun an va hnawl nasa awm de!Anni chu ko lom lom hlak sien khom, A bul hnaia hrim an um nuom nawh. 8 Varna nei chu mani inditsakna a na, Hrietthiemna nei chu hmuingilna a nih. 9 Hrepuitu der chun hrem pumpel top naw nih, Khêl hril hmang chu bohmang a tih. 10 Khawsak insàng le mi invêt an inhmè naw a, Milien chunga siehlaw inlal an inhmè naw zuol. 11 Mi var chu a lungsen mei mei nuom naw a, A poi an tawk a haider thei chu a ropuina a nih. 12 Lal lungsen chu keipui inrûm ang a na, A ditsakna chu hlobet chunga daidaw tla ang a nih. 13 Nau invêt chu a pa tlâkranna a na, Nuhmei hrangsie chu ruo nichîng do ang a nih. 14 In le lo hi nu le paa inthoka ei rochung a na, Nuhmei var ruok chu LALPA mi pêk a nih. 15 Mi thabo chu a in chur chur a, Mi zomthaw chun phingtâm tuor a tih. 16 Thupêk zawmtu chun nun a vong tha a, A ngaithâtu ruok chu bohmang a tih. 17 Tu khom retheihai lunginsiettu chu, LALPA kuoma thil inpûktirtu ang a na, A thil thaw thathai chu la rul vong a tih. 18 Beiseium a la ni laiin i nau chu thunun rawh, Chuong naw chun a thì i remti tina a nih. 19 Lung inrom chun a nunsiet man hmung a ta, San la khom i san nawk pei ngai a tih. 20 Thurawn ngàithla la, thupêk zawm la, A tawpah mi var la hung nîng i tih. 21 Mihriem lungrilin thaw tum hau sien khom, LALPA remruot chauh a dingchang hlak. 22 Mihriema thlâkhlàum chu a ringumna a na, Mi khêlhlip nêkin mi rethei ni a tha lem. 23 LALPA ti chu hringna a ni takzet a, A tîtu chu lungawi takin an um a, Thil tha loin tlâkbuok naw nih. 24 Mi thabo chun buthlêng a pur a, Bu beng dingin kut a hlàng pei si nawh. 25 Mi hmusit chîng hlak i vuok chun, Chu mimawl chun fîmkhur inchûk a ta; Hrietthiemna nei mi i zil ruok chun, A hrietna hung pung a tih. 26 Pâhai rok a, nûhai hnot suoktu nau chun, Inzakna le muolphona a'n tlun hlak. 27 Ka naupa, zirtirna i dong pei theina dingin, Hrietna lampui pèt hmangsan naw rawh. 28 Hrepuitu porchè chun rorêlna a palzût a, Mi rilo chun suolna a dol thlâk zung zung. 29 Nuisawtuhai chu thiem naw chang sà an na, Mi invêthai chu ruongzàngah vuong an tih.

Proverbs 20

1 Uoiin hi nuizatbûra mi siemtu a na, Zu hrât chu insuol khêkna siemtu a na, Zu dawi vèta um chu a varthlâk nawh. 2 Lal lungsen chu keipui inhûk ang a na, A suklungsentu chun hringna a chân hlak. 3 Innghirnghona laka fihlim hi inzaum nina a na, Mi invêthai ruok chu an inrol phêt hlak. 4 Mi thabo chun a hunah hnuoi a'n let pei naw a, Busîk hunah sîk ding a hmu ngai bok nawh. 5 Lungrila mihriem tumhai chu li angin a'n thûk a, Sienkhom mi var chun a man suok vong thei. 6 Mi tam tak ringumin an insâl hlak a, Mi ring tlâk tak tak chu tuin am hmu zo a ta? 7 Indiknaa kalchawi hlak mi fel chu, A hnung zuitu a thlàhai an hamtha. 8 Ro rêl dinga lal a'n thung pha chun, A mitin thil tha naw po po a sêp fai hlak. 9 "Ka lungril ka vong thienghlim a, Suol lakah ka fâi" tu am ti thei? 10 Bùkna indik lo le inkhìna indik lo chu, Pathienin a theida ve ve a nih. 11 Naupang khom a changchavoiah, Mi thâ le indik a nizie a'n lang vong. 12 Hriet theina nâ le hmu theina mit hai hi, LALPA siem vong a nih. 13 Imu i thlâkhla chun rethei i ta, I har zing chun fâk seng lo nei i tih. 14 Inchawtuin, "A tha nawh, a tha nawh" a ta, A fe pha a thil inchawk chu a suong vieu si hlak. 15 Rangkachak dâm, lunghlu rubi dâm a tam, Hrietna thu hrilna hmûr ruok chu lunghlu vàng a nih. 16 Hnam dang ta dinga dakhama insietu silfên chu la la, Nuhmei tha lo ta ding a ni lem chun a silfen chu dakhamah sie rawh. 17 Thil fâk rûk chu inhnik hle khom ni sien, A tawpah bâua lung thîl hnaw sip ang a nih. 18 Mi berawnin thil ruohmang hlak la, Var taka râl rêl hmasa zetin bei hlak rawh. 19 Mi bâu tam chun thurûk a ip thei naw a, Chuleiin, mi bâu tam chu pawl naw rawh. 20 Tu khom nû le pâ tongsie inphurtu chu, Thim sa lai tak a khawnvar sukmitin um a tih. 21 Olsam taka rosum hau thut mihai chu, A tawp tieng hmûingìl naw ni hai. 22 "Ka poi i tawk, thungrul ka ti che"Ti ngai hrim hrim naw ro, LALPA nghâk unla, hung san suok a ti cheu. 23 Bùkna indik lo hi LALPAN a theida a, Inkhìna indik lo chu a tha bok nawh. 24 Ei kalchawi tin hi LALPA ruot a na, Tuin am a lampui ding hre thei a ta? 25 Thu intiem thuta a hnunga ngaituo chauh hi, Mani le mani insukkolawkna a ni hlak. 26 Lal var chun mi rilohai a zâp lêng a, Tawlailirin a chîl tawl hlak. 27 Mihriem lungril elvartu chu LALPA a na, A sûngril inthûk tak chenin a èn suok hlak. 28 Hmangaina le ringumnain lal a vong him a, A lalthungpha chu hmangainaa suknghet a nih. 29 Tlangvàlhai ropuina chu an hrâtna hi a na, Upahai mawina chu an lu intuok hi a nih. 30 Hliem khopa invuokin thil tha lo a sukfai a, Vuokna chun sûngril chen khom a tlêng fai hlak.

Proverbs 21

1 Lal lungril chu LALPA kuta tui hnàr ang a na, A nuomna tieng tieng an luongtir hlak. 2 Miin a lampui tin indikin a hriet hlak a, LALPA ruok chun lungril a bûk hlak. 3 Thil fel tak le indik taka thaw hi, Inthawina nêkin LALPAN a pom lem. 4 Mit meng insâng le lungril chapo hi, Mi riloin hmathead a hmang a na, Chu chu thil suol a nih. 5 Mi taima thiltum a hlawtling hlè hlak a, Hmawsaruma thawtu chu a tlaran hlak. 6 Khêla hausak chu tui hu inzâm ang a na, A zongtu chun thìna a zong a nih. 7 Mi suolhan thil dik thaw an nuom naw leiin, An nunrawngna chun phît hmang tawl a tih. 8 Thiem naw changtu lampui chu a kikawi a, Poi tawk lo lampui ruok chu a tha ngîl hlak. 9 Nuhmei inhal hmang le in lien hluo nêkin, In chung sîp kila um a tha lem. 10 Mi rilo chun suol thaw a châk dop dop a, A tuolbawmhai lakah zàngaina a'n langtir ngai nawh. 11 Hmusittu ei hrem chun mi mawlhai an var pha a, Mi var ei zirtir chun a hriet sap phâ teuh hlak. 12 Mi Dik chun mi suol sûngkuo a'n chik a, An chungah sietna a'n tlungtir hlak. 13 Mi retheihai khêk ri ngaithàtu chu, A khêk ve pha leh ngaithà ni vêng a tih. 14 A rûka thilpêkin lungsen a thawi dam thei a, Nasa taka lungsen khom tham lungawi thei a nih. 15 Ro a fel pha mi indikhai an lawm a, Thil suol thawtuhai ruok chu an chi-ai hlak. 16 Hrietthiemna lampui pêtsantu chu, Mithi ruol lai khawsa vêng a tih. 17 Nuomtawl ngot thlâkthlatu chu rethei a ta, Zu le sa ngainatu chu hausa ngai bok naw nih. 18 Mi suol chu mi fel intlanna'n hmang an ta, Mi ringum lohai chu mi indikhai intlanna'n. 19 Nuhmei hrângsie le inhal hmang le chèng nêkin, Thlalêra um a tha lem. 20 Mi var chêngnaah rosum le hriek a um zing a, Mi invêt ruok chun a chèn ral vong pei hlak. 21 Felna le hmangaina hnottuhai chun, Hringna, felna le chawimawina an dong hlak. 22 Mi var chun mi hrâthai khawpui a rùn a, An ringsan tak kulpui chu a sukchim hlak. 23 Tu khom a bâu le lei vêng thatu chun, Siet theina lakah a nun a vèng him a nih. 24 Mi chapo hming chu 'Hmusittu' a na, Chin lêm nei loa uongin thil a thaw hlak. 25 Mi thabo chun ieng khom a thaw pei naw leiin, Ruol inhnar rêng rèngin a thi hmang hlak. 26 Mi rilo inhnarna chu a pung ni tin hlak a, Mi fel ruok chun inro nei loin a sem hlak. 27 Mi rilo inthawina chu LALPAN a tirdak a, Suol thaw tumna lungril puta a hung chawi lem chu, A va hang tirdak nasa zuol awm ngei de! 28 Hrepuitu der chu bohmang a ta, A thu awituhai khom kumkhuon bohmang an tih. 29 Mi rilo chu a meng inrum a, Mi indik ruok chun a lam hraw a ngaituo hlak. 30 Varna, hrietthiemna le remruot iengkim, LALPA kalzawng chu a hlawtling ngai nawh. 31 Sakor chu indo nia dinga buotsai a na, Hnèna ruok chu LALPA ta a nih.

Proverbs 22

1 Hming tha hi sum tam tak nèkin a ditum lem, Mi ngaihlut ni khom tangka le rangkachak nèkin. 2 Rethei le hausain nina an intawm chu, LALPA kutsuok vong an nina hi a nih. 3 Remhre mi chun titna a hmu pha a'n bi a, Mi mawl chun a tawn a, a tuor pha hlak. 4 Inngaitlawm le Pathien ti man chuHausakna, chawimawina le hringna a nih. 5 Mi rilo lampui chu hling le chângin a sip a, Nun vong him nuomtu chun a hnai ngai nawh. 6 Naupang chu lampui indik inchûktir la, A upat hnung khomin pêtsan ngai naw nih. 7 Mi hausahan pasiehai chungah thu an nei a, Thil pûktu chu inpûktirtu siehlaw a nih. 8 Hleineina tùtû chun buoina a sîk hlak a, Mi chunga lungsenna hmol a lek chu suktliekin um a tih. 9 Mi tiktlai chu malsawmin um a tih, Mi retheihai chu bu a pêk hlak leiin. 10 Hmusittu hnot suok la, innghirnghona bo a ta, Inhal le inbiek sisawhai khom rèng a tih. 11 Lungril thienghlim ngainatu leHawihawm taka mi biengbiek thiem chu, Lalin ruolah nei a tih. 12 Hrietna nei mi chu LALPAN a hum tlat a, Mi khêlhliphai thu ruok chu a pei thlâk hlak. 13 Mi thabo chun, "Tuolah sakeibaknei a um!Ka suok chun mi sè hlum a tih" dâm a ti hlak. 14 Nu leplêr bâu chu tlâkpûm inthûk tak ang a na, LALPA lungsenna phurtuhai chu tla lùt an tih. 15 Naupang lungrila invêtna bu khuor chu, Thununna hmola hnot hmang thei a nih. 16 Hausak nuom leia pasiehai nêksawr leThilpêka mi hausa tlon chu tlâkranna a nih. 17 I nâ dawin, ka thuhai hi ngaithla la, I lungrilin ka hrilhai chu vong rawh; 18 I lungrilah vong a, i hmùrah i sie zing chun, Thil lawmum tak nîng a tih. 19 LALPA ringa amaah i'n nghat theina dingin, Voisun hin i kuoma ngei ka hril a nih. 20 Thurawn le hrietna thuvar sawmthum, Ka ziek suokpêk diem che a nih, Chu chun remruot thiem dàn a chuong. 21 Chu taka chun thu dik ring tlâk hrieng i ta, Thu dik hmu suok dinga an tir phâ che, A donna indik tak hre thei i tih. 22 Mi pasiehai rok naw rawh, an rethei si a, Rorêlnaah hrilpuitu nei lohai pal zût naw rawh. 23 LALPAN an thu hung hrilpui a ta, Anni roktuhai chu rok vèng a tih. 24 Mi nunsie ruolah siem naw la, Lungsen hmang inkoppui naw rawh, 25 A nungchang la pal i ta, Intâng song hlauh rawi i tih. 26 Mi leibat rul dingin intiemkam naw la, Dàkhamah insie ngai bok naw rawh; 27 A thungna ding i nei si naw chun, I zàlkhum chen làkpêk an ti che. 28 Tiena tlânga in pi le puhai lo phun, Ramri lung chu son ngai naw rawh. 29 Mani sin thiem mi i hmu am?Ama chu lal kuomah sin thawng a ta, Mi naranin sor phâk naw ni hai.

Proverbs 23

1 Rorêltu leh thlaithlèng i kîl chângin, I hmaa um kha en fîmkhur la, 2 Tâm taluoa i beng tuom tuom chun, I hnuk le chemte i chuktuo ang nîng a tih. 3 Indawhâna ruoi el a ni thei ti hre zingin, A'n hnikna ngot chu hnot naw rawh. 4 Hausak tum leiin insuk-kulcho naw la, Insùm dan chintawk hre dingin var rawh. 5 Hausakna chu i hmu vuoi a, a bo nawk dai a, Mupui thla put ve ang elin vàn tiengA vuong hmang nawk thut hlak a nih. 6 Mi tiksie inah bu fa ngai naw la, Thil inhnik a neihai chu inhnar naw rawh; 7 A sêng zàt ding ngot sût mi a na, e "Fain dawn teuh rawh" ti sien khom, A lungrilin a ngài poimaw naw che. 8 I fàk tah tlawmte khom inluok suokin, Inpâk thlawn pal hlauh rawi i tih. 9 Mi invêt chu ieng khom hril naw rawh, I thu varhai chu iengah ngai naw nih. 10 Pipu ramri lungphun son naw la, Fahràhai ram nêk ngai bok naw rawh, 11 Anni Humtu chu a hrât a, Anni chu tan a ta, khing a ti che. 12 A zirtirnaah i lungril innghat la, Hrietna thu tieng i nâ daw rawh. 13 Naupang thununah intîm naw rawh, Hmola i vuok leiin thi naw nih. 14 Hmol hmangin hrem la, Seola inthokin a thlarau san suok i tih. 15 Ka naupa, i lungril a var chun, Ka lungril lawm takzet a tih. 16 I bâuin thu indik a hril chun, Ka thlarau lawm takzet a tih. 17 I lungrilin mi suolhai inhnar naw la, LALPA tîna tieng thahnem ngai pei lem rawh. 18 Chuongchun, hma tieng beisei ding nei i ta, I beiseina chu thlawn ngai hrim hrim naw nih. 19 Ka naupa, ngaithla la, var rawh, Lampui indikah i lungril sie tlat rawh. 20 Uoiin hè mi chu inkoppui naw la, Sa hè mihai lai inzêl bok naw rawh; 21 Inrui hmang le hnukrawlhai chu rethei an ta, Inrui muchukhai chun zakaw tiek hâk an tih. 22 A hringtu che i pâ thu zawm hlak la, I nû a hung tar pha hmusit naw rawh. 23 Thu dik inchaw la, zor ta naw rawh; Varna, inkeithuoina le hrietthiemna hai inchaw rawh. 24 Nau fel neitu chu nasa takin a hlim a, Nau var neitu chu a nau chungah a lawm hlak. 25 I chungah i nû le pâ lawm hai sien, A hringtu che chu hlim raw se. 26 Ka naupa, i lungril mi pe la, Ka lampui chauh bi ngar ngar rawh. 27 Nawchizor chu tlâkkhur inthûk tak ang a na, Nuhmei suol chu tuikul inchêp tak ang a nih; 28 Suomhmang angin mi an inchàn a, Pasal ruol lai bawsietna an sukpung. 29 Tu am chungpik, tu am lungngai, Tu am buoina nei, tu am thubuoi nei, Tu am tûl loa hliem tuor hlak, Tu am mit meng sen rûm hlak chu? 30 Sawt tak tak uoiin inthung chila, Uoiin chokpol dawn hlakhai chu an nih. 31 Noa uoiin sen phul sar sar el, An lem khiet khiet lai dâm chu, A en khom en ngai naw rawh. 32 A tawpah rûl angin mi a chuk a, Rûlngân tûr angin mi a fang hlak. 33 I mitin thil mak tak tak hmung i ta, Thil inzom lo tak tak ngaituong i ta, 34 Tuipui insok chunga zâl ang leLong ngul lêra inthên inthên, Long inrui ang el nîng i tih. 35 "An mi loka chu a na nawh, An mi vuoka chu ka hriet si nawh!Ieng tik am kei hi tho harin, Dawn ding ka hmu thei ding chu aw?" ting i tih.

Proverbs 24

1 Mi rilohai inhnar naw la, Anni lai thang ve châk bok naw rawh; 2 Inpawngnêkna ding ngot an dap a, Poi tawk dàn ding ngot an hril hlak. 3 Varna hmanga sûngkuo chu indin a na, Inhrietthiem tonnaa suknghet a nih. 4 In sûng chu ro hlu le mawi tinrênga, Hrietna hmanga sung sip a nih. 5 Pasaltha var chun mi hrât khawkhêng nêkin, Nasa takin thil a thaw thei lem a, Hrietna hi awmkhau nêkin a tha lem. 6 Râl do dingin râl rêl thiem a ngai a, Remhre hauhai chun hmèlma an hnè hlak. 7 Kul kota mipui pungkhawmnaaThupui vai phâk lo mi invêthai ta dingin, Varna hi ban phâk ruol a ni nawh. 8 Thil tha lo thaw ding phier hlaktu chu, Mihaiin mi khel siet hmangah an ngai. 9 Thil tha lo phier hi suol a na, Hmusittu chun mi hnâm a kai. 10 Buoi mangang huna i châu tlep el chun, Hràtna i nei tlawm hlê a nih. 11 Indik lo taka thi dinga an thuoihai chu san lo a, That dinga an fen dawr dawrhai chu ensan a, 12 "Kan lo hriet ve rêng rêng lem ie!"Tia inhril tlip in tum tâl dâm a ni chun, Lungril bûktu'n a hmu naw ding cheu maw?In thlarau vêngtu chun a hriet kim vong a, Mi tin an thil thaw angin a rul ding a nih. 13 Ka naupa, khuoizu dawn rawh, a tha si a, A thlâra inthoka far ngei chu inhnik i ti kha. 14 Varna hi i hringnun khuoizu a nih ti hre la, I man fûk chun hma tieng beisei ding nei i ta, I beiseina chu thlawn ngai hrim hrim naw nih. 15 Suomhmang angin mi fel in inchân naw la, A chêngna in chu rok ngai naw rawh, 16 Mi fel chu voi sari tlu sienkhom, A hung tho nawk pei hlak a, Mi rilohai ruok chu sietnain a chim nel hlak. 17 I hmêlma a tlùkin diriem naw la, A'n sui chângin i lungril lawm naw raw se. 18 LALPAN hmuin dit nawng a ta, A chunga a lungsenna rè hlau rawi a tih. 19 Thil suol thawtuhai leiin insukhnûr nuom naw la, Mi rilohai chu inhnar ngai bok naw rawh 20 Mi suol chun beisei ding hrim a nei naw a, Mi rilo khawnvar chu sukmit vak nîng a tih. 21 Ka naupa, LALPA le lal chu ti la, Anni laka helhai chu inkoppui naw rawh; 22 An chungah sietna intlungtir thut an tih, Sietna intlun theitu an ni ve ve si a. 23 Mi var chun hienghai khom hi a hril:Rorêlnaa thlei bik nei hi a tha nawh. 24 Mi rilo kuomah, "Poi i tawk nawh" titu chu, Miin tongsie inphur an ta, Hnam tinin tirdak an tih. 25 Thiem naw inchangtirtu ruok chu lawm an ta, Malsawmna tam tak vûrin um bok a tih. 26 Donna indik tak pêk chu, Hmûra infawp ang a nih. 27 Puo tienga i sin chu thaw zo la, I lohma iengkim rêl fel diem la, Chu zoah i in ding indin rawh. 28 A san boin i tuolbawmhai thubuoiah, A kal zawngin hrepuituah thang ngai naw la, Khêl hrilnan i hmûr hmang naw rawh. 29 "Amân ka chunga a thaw ang charin, Hang thungrul vèng ka tih" ti ngai naw rawh. 30 Mi thabo lo ka hraw tlang a, Rem hre lo grèp huon ka sir bok a, 31 Hmun tin hlingin a bawm sip a, A hnuoi thûlin a tuom phui vong a, A dâi lung bang a chim thla vong. 32 Ka thil hmu ka ngaituo neu neu chun, Inchûk ding thil ka hmu suok a: 33 'La hang zâl met ka tih, La hang inhnâr met ka tih, Kut hmasuiin, hadam takin, La'n zam met ka tih' i ti sûng khan, 34 Pasietna chun rûkru angin, Hung nang thut a ti che a, Tlâksamna khomin râl angin, Hung nangching thut a ti che.

Proverbs 25

1 Hienghai khom hi Solomon thuvar dang, Judai ram lal Hezekia mihaiin, An ziek thlâk sawng chu a nih: 2 Pathien ropuina chu a thil thup a na, Lalhai ropuina chu a thil thup zong suok a nih. 3 Vàn insângzie le hnuoi inthûkzie ang bokin, Lalhai lungril khom sui suok ruol a ni nawh. 4 Tangkaruo êk po i pei hmang chun, A sertuin thil tha hung ser suok a tih; 5 Lal bula inthokin mi rilo po son hmang la, A lalna chu felnaa suknghetin um a tih. 6 Lal hmaah invor làr tum naw la, Milienhai lai thung inchu bok naw rawh; 7 Milienhai hmaa insukhmaimawk nêkin, Thungna tha lema thung dinga fiel ni a tha lem. 8 I mit ngeia i thil hmuhai khom, Rorêltu kuomah intlun inhmaw naw rawh; A tawpah i tuolbawmin sukmuolpho sien che, Ieng am i law hrim ding a na? 9 I tuolbawm leh thubuoi in nei a ni khomin, Hmai intonin in thu chu hrilpui la, Mi dang thurûk hril suok ngai naw rawh; 10 A lo hretuin sukmuolpho hlau a ti che a, I hming siet rè ta ngai naw nih. 11 Thû a ni dàn ding ang taka hril suok hi, Tangkaruoa rangkachak mûm phùm ang a nih. 12 Mi var zilhauna chu a ngàithlatu ta dingin, Rangkachak nabe le kutsebi nêkin a hlu lem. 13 Palai ringum chu a tirtu ta dingin, Bu sîk huna vûr dei ang a na, A puhai lungril a sukhar song song hlak. 14 Thilpêk pe dinga intiem sia pe lo chu, Sûm tui pai lo thliin a lên ang chauh a nih. 15 Dawtheinain rorêltu lungril a hnè thei a, Tong innemin rù khom a dèng tliek thei. 16 Khuoizu i hmu chun a huntawk char fa rawh, I fâk rawn taluo chun inluok rawi i tih. 17 An khât tawk chauin i tuolbawmhai sir rawh, I leng inzing taluo chun nghok an ti che. 18 Mani tuolbawmhai indik lo taka hèk chu, Hmol le kawlhnàm le thal inzum tak ang a nih. 19 Buoi nikhuoa mi ringum lo ringsana hmang chu, Ha nâ le ke rù inpelsol nei ang a nih. 20 Mi lungngai laia hla sakkhum chu, Dei laia silfên lakpêk ang le, Hliemna bea changal bur ang a nih. 21 I hmêlma a phing a tâm chun bu pe la, A dang a châr chun dawn ding pe rawh. 22 I pêk chun a luah meiling i sie khawl nîng a ta, LALPAN lawmman pêng a ti che. 23 Hmar thliin ruo a hung thuoi hlak angin, Mi dem hmang leili chun lungsen hmêl a kei pung. 24 Nuhmei hrângsie le in lien tak hluo nêkin, In chung sîp kila um a tha lem. 25 Ram hla taka inthoka chanchin lawmum hriet chu, Châu dangchârin tui dei a'n khiet ang hi a nih. 26 Mi rilo hmaa mi fel tlawm chu, Tuikhur suksiet le tuihnar sukporchè ang a nih. 27 Khuoizu dawn rawn taluo a tha naw ang bokinChawimawi hlaw tum taluo hi a tha nawh. 28 Mani inthunun thei lo mi chuKhaw kul bang chim ang a nih.

Proverbs 26

1 Nipui laia vûr tlâk le busik huna raw sûr chu, Thil inhmè lo a ni ang bokin, Mi invêt le chawimawina hi thil inhmè lo a nih. 2 Chongzong vuong kuol le peleu inlêng angin, A san boa tongsie inphur chu a'n leng kuol hlak. 3 Vuokna hruol chu sakor ta ding a na, Thîrbar chu sabengtung ta ding a na, Hmoltum chu mi invêt ruongzànga ding a nih. 4 Zawna invêt tak tak i don pei chun, A zawna indontu anga invêt ni vêng i tih 5 Invêt chu a'n vêt dàn ang chauhin don rawh, Chuong naw chun varah inngai hlauh rawi a tih. 6 Mi invêt zuolkoa tirtu chu, Mani ke tan bong a, Nunrawngna tui dawntu ang a nih. 7 Thuvar hi mi invêt baua ding chun, Ke zeng thên ang mei mei a nih. 8 Chawimawina mi invêt inkhumtir chu, Saihlia saihlûm khit de ang a nih. 9 Thuvar hi mi invêt bâua ding chun, Zurui kuta hling lût ang a nih. 10 Mi invêt le mi lênglak sor hlaktu chu, A hmû hmù kâp hliem hlak thal kâptu ang a nih. 11 A luoka bok kîr nawk hlak ui angin, Invêt chun thil invêt a thaw non rop hlak. 12 Var si loa vara inngai nêkin, Mi invêt chun beisei ding a la nei lem. 13 Thabo chun, "Lampuiah keipui a um, Kotthlêrah keipui a'n vâk" a ti hlak. 14 Kotkhâr chu kopzaa inthlung a ni angin, Mi thabo khom a khum leh an inmat hlak. 15 Mi thabo chun buthlêng a pur a, Bu beng dingin kut a hlàng pei si nawh. 16 Fîmkhur taka thu hril hlak mi pasari nêkin, Mi invêt chun var lem daiah a'n ngai. 17 Lam laka mi buoinaa inroltu chu, Ui tuol leng lai naa lo mantu ang a nih. 18 Mi invêt, thingthu hringa mi nor a, Thi theina thala mi kâptu chu, 19 Mani tuolbawmhai hlêm a, "Ka fiemthu a nih" titu ang char a nih. 20 Thingthu bo chun mei a rêm ang hin, Inlawt tuo a um nawnaah inhal a rè hlak. 21 Meihol a tam leh mei a'n ling tha a, Thing a tam leh mei a chok tha ang bokin, Inhal hmang tamnaah buoina a pung hlak. 22 Inlawt indem hi bu inhnik tak ang a na, Mihriemin ei dol lût zung zung el hlak. 23 Hmûr thiem, lungril suol put si chu, Dâr tuia pil bêl zût tlêt ang a nih. 24 Mi vervêkin theidàna a pài ruk chu, Tongkam thain a thup thiem hlak. 25 Thu hril thiem hlè sien khom awi naw rawh, A lungrilah tirdakum pasari a pâi si a. 26 A theidàna chu hlêmna thuin thup sien khom, A rîtlona chu tlâng hrieta phor lang ni tho a tih. 27 Tlâkkhur chotu chu ama khur choa chun tlâng a ta, Lung inhlumtu chu a chungah hung inhlum lêt a tih. 28 Lei khêlhlip chun a'n hliemhai chu a theida a, Inpâk derna hmûr chun sietna a'n tlun hlak.

Proverbs 27

1 Zînga ding thil uongpui naw rawh, Zîngin iem a her suok ding i hriet si nawh. 2 Mani bâua mani inpâk loin, Mi dangin inpâk lem raw hai se che, Nangma hmûra inthok ni loin, Hmêl hriet lo hmûra inthok ngeiin. 3 Lung hi a rik a, phaiphin hi a khìn a, Mi invêt chona chu an pahni nêkin a rik lem. 4 Lungsenna hi a rawng a, Lungsen intûr lem chu a phul buon buon a, Sienkhom thîkna chu tuin am tuor zo a ta? 5 A rûka inhmangai nêk chun, Tlang taka inzil hi a hlu lem. 6 Ruol mi ben chu thatna ding a na, Hmêlma fawp luom chu a der a nih. 7 Khop lai chun khuoizu khom ei hnâm a, Tâm chun thil khá khom a'n hnik vong. 8 In le lo ngaisak loa dauràp chu, A bu op lum hman lo vate ang a nih. 9 Hriek le rimtuiin lungril a suklawm angin, Lungril taka suok ruol tha thurawn pêk chun, Lungril a sukhlim hlak. f 10 I ruol le i pâ ruolhai nghatsan naw la, Sietna i tuokin i unau kher pan naw rawh. Ràla unauhai nêkin tuolbawmhai an tangkai lem. 11 Ka naupa, var la, ka lungril suklawm rawh, Mi hrilsetuhai chu ka don lêt theina dingin. 12 Remhre mi chun titna a hmu pha a'n bi a, Mi mawl chun a tawn a, a tuor pha hlak. 13 Hriet lo mi ta dinga dakhama insietu silfên chu la la, Nu tha lo lakah a ni lem chun a silfên chu dakhamah sie rawh. 14 Zîng inhma taka mi kei tho a, Inring vuola mi chibai chìng chu, Tongsie inphur ang charin ngai an tih. 15 Nuhmei inhal hmang chu ruo nichîng ang a nih; 16 Khap dei tum chu thli dang tum ang leKuta sahriek fùn dè tum ang a nih. 17 Thîrin thîr bok a sukngei thei angin, Mihriemin mi dang a tât ngei hlak. 18 Theichang kung enkoltu chun a rà fâng a ta, A pu enkoltu chun chawimawi hlawng a tih. 19 Tuiah hmêl thla a'n lang angin, Mihriem lungrilah a nìna a'n lang. 20 Thina le Sietnan khop tik an nei naw angin, Mihriem mit khomin khop tik a nei nawh. 21 Suongtuina bêl chu tangkaruoa ding a na, Rawtuina pûm chu rangkachaka ding a na, Mihriem fiena chu inpâk a hlawnaah a nih. 22 Mi invêt chu bu rawtna lunga rawtin, Sumah fahrelin suk hrep khom ni la, An vètna chu sukkhè thei chuong naw ti nih. 23 I beramhai ngîrhmun hre chieng la, I ran ruol fîmkhur takin enkol rawh. 24 Hausaknain kumkhuo a dai naw a, Lalna khomin thang tam a dai nawh. 25 Hlo an àt a, der thar a hung insuo a, Tlânga inthokin ran bu an làk khawm hlak. 26 I beram hmulhai chu sil i ta, Kêl manin ram inchawng i ta, 27 I sûngkuo chawmna dinginKêl nenetui tam tak sawr i ta, I siehlaw nunghâkhaiin tlàn bok an tih.

Proverbs 28

1 Mi suol chu tu hnot loin a tlânsie a, Mi fel chu sakeibaknei angin a huoi. 2 Ram sûngah helna a suok pha, Rorêltu an inthlàk zûr zut hlak a; Lal var le hrietna hau mi ruok chun, Buoina um loin ram a enkol hlak. 3 Pasiehai nêksawr mi rorêltu chu, Bù phà setu ruopui vânawn ang a nih. 4 Dàn bawsetuhan mi rilohai an inpàk a, Dàn zawmtuhai ruok chun an dodàl hlak. 5 Mi suolhan rorêlna dik an hriet thiem naw a, LALPA zongtuhai chun iengkim an hriet thiem. 6 Nun khawkher hrawtu mi hausa ni nêkin, Soisel boa kalchawitu mi rethei ni a tha lem. 7 Dàn zawmtu nau chu lungvar nei mi a na, Mi hnukrawlhai pawltu chu a pâ sukzaktu a nih. 8 Sum pung la teua insukhausatu chun, Mi rethei lâinatuhai ta dingin a khawl khawm a nih. 9 Tu khom dàn bengkhon nawtu chu, An tongtainahai chen khom a tirdakum. 10 Lampui tha loa mi indikhai thuoitu chu, Ama tlâkkhur choa ngei chun tlâng a ta, Soisel boa khawsatu ruok chunThil tha dongin rochung a tih. 11 Mi hausa chun var a'n ti hle khom a ni thei a, Lungvar nei mi rethei chun a hmu tlang vong si. 12 Mi fel a hlawtling chun hlimna nasa tak a um a, Mi rilo a dingchang pha mi an inbi hmang hlak. 13 Mani suolna iptu chu hmuingil naw ni a, Inpuonga simtu chun zàngàina hmung a tih. 14 LALPA ti roptu chu a hamtha, Mi lulul ruok chu a vangduoi hlak. 15 Rorêltu suol chu mi retheihai ta dingin, Keipui inrum le savom mi hnot ang a nih. 16 Hrietthiemna tlasam lal chun, Rawng takin mi a nêksawr hlak; Hlêprûkna theidatu lal ruok chu, A dam sung nihai sukseiin um a tih. 17 Tuolthattu chu tuoltlân sien khom, Tu khomin hum naw hai sien la, A thi chenin tlân se zing raw se. 18 Soisel boa kalchawitu chu him a ta, Nun khawkher hrawtu ruok chu tlu thut a tih. 19 Mani lo inlettu chun bu hau a ta, Duthusam ringot hnottu chu pasieng a tih. 20 Mi ringum chun malsawmna dong rawn a ta, Hausak thut tumtu chu hrem loin suok naw nih. 21 Thlei bîk nei hi a tha nawh-Bei hlek chunga khom thaw suol thei a nih. 22 Mi tiksie chun hausak vat a châk a, Pasietnan a nghâk zing ti a hriet si nawh. 23 Mi ziltu chun mi inpâk dertu nêkinA tawpah mi ngàinat hlaw lem a tih. 24 Mani nû le pâhai rok a, "Ieng khom a suolna a um nawh" titu chu, Suomhmang ruol tha a nih. 25 Mi duâm chun innghirnghona a chok suok a, LALPA-a innghattu ruok chu hmûingìl a tih. 26 Mani lungrila innghattu chu mi invêt a na, Varnaa kalchawitu ruok chu a him hlak. 27 Pasiehai somdawltu chu tlasam ngai naw ni a, Mit insîmsantu ruok chun tongsie phur teu a tih. 28 Mi rilo an dingchang pha mihai an inbi a, Mi rilo an ram pha leh mi fel an pung hlak.

Proverbs 29

1 Zil rop khoma rîng la sukkhong tlattu chu, Sukdam ruol loa suktliekpêk thut la nîng a tih 2 Mi felin lalna an chang phâ mipui an lawm a, Mi riloin ro an rèl phâ mipui an inrûm. 3 Varna dittu nau chun a pâ a sukhlim a, Nawchizor inkoppuitu chun a suktlaran hlak. 4 Rorêltu indik lal chun ram a suknghet a, Thamna ngàinatu ruok chun a suksiet hlak. 5 Tuolbawm inpâk der ching mi chun, A'n awkna ding lên châng a kam a nih. 6 Mi tha lo chu a suolnan a awk a, Mi fel ruok chun hlim takin hla a sak. 7 Mi fel chun retheihai chan a hriet thiempui a, Mi rilo ruok chun a hriet thiempui ve nawh. 8 Hmusittuhai chun khuo an chokbuoi a, Mi felhai ruok chun an thawi dam hlak. 9 Mi varin mi invêt a khing chun, Mi invêt êltam hràng ri chun, Tawp zâi rêng a rèl ngai nawh. 10 Thisen insuo mihan mi indik an theida a, Mi ngîlhai sukhlum dàn an zong hlak. 11 Mi invêt lungsen chu a'n hrawt hrep a, Mi var ruok chu a'n khap dei hlak. 12 Rorêltuin thukhêl a dondai chun, A thoktu po po mi rilo an inchang hlak. 13 Pasie le a nêksawrtu inthuhmunna chu, LALPAN hmu theina mit a pêk ve ve hi a nih. 14 Pasiehai chunga indik taka rorêltu chu, A lalna suknghet ni zing a tih. 15 Thununna hmol chun varna a'n tlun a, Thunun lo nau chun a nû a sukmuolpho hlak. 16 Mi rilo an inlal pha bawsietna khom a pung a, Mi felhai ruok chun an tlûksiet hun la hmung an tih. 17 I nau i thunun tha chun hadam i ta, I lungril suklawmtu nîng a tih. 18 Hmulawkna a um nawna hmuna chun, Mipui an inthlàdà hlak a, Dàn zawmtuhai ruok chu an hamtha hlak. 19 Siehlaw chu hril chaua thunun thei a ni nawh, Hre thiem khom ni sien, ûksak naw nih. 20 Nuompawnga tong puot puot mi nêkin, Mi invêtin beisei ding a la nei lem. 21 A chîn laia inthoka siehlaw duot suol chun, A tawpah ro chen hung inchù pei a tih. 22 Thinsie chun innghirnghona a chok suok a, Lunginrom chun suol a thaw rem rum hlak. 23 Mi chapo chu a chaponain a hnûk hnuoi a, Lungrila inngàitlawm chun chawimawi a hlaw hlak. 24 Rûkru inkoppuitu hmêlma chu ama a nih, Thudik hril dinga intiemkam siin a hril ngam nawh. 25 Mihriem tina chun châng angin mî a awk a, LALPA-a innghattu ruok chu a him hlak. 26 Mi tam takin lal ditsakna an zong a, Indik taka rorêltu chu LALPA a ni lem si. 27 Mi felin mi ringum lo a ten a, Mi riloin mi indik a ten bok.

Proverbs 30

1 Jakeh naupa Agur thu, Ithiel le Ukal kuoma thuvar a hrilhai chu:g 2 "Mi laia a mawl tak ka na, Mi hriet ang ka hriet phàk ve naw a, 3 Varna ka'n chûk naw a, Mi Thienghlim ka hriet bok nawh. 4 Tu am vànah lawna hung tum nawk?Tuin am kutpàrin thlî a fûn khawm thei?Tuin am puonin tui a fûn thei?Tuin am kawlkil tin a siem nghet?Tu am a hming le a naupa hming?A hrie in um chun mi hril ro. 5 "Pathien thu tin hi soisel boa indik a na, Ama bêltuhai ta dingin phaw a nih. 6 A thuhai chu belsa naw ro, Chuong naw chun zil a ti cheu a, Khêlhlip ni pal rawi i tih. 7 "Aw LALPA, thil pahni chauh ka ngên che, Ka thì hmain mi remtipek lul rawh. 8 Indik nawna le khêl po po lakah, Nangman mi vêng him la, Mi sukhausa naw la, Mi sukpase bok naw la, Ka ni khat tlâk char bu mi pe rawh; 9 Ka hausa taluo pal hlauh chun, 'LALPA chu tu am a na?' tiin, Inphatsan hlauh rawi ka ti che. Ka rethei chun rûk dâm inrûng ka ta, Ka Pathien hming sukhmêlhem rawi ka tih. 10 "A pû bulah siehlaw dem naw rawh, Tongsie inphur hlauh a ti che a, Thiem naw chang palh rawi i tih 11 "Thenkhat chu pâhai tongsie inphur, Nûhai malsawm lo dâm an um. 12 Mani tirdakumna sawp fai si loa, Thienghlim êm êma inngai an um bok. 13 Ieng lai khomin an meng chapo a, Mi tham naw êm êmin an meng inlir. 14 Hnuoia mi retheihai fâkna dingin, An hà kawlhnâm angin a ngei a, Mi pasiehai soi nawina dingin, An hapui chu chemte lu zum ang a nih. 15 'Mi pe rawh, mi pe rawh' tia khêk hlak, Invot chun nau nuhmei pahni a nei. 'Thil pathum, khop tik nei lo an um a, 'A hun tah' ti ngai lo thil pali an um bok: 16 Thlàn, sul ching, Tui khopkham dong lo hnuoi châr, 'A hun tah' ti ngai dèr lo mei. 17 "Nau, pâhai mit phielkhumtu, Nau, nû thu awi loa nuisantu chu, Phaia vaâkhaiin a mit la chuk dok an ta, Mulukolhan a ruong la tlàn an tih. 18 "Thil pathum mak ka ti tawp lo an um a, Thil pali ka hriet thei lo an um bok: 19 Boruoka muvânlai fêna hnûhma, Lungpuia rûl fêna hnûhma, Tuipuia long fêna hnûhma, Pasalin nuhmei a pawlna hnûhma. 20 "Hi hi a nih nuhmei uire um dàn chu:Mi a uirepui a, a'n sawp fai a, 'Suol ieng khom ka thaw nawh' a ti hlak. 21 "Thil pathum leiin hnuoi hi an hnìng a, Thil pali khawvel tuorhla a um: 22 Siehlaw lala inthung, Mi invêt bu le sa hauh, 23 Nu theidaum pasal nei, Siehlaw nunghâk, a pî hlàntu. 24 "Hnuoia hin thil pali chiktê tè, Sienkhom var deu el an um: 25 Phâivâng hi hrât naw tak an nia chu, Thâlah fâk ding an sêkkhawl hlak; 26 Sangawi hi hrat naw tak a nia chu, Lungpui kak kâr inin an hmang; 27 Khau hin lal an nei nawa chu, A honin an intlon hlak; 28 Cholru hi man el thei a nia chu, Lal inah a chêng tlat hlak si. 29 "Thil pathum, an nawh thil pali lem, An hang chêt vela inzà phur tak an um: 30 Sakeibaknei, ramsahai lal, Tû hmaa khom zâm ngai lo; 31 Arkhong lawn theu theu; A ruol laia kèlchal; Lal, a sipaihan an ngîr huol khup lai. 32 "Invêt taka nangma inchawisâng a, Thil suol thaw ding i lo phan a ni chun, I kutin i bàu hup hmak rawh. 33 Bawngnene inluma chok zing chun, A khal a hung suok hlak ang le, Hnâr her chun thisen a suok hlak angin, Lungsenna i cho phawk ngei chun, Insuolna chok dok a tih. "Lal Lemuel thuvarhai

Proverbs 31

1 Lal Lemuel thuvarhai, a nuin a zirtirhai chu: 2 "Aw ka naupa, aw ka rîla rà, Ka thu intiemkamna rà suok, 3 Lalhai suksetu nuhmei lakah, I hrâtna hmangthâi naw rawh. 4 Aw Lemuel, uoiin dawn hi, Lalhai thaw ding a ni naw a, Rorêltuhai khom zu hrât ngaiin, An dang a châr ding a ni nawh; 5 An dawn chun dàn theinghilin, Nêksawrhai piengvo lapêk rawi an tih. 6 Boral mèkhai chu zu hrât pe la, Mi lungngaihai chu uoiin pe rawh. 7 Dawn hai sien, an pasietna le, An rinum tuor theinghil raw hai se. 8 "Mani thu hril thei lohai chu hrilpêk la, Mi baivaihai chu san rawh. 9 Hrilpui la, thu inlai takin rêl la, Mi retheihai chanvo humpêk rawh. 10 Nuhmei tha le inzaum hi, Thil hmu harsa tak a na, Lunghlu sen nêk daiin a hlu lem. 11 A pasalin a ringzo a, Hlutna iengkim koltu a nih. 12 Ama chun a dam sûng po poin, Sietna nêkin thil tha a hung intlun a, 13 Beram hmul le pat a zong a, A kutin inhawk takin a khawng a. 14 Ram hla taka inthoka hung, Bu tol sumdawng long angin, Fâk ding a lâk khawm hlak a. 15 Khaw var hmain a tho a, A sûnghai zîng bû a pèk a, A siehlawnuhai thaw ding a rèl fel a. 16 Huon ding ngàituoin a'n chawk a, A thaw suokin grèp huon a siem a. 17 Thatho takin sinah a pu a, A bân thàhai a sukhràt a. 18 Hlawk ngei dingin sum a dawng a, Zànah a khawnvar a mit ngai nawh. 19 A kutin hmûi thlùr a chel a, A kut khingin pat a kher a. 20 Mi retheihai ta din a thilphal a, Mi baivaihai a somdawl hlak. 21 Vûr tlâk hunah a sûngkuohai, An lungkham ve ngai dêr nawh, An rêngin thuom lum an nei si. 22 Khumpha puon mawi a khawng a, Silfên to le puon sendukin a'n thuom a. 23 Kul kot bula pungkhawmhai lai, A pasal chu upahai lai a thung ve a, Mihai inzà a hlaw a. 24 Silfên man to siemin a zor a, A hrènpuon tà chu sumdawnghai a thon a. 25 Hràtna le inzaumna'n an thuom a, A hmâ tieng chu a ta din innuina a nih. 26 Var takin thu a hril a, A bâu suok chu ringumna thuchà a nih. 27 Insûng khawsak tha takin a enkai a, Thabona bu a fâk vè ngai nawh. 28 A nauhai chun a hmaah thoin, "Hamthanu" tiin an ko a, A pasal khomin chuong anga inpâkin, 29 "Thil hlû thaw nuhmei an tam vei leh, Nang ruok chun i khûm zo vong" tiin. 30 Ngainobeina hi thil hlun lo a na, Hmêlthatna khomin sawt a dai nawh; LALPA tìtu nuhmei chu inpâk tlâk a nih. 31 A thaw rà lukhawng dong sien la, Kul kotkhârah chawimawi hlaw raw se.

Ecclesiastes 1

1 Jerusalem lal, Davida naupa, Thuhriltua thuhai chu: 2 Thuhriltu chun iengkim el hi Iengma lo, Iengma lo takzet a ni vong, a ti a. 3 Ni hnuoia mihriem sawlpui po poa hin, Ieng am hlawkna a hmu a? 4 Thang khat an liem a, thang dang an hung a, Hnuoi ruok chu a pangngai zing. 5 Nisa a suok a, a tla nawk a, A suokna tieng a pan nawk nghal a. 6 Thlî chu sim tieng a hrâng a, Hmar tieng a hung lèt nawk a, A'n vir kuol a'n vir kuol a, A lam ngaia bok a kîr nawk a. 7 Vadung tin tuipuiah an luong lût a, Tuipui ruok chu a liem chuong nawh. A hung suokna vadunga bok, Tui chu a kîr nawk vong hlak. 8 Iengkim hi a sawlum thlâk vong, Hang hril sèng khom a ni nawh. Mitin khop tik a nei naw a, Nâin tlai tik a nei bok nawh. 9 A um tah kha a hung um nawk a, Thaw ta sa kha ei thaw nawk a, Vàn hnuoiah thil thar hrim a um nawh. 10 "En ta, hi hi thil thar a nih!"Hang ti ding ieng am a um a?Sawt taka inthoka um ta vong, Ei um hma daia lo um tah a nih. 11 Miin thil hlui an hriet zing naw a, La tlung ding peihai khom chu, A hnunga haiin hre zing naw nih. 12 Kei, Thuhriltu hi Jerusalema Israelhai lal ka ni ta a. 13 Vàn hnuoia thil thaw tah po po chungchâng khom varna hmanga hmu suok tumin ka lo bei ta hlak a. Pathienin mihriem chana phur a lo siempêk hi a rik ngot el. 14 Nisa hnuoia thil thawa umhai chu ka hmu a, iengkim el hi iengma lo le thli hnot ang chauh a lo ni vong. 15 A kawi tah chu suktlûn thei a ni naw a, A um naw chu tiem sa thei a ni bok nawh. 16 "En ta u, ka hmaa Jerusalema lalhai po po nêka nasain varna tieng ka'n thanglien a, varna le hrietna khom ka hmang rawn lem" ka ti lungril a. 17 Ka lungril hi varna hre thiem ding le invêtna le intlawkna hre thiem dingin ka hmang a, sienkhom chuong thilhai khom chu thli hnot ang chauh a nih ti ka hriet tah. 18 Varna hau chu lungkham hauna, Hrietna hau chu beidong tamna a nih.

Ecclesiastes 2

1 Ka lungrilin, "Khaw tam, nuomsip hang chèn vêng ka tih, ieng angin am a'n hoi hrim!" ka ta, sienkhom ieng khom a lo ni chuong nawh. 2 "Innui ringot hi thil invêtthlak a nih. Hlimhlop ringot khom iem a hlawkna a um a?" ka ta. 3 Ka'n ngaituo fè hnungin, uoiin-a insukhlim ka tum a. Varna zong zing siin invêtna chu ka'n kuopui a. Chuong ang chun, vàn hnuoia mihaiin hringnun tawite sûnga hlimna an hmu chu tong ve ka lo inbeisei a nih. 4 Thil tam tak ka thaw a, ka in ding ka bawl a, ka grèp huon ding ka siem a. 5 Lengna hmun huon inhoi tak tak ka siem a, theikung chi hrang hrang ka phun teu a. 6 Huon chawmtu ding dîl ka siem a. 7 Bawi ding nuhmei le pasal ka'n chawk a, ka ina inthoka pieng ngot khom an tam. Ka hmaa Jerusalema lal po pohai nêkin bawng ruol le beram ruol khom ka hau lem. 8 Tangkaruo le rangkachak ka sêk khawm teu a, lalhai le biel optuhai ro mi pêkhai khom ka nei thèr thûr a. Hla sak thiem nunghâk le tlangvàl ka nei teu a, pasal lawmzawng hmei hmèl tha tak tak ka hau bok a. 9 Ka hmaa Jerusalema lo um ta hlak po po ka khûm vong a, ka varna khom ka la kol zing bok a. 10 Mita ka châk taphot chu, Hlà ka nei naw hrim hrim a, Hoithawnaa inhmang dingin, Ka lungril ka khap ngai nawh. Ka sin inrimnaah ka lawm a, Chu chu ka lawmman a nih. 11 Kuta ka thaw suokhai thlîr a, Ka sin inrim rà ka en hin, Thil iengkim hi iengma lo leThli hnot ang chauh a lo ni si. Ni hnuoiah hlawkna a um nawh. 12 Varna, invêtna le mawlnahai, Lungrilin ka ngaituo neu neu hlak. Lal khomin a hmaa lalhai thaw bàk, Ieng am a thaw thei bîk chuong a? 13 Var chu inthim nêka tha lem, Varna khom invêtna nêka tha lemA nizie chu ka hriet chieng a. 14 Mi var chun a fèna ding a hmu a, Mi invêt chu thimthamah a lawn. Sienkhom mi var le mi invêt khom, Khuorel thuhmun intawm an nih. 15 "Mi invêt chunga tlung chu, Ka chungah tlung vèng a ta, Iem ka var ka hlawkpui bìkna?"Ti dâm chu ka ngàituo hlak a. "Hi khom hi iengma lo a nih"Tiin ka lungril ka hril a. 16 Mi var chu invêt ang bokin, Hriet zing hlaw bîk naw ni a, Hun la hung tlung pei dinga chun, Theinghil la ni ve vêng an tih. Mi invêt ang bokin mi var chu, A la thi ve ding a ni si a. 17 Nisa hnuoia thilthaw rêng rêng hi mi sukrimtu a ni leiin, nun hi ka nghok a nih; iengma lo vong, thli hnot ang char a nih. 18 Nisa hnuoia ka thokrimna san po po hi ka hnunga hunghai ta dinga ka mâksan el ding chauh a ni leiin, ka nghok a nih. 19 Ama chu mi var amanih mi invêt amanih ding tuin am hre thei a ta? Sienkhom, nisa hnuoia ka thokrimna ra po po neitu a hung ni ding a ni si. Hi hi thil ho tak a nih. 20 Chuleiin, nisa hnuoia ka thokrimna po po chungah ka'n sir rum rum tan a nih. 21 Varna le hrietna le thiemna hmanga nasa taka thokrimtuhai thaw rà chu ieng khom thaw ve hrim hrim loin a rochung hlauh hlak si. Hi khom hi thil ho tak le vangduoi thlâk tak a nih. 22 Miin nisa hnuoia sawl taka a thawna po poa chun ieng am a hlawkpui a? 23 A dam sûng rimsikna le tuornain a sip a, zàna chen khom imu hmu loin a ngàituo hlak. Hi khom hi thil ho tak a lo nih. 24 Mihriem ta dingin dit tawka fâk le dawn le mani sina lungawi bàka tha hi a lo um nawh. Hi khom hi Pathien kuta inthok a nih ti ka hung hriet tah. 25 Ama boin tuin am faa dawnin, inhoitiin um thei a ta? 26 Ama suklawmtu kuoma chun Pathienin varna hai, hrietna hai le lawmna hai a pêk si a. Mi suolhai ruok chu Pathien suklawmtuhai rochung ding la khawmtu le sêk khawmtuah a sor thung a nih. Hi khom hi iengma lo, thli hnot ang tho a nih.

Ecclesiastes 3

1 Iengkim ta dingin hunbi ruot a um a, Vàn hnuoia thil iengkim hin hunbi a nei seng: 2 Pieng hun a um a, thì hun a um; Phun hun a um a, phawi hun a um; 3 Sukhlum hun a um a, sukdam hun a um; Thiek hun a um a, bawl hun a um; 4 Tap hun a um a, innui hun a um; Sûn hun a um a, làm hun a um; 5 Lung pei hun a um a, lâk khawm hun a um; Inkuo hun a um a, inhnàm hun a um; 6 Zong hun a um a, sukhmang hun a um; Kol hun a um a, dehawn hun a um; 7 Sukthlêr hun a um a, phawk hun a um; To hun a um a, tong hun a um; 8 Hmangai hun a um a, theidà hun a um; Indo hun a um a, muong hun a um. 9 Sinthawtuin a sin inrimnaa inthokin hlawkna ieng am a hmu a? 10 Pathienin mihriem nauhai chunga phur a lo innghat chu ka hmu tah. 11 Iengkim mani hun senga mawi dingin a siem a. Mihriem lungrilah chatuon a sie bok a. Sienkhom, chuong sà khom chun a tîra inthoka a tawp chena Pathien thilthaw chu an hmu suok thei chuong nawh. 12 Hlim taka um a, an dam sûnga thil tha mihriemin an thaw nêka tha lem ieng khom ka hriet nawh. 13 Mi tinin fa le dawn a, an sin inrimna po poa lungawina an hmu hi Pathien thilthlawnpèk a nih. 14 Pathienin a thaw taphot hi kumkhuo dai ding a nih ti ka hriet a, ieng khom bel sa thei a ni naw a, ieng khom pei thei a ni bok nawh. Mihriemin ama an ti theina dinga Pathienin a thaw a ni si a. 15 A um lai hi a um ta sa a na, A la hung um pei ding khom, A um ta sa vong a nih; Pathien chun a bo tahai kha, A hung làk kìr nawk pei a nih. 16 Chun, nisa hnuoia thil um danghai khom ka hung hmu suok pei a:Rorêlna hmunah rîtlona a thung a, Indikna hmunah rîtlona a thung bok. 17 Lungrilin ka ngaituo a:"Mi felhai le mi suolhai chungthu, Pathienin la hung rèl a tih; Iengkim ta dingin hun remchâng leThil iengkim thawna hun chu, A la ruot ding a ni si, " tiin. 18 Mihriem nauhai chungthua chun, ram sâ ang el an nizie an inhriet theina dingin Pathienin anni chu a fie hlak a nih tiin ka ngaituo bok a. 19 Mihriem nauhai chana tlu khuorêl char chu ram sahai chan ding a ni ve a, chu chan chun an pahniin a nghàk vê vè a nih. Pakhat a thi ang bokin a dang khom chu thi vêng a tih. Thuok laa hring vong an na, ram sa nèka mihriem chan a vawng bîkna a um nawh. Thil iengkim hi iengma lo vong a nih. 20 An rêngin hmun khatah an kîr vong a, pilvuta inthoka siem an na, pilvutah kîr nawk vong an tih. 21 Mihriem nauhai thlarau chun chung tieng pan a ta, ram sahai thlarau chun hnuoi tieng pan a tih ti tuin am a hriet? 22 Chuleiin, mihriem chun a thilthaw inhoi a ti nêka tha lem ieng khom a um nawh ti ka hmu suok a, chu chu a chan a nih. A hnunga thil hung umhai hmu dingin tuin am a hung thuoi kìr teu ding?

Ecclesiastes 4

1 Ka hei thlîr vel a, nisa hnuoia inpawngnêkna um po po chu ka hmu a:Nêksawrhai chu an tap zoi zoi a, Hnèmtu tu khom an nei si nawh; Nêksawrtuhan thuneina an chel leiin, Thlamuongtu ding tu khom an nei nawh. 2 Dama la um zinghai nêk daiin, Thi tahai chu inhnar an um lem, Ti hi kei chu ka hmu dàn a nih. 3 Anni nêka chan tha lem chu, Ni hnuoia thil thalo la hmu hman lo, La pieng lohai hi an nih. 4 Chun, sin inrimna po po le thil ei hlen suok po po hi tuolbawmhai ei inhnarna leia hung um a nih ti ka hriet tah. Hi khom hi iengma lo, thli hnot ang chauh a nih. 5 "Invêt chun a kut a sui a, Phingtàmin a thi" ti a ni a. 6 "Hadam taka bàr khat nei chu, Inrim taka bàr hni nei nêkin a tha lem"Ti zawnga la pawl an um bok a, A tawp chu thli hnot ang chauh a nih. 7 Chun, ka hei thlìr nawk a, ni hnuoia hin iengma lo thil dang khom ka hmu a: 8 Nau nei lo, unau khom nei lo, Mi pakhat, pa mal hi a um a, Chawl loin sin a'n rim a, A hausak leia a lungawina, A hmêlah a'n lang hrim hrim nawh. Fain a dawn tha ngam naw a, Tu ta dinga inrim am a na, Ti khom a ngaituo bok nawh. Hi khom hi thil ho tak le, Thil retheithlâk tak a nih. 9 Mani chaua thaw nêk chun, Thawpuitu nei a tha lem a, An thaw suok khom a tam lem. 10 Pakhat a lo tlu khomin, Pakhatin a tung ding thei. Makhat chaua khawsa chu, Mi vangduoi tak a ni a, A tlu pha leh mi tu khom, Tungdingtu a nei si nawh. 11 Pahni an zâl hmunkhat chun, An inhneng lum tuo thei a, Makhat chun mani le mani, Iengtin am inhneng lum a ta? 12 A mal ringota um chu, Hnebàn a olsam hlak a, Pahni chu an insan thei. Hrui khom thlop thum a ni chun, Kei tan el thei a ni nawh. 13 Lal tar le invêt, mi thurawn la ta lo nêk chun tleirawl rethei, sienkhom var si chu a tha lem. 14 Chuong ang tleirawl chu lung ina inthoka hung suok khom ni sien, an naw leh rethei mongtola pieng khom ni sien, lal a la hung ni thei a nih. 15 Nisa hnuoia lêng mi tinin chuong ang tleirawl chu lala siem dingin thangpui an nuom ti ka hriet tah. 16 Sienkhom, lal chu ienganga inlârin mi tiem sêng loin zuihai sien khom, thang tharhaiin an la hung hnawl nawk tho hlak. Hi khom hi iengma lo le thli hnot ang chauh a nih.

Ecclesiastes 5

1 Pathien ina i fe chàngin fîmkhur rawh. Thil thalo an thaw ti khom hre thei lo mi invêthaiin inthawina an inhlàn nèkin thu ngàithla dinga Pathien ina fe a tha lem. 2 I bau phong inrang naw la, Pathien hmaa thu i tiem dingin, I lungril inhmaw naw raw se. Pathien chu vàna um a na, Nang chu hnuoia um i na, Chuleiin hril rawn naw rawh. 3 Buoi taluo chu mang sietna, Invêt chu tong rawnna a nih. 4 Pathien kuoma thu i tiem chu hlen inhmaw rawh. Mi invêt chungah Pathien a lawm ngai nawh; i thu tiem chu hlen ngei rawh. 5 Thu tiem sia hlen lo nêkin intiem naw law law a tha lem. 6 I bauin suol inthawtir naw raw se che. Tempula Pathien tirko kuomah, "Ka lo intiem suol a nih" tiin thang la ngai naw rawh. Ieng leiin am i bau suoka Pathien suklungsenin, i thilthaw a suksietpèk ding che a na? 7 A manga mang rawn zawng le a hril rawn tienga hràt rak hi umze bo a nih. Chuleiin, Pathien inzà rawh. 8 A rama mi retheihai an nèksawr lai le indik lo taka an chanvo an làkpèk lai i hmu chun makti naw rawh; biel tina hotu chun a chunga hotu thupêk ang peia a thaw a na, chuong ang chun hotu an insersuon teu a nih. 9 A ram tharsuok an lâk seng a, lal chen khom a ram tharsuok ringa khawsa a nih. 10 Tangka sum ngainatu chun, Dit tawk a ngà ngai naw a, Hausakna ngainatu chun, Dit tawk a hmu ngai bok nawh. Hi khom hi iengma lo a nih. 11 Sum le pai a hung pung chun, A fatu an pung pei hlak. Mita en liem el naw chu, Iem a sawtna a um a? 12 Inrim taka sinthawtu chu, Fa tamin fa tlawm sienkhom, Indên takin a in hlak a, Hausa chu a hausaknan, Imu a'n hmùtir ngai nawh. 13 Ni hnuoia thil poi dang chu, Mani sietna ding ni si, Hausakna khawl tèn tûn dâm, 14 Hausak tum taluo luot a, A sum nei sukpung tum a, A naupa màksanpêk ding, Nei lo khopa cha dêr hi a nih. 15 A nu sûla inthokin, Saruokin a hung pieng a, Saruokin a kîr nawk a, A sin inrim rahai chu, Ieng khom a som thei si nawh. 16 Thil tha lo tak dang le beidongum thlâk chu hi a nih:A hung pieng dàn ang bokin, Mihriem chu a kîr nawk a, Thli hnota inrimtu chun, Iem a sawtpui hrim hrim a? 17 A dam sûng hun po poin, Thim hnuoiah bu a fâk a, Lungni lo le na tuorin, Lungsenin hun a hmang zo. 18 Chu zoa ka hmu suok chu, Pathienin hun tawite mihriem a pèk sùnga a ta dinga tha le indik chu nisa hnuoia a sin inrimna rà chèna a, lungawi taka faa dawn hi a nih; chu chu a chanvo a nih. 19 Pathienin hausakna sum le pai a pèk chu chèn thei ding le a chana tlu khuorèl chu pom a, a sina lawm thei dinga mihriem a siem hi Pathien thilthlawn pêk a nih. 20 Pathienin lungril hlimnaa a sung sip leiin a dam sùng nihai zuk lungkhamna hman a nei nawh.

Ecclesiastes 6

1 Ni hnuoia thil tha lo dang, mihriemhai del riktu ka hmu chu: 2 Pathienin mi thenkhat chu hausakna, sum le pai le inzaumna a pêk a, an lungril dit zawng le chàk zawng po po chu tlâksam hrim a nei naw a, sienkhom chèn ve theina a pêk si naw leia a hausakna mi dangin an chèn ta lem hi a nih. Hi hi iengma lo le mi sukrinumtu thil tha lo chu a nih. 3 Miin nau zakhat neiin kum tam tak dam sien khom, a dam lai thil tha chèn lo a, a thi pha phûm khom a hlaw bok si naw chun, naute a ni lai khan hlamzuiin lo liem sien, a ta dingin a tha lem. 4 Naute hlamzui chu a hung pieng a, thimah a lût nghal a, hming khom nei hman loin thimin a tuom hmang a. 5 Chu bâkah, var a hmu naw a, ieng khom a hriet hman bok naw leiin, chu mi nèk chun a hadam lem dai a nih. 6 Kum sâng lêt hni khom mi chu dam sien la, thil tha a chèn thei si naw chun thuhmun an ni el naw maw? 7 Mihriem hi a hnuk ta dinga inrim a na, Sienkhom a châkna a rè thei chuong nawh. 8 Mi var ni chu invêt nêkin, Iem a hlawk bîkna a um a?Mihai hmaa chàng dàn mawi, Mi retheiin a'n chûk khan, Iem a na a hlawkpui chu? 9 Um lo beisei kuol vèl nêkin, Hmu phâka lungawi a tha lem. Hi khom hi iengma lo le, Thli hnot ang chauh a ni vong. 10 Thil um phot hi hming nei sa vong, Mihriem nina khom hriet sa vong a na, A nêka hrât lem a hnè thei nawh. 11 Thu a tam leh kawk bo a tam, Iem a na hril teu a tangkaina? 12 Hlimthla anga ral el ding a hringnun tawite le iengma lo hi mihriemin a hmang sûngin a ta dinga tha tak ding chu tuin am hre thei a ta? A liem hnunga nisa hnuoia thil la hung um ding chu tuin am hril thei a ta?

Ecclesiastes 7

1 Hming tha hi a hlu lem, Hriek rimtui to tak nêkin, Thi ni khom pieng ni nêkin. 2 Ruoithena ina fe nêkin, Lusûn ina lèng a tha lem; i tin hi la thi ding vong ei na, Chu chu dam laia ngaituo a tha, 3 Innui nêkin lungngai a tha lem, Ngui hmêlin lungril a tawk. 4 Mi var chun lusûnhai a ngaituo a, Mi invêt chun hlimhlopna ngot. 5 Mi invêt inpàk hlaw nêkin, Mi var zilhau hlaw a hlu lem. 6 Mi invêt innui thek ri chu, Thuka hling intèk ang a na, Sawtnawteah a rè nghal hlak. Hi khom hi iengma lo a nih, 7 Làkluina hin mi var a sukvèt a, Thamna chun lungril a sukporchè. 8 Zo hi tan nêkin a tha lem a, Dawthei khom lungril chapo nêkin. 9 Lungsen insùm thei a tha, Invêt chun lungsenna a pâi zing. 10 "Tu lai nêkin tien lai hun kha, Ieng leia a'n hoi lem am a na?" iin indon ngai naw rawh, Chu chu thil var thlàk a ni nawh. 11 Varna hi rochan angin a hlu a, A dam lai ta dinga hlawkna a nih. 12 Varna hin tangka ang bokin, A neitu nun a hum thei a, Varna chun a neitu nun a vong him, Chu chu hrietna hlawkna chu a nih. 13 Pathien thilthaw dàn ngaituo ro, A siem kawi chu tu'm suktlun thei? 14 Thatnia chun hlim la, Sietniaah inngaituo rawh, Pakhat chu a dang ang bokaathien siem ve tho a nih. A ieng lem am a hung tlung ding, Mihriemin a hriet thei si nawh. 15 Ka hringnun iengma lo sûng hin, Hieng hi ka tong vé vè tah:Mi indik, a felna leia bohmang, Mi rilo, rilo taka nun hmang, Sienkhom dam sawt vieu bok si. 16 Insukfel taluo naw la, Insukvar taluo bok naw rawh; Ieng leiin am i'n suksiet ding? 17 Rilo taluoin um naw la, Invêt biling bok naw rawh; I thi hun hma'n i thi ding maw? 18 A taluo thil hrim hrim chu, A ieng khom thaw a tha nawh. Pathien tituhai ruok chun, Thil inbûk tawk an hriet hlak. 19 Varna chun mi pakhat chauh khom, Khawpuia rorêltu sawm nêkin, Thilthawthei lemin a siem hlak. 20 Thil indik chauh thaw hlak mi, Thil suol thaw ngai dèr lo tu khom, Hi hnuoiah hin an um nawh. 21 Mi hril nazong bengkhon naw rawh, I siehlaw tongsie inphur che hre pal i tih; 22 Tongsie mi i'n phur rûkhai khom, Nangma ngèiin i hriet zing kha. 23 Hieng po po hi varna hmangin, Ka lo fie chieng vong tah hlak a; 'Kei khom var tâng ka tih' ka ta, Sienkhom a lo thei teu si nawh. 24 Ieng ang varna khom ni sien, Inril le inthûk tak a ni vong a, Tu'n am hmu suok phâk an ta? 25 Chuleiin, varna le thil niphung hai, Hre a, bi a, zong suok tumin, Ka lungrilin ka dap vêl a; Rîtlona hang intlawkzie dâm leMawlna hang invètzie dâm chu, Hriet thiem tumin ka bei bok a. 26 Thina nêka kha lem ka hmu chu:Tokdara thang nuhmei a nih. A lungril chu châng a na, A kut chu thîrkol a nih; Pathien suklawmtu chun pumpel a ta, Mi suol ruok chu man bet a tih. 27 Thuhriltu chun, "En ta u, Ka thil hmu suok chu hi a nih:Thil niphung hmu suok ding chun, Sîr tina en chieng a tha hlak. 28 Ka hmù hmâ khat ka zong a, Pasal sângkhat lai mi ngîl, akhat vel chu ka hmu a, Nuhmei lai chu ka hmu nawh. 29 Hi hi a nih ka hmu suok chu:Tluongngîl taka khawsa dingin, athienin mihriem a siem a, Sienkhom thil dang dang zongin, An kawi hmang ta seng a nih.

Ecclesiastes 8

1 Mi var ang chu tu am a um?Thil hrilfie theitu an um maw?Varna chun hmêl a sukhlim a, Hmêl inrum khom a suknèm. 2 Pathien hmaa thu inkhàmna i nei tah angin lal thupêk chu i zawm ding a nih ti ka hril che a nih. 3 I sin dinga dande chu pumpel tum naw la, thil tha naw phiertuhai lai thang ngai naw rawh. Lal chun a thu zawm nawtuhai chunga chun a nuom ang angin a thaw ding a ni si a. 4 Lal chu thu tawp neitu a ni leiin tuin am, "Iem a na i thaw hi?" a ti thei ding? 5 A thupêk zawmtu chun tuor naw ni a, Mi var chun zawm hun le zawm dàn a hriet. 6 Mihriem chu rimsiknan deldè sienkhom. Iengkim thaw hun le thaw dàn a um. 7 Mihriemin a hma tieng a hriet lawk naw a, A hril thei tu khom an um bok nawh. 8 Tu khomin thlî an chel thei nei naw angin, Mani hringna chel thei tu khom an um nawh. Indo lai tu khom an inchawltir ngai naw angin, Suolna chun a thawtuhai a'n chawltir ngai nawh. 9 Nisa hnuoia thilthaw po po kim taka ka ngaituo laiin hieng hi ka hmu suok chu a nih. Maniin sietpui pha khopa mihai chunga insuklal hun a um hlak. 10 Inzaum taka mi rilo an vui liem ka hmu tah hlak a. Chuong mihai chu tempula fe zing zing hlak le thil tha naw an thawna khawpui ngeia mihai inpâk hlaw mi an ni tlat chu tie! Hi khom hi thil ho tak chu a nih. 11 Thil suol thawtuhai hrem nghal an ni naw chun, mipui khomin thil suol thaw ding an phan sup sup pha hlak. 12 Voi zakhat thil suol thawtu hman a dam sawt chun, Pathien tituhai chu dam sawt lem an tih ti ka hriet. 13 Mi rilohai chun Pathien tìna an nei naw leiin inhoiin nun hmang naw ni hai a, an nihai khom zàn tieng ni hlimthla angin sei ve naw nih. 14 Khawvela hin iengma lo thil dang khom a tlung hlak. Mi felhaiin mi rilohai tuok ding ni awm tak an tuok a, mi rilohaiin mi felhai tuok ding ni awm tak an tuok bok a. Hieng thilhai khom hi thil ho tak chu a nih. 15 Chuleiin, khawvela hin inhoi taka faa dawn tluka thil tha mihriemin a nei chuong si naw leiin, inhoi taka nun hmang hi tha ka ti a nih. Chu chu nisa hnuoia a dam hun dinga Pathienin a ruot sûnga sin inrim taka a thaw puma hlim taka a thaw thei sun a nih. 16 Varna zonga ka ngaituona pe a, sùn le zàna imu khom intuo tha hman lèk loa nisa hnuoia inrim taka mihriemin sin a thaw dàn ka thlîr chun, 17 Pathien thilthaw dàn ka hmu suok a. Mi tu khomin nisa hnuoia thil um dàn hi an man phâk nawh. Ieng anga beiin zong suok tum sienkhom, a umzie mihriemin hmu suok zo naw nih. Mi varin hre angin inhril sien khom, a umzie man phâk tak tak thei naw nih.

Ecclesiastes 9

1 Hi thil hi ngaituoa ka dap suok chu a nih: Mi fel le mi varhai thilthaw po po hi Pathien kuta um vong a na, sienkhom ditsaknain a lo hmuok ding le ding naw hre thei tu khom an um nawh. 2 Mi fel le mi rilo, mi tha le mi suol, inthieng le porchè, inthawina inhlàn hlak mi le inhlàn ngai lohai khomin khuorèl thuhmun an intawm vong a nih. Mi tha chunga tlung chu, Mi rilo chunga khom a tlung a, Inkhâm chîng chunga tlung chu, A chîng naw chunga khom a tlung. 3 Ni hnuoia thil tlung po poin a tawpa an intawm seng thil tha lo chu hi khuorel thuhmun hi a nih. Chu chun a tawpah a hnot khûm vong hlak. Mihriem lungril chu a suol a, a dam sûng invêtnain a lungrilah hmun a khuor a, chu hnungah thi tahai chu a zui ve el a nih. 4 "Sakeibaknei thi hnung nêkin ui hring nì chu a tha lem" ti angin, a la damhai ta ding chun beisei ding a la um annawm. 5 A dam lai chun an thi ding ti an hriet a, Mithi chun ieng khom an hriet ta nawh. Lawmman dong ding an nei ta naw a, Tu hriet khom an hlaw ta bok nawh. 6 An hmangaina, theidàna le thîknaIengkim khom a bohmang dai tah. Ni hnuoia thilthawna ienga khom, Thang nawk ta ngai naw ni hai. 7 Fe la, lawm takin bu fa la, lungril hlim takin uoiin dawn rawh, Pathienin i thilthawhai chu a pom ta si a. 8 I silfènhai chu vâr zing sien la, i lu khom tlor zing raw se. 9 Pathienin ni hnuoia a pèk chè i hun iengma lo sûng hin i nuhmei, i hmangai leh chun nun inhoi takin hmang ro. Chu chu i chanvo a na, ni hnuoia i sin inrimnaa i chanvo chu a nih. 10 I kutin thaw ding a hmu taphot chu theitawpin thaw rawh; i fèna ding thlàna chun sinthaw ding le remruot ding amanih le hrietna le varna amanih a um si nawh. 11 Ni hnuoia thil dang ka hmu chu:Hi intlânsieknaa hin, Tlân hràt an hràt bik naw a, Hi indonaa khom hin, Râl hrât an hràt chuong bok nawh. Mi varin fàk an hmu bîk naw a, Mi chuongkai an hausa chuong naw a, Mi thiemin ditsak an hlaw bîk naw a, A hun le khuorèl angin, Mi tin chungah a tlung el a nih. 12 Mani hringna tawp hun ding, A hrie tu khom an um nawh:Lèn tiumah nga intàng a, Chângah vate a awk angin, Hun tha loin mihriemhai hi, A tlâkbuok thut hlak a nih. 13 Nisa hnuoiah hieng ang varna hi ka hmu suok bok a, chu chu ka ngai poimaw hle a nih. 14 Khawpui lien lo, mi tlawmte umna hi a um a. Lal hrât takin a hung bei a, a'n huol a, a vêlin dâi a sak khum a. 15 Chu khuoa chun mi rethei var tak a um a, a varna hmangin khuo chu a san suok a, sienkhom chu mi rethei chu tu khomin an hriet zing nawh. 16 Mi rethei varna chu hmusitin, a thu chu ngaithla nuom ta naw hai sienkhom, kei ruok chun, "Hràtna nêkin varna a tha lem" ka ti tho tho a nih. 17 Damtea mi var hril chu, Lal invêt ruol khèk nêkin, Ngai poimaw lem ding a nih. 18 Varna hi râlthuom nêkin a hlu lem; Mi suol pakhat ringot khomin, Thil tha tam tak a suksiet hlak.

Ecclesiastes 10

1 Tho thiin rim inhnik khom Rimsiea a siem angin, Invêtna chikte chauin, Varna le inzaumna khom, A sukmuolpho hlak a nih. 2 Mi var lungril hrim hrim chun, Indikna tieng a awn a, Mi invêt lungril ruok chun, Indik nawna tieng a awn. 3 Mi invêt khawlai lêng chu, Ningkhong a hriet naw leiin, A'n vètzie a târ lang hlak. 4 I chunga rorêltu lungsen chu, In hmùrin tausan el naw rawh; To inchu hin lungsen khom, A thawi dam thei hlak a nih. 5 Ni hnuoia thil tha lo ka hmu chu, Rorêltuhaia inthoka suok a nih: 6 Invêt ngîrhmun sângah an sie a, Mi hausa ngîrhmun inhnuoiah. 7 Sakor chungah siehlaw a chuong, Siehlaw angin hotu kèin a lawn. 8 Tlâkpùm chotu tlâkpùmah tlâng a ta, Bang nèrtu chu rûlin chuk a tih. 9 Lung sertu lungin inhliem a ta, Thing chêktu chu a thing chêkin. 10 Hreipui mawl chun thâ a he a, Chuleiin, tàt ngei ding a nih; Chu chu annawm varna hlutzie, Hlawtlingna intluntu a nizie chu. 11 A dawi vèt hmaa rûlin a chuk chun, Rûl dawithiem ni a tangkai nawh. 12 Mi var bausuok a hoihawm a, Invêt bau chun ama a dol hlak. 13 Thu invêtin a hang tan a, Lei chawina ding a hril suok hlak. 14 Invêt chun thu uor a chîng a, Hma tieng hre lawk ni awm takin, Mihai kuomah thu a hril hlak a; Sienkhom tu'n am hma tieng a hriet? 15 Mi invêt sinthawa fè vè chu, Inlawi nachang khom hre loin, changTamsawl khopin a pu rak hlak. 16 Siehlaw lala an siena ram, Mi lienhan zîng hmâng hmàng a, Ruoi an thè dur durna chu, Ram vangduoi a va ni ngei de! 17 Mi tha lala an neina ram, Inruina ding nèka hrâtna dinga, An mi lienhaiin a hun taka, Ruoi an thèna hlak ram chu, Ram vangnei a va ni ngei! 18 Thabo in chu a hung insawi a, Zomthaw inchung a hung zung hlak. 19 Ruoi hin mi a suklawm a, Uoiin hin nun a sukhlim; Amiruokchu hienga ding hin, Sum hi a tul pei hlak a nih. 20 I lungril rûk khomin lal chu, Hril se ngai hrim hrim naw la, I khum laizawla inthok khomin, Mi lienhai tongsie inphur naw rawh, Chunglèng vatehan put dar an ta, An kuomah va hril rawi an tih.

Ecclesiastes 11

1 Tui chungah i bei pei rawh, Ni iemani zât hnunga chun, I hmu nawk ding a ni si a. 2 I neihai chu sem dar rawh, Hmun sarih, hmun rieta khom, A ram chungah sietna ieng am, A tlung ding ti i hriet si nawh. 3 Sûmin tui a pai rawn chun, Hnuoi chungah ruo a sûr hlak. Thing chu sim tieng am hmar tieng, A khaw tieng khom tlu sien la, A tlùknaah a zâl hlak. 4 Thli poisatu tu khomin, Thlai chî thlâk ngai naw ni a, Sûm ringot thlîr hlaktu chun, Sîk ding nei ngai bok naw nih. 5 Thli lampui i hriet naw a, Sûla nau insieng dàn khom. Chuong ang bokin Iengkim Siemtu, Pathien thilthaw i hriet thei nawh. 6 Zîng tieng leh thlaichi thlâk la, Zân tieng khom chawl chuong naw rawh, A ieng tak am a puitling ding, Nangin i hriet thei si nawh, An puitling vong khom a ni thei. 7 Var chu a mawi a, Nisa hmu khom a hlimum. 8 Ieng chen khom mihriem dam sien, Hlim takin hmang vong raw se. Sienkhom, inthimna hun khom, A tam dingzie hre raw se. Iengkim la hung dinghai khom, Iengma lo vong a ni si a. 9 Thalaihai, vàng lai chènin, In lungril chu hlim raw se. In lungril nuom zawng zuiin, In thaw nuom nuom chu thaw ro. Sienkhom in thaw ang peiin, Pathien khomin in chungthu, Rêl a tih ti hre zing ro. 10 In lungrila lungkhamna, In taksaa borsawmna, A rêngin hlip thla vong ro, n that lai ni a tawi si.

Ecclesiastes 12

1 I vânglaiin nangma Siemtu che hre zing rawh-Hun harsa, tar hunin a nang hma che, "Dam khom inhoi ka ti ta nawh"I ti hun a tlung hmâ ngei hin; 2 Nisa le var, thla le arasihai, I hmu that thei naw hma le, Ruo sûr zo, sûm inkieng khom, Innîm zinga i hriet hmâ ngei hin; 3 I'n vêngna i kut inthin a, I zâng hung inkûl vong a, Bu fâkna ding hâ nei ta lo a, Bu khom soi thei ta loa um a, I mithai hung inthim a, Khuo i hmu thei naw hma hin; 4 I nâhai hung sêt vong a, Kotthlêra ri hre thei ta lo a, Bu her khawl ri hre liet liet a, Vate inhrâmin kei tho a, An inhrâm i hriet liet liet hun, A hung tlung hmâ ngei hin; 5 Thil insànghai hung ti a, Kotthlêrah invâk ngam ta lo a, Luah kêlsam hung to a, Khau ang ela hung invâk a, Tisa chàkna hrim nei ta lo a, Thìna kotkhâra chun ngîr a, Chatuon in i pan tawm a, Kotthlêrah mipui inzui dûl dûl a, Sûna an tà liem hmâ che hin; 6 I nun tangka zâi chu inchat a, Rangkachak berbu chu koi a, Tuikhura tuibèl chu koi a, A khai suokna hrui inchat a, 7 Pilvut chu hnuoiah kîr a, A petu Pathien kuom tieng, I thlarau a kîr hma hin. 8 Thuhriltu chun, "Iengma lo el, Thil po po hi iengma lo takzet, An lo ni vong a nih" a ta. Thu khaikhawmna 9 Thuhriltu chu a var chauh khom ni loin, mihai chu hrietna a zirtir a, thuvar tam tak ngaituoin a zong suok a, indot peiin a rem khawm a. 10 Thuhriltu chun a hril suokna ding thu fie tak a dap suok a, a thuhrilhai hi a felin a'n dik a nih. 11 Mi varhai thu chu Berampu pêk ran khalna hawlthîr zum ang a na, an thuvar khon khawmhai khom thîrkila nghet taka kil bur anga nghet a nih. 12 Ka naupa, hieng thuhai hi infuinaah hmang rawh. Lekhabu siemin tawpintâi a nei naw a, tiem rawn khom taksa sawlna a nih. 13 Hieng thu po po khaikhawmna chu hi hi a nih: Pathien ti la, a thupêkhai vong rawh; chu chu mihriem po po thaw ding tak chu a nih. 14 Pathien chun ei thilthaw iengkim, a rûka ei thawhai khom, a sie a tha ang peiin, ei chungah ro a rèl ding a ni si a.

Song of Solomon 1

1 Hienghai hi hla thlang khawm, 2 Mi fawp rawh, i hmûr ngei khan, I hmangaina a thlum lem, uoiin nêkin. 3 I rim a va hang inhnik de aw!I hming khomin lunglai a kuoi!Dit naw che ruol an ni nawh, lànuhan. 4 Mi thuoi la, sawt riel loin, Lal pindana chun mi thuoi rawh. Kan hlimna le lawmna i nih, I hmangaina kan kùrpui, uoiin sîngin. An hlut che hi an thaw dik ngei! 5 Aw Jerusalem lànuhai, Ka hànga chu ngaino ka bei; Kedar puon in ienga hàng, Solomon puonzâr ienga nal ka nih. 6 Ka hàng leiin mi iei naw rawh, Ni intèng em hàng ka ni hi. Ka tâhai an lungsen leiin, Grèp huon an mi'n vêngtir a, Ka'n tuoi nam hman ve naw a nih. 7 Mi hril rawh, aw ka hmangai, Khaw la'm i ran ruol intlattirin, Sùn lai khaw la'm i'n chawltir hlak?Ieng leiin am hmai inkhumin, Mi ran ruol lai ka zong ding che? 8 I hriet naw chun, aw nang hmêltha, Minu po po sîng zotu, Beram ruol hniekhnung zui la, Berampuhai bûkthlàm sìrah, I kèltehai hung intlattir rawh. 9 Faraw tawlailir keitu sakor la tuoi, I ieng ngei maw, aw ka hmangai! 10 I bieng no le i nabê an inhmè, I ring mawitu lunghlu par sing seng leh. 11 Tangkaruo tle senga bel mawi, Rangkachak thi siempêk ka ti chê. 12 Laikhumah ka lal a zâl a, Ka hriek rimtuiin in sûng a sip. 13 Ka tânga inbei ka hmangai hi, Ka ta din beraw bawmpui a nih. 14 Ka hmangai hin a ieng ngei maw, Engedi huona henna pâr vul lai. 15 I mawi chuong ie, aw ka hmangai, I sakhmèl a mawi chuong ngei!I sîngmitin thûva sîngmit a ieng. 16 I nal ngei maw, aw ka lungrun, Ka lung i va hang dum ngei aw!Ei zàlna sawl hring nghiel chenin. 17 Mi zàr khumtu sidar thing leFâr thing zàrhai chen khom an mawi!

Song of Solomon 2

1 Kei hi Saron raws pâr ka nih, Phaizawla lili pâr vul chu. 2 Hling buk laia lili ieng hi, Ka hmangai chu a nih, lànuhai lai. 3 Ka hmangai chu vâl ruol lai hin, Ngaw kara epul kung ieng a nih. A zâr hnuoiah hlimin ka chawl, A rà a thlum, ka ta dingin. 4 Ruoithèna hmunah a mi thuoi a, A mi hmangaina puonzâr a khài. 5 Grêp beiin mi sukhrât la, Epul theiin mi sukhar rawh, I zùna inuoi ka ni hi! 6 A kut voi tieng ka lukham a, A kut chang tiengin a mi kuo. 7 Aw Jerusalem lànuhai, Ram zuktuoi le zukpui sâlin, Kan inkâra hmangaina hin, Dit tawk a ngà hmâ khat chu, Inther lo dingin ka ngèn cheu. 8 Ka hmangai rawl ri ka hriet, En ta, saw a hung mèk ie!Tlânghai a hung zuon khûm a, Muolhai a tlàn khel zung zung. 9 Zuktuoi anga hrât ka hmangai chu, En ta, bang phènah a ngîr; Tukver a'nthok a hung bi a, Zawngdaikal awnga inthokin. 10 Ka hmangai chun a mi biek. Ka hmangai, ka enchim lo, Tho la, mi hung zui raw khai. 11 Thlasik hun a liem ta a, Khuongruo sûr khom a rè tah. 12 Hnuoiin pàr a hung insuo a, Sîrvahan zâi hlâ an rem a, Thûva zâi ri khom ei hriet tah, Ei ram muol le tlânga hin. 13 Theichang an inbàl tan a, Grêp khom an hung pâr vul a, A rim a va'n hnik ngei de!Tho la, hung rawh, ka hmangai, Ka enchimlo, hung raw leh. 14 Suonglung kak kàra inbî, Aw ka thûva hung suok rawh; I hmêl mawi mi'n hmutir la, I rawl mawi mi'n ngaitir rawh. 15 Mi manpêk ro, sihal le a tehruoihai, Kan grêp vul lai an sukram hmain. 16 Ka hmangai chu ka tâ a na, Kei khom ka hmangai ta ka nih. Lili pâr lai a ran ruol a'n tlattir. 17 Khawfing a hung chat hma, Zân thim a'n kieng hma ngei hin, Hung kîr ta rawh, aw ka hmangai, Zuktuoi anga hrâtin hung tlàn rawh, Bether tlànga sakhi tuoi anga hràtin.

Song of Solomon 3

1 Zàn khuo'n ka laikhum zawlah, 2 Tho ka ta, khawpui fangin, Kotthlêr le tuol zawla chun, Ka hmangai chu zong ka tih. Ka zong vel, ka tong si nawh. 3 Khawpui kan kuola invàk, Zàn vêngtuhai ka hmu a, "Ka hmangai in lo hmu am?"Tiin anni ka'n don a. 4 Anni rawi ka pêl charin, Ka hmangai chu ka hmu tah. Ka kuo a, inthla naw ning, Ka nû in, mi pâitu pindanah, Ama ka thuoi lût hmâ khat chu. 5 Aw Jerusalem lànuhai, Ram zuktuoi le zukpui sâlin, Kan inkâra hmangaina hin, Dit tawk a ngà hmâ khat chu, Inther lo dingin ka ngèn cheu. 6 Thlalêra inthoka hung, Meikhu ngìr ang saw tu'm a na? Beraw le rimtui an nam rum rum a, Sumdawnghai phur hmuihmer rim leh. 7 En ta, Solomon tawlailir a nih. Israel pasaltha le râlhrât ngot, Mi sawmrukin an zui saw! 8 An rêngin kawlhnâm an chawi, Indo thiem mi vong an nih; An ngûm sìrah kawlhnâm an pài, Zàn tiuma invèngna dingin. 9 Lal Solomon chuongna chu, Ama ta dinga a siem a na, Lebanon thinga siem a nih. 10 A ban chu tangkaruoa siem, A chung khum rangkachaka chei, A thungna puon senduka tuom, A sûng chu Jerusalem lànuhan, Uluk taka an chei a nih. 11 Hung suok ro ie, Zaiawn lànuhai, Solomon hi hung hmuok ro khai, A nu'n lallukhum a'n khumtir ie, A thâi lâk ni, a hlimna nia hin.

Song of Solomon 4

1 I hmêl a tha, aw ka hmangai, I va hàng nal ngei de aw!I hmai dier phèna i sîngmit khan, Thûva sîngmit a va ieng ngei!Gilead tlânga hung thlà kèl ruol, I bàsamin a ieng ngei ie! 2 Beram ruol hmul vaw zo a, An insil fâi hlim angin, A var sieu el, i hâhai chu!A va hang kopkim ngei de, A mel hrim khom a um nawh. 3 I hner senin zozàm a ieng, I bàu chàng a va mawi ngei!I hmai dier phèna i bienghai khan, Theibufai phel an va ieng ngei! 4 I rîngin a ieng, Davida kulbing sâng, Râlthuom siena dinga siem chu; Chu chun phaw sângkhat an sie a, Râl hrât khawkhènghai phaw ngei chu. 5 I tâng vûm mawi inthieng that chun, Lili buka tla dûn riel riel, Zukte phîr an ieng ngei ie! 6 Khawfing a hung chat hma ngei, Thimna a'n kieng hma ngei hin, Beraw tlânga chun fein, Rimtui muolah fèng ka tih. 7 I tha zo ngei, ka hmangai chu, I va hang tha famkim ngei aw! 8 Hung rawh, Lebanon tlânga inthokin, Lebanon tlânga inthok ngei chun, Tum thla dûn ei tih ka lungdi; Amana tlâng sìpa inthoka tumin, Keipui le keitehai tuol lêngna, Senir le Hermon tlâng sìpa inthokin, Zuk tum thla riel riel ei ti khai. 9 Aw ka rohlupui le ka lungdi, Ka lunglai hluo zotu i nih; Lunghlu thi rîngah hli a, Mit sìra i mi ât zauh khan, Ka lungril i'n rûk hmang vong. 10 Ka rohlupui le ka lungdi, I hmangaina hi a hlimum de!oiin nêk daiin i hmangaina chu, A lo va hang hlimum nasa de!Rimtui dang po po sîngin, I rimtui chu a rimtui lem. 11 I bàu suok a thlum, ka lungdi, Khuoi thlâra far thla angin. I lei hnuoi a'nthok khuoizu leBawngnènè an hung far thla. I silfèn rimtuizie chu, Lebanon rim ang a nih. 12 Aw ka rohlupui le ka lungdi, Huon humhal tlat ang i nih, Tui hnàr inhuon khum ang leTuikhur khàr tlat ang el chu. 13 I huona chun theibufai, Kûr thlek thlukin a rà a, Henna le nard rimtui a tam, 14 Nard kung le safrona kung hai, Mafu rimtui le thingzungthak, Rimtui thing chi tinrênghai, Beraw le aloi rimtui, Rimtui tha tak po po leh. 15 Nang chu huona tuikhur tha, Lebanon tlânga inthoka hung, Zo tuiin a chawm ang chu i nih. 16 Nang hmar thli hung inthok la, Nang sim thli hung inthok bok la, Ka huon tieng hung hràng unla, Ka rimtui inlêng suok raw se; Ka hmangai chu ka huonah hungin, A thei dú dù hung tlàn raw se.

Song of Solomon 5

1 Ka huona chun ka hung lût ie, Aw ka rohlupui le ka koplaidi, Ka beraw le rimtuihai la khawmin, Ka khuoithlâr ka fâk, a khuoizu pumin; Ka uoiin ka dawn, bawngnênè leh. Fa ro, aw ruolhai, dawn ro, Khop takin dawn ro, Aw lungchimhai. 2 Ka zâla chu ka la meng zing, Chu, ka hmangaiin kot a kik chu!Mi hongpêk rawh, ka rohlupui, Ka hmangai thûva le ka soiselbo, Zàn daidawin ka lu a far hu a, Ka sam khom a'n dap zo tah. 3 Ka silfên ka hlîp ta a, Ka'n chei nawk ding am a ni?Ka kè khom ka sawp ta a, Ka sukbal nawk di'm a ni? 4 Kotkhâr chu hung hong tumin, Ka hmangai chun a hung pur, Ka lung a'n chawmchawrok a. 5 Ka zuong tho, kot hong dingin. Kot kalna ka hong lai chun, Beraw'n ka kut a far a, Ka kutpha chungah a luong, Kotkhâr kalna chunga khom. 6 Ka hongpêk, ka hmangai chu, Sienkhom a um ta si nawh!Lam ang a hang lêt el chu, Ka lung a va na de aw!Ka zong ruoi a, ka tong si nawh. Ka ko khèk a, a mi don nawh. 7 Khawpui kan kuola invâk, Zàn vêngtuhan an mi hmu a, Mi vawin an mi'n hliem a, Zàna kul vêngtuhai chun, Ka silpuon an mi làkpèk. 8 Aw Jerusalem lànuhai, Ka hmangai in lo hmu chun, A zùnah kan uoi a nih, Ti mi hung hrilpèk hràm ro. 9 Minu laia tha chungchuong, Mi nêkin i hmangai chu, Iem a that bîkna a um?Iem a that bîkna a um, Chuong lawma i ngên el chu? 10 Ka hmangai tha sen sier chu, Sângsawm chunga lêng a nih. 11 A thlungluin rangkachak a ieng, A bàsam inkir mawi tak chu, Vaàk anga dum tle seng a nih. 12 A mitin thûva sîngmit a ieng, Nènètuia insil hlim hlol, Vadungte kama tla thûva, A mita lunghlu thieng bel ang chu. 13 A bieng chu hlo rimtui hmun, Rimtui innam zing ang a nih. A hmùr chu lili pâr ang a na, A thuok beraw rimtui ang a nih. 14 A bân chu rangkachak tluon, Krisolit lunga phun ang a na, A taksa chu sai ha nawt nam, Safir lunga cheimawi ang a nih. 15 A kehai chu sailungvâr tluon, Rangkachak hlîr thuta phun ang a na, A hmêlhmang chu Lebanon tlâng leA sidar thing tha tak ang a nih. 16 A bàu a thlum ngawi ngawi a, Iengkimah ditumnaa sip a nih. Aw Jerusalem naunuhai, Ama hi a nih ka hmangai chu, Ama hi a nih ka ruol chu.

Song of Solomon 6

1 Minû laia hmêl tha chungchuong, I hmangai khaw la'm a fe ta a?Kan zongpui theina ding chein, I hmangaiin khaw tieng am a pan? 2 Ka hmangai a huonah a fe thlàk, Rimtui chìngna hmuna chun, A ran ruolhai intlattir ding leLili pâr hai lawr khawm dingin. 3 Ka hmangai tà chu ka ni a, Ka hmangai khom ka tâ a nih, Lili bila ran ruol intlattirtu chu. 4 Ka hmangai i mawi, Tirza khuo iengin, I ditum bèk bèk, Jerusalem iengin, I ropui, puonzâr khai pheisen ruol iengin. 5 I sîngmit la kîr rawh, ka laka hin, Ka dol zor chieng ta êm el. Gilead tlânga tla diel diel kel ruol, I basamin a ieng ngei ie! 6 Beram ruol hmul vaw zo a, An insil fai hlim lai chu, An ieng ngei ie, i hâhai chun!Mani koppui an nei seng a, A mala tla fâl an um nawh. 7 I hmâi dier phèna i bienghai khan, Theibufai phel an va ieng ngei! 8 Lalnu sawmruk, hmei sawmriet, Lànu thienglâm tam tak ka nei a, 9 Sienkhom ka thûvate, soiselbo hi, A tha chungchuong bîk a nih, A nû nau mal, a hringtu duot hlawnu hi. A hmutu lànuhan, "Hamthanu" an ta, Lalnuhai le hmeihaiin an inpâk. 10 Zîng ni zung mawi ienga hung var, Sorthlapui ienga eng no nghiel, Turnipui ienga var phût el, Puonzâr khài pheisen ruol ienga ropui kha, A tu tak am ni tang a ta? 11 Ruon chi hrang hrang bilah ka zu fe a, Thâla varuoma thil inder thar hai, Grêp inder thar le theibufai pâr en dingin. 12 Ka hriet naw kârin ka tawlailir chungah, Ka hmangai tàngah ka lo inbei dai si! 13 Aw Sunam lànu, hung kîr rawh, Hung kîr rawh, hung kîr nawk hràm rawh, I sakhmèl kan hmu nawk theina dingin. (14) Ieng leia Mahanaim làm ang hiel a, Sunam lànu hi in hmu nuom am a na?

Song of Solomon 7

1 I fukè le pheikhok an inhmè, I mawi ngei ie, lal nau lànu; I mal mûmin lunghlu a ieng, Themthiem kut suok ngei chu. 2 I lâibûin berbu a ieng, Uoiin thaa sung sip zing chu. I phìngin bu vûm a ieng, Lili pâr hmuna sung vûm chu. 3 I tâng vûmin zukte phîr a ieng, Zuk la tuoi hring ngei el chu. 4 I rîngin saiha kulbing sâng a ieng, I mitin Bath Rabim kota Hesbon dîltè. I hnârin Lebanon kulbing sâng a ieng, Damaska tieng nghaa ngîr chu. 5 I thlungluin Karmel tlângpui a ieng, I bàsam thlai mawi dum tle seng chu, Lalin a tuor zo lul naw a ni hih! 6 Aw hmangai, dit i va um ngei, I mawinan lunglai a hnèm hlie hlie! 7 I duongkai a tha, tûm thing iengin, I tàng vûmin thei bawr an ieng. 8 "Tûm thinga chun lawn tung ka ta, A raa chun intûl ka tih" ka ta. I tâng chu grêp rà bawr ieng a na, I thuok epul rim ang hiem a na, 9 I bàu uoiin inhnik tak ang a nih. Ka dittak bàu le ha kâra chun, Uoiin luong thla dèl dèl raw se. 10 Ka hmangai tà ka ni a, A lunglai khamtu ka nih. 11 Aw ka hmangai, hung raw leh, Ram hnuoiah lêng vel ei ta, Thingtlâng khuoa son riek ei tih. 12 Zîng hmânga inthok suokin, Grêp huon dâm sir ei ta, Grêp kumumin an pàr ta'm, Ti dâm va thlîr dûn ei ta, Theibufai vul lai thlîr ei ta, Chu chun inhlàn ka che, ka hmangaina. 13 Zawlaidi rim a'n nam rem rem, Ei kot bulah thei inhnik tinrêng, Lo thar le a hmin zûmhai ka sie, A hmin thâ thà kha aw ka dittak, I ta dinga ka khèk a nih.

Song of Solomon 8

1 Ka tapa, nènè ka'n tawmpui chu ni la, Tuola ei intuok lai khom khan, Fawp chot nghal ka ti che a, Tu khomin mi dem naw nih. 2 Ka nû pindan rilah thuoi ka che, Iengkim mi zirtirtu kuoma chun, Uoiin rimtui tul ka ti che, Ka theibufai hnîng ngei el chu. 3 I kut voi tieng lukham ka ta, I kut changin mi kuong i tih. 4 Aw Jerusalem lànuhai, Kan inhmangaina hin dû tawk, Amaa a ngà hmâ khat chun, Hawl tho lo dingin ka ngèn cheu. 5 Tu am a na a ngaizawngpa innghâi a, Thlalêra inthoka hung tung hi?Epul zâr hnuoiah ka kei har che a, Chu taka chun i nu'n a pai tan che a, Chu taka bok chun nau ha se tuorin, A hung hring suok che a ni kha. 6 I lunglaiah suoi ang mi nam la, I bânin mi chel tlat bok rawh; Hmangaina hi thìna angin a hrât a, A thîkthu khom thìna tluka sie a nih. Mei angin a chok puot puot a, LALPA meipui ang top a nih. 7 Hmangaina chu tui tam taka, Bur hlum thei a ni naw a, Tuipui khomin a chìm hlum thei nawh. Miin a hausakna po po sêngin, Hmangaina hi inchawk tum sien, Mi nuizatbûr chauh hlawng a tih. 8 Farnu tleirawltè kan nei a, A tâng khom a la'n bàl naw a, Inlèng a nei ve pha leh, Ieng am kan thawpek ta ding? 9 Kul bang dâm chu lo ni sien, Tangkaruo kulbing bawlpêk kan ta, Kotkhâr dâm lo ni sienla chu, Sidar thingin tuom mawi kan tih. 10 Ka nih annawm, kul bang chu, Ka tângin kul bang pawng a ieng; Ka hmangai sìngmita chu, Lung sukawitu ka ni hi. 11 Baal Hamon-a a grêp huon chu, Solomonin mi a'n sàntir a, A sântu sengin chêng sângkhat, Sàn man an pêk ding a nih. 12 Ka grêp huon chu ka tâ a na, Sângkhat chang rawh, aw Solomon, Huonpuhaiin zahni chang sien la. 13 Nang, huona chêng hlak lànu, I rawl ngâi phàkhai chu an vàngnei!Kei khom mi'n ngàithlâktir ve rawh. 14 Hung inhmaw rawh, ka hmangai, Zuktuoi anga hrâtin hung tlàn rawh, Rimtui tlânga sakhî tê anga hrâtin.

Isaiah 1

1 Amoz naupa Isaiin Judai rama lal Uzzia hai, Jotham hai, Ahaz hai le Hezekia hai inlal laia Judahai le Jerusalem chungthua inlàrna a hmuhai chu: 2 Aw vànhai, lo hre unla, Aw leihnuoi, lo ngaithla rawh!LALPA chun thu a hril ie:"Nauhai chawmin ka keitlei a, Sienkhom ka chungah an hel. 3 Bawngchalin a pu a hriet a, Sabengtungin a ranthlêng a hriet; Israelhai ruok chun an hriet nawh, Ka miha'n an hriet thei nawh. 4 E khai! hnam suol ni telul e, Khawhlonain a del dè, Suol thaw ringot ngaituo hnam, Hlemhlè taka thaw chîng mi an nih. LALPA chu an thlauthlâk a, Israel Mi Thienghlim chu hmusitin, An hnung tieng an innghatsan. 5 Ieng leia vuok tuok zing cheu?Ieng leia hel lui zing cheu?In lu hliemin a sip zo a, In lungril a na ngawi ngawi a. 6 Kephaa inthoka in lu sîp chen, A damna lai hrim a um nawh-A pop, vuok duk le pânna, Sawp lo, tuom lo, hriek nàl lo-Natnain a bawm sip vong. 7 In ram rausanin a um a, In khawpuihai a kâng ram zo a, In lohai in mithmu ngeiah, Ram dang mi'n an rût fai a, Hmêl hriet lohan suksein, A lo ram zo tah a nih. 8 Grêp huon vêngtu tu tawp ang, Busik zoa rabok rausan ang, Khawpui inhuol bet tlat angin, Zion naunu chu a lo inchang tah. 9 Iengkim LALPA chun dam khawsuok, Tlawma zawng mi hlàpêk naw sien chu, Sodom khuo ang kha nîng ei ta, Gomorra khuo ang kha nîng ei tih. 10 Sodom khaw rorêltu ang el hai, LALPA thu hi lo ngaithla ro, Gomorra khaw mipui ang el hai, LALPA dàn chu ngaisak ro. 11 "In inthawina zozàihai hi, Ka ta di'n iem a ni a?Beramchal pumrawa inhlàn a, an thâu thâu in hung inhlàn hi, Nghok khom ka nghok zozài tah. Bawngchal, beram te, kèlchalThisenah lawmna ka nei nawh. 12 Ka hmaa in hung inlang hin, Hieng thilhai hi thaw dingin, Tuin am a hril cheu a, Ka tuol in hung chîl hrep hlak? 13 Thil hlawk lo in thilhlànhai hi, Hung inhlân vet ta naw ro, In rimtui rim ka tirdak. Thla thar lawm, Sabat inkhawm, Inkhawmpui hrang hrang in tih, Inkhawm rilo ka ngài thei nawh. 14 Thla thar kût le kût danghai, Hunbi neia hmang hlakhai hi, Ka lungrilin ka theidà a nih. Ka ta di'n hnoksak an tling a, Ka nghok put put a nih. 15 Tongtaia kut inphar phâ, Ka mit lo hup tâng ka ta, Voi tam tongtai inla khom, Ngàithlapèk ta naw nîng cheu, In kut thisenin a sip si a. 16 Insawpin insukthieng unla, Thil tha lo in thawhai hi, Ka hmu ngeiah bânsan ro. 17 Thil tha thaw inchûk unla, Rorêlna fel hnot unla, Nêksawrhai tungding unla, Fahràhai chu san unla, Hmeithaihai chu hrilpui ro. 18 Lalpa chun hieng hin a tih:"Hung ro, ngaituo tlâng ei tiu, In suol chu senlâr angin, Lo sen tah khom ni sien la, Vûr angin hung vâr a ta; Senduk angin sen sien khom, Sahmul angin vâr a tih. 19 Ka thu awia in zawm chun, A ram tharsuok tlàn in tih. 20 Mi kala in hel ruok chun, Kawlhnâmin lem zo a ti cheu"Tiin LALPA chun a hril. 21 En ta, khawpui ringum ni hlak kha, Nawchizor a lo inchang ta hi!Thil fel taka ro rêl hlak nu, Indikna chêngna hlak nu kha, Tuolthattu a lo inchang tah! 22 I tangkaruo a nghar-êk zo a, I uoiin tha khom a da zo tah. 23 I rorêltuhai hlak hel hmang, Rûkruhai ruol bul an inchang zo. Thamna an ngaina êm êm a, Thilpêk a hnotin an hnot. Fahrahai an san ta ngai naw a, Hmeithaihai thu an hrilpui ta nawh. 24 Chuleiin Lalpa, Iengkim LALPA, Israelhai Mi Hrât chun hieng hin a tih:"Khai leh, mi dotuhai inthielin, Ka hmêlmahai thungrul ka tih. 25 In chungah kut thlâk ka ta, In ngharêknahai sukfai var ka ta, In inthieng nawnahai pei ka tih. 26 Kha hmaa in nei ang bok, Rorêltu tha le remruot thiem, Siepêk nawk ka ti cheu a, Chu chun khawpui indik le ringum, Tiin ko nawk tâng in tih. 27 ​Rorêlna indik hmangin, Zion chu intlan suok ka ta, A sûnga insîra simtuhai khom, Felnain san suok ka tih. 28 Mi hel le suolhai ruok chu, Suksiet ni vê vèng an ta, LALPA nghatsantuhai khom, Sukbohmangin um an tih. 29 Saisaw buk hnuoia milem, Lawm taka in biek hlak kha, Chu pha chun inzàpui in ta, Huona fe in thlang hlak khan, La sukmuolpho a ti cheu. 30 Saisaw thing vuoi ta hnung leTui hmu lo huon ang bokin, Nangni khom la tawl in tih. 31 Mi hrât chu rawpon ang el, A sinthaw khom meisi ang, A la hung ni ding a ni si a; An pahni chun kàng a ta, Tu khomin sukmit naw ni hai" tiin.

Isaiah 2

1 Amoz naupa Isaiin Judahai le Jerusalem chungchàng thu a hmu chu hi hi a nih: 2 Ni nuhnunga hai chun, LALPA tempul tlâng chu, Tlâng po po laia lien takin, A la hung ngîr ding a nih. Tlâng po po khûm vong a ta, Hnam tin hung fuon khawm an tih. 3 Hnam tinrênghai hung an ta, "Hung ro, LALPA tlângah kaiin, Jakob Pathien inah fêng ei tiu; A lampui ei hraw theina dingin, A lampui mi lo zirtir a tih"Tiin an la hril ding a ni si a. Zion-a inthokin dàn thu chu, Jerusalema inthokin LALPA thu, A fè suok ding a ni si a. 4 Hnam tin inkâr thu rêl a ta, An thubuoi rêl felpêk a tih. An kawlhnâmhai chu làngkûmah, Leiletna dingin sut tâng an ta, An feihai theikung tanna chemin. Hnam dangin hnam dang chungah, Kawlhnâm inlet ta naw ni a, Râldo dàn inchûk ta naw ni hai. 5 Hung ro, aw Jakob sûngkuohai, LALPA vara chun lêng ei tiu. 6 I mi, Jakob sûngkuohai chu, I lo thlauthlàk ta si a. Khawsak tieng dawi an hmang a, Filistin zawlneihai chu ruoiin, Ringnawtuhai leh kut an insui. 7 Chuong mihai chèngna ram chu, Tangkaruo le rangkachakin a sip a, An sum hauzie hriet phâk an nawh. An ram chu sakorin a sip a, Sakor tawlailir tiem sèng lo an nei. 8 An ram chu milemin a sip a, An kuta siem hmaah an kûn a, Kuta an siem ngei hmaa chun. 9 Mihai chu rawt hnuoi nîng an ta, Mihai chu suktlawm nîng an tih, Ngaidam tawl hrim hrim naw rawh. 10 Lalpa tiumna le mawina ropuiLaka inbi hmang dingin, Lungpui kâra hai lût ro. 11 Mit meng sâng chu sukhnuoi a ta, Mi chapo chu suktlawm a tih. Chu ni a hung tlung phâ chun, LALPA chauh chawisângin um a tih. 12 Chapo le inngaisânghai ta dingin, Iengkim LALPA chun hun a ruot a, Chawisânga um po po chu, Suktlawmin la um vong an tih: 13 Lebanona sidar thing insànghai, Basana saisuo kung insànghai, 14 Tlâng le muol inchung lûrhai, 15 Kulbing insâng le kul bang sàhai, 16 Sumdawng long ruol po po leLong ropui po pohai khom. 17 Mi indu chu sukhnuoiin um a ta, Mi chapo chu suktlawmin um a ta, LALPA chauh chawisângin um a ta, 18 Milem po po sukram vong a tih. 19 LALPA a hung tho suok a, Hnuoi hi a sawi hnîng pha chun, A hmêlmahai thlabâr an ta, Hnuoi kuoah invâk lût an ta, LALPA tiumna le mawina ropuiLaka inbîk hmang tumin, Lungpui kârah tlân lût an tih. 20 Rangkachak le tangkaruoa siem, An milem biek hlakhai chu, Buikelek le bâkhai hmaah, Pei hawnin la mâksan an tih. 21 Thoa hnuoi hi a sawi pha chun, LALPA tiumna le mawina ropuiLaka inthoka inbi hmang dingin, Lungpui kâra hai tlân lût an ta, Lung tolawt kârah inbîng an tih. 22 Hnâra thuok la ve hlak tho, Mihriem ringsana nei hi ma ro. Ieng am ringsan tlâk a ni a?

Isaiah 3

1 Lalpa, Iengkim LALPA chun, Jerusalem le Judai rama inthokin, Fâk le dawn le tui lâkna hnàr, A sukchât ding têp a nih! 2 Mi huoisen le râlhrâthai, Rorêltuhai le zawlneihai, Aisànthiemhai le upahai, 3 Sawmnga chunga hotu le lalhai, Remruottuhai le themthiemhai, Aikei thiemhai khom an rêngin, A la suktawp vong ding a nih. 4 An lalah naupang sieng ka ta, Tlanglaktehan an chungah ro rêl an tih. 5 Anni le anni innêksawr an ta, Pasalin pasal, tuolbawmin tuolbawm. Upa chungah tleirawl inlek a ta, Mi chînin mi inzaum hmusit a tih. 6 Miin a pâ inah a unaupa chelin, "Nang chun zakaw fuol i nei a, Kan thuoituah thang rawh" tîng a ta, 7 Sienkhom chu ni chun aman, "Kei chun ieng law thei naw ning, Ka inah fâk ding a um naw a, Sil le bil ding a um bok nawh, Mipui thuoituah mi sie lul naw ro"Tiin la khêk suok a tih. 8 LALPA ropuina chu cho a, Tong le thilthawa an do leiin, Jerusalem chu a chim thla a, Judai ram an tlu thal rum a. 9 An hmêlah an suolzie a'n lang a, Sodom mihai ang bokin, Uolâu taka che pawrin, An suol an thup thlawt ta nawh. An chung a va pik de aw!Mani insuksetuhai chu. 10 Mi felhai ruok chu hril la, An kalchawi la tluong a tih, An thilthaw rà suokhai chu, An la tlàn ding a ni si. 11 Mi rilohai chung a pik!Sietnan thla a zâr khum zing!An kut thilthaw ang peiin, Thungrulin la um an tih. 12 Ka mihai nêksawrtu chu, Tleirawl té tè chauh an na, An chunga rorêltu khom, Nuhmei an ni tlat chu tie!Aw, ka mihai, in thuoituhan, Lam naw tienga thuoi suolin, An inhmangpui cheu a nih. 13 Ro rêl dingin LALPA chu, Rorêlna hmunah a thung a, A mihai chungchang thu chu, Hril dingin a hung tho a. 14 Upahai le thuoituhai chungthu, LALPA chun a hang rèl a:Ka grêp huon in sukram a, Pasiehai thil in rokhai chu, In inah in kol fur tawl a. 15 Ka mihai sir sop neng a, Retheihai hmài in rawt hi, Iengtizie am an ta a?" tiinLalpa, Iengkim LALPA chun a hril. 16 LALPA chun a hril pei a:"Zion minûhai chapozie hi, Dâk awr awrin an lawn a, Lèm tumin mi an mel a, Telnêng pal ri sieu sieuin, Hniek tiemin an lawn awt awt. 17 Chu lei takin LALPA chun, Zion minûhai lusîp chu, Pansie inbawmtir a ta, An lu sukkolpêk a tih" tiin. 18 Chu nia chun an incheina tha bânbun hai, luhren hai, thimkuol hai, 19 nabê hai, ngûn kuol hai, hmaidier hai, 20 samhrèn hai, kerèka bun telnêng hai, kawnghrèn hai, rimtui bawm hai, âi thatna dinga an bun hlak àibun hai, 21 suoi namna kutsebi hai, hnârbe kuol hai, 22 kût nia incheina thuomhnaw tha korfuol hai, silpuon hai, aiman zakuo hai, 23 hlimen hai, puon zâi inhmì hai, khài nel nel hai le bâtpuon hai chu LALPAN la hmangpêk a tih. 24 Rimtui nêkin rimsie, Kawnghrèn nêkin hrui zèn, Sam chei nêkin lu kawk, Puon mawi nêkin saiip, Hmêl tha nêkin hmai dep kawng, An chan hung ni ta lem a tih. 25 I mihai kawlhnâmin that an ta, I mi hràthai indonaah thîng an tih. 26 Zion kotkhârhai chun sûnin, Mitthli leh tap tlok tlok an ta, Vâkvaiin hnuoiah inthung zap an tih.

Isaiah 4

1 Chu nia chun nuhmei pasariin, 2 Chu ni chun LALPA-a inthoka inder suok Kau chu mawi tak le ropui takin la hung um a ta, a ram tharsuok chu Israel rama dam khawsuoka la umhai uongpui tak le an ropuina chu la nîng a tih. 3 Zion-a la um zing, Jerusalema la um zinga an hming inchikhai chu mi thienghlim tia ko nîng an tih. 4 LALPA thlarau chun Zion minuhai chungthu chu rêl felin, an porchèna chu sawp fai a ta, Jerusalema thisen kai po po chu LALPA thlarau mei chun kàng fai a tih. 5 LALPA chun Zion tlâng le chu taka mi chêng khawmhai chunga chun sùnah sûm anga inzâm meikhu sieng a ta, zànah meichok var sie bok a ta, a ram pum chu a ropuinain zàr khum a tih. 6 Chu chun sùn lum vànglaia zàr hlimtu bawkte le thlipui le ruopui laka an inhumhimna nîng a tih.

Isaiah 5

1 Ka grêp huon duot chungchang thu, Hlain ka'n zawt ding a nih:Tlâng pang hnuoi thatna hmunah, Ka hmangaiin grêp huon a nei a. 2 Lung a'n thiel a, khur a cho a, Grêp tha tak chi a phun a; Vèngbûk insâng a bawl a, Grêp sawrna ding khur a cho a. A rà thlum tak lo hun a nghâk a, Sienkhom grêp suok a lo ni si! 3 Nangni Jerusalem mi le, Judai rama chênghai hin, Ka grêp huon le kan chungthu hi, Tuhin mi rêlpêk ro khai. 4 Ka huona ka thaw ta po bâk kha, Thaw dàn ding chuong iem a um a? Grêp tha ka beisei zing laiin, Ieng leia a puopa ngotin a ra? 5 Huon chunga ka thaw dàn ding chu, Tuhin mi lo ngàithlapêk hràm ro. A'n zàmnahai thiek ka ta, A dâihai thiek bok ka ta, Mi pal sopin hung um a tih. 6 Ka grêp huon chu sukram ka ta, Tu khomin thum ta naw ni a, A hnuoi cho phit ni ta nawng a ta, Hling le buorin bawm lem an ta, A chunga ruo insûrtir lo dingin, Sûmhai khom thû pe bok ka tih. 7 Iengkim LALPA grêp huon chu, Israel sûngkuo hi an na, Judahai hi a huon mawitu an na, An lakah rorêlna fel a beisei a, Thisen insuona ngot a hmu a, Felna hmu a'n beisei laiin, Beidong khêk ri a hriet lem si. 8 Ram laili lai tak hluo a, In dang inchaw sap pei a, Lohai khom zauh sap pei a, Mi dang hmun inchan lo a, Màkhâta pumbiltu chu, A chung a va pik ngei de! 9 Iengkim LALPA chun ka hrietah, Hieng ang hin thu a hril a:"A in ropui tak el chu, Rausanin um ngei a ta, In ropui le mawihai chun, Hluotu ding hrim nei naw nih. 10 Grêp huon pari nga vêlah, Uoiin litar sawmhni chauh, Thlai chi tîn sawm tùnaah, Tîn khat chauh inthar an tih" tiin. 11 Zu dawn ding ringot hnot a, Zîng inhma taka tho hlak, Uoiin inrui hmâ khat a, Zàn sawt tak tak meng hlak chu, An chung a va pik de aw! 12 Ruoi an kìlna hmuna chun, Tingtang, perkhuong le khuongtê, Theihlê le uoiin an nei a, Sienkhom LALPA thilthawhai chu, An ngaisak hrim hrim naw a, A kut suok thilhai khom chu, An ngaituo chuong ngai bok nawh. 13 Hriet thiemna an tlâksam leiin, Ka mihai chu salah intâng an ta, An mi lienhai chu phingtâmin, An mipuihai chu dangchârin, An la thi tawl ding a nih. 14 Seol phing a suktàm zuol a, Inkhì ruol loa lienin, A bàu chu a ka huou a, An mi ropuihai le mipuihai, Inrui puom le hlimhlop chènhai, Chu chun lût thla diel an tih. 15 Chu ni a hung tlung pha chun, Mihai chu thum hnuoi a ta, Mihriemhai suktlawm a ta, Chapo meng insânghai khom, Sukhnuoiin um tâng an tih. 16 Sienkhom Iengkim LALPA chu, A'n diknain chawisâng a ta, Pathien thienghlim chu a felnain, A thienghlimzie inlangtir a tih. 17 Chu pha chun beramhai chu, An tlatna hmunah tla nawk an ta, Hausahai rausan hmuna chun, Beramte ruolin tuolchai an tih. 18 Inhlèmna hruola suol hnûktu, Tawlailir anga ritlona hmangtu chu, An chung a va pik de aw! 19 "Ei hmû vè theina dingin, Pathien chun thaw inhmaw sien, Ama chun mi hung hnaiin, Ei hriet vè theina dingin, Israelhai Mi Thienghlim chun, A remruot intlungtir raw se"Tituhai chung chu a va pik ngei! 20 Thil tha lo thil tha ti a, Thil tha thil tha lo titu dâm, Thim chu vara ngai tlattu, Var chu thima ngaitu dâm, Khâkna thlumnaa ngai a, Thlumna khâknaa ngaitu chu, An chung a va pik de aw! 21 Mani ngaia vara insietu, Mani mithmua thiema inngai chu, A chung a va hang pik de aw! 22 Uoiin dawna mi hnèbàntuhai, Zu pol thiema mi chungchuonghai, 23 Thamna an fâk rûk leia, Mi suol thiem inchangtir a, Mi fel thiem naw inchangtirtuhai, An chung a va hang pik de aw! 24 Meiin bu pawl a kàng ang le, Hlo tawl a kàng ral angin, An zunghai hung hmon a ta, An pàrhai chu pilvut angin, Lèn hmangin la um a tih, Iengkim LALPA dàn hnawl a, Israel Mi Thienghlim thu an hnawl leiin. 25 Chuleiin, LALPA lungsenna chu, A mihai chungah a chok a, A kut hlângin a vuok a, Tlânghai an inthin dur dur a, Kotthlêra hmunhnok ang elin, Ruong an inthal rem rum a. Chuong khom chun a lungsenna, A la lâk kìr chuong naw a, A kut khom a la hlâng zing. 26 Hla taka um hnamhai kuomah, Inhriettirna thon suok a ta, Kawl kil tawpa um hnamhai chu, Faifûkin ko khawm a ta, Inrang takin hung nghal an tih. 27 Tu khom châuin tlu naw ni a, In innghil bok naw ni a, An kawng inthêp naw ni a, An pheikhok se bok naw nih. 28 An thal zumhai a ngei a, An thalngul kuoi sâ a na, An sakor tinhai khom chu, Lungthìr angin a chang a, An tawlailir ke invir khom, Thawngaleivir ang a nih. 29 Keipui angin an inrùm a, Sakeibaknei vanglai angin, An sa sè an inngur khum a, Tu khomin san ngam loin, An sa sè chu an fen hmang. 30 Chu ni chun tuifinriet inrùm angin, Anni chun inrûm khum an ta, Mihan ram hang thlîr an ta, Thimna le beidongna naw chu, Thil dang hmu nei naw ni a, Var khom sûmin hlieng a tih.

Isaiah 6

1 Lal Uzzia a thi kumin LALPA chu lalthungpha insâng taka chawimawia a thung lai ka hmu a, a silfên fuol hmorin tempul chu a'n khum vong a. 2 A bula chun serafimhai an ngìr a, thla paruk seng an nei a. Thla hniin an hmai an hlie a, thla hniin an kepha an hlie a, thla hni dangin an vuong a. 3 Anni chun, "Iengkim LALPA chu a thienghlim, A thienghlim, a thienghlim, A ropuinain hnuoi a sip"tiin an insam ton a. 4 An rawl ri chun tempul kotkhâr bieng le tuong chu a nghor nghing dur dur a, tempul chu meikhuin a bawm sip a. 5 Chu phing leh kei chun, "Hmûr porchè put mi ka na, hmûr porchè puthai laia um ka na, ka mit ngeiin Lal, Iengkim LALPA chu ka hmu ta si a, ka chung a va hang pik de aw!" tiin ka khêk suok a. 6 Chu phing leh serafimhai laia pakhatin maichâma meiling chu chaichèin a chep a, ka kuom tieng a hung vuong a, 7 meiling chun ka hmûr a dep a, "Ngai rawh, hi hin i hmûr a tawk ta a, i khawlona chu lâk hmang a ni ta a, i suol khom ngàidam a ni tah" a ta. 8 Chu zoa chun, "Tu am tir ka ta? Tu am ei ta dingin fèng a ta?" tiin LALPA rawl chu ka hriet a. Kei chun, "Hi taka hin kei ka um, mi tir ta la" ka ti a. 9 Ama chun, "Fe la, hi mihai kuomah hieng thu hi hril rawh:'Nâ chun hrieng in ta, A ngaina hre naw ti niu, Mit chun hmung in ta, A umzie man naw ti niu. ' 10 Hi mihai lungril hi sukngar la, An nâhai suksêt la, An mithai insìmtir rawh. Chuong naw chun mita hmuin, Lungrilin man bok an ta, Ngha kîrin dam rawi an tih" tiin. 11 Chu phing leh kei chun LALPA kuomah, "Aw LALPA, chu chu ieng chen am ni tâng a ta?" ka ta. Ama chun hieng hin a mi don a:Hluotu tu khom um loa. Khawpuihai hung ram vong a, Inhai khom rausan vong a, Lohai khom tlaran vong a, 12 Mihai chu ram hla taka, LALPAN a son hmang vong a, A ram an rausan dêr chen. 13 A ramah sawma pakhat, La chêng zinghai sienla khom, La tlaran tho tho a tih. Insie le saisuo phùr hnung, A bul a um zing ang bokin, Chi thienghlim chu a rama, Bul hluo zingtu nîng a tih"tiin.

Isaiah 7

1 Juda lal Uzia naupa Jotham naupa Ahaz inlal laiin, Aram lal Rezin le Remalia naupa Israel lal Peka hai chu Jerusalem rûn dingin an hung inthok a, sienkhom an hnè el thei naw a. 2 Chu phing leh Davida sûnghai kuoma chun, "Aram lal le Efraimhaia an thang ruol a nih" tiin an va hril a, lal Ahaz le a mipuihai lungril chu thliin ram thing a mut hnìng ang elin a'n hnìng a. 3 Chuongchun, LALPAN Isai kuomah, "I naupa Sear-Jasub thuoi la, Ahaz va hmu rawh. Dil sakhnung lema tui lâkna lampui tawpa puon sawptuhai hmun panna lampuiah a um. 4 A kuomah, 'Fîmkhur la, ti loin muong takin um rawh. Aram lal Rezin le Remalia naupa lungsen inhrawk chu thingthu hring rèm hnung khu lui lui ang chauh a na, thlaphàngna ding ieng khom a um nawh. 5 Aram hai, Efraim hai le Remalia naupa hai chun i sietna ding an phier rûk a, 6 'Judai ram hang rûn ei ta, khoi dar vong ei ta, insem ei ta, lal Tabeel naupa chu lalah sieng ei tiu" an ti a nih. 7 Lalpa PATHIEN ruok chun hieng hin a hril:"An thil phier puitling naw ni a, Hlawtling ngai bok naw ni hai, 8 Aram khawpui chu Damaska a na, Damaska lu chu Rezin el hi a nih. Kum sawmruk le panga sûngin, Efraim hnam khom se vong an ta, Hnamin dam khawsuok naw nih. 9 Efraim lû chu Samaria a na, Samaria lú chu Remalia naupa el a nih. Ringnaah in ngîr nghet naw chun, Dingchang thei ngai naw ti niu"tiin. 10 LALPA chun Ahaz a biek nawk a, 11 "Seol inthûk tak amanih le vàn insâng taka inthokin amanih inchikna inentir dingin LALPA i Pathien kuomah hni rawh, " a ta. 12 Ahaz chun, "Hni naw nîng, LALPA chu fie naw ning" a ta. 13 Chu phing leh Isai chun, "Davida sûnghai, tuhin lo ngàithla ro. Mihriemhai dawtheizie fie hi huntawk in la ti naw rop a ni maw? Ei Pathien dawtheizie chen khom fie pei in tum am a ni? 14 LALPA ngei chun inchikna inhmutir a ti cheu: Nunghâk thienglâm chun nâu pâi a ta, nau pasal nei a ta, a hmingah Immanuel sak an tih. 15 Ama chun a sie le a tha a thlier thei pha chun bawngnènè khal le khuoizu ring a tih. 16 Chu naupang chun a sie hnawl a, a tha a thlang thei tak tak hma khomin i ti èm êm hlak lal pahnihai ram chu sukramin um a tih. 17 Efraim-in Juda a thèab inthoka la tlung ngai lo thil chu LALPAN nangma le i khuo le tuihai le i pâ sûngkuohai chungah hung intlungtir a ta, Asuria lal chu hung thuoi a tih. 18 Chu ni chun LALPAN Aigupta vadung tawp rèta thohai le Asuria rama khuoihai chu faifûkin ko a ta, 19 ruom khokroka hai, lungpui kak kàra hai, hling buk le tui làkna hmun po poah fu sip vong an tih. 20 Chu ni chun Eufretis vadung khêla LALPA hmul vawna haw Asuria lal chu hmangin in lû le kè vaw kol vong a ta, in khâkhmul chen khom ziet fai a tih. 21 Chu ni chun bawng tuoi pakhat le kèl pahni bâk chang nei naw ti niu. 22 A rama chêng la um sunhai chun bawngnènè khal le ram khuoizu ring an tih. 23 Chu ni chun tangka bûk sângkhat man grèp kûng sâng umna hmunhai kha hling le buorin bawm sip a tih. 24 A ram chu hling le buorin a bawm sip tàk leiin chu taka chun sapêlin mihai chu thalngul le thal chawiin ramsuok an tih. 25 Tuthlaw hmanga tlâng lo in neina hlakhai chu hling le buorin bawm khum a ta, fe ta ngai nawng in ta, bawng ruol le beram ruol tlatna hmun inchang tàng a tih.

Isaiah 8

1 LALPA chun ka kuomah, "Thil 2 chun, ka ta dinga hrepuitu ringum dingin thiempu Uria le Jaberekia naupa Zekaria hai chu ko ka tih" a ta. 3 Chu hnungah zawlneinu, ka nuhmei chu ka umpui a, nau a hung pai a, nau pasal a nei a. LALPA chun ka kuomah, "A hmingah Maher-Shalal-Hash-Baz i sak ding a nih. 4 Hi nau hin 'Pâ, Nû' a ti thei hmain Damaska hausakna po po le Samaria râl lâk sumhai po po chu Asuria lalin tol hmang vong a tih" a ta. 5 Chun, LALPAN a mi biek nawk a, 6 "Hi mihai hin Siloa tui luong dam diei chu hnawlin, Rezin le Remalia naupa Peka hai chu an hlimpui lem a. 7 Chuleiin, kei LALPA hin Eufretis vadungpui khauh tak le tam tak el, Asuria lal le a sipaihai chu tui angin hung inlientir ka ta, a kuong liem zuoi zuoiin a kama chun lêt a tih. 8 Judai ram chenin luong lût hum hum a ta, rîng chena insângin chîm a tih. I thla zâr chun, Aw Immanuel, i ram zâr khum duoi a tih. 9 Asuria-hai chun, "Aw hnam tinhai, indo dingin tlâng insam ro, hang nuoi hmât kan ti cheu. Ram hlaa mihai khomin lo ngàithla un la, indo dingin inpuochà ro, hang nuoi hmât tak tak kan ti cheu. 10 Thang khaw dàn ding phan inla khom, ieng bar ni chuong naw ti niu. Thaw dàn ding rêl inla khom, ieng khom sawt naw nih, Pathien kan kuomah a um si a" tiin vaukhawng an tih. 11 LALPA chun hieng mihai lampui hi ka zui ve nawna dingin khau takin thu a mi pèk a: 12 "Hienghai thu phiernaa hin, Nang chu thang ve dèr naw rawh; An tîhai hi tì ve naw la, An pangzat pangzat naw rawh. 13 Iengkim LALPA chauh a nih, Thienghlima i ngai ding chuh. Ama chauh chu a nih ti ding, Ama chauh chu a nih pangzat ding. 14 Ama chu i himna ding a nih; Israel sûng hni ta ding ruok chun, Tlûkna le dàlna lungpui, Jerusalema chênghai ta din, An bil le châng ni lem a tih. 15 Tam tak insui thlûng an ta, Tluin koi dar phung an ta, Awkin man tawl bok a tih" tiin. 16 Inhriettirna thuhai chu, Ziek thlain kol diem ka ta, Ka thuoihruoihai lungrilah, Inhlànin tùnghet ka tih. 17 Jakob sûngkuohai laka, A hmai thuptu LALPA chu, Kei ruok chun nghâk zing ka ta, Amaah innghat tlat ka tih. 18 En ta, kei le LALPA mi pèk ka nauhai hi, Zion tlânga chêng, Iengkim LALPAN Israel rama inchikna thil maka a hmanghai chu kan nih. d 19 Dawi hla thûm bul bula insam hlak aienthiem le râu ko thiemhai rawn dinga mihaiin an hril pha cheu chun, "Mihaiin Pathien an rawn lem ding a ni naw am a ni? Dam lai nêkin mithi hnung an rawn lem hlak am a ni?" tiin don hlak ro. 20 Dàn Thu le Inhriettirna Thu chu zawm lem ding a nih. Hi thu anga an hril a ni naw chun an ta dingin khawfing chat ngai naw nih. 21 Beidong le phingtamin ram tinah invâk kuol an ta, an tamsawl phâ leh lungsen êm êmin chung tieng en an ta, an lal le an Pathien chu tongsie inphur an tih. 22 Chu zoah hnuoi tieng en an ta, beidongna le thim, thimpui tium chauh hmung an ta, thim sà mupah hnaw hmangin um an tih.

Isaiah 9

1 Nisienlakhom, beidonga umhai khom lungzîng zing ta naw ni hai. Khâ hmâ khan Zebulun ram le Naftalia ram chu a suktlawm a, sienkhom hun la hung dinga ruok chu Jordan vadunga inthoka tuipui panna lampuia um Jentelhai chèngna Galili ram chu ropui taka chawimawiin um a tih. 2 Thim hnuoia kalchawihai chun, Var ropui tak an hmu a, Thìna hlima chênghai chungah, Zîng khaw mawi a hung var a. 3 Hnamhai chu i siemlien a, An hlimna i sukpung a, Bu sîk huna an hlim angin, Râllâk sum insem chânga, Nasa taka an hlim angin, I hmaa chun an hlim a. 4 Midianhai i hnè ni ang khan, An rikphurna ringkolhai, An thil inkotna liengkothai, Nêksawrtuhai hmoltumhai, Nangin i suktliekpèk tah. 5 Indonaa sipaihai pheikhok bun dâm, Thisen kâi hnuong an thuomhai dâm, Meiin la raw hmang an ta, Thing angin la ti'ng an tih. 6 Ei ta dingin nau a pieng a, Nau pasal pèkin ei um a, A liengkoa chun rorêlna, Innghatin kengkawng a ta, A hming chu Remruottu Mak, Pathien Hrât, Chatuon Pâ, Remna Lal la ti'ng an tih. 7 A ram lien zuol pei a ta, A ramah inremnain, Tawpintâi nei ngai naw nih. Davida lalthungphaah, Thungin ro hung rêl a ta, Indik tak le fel takin, Chu hun le chatuon chenin, A ram chu suknghet a tih. Iengkim LALPA thahnemngainan, Chuong po po chu thawng a tih. 8 Israel chunga thil tlung ding chu, LALPAN Jakob sûngkuo a hril a. 9 Israel ram le Samaria chênghaiin, An rêngin la hrieng an tih. Anni chun chapo tak leLungril uongthuong tak elin, 10 "A têklei chim tahai chu, Lung ser nàmin thlâk ei ta; Theichang tluon an hmanghai khom, Sidar thingin thlâk ei tih"Tiin an hril hlak si a. 11 Sienkhom anni bei dingin, An hmêlma Rezin kut chu, LALPAN a sukhràtpek a. 12 Sak tieng pangah Aramha'n, Thlang tieng pangah Filistinha'n, Israelhai fàk zo tumin, An bàu an ka tuou a nih. Chuong ang hiel chu ni sienkhom, A lungsen a rè naw a, A kut a hlâng zing a nih. 13 Chuonga a hrem tawl khomin, Iengkim LALPA kuom tieng chun, Simin an hung kìr chuong nawh. 14 Chuleiin, Israel lû le mei chu, Tûm kâu le phairuong angin, LALPAN ni khat thilthuin, A fik bong vong ding a nih. 15 Mi lien le upahai chu, A lû tieng pang nîng an ta, Khêl hriltu zawlneihai chu, A mei tieng pang nîng an tih. 16 Hnam thuoituhan an mihai, An thuoi suol a, an boral zo. 17 Pathien poisakna nei lo, Mi rilo le khêl hril hmang, Anni tawl vong tlat leiin, Thangtharhai chungah Pathien, A lungni thei ta naw a, Fahrà le hmeithaihai khom, A lunginsiet thei ta nawh. Chuong ang hiel chu ni sienkhom, A lungsen a rè naw a, A kut a hlâng zing a nih. 18 Meiin buor le hlo hling nei, A kàng hmang vong hlak angin, Suolna khomin mei angin, Ram a kàng dur dur hlak a, Rampuihai khom a kàng a, A khu a tung ngût ngùt hlak. 19 Iengkim LALPA lungsenin, Ram po po raw hawp a ta, Mihai chu meia tì din, Thing herah inchang an ta, Mani unauhai chen khom, Tu khomin hlà naw ni hai. 20 Chang tienga mi an dol a, An tàm a rè chuong naw a, Voi tienga mi an fàk nawk a, Khop tik an nei chuong si nawh. Mi tinin mani nauhai sa, Intîm loin fâng an tih: 21 Manase le Efraimhai inbei an ta, An pahni'n Judahai beihron an tih. Chuong thil hiel chu tlung sien khom, A lungsen a rè naw a, A kut a la hlâng zing tho.

Isaiah 10

1 Dàn indik lo siem suok a, Nêksawrna thu petuhai chu, An chung a va pik de aw! 2 Ka mihai chu nêksawrin, Rethei, hmeithai le fahra hai, hanvo an inchû thlàkpèk a, Hmeithaihai thil an fàkpèk a, Fahrahai rokin an suom hlak. 3 Ram hla taka inthoka, Sietna ka hung tir pha leh, Iem in chang hrim ding a na?Thangpuitu tu'm in ko ta ding?In hausakna po po kha, Khawlam in thup hmang ta ding? 4 Sala an manhai laiaLo inthin hawp ve el le, An thathai laia thang chu, In chan ding um sun a nih. Chuong ang hiel chu ni sienkhom, A lungsen a rè naw a, A kut a la hlâng zing tho. 5 Ka lungsenna hmola ka hmang, Asuria chung chu a va pik de!Ka lungsenna hmoltum chu, Kutin ka'n let zing a nih. 6 Pathien inzà lo hnam chu, Do dingin ka tir suok a, Ka lung suksentu bei di'n, Ama chu ka tir a nih:Râllâkhai chu làkpek a, Suom thei po po chu suom a, Kotthlêra chirhak ang a, Anni chu chîl pher dingin. 7 Sienkhom chu chu a tum nawh, Ngaituo khom a ngaituo nawh. Hnam tam tak rawt ram teuh chu, A tum rùk a lo ni lem. 8 'Ka kawmandar hai po po hi, Lal tluk seng an ni naw maw? 9 ​Karkhemis ka tukdol angin, Karno khuo khom ka hnè an naw?Hamath khom Arpad angin, Samaria khom Damaska angin, Ka soisak tawl a ni kha. 10 Milem betuhai ram chu, Ka kut ngèiin ka lâk a, Jerusalem le Samaria nêka, Khaw hmingthang lem vong an nih. 11 Samaria le a milemhai, Ka soisak tah ang char khan, Jerusalem le a milemhai khom, Ka soisak ve naw di'm a ni?Tiin a hril vêl vei a ni kha. 12 LALPA chun, "Zion tlâng le Jerusalem chunga ka thaw tum po po ka thaw zo pha, Asuria lal chu a lungril a chapo êm lei le uongthuong taka a meng leiin ka hrem ding a nih" tiin a hril. 13 Asuria lal chun hieng hin a hril a:"Ka kut hràtin hieng hi ka thaw a, Varna le hriet thiemna ka nei leiin. Hnam tin ramrihai ka son kuol a, An rosumhai ka rok a, Mi hrât khawkhèng ang elin, An lalhai ka tukdol a. 14 Kuta vate bu luok angin, Hnamhai hausakna ka luok a, Mihan a pui rausan hnungaA tui an lâk khawm angin, Ram tam tak ka luok khawm a, Thla khawng ngam an um naw a, Inhrâm ngam an um bok nawh" tiin. 15 Hreipui hlàngtu chunga chun, Hreipui a uong thei hlak maw?Thing àtna hmangtu chungah, Thing àtna a uong thei maw?Hmol tumin a lektu chu, Iengtin khom a lek khum thei nawh; Funghrol khom thuntu boin, Amain a lawn thei nawh. 16 Lalpa, Iengkim LALPA ngei chun, A pasalthahai chungah, Ropna hri inlèngtir a ta, A ropuinan em kâng a ta, Meipui angin chok an tih. 17 Israelhai Èntu chu, Chu mei ngei chu nîng a ta, An Mi Thienghlim ngèi el chu, An meiser chu nîng a ta, Chu chun ni khat thilthuah, Buor le hlo hling neihai chu, Kàngin sukbohmang a tih. 18 A ramngaw zîng khup el le, A ramchang hmun thahai chu, Damnaw zûr hmang ang elin, A la se vong ding a nih. 19 Ngaw thing hlaa um sun chu, Naupang tiem khop chauh nîng a tih. 20 Chu ni chun hlaa la um Israelhai, Jakob sûngkuo dam khawsuokhai chun, Anni thattuhaiah innghat ta loin, LALPA, Israel Mi Thienghlim a chun, Titakzetin innghat lem tâng an tih. 21 Hlaa la um sunhai laia, Jakob thla la dam sunhai chu, Pathien Hrât kuomah kîr nawk an tih. 22 Aw Israel, i mihai tamzie chu, Tuipui tieu ang hiel khom ni sien, Hlàa umhai chauh kîr nawk an tih. An phû anga siet tuok dinga, Fel taka rèl sa a nih. 23 Lalpa, Iengkim LALPA chun, A ram puma sietna intlun dinga, Thu a lo ruot tah ang ngeiin, Aman hung hlen suok a tih. 24 Lalpa, Iengkim LALPA chun, Hieng thu hi a hril a nih:"Aw, Ziona chêng ka mihai, Aigupta mihai thaw ang khan, Asuria-han hmola vawin, Kut inlet khum sien cheu khom, Anni chu tì dêr naw ro. 25 In chunga ka lungsen hi, Ka lâk kieng vak ding a na, Anni suksietna dingin, An chungah fu tâng a tih. 26 "Horeb lungpuia Midianhai, LALPAN a sukhlum ang khan, Iengkim LALPAN anni chu, Vuokna hruolin vuong a ta, Aiguptaa a thaw ang khan, Tui chungah hmol hlâng a tih. 27 Chu ni chun in liengkoa, Phurrik an innghathai chu, Hlìp thlâkin um tâng a ta, Bawi ringkol in bâthai khom, Sukbongin um tàng a tih, In hung thàu ta hle si a. 28 Aiath khuo an lût ta a, Migron khuo an hung pêl a, An thuomhnawhai po po chu, Mikmas-ah an sèk khawm a. 29 Chu zoah kawn an liem a, Geba khuoah an riek a, Rama khuohai an inthin a, Saula khuoa Gibea mihai an tlân sie. 30 Aw Gallim naunuhai khêk ro, Laisa khuohai, lo ngàithla ro, Aw Anathot, lo don ta la! 31 Madmena chu a tlân sie a, Gebim mihai an inbi a. 32 Voisun Nob khuoah châm an ta, Zion naunu tlâng, Jerusalem chu, An kuttum inhmung an tih. 33 Lalpa, Iengkim LALPA chun, Thing zà angin tha hnè takin, Sok thla hmok hmok tawl a ta, Thing lienhai chu phûr a ta, Thing insânghai thum a tih. 34 Rampui chu hreipuiin vât a ta, Lebanon thing insâng lûr angin, Asuria chu phûr thlùng a ta, Mi Hrât hmaah inthal a tih.

Isaiah 11

1 Jesai zungzàma inthokin, A der hung indawn suok a ta, Chu zunga inthoka Kâu chun, Rà la hung insuong a tih. 2 LALPA Thlarauin umpui a ta, Varna le hrietthiemna hai, Remruot thiemna le hràtna, Hrietna le LALPA tìna nei a tih. 3 LALPA tìa a thu zawm chu, A lung lawmna nîng a tih. Mita inlang dàn ang elin, Thu potchat ngai naw ni a, Nâa a hriet satlie ang elin, Ama chun ro rêl naw nih. 4 Tlasamhai chu indik takin, An chungthû rêlpêk a ta, A rama retheihai thu khom, Hlei nei loin rêl a tih. A thû, hmoltum chu hmangin, Hnuoi hi a vuok ding a na; A bàua inthoka thuok chun, Mi suolhai mût hlum a tih. 5 Felna chu kawngchùn a ta, Ringumna kawngzem a tih. 6 Satené le beramte hai chu, Huong khatah chêng tlâng an ta, Keite le kèl bok tlâng an ta, Bawngte le sakeibakneite khom, Tla khawm diel diel tâng an ta, Naupangtein thuoi dul dul a tih. 7 Bawngpui le savom tla khawm an ta, An tehai khom bok tlâng an ta, Sakeibaknei chun bawng angin, Bupawl fa ve tâng a tih. 8 Chongkor buzawl bula chun, Nautehai inhnel an ta, Rulngân bu khom naupangtehan, Nuom nuomin pur tâng an tih. 9 Ka tlâng thienghlimah tu khom, Insukna ta naw ni hai a, Insuksiet um ta bok naw nih. Tuipui chu tuia a sip angin, Hnuoi hi LALPA hrietna'n sip tâng a tih. 10 Chu ni chun Jesai Zungzàm chu hnam tin pholêngah ngîr a ta, a vêlah hnam tin hung fuon khawm an ta, a chawlna hmun chu ropui a tih. 11 Chun, chu ni chun Asuria rama dâm, Aigupta chuonhnuoi le chuonchunga dâm, Ethiopia rama dâm, Elam rama dâm, Babulon rama dâm, Hamath rama dâm le tuifinriet thlierkâr hrang hranga Israel mi thi bâng, hlaa la umhai chu thuoi kîr dingin a voi hninaah LALPAN a kut phar nawk a tih. 12 Hnamhai puonzâr ding khai a ta, Israel tlân darhai thuoi khawm a ta, Hnuoi kil tina inthokin, Juda tlân darhai chu thuoi khawm a tih. 13 Efraim thìkthu khom bo tâng a ta, Juda dotuhai khom bo tâng an ta, Efraim chun Juda thîk ta naw ni a, Juda khomin Efraim theidà ta naw nih. 14 Thlang tienga um Filistinhai chu, Fe thlain zu do hron an ta, Sak tieng khom hang rok tlâng an ta, Edom le Moab chungah kut thlâk an ta, Amonhai chu sie khuoah siem an tih. 15 Aigupta kaia litengsawlhai chu, LALPAN inkangtir vong a ta, A kutin thli lum huom huom chu, Eufretis vadung chungah tir a ta, Vadungte pasariin luong dar a ta, Mihan ke hu loin pal kài an tih. 16 Israelhan Aigupta an suoksana, Hraw ding lamlien an nei ang khan, Hlaa um a mihai kîrna dingin, Asuria rama inthokin, Lamlien la um rung a tih.

Isaiah 12

1 Chu ni chun hieng hin hla sak in tih:"Inpâk ka ti che aw LALPA, Ka chunga i lungsenna chu, I mi làk kiengpèk ta a, Tuhin i mi thlamuong tah. 2 LALPA chu mi sandamtu a na, Ring ka ta, ti ta naw ning; Lalpa, JEHOVA ngei chu, Ka hràtna le ka hlâ a na, A mi sandamtu a nih" tiin, 3 Sandamna tuikhura tui chu, Hlim takin chawi tâng in tih. 4 Chu ni chun lawm hla remin, LALPA kuomah lawmthu hril ro, A hming chu lam rop hlak ro!A thilthaw le ropuiziehai, Hnam tin kuomah puong darin, A hming chawimawi tlâk a nizie, Hnam tin kuomah hril vêl ro. 5 LALPA inpàkna hlâ remin, Thil ropui tak a thawhai chu, Khawvel pumpui inhriettir ro. 6 Zion mihai, hlima khêkin, Inring takin zâi hlâ rem ro, Nangni laia um mi ropui chu, Israelhai Mi Thienghlim a ni si.

Isaiah 13

1 Babulon chungthua hril lawkna Amoz naupa Isaiin a hmu chu: 2 Muol kol sìpah puonzâr khaiin, Anni chu ko khêk unla, Mi lienhai kotkhâra lût di'n, Anni chu kutin hûi ro. 3 Ka mi thienghlimhai thu ka pêk a, Ka lungsenna hrîk thla dingin, Ka mi huoisenhai ka khawm tah, Ka hnèna chunga lawmhai chu. 4 Ngai ta u! Mipui tam tak ri ang, Tlânga ri so nuoi nuoi chu!Hnam tinhai khêk ri a na, An sipaihai an khawm a ni chu!Iengkim LALPA chun indo di'n, A sipaihai a khawm a nih. 5 Hla taka inthokin an hung, Kawl kil tawp rêta inthokin. A ram pum sukse vong dinga, LALPAN hriemhreia a hmang an nih. 6 LALPA nì chu a hnâi ta a, Nasa takin tap khêk ro, Iengkimthawtheia inthokin, Sietna râpthlàk hung tlung a tih. 7 Hi lei hin kut po po zoi a ta, Lungril tin itui zop a tih. 8 Thlaphangnain man tawl a ta, Natna le lung natnain thâm a ta, Nau hase tuor angin inkon an ta, Anni le anni inpangzat an ta, An hmèl mei angin sen phût a tih. 9 En ta, LALPA nì, ni râpthlâk tak, Lungsen sosâng le tium nì chu, A hung tlung ding a ni tah. Ram chu rausan ramah siem a ta, A sûnga mi suolhai that vong a tih. 10 Arasi le arasi bawrhai khin, Var insuo ta naw ni hai a, Zîng ni suok chu inthim a ta, Thla khom var ta bok naw nih. 11 Khawvel hi a suolna leiin, Mi suolhai chu an suolna leiin, Ka hrem tawl ding a ni si a. Chapohai uongna suktawp ka ta, Tawrothai insuongna suktlawm ka tih. 12 Rangkachak hlîr nèk khomin, Ofir rangkachak nêk khomin, A dam khawsuok mi vâng an tih. 13 Iengkim LALPA lungsen nî chun, Vàn sawi hnìng dur dur a ta, A lungsen a chok suok nî chun, Hnuoi hi inson dawr khopa, Sukhningin la um a tih. 14 Mi pêl lai sazuk tuoi ang leVêngtu um lo beram ruol angin, Mi tinin mani mihai bèl dingin, An ram tieng râlzâm an tih. 15 An hmu taphot sun tlang an ta, An man taphot sât hlum an tih. 16 An nautehai chu an hmu ngèiah, Hnuoi vuoknan hmangpêk an ta, An inhai rokpêk an ta, An nuhmeihai pawngsuol an tih. 17 En ta u, Babulon chu bei dingin, Tangkaa tlon lungawi thei lo, Rangkachak ienga khom ngai lo, Media mihai ka chok tho a nih. 18 An thalin tlangvâlhai kâp tlang an ta, Naute chungah zà ngai naw ni hai a, Naupang lunginsiet bok naw ni hai. 19 Lal ram khuoa ropui tak, Kaldaihai nunphung vulna chu, Sodom le Gomora ang bokin, Pathienin sukram a tih. 20 Tu khomin hluo ta naw ni a, Tu thlâ khom chêng ta naw nih; Arab mi khuolzinhaiin, Puon in kei ta naw ni a, Berampuhan an beram ruol, Intlattir ta ngai naw nih. 21 Thlalêr ramsa chêng an ta, Sihal inzi nuoi nuoi an ta, Chingpirinuhan bu sep an ta, Sakêlhai tuolchaina ni tâng a tih. 22 Kulah satene hon inhrâm an ta, Lal inah sihal ruol inhrâm an tih. Babulon siet nî a hnâi ta a, Hun sawt riel ni ta naw nih.

Isaiah 14

1 LALPAN Jakob lunginsiet a ta, Israel chu hung thlang nawk a ta, An ramah inchêngtir nawk a ta, Ram dang mihai khoma hung zomin, Jakob sûnghai chu inkoppui an tih. 2 Hnam tinin hung thuoi khawm an ta, Anni ram ngeia chun fepui an ta, LALPA rama chun Israel sûngkuoin, Siehlawpa le siehlawnua dingin, Hnam danghai chu la sor an ta, Sala neituhai chu salah man an ta, Nêksawrtuhai chunga ro la rêl an tih. 3 Inrim tak le rawng taka sala in intàngna le buoina in tuoknaa inthoka LALPAN a'n chawltir pha cheu chun, 4 hi ti-elna thu hi Babulon lal chu in insam khum ding a nih:Nêksawrtu chu i va rè ta ngei de!I vaupûm khom a va rè ta ngei de! 5 LALPAN i rîtlona hmol le, I lal hmol a suktliekpêk ta chê. 6 Chu hmol chun lungsen eltiengin, Mipui i vuok zot zot hlak a, Hnam danghai chawl loa nêkin, Rawng takin i tukdol hlak kha. 7 Ram po po râlmuonga chawlin, Zâi hlâ an rem thei nawk ta hi. 8 Lebanona fâr le sidarhai chenin, I chungthu leiin an lawm a, "Suktlawma i um hnung hin chu, Mi phûr thlu ding an hung ta nawh"Tiin lawmin an hril a nih. 9 Hnuoia Seol, mithi khuoah, I tlung hun ding an tûng a nih!Fam lo chang tah thlarauhai chu, Hmuok ding chein a chok tho a, Hnam tin lalhai an hung tho ie, An lalthungphaa inthokin. 10 An rêngin nangma chu bein, I kuomah hieng hin hril an tih:"Nang khom keinihai ang bokin, I chàu vê dèr el an ta maw? 11 I ropui bùng bûng vei leh khan, I perkhuong ri siehai po po leh, Seol-ah thuoi thlâk i ni ta si. I puonphá chu thil ngê a na, I sil ding chu thil lung a nih, " 12 Aw nang, 'Vartien naupa leSikhawvar' inti hlak pa, eVàna inthokin i tla dêr el a!Nang, hnam danghai suksetupa, Hnuoiah pei thlâkin i um tah hi! 13 'Vànah hang lawn kai ka ta, Pathien arasihai chunga khin, Ka lalthungpha indin ka ta, Hmar tawp kil, pathienhai tlàngah, fLalthungphaah inthung ka ta, 14 Sûm chungah hang kai ka ta, Chunghnungtak tlukah insiem ka tih"I ti lungril hlak vei leh khan! 15 Sienkhom Seol khur mong rètah, Nam thlâkin i um ta si! 16 A hmu phot che chun en zuiin, "Hi hi maw hnuoi sawi hnìng a, Lal ramhai sawi danglamtu kha? 17 Hnuoi hi thlalêra inchangtir a, Khawpui tam tak suksetu le, A sal manhai insuo nuom lotu kha?"Tiin i chungthu la hril an tih. 18 Hnam dang lalhai chu ropui takin, Mani thlân sengah an inzâl hlak. 19 Nang chu kâu sât thlàk angin, I thlàna inthoka pei suokin, Râl kuta thi, kawlhnâma sun tlang, Ruong an sir ziel mei mei haiin, An del khum ding che a nih. 20 I ram i suksiet neng a, I khuo le tuihai i that leiin, Anni lai phûm ve naw ni chê. Mi rilo thlàhai hming chu, Tu khomin sâm zui naw nih. 21 An pahai suolna leiin, An nauhai that ram pei ro:Ram hluoa lal hung ni a, Khuo siema hluo sip dinga, An kìr ta nawna dingin. 22 "Anni bei din hung tho ka ta, Babulona inlal ta lo dingin, An hming chu sukbo ka ta, A dam khawsuok sunhai le, An nauhai le an thlàhai chenin, Ka sukbohmang ding a nih, "Iengkim LALPA chun a tih. 23 "Simbug chêngnaah siem ka ta, Chirdûmah inchangtir ka ta, Sietna hmunphiin phît ka tih, "Iengkim LALPA chun a tih 24 Iengkim LALPAN hming sâl meuin, Hieng ang hin thu a'n khàm a:"Ka tum dàn angin tlung a ta, Ka thu ruot chu dingchang a tih. 25 Ka ramah ngei hung thuoiin, Asuria chu tukdol ka ta, Ka tlângpuiah sir sop ka tih. Ringkol a lo inbàttirhai chu, Keiin hlîp thlapèk ka ta, An liengkoa inthokin, An rikphur chawi thlâng ka tih. " 26 Khawvel pum pui ta dinga, Chu chu a thaw tum a nih; Chu kut chu hnam tin chungah, Inlet a ni tah zing bok. 27 Iengkim LALPA thaw tum chu, Tuin am sût thei a ta?A kut inlet ta hnung chu, Tuin am kei thlâng a ta? 28 Lal Ahaz a thi kumin, Hi thu hi a hung tlung a: 29 Filistin mi po pohai, An vuokna hlak cheu hmol chu, A tliek leiin lawm naw ro; Khâ rûl tuia inthok khan, Rûlngan dang hung suok a ta, Chu rûl chu tûra sip rûl, Rûl vuong thei la nîng a tih. 30 Rethei mongtolhan tlatna, LALPA bulah hmung an ta, Tlasamhai chu muong takin, A bulah chawldam an tih. In zunga suokhai ruok chu, Tàmin sukhlum tawl ka ta, A thi mahlâ po that ka tih. 31 Aw kotpui, tap khêk rawh!Aw khawpui, tap inrûm rawh!Nangni Filistinhai, zop thla ro!Mei khu lui lui angin hmar tieng, Sipai an hung mup mup a, A hnufuol hrim an um nawh. 32 Filistin hnam palaihai chu, Iengtin am ei lo don ta ding?"Zion chu LALPA indin a na, A mi sukdudàna tuorhaiin, Chu chun himna hmung an tih"Tiin in hril ding annawm.

Isaiah 15

1 Moab-hai chungthu hril lawkna chu:Moab rama Ar khuo chu, Zàn khat thilthu'n a ram ie!Moab rama Kir khuo khom, Zàn khat thilthuin a ram! 2 I mihai chun Dibon-aHmun sâng tempula hai chun, Nebo le Medeba chan chu, Sûnin tap tlok tlok an ta, An lu mêt kol vong an ta, An khâkhmul khom tan an tih. 3 Kotthlêrah saiip silin, In chung le tuol zawla hai, Dingthathuona inthungin, Tapin khêk rong rong an tih. 4 Hesbon le Eleale tap ri chu, Jahaz chen a'n hriet phàk a, Chu chun Moab sipaihai lungril, Nasa takin a sukzâm a, An tap rût rût el a nih. 5 Ka lungrilin Moabhai a tà. Zoar le Eglat Selisya chenin, Mipui chu an ràltlàn a. Tap pum zinga pan tungin, Luhit khuo chen an tlung a, Horonaim lampui tluonin, An siet tuok chu an ta a. 6 Nimrim tui chen a kang a, Hlohai an hung vuoi zo a, Thil mawnghai an thi vong a, Hmun hring hrim a um ta nawh. 7 Rosum an khawl khawmhai chu, Phurin an tlànpui tawl a, Phahrâm Ruom râl tieng an pan. 8 Moab ramri intluonin, An tap ri a thangkhawk a, An chieu riin Eglaim a tlung a, An inrûm riin Beer Elim a tlung. 9 Dimon vadung tuihai chu, Thisenin a pol sen kul a. Chu nêka râpthlâk lem chu, Dibon chungah la tir ka tih:Moab rama inthoka râltlân leA rama la um sunhai chu, Sakeibakneiin sè hlum a tih.

Isaiah 16

1 Thlalèr dep Sela khuoa, Moab mi râltlànhai chun, Ram rorêltuhai kuomah, Dawvan an kaina dingin, Beramte chawi raw hai se, Zion naunuhai tlânga chun. 2 A bua inthoka rau darh, Vate vuong vêl ang elin, Arnon vadung kài velah, Moab nûhai an invàkvâi. 3 "Kan um dàn ding mi rêlpêkin, Nangnin rem mi ruotpêk unla, Sùnchanga thingbuk hlim angin, In hlimah mi'n chawltirin, Râltlânhai mi hliekhu unla, Hmêlma kutah mi'n hlàn naw ro 4 Moab mi, tlân darhai hi, Nangni lai kan um phal unla, Mi sukbohmang tumtuhai lakah, Râltlânhai hi mi hum hrâm ro"Tiin Judahai chu an ngèn a. Nêksawrtu chu la bo a ta, Sietnahai khom la rêng a ta, A rama inthokin rûntu khom, An inkieng hun la tlung a tih. 5 Davida sûngkuoa mi chu, Lalin la hung inthung a ta, Ringumna le hmangaina leh, Thudik tanin, ro fel takin, A la rèl zung zung ding a nih. 6 Moab chapo hlakzie kan hriet-An chapo dân a hleiinhluok; Mi an chaldel, an tuklul bok; Umzie boa uongthuong an nih. 7 Chuleiin, Moab mihai po poin, Moab chana tlu chu sûnin, An rêngin an tap khêk a nih. Kir Hareset mihai ta dingin, Lungse vànkaiin tàp ro. 8 Hesbona huonhai an rêm zo a, Sibmaa grèp huonhai khom. Grèp thà anga inzâm dar Moab, Jazer khuo chen inzâm a, Thlalêr ramah inzâm lût a, A kâupenghai inzâm dar a, Tuipui thî chena inzâm chu-Hnam tin lalhan an pal sop tah. 9 Jazerin Sibmaa grèp huon, A tà angin ka tà ve cheu a nih. Aw Hesbon, Aw Eleale, Mitthliin ka'n siltir cheu hi!I thei hmin chunga i lawm rihai, Busîk huna i hlim rihai kha, Tu hin a va hang rè ta ngei de! 10 Thei huona hlimna rihai kha, Lâk hmangin a um ta a, Grêp huonah tu khom khêkin, Zâi hlâ rem an um ta nawh. Grêp sir sawrna khura hai, Uoiin sawr ta naw ni hai, Hlimna ri ka suktawp ta si a. 11 Tingtang ri inuoi ngawi angin, Ka lungrilin Moab a sûn a, Ka lairil takin Kir Hareset. 12 A hmun sânga Moab kai chu, A sawl thlawn mei mei a nih; A tempula a tongtai khom chun, Tangkaina a nei dêr nawh. " 13 Chu chu Moab chungthua LALPAN kha hmaa a hril tah kha a nih. 14 Tu hin hieng hin LALPAN a hril nawk a: "Kum thum sûngin, inhlawfa kum tiema kum thum sûngin, Moab ropuina le a mipuihai po po chu hmusitin la um a ta, a dam khawsuok um sunhai chu mi tlawmtè, hril khop lo la nîng an tih" tiin.

Isaiah 17

1 Damaska chungthu chu hieng ang hin a nih:"Ngai ta, Damaska khawpui chu, Chimin tlu se vong a ta, Khawpui ni zing ta naw nih. 2 Aroer biela khuohai chu, Ràusanin um vong a ta, Beram ruol bok khawm an ta, Suktitu um ta naw ni hai. 3 Kula inhuon khawpui hrim hrim, Israel ramah um ta naw ni a, Damaska inlalna khom tawp a ta, Aram mi la um sunhai chun, Israel chan ang chu chang vèin, An ropuina la chuoi vèng a tih, "Iengkim LALPA chun a tih. 4 "Israel ropuina chu, Chu nî chun chuoi tâng a ta, A ram hausaknahai khom, Zûr thla zo vong tàng a tih. 5 Refaim ruoma bu sîk huna, Buphal lâk khawm zo hnunga, Lâk hmai zong ang nîng a tih. 6 Oliv ra sawi til hnung a, A zîk tieng pahni pathum, A buk thatnaah pali panga, La um ang chauh ni tâng a tih, "LALPA, Israel Pathien chun a tih. 7 Chu huna chun mihaiin, Anni Siemtu tieng nghâng an ta, Israel Mi Thienghlim chu en an tih. 8 An kuta siem maichàm tieng, Ngha zing ta naw ni hai a, Kuta siem Asera lim thing dâm, Rimtui inhlànna maichâm dâm, Ngaihlu ta bok naw ni hai. 9 Chu nî chun khaw nghet tak tak, kha hmaa Israelhai leia Hiv mihai le Amor mihai lo tlànsan ang khan an khawpui kul nghet tak takhai chu ram hnuoi chîmbuk kàra rausan khuo ang vong ni tâng a ta, khaw ram inchang tàng a tih. 10 In Sandamtu Pathien chu, In lo theinghil dêr ta a, In himna kul Lungpui chu, In hriet fùk ta ngai bok nawh. Hmun danga inthoka in làk, Grêp tha tak phun inla khom, 11 An inthang nuom êm leiin, Ni khat sûngin inpârtir inla khom, Grêp râ hrim lo naw ti niu a, In sìk ding chu lungngaina leNatna benvon chauh nîng a tih. 12 Hnamhai lungsen hrâng vel chu, Tuipui insok rì ang a nih!Hnamhai rì sosàng dàn chu, Tui tam tak rì ang a nih. 13 Tui lien sàng ang hum humin, Hnamhai so buon buon sienkhom, Amàn a zilhàu pha chu, Hla takah tlân hmang an ta, Tlânga bu si thli lèn dar ang leThlipuiin kokbong a fen angin, Anni chu hnot lêngin um an tih. 14 Zàn tienga tium râpthlâk chu, Khaw var hmain a bo zo tah!Chu chu mi roktuhai chan a na, Chu chu mi suomtuhai chan a nih. Ethiopia chungchang thu

Isaiah 18

1 Nile vadung hrûla um Ethiopia, Khàu anga thla zâp ri hum hum, 2 Tuipuiah phairuong long hmang a, Palai hung tir hlaktu ram chu, A chung a va hang pik de aw!Hnam dolkai tha le pangti nâm, An kawl le kienga mihai tìsim, Hnam kol le tong dang hmang mi, Nile vadung pêng dar ramaChênghai kuoma chun fe ro, Aw, nangni palai tuonranghai. 3 Khawvela chênghai po po, Leihnuoi hluotu po poin, Tlângah indona puonzar, Ka khài phâ hmu seng in tih. Tawtawrawt ka mût phà leh, A ri hre seng bok in tih. 4 Hi hi LALPA mi hril a nih:"Sûn luma laiking bèl raw angin, Busik hun thal rum vâng laia, Dàidaw pâitu sûm ang elin, Ka chèngna hmuna inthokin, To zingin zuk thlîr ka tih" tiin. 5 Grêp a pàr a, a hung rà a, Grêp hmina a'n chang hmaa, Theikûng thumnaa a kâuhai, At bonga an dehawn angin, Ethiopia khom la sâm an tih. 6 An ruonghai chu tlânga vate leRamsahai tlàn di'n mâksan an ta, Nipui sûng vatehaiin tlàn an ta, Thlasik lai ramsahan tlàn an tih. 7 Chu hun chu a tlung pha chun, Hnam dolkai thà le pangti nâm, An kawl le kienga mihai tìsim, Hnam kol le tong dang hmang mi, Nile vadung pêng dar rama um hai khom, Iengkim LALPA kuomah hungin, A hming chèngna Zion tlângah, Thilpêk hung chawi tâng an tih. Aigupta chungthu hrilna

Isaiah 19

1 Aigupta chungthua hril lawkna thu chu:En tû, sûm hrât tak chunga chuongin, Aigupta panin LALPA chu a hung. Aigupta milemhai chu, A hmaah an inthin a, Aiguptahai lungril chu, A tui inzop el a nih. 2 "Aigupta miin Aigupta mi, Do dingin chok phûr ka ta, Unau le unau, tuolbawm le tuolbawm, Khuo le khuo, ram le ramIndo tuong an tih. 3 An lungril hung zuoi a ta, An thil tum suktlol ka ta, An milemhai rawn an ta, Mithi thlarau rawn an ta, Aisanthiemhai rawn an ta, Rau ko thiemhai rawn an tih. 4 Hotu rawng le suol tak kutah, Anni chu pe suok ka ta, Lal kol takin hruol tawl a tih, "Lalpa, Iengkim LALPA chun a tih. 5 Vadung tui kang vong a ta, Va kam inhil bor bor a tih. 6 Tuilamhai hung thûng a ta, Aigupta va hnâr tui chu, Hung tlawmin kang vong a tih. Phairuong le tui hlohai chu, Vuoiin hung rop vong a ta, 7 Nile kam le a suo lai a, An thil chìnghai po po chu, Hung tawlin hung rop a ta, Thliin lèn hmang vong a ta, Hmu ding hrim um ta naw nih. 8 Ngamantuhai tap an ta, Nile-a ngakuoi le lèn dêngaFàk zongtuhai po po chu, Beidongin inrûm an tih. 9 Ziza khawnga fâk zonghai chu, Beidong takin um an ta, Puon zâi inhmì khawngtuhai chu, An beisei bo dêr a tih. 10 Pat thema inhlawhai chu, Lungzingin ngui tlep an ta, Inhlawfahai hrim hrim chu, An lungril lungngai a tih. 11 Zoan khaw thuoituhai chu, Invêt um khawm ruol an nih; Faraw remruottu mi varhaiin, Thurawn hmang lo an pèk a. Iengtin am Faraw kuomah, "Mi var pakhat vè ka na, Tien lai lalhai thlà ka nih"An ti ngam hrim hrim a na? 12 Khaw lai am i mi varhai chu? Aigupta chunga Iengkim LALPAN, A thaw tum chu inentir che raw se! 13 Zoan khaw thuoituhai chu, An lo invèt zo ta a, Memfis-a thuoituhai khom, Hlèmbawla um vong an nih; A mihai innghatna banha'n, Aigupta an thuoi hmang si. 14 LALPA chun an lu chungah, Lu hâina thlarau a buok a; Zurui chu a luok bulah, A pai chon chon hlak angin, Aigupta thilthaw tinrêngah, An infe suoltir vong a nih. 15 Mi hausa amanih rethei, Mi poimaw amanih poimaw lo, Tu khom ta din Aigupta chun, Thawpêk thei a nei dèr nawh. 16 Chu ni chun Aigupta mihai chu nuhmei ang el nîng an ta, Iengkim LALPAN kut a hlàng khum an hmu chun tiin inthin hawp an tih. 17 An chunga tlung ding LALPA thu ruot lei chun Judai ram chu Aigupta mihai pangzat hung nîng a ta, Juda hming an sàm ringot khomin thlabâr an tih. 18 Chu ni chun Aigupta rama khawpui pangahai chun Hebrai tong hmangin Iengkim LALPA chungah ringum dingin thu intiemkam an tih. Chuong laia khuo pakhat chu Heliopolis, Nisa Khawpuih ti a nih. 19 Chu ni chun Aigupta lailia chun LALPA ta dingin maichâm um a ta, a ramria chun LALPA ta dingin lungphun um bok a tih. 20 Chu chu Iengkim LALPA ta dinga Aigupta rama inchikna le hrepuitu nîng a tih. Nêksawrtuhai leia LALPA an ko pha chun, sandamtu le humhimtu an kuomah tir a ta, ama chun anni chu san suok a tih. 21 Chuongchun, LALPAN Aigupta mihai kuomah ama inhriettir a ta, chu ni chun LALPA chu hung pom tâng an ta, inthawina le thilpêk inhlànin chawibiek tàng an ta, LALPA kuomah thu tiem an ta, chu chu hlen bok an tih. 22 LALPAN Aigupta chu a sukdam theina dingin hripuiin hrem a tih. Chuongchun, Aigupta mihai chu LALPA tieng nghâng an ta, an hnìna chu lo ngaithlàng a ta, sukdam tawl a tih. 23 Chu pha chun Aigupta le Asuria inkâr chu lamlienin sun tlang tàng a ta, Asuria mihai le Aigupta mihai chu insir paw thei tàng an ta, Pathien pakhat chawibiek tlàng ta bok an tih. 24 Israel ram chu an ram inzompui ni tâng a ta, khawvel ta dinga malsawmna nîng an tih. 25 Iengkim LALPA chun, "Ka mi Aiguptahai, ka kutsuok Assuria-hai, ka rochan Israelhai, mal ka sawm cheu ie" tiin mal a sawm tawl ding a ni si a.

Isaiah 20

1 Asuria lal Sargon chun a sipai lal tak chu Filistin khawpui Asdod bei dingin a tir a, a hne a. 2 Chuong lai chun Amoz naupa Isai kuomah LALPA thu a hung tlung a, "Fe la, i kawnga i dierkei saiip kha hlîp la, i pheikhawk khom kha hlîp bok rawh" a ta. A ti ang chun a thaw a, saruokin, pheikhok khom bun loin a fe ta a. 3 Chun, LALPA chun, "Ka siehlaw Isai hi kum thum zet saruok le pheikhok bun loin a um ta a. Hi hi Aigupta chunga le Ethiopia chunga buoina nasa tak ka hung intlungtir ding inchikna chu a nih. 4 Asuria lal chun Aigupta mihai le Ethiopia mihai chu a naupang a upain man khawm a ta, Aigupta chu muolpho taka siemin, saruok le pheikhok bun loin, mong inlangin thuoi hmang tawl a tih. 5 Ethiopia hrâtna le Aigupta ropuina inhnèmpuituhai chu ti'ng an ta, sukzakin um an tih. 6 Chu ni chun tuifinriet kama chênghai chun, 'En ta û, Asuria lal laka mi sanhim dinga ei ringsan le an mi thangpui beiseia ei bêlhai kha ieng am an chang an ta maw! Iengtin am ei insan suok thei ta ding a na?' la tîng an tih" a ta.

Isaiah 21

1 Babulon ram chungthu chu:Negev nuoitu thawngaleivir angin, Thlalèra inthokin rûntu a hung, Ram tìtàmuma inthokin. 2 Inlàrna râpum tak ka hmu a:Phatsantu chun a phatsan a, Mi roktu chun a rok a. Elam, nangnin nor tung unla, Media, nangnin hang inhuol ro. Inrûmna a'n tlungtir po po chu, Ka suktawp ta ding a nih. 3 Chuleiin ka tâi bawr vel, A satin a sa huoi huoi a, Nuhmei nau ha se angin, Inkon khopin a mi thàm a; LALPA thilthaw tum ka hrietin, Khuo hre loin ka zoi thla a, Pangzatin ka mit a'n vài. 4 Ka lung a chawmchawrok a, Tiin ka'n thin hlop hlop a, Zàn tieng ni tla innèm riei, Ka nghâkhlà èm êm hlak khom, Ka pang sukzatu a nih. 5 Ruoi an buotsai a, Tuongah zampher an pha a, An fàk a, an dawn a!Tho ro khai, hotuhai, In phawhai hriek nàl ro! 6 LALPA chun ka kuomah, " Fè la, kulah râlvêngtu sie la, A thil hmu hung ripawt raw se. 7 Sakor chung chuong mi hung a hmu a, A kop kopa an hung chun, Sabengtung chunga chuong dâm, Sanghawngsei chunga chuong dâm, An hung a hmu pha chun, Ngun takin en chieng sien la, Inrâlring hlè raw se" tiin. 8 Râlvêngtu chu a hung khêk a:"Aw LALPA, kulbing sângah, Sûnnithlâkin ka ngîr zing a, Zàn khawvârin ka um bok a. 9 En ta u, sakor chung chuong mi, A kop kopin an hung saw. Anni chun hieng hin an hril:'Babulon a tlawm tah, a tlawm tah, A pathien lemhai po po khom, Hnuoiah an tlu dar vong tah!' tiin. 10 Hrizawla bu an chìl anga, Chìl hrep tuok tah aw ka mihai, Iengkim LALPA thu mi'n hriettir, Israel Pathien thu ka hriet chu, Ka hril sawng cheu a ni hi. 11 Dumai chungthu chu:Seir tlânga inthokin tuin amanih, "Râlvêngtu, zàn a bo vâng ta?Iengtik am khuo a var ding?"Tiin a hung indon a. 12 Râlvêngtu chun a don a:"Khuo a var ding an tah a, Zàn hung tlung nawk vak a tih; I'n don nuom nawk a ni chun, Hung kîr la, mi'n don nawk rawh" Tiin ama chu a hril a. 13 Arabia chungthu chu:Aw Dedan mi, in ran ruolhai leArabia phùla inkulhai, 14 Nangni Tema khaw mihai, Dangchârhai dawn ding tui hung chawiin, Râltlân chàuhai ta dingin, Fàk le dawn ding hung chawi ro. 15 Indona râpthlâk tak hmun, Kawlhnâm le thal inlèngna, Thalpui an kuoinaa inthokaHung tlân suokhai an ni kha. 16 LALPA chun ka kuomah, "Inhlawfahai kum tiema kum khat sûngin Kedarhaij ropuina po po chu bo a tih. 17 Kedar thlahai laia mi huoisen, thal kàp mi dam khawsuok chu tlawmte nîng an tih" tiin a hril a. Hi hi LALPA, Israelhai Pathien hril chu a nih.

Isaiah 22

1 Jerusalemk chungthu chu:Iengin am a sukbuoi cheu a, In chunga in kai seng hi? 2 Khawpui inzi nuoi nuoi el, Hlima inri beng bung hlak kha, Nang hi i nih an naw maw?I mithi ruong zâl khep khup hi, Kawlhnâma that an ni naw a, Indoa thi an ni bok nawh. 3 I rorêltuhai an tlànsie a, Hriem hmang loin an man vong a, Intâng dingin an thuoi tawl a, Hmêlma hung tlung hma dai a, Lo tlânsie tawl vong an nih. 4 Chulei tak chun an kuomah, Hieng ang hin ka hril tawl a:"Mi fèsan vong tawl ro khai, Ka mi an thathai ruong hi, Lung na takin tàng ka tih, Mi hnèm khom tum naw ro" tiin. 5 Lalpa, Iengkim LALPAN, Chî-àina le sietna tibaium tak, Inlàrna Ruoma a'n tlungtir ni chun, Jerusalem bang a chim dur dur a, Tlâng tinah beidongin an khêk chul. 6 Elam miha'n thal bawm an pài, Sakor tawlailirah an chuong a, Kir miha'n an phaw an phor. 7 I ruom mawi taka chun tawlailir, An inhnaw sip hmur el a, Sakor chung chuong pawlhai chu, I kot bulah an tlim hmur a. 8 Judahai inhliekhùna kul chu, Phìn darin a hung um tah. Chu ni chun Lebanon Ngawpui Rûn-ah, Râlthuom lam dingin in fe a; 9 Davida khawpui kul sietna laiHang tamzie chu in thlìr vel a, Dil chuonhnuoiah tui in sèk khawl a. 10 Jerusalem inhai chu in tiem a, A then bang tholna di'n in thiek a. 11 Dil chuonchunga luong lût di'n, Kul bang pahni inkârah, Tui sie khawlna in siem a; Sienkhom, tiena inthokaChuong thilhai lo ruot lawka, Hung intlungtirtu ruok chu, In ngaisak ta hrim hrim nawh. 12 Lalpa, Iengkim LALPA chun, Awm inchuma tap ding leLu vaw kola saiip sil di'n, Chu ni chun a ko cheu a. 13 Sienkhom bawng le beram thatin, Ruoi thea uoiin dawnin, Hlimhlop chènna'n in hmang a, "Khai leh, fain dawn ei tiu, Zïnga thi el ding ei ni hih"In ti tawl lem hlauh si a. 14 Hi suolna hi in thì nî chenin ngaidam ni hrim hrim naw nih tiin Iengkim LALPA chun ka kuomah a hril. Chu chu Lalpa, Iengkim LALPA rorèl chu a nih. 15 Chu bâkah Lalpa, Iengkim LALPA chun, "Lal sum enkoltu Sebna kuomah fe la, hmaisanah hi thu hi va hril rawh: 16 'Hi taka hin iem i thaw a?Hi taka hin i thlàn ding, Tlâng pangah lung ker dingin, Tuin am phalna a pêk che a? 17 Ngai ta, fîmkhur hlè rawh, LALPAN a thâm tèp ta che a, Aw, nang mi ropui bùng bûng, A peihawn dai ding che a nih. 18 Thil hlùm angin thâm a che a, Ram zâu takah dêng lût a ti che. Chu taka chun i suong èm èm, I tawlailir bulah thîng i ta, I pû insùng sukzak i tih. 19 I sina inthoka bàn nîng i ta, I ninaa inthokin tlâng i tih. 20 Chu ni chun ka siehlaw Hilkia naupa Eliakim chu ko ka tih. 21 Ama chu i korfuol inhâktir ka ta, a kawngah kawnghren hrênpêk ka ta, i lalna hi a kuomah inhlàn ka ta, ama chu Jerusalema mihai le Judai rama mihai ta dingin pâ ni tàng a tih. 22 A kutah Davida sûngkuo chabi chu inhlàn ka ta, a hong chu tu khomin khâr naw ni hai a, a khàr chu tu khomin hong naw ni hai. 23 Ama chu hnuoi changa ban nghet taka phun angin suknghet ka ta, a sûngkuohai ta dinga suongum tak nîng a tih. 24 A sûngkuohai le an thlàhai pei ropuina po po chu amaah inthlung nghet a ta, a sûngkuohai laia hnuoihnung tak chen khom khâidingtu nîng a tih. 25 Chu pha chun hmun nghet taka ka ban phun chu hung inhnìngin inkar phong a ta, chu taka inkhâi po po chu chim se vong a tih, Lalpa, Iengkim LALPA chun a tih" tiin.

Isaiah 23

1 Tura khaw chungthu chu:Aw Tarsisl longhai, tap ro, Tura chu suksietin a um ta a, In lè long chawlna a nei ta nawh. Kupraa thuthang in lo hriet kha, Thu indik a ni si a. 2 Longpuhaiin an sukhausa, Tuipui kama chênghai leSidona sumdawngtuhai, To thiepin tà ta ro khai. 3 Tuipuia sumdawnghai chun, Nile vadung kam tharsuok, Sihor-a bu chu an hung tol a, Hnam tinin an hung inchawk a, Tura sum hnâr tak a nih. 4 Inzak rawh, aw Sidon, Nang, tuipui kama kulpui nghet, Tuipui chun hieng hin a tih:"Nauha sê ka'n voi ngai naw a, Nau khom ka hring ngai bok nawh; Naupa ka chawm tlei naw a, Naunu ka kei tlei bok nawh" tiin. 5 Tura chanchin an lo hriet pha, Aigupta mihai beidong an tih. 6 Tarsis tieng tlân hmang ro, Tap ro, thlierkâra chênghai. 7 In khawpui hlui, hlimhlop chènna, Khawtotima inthoka khawpui, Hla taka hmun khuor dinga, Thuoi hlaktu cheu khawpui kha, Hi khawpui hi a ni naw maw? 8 Lala mi tam tak indin suoktu, Mi hausa tam tak indintu, An sumdawngtuhai khom, Khawvel hrieta mi hmingthang, Tura chunga tlung dingin, Tuin am hieng hi a ruot a na? 9 Iengkim LALPAN a thaw a nih, An ropuina suonghai suktlawm a, Hnuoi mi lârhai sukmuolpho dingin. 10 Aw, nangni Tarsis mihai, Nile vadung kam an thaw angin, Nangni khomin in ram inlet ve ro, Long chawlna in nei ta si nawh. 11 LALPAN tuipui chungah kut inletin, Lalram tam tak a sawi hnìng a, Foinikihai kul po po khom, Sukse dingin thu a pêk a. 12 Chun, ama chun an kuomah, "Aw Sidon naunu, nu thienglàm, Tuhin intlawmin i um ta hi!Thoin Kupra-ah fe thla la khom, Chu chun him chuong naw ti nih. 13 En tâ, Kaldaihai ram hi, Tì khop mi an um ta nawh. Thlalêra ram sâhai tlatna dingin, Asuria-hàn an inchangtir zo tah. A'n huolna di'n in sâng an bawl a, An kulhai chu an rok fai kêl a, An sukchim vong bok a. 14 Tarsis longhai, tap inrûm ro, In kul suksietin a um ta si. 15 Chu pha chun Tura khuo chu lal dam kum zât kum sawmsari sûng chu theinghilin um a ta; sienkhom kum sawmsari hnunga chun, nawchizor hlaa a hril angin hung um nawk a tih: 16 Tingtang tumin khawpui fang rawh, Mi theinghil hnung, aw nawchizor; Tingtang tum la, hla sak teu rawh, 17 Kum sawmsari hnungah LALPAN Tura chu hung sir nawk a ta, a sumdawngna hung sunzom a ta, khawvel ram po po leh nawchizor angin hung indawr ton nawk an tih. 18 A sum lam suok le a hlawhai po po chu LALPA ta dinga ser hran hung ni tâng a ta, hmang loa khawl khawm ni ta naw nih. A hlawkhai chu LALPA hmaa rongbawltuhai pèng a tih, fâk le dawnah hnienghnâr a, silfên tha le mawi an nei theina dingin.

Isaiah 24

1 Ngai ta, LALPAN hnuoi hi sukruokin, A sukram vong ding a nih. A letin kei khup thop a ta, A mi chênghai dâi dar a tih. 2 Vàntlâng chunga a thaw angin, Thiempu chunga khom thawng a ta, Hotu chunga a thaw angin, Siehlaw chunga khom thawng a ta, A pî chunga a thaw angin, Siehlawnu chungah thawng a ta, Zortu chunga a thaw angin, Inchawtu chungah thawng a ta, Pûktu chunga a thaw angin, Inpûktirtu chungah thawng a ta, Battu chunga a thaw angin, A batna chungah thawng a tih. 3 Hnuoi chu sukram dèr a ta, Rok ram dèrin la um a tih, Tiin LALPA chun a hril. 4 Hnuoi hi chârin hung chuoi a ta, Khawvel hi chàuin ongrop a ta, Hnuoi le vàn dul rui a tih. 5 Hnuoia chêng mipuihaiin, Hnuoi hi an sukporche a, Dànhai an zawm nuom naw a, Thupêkhai chu an bawsiet a, Kumkhaw thuthlung an poisa nawh. 6 Chu lei tak chun hi hnuoi hin, Tongsie a lo phur ta a, A sûnga chêng mipuihai chun, An suol thaw man intêlin, Hnuoia chêng an hung kiem a, A dam suok tlawmte an nih. 7 Uoiin a hung kang zo a, Grêp hrui a hung vuoi a, Hlimhlop chènhai an ngui zo tah. 8 Dârbenthek ri a chawl a, Hlimhlop ri a hung re a, Tingtang ri hlimum a rè tah. 9 Uoiin dawna hlim taka, Hla sak rihai a um ta nawh, Zu chu khâ an ti èm èm si. 10 Buoina khawpui chu tlu ramin, In tin kot chu a'n kal vong a, Tû khom lût thei a ni nawh. 11 Uoiin a um ta naw leiin, Kotthlêrah an khêk chùl a, Hlimna chu beidongnan inchangin, Hnuoi lawmnan muol a liem tah. 12 Khawpui a tlu ram vong a, Kul kotkhârhai an sàt siet zo. 13 A rà sawi til hnung oliv kung leGrêp rà lo hnung vè nawk angin, Khawvel hnam tin la um an tih. 14 A dam sunhai chun lawmin, Hlim takin khêk suok an ta, Khawthlang rama chênghaiin, LALPA ropuizie khêkpui an tih. 15 Khawsaka chênghai khomin, LALPA ropuizie chawimawiin, Thlierkâra chênghai khomin, LALPA, Israel Pathien hming chu, Inpâkin chawimawi raw hai se. 16 Mi fel an chawimawina ri chu, Hnuoi kil tawpa inthok khomin, Kan lo hriet phàk ve vong a. Nisienlakhom kei ruok chun, "Lungngaiin ka zûr tiel tiel, Lungngaiin ka zûr tiel tiel, Ka chung a va pik de aw!Mi'n phattu chun mi'n phat peiin, A mi'n phat zuol deu deu si"Tiin ka lo hril ve thung a nih. 17 Aw, hi leihnuoia chênghai, Titna le khur le chânghaiin, An inhuol vel chêu a nih. 18 Titna ri leia tlânsie chu, Khuorkhurûmah tlâng a ta, Khuorkhurûma inthoka suok chu, Chânga chun inawk a tih. Vàn kotkhâr hung inhong a ta, Ruopui vànawn hung sûr a ta, Hnuoi lungphum inhnîng a tih. 19 Hnuoi hi koi dar vong a ta, Hnuoi hi inchek dar a ta, Hnuoi hi sawi letin um a tih. 20 Hnuoi hi zurui lawn angin, A paiin pai tliei tliei a ta, Tu sawi hnìng ang nîng a tih. A bawsietnan a del rik a, A tlu dêr a, tho ta naw nih. 21 Vàna vàn lêngruolhai chu, Chu pha chun LALPAN hremin, Hnuoi lalhai khom hrem a tih. 22 Rip sûnga intânghai angin, Anni chu khal khawm a ta, Tàng inah khum tawl a ta, Ni iemani zât hnungah, Anni chu hrem tawl a tih. 23 Zion tlàng, Jerusalemah, An upahai hmaah ropui takin, Iengkim LALPA chun ro rêlin, Lalah inthung tâng a ta, Thlapâ khi inzakin dâng a ta, Nisâ khi inzakin sen a tih.

Isaiah 25

1 Aw LALPA, ka Pathien i na, I hming inpâkin chawimawi ka tih. Thil mak tak tak i thaw hlak a, Tiena inthoka i remruothai chu, Ringum takin i hlen suok hlak. 2 Hmunhnok dèng bùmna angin, Khawpuihai chu i'n changtir a, Kul nei khuohai po po khom, Nangman i sukchim vong a. Ram danghai kulpui nghet khom, Nangman i sukram vong a, Indin thar ni ta ngai naw nih. 3 Chuleiin, mi hrât takhai chun, Nangma chawimawi an ti che a, Hnam tawrothai chêngna khuohan, Nangma inzà hlêng an ti che. 4 Thlipuiin bang a nêk anga, Thlalèr sa huom huom anga lum, Mi tawrothai thuokin a mùt, Retheihai inbìkna i na, Beidong tlasamhai ta dinga, An kulbing nghet chu i nih, Ruo le thlipui laka himna, Nisa laka an deihlim chu. 5 Thlalèr lum anga chawl loa, Hung nuoitu hnam dang rihau chu, Nangman i sukrè ta vong a, Sûmin ni a zàr hlim angin, A ram chu i zàr hlim a, Tawrothai rihau a rè tah. 6 Chu tlânga chun Iengkim LALPAN, Mi tin ta di'n ruoi hnienghnâr, A la buotsai ding a na, Sa inhnik hnik, a thlînhai leh, Uoin tha tha, a tuitling ngat leh, Ruoipui a la thè ding a nih. 7 Mi po po hmai tuom hlaktu, Hnam tin chunga inzâr chu, Chu ni chun hlîp kieng a tih. 8 Thìna chu lem song tâng a ta, A mihai mitthli hru hul a ta, A mihai hmingsietna po po chu, Hnuoi a'nthok la hmang a tih, Chu chu LALPA hril a nih. 9 Chu ni chun, hieng hin hril an tih:"Ama ngei hi ei Pathien a nih; Ei ringsan a, a mi sansuok tah. Ei innghatna LALPA chu a nih; A sandamna chunga hin, Hlim takin lawm ei tiu" tiin. 10 LALPA kut chu hi tlânga hin, A hung innghat ding a ni si a. Êk dûra bupawl sir phûm angin, Moab-hai chu sir sop a tih. 11 Tuia mi an inhlieu pha, Kuta an inzàp hlak ang hin, Êk khura chun kut zâp an ta, Ieng angin zâp thiem sienkhom, An chapona leh êk dûrah, Pathienin nam phûm a tih. 12 Kul bang insânghai khom chu, Sukchimin um vong a ta, Pilvut lai inlet rum an tih.

Isaiah 26

1 Chu ni chun Judai rama mi tinin, Hi hla hi sak tâng an tih:Khawpui nghet tak kan nei a, Pathien sandamna kul bang chu, A mi huol vèltu a nih. 2 Hnam fel le ringumhai chu, Kot hongpêkin in lûttir rawh. 3 I chunga lungril innghattu, Nangma ring tlattuhai chu, Thlamuongna famkim pein, Anni chu huol him i tih. 4 Kumkhuoin LALPA ring ro, LALPA JEHOVA ngei chu, Chatuon lungpui a ni si. 5 Hmun insànga chênghai chu, Ama chun a suktlawm a, Khawpui inchung lûrhai chu, Hnuoi tawkin a thum hnuoi a, Pilvut lai a'n zâltir a. 6 Mihaiin an sir sop a:Nêksawra umhai kèin, Retheihai kê ngei el chun. 7 Mi fel lampui a tluongngil a, Aw Mi Indik, mi felhai lampui chu, Nangin i sukruolpèk hlak. 8 A nih, LALPA i dàn zawmin, Nang chu kan nghâk zing che a, I hming sukropuitu ni hi, Kan lungril nuom tak a nih. 9 Zàn khuo'n ka thla'n a ngai che a, Zîng tieng ka thlain a zong che. Hnuoi ro i hung rèl phâ le chauh, Mihan thil fel thaw an tum hlak. 10 Mi rilohai chunga chun, Lungsietna inentir la khom, Mi fel ni an tum chuong nawh. Indikna rama ngei khom, Thil suol an thaw zui zing a, LALPA ropui an poisa nawh. 11 I kut inlet khom hi LALPA, An mitin an hmu hrim hrim nawh. An ta dinga i thahnemngaizie hi, Hrea an inzak theina dingin, Hmêlma ta dinga i sèk khawl, Mei khan kâng tawl lem raw se. 12 Muongna mi pe rawh, LALPA, Kan thil hlenhai po po hi, Nangma thaw vong a ni si. 13 Aw LALPA kan Pathien, Lal dang khomin kan chungah, Thu neiin an inlal hlaka chu, Nangma hming chauh a nih kan lam. 14 Thiin muol an liem zo a, Hung kîr nawk ta naw ni hai. Nangman beiin i sukbohmang a, Hriet zui ding an um ta nawh. 15 LALPA, kan hnam sukpungin, Kan hnam hi i suklien a; Kan ramri khom mi zauhpêkin, Nangma i hung inchawimawi. 16 I thununna an tuor phâ leh, Beidongin an pan che, LALPA, An rawl khom a suok zo ta nawh. 17 Nuhmei, nau nei ding tawm têp, Nauha se tuor lai ang elin, LALPA, i hmaah kan um hi. 18 A nih, nau kan pai ve a, Nauha se tuorin kan inrùm a, Sienkhom thli chauh kan hring suok si. Hnuoi sansuokna kan intlun nawh, Khawvel hluotu ding kan hring nawh. 19 I mi thihai chu hring nawk an ta, An ruonghai chu tho nawk a tih. Pilvuta zâlhai khom hung har suokin, Hlim takin zâihlâ rem an tih. Daidaw fimin hna vuoi hnung khom, A hung sukhar nawk hlak angin, I daidaw chun hnuoia zâl hnung, Mithihai sukhring nawk a tih. 20 Ka mihai, in pindanah lût ro, Sung tieng kot inkal khum ro; A lungsen inkieng hma po chu, Chu chun inbi hmang hrì ro. 21 A chèngna hmuna inthokin, Hnuoia mi suolhai hrem dingin, En ta u, LALPA a hung suok mêk. Hnuoiin a mithi zât puong a ta, An ruong thup zing ta naw nih.

Isaiah 27

1 Chu ni chun a kawlhnâmngei, Tium le hromhraw tak chu, Rûlpui vuong thei Leviathan, Inziel hnûr chu hrem dingin, LALPA chun inlet a ta, Tuipui dragon chu that a tih. 2 Chu ni a hung tlung pha chun, A grêp huon tha chanchin chu, LALPAN hieng hin hril a tih: 3 Kei, LALPA hin ka vèng a, Tuiin ka chawm zing hlak a, Tu khom suksiet lo dingin, Sùn le zànin ka vèng hlak. 4 Ka lung sen zing ta naw nih. Hmêlma hling le buorhai chu, Keima ngeiin hmasuon ka ta, Inthiel fai vong tawl ka ta, Meiah raw hmang vong ka tih. 5 An hmêlmahai chen khomin, Ka humhimna an dit a ni chun, Ka kuomah hung tlu lûtin, Mi hung inrempui hai sien, Dawvàn hung kai raw hai se. 6 Hun la hung tlung dinga chun, Jakob thlahan zung kei an ta, Israelhai chu hung kumumin, La hung pâr vul nawk an ta, An ràin hnuoi sip a tih. 7 Anni vawtuhan an vuok angin, LALPAN anni a vuok ve nawh; Anni thattuhai a that rawn lem. 8 Saltàng dingin a tir suok a, Khawsak thliin a'n lèn hmangtir. 9 Hnam danghai maichâm lungrem, Chinai anga rawt phit vong a, Asera lem thinghai phûr a, Rimtui inhlànna maichâmhai, An sukbo vong huna chauh, Jakob thlahai suolna chu, Thawi dam hung ni chauh a ta, Israelhai suolna rà po po chu, Lâk hmang ni ve chauh a tih. 10 Kul khuohai a ram vong a, Thlalèr hmun rè a'n chang a, Ranha'n tlatnaa hmangin, Bok khawmnain an hmang a, Thing hnàhai an pet zo a. 11 Thing zàrhai a hung tawl a, A kauhai a hung rop thla a, Nuhmeihan meia ti dingin, A kau tawlhai chu an fom khawm. Hrietthiemna nei lo hnam an na, An Siemtu'n a lunginsiet naw a, An Siemtu'n a lainat bok nawh. 12 Chu ni chun buphal angin anni chu LALPAN a mal malin a kutin rût khawm a ta, sak tieng Eufretis vadunga inthoka thlang tieng Aigupta varuom chena Israelhai chu a hrizawla chun hung thuoi khawm a tih. 13 Chu ni chun tawtawrawt lien tak mût an ta, Asuria le Aiguptaa khawsa, thi lêng lèng tahai chu hung kìr an ta, Jerusalema tlâng thienghlima chun LALPA chu chawibiek an tih.

Isaiah 28

1 Zurui ruol Efraimhai pâr thi uongpui, Phai hnienghnâr tontira um khawpui, Uoiin fâk siethai chapopui khuo, A ropuina pâr anga chuoi mêk chu, A chung a va hang pik de aw! 2 Ngai ta, Asuria sipai ropui tak chu, Ama bei dingin LALPAN hung tir a ta, Thlipui hrâng le ruopui vânawn angin, Anni chu hung nuoi hmât an ta, 3 Ruihmang Efraimhai pâr thi chu, Hnuoiah hung sir sop an tih. 4 Phai tontira um khawpui mawi, A pâr mawina chuoi mêk chu, Busik tawm nipui intan hlima, Theichang hmin hmasa hmutuin, Loa a beng zo nghal hlak angin, Sawtnawteah bohmang a tih. 5 Chu ni chun Iengkim LALPA chu, Hlaa la um a mihai ta dingin, An lallukhum ropui leAn pàr thi mawi nîng a tih. 6 Rorêltuhai ta dingin, Indikna thlarau nîng a ta, Râlvêngtuhai ta dingin, Hrâtna thahrui nîng a tih. 7 Zawlnei le thiempuhai khom, Inhâi khopin uoiin an inrui a, Pai tliei tlieiin an thle bèr bêr a; Uoiin le rakzuin a chokvèt a, Zawlneihan inlàrna an hmu chu, Dongsawng thei lo khopin an inrui a; Thiempuhai khomin an ro rèl ding, Rêl thei lo khopin an inrui bok. 8 An dawkânhai luokin a sip a, A porchè nawna lai hrim a um nawh. 9 "Tu am zirtir a tum hrim a na?Tu kuom am thu a hril fie tum?Nû tànga inthoka làk thlâk, Nene nghei hlimhai kuoma maw? 10 Hi hi tiem rawh, a mal malin, Tlar khat peiin, tlar khat peiin, Hi hi tlawmte, kha kha tlawmte, Tiin mi zirtir a tum a nih" an tih. 11 Chuong ang chu a ni leiin, Hnam dang hmûr le tong hmangin, Pathienin hi mihai hi be tâng a tih. 12 "Hi hi chawlna hmun a na, Chàuhai chawl hadam raw se; 13 Anni chun LALPA thu chu"Hi hi tiem rawh, a mal malin, Tlar khat peiin, tlar khat peiin, Hi hi tlawmte, kha kha tlawmte"Ti ang chaua an ngainèp leiin, Fèng an ta, tlu thal dêr an ta, Hliem an ta, chângah awk an ta, Man khawmin um an tih. 14 Chuleiin, nangni mi chêksoltu, Jerusalem chunga rorêltuhai, LALPA thu hi lo ngaithla ro. 15 Nangni chun chapo takin, "Thìna leh thu kan thlung ta a, Seol leh inremna kan siem tah. Hremna tuipui hung lien sien khom, Mi chîm buoi ve thei naw nih, Inbîknan khêl kan hmang a, Inhumnan hlêmna kan ruoi" in tih. 16 Chuleiin, LALPA Pathien chun, Hieng ang hin a hril a nih:"Ngai ta u Zion-ah lung ka phum, Lung him tak le ringum tak el, A kil do nghettu lung poimaw, A thut suknghettu lung ngei chu. Ama a innghattu chu inhnîng naw nih. 17 Rorêlna dik chu inkhìna hruiah, Felna chu dârmumkhaiah ka hmang. Khêla in inhumhimna kul chu, Rielin dêng se vong a ta, In inbìkrùkna hmun chu, Tuiin chîm pil vong a tih. 18 Thìna le in thuthlung sût ka ta, Seol le in thutiem thiek ka tih. Hremna tuipui a hung lien pha, Hnuoiah chim hmât a ti che. 19 A lien zàta a thaw dàn angin, Fen hmang hlak a ti cheu a, Zîng tin zîng tinin lien a ta, Sûn le zànin hrût ziel a ti cheu. Hi thu umzie hi hre inla chu, In pang inza nasa hlèng a tih. 20 In khum siem a tawi taluo, Hang inthluonna khop an nawh; In rizai a chîn taluo, Hang sil khop khom a ni nawh. 21 Perezim tlânga a thaw ang leGibeon ruoma a thaw ang khan, LALPA chu hung tho suok a ta, A thaw tum mak tak tak leA thaw tum inril tak tak chu, LALPA chun hung thawng a tih. 22 Chuleiin, mi nuizat ta naw ro, In kol bun sukrik ting a tih; Lalpa, Iengkim LALPA chun, A ram pum sukse dingin, A ruot fel tah ti ka hriet. 23 Chuleiin ka rawl ngai ro, Ka hril chêu hi ngaisak ro. 24 Lo neitu'n thlài chìngna di'n, A kei dûr kumkhuo hlak maw? 25 A hnuoi a hrût ruol pha leh, Pàrdi chi chu a the a, ìra chi a thê bok a, A tlarin huit a chîng a, Barli khom a hmun dingah; Hnawmah mîm a tû bok a, An huong ding seng a ruot hlak. 26 Indik taka lo nei dàn ding, LALPAN a zirtir vong a nih. 27 Zira chu an khawng chàngin, Hmoltumin an vuok ngai naw a, Pàrdi an khawng chàng khomin, Tawlailirin an chìl ngai nawh; Hmolfiekin zira an vuok til a, Hmoltein pàrdi an khawng hlak. 28 A mal innawi khop hielin, Huit an chìl ngai naw a, A mal koi naw tawk charin, Sakor tawlailirin an chìl thiem. 29 Chuong po po zirtirtu chu, Iengkim LALPA chu a na, Ama chu thurawn petu ropui, Varnaa mak chungchuong a nih.

Isaiah 29

1 E khai, nang Ariel, Ariel, Davida chèngna khawpui, I chung a va hang pik ngei de!Kum tinin, kum tin elin, In kût hunhai tlung pei raw se. 2 Sienkhom, Ariel chu inhuol ka ta, Lusûnin tap inrûm a ta, Ama chu ka ta dingin, Maichâm thuk ang nîng a tih. m 3 Bei dingin inhuol ka ti che a, I vêlin hnuoi sung pawng ka ta, Thamte daw huol khum ka ti che. 4 Hnuoi rila inthoka tong angin, I rawl chu pilvut laia inthokin, Damtein hung inri suok a ta, Hnuoi sûnga inthoka thlarauin, A hung biekrùk ang ela damin, Pilvut lai i rawl hung suok a tih. 5 Sienkhom, nangma dotuhai chu, Pilvut dip ang inchang an ta, Mi tawrot ruolhai po po chu, Busi lèn dar ang hung nîng an tih. 6 Mit khap kàr loin, inrang takin, LALPA Iengkimthawthei chun, Vàninrum dâm, lirnghîng dâm, Rî nasa tak dâm, thawngaleivir dâm, Thlipui le kàng hmang thei meiin, A hung kan ding che a nih. 7 Ariel dotu hnamhai po po, Ama le a kulbing beitu po po, A suklungzingtu po po chu, Zàn mang ang inchang an tih. 8 Phingtâmin mangah bu a fâk a, A har pha a khop chuong naw a, Dangchârin mangah tui a dawn a, A har pha a lo la chàu zing a, A dangchâr a rè chuong naw angin, Zion tlâng beitu hnam po po khom, Chuong ang chu la nîng a tih. 9 Maktiin ka hâk ro!In mit âr-intà sien la, In mit sukdel law law ro!Uoiin dawn ve si loin, Inrui hriel hrep unla, Rakzu intem si loin, Pêm tliei tlieiin lawn ro. 10 LALPAN inlûsukna hrivoi, In chungah a buok ta si a; Zawlneihai mit a tuompèk a, Hmutheituhai lu a khupkhum. 11 Hieng inlàrna po po hi in ta dingin lekhabu chàr tlat sûnga thu ang a nih. A tiem theituhai kuomah chawi a, "Mi tiempêk hràm raw khai" in ti chun aman, "Ka tiem thei nawh, chàr tlat a ni hih" ting a tih. 12 Chun, a tiem thei nawtu kuomah in chawi a, "Mi tiempêk hrâm raw khai" in ti chun aman, "Lekha ka tiem thei nawh" ting a tih. 13 LALPA chun hieng hin a tih:Hi mihai hin bàuin an mi hnai a, An hmûrin an mi chawimawi a, Lungril ruok chun an mi hlat hlè si. An mi chawibiekhai khom hi, nMihriemin an inzirtir dàn angaAn thaw vèl mei mei a nih. 14 Chuleiin, hi mihai chunga hin, An lung sukthawngna dingin, Thilmak tak tak thaw nawk ka ta, An mi varhai varna la bo a ta, An mi thiemhai thiemna rè dai a tih. 15 LALPA laka an thil phan rûk, Thup tumtuhai chung chu a pik!A rûka an thawa inngaiin, "Tuin am mi hmu thei a ta?Tuin am a mi hriet a?" an tih. 16 A letlingin thu an làk a nih!Bepilin a hemtu a tluk hlak maw?Thilsiemin a siemtu kuomah, "I mi siem ka ni teu nawh"A ti hlak hrim hrim am a ni?Thilsiem chun a'n dintu kuomah, "Ieng khom hriet i nei dèr nawh" A ti hlak hrim hrima maw? 17 Sawtnawteah Lebanon chu, Lo hnienghnârah inchang a ta, Ramngaw angin zîng dup a tih. 18 Chu ni chun nasêthaiin, Lekhabu thu tiem ri hrieng an ta, Thima thung mitdelhai mit khom, Hung varin hmu tâng an tih. 19 Retheihai chun LALPA-ah, Lawmna hmu nawk tâng an ta, Israel Mi Thienghlim hmaah, Pasiehai khom hlim an tih. 20 Mi tawrothai rè tâng an ta, Hmusittuhai bo tâng an ta, Suol thaw ding meltuhai chu, Sàt thlâkin um tâng an tih. 21 Mi dang suola intum chîng, Rorêltuhai khal awk a, Mi indik khom thu hmang loa, Intuortir hlaktuhai chu, An rêngin bo tâng an tih. 22 Chuleiin, Abraham sansuoktuLALPA chun Jakob sûngkuo chungthu, hieng ang hin a hril a nih:Jakob muolpho ta naw ni a, A hmâi mawk ta ngai naw nih. 23 Ka pêk ngei a nauhai chu, Anni lai a hmu pha chun, Ka hming vong thienghlim an ta, Israel Mi Thienghlim chu pomin, Jakob Pathien chu ti tâng an tih. 24 Thlaraua fe suolhai khomin, Hrietthiemna nei tâng an ta, Mi chier hmang hlakhai khomin, Zirtirna zawm tâng an tih.

Isaiah 30

1 LALPA chun hieng hin a tih:"Nau helhmanghai chung chu a pik!Ka remruotna thang ve dèr lo, Anni thil phan chu an thaw a, Ka thlarau thang dêr loin, Anni kârah thuthlung an siem a, An chungah suol an intieng a; 2 Keima mi rawn dêr loin, Aigupta ramah an fè thlàk a, Faraw humhalna ngênin, Aigupta ângsûng an pan a. 3 Sienkhom Faraw humhalna chu, Anni sukzaktu chauh nîng a ta, Aigupta ângsûng an bêl chu, An muolphona chauh nîng a tih. 4 An hotuhan Zoan an tlung a, An palaihan Hanes an tlung tah. 5 An ta dinga hmangna bo der, Thangpui thei lo, hlawkna nei lo, Inzakna le muolphona chauh, Pe theitu hnamhai lei chun, An rêngin muolpho an tih. 6 Negev-a ramsahai chungthu chu:Harsatna le beidongna ram, Keipui le keichalhai lèngna, Rûlriel le rûl vuong thei tamna, Tangkai lo hnamhai pêk dingin, Palaihaiin an sum le paihai chu, Sabengtung ruol inphurtirin, An sanghawngseihai thlukvûmahAn rosumhai an inphurtir. 7 Aigupta thangpuina chu, Hmangna bo dêr a ni leiin, 'Rulpui Kawkbo' ka ti a nih. 8 Tu hin fe la, an ta dingin, Lung phèkah ziek thlapèk la, Lekhabuah ziek thla bok rawh, Ni la hung tlung pei dinga hai, Hrepuitu ni kumkhuo dingin. 9 Hienghai hi hnam helhmang, Nau khêlhril hmang tak el, LALPA thupêk ngai pei lo an nih. 10 Hretheituhai kuoma chun, "Inlàrna hmu ta naw ro" an ta, An zawlneihai kuoma khom, "Thu dik mi hril lawk ta loin, Ngaithlâk inhoi chauh hril unla, Duthusam thil hril lem ro. 11 Hi thil hi tawpsan unla, Hi lampui hi pêtsan ta ro; Israel Mi thienghlim lehMi'n hmasontir ta naw ro" tiin. 12 Chuleiin, Israel Mi thienghlim chun:"Nangnin ka thu hi hnawla, Inpawngnêkna le inhlèmna thuRinga in innghat lem leiin, 13 Lung bang sâng, kak puom pûr, Thawk le khata chim thut angin, In suolnan del chim thut a ti cheu. 14 Bêlhemtu'n indoi loa, Bêl a vuok dar vong angin, Vaw dar vong a ti cheu a, A koihàr mei luokna khop, Bêla tui luokna khop khom, Rût ding um naw nih" tiin. 15 LALPA Iengkim LALPA, Israelhai Mi Thienghlim chun, Hieng ang hin a tì a nih:"Inlamlèta um tok tok hi, In ta dinga sandamna a na, Dei dapa um le ring ngam hi, In ta dinga hràtna a nih. Nisienkhom in nuom si nawh. 16 'Kan nuom ve nawh, Sakor chungah chuong kan ta, Tlân hmang kan tih' in tih. A nih, tlân hmang mol in tih. 'Sakor hràtin tlân hmang ei tih'In ti vêl vei a ni naw maw?Sakor hràt lemin hnot an ti cheu. 17 Mi pakhat inthì le hrawkin, Mi sângkhat tlân sieng in ta, Mi panga inthì le hrawkin, In rêngin tlân sieng in ta, Tlâng sîpa in puonzâr khài chu, A malin tlansietsan in tih. 18 Chuleiin, in chungah zàngai dingin, LALPAN a la nghâk zing cheu a, Lungsietna inhmutir ding cheuin, A mong a phong zing a nih. LALPA chu rorêl thiem Pathien a na, Ama nghâktuhai chu an eng a thawl. 19 Aw Zion mipui, Jerusalema chènghai, tap ta naw ti niu. Thangpui in hnìna rawl ri a hriet pha chun ieng ang lawmin am a lunginsiet ding cheu chu! A hriet charin hung don a ti cheu. 20 LALPAN vângduoina bu le tuorna tui pe sienla cheu khom, in Zirtirtu chu inbi hmang zing ta naw ni a, in mit ngèiin hmu tâng in tih. 21 Chang tieng amanih voi tieng amanih in pèt chàng khomin, in hnung tienga inthoka, "Hi hi lampui chu a nih, hi tieng hin fe ro" tia hrilna rawl chu in nâ ngèiin hrieng in tih. 22 Chu phâ chun tangkaruo le rangkachaka siem in milemhai chu tenin, nuhmei thla pal laia a sukporchè puon angin, "Thuruk sek" tiin peihawn in tih. 23 Loa in thlài chi thèhai tona dingin ruotui hung tir a ta, a ramin bu le bâl a tontawin tharsuok a ta, chu phâ chun in ranhai chu hmun hring incham duoiah tla tâng an tih. 24 In ran sor bawngchal le sabengtunghai chun chi saw rân bu tha, thîrkut le suodura chok hruoi chu fa tâng an tih. 25 Chu nî, in hmêlmahai phêk sàm a, an kulbing sânghai in sukchim dur dur ni chun tlâng tin le muol tina inthokin tui hnàr hung luong suok a tih. 26 LALPAN a mihai sukdam a, an hliemhai a tuompêk ni chun, thlàpa chu nisa angin var a ta, nisa chu a lêt sariin, ni sari sûnga a var po po tlukin hung var tâng a tih. 27 En ta u, hla taka inthokin, Lungsenna mei chok puot puot, A khû intûr ngul ngul leh, LALPA hming chu a hung ie!A bàu chu lungsennain a sip a, A lei chu meichok angin a'n hlap. 28 A thuok chun tui lien sâng angin, An rîng chenin a chìm a, ietna leidârah hnamhai chu a sêp a, Hnamhai chu thuoi hmang dingin, An bàuah sietna thîrbar a'n bùk. 29 Nangni ruok chu kût thienghlim in hmang tìr zân ang khan hlim takin hla sak in ta, Israelhai Lungpui, LALPA tlàng pana theihle mût ri leh inawi a, in insom tung duol duol lai ang khan hlim in tih. 30 LALPA chun a rawl ropui tak insuong a ta, a kutthlàk chu mi tinin hmung an ta, a lungsenna râpthlâk tak chu kàng hmang thei meichok puot puot ang le ruopui vànawn sûr le thlipui hrâng le riel tla dur dur angin hung tlung a tih. 31 A hmoltuma a vuok pha chun, LALPA rawl leiin Asuria chu inthin hawp a tih. 32 LALPAN Asuria chunga hremna kut a thlâk zàtin khuong vawin tingtang tum in ta, a kawlhnâm vaiin anni chu bei a tih. 33 Asuria lal rawna ding chu buotsai diem a ni ta a, khur inthûk tak le lien tak a na, thing an buk vûm thûr a, sukkàng dingin LALPA chun kât vadung anga luong meichok inthuok suok a tih.

Isaiah 31

1 Israel Mi Thienghlim en loa, LALPA thangpuina hni loa, Aigupta thangpuina zonga, An sakorhai chu ring a, An tawlailir hauah inhnèm a, An sakor chungchuonghai hràtnaaInnghat lemtu chung chu a pik ie! 2 Ama chu var tak a na, Sietna intlun theitu a na, A thu khom a sût ngai nawh. Mi rilo sûngkuohai leThil suol thawpuituhai chu, Hung thoin bei tawl a tih. 3 Aigupta mihai chu mihriem an na, Pathien an ni ve nawh; An sakorhai chu sa el an na, Thlarau an ni ve nawh. LALPAN a kut a'n let pha chun, Thangpuitu chu petek a ta, A thangpui chu tlung a ta, An pahniin bohmang an tih. 4 Hieng hin LALPAN a mi hril:Sakeibaknei sa hauh lai chu, An inrûm nghur nghur hlak a; Berampu ruol inpun la khom, An khêk ri le hawhaw ri chu, Iengah a ngai naw ang bokin, Iengkim LALPA khom indo di'n, Zion tlângah hung tum a tih. 5 Vatehan an buzawl vêng a, An vuong kuol vèl hlak angin, Iengkim LALPA chun a phawin, Jerusalem chu hliekhùng a ta, Op khumin sandam a ta, Hung kanin san suok a tih. 6 Aw nangni Israel mihai, Nasa taka in hel hmangsan tieng chu, Ngha lêtin hung kìr ta ro. 7 Chu ni a hung tlung pha chun, Tangkaruo le rangkachak hmanga, In kut tirdakuma in siem, Milemhai chu hnawl tàng in tih. 8 "Mihriem kawlhnâm ni loin, Mihriem inlet lo kawlhnâmin, Asuria chu tlûng a tih. Kawlhnâm hmaah tlân sieng an ta, An tlangvâlhai chu man an ta, Sala thuoiin sor lui an tih. 9 Tium râpthlâk tak lei chun, An kulpui nghet chu chim a ta, Indona puonzâr an hmu pha, An kawmandarhai chî-àiin, Bak lêngin tlân sieng an tih"Tiin Zion-a mei sèmtu leJerusalema thuk neitu, LALPA chun a puong ta si.

Isaiah 32

1 Ngai ta u, fel taka rorêltuding, Lal a hung suok ding a na, A upahai khomin ro, Fel takin rêl tâng an tih. 2 Thlipui laka inbîkna, Ruopui laka inhumhimna, Thlalèra vadungte ang, Ram châra lungpui hlim ang, An hung ni ta ding a nih. 3 Mita entuhai mit chu, Inkhup ngai ta naw ni a, Naa ngàituhai khomin, An nà daw zing tàng an tih. 4 Lungril inhmawhai khomin, Mani'n hre thiem tàng an ta, Dang inawk hlakhai khomin, Innâl takin hril tâng an tih. 5 Invêthai chu inzaumah, Mihan ngai ta naw ni a, Mi vervêk chu tu khomin, Ngaisâng ta bok naw ni hai. 6 Invêt tong chu a tlahol a, Suol thaw ding ngot a phan a, Pathien poi tawk a tum ràn a, LALPA thu indik lo takin, Mihai kuomah a thè dar a, Phingtamhai fâk ding a ban thlâk a, Dangchârhai dawn ding a chàr hlak. 7 Mi vervêk tum dàn chu a rilo a, Khêla retheihai suksiet tumin, An indikna thila hai khom, Thil tha lo a phan rûk hlak. 8 Mi tha chun thil tha a ngaituo a, Chu chu a ngìrpui ngam pei hlak. 9 Nangni ngai sukngam nuhai, Tho unla, ka thu hi ngàithla ro; Nangni hima inngâi nuhai, Ka thu hril hi lo ngàithla ro. 10 Kum khat invoi hnung elah, Hima inngàihai hi inthin in ta, Grêp sìk ding um naw ni a, Huon thei ieng khom tlung naw nih. 11 Inthin ro, ngài sukngamnuhai, Hima inngài naunuhai, In mit âr intà raw se!In silfênhai hlîp unla, In kawngah saiip bì ro. 12 In lo tha le ditum hai, In grêp rà nuomhai sûnin, Beidongin awm inchum ro. 13 Hling le buorin a bawm ding, Ka mihai ram hi sûn ro, Hi hlim chenna khawpui leHlimhlopna in po po hi, Sûnin tap khêk rong rong ro. 14 Kul chu rausanin um a ta, Khawpui so rì rè tâng a ta, A muol zawl le râlvêngbùkhai, Kumkhuoin ram tàng a ta, Sabengtung le beram ruolin, Tlatna hmunah hmang an tih. 15 Sienkhom, chunga inthoka Thlarau buok a ni pha chun, Thlalèr ram chu ram hnawngah, La hung inchang nawk a ta, Lohai chu rampui angin, La hung zîng khup nawk a tih. 16 Thlalèr hmun ni hlaka chun, Indiknan ro rêl a ta, Ram thaa chun fel takin, Thil iengkim thaw tàng an tih. 17 Fel taka thil an thaw leiin, Hmun râlmuong inchang a ta, Felna chun kumkhawtluongin, Muongna le himna intlun a tih. 18 Ka mihai chu muongleiah, Tu khomin chawkbuoi loin, In himah chêng tàng an tih. 19 Rampui chu thli le rielin, Hung nuoi hmât vong khom ni sien, Khawpui chu tlu hmât sienkhom, 20 Ruom tinah thlài chîng in ta, In ran ruol le sabengtunghai, Zalen takin tlâng an ta, In ham a va tha awm de!

Isaiah 33

1 Aw, nang suksetu Asuria, oSuksieta um ve ngai si lo, Aw, nang mi dawhaa thaw hlak, Mi dawhaa um ve ngai si lo, I chung a va hang pik de aw!Mi i suksiet zo pha leh, Nang khom suksiet nîng i ta, Mi i dawha zo pha leh, Nang khom dawhâng an ti che. 2 Aw LALPA, kan chungah zàngai la, Nangma a nih kan ngai chu. Tûk tina kan hrâtna ni la, Beidong nia kan sandamna ni rawh. 3 I rawl inri dur dur chu hrein, Mipui an tlàn se dur dur a, Nang i hung inthok meu chun, Hnam tin an tlàn dar chum chum. 4 Aw Asuria, i ràllâk sumhai chu, Khau intâm anga tamin, Inchù thlâkpèk che tumin, Hung baw sup sup an ti che. 5 Vàn sânga khin ropui takin, LALPA chu chawisângin a um, Indik tak le fel takin, Zion-ah ro hung rêl a tih. 6 Ama chu in dam sûnga, Nghet taka in innghatna, In sandamna le varna, Hrietna robawm nîng a ta, Robawm hongna chabi chu, LALPA tìna nîng a tih. 7 En ta, an pasalthahai saw, Kotthlêrah an tap khêk a, Inremna palaihai khom, Lung na takin an tap saw! 8 Lamlienhai a thing thuop a, 9 Ram chu tapin a chàu a, Lebanon inzakin a ngûi a, Saron chu thlalèr a'n chang a, Basan le Karmel tlânga, Thing hnàhai an til zo tah. 10 LALPA chun hieng hin a tih:"Tu hin hung tho suok ka ta, Keima in chawisâng ka ta, Ka ropuizie târ lang ka tih. 11 In nau von chu favai a na, Bupawl in hung hring suok a; Meichok in inthuok suok chu, Nangni kâng hmangtu a nih. 12 Chinai ang elin mihai chu, Meipuia raw nîng an ta, Hling tawl angin pei an ta, Kàng hmang vong an tih" tiin. 13 Nangni ram hlaa mihai, Ka thilthaw hi lo hre ro; Nangni kâr hnaia umhai, Ka thilthawtheizie hre ro. 14 Ziona mi suolhai chu, Tiin an inthin hawp a, Pathien inzà nawhai chu, Inthinnan a man tawl a, "Kang hmang thei meichok lai hin, Tu am khawsa thei an ta?Kumkhuoa chok zing mei hi, Tuin am tuor thei an ta?" an tih. 15 Indik taka kalchawihai, Thudik chauh hril hlak mihai, Pawnglâkna leia hlawkna, Hmutuhai lungten mihai, Thamna la nuom nawtuhai, Mi that dinga rotna thu, Ngàithla nuom ngài nawtuhai, Suol ngàituonahai laka, Nakawr hip tlat hlaktuhai chu, 16 Hmun insângah chêng an ta, Tlânga suonglungpuihai chu, An himna kul nîng a ta, Fàk ding pêkin um an ta, Tui tlasam ngai naw nihai. 17 Lal hmêl mawi chu hmung an ta, Ram inzâr duoi la thlîr an tih. 18 In thlaphang hun in thlîr kìr châng, Asuria hotu lien tak dâm, An râllàk sumhai tiemtu dâm, Râl vêngbûk zàt tiemtuhai dâm, Lungrilin la ngaituo suok in ta, 'Khaw lai am an um zo ta a?'Tiin in la'n don ding a ni si. 19 Chuong ang mi kol takhai leTong hriet thei lo hmangtuhai chu, Hmu nawk ta ngai naw ti niu. 20 Ei kûtna hlak Zion tlângpui, Jerusalem, muongna khawpui, Umhmun nghet in khuorna chu, Mitin thlîr lem tâng in tih. In puon in thlungphunhai khom, Pot phawi ni ta ngai naw ni a, In puon in keina hruihai khom, Intan ngai hrim hrim naw nih. 21 Chu taka chun LALPA chu, A Ropuitak nîng a ta, Ama chu hnâr tam tak nei, Vadungpui ang nîng a ta, Hmêlmahai long hrim hrimin, Long kar chi le long lienin, Chu chu lût thei naw ni hai. 22 LALPA chu ei ro rêltu a na, LALPA chu dàn mi petu a na, LALPA chu ei lal a na, Ama chun mi sandam a tih. 23 In long hrui inthlà fuol in ta, Long ngulah vêt ngai naw ni a, Puonzâr in zàr ngai bok naw nih. Râllâk sum tam tak insem in ta, Kebai chenin phur vêng an tih. 24 Zion tlânga chêng tu khomin, "Ka dam nawh" ti nei naw ni hai; Chu taka chênghai suolna chu, Ngaidamin um vong tàng a tih.

Isaiah 34

1 Hnam tinrênghai, hung hnai unla, Ngàithla dingin hung inkhawm ro!Aw hnamhai, ngai poimaw ro, Hnuoi le a sûnga um po po le, Khawvel le amaa suok po po khomin, An rêngin ngàithla raw se. 2 Hnam tin chungah LALPA a lungsen a, An sipaihai chungah a lung an ling. Anni chu sukse vong a ta, That dingin pe suok a tih. 3 Thathai chu pei suok an ta, An ruong thu vut vut a ta, Tlânghai chu an thisenin, Luong khumin chie zop a tih. 4 Vàna arasihai khi, Sukbohmangin um an ta, Vàn khi lekhabu angin, A zuolin la zuol a tih. Vàna umhai po po khi, Grêp hna tawl hnung ang le, Theichang ra vuoi ang elin, La hung til thla vong an tih. 5 Vànvêla khin ka kawlhnâmin, A khop tawk a dawn ta a, En ta, hnam ka suksiet hnung, Edom chungah ro rêl dingin, A hung tum thla ding a nih. 6 LALPA kawlhnàma kai chu, Thisen le thau inpol a nih:Beram le kèl thisen dâm, Beramchal kala thàu dâm. LALPA chun Bozrah khuoah, Inthawina la hmang a ta, Edom mihai that teu a tih. 7 Ramsielhai leh that a ta, Bawng tuoi le bawngchalhai leh. An ram chu thisena zopin, An pilvut chu thauin tlor a tih. 8 LALPAN phuba a làk nî, Zion chunga Edom thilthaw, A thungrul kum a ni si a. 9 Edom vadunghai po po chu, Alkatara angin inchang a ta, A pilvut chu kât chok angin, A ram phêkin chok a tih. 10 Sùn le zàn mit naw ni a, Kumkhuoin khu tung a ta, Suon an um sûng po po chu, Sukramin um tàng a ta, Tu khomin sir ta naw nih. 11 Simbu le chingpirinu hai, Mungêk le vaàk ruolin, pChu hmun chu hluo tâng an tih. Pathienin Edom chunga chun, Chî-âina hrui kei zam a ta, Inkhìna hmol a hmang khom chu, Tlâkram dèrna hmol nîng a tih. 12 A ram optua thang nuom, Tu khom um naw ni hai a, Hotu ding um naw ni hai. 13 Lal in chu hlingin bawm a ta, Theihmî le zakthlai bilin, An kulhai chu inchang a ta, Sihalhai le chingpirinuhai, Tuol lèngna hmun ni tâng a tih. 14 Thlalèra ram sahai chu, Satene ruol leh tlâng an ta, Sakèlin sakèl ko a ta, Zàna fâk zong hlakhai chun, Chu taka chun hmun khuorin, Zànah rieknan hmang an tih. 15 Chu chun simbuin bu sep a ta, Intuiin op kêu a ta, A thla hnuoiah op khawmin, A te hruoihai chu chawm a ta; Muzum khomin a kop kopin, Riekna hmunah hmang bok an tih. 16 LALPA lekhabuah en ro, Chuonghai chu pakhat té khom, A kim lo um naw ni hai a, Koppui bo um bok naw nih. A bâu ngeiin thu a pêk a, A Thlarauin thuoi khawm a tih. 17 An chan seng a ruotpêk a, Ama kut ngeiin a sem a, Kumkhawtluongin hluo tâng an ta, Suon an um sûng po po chu, Chu taka chun chêng an tih.

Isaiah 35

1 Thlalèr ram tawl chu lawm a ta, Hlimin hung pâr vul a tih. 2 Bulhlawng angin hung vul a ta, Hlim takin lawm hla rem a ta, Lebanon tlàng anga hringin, Karmel phul le Saron phai angin, Thlalèr chu hung inchang a ta, LALPA ropuina hmûng an ta, Pathien mawina hmu bok an tih. 3 In bân zoihai sukhrât unla, In khûp tlephai chu sukhrât ro. 4 Lungril dawihai kuoma chun, "Insukpachangin ti naw ro, In hmêlmahai sukse dingin, In Pathien a hung ding a nih; Phuba lain hrem tawl a ta, Ama chun san suok a ti cheu"Tiin i hril tawl ding a nih. 5 Mitdelhai mit hung var a ta, Nasêthai nà inhong a tih. 6 Kebâihai chu sakhî angin, Inchawm zek zek tàng an ta, Tong thei lohai khomin hlimin, Lawmna hla sak tâng an tih. Thlalêrah tui hung pût a ta, Thlalêrah vadung luong a tih. 7 Pilvut sa huom huom hlak chu, Dîlah hung inchang a ta, Ram tawlah tui hnar pût a ta, Sihal ruol inkulna hmun chu, Hlobet, phairuong le thielkuongTamna bilah inchang a tih. 8 Lamlienin hung sun a ta, 'Thienghlimna Lamlien' tiin, A hming khom inbûk an tih. Mi porchèhan hraw naw ni a, Lam mihai chauhin hrawng an ta, Mi rilo invêthan hraw naw nih. 9 Sakeibaknei um naw ni hai a, Ram sa kolin hraw naw ni hai a, Hmu ding um bok naw ni hai; Tlanhai chauin hrawng an tih. 10 LALPA intlanhai hung kìr an ta, Hla sakin Zion lût an ta, Chatuon lawmna chu khum an ta, Lungngai inrûmna bo a ta, Hlimna le lawmnan hmuok a tih.

Isaiah 36

1 Hezekia inlala inthoka kum sawm le kum linaa chun Asuria lal Senakerib chu Judai rama kul nei khuo po po rûn dingin a hang fe a, a lâk a. 2 Chu zoah Asuria lal chun Jerusalema lal Hezekia rûn dingin sipai tam tak leh a sipai kawmandar Rabsake chu Lakis-a inthokin a tir a, dîl chuonchung tui lâkna kor bul, puon sawptuhai phùl panna lamliena chun a ngîr a. 3 Lal in enkoltu Hilkia naupa Eliakim hai, lekha ziektu Sebna hai le chanchin ziektu Asaf naupa Joa hai chu ama hmu dingin an hung suok a. 4 Sipai kawmandar chun an kuomah, "Hezekia kuomah hieng hin hril ro. Asuria lal ropui tak chun hieng hin a tih: 'Ieng am i ringsana ngai i sukngam ringot? 5 Râl rèl thiem le sipai hrât tak tak ka nei dâm i ti vèl a, kawk boa inpawt mei mei i nih. A tu am ringsanin ka lakah i hel a na? 6 Tu hin ngai rawh, Aigupta, luong hmol por ang, chel pal chun kut ât popa mi sukhliem thei ang mei mei hi maw ringsana i nei chu? Aigupta lal Faraw inhnèmpuihai chan chu luong por ang chauh a ni vong. 7 Tu hin, 'Kan ringsan chu LALPA kan Pathien a nih' dâm i ti maw? A biekna hmun sânga a bawlhmun le maichâmhai Hezekian a nuom nuomin a sonpêk a, Judahai le Jerusalem mihai kuomah, 'Jerusalema maichâm hmaa chauh hin Ama hi in biek ding a nih' a ti Pathien kha maw in la ring rop chu? 8 "'Chuleiin, tuhin ka pu Asuria lal kuomah hung la, indawrpui rawh. A khaltu ding mi i hmu dai phot chun sakor khom sânghni pêng ka ti che. 9 Aigupta sakor tawlailir le sakor chungchuonghai i ringsan a ni chun, iengtin am ka pu sipaihai laia a nêp tak khom hi i dang kìr zo ding a na? 10 Chu bâkah, LALPA thu thang loin hi hmun hi bei le hnè dingin ka hung i ring am a ni? LALPA ngei chun hi ram hi hang beia hnè dingin a mi hril a nih' tiin hril ro" a ta. 11 Chu phing leh Hilkia naupa Eliakim le Sebna le Joa chun sipai kawmandar kuomah, "Lunginsiet takin Aramik tongin mi hrilpêk hrâm rawh, i siehlawhai hin kan hriet si a; kul bula umhai hrietah Hebrai tong chun mi be ta naw hràm rawh" an ta. 12 Sipai Kawmandar ruok chun, "Kula inthunghai, nangni le anni, mani êk faa mani zun la dawn dinghai kuoma khom hril dingin a mi tir bok a ni naw am a ni?" a ta. 13 Chuongchun, kawmandar chu a ngîr a, Hebrai tongin, "Lal ropui tak, Asuria lal thu hi lo ngàithla ro. 14 Lal chun hieng hin a tih: 'Hezekia hlèm bawlin um naw ro, ama chun ka kuta inthokin a san suok thei teu naw cheu. 15 Hezekia chun, 'LALPAN mi san suok ngei a ta, hi khawpui hi Asuria lal kutah pêk ni naw nih' tiin LALPA chu ring dingin thuhnè naw raw se cheu. 16 Hezekia thu chu ngai naw ro. Asuria lal chun hieng hin a tih: 'Mi'n rempui unla, ka kuomah hung inpe ro. Chuongchun, mi tinin mani huona mi theichang le grêp fain, mani tui bèla mi ngei tui dawn zing in tih. 17 Chu chu nangni ram ang boka ram hnienghnâr, bu le uoiin thar tamna ram, bei le grêp tamna rama ka thuoi hma cheua in khawsak dàn ding chu a nih. 18 Hezekiain, 'LALPA chun mi san suok a tih' a ti hin thuoi suol naw raw se cheu. Tu hnam pathienin am Asuria lal kuta inthokin ram a san suok tah hlak ti in hriet a? 19 Hamat le Arpad hai pathien kha khaw lai am an um zo ta a? Sefarvaim-hai pathien kha khaw lai am a um ta a? Ka kuta inthokin Samaria khuo an san suok a ni? 20 Chuong rama pathienhai po po lai chun tuin am ka lakah an ram a san him a? LALPA chun ka kuta inthokin Jerusalem hi a san suok telul ding maw?' tiin" a ta. 21 Lal Hezekia-in, "Anni chu don dèr naw ro" tia thu a pèk angin mipui chu an to tok tok a. 22 Chu zoah Hilkia naupa Eliakim, lal in enkoltu lû tak le lekha ziektu Sebna le chanchin ziektu Asaf naupa Joa hai chu Hezekia kuomah an fe a, an puonhai an pot thlêr a, sipai kawmandar thu hrilhai chu an hril sawng a.

Isaiah 37

1 Hezekia-in chu thu a lo hrietin a silfênhai a pot thlèr a, saiip a sil a, LALPA tempulah a lût a. 2 Lal in enkoltu lu tak Eliakim le lekha ziektu Sebna le thiempu upahai chu saiip inbelin Amoz naupa zawlnei Isai kuomah a tir a. 3 Anni chun a kuomah, "Hezekia-in hieng hin a tih: 'Voisun hi beidongna ni, invauna ni le hmaimawkna ni a na; naute pieng a hun ta sia a hring suokna dinga a nuin thâ sang ding a nei ta si naw ang hi kan nih. 4 A pu Asuria lalin Pathien hring hrilsie dinga a tir sipai kawmandar thu hrilhai po po chu LALPA i Pathien chun hre ngei a ta, a thu hriethai lei chun ama chu LALPAN la hal ve rawi nawnim. Chuleiin, hlaa la um sunhai ta dingin tongtaipêk rawh' tiin a tih" an ta. 5 Hezekia mi tirhai chun Isai kuom an hung tlung a. 6 Isai chun an kuomah, "In pu chu hieng ang hin hril ro: 'LALPA chun hieng hin a tih: I thu hriet, Asuria lal hnuoia thoktuhai mi hrilsietna chu tì der naw rawh. 7 Ngai ta, a sûnga chun thlarau sieng ka ta, thuthang a hriet charin a ram tieng kîr nawk a ta, chu taka chun kawlhnâmin inthattir ka tih, a tih' tiin" a ta. 8 Sipai kawmandar chun Asuria lalin Lakis a suoksan ti a hrietin a'n hnûk kîr a, Libna khuo a lo bei lai chu a va hmu a. 9 Chuong lai bok chun Aigupta lal Kushq mi Tirhaka chu ama rûn dingin a hung ti Asuria lal Senakerib chun thu a dong leiin Hezekia kuomah mi a tir a, 10 "Hieng ang hin Juda lal Hezekia kuoma chun hril ro: 'I ring Pathien chun 'Jerusalem hi Asuria lal kutah pêk ni naw nih' tiin hlèm naw raw se che. 11 Asuria lalhaiin ram po po sukse vonga an chunga kut an thlàk dàn khom i hriet chieng kha. 12 An leh, nang hi san him ni bîk dinga inngai i nî? Ka pi le puhaiin Gozan hai, Haran hai, Rezep hai le Tel Asar-a um Eden mihai an sukbohmang lai khan in hnam pathienhai chun an san suok a ni? 13 Hamat lal hai, Arpad lal hai, Sefarvaim khaw lal hai, Hena lal hai le Iva lal hai kha tu hin khaw lai am an um zo ta a?' tiin" thu a'n phurtir a. 14 Chu lekha a hmu chun Hezekia chun a hang tiem a, LALPA tempulah a tlân lût a, LALPA hmaa chun lekha chu a phar a. 15 LALPA kuomah a tongtai a, 16 "Aw Iengkim LALPA, Israelhai Pathien, cherubhai inkâra lalthungphaa inthung, nang chauh hi hnuoia lalram po po chunga Pathien i nih. Hnuoi le vàn hi nangma siem a nih. 17 Aw LALPA, i nâ lo dawin mi ngàithla hràm rawh; aw LALPA, i mit mengin mi hung en ta; Senakerib-in Pathien hring a hrilsietna thu hi lo ngàithla hràm rawh. 18 "A nih, aw LALPA, Senakeribin hnam le ramhai a sukram nasatzie hi thudik a nih. 19 An pathienhai chu meiah a pei a, a suksiet a, chuonghai chu pathien an ni naw hrim a, mihriem kuta siem thing le lung mei mei an nih. 20 Chuleiin aw LALPA kan Pathien, nangma chauh hi LALPA Pathien i nizie hnuoia lalram po po hin an hriet theina dingin, a kuta inthokin mi hung san suok ngei rawh" tiin. 21 Chuong lai chun Amoz naupa Isai chun Hezekia kuomah mi a tir a, a kuomah, "Hi hi LALPA, Israel Pathien hril chu a nih: 'Asuria lal Senakerib chungthua i hung hnìna ang khan, 22 hieng hi ama chungthua LALPA thu chu a nih:"Zion nunghâk thienglâm chun, Hmusitin a nuizat che. Jerusalem naunu chun, I tlànsiet lai a hmuin, A lu a thin khum che a nih. 23 A tu hrim hrim am a na, Hmusita i deusaw kha?Tu chung am a na i rawl, I hang sukpuom hrim hrim kha?Tu lak am a na i mit, I hang meng sâng hrim hrim kha?Israelhai Mi Thienghlim chungah. 24 I mi tirhai bàu hmangin, LALPA hming i hrilsiet a: 'Ka tawlailir tam tak leh, Tlâng sâng chen ka hang hnè a, Lebanon tlâng sîp ka chuon a, A sidar tluon sei sei hai leA fâr thing thá thàhai chu, Ka nuom nuomin ka phûr a, An ram ril le ngaw thatna, Tlok naw sam ka nei ta nawh. 25 Ram dangah tuikhur choin, An ram tuihai ka tlàn a. Aigupta vadungte po po, Kein ka pal kangpêk vong'Tiin i hril a ni kha. 26 " 'Tiena inthoka keiman, Thaw dinga ka lo ruot sa, A nih ti i hriet naw maw?Ka ruohmang ta sâ angin, Thil iengkim a hung tlung a, Kul nei khuohai i suksiet a, Lung bum khawm i'n changtir a; 27 An mipuihai chu che thei loin, Chî-àiin an muolpho a, Phûla hlo mawng ang an na, Thing tuoi dawng lai ang an na, In chunga hlo a hung mawng, A'n thang lien hmaa nisa'n, A em vuoi ang hi an nih. 28 " 'Sienkhom i chèngna hmun le, I fe le hung ka hriet vong, Ka chunga i lungsen hràng khom. 29 Ka chunga i lungsen hràng, Tong uong i mi thaw khumhai, Ka nâin a lo hriet leiin, I hnârah hnâr kol inbunin, I bauah thir bar inbûk ka ta, I hungna tieng lama bok, Hnûk kîr nawk ka ti che'tiin" a ta. 30 Isai chun Hezekia kuomah, "Hi hi i ta dingin inchikna nîng a tih:Tu kum bu tuolto ring in ta, Kum nawk leh ring bok in tih. Kum thumnaah thlai chîng unla, A rà khom sîk tâng in ta, Huonah grêp phun unla, A ràhai chu tlàn ta ro. 31 Hlaa um Juda sûngkuo chun, Hnuoi tieng zung hung kei an ta, A lêr tieng ra insuong an tih. 32 Jerusalema inthokin, laa umhai chu hung suok an ta, Zion tlânga inthokin, A dam sunhai chu hung suok an tih. Iengkim LALPA thahnemngainan, Chuong ang chun hlen suok a tih. 33 "Chuleiin, Asuria lal chungthuah, LALPAN hieng ang hin a hril:'Hi khawpui hi lût naw ni a, hal khomin kâp bok naw nih. Phaw leh hung inlang naw ni a, Inhuolna ding hlàn daw naw nih. 34 A hungna ngaiah kîr nawk a ta, Hi khawpuia hin lût naw nih, Ti hi LALPA thu suok a nih. 35 Kei le ka siehlaw Davida zàrin, Hi khawpui hi hum ka tih'tiin" a ta. 36 Chu zàn chun LALPA vântirko chu a'n thok suok a, Asuria-hai riebûka chun mi nuoi khat le sîngriet le sângnga a sukhlum a. Zîng tieng an hang tho chun mithi ruong ngot a lo ni el ta a. 37 Asuria lal Senakerib chun an riebûk chu a suoksan a, Ninevi khuo tieng a kîr a, chu taka chun a um a. 38 Ni khat chu tempula an pathien Nisrok a biek laiin a nauhai pahnih, Adramalek le Sarezer chun kawlhnàmin an sât hlum a, Ararat ramah an tlàn lût a, a naupa Esarhadon chun a lalna chu a hung hluo ta a.

Isaiah 38

1 Chuong hun lai chun Hezekia chu thì ngamin a na a. Chun, Amoz naupa zawlnei Isai chun a hung kan a, a kuomah, "LALPA chun hieng hin a tih: 'Dam suok loin i thi ding a na, i sûngkuo um dàn ding rêl fel rawh' a tih" a ta. 2 Hezekia chu bang tieng a ngha a, LALPA kuomah, 3 "Aw LALPA, i hmaah ringum tak le inpe fai thakin kal ka chawi hlakzie le i mithmua thil tha ka thaw hlakzie kha mi hrepêk hràm rawh" tiin a tongtai a. Hezekia chu namên loin a tap a. 4 Chun, LALPA thu chu Isai kuomah a hung tlung a, 5 "Kîr nawk la, Hezekia kuomah hieng hin hril rawh: 'LALPA, i pu Davida Pathien chun hieng hin a tih: I tongtaina kha ka lo hriet a, i mitthli tlàk khom ka hmu bok. 6 Ngai ta, i dam sûng kum khom kum sawm le kum ngain suksei ka ta, nang le hi khawpui hi Asuria lal lakah san him ka ta, khawpui hi huol him bok ka tih. 7 "Chun, LALPAN a thutiem a hlen ngei dingzie inchikna chu hi hi nîng a tih: 8 nisa hlim chu sirbi sawm chen, lal Ahaz-in dârkar inher chin inkhìna dinga sirbi a bawl chen intawl kìr a tih" a ta, chuongchun nisa tla ta hnung chu sirbi sawmin an tawl kîrtir nawk a. 9 Judai ram lal Hezekia damnaw hung dam nawk chun hieng hin lekha a ziek a: 10 Hieng ang hin ka lo ti a:"Ka hringnun vànglai tak hin, Thlàn muol ka liem el ding maw?Ka nun hmang zo hman loin, Lâkpêkin ka um ding maw? 11 Hringmi lèngna rama hin, LALPA hmèl hmu ta loin, Hringmi tu khom hmu ta loin, Hringmi khawvela chênghai lai, Ka um ta naw el ding a na maw! 12 Berampuhai puon in angin, Ka hringnun puon in chu thiekin, A lâk hmang el ta si a. Puonkhawngtu puonkol angin, Ka nunkol chu a zuol a, Puonkol a'nthok mi tan thlain, Sùn le zàn a mi suklungdong. 13 Zàn khawvârin ka nghâk a, Sienkhom sakeibaknei ang elin, Ka rù le châng a pot nawi a, Sùn le zàn a mi suklungdong. 14 Vamûr le kànghlai angin, Inhrâmin ka kiu vel a, Zîngkâr vàthû ang elin, Inrûmin ka'n kuk bok a. Vàn tieng ka thlìrna leiin, Ka mithai a'n thim zo tah. Aw LALPA mi hung san rawhKa bei a dong a ni hih, " tiin. 15 Iengtin am hril tâng ka ta?Ama chun a mi biek a, Hi natna hi ama hung tir a ni si!Ka lungzingnahai lei chun, Ka dam sûng la um poah, Fimkhur takin kal chawi ka tih. 16 LALPA, chuong thilhaia chun, Mihan damna an hmu hlak a; Ka thlarau khomin damna a hmu a, Chuleia mi sukdam nawkin, I mi'n hringtir nawk a ni hi. 17 Lungzîngna ka lo tuor kha, Ka thatna ding a lo nih. Sietna khura inthokin, I hmangainan mi humin, Ka suolhai i ngàidam tah. 18 Mithi khuoa inthokin, Lawmthu an hril thei naw che, Khuorkhurûma tla tahai chun, I ringumna an beisei thei ta nawh. 19 Hring le dama umhai chauin, Voisuna ka thaw ang bok hin, An inpàk thei che a nih. Paha'n an nauhai kuomah, I ringumna thuhai hi, An inhlàn sawng pei a nih. 20 LALPAN a mi sukdam a, Tingtang rimawi leh remin, Ka dam sûng po poin lawm hla, LALPA inah sak tâng ka tih. 21 Chun, Isai chun, "Theichang kha hmet hlawm unla, a hnàk kha hung la un la, a khuoihliah bel sien la, hung dam suok el a tih" a ta. 22 Hezekia chun, "Tempulah ka kai nawk ngei dingzie hrietna dingin inchikna ieng am nîng a ta?" tiin a lo indon tah hrim a nih.

Isaiah 39

1 Chuong lai chun Babulon lal Baladan naupa Merodak Baladan chun Hezekia damnaw thu a lo hriet leiin lekhathon le thilpêk inchawitirin mi a tir a. 2 Hezekia chu an chungah a lawm hle a, a rosum tangkaruo le rangkachak dâm, rimtui dâm, hriek hlu tak dâm, râlthuom dâm siena in le a ina ro um po po chu a'n entir a; a ina mi le a ram sûnga a thil nei po po chu inentir naw sam a nei nawh. 3 Chun, zawlnei Isai chu Hezekia kuomah a fe a, "Hienghai hin iem an hril a, khaw laia inthoka hung am an na?" tiin a'n don a. Hezekia chun, "Ram hla tak, Babulona inthoka hung an nih" a ta. 4 Zawlnei chun, "I ina hin ieng ieng am in inentir ta a?" a ta. Hezekia chun, "Ka in sûnga thil um po po hi an hmu vong ta a, ka ro laia mi inentir naw hrim hrim ka nei nawh" a ta. 5 Isai chun Hezekia kuomah, "Iengkim LALPA thu hi lo ngàithla raw khai. 6 'Ngài ta, i in sûnga um po po le voisun chena i pi le puhai ro khawl khawmhai chu Babulon tienga an fepui ni la hung tlung a ta, ieng khom mâksan hrim nei naw ni hai' LALPAN a tih. 7 'Chun, i thlàhai, nangma taksa le thisen put ngei la hung pieng dinghai laia mi ngei khom la thuoi hmang an ta, Babulon lal ina an sor mi tilrehai lai la thang vêng an tih' a tih" a ta. 8 Hezekia chun a dam sûng chu râlmuong le him takin a um ding thu a hrilnaa ngaiin, Isai kuomah, "LALPA thu i hril hi a tha" a ta.

Isaiah 40

1 "Ka mihai hi thlamuongrawh, A nih, hnèmin thlamuong rawh, " In Pathienin a ti a nih. 2 "Jerusalem kuoma chun, Thlamuongna thu hril unla, A tuor inrim hun a kin ta a, A suolhai ngàidam a ni ta a, A suol man bat a lêt hniin, LALPAN a'n tuortir zo tah. 3 Rawl chun hieng hin a tih:"Thlalêrah LALPA lampui ding rel ro; Ei Pathien lamlien ding chu, Thlalêrah ngîl takin rel ro. 4 Ruom tin chu sung sip unla, Tlâng le muolhai rawt hnuoi unla, Lam kawihai siem ngîl unla, Hmun khokrokhai siem ruol ro. 5 LALPA ropuina chu, Suklangin hung um a ta, Mi tinin hmu seng an tih, Tiin LALPA bauin a hril. " 6 Rawl chun, "Khêk rawh" a mi ta, "Iem ka khèkpui ding?" ka ta. "Mi po po hlobet ang an na, An ropuina po po khom, Phùla hlo pâr ang a nih. 7 LALPA thuokin a mût a, Hlobet chu a hung vuoi a, A pàr chu a hung til hlak. Mi tin hlobet ang an ni takzet. 8 Hlobet chu a hung vuoi a, A pàr chu a hung til a, Ei Pathien thu ruok hi chu, Chatuonin um zing a tih" tiin. 9 Aw nangni Zion tlânga, Chanchin tha hung intluntuhai, Tlâng sânga khin hang lawn ro. Aw nangni Jerusalema, Chanchin tha hung intluntuhai, Inring takin khêk unla, Khêk inring zuol sauh unla, Ieng khom ti hrim hrim naw ro. Judai ram khuoa hai chun, "En ro, in Pathien a hung!"Tiin khaw tinah hril ro. 10 En tu, Pathien Ropuitak chu, Thilthawtheina leh a hung, A kut hràt chun ro a rèl. A lawmman a kuomah a um, A thungrulna khom a um bok. 11 Ama chun berampu angin, A mihai chu chawm a ta, Beramtehai chu kuta chawiin, A ângsûngah pom a ta, A tehruoi nei lai hai chu, Damten thuoi diel diel a tih. 12 Tuin am tui tamzie hi, Kutphain a'n khì thei a?Tuin am vàn insângzie, Tongin a'n khi thei hlak a?Tuin am hnuoi pilvut hi, Bawma khaia inkhiin, Tlâng le muol rikzie hre di'n, Phahlaah a bûk hlak a? 13 Tuin am Pathien lungril, A hriet suok thei hrim hrim a?Tuin am thurawn pein, A thaw ding a hril hlak a? 14 Ama chun bengvarna di'n, Tu am a rawn hlak hrim a?Tuin am lampui indik, A kawkhmu hlak hrim hrim a?Tuin am hrietna zirtirin, Hrietthiemna lampuihai chu, A kawkhmu hlak hrim hrim a? 15 Hnamhai chu baltîna tui, Far khat ang chauh hi an na, Phahlaa pil hlek kai ang, Hriet khop lo ang chauh an nih. Thlierkârhai chu pilvut angin, Ama chun a thâm hmang a. 16 Lebanon chu maichâm meia, Tì thamah a ruot naw a, A ran ruolhai po po khom, Pumraw inthawina thilhlâna, Hmang thamah a ngai bok nawh. 17 Hnam tinrêng khom a hmaah, Iengma tham an ni naw a, Iengma lo nêka tlawm lem, Boruok le thil huom ang an nih. 18 Pathien chu tu le hrim am, I hrilkhì ta ding a na?An naw leh ieng le hrim am, I tèkhì ta ding a na? 19 Mi lem chu kuta an ser, Rangkachaka inluon khum, Tangka khaidiet an siempêk, Themthiem kutsuok vong a nih. 20 Chuong ang thaw zo ve nawhan, Hmon thei thingin an siem a, A ker thiemhai an ruoi a, Tlu lo dingin an siempêk a. 21 Chu chu in hriet ngai naw maw?Ieng leia in hriet thiem naw?A tìra inthok khomin, An lo hril ngai naw cheu maw?Leihnuoi insieng a'nthok khan, In hriet thiem naw hrim a ni? 22 Ama chu hnuoi khup khumtu, Vàn khup chungah a thung a, Mihai a zuk hmu dàn chun, Khauthikthi ang chau an nih. Ama chun puon hlap angin, Vànhai khi a kei phar a, Chêngna hmun dinga siemin, Puon in angin a zar a. 23 Ama chun mi lienhai chu, Iengma loah a siem a, Khawvel rorêltuhai khom, Ieng khom loah a siem hlak. 24 A phun a, a phawi nawk a, A tu a, a lâk hmang a, Zung an kei hma'n a phawi a, Ama chun a mût vuoi a, Thawngaleivirin bupawl, A lèn angin a lèn hmang hlak. 25 "Tu le'm mi hrilkhîng in ta?Tu am ka tlukpui a um a?"Tiin Mi Thienghlim chun a'n don. 26 ​Vàn tieng mit hang inlèn t'u, In hmuhai khi tû siem zozâi?Ama chu vàn lêngruolhai , A dot dota thuoi suok theitu, An hming senga kotu a nih. A thilthawtheina ropui le, A hràtna nasa tak leiin, Pakhat khom an bo ngai nawh. 27 Iengti leia aw Jakob, Iengti leia aw Israel, "LALPAN a mi hriet fûk nawh, Ka thu a ngàithlàk ta nawh"In ti hlak am a na? 28 LALPA chu chatuon Pathien, Hnuoi kil tawp chen khom Siemtu, Chàu thei lo, sawl thei bok lo, A hriet thiemna inthûkzie, Inkhì ruol a ni nawzie, In la hriet naw am a ni? 29 Chàuhai hràtna a pêk a, Hrâtnawhai a sukhràt a. 30 Tleirawl sawlin an chàu a, Tlangvàl khom an tlu dèr hlak. 31 LALPA nghâktuhai ruok chun, Hràtna thar dong pei an ta, Mupui angin vàn sângah, Vuongin inher sâng an ta, Sawl loin tlân pei an ta, Chàu loin kal chawi an tih.

Isaiah 41

1 "Aw nangni thlierkàr tinhai, To tok tokin mi ngàithla ro. Hnam tinin tha thar insuoin, Ka rorêlna hmaah hungin, In chungthu hung hril unla, Hang inhmu tlâng ei tiu khai. 2 "Khawsak tienga mi pakhat, Felna leia rongbawla a ko, Sîr tina hnèna changtu hi, Tuin am a ko suok a na?A kutah hnamhai a pêk a, A hmaa lalhai a tukdol a, A kawlhnâm chun pilvut angin, A thal chun bu si inlêng angin, Anni chu a'n changtir a. 3 Kea a la sir lo ram chenin, Anni chu a hnot thlûr a, Him takin hma a tawn pei a. 4 Hieng hi thaw a, inhlentirtu, Mihriemhai um dàn ding rêl a, Suon peihai ko suoktu chu, KEIMA, LALPA ngei ka na, Kei hi a bul le tawp ka nih. " 5 Thlierkârhan hmuin an ti a, Kawl kil chenin an inthin a, Hung panin an hung hnai a. 6 "Hrât takin um rawh" tiin, Mi tin an inthangpui tuo a, An unauhai an infùi phûr a. 7 Thil ser le sung thiem mi chun, Rangkachak sungtu a'n fùi phûr a, An milem siem vaw nàmtu chun, Thîrsù chu a'n fùi phûr a, Thîr chàrtu kuomah "A tha ie" a ta, Mi lem chu tlu lo dingin, A chàr a, a kil nghet a. 8 "Nang chu aw ka siehlaw Israel, Ka mi thlang Jakob nauhai, Ka ruolpa Abraham thla in nih. 9 Ka rong in bawl theina dingin, Hnuoi tawpa inthoka thuoi suokin, Pei thla loin ka thlang cheu hi. 10 Ti naw ro, kei in kuomah ka um, Chî-ài naw ro, kei in Pathien ka ni si. Sukhrâtin thangpui ka ti cheu a, Ka felna kutin tungding ka ti cheu. 11 "Nangni theidatuhai chu, Muolpho takin um an ta, Nangni khingtuhai po po chu, Iengma loin bohmang an tih. 12 In hmèlmahai zong inla khom, Tu khom hmu zo ta naw ti niu. Nangni hung dotuhai po chu, Iengma lo inchang an tih. 13 In kut chang tiengah chela, 'Ti naw, thangpui ka ti cheu'Titu LALPA in Pathien ka nih. 14 Aw Israel, mi hmusit ni la khom, Ti naw rawh, thangpui ka ti che"Tiin nangni intlantu LALPA, Israel Mi Thienghlim chun a hril. 15 "Bu chìlna khawl thar tha tak, Ha nei chi angin siem ka ti che a, Tlânghai chu chîl dar i ta, Muolhai chu bu sî angin siem i tih. 16 Hang zâp in ta, thliin lèn a ta, Thawngaleivirin fen hmang a tih. Chuongchun LALPA-ah lawm in ta, Israel Mi Thienghlim ropui a tih. 17 "Retheihai le tlasamhaiin, Tui an zong a, an hmu naw a, An dangchârin a'n hil a nih. Kei, LALPA chun ngàisak ka ta, Kei, Israel Pathien ngei chun, Anni chu mâksan naw ning. 18 Tlâng châra inthok khomin, Vadung inluongtir ka ta, Ruomah tui hnàr suok a taThlalèr chu dîlah siem ka tih, Ram châr khom tuihnàr hmunah. 19 Sidar thing le sitim thing dâm, Inhmûi le oliv thing dâm, Fâr thing chi hrang hranghai lehThlalèra chun phun ka ta; 20 Chu chu miha'n hmung an ta, LALPA kutin chuong po po chu, A thaw a niziehai ngàituoin, Israel Mi Thienghlimin a'n umtir, A nizie hung hre tâng an tih. 21 "In thu hung put lût unla, In thiemthu hung hril ro khai"LALPA, Israelhai lal chun a tih. 22 "In milemhai hung chawi unla, Thil tlung ding hril lawk unla, Thil tlung ta sa hril bok unla, Chu chu lo ngàituong kan ta, Thu tawpna hre thei ei tih. Chuong an naw leh thil tlung ding, Iemani bèk hung hril ro khai. 23 Thil tlung ding hril lawk unla, Pathien in ni am lo hrieng kan tih. Maktia kan inthin hawpna dingin, A tha a sie iemani bèk thaw ro. 24 Sienkhom ieng khom ni lo a, Hmangna bo dèr in lo ni chun, A thlangtu cheu chu tirdak a um. 25 "Khawsaka inthokin mi ka ko a, Ama chun ka hming lam a tih; Hmar tienga inthokin hung a ta, Ama chun rorêltuhai chu, Bu rawt lung angin rawt a ta, Belhemtun bepil a sir hriel angin, Anni chu sir hriel a tih. 26 Ei hriet lawk theina dingin, Tu'n am a tìr khan a lo hril hlak?"Hi hi a'n dik" ei ti theina dingin, Tu'n am a mi lo hril lawk hlak?Tu khomin an hril ngai naw a, Tu khomin an hril lawk naw a, In thu hrie an um dêr nawh. 27 Keiin Jerusalem kuomah, "En tu, in mihai an hung saw" tiin, Chanchin lawmum tlung ding chu, Ka lo hril lawk a ni kha. 28 Milemhai ka en vel a, Thurawn pe thei an um naw a, Ka zawna an don thei bok nawh. 29 En ro, milem vong an ni hi!Ieng khom thaw thei an nei nawh; An milem sunghai po po hi, Buoina thli ang chauh an nih.

Isaiah 42

1 En ta, ka siehlaw, ka cheltlat, Ka mi thlang le ka lawmna hi; A chungah ka Thlarau ka buok a, Ama chun hnamhair chungah, Indik takin ro rêl a tih. 2 Khêkin ràu khawng naw ni a, Vântlâng hmaah rawl ki insâng, Hmang ngai hrim hrim bok naw nih. 3 Hrât nawhai pal zût naw ni a, An beisei sukthlawn naw ni a, sThudik tanin ro rêl a tih. 4 Hnuoi chungah rorêlna indik, A'n din hma khat chawl naw ni a, A lung hnuolin beidong naw nih. A dàn thu chu thlierkâr tinhai, Beisei innghatna ni zing a tih. 5 Vàn inumtira kei phar duoitu, Hnuoi le a sûnga umhai indintu, Hringna thuok le thlarau petu, LALPA chun hieng hin a tih: 6 "Kei hi LALPA chu ka nih. Indik taka ro rêl dingin, Nang hi ka ko suok che a, Kuta chelin hum ka ti che. Hnam tin ta dinga thuthlung le, Jentelhai el var ding dâm, 7 Mitdelhai mit sukvar ding dâm, Ripa intâng le thima thunghai, Insuoa thuoi suok ding dâmin, Nang hi ka ruot chè a nih. 8 Kei hi LALPA chu ka nih, Chu ngei chu ka hming a nih. Tu khomin ka ropuina, An mi'n tawmpui thei naw a, Chawimawia an mi'n pâkna khom, Milem ka'n tawmpui thei nawh. 9 Ngài ta u, hril lawka umhai kha, A hung tlung kim tawl ta a, Tu hin thu thar ka puong a, Chu chu a hung tlung hmain, In kuomah ka puong a nih. 10 LALPA chu hla thar rempêkin, Kawl kil tawp chenin sak ro, Tuipuia inzin le a sûnga umhai, Thlierkâra chênghai khomin, LALPA inpâkin zâi hla rem ro. 11 Thlalêr le a sûnga khuohan, An hla chu lo zawm ve unla, Kedara khuohai chu hlim sien, Sela mihan lawm hla rem sien, Tlâng sîp a'nthokin khêk raw hai se. 12 Tuipui kama thlierkârhai chun, LALPA chu chawimawi hai sien, 'n pâkna hla sak raw hai se. 13 Indonaa mi hrât khawkhèng, Lungsena inthok suok angin, LALPA a hung inthok suok a, Mi râlhrâng anga insèruin, A hmêlmahai tukdol dingin, Inring takin a khêk suok 14 "Sawt tak el ka to zing a, Insûmin ka'n kei dei a; Tuhin nuhmei nau hase angin, Inrûmin ka khêk suok a, Ka'n thuok hlop hlop el a nih. 15 Tlâng le muolhai sukram ka ta, Hna hringhai suktawl ka ta, Vadunghai khawmuolah siemin, Dîlhai khom sukkang ka tih. 16 An hraw ngai lo lam tharahMitdelhai chu thuoi ka ta, An hriet lo lampuiah thuoi ka tih. An hma zawna inthimna chu, Varah inchangtir ka ta, An lam hraw ding sukruol ka tih. Chuong ang tak chun thawng ka ta, Anni chu thlàthlam naw ning. 17 Sienkhom milemhai ringsana, 'Kan pathienhai in nih' titu chu, Inzakin inkîrtir ka tih. 18 "Aw nasêthai, lo ngàithla ro, Aw mitdelhai, enin hmu ta ro! 19 Ka siehlaw naw, tu am mitdel?Ka tirko naw, tu am nasêt? LALPA siehlaw le thlang ang hrima, Mitdel hi tu'm an um a? 20 Thil tam tak a hmu ta a, Sienkhom, a ûksak si nawh. A nà a daw ve ngeia chu, Ieng khom a hriet dèr si nawh. " 21 A'n dikzie suklangtu dinga, A Dàn chawimawi le sukropui hi, LALPA lawm zawng tak a nih. 22 Sienkhom hi mihai ruok hi chu, Mi rok le suomin an um a, Mihai tlâkkhurah an tla a, Tàng inah an intàng a, Suom le rok takah an thang a, San suoktu ding an nei naw a, "Kîr ta ro" ti ding an um nawh. 23 Chuong thila chun nangni lai, Hun la hung tlung dinga khom, Tu am ngàithlaa bengkhon cheu? 24 Tuin am suomhmang kutah, Jakob thlàhai a pêk suok a?Tuin am roktuhai kutah, Israelhai a'n hlàn a na?Ei suol hmangsan LALPA ngei chu, A pe suoktu a ni naw maw?A lampui an zui nuom naw a, A dàn an zawm nuom bok nawh. 25 Chuleiin a lungsenna chu, An chungah a bun thlâk a, Indona a hung intlungtir a, Chu meichok chun a tuom vel a, Chu chun anni chu a kàng a, Sienkhom an bengkhon chuong nawh.

Isaiah 43

1 LALPA chun hieng hin a tih:"Jakob, nang hi ka siem che a, Israel, keima indin suok i nih. lTi naw, nangma intlantu ka nih; I hming lamin ka ko che a, Ka ta i nih. 2 Tui inthûk i pal laiin, I kuomah um zing ka ta, Vadung i pal kài laiin, Tuiin chìm pil naw ni che; Meipui i hraw tlang laiin, Meiin hlieu na naw ni che. 3 LALPA i Pathien ka na, Israelhai Mi Thienghlim, Nangma Sandamtu ka nih. Nangma intlanna dingin, Aigupta ram ka pêk a, Nangma ka thlengna aiah, Ethiopia le Seba ka pêk. 4 Ka ngàihlu èm êm che a, Ngàisânga ka hmangai che leiin, I aiah mi dang pe suok ka ta, I hringna aiah mi dang tam tak. 5 Ti naw rawh, i kuomah ka um; I thlàhai chu khawsak a'nthokin, Keiin hung thuoi khawm ka ta, Khawthlanga inthok khomin, Ka hung thuoi khawm ding a nih. 6 Hmar tieng kuoma chun keiin, Hung inthlà di'n hril ka ta, Chuong ang chun sim tieng kuomah, Chel tâng lo din hril ka tih:Ram hla taka inthokin, Ka naupahai hung thuoi la, Kawl kil tawpa inthokin, Ka naunuhai hung thuoi rawh. 7 Ka hming puttu taphothai chu, Ka ropuina inlangtirtu dinga, Indina ka siem an nih, tiin. 8 Mit nei si, indel tlat si, Na nei si, sêt tlat bok sihai chu, Hung thuoi khawm tawl ro. 9 Hnam tinrêng thuoi suok unla, Mi tin um khawm raw hai se. Thil hung tlung ding hril lawk thei, Thil tlung ta sahai hril thei bok, An milem lai an um a ni?An indikzie hrietna dingin, Hrepuitu hung thuoi raw hai se. Chuongchun, mihaiin chu chu hre a, "A'n dik" an ti theina dingin. 10 LALPA chun hieng hin a tih:"Aw nangni Israelhai, Ka thu hretu, ka siehlaw in nih. Kei chauh hi Pathien ka nizieHre a, ring a, hre thiem dingin, Nangni ka thlang cheu a nih. Ka um hmaa um Pathien, Ka um hnunga um Pathien, Tu khom an um ngai dêr nawh. 11 Kei chauh hi LALPA chu ka nih, Kei chauh hi Sandamtu chu ka nih. 12 Keima ngeiin ka hril cheu a, Sandamtu chu kei ngèi ka nizie, Keiman ka'n hriettir cheu a, Kei anga thaw hnam dang pathien, Tu khom an um ngai hrim hrim nawh. Kei chauh hi Pathien ka nih, Ka thu hrepuituhai in nih, Tiin LALPA chun a puong. 13 A nih, chatuona inthok chatuonin, Kei hi Pathien chu ka nih. Ka kuta inthoka inchù thla thei, Tu khom an um hrim hrim nawh. Ka thaw tah chu tu am sût thei?" tiin. 14 Nangma Tlantu, Israel Mi Thienghlim, LALPA chun hieng hin a hril:"Nangni leiin Babulon rûntu ding, Sipai ruol ka tir ding a nih. Kaldaihai chu mi tlân hmang angin, An uongpui hlak an long lien chun, Ka hung thuoi tawl ding a nih. 15 Kei hi LALPA, in Mi Thienghlim, Israelhai Siemtu, in Lal chu ka nih. 16 ​LALPA chun hieng hin a hril:Tuipuia lampui relpêktu ka nih, Tui fawn laia lampui sieltu chu; 17 Sipai ruol tam tak ko suok a, An tawlailirhai le sakorhai thuoi a, Tho nawk ta lo dinga sukpiltu leKhawnvar phita anga hmet mittu chu. 18 Tuta hma thilhai kha theinghilin, Tien lai thil kha ngàituo ta naw ro. 19 Ngài ro, thil thar ka thaw mêk a, Chu chu a hung tlung tèp a nih. In man fûk thei naw a ni maw?Thlalêrah lampui ka siem mèk a, Ram tawlah vadung luong a tih. 20 Ka mi thlanghai dawn dinga, Tuihnàra thlalêr ka chawm pha, Ram tawla tui ka'n luongtir leiin, Ram saha'n mi chawimawi an tih, Sihal le simbu hai chen khomin. 21 Ka ta dinga ka siem an na, An mi la chawimawi ding a nih. 22 Nisienlakhom aw Jakob, Nangin i mi ko ta naw a, Aw ka mi Israelhai, In mi nghok ta lem a nih. 23 Pumraw thilhlân beramhai, In mi hung chawipêk ta naw a, Inthawinahai hung inhlànin, In mi chawimawi ta bok nawh. Bu le bâl le rimtuihai, Inhlàna inthawi dingin, Ka phût ngai hlak bok naw cheu. 24 Ka ta dingin mafu rimtui, In hung chawi ta ngai naw a; Inthawina ran thâu inhlànin, In mi hung suktlai ta bok nawh. In suolna hin a mi ngei a, In bawsietnahai ka khop tah. 25 Keima hi, keima ngei hi, Keima le keima zâr lei chauaIn bawsietnahai thâi bo a, In suolhai theinghiltu ka nih. 26 Hun liem tah suikîr unla, Poi in tawk le tawk naw hril unla, Hang ngàituo tlâng ei tiu khai. 27 In thlatu bul khan thil suol a thaw a, In thuoituhan ka dàn an bawsiet a. 28 Chuleiin, in tempula hotuhai chu, Muolpho takin siem tawl ka ta, Jakob thlahai chu sietin nel a ta, Mi nuizatbùr hung inchang an tih.

Isaiah 44

1 "Aw ka siehlaw Jakob thlahai, Aw, ka mi thlang Israelhai, Tu hin ka thu hi lo ngàithla ro. 2 Sûla inthoka indintu cheu, Nangni thangpuitu LALPA chun, Hieng thu hi a hril a nih:Aw ka siehlaw Jakob thlàhai, Ka thlang Jesurunhai, t ti naw ro. 3 Ram tawlah tui buok ka ta, Hnuoi chàrah vadung inluongtir ka ta, I suonhai chungah ka Thlarau buokin, I tû le tèhai malsawm ka tih. 4 Phûl zawla hlobet hring dup leTui luongna bula phahrâm angin, Hung inthang tuol tuol an tih. 5 Pakhatin, 'LALPA ta ka nih' tîng a ta, Mi dangin Jakob hming chu put a ta, Mi dang nawk chun a kutah, 'LALPA tà ka nih' tiin ziek a ta, Israel hming chu hnam hmingah, Hung hmang tâng a tih" tiin. 6 Lalpa, Israelhai Lal le Tlantu, Iengkim LALPA chun a hril:A hmasatak le nuhnung tak ka nih; Keima naw Pathien dang an um nawh. 7 Tu am a na, keima hril angaThil tlung ding hril lawk theitu chu?An thei chun puonghai sien la, An thawtheizie suklang raw hai se. Tiena inthoka ka thaw hlak angin, Thil tlung ding le hung um dinghai, Hung hril lawk ve raw hai se. 8 Zâm naw ro, ti bok naw ro. Tiena inthok khan hieng thil hi, Hrilin ka'n hriettir cheu an naw maw?Nangni hi ka thu hretuhai in nih. Keima naw Pathien dang an um maw?An um nawh, Lungpui dang hrim, Pakhat khom an um ka hriet nawh" 9 Milem siemtuhai chu an rêngin mi hmang lo an ni a, an thil ngâihlut zawnghai chu thathnempui tlâk a ni naw a, an milemhaiin an hmu thei nawzie le hriet thei nawzie hrepuitu khom anni ngèi an nih. Chuleiin, la muolpho an tih. 10 Tuin am pathien lem indinin, tangkaina nei lo milem chu a sung ding a na? 11 Ngai ta u, milem betuhai po po le milem siemtu, pathien siem theia inngaihai, mihriem ve el ni sihai chu LALPA hmaah an rêngin ti tak le muolpho takin la ngîr an tih. 12 Thirsu chun milem a sut a, meilingah a rol lût a, tuboin a sut a, a bân tha hràt chun a vuok dèn a, a ser a. A phìng a hung tàm a, a thâ a hung zoi a, tui hrim hrim a dawn naw chun a hung chàu hlak. 13 Mistiri chun inkhîna hruiin thingtum chu a'n khi, a ruongâm ding pensilin a'n chik a, haver le thing nawtna hmangin a mawi thei dàn ang takin mihriem lim a ker a, tempula inthut dingin a siem a. 14 Sidar thing dâm, inse thing dâm, saisuo thing dâm a phûr a, a hung chang theina dingin ram hnuoiah a sie tawl phot a. Sidar thing a phun a, ruotuiin a hung chawm lien a. 15 Thinga tì thei a ni phâ chun a then meia ti dingin a lâk a, mei a sèm a, a awi a, bei dâm siemin a ur a. A thing làk a thena inthokin pathien lem a siem a, a biek a, a milem ker hmaa ngei chun a bokkhup a. 16 Thing zàtve chu meiah a ti a, sâ a raw a, a fâk a, a khop a. Mei chu awiin, 'Tuhin chu ka lum tawk tah. Mei awi chu a manhlâ ie" a ta. 17 Meia a ti bâng po chun pathien a siem a, a hmaah a kûn a, a biek a; a kuoma chun tongtaiin, "Mi sanhim rawh, ka pathien i ni si" a ti hlak. 18 An hriet naw a, an man phâk nawh. An hmu thei nawna dingin an mit a'n del tlat a, an hriet thiem thei nawna dingin an lungril mit a'n del sà bok a. 19 "A zàtve meiah ka ti a, meilingah bei ka hlieu hmin a, sa ka em a, ka fâk a. A dang po hi thil tirdakumah siemin, thing tum hmaah ka kûn el ding am a ni?" hang ti nachâng hre dingin hriet thiem theina an nei si nawh. 20 An lungril dawi vêta a um leia fe suol le vut bâr an ni tlat leiin, "Ka chang tienga ka chawi hi inhlèmna thil meimei a ni naw maw?" tia hang intâl suok nachàng an hriet hrim hrim nawh. 21 Hieng hi hre ro, Jakob thlahai, Israelhai khomin hre zing ro, Ka siehlaw in ni si a. Ka'n din cheu a, ka siehlawhai in nih, Israelhai, theinghil naw ning cheu. 22 In bawsietnahai chu sûm angin, ka lâk kiengpèk ta chêu a, In suolnahai khom tieusum angin, Ka lâk kiengpêk vong ta chêu. Ka kuom tieng hung kìr ta ro, Ka'n tlan suok ta si chêu a. 23 Aw vànhai, hlimin khêk ro, LALPAN a thaw ta si a; Piellei thuo riet khom hlimin, Inring takin khêk raw se. Aw tlânghai, hlimin khêk ro, Rampui le thing tinrêng khomin; LALPAN Jakob thlahai chuA hung intlan suok ta a, Israelhai lai a'n chawimawi. 24 Sûla inthoka indintu che, Nangma intlantu LALPA chun, "Kei hi iengkim siemtu LALPA, ani chaua vàn kei phartu, Hnuoi phèk zartu chu ka nih. 25 Zawlnei khêlhliphai hril lawkhai, Suktloltu chu kei ka na, Aisan thiemhai invêta siemtu, Mi varhai khom sukvêt a, Thurawn indik lo inpêktirtu; 26 A siehlaw thu suknghet a, A mi tirhai thù hlenpêk a, Jerusalem chungchâng thua, "Hluoin la um nawk a tih" titu le, Judai ram khuohai chungthua, 'Indin thatin um nawk a ta, A sietna lai siem nawk ka tih' titu, 27 Lipui ril kuoma, "Kang rawh, Vadunghai sukkang ka tih" titu, 28 Kura khom, "Ka berampu a nih, Ka tum angin hlen a tih" titu, Jerusalem chungthua, "Indin tharin um nawk a tih" titu, Tempul chungthua, "I lungphùm remin um nawk a tih'Titu ngei chu ka nih" tiin.

Isaiah 45

1 A hmaa hnamhai tukdol a, Lalhai râlthuom hlîppèk a, An kul kotkhârhai nor hong a, Khâr ta loa inumtirtu dingaA mi thlang le a kut a sukhràt, Kura chungthua LALPA hril chu: 2 'Kei i hmaah fèng ka ta, Tlânghai rawt cham vong ka ta, Dâr kotkhârhai suksieng ka ta, A kalna thîr tluonhai sukbong ka tih. 3 Kei hi LALPA, Israelhai PathienI hming ngeia kotu chè chu, Ka nizie i hriet theina dingin, Pindan rila an rohlu sie khawl, An thup rûkhai chu pêng ka ti chê. 4 Ka siehlaw Jakob thlàhai leKa thlang Israelhai leiin, Hming suot meuin ka ko che a, I mi hriet ngai nawa chu, Hming inzaum ka pêk che. 5 Keima hi LALPA chu ka nih, Tu dang khom an um nawh, Keima naw Pathien dang an um nawh. I mi hriet ngai nawa chu, Ka sukhràt ding che a nih, 6 Khawsak a'nthok khawthlang chenin, Keima naw chu Pathien dang hrim, An um nawh ti mihaiin, An hung hriet theina dingin, Keima naw Pathien dang an um nawh. 7 Var ka siem, thim ka siem bok, Malsawmna petu ka nà, Sietna intluntu ka ni bok a, Keima, LALPA ngei el chun, Chuong thil chu ka thaw a nih. 8 Aw nangni chung vàn sânghai, elna hung insûrtir unla, Sûm kha hung tè thla raw se. Hnuoi khom lo inhong lien sien, Sandamna le felna chu, A ruolin hung to raw se. Chuong thil inumtirtu chu, Kei, LALPA ngèi el hi ka nih. 9 Siemtu inkhingpuitu chu, A chung a va hang pik ngei de!Chu mi chu belhemtu dehawn, Bel koi hàr ang chauh a nih. Bêl chun a hemtu kuomah, 'Iem a na i siem kha?' tiin, A'n don hlak hrim am a ni?I thilsiem khan i kuomah, 'I mi siem ka ni teu nawh'A ti hlak hrim am a ni? 10 Mani nu le pa kuomah, 'Iengti leia hieng anga, In mi nei hrim hrim am a na?'Titu chung chu a pik ie! 11 Israelhai Mi Thienghlim, Anni Siemtu LALPA chun, Thil la um ding chungchàng thu, Hieng ang hin a hril a nih:Ka thilthaw in soisèl maw?Ka thaw dàn dinghai chenin, Thu in mi pèk hlaka maw? 12 Kei hi hnuoi siemtu ka na, Mihriem khom ka siem a nih. Ka kutin vàn ka kei phar a, Vàn lèngruolhai po po khi, Ka thu hnuoia um an nih. 13 Ka felnan Kura chawm ka ta, A lampui sukngîlpêk ka tih. Sum le lawmman beisei loin, Ka khawpui indin nawk a ta, Ka saltànghai insuong a tih, Iengkim LALPA chun a tih. 14 LALPA chun hi hi a hril:'Aigupta mihai, Ethiopia mihai, Mi dung sei Seba mihai chu, I thu hnuoiah sie vong ka ta, An ram thil nei po po lehI hmaah hung tlu lût an ta, I ta hung ni vong a tih. Thîr khaidieta thlung khawmin, Zui dul dul an ti che a, I hmaah dingthathuonin, 'Pathien i kuomah a um, Ama chauh Pathien a nih'Tiin chibai bûk an ti che. 15 Israelhai Sandamtu Pathien chu, Pathien inthup hlak i lo ni ngei el! 16 Milem siemtuhai po po chun, Inzakna la tuok an ta, Muolpho takin liem hmang an tih. 17 Israelhai ruok chu LALPAN, A chatuon sandamnain, Kumkhuoin sandam a tih. Inzak le muolpho takin, Kumkhuoin siem ngai naw nih. 18 LALPA chu Pathien a na, Vànhai siemtu Pathien a na, Leihnuoi hi chèngna dinga, A ruoka sie ding ni loa, Indintu chu ama a na, Ama chun hieng hin a hril:"Keima hi LALPA chu ka na, Keima naw tu khom an um nawh. 19 ​Hmun inthima inthokin, A rûkin thu ka hril ngai nawh. Jakob thlàhai kuoma khom, 'Mi zong thlawn ro'Tiin ka hril ngai dèr nawh. Kei, LALPA hin thutak ka hril a, Thu indik tak ka puong hlak. 20 Inko khawm unla, hung ro. Hnam tina mi saltânghai, Inko khawmin hung hnai ro. Thing milem zawntuhai le, Mi sandam thei hlei lo milem, Pathiena betuhai chun, Hrietna an tlasam a nih. 21 Inrawn khawm tawl unla, Milem biek hlawk inti dàn, Mi hang hril rêng rêng ta u. Hieng ka thu inhriettirhai hi, Tiena tlânga inthok khan, Tuin am an hril ta hlak a?Kei, LALPA hi ka ni naw maw?Kei naw Pathien an um nawh, Pathien fel le sandamtu, Kei naw tu khom an um nawh. 22 Khawvel kil tina chênghai, Ka kuom tieng hung kìr unla, Keiin lo sandam ka ti cheu. Kei hi Pathien chu ka na, Kei naw tu khom an um nawh. 23 Keima sâlin ka'n khàm a, Ka bau suok thu a'n dik a, Ka thu ka lâk kìr ngai nawh. Ka hmaah hnam tinrênghai, Kûnin la bokkhup an ta, Ka hmaah lei tinrêngin, Ka hming sâlin inkhâm an tih. 24 'Indikna le hràtna chu, LALPA-a chauh a um' tiin, Mihaiin la hril an ta, A chunga lungsenhai chu, Muolpho takin la um an tih. 25 Israel thlahai po po chu, LALPA-ah thiem chang an ta, Ama chu chawisâng an tih" tiin. Babulon pathienhai

Isaiah 46

1 An pathien Bel le Nebou hai chu, An va tlawm ta rong rong de!Sabengtung ruolin an phur a, Milemhai chu an rik leiin, A phurtu ran khom an sawl hle. 2 Phurtuhai le an thil phurhan, Inkhup lupin hnuoi tieng an en. A betuhan an hum thei naw a, An biekhan an hum thei bok naw a, An pahnin salah an thuoi diel a. 3 Aw, nangni Jakob sûngkuo, Israel sûngkuo la um sunhai, Ka thu hi lo ngàithla ro. Sûla inthoka tungdingtu cheu, In pienga keitleitu cheu ka nih. 4 Tar kûn lu tuok in ni chenin, Keima, keima ngei el hi, Nangni tungdingtu ni zing ka tih. Ka siem cheu a, pom ka ti cheu, Tungdingin san suok ka ti cheu. 5 A tû le am mi tekhiin, Tû am ka tlukpuiah in sie?Tû am ka ang nia hrein, Tû le'm in mi tekhi ding? 6 Thenkhatin an ipa inthokin, Rangkachak an bun suok a, An tangkaruo an bûk suok a, Thil ser thiemhai an ruoi a, Pathien lem an insungtir a, Kûnin chibai an bùk a. 7 Liengkoah an inchuon a, A hmunah an inthut a, Chu chun che son thei loin, Milem chu a ngîr zing a, An ko khomin a don nawh; An buoiin a san thei bok nawh. 8 Nangni lungril helhmanghai, Chu chu hre zinga ngaituoin, In lungrilah vong zing ro. 9 Tiena tlânga thil tlung tah, Thil um dàn kha hre zing ro. Keima hi Pathien chu ka nih, Keima naw tu khom an um nawh. Keima hi Pathien chu ka nih, Keima ang tu khom an um nawh. 10 Kei chun a tawp dàn dinghai, Atìra inthokin ka'n hriettir a, Thil la hung tlung dinghai khom, Tiena inthokin ka hriet vong. Ka tum chu dingchang a ta, Ka nuom angin thawng ka tih. 11 Khawsak tienga inthokin, Vate hnukrawl ko ka ta, Ram hla taka inthokin, Ka mi ruot chu ko ka tih, Ka thil tum hlentu dingin. Ka hril angin thawng ka ta, Ka tum angin hlen ka tih. 12 Nangni lungril ngar le khauh, Felna le inkârkîkhai, Ka thu hi lo ngàithla ro. 13 Tu hin hun sawt riel loin, Ka sandamna hung hnai a ta, Zion chu san suok ka ta, Israel sukropui ka tih.

Isaiah 47

1 Aw Babulon naunu 2 Bu rawtna lung kha chel la, Bei ding buhùm rawt phit rawh. I hmai inkhumna kha hawk la, I puonbil kha hlím sîng la, I pheikhokhai hlîp vong la, Ke lawngin tui pal kai rawh. 3 Saruok filin um i ta, I zamaw inlang a tih. Phuba ka lâk ding a na, Tu khom hlà hrim nei naw ning. 4 Am'in Tlantu chu Israel Mi Thienghlim, A hming chu Iengkim LALPA a nih. 5 Aw Kaldai naunu, to zingin, Thimthama hin inthung rawh, 'Ram tin lalnu' ti hrim hrimin, Ko ta ngai nawng an ti che. 6 Ka mihai chunga lungsenin, Ka rochanhai ka soisak a, I kutah ka'n hlan tawl a, An chungah zà i ngai naw a, Tar chen khom indoi loin, Phur rik tak i'n phurtir a. 7 'Lalnu ni kumkhuong ka tih'Tiin ni song i'n ring a. Sienkhom hieng thil hrim hrim hi, I lo ngàituo ngai naw a, Thil la hung tlung theihai khom, Sût nachâng i hriet bok nawh. 8 Chuleiin, nang hoithawnu, Ngaingam taka khawsain, 'Kei hi ka ni el a nih, Kei naw tu khom an um nawh; Hmeithâi ni ngai nawng ka ta, Nauhai chàn ngai naw ningah'I ti hlak a ni naw maw? 9 Chu pahni chun thawklekhatin, Hung nang thut an ti che a, Ni khatah tlung ruol a ta, Nau chànin hmeithâi i tih. Ieng anga aisân thiemin, I dawithiemna hmang la khom, A kimin hung tlung a tih. 10 I rîtlona ringsanin, 'Tu khomin an mi hmu nawh'I ti hlak a ni naw maw?Var le hrea inngai a, 'Kei hi ka ni el a nih, Kei naw tu khom an um nawh'I ti hin a thuoi suol che. 11 Sietnan tlàk buok a ti che a, Dang ngaina hrim hre naw ti nih. Vangduoinan tlâk buok a ti che a, Intlan suok zo naw ti nih. Sietna rùnpuiin hriet lawk loin, A nang thut ding chè a nih. 12 I naupang lai a'nthoka, Mitvaidawi le dawithiemhai, I lo ngàisàng hlakhai khan, An san thei ding phot chê chun, Chuonghai chu ko khêk ta la!Mipuihai pangzat ding zawng, Thawpèk nawk ding che'n ngèn rawh. 13 Remruottu i hau taluo hi, I sawl phà lem a ni hi. Vàn arasihai hmanga, Thil hung tlung ding hril lawk thiem, Thla kipa ding hrillawktuhan, Hung thangpuihai sienla che, Thil hung tlung ding laka chun, Hung san suok che raw se chu! 14 Sienkhom, meia kàng hmang thei, Bupawl ang chauh an ni si. Meichok laka inthokin, An in san suok thei si nawh. Thuka mei awi ang an nawh, An ta dingin a sa taluo. 15 I naupang laia inthoka, I lo thokrimpuihai leI lo indawrpuihai kha, Chuong ang chauh chu an ni si. Mi tinin an lam inhmang, An la zui tawl ngat ngat a, San suok ding chè an um nawh.

Isaiah 48

1 Aw, nangni Jakob sûngkuo, Nangni Israel hming chawitu, Juda thàlbea inthoka suok, Thutak le felnaah ni loa, LALPA hminga inkhâma, Israel Pathien hming lamtuhai, Hi thu hi lo ngàithla ro: 2 "Khawpui thienghlim mi le sàTiin in inko hlak a, In innghatna Israel Pathien khom, A hming Iengkim LALPA a nih. 3 Khâ hmaa thil tlunghai kha, Tiena ka hril lawk sâ a na, Ka bâu ngeiin ka puong a, Kei ngeiin ka'n hriettir a, Chuonghai chu ka hlen thut a, Chuongchun an hung tlung ta a. 4 In lululzie ka hriet a, In rìng thà chu thîr ang a na, In bawk khom dâr angin a chang. 5 'Kan milemhai thaw a nih, Kan thing milem siemhai leKan thîr sung pathienhaiin, An intlungtir vong a nih'In ti thei nawna dingin, Hieng thil hung tlung hma dai hin, Ka hril lawk cheu a ni kha. 6 Hieng thil hi in hriet tah a, Indik in ti hle naw maw?Tuta inthok ruok hin chu, Thu thar hril tâng ka ti cheu, In hriet lo thil inthup chu. 7 A hmaa in hriet ngai lo, Tuta ka'n umtir a nih, 'Kan hriet ta sa vong a nih'In ti thei nawna dingin. 8 Nâin in hriet ngai naw a, Lungrilin in hriet ngai nawh, Hun sawt taka inthok khan, In na a var ta si nawh. Vervêk taka thaw hlak mi, In nizie ka hriet chieng a, In pienga inthok hrima, Hel hmang tia ko in nih. 9 Ka sât thlàk nawna ding cheuin, Ka hming zârin ka lungsen, Ka'n kei tìm hràm hrâm hlak a, Inpâk ka hlawna dingin, In chungah ka'n sûm a nih. 10 En ta u, ka sukthienghlim cheu, Tangkaruo ang chu ni loin, Tuorna meiin ka fie cheu hi. 11 Keima le keima zârin, Keima le keima zâr chauin, Hieng thil hi ka thaw a nih. Ieng leiin am ka hming hi, Sukhmêlhemin um a ta?Mi dang kuomah ka ropuina, Pe suok ngai hrim hrim naw ning. Kura, LALPA mi thlang 12 Aw, nangni Jakob sûngkuo, Nangni Israel hming chawituhai, 13 Hnuoi innghatna lungphùm chu, Ka kut ngeiin ka phùm a, Vàn khi ka kut chang tiengin, Ka kei phar a, ka zâr a, Ka ko pha an ngîr thup hlak. 14 In rênga hung inkhawmin, Ka hril hi hung ngàithla ro. Hieng thil hi milemhai lai, Tu'm hril lawk thei an um a?LALPA thlang Kura ngei chun, Babulon chunga a thiltum, A rêngin hung hlen a ta, Kaldai mihai chunga chun, A kut chu hung thlâk a tih. 15 Keima ngeiin ka hril hi, Ama chu ka ko ta a, Ama chu hung thuoi ka ta, A thilthaw hlawtling a tih. 16 Ka kuom hung pan hnai unla, Ka hril hi hung ngàithla ro:Thu ka puong hmasa tak khan, A rûkin ka hril naw a, A hung tlung hun lai khomin, Keima chu um zing ka tih. "Tuhin Chunghnungtak LALPA chun, A Thlarau leh a mi tir a nih. A mihai ta dinga LALPA thil tum 17 Nangni intlantu LALPA, Israelhai Mi Thienghlim chun, ieng ang hin a hril a nih:" LALPA in Pathien chu ka nih, In thatna dinga zirtirtu, zKal chawi dàn hriltu cheu chu. 18 Ka thu in ngàithlâk phot chun, Inremna chu in chungah, Tui ang luong dem dem a ta, Felna khom tui fawn angin, In chungah fawn vèl a tih. 19 Tieulung ang hiela tamin, In thlàhai hung pung an ta, Pilvut anga tiem seng lo, Tû le tè hung nei in ta, An hming chu ka hmaa hin, Thai bo ni ta ngai naw nih. . 20 Babulon suoksan unla, Kaldaihai tlân hmangsan ro. Hi thu hi hlima khêkin, Hrilin puong dar vel unla, "LALPAN a siehlaw Jakob, A'n tlan tah" tia hrilin, Hnuoi kil tinah puong dar ro. 21 Thlalêra a thuoi lai chun, Dangchâr hrim an hriet naw a, Lungpuia inthokin tui, An ta di'n a'n luongtir a, Lungpui chu a vuok koi a, Tui a'n chik suok zur zur a. 22 "Mi rilo ta ding ruok chun, Muongna hrim hrim a um nawh"Tiin LALPA chun a hril.

Isaiah 49

1 Thlierkârhai, ka thû 2 Kawlhnâm ang topa ngeiin, Ka bàu hi a'n changtir a, A kut hràt hnuoiah mi thupin, Thal tle tak anga mi siemin, A thal bawmah a mi khum a. 3 "Ka ropuizie ka puongna ding, Ka siehlaw Israel i nih'Tiin ka kuomah a hril. 4 Kei ruok chun ama kuomah, "Hmang loa thokrim mei mei, A thlawna tha sèng ka nih. Sienkhom keima chungthu chu, LALPA kuta um a na, Ka lawmman hmu ding khom chu, Pathien kuoma um a nih" ka ta. 5 Jakob thlahai thuoi kîr ding le, Israelhai hûi khawm dinga, Sûla ka um laia inthok khoma, A siehlaw dinga mi'n dintu, A mitah inzauma mi siemtu, Ka hràtna le ka Pathien, LALPA chun hieng hin a hril: 6 "Jakob thlàhai tungding a, Israel thlâ ka hum sunhai, Thuoi kîr dinga ka siehlaw ruot, I nìna hi a huntawk nawh. Jentelhai sukvartu ding khomin, Ka ruot sà ding che a nih, Hnuoi kil tinah ka sandamna, Intluntu hung nîng i tih" tiin. 7 Israelhai intlantu LALPA, Mi Thienghlim chun hieng hin a tih:"Nang, mi hmusit le endong, Rorêltuhai siehlawa um, Bawia inthoka i suok lai, Lalhaiin an hmu pha chun, A thlangtu che LALPA ringum, Israelhai Mi Thienghlim leiin, Nangma inzàin tho an ta, Milienhan hmûng an ti che a, I hma bulah kûn an tih" tiin. 8 Hieng hin LALPA chun a hril:"Ka lungawi hunah ka ngàithlàk che a, Sandamna niah ka thangpui che; Hnamhai kuoma ka thuthlungna, Ni dingin ka hum che a nih:In rochan, rausan hnung ram, Tungding le hluo nawk ding dâm; 9 Tânghai kuomah 'Suok ta ro' ti a, Thima inthunghai kuomah, 'Zalen ta ro' titu ding dâmin. Lam sira hai tla khawm an ta, Muol kol vung hmunah hai khom, Tlatna hmun hring hmùng an tih. 10 Phingtâm tuor ta naw ni hai a, Dangchâr tuor ta bok naw ni hai; Thlalèr lum le ni intêngin, Sukrinum ta ngai naw ni a, Anni lunginsiettu ngei chu, An thuoitu ni tâng a ta, Tui luong del delna vakamah, Anni chu thuoi lem tàng a tih. 11 Ka tlâng tinhai chu lampuiin, Insun tlangtir rui vong ka ta, Ka lamlienhai siem ruol ka tih. 12 En ta u, hmar tienga inthok dâm, Thlang tieng panga inthok dâm, Aswan bielav inthok dâmin, An hung kir tawl a ni saw!" 13 Aw vànhai, hlimin khêk ro; Aw leihnuoi, hlimin lawm rawh; Aw tlânghai, zâi hlâ vawr ro!LALPAN a mihai a thlamuong a, Tuorhai chu lunginsiet a tih. 14 Nisienlakhom Zion chun, "LALPAN a mi fesan tah, LALPAN a mi theinghil tah" a tih. 15 Nenea a chawm lai naute, Nuin a theinghil hlaka maw?A rîla rà naupang ngei chu, A lunginsiet naw ding maw?A theinghil a ni khomin, Kei chun theinghil nawng ka cheu. 16 En ta, ka kutphaa hin, I hming ka ker a ni hi!I kul bang chim tahai chu, Mitthlain ka hmu zing hlak. 17 I nauhai an hung kìr inhmaw, Nangma suksetuhai chun, An suoksan ding chè a nih. 18 Dâk la, i mit inlèn rawh, I nauhai an inko khawm a, I kuom tieng an hung pan saw!Ka hringna sâlin ka hril:"Incheina thi ang elin, I rîng mawitu nîng an ta, Moin a hlì ang elin, Nang khomin hlì tâng i tih. 19 "Sukchim le rausana umin, I ram chu tlaran sienkhom, Inleng loin hluo sip nawk an ta, Sukramtu i hmêlmahai chu, Hla takah um tâng an tih. 20 I lusûn laia nau pienghan, 'Kan intar taluo ta a, Hmun inthawl lem mi pe rawh'Tiin i kuomah la hril an tih. 21 Chu pha chun i lungrilin, 'Hienghai hi tu rêngin am, A mi lo hringpêk a na?Nauhai sûnin ka ching a, Saltâng mi hnawl ka ni a; Tuin am hieng nauhai hi, A lo chawm tlei nîng a ta?Keima chaua mal taka, An mi mâksan kha ka na, A tuin am hienghai hi, A lo hring ni tâng a ta?' Tiin la'n don ngei i tih. " 22 LALPA Pathienin hieng hin a tih:"Ngai ta, hnam tin hmuah bân vaiin, Jentelhai chu hûi ka ta, I naupahai hung pom an ta, I naunuhai hung puong an ta, I kuomah hung thuoi an tih. 23 Lalhai chu i paah siem ka ta, Lalnuhan enkol an ti che. Bokkhupa hmaia hnuoi sikin, I hmaah hung kûn an ta, I kea pilvut chu liek an tih. Chu phâ chun kei hi LALPA, Ka nizie hung hrieng i tih. Ka chunga beiseina neituhai chu, Muolpho ngai naw ni hai" tiin. 24 Mi huoi râllâk chu tuin am, An inchù thlàk ngam hlak a?Mi kolsen sal man chu tuin am, An san suok ngam hlak a na? 25 LALPA chun hieng hin a hril:"Mi râlhrât kuta inthokin, Salhai chu làpêk ka ta, Mi kolsen kuta inthokin, A râllâkhai la kîr ka tih. Nangma dotu chu do ka ta, I nauhai san suok ka tih. 26 Nangma nêksawrtuhai chun, Anni taksa la fâng an ta, Uoiin inrui ang elin, An thisen inrui an tih. Chuongchun hringmi tinrêngin, Kei hi LALPA, in Sandamtu, In Tlantu le Israel Mi Hràt chu, Ka nih ti hre tâng an tih" tiin.

Isaiah 50

1 Hi hi LALPA chun a hril:"In nu ka tir hmang lai khan, Mâkna lekha ka pêk maw? Ka leibatna mihai kuomah, Nangni ka zor cheu a ni?In suolna leiin annawm, Zor hmanga in um lem chu. In bawsietna lei chauin, In nu khom tir hmang a nih. 2 Ieng leiin am ka hung khan, Tu khom in um naw a na?Ieng lei am ka ko cheu khan, Mi don ding in um dèr naw?Nangni sansuokna dingin, Ka bân a tawi taluo tah maw?Nangni san suokna dingin, Ka hrât tawk ta naw a ni?Tuipui khom ka hal kang a, Ka thuin vadunghai khom, Thlalèrah ka'n changtir a, Tui tlasamin nga an thi a, Ngahai chu an thu zo a. 3 Vàn chu thimin ka'n khum a, Saiipa tuom khum angin" tiin. 4 Thua chàuhai tungding dàn, Ka hung hriet theina dingin, LALPA ka Pathien ngei chun, Zirtir thiemna lei mi pein, Tûk tin tina mi keiharin, A thu zirtir hre thiem dingin, Ka nâ a mi hongpêk hlak. 5 LALPA ka Pathien ngei chun, Ka nâ a mi hongpêk a, A lakah ka hel ta ngai naw a, Ka hnung tawl ngai ta bok nawh. 6 Mi vawtuhai kuoma chun, Ka hnungzâng ka dawpêk a, Ka khâkhmul pottu kuomah, Ka bieng khom ka dawpêk a, Nuizatbura mi siem a, Chil mi sâkkhumtu kuomah, Ka hmâi ka dawpèk lem hlak. 7 ​LALPA ka Pathien ngèi chu, Mi thangpuitu a ni leiin, Muolphoin um ngai naw ning. Chuleiin, meitawk lung angin, Ka hmâi ka sukpachang a, Inzakin mi siem naw nih, Ti hi chieng takin ka hriet. 8 Mi tantu a hung hnài ie, Tu'n am mi khing ngam an ta?Hang inhmason ei ti aw!Tu'm a na mi hêktu chu?Hmaisanah inbei kan tih. 9 LALPA ka Pathien ngei chu, Mi thangpuitu a ni leiin, Tu'n am thiem naw mi'n chang a ta?Silfên angin la hlui an ta, Hângthîmin fa se vong a tih. 10 Nangni lai hin LALPA titu, A siehlaw thu awi in um am?Inthim hnuoiah kal chawiin, Var hrim nei nawtu khomin, LALPA hming chu ring sien la, A Pathienah innghat raw se. 11 Tuta mani mei awi a, Mani mei insittuhai, In meichoka chun lêngin, In mei lum chu awi mol ro, Ka kuta in dong ding chu, Na tak tuora inper a nih.

Isaiah 51

1 "Felna hnottuhai po po leLALPA zongtuhai po po chun, Ka thû hi lo ngàithla ro:In piengna lungpui hi en unla, In hung suokna lung khur hi en ro. 2 In pu Abraham tieng en ro, A hringtu cheu Sari en ro. Ka ko lai chun nau an nei nawh. Mal ka sawm a, ka sukpung a, Mi tam takin ka siem suok kha. 3 LALPA chun matheiloin, Zion chu thlamuong a ta, A chim sietnahai po po khom, Lungsietna mitin thlîr a ta; Thlalèr chu Eden huon angin, Ram tawl chu LALPA huon angin, A la hung siem ding a nih. Chu taka chun hlimna le lawmna, Lawmthu hrila inpâkna ri, Hriet hung ni lem tâng a tih. 4 "Ka mihai, mi lo ngàithla ro; Ka hnamhai, mi lo ngàithla ro:Keima kuoma inthokin, Dàn thu chu a hung suok a, Ka rorêlna indik chu, Hnamhai èntu nîng a tih. 5 Ka felna chu a hung hnai a, Ka san suok hun a tlung mêk; Ka bânin hnam tin chungah, Indik takin ro rêl a ta, Thlierkârhan mi beisei an ta, Ka bân hrât hi ngai an tih. 6 Chung tieng khi hang thlîr unla, Hnuoi tieng khom zuk thlîr bok ro. Vàn khi meikhu ang elin, A la'n zâm ral ding a na, Hnuoi khom hi silfên angin, A la chul vong ding a na, A chunga chêng po po khom, Tho angin la thîng an ta, Sienkhom sandamna ruok chu, Kumkhawtluonga ding a na, Ka felna tlol ngai naw nih. 7 "A tha le a sie thlier theitu, Lungrila ka dàn vongtuhai, Ka thû hi lo ngàithla ro:Mihai deusaw ti naw unla, An diriemna ti bok naw ro. 8 Anni chu silfên angin, Hângthîmin fa zo a ta, Sahmul a fâk siet angin, A la fàk siet ding a nih. Sienkhom ka felna ruok chu, Kumkhuoin um tâng a ta, Ka sandamna chun suon tin, A dai vong ding a ni si a. 9 LALPA har la, har la, tho rawh, I bân tha hràtin inthuom rawh. Tiena ang khan hung tho dok rawh, Thang tam liem taa i thaw ang khan. Nangma in naw Rahabw sât nawi a, Tuipui Dragon sun tlangtu kha? 10 Tuipui inthûk chu sukkang a, I'n tlanhai kàn theina dinga, Tuipui monga lam siemtu kha, Nangma i ni naw am a ni? 11 LALPA, i'n tlanhai hung kîrin, Lawm hla leh Zion lût an ta, Chatuon lawmna khum tâng an ta, Hlimna le lawmnan hmuok a ta, Beidong inrûm rè tâng a tih. 12 "Keima, keima ngei el hi, A thlamuongtu cheu chu ka nih. Hlobet anga ral nawk el ding, Thi thei mihriemhai mei mei hi, Ieng dinga in ti am a na? 13 Kei hi LALPA, nangni siemtu, Vàn kei phar a, hnuoi thut remtu, Ka nizie in theinghil ta maw?Ieng leia nêksawrtu lungsen, Ti rêng rênga in um a na? 14 Kun tlok tloka intânghai chu, Insuo zalen ni vak an ta, Lung in thimah thi nawng an ta, Fàk ding tlasam bok naw ni hai. 15 Kei hi LALPA in Pathien, Tuipui chok phula infawntirtu, Iengkim LALPA chu ka nih; 16 Kei, vànhai khom kei phartu, Leihnuoi innghatna phûmtu, 'Ka mihai in ni ie' ti a, Zion kuoma hriltu chun, I bàuah ka thu ka sie a, Ka kutin ka hum zing che. " 17 LALPA kuta inthoka, A lungsenna no dawn a, A hlek chikte khom hla loa, Nang, a berbu tlâk fâi paptu, Har ta rawh, har ta rawh, Aw Jerusalem, thanghar rawh. 18 I nau pasal hringhai lai khan, Thangpui ding che an um naw a, I nau chawmlienhai lai khan, Kei bât ding che an um bok nawh. 19 I chunga sietna thuo hni tlung-Sukràuna le sukramna lakah, Tàmpui le kawlhnâm laka hin, Iengtin am hnèm ka ti che a? 20 I nauhai chàuin an tlu hmàt a, Lèn chânga sakhi awk ang elin, Kotthlèr tontìrah an tlu phung a. LALPA lungsennan a del a, Pathien zilhau an tuok a nih. 21 Chuleiin, nang hrem tuortu, Uoiin loa vai ruia um, Hi thu hi lo ngàithla rawh: 22 LALPA i Pathien ngei el, I mihai humhaltu chun, Hieng ang hin a hril a nih:" En tâ, a sukruitu chè no kha, I kut a'nthokin ka lâk hmang tah. Ka lungsenna berbua mi kha, Dawn nawk ta ngai naw ti nih. 23 Nangma sukrinumtu che, 'Sirsana kan hmang dingin, Hnuoiah tlun takin bok rawh, 'Tia i ruongzâng hrawtu kutah, Berbu chu pe tâng ka tih" tiin.

Isaiah 52

1 Aw Zion har la, tho rawh, Hràtna thuomin inbel la, Ropui takin inchei rawh. Aw Jerusalem, khawpui thienghlim, I sûngah sertan nawhai lûtin, Sukporchè ta nawng an ti che. 2 I pilvut kai chu thin thla la, Aw, Jerusalem, tho suok la, Lalthungphaah inthung rawh. Aw saltâng, Zion naunu, I rîng thlungna kha sût ta rawh. 3 LALPA chun hieng hin a hril:"Ieng khom loa zor hmang in na, Tangka loa intlan nîng in tih" tiin. 4 LALPA ka Pathien ngei chun, Hieng ang hin a hril a nih:"A hmasain ka mihai chu, Aiguptaa chêng dingin an zu fe a; Tu hin Asuria nêksawrin an um. 5 Tu hin ieng am ka nei ta le?Ieng khom loin ka mihai chu, Thuoi hmangin an um zo a, An chunga rorêltuhai chun, Nuizatbûrah an siem a. Sùnnithlâkin ka hming hi, Chawl loin an hrilsiet zing. 6 Chuleiin, ka mihaiin, Ka hming hi la hung hrieng an ta, Chu ni chun keima ngei hi, Hieng thil hril lawktu ka nizieLa hung hrieng an tih, Keima ngei hi ka ni si a" tiin. 7 "I Pathien chun ro a rèl ie!"Tia Zion kuomah hung hril a, lâng tinah inremna thu insampui a, Chanchin lawmum hung intlun a, Sandamna thu puongtuhai chu, An pheikhài a va mawi ngei! 8 I râlvêngtuhai rì chu ngai rawh, Hlimin an khêk ruol a ni chu!Zion-a LALPA hung kìr chu, Mit ngeia an hmu leiin. 9 Jerusalem tlu rama chênghai, Hlim zâi vawrin khêk suok ro, LALPAN a mihai thlamuongin, Jerusalem a'n tlan ta si a. 10 LALPAN hnam tin mithmuah, A bân thienghlim a phar suok a, Ei Pathien sandamna chu, Kawlkila umhai chen khomin, An la hmu ding a ni si a. 11 Suok ta ro, suok ta ro khai!Chu taka inthok chun suok ro. Thil thieng lo hrim tawk naw ro!LALPA bùr le bèl chawituhai, Thienghlim takin hung suok ro. 12 Hmawsarumin suok naw ro, Râltlân angin suok bok naw ro; LALPAN in hma thuoi a ta, Israelhai Pathien ngei chu, In hnung dâltu ni bok a tih. LALPA siehlaw tuorna le ropuina 13 En ta u, ka siehlaw chun, Var takin hung thawng a ta, Dom sâng le hlàng kai nîng a ta, Chawimawiin ngaisâng an tih. 14 Tam tak makti ang hrimin, Hmêl pangngai put lo khopaA hmêl an sukhempêk a na, Mihriem ruongàm ang lo khopa, A pienhmang an sukhem a nih. 15 Hnam tinin mak tîng an ta, Ama hmuin lalhai chun, An hmùr inchîp hmak an tih. An la hmu ngai lo hmung an ta, An la hriet ngai lo hre bok an ta, Hung hre thiem thei tàng an tih.

Isaiah 53

1 Kan thu hril hi tuin am awi a ta? LALPA kut hung inlang hi, Tuin am hre thiem an ta? 2 A hmaa chun thing tuoi inno, Hnuoi chàra zung thlâk angin, Ama chu a hung pieng a. Ama chu hang ditzawng dingin, Pienhmang mawina a nei naw a, A hmêl inlang dàn hrima khom, Hang lungdumna ding a um nawh. 3 Mihan hmusitin an hnawl a, Mi lungngai, natna hre mi a nih. Mihan an hmuin hmâi an hup a, An endong a, ei ngaisâng nawh. 4 Ama chun ei natna mi tuorpêkin, Ei lungngainahai a mi phurpêk. Sienkhom Pathien kut a tuor leia, Vuok thitling le suknata um, Niin ei ngaipèk lem hlauh si. 5 Ei bawsietnahai leiin, Ama chun hliem a tuor a, Ei khawlonahai leiin, Vuok thitlinginx a um a; Thlamuonga ei umna dingin, Hremna a chungah a tla a, An vuokna hliemhai lei chun, Sukdamin ei lo um tah. 6 Ei rêng hin beram angin, Mani lampui seng hrawin, Ei invàk hmang zo ta a; Ei khawlona po po chu, LALPAN a'n phurtir a nih. 7 Soisakin an intuortir a, Sienkhom a don lèt ve nawh. That ding beramte angin, Ama chu an thuoi vèl a, Beram hmul vawtu hmaa, Beram a to zing angin, Ama khomin bàu a ka nawh. 8 Mana a chungthu rêlin, Ama chu an thuoi hmang a, A thlàhai chanchin tu'n am, An hung hril ta ding a na?Mihring rama inthokin, A hringna an làkpèk a, Ka mihai bawsietna leiin, Thatin a lo um ta si. 9 Tharum insuo ngai lo leKhêl hril ngai lo ni sien khom, Mi suol angin an vûi a, Mi hausa thlânah a zâl. 10 Sienkhom LALPA thu leia, Vuok thitling chu tuor a nih; Ama chu suol inthawinan, Lo inhlàn tah sienla khom, A chi thlahai la hmung a ta, A dam kum suksei a ta, A kutah LALPA tum chu, Sukhlawtlingin um a tih. 11 A tuor inrim rà a hmu pha, Hringna var la hmùng a ta, A lung chu awi tàng a tih. Ka siehlaw mi fel hrietna chun, Mi tam tak thiem inchangtir a ta, An suolhai phurpêk a tih. 12 Chuleiin, ka siehlaw chun, Thi hiela hringna bun thla a, Bawsetu lai tiema a um leiin, Mi lienhai lai tiem vêng ka ta, Mi tam tak kuomah râllâk, Ama chun sem tâng a tih; Mi tam tak suolhai phurtu, Bawsetuhai hrilpuitu a ni si.

Isaiah 54

1 "Aw nang ching, nau nei ngai lo, Hlim takin hla sak rawh; Nang, nau hase tuor ngai lo nu, lim takin zâi hlâ rem rawh. Pasal nei nû nêk daiin, Rausan nu chun nau a hau lem"Tiin LALPA chun a hril. 2 I puon in hmun chu zauh la, I puon in chu zâr lien la, A keina hruihai suksei la, A thlungphun vaw nghet sauh rawh. 3 Chang tieng le voi tieng pangah, Hung indar zau pei i ta; I thlàhaiin hnam danghai, La hung hnot suok pei an ta, An khaw rausan hnunga hai, Umhmun la khuor nawk an tih. 4 "Ti naw, muolpho naw ti nih, Hmingsiet inlâu hrim hrim naw, Hmâimawkin um naw ti nih. I tleirawl lai muolphona kha, Theinghilin um tàng a ta, I hmeithai hmaimawkna khom, Hre zing ta naw bok i tih. 5 I pasal chu nangma Siemtu, A hming chu Iengkim LALPA, I Tlantu chu Israel Mi Thienghlim, Khawvel po po Pathien a nih. 6 Tleirawlte laia pasal nei, Sienkhom hnawl le màka um, Lungril beidong taka khawsa, A pasalin a ko nawk ang elin, Pathienin ko nawk a ti che. 7 "Sawtnawte ka mâksan che a, Sienkhom lungsietna inthûk takin, Ka ko nawk ding che a nih. 8 Ka lungsen phulin sawtnawte, I lakah ka hmêl ka thup a, Sienkhom kumkhaw ngilneinain, Ka lunginsiet ding che a nih"Tiin LALPA, i Tlantu'n a hril. 9 "Tuiin hnuoi chìm pil ta lo dingaNova kuoma ka'n khàm ang khan, I chungah ka lung sen ta naw ni a, Zilhàu ta bok naw ning cheng, Tiin thu ka'n khàm a nih. 10 Tlânghai inhnîng dur durin, Muolhai son hmang ni sien khom, Ka ngilneina chu i lakah, La hmang ta ngai nawng ka ta, Ka remna thuthlunghai kha, Sonin um ngai dèr naw nih"Hmangaitu LALPAN a tih. 11 "Aw, nang khawpui rimsi, Tui fawn vor anga vor lèng, Muongna hmu ngai lo, khawpui, Indin thar nawk ka ti che. Lung tha chîin rem ka ti che a, A kil thutah safir lung, 12 I vèngbùkah rubi lung, Kotkhàrah lung chang tle chi, Bangah lung tha ngot hmang ka tih. 13 In nauhai LALPAN zirtir a ta, Nasa takin thlamuong an tih. 14 Felnain suknghet ka ti che a, Neksawrtu leh inhlat in ta, Ti ding hrim nei naw ti nih. Titum la hmangpêk ka ti che a, I kawl hnaiah hung naw nih. 15 Bei ding chea hung inthok chu, Ka thua hung ni naw ni a, A beitu taphothai chê chu, I hmaah tlawm vong an tih. 16 Ngai ta, thîrsû chu ka siem a na, Pûmah meihol zâp lingin, Indona hriemhrei a ser a. Hriemhrei suksetu ding khom, Keima siem tawl tho an nih. 17 Nangma beina dinga ser, Hriemhrei chu tangkâi naw nih; Nangma hêktuhai po po khom, Thiem naw inchangtir ka tih. Chu chu LALPA siehlawhai chan a na, Hnèna petu chu kei ka nih, "Tiin LALPA chun a hril.

Isaiah 55

1 Dangchâr taphot hung unla, Tui hi hung dawn ro; Poisa nei nawhai khomin, A thlawnin bu hung fa ro!Uoiin le bawngnene hai, A thlawnin hung la tawl ro. 2 Bua ring thei ni si loah, Ieng leiin am sum in sèng ding?Khop le tlaina ni si loah, Ieng leiin am thâ in sèng ding?Ka thu hi ngun takin ngai ro:Thil tha chu fain dawn ro, Thil hâng inhnik in tlân chun, In thlarau khom lawm a tih. 3 "Ngâithlain ka kuomah hung ro, Ngâithla ro, in hring theina di'n. Davida kuoma hmangaina thu, Ka lo tiem tlat tah angin, Nangni leh kumkhaw thuthlung, Ka thlungpui ding cheu a nih. 4 En tu, ama chu hnam tin lai, Hrepuituah ka ruot a, Thuoitu le hotuah khom. 5 In hriet ngai lo hnamhai khom, In nuom nuomin ko in ta, A hre nawtuhai cheu khom, Inhmaw takin hung an tih, LALPA in Pathien ngei el, Israelhai Mi Thienghlim chun, A chawimawi cheu lei a nih. 6 Hmu theia a la um lai hin, LALPA chu zong unla, A la hnai lai hin ko ro. 7 Mi riloin a nun dân bànsan sien, Mi suolin suol ngàituo bânsan raw se. LALPA kuom tieng kîr nawk sienla, Ama chun lo lunginsiet a ta, A thlawnin lo ngàidam a tih. 8 LALPA chun hieng hin a tih:"Ka ngàituo i ngàituo an nawh, Ka lampui i lampui an nawh. 9 Vàn khi hi hnuoi nêk daia, Insâng lem a ni angin, Nangma lampui nêk daiin, Ka lampui a'n sàng lem a, I ngàituona nêkin daiin, Ka ngàituona a'n sàng lem. 10 "Vàn a'nthokin ruo le vûr, Hnuoiah a hung tla hlak a, Leihnuoi chawm le sukhnawng a, Thil intotir le inthangtir a, Lo neitu ta dingin thlai chi, A fatu ta dingin bu le bâlA hung insuotir hma chun, Vàn tieng a kîr nawk ngai nawh. 11 Ka bàua thu suokhai khom, Ka dit dàn anga hlen suoka, Ka tum le tir san ang chu, Sukhlawtling a ni hmâ chun. A thlawnin a kîr ngai nawh. 12 "Hlim tak le thlamuong takin, An thuoi suok ding cheu a nih; In hmaa muol le tlânghai, Hlim zâi vawrin khêk an ta, Lêntu thing tinhai khomin, Hlim takin kut ben an tih. 13 Hlingin a bawm rama chun, Fâr thing hung to tàng a ta, Buorin a bawm rama chun, Inhmûi to lem tâng a tih. Chu chu LALPA thil thawhai, Kumkhuoa hrietna dingaInchikna ni tâng a ta, Phùr thlûk ni ta ngai naw nih.

Isaiah 56

1 LALPA chun hieng hin a tih:"Indikna kengkaw unla, Indik takin ro rêl hlak ro; Ka san suok vak ding cheu a na, Ka felzie hung inlang vak a tih. 2 Indikna kengkaw tlata, Kei mi pom nghet tlat hlaktu, Ka chawlni vong thienghlimtu, Suol thaw laka kut keitu chu, Chuong ang mi chu a hamtha. 3 LALPA cheltu ram dang miin, "LALPAN a mihai lakahKei chu mi en hrang a tih"Ti ngai hrim hrim naw raw se. Mi tilre khomin inthlahrungin, "Kei chu thing tawl ang ka nih"Ti ngai hrim hrim naw raw se. 4 Mi tilrehai chungthuah, LALPA chun hieng hin a hril:"Ka chawlnihai insertu, Ka lawmzawng thaw thlang hlaktu, Ka thuthlung vong nghettu chu- 5 Ka tempul le kul bang sûnga, Ka naunu le naupahai nêkin, Hming tha lem chu pêng ka ta, Kumkhuon a hming bo naw nih. 6 "Ram dang mi, LALPA cheltu, A rong bawl dinga inpe, LALPA hming chu hmangaia, Ama chawibiek hlaktuhai, A chawlni bawse loaInser thienghlim hlaktuhai, Ka thuthlung vongtuhai chu- 7 Ka tlâng thienghlimah thuoiin, Ka tongtaina ina chun, Anni chu sukhlim ka ta, Pumraw thilhlân le inthawina, Ka maichâma an inhlàn chu, Keiman lo pompêk ka tih; Ka in chu hnam tin ta dinga, Tongtaina in la tîng an tih. " 8 Israel sâltànghai thuoi khawmtu, LALPA ka Pathien chun, "Ka thuoi khawm tahai bàkah, A dang khom hung thuoi ka tih"Tiin a hril bok a nih. Israel thuoituhai a dem 9 Ram sa po pohai hung ro, Ram hnuoia sa tinrênghai, Anni fa dingin hung ro. 10 Israel vêngtuhai chu, Mitdel le ieng khom hre lo, Rawl nei lo ui ang an na, Tu khom an inbauh thei nawh. Zàl puma thil suongtuo hi, An inhoi tizawng a na, In bur bur hi an thlàkhlà. 11 Ui hnukrawl, tâm zing angin, Khop tik hrim an nei naw a, Berampu an ni dea chu, A sie a tha an thlei thei nawh. Mani hlawkna tieng hnota, Mani lam hrawtu an nih. 12 "Hung ro, uoiin lam ka ta, Dit tawkin dawn ei tiu khai; Zînga lem chu voisun nêk hin, Inhoi dai lem hman a tih"Tiin an inko tuo a. .

Isaiah 57

1 Mi indik chu a thiin, Ngaituo zui hrim an um nawh; Pathien ngaisaktuhai khom, Làk hmanga an um lai khan, Thil tha naw tuok lo dinga, Làk hmang an nih ti hrim hrim, Tu khomin an hriet phàk nawh. 2 Ngîl taka kal chawitu chu, Thlamuongnaah an lût a, Hadam takin an chawl hlak. 3 Nangni dawithiemnu nauhai, Uire le nawchizor thlahai, Hi taka hin hung hnai tawl ro. 4 Tu am a na in nuisaw?Tu am hmêl insiet khum a, Tu am a na lei in thlàk khum?Hel hmang nauhai in ni naw maw, Mi khêlhlip ruol thlahai chu? 5 Saisuo bilah zâuthau takin, A buk tin hnuoiah in che a; Ruom inthûk, rawl ko hnuoiah, In nauhai in inhlàn a. 6 Ruoma lung màm taphot chu, In pathien lema ngaiin, In chanpuol bîkah in ruot a, In chanpuol khom a ni hrim. A chungah uoiin burin, Bu le bâl thilhlânhai chu, In inhlàn hlak a ni kha. Hieng ang thil po po lei hin, Ka lung a awi ding a ni? 7 Hmun sâng le tlâng sâng tinah, In zàlkhum ding in rem a, Chutaka chun inthawi dingin, In hang fe hlak a ni kha. 8 In kot bul le in sûngah, Pathien lemhai in sie a, Keima mi theinghil daiin, In khumpha chu in hawk a, Khum laizawlah in kai a, In inkei phar hlak a ni khah. In zàlpui châk deuhai chu, Thu in intiempui hlak a, An saruokna in enhlà hlak. 9 In pathien Molek kuomah, Oliv hriek leh in fe a, Rimtui in innâl teuh bok a. In palaihai chu hla takah, Biek ding zongin in tir a, Seol chena inthûkin, In infetir hlak a ni kha. 10 Biek ding in zongna lamah, In insuksawl dèr hlak a, Sienkhom, "Beisei a bo ie!"In ti nuom chuong ngai si nawh. Beisei ding thar in hmu pei a, In chàu tlep naw mei mei a nih. 11 Ka kuomah thukhêl hril a, Hriet khom mi hre ta lo a, Mi ngàituo zui lo khopa, In pangzat le in ti chu, Tu hi'm a ni rêng rèng a?Ka to sawt taluo leia, In mi ti ta naw a ni? 12 Dika in hriet le thilthawhai chu, Ka hung puong lang ding a na, Sawtpuina nei naw ti niu. 13 Thangpuitu ding in ko pha, In milem làk khawmhai hin, Hung thangpui cheu raw se chu!Thliin la hmang vong a ta, Thuokin mût lêng vong a tih. Keima mi bèltu ruok chun, Ram hi hung rochung a ta, Tlâng thienghlim hi hluong a tih. Lungngàihai thlamuongna 14 "Sung pawng ro, sung ruol lo, An lam hraw ding buotsai ro; Ka mihai inpalna thei po po, A rêngin inthiel fai ro"Tiin ama chun la hril a tih. 15 Hmunsânga chêng, chatuona hring, Mi Thienghlim chun hieng hin a tih:"Hmun chunghnungtakah chêngin, Hmun thienghlimah um lang khom, Thuhnuoirol le insîrhai kuomah, An thlarau chawisâng ding leInsîrhai lungril kei har dingin, An kuomah ka um zing hlak. 16 Suolah intum zing naw ning, Ka lung sen zing bok naw nih. A sen zing chun bohmang an tih, Thuoka ka'n din an ni si a. 17 An suol le du-àm leiin, An chungah ka lungsen a, Anni chu ka hrem tawl a, Ka hmêl ka thuppêk dai a, Anni hlakin an nuom zawng, Lampui chu an hraw pei a. 18 An um dàn ka hmu vong a, Sienkhom sukdam nawk ka tih. Thuoi ka ta, an ngîrhmun khom, Hadamin siem nawk ka tih. 19 Israel rama lusun po po bàuah, Inpàkna thu sieng ka ta, Ram hla le hnaihai kuomah, Inremna inlèngtir ka ta, An rêngin sukdam ka tih"Tiin LALPA chun a hril. 20 "Sehnok le chir vor suok hlak, Tuipui insok zing ang hin, Mi rilohai chu um an ta, Muongna hrim hmu naw nihai"Tiin ka Pathienin a hril. 21 (A um nawh)

Isaiah 58

1 "Inring takin khêk unla, In rawl ren hrim hrim naw ro. Tawtawrawt ri ang elin, Inring takin khêk suok ro. An bawsiet le helna chu, Ka mihai kuoma chun hril la, Jakob sûngkuohai kuomah, An suolnahai chu hril rawh. 2 An Pathien thupêkhai chu, Zamsan naw ni awm takin, Ka lampuihai hre châk a, Thil indik thaw nuom angin, Ni tin tin an mi zong a; Pathien hung hnai châk angin, Rorêlna fel an mi hnih. 3 'Nangin i mi hmu si naw chun, Ieng leiin am bu ka nghei ding?I mi hriet fûk si naw chun, Ieng leiin am ka'n sukrimsi ding?'Tiin in hril hlak a ni kha. Bu in nghei ve chàng hlak chun, Nuom ang angin in che a, Sinthawtu in sorhai hlak, In nêksawr a rè chuong nawh. 4 In bu nghei ve nihai chu, Inhal insuolin a tawp a, Kuttum in inthlàk khum a, Tuta in bu nghei dàn hi, Chung tieng hriet tlàk a ni nawh. 5 Insukrimsik nia ngaiin, Thli mût kùr luong ang elin, In lu in kei kûn tawl a. Saiip sila zâl thlep a, Vut laia in inbuol hi, Bu nghei dàn ding chu a ni?LALPA a lawm in ring maw? 6 Bu nghei dàn dinga ka dit chu, Indik lo taka hrènhai, An hrêngthir sùtthlakpêk dâm, An ringkol hrui sùtpêk dâm, Nêksawrhai chu insuo a, An ringkol suktliekpêk dâm, 7 Retheihai fâk ding sem dâm, Vâkvaihai ina thuoi dâm, Saruokhai silfên pèk dâm, Laichinhai nghatsan lo dâm, Ka dit dàn chu a ni lem. 8 Chu phâ zet chun in var chu, Zîngkhuo angin var a ta, In natna dam nghal a ta, Mi Dik chun in hma thuoiin, LALPA ropuina chun somin, In hnung dàltuah thang a tih. 9 Chu huna chun ko in ta, LALPAN hung don a ti cheu. Thangpui dinga in ko pha, 'Hi taka hin ka um ie'Tiin don nghàl a ti cheu. "Nêksawrtu ringkol thè thla a, Mi khîksaw chîng mihai leHrilsetuhai in thè thlàk phâ, 10 Phingtâmhai chu ngàisak a, Nêksawrhai in suktlai pha chun, In var chu inthim mup lai, Hung varin êng suok a ta, In zàn chu sùnchang angin, Hung var phût lem tàng a tih. 11 LALPAN thuoi a ti cheu a, Ni intèng le ram tawlah, In mamaw phuhrûk a ta, In rurèlhai sukhrât a ta, Tui chawm zing huon ang el leTuihnàr kang lo ang nîng in tih. 12 Khaw ram hnunghai bawl thâng in ta, A lungphûmhai rem sâng in ta, 'Bang tlu hnung tungdingtuhai, Umna ding le kotthlêr siemthatuhai'Ti hming la hung put in tih. Sabat inser lawmman 13 "Ka Chawlni bawse lo ding leNuom thawnaa hmang lo dinga, In kèhai in vêng tlat chun, Ka Chawlni chu lawmum ti a, LALPA ni thienghlim chu inzà a, Nuom thawnaa hmang lo a, Titinaa in hmang naw chun, 14 LALPA-a chun lawm in ta, Hmun sângah sieng ka ti cheu a, In pu Jakob ka rochung thilhaiin, Ka hrâi tlai ding cheu a nih"Tiin LALPA bàuin a hril. Suol, puongna le tlanna

Isaiah 59

1 Sansuokna din LALPA kutchu, A tawi taluo teu naw a, A nâ khom a sêt bok nawh. 2 Sienkhom in khawlonain, LALPA leh a kei thè cheu a, Insuolnain a hmêl chu, Hmu thei loin a hlie a, A rawl khom in hriet thei nawh. 3 In kutah thisen a kai a, In kut parhai po po khom, Khawlonain a sukporche a; In hmûrin khêl a hril a, In leiin rîtlona a sâk suok. 4 Thudik zong in um naw a, In chungthu khom indik takin, Tu khomin in hril ngai bok nawh. Thu hmang loin in insèl a, Thukhêl ngot in hril tuo a, Buoina chu nauin in von a, Khawhlona in hring suok a. 5 Rûlngân tui in op keu a, Aiumrîl puon in khawng a, An tui fatuhai chu an thi a, A koia chun rûl dang an pieng a. 6 Aiumrîl puon chu puon dingaHmang tlâk hrim a ni naw a, An puon khawng chu silfêna, Inbel thei chi a ni nawh. yAn thilthawhai hrim hrim chu, Khawhlona thil vong a na, Rawng takin kut an thlàk hlak. 7 Suol dingin an ngal a hrât a, Poi tawk lo thisen insuo chu, An kut inrangna zawng a nih. Thil suol ngot an ngàituo a, Ràuna le sietnahaiin, An lam tin chu a sip a. 8 Thlamuongna lam an hriet naw a, An lam hraw taphota chun, Indikna a um ngai nawh. A kawitan ngot an zong a, Anni le fe tu el khomin, Thlamuongna an hmu ngai nawh. 9 Rorêlna indik chu kan hlat a, Felnain a mi tlung phàk nawh; Var chu zongin kan nghàk a, Sienkhom thimnan a mi chìm a, Êng zongin kan inmai a, Thim sà mup vong a ni si. 10 Mitdel anga bang chel bâtin, Kan inmai kan inmai hlak a, Mit bo mihriem ang kan nih. Thimbut angin sùnchanga khom, Kan insui khut khut hlak a. Mi hrâthai le tekhì ding chun, Mithi ruong ang chauh kan nih. 11 Savom angin kan inhùk a, Vathû angin kan inkùrakuka a. Rorêlna indik kan nghàk a, Sienkhom a um dèr si naw a, Sansuoktu ding kan nghàk a, Sienkhom a hla hlê bok si. 12 Kan bawsietna a tam a, I mithmuah a'n tieng hnûr a, Kan suolnahan an mi hèk a, Kan bawsietnahai hlak chun, An mi chêngchil zing bok si. 13 Kan khawhlonahai kan hriet:Inphatsan le helsanin, LALPA chu kan hnung nghat a, Nêksawr ding le hel dingaInfui portu kan ni a, Kan lungrila kan pài rùk, Khêl thu ngot kan sàk suok hlak. 14 Rorêltu tha kan hnot hmang a, Felna chu hla takah a ngîr a, Thutak chu kotthlêrah a tlu a, Indikna a lût thei ta nawh. 15 A nih, thutak an leng ta naw a, Thil tha lo hnawltuhai chu, Sâ anga pêlin an um pei. Chuong chu LALPAN a hmu zing a, Indikna a bo tah lei chun, A lung a awi thei ta nawh. 16 Mi indik a hmu dèr nawh, Hrilpuitu khom an um nawh. Mak a ti èm êm leiin, Ama bân thâ ngei hmangin, Sandamna a siempèk a, Ama felnan a hum a. 17 Felna awmphaw chu hâkin, Sandamna lukhum khumin, Phuba lâkna silfèn inbelin, Thahnemngaina korfuol chun, Ama chu a'n zem khum a. 18 An thilthaw dungzui peiin, Ama chun thungrul a ta, Hmêlma chungah a lungsenna, Dotu chungah a thungrulna, Ama chun intlâktir a ta, Thlierkârhai khom thungrul a tih. 19 Khawthlang tienga chênghaiin, LALPA hming tì tâng an ta, Khawsak tienga chênghaiin, A ropuina inzà tâng an tih. LALPA thuoka a mùt luong, Tui lien insâng hung angin, A hung inthok ding a ni si a. 20 ​Zion tlânga Jakob thlàhai, Màni suol simhai kuoma chun, Tlantu a hung ding a ni si a"Tiin LALPA chun a puong. 21 LALPA chun hieng hin a hril a, "Hi hi anni le keima inkâra ka thuthlung chu a nih: Nangmaa um ka Thlarau le i bàua ka sie ka thuhai hin, tuta inthok le chatuon chenin, i bàu suoksan ta naw ni a, i thlàhai bàu khom suoksan ta naw ni a, i thlàhai thlàhai pei bàu khom tuta inthoka kumkhuoin suoksan ngai naw nih" tiin.

Isaiah 60

1 "Tho la, i êng insuo rawh, I var chu a hung tlung ta a, LALPA ropuina i chungah, A hung suok tah a ni hi. 2 En ta, thimin hnuoi a'n khum a, Thim sain mipui a tuom a, Nisienlakhom, i chungah, LALPA êng a hung suok a, A ropuinan a'n khum che. 3 Hnamha'n i êng pan an ta, I hung var suokna tieng chu, Lalhai khomin pan an tih. 4 "Ngha vêlin hang thlîr vêl la, An rênga inhûi khawmin, I kuom tieng an hung pan ie. Ram hla taka inthokin, I naupahai an hung a, I naunuhai an hung thuoi. 5 Chu huna chun i hmêl chu, Hlimin hung êng suok a ta, Um ngaina hre lo khopin, Hlimnain sip tâng i tih. Tuifinrieta sumdawnghaiin, Hausakna hung phur an ta, Hnam tinhai hausakna chu, I kuomah hung lût a tih. 6 "I ramah sanghawngsei ruol, Midian le Efaa inthoka, Sanghawngsei tuoihai le chun, Hmun tinah tla khawm an ta, Seba rama inthokin, Rangkachak le rimtui phurin, Hung pan duol duol an ti che a, LALPA inpàkna thu puong an tih. 7 Kedarhai ran ruol po po khom, I kuomah hung thuoi an ta, Nebaiothz beramchalhai khom, Ka maichàma inthawina dingin, Pumraw thilhlânah hmang i ta, Chuonghai chu pom nîng an ta, Ka tempul chawimawi ka tih. 8 "Sûm anga intawl duol duol, Mani buzawl seng pana, Vathu ruol anga vuong saw, Tuhai am an ni ta le? 9 Thlierkâr hla taka inthoka, Israel thlahai hung phurtu, Tarsis long ruol an ni saw!Israelhai Mi Thienghlim, LALPA in Pathien ropuina di'n, An rangkachak le tangkaruo leh, An hung phur tawl a ni saw. Ama chun ropui takin, A'n thuom mawi cheu a ni hih. 10 "In kul bang chim tahai chu, Ram danghan rem nawk an ta, An lalhan in rong bawl an tih. Lungsenin ka vuok cheua chu, Ditsakin lunginsiet tàng ka ti cheu. 11 In kul kotkhàrhai sùn le zànin, Khàr loin inhong tâng a ta, Hnam tin lalhan an rosumhai, Hung tol lût zut zut an ta, An lalhan hung zui lût an tih. 12 Tu khom i rong bawl nuom lo, Ram le hnamhai hrim hrim chuSein bohmang letdèr an tih. 13 Lebanon tlâng sukropuitu, Fâr thing chi hrang hranghai chu, Ka hmun thienghlim cheimawina di'n, Hung tol thla hum hum an ta, Ka ke nghatna hmun ngei chu, Ka sukropui ding a ni si. 14 Nêksawrtu che thlàhai chu, In hmaah hung bokkhup an ta, A hmusittu che po po khom, I ke bulah bokkhup an ta, 'Israel Mi Thienghlim Zion, LALPA Khawpui' tîng an ti che. 15 "Rausan le theida changin, Tû sir hlaw naw ni la khom, Kumkhuoa khawpui suongum, Suon tin lawmah siem ka ti che. 16 Hnam tin nenetui tlàn i ta, Lalhai nenetui dawn i tih. Chu hun a hung tlung pha chun, Kei LALPA hi, i Sandamtu, Tlantu le Jakob Mi Thienghlim chu, Ka nizie hung hre tâng i tih. 17 Dâr aiah rangkachak pein, Thîr aiah tangkaruo pein, Thing aiah dâr thîr pe lemin, Lung aiah thîr pêng ka ti che. Thlamuongna chu inlal a ta, Felna chun ro rêl tâng a tih. 18 Inpawngnêkna rì hrim hrim, A ramah hriet ni ta naw nih. Ràuna le sietna ri hrim hrim, A ramah hriet ni bok naw nih. In kul hming chu 'Sandamna'Kotkhâr hming chu 'Inpâkna'Tiin ko ta lem in tih. 19 Sùna nangma èntu dingin, Ni khi hmang ta nawng i ta, Thla var ngai ta nawng i ta, LALPA chu kumkhawtluonga, I var hung ni tâng a ta, Pathien chu kumkhawtluonga, I ropuina nîng a tih. 20 I nisa chu tla ta naw nih, I thlà mang ta bok naw nih. LALPA chu kumkhawtluonga, I var hung ni tàng a ta, I lungngaina nihai chu, Kumkhuoin tawp tâng a tih. 21 Chu pha chun i mihai chu, Mi fel ni vong tàng an ta, A ram chu kumkhawtluongin, An hluo song ta ding a nih. Ka mawina târ lang dinga, A zung inder ka phun an na, Ka kutsuok lieu lieu an nih. 22 In laia chîn tak khom hi, A sângin la pung a ta, In laia hnam chîn tak khom, Hnam ropui la nîng a tih. Kei hi LALPA chu ka na, Hienghai hi a hun takah, Inrang takin hlen ka tih" tiin.

Isaiah 61

1 LALPA Pathien thlarau chu, Ka chunga hin a um a, LALPAN hriek a mi nâl a, Riengvaihai kuoma chanchin tha, Hril dingin a mi tir a nih:Lungril koihai thawi dam ding dâm, Saltànghai suok thu hril ding dâm, Thima intânghai insuo ding thu dâm, 2 LALPA lungawi kum thu puonga, Pathien phuba lâk ding thu hril a, Lusûnhai thlamuong ding dâm, 3 Zion-a pûrdohai chu hnèm a, Vut nêka pàr thi inhlìtir lem a, Sûnna nêka hlimna hriek nàl a, Ngui muchukna thlarau nêka, Inpâkna silfên pe lem dingin. LALPAN ama chawimawina dinga, Felna saisaw thing a phun an nih, Ti thu hriltu ding ka nih. 4 Hmun hlui tlu ram tahai chu, A tharin rem nawk an ta, mun rausan ta hnunghai chu, Hung indin thar nawk an ta, Thang tam lo tlu se ta hnung, Khuohai chu bawl thar an tih. 5 In ran ruol vêngtuhai chu, Ram dang mi ni tâng an ta, In leilet le grèp huona hai, Ram dang mi sor tâng in tih. 6 Nangni chu 'LALPA thiempu, 'Tia ko ni tâng in ta, 'Ei Pathien rongbawltuhai'Tia ko ni bok in tih. Hnam danghai nei tlàn in ta, An nei chu uongpui in tih. 7 An muolpho aiah chan let hni, Ka miha'n chang tâng an ta, An inzak aiah hlim takin, An chanvo rochung an ta, An ram lèt hnih hluong an ta, Kumkhuoin hlim tâng an tih. 8 Kei hi LALPA chu ka na, Rorêlna fel ka ngaina a, Inrok le khawlonahai, Ka theida èm êm a nih. Anni chu ringum takin, An lawmman ding pêng ka ta, Chatuon thuthlung thlungpui ka tih. 9 An thlàhai chu hnam tin lai, Mi hriet lâr hung nîng an ta, An thla sawng peihai khom chu, Mi hriet hung hlaw pei an tih. Anni hmutu taphot haiin, 'LALPA malsawmhai an nih'Tiin hung namnghet an tih. 10 LALPA-ah ka lawm hle a, Pathienah ka thlarau a hlim. Moneituin thiempu anga, Chêng lûra lû a kawm ang le, Moin thuom mawi a'n bel angin, Sandamna silfên mi'n belin, Felna korfuol a mi'n hâktir. 11 Leilungin thil intotir a, Huonah thlai a'n thanglien ang hin, LALPA ei Pathien ngei chun, Felna le inpâknahai chu, Hnam tin lai intotir a tih.

Isaiah 62

1 A felna zîngkhuo anga var a, A sandamna chu meiser anga, A hung var suok hmakhat chun, Zion leiin to nawng ka ta, Jerusalem leiin to naw ning. 2 Hnam tinin i felzie hmûng an ta, Lalhan i ropuizie hmûng an tih. LALPA ngeiin i hming thar ding, A la sakpèk ding chè a nih. 3 LALPA ta din lallukhum mawi, Pathien ropuina lukhum nîng i tih. 4 'Màk hnung' ti ta naw ni hai a, 'Ràusan ram' ti ta bok naw ni hai. 'Ditlai' tiin ko tâng an ti che a, I ram khom 'Pomlai' ti tàng an tih. I chungah LALPA lawm a ta, I ram chu neiin hluo tâng i tih. 5 Tlangvàlin nunghak a nei angin, I nauhaiin hluong an ti che a, Moneituin mo a lawm angin, I chungah i Pathien lawm tâng a tih. 6 Aw Jerusalem, i kul chungah, Râlvêngtuhai chu ka sie a, Sùn le zàn ieng lai khomin, An rì chu rè ngai naw nih. Nangni LALPA kotuhai, Chawl loin ko zing hlak ro, 7 Jerusalem hung tungding a, Hnam tin inpâk tlàk dinga, A hung siem nghet hma khat chun, A thutiem kha hre zing dingin, Chawl loin LALPA chu ko ro. 8 A chang tieng bân tha hràtin, LALPA chun thu a'n khàm a:"Ienglai khomin in buhai chu, Hmêlma fâk di'n pe ta naw ning, Hnam dangin in uoin tharsuok, Dawn zopêk ta naw ni cheu. 9 Bu sîktuhan an bu fa tâng an ta, LALPA chu inpâk an tih; Grêp rà lotuhai khomin, Ka in thienghlim tuolzawlah, An uoiin dawn tâng an tih" tiin. 10 Fe suok ro, fe suok ro, Ka mihai ta di'n lam siem ro; Sung pawng ro, lamlien siem ro, Lunghai inthiel fai unla, Hnam puonzâr chu khâi kâng ro. 11 LALPAN hnuoi kil tawp chenin, Hi thu hi a puong dar a:"Zion naunu kuoma chun, 'En ta, i Sandamtu a hung!A san suokhai a hung thuoi a, A'n tlàn suokhai a hung som. 12 Anni chu 'Mi thienghlimhai, LALPA tlanhai' tîng an tih. Nang khom, 'Khawpui Ditum, Hnawl lo khawpui' tîng an ti che.

Isaiah 63

1 Edom rama inthoka hung, Bozra khuoa inthoka mi, Thuom sen hâk saw tu am a na?Lal thuom mawi tak inbel a, Hrât taka hung saw tu'm a na?"Keima, indik taka thu hril hlak, Ropui taka sandamtu ka nih. " 2 Iengti leia i thuom khom chu, Grêp sawrna khura thokhai anga, A sen hneng hnuong am a na? 3 "Keima chauin hnam danghai chu, Grêp rà angin ka sir sawr a, Keima chauin ka chìl tawl a, Tu khomin an mi thangpui nawh. Lungsenin ka sir sop a, Lung chokin ka chìl rak a, An thisenin a mi chik khum a, Ka thuomah a kai a nih. 4 Phubâ ka làk ni ding chu, Ka lungrilah a um tlat a, Ka mihai intlanna dinga, Ka kum ruot a tlung ta si. 5 Thangpuitu an nei am tiin, Ka hei ngha vêl ruoia chu, Mi tu khom an hung si nawh. Santu an nei hlol naw el chu, Mak khom ka ti èm êm a. Chuleiin ka bânin sandamna chu, Keima ngeiin ka hlen suok a, Ka lung chokin a mi sukthatho a. 6 Ka lungsen chokin hnamhai chu, Sukruiin ka sir sop neng a, Hnuoiah an thisen ka bun thlâk a. " 7 LALPA ngilneizie hril ka tih; Ka ta dinga a thilthawhai dâm, A lungsietna le ngilneina zâra, Israel sûngkuo ta dinga thil tha, A thawpêk zozaihai dâm leiin, Ama inpâkin hla sak ka tih. 8 LALPAN, "Ka mihai ngei an na, Mi hlèmtu nau an ni nawh" a ta, Anni sandamtuah a thang a, 9 An lungzingna a lungzingpui a, An beidong ni po poah, A vàntirkohai chu hmangin, Anni chu a san suok a, A hmangaina le zàngainain, Anni chu a'n tlan suok a, Tiena tlânga inthok ta khan, Pom kângin a puok tawl hlak. 10 Sienkhom a lakah an hel a, A Thlarau Thienghlim an suknuor a. Chu lei chun a lungril thlâkin, An hmêlmaah a thang a, Anni chu a do lèt tah a nih. 11 Chu phing leh a mihai chun, Mosie hun laia thil tlung tahai, Tien lai thilhai chu an sui kìr a, An ran ruolhai le an vêngtu, Tuipui a'nthoka thuoi suoktu kha, Khaw lai am a um ta le?Anni laia a Thlarau Thienghlim, Sietu kha khaw lam a um ta a? 12 Mosie bàn chang tienga thang, Bân mak le hrât hung tirtu kha, Kumkhaw hrilfàk tling hiel khop, An hmaa tui vaw tantu kha, 13 Li ril inhraw thlengtirtu, Hmun rema sakor thuoi anga, Insui thlu loa in kantirtu kha, Khaw lai am a um ta a? an ta. 14 Phaia ran ruol tla dem dem angin, LALPA thlarauin an chawl hadamtir a, Chuong ang chun a hming ropuina din, A mihai chu a thuoi tawl si. 15 I hmun thienghlim le ropui, I chèngna vàn sànga inthok khan, Zuong thlìrin mi zuk en ta, I thahnemngaina le hràtna kha, Khaw lai am a um zo ta a?I mi'n voina le lâinatnahai kha, Kan lakah i lâk kîr vong an ta? 16 Nang chu kan Pa i nih; Abrahamin a mi hriet phàk nawh, Israelin a mi hmu phàk bok nawh. LALPA, nang ruok chu kan Pa i na, Tiena inthokin i hming hi, Kan Tlantu a ni kumkhuo. 17 Aw LALPA, i lampui a'nthok, Ieng dinga i mi'n vàk hmangtir?Ieng dinga nangma ti lo dinga, Kan lungril i sukngar hlak am?I siehlaw, i rochan hnamhai leiin, Hung ngha kìr nawk hràm raw khai! 18 I mihai hin sawt nawte chauh, I hmun thienghlim an hluo hman a, Tu hin kan hmêlmahai chun, I hmun thienghlim an chìl siet zo tah. 19 Tiena inthoka i tâ kan na, Sienkhom kan lal ni ngai lo, I hming put ngai lohai ang el, Kan lo inchang zo ta si a.

Isaiah 64

1 Vàn kei thlêrin hung tum la, Ka va hang ti ngei de aw!I hma bulah tlânghai chu, An inthin dur dur awm si! 2 Thukah thing tawl ei ti a, Tui ei suong so bor bor anga, hmêlmahai hin i hming, An hung hriet theina ding leHnamhai chu i hma bulah, An inthin hlop hlopna dingin, Hung tum la ka nuom a nih. 3 Tien lai khan i hung tum a, Kan beisei nêka nasain, Thil râpthlâkhai i thaw a, Tlânghai chu i hma bulah, An inthin dur dur hlak kha. 4 Tiena tlânga inthok khan, Nang Pathien chauh naw hi chu, Anni nghâktuhai ta dinga, Hieng ang thil thawpêk hlak hi, Tu khom an hriet ngai naw a, Nain an la hriet ngai naw a, Mitin an hmu ngai bok nawh. 5 Lawm taka thil fel thaw a, I lampui hrawtuhai chu, Nangman i thangpui hlak a. Sienkhom i lampui hraw loa, Kan hung suol zui pei hnungin, Kan chungah i lungsen a. Iengtin am keini rawi hi, Sandam ni thei tâng kan ta? 6 Kan rêng el hin mi porchè, Kan lo ni tawl ta vong a, Felna thil kan thawhai khom, Suontiek bal ang chauh a na, Hnatawng angin kan rop a, Kan suolna chun thlî angin, A mi lèn hmang hlak a nih. 7 I hming kan lam ta naw a, Nangma chel tuma bei hrim, Tu khom kan um ta bok nawh; Kan lakah i hmêl i thup a, Kan khawlonaa zûr hmang dingin, I mi lo pèk suok tah a nih. 8 Chu khom chu ni sien LALPA, Nang kan Pa i ni tlat si. Keini hi bepil kan na, Nang chu bêlhemtu i na, I kutsuok vong kan ni hi. 9 Aw LALPA kan chunga hin, I lung sen taluo naw sien, Kan suolnahai kumkhuoin, Mi hre zing pèk naw hràm rawh. Mi zuk en nawk hràm rawh khai, I mihai kan ni si a. 10 I khawpui thienghlimhai chu, Thlalèr an inchang zo a, Zion khom thlalèr inchangin, Jerusalem chu rausan khawpui, A lo inchang dèr tah hi! 11 Kan thlatuhan an inpàkna che, Tempul ropui le thienghlim chu, A lo kàng ram vong ta a, Kan hlut rosum po po khom, A kàng ram ta vong a nih. 12 Hieng sà khom hin aw LALPA, Kut i kei tîm zing ding maw?To zingin, tawp nei loin, I mi hrem zing tawl ding maw?

Isaiah 65

1 LALPA chun hieng hin a tih:"Mi lam ngai nawtu kuomah, Keima chu inpuong ka ta, Mi zong ngai nawtu khomin, Mi hmu thei ve tàng an tih. Ka hming lam ngai lohai kuomah, 'Hi takah ka um, hi takah ka um'Tiin keiman ka hril tawl a. 2 Mi lululhai ta dingin, Ni tin tinin bân ka phar a, Lam tha naw tieng an hraw a, An suongtuona an hnot a. 3 Chuong mihai chu chawl loa, Hmâi sana mi cho phawktu, Huonah pumraw thilhânhai, Lung rem chungah rimtuihaiInhlàn hlaktuhai an nih. 4 Thlàn muola hai chun thungin, Hmun fienrielah an riek a, Voksa dâm an fâk hlak a, Sa thieng lo bêlah suongin, A tuihàng dâm an sie a; 5 Mi kuomah, 'Mi hnai naw rawh, Kei chu mi thienghlim ka nih'Ti hlak sihai chu an nih. Chuonghai chu ka hnâr urtu, Rimsie ang char an ni si a. 6 "Ngài ta, ka hmaah ziekin a um:To zing loin thungrul ka ta, A nih, a kimin thungrul ka tih- 7 Anni suolna chauh ni lo, An pi le puhai suolna khom. Tlângahai chun inthawiin, Muol tin an sukporchè a, An thil suol thaw tahai chu, A kimin thungrul ka tih"Tiin LALPA chun a hril. 8 Hi hi LALPA chun a hril:"Grêp rà bawr luoi lai chun, A tha a la um lei a, 'A rêng khan dehawn naw rawh, A tha thenkhat a la um'An ti hlak ang deu bok khan, Ka siehlawhai zâr chauin, An rêngin sukse naw ning. 9 Jakob thlaa inthokin, Chi pakhat indin ka ta, Juda thlaa inthokin, Ka tlâng hung hluotu ding chu, La hung indin suok ka ta, Ka thlanghan rochung an ta, Ka siehlawhai chêng an tih. 10 Ka mi, mi zongtuhai ta dingin, Saron phai chu an beram ruolhai, Tlatna hmun hung nîng a ta. Akor ruom chu an bawng ruolhai, Chawldamna hmun nîng a tih. 11 Sienkhom LALPA mâksantu, Ka tlâng thienghlim theinghiltu, Vàngnua ta dinga dawkan buotsaia, Khuorèl ta dinga uoin chokpoltu chu, 12 In chanah kawlhnâm be ka ruot a, Sukhlumtu hmaah kûn in tih; Ka ko cheu a, in mi don nawh, Ka biek cheu a, in ngàithlak nawh; Ka mitah thil suol in thaw a, Ka theida zawng in thlang si a 13 Chuleiin, LALPA Pathien chun hieng hin a tih:Ka siehlawhaiin fâng an ta, Nangni chu phingtamin um i tih; Ka siehlawhaiin dawn an ta, Nangni chu dangchârin um i tih; Ka siehlawhai chu hlim an ta, Nangni ruok chu inzak i tih. 14 Ka siehlawhan lungril takin, Hlimin lawm hla sak an ta, Nangni ruok chu lungzinga tapin, In thlarau beidongna leiin, Inrûmin tap khêk in tih. 15 Ka thlanghaiin in hming chu, Tongsie inphurnan hmang an ta, Kei LALPA Pathien ngei hin, Nangni chu sukhlum ka ti chêu a, Ka siehlawhai kuoma ruok chu, Hming thar ka pêk ding a nih. 16 A ram sûnga malsawmna hni photin, Thutak Pathien kuomah hnîng an ta, A ram mi intiemkamtu taphotin, Thutak Pathien hmingin intiem an tih. An buoina nihai kha theinghil an ta, Tong nawk tah ngai naw ni hai. 17 "Ngai ta u, vàn thar le hnuoi thar, Ka hung inumtir ding a nih. Thil hmasahai kha an liem ta a, Hriet fùk ni ta naw ni hai. 18 Ka thil thar inumtira chun, Lawmin hlim kumkhuong in tih. Jerusalem chu ditum takin, A mi chênghai khom lawm takin, Ka siem ding a ni si a. 19 Jerusalem chungah lawm ka ta, Ka mihai chungah hlim ka tih. Chu hmuna chun tap ri hrim hrim, Hriet ni nawk ta ngai naw nih. 20 Chu taka pieng nautehai chu, Hlamzuia thi um naw ni hai a, Tarkûnin dam tâng an ta, Kum za tling chauha thihai chu, Tleirawla thiah ngai an ta, Kum za khom dam tling lo chu, Tongse phura ngai nîng an tih. 21 An in bawla chun chêng an ta, Grêp phunin a rà tlàn an tih. 22 Mi dang hluopêk el dingin, A thlawnin in bawl ta nawng an ta, Mi danghai fàkpèk el dingin, A thlawnin grêp chîng ta bok naw nih. Thing dam kum zât zet dam an ta, Ka mi thlanghai chun an thaw rà, Tarkûn chenin tlân tàng an tih. 23 Sin inrim thlawn ta naw ni a, Vàngduoi ding nau nei bok naw nih; An tù le tèhai chen khomin, LALPA malsawmna dong an tih. 24 An mi ko hmain don ka ta, An hril laiin ngàithlâng ka tih. 25 Satenê le beram tla khawm an ta, Sakeibaknei khomin bupawl, Bawngchal angin fa vê tàng a ta, Rûlin pilvut buah ring a tih. Insuknat le insuksiet hrim, Ka tlâng thienghlimah um naw nih, LALPA chun a tì a nih.

Isaiah 66

1 LALPA chun hieng hin a tih:"Vàn khi ka lalthungpha a na, Hnuoi hi ka ke nghatsan a nih. Khaw lai am ka in ding chu, In mi bawlpêk ta ding a na?Khaw lai hmun am chêng ka ta? 2 Thil iengkim hi ka kuta siem, Ka'n umtir vong a ni naw maw?" Hi hi ka ngaihlut zawng a nih:Lungrila inngaitlawm hlak mi, Lungrila insîr ngawi ngawi mi, Ka thu inzaa inthin hlak mi. 3 "Sienkhom hienghai ngaia chu, Bawngchal thata inhlàn amanih, Mihriem thata inthawi amanih, A danglamna a um chuong nawh. Beramte inhlàn amanih, Ui rèk hlum inhlàn amanih, Bu le bâl inhlàn amanih, Vok thisen inhlàn amanih, Rimtui an raw amanih, Milem an biek amanih, Thil danglamah an ngai nawh. An nuom nuomin thil an thaw a, Thil porchè an thawhai chun, An lungril a suklawm hlak. 4 Ka koin an mi don naw a, Ka biekin an mi ûksak nawh. Ka mithmuah thilsuol thaw a, Ka theida zawng an thaw leiin, Kei khomin indoi loin, Na takin soisak tawl ka ta, An lo tithawng tak thil chu, An chungah intlungtir ka tih. " 5 A thu tia inthin hlakhai, LALPA thu hi lo ngàithla ro:"Ka hming leia theidàtu le, Hnawltu chêu in unauhai chun, 'LALPA chu ropuina leh, Hung inlang mol raw se chu, In lawm chie am hang en ei tih'Tiin an tong khum cheu kha. Sienkhom la muolpho an tih. 6 Khawpui buoi ri chu ngai ro, Tempula an rihàu chu!An suol dàn ang phú pei a, A hmêlmahai thungrultu, LALPA chèt rì a ni chu! 7 "Nau hase tuor hman lo a, Nau nei ta thut ang elin, A nat hung intan hmain, Nau a hring a ni chu tie! 8 Chuong ang thil chu tuin am, Hrein an hmu hlak hrim a?Ni khat sûng thilthu chauin, Ram a pieng hlak am a ni?Mit khap kâr khom tling loin, Hnam a pieng hlak am a ni?Nisienlakhom Zion chun, Nau hase a tuor tan chauin, A nauhai a hring tlat si! 9 Nau nei hun chen thuoi tlungin, Nau ka'n hringtir naw ding maw?A hring hun a tlung phing leh, A sûl ka khârpek ding maw?"Tiin LALPA chun a hril. 10 "A hmangaitu po po chun, Jerusalem chu hlimpuiin, Ama sûntu po poin, Nasa takin lawmpui ro. 11 A tângah inbeitirin, A nene'n chawm tlei a ti cheu; Fawpin ne kuong kuong in ta, A tui tam chu lawm in tih"Tiin in LALPA chun a hril. 12 Hi hi LALPA chun a hril:"Remna chu vadung angin, A kuom tieng luong lût a ta, Vadungte lèt ang elin, Hnam tinhai hausakna chu, A kuongah luong liem a ta; Chuonghai chu tlân tàng in ta, A kutin pom a ti cheu a, A mal chungah chuong in tih. 13 Nuin nau a'n awi angin, Kei khomin inawi ka ti cheu; Jerusalema chun muong takin, In um ta ding a ni si" tiin. 14 Chu thil chu in hmu pha chun, In lungril lawm tâng a ta, In rùhai khom hlobet angin, Hung inno dur dur a tih. A siehlawhai chunga chun, LALPA kut chu um a ta, A hmêlmahai chunga chun, A lungsen suklang a tih. 15 A lungsen hrîk thla ding leMeichoka zilhau tawl dingin, En ta, mei leh LALPA chu a hung; A tawlailirhai khom chu, Thawngaleivir ang a nih. 16 A meichok le kawlhnâmin, Mihriemhai chungah rorêlna, LALPA chun hung chelek a ta, Mi tam tak sukhlum a tih. 17 "Inthawi le insukthienghlim dinga huona fehai le voksa le mazu sa le sa porchè fatuhai chu an rêngin bohmang tlàng an tih, " tiin LALPA chun a hril. 18 "An thilthawhai le an suongtuohai ka hriet a, hnam tin le tong tina mihai chu lawr khawm dingin ka hung tèp a nih; chuongchun hung an ta, ka ropuina hmûng an tih. 19 "Chun, anni lai inchikna inentir ka ta, hlaa la um sunhai chu hnam tin- Tarsis mihai, Libia mihai, thal kâp thiem Lydia mihai, Tubal le Grik mihai le thlierkâr hla taka um, ka hming inthangzie la hre ngai lo le ka ropuizie la hmu ngai lohai- kuoma chun tir ka ta, hnamhai kuoma chun ka ropuizie puong dar an tih. 20 Israel thlahaiin an thil inhlànhai chu bûr le bèl thienghlim taka LALPA tempula an hung lâk lût hlak ang hin, LALPA kuoma thilhlân dingin hnam tin laia inthokin in unauhai po po chu sakor chunga dâm, tawlailira dâm, thuomhnaw phurna tawlailira dâm, sabengtung le sanghawngsei chunga dâm chuongin, ka tlâng thienghlim, Jerusalemah ka hung thuoi khawm ding a nih. . 21 Chuonghai laia mi thenkhat chu thiempu ding dâm le Levi chia ding dâmin ruot ka tih, " LALPA chun a tih. 22 "Chun, vàn thar le hnuoi thar ka siem ding chu ka hmaah um zing a ta, in thlahai le in hminghai khom um zing bok a tih. 23 Thla thar ni zât le Sabat ni zâtin mi po po chu chibai mi bûk dingin ka hmaah hung zut zut an tih. 24 Chun, fe suok an ta, ka laka helhai ruong chu en an tih; an ngèhai chu thi naw ni a, mei khom chu sukmitin um bok naw ni a, mi po poin tirdakum ting an tih" tiin LALPAN a hril.

Jeremiah 1

1 Benjamin ram Anathot khuoa thiempuhai laia mi pakhat Hilkia naupa Jeremia thuhai chu a nih. 2 Juda lal, Amon naupa Josia inlala inthoka kum sawm le kum thumnaaha a kuomah LALPA thu a hung tlung a. 3 Juda lal, Josia naupa Jehoiakim inlal lai khomin a hung tlung a; Juda lal Josia naupa Zedekia inlala inthoka kum sawm le kum khatna, thla nganaab Jerusalem mipuihai sala thuoi an ni chen khan, a hung tlung bok a. 4 LALPA thu ka kuomah a hung tlung a, 5 Sûla ka'n din hmâ chè khan, Ka lo hriet dai ta che a, Sûla inthoka i suok hmâin, Ka lo ser hran ta che a, Hnamhai kuoma zawlnei dingin, Ka lo ruot ta che a nih" tiin. 6 Kei chun, "E khai, Chunghnungtak LALPA, tong dàn khom ka la thiem nawh, naupang ka la ni si a" ka ti a. 7 LALPA ruok chun ka kuomah, " 'Ka la naupang' ti naw rawh. Ka tirna chê taphot kuomah fêng i ta, hril dinga thu ka pêkhai chè chu i hril ding a nih. 8 San suok pei ding chein i kuomah ka um ding a ni leiin anni chu ti dêr naw rawh" a ta. 9 Chun, LALPA chun a kutin ka bau a hung them a, "Tu hin ka thuhai chu i bauah ka sie ta a. 10 Ngài ta, hnamhai le lalramhai chu phawi a, thiek a, suksie a, pei thla a, siem tha a, indin dingin ka ruot che a nih" tiin a mi hril a. 11 LALPA thu chu ka kuomah a hung tlung a, "Jeremia, iem i hmu a?" a ta. Kei chun, "Ruon thing kau zàr ka hmuh" ka ta. 12 LALPA chun, "I hmu indik ie, ka thu hlen dàn ding ka melkâi zing a nih" a ta. 13 LALPA thu chu ka kuomah a hung tlung nawk a, "Iem i hmu a?" a ta. Kei chun, " Hmar tienga bêl intlok bor bor ka hmu a, hieng tieng hin a hung so liem têp a nih" ka ta. 14 LALPA chun, "A rama chênghai po po chungah hmar tienga inthokin sietna a hung tlung ding a nih. 15 Hmar tieng lalrama chêng po pohai hi ka ko suok têp tawl an tah" a ta. "An lalhai chu hung an ta, Jerusalem kotkhàr bulah, An lalthungpha hung rem an ta, A bang po po chu inhuol an ta, Judai rama khuo po po khom, Anni chun inhuol an tih. 16 Rilo taka mi màksan a, Pathien dang hmaa rimtui inhlàn a, An kuta siem an biek leiin, Anni chu ka hrem ding thu, Ka hung puong lang ding a nih. 17 "Chuleiin, insiem zo nghal rawh. Ngîr suok la, hril dinga thu ka pêkhai che chu an kuomah va puong rawh. An hmaah zâm dèr naw rawh, chuong naw chun an hmaah sukzâm ka ti che. 18 Voisun hin a ram puma Juda lal le hotuhai, thiempuhai le mipuihai chu ep dingin khawpui kul nghet tak nei, thîr ban le dâr bang nei angah ka siem che a nih. 19 Bei an ti che a, sienkhom hnè nawng an ti che, kei i kuomah ka um a, san suok ka ti che" ti hi LALPA thu suok a nih.

Jeremiah 2

1 LALPA thu ka kuomah a hung tlung a: 2 Fe la, Jerusalem hriet ngeiah, Hieng thuhai hi puong dar rawh:'I tleirawl le mo thar laia, I mi suklawm nuomzie kha, Ka theinghil ngai hrim hrim nawh. I mi hmangai êm êm a, Tuk lo ram thlalèra khom, I mi zui hlak a ni kha. 3 Israel chu LALPA ta d'in, Mi thienghlim tak la niin, A tharsuok hmasa a nih; Ama fa ramtuhai chu, Thiem naw changa ruot an na, Sietnain a tlâk buok hlak'Tiin LALPA chun a hril. 4 Nangni Jakob sûngkuohai, Israel thla po pohai, LALPA thu hi lo ngai ro. 5 Hieng hin LALPA chun a hril:"Inthlatuhan keimaah, Ieng am fel nawna hmuin, An mi fesan dai a na?Hmangna bo milem bein, Hmangna boah an insiem a. 6 'Aigupta ram a'nthok a, Thlalèr ram tawl pal tlang a, Ram fil, ruom inthûk kâr a, Thìna hlim le ram tawl hmun, Tu khom inzin ngai nawna, Tu khom chèng ngai nawnaa, Mi thuoi tlangtu LALPA kha, Khaw lai am a um ta a?'Tiin an indon ta nawh. 7 Ram tha le a tharsuokhai, Hnienghnâr taka tlàn dingin, Keiman ka thuoi lùt cheu a, Sienkhom in hung lùt hnungin, A ram in sukporche a, Ka rochan in sukmuolpho. 8 In thiempuhai chen khomin, 'Khaw lam LALPA a um a?'Ti hrimin an indon nawh. Dàn kengkawtuhai khomin, Keima an mi hriet naw a, Thuoituhai ka lakah an hel. Zawlneihan Baal hmingin, In kuomah thu an hril a, Milem hmang lo an zui a. 9 "Chuleiin khing ka ti cheu, In nauhai thlahai chen khom, Ka khing pei ding cheu a nih, Tiin LALPA chun a hril. 10 Kittim thlierkàrah fein, A kamhai zu fang ta u'm; Kedarc chen mi tir unla, Ngun takin bi chieng hai sien, Hieng hi an thaw hlak hrim am, Ti dâm en fie raw hai se. 11 Pathien tak ni naw sien khom, Hnam danghai chun an pathien, An thlàk mei mei hlaka maw?Ka mihai ruok chun an Ropuina, Milem hmangloin an thlàk si. 12 Vànhai, in pangzat naw maw?Maktiin inthin hawp ro"Tiin LALPA chun a hril. 13 Ka chungah thil suol pahnih, Ka mihaiin an thaw a:Hringna tui kei mi hnawlin, Tuikhur ding an cho fawm a, Tuikhur kak le fâm thla zing, Tui intling thei lo ding chu. 14 Israel chu siehlaw a ni?Vanlunga piengd am a ni?Ieng leia râllâk thila, A'n chang el am an ta a? 15 Sakeibaknei inrûmha'n, An inhûk khum dur dur a, A ram an sukpawn zo a, A khuohai an raw fai a, Hnung son ram an inchangtir. 16 Memfise le Tapanhes-haiin, I lu an vaw kol rìt a. 17 LALPA i Pathien thuoi lai che, Nangin i tlànsan leiin, Hieng thilhai hi i chungah, I'n tlungtir a ni naw maw? 18 Sihorf tuihai dawn dinga, Aigupta tieng i pan hi, Iem a na i hlawkpui ding?Eufretis tui dawn ding a, Asuria-a i fe chu, Iem a na i hlawkpui ding? 19 I rîtlonan hrem a che a, I hnungtolnan zil a ti che. Tìna hlek khom mi nei loa, LALPA i Pathien i tlànsan hi, Ieng ang suol khà am a na, Ngaituoin hre suok ta rawh, "Lalpa, Iengkim LALPA chun a tih. 20 Tiena tlânga inthok khan, I ringkol suktliekpèkin, I khaidiet ka suktan a, Sienkhom, ka rong bawl loin, Tlâng sâng thing buk tin hnuoiah, Milem hmaah bokkhupin, I mi hur hmangsan lem a. 21 Grêp inziet tak ang leTha tak ang ka phun che a, Ieng leia grêp puopaa, I hung inchang am a na? 22 Changala insawp faiin, Sabon innàl teu la khom, Porchè i kaina lai chu, Ka mitah a'n lang zing tho, Chunghnungtak LALPAN a tih. 23 'Porchè ka kai hrim hrim nawh, Baal ka hnot zui ngai nawh'Iengtin am i ti thei a?Ruoma i um dàn en la, I thilthawhai ngàituo rawh. Sanghawngsei hur lai angin, Ram tinah i tlân vêl kha. 24 Ram sabengtung hur laia, A chàkna a suok chàng a, Thli chen a'n hnam hlak angin, Tuin am i chàkna chu, An chel hnè ta ding a na?A hung beiseituhaiin, An zong sawl che ngai loin, Anni i hnot lem hlak si. 25 Ram dang pathienhai hnotin, I kè sukna pha naw la, I dang khom suktawl naw rawh. Sienkhom i poisa naw a, 'Inhrilin a sawt ta nawh, Ram dang pathien ka ngai a, Ka hnot naw thei naw a nih'Tiin i don lem si kha. 26 "Rûkru an man suok pha a, A'n zak êm êm hlak ang hin, Israel sûngkuohai khom, An lalhai le hotuhai, Thiempuhai le zawlneihai, An muolpho vong ta si a. 27 Thing kuomah, 'Ka pâ i nih, 'Lung kuomah 'I nau ka nih'Tituhai chun hnung nghatin, An hmai an mi'n son nuom nawh. Sienkhom, buoina an tuok pha, 'Hung la, mi hung san suok rawh'An ti nawk ang loi bok si. 28 In kutsuok pathienhai chu, Khaw la'm an um zo ta a?Hung san suok raw hai cheu chu!Aw Juda, khuo i nei zàt anga tam, Pathien i nei bok si a! 29 Ieng leia in mi khing am?Ka lakah in hel vong si, "Tiin LALPA chun a hril. 30 "I nauhai chu ka hrem a, Sienkhom ieng khom a sawt nawh, That phana'n an hmang chuong nawh. Sakeibaknei hnukrawl angin, Nangni rawi kawlhnâm ngei chun, Ka zawlneihai a lem hlak. 31 "Nangni tuta ruoltharhai, LALPA thu hi ngaituo ro:Israelhai ta dingin, Thlalèr ka ni am a ni?Thim sa ka chang ta'm a ni?Ieng leia ka mihaiin, 'Kan zalen engthawl ta a, I kuom tieng kîr nawng kan tih'Tia an hril am a na? 32 Nuhmeiin a'n cheinahai, A theinghil hlak am a ni?Mo khomin a mo thuomhai, A theinghil hlak am a ni?Ka mihai ruok chun ni tam, Tiem seng loa sawt hiel chu, An mi lo theinghil ta si. 33 Ngaizawng zawr i va thiem de!Nawchizorhai chen hiel khom, I zirtir thei an ta hi! 34 Mihaiin i silfènahPoi tawk lo le retheihai, Thisen kai chu an hmu a; I in rok naw hai sien khom, I sukhlum tawl a ni kha. 35 Chuong sà khom chun nang ruok chun, 'Ieng khom suksuol ka nei nawh, Ka chungah a lungsen nawh'I la ti ta tàl si a. Thiem changa i'n ngai leiin, I chungah ro rêl ka tih. 36 I um dàn thlâk zung zungin, Ieng dinga mi dawr kuol che?Asuria thaw ang bok khan, Aigupta khoma thawin, La sukzak vèng a ti che. 37 I lua i kut suiin, Chu hmun chu suoksan i tih, Ringsana i neihai chu, LALPAN a hnawl tawl leiin, Hung thangpui nawng an ti che.

Jeremiah 3

1 "Miin nuhmei ma sien la, Suokin pasal dang nei sien, A nuhmei chu a ko nawk ding?A ram a sukporchè vong naw ding?Nang khom nawchizor ang elin, Ngàizawng i kop rawn êm êm a, Ka kuomah i kîr nawk ding maw?"Ti hi LALPA thu suok a nih. 2 Tlâng kol lul tieng khi thlîr la, An zalpui nawna che hmun hrim, Khaw lai am a um rêng rèng a?Thlalèra chêng Arab mi angin, Zàlpui ding nghâkin lam sîrah, I thung ngat ngat hlak a ni kha. I hurna le ritlonain, Ram i sukporchè zo ta hi. 3 Chu lei chun ruo a sûr naw a, Thâl ruo hrim khom a sûr naw hi. Chuong sa khom chun hmai suksain, Zakmaw nawchizor ang elin, Inzak hmèl hrim i put naw hih. 4 Tu el khom khan mi hung koin, "Ka naupang laia inthoka, Mi hmangaitu ka Pâ i nih; 5 I lung i suksen zing ding maw?Kumkhuoin a sen el ding maw"Tiin i hung tong a ni kha!Sienkhom a suol theipatawpin, Suol i la thaw zom zing tho" 6 Lal Josia inlal laiin LALPAN ka kuomah, "Hnung tol hmang Israel thilthaw kha i hmu am? Tlâng sâng tinah fein, thing buk tin zàr hnuoiah a uire a. 7 Hieng ang thil a thaw hnung hin ka kuom tieng hung kìr nawk naw ni'm ka lo ti a, sienkhom a hung kìr chuong naw a, a zuorpuinu mi ringum lo Juda khomin a hmu a. 8 Hnung tol hmang Israel chu màkna lekha ka pêk a, a uiretna zozai lei chun ka tir hmang a. Chu chu a zuorpuinu mi ringum lo Juda-in a hmu zing sa khomin a mi tì chuong naw a, a fe suok a, a va uire ve a. 9 Israelhai uiretna chu ienga khom ngai loin, a ram chu sukporchein, thing le lung bul bein a uire a. 10 Chuong sà khom chun a zuorpuinu Juda chu ringum loin a um a, a lungril taka thaw loin ka kuom tieng a hung kìr tehlèm a" tiin LALPA chun a hril. 11 Chun, LALPA chun ka kuomah hieng ang hin a hril a: Mi ringum lo Israel chu a zuorpuinu mi hlêm hmang Juda nêk chun fel lemah a'n ngai a nih. 12 Hi thu hi hmar tieng va puong dar ro:'Mi ringum lo nang Israel, Hung kìr rawh, LALPAN a tih; Mel rum ta naw ning chengah, Zàngai thei tak ka ni si a, Lungsen kumkhuo naw ningah'Ti hi LALPA thu suok a nih. 13 LALPA i Pathien helsanin, Thing buk zâr tin hnuoia hai, Ram dang pathienhai lakah, Indawin i'n phalrài a, Ka thu hril i zawm nuom nawh, Ti hi pomin inpuong rawh"Ti hi LALPA thu suok a nih. 14 "Nangni mi ringum nawhai, hung kìr ta ro" ti hi LALPA thu suok a nih. "Kei hi in pasal ka na, a thlangtu cheu ka nih. Nangni laia mi khawpuia mi pakhat le sûngkuoa inthokin mi pahnih ka thlang ding cheu a na, Zion-ah thuoi ka ti cheu. 15 Ka lung tuok mi berampuhai pêng ka ti cheu a, anni chun hrietna le hriet thiemnain keithuoi an ti cheu. 16 Chu huna nasa taka mi in hung pung pha chun, 'LALPA thuthlung bawm' in kol lai hun kha ngai ta nawng in ta, hre fu ta bok nawng in ta, Thuthlung Bawm siem nawk ngai ta bok naw nih. 17 Chu pha chun Jerusalem chu 'LALPA Lalthungpha' ti hung ni tàng a ta, hnam tinhai chu LALPA hming chawimawi dingin Jerusalemah hung an tih. An lungril suol le lululna chu put zing ta naw ni hai. 18 Chu nia chun Juda sûngkuohai le Israel sûngkuohai chu infin an ta, in thlatuhai hluo dinga ka rochung rama chun hmar tienga inthokin hung tlàng an tih. 19 "Keima ngeiin hieng hin ka hril kha:'Ka nauhai anga en a, Ram ditum tak chu pe a, Hnam tu khom hluo nêka tha, Ram inrochungtir cheu a, Kei mi zui hi ma loa, 'Pâ' tia in mi ko hi, Ka lo beisei hlak a na. 20 Sienkhom, nuhmei ringum lo, Pasal uiresantu angin, Aw, Israel sûngkuohai, In mi uiretsan si a"Ti hi LALPA thu suok a nih. 21 Tlâng kol vula inthoka, Israelhaiin thil ngènaAn tap ri chu ka hriet a, LALPA an Pathien theinghilin, Lam naw tieng an pèt ta si. 22 "Nangni mi ringum lohai, Ka kuom tieng hung kìr ta ro; In hnung tolna lungril chu, Keiin lo sukdam ka tih. ""Ni e, hung kîr ngei kan tih, Kan LALPA, Pathien i nih. 23 Muol le tlânga inthoka, Kan milem biek so ri hi, Inhlèmna vong a lo nih; Nang chu LALPA kan Pathien, Israelhai sandamna, I lo ni takzet si a. 24 Kan tleirawl lai a'nthok khan, Kan thlatuhai inrim ra, Beram ruol le bawng ruolhai, An naupa le naunu chenin, Inzakna hre phâk dèr lo, Milem biekna mei meiah, Kan lo sèng ral hlak si a. 25 Ei muolphona chu silin, Inzak takin zâl ei tiu. LALPA ei Pathien chungah, Eini le ei thlatuhan, Thil suol ei thaw hlak si a; Ei tleirawla inthoka, Voisun hunhai chen khomin, LALPA ei Pathien thu chu, Ei zawm nuom ngai si naw" in tih.

Jeremiah 4

1 "Aw Israel, i lamlèt ding a ni chun, Keima tieng hung kìr nawk rawh"Ti hi LALPA thu suok a nih. "I milem tirdakumhai, Ka hmu loah sie hmang a, I pêt hmang ta naw ding chun, 2 Thudik lampui chu hraw a, Indik tak le fel taka, Nun hmang dinga i'n tiem chun, Hring zing LALPA hming sâlin, Hnamhai chu malsawm ka ta, Annin mi chawimawi an tih. " 3 Judai rama mihai le Jerusalem mihai kuomah LALPA chun hieng hin a hril:"In hnuoihai inlet unla, Hling lai thlài chî thlâk naw ro. 4 Nangni Juda mihai leJerusalema chênghai, LALPA-ah ser tan unla, In lungril ser chu tan ro. In tan nuom naw a ni chun, Ka lungsenna chok a ta, Kàng hmât tawl rawi a ti cheu, Tu khom thel ruol ni naw nih. 5 "Judai ramah hril unla, Jerusalemah puong ro:Ram pumah tawtawrawt mûtin, 'Inrêngin hung tlàn khawm unla, Kul nei khuoah tlân lût ei tiu', Tiin inring takin khêk ro. 6 Zion tieng pan dingin hril ro, Himna hmun zongin tlân nghàl ro!Hmar tienga inthokin sietna, Ka hung intlungtir ding a nih, Sietna râpthlâk tak el chu. " 7 A buzawla inthokin, Sakeibaknei a hung suok, Hnamhai suksetu ding chu; A umna a suoksan tah, In ram sukram vong dingin. In khuohai tlu ram a ta, Hluotu tu khom nei naw nih. 8 Chuleiin, saiip silin, Tap le inrûmin khêk ro. LALPA lungsenna râpthlâk chun, Ami la'n kiengsan si naw a. 9 LALPA chun hieng hin a tih: "Chu ni chun, lal le hotuhai lungril zâm a ta, thiempuhai chu thlabâr an ta, zawlneihai pang inzâng a tih. 10 Chun, kei chun LALPA kuomah, "Aw Chunghnungtak LALPA, hieng mihai le Jerusalema mihai hi i hlèm letdèr a ni hi! 'Thlamuong takin um in tih' i ti a, kan rìng le kawlhnâm an inmat ta si hi" ka ta. 11 Chu pha chun hieng mihai le Jerusalem mihai kuomah, "Thlalèr tlâng fila inthokin ka mihai tieng thli lum tak a hrâng a, sienkhom ka mihai zâp fai ding le mût fai dinga hrâng a ni nawh. 12 Thli na tak chu keimaa inthokin hung a tih. Tuhin an chungthu hi keiin rêl ka tih" ti thu inhriettir nîng an tih. 13 Ngai ta, sûmpui angin a hung a, A tawlailirhai khom chu, Thawngaleivir ang a na, A sakor thuoihai khom chu, Mupui vuong nêkin an hràt lem. Ei chung a va hang pik de aw!Ei se let dêr an ta hi! 14 Aw, nang Jerusalem, Sandam i ni theina dingin, I lungril suol sawp fai rawh. Ieng chen am lungril rilo, I la put pei ding a na? 15 Dan le Efraim tlângramah, I siet tuok ding an puong tah. 16 I vêla hnamhai hril la, Jerusalemah puong rawh:'Ram hla taka inthokin, Mi'n huoltu ding an hung a, Judai ram khuo po poah, Indona thu an puong a, 17 Lo vèngtuhai ang elin, Jerusalem an inhuol, Ka chungah an hel leiin'Tiin LALPA chun a hril. 18 I nungchang le thilthawin, Hieng thilhai hi i chungah, A hung intlun a ni hi. Hi hi i hremna tuor chu a na, Nâ khom i ti êm êm a, I lung a sun tlang a ni hih. 19 Aw a na ngei, aw a na ngei!Nâ ti taluo'n ka'n kon a. Aw, ka lung a va hang dong de!Ka lung an inthumhron a, Ka'n rûm naw thei naw a nih. Tawtawrawt ri chu ka hriet, Indo râlkhêl rihai chu. 20 Sietna chungah sietna a tlung, A ram pumin a tlu hmât a, Ka chèngna puon in ngèi khom, Thawk-le-khatin a tlu ram tah. 21 Ieng chen am indo hi hmuin, Tawtawrawt ri ka ngaithlàk ding? 22 "Ka mihai an invèt zo a, Tu am ka nih an mi hriet nawh; Naupang invèt ang an na, Hriet thiemna an nei tlat nawh. Thil suol thaw tieng an balam a, Thil tha thaw an thiem si nawh. " 23 Leihnuoi hi ka zuk en a, Ruongâm bo le ruok a na, Vànah var hrim a um nawh. 24 Tlânghai chu ka hei thlîr a, An inthin dur dur el a, Muolhai chu an inthèn a. 25 Ka ngha vêl a, mi an um nawh, Chunglèng vate po po khom, An vuong hmang zo vong ta si. 26 Ka hang ngha vèl a, ngai ta, Lo hmun thahai po po chu, Thlalèr an inchang vong a, LALPA lungsenna hmaah, Khuohai an tlu ram vong si. 27 LALPA chun hieng hin a tih:"A ram pumin sieng a ta, Sienkhom sukram vong naw ning. 28 Chuleiin, hnuoi ngûi a ta, Vàn khom inthim khup a tih; Ka hril tah chu sût naw ning, Ka rèl tah chu hlen ka tih. 29 Sakor chungchuong mihai leThalngul chawituhai ri hrie'n, Khaw tina mi tlân sieng an tih. A then ram hnuoiah tlân lûtin, A then lungpuiah kâi an ta, Khuohai rausan vong an ta, Hluotu tu khom um nawh. 30 Aw, nang mi roka um nu, Ieng am a na i thaw kha?Puon senlàra inthuomin, Rangkachak incheinahai, Ieng leia i'n bel am a na?Ieng leia i mit dâm kha, I nàl dum vèl am a na?Inchei la khom a sawt nawh. I tlangvàlhan an hnawl ta che, I hringna a nih làk an tum. 31 Nau lutîr hring ding nuhmei, Nau hase tuor inrûm anga, Zion naunu inrùm ri ka hriet; A kuthai chu phar vêlin, "Ka chung a va pik de aw!Tuolthattu kutah ka nun, Pèkin a um ta si a"Tia a khèk lai ri chu.

Jeremiah 5

1 "Jerusalem kotthlêra hinA suk a tungin tlân vèl la, Tuolzawlahai zong vong la, Indik taka thilthaw hlak, Thutak zong mi pakhat bêk, I hmu pal hlauh a ni chun, Hi khuo hi ngaidam ka tih. 2 LALPA hringna sâlin thu, Intiemin inkhâm sien khom, Khêlin an inkhâm zing tho. " 3 Aw LALPA, thutak i zong a, I vuok tawl a, nâ an hriet nawh, I rawt nawi, an sim chuong nawh. Lung thìr nêk a chang hielin, An hmèlhai an sukrum a, Sim an tum chuong dêr naw. 4 Kei chun, "Mi pasie an ni a, An mawlin an invêt bok a, LALPA lampui an hriet naw a, Pathienin an thaw vè dingaA tuk chin khom an hriet nawh. 5 An thuoituhai kuomah fein, Anni chu inbiekpui ka tih; Anni chun LALPA dànhai lePathien thu tak hrieng an tih"Tiin ka lo ngaituo hlak a. Sienkhom zai khata luongin, An ringkol an suktliek a, An khaidiet an suktan a. 6 Chuleiin, ram palailèngah, Sakeibakneiin sèng a ta, Thlalèra satenen pot chen an ta, An kotah keiten inchàn a ta, A suok phot lo pot chen a tih, An hel dàn hi a râpthlàk a, An hnungtolna a tam bok si. 7 "Ieng leia ka ngaidam ding che?I nauhan an mi nghatsan a, Pathien ni lohai hming chu, Sâlin thu an inkhàm a. An mamaw po ka phuhrùk a, Sienkhom an mi uiresan a, Nawchizor bûkah an intom. 8 Sakor hur chawm thau angin, Mani tuolbawm nuhmei châkin, A tu el khom an inhrâm si. 9 Hi lei hin ka hrem naw ding maw?Chuong ang hnamhai chunga chun, Phuba ka lâk naw ding maw?"Ti hi LALPA thu suok a nih. 10 "A grêp huon hang suosam ro, Amiruokchu sukram naw ro. A kâuhai sât thla vong ro, LALPA ta an ni si naw a. 11 Israel le Juda sûngkuohai chu, Ka lakah an ringum naw hulhuol"Ti hi LALPA thu suok a nih. 12 LALPA chungthuah khêl hrilin, "Ieng khom mi law teu naw nih, Sietna ei chungah tlung naw nih; Tàm le kawlhnâm tuok naw'm ei nih. 13 Zawlneihai chu thlî ang chauh, Anniah thu a um nawh; An hrilhai po po khom chu, An chungah tla vong raw se"Tiin an hril hlak a ni kha. 14 Chuleiin, LALPA Iengkim Pathien chun hieng hin a hril:"Chuong chu an hril hlak leiin, I bàua ka thuhai hi, Meiah inchangtir ka ta, Meia raw hmang vong dingin, Hieng mihai hi thingherah, Inchangtir tawl vong ka tih. 15 Aw, Israel sûngkuohai, Nangni beitu ding cheuin, Hnam danghai hung thuoi ka tih, Tiin LALPA chun a hril. Hnam upa le hnam tlo tak, An tong khom i hriet ngai lo, An hril khom i man phâk lo, Ka hung thuoi ding a ni si. 16 An thal bawm thlàn inhong ang, Râl hrât khawkhêng vong an nih. 17 I lo tharsuok fa ram an ta, I naupa le naunuhai lem an tih. I beram ruol le bawng ruolhai, I grêp rà le theichang ràhai, Anni chun fa zo an ta, Kul khuo i ringsanhai chu, Kawlhnâmin suksieng an tih. 18 "Chuong nia hai khom chun sukchimit nawng ka ti cheu" ti hi LALPA thu suok chu a nih. 19 "Mihaiin, 'Ieng dinga LALPA ei Pathienin hieng thil hi ei chungah a thaw el am a na?' an ti huna chun, 'An mi fesan a, an rama ngei ram dang pathien rong an bawl angin, tu hin mi ramah ram dang mihai rong an bawl ding a nih' tiin la hril in tih. 20 Jakob sûngkuo kuoma le, Judai ramah hi hi hril dar rawh: 21 Mi invèt le chawlolhai, Mit nei sia hmu thei si lo, Na nei sia hre thei si lohai, Hi thu hi lo ngaithla ro: 22 In mi tì ding an naw maw?Ka hmaah in inthin naw maw?Tuipui ramri dinga tieupho, Kumkhuoa a kàn lo ding, Khampêktu chu kei hi ka nih. Tuipui fawn invor sienkhom, A kuong a liem chuong naw a, Inri hum hum sienla khom, A ramri a pèl ngai nawh. 23 Sienkhom hienghai lungril hi, A lululin a hel a, An tukhnungkhur mi'n nghatin, An mi fesan tah a nih. 24 An lungril suongtuonaah, 'Ruo hmasa le ruo nuhnung, A hun taka hung tirtu, Bu sîk hun mi ruotpêktu, LALPA ei Pathien ngei chu, Ei tî ding a nih' ti nachâng, An ngaituonaah a um nawh. 25 In bawsietnahai leiin, Hieng thil hi in chàn hlak a, In suolna leiin thil tha, In chang naw pha hlak a nih. 26 Ka mipuihai laia hin, Mi rilo ruol an um a, Vate vètu ang elin, Mihai an inchàn rûk a, Châng kamin mi an awk a. 27 Vatea sip bawm angin, An in inhlèmnan a sip a, An hung hausa tuol tuol a, Thil an thaw thei deu deu bok. 28 An thàu a, an hung nàm a. Thil tha naw thawna tiengah, Chin tawk hrim hrim an nei nawh. Fahràhai chan thatna ding, An hrilpêk nuom ngai naw a, Pasiehai an tan ngai nawh. 29 Hi lei hin hrem tawl loin, Ka um el ding am a ni?Chuong ang hnamhai chunga chun, Phuba ka lâk naw ding maw?"Ti hi LALPA thu suok a nih. 30 Thil râpthlàk le pangzatum, Hi rama hin a tlung a: 31 Zawlneihan khêl an hril a, Thiempuhan an thu hmangin, Nuom dàn dânin an rêl a, Chuong ang zawnga khawsak chu, Ka mipuihan an lawm si. A tawp iem ni tâng a ta?

Jeremiah 6

1 "Nangni Benjamin thlahai, Himna zongin tlân hmang ro, Jerusalem suoksan ro!Tekoa-hai hril dingin, Tawtawrawt chu mût unla, Beth-Hakerem-ah puong dar ro!Hmar tieng panga inthokin, Sietna a hung inthok ie, Tlàksietna râpthlâk tak chu. 2 Zion naunu hmêl tha leInno chu suksieng ka tih. 3 Ama chu hung do dingin, Berampuhai chu hung an ta, An beram ruol hung thuoi an ta, A vêlah puon in kei an ta, An nuomna sengah um an tih. 4 "Do dingin inbuotsai ro khai!Tho ro, sùnchangah bei ei tiu!Sienkhom, a va hang poi ngei de!Nisa a tla dier dier ta a, Ni hlim khom a sei ta hle hi. 5 Thaw ro, zànah bei lem ei tiu, A kulhai ei suksiet ding a nih. " 6 Iengkim LALPA chun a hril:"A thinghai phûr thlu unla, Jerusalem inhuolna dingin, A vêlin hnuoi sung pawng ro. Nêksawrnaa sip khawpui hin, Hremna a tuor ngei ding a nih. 7 Tuikulah tui a pût angin, Khawlona a phù suok zing a. Inpawngnêkna le inroknahai, A sûnga hin a hluor a; A natna le hliemna tuorhai, Hmu ding a um zing a nih. 8 Aw Jerusalem, fimkhur hlè la, Ka zilna che hi poisa rawh; Chuong an naw chun nghatsanin, Hmun rausanah siem ka ti che a, Hluotu hrim nei naw ti nih. " 9 Iengkim LALPA chun hieng hin a tih:Israel mi hlaa um sunhai chu, Grêp rà i lo fai kèl angin, An rêngin rût khawm vong la, A kâu tin chu kuta maiin, A rêngin lo fài kèl rawh. " 10 Tu am bein, fimkhur dingin, Ka'n hriettir ta ding a na?An ngaithlàk nawna dingin, An nàhai an sukset a, LALPA thu chu an ta dingin, Ngai nghokum a'n chang ta a, An hlimpui ta hrim hrim nawh. 11 Sienkhom LALPA lungsennan, A mi hluo sip tlat leiin, Insùm harsa ka ti a nih. "Khawlaia naupang ruol leTlangvàl pungkhawmhai chungah, Bun suokin hrîkthla el rawh; Nupa khomin tuor an ta, Upa, tarkûna damhai khomin. 12 Chu rama chênghai chunga, Ka kut hi kan let pha chun, An in le lo le nuhmeihai, A rêngin chân vong an ta, Mi dangin neipêk an tih"Ti hi LALPA thu suok a nih. 13 A chîn taka inthokaA lien tak chenin tu khom, Duàmnain an sip a, Zawlnei le thiempuhaiin, Mi hlèm ringot an thaw a. 14 Ka mihai hliempui tuor chu, Rûndàlin an tuompèk a, 'Dam a tih, dam a tih' an ta, A dam chuong teu si naw a. 15 An chàng dàn luoksuokum chu, An inzàpui dèr naw maw? Inzàpui teu teu lo e!An hmài a tim hrim hrim nawh. Chuleiin, a tluhai lai, Anni khom tlu vêng an ta, Anni ka hrem huna chun, Pei thlâkin um vong an tih'Tiin LALPA chun a hril. 16 LALPA chun hieng hin a tih:"Lamthuomah ngîrin en ro, Lampui hlun chu indon ro, Lampui tha indon suok unla, Chu lampui chu hraw unla, Chu chun in thla muong a ta, Chawl hadamna hmung in tih. "Amiruokchu, nangni chun, "Hraw nawng kan tih" in ti si. 17 Nangni enkaitu dingin, Râlvêngtuhai ka sie a, "Tawtawrawt ri ngaithla ro"Tiin ka hril diem cheu a, Nisienlakhom, nangni chun, 'Ngaithla naw ning' in ti si. 18 An chunga thil tlung ding chu, Aw hnamhai, ngaithla unla, Hrepuituhai, en chieng ro. 19 Aw leihnuoi, lo ngaithla rawh, Hienghai chunga hin sietna, Ka hung intlun ding a nih, An thil phanhai râ ngei chu; Ka thuhai ngaithla loin, Ka dànhai an hnawl si a. 20 Seba a'nthoka rimtui le, Ram hlaa mafu hmui chu, Iem a na ka thlâkhla ding?In pumraw thilhlànhai chu, Lawm tlâkah ka ruot naw a, In inthawinahai khom chun, A mi suklawm chuong bok nawh. " 21 LALPA chun hieng hin a tih:Hieng mihai lampuia hin, Tlûkna ka sie ding a nih. Pâhai le naupâhai chu, Inpal thlu rem rum an ta, Tuolbawmhai le ruolhai khom, Tlu hlum rem rum tawl an tih. 22 Hi hi LALPA chun a hril:Hmar tieng rama inthokin, En rawh, sipai an hung saw; Hnuoi kila hnam ropui chu, Chok thoin a um mèk tah. 23 Thal ngul le fei an chawi a, An kolin zà an ngai nawh. Sakora an tlàn ri chu, Tuipui inrum ang a na, Râlthuom an inbel vong a, Do ding chea hung an nih, Aw, nang Zion naunu. " 24 An rìva kan lo hriet a, Kan kuthai a zoi zo tah. Lungngainan a mi man a, Nau hase tuor ang kan nih. 25 Ram tieng fe suok naw unla, Lampuiah invâk naw ro, Hmêlmahan kawlhnâm an chawi, Kil tinah râl an hung lien. 26 Aw ka mihai, saiip silin, Vut lai intâl ta ro khai; Naupa mal chân ang topin, Sûnin tap rak rak ta ro, Sawt nawteah suksetu'n, A mi nang thut ding a nih. 27 "Thîr fietuah ka siem che a, Ka mihai hi kapathîr an na, Fiein an lampui inchieng rawh. 28 An rêngin hel hmang an na, Mi hrilsiet an hmang bok a, Dâr le thîr ang hi an na, An thilthawna iengkimah, Ngharêk an kai vong a nih. 29 Pùm zâptun a zâp ling a, Suon chu a'n tui ral vong hlak. Annihai rawi ruok hi chu, Mi suolhai pei vong naw chun, Sukthieng tum a tangkai nawh. Tangkaruo êk sie ang a, LALPA hnawl hnung an ni si. 30 (A um nawh)

Jeremiah 7

1 LALPA thu chu Jeremia kuomah a hung tlung a: 2 "LALPA in kotkhàra chun ngîr la, hi thu hi puong rawh: 'Nangni Juda mi, LALPA chawibiek dinga kotkhàr sûnga hung lùthai, LALPA thu hi ngaithla ro. 3 Iengkim LALPA, Israelhai Pathien chun hieng hin a tih: In um dàn le in thilthaw dànah insiemtha unla, hi hmuna hin inchèngtir ka ti cheu. 4 'Hi hi LALPA tempul, LALPA tempul, LALPA tempul' in ti lei ringota him dinga in inring a ni chun chu chu khêl a nih. 5 "In um dàn le thilthaw dànhai in insiem tha takzet a, indik taka indawr tuo a, 6 hnam dang mihai, fahrahai le hmeithaihai poi tawk lo a, hi hmuna hin thisen in insuo naw a, in sietna ding pathien dang in zui naw phot chun, 7 hi ram, tiena tlânga inthoka in thlatuhai kuoma ka pèka hin, kumkhuoin inchêngtir ka ti cheu. 8 Sienkhom en ta u, khêl thu, thu hmang lo chu in ringsan lem si. 9 "Rûk inruin, tuol thatin, uirein, pathien danghai hming sâla inkhâmin, Baal hmaah rimtui rawin, in hriet ngai lo pathienhai chu zui zing siin, 10 tu hin hi tempul, keima hming ngei chawitua hin in hung a, ka hmaah ngîrin, 'Ei him tah ie!' in ti hin, hieng thil tirdakum po po hi thaw thei dinga him taa inngai in ni? 11 Hi tempul, ka hming chawitu hi suomhmang pûka in ngai am a ni? Ka bithlâk zing cheu a nih" ti hi LALPA thu suok a nih. 12 "Ka hming chêngnaa ka hmang hmasak Siloa chun fe unla, ka mi Israelhai rîtlona leia ka thilthaw chu va en ro. 13 Hieng thil in thaw zing pum khomin, kei chun ka la biek tawk tawk cheu a, sienkhom in mi ngaithlàk naw a, ka ko cheu a, in mi don bok nawh, LALPA chun a tih. 14 Silo chunga ka thaw ang khan, hi tempul, ka hming chawitu, nangni le in thlahai kuoma ka hmun pèk, in ringsan hlak chunga khom hin ka thaw ve ding a nih. 15 Efraim thla, in unauhai ka hnot suok vong ang khan, nangni khom ka kuoma inthokin hnot suok vèng ka ti cheu, ti hi LALPA thu suok a nih. 16 "Chuleiin, hieng mihai hi hung tongtaipèk naw la, an ta dingin ka kuomah dawvàn hung kai naw la, hung hnipêk naw bok rawh, ka ngaithlàk naw ding che a ni leiin. 17 Judai ram khuoa hai le Jerusalem kotthlêra an thilthawhai hi i hmu naw am a ni? 18 Naupanghan thing an fom a, pahaiin mei an sèm a, nuhaiin bei tlang an hmet a, vàn lalnu kuoma inhlàn dingin bei an siem a, pathien danghai kuomah dawn thilhlân uoiin an bun suok a, ka lungsen cho phawk dingin. 19 Kei hi a ní an cho phawk chu? Anni sietna ding le muolphona ding an thaw lem an naw maw?" ti hi LALPA thu suok a nih. 20 Chuleiin, Chunghnungtak Pathien chun hieng hin a tih: "Ngai ta u, hi hmun chunga dâm, mihriem le sahai chunga dâm, rama thing le hnuoia thei rahai chunga dâm ka lungsenna le lung inlingna chu hrîk thlàng ka ta, kàng a ta, mit naw nih" tiin. 21 Hi hi Iengkim LALPA, Israelhai Pathien chun a hril: "Fe unla, pumraw thilhlàn chu inthawina pangngaiah bel sa unla, a sâ khom chu fa law law ro. 22 Aiguptaa inthoka in thlatuhai ka hung thuoi suok khan, pumraw thilhlân le inthawina thilhlân chungchàngah in thlatuhai kuomah ieng khom ka phût nawh. 23 Hi thu hi a nih ka pêk lem chu: 'Ka thupêk zawm unla, in Pathien nîng ka ta, ka mihai nîng in tih. Ka thupêk ang taka in khawsa chun, in ta dingin thâng a tih, ' tiin. 24 Nisienlakhom, an ngaithlàk naw a, an ûksak bok nawh; chuong nêk hmanin, an lungril tha naw tieng chu awnin tuklul an insuo a, hma tieng pan nêkin an hnungtol ta lem a. 25 In thlatuhaiin Aigupta an suoksana inthoka voisun chen hin ka rongbawltu zawlneihai chu in kuomah ka tir ni tin hlak a. 26 Nisienlakhom, an ngaithlàk naw a, an bengkhon bok nawh. Lululin rîng an sukkhong a, an thlàtuhai nêkin thil tha lo an thaw nasa lem. 27 "Chun, hieng thu po po hi an kuomah hril la khom ngaithla naw ni hai che a, ko la khom don naw bok an ti che. 28 An kuomah hieng hin hril rawh: Hi hnam hin LALPA an Pathien thu an ngaithlàk naw a, a keithuoina an zawm bok nawh. Thudik a bo ta a, an baua inthokin a suok ta nawh. 29 I sam tan la, peihawn rawh. Tlâng sâng kol vula chun lûsun angin um rawh. Hi suonhai chunga hin kei LALPA hi ka lungsen a, peithlain ka hnungson tawl ta si a. 30 "Judai rama chênghai chun ka mithmuah thil suol an thaw a. Ka hming chawitu ina chun an thil tirdakum milemhai siein an sukporche a. 31 Meia an naupa le naunuhai rawna dingin Hinom Ruoma chun Tofet bawlhmunhai an siem a, chuong chu ka thupêk a ni naw a, ka ngaituonaa khom a lût ngai nawh. 32 Chuleiin, fimkhur ro, nihai chu a hung tlung ding a ni tah, LALPA chun a tih. Chu pha chun mihaiin 'Tofet' amanih 'Hinom Ruom' ti ta loin 'Insàmna Ruom' ti ta lem an tih, a ruoma phûm sèng naw khop Tofeta chun mithi ruong zâl a tih. 33 Ruonghai chu chunglèng vatehai le ram sahaiin tlàn an ta, tu khomin hnot zâm naw ni hai. 34 Judai rama khawpuihai le Jerusalem kotthlêra hai chun lawmna le hlimna ri hrim hrim, mo le moneitu rawlhai khom sukrè vong ka ta, rausan ram inchang tàng a tih.

Jeremiah 8

1 LALPAN hieng ang hin a hril: "Chu phá chun Juda lalhai rù dàm, hotuhai rù dàm, thiempuhai rù dàm, zawlneihai rù dàm, Jerusalema chênghai rù dàm chu an thlàna inthokin la suok an tih. 2 Ngaina taka an rong an bawl, an zui, an rawn le biek hlak nisa le thla le vàna arasihai hmua chun an rùhai chu phor suok an ta, la khawm an ta, phûm nawk ta naw ni hai a, hnuoia hmunhnok dèng bùm angin indar a tih. 3 Hi hnam suol tak la um sun po po, ka hnot darna hmuna la chambânghai chun dam nêkin thì thlang lem an tih ti hi Iengkim LALPA thu suok a nih. 4 Chuong naw khom chu an kuomah, LALPA chun hieng hin a tih:Mi an tlu pha, tho ta loin, An um song hlak am a ni?An pèt hmang pha, kîr ta loin, An liem song hlak am a ni? 5 Ieng leia hi mihai hi, An pèt hmang hlak am a na?Ieng leia Jerusalem hi, A pêt hmang hlak am a na?Lam indik lo hraw tlatin, Hung kìr zai hrim an rèl nawh. 6 Nâ sitin ka ngaithlàk a, Thudik hril an um dèr nawh. "Iem ka thaw leh?" an ti a, An suol an bànsan nuom nawh. Indonaa sakor lìm angin, An lampui tieng seng an tlàn. 7 Chunglêng tuivaarngo chun, Hunbi inthlàk a hriet a, Vathu, vamûr le kànghlai ha'n, An inpèm hun ding an hriet. Keima mihai ruok hin chu, LALPA thuruot an hriet nawh. 8 Iengtin am 'Mi var kan nih, LALPA dàn koltu kan nih'In ti ngam hrim hrim a na?In lekhaziektuhaiin, An kawlom khêlhlip hmanga, An hlèm lei cheu a ni kha. 9 Mi varhai chu inzakin, Chî-àiin man tuok an tih. LALPA thu an hnawl si chun, Ieng varna'm nei tâng an ta? 10 Chuleiin mi dang kuomah, An nuhmeihai pêng ka ta, An in le lohai khom chu, Mi dangin chang tàng an tih. A chîn tak le lien tak chenin, Duàmna ringotin an sip a, Zawlneihai le thiempuhai khom, Mi hlèm ringot a nih an thaw. 11 Ka mihai hliempui tuor chu, Rùndâlin an tuompèk a, 'Dam a tih, dam a tih' an ta, A dam chuong teu teu si nawh. 12 An chàng dàn luoksuokum chu, An inzàpui dèr naw maw? Inzàpui teu teu lo e!An hmài a tim naw hrim hrim. Chuleiin, a tluhai lai, Anni khom tlu vêng an ta, Anni ka hrem huna chun, Pei thlâkin um vong an tih'Tiin LALPA chun a hril. 13 LALPA chun hieng hin a hril:"Sìk ding nei dêr naw ni hai, Grêp hrui rà naw ni a, Theichang rà bok naw ni a, A hnàhai vuoi vong a tih. An kuoma ka pêk po khom, La kîrpêk nawk vong ka tih"Ti hi LALPA thu suok a nih. 14 'Ieng leia inhawr khawma, Ei thung zing el am a na?Thaw ro, kul nei khuoa hai, Thi dingin tlân khawm ei tiu!LALPA ei Pathien hlak chun, A lakah ei suol leiin, Tûr tui a mi'n dawntir a, Bohmang dinga a ruot sa, Ei ni tawl vong tlat si a. 15 Muongna ei beisei hlak a, Sienkhom thil tha a tlung nawh; Dam hun ding ei beisei a, Thlaphângna chauh ei dong si. 16 Hmêlma sakor hnàr hnawt ri, Dan a'nthokin ei hriet a, An sakor inhràm ri chun, Ram pumpui a sukthin a. A ram sûnga um po po, Khawpui le a mi chènghai, Rawt ram dingin an hung ie" tiin. 17 " Nangni lai rûl tûr neihai, Tu khom khawi ngam thei lo chu, Ka hung tir tawl ding a na, Chuonghai chun chuk an ti cheu"Ti hi LALPA thu suok a nih. Jeremia'n Jerusalem a tà 18 Ka hlimna a hung chuoi a, Lungngainan a mi tuom a, Ka lung a na ngawi ngawi a. 19 A ram dung le khanga chêng, Ka mihai tap ri chu ngai ro:'Zion-ah LALPA a um naw maw?A sûngah a Lal a um naw maw?"Tia an tap khêk ri chu. "An milim siem fawmhai leHnam dang pathienhai bein, Ieng leia ka lungsenna, An cho phawk hrim am a na?" 20 "Bu sîk hun a liem ta a, Nipui khom a tawp ta a, Sandam ei la ni si nawh"Tiin mipui an beidong. 21 Ka mihai an hliem chàngin, Kei khomin ka tuor ve a, Hrilhaiin ka sùnpui hlak. 22 Gilead-ah thing hnai damdawi, A um hlol naw a ni maw?Chu taka chun sukdamtu, A um ve naw am a ni?Ka mihai hliempui tuor hi, Ieng leia a dam thei naw?

Jeremiah 9

1 Ka thlunglu hi siktui hnârah, Ka sîngmit hi mitthli hnârah, Inchang thei sien la chu aw!Ka mi an thathai sûnin, Sùn le zàn ka tà ding bah! 2 Thlalèrah khuolbûk nei lang, Ka mihai hi màksan daiin, Intom bo ka va nuom ngei!Uire hmang vong an ni si!Depde fuon khawm ruol an nih. 3 "An leiin khêl kâp suok di'n, Thal ngul angin a'n pei zing. A ram sûngah thudikin, Hnèna a chang thei ta nawh. Suol pakhata inthokin, Suol dangah an pakai a, Kei an mi hriet fûk ta nawh"Tiin LALPA chun a hril. 4 "Ruolhai lakah fimkhur ro, In unauhai ring naw ro. Unauhai chu hlèmhmang an na, Ruolhai chu mi demhmang an nih. 5 Ruolin ruol dang a hlèm a, Thudik hril an um ta nawh. An lei chu khêl hril dingin, An inchûktir ngat ngat a, Anni rawi sawlpui tak chu, Thil suol thaw ngat ngat a nih. 6 Hlèmhmang laia chêng i na, Inhlèma an buoi leiin, Kei an mi hriet fûk ta nawh"Ti hi LALPA thu a nih. 7 Chuleiin, Iengkim LALPA chun, Hieng ang hin a hril a nih:"Ngaitu, ka mihai suol leiin, Raw tuina meiah rawin, Anni chu ka fie ding a nih. Chuong bàka thaw dàn ding chu, Ieng am a um chuong bîk a? 8 An lei chun thalhlawn angin, Khêl a phu suok zung zung a; An tuolbawm seng bàu thain, An biek liem liem tawl hlak a, Sienkhom an lungril ruok chun, Châng an kam khum tawl hlak si. 9 Hieng thil lei hin anni chu, Ka hrem naw ding am a ni?Chuong ang hnamhai chunga chun, Phuba ka lâk naw ding maw?"Tiin LALPA chun a hril. 10 Tlânghai sûnin tap ka ta, Inring takin khêk ka ta, Thlalèr phùl khom sûn ka tih; Rausan hmun inchang zoin, Tu khom an fè ta naw a, Bawng inbu ri a rè ta a, Chunglèng vahai an tìn hmang a, Ran ruol tla an um ta nawh. 11 "Jerusalem chu hmun se ram, Sihal chèngna hmun nîng a ta, Judai rama khawpuihai chu, Hluotu tu khom um loin, Rausan hmunah inchang a tih. " 12 Chuong thil chu hre thiem ding tawk mi var an um naw a ni maw? Tu am a na LALPA thu lo dongtu le puongtu ding chu? Tu khom hraw ngai lona thlalèr ang topa ieng leia ram chu a se hmât zo am an ta a? 13 LALPA chun, "An kuoma dàn ka pèkhai chu an hnawl a, ka rawl an ngaithlàk nuom naw a, ka thu an zawm nuom bok nawh. 14 Zawm nêk hmanin lulul an insuo a, an thlatuhaiin an lo inchûktir ang khan, Baal an biek ta lem a. 15 Chuleiin, Iengkim LALPA, Israelhai Pathien chun, "Ngai ta u, hieng mihai hi bu khá infâktir ka ta, an dawn dingin tui khà peng ka tih. 16 Anni le an thlatuhai khomin an la hriet ngai lo hnamhai lai chun sukdar ka ta, ka sukbohmang vong hmâ khat chu kawlhnâmin inhnottir ka tih" a ta. 17 Hi hi Iengkim LALPA chun a hril:"Tuhin in ngaituo ro khai, Nuhmei ruol tap khêkhai chu, Hung dingin hril tawl unla, Tap thiem thiem hung raw hai se. 18 Inhmaw takin hung hai sien, Kan mitthli far zoi zoi a, Tui anga a luong chenin, Mi hung tap khum raw hai se. 19 Zion-a inthok khomin, Tap ri chu an hriet phâk a, 'Ei va hang se ta ngei maw!Ei va hang muolpho de aw!Ei inhai a ram zo tah, Ei ram suoksan el ei tiu'Ti chu an tap hla a nih. 20 Aw nangni nuhmei ruolhai, LALPA thu hi ngaithla ro; A thu in naah lût sien, In naunuhai chu tap hla, Insam dàn zirtir unla, Mani tuolbawmhai seng chu, Lusûn hla inchûktir ro. 21 Thìna chu ei tukverah, A hung invâk lût ta a, Ei kul sùngah a lût tah; Kotthlêra naupang inhnel, Hmu ding an um ta naw a, Tuolzawla tlangvâl um khawm, Hmu ding hrim an um ta nawh. 22 "Miruong chu hnawmhnok angin, Tuol lai indar phung a ta, Buphal lâk hmai ang elin, Tu khomin inkhawm naw nih"Tiin LALPA chun a hril. 23 LALPA chun hieng hin a tih: "Mi varin a varna uongpui naw sien la, mi hrât khomin a hràtna uongpui naw sien, mi hausa chun a sum le pai uongpui bok naw raw se. 24 A uongpui taphot chun kei LALPA, hi hnuoi chunga zangaina le indikna hmanga fel taka rorêl hlaktu le chuong ang thil lawm hlaktu ka nizie a hriet thiemna le a hrietna chu, uongpui lem raw se, " tiin. Chu chu LALPA thu suok a nih. 25 LALPA chun, "Ngai ta u, taksa chauha sertanhai ka hremna ding nihai chu a hung tlung mèk a nih. 26 Aigupta mi hai, Juda hai, Edom mi hai, Amon mi hai, Moab mi hai le thlalèr ram hla taka um, baksam ziet kawnghai po po khom chu hrem ka tih. Chuonghai chu sertan lo hnam vong an na, Israel sûngkuohai ngèi khom lungril tienga sertan lo an nih" tiin.

Jeremiah 10

1 Aw, Israel sûngkuohai, LALPA hril hi lo ngaithla ro, 2 LALPA chun hieng hin a tih:"Hnam danghai chìng dàn taphot, Thaw ve di'n inchûk naw ro; Vàna inchiknahai chu, Hnam dangha'n an tì angin, Nangni chun ti ve naw ro. 3 Hnam danghai thil chìnghai chu, Hmangna bo thil vong a nih:Rama thing an va làk a, Kut themthiemha'n hrei hmangin, Milem an hung ker suok a. 4 Tangkaruo le rangkachakin, Milem chu an cheimawi a, A tlûk el nawna dingin, Tubo le thîrkil hmangin, Nghet takin an kil khawm a. 5 Leipuia vate ti ding, Tikhai an sie ang a nih:Milem chu an tong thei nawh; Kè an nei ve naw leiin, A puta put son an ngai. Anni chu tì naw unla, Ieng poi an tawk thei naw a, Thil tha an thaw thei bok nawh. " tiin. 6 Aw LALPA nangma ang hrim, Mi tu khom an um dèr nawh; I hrât a, thil i thaw thei a, I hming a ropui bok. 7 Aw, nang hnam tinhai Laltak, Tu'm inzà lo an um ding che?Inzà i phû hrim a nih, Hnam tina mivarhai leAn lalram sûng po poah, Nangma ang an um dèr nawh. 8 An rêngin mi chawlol leHmangna bo an ni vong a, Hmangna bo thing milim chu, An zirtirtu a ni si. 9 Tangkaruo an sut phèk chu, Tarsis a'nthokin an làk a, Upaz-a inthokin rangkachak. Themthiem le rangkachak sertuhan, Milim an hung siem suok a, Puon dumpawl le sendukin, Chuonghai chu an inthuomtir a, Sienkhom kuta siem an ni si. 10 LALPA ruok chu Pathien tak, Pathien hring, chatuon Lal a nih. A lungsen pha, hnuoi a'n hnìng a, A lungsenna inling chu, Hnamhaiin an tuor zo nawh. 11 "An kuomah hieng hin hril rawh: 'Hieng pathienhai, hnuoi le vànhai siemtu khom ni ve lohai hi chu hnuoia inthokin la bohmang an ta, vànkhup hnuoia inthokin bohmang vong an tih' tiin" a ta. 12 Sienkhom a thilthawtheinan, Pathienin hnuoi a siem a, A varnaa khawvel indinin, A hriet thiemnan vàn a zàr phar. 13 A rawl a hang insuo pha, Vàn tui a'n ri hum hum a; Kawl bulah sûm hung suokin, Ruo sûrin kawl a'n leptir a, A thli bawma inthokin, Thli a hung inthè suok hlak. 14 Mi tin an chawlol zo a, Hrietna hrim an nei naw a, Rangkachak sertu phot chu, A milemhan sukzak an tih, Inhlèmna thil vong a na, Maniin thuok an nei nawh. 15 An rêngin hmangna bo leNuizatbûr an ni vong a, An chungthu rèl a ni pha, An rêngin bohmang an tih. 16 Jakob Chanpuol LALPA ruok chu, Anni ang a ni ve nawh; Thil iengkim Siemtu a na, Israel chu a ro hluotu a na, A hming chu Iengkim LALPA a nih. 17 An inhuol mèk ta cheu leiin, In puonthuo zielin tlân suok ro. 18 LALPA chun hieng hin a tih:"Tuta a rama chênghai hi, Ka thâm suok tawl ding a nih. An man khawm vong theina di'n, Buoinan hung tlàk buok a tih" tiin. 19 Ka hliem chu ka vangduoi ngei!Sukdam ruol ka ni si nawh!"Ka natna a ni tlat leiin, Keiman ka tuor el ma naw'n!"Tiin kei ka'n hnèm fawm a. 20 Ka puon in a chim ta a, A thlungna a chat vong tah. Ka nauhai an thuoi hmang a, Puon in mi zârpêktu ding, Tu khom an um ta si nawh. 21 Beram vêngtuhai hlak chun, An hmuingil theina dinga, LALPA hang rawn nachang khom, An hriet teu teu bok si nawh. Chuleiin, an beram ruol, An inchek dar vong a nih. 22 Ngai tu, ri a hung tlung chu, Hmar tieng panga inthokaBuoina rî râpthlâk tak chu; Judai khawpuihai sukramin, Sihal ruol chèngna hmunah, An inchangtir ding a nih. 23 Mihriem nun hi aw LALPA, Ama thua nung a ni naw a, Mihriem chun ama le ama, A'n thuoi thei nawh ti ka hriet. 24 Aw LALPA, mi thunun la, Sienkhom lungsenin ni loin, Zaidam takin mi thunun rawh, Chuong naw chun thi el ka tih. 25 Nangma pom ve nuom nawtu, I hming lam ve nuom nawtu, Hnam dang mihai chunga chun, I lungsenna bun thla lem rawh. Jakob sûngkuohai fa zoin, An ram an suktlaran a, An fàk ram rìt an ta hi.

Jeremiah 11

1 Hi hi Jeremia kuoma LALPA thu hung tlung chu a nih: 2 Hi thuthlungin a bitukhai hi ngaithla la, Judai ram le Jerusalema chênghai kuomah hril rawh. 3 LALPA, Israel Pathien chun hieng hin a hril: "Hi thuthlunga thu bitukhai ngaithla nawtu chu tongsie phurin um raw se. 4 Chuonghai chu Aigupta ram, rawtuina meia inthoka in thlatuhai ka hung thuoi suok laia an zawm dinga thu ka pèkhai chu a nih. An kuomah, 'Ka thu awiin ka hril taphothai hi zawm unla, ka mihai nîng in ta, kei khom in Pathien nîng ka tih. 5 Chuongchun, nenetui le khuoizu luongna ram, in thlatuhai kuoma inkhâm meua pêk ka lo tiem chu hlen suok ka tih' ka ta, chu chu voisuna in hluo ram hi a nih" a ta. Chun, kei chun, "Amen, Aw LALPA" tiin ka don a. 6 LALPA chun ka kuomah, "Judai ram khuoa hai le Jerusalem kotthlêra hai hieng thu po po hi puong rawh: "Hi thuthlunga thu bitukhai hi zawm ro. 7 Aigupta rama inthoka in thlatuhai ka hung thuoi suok nia inthoka voisun chen hin, 'Ka thu zawm ro' tiin ka hril zing tawl a. 8 Sienkhom, an awi nuom naw a, an ngaisak bok nawh; chuong nèk hmanin lulul takin an lungrila rîtlona chu an zawm lem hlak. Zawm dinga ka pèk thuthlung thuhai chu an zawm naw leiin chuong thil po poa tongsie chu an chungah a hung tlung tah a nih" tiin. 9 LALPA chun ka kuomah, "Juda mihai le Jerusalema chênghai hin thil phierrûk an nei a. 10 An thlatuhai, ka thu ngaithla nuom nawtuhai suolna tieng chun an kìr nawk a, pathien danghai zuiin an rong an bawl a, Israel sûngkuo le Juda sûngkuohai chun an thlatuhai kuoma ka thuthlung chu an bawsiet tah a nih. 11 Chuleiin, LALPA chun hieng hin a tih: Ngai ta u, an pumpel thei lo ding sietna chu an chungah ka hung intlungtir ding a nih. Mi ko khêk hai sien khom, don tawl naw ning. 12 Sietnan a hung tlàk buok pha chun, Judai rama khuohai le Jerusalema chênghai chun rimtui rawa an biek hlak pathienhai chu ko khêk an ta, chuonghai chun sietna laka chun hung thangpui naw ni hai. 13 Aw Juda, khuo i nei zât hiela tam pathien i nei a, thil inzakumthlâk tak el, Baal hmaa rimtui i rawna ding maichàm khom Jerusalem kotthlêr zât hiel i nei bok hi. 14 Chuleiin, hieng mihai hi tongtaipèk naw la, an ta dingin ka kuomah dawvàn hung kai naw rawh, an beidong huna khom an mi kona chu ka don naw ding a ni si a" tiin. 15 "Mi tam tak suolpui hlak siin, Ka hmangai chun ka tempulah, Ieng am a thaw rêng rêng a na?Sa ser i hung inhlànhai leiin, Hremna pumpel i'n ringa maw?Rîtlona i thaw phâ phà leh, Inhoi i ti chauh hlak si a" tiin. 16 'Oliv thing hring le mawi, Kûr thluka ra tha insuo hlak', Tiin LALPAN a ko hlak che. Sienkhom thlipui anga nasa, Meipui inrûm hum huma chun, A raw hmang ding che a na, I kauhai kàng hmang a tih. 17 Israel sûngkuohai le Juda sûngkuohaiin suol thaw a, Baal kuomah rimtui inhlàn a, nangni phuntu cheu, Iengkim LALPA chu lungsen dinga in cho phawk leiin, nangni ngeiin in chunga sietna in intlun thu chu a hung puong a nih. 18 That tuma an mi phierrûkna chu LALPAN a mi'n hriettir leiin ka hriet a, chuong lai chun an thilthaw po po chu a mi'n hmutir a. 19 Kei chu that dinga an thuoi beramte nunnem tak ang ka ni leiin hieng anga an mi lo phierrûk thu khom hi ka lo hriet dèr si nawh:"Thing chu a rà leh phûr ei ta, Hringmi khawvela inthok hin, Ama chu sât thlâng ei ta, Tu khom hriet ta lo dingin, A hming khom sukbo ei tih. " 20 Sienkhom aw Iengkim LALPA, Rorêlna fel kengkawtu, Sungril le lungril fietu, Iengkimthawthei i ni leiin, Anni rawi chunga phuba, I làk phâ mi'n hmutir rawh, Ka chungthu hi i kuomah, Iengkim ka'n koltir si a. 21 Chuleiin, Iengkim LALPA chun, "I hringna la tumtu Anathot mihai, 'Kan kuta i thi nawna dingin LALPA hmingin thu hril ta naw rawh' tituhai kuoma chun hieng hin a tih: 22 'Anni chu hrem tawl ka ta, tlangvàlhai chu kawlhnâmin thîng an ta, an naunuhai le naupahai chu tàmin thîng an tih. 23 Anathot mihai ka hrem kum a tlung pha chun an chungah sietna ka hung intlungtir ding a ni leiin a thi mahla tu khom um naw ni hai' tiin" a ta.

Jeremiah 12

1 Aw LALPA, ka chungthuhai, I kuoma ka hung intlun changin, Indik takin i thaw hlak. Sienkhom ka vuivaina thu chu, Ka hung hril tho ding a nih:Ieng leia mi suolhai hi, An hmuingil hlak am a na?Ieng leia mi depdehai, Inhoi taka an um hlak? 2 I phun a, zung an kei a, Inthangin an hung ra a, An hmûrah i hnai zing a, An lungrilah i hla si. 3 Aw LALPA, i mi hriet a, Nangin i mi hmu zing a, Ka ngaituo zing che ti khom, Enin i fie vong hlak kha. That ding beram ang elin, Anni rawi hi hnûk suok la, Thata an um ni ding khom, Nangma chun hung ruot ta rawh. 4 Ieng chen am ram hi tawlin, Hnà tinrêng an vuoi vong ding?A chêngtuhai rîtlona leiin, Ramsahai an ram zo a, Vate khom an thi zo tah. Chu bâka chun mihaiin, "Ei chungah ieng am a tlung, Ti dâm chu en hlak a tim!"An ti hiel ta chê a nih. 5 Mi leh in intlànsiek hmana, An hnebàn che a ni chun, Sakor dàm leh lem lem chu, Iengtin am in intluk ding?Hmun hima hman i'n sui thlu chun, Jordan ramngawpuia lem chu, Iengtin am i che ta ding? 6 I unau le sûnghai chenin, An lo inphatsan ta che a, An dem luoi luoi che a nih. An lo biek tha che khomin, Anni chu ring ta naw rawh. 7 Ka in chu suoksan ka ta, Ka ro khom màksan ka tih; Ka hmangai chu hmêlma kutah, Ka pêk suok ta ding a nih. 8 Ka rochan ka tihai hlak, Ram hnuoia keipui angin, An lo inchang zo tah a, An mi'n rûm khum dur dur a, Ka theidà zawng tak a nih. 9 Ka rochanhai chu vate ang, Muin la dinga a vèl lai zing, Vate dangin an ching hron, An lo ni ta hiel naw maw?Ramsa po po ko khawm la, A fa dingin hung thuoi rawh. 10 Berampuhan ka grêp huon, Chîlin an suksiet zo a, Ka lo tha tak el khom chu, Ram tawl an inchangtir zo. 11 Rausan hmunah an siem a, Tawlin a thing bor bor a, Tu ngaisak a hlaw ta nawh. 12 Tlâng ram kol sen vunga chun, Sukramtu invâk an ta, A ram dung le khanga mihai, LALPA kawlhnàmin lem a ta, A him tu khom um naw nih. 13 Bu chi chu thè vèng an ta, Sienkhom hling chauh sîk an ta, Chau hnêpin inrim sien khom, Ieng khom hlawkpui naw ni hai. LALPA lungsen inling lei chun, An sìk sun khom inzàpui an tih. 14 Hi hi LALPA hril chu a nih: "Ka mi Israelhai kuoma ro hluo ding ka pêk ram lo la hêktu an tuolbawm ram rilohai chu an rama inthokin pot dok ka ta, anni laia Juda sûngkuo umhai khom chu la suok ka tih. 15 Ka lâk suok hnung chun anni chu lunginsiet nawk ka ta, an rochan ram sengah hung thuoi nawk ka tih. 16 Kha hmaa Baal hminga inkhâm dàn ka mihai lo zirtir hlaktu ni hai sien khom, ka mihai um dàn anga khawsa ve a, 'LALPA hringna sâlin kan intiem' tia ka hminga an inkhâm ve pha chun, ka mihai lai indin tawl ka tih. 17 Sienkhom ka thu ngaithla nawtu hnam taphot chu pot suok ka ta, sukbo ka tih" ti hi LALPA thu suok a nih.

Jeremiah 13

1 Chun, LALPA chun ka kuomah, "Fe la, puon kawnghrèn inchaw la, chu chun i kawngah inhrên la, sienkhom tui intawktir dêr naw rawh" a ta. 2 Chuongchun, LALPA thu angin puon kawnghrèn chu ka'n chawk a, ka kawngah ka hrèn a. 3 Chun, LALPA thu chu ka kuomah a hung tlung nawk a, 4 "I kawnghrèn inchawk, i kawnga i hrèn kha sût la, Eufretisg vadungpui pan la, chu taka chun lungpui kuo karah thup rawh" tiin a mi hril a. 5 Chuongchun ka fe a, LALPA mi hril ang chun Eufretis-a lungpui kuo kara chun ka thup a. 6 Ni iemani zàt hnung chun LALPAN, "Fe la, Eufretis vadung pan la, hrènpuon i thup kha la suok rawh" a ta. 7 Chuongchun, Eufretis vadung tieng chun ka fe a, hrènpuon chu ka siena hmuna inthok chun ka pur dok a, sienkhom a lo hmon vong ta a, ienga ding khomin a tlâktlài ta nawh. 8 Chun, LALPA thu chu ka kuomah a hung tlung a: 9 "Hieng ang bok hin Judahai chapopui le Jerusalemhai suongtawlol chu ka suksiet ding a nih. 10 Hi hnam rilo, ka thu ngaithla nuom lo a, anni tuklulna lungril zuia pathien danghai rong bawl le be lemtuhai hi, hi hrènpuon, ieng ding khoma hmang tlâk ta lo ang bok hi an nih. 11 Hrènpuon chu kawngah ka vêt zing ang hin Israel sûngkuo pumpui le Juda sûngkuo pumpui hi ka mihai, ka hmingthangna, mawina le ropuina ni dinga ka kuoma um tlat dinga ka siem an ni a, sienkhom ka thu an ngai si nawh. 12 "An kuomah hieng hin hril rawh: 'Hieng hin LALPA, Israel Pathienin a hril: Uoiin peng po po chu uoiin thun sip ro' ti hi. Chun, tu khomin, 'Uoiin peng tin sung sip ding chu ka hriet nawa i ngai a ni?' an ti chun, 13 nangin hieng hin hril tawl rawh: 'LALPA chun hieng hin a tih: Hi rama chêng po po, Davida lalthungphaa inthung lalhai dàm, thiempuhai dàm, zawlneihai dàm le Jerusalema chênghai po po chu hrâi rui hrep tawl ka tih. 14 Anni le anni invaw hmâttir ka ta, pahai le nauhai chu insuol an tih. Anni chu hlà loa ka sukbohmang theina dingin lunginsietna le zàngaina le lâinatna insuo naw ning. 15 Nâ dawin ngaithla unla, A tu khom chapo naw ro, LALPA thu suok a ni hi. 16 LALPA in Pathien chawimawi ro:Inthimna a hung tir hma, Tlâng thimah insui thlu a, In ke pèn a'n phet hma hin; Var in beisei lai zingin, Beidongna thimpui zîngin, Thim sâ inchangtir a tih. 17 In ngaithlàk chuong naw ruok chun, In chaponahai leiin, Arûkin tàng ka ti cheu; LALPA beram dit ruolhai, Sala thuoi an ni ding chu, Lung na takin tàng ka ta, Mitthliin mi'n sil a tih. 18 Lal le a nu kuoma chun, 'In lalthungphaa inthok khan, Khai leh, hung tum thla ta ro; In lallukhum khumhai kha, Lak thlâk a ni ta ding si'Tiin an kuomah hril rawh. 19 Sim tieng khuohai po po chu, Tu khom suok thei lo dingin, Inhuolin dang chêp an ta, Tu khom suok thei naw ni hai. Juda mihai po po chu, Sala thuoiin um an ta, An rêngin intâng an tih. 20 Hmar tieng son mit inlèn la, A hunghai saw hei thlîr rawh. I beram ruol enkolhai, I uongpui êm êm hlak kha, Khaw lai am an um ta a? 21 Ruol thaa i siem kha LALPAN, Nangma rûntuah a sie pha chun, Nuhmei nau hase angin, Nâ i ti hle naw ding maw? 22 'Ieng leiin am hieng thil hi, Ka chungah a tlung a na?'Tia i'n don a ni chun, I suolnahai lei a nih:I puonbil an hlìmpèk che a, An soisak che a ni kha! 23 Ethiopia miin a rong, A thlâk thei hlak am a ni?Keite khomin a zie tiel, A thup thei hlak hrim hrim maw?Thil suol thaw chînghai khomin, Thil tha an thaw thei ngai nawh. 24 "Thlalèr thliin a lèn hmang, Bu sî vuong dar ang elin, Ka sukdar ding cheu a nih. 25 Nangin kei mi theinghil a, Pathien dang i biek leiin, Chu chu i chan dinga tlu, Keiman ka ruot chu a nih; Ti hi LALPA thu suok a nih. 26 "Kei ngeiin i puonbil chu, I hmai inkhum hiel khopin, Ka hlìmpèk ding chè a na, I zàmaw inlang a tih. 27 Tlâng tin le phûl hmuna hai, Uirea hur kawdàk a, Zakmaw taka inzor a, Tirdakum i thawhai kha, Ka phawk suok vong ta si che. Aw Jerusalem, i chung a pik!Ieng chen am i porchè ding?

Jeremiah 14

1 Khaw inthàl ding chungthua, LALPA hril chu hi hi a nih: 2 "Judai ramin a sûn a, Khawpuihai a ngûi ruoi a, A ram chu an tà khum a, Jerusalema inthokin, Tap ri a so veng vung a. 3 Mi lienha'n an siehlawhai, Tui chawi dingin an tir a, Tuikul tieng an pan tawl a, Sienkhom tui hrim an hmu nawh. An tuibèl leh hrilhaiin, Beidong takin an kîr a, An lu puon an khup khum a. 4 Ruo a sûr dêr naw leiin, Hnuoi chu a hung kak tuor a, Lo neituhan hrilhaiin, An lu puon an khup khum a. 5 Phùla zasukpui khomin, Pet ding a nei naw leiin, A tê chu a màksan a. 6 Ram sabengtunghai khom chu, Tlâng sâng filah an ngìr a, Sihal inthuok ang topin, An inthuok ve hlop hlop a, Ram hring an thlìrna lamah, An mithai a chàu zo tah. 7 Kan suolnan mi hêk sien khom, I hming leiin Aw LALPA, Mi hung thangpui lul raw khai. Kan hnungtolna a tam a, I lakah kan suol a nih. 8 Aw, Israelhai Tlumte thlîr, Beidong huna Sandamtu, Hi ramah mikhuol anga, Zàn khat chauh riek ding ang a, Ieng dinga um am i na? 9 I chî-ài ve am an ta?Ieng leia mi san thei lo, Pasaltha anga i um?Sienkhom nang chu aw LALPA, Keini lai i um zing a, I hming puttu kan ni a, Mi màksan tawl naw hràm rawh! 10 Hi mihai chungchànga hin, LALPA chun hieng hin a hril:"Invâk hmang inhoi an ta, An kè an thunun ngai nawh. Chu lei tak chun anni hi, LALPAN a lawm tawl naw a, An rîtlozie a hriet zing a, An suol leiin hrem a tih" tiin. 11 LALPA chun ka kuomah, "Hieng mihai thatna ding hin hnipêk naw rawh. 12 Bu nghei hai sien khom an rawl lo ngaithla naw ning; pumraw thilhlân le bu le bâl thilhlân an hung inhlànhai khom lo pom bok naw ning. Chuong nèk hmanin, kawlhnâm le tàmpui le hripuiin ka sukbohmang tawl ding a nih" a ta. 13 Kei chun, "E khai, LALPA Chunghnungtak, i zawlneihai po poin, 'Kawlhnâm tuok naw ti niu a, tàm khom tuor bok naw ti niu. Hi hmuna hin muongna hlun ka pêk lem ding chêu a nih' tiin i thu an lo hril rop hlak si a" ka ta. 14 LALPA chun, "Zawlneihaiin ka hmingin khêl an hril hlak a ni chu. Anni chu ka tir naw a, ka ruot naw a, ka biek tawl bok nawh. An thil hmu khom ni lo, hmangna bo thumvawra an thil dong le an lungril suongtuona mei mei an hrilpèk cheu a ni chu" a ta. 15 Chuleiin, LALPA chun hieng hin a hril: Ka tir khom ni hlei lo, ka hming sâla, 'Hi rama hin kawlhnâm le tàm tlung naw nih' tia hriltu cheu zawlneihai chu kawlhnâm le tàmin bohmang an tih. 16 Chun, an chungthu an hril mihai chu tàm le kawlhnâm inlèng lei chun Jerusalem kotthlêrah pei suokin um an ta, anni le an nuhmeihai, an naunuhai le naupahai chun phûmtu hrim nei naw ni hai. An phù ang hrimin an chungah sietna ka bur khum ding a ni si a. 17 "Hi hi an kuomah hril rawh:'Ka mi, ka naunu thienglâm chun, Siet dêrna khop kut tuok a, Hliempui na tak a tuor leiin, Ka mitthli hi sûn le zànin, Chawl loin luong zing raw se. 18 Ramhnuoiah ka va suok leh, Kawlhnâma an thathai ruong, Zâl thlek thluk ka va hmu a; Khawpui sûngah ka lût leh, Tàmpuia thi ka hmu bok a. Zawlneihai le thiempuhai khom, Hriet lo ram an pan zo tah' tiin. " 19 Juda chu i hnawl dèr el an ta?Zion khom i tirdak am an ta?Sukdam thei naw hiel khop a, Ieng dinga i mi'n tuortir am?Muongna hun kan beisei a, Thil tha ieng khom a tlung nawh, Damna hun kan beisei a, Thlaphângna chauh a tlung lem. 20 Kan suolzie hi aw LALPA, I hmaah kan inphat nawh, Kan thlàtuhai suolzie khom; Kan lo suol takzet si a. 21 I hming leiin mi thìm naw la, I lalthungpha ropui tak chu, A muolpho phal lul naw rawh. Kan kuoma i thuthlunghai kha, Hre zingin bawse naw hràm rawh. 22 Hnam dang pathienhai lai hin, Ruo hung tir thei tu'm an um?Vànin a'n sùrtir am a ni?Ni lo e, nangma i nih, Aw kan LALPA kan Pathien. Kan beisei nang chauh i nih:Hieng thil po po thawtu chu, Nangma chauh i ni si a.

Jeremiah 15

1 LALPA chun ka kuomah, "Mosie le Samuel khom ka hmaah hung hai sien, ka lungrilin hi mihai tieng hi ngha chuong naw nih. Ka hmu phàk loah hnot suok la, fe hmang dai raw hai se. 2 'Khaw la'm kan fe ding?' tia an indon che chun, an kuomah hieng ang hin hril rawh:Hieng ang hin LALPAN a tih:'Thi dinga ruothai chu thìnaah, Kawlhnâm tuor ding chu kawlhnâmah, Tàmpui tuor ding chu tàmpuiah, Saltàng ding chu saltàngnaah' tiin. 3 "LALPA chun hieng hin a tih: 'Suksetu dingin thil chi li tir ka tih- sukhlumtu ding kawlhnâm, an ruong fen hmangtu dingin ui, fa zo le sukraltu dingin chunglèng vatehai le hnuoia ramsa kolhai. 4 Jerusalema Juda lal Hezekia naupa Manase thilthaw leiin hnuoia lalhai po po tirdakah siem tawl ka tih. 5 " Aw Jerusalem. Tuin am a lunginsiet ding che?Aw, Jerusalem, Tuin am a tà ta ding che? I chanchin indon dingin, Tu hrim am chawl tâng an ta? 6 Nangin i mi hnawl thlàk a, I hnungtol deu deu pei si. Chuleiin, sukse ding chein, I chungah kut thlâk ka ta, Zâi daw zozai ta naw ning"Ti hi LALPA thu suok a nih. 7 Khaw tin kul kot bula chun, Cheiruongin vaw dar ka ta, Sietna le lusûnnain, Ka mihai tlâk buok a tih, An nun dàn an thlâk si nawh. 8 Hmeithai pung deu deu an tih, Tuipui tieu nêka tamin. Sûn chang lai tak suksetu, Tlangvàlhai lai tir ka ta, Beidongna le thlaphângnan, Hung nangchìng thut tawl a tih. 9 Sal sari hringtu nu chu, Thidangin tlu hlum a ta, Sûn lai a ni liem a ta, Hming sein muolpho a tih. A thi bâng la um po chu, Kawlhnâma sukhlum dingin, Hmêlma kutah pêng ka tih"Ti hi LALPA thu suok a nih. 10 Ram pum do le khing dinga, I mi nei kher kher hi chu nu, Ka chung a va hang pik ngei!Tu khom inpûktir loin, Tu tâ pûk lo khom ni lang, Tongsie an mi'n phur vong si. 11 LALPA chun hieng hin a tih: "A san tha tak a um chun, San him ngei ka ti cheu a, Siet ni le lungzîng niah, Hmêlmahai chu in hmaah, Hung inkûntir ngei ka tih. 12 "Hmar tienga thîr le dâr chu, Tu'n am suktliek thei an ta? 13 Ka mihai suolna leiin, An ro hlu le sum po po chu, Râllâk sumah pêng ka tih. 14 Hmèlma ram hriet ngai loah, Salah thuoi an ti cheu a, Ka lungsen chu chok a ta, Chu chun hlieu hrep a ti cheu" tiin. 15 Aw LALPA, nang chun i hriet, Mi hre zingin, mi kan la, Mi sukdudatuhai chungaKa phuba chu mi lapêk rawh. Nang chu i dawthei leiin, Mi la hmang ve lul naw la, Nangma leia ka tuorzie kha, Mi hrepêk zing lem hlak rawh. 16 I thuhai ka dong pha leh, Kei chun ka fâk miel miel a, Ka ta dinga lawmna leLungril sukhlimtu a nih. Aw Lalpa, Iengkim Pathien, I hming puttu ka ni si a. 17 Inhoina chèntuhai lai, Ka thung ve ngai dèr naw a, Hlimhlop ka chèn ve ngai nawh; Kut i mi'n nghat khum leiin, Makhât chauin ka'n thung a, Lunghnûrnain i mi sung sip. 18 Ieng leia ka nat tuor hi, A rè thei dêr naw'm a na?Ieng leia ka hliem tuor hi, Dam thei loa a um zing?Ka laka hin vadungte, Bèl tlâk lo le kang el hlak, I'n chang el ding a ni maw? 19 LALPA chun hieng hin a tih:"I sim chun tungding ka che, Ka rong i bawl theina di'n; Hmangna bo thu hril lo a, Thu tak hriltu i ni chun, Ka thu puongtu nîng i ta, Mihai chu nangin pan loin, Annin pan lem an ti che. 20 Hienghai laka hin kul bang, Dâr bangah siem ka ti che. Hung bei hlak an ti che a, Sienkhom hnè nawng an ti che, San suok le hum ding chein, I kuomah ka um si a. 21 Mi rilohai kut a'nthokin, Keiman san suok ka ti che a, Mi nunrawnghai lak a'nthokin, Keiman hum him ka ti che"Ti hi LALPA thu suok a nih.

Jeremiah 16

1 LALPA thu chu ka kuomah a hung tlung a: 2 "Nuhmei i nei ding a ni naw a, hi hmuna hin nau le te i nei ding a ni bok nawh" tiin. 3 Hi hmuna pieng naunu le naupahai le anni hringtu nu le pahai chungthua chun LALPAN hieng ang hin a tih: 4 'Hripuiin thîng an ta, tu khomin phûmin sûn naw ni hai a, an ruong chu tuolah hmunhnok angin indar a tih. Kawlhnâm le tàmpuiin thi bok an ta, an ruong chu chunglêng vatehai le ramsahaiin tlân an tih. 5 LALPA chun hieng hin a tih: "Khawsawt ina ruoi an siemnaah lût naw la, sûn dingin fe naw la, anni chu tà bok naw rawh, hieng mihai laka hin ka malsawmna hai, hmangaina hai le lâinatna hai chu ka lâk kîr ta si a, " ti hi LALPA thu suok a nih. 6 "Hi rama hin mi lien le mi chìnhai thîng an ta, tu khomin phûmin sûn naw ni hai a, anni sûnnain tu khomin lu vaw kol bok naw ni hai. 7 Mithi sûnhai ràlna dingin tu khomin fâk ding pe naw ni hai a, an nu amanih an pa amanih lei khomin, anni hnêmna dingin tu khomin dawn ding pe naw ni hai. 8 "Chun, ruoi thèna hmuna hrim hrim anni lai thunga kîl ve dingin i lût ding a ni nawh. 9 Iengkim LALPA, Israel Pathien chun hieng hin a hril: 'Ngai ta, i mithmu le i dam sûng ngei hin hlimna le lawmna ri le mo le moneitu rawlhai khom hi hmuna inthok hin sukrè vong ka tih' tiin. 10 "Hieng thuhai po po hi mihai kuoma i hril pha chun annin, 'Ieng leiin am hieng ang lawma sietna hi LALPAN kan chungah a thaw el am a na? Iem kan thaw suol a um? LALPA ei Pathien chungah ieng suol am kan thaw hrim hrim a?' tîng an tih. 11 Chun, nangin, 'In thlatuhaiin mi màksan a, Pathien danghai hnot a, an rong bawl a, anni be a, mi fesan a, ka dàn an zawm naw lei a nih. 12 Nangni hlak chun tuklul insuoa in lungrila rîtlona chu zawm lemin, in thlatuhai nêka nasa lemin in thaw nawk pei si a. 13 Chuleiin, hi rama inthok hin nangni le in thlatuhai khoma an la hriet ngai lo rama chun ka hnot suok ding cheu a na, chu taka chun a sûn a zànin pathien danghai rong bawl in ta, ka ditsakna hmu naw ti niu' ti hi LALPA thu suok a nih. 14 Chun, LALPA thu suok chun hieng hin a hril: "Mihaiin, 'Aiguptaa inthoka Israel nauhai thuoi suoktu LALPA hringna sâlin' ti ta loa, 15 'Hmar tieng ram le a hnot darna rama inthoka Israelhai hung thuoi suoktu LALPA hringna sâlin' tia in inkhàm hun a la hung tlung ding a nih. An thlatuhai kuoma ka pèk rama chun ka thuoi kìr tawl nawk ding a ni si a" tiin. 16 "Ngamantu tam tak ko ka ta, anni chun man tawl an tih. Sapêltu tam tak tir bok ka ta, anni chun muol le tlâng tin le lungpui kak kara mihai khom chu hung pèl suok an tih. 17 An um dàn po po ka hmu vong a, ka lakah thup a um naw a, an suolnahai khom ka mita inthoka thup a um bok nawh. 18 Hringna nei lo milem tirdakuma a ram an sukporchè lei le ka rochung ram chu an pathien lem tirdakuma an suksip leiin, an rìtlona le suolna chungah a let hniin thungrul ka tih" ti hi LALPA thu suok chu a nih. 19 Aw LALPA, Ka hràtna le ka kulpui, Lungzing nia ka bèlbul, Kawlkawdonga inthokin, Hnam tin i kuomah hung an ta, "Kan thlatuhai rochung chu, Hmangna bo dèr pathien lem, Milem siem fawm el an nih. 20 Miin mani pathien ding, A siem fawm thei am a ni?Chuong ang milem siem fawm chu, Pathien an ni thei si nawh"Tiin la hung hril an tih. 21 Chuleiin, tu tum khom hin, Ka hrâtna le thilthawtheina, Hang inhriettir nawk ka tih. Ka hming hi LALPA a nizie, Chu chun hung hre tâng an tih.

Jeremiah 17

1 "Juda suolna chu thîr kawlom le lunghlu hmor zum ngei taka an lungril phèka ker a na, an maichàm kia khom ker a ni bok. 2 An nauhai khomin thing buk hnuoi le tlâng sîp tina bawlhmun an siemna le an pathiennu Asera lem thing an phunna hmunhai chu an hung hriet kar vong a nih. 3 A ram dung le khanga i suolna leiin a rama ka tlânghai le i hausakna le rosum po po chu, i hmun sânga bawlhmunhai po po leh, râllâk sumah ka pêk ding a nih. 4 I bawsietna leiin i chanpuol ka'n rochungtir che ram hi chân i tih. I lakah ka lungsenna chu mei anga a chok zing leiin, i hriet ngai lo ramah i hmêlmahai rong bawl i tih, " tiin. 5 LALPA chun hieng hin a tih:"Mihriem ringsana neitu, Mihriem hrâtnaa innghattu, Lungrila LALPA nghatsantu chu, Tongsie phurin um raw se. 6 Thlalèr hlobuk ang a na, Vangneina a hung phâ khom, Dong ve phàk ngai naw ni a, Thlalèr ram tawl, tu hluo lo, Chi leilungah chêng a tih. 7 LALPAA ringna nghattu, Ama ringzotu ruok chu, Mi hamtha a va ni ngei! 8 Tui luongna bula thing phun, Vakama zung kei angin, Thâl tlung ding a ti naw a, A hnàhai a hring zing hlak. Khaw thâl kum a poisa naw a, Rà naw kum a nei bok nawh. 9 Lungril hi ieng po nèka, Mi hlèm hmang chungchuong a na, Beidongum khopin a sie a, hTu'n am hre thiem thei a ta? 10 "Kei hi lungril entu LALPA, Ngaituonahai fie hlaktu, Mi tin an nun dàn ang leThilthaw dàn ang phû peia, Lawmman pe hlaktu ka nih. " 11 Kut tling loa hausa chu, Mani tui ni lo op kêutu, Varung ang chauh hi a nih. A vànglaiin a hausaknan, Ama chu la tinsan a ta, Mi invêt la hlawng a tih. 12 A tîra inthoka chawi sàng, Lalthungpha anga ropui chu, Ei tempul hmun hi a nih. 13 Aw LALPA, Israel beisei, Nangma phatsantuhai chu, Sukmuolphoin um an tih. Nangma nghatsantuhai chu, Pilvuta hming ziek angin, An la bohmang ding a nih, Hringna tuikhur LALPA chu, An invàk hmangsan si a. 14 Aw LALPA, mi sukdam la, Chuongchun dam ka ta, Mi sanhim la, Chuongchun him ka tih, Ka'n pàk hlak chu nang i nih. 15 "Khaw'm a na LALPA thu chu?Tu'n hung hlen sien ni naw ni!"Tiin an hril an hril hlak. 16 Nangma zuitu berampu, Ka nìna ka'n phat ngai nawh; Sietna hung intlungtir chu, Ka dit nawh ti i hriet chieng. Ka baua thu suok hrim hrim, Nangin i hriet vong a nih. 17 Mi sukthlabâr naw hràm rawh, Nang chu siet tuok nikhuo a, Ka'n humhimna i ni si. 18 Mi sukdudatuhai chu, Nangman sukmuolpho tawl la, Kei chu mi sukmuolpho naw. Sukthlabârin um hai sien, Kei chu mi sukthlabâr naw. Sietna ni intlungtir la, A lêtin sukse tawl rawh. 19 LALPA chun hieng hin a mi hril: "Vàntlâng lûtna tieng kul kotkhàr, Juda lalhai lûta an suokna le Jerusalem kul kotkhàr po poa chun fein va ngîr rawh. 20 Chun, an kuomah, 'Nangni Juda lalhai, Juda mi po po le Jerusalema chêng, hieng kotkhâra lût hlaktuhai, LALPA thu hi lo ngaithla ro. 21 LALPA chun hieng hin a tih: Chawlniin thil phur lo dingin fimkhur unla, Jerusalem kul kotkhàrah thil phurin lùtpui bok naw ro. 22 Chawlniin in ina inthokin phur in phur suok ding a ni naw a, sin hrim hrim in thaw ding a ni bok nawh. In thlatuhai kuoma thu ka pèk angin chawlni chu in inser thienghlim ding a nih. 23 Chuong sà khom chun in ngaithlàk naw a, in uksak bok nawh; in insuklulul a, inthununna in ngài thei naw a, in donsak bok nawh. 24 LALPA thu suok chun hieng hin a tih: Amiruokchu, ka thu hi in poisa a, chawlniin ieng khom kul kotkhàr sûngah hung la lût lo a, sin ieng khom thaw loa in inser thienghlim chun, 25 hi khawpui kul kotkhâra hin lalhai le hotuhai, Davida lalthungphaa thunghai chu tawlailir le sakora chuonghai le an hnung zuitu mi lienhai, Judai rama mihai le Jerusalema chênghai chu hung lût an ta, hi khawpuia hin chêng song tàng an tih. 26 "Chun, Judai ram khawpuihaia inthok dâm, Jerusalem sèvêl khuohaia inthok dâm, Benjamin rama inthok dâm, thlang tieng tlâng thut vèla inthok dâm, sim tienga inthok dâmin hung an ta, pumraw thilhlân le inthawina hai, bu le bâl thilhlân le rimtui hai le lawmna thilpêkhai chu LALPA tempula chun hung inhlàn an tih. 27 Amiruokchu, phur ieng khom Jerusalem kul kotkhâra phur lût loa chawlni inser thienghlim dinga ka hril ang cheua in thaw naw vai chun, kul kotkhàrah thel ruol lo mei insuoktir ka ta, a kul po po kàng hmang vong a tih" tiin.

Jeremiah 18

1 LALPA thu chu Jeremia kuomah a hung tlung a: 2 "Tho la, bêlhemtu inah zu fe la, chu taka chun ka thuhai inhriettir ka ti che" a ta. 3 Bêlhemtu inah chun ka zu fe a, a bêl siemna khawlah sin a lo thaw a. 4 Pilpoka bêl a siem lai chu a kuta a tawk siet pal pha leh a pilpok bok chu hmangin tha a ti dàn ang takin bêl dangin a siem nawk pei a. 5 Chuongchun, LALPA thu chu ka kuomah a hung tlung nawk a: 6 "Aw Israel sûngkuohai, bêlhemtu thaw dàn ang hin ka thaw thei ve naw chêu am a ni?" ti hi LALPA thu suok a nih. "Aw Israel sûngkuohai, bêlhemtu kuta pilpok ang el hin ka kuta um in nih. 7 Ieng huna khom ram le hnam pot suok a, thiek a, suksiet ka tum thu puong lang khom, 8 chu hnam chun a chungthu ka hril leia thil tha lo a chìng chu a nghatsan chun a chunga thil tha lo thaw ka tum chu inkei kîr ka tih. 9 Ieng huna khom ram le hnam ka siem ding thu le indin ding thu lo hril tah lang khom, 10 ka thu hril ngaithla lo a, ka mithmuah thil tha lo an thaw chun, an ta dinga thil tha thaw ka tum chu sût nawk ka tih. 11 "Chuleiin, Juda mihai le Jerusalema chênghai kuoma chun, 'Ngai ta u, in lakah thil tha naw phier ka nei a, sietna ka hung intlungtir ding a nih. Mi tinin in thilsuol thawhai chu sim unla, in um dàn tha nawhai le thil tha naw in thawhai chu nghatsan ro' tia va hril tawl dingin LALPAN a mi tir a nih. 12 Anni ruok chun, "A tûl nawh. Kan nuom ang angin um kan ta, kan nuom leh lulul insuoin suol zom pei kan tih" tîng an tih. 13 Chuleiin, LALPAN hieng hin a tih:"Hieng ang hrim hi an um hlak am?Tiin hnam danghai indon hrim ta u!Israel nunghâk thienglâm chun, Thil pangzatum tak a thaw a nih. 14 Lebanon tlàng sìpa vûr chun, A tlâng an kiengsan hlak am?Hla taka inthoka hung luong, A tui dei chu a kang hlak am? 15 Ka mihai ruok chun mi theinghilin, Hmangna bo milem bein, An hmaah rimtui an inhlàn a, Chu chun a'n sui thlûktir a, Tiena inthoka an hraw hlak, Lampui hlun chu pêtsanin, Tuk lo lam an hraw ta si. 16 A ram tlaran vong a ta, Mi hmusit inchang a ta, Mi invâk vèl taphotin, Pangzatin lu thin an tih. 17 Khawsak thlipui ang elin, Hmêlma hmaah phìn dar ka ta, Sietna an tuok nia chun, Ka hmêl inhmutir loin, Tukkhum innghat lem ka tih. 18 Chun, anni chun, 'Thaw ro, Jeremia hi phierrûk ei tiu; dàn thu mi zirtirtu ding thiempuhai, thurawn mi petu ding mi var hai, thu mi hriltu ding zawlneihai um zing tho an tih. Thaw ro, soisel mur mur ei ta, a hril hrim hrim hi ngaisak nawng ei tiu" an ta. 19 Mi ngaisak rawh, Aw LALPA, Mi hêktuhai hril hi lo ngaithla rawh. 20 Tha hi maw suolin an rul hlak?Ka tlàkna ding tlâkkhur an cho si. An laka i lungsen la kieng dinga, Ka hnìpèk tawl kha hre zing rawh. 21 An nauhai tàmpui intuoktir la, Kawlhnâm ngei inhmatontir rawh. An nuhmeihai nau boin hmeithai sien, An pasalhai sukhlumin um hai sien, An tlangvàlhai khom indonaah, Kawlhnâmin thi vong raw se. 22 Mi man tuma, tlâkkhur cho a, Ka kea an mi phì awkna ding, Arûka châng an kam leiin, Rûntuhai i'n nangtir thut la, An inah khêk rong rong raw hai se. 23 Mi that tuma an phierrûk dàn, LALPA nang chun i hriet vong. An suol thaw hi ngaidam naw la, I mithmuah thai bo naw rawh. I hmaah thè thal vong la, I lungsen ni'n soisa hrep rawh.

Jeremiah 19

1 Chun, LALPA chun ka kuomah, "Fe la, bêlhemtu pil bêl va'n chaw la, khawtlâng upahai le thiempuhai thuoi la, 2 bêlhemtuhai lùtna kotkhàr bula Ben Hinom ruoma chun fe thla la, chu taka chun i kuoma thu ka hril ding che hi puong rawh. 3 Hieng ang hin hril rawh: 'Juda lalhai le Jerusalema chênghai, LALPA thu hi lo hre ro. Israelhai Pathien, Iengkim LALPA chun hieng hin a tih: Ngai ta u, hi hmuna hin sietna ka hung intlungtir ding a na, a hre taphot nà nghor a tih. 4 Hieng mihai hin an mi zàmsan a, hi hmun hi an sukporche a, anni le an pahai le an lalhai khomin an la hriet ngai lo hnam dang pathienhai an làk lùt a, an kuomah an inthawi a, hi hmun hi poi tawk lo thisenin an suksip a. 5 Chun, ka thupêk le thaw dinga ka hril khom ni lo, ka ngaituonaa khom la lût ngai lo thil thawin, Baal ta dinga an nauhai pumraw thilhlâna an inhlàn theina dingin bawlhmun, hmun sâng an indin bok a. 6 Chuleiin, ngai ta, hi hmun hi Tofet amanih Ben Hinom Ruom amanih ti ta loa Insàmna Ruom an la ti lem ni ding chu a hung tlung ding a nih. 7 " 'Hi hmuna hin Judai ram le Jerusalema mihai thil tumhai chu suktlol vong ka ta, that tuma zongtu an hmêlmahai kawlhnâmah tlûng an ta, an ruonghai chu chunglèng vatehai le hnuoia ramsahai bu dingin pêng ka tih. 8 Hi khawpui hi nuoi hmât ka ta, mi nuizatbûrah siem ka ta, a fe pèl taphotin a hliem tuor lei chun maktiin inchek khum an tih. 9 An naupahai le naunuhai sà infâktir ka ta, an hringna la tumtu hmêlmahaiin an inhuol tom beidong lai chun anni le anni sa infa ton an tih. 10 "Chun, i fepuihai mithmuah bèl chu vaw koi i ta, 11 an kuomah, 'Iengkim LALPA chun hieng hin a tih: bêlhemtuin bêl a vuok koi a, siem that nawk ruol a ni naw ang hin, hi hnam le hi khawpui hi bêl ang hin vaw dar ka tih. An mithihai chu Tofet-ah phûm an ta, a hmun khomin keng naw nih. 12 Hieng ang char hin hi hmun le hi khawpuia chênghai chunga hin thaw vèng ka ta, hi khawpui hi Tofet angin siem ka tih' LALPA chun a tih. 13 Jerusalema inhai le Juda lalhai in po po, in chunga rimtui raw a, vàn lêngruol le pathien dang dang be a, dawn thilhlânhai an bun suokna hmun po po chu Tofet hmun ang boka tirdakumah inchang vèng a tih" tiin. 14 LALPAN thu hril dinga a tirna hmun Tofet-a inthok chun Jeremia chu a hung tung a, LALPA tempul inhuonna sùnga chun a ngîr a, mipuihai kuomah, 15 "Hi hi Iengkim LALPA, Israelhai Pathienin a hril chu a nih: 'Ngai ta u, thil tha lo ka hrilhai po po kha hi khawpui le khaw dang po po chunga hin ka hung intlungtir ding a nih, insuklulul a, ka thu an ngaithlàk naw leiin' tiin" a ta.

Jeremiah 20

1 LALPA tempula hotu tak, Imer naupa thiempu Pasurin Jeremia thu hrilhai chu a lo hriet a. 2 Chuongchun, thiempu Pasur chun zawlnei Jeremia chu mi a'n vuoktir a, LALPA tempula Benjamin Kotkhàr Chuonchunga chun kol inbuntirin ripah a hrèn a. 3 A zînga Pasurin Jeremia kol bun a sût lai chun Jeremian, "Pasur, LALPAN i hming hi a thlâk ta a, Magor-Misabib tia ko ni lem tàng i tih. 4 LALPA chun hieng hin a tih: Ngai ta, nangma le i ruolhai po po ta dingin mi tibaiumah siem ka ti che a, hmêlmahai kawlhnàma i ruolhai an sàm thlùk lai chu i mit ngeiin hmung i tih. Judahai po po Babulon lal kutah pe vong ka ta, ama chun Babulon tieng sala a thuoi naw po kawlhnâmin that a tih. 5 Chu bâkah, khawpui hausakna po po hai, a thaw suok le thar suok po po hai, a ro hlu po po hai le Juda lalhai rosum po po hai chu hmêlmahai kutah pêng ka ta, anni chun rok an ta, lâng an ta, Babulon tieng hawn vong an tih. 6 Chun, nang Pasur chu, i ina chêng po pohai leh, salah intâng i ta, Babulon tieng thuoi an ti che a, chu taka chun thîng i ta, khêl thu i'n bà hlak i ruolhai po po leh chu taka chun phûm an ti che" a ta. 7 Aw LALPA, nangin i mi hlèm a, Hlèmin ka um let dèr a ni hi. Ka nêkin i hrât lem si a, Ka dol zor dèr a ni hi. Sùnnithlâka mi chêksolin, Mi tinin an mi nuisaw. 8 Ka hang khêk ve zàt hlak chun, Inpawngnêkna thuhai leSietna thu ngot ka puong si. LALPA thu ka puonghai chun, Nuizatbûr mi'n changtirin, Mi hal kawng a mi'n hlawtir. 9 "Ama sâm sâ ta naw ningah, A hmingin hril ta ngai naw ning"Tia ka hang hril hlak chun, Ru sûnga mei thun angin, I thu chun ka lungrilah, Mei angin a mi hlieu a, Ka pai tok tok thei naw a, Ka topui thei hlol si nawh! 10 Sîr tina mi deusawin, "Titna ringot hril hlakpa, I hril phot ripawt kan tih"Tiin an mi nuisaw a, Ka hril suol an inchàn a, Chu chun kei chu mi khita, Phuba lâk an tum a nih. 11 Sienkhom mi hrât le huoisen, LALPAN a mi umpui leiin, Mi sukdùdàtuhai chu, Mi hnè loin tlûng an ta, An tum hlawsam dêr an ta, Kumkhuoin muolpho an ta, An muolpho hmingsietna chu, Theinghil ni ta ngai naw nih. 12 Aw Iengkim LALPA, Mi indik chu bi chieng a, Lungril le ngaituonahai, Thlîthlàia en fie hlaktu, An chunga i phuba làk chu, Mit ngeiin mi'n hmutir rawh, Ka chungthu hi i kutah, Ka'n koltir vong ta si a. 13 LALPA kuomah hla sak ro!LALPA inpâkin chawimawi ro!Mi suolhai kuta inthokin, Thangpui ngaihai hringna chu, San suokin a hum si a. 14 Ka hung pieng thlàkna ni chu, Tongsie phurin um raw se!Ka nu'n a mi nei ni chu, Malsawmin um naw raw se! 15 "Nau pasal i nei!" ti a, Ka pa kuomah hung hril a, A lungril suklawmtu chu, Tongsie phurin um raw se. 16 Lungsietna nei dêr lo a, LALPA sukram khuo angin, Chu mi khom chu um sien la, Zîngkâr tap ri ngaithla sien, Sûn chang pha leh indo ri. 17 Sûlah mi lo sukhlum sien, Sûl chu ka thlàn nîng a ta, A mi von song el ding bah! 18 Buoi le lungngaina tuor a, Ka nihai inzak taka, Hmang zo nawk el ding chauin, Ieng leia sul a'nthokin, Ka pieng rêng rèng am a na?

Jeremiah 21

1 Malkija naupa Pasur le Maseia naupa thiempu Zefania hai chu Lal Zedekian Jeremia kuomah a tir a. 2 Ama chun an kuomah, "Hi, Babulon lal Nebukadnezzar chun a mi do ta si a. LALPAN kha hmaa thil mak a thaw hlak ang bok khan a mi thawpèk chun, a'n kîrtir el thei a. Chu thu chu Jeremia-in LALPA kuomah mi lo indonpèk raw se" a ta. 3 Jeremia chun an kuomah, "Zedekia kuomah hieng ang hin va hril ro. 4 Israelhai Pathien, LALPA chun hieng hin a tih: 'Ngai ta, Babulon lal le Kaldai mi, kul puo tienga inhuoltuhai che i dona hriemhrei chu nangma tieng inlettir ka ta, khawpui sùnga hin hmêlmahai chu thuoi lût ka tih. 5 Keima ngei hin lungsen tak le intûr takin, keima kut hrât ngei inletin, intìmna nei dêr loin ka bei ding cheu a nih. 6 Hi khuoa chêng mihriem le ranhai chu nghaisàng ka ta, hripuiin thîng an tih. 7 Chu hnunga chun Zedekia le a thoktuhai le mi dang, hi khuoa chêng, kawlhnâm le tàma thi lohai chu Babulon lal Nebukadnezzar le hmêlmahai kuta le anni that tumtuhai kuta chun pêng ka tih. Kawlhnâm ngeiin that an ta, lunginsiet naw ni hai a, lainat bok naw ni hai' ti hi LALPA thu suok a nih. 8 "Chu bâkah, mipuihai kuomah hieng hin hril rawh: 'Ngai ro, in hmaah hringna lampui le thìna lampui ka sie ding a nih. 9 Hi khawpuia um taphot chu kawlhnâm amanih, tàm amanih, hripuiin amanih thîng an tih. Tu khom tlân suoka, a'n huoltu cheu Kaldaihai kuoma inpehai chu dam an ta, an hringna humin um a tih. 10 Hi khawpui thatna ding nêka a sietna ding thaw ka tum leiin, Babulon lal kutah pèk nîng a ta, meiin raw hmang a tih' ti hi LALPA thu suok a nih. 11 "Juda lal sûngkuohai chungthua LALPA thu hi ngaithla ro. 12 Aw Davida sûngkuohai, LALPA chun hieng hin a tih:'Tûk tinin ro rêlpêk unla, Sukdùdàtu kuta inthokin, Roka um chu san suok ro; Chuong naw chun ka lungsennan, In thil tha naw thaw leiin, Meichok angin kàng a ta, Thel ngaina hrim um naw nih. 13 Nang, tlâng sîp zawla chêng, Lungpui zawl chungah chuonga, 'Tu'n am an mi bei thei ding?An mi hlù khum ngam ding maw?'Tituhai, ka khing chêu a nih, Ti hi LALPA thu suok a nih. 14 In thilthaw phû ang peiin, Ka hrem ve ding chêu a nih. . In ramngaw kàng ral dingin, Mei insuopêk ka ti chêu a, A vêl po kàng vong a tih, Ti hi LALPA thu suok a nih.

Jeremiah 22

1 LALPA chun hieng hin a tih, "Juda lal inah zu fe la, hi thu hi zu hril rawh: 2 Aw, Juda lal, Davida lalthungphaa inthung, nangma le i thoktuhai le hi kotkhàra hung lùt hlak i mihai leh, LALPA thu suok hi lo ngaithla ro. 3 LALPA chun hieng hin a tih: Indik tak le fel takin ro rêl unla; sukdudatu kuta inthokin rok tuokhai chu san suok unla; mikhuolhai, fahrahai le hmeithaihai nêksawr le an chunga indik lo taka thaw chîng naw unla; hi hmuna hin poi tawk lo thisen insuo bok naw ro. 4 Hi thu hi fimkhur taka in zawm chun, Davida lalthungphaa inthung lalhai chu tawlailir amanih le sakor amanih chunga hai chuongin, an thoktuhai le mipuiin zuiin, hi in kotkhàra hin lût hlak an tih. 5 Amiruokchu, hieng thupêkhai hi in zawm naw chun hi lal in hi tlu ram vong a tih ti keima ngei insâlin ka hril a nih ti hi LALPA thu suok a nih' tiin. " 6 LALPA chun Juda lal in chungthu chu hieng ang hin a hril:Ka ta dingin Gilead ang el leLebanon tlàng sìp ang ni la khom, Thlalèrin siem ka ti che a, Khawpui rausan hnung angin. 7 Suksetu ding hung tir ka ta, Hreipui hung chawi seng an ta, I sidar thá thàhai phûr an ta, Meipuiah tì hlut hlut an tih. 8 "Chun, hnam danghai, hi khawpui hung pal tlangtuhai chun, 'Ieng dinga hieng ang lawma LALPAN hi khawpui chunga hin a thaw el am a na?' tiin indon tuong an tih. 9 'An Pathien, LALPA thuthlung chu màksana hnam dang pathienhai be a, an rong an bawl lei a nih' tiin don an tih. 10 Lal thi chu tà naw unla, A um naw chu sûn naw ro; Saltàng chu sûn rak lem ro, A pieng le murna ramah, Hung kîr ta ngai naw ni a, Hmu khom hmu ta bok naw nih. 11 Juda lal Josia naupa Salum, i a pa Josia hung thlâktu, hi hmuna inthoka thuoi hmanga um chu hung kîr nawk ta ngai naw nih, ti hi LALPA thu suok a nih. 12 Sala an thuoinaa an siena hmuna chun thîng a ta, hi hmun hi hung hmu nawk ta ngai naw nih. 13 "Felnawnaa lal in bawl a, Indik loa insawng bawltu, A ram mihai sor hrep a, An hlaw pe si lotu chu, A chung a va hang pik ngei! 14 'In ropui tak bawl ka ta, Pindan chunghnung lien tak leh; Tukver lien tak siem ka ta, Sidar thing phêk bel ka ta, Rong senin nàl vong ka tih'Titu chung ngei chu a pik. 15 Sidar thing in i bawl leiin, Inlal lemah i'n ngai a ni?I pa khan fâk le dawn ding, A tlasam hlak am a ni?Indik taka a thaw leiin, A hmuingil an nawm a ni? 16 Mi pasie le tlasamhai, Chungthu a rèl fel hlak a, Iengkimah a tluong a ni kha. Chuong ang chu nang ngei khomin, I mi hriet dàn ding an naw maw?Ti hi LALPA thu suok a nih. 17 Sienkhom hlèprûk dàn ding le, Poi tawk lo thisen insuoa, Nêksawra làklui dànhai, Lungrilin i mel ràn si. 18 Chuleiin, Juda lal Josia naupa Jehoiakim chungthu chu LALPAN hieng ang hin a hril:'' 'A poi ngei maw, unaupa!A poi ngei maw, unaunu!'Tiin sûn naw ni hai a; 'I pâm ngei maw, ka lalpa!I ropuina a pâm ie!'Tiin sûn bok naw ni hai. 19 Sabengtung phûm ang elin, Jerusalem kul puo tieng, A ruong chu kei phît an ta, Tuola chun dehawn an tih. 20 Lebanon tlângah kaiin, Chu tak a'nthok chun khêk la, Basan chen thangkhawk raw se; Abarim tlângah tap rawh, I'n zompuihai po po kha, An bohmang vong ta si a. 21 I ngai i sukmuong lai khan, Fimkhur di'n ka'n fui che a, 'Ngaithla naw nîng' i ti si. I tleirawl lai a'nthok a, Chu chu i um dàn a na, Ka thu i ngaithlàk nuom nawh. 22 I berampuhai po po, Thliin lèn hmang vong a ta, I'n zompuihai po po khom, Salah intâng vong an tih. I rîtlonahai leiin, Chu pha chun muolpho taka, Hmaimawkin la um i tih. 23 Lebanon Ngaw Runaj chêng, Sidar ina bu khuortu, Nau hase ang topa nâ, Natnan a bawm pha chea, I nat tuor inrûm ding chu, Ieng am top am nîng a ta! 24 "Nang Jehoiachink hi Juda lal Jehoiakim naupa, ka suoi namna kutsebi khom ni la, ka kuta inthokin ka phawi suok ding chè a nih. 25 That dinga zongtu che, Babulon lal Nebukadnezzar kuta le Kaldaihai kuta ngei chun pe suok ka ti che. 26 I piengna ni lo ram dangah nang le i nu, a hringtu che hi pei suok ka ta, chu taka chun thîng in tih. 27 Kìr nawk in châk êm êmna rama chun kîr nawk ta naw ti niu" tiin. 28 Hi Jehoiachin hi bêl koi dar, Mi hnawl hnung a ni naw maw?Ama le a thlahai chu, An hriet ngai lo rama chun, Ieng leia an pei suok am? 29 Aw ram, aw ram, aw ram, LALPA thu hi lo ngai rawh! 30 Hieng hin LALPA chun a hril:Nau nei dèr naw ang elin, Hi mipa hi inchik rawh:Pa hmuingîl lo ding a na, A thlàhai laia tu khom, Mi hmuingîl um naw ni a, Davida lalthungphaah, Tu khom inthung naw ni a, Judai ram chungah tu khom, Inlal ngai bok naw ni hai, "Tiin LALPA chun a puong.

Jeremiah 23

1 "Ka ran tlatna hmuna beramhai suksetu le sukdartu berampu chu a chung a va hang pik ngei" ti hi LALPA thu suok a nih. 2 Chuleiin, LALPA, Israelhai Pathien chun ka mihai enkoltu berampuhai kuomah hieng thu hi a hril: "Ka ran ruolhai sukdar a, hnot hmang a, in enkol tha naw leiin, in thilthaw indik naw leiin ka hrem ding cheu a nih, " ti hi LALPA thu suok a nih. 3 "Ka ran ruol, hlaa la um sunhai chu ka hnot darna hmuna inthokin thuoi khawm nawk ka ta, an huongah tla nawk an ta, chu taka chun nasa takin hung pung an tih. 4 Anni enkoltu ding berampu sieng ka ta, tiin an thlà phâng ta naw ni a, tu khom inhmang um ta nawng an tih" ti hi LALPA thu suok a nih. 5 "Ngai ta, Davida ta dinga felna kau zâr ka hung insuopêk hun ding chu a hung tlung ding a nih" ti hi LALPA thu suok a nih. Ama chu lalah inthung a ta, var takin a ram pumah indik tak le fel takin hung thawng a tih. 6 Ama huna chun Juda chu sandamin um a ta, Israel chu him takin um a tih. A hmingah EI FELNA LALPA tiin ko an tih. 7 "Chuongchun, chu hun chu a hung tlung ding a ni tah" ti hi LALPA thu suok a nih. "Chu phâ chun, 'Aigupta rama inthoka Israelhai thuoi suoktu LALPA hringna sâlin' ti ta loin, 8 'Hmar tieng ram le a hnot darna ram po poa inthoka Israel thlahai hung thuoi khawm nawktu LALPA hringna sâlin' tiin thu inkhâm lem tàng an tih. Chu phâ chun anni rama ngei um tâng an tih" tiin. 9 Zawlneihai chungthua chun:Ka lung hi a koi dar a, Ka rùhai an inthin a. Zu rui ang el ka ni ie, Zuin a chie zor ang el. Chu chu LALPA thaw a na, A thu thienghlim lei a nih. 10 Ram chu uiretnan sipin, Tongsie phur a ni leiin, A ram phêkin a tawl a, Thlalèra hmun hringhai khom, A hung tawl zo ta vong a, Zawlneihan lam suol hrawin, An thilthawtheina kol chu, Fel naw takin an hmang si. 11 "Zawlneihai le thiempuhan, Pathien an poisa naw a, Ka tempul sûnga chen khom, Rîtlona thil ka hmu si"Tiin LALPA chun a hril. 12 Chuleiin an lampui khom, Hung innâl deu deu a ta, Thimah hnot lût nîng an ta, Chu chun intol thlûng an tih. Ka hrem hun a tlung pha chun, Sietnain vur tawl ka tih"Tiin LALPA chun a hril. 13 "Samaria zawlneihai lai, Thil tirdakum ka hmu a, Baal thu an hril tawl a, Israelhai an thuoi hmang. 14 Jerusalema zawlnei lai, Thil râpthlâk tak ka hmu a, Uirea khêl hringpuiin, Thil suol thawtuhai kut chu, Sukhrâttuah an thang a, Tu khomin an rìtlona, Bàn an tum naw phà a nih. Jerusalem mihai hi, Ka ta ding chun Sodom leGomorra mi ang an nih. 15 Zawlneihai chungchanga Iengkim LALPA thu suok chu hi hi a nih:"Bu khá in fâktir tawl ka ta, Tûr tui indawntir tawl ka tih, Jerusalema zawlneihai leiin, Pathien ngaisak nawna lungril, A ram pumah a'n lêng si" tiin. 16 Iengkim LALPA chun hieng hin a hril:" Zawlneihai thu hril awi naw ro, Beiseina lem petuhai hi. LALPA bàua an dong ni lo, An lungrila an suongtuo thil, In kuomah an hril hlak si a. 17 Kei mi hmusittu kuomah, 'I ta dingin thâng a tih'Tiin an hrilpêk rop a; An lungril nuomzawng hnota, Lulul insuohai kuomah, 'Sietna i chungah tlung naw nih'Tiin an hrilpêk bok hlak. 18 LALPA remruotna hmunah, A tu am thang ve hlakin, Ama hmu le a thu hrein, An ngaithlàk tah hrim hrim a? 19 LALPA lungsenna thlipui chu, En rawh a hung hràng ding a nih, Thawngaleivir a hung thla, Mi suolhai lu nuoi dingin. 20 A lungrila a thil tum, A hlen kim zo hmâ khat chun, LALPA lungsen kîr naw nih. A ni a hung tlung pha chun, Iengkim la hre chieng in tih. 21 Hieng zawlneihai hi ka tir nawh, Anni thu a nih an invirpui; An kuomah thu ka hril nawh, Anni thu a nih an hril. 22 Ka remruotnaa thang ve, An lo ni chu ni sienla, Ka mihai kuomah ka thu, An puong dar tah ding a na, Thil tha naw an thaw lakah, Inlamlettir tâng an tih. 23 "Hla taka um Pathien ni loin, hnâitea um Pathien ka ni lem" ti hi LALPA thu suok a nih. 24 "Ka hmu thei lona dinga inbiru thei tu am an um ding a na?" ti hi LALPA thu suok a nih. "Kei hi hnuoi le vàn hluo siptu ka nih" ti hi LALPA thu suok a nih. 25 " 'Mangah ka mang, mangah ka mang' tia ka hminga khêl hril hlaktu zawlneihai thu hril chu ka hriet. 26 Zawlnei khêlhlip, mani suongtuona thu hril hlakhaiin hieng ang lungril hi ieng chen am an put ding a na? 27 Anni le anni mang inhril tuoin, an thlatuhaiin Baal an biek leia ka hming an theinghil ang khan, ka mihai chu ka hming intheinghiltir an tum a nih. 28 Mang neitu zawlnei chun a mang chu hril sien la, ka thu hretu zawlnei ruok chun ka thuhai chu ringum takin puong raw se. Bu tak le bupawlin ieng am inangna an nei a?" ti hi LALPA thu suok a nih. 29 "Ka thu hi mei ang le lung vuok nawina tubo ang a ni naw am a ni?" ti hi LALPA thu suok a nih. 30 "Chuleiin, ngai rawh, ka thu ni awm taka an ruolhai thu hril sawng hlak zawlneihai hi ka do a nih" ti hi LALPA thu suok a nih. 31 "Ngai ta u, zawlnei mani phuokfawm hril tlor a, 'LALPAN a tih' ti hlaktuhai hi ka do a nih" ti hi LALPA thu suok a nih. 32 "A nih, ka tir le ruot khom ni lo, mang tehlèm mei mei hrila khêl muhluma ka mihai thuoi hmang chîng hlak zawlneihai hi ka do takzet a nih. Ka mihaiin tangkaipuina hlek khom an nei nawh" ti hi LALPA thu suok a nih. 33 "Hieng mipuihai laia mi tuin amanih, zawlnei tuin amanih, thiempu tuin amanih 'LALPA thucha chu ieng am a na?' tia an indon cheu chun, 'Nangni hi a thuchal chu in na, ka pei hmang ding cheu a nih' ti hi LALPA thu suok a nih, tiin in don ding a nih. 34 Zawlnei amanih, thiempu amanih le tu el khomin, 'Hi hi LALPA thucha chu a nih' a ti chun ama le a sûngkuohai hrem ka tih. 35 Nangni laia in chîng tak chu, 'LALPAN iengtin am a don? LALPAN iengtin am a hril?' tia in ruolhai amanih in sûnghai amanih in indon kuol hi a nih. 36 Amiruokchu, 'LALPA thucha' ti ruok chu hril ta naw ro; mi tinin in hril chu nangni thucha a ni leiin, Iengkim LALPA, ei Pathien, Pathien hring thucha chu in keilet mei mei a nih. 37 Zawlnei kuoma chun, 'LALPAN iengtin am a don che? LALPAN iengtin am a hril a?' tiin indon ro. 38 'LALPA thucha chu' in ti vai chun, LALPA chun hieng hin a tih: 'LALPA thucha chu in ti ding a ni nawh' ka ti sain 'LALPA thucha chu a nih' in ti leiin, 39 ngai ro, ka pot suok ngei ding cheu a na, ka kuoma inthokin pei hmang ka ti cheu, nangni le in pahai kuoma ka lo pêk tah hi khawpui leh hin. 40 Chun, kumkhaw muolphona le inzakna theinghil thei ruol lo chu in chungah hung intlungtir ka tih" tiin.

Jeremiah 24

1 Nebukadnezzar, Babulon lalin Judahai lal Jehoiakim naupa Jehoiachin le Juda hotuhai, mi themthiemhai le thîrsuhai leh Jerusalema inthoka Babulon tieng sala a thuoi hnung khan LALPA tempul hmaa theichang bawm hni inthut chu LALPAN a mi'n entir a. 2 Bawm pakhata chun theichang tha tak, a rà hmin hmasa ang chu a um a, bawm danga chun theichang tha lo, fàk tlâk lo khopa sie a lo um a. 3 LALPA chun ka kuomah, "Jeremia, ieng am i hmu a?" a ta. Kei chun "Theichang ka hmuh. A then chu a tha hle a, a then chu fàk tlâk loa sie a nih" ka ta. 4 Chun, LALPA thu chu ka kuomah a hung tlung a. 5 "LALPA, Israelhai Pathien chun hieng hin a tih: Juda lal saltânghai, Kaldaihai rama an thatna dinga ka tir suokhai chu, hieng theichang ra tha ang hin ka en tawl ding a nih. 6 An thatna dingin an chungah mit inlèn zing ka ta, hi rama hin thuoi kîr nawk ka ta, anni chu thiek hmang loin tungding ka ta, phawi hmang loin phun lem ka tih. 7 Kei hi LALPA ka nizie an mi hriet theina dingin lungril pêng ka tih. Ka mihai nîng an ta, kei an Pathien nîng ka ta, an lungril po po leh keima tieng an hung ngha kìr nawk ding a ni si a. 8 "Theichang tha lo, fàk thei lo khopa sie ang hin Judahai lal Zedekia le a thoktuhai le Jerusalema la chambâng, hi rama la umhai le Aigupta rama chênghai chu nghatsan tawl ka tih. 9 Ka hnot hmangna khawlai rama khom mihai tirdak le theida dingin siem tawl ka ta, mi vîn le hal kawng, mi nuizat le tongsie phurin um an tih. 10 Anni le an thlatuhai kuoma ram ka pèka inthoka sukbohmang anni hmâ khat chu anni lai kawlhnâm le tàm le hripui inlèngtir ka tih" tiin.

Jeremiah 25

1 Juda lal Josia naupa Jehoiakim inlala inthoka a kum lina chun Judai rama mihai po po chungthua LALPA thu chu Jeremia kuomah a hung tlung a; chu chu Babulon lal Nebukadnezzar inlal kum khatnam a nih. 2 Chuongchun, zawlnei Jeremia chun Judai rama um po po le Jerusalema chêng po po kuomah chu thu chu a hril a: 3 Kum sawmhni le kum thum sûng, Amon naupa Juda lal Josia inlal kum sawm le kum thumnaa inthokin tu chen hin LALPA thu chu ka kuomah a hung tlung hlak a, chuonghai chu ka hril ka hril hlak cheu a, sienkhom in ngaithlàk si nawh. 4 Chun, LALPAN in kuomah rongbawltu zawlneihai a hung tir a hung tir hlaka chu an thu in ngaithlàk naw a, an hrilhai in poisa bok nawh. 5 Anni chun, "Mi tin mani suolna lampuia inthok le thil tha naw thaw in chìngnaa inthokin hung kìr un la, LALPAN nangni kuoma le in thlatuhai kuoma tiena tlânga inthoka kumkhuoa dinga a pèk cheu rama chun chêng thei in tih. 6 Pathien danghai be ding le an rong bawl dingin zui naw unla, in kuta siem milemhaiin mi cho lungsen naw unla, chuongchun sukna nawng ka ti cheu" tia LALPA hril chu in kuomah an puong hlak a ni kha. 7 "Nisienlakhom, in mi ngaithlàk naw a, in kuta siem thilhaiin in mi cho phawk a, nangni le nangni chungah thil tha lo in intlun hlak" ti hi LALPA thu suok a nih. 8 Chuleiin, Iengkim LALPA chun hieng hin a hril: "Ka thu in ngaithlâk si naw leiin, 9 hmar tienga hnamhai le ka siehlaw Babulon lal Nebukadnezzar chu ko ka ta, hi ram le a sûnga umhai le a kawl vela hnam chènghai po po chu hung bei an tih. Sukbohmang vong tawl ka ta, mi pangzat le endong nîng an ta, kumkhuoin tlu ram an tih. 10 Hlimna le lawmna ri hai, mo le moneitu rawl ri hai, bu rawt ri hai le khawnvar êng hai po po suktawp vong ka tih. 11 Hi ram pumpui hi rausan ramah inchangtir ka ta, Babulon lal rong kum sawmsari sûng bawl an tih. 12 "Kum sawmsari a'n voi pha leh Babulon lal le a hnam, Kaldai mihai chu an suolna leiin hrem ka ta, kumkhuoin sukram ka tih" ti hi LALPA thu suok a nih. 13 "Ka hril tah po pohai, hi lekhabua ziek po pohai le hnamhai chungthua Jeremia hril lawk po pohai chu, chu ram chunga chun hung intlungtir ka tih. 14 Hnam tum tum le lal ropui tak tak hai chun anni chu salah thuoi ve thung an ta, an thilthaw ang pei le an kut sinthaw ang phu peiin ka thungrul ding a nih" tiin. 15 LALPA, Israelhai Pathien chun ka kuomah hieng hin a tih: "Hi ka lungsenna uoiin no hi ka kuta inthokin la la, ka tirna ding che hnamhai chu indawntir rawh. 16 Dawn an ta, pêm tliei tliei an ta, anni lai kawlhnâm ka'n lêngtir ding a ni leiin invêt zo an tih" tiin. 17 Chuongchun, LALPA kuta no chu ka lâk a, a mi tirna hnamhai po po chu ka'n dawntir a. 18 Jerusalem le Judai ram khuoa hai fèin, an lalhai le hotuhai chu ka'n dawntir a, chu taka inthoka voisun ni chen hin rausan hmun, mi pangzat, nuisaw le tongsephur an hung ni ta pei a nih. 19 Chun, Aigupta ramah fein, Faraw le a mi lienhai, thoktuhai le mipuihai chu kan biekpui a, chu no tiuma mi chu an dawn bok a, 20 anni bâkah a rama chêng ram dang mihai khomin an dawn a. Chuongchun, Uz rama lalhai dâm; Palestina rama lal po po, Askelon le Gaza le Ekron khuoa lalhai le Asdod khuoa mâksana la umhai dâm; 21 Edom le Moab le Amon thlahai dâm; 22 Tura le Sidona lalhai le tuipui kam rama lalhai dâm; 23 Dedan hai, Tema hai, Buz hai le ram hlaa chênghai dâm; 24 Arabia rama lalhai po po le thlalèra ram dang mi chênghai po po dâm; 25 Zimri hai, Elam hai le Media hai lalhai dâm; 26 hmar tieng lalhai, hmun hla le hnaia mihai le hnuoia lalram po poin an dawn seng a. An rênga an dawn hnung chun Sesak laln khomin dawn vêng a tih. 27 Chun, Iengkim LALPA, Israelhai Pathien chun hieng hin hril rawh a mi tih: Dawn unla, inrui unla, inluok unla, tlu unla, tho ta naw ro, nangni lai kawlhnâm ka hung tir ding a ni si a. 28 Sienkhom, i kuta inthoka no chu la nuom loa an dawn nuom bok naw chun, an kuomah hieng hin hril rawh: 'In dawn ngei ding a nih' ti hi Iengkim LALPA thu suok a nih. 29 'En ta u, ka hminga ko khawpui chunga khom sietna ka'n tlungtir tan a, nangni lem chun hremna pumpel thei in inring hrim hrim am a ni? Hremna pumpel naw top in tih, hnuoi chunga chênghai po po chungah kawlhnâm ka'n let ding a ni si a' ti hi Iengkim LALPA thu suok a nih. 30 "Chuleiin an kuomah hieng thuhai hi puong la, hieng ang hin hril rawh:LALPA chu vàn sânga inthok, A hung khêk suok ding a na, A chêngna thienghlim a'nthok, Hi ram hi inrûm khum a tih. Grêp sawrtuhai khêk ang elin, Hnuoia chênghai po po hi, A hrawk khum ding a ni si. 31 A thangkhawk ri so vêl chun, Kawl kil chen nghor suok a tih; Hnuoia hnamhai po po chu, LALPAN a khing ding a na, Hringmihai ro rêl a ta, Mi rilohai po po chu, Kawlhnâmin sukhlum a tih'Ti hi LALPA thu suok a nih. 32 Iengkim LALPA chun hieng hin a tih:"En ta, sietna rùnpui chu, Hnam tin chungah a tlung ie; Hnuoi hmun tawpa inthokin, Thli sie a hung inthok saw!" 33 Chu nia LALPA mi thathai chun hnuoi tawpa inthoka hnuoi tawp chen dâp suok an ta, sùn lo, làk khawm lo le phùm loin um an ta, hnuoi chungah hmunhnok angin pei dar an tih. 34 Berampuhai, tap rak unla, Inring takin khêk rong rong ro; Beram ruol hmathuoituhai, Hnuoiah intâl top top ro. Thata in um ni a tlung, Belhemtu bêl ang el a, Dèng dar in ni ding ni chu. 35 Berampuhai ta dingin, Tlàn hmangna a um naw a, Beram ruol thuoitu ta dingin, Suok ngaina a um ta nawh. 36 Berampu rawl chu ngai ro, Ran ruol thuoitu tap ri chu; An tlatna hlobet hmun chu, LALPAN a sukram mêk a; 37 LALPA lungsenna leiin, Tlatna hmun hring muongum chu, Rausanin a um mêk si. 38 Sakeibaknei ang elin, A buzawl suoksan a tih; Nêksawrtu kawlhnâm lei leLALPA lung intûr leiin, An ram a ram zo ta si.

Jeremiah 26

1 Juda lal Josia naupa Jehoiakim inlal tan tìr lai LALPA thu chu Jeremia kuomah a hung tlung a. 2 "LALPA chun hieng hin a hril a: 'LALPA tempul tuol sûngah ngîr la, Judai ram hmun hrang hranga inthoka LALPA tempula chawibiek dinga hunghai kuomah thu ka pèkhai po po che kha ieng khom hmai nei dêr loin hril vong rawh. 3 Ngàithla a, an um dàn suol màksan khom an um miel el thei a nih. Chuong a ni chun, an suolna leia an chunga sietna intlungtir ka tum chu intlungtir loin ka thu sût ka tih. 4 Chun, nangin an kuomah, 'Hi hi LALPAN a hril: In kuoma ka pêk, ka thu in poisa naw a, ka dàn khom in zawm bok nawh. 5 In kuoma ka hung tir rop hlak ka zawlneihai thu in poisa naw leiin, 6 hi in hi Siloo angin suksieng ka ta, hnuoi chunga hnam tinrêng tongsephurin um a tih' tiin hril bok rawh" tiin. 7 Thiempu hai, zawlnei hai le mipui po po chun LALPA tempula Jeremia thu hril chu an ngàithlàk a. 8 Mipuihai kuoma hril dinga LALPAN thu a pêk po po a hril zo chun thiempu hai, zawlnei hai le mipui hai chun an man a, "I thi ngei ding a nih. 9 Ieng dinga LALPA hming sâla, 'Hi tempul hi Silo ang la nîng a ta, hi khawpui hi hluotu um loin la rausan an tih' tia i hril am a na?" an ta. Chuongchun, LALPA tempula chun mipuiin Jeremia chu an bawr luoi luoi a. 10 Hieng thu hi lal ina Juda rorêltuhaiin an hriet chun tempulah an hang fe a, LALPA tempul lûtna Kotkhàr Thara chun an inthung a. 11 Thiempuhai le zawlneihai chun rorêltuhai le mipuihai kuomah, "Hi khawpui siet ding thu hi a hril lawk leiin hi pa hi thi tlâk a nih. In nâ ngeiin a hril khom in hriet kha!" an ta. 12 Jeremia chun rorêltuhai le mipuihai kuomah, "In thu ngàithlàk tah po po ang khan, hi tempul le hi khawpui siet ding thu hi hril dingin LALPAN a mi tir a nih. 13 Chuleiin, tuhin in um dàn le chêt dàn insiem tha unla, LALPA in Pathien thu chu awi ro, chuongchun LALPAN in chunga sietna hung tlung ding a puong tah chu sût nawk a tih. 14 Kei ruok chu in kuta um ka ni hi; indik le tha in ti dàn ang angin mi thaw ro. 15 In mi sukhlum chun nangni le hi khawpui le a sûnga chênghai chungah poi tawk lo thisen maw chu tlâng a tih ti hre ro; LALPA chun in hriet ngèia hieng thuhai hi indik taka hril dingin a mi tir si a" a ta. 16 Chuongchun, rorêltuhai le mipuihai chun thiempuhai le zawlneihai kuomah, "Hi mi hi thi ding a ni nawh! LALPA ei Pathien hmingin ei kuoma thu a hung hril a ni hi" an ta. 17 A ram mi upa iemani zât an hung ngìr suok a, mipui pungkhawm hmaa chun, 18 "Juda lal Hezekia hun lai khom khan Moreset mi Mika khomin Juda mi po po kuomah, "Iengkim LALPA chun hieng hin a hril:'Zion chu lo anga inlet nîng a ta, Jerusalem chu tlu se rem rum a ta, Tempul muol chu chîmbukin bawm a tih"tiin a lo hril lawk a ni kha. 19 Juda lal Hezekia le Judahai khan ama chu an sukhlum am a nih? LALPA tiin, LALPA ditsakna an ngèn a, LALPAN an chunga sietna intlungtir dinga a puong ta chu a sût nawk a ni naw am a ni? Sietna râpthlâk tak chu eini ngeiin ei tong buok têp lem a ni hi! 20 Chun, mi dang, Kiriat Jearim mi, Semaia naupa Uria khomin LALPA hmingin hi khawpui siet ding thu bok hi Jeremia ang hin a hril lawk ve kha. 21 Lal Jehoiakim le a mi lienhai po po le rorêltuhaiin an hriet chun Uria chu lalin sukhlum a tum a, sienkhom chu chu Uria-in a lo hriet a, tiin a tlân hmang a, Aigupta ramah a fe a. 22 Lal Jehoiakim chun Aigupta ramah Akbor naupa Elnathan le mi iemani zàt a tir a. 23 Uria chu Aigupta rama inthokin an hung thuoi kîr a, lal Jehoiakim hmaah an thuoi a, kawlhnâmin a sât hlum a, mi naran phùmnaah a ruong an pei lût a ni kha" an ta. 24 Chu bâkah, Safan naupa Ahikam chun Jeremia chu a tan tlat leiin, that dingin mipui kuomah an pèk lût ta naw a nih.

Jeremiah 27

1 Juda lal Josia naupa Zedekia inlal tan hlimin LALPA kuoma inthokin hi thu hi a hung tlung a. 2 LALPA chun, "Ringkol le a hrui siem la, i ringah bât rawh. 3 Edom lal hai, Moab lal hai, Amon lal hai, Tura lal hai le Sidon lal hai kuoma chun Jerusalema Juda lal Zedekia kuoma an palai hung tirhai hmangin an kuomah thu thon rawh. 4 Hieng thu hi an puhai kuoma hril dingin hril rawh: Israel Pathien, Iengkim LALPA chun hieng hin a tih: 5 'Ka thilthawtheina ropui tak leh ka bân pharin hnuoi le mihriemhai le a chunga um ramsahai hi ka siem a, ka pèk nuom nuom kuomah ka pêk a. 6 Tu khom hin ka rongbawltu Babulon lal Nebukadnezzar kutah hi ram po po hi ka pêk tah a, ramsahai khom ama rong bawl dingin ka pêk tah bok a nih. 7 Ama tlâkran hun a tlung hma chun hnam po poin ama le a nauhai le a tuhai rong bawl an ta, chu hnunga ruok chu a siet hun hung tlung a ta, hnam hrang hrang le lal tum tumin an thu hnuoiah sie ve thung tàng an tih. 8 "Amiruokchu, hnam amanih ram amanih tu khom Babulon lal Nebukadnezzar ringkol bât nuom lo le a rong bawl nuom lo an um chun chuonghai chu amain a tukdol hmain kawlhnâm le tàm le hripuiin keiman hrem tawl ka tih. 9 In zawlnei hai, aisanthiem hai, mang hril fie thiem hai, rau ko thiem hai le dawithiem haiin in kuomah, 'Babulon lal rong bawl naw ti niu' an ti chun an thu ngâithla naw ro. 10 Keiin in rama inthoka hla takah ka hnot suok theina ding cheu le in bohmang theina dingin in kuomah khêl thu an hril hlak a nih" ti hi LALPA thu suok a nih. 11 'Amiruokchu, Babulon lal ringkol bât a, a rong bawl nuomtu hnam chu an ram ngaiah inumtir ka ta, a hnuoi inlet an ta, chu taka chun chêng zing an tih'" ti hi LALPA thu suok a nih. 12 Chun, Juda lal Zedekia kuomah chu thu char chu hieng hin ka hril a: Babulon lal ringkol bât unla, ama le a mihai rong bawl unla, chuongchun hring in tih. 13 Babulon lal rong bawl nuom lo hnam chungthu LALPAN a hril tah ang khan, ieng leiin am kawlhnâm hai, tàm hai le hripui hai leiin nang le i mihai chu in thi ding? 14 Zawlnei tu khomin in kuomah, 'Babulon lal rong bawl naw ro' an hung ti chun ngâithla naw ro, in kuoma khêl thu an hril mei mei a ni lem. 15 'Anni chu ka tir an ni naw a, ka hming sâlin khêl thu an hril hlak a, nangni le in kuoma thu hung hriltuhai chu hnot suok a, ka sukbohmang theina ding cheuin' ti chu LALPA thu suok a nih. 16 Chun, thiempuhai le mipuihai kuoma khom ka hril bok a. LALPA chun hieng hin a tih: In kuoma zawlnei tu khomin, 'Ngai ro, Babulona inthokin LALPA tempula bûr le bêlhai chu an hung chawi kîr nawk vak ding a nih' an ti chun awi naw ro, khêl thu an hril cheu a nih. 17 Anni chu ngâithla naw unla, Babulon lal rong bawl unla, hring in tih. Ieng leiin am hi khawpui hi sukrama a um ding chu? 18 Zawlnei an ni a, LALPA thu an kuomah a um a ni chun, LALPA tempul le Juda lal in le Jerusalema bûr le bêl la umhai chu Babulon tienga tol a ni nawna dingin Iengkim LALPA kuomah ngèn lem raw hai se. 19 Chuong ang chun Iengkim LALPAN dâr ban hai, dâr tuizem hai, thilthuta hmang tawlailir hai le bûr le bêl, khawpuia an màksanhai chungchang thu chu a hril a ni kha. 20 Babulon lal Nebukadnezzar-in Juda lal Jehoiakim naupa Jehoiachinp le Judai ram le Jerusalema mi tha po po Babulon tienga sala a thuoi khan chuonghai chu a lâk sà naw hrim a nih. 21 A nih, LALPA tempul le Juda lal in le Jerusalema thil màksana la umhai thu kha Iengkim LALPA, Israel Pathien chun a hril a nih. 22 "Chuonghai chu Babulon tieng làkin um an ta, anni ka hung kan hma po chu chutaka chun um zing an ta, keiin la kîr nawk ka ta, hi hmuna hin sie kîr nawk ka tih" ti hi LALPA thu suok a nih.

Jeremiah 28

1 Juda lal Zedekia inlala inthoka a kum lina, thla nganaq chun Azur naupa zawlnei Hanania, Gibeon mi chun thiempuhai le mipui po po hmaah LALPA tempula chun a mi biek a, ka kuomah, " 2 Iengkim LALPA, Israel Pathien chun hieng hin a tih: Babulon lal ringkol chu suktliek ka tih. 3 Babulon lal Nebukadnezzarin LALPA tempula inthoka bûr le bèl a lâk po po chu kum hni sûngin hi hmuna ngei hin hung inthaktir nawk vong ka tih. 4 Hi hmuna hin Juda lal Jehoiakim naupa Jehoiachin le Babulona fe Juda mi sala intânghai po po chu hung thuoi kîr nawk vong ka ta, Babulon lal ringkol chu ka suktliek ding a nih' ti hi LALPA thu suok a nih" tiin. 5 Chu phing leh zawlnei Jeremia chun LALPA tempula ngîr thiempuhai le mipuihai hmaa chun zawlnei Hanania chu a don a. 6 Ama chun, "Amen, chuong ang chun LALPAN thaw sien ni ding maw! LALPA tempula bûr le bèlhai le saltânghai chu i hril ang chun LALPAN thawin hi hmuna hin hung intlungtir nawk vong raw se. 7 Amiruokchu, nangma le mipuihai hriet phâk ngeia ka hril hi lo ngâithla rawh. 8 Kha hma daia inthok tah khan, nangma le keima inlang hma khan zawlneihai chun ram tam tak le lalram tam tak chunga indona dâm, sietna dâm le hripui dâm hung tlung ding thu an hril lawk hlak a. 9 Muongna hun hung tlung ding zawlnei hrilhai chu a hung tlung indik chun, ama chu LALPA tir ngei a nih ti chieng el a tih" a ta. 10 Zawlnei Hanania chun zawlnei Jeremia ringkol bàt lai chu a lâk thlàk a, a suktliek a. 11 Mipui po po hmaa chun Hanania-in, "Hieng hin LALPA chun a tih: Hieng ang bok hin Babulon lal Nebukadnezzar ringkol chu kum hni sûng ngeiin hnamhai po po ringa inthokin suktliek ka tih' a ti a nih" a ta. Chu phing leh zawlnei Jeremia chun a mâksan ta a. 12 Zawlnei Hanania-in zawlnei Jeremia ringkol bàt a suktliek hnung chun LALPA thu chu a hung tlung a, 13 "Fe la, Hanania kuomah hieng ang hin va hril rawh: Thing ringkol i suktliek a, chu ai chun thîr ringkol i siempêk lem a. 14 Hieng ang hin Israel Pathien, Iengkim LALPA chun a hril: Babulon lal Nebukadnezzar rong an bawl theina dingin hieng hnam po po hi thîr ringkol i'n bâttir a nih; ama rong bawl an ta; ram hnuoia ramsahai chen khom ama ka pêk bok a nih, tiin. 15 Chun, zawlnei Jeremia chun zawlnei Hanania kuomah, "Ngai rawh, Hanania, LALPAN a tir awzawng naw che! Hieng mihai hi khêl thu inringtir i tum mei mei a ni lem. 16 'Ngai ta, hnuoi chunga inthok hin ka sukbohmang dai ding chè a nih' ti hi LALPA thu suok a nih. LALPA laka helna thu i tlâng insampui leiin tu kum ngei hin thîng i tih" a ta. 17 Chuongchun, chu kum thla sarinaa chun zawlnei Hanania chu a thi ta a.

Jeremiah 29

1 Hi hi Jerusalema inthoka Nebukadnezzarin Babulon tienga sala a thuoi upa hai, thiempu hai, zawlnei hai le mi dang hai laia a dam la um sunhai kuoma Jerusalema inthoka zawlnei Jeremia lekhathon chu a nih. 2 Chu chu lal Jehoiachin le lalnu nu hai, lal ina thoktu hai, Judai ram le Jerusalema thuoitu hai, mi themthiem hai le thirsu haiin Jerusalem an suoksan hnung kha a nih. 3 Chu lekha chu Safan naupa Elasa le Hilkia naupa Germaria hai, lal Zedekia-in Babulona lal Nebukadnezzar kuoma a tirhai chu a'n chawitir a. Hieng hin a ziek a: 4 Hi hi Iengkim LALPA, Israel Pathienin Jerusalema inthoka Babulona sala an thuoihai kuoma a hril chu a nih: 5 "Inhai bawlin umhmun khuor unla, thlaihai chîngin a tharsuok fa ro. 6 Nuhmei pasal inneiin, naupa le naunuhai nei unla, in naupahai nuhmei ding zongpèk unla, in naunuhai pasal ding zongpèk bok ro, nangni anga thla an hung nei ve theina dingin. Chu taka chun hung pung unla, kiem tieng pan naw ro. 7 Sala ka thuoina cheu khuo ta dinga muongna le hmuingilna chu zong ro. Chu ding chun LALPA kuomah hni ro; a hmuingil chun nangni khom in hmuingil ve ding a ni si a. 8 A nih, hi hi Iengkim LALPA, Israel Pathien hril chu a nih: "Nangni laia zawlneihai le aisanthiemhai hlèmin um naw ro. An mang an hril cheu chu ngaithla naw ro. 9 Ka hmingin khêl thu an hril cheu a ni kha. Anni chu ka mi tirhai an ni nawh" ti hi LALPA thu suok a nih. 10 Hi hi LALPA hril chu a nih: "Babulon ta dinga kum sawmsari a tlingtla pha leh hung kan ka ti cheu a, hi hmuna thuoi kîr nawk ding cheua ka thu tiem inzaum tak chu hung hlen ka tih. 11 In hmuingilna ding dâm, thil tha lo in chunga a tlung nawna ding dâm, beiseina neia hma tieng in thlîr theina ding dâma in ta dinga ka remruothai chu ka hriet, " ti hi LALPA thu suok a nih. 12 "Chun, ka hming lamin, ka kuomah hung tongtai in ta, lo ngaithlàng ka ti cheu. 13 Mi zong in ta, in lungril po poa in mi zong huna chun mi hmûng in tih. 14 Nangni mi hmu theiin um tàng ka ta, hnam tin lai le ram tina ka hnot darna cheu hmuna inthok chun thuoi khawm nawkin, in saltângnaa inthokin thuoi kîr ka ti cheu" ti hi LALPA thu suok a nih. 15 Nangni chun, "LALPAN Babulon rama khom kan ta dingin zawlnei a mi'n dinpêk" in ti khom a ni el thei. 16 Davida lalthungphaa thunghai le Jerusalema la chambâng, Babulon tienga sala thuoi sa ve lo in unauhai chungchàng thu LALPAN a hril chu hieng ang hi a nih. 17 A nih, Iengkim LALPA chun hieng ang hin a tih: "An chungah kawlhnâm dâm, tàm dâm le hripui dâm inlêngtir ka ta, theichang hrût, fâk tlâk dèr lo angin siem ka tih. 18 Kawlhnâm le tàm le hripuiin hnot zui ka ta, hnuoia lalram po po intentir ka ta, mi tongsie le pangzat phur an ta, ka sukdarna hnam po po hmusit le hal kawng nîng an tih. 19 An kuomah ka thu hriltu ding ka siehlaw zawlneihai ka tir ka tir khoma an lo ngaithlâk nuom si nawh. Nangni saltânghai khomin in ngaithlâk chuong bik nawh" ti hi LALPA thu suok a nih. 20 'Chuleiin, Jerusalema inthoka Babulona ka thon hmang, nangni saltâng po pohai, LALPA thu hi ngaithla ro. 21 Ka hming sâla in kuoma khêl thu hril hlaktu Kolai naupa Ahab le Maseia naupa Zedekia chungthua Israel Pathien, Iengkim LALPA hril chu hi hi a nih: "Babulon lal Nebukadnezzar kutah pêng ka ta, in mithmu ngèiah anni chu sukhlum a tih. 22 Anni lei chun Judai rama mi Babulona saltàng po po chun, 'Babulon lalin meia a raw hlum Zedekia le Ahab angin LALPAN i chungah thaw ve raw se' ti hi tongsie inphurna tonglamkeiah hung hmang pha hiel an tih. 23 Israel rama chun thil invêt thlâk tak an thaw a, an tuolbawmhai nuhmei an uirepui a, ka hming sâlin, ka thupêk ni si loin, khêl thu an hril a. Chu chu kei a hmutu le hrepuitu chu ka nih" ti hi LALPA thu suok a nih. 24 Nehelam mi Semaia kuomah hi thu hi hril rawh. 25 "Israel Pathien, Iengkim LALPA chun hieng hin a tih: Nangma thuin thiempu Maseia naupa Zefania kuomah lekha i thon a, thiempu dang po pohai le Jerusalema mipuihai kuomah a kawpi i thon tawl a. Zefania kuoma chun, 26 'LALPA tempul enkoltu dingin LALPAN Jehoiada aiin thiempuah a ruot che a, mi invêt, zawlnei inti taphothai chu thîr kol i'n buntir ding i nih. 27 Ieng dinga Anathot khaw mi Jeremia, in kuoma zawlnei anga hung insàl kha i zil naw am a na? 28 Babulona dâm lekha a hung thon a, 'In sal intâng sûng ding hi a sawt ding a ni leiin in bawlin umhmun khuor unla, huonhai siemin a tharsuok chu fa ro' dâm a hung ti a nih" tiin. 29 Thiempu Zefania-in Semaia lekhathon a hmu chun Jeremia kuomah a chawi a, a tiem a. 30 Chu phing leh LALPA thu chu Jeremia kuomah a hung tlung a: 31 "Hi thucha hi saltànghai kuomah thon rawh: Nehelam mi Semaia chungthua LALPA thu suok chu hi hi a nih: Semaia kha ka tir ni si loin thil dâm a hril lawk a, khêl thu a'n ringtir cheu a. 32 Chuleiin, LALPA chun hieng hin a tih: Nehelam mi Semaia le a thlàhai chu hrem ngei ngei ka tih. Ka laka hel thu a hril leiin hieng a mihai lai hin tu khom dam khawsuok um naw ni hai a, ka mihai ta dinga thil tha ka thaw dinghai khom hmu phâk bok naw nih' ti hi LALPA thu suok a nih", tiin.

Jeremiah 30

1 Jeremia kuoma LALPA thu hung tlung chu: 2 "Hi hi LALPA, Israel Pathien hril chu a nih: 'Ka thu hril po po che hi lekhabuah ziek thla rawh. 3 Ngai ta, ka mi Israel le Juda saltànghai ka thuoi kîr nawk hun le an thlatuhai rochung dinga ram ka pêka ka tungding tawl nawk hun chu a hung tlung mèk a nih' ti hi LALPA thu suok a nih. 4 Israel le Juda chungthua LALPA thuhai chu hieng hi a nih: 5 LALPA chun hieng hin a tih:" 'Thlaphâng tap rawl ka hriet, Muongna ni lo, lungphâng ri. 6 Indonin hang en vel tu'm, Pasalin nau an nei thei maw?Chuong ni sî chun ieng lei a, Nuhmei nau hase ang a, Pasalthahan an tài dom a, An hmài a dâng am a na? 7 Chu ni râpthlàk dingzie chu, A tlukpui um thei naw nih. Jakob beidong ni a na, Sienkhom san suok nîng a tih. 8 Chu ni chun, an ringkol bàt chu suktliek ka ta, a hrui chu sukchat ka ta, ram dang mihaiin anni chu rongbawltuah hmang ta ngai naw ni hai. 9 LALPA an Pathien le an lal dinga ka tungding ding Davida rong chu bawl lem tàng an tih, Iengkim LALPA chun a tih. 10 Chuleiin, aw ka siehlaw Jakob, Lungphâng hrim hrim naw la, Aw Israel, zâm der naw raw khai, Ti hi LALPA thu suok chu a nih. "Ram hla takah um la khom, San suok ngèi ngêi ka ti che a, I saltàngna rama inthokin, I thlàhai chu san suok ka tih. Muongna le himna hmunah, Jakob chu chêng nawk a ta, Thlabârin um ta naw nih. 11 Umpuiin hum ka ti che, Ti hi LALPA thu suok a nih. Ka sukdarna cheu hnamhai, An rêngin sukram lang khom, Sukram vong nawng ka ti cheu. Thunun ka ti cheu a, Sienkhom a hun tawk chauin; Hrem lo chun suok naw ti niu. " 12 LALPA chun hieng hin a tih:"I hliemna sukdam ruol an nawh, A bè sukdam thei a ni nawh. 13 I pânna sukdam dingin, Enkoltu che an um naw a, Damdawi hrim a um bok nawh. 14 I'n koppuihai po po khan, An theinghil vong ta che a, Ngaisak chê an um tah nawh. Hmêlma angin ka vuok che a, Mi tawrot angin ka hrem che, I bawsietna a tam èm a, I suolna a nasa si leiin. 15 Ieng dinga i hliemna leiaI tap khêk ringot am a na?I natna sukdam ruol an nawh; I bawsietna a tam lei le, I suolna a nasat leiin, Hieng po po hi i chungah, Ka hung intlungtir a nih. 16 Nangma fa ramtuhai chu, Fâk ramin um vèng an ta, In hmêlmahai po po chu, Salah la'n tàng vèng an tih. A hung roktuhai cheu chu, Mihaiin rok vèng an ta, Râllâka latuhai che chu, Râllâkin la vêng an tih. 17 Sukhrisel nawk ka ti che a, I hliemhai sukdam ka tih, "LALPA thu suok chun a tih, 'Tû ngaisak hlaw lo Zion, Mi hnot suok hnung' an ti che leiin. 18 LALPA chun hieng hin a tih:Jakob puon ina chênghai, Hung intuoi thar nawk ka ta, Anni lunginsiet ka ta, An muol le tlâng ngeia chun, An khawpui tlu ram hnung chu, Hung indin thar nawk ka tih. 19 Chu mihaia inthok chun, Lawmthu hrilna hlahai leLawmna ri hung suok a ta, Anni chu sukpung ka ta, Tlawm tieng pan ngai naw ni hai. Anni chu chawisâng ka ta, Endong ni ta nawng an tih. 20 Tuta hmaa ang bokin, An nauhai hung pung an ta, An khaw tlànga chênghai chu, Ka hmaah phun nghet ka ta, Anni nêksawrtu taphot chu, Keiman hrem pei tawl ka tih. 21 Anni mi le sâ ngei chu, An thuoitu hung nîng a ta, An rorêltuhai khom chu, Anni mi bok nîng an tih. Ka bulah hung thuoi ka ta, Aman mi hnai tâng a tih. Keimain ka fiel naw chun, Tu'n am mi hnai ngam a ta?Ti hi LALPA thu suok a nih. 22 Chun, ka mihai nîng in ta, Kei in Pathien chu nîng ka tih. 23 En ta, LALPA lungsenna thlipui, Thlipui intûr ngul el chu, Mi rilohai nuoi dingin, A hung hràng thla ding a nih. 24 A thil tum a hlen hma chun, LALPA lungsen intûr chu, A lamlêt naw ding a nih. Ni la hung tlung dinga chun, Hi hi la hre thiem in tih.

Jeremiah 31

1 "Chu hnunga chun kei hi, Israelhai Pathien ni tâng ka ta, Anni khom ka mihai nîng an tih" Ti hi LALPA thu suok a nih. 2 LALPA chun hi thu hi a hril:"Kawlhnâma thi mahlahai chun, Thlalèrah ditsakna hmûng an ta, Keima hungin, Israelhai chu, Chawl hadamna pêng ka tih. " 3 Tien lai khan chu ei kuomah, LALPA a hung inlang hlak a, Ei kuomah hieng hin a hril a:Hmangai tawp loa hmangaiin, Laina takin ka kei hnài che a. 4 Aw Israel nunghak thienglâm, Indin thar nawk ka ti che a, Tungdingin um nawk i ta, I khuongtè leh inthokin, Hlim takin lâm nawk i tih. 5 Samari tlâng dung tluonin, Grêp huon siem nawk i ta, Loneituhan chîng an ta, Annin a rà tlàn an tih. 6 Efraim tlângrama ngei chun, "Thaw ro, Zion-ah fêng ei tiu, LALPA ei Pathien kuomah"Tia vêngtuhai an khêk ni, A la hung tlung ding a ni si. 7 LALPA chun hieng hin a tih:Jakob ta di'n lawm hla rem ro, Hnam laia ropui tak ta dingin, Inring taka khêk suokin, Chawimawiin puong suok unla, "Hlaa um sun i mi Israelhai chu, LALPA, nangin humhim rawh" tiin. 8 "En ta u, hmar tieng rama inthokin, Anni chu hung thuoi ka ta, Kawl kil tawp chena mi khom, An rêngin thuoi khawm ka tih. Mitdel dâm le kebai dâm, Nuhmei nau pai inrik dâm, Nau hase invoi mek dâm, Anni lai chun thang an ta, Mi tam tak hung khawm an tih. 9 Mitthli pumin hung an ta, Chuonga ka thuoi kìr lai chun, Tongtai mol mol tawl an ta, Vadung kam hmun ruol remah, An insui nawna dingah, Anni chu thuoi tawl ka tih. Israelhai pà ka na, Efraim chu ka nau lutìr a nih. r 10 Khawvela hnam po pohai, LALPA thu lo ngaithla ro; Tuipui ràl ram hla takah, A thuhai chu puong dar ro. Israelhai sukdartu chun, A lâk khawm nawk ding a na, Berampuin a beramhai, A vèng angin vêng a tih. 11 Jakob chu LALPAN intlan a ta, Anni nêk daia hrât lem, Kut a'nthok san suok a tih. 12 Zion tlàng sîpah chuongin, Hlimna hlâ hung sak an ta, Bu hai, uoiin hai, hriek hai, Beram ruol le bawng ruolhai, Hnienghnâr taka hung vurtu, LALPA chungah lawm an tih. An hringna chu tuia chawm zing, Huon hring dup ang nîng a ta, Lungzîngin um tah naw ni hai. 13 An nunghàkhai lâm an ta, Tlangvàlhan hung zawm an ta, A tar a zûr hlim an tih. An lusûn chu lawmnaahInchangtir lem tàng ka ta, Lungngaina nêkin hlimna, Thlamuongnan vûr lem ka tih. 14 Thiempuhai hrâi tlai ka ta, Ka hausak hnienghnàrna chun, Ka mihai sung sip ka tih, Ti hi LALPA thu suok a nih. 15 LALPA chun hieng hin a tih:"Rama khuoa ri an hriet chu, Lusun tap khèk rong rong a nih; Rakilin a nauhai a ta a, An um ta si naw leiin, Thlèm tlài ruol hrim a ni nawh. " 16 LALPA chun hieng hin a tih:" I tap lai bâng ta raw khai, I mitthli khom hul ta raw se, I thilthaw'n lukhawng neiin, Hmêlma rama inthokin, An hung kìr nawk ding a nih"Ti hi LALPA thu suok a nih. 17 "Hma tieng beisei ding i nei, I nauhai chu an ram ngeiah, An hung kìr nawk ding a nih"Ti hi LALPA thu suok a nih. 18 "Efraim inrûm ri chu ka hriet:'Bawng tuoi hel sawi ang elin, Nangin i mi thunun a, Thununin ka um ta hi. Mi siem thar la, hung kìr ka tih, LALPA ka Pathien i ni si a. 19 Invâk hmang ka sim ta a, Ka hung inhriet chieng hnungin, Poitiin awm ka chum a; Ka tleirawl suolna phurin, Inzakin ka hmâi a mawk' tiin. 20 Efraim chu ka nau dit tak, Ka lawmna a ni naw maw?Ka khak chàng um rop sien khom, Ka theinghil ngai hrim hrim nawh. Lungrilin ka thlâkhla a, Ka lunginsiet hlè a nih"Ti hi LALPA thu suok a nih. 21 'Lam inchiknahai siem la, Lam kawkhmunahai târ rawh. I lamlien hraw en ngun rawh. Aw Israel nunghàk thienglâm, I khuo tieng hung kìr nawk rawh. 22 Aw, nang naunu lepchie, Ieng chen am i'n vàk rawlai ding?LALPAN hnuoi hi a letlingin, A lo siem danglam am an ta, Nuhmeiin pasal a lèng lem el hi? 23 Iengkim LALPA, Israel Pathien chun hieng hin a tih: An saltàngnaa inthoka ka thuoi kìr tawl pha chun Judai ram le a khawpuia chênghai chun hieng ang tongkam, 'Aw nang tlâng thienghlim, Felna a chèngna tlângpui, LALPAN malsawm che raw se'ti hi la hmang nawk an tih. 24 Judai ram le a khawpuia hai chun mi po po chu chêng tlâng an ta, loneituhai le beram vêngtuhai chu chêng tlâng an tih. 25 Chàuhai chu sukhar ka ta, tamsawlhai chu hrâi tlai ka tih" tiin. 26 Chuongchun, ka hang har a, ka ngha vel a. Ka mang chu inhoi ka ti hle a. 27 'Ngai ta u, Israel sûngkuo le Juda sûngkuohai ka phun nawk ding hun le an ran ruolhai ka sukpung nawk ding hun chu a hung tlung ding a nih. 28 Phawi dok le kei thlûk a, thè zap le suksiet dinga ka'n chàn ang khan anni ka tungding hun le phun nawk ding hun chu ka mel kâi zing a nih" ti hi LALPA thu suok a nih. 29 Chuong nia hai chun mihaiin, 'Pahaiin grêp thùr an fàk a, An nauhai hà a suktim'ti dâm hi ti nawk ngai tah naw ni hai. 30 Chuong nêk hmanin, mi tinin mani suol thaw thipui an ta, grêp thùr fatu hà chu tim lem tàng a tih. 31 "Ngai ta u, Israel sûngkuo le Juda sûngkuo leh thuthlung thar ka siem ding hun chu a hung tlung ding a nih" ti hi LALPA thu suok a nih. 32 Aigupta rama inthoka an thlatuhai kuta chela ka thuoi suok laia ka thuthlung ang kha ni ta naw nih. An ta dinga lû ka ni zing khomin chu thuthlung chu an bawsiet a ni kha" ti hi LALPA thu suok a nih. 33 "Chu ni a hung tlung pha chun, Israelhai chu thuthlung thar siempui ka ta, an ngaituonaah ka dànhai sieng ka ta, an lungrilah ziek bok ka ta, an Pathien nîng ka ta, anni chu ka mihai nîng an tih. 34 Tu khomin mani tuolbawmhai amanih unau amanih kuomah, "LALPA chu hre rawh" tiin zirtir ta naw ni hai a, a chîn taka inthoka a lien tak chenin, an rêngin mi hre vong tàng an tih. An ritlonahai chu ngaidamin, an suolnahai chu hre zing ta naw ning" ti hi LALPA thu suok a nih. 35 LALPA chun hieng hin a hril:"Sùn elvartu dinga nisa petu, Zàn elvartu dinga thlà le arasi petu, Tuipui inrûm dinga chokthotu chu-A hming Iengkim LALPA a nih. 36 Hieng thu ruothai po po hi, Ka hmua an bo hun chauin, Israel thlâhai khom chu, Hnam an nina a'nthokin, Ka hmaah bo chauh an tih" tiin. 37 LALPA chun hieng hin a hril:"Vàn khi inkhì thei a ni pha, Hnuoi thut zong suok a ni phâ chauh, Israel thlâhai khom chu, An thilthaw leiin hnawl ka tih" tiin. 38 "Hananel kulbîng sànga inthoka a Kil Kotkhàr chen bawl thar a ni ding hun chu a hung tlung mêk a nih" ti hi LALPA thu suok a nih. 39 "A'n khìna hrui chu Gareb tlâng chenin tlûn takin fe thleng a ta, Goa tieng kawi a tih. 40 Mithi ruong le vut peina ruom pumpui le khawhnawm po po, Kidron vadung chenin, sak tieng Sakor Kotkhàr kil chen chu LALPA ta dinga ser thienghlim nîng a ta, a khawpui chu sukdar le thiek ni ta ngai naw nih" tiin.

Jeremiah 32

1 Juda lal Zedekia inlala inthoka kum sawmnas le Lal Nebukadnezzar inlala inthoka kum sawm le kum rietnaa chun Jeremia kuomah LALPA thu a hung tlung a. 2 Babulon lal sipaihaiin Jerusalem an inhuol lai a na, zawlnei Jeremia ruok chu Juda lal in vêngtuhai inkulnaa chun an intàngtir a. 3 Juda lal Zedekia chun Jeremia kuomah, "Ieng leia thil hril lawk i chîng am a na? Hieng hin i hril a, 'Hieng hin LALPA chun a tih: Hi khawpui hi Babulon lal kutah ka pêk tèp a, ama chun a lâk ding a nih. 4 Juda lal Zedekia chu Babulon lal kuta inthokin tlân suok naw ni a, a kutah pèkin um a ta, hmai intonin, a mit ngeiin hmung a tih. 5 Zedekia chu Babulon ramah thuoi a ta, ama ka kan hmâ khat chu chu taka chun um zing a tih. Kaldai mihai chu do inla khom hlawtling chuong naw ti niu. Chu chu LALPA thu suok a nih' ti dâmin ieng leia i hril am a na?" a ta, chu thil leia lung ina a khum a nih. 6 Jeremia chun, "LALPA thu chu ka kuomah a hung tlung a: 7 Ngai rawh, i papui Salum naupa Hanamel chu Anathot khuoa inthokin i kuomah hung a ta, 'Ka lo mi'n chawpêk rawh, nang chu laichin hnai le an ro khom khawm thei, a'n chaw ding tak i nih' tiin a hung ngèn ding che a nih" tiin. 8 Chuongchun LALPA hril ang ngei chun ka papui naupa Hanamel chu lal vêngtuhai inkulna sûnga chun a hung a, ka kuomah, 'Benjamin rama Anathot khuoa ka lo inchaw ta la, ka ro khawm theitu i ni leiin a'n tlantu ding tak i na, i ta dingin inchaw el rawh' a ta. Chuongchun, hi hi LALPA thu ngei kha a nih ti ka hriet ta a. 9 Ka papui naupa Hanamel, Anathot khaw mi lo chu ka'n chawk ta a, tangka chu kan hang bûk a, tangkaruo shekel sawm le pasari a nih. 10 Inchawkna lekhaa chun ka hming ka ziek a, suoi ka nam a, hrepuituhai hming ka'n inziektir bok a, phahlaa chun tangkaruo chu kan bùk a. 11 Inchawkna lekha, inchawk a ni dàn le a umzie ziekna le suoi namna kawpi le suoi nam lo kawpi chu ka lâk a, 12 chuong lekhahai chu ka papui naupa Hanamel le hrepuitua hming chuonghai mithmua le vêngtuhai inkulna huong sûnga Juda inthunghai po po mithmua chun Maseia naupa Neria naupa Baruk chu ka pêk a. 13 Chuonghai hmaa chun Baruk chu hieng ang hin thu ka pêk a: 14 'Hi hi Iengkim LALPA, Israel Pathien hril chu a nih: Hieng lekhahai, inchawkna lekha, suoi nam le nam nawhai hi sawt tak a um theina dingin pil bêlah sie rawh. 15 Israel Pathien, Iengkim LALPA chun, 'Hi rama hin in hai, lo hai le grêp huon hai mihaiin an la'n chawk ding a nih, a tih' tiin. 16 Neria naupa Baruk kuoma inchawkna lekha ka pêk zo chun LALPA kuomah ka tongtai a: 17 "Aw LALPA Chunghnungtak, i kut thilthawtheina nasa tak chu pharin hnuoi le vànhai i siem a. Ieng khom i ta ding chun thaw harsa a um nawh. 18 Sâng tam tak chungah i hmangaina i'n langtir a, an pàhai suolna leiin an nauhai i hrem bok a. Aw Pathien ropui le thilthawthei, i hming chu Iengkim LALPA a na, 19 i thiltumhai a lien a, i thilthawhai a ropui a. Mihriem nauhai um dàn po po i hmu vong a, mi tin an um dàn le thilthaw phû ang peiin lawmman i pêk hlak. 20 Aiguptaa khan inchikna le thil mak tam tak i thaw a, tu chen khom hin Israelhai le mihriemhai po po chungah i la thaw zom zing a, chu chu i nìna hrim, i hming sukthangtu a nih. 21 I mi Israelhai chu Aigupta rama inthokin inchikna le thil mak leh, i kut thilthawtheina chu pharin, thil râpthlàk tak tak thawin i thuoi suok a. 22 Hi ram, nenetui le khuoizu luongna ram, an pi le puhai kuoma pèk i lo tiem tah chu i pêk a. 23 An hung lût a, an hluo a, sienkhom i thu an awi naw a, i dàn an zawm naw a, i thupêk angin an thaw bok nawh. Chuleiin, hieng sietnahai hi an chungah i hung intlungtir a nih. 24 "En ta, khawpui inhuolna le làkna dinga hnuoi an sung pawng po po hi? Kawlhnâm le tàm le hripui leiin khawpui chu a hung beitu Babulon mihai kutah pèkin a um ding a ni si a. I hril tahai po po kha i hmu ang hin a hung tlung mèk tah a ni hi. 25 Aw LALPA Chunghnungtak, khawpui chu Babulon mihai kutah pèk ding ni sien khom, nang ngeiin 'Lo chu tangkain inchaw la, hrepuitu ko rawh' i mi ti bok si a" tiin. 26 Chu zoah LALPA thu chu Jeremia kuomah a hung tlung a: 27 "Kei hi LALPA, mi po po Pathien chu ka nih. Ka ta dingin thaw harsa a um am a ni? 28 Chuleiin, LALPA chun hieng hin a tih: Hi khawpui hi Babulon mihai le Babulon lal Nebukadnezzar kutah ka'n hlàn têp a, ama chun lâng a tih. 29 Hi khawpui rûntu Babulon mihai chu hung lût an ta, rawng an ta, kàng dur dur a ta, ka lungsenna cho phawk dinga Baal kuoma rimtui inhlàn a, pathien danghai kuomah inthawia dawn ding an bun thlâkna in chung po po khom raw chim vong an tih. 30 "Israelhai le Judahai chun an tleirawla inthokin ka mithmuah thil suol naw chu ieng khom thaw an nei nawh. A nih, Israelhai chun kuta an siem fawm milema mi cho phawk naw chu ieng dang khom thaw an nei nawh" ti hi LALPA thu suok a nih. 31 Hi khawpui hi an rela inthoka tu chen hin, ka mithmua inthoka sukbohmang dai awm hrimin, ka lung suksenna ding ngot an thaw ngat ngat a nih. 32 Israel le Juda mipui hai, an lal hai, hotu hai, thiempu hai, zawlnei hai le Juda mi le Jerusalema mi hai chun ka lungsenna ding thil tha lo ngot an thaw a. 33 Ka tieng ngha loin tukhnungkhur an mi'n nghat a, zirtir ngat ngat tawl lang khom an ngaithlàk nuom naw a, insiem that an tum bok nawh. 34 Ka hming chuongna in chu sukporchè dingin milem tirdakum an làk lùt a. 35 Ben Hinom ruomah Baal ta dingin hmun sânghai an bawl a, an naunuhai le naupahai chu Molek kuoma meia inhlàn dingin an pèk a; chuong thil chu thaw dingin thu ka pêk ngai naw a, hieng thil theidaum hi thawin Judahai chu suol inthawtir an tih ti khom ka ngaituonaah a lût ngai hrim hrim bok nawh. 36 Israelhai Pathien, LALPA chun hieng hin a lo hril a: "Hi khawpui hi Babulon lal kutah pèk nîng a ta, kawlhnâm le tàm le hripui tuor a tih. 37 Sienkhom, ka lungsen inling laia ka hnot hmangna ram po poa inthok chun anni chu hi hmuna hin hung thuoi khawm nawk ka ta, him takin inumtir ka tih. 38 Ka mihai nîng an ta, kei an Pathien nîng ka tih. 39 Anni thatna ding le an thlàhai thatna ding le kumkhuoa an mi tì song theina dingin, anni chu lungril hmun khat inputtirin zai khatin inluongtir ka tih. 40 An kuomah kumkhaw thuthlung siem ka ta, an thatna ding thaw ma ngai nawng ka ta, an mi nghatsan nawna dingin, mi ti dingin an lungril sukphûr zing ka tih. 41 An thatna ding thaw chu ka lawmzawng nîng a ta, ka lungril po poin hi rama hin phun nghet tawl ka tih" tiin. 42 LALPA chun hieng hin a tih: "Hi mihai chunga thil tha naw ka'n tlungtir ang bok khan an kuoma thil tha ka tiem po pohai kha intlungtir ka tih. 43 'Hi rausan ram, sa le mihriem an chèng ta nawna ram, Babulonhai kuoma pèk suok ta hnung ram' in ti ngèia hin mihaiin in le lo inchawin an la bawl nawk ding a nih. 44 Benjamin rama hai, Jerusalem le a sèvel khuoa hai, Judai ram khawpuia le tlângram khuoa hai, thlang tieng phai thuta hai le sim tieng khawpuia hai chun mihaiin tangkain lo inchawng an ta, inchawkna lekha ziek an ta, suoi nam an ta, hrepuituhai ko an tih; an vàngneina chu ka sukhmuingil nawk ding a ni si a' ti hi LALPA thu suok a nih.

Jeremiah 33

1 Lal in vêngtuhai inkulna huong sûnga Jeremia an intàngtir lai chun LALPA thu voi hnìna chu a kuomah a hung tlung nawk a. 2 "Hnuoi indintu, duong suoktu le suknghettu LALPA, a hming khom LALPA chun hieng hin a tih: 3 'Mi hung ko la, don ka ti che a, thil ropui le i zong suok phàk ngai lo dinghai chu hril ka ti che. 4 LALPA, Israel Pathien chun hieng hin a tih: Babulont mihaiin an inhuolna cheu laka thang khawna ding le kul suknghetna dingin in inhai le lal in chen thiek hiel inla khom, 5 Babulon mihai chu hung lût tho an ta, ka lung inling leia ka sukhlumhai ruong chun hi khawpui hi sip a tih, an rîtlona leiin hi khawpui laka hin ka hmêl ka thup ding a ni si a. 6 "Amiruokchu, damna le hrilselna hung intlungtir nawk ka tih. Ka mihai chu sukdam ka ta, muongna le himna hnienghnâr takin tlàn an tih. 7 Juda le Israel chu an saltàngnaa inthokin hung thuoi kîr ka ta, a hmaa an nìna ang bokin suknghet nawk ka tih. 8 Chun, ka laka an suolna chu tlêng fai ka ta, ka laka an helna po po chu ngaidam ka tih. 9 Hi khawpui chungah hin that insuo a, hmuingìlna le muongna hnienghnâr taka ka vùrzie hretu le hmutu hi hnuoia hnamhai chun maktiin anni chu tiin inthin an ta, chuonghai hmaa chun hi khawpui hi kei mi sukhlimtu, suklawmtu le mi chawimawitu hung ni tâng a tih. 10 'LALPA chun hieng hin a tih: 'Hi hmun rausan le ram tah hnung tia an hril hlak le Judai ram khawpui hai, Jerusalem kotthlèr ram ta hnung, sâ le mihriem an chêng ta nawna hmuna an hril ngeia hin, 11 hlimna le lawmna ri hai, mo le moneitu rawl ri hai, LALPA tempulah, LALPA kuomah lawmthu hril ro, LALPA chu a tha si a, A ngilneinan kumtluong a daitia inthawina thilhlân an inhlàn rihai chu la hung hre nawk in tih. A ram vàngneina chu a hmaa ang bokin ka tungding nawk ding a ni si a' ti hi LALPA thu suok a nih. 12 "Iengkim LALPA chun hieng hin a tih: Mi le sâ an chèng ta nawna hmun rausan le khawpui ram hnung hmun tina chun ran tlatna hmun hring hung um nawk a ta, chuong hmuna hai chun berampuhan an beramhai intlattir an tih. 13 Tlâng ram khuoa hai, phai ram khuoa hai, sim tieng khawpuia hai, Benjamin rama hai, Jerusalem le a sè vèla hai le Judai ram khawpuia hai berampuhaiin an beramhai la hung tiem nawk mol mol an tih' ti hi LALPA thu suok a nih. 14 " 'Ngai ta, Israel sûngkuo le Juda sûngkuo laka ka thu tiem inzàum tak chu ka hlen suok ni ding a hung tlung mêk a nih' ti hi LALPA thu suok a nih. 15 'Chu ni le chu huna chun, Davida zungzâma inthokin, Felna Zâr inder suoktir ka ta, Ama chun fel tak le indik takin, A ramah ro hung rêl a tih. 16 Chuong nia chun Juda chu, Sanhimin um tàng a ta, Jerusalem khawpui khom, Him takin um tàng a tih. 'LALPA, Kan Felna chu'Ti hi a hming nîng a tih. ' 17 LALPA chun hieng hin a tih: "Davida chun Israel sûnghai lai lalthungphaa inthung ding mi invâi ngai naw nih; 18 thiempuhai, Levi chia mihai khomin ka hmaah inthawina pumraw thilhlânhai le bu le bâl thilhlânhai inhlàn zingtu ding mi invâi bok naw ni hai" tiin. 19 LALPA thu chu Jeremia kuomah a hung tlung a: 20 "LALPA chun hieng hin a tih: 'Sùn le zàn ta dinga thuthlung ka ruothai vé vè hi sukdanglam a, a hung tlung hun ding taka tlung lo dinga sùn le zàn in siem thei a ni chun, 21 ka rongbawltu Davida kuoma a lalthungpha hluotu ding mi a nei zing dingzie thu ka thlung chu sukdanglam thei ni chauh a tih; chuong ang bokin ka rongbawltu Levi chihai le thiempuhai kuoma ka thuthlung khom thiek thei ni chauh a tih. 22 Ka rongbawltu Davida thlàhai le ka hmaa rongbawltu Levi thlàhai khom vàna arasi tiem sèng lo ang le tuipui kama tieu vut tiem sèng lo ang elin sukpung ka tih. " 23 Chun, LALPA thu chu Jeremia kuomah a hung tlung a: 24 " 'LALPA thlang sûngkuo hnihai ram chu a suksiet tah' tia mihai hril hi i lo hriet ve hlak am? Chuong ang chun ka mihai chu hmusitin hnama khom an tiem sa ve ta naw a nih. 25 LALPA chun hieng hin a tih: Sùn le zàn kuoma ka thuthlung hi a nghet naw a, hnuoi le vàn um dàn ding ka ruot hi a nghet naw a ni chauhin, 26 Jakob thlahai le ka rongbawltu Davida thlahai chu pei hmang ka ta, Abraham hai, Isak hai, Jakob thlahai chunga rorêltuah a thlahai chu inumtir naw ning. An vàngneina chu tungdingin, ka lunginsiet tawl ding a ni si a" tiin.

Jeremiah 34

1 Babulon lal Nebukadnezzar le a sipai ruol po po le a hnuoia ram po poa lalhai le an sipaihaiin Jerusalem le a sè vèla khuohai an bei laia LALPA thu Jeremia kuoma hung tlung chu: 2 "LALPA, Israel Pathien chun hieng ang hin a tih: 'Juda lal Zedekia kuomah fe la, a kuomah hieng hin hril rawh: 'Hi hi LALPA thu chu a nih. Hi khawpui hi Babulon lal kutah ka pêk têp ta a, ama chun meiin rawng a ta, 3 a kuta inthokin intâl suok naw top i tih. Man nîng i ta, a kutah pêng an ti che a, bàu ngeiin inbiekpui i ta, Babulon ramah thuoi a ti che. 4 Aw Juda lal Zedekia, LALPA thutiem hi ngaithla pei rawh. I chungchang thua chun LALPAN hieng hin a tih: kawlhnâmin thi nawng i ta, thlamuong takin chawl lem i ta, 5 i hmaa lal lo thi tah i pi le puhai ang bokin nang khom an sùnna le inzanain rimtui rawpêk an ti che a, 'Aw Pu' tiin sûn an ti che' ti hi keima ngeiin ka tiem a nih' ti hi LALPA thu suok a nih" tiin. 6 Zawlnei Jeremia chun chuong thuhai po po chu Jerusalema Juda lal Zedekia chu a hril a. 7 Babulon lal sipai ruolin Jerusalem an inhuol lai chun Judai rama kul nei khuo dang an la làk naw chu Akis le Azeka hai chauh a ni tah. 8 Hebrai mi bawipa amanih bawinu amanih nei po poin an bawihai insuo vong dinga Lal Zedekia-in Jerusalema um mipuihai chu thu a thlungpui hnungin Jeremia kuomah LALPA thu a hung tlung a. 9 Chu dungzui chun, mi tinin Hebrai mi bawi an neihai chu a nuhmei a pasalin an insuo ding a na, tu khomin mani Juda chanpuihai hrim hrim bawiah an sie ding a ni ta nawh. 10 Chuong ang chun hotuhai le mipuihai chun an bawi kol senghai chu insuo zalèn an remti a, an insuo a. 11 Amiruokchu, iemani chen hnungah an lungril an thlàk a, an bawi insuohai chu la kîrin bawiah an siem nawk ta a. 12 Chuongchun, LALPA thu chu Jeremia kuomah a hung tlung a. 13 "Hi hi LALPA, Israel Pathien hril chu a nih: In pi le puhai Aigupta bawia inthoka ka hung thuoi suok lai khan thu ka thlungpui a. 14 An kuomah, 'Tu khomin in unaupa Hebrai mi, in kuomah an hung zora in inchawk chun, kum ruk in rong a bawl pha, a kum sarìnaah in insuo zalèn ding a nih' tiin ka hril a. In thlàtuhai chun ka thu an ngaithlàk naw a, an mi ûksak bok nawh. 15 Tu lai hnâi el khan inlamlêtin ka mithmuah thil indik in thaw a, mi tinin in unau chanpuihai chu in insuo zalèn a. Ka hming put tempula chun ka hmaah thuthlung in siem a. 16 Amiruokchu, in lungril in thlàk a, in nuom dàn ang taka in insuo in bawinu le bawipahai chu in thuoi kìr a, ka hming in suksiet a, in bawia sie nawk dingin in làk lui tawl nawk tah hi. 17 "Chuleiin, LALPA chun hieng hin a tih: Ka thu in zawm naw a, in unau chanpuihai chu zalènna in pèk nuom nawh. Chuleiin tu hin kawlhnâm le tàmpui le hripuiin zalen taka a nuoi dingin zalènna ka pêk cheu a, hi hnuoia lalramhai po po tirdak kai in tih. 18 Ka thuthlung bawsetuhai po po le ka hmaa an thutlung zawm si lohai chu bawng tuoi tan bong, a bong kàra fe thleng ang charin siem vêng ka tih. 19 Judai ram le Jerusalema hotu hai, rorêltu hai, thiempu hai le a rama chêng hai po po, bawng tuoi tan bong kàra fe thlenga thu an thlung hlen lotuhai chu, 20 that tuma zongtu an hmêlmahai kutah pêng ka ta, an ruonghai chu chunglèng vate le hnuoia ramsâhai tlàn ding chauh nîng a tih. 21 "Juda lal Zedekia le a rawihai chu that tuma zongtu an hmêlmahai le Babulon lal sipai ruol, anni tinsantuhai kuta chun pêng ka tih. 22 Hi khawpuia hung kìr nawk ding hin thu pêng ka ta, hung bei nawk an ta, lâng an ta, raw ram vong an tih. Judai ram khawpuihai chu hluotu um loin sukram ka tih" ti hi LALPA thu suok a nih.

Jeremiah 35

1 Juda lal Josia naupa Jehoiakim inlal laia Jeremia kuoma LALPA thu hung tlung chun: 2 "Rekab sûngkuohai chu LALPA tempul sûnga pindan pakhatah hung dingin fiel tawl la, dawn ding uoiin pe rawh" tiin a mi hril a. 3 Chuongchun, Habazinia naupa Jeremia naupa Jaazania le a unauhai le an naupahai po po le Rekab sûngkuo po po kuoma chun ka fe a. 4 An rêngin LALPA tempula Pathien mi Igdalia naupa Hanan naupahai pindana chun ka hung thuoi a, chu pindan chu tempul hotuhai pindan bul, kotkhàr vêngtu Salum naupa Maaseia pindan chunga um a nih. 5 Chun, Rekab sûngkuoa pahai hma senga chun berbu le no iemani zàt, uoiin sung sip chu ka sie a, "Uoiin hi dawn ro khai" ka ti a. 6 Nisienlakhom, anni chun, "Uoiin chu kan dawn ngai nawh. Kan thlàtu Rekab naupa Jonadab chun, 'Nangni le in thlàhai tu khomin kumkhuoin uoiin in dawn ding a ni nawh; 7 inhai bawlin, thlaihai chîngin, grêp huonhai in siem ding a ni bok naw a, in umna rama hin in dam sawt theina dingin in dam sùngin puon inah chêng ro, ' tiin thu a mi pèk a nih. 8 Chuongchun, kan thlàtu Rekab naupa Jonadab-in tongbaua thu a mi'n chà po po- kan dam sùnga keini le kan nuhmeihai le kan naupahai le naunuhaiin uoiin dawn lo ding dàm, 9 kan chèngna ding in bawl lo ding dàm, grêp huon siem lo ding dàm, thlài chîng lo ding- tihai dàm chu kan zawm a, 10 puon ina hai kan um lem a, kan thlàtu Jonadab thupêk po po chu awiin kan zawm vong a nih. 11 Chun, Babulon lal Nebukadnezzarin ram a hung bei lai khan, 'Thaw ro, Kaldai sipai ruol le Aram sipai ruolhai laka ei him theina dingin Jerusalemah tlàn ei tiu' kan ta, kan hung a, kan chèng ve el tah a nih" an ta. 12 Chun, LALPA thu chu Jeremia kuomah a hung tlung nawk a. 13 "Israel Pathien, Iengkim LALPA chun hieng hin a tih: Judai rama mihai le Jerusalema mihai kuomah fe la, an kuomah, LALPA chun, 'Ka thuhai a inthoka thil tha inchûkin in zawm naw ding am a nih?' a ti a nih. 14 Rekab naupa Jonadab chun a nauhai kuomah uoiin dawn lo dingin thu a pêk a, an thlatu thupèk chu inzà èm êma zawmin voisun chen hin uoiin an dawn naw a nih. Kei chun voi tam ka hril non ka hril non ta cheu a, sienkhom ka thu hrim in zawm nawh. 15 Ka rongbawltu zawlneihai chu in kuomah ka hung tir ka hung tir hlak a. In kuomah, 'Mi tinin in um dàn suol màksan unla, in thil thawhai thlâkin insiem thar unla, pathien danghai rong bawl dingin zui naw ro. Chuongchun, nangni le in thlàhai kuoma ka pèk rama hin chêng in tih' tiin an hril hlak cheu a, sienkhom in bengkhon naw a, in mi ngaithlak nuom bok nawh. 16 Rekab naupa Jonadab thlâhai ruok chun an thlàtu thupèk an zawm a, hi mihai ruok hin chu ka thupêk an ngaithlâk si nawh. 17 Chuleiin, Iengkim LALPA, Israel Pathien chun hieng hin a tih: Ngai ro, Judai ram le Jerusalema chênghai po po chungah sietna hung intlun dinga ka lo hril tahai po po kha ka hung intlungtir ding a nih. An kuomah thu ka hril a, an mi ngaithlâk nuom si naw a, anni ka ko leh an mi don bok si nawh" tiin. 18 Jeremia chun Rekab thlàhai kuomah, "Iengkim LALPA, Israel Pathien chun hieng ang hin a tih: 'In thlàtu Jonadab thupèk zawm a, a thu suok po po zui a, a ti dàn ang taka in thaw leiin, 19 Rekab naupa Jonadab chun kumkhuoin ka hmaa rongbawla ngîr ding mi invâi ngai naw nih' ti hi Iengkim LALPA, Israelhai Pathien thu suok a nih" tiin a hril tawl a.

Jeremiah 36

1 Juda lal Josia naupa Jehoiakim inlala inthoka kum linaa chun Jeremia kuomah LALPA thu a hung tlung a: 2 "Lekhabu ziel la la, chu taka chun i kuoma ka thu hril tah po po, Israel chungthu dâm, Juda chungthu dâm, hnam po po chungthu dâm, Josia hun laia i kuoma ka hrila inthoka voisun ni chena thil tlunghai po po chu ziek thla rawh, 3 Juda sûngkuohai chun an chunga sietna intlungtir ka tum po po chu hrea an um dàn suolhai an sim tâkduoiin; an sim chun an rîtlona le suolna chu ngaidam ka tih" a ta. 4 Chuongchun, Jeremia chun Neria naupa Baruk chu a ko a, a kuoma LALPA thu hril po po chu a hril a, savun lekhaah Baruk chun a lo ziek thlâk pei a. 5 Jeremia chun Baruk kuomah, "LALPA tempula fe thei lo dinga khuokhir ka ni si a. 6 Chuleiin, nang fe la, ka tongbaua inthoka LALPA thu ka hril, lekhabu ziela i ziek kha chawi la, bu nghei niah LALPA tempula um mipuihai hriet ngeiah tiem suok rawh; Juda mi, an khuoa inthoka hunghai po po hrieta khom tiem suok bok rawh. 7 Mihaiin an um dàn suolhai inlamlêt a, LALPA hmaah ngaidam an inhni tâkduoiin, ka ti a nih. LALPA thu puong, a mihai laka a lungsen inling dàn hi a râpthlâk êm si a" a ta. 8 Chuongchun, Neria naupa Baruk chun zawlnei Jeremia hril ang chun lekhabua LALPA thuhai chu LALPA tempula chun a tiem suok ta a. 9 Juda lal Josia naupa Jehoiakim inlala inthoka kum ngana thla kuonaau chun Jerusalema mi po po le Judai ram khaw tina inthoka Jerusalema hung mi po po chun LALPA hmaa bu nghei thu an puong a. 10 Baruk chun LALPA tempul lutna Kotkhàr Thar chuonchunga ziektu Safan naupa Gemaria pindana inthokin Jeremia thu dong lekhabua um chu mi po po hrietah a tiem a. 11 Safan naupa Gemaria naupa Mikaia'n lekhabua mi LALPA thuhai po po a hriet chun, 12 lal inah a fe thla a, ziektu pindana chun a lût a, chu taka chun hotu po po chu an lo inthung a. Chuonghai chu ziektu Elisama hai, Semaia naupa Delaia hai, Akbor naupa Elnathan hai, Safan naupa Gemaria hai, Hanania naupa Zedekia hai le hotu danghai an nih. 13 Mikaia chun mihai hrieta Barukin lekhabua mi a tiem thuhai chu a hriet ang angin a hril tawl a. 14 Hotuhai po po chun Kushi naupa Selemia naupa Nethania naupa Jehudi chu Baruk kuomah an tir a, "Mihai hrieta i tiem lekhabu chu chawiin hung rawh" tia hril dingin thu an incha a. Chuongchun, Neria naupa Baruk chu lekhabu ziel chawiin a hung a. 15 Anni chun, "Inthung la, kan hriet ngeiah tiem ve raw khai" an ta, Baruk chun a tiem tan ta a. 16 Chuong thuhai an hang hriet chun tiin an inen a. Baruk kuoma chun, "Hieng thu po po hi lal kan hril ngei ngei ding a nih. 17 Hieng thu po po hi iengtinam i ziek thlàk a na? Jeremia-in a hril che a ni? tiin an indon a. 18 Baruk chun, "Ni e, aman a hril a, keiin savun lekhaah lekhatuiin ka lo ziek thlàk a nih" a ta. 19 Hotuhai chun Baruk kuomah, "Fe la, Jeremia leh inbi hmang ro; tu khomin in umna hre naw raw hai se" an ta. 20 Ziektu Elisama pindanah lekhabu ziel chu an sie hnungin lal tuolzawla chun lal kuomah an fe a, an thu hriet po po chu an hril a. 21 Lal chun lekhaziel chu la dingin Jehudi a tir a, ziektu Elisama pindana inthok chun a hung làk a, lal le a bula ngîr hotuhai hrieta chun a tiem a. 22 Thla kuona a ni ta a, lal chu a thlasik ina chun a hmaa thuka mei chu awiin a'n thung a. 23 Jehudiin thlep thum amanih thlep li amanih a tiem zo chun lal chun a chemtein lekhabu ziel chu a ât bong a, thuka chun a hmatiemin a rênga a raw hmang vong chenin a dèng lût pei a. 24 Lal le a thoktuhai, hieng thu po po ngaithlatuhai chun tit hmel an put naw a, silfèn kei thlêr khom an um bok nawh. 25 Elnathan hai, Delaia hai le Gemaria hai chun lekhabu ziel chu raw hmang lo dingin lal kuomah an ngên raka chu a sawt chuong nawh. 26 Chuong nêk hmanin, lal chun a naupa Jerameel le Azriel naupa Seraia le Abdeel naupa Selemia hai chu ziektu Baruk le zawlnei Jeremia hai chu man dingin a tir a. Sienkhom, anni pahni chu LALPAN a thuprûk a. 27 Jeremia thu hril sawng Barukin a lo ziek thlàk po po lalin a raw hmang hnung chun LALPA thu Jeremia kuomah a hung tlung a: 28 "Lekhabu ziel dang la la, lekhabu ziel hmasaa thu po po, Juda lal Jehoiakimin a raw hmang tahai chu ziek thla nawk vong rawh. 29 Chun, Juda lal Jehoiakim chungchang thua chun hieng hin hril rawh: LALPA chun hieng hin a tih: 'Babulon lal chu hung ngèi a ta, hi ram hi suksein, hi taka um a mi le sâhai hi sukbohmang vong a tih' tia ziekna lekhabu chu nangin, 'Ieng dinga chuong thil chu i ziek am a na?' tiin lekhabu ziel chu i lo raw hmang a. 30 Chuleiin, Juda lal Jehoiakim chungthua chun LALPAN hieng ang hin a tih: Davida lalthungphaa inthung ding mi nei naw ni a, a ruong khom sùn ni lum em ding le zàna vur del dingin pei suok an tih. 31 Chun, a rîtlona leiin ama le a thlàhai le a rongbawltuhai chu hrem ka ta; anni le Jerusalema chênghai le Juda mihai chunga sietna hung tlung ding ka puong tahai, an ngaithlàk nuom lo po po chu hung intlungtir ka tih" tiin. 32 Chuongchun, Jeremia chun lekhabu ziel dang a lâk a, ziektu Baruk, Neria naupa chu a pêk a, ama chun Jeremia bàua inthoka thu a hmaa lekhabua a ziek ta po po, Jehoiakimin meia a raw hmanghai chu a ziek suok nawk vong a, chuonghai bàka chun thu inang iemani zàt a bel sa bok a.

Jeremiah 37

1 Josia naupa Zedekia chu Juda lal dingin Babulon lal Nebukadnezzar chun a ruot a, Jehoiakim naupa Jehoiachin aiin a hung inlal ta a. 2 Nisienlakhom ama le a rongbawltuhai le a rama mihai chun LALPA thu zawlnei Jeremia hril chu an poisa nawh. 3 Chun, lal Zedekia chun Selemai naupa Jehukal le Maaseia naupa thiempu Zefania hai pahni chu zawlnei Jeremia kuomah, "LALPA, ei Pathien kuomah mi tongtaipek rawh" tia ngèn dingin a tir a. 4 Chuong lai chun Jeremia chu lung inah an la khum hri naw leiin mipuihai lai a nuom nuomin a la lêng thei a. 5 Faraw sipaihai chu Aiguptaa inthokin an hung inthok suok a, an hung ti Jerusalem inhuoltu Babulon sipaihaiin an hriet chun Jerusalema inthokin an inhnûk suok a. 6 Chuongchun LALPA thu chu zawlnei Jeremia kuomah a hung tlung a, 7 "LALPA Israel Pathien chun hieng hin a tih: Juda lal, mi rawn dinga mi hung tirtu kuoma chun hieng hin hril rawh: Ngai ta, Faraw sipai ruol, nangma santu dinga hunghai chu an ram tieng kîr nawk an tih. 8 Chu zoah Babulon sipaihai chu hung kìr an ta, khawpui hi hung bei an ta, lâng an ta, raw hmang an tih. 9 LALPA chun hieng hin a hril: 'Babulonhai chun mi'n kiengsan ngei an tih' ti lungril neiin nang le nang inhlèm naw rawh. Inkiengsan teu naw ni hai! 10 A hung beitu che Babulon sipaihai hi hnè vongin, a hliemhai chauh an puon inah màksan khom ni la, chuonghai chu hung suokin khawpui hi raw hmang tho an tih" tiin. 11 Faraw sipaihai leia Babulon sipaihaiin Jerusalema inthoka an inhnuk dok hnung chun, 12 Jeremia chun Benjamin rama a chanvo ram la dingin khawpuia inthok chun a'n thok suok a. 13 Sienkhom Benjamin Kotkhàr a tlung chun vêngtuhai kapten, Hanani naupa Selemia naupa a hming Irija chun, "Babulonhai tieng inpêk i tum a nih" tiin a lo man a. 14 Jeremia chun, "Ni hlak a tim ie! Babulonhai tieng inpe naw ning" a ta, sienkhom a ngaithlàk naw a, a man a, hotuhai kuomah a thuoi a. 15 Hotuhai chu Jeremia chunga chun an lung a sen hle a, an vuok a, ziektu Jonathan ina chun an intàngtir a, chu chu tàng ina an hmang a nih. 16 Jeremia chu in hnuoi ripa chun an khum a, chu taka chun hun sawt tak an intàngtir a. 17 Chun, lal Zedekia chun a ko suok a, arûkin "LALPA kuoma inthokin thu iemani bêk a um am?' tiin a'n don a. Jeremia chun, "Um e. Babulon lal kuta inmantirin um i tih. 18 Nangma chunga le i thoktuhai le i mipui hai chungah ieng am ka suksuol a, hienga lung ina i mi khum el hi? 19 I kuoma, 'Babulon lalin hung bei naw ni che' tia hriltu che i zawlneihai kha khaw lai am an um zo ta a? 20 Aw ka pu, lal tak, ka hnìna hi ngâithlaa mi pompêk dingin ka ngèn che a nih; ziektu Jonathan ina chu mi'n kîrtir ta lul naw rawh, chuong naw chun thi el ka tih" a ta. 21 Lal Zedekia chun thu a pêk a, vêngtuhai inkulna sûnga chun a'n tàngtir a, ni tin bei siemtuhai bei tlang khat, khawpuia bei a um sûng phot chu a pêk a, chuong ang chun Jeremia chu vêngtuhai inkulna sûnga chun a um ta zing a.

Jeremiah 38

1 Chun, Matan naupa Sefatia le Pasur naupa Gedalia le Selemia naupa Jukal le Malkija naupa Pasur haiin mipuihai kuoma Jeremia'n, 2 "LALPA chun hieng hin a tih: hi khawpuia um zinghai chu kawlhnâm amanih, tàm amanih, hripuiin amanih thîng an ta, Babulonhai kuoma inpehai ruok chu an hringna sanhimin um an ta, dam an tih. 3 Hi khawpui hi Babulon lal sipaihai kutah pèk nîng a ta, lâng an tih, ti hi LALPA thu suok a nih" tia a hril chu an ngàithlàk a. 4 Chuongchun, hotuhai chun lal kuomah, "Hi mi hi sukhlum ni sien ti kan ngèn chê a nih. Ama hin hieng thu hi a hril leiin mipuihai le hi khawpuia la um sun sipaihai lungril khom a sukhnuol vong a nih. Hi mi hin hi mipuihai thatna hi a zong naw a, an sietna ding a zong lem a nih" an ta. 5 Lal Zedekia chun, "Ngai ta u, ama chu in kuta um an nawm; lal hi in dit naw zawng thaw thei a ni lèm" a ta. 6 Chuongchun, Jeremia chu an thuoi a, vêngtuhai inkulna huong sùnga um lal naupa Malki in hnuoia rip inthûk taka chun hruiin an thlàk thla a. Chu khur sùng ripa chun chirdiek ngot naw chu tui a um naw a, Jeremia chu chirdieka chun an thlàk thla a nih. 7 Chun, Ethiopia mi, lal ina um hlak, mi tilre Ebedmelek chun chir khura Jeremia an thlàk thu chu a lo hriet a, chuong lai chun lal chu Benjamin Kotkhàr bula chun a'n thung a. 8 Ebedmelek chu lal ina inthokin a suok a, lal kuoma chun, 9 "Ka lalpa, hieng mihai hin zawlnei Jeremia chungah rilo takin thil an thaw a, hnuoi sùng ripah zawlnei Jeremia an thlàk thla a, chu taka chun phingtamin thi el a tih, khawpuia takngiel khom bei a um ta si naw a" a ta. 10 Lal chun Ethiopia mi Ebedmelek chu thu a pêk a, "Hi taka inthok hin mi sawmthum thuoi la, Jeremia chu a thi hmâ ngeiin khura inthok chun la suok ro" a ta. 11 Ebedmelek chun mihai chu a thuoi a, lal tangka siena in hnuoia chun an lût a, zakuo tiek le silfèn hluihai chu a chawi a, hnuoi sùnga ripa chun Jeremia kuomah hruiin a thlâk thla a. 12 Ethiopia mi Ebedmelek chun Jeremia kuomah, "Hieng puon tiekhai hi i zak hnuoiah hrui hin thlung de rawh" a ta, chuong ang chun Jeremia chun a thaw a. 13 Jeremia chu khura inthok chun an khài suok a. Jeremia chu vêngtuhai inkulna huong sùnga chun a um ta zing a. 14 Lal Zedekia chun zawlnei Jeremia chu a ko a, LALPA tempul lûtna kotkhàr pathumnaa chun an hung thuoi a. Lal chun Jeremia kuomah, " Thil indon ka ti che a, ka lakah ieng khom ip nei naw rawh" a ta. 15 Jeremia chun Zedekia kuomah, "Ka hril che chun i mi sukhlum ngei naw ding maw? Thurawn pe lang che khom i ngàithlàk awm si naw a" a ta. 16 Lal Zedekia chun Jeremia kuomah, "Ka hringna siemtu LALPA hringna sâlin thu ka'n tiem a, sukhlum naw top ka ti che a, i hringna làk tumtuhai kuoma khom pe bok nawng ka ti che" tiin a rûkin thu a'n khàm a. 17 Jeremia chun Zedekia kuomah, "Iengkim LALPA, Israel Pathien chun hieng hin a tih: 'Babulon lal hotuhai kuomah in inpèk chun him in ta, hi khawpui hi raw hmang ni naw ni a, nang le i sûnghai khom hlàin um an tih. 18 Babulon lal kuoma in inpèk naw ruok chun hi khawpui hi Babulonhai kuta pèk nîng a ta, rawng an ta, a kuta inthokin suok naw top i tih" a ta. 19 Lal Zedekia chun Jeremia kuomah, "Babulonhai kuta lo inpe tah Judahai mi'n mantirin, nuizatbûrah mi siem an tih ti ka'n lau a nih" a ta. 20 Jeremia chun, "Inmantir naw ni che, i kuoma ka hril hi LALPA rawl a na, awi el rawh. Chuongchun, i ta dingin thâng a ta, dam bok i tih. 21 Inpêk i nuom naw chun hi hi LALPAN thu a mi hril chu a nih: 22 Ngai rawh, Juda lal ina nuhmei la um po pohai chu Babulon lal hotuhai kuoma thuoiin um an ta, nuhmeihai chun, I ringsan i ruolhai ngei khan, Thuoi suolin an hnè che a, Kemit tlumin chirdiek i pal a, I ruolhan an zàmsan ta si chetiin hla sak khum an ti che. 23 I nuhmeihai le nauhai po po chu Babulon mihai kuomah thuoi vong an ta, an kuta inthokin intâl suok naw ti ni a, Babulon lal kutah manin um i ta, nangma leiin hi khawpui hi rawng a tih" a ta. 24 Zedekia chun Jeremia kuomah, "Hieng thuhai hi tu khomin hre naw raw se, chuongchun thi naw ti nih. 25 Nisienlakhom, hotuhan ka biek che hi an hriet a, i kuomah an hung a, 'Lal kuoma i hril chu mi hril ve rawh; kan lakah ieng khom ip nei naw la, chuong naw chun kan that ding che a nih' an ti chun, 26 nangin an kuomah, 'Jonathan inah mi'n kîrtir ta naw rawh, chuong naw chun ka thi el ding a nih' tiin hnìna ka siem a nih' i ti ding a nih" a ta. 27 Chun, hotuhai po po chu Jeremia kuomah an hung a, an hung indon ta ngei a, lalin thu a pêk ang tak chun a lo hril a, tu khomin an indon sap ta nawh, lal le an inbiekna chu a hrie tu khom an um bok si nawh. 28 Chuongchun, Jeremia chu Jerusalem an làk ni chenin vêngtuhai inkulna huong sûnga chun a um ta zing a.

Jeremiah 39

1 Jerusalem làk a ni dàn chu hieng ang hi a nih: Judai lal Zedekia inlala inthoka kum kuona thla sawmnaav chun Babulon lal Nebukadnezzar le a sipai po po chun Jerusalem an hung bei a, an inhuol a. 2 Zedekia inlal kum sawm le pakhatna, thla lina ni kuoa chun khawpui kul chu an sut tlang a. 3 Chuongchun, Babulon lal hnuoia hotu Samgar mi Nergal Sarezer hai, an hotu lu tak Nebo-Sarsekim hai, lal mi rawn tak Nergal-Sarezer hai le hotu dang tam tak an hung lût a, kotkhàr lailung taka chun umhmun an rem a. 4 Juda lal Zedekia le a sipaihaiin an hmu chun an tlânsie a, zàna chun lal huon tienga kul bang pahni inkâra lama chun an inrel a, Arabia panna tieng chun an suok a. 5 Amiruokchu, Babulon sipaihai chun an hnot a, Jeriko phaizawlah Zedekia chu an hnot phàk a, an man a, Babulon lal Nebukadnezzar kuomah Hamat ram Ribla khuoa chun an thuoi a, ama chun a chungthu chu a lo rêl a. 6 Riblaa chun Zedekia mithmu ngeiah a naupahai chu Babulon lal chun a that a, Juda mi tha tam tak a that bok a. 7 Chu zoah Zedekia mit chu a khel dokpèk a, dâr kol a'n buntir a, Babulon tieng a thuoi a. 8 Babulon mihai chun lal in le mi dang in po po chu an raw a, Jerusalem kul bang chu an sukchim vong a. 9 Lal vêngtuhai kawmandar Nebuzaradan chun khawpuia mipui la umhai le a kuoma mania hung inpehai chu Babulon tieng salin a thuoi a. 10 A bâng la um sun, mi rethei ruol ieng khom nei lohai chu Judai ramah Nebuzaradan chun a màksan a, grêp -huon le lohai a pêk tawl a. 11 Jeremia chungthua ruok chu Babulon lal Nebukadnezzar chun vêngtu kawmandar Nebuzaradan kuomah, 12 "Ama hi thuoi la, a chungah tha takin thaw la, sukna naw la, i kuoma a hril ang peiin thaw lem rawh" tiin thu a pêk a. 13 Vêngtu hotu Nebuzaradan chun an hotu lu tak Nebusazban hai, Nergal-Sarezer le Babulon lal hnuoia ofisar lienhai chu a ko khawm a, 14 Jeremia chu vêngtuhai inkulna huong sûnga inthok chun an ko suok a, Safan naupa Ahikam naupa Gedalia kuta chun a in tienga fepui dingin a'n koltir a, chuongchun ama mihai lai chun a khawsa vè nawk ta a. 15 Vêngtuhai inkulna huong sùnga Jeremia an khum lai chun a kuomah LALPA thu a hung tlung a: 16 "Ethiopia mi Ebedmelek kuomah Iengkim LALPA, Israel Pathien thu chu hieng hin hril rawh: 'Ngai rawh, hi khawpui laka ka thuhai chu i mithmu ngèiah ka hlen tèp a, thatna ni loin sietna ka hung intlungtir ding a nih. 17 Chu ni chun nang ruok chu san suok ka ti che a, i mi tìhai kutah pèk lût ni vê naw ti nih ti hi LALPA thu suok a nih. 18 Kei i mi ring tlat leiin hum ka ti che a, kawlhnâmin thi naw ti ni a, i hringna chu san himin um ngei a tih' ti hi LALPA thu suok a nih' tiin va hril rawh" a ta.

Jeremiah 40

1 Lal vêngtu sipai kawmandar Nebuzaradanin Rama khuoa Jeremia a'n suo hnung chun LALPA thu chu Jeremia kuomah a hung tlung a. A'n suo hma chun Jeremia chu Judai ram le Jerusalema um hai, Babulon tienga sala an thuoi mèkhai lai chun khaidiet bunin a lo um ve a. 2 Vêngtu kawmandarin Jeremia a hmu chun a kuomah, "LALPA i Pathien chun hi hmuna sietna hung tlung ding hi a lo puong tah a. 3 Tu hin LALPA chun a hung intlungtir ta a, thaw dinga a hril ang takin a thaw ta ngei a. Hieng po po hi a hung tlungna san chu LALPA thu zawm loa a lakah an suol lei a nih. 4 Nisienlakhom, nang chu voisuna inthok hin i khaidiet bun chu ka sutpêk che a, Babulon tieng ka kuoma hung i nuom leh hung la, lo enkol ka ti che a, i nuom naw leh i nuomna tieng tieng fe la, ram po po i hmaah a'n zâr duoi hih. 5 I nuom leh Babulon lalin Juda khuohai optu dinga a sie Safan naupa Ahikam naupa Gedalia kuomah kîr la, an naw leh fe i nuomna tieng tieng fe rawh" a ta. 6 Vêngtu kawmandar chun fàk ding le thilpêk a pêk a, a'n fetir ta a. Jeremia chu Ahikam naupa Gedalia kuomah Mizpa khuoa chun a fe a, a kuoma chun a rama mi la um sunhai lai a um ve ta a. 7 Chun, ram hnuoia um sipai hotuhai po po le an rawihaiin Ahikam naupa Gedalia chu ram optu ding le a rama mi rethei tak tak, sala thuoi ve lohai enkoltu dingin Babulon lalin a ruot ti an hriet phing leh, 8 Gidelia kuomah Mizpaa chun an hung a, chuonghai chu Nethania naupa Ismael hai, Karea naupa Johanan le Jonathan hai, Tanhumet naupa Seraia hai, Netofat mi Efai naupa hai, Makat naupa Jaazania hai le an mihai an nih. 9 Safan naupa Ahikam naupa Gedalia chun anni le an mihai kuomah, "Babulon mihai rongbawla um hi ti naw ro. Hi rama hin um inla, Babulon lal rong bawl unla, in ta dingin thâng a tih. 10 Kei ruok chu nangni aiawa Babulon mihai hmaa ngîr dingin Mizpa khuoa hin um ka ta, nangni ruok chun uoiin hai, nipuia rà theihai le hriekhai chu la khawm unla, in bêlpuia hai chun sie khawm unla, khawpui in hluo tah haia chun chêng ro" tiin a lo hril a. 11 Chuong ang bokin, Moab rama chênghai, Amon mihai laia chênghai, Edom rama chênghai le ram danga Juda um haiin Babulon lalin Judai ramah mi tlawmte a màksan ti le rorêltu dingin Safan naupa Ahikam naupa Gedalia chu a siem ti an hriet chun, 12 Judai ramah, Mizpa khuoa Gedalia kuoma chun an tlàn darna hmun hrang hranga inthokin an hung kìr a, uoiin le nipuia rà thei an hung chawipêk teu a. 13 Chuonghai bàka chun Karea naupa Johanan le sipai pawl hotu, rama umhai po po chu Mizpa khuoah Gedalia kuoma chun an hung a, 14 a kuomah, "Amon mihai lal Baalis chun i hringna la dingin Nethania naupa Ismael a hung tir ti i hriet naw a ni maw?" an ta. Ahikam naupa Gedalia ruok chun an thu hril chu a ring nawh. 15 Karea naupa Johanan chun arûkin Mizpa khuoa Gedalia chu a'n biekpui a, "Arûkin mi'n fètir la, Nethania naupa Ismael chu va that ka ta, chu chu tu khomin hre naw ni hai. Ieng leiin am ama chun i hringna lain, i kuoma um Juda mihai po po le Judai rama la um sunhai hi indarin an bohmang ding a na?" a ta. 16 Ahikam naupa Gedalia ruok chun Karea naupa Johanan kuomah, "Chuong thil chu thaw hrim hrim naw rawh! Ismael chungchàng thu i hril hi khêl a nih" a ta.

Jeremiah 41

1 Favâng lailung vêlah Elisama naupa Nethania naupa Ismael, lal chia mi le lal khawnbawl laia pakhat chun mi sawm thuoiin Mizpa khuoa Ahikam naupa Gedalia kuoma chun a hung a, chu taka chun bu an fàk tlàng a. 2 Nethania naupa Ismael chu a mi thuoi sawm le chun an tho thut a, Safan naupa Ahikam naupa Gedalia, Babulon lalin ram optua a siem chu kawlhnâmin an that a. 3 Ismael chun Mizpa khuoa Gedalia kuoma Juda um po po le chu khuoa Babulon sipai um ve hai chu a that bok a. 4 Gedalia an that ni zìnga chun, an that tì tu khomin an la hriet hmain, 5 Sekema inthok dâm, Siloa inthok dâm le Samaria inthok dâmin mi sawmriet, khâkhmul vaw a, silfènhai kei thlêr a, mani inât pop neng nungin, LALPA ina inhlàn ding bu le bal thilhlân le rimtui chawiin, an hung a. 6 Nethania naupa Ismael chu Mizpa khuoa inthokin anni hmuok dingin a suok a, lampui intluonin a tap a. Anni a hmu chun an kuomah, "Ahikam naupa Gedalia kuomah hung ro" a ta. 7 Khawpui sùng an lùt chun Nethania naupa Ismael le a mi thuoihai chun anni chu an that a, khuorkhurûmah an pei a. 8 Anni laia sawm ruok chun, "Mi that naw ro, ram hnuoiah bu hai, buman hai, hriek hai le khuoizu hai kan thuprûk teu si a" an ti leiin an hla a, an unauhai ruol chun an that sa ve ta naw a. 9 Ismaelin Gedalia ruola a thathai ruong a peina khuorkhurûm chu lal Asa-in Israel lal Baasa laka inhumhimna dinga khur a siem a nih. Nethania naupa Ismael chun chu chu mithi ruongin a vur sip a. 10 Ismael chun Mizpa khuoa mi a dam um sun lal naunuhai le Ahikam naupa Gedalia hnuoia vêngtu kawmandar Nebuzaradanin a'n koltir, Mizpa khuoa la um po pohai chu salah a thuoi vong a, chuonghai le chun Amon mihai ram panin a suok a. 11 Karea naupa Johanan le a kuoma um sipai pawl hotuhaiin Nethania naupa Ismael thil suol thaw po po an lo hriet chun, 12 mi po po chu an thuoi a, Nethania naupa Ismael bei ding chun an fe a, tui tamna hmun Gibeon-a chun an va hmu a. 13 Ismael kuoma umhai po po chun Karea naupa Johanan le a kuoma um sipai pawl hotuhai po po an hang hmu chun an lawm hle a. 14 Chuongchun, Ismaelin Mizpaa inthoka sala a thuoi po po chu an ngha kìr a, an kìr a, Karea naupa Johanan tieng chun an pakai tah deu vong a. 15 Nethania naupa Ismael ruok chu mi pariet leh Johanan kuta inthok chun an tlàn suok a, Amon mihai kuomah an tlàn lùt a. 16 Ahikam naupa Gedalia-in Gibeon-a inthoka a hung thuoi sipaihai, nu le nauhai le thoktuhai chu Nethania naupa Ismaelin Gedalia a that hnung chun a chang ta vong a, chuonghai laia a dam la um sun, Johananin Ismael kuta inthoka a san suokhai chu Johanan le a sipai hotuhai chun an rêngin Mizpa khuoa inthok chun an thuoi suok a, 17 Babulon mihai laka tlàn suok tumin Aigupta an panpui a, Bethlehem khaw bula Gerut Kimhama chun an chawl a. 18 Babulon lalin ram optu dinga a ruot Ahikam naupa Gedalia chu Nethania naupa Ismaelin a that lei chun an ti êm êm a nih.

Jeremiah 42

1 Chun, sipai pawl hotuhai le Karea naupa Johanan le Hosaia naupa Jezania le mipui po po, a chîn taka inthoka a lien tak chenin zawlnei Jeremia chu an hung hnai a, a kuomah, 2 "I hmaa kan hnìna hi lo pom la, hieng la dam sunhai po po ta ding hin LALPA i Pathien kuomah mi tongtaipèk dingin kan ngèn che a nih. I mi hmu ang hin, mi tam tak ni hlak kha tlawmte chauh hlàin kan um ta hi. 3 Khaw tieng am kan pan ding a na, ieng am kan thaw ding a na ti mi hril dingin LALPA i Pathien kuoma chun mi hnipêk rawh" an ta. 4 Zawlnei Jeremia chun, "In thu chu ka hriet. In hnì angin LALPA Pathien kuoma chun tongtai mol ka tih. LALPAN a mi hril po pohai chu ip nei dêr loin hril vong ka ti cheu" a ta. 5 Anni chun Jeremia kuomah, "LALPA i Pathienin kan ta dinga thu a hril che ang peia kan thaw naw chun LALPA chu kan lakah thu hretu indik le ringum ni raw se. 6 Kan tirna che LALPA thu chu a sie a tha khom ni sien, LALPA kan Pathien thu chu awi ngei ngei kan tih; a thu awi chu kan ta dinga thatna ding a ni si a" an ta. 7 Ni sawm hnunga chun LALPA thu chu Jeremia kuomah a hung tlung a. 8 Chuongchun, Karea naupa Johanan le a kuoma um sipai pawl hotu po po le mipui, a chîn taka inthoka a lien tak chenin, a ko khawm a. 9 An kuomah, "LALPA in Pathien, a hmaa in hnìna intlun dinga in mi tirna khan hieng hin a tih: 10 'Hi rama hin in um zing chun thiek loin tungding ka ti cheu a, phawi loin phun ka ti cheu; in chunga sietna ka'n tlungtir hin poi ka ti vè a nih. 11 Tuta in tì èm èm Babulon lal hi tì dêr naw ro. Ama chu tì naw ro, keima in kuomah ka um a, keiin a kuta inthokin san suok ka ti cheu. 12 In chungah zàngaina insuo a, in ramah a'n kìrtir nawk theina ding cheuin in chungah zàngaina inentir ka tih' ti hi LALPA thu suok a nih. 13 "Amiruokchu, 'Hi rama hin um nawng kan tih' tia LALPA in Pathien rawl chu poisa loa in um a, 14 'A teu nawh. Aigupta ramah fe lem kan tih. Chu taka chun indona tuok tah nawng kan ta, tawtawrawt rì hre tah naw bok kan ta, tàm tuor khom um tah naw nih' in ti a ni ruok chun, 15 Aw Juda la um sunhai, LALPA thu chu hre ro khai, Iengkim LALPA, Israel Pathien chun hieng hin a tih: 'Aigupta rama lût ding le chu taka chêng dinga in ngha lui tlat a ni chun, 16 in ti ang ngeiin kawlhnâmin Aigupta rama chun nangchîng a ti cheu a, in ti ang ngeiin tàmin hnot zui pei bok a ti cheu a, chu taka chun thîng in tih. 17 Aigupta rama chêng dinga ngha lui tlat po po chu chuong ang chun kawlhnâm le tàm le hripuiin thîng an ta, an chunga sietna ka'n tlungtir ding laka chun tu khom himin suok naw ni hai. 18 "Iengkim LALPA, Israel Pathien chun hieng hin a tih: Jerusalema chênghai chunga ka lungsenna ka bun thlâk ang bokin Aigupta rama in lût pha chun in chungah ka lungsenna bun thlâng ka ta, tongse phur le mi makti huoi huoi, mi biek sìsaw le hril siet nîng in ta, hi hmun hi hmu nawk ta ngai naw ti niu. 19 Aw Juda la um sunhai, LALPA chun in chungthu ding a hril ta a, Aiguptaa chun lût naw ro. Voisuna chieng taka ka hril cheu hi hre mol ro. 20 'LALPA kan Pathien kuomah mi tongtaipèk la, LALPA kan Pathienin a ti taphot mi hril la, zawm pei kan tih' tia LALPA in Pathien kuoma in mi tir a ni leiin in thìna ding thil chu thaw lul naw ro. 21 Voisuna in kuoma ka puong, LALPA in Pathien mi hril thu chu in awi nuom chuong si naw hi! 22 Chuongchun, hi hi hre ro: in chèng nuomna hmuna chun kawlhnâm le tàm le hripuiin thi ngêi in tih" a ta.

Jeremiah 43

1 LALPAN mipuihai kuoma LALPA an Pathien thuhai hril dinga Jeremia a tir anga a hril zo chun, 2 Hosaia naupa Azaria le Karea naupa Johanan le mi uongthuong po pohai chun Jeremia kuomah, "Nang hin khêl i hril a nih. LALPA kan Pathien chun, 'Aigupta rama chêng dingin fe naw ro' ti hril dingin a tir hrep naw che. 3 Babulon mihai mi'n mantir a, an mi that amanih sala an mi thuoi theina dinga Neria naupa Barukin a hung infui por chê a ni lem hi" an ta. 4 Chuongchun, Karea naupa Johanan le sipai pawl hotuhai le mipuihai chun Judai rama um zing dinga LALPA hril chu an awi nuom ta naw a. 5 Awi nêk hmanin Karea naupa Johanan le sipai pawl hotuhai chun Juda la um sunhai, hnam danghai laia hnot dara um, sienkhom Judai rama chêng nawk dinga hung kìrhai po po chu an thuoi a. 6 Babulon lal vêngtu kawmandar Nebuzaradanin Safan naupa Ahikam naupa Gedalia le zawlnei Jeremia le Neria naupa Baruk hai kuoma mi a màksan, pasal le nu le nauhai le lal naunuhai po po chu an thuoi vong bok a. 7 Chuongchun, LALPA thu chu awi loin Aigupta rama chun an fe a, Tahpanhes khuo chen an zu tlung a. 8 Tahpanhes khuoa an um lai chun Jeremia kuomah LALPA thu a hung tlung a. 9 "Lung lien tak tak la khawm la, Tahpanhes-a Faraw in lùtna kotsuoa lung rem kailawn sîra chun pil hnâkah Judahai mithmu lâi ngèiin phûm rawh. 10 Chun, an kuomah, "Israel Pathien, Iengkim LALPA chun hieng hin a tih: 'Ngai rawh, ka rongbawltu Babulon lal Nebukadnezzar chu inchà suok ka ta, hieng lung phùmhai chunga hin a lalthungpha chu innghat ka ta, a lal puon in zàr khum a tih. 11 Ama chu hung a ta, Aigupta ram hung rûn a ta, thi dinga ruothai chungah thìna, sala intâng dinghai chungah saltàngna, kawlhnâma thi dinghai chunga kawlhnâma thìna hung intlun a tih. 12 Aigupta rama an pathien tempulhai chu rawng a ta, kàng a ta, an pathienhai chu salah hawn a tih. Berampuin a silfena inthoka thil hrik a thin fai angin Aigupta ram chu thin fâi vong a ta, ngaingam takin suoksan a tih. 13 Aigupta ram Heliopolis-a an nisa pathien tempula lung ban insànghai chu sukchim a ta, tempula Aigupta pathienhai chu meiin rawng a tih' ti rawh" a ta.

Jeremiah 44

1 Aigupta chuonhnuoia khuo Migdol hai, Tahpanhes hai le Memfis hai le Aigupta chuonchung a Juda chênghai po po chungthua Jeremia kuoma thu hung tlung chu: 2 Iengkim LALPA, Israel Pathien chun hieng hin a tih: 'Jerusalem le Juda khawpui po po chunga sietna ka hung intlun tahai chu in hmu a, an thil suol thaw leiin chuonghai chu tuhin an ram ta vong a, hluotu an um ta nawh. 3 Ka lungsenna chok tho dinga anni khomin, nangni khomin, in thlatuhai khomin in hriet ngai lo pathien danghai rong bawl a, an kuomah rimtui an inhlàn lei a nih. 4 Chuong sà khom chun keiman, 'Hieng thil tirdakum, ka theida zawng hi chu thaw lul naw ro' ti hril dingin ka rongbawltu zawlneihai ka hung tir ka hung tir a. 5 Sienkhom, an ritlona chu nghatsan a, pathien danghai kuoma rimtui inhlàn lo dinga ka hril chu an ngàithlàk nuom chuong nawh. 6 Chuleiin ka lungsenna le lung inlingna chu an chungah ka bun thlàk a, Judai ram khawpuihai le Jerusalem kotthlêrhai chu a kàng a, voisun hin an ram dêr a, rausanin an um tah a nih. 7 "Chuleiin, tu hin LALPA, Iengkim Pathien, Israel Pathien chun hieng hin a tih: Nangni laia a nuhmei a pasal, naupang le naute chen khom hlà um dèr loa rawt chimit vong tum ang hrimin ieng leia hieng thil suol hi in hringna chungah in thaw am a na? 8 In va chèngna Aigupta pathienhai kuomah rimtui rawin, in kuta siem thil ngei chun ieng leia lungsen dinga in mi cho phawk am a na? Nangni le nangni insuksieng in ta, hnuoia hnam tin tongsie phurin, mi biek sìsaw hung nîng in tih. 9 In thlàtuhai, Juda lalhai le lalnuhai, nangni le in nuhmeihaiin Judai ram le Jerusalem kotthlêra rîtlona thil in thaw zozàihai kha in theinghil ta'm a ni? 10 Voisun ni chen hin inphà hnuoiin in mi la'n zà chuong naw a, in thlàtuhai le nangni kuoma ka pèk, ka dàn le thu suokhai chu in la zawm chuong bok nawh. 11 "Chuleiin, Iengkim LALPA, Israel Pathien chun hieng hin a tih: 'Ngai ro, in chungah sietna hung intlungtir ding le Judahai po po rawt chimit vong dingin lungril ka siem tah a nih. 12 Juda mi la um sun, Aigupta rama chèng lui tumhai chu la hmang tawl ka tih. An rêngin Aigupta ramah bohmang an ta, kawlhnâm an naw leh tàmin bohmang an tih. A nih, a chîn taka inthoka a lien tak chenin kawlhnâm an naw leh tàmin thîng an tih. Mihaiin tongsie inphurin pangzat an ta, demin hril sieng an tih. 13 Jerusalem ka hrem ang bokin Aigupta rama chênghai chu kawlhnâm le tàm le hripuiin ka hrem ding a nih. 14 Chuongchun, Aigupta rama chêng dinga fe Juda la um sunhai chun Judai rama kìr nawk nuom êm êm hai sien khom, a rûka inrel suok tihai chauh naw chu, tu khom kîr dinga dam khawsuok um naw ni hai. 15 Chuongchun, pasal po po, an nuhmeihaiin pathien danghai kuomah rimtui an inhlàn ti hretuhai le chu taka um nuhmeihai le mipui tam tak, Aigupta chuonhnuoi le chuonchunga um hai chun Jeremia kuomah, 16 "LALPA hminga kan kuoma thu i hrilhai hi ngâithla nawng kan tih. 17 Keini le kan thlàtuhai, kan lalhai le kan hotuhaiin Judai ram khawpuia le Jerusalem kotthlêra hai an lo thaw ta hlak ang khan vàn lalnu kuomah rimtui rawin, a kuomah dawn ding uoiin bun suok kan ta, kan hril ang char khan thawng kan tih. Khang lai huna khan fâk le dawn thilah kan hnienghnàr a, kan tha a, sietna hrim kan hriet nawh. 18 Amiruokchu, vàn lalnu kuomah rimtui raw lo a, dawn thil kan inhlàn ta nawa inthokin iengkim kan tlasam a, kawlhnâm le tàma sukbohmangin kan um ta lem a nih" an ta. 19 Chun, nuhmei ruol chun, "Vàn lalnu kuomah rimtui raw a, dawn ding kan bun suok lai khan, ama limin bei dàm siemin, a kuomah dawn thil kan bun suok hlak ti kan pasalhaiin an hriet nawa i ngai am a ni?" an lo ti ve a. 20 Jeremia chun ama dontu po po, nuhmeihai le pasalhai kuomah, 21 "Judai ram khawpuia hai le Jerusalem kotthlêra hai, nangni le in thlàtuhai, in lalhai le hotuhai le a ram mipuihaiin rimtui an rawhai chu LALPAN hre zingin, a lungrilah a pai zing naw am a ni? 22 Thil suol le tirdakum in thawhai chu LALPAN a tuor zo ta naw a, in ram chu mi diriem le rausan hung niin, hluotu khom a nei ta naw a ni hi. 23 Rimtui in raw a, LALPA chungah in suol a, LALPA thu awi nuom loin, a dàn hai, thupêk hai le bitukhai in zawm nuom naw leiin tuta in hmû zing sietna hi in chungah a hung tlung a nih" a ta. 24 Chu bâkah mi po po le nuhmeihai hrietah Jeremia chun, "Nangni Juda mi Aiguptaa chênghai, LALPA thu hi lo ngaithla ro. 25 Iengkim LALPA, Israel Pathien chun hieng hin a tih: Vàn lalnu kuoma rimtui raw le dawn thil bun suok dinga in lo intiem tah ang ngeiin nangni le in nuhmeihaiin a takin, thilthawin in inentir tah a. In thu tiem ang ngei chun thaw mol ro! In thu inkhàmna chu vong tlat ro! 26 Amiruokchu, nangni Aigupta rama um Juda mihai, LALPA thu hi ngâithla ro. Kei LALPA Chunghnung tak hin ka hming ropui tak sâlin thu ka'n tiemkam a, Aigupta rama chêng Juda mi tu khomin, 'Iengkim LALPA hringna sâlin' tiin ka hming hmangin thu intiemkam ta naw ni hai ti hi LALPA thu suok a nih. 27 Ngai ro, an thatna ding ni loin an sietna dingin inchàn zing tawl ka ta; suksiet vong an ni chenin Aigupta rama Judahai chu kawlhnâm le tàmin rawt ka tih. 28 Kawlhnâma sukhlum mahla tlawmte chu Aigupta rama inthoka suokin Judai ramah lût an ta; chu pha chun Juda dang po po, Aiguptaa chêng dinga lûthai chun tu thu am a dingchang lem, anni thu am ka thu, ti la hrieng an tih. 29 "Chun, ka thu chu ngîrin, ka lo zilhau tah chêu anga hi hmuna hin ka hrem ngei dingzie cheu inchikna chu hi hi nîng a tih: 30 Faraw Hofra, w Aigupta lal chu a hmêlma, a hringna làk tuma zongtu Babulon lal Nebukadnezzar kutah Juda lal Zedekia ka pèk ang bok khan pe suok ka tih' ti hi LALPA thu suok a nih" a ta.

Jeremiah 45

1 Juda lal Josia naupa Jehoiakim inlala inthoka a kum linaa zawlnei Jeremia thu hrilhai lekhabu ziela Barukin a ziek thlàk hnunga zawlnei Jeremia-in Neria naupa Baruk kuoma a hril chu a nih. 2 "Aw Baruk, LALPA, Israel Pathien chun i kuomah hieng hin a tih: 3 Nangin, 'Ka chung a va hang pik de aw! Lungngaina ka tuor hi LALPAN a mi bel sàpèk a; ka'n rûmnain ka chàu zo ta a, hadamna hrim ka hmu nawh' i ti a. 4 LALPA chun i kuomah hieng hin hril dingin a mi tih: "Hieng hin LALPA chun a tih: 'A ram pumpuiah ka bawl tahai chu thiek ka ta, ka phun tahai chu phawi ka tih. 5 Chuong a ni si chun i ta dingin ieng am thil ropui zong ding a um a? Zong naw law law lem rawh. A ram pumah sietna ka hung intlungtir ding a na, sienkhom i fèna taphotah i hringna chu hlàpêk pei ka ti chê' tiin" a ta.

Jeremiah 46

1 Hnamhai chungchàng thua zawlnei Jeremia kuoma LALPA thu hung tlung chu hi hi a nih: 2 Aigupta chungchàng thu: Juda lal Josia naupa Jehoiakim inlala inthoka a kum lìnaa Eufretis vadung kama khuo Karkhemis hmunax Babulon lal Nebukadnezzarin Aigupta lal Faraw Neko sipaihai a hnè chungchàng thua chun: 3 "Phaw chîn le lienhai chawiin, Hma tieng norin râl tawn ro! 4 In sakorhai buotsai unla, Sakor chungah chuong unla, In thîr lukhum khum unla, Mani hmun sengah inring ro!In feihai kha tât ngei unla, In thìr zakuohai kha hâk ro. 5 Iem a na ka thil hmu hi?An thlabâr tawl hle a ni saw!An pasalthahai an tlawm a, Tukkhum sonin an zàm sie!Bak lêngin an tlânsie a, Hnung tieng ngha kîr an um nawh, Sîr tinah titna a hrâng si"Ti hi LALPA thu suok a nih. 6 "Tuon thâ an tlànse hman nawh, Râlhrâthai an suok thei bok nawh. Eufretis vadung hmar tieng chun, An inpal tlu rem rum el a. 7 Nile anga hung lien hi tu am?Tuifawn sàng anga hung lien hi? 8 Nile angin Aigupta a hung lien, Tuipui lien insàng ang elin; "Hnuoi hi chìm khum vong ka ta, Khawpuihai le a hluotuhai, Chìm hlum vong ka tih" a tih. 9 Aw sakorhai, hma tawn ro!Aw tawlailirhai, tlân hrat ro, Ethiopia le Libya mihai chu, Phaw chawiin an hung inthok a, Thalkàptu chu Lydiay mihai an nih. 10 Sienkhom chu chu LALPA ni, Iengkim LALPA ni, Phuba a làkna ni a ni si a. Hmêlma chungah phuba lain, Kawlhnâm chun mawl rak khopin, Thisen liek ngat ngat a ta, Thisen inrui bûr a tih. Lalpa, Iengkim LALPA chun, Hmar tieng Eufretis vèla chun, Inthawina a hmang ding a nih. 11 Aw Aigupta naunu thienglâm, Gilead tlàngah hang kai la, Thing hnài damdawi hang la rawh; Damdawi i sèng thlawn rawn tah, Sienkhom i dam phá si nawh. 12 I muolphona rihau chu, Hnam tinin hung hrieng an ta, I tap ri'n hnuoi sip a tih. Râl hrât vé vè insut an ta, An pahniin tlu ruol an tih" tiin. 13 Babulon lal Nebukadnezzar hung ding thu le Aigupta a rùn ding thua LALPAN zawlnei Jeremia kuoma a hril chu: 14 Aigupta ramah puong dar unla, Migdol-ah tlâng insam unla, Memfis le Tahpanhes-ah puong ro:Thanghmun khawin inrâlring ro, In vèla mihai po po hlak chu, Kawlhnâmin a lem zo ta si. 15 Ieng leia i mi huoisenhai, An che ngam naw am a na?LALPAN a nam tlum tawl a, Ngîr suok ngam ding an ni nawh. 16 An sir inphet zing a ta, Indel tlu rem rum an tih. "Nêksawrtu kawlhnâm tlànsanin, Ei pieng le murna ramah, Thaw ro, fe kîr nawk ei tiu"Tiin inhril tuong an tih. 17 "Aigupta lal Faraw hin, A rî chauh a sukna a, A huna hlak hung inlang si lo"Tiin makti tawl an tih. 18 "Ka hringna salin ka hril:Tlâng laia Tabor tlàng ang el, Tuipui bula Karmel tlàng ang, Mi lien a hung ding a nih"Tiin Laltak chun a hril, A hming Iengkim LALPA chun. 19 Nangni Aiguptaa chênghai, Saltàng dingin insiem ro; Memfis chu la rausan an ta, Hluotu boin tlu ram a tih. 20 Aigupta chu bawng la nal a na, Sienkhom hmar tienga inthokin, A sètu ding tlip a hung. 21 A sipai ruoi khawmhai chu, Bawng tuoi thau ang el an na; Sienkhom thanghmun khaw loin, Anni khom tlânsieng an tih, An chungah sietna ni leHremna ni a tlung pha chun. 22 Hmêlmahan an hung hnai pha, Rûlpui tlânsie ang elin, Aigupta chu insûk a ta, Hreipui leh hung inthok an ta, Thing angin phûr thlùng an tih. 23 Ieng anga pik ni sien khom, A ramngaw chu thiek an tih, Ti hi LALPA thu suok a nih. Khàu ruol nêka tam an na, Tiem seng ruol an ni nawh. 24 Aigupta naunu muolpho a ta, Hmar tieng mihai kutah pêng an tih. " 25 Iengkim LALPA, Israel Pathien chun hieng hin a tih: "Ngai ta u, Thebes-a Amonhai pathien hai, Faraw hai, Aiguptaa an pathienhai le an lalhai le Farawa innghattu po pohai chungah hremna ka hung intlungtir ding a nih. 26 Anni that tuma zongtuhai le Babulon lal Nebukadnezzar le a rongbawltuhai kutah pe suok ka tih. Amiruokchu, a hnungin Aigupta ram chu khâ hmâ ang bok khan hluoin hung um nawk a tih" ti hi LALPA thu suok a nih. 27 Aw, ka siehlaw Jakob, ti naw, Aw Israel, zâm dèr naw rawh. Ram hla taka inthok khomin, San suok ngèi ka ti che a, Saltàngnaa inthokin, I thlàhai san suok ka tih. Tu khom sukbuoi ta loin, Him tak le thlamuong takin, Jakob chu la um a tih. 28 Aw, ka siehlaw Jakob, ti naw, I kuomah ka um si a. Ka hnot darna cheu hnamhai, Ka suksiet vong khom ni sien, Sukse vong nawng ka ti cheu. Hrem chu hrem ka ti cheu a, Indik takin thawng ka tih, Hremna pumpel naw ti niu"Ti hi LALPA thu suok a nih.

Jeremiah 47

1 Faraw-in Gazaa Filistinhai a rûn ding thua zawlnei Jeremia kuoma LALPA thu hung tlung chu: 2 LALPA chun hieng hin a tih:"Hmar tieng panga inthoka, Tui hung lien dàn hi thlîr rawh; A kuong liem zur zur a ta, Ram le iengkim chìm a ta, Khawpui le a sûnga chênghai, An rêngin chìm vong a tih. Mihai chu tap khêk an ta, A rama chênghai po po, Tapin khêk rong rong an tih. 3 Sakor pèn thuop thuop rihai, Râl tawlailir thûm dur dur le, An ri so chur chur kàra chun, An nauhai ngaisak chang loin, Pahai chu tlân sieng an ta, An kuthai zoi vong a tih. 4 Filistinhai chu hung bei a, A suosàm ni a tlung ta a, Tura khuo le Sidon khuo, Thangpui thei um sunhai chu, A that ram ni a tlung tah. Kaftorz kama inthoka hung, Filistin la dam sunhai chu, LALPAN a suksiet tawl tèp si. 5 Lusûn pûrdo Gaza chun, A lû vaw kol vong a ta, Askelon chu chimit a tih. Aw, phâia chêng mi um sunhai, Ieng chen am nangni le nangni, In insun pei ding a na? 6 "Aw, nang LALPA kawlhnâm, Ieng tik am chawl tâng i ta?I pâiah chun lût nawkin, Chawl ta rawh" ti'n khêk in tih. 7 LALPAN thu a pêk si chun, Ieng tin am chawl thei a ta?Askelon le tuipui kama chênghai, Do dingin thu a pêk mieu si a.

Jeremiah 48

1 Moab chungthua Iengkim LALPA, Israel Pathien hril chu hi hi a nih:Nebo chung a va pik de aw!Sukramin a um ding a ni si a; Kiriathim chu lâng an ta, Hmâi mawk takin siem an ta, A kulhai sukmuolphoin, An sukchim ding a ni si. 2 Moab hming chu tu khomin, Uongpui ta ngai naw ni hai. Mihai chun Hesbonah, "Hi hnam hi nuoi bo ei tiu"Tiin la phierrûk an tih. Aw nang Madmen khuo khom hi, I la chimit ding a nih, Kawlhnâmin hnot thlûr a ti che. 3 Heronaim rihau chu ngai ta, Sietna râpthlàk rìhàu chu! 4 Moab chu koi dar a ta, A nauhai inchiek ri chu, Zoar chen hre phâk an tih. 5 Nasa taka tap pumin, Luhit tungah kai an ta, Horonaim suka hai khom, Thlaphâng tap ri inlêng a tih. 6 Tlân ro, in hringna ta dingin, Thlalèrah inbi hmang ro. a 7 I theina le sumah i'n nghat leiin, Salah man vêng an ti che. In pathien biek Khemos chu, A thiempu le rongbawltuhai leh. Salah thuoi hmang bok an tih. 8 Suksetu chun i khawpui tin, A hung rûn tawl ding a na, A pumpel um naw ni hai. Phai ruom le tlâng zawla chêng, Tu khom sukse vong a tih, Ti hi LALPA thu suok a nih. 9 Moab chu machi thè khum rawh, Sukram a ni ding si a; A khuohai chu rausan an ta, Hluotu tu khom nei naw nih. 10 LALPA sin ngaithâtu chu, Tongsie phurin um raw se; Thisen insuona dingaKawlhnâm hmang ngai nawtu chu, Tongsie phurin um raw se! 11 A bêla sie tok tok hlak, Uoiin angin Moab chu, Muong takin a um hlak a, Bun suok a tuok ngai naw a, Salah an thuoi ngai bok nawh. Chuleiin a'n hnik zing a, A rim khom a danglam nawh. 12 Sienkhom bun suoktu ding mi, Ka tir ni hung tlung a ta, Anni chun bun suok an ta, An bun suok fâi rìt pha leh, Bêl chu vaw koi vong an tih, Ti hi LALPA thu suok a nih. 13 Israel sûngkuohaiin, Bethela an bawng lem biek, An muolphopui ang bok khan, Moab khomin a pathien, Khemos inzàpui a tih. 14 'Tu cho ruol lo mi râlhrât, Indoa huoisen kan nih'Ieng leia in ti'm a na? 15 Moab chu ram vong a ta, A khuohai chu rûn an ta, A tlangvàl thá thàhai chu, Indonaah suom an tih, Iengkim LALPA chun a tih. 16 Moab chu a tlu têp a, Sietnan hung nang thut a tih. 17 A kawl hnai vela umhai, A hmingthangzie hretuhai, 'Khang anga hmol ropui si. A tliek ruop el hi chu aw!'Tiin ama chu tà ro. 18 Nangni Dibon hraichawihai, In ropuina suoksanin, Hnuoi chàra hin hung thung ro; Moab suksetu ngei chun, Nang khom hung bei a che a, I kulhai sukchim a tih. 19 Aroer khuoa chênghai chun, Lamah ngîrin thlîr vêl ro; Pasal hung tlânsiehai leNuhmei hung inrelhai chu, 'Ieng thil am a tlung ta leh?'Tiin lo indon tawl ro. 20 Moab a muolpho ta ie, A tlu hmât ta vong el ie!Tia sûnin tap khêk ro. Moab a siet tâk thu hi, Arnon-a khom puong dar ro. 21 Rorêlna a hung tlung ie, Tlâng zawla khuohai chungah-Holon, Jahza le Mefaat, 22 Dibon, Nebo le Beth Diblathaim, 23 Kiriathaim, Beth Gamul le Beth Meon, 24 Keriot le Bozra khuoahai, Moab rama khuo po po, A hnai le kilkhawr chunga chun. 25 Moab ki a rawt tliek a, A bân khom a suktliek bok"Ti hi LALPA thu suok a nih. 26 "Moab chu vâi rui dèr rawhLALPA a khing ngam leiin; A luokah inbuol sien la, Mi nuizatbûr kai raw se. 27 Israel chu i ta dingin, Nuizatbûr a ni hlak maw?Rûkru lai an man sa maw, A chanchin i hril zàt a, Hmusit tak le endong a, I lu i thin zie hlak hi? 28 Moab rama chêngtuhai, In khawpuihai tlânsanin, Lungpui kàra bû sep hlak, Vàthû angin pûk tontirah, Nangni khom bû khuor ve ro. 29 Moab chapozie kan hriet, A hang insie sàngziehai, A uongzie le chaltlaizie, A lungril indûziehai chu. 30 A chapo a tangkai nawh, A uongin kawk a nei nawh"Ti hi LALPA thu suok a nih. 31 Chuleiin, inring takin, Moab chu tà khum ka ta, Moab pumpui sûn ka ta, Kir Hareset mihai sûn ka tih. 32 Aw Sibma grêp kûnghai, Jazer ka ta nêk hmana, Nasain tàng ka ti cheu. I zârhai chu Tuipui Thi chen, An inzàr phar dei duoi a, Suksetun a hmal vong a, I grêp le thei hminhai chu, A hmal fai vong ta si a. 33 Moab rama huona hai, Hlim le lawm rî a re a; Uoiin sawrna khur a'nthok, Uoiin a suok ta naw a, Hlima grêp chìl sawr rìhai, Hriet ding hrim a um ta nawh. Khêk rì an hriethai khom chu, Hlimna khêk rì an ta nawh. 34 Hesbon khuoa inthokaEleale le Jahaz chenin, An khêk rì a'n hriet phàk a; Zoar a'nthok Horonaim leEglath Selisiya chenin. Nimrim tuikhurhai chen khom, A lo kang zo ta si a. 35 Hmun sânga an inthawina, An biek pathienhai kuoma, Rimtui an inhlànnahai khom chu, Keiin suktawp vong ka tih, Ti hi LALPA thu suok a nih. 36 Theihlê angin ka lungrilah, Moab sùnna hla a'n ri a; Kir Hareset-hai sùnna hla chu, Ka lungrilah a'n ri bok a. Hausakna an khawl khawmhai, A riral zo vong ta si a. 37 Mi tinin lu an vaw kol a, An khàkhmul an vaw bok a; Mi tinin bân an àt pop a, Saiip an kawngchun seng bok. 38 Moab in chung po po leAn tuolzawl po pohai chu, Lusûnna hmun a'n chang a, Tu dit lo bêl ang elin, Moab ka vuok dar ta si, Ti hi LALPA thu suok a nih. 39 A va hang koi nasa de!An va hang tap nasa ngei!Moab chu muolpho taluo'n, Tu khom a hmason ngam nawh. A kawl le kienga chênghai, Nuizatbûr inchang zoin, Mi pangzat a kâi ta si. 40 Hieng hin LALPA chun a hril:"En ro, mupui chu thla zârin, Moab chungah a bir thla a. 41 Khawpuihai chu la'ng a ta, Kulhai khom la vong a tih. Chu ni a hung tlung pha chun, Moab mihrânghai lungril chu, Nuhmei nau hase lai angin, Thlaphângnain sip a tih. 42 LALPA a cho ngam leiin, Moab hnam chu rîral a tih. 43 Aw nangni Moab mihai, Thlaphângna le khuorkhurûm, Chânghaiin an lo nghàk cheu"Ti hi LALPA thu suok a nih. 44 Titna tlânsan tumtu chu, Khuorkhurûmah tlâng a ta, Khuorkhurûm suoksantu chu, Chânga chun inawk a tih. Hremna a tuor ding kum chu, A hung tlung vak ding a nih"Ti hi LALPA thu suok a nih. 45 Hesbon hlim phèna inbi, Râltlânhai bei a dong ngei!Sihon lal khawpui Hesbon chu, Mei suok tanna hmun a na, Moabhai bawksam a kàng ie, Chapo ri siehai lu bùr chu. 46 Aw Moab, i chung a pik!Khemos mihai an boral tah. I naunu le naupahai chu, Salah an thuoi tawl ta si. 47 Sienkhom ni nuhnunga chun, Moab vàngneinahai chu, Ka tungding nawk ding a nih"Ti hi LALPA thu suok a nih. Hi chen hi Moab chungthu hrilna chu a nih.

Jeremiah 49

1 Amon chungthua chun LALPAN hieng ang hin a hril:"Israelin nau a nei naw maw?Rohluotu ding a nei naw a ni?Iengti leia Gad-hai ram chu, Molekinb a chang am a na?Ieng leia a mihaiin, An khuohai an hluo am a na? 2 Sienkhom indona rihai, Amon khawpui Raba-ahAn hriet hun la tlung a ta, A khuo tlu ram vong a ta, A sevel khuohai khom chu, A rêngin raw fai an tih. Ama hnot suoktuhai chu, Israelin hnot suok a tih"Ti hi LALPA thu suok a nih. 3 Aw Hesbon, tap rak rak rawh, Ai khuo suksiet a ni ta si a!Nangni Raba khaw mihai, Inring takin tap rak rak ro!Saiip silin sûn unla, Kul sûngah tlân vêl ruoi ro, Molek le a thiempuhai, A rongbawltu po po leh, Salah an thuoi ding a ni si. 4 Aw naunu ringumlonu, Ieng leia i phairuom thahai, I suong bèk bêk am a na?I hausaknahai chu suongin, 'Tuin am a mi bei ngam ding?'Tiin i tong hlak a ni kha. 5 I vêl tina inthokin, I chungah thlabârnahai, Ka hung intlun ding a nih. Hnot hmang vong an ti cheu a, Tlânsehai hûikhawmtu ding, Tu khom um ta naw ni hai"Lalpa, Iengkim LALPAN a tih. 6 Nisienlakhom chu hnungah, Amon thlàhai vàngneina chu, Ka tungding nawk ding a nih'Ti hi LALPA thu suok a nih. 7 Edom chungthua chun Iengkim LALPA chun hieng hin a hril:Teman-ahc mi var hrim hrim, An um dèr ta naw a ni?Thurawn pe theitu rem hrie, An bo dèr el am an ta?An varna a thing zo maw? 8 Nangni Dedana chênghai, Ngha kîrin tlânsie unla, Pûk rilah inbi hmang ro, Esau ka hrem huna chun, Sietna hung intlun ka tih. 9 Grêp lotuhai an hung pha, Hlà tawk an nei naw ding maw?Zànah rûkru an hungin, An dit bàk an làk hlak maw? 10 Kei chun Edom innàm ka ta, A'n bìkna hâi lâng ka ta, Inbi hmang thei ta naw nih. A nauhai le laichinhai, A tuolbawmhai bo an ta, Hmu ding hrim um ta naw nih. 11 I fahrahai chu mâksan la, Keiman lo hum him ka tih; I hmeithâihai chen khomin, Kei hi mi ring raw hai se. " 12 LALPA chun hieng hin a tih: No chu a dawn naw dinghai hman an indawntir si chun, hrem lo topin i suok thei ding am a ni? Hrem loin suok naw top i tih, no chu i dawn ngei ding a nih. 13 Bozra chu tlu ramin, mi pangzat, diriem le tongsie inphur huoi huoi hung nîng a ta, a khuohai chu kumkhuoin tlu ram a tih" ti hi LALPA thu suok chu a nih. 14 LALPA thucha ka hriethai chu:Hnam tinhai kuomah hi thu hi, Hril dingin palai an tir a:"Pung khawm unla, bei ro, Indo puongin khêk suok ro!" tiin 15 "Ngaita, nang chu hnamhai lai, Ka sukchìn ding chè a na, Mihai endong nîng i tih. 16 I'n sukparapnahai kha, Lungrila i chaponain, A dawi vèt lei che a nih. Aw nang rawl lung kâra chêng, Tlâng sîpa umhmun khuortu, Mupui bu sepna angaInsângah bu sep la khom, Chu hmun sânga inthok chun, Hnûk thla tho tho ka ti che, "Ti hi LALPA thu suok a nih. 17 "Edom chu pangzat an ta, Mi inlon vèl taphotin, A hliemnahai chu hmuin, Maktiin nuisawng an tih. 18 Sodom le Gomorra khuo leAn kawl vèla khuo po po, Suksieta a um ang khan, Tu khom chêng ta naw ni a, Tu khomin hluo ta naw nih, "Ti hi LALPA thu suok a nih. 19 Jordan ram pik a'nthok a, Ran tlatna hmun phûlzawlaSakeibaknei hung angin, Ama rama inthokin, Edom chu hnot thlûr ka ta, A chunga thuneitu ding, Ka nuom taphot ruot ka tih. Keima ang tu'm an um a?Mi cho thei ding tu'm an um?Berampu tu am mi kal thei? 20 Edom chunga thaw dingaLALPA ruot chu ngâithla ro, Teman mihai chunga a ruot khom. An ran tehruoi fen hmang an ta, Anni leiin ran tlatnahai, A rêngin suksieng a tih. 21 An tlûksiet ri a hriet pha, Hnuoi inthin dur dur a ta, An beidong khêk thangkhawk chun, Tuipui Sen ruom khawk a tih. 22 En ta, mupui vuong tung khi, A hung bir thla ding a na, Bozra chungah thla zâr a ta, Chu ni a hung tlung pha chun, Moab mihrânghai lungril chu, Nuhmei nau hase lai angin, Thlaphângnain sip a tih. 23 Damaska chungthua chun:"Hamat le Arpad an chî-ài, Thu tha lo an hriet leiin. An lungril a zâm hle a, Tuifawn insawk zing angin, An lungril a chawmchawrok. 24 Damaska chu zoi thlain, Tlân hmang di'n a'n singsa a, Thlabârnan a man khong a, Nuhmei nau hase angin, Lungngaina tuorin a'n kon. 25 Khaw inlâr le hlim thei chu, Rausanin a lo um tah. 26 Chu taka thalaihai chu, Kotthlêrah tlu phung an ta, A sipaihai chimit an tih, "Iengkim LALPA chun a tih. 27 "Damaska kul chu rawng ka ta, Ben-Hadad kulpui chu kàng hmang a tih. " 28 Kedarhai le Hazor ramhai Babulon lal Nebukadnezzarin a hung bei ding thua LALPA thu suok chu:"Tho unla, Kedar hai bei unla, Khawsak mihai chu nuoi bo ro. 29 An puon in le ran ruolhai, An puonzàr le hmangruohai, Iengkim làkpêk vong unla, An sanghawngseihai hawn ro. "Sîr tinah titnan a'n huol cheu"Tiin mihan khêk khum an tih. 30 "Nangni Hazora chênghai, Inhmaw takin tlân hmang ro!Pûk rila hai chun inbi hmang ro. Babulon lal Nebukadnezzar chun, Do ding che'n thu a phierruk a, Suksiet a tum che a nih"Ti hi LALPA thu suok a nih. 31 "Nuoma ngai sukngam ringot, Kul le kotkhâr khom nei lo, Kot kalna tluon khom nei lo, Thlalêra khawsahai chu, Tho unla, va bei tawl ro, "Ti hi LALPA thu suok a nih. 32 "An sabengtung ruolhai leAn ran ruolhai po po chu, Râlin lâkpêk vong an ta, Lu ziet kawng hlak hnamhai chu, Thli angin lèn dar ka ta, Kil tin a'nthokin sietna, An chungah bun thlâng ka tih, "Ti hi LALPA thu suok a nih. 33 "Hazor chu sihal ruolhai, Chèng khawmna hmun nîng a ta, Rausan hmun ni kumkhuoin, Tu khom chêng ta naw ni a, Tu khomin hluo ta naw nih. " 34 Juda lal Zedekia inlal tan tira Elam chungthua LALPA thu, zawlnei Jeremia kuoma hung tlung chu: 35 LALPA Iengkimthawthei chun hieng hin a tih:"En ta, Elamhai suongtawlol tak, An thalngul ul tliek ka tih. 36 Kawl kil lia inthokin, Thli thuong li hung tir ka ta, Elam chungah hrâng a ta, Thli thuong li chun lèn dar a ta, A lèn dar nawna hnam le, An tlân dar nawna hmun hrim, Khaw lai hmun khom um naw nih. 37 That tuma anni zongtu, An hmêlmahai hmaa chun, Anni chu vaw dar ka ta, An chungah sietna buok ka tih, Ka lungsenna inling ngei chu; Ka sukchimit vong hma khat, Kawlhnâmin hnot thlûr ka tih. 38 An lal le hotuhai suksein, Elama chun ka lalthungpha, Ka hung innghat ding a nih, "Ti hi LALPA thu suok a nih. 39 "Sienkhom Elam vangneina, Ka tungdingpêk nawk hun chu, A la hung tlung ding a nih, "Ti hi LALPA thu suok a nih.

Jeremiah 50

1 Babulon le Kaldai ram chungthua Jeremia hmanga LALPA hrilhai chu: 2 "Hnam tin lai hrilin puong rawh, Puonzâr khâiin puong suok rawh, Ieng khom ip nei dêr naw rawh. Hieng hin i hril ding a nih:Babulon chu tlawm a ta, Beld chu muolpho dèr a ta, Titnan Marduk sip a ta, A hmêl chu inzak a ta, A limhai thlaphâng an tih. 3 Hmar tienga hnam pakhatin, Ama chu hung do a ta, A ram suktlaran a ta, Tu khom chêng ta naw ni a, Mi le sà zâm hmang an tih. 4 "Chu hun le ni a tlung pha, Israel le Judahai chu, Hung insuikhawm tâng an ta, LALPA an Pathien zongin, Tap pumin hung pan an tih. 5 Zion lampui indonin, Zion tieng ngha tâng an ta, Hungin LALPA chel an ta, An theinghil ta ngai lo ding, Kumkhaw thuthlung thlung an tih. 6 Ka mihai chu beram angin, An lo inhmang zo ta a, Berampuhan thuoi suolin, Tlânga hai an invàk hmang a. Muol le tlâng dungahai chun, An invàk dar ta vong a, An huong khom an hriet ta nawh. 7 A hmú hmùn an lo fàk a, 'Ieng poi khom kan tawk dèr nawh, LALPA, an tlatna huongpui, An thlàtuhai beisei chu, An suol hmangsan lei a nih'Tiin an ràlhan an hril. 8 "Babulon chu tlànsanin, Kaldai ram chu mâksan ro, Kèl ruol thuoitu kèlchal ang, Nangni khom hung ni ta ro. 9 Babulon hung bei dingin, Hmar tienga hnam ropuihai, Suikhawmin chok tho ka ta, Ama chu hung ep an ta, Hmar tieng panga inthokin, An hung làk ding a ni si. Kut ruoka kîr ngai dèr lo, Râl do thiemhai thal angin, Hlawsama kîr um naw nih. 10 Babulon chu rok an ta, A roktuhai tlai an tih, "Ti hi LALPA thu suok a nih. 11 Nang ka rochanhai roktu, Bu chîltu bawngla tuoi angin, Bupawl lai invêl kuolin, Sakorchal inhràm angin, Hlima lawmin um la khom, 12 I nû la'n zak hlèng a ta, A hringtu che hmaimawk a tih-Hnamhai laia hnuoihnung tak, Thlalêr ram tawl le fil ang, I la ni ding a ni si a. 13 LALPA lungsenna leiin, Hluoin um ta naw ni a, Ràusan dèrin um a ta, Babulon sir taphotin, A hliemna zozai lei chun, Pangzatin diriem an tih. 14 Thalngul chawituhai poin, Babulon inhuol unla, Kâp ro, in thal ren naw ro, LALPA lakah a suol si a. 15 Sîr tinah hawhaw'n nor ro:Ama ngei a hung inpèk, A râlvêngbùk a tlù ie!A kul bang a chim dur dur. LALPA thungrul ni a na, Mi a thaw dàn ang charin, A chungah phuba la ro. 16 Babulona inthokin, Chi thètu le bu âttuhai, An rêngin hnot hmang unla, Hung nêktu kawlhnâm tiin, An mihai umna panin, An ram tieng tlân seng raw se. 17 Sakeibaknei hnot dar angin, Israelhai chu an tlàn dar a; Asuria lalin a fâk hmasa phot a, A tawpa an rû chen kheltu chu, Babulon lal Nebukadnezzar a nih. 18 Chuleiin, Israelhai chungthua chun Iengkim LALPA, Israel Pathien chun hieng hin a tih:"Asuria lal ka hrem ang khan, Babulon lal le ram hrem ka tih. 19 Sienkhom Israel ruok chu, A tlatnaah thuoi kîr ka ta, Karmel tlâng le Basan ramah, Efraim le Gilead muolah, Khop takin tla nawk a tih. 20 Chu hun chu a tlung pha chun, Israel bawsietnahai chu, Zong suok tumin dap an ta, Sienkhom ieng khom um naw nih. Juda suolna hrim hrim khom, Hmu ding um ta bok naw nih, A dam sun, ka hlàhai chu, Ka ngaidam ding a ni si"Ti hi LALPA thu suok a nih. 21 Merathaim ram chu bei unla, Pekod-a chênghai khom chu; Hnotin, thatin, rawt ram unla, Ka thupêk ang takin thaw ro"Ti hi LALPA thu suok a nih. 22 A ramah indona rî a so a, Sietna rì râpthlâk tak chu. 23 Leihnuoi tubo lien tak el, Babulon chu a koi dar a, A va hang se nasa de aw!Hnam tin lai Babulon chu, A va hang ram nasa ngei de! 24 Aw Babulon, ka châng kamah, I'n ring hma'n i awk chieng de!Hmu suok le man i ni tah, LALPA chu i khing leiin. 25 LALPA chun a lungsennaHriemhreihai la suok dingin, A râlthuom siena a hong a, LALPA Iengkim LALPAN chun, Kaldai ramah thaw ding a nei. 26 Kawl kil tina inthokin, Ama chu hung bei unla, A sum siekhawmna hong un la, Bu hûm angin deng vûm ro. Iengkim sukse vong unla, Hlà ieng khom nei dêr naw ro. 27 Ran thatna inah thuoiin, A bawngchal tuoi that vong ro. Hrema an um ni ding chu. A hun a hung tlung ta si a, An chung a va hang pik ngei! 28 A tempul suksetuhai laka, LALPA ei Pathien phuba làk dàn, Babulona inthoka tlân suok, Râltlân kìrhan Zion tlànga, An hril chu lo ngaithla ro. 29 Babulon beitu dingin, Thal kàp thiemhai ko khawm ro. Tlân suok um dèr lo dingin, A vêlin inhuol tlat ro. A thilthaw thungrul unla, A thaw angin thaw ve ro, Israel Mi Thienghlim, LALPA chu a khing ngam leiin. 30 Chuleiin, a tlangvalhai, Kotthlêra hai tlûng an ta, Ni khat thil thu ringotin, A sipaihai chimit an tih"Ti hi LALPA thu suok a nih. 31 Ngai rawh, aw nang mi chapo, Khingin ka do chê a nih; I ni ding chu a tlung tah, Hremna i tuor hun ding chu, Iengkim LALPA chun a tih. 32 Mi chapo inpal thlùng a ta, Tu khomin kei tho naw nih; A khuohai rawpêk ka ta, A vêla umhai po po leh, An rêngin kang hlum a tih. 33 Iengkim LALPA chun a hril:"Israelhai le Judahai chu, Suknomnatin an um a, Sala mantuhai po po chun, Nghet takin an chel tlat a, An insuo nuom hrim hrim nawh. 34 Sienkhom an Tlantu a hrât, A hming Iengkim LALPA a nih. Ama chun a kûl a tâia tanin, An ramah muongna intlun a ta, Babulona chênghai ruok chun, Muongna hrim hmu naw ni hai. 35 "Babulona chêng Kaldaihai, An mi lien le varhai chungah, Kawlhnâm inlèngtir ka tih"Tiin LALPA Pathienin a hril. 36 A zawlnei derhai chungah, Kawlhnâm inlèngtir ka ta, Mi invêt inchang an tih. A pasalthahai chungah, Kawlhnâm inlèngtir ka ta, Thlabârnain sip an tih. 37 A sakor le tawlailirhai, Hnam dang an sorhai chungah, Kawlhnâm inlèngtir ka ta, An rêngin thaiduop an tih. A ro sie khawlhai chungah, Kawlhnâm inlèngtir ka ta, A rosumhai rok an tih. 38 A tuikhurhai chunga khom, Kawlhnâm inlèngtir ka ta, A rêngin kang vong a tih, Milem pangzatum tamna, An invêtchilna ram a nih. 39 Thlalèr ram sakolhai leSatenê ruolin hluong an ta, Chingpirinuhai chêng an ta, Hluo ni ta ngai naw ni a, Suon a'nthok suon dang chenin, Tu khom chêng ta naw ni hai. 40 Sodom le Gomorra khuo leAn sèvela khuo po po, Sukram a ni vong ang khan, Tu khom um ta naw ni a, Tu khom chêng ta bok naw nih"Ti hi LALPA thu suok a nih. 41 En ta, hmar tienga inthokin, Sipai ruol an hung a ni saw!Hnuoi kil tawpa inthokin, Hnam ropui le lal tam takhai, An hung inthok a ni saw! 42 Phaw le feihai an chawi a, An rawng a, ngil an nei nawh. Tuipui so hum hum angin, Sakor chungah an hung chuong; Râl bei dinga insingsain, Aw nang Babulon naunu, An hung rûn ding che a nih. 43 Babulon lalin a hriet chun, A kuthai a zoi thla a, Lungngainain a man a, Nuhmei nau hase angin. 44 Jordan ngawa inthokaRan tlatna hmun hringa suokSakeibaknei ang elin, Babulona chênghai chu, Keiman hnot suok thut ka ta, A chunga thuneitu ding, Ka dit ang ang ruot ka tih. Keima ang tu'm an um a?Mi cho thei tu hrim am an um?A tù berampu hrimin am, An mi cho thei ding a na? 45 Babulon le Kaldai chunga, LALPA thaw tum hi ngai ro:Ran tehai chu kei hmang a ta, Ran tlatna hmun po po chuAnni leiin sukram a tih. 46 Babulon tlawm thu riva chun, Hnuoi nghor hnìng dur dur a ta, A tap ri chu hnam tin lai, A thangkhawk ding a ni si.

Jeremiah 51

1 LALPA chun hieng hin a tih:Ngai ta, Babulon chunga leLeb Kamaie mihai chunga chun, Suksetu chu tir ka tih. 2 Babulon chu sêp fai ding leA ram sukse vong dingin, Ram dang mi hung tir ka tih. A siet ni a tlung pha chun, Sîr tinah inhuol an tih. 3 Thal kâptuin a thalngul, Kuoina hman nei naw ni a, Thîr zakuo hâk hman naw nih. A thalaihai hlà nei dêr naw la, A sipaihai rawt chimit rawh. 4 Kaldai ramah that teu an ta, Kotthlêrah inthal phung an tih. 5 Israel Mi Thienghlim hmaah, A ram chu suolin sip sien khom, Pathien, Iengkim LALPA chun, Israel le Judahai chu, A màksan tawl ngai si nawh. 6 "Babulon chu tlànsan ro, In hringna hum di'n tlân ro!A suolna thì phà naw ro. LALPA thungrul hun a na, A phû ang tak hmûng a tih. 7 Babulon chu LALPA kutaRangkachak no ang a na, Chu chun hnuoi pum a'n ruitir a; Hnamhan a uoiin an dawn a, An inhài hmuol vong a nih. 8 Babulon tlu dar thut a tih. Ama chu tà rak rak ro!A hung dam thei takduoiin, Thinghnài damdawiin zût ro. 9 "Babulon sukdam ka tum a, Sienkhom a dam thei si nawh; Chuleiin, mani ram sengah, Ama chu màksan ei tiu. A thiem nawna'n vàn a tong a, Vàn sânga sûm a hang tong. 10 'LALPA chun a mi'n thiem tah. LALPA ei Pathien thilthaw hi, Thaw ro, Zion-ah puong ei tiu. ' 11 Thalhai chu tât ngei unla, In phawhai chu chawi seng ro!Babulon suksetu dingin, Media lalhai lungril chu, LALPAN a chok tho a nih. LALPAN phuba lâng a tih, A tempul phuba ngei chu. 12 Babulon kul bang ep-a chun, In puonzâr chu khai unla, Vêngtu tam lem sie unla, Enthlatu sie bok unla, Lambun dingin inring ro!Babulon mihai chunga, LALPAN thaw a tumhai chu, A hung hlen suok ding a nih. 13 Nang tui tam tak laia chêng, Sum le pai hau êm êmtu, I tawpna chu a tlung tah, I nun hrui sat chat ni chu. 14 Iengkim LALPA chun maniInsâl meuin thu a'n khàm a:Khau hon anga tam mihriem, I lakah hung tir ka ta, Hlado insam khum an ti che. 15 A theinain hnuoi a siem a, A varnain khawvel a'n din a, A remhrietnain vàn a zar a. 16 A rawl a hung insuo pha, Vàna tui an ri dur dur a; Kawl kilah sûm a'n suoktir a, Ruo a sûr a, kawl a'n lep a, Thlî chu a bawma inthokin, A hung insuo hum hum a. 17 Mi tin chu an chawlol a, Hrietna hrim an nei naw a, Rangkachak sertuhai chu, An milem serin a sukzak a, An milemhai chu thuok nei lo, Inhlèmna thil mei mei an nih. 18 Tlâktlaina an nei naw a, Mi nuizatbùr vong an na, An chungthu rèl a ni pha, An la bohmang ding a nih. 19 Jakob Chanvo ve ruok chu, Chuong ang chu a ni ve nawh. Thil iengkim Siemtu a nih, A rohluotu hnam chenin; A hming chu Iengkim LALPA. 20 Râldonaa ka hembawk, Ka hriemhrei chu nang i nih:Hnamhai le lalramhai chu, Nangma hmangin ka sukdar a, 21 Sakor le a chung chuonghai, Tawlailir le a khaltuhai chu, Nangma hmangin ka phìn dar. 22 A nuhmei a pasalin, Putar le tleirawlhai dâm, Nunghàk le tlangvàlhai dâm, Nang le chu ka ngam vong a, 23 Berampu le ran ruolhai, Loneitu le bawngchalhai, Ram optu le thoktuhai, Nang le chu ka thuhnè vong. 24 "Babulon le Kaldai mihaiin, I mithmu ngeia Zion chungaThil tha lo an thaw po po chuKa thungrul ngei ding a nih, "Ti hi LALPA thu suok a nih. 25 "Aw nang suksetu tlâng lien, Khawvel po po suksetu, Ka khing che a nih" ti hiLALPA thu suok chu a nih. "I chungah kut thlâk ka ta, Rawlah inhlum ka ti che a, Tlâng kâng hawpah siem ka ti che. 26 In kila a lungphum dingin, I lung làk ni ngai naw ni a, Inthuta rem ding khomin, I lung la ngai naw ni a, Kumkhuon rausan nîng i tih"Ti hi LALPA thu suok a nih. 27 "A ramah puonzâr khâi la, Hnamhai lai tawtawrawt mûtin, Ama do ding hnamhai buotsai la, Ararat le Minni le AskenazRamhai hi inpung khawm la, An kawmandar ding ruot la, Khau hon anga tam sakor, Anni bei dingin tir rawh. 28 A do ding hnamhai buotsai la, Media lalhai, ram optuhai, Thoktuhai le an ram ophai leh. 29 Ram chu na tuorin a'n thin a, Babulon sukram dèr a, Hluotu nei ta loa siem chu, LALPA tum tlat chu a nih. 30 Babulon râlhrâthai chun, An râldo lai chu an bàng a, Kulpui sûngah an intom a, An pachangna a hung re a, Thaiduopah an inchang zo a; An inhai a kàng dur dur a, Kotpui kalnahai a tliek a. 31 Khawpui po po an lâk thu, Babulon lal hril dingin, Zuolko an tlàn zûr zut a, Tirhai chu an insùlpel zut zut. 32 Vadung kâihai an làk a, Phairuong bil chu an raw a, Sipaihai an zàm zo tah. 33 Iengkim LALPA, Israel Pathienin hieng hin a tih:"Babulon naunu chan chun, Hrìzawla bu chìl lai a ang!Bu anga an chìl hrep hun chu, A hung tlung ding a ni si a. 34 "Babulon lal Nebukadnezzarin, A mi lem zo vong tawl a, Phìn darin a mi sukchi-ai a, Bêl angin a mi bun suok a, Rûlpui angin a mi dol a, Inhnik a tizawng po poin, A phingpui a sukkhop a, Chu zoah a mi luok suok a. 35 Zion tlànga chênghai chun, 'Kan chunga a thaw angin, Babulon chungah tlung sien, Soisakna tuor ve raw se' ti sien, Jerusalema chênghai khomin, 'Kan thisen maw po po chu, A chungah tla vong raw se" ti sien. 36 Chuleiin, LALPAN hi hi a hril:"Ngai ta, nangma tan ka ti che a, I phuba khom lapêk ka ti che; A tuipui sukkang vong ka ta, A tuikhur khom sukkang ka tih. 37 Babulon chu tlu ram a ta, Sihalhai tuol lèngna hmun, Mi makti le inchek khum, Tu chêng nawna hmun nìng a tih. 38 Sakeibaknei vàng lai angin, A mihai an inhùk dum dum a, Sakeibaknei tehruoi angin, Mi an inngur khum hlak a. 39 An inrawp zuol lai takin, An ruoi ding buotsai ka ta, Khuo hre loin hrâi rui ka ta, Hlimin innui khêk an ta, Chu zoah tho ta lo dingin, Kumkhuoin in tâng an tih"Ti hi LALPA thu suok a nih. 40 "That ding beramte angin, Beramchal le kelchal angin, Anni chu thuoi hmang ka tih. " 41 Khawvel uongpui Sesakf chu, An la man ruou ding a na, Babulon chu hnam tin lai, Mi pangzat hung kai a tih. 42 Babulon chungah tui lien a ta, Tui fawn sàngin chim pil a tih. 43 A khawpuihai chu rausan khuo, Thlalêr ram tawl, mi chêng nawna, Khuolzin tu khom sir lona hmun, Hung inchang vong tâng a tih. 44 Babulona Bel chu hrem ka ta, A lo dol tah po po khom, Inluok suoktir nawk ka tih. Hnamhan hung bèl ta naw ni a, Babulon kul bang chu chim a tih. 45 "Ka mihai, hung suoksan ro!Hringna hum di'n tlân suok ro!LALPA lungsenna tium lakah, Insanhim di'n tlân suok ro. 46 Thuthang a hung inlèng pha, Zâm naw unla, ti bok naw ro. Tu kum thuthang lo hrieng in ta, Kum nawk thuthang hre bok in tih, Ram sûngah inpawngnêkna thu leLal le lal insuol rì a'n thang. 47 Babulona an milemhai, Ka hrem ni la tlung ngei a ta, A ram pumin muolpho a ta, Mi ka sukhlumhai po po chu, A bulah tlu phung an tih. 48 Hmar tieng panga inthokin, Suksetuhan hung rûn an ta, Hnuoi le vàn le a sûnga mihan, Babulon siet tuok lawm an tih"Ti hi LALPA thu suok a nih. 49 Israelhai a that teuh leiin, Babulon chu tlu ngei a tih, Khawvel puma mi tam tak, Thìna intluntu a ni si a. 50 Nangni kawlhnâm pumpeltuhai, Muongchàng loin tlân suok ro!Ram hla taka inthok khomin, LALPA chu hre zing unla, Jerusalem theinghil naw ro. 51 "LALPA in, hmun thienghlimah, Ram dang mi an lût leiin, Kan muolphona chunga chun, Inzakin kan hmài a mawk. " 52 "Sienkhom a ram pumpuia, An milemhai ka hrem ni chu, A la hung tlung ding a na, Hliem tuorin inrûm an tih, "Ti hi LALPA thu suok a nih. 53 Babulon chun vàn tongin, A kulhai suknghet sien khom, Suksetu ding hung tir ka tih"Ti hi LALPA thu suok a nih. Babulon siet ding thu 54 Babulona inthoka tap ri, Kaldai ramin sietna râpthlàk, A tuok ri chu ngaithla ro. 55 LALPAN Babulon sukmit a ta, A vaupùm ri na tak chu, A hung hmet dei ding a nih. Tuipui fawn insok angin, Hmêlma lungsen sosâng a ta, An ri chu thangkhawk a tih. 56 Suksetu chun Babulon, A hung bei ngei ding a na, Pasalthahai man a ta, An thlàhai suktliek a tih. LALPA, Thungrultu Pathienin, La thungrul ngèi ngèi a tih. 57 A hotuhai le a mi varhai, Optuhai le thangpuituhai, An pasalthahai khom chu, An rêngin hrâi rui ka ta, In song an ta, har ta naw ni hai"Tiin Laltak chun a hril a, A hming Iengkim LALPA a nih. 58 "Babulon kul sà tak chu, A la tlu hmât ding a na, A kotkhàr insânghai khom, A la kàng hmang ding a nih; Hmang loin mipuihai chu, An insuksawl mei mei a, An hnam sininrimna chu, Meia ti ding chauh a nih"Iengkim LALPA chun a tih. 59 Hi hi Juda lal Zedekia inlala inthoka kum linaa Babulon tienga Zedekia le fe ve Seraia kuoma zawlnei Jeremia-in thucha a pèk chu a nih. Seraia chu lal in enkoltu lû tak a na, a pa chu Maseia naupa Neria a nih. 60 Jeremia chun Babulon chunga sietna hung tlung ding po po chu inchikin lekha zielah a ziek thlâk vong a. 61 Ama chun Seraia kuomah, "Babulon i tlung pha leh hieng thuhai po po hi tiem ngei la, 62 'Aw LALPA, hi hmun hi kumkhuoa mi le sa chêng ta lona dinga i sukram ding thu chu i lo hril tah hi' ti rawh. 63 Chun, hi lekha ziel hi i tiem zo pha lungtum leh khit de la, Eufretis vadungah pei la, 64 'Babulon chu hieng ang hin a mi chênghai leh la pil a ta, a chunga sietna ka hung intlun ding lei chun tho nawk ta ngai naw nih' tiin i hril ding a nih" a ta. Hi po hi Jeremia thu chu a nih.

Jeremiah 52

1 Zedekia a hung inlal chun kum sawmhni le kum khat mi a na, Jerusalemah kum sawm le kum khat a'n lal a. A nu hming chu Hamutal a na, Libna khuoa Jeremia naunu a nih. 2 Ama chun Jehoiakim thaw ang bokin thil suol a thaw a. 3 LALPA lung a sen êm leiin hieng thilhai hi Jerusalem leh Judai ramah a hung tlung a, a tawpah a mithmua inthokin a pei suok a. Zedekia chu Babulon lal chunga chun a hung hel tah a nih. 4 Zedekia inlal kum kuona thla sawmna le ni sawmag chun Babulon lal Nebukadnezzar le a sipai ruol po po chu Jerusalem do dingin an hung inthok a, riebûk an khuor a, a vêlin kulin an inhuol khum a. 5 Lal Zedekia inlal kum sawmpakhatna chenin khawpui chu inhuolin an chàrchil a. 6 A kum sawmpakhatna thla lina ni kuonah chun khawpui chu an hung tàm ta hle a, mipuiin fàk ding ieng khom an nei ta nawh. 7 Chuongchun, khawpui kul bang chu an sut hong a, sipaihai po po chu an tlàn suok a. Babulon mihai chun khuo chu inhuol vêl vong hai sienkhom, lal huon bang pahni inkàra lampuia chun zànah an inrel suok a, Araba lampuia chun an fe a. 8 Amiruokchu, Babulon sipaihai chun Zedekia chu an hnot zui a, Jeriko phaizawlah an zu nang a. A sipaihai chu an tlàn dar vong a, 9 ama chu an man a, Hamat rama Ribla khuoa chun Babulon lal kuomah an thuoi a, ama chun a chungthu chu a rèl a. 10 Babulon lal chun Zedekia naupa chu a mithmu ngeiah a that a, Riblaa chun Juda mi lienhai po po khom a that bok a. 11 Chu zoah Zedekia mit chu a khel dokpèk a, dâr kol a'n buntir a, Babulon tieng a thuoi a, chu taka chun a thi chenin lung inah a sie a. 12 Babulon lal Nebukadnezzar inlala inthoka kum sawm le kum kuona, thla ngana ni sawmi chun lal vêngtu pawl kawmandar, Babulon lal hmaa ngîr hlak, Nebuzaradan chu Jerusalemah a lût a. 13 LALPA tempul le lal in le Jerusalema in po po chu a raw a; Jerusalema in poimaw taphot chu hlà a nei nawh. 14 Babulon lal vêngtu pawl sipai kawmandar hnuoia sipaihai chun Jerusalem kul bang chu an sukchim vong a. 15 Vêngtu pawl kawmandar Nebuzaradan chun mipuihai laia mi rethei tak tak, khawpuia an màksanhai, a hmaa Babulon lal kuoma lo inpe tahai le themthiem la um sunhai chu salah a thuoi vong a. 16 Sienkhom, a rama mi rethei mongtol thenkhat ruok chu grèp huon enkoltu ding le loa sinthaw dingin Nebuzaradan chun a màksan a. 17 LALPA tempula dâr banhai le dâr tuizèng inthutnahai chu a vuok chim a, a dârhai chu Babulon tieng a hawn vong a. 18 Tempula an hmang bûr le bèlhai, vutluohai, khawnvar phita chep ruolnahai, maihùnhai, thlèng le dâr hmangruo po po, tempula rongbawlnaa an hmang hlakhai chu a lâk vong a. 19 Chun, màihùn hai, mei lâkna berbu hai, thil thèna maihunte hai, bêl hai, khawnvar siena hai, dawn ding inhlàn chànga hmang hlak thlèng le thlèngkûm, rangkachak le tangruoa siem po po chu kawmandar chun a lâk vong a. 20 Dâr ban pahnihai le dâr tuizèng le a thut, son thei le dâra siem bawngchal lim sawmpahni, Solomonin LALPA tempula dinga a'n siemtir rikzie chu bûk zo ruol a ni nawh. 21 Ban pakhat insàngzie chu meter riet, a lienzie meter nga le centimeter li vel tuok a na, a sa zawng chu centimeter riet a na, a lai chu a kawrong a. 22 A ban hmawra dâr lu bawk chu meter khat le centimeter thuma insâng a na, a lu bawk vel tuoka chun dâra mawi taka siem theibufai lim a'n tlar suok a, dâr ban pakhat dang, chuong ang boka theibufai lim chuongna chu, inang chara siema nih. 23 Chun, a panga chun theibufai lim sawmkuo paruk a um a, a vêla cheimawina theibufai lim um zàt chu zakhat a nih. 24 Kawmandar Nebuzaradan chun thiempu lal Seraia le a dota mi thiempu Zefania le kotkhàr vêngtu pathumhai chu a man a. 25 Khawpuia la um sipai hotu hai, lal khawnbawl mi pasari, a rama sipai latu lu tak le a mihai sawmruk, khawpuia la umhai chu a thuoi tawl bok a. 26 Kawmandar Nebuzaradan chun anni chu Riblaa um Babulon lal kuoma chun a thuoi a. 27 Hamat ram Riblaa chun Babulon lal chun anni chu a'n thattir a. Chuongchun, Juda hnam chu an rama inthokin sala thuoiin an um ta a. 28 Nebukadnezzarin sala a thuoihai chu: a kum sarinaahj Juda mi sângthum le sawmhni le pathum an na; 29 Nebukadnezzar kum sawm le kum riet a'n lal kumah, k Jerusalem mi zariet le sawmthum le pahnih an na; 30 kum sawmhni le kum thum a'n lal kuml a lal vêngtu pawl kawmandar Nebuzaradan-in a hung thuoi po Juda mi zasari le sawmli le panga an na, an rêngin sângli le zaruk an nih. 31 Sala Juda lal Jehoiachin kum sawmthum le kum sari a'n tàng kum, Babulon lal Evil-Merodakm inlala inthoka kum khatnaa chun Juda lal Jehoiachin chu saltàngnaa inthokin Babulon lal chun a'n suo ta a. 32 Jehoiachin chu hoihawm takin a biek a, a kuoma um ve lal danghai nêka insâng lemah a sie a. 33 Chuongchun a saltàngna zakuo chu hlîpin, a dam sûng hun po lal dawkanah fain a dawn ve ta a. 34 A thi chena ama inphuhrukna dingin Babulon lal chun Jehoiachin chu sum le pai a pêk thlar bok a nih.

Lamentations 1

1 Kháng khopa khawpui lùn kha, 2 Biengah mitthli luong zoi zoiin, Zànah a tap tlok tlok a; A ngaizawnghai tu el khom, Thlamuongtu an um ta nawh. A ruolhaiin lêm ang derin, Dorâl an lo inchang zo tah. 3 Salah an intâng, Juda mihai, Hrem le sor inrim an tuor; Hnam danghai lai khawsain, Sawl damna hrim an hmu nawh. Anni hnottuhan nangchîngin, An beidong lai an hnaw chèp. 4 Zion lampui a thing zo a, Kût hmanga hung an um ta nawh. A kotkhàrhai chu ram zoin, A thiempuhai an tap inrùm. A nunghâkhai an beidong a, A lairil a na vong vong. 5 A dotuha'n an op khum a, Hmêlmahaiin nunkhuo an phâm; A suol nasa êm leiin, LALPAN a'n tuortir ta si. A nauhai chu hmêlmahaiin, Salah manin an thuoi hmang. 6 Zion naunu mawina chu, Puon ang a lo chul zo tah. A hotuhai khom tlatna bo, Sazuk ang an hung ni tah. A hnottuhai hmaa chun, Zoi nengin an tlânsie a. 7 Rinum tuora an vài lai chun, A ropui lai nihai kha, Jerusalem chun a hriet suok a. Hmêlman an hung lâk lai khan, Santu tu khom a nei nawh. A chan siet chu hmêlmahan, Hmuin an diriem hle a. 8 A suol nasat êm leiin, Jerusalem khawpui chun, Tirdakum a kâi zo tah; Ama ngaisângtuhaiin, Saruoka an hang hmu chun, An endong ta êm êm a; Mi hmêl khom hmu ngam loin, Naw tieng nghain a'n rûm a. 9 A tirdakumnahai chu, A puonbilah a kai luoi a, Thup nachang a hriet ta nawh. A tlawm dàn a râpthlàk a, Hnèmtu tu khom an um nawh. "En ta, LALPA, ka tuorna hi, Hmêlmahai an dingchang ta si!" 10 A rosum nei po pohai chu, Hmêlmahaiin an rok a, I mihai pungkhawmnaa, An thang i phal ngai naw hlak, Pathien ringnawtuhai kha, I hmun thienghlima an lût lai, Mit ngeiin a thlir vong vong. 11 A mihan inrûm pumin, Fàk le dawn ding an zong a, An hring theina ngaituoin, An rosumhan bu an thleng. "Mi zuk en ta, aw LALPA, Mi hmusit ka kai tah hi!" 12 Nangni inlon invàkhai, Iengma loah in ngai maw?Ngha vêlin en chieng unla, Hremna ka chunga hung tlung, Ka tuor nêka nasa lem hi, A um hlak hrim am a ni, A lungsen inling ni aLALPA mi hremna tluk hi? 13 Ka rù sùng hlieutu dingin, Vàna inthok mei a hung thlàk. Ka awkna di'n châng a kam a, A letlingin a mi khài a. Inrieng taka mi màksanin, Sùnni thlàkin thi hmun ka suol. 14 Ka suolnahai chu her thlopin, Ka ringkol dingin a siem a; Ka rîngah a hung innghat a, LALPAN ka thâ a sukchàu a, Ka do zo lo dinghai kutah, Ama chun a mi'n hlàn ta si. 15 Kan pasalthahai po hlak chu, LALPAN a hnawl hmang vong a; Kan vàl ruol rawt chimit dingin, Mi beitu ding râl a hung tir. Sawrkhura grêp sir sawr angin, Juda nunghàk thienglâmhai chu, LALPAN dù tawkin a sir sawr. 16 Chu lei chun a nih ka tap, Ka mitthli a hul thei nawh. Hnèma mi sukhartu ding, Ka hnaiah mi an um nawh. Ka nauhai an va'n rieng ngei, Hmêlman an chungdel ta si! 17 Zion chun bân a phar a, Sienkhom hnêmtu an um nawh. Jakob chu a vêla chênghaiLALPAN a'n hmèlmàktir si. An ta di'n Jerusalem chu, Tirdakum a lo chang tah. 18 LALPA chu a'n dik vei leh, A lakah ka lo hel ta si a; Mi po pohai en ta u, Ka hang tuor nasat dàn hi!Ka nunghàk tlangvàlhai hlak, Salah an intàng zo tah! 19 Ka'n thloppuihai ka ko a, Sienkhom an mi'n phatsan tah. An hringna san him tuma, Fàk ding bu an zong laiin, Ka thiempuhai le upahai hlak, Tuolah an tlu hlum zo tah. 20 Ka beidong dàn êm êm hi, Aw LALPA mi zuk en ta!Ka sûng a sa huoi huoi a, Ka lung a zing êm êm bok; Ka hel hmang lei vong a nih. Lusûnna sukpungtu di'n, Tuolah kawlhnâm a hrâng a, In sûngah hripui a'n lèng. 21 Mihan ka'n rûm ri an hriet, Sienkhom hnêmtu an um nawh. Ka hmêlmahai po poin, Ka beidongzie an hriet a, I thilthaw an lawm a nih. Keima ang an hung ni hun, I tiem chu intlungtir rawh. 22 An rîtlona po po chu, I hmaah hung inlang sien, Ka bawsietnahai leia, Ka chunga i thaw ang hin, An chunga khom thaw ve rawh. Ka'n rûmna zozai lei hin, Ka lung a chàu zo ta si.

Lamentations 2

1 LALPAN Zion naunu chu, A lungsenna sùmpuiin, A hung inkhum ta mup el!Vàna inthokin hnuoiah, Israel ropuina a pei thlàk; A lungsen sosàng ni chun, A ke nghatsan a hriet fûk nawh. 2 Judai ram khuo po po chu, Lunginsietna nei dêr loin, LALPAN a lem zo vong a, Juda Naunu kulpuihai chu, Lungsenin a sukchim a. An ram le an hotuhai chu, Hnuoi phìtin a suktlawm tawl. 3 Israel kî po po khom, Lungsenin a tan bong a. Hmêlmahai an hung hnaiin, Anni chu a san nuom nawh. A vêl kàng vong hlak mei angin, A lungsenna chu Jakob chungah, A hung chok tah puot puot a. 4 Hmêlma angin thalngul a kuoi, A kut chang tiengin a tin zing; A enchim lohai po po khom, Hmêlma angin a that vong a, Zion naunu puon in chungah, A lungsenna mei a bun thlâk. 5 LALPA chun hmêlma angin, Israelhai a lem zo a, An kul le an lal inhai, Sukchimin a suksiet a, Juda Naunu ta dingin, Lusun tapna a sukpung. 6 Huona bùkthlâm ang elin, An tempul a sukchim a, Intuokna Puon in suksein, A kût le chawlnihai khom, Zion a'n theinghiltir a, Lal le thiempuhai khom chu, A lungsenin a hnawl vong. 7 LALPAN a maichàm hnawlin, A biekbûk a ràusan a. A kul banghai inthiektirin, Hmêlma kutah a pêk a; Hlima kût an hmangnaah, Hmêlma rì a so veng vung. 8 Zion Naunu kulpui chu, LALPAN sukchim a tum a, Suksiet chin ding a'n khi a, A kut thlàk a na ngei el!Kul chung zawl le banghaiin, An siet tuok chu an sûn a, A ruolin an chim thla rem rum. 9 A kotkhàrhai a tlu zap a, A kalna tluon a bong rem rum. Lal le an mi lienhai chu, Hnam dang salah an intàng. Dànhai an nei ta naw a, LALPA inhriettirna khom, Thiempuhan an dong ta nawh. 10 Zion Naunu upa ruol chu, To toka saiip silin, Hnuoiah an inthung biel a, Luah pilvut an inphul a. Jerusalem nunghàkhai chu, Bawka hnuoi sikin an kùn. 11 Ka tapna'n ka mit a'n vai zo, Ka sûngril a sa huoi huoi a; Ka mihai siet tuok lai thlîr a, Naupanghai le nautesenhai, Chaua kotthlêra an thidang lai, Ka hmuin ka lainat êm êm a, Ka thlarau a'n chek dar vong. 12 "Khaw la'm bei le uoiin teh?"Tiin an nuhai an indon a; Hliem tuor thisûk baw angin, Kotthlèrah an tlep thla a, An nuhai àngsûng ngêiah, An nun a chat thla riei riei. 13 I ta di'n iem hril ka ta?Ieng le'm ka têkhi ding che, Aw Jerusalem Naunu?Ka hnèm theina ding chein, Ieng am ka'n chansin ding che, Aw Zion Naunu thienglâm?I hliemna inthûkzie hi, Tuipui li ril ang a na, Tu'n am a sukdam ding che? 14 I zawlneihan inlàrna, Tlâktlai dèr lo an hmu a, I suolna tar lang lem hai sien, Saltàng pumpel thei i na, Sienkhom khêl le inhlemna thu, An inba lem tlat si che kha. 15 A fe pêl taphot chein, An kut an ben khum che a, Jerusalem Naunu chu, Nuisawa lu thin khumin, "Hi khawpui hi an naw maw, Hnuoia khaw mawi famkim leHlimna khuoa an hril chu?"Tiin an ti-el hlak che. 16 I hmêlmahai po poin, An bau an phong khum che a, Nuisaw le hâ rawt khumin, "Ei lem zo dêr an ta hi!Hi ni ngei hi an naw maw, Ei lo Tlumte thlîr hlak kha?Damin ei tong an ta hi!" an tih. 17 LALPAN a tum a thaw a, A thu chu a hlen zo tah, Tiena a puong tah angin. Lungsietna nei dêr loin, Aman a kei thlàk che a; Hmêlma a'n uongkhumtir che, I dohai ki a chawisàng. 18 Aw Zion Naunu kulpui, aLungrilin LALPA ko khêk ro, In mitthli sùn le zànin, Vadung angin luong raw se. Chawl loin tap zing unla, In mit insîm naw raw se. 19 Zàn vèng intana inthokin, Tho unla, khêk tan ve ro; LALPA hmaah in lungril, Tui angin bun suok unla, In nauhai hringna ta di'n, LALPA hmaah bân phar ro, Kotthlêr tontir taphotah, Phingtâmin an tlep thla hi. 20 LALPA en la, dawn ve rawh!Hieng ang hrim hrim hin mi dang, I soisak hlak am a ni?Nuhaiin an rìla rà, An nau duot ngawi ngawi laihai, An fâk el ding am a ni?Thiempu le zawlnei chen khom, LALPA hmun thienghlim ngeiah, Thatin an um el ding maw? 21 Naupang le a tar a zûr, Kotthlêr pilvut lai an tlu a, Ka nunghàk tlangvàlhai chu, Kawlhnâmin an sàt thlûk a, I lungsen ni'n i that a, Lainatna hrim nei loin, A sàmin i sàm tawl kha! 22 Kûta i ko khawm angin, Sîr tina min huol dingin, Ka ràpzawnghai i ko khawm. LALPA lungsenna ni chun, Hima tlân suok an um nawh; Ka mi duot le keitleihai, Hmêlman an rawt ram zo tah.

Lamentations 3

1 A lungsenna hmoltum hnuoia, A'n tuortir dàn hmutu ka nih. 2 Ama chun vara inthokin, Thimah a mi hnot lùt a. 3 Ka chungah sùnnithlâkin, A kut a thlâk ngat ngat a. 4 Ka taksa le ka vunhai khom, A suktawm zo vong ta a, Ka rùhai a vuok tliek a. 5 Khâkna le harsatnain, Sîr tinah an mi'n huol a. 6 Fam lo chang daih tah angin, Thimah a mi'n chèngtir a. 7 Ka tlàn suok thei nawna di'n, Dai a mi sakkhum vong a, Khaidiet rikin a mi thlung. 8 Santu ding ka ko khomin, Ka hnìna a khârkhip vong. 9 Lung bùmin ka lam a khâr, Ka lampui a sukping vong. 10 Savom mi'n chàn ang el le, Sakeibaknei intom rùk angin, 11 Lam a'nthok mi hnùk thlain, Santu nei loin a mi pot chen. 12 A thalngul chu a kuoi a, Kâp dingin a mi tin a. 13 A thal bawma thal ngei chun, Ka lungah a kâp tlang a. 14 Ka mihai nuizatbûr kâiin, Sùnnithlâk hlâin an mi ti-el. 15 Thil khâin a mi hnaw sip a, A mît ringot a mi'n bâ si. 16 Lungah ka há tauh tlamin, Pilvut lai a mi sir ziel a; 17 Muongna a mi pèk naw a, Hmûingìl umzie ka theinghil tah. 18 "Ka ropuina a chuoi ta a, LALPA-a ka beiseina khom" Ka ti hlol el a'n tah hi! 19 Ka tuorna le vâkvainahai, Mît hang khàkziehai dâm chu, Ienglai khomin ka hriet zing a, 20 Ka hriet chieng nasa leiin, Ka sûngril a sukngùi hlak. 21 Chuong sà chun, hi hi hrein, Beiseina ka nei nawk hlak: 22 Bohmang loa ei um el hi, LALPA zàngaina lei a na, A lungsietna a tlol ngai nawh. 23 A thar pei hlak, tûk tinin, A ringumna a ropui si. 24 "Ka chanpuol LALPA a na, Ama chu nghâk zing ka tih"Tiin ka'n hnèm hlak a nih. 25 Amaa beiseina neitu, Ama nghâktu ta dingin, LALPA chu a tha a nih. 26 A sandamna beisei a, To zinga nghàk hi a tha. 27 Tleirawl laia inthununnaRingkol bàt hi a tha a nih. 28 LALPAN a'n bâttir leiin, To zingin um el raw se. 29 Pilvutah hmai phum sien la, Beisei ding a la um si. 30 A bieng bentu kuoma chun, Khing tieng khom dawpêk sien la, Inzaknain sip raw se. 31 Mihriemhai hi kumkhuoin, LALPAN a pei thlàk ngai nawh. 32 Lungngaina intlun sien khom, Lainatna a'n entir nawk hlak a, A hmangaina ropui chu, Ieng lai khom a rè ngai nawh. 33 Hriem nauhai chunga tuorna, Lungngaina intlungtir hi, A nuomzawng a ni si nawh. 34 Saltànghai sirdè amani dàm, 35 Chunghnungtak hmaa mihriem, A chanvo hnawlpêk amani dàm, 36 Mi thu sukkhawhlopèk dàm hi, LALPAN a hmu naw am a ni? 37 LALPA thupèk a ni naw chun, Tu thu am hlawtling a ta? 38 Sietna le thil tha tlunghai hi, Chunghnungtak baua inthokaSuok vong a ni naw am a ni? 39 Suol leia hremna tuor hi, Hringmi tu'm soisel thei ding? 40 Ei lam hrawhai bi chiengin, LALPA tieng kîr nawk ei tiu. 41 Ei lungril le ei kuthai hi, Chung Pathien tieng phar suokin, 42 "Suol thawin kan lo hel a, Nangin i mi ngaidam naw a. 43 Lungsennaa inthuomin, Nangin i mi hnot thlûr a, Lungsietna nei dêr loin, Dittawkin i mi suom tawl a. 44 Kan hnìna tlung thei lo di'n. Sûmin i'n tuom khum tlat a. 45 Hnamhai lai mi tirdak kai, Hmunhnokah i mi siem a. 46 Kan hmêlmahan dit tawkin, An bàu an mi phong khum a. 47 Thlaphângna le tlâkkhurhai, Sietna le ramna kan tuor a. 48 Ka mihai siet tuok leiin, Vadung tui anga tamin, Ka mitthli a luong zoi zoi. 49 Ka mitthli hi chât loin, A la luong pei ding a nih, 50 Vàna inthoka LALPAN, A mi zuk en hmakhat chun. 51 Jerusalem nuhai chan ding, Ka hmuin ka lung a zîng. 52 San boa mi hmêlmatuhan, Vate angin an mi ve a. 53 A hringin khuorkhurûmah, Thi dingin an mi pei a, Lungin an mi dèng mur mur. 54 Tuiin a mi chìm pil a, Thi ngei dingin kan ngai a. 55 Khuorkhurûm mong a'nthokin, LALPA, i hming ka lam a, 56 "Beidongin ka ko che hi, I na mi sitpêk hràm rawh"Tia ka hung hnìna chu, I mi lo ngaithlàkpêk a, 57 Nang chun i mi hung hnai a, "Ti naw rawh" i hung ti kha. 58 Ka chungthuah aw LALPA, Nangma i hung inrol a, Ka hringna i'n tlan suok kha. 59 Ka chunga tha naw taka, An thaw dànhai i hmu a, Ka'n dikna mi humpêk rawh! 60 An phuba lâk tum dàn leAn mi phier inthûk dàn khom, Nang chun i hmu vong si a. 61 An mi biek sìsawnahai, An mi phierrûkna po po, Aw LALPA i hriet vong a- 62 Sùnnithlâka hmêlmahan, An mi hrilsietna zozai chu. 63 En ta, an thung le ngîr hi!An mi nuisawna hla naw chu, Khûkpui dang hrim an nei nawh. 64 Aw LALPA, an phù ang le, An kut sinthaw ang peiin, Nangin thungrul tawl lem rawh. 65 An lungril sukmawkpêk la, I tongsie phur raw hai se! 66 Lungsenin hnot thlûr tawl la, Vàn hnuoia inthok hin LALPA, Anni chu sukbohmang rawh.

Lamentations 4

1 Rangkachak hlîr ni hlak si kha, A tlèt dàn chu a va dul ta de!Hmun Thienghlima lunghluhai, Kotthlêrah an pei dar rui a. 2 Rangkachak hlîr anga hlu, Zion naupa ditumhai kha, Bêlhemtu pil bêl ang chauh, An hung inchang zo ta ie! 3 Sihal hmanin a têhai chu, Nene pèk nachang a hriet a; Ka mihai chun an hriet nawh:Thlalèr vanghawngsei angin, Lunginsietna an nei nawh. 4 Dangchâr leiin nautehai lei, An dangah a kop zo a; Naupanghan bei an ngèn a, Tu khomin an pêk si nawh. 5 Fàk ding tha tlàn hlakhai kha, Kotthlêrah an vàkvài a, Puon senduk sil hlakhai kha, Hmunhnok lai an intàl tah. 6 Santu ding tu khom um lo, Thawk le khata bohmang thut, Sodom tuorna nêk dai khan, Ka mihai tuor a sà lem. 7 Vûr le bawngnénè nêkin, An mi lienhai an ngo lem a, An tì rubi angin a sàr a, Safir lung angin an mawi. 8 Tu'n chu inting nêk daiin, An inlang dum ta lem a, Kotthlêra hmu châng khomin, Hriet hrang thei an ni ta nawh. An rù vunin a tuom tawk a, Thing tawl angin an tawl hawp. 9 Kawlhnâma lo thihai kha, Tàma thihai nêk daiin, An lo vangnei lem a nih. Phingtàmin an hung rop a, Lo suok fâk ding nei loin, Damten an hung zûr hlum hlak. 10 Ka mihai siet tuok ni chun, Nu ngilnei takhai khomin, An hring ngei an nauhai sà, Suongin an fâk hiel el si! 11 LALPAN lungsen hrîk thlain, A lung inlingna a bun suok; Zion-ah mei a'n suo a, A lungphum chen a kàng ram. 12 Hmêlmahai le dotuhaiin, Jerusalem an lùt thei hrim, Hnuoia lalhaiin an ring nawh, Khawvela mi po po khomin. 13 Sienkhom chu chu a hung tlung, A zawlneihai suolna lei leA thiempuhai khawhlona leiin. A sûngah mi fel thisen insuoin, Khawpui an sukporchè hlak si. 14 Kotthlêra hai, mitdel angin, Inmaiin an invàk vèl a; Thisen an kai nasat leiin, Mihaiin an tirdak a, An silfèn chen khom an lo thîm a, 15 "Fe hmang dai ro, tirdak kaihai, Fe hmang dai ro, mi tawk naw ro"Tiin mihan an khèk khum a. Hnamtin lai an tlân hmangnaah, "Hi hin um thei ta naw ti niu"Tiin an lo khèk khum pei. 16 LALPAN a hnot dar tawl a na, A en zui zing tawl ta bok nawh; Thiempuhai a'n zà naw a, Upahai a ditsak bok nawh. 17 Thangpuitu ding kan thlìrnaah, Kan mithai khom a chau zo tah; Mi san him thei lo ding nghâkin, Kulbing sâng a'nthokin kan thlìr. 18 Mihan an mi sui zui zing a, Khawlaiah kan suok ngam nawh. Kan tawp a hnai, kan ni a kin, Kan tawpna ni a hung tlung tah. 19 Vàna mupui vuong nêk daiin, Mi hnottuhai chu an hràt lem; Tlângahai an mi hnot pei a, Thlalêrah an mi lo inchàn. 20 LALPA hriek nâl, kan bêl tak, An châng kamah a awk ta si; A rawi chun hnam dang lai khom, Um el ei tih', kan lo ti hlak kha. 21 Edom le Uz rama chênghai, In lawm thei lai hin hlim ro; No chun a nang tèp ta cheu a, Inrui in ta, saruokin um in tih. 22 Aw nang Zion Naunu, I hrem tuor chu la tawp a ta, Salah hrèn sawt ta naw ni che; Nang Edom Naunu ruok chu, I suol leiin hrem a che a, I rîtlona phor lang a tih.

Lamentations 5

1 Kan chunga thil tlunghai hi, Aw LALPA hung hre zing rawh. En ta, kan muolphozie hi! 2 Kan rochung kan ram hluohai, Hnam dangin an nei zo tah, Kan inhai khom hmêl hriet loin. 3 Pa nei lo, fahra ang kan ni ta a, Kan nuhai khom hmeithai ang. 4 Kan tuisik tlàn lai ngei khom, Kan inchawk hiel a ngai ta a, Thing khom kan ìnchawk a ngai. 5 Mi hnottuhan an mi'n thlà nawh, Chauin sawl hle inlang khom, Kan chawl hadam thei si nawh. 6 Fàk ding kan hmu theina din, Aigupta le Asuria kan bêl a. 7 Kan pahan an lo thaw suol a, Anni an um ta si naw a, Keinin a maw kan tuor a nih. 8 Kan chungah bawi an inlal a, An kut a'nthoka mi san suok ding, Tu khom hlak an um si nawh. 9 Thlalèr ram hmun ti-umah, Kawlhnâm inlèngna hmunah, Thi huomin bu kan zong a. 10 Tàm khawsik mi not leiin, Kan pang thuk angin a sa. 11 Zion-ah kan nuhmeihai, Mihaiin an pawngsuol a, Judai ram khaw tinah hai, Kan nunghàkhai an pawngsuol. 12 Lal nauhai hruiin an khai a, Upahai khom an inzà nawh. 13 Bu rawtnaah tlangvàlhai, Bu herin an sor kawng a, Naupanghan kat tang tangin, An thing tì ding an phur a. 14 Kul kotkhâr bula thung hlak, Upahai an zàm zo ta a, Tlangvàl hla sak pawl khomin, An hla sak an chawlsan tah. 15 Kan hlimna a chuoi zo a, Kan làm lusunah a'n chang a. 16 Kan lallukhum khum a tla a, Kan suol tlat bok si leiin, Kan chung a va pik de aw! 17 Hieng lei hin kan lung a se a, Kan mithai a'n thim zo tah. 18 Zion chu ràusana umin, Sihalhai tuolchaina a'n chang tah. 19 Aw LALPA, chatuon Lal i na, I lalna chu suon tin dai a nih. 20 Ieng leia i mi theinghil zing?Ieng leia hi chen hi i mi mâksan? 21 Nangin LALPA mi siemtharin, I kuom tieng mi thuoi kîr rawh. Tiena kan hlim lai ni ang khan, Nangin mi tuoi thar nawk rawh- 22 Nangin mi hnawl letdèr aKan chunga i lungsenna kha, Dam thei lo a ni ngot naw chun.

Ezekiel 1

1 A kum sawmthumna, thla lina, ni nganaaa Juda saltànghai lai Kebar vadung kama ka um laiin vàn a hung inhong a, Pathien inlàrna ka hmu a. 2 Chu thla a ni ngana chu sala lal Jehoiachin intànga inthoka a kum ngàna a nih. 3 Kei thiempu Ezekiel, Buzi naupa kuoma hin Babulon rama Kebar vadung kamah LALPA thu chu a hung tlung a, LALPA kut chu ka chungah a um a. 4 Ka hei en a, hmar tienga inthoka thlipui hung inthok ka hmu a, sûmpui intûr ngula inthok chun kawl a hung inphe zor zor a, a kawl vèl chu a el var phût el a. Kawl inphètnaa mei chu thîr inling ang a nih. 5 Chu meilinga chun thilhring pali ni awm tak, mihriem ruongâm put ni si hi, ka hmu a. 6 Thilhring tin chun hmai pali le thla pali an nei seng a. 7 An ngal a tlûn a, an ke tin chu bawng ke tin ang a na, dâr nawt tlèt angin a tle phût a. 8 Hmai pali le thla pali bâkah an thla hnuoia chun kut, mihriem kut ang hi an nei seng a. 9 An thlàhai chu intawk phak vongin an zàr a. Chu thilhringhai chu inhêm ngai loin khaw tieng tieng khom an vuong suok thei nghal a. 10 Thilhring palihai inlang dàn chu an hmà tieng mihriem hmêl, an chang tieng sakeibaknei hmèl, an voi tieng bawngchal hmêl, an hnung tieng mupui hmèl ang a nih. 11 Chu chu an hmêl put dàn a nih. An thla pahni seng chu an thla ki intawk phàkin an zâr a, an thla pahni dang chun an taksa an inkhum a. 12 Thilhring palihai chu khaw tieng khom inhèm kuol ngai loin thlarau fèna tieng tieng chun an fe nghal thei a. 13 Thilhringhai hmèl chu meiling amanih meiser chok lai amanih ang a na, anni lai chun mei var tak a lawn kuol a, chutaka inthok chun kawl a hung inlep a. 14 Thilhringhai chu kawlphê anga hrâtin an invir ton zok zok a. 15 Thilhring pali, hmai li seng neihai chu ka en zing laiin, an sîr senga chun tawlailir, hnuoia innghat ka hmu bok a. 16 Tawlailirhai chu an inang vong a, lunghlu krisolit angin an var phàt seng a, tawlailir ke kuol sûnga tawlailir ke dang um ang hi a nih. 17 Inher loin khaw tieng ngha khomin an inlir thei a. 18 Tawlailir ke kuol chu lien tak le râpum tak a na, a rei kuol tlàng chu mit ngotin a sip a. 19 Thilhringhai chu an che son pha leh tawlailirhai khom chun an zui pei a, an tho leh an tho ve pei a. 20 Thilhringhai chu thlarau fèna tieng tieng an fe a, tawlailirhai khom chun an zui pei a, tawlailir kea chun thilhringhai thlarau chu a um a nih. 21 Thilhringhai chu an fê pha tawlailirhai khom an fe a, an ngîr pha an ngîr ve a, hnuoia inthoka an inkàng pha an inkàng ve pei a, tawlailir kea chun thilhringhai thlarau chu a um si a. 22 Thilhringhai lu chunga chun boruok inkûm ang zâu tak, râpum deu el, vûr anga tle sur el hi a'n zàr duoi a. 23 Chu inchung zâu tak hnuoia chun thilhringhai chun an thla ki intawkin an thla pahni seng chu an zàr a, an thla pahni dang chun an taksa an inkhum a. 24 An vuong laia an thla zàp ri chu tuipui insok ri ang le sipai ruol hawhaw ri le Iengkim Pathien rawl ang a nih. An vuong naw pha leh an thlahai chu an inkhup a. 25 Vuong loa thla inkhupa an chung inkhumna zau tak hnuoia an um lai chun an lu chung tienga inthok chun rawl a hung suok a. 26 An lu chunga chun lalthungpha ni awm tak, safir lunghlu ang ela inlang hi a um a, chu hmun insâng tak chunga lalthungphaa chun mihriem ni awm tak hi a'n thung a. 27 A kawnga inthoka chung tieng chu dâr tle sût angin ka hmu a, a kawng hnuoi tieng chu mei chok angin ka hmu bok a, var ropui takin a tuom vèl a. 28 Raw sûr zoa sumrisàng inzàm ang phûtin a vêla chun a'n zàm a. Hi hi Pathien ropuina inlang dàn chu a nih. Chu chu ka hmuin bokkhupin ka tlu a, a mi betu rawl chu ka hriet a.

Ezekiel 2

1 Chun, ka kuomah, "Mihriem naupa, ngîr suok la, thu ka hril ding che a nih" a ta. 2 Ka kuoma thu a hril lai chun thlarau chu keimaah a hung lùt a, a mi'n ngìrtir a, a thu hril chu ka ngâithlàk a. 3 Ama chun, "Mihriem naupa, Israel nauhai, hnam hel hmang tak le ka chunga hel zing zing hlakhai kuomah ka tir ding chè a nih; anni le an thlatuhai chu voisun ni chen hin ka lakah an la hel zing a nih. 4 Ka tirna che mihai hi mi lulul le timaw tak an nih. An kuomah, 'Lalpa PATHIEN chun hieng hin a tih' i ti ding a nih. 5 Hnam hel hmang an ni leiin, i hril chu an awi ta'm, an awi naw ta'm, anni lai zawlnei a um ti an hriet ve hrim hrim ding a nih. 6 Nang mihriem naupa, anni chu ti naw la, an vauh zàm tum che khomin zâm naw rawh. Thùl le hling kârah, ainuvèt ruol laia um ni la khom, ti dêr naw rawh. Hel hmang sûngkuo an nia chu an vaupum le inthìnahai chun sukzâm naw raw se che. 7 Hnam hel hmang an nia chu, an ngâithlàk ta'm, an ngâithlàk naw ta'm, an kuomah ka thu i hril hrim hrim ding a nih. 8 Mihriem naupa, nang ruok chun ka hril hi ngàithla la, anni angin hel ve naw rawh. I bàu ka la, ka thil pêk che hi lem rawh" a ti a. 9 Chuongchun, ka hang en a, ngai ta, kuta a mi hung ban lai chu ka hmu a, lekhabu ziel a chawi a. 10 Ka hmaa chun lekhabu ziel chu a kei phar a, khing tieng khing tieng chu thu ziekin a sip vong a, chuonghai chu tapna le lusûnna le chungpikna thu vong a nih.

Ezekiel 3

1 Chun, ka kuomah, "Mihriem naupa, i hmaa lekhabu ziel hi fa rawh; chu zoah fe la, Israel sûngkuohai kuomah thu va hril rawh" a ta. 2 Chuongchun, ka bàu ka ka a, lekhabu ziel chu a mi'n fàktir a. 3 Ama chun ka kuomah, "Mihriem naupa, lekhabu ziel ka pêk che hi lem la, khop takin fa rawh" a ta. Chuong chun ka fâk a, ka bàua chun khuoizu angin a thlum a. 4 Chun, ama chun ka kuomah, "Mihriem naupa, tu hin fe la, Israel sûngkuohai lai ka thu va hril rawh. 5 Tong dang le tong harsa hmang mi, an tong i hriet thiem nawhai kuoma tir i ni naw a, Israel sûngkuohai laia tir i ni lem hih. 6 Chuong hnam danghai kuoma tir chu ni la, lo ngâithlâng an ti che. 7 Israel sûngkuohai ruok chun an ngâithlàk naw ding che a nih, kei an mi ngàithlàk nuom naw leiin. Israel sûngkuohai po po chu mi lungril khau le lulul an nih. 8 ​Anni ang boka tawk khir le lungril khauin siem ka ti che. 9 I chal chu meitawk lung nêka chang, lung chang tak angin siem ka tih. Hel hmang sûngkuo ni hai sien khom, anni chu ti dêr naw la, an vaupûmah zâm naw rawh" a ta. 10 Chu bâka chun ka kuomah, "Mihriem naupa, fimkhur takin ngàithla la, ka thu hril po po che hi i lungrilah khum rawh. 11 Tu hin i chipui saltànghai kuomah fe la, an ngàithlàk ta'm, an ngàithlàk naw ta'm, an kuomah, 'Lalpa PATHIEN chun hieng hin a tih' tiin hril tawl rawh" a mi ti a. 12 Chuongchun, thlarauin a mi chawi kàng a, ka hnung tieng chun thûm bul bula thu insamin, 'A chêngna hmuna chun LALPA ropuina chu malsawmin um raw se' an ti ri ka hriet a. 13 Thilhringhai thla zâp inkhak ri le an bula um tawlailir ri le thil inrum ri dur dur ka hriet bok a. 14 Chu zoah thlarauin a mi chawi kàng a, a mi làk hmang a, lungsen tak le rin tak pumin ka fe a, LALPA kut hrât chu ka chungah a um si a. 15 Kebar vadung kama Israel saltànghai umna Tel Abib chu ka hung tlung a, chu hmuna chun anni lai hrilhai takin ni sari zet ka'n thung ve a. 16 Ni sari zoa chun ka kuomah LALPA thu a hung tlung a. 17 "Mihriem naupa, Israel sûngkuohai vèngtu dingin ka ruot che. Ka thu hril hi ngaithla la, anni chu zilhaupêk rawh. 18 Mi rilohai kuomah, 'Thi ngei in tih' ti lang, inlamlèt a, an suolna chu bànsan a, an hringna chu hum dinga i zilhau tawl si naw chun an rîtlona chu thìpui an ta, an thìna maw chu i lakah phût ka tih. 19 Amiruokchu, mi rilohai chu i zil lawk a, rîtlona le suolna lampuia inthoka inlamlèt nuom loa an suol lui pei a ni ruok chun, an suolna chu thìpui an ta, an thìna maw chu phur naw ti nih. 20 "Chun, mi felhaiin felna lampui bànsanin thil tha naw an thaw a, an hmaah dàlkham ka lo kham bok chun, chutaka chun tlu hlum an tih. Zilhàuna i nei naw leiin an suolnaa chun thîng an tih. Thil fel an lo thaw tahai kha hriet zing ni ta naw ni a, an thisen maw ruok chu i lakah phût ka tih. 21 Amiruokchu, mi felhai chu suol lo dinga i zilhàu a, i zilna chu poisaa thil suol thaw loa an um chun hring ngei an ta, nang khomin tuor naw ti nih" a ta. 22 Chu taka chun LALPA kut chu ka chungah a um a. Chun, ka kuomah, "Tho la, phaizawlah fe la, chu taka chun inbiekpui ka ti che" a mi ti a. 23 Chuongchun, ka tho a, phaizawla chun ka fe a. Chu taka chun Kebar Vadung kama ropuina ka hmu ang bok kha LALPA ropuina chu ka hmaah a hung ngìr a, hnuoiah ka bokkhup a. 24 Thlarau chu keimaah a hung lùt a, ka kein a mi'n ngìrtir a, a mi biek a, "Fe la, i inah inkhàr khum rawh. 25 Nang mihriem naupa, anni lai lêng suok thei ta lo dingin hrui hruolin an khuop ding chè a nih. 26 I lei chu i dangah inkoptir ka ta, tong thei loin um i ta, hel hmang sûngkuo ni hai sien khom kawk thei ta naw ti nih. 27 I kuomah thu ka hril phâ ruok chu i bau inphongtir ka ti che a, an kuomah, 'Lalpa PATHIEN chun hieng hin a tih: A ngâithlain ngâithla hai sien, a ngâithla naw chun ngâithla naw el raw hai se; hel hmang sûngkuo an ni si a' tiin i hril ding a nih.

Ezekiel 4

1 "Nang mihriem naupa, têklei phèk la la, i hmaah rem khawm la, chu taka chun Jerusalem khawpui lem ziek rawh. 2 A vêla inhuolna ding hlàn daw kuol la, muol dêng pawng siem huol la, sipai riebûk siem la, kul bang sut hongna ding a vêlin siem bok rawh. 3 Chun, thîr phèk la la, chu chu nang le khawpui inkâra kul bang angin sie la, chu tieng pang chun ngha rawh. Khawpui chu inhuolin um sien la, nangman inhuol rawh. Chu chu Israel sûngkuo ta dinga inchikna nîng a tih. 4 "Chun, i voi tieng sìr delin zâl la, i chungah Israel sûngkuohai suolna po po innghat rawh. A sîra i zàl sùng po po chun an suolnahai chu i phur ding a nih. 5 An suol sùng po po kum khat pei kha ni khat pei anga tiemin ni zathum le sawmkuo sûng Israel sûngkuohai suolna chu phurin i zâl ding a nih. 6 Chuong anga i thaw zo pha leh i chang tieng sîr delin, Juda sûngkuohai suolna chu phurin ni sawmli sûng zâl nawk i ta, ni khat pei chu kum khat pei anga tiem ning a tih. 7 Chu zoah Jerusalem tieng nghain inhuol la, i kuttum inletin, a siet ding thu hril mol mol rawh. 8 Inhuol dinga ka ti sûng a tlingtlàk hmâ khat chu che son thei dêr loin hruolin ka khuop dè ding chè a nih. 9 "Chun, huit le barli, bete le dailuo, butun le huit tha naw chi la la, bêl pakhatah sie la, beiin siem rawh. I pang sîr khat chauh dela i zàl sûng, ni zathum le sawmkuo sûng chu, chuonghai chu i ring ding a nih. 10 I fàk ding chu inkhi vong ding a na, ni khatah gram 228 11 Tui khom inkhì vongin dawn i ta, litar ruk inleng bêla mi chu hmun rukin inkhì suok i ta, a hun tak peiah i dawn ding a nih. 12 Ni tinin i bu dingin barlia siem bei i ur ding a nih. Chu chu mi um lai le an hmu lai ngei, mihriem êk tawl thinga hmangin i ur ding a nih. 13 Hieng ang hin Israel mihai chun ka hnot hmangna ding hnamhai lai bu porchè fâng an tih" tiin LALPA chun a mi hril a. 14 Chu phing leh kei chun, "Ni lo e, Lalpa PATHIEN! Ka nun hi ka sukporchè ngai naw a. Ka tleirawl laia inthoka tu chen hin ran thi sa amanih, sa tlaw amanih ka la fâk ngai naw a, sa thieng lo hrim hrim ka bàua hin a la lût ngai bok nawh" ka ta. 15 Ama chun ka kuomah, "Chuong a ni leh mihriem êk aiah bawng êk pêng ka ti che, chu chun i fâk ding bei chu i ur hmin ding a nih" a ta. 16 Chun, ama bokin, "Mihriem naupa, ngai rawh, Jerusalema fâk le dawn an làk lût ding po po chu ka chàrchil vong ding a ni leiin, mihai chun beidong takin an bu fàk ding tawk inkhìng an ta, an tui dawn ding khom inkhì bok an tih. 17 Bu fâk ding le tui dawn ding a vâng êm èm ding a nih. An inhmu pha khom hrilhai takin inen an ta, an suolna leiin zûr hmang an tih" a ta.

Ezekiel 5

1 "Tuhin, nang mihriem naupa, kawlhnâm ngei tak la la, chu chu i sam le i khâkhmul vawna dingin lu vawtu hmul mètna chem angin hmang rawh. Bùkna la la, i sam chu hmun thumah bûk thè rawh. 2 Jerusalem i'n huol ni a kim pha leh hmun thuma thea hmun khat chu khawpui lem map i siem sùnga chun raw rawh. Hmun khat dang chu khawpuia chun thè dar la, kawlhnâmin sât nawi vong rawh. Hmun thuma thea hmun khat dang po chu thli inlèn hmangtir rawh. Kawlhnâmin ka hnot zui tawl ding a ni si a. 3 Sam tlawmte ruok chu hlà la, i korfuol hmawrah inbawk rawh. 4 Tlawmte la umhai chu meiah pei la, raw hmang rawh. Chu taka inthok chun Israel insùngah mei a suok ding a nih. . 5 "Lalpa PATHIEN chun hieng hin a tih: Hi Jerusalem hi annawm a vêla ram le hnam po pohai laia a lailung taka ka sie chu. 6 Sienkhom a rîtlona leiin a vêla hnam le ramhai nêk khomin ka dàn le thu ruothai lakah a hel nasa lem a; ka dànhai a hnawl a, ka thu ruothai a zawm si nawh. 7 Chuleiin, Lalpa PATHIEN chun hieng hin a tih: In vèla hnamhai nêkin thunun in harsa lem a, ka thu ruothai in zawm naw a, ka dànhai in vong bok nawh. In kawl le kienga hnamhai nun dàn ang khomin in khawsa phàk nawh. 8 "Chuleiin, Lalpa PATHIEN chun hieng hin a tih: Jerusalem, ngai rawh, kei meu khomin ka dodàl che a, hnamhai mithmua ngei i chungah hremna ka hung intlungtir ding a nih. 9 I milem biek tirdakumhai leiin thil ka la thaw ngâi dèr lo, a hnunga khom ka thaw ta ngai bok lo ding chu, i chungah ka thaw ding a nih. 10 Nangni lai ngei pahaiin an nauhai sa fâng an ta, nauhaiin an pahai sa fa bok an tih. I chungah hremna intlungtir ka ta, a la dam sunhai po po chu thliin inlèn hmangtir ka tih. 11 Chuleiin, ka hringna sâlin ka'n khàm: i milem porchèhai le i thil chîng tirdakumhaia ka in thienghlim i sukporchè leiin, ka ditsakna chè la kîr ka ta, lâinatna mitin en ta nawng ka ti che a, hlà bok naw ning che ti hi Lalpa PATHIEN thu suok a nih. 12 I sûnga hmun thuma thea hmun khat hi hripui le tàmin thing an ta; hmun thuma thea hmun khat chu kul puo tieng kawlhnâmin thîng an ta; hmun thuma thea hmun khat chu sukdar vong ka ta, kawlhnâmin hnot zui ka tih. 13 Chu zoah ka lungsenna chu rèng a ta, in kei dei ka tih, ka thungrul ding chu ka thungrul tah leiin. An chunga ka lungsenna ka hrîk thlàk pha chun, thahnemngai taka lo hril lom lom hlaktu cheu LALPA chu ka nih ti hung hre tâng an tih. 14 "Chu bâkah, i vêla hnamhai lai le khuolzin invâkhai mithmuah khaw râusan le hmutsitumah ka siem ding che a nih. 15 Na taka zil a, lungsen inlinga ka hrem pha che chu, i vêla hnamhai po po cheksol, ti-el le pangzat, mi dang infuinaa thil râpthlàka an hmang chu hung ni tâng i tih, ti hi kei LALPA hin ka hril a nih. 16 Thìna le sietna thal, tàmna thala ka kâp pha cheu chu, sukse ngei dingin a nih ka kâp ding cheu chu. In chungah tàm nasa lem hung tir ka ta, bu hung lûtna hnàr khâr vong ka tih. 17 Tàm le ramsa kolhai hung tir ka ta, suonmongin siem an ti cheu. Hripui le thisen insuonain hrût fai a ti cheu a, nangni beitu dingin kawlhnâm hung inlèngtir bok ka tih ti hi LALPA, kei ngeiin ka lo hril ta sâ a nih" tiin.

Ezekiel 6

1 LALPA thu chu ka kuomah a hung tlung a: 2 "Mihriem naupa, Israel tlâng tieng son mit inlèn la, an chunga thil tlung dinghai chu hril rawh: 3 'Israel tlânghai, Lalpa PATHIEN thu hi ngàithla ro. LALPA Pathien chun tlâng le muol le ruom le kor dunghai kuomah hieng hin a tih: in chungah kawlhnâm ka hung inlèngtir têp a, hmun sânga in bawlhmunhai po po ka suksiet vong ding a nih. 4 In maichàmhai sukchimin, rimtui in rawna maichàmhai chu sukkoi vong ka ta, in milemhai hmaah in mihai chu sukhlum ka tih. 5 Israel nauhai ruong chu an milem biekhai bulah pei ka ta, an rûhai chu in maichàm vêla hai thè dar ka tih. 6 In chèngna taphota khawpuihai chu sukram ka ta, in bawlhmunhai sukchim ka ta, in maichàmhai suksein sukram ka ta, in milemhai chu vaw koiin suksieng ka ta, in kutsuokhai sukbohmang vong ka tih. 7 Nangni lai in mihai ruong ngei chu inthal phungin zâl a ta, chuongchun kei hi LALPA ka nih ti hung hrieng in tih. 8 "Amiruokchu, sukbohmang loa ka hlà iemani zàt la um in ta, chuonghai chun kawlhnâm pumpelin khawvela hnam tin lai indar an tih. 9 Hnam danghai laia an saltàng pha chun mi hung hre suok an ta, hnam danghai pathien beiseia, ka laka an lungril le mit a uirètna chunga poi ka hang tizie dâm hung hre suok bok an ta, rîtlona le thil theidaum thaw an chîngna thuah anni ngèi khom intirdak an tih. 10 Chun, LALPA ka nizie le an chunga sietna tlung ding thu ka hrilhai hi a thlawna ka hril mei mei a ni nawzie hung hre suok tàng an tih. 11 "Lalpa PATHIEN chun hieng hin a tih: Kut ben la, i ke tet la, inring takin, 'Khai leh!' tiin khêk suok rawh. Israel sûngkuohai suol thaw leiin, tu hin indo le tàm le hripuiin an thi ding a ni si a! 12 Ram hlaa umhai chu hripuiin thîng an ta, a hnaia umhai chu kawlhnâmin thîng an ta, dama tlân suokhai chu tàmin thîng an tih. Chuong ang chun ka lungsenna chu an chungah hrîkthlàng ka tih. 13 Milem kuoma rimtui an inhlànna an hmunsânga hai, tlâng sîpa hai, thingbuk hnuoia hai le saisuo buk zâr hnuoia milem an biekna maichàm bul taphotah mithi ruong zâl thlek thluk an hmu pha chun, kei hi LALPA ka nizie hung hrieng an tih. 14 An chungah kut inlet ka ta, thlalèra inthoka an chèngna Dibla hmun po po chu thlalèr rausan hmunah siem ka tih; chu pha chun kei hi LALPA chu ka nih ti hrieng an tih" tiin.

Ezekiel 7

1 LALPA thu chu ka kuomah a hung tlung nawk a: 2 "Mihriem naupa, Israel ram chungthua Lalpa PATHIEN thu chu hi hi a nih: Hun tawp, tawpna chu a ram kil tinah a hung tlung ie. 3 Tawpna chun a hung nang ta che a, i chungah ka lungsenna ka bun thlàk ding a nih. I um dàn ang peiin i chungah ro rêl ka ta, i tirdakumna po po laka chun thungrul ka ti che. 4 Lunginsietna mitin en tah nawng ka ti che a, indoi nawng ka ti che a, i nungchang le khawsak dàn ang le nangni laia tirdakum thaw in chìng ang dungzuiin thungrul ka ti che. Chu phâ chun kei hi LALPA chu ka nih ti hung hre tâng i tih. 5 "Lalpa PATHIEN chun hieng hin a tih: 'Khâ hmaa sietna in la hriet ngai lo, sietna râpthlâk tak chu a hung ie! 6 Tawpna chu a hung tlung a, ngai ta, a hung tlung ta rup el! 7 Aw nang ram hluotu, sietnan a hung tlàk buok ta che ie! A hun chu a hung tlung a, a ni chu a hnai ta a, tlânga hai chun hlimna nêkin chî-àina a'n lèng. 8 In chungah ka lungsenna ka bun thlâk tèp a, ka hrîkthla ding a na, in um dàn ang peiin hrem ka ti cheu a, thil tirdakum in thaw dàn ang dungzuiin ka thungrul ding cheu a nih. 9 Lunginsietna mitin en tah nawng ka ti cheu a, indoi nawng ka ti cheu a, in nungchang le khawsak dàn ang le tirdakum thaw in chìng dàn ang dungzui peiin rul ka ti cheu. Chu phâ chun kei hi LALPA, in chunga kut thlâktu chu ka nih ti hung hre tâng in tih. 10 "Ngai rawh, ni chun a hung nang ta cheu a, a hung tlung dèr tah! Sietna chu a hung puok dar a, hmol chu a hung kùmùm a, chapona chu a hung pàr tah. 11 Rîtlona hrem dingin inpawngnêkna chu hmolah a hung inchang a, mi tu el khom a lakah him naw ni hai a, hausakna le thil hlû iengkim khom hlà bok naw nih. 12 A hun chu a hung tlung ta a, a ni ding chun a hung nang ta cheu. Inchawtu chu hlim naw sien, zortu chu lungngai bok naw raw se, an rênga chungah lungsenna chu a hung tlung ding a ni si a. 13 Ram zortu chun ama le a'n chawtu dam sûngin hmu kîr nawk ta ngai naw nih. An rênga chungthua inlàrna chu thlâk danglam ni naw ni a, an suolnahai leiin tu khom dam khawsuok um naw ni hai. 14 Tawtawrawt mûtin, indo dingin inpeihai sien khom, indo dingin tu khom inthok suok naw ni hai, ka lungsenna chu an rênga chungah a um si a. 15 "Tuolah kawlhnâm, insùngah hripui le tàm inlêng a ta, rama umhai chu kawlhnâmin thîng an ta, khawpui sùnga umhai chu tàm le hripuiin lem zo a tih. 16 Dama tlânga tlân suokhai chu an suolna leiin chul ram vathu angin inrieng takin um an tih. 17 Mi tin bân thâ chu zoi thlàng a ta, an khùphai chu tui angin innêm a tih. 18 Saiip sil an ta, titnain tuom vêl a ta, hmaimawknain sip an ta, an samhai tla kol vong a tih. 19 An tangkaruohai chu kotthlêrah pei suok an ta, an rangkachakhai chu thil tirdakumah inchang a tih. LALPA lungsen nia chun an tangkaruo le rangkachakin san suok naw ni a, suola intlûktirtu a ni leiin fâk le dawn inchawkna ding khomin hmang naw ni hai. 20 An inbel mawina thilhai chu an chapopui a, chuong thilhai hmang chun milem rilo le tirdakumhai an siem a. Chuleiin, an ta dinga thil tirdakumah ka siem tah a nih. 21 Chuonghai chu râllâka dingin hnam danghai kuomah pêng ka ta, hnuoia mi rilohai inroktir ka ta, annin lo sukporchêng an tih. 22 Anni chu nghatsan ka ta, ka hmun hlu chu sukporchèng an ta, a sûngah roktuhai lût an ta, sukborbâng an tih. 23 "A ram hi thisen insuona le a khawpui hi inpawngnêknaa a sip leiin, thîr khaidiet siem rawh. 24 Hnam laia khom hnam rawng tak hung thuoi ka ta, an inhai neipèk an ta, mi ropuihai chapona chu suktawp ka ta, an hmun thienghlimhai chu sukborbângin um a tih. 25 Tium a hung tlung pha leh muongna zong an ta, sienkhom hmu naw ni hai. 26 Sietna ngot sietna ngot tlung a ta, thuthang ngot thuthang ngot inlêng a tih. Zawlnei laka inthokin inlàrna zong an ta; thiempuin inchûktir ding hre ta naw ni a; upahai khomin thurawn pèk ding nei ta bok naw nih. 27 Lal chu lungngaiin um a ta, milienhai chun beidongna puon sil an ta, a ram mipuihai kut chu inthin hlop hlop a tih. An um dàn ang peiin an chungah thawng ka ta, an thilthaw ang peiin an chungthu rêl bok ka tih. Chu phâ chun kei hi LALPA chu ka nih ti hre tâng an tih" a ta.

Ezekiel 8

1 Sala lal Jehoiachin an thuoia inthoka kum rukna, thla rukna le ni nganac chun ka inah ka um a, Juda upahai chu ka hmaah an inthung a, chuong lai chun Lalpa PATHIEN kut chu ka chungah a hung innghat a. 2 Ka hang en chun mihriem ni awm tak hi ka hmu a. A kawng hnuoi tieng po chu meichok angin ka hmu a, a kawng chung tieng chu thihna sen lâr angin a êng phût el a. 3 Kut ni awm tak hin ka lu sîp samah a mi thàm a, thlarau chun hnuoi le vàn kârah a mi chawi kàng a, Pathien inlàrna chun Jerusalemah a mi'n thum a. Tempul inhuonna sûng hmar tienga kotkhàr bul chu a mi tlungpui a, chu taka chun pathien lim hnàmum, Pathien lung kheitu chu a ngîr a. 4 Phaizawla inlàrna ka hmu ang el khan, ka hmaa chun Israel Pathien ropuina chu a um a. 5 Chun, ama chun ka kuomah, "Mihriem naupa, hmar tieng saw en rawh" a ta. Ka hei en chun, maichàm panna kotkhâr bula lung sukkheitu lim chu ka hmu a. 6 Chun, ama chun ka kuomah, "Mihriem naupa, an thilthaw saw i hmu am? Israel sûngkuohaiin thil tirdakum tak an thaw lei son ka in hi suoksan loin ka um zing ding maw? Sienkhom, hieng nèka tirdakum lem dai hi la hmung i tih" a ta. 7 Tempul tuolzawl lûtna kotsuoa chun a mi thuoi a. Ka hei en a, bang awng ka hmu a. 8 Ama chun ka kuomah, "Mihriem naupa, bang kha hang ver lien ta" a ta. Bang awng chu ka hang ver lien a, kotkhàr a lo um a. 9 Ama chun, "Lût la, a sûnga thil rilo le tirdakum an thawhai chu va en rawh" a ta. 10 Chuongchun, ka lût a, ka ngha vel a, banga chun thil tirdakum rûl lem hai, ramsa porchè lem hai le Israel sûngkuohai biek milem tinrêng chu an ziek tlar dul a. 11 Chuonghai hmaa chun Safan naupa Jazania rawiin Israel inpuia upa sawmsarihai chu an ngìr a, mi tinin an kutah rimtui rawna berbu an chawi a, rimtui chu a khu tung lui lui a. 12 Ama chun ka kuomah, "Mihriem naupa, Israel inpuia upahaiin thim hnuoia an milem seng pindana an biek saw i hmu am? 'LALPAN a mi hmu nawh; LALPAN ram chu a zàmsan tah annawm' an ti a ni saw! 13 Sawng nèka an thilthaw tirdakum lem khom la hmu pei i tih" a ta. 14 Chuongchun, hmar tienga inthoka LALPA tempul lùtna kotkhàra chun a mi thuoi a, chutaka chun nuhmei thenkhat, Tamuzd pathien zûn ngaia inthung le tap ka hmu a. 15 Ama chun, "Mihriem naupa, hi thil hi i hmu maw? Hieng nêk daia tirdakum lem hi la hmung i tih" a ta. 16 Chuongchun, LALPA tempul tuolpùka chun a mi thuoi a, tempul bathlàr le maichàm inkâra chun mi sawmhni le panga inthung ka hmu a. Anni chun tempul chu an hnung nghat a, suo tieng an ngha a, sak tieng kawla nisa chu an biek a. 17 Ama chun ka kuomah, "Mihriem naupa, hi thil hi i hmu am? Hieng ang thil tirdakum Juda sûngkuoin hi hmuna an thawhai hi thil mei mei am a ni? A ram hi inpawngnêknaa suksipin, lungsen dingin an mi cho phawk zing el ding am a ni? En ta, thing hnain an hnàr an hup saw! 18 Chuleiin, kei khomin lungsen takin thaw vèng ka ta, lunginsietna inentir nawng ka ta, indoi tawl bok naw ning. Ka na bulah khêkhai sien khom, ngàithla tawl naw ning" a ta.

Ezekiel 9

1 Chun, LALPA chun rawl râpum takin, "Khawpui hremtu dinga ruothai khan an hriemhrei seng chawiin hung hnai ta raw hai se" tiin a ko khèk a. 2 Hmar tieng kotkhàr chunghnunga inthok chun mi paruk, an kuta thìna hriemhrei chawiin, an hung a. Anni laia puon zái inhmì siltu chun lekhatui bùr a pâi a, a hung lût a, dâr maichàm bula chun a ngîr a. 3 Israel Pathien ropuina chu a umna cherub-hai chunga inthok chun a tho a, tempul tuongah a hung tum thla a, puon zâi inhmia inthuom lekhatui chawitu chu a ko a. 4 LALPA chun a kuomah, "Khawpui chu fang la, Jerusalem chu fang suok rawh; a sûnga thil tirdakum an thaw leia lungngai taka taphai chu an chalah inchik pei rawh" a ta. 5 Mi danghai kuoma chun ka hriet ngeiin, "Ama hi khawpuiah zui lùt unla, tu khom lunginsietna le zàngaina nei dêr loin that ro. 6 Pu tar le naupanghai, tlangvàl le nunghàkhai, nuhmei le naupang po pohai, an chala inchikna put naw taphot chu, that fai vong ro. Ka tempula inthokin bei tan ro" a ta. Chuongchun, tempul kota upahaia inthok chun an that tan ta a. 7 Chun, ama chun an kuomah, "Hi tempul hi sukporchè unla, mithi ruongin suksip ro. Fe ro leh!" a ta. Chuongchun an fe suok a, khawpui sûng po poa chun an che ta a. 8 Chuonga an that lai chun ka khât chauin an mi màksan a, ka bokkhup a, "Aw Lalpa PATHIEN, Jerusalem chunga i lungsenna i bun thlâk hin Israelhai laia i la hlà sunhai khom i sukram vong el ding am a ni?" tiin ka khêk a. 9 Ama chun ka kuomah, "Israel le Juda sûngkuohai suolna hi a nasa tah bêk bêk a, a ram hi thisen insuonain a sip a, khawpui hi hlemhlè taka rorêlnain a sip zo ta a, 'LALPAN ram chu a màksan ta a, LALPAN ieng khom a hmu nawh' an ti a. 10 Chuleiin, lunginsietna mitin en ta nawng ka ta, hlà nei tawl bok naw ning. An suol maw chu an thaw dàn ang charin an lu chungah ka bun thlàk ding a nih" a ta. 11 Chun, puon zâi inhmia inthuom, lekhatui paitu khan, "I thu mi pèk angin ka thaw zo tah" tiin thu a hung intlun a.

Ezekiel 10

1 Ka hang en a, ngai ta, cherub-hai lu chunga vàn zâu tak inkûm kula chun safir lunga siem ni awm tak lalthungpha ka hmu a. 2 LALPA chun puon zâi inhmia inthuom kuoma chun, "Cherub hnuoia tawlailir ke inkâra khun zu lût la, cherub-hai inkâra meiling khu i kut khing hni sipin zu luok la, khawpui chungah thè dar rawh" a ta. Ka thlîr zing lai chun ama chu a fe a. 3 A lût lai chun cherub-hai chu tempul sim tieng pangah an ngìr a, tuolpûk chu sûmin a sip mup a. 4 LALPA ropuina chu cherubhai chunga inthok chun tempul tuonga chun a tum thla a. Tempul chu sûmin a bawm a, LALPA ropuina chun a elvar phût a. 5 Cherubhai thla zàp ri chu tempul tuol puo tienga inthok khomin Iengkim LALPAN mi a biek laia a rawl ang elin a'n hriet thei a. 6 LALPA chun puon zâi inhmia inthuom kuoma chun, "Cherub-hai inkàra tawlailir ke bula mei saw va la rawh" tiin thu a pêk a, ama chu a lût a, tawlailir ke bula chun a ngîr a. 7 Cherub laia pakhat chun cherub danghai le an inkàra mei chu a ban a, a lâk a, puon zâi inhmia inthuom kuoma chun a pêk a, ama chun a lâk a, a hung suok a. 8 Cherub-hai chun an thla hnuoiah mihriem kut ang hi an nei seng a. 9 Chun, ka hei en a, cherubhai bula chun tawlailir pali, cherub pakhat bulah tawlailir pakhat pei, ka hmu a, tawlailirhai chu krisolit lung angin an tle sur a. 10 An inlang dàn chu, an pali chun an inang vong a, tawlailir ke kuol sûnga tawlailir ke kuol dang um ang a nih. 11 An hang inlir chun inher chuong loin cherubhai nghatna tieng tieng an inlir thei a. 12 An pumin, an hnung tienga hai, an kuta hai, an thlaa hai le tawlailir ke kuola hai khom chun mit a sip a. 13 Tawlailir kehai chu ka hriet ngeiah 'virvut' an ti a. 14 Cherub tinin hmêl pali an nei seng a, hmêl pakhatna chu cherub hmèl a na, pahnina chu mihriem hmèl a na, pathumna chu sakeibaknei hmèl a na, palina chu mupui hmèl ang a nih. 15 Chun, cherubhai chu an tho a. Hienghai hi Kebar vadung kawla ka hmuhai chie kha an nih. 16 An fe chun an bula tawlailirhai chu an inlir ve pei a, an vuong suok leh tawlailir kehai chun an zui pei bok a. 17 Anniah thilhringhai thlarau chu a um leiin, cherubhai chu an ngìr leh tawlailirhai khom chu an ngìr ve a, an vuong leh an vuong ve pei el a nih. 18 Chu zoa chun LALPA ropuina chun tempul tuong chu a màksan a, cherubhai chunga chun a chawl a. 19 Chuonga ka thlîr zing lai chun cherubhai chun thla an zàr a, hnuoia inthok chun an vuong tung a, tawlailirhai chun an zui ve pei a. LALPA tempul suo tieng kotsuoa chun an chawl a, Israel Pathien ropuina chu an chungah a um a. 20 Hienghai hi Kebar vadunga Israelhai Pathien hnuoia ka thilhring hmuhai chie kha an na, cherub ruol an nih ti ka hung hriet ta a. 21 Mi tinin hmêl hrang pali le thla pali an nei seng a, an thla hnuoia chun mihriem kut ang kut an nei seng bok a. 22 Chun, an hmêl chu Kebar vadunga ka hmuhai ang char kha an nih. Mi tinin an hma zawn sengah khaw tieng tieng khom an pan thei.

Ezekiel 11

1 Chun, thlarau chun a mi chawi kàng a, suo tienga LALPA tempul lûtna kota chun a mi'n thum a. Kotkhàr bula chun mi sawmhni le panga an lo um a, anni lai chun mipui thuoitu Azur naupa Jaazania le Benaia naupa Pelatia hai khom ka hmu ve a. 2 LALPA chun ka kuomah, "Mihriem naupa, hieng mihai hi an nih suol phier hlaktu le khawpuia thil rilo rot suok hlaktuhai chu. 3 Hienghai hi an nih, 'In bawl hun chu a hung tlung vak el naw dim a ni? Tu hin chu khawpui hi sa bêl intlok lai ang a na, eini hi a sâ chu ei nih' tituhai chu. 4 Chuleiin, mihriem naupa, an chungthu ding hi hrilpêk rawh" a ta. 5 Chun, LALPA thlarau chu ka chungah a hung tlung a, ama chun ka kuomah, "Hril rawh, LALPA chun hieng hin a tih: Aw Israel sûngkuohai, chuong ang chun in hril hlak hrim a, in lungrila thil umhai chu ka hriet fai vong si a. 6 Hi khawpuia hin mi tam tak in that tah a, a kotthlêrhai chu mithi ruongin in suksip hlak kha. 7 Chuleiin, Lalpa PATHIEN chun hieng hin a tih: a sâ chu mithi ruong in peihai chu an na, a sa bèl chu khawpui hi a nih. Sienkhom, chu taka inthok chun hnot suok ka ti cheu. 8 Kawlhnâm in ti a, kawlhnâm ngei chu in chungah hung tir ka tih, Lalpa PATHIEN chun a tih. 9 Khawpuia inthoka hnot suokin, ram dang mihai kutah pêng ka ti cheu a, hrem ka ti cheu. 10 Kawlhnâmin thîng in ta, Israel ramri sûng ngeiah in chunga ka thu rêl chu hlen ka tih. Chu pha chun LALPA chu ka nih ti hung hre tâng in tih. 11 Hi khawpui hi in sa bêl ni ta naw ni a, a sâ khom ni bok naw ti niu. Israel ramri sûnga ngei ka thu rêl chu hlen ka tih. 12 Chu pha chun LALPA ka nizie hrieng in tih, ka thu ruothai zui loin, ka dànhai vong bok loin, in kawl le kienga hnam danghai chìng dàn in zawm hlak si a' a ti a nih" tiin. 13 Chuonga ka hang hril lai chun Benaia naupa Pelatia chu a tlu a, a thi el ta a. Chu phing leh ka bokkhup a, inring takin, "E khai! Lalpa PATHIEN, Israel mi i hlà sunhai hi i suksiet vong el ding a ni?" ka ta. 14 LALPA thu chu ka kuomah a hung tlung a, 15 "Mihriem naupa, i unauhai, i chi le kuong Israel sûngkuohai hi an nawm Jerusalem hluotuhaiin, 'LALPA an hlat nasa êm a, hi ram hi kan kutah a mi pèk a nih' tia an hrilhai kha! 16 "Chuleiin, an kuomah hieng hin hril rawh: Lalpa PATHIEN chun hieng hin a tih: Hnam danghai lai ram hla takah son hmangin, ram tinah thè dar lang khom, an fe dar sùnga an umna hmun taphota chun an biekbùk ka ni pei a nih. 17 Chuleiin, Lalpa PATHIEN chun hieng ang hin a tih: 'Hnam danghai laia inthokin thuoi khawm nawk ta ti cheu a, in um darna rama inthokin la khawm nawk vong ka ti cheu a, Israel ram chu pe nawk ka ti cheu' tiin. 18 "Chu taka inthok chun hung kìr nawk an ta, thil porchè le milem tirdakumhai po po chu inthiel fai vong an tih. 19 Lungril hmun khat inneitirin, lungril thar pêng ka ta; lung anga sakhat an lungril ngar chu la hmangin, taksa anga innem lungril pêng ka tih. 20 Ka thupêkhai zawm tâng an ta, ka dànhai fimkhur takin vong tàng an tih. Ka mihai nìng an ta, an Pathien nìng ka tih. 21 Sienkhom, an thil tirdakum le porchè la ngaina zingtuhai ruok chu an thilthaw maw an lu chungah bun thlâng ka tih' tiin Lalpa PATHIEN chun a hril" tiin. 22 Chuongchun, cherubhai chu an vuong a, tawlailirhai chun an zui a, an chungah Israelhai Pathien ropuina chu a um a. 23 Khawpui sùnga inthok chun LALPA ropuina chu a suok a, suo tieng tlânga chun a ngîr a. 24 Kei khom thlarau chun a mi chawi kang a, Pathien thlarau inlàrna chun Babulon rama saltànghai lai a mi thuoi a. Chu phing leh inlàrna ka hmu chun chung tieng a mi fesan a. 25 LALPA thil mi'n hmutir po po chu saltànghai kuoma chun ka hril ta a.

Ezekiel 12

1 LALPA thu chu ka kuomah a hung tlung a. 2 "Mihriem naupa, hel hmanghai laia um i ni khah! Enna dingin mit an nei a, an hmu thei si naw a, ngàithlâkna ding na an nei a, an hriet thei chuong bok naw a, an hel lui pei a nih. 3 Chuleiin, nang mihriem naupa, sûn pachangah an mithmua ngei saltàngnaa fe ding angin i puonthuo intèl la, an hmu lai zingin i umnaa inthok khan hmun dang panin inthok suok rawh; hel hmang sûngkuo an nia chu inhriet suoknaa an hmang pha takduoiin. 4 Sùnah an hmu lâi ngei i Saltàngna ding puonthuo chu hung put suok la, zân tieng chun an hmu lâi ngei sala intâng ding angin suok rawh. 5 An mithmua ngei kul bang chu ver pop la, chu taka chun i thuomhnawhai leh suok rawh. 6 An hmu ngeiah i puonthuo chu liengkoah put la, thimbutah suok rawh. Khuo hmu thei lo dingin i hmai tuom rawh; Israel sûngkuohai ta dinga entir lawknaah ka siem che a ni si a" a ta. 7 Chuongchun, thu a mi pèk ang chun ka thaw a. Sûn vara chun saltànga fe ding angin ka thuomhnawhai chu ka'n têl a. Zàn tieng chun ka kutin bang chu ka ver pop a. An hmu zing laiin ka thuomhnawhai chu ka put a, thimbutin ka suokpui a. 8 Zîng tieng chun LALPA thu chu ka kuomah a hung tlung a: 9 "Mihriem naupa, hel hmang Israel sûngkuohaiin, 'Iem a na i thaw hi?' tia an indon che chun, 10 an kuomah hieng ang hin hril rawh: Lalpa PATHIEN chun hieng hin a tih: Hi thu hi Jerusalema rorêltuhai le chu taka chêng Israel sûngkuo po po ta dinga inentir lawkna thucha a nih. 11 Keima hi in ta dinga inchikna chu ka nih. Ka thaw ang hin nangni chunga khom thaw ni vêng a ta, sala intâng dingin thon hmang la nìng in tih. 12 Lal Zedekia khomin puonthuo putin thimbutah tlân suok a ta, a suokna dingin bang ver poppêk an ta, khuo a hmu thei nawna dingin a mit tuom a tih. 13 Ka lèn chàng zara chun inawk a ta, Kaldaihai ram Babulon tieng thuoi ka ta, sienkhom chu khuo chu a mitin hmu thei loin chu taka chun thîng a tih. 14 Ama thangpuitu, a bula um thoktuhai le vêngtu sipaihai chu thliin inlèn dartir ka ta, kawlhnâm phawiin hnot thlûr ka tih. 15 Hnam danghai lai hnot dar a, ram tinah ka sukdar pha chun LALPA chu ka nih ti hung hre tâng an tih. 16 Amiruokchu, kawlhnâm hai, tàm hai le hripui hai laka chun mi tlawmte hlàng ka tih. Chuonghai chun an saltàngna rama mihai hrietah an tirdakumzie po po chu puong an ta, chu pha chun LALPA chu ka nih ti hung hre tâng an tih" tiin. 17 Chun, LALPA thu chu ka kuomah a hung tlung a: 18 "Mihriem naupa, inthin hlop hlop pumin i bu fa la, mit ârintâ rak khopa tiin i tui chu dawn rawh. 19 A ram mipuihai kuomah hieng ang hin hril rawh: 'Hi hi Jerusalem le Israel rama chênghai chungthua Lalpa PATHIEN hril chu a nih: 'An bu chu lungkham takin fâng an ta, an tui chu beidong takin dawn bok an tih, anni laia inpawngnêkna leiin a ram sunga um po po chu rok faiin a um ding a ni si a. 20 An chèngna khawpuihai chu tlu hmât vong a ta, a ram chu ràusanin um a tih. Chu phâ chun LALPA chu ka nih ti hung hre tâng in tih' tiin hril rawh" a ta. 21 LALPA thu chu ka kuomah a hung tlung a: 22 Mihriem naupa, Israel rama thuvar tawi in nei, 'Ni khuo a hung sawt pha inlàrna tin chu iengma lo a hung inchang hlak' ti hi ieng tìna am a na? 23 Hi thuvar hi sukbo ka ta, Israel ramah tu khomin hril sawng nawk ta ngai naw ni hai. Inlàrna tin tlung kimna ni ding chu a hnâi tah. 24 Israel mihai laia inlàrna tehlem le hmangna bohai le ngai thatna dinga thum vawra inhlèmna hrim hrim um ta naw nih. 25 Kei LALPA hin ka hril ding taphot chu hril ka ta, chuonghai chu hlenin um vak a tih. Nangni sûngkuo hel hmanghai, in dam lai ngei hin ka hril taphot chu hlen ka tih' ti hi LALPA Pathien thu suok a nih" tiin. 26 LALPA thu chu ka kuomah a hung tlung a: 27 "Mihriem naupa, Israel sûngkuo chun, 'Inlàrna a hmuhai chu nakie huna ding a na, a thu hril lawkhai khom hla tak hnunga tlung ding chauh a nih' an ti a. 28 Chuleiin, an kuomah, 'Lalpa PATHIEN chun hieng hin a tih: ka thu ieng khom hi sukhnûk um naw ni a, ka hril taphot chu tlung kim a tih' ti hi Lalpa PATHIEN thu suok a nih, tiin hril rawh" a ta.

Ezekiel 13

1 LALPA thu chu ka kuomah a hung tlung a: 2 "Mihriem naupa, Israelhai zawlnei ruol, zêldin thu hmanga thil hril lawkhai chungthu chu hril la, LALPA thu ngàithla dingin hril tawl rawh. 3 Lalpa PATHIEN chun hieng hin a tih: Zawlnei invêt, ieng khom hmu nei si loa mani zêldin thu khêkpuituhai chung chu a pik ie! 4 Aw Israel, i zawlneihai chu khaw ram sihal ang chauh an nih. 5 Israel sùngkuo ta dinga LALPA nia indonaa ngîr zo dinga siem tha dingin kul chimna lai an va paw ngam nawh. 6 An inlàrna hmu chu a lem a na, thum vawra an hril lawkhai chu thukhèl vong a nih. LALPA tir ni rêng rèng loin, "LALPA thu suok a nih" an ti ve a, an thu hrilhai chu hung tlung kim dingin an ring nawk nghal a! 7 Keiin in kuomah thu hril si loa, 'LALPA thu suok a nih' in ti chun inlàrna hmang lo hmuin thu indik lo in hril lawk a ni naw am a ni? 8 "Chuleiin, Lalpa PATHIEN chun hi hi a hril a nih: In khêl hril lei le inlàrna tehlem hmua in inhril leiin ka khing cheu a nih ti hi Lalpa PATHIEN thu suok a nih. 9 Inlàrna tehlem hmutu le thu khêl hmanga thil hril lawktu zawlneihai chu ka kutin dodal a ta, ka mihai inrawn khawmnaah thang naw ni hai a, Israel sûngkuo hming zieknaah ziek sa ni naw ni hai a, Israel ramah lût bok naw ni hai. Chu pha chun Lalpa PATHIEN chu ka nih ti hung hre tâng an tih. 10 "Muongna um si loin, 'A muongum' tiin ka mihai an thuoi hmang a; bang lem an bawl a, chinaiin an zût vàr a. 11 Chuleiin, bang nàl vârtuhai kuoma khan an bang nàl vàr kha a tlu tho ding a nih ti hril rawh. Ruopui vànawn hung tir ka ta, riel inhrolin hung dêng a ta, thlipui hràtin hung nuoi bok a tih. 12 Bang chu a chim thla pha leh mihaiin, 'Chinaia i nàl vàr bang kha khaw lai am a um ta leh?' tiin indon ngei an tih. 13 "Chuleiin, Lalpa PATHIEN chun hieng hin a tih: 'Ka lung inlingin thlipui na tak insuong ka ta, ka lungsenin riel inhrol le ruopui vànawn tir thlâng ka ta, sukse rem rum a tih. 14 I bang nàl vàr chu sukchim ka ta, hnuoiah tlu sop a ta, a lungphumhai hung dawk vong a tih. A chim pha leh thi vêng in ta, chu pha chun LALPA chu ka nih ti hung hre tâng in tih. 15 Chuong ang chun bang le a nàl vàrtu chungah ka lungsenna hrîk thlàng ka ta, 'Bang chu a um ta naw a, a nàl vàrtuhai khom an um ta bok nawh' la tîng ka tih. 16 Chuong ang chu Israel zawlneihai, Jerusalem chungthu hril lawk a, muongna um si loa muongna um anga inlàrna hmutuhai chan chu nîng a tih" ti hi Lalpa PATHIEN thu suok a nih. 17 "Tuhin nang mihriem naupa, mani zêldinna hmanga hril lawktu i mi, nuhmeihai hi hmason la, anni kal zawngin an chungthu hril lawk rawh. 18 Lalpa PATHIEN chun hieng hin a tih: Kut rînga zawldi-ai bânbun bun a, mihai zawl thlûkna dinga hmai dier chi hrang hrang khumtu nuhmeihai chung chu a va pik ngei! Ka mihai awkin nangni in him bik ding maw? 19 Barli tlawmte le bei phèk tlawmtein ka mihai zawr hmangin ka hming in suksiet a. Khêl ngàithla chàk ka mihai chu khêl inbain, thi lo dinghai chu in sukhlum a, dam tlâk lohai kuomah damna thu in tiem hlak si a. 20 "Chuleiin, Lalpa PATHIEN chun hieng hin a tih: Mihai awkna dinga vate tokdar anga bâna zawlaidi in bun hi ka theida a, in bàna inthokin pot thlâng ka ta, vate anga awk ka mihai chu insuoktir ka tih. 21 In hmài dierhai pot thlêr ka ta, in kuta inthokin ka mihai insuoktir ka ta, in nuom nuomin awk thei ta naw ti niu. Chu phâ chun LALPA chu ka nih ti hung hre tâng an tih. 22 Suklungngai ka nuom lo mi indikhai chu khêl thuin an lungril in sukhnuol a, mi rilohai inlamlèttir tum nêkin suolna lampui nghatsan lo dingin in infuipor lem hlak si. 23 Chuleiin, inlàrna tehlem in hmuhai hi suktawp ka ta, thumvawra aisan khom thaw ta naw bok in tih. In kuta inthokin ka mihai ka san suok ding a nih. Chu pha chun kei hi LALPA chu ka nih ti hung hre tâng in tih' tiin hril rawh" a ta.

Ezekiel 14

1 Israel upa thenkhat ka kuomah an hung a, ka hmaah an inthung a. 2 Chun, LALPA thu chu ka kuomah a hung tlung a: 3 "Mihriem naupa, hieng mihai hin lungrilah milem pathien an sie tlat a, suola intlûktirtu milemhai chu an pom tlat si leiin, an thu chu ka donsak an ring hrim hrim am a ni? 4 Chuleiin, hieng hin hril tawl rawh: 'Lalpa PATHIEN chun hieng hin a tih: Israel sûngkuohai, lungrila milem pathien sie a, suola intlûktirtu milem pom tlat sihai chu zawlnei rawn dinga an hung pha leh kei LALPA hin milem betuhai chu an milem biek le inphû tawk charin ka lo don ding a nih. 5 Hieng milemhai lei hin Israelhai chun an mi lo fe hmangsan tah leiin, an lungril hnè kîr nawk theina dinga ka thaw a nih. 6 "Chuleiin, Israel sûngkuohai kuomah hril la, Lalpa PATHIEN chun hieng hin a tih: Sim unla, in milemhai nghatsanin, thil tirdakum in chìnghai po po khom bànsan ro. 7 Israel sûngkuohai laia mi tu khomin amanih, Israel rama chêng ram dang mi tu khomin amanih mi fesan a, lungrilah milem sie a, suola intlûktirtu milem pomtuin zawlnei rawn dinga a fe chun, kei LALPA ngei hin lo don ka tih. 8 Lo soisak ka ta, mi pangzat le hrilsîmah siem ka ta, ka mihai laia inthokin pei suok ka ta, chu phâ chun LALPA chu ka nih ti hung hre tâng in tih. 9 "Chun, zawlnei tu khom thu puong dinga hlèma a um chun, chu zawlnei hlèmtu chu kei LALPA hi ka na, a chungah kut inlet ka ta, Israelhai laia inthokin sukbohmang ka tih. 10 An suolna maw chu phur an ta, zawlnei le a rawntu chu thiem naw an chang dàn thuhmun char nîng a tih. 11 Israel sûngkuohai chu ka laka inthokin invâk hmang ta naw ni hai a, suol lakah insukporchè ta ngai naw ni hai. Ka mihai nîng an ta, an Pathien nîng ka tih ti hi Lalpa PATHIEN thu suok chu a nih' tiin hril rawh" a ta. 12 Chun, LALPA thu chu ka kuomah a hung tlung a: 13 "Mihriem naupa, ka chungah ringum loa a ram mihai an suol a, keiin an chungah kut inlet a, an fàk dinghai siktan a, an chungah tàm intlâktir a, mi le sahai ka sukbohmang lai chun, 14 hieng mi pathum Nova hai, Daniel hai le Joba hai khom hi an lo thang ve khom ni sien, an felna lei chauin anni hringna chauh sanhim an tih' ti hi Lalpa PATHIEN thu suok a nih. 15 "An naw leh a ram pumah ram sakol tirin, suon le thla khom nei loa siemin, sakolhai an hràng leiin a ram chu tu khom sir ngam loa rausanin lo um ni ta ang sien, 16 hieng mi pathumhai hi chu hmuna chun an lo um khom ni sien, an naunu le naupahai khom hum thei naw ni hai a, anni hringna chauh sanhim thei an ta, a ram chu sukramin um a tih ti hi ka hringna sâlin kei Lalpa PATHIEN hin ka puong a nih. 17 "An naw leh, chu ram chunga chun kawlhnâm inletin, 'A ram phêkin kawlhnâm inlêng raw se' ti lang, a rama mi le sahai sukhlum ni ta lang, 18 hieng mi pathumhai hi lo um khom ni hai sien, an naunu le naupahai khom hum thei naw ni hai a, anni hringna chauh sanhim an tih ti hi ka hringna sâlin kei Lalpa PATHIEN hin ka puong a nih. 19 "An naw leh, chu rama chun hripui inlèngtirin, an chungah thisen insuoin ka lungsenna bun thla lang, mi le sahai chu lo rawt bo tah lang, 20 Nova hai, Daniel hai le Joba hai meu khom an lo um ni sien, an naunuhai le naupahai khom hum thei naw ni hai a, an felna leiin anni hringna chauh sanhim an tih ti hi ka hringna sâlin kei Lalpa PATHIEN hin ka puong a nih. 21 "Lalpa PATHIEN chun hieng hin a tih: Mi le sahai sukhlum dinga Jerusalem chunga ka hremna tibaium pali- kawlhnâm le tàm le sakol le hripui-hai ka tir pha chun ieng anga nasa nawk zuol am nîng a ta! 22 Chuong sà khom chun dama hlà iemani zât um an ta, chuonghai naunuhai le naupahai chu thuoi suokin um an tih. Anni chu in kuomah an hung chun, an nungchang le an thil thawhai in hmu pha leh, Jerusalem chunga sietna ka'n tlungtir chungthua ka thil thaw po po chu thaw awm hrim a nih tîng in tih. 23 An nungchang le an khawsak dàn in hmu pha chun an chunga ka thaw po po chu san boa ka thaw a ni nawzie hung hre tâng in tih' ti hi Lalpa PATHIEN thu puong a nih" tiin.

Ezekiel 15

1 LALPA thu chu ka kuomah a hung tlung a: 2 "Mihriem naupa, grêp hrui le a kauhai hi ramngaw thing kau danghai nêka a that chuong bikna iem a um a? 3 Grêp hruia inthokin thil hmang tlâk an siem suok hlak hrim hrim am a ni? Thil tàrna ding takngiel khomin an hmang hlak am a ni? 4 Meiah an ti a, a bul le a lèr tieng a kàng a, a kàng bàng thingthu bong chu ieng am hmangna ding a um a? 5 A kàng hma hmana hmangtlâk a ni naw chun, a kàng chàr hnung lem chu hmangna ding a um naw nawk zuol awm ngei de! 6 "Chuleiin, Lalpa PATHIEN chun hieng hin a tih: 'Ramhnuoi thinghai lai meia ti dinga grêp hrui ka pèk angin, Jerusalem hluotuhai khom siem ka tih. 7 Anni chu soisak ka ta, meia inthoka hung suokhai khom, mei chun la kâng hlum tho tho a tih. Anni ka soisak pha chun LALPA chu ka nih ti hung hre tâng in tih. 8 Ka chungah an ringum naw leiin a ram chu suktlaran ka tih' ti hi Lalpa PATHIEN thu suok chu a nih" tiin.

Ezekiel 16

1 LALPA thu chu ka kuomah a hung tlung a: 2 "Mihriem naupa, Jerusalem chu a thil chîng tirdakumhai leh hmason la, a kuomah, 3 'Lalpa PATHIEN chun hieng hin a tih: I pieng le murna ram chu Kanan mihai ram a na, i pa chu Amor mi a na, i nu chu Hit mi a nih. 4 I hung pieng thlàkin i laihrui àt a ni naw a, tuia insil fai i ni naw a, machi nal i ni naw a, tuom lum i ni bok nawh. 5 Tu khomin an lainat en naw che a, chuong ang thil thaw dingin lunginsiettu che i nei bok nawh. Lainat nêk hmanin kawhnawmah an pei che a, i pieng nia inthoka mi ten i nih. 6 "Chun, kei ka hung a, thisena sipa inperin ka hmu che a, i thisena i'n buol lai chun keiin, 'Dam rawh' ka ti che a. 7 Rama thing tuoi angin ka'n thanglientir che a. I hung seilien a, lunghlu laia mawi tak ang i hung ni a, iitâng a hung inbàl a, i sam a hung sei a, sienkhom saruok le ruok ringot el i la ni zing si. 8 Ka hung hmu nawk che chun ngaizawng nei ruol i ni ta leiin ka puon ka'n zawn che a, i saruokna ka'n khumpêk che a. Khûn takin thu tiemin, thu ka thlungpui che a, ka ta i hung ni tah" ti hi Lalpa PATHIEN thu suok a nih. 9 "Chuongchun, tui ka'n siltir che a, i thisen kai chu ka sawp fai a, hriek rimtuiin ka chûl che a. 10 Puon cheiin ka tuom che a, savun pheikhok ka'n buntir che a, puon zâi inhmi le silfèn man toin ka'n thuom che a. 11 Belmawi tinrênga cheiin, i kutah bânbun inbuntirin, i rîngah rangkachak thî inhlìtirin, 12 i hnârah hnârbe le i naah nabê inbetirin, i luah lallukhum ka'n khumtir che a. 13 Chuongchun, rangkachak le tangruo belmawia chei i ni ta a, puon zâi inhmi le silfèn man to le puon cheimawia inthuom i ni a, beiphit indip le khuoizu le oliv hrieka chawm i ni bok a. I hmêl a hung tha ta êm êm a, lalnu ni dinga hlàngkai i ni bok a. 14 Ka mawina ropuia ka'n thuom che leiin i hmêl a tha famkim a, i hmêl that lei chun hnam tin lai i hming a'n thang luoi luoi a" ti hi Lalpa PATHIEN thu suok a nih. 15 "Nisienlakhom, i hmêl thatna chu suongin, i hming inthangna chu nawchizora insiem phanain i hmang a. A hung pan taphot che kuomah i'n phalrai a, i hmêl thatna chu a ta a hung ni ta a. 16 I silfènhai hlîpin, hmun sânga bawlhmunhai chu i cheimawi a, chu taka chun i'n zor a. Chuong thil chu a la tlung ngai naw a, tlung hlak chi khom a ni bok nawh. 17 Rangkachak le tangkaruo belmawi tak tak ka pêkhai che kha i lâk a, pasal lem i siem a, chuonghai hmaa chun i'n phalrai a. 18 Mawi tak taka thui i silfènhai chu i lâk a, anni inthuomnan i hmang a, ka hriekhai le rimtuihai chu anni hmaah rimtui dingin i'n hlàn a. 19 Fàk dinga bu ka pêk che beiphit tha, oliv hriek le khuoizu hai khom chu rimtui inhnik dingin an hmaah i'n hlàn a. Chu chu thil um dàn chu a nih' ti hi Lalpa PATHIEN thu suok a nih. 20 "Chu bâkah, i mi hringpèk i naunuhai le naupahai chu milemhai kuoma pumraw inthawina dingin i pêk a. Nawchi i zor hi i la dit tawk naw a ni? 21 Ka nauhai thatin, milem hmaah i'n hlàn a. 22 Thil tirdakum thaw chîng a, nawchi i zor hnung hin i naupang lai, saruoka uma i thisena i'n per lai nihai dàm kha i hriet fùk ta si nawh. 23 "Lalpa PATHIEN chun, 'I chung a pik! I chung a pik!' a tih. 24 Chuong i rîlonahai bàka chun tuolzawl laili tinah muol dêng pawngin, a chungah bawlhmun insâng i bawl a. 25 Kotthlêr tontir taphotah bawlhmun insâng i bawl bok a, i mawina chu thil tirdakumah inchangtirin, a fe inlon taphot kuomah uolau takin i lo inhlîm a. 26 Aigupta mihai, i tuolbawm mi hurhai kuomah inzorin, uolau taka i hur herna chun lungsen dingin i mi cho phawk a. 27 Chuleiin, i chungah kut ka'n let a, i ram chu ka sukchìn a; nangma theidatu Filistin mihai, i hur dàn makti êm êmtu kuoma chun nuom nuoma an soisak dingin ka pêk suok che a. 28 I la dit tawk ta naw rop leiin Asuriahai kuoma khom i'n zor a, chu khom chun i la dit tawk chuong bok nawh. 29 Inphalrai zuol peiin sumdawnga hung Babulon mihai kuomah i'n zor a, sienkhom i la dit tawk chuong naw rop. 30 "Nawchizor zakmaw anga hieng thilhai i hang thaw el hi chu, thlèm thlûk i lo va hang olsam de aw!" ti hi Lalpa PATHIEN thu suok a nih. 31 "Kotthlêr hmatawng taphotah muol siem a, tuolzawl lailia bawlhmun sâng i bawl lei hin nawchizor naran el khom i ni nawh; i'n zorna man khom i lâk bok nawh. 32 "Nang uirenu, mani pasal nêka mi dang dit lemtu! 33 Nawchizor tinin an inzor man an làk hlak a, nang ruok chun a zàlpuitu ding che hmun tina mihai i zawr a, a zàlpui taphot che chu thilpêk i pêk lem si a. 34 Nawchizor dangdai le letling i nih: zàlpui dingin an pan naw che a, nangnin i zawr tawl lem a; an zàlpui man che pe loin nangin a man i pêk lem si. 35 "Chuleiin, nang nawchizor, LALPA thu hi ngàithla rawh! 36 Lalpa PATHIEN chun hieng hin a tih: I ngàizawng taphot kuomah phalrai taka inzor a, milem tirdakum tam tak nei a, i nauhai thisen chu an kuomah i'n hlàn leiin, 37 nangma ngàitu le inhoi i chènpui po po hai le i lo inngàipuihai le i theidahai po po chu ko khawm ka ta, saruokin kei phar ka ti che a, i saruokna po po hmung an tih. 38 Nuhmei uire le nauhai thisen insuotu chungthu an rèl angin i chungthu khom rêl ka ta, thisen phuba le ka thîkna che leia ka lungsenna phuba chu i chungah hung intlungtir ka tih. 39 An kutah pe suok ka ti che a, i muol pawng siemhai le bawlhmun sâng bawlhai chu sukchimin sir sop an tih. I silfènhai hlippèk an ti che a, i belmawi thahai làkpêk an ti che a, saruok le ruokin hluihlawn an ti che. 40 I chungah tlâng inpung an ta, lungin dêng an ti che a, kawlhnâmin chan phit an ti che. 41 I inhai raw hmang an ta, nuhmei tam tak mithmua ngei i chungah hremna chu hlen ka ta, i nawchizor suktawp ka ta, i zawlpuihai kuoma zawrna thilpêk i pèk hlakhai khom pe ta naw ti nih. 42 Chu pha chun ka thîk êm che leia i chunga ka lungsenna chu rèin, ka lung nat khom hung dam tàng a tih. 43 "I tleirawl lai nihai kha hre zing ta loa, hieng thilhaia i mi suklungsen leiin, i thilthaw maw chu i lu chungah intlâktir ka tih ti hi Lalpa PATHIEN thu suok a nih. I thil chîng tirdakum po poah hurna rong i'n kai zaptir vong a ni naw am a ni? 44 I chungthua thuvar tawi an hril sawng zâtin, 'A naunuin a nu a sûn' hung ti zieng an tih. 45 A pasal le a nauhai lungtentu, i nu i puo fûk hle a, mani pasal le nauhai lungtentu i zuorpuihai unaunu indik tak i ni chieng khop el! I nu chu Hit mi a na, i pa chu Amor mi a nih. 46 I zuorpuinu upa lem, hmar tienga a naunuhai le um chu Samaria mi a na, sim tienga a naunuhai le um i sangnu chu Sodom mi a nih. 47 An thaw dàn zawma an thil tirdakum chîng po po chu i chîng ve el chauh khom ni loin anni nêka zuolkai lemin i lêlo ta hi. 48 Nang le i naunuhaiin in thaw ang hrima nasa hin i sangnu Sodom le a naunuhai khomin an thaw ngai nawh ti hi kei Lalpa PATHIEN hin ka hringna sâlin ka hril a nih. 49 "I sangnu Sodom le a naunuhai suolna chu hi hi a nih: an chapo a, an khop inlèt a, ieng khom an bengkhon naw a, mi rethei le tlasamhai an uksak bok nawh. 50 An uongthuong èm êm a, ka mithmua ngei thil tirdarkum an thaw hlak a, chuleiin in hmu tah angin, ka sukbohmang tawl a ni kha. 51 Samaria chun i suol thaw zàtve khom hi a thaw ve nawh. Anni nêk daia zuolkaia thil tirdakum i thaw leiin i unaunuhai chu mi fel angin i suklang tawl hiel a nih. 52 I zuorpuihai chu indik awm hiela i'n langtir leiin nangin inzakna le hmaimawkna chu tuor i tih. 53 "Amiruokchu, Sodom le a naunuhai le Samaria le a naunuhai vangneina chu i vangneina leh la tungding nawk ka tih, 54 anni chu ngai sukngam khopa i siem tawlna chunga inzaka i hmâi a mawkna dingin. 55 I zuorpuihai, Sodom le a naunuhai le Samaria le a naunuhai chu an um dàn hmasa angin um nawk an ta, nang le i naunuhai khom in um dàn hmasa angin um nawk in tih. 56 I chapo vàng lai khan chu i zuorpuinu Sodom hming khom i sàm ngai naw kha. 57 Tu ruok hin chu i rîtlozie khawvel hmaah phor suok a ni ta a, Arame mihai le an sè vèla ramhai le Filistinhai cheksol i kai thung tah hi. 58 I hur herna le i thil chîng tirdakumhai maw chu i phur pei ding a ni si a" ti hi LALPA thu suok a nih. 59 "Lalpa PATHIEN chun hieng hin a tih: Ka thuthlung bawse a, ka thu intiemkamna chu i hmusit leiin i phû ang charin i chungah thaw vèng ka tih. 60 Nisienlakhom, i tleirawl lai huna i kuoma ka thuthlung kha ka hriet zing a, kumkhaw thuthlung siempui ka ti che. 61 Chuongchun i zuorpuihai, i u le i sanghai i hmu hunah i um dànhai hung hre suok i ta, inzàpui i ta, anni chu i kuoma ka thuthlunga thang ni ve naw hai sienkhom, i naunuhai angin ngai ka tih. 62 Chuongchun, thuthlung thlungpui ka ti che a, LALPA chu ka nizie hung hre tâng i tih. 63 I thilthaw tah po po ka ngaidam vong pha che chun i suolnahai hung hre suokin inzak i ta, i bau phong ngam loin um i tih" ti hi Lalpa PATHIEN thu suok a nih.

Ezekiel 17

1 LALPA thu chu ka kuomah a hung tlung a, 2 "Mihriem naupa, tienami inentir nei buotsai la, Israel sûngkuo kuomah tekhinthu angin hril rawh. 3 Lalpa PATHIEN chun hieng hin a tih: 'Mupui lien tak le hrât tak, thla ki sei tak le hmul sà tak nei, tiel buoi el chu Lebanonah a hung a, sidar thing zìkah a fu a, 4 a zîk dawng chu a thliek a, sumdawng mihai khawpuiah a vuong lùtpui a, chu khawpuia chun a phun a. 5 "In rama thlai chi khom a lâk a, hnuoi thatna hmunah a'n so a, tui tamna hmunah phahrâm angin a phun a. 6 Chun, a hung inthang a, grêp buk inhnuoi chi angin a hung inzàm dar a. Hnuoiah zung nghet tak thlâkin, a kau zârhai chu mupui tieng chun an inzàm a. Chuong ang chun grêp chu a hung um a, a kau inzâr duoiin a hna a hung inbuk hlûp a. 7 "Mupui lien tak dang, thla sei tak le hmul sa tak nei a um bok a. A tona hmuna inthok chun tui a dong tam theina dingin grêp zung le zâr chu mupui tieng chun a'n zàm a. 8 Chu grêp chu grêp kung tha tak hung ni a, a kauhai hung inzâr duoi a, ra tha tak insuo dinga hnuoi thatna le tui tamna hmuna phun a nih. 9 "Lalpa PATHIEN chun hieng hin hril tawl rawh a tih: 'Hi grêp hi puitling thei a tim? A phuntu chun a zung pot phawiin, a ràhai suktilin, a dawn tharhai chu a sukvuoi el naw ding maw? A pot phawina dingin tha tam seng ngai naw ni a, mi tam ruoi ngai bok naw nih. 10 Phun son khom ni inla, a puitling chuong ding am a ni? Khaw sak thliin a hung nuoi pha leh a zung thlâkna hmuna chun a mut tawl vong tho naw ding maw?' ti rawh" tiin. 11 Chu zoa chun LALPA thu chu ka kuomah a hung tlung a: 12 "Hel hmang sûngkuohai kuomah hieng hin hril rawh: 'Hi thil umzie hi in hriet am? Babulon lal chu Jerusalemah a fe a, an lal le hotuhai chu a man a, ama ruolin Babulon tieng a thuoi a. 13 Chun, lal sûngkuo laia a man pakhat chu thuthlung a siempui a, thu a'n tiemkamtir a. A rama thuoituhai po po khom a thuoi hmang bok a. 14 Chuongchun chu ram chu amaa ngîr suok thei ta lo dinga siem a hung ni a, thuthlung zawm chauh chu Israel hnam dam khawsuok theina ding lampui chu a nih. 15 Nisienlakhom, Israel lal chu Babulon lal lakah a hel a, Aigupta sakorhai le sipaihai inpun dingin palai a tir a ni kha. A hlawtling am? Chuong ang thawtu chun a'n san suok am? Thuthlung bawse siin himin a suok ding am a ni? 16 "A thuthlung bawsie a, a thu intiemkamna hmusittu Israel lal chu lala siemtu le thu thlungpuitu Babulon lal rama chun thîng a tih ti kei Lalpa PATHIEN hin ka hringna sâlin ka hril a nih. 17 Mi tam tak sukhlum dinga Babulon lalin Jerusalem inhuol a, thanghmun khawna ding hnuoi dêng pawng a, thamte a daw kuol pha chun Faraw sipai le a râlhrâthai chu ama ta dingin ienga khom hmangna um naw ni hai. 18 A thuthlung bawsein a thu intiemkamna chu a hmusit a. Thu intiemkam hnunga hieng ang thil a thaw nawk si lei hin, intâl suok naw top a tih. 19 "Chuleiin, Lalpa PATHIEN chun hieng hin a tih: 'Ka'n tiemkamna hmusit a, ka thuthlung bawsetu chunga chun tuong ngèi ngêi ka tih ti hi ka hringna sâlin ka hril. 20 Ka lèn châng zar khum ka ta, awk ka ta, Babulon tieng thuoi ka ta, ka chunga a ringum naw leiin chu taka chun a bawsietna lakah a chungthu rêl ka tih. 21 A sipai tlân siehai po po chu kawlhnâmin that vong an ta, a la dam sunhai chu thli lên dar angin kawlkil tinah indar an tih. Chu pha chun kei LALPA hin ka lo hril ta sa vong a nih ti hung hre tâng in tih. 22 "Lalpa PATHIEN chun hieng hin a tih: 'Sidar zîk dawng chu keiin lâng ka ta, phun ka tih. A kau dawnghai khom chu thliek ka ta, tlâng insàng leh langsàrah phun ka tih. 23 Israel tlâng sîpa hai chun phun ka ta, a kauhai hung inzâr a ta, ra insuong a ta, sidar ropui tak hung nîng a tih. Va tinrênghaiin a zârah bu sep an ta, a zâr hlima hai chun chawl hadam an tih. 24 Thing insànghai thum hnuoi a, thing inhnuoihai chu suksângtu, thing hringhai suktawl a, thing tawlhai chu sukhringa inthangtirtu LALPA chu ka nizie hung hre tâng an tih' ti hi kei LALPA hin ka hril ta a, ka hril angin thaw bok ka tih" tiin.

Ezekiel 18

1 Pathien thu ka kuomah a hung tlung nawk a. 2 "Israel ram sûnga nangni rawiin thuvar in hmang hlak, 'Pahaiin grêp thùr an fàk a, an nauhai ha a tim' ti hi ieng tina am a na? 3 Hi thuvar hi Israel ramah hmang nawk ta ngai naw ti niu ti hi kei Lalpa PATHIEN hin ka hringna sâlin ka hril. 4 Hringna po po hi ka tâ a na, pa hringna chu ka ta a ni ang bokin naupa hringna khom ka ta a nih. A thi ding chu thil suol thawtu chu a nih. 5 "Mi fel pakhat hin thil fel le indik chauh thaw sien, 6 tlânga an bawlhmunahai bu fa ve loin, Israel sûngkuohai milem biek tieng chun ngha ve ngai naw sien, a tuolbawm nuhmei sukporchè loin, nuhmei thla pal lai pawl bok naw sien, 7 tu khom nêksawr loin, a laka miin thil an pùk aia dakhama an sie chu pe kîr sien, tu khom rok loin, phingtamhai chu bu pein, saruokhai chu silfèn pe sien, 8 a pung hnota inpûktir loin, a pung khom la bok naw sien, suol thawna dinga kut hmang loin, mi le mi inkâra thu indik takin rêl sien, 9 ka thu suokhai zawmin, ka dànhai vong tlat sien, chu mi chu mi fel a na, matheiloin hring a tih' ti hi Lalpa PATHIEN thu suok a nih. 10 "An naw leh nau tawrot, thisen insuo hmang neiin, 11 a pain a thaw ve ngai dêr lo chuong ang thil suol chu thaw hlak sien, tlânga bawlhmunahai bu fain, a tuolbawm nuhmei sukporchè sien, 12 mi rethei le tlasamhai nêksawrin, mi rokin, dakhama thil an siehai chu pe kïr ngai loin, milem tieng nghain, thil tirdakumhai thaw sien, 13 a pung hnota inpûktirin, a pung la teu sien, chuong ang mi chu a hring ding maw? Hring lo e! Hieng thil tirdakum po po hi a thaw si leiin matheiloin sukhlum nîng a ta, ama thisen maw chu phur a tih. 14 "Amiruokchu, a naupa hin nau nei sien, a pa thil suol thaw po po chu hmu vong sien, thaw nuom ve dêr naw sien, 15 tlânga bawlhmunahai bu fa ve loin, Israel sûngkuohai milem biek tieng chun ngha ve ngai naw sien, a tuolbawm nuhmei sukporchè naw sien, 16 tu khom nêksawr loin, thil a'n pûktirin dakham la nuom ve naw sien, mi rok ngai loin, phingtâmhai chu fàk ding pein, saruokhai chu silfèn pe sien, 17 suol tawk lo dinga kut intîm tlatin, a pung neia inpûktir loin, a pung la bok naw sien, ka dànhai vongin ka thusuokhai zawm sien, chu mi chu a pa thilsuol thaw leiin thi naw ni a, matheiloin hring a tih. 18 A pa ruok chu rawng taka mi nêksawr a, a unauhai rok a, a mihai laia thil tha lo thawtu a ni leiin, ama suolna leiin a thi ding a nih. 19 "Sienkhom nangni chun, 'Ieng leiin am naupa chun a pa khawlona chu a tuor ve naw ding?' in ti hlak. A naupa chun thil fel le indik thaw a, ka thu suokhai fimkhur taka a zawm leiin, ama chu matheiloin hring a tih. 20 A thi ding chu thil suol thawtu chu a nih. Naupa chun a pa khawlona chu tuor naw ni a, pa khomin a naupa khawlona chu tuor bok naw nih. Mi fel chun a fel man intêl a ta, mi rilo chun a rîtlona man tuor a tih. 21 "Amiruokchu, mi rilo chun a suol thawhai bànsan a, ka thuruothai zawm a, thil fel le indik a thaw chun, matheiloin hring a ta, thi naw nih. 22 Thil suol a lo thaw tahai po po chu hriet zing ni ta naw nih. Thil indik a thawhai lei chun hring a tih. 23 Mi rilo thi hi ka lawma in ngai am a ni? A lampui màksan a, a hring hi an naw maw ka lawm lem chu? ti hi Lalpa PATHIEN thu suok a nih. 24 "Sienkhom, mi fel chun a lampui màksanin, thil suol thawin, mi rilo thaw hlak thil tirdakumhai chu thaw ve sien, a hring ding am a ni? Thil fel a lo thaw tahai kha pakhat khom hrietpêk ni ta naw nih. A ringum nawna leia thiem naw a changna lei le a thil suol thawhai lei chun, ama chu a thi ding a nih. 25 "Chuong a ni sà khom chun, 'LALPA thaw dàn hi a'n ang chuong vong ngai lem' in ti hlak. Aw Israel sûngkuohai, lo ngâithla ro. Ka thaw dàn hi maw a felfàk nawh? In thaw dàn an naw maw felfàk lo lem chu? 26 Mi felin felna lampui màksana thil suol a thaw chun, chu chu thìpui a tih; a thil suol thaw lei chun a thi ding a nih. 27 Amiruokchu, mi riloin rîtlona a thaw hlak chu màksana, thil fel le indik a thaw chun, a hringna chu hum a tih. 28 Thil poi a tawkhai po po chu ngàituo a, chuong thilhai chu a màksan leiin, matheiloin hring a ta, thi naw nih. 29 Sienkhom, Israel sûngkuo chun, 'LALPA thaw dàn a felfàk nawh' in ti tho. Aw, Israel sûngkuohai, ka thaw dànhai maw a felfàk naw chu? In thaw dànhai an naw maw felfàk lo lem chu? 30 "Chuleiin, aw Israel sûngkuohai, mi tinin in thaw dàn ang peiin in chungthu rêl ka tih, ti hi Lalpa PATHIEN thu suok a nih. Sim ro! In bawsietna po pohai chu nghatsan unla, thil suol thaw chu in tlûk sietna san ni ta da'l a tih. 31 In bawsietna po po lakah fihlîm unla, lungril thar le thlarau tharin inthuom ro. Aw Israel sûngkuohai, ieng leiin am in thi ding a na? 32 Tu thînaa khom lawmna ka nei nawh ti hi Lalpa PATHIEN thu suok a nih. Sim unla, hring ro" tiin.

Ezekiel 19

1 "Chu bâkah, Israel hotuhai sùnna hla hieng ang hin phuok rawh: 2 I chûnnu kha sakeibaknei laia, A keipui tak a ni hlak kha!A te hruoihai lai bokin, Chawmin a keitlei tawl a. 3 A tê laia pakhat chu, Hrât takin a keitlei a; Sa sè dàn inchûktirin, Mihriem sâ a fâk hlak a. 4 Hnam danghan an hung hriet chun, An tlâkkhurah an awk a, Hrêngthîr kol inbuntirin, Aigupta tieng an thon a. 5 A chûnnu beiseina chu, A hung hlamzui tak leiin, A tê laia pakhat chu, Chawmin a keitlei nawk a. 6 Keichal hrât tak hung niin, Sakeibakneihai lai a tla a, Sa se dànhai hung thiemin, Mihriem sâ a fâk hlak a. 7 An kulhai chu baw chimin, An khuohai a sukram a. A'n rûm ri an hang hrietin, Ram le a mi chênghai chu, Tiin an inthin hawp a. 8 A sè vêla hnamhai chun, Pung khawmin an bei hron a, A vêlin châng an kam khum a, An tlàkpùmah a tla a. 9 Thîr khaidietin an khit a, A bawm sùngah an thun a, Babulon lal an pêk a, Lung in sùngah a khum a, Israel muol le tlângah, A'n rûm ri an hriet ta ngai nawh. 10 I chûnnu kha grêp huon, Tui tamna hmun sìra phun, Grêp kungpui ang a na, Tuiin a chawm hnè leiin, Inbukin a râ luoi a. 11 Lal hmola hmang thei hielin, A kâuhai khom a'n uoi a, Thing buk danghai a khûm a, An chungah a dawk lûr a, A kâu a'n zâr duoi bok a, Insângin a langsàr hle. 12 Nisienlakhom lungsenin, An phawi a, an pei zap a; Sak thliin a nuoi kon a, A rà a mût til vong a, A kàuhai a rop thla a, Meiin a kàng hmang zo tah. 13 Thlalêr tui um nawnaah, A kûngpui chu an phun a. 14 A kàu pakhata inthokin, Mei suokin a kàng dar a, A ràhai a kâng vong a, Lal hmola hang hmang tlâk ding, A kâu hrim hlà a nei ta nawh'tiin. Hi hi lusûnna hla a na, lusûn chànga hmang hlak ding a nih", a ta.

Ezekiel 20

1 Babulon sala Lal Jehoiachin intànga inthoka kum sari kum, thla ngana, ni sawm nif chun Israel upahai laia thenkhat chu LALPA rawn dingin ka kuomah an hung a, ka hmaah an inthung a. 2 Chun, LALPA thu chu ka kuomaha hung tlung a. 3 "Mihriem naupa, Israel upahai kha inbiekpui la, an kuomah hieng hin hril rawh: 'Lalpa PATHIEN chun hieng hin a tih: 'Mi rawn dinga hung in ni maw? Nangni rawnin um naw ning' ti hi Lalpa PATHIEN hin ka hringna sâlin ka hril a nih. 4 "An thu i rèlpèk di'm a ni? Mihriem naupa, an thu i rèlpèk naw ding maw? An pahai thil chìng tirdakum leh anni chu hmason la, 5 an kuomah, 'Lalpa PATHIEN chun hieng hin a tih tiin hril rawh: Israelhai ka thlang ni khan, Jakob sûngkuo le an thlâhai hmaah kut phar meuin, "Kei hi LALPA in Pathien chu ka nih" tiin, Aigupta rama khan keima chu anni kuomah ka'n puong a. 6 Chu ni chun inkhâm meuin, Aigupta rama inthoka thuoi suok a, an ta dinga ka ram huol, nenetui le khuoizu luongna ram, ram po po laia mawi taka ka thuoi lût ding thu chu ka hril a. 7 An kuomah, 'Mi tinin in mit latu milem tirdakumhai chu sie hmang vong unla, Aigupta milemhaiin insukporchè ta naw ro, kei hi LALPA in Pathien chu ka ni si a' tiin ka hril tawl a. 8 "Amiruokchu, ka chungah an hel a, ka thu an ngàithlàk nuom naw a, an mit latu milem tirdakumhai chu an pei hmang naw a, Aigupta milemhai chu an nghatsan bok nawh. Chuongchun, an chunga ka lungsenna ka hrîk thlàk ding thu le Aigupta ram sûnga ngei ka lungsenna ka bun thlàk ding thu ka hril a. 9 Nisienlakhom, an chêngna rama hnam danghai mithmua ka hming hril sieta a um ding chu ka vèng leiin chuong ang chun an chungah ka thaw ta êm naw a, Aiguptahai mithmua ngei Israelhai kuomah keima chu inpuongin, a rama inthok chun ka thuoi suok tawl ta lem a. 10 Aigupta rama inthoka thuoi suokin thlalèrah ka thuoi lût tawl a. 11 Ka thu suokhai le ka dànhai ka pêk a, chuonghai chu mi tu khomin zawm a, an hringpui theina dingin. 12 Keima le anni inkàra inchikna dingin ka chawlni Sabat ka pêk bok a, kei LALPA hi anni ser hrangtu ka nizie an hriet theina dingin. 13 "Sienkhom Israel sûngkuohai chu thlalèra khan ka chungah an hel a. An hringpui ding ni si ka thu suokhai chu zawm nuom loin, ka dànhai an hnawl a, ka chawlnihai nasa takin an bawsiet a. Chuleiin, thlalèra chun ka lungsenna an chungah bun thla a, sukse vong di'm a nih ka ti a. 14 Amiruokchu, ka hung thuoi suok lai hmutu hnamhai laia ka hming inpawi ding ka vêng leiin chuong ang chun ka thaw ta naw a. 15 Chu bâkah, thlalèra khan ka ram pêk, nenetui le khuoizu luongna ram, ram po po laia mawi taka chun thuoi lût lo dingin kut phar meuin thu ka'n khàm a. 16 A san chu ka dànhai hnawlin ka thu ruothai an zawm nuom naw a, ka chawlni an bawsiet bok a; an lungril chu an milemhai tieng a ngha tlat si lei a nih. 17 Nisienlakhom, hang sukbohmang èm dingin ka lunginsiet tawl si a, thlalèra khom khan ka sukbohmang vong ta naw a nih. 18 Thlalèra khan an nauhai kuomah, "In pahai dàn siem kha zawm naw unla, an dànhai vong naw unla, an milemhaiin insukporchè naw ro. 19 Kei hi LALPA in Pathien chu ka na, ka thu ruothai zawm unla, ka dànhai fimkhur takin vong ro. 20 Ka chawlni inser ro, kei le nangni inkâra inchikna a ni theina dingin. Chuongchun, LALPA in Pathien ka nizie hung hrieng in tih" ka ti a. 21 "Nisienlakhom, an nauhai chu ka lakah an hel a, an hringpui ding ni si ka thu ruothai chu an zawm naw a, ka dànhai an vong fimkhur naw a, ka chawlnihai an bawsiet a. Chuleiin, thlalêra khan ka lungsenna hrîk thla a, an chungah bur khum dingin ka ti a. 22 Amiruokchu, ka hung thuoi suok lai hmutu hnamhai laia ka hming inpawi ding ka vèng leiin kut ka kei a. 23 Chun, hnamhai lai sukdar a, ram tinah thè dar vong dingin kut phar meuin thlalêra khan thu ka'n khàm a, 24 a san chu ka dànhai an zawm naw a, ka thu ruothai an hnawl a, ka chawlni an bawsiet a, an pahai milem tieng an lungril a nghat tlat leiin. 25 Chuleiin, an thatna ding ni lo dàn hnuoiah siein, an nunpui thei lo ding thu ka pêk bok a, 26 ka thilpêkhai ngei chun anni le anni an insukporchè a, an nau lutîrhai chu an milem kuomah meiah an inhlàn a; LALPA chu ka nih ti an hriet theina dingin, anni chu pangzatnain ka suksip a nih. 27 "Chuleiin, nang mihriem naupa, Israel mipuihai chu inbiekpui la, an kuomah hieng hin hril rawh: Lalpa PATHIEN chun hieng hin a tih: Hieng thila hin in pahai chun mi nghatsanin an mi hrilsiet zui pei a. 28 Ram pèk ding ka tiemah ka thuoi lût hnungin, tlâng insâng le thing zàr buk tha an hmuna taphotah inthawina an inhlàn a, rimtui rawin, dawn ding thilhlânhai an bun suok a, lungsen dingin an mi cho phawk a. 29 Kei chun, 'Hmun sâng in fe hlak hi ieng in tìna am a na?' ka ta. (Chuleiin tu chen hin a hmingah 'Bamah'g ti a hung ni tah a nih. ) 30 "Chuleiin, Israel sûngkuohai kuomah hieng hin hril rawh: 'Lalpa PATHIEN chun hieng hin a tih: In pahai ang bokin nangni khom insukporchein, milem tirdakum chu hnotin in hur hmang ve ding am a ni? 31 In thilpèkhai inhlànin, in nauhai meiah peiin, voisun ni chen hin in insukporchê zing a ni naw am a ni? Aw Israel sûngkuohai, nangni mi rawn ding am ka ni? Nangni rawnin um naw ning ti hi kei Lalpa PATHIEN hin ka hringna sâlin ka hril a nih. 32 "In lungrilin 'Khawvela hnam danghai ang boka thing bul le lung bul betu ni kan nuom ve' ti inla khom, in ti angin khawsa naw ti niu. 33 Indoi dêr loin in chungah kut thlâk ka ta, ka lungsenna hrîk thlâng ka tih ti hi kei Lalpa PATHIEN hin ka hringna sâlin ka hril. 34 Hnam danghai laia sukdara in umnaa inthoka ka thuoi kìr pha cheu ka thilthawtheizie le ka lungsenzie inentir ka ti cheu. 35 Hnam danghai ram thlalèrah thuoi ka ti cheu a, chu taka chun inhmasonin, in chungthu ka rèl ding a nih. 36 Aigupta thlalêra in thlatuhai chunga ro ka rèl ang bok khan nangni chunga khom ro rêl vêng ka tih ti hi Lalpa PATHIEN thu suok a nih. 37 Ka hmol hnuoiah inkûntir ka ti cheu a, ka thuthlung khuokhirna hnuoiah thuoi lût ka ti cheu. 38 Nangni laia ka thu awi lo le ka laka helhai chu inthiel fai ka ta, an umna rama inthokin hung thuoi suok ka ta, sienkhom Israel ram chu lût naw top an tih. Chu pha chun LALPA chu ka nih ti hung hre tâng in tih. 39 "Aw Israel sûngkuohai, in chungthua Lalpa PATHIEN hril chu hi hi a nih: Ka thu in ngàithlàk naw law law si chun in rêngin fe hmang unla, tuta le a hnung chenin in milem pathien rong chu va bawl ro; in thilpèkhai le in milemhaiin ka hming thienghlim sukporchè ta naw ro. 40 Ka ram, ka tlâng thienghlim, Israel tlâng sànga chun Israel sûngkuo po poin ka rong an bawl ding a nih; chu taka chun anni chu lo pom ka tih. Chu taka chun in thilhlànhai, in thilpêk hlu tak takhai le in inthawina thil ser po pohai khom chu lo pom tàng ka tih. 41 Hnam danghai laia inthoka la suok a, in indarna ram tina inthoka ka thuoi khawm phâ cheu chun rim inhnikah pom tâng ka ti cheu a, hnam danghaiin nangniah ka thienghlimzie hmu tâng an tih. 42 In thlatuhai kuoma kut phar meua pèk ka tiem Israel ramah ka hung thuoi lùt pha cheu chun kei hi LALPA chu ka nih ti hung hre tâng in tih. 43 Chu pha chun in um dànhai le in thilthaw hlak haia in insukporchè dànhai hung hrieng in ta, thil tha lo in lo thaw tahai leiin nangni chen khom intirdak phàng in tih. 44 Aw Israel sûngkuohai, in um dàn tha naw ang ni lo le thil porchè thaw in chìng hlak ang kha ni bok loa, ka hming sika ka dawr pha cheu, kei hi LALPA chu ka nih ti hung hre tâng in tih, ti hi Lalpa PATHIEN thu suok a nih" tiin. 45 Chun, LALPA thu chu ka kuomah a hung tlung a. 46 "Mihriem naupa, sim tieng ngha la, sim tieng chungthu hrilin, sim tieng ram ngirhmun ding hril lawk rawh. 47 Sim tienga rampui kuomah hieng hin hril rawh: 'LALPA thu hi ngàithla rawh, Lalpa PATHIEN chun hieng hin a tih: 'Nang hi meiin ka raw tèp ta che a, chu mei chun, i thing hring le tawl po po khom lem zo vong a tih. Mei chok puot puot chu sukrêm ni naw ni a, sim tieng le hmar tieng inkâra um po pohai chu kàng ût vong a tih. 48 Chun, mi po poin kei LALPA hi mei insuotu chu ka nih ti hmung an ta, mei chu sukmit ni naw nih a tih' ti rawh" a ta. 49 Kei chun, "A khai, Lalpa PATHIEN! 'Tekhinthu mei mei an naw maw a hril hi?' an mi ti hman dèr tah a nih" tiin ka hril a.

Ezekiel 21

1 Chun, LALPA thu chu ka kuomah a hung tlung a. 2 "Mihriem naupa, Jerusalem hmason la, an hmun thienghlimhai kal zawngin thu hril la, Israel ram chungthu ding hril lawk rawh. 3 Hieng hin hril rawh: 'LALPA chun hieng hin a tih: Ka do che a nih. Ka kawlhnâm chu a pâia inthokin phawi ka ta, mi fel le mi rilohai inang rongin rawt ka tih. 4 Sim le hmar inkâra um mi fel le mi rilohai ka rawt ding a ni leiin ka kawlhnâm chu phawi zing ka tih. 5 Chu pha chun mi po poin, kei LALPA hin ka kawlhnâm chu ka phawi a nih ti hung hre tâng an ta, a pâiah lût nawk ta naw nih. 6 "Chuleiin, mihriem naupa, inrûm rawh! An hmaah lung na tak le beidong takin inrûm ngawi ngawi rawh. 7 'Ieng leia inrûm am i na?' an ti chê chun, 'Chanchin pangzatum hung tlung ding leia inrûm ka nih. Lungril tin intui zop a ta, bân po po zoi thlàng a ta, ngàituona po po chàu tlep a ta, khûp po po tui angin zop thlâng a tih' ti rawh. Ngai rawh, a hung tlung mêk ie! Tlung ngei a tih, ti hi Lalpa PATHIEN thu suok a nih, ti rawh" tiin. 8 Chun, LALPA thu chu ka kuomah a hung tlung a. 9 "Mihriem naupa, hril lawk la, hieng hin ti rawh: 'LALPA chun hieng hin a tih:'Kawlhnâm chu, kawlhnâm chu, Tàt ngei le nawt tler a ni tah: 10 Mi sâtna dinga tàt ngei, Tle lep dinga nawt tlêt chu!Ka naupa Juda lal hmol ringin, Ei la hlim zing ding am a ni?Kawlhnâm chun ieng ang hmol khom, Tham naw hrim a nei dêr nawh. 11 Kawlhnâm chu vai vèl dinga, An innawt tlèttir a na, Thattu kuta vilik dinga, An intàt ngeitir a ni si a. 12 Mihriem naupa inrûm la, Inring takin khêk suok rawh, Ka mihai tuor ding a ni si a; Israel mi lien po pohai khom. Ka mihai leh a ruolin, Kawlhnâm kuomah an pèk suok; Chuleiin, awm inchum rawh. 13 Fiena hung tlung ngei a tih. Kawlhnâmin ienga a ngai naw, Juda lal hmol chu lo tawp ta sien, Iengtin am ni tâng a ta?Lalpa PATHIEN chun a tih. 14 "Chuleiin, mihriem naupa, Kut benin thu hril lawk rawh. Kawlhnâm chun voi hni sât sien, Voi thum khom sât non raw se; Mi thatna kawlhnâm a na, Tam tak thatna ding a na, Sîr tinah inlêng raw se. 15 An lungril zopna ding le, Mi tam tak vai thlûkna di'n, Kotkhàr bul tina hai chun, Kawlhnâm ka sie vong a nih. Kawlphe ang inlep zok zokin, Thìna chemsen chu an vilik. 16 Aw kawlhnâm, chang tieng sat la, Voi tieng khom sât zot zot rawh, I be nghatna tieng tieng chu. 17 Kei khomin kut ben ka ta, Ka lungsen rè tâng a tih, Tiin LALPA chun a hril'tiin hril tawl rawh" a ta. . 18 Chun, LALPA thu chu ka kuomah a hung tlung nawk a. 19 "Mihriem naupa, Babulon lal kawlhnâm chu a hung tlung theina dingin lampui pahni sât la, chu lampuihai chu ram pakhata inthoka hung suok a ni ding a nih. Khawpui lùtna kotsuoa chuong lam pahnihai pèngnaa chun lam kawkhmuna kawkbâr siem rawh. 20 Kawkbâr pakhat chun kawlhnâm lûtna ding Amon mihai khuo Raba chu inkawktir la, kawkbâr dang chun kawlhnâm lûtna ding Judai ram le Jerusalem kul tieng chu inkawktir bok rawh. 21 Babulon lal chu lam thuoma chun chawl a ta, a thal bawma thalhai chu vawrin âi sân a ta, a milemhai rawn a ta, inthawinaa ran an inhlànhai thin chu en a tih. 22 A âisânna thal vawr, Jerusalem tieng kawka tlu po chu a kut chang tiengin lâng a tih. Kul sut hongna dinghai siem a ta, mihai chu suom dingin thu pêng a ta, haw hawa kul kotkhàr chu sut hong dingin hril a ta, kul inhuolna dingin a vêlin muol dêng pawngin, thamte daw kuol a tih. 23 Jerusalem mipuihai chun Babulon lal chu thu an thlungpui ta sâ a ni leiin a âisân chu thil thlawn elah ngai an ta, sienkhom a laka an suolnahai inhriettir dingin anni chu bei a ta, man tawl a tih. 24 Chuleiin, Lalpa PATHIEN chun hieng hin a tih: 'In tuol helna chun in lungril suolzie le in thilthaw taphotah in suolzie in suklang leiin, chu thil in thaw lei chun sala thuoiin um in tih ti hi Lalpa PATHIEN thu suok a nih. 25 Aw nang Israel hotu, mi tirdakum le rilopâ, i suolna leia hremna tawpkhawk i hmûna ni ding chu a hung tlung tah ie! 26 Lalpa PATHIEN chun hieng hin a tih: I lukawm kha hlîp la, i lallukhum kha la thla rawh. A hma ang kha ni ta naw nih: mi hnuoihnunghai chawi sàng nîng an ta, mi lienhai suktlawm nîng an tih. 27 Sietna maw! Sietna maw! Ni e, sietna chu intlungtir mol ka tih! A neitu indik tak a hung hma chun indin thar ni ta naw nih; ama kuta chun pêng ka tih. 28 "Nang mihriem naupa, Amon mihai chungthu le an mi hril sietna thua chun hieng ang hin hril rawh: 'Lalpa PATHIEN chun hieng hin a tih: Nangma thatna dingin ka kawlhnâm chu phawi saa um a ni ta a, mi thatna ding le sukbohmangna dinga kawlphe anga nawt tlêt a nih. 29 I zawlnei tehlèm le âisân thiemhaiin inlàrna tehlèm an hmupèk che a, khêlin âi an sànpek bok che a. Mi rilo le mi suol i ni leiin, i chunga hremna tawpkhawk tlung ding chu a hung tlung mèk a, i rîngah kawlhnâm inbûr a tih. 30 "Kawlhnâm chu a pâiah khum nawk el rawh. I pi le pu chèngna ram, i pieng le murna ram ngeiah i chungthu chu rêl ka tih. 31 I chungah ka lungsenna mei buok ka ta, ka lungsen chokin hlieu ka ti che a, mi suksiet thiema chemkal mi tawrothai kutah pe suok ka ti che. 32 Meiah tìng an ti che a, i ram ngeiah i thisen luong a ta, tu khomin hre zui ta naw ni hai che' ti hi LALPA thu suok chu a nih, ti rawh" a ta.

Ezekiel 22

1 LALPA thu chu ka kuomah a hung tlung a. 2 "Mihriem naupa, thisen insuo hmang khawpui chungthu hi i hril naw ding am a ni? A tirdakumna po po chu hmaisanah hril rawh. 3 A kuomah, 'Lalpa PATHIEN chun hieng hin a tih: Aw khawpui, mani chunga sietna intlun dinga mani sûnga thisen insuotu le milemhai siema insukporchètu, 4 thisen insuoa thiemnaw i phur lei le milemhai siema i'n sukporchè leiin, i tawpna hun ding i kei hnai a, i tawpna kum a tlung mèk a, hnam danghai cheksol le ram dang mihai nuizatbûrah ka siem ding chè a nih. 5 Aw, hming inpawi le buoinaa sip khawpui, i sè vèla umhai le ram hlaa umhaiin nuisawng an ti chê. 6 "Ngai ta, Israel mi lien tinin i sûnga thisen insuo dinga an thuneina seng an hang chelek dàn èm èm hi! 7 I sûnga hin miin nu le pa an hmusit a; i sûngah ram dang mihai an suknomna a, fahrahai le hmeithaihai an nèksawr a. 8 Ka hmun thienghlim an suknomna a, ka chawlnihai an bawsiet a, 9 sukhlum dingin mi an hêk a, tlânga bawlhmunah inthawina ruoi fain an dawn a, hurna thilhai an thaw a. 10 I sûngah mani pahai khum sukporchètu le nuhmei thla pal laia pawl lui hlak an um a. 11 I sûngah mani tuolbawm nuhmei sukporchètu dâm, mani mo inzakumthlâk taka sukporchètu dâm le mani farhai ngei suol luitu dâm an um a. 12 I sûngah mihaiin thisen insuo dingin thamna an làk a; a pung tam tak hnotin thil an inpùktir a, tuolbawmhai thil tam tak an làk lui a, kei ngei khom in mi lo theinghil tah ti hi Lalpa PATHIEN thu suok a nih. 13 "Indik lo taka i hlèprùkna thua le nangma sûnga thisen i'n suona thuah kut ben khum ka ti che. 14 Nang ka bei ni che chun, i huoisenna khan mi ngamin i kut hràtna khan a mi tuor zo ding am a ni? Kei LALPA hin ka hril ta cheu a, ka hril ang takin thaw bok ka tih. 15 Hnam tin lai sukdar ka ti cheu a, ram tinah indar in ta, in tirdakumna chu sukbo ka tih. 16 Hnamhai mithmua tirdakumah ka siem pha cheu chun LALPA chu ka nih ti hung hre tâng in tih' tiin hril rawh, " a ta. 17 Chun, LALPA thu chu ka kuomah a hung tlung nawk a. 18 "Mihriem naupa, ka ta ding chun Israel sûngkuo chu thîr èk, rawtuina hmuna dâr hai, tîn hai, thîr hai le suon kàng êk ang chauh an ni tah. Tangkaruo tui êk ang char an nih. 19 Chuleiin, Lalpa PATHIEN chun hieng hin a tih: Thîr èk ang chauh in ni vong tah leiin, Jerusalemah dêng khawm ka ti cheu. 20 Rawtuina mei sa taka raw tui dinga miin dâr hai, tîn hai, thîr hai le suon hai a lâk khawm angin, kei khomin ka lungsen inlingin khawpui sùngah la khawm ka ti cheu a, raw tui ka ti cheu. 21 A nih, la khawm ka ti cheu a, in chungah ka lungsenna mei sem ka ta, chu taka chun intui ral in tih. 22 Rawtuina meia tangkaruo an raw tui anga raw tui in ni pha chun, kei LALPA hin ka lungsenna in chungah ka bun thlàk a nih ti hung hre tâng in tih' tiin. 23 Chun, LALPA thu chu ka kuomah a hung tlung nawk a. 24 "Mihriem naupa, a ram chungthu chu hieng ang hin hril rawh: 'Lungsen nia ruotui um nawna le ruo a sùr ngai nawna ram chu i nih. 25 Sakeibaknei inrûmin sa sè ding a vè lai ang elin anni laia mihai ngèiin an zawlneihai suksiet dàn ding thu an phier a, mi hringna an dol a, an thil hlu le rosumhai an làkpèk a, nuhmei tam tak hmeithaiin an siem a. 26 An thiempuhaiin ka dàn an bawsiet a, ka hmun thienghlim an sukporche a, thil thienghlim le thil naran an thlei naw a, mi inthieng le mi inthieng naw danglamna um lo angin an inchùktir a, ka chawlnihai an bawsiet a, anni lai tu khomin an mi'n zà nawh. 27 Anni laia hotuhai chun satene virkawngin a sa sè a kei chen ang topin, indik lo taka an hlèp rùk theina dingin thisen an insuo a, mi an that a. 28 An thilthawhai chu an zawlneihai chun inlàrna tehlèm hmuin le khêla âi sânin an tlip nàm a, 'Hi hi Lalpa PATHIEN hril a nih' an ta, LALPA hlak chun a biek tawl dèr bok si nawh. 29 A ram mihai chun mi thil la luiin an rok a, mi pasiehai le tlasamhai an nèksawr a, ram dang mihai chungthu indik naw taka rêlpêkin an suknomna a. 30 Ram chu ka suksiet nawna dinga anni laia dai lo saktu ding le kan inkâra kut lo phartu ding mi ka zong a, ka hmu si nawh. 31 Chuleiin, an thilthaw phû angin an lu chungah ka lungsenna chu bun thlâng ka ta, ka lungsen inlingin anni chu kàng hmang a tih ti hi Lalpa PATHIEN thu suok a nih, ' ti rawh" a ta.

Ezekiel 23

1 LALPA thu chu ka kuomah a hung tlung a. 2 "Mihriem naupa, nuhmei pahni an um a, nu hmunkhat an nih. 3 An tleirawla inthokin Aigupta ramah an inzor a, chu taka chun an nene tlàipêkin, an tleirawl tâng nem chu an chùlpèk a. 4 A upa lem hming chu Ohola na, a sangnu hming chu Oholiba a nih. An pahni chun nuhmeiin ka nei a, naupa le naunuhai an mi neipèk a. Ohola chu Samaria inentirna a na, Oholiba chu Jerusalem inentirna a nih. 5 "Ohola chu ka nuhmei a ni lai zingin a hur hmang a, mi râlhrât Asuria-hai chu huorin a hnot a. 6 Anni chu zakuo dumpawla inthuom, mi lien le mi lal, tlangvàl hmeltha thlang khawm, sakor chungchuong mi vong an nih. 7 Chuong mi lienhai lai chun inphalrâiin, a hurpui taphot milem biek chu be ve peiin a'n sukporche a. 8 A tleirawl lai Aiguptaah inzor a, mihan zàlpui a, a tleirawl tâng vûm chûl a, an chàkna an hrîkthlàk hlak lai nun kha a bànsan ngai nawh. 9 Chuleiin, a ngaizawng le a hurpui Asuriahai kutah ka pêk tah a nih. 10 Anni chun kawlhnâmin an that a, saruokin an màksan a, a naupahai le naunuhai an làkpèk a. A thil tuor chu nuhmeihai lai inthìna takin an hung hmang tah hiel a nih. 11 A sangnu Oholiba chun chu chu a hmu vong a, hur tieng le inzor a chàkna tieng chu a unu nêk daiin a zuolkai lem a. 12 Tlangvàl châkum tak tak vong Asuria mihai, a then ram optu dâm, kawmandar dâm, râldo mi thuom famkima inthuom dâm le sakor chungchuong mihai chu a hnot a. 13 Ama khom chu a'n sukporche ve a, an pahni chun lampui thuhmun an hraw a. 14 A hurna chu a hung zuol tul tul a. Kaldai ruol lim, sen vûta an ziek, banga intâr chu a hmu a. 15 Chuonghai chun kawngchùn an chùn a, lukawm mawi tak an kawm bûr a, hang en khoma hotu ni awm hlie hlie an ni a, Kaldai rama Babulon mi sakor tawlailir khaltuhai lim a nih. 16 Anni a hang hmu chun a châk huom huom a, Kaldai ram chenin palai bawngte a tir a. 17 Chuongchun, Babulon mihai chu an hung a, an hung zàlpui a, an sukporche a. Dit tawka an sukporchè hnung chun anni chu nghokin a zàmsan a. 18 Chuonga uolau taka inzor le inhlìm a thaw lei chun a u ka nghatsan ang bokin beidongin ka nghatsan a. 19 Sienkhom, a tleirawl laia Aigupta rama a'n zor lai kha hre zingin a'n phalrai deu deu si. 20 Chuong laia a hurpuihai chu sabengtung ser ang ser nei, sakor chè zât zet chè suok thei an nih. 21 Chuleiin, i tleirawl hur vânglai, Aigupta mihaiin i nene tlài a, i tâng vûm an chûl hrep lai hun kha i ngai vong vong hlak a ni hih. 22 "Chuleiin, aw Oholiba, hieng hin LALPAN a tih: Ngai rawh, ngaizawng i lo umpui tah le hnàm êm êma i thè tahai po po kha nangma khingtu dingin kil tina inthokin ka hung tir tawl ding a nih. 23 Babulon mihai le Kaldai mihai po po, Pekod mihai, Soa mihai, Koa mihai, Asuria mi po po, tlangvàl hmêl tha tak tak, a then ram optu dâm, kawmandar dâm, sakor tawlailir neitu dâm, mi hmingthang dâm, an rênga sakor chungchuong mi vong chu hung an tih. 24 Anni chun hriemhrei chawiin, indona tawlailir hai, thil phurtu tawlailir hai le mipui tam tak thuoiin hung bei an ti che a, phaw chîn le phaw lien chawiin, dâr lukhum khumin sîr tinah hung inhuol an ti che. An nuom dàn ang anga i chungthu rêl le hrem ding chein an kutah ka pêk suok ta chê a nih. 25 Ka thìkthu lungsen inling lai ang elin lungsen takin bei an ti che a, i hnâr le i nakawrhai ât thlàng an ta, a la dam sunhai chu kawlhnâmin that an tih. I naunuhai le naupahai chu man an ta, an man bâng po chu meiin raw hlum an tih. 26 I silfènhai hlîppêk vong an ti che a, i belmawi tha tak takhai khom làkpêk an ti che. 27 Chuong ang chun Aiguptaa inthoka i chìng tan hurna le nawchizorna chu suktawp ka ta, chuong tieng pang chu ngaiin mit inlèn ta naw ti ni a, Aigupta khom hre fu zing ta naw ti nih. 28 "Lalpa PATHIEN chun hieng hin a tih: 'Ngai rawh, i theidà, ngei êm êma i nghatsanhai kuta khan ka pêk suok ding chè a nih. 29 Theida takin soisak an ti che a, inrim taka i thaw rahai po po làkpêk vong an ti che. Saruok inkhumna nei loin màksan an ti che a, i nawchizorna chu muolpho taka tar langin um a tih. 30 Hnam danghai hnota an milemhaia i'n sukporchè leiin, i zàuthauna le inphalraina chun hieng thil hi i chungah a hung intlun a nih. 31 I u anga i khawsak ve pei leiin tuorna no chu i kutah indomtir vèng ka ti che. 32 "Lalpa PATHIEN chun hieng hin a tih:I zuorpui no tung, sip luou chu, Nang khomin dawn vêng i tih; Nuisaw le chèksolin um i tih, A keng rawn nasa hle si a! 33 Inruina le lungngainaa sip, I zuorpui Samaria no chu, Sietna le ràuna no a ni si a! 34 Kang rawtin dawn vong i ta, A no chu dêng koi i ta, I tâng bawr huot thlèr i tih'ti hi kei, Lalpa PATHIEN hin ka puong a nih. 35 "Chuleiin, Lalpa PATHIEN chun hieng hin a tih: Mi theinghil a, i mi hnungson tah leiin, i hurna le nawchizorna maw chu nangin phur i tih" tiin. 36 LALPA chun ka kuomah hieng hin a hril nawk a. "Mihriem naupa, Ohola le Oholiba chungthu chu i rèl naw ding am a ni? An thil chìng tirdakum leh hmason rawh. 37 Inzorin an uire a, an kutah thisen a kai hnuong a nih. Milem an biek a, ka ta dinga an mi hringpèk nauhai chu an that a, an milemhai kuomah kàng hmang dingin meiah an inhlàn a nih. 38 Hi thil chauh hi ka chungah an thaw le! Ka hmun thienghlim an sukporche a, ka chawlnihai an bawsiet a. 39 Milem hmaa an nauhai an inhlàn ni lá làin, chu ni ngei chun ka Hmun Thienghlimah an hung a, ka in an hung sukporchè hlak. 40 "Chuong naw khom chu, hla taka inthokin pasal an incha a, mi an tir a, an hung tlung chun anni epna dingin an insil fai a, an mit an nâl a, belmawi thá thà an inbel a. 41 Thungna nêmah lo inthungin, an hmaa dawkan lien tak chunga chun ka rimtui le ka hriekhai chu an lo zar a. 42 An bula chun nuomtawl inhawr khawm ri a so a. Chuonghai chu thlalèra inthoka an fiel khawm, mi hur le zu rui ruol an nih. Nuhmei le a sangnu chu bânbun an inbuntir a, lukhim mawi tak an inkhimtir a. 43 Chun, nawchi zorna leia chul zo tah nuhmei chungthu chu hrilin, 'Hieng anga tar ta hnung nawchizor dâm an zàlpui nuom phot leh, zàlpui ta raw hai se chu' ka ta. 44 Chu char chu an thaw hrim a, nawchizor Ohola le Oholiba chu an zàlpui a. 45 Nisienlakhom, mi felhai ruok chun uire le thisen insuo chìngah ngai an ta, thiem naw inchangtir ngei an tih; uire hmang an ni hrim a, an kutah thisen a kai rawn a nih. 46 'Lalpa PATHIEN chun hieng hin a tih: Nangni beitu dingin mipui hung ko khawm ka ta, in roktir ka ti cheu a, soisak hrep an ti cheu. 47 Mipuiin lungin dêng an ti cheu a, kawlhnâmin sât bong an ti cheu a, in naunuhai le naupahai khom that an ta, in in pumin raw hmang an tih. 48 Chuong ang chun hurherna chu a rama inthokin sukbo ka tih, nuhmei po poin entona hmang tlâk in ni nawzie an hriet theina dingin. 49 Nangni unau hin in inphalràina maw chu tuor in ta, milem in biekna leia in suolna maw khom chu phur in tih. Chu pha chun Lalpa PATHIEN chu ka nih ti hung hre tâng in tih' tiin" a ta.

Ezekiel 24

1 Babulon sala lal Jehoiachin intànga inthoka kum kuona, thla sawmna le ni sawma, h chun LALPA thu chu ka kuomah a hung tlung nawk a. 2 "Mihriem naupa, voisun, voisun tàrik ngei hi inchik rawh, Babulon lalin Jerusalem a'n huol tan ni a nih. 3 Hi hel hmang sûngkuo kuoma hin tekhin thu hril la, "Lalpa PATHIEN chun hieng hin a tih'" tiin hril tawl rawh:'Bêl inchuon rawh, thlai suongna bêl, A sûnga chun tui bur rawh. 4 Sa chan sahai kha thlâk la, A'n hnikna lai, a mal le a dàrhai leh, A ru tha tha khom thlâk sà rawh. 5 Ran ruol laia a thá thà thlang la, Thukah thingher rol teu la, Soin intlok but but sien la, A rù khom hmin vong raw se. 6 Lalpa PATHIEN chun a hril:Thisen insuo hmang khawpui, Sa bêl anga kang dum tah, A khir rè thei lo ang chu, A chung a va hang pik ngei!A sâ kha luok teu loin, A mal malin thur dok ro. 7 " 'A thisen insuohai chu, Amaah a kai zing a; Pila vur hmang el theina, Hnuoiah bun thla ta nèkin, Lung chungah a bun thlàk a. 8 Phuba ka làk theina dinga, Lungsenna chok thotu dingin, Tu khom vur khum lo dinginLung chungah ka buok vè a nih. 9 " 'Lalpa PATHIEN chun a hril:Thisen insuona khawpui chu, A chung a va hang pik ngei!Thing tam tak buk khum ka tih. 10 Thing her buk khum teu unla, Meiin raw hlut hlut unla, Sa chu hmin taka suongin, A bawlhlohai thlâk unla, A rù tawl rakin ur ro. 11 Bêl ruok chu meiling chungah, Suon loin inchuon zing ro, Bêl chu hung inling vong a, A panga kophai zop thla a, A khir a kâng vong chenin. 12 Sienkhom a kàng khirhai chu, Nghok khopa thaw hnung khomin, A kàng hmang thei hrim hrim nawh. 13 "Hur hi i porchèna a na, Tlèng fâi ngiel ka tum che a, Sienkhom i fâi thei chuong nawh; I chunga ka lungsenna hi, Ka hrîkthlàk vong hma khat chu, Tlèng fàiin um naw ti nih. 14 "Kei LALPA hin ka hril ta a. Ka chèt hun a hung tlung ta a, ka kut kei ta nawng ka ta, lunginsiet ta nawng ka ta, inhnûk kìr ta bok naw ning. I nungchang le thilthaw angin i chungthu chu rêl ka tih' ti hi Lalpa PATHIEN thu suok a nih" tiin. 15 LALPA thu chu ka kuomah a hung tlung nawk a. 16 "Mihriem naupa, i dit lai ngawi ngawi ka làkpêk thut ding che a nih. Sienkhom, i sûn ding a ni naw a, i tap ding a ni bok nawh. 17 A rûkin inrûm la, sienkhom sûn naw rawh. I lukawm kawm zing la, pheikhok bun zing bok rawh. I hmùr hup naw la, ruokngha sa khom kîl bok naw rawh" tiin a mi hril a . 18 Chun, zîng tieng chun mipuihai kuomah thu ka hril a, zàn tieng chun ka nuhmei chu a thi el ta a. A zînga chun hrila ka um ang charin ka thaw a. 19 Mipui chun, "Hieng thil i thawhai hin kan ta dingin inentir iem an nei a?" tiin an mi'n don a. 20 Chuongchun, an kuomah hieng hin ka hril a. "LALPA thu ka kuomah a hung tlung a. 21 Lalpa PATHIEN chun hieng ang hin a tih: 'Ka Hmun Thienghlim, in thlamuongpui le suong êm êm, in en nghok ngai lo le ngàinat tawp ngai lo chu ka sukporchè ding a nih. Judai rama in màksan in naunuhai le naupahai chu kawlhnâmin sâm an tih. 22 Ka thaw ang char hin in thaw vè ding a nih. In hmùr tuom naw unla, ruokngha sa fa bok naw ro. 23 Lukawm kawm zing unla, pheikhok bun zing bok ro. Sùn naw unla, mitthli intlàktir bok naw ro. Amiruokchu, in suolna lei le in lusùnna leiin zûr hmang in tih. 24 Chuong ang chun Ezekiel hi in ta dinga entirna nîng a ta, a thaw dàn ang peiin in thaw ve ding a nih. Hi hun hi a hung tlung pha chun kei hi Lalpa PATHIEN chu ka nih ti hung hre tâng an tih' tiin. 25 "Chun, nang, mihriem naupa, an kulpui nghet, an hlimpui le suong, an en nghok ngai lo le lungdum chu làkpèk ka ta, an naunuhai le naupahai khom la hmang bok ka tih. 26 Chu ni ngei chun Jerusalema inthoka tlân suok um sun chu Babulon-ah i kuomah hung a ta, thil tlung chanchin hung hril a ti che. 27 Chu pha chun i bau hung inhong a ta, ama chu inbiekpui i ta, to zing ta nawng i tih. Chuong ang chun an ta dingin entirna nîng i ta, LALPA chu ka nizie hung hre tâng an tih" a ta.

Ezekiel 25

1 LALPA thu chu ka kuomah a hung tlung a. 2 "Mihriem naupa, Amon mihai tieng ngha la, an chungthu ding hrilpêk rawh. 3 Lalpa PATHIEN thu hi lo ngaithla dingin hieng hin hril rawh: Hi hi Lalpa PATHIEN hril chu a nih: Ka tempul an suosam lai le Israel ram an sukram lai le Judai ram mipuihai sala an thuoi lai khan, 'Eheu!' tia in lo diriem leiin, 4 khawsak mihai kutah ka pêk suok ding cheu a nih. In ramah umhmun khuorin an puon inhai zar an ta, in thei ràhai le in ranhai nenetui chu tlànin dawn an tih. 5 Raba khuo chu sanghawngseihai tlatna hmunah siem ka ta, Amon thlahai ram chu beram ruol bok khawmna hmunah siem bok ka ta, chu pha chun kei hi LALPA chu ka nih ti hre tâng in tih. 6 Lalpa PATHIEN chun hieng hin a tih: Israel ram chu kut ben khum a, ke tet khum a, in lungril po poa a sietna chungah in lawm leiin, 7 in chungah kut inlet ka ta, hnam danghai ràllàka hawn dingin inroktir ka ti cheu. Hnama tiem tlâk loah siem ka ti cheu a, ram nei loin sukchimit ka ti cheu. Ka suksiet pha cheu LALPA chu ka nih ti hre tâng in tih. 8 "Lalpa PATHIEN chun hieng hin a tih: 'Moab le Seir chun, "Entu, Juda sûngkuo chu hnam dang ang char an nih" an ti leiin, 9 Moab ramria a ram huoltu khawpui Beth Jesimot hai, Baal Meon hai le Kiriathaim hai, a ram sukropuitu khuohai khom thang vongin, 10 Moab ram le Amon thlahai ram chu khaw sak rama umhai ta dingin pêng ka ta, Amon thlahai chu hnamhai laia hriet zing ni ta naw ni hai. 11 Moab ram chungah hremna intlungtir bok ka tih. Chu pha chun LALPA chu ka nih ti hre tâng an tih. 12 "Lalpa PATHIEN chun hieng hin a tih: 'Edom chun Juda sûngkuo chungah phuba a lâk leiin nasa takin a suksuol a nih. 13 Chuleiin, Lalpa PATHIEN chun hieng hin a tih: Edom chungah kut inlet ka ta, a mi le sahai that ka ta, a ram chu suktlaran ka ta, Temana inthoka Dedan chenin kawlhnâmin sâm tawl ka tih. 14 Ka mi Israelhai hmangin Edom lakah phuba lâng ka ta, ka lungsen inling dàn ang peiin soisak an ta, phuba ka làk a nih ti hre tâng an tih ti hi Lalpa PATHIEN thu suok a nih. 15 "Lalpa PATHIEN chun hieng hin a tih: 'Filistinhai chun tiena tlânga inthoka an lo hmèlmàkna chu pâi zinga suksiet nuomna lungril neia Juda chungah phuba an làk leiin, 16 Lalpa PATHIEN chun hieng hin a tih: Ngai rawh, Filistinhai chunga chun kut ka'n let tèp a, Keret khaw mihai chu rawt ram vong ka ta, tuipui kama chênghai khom sukbohmang vong ka tih. 17 An chungah na takin phuba lâng ka ta, lungsenin hrem ka tih. An chunga phuba ka lâk pha chun, LALPA chu ka nih ti hre tâng an tih, " a ta.

Ezekiel 26

1 Babulon sala lal Jehoiachin intànga inthoka kum sawm le kum khatna, chu thla ni hmasa takai chun LALPA thu chu ka kuomah a hung tlung a. 2 "Mihriem naupa, Tura mihai chun Jerusalem siet thuah, 'Eheu! sak ram le insumdawng tuona kotsuo Jerusalem chu a se tah ie! A siet tàk leiin keinin hmûingìl pha hlauh kan tih' an ti vèl a. 3 Chuleiin, Lalpa PATHIEN chun hieng hin a tih: Aw Tura, ngai rawh, ka do chê a nih. Tuipui fawn invor tung angin nangma beitu ding hnam tam tak hung tir ka tih. 4 Tura kul banghai chu nor chim an ta, a kulbing sànghai chu sukchim an ta, a tlu sophai po po phît fai vong an ta, lungpui fil ringotin siem ka tih. 5 Kei Lalpa PATHIEN hin ka hril tah angin, ngamantuhai lèn zar hulna hmunah inchang a ta, hnam danghai rok ramin um a tih. 6 Lobûka umhai po po chu kawlhnâmin rawt ram an tih. Chu pha chun LALPA chu ka nih ti hung hre tâng an tih. 7 "Lalpa PATHIEN chun hieng hin a tih: 'Tura beitu dingin hmar tienga inthokin Babulon lal Nebukadnezzar, lalhai lal chu hung tir ka ta, a sakor hai, tawlailir hai, sakor chungchuong mi hai le sipai tam tak leh hung a tih. 8 A kam ram lobûka chênghai po po chu kawlhnâmin rawt ram a ta, inhuol a ti che a, muol pawng siem a ta, i kul chenin thamte dawng a ta, a phaw-in nêk a ti che. 9 I kul banghai chu a sut hongnain sut hong a ta, a hriemhrei chawiin i kulbing sànghai chu sukchim a tih. 10 A sakorhai chu an tam êm leiin an pilvut pal khûk chun vur khum a ti che. Miin kul bang vera khuoa a lût anga i kotkhàra an hùng lût hum hum pha chun indo sakor ruol inhnawt ri le tawlailir tlân ri chur chur lei chun i kul banghai chu inhnîng dur dur a tih. 11 I kotthlèr chu a sakorhaiin chil phit dur an ta; i mihai chu kawlhnâmin that an ta, i lungphun detdo tak takhai chu hnuoiah tlu sop a tih. 12 I hausaknahai chu râllâk sumah hawn a ta, i sumdawng thuomhnawhai chu rok a ta, i bang sukchim a ta, in i suong êm êm hlak hai chu thiek a ta, lung le thing le thil tlu hnophai chu tuipuiah pei a tih. 13 I hla sak rì suktawp ka ta, i tingtang tum rî hrim hriet ni ta ngai naw nih. 14 Lungpui fil ringotah inchangtir ka ti che a, lèn zar hulna hmunah inchang i tih. Indin ni nawk ta naw ti nih ti kei LALPA hin ka hril ta si a' ti hi Lalpa PATHIEN thu suok a nih. 15 "Hi hi Tura chungthua Lalpa PATHIEN hril chu a nih: 'I sûnga mi an thathai, hliem tuor inrûm ri le i tlûk riin tuipui kama ramhai a nghor nghìng pha chun an inthin hawp naw ding maw? 16 Chu pha chun chuong rama lalhai po po chu an lalthungphaa inthoka tumin, an silpuonhai thè thlain, an silfèn thuicheihai hlîp an ta, thlabârna puon sil an ta, hnuoiah inthung biel an ta, i siet dàn chu pangzatin inthin hlop hlop an tih. 17 I lusûnna hla ding phuok an ta, hieng ang hin tàng an ti che:Aw nang khawpui hmingthang, Tuipuia fàk zonghai chèngna, I siet dàn a va râpthlâk de!Nang le i sûnga chênghai chu, Tuifinrieta thuneitu niin, Mi tîsim in ni hlak vei le khan! 18 I hang tlûk rum ni khan chu, Vakama chênghai inthin hawpin, I tlùk sop nuoi chu pangzatin, Thlierkârhai an ài inchì'tiin. 19 Lalpa PATHIEN chun hieng hin a tih: Khawpui ràusan ta hnung, tu khom hluo lo anga ka siem pha chè chun, tuifinriet li mongah inpiltir ka ti che a, tui tam takin chìm pil a ti chê. 20 Tiena tlânga mihai lùtna khur inthûk takah thlâk ka ti che a, hmakhawsànga tlu ram tah hnuoia zâlhai angin hnuoi pilrilah anni leh inchêngtir ka ti che a, mihring ramah hung kìrin i hmun hluo ta ngai naw ti nih. 21 Tawpna râpthlàk i chungah intlungtir ka ta, boral song tàng i tih. Mihaiin zong an ti che a, sienkhom hmu ta naw top an ti che' ti hi Lalpa PATHIEN thu suok a nih.

Ezekiel 27

1 LALPA thu chu ka kuomah a hung tlung a. 2 "Mihriem naupa, Tura sûnna hla insam rawh. 3 Sumdawng hnamhai le tuipui kam ram tam tak hnaia tuipui suoa um Tura chungchâng chu, hieng ang hin Lalpa PATHIEN chun a tih tiin Tura kuoma chun hril rawh:'Aw nang Tura, "Ka mawi famkim" i ti kha maw! 4 I chètna chu tuipui lien a na, A siemtuhai chê khomin, Mawi famkim di'n an duong chê. 5 Senirj fàr thingin an siem che a, I ngula hmang ding khomin, Lebanon sidar ngat a nih an hmang. 6 Zàpna hmola i hmang dingin, Basan saisaw thing an hmang. I tuong khom Kuprak kaia inthoka, Fâr thing an hung tol a nih. I long khàndàr po po khom, Saihaa cheimawi a nih. 7 Long puonzâra i hmang khom, Aigupta puon chei a na, Chu chun i'n chikna a chuong. Puon rong dumpawl le senduk, Elisa kàia inthoka làk chu, Hliepzàrah i hmang bok a. 8 I long kartuhai po po chu, Zidon le Arvad mi an na, I long khal thiemhai po po khom, Tura khaw mi vong an nih. 9 I longa chun Geball mi un, Long thol le chàr nghettu ding, Mi themthiem ruol an um a. Tuipuia long le a puhaiin, Hung panin an dawr hlak che. 10 Persia, Lydia le Libya mihai, I sipaiah an thang tawl a, I banga an phaw le lukhum, An tàrhai chun a sukmawi che. 11 I kul chu a sîr tuokin, Arvad le Helek-han an vèng a, I kulbing sàng tieng po chuGamad mihan an vêng bok. Bangah phaw an khai tuor a, I hming sukmawitu an nih. 12 Dawr thuomhnaw i hau leiin, Tarsis-hanm an hung dawr che a, Tangkaruo, thîr le suonhai, Thuomhnaw manah an pèk che. 13 Grik, n Tubal le Mesek ramhan, Sal le dâr bûr le bèl chawiin, An hung dawr hlak bok che a. 14 Chuongna le tawlailira hmang ding, Sakor le sabengtung chawiin, Togarma-haiin an hung dawr che. 15 Dedan mihan an hung dawr che, Tuipui kama ram dang khomin, Saiha le eboni thing hung chawiin. 16 Dawr thuomhnaw i hau leiin, Edom mihan an hung dawr che, Lungmantam hai, puon senduk hai, Thuichei puon hai, puon zâi inhmì hai, Kawral le rubi belmawihaiin. 17 Juda le Israelhan an dawr che, Minit-a inthoka huit dàm, Theichang em tawl dàm, Khuoizu dàm, oliv hriek dàm, Thing hnài damdawi dàm chawiin. 18 Thilsiem chi hrang hranghai leDawr thuomhnaw i hau leiin, Helbon uoìin le Zahar sahmulin, Damaska khomin a hung dawr che. 19 Uzala Dan le Grik mihai khomin, Thîr le thingzungthakhai dàm, Mafu rimtui dàmin an hung dawr che. 20 Dedanhai chun sahmul puonpha lum, Chawiin an hung dawr hlak che. 21 Arabia mihai le Kedar lalhan, Beramte le beramchal dâm, Kèl dâm keiin an hung dawr che. 22 Seba le Rama mihaiin, Rimtui tha tak, lungmantam leRangkachak fìrin an hung dawr che. 23 Haran le Kanne le Eden mihai, Seba, Asur le Kilmad ramaSumdawnghan an hung dawr che. 24 Silfèn mawihai, puon dumpawlhai, Thuichei puonhai, karpet rong hrang hrang, Pat thlûra det taka tàhai chu, Chawiin an hung dawr hlak che. 25 Tarsis long ruol po po chu, I thuomhnaw phurtu an na, Tuipuiah an intlon duol duol a, An phur khom a rik tawl hle. 26 Sienkhom long khaltuhaiin, Tui fawnah an khal lùt che; Tuipui laili lai taka chun, Khaw sak thliin hung notin, A nuoi phit ding che a nih. 27 I hausakna, dawr thuomhnaw, Long mihai le long khaltuhai, Long siemtu le chàrtuhai, Sumdawngtuhai le sipaihai, Long sûnga um po po leh, Long siet i tuok ni pha chun, Tuipuiah pil vong in tih. 28 I long khaltuhai khêk ri chun, Va kama mihai sukthin a ta, 29 Long karna hmol cheltuhaiin, Long chu tlànsan vong an ta, Long khaltu le long mihai chu, Va kama chun ngîr an tih. 30 I chungah tap rawl insuoin, Lung na takin tap khum an ti che. An luah pilvut phul an ta, Vut lai zâlin inbuol an tih. 31 Nangma leiin lu met kol an ta, Saiipin inthuom an ta, Lungna takin tàng an ti che a, I pûr inrim takin do an tih 32 Lungse vànkaiin tap an ta, Sùnna hla dâm phuok an ta, 33 I thuomhnawhai chu tuipuiah, An thon suok chàng hnamhai an tlai. I sum le pai le thuomhnawhan, Hnuoi lalhai i sukhausa hlak. 34 Sienkhom sietna i tuok ni khan, Tuipui rilah i pil hmang a, I sumdawngna thil po po khom, Nangma ruolin an thàmral tah. 35 Tuipui kama chêng po poin, An pangzat huoi huoi che a, An lalhai an inthin hawp a, Titnan an hmài a sawm kon vong. 36 Hnam tin laia sumdawngtuhan, An inchek khum tlok tlok che; I tawp dàn a râpthlâk êm a, I bo song ding a ni si" tiin. Tura lal chungthu hril lawkna

Ezekiel 28

1 LALPA thu chu ka kuomah a hung tlung a. 2 "Mihriem naupa, Tura lal kuomah hieng hin hril rawh, 'Lalpa PATHIEN chun hieng hin a tih: I lungril a chapo a, "Kei hi pathien ka nih, Tuipui laili lai takah, Pathien thungnaah ka'n thung"Tiin i hril a ni kha!Pathien anga var hielin, I lo inngài a ni khomin, Mihriem vê el chauh i na, Pathien i ni hrim hrim nawh. 3 Daniel nèkin i var lem maw? Thu thup i hriet vonga maw? 4 I varna le i hriet thiemnain, Hausakna i khawl khawm a, I robawmah rangkachak leTangkaruo i hlù lùt rawn hle. 5 I sumdawng thiemna leiin, I hung hausa ta hle a, I hung hausa ta leiin, I hung chapo tah a nih. 6 Chuleiin, Lalpa PATHIEN chun, Hieng ang hin a ti a nih:Pathien anga var hiel a, I hung inngài ta leiin, 7 Nangma hung beitu dingin, Hnam dang mi tibaium tak, I kuomah hung tir ka ta, I varna chungah kawlhnâm, Inlet khum an ti che a, I ropuina sun tlang an tih. 8 Khurah hnûk lùt an ti che a, Tuipui rilah rawng takin, An that ding che a ni si. 9 A thattu che hmaa chun, "Pathien ka nih" i ti ngam ding? A thattu che kuta chun, Pathien ni naw ti ni a, Mihriem el ni lem i tih. 10 Ram dang mihai kuta chun, Ser tan lo thiin thîng i tih'Lalpa PATHIENIN a tih. 11 Chun, LALPA thu chu ka kuomah a hung tlung nawk a. 12 "Mihriem naupa, Tura lal sûnna hla insam la, a kuomah hieng ang hin hril rawh: 'Hi hi Lalpa PATHIEN hril chu a nih:Varna le hmèl thatnaa, Famkim tling zo i ni khah! 13 Pathien huon Edenah chêngin, Lunghlu tinrêng i'n bel a, Rubi, topaz, emeral, Krisolit, onik le jaspi, Safir, torki le beril haiin, Lunghluhai belna ding chu, Rangkachaka siem a na, Siema i um ni ngei khan, Chuonghai chu buotsai a nih. 14 Vêngtu cherub ni dingin, Hriek khom ka nâl diem che a, Chu dinga namnghet i nih. Pathien tlâng thienghlimah umin, Lunghlu inling chungah i lêng. 15 Siema i uma inthokin, Rîtlona i thaw hma po khan, Soisel boin iIkhawsa hlak. 16 I sumdawngna a hung lien a, Inpawngnêknan i hung sip a, Suolah i tlu lût ta si. Pathien tlânga inthokin, Hnawlin ka hnot suok che a; Vêngtu cherub-a ka ruot ni la khom, Lunghlu ling laia inthokin, Ka hnot suok chê a ni kha. 17 I hmêl thatnan lungrilah, Chapona a pêk che a, I varna khom i ropuinan, A hung sukkhawlo vong a; Hnuoiah ka pei thlàk che a, Lalhai hrilfàk tling khopin, Ennuomah ka siem che hi. 18 Fel lo taka sumdawnga, Suol tam tak i thaw leiin, I hmun thienghlim po po chu, Tirdakumah i siem a, Chuleichun nangni sûngah, Mei ka hung insuoktir a, Chu chun a kàng hmang che a, A thlîr taphot mithmuah, Meivàmah ka'n changtir che. 19 A hretu che hnam tinin, Maktiin pangzat an ti che, I tawp dàn a râpthlâk êm a, I bo song ding a ni si" tiin. 20 LALPA thu chu ka kuomah a hung tlung a: 21 "Mihriem naupa, Sidon khuo tieng ngha la, a chungthu ding hieng hin hril rawh: 22 'Lalpa PATHIEN chun hieng hin a tih:" Aw Sidon, ka khing che a nih; I sûngah chawimawi ni nawk ka tih. Hremna ka'n tlun zo phaa, Ka thienghlimzie ka'n entir pha, LALPA chu ka nizie hrieng in tih. 23 Hripui inlèngtir ka ta, Kotthlêrah thisen luong a tih. A sûngah ruong tlu phung a, Sîr tinah kawlhnâm a'n lèng pha, LALPA chu ka nih ti hrieng an tih. 24 "Chun, hling buk le hling zum anga Israel sûngkuohai na taka sun hlaktu tuolbawm suol um ta naw ni hai. Chu pha chun Lalpa PATHIEN chu ka nih ti hung hre tâng an tih. 25 "Lalpa PATHIEN chun hieng hin a tih: An um darna ram tina inthoka Israel sûngkuohai ka thuoi khawm pha chun, hnam tin mithmuah Israelhai lai ka thienghlimna inentir ka ta, chu pha chun Jakob kuoma ka pèk, an ram ngeia chun chêng tâng an tih. 26 Chuongchun, him takin um tàng an ta, inhai bawlin grêp huonhai siem an ta; anni sukse tumtu, an vèla chêng hnamhai ka hrem pha chun muong takin um tàng an tih. Chu phâ chun kei hi LALPA an Pathien chu ka nih ti hre tâng an tih" tiin.

Ezekiel 29

1 Babulon sala lal Jehoiachin intànga inthoka kum sawmna, thla sawmna le ni sawm le ni hninao chun LALPA thu ka kuomah a hung tlung a. 2 "Mihriem naupa, Aigupta lal Faraw chu hmason la, a chungthu le Aigupta ram po po chungthu ding hrilpêk rawh. 3 Hieng hin hril rawh: 'Lalpa PATHIEN chun hieng hin a tih:Nang Aigupta lal Faraw, Vadung suoa rûlpui hrèu bok hlak, Ka khing che a nih. "Nile vadung hi ka tâ a na, Keimain ka siem a nih"I ti rop hlak a ni kha! 4 I khâkah ngakuoiin kuoi ka ti che a, I phuhlipah nga inkopptir ka ta, I phuhlipa kâi ngâ po po leh, Vadunga inthok pot suok ka ti che. 5 Nang le i vadunga ngâ po po, Thlalèrah màksan ka ti cheu. Ram palailèngah tla dar in ta, Rùt khawm ni naw ti niu a, Ramsa le chunglèng vatêhaiTlàn dingin pe suok ka cheu. 6 "Chu pha chun, Aigupta rama chêng po poin kei hi LALPA chu ka nih ti hung hre tâng an tih. Israel sûngkuo ta dingin luong hmol i lo ni hlak a. 7 An hang thun chê leh i por ruop a, an dàr an her pha a; an hang ringsan tum che leh i tliek buk a, an zàng ru a'n pelsol a. 8 "Chuleiin, Lalpa PATHIEN chun hieng hin a tih: Nangma bei dingin kawlhnâm leh hung inthok ka ta, i mi le sahai rawt ram vong ka tih. 9 'Nile vadung hi ka tâ a na, keima siem a nih' i ti hlak leiin, Aigupta chu ràusan ram inchangtir ka ta, chu phâ chun LALPA chu ka nih ti hung hre tâng an tih. 10 Chuleiin, nang le i vadunghai hi ka do cheu a, Migdol-a inthoka Aswan chen le Ethiopia ramri chenin sukram vong ka ta, ràusan ramah siem ka tih. 11 Kum sawmli sûng chu mihriem khom ramsa khomin sir naw ni hai a, hluotu um naw ni hai. 12 Aigupta chu ràusan ramah siem ka ta, a khawpui chu kum sawmli sûng hluotu um loin tlu ram a tih. Aigupta mihai chu hnam tin lai hnot dar ka ta, ram tinah indar an tih. 13 Chuong sa khom chun, Lalpa PATHIEN chun hieng hin a tih: 'Kum sawmli a ral pha Aigupta mihai chu an tlàn darna hnamhai laia inthok chun thuoi khawm nawk ka tih. 14 An saltàngnaa inthokin thuoi kîr ka ta, an pi le puhai ram, Aigupta chuonchungah thuoi kîr ka ta, chu taka chun tlawm takin inlal an tih. 15 Lalram po po laia a mong dàp nîng a ta, hnam danghai chungah inlek ta ngai naw ni a, hnam dang chunga thu nei nawk ta lo dingin hrât naw takin siem ka tih. 16 Israelhai ringsan ni ta loin, thangpuitu dinga Aigupta tieng an ngha zàta an suolzie lo inhriet nontirtu hung ni ta lem a tih. Chu phâ chun Lalpa PATHIEN chu ka nih ti hung hre tâng an tih a tih' ti rawh" tiin. 17 Babulon sala lal Jehoiachin intànga inthoka kum sawmhni le kum sarina, thla khatna le ni khatnap chun LALPA thu chu ka kuomah a hung tlung a. 18 "Mihriem naupa, Babulon lal Nebukadnezzar chun ngor taka Tura bei dingin a sipaihai a nor rak a, an lu kol rak khop le an dàr vunhai inhlip neng nung khopin an bei a, sienkhom ama le a sipaihaiin Tura an beinaa inthokin hlawkna ieng khom an hmu si nawh. 19 Chuleiin, Lalpa PATHIEN chun hieng hin a tih: Aigupta ram chu Babulon lal Nebukadnezzar kutah pêng ka ta, a hausaknahai chu hawn a tih. Rok a ta, a rama thil umhai chu râllâk sumah lâng a ta, chu chu a sipaihai hlawah pêng a tih. 20 Ama le a sipaihaiin ka rong an bawl leiin Aigupta ram hi lawmmanah ka pêk ding a nih ti hi Lalpa PATHIEN thu suok a nih. 21 "Chu ni chun Israel sûngkuo chu sukhrât ka ta, an hmaah thu inhriltir ka ti che a, chu phâ chun LALPA chu ka nih ti hung hre tâng an tih" tiin.

Ezekiel 30

1 LALPA thu chu ka kuomah a hung tlung a. 2 "Mihriem naupa, hril lawk la, 'Hieng hin Lalpa PATHIEN chun a tih' tiin hril rawh:'E khai! Chungrikna nî tak hi chu aw!'Tiin tap khêk chèl chûl ro. 3 Chu nî chu a hnâi ta a, LALPA ni chu a hnâi tah, Sûmpui hung zìngna ni ding, Hnamhai sietna ni ding chu. 4 Aigupta chungah chemsen inlêngin, Lungngainan Ethiopia tlàk buok a tih: Aiguptaah ruong zâl thluk a, A hausaknahai tol hmangpèk a, A lungphumhai a chim ni chun. 5 Ethiopia, Put, Lydia le Arabia, Libya le thuthlung rama chêng po po, Aigupta leh chemsenin tlûng an tih. 6 LALPA chun hieng hin a tih:Aigupta inkoppuihai po po khom, An rêngin tlu vong an ta, A tha hràt a suong hlak chu, Chàuin hung zûr thlàng a ta, Migdol a'nthok Aswan chenin, Kawlhnâmin tlu vong an tih'Lalpa PATHIEN chun a tih. 7 Ràusana um ramhai lai, Ram râusan ni vêng an ta, An khawpui ràusanhai khom, Khaw chul ram chang tàng an tih. 8 Aigupta ka raw phaa, A thangpuituhai ka rawt ram pha, LALPA chu ka nih ti hrieng an tih. 9 "Chu ni chun ngai tha deua um Ethiopia mihai chu thawng tho dingin zuolkohai chu longin suok an tih. Aigupta siet tuok ni chun beidongnan hung nang tawl a tih; a hung tlung ngei ding a ni si a. 10 "Lalpa PATHIEN chun hieng hin a tih: Babulon lal Nebukadnezzar kut hmangin, Aigupta hausakna chu suktawp ka tih. 11 Hnamhai laia tìbàium tak, Ama le a sipai ruolhai chu, Ram sukse dingin hung an ta, Aigupta lakah chemsen inlèn an ta, A ram chu ruongin sip a tih. 12 Nile vadung hnàrhai po po, A rêngin sukkang ka ta, Ram chu mi suolhai kuomah, Ka zor hmang vong ding a nih. Ram dang mihai kut hmangin, A ram chu sukram ka tih, A sûnga um po po leh, ti hiKei LALPA hin ka puong a nih. 13 "Lalpa PATHIEN chun hieng hin a tih:A lembiekhai suksieng ka ta, Memfis-aq a milemhai po po khom, Sukbohmang vong ka tih. Aiguptaah lal um ta nawng an ta, A ram pumah titna inlêng a tih. 14 Aigupta chuonchung sukram ka ta, Zoanr chu meiin raw hmang ka ta, Thebes khom hrem bok ka tih. 15 Aigupta kulpui Pelusium chungah, Ka lungsenna buok khum ka ta, Thebe ruol chu rawt tawl ka tih. 16 Aiguptaah mei insuong ka ta, Pelusium chu na tuorin inkon a ta, Thebe chu thlipuiin nuoi a ta, Memfis chu buoinan tlung chil a tih. 17 Heliopolis le Bubastis tlangvàlhai chu, Kawlhnâmin tlu phung an ta, A khaw mihai chu salah thuoi an tih. 18 Aigupta ringkol ka suktliek pha, A chapopui hràtna ka suktawp pha, Tahpanhest chan chu inthim a tih; Ama chu sumpuiin chìm khum a ta, A khaw mihai chu salin thuoi an tih. 19 Chuong ang chun Aigupta chungah, Hremna chu intlungtir ka ta, LALPA chu ka nih ti hrieng an tih. 20 Babulon sala lal Jehoiachin intànga inthoka kum sawm le kum khatna, thla khatna le ni sarinau chun LALPA thu chu ka kuomah a hung tlung a. 21 "Mihriem naupa, Aigupta lal Faraw bàn chu ka suktliek ta a, a hung dam nawk theina dinga tuom a ni naw a, kawlhnâm chel thei khopa hung hrât nawk thei dinga ngar khuo a ni bok nawh. 22 Chuleiin, Lalpa PATHIEN chun hieng hin a tih: Ngai rawh, Aigupta lal Faraw chu ka khing a nih. A bân tliek nawna tieng khom suktliek ka ta, kawlhnâm chel thei ta naw nih. 23 Aigupta mihai chu hnam tin lai sukdar ka ta, ram tinah dêng dar ka tih. 24 Babulon lal bân chu sukhrât ka ta, a kutah ka kawlhnâm inchawitir ka ta, Faraw bân ruok chu vaw bong ka ta, a hmaa chun thi suola na tuor inrûm angin inrûm a tih. 25 Babulon lal bàn chu sukhrât ka ta, Faraw bàn chu zûr tlep a tih. Babulon lal kutah ka kawlhnâm sie a, Aigupta lakah a vilik pha chun, LALPA chu ka nih ti hre tâng an tih. 26 Aigupta mihai chu hnam tin lai sukdar ka ta, ram tinah um dar an tih. Chu phâ chun LALPA chu ka nih ti hrieng an tih" tiin.

Ezekiel 31

1 Babulon sala lal Jehoiachin intànga inthoka kum sawm le kum khatna, thla thumna, ni khatnav chun LALPA thu chu ka kuomah a hung tlung a. 2 "Mihriem naupa, Aigupta lal Faraw le a khuo le tuihai kuoma chun hieng hin hril rawh: Ropuinaa sîng zotu che, Tu am an um hrim hrim a? 3 Lebanon sidar lo ni ta hlak, Asuria ang kha i nih. A zârin thing dang khûmin, Thing buk dang po po chungah, A dawk lûr hlak a ni kha. 4 Siktui inthienga chawm lien, Tui hnàr rila chawm lien a nih . A kûng bul vèla hai chun, Fiertui a luong dem dem a. Tui hnàr hung luong dar pei chun, Ram thing tin an chawm lien a. 5 Chuonga inthang lien peiin, Thing danghai a khûm vong a, A buk a lien deu deu a, A kâuhai a hung zâr duoi a, Fiertui thieng chawm a ni si. 6 Chunglèng va tinrênghaiin, A zârah bu an sep a; Hnuoilèng ramsa tinrênghan, A buk hnuoiah hrai chawiin, Hnam ropui po pohai chu, A zâr hlimah an chèng a. 7 A ropuiin a mawi a, A kâu chu a'n zâr duoi a, A zung chu fiertui thiengin, Hnienghnâr takin a chawm si. 8 Pathien huona sidarhai, Ama sîng zo an um nawh; Far thing po pohai nèkin, A buk a'n zàr tha lem a, Thing danghai po po khomin, A kâu zâr chu an chen nawh. Pathien huona thinghaiin, A mawizie an sìng zo nawh. 9 A kâu zâr inbuk hlûpa, Mawi taka siemtu ka na, Pathien huon Eden thinghan, An thìk le er tak a nih. 10 "Chuleiin, Lalpa PATHIEN chun hieng hin a tih: A hung insàng tah êm êm a, thing buk dang po po chungah a dawk lûr a, a'n sâng êm lei chun a hung chapo a. 11 Chuleiin ka hnawl a, hnam dang lal kutah ka pêk a, ama chun a rîtlona ang charin lo thawng a tih. 12 Hnam tibaium tak takhai chun phûr thluin màksan an ta, tlâng le phaihai a bukin del a ta, ruoma hai chun a kâu tliekhai chu tla dar rem rum a tih. A buk hlima chêng hnam po pohai chu hung suok an ta, zàmsan an tih. 13 Chunglèng vatêhai chun a bukah bu sep an ta, a kâu zâr hnuoia chun ramsahai chu chêng an tih. 14 Chuleiin, tuta inthok chu, ieng anga tui thaa chawm lien thing khom ni sien, ama anga sûm tong rak khopa insâng lûr el um ta ngai naw ni hai. Mihriemhai ang boka thi ding le mithi khuo, khur inthùka liem thla dinga ruot sa vong an ni si a. 15 "Lalpa PATHIEN chun hieng hin a tih: Mithi khuoa a liem ni chun tui hnàr rilhai chu ka'n sùntir a, an hnàrhai inkang châttirin tui an insuo nawh. Lebanon chu lusûn thuom ka'n beltir a, ram thing hnahai khom a thêm vong a. 16 Khuorkhurûma liem tahai umna thlàna ka pei thlàk ni chun, a tlàk ri hrein hnamhai chu an inthin hawp a. Mithi khuoa lo liem tah, tuia chawm Edena thing po pohai le Lebanona thing thâ thàhai chun hnuoi sûnga an umnaa a hung tlàk thlàk an hmu chun an lawm a. 17 A zâr hlima chêng, a'n koppui hlak hnamhai khom chu ama ruolin kawlhnâma an that tahai laia um ve dingin an liem thla diel a. 18 "Eden thinghai lai hin mawina le ropuinaah nang le hril khì ding tu am an um a? Chuong sa khom chun nang chu Eden thinghai leh hnuoi rilah pei thlâk nîng i ta, chu taka chun kawlhnâma that, sertan lohai lai zâl vêng i tih. Hi hi Faraw le a khuo le tuihai chan chu a nih' ti hi Lalpa PATHIEN thu suok a nih" tiin.

Ezekiel 32

1 Babulon sala Jehoiachin intànga inthoka kum sawm le kum hnina, thla sawm le thla hnina le ni khatnaw chun LALPA thu chu ka kuomah a hung tlung a. 2 "Mihriem naupa, Aigupta lal Faraw sûnna hla inzawt la, a kuomah hieng hin hril rawh:"Hnamhai lai chun nang chu, Sakeibaknei angin i'n ngai a, Tuipuiah dragon angin i'n ngai; I chèngna va hnârah inper velin, I kein tui i chok phul buon buon a, Vadung tuihai i suknu zo. 3 "Lalpa PATHIEN chun, I chungthu hieng hin a tih:'Lèna mantu ding chêin, Mi tam tak hung tir ka ta, Lènin khâi suok an ti chê. 4 Khawmuolah pei ka ti che a, Khaw hnawmah pei suok ka ti che, Chunglèng vatehai po po chu, A tlàn ding che'n hung tir ka ta, Hnuoia ramsahai po poin, Fain pot chen neng an ti che. 5 I ruong hmon chu tlâng le ruomah, Thè dar phengphung ka tih. 6 I chèngna muol le tlângah, I thisen inluongtir ka ta, Kor tin le ruom tinhai chu, I ruongin hnaw sip ka tih. 7 Ka sukchimit phâ che chun, Vànhai khi inkhum ka ta, Arasihai sukthim ka ta, Nisa chu sûm inhlietir ka ta, Thlain var insuo naw nih. 8 Vàn sânga var po pohai, I chungah sukthim ka ta, Thimin i ram bawm a tih, Lalpa PATHIEN chun a tih. 9 I siet ni ka'n tlun pha chun, I hriet ngai lo rama chen, Mi tam tak chî-ài an tih. 10 Mihai pangzat huoi huoiin, An hmaah siem ka ti che a, Ka kawlhnâm ka vilik pha, Nangma leiin lalhai khom, Thlabârin inthin an tih. I siet ni ka'n tlun pha chun, Mi tinin nun chàn inlauin, Tiin inthin hawp an tih. 11 "Lalpa PATHIEN chun hieng hin a tih:'Babulon lal kawlhnâm chun, A hung bei ding chè a nih. 12 Mi râlhrânghai kawlhnâmah, I mihai intlûktir ka tih, Hnam tibaium tawphai kutah. Aigupta ropuina suksein, A mipuihai po po chu, Ka sukbohmang ding a nih. 13 Tui tam tak kama tla, A ran ruolhai sukbo ka ta, Mihriem kê le ran kein, Tui chu pal nu ta naw nih. 14 Tuihai chu sukvâr ka ta, An vadung chu hriek angin, Luong del del ta lem a tih, Lalpa PATHIEN chun a tih. 15 Aigupta suktlaran a, A iengkim sukram vong a, A chênghai ka sukhlum pha, Kei hi LALPA chu ka nih, Ti hi hung hre tâng an tih, 'tiin. 16 "Hi hi a sûnna hla ding chu a nih. Hnam tin naunuhai chun hi tap hla hi insamin, Aigupta le a mihai chu tàng an tih' ti hi Lalpa PATHIEN thu suok a nih. 17 Babulon sala Jehoiachin inlala inthoka kum sawm le kum hnina, ni sawm le ni nganax chun LALPA thu chu ka kuomah a hung tlung a. 18 "Mihriem naupa, Aigupta ruol chu tap khum rak rak la, ama le hnam ropui tak tak naunuhai chu khuorkhuruma liem thla tahai kuom tieng hnuoi rilah thon thla tawl rawh. 19 An kuoma chun, 'Mi nêkin ditsak i hlaw bik ding maw? Fe thla la, sertan lohai lai khun zu zâl rawh'tiin hril rawh. 20 Kawlhnâma thathai lai chun zâl vèng an tih. Kawlhnâm chu phawi a ni ta a; a mihai rawi leh hnûk hmang rawh. 21 Thlàn khur nghâka um thuoitu hràthai chun Aigupta le a thloptuhai chungthu chu hrilin, 'An hung thla a, kawlhnâma that, sertan lohai lai an zàl' la ting an tih. 22 "Thlàna chun Asuria chu a sipaihai po po leh a um a, kawlhnâma a mi thathai thlàn chun a'n huol vel a. 23 An thlànhai chu khuorkhurûm inthûk taka um a na, a sipaihai thlàn chun a thlàn chu an inhuol vel a. Mihring rama thlabârna siem hlaktuhai po po chu kawlhnâma that vong an nih. 24 "Chu taka chun Elam khom chu a zâl ve a, a mihai thlânin a'n huol vel a. An rêng chun kawlhnâma that vong an nih. Anni chu mihring rama thlabàrna siem hlaktu le sertan lohai laia zâl dinga khuorkhurûm monga fe thlâ an nih. Thlàna chun khuorkhurûma liem tahai leh an muolphona chu an zàlpui a. 25 Thata umhai lai chun ama le a rawihai zàlna ding chu an siempèk a. An rêng chun sertan lo, kawlhnâma thi vong an nih. Mi hring rama thlabàrna siemtu an ni leiin, thathai lai inzàltirin, khuorkhurûma liem tahai leh an muolphona chu an phur tlàng a nih. 26 "Mesek le Tubal hai khom chu taka chun an rawihai leh an zàl a; an rawihai thlànin an thlàn chu a'n huol vel a. An rêngin sertan lo an na, mi hring ramah thlabàrna an siem hlak leia kawlhnâma thi vong an nih. 27 Anni chu tiena sertan lo mi râlhrât tlu tah, an râlthuomhai leh thlânah liema, an phawin an rùhai inkhuma, an kawlhnàm lukhama zâl tahai le chun hmun khatah an zàl an naw am a ni? Hieng râlhrâthai titàmumna chun mihring ram lo inhuol vèl hlak sien khom, anni hremna chu an lu chungah a tla ta si a. 28 Nang khom aw Faraw, kawlhnâma that, sertan lohai lai chun bong rem rumin zâl vêng i tih. 29 "Chu taka chun Edom khom a lalhai le hotuhai po po leh a um ve a, an hrât hle hlaka chu kawlhnâma thihai lai an rêngin an inzàltir a, sertan lo, khuorkhurûma liem tahai lai chun an sie a nih. 30 "Chu taka chun hmar tienga hotuhai chu an rêngin, Sidon mihai po po, thathai laia liem thla tahai le chun an um a, an hràtnain mi sukthlabâr hlak sienla khom kawlhnâma thi, sertan lohai lai muolpho takin an zàl a, khuorkhuruma fe tahai leh an muolpho tlàng tah a nih. 31 " 'Farawin a mihai po po, ama le kawlhnâma that tah, a sipai ruol po po leh, a lo hmu pha chun thlamuong pha hiel a tih' ti hi Lalpa PATHIEN thu suok a nih. 32 Faraw le a rawihai chu mi hring rama thlabàrna inlèngtir dinga ka hmang ni hai sien khom sertan lo, kawlhnâma thihai lai chun zâl vêng an tih' ti hi Lalpa PATHIEN thu suok a nih" a ta.

Ezekiel 33

1 LALPA thu chu ka kuomah a hung tlung a. 2 "Mihriem naupa, i hnam chanpuihai kuomah hieng hin thu hril rawh: 'A ram sûnga indona ka'n tlungtir ding pha leh, mipuihaiin anni laia mi pakhat râlvêngtuah ruot sien la, 3 ama chun râl hung a hmu pha leh mipui inrâlringna dingin tawtawrawt a mût ding a nih. 4 Tu khom tawtawrawt ri chu hrea, poisa nawtu chu râl kuta a lo thi a ni khomin a thisen maw chu ama chungah tlâng a tih. 5 Tawtawrawt ri chu a hriet a, a poisak naw leiin a thisen maw chu amain a phur a nih; poisa sien chu thi pumpel thei a tih. 6 Amiruokchu, râlvêngtu chun râl hung a hmu a, mipui inrâlring theina dinga tawtawrawt a mût si naw chun, râlin mi pakhat khom that sien, chu mi chu râlvêngtu suol leia thiah ngai ka ta, a thisen phuba chu râlvêngtu chungah lâng ka tih. 7 "Chuong ang chun nang mihriem naupa, Israel sûngkuo ta dingin râlvêngtuah ka ruot che a, chuleiin ka thu suokhai hi ngàithla la, an inrâlringna dingin hril tawl rawh. 8 Chun, keiin mi rilo chu thi ngêi ngèi a tih ti lang, inlamlèt a, a hringna hum dinga i hril si naw chun mi rilo chu a suolnaah thîng a ta, a thisen phuba chu i chungah lâng ka tih. 9 Amiruokchu, mi rilo chu inlamlèt dingin i hril a, a poisa si naw chun a suolnaah thîng a ta, nang ruok chu fihlîm i tih. 10 "Chun, mihriem naupa, Israel sûngkuohai kuomah hieng hin hril rawh: 'Ei bawsietnahai le suolnahai chun an mi del a, chuonghai lei chun ei ongrop zo tah a nih. Hieng ringot hin chu iengtin am ei hring zo ding a na?' in ti hlak a. 11 Chuleiin an kuomah, 'Mi rilo thi hin lawmna hrim ka nei naw a, inlamlèta a dam hi ka lawmna lem chu a nih ti hi kei Lalpa PATHIEN hin ka hringna sâlin ka hril. Chuleiin, inlamlètin, in nun dàn suola inthokin kîr ro! Aw Israel sûngkuohai, ieng leiin am in thi el ding a na?' tiin hril tawl rawh. 12 "Mihriem naupa, i hnam chanpuihai kuomah hieng hin hril rawh: 'Mi fel felna chun a bawsiet niah san him naw ni a, mi rilo rîtlona chun a lamlêt niah sukse bok naw nih. Mi felin a bawsiet chun a hmaa a felna leiin hring naw nih. 13 Mi fel kuomah, 'Hring ngei i tih' ti ka hril a, a felna ringa thil suol a thaw chun a thil tha thaw tah pakhat khom hriet zing ni naw ni a, a thil suol thaw lei chun thi lem a tih. 14 Chun, mi rilo kuomah, 'Thi ngêi i tih' ti ka hril a, a suolna inlamlèt a, thil tha le indik thaw a, 15 a thil inpùktir leia dakhama a làk chu pe kîr a, a thil inrùk thak kîr a, hringna petu dàn thusuokhai chu zawm a, thil tha lo ieng khom thaw loa a um chun hring ngei a ta, thi naw nih. 16 Suol a lo thaw tahai po po khom hriet zing ni ta naw nih. Thil tha le indik a thaw leiin, matheiloin hring a tih. 17 "Amiruokchu, i hnam chanpuihaiin, 'LALPA thaw dàn hi a felfàk nawh' an ti a, sienkhom anni thaw dàn a nih a felfàk naw lem chu. 18 Mi felin felna lampui nghatsana suol a thaw chun thi ngei a tih. 19 Mi riloin a rîtlona nghatsana thil tha le indik a thaw chun, a thilthaw leiin hring a tih. 20 Chuong sà khom chun, aw Israel sûngkuohai, 'LALPA thaw dàn hi a felfàk nawh' in la ti zing tho. Mi tinin in thilthaw dàn ang peiin in chungthu ka rèl ding a nih' tiin hril rawh" a ta. 21 Babulon sala kan intànga inthoka kum sawm le pahnina, thla sawmna, ni nganaay chun Jerusalema inthoka hung tlân suok mi pakhat a hung a, "Khawpui chu an làk tah!" tiin a mi hung hril a. 22 Chu mi hung tlung ni zàn tieng chun ka lu chungah LALPAN kut a hung innghat a; a tûk zîngkàra mi tlân suokin a mi hung hmu hma chun ka bàu a mi hongpêk a, ka hung tong thei ta a. 23 Chun, LALPA thu chu ka kuomah a hung tlung a. 24 "Mihriem naupa, Israel rama khawpui tlu ram hnunga chênghai chun, 'Abraham chu màkhât chauh khom ni sien ram pumpui a pêk a, eini ruok chu tam tak ei ni ta a, ram chu ei rochung dingin a mi pêk ngei chu a lo nih' an ti a. 25 Chuleiin an kuomah, 'Sa thisen in fàk a, milem biekna tieng mit in inlèn a, thisen in insuo si chun nangnin ram chu in chang dinga maw? 26 In kawlhnàm in ringsan a, thil tirdakum tam tak in thaw a, in tuolbawmhai nuhmei in sukporche a. Chuong sà khom chun ram chu in hluo ding maw? ti hi Lalpa PATHIEN thu suok a nih' tiin hril rawh. 27 "Hieng ang hin an kuomah hril rawh: 'Lalpa PATHIEN chun hieng hin a tih: 'Hmun ram ta hnunga chênghai chu kawlhnâmin thîng an ta, ram hnuoia umhai chu sakolhai fàk zo dingin pêng ka ta, kul nghet le pûka umhai chu hripuiin thîng an tih ti hi kei Lalpa PATHIEN hin ka hringna sâlin ka hril. 28 Ram chu ràusan ramah siem ka ta, an hràtna an suong èm êm hlak chu suktawp ka ta, Israel tlânghai chu ràusan an ta, tu khomin sir ta naw ni hai. 29 Thil tirdakum tak tak an thaw leia a ram ka suktlaran pha chun LALPA chu ka nih ti hung hre tâng an tih. 30 "Chun, nang, mihriem naupa, i mihai chun kul bang bul le kotkhàr bula hai an intuokna taphotah i chungchàng thu an hril nak nak a, mi tinin an unauhai kuomah, 'Hung ro, LALPA thu a hril chu va ngaithlâng ei tiu' an tih. 31 An thaw dàn pangngaiin a hon honin i kuomah hung an ta, ka mihai ni awm takin i hmaah inthung an ta, i thu ngaithlâng an ta, sienkhom a takin zawm chuong naw ni hai. An bàu chun an inpèk zozie hril an ta, an lungril ruok chun hlêprûka hausak dàn ringot a nih an ngaituo. 32 A nih, rawl mawi taka hla lênglawng sak thiem le rimawi tum thiem tak ang lekah an ngai chê a nih. I thuhai chu an hriet a, sienkhom anniah a takin hmang an tum nawh. 33 Hieng thilhai po po hi a hung tlung pha, a hung tlung ngei bok ding a na, anni lai zawlnei a lo um takzet a nih ti hung hre chauh an tih' a tih, tiin hril tawl rawh" a ta.

Ezekiel 34

1 LALPA thu chu ka kuomah a hung tlung a. 2 "Mihriem naupa, Israelhai vêngtu berampuhai chungthu chu an kuomah hieng ang hin hril rawh: 'Lalpa PATHIEN chun hieng hin a tih: Israel berampuhai, mani chauh inngaisaktuhai chung chu a pik! Berampuhai chun beram ruol an ngaisak lem ding a ni naw maw? 3 An thau in sawk a, an hmulin in inthuom lum a, a thâu thâu in that a, sienkhom beram ruol chu in enkol si nawh. 4 A songnawihai in keitlei naw a, natna neihai in ngaisak naw a, hliem tuorhai in tuompèk naw a, pêt hmanghai in thuoi kîr naw a, inhmanghai in zong bok nawh. Khauh tak le rawng takin an chungah lal in hrawt a. 5 Berampu an um naw leiin sukdarin an um a, a tlân darhai chu ramsa kolhai bu remchangah an inchang a. 6 Ka beramhai chu tlâng tin le muol tinah an indar a, hnuoi hmun tinah an invàk dar a, zongtu le enkaitu tu khom an um nawh' tiin hril rawh" a ta. 7 "Chuleiin, nangni berampuhai, LALPA thu hi ngâithla ro. 8 Ka beramhaiin berampu an nei naw leiin suomin an um a, ramsa kolhai bu an inchang a; ka berampuhaiin ka beramhai chu an zong naw a, beram ruol nêkin anni hmakhuo chauh an ngàituo lem a nih ti hi kei Lalpa PATHIEN hin ka hming meu sàlin ka hril a nih. 9 Chuleiin, aw berampuhai, LALPA thu hi lo ngâithla ro: 10 Lalpa PATHIEN chun hieng hin a tih: Berampuhai chu khing ka ta, ka beramhai maw chu anni inphurtir ka tih. Beram vêngtu an nìna chu suktawp ka ta, mani inchawmnan hmang thei ta naw ni hai. An baua inthokin ka beramhai chu inchù thlapêk ka ta, an ta dinga bù ni ta naw ni hai' tiin. 11 "Lalpa PATHIEN chun hieng hin a tih: 'Keima ngeiin ka beramhai chu zong suok ka ta, enkol tawl ka tih. 12 Berampuin a beram tla darhai enkola a umpui angin ka beramhai chu enkol ka ta, sûmpui zìng le inthim hnuoia khom ka beramhai chu an tlat darna hmuna inthokin san suok ka tih. 13 Hnam tin laia inthokin la suok ka ta, ram tina inthokin hung thuoi khawm ka ta, an ramah hung thuoi kîr ka ta, Israel tlâng le ruom le a rama umhmun an khuorna hmuna hai chun intlattir ka tih. 14 Hlo thatna hmuna hai thuoi ka ta, Israel tlâng sânghai chu an tlatna hmun nîng a tih. Chuong tlatna hmun inhoia chun bok an ta, Israel tlânga hlo tha thahai chun inchawm an tih. 15 Keima ngeiin ka beramhai chu enkol ka ta, inboktir ka tih ti hi Lalpa PATHIEN thu suok a nih. 16 Beram inhmanghai chu zong ka ta, a pêt hmanghai chu hung thuoi kîr ka tih. Hliem tuokhai tuompèk ka ta, a chauhai sukhrât ka ta, a thâuhai le a hrâthai sukbo ka ta, beram ruol chu indik takin enkol ka tih. 17 "Nangni ka beram ruolhai chungthua chun, Lalpa PATHIEN chun hieng hin a tih: Ka beramhai inkàr thu chu rêlpêk ka ta, beramchal le kèlchal inkàr thuhai khom. 18 Tlatna hmun thaa tlat hi in ta dingin a hun tawk an naw maw? Ieng leiin am tlatna hmun tha danghai chu kein in chìl siet ding a na? Tui inthieng in dawn hi a hun tawk an naw maw? Ieng leiin am tui danghai chu kein in pal nu ding a na? 19 Ka beramruolhai chun kea in sir sop hnung hlo chu petin, in pal nu ta hnung tui bal chu an dawn ding am a ni? 20 "Chuleiin, Lalpa PATHIEN chun an kuomah hieng hin a tih: Ngai ro, keima ngèiin beram thâu le beram chêr inkàr thu chu rêl ka tih. 21 A hrât nawhai in nèk pèr a, in nor lèng a, in kiin in sik a, in phîn dar hlak. 22 Kei ruok chun ka beram ruolhai chu hum ka ta, tu khomin suom ta naw ni hai. Beram le beram inkâr chungthu chu keiman rêl ka tih. 23 Anni enkoltu dingin berampu pakhat, ka siehlaw Davida ang chu sieng ka ta, ama chun enkol a ta, an vèngtu nîng a ta, anni chu chawm a tih. 24 Kei LALPA hi an Pathien nîng ka ta, ka siehlaw Davida ang chu an chunga hotu nîng a tih ti hi kei LALPA thu suok chu a nih. 25 "Chun, anni leh inremna thuthlung siem ka ta, sakolhai chu a rama inthokin sukbo ka ta, thlalèra hai khom him takin chêng an ta, ramngaw hnuoia khom ngàingam takin in bor bor thei tàng an tih. 26 Anni chu mal sawm ka ta, an vêla tlânghai khom mal sawm bok ka tih. A hun takah ruo insùrtir ka ta, malsawmna ruopui sûr a tih. 27 Rama thinghai chun rà insuong an ta, hnuoiin rà insuong a ta, a rama chênghai chu him an tih. An rìngkolhai suktliekpek a, bawia siemtuhai kuta inthoka ka san suok tawl pha chun kei hi LALPA chu ka nih ti hung hre tâng an tih. 28 Hnam danghaiin rok ta naw ni hai a, ramsa kolhaiin sè ta bok naw ni hai a, him takin khawsâng an ta, tu khomin sukti ta naw ni hai. 29 Thlai thatna hmuna mi hril chu pêng ka ta, a ram sûngah tam tuor ta naw ni hai a, hnam danghai hmusitna tuor ta bok naw ni hai. 30 Chu pha chun kei, LALPA an Pathien hi an kuomah ka um ti le Israel sûngkuo hi ka mihai an nih ti hung hre tâng an tih ti hi Lalpa PATHIEN thu suok a nih. 31 Nangni ka beramhai, ka ran tlatna hmuna beramhai hi ka mihai chu in na, keima hi in Pathien chu ka nih' ti hi Lalpa PATHIEN thu suok a nih" tiin.

Ezekiel 35

1 LALPA thu chu ka kuomah a hung tlung a. 2 "Mihriem naupa, Seir tlàng tieng ngha la, a chungthu ding hieng hin hrilpêk rawh: 3 'Lalpa PATHIEN chun hieng hin a tih: Seir tlâng, nang hi ka khing che a, i chungah kut inlet ka ta, hmun ràusanah siem ka ti che. 4 I khawpuihai intlûk ramtir vong ka ta, ràusanin um i ta, chu pha chun LALPA chu ka nih ti hung hre tâng i tih. 5 "Tiena inthoka Israelhai i theidàna kha la pâi zingin, an ngìrhmun siet lai, hremna vawrtawp an hmasuon lai khan kawlhnâmin i lo bei lem a. 6 Chuleiin, thisen insuotu kutah inhlàn ka ti che a, chu chun hnot thlûr a ti che ti hi kei, Lalpa PATHIEN hin ka hringna sâlin ka hril a nih. Thisen insuo i châk a, thisen chun hnot thlûr a ti che. 7 Seir tlàng chu ram se tawngah siem ka ta, tu khomin sir ta naw nih. 8 I tlânghai chu mithi ruongin suksip ka ta, i muol hai, phai hai le ruom haia chun kawlhnâma an thathai ruong inhlum rem rum a tih. 9 Ràusan ram ni song i ta, i khawpuihai chu tu khomin hluo ta naw ni hai. Chu pha chun kei hi LALPA chu ka nih ti hung hre tâng i tih. 10 Kei LALPA hi ka um zing laiin, 'Hieng hnam pahnihai le an ramhai hi ka ta hung nîng a ta, nei ka tih' dàm i ti vèl a. 11 Anni chu theida a, an chungah lungsen a, an ram i'n hnar ang char hin i chunga khom thaw vèng ka ta, i chungthu ka rèl pha chu keima hi an kuomah inhriettir ka tih ti hi kei Lalpa PATHIEN hin ka hringna sâlin ka hril a nih. 12 Israel tlânghai diriem khum a, "Sukramin a um ta a, dol el dingin kan kuomah pèkin a um tah" i tihai po po kha kei LALPA hin ka lo hriet vong a nih ti, chu pha chun hre tâng i tih. 13 I mi uongkhum a, insûm der loa i mi tong khumhai kha ka hriet vong. 14 Hnuoi pumpui lawmah sukram ka ti che ti hi Lalpa PATHIEN hril a nih. 15 Israel sûngkuohai rochan ram sukrama a um khan i hlim hle a, chuong ang char chun thaw vèng ka ti che. Aw nang Seir tlâng, Edom ram po po leh sukram ka ti che. Chu pha chun LALPA chu ka nih ti hung hre tâng an tih.

Ezekiel 36

1 "Mihriem naupa, Israel tlânghai chungthua chun hieng ang hin hril rawh: 'Aw Israel tlânghai, LALPA thu hi lo ngaithla ro. 2 Lalpa PATHIEN chun hieng hin a tih: 'I hmêlmahai chun èsèl takin, "Sei leh! Tlâng hluihai chu ei chang nawk an ta hi" an ti a. 3 Chuleiin, hieng ang hin an kuomah hril rawh: 'Hi hi Lalpa PATHIEN thu suok chu a nih: In vèla hnamhai chun in ram chu an nei theina dingin an bei cheu a, an sukram cheu a, an chèksol cheu a nih. 4 Chuleiin, Israel tlânghai, Lalpa PATHIEN thu hi lo ngaithla ro: tlâng hai, muol hai, ruom hai, hmun ràusan le rok tuok, in kawl le kienga hnamhai hmusit hlawhai, Lalpa PATHIEN chun hieng hin a tih: 5 Ka thahnemngai sosângin in sè vèla hnam danghai chu demin ka hril a nih. Edom lem chu ka dem nawkzuol. Dit tawka ka ran tlatna hmunhai suosàm tumin, hlim tak le lungril se takin ka ram chu a lâk a. 6 Chuleiin, Israel ram chungchàng thu chu muol le tlàng le ruom le phaihai kuomah hieng hin hril rawh: Lalpa PATHIEN chun hieng hin a tih: Hnamhai hmusit i tuor leiin ka thîkthù lung intar takin ka hril a nih. 7 I sè vèla chêng hnamhai chun muolphona tuok vèng an tih tiin Lalpa PATHIEN hin kut hlâng meuin ka'n tiemkam a nih. 8 "Aw Israel tlânghai, nangni ruok chu in kauhai hung inder tharin, ka mi Israelhai ta dingin rà insuong in tih, in tieng an hung kîr vak ding a ni si a. 9 Ka'n voi cheu a, ditsakna mitin en ka ti cheu. Ram chu inlet nawk an ta, thlài chî thlâk an tih. 10 A hluotuhai chu sukpung ka ta, Israel sûngkuo hung pung tuol tuol an tih. Khuohai chu hluo nawk an ta, hmun tlu ram tahai chu tungding nawk an tih. 11 Nangni laia khawsa mihriem le ranhai chu sukpung ka ta, hung hmuingil an ta, tam tak hung nîng an tih. Kha hma ang bok khan ram chu hluo nawk an ta, a hmaa nêka hmûingìl lemin siem ka tih. Chu pha chun LALPA chu ka nih ti hre tâng in tih. 12 Ka mihai, ka mi Israelhai ngei tuol lèngnaah siem ka ta, hluong an ti cheu a, an rochan nîng in ta, in nauhai chu chân nawk ta ngai naw ti niu. 13 "Lalpa PATHIEN chun hieng hin a tih: Mihaiin, 'Hi ram hi mihriemhai fa zotu le an nauhai insùntirtu a nih' an ti hlak. 14 Sienkhom mihriemhai fa ramtu le nauhai sùnna ram ni ta ngai naw nih' ti hi Lalpa PATHIEN thu suok a nih. 15 Hnam danghai èsèlna le hmusitna tuor ta naw ni hai a, an hnam phûrthlutu ni ta ngai bok naw ni hai' ti hi Lalpa PATHIEN thu suok a nih, tiin hril rawh" a ta. 16 "Chun, LALPA thu chu ka kuomah a hung tlung nawk a. 17 'Mihriem naupa, Israel sûngkuohai chu an rama an chèng lai khan an um dàn le thilthawin a ram chu an sukporche a. Ka mita chu an um dàn hi nuhmei thla pal lai anga tirdakum a nih. 18 A ramah thisen insuo a, milemhai biea an insukporchè leiin ka hnot suok tawl a ni kha. 19 Hnam tin lai ka sukdar a, ram tinah an um dar a; an um dàn ang le thilthaw dàn angin an chungah ro ka rèl a nih. 20 An fena taphota hnamhai lai ka hming thienghlim an sukpawi a, mihaiin 'Hienghai hi LALPA mihai an nia chu a rama inthokin a hnot suok tawl a ni hi!' an ti hlak si a. 21 Israelhaiin an fèna taphot hnamhai laia ka hming thienghlim an sukpawi hi ka lâi a nâ a nih. 22 "Chuleiin, Israel sûngkuohai kuomah hieng hin hril rawh: 'Lalpa PATHIEN chun hieng hin a tih: Aw nangni Israel sûngkuohai, nangni ka lâinat cheu lei ni loin, in fèna taphot hnamhai laia in sukpawi hlak ka hming thienghlim chu ka lâinat lei lemin hieng thilhai hi ka thaw ding a nih. 23 Ka hming ropui tak, hnam danghai laia sukpawia um, nangni ngeiin in sukpawi chu, a thienghlimzie inhmùtir ka ti cheu. An mithmu ngeia nangni hmanga ka thienghlimna ka'n entir pha chun LALPA chu ka nih ti hung hre tâng an tih ti hi Lalpa PATHIEN thu suok a nih. 24 "Hnam danghai laia inthokin thuoi suok ka ti cheu a, ram tina inthoka thuoi khawmin in ramah thuoi kîr ka ti cheu. 25 Tui fìmin buok ka ti cheu a, hung inthieng tàng in ta, tirdakum in kàihai po po le in milem bieknaa inthokin tlèng fai ka ti cheu. 26 Lungril thar pêng ka ti cheu a, in sùngah thlarau thar sieng ka ta; in lungril, lung anga ngar chu la suokin, pangtî anga innêm lungril pêng ka ti cheu. 27 In chungah ka thlarau sieng ka ta, ka thu suokhai inzawmtirin ka dànhai fimkhur takin invongtir a ti cheu. 28 In thlàtuhai kuoma ka pèk rama chun chêng in ta, ka mihai nîng in ta, in Pathien nîng ka tih. 29 In porchèna po poa inthokin san suok ka ti cheu a; fâng ko ka ta, a tontawin bu hau in ta, tàm intlâktir ta naw ning. 30 Thing ràhai sukpung ka ta, in lohma sukthâng ka ta, tàm leiin hnamhai lai muolphona tuok ta naw ti niu. 31 Chu pha chun in nun dàn suolziehai le in thilthaw riloziehai hung hrieng in ta, suolna le thil tirdakum in lo chìnghai lei chun nangni chen intirdak in tih. 32 Hieng thil hi nangni leia ka thaw a ni nawh ti hre ro ti hi Lalpa PATHIEN thu suok a nih. Aw Israel sûngkuohai, in um dàn chu inzàpuiin, inphalam tlok tlok ro. 33 "Lalpa PATHIEN chun hieng hin a tih: In suolnahaia inthoka ka sawp fai phâ cheu leh in khawpuihai inhluotir nawk ka ti chêu a, hmun ram ta hnunghai chu indin thar nawk ka tih. 34 Chun, ram ràusan ta hnunghai chu inlet nawk in ta, inzin inlonhai mithmuah ràusan ram ni zing ta naw nih. 35 Anni chun, "Ràusan ram ni hlak kha Eden huon ang elin a hung inchang nawk ta hi! Khawpui tlu ram hnung, ràusan le suksieta umhai khom kha kula inhuonin an hluo nawk tah" tîng an tih. 36 Chu pha chun, a tiek ta hnunghai tungding nawk a, a tlaran ta hnunghai phun thar nawktu chu kei LALPA hi ka nih ti in kawl le kienga hnam la umhai chun hung hre tâng an tih. Chu thu chu kei LALPA hin ka puong a, ka hril ang takin thaw ngei ka tih. 37 "Hi hi Lalpa PATHIEN hril chu a nih: Israel sûngkuohai thil hni chu ngâithlapêk nawkin, hi hi thawpêk ka tih: Israel sûngkuohai chu ran ruol anga tamin sukpung ka tih. 38 Jerusalema kût hmang huna inthawinaa inhlàn ding ran ruol ang topa tamin khawpui tlu ram tahai chu mipuiin hung hluo sip nawk an tih. Chu pha chun kei hi LALPA chu ka nih ti hre tâng an tih" a ta.

Ezekiel 37

1 LALPA kut chu ka chungah a um a, LALPA thlarau chun a mi thuoi suok a, ruom lai takah a mi sie a; chu ruom chu rù ngotin a sip a. 2 Ruom chu a mi fangpui a, ruom dàpin rù a'n hlum rem rum a, ru tawl vong a nih. 3 Ama chun ka kuomah, "Mihriem naupa, hieng rùhai hi hring nawk thei a ti?" a ta. Kei chun, "Lalpa PATHIEN, nang chauin i hriet" ka ta. 4 Ama chun ka kuomah, "Hieng rùhai chunga hin thu hril la, an kuomah, 'Aw nangni ru tawlhai, LALPA thu hi lo ngài ro. 5 Hieng rùhai kuoma Lalpa PATHIEN hril chu hi hi a nih: Ngâi ro, nangniah thuok inlûttir ka ta, hring in tih. 6 Chun, nangniah thahrui sieng ka ta, taksain tuom ka ti cheu a, vunin inkhum ka ti cheu; chun, in sùngah thuok inumtir ka ta, hring in tih. Chu pha chun LALPA chu ka nih ti hrieng in tih' ti rawh" a mi ti a. 7 Chuongchun, thu a mi pèk ang chun ka hril a. Ka hang hril chun ri a hung um a, a hung inri rok rok a, rùhai chu mani inzompui senga chun an inchuktuo khawm a. 8 Ka hei en chun, ngai ta, anni thahrui seng an hung put a, taksain a hung tuom a, vunin a hung inkhum a, thuok ruok chu annia chun a um nawh. 9 Chuongchun, ama chun ka kuomah, "Mihriem naupa, thli kuomah thu hril la, hril ngèi ngèi la, hieng hin ti rawh: 'Lalpa PATHIEN chun hieng hin a tih: Aw Thuok, z kawl kil lia inthokin hung la, hieng thata um tahai hi an hring theina dingin hung mût rawh' ti rawh" a mi ti a. 10 Chuongchun, a thupêk ang chun ka hril a, thuok chun a hung mùt a, an hung hring a, mani ke sengin an ngìr a, sipai ruol ropui tak an hung ni ta a. 11 Ama chun ka kuomah, "Mihriem naupa, Israel sûngkuo pumpui hi hieng ru tawl ang hi an nih. Ngai ta, anni chun, 'Kan rùhai a tawl zo a, kan beisei a bo zo ta a, sàt thlâkin kan um tah' an lo ti hlak a. 12 Chuleiin, an kuomah thu hril la, Lalpa PATHIEN chun hieng hin a ti a nih: 'Ka mihai ngâi ro, in thlànhai hong ka ta, in thlàna inthokin insuoktir ka ti cheu a, Israel ramah thuoi lût nawk ka ti cheu. 13 In thlànhai honga kan suoktir pha cheu chun, aw ka mihai, LALPA chu ka nih ti hre tâng in tih. 14 Chun, nangniah ka Thlarau sieng ka ta, hring in ta, in ram ngeiah sie nawk ka ti cheu' tiin kei LALPA hin ka hril ta a, thaw ngei bok ka tih ti hrieng in tih, ti hi LALPA thu suok a nih" a ti a. 15 Chun, LALPA thu chu ka kuomah a hung tlung a. 16 "Mihriem naupa, hmol pakhat la la, hmola chun 'Juda le a zompui Israel nauhai ta' tiin ziek rawh. Chun, hmol dang la bok la, chu hmola chun, 'Efraim hmol, Josefa le a zompui Israel sûngkuo po po ta' tiin ziek rawh. 17 Chu hmol pahni chu hmet thlop la, hmol pakhatin siem rawh. 18 "Chun, i mihaiin, 'Hi hi ieng tìna am a nih ti mi hril thei i tim?' tia an indon che chun, 19 an kuomah 'Lalpa PATHIEN chun hieng hin a tih: Efraim kuta um Josefa hmol chu lâng ka ta, a zompui Israel sungkuohai hmol chu la bok ka ta, Juda hmol leh hmet thlop ka ta, hmol pakhatah siem ka ta, ka kutah hmol pakhat hung ni tâng an tih' i ti ding a nih. 20 An mithmua ngei thu i ziekna hmol pahni chu hmet thlop la, 21 an kuomah hieng ang hin hril rawh: Lalpa PATHIEN chun hieng hin a tih: Israelhai chu an fèna hnam danghaia inthok chun la suok ka ta, hmun tina inthokin thuoi khawm ka ta, an ramah hung thuoi kìr nawk ka tih. 22 Chu ram, Israel tlângahai chun hnam pakhatah indin ka ta, rorêltu lal pakhat nei an ta, hnam hni le ram pahnia inthè hlak kha hnam khat le ram khat ni tâng an tih. 23 Milem biek le thil tirdakum an thawhai le thil poi chi hrang hrang an tawk hlakhai chun insukporchè ta naw ni hai a, an hnungtol ding vêng ka ta, tlèng fai tawl ka tih. Ka mihai nîng an ta, kei hi an Pathien nîng ka tih. 24 "Ka siehlaw Davida ang lal nei an ta, rorêltu pakhat hnuoiah um tàng an ta, ka dànhai zui an ta, ka thu ruothai fimkhur takin vong tàng an tih. 25 Ka siehlaw Jakob kuoma ka pèk, in pi le puhai chèngna rama chun chêng an ta, anni le an nauhai, an nauhai nauhai khom kumkhuoin chêng tàng an ta, ka siehlaw Davida ang chu an lal ni kumkhuong a tih. 26 Inremna thuthlung siempui ka ta, chu chu an ta dingin kumkhaw thuthlung nîng a tih. Anni chu suknghet ka ta, sukpung bok ka ta, anni lai ka biekbùk kumkhuoin indin ka tih. 27 Anni lai chêng ka ta, an Pathien nîng ka ta, ka mihai nîng an tih. 28 Kumkhuoa anni lai ka biekbùk a um pha chun kei, LALPA hi Israelhai sukthienghlimtu chu ka nizie hnamhaiin hre tâng an tih' ti rawh" tiin.

Ezekiel 38

1 LALPA thu chu ka kuomah a hung tlung a. 2 "Mihriem naupa, Mogog rama mi, Mesek le Tubal hnamhai lu tak Gog chu hmason la, a chungthu ding hrilpêk rawh. 3 Lalpa PATHIEN chun hieng hin a tih: 'Aw Gog, Mesek le Tubal hnamhai hotu tak, ka khing che a nih. 4 Tuoi vir ka ti che a, i khâkah ngakuoiin kuoi ka ti che a, râlthuom kima inthuom i sipai ruol, sakor le sakor chungchuong hai, mi tam tak, phaw lien le phaw chin chawituhai le kawlhnâm viliktuhai po po le chun khai suok ka ti che. 5 Persia mihai, Sudan mihai le Libya mihai chu phaw chawia thîr lukhum khumin nang leh hung an ta, 6 Gomer le a sipai ruolhai dàm, hmar tieng hla taka mi Bet Togarmat le a sipai ruolhai dàm le hnam tam tak chu nangma ruolin hung bok an tih. 7 "Chuleiin, inrâlring la, inpei la, i mi hawr khawmhai chunga thu petuah thang rawh. 8 Ni iemani zàt hnungah râl bei dinga ko nîng i tih. Indonaa inthoka san suoka um le hnamhai laia inthoka làk khawma umhai chèngna Israel tlâng, ràusana um hlak chu la hung bei i tih. Anni chu hnamhai laia inthoka thuoi suok an ni hnunga thlamuong taka an rama khawsa an nih. 9 Chun, nang chu thlipui ang elin hràng tung i ta, a ram chu sûm angin bawm khum i tih. 10 "Lalpa PATHIEN chun hieng hin a tih: Chu ni a hung tlung pha chun lungril tha naw hung put i ta, thil tha lo tak phier i tih. 11 Chuongchun, 'Ram, kul khom nei ve lo khuohai chu rûn ka ta, him taka um tok tok, kul nei loa chêng, kul kotkhàr le a kalna thîrhai khom nei ve lohai chu bei ka tih. 12 Chuong hnamhaia inthoka thuoi khawm, khaw ram tahnung hung hluo nawktu, ram lailia chêng, ran ruol le sum hung hau nawkhai chu rûnin rok ka ta, an chungah kut inlet ka tih' tîng i tih. 13 Seba le Dedan le Tarsis sumdawnghai le an khuohai po po chun, "Mi rok dingin i hung a ni maw? Tangkaruo hai, rangkachak hai, ran ruol hai le sum tam tak nuom tawka roka phur hmang dingin maw i mihai i hawr khawm chu?" tîng an ti che. 14 "Chuleiin, mihriem naupa, Gog chungthu chu hieng ang hin hrilpêk rawh: Lalpa PATHIEN chun hieng hin a tih: Chu ni, ka mi Israelhai him taka an um hun ding chu i hriet kar a. 15 I chèngna hmar tieng ram tawpa inthokin hung i ta, i ruolin hnam tam taka mi sakor chungchuong ngot, sipai nawlpui ropui tak hung thuoi bok i tih. 16 Sûmpuiin ram a tuom mup mup angin ka mi Israelhai chu hung tuom i tih. Chu ni hung tlung dinga chun aw Gog, nangma hmanga hnamhai mithmua keima ngeia ka thienghlimzie ka'n entir theina ding chein, ka ram bei dingin hung thuoi ka ti che. 17 "Lalpa PATHIEN chun hieng hin a tih: 'Anni do dinga mi hung inthok ding thu, tiena tlânga inthoka kum tam tak sûng ka siehlaw Israel zawlneihai hmanga ka lo inhril lawktir tah hlak kha, nang hi i ni naw maw? Chuong lai chun anni ka la'n dotir ding che thu hi kum tam tak an lo puong ngat ngat tah a nih. 18 Chu ni chun hieng ang hin nîng a ta, Israel ram bei dinga Gog a hung pha chun ka lungsen suksosâng a tih ti hi Lalpa PATHIEN thu suok a nih. 19 Ka lungsen sosângin ka hril a nih: chu ni chun Israel ramah lir nasa takin inhnîng a tih. 20 Tuia chêng nga hai, chunglèng vate hai, ramsa hai le hnuoi chunga invâk thilhring tinrêng hai le hnuoi chunga mihriem po po hai chu ka hmaah inthin hawp an tih. Tlânghai inletkhup a ta, rawlhai chim a ta, kul bang po po hnuoiah tlu rem rum a tih. 21 Gog-hai bei dingin tlâng tina inthokin kawlhnâm ko khawm ka ta, mi tinin an kawlhnàm chu an unauhai chungah inlet an tih ti hi Lalpa PATHIEN thu suok a nih. 22 Hripui le thisena hremna chu a chungah intlungtir ka ta, ruopui vànawn le rielin nuoi a ta, ama le a sipaihai le hnam tam tak a hung thuoihai chunga chun mei le kât insùrtir ka tih. 23 Chuong ang chun ka ropuina le thienghlimna chu inentir ka ta, hnam tam takhai mithmuah keima chu inhriettir ka tih. Chu pha chun LALPA chu ka nih ti hre tâng an tih.

Ezekiel 39

1 "Chun, mihriem naupa, Gog chungthu hieng hin hril rawh: Lalpa PATHIEN chun hieng hin a tih: Aw Gog, Mesek le Tubal hnamhai hotu lù tak, ka khing che a nih. 2 ​Kei herin fen lèng ka ti che a, hmar tawp rama inthokin Israelhai tlângah thuoi ka ti che. 3 I kut voi tienga i thalngul chu suktliek ka ta, i kut chang tienga i thal chawi chu pei thlâng ka tih. 4 Israel tlânga hai chun nang le sipai ruol po po le hnam i hung thuoihai po po hai chu tlûng in ta, sa fa mi chunglèng vatehai le ram sakolhai fàk dingin pe suok ka ti cheu. 5 Ram palailengah tlu phung in tih ti hi Lalpa PATHIEN thu suok a nih. 6 Magog chunga le tuipui kama muong taka chênghai chunga chun mei insuoktir ka ta, LALPA chu ka nih ti hre tâng an tih. 7 "Chun, ka mi Israelhai lai ka hming thienghlim inhriettir ka ta, ka hming thienghlim an sukporchè nawk phal ta nawng ka ta, chu pha chun hnam tinin kei hi LALPA, Israel Mi Thienghlim chu ka nih ti hre tâng an tih. 8 Ngai ta, hun hung tlung ding ka hril kha a hung hnai tah ie! Hung tlung ngei a tih ti hi Lalpa PATHIEN thu suok a nih. 9 Israel khawpuia umhai chu fe suok an ta, an râlthuom tinrêng phaw hai, awmphaw hai, thalngul hai, thal hai, hmoltum hai le fei hai chu thing dingin la khawm an ta, thing tiah hmang an ta, kum sari sûng thingin ring an tih. 10 An râlthuom tlànsanhai chu thing tia an hmang ding a ni leiin rama thing an fom ngai naw ni a, thing an phûr ngai bok naw nih. Anni suomtuhai chu suom lêt an ta, anni roktuhai chu rok lêt ve thung an tih ti hi Lalpa PATHIEN thu suok a nih. 11 "Chu ni chun Gog ta dingin Tuipui Thi sak tieng, 'Khuolzin Ruom' an ti, Israel rama chun thlàn hmun ruotpèk ka ta, chutaka chun Gog le a mi hung thuoihai po po phum an ta, an thlàn hmun chun khuolzinhai lampui dang a ta, chu ruom chu Hamon Gog tia ko hung ni tàng a tih. 12 Israel mihai chun a rama inthoka ruong inthiel faina le phumna dingin thla sari sûng awng an tih. 13 A ram mipuihai chun phûm an ta, chu ni, chawimawia ka um ni chu an ta dinga ni inchik tlâk nîng a tih ti hi Lalpa PATHIEN thu suok a nih. 14 "A ram inthiel faina sin thaw ngar ngartu ding mi ruot hiel an tih. A then ruong zongin invâk vèl an ta, a thenin ruong phum loa hnuoia la zâlhai chu phûm an tih. Thla sari a hung invoi hnungah phùm thelh ruong zong pawl ruot an ta, an sin thaw tan an tih. 15 Ruong zong pawlin mithi ruro an hmuna taphotah inchikna siem an ta, a phumtuhaiin Hamon Gog ruomah phum an tih. 16 Chu bula chun khuo pakhat a hming Hamona tia ko um bok a tih. Chuong ang chun a ram chu inthiel fai an tih. 17 "Mihriem naupa, Lalpa PATHIEN chun hieng hin a tih: Vate le ramsa tinrêng ko suok la, an kuomah, 'Inhawr khawm unla, Israel muol le tlânga inthawina ruoi ropui tak in ta dinga ka buotsai chu kîl dingin kil tina inthokin hung ro. Chu taka chun sa fain, thisen dawn in tih. 18 Beramchal le beramte, kèlchal le bawngchal sa ang topin mi ropuihai sà fâng in ta, hnuoia hotuhai thisen dawn in ta, an rêngin Basan rama ran chawm thau tak tak ang vong an nih. 19 Inthawina ka buotsaipêk cheua chun luok suok bûr khopin in fa thàu in ta, thisen khom inrui khopin dawn in tih. 20 Ka dawkàna chun sakor le a chunga chuonghai sà dàm, mi ropuihai le râl do mi chi tinrêng sà dàm in dit tawkin fâng in tih' ti hi Lalpa PATHIEN thu suok a nih. 21 "Hnam tin kuomah ka ropuina târ lang ka ta, an chungthu ka rèl tah anga ka hremzie le an chunga kut ka thlàkziehai hmung an tih. 22 Chu nia inthok chun Israel sûngkuohai chun LALPA an Pathien ka nizie hung hre tâng an tih. 23 Chun, sala Israelhai an intàngna san chu ka chunga ringum loa an suol lei a nizie hnam danghai chun hung hre tâng an tih. Anni chu ka nghatsan a, an hmêlmahai kutah ka pêk a, kawlhnâmin an that ta vong a. 24 An tirdakumzie le bawsietna ang peiin ka hrem a, ka nghatsan a nih. 25 "Chuleiin, Lalpa PATHIEN chun hieng hin a tih: 'Tu hin saltàngnaa inthokin Jakob chu thuoi kîr ka ta, Israel sûngkuohai chu lunginsiet nawk ka ta, ka hming thienghlim hi thahnemngai takin humhal tlat ka tih. 26 Tu khom ti loa an ramah muong taka an chèng nawk pha chun an muolphona le ka chunga an ringum nawnahai chu theinghil tâng an tih. 27 Hnam dang, an hmèlmahai rama inthoka ka hung thuoi kìr pha chun, hnam tam takhai mithmuah anni hmangin ka thienghlimzie inentir ka tih. 28 Hnam tin lai salah intàngtir tawl lang khom, tu khom màksan nei loa an rama ngeia ka hung thuoi khawm nawkzie an hmu pha chun LALPA an Pathien chu ka nih ti hung hre tâng an tih. 29 An lakah ka hmêl thup ta nawng ka ta, Israel sûngkuohai chungah ka thlarau buok ka tih" ti hi Lalpa PATHIEN thu suok a nih.

Ezekiel 40

1 Sala kan intànga inthoka kum sawmhni le kum ngana, Jerusalem sieta inthoka kum sawm le kum lina, kum bul ni sawmna ni tak, a chun LALPA kut ka chungah a um a, chu taka inthok chun a mi thuoi a. 2 Pathien inlàrna chun Israel ramah a mi fepui a, tlâng insâng takah a mi thuoi a, chu sim tieng chun khawpui bawl thar ni awm tak hi a um a. 3 Chu hmuna chun a mi thuoi a, chu taka chun mi pakhat, a hmêl dâr anga tle hi ka hmu a; kotkhârah a ngîr a, a kutin hrui le thil inkhìna hmol a chawi a. 4 Chu mi chun ka kuomah, "Mihriem naupa, i mitin en la, i nain ngâithla la, ka'n entir ding che po po hi lung lût takin inchik rawh, chu dinga hi taka hung thuoi i ni si a. I thil hmuhai po po chu Israel sûngkuohai kuomah i hril ding a nih" a ti a. 5 Banga inhuon tempul ka hmu a. Miin inkhìna hmol a chawi chu meter thumab sei a na, bang sàzie le insàngzie chu a'n khi a, meter thum vé vè a nih. 6 Chu zoah sak tienga inthoka lùtna kailawna chun a lawn tung a, kailawn tawpa chun zawl, inkhìna hmol tlûk khata lien a um a. 7 Lùt peina sir tuoka chun vèngbûk pathum vé vè a um a, chuong vèngbûk tin dung le khang chu inkhìna hmol tlûk khat vong a na, vèngbûk inkàr bang sazie chu meter hni le a chenve a nih. Tempul tieng ngha tuolpûk khèla lùtna kot bul tuong zawl khom chu inkhìna hmol tlûk khata lien a nih. 8 Chun, tempul lûtnaa tuolpûk chu a'n khî bok a, 9 meter li le centimeter hnia inpûk a na, ban meter khat biela lien a um a, kotkhàrpui tuolpûk chu tempul tieng nghaa um a nih. 10 Sak tienga inthoka lùtna sîr khing vé vea vèngbûk pathumhai chu an intiet vong a, an inkàr bang seizie khom an inang vong bok. 11 Chun, a kotpui lùtna khom chu a'n khi a, a khang chu meter nga a na, a seizie chu meter ruk le a chenve a nih. 12 Vèngbûk lùtna bang thut chu centimeter sawmngaa insâng a na, a sûng tieng ruok chu a sîr tuokin meter thum vong a nih. 13 Chu zoah vèngbûk epa lùtna kotpui seizie chu vèngbûk chawr tieng banga inthokin a hma tieng bang tawp chen chun a'n khì nawk a, a seizie chu meter sawmpahni le a chenve a nih. 14 A sûng bang inkàr chu a lùtnaa inthoka tempul tuolzawl tienga ngha tuolpûk chen a'n khì nawk a, meter sawmthum a nih. 15 Lùtna tontira inthoka a suokna chen inkâr seizie chu meter sawmhni panga a nih. 16 Vèngbûk chawr tieng bang tina chun tukver chîn pakhat pei a um a, a sûnga pindan le pindan inkâra chun tukver pakhat seng a um bok a. Lampui hrûla pindan bang tina chun tûm thing lim an ziek a. 17 Mi chun tempul inhuonna sùng tuolzawl tontira chun a mi thuoi a. Tuolzawl sîr tuokin, kul puo tieng bang ringin pindan sawmthum an rem kuol a, chuong pindan tuol tuong chu lung rem vong a nih. 18 Chu lûtna kot zawn sîr vé vea chun lungrem, a dung le khang intiet char a um a, chu chu a chuonhnuoi tuolzawl chu a nih. 19 Tempul chuonchung le chuonhnuoi inkàr chu a'n khi nawk a, suo tieng le hmar tieng chu meter sawmnga vé vè a nih. 20 Chun, hmar tienga inthoka lùtna kot, tempul inhuonna sùnga tuolzawl tontir zuk pawtu chu a dung le khang a'n khi bok a. 21 A lùtna sîr tuoka vèngbûk pathum vé vè le an inkàr bang seizie le tempul tuolzawl nghaa tuolpûk chu a'n khî vong a, suo tieng kotkhàra mi leh an intiet char a, a dung meter sawmhni panga le a khang meter sawmpahni le a chenve a nih. 22 A tukver hai, a bathlàr hai le tûm thing lim banga an ziek hai khom chu suo tieng kotkhàr le inang char bok a nih. Kai tungna sirbi pasari a um a; tuolzawl a va pawna sìra chun tuolpûk a sûng tieng a um bok a. 23 Suo tieng kot ang charin tempul inhuonna sûnga chun hmar tieng khom kot a um a. A chuonhnuoi le a chuonchung lùtna le suokna kot inkâr chu a'n khi a, meter sawmnga a nih. 24 Chun, sim tieng pangah a mi thuoi a, sim tieng nghaa um a lùtna kot chu ka hmu a, kot bienga inthok chun a tuolpûkhai chu a'n khi vong a, a danghai leh thuhmun char a nih. 25 A sûng tieng banga chun tukver chikté tè a um a, tempul inhuon sûng tuolzawl va pawna sira chun tuolpûk a sûng tieng a um a. A dang ang bokin a dung chu meter sawmhni panga a na, a khang chu meter sawmpahni le a chenve a nih. 26 Kai tungna sirbi pasari a um a, a sûng tieng chun tuolpûk a um a, a lùtna bang khing tieng khing tieng chun tûm thing lim an ziek a. 27 Tempul inhuonna tuolzawl chun sim tieng kot a nei a, a chuonhnuoi le chuonchung lùtna kot inkâr chu a'n khi a, meter sawmnga a nih. 28 Sim tienga inthoka a chuonchung lûtna kota chun a mi thuoi a, a kot bienga inthok chun a tuolpûkhai chu a'n khi a, a danghai leh an inang char a. 29 Vèngbûk hai, a bang inkàr hai le a tuolpûk hai chu kotkhàr danga mihai leh an intiet char bok a. A bang sir tuok le a tuolpûk tina chun tukver a um vong a. A dung seizie chu meter sawmhni panga le a khang chu meter sawmpahni le a chenve a nih. 30 A vêla chun tuolpûk a dung meter sawmpahni le a chenvea sei le a khang meter hni le a chenvea lien a um a. 31 A tuolpûk chu a chuonchung tuolzawl tieng a ngha a, banga chun tûm thing lim an ziek a. A chuonhnuoia inthoka a chuonchung kai tungna sirbi chu pariet a nih. 32 Suo tienga inthoka a chuonchung lùtna kota chun a mi thuoi a, a hang inkhi a, a danghai tiet bok a nih. 33 Vèngbûk hai, bang inkàr hai le a tuolpûk hai chu a danga ang bok a nih. Tukver le tuolpûk a um ve vong a, a dung meter sawmhni panga le a khang meter sawmpahni le a chenve a nih. 34 A tuolpûk chun a chuonhnuoi tieng a ngha a; khing tieng khing tienga pindan sûng tieng banga chun tûm thing lim a um a, a hnuoia inthoka a chuonchung tieng kai tungna sirbi pariet a um a. 35 Chu zoah hmar tienga inthoka a chuonchung lûtnaa chun a mi thuoi a, a'n khi a, a danghai tiet bok a nih. 36 Vèngbûk hai, a kâr bang hai, tuolpûk hai le tukver inhonghai chu a danghai ang char a nih. A dung chu meter sawmhni panga le a khang chu meter sawmpahni le a chenve a nih. 37 A tuolpûk chun a chuonhnuoi tieng chu a ngha a, a banga chun tûm thing lim a um a, a hnuoia inthoka a chuonchung tieng kai tungna sirbi pariet a um bok a. 38 Hmar tienga inthoka a chuonhnuoi lùtna sìra chun a lùtnaa inthoka lùt el thei in pakhat a um a, chu pindan chu pumraw inthawinaa inhlàn dinghai an sawp faina hmun a nih 39 Kotkhàr bul tuolpûk khing tieng khing tieng chun dawkan pahni vé vè a um a, chuonghai chu pumraw inthawina dàm, suol inthawina dàm le thiem naw changna laka inthawina thilhlânhai dàm an thatna hmun a nih. 40 Pindan puo tieng, hmar tienga inthoka lùtna tuolpûk khing tieng khing tieng chun dawkan pahni vé vè a um bok a. 41 Chu taka pumraw inhlàn ding ran an thatna le buotsaina dawkàn um zàt chu pariet, a sûng tieng pali, a puo tieng pali a nih. 42 Chun, pumraw inhlànna ding dawkàn pali, lung sera siem a um bok a, a'n sàngzie chu centimeter sawmnga le a chung biel vel lienzie chu centimeter sawmsari le panga seng a nih. Dawkàn chunga chun pumraw inthawina le inthawina dang danga hmang ding ran thatna hmangruohai chu an sie a. 43 Tuolpûk banga chun a vêlin sa khàina ding thir zum kuoi inkàk, centimeter rieta sei an khâi fur bok a. Dawkanhai chu inthawina sa siena ding a nih. 44 A chuonchung zawla hmar tienga inthoka lùtna le sim tienga inthoka lùtnaa chun in a um vé vè a, pakhatin sim tieng a ngha a, pakhatin hmar tieng. 45 Ama chun, "Hmar tienga um, sim tieng ngha in hi tempula rongbawltu thiempuhai umna a ni a; 46 sim tienga um hmar tieng ngha in hi maichàma rongbawl thiempuhai umna a nih; chuonghai chu Zadok thlahai an ni a, Levi chihai lai khom anni chauh hi LALPA hmaah hung inlang a, a rong bawl theihai chu an nih" tiin a mi hril a. 47 Chun, a chuonchung zawl chu a'n khi a, a dung meter sawmnga, a khang meter sawmnga a ni a; tempul tuolzawl laili taka chun maichàm a um a. 48 Tempul tuolpûka chun a mi thuoi a, a dona banhai chu a'n khi a, meter hni le a chenve biel vel senga lien a nih. A lùtna kot chu a khang meter saria lien a na, a sîra banghai chu meter khat le a chenvea sà a nih. 49 A tuolpûk chu meter sawma sei le meter ruka inpûk a na, a kai tungna dingin sirbi sawm a um a, a sîra chun sûtpui pakhat vé vè a ngîr a.

Ezekiel 41

1 Chun, mi chun tempul chuonhnuoiah a mi thuoi a, kotkhàr bieng banhai chu a'n khi a, meter thum vé vea sà le sei a nih. 2 A lùtna bang le bang inkàr lienzie chu meter nga a na, a sîr vé vea bang chu a khang meter hni le a chenve nih. Hmun Thienghlim sûng chu a dung meter sawmhni le a khang meter sawm a nih. 3 Chu zoah tempul sûngrila chun a lût a, kotkhàr bienghai a'n khi a, meter khata lien vé vè a nih. A lûtna kot chu meter thuma lien a na, a sîr tuoka banghai chu meter thum le a chenve vé vea sei a nih. 4 Pindan sûngril chu a hang inkhi a, a dung le a khang chu an inchen a, meter sawm vé vè a nih. Ama chun, "Hi hi Hmun Thienghlim Tak chu a nih" tiin a mi hril a. 5 Chu zoah tempul bang sàzie chu a'n khi a, meter thuma sà a nih. Bang thut ring chun puo tieng pindan meter hnia lien a um tluonsuok a. 6 Chuong a sîr pindanhai chu sawng thuma insânga bawl a na, sawng tinah pindan sawmthum pei a um a. Tempul bang chu sawng tinah a zui thla hret hret a. In sawng chu tempul bang thut sordawka innghat a na, tempul bang ringsana innghat a um nawh. 7 Tempul bang inzui tung hret hret le inmilin pindanhai chu an iner tung hret hret thung a. Sawng hnìnaa kaina kailawn a um a, chu taka inthok chun sawng thumnaa kaina kailawn a um pei a. 8 Tempul sìr tuokin lungrem pawng ka hmu a, chu chunga chun pindanhai chu an rem a, lungrem insàngzie chu inkhìna hmol chen, meter thum a nih. 9 Hieng pindan huol hin lam meter hni le a chenvea lien a um suok vong a, bang meter hni le a chenvea sàin a huol suok bok a. 10 Hi bang puo tieng hin thiempuhai umna pindan le inkârah tempul vêl tuokin hmun awl, a khang meter sawma lien, a um a. 11 Hi hmun awla inthok hin hmar tieng le sim tieng a sûng tieng lùtna ding kotkhâr pakhat vé vè, meter hni le a chenvea lien a um a. 12 Tempul chawr, tlâk tieng nghaa in chu a khang meter sawmthum le pangaa lien a na, a vêla inhuonna bang seizie chu meter sawmli panga le a sàzie chu meter hni le a chenve a nih. 13 Chun, tempul thut lienzie chu a'n khi a, a dung meter sawmngaa sei a na, tempul tuolzawl le in um chu meter sawmnga bok a nih. 14 Chun, suo tieng tempul kota hmun awl le tuolzawl lienzie khom chu meter sawmnga bok a nih. 15 Tlâk tieng tuolzawl epa ngha tempul le a bathlàrhai chu a'n khi a, meter sawmnga bok a nih. 16 Hmun Thienghlim, Hmun Thienghlim Tak, tuolzawl epa um tuolpûk bang le tuong le tukver chînhai po po chu thingphèka inthuo vong a nih. 17 Hmun thienghlim lùtna kotkhàr lu chung le hmun thienghlim pindan le a tuol tieng pindan banga chun a'n khat tawkin cherub lim le tûm thing lim an ker a, 18 cherub inkârah tûm thing lim a um pei a, cherubhai chun hmâi pahni an nei seng a. 19 Khing khata inthoka tûm thing tienga ngha chun mihriem hmêl a put a, a khing tienga inthoka tûm thing tienga hung ngha chun sakeibaknei hmèl a put thung a. Chuong ang chun tempul sùng inthuona thingphèk banga chun a vêlin an ker a. 20 Hmun Thienghlim tuonga inthoka kotkhàr lu chung chenin cherub le tûm thing lima ker suok vong a nih. 21 Hmun Thienghlim Tak lùtna kotkhàr bieng chu thing kil li neia siem a na, Hmun Thienghlim Tak lùtna kotkhàr bieng khom chuong ang boka siem chu a nih. 22 Hmun Thienghlim Tak kotkhàr bula chun thinga siem maichàm ang deu, meter khat le a chenvea insâng le a dung le khang meter khat vé vea lien a um a, a kil le mong le kawmhai chu thinga siem vong a nih. Chun, mi chun ka kuomah, "Hi hi LALPA hmaa dawkàn chu a ni hih" a ta. 23 Tempul sûnga Hmun Thienghlim le Hmun Thienghlim Tak kotkhàrhai chu phel hni neia siem a na, 24 a laia nam hong thei a na, phel tin chu kopza pahnia inbûk a nih. 25 Hmun thienghlim lùtna kotkhàr puo tieng chun banga an ker ang bok cherub lim le tûm thing lim an ker a; a tuolpûk chunga chun thingphèk an dàp a. 26 Tuolpûk bang a khing a khing chun tukver hong thei lo a um a, chu taka chun tûm thing lim an ker a. Tempul sìra pindan lu chunga chun thingphèk an dâp vong bok a.

Ezekiel 42

1 Chun, mi chun tempul hmar tieng kota inthok chun a mi suokpui a, a chuonhnuoiah kan lùt a, a chuonchung bang le inzoma hmar tienga pindan tam tak an bawlna hmuna chun a mi fèpui a. 2 Hieng hmar tieng nghaa pindan intlar hi a dung meter sawmnga le a khang meter sawmhni pangaa lien a nih. 3 Pindan thlêr khat chun a chuonchung tuolzawl meter sawma lien tieng chu a ngha a; pindan thlêr dang chun a chuonhnuoi thlèra lungrem tieng chu a ngha a, sawng thuma sawng tin bathlàr chu an inhmaton a. 4 Hmar tieng ngha pindan kotkhâr hmaa chun inlonna meter ngaa lien le meter sawmngaa sei a um a. 5 Pindan chunghnung tak chu inlonna ding bathlàrin hmun a aw lien leiin a lailung le a hnuoi tienga pindan nêkin a chîn lem. 6 Sawng thum ni sien khom in dang anga ban nei ve lo a ni leiin a, a hnuoi pindan nêkin a chung tieng pindan chu a chîn hret hret pei a nih. 7 Pindan hrûla chun bang, meter sawmhni le pangaa sei, tuolzawl puo lem hnaia chun a um a. 8 Tuolzawl puo lem hnaia pindan tlar chu meter sawmhni pangaa sei a na, tempul ep tienga pindan thlèr seizie chu meter sawmnga a nih. 9 A chuonhnuoi tuola inthoka pindana kai tungna kailawn suo tieng panga chun a um. 10 Sim tieng khom tempul chuonhnuoi bang hrùl, tuolzawl bul, bang puo tieng epin pindan tlar a um a, 11 hmar tienga mi ang charin pindan tlar inkàra chun lampui a um a, a dung le khang, a lùtna le suokna kotkhàr lienzie khom inang vonga bawl a nih. 12 Pindan tlar ep bang hrùla chun suo tienga inthoka lùtna kotkhàr a um bok a. 13 Chun, ama chun ka kuomah, "Tempul tuolzawl nghaa um sim tieng le hmar tienga pindanhai hi thiempuhai umna a na, LALPA hmaa inlang hlak thiempuhai chun inthawina sa thienghlim chu hi hmuna hin an fàk ding a nih. Inthawina thil thienghlim, bu le bâl thilhlânhai, suol thawina thilhlânhai le bawsietna thilhlânhai chu an sie khawm ding a nih, Hmun Thienghlim a ni si a. 14 Chu Hmun Thienghlima thiempuhai an lùt tah chun, a chuonhnuoi tuolzawla an fe nawk ding pha an rongbawlna silfèn an hlìp hmasa zet naw chun an suok phal a ni nawh, an silfèn khom chu thil thienghlim a ni si a. Mipui umnaa an fè ding chun silfèn an inthlàk hmasa zet ding a nih" a ta. 15 Tempul le a tuol vêl po po a'n khi zo chun suo tieng kotkhàrah a mi suokpui a, tempul ram lienzie chu a vêlin a'n khi a. 16 Sak tieng bang chu a'n khi a, a'n khìna hmol ang chun meter zahni sawmnga a nih. 17 Hmar tieng bang a'n khi a, a'n khìna hmol ang chun meter zahni sawmnga bok a nih. 18 Sim tieng bang chu a'n khi a, an khìna hmol ang chun meter zahni sawmnga a ni nawk a. 19 Thlang tieng bang chu a'n khi a, a'n khìna hmol ang chun meter zahni sawmnga bok a nih. 20 Chuongchun, a bang kil li a'n khì zo chun a dung tieng meter zahni sawmnga, a khang meter zahni sawmnga a nih. Bang chu hmun thienghlim le vàntlâng umna tuolzawl daidantu a nih.

Ezekiel 43

1 Chun, mi chun suo tieng kotkhàrah a mi thuoi a. 2 Ngai ta, suo tienga inthoka LALPA ropuina hung chu ka hmu a. A rawl chu tuipui insok ri ang a na, a ropuina leiin hnuoi chu a èng phut a. 3 Inlàrna ka hmua a'n lang dàn chu, khawpui sukse dinga a hung tum le Kebar vadung kama inlàrna ka hmua mi ang bok kha a na, bokkhupin hnuoiah ka tlu a. 4 Suo tieng kotkhàra inthokin LALPA ropuina chu tempula chun a hung lùt a. 5 Chun, Thlarauin a mi chawi kàng a, tempul chuonchunga chun a mi'n thum a, LALPA ropuinain tempul chu a sip a. 6 Mi chu ka bula a ngìr laiin tempul sûnga inthokin tuin amanih mi hung bein ka hriet a. 7 Ama chun, "Mihriem naupa, hi hi ka lalthungpha umna hmun, ka kepha innghatna, Israel nauhai laia kumkhuoa ka chèngna ding hmun chu a nih. Israel sûngkuohai leh an lalhai chun ka lakah uirein, hringna nei lo an lalhai milem biek chu zuiin ka hmun thienghlim hi sukporchè ta ngai naw ni hai. 8 Ka sumphuk bulah an sumphuk rem a, ka kotkhàr bieng le an kotkhàr bieng intawka rem a, kan inkârah bang chauh an intlàktir lai khan an thilthaw tirdakum tak chun ka hming thienghlim an sukporche a; chuleiin, ka lungsenin anni chu ka hrem a nih. 9 Tuta inthok hin chu an nawchi zorna bànsan hai sien, an lalhai lembiek, hringna nei lo milemhai chu sie hmang bok hai sien, anni lai kumkhuoin chêng ka tih. 10 "Nang mihriem naupa, Israel sûngkuohaiin an thil suol thaw an inzakna dingin tempul lem ka'n hmutir che le a ruohmang kha inentir tawl rawh. 11 An thil suol thawhai leia inzak nachang an hriet chun, tempul um dàn ding hai, a lùt le suokna ding hai, a riruong iengkim, a hmang dàn ding le vong dàn dinghai inentir rawh. An mithmua ngei ziek thla diem rawh, ringum taka a riruong ang chu zui a, a thaw dàn dinghai chu an zawm theina dingin. 12 Hi hi tempul dàn chu a nih. Tempul ngirna tlâng sipzawl chen hi hmun thienghlim a nih. Hi hi tempul dàn phung chu a nih. 13 "Tong seic hmanga inkhiin maichàm lienzie chu hieng ang hi nîng a tih: a hnuoi thut chu lung rem, centimeter sawmngaa sa, a khang lienzie chu centimeter sawmnga, a kotlâng chu puo tienga inthoka inkhiin centimeter sawmhni le pangaa insâng a ni ding a nih. 14 Maichàm thuta chun a sersuon, meter khata insâng le centimeter sawmngaa lien chu innghat a ta, chu chunga chun meter hnia insângah a sersuon lien lem, centimeter sawmngaa lien chu innghat a tih. 15 Meter hnia insâng maichàm tap zawl kil lia inthok chun ki pali a hung dawk suok ding a nih. 16 Maichàm tap zawl chu kil li nei nîng a ta, a dung meter ruka sei le a khang meter ruka lien a ni ding a nih. 17 Maichàm tap inthutna tuong chu kil li nei, a dung le a khang meter sari vé vea lien, a rei tlâng chu centimeter sawmhni le pangaa insâng a ni ding a nih. A thuta chun a vêlin tui luong suokna centimeter sawmngaa lien a um ding a nih. Maichàm tapa lawn kaina ding suo tieng pangah kailawn a um ding a nih. 18 Chun, ama chun, "Mihriem naupa, Lalpa PATHIEN chun hieng hin a tih: maichàm in bawl phaa maichàma pumraw thilhlâhai in inhlàn dàn ding le thisen in thè dàn ding chu hieng ang hin a nih: 19 Thiempu, Levi chia mi Zadok thlahai chauh ka hmaah hung thei an ta, suol thawinaa an inhlàn ding bawngchal tuoi i pêk hlak ding a nih" ti hi Lalpa PATHIEN thu suok a nih. 20 "Ran thisen chu iemani zàt lâng i ta, maichàm ki li le a rei po po le a thut sordawk kil li le a rei po poah tât i ta, maichàm chu inthienin inremna i siem ding a nih. 21 Suol thawina bawngchal tuoi chu lâng i ta, tuolah, Tempul tuola hmun ruot bìka chun i raw hmang ding a nih. 22 "Chun, a ni hninaa chun kèlchal, hmêl hem lo chu suol thawina dingin in inhlàn ding a nih. Bawngchal tuoi thisena maichàm in inthien ang bok khan maichàm chu in inthien ve ding a nih. 23 Maichàm inthien chu in thaw zo hnungah ran ruol laia mi bawngchal tuoi, hmêl hem lo le beramchal, hmêl hem lo chu in inhlàn ding a nih. 24 LALPA hmaah inhlàn in ta, thiempu chun machi phul a ta, LALPA kuoma pumraw thilhlânah inhlàn a tih. 25 "Ni sari sûng chu ni tin suol thawina dingin kêlchal inhlàn in ta, ran ruol laia mi bawngchal tuoi le beramchal, hmêl hem lo chu in inhlân bok ding a nih. 26 Maichàm inthien faina dingin ni sari sûng awng a ta, chu zoah sawp fai in ta, maichàm chu ser thienghlim hung ni tâng a tih. 27 Chuonghai chu thaw zo a ni phâ leh, a ni riet nia inthokin thiempuhaiin pumraw inthawinahai le inremna inthawinahai chu maichàmah inhlàn an ta, keiin lo pom ka tih ti hi Lalpa PATHIEN thu suok a nih" a ta.

Ezekiel 44

1 Suo tienga inthoka Hmun Thienghlim chuonhnuoi lùtna kotkhàra chun a mi thuoi kìr a, a lo inkhàr a. LALPA chun ka kuomah, "Hi kotkhàr hi inkhâr zing a ta, hong ni naw ni a, tu khom lût naw ni hai. 2 LALPA, Israel Pathien hung lùtna a ni leia inkhâr zing a nih. 3 Lal ruok chu LALPA hmaa ruoi kîl dingin bathlàr hi hrawin ama chauh lût thei a ta, chu a hungna lampuia bok chun hung kìrin suok nawk a tih" a ta. 4 Chun, mi chun hmar tienga inthoka lùtna tempul kota chun a mi thuoi a. LALPA tempul chu LALPA ropuinain a sip a, bokkhupin ka tlu a. 5 LALPA chun ka kuomah, "Mihriem naupa, fimkhur takin en la, LALPA tempul hmang dàn ding chungthua dàn ka hrilhai po po che hi chîk tak le lung lût takin ngàithla rawh. Tempula lùt dàn le hmun thienghlima inthoka suok dànhai hi i lungrilin inchik rawh. 6 Hel hmang Israel sûngkuohai kuomah hieng hin hril rawh: 'Hi hi Lalpa PATHIEN hril chu a nih: Aw Israel sûngkuohai, in chìng dàn tirdakum hi ka nghok tawk tah. 7 In chìng dàn tirdakum chu la dit tawk loin, lungril le taksaa ser tan lo ram dang mihai chu ka hmun thienghlimah hung thuoiin ka tempul in sukporche a, bu le bâl le thàu le thisen in inhlàn lai zingin ka thuthlung in bawsiet zing bok a. 8 Ka hmun in vong thienghlim naw a, a vongtu dingin hnam dang mi in sie lem a. 9 Lalpa PATHIEN chun hieng hin a tih: 'Lungril le taksaa ser tan lo hnam dang mi tu khom, Israelhai laia chênghai chen khom, ka hmun thienghlimah an lût ding a ni nawh. 10 "Milem hnota Israelhai an invâk hmang lai khan Levi thlahai khomin an mi hlat a, an bawsietna maw chu tuor an tih. 11 Ka Hmun Thienghlimah rong bawlin, kotkhàr vêngtu nîng an ta, mipui pumraw thilhlân ding le inthawinaa an ran inhlànhai chu thatpêk an ta, an lo thangpui ding a nih. 12 Mipuiin milem an biek lai khan an thil inhlànhai lo inhlànpektu an ni a, suola Israel sûngkuohai intlûktirtu bul an ni leiin, an thil suol thaw maw an phur ngei dingzie kut phar meuin thu ka lo intiemkam tah a nih ti hi Lalpa PATHIEN thu suok a nih. 13 Thiempu angin ka hmaah rong bawlin an hung inlang ding a ni naw a, ka thil serhai le thilhlân thienghlim takhai hnaia khom an hung ding a ni bok nawh; an thil chìng tirdakum leiin inzakna tuor an tih. 14 Chuong sà khom chun tempul vêngtu le thaw ding um taphot thaw dinga tirtawnah ka sie tawl a nih. 15 "Thiempu, Levi chia mi, Zadoka thlahai ruok chu ka laka Israelhai an invàk hmang lai khoma ringum taka ka Hmun Thienghlim vongtuhai an ni leiin, anni chauh ka rong bawlin ka hmaah inlang thei an ta, thàu le thisen ka kuomah hung inhlàn an tih, ti hi Lalpa PATHIEN thu suok a nih. 16 Anni chauh ka Hmun Thienghlimah lût an ta, ka dawkàn hung hnai an ta, ka rong bawl an tih. 17 " Tempul chuonchung an hung lùtin pat zâi inhmi hmanga khawng korfuol hâk an ta, a chuonchung zawl amanih tempul sûng amania rong an bawl laiin sahmula siem silfèn hrim hrim an inbel ding a ni nawh. 18 Pat zâia inthoka khawng lukawm kawm an ta, pat zâi inhmi hmanga khawng kekor bun bok an ta, thlan suksuok thei chi ieng khom an inbel ding a ni nawh. 19 Chuonhnuoi zawla vàntlâng umnaah an fè phâ leh an silfèn inthlâk an ta, a siena dinga pindan ser hrana chun màksan an ta, silfèn dang inbel an tih. Chuong naw chun an silfèn thienghlim chu mipuiin tawk palh an ta, tuor rawi an tih. 20 "An lu an invaw koltir ding a ni naw a, an sam an hla sei ding a ni naw a, an invawtir hlak ding a nih. 21 Tempul chuonchung sûng lùt hnungin thiempu tu khomin uoiin an dawn ding a ni nawh. 22 Hmeithai amanih mi mâk hnung amanih nuhmeiah an nei ding a ni naw a, Israel thlaa mi nunghak thienglâm amanih le thiempuhai thisan hmeithaihai chauh nuhmeiah an nei ding a nih. 23 Thiempuhai chun thil ser thienghlim le thil naran danglamzie le thil porchê le thil inthieng thlier hrang dàn ka mihai an inchùktir ding a nih. 24 "Thubuoi hrim hrimah thiempuhai chu rorêltu nîng an ta, ka dàn thusuok angin an rèl ding a nih. Kût hmang dinga ka ruothai po poa chun ka dànhai le thupêkhai kengkawin, ka chawlnihai an vong thienghlim ding a nih. 25 "Mithi ruong hnaia fein thiempu chu a'n sukporchè ding a ni nawh; mithi chu a nu le pa amanih, a naunu le naupa amanih, a unaupa amanih, pasal la nei lo a farnu amanih a ni ruok chun insukporchè thei a tih. 26 A'n thienfai hnungah ni sari sûng a la nghâk ding a nih. 27 Hmun Thienghlim chuonchunga hmun thienghlima rongbawl dinga a lùt ni chun, ama ta dingin suol thawina a'n hlàn ding a nih ti hi Lalpa PATHIEN thu suok a nih. 28 "Thiempu chun rochan ieng khom a nei ding a ni nawh; a rochan nei sun chu keima chauh hi ka ni ding a nih. Israelhai lai chanpuol ieng khom in pèk ding a ni nawh; keima hi an chanpuol chu ka nih. 29 Fàk ding an hung inhlànhai, suol thawinaa an thil inhlànhai le bawsietna chungah an thil inhlànhai le Israel ram sûnga LALPA ta dinga an thil serhai po po chu an ta ding a nih. 30 Rà hmasa laia a tha takhai, in thil inhlàn tinrênga a tha takhai chu thiempuhai ta ding a nih. Fàk dinga beiphit thar in hmet hmasa tak chu thiempu kuomah inhlàn ro, in insûngah malsawmna a châm zing theina dingin. 31 Thiempuhai chun sa tlaw hrim hrim, vate amanih, ran amanih, ram sain a sè le amaa thi amanih sa hrim hrim an fàk ding a ni nawh.

Ezekiel 45

1 " Chu bakah, rochan dinga ram in sem pha leh LALPA chan ding ram bung khat, a dung kilometer sawmpahni le a chenvea sei le a khang kilometer sawma lien chu in ser hrang ding a nih; chu hmun pumpui chu hmun thienghlim nîng a tih. 2 Hi hmuna hin tempul bawlna ding hmun kil li nei, sîr tin meter zahni sawmnga senga sei ruot in ta, chu chu meter sawmhni le pangaa lienin sîr tinah hmun ruokin a huol vel ding a nih. 3 Chun, hi inkhi ta saa inthok hin a dung kilometer sawm le a khang kilometer nga inkhì suok rawh. Chu sûnga chun LALPA Hmun Thienghlimtak chu a um ding a nih. 4 Chu hmun ser chu LALPA rong bawl dinga a hmaa hung hnaitu thiempuhai chan dinga hmun ser a ni ding a nih. Chu hmun chu an in hmun ding le hmun thienghlim ta dinga hmun ser nîng a tih. 5 Hi ram bula hin tempula rongbawltu Levihai puola ram ser, a dung kilometer sawmpahni le a chenve le a khang kilometer nga um a ta, an chèngna khawpui nîng a tih. 6 Ram ser hrang tah hrùla hin khawpui hmun ding a dung kilometer sawmpahni le a chenve le a khang kilometer hni le a chenve inkhi suok unla, chu chu Israel sûngkuo po po ta ding nîng a tih. 7 Lal chanpuol ram chu ram ser hrang tah le khawpui hmun dinga ruot sîr tuok vé vè chu nîng a tih. Tlâk tieng panga mi chu tlâk tieng pangah inzar a ta, suo tieng panga mi chu suo tieng inzar bok a ta, Israel hnam pakhat chanpuol dinga ruot tiet a ni ding a nih. 8 Chu po chu Israel rama lal chanpuol bik ram chu nìng a ta, ka lalhai chun ka mihai nêksawr ta naw ni hai a, Israel sûngkuohai chu an hnam dungzui peiin an chanpuol ram ding sempêk lem an tih. 9 Lalpa PATHIEN chun hieng hin a tih: "Aw Israel lalhai, a huntawk tah! Inpawngnêkna le innêksawrna po po bànsanin, thil fel le indik thaw chîng lem ta unla, ka mihai hi an rama inthokin nêk suok ta naw ro" ti hi Lalpa PATHIEN thu suok a nih. 10 "Phahla indik le bùkna lung le inkhìna indik tak hmang seng ta ro. Thil hul inkhìna efa le thil intui inkhìna bat indik tak hmang ro. 11 Efa le bat hi an intluk char ding a nih. Thil inkhina homer-a inthoka inkhì ding a nih. Homer 1= Efa 10=Bat 10 12 Chun, in bùkna lung chu hieng ang hin nîng a tih: gera 20=shekel 1, shekel 60=mina 1 13 "Chun, in lo tharsuok in pèk zàt ding chu hieng ang hin a nih: huit le barli chu phur sawmruk peiah phur khat nîng a ta, 14 oliv hriek chu bûk zakhat peiah bûk khat (chu chu bath 10=1 15 beram chu Israel ram tui le hlobet thatna hmuna ran ruol laia zahni peia pakhat nîng a tih. Hieng ranhai hi bu le bâl thilhlâna dàm, pumraw thilhlâna dàm, inremna thilhlâna dàm le mipui ta dinga suol thawina thilhlâna dàm in hmang ding a nih" ti hi Lalpa PATHIEN thu suok a nih. 16 "A rama mi po poin hieng thilhlânhai hi lal kuomah an hung pèk ding a nih. 17 Chun, kût huna dàm, thla thar lawmnaa dàm, chawlnia dàm le Israel sûngkuo ta dinga ruot kût hmangna hrim hrima dàm pumraw inthawina thilhlân hai, bu le bâl thilhlân hai, dawn thilhlân hai, inremna thilhlân hai, mipui thatna dinga inthawina thilhlân hai le Israel sûngkuo suol thawinaa hmang ding thilhlân hai po po chu lalin a tum ding a nih. 18 Lalpa PATHIEN chun hieng hin a tih: "Thla khatna ni khatnaah bawngchal tuoi hmêl hem lo thatin tempul inthien rawh. 19 Thiempu chun suol thawina ran thisen chu lâng a ta, tempul kotkhàr bienga hai le maichàm rei le a ki lia hai le a chuonchung kotkhàr bienga hai chun tât a tih. 20 Chuong ang bokin a ni sarinaah suol thaw pal amanih le hriet naw leia thilsuol thawhai ta dingin tempul chu inthien nawk a tih. 21 "Thla hmasa tak ni sawm le ni lia chun fekân kùt inser in ta, ni sari sûng chu chol thang lo bei in fàk ding a nih. 22 Chu ni chun lalin ama le a rama mi po po suol thawina dingin bawngchal tuoi tumpêk a tih. 23 Kût hun ni sari sûng po chun ni tin pumraw inthawina dingin bawngchal tuoi pasari le beramchal pasari, hmêl hem lo tumpêk a ta, suol thawina dingin kèlchal pakhat tum zie bok a tih. 24 Beiphit inhlàn ding khom bawngchal pakhat peiah efa khat le efa khat peiah hriek hine khat a tumpèk ding a nih. 25 Thla sarina, ni sawm le ni nga nia kûta chun ni sari sûng chuong ang bok chun thawng in ta, suol leia inthawina dàm, pumraw inthawina dàm, bei inhlànhai le hriek inhlànhai khom tumpêk vong a tih" a ta.

Ezekiel 46

1 Lalpa PATHIEN chun hieng hin a tih: Suo tienga inthoka a chuonchung lùtna kotkhàr chu sinthaw hun ni ruk sûng khâr in ta, chawlni le thla thar nia ruok chu in hong ding a nih. 2 Lal chu chuonchung lûtna bul tuolpûka chun lût a ta, kotkhàr bula chun ngîr a ta, thiempuhai chun pumraw inthawina le inremna inthawina thilhlânhai chu inhlàn an ta, kotkhàr bul tuolpûka inthok chun Pathien chawibiek a ta, chu zoah suok a ta, kot ruok chu zàn tieng chen khàr lo ding a nih. 3 Vàntlâng mipui khomin chawlni le thla thar niah kotkhàr bul tuolpûka inthok chun LALPA an chawibiek ding a nih. 4 Chun, lalin chawlnia LALPA kuoma pumraw thilhlân a'n hlàn ding chu beramte paruk le beramchal pakhat, hmêl hem lo vong a ni ding a nih. 5 Beramchal pakhat peiah beiphit efa khat, beramte a ni ruok chun a pêk thei ang ang, inhlàn a ta, chun efa khatah hriek hin khat pei inhlàn bok a tih. 6 Thla thar niah bawngchal tuoi pakhat, beramte paruk le beramchal pakhat, hmêl hem lo vong, inhlàn a tih. 7 Bu le bâl thilhlâna dingin bawngchal pakhatah beiphit efa khat, beramchal pakhat peiah efa khat, beramte a ni ruok chun a pêk nuom zât zàt pêng a ta, hriek chu efa khat peiah hin khat nîng a tih. 8 Lal chu a hung lût tieng kotkhâr bul tuolpûkah lût a ta, chu taka inthok bok chun suok nawk a tih. 9 "Vàntlâng mipui ruok chu kût nia LALPA hmaa an hung inlang pha leh, hmar tieng kotkhàra lûthai chu sim tieng kotkhàrah suok an ta, sim tieng kotkhàra lûthai chu hmar tieng kotkhàrah suok an tih. Tu khom a hung lûtna tieng suok loin an hma zawn khing tienga kotkhàra chun a suok ding a nih. 10 Lal khom anni ruolin lût vèng a ta, an suok ruolin suok vèng a tih. 11 "Kût ni le kûtpuia bei an inhlàn chu bawngchal tuoi pakhatah efa khat, beramchal pakhatah efa khat, beramte a ni ruok chun an pèk thei ang ang le efa khat peiah hriek hin khat pei a ni ding a nih. 12 "Chun, lalin ama lung puok le nuom thua LALPA kuomah pumraw thilhlân amanih inremna thilhlân amanih a'n hlàn ding chun suo tieng kotkhàr chu ama ta dingin hongpêk nîng a tih. Pumraw thilhlân le inremna thilhlânhai chu chawlnia a thaw hlak angin inhlàn a ta, chu zoah suok a ta, kotkhàr chu khàr nîng a tih. 13 "Tûk tin LALPA kuomah pumraw inthawina dingin beramte kum khata upa, hmêl hem lo in inhlàn ding a nih. 14 Tuk tin beiphit inhlàn ding buotsai in ta, efa hmun ruka thea hmun khat le a hmet zoina ding hriek hin hmun thuma thea hmun khat leh; chu chu kumkhuoa LALPA kuoma bei in inhlàn dàn ding chu a nih. 15 Hieng ang hin pumraw thilhlâna inhlàn rop dingin beramte dàm, beiphit inhlàn ding dàm le hriek inhlàn ding dàm chu tûk tin in buotsai hlak ding a nih" a ta. 16 "Lalpa PATHIEN chun hieng hin a tih: Lalin a naupahai laia mi tu kuoma khom a rochana mi thilpêk a pêk chun a thlàhai ta nîng a ta, an rochan hung ni tàng a tih. 17 Sienkhom, a rochana mi chu a siehlaw tu amanih kuomah a pêk chun, bawi insuo kum chenin a siehlaw chun nei thei a ta, chu zoah lal kuomah a pêkkir nawk ding a nih; lal ro pangngai chu a naupahai ta ding a nih. 18 Chun, lalin mihai rochan a lâkpèk ding a ni naw a, an in le loa inthokin a hnot suok ding a ni bok nawh. Mani in le loa inthoka ka mihai sukthlong an ni nawna dingin, lal chun ama chanpuol ngeia mi chu a naupahai kuomah rochanin a pêk ding a nih" tiin. 19 Chun, sim tienga inthoka lùtna bula thiempuhai umna pindan thienghlim, hmar tieng nghaa chun a mi thuoi a, a chawr, khaw thlang tienga hmun um chu a mi'n entir a. 20 Ama chun ka kuomah, "Hi hi thiem naw chang leia inthawina thilhlân dàm le suol thawina thilhlân dàm an suongna hmun le bu le bâl thilhlâna an beiphit hung pêkhai an urna hmun chu a nih. Mipui chunga thil poi a tlung pal nawna dingin thil thienghlim hrim hrim a chuonhnuoi zawla làk thlâk ding a ni nawh" a ta. 21 Chun, a chuonhnuoi tuolzawla mi thuoiin a mi fang kuolpui a, kil tina chun tuolzawl tekem a lo um vong a. 22 An huonna kil lia tuolzawl tekem, banga inhuon chu a dung meter sawmhni le a khang meter sawmpanga seng a nih. 23 Chuong tuolzawl tekem sir tuok chu lungrem vong a na, a hnuoia chun a vêlin thlai suongna ding thuk a um a. 24 Chun, ka kuomah, "Hienghai hi thlai suongna hmun, tempula rongbawltuhaiin mihai inthawina sa an suongna hmun chu a ni hih" a ta.

Ezekiel 47

1 Mi chun tempul kotkhàrah a mi thuoi kìr nawk a, suo tieng ngha tempul kotkhàr bula inthok chun tui a hung luong suok a, tempul chu suo tieng ngha a ni hrim a; tui chu tempul sim tienga luongin maichàm chang tieng sîra chun a hung luong thla a. 2 Hmar tienga inthoka lùtna kotkhàra chun a mi thuoi suok a, sak tienga inthoka lùtna kotkhàr bul chen a mi thuoi a, chang tieng koa chun tui chu a hung luong suok a. 3 Mi chun inkhìna hmol chawiin sak tieng a pan a, meter zanga a'n khi chun tui chu a mi'n pal kàitir a, kemit chen a nih. 4 Chun, meter zanga a'n khì nawk a, tui chu a mi'n pal kàitir nawk a, khûp chen a ni ta a. Meter zanga a'n khì nawk a, tui chu a mi'n pal kàitir nawk a, kawng chen a ni ta a. 5 Chun, meter zanga a'n khì nawk a, tui chu ka pal kài ruol loa lien le inhlieuna khopa inthûk, tû pal kai thei lo ding a hung ni ta a. 6 Mi chun ka kuomah, "Mihriem naupa, hi hi i hmu am?" a ta, vakam tieng chun a mi thuoi kîr nawk a. 7 Vakam ka tlung chun a kam tuoka thing zîng khup el chu ka hmu a. 8 Ama chun ka kuomah, "Hi tui hi khaw sak tieng a luong a, Jordan vadung a zuk fin a, Tuipui Thi-ah a luong lût a, tuipui tui chu tui thienghlimah a siem a nih. 9 Vadung hi a luongna taphotah thilhring chi tinrêng pung an ta, nga hung tam èm êm an tih; hi tui hi tuipui al sukthienghlimna ding le a luongna taphota hring tinrêngin an dam phàna dinga hung luong a ni si a. 10 A kama chun ngamantuhai ngîr khup an ta, Engedi kaia inthoka Eneglaim kâi chenin lèn dèngna hmun nîng a ta, nga chi hrang hranghai chu Mediterranean tuipuia nga ang elin hung tam an tih. 11 Vakam chirdûp le dûmhai ruok chu chi khura hmang dingin la al zing tho a tih. 12 ​Vadung kam tuoka chun thei kung chi tinrêng to a ta, a hnà vuoi ngai naw ni a, kûr tukin rà insuo zing an tih. Tempula inthoka tui luong suokin a chawm leiin thla kipin ràng an tih. An rà chu bu ding a na, an hnà chu damna ding a tih" tiin. 13 Lalpa PATHIEN chun hieng hin a tih: "Hieng ang hin Israel hnam sawm le hnam hnihai rochan ding ram chu thepêk i ta, Josefa chun chan hnih chang a tih. 14 Ram chu chan inang sengin i sem ding a nih. In pi le puhai kuoma kut phar meua pèk ka tiem tah a ni leiin, ram chu in rochan nîng a tih. 15 Hi hi an ramri inthè dàn ding chu nîng a tih: Hmar tieng ramri chu Tuipui Lienaf inthoka Hethlon fe thlengin Hamat lùtna kawnah Zedad khuo chen fèng a ta, 16 Hamat le Berotha-a fe pei a ta, Hamat kawn le Damaska inrìna laia um Sibraim fe thlengin, Hauran ramri bula um Hazer Hatikon chen fêng a tih. 17 Chuongchun, hmar tieng ramri chu Tuipui Liena inthokin Damaska hmar tieng ramri bula Hazar Enan chen le Hamat ramri bul chen fèng a ta, chu chu hmar tieng ramri chu nîng a tih. 18 Sak tieng ramri chu Hauran le Damaska inrìnaa inthokin sim tieng panin fèng a ta, Jordan vadung zui a ta, thlang tieng chu Jordan vadung nîng a ta, sak tieng chu Gilead ram nîng a ta, ramri chu Tuipui Thiah fein Tamar chen tlung a tih. Hi hi sak tieng ramri chu nîng a tih. 19 Sim tieng ramri chu Tamar-a inthokin sim tieng panin Meriba-Kades chen fèng a ta, chu taka inthokin Aigupta Ruom hrawin Tuipui Lien chen tlung a tih. Hi hi sim tieng ramri chu nîng a tih. 20 Thlang tieng chu Tuipui Lien leh inrìng an ta, Hamat lùtna kawn zawn chenin fèng a tih. Hi hi thlang tieng ramri ding chu a nih. 21 "Chuongchun, ram hi Israel hnam lai a chî chiin in insem ding a nih. 22 Nangni ta dinga rochan ding le nangni laia in sà phuna chêng ram dang mi, nau le tè neia khawsahai khom an chan ding ram in sem ding a nih. Anni chu Israelhai anga a ram mi hrim anga ngaiin, Israel hnamhai lai nangni ang bokin chan an nei ve ding a nih. 23 Hnam dang mihai chu tu hnam laia lo khawsa khom ni hai sien, an khawsakna hmuna chun an chan ding ram in ruotpèk ding a nih" ti hi Lalpa PATHIEN thu suok a nih.

Ezekiel 48

1 "Hienghai hi hnam, an hnam hming senga inchika umhai chu an nih: Hmar tieng ramri, Hethlon fe thlenga Hamat lùtna kawn chen; Hazar Enan le Hamat khèla Damaska hmar tieng ramri chen, sak le thlang zawngin chan khat chu Dan hnam chan nîng a tih. 2 Danhai chan le inrì, sak le thlang zawnga chan khat chu Aser hnam chan nîng a tih. 3 Aser-hai chan le inri, sak le thlang zawnga chan khat chu Naftali hnam chan nîng a tih. 4 Naftali-hai chan le inri, sak le thlang zawnga chan khat chu Manase hnam chan nîng a tih. 5 Manase-hai chan le inri, sak le thlang zawnga chan khat chu Efraim hnam chan nîng a tih. 6 Efraim-hai chan le inri, sak le thlang zawnga chan khat chu Reuben hnam chan nîng a tih. 7 Reuben-hai chan le inri, sak le thlang zawnga chan khat chu Juda hnam chan nîng a tih. 8 "Judahai chan le inri, LALPA kuoma a bîka ram in pèk dinga ruot chu a khang kilometer sawmpahni le a chenve le a dung kilometer ngaa lien nîng a ta, a laia chun Tempul um a tih. 9 LALPA kuoma in pèk ding ram lienzie chu a dung kilometer sawmpahni le a chenve le a khang kilometer sawmg a nih. 10 Hi taka inthok hin thiempuhai chèngna dingin hmun ser ruot in ta, chu chu sak tieng le thlang tieng kilometer sawmpahni le a chenve nîng a ta, sim tieng le hmar tieng zawngin kilometer nga nîng a tih. A lailunga chun LALPA Tempul um a tih. 11 Hi hmun thienghlim hi thiempua ser hrang bîk, ka thu vongtu Zadok thlahai umna hmun ding a nih; Levi thla danghai chun Israelhai an invàk hmang lai khan an lo zui ve a, anni ruok hin chu an zui ve nawh. 12 Chuleiin, Levi chihai leh inramriin, hmun thienghlim taka chun um an tih. 13 "Thiempuhai chan hrûl peia chun Levi chihaiin chan nei an ta, chu chu sak tieng le thlang tieng zawngin a dung kilometer sawmpahni le a chenve le sim tieng le hmar tieng zawngin a khang kilometer nga nîng a tih. 14 Ram chu an zor ding a ni naw a, mi le khom an inthleng ding a ni bok nawh. Hieng lai hi a ram laia a thatna tak a na, mi dang kuta pèk awi a ni nawh, LALPA ta dinga hmun serh thienghlim a ni si a. 15 "Hi ram sûnga ram sem mahla, a dung kilometer sawmpahni le a chenve le a khang kilometer hni le a chenvea lien chu vàntlang chêngna in hmun ding le ran tlatna hmun ding a ni leiin hmun serh a ni vè nawh. A lai takah khawpui chu um a tih. 16 Khawpui lien dàn chu, hmar tieng kilometer hni le meter zahni sawmnga nîng a ta, sim tieng, sak tieng le thlang tieng khom chuong ang vonga lien chu nîng a tih. 17 Khawpui huol tuokin ram ruok um a ta, hmar tieng le sim tieng, sak tieng le thlang tienga a khang lienzie chu meter za le sawmhnipanga vong nîng a tih. 18 Chun, ram ruot sùnga hmun serh hrûla ram ruok la um, sak tieng kilometer nga le thlang tieng kilometer nga chu khawpui sùnga umhaiin huon le loah nei thei an tih. 19 Chu hmuna chun khawpui sùnga um Israel hnam tu khomin huon siem thei an tih. 20 Ram ruota um po chu kil li nei a na, khawpui huom sùng khom thang sain sîr tin chu kilometer sawmpahni le a chenvea lien vong a nih. 21 "Ram ruot sùnga hmun serhai le khawpui huom sùng bâk po, sak le thlanga ram la um po chu lal chan ding a nih. Sak tienga a dung seizie chu kilometer sawmpahni le a chenve nîng a ta, thlang tieng khom kilometer sawmpahni le a chenve bok nîng a tih. Hieng ramhai hi Israel chi hnamhai ram chan hrùlah um a ta, hmun serh bik, hmun thienghlim umna chu a laili takah um a tih. 22 Chuong ang chun Levi chihai chan le khawpui chan chu lal chan inkârah um a ta, lal chan chu Juda chan le Benjamin chan leh inrìng an tih. 23 "Hnam dang la umhai chan insem dàn ding chu: sak le thlang zawngin chan khat chu Benjamin hnam chan nîng a tih. 24 Benjamin-hai chan le inriin sak le thlang zawngin chan khat chu Simeon hnamin chang an tih. 25 Simeon-hai chan le inriin sak le thlang zawngin chan khat chu Isakar hnamin chang an tih. 26 Isakar-hai chan le inriin sak le thlang zawngin chan khat chu Zebulun hnamin chang an tih. 27 Zebulun-hai chan le inriin sak le thlang zawngin chan khat chu Gad hnamin chang an tih. 28 Sim tienga Gad-hai ramri chu Tamar-a inthokin Meriba Kades tui chen fêng a ta, chu taka inthokin Aigupta ruom zui thlain Mediterranean Tuipuiah tawp a tih. 29 Hieng ang hi Israel hnamhai rochan ding ram i sem dàn ding le an ram chan seng chu a nih" ti hi Lalpa PATHIEN thu suok a nih. 30 "Hienghai hi Jerusalem khawpuia lùt le suokna kotkhàrhai chu a nih: hmar tieng chu kilometer hni le meter zahni le sawmngaa sei a na, 31 chu taka chun kotkhàr pathum um a ta, chuonghai chu Israel thlàhai hming chawiin Reuben kotkhàr, Juda kotkhàr le Levi kotkhàr tia ko nîng a tih. 32 "Sak tieng pang khom kilometer hni le meter zahni le sawmngaa sei a na, kotkhàr pathum, Josefa kotkhàr, Benjamin kotkhàr le Dan kotkhàr um a tih. 33 "Sim tieng pang khom kilometer hni le meter zahni le sawmngaa sei a na, kotkhàr pathum, Simeon kotkhàr, Isakar kotkhàr le Zebulun kotkhàr um a tih. 34 "Thlang tieng pang khom kilometer hni le meter zahni le sawmngaa sei bok a na, kotkhàr pathum, Gad kotkhàr, Aser kotkhàr le Naftali kotkhàr um a tih. 35 "Sîr tin huopa a bang seizie chu kilometer kuo a nih. Chu nia inthok chun khawpui hming chu LALPA UMNA HMUN ti ni tâng a tih" tiin.

Daniel 1

1 Juda lal Jehoiakim inlala inthoka kum thumnaa chun Babulon lal Nebukadnezzar chu Jerusalemah a hung a, a'n huol a. 2 LALPA thuin Juda lal Jehoiakim chu a man a, Pathien ina bûr le bèl thenkhat khom a lâk sâ bok a, chuonghai chu Babulon tieng a pathien inah a hawn a, rosum sie khawmnaa chun a sie a. 3 Chun lal chun Israelhai lal thla le milien nauhai, tlangvàl pieng fel le hmêl tha, 4 thil hrang hrang inchûk thei dinga lungvar nei, hrietna nei tha, thil man zung zung thei mi le lal ina thok tlâk mi ni dinghai chu thlang suok a, Kaldai tong le an thu le hla inchûktir dingin a lal ina thoktuhai po po hotu Aspenaz chu thu a pêk a. 5 Ni tina an fâk le dawn ding bu le uoiin chu lal chokaa inthoka mi ngèi pe dingin lal chun thu a pêk bok a. Chuong anga kum thum a zirtir hnung chun lal hmaah an inlang ding a nih. 6 Chuong an mi thlanghai chu Juda thlaa mi Daniel hai, Hanania hai, Misael hai le Azaria hai an nih. 7 Lal ina hotu chun an hming thar ding a sakpêk a, Daniel chu Beltesazar a'n bùk a, Hanania chu Sadrak, Misael chu Mesak, Azaria chu Abednago a'n bûk bok a. 8 Daniel ruok chun lal bu le uoiin-a insukporchè naw a tum tlat leiin lal in hotu kuoma chun chuong anga insukporchè lo dinga phalna chu a hni a. 9 Pathienin Daniel chu a hotu ditsakna le lunginsietna a'n dongtir a. 10 Sienkhom, hotu chun Daniel kuomah, "In fàk le dawn ding ruottu ka pu, lal hi ka ti a nih. Nakie hin nangni kum ruolpuihai nèka se lemin hung hmu sien cheu iem mi law tâng a ta? Lal chun nangni leiin ka lû la ngêi a tih" a ta. 11 Daniel hai, Hanania hai, Misael hai le Azaria hai enkoltu dingin lal ina hotu tak chun mi pakhat a ruot a. Daniel chun a kuomah, 12 "I siehlawhai hi ni sawm sûng mi ensin rawh. Chu sûng chun fàk ding thlai le dawn ding tui chauh naw chu thil dang mi pe naw rawh. 13 Chu zoah kan hmèl le lal bu fatuhai hmèl enkhì la, i hmu dàn angin i siehlawhai chunga hin thaw rawh" a ta. 14 Chuong ang chun a remti a, ni sawm sûng a ensin a. 15 Ni sawm hnung chun lal bu fatu tlangvàlhai po po nêkin anni chu an inlang hrisel lemin an sà khom a nàm tha lem a. 16 Chuongchun, anni enkoltu chun lal bu hnienghnâr le uoiin chu a lâk hmang a, thlai ringot a pêk ta lem a. 17 Hieng tlangvàl palihai hi Pathienin thu le hla le thil tinrêng hriet theina le hriet thiemna a pêk a. Daniel lem chu inlàrna le mang tinrêng hril fie theina a pêk a. 18 Lal hmaa an inlang ni dinga ruot a hung tlung chun lal in hotu chun anni chu Nebukadnezzar hmaah a thuoi a. 19 Lal chun a lo biek tawl a, Daniel le Hanania le Misael le Azaria hai tluka var mi dang tu khom a hmu naw a, lal ina thoktu dingin a lâk tawl nghal a. 20 Lalin varna thu le hriet thiemna tinrêng thil a'n donhai hrim hrim chu a ram puma mitdawivaihai le dawithiemhai lèt sawmin an hriet lem vong ti a hung hriet ta a. 21 Daniel lem chu lal Kura inlal hnung kum khatna chen a thok zom pei hrim a nih.

Daniel 2

1 Nebukadnezzar inlala inthoka kum hnìnaab chun zàn khat chu mang a nei a, a mang chu a ngàituo buoi leiin a in nawk thei ta naw a. 2 Lal chun a mang chu hril dingin mitdawivaihai, aikei thiemhai, dawi thiemhai le arasi hmanga aisan thiemhai chu a ko khawm a, an hung a, a hmaah an ngìr a. 3 Lal chun an kuomah, "Ka lung sukzìngtu mang ka nei a, a umzie iem a nih ti hriet ka nuom a nih" a ta. 4 Arasi rawn mihai chun Aramik tongin, "Aw laltak, kumkhuoin dam rawh. I mang chu i siehlawhai hi hril phot la, a umzie hril kan ti che" an ta. 5 Lal chun an kuomah, "Hi hi thu tlûkna ka siem nghet chu a nih: Ka mang le a hrilfiena in mi hril thei naw chun chan nawi vong nîng in ta, in in khom hmunhnokah inchangtir ka tih. 6 Ka mang chu in mi hril thei a, a umzie in mi hril bok chun thilpêk le lawmman le chawimawina ropui tak keimaa inthokin dong in tih. Chuleiin ka mang chu mi hril unla, mi hril fiepek bok ro" a ta. 7 Anni chun, "Lalin a mang chu a siehlawhai hi mi hril phot sien la, a hrilfiena chu hril el kan tih" an ti nawk a. 8 Lal chun an kuomah, "Ka thu tlûkna siem kha ka hlen ding a nih ti in hriet leiin hun pot sei dàn in zongna mei mei a nih ti ka hriet tah. 9 Ka mang in mi hril thei naw a ni chun thuhmun sengin ka hrem ding cheu a nih. Ka thu ka thlâk thei beiseiin ka hmaah khêl inzawt kuol a, thu hmang lo in phan khawm mei mei a ni hi. Ka mang chu mi hril phot unla, in hril fie thei le thei naw hre el ka tih" a ta. 10 Arasi rawn mihai chun lal kuomah, "Lal thil indon hi a thaw thei ding khawvelah tu khom um naw ni hai. Hieng ang thil hi ieng anga lal ropui khomin mitdawivai hai, aikei thiem hai le arasi hmanga aisân thiem hai kuomah an indon ngai nawh. 11 Lal thil indon hi a harsa taluo. Hieng thil hi pathienhai chauh naw chun lal kuomah tu khomin hril thei naw ni hai, anni hlak chu mihriem laia chêng an ni vê si nawh" an ta. 12 An thu hril chun lal chu namen loa a suklungsen leiin Babulon rama mi var po pohai chu sukhlum vong dingin thu a pêk a. 13 Mi varhai that dinga lal thupêk lei chun Daniel le a ruolhai khom chu sukhlum dingin an zong a. 14 Mi varhai sukhlum dinga tirh, lal vêngtu kawmandar Ariok chu Danielin var tak le thiem takin a lo inbiekpui a. 15 Lal vêngtu pawl kawmandar kuoma chun, "Iengti dàna chuong ang lawma thupêk khauh chu lalin a'n suo am a na?" a ta. Ariok chun Daniel kuomah thil um dàn iengkim chu a hrilfie a. 16 Chu phing leh Daniel chu lal kuomah a fe a, a mang chu a hrilfie theina dinga hun iemani chen bèk la pe dingin a hni a. 17 Daniel chu a inah a'n lawi a, a ruolhai Hanania le Misael le Azaria kuoma chun thil um dàn chu a hril a. 18 Babulon mivarhai ruola anni khom chu sukhluma an um ve nawna dinga vàn Pathien zângaina ngèn a, thu khir chu hril fie theina hni dingin a hril tawl a. 19 Chu zân lá là chun thu inthup chu Pathienin Daniel kuomah a hung inhriettir a. Daniel chun vàn Pathien inpâkin, 20 "Pathien hming chu kumkhuoin, Inpâkin um zing raw se; Varna le thilthawtheinahai, Ama ta vong a ni si a. 21 Hun le hun bihai thliekin, Lalhai siein a pei thlàk a. Mi var kuomah varna a pêk a, Man riltu kuomah hrietna. 22 Thu ril le thil inthuphai, Ama chun a puong lang a, Thima thil um a hriet a, Amaah var a chèng zing. 23 Aw ka thlàtuhai Pathien, Lawmthu hrilin ka'n pàk che; Varna le theina mi pein, Ka hni i mi'n hriettir a, Lal mang i mi'n hriettir tah"tiin lawmthu a hril a. 24 Babulon mi varhai sukhlumtu dinga lalin a ruot Ariok kuomah Daniel chu a fe a, a kuomah, "Babulon mi varhai hi sukhlum naw rawh. Lal kuomah mi thuoi la, keiin a mang chu hril fiepêk ka tih" a ta. 25 Ariok chun Daniel chu lal kuomah a fepui nghàl a, a kuomah, "Juda saltànghai laia mi, lal mang umzie hril fie theitu ding mi pakhat ka hmu ie" a ta. 26 Lal chun Daniel (Beltesazar tia an ko bok) kuoma chun, "Ka manga ka thil hmu chu mi hrilin, a umzie i hril fie thei ding maw?" a ta. 27 Daniel chun, "Mi var, aikei thiem, mitdawivai thiem le aisân thiem tu khomin lal thil indon, thu inthup tak chu hrilfie thei naw ni hai. 28 Amiruokchu, thu inthuphai puong theitu Pathien chu vànah a um. Ama chun lal Nebukadnezzar kuomah thil la hung tlung dinghai chu a hung puong a ni hi. Khuma i zàl laia i mang le i ngàituona hluotu inlàrnahai chu hieng hi a nih: 29 Aw laltak, khuma i zàl laiin thil la hung tlung dinghai chu i ngàituo a, thu inthuphai puong langtu chun thil la hung tlung dinghai chu a'n hmùtir che a nih. 30 Aw laltak, keima hin mihai nêka varna ka hau lem lei ni loin, lal chun i mang umzie chu hre a, i lungrila thil hung lùt chu i hriet thiem theina dingin hi thu inthup umzie hi ka kuoma puong a ni chauh lem a nih. 31 "Aw laltak, i hang dàk suok a, i hmaah milim lien tak a lo ngìr a, a ropuiin a tle sur a, a hmêlin mi a râp a. 32 A lu chu rangkachak hlîr, a awm le bânhai chu tangkaruo, a phìng le a malpuihai chu dâr, 33 a ngalhai chu thîr, a kepàrhai chu thîr le pil raw chang inpola siem a nih. 34 Chuonga i thlîr zing lai chun, mihriem kut thang der loin lung a hung chim thla a, milim ke, thîr le pila siem chu a del a, a koi dar ta vong a. 35 Chu ruol chun thîr hai, pil hai, dâr hai, tangkaruo hai le rangkachak hai chu an koi dar vong a, nipui laia hrizawla bu sî ang el an hung ni a, a hlek khom hlà nei loin thliin a lèn hmang ta vong a. Milim deltu lung ruok chu tlâng lien takah a hung inchang a, hnuoi hi a hluo sip ta mup a. 36 "Hi hi i mang chu a ni a, chu hrilfiena chu lal kuomah hang hril ei tih. 37 Aw laltak, nang hi lalhai lal chu i nih. Vàna Pathienin lalram dâm, thilthawtheina dàm, hrâtna dâm le ropuina dàm a pêk che a. 38 I kutah mihriemhai le chunglèng vatehai le hnuoilèng ramsahai a sie a, an chêngna hmun taphotah an chungah lalin a siem che a, rangkachak lû ang chu i nih. 39 "I hnunga hin i lalram nêka hnuoihnung lem lalram hung ngìr a tih. Chu hnunga chun lalram pathumna, dâr ang chu, hung ngìr a ta, hnuoi pumpui chungah inlal a tih. 40 A tawpah, lalram palina, thîr anga khauh chu hung ngìr a tih. Thîr chun a vuok taphot vaw bong a, a vuok nawi angin, ama chun lalram danghai po po chu sir hmâtin vaw nawi a tih. 41 A kepàr chu a then thîr, a then pila siem a nih ti i hmu ang ngei khan, ram lungruol lo nîng a ta; thîr le pil inpol a nih ti i hmu ang khan, thîr khauhna ruok chu iemani chenah la nei zing a tih. 42 Chun, a kepàr chu a then thîr, a then pil a ni ang bokin, a ram chu hmun thenkhatah hrât a ta, hmun thenkhat ruok chu ongrop a tih. 43 Thîr le pil chang inpol a nizie i hmu ang bok khan, mipuihai khom hnam tin inchekpol nîng an ta, thîr le pil an inzom tak tak thei naw ang bokin, inzom zing thei naw ni hai. 44 "Chuong lalhai hun lai chun vàn Pathien chun lalram se thei ta lo ding chu hung indin a ta, chu ram chu hnam danghai hnuoiah sie ni ta ngai bok naw nih. Lalram danghai po po chu tukdolin suktawp vong a ta, kumkhuoin ngîr zing a tih. 45 Chu chu a nih inlàrnaa lung i hmu, mihriem kut thang loa hung chim thla, thîr hai, dâr hai, pil hai, tangkaruo hai le rangkachak hai del nawi vongtu lung umzie tak chuh. Pathien ropui tak chun thil la hung tlung dinghai chu lal kuomah a puong a nih. Mang chu a tak ngèi a na, a hrilfiena khom hi a'n dik bok" a ta. 46 Lal Nebukadnezzar chu Daniel hmaah a bokkhup a, inzà takin chibai a bûk a, thilhlân le rimtuihai chu Daniel kuomah hung inhlàn dingin a mihai chu thu a pêk a. 47 Lal chun Daniel kuomah, "Hi thil inthup i puong theia inthok hin i Pathien chu pathienhai po po Pathien, lalhai Lal, thu inthup puongtu a lo ni chieng ngei el" a ta. 48 Chuongchun, lal chun Daniel chu ngîrhmun insâng takah a hlàngkai a, thilpêk tam takin a vur a. Babulon biel pumpui chunga rorêltu le a mi varhai po po chunga lû takah a siem a. 49 Chun, Daniel hnìna angin lal chun Sadrak hai, Mesak hai le Abednago hai chu Babulon biel enkoltuhai lai hotuah a ruot seng a, Daniel ruok chu lal bulah a um ta zing a.

Daniel 3

1 Lal Nebukadnezzar chun Babulon biel Dura phaizawlah rangkachak milim, meter sawmhni pasaria insâng le a khang meter thum vela lien a'n din a. 2 A hnuoia ram bung hrang hranga lal tênau hai, aiawtu hai, optu hai, rorêltu hai, remruottu hai, sum enkoltu hai, dàn hre mi hai le biel hrang hranga rorêltuhai chu a milim indin inhlànnaa thang dingin lal Nebukadnezzar chun a fiel khawm a. 3 Milim inhlàn ni chun ram bung hrang hranga lal tênau hai, aiawtu hai, optu hai, rorêltu hai, remruottu hai, sum enkoltu hai, dàn hre mi hai le biel hrang hranga rorêltuhai chu an hung fuon khawm a, milim hmaa chun an ngîr khup a. 4 Tlângsamhai chun inring takin, "Aw hnam tina mi, mi tina mi le tong tina mihai, hi hi in thaw dinga thupêk chu a nih: 5 Tawtawrawt hai, theihle hai, perkhuong hrui sawmli neihai, tingtang hai, perkhuong hai, baja hai le rimawi tum rîk thei po pohai ri in hriet pha leh lal Nebukadnezzar rangkachak milim indin hmaah bokkhup unla, chibai bûk ro. 6 Tu khom bokkhupa chibai bûk lo chu rawtuina meipuia pei lût ni nghal an tih" tiin an insam a. 7 Chuongchun tawtawrawt hai, theihle hai, tingtang hai le tum rîk thei po po ri an hriet charin hnam tina mi, mi tina mi le tong tin hmanghai chu lal Nebukadnezzar rangkachak milim indin hmaa chun an bokkhup a, chibai an bûk a. 8 Chuong lai chun Kaldai mi thenkhat chu a hma tieng an hung a, Judahai chu an hung hèk a. 9 Lal Nebukadnezzar kuoma chun, "Aw laltak, kumkhuoin dam rawh. 10 Nangin aw laltak, mi tu khom tawtawrawt hai, theihle hai, perkhuong hrui sawmli neihai, tingtang hai, perkhuong hai, baja hai le rimawi tum rîk thei po po inri hre taphot chun bokkhupin rangkachak milim chibai bûk ding le 11 tu khom bokkhupa chibai bûk naw taphot chu rawtuina meipuia pei lût nghal dingin thupêk i siem a. 12 Sienkhom Juda mi thenkhat, biela hotua i siem Sadrak hai, Mesak hai le Abednago hai chun aw lalpa, i pathien rong an bawl nuom ve naw a, rangkachak milim i'n din chu chibai an bûk nuom ve nawh" tiin an hril a. 13 Nebukadnezzar chu nasa takin a lungsen a, Sadrak hai, Mesak hai le Abednago hai chu hung thuoi nghal dingin thu a pêk a, an rêngin a hmaa chun an hung thuoi a. 14 Nebukadnezzar chun an kuomah, "Sadrak, Mesak le Abednago, ka pathienhai rong bawl nuom loa, ka rangkachak milim indin khom chibai in bûk nuom naw thu an hril hi thudik a ni? 15 ​Tawtawrawt hai, theihle hai, perkhuong hrui sawmli nei hai, tingtang hai, perkhuong hai, baja hai le rimawi tum rîk thei po po inri hre a, ka milim siem hmaa bokkhupa chibai in bûk chun a tha. Chibai in bûk nuom naw a ni ruok chun rawtuina meipuia pei lût ni nghal in tih. Ka kuta inthoka san suok ding cheu chu ieng pathien tak am ni tâng a ta?" a ta. 16 Sadrak le Mesak le Abednago chun lal kuomah, "Aw Nebukadnezzar, hi thua hin i hmaah kan inhril hlìp khom a ngai dèr nawh. 17 Kan Pathien, a rong kan bawl hlak chun rawtuina meipuia inthokin a mi san suok thei a, i kuta inthok khomin aw laltak, ama chun mi san suok el a tih. 18 Chuong chu a ni naw a lo ni khomin, aw laltak, i pathienhai rong chu bawl nawng kan ta, i rangkachak milim indin khom chibai bûk bok nawng kan tih ti hi i hriet kan nuom" tiin an hril a. 19 Nebukadnezzar chu a hmêl danglam khopin Sadrak le Mesak le Abednago hai chunga chun a lung a sen a. Rawtuina meipui chu a lêt saria sa zuol dinga buk sà dingin thu a pêk a. 20 Sadrak le Mesak le Abednago hai chu khuopa meipuia pei dingin a sipai ruol laia mi hrât hràt hai chu thu a pêk bok a. 21 Anni rawi chu an korfuol, an zakuo hnuoi, an lukawm le an silfèn danghai chopa khuopin meipui inhlap puot puota chun an dèng lùt a. 22 Lal thupèk chu a'n hmaw êm lei le meipui chu a chok nasat êm leiin Sadrak le Mesak le Abednago peitu sipaihai chu meiin a kàng hlum a, 23 an pathum chun khuop pumin meia chun an tlu lùt a. 24 Chun, lal Nebukadnezzar chu maktiin a tho thut a, thurawn petuhai kuoma chun, "Khuop puma meipuia ei peihai kha mi pathum an ni naw maw?" a ta. Anni chun, "Aw laltak, ni chieng e" tiin an don a. 25 Ama chun, "En ta u! Khuop loa mi pali mei laia nâ hre dêr loa inlon kuol ka hmu tlat el! A palina lem chu pathien naupa ang a nih" a ta. 26 Nebukadnezzar chun rawtuina meipui kotkhâr chu a hung pan hnai a, "Sadrak, Mesak, Abednago, nangni Chunghnungtak Pathien siehlawhai, hung suok unla, hi taka hin hung ro" tiin a ko khêk a. Chuongchun, Sadrak le Mesak le Abednago chu meipuia inthok chun an hung suok a. 27 Ram bung hrang hranga lal tênau hai, aiawtu hai, optu hai le lal remruotpuitu hai chun an hung ngìr huol a, meiin an taksa a kâng thak naw a, an sam zâi khat khom a hlieu kir naw a, an korfuolhai a kàng naw a, mei rim khom an innam dêr nawh ti chu an hmu a. 28 Chu phing leh Lal Nebukadnezzar chun, "Sadrak, Mesak le Abednago hai Pathien chu inpâkin um raw se. Ama chun a vàntirkohai a hung tir a, a siehlawhai chu a hung san suok ta si a. Ama chu an ring leiin lal thupêk chu an kal a, anni Pathien chauh naw chu pathien dang hrim hrim rong bawl lo ding le chibai bûk lo dingin an hringna chen khom chàn an huom a nih. 29 Chuleiin, mi tin, hnam tin le tong tina mi tu khom Sadrak le Mesak le Abednago Pathien kal zawnga thu hril taphot chu sàt nawi nîng an ta, an inhai khom hmunhnok dèng bum angin inchang a tih ti thu ka pêk a nih; hieng anga san suok theitu pathien dang hrim hrim an um si nawh" a ta. 30 Chuongchun, Sadrak le Mesak le Abednago hai chu lalin Babulon ram biel hotuah a'n kaisàngtir ta a.

Daniel 4

1 Hi hi khawvel pumpuia chi tin, hnam tin le tong tinhai kuoma Lal Nebukadnezzar thucha chu a nih:"In rênga chungah hmûingìlna nasa takin pung raw se. 2 "Chunghnungtak Pathienin ka ta dinga inchikna mak le thil mak a'n entirhai hi ka hril nuom cheu a nih. 3 Inchikna a'n entirhai chu, A va hang ropui ngei de!A thil mak thaw a ropui. A ram chu kum hlun ram a na, Suon an um sûng po po chu, Rorêltu ni zing a tih. 4 Kei, Nebukadnezzar hi ka lal inah inhoi tak le hnienghnâr takin ka khawsa a. 5 Sienkhom zàn khat chu mang pangzatum tak el ka nei a. Inlàrnaa ka thil hmuhai chu khum laizawlah ka ngàituo a, ka lungril a sukmangang hle a. 6 Chuleiin, ka mang chu hrilfie dingin Babulon mi varhai po po chu ka hmaa hung thuoi dingin thu ka pêk a. 7 Chuongchun, mitdawivai thiem hai, aikei thiem hai, arasi hmanga aisân thiem hai le dawithiemhai chu an hung a, ka mang chu ka hril tawl a, sienkhom an mi hrilfie thei naw a. 8 A tawpah Daniel a hung a, ka mang chu ka hril a (Ama hi ka pathien hming chawia Beltesazar ti hming ka'n puttir a na, amaa hin pathien thienghlimhai thlarau chu a um a nih). 9 A kuomah, "Aw Beltesazar, mitdawivai thiemhai hotu, nangmaah pathien thienghlimhai thlarau a um ti ka hriet a, i ta dingin ieng anga thu inthup khom hrilfie intak a um nawh. Ka mang chu hi hi a na, mi hang hrilfiepêk raw leh. 10 Khuma ka zàl laia inlàrna ka hmu chu hi hi a nih: Ka hei ngha a, ka hmaa chun ram lailung takah thing lien tak el, namên loa insâng hi a lo ngìr a. 11 Thing chu detdo takin a'n thang lien pei a, a zîkin vàn a tong a; hnuoi tawp kila inthok khoma hmu thei a nih. 12 A hnahai a mawi a, a rà a tam a, hring tinin khopkhamin an tlàn a. Ramsahaiin a zâr hlim an bèl a, chunglêng vatehaiin a zârah riebûk an rem a, taksa put hringcha po po chawmtu a nih. 13 "Ka khum laizawla inlàrna ka hmu lai chun ka hei en a, ka hmaa chun vêngtu mi thienghlim, vàna inthoka hung tum lai chu ka hmu a. 14 Rawl inring taka khêkin, "Thing kha phûr unla, a kàuhai kha tan unla, a hnahai sât thla vong unla, a ràhai chu pei dar ro. A hnuoia ramsa chènghai chu tlàn hmang hai sien, a zâra vatehai khom vuong hmang vong raw hai se. 15 A bul le a zunghai ruok chu hlà unla, thîr le dârin thlung unla, hlo buk lai ngîr vê zing sien, vàn daidawin tlàk khum sien, hnuoia hlo buk lai ramsa angin khawsa ve raw se. 16 Chuong anga kum sari a hmang zo hma po chu mihriem lungril put ta loin ramsa lungril put raw se. 17 " 'Hi thurêl puongtu chu mi thienghlim vàntirkohai an nih, Chunghnungtak chu mihriemhai lalram chunga thuneitu, a ditsak taphot kuoma lalram chu pe theitu le mi hnuoihnung tak khom inhluotir theitu a ni hlakzie tu khomin an hriet theina dingin' tiin. 18 "Chu chu a nih, kei Lal Nebukadnezzarin manga ka hmu chu. Tuhin nang Beltesazar, ka mang umzie chu hang hrilfie raw leh, ka lalrama mi var tu khomin an mi hril fiepêk thei si naw a. Pathien thienghlimhai thlarau chu nangmaah a um leiin, nang chun i hril fie thei a nih" a ta. 19 Chu phing leh Daniel (Beltesazar tia ko bok) chu a ti hle a, iemani chen chu ieng khom a hril thei nawh. Lal chun a kuomah, "Beltesazar, mang le a hril fiena leiin thlaphâng naw rawh" a ta. Beltesazar chun, "Ka lalpa, mang chu a theidàtu che mang le a hrilfiena chu i hmêlmahai chan ni lem hlauh sienla ni ding maw! 20 Thing i hmu, nghet taka vàn tonga hung inthang lien, kawl kil tawpa inthok khoma hmu thei, 21 a hnà mawi tak, a rà tam êm êm, mi tin tlàn tham, a buk hnuoi ramsahaiin chêngnaa an nei, a zârhai chu chunglèng vatehaiin riebûka an lo hmang hlak chu, 22 aw laltak, nang hi i nih. Ropuiin i hung hrât a, vàn tong khopin i hung lien a, i lalram chun kawl kil chen a tlung a nih. 23 "A nih, aw laltak, vàna inthoka vàntirko mi thienghlim hung tum i hmu khan, 'Thing chu phûr thlu unla, sukbohmang ro. A bul le a zunghai ruok chu thîr le dâra khitin hlo buk lai la um zing sien, vàn daidawin tlàk khum sien, kum sari a'n voi hmâ khat chu ram sa angin khawsa raw se' a ti a ni kha. 24 "Aw laltak, a hrilfiena le Chunghnungtakin laltak, ka lalpa chungthua thu a rèl tah chu hi hi a nih: 25 I khuo le tuihaia inthoka hnot suokin um i ta, ramsahai lai khawsâng i ta, ran angin hlo pet i ta, vàn daidawin tlàk khum a ti che. Chunghnungtak chu mihriemhai lalram po po chunga lal tak a nizie le lalna chu a ditsak taphot kuomah a pèk hlakzie i hriet thiem a, i pom hma khat chu kum sari sûng chuong ang chun um i tih. 26 Chun, a bul chu hlà dinga thû a pèk angin, vànin thû a neizie i hung hriet pha chun i lalram chu pèk kîr ni nawk i tih. 27 Chuleiin, aw laltak, ka thurawn pèk che hi pom tlâkah ngai rawh. I suolhai bànsan la, thil indik thaw la, i rîtlona khom nêksawrhai chungah ngilneinain inlangtir lem rawh, i hung hmùingîl pei thei tâkduoiin" a ta. 28 Chuong thil po po chu Nebukadnezzar chungah a hung tlung a. 29 Thla sawm le thla hni an voi hnung chun Babulona a lal in chungah lal chu a'n vàk a, 30 Khawpui a hei thlìr vèl chun, "Babulon khaw ropui le mawi tak hi, ka lal in umna ding le ka ropuiizie inentirna dinga keima kut hrât ngeia ka bawl a ni naw am a ni?" a ta. 31 A la tong lai zing chun vàna inthoka rawlin, "Aw Nebukadnezzar, i chungthu chu hieng anga rèl a nih: I lalna chu i kuta inthokin làk hmang a ni tah. 32 Mihai laia inthoka hnot suok nîng i ta, ramsahai lai chêng i ta, ran angin hlo pet i tih. Mihriemhai lalram chunga thuneitu le a ditsakhai kuoma inlalna petu chu Chunghnungtak a nizie i hriet suok le pom hmâ po, kum sari sûng chu, chuong ang chun um i tih" tiin a hung hril a. 33 Chu ni lá là chun hrila um tah chu Nebukadnezzar chungah a hung tlung nghal a, mihriemhai laia inthokin an hnot suok a, ran angin hlo a pet ve a, vàn daidawin a tlàk khum a, a sam chu mupui hmul anga seiin a hung inthang a, a tinhai chu vate tin ang el a hung ni ta a. 34 Chun, a hun a hung tlingtlàk chun, kei Nebukadnezzar hin vàn tieng mit ka hang inlèn a, ngaituona pangngai ka hung put nawk ta a. Chuongchun, Chunghnungtak chu inpâkin, chatuona hring chu inzà takin ka chawimawi a:A ram chu chatuon lalram a na, Suon po po dai a ni si. 35 Leilung hluotu hnamhai hi, Ieng tham khom an ni si nawh. Vàna sipai ruolhai leHnuoia chêngtuhai chungah, A nuom angin a thaw hlak. Tû khom a kut thlâk ding chu, Kei kîr thei an um naw a, "Iem a na i thaw hrim hi?" Ti thei tû khom an um nawh. 36 Ngaituona pângngâi ka hung put chara inthok chun ka lalram ropuina dingin ka'n zaumna le ropuina chu pêk kîrin ka um a. Ka mi rawn hlakhai le ka khawnbawlhai chun an mi hung zong suok a, ka lalthungphaah an mi'n thungtir a, a hmaa nêka ropuia tungdingin ka hung um nawk tah a nih. 37 Chuongchun, kei Nebukadnezzar hin tu hin Vàn Lal chu inpâka inzàin ka chawi sàng a nih. A thilthaw taphot indikin, a lampui taphot a fel a, chapo taka kal chawituhai chu a suktlawm hlak, " tiin.

Daniel 5

1 Lal Belsazar chun a mi ropui sângkhat ruol ta dingin ruoi ropui tak a the a, uoiin an dawn tlàng a. 2 Belsazarin uoiin a dawn lai chun a nuhmei hai, a hmei hai le a mi lien hai uoiin dawnna dingin a pa Nebukadnezzarin Jerusalem Tempula inthoka tangkaruo le rangkachak no a hung làkhai laia mi chu hung la suok dingin thu a pêk a. 3 Chuongchun, Jerusalem Tempula inthoka an làk rangkachak no mawihai chu an hung chawi a, lal le a nuhmei hai le hmei hai le a milien hai chun zu dawnnain an hmang a. 4 Chuonga zu an dawn lai chun rangkachak dâm, tangkaruo dâm, thîr dàm, dâr dâm, lung dàm le thing dàma siem an milem pathienhai chu an chawimawi a. 5 Chuong lai tak chun mihriem kutpàr a hung inlang a, lal ina khawnvar siena bula bang zût nama chun thu a hung ziek a, a ziek lai chu lal chun a thlîr zing a. 6 A hmai chu a hung dàng a, a ti êm leiin a khûp le khûp invaw tuo hlop hlop khopin a'n thin a, a ke thà a zoi thla vong a. 7 Lal chun a aikei thiem hai, arasi hmanga aisân thiem hai le dawithiem hai chu a'n kotir a, chuong Babulon mi varhai kuoma chun, "Tu khom hi thu ziek hi tiema a hrilfiena mi hril theitu chu puon senduk insiltir nîng a ta, rangkachak thi inhlìtir ni bok a ta, a rama rorêltu lien tak pathumnaah sie nîng a tih" a ta. 8 Chuongchun, lal mi varhai po po chu an hung lùt a, sienkhom ziek chu an tiem thei naw a, an hril fie thei bok nawh. 9 Lal Belsazar chu a thlabâr zuol a, a hmai khom a hung dàng zuol a, a milienhai hlak chun thaw ngaina an hriet bok si nawh. 10 Lal le a milienhai ri chu hrein lalnu chu ruoithèna pindana chun a hung lùt a, "Aw laltak, kumkhuoin dam rawh. Thlabâr naw rawh. I hmai khom dâng naw raw se. 11 I lalrama hin pathien thienghlimhai thlarau nei mi pakhat a um a. I pa, laltak hun lai khom khan chu mi chun pathienhai tluka thu inril hriet theina le varna a kol ti hriet suok a ni ta a; i pa, lal Nebukadnezzar ngeiin dawivai thiem hai, aikei thiem hai, arasi hmanga aisân thiem hai le dawi thiem hai hotu takah a siem a. 12 Ama Daniel, i pain Beltesazar tia a ko chu mi lungril hrât, hrietna hau le hriet thiemna nei mi, manghai hrilfie thiem, thu khirkhàn hrilfie thei mi le harsatna hrang hrang sut kieng theitu a nih. Daniel chu inkotir la, thuziek umzie chu hril fie thei a ti che" a ta. 13 Chuongchun, Daniel chu lal hmaa chun an hung thuoi a. Lal chun, "Nang Daniel, ka pa laltakin Judai rama inthoka saltàng a hung thuoi laia mi chu i ni maw? 14 Nangmaah pathienhai thlarau a um thu le sungril mit varna nei, lungril hrât tak le var chungchuong i ni thu ka lo hriet a. 15 Hi thu ziek hi tiema a umzie mi hrilfie dingin mi varhai le aikei thiemhai an hung thuoi a, sienkhom tu khomin a umzie an mi hril thei naw a. 16 Nang ruok chun thil harsahai khom hril fiein i sukfel thei ti ka lo hriet a. Hi thil ziekhai hi tiema i mi hril fie thei chun puon senduk insiltir nîng i ta, rangkachak thi inhlìtir ni bok i ta, ka lalrama rorêltu lû tak pathumnaah sie ni bok i tih" a ta. 17 Daniel chun lal kuomah, "I thilpêkhai chu nangma ta ni sien, i lawmmanhai chu mi dangin chang raw hai se. Sienkhom thil ziek chu lal hriet dingin tiem ka ta, a umzie hril fie bok ka tih. 18 Aw laltak, Chunghnungtak Pathien chun i pa Nebukadnezzar kuomah chunghnungna hai, inlalna hai, ropuina hai, chawimawina hai le mawina hai a pêk a. 19 Ngîrhmun insâng tak a pêk lei chun mi tina mi le hnam tina mi le tong tina mihai chun an ti a, a hmaa chun an inthin hlak a. Lal chun sukhlum dinga a tihai chu a sukhlum a, dama a hlà nuomhai chu a hla a, a chawisàng nuomhai a chawisàng a, a suktlawm nuomhai chu a suktlawm a. 20 Sienkhom a hung chapo a, uongthuongnain a lungril a sukngar phing leh a lalthungphaa inthokin a pei thlàk a, a ropuina po po chu a làkpêk vong a. 21 Chun, mihriemhai laia inthoka hnot suokin, ramsa lungril a'n puttir a, ram sabengtunghai lai a khawsa a, ran angin hlo a pet a, vàn daidawin a tlàk khum a, Chunghnungtak Pathien chu mihriemhai lalram chunga thuneitu tak le a ditsak taphothai chunga lalna petu a nizie a hriet suok le pom hmâ chun chuong ang chun a khawsa a nih. 22 "Sienkhom a naupa nang Belsazar chun hieng po po hi i hrieta chu inngàitlawm i tum nawh. 23 Inphàhnuoi nêk hmanin vàna LALPA i cho a, a tempula nohai chu i kuomah i hung inlàktir a, i nuhmeihai le hmeihai le i milienhaiin zu dawnnain in hmang a. Rangkachak dâm, tangkaruo dâm, dâr dâm, thîr dàm, thing le lung dàma siem i milem pathienhai, ieng khom hmu thei lo, ngàithla thei lo le hre thei lohai chu i chawimawi a, i hringna le i lampui po po a kuta koltu che Pathien ruok chu inzà nachâng i hriet nawh. 24 Chuleiin ama chun hi thu ziek ding hin kut a hung tir a nih. 25 "Hi hi a nih a ziek chu: MENE, MENE, TEKEL, PARSINc. 26 A hrilfiena chu hi hi a nih: MENE: Pathienin i lal hun sùng dinga a ruot chu a tawp tah. 27 TEKEL: Bûkin i um a, i tling ta nawh. 28 PARSIN: I lalram chu thein a um a, Media le Persia kuomah pêk a ni tah" a ta. 29 Chun, Belsazar thupêkin Daniel chu puon senduk an insiltir a, rangkachak thi an inhlìtir a, a lalrama rorêltu lû tak pathumnaah a puong a. 30 Chu zân lá là chun Babulon mi Belsazar chu that a ni a, 31 Media mi Daria, kum sawmruk le pahnia upa chun ram chu a chang tah a nih.

Daniel 6

1 Daria chun a lalram biel za le sawmhnia optu dinghai a thlang a. 2 Optuhai chunga chun hotu pathum a ruot a, chuonghai laia pakhat chu Daniel a nih. Lal ditzawng anga biel optuhaiin ro an rèl theina dingin hotu pathumhai chu an mawphurna biel ding seng a ruotpèk a. 3 Daniel chu mi thei chungchuong a ni leiin hotuhai lai chun a thaw tha tak a, lal chun a ram pumpuia rorêltua sie a lungril a. 4 Hi thil lei hin a thokpui hotuhai le biel optuhai chun suksiet tumin a thaw suol an inchàn a, sienkhom an hmu thei si nawh. A ringum a, a hlemhlè ve naw a, thil ngaizal mi a ni naw leiin a'n dik nawna an hmu zo nawh. 5 A tawpah chuong mihai chun, "A Pathien dàn zawm thu le inzom thilah a ni ngot naw chun ama awkna ding remchang hmu zo ngai naw'm ei nih" an ta. 6 Chuongchun, hotuhai le biel optuhai chu lal kuomah a honin an fe a, a kuomah, "Aw lal Daria, kumkhuoin dam rawh. 7 Lal hnuoia hotuhai, thuneituhai, biel optuhai, thurawn petuhai le optuhai po po chu ni sawmthum sûng, aw laltak, i kuoma chauh naw chu pathien amanih mihriem tu khom amanih kuoma thil hni taphot chu sakeibaknei pùka thlàk ni sien ti thupêk hi insuo le kengkaw ni sien ti kan remti tlàng a. 8 Tuhin aw laltak, thupêk chu puongin ziek ngeiin insuo la, Media le Persia dàn sukdanglam thei lo ni dingin lalin a hming ziekna suoi ngei nam raw se" tiin an hril a. 9 Chuong ang chun thupêk chu Daria chun ziek ngeia insuoin a suoiin a nam nghet a. 10 Thupêk chu insuo a ni tah ti Danielin a hriet charin in sawng tienga a pindan, Jerusalem tieng ngha tukver umnaa chun a'n lawi a. A hmaa a thaw dàn ang bokin, Pathien kuomah dingthathuona lawmthu hrilin ni tin voi thum a tongtai zie a. 11 Chun, hieng mihai hi a ruolin an hang fe a, Pathien kuoma thil hnia a tongtai lai chu an hmu a. 12 Chuongchun, lal kuomah an fe a, lal thupêk chu hrilin a kuomah, "Aw laltak, ni sawmthum sûng chu nangma kuoma chauh naw pathien amanih mihriem amanih tu khom kuoma hnìna siem taphot chu sakeibaknei pûka pei ding ti thupêka khan i hming ziekin suoi i nam a ni naw maw?" an ta. Lal chun, "Ziek e. Chu chu thupêk ngïr lai, sût thei lo Media le Persia dàn a nih" a ta. 13 Anni chun lal kuomah, "Aw laltak, Juda mi saltànghai laia mi Daniel khan a poisa naw che a, khapnaa i hming ziek khom kha a poisa bok nawa, ni tin voi thum a la tongtai zing a nih" an ta. 14 Lalin chu thu a hriet chun nasa takin beidong a, Daniel chu san suok a tum tlat a, ni tlâk chenin a theitawpin a bei a. 15 Sienkhom mihai chu a honin lal kuomah an fe a, a kuomah, "Nang laltakin Media le Persia dàn ang thlapa suoi nama thupêk i'n suo tah chu sukdanglam thei a ni nawh ti i hriet" an ta. 16 Chuongchun, lal chun thu a pêk a, Daniel chu an man a, sakeibaknei pùkah an thlàk a. Lal chun Daniel kuomah, "I Pathien, ringum taka a rong i bawl rop hlak chun sanhim che raw se" a ta. 17 Pûk chu lungin an sìn a, tu khomin Daniel chu an làk suok thei nawna dingin lung chu an chàr a, lal le mi lienhai chun suoi an nam khum a. 18 Lal chu inah a'n lawi a, bu a nghei a, mi sukhlimtuhai a ko naw a, zànkhuoin a in bok nawh. 19 Lal chu zîngkàr inhma takin a tho a, inhmaw takin sakeibaknei pûka chun a fe a. 20 Daniel an thlàkna pûk a tlung chun tap rawlin, "Aw Daniel, Pathien hring rongbawltu, ringum taka a rong i bawl hlak Pathien chun sakeibaknei laka inthokin a san suok thei che am?" tiin a ko khèk a. 21 Daniel chun lal kuomah, "Aw laltak, kumkhuoin dam rawh. 22 Ka Pathien chun a vàntirko a hung tir a, sakeibakneihai bàu a sukchìp a, ieng khom an mi law nawh; a mithmuah soisel boin ka um si a. Chun, aw laltak, i chungah ieng poi khom ka tawk naw bok " a ta. 23 Lal chu a lawm ta êm êm a, Daniel chu pûka inthoka la suok dingin thû a pêk a, chuongchun an lâk suok a, Pathien a ring tlat leiin hliem pakhat khom a tuor nawh. 24 Chun, lal thupêkin Daniel hèktuhai chu an hung thuoi khawm a, an nuhmei le nauhai leh sakeibaknei pûka chun an pei lùt a. Pûk tuong khom tlung hman loin sakeibakneihai chun an lo pot chen a, an rùhai khom an se hawp vong a. 25 Lal Daria chun a ram sûng po poa mi tin le hnam tin le tong tin hmanghai kuoma chun lekha a ziek a:"In rênga chungah hmûingìlna nasa takin pung raw se. 26 "Ka ram op sùng po poa hin mihaiin Daniel Pathien chu tia inzà dingin hi thupêk hi ka siem a nih:Ama chu Pathien hring a na, Kumkhaw dai Pathien a na, A ram chu suksiet ruol lo, A lalna tawp nei lo a nih. 27 San suokin a sandam a, Vàn le hnuoiah inchikna, Thil makhai a thaw hlak a, Sakeibaknei kut a'nthok, Daniel khom a san suok a" tiin. 28 Chuongchun, Daniel chu Daria inlal sûng le Persia mi Kura inlal sûng po po chun kong iengkimah a hmûingìl ta hle a.

Daniel 7

1 Babulona lal Belsazar inlal kum khatnaah Daniel chu khuma a zàl laiin a mangin inlârna a hmu a, a mang chu a tlângpui a ziek thlak a. 2 Daniel chun, "Zàna inlàrna ka hmu chu ka hei en a, ka hmaa chun kawl kil lia inthokin thli a hung hràng a, tuipui chu a sukso buon buon a. 3 Tuipuia inthok chun sakol lien tak tak pali, inang lo seng hi, an hung suok a. 4 A pakhatna chu sakeibaknei ang a na, mupui angin thla a nei a, ka en zing lai chun a thla chu an pot kol a, hnuoia inthokin an kei tho a, mihriem angin ke pahniin an inngìrtir a, mihriem lungril an inputtir a. 5 Chun, ka hmaa chun sakol pahnina chu a lo ngìr a, savom ang a na, a kè hnung tieng chauin a ngîr a, a baua chun nâkru pathum a sè put a, rawl hung suok chun, "Tho la, i khop tawkin sa fa rawh" tiin an hril a. 6 Chu hnunga chun ka hang en a, sakol dang a hung inlang nawk a, keite tiel ang a na, a hnung tieng chun vate thla ang thla pali a nei a, lu pali a nei bok a, a kuomah chun rorêl theina thuneina an pèk a. 7 Chuonga zàna inlàrna ka en zing lai chun ka hmaah sakol palina chu a hung inlang a, pangzatum tak le tibaium tak a ni a, a hrât êm êm a. Thîr hà inhrol tak tak a nei a, a sa sèhai chu a pot chen a, a dolin a dol zung zung a, a fàk bâng po chu a chìl sop hrep a. Sakol dang ang loin kî khom sawm zet a nei a. 8 A kîhai ka en zing lai chun ki dang chikte hi a hung mawng nawk a, ki hmasa pathum chu an phawi a. Hi ki mawng thar hin mihriem mit ang mit a nei a, a bàu chun uongna thu ngot a sâk suok a. 9 Chuonga ka thlîr zing lai chun, Lalthungpha an hung rem a, Chu chun Tienlaimi hi a'n thung a; A silfen chu vûr angin a vâr a, A sam khom sahmul var ang a nih. A lalthungpha chu meichok ang a na, A ke kuolhai chu a chok puot puot a. 10 A hmaa inthok chun meilingVadung angin a luong suok a. Sâng tamin a rong an bawl a, Sîng tam a hmaah an ngîr bok a. Rorêlna chu an hang tan a, Lekhabuhai chu an phar a. 11 "Ka en zing lai chun, chapo taka a ki chu a tong a tong leiin sakol palina chu an that a, a ruong chu an chan phit a, meia chun an pei a. 12 Sa danghai thuneina khom chu an làkpèk vong a, iemani chen an la dam ruok chu an phalpèk a. 13 Zàna inlàrna ka hmu chu ka en zing laiin, ngai ta, vàn sûm laia inthoka hung thla mi pakhat, mihriem naupa ang hi ka hmu a. Tienlaimi chu a hung pan a, a hmaa chun an hung thuoi a. 14 Thuneina hai, ropuina hai le thilthawtheinahai chu a kuomah an pèk a, mi tin, hnam tin le tong tina mihai chun an chawibiek a. A lalna chu lalna hlun, ral ngai lo ding a na, a lalram chu tû suksiet thei ngai lo ding chu a nih. 15 Kei, Daniel hi, zàna inlàrna ka hmuhai chun an mi sukthlaphang a, ka lungril an chokbuoi hle a. 16 Hieng thil umziehai po po hi mi hril fie dingin chu taka ngîr laia pakhat chu ka va pan a, ka'n don a. Chuongchun thil um dàn le a hrilfienahai chu a mi hril a: 17 "Sakol pali i hmuhai kha hnuoia lalram pali la hung ngìr dinghai chu an nih. 18 Amiruokchu, Chunghnungtak mi thienghlimhai chun lalram chu chang an ta, kumkhuoin nei an tih, a nih, chatuona inthoka chatuon chenin" a ta. 19 Chun, sakol palina, a danghai nêka danglam bik, tìbàium tak el, thîr ha le dâr tin nei, a sa sehai pot nawi a, dol zung zung a, a fàk bànghai chil sop hlak chungchang chu hriet ka châk ta a. 20 A lua ki sawm um chungchàng dâm, ki dang a hung inder suok hnunga ki hmasa pathum a tlong dàn hai, ki mit nei le a baua uongna thu a'n pawt suok zing chungchàng dâm khom chu hriet ka châk bok a. 21 Chun, ka en zing a, kî chun mi thienghlimhai chu a do a, a hne a. 22 Sienkhom Tienlaimi chu a hung a, Chunghnungtak mi thienghlimhai chu hnèna a'n changtir ta lem a, lalram an hluo hun chu a hung tlung ta a. 23 Chun, sakol palìna chungchàng chu hieng ang hin a hril a: "Hi sakol palìna hi hnuoia lalram hung ngir ding palìna chu a nih. Lalram danghai nêk khan danglam a ta, hnuoi pumpui hi dol a ta, a kein chîl sop a ta, rawt nawi a tih. 24 A kî sawmhai chu hi lalrama inthoka lal sawm hung suok dinghai chu an nih. Anni hnunga hin lal pakhat hung suok a ta, a hmaa lal pathumhai chu tukdol a tih. 25 Chunghnungtak chu kalin hril se bor bor a ta, mi thienghlimhai chu nêksawr a ta, hun bi ruothai le dànhai chu thlâkthleng vong tum a ta, mi thienghlimhai chu hun khat le a chenve a kutah pèkin um an tih. 26 "Amiruokchu, rorêlna um a ta, a thuneina chu lapêk an ta, kumkhuoin sukbohmang an tih. 27 Chu zoah vànkhup hnuoia lalramhai chunga lalna, thuneina le ropuina chu Chunghnungtak mi thienghlimhai kutah pêng an tih. A lalram chu lalram kum hlun nîng a ta, rorêltuhai po po chun chawibiekin a thu zawm an tih. 28 Hi hi thil tawp dàn chu a nih. Kei, Daniel hin, hmai dâng hiel khopa tiin ka thil hmuhai chu ka ngàituo a, lungrilin ka pâi rûk ta zing a.

Daniel 8

1 Lal Belsazar inlala inthoka kum thumnaa chun kei, Daniel kuoma hin inlàrna dang a hung inlang a. 2 Inlàrnaa chun Elam biela Susan lal in, Ulai tuikor kama umin ka lo inhmu a. 3 Ka hang ngha vèl a, ka hmaa tuikor kama chun beramchal, ki pahni nei ngîr hi ka hmu a, a kî chu a sei hle a. Ki khat chu ki dang nek chun a sei lem a, a sei lem chu a mawng nuhnung lem a nih. 4 Beramchalin thlang tieng le hmar tieng le sim tieng nora a'n phìt lai chu ka hmu a, sa dang hrim hrim ama cho ngam an um naw a, a laka inthoka san suok thei an um nawh. A nuom ang anga chein a'n hrosa a, a hung chalngèng ta hle a. 5 Ka thil hmu ka ngàituo lai chun khawthlang tienga inthokin kèlchal, a mit khing hni inkâra kî langsàr deu nei hin hnuoi pum hlênin a hung inlang thut a, a kè chun hnuoi khom a tawk nawh. 6 Tuikor bula ngîr beramchal, ki hni nei chu lungsen êm êmin a hung pan a. 7 Beramchal chu na takin a baw a, a sik a, a kî pahni chu a siktliekpêk a, hnuoiah a sik thlûk a, a sir ziel a, a kuta inthoka beramchal san suok thei tû khom an um nawh. 8 Kèlchal chu a hung chalngèng ta hle a, sienkhom a hràt vànglai takin a ki hrêu chu a tliek a, a hmuna chun ki pali, kawl kil li nghain a hung mawng a. 9 Ki pali laia ki pakhata inthok chun ki chikte a hung indawn suok a, tlawm taka intanin sim tieng le sak tieng le Ram Mawid tieng chun nasa takin a hung inzàr lien a. 10 Vàn lêngruol tong hiel khopin a'n thang lien a, arasi bawr iemani zât zet chu hnuoiah a hol thlâk a, a sir hmàt a. 11 Chuong vàn lêngruolhai lal anga insuklienin, ni tina pumraw thilhlân an inhlàn hlak hai chu a lâkpèk a, a Hmun Thienghlim chu a suksiet a. 12 Vàn mi thienghlim pawlhai laia helna leiin, vàn mihai le ni tina inthawina thilhlânhai chu ama kuta chun an pèk a, iengkimah a hung hlawtling a, thutak chu hnuoia pei thlâkin a um ta a. 13 Chun, vàntirko pakhat tong ri ka hriet a, a kuoma chun vàntirko dangin, " Ni tina pumraw thilhlân chungthu dâm, helna leia sukramna a tlung thu dâm, sir ziel dinga Hmun Thienghlim le chu taka chênghai chu pèk suok an ni thu dàma inlàrna hi hlen kim a nina dingin hun ieng chen am lâng a ta?" a ta. 14 Ama chun, "Zîng tieng le zàn tieng voi sânghni le zathum sûng awng a ta, chu zoah Hmun Thienghlim chu inthien fai ni nawk a tih" a ta. 15 Kei Daniel hin inlàrna chu thlîra a umzie hriet ka tum lai chun, ka hmaah mi pakhat, mihriem ni awm tak hi a hung ngìr a. 16 Ulai tuikor kama inthok chun pasal rawlin, "Gabriel, hi pa hi inlàrna umzie chu hril fie rawh" tia a hung hril ri ka hriet a. 17 Ka bul a hung hnai chun ka ti hle a, a hmaah ka bokkhup a. Ama chun, "Mihriem naupa, inlàrna hi hun tawp ding hrilna a nih ti hre rawh" a ta. 18 A tong lai chun hmaia hnuoi sikin indên takin ka lo in a, sienkhom a mi keihar a, a mi chel ngìr a. 19 Ama chun, "Ngai ta, lungsenna ni a hung tlung phaa thil um dàn ding chu ka hril ding che a nih, inlàrna i hmu hi khawvel tawp ding thu hrilna a ni si a" a ta. 20 Chun, ama chun ka kuomah, "Beramchal ki pahni nei i hmu kha Media le Persia lalhai tìna a nih. 21 Kelchal inhmul dum kha Grik lal tìna a na, a mit le mit inkâra a ki hrêu kha an lal hmasa tak chu a nih. 22 Chun, kha a ki tliekna hmuna ki pali hung indawn suokhai kha, chu hnama inthoka ram pali la hung suok ding thu inentirna a nih; thilthawtheina ruok chu a ki hreu angin nei ta naw ni hai. 23 An inlal tawp tienga helhai an hung rilo tawpkhawk pha chun lal hmêl tium tak, thil phierrûk thiem, hung suok a tih. 24 Nasa takin hung hràt a ta, sienkhom a thilthawtheina chu amaa inthok suok ni naw nih. Ràpthlâk takin thil sukram a ta, a thaw taphotah hlawtling a ta, mi hrât khawkhènghai le mi thienghlimhai chu suksieng a tih. 25 Inhlèm chu thil hlawkah hung inchangtir an ta, chu taka a pukhawi tak chu ama nîng a tih. Muonga an inngai laiin mi tam tak suksieng a ta, lalhai Lal chu khing a ta, sienkhom mihriem kut thang loa suksietin um a tih. 26 Zîng tieng le zàna inlàrna inhmutira i um tahai kha thudik a na, amiruokchu hun sawt tak hnunga la tlung ding chauh a ni leiin inlàrnahai kha chàr khum rawh, " a ta. 27 Kei Daniel hin ka thil hmu chu ka chàupui phâ dèr a, ni tam tak dam loin ka zâl a. Ka hung tho inkàng thei chun lal sin chu ka sunzom nawk a. Inlàrna chu pangzatum ka ti hle a, hriet thiem phàk ruol a ni si nawh.

Daniel 9

1 Zarzia naupa Daria, Media hnama mi chu Babulon ram lalah a hung um a. 2 A hung inlala inthoka kum khatnaa chun kei, Daniel hin LALPAN zawlnei Jeremia hmanga Jerusalem a sukram hun sûng dinga a lo hril chu kum sawmsari a nih ti lekhabua inthokin ka hung hriet ta a. 3 Chuongchun, bu ngheiin, saiip silin, vuta inbuolin, LALPA Pathien kuomah tongtaiin dawvan ka kai a. 4 LALPA Pathien hmaah inphorin, ka mihai thil suol thaw leiin thupha ka chawi a:"Aw LALPA, Pathien ropui le tium, ama hmangaitu le a thupêk zawmtuhai chunga a hmangaina thuthlung vong tlat hlaktu, 5 i lakah thil suol thawin i poi kan tawk a. Kan rilo a, kan hel a, i thupêk le dànhai kan nghatsan a. 6 Nangma hminga kan lal hai, mi lien hai, pa hai le a ram mipui po po kuoma thu hung hril hlaktu i siehlaw zawlneihai thu chu kan ngàithlàk nuom bok nawh. 7 "Aw LALPA, nang chun indik takin thil i thaw hlak a, keini ruok chun i hmâimawkna ding ngot kan thaw lem hlak si. Judai rama mi hai, Jerusalem le Israel rama mihai le ram hla le hnaia i hnot darhai po po hi i lakah kan ringum ngai si nawh. 8 Aw LALPA, keini le kan lal hai, mi lien hai le pâ hai hi i lakah kan suol leiin inzaknan kan sip a ni hi. 9 LALPA ka Pathien, nang chun ngil i nei a, i lakah hel hlak inlang khom nang chun i mi ngàidam hlak. 10 LALPA kan Pathien thu kan zawm naw a, a siehlaw zawlneihai hmanga dàn a mi pèkhai khom chu kan vong bok nawh. 11 Israel mi po poin i dàn an bawsiet a, an nghatsan che a, i thu an awi nuom si nawh. Kan suol tlat si leiin i siehlaw Mosie Dàn bua inziek tongsie po po le i hming sâl meua kan chunga thil tha lo intlungtir dinga i lo inkhàmna po po kan chungah bun thlâkin a um tah a nih. 12 Keini le kan lalhai chunga thil hung tlung dinga i hrilhai chu hung hlenin, sietna râpthlâk tak kan chungah i hung intlungtir a. Jerusalem tluka naa i soisak khuo hi vànkhup hnuoiah tu khuo khom a um nawh. 13 Mosie Dàna inziek angin, hieng sietnahai hi kan chungah hung tlung sien khom kan suolhai sima thutak tieng ngaisak dingin LALPA kan Pathien ditsakna kan zong nuom si nawh. 14 LALPA kan Pathien chun iengkim indik takin i thaw hlak leiin, kut kei loin kan chungah sietna i hung intlungtir a ni si a. Chuong sà khom chun i thu kan awi nuom chuong si nawh. 15 "Aw LALPA kan Pathien, Aigupta rama inthokin i kut hràtin i mihai i thuoi suok a, tu chen hin hming i ser a. Keini ruok chu i chungah kan suol a, i poi kan lo tawk a nih. 16 Aw LALPA, i felna po po leiin i lungsenna le intûrna chu i khawpui Jerusalem, i tlâng thienghlima inthok hin la hmang tah dingin ka ngèn che. Kan suolna lei le kan pahai bawsietna leiin Jerusalem le i mipuihai hi kan kawl le kienga mihai nuizatbûr kan inchang zo ta si a. 17 "A nih, tuhin aw Pathien, i siehlaw tongtaina le hnìna hi lo ngàithla hràm rawh. Aw LALPA, nangma zâr bêkin i Hmun Thienghlim ram ta hnung hi ditsakna mitin hung en nawk hràm raw khai. 18 Aw Pathien, i nâ mi dawpêk la, mi ngâithla la, i mit mengin i hming puttu khawpui hang ram tàk dàn hi zuk en ta. Kan felna leia i hmaa dawvan hung kâi kan ni naw a, i zangaina ropui tak lei lema hung kâi kan nih. 19 Aw LALPA ngàithla la, aw LALPA ngàidam rawh; nangma lei bêkin aw ka Pathien, che nghal la, sawt riel ta naw rawh, i khawpui le i mipuihai hin i hming an put si a" tiin. 20 Chun, ka suol le ka mi Israelhai suol thupha chawiin ka tongtai pei a, LALPA ka Pathien kuomah a tlâng thienghlim indin thar nawk dingin ka hni a. 21 Chuonga ka tongtai lai chun, kha hmaa inlàrnaa ka hmu tah Gabriel chun zàn tieng pumraw thilhlân hun lai vel hin hrât taka vuongin a mi hung pan a. 22 Ama chun ka kuomah, "Daniel, sùngril mit varna le hriet thiemna lungril pe ding chein ka hung a nih. 23 I hnî hlima inthok khan a donna pèk i ni tah ti ka hung hril che a nih, ngàisak i hlaw hle si a. Chuleiin, ka thucha hung hawn hi ngun takin ngàituo la, inlàrna i hmu chu a umzie hre chieng rawh. 24 "I mihai le khawpui thienghlim hi bawsietna le suolna laka inthoka inthiel faina ding dàm, rîtlonaa inthoka inthien faina ding dàm, chatuon felna làk lûtna ding dàm, inlàrna le hril lawknahai hlenna ding dàm le mi thienghlimtak hriek nàlna ding dàmin hapta sawmsari ruot a nih. 25 Jerusalem tungding le bawl that dinga thupêk insuo a nia inthoka Hriek Nàl lala a hung inthung chenin hapta sari nîng a tih ti hre fie rawh. Harsatna tam tak kàrah Jerusalem kotthlêr siemna ding le tên khurhai chona dingin hapta sawmruk le pahnih ruot a tih. 26 Hapta sawmruk le pahni hnunga chun Hriek Nal chu thatin um a ta, mi le sa tu khom nei naw ni a, lal dang hung suok a ta, ama chun a sipaihai thuoiin khawpui le tempul chu suksieng a tih. Tawpna chu tui lien angin hung a ta, a tawp chenin indona um a tih, sukramna chu tlung dinga ruot sâ a ni si a. 27 Hapta khat sùng chu mi tam tak thuthlung siempui a ta, sienkhom hapta chenveah inthawinahai le thilhlânhai chu suktawp a tih. Tempul sîr khata chun sukramtu tirdakum sieng a ta, a tawpna hun dinga ruot a tlung phaa a chunga lungsenna bun thlâk a ni chenin tempula chun um a tih" a ta.

Daniel 10

1 Persia lal Kura inlala inthoka kum thumnaa chun Daniel (Beltesazar tia ko bok) kuomah thu a hung tlung a. Chu thu chu thu indik, indona ropui tak chungchàng thu a na, a thu umzie khom inlàrnaah a hril fiepèk a. 2 Chuong lai chun kei Daniel hi hapta thum pumhlûm lusûnin ka um a. 3 Bu dukdak ka fâk naw a, sâ amanih uoiin amanih ka bàuah a lût naw a, hapta thum a tlingtlàk hma chun hriek khom ka'n nàl bok nawh. 4 Chun, thla khatna ni sawmhni le palìna chun vadung lien tak Tigris kamah ka lo ngìr a. 5 Ka hang en a, mi pakhat puon zài inhmia inthuom le a kawnga rangkachak hlîr kawngchûn inzem hi ka hmu a. 6 A taksa chu beril lung ang, a hmêl chu kawlphe anga var, a mit chu meiser chok ang, a bân le kehai chu dâr nawt tle sèt ang le a rawl chu mipui tam tak rawl ang a nih. 7 Chu inlàrna chu kei Daniel chauh hin ka hmu a, ka bula umhai chun inlàrna chu an hmu ve naw a, sienkhom chuong ang thil tibaiumin a tuom lei chun inbikna ding zongin an tlànsie a. 8 Chuongchun, keima chauh ka ni ta a, inlàrna râpthlâk tak chu ka hmason a, tha hrui hrim ka nei naw a, mithi ang elin ka hmêl chu a dâng a, ka zoi vong a. 9 Sienkhom a tong ri chu ka hriet a, ka ngàithlàk lai chun bawka hnuoi sikin ka lo in innghil ta dèr a. 10 Chun, kutin a mi hung chel a, ka kut le kehai chu a'n thin hlop hlop a. 11 Ama chun ka kuomah, "Aw Daniel, Pathien mi ngàinat i nih. Tu hin ngîr inchang la, ka thu hril ding che hi fimkhur takin ngàithla rawh, i kuoma tir ka ni si a" a ta. Chu thu chu a hril zoin inthin pumin ka ngîr suok a. 12 Ama chun ka kuomah, "Daniel, ti naw rawh. Pathien hmaa inngàitlawm ding le hrietthiemna lungril put dinga lungril i siem nia inthok khan i thuhai chu ngàithlàkin a um a, chu leia hung chu ka nih. 13 Persia ram hotu ruok chun ni sawmhni le ni khat a mi dodal a. Persia lalin a mi chàr de tlat leiin mi san dingin vàntirko hotu Mikael a hung a. 14 I mihai chunga thil la hung tlung dinghai chu hril ding chein tuhin ka hung a nih, inlàrna i hmu kha thil la hung tlung ding thu a ni si a" a ta. 15 A hril lai chun hnuoi sikin ka bokkhup a, ka tong thei naw a. 16 Mi pakhat, mihriem ang deu hin ka hmùr a hung them a, chuongchun ka bàu ka ka a, ka hmaa ngîr kuoma chun, "Aw ka lalpa, inlàrna ka hmu chun a mi suklungngai a, thahrui hrim ka nei nawh. 17 Ka lalpa, i siehlaw kei hin iengtin am ka biek ding che a na? Thâ hrim ka nei naw a, ka'n thuok dèp dêp chauh a ni hi" ka ti a. 18 Chuongchun, mihriem ang deua inlang chun a mi them nawk a, a mi sukhràt a. 19 Ama chun, "Ti naw rawh, nang Pathien ngàinat mi! Thlamuong takin um rawh! Tuhin hung hràt ta rawh, hung hràt ta rawh" a ta. Chuonga a hril lai chun ka hung hràt a, "Ka lalpa, hril pei rawh, i mi sukhràt ta si a" ka ta. 20 Ama chun ka kuomah, "I kuoma ka hung san hi i hriet am? Tuhin Persia ram hotu bei dingin ka kîr ding a na, ka hnè phâ leh Grik ram hotu hung inthok a tih. 21 Sienkhom, a hmasain Thudik Bua inziek chu hril phot ka ti che: hieng mihai ka beinaa ka tienga thang chu in hotu Mikael chauh kha a nih.

Daniel 11

1 "Chun, Media mi Daria inlal tan kuma inthok khan ama thangpui ding le hum dingin kei hi ka ngîr tlat a nih" a ta. 2 "Chun, tuhin thudik ka hril ding che a nih. Persia ramah lal pathum hung suok an ta, a palìna chu a danghai nêkin nasa takin hausa lem a tih. A hausakna leia a ngìrhmun a sukhràt phâ chun Grik ram do dingin cho a tih. 3 Chun, lal hrât tak hung inlang a ta, a hrâtna nasa tak chu hmangin a nuom ang angin thawng a tih. 4 A'n lal vanglai takin a ram chu khoi dar nîng a ta, kawl kil liah sem dar an tih. A thlàhai ni lo lal dang hung inlal an ta, sienkhom ama ang tluka hrât tu khom um naw ni hai. 5 "Sim tieng lal chu hung hràt a ta, sienkhom a kawmandarhai laia pakhat chu ama nêkin hung hràt lem a ta, ama ramah thuneina nasa tak neiin inlal a tih. 6 Kum iemani zât hnungah sim tieng lal chun hmar tieng lal chu inruolthatpuiin, a naunu chu nuhmeiah inneitir a ta, sienkhom lal naunu chun thuneina chel zing naw ni a, hmar tieng lal le a thlàhai khom inlal sawt naw ni hai. Chuong hun lâi vèk chun lal naunu le a pa le a siehlaw hung somhai chu that vong an tih. 7 Chu hnung chun lal naunu sûngkuo laia pakhat chu hung inlal a ta, hmar tieng lal le a sipaihai chu do a ta, an kulah hlûkhum a ta, bei a ta, hnèng a tih. 8 An pathienhai, an milim sunghai, tangkaruo le rangkachaka siem an bûr le bêl tha tak takhai chu sim tieng ramah tol hmang a tih. Kum iemani zàt chu hmar tieng lal chu tawkbuoi naw nih. 9 Chu zoah hmar tieng lal chun sim tieng ram chu rûn a ta, sienkhom hnot kîr an tih. 10 Chun, hmar tieng lal naupa chu sim tieng do dingin insingsàng a ta, sipai tam tak khawm a ta, tui lien sàng dang ruol lo angin an kul bul chen inhuol a tih. 11 Mi tam tak thuoiin sim tieng lal chu lungsen takin hmar tieng lal chu bei dingin inthok suok a ta, hmar tieng lal chu sipai tam tak leh lo thang a ta, sienkhom tlawm a tih. 12 Hmar tieng sipai tam tak a thuoi hmang leiin sim tieng lal chu insuong hlêng a ta, mi tam tak that a ta, sienkhom hnèna chu chang zing naw nih. 13 Hmar tieng lal chun a hma nêka tam lem sipai khawm a ta, kum iemani zàt hnungah râlthuom kima inthuom sipai tam tak leh hung bei lêt a tih. 14 "Chu huna chun sim tieng lal chu do dingin mi tam tak hung ngîr suok an tih. I chihai laia thisen insuo hmanghai khom inlàrna sukpuitling dingin hel vêng an ta, sienkhom hlawtling naw ni hai. 15 Chu phing leh hmar tieng lal chu hung a ta, kul inhuolna dingin muol pawng siem a ta, kula inhuon khawpui chu lâng a tih. Sim tieng sipai hràtna chun dang zo naw ni a, an sipai hrât takhai khom che thei naw ni hai. 16 Rûntu chun a nuom ang angin thawng a ta, tu khomin kal ngam naw nih. Ama chun Ram Mawiah umhmun khuor a ta, a kutah sukram theina kol a tih. 17 A hrâtna po po leh hung inthok a ta, a ram a suksiet theina dingin sim tieng lal ruol thaa siem dingin a naunu chu nuhmeia inneitir tum a ta, sienkhom a tum chu hlawtling naw ni a, hlawkpui bok naw nih. 18 Chu hnung chun tuipui kam ramhai chu bei a ta, tam tak lâng a ta, sienkhom a kawmandar laia pakhat chun a chapona chu suktawp a ta, ama chungah bun lèt a tih. 19 Chu zoah a rama a kul umna tieng kîr nawk tum a ta, sienkhom that an ta, chu chu a tawpna nîng a tih. 20 Ama thlâktu lal chun a lalna chu ropui taka kengkaw zing tumin sie inchawi luitir dingin siekhontuhai tir suok a ta, sienkhom kum sawt naw teah lungsen lei le indo lei khom ni loin lal chu suksietin um a tih. 21 A hmuna chun mi rilo deu el pakhat hung inlal a ta, dàn anga lallukhum inkhumtir khom ni naw ni a, dawha hmangin, a ram mipuiin muonga an inngai lai chu hung rûn thut a ta, lalna chu hung hluong a tih. 22 A hmaa chun ama kaltu sipai tam tak chu tui lien angin hrût hrep a ta, lèn hmang a ta, chuonghai lai chun thuthlungtu lal khom thang a tih. 23 Vervêk taka inruolthatna thu hnam danghai a thlungpui hnungin anni chu hlêm a ta, a zuitu mi tlawmte leh hung ngîr suok a tih. 24 A ram sûnga biel hausa sahai chu muonga an inngai laiin rûn thut a ta, a pi le puhai khoma an thaw ngai lo chu thawin, a hnungzuituhai chu râllâk thil le a sum rokhai chu sem a tih. Kul nei khuohai lâk dàn ding phierrûk a ta, sienkhom hun sawt dai naw nih. 25 "A hràtna le huoisenna chu chok thoin, sipai tam tak leh sim tieng lal chu bei a ta. Sim tieng lal khomin sipai tam tak le hrât tak leh lo do a ta, sienkhom an lo phierrûkna leiin hmar tieng lal chu ngam naw nih. 26 A ruoi hnienghnâr kîlpui hlakhai ngei chun ama chu sukbohmang an ta, a sipaihai tlân dar an ta, indonaah tam tak thîng an tih. 27 Hieng lal pahnihai hin insuksiet tumna lungril put rân siin ruoi kîl tlàngin thukhêlin indawr an ta, sienkhom hlawtling naw vê vèng an ta, a hun ruotah la tawp vé vè tho an tih. 28 Hmar tieng lal chu rosum tam tak leh ama ram tieng kìr a ta, sienkhom a lungrilin thuthlung thienghlim chu thiekpêk tum a ta, a nuom anga a thaw zoah a ramah kîr nawk a tih. 29 "Hun ruota chun sim tieng lal chu do nawk a ta, amiruokchu a hmaa ang ni ta naw nih. 30 Ama do dingin thlang tieng tuipui kam ramaf inthokin long ruol hung an ta, a lungril zâm a ta, a lungsen hrìk thlàkna dingin thuthlung thienghlim chu thiek tum a ta, thuthlung thienghlim kaltuhai chu hung ditsak a tih. 31 A sipaihai chu tempul inhuonna kul suosam dingin hung inthok an ta, hmun thienghlim chu sukporchèng an ta, ni tina pumraw inthawina thilhlân an thaw hlak chu suktawp an ta, sukrautu thil tirdakum chu sieng an tih. 32 Thuthlung inphatsantuhai chu tongkam thluma inpâk derin sukporchêng a ta, sienkhom Pathien thu zawmtuhai ruok chu nghet taka thang tlatin ama chu do an tih. 33 "Anni laia mi varhai chun mi tam tak zirtir an ta, sienkhom iemani hun sûng chu a then kawlhnâm le meiin thîng an ta, a then lung inah khum an ta, a then chu rok bok an tih. 34 An tlu pha thangpuitu nei tlawm an ta, lungrila ti tak tak lo mi tam takin anni chu zui an tih. 35 Mi var thenkhat chu tawp hun a tlung chena thlit fìm a, sukthieng a, bal kai loa an um theina dingin tuor bok an tih, hun ruot chu a la hung tlung ding chauh a ni si a. 36 "Lal chun a nuom dàn ang angin thawng a ta, ama insukropuiin inchawisâng a ta, pathienhai po po chungah insieng a ta, pathienhai Pathien kalin, hril tìpa nei loin inpawt a ta, lungsenna hrîk thlâk zo a ni hmâ khat hlawtling a tih, ruota lo um ta sa chu a hung tlung ngei ding a ni si a. 37 A thlàtuhai pathien chu poisa naw ni a, nuhmei ruol ngainat pathienhai le pathien dang hrim hrim khom poisa bok naw ni a, an rênga chungah insieng a tih. 38 Annihai nêkin kul humtu pathien chu chawimawi lem a ta, a pi le puhai hriet ngai lo pathienhai chu rangkachak hai, tangkaruo hai, lunghlu hai le thil hluhai pein chawimawi a tih. 39 Ram dang pathienhai thangpuinain kul nghet tak takhai chu bei a ta, tu khom ama pom taphot chu suklien a ta, tam tak chungah ro inrêltir a ta, a ram chu man neiin sem a tih. 40 "Chun, tawpna huna chun sim tieng lalin ama chu hung bei a ta, hmar tieng lal chun tawlailir leh, sakor chungchuong mi le long tam tak leh ama chu do dingin thlipui angin inthok suok a tih. Ram tam tak do a ta, tui lien sàng angin hrût hmang a tih. 41 Ram Mawi khom chu rûn a tih. A hmaah ram tam tak tlûng an ta, sienkhom Edom le Moab le Amon hnam thuoituhai ruok chu a kuta inthoka san suok nîng an tih. 42 Ram tam tak chungah inlal a ta, Aigupta khomin pumpel bik naw nih. 43 Aigupta rama rangkachak le tangkaruo sie khawmna le a ram thil hluhai po po chu hung lâng a ta, Libya mihai le Ethiopia mihai khom a thu hnuoiah kûn an tih. 44 Sienkhom, sak tieng le hmar tienga inthoka rîva a hrietin a lung thawng a ta, anni do ding le sukchimit dingin lungsen takin inthok suok a tih. 45 Tuipui le tlâng thienghlim le mawi inkârah bûk khuor a ta, sienkhom a tawpna hung tlung a ta, tu khomin thangpui naw ni hai.

Daniel 12

1 "Chu huna chun i mihai vêng hlaktu hotu ropui tak Mikael chu hung suok a tih. Hnamhai an uma inthoka la tlung ngai lo buoina nasa tak tlung a tih. Chu huna chun, I mihai, lekhabua hming chuong taphothai ruok chu san himin um an tih. 2 Hnuoi pilvuta zâl tah mi tam tak chu hung tho an ta, thenkhat chu chatuon hringna chang dingin tho an ta, thenkhat ruok chu inzakna le chatuon muolphonaah lût an tih. 3 Mi varhai chu vàna var angin êng an ta, felnaa mi tam tak thuoi lûttuhai chu arasi angin chatuonin var tâng an tih. 4 Sienkhom aw nang Daniel, thu ziekna bu chu ziel la, tawpna hun a tlung chenin chàr tlat rawh. Hre nuomin mi tam tak tlân vêl ruoi an ta, hrietnag pung phâng a tih" a ta. 5 Chun, kei Daniel chun ka hang en a, ka hmaa chun vakam tuoka mi pahni ngîr ka hmu a. 6 Vadung hnâr tienga um puon zâi inhmia inthuom kuoma chun pakhatin, "Hieng thilmakhai tlung kimna ding hin kum ieng zât am la ngai a ta?" a ta. 7 Puon zâi inhmia inthuom, va hnâr tienga um chun a kut chang tieng le voi tieng chu vàn tieng a phar a, chatuona hring hming chu sâlin, "Hun khat, hun hnih, hun chenve sûngh nîng a tih. Pathien mihai sukdùdàna a tawp pha leh hieng thil po po hi hlen kim nîng a tih" a ta. 8 A tong ri chu ka hriet a, a umzie ruok chu ka hriet nawh. Chuleiin, "Ka lalpa, hieng po po tawpna chu iem nîng a ta?" tiin ka'n don a. 9 Ama chun, "Daniel, fe ta rawh, thuhai chu a tawp hun chena dinga chàr a ni tah. 10 Mi tam tak thlit fim le sukthieng le fai vara siem nìng an ta, sienkhom mi rilohai chu rilo zing an tih. Mi rilo tu khomin hre thiem thei naw ni hai a, mi varhai ruok chun hre thiem an tih. 11 Ni tina pumraw thilhlân suktawp a nia inthoka sukràutu tirdakum sie a hung ni hun inkârah ni sângkhat le zahni le sawmkuo tlâng a tih. 12 Nghâk hràm hrám a, ni sângkhat le zathum le sawmthum le panga nghâk tlungtu chu a eng an thawl. 13 Nang chu a tawp chenin fe pei rawh. Chun, chawl i ta, i nihai tawpna a tlung pha leh i rochana ruot chu dong dingin tho nawk i tih" a ta.

Hosea 1

1 Juda lal Uzia hai, Jotham hai, Ahaz hai le Hezekia hai inlal lai le Israel lal Jeroboam, Jehoasha naupa inlal laia Beri naupa Hosea kuoma LALPA thu hung tlung chu: 2 LALPAN Hosea hmanga Israelhai kuoma thu a hril tan lai khan, LALPA chun Hosea kuomah, "A ramin LALPA nghatsan a, suol taka a uiretsan angin, nang khom fe la, nuhmeiah nawchizor va nei la, nawchizor le chun nau nei ro" a ta. 3 Chuongchun a fe a, Diblaim naunu Gomer chu nuhmeiah a nei a, nau a pai a, naupa a hringpêk a. 4 LALPA chun Hosea kuomah, "A hmingah Jezreel sak rawh; sawt riel loin Jezreel phuba chu Jehu sûngkuo chungah ka lâk ding a ni si a; Israel lalram khom suktawp bok ka tih. 5 Chu nia chun Israel thalngul chu Jezreel Ruomah ul tliek ka tih" a ta. 6 Chun, Gomer chun nau a pai nawk a, naunu a hring a. LALPA chun Hosea kuomah, " Israel sûngkuo chu laina zing ta loa ka ngaidam el ta naw ding a ni leiin, a hmingah 'Lo-Ruhama'b sak rawh. 7 Juda sûngkuo ruok chu laina zing ka ta, thalngul amanih, kawlhnâm amanih, sakor le sakor chungchuong mihai hrâtna hmang loin, LALPA an Pathien chun san suok ka tih" a ta. 8 Lo-Ruhama-in nene a nghei hnung chun Gomer-in nau a pai nawk a, naupa a hring a. 9 LALPA chun, "Ka mihai in ni ta naw a, in Pathien ka ni bok naw leiin a hmingah Lo-Ammic sak rawh" a ta. 10 Amiruokchu, Israel nauhai chu tiem seng lo le inkhi ruol lo, tuifinriet kama phaiphin anga tam la nîng an ta, "Ka mihai in ni nawh" a tìna hmuna ngèi chun "Pathien hring nauhai in nih" tiin la ko an tih. 11 Juda mihai le Israel mihai chu insuikhawm nawk an ta, thuoitu pakhat nei an ta, an ram chu hluong an ta, Jezreel nid chu la ropui a tih.

Hosea 2

1 In unaupahai chu 'Ammi' tiin, In farnuhai chu "Ruhuma' ti ro. e Israel hremna le tungdingna 2 In nu hi hal ro, hal mol ro, Ka nuhmei a ni tah naw a, A pasal ka ni tah bok nawh. A nawchizor mitmeng hi peiin, A tâng a dor hi bânsan raw se. 3 Chuong naw chun a pieng ni a, Saruoka a um ang khan, Saruok dêrin siem ka tih. Thlalèr angin siem ka ta, Ram tawlin inchang a ta, Tui sam dangchârin thîng a tih. 4 A nauhai làinat naw ning, Nawchizor nau an ni si a. 5 An nu a ringum naw a, Muolpho taka a pai an nih. "Fâk le dawn le sil le bil, Sahriek le uoiin mi petu, Ka ngaizawnghai hnot ka tih"Tiin ama chun a hril a. 6 Chuleiin, a lampuiah, Hling bon inzàmtir ka ta, Lampui a hmu nawna di'n, Dâi sakin hnaw ping ka tih. 7 A ngaizawnghai hnot a ta, Sienkhom hnot phâk nei naw nih; Anni chu zong ruoi a ta, Sienkhom tu khom hmu naw nih. "Ka pasal hmasa kuomah, Fe kîr nawk phot el ka tih, Tuta nêk chun khâ hmaa, Ka ngîrhmun kha a tha lem"Tiin ama chun hril a tih. 8 Baal bieknaa a'n hlàn hlak, Bu le uoiin le hriekhai chu, Keima pêk ngot a nizie dâm, Tangkaruo le rangkachakaVurtu ka ni ziehai khom, A hriet nuom ta hrim hrim nawh. 9 "Chuleiin bu sîk hunah, Ka buhai làkpêk ka ta, Uoiin thar a sawr hunah, Keiman làkpêk vong ka ta, A saruok inkhumna dinga, Ka pêk sahmul le pathai, Keiman lakîr vong ka tih. 10 A ngaizawnghai mithmuah, Saruokin kei phar ka ta, Ka kuta inthok tu khomin, San suok thei hrim hrim naw nih. 11 Insukhlimna a nei po po, Thla thar lawmhai, chawlnihai, Kût a hmang hlak po po chu, Keiman suktawp vong ka tih. 12 A grêp le theichang kunghai, A ngaizawng laka a hlaw suok, Ni dinga a hril hlakhai chu, A rêngin sukram ka ta, Thùlbukah inchangtir ka ta, Ramsahaiin tlàn an tih. 13 Baal hmaah rimtui raw a, Ni a hmang sûng zât po chu, Ama hremnan hmang ka tih. Kutsebi le belmawi tinrêng, Inbelin ngaizawng a hnot a, Kei ruok chu a mi theinghil si"Ti hi LALPA thu suok a nih. 14 "Sienkhom ama chu zawr nawk ka ta, Thlalèr hmunah thuoi ka ta, Biethu inhlàn nawk ka tih. 15 A grêp huon pekîr ka ta, Buoina ruom Akorf khom chu, Beiseina kot inchang a tih. A tleirawl lai nihai angin, Aigupta a suoksan lai ang khan, Chu pha chun lawm hla rem a tih. 16 "Chu ni chun 'Ka lalpa' mi ti loin, 'Ka pasal' tiin mi ko tâng a tih, Ti hi LALPA thu suok a nih. 17 A hmûra inthokin Baal hming, Ka lâk hmangpêk ding a na, Sàm khom sâm ta ngai naw nih. 18 Ramsa le chunglêng vahai, Hnuoia hring tinrênghai leh, Inremna siempêk ka ta, Thalngul, kawlhnâm le indonahai, A ramah sukbo ka ta, Him takin chêng tlâng an tih. 19 Kumtluonga ka thai dingin, Nei song tàng ka ti che a, Fel tak le ringum takin, Hmangaina le lungsietnain, Thâiah pom tâng ka ti che. 20 Ringumnan huol ka ti che a, LALPA ka ni hre tâng i tih. 21 LALPA chun hieng hin a tih:"Chu ni chun inhong ka ta, Vàn lakah inhong ka ta, Hnuoi lakah inhong an tih; 22 Bu le uoiin le hriek ta dingin, Leihnuoi chu inhong a ta, Bu le uoiin le hriek hai khom, Jezreelg ta din inhong an tih. 23 Jezreel chu ka ta dingin, A rama chun phun ka ta, Hmangai hlaw ngai lo chungah, Hmangaina suklang ka ta, 'Ka mihai' ti hlaw lo chun, 'Ka mihai' ti hlaw tâng an ta, Annin, 'Kan Pathien' mi tîng an tih.

Hosea 3

1 Chun, LALPA chun ka kuomah, "Israel thlahai chu pathien dang tieng nghain, grêp tawla siem bei inhlàn uor hai sien khom LALPAN anni chu a hmangai zing ang bokin, nang khom mi dang le indit le uire tah i nuhmei kuomah fe la, va hmangai nawk rawh" a ta. 2 Chuongchun, tangka shekel sawm le panga le barli kilogram za le sawmngain ama chu ka'n chawk a. 3 Chun, a kuomah, "Ni tam tak ka kuoma um ding i ni leiin nawchi zor ta naw la, pasal dang umpui nei bok naw la, chuong ang bokin kei khom i lakah um ka tih" ka ta. 4 Israel thlahai khom hun sawt tak lal le hotu hai, inthawina hai, an lung thienghlim hai, thiempu zakuo efod hai le an aisanna milim hai nei loin an khawsa ding a ni si a. 5 Chu hnung chun Israel thlahai chu hung ngha kìr an ta, LALPA an Pathien le an lal Davida chu pan nawk an ta, LALPA chu tî tâng an ta, a thatna zàr zo kumkhuo tâng an tih.

Hosea 4

1 Aw nangni Israel thlahai, LALPA thu hi ngaithla ro. A ram sûngah indikna hai, Ringumna le Pathien hrietna, Hmu ding a um ta naw leiin, LALPAN a sûnga chênghai, Thiem naw a'n changtir a nih. 2 Inkhàm, inhlèm le inthat, Rùkrùk le uire a'n lêng a, An inthat zom zat a nih. 3 Chu chu ramin a tuor a, A mi chênghai an ngùi a, Ramsa le chungleng vahai, Tuipui nga chenin an tuor hlà. 4 Sienkhom tu khomin mi dang, Intum hrim hrim naw raw se; In thiempuhai hi an nih, Mi hêka bei hrep hlaktu chu. 5 Sûn le zànin in petek a, Nangni ruolin in zawlneihai, An lo petek ve pei bok a. Chuleiin, in nu Israel hi, Ka sukbohmang ding a nih. 6 Ka mipuihai sietna bul chu, An mi hriet naw hi a nih. Nangni ka thiempuhaiin, In mi hriet nuom naw leiin, Ka thiempuah ka hnawl cheu a, In Pathien Dàn in thlàthlam a, In nauhai thlathlam vêng ka tih. 7 Thiempu ruol an tam po leh, Ka laka hel an pung a, An Ropuina Pathien chu, An sukmuolpho takzet si. 8 Ka mihai bawsietna chu, Insukthaunan an hmang a; Mipui an rilo po leh, An lawmna a zuol ting si. 9 Thiempuhai le mipuihai, A chuong a liem an um nawh; An um dàn ang chara hreminAn thilthaw thungrul ka tih. 10 "Inthawina sà an fâk teu a, Sienkhom an khop chuong naw a; Chi thatna pathien an pan a, Sienkhom an pung chuong si nawh, LALPA an zàmsan lei a nih. 11 Nawchizorin an inhmang a, Hrietthiemna inhmang khopin, Uoiin chènin an intâl buoi. 12 Ka mihan thing milem bein, Thing bong thu an khûkpui a; Nawchizornan thuoi hmangin, An Pathien an nghatsan a. 13 Tlâng sîp tinah inthawiin, Saisuo thing le beraw thing zâr, Tarpin thing buk hnuoia hai, An naunuhai inphalraiin, An mohai khom an uire hlak. 14 An naunuhan nawchi zor a, An mohai an uire khomin, Anni chu hrem tawl naw ning, Nangni ngei hi nawchizorhaiZawl puon inzawnpui hlaktu, Tempula nawchizor ruol leInthawi tlàng hlaktu in nih. Hrietthiemna nei lo mihai chu, An tlu se ding hrim annawm. 15 Aw Israel, nang inzor la khom, Juda chu kai zap lul naw rawh. Gilgal le Beth-Aven ah hai, Inthawi din hang fe naw la, Chu chun LALPA hming salin, Siesamin inkhâm naw rawh. 16 Israel mihai lululzie chu, Bawng la lulul ang an nih. Beram ruol anga khalin, Iengtin am hlobet hmunah, LALPAN intlattir thei a ta? 17 Efraim-in milem a'n zompui a, A cháng chàng changpui raw se! 18 Zu hmun hlim an chèn zo pha, Nawchi zorin an inphalrai a; An rorêltuhai thlàkhlà chu, Thil inzapuium thaw a nih. 19 Thlipuiin fen hmang tawl a ta, An inthawinahai lei chun, Muolphoin la'n zak an tih.

Hosea 5

1 Thiempuhai, hi hi hre ro!Israel mihai, ngaituo ngun ro!Lal sûngkuohai, in na daw ro!In chungthu hrilna a ni si a:Mizpa tlàngah châng in kam a, Tabor tlâng chen lèn in zar hi. 2 Helna le mi suomnaah, Kut in rol inthûk èm êm a, Ka hrem vong ding cheu a nih. 3 Efraim chungthu ka hriet vong, Israel khom ka hmu tlang vong. Efraim chu a uire tàk leiin, Israel chu a lo porchè zo tah. 4 An Pathien tienga kîr dingin, An thilthawin a dâl tlat si. Inzor an châk dop dop a, LALPA hrim an hriet fûk nawh. 5 Hmâisana Israelhai hèktu chu, An chapona hi a nih; Israel le Efraim hai chu, An suolnan a bûk thlûk a, Juda khomin a tlùkpui ve. 6 An beram le bawng ruol inhlànin, LALPA zongin inthawi sien khom, Ama chu hmu zo naw ni hai, A nghatsan tawl ta si a. 7 LALPA lakah ringum loin, Hnam dang sawn dâm an hringpêk a; Thla thar dêt pha an ram chopin, An rêngin ram vong an tih. 8 Gibea-ah beram kî mût unla, Rama khuoah tawtawrawt, Beth-Avenah râlkhêl mût ro; Benjamin, hnung tieng en rawh! 9 Hremna ni a tlung pha chun, Efraim chu ram vong a tih. Thil hung tlung ngei dinghai chu, Israelhai kuomah ka hril a ni hi! 10 Judai rama mi lienhai chu, Ramri lung sontu ang an nih. Ka lungsenna chu an chungah, Tui angin bun thlâng ka tih. 11 Efraim chu nêksawrin a um, A thu tlûkna siem a sietpui, Ieng khom ni lo a bêl tlat leiin. 12 Efraim lakah hângthîm ang, Juda lakah hmonna ang ka nih. 13 Efraim chun a natzie a hriet a, Juda khomin a hliem natzie a hriet. Efraim chun thangpuitu dingin, Asuria lal a bèl a, Sienkhom a sukdam thei nawh. 14 Efraim lakah sakeibaknei ang, Juda lakah keipui ang ka nih. Pot chen nengin fesan ka ta, Anni chu fen hmang ka ta, Tu khomin san ngam naw nih. 15 Suol sima an hung kìr hmâ khat, Ka hmun tieng fesan ka tih. Chuongchun ka hmêl zong an ta, An rinum tuorna lei chun, Namên loin mi zong an tih.

Hosea 6

1 "Hung ro, LALPA kuomah kîr ei tiu. Mi lo kei nawi tah sien lakhom, A mi sukdam nawk ding a nih; Mi lo inhliem tah sien lakhom, Ei hliemnahai tuom nawk a tih. 2 A kuoma ei chèng theina dingin, Ni hni hnungah mi kei har a ta, Ni thum niah mi tungding a tih. 3 LALPA chu hrieng ei tiu khai, Hre dingin thaw pei ei tiu. Khêl loa ni a suok angin, A la hung inlang ding a nih. Ruotui angin hung tlung a tih, Hnuoi sukhnawngtu thâl ruo angin. h 4 "Efraim, iem ka law ding che a na?Juda, nang khom iem ka law ding che?In mi hmangaina chu tieusûm ang, Zîng daidaw ral nawk el ang a nih. 5 Chuleiin, ka zawlneihai hmangin, Ka rawt nawi hlak cheu a ni kha. Ka tong bausuok thu hmangin, Ka sukhlum hlak bok cheu a, Ka rorêlna chun têk tla angin, A hung dèng hlak cheu a nih. 6 Inthawina nêka ka dit lem chu, Hmangaina detdo a nih; Pumraw inthawina nêkin, Pathien hrietna ka dit lem. 7 "Sienkhom Adam ang bokin, Ka thuthlung an bawsiet a, Ka lakah ringum loin, Chuong thilhai chu an thaw si. 8 Khawpui suol Gilead hniekah, Thisen a kai zel zula. 9 Roktuhan mi an inchân angin, Thiempuhan mi an lambun a, Sekem lampuiah mi an that a, Thil suol râpthlâk tak an thaw. 10 Israel sûngkuohai lai hin, Thil pangzatum tak ka hmu a, Efraim nawchizorna chun, Israel a sukporchè zo tah. 11 Saltàngnaa inthoka, Ka mihai ka thuoi kìr pha, Nang ngei khomin aw Juda, I thaw rà la sîk i tih.

Hosea 7

1 Israel tungding ka tum pha leh, Efraim suolna ngot ka hmu a, Samaria suolna po po leh. Inhlèm tuo ngot an chîng a, Mi inah lûtin an rok a, Tuol pârah mi an suom a; 2 An suol thaw ka hriet vong ti, Ngaituona châng an hriet nawh. An suolnan a chìm vel a, Ka hmaah a'n lang zing si. 3 Rîtlonan lal an suklawm a, Khêl hril thiemnan mi lienhai; 4 An rêngin uire an na, Bei siemtun bei a ur a, A bei ur puom hma poa, Mei a ti hlut hlut ang hin, Suol thaw châkin an sahal. 5 Lalin ruoi a thè chângin, Mi lienhai an indawn rui a, Lal khom nuizatbûra insiemin, Ama nuisawtuhai lai a thang a. 6 An lungril chu thuk ang a na; Dawhaa lal an phierrûkna chu, Zàn khuo'n an lungrilah a'n ài a, Zîng tieng a hung chok suok a. 7 An rêngin thuk angin an chok a, An lalhai an tlu thal rum a, Tu khom mi ko an um nawh. 8 Efraim chu hnam danghai leZawl puon inzawn mi a na, Bei phêk inlet lo ang a nih. 9 Ram dang mihaiin a thâ, An sor chàu ti a hriet naw a, A sam an tuok vong tah ti khom, A hriet thei hrim hrim si nawh. 10 Hmaisana Israel hêktu chu, A chapona hi a na, Chuong chu a ni sà khomin, LALPA a Pathien zonga, Hung kîr nachâng a hriet nawh. 11 Efraim chu vàthu lungmawl, Hlem bawl olsam ang a na, Aiguptahai a ko khêk vak, Asuria tieng a thle nawk thùl. 12 A fèna taphotah lènin, Ama chu inkhum ka ta, Vate angin man khawm ka ta, An fuon khawm ti ka hriet pha, Lènin man khawm tawl ka tih. 13 An chung a va pik ngei de!An mi nghatsan tlat si a. Ka laka hel an ni leiin, Sietna an chungah tlung raw se!Intlan suok ka nuom hlea chu, Thukhêl ngotin an mi bei si. 14 Lungril takin an mi ko nawh, Khum laizawla inhrawt an nih. Bu le uoiin an dit lei a, Inât thi neng nung an na, Ka laka helhai an nih. 15 Zirtîrin ka sukhràt tawl a, Sienkhom ka lakah thil tha lo, Anni chun an phan rûk si. 16 Chunghnungtak kuom tieng panin, An hung ngha kìr nuom naw a, Thalngul kawia kawi an nih. An hotu tong chapohai chu, Kawlhnâmin sâm thlung an ta, Hi lei hin Aigupta ramah, Nuizatbûr inchang an tih.

Hosea 8

1 "Ka thuthlunghai bawse a, Ka dàn lakah an hel leiin, Hmêlmahai chun mupui angin, LALPA in chung an hung vêl a, Râlkhêl tawtawrawt mût ro. 2 Israelhai chun ka kuomah, 'Aw Pathien, keinìn kan hriet che'Tiin an hung khêk hlaka chu, 3 Thil tha an hnawl tlat si leiin, Hmêlmahaiin hnot thlûr an tih. 4 Ka thu la hrim hrim loin, Annin lal an insiem a, Ka remtina thang dêr loin, An hotu ding an inruot a; Anni insuksietna dingin, Tangkaruo le rangkachakin, Milemhai an insiem bok. 5 Aw Samaria, i bawngte lim biek, Ka lung kheitu kha hnawl rawh. Ieng chen top am insukporche, In la tum zing ding a na? 6 Israel kut themthiemhai siem, Milim chu Pathien a ni dèr nawh. Samaria-a bawngte milim chu, Suknawi vong la nîng a tih. 7 Thli an tu a, Thawngaleivir an sìk. Bu kûngin vui a nei naw a, Bu sìk ding hrim um naw nih. Lo sîk ta hrim hai sienkhom, Ram dang mihan fa zo an tih. 8 Israel chu lem zoin a um a, Tlâktlàina nei lo bêl angin, Hnamhai lai a lo inchang tah. 9 Ram sabengtung vâkvài angin, A ngaizawnghai kuoma chun, Efraim chu a lo hang inzor ta si. 10 Hnam dang lai inzor sien khom, Tuhin la khawm nawk ka tih, Lal hrât sawrdèna hnuoiah, An zùr hlum ding an ta si a. 11 Efraim chun inthawina din, Maichàm tam tak a bawl a, Sienkhom suol sukpung zuoltu, Maichàm an inchang lem si. 12 Ka dànhai ka ziekpêk teu a, Sienkhom mi dang ta an sawn a. 13 Ka ta dinga thilhlânhai chu, Inthawina dingin an hmang a, A sahai chu an fâk a, Sienkhom LALPA a lawm nawh. An rîtlona hre zing ka ta, An suol leiin hrem ka ta, Aiguptaah kîr nawk an tih. 14 Israel chun a Siemtu nghilin, Lal in ropui tak tak a bawl a; Juda chun kul nei khuohai. Indin belh teuh sienla khom, Khuohai chu raw vong ka ta, An khaw kulhai kàng ram a tih.

Hosea 9

1 Aw Israel, hlim naw rawh, Hnam danghai hlìm khèk angin, Lawmin hlim chiri naw rawh; I Pathien i uiresan a, Hrizawl tina i'n zorna man chu, I thil thlâkhlâ tak a nih. 2 Hrizawl le grêp sawrna khurah, I khopkham hmu naw ti nih; Uoiin thar tlung bok naw nih. 3 LALPA ramah chêng zing naw ti nih; Efraim chu Aiguptaah kîr a ta, Asuria-ah fâk thieng lo fâng a tih. 4 LALPA kuomah dawn thilhlân, Uoiin bun suok naw ni hai a, An thil inhlânah lawm naw nih. Ruokngha sa kîltu ang elin, An bu fa taphot porchêng an tih. Anni chauh fâk ding a na, LALPA inah hung lût naw nih. 5 LALPA kùt nihai a tlung pha, Ieng am in thaw ta ding a na? 6 Sietna an tlànsan khomin, Aigupta'n ruong inhlawm a ta, Memfis-ah phûm tawl an tih. An rothil tangkaruohai chu, Chîmbukin bawm khum a ta, An puon in zarna hmunhai chu, Hlingin la bawm sip a tih. 7 Hremna ni a hung tlung mèk, Suol man intèlna ni ding chu:Israelhai, lo hre ro khai. In bawsietnahai chu tamin, In helna hi a nasa êm leiin, Zawlnei khom invêtah in ngai a, Thlarau mi khom intlaw bilingah. 8 Zawlnei chu, ka Pathien mi, Efraimhai ralvèngtu a na, Sienkhom a fèna taphotah, A awkna ding châng an kam a, Pathien inah an lo tai a. 9 Gibea chèng lai ni ang khan, Porchèna tieng an tla inthûk a, Pathienin an rîtlona a hriet a, An suol leiin la hrem a tih. 10 "Israel ka hmu tìr khan, Thlalèra grêp hmu ang ka na, In thlàtuhai ka hmu tìr khan, Theichang lèra a ra hmasa, A hmin tìr hmu ang ka nih. Sienkhom Bal Peor an tlung chun, Milim inzapuium tak hmaah, An hung inhlân ve el ta a, An milim ngainathai ang bokin, Tirdakum an hung kai ve ta si. 11 Efraim ropuina chu vate angin, A lo vuong hmang dai ta si a; Nau pieng um naw ni hai a, Nau von um naw ni hai a, Nau pai um bok naw ni hai. 12 Naupang nei an ni khomin, An nauhai lu sûn an ta, Dama hlà hrim nei naw ning. Anni ka nghatsan pha chun, An chungpikna zuol a tih. 13 Efraim chu Tura ang boka, Ram tha taka phun a nih. Sienkhom Efraim nauhai chu, That ding chaua a nei an nih. 14 Aw LALPA, an ta dingin, Iem a na i thawpêk ding chu?Nau insiet hlak sùl pe la, Nene vuoi tui nei lo leh. 15 "Gilgala an rîtlonahai lei khan, Ka theida tawl ta hrim a; An thil suol thawhai leiin, Ka in a'nthok hnot suok ka ta, Hmangai zing ta nawng ka tih, An hotuhan an mi helsan si. 16 Efraim hna a tlol zo a, A zung chen a vuoi zo a, Ra hrim insuo ta naw nih. Nau a hring a ni khomin, A nau dit em emhai chu, Keiman sukhlum tho ka tih. " 17 A thu an awi naw leiin, Ka Pathienin hnawl tawl a ta, Hnam tin lai vâkvài an tih.

Hosea 10

1 Israel chu grêp inbuk tha tak, Kûr luoia ra ang a ni hlak. A hung rà rawn ang peiin, Maichàm a siem rawn pei a; A ram hmuingil ang peiin, Lung ser lim a'n din rawn a. 2 A lungril inhlemnan a sip a, Thiemnaw ârbawm phur a tih. An maichàmhai sukchim ka ta, An lung biekhai suksieng a tih. 3 'LALPA kan ti naw leiin, Lal kan nei ta naw a nih; Lal nei khom ni hrim inlang, Iem a mi thawpêk thei ding?'Tiin anni chun la hril an tih. 4 Thu tam tak an intiem a, Khêlin thu an inkhàm a, Mihai thu an thlungpui a. Chuleiin, leilet indûr a, Hnamtûr a to rawn angin, Thubuoi a suok rawn lem si. 5 Samaria chênghai chu, Beth Avena bawngte lim leiin, Thlaphâng takin an um a; Mipuihai chun an sûn a, Thiempuhai an tap inrûm a, An ropuina milim chu, Làk hmanga a um leiin. 6 Milim chu Asuria tieng, Lal tak kuoma pêk dingin, An fe hmangpui ding a nih. Efraim chu inzak a ta, Israel chun a thing milim, La muolphopui ngei a tih. 7 Tuiin hnawl a lèn angin, Samaria lal fen hmang an tih. 8 Beth Avena bawlhmun sânghai, Israelhai suol thawna hmun chu, Suksiet la ni vong a tih. Hling bukin bawm khum an ta, Mihai chun tlânghai kuomah, "Mi sìn khum rawh" tîng an ta, Muolhai kuoma khom mihan "Mi del rawh" la tîng an tih. 9 Gibea khuoa i suol ang khan, Aw Israel, i suol zom zar zar a, Inthlâkthleng hrim i tum nawh. Gibea thil suol thawtuhai kha, Indonan a nangchîng ni lo maw? 10 Ka nuom pha leh hrem ka ta, Thuo hnia an suol leiin, Hrengthîr inbuntir dingin, Hnam tinhai hawr khawm ka tih. 11 Efraim chu bawngla zirtir tah, Bu chil châk tak ang hi a na, Inrim nawk zuola sor dingin, A thlukvum mawiah ringkol, Keiin inbâttir ka tih. Efraim in làngkawn hnûk a ta, Làngkumah Juda hmang ka ta, Jakob chun pil tuk nawi a tih. 12 In ta din ram thar inlet unla, Felna chi chu tu unla, Chuoi lo hmangaina sîk ro. In kuomah LALPA hung a, Felna hung insûrtir dingin, Ama chu zong hun a nih. 13 Sienkhom rîtlona in tu a, Khawlona rà in sìk a, In khêlhlip rà in fàk a. Nangni hrâtna chu ring a, In sipai hau in ringsan leiin, 14 Râlin hung bei an ti cheu a, In kulhai sukchim vong an ta, Beth Arbel a hung bei ni a, Salmanin a suksiet ang khan, Nu le nauhai chu hnuoi vuoknan, An la hmang ding a ni si a. 15 ​Nangni Bethela chenghai, In rilo bêk bêk leiin, Chuong chu in chungah tlung a ta, Zîngkar indona a'n tran pha leh, Israel lal chu se vong a tih.

Hosea 11

1 A naupang lai daia inthokin, Israel chu ka hmangai a, Aigupta rama inthokin, Ka nau dingin ka ko suok a. 2 Sienkhom ka ko inzing po leh, A mi'n hlat zuol sauh hlak si. Baal kuomah an inthawi a, Milem kuomah rimtui an inhlàn. 3 Efraim chu a bânah chel a, Lawn dàn zirtirtu ka nih; Sienkhom ka keitlei a nizie, Anni chun an hriet si nawh. 4 Ngilneina hruolhruia keiin, Hmangaina hruiin ka thlung a; An ringkol bàt ka hlîppêk a, Kûnin bu ka'n bà tawl a. 5 Chuong chu a ni sà khomin, An inlamlèt nuom si nawh. Aiguptaah kìr nawk an ta, Asuria lal hnuoiah kûn an tih. 6 An khawpuiah chemsen inlêng a ta, An kul kotkhàrhai suksieng an ta, An thil tumhai suktawp an tih. 7 Ka mihai chun mi nghatsan lui, An tum tawk tawk tlat leiin, Chunghnungtak ko hai sien khom, Aman lo ûksak naw nih. 8 Aw Efraim, iengtin hrim am, Thlauthla thei ka ti che a?Aw Israel, iengtin hrim am, Inthlà thei ka ti che a?Adma khuo le Zeboim khuo, Ka suksiet ang khan nang khom, Ka suksiet ve ding che maw?Ka lungrilah i châm tlat a, Ka hmangaina che a zuol. 9 Ka lung inling kei kìr ka ta, Efraim sukbo ka tum khom, Hlen tum nawk ta ngai naw ning. Mihriem ni loin Pathien ka na, Nangni laia Mi Thienghlim ka na, Lungsen pumin hung tah naw ning. 10 LALPA chu zui tâng an ta, Keipui angin inrûm a tih. Chuong anga a'n rûm zàt chun, Khawthlang tienga inthokin, A têhai chu inthin pumin, Hung tlàn khawm dul dul an tih. 11 Inthin pumin hung an ta, Aigupta vatehai ang leAsuria vathuhai angin, An in lum inhluotir ka tih"Ti hi LALPA thu suok a nih. 12 Efraim chun thukhêl ringot, A mi hril kuol a mi hril kuol a, Israel sûngkuohan mi hlem an hràt a, Juda khomin Pathien Mi Thienghlim, Mi Ringum chu a dodâl zing.

Hosea 12

1 Efraim chun thli, bu-ah a ring a, Sùnnithlâk khawsak thli a hnot a, iKhêl le thisen suokna a sukpung. Asuria leh thuthlung a thlung a, Aigupta kuomah hriek a thon a. 2 Juda chunga khom LALPAN, Lungni nawna a nei a, Jakob chu a um dàn anga hremin, A thilthaw dungzuiin rul a tih . 3 Sûla an um lai khomin, A unau kekhongah a man a; A puitling hnungin Pathien a buon a. 4 Vàntirko leh an inbei a, Ama chun a hnèbàn a, Tapin ditsakna a hni a, Ama chu Bethelah a hmu a, Chu taka chun a'n biekpui a. 5 A hming chu LALPA a nih, Iengkim LALPA Pathien chu. 6 Chuleiin, i Pathien kuomah kîr nawk la, Hmangaina le indikna vongin, I Pathien chu nghâk zing hlak rawh. 7 Kanan mihai ang bokin, Israel mi sumdawnghai chun, Bùkna indik lo an hmang a, Mi hlèma fàkpêk an lawm. 8 Efraim chun chapo takin, "Ka hausa a, ka neinung a, Ka hausakna po po lei hin, Tu khomin thil suol thawah, Mi'n tum ngam naw nih" a tih. 9 " Kei hi LALPA in Pathien, Aigupta rama inthokaThuoi suoktu cheu chu ka nih. Thlalêra kût in hmang lai ang khan, Puon inah inchêngtir nawk ka ti cheu. 10 Zawlneihai ka biek hlak a, Inlàrna voi tam ka'n hmutir a, Tekhinthu hmangin ka hril hlak. " 11 Gilead chu a rilo hlè maw?A mihai hmangna bo an nih!Gilgalah bawngchal inhlànin, Milem hmaah an inthawi maw? Leilet sìra lung dèng bùm angin, An maichâmhai chu siem ka tih. 12 Jakob chu Aramah a tlân hmang a, Israel chun a nuhmei ding hlawin, Sin a thaw a, beram a vèng a. 13 Aigupta rama inthoka, Israelhai thuoi suok dingin, LALPAN zawlnei a hmang a, A zawlnei hmangin a enkol a. 14 Nisienlakhom Efraim chun, Nasa takin a suklungsen a nih. A thisen insuona maw chu, LALPAN a chungah intlâktir a ta, A sukmuolphona po po leiin, LALPAN sukmuolpho veng a tih.

Hosea 13

1 Efraim a hang tong pha leh, Israel thla danghai an inthin a, Anni laia ngaisàng hlaw a nih. Sienkhom Baal biekna tieng, An hmang suol leiin a thi a. 2 Tuhin an suol deu deu a, Tangkaruo milim an sung a, An milim duong suokhai chu, Themthiemhai siem vong a nih. "Mihriemin an inthawi a, Bawngte lim chu an fawp a"Tiin an chanchin an hril hlak. 3 Chuleiin, zîng tieusûm ang, Zîng daidaw ral nawk el ang, Hrizawla bu si inlêng darh ang, Tukvera meikhu suok angin, An la hung inchang ding a nih. 4 "Aiguptaa inthok tah khanLALPA in Pathien ka na, Kei naw Pathien dang tu khom, In hriet ngai hrim hrim naw a, Kei naw chu Sandamtu dang, Tu khom an um hrim hrim nawh. 5 Ram lum le sahâl hmunah, Thlalêrah ka don cheu kha. 6 Ka chawm chêu a, in khop a, In khopkham pha in chapo a, Chu pha leh in mi theinghil si. 7 Chuleiin sakeibaknei angin, In chungah hung tuong ka ta, Keite ang elin lampuiah, Lo inchàn rùk ka ti cheu. 8 A tê lâkpêk savom ang elin, Lo beiin pot thlêr ka ti cheu a, Keipui angin in sa fâng ka ta, Ramsa angin pot chen ka ti cheu. 9 "Aw Israel, a thangpuitu che, Nangman i mi do tlat leiin, Suksietin i um a ni hih! 10 A san ding che i lal chu, Khaw lai am a um ta a?In khawpuihai santu dinga, Lal le hotu in hnîhai kha, Khaw lai am an um zo ta a? 11 Lungsenin lal ka pêk cheu a, Lungsenin ka lâk nawk a. 12 Efraim suolna intieng thùr chu, Zieka inchik le kol vong a nih. 13 Nauha se ang na invoi a ta, Sienkhom nau a pieng huna, Suok nachang hre lo nau ang, Varna nei lo nau a ni si a. 14 "Seol thilthawtheinaa inthok, Ka'n tlan suok tawl ding am a ni?Thìna laka inthokin, Ka san suok tawl ding a ni?Aw thìna, khawla'm i hri sie chu?Aw Seol, khawla'm i suksiet theina chu?Lungsietna mitin en ta naw ning, 15 Unau laia hmuingil khom ni sien. Sak tieng thlalêra inthokin, LALPA thliin hung nuoi a ta, A tui hnàrhai kang chât a ta, A tuikhurhai inhil vong a tih. A ro sienaa rosumhai chu, Hung rok rampêk vong an tih. 16 Pathien laka an hel leiin, Samaria khawpuia chênghai chun, An suol man chu intêl an ta, Kawlhnâmin sâm thlûng an ta, Hnuoi vuoknan naute hmang an ta, Inrâihai phìng dawt thlèr an tih. "

Hosea 14

1 LALPA i Pathien kuoma chun, Aw Israel, kîr nawk ta rawh; I suolna i tlûk sietpui a ni hi! 2 LALPA kuomah hung kîr nawk la, Hieng hin thupha hung chawi rawh:"Kan suolna po po ngaidam la, Ngilnei takin mi lo pom rawh, Bawngchala hung inthawi nèk a, Kan bâu ngeia inpâkna inthawi, I kuoma kan inhlàn theina dingin. 3 Asurian a mi san suok thei nawh; Indo sakorin a mi hum thei nawh. Kan kut suok milimhai kuomah, 'Kan pathienhai' ti ta nawng kan tih. Fahràhai chun i kuoma inthokin, Lunginsietna an dong hlak si" tiin. 4 An petekna sukdam ka ta, Ka lungsenna la kieng ka ta, Tiem chin boin hmangai ka tih. 5 Israel lakah daidaw ang nîng ka ta, Ama chu lili angin hung vul a ta, Lebanona sidar thing angin, Nghet takin zung thlâk dar a ta, 6 Dawn thar hung insuong a ta, Oliv thing angin mawi a ta, Lebanon angin rimtui a tih. 7 Ka hlimah chêng nawk a ta, Bu kûng anga hung tal tharin, Grêp angin hung vul a ta, Lebanon uoiin ang elin, A hming hung inthang a tih. 8 Efraim chun milem pathien, Inzawlpui zing ta naw ni a, Keiman donin enkol tàng ka tih. Keiman fâr thing hring angin, Ama chu zàr hlieng ka ta, A ràhai malsawm ka tih" tiin. 9 Hieng hi mi var tuin am, An man suok thei ding a na?Lungvar nei tu hrimin am, An hriet thiem thei ding a na? LALPA lampui chu a'n dik a, Mi felhan an hraw hlak a, Mi rilohan an hraw naw leiin, An insui thluk hlak a nih.

Joel 1

1 Pethuel naupa Joel kuoma LALPA thu hung tlung chu: 2 Upahai, lo ngaithla unla, A rama chênghai po poin, In nà lo daw seng ro khai. In pi le puhai huna khom, Hieng hi a tlung ta hlak am? 3 Chu thu chu in nauhai hril unla, In nauhan an nauhai hril hai sien, Suon tinin inhril sawng pei raw hai se. 4 ​Khàu hon fàk mahlahai chu, Khàuthikthiin an fàk a, Khàuthikthi fâk mahlahai chu, Tuktulungin an fàk a, Tuktulung fàk mahlahai chu, Thil ngêina an fàk zo a. 5 Zu ruihai, tho unla, tap ro!Uoiin dawntuhai, tap khêk ro, In uoiin thar chu tà ro, Dawn ding in nei ta si nawh. 6 Ka ram hung rûntu hnam chu, An hrâtin an tam hle a, Sakeibaknei ha ang an nei a, Keipui ngho ang ngho an nei bok. 7 Ka grêp huonhai an chìl siet a, Ka theichang bil an suksiet a, A kâuhai an hmal thlâk a, A zârhai a hung rop zo tah. 8 Nunghàkin a pasal huol lai, A sùn angin nangni khomin, Saiip silin tap ve ro. 9 LALPA ina inhlàn ding, Bu le uoiin a um ta nawh; LALPA hmaa rongbawltu, Thiempuhai lung an vai zo. 10 Lohai an suksiet vong a, Hnuoi inhilin a châr bor a, Buhai an hung rop vong a, Uoiin thar a kang chat a, Oliv hriek a suok ta nawh. 11 Loneitu le grêp chìngtuhai, Beidong takin tap khêk ro. In huit le barli bilhai tà ro, Sìk ding hrim in nei ta nawh. 12 Grêp kûng a vuoi zo ta a, Theibufai hai, tûm thing hai, Epul thei le thing hrim hrim khom, A rêngin an tawl zo a, Hringmi lunglawmnahai chu, An lo vuoi hmang zo ta si. 13 Thiempuhai, saiip silin sûn ro, Maichâma rongbawltuhai, tap khêk ro. Pathien hmaa rongbawltuhai, Saiip silin hung unla, Zànkawvârin zâl thlep ro, In Pathien ina inhlàn dingBu le uoiin a um ta si nawh. . 14 ​Bu ngheiin umni khâm unla, Inkhawmpui lien buotsai unla, LALPA Pathien ina hung dingin, Upahai le a rama chênghai po po, An rêngin inchà khawm unla, LALPA chu koin khêk suok ro. 15 Chu ni chu a chung a pik ie!LALPA ni chu a hnâi ta si a; Iengkimthawthei chun sietna, A hung intlungtir ding a nih. 16 Ei mithmu ngèiah bu le bâl, Làk hmangpèkin ei um a, Ei Pathien ina ei hlimna leEi lawmnahai a chuoi zo tah. 17 Hnuoia thlài chî a tawl zo a, Bupanghai khom a tiek zo a, Bu in khom a tlu ram zo a, Bu hlek tê khom a um ta nawh. 18 Tlatna hmun hring invâiin, Beidongin bawng ruol an inbu a, Beram ruol an hril a hai. 19 Aw LALPA, nang ka ko che, Meiin ram hring a lem zo a, Rama thing khom a kàng zo tah. 20 Ramsahai khom nangma ngaiin, An inthuok hlop hlop a nih; Tui hnàr po po a kang zo a, Ran tlatna hmun hring po po khom, Meiin a kàng ram zo tah.

Joel 2

1 In inràlring theina dingin, Zion-ah tawtawrawt mût unla, Ka tlâng thienghlima chun mût ro. LALPA ni chu a tlung mèk a, Hnai tea um a ni ta a, A ram mi po po inthin raw se. 2 Chu ni chu pikin zîng a ta, Sûm inthimin bawm khum a tih. Khaw varin tlâng a tuom angin, Kha hmaa in la hmu ngai lo, Sipaib honpui hung thlahai chun, A ram phêkin hung tuom an ta, Chuong ang chu a hnung khomin, Hmu nawk ni ta ngai naw nih. 3 Meiin ram a kàng hmang angin, An hma zawn fa zo pei an ta, An liem hnunga an hnùhmà chu, Ringmu angin kol vung a tih. An tlung hma chun a ram chu, Eden huon ang el nîng a ta, An pèl hnung ruok chun ram chu, Thlalèr ram fil ang nîng a ta, Ieng khom hlà nei naw ni hai. 4 Sakor angin an inlang a, Sakor chungchuong angin an tlàn a. 5 Tawlailir anga thûm chur churin, Tlâng sîpah an kat sup sup a, Bupawl kâng intêk ang el le, Indo dinga sipai tam tak, Inpuocha mup mup ang an nih. 6 Mihan an hmuin an thlaphàng a, Mi tin hmêl a dâng hlawp hlawp a. 7 Râl hrât angin hma an nor a, Sipai angin bangah an lawn a. Mani zawn seng an pan a, Tu khom a pêt buoi an um nawh. 8 Tu khom innêk buoi loin, Ngîl takin hma an pan a, Râl dâihai an nêr thleng a, Pêt hmang tu khom an um nawh. 9 Khawpuiah an tlàn lùt a, Kul bang hrûlah an tlàn a. Mi inah an lawn kai a, Rûkrù angin tukverah an lût. 10 An fèna tieng taphotah, Hnuoi inhnîngin vàn a'n thin a, Nisa le thlàpa an inthim a, Arasi hrim hrim a de nawh. 11 A sipai ruolhai chu thuoiin, LALPA chun thu a pêk a, Tiem sèng lo sipai a nei a, A zuitu an tam êm êm. LALPA ni chu a ropui a, A râpum êm êm bok a, Tuin am dawl zo an ta? 12 "Chuong chu ni sien khom tu hin, Bu nghei le lungngaia tapin, Lungril po po leh hung kìr nawk ro'Ti hi LALPA thu suok a nih. 13 In hàk lai silfèn ni loin, In lungril pot thlêr unla, LALPA in Pathien kuomah kîr ro, Ama chu lunginsietna hau, Lainatnaa sip, Lung inuoi le hmangainaa sip, Sietna intlun ding a tì khom, Inlamlèt hlak mi a ni si a. 14 ​Ama chu hung ngha lètin, Lainata mal hung sawm cheuin, LALPA in Pathien ta dinga, Bu le dawn thilhlân dinghai, Hung pe nawk nawng a ti cheu ti, Tuin am hre thei a ta? 15 Zion-ah tawtawrawt mût unla, Umni khâmin bu nghei unla, Inkhawmpui thienghlim ko ro. 16 Mipuihai chu ko khawm unla, Inkhawmpui chu inthien unla, Upahai ko khawm unla, Nene ne lai chen khawm ko ro. Moneitun a pindan suoksan sien, Mo khom hung suok bok raw se. 17 LALPA siehlaw thiempuhaiin, Tempul bathlàr le maichâm inkârah, Hieng hin tap hla inzawt raw se:"Aw LALPA, i mihai hi hum la, Hnam dang nuizatbûr le bieksisawah, I rochan hnam hi phal lul naw rawh. Ieng leiin am hnam danghaiin, "Khaw lam an Pathien chu teh!" An mi tìkhum ding a na? tiin. 18 LALPAN a ram chu invoi a ta, A mihai chu lunginsiet a tih. 19 Hieng hin LALPAN don a tih: "Bu le uoiin le hriek thar, In tlai hlè khop pêng ka ti cheu; Hnam danghai nuizatbûrah, Siem ta ngai nawng ka ti cheu. 20 "Hmar tienga in dorâlhai chu, Hla takah hnot hmang ka ta, Ram tawl le filah hnot lût ka ta, A hmasa pawl Tuipui Thi ruomah, A danghai Thlang Tuipui kamah. An rim chu thu vut vut a ta, Vàn ur tung a tih" tiin. LALPAN thil ropui a thaw ngei el! 21 Aw ram, ti dêr naw la, Hlimin lawm lem rawh khai, LALPAN thil ropui a thaw chieng si a. 22 Aw ramsahai, ti dêr naw ro, Ran tlatna hmunhai hring nawkin, Thinghan rà thar insuong an ta, Theichang kûng le grêp hruihan, Inbawr luoiin rà insuong an tih. 23 Aw Zion mihai, hlim ro, LALPA in Pathien chungah lawm ro, Favang ruoc khom a hun takah, A hung insùrtir nawk a ni hih. A hma angin favang le thâl ruo, A hun tawkin a pêk cheu hi. 24 ​Hrizawlah bu vûm thûr a ta, Uoiin le hriek khurhai sip liem a tih. 25 "Nangni laia ka sipai hung tir, Khàu honpui le khàuthikthihai, Tuktulung le thil ngêhaiin, An fâk siet zàt hù po po kha, A kum tèlin rul ka ti cheu. 26 Fàk ding hauin tlai in ta, Thil mak thawpêk hlaktu cheu, LALPA in Pathien hming chu, Inpâkin chawimawi tàng in ta, Ka mihai muolpho ta ngai naw nihai. 27 Israelhai lai ka um ti leLALPA in Pathien chu ka nizie, Tu khom dang an um nawzie, Chu pha chun hre tâng in ta, Ka mihai chu sukmuolphoinUm tah ngai hrim hrim naw nih. 28 Chu hnunga chun keimain, Ka mihai po po chungah, Ka Thlarau buok khum ka ta, In naunuhai le naupahaiin, Ka thu dongin hril an ta, Upahan mangah mang an ta, Tlangvàlhan inlàrna hmûng an tih. 29 Ka bawinu le bawipa chunga khom, Chu ni chun ka Thlarau buok ka tih. 30 Chung tieng vànah thilmakhai, Hnuoi chungah thisen le mei, Meikhu intûr ngul el hai chu, Ka hung inlangtir ding a nih. 31 LALPA ni ropui tak lePangzatum tak tlung hmain, Nisa chu thimah inchang a ta, Thla khom thisenah inchang a tih. 32 LALPA hming lam taphot chu, Sandamin um an tih; LALPAN a lo hril tah ang khan, Zion tlâng le Jerusalema, Dam khaw suokhai laia mi, LALPA kohai chu him an tih.

Joel 3

1 "Chuong nihai le chu huna chun, Judai ram le Jerusalem vangneina chu, Ka tungding nawk ding a nih. 2 Jehosafat Ruoma chun, Hnam tinhai ko khawm ka ta, Ka rochan, ka mi Israelhai, Hnam tin laia hnot dartu le, Ka ram sem dartu hnamhai chu, An chungthu la rêl ka tih. 3 Thum vawrin ka mihai an insem a, Pasaltehai chu nawchi manah an zor a, Nuhmeitehai chu an dawn ding, Uoiin inchawkna manah an zor bok. 4 "Aw nangni Tura le Sidon le Filistin ram biel po pohai, ieng leia hienga in mi khing am a na? Ka thilthawhai kha mi thungrul in tum am a ni? Mi thungrul in tum a ni chun ka chunga in thaw ang char chu inrang takin in lu chungah bun lêt ka tih. 5 Ka tangkaruo hai, ka rangkachak hai le ka rohlu tam takhai chu lain in tempulah in hlù lùt a. 6 Judai rama mihai le Jerusalem mihai chu an rama inthoka hla taka an inson hmang theina dingin Grik mihai kuomah in zor bok a. 7 "Ngai ro, in zorna hmuna inthok khan anni chu hung chok tho ka ta, in thilthaw chu in lu chungah hung bun lêt an tih. 8 In naunu le naupahai chu Juda mihai kuomah zor ka ta, anni chun kawl kila um Sabed mihai kuomah zor sawng an tih" ti hi LALPA kam suok thu chu a nih. 9 Hi thu hi hnamhai lai puong ro:Indo dingin in buotsai ro!Pasalthahai kha chok tho ro! Râl do thei chin hung hnai unla, Hma tieng norin bei ro! 10 In lo keina làngkumhai kha, Kawlhnâma hmang di'n sut unla, Thei kàu tanna chemkuoi kha, Feia hmang dingin sut ro. Mi hrât naw khomin, "Takchapa!Ka hrât a nih" ti raw hai se. 11 Nangni a sè vèla hnam po pohai, Inhmaw takin hung tlàn unla, Chu taka chun pung khawm ro. Aw LALPA, i pasaltha ruolhai chu, Hung tir thla tawl tah raw khai! 12 Hnamhai inrâlring hai sien, Jehosafat Ruom pan raw hai se; Chu taka chun inthung ka ta, Hnamhai chungthu chu rêl ka tih. 13 An suolna a râpthlâk êm a, In kawitehai kha vilik ro, Bu sîk dingin a hmin tah. Grêp sawr khura sir sawr angin, A kuong sipin sir sawr ro, Uoiin bèla liem zur zur khopin. 14 Mipui an pungkhawm luoi luoi, Rorêlna ding ruoma chun; LALPA ni chu a tlung hnai tah, Rorêlna ding ruoma chun. 15 Ni le thla inthim a ta, Arasi khom de ta naw nih. 16 LALPA chu Zion-a inthokin, Hung inrûm dur dur a ta, Jerusalema inthokin, Vàn inrum angin inrûm a ta, Hnuoi le vàn inthin a tih. A mihai ta ding ruok chun, LALPA chu an inhumhimna, Israel thlahai kulpui nîng a tih. Pathien mihai ta dinga malsawmna 17 Chu ni a hung tlung pha chun, Kei, LALPA in Pathien ngei hi, Ka tlâng thienghlim Zion-ah, Ka chêng ti hre tâng in tih. Jerusalem chu thienghlim a ta, Hnam danghan rûn ta ngai naw nih. 18 "Chu nia chun tlânghaiin, Uoiin thar insuong an ta, Muol tina chun nene tui, Hung put thla huou huou a ta; Ruom tinah tui luong a tih. LALPA ina inthokin, Tui hnàr inchik suok a ta, Sitim ruom chawm hnawng a tih. 19 Judahai chungah nunrawnga, Poi tawk lo thisen an insuo leiin, Aigupta chu ram vong a ta, Edom chu thlalêrah inchang a tih. 20 Judai ram chu hluo kumkhuong an ta, Suon a'nthoka suon nawk peiin, Jerusalem chu hluo tâng an tih. 21 An thisen phuba lâng ka ta, Thil suol thawhai chu hlà naw ning, LALPA chu Ziona chêng a ni si

Amos 1

1 Juda lal Uzia inlal lai le Israel lal Joas (Jehoas) naupa Jeroboam inlal lai, lìr inhnîng hma kum hniah, Tekoa beram vêngtuhai laia mi pakhat Amos chun Israel chungchang thuah inlàrna a hmu a, hieng ang hin a hril a: 2 "LALPA chu Zion-a inthokin, Inring takin a khêk a, Jerusalema inthokin rawl a'n suo:Beram tlatna hmunhai a tawl vong a, 3 LALPA chun hieng hin a tih: "Damaska khaw suolna pathum leiin, A nih, a suolna pali leiin, Ka lungsen kei kîr naw ning, Bu chilna thîrkut zum hmanga, Gilead mihai a zei hrep leiin, 4 Hazael inah mei tir ka ta, Ben Hadad kul kàng vong a tih. 5 Damaska kotkhàr suksieng ka ta, Aven ruoma lal chu sukhlum ka tih; Beth Eden-a lal hmol cheltu chu, Sukbohmang bok ka ta, Aramhai chu sala intâng dinginKir tieng thuoi hmang an tih, "Ti hi LALPA hril a nih. 6 LALPA chun hieng hin a tih:"Gaza suolna pathum leiin, A nih, a suolna pali leiin, Ka lungsen kei kîr naw ning, An rêngin salah a man a, Edom kuomah a zor si a. 7 Gaza kulah mei tir ka ta, A kulhai kàng hmang a tih. 8 Asdod lal sukhlum ka ta, Askelona lal hmol cheltu khom. Ekron chungah kut inlet ka tih, Filistinhai an thi vong chenin, "Chunghnungtak LALPAN a tih. 9 LALPA chun hieng hin a tih:"Tura suolna pathum leiin, A nih, a suolna pali leiin, Ka lungsen kei kîr naw ning, Unauna thuthlung bawsein, A manhai chu salah a zor si. 10 Tura kulah mei tir ka ta, A kulhai kàng hmang a tih. " 11 LALPA chun hieng hin a tih:" Edom suolna pathum leiin, A nih, a suolna pali leiin, Ka lungsen kei kîr naw ning, A unaua kawlhnâma hnot a, Lunginsietna nei dêr lo a, A lungsenna inchoktir zing a, Sukmit loa a'n hlaptir zing leiin. 12 Temana chun mei tir ka ta, Bozra kul kàng vong a tih. " 13 LALPA chun hieng hin a tih:"Amon suolna pathum leiin, A nih, a suolna pali leiin, Ka lungsen kei kîr naw ning, A ram zauh nuom lei ringotaGilead nuhmei nau pai lai, An phìng a dawt thlèr leiin. 14 Raba kul chu rawng ka ta, Indona ri so chur chur leThawngaleivir hrâng kârah, Kulhai chu kàng vong a tih. 15 An lal salah man an ta, A khawnbawlhai leh thuoi an tih"Tiin LALPA chun a hril.

Amos 2

1 LALPA chun hieng hin a tih:"Moab suolna pathum leiin, A nih, a suolna pali leiin, Ka lungsen kei kîr naw ning, Edom lalhai rù po po chu, Chinai lung ang ela a raw leiin. 2 Moab-ah mei insuoktir ka ta, Keriot kul chu kàng vong a ta, Buoina râpthlâk tak suok a ta, Indo ri le tawtawrawt ri kârah, Moab chu suksietin um a ta, 3 Rorêltu chu sukhlum ka tih, A milienhai po po leh"Tiin LALPA chun a hril. 4 ​LALPA chun hieng hin a tih:"Juda suolna pathum leiin, A nih, a suolna pali leiin, Ka lungsen kei kîr naw ning, LALPA dàn chu an hnawl a, A thupêkhai an vong naw a, An pi le puhai milem pathienin, Anni chu a thuoi hmang leiin. 5 Judai ramah mei tir ka ta, Jerusalem kul kàng hmang a tih. " 6 LALPA chun hieng hin a tih:"Israel suolna pathum leiin, A nih, a suolna pali leiin, Ka lungsen kei kîr naw ning, Mi felhai tangkaruoin an zor a, Mi retheihai holrok pheikhokin. 7 Hnuoia pilvut ang topin, Pasiehai lu an sir sop a, Nêksawrhai an thlei bik a, Pâfain nunghàk an intawm a, Ka hming thienghlim an sukporche. 8 An dakham lâk silpuon silin, Maichàm bul tinah an zàl a, Mi an inchawitir uoiinhai chu, An Pathien inah an dawn hlak. 9 "An hmaa um Amor mihai, Sidar thing anga insâng leSaisuo thing anga detdohai chu, Keiman ka sukboral a, An rà le zung ka sukhlum. 10 "Aiguptaa inthoka la suokin, Thlalêrah kum sawmli thuoiin, Amor-hai ram ka pêk cheu a. 11 In nauhai lai zawlnei ding, In tlangvàlhai lai Nazaritb ding, Ka ta dingin ka ruot tawl kha. Aw nangni Israel thlahai, Chuong ang chu in ni naw maw?" Ti hi LALPA thu suok a nih. 12 Sienkhom Nazarit mihai chu, Uoiin dàm in indawntir a, Zawlneihai khom thu hril lo dingin, Khapna thu dàm in pêk hlak si. 13 "Bu rik tak phur tawlailirin, Thil a chìl nawi riep angin, Ka chîl nawi ding cheu a nih. 14 Tuonrang tlân suok naw ni a, Mi hrât thàin zo naw ni a, Pasaltha khom insanhim naw nih. 15 Thal kàptu che hman naw nih, Ngal hrât tlân suok bok naw nih; Sakor chungchuong mi khomin, A hringna hum bik naw nih. 16 Chu ni chun mi huoi tak khom, Saruokin tlân hmang a tih"Ti hi LALPA thu suok a nih.

Amos 3

1 Aigupta rama inthoka ka hung thuoi suok, aw Israel sûngkuohai, in chungthua LALPA soiselna cheu hi lo ngaithla ro: 2 "Khawvela sûngkuohai lai, Nangni chauh ka thlang cheu a, Chuleiin, in suolna po po lakah, Keiman ka hrem ding cheu a nih. 3 An inthukop si naw chun, Mi pahni an intlon hlak am? 4 A sase inhûkpui loin, Ram hnuoiah sakeibaknei, A'n ngur hlak hrim am a ni?Sa se nei loin a pûkah, Keipui an ngur hlaka maw? 5 Châng an kam nawna hmunah, Vate a'n awk hlak am a ni?Awk ding um nawna hmunah, Châng an kam hlak hrima maw? 6 Khawpuiah râlkhêl tawtawrawt, An hung mût ruoi ruoi pha leh, Mi tin an ti hlak an naw?LALPA thu loin khawpuiah, Sietna a tlung hlak am a ni? 7 A siehlaw zawlneihai kuomah, A thilthaw tum hril lawk loin, Chunghnungtak LALPAN ieng khom, A'n tlungtir ngai hrim hrim nawh. 8 Sakeibaknei a'n rûm ie, Tu am a na ti lo ding? Chunghnungtak LALPA a tong, Tu am hril sawng lo ngam ding? 9 Asdod kul le Aigupta kulah, Hieng ang hin thu puong dar ro:"Samaria tlângah tlân khawm unla, Chu taka an buoi râpthlâk dàn leInpawngnêkna tlung chu thlir ro. 10 An thil rok le làkpêkhai chu, An in ropuiah an bûm hnûr a, Thil indik thaw nachang hrie, Tu khom an um ta dêr nawh"Ti hi LALPA thu suok a nih. 11 Chuleiin, Lalpa PATHIEN-inHieng ang hin a hril a nih:"Ram chu hmêlman rûn a ta, Kulhai chu sukchim a ta, Lal inhai chu rok a tih. " 12 LALPA chun hieng hin a tih:"Sakeibaknei baua inthokaBeram mal pahni amanih, A nakawr pakhat amani bêk, Berampun a'n chù thlàk angin, Samaria le Damaska khuoa um, Khum kil le puonri hnuoia inbi, Israelhai chu sansuokin um an tih"c 13 Lalpa PATHIEN, Iengkim LALPAN, Hieng ang hin a hril a nih: 14 "Hi thu hi ngaithla unla, Jakob sûngkuo hmaah puong ro:A suol leia Israel ka hrem ni chun, Bethela maichàmhai sukchim ka ta, Maichàm kihai suktliek ka ta, Hnuoiah tla zap neng nung a tih. 15 An phalbi in le nipui inhai chu, A ruolin sukchim vong ka ta, An saiha inhai suksieng ka ta, In ropuihai chu sukram ka tih, "LALPA thusuok chun a tih.

Amos 4

1 Basan bawngpui anga thâu, Samaria tlânga chêng nuhai, Pasiehai nêksawrtu, tlasamhai sirdètu, Mani pasalhai tir kalàng a, "Dawn ding hung la rawh" tituhai, Hi thu hi lo ngaithla ro. 2 Lalpa PATHIEN ngei chun, A thienghlimna sâla intiemin, "Thîr kuoia ka kei hun cheu, A la tlung ngei ding a nih; A mong dàpa thanghai lem chu, Ngakuoiin hnûk dok ka tih. 3 Kul bang pop hnaina takah, La thuoi suok an ti cheu a, Harmon-ah khal khawm an ti cheu"Ti hi LALPA thu suok a nih. 4 "Bethelah hungin suol thaw unla, Gilgalah fein suol zuol sauh unla, Tûk tin inthawi zie unla, Ni thumd danah sawma pakhat pe unla. 5 Lawmthu hril inthawina dingin, Chol thang bei inhlàn unla, Mani lungpuoka in inhlànhai chu, Aw Israelhai, uongpui ro khai, In thaw chàk zawng tak a ni si, "Lalpa PATHIEN chun a tih. 6 "Khaw tinah tàm ka'n tlàktir aeKhaw tinah fàk ding a um naw a, Chuong anga thil a tlung khom chun, Ka kuom tieng in kìr chuong nawh"Ti hi LALPA thu suok a nih. 7 "Bu sîk hun thla thum a la bâkin, Ruo sûr ding ka chel tàng a, Khaw khatah kan sùrtir khomin, Khaw dangah ka chel tàng a; Lo pakhatin ruotui a hmu a, Pakhat dang chu a tawl bor bor a. 8 Tui nei ve lo khuohai chu, Dawn ding zongin an inmai a, Khaw hrang hrangah an tlàn a, Sienkhom khopkham an hmu nawh. Chuonga thil a tlung khom chun, Ka kuom tieng in kìr chuong nawh"Ti hi LALPA thu suok a nih. 9 "Tlolna le hmuornain voi tam, In lo le grêp huonhai ka hrem a, In theichang le oliv kûnghai, Thil ngèin ka'n fâksiettir a, Chuonga thil a tlung khom chun, Ka kuom tieng in kìr chuong nawh"Ti hi LALPA thu suok a nih. 10 "Aigupta chunga ka thaw angin, In chungah hripui ka'n lèngtir a, In thalaihai kawlhnâmin ka that a, In sakorhai ka manpêk cheu a. Riebûka in mithi hmon rimin, In hnàr ka urpêk hrep cheu a, Chuonga thil a tlung khom chun, Ka kuom tieng in kìr chuong nawh"Ti hi LALPA thu suok a nih. 11 "Sodom le Gomora ang khan, A then chu ka hrem cheu a, Thuka thingthu hring angin, A then ka pot suok cheu a, Chuonga thil a tlung khom chun, Ka kuom tieng in kìr chuong nawh"Ti hi LALPA thu suok a nih. 12 "Chuleiin aw Israel, I chungah thil tha lo tak, Ka thaw ding a ni leiin, Aw Israel, i Pathien chu, Hmason dingin inpei rawh. " 13 Tlânghai hung indin suoktu, Thlihai khom inumtirtu, Mihriem kuoma a thu puongtu, Zîng khawvar khom sukthim a, Tlâng sânghai sir de theitu chu, LALPA, Iengkim Pathien a ni si.

Amos 5

1 Nangni Israel sûngkuohai, Hi thu hi lo ngaithla ro, Nangni sûnna thu a nih: 2 "Nunghàk thienglàm Israel chu, Tho nawk ta lo di'n a tlu ie!A ramah màksanin a um a, Kei thotu hrim a nei nawh. " 3 Lalpa PATHIEN chun a hril:"Israel khawpuia inthokaIndoa fe sipai sâng khat lai, Za khat chauh kîr nawk an ta, Za khat fe suokhai lai khom, Mi sawm chauh hung kîr an tih" 4 Israel sûngkuohai kuomah, LALPA chun hieng hin a hril:" Mi zong unla, dam in tih. 5 Bethel-ah mi zong naw unla, Gilgalah fe bok naw unla, Beerseba khom pan naw ro. Gilgal mihai chu salah man an ta, Bethel khuo chu sukram an tih. " 6 LALPA zong ro, dam in tih. Chuong anga in thaw naw chun, Josefa in sûngah mei suok a ta, Bethel kàng hmang vong a ta, Mei theltu nei naw ni hai. 7 Hlei nei taka ro rêl a, Thu dik hnuoia peituhai, In dù la hmu ngei in tih. 8 Siruk le sizucho hai siemtu, Thim khom zing khawvara inleta, Var khom zàna inchangtirtu, Tuipuia tuihai chu ko a, Hnuoi chunga buok hlaktu hi, A hming chu LALPA a nih. 9 Mi hrâthai a suktlawm a, An kulhai a sukchim hlak. 10 Indik taka roreltu chu theidain, Thu dik hriltu cheu in hmusit si. 11 Pasiehai in sirde a, An buhai in inchu thlàkpêk a. Pakka in ropui in bawla chu, Chu taka chun chêng naw ti niu; Grep huon tha in siema chu, A uoiin chu dawn naw ti niu. 12 Poi in tawk rawn tàkzie hai, In suolziehai ka hriet vong. Mi indik in sukduda a, Thamna làk in chîng bok a, Pasiehai chu rorêlnaah, Thiem naw in inchangtir hlak. 13 Chuleiin mi fimkhur chun, To an inchu a ni hih, Hun tha naw lai a ni si a. 14 Suol ni loin thil tha hnot ro, In dam khawsuok theina dingin; Chuongchun in hril ang hrimin, LALPA, Iengkim Pathien chu, In kuomah um zing a tih. 15 Suol theidain, thil tha dit unla, Rorêlna fel kengkaw ro, LALPA, Iengkim Pathien chun, Josefa thla dam sunhai chu, A lunginsiet thei tâkduoiin. 16 LALPA Iengkim Pathien, LALPA chun hieng hin a tih:"Kotthlêr tinah tap khêk an ta, Tuolzawl tinah inrûm an tih. Loneituhai chu tap ding leTap thiemhai chun lusûn hla, Inzawt dingin ko khawm an tih. 17 Grêp huon tinah tap an tih, Ka pal tlang ding a ni si a"Ti hi LALPA thu chu a nih. 18 LALPA ni nghâktuhai chung chu, A va hang pik char char ngei de!Ieng leia LALPA ni chu, In nghàk hrim hrim am a na?Chu ni chu var loin inthim a tih. 19 Sakeibaknei laka tlàn suokin, Savom a'n tuokpui ang el le, Mani inah lût a, bang hang tawk a, Rûlin a lo chuk ang hi a nih. 20 LALPA ni chu var ni loin, Inthima khom thim sa tak el, Var zung hrim a lût nawna, A ni ding an naw am a ni? 21 In kût hmanghai po po hi, Theidàin ka hmu dong a, In inkhawmpui ropuia hai khom, Lawmna hrim ka nei ta nawh. 22 Pumraw inthawina thilhlânhai, Bu le bâl thilhlânhai chu, In hung chawi a ni khomin, Lo pompêk nawng ka ti cheu. Ran thâu in inhlànhai khom, Ienga ding khom ka ti nawh. 23 In hla sak ri ka ngai pei nawh, In tingtang tum ngâithla naw ning. 24 Sienkhom rorêlna indik chu, Vadung angin luong sienla, Tui hnâr kang lo vadung angin, Felna chu luong dem dem raw se. 25 Aw Israel sûngkuohai, Thlalêra kum sawmli sûng, Ka thuoi sûng po po chêu khan, Inthawina le thil inhlânhai, In mi hung chawipèk hlak maw? 26 In milem, lala inko Sakut le, In arasi pathien Kaiuan hai chu, An tempulhai leh in som pei a. 27 Chuleiin Damaska khaw khêlah, Salah ka thuoi ding cheu a nih"Ti hi LALPA thu suok a na, A hming chu Iengkim Pathien a nih.

Amos 6

1 Zion-a ngai ngam taka khawsa, 2 Kalne-ah fe unla, va en ta u; Chu zoah Hamath khaw ropuiah; Chu taka inthokin Filistin ram, Gath khuoa chun fe thla ro. Israel ram le Judai ram nêkin, An changkang lem am a ni?In ram nêkin a lien lem maw? 3 Sietna ni ding chu sie hla siin, Thilthawin buoipui in pot hnai a. 4 Saihaa chei khumah zâlin, Thungna nêmah inzam kuolin, Beram tê le bawng tuoi thau thau, A'n hnik hnikin ruoi in the a. 5 Davida anga tingtang keiin, Mani hla in insiem chop a. 6 Nopui ngata uoiin dawnin, Hriek tha tawpin in inchùl a. Josefaf siet tuokna ruok chu, In invoi ve hrim hrim nawh. 7 Chuleiin, sala fe hmasahai ruolin, Nang khom salah fe vèng i ta, Ruoi kîla in inri bung bung kha, Suktawpin um tàng a tih. 8 Iengkim LALPA chun hming sâlin, Hieng ang hin a hril a nih:"Jakob chapona chu ka ten a, A lal in thahai ka theida a, Khawpui le a sûnga um po po, An rêngin immantir ka tih, " Ti hi Iengkim Pathien thu suok a nih. 9 In khatah mi thi bâng sawm, An màksan a lo ni khomin, An rêngin thi tho tho an tih. 10 Laina ruong inhlawmtuhan, In sûngrila intomhai kuomah, "A dang khom an la um am?"Tia an hung indon phaa, "An um ta nawh" titu chun, "To rawh, LALPA hming lam pal ei tih" Tiin a la hril ding a ni si a. 11 LALPA chun thu a pêk a, "In ropui chu nor chim unla, In tè chu nor phit vong ro. 12 Lungpui khokrokna hmunah, Sakor a tlân hlak am a ni?Chu taka chun bawngchalin, Lo a kei ngai hlak am a ni?Nangnihai rorêl ruok hi chu, Indikna chu thìna tûrah, Felna chu khâknaah in inchangtir si. 13 Log Debar in hnè kha suongin, "Karnaim khuo la thei khopin, Ei hràt a nih" in tih an naw? 14 "Aw nangni Israel sûngkuohai, A do ding cheu hnam chok tho ka ta, Hamath kawn le Arabah ruom chena, Mihai po po chu nêksawr an ti cheu"LALPA, Iengkim Pathienin a tih.

Amos 7

1 Lalpa PATHIEN chun inlârna a mi'n hmutir a. Khauthikthi honpui a buotsai lai chu ka hmu a. Hi hi lal chanpuol ran bu àt hnunga hlo thar a hung mawng nawk hun lai a nih. h 2 Khau honin chu rama hlo hna an fâk kol rìt hnung chun keiin, "Aw Lalpa PATHIEN, ngaidam rawh. Jakob chu a chîn tham vei leh, iengtin am dam khawsuok zo a ta?" tiin ka khêk a. 3 Chuongchun LALPA chu a'n lamlèt a. LALPA chun, "An leh, hi thil hi tlung ta naw nih" a ta. 4 Lalpa PATHIEN chun inlàrna dang a mi'n hmutir nawk a. Lalpa PATHIEN chun mihai hremna dingin mei a ko a, tuipui inthûk tak khom chu a kàng hil vong a, ram khom a lem puot puot a. 5 Chu phing leh kei chun, "Lalpa PATHIEN, suktawp dingin ka ngèn che. Jakob chu a chîn tham vei leh iengtin am dam khawsuok zo a ta" tiin ka khêk a. 6 LALPA chu a'n lamlèt a. Lalpa PATHIEN chun, "Hi thil khom hi ni ta naw nih" a ta. 7 Chun, hi thil hi a mi'n entir a: LALPA chu bang ngil taka rem bulah a ngîr a, a kutin enremna thirmûm a chawi a. 8 LALPA chun ka kuomah, "Amos, iem i hmu a?" a ta. Kei chun, "Enremna thirmûm" ka ta. LALPA chun, "En rawh, ka mi Israelhai lai enremna hi ka sie ding a na, tu khom hlà bik nei naw ning. 9 Isak hmun sànghai sukram ka ta, Israel hmun thienghlimhai khom, A rêngin sukchim ka ta, Jeroboam sûngkuo chungah, Ka kawlhnâm inlet ka tih" tiin. 10 Bethel khuoa thiempu Amazia chun Israel lal Jeroboam kuomah, "Amos hin Israel sûngkuohai lai a phierrûk che a. A hrilhai po po lem hi chu a ram khomin dawl zo naw nih. 11 Amos chun hieng hin a tih:'Jeroboam chu kawlhnâmin thîng a ta, Israelhai chu salah intâng ngei an tih, An rama inthoka hmun hla takah'tiin. 12 Amazia chun Amos kuomah, "Aw nang zawlnei, fe la, Judai ram tieng kîr nawk la, chu taka chun i fâk ding hlaw la, thu hril rawh. 13 Bethel khuoa ruok hin chu thu hril nawk ta naw rawh, lal hmun thienghlim le a tempul umna a ni si a" a ta. 14 Amos chun Amazia kuomah, "Zawlnei ka ni naw a, zawlnei naupa khom ka ni bok nawh. Kei chu beram vêngtu ka ni a, theichang bil khom ka enkol bok hlak. 15 Sienkhom, beram ka vèng laiin LALPA chun a mi làk a, ka kuomah, 'Fe la, ka mi Israelhai kuomah thu hril rawh' a mi ti a. 16 Chuleiin tu hin LALPA thu chu lo ngâithla rawh. Nang chun Israel kal zawng le Isak sûngkuo kal zawnga thu hril ta lo dingin i mi ti a. 17 Chuleiin, LALPA chun hieng hin a hril: 'I nuhmei chun khawpuiah nawchi zor a ta, i naunu le naupahai chu kawlhnâmin thîng an ta, i ram chu inkhiin insem dar vong an ta, sakhaw dang bie hnam dang mi ramah nang chu thîng i ta, Israel thlahai chu matheiloin an rama inthoka hla takah sala thuoi hmangin um an tih' a tih" tiin a hril a.

Amos 8

1 Lalpa PATHIEN chun inlàrna a mi'n hmutir nawk a. Theihmina sip bawm ka hmu a. 2 Ama chun, "Amos, ieng am i hmu a?" a ta, kei chun "Theihmin umna bawm" ka ta. LALPA chun ka kuomah, "Ka mi Israelhai tawp hun ding chu a tlung ta a; tu khom hlà nei ta naw ning" a ta. 3 Lalpa PATHIEN chun, "Chu ni chun Tempula chawibiekna hla chu lusûn hlaah inchang a ta, hmun tinah mithi ruong dêng dar pheng phung an ta, siksikrieu inhrâm a tih!" a ta. 4 Nangni, mi pasiehai sirde a, Tlasamhai fa hlum nuomtuhai, Hi thu hi lo ngâithla ro. 5 Nangni chun nghâkhlâ takin, "Thla thar kût bo vat vat sien, Bu zor kâr nghàkhla a um tah. Chawlni hi bo vat vat sien, Beiphit zor kâr nghàkhla a um. Inkhìna chîn hmang ei ta, A man tieng sukpung ei ta, Bùkna lem hmangin hlêm ei tih. 6 Busi le rût pol zor ei ta, Tangkain mi rethei inchawng ei ta, Tlasam chu holrok bun khatin, "Tiin in lungrilin in ti hlak. 7 LALPA chun, "An thilthawhai kha theinghil nei hrim hrim nawng ka tih" tiin Jakob Suongtawlol chun mani insâlin thu a'n khàm a. 8 Hi lei hin a ramah lir inhnîngtirin, A sûnga chênghai po po khom, Ka sukthlaphàng naw ding am a ni? Aigupta ram chunga Nile vadungpui, A liena a kiem nawk duok angin, Ram pum chu insângin tlum a tih. i 9 Lalpa PATHIEN chun a hril:"Chú ní chun sùnchang lai tak, Nisa intlâktir ka ta, Sùn pachang lai zing siin, Hnuoi hi hung inthim a tih. j 10 Kûta in ruoi thèhai chu, Ruokngha ruoiah inchangtir ka ta, In hla sakhai po po khom chu, Tap hlaah inchangtir ka tih. Saiip insiltir ka ti cheu a, In lù vaw kol vong ka tih. Nau mal sùn ang topa rinumin, In nì chu kha takin inliemtir ka tih. " 11 Lalpa PATHIEN chun a hril:"Ram puma tàm ka tir ding ni chu, A hung tlung mêk zing a nih. Chu chu bu tienga tàmna amanih, Tuia dangchârna amanih ni loin, LALPA thu hriet châka tàmna a nih. 12 LALPA hriet châka zongin, Tuifinrieta inthoka tuifinrietah, Sim le hmarah tlân vèl an ta, Sienkhom hmu zo naw ni hai. 13 " Nunghàk tlangvàl tha hrât lai khom, Dangchârin thidang an tih. 14 Samaria milem hming sâltuhai le'Aw Dan, i pathien hringna sâlin' 'Beersheba pathien hringna sâlin'Tia inkhâmtuhai chu tlûng an ta, Tho nawk ta ngai naw ni hai".

Amos 9

1 Maichàma ngîr lai LALPA chun, Ka kuomah hieng hin a hril:"Tempul sûtpui ler vaw rak la, Tuong nghor hnìng dur dur sien la, An lu chungah chim thla sien la, A del hlum mahla pohai chu, Keiman kawlhnâmin that ka tih; Pakhat khom suok naw ni hai a, Pakhat khomin pumpel naw nih. 2 Mithi khuo chen kuo hreu sien khom, Ka bânin pot suok tho ka tih; Vàn chen hang lawn hai sien khom, Hnûk thla nawk vong tawl ka tih. 3 Karmel sìpah inbihai sien khom, Pèl suokin man tawl ka tih; Tuipui mongah inbihai sien khom, Rulpui thû pein inchuktir ka tih. 4 Hmêlman salah thuoihai sien khom, Sât hlum dingin thu pêng ka tih. Anni chu sukhlum dingin, Ieng lai khom melkai ka tih. 5 Lalpa, Iengkim LALPA chun Hnuoi a them a, a'n tui zop a, A sûnga chênghan an sûn a. Aigupta ram chunga Nile vadungpui, A liena a kiem nawk duok angin, Ram pum chu insângin a tlum. 6 Vàn sângah chêngna in a bawl a, Hnuoi hi a in thutah a hmang a, Tuifinrieta tuihai chu ko a, Hnuoi chungah a'n sûrtir hlak. A hming chu LALPA a nih. 7 LALPA chun Israelhai kuomah, "Nangni hi Ethiopia mihai leh, Ka ta din angkhat in ni naw maw?Aigupta rama inthokin Israelhai, Kaftor-a inthokin Filistin mihai, Kir-a inthokin Aram mihai, Ka thuoi suok tawl an naw maw? 8 "Lalpa PATHIEN LALPA mit chu, Ram suol chungah a fu a, Hnuoi a'nthokin sukbo ka ta, Jakob sûngkuohai ruok chu, An rêngin inram naw ning"Ti hi LALPA thu suok a nih. 9 "Keima ngeiin thu pêng ka ta, Leidara bu an sêp ang elin, Hnam danghai laia inthokin, Israelhai chu sêp suok ka ta, A mal hlek khom tla dar naw nih. 10 Ka mihai laia mi suol po le, 'Sietnan mi nang naw ni a, Mi nang teu naw nih' tituhai chu, Kawlhnâmin bohmang an tih. 11 "Davida bawkte chim chu, Chú ní chun tungding ka ta, A'n awngnahai thol phui ka ta, A chimhai rem thâng ka ta, A ngaiin indin nawk ka tih. 12 Edom rama hlaa la umhai le, Ka hming puttu hnamhai chu, Anni chun nei nawk an tih" tiinA thaw theitu LALPAN a hril. 13 LALPA chun hieng hin a tih:"Busîktuhai le lokeituhai, Grêp chìngtuhai le sawrtuhaiAn inphahman zat hun ding le, Tlânga inthokin uoiin thar, A hung far thla huou huou a, Muol tina a luong hun ding, Nihai chu a tlung mèk ie. 14 Saltàng ka mi Israelhai chu, Hung thuoi kîr nawk tàng ka ta; Khaw ram hnung indin tharin, Umhmun khuor thar nawk an tih. Grêp huon siema, uoiin dawnin, Huon siemin a rà tlàn an tih. 15 Phawi dok nawk ta lo dingin, Anni ka pêk ngei rama chun, Israelhai chu phun ka tih"Ti hi LALPA Pathien thu suok a nih.

Obadiah 1

1 Hi hi Obadia inlârna hmu chu a nih. Edom chungthua Chunghnungtak LALPA hril chu hieng hi a nih:LALPA thucha chu kan lo hriet. Hnamhai kuoma a palai tir chun, "Edom do dingin inthok ei tiu"Tiin anni chu a hril a. 2 Edom chungthua LALPA thu chu:"Ngai ta, hnam lai sukchîn ka ti che a, Nasa takin hmusit an ti che. 3 Nang, lungpui kak kâra chêng, Hmun sângah umhmun khuora, 'Tu am hnuoia mi keithla ding?'Tia lungrila inhàntaw hlaktu, I lungril chapona chun, A hlèm letdèr chê a nih. 4 Mû anga vuong insàngin, Arasi lai bu sep la khom, Chutaka inthok khom chun, Hung kei thla tho ka ti che"Ti hi LALPA thu suok a nih. 5 " I kuomah rûkru hungin, Zànah roktu hung sien chu, I va se nasa awm de aw!An thil dithai po lain, An rok hrep naw ding che maw?Grêp lotu hung hai sien, Lo bâng an hla met naw ding? 6 Esau, an suosàm pha che chu, I rosum thup an dithai po lain, An va rok nasa ding che de aw! 7 I tienga thang po poin, Ramri chen hung hnot an ti che. Inrem taka i khawsakpuihan, Hlèmin hnèng an ti che a, I bei fatuhaiin châng, I awkna ding kam an ta, Sienkhom hre si naw ti nih. 8 "Chu ni chun Edom mi varhai, Esau tlànga mi thiemhai chu, Ka sukbohmang naw ding maw?"Ti hi LALPA thu suok a nih. 9 "Aw Teman, i pasalthahai chu, Tiin inthin hawp an ta, Esau tlànga mi po po chu, Sàt hlumin um vong an tih. 10 "I unaupa Jakob chungahTharum i lo thaw leiin, Inzaknan inkhum a ti che a, Kumkhuoa suksiet nîng i tih. 11 Mikhuolin a hausakna, Roka an phur suok ni khan, Nang chun i lo ràl thlìr a, Kul kotkhàrah an lùt a, Jerusalem chungthua thum, An vawr lai khan nang ruok chu, Anni ang charin i um. 12 I unau vângduoi tuok ni'n, I diriem ding a ni naw a, Juda thlahaiin sietna, An tuok niin hlim naw la, Harsatna an tuok niin, I'n iem rak ding a ni nawh. 13 Ka mihai siet tuok niin, An kotkhàrah lût naw la, Vàngduoina an tuok niin, An rinum tuor thlîr naw la, An rosumhai la naw rawh. 14 A tlân suokhai that dingin, Lam thuomah inchàn naw la, Buoina an tuok nikhuo a, A dam sun la umhai khom, Mi kutah inmantir naw rawh. Hnamhai chunga Pathien hremna 15 LALPA ni chu hnam tin chungah, A hung tlung hnai ta si a; I lo thaw dàn ang charin, I chungah thaw vèng a ta, I thilthaw dàn ang charin, I lu chungah tlâng a tih. 16 Ka mihan ka tlâng thienghlimah, Ka hremna no an dawn angin, Hnam tinin dawn rop an ta, Dawn an ta, lem thlàng an ta, Pieng lo angin la um an tih. 17 Sienkhom Zion tlànga chun, Hung tlân suokhai la um an ta, Tlâng thienghlim tak nîng a ta, Jakob le a thlahaiin, Chu tlâng chu rochung an tih. 18 Jakob sûngkuo chu mei ang, Josefa sûngkuo chu meichok ang, Esau sûngkuo chu bupawl ang, An la ni ding a ni leiin, Esau sûngkuo chu kàng hmang an ta, Tu khom hlà um naw ni hai"Ti hi LALPA thu suok a nih. 19 Judai ram sim tieng mihan, Esau tlàng chu hluong an ta, Phai zawl thut hluotuhai chun, Filistinhai ram chang an ta, Efraim le Samaria ram khom, A rêngin hluo sa'ng an ta, Benjamin-in Gilead chang a tih. 20 Israel saltàng hung kìrhan, Kanan ram hung hnêng an ta, Zarefa chen hluong an tih. Jerusalema inthoka saltâng, Sefarad-a chênghai chun, Sim tieng khuohai chu chang an tih. 21 Zion tlàng san suoktuhan, Edom ram chu rûn an ta, Esau tlàng chu op khum an ta, LALPA ram ni tâng a tih.

Jonah 1

1 Amitai naupa Jona kuomah LALPA thu a hung tlung a: 2 "Tho la, khaw ropui tak Nenevi-ah fe la, an chungthu ding tlâng insampui rawh, an rîtlona chu ka hmaah a hung tlung ta si a" tiin. 3 Nisienlakhom, Jona chu Pathien hmaa inthoka tlân hmang dingin Tarsis tieng a pan a. Jopa khuoah a fe thlàk a, Tarsis pan ding long a hmu a, kal man ding a pêk a, longah a lût a, LALPA hmaa inthoka tlân hmang dingin Tarsis tieng a pan a. 4 Chu phing leh LALPAN thlipui hrât tak el tuipuia chun a tir a, long chu mut koi thei hiel khopa nain a hrâng a. 5 Longpuhai chu an ti hle a, mani pathien seng koin an khêk a. Long sukzângna dingin long thuomhnawhai chu tuiah an pei thawl bok a. Jona ruok chu long sûnga chun a fe a, a zâl a, a in bor bor a. 6 Long kapten chu a kuomah a fe a, "Iengtia in am i na? Tho la, i Pathien ko ve rawh, amàn mi ngaisak a, ei bohmang nawna dingin" a ta. 7 Chun, longpuhai chun, "Hi sietna hi tu leia hung tlung am a nih ti hrietna dingin thum vawr ei tiu" an ta. Chuongchun, thum an vawr a, Jona chungah a tla a. 8 Anni chun a kuomah, "Buoina ei chunga hung tlung hi ieng lei am a na ti mi hril raw khai. I sinthaw iem a na? Khaw laia inthoka hung am i na? Khaw lai ram mi am i na? Ieng hnam am i na?" tiin an indon a. 9 Ama chun, "Hebrai mi ka ni a, LALPA, vàn Pathien, hnuoi le tuipuihai siemtu betu ka nih" a ta. 10 Mihai chu a sukthlabàr zuol a, a kuomah, "Ieng top am i thaw an ta maw!" an ta (LALPA a tlàn hmangsan thu chu a hril tawl tah leiin an hriet a) 11 Tui chu a fawn zuol deu deu a. Chuongchun a kuomah, "Tuipui fawn hi a rè theina dingin i chungah iem thaw tâng kan ta?" an ta. 12 Ama chun, "Mi chawi kâng unla, tuipuiah mi pei unla, tui fawn chu rè el tih. Keima indik nawna leiin thlipui na tak hi in chungah a hung hràng a nih ti ka hriet" a ta. 13 Chuonga thaw el loin, longpuhai chun khawmuol tieng kîr nawk tumin theitawpin long chu an kar ngat ngat a, sienkhom an thaw thei naw a, a hma nêkin tuipui chu a'n sok nasa zuol sau a. 14 Chuleiin, LALPA chu an ko a, "Aw LALPA, hi mipa hringna lei hin mi sukbohmang naw la, poi tawk lo thisen maw chu kan chungah innghat lo dingin kan ngèn che; nang chu aw LALPA, i dit ang anga thil thaw hlaktu i ni si a" tiin an ngèn a. 15 Chuongchun Jona chu an chawi kâng a, tuipuia chun an pei a, tuipui fawn insok buon buon chu a rè ta a. 16 Chu chu an hmuin mihai chun nasa takin LALPA chu an ti a, LALPA kuomah inthawina an inhlàn a, thu an intiemkam a. 17 LALPA ruok chun Jona lemtu ding ngapui a lo ruot diem a, ngapui sûnga chun Jona chu ni thum le zan thum a um a.

Jonah 2

1 Ngapui sûnga inthok chun LALPA a Pathien kuomah Jona chu a tongtai a. 2 Hieng hin a hril a:Ka beidongin LALPA chu ka ko a, Ama chun a mi hung don a. Thlàn rila inthokin thangpuitu ka ko a, Nangin ka kona rawl i lo hriet a. 3 Tui inthûk takah i mi pei lût a, Tuipui li ril inthûk taka chun, Tui fawnin an mi'n huol vèl a, I tui fawn le insokhai chun, An mi vûr khum hlup hlup a. 4 'I mithmua inthokin, Nangin i mi hnot hmang a, Sienkhom i in thienghlim tieng, Hung ngha nawk ka tih' ka ta. 5 Tuiin a mi chim vèl a, Inthuok harsa ka ti a, Tuipuiin a mi sìn khum a, Tui hlohan ka lu an tuom a. 6 Tlâng thut rawt chen ka tla thla a, Kumkhuoa hnuoi ril nghâk dingin. Sienkhom aw LALPA ka Pathien, Khuorkhurûm monga inthokinKa hringna i lâk suok si. 7 "Ka hringna a liem têpin, LALPA ka hung hriet che a, I tempul thienghlima chun, Ka tongtainan a hung nang che. 8 "Milem hmangna bo betuhai chun, Lunginsietna an dong ding chu, Chàn phanain an hmang hlak. 9 Kei ruok chun lawmthu hrilin, I kuomah hung inthawi ka ta, Ka thu tiemhai khom hlen ka tih. Sandamtu chu LALPA a ni si a" tiin. 10 Chun, LALPA chun ngapui chu thu a pêk a, Jona chu khawmuolah a luok suok ta a.

Jonah 3

1 LALPA thu chu Johan kuomah a hung tlung nawk a: 2 "Tho la, khaw ropui tak Nenevi-a chun fe la, thu ka hril che hi tlâng insampui rawh" a ta. 3 Chuongchun Jona chu a tho a, LALPA thu ang chun Ninevi khuoa chun a fe a. Ninevi chu khaw poimaw tak el a na, a lienzie chu kea ni thum lam a nih. 4 A ni khatnaa chun Jona chun khawpuiah, "Ni sawmli hnungah Ninevi hi sukbohmang nîng a tih" tiin tlâng a'n sam a. 5 Ninevi mihai chun Pathien an ring a, bu nghei an puong a, a lien taka inthoka a chîn tak chenin saiip an sil a. 6 Ninevi khaw lalin chu chu a lo hriet chun a lalthungphaa inthokin a tho a, a lal thuom a hlîp a, saiip a sil a, pilvut lai a'n thung a. 7 Ninevi khaw lal le a mi lienhai chun hieng ang hin thupêk an insuo a: "Lal le a khawnbawlhai thupêk angin, mihriem amanih, ran amanih, beram ruol le bawng ruol amanih tu khomin ieng khom fain an dawn ding a ni nawh. 8 Mihriem le ransahai khomin saiip sil hai sien, thahnemngai takin Pathien ko raw se. Mi tinin mani lampui tha naw le tharum hmanga thisen insuona chu bansan raw se. 9 Ei bohmang nawna dingin Pathien chu inlamlètin, a zangaina nasa tak lei chun a lungsenna nasa taka inthok chun in kei kîr naw nih ti tuin am a hriet?" tiin. 10 Pathienin an um dàn chu a hmu a, an suol an sim ti a hriet chun anni chu a lunginsiet a, an chunga sietna intlun dinga a hril chu a thul ta a.

Jonah 4

1 Jona ruok chu a lawm naw hlea, a lung a sen a. 2 LALPA kuomah, "Aw LALPA, hi hi an naw maw ina ka um laia ka hril ta kha? Hi lei hi annawm Tarsis tieng inrang taka ka tlàn hmang kha. Nang chu Pathien, mi lâinatu le lunginsiettu, lung inuoi le hmangainaa sip, sietna intlungtir ding laka kut kei kîr hlak mi i nih ti ka hriet annawm. 3 Tu hin LALPA, ka hringna hi la el rawh, ka ta dingin hring nêkin thì a tha lem" a ta. 4 ​LALPA chun, "Lungsen theina san ding iem i nei hrim hrim a?" a ta. 5 Jona chu khawpuia inthokin a suok a, khawpui sak tieng panga chun a'n thung a, chu taka chun sawlbùk a bawl a, khawpui chunga thil hung tlung ding chu hmu tumin sawlbùk hlima chun a nghâk ta zing a. 6 LALPA chun Jona lu zàr hlie a, a rinumnaa inthoka sukhadam dingin ûm a'n zâmtir a, ûm hlim lei chun Jona chu a lawm hle a. 7 Amiruokchu, a tûk khawfingchat laiin Pathienin ûm zung fatu dingin thil ngê a ruot a, chu chun ûm zung chu a rêt a, a hung vuoi ta a. 8 Ni a hung insàng chun Pathienin khawsak thli lum tak el a hung tir a. Jona lu chu ni intèngin a em a, luhaiin a chàu a. Thi hiel nuomin Pathien kuomah, "Ka ta ding chun dam nêkin thi a tha lem" a ta. 9 Sienkhom Pathien chun Jona kuomah, "Ûm zâm thuah lungsen theina san i nei hrim hrim am a ni?" a ta. Jona chun, "Nei e, thi pha hiel khopin ka lung a sen a nih" a ta. 10 LALPA ruok chun, "Hi ûm, nangma inrimpui le chawm lien khom ni lo, zàn khat thila hung uma zàn khat thila bo nawk el hi i lainat a. 11 Ninevi khuo, khaw ropui tak, a sûnga mani voi le chang khom la hre thei lo mi nuoi khat le singhni chuong le ran ruol tam tak umna hi, ka lunginsiet naw ding am a ni?" a ta.

Micah 1

1 Judai ram lal Jotham hai, Ahaz hai le Hezekia hai inlal laia Moreset khaw mi Mika kuoma inlàrnaa Samaria le Jerusalem chungthua LALPA thu hung tlunghai chu: 2 Hnam po pohai, lo ngai unla, Hnuoi le a sûnga umhai, ngâithla ro, Lalpa PATHIEN chun a chèngna, Hmun thienghlima inthokin, Nangni kal zawnga hrepuituah, A hung thang ding a nih. 3 Ngai ta! a chèngnaa inthokin, LALPA chu hung tum a ta, Hnuoi hmun sânghai chîl a tih. 4 Mei bula khuoihlu sie angin, A hmaah tlânghai chu zop an taTêna tui luong thlur sung ang elin, Varuom inthlêr sungin siem a tih. 5 Hieng hi Jakob bawsietna lei le, Israel sûngkuo suolna lei a nih. Jakob bawsietna bul chu iem?Samaria-ah a ni naw am a ni?Judai ram hmun sâng chu iem?Jerusalem a ni naw am a ni? 6 "Chuleiin Samaria chu khaw ram, Hmunhnok dèng bùmnaah siem ka ta, Chu taka chun grêp chîng an ta, A lung chimhai chu kor ruomah, Inhlum thlapêk vong ka ta, A lungphûmhai dawk vong a tih. 7 A milem biekhai vaw nawi ka ta, Tempula an thilpêkhai po po chu, Meiin raw hmang vong ka ta, A milemhai sukse vong ka tih. A thilpêk dong po pohai chu, A nawchizorna man a na, Nawchi zorna man a ni ang hrimin, Nawchi inchawknan hmang an tih. " 8 Hi lei hin tap khêk ka ta, Ke lawng le saruoka invâkin, Sihal angin inhrâm ka ta, Chingpirinu angin tuibira ka tih. 9 A hliemna dampui ruol an nawh; Judai ram khom a tlung ta a, Ka mihai chêngna JerusalemKotkhàr bul chen a lo tlung tah. 10 Gath khuoah hril naw unla, An hrietah tap dêr naw ro. Beth Ofra khuoa ruok chu, Pilvut lai zâl inbuol ro. 11 Nangni Safira hmuna chênghai, Saruok le inzak takin, Ama chu fè pèl unla, Zanan hmuna chênghai chu, Hung suok dok ngam naw ni hai. Beth Ezel chu lungngàiin a'n rùm a, A'n humhimna a chân ta si. 12 Marot-a chênghai chu, Na tuorin an in-iel a, Dam nghâkhlain an thlîr a, Jerusalem kot bul chenin, LALPAA inthoka sietna chun, A hung nang phàk ta si a. 13 Nangni Lakis-a chênghai, Sakor tawlailir chu buotsai ro, Zion naunu suolna bul chu, Nangni hi in ni si a; Israel bawsietna chu, Nangni-ah a um a nih. 14 Chuleiin Moreset Gath kuomah, Inthlàna thilpêk pe rawh. Akzib chu Israel lalhai ta dingin, Hlêmtu la hung inchang a tih. 15 Maresa tukdol dingin, Hnètu la hung tir ka ta; Israel ropuina chun, Adulam la hung tlung a tih. 16 Pûr doin lu vaw kol rawh, I nau dithai pûr chu doin; Mulukol ang hiela kolin, A mètin mêt kawng vong rawh, I kut ngeia inthokin salah, An thuoi hmang ding a ni si a.

Micah 2

1 Suol phantuhai chung chu a pik, Khum laizawla suol phiertuhai!Zîng khuo a hung var pha leh, An phier angin an hlen suok hlak, Chuong thawtheina chu an nei si a. 2 Mi lo an inhnar a, an làkpèk a, Mi in an inhnar a, an làkpèk bok a. Mi hlèmin an inhai an làkpèk a, An rochan chen an làkpèk hlak. 3 Chuleiin, LALPAN hieng hin a tih:"In sûngkuo sietna ding chu, In pumpel thei dêr lo dingin, Keiman ka phan zing a nih. Chapoin lêng ta nawng in ta, Sietnain hung nang a ti cheu. 4 Chu ni chun mihan nuizatin, Tap hla phuok khum an ti cheu:'Rok ramin kan um ta a, Kan ram a sem dar vong a; Kan kuta inthokin a lâk a, Phatsantuhai kuomah a sem" tiin. 5 Chuleiin, LALPA mihai inkhawma, Thum vawra ram insem ding hrim, Mi tû khom nei naw ti niu. 6 Anni rawi chun ka kuomah, "Kan kuomah thu hril naw la, Hieng hi mi hril vet naw rawh; Muolphonan mi nang naw nih" an tih. 7 Aw nangni Jakob sûngkuohai, 'Hieng ang thil hi thaw dingin, LALPA Thlarau a lungsen maw?'Ti zawnga hril lem ding a ni?"Indik taka khawsahai chungah, Ka thu'n kongro a suk naw a ni? 8 Tu lai hnai hin ka mihai chu, Hmêlma angin in en a, Indona hmuna inthoka, Ralmuong taka hung kîrhai chu, An korfuolhai in làkpèk a. 9 An in inhoi taka khawsa, Ka mi, nuhmeihai in hnot suok a. An nauhai mal ka sawmna chu, Kumkhuoin in làk hmangpèk a. 10 Tho unla, fe suok vat ro, In ta dingin a râlmuong nawh; Siem that thei ruol lo khopa Sukporchè le suksiet a ni tah. 11 Khêlhlip le hlèm hmang hungin, 'Uoiin le zû pe teuh kan ti cheu'Tiin hung hril sienla cheu, Chu mi chu hi mihai zawlneiNi awm lek a ni hrim a nih! 12 "Aw Jakob thlahai, matheiloin, In rêngin ko khawm ka ti cheu a, Israel thla, hlaa umhai po po chu, Hung thuoi khawm ngèi ka ta, Ran huonga beram ruol ang leRan tlatnaa bawng ruol angin, Anni chu hung thuoi khawm ka ta, Mipui inzi nuoi nuoi an tih. 13 Kot hongtu chun hma thuoi a ta, Kot chu kânin lût hum hum an ta, An lal chu an hmaah fèng a ta, LALPA chun hma thuoi a tih. "

Micah 3

1 Chu zoah hieng hin ka hril a:"Jakob sûngkuoa lukhâituhai, ngai ro, Israel sûngkuoa rorêltuhai, ngai roRo rêl dàn in hriet a tha naw maw? 2 Thil tha theidain, thil suol in dit a, Ka mihai vun in hìkpèk a, An rû-a taksa in huot thlàk a; 3 Ka mihai taksa in fàk a, An vun in hìk thlàkpèk a, An rù in vuok tliekpèk a; Thlèngah an sa in chan dar a, Bêla suong dingin in chan nawi" tiin. 4 Chu zoah LALPA chu ko an ta, Sienkhom lo don tawl naw nih. Chu pha chun an suol thawhai leiin, An lakah a hmai lo thup a tih. 5 LALPA chun hieng hin a tih:"Ka mihai hlèmtu zawlneihan, Thil pèk ding neihai kuomah, Thlamuongna thu an puong a, Pèk ding nei nawhai ruok chu, An lo vauh khawng el hlak si. 6 Chuleiin zàn thimin nang a ti cheu a, Inlàrna hmu naw ti niu; Thimnain bawm a ti cheu a, Ai khom sân thei naw ti niu. Zawlneihai ni chu tlâng a ta, An sùn chu zàn inchang a tih. 7 Hmutheitu chu inzak a ta, Aisânthiem chu muolpho a tih. Pathiena inthoka donna, A um ta si naw leiin, Inzakin hmai hup an tih" tiin. 8 Nisienlakhom kei ruok chu, Jakob bawsietna puong ding leIsrael suolna inhriettir dingin, LALPA Thlarau thilthawtheina, Rorêl indikna le hràtna chun, Inthuom sipin ka um si a. 9 Jakob sûngkuoa lukhâituhai, Israel sûngkuo chunga rorêltuhai, Rorêlna indikhai pal zût a, Dikna tinrêng chokchawrawituhai, Ka thil hril hi lo ngàithla ro. 10 Zion chu thisenin in bawl a, Jerusalem chu rîtlonain. 11 Hotuhan tham beiseiin ro an rèl a, Thiempuhan hlaw beiseiin an zirtir a, Zawlneihan sum beiseiin âi an sàn a. Chuong sà khom chun anni chun, 'Ei kuomah LALPA a um an naw?Sietnan mi nang naw nih' tiin, LALPA chungah an innghat chu! 12 Chuleiin, nangni lei tak hin, Zion chu lo anga inletin um a ta, Jerusalem chu tlu ram a ta, Tempul muol chu chimbuk bawm, Muol pawngah inchang a tih.

Micah 4

1 Sienkhom hun nuhnunga chun, LALPA tempul ngîrna tlàng chu, Suknghetin hung um a ta, Tlâng po po sìngtu nîng a ta, Muol po po chungah lêng a ta, Hnam tin khuoi ang kai an tih. 2 Hnam tam takin hung pan an ta, Hieng ang hin hung tîng an tih:'Thaw ro, LALPA tlàngah, Jakob Pathien inah kâi ei tiu, A lampui ei hraw theina dingin, A lampui mi lo zirtir a tih' tiin. Zion tlànga inthokin dàn thu, Jerusalem-a inthokin LALPA thu, A luong suok ding a ni si a. 3 Hnam tin inkârah ro rêl a ta, Kil tina um hnam hràthai khom, An inkàr thu rêlpêk a ta, An kawlhnàmhai chu làngkûmah, Lo keina dingin sut an ta, An fei chu thing kau thumna, Chemkuoiah sut tâng an tih. Hnam dangin hnam dang chungah, Chemsen inlèn ta naw ni a, Râldo inchûk ta naw bok an tih. 4 Mi tin mani grêp buk hnuoiah, Theichang buk zàr hlim hnuoiah, Muong takin thung tâng an tih, Tiin Iengkim LALPA chun a hril. 5 Hnam tinin mani pathien zui an ta, Keini ruok chun kumkhawtluongin, LALPA kan Pathien zui tàng kan tih. 6 LALPA chun hieng hin a tih:"Chu ni a hung tlung pha chun, Kebaihai chu ko khawm ka ta, Saltànghai ko khawm ka tih, Lungngaia ka siem po pohai. 7 Kebaihai chu hlàng ka ta, Hnot lènga um tahai chu, Hnam hrât takah siem ka tih. Chu nia inthok chun LALPAN, Zion tlàngah kumkhuoin, An chungah ro rêl a tih. 8 Aw nang, ran ruolhai vèngbùk, Zion naunu kulpui nghet, I lalram hmasa tungding nawk ka ta, Jerusalem naunu chu inlal a tih. 9 Ieng leia tuta i tap rak am?Lal i nei naw am a ni?I remruottu a boral am a ni?Nau hase anga natna chun, A man tah che am a ni? 10 Aw nang Zion naunu, Nau hase tuor ang elin, Na tak tuorin inrùm rawh. Tuhin khawpui suoksanin, Ram hnuoia chun inkul rawh. Babulonah i fe ding a na, Chu chun san suokin um i tih. Chu taka inthok chun LALPANI hmêlmahai kuta inthokin, A san suok ding che a nih. 11 Tuhin hnam tam takhai chu, Do ding che'n an insingsa a; 'Sukporchein um sien la, Zion chu inriem khum ei tih'Tiin an ti che a ni hi! 12 Sienkhom LALPA ngaituona, An hriet phâk teu si naw a; A remruot an hriet thiem bok nawh. Hrizawla chìl ding buphal angin, Anni chu a lâk khawm ta si a. 13 "Aw Zion naunu, tho la, chîl rawh, Kapathîr ki pêng ka ti che, Ke tinbawrah dâr pêng ka ti che a, Hnam tam tak i sir nawina ding" tiin. Mi thil an làkpèkhai chu, LALPA kuomah hung inhlàn unla, An hausakna khom hnuoi pum neitu, LALPA kuoma chun inhlan rawh.

Micah 5

1 Aw kula inhuon Jerusalem, I sipai ruolhai khawm rawh, Inhuolin ei um ta si a. Israelhai rorêltu bekah, Thîr hmolin an vuok ding a nih. 2 Sienkhom nang Bethlehem, Efrata, Judai khawpui lai chîn hle la khom, I sûnga inthokin ka ta dingin, Israel rorêltu hung suok a tih; A tobul chu tiena tlânga mi, Chatuona inthoka suok a nih. 3 Chuleiin, nau hase tuortunuin, Nau a nei thlàk hmâ khat chun, Israel chu màksanin um a ta; Chu zoah a unau hlaa la umhai chu, An saltàngna hmuna inthokin, Israel ramah kîr nawk an tih. 4 LALPA hràtnaa chun ngîrin, LALPA a Pathien hming ropuinain, A beramhai chu chawm a ta, Muong takin khawsa tâng an tih, Chu pha chun a hming ropuinain, Hnuoi kil tawp dêng tâng a tih. 5 Ama chu muongna bul nîng a tih. Asuria-haiin ei ram hung rûn a, Ei kul sûnga hai an lût pha chun, A dotu ding berampu pasari leThuoitu pariet inngìr suok ei tih. 6 Asuria ram, Nimrod ram chu, Kawlhnâmin op khum an ta, Ei ram rûn a, ei ramri a tlung pha, Asuria lakah mi san suok a tih. 7 Jakob thla hlaa la umhai chu, Hnam chi hrang hranghai lai chun, LALPAA inthoka daidaw tla le, Hlobet chunga ruo sûr angin, An la tla dar ding a nih; Chu chun mi a nghàk naw a, Mihriem ta din a châm bok nawh. 8 Jakob thla hlaa la umhai chu, Hnam chi tin lai um vèng an ta, Ramsahai le beram ruol laiaSakeibaknei vanglai chetlain, A hmu phot sè le pot chen a, Santu tu khom an nei naw angin, 9 A hmêlmahai chungah lêng a ta, A dotuhai chu sukboral a tih. 10 LALPA chun hieng hin a tih:"Chu ni a hung tlung pha chun, In sakorhai sukhlum ka ta, In tawlailirhai suksieng ka tih. 11 In khawpuihai suksieng ka ta, In kulpuihai sukchim ka tih. 12 In dawithiemhai sukhlum ka ta, Aisânthiem nei ta naw ti niu. 13 In milem kerhai suksieng ka ta, In lung serhai vaw nawi ka ta, Mihriem kuta siem thil hmaah, Bokkhup ta ngai naw ti niu. 14 Asera lim thing in phunhai chu, Phûr thlupêk vong ka ti cheu a, In khawpuihai suksieng ka tih. 15 Ka thu zawm lo hnamhai chungah, Lunginsen le thin inlingin, Phuba ka lâk ding a nih" tiin.

Micah 6

1 "Ngir la, tlâng hmaa thiem thu hril la, Muolhaiin i hril ngâithla raw se. 2 LALPAN a khingna cheu hi, Aw tlânghai lo ngaithla ro; Hnuoia tlâng hlunhai ngai ro, LALPAN a mihai a khing a, Israelhai a khing a ni hi. 3 "Ka mihai, in chungah iem ka thaw a?Iengtin am in phur ka sukrik a?Mi hang don ve ta u, khai; 4 Aiguptaa inthoka thuoi suokin, Bawi ninaa inthokin ka'n tlan cheu a, Thuoitu ding Mosie hai, Aron hai, Miriam hai ka pêk cheu kha. 5 LALPAN thil fel a thawziehai, Ka mihai, in hriet zing theina din, Moab lal Balak thurawn pèk hai, Beor naupa Balaam don dàn hai kha, Theinghil ngai hrim hrim naw ro. Sitim-a inthoka Gilgal chenaIn thil tuokhai kha hre zing ro" tiin. 6 LALPA hmaah inlang ding lePathien inzaum hmaa ngîr dingin, Ieng le am ka hung ding a na?Pumraw thilhlâna inhlàn dingin, Bawng tuoi kum khat mi ka hung kei ding? 7 Beramchal a sâng ruola tiem, Oliv hriek vadung sîngkhatin, LALPA ka suklawm thei ding?Ka bawsiet thawi damna dingin, Ka nau lutîr chu inhlànin, Ka thlarau suolna leiin, Ka rîla rà chu ka'n hlàn ding? 8 Aw mihriem, ieng am thil tha chu, Aman a hril dèr ta chê kha. Iem a na LALPA phût chê chu?Indik taka thaw, zangaina ngaihlut, I Pathien le thuhnuoirol taka intlon, A ni lem naw am a ni? 9 I hming ti hi a varthlâk a nih. LALPA chun inring takin, Jerusalema mi po po a ko a nih:"Hmol le a hmangtu thu chu poisa ro. 10 Aw, sûngkuo rilohai, Indik lo taka in ro khawlhai, Inkhìna indik lo in hmanghai, Ka theinghil el ding am a ni? 11 Phahla indik lo hmangtu leBûkna lung indik lo koltu chu, Thiem changin ka'n suo ding maw? 12 In mi hausahai an tawrot a, In mipuihai an khêlhlip a, An leiin thukhêl a per suok. 13 Chuleiin, hrem ka ti cheu a, In suol leiin sukram ka ti cheu. 14 Fâng in ta, khop si loin, In phìng khom tâm zing a tih. Sêk khawm in ta, hum thei si loin; In hum sun indonaah bo a tih. 15 Chîng in ta, sîk si loin; Oliv hriek sir sawr in ta, Nangnin hmang phâk si loin; Grêp rà sir sawr in ta, A uoiin dawn phâk si loin. 16 Lal Omri um dànhai zuiin, Lal rilo Ahab insûng ching dàn, An ser le sànghai in zawm leiin, Khaw ramah siem ka ti cheu a, Mi nuizatbûr le hmusit nîng in tih. "

Micah 7

1 Mi rimsi ka va hang ni ngei de!Nipui thei an lo vong hnung, Grêp ra an lawr vong hnunga, Lo thel zonga fe ang ka nih; Ka chàk èm èm grêp hmin leTheichang hmin a um ta nawh. 2 Pathien ngaisak mi po po chu, A rama inthokin an phìt fai a, Mi indik an um ta dèr nawh. Inthat tumin an inchàn tuo a, An unauhai chu man tumin, Lèn chawiin an invè tuo a. 3 Thil tha naw thawna dingin, An kuthai a chemkal a. Hotuin thilpêk an phût a, Rorêltuhan thamna an ngiet a, Thilthawtheihan an dit dànin, Iengkim mi an hnaw lui a, Inthukopin thil an phier a. 4 An mi tha tak khom buor ang a na, Anni laia mi indik tak chu, Dai hling nêkin a se lem. Nangni vêngtu a chèt ve hun, Pathienin a kan cheu hun a tlung a, Tu hi an chì-ai hun chu a nih. 5 I tuolbawmhai ring naw la, I ruol tha khom ring naw la, I tânga inbeinu laka khom, Fimkhur takin bàu phong rawh. 6 Naupan a pa sukmuolpho a ta, Naunu a nu lakah hel a ta, Moin a tarpinu do a ta, Mihriem hmêlmahai chu, Ama sûnghai nîng an tih. 7 Kei ruok chun beiseina leh, Ka LALPA chu thlîr ka ta, Ka Tlantu Pathien chu nghâk ka ta, Ka Pathien chun mi ngaithlâng a tih. 8 Ka hmêlma, mi diriem naw rawh!Ka tlu khomin tho nawk ka tih. Thim hnuoiah inthung lang khom, LALPA chu ka var nîng a tih. 9 Ama lakah ka suol leiin, LALPA lungsenna phur ka tih, Ka chungthu mi hrilpui a, Indika a mi sie chenin. Chu chun varah mi thuoi a ta, A felna chu hmu tâng ka tih. 10 Chu pha chun ka hmêlmahai, "Khawm LALPA i Pathien chu teh?"Titu chu inzakin sip a ta, Ka mit ngèiin a tlûk hmûng ka ta, Tuol chirhak angin sir hriel an tih. 11 I kul banghai bawl nawk hun leI ramri zauh bel ni la tlung a tih. 12 Chu ni chun Asuria ram dâm, Aigupta khawpuia inthok dâm, Aigupta le Eufretis inkâra mi dâm, Tuipui le tuipui inkâra inthok dâm, Tlâng le tlâng inkâra inthok dâm, I kuomah mihai hung an tih. 13 Ram chu a sûnga chênghai le, An thil suol thawhai leiin, Ràusan ramah inchang a tih. 14 Ram hnuoi, tlatna hnienghnârah, I rochanhai chu intlattir la, I hmolin anni chu vêng la, Basan le Gilead-a an tlat hlak ang khan, Tla duol duol nawk ta raw hai se. 15 "Aigupta rama inthokaIn hung suok lai ni ang khan, Thilmak inentir nawk ka tih. " 16 Thilthawtheina nei ve ta lo, Hnam tinhai chun hmung an ta, Inzakin bàu hup an ta, An nà khom sêt vong a tih. 17 Rûl angin pilvut liek an ta, Bokvâka invâkhai ang elin, An umna kuoa inthokin, Inthin pumin hung suok an ta; LALPA ei Pathien kuoma chun, Ti êm êmin hung an ta, Nangma leiin ting an tih. 18 Nangma anga suol ngaidam hlak, Hlaa um i rochanhai bawsietna, Ngaidam thei Pathien tu'm an um a?I lungsen kumkhuo nuom naw a, Zangaina inhmùtir chu i lawm si a. 19 Kan chungah za ngai nawk i ta, Kan suolhai mi hnèpêk i ta, Kan bawsietna po pohai chu, Tuipui mongah pei hmang i tih. 20 Tiena kan pi le puhai kuoma, Inkhâm meua thu i tiem ang khan, Jakob chungah sukdik i ta, Abraham chungah zà ngai i tih.

Nahum 1

1 Ninevi chungthua Elkos mi Nahum-in inlàrna a hmu thu inziekna bu a nih. 2 LALPA chu Pathien thîkthusie, Phuba la hmang a nih; LALPA chun lungsen takin, A phuba chu a lâk hlak a, LALPA chun ama dotuhai chu, A thungrul ngei ngei hlak a, A hmêlmahai laka khom, A lungsen a'n tûr zing hlak. 3 LALPA chu mi lung inuoi a na, Nasa taka thilthawthei a na, LALPA chun mi suol tu khom, Hrem loin a'n suo ngai nawh. LALPA-in lampuia a hmang chu, Thawngaleivir le thlipui a na, Sûm hi a pilvut pal khùk a nih. 4 Tuipui a hal a, a kang chat a, Vadunghai khom a kang zo a, Basan le Karmel tlàng an tawl a, Lebanon tlàng vul mawi a chuoi. 5 A hmaah tlânghai an inhnìng a, Muolhai an intui zop a, Hnuoi le a sûnga chênghai chu, A hmaah an inthin dur dur. 6 Tu'n am a lungsen hmason a, A lung inling tuor zo ding?A lungsen chok inhlap chun, Lungpuihai khom a hlap dar. 7 LALPA chu a tha a, Buoi huna kul nghet a na, Ama ringzotuhai a ngaisak hlak. 8 Ninevi chu tui lien sàngin, Inchìm pil hmangtir a ta, Ama dotuhai chu khaw thimah, An rêngin hnot lût a tih. 9 LALPA an phiernahai chu, Aman suktawp vong a ta, Buoina um nawk ta naw nih. 10 Hling bukah intâng an ta, An uoiin indawn rui an ta, Meiin bupawl a lem angin, Anni chu lem hmang a tih. 11 Aw Ninevi, nangmaa inthokin, LALPA chunga thil suol phiertu, Thurawn rilo petu a hung suok. 12 LALPA chun hieng hin a tih:"Asuria-hai chu tam tak niin, Inkoppui neihai sien khom, Sàm thlûkin la um an ta, La bohmang vong tawl an tih. Sukrinum hlak lang che khom, Aw Juda, sukrinum ta nawng ka che. 13 An ringkol inbàttir che chu, Tuhin hlîppêk ka ti che a, I kol bun peihawn ka tih" tiin. 14 Ninevi, i chungthuah, LALPAN hieng hin thu a pêk:"I hming la hung puttu ding, Thlà hrim hrim nei naw ti nih. Tempula i milem ker le siemhai, A rêngin suksieng ka ta, I thlàn ding buotsai ka tih, Mi suol tawp i ni si a" tiin. 15 Tlânga inthoka chanchin tha, Hung intluntuhai ke chu, en ta, Inremna thu intluntuhai ke chu!Aw Juda, i kûthai chu inser la, I thutiemhai chu hlen rawh. Mi rilohan rûn ta naw ni che, Suksiet dèrin um an tih.

Nahum 2

1 Aw Ninevi, A rûntu ding che a hung. Kulbing vêng la, Lampui vêng la, Insingsa la, Takchapa tiin thang rawh. 2 Israel ropuina ang bokin, Jakob ropuina khom chu, Suksetuhaiin sukramin, A grêp kung suktlaran sien khom, LALPA chun tungding a tih. 3 A sipaihan phaw sen an chawi, A sen lârin an inthuom a. An tawlailir buotsai ni chun, A thîrhai chu a tle zok zok a, Fâr fei ngul an chawi fuk a. 4 Tawlailirhai chu kotthlêrah, A suk a tungin an tlàn a, Meiser angin an inhlap a, Kawl angin an inlep zok zok. 5 A mi huoi thlanghai a ko a, Tlu nok nokin an hung tlàn a. Kul bei dingin an baw rok rok a, An inphênna ding an siem a. 6 Va kam ep kot chu an hong a, Lal in chu a tlu ta ruop a. 7 A khuoa chêng po po chu, Sala thuoi di'n thu an pèk a, aBawinuhai chun awm inchumin, Vàthû angin an inrûm a. 8 Ninevi mihai chu dîl sàt thè ang elin, An tê huk a, an tlànse hum hum a, "Ngîr ro, ngîr ro" tiin an khêk a, Ngha kîr tu khom an um nawh. 9 Râllâk sum inchu unla, Tangkaruohai kha la ro!Rangkachakhai kha la ro!A rosum hauzie hlak chu, Hril ngaina khom a um nawh! 10 An rok a, an suom a, Saruok kèlin an siem a!An lung a zop a, an khûp a zoi, An kawng a'n thin hlop hlop a, An hmèl a dâng zo vong tah. 11 Sakeibakneihai bu zawl, Ti nei loa an khawsakna, Keipui le keichal ruolin, An tèhai an chawm tleina chu, Khaw lai am a um ta a? 12 Keichalin a tèhai chawmna khop, A sa sè a bùm rem rum a, A koppui chawmna dingin, A sa man chu a rêk hlum a, A pûk chu a sa sein a hnaw sip a, A bu zawl chu sa ruong ngotin. 13 Iengkim LALPA chun, "Ngai ta, ka do chê a nih. I tawlailirhai chu khu lui luiin, Ka raw hmang vong ding a na, I tèhai kawlhnâmin that an ta, Hnuoia hin sa se ding hrim, Màksanpèk nawng ka ti che. I palaihai rawl hrim hrim, Hriet ni ta ngai dêr naw nih" Tiin a lo puong ta si a.

Nahum 3

1 Thisen insuo hmang khawpui, Khêl le inroknaa sip, Chatlak loa sa sè nei zing chu, A chung a va hang pik de aw! 2 Vuokna hmol an ri zot zot, Tawlailir kè a thûm chur chur, Sakor ruol an tlàn puot puot, Tawlailir an sukchawl thut! 3 Sakor chungchuong mihaiin Hma norin an tlàn chur chur, Kawlhnâm an vai de zok zok, An fei hmor a tle zor zor, Hliem an tlu dar rem rum a, Ruong tiem seng lo zàlhai chu, An dèng bum hnèr hnûr el a, Ruongah an inpal nok nok. 4 Chuong po po chu dawithiemnu, Mi zawr thiem le hurkawngnuin, A nawchizor le dawithiem leiaHnamhai bawia a siem lei a nih. 5 Iengkim LALPA chun a hril:"Nang hi ka do chê a nih. I puonbil chu i hmâi chenin, Hlîm tungpèk ka ti che a, Hnamhai hmaah i saruokna, Lalramhai hmaah i muolphona, Ka phor lang vong ding a nih. 6 Chir thuin thèng ka ti che a, Hmusit taka suknomnain, Ennuomah siem ka ti che. 7 A hmu che taphothai chun, 'Ninevi a ram tah ie!Tuin am sûn tâng an ta?Nangma sûntu ding khaw lam, Mi ka hmu zo ding a na?'Tiin tlànsan an ti che" 8 Nile vadungin a huol, Thebesb nêkin iem i tha lem?Vadung chu a kulpui a na, Tui chu a kul bang a nih. 9 Tluk ruol loa a hràtna chu, Ethiopia le Aigupta an na, Put le Libia in an thangpui bok a. 10 Sienkhom manin a um a, Salah an intàngtir a, Kotthlêr pèng thuom tina chun, Hnuoi vuoknan naute hmangin, Indar nuoiin an peihawn a. Thumvawrin a milienhai an insem a, A mi ropuihai khaidietin an khit a. 11 Nang khom hung inrui i ta, Hmêlma laka inbìkna ding leInhumhimna ding zong i tih. 12 I kulpuihai po po chu, Theichang hmin hmasa sawi tilh, A fatu baua tla ang nîng a tih. 13 I sipaihai hi hei en ta, Nuhmei ruol ang vong an ni hi!I hmêlmahai lût theina dingin, I ram kot an hong huoi a, A kot kalna thîr tluonhai chu, Meiin a kang siet ta si. 14 An inhuol ding chè a nih, I dawn ding tui chawi khawl la, I kul banghai suknghet rawh. Pilpok siemin buotsai la, Lung chàrna ding rawt nawi la, Bang tholna ding têklei siem rawh. 15 Chuonga i siem lai ngei chun, Meiin lem hmang a ti che a, Kawlhnâmin sukhlum an ti che, Thing ngè angin that an ti che. Khàu angin insukpung la, Khau hon angin insukpung rawh. 16 Vàna arasi nèka tamin, Sumdawnghan an bawr che a, Nisienlakhom khàu hon angin, A ram an fàk kol zo a, Chu zoah an vuong hmang a. 17 In hotuhai chu khàu ang an na, In vèngtuhai chu khàu hon ang; A dei pha bangah an kop a, A lum pha an vuong hmang a, An fèna chin hrie an um nawh. 18 Aw Asuria lal, i vêngtuhai an in, I mi thahai an zàl hadam a, I mipuihai tlângah an tla dar a, Thuoi khawmtu tu khom an um nawh. 19 I hliemna hi thipui khop a na, Ieng khomin sukdam naw nih. I tlùk siet thu hre taphotin, Lawmin an kut an ben a; I rawngzie hril ruol lo kha, Tuor lo tu am an um a?

Habakkuk 1

1 Zawlnei Habakuk thu dong chu: 2 Ieng chen hiel am Aw LALPA, Thangpui ngèna ka kona hi, Ngaithla loin i um ding a na?"Inpawngnêkna!" ti'n ka khêk a, Mi san suok di'n i hung si nawh. 3 Ieng leiin am thil indik lo, I mi'n hmutir zing am a na?Ieng leia thil poi i ngai thei am?Sietna le inpawngnêknahai, Ka hmaa hin ka hmu zing a, Innghirnghona le inkhakna a tam. 4 Dànin kong ro a suk ta naw a, Indikna'n hmun a chang ta nawh. Mi suolin mi fel an inhuol a, Indikna a lutinle zo tah. 5 "Hnam danghai hi enin thlîr la, Nasa takin makti rawh:I dam lai ngei thawng ka ta, Chu chu mi'n an hril phâ che, Awi khom awi nuom naw ti nih. 6 Hnam tawrot le dawn tawi tak, Mi dang chèngna hmunhai rûn a, Hnuoi khang dâpa phît faitu, Kaldai mihai ka chok tho mèk. 7 Mi tìsim le pangzat kâi an na, An thaw dán dàn chu dàn a na, Anni tànghma chauh an ngaituo. 8 An sakorhai hang hràtzie chu, Keite nêka tuonrang an na, Thimbuta satené nêk khomin, An tìum lem dai a nih. An sakor chungchuonghai chu, Ram hla taka inthokin, Hrât takin an hung tlàn a, Ar la ding mupui angin, Dîng takin an hung inbir thla. 9 Mi rûn dinga hung an nih. Thlalèr thlî ang an hung hràng a, Tieu anga tam sal an man khawm. 10 Lalhai chu an hung palzût a, Rorêltuhai an nuizatbûr a, Kul khuo iengah an ngai naw a, Inhuolna ding pil an dèng pawng a, Kulhai chu an làk zung zung a. 11 Thlipui angin an hung nuoi a, Hma an tawn tlang pur pur a. Sienkhom thiem naw phur an nih, An hràtna chu pathiena an nei leiin. " 12 Aw LALPA, chatuona miI lo ni naw hrim am a ni?Ka Pathien, ka Mi Thienghlim, Thi hmang naw ning ungah. Aw LALPA, i rorêlna hlen dinga, Anni chu i ruot an na, Keini mi hremtu dingaI ruot an nih, Aw Lungpui. 13 Thil tha lo enna dingin, I mit a thienghlim taluo a, Thil tha lo i ngai thei nawh. Chuong chu ni siin ieng dinga, Dawhaa che hlak mihai hi, I ngai thei tawl am a na?Mi rilohaiin mi felhai, An lem zo duok duok lai khan, Ieng dinga i to zing am? 14 Tuipuia nga le rannunghai, Rorêltu nei lohai ang chaua, Ieng dinga mihriem hi i siem? 15 Hmêlma rilo chun ngakuoiin, Anni chu a khài dok a, A lènin a man tawl a, A lènkhangin a fûn khawm a, Chuleiin hlimin a lawm. 16 Chuleiin a lèn kuomah, Inthawinahai a'n hlàn hlak a, A lènkhang kuomah rimtui; A lèn leia hnienghnâr a na, Fâk ding inhnik petu a nih. 17 A lèn chu bun ruok zingin, Lungsietna nei dêr loin, Hnamhai a suksiet ding maw?

Habakkuk 2

1 Ka râlvêngna bùkah kâi ka ta, Kul chungah nghâk zing ka ta, Ka nuorna thuah iengtin am, A mi hung don nghâk ka ta, Ka donna ding ngaituong ka tih. 2 LALPAN hieng hin a hung don a: "Inlàrna thu hi lungah ziek la, Tlângsamin a tlànpui phaa, Fie kuoua hmu theiin ziek rawh. 3 Inlàrna hi tlung nghal naw nih. A tlung hunbi ding ruot a na, 4 "En ta, mi chapo inpam puom hi!A lungril nuom zawng a lûtinle; Mi fel ruok chu a ringnain hring a tih. a 5 Hausaknab hi hlèmhmang a na, Mi chapo khomin sawt a dai nawh. Thlàn angin a bàu a ka zing a, Thìna angin khop tik a nei nawh. Mi po po a lâk khawm a, Sal dingin a man khawm hlak. 6 Mi po poin ti-el le hmusitin, 'A thil inrùkhai bûm hnûr a, 7 I leibatnahai hung tuongin, Hung thîn thut an ti che a, Suklungzing an ti che a, An kuttum la tuor i tih. 8 Hnam tam tak i rok tah a, Mi thisen insuo i hmang a, Ram le khawpuihai i suosàm a, A sûnga chênghai i rawt leiin, A damhan soisa vèng an ti che. 9 "Hlèprûka sûngkuo indin a, Mi suol kut tuor pumpel tum a, Insawng bawla bu khuortu chu, A chung a va pik ngei dê! 10 Mi tam tak sietna dinga, Thil tha lo i phier lei khan, I insûng i sukmuolpho a, I nun i chàn pha bok a nih. 11 Lung banghai khêk suok an ta, Tlungpûmhan hril sawng an tih. 12 "Thisena khawpui indintu leTuolthata khuo suknghettu chu, A chung a va pik ngei dê! 13 Kàng hmang el ding in bawlin, Mihai chun sin an inrim a, Chuonga inrim thlawn dinga, A hnam pum inthawtirtu chu, Iengkim LALPA a ni naw maw? 14 Tuipui hi tuia a sip angin, LALPA ropuizie hrietna chun, Hnuoi hi la sip vong a tih. 15 "Mi saruokna hmu nuoma, Tuolbawmhai uoiin pe a, A bûra inthoka thlit a, An inrui chena hràitu chu, A chung a va pik ngei de! 16 Mi ngai ropui hlaw nêkin, Inzaknan la sip i tih. Tu'n i hun a tlung ve ta a, Dawn la, pai la, muolpho rawh. LALPA kuta a no chun, A hung hnai mèk ta che a, I ropuina chu muolphonan, La hung inkhum vong a tih. 17 Lebanon i suosàm angin, Suosàmin um vèng i ta, I sukboral sâhai ang khan, Sukthlabâr ni vêng i tih:Mihriem thisen insuo a, Ram le khawpui le a chênghai, An rênga i suksiet leiin. 18 "Milemin iem hlutna a nei?Mihriem siem fawm el a nih. Khêl zirtirtu milim khomin, Hlutna ieng am a nei a?A siemtuin ama siem fawm, Tong khom tong thei hlei lo thil, A ring chop mei mei a nih. 19 Thing kuomah, "Har rawh" ti a, Hringna nei lo lung kuomah, 'Tho rawh' tia betu chu, A chung a va pik de aw!Chu chun iem a kawkhmu ding?Rangkachak le tangkaruoa luon, Thuok nei lo a ni si a. 20 A tempul thienghlima chun, LALPA ruok chu a chêng a, A hmaah hnuoi pumpui hi, To thiepin um raw hai se. "

Habakkuk 3

1 Zawlnei Habakuk tongtaina, Sigionot thlùka rem ding. 2 LALPA, i ri ka lo hriet a, I thilthawhai chu maktiin, Râpum ka ti hlak, LALPA. Kan huna khom thaw nawk la, Kan hunah inhriettir nawk la, I lung a sen hlea chuI zangàina kha hre zing rawh. 3 Teman-a inthokin Pathien a hung, Paran tlàngpuia inthokin, Mi Thienghlim chu a hung ie. A ropuinan vàn a tuom a, A'n pâknain hnuoi a sip. 4 Ni suok angin a mawi ropui, A kutah ni zung a suok, A hràtna a thuprûknaa inthokin. 5 A hmaah hrilêng a fe a, A hnungah hripuiin a zui. 6 A ngîr pha hnuoi a'n hnìng a, A ngha pha hnamhai an inthin. Tlâng hlunhai an chim thla a, Muol hlunhai an koi dar a. A hràtnain chatuon a dai. 7 Kus-hai puon inah buoina ka hmuh, Midianhai chèngnaah lungngaina; Thlaphângin an inthin hawp a. 8 Aw LALPA, vadunghai chun, An suklungsen che am a ni?Tuipui le tuifinriethaiin, I lung an sukling am a ni?I sakor chungah chuong a, Hnèna tawlailira i chuong khan, Tuipui lakah i lung a sen maw? 9 I thalngul i hung phor a, Thal tam tak i'n lâktir a, Varuom ding hnuoi i kâp kak a. 10 Tlânghan hmuin an inkon a, Tuipui insokin an inrûm a, Insâng takah an invor dar. 11 I thal inlêng nuoi nuoi le, I fei tle zor zor an hmuin, Vàna ni le thla hai chu, Che châng loin an ngîr zing. 12 Lung chokin hnuoi i pal zût a, Lungsenin hnamhai i chîl a. 13 I mihai chu san suok dingin, I hriek nâlhai san suok dingin, Nangma i hung inthok suok a. Ram riloa an thuoitu chu, A lu ru i vuok koi a, Saruok kèlin i siem a. 14 Keini mi phîn dar dinga, Thlipui anga hung inthok, A mi huoisen hung tirhai, Mi rethei inbi khawmhai, Dol vong dinga inhrilhai chu, Nangman a fei zum hmangin, An luah i thil tlang a. 15 I sakorhan tuipui palin, Tui an chìl so but but a. 16 A ri hrein ka sûng an thin, Ka hmùr a'n lap dor dor a, Ka rùhai a moi zo a, Ka kè an thin hlop hlop a. Mi rûntu hnamhai chunga, Sietna a tlung ni ding chu, Nghâkhlâ takin thlîr ka tih. 17 Theichangin ra insuo loin, Grêp hruiin ra insuo loin, Oliv kùngin ra insuo loin, Loin bu thar insuo loin, Beram huonga inlawi um loin, Bawng inah ran um naw sien khom, 18 LALPA-a chun hlim pei ka ta, Mi sandamtu Pathiena chun, Ka lawm pei ding a ni si a. 19 Lalpa PATHIEN chu ka hràtna, Zukpui anga ka kè sukhrâttu, Hmun sânga mi'n tlattirtu a nih. (Hlapawl thuoitu ta dingin: tingtang hrui rimawi le rema sak ding)

Zephaniah 1

1 Juda lal Amon naupa Josia inlal laiin Hezekia naupa Amaria, chu naupa Gedalia, chu naupa Kusi le chu naupa Zefania kuomah LALPA thu chu a hung tlung a. 2 "Hnuoi chunga inthokin iengkim, Ka sukbohmang ding a nih"Ti hi LALPA thu suok a nih. 3 "Mihriem le sâhai sukbo ka ta, Chunglèng vatehai sukbo ka ta, Tuipuia ngâhai sukbo ka tih. Hnuoi chunga inthoka mihriem, Ka sukbohmang ni a tlung pha chun, Mi rilohai chan ve ding chu, Hmunhnok ringot chauh nîng a tih, "Ti hi LALPA thu suok a nih. 4 "Judahai chungah kut inlet ka ta, Jerusalema chênghai chunga khom. Hi hmuna Baal hnuhma la um po po, A rêngin sukbohmang ka ta, An milem biek dang po po khom, Thiempuhai chopin sukbo ka tih. 5 In chung sipzawla inthoka, Vàn lêngruol bea kûn hlakhai, LALPA betua inhril si a, Molek khom be hlak sihai chu, An rêngin sukbohmang ka tih. 6 LALPA zui loa nghatsantuhai, Zong lo le ngaiven bok lohai chu, An rêngin sukbohmang ka tih. 7 Chunghnungtak LALPA hmaah, To tok tokin um ro khai, LALPA ni chu a hnai ta si a. LALPAN inthawina a buotsai a, A fielhai a'n hlàn thienghlim tah. 8 LALPA inthawina nia chun, Hotuhai le lal nauhai bàkah, Ram dang thuoma incheihai chu, An rêngin hrem tawl ka tih. 9 Chu ni chun kot bul sir nuom lohai, aInpawngnêkna le inhlemnaa, An pathien Tempul suksiptuhai chu, An rêngin hrem tawl ka tih. 10 "Chu ni chun Nga Kotkhàrah, Tapin khêk rong rong an ta, Vêng tharah tap khêk an ta, Muol chim hum hum bok a tih, "Ti hi LALPA thu suok a nih. 11 Bazar vênga chênghai, tap ro, Dawrkaihai chu thi vong an ta, Tangkaruo zortuhai se vong an tih. 12 Chu pha chun khawnvar sitin, Jerusalem dap suok ka ta, 'LALPAN a sie a thain, Ieng mi law naw nih' tituhai, Uoiin penga a neng la um anga, Um mei meihai chu hrem ka tih. 13 An rosumhai rokpêk an ta, An inhai thiekpèk an tih. In bawl an ta, hluo naw ni hai, Grêp huonhai siem an ta chu, A uoiin dawn naw ni hai. 14 "LALPA ni ropui a hnâi ta a, A hnâi ta hle a, tlung vak a tih. Ngai ro! LALPA nia tap ri chu, Nasa takin inring a ta, Mi huoisenhai chen khêk an tih. 15 Chu ni chu lungsenna ni, Beidongna ni le lungzingna ni, Buoina ni le sietna ni, Inthim ni le khuo innìm ni, Sûm le thim sa mup in a bawm ni, 16 Khawpui kulhai bei ding leKhaw kil kulbinghai la dinga, Tawtawrawt mût ruoi ruoi a, Râl tawn dinga an inko ni a nih. 17 Mipui nasa takin beidong an ta, Mitdel angin inmai an ta, LALPA chunga an suol êm leiin. Vut angin an thisen pei an ta, An rìlhai chu hmunhnok angin. 18 LALPA lungsen nia chun, An tangkaruo le rangkachakin, Intlan suok thei naw ni hai. A thìkna lungsen chok chun, Ram pum la kâng hmang a ta, Hnuoia chênghai po po chu, La sukbohmang rup a tih. "

Zephaniah 2

1 Aw nangni hnam zakmawhai, Inko khawm ro, inko khawm ro, 2 A hun ruot a tlung hma hin, Busî anga len hmang in ni hma, LALPA lungsenna ni chu, In chungah a hung tlung hma, LALPA lunginling ni chu, In chunga a tlung hma hin. 3 A thupêk anga thaw hlaktu, A rama mi thuhnuoirolhai, LALPA chu zong hlak unla, Felna chu zong hlak unla, Thuhnuoirol takin um ro, LALPA lungsenna niah, Huma in um thei takduoiin. 4 Gaza chu ràusanin um a ta, Askelon chu sukramin um a tih. Asdod chu sùnah inruok an ta, Ekron chu phawi hmang an tih. 5 Tuipui kama chêng Keret mihai, In chung a va hang pik de aw!Filistin rama um aw Kananhai, Hluotu um loin sukram ka ti cheu"Tiin LALPA chun a hril. 6 Tuipui kam Kerethai chèngna chu, Berampuhai bûk khuorna leBeram huongah inchang a tih. 7 Juda sûngkuo hlaa la umhaiin, Chu hmun chu nei tâng an ta, Beram ruol intlattir an ta, Askelona in ràusanhai chu, Zànah rieknan hmang an ta, LALPA Pathienin enkol a ta, An saltàngna hmuna inthokinAnni tungding nawk a tih. 8 "Moab-hai deusawna ri ka hriet, Amon mihai ti-elna rihai khom; Ka mihai an deusaw a, An ram lâkpêk tumin an vauh. 9 Chuleiin Moab chu Sodom angin, Amon mihai chu Gomora angin, Zakthlài bil le chi khur umna hmun, Kumkhuo ràusan ram nîng a tih. Iengkim LALPA, Israel Pathienin, A hringna sâlin a puong:"Ka mi, hlaa umhai chun rok an ta, Ka hnam laia dam khawsuokhai chun, An ram chu neipêk an tih" tiin. 10 Chu chu an chapona rà nîng a tih, Iengkim LALPA mihai chu hmusita, Nuizatbûra an hmang leiin. 11 An pathienhai a sukboral pha chun, LALPA chu râpum la tîng an ta, Vakam ram tina chêng hnamhaiin, Mani hmun sengah chawibiek an tih. 12 "Nangni Ethiopia mihai khom, Ka kawlhnàma that nîng in tih"Tiin LALPA chun a hril. 13 A kut chu hmar tieng inlet a ta, Asuria chu suksieng a ta, Ninevi sukram dèr a ta, Thlalèr angin tawl hawp a tih. 14 Beram ruol le bawng ruolhai, A sûngah bok khawm an ta, Ramsa tinrêng riek khawm an tih. Thlalèr simbuk le chingpirinuhan, A ban sîpah bû sep an ta, Tukvera inthokin inhràm an ta; Kot bul chu hmunhnokin sip a ta, A sidar tlungpum khom dawk a tih. 15 Hi hi khawpui, poisak nei lo, Muong taka um hlak kha a nih. "Mi sîng zo tu khom an um nawh"A ti lungril hlak si a. A va hang tlu ram nasa ngei de!Ramsahan rieknan an hmang a, A fe pèl taphot hlak chun diriemin, An kut thinin an inchek khum.

Zephaniah 3

1 Inpawngnêkna khawpui, Hel hmang le tirdakum chu, A chung a va hang pik de! 2 Tu thû khom a ngai naw a, Tu zil khom a poisa nawh. LALPA a ring nuom naw a, Pathien a hnaih nuom bok nawh. 3 A sûnga a milienhai chu, Sakeibaknei inrûm ang an na, A sûnga rorêltuhai khom, Zàn tieng satenè ang an na, A tûka ding hlà an nei nawh. 4 A zawlneihai an chapo a, Dawhaa mi hlèm an hmang a, A thiempuhan tempul sukporchèin, Nuom nuomin Dàn an suosàm hlak. 5 A sûnga um LALPA chu a fel a, Thil indik lo a thaw ngai nawh. Tûk tin fel takin ro a rèl a, Ni tin thul tik a nei ngai nawh. Sienkhom mi fel lohai ruok chun, Inzak nachang an hriet nawh. 6 "Hnamhai chu ka nuoi bo a, An kulpuihai ka sukchim a, Tu khom hraw thei naw dingin, An kotthlèrhai ka sukram a. Tu khom chèng nawna dingin, An khawpuihai ka suksiet vong. 7 Khawpui kuoma chun keiman, 'Nangin mi hang ti phot la, Ka zilna che hi poisa la, Chuongchun i chèngnaa inthokin, Nuoi bo ni naw ti ni a, Ka hremnahai po po khom, I chungah tlung naw nih' ka ta; Sienkhom thil dik lo thaw chu, An inhawk lem tlat pei si! 8 Chuleiin, hrepuitua keiKa ngìr ni chen mi nghâk ro. Hnamhai la ko khawm ka ta, Lalramhai kei khawm ka taAn laka ka lungsenna, Ka lung inlingna po pohai, An chungah bun thlâng ka ta, Ka thìkna lungsen chok chun, A ram pum kâng hmang a tih"Ti hi LALPA thusuok a nih. 9 "Chu pha chun mipuihaiin, LALPA hming thienghlim lam a, A rong an bawl theina di'nHmùr thienghlim inputtir ka tih. 10 Mi chawibiektu, ka mihai, Nile vadung khêla umhai khomin, Thilpêk hung inhlàn an tih. 11 Chu ni chun ka chunga poiIn tawkna po pohai lei khan, In hmài mawk ta naw ni a; Hi khawpuia inthok hin, Mi chapohai po po chu, Lo hnot suok vong tàng ka ta, Ka tlâng thienghlimah tu khom, Mi uongthuong um ta naw nih. 12 Mi zàidam le inngàitlawmhai, LALPA hming ringtuhai chu, I sûnga chun màksan ka tih. 13 Hlaa um sun Israelhai chun, Poi tawk ta ngai naw ni hai a, Khêl hril ta naw ni hai a, An bàuah khêl suok naw nih. Fain zâl hadam an ta, Tu khomin sukti ta naw nih. " 14 Aw Zion naunu, zâi hlâ rem rawh, Aw Israel, inring takin sak rawh!Aw Jerusalem naunu, Lungril po poa hlimin lawm rawh! 15 LALPAN i hremna a lâk kieng a, I hmêlma a hnot kìr tah. LALPA ngei, Israel Lal chu, Nangma kuomah a um a, Suknata um hrim hrim khom, Inlâu ta ngai nawng i tih. 16 Chu ni chun Jerusalem kuomah, "Ti naw rawh, aw Zion, I bân khai thlep el naw rawh. 17 LALPA i Pathienin a umpui che. Ropui taka sandamtu a nih. Nasa takin lawm a ti che a, A hmangainan inawi tleiin, Hlim takin hlain awi a ti che. 18 Kût huna in beidongnahai, La kiengpêk dai ka ti cheu:In ta dinga phurrik inzakum a nih. 19 A nêksawrtu cheu taphot chu, Chu pha chun keiman bei ka tih. Kebaihai san suok ka ta, Tlân darhai ko khawm ka ta, An muolphona ram po poah, Mi inpâk le inza-ah siem ka tih. 20 Chu huna chun thuoi khawmin, In tieng thuoi kîr ka ti cheu. In saltàngnaa inthoka, In mithmua ngei tungding a, Ka thuoi kìr nawk cheu pha chun, Hnuoi chunga mi po pohai lai, Chawimawina le inpâknahaiInkhumtir ka ti cheu, " LALPAN a tih.

Haggai 1

1 Lal Daria inlala inthoka kum hnìna, thla rukna ni khat nia chun zawlnei Hagai hmangin LALPA thu chu Judai ram optu, Sealtiel naupa Zerubabel kuoma le thiempu laltak Jehozadak naupa Josua kuomah a hung tlung a. 2 Iengkim LALPA chun hieng hin a tih: "Hieng mihai hin, 'LALPA in bawl that hun ding chu a la tlung nawh' tiin an hril a nih" tiin. 3 Chu phing leh, zawlnei Hagai hmangin LALPA thu chu a hung tlung a: 4 "LALPA in a tlu sop zing laia nangni in inhoi taka in chèng bîk hi thil indik am a ni?" tiin. 5 Iengkim LALPA chun hieng hin a tih: "In um dànhai hi ngun takin sût ro. 6 In chîng teu a, tlawmte in sìk a. In fàk a, in tlai si naw a. In dawn a, in khop si nawh. Thuom in hàk a, in lum si nawh. In sum hlaw suokhai hlak chu mansa popa thlàk ang chauh a nih. " 7 Iengkim LALPA chun hieng hin a tih: "In um dànhai hi ngun takin sût ro. 8 Tlângah hang fe unla, thing hang put unla, ka in ding bawl ro; chu chun lawm ka ta, chawimawiin um ka tih. 9 Hmù teuh in inbeisei a, tlawmte chauh in chang a, ina in hung hawn sunhai hlak chu ka lo mùt hmang a. Chu chu ieng lei am a na?" ti hi Iengkim LALPA thu suok a nih. "Chu chu ka in in ngaisak naw lei a nih; mi tin mani in bawlah in buoi seng a, ka in hlak a tlu sop zing si. 10 Chuleiin, nangni leiin vànin daidaw a'n tlâktir naw a, hnuoiin rà a'n suotir bok nawh. 11 Lo chunga hai, tlâng chunga hai, bu le bâl chunga hai, uoiin thar chunga hai, hriek chunga hai, hnuoiin rà a'n suona po po chunga hai, mihriem le ran chunga hai le kuta in lam suok thil po po chunga hai khuo ka'n thàltir a nih" tiin. 12 Sealtiel naupa Zerubabel le Jehozadak naupa thiempu laltak Josua le Israel mi hlaa la um sunhai po po chun LALPA an Pathien rawl le LALPA an Pathien hung tir zawlnei Hagai thu chu an zawm a; mipuihai chun LALPA an ti a. 13 LALPA tirko Hagai chun mipui kuomah, "Ka umpui zing cheu a nih" ti hi LALPA thu suok a nih tiin LALPA thu chu a puong a. 14 Sealtiel naupa, Judai ram optu Zerubabel lungril le Jehozadak naupa, thiempu laltak Josua lungril le hlaa la um po pohai lungril chu LALPAN a chok tho a. Chuongchun an fe a, Iengkim LALPA, an Pathien in chu bawl tan dingin an inthok suok a. 15 Chu chu lal Daria inlala inthoka kum hnìna, thlarukna le ni sawmhnìnab a nih.

Haggai 2

1 Daria inlala inthoka kum hnina, thla sarina le ni sawmhni pakhatnac chun LALPA thu chu Hagai kuomah a hung tlung a: 2 "Sealtiel naupa, Judai ram optu Zerubabel kuoma le Jehozadak naupa Josua, thiempu laltak kuoma le hlaa la um sunhai kuoma chun hieng hin thu indon tawl rawh: 3 'Nangni lai hin khá hmaa hi tempul ropui a ngìr lai kha a hmu phâk in um am? Tu hin ieng angin am in hmu a? Nêp in ti ta hlè naw maw? 4 Sienkhom aw nang Zerubabel, hrât takin um rawh' ti hi LALPA thu suok a nih. 'Aw nang Josua, Jehozadak naupa, thiempu laltak, hrât takin um rawh. Aw a ram mihai, hrât takin um unla, sin thaw ro. Ka umpui zing cheu a nih' ti hi Iengkim LALPA thu suok a nih. 5 "Aigupta rama inthoka in hung suok laia in kuoma thu ka thlung ang khan, ka Thlarau in kuomah a chêng zing a, zâm hrim hrim naw ro. ". 6 Iengkim LALPA chun hieng hin a tih: "Hun sawt nawteah voi khat chu hnuoi le vàn le khawmuol le tuifinriet hai hi la sawi hnìng nawk ka tih. 7 Hnam po po sawi hnìng ka ta, hnamhai rosum hlú hlùhai chu hung lâng an ta, hi in hi ka ropuinain insiptir ka tih" ti hi Iengkim LALPA thu suok a nih. 8 "Tangkaruo ka tá a na, rangkachak khom ka tá a nih" ti hi Iengkim LALPA thu suok a nih. 9 "Tuta hi in ropuina hi a hmasa nêk khan nasa lem a tih" ti hi Iengkim LALPA thu suok a nih. "Hi hmuna hin inremna pêng ka tih" ti hi Iengkim LALPA thu suok a nih. 10 Lal Daria inlala inthoka kum hnìna, thla kuona le ni sawmhni pakhatnad chun zawlnei Hagai kuomah LALPA thu a hung tlung a. 11 Iengkim LALPA chun hieng hin a tih: "Dànin iengtin am a hril ti thiempuhai indon rawh: 12 Miin a korfuol hmorah sa inhlàn thienghlim fûn sien, a korfuol hmor chun bei amanih, hmepok amanih, uoiin amanih, hriek amanih le fâk thei thil hrim hrim tawk sien, a tawk taphot chu a thienghlim ve el am a ni?" tiin. Thiempuhai chun, "Thienghlim naw nih" an ta. 13 Hagai chun, "An leh, mithi ruong a tawk leia inthieng lo miin chuong thilhai chu a ieng khom tawk sien, a tawk taphot chu a porchè el a ni?" a ta. Thiempuhai chun "Ni e, a sukporchê vong a nih" an ta. 14 Hagai chun, "LALPA chun hieng hin a tih: 'Chuong ang bok chun hi mihai chunga hin a ni ve. Ka mita chu hi hnamhai thilthaw le thil inhlàn hrim hrim hi thil porchê vong a nih. 15 Chuleiin, voisuna inthokin LALPA tempula lung an remhai insersuon pei dàn dâm hi fimkhur takin ngaituo ta ro. 16 Lung sawmhni an bùmna hmuna lung chu sawm chauh a lo tling a. Uoiin bûr sawmnga thâl bit dinga fe chun bûr sawmhni chauh thàl ding a hmu a. 17 In kutsuok thil po po chu tlolna hri, inngèna hri le rielin ka suksiet a, chuong sà khom chun ka kuom tieng in hung ngha nuom chuong nawh' ti hi LALPA thu suok a nih. 18 LALPA tempul lungphûm in rem tan nia inthoka voisun, thla kuona ni sawmhni palinaa in bawl zo ni chena thil um dànhai kha ngun takin ngaituo ro. 19 In bu ina hai bu chî ding a la um am a ni? Tu chen hin grêp hrui dâm, theichang kung dâm, theibufai kung dâm le oliv kung dâm a rà a la um dèr nawh. Voisuna inthok ruok hin chu mal ka sawm ta ding cheu a nih" tiin. 20 Chu thla, ni sawmhni palinae chun LALPA thu chu Hagai kuomah a hung tlung nawk a. 21 "Judai ram optu Zerubabel kuomah, hnuoi le vàn ka sukhnìng ding thu chu hril rawh. 22 Lalhai pei thlâng ka ta, ram danghai hràtna chu phìn dar ka tih. Sakor tawlailir le a khaltuhai chu suksieng ka ta, sakor le a chunga chuonghai chu tlûng an ta, anni kawlhnâmin insun hlum an tih. 23 Chu ni chun aw nang ka siehlaw Zerubabel, Sealtiel naupa, chel tlat ka ti che a, ka suoi namna kutsebi angah siem ka ti che, nang hi ka thlang ta si che a" ti hi Iengkim LALPA thu suok chu a nih.

Zechariah 1

1 Lal Daria inlala inthoka kum hnina, a thla rietna, favàng laihawl lai chun Ido naupa Berekia, chu naupa Zekaria kuomah LALPA thu a hung tlung a: 2 "In thlatuhai chunga khan LALPA lung a awi naw hle a. 3 Chuleiin, hi mihai kuomah hieng hin va hril rawh: Iengkim LALPA chun hieng hin a tih: 'Ka kuom tieng hung ngha nawk unla, kei khom in kuom tieng hung nghàng ka tih. 4 In thlatuhai ang khan um ve naw ro. Iengkim LALPA chun a zawlnei hmasahai hmangin an kuomah, 'In um dàn suolhai nghatsan unla, in thil chìng tha nawhai bànsan ro' tiin a hril a, sienkhom an bengkhon naw a, an uksak bok nawh, ti hi LALPA thu suok a nih. 5 In thlatuhai kha khaw lai am an um zo ta a? An zawlneihai khom kha, kumkhuoin an dam a ni? 6 Ka siehlaw zawlneihai kuoma thucha le thuruot ka pèkhai khan in thlatuhai chu a nangchìng tawl an naw maw? Chu zoah an sim a, 'Iengkim LALPA chun thaw a tum ang hrimin, ei um dàn le ei thilthaw ang peiin ei chungah a thaw a nih' an ti a ni kha" tiin. 7 Daria inlala inthoka kum hnina, thla sawmpakhatna, ni sawmhni palina, Sebat thlaab chun Ido naupa Berekia, chu naupa Zekaria kuomah LALPA thu a hung tlung a. 8 Zàna chun inlàrna ka hmu a. Ka hmaa chun mi pakhat, sakor sen chunga chuong a lo um a, ruoma inhmui thing buk lai chun a ngîr a. A hnung tieng chun sakor sen dàm, a sen-uk dàm le a vâr dàm an um a. 9 Kei chun, "Ka lalpa, hieng hi ieng tìna am an na?" tiin ka'n don a. A mi betu vàntirko chun, "Ieng am an nih ti inentir ka ti che" a ta. 10 Chu phing leh inhmûi buk hnuoia ngîr chun, "Hienghai hi hnuoi pumpui fang suok dinga LALPA mi tirhai chu an nih" tiin a mi hril a. 11 Anni chun inhmûi buk hnuoia ngîr vàntirko kuoma chun, "Khawvel kan fang suok ta a, hnuoi pumpui chu muong tak le inrem taka umin kan hmuh" tiin an hril a. 12 Chu phing leh vàntirko chun, "Iengkim LALPA, Jerusalem le Judai rama khuohai chungah kum sawmsari zet i lung a sen ta a, ieng chen am i zàngaina kut i la kei tìm ding a na?" a ta. 13 Mi betu vàntirko kha LALPAN zâidam tak le thlamuongum takin a don a. 14 Mi betu vàntirko chun ka kuomah, "Hi thu hi puong rawh: Iengkim LALPA chun hieng hin a tih: 'Jerusalem le Zion laka hin ka thîkthu a se takzet a nih. 15 Ka mihai chunga ka lungsen met sûngin hnam dang haiin an lo intuortir hrep el a, chuong hnamhai, him taka inngaihai chunga chun ka lung a sen hlê a nih. 16 Chuleiin, zàngaina leh Jerusalem tieng kîr nawk ka ta, chutaka chun ka in chu indin thar nawk nîng a ta, ka'n khìna hrui chu Jerusalem chungah kei zam nawk tàng ka tih'c ti hi Iengkim LALPA thu suok a nih. 17 "Hi khom hi puong sa bok rawh: Iengkim LALPA chun hieng hin a tih: "Ka khawpuihai chu hmûingìlin hung vul nawk an ta, LALPAN Zion tlàng chu thlamuong takin inumtir nawk a ta, Jerusalem chu thlang nawk a tih" tiin. 18 Chun, ka hang en a, ka hmaa chun ki pali ka hmu a. 19 Mi betu vàntirko kuoma chun, "Hienghai hi iem an na?" ka ta. Ama chun, "Hieng kihai hi Juda mihai, Israel mihai le Jerusalem mihai phìn dartu dinghai chu an nih" a ta. 20 Chu zoah LALPAN thîrsu pali a mi'n hmutir a. 21 Kei chun, "Hienghai hi ieng thaw dinga hung am an na?" ka ta. Ama chun, "Hieng kîhai hi Judahai phìn dartu an nia chu tu khom a khing ngam an um naw leiin hieng thîrsuhai hi a hawl zâmtu ding le Judai ram hung bei a, a mi chênghai phìn dar dinga lu hung lei hnam taphothai ki chu vaw tlam dinga hung an ni hih" a ta.

Zechariah 2

1 Ka hang en a, ka hmaa chun mi pakhat, a kuta inkhìna hrui chawi hi ka hmu a. 2 "Khaw laia fe ding am i na?" tiin ka'n don a. Ama chun, "Jerusalem dung le khang lienzie hriet tuma inkhì dinga hung ka nih" a ta. 3 Chuongchun, mi betu vàntirko chu a fe a, ama hmu dingin vàntirko dang a hung a. 4 Ama chun a kuomah, "Tlân la, saw tlangvàl kuoma son, 'Jerusalem hi mi tam tak le ran ruol tam tak chêngna ding a ni leiin huondai nei lo khawpui nîng a tih. 5 Keima ngei hin mei bangin inhuon ka ta, a sûnga a ropuina chu keima hi nîng ka tih, LALPA chun a tih' tiin hril rawh" a ta. 6 LALPA chun, "Kawl kil lia thli kuo chen dâpin ka sukdar tah cheua chu tu hin hung suok ta ro, hung suok ta ro, hmar rama inthokin tlân suok ro! 7 Aw Zion nauhai, suok ro! Babulon naunu kuoma chênghai, inrel suok ro" tiin a mihai chu a hril a. 8 A mi chawimawi hnung le nangni roktu hnamhai lai a mi tir hnung hin, Iengkim LALPA chun anni chungthu chu hieng hin a tih: 'Nangni dotu taphot chun ka mit naulèng an tawk ang a nih. 9 Chuonghai chunga chun kut inlet ka ta, hmet nawi ka ta, anni salhai ngèiin rok lêt ve thung an tih. Chu pha chun Iengkim LALPA chun a mi tir a nih ti hung hre tâng in tih. 10 "Aw Zion naunu, hlimin khêk rawh. Ngai ta, ka hung mêk a, i kuomah ka chêng ding a nih" ti hi LALPA thu suok a nih. 11 Chu huna chun hnam tam takin LALPA hung zui vèng an ta, a mihai ni tâng an ta, anni lai chêng a ta, chu pha chun Iengkim LALPA chun in kuomah a mi tir a nih ti hung hre tâng in tih. 12 Judai ram chu ram thienghlima LALPA rochung ram hung nîng a ta, Jerusalem chu a khawpui dittak hung ni nawk tâng a tih. 13 ​LALPA hmaa chun mi tin to thiep ro, a hmun thienghlima inthokin ama thu ngèiin a hung inthok suok ta si a

Zechariah 3

1 LALPA vàntirko hmaa thiempu laltak Josua ngîr le chang tienga ama khingtu Setan ngîr lai chu LALPAN a mi'n hmutir bok a. 2 LALPA chun Setan kuomah, "Setan, LALPA chun a kawk che! Jerusalem thlangtu LALPA chun a hal che! Hi mi hi meia inthoka thingthu hring kei dok ang chauh a ni naw am a ni?" a ta. 3 Josua chu thuomhnaw top tak leh vàntirko hmaa chun a ngîr a. 4 Vàntirko chun a bula ngîrhai kuomah, "A thuomhnaw bal kha hlîppèk ro" a ta. Chun, Josua kuoma chun, "En rawh, i suolna ka lâk hmangpèk ta che a, thuomhnaw tha takin ka'n thuomtir ta ding chè a nih" a ta. 5 Kei chun, "Lukawm fai inkawmtir ro" ka ta. LALPA vàntirko ngîr zing chun lukawm thar a hung inkawmtir a, silfèn fai an inhâktir bok a. 6 LALPA vàntirko chun Josua kuomah mawphurna pein, 7 "Hi hi Iengkim LALPA hril chu a nih: 'Ka lampui i hraw a, ka ti ang peia i thaw chun ka insûng rêlbawltu nîng i ta, ka rorêlna hmun enkol i ta, hi taka ngîrhai lai hin ngirhmun chang vèng i tih. 8 "Aw Josua, thiempu laltak, nang le i hmaa thunghai khom khan, thil tlung ding inentir lawknahai hi lo ngaithla ro: ka siehlaw, Kâu chu ka hung insuo ding a nih. 9 En ta, Josua hmaa lung ka phun saw! Saw lunga son mit pasari a um a, a chungah thil inkertir ka ta, hi rama suolna hi ni khat thilthuin la hmang vong ka tih" ti hi Iengkim LALPA thu suok a nih. 10 Chu nia chun mi tinin mani grêp buk hnuoi le theichang buk hnuoia inthung tlâng dingin an tuolbawmhai seng fiel tâng an tih' ti hi Iengkim LALPA thu suok a nih" tiin.

Zechariah 4

1 Mi betu vàntirko kha a hung nawk a, mi in lai not har ang elin a mi hung kei har a. 2 " Iem i hmu a?" a ta. Kei chun, "Rangkachak sakhata siem khawnvar siena, thuom sari nei, a fong tin sîpa hriek bawm le khawnvar phita nei ka hmu a 3 . Khawnvar siena sîrah oliv kung pahnih a um a, a chang tieng pakhat, a voi tieng pakhat" tiin ka don a. 4 Mi betu vàntirko kuoma chun, "Pu, hieng hi ieng am a ni leh?" ka ta. 5 Ama chun, "Hieng hi iem a nih ti i hriet nawa maw?" a ta. Kei chun, "Pu ka hriet nawh" ka ta. 6 Chu phing leh ama chun, "Hi hi Zerubabel kuoma LALPA thu chu a nih: 'I hràtna ni loin, i thilthawtheina ni bok loin, ka Thlarau lei lemin thaw nîng a tih' ti hi Iengkim LALPA thu suok a nih. 7 Aw nang dâltu tlâng lien, ieng am i ni hrim leh? Zerubabel chun rawt zawl a ti che a, tempul bawl zoa a lung rem nuhnung tak an pha hunah, mipuiin, 'A va mawi ngei de! A va mawi ngei de!' tiin khêk dur dur an tih. 8 LALPA thu chu ka kuomah a hung tlung a, 9 "Zerubabel chun hi tempul lungphûm hi a kut ngeiin a lo phûm tah a, ama kut ngeiin bawl zo a tih. Chu pha chun Iengkim LALPA chun nangni kuoma hin a mi tir a nih ti hung hre tâng in tih. 10 Thaw kuok in la nei naw lai khan an hmusit hlak cheu an naw? Mihaiin Zerubabel kuta inkhìna dar mûm a chawi an hmu pha ruok chu nasa takin hlim an tih. Chun, hieng khawnvar pasarihai hi LALPA mit aiawa ngîr an na, hnuoi pumpui hi an hmu vong a nih" a ta. 11 Chun, vàntirko kuoma chun, "Khawnvar siena sîr ve vea oliv kunghai hi teh, iem a na a umzie? 12 Rangkachaka siem, hriek thlit suokna khei pahnihai bâkah oliv kàu pahnihai umzie khom hi teh?" tiin ka'n don a. 13 Ama chun, "Hieng hi i hriet nawa maw?" a ta, kei chun, "Pu, ka hriet nawh" ka ta. 14 Ama chun, "Hieng hi mi pahnih, hnuoi pumpuia LALPA rong bawl dinga hriek nàlhai chu an nih" a ta.

Zechariah 5

1 Ka hang ngha nawk a, ka hmaa chun lekhabu ziel vuong duoi duoi hi ka hmu a. 2 Ama chun, "Iem i hmu a?" a ta, kei chun, "Lekhabu ziel vuong duoi duoi lai ka hmu a, a dung meter kuo le a khang meter li le a chenve vel a nih" tiin ka don a. 3 Ama chun, "Hi hi a ram pum chunga tongsie thon suok mêk chu a nih. A phêk hma tienga inziek angin rûkru taphot chu a rama inthoka hnot suok nîng an ta, a phêk hnung tienga inziek angin khêla inkhâm taphot chu a rama inthoka hnot suok ni bok an tih. 4 Tongsie chu infesuoktir ka ta, rûkruhai ina le khêla ka hminga inkhâm taphot inah lût a ta, an in sûngah um zing a ta, ina lung le thinghai chu sukse vong a tih' ti hi Iengkim LALPA thu suok a nih" tiin. 5 Mi betu vàntirko khan a mi hung pan a, ka kuomah, "Hang ngha la, thil hung inlang ding chu en rawh" a ta. 6 Kei chun, "Ieng thil am a na?" ka ta, ama chun, "Inkhìna bawm fe suok tah kha a na, a ram pum rîtlona chu a nih" a ta. 7 Chu bawm sìn, suona siem chu a hong a, bawm sûnga chun nuhmei pakhat a thung a. 8 Ama chun, "Hi hi Suolbûr chu a nih" a ta, nuhmei chu bawma chun a nam lût nawk a, suon sìn chun a sìn khum a. 9 Chun, ka hang en nawk a, nuhmei pahni ka hmu a, an thla vê vea chun thlî an pài a, an thla chu kànghlâi thla ang a na, bawm chu vàn le hnuoi inkàrah an vuongpui a. 10 Mi betu vàntirko kuoma chun, "Bawm hi khaw tieng am an fepui ding a na?" tiin ka'n don a. 11 Ama chun, "A in ding an bawl tumna Babulon ram Sinar phai tieng fepui an ta, a in ding an bawl zo pha leh chu taka chun ama hmunah sieng an tih" a ta.

Zechariah 6

1 Ka hang en nawk a, ka hma tieng chun tlâng pahni inkâra sakor tawlailir pali hung suok lai hi ka hmu a, tlânghai chu dâr vong a nih. 2 Tawlailir pakhatnaa sakorhai chu a sen, pahninaa hai chu a dum, 3 pathumnaa hai chu a vâr, palinaa hai chu a râng an na, an rêngin sakor hràt chî vong an nih. 4 Mi betu vàntirko kuoma chun, "Pu, hienghai hi ieng am an na?" tiin ka'n don a. 5 Vàntirko chun, "Hienghai hi vàn thli pali, hnuoi pumpuia Lalpa hmaa ngîr le chu taka inthoka fe suok hlakhai chu an nih. 6 Sakor senhai chu sak tienga fe ding an na, a dumhai chu hmar tieng, a vârhai chu thlang tieng, a rânghai chu sim tieng" a ta. 7 Sakor hràthai chu an hung inper suok tek tek a, khawvel pumpui hrùt suok châkin an thà a'n za zok zok a. Ama chun, "Fe unla, khawvel fang suok ro" a ta, chuong ang chun an fang suok a. 8 Chun, ama chun a mi hung ko khêk a, "En ta, hmar tienga fehai khan hmar tieng rama chuh ka Thlarau an sukhadam a nih" a ta. 9 LALPA thu chu ka kuomah a hung tlung a: 10 "Babulona saltànghai thilpèk, Heldai le Tobija le Jedaia hai hung chawi tangkaruo le rangkachak hai chu la khawm la, chu ni lá là chun Zefania naupa Josia kuomah fepui rawh. 11 Tangkaruo le rangkachak chun lallukhum siem la, chu chu thiempu laltak, Jehozadak naupa Josua chu inkhumtir rawh. 12 Chun, a kuomah hieng hin hril rawh: Iengkim LALPA chun hieng hin a tih: 'Hi mi hi a nih a hming Kâu chuh; a hmuna inthokin hung inkàu dar a ta, LALPA tempul bawl a tih. 13 Ama ngei hi a nih LALPA tempul bawltu ding chu; ropui takin inthuom a ta, a lalthungphaa thungin ro rêl a tih. A chang tieng chun thiempu inthung a ta, inrem takin um an tih. 14 Chun, lallukhum chu Heldai hai, Tobija hai, Jedaia hai le Zefania naupa Hen (Helem) hai kuomah LALPA tempula hriet zingna dingin pêng an tih. 15 Hla taka mihai khom LALPA tempul bawla thang dingin hung an ta, chu pha chun nangni lai hin Iengkim LALPA chun a mi tir a nih ti hung hre tâng in tih. LALPA in Pathien thu chu taima taka in zawm phot chun hieng thu hi la hung tlung ngei a tih' a tih tiin hril rawh" a ta.

Zechariah 7

1 Lal Daria inlala inthoka kum lina, thla kuona, Kislev thla, ni linad chun LALPA thu chu Zekaria kuomah a hung tlung a. 2 Bethel mihai chun LALPA ditsakna ngèn dingin Sarezer le Regem Melek hai chu an mihai leh an hung tir a. 3 Iengkim LALPA tempula thiempuhai le zawlneihai kuoma chun, "Kum tam tak kan lo thaw ta hlak angin Jerusalem Tempul siet sûnnain a thla nganaah bu kan la nghei zom pei ding am a ni?" tiin an hung indon a. 4 Iengkim LALPA thu chu ka kuomah a hung tlung a: 5 "A rama mi po po le thiempuhai kuomah hieng hin indon rawh: Kum sawmsari sûng a thla ngana le thla sarinaa bu ngheia in sûn lai khan, ka ta dinga bu nghei in ni chie maw? 6 Faa in dawn chàng khomin, nangni ta dinga fa le dawn in ni naw maw? 7 Muong tak le hmûingîl taka Jerusalem le a sè vèla khuohai le sim tieng ram le thlang tieng phai thut puollawi in hluo lai khan hieng thuhai hi zawlnei hmasahai hmangin LALPAN a lo hril dai ta cheu an naw maw?" tiin. 8 LALPA thu chu Zekaria kuomah a hung tlung nawk a: 9 "Hi hi LALPA hril chu a nih: 'Indik takin ro rêl unla, zàngaina inhmutirin, inlunginsiet tuo ro. 10 Hmeithaihai, fahrahai, ram dang mihai le pasiehai nêksawr naw ro. Mi dang ta dinga tha lo hrim hrim lungrilin ngaituo ngai naw ro" tiin. 11 " 'Sienkhom an ngaithlàk nuom naw a, lulul takin tukhnungkhur an mi'n nghat a, an nà an suksèt a. 12 An lungril chu lungthìr angin an sukchang a, dàn thuhai le Iengkim LALPA thlarauin a zawlneihai hmanga thu a hung inpuongtirhai chu an ngaithlàk nuom nawh. Chuleiin, Iengkim LALPA chu an chungah nasa takin a lungsen a nih. 13 " 'Ka koin an mi ngaithlàk naw a, chuleiin an mi ko pha ngaithla naw ning' ti hi Iengkim LALPA thu suok a nih. 14 'An hmèl hriet lo hnam tin lai thawngaleivirin inlâk hmangtir tawl ka ta, tu khom lûta an suok naw khop hielin an ram chu sukrieu ka ta, chuong ang chun an ram inhoi tak chu ràusan ramah inchangtir ka tih' tiin" a ta.

Zechariah 8

1 Iengkim LALPA thu chu ka kuomah a hung tlung nawk a. 2 Iengkim LALPA chun hieng hin a tih: 'Zion lakah ka thîkthu nasa takin a sie a, lung sahâl khopin ka thîk a nih' tiin. 3 LALPA chun hieng hin a tih: "Zion-ah kîr nawk ka ta, Jerusalemah chêng ka tih. Chu pha chun Jerusalem chu Thudik Khawpui ti ni tâng a ta, Iengkim LALPA tlàng chu Tlâng Thienghlim ti ni bok a tih. " 4 Iengkim LALPA chun hieng hin a tih: "Jerusalem kotthlèra hai chun tar kûna dam nuhmei pasal, an kum tam tàk leia hmol thuna lêng le inthung hung um nawk tâng an tih. 5 ​Khawpui kotthlèra hai chun tlanglakte ruol inhnelin infiem nuoi nuoi nawk ta bok an tih. " 6 Iengkim LALPA chun hieng hin a tih: "Chu huna chun hieng hlaa la um sunhai ta ding chun mak hlê angin inlang a ta, sienkhom ka ta dingin a mak ve ding maw?" ti hi Iengkim LALPA thu suok chu a nih. 7 Iengkim LALPA chun hieng hin a tih: "Sak ram le thlang rama ka mihai chu san suok ka tih. 8 Jerusalemah thuoi kîr nawk tawl ka ta, ka mihai nîng an ta, kei an Pathien nîng ka ta, an chungah ringumin fel ka tih" tiin. 9 Iengkim LALPA chun hieng hin a tih: "Nangni, Iengkim LALPA tempul lungphùm an phùm nia zawlnei bàua inthoka hieng thuhai lo hretuhai, tempul chu in bawl theina dingin in kut sukhrâtin um raw se. 10 Khâ hmâ khan mihriem le ran ta dingin inhlawna a um ngai naw a, hmêlma leiin tu khomin muong takin sum an lam thei nawh, mi tin chu a tuolbawm leh ka'n dotir si a. 11 Tu ruok hin chu hlaa la umhai hi khâ hmaa ka thaw ang khan thaw ta naw ningah" ti hi Iengkim LALPA thu suok a nih. 12 "Muong takin thlai chî thlâk in ta, grêp hruihai chun ra insuong an ta, hnuoiin bu le bâl tharsuok a ta, vànin daidaw intlâktir a tih. Chuonghai chu hlaa la um sun mipuihai ta dingin rochanah pêng ka tih. 13 Aw Juda sûngkuo le Israel sûngkuohai, hnam danghai tongsie phurtu lo ni hlak inla khom san suok ka ti cheu a, malsawmna hung ni lem tâng in tih. Ti naw unla, in kut sukhrâtin um raw se. " 14 Iengkim LALPA chun hieng hin a tih: "In thlatuhaiin an mi suklungsen leia lainatna thang loa in chunga sietna intlungtir dinga ka tî tlat ang khan, 15 tu ruok hin chu a letlingin Jerusalem le Juda sûngkuo chungah thil tha thaw ka tum tlat tah thung a nih. Chuleiin, ti naw ro. 16 Hieng hi in thaw ding chu a nih: Mi tinin mani tuolbawm seng kuomah thudik tak hril unla, ro indik tak le inlai takin rêl unla, 17 in tuolbawmhai sietna ding phierrûk naw unla, thu khêla inkhàm chîng naw ro. Hieng thil hi ka theida a nih" ti hi Iengkim LALPA thu suok a nih. 18 Chun, Iengkim LALPA thu chu ka kuomah a hung tlung nawk a. 19 Iengkim LALPA chun hieng hin a tih: "Thla linaa in bu nghei le thla nganaa in bu nghei le thla sarinaa in bu nghei le thla sawmnaa in bu nghei hlakhai chu Juda sûngkuo ta dinga hlimna le lawmna hun, kût hlimumah inchang tàng a tih. Chuleiin, thudik le inremna chu zong ro" tiin . 20 Iengkim LALPA chun hieng hin a tih: "Hnam tam tak le khawpuia chêng mi tam tak an la hung ding a nih. 21 Khawpui pakhata chênghai chu khawpui dangah fèng an ta, 'Thaw ro, Iengkim LALPA ditsakna chu ngèna dawvan kai dingin fe nghâl ei tiu. Keini khom kan fe ve ding a nih' tiin infiel tuong an tih. 22 Mi tam tak le hnam ropui tak takhai chu Iengkim LALPA zong ding le a hmaa dawvan kai dingin Jerusalemah hung an tih" tiin. 23 Iengkim LALPA chun hieng hin a tih: "Chu huna chun hnam hrang le tong hrang hrang hmang mi sawmin Juda mi pakhat kor fuolah chelin intûl tlat an ta, 'I kuomah Pathien a um ti kan hriet leiin i ruolin kan hung ve ding a nih' la tîng an tih" tiin.

Zechariah 9

1 Hadrak ram lakah LALPA thu a rik, Damaska chunga khom tlung a tih. Mi tin mit le Israel hnamhai mit chu, LALPA chungah a fu thup a. 2 Damaska khawpui le inramri, Hamat chunga khom tlung a ta, Tura le Sidon chungah tlung a tih, Varin themthiem hle hai sien khom. 3 Tura chun ama ta dingin, Kul ropui tak a bawl a, Pilvut anga tangkaruo bùmin, Chihrak ang elin kotthlêrah, Rangkachak a sêk khawm a. 4 Sienkhom a nei po po chu, Lalpan làkpêk vong a ta, Tuipuia a hràtna chu pei hmang a ta, Meiin a khuo lem hmang a tih. 5 Askelon chun hmuin tìng a ta, Gaza chun na tiin inkon a ta, Ekron khom chuong ang bokin, A beiseina hlamzui dèr a ta, Gaza chun a lal chân a ta, Askelon chu rausan an tih. 6 Filistinhai suong Asdod chu, Ram dang mihan hluong an ta, Sukbohmangin um a tih. 7 Sa thisen an fàkhai chu, An baua inthokin la suok ka ta, Sa thieng lo an fàkhai khom chu, An ha kâra inthokin pot suok ka tih. Hlaa la um sunhai po chu, Ka ta hung ni tâng an ta, Judai ramah hotu nîng an ta, Ekron mihai chu Jebuhai ang, An la hung ni ding a nih. 8 Rûntu lakah ka in vêng ka ta, Ka vèng hnunga inthok chu, Nêksawrtuhan ka mihai, Hung pal zùt ta naw ni hai. 9 Nasa takin hlim rawh, Zion naunu!Inring takin khêk rawh, Jerusalem naunu!En ta, i kuom tieng i Lal a hung, Mi fel le Sandamtu a nih; Sienkhom inngaitlawm takin, Sabengtung chungah a chuong, Sabengtung tuoi chung ngeiah. 10 Efraim tawlailirhai la hmang ka ta, Jerusalema indona sakorhai khom; Indona thalngulhai suktliek ka tih. Hnamhai kuomah inremna thu hril a ta, Tuipuia inthoka tuipui chenin, Eufretis a'nthoka hnuoi tawp chenin, A lalna chun huop vong a tih. 11 Nangma chungthua khom, Nang le ka thuthlungna thisen leiin, Tui um lona khura inthokin, I mi intànghai chu insuong ka tih. 12 Aw, beiseina hruia intûlhai, In kulpuiah kîr nawk ta ro. A lèt hniin tungding ka ti cheu ti, Voisun hin ka puong a nih. 13 Ka thalngul ka kuoi angin, Juda chu kuoi kûr ka ta, Efraim chu thalah hmang ka tih. Aw Zion, Grik nauhai do dingin, I nauhai chu chok tho ka ta, Mi hrât kawlhnàmah siem ka tih. 14 An chungah LALPA hung inlangin, A thal chu kawlphê ang inlep a tih. LALPA Chunghnungtak ngei chun, A tawtawrawt hung mût a ta, Sim thlipui leh inthok suok a tih. 15 Iengkim LALPA chun hum a ta, Vomvir ringot hmang khomin, Hmèlma hnèin tukdol an ta, Dawn an ta, uoiin inrui ang elin, An ri so veng vung a ta, Maichàm thèna berbu angin, Sung sipin um zing an tih. 16 Chu hun a tlung pha chun LALPA, An Pathien chun ran ruol angin, A mipuihai chu san him a ta, Lallukhuma lunghlu angin, A ramah var sing seng an tih. 17 Mawiin hmu nuom an um awm de!Buin vâl ruol chawm hrât a ta, Uoiin tharin nghâknu lênghai. LALPAN Juda enkol a tih

Zechariah 10

1 Thâl ruo sùr hun a tlung pha leh, LALPA kuomah ruo hni hlak ro, LALPA chu kawl sukphetu a na, Mihriem le thlaihai ta dingaRuopui insûrtirtu chu a nih. 2 An milemhan khêl an hril a, Aisanthiemhan khêl an hmu a, Mang indik lo an manghai chun, Mihai ngai an suktha thlawn a. Chuleiin beram ruol angin, Mipuihai an invàk hmang a, Vêngtu nei loin an nêksawr. 3 Berampuhai chunga hin, Ka lung a sen êm êm a, Thuoituhai hi hrem ngei ka tih. Iengkim LALPAN a beram ruol, Juda sûngkuohai chu enkol a ta, Indo sakor suongum tak angin, Anni chu hung sukhrât a tih. 4 Juda sûngkuoa inthokin, A kil dotu lungphumhai, Puon in kei marna thlungphunhai, Indona thalngulhai le, Rorêltuhai po po khom, An hung suok ding a ni si. 5 LALPAN a umpui leiin, Indo laia mi huoisenhaiin, Kotthlêra an hmêlmahai, Chihrak anga an pal zût angin, Sakor chungchuong mihai khom, Do hronin intlawm an tih. 6 "Juda sûngkuo sukhrât ka ta, Josefa sûngkuo san suok ka tih. Thuoiin tungding nawk ka tih, Ka lainat tawl tlat si a. Hnawl ngai lo ni awm hrimin, An hnìnahai chu don ka tih, LALPA an Pathien ka ni si a. 7 Mi hrât khawkhènghai angin, Efraim chu hung hrât a ta, Uoiin no dom lai ang elin, A lungril chu hlim a tih. A nauhaiin hmung an ta, An lungril LALPA chungahNasa takin hlim a tih. 8 Faifûkin ko khawm ka ta, Intlan suok ngei tawl ka ta, An tam hun lai ang bok khan, Ka sukpung nawk ding a nih. 9 Hnam tin lai hnot dar lang khom, Ram hla taka inthok khomin, Mi la hung hre zing an ta, An nauhai leh dam khawsuokin, Hung kìr nawk ngèi ngéi an tih. 10 Aigupta rama inthokin, Anni chu thuoi kîr ka ta, Asuria rama inthok khomin, Anni chu lawr khawm ka tih. Gilead le Lebanona inthokin, Anni chu hung thuoi ka ta, Inleng naw hiel hman an tih. 11 Buoina tuipui kân an ta, Tui insok chu rèng a ta, Nile li mong chen kang a tih. 1 12 LALPA-ah sukhrât ka ta, A hmingin kal chawi an tih"Ti hi LALPA thu suok a nih.

Zechariah 11

1 Aw Lebanon, i kot hong rawh, I sidar thing po pohai kha, Meiin a kàng fai theina dingin. 2 Aw fâr thinghai, tap rak rak ro, Sidar thing chu a tlu ta ie!Thing intuoi zet zuthai chu, Suksietin an um zo tah!Basan saisuohai, tap rak ro, Ramhmângpuihai an rêm zo tah! 3 Berampuhai tap ri ngai ro, Hmun hringhai an rêm zo ta si!Keipuihai inrùm ri ngai ro, Jordan chìmbuk a ram zo tah. 4 LALPA ka Pathien chun hieng hin a tih: "That dinga ruot beramhai chu enkol rawh. 5 A'n chawtuhai chun an that a, hrem an ni ngai nawh. A zortuhai chun, 'LALPA chu inpâkin um raw se, ka hung hausa ta si a' an ti a. A nih, anni vêngtu berampuhai ngéi khomin an lunginsiet nawh. 6 Kei khomin a rama chênghai hi ka lunginsiet zing ta naw ding a nih. Mi tin el chu a tuolbawm kuta le a lal kutah ka pêk suok ding a nih. A ram chu suosàm an ta, an kuta inthokin san suok naw ning" ti hi LALPA thu suok a nih. 7 Chuongchun, ran ruol laia that dinga ruothai, abikin nêksawra umhai chu ka enkol a. Chun, hmol pahnih ka lâk a, pakhat chu "Ditsak', a dang chu 'Suikhawm' tiin ka ko a, chuong chun ran chu ka ching a. 8 Thla khat sûngin beram vêngtu pathumhai chu ka sukbohmang a. Ran ruol chun an mi theida a, kei khomin ran ruol chu ka nghok bok a. 9 Chun, an kuomah " Nangni vêngtu ni ta naw ning. A thi dinghai chu thi hai sien, a bohmang ding chu bohmang raw hai se. A thi mahlahai chun an sa infa ton raw se" ka ta. 10 Chun, ka hmol pakhat Ditsak chu ka lâk a, ka tan bong a, hnam po pohai laka ka thuthlung chu ka sût a. 11 Chu nia ka thuthlung sût hmutu, nêksawra um ranhai chun LALPA thu a nih ti an hriet a. 12 Kei chun an kuomah, "Awm in tìzawng a ni chun ka hlaw mi pe unla, inti naw chun nangnin kol el ro" ka ta. Chuongchun, tangkaruo chêng sawmthum an mi pêk a. 13 Ka man awm tawka an sak chu LALPA chun, "Bêlhemtu hmunah pei rawh" tiin a mi hril a. Tangkaruo chêng sawmthum chu ka lâk a, LALPA ina chun bêlhemtu kuomah ka pêk a. 14 Chuongchun, Juda le Israel inkâra inunauna chu suktan dingin ka hmol dang Suikhawm chu ka lâk a, ka tan bong a. 15 Chun, LALPA chun ka kuomah, "Berampu hmangna bo hmangruo bok kha la la, a âi va aw rawh. 16 A ramah berampu dang ka sie nawk ding a na, ama chun inhmanghai chu ngaisak naw ni a, a têhai zong naw ni a, hliemhai enkol naw ni a, a hriselhai khom chawm naw ni a, a thâu thâu sâ chu fa ram vong lem a ta, an tin kawmhai chenin thlong a tih. 17 "Berampu tlâktlài lo, Ran ruol màksantu chung chu, A va hang pik ngei de aw!A bân le a mit chang tieng, Kawlhnâmin sâthai sien la, A bân chu zeng thla vong sien, A mit chang tieng indel raw se. "

Zechariah 12

1 Israel chungthua LALPA thu chu: LALPA, vànhai keiphartu, hnuoi nghatsan phûmtu, mihriema thlarau sietu chun hieng hin a hril: 2 "Jerusalem chu a vêla mi po po sukruitu no-ah siem ka ta, Judai ram chu inhuol an ta, Jerusalem khom inhuol an tih. 3 Chu nia ama bei dinga hnuoia hnamhai po po an inkhawm pha chun, Jerusalem chu hnam po po ta dinga sukchàng ruol loah siem ka ta, a la son tum taphot chu anni le anni na takin inhliem an tih. 4 Chu ni chun sakor tin chu sukthlabâr ka ta, a chunga chuonghai chu chî-ài an tih ti hi LALPA thu suok a nih. Juda sûngkuo chungah mit inlên zing ka ta, hnam dang indona sakorhai mit chu sukdel ka tih. 5 Chu pha chun Juda sûngkuo tina luhai chun lungrilin, 'Jerusalem mipuihai hràtna san chu Iengkim LALPA chu an Pathien a ni lei a nih' la tîng an tih. 6 "Chu pha chun Juda hotuhai chu thinghuon chunga meiphu sie ang le bupawl laia meiser chok rol ang nîng an ta. an kawl le kienga umhai chu an voi le changah kàng hmang an ta, Jerusalem ruok chu a hmun ngaiah him zing a tih. 7 Davida sûnghai le Jerusalem ropuina chu Juda sûngkuo nèka a ropui lem nawna dingin, LALPA chun Judahai chèngna hmun chu san suok hmasa tak a tih. 8 Chu ni chun LALPAN Jerusalema chênghai chu hum a ta, anni laia a ongrop tak khom Davida anga hrât nîng a ta, Davida sûngkuo chu Pathien ang, an hmaa LALPA vàntirko fe ang chu hung nîng an tih. 9 Chu ni chun Jerusalem hung beitu hnamhai po po chu sukse dingin inthok suok ka tih" tiin. 10 "Davida sûngkuo le Jerusalema chênghai chunga chun lunginsietna le hnìna thlarau buok khum ka ta, an sun hlumpa chu en an ta, miin a naupa nei sun a sùn angin sûn an ta, nau lutîr pùrdo anga nain a pûr chu do an tih. 11 Chu ni chun Megido phai Hadad Rimon-a an tap anga nasain Jerusalema khom nasa takin tap an tih. 12 A ramin sûn a ta, Davida sûngkuoa pahnam tinin an nuhmeihai leh sûn an ta, Nathan sûngkuohai khomin an nuhmeihai leh sûn an tih. 13 Levi sûngkuoa pahnam tin le an nuhmeihai le Simei sûngkuoa pahnam tin le an nuhmeihaiin sûn an ta, 14 pahnam dang po po le an nuhmeihaiin sûn bok an tih. " tiin.

Zechariah 13

1 "Chu ni chun Davida sûngkuo le Jerusalema chênghai suolna le tirdakumnahai chu sawp faina dingin tui hung luong suok a tih. 2 "Chu ni chun milem hming an lam hlakhai chu a rama inthokin sukbo ka ta, hriet zing ni ta naw ni hai" ti hi Iengkim LALPA thu suok a nih. "Zawlneia insâlhai le thlarau tirdakumhai chu a rama inthokin la hmang ka tih. 3 Tu khomin thu an la hril lawk rop a ni chun, a hringtu nu le pahai chun, 'LALPA hminga khêl i hril leiin i thi ding a nih' tîng an ta, thu a hril lawk lai ngei chun a hringtu nu le pahai ngeiin sun hlum an tih. 4 "Chu pha chun chuong zawlneihai chun inlàrna an hmu chu inzàpui tâng an ta, mi hlèmna dingin zawlnei korfuol inhmul dem dum hâk ta bok naw ni hai. 5 'Zawlnei ka ni nawh. Lo nei mi ka ni a, ka tleirawla inthoka lo sin thawa fâk zong hlak mi hrim ka nih' tîng an tih. 6 Chun, miin, 'I panga hliemna serhai kha teh?' tia an indon chun, 'Ka ruolhai inah ka changsuola a nih' tiin don a tih. 7 Iengkim LALPAN hieng hin a tih:"Aw kawlhnâm, har rawh, Ka berampu laka chun har rawh, Ka sangawizawnpui laka chun. Berampu chu sât hlum la, Beram ruol chu indar an ta, A têhai chungah kut thlâk ka tih. 8 Hmun thuma thea hmun hni chu, A ram pumah thi hmang an ta, Hmun thumna chu hlà nîng an tih. 9 Anni chu meiah fieng ka ta, Tangkaruo angin thlit fìm ka ta, Rangkachak angin fieng ka tih. Ka hming hung lam tâng an ta, Anni chu lo don ka ta, "Ka mihai an nih" ti tâng ka ta, "LALPA chu kan Pathien a nih"Tiin mi ko ve tâng an tih. "

Zechariah 14

1 Ngai ta, in râllâkhai nangni laia in insem hun ding LALPA ni chu a hung hnâi mèk a nih. 2 Jerusalem do dingin hnam po po ka ko khawm ding a nih. Khawpui chu lâng an ta, inhai rok ram an ta, nuhmeihai chu suollui an tih. Khawpui mihriem zâtve chu salah thuoi hmang an ta, a danghai chu khawpuia inthokin suok naw ni hai. 3 Chu pha chun LALPA chu inthok suok a ta, indo chânga a bei hlak angin, chuong hnamhai chu bei a tih. 4 Chu ni chun Jerusalem sak tienga Oliv tlànga chun a kè innghat a ta, a tlâng chu a laiah sak le thlang zawngin inphel a ta, a laiah ruom lien tak hung um a ta, a tlâng tieve chu hmar tieng intawl a ta, a tieve chu sim tieng intawl a tih. 5 Tlâng kâr ruoma chun inbi hmang in ta, ruom chun Azel chen va sun a tih. Judai ram lal Uzia inlal laia lirhnînga in tlàn siet ang khan tlân sieng in tih. Chu zoah LALPA ka Pathien chu a mi thienghlim po po leh hung a tih. 6 Chu ni chun var um naw ni a, dei naw ni a, zil tla bok naw nih. 7 Chu ni chu ni dangdai tak, LALPA chauh hriet, sùn ni lo, zàn ni bok lo nîng a tih. Zàn tieng ruok chun var hung um a tih. 8 Chu ni chun Jerusalema inthokin hringna tui hung luong suok a ta, a zàtve chu Tuipui Thiah luong lût a ta, a zàtve dang chu Mediterranean tuipuiah; chuong ang chun nipui le thlasika khom nîng a tih. 9 LALPA chu hnuoi pumpuiah lal nîng a ta, chu ni chun LALPA pakhat chauh um a ta, a hming chauh chu hming um sun nîng a tih. 10 Ram po po chu Gebaa inthoka Jerusalem sim tienga Rimon chenin Araba ang hung nîng a tih. Sienkhom, Jerusalem chu chawi sàngin um a ta, Benjamin kotkhâr-a inthoka kotkhàr pakhatna le a kila kotkhàr chen le Hanalel Insàng le laltak uoiin sawrna khur chenin a hmun pangngai hluong a tih. 11 Hluo sip an ta, suksiet ni ta naw ni a, Jerusalem chu him tâng a tih. 12 Jerusalem dotuhai po po chunga LALPAN hripui a'n lêngtir ding chu hi hi a nih: An kea an ngîr zing laiin an taksa hmon thlàng a ta, an mit khurah an mithai zop ral a ta, an bàuah an lei hmon thlàng a tih. 13 Chu ni chun chí-âina nasa takin LALPAN mihai chu inmantir a ta, pakhatin pakhat dang kutah man a ta, inbakkei an tih. 14 Juda khomin Jerusalem bei a ta, an sè vèla hnamhai rosum, rangkachak le tangkaruo le silfèn tam tak la khawm a tih. 15 Chu hripui chu sakor hai, sabengtung lien chi hai, sanghawngsei hai, sabengtung chin chi hai le an inkulnaa ran um po pohai chunga khom inlèngtir a tih. 16 Jerusalem do hlaktu, hnam hrang hrang la dam khawsuokhai chu kum tinin Laltak, Iengkim LALPA chu chawibiek ding le Bawkte Kùt hmang dingin Jerusalemah hung hlak an tih. 17 Hnuoia hnam tu khom Jerusalema Laltak, Iengkim LALPA chawibiek dinga kûta hang fe naw taphot chun ruotui dong naw ni hai. 18 Aigupta mihai khom kût hmang dinga an hang fe ve naw chun ruotui dong naw ni hai. Bawkte Kùta hang fe ve lo hnamhai a hremna hripui bok chu an chungah inlèngtir a tih. 19 Chu chu Aigupta hremna le Bawkte Kùt hmang dinga hang fe ve lo hnamhai po po hremna chu nîng a tih. 20 Chu ni chun sakor telnènga hai khom LALPA TA DINGA SER HRANG ti chuong tâng a ta, LALPA ina bûr le bèl po po khom maichàm hmaa ser thieng bûr le bèl angin thienghlim vong tâng a tih. 21 Jerusalem le Judai rama bûr le bèl po po chu Iengkim LALPA ta dinga thienghlim nîng a ta, inthawia fehaiin bûr le bèlhai chu thlai suongna dingin hmang an tih. Chu ni chun Iengkim LALPA inah sumdawng tu khom um ta naw ni hai.

Malachi 1

1 Zawlnei Malaki hmanga Israelhai chungthua LALPA thu puong chu: 2 LALPA chun, " 'Ka hmangai cheu a nih' a ta, nangni ruok chun, 'Ieng tik khan am i mi hmangai a?'" in ti a. "Esau kha Jakob unaupa a ni naw am a ni? Sienkhom, Jakob chu ka hmangai a, 3 Esau ruok chu ka theida a, a tlâng hluo chu ràusan hmunah ka siem a, a rochan chu thlalèra sihalhai ka pêk a ni kha" ti hi LALPA thu suok a nih. 4 Edom mihai chun, "Suksietin ei uma chu ei ram tlu se tah chu indin thar ei tiu" an ti khom a ni thei. Sienkhom, Iengkim LALPA thu suok chu hi hi a nih: "Indin tha khom ni hai sien keiin thiek nawk tho ka tih. 'Ram Rilo' ti hming put a ta, LALPA lungsenna chu an chungah fu zing a tih. 5 Chu chu in mit ngeiin la hmûng in ta, 'Israel ram puo tieng khom LALPA chu a ropui ie!' la tîng in tih" tiin. 6 "Naupa chun a pa a chawimawi a, siehlaw chun a pu a chawimawi. Kei hi pa ka ni chun, khaw'm a na ka phu ang chawimawina in mi pèk chu? Hotu ka ni chun khaw'm a na ka phû ang inzàna in mi'n entir chu? Aw thiempuhai, nangni tak tak hi in nih ka hming sukmuolphotu chu!" ti hi Iengkim LALPA thu suok a nih. "Sienkhom nangni chun, 'Iengti kongin am i hming kan sukmuolpho a?' tiin in indon hlak. 7 Ka maichàmah sa porchè in sie zing lai khomin, 'Iengti kongin am kan sukporchè che a?' in tih. Chuonga in ti lei chun LALPA maichàm chu hmusitumah in siem a nih. 8 Inthawina dinga ran mitdel in hung lâk kha thil indik a ni? Ran kebai le natna nei in inhlàn kha thil indik a ni? In ram optu kuomah inhlàn tum hrim ta u. In chungah a lawm in ring am? A lo hlutsak cheu in ring hrim hrim a ni?" ti hi Iengkim LALPA thu suok a nih. 9 "In chungah zangai dingin Pathien chu ngèn mol ro. Amiruokchu, chuong ang thilhlân in hung chawi si chun, ieng leiin am a pom ding cheu a na?" ti hi Iengkim LALPA thu suok a nih. 10 "Ka maichàmah a thlawna mei in inkhùk nawna dingin tempul kot lo khàrtu ding mi um hai sien chu tha ding bah! In chungah lawmna hrim ka nei naw a, in kuta inthoka thilhlân ieng khom pom naw ning" ti hi Iengkim LALPA thu suok a nih. 11 "Nisa suoknaa inthoka a tlàkna chenin hnam tin lai ka hming hi la ropui a tih. Hnam tin lai ka hming a ropui leiin, hmun tinah ka hmingin rimtui rawng an ta, inthawina inhlân bok an tih, " ti hi Iengkim LALPA thu suok a nih. 12 "Nisienlakhom nangnin, 'LALPA maichàm chu a va porchè de! An thil inhlànhai khom chu inzàpui a va hang um de!' in ti hin ka maichàm in suktirdakum a nih. 13 ​Chun, 'A va hei nghokum de aw' tiin hmusit takin hnâr in hnawt khum bok hlak" tiin Iengkim LALPA chun a hril. "Ran sil-ong dâm, kebai dâm le natna nei dàm in hung inhlàn hin, in kuta inthokin ka lo pom ding am a ni?" LALPA chun a tih. 14 "Mani ran ruol laia hmêl hemna nei lo a chal nei zing a, chu chu inhlàn dinga thu intiemkam bok sia ran hmêl hem LALPA kuoma inhlàn lemtu chu tongsie phurin um raw se. Kei hi lal ropui tak el ka na, ka hming hi hnam tin lai khom an tì ding a nih" ti hi Iengkim LALPA thu suok a nih.

Malachi 2

1 "Aw thiempuhai, hi zilna hi nangni ta ding a nih. 2 In ngaithlàk nuom naw a, ka hming sukropui dinga lungril in siem naw chun, in chungah tongsie hung intlun ka ta, in malsawmna donghai po po khom tongsie inphur ka tih. A nih, keima mi chawimawi dinga lungril in siem naw leiin tongsie ka'n phurtir dèr tah cheu a nih" ti hi Iengkim LALPA thu suok a nih. 3 "Nangni leiin in thlahai chu zilhau ka tih. Inthawinaa in ran inhlàn èk chu in hmàiah tât pher ka ta, chu pum chun làk hmangin um in tih. 4 Levi kuoma ka thuthlung chu a ngîr zing theina dingin ka zilhau cheu a nih ti hi chu pha chun la hrieng in tih" ti hi Iengkim LALPA thu suok a nih. 5 "Ka thuthlung, hringna le thlamuongna thuthlung chu Levi kuomah ka pêk a, chu chun inzà a phur leiin a mi'n za hrim a, ka hming nasa taka inzain a mi ti a. 6 A bàuin zirtirna indik a sàk suok a, a hmûra inthokin thu indik lo a suok ngai nawh. Ringum tak le ngîl takin a mi zui a, mi tam tak chu an suolnaa inthokin a'n lamlèttir a. 7 Thiempu hmùr chun hrietna a pai ding a na, a baua inthokin mihaiin zirtirna thucha an zong hlak ding a nih, ama chu Iengkim LALPA tirko a ni si a. 8 Nangni ruok chu lampuia inthokin in pèt hmang a, in zirtirna chun mi tam tak in insuithlùktir a, Levi le ka thuthlung siem chu in bawsiet a nih" ti hi Iengkim LALPA thu suok a nih. 9 "Ka lampuihai in hraw naw lei le dàn thilah thlei bik in nei leiin mi po po hmaah hmusit le endongah ka siem chêu a nih" tiin. 10 Ei rêngin Pa pakhat chauh ei intlâng a ni naw am a ni? Pathien pakhat siem vong ei ni naw am a ni? Ieng leia pi le puhai thuthlung sukporchè a, unau le unau ei inhlèm hlak am a na? 11 Juda chu a depdè leiin Israel ram le Jerusalemah thil tirdakum a thaw a, ram dang milem pathien betu chu nuhmeiin a nei a, LALPA hmangai hmun thienghlim chu a sukporchè ta si a. 12 Hieng thil thawtu chu tu khom ni sien, Iengkim LALPA kuoma thilhlân hung chawitu khom ni sien, ama chu Jakob sûngkuoa inthokin LALPAN sât thla raw se. 13 "In thilthaw dang pakhat chu LALPA maichàm mitthlia in infar khum hi a nih. A ngàithlàk ta naw cheu lei le kuta thilhlân in hung chawihai chu a pom ta naw leiin in tap khêk a. 14 Nangni chun "Ieng leia a pom naw nîng a ta?" dàm in la ti ta deu deu a! A san chu, LALPA hrietpuia i vànglai nuhmei chu ringum taka inkoppui tlat dinga thu tiem siin i thuthlungna, i nuhmei lakah i ringum si nawh. 15 "LALPA chun anni chu pumkhatin a siem a ni naw am a ni? Taksa le thlarauah a ta an nih. Ieng leia pumkhata a siem am a na? Pathien ngaisak mi chi thlatu ding a zong lei a nih. Chuleiin, in nun vong tha unla, in vànglai nuhmei lakah depdè naw ro. 16 LALPA Israel Pathien chun, "Inmâk hi ka theida takmeuh a nih. Nuhmeihai rawng taka soisak khom ka theida a nih. Chuleiin, in nun vong tha unla, in nuhmei chungah ringum ro" ti hi Iengkim LALPA thu suok a nih. 17 In thuin LALPA a suksawl zozai tah. Sienkhom nangni chun, "Iengtin am kan suksawl hrim hrim a?" in tih. "A mithmua thil suol thawtu taphot chungah LALPA a lawm" ti amanih, "Khaw lai am indik taka rorêltu Pathien chu a um a?" ti amanih in hril vet hi a ngai nghok a nih.

Malachi 3

1 " Ngai ta, ka tirko ka hung tir a, Ka hmaah lampui buotsai a tih. In zong rop hlak LALPA chu, A tempulah hung inlang thut a ta, Thuthlung tirko in nghàkhlà chu, A hung inlang ding a nih, "Iengkim LALPA chun a tih. 2 Sienkhom a hung inlang ni chu, Tuin am tuor zo a ta?Ama a hung inlang pha chun, A hmaah tu'm ngîr ngam a ta?Ama chu rawtuina mei ang lePuon sawptu sabon ang a nih. 3 Tangkaruo raw thiengtu leThlit fimtuah inthung a ta, Rangkachak le tangkaruo angin, Levi thlahai sukthieng a ta, A hmaa thil inhlàntu ding, LALPAN mi fel nei tâng a tih. 4 Tien lai hun le nihai ang khan, Judai ram le JerusalemaAn thil hung inhlànhai chu, LALPAN lo pom tàng a tih. 5 Ro rêl dingin hung hnai ka ta, Dawithiemhai, uire hmanghai, Thukhêla inkhâm chînghai, Inhlawfahai hlaw hlêppèk a, Hmeithaihai le fahrahai nêksawr a, Ram dang mihai chu thlier a, Indik taka ro rêlpêk ngai loa, Mi tìna nei lohai chunga chun, Hrepuitu tuonrangah thang ka ta, An chungthu rêl nghal ka tih"Iengkim LALPA chun a tih. 6 "Kei hi danglam lo LALPA, Ka ni leiin aw Jakob thlahai, In bohmang naw a ni hih. 7 In pi le pua inthok khan, Ka thu ruothai nghatsanin, Ka thu in zawm nuom si nawh. Ka kuomah hung kìr unla, In kuomah hung kìr ka tih"Iengkim LALPA chun a tih. Nisienlakhom, nangni ruok chun, "Iengtin am ei kìr ding?" in tih. 8 Tu'n am Pathien a rok hlak?Sienkhom in mi rok hlak si. Chuong sa khom chun nangni chun, "Iengtin am kan rok che?" in tih. "Sawma pakhat le thilhlânah tie! 9 Nangnin in mi rok leiin, Tongsie hnuoiah in um a, Hnam pumin tongsie in phur. 10 Ka ina bu tamna dingin, In sawma pakhat kim takin, Ka bu inah hung hlù lût ro. Ka vàn zèngpuihai hongpêkin, Malsawmna tiem seng lo hiel, Ka vûr ding le ding naw cheu, Hi thila hin mi fie ngat ro"Iengkim LALPA chun a tih. 11 "Fa se theitu po po lakah, In thlàihai vêngpêk ka ti cheu a, In huona grêp ràhai khom, A hlam til hrim um naw nih, "Iengkim LALPA chun a tih. 12 "Chuongchun, hnam tinrênghaiinHamtha la tîng an ti cheu a, In ram chu ram ditum tawp, A la hung ni ding a ni si, "Iengkim LALPA chun a tih. 13 "Nasa takin in mi hrilsiet"Tiin LALPA chun a hril. Chuong sà khom chun nangni chun, "I nâk kal zawng iem kan hril?"Tiin in hung indon lêt a. 14 'Pathien rongbawl ei ti hi, Thilthlawn mei mei a lo nih. A mamaw thilhai thaw a, Iengkim LALPA hma bula, Lusûn anga ei kùn khom hin, Ieng am hlawkna ei hmu a? 15 Mi chapo an engthawl a, Suol thawtu an hmûingìl a, Pathien chotu khom an him'Tiin in hril hlak an naw? 16 LALPA tituhai ruok chu, Inbein an inrawn khawm a, LALPAN an thu a ngàithlàk hlak. LALPA tia a hming inzatuhai chu, Hriet zingna lekhabua chun, A mithmuah an ziek thlàk hlak. 17 Iengkim LALPAN hieng hin a tih:"Ka rohai ka khawm pha chun, Anni hi ka rochan nîng an tih. A rongbawltu a naupa ta dinga, Pain ro a hlàpêk hlak angin, Anni khom chu hlàpêk ka tih. 18 Chu pha chun mi fel le mi rilo, Pathien rong bawltu le tu nawhai, Chan inthlàuzie hmu nawk in tih.

Malachi 4

1 "Ngai ta, ni chu la tlung ngei a ta, Rawtuina mei angin kàng a tih. Mi chapo le mi suolhai chu, Bupawl ang chauh nîng an ta, Chu ni chun raw hmang an ta, An zung le zàr hlà naw nih"Iengkim LALPA chun a tih. 2 "Ka hming titu nangni chungah, Felna nisa hung suok a ta, Ni zunga chun damna a um. Bawngte hrèn lai insuo angin, Hlim takin inchawm in tih. 3 Ka ni ruota ka chèt pha chun, In ke hnuoia meivap angin, Mi suolhai chu sir dèng in tih, "Iengkim LALPA chun a tih. 4 "Israelhai po po ta dingaKa siehlaw Mosie kuoma, Horeb tlànga ka pèk tahai, Dàn le thuruot po po hai kha, Ieng lai khomin hre zing hlak ro. 5 "LALPA ni ropui le râpthlâkin, A hung nang cheu hma ngeiin, Zawlnei Elija hung tir ka tih. 6 Ama chun pahai lungril chu, Nauhai tieng innghattir a ta, Nauhai lungril chu pahai tieng. Chuong an naw chun hung ka ta, A ram pum hi tongsie inphurin, Hrem pal hlauh rawi ka tih" tiin.

The New Testament of our Lord and Saviour Jesus Christ

Matthew 1

1 Abraham naupa, Davida naupa Isu Krista thlàtuhai inthlà sawng dàn chu hieng ang hi a nih: 2 Abrahamin Isak a thla a, Isakin Jakob, Jakobin Juda le a unauhai, 3 Judain Tamari lakah Perez le Zera, Perez-in Hezron, Hezronin Aram, 4 Aramin Aminadab, Aminadabin Nason, Nasonin Salmon, 5 Salmon le a nuhmei Rahabin Boaz, Boaz le a nuhmei Ruthiin Obed, Obed-in Jesai, 6 Jesaiin Lal David. Davidan Uria nuhmei lakah Solomon a thla a, 7 Solomonin Rehoboam, Rehoboam-in Abija, Abija-in Asa, 8 Asa-in Jehosafat, Jehosafatin Joram, Joramin Uzia, 9 Uzzia-in Jotham, Jothamin Ahaz, Ahaz-in Hezekia, 10 Hezekia-in Manase, Manase-in Amon, Amon-in Josia, 11 Josia-in Babulon sala an intàng lâi vêlin Jekoni le a unauhai a thla a. 12 Babulon sala inthoka an suok hnungin, Jekoni-in Sealthiel, Sealthiel-in Zerubabel, 13 Zerubabel-in Abiud, 14 Abiud-in Eliakim, Eliakim-in Azor, 15 Azor-in Zadok, Zadok-in Akim, Akim-in Eleazar. Eleazar-in Mathan, Mattan-in Jakob, 16 Jakob-in Josefa, Mari pasal, Mari lakah Isu, Krista an ti chu a hung pieng tah a nih. 17 Chuongchun, Abrahama inthoka Davida chen inkârah suon sawm le suon li an um a, Davidaa inthoka Babulon sala an thuoi hun chen inkârah suon sawm le suon li an um a, Babulon sala an thuoia inthoka Krista chen inkârah suon sawm le suon li bok an um a nih. 18 Isu Krista hung pieng dàn chu hieng ang hi a nih: A nu Mari chu Josefa nuhmei huol a na, nupaa an um hmunkhat hmâin Thlarau Thienghlimin nau a'n pâitir ti hriet a hung ni tah a. 19 A pasal huol Josefa chu mi fel tak a ni leiin tlâng hrieta sukmuolpho a nuom naw a, a rûka thè el a tum a. 20 Nisienlakhom, chuonga a ngaituo hnung chun a mangah Lalpa vàntirko a hung inlàr a, a kuomah, "Josefa, Davida naupa, Mari hi i nuhmei dinga thuoi intîm naw rawh, a nau pâi chu Thlarau Thienghlim laka mi a nih. 21 Nau pasal nei a ta, a hmingah ISU i sak ding a nih; ama chun a mihai chu an suolhai laka inthokin a sandam ding a ni si a" a ta. 22 Hieng thil tlung po po hi Lalpan zawlnei hmanga a lo hril tah chu a hung tlung kimna ding a nih: 23 " Nunghàk thienglâmin nau pâi a ta, Nau pasal nei a ta, A hmingah Immanuel sak an tih"tiin. Immanuel chu "Ei kuomah Pathien a um" tìna a nih. 24 Josefa a hung thanghar chun Lalpa vàntirko hril ang chun a thaw a, Mari chu nuhmeiah a nei a 25 Nisienlakhom, a nau a pieng hmâ khat chun a pawl nawh. Chu nau hminga chun Isu a sak a.

Matthew 2

1 Lal Heroda inlal laia Judai ram Bethlehema Isu a hung pieng chun, khawsak tienga inthokin Jerusalemah mivarhai an hung a. 2 "Judahai lal hung pieng chu khaw lai am a um a? Khawsak tieng a arasi kan hmu a, ama chawibiek dingin kan hung a nih" an ta. 3 Lal Herodan chu thu a hriet chun a lungzîng hle a, Jerusalem mi po po khomin an lungkham a. 4 Chuongchun, thiempu lalhai le Dàn hretuhai chu a ko khawm a, Krista piengna hmun ding chu a'n don a. 5 Anni chun, "Judai ram Bethlehem khuoa pieng ding a ni thu hieng ang hin zawlneiin a ziek: 6 Nang Bethlehem, Judai rama mi, Judai rama rorêltuhai lai hin, I chîn tak naw top, I sûnga inthokin rorêltu, A hung suok ding a ni si a, Ka mi Israelhai optu ding chu"an ta. 7 Chuongchun Herod chun mivarhai chu a rûkin a ko a, arasi hung inlang hun chu ngun takin a'n don a. 8 Bethlehem tieng chun a'n fetir a, "Fe unla, nâute thu chu ngun takin hung indon suok ro. In hmû charin mi hung hril unla, keikhoma ka chawibiek ve theina dingin" a ta. 9 Lal thu an hriet hnung chun an fe pei a, khawsak tienga arasi an hmu khan nâute umna chung zawn a tlung chenin an hma a thuoi a. 10 Arasi chu an hmuin an hlim èm êm a. 11 In sùng an va lût chun Mari le a naute chu an hmu a, hnuoi sikin an chawibiek a; an robawmhai hongin, thilpêk rangkachak dâm, beraw dâm le mura dâm an pêk a. 12 Heroda kuomah kîr nawk ta lo dinga manga hrilh an ni leiin an ram tieng lampui dangah an kîr nawk ta a. 13 Mi varhai an kìr hnung chun Josefa mangah Lalpa vàntirko a hung inlâr a, " Naute hi Herodan that tuma a zong leiin, tho la, naute le a nu thuoi la, Aigupta ram tieng tlân rawh; ka hril nawk hmâ che chu, chu taka chun um zing rawh, " a ta. 14 Chuongchun, a tho a, a zân a zânin Aigupta ram an pan a, 15 Heroda thi hma po chu taka chun an um a, zawlnei hmanga, "Ka naupa chu Aigupta rama inthokin ka ko suok a" tia a lo hril kha a hung tlung tah a nih. 16 Mivarhaiin an dawha ti Herodan a hriet chun a lung a sen êm êm a, mivarhaiin naute pieng hun awma an hril ang khan Bethlehem le a sè vèla pasal naupang kum hnia inthoka a hnuoi tieng po chu that vong dingin thu a pêk a. 17 Zawlnei Jeremia-in hieng thu a lo hril kha a hung tlung kim tah a nih: 18 "Rama khuoa ri an hriet chu, Lusûn tap khêk rong rong a nih; Rakilin a nauhai a ta a, An um ta si naw leiin, Thlêm tlâi ruol a ni nawh". Aiguptaa inthoka an kîr thu 19 Heroda thi hnungin Aigupta rama um Josefa mangah Lalpa vàntirko a hung inlàr a, 20 "Tho la, naute le a nu thuoi la, Israel ramah kîr nawk ta rawh; naute that tumtuhai kha an thi tah" tiin a hril a. 21 Chuongchun a tho a, naute le a nu chu a thuoi a, Israel ram tieng a kîr nawk ta a. 22 Nisienlakhom, Arkelausa chu a pa Heroda aiawin Judai ramah a'n lal ti a hrietin chu taka chun fe ngam loin, manga inhriettir a ni angin Galili ram tieng a pan a, 23 Nazaret khuo an tia chun a um ta a. Zawlnei hmanga a lo hril, "Ama chu Nazaret mi tîng an tih" ti chu a hung tlung kim tah a nih.

Matthew 3

1 Chuong lai chun Baptistu Johan chu Judai ram thlalèrah thu hrilin a hung a. 2 "Sim ro, vàn ram chu a hnâi tah" a ta. 3 Ama hi a nih zawlnei Isaiin, Thlalêra mi khêk rawl chun, 'Lalpa lamlien siel unla, Lam tlûn siempêk ro' a tih"tia a chanchin a lo hril kha. 4 Johan chun sanghawngsei hmula siem zakuo a hâk a, savun kawngchûn a chûn a, a bu chu khauthikthi le khuoizu a nih. 5 Chuong lai chun Jerusalem le Judai ram hmun tina umhai le Jordan vadung kam vela umhai chun ama chu an hung pan a, 6 an suolhai an inpuong a, Jordan vadungah a lo baptis tawl a. 7 Baptisma chang dinga hung tam tak lai chun Farisaihai le Sadukaihai khom a hmu ve a, an kuomah, "Rûl thlahai, lungsenna hung tlung ding chu tlànsan dingin tuin am a'n fui chêu a? 8 In simzie ang peiin thilthawin rà insuo lem ro. 9 'Kan pa chu Abraham annawm' tiin ngài suktha el naw ro; ka hril cheu hi, Pathien chun hieng lunghai hi Abraham thlaah a'n din thei a nih. 10 Tuta inthok el khom hin thing bul tinah hreipui sie a ni tah, rà thaa rà naw thing taphot chu phûra meia ti el ding a nih. 11 Kei chun sim inentirna dingin tuiin ka baptis hlak chêu a; ka hnunga hung ding ruok chu keima nêkin a ropui lem a, a pheikhok khâi tlâk khom ka ni nawh. Ama chun Thlarau Thienghlim le meiin a baptis ding chêu a nih. 12 Hrìzawla buhai chu thlei faia bu ina hlu lût dingin a kutin sisêp a chawi a, a sihai ruok chu mei rêm thei loah raw hmang a tih" a ta. 13 Chuong lai chun Johan kuta baptisma chang dingin Galili rama inthokin Jordan vadungah Isu a hung a. 14 Johan ruok chun, "Kei hi i baptis ngâi lem ka ni vei leh, ka kuomah i hung lem tlat a ni maw?" tiin a sêl a. 15 Nisienlakhom Isun, "Tu hin remti hrâm rawh, hieng ang felna thil po po hraw kim hi ei ta dingin thil mawihnâi a nih" a ta, Johan chun a remti ta a. 16 Isun baptisma a chang zo chun tuia inthokin a hung suok nghal a. Chuong lai tak chun vàn a hung inhong a, vàthu anga Pathien Thlarau hung tum le a chunga hung fù chu a hmu a. 17 Ngai ta, vàna inthoka rawl chun, "Hi hi ka Naupa, ka Dittak chu a nih, a chungah ka lawm êm êm a nih" a ta.

Matthew 4

1 Chu zoa chun Isu chu Diebol thlèm dingin Thlarâuin thlalèrah a thuoi a. 2 Ni sawmli le zàn sawmli bu a nghei hnung chun a phìng a hung tâm ta a. 3 Thlêmtu chu a kuomah a hung a, "Pathien Naupa i ni takzet chun hieng lunghai hi beia inchang dingin thu pe rawh" a ta 4 Isu ruok chun, " 'Mihriem hi bei chauh ringin a hring naw a, Pathien baua inthoka suok thu tinrêng ringin a hring ding a nih' ti ziek a nih" tiin a don a. 5 Diebol chun ama chu khaw thienghlimah a thuoi a, tempul sìp zumah a'n ngìrtir a. 6 "Pathien Naupa i ni takzet chun inchawm thla rawh. 'Vàntirkohai chu thu pêng a ta, I lam tinah vêng an ti che; An kutin dom an ti che a, Lungah i kè sui naw ti nih. ti ziek a ni si a" a ta. 7 Isu chun a kuomah, " 'Lalpa i Pathien fie naw rawh' ti khom ziek a nih" a ta. 8 Diebol chun tlâng insâng takah a thuoi nawk a, khawvel lalram po po le an ropuinahai chu a'n entir a, 9 "Bokkhupin chibai mi bûk la, hieng po po hi pe vong ka ti che" a ta. 10 Isu chun a kuomah, "Setan, fe hmang dai rawh! 'Lalpa i Pathien chawibiek la, ama rong chauh bawl rawh' ti ziek a nih" a ta. 11 Chuongchun, Diebol chun a màksan a, vàntirkohaiin rong an bawlpèk a. 12 Lung inah Johan an khum tah ti Isu'n a hriet chun Galili ram tieng a kîr nawk a. 13 Nazaret suoksanin Kapernaum-ah a um ta zing a, chu khuo chu Jebulun le Naftali biel, Galili dìl kama um a nih. 14 Zawlnei Isai bâua, 15 "Zebulun ram le Naftali ram, Jordan ruoma tuipui panna lamJentêlhai chêngna Galili rama 16 Thim hnuoia inthunghai chun, Var ropui tak an hmu a; Thìna hlim rama chênghai chungah, Var a hung êng suok tah' tia a lo hril kha a hung tlung kim theina dingin. 17 Chu taka inthok chun Isun, "Sim ro, vàn ram chu a hnâi tah" tiin a hril tan ta a. 18 Galili dil kama Isu a lêng laiin unau pahnih, Simon, Peter an ti bok le Andri hai lèn dèng lai chu a hmu a, nga mantu an ni hrim a. 19 An kuomah, "Mi zui ro, mihriem mantuah siem ka ti cheu" a ta, 20 chuongchun an lênhai màksanin an zui ta nghal a. 21 Chu taka inthok chun an fe pei a, unau dang pahnih, Zebedai naupa Jakob le a unaupa Johan chu a hmu a, an pa Zebedai rawiin longah an lènhai an lo buotsai a. 22 Anni khom chu a ko a, chuongchun, an long le an pa chu màksanin an zui ve ta nghal a. 23 Isu chun Galili ram pumpui a fang a, sunagoga hai inchûktirin Pathien ram Chanchin Tha a hril a, hri hrang hrang invoihai le natna chi hrang hranga nahai chu a sukdam a. 24 A chanchin chu Suria ram po poah a'n thang a, natna chi tum tuma na, damnaw inrik tak tak hai, ramhuoi zawl hai, hringol invoi hai le zeng hai chu a kuomah an hung thuoi a, a lo sukdam tawl a. 25 Galili rama inthok dâm, Dekapolib rama inthok dâm, Jerusalema inthok dâm, Judai rama inthok dâm le Jordan ràl khing tienga inthok dâma hung mipui tam takin ama chu an zui a.

Matthew 5

1 Mipui chu a hmuin tlângah a kâi a, a'n thung a, a zirtirhai an hung inkhawm a, 2 thu hrilin a'n chûktir tawl a: 3 Thlarau tienga an pasietzie inhrehai chu an hamtha, Vàn ram an ta a ni si a. 4 Lusûnhai chu an hamtha, Thlamuongin an la um ding a ni si a. 5 Thuhnuoirolhai chu an hamtha, Hnuoi hi an rochung ding a ni si a. 6 Felnaa tâm le dangchârhai chu an hamtha, An la tlai ding a ni si a. 7 Mi zangai theihai chu an hamtha, Zangaina an hlaw ding a ni si a. 8 Lungril thienghlimhai chu an hamtha, Pathien an hmu ding a ni si a. 9 Inremna siemtuhai chu an hamtha, Pathien nauhai ti an la ni ding a ni si a. 10 Felna leia sukdùdàna tuorhai chu an hamtha, Vàn ram an ta a ni si a. 11 "Keima leia mihaiin hal a, suknomna a, indik naw taka suol tinrêng thawa an intum pha cheu chun in va hamtha awm ngei de! 12 Lawm unla, hlim takin um ro, vànah in lawmman a um rawn si a; in hmaa hung zawlneihai khom kha chuong ang chun an lo suknomna hlak kha. 13 "Hnuoi machi in nih. Nisienlakhom, machi hi lo da ta sien, engtin am suk-al nawk thei nîng a ta? Dehawn a, mihai sir de mei mei naw chu ienga khom tlâktlàina a nei ta nawh. 14 "Khawvel var in nih. Tlâng sîpa khaw um chu thup thei a ni nawh. 15 Miin khawnvar sitin leikhawr hnuoiah an sie ngai nawh; in sùnga mi po po a el var theina dingin khawnvar inthutnaah an sie lem hlak. 16 Chuong ang bokin, in var chu mi hmuin var suok raw se, chuongchun thil tha in thawhai chu hmûng an ta, in Pa vàna mi chawimawi thei an tih. 17 "Dàn thu le zawlneihai thu sukbo dinga hung ka nih ti ring naw ro; sukbo ding ni loin sukfamkim lem dinga hung ka nih. 18 Thu dik ka hril cheu hi, hnuoi le vàn a um sùng chun, Dàn thua mi sunhàng chîte amanih le thai ràng chîte amanih khom hi a tlung kim vong hmâ chun pakhat khom bo naw top a tih. 19 Hieng thupêk laia chîn tak khom hi bawsie a, chuong anga thaw ve dinga mihai sukhmùtu taphot chu vàn ramah mi chîn tak tîng an ta; tu khom zawma inchûktir vetu ruok chu vàn ramah mi lien tîng an tih. 20 In felnain Dàn hretuhai le Farisaihai felna a khûm naw chun vàn ramah lût naw top in tih ti ka hril cheu a nih. 21 "Tien lai mihai kuomah, 'Tuol i that ding a ni nawh, tu khom tuol that taphot chu a chungthu rèl ding a nih' ti a ni thu in hriet a. 22 Kei ruok chun ka hril cheu hi, tu khom mani unau chunga a san um loac lungsen chu a chungthu rêl ding a nih. Chun, tu khom mani unaupa 'Mi intlaw'd titu chu Sanhedrina a chungthu rêl ding a ni bok; a unaupa 'Mi invêt' titu lem chu Gehennaa fe tlâk a nih ti ka hril cheu. 23 Chuongchun, maichàma i thilpêk i'n hlàn ding laiin i unauin i chungah lungninawna a nei ti i hriet suok chun, 24 maichàm hmaah i thilpêk chu màksan la, fe la, i unau chu va'n rempui zet la, chu zoah i thilpêk chu inhlàn rawh. 25 I khingpui chu lampuia in intlon laiin inrempui vat rawh, chuong naw chun rorêltu inmantir a ti che a, rorêltu chun pulis kuomah inhlàn a ti che a, lung inah khum pal hlauh rawi a ti che. 26 Thu dik ka hril che hi, poisa khat khom i tlàk vong hmâ khat chu, chu taka inthok chun intâl suok naw top i tih. 27 " 'I uire ding a ni nawh' ti in hriet a. 28 Kei ruok chun ka hril cheu hi, tu khom inngàipui châkna mita nuhmei meltu chu a lungrilah a uire dèr tah. 29 I mit chang tiengin a sukthlùk chê chun khel dok la, dehawn dai rawh; i taksa pumpui Gehena peihawna a um nêk chun i taksa pêng pakhat bohmang chu i ta dingin a tha lem. 30 Chun, i kut chang tiengin a sukthlùk che chun tan la, dehawn dai rawh; i taksa puma Gehena peihawn i ni nêk chun i taksa pêng pakhat bohmang chu i ta dingin a tha lem. 31 " 'Tu khom nuhmei ma chun inmâkna lekha pe raw se' ti a ni hlak. 32 Kei ruok chun, tu khom uire lei ni loa mani nuhmei ma taphot chun ama chu a'n uiretir a nih, màk hnung nei khom an uire a nih. 33 "Tien lai mihai kuomah, 'Khêlin inkhâm naw unla, Lalpa kuoma in inkhâmna chu in hlen ngei ding a nih' ti a nih ti in hriet bok a. 34 Kei ruok chun ka hril cheu hi, inkhâm ngai hrim hrim naw ro. Vàn sâlin inkhâm naw ro, chu chu Pathien lalthungpha a nih. Hnuoi sâl khomin inkhâm naw ro, chu chu a ke nghatsan a ni si a. 35 Jerusalem sâlin inkhâm bok naw ro, chu chu Lal ropui tak khawpui a nih. 36 In lu sâlin inkhâm naw ro, in sam zâi khat khom suktuokin in sukdum thei si nawh. 37 In thu hrila chun 'A nih' ti chu a nih ni sien, 'A ni nawh' ti chu a ni nawh ni el raw se; chu bâk chu suola inthoka suok vong a nih. 38 " 'Mit aia mit, ha aia ha' ti hi in hriet tah. 39 Kei ruok chun ka hril cheu hi, mi suol khing naw ro; i bieng chang tieng bentu chu khing tieng khom dawpêk rawh. 40 Tu khomin i lakah thubuoi siemin i zakuo làkpêk a tum che chun i korchung khom inlâktir rawh. 41 Mêl khat fe dinga phûttu che chu mêl hnih fepêk rawh. 42 A hnitu che chu pe la, i laka pûk nuomtu chu nghatsan naw rawh. 43 " 'I vênghai hmangai la, i hmêlma chu theida rawh' an ti hi in hriet. 44 Kei ruok chun ka hril cheu hi, i hmêlma chu hmangai la, a suknomnatu che chu tongtaipèk rawh, e 45 in Pa vàna mi nauhai in ni theina dingin. Ama chun mi suolhai le mi thahai chungah nisa a'n suoktir a, mi indik le indik nawhai chunga khom ruo a'n sûrtir hlak. 46 Nangni hmangaituhai chauh in hmangai hin ieng lawmman am hmung in ta? Siekhontuhai chen khomin chuong ang chun an thaw ve naw am a ni? 47 Chun, in unauhai chauh chibai in bûk hin iem mi dang nêka in thaw tamna bik a um? Jentelhai khomin chuong ang chun an thaw vê tho an naw'm a ni? 48 Chuleiin, in Pa vàna mi a famkim angin nangni khom in famkim ding a nih.

Matthew 6

1 "Felna thil in thawhai chu mi hmu dinga an hmaah thaw lo dingin fimkhur ro, chuong naw chun in Pa vàna mi kuomah lawmman hmu naw ti niu. 2 "Chuongchun, retheihai kuomah thil i pêkin, lemderhaiin mi inpàk an hlaw theina dinga Sunagog le kotthlêra hai an thaw hlak ang hin mani tawtawrawt inmûtin hril dar naw rawh. Thu dik ka hril chêu hi, an lawmman chu a rêngin an hmu dèr tah. 3 Nang ruok chun thil i pêkin, i kut chang tiengin a thaw chu i kut voi tieng inhriettir naw rawh, 4 i thilpêk chu a rûk a ni theina dingin; chuongchun a rûka i thaw hmutu i Pa chun lawmman pêng a ti che. 5 "In tongtai khomin lemderhai thaw dàn angin thaw ve naw ro; mihaiin an hmu theina dingin sunagoga hai, kotthlêr sîra hai ngîr puma tongtai an ngaina hlak si a. Thu dik ka hril cheu hi, an lawmman chu an hmu dèr tah. 6 Nang ruok chu i tongtai ding pha leh i pindan rilah lût la, kot khâr la, a rûka hmutu che i Pa kuoma chun tongtai rawh; chuongchun, a rûka i thilthaw hmutu i Pa chun lawmman pêng a ti che. 7 Chun, in tongtaiin Jentelhai angin hril ngai ngot samphuol naw ro, an insam rawn leiin ngaithlâk hlaw an inring hlak si a. 8 Anni angin um ve naw ro, in mamawhai chu in hnì hma khomin in Pain a hriet si a. 9 Chuongchun, hieng ang hin tongtai hlak ro:Kan Pa, vana mi, I hming inza um sien la, 10 I ram hung tlung raw se. I ditzawng vàna an thaw angin, Hnuoiah thaw ve raw hai se. 11 Voisun hin fàk ding bu mi pe la, 12 Kan leibattuhai kan ngaidam angin, Kan bathai mi ngaidam la. 13 Thlèmnaah mi thuoi lut naw la, Mi suol lakah mi sanhim rawh. f tiin. 14 In chunga bawsetuhai in ngaidam chun in Pa vàna mi khomin ngaidam vèng a ti cheu. 15 Nisienlakhom, mihai bawsietna in ngaidam si naw chun, in Pa vàna mi khomin in bawsietnahai chu ngaidam bìk naw nih. 16 "Bu in nghei pha khom lèmderhai angin ngùi hmêl put ve naw ro; anni chun mi hmua bu ngheia an inlang theina dingin an hmèl an sukpor hlak. Thu dik ka hril cheu hi, an lawmman an hmu zo tah. 17 Nangni ruok chu bu in nghei pha hmai phì fai unla, in lu sahriek nàlin khui nâm ro, 18 chuongchun in Pa, a rûka um hmaa chauh naw chu mi hmuah bu ngheiin inlang naw ti niu a, in Pa, a rûka hmutu cheu chun rul a ti cheu. 19 "Hângthîm le tuièkin an fàk siet theina, rûkruhaiin ver popa an inrùk theina hnuoia hin in ta dingin ro inkhawl naw ro. 20 Hângthîm le tuièkin an fàk siet thei nawna, rûkruhaiin ver popa an inrûk thei nawna vàna chun in ta dingin ro inkhawl lem ro. 21 In ro umna taphotah in lungril khom a um hlak si a. 22 "Taksa khawnvar chu mit a nih. I mit a tha chun i taksa pumin var suok a tih. 23 I mit a tha naw ruok chun i pumin inthim a tih. I sûnga var chu thim a ni chun, chu thim chu a va sà awm de aw! 24 Tu khomin hotu pahni rong a bawl kop thei nawh, pakhat theidain pakhat chu a ngaina amanih, annawleh pakhat chu inzàin pakhat chu a hmusit amanih nîng a tih. Pathien rong le sum rong bawl kop thei a ni nawh. 25 Chuleiin ka hril cheu hi, in hringna thilah ieng am fain in dawn ding, in taksa thilah ieng am silin in bil ding ti lungkham naw ro. Fàk ding nèkin hringna, silfèn nèkin taksa a poimaw lem an naw maw? 26 Chunglèng vatehai hi en ta u, bu an tu naw a, an sìk naw a, bu inah bu an sèk lût bok nawh; sienkhom in Pa vàna mi chun a chawm tawl si a. Anni nêk daiin in hlu lem naw maw? 27 Nangni lai tu am lungkham leia mani hringna darkar khata sukseig thei? 28 Silfèn thuah ieng dinga in lungkham am? Ram lili pàr inthang dàn hi ngaituo ta u, sin an thaw naw a, pat an kher bok nawh. 29 Nisienlakhom, ka hril cheu hi, Solomon meu khom a ropui thei ang taka a'n thuom khan hieng lili pâr pakhat tluk khom hin chei a ni nawh. 30 Chuongchun, ram hlohna, voisun chauh hring a, a zînga meia ti hmang nawk el ding hman Pathienin chuong ang lawma a chei si chun, aw nangni ringna tlawmhai, chuonghai nêk chun a'n thuom nasa zuol naw ding cheu am a ni? 31 Chuleiin, ieng am fain dawn ka ta, ieng am silin bil ka ta ti lungkham naw ro. 32 Jentêlhai chun chuong thil chu an hnot tak a nih. In Pa vàna mi chun hieng po po hi in mamaw ti a hriet. 33 A ram le a felna chu zong hmasa zet lem ro, chuongchun, hieng po po hi a pêk belsa ding chèu a nih. 34 Chuleiin, zînga ding lungkham naw ro, zîng chun ama ding lungkham a tih. Ni khat buoina hi ni khata dingin a huntawk.

Matthew 7

1 "Soisêl naw ro, soisêla in um nawna dingin. 2 In soisêlna ang charin soisêl nîng in ta, in inkhìna ngeiin inkhìpêk an ti cheu. 3 Iengtiziea mani mita thingtum um chu ngaimaw si loa i unau mita thil hlek um chu i hmu am a na? 4 Mani mita thingtum um zing siin i unau kawlah 'Khawm, i mita thil hlek kha mi'n lâk suoktir rawh' iengtin am i ti thei ding? 5 Lêmdertu, nangma mit ngeia thingtum inkhang kha la suok hmasa zet la, i unau mita thil hlek lâk suok ding chu hmu fie thei tàng i tih. 6 "Ui chu thil inthieng pe naw ro; vok hmaa khom tuikeplung pei bok naw ro. In pei vai chun chîl hrep an ta, chu zoah nangni tieng hung tuongin phir chen neng an ti cheu. 7 "Hni ro, pèk nîng in tih; zong ro, hmùng in tih; kik ro, kot chu hongpêk nîng in tih. 8 A hni taphotin an dong hlak a, a zong taphotin an hmu bok hlak a, a kik taphot chu kot hongpêk nîng an tih. 9 Anleh, nangni lai tu khom a naupain bei hni ta sien, tuin am lung a pêk ding? 10 Nga hni sien tuin am rûl a pêk ding? 11 Nangni mi suolhai hmanin thil tha in nauhai pèk nachâng in hriet si chun, in Pa vàna mi lem chun a hnituhai chu thil tha a va pêk rawn awm ngei de! 12 "Chuongchun, thil iengkimah miin in chunga an thaw dinga in dit dàn ang takin mi chunga khom thaw ve ro; chu chun Dàn le zawlneihai thu a fûn khawm vong a nih. 13 "Kotkhàr chîna chun lût ro. Bohmangna kotkhàr chu a lien a, a lampui khom a lien bok a, chu tienga lût chu an tam bok. 14 Hringna kotkhàr ruok chu a chîn a, a lampui khom a'n chèp a, a hmutu khom tlawmte an nih. 15 "Zawlnei tehlèmhai laka chun fimkhur ro, chuonghai chu beram vun silin in kuomah an hung a, sungril tieng ruok chu satene hnukrawl ang an nih. 16 Anni chu an raah hrieng in tih. Hling bukah grêp an lo hlak am a ni? Intùn bukah theichang an lo hlak maw? 17 Chuong ang bokin, thing tha chu a rà a tha hlak a, thing sie hlak a rà a tha thei bok nawh. 18 Thing tha chun ra sie a'n suo thei naw a, thing tha naw chun ra tha a'n suo thei bok nawh. 19 Thing tin ra thaa rà naw taphot chu an phùr a, meiah an pei hlak. 20 Chuongchun, anni chu an raah hrieng in tih. 21 "'Lalpa, Lalpa' mi ti nazong vàn ramah lût naw ni hai, ka Pa vàna mi ditzawng thawtuhai chauh lût an tih. 22 Chu nia chun mi tam takin, 'Lalpa, Lalpa, i hmingin thu kan hril a, i hmingin ramhuoihai kan hnot suok a, i hmingin thilmak tam tak kan thaw hlak an nawm a ni?" la tîng an tih. 23 Chu huna chun, 'Nangni thil suol thawtuhai, ka hriet ngai naw cheu, ka kuoma inthokin fe hmang dai ro' tiin anni chu la hril ka tih. 24 "Chuleiin, hieng ka thuhai hi hrea a tak ngeia zawmtu taphot chu mi var, lungpui chunga in bawltu ang chu a nih. 25 Ruo a hung sùr a, vadung tui a hung lien a, thlî a hung hràng a, in chu a hung nam sok sok a, sienkhom a tlu nawh, lungpui chunga rem a ni tlat leiin. 26 Sienkhom, hieng ka thuhai hi hrea a taka zawm si lo chu mi invêt, phaiphin chunga in bawltu ang chu a nih. 27 Ruo a hung sùr a, vadung tui a hung lien a, thli a hung hràng a, chu in chu a hung nam sok sok a, a tlu sop ta ruop el a nih" a ta. 28 Isun chuong thu a hril zo chun mipuihaiin a thu inchûktir chu mak an ti hle a, 29 a san chu Dàn hretuhai ang ni loa thu nei taka anni a'n chùktir lei a nih.

Matthew 8

1 Tlânga inthoka a hung thlàk chun mipui tam takin an zui a. 2 Phâr pakhat a kuomah a hung a, bokkhupin chibai a bûk a, "Lalpa, i nuom chun i mi sukthieng thei" a ta. 3 Isu chun a hei ban a, a them a, "Nuom e, lo inthieng ta rawh" a ta, phâr chu a'n thieng ta nghal a. 4 Isun a kuomah, "Tu kuoma khom hril naw rawh, amiruokchu thiempu kuomah fe la, i dam ngei ti mihaiin an hrietna dingin Mosien thil inhlàn dinga a ti chu va'n hlàn rawh" a ta. 5 Kapernaum khuo a hung lùt chun a kuomah sipai zahotu a hung a, 6 "Lalpa, ka siehlawpa a zeng a, inah a zâl zing a, a na inrim hlè a nih" tiin thangpuina a hni a. 7 Isun a kuomah, "Hung ka ta, hung sukdam ka tih" a ta. 8 Sipai zahotu ruok chun, "Lalpa, ka in sùnga lût dinga ko tlâk che ka ni nawh, thu chauh hril la, ka siehlaw chu dam el a tih. 9 Kei khom mi thu hnuoia um ka na, ka hnuoiah sipai an um nawk sawng a, 'Fè rawh' ka ti chu an fe a, 'Hung rawh' ka ti chu an hung el a, ka siehlaw khomin 'Hi hi thaw rawh' ka ti chu a thaw el hlak" a ta. 10 Isun chu chu a hrietin mak a ti hle a, a zuituhai kuoma chun, "Thu dik ka hril cheu hi, Israel lai khom hieng lawma ringna nasa hi tu khom ka hmu nawh. 11 Ka hril cheu hi, sak le thlanga inthokin mi tam tak hung an ta, vàn rama chun Abraham hai, Isak hai, Jakob hai leh ruoi la kîl tlâng an tih. 12 Sienkhom, vàn ram khuo le tuia pieng ni sihaii ruok chu tuol inthimah hnot suok nîng an ta, chu taka chun tapin hâ rawt an tih" a ta. 13 Sipai zahotu kuoma chun Isun, "Fe ta la, i hni ang chun hung tlung a tih" a ta. Chuongchun, chu dârkâr ngei chun a siehlaw chu a dam ta a. 14 Peter ina Isu a hung lùt chun Peter tarpi, khawsika lo zâl chu a hmu a, 15 a kut a thempèk a, a khawsik chu a rè ta nghal a; a tho a, fâk rong a bawlpèk a. 16 Zàn tieng chun ramhuoi zawl tam tak an hung thuoi a, ramhuoihai chu thu pein a lo hnot suok a, damnaw hung po po hai chu a sukdam bok a. 17 Zawlnei Isaiin, "Ama chun ei hràt nawnahai a lâk a, Ei hrivoihai a phur"tia a ziek kha a hung tlung kimna ding a nih. 18 A kawl vèla um mipui tam tak a hmuin Isu chun Jordan ràl khing tieng kai dingin a zirtirhai chu thu a pêk a. 19 Dàn zirtirtu pakhat hi a kuomah a hung a, "Zirtirtu, i fèna taphotah zui ka ti che" a ta. 20 Isun a kuomah, "Sihalhan kuo an nei a, chunglèng vatehai khomin riebûk an nei a, Mihriem Naupa ruok hin chu lu nghatna a nei nawh" a ta. 21 Mi dang, a zirtirhai laia pakhat chun Isu kuomah, "Lalpa, ka pa la va vûi zet ka ti aw" a ta. 22 Isun ruok chun, "Mi zui rawh, mithi chun anni mithi chu lo invûi el raw hai se" a ta. 23 Chuongchun, longah a chuong a, a zirtirhaiin an zui a. 24 Inringna hman um loin dila chun thlipui na tak a hung hrâng thut a, tuifawn chu longah a'n vawr lùt hlup hlup el a, Isu ruok chu a in a. 25 Zirtirhai chun an va kei tho a, "Lalpa, mi sanhim rawh, kan pil hmang el ding an ta hi" an ta. 26 Isu chun an kuomah, "Ringna tlawmhai, ieng dinga chuong lawma chu in ti?" a ta. Chuongchun a tho a, thli le tuifawn chu a hal a, a rè ta thup a. 27 Mihai chun mak an ti hle a, "Hi pa hi mi ieng ang am an ta le? Thli le tuifawn chenin a thu an awi a ni hi!" an ta. 28 Ràl khinga Gadarinj mihai ram an va tlung chun, thlânmuola inthoka hung ramhuoi man pasal pahniin an hung pan a, an kol êm leiin chu lampui chu tu khomin an hraw ngam nawh. 29 Anni chun, "Pathien Naupa, kan chungah iem thaw i tum hrim hrim? Hun tiem a tlung hmaa mi soisa dingin i hung a ni maw?" tiin an lo khêk khum a. 30 Chu taka inthoka hla nawtea chun vok ruol an tla sup sup a. 31 Ramhuoihai chun, "I mi hnot suok chun vok ruol sûnga son mi'n lûttir rawh" tiin Isu an ngên a. 32 Isu chun an kuomah, "Va lût ro" a ta. Chuongchun, an hung suok a, vok ruol sûnga chun an lùt a, vok ruol chu dîl pang tênbarama chun an tlàn liem a, tuiah an tla hlum ta vong a. 33 Vok vêngtuhai chu khuo tieng an tlàn a, thil um dàn po po le ramhuoi manhai chunga thil tlung chu an va hril a. 34 Chuongchun, a khaw nawtin Isu hmu dingin an hung inthok suok a, ama an hmu chun an biel suoksan dingin an ngèn a.

Matthew 9

1 Isu chu longah a chuong a, dîl ràl a kâi a, a chèngna khuo a hung tlung chun, 2 mi thenkhatin zeng pakhat hi a zàlna puonpha pumin a kuomah an hung zawn a. An ringzie Isun a hmu chun zeng kuomah, "Ka naupa, lungmuong takin um rawh; i suolhai ngaidam a ni tah" a ta. 3 Chu phing leh Dàn zirtirtu thenkhathai chun lungrilin, "Hi pa hin Pathien a hrilsiet a nih" an ta. 4 An ngaituona chu Isun a hriet a, "Ieng dinga in lungrilin thil suol in ngaituo am a na? 5 'I suolhai ngaidam a ni tah' ti am 'Tho la, lawn rawh' ti hi a ieng am a olsam lem a? 6 Sienkhom, khawvela hin Mihriem Naupan suol a ngaidam thei ti inhriet theina dingin" a ta, zeng kuoma chun, "Tho la, i puonpha kha la la, inah fe ta rawh" a ta. 7 Chuongchun, chu pa chu a tho a, a in tieng a fe ta a. 8 Chu thil hmutu mipuihai chu maktinain an sip a, chuong ang thuneina mihriemhai kuoma petu Pathien chu an inpâk a. 9 Chu taka inthoka Isu a suok chun siekhonna hmuna inthung mi pakhat a hming Mathai a hmu a, "Mi zui rawh" a ta, ama chu a tho a, a zui ta nghal a. 10 Isu le a zirtirhaiin Mathai ina zànbu an kìl laiin sienkhontuhai le mi suolk tam takin an hung kìlpui ve a 11 Farisaihaiin chu chu an hmuin a zirtirhai kuomah, "Ieng leia in zirtirtu hin siekhontu le mi suolhai lai bu a fâk ve am a na?" an ta. 12 Chu chu a hrietin Isun, "Mi hriselhaiin daktor an mamaw naw a, mi borsawmhaiin a nih an mamaw lem. 13 Chuleiin, fe unla, 'Inthawina nêkin lunginsietna ka dit lem'l ti hi iem a umzie va'n chùk ro. Mi felhai lam dinga hung ni loin mi suolhai lam dinga hung ka ni lem" a ta. 14 Johan zirtirhai chu Isu kuomah an hung a, "Iem a ta, Farisaihai le keini rawi hin bu kan nghei a, i zirtirhai hin an nghei ve si nawh?" an ta. 15 Isun an kuomah, "Anni lai moneitu a um sùng chun mo lawma fielhai chun an sùnm ding am a ni? Moneitu chu an kuoma inthoka thuoi hmang ni la hung tlung a ta, chu pha chun bu la nghei vêng an tih. 16 "Tu khomin puon thar la rin mar loin puon hlui an phawk ngai nawh, a phawkna chun puon chu kei tawm a ta, inek nasa zuol a tih. 17 Uoiin thar khom savun peng hluiah an thun ngai nawh; an thun chun chu savun chu mor koi a ta, têng a ta, savun peng chu se vong a tih. Uoiin thar chu savun peng tharah an thun lem hlak, chuongchun him takin a um rèl hlak" a ta. 18 Chuong thu chu an kuoma a hril laiin, rorêltu pakhat a hung a, bokkhupin chibai a bûk a, " Tu el khan ka naunu a thi a, sienkhom hung la, a chungah kut innghat la, dam nawk el a tih" a ta. 19 Isu chu a tho a, a zirtirhai le chun ama chu an zui ta a. 20 Nuhmei pakhat, kum sawm pahni thi pûta damnaw hi a hnungah a hung a, a korfuol hmor a hung them a. 21 Chu nu chun a lungrilin "A korfuol hmor chauh khom them lang dam ka tih"a ta. 22 Isu chu a ngha kîr a, ama chu a hmu a, "Ka naunu, thlamuong takin um rawh; i ringnan a sukdam chê a nih" a ta. Chuongchun, nuhmei chu chu taka inthok chun a dam ta nghal a. 23 Isun hotupa in a va tlung chun theihle mût pawl le mipui so mur mur chu a hmu a, 24 "Lo inkieng ro. Naupang hi a thi nawh, a in a ni lem" a ta. Anni ruok chun an nuisan a. 25 Mipui chu tuolah an hnot suok vong hnungin inah a lût a, naupang kut chu a chel a, a hung tho tah a. 26 Chu thu chu a biel sùnga chun a'n thang suok a. 27 Chu taka inthok chun Isu chu a fe pei a, mitdel pahniin an zui a. "Davida naupa, mi lunginsiet rawh" tiin an khêk a. 28 In a lût chun mitdel pahnihai chu a kuomah an hung a, Isun an kuomah, " Hi hi ka thaw thei in ring am?" a ta. 29 Anni chun, "Ring e, Lalpa" an ta. Isun an mit chu a them a, "In ring angin in chungah hung tlung raw se" a ta. 30 Chuongchun, an mit chu a hung var tah a. Isun an kuomah, "Tu khom hril dêr naw ro" a ta. 31 Nisienlakhom anni chu an suok a, chu biel po poa chun a chanchin chu an hril dar tah a. 32 Chun, an fe suok lâi mêkin, ramhuoi zawl, tong thei lo pakhat hi, Isu kuomah an hung thuoi a. 33 Ramhuoi chu a hnot suok phing leh tong thei lo chu a hung tong thei ta a. Mipui chun mak an ti hle a, "Hieng ang thil hrim hi Israelhai lai hmu a la ni ngai nawh" an ta. 34 Farisaihai ruok chun, "Ramhuoi lal a ni leiin ramhuoihai a hnot suok hlak a nih" an ta. 35 Isu chun khaw lien le khaw têhai fangin, sunagoga hai Pathien ram Chanchin Tha hrilin a'n chùktir a, hri le natna chi hrang hrang invoihai chu a sukdam pei a. 36 Mipuihai chu vêngtu nei lo beram ruol anga santu nei lo le hnawtoma um an nih ti a hmuin a lunginsiet tawl êm êm a. 37 Chuongchun a zirtirhai kuomah, "Bu sîk ding a tam a, sinthawtu an tlawm si leiin, a loa bu sîktu ding sinthawtu tir dingin lo Neitupa hni ro" a ta. 38 (A um nawh)

Matthew 10

1 A zirtir sawmpahnihai chu a ko a, thlarau tirdakumhai hnot suok theina dinga thuneina le hri le natna chi hrang hranga nahai sukdam theina dinga thilthawtheina a pêk a. 2 Tirko sawmpahnihai hming chu: a hmasa takin Simon, Peter an ti le a unau Andri, Zebedai naupa Jakob le a unau Johan, 3 Filip le Bartholomai, Thoma le siekhontu Mathai, Alfai naupa Jakob le Thadai, 4 Kanan mi Simon le a'n mantirtu Juda Iskariot hai an nih. 5 Chuong sawmpahnihai chu Isun a tir suok a, hieng hin thu a pêk a: "Jentelhai lai fe naw unla, Samari mihai khuo sir bok naw ro; 6 beram inhmang Israelhai kuoma chun fe lem ro. 7 In inzinnaah, 'Vàn ram chu a hnâi tah' ti pei ro. 8 Damnawhai sukdam unla, mithihai kei tho unla, phârhai sukthieng unla, ramhuoihai hnot suok ro. A thlawnin in hmu a, a thlawnin pe ro. 9 In kawngchûnah rangkachak le tangkaruo le dâra siem tangka hrim hrim chûn sa naw unla; 10 in inzinnaah mansa amanih, zakuo inthlâkna ding amanih, pheikhok amanih, hmol amanih chawi bok naw ro; sinthawtu chu fâk hmu tlâk a ni si a. 11 "Khaw lien le khaw chîn in lûtna taphotah tlungna tlâk awm mi zong unla, a khuo in suoksan chenin chu taka chun tlung zing ro. 12 Ina in lùtin chibai bûk ro. 13 Chu ina chênghai chu chibai dong tlâk an ni chun in thlamuongna thun chu an chungah tlung raw se. 14 Mi tu khomin an lo lawm naw cheu a, in thu khom an lo ngàithlàk naw chun, chu ina inthok amanih, chu khuoa inthok amanih in suok hunah in kea pilvut chu thin thla ro. 15 Thu dik ka hril chêu hi, rorêl nia chun chu khaw tuor ding nêk chun Sodom le Gomora tuor chu zieum tak ni lem a tih. 16 "Satene ruol laia beram inlûttir ang elin nangni khom ka tir suok chêu a ni hi; chuleiin rûl anga var le vathu anga poi tawk loin um ro. 17 Mihai laka chun invêng fimkhur ro; Sanhedrin kutah inhlànin, sunagoga hai invuoktir an ti cheu. 18 Keima leiin hotuhai le lalhai hmaah, anni le Jentêlhaiin ka thu an hriet theina dingin, la thuoi an ti cheu. 19 Chuonga an man pha chêu chun ieng am in hril ding le in hril dàn ding thuah lungkham naw ro. In hril ding chu a hun takah inhriettir nîng in tih. 20 A hriltu chu nangni ni loin, nangni hmangin in Pa Thlarau chun a hril lem ding a ni si a. 21 "Chun, sukhlum dingin unaupa chun a unaupa inmantir a ta, pâ khomin a naupa inmantir a ta; nauhai khomin an nu le pahai do an ta, sukhlum an tih. 22 Ka hming leiin mi po po theida nîng in ta; a tawp chena ngîr nghettuo chu sandamin um a tih. 23 Hmun khatah an suknomna pha cheu hmun dangah tlànsan pei ro. Thu dik ka hril cheu hi, Mihriem Naupa hung hmain Israel khuohai sir suok hman naw ti niu. 24 "Inchûklai chu a zirtirtu chunga mi a ni naw ang bokin siehlaw khom a pu chunga mi a ni nawh. 25 Inchûklai chu a zirtirtu ang le siehlaw chu a pu ang a ni chu a ta dingin a huntawk. In neitupa hman hi Belzebub an mi ti si chun a sûngkuohai lem chu an va hril siet nasa zuol ding de aw! 26 "Chuleiin, anni chu ti naw ro. Inlang lo dinga thup ieng khom a um naw a, hriet lo dinga ip ieng khom a um bok nawh. 27 Thimthama ka hril cheu hi khaw varah hril ro; biekrûka ka hril cheu hi in chung sîpa inthokin tlâng insampui ro. 28 Taksa sukhlum thei, sienkhom thlarau sukhlum thei si lohai chu tì naw unla, hremhmuna thlarau le taksa sukbohmang theitupa ruok chu tì hle ro. 29 Chongzong pahni poisa khatinp an zor hlak an naw maw? Nisienlakhom, anni laia pakhat khom in Pa thu loin hnuoiah tla naw nih. 30 In sam zâi chen hin inchik vong a nih in sonnaw. 31 Chuleiin, ti naw ro, chongzong tam tak nêkin in hlu lem si a. 32 "Chuongchun, mihai hmaa mi tan taphot chu kei khomin ka Pa vàna mi hmaah tan vèng ka tih. 33 Tu khom mihai hmaa mi'n phattu ruok chu kei khomin ka Pa vàna mi hmaah inphat vèng ka tih. 34 Hnuoia hin inremna inlèngtir dinga hung ka nih sawn naw ro; inremna inlèngtir ding ni loin, kawlhnâm inlèngtir dinga hung ka ni lem. 35 Naupa chu a pa indotir ding dâm, naunu chu a nu indotir ding dâm, mo chu a tarpi indotir ding dàma hung ka ni lem. 36 Miin a hmêlma chu ama sûngkuo laia mi ngei nîng a tih. 37 Tu khom mani nu amanih, pa amanih keima nêka hmangai lemtu chu ka mi ni tlâk a ni nawh. Tu khom keima nêka mani naupa hmangai lem chu ka mi ni tlâk a ni nawh. 38 Tu khom mani kraws puta mi zuitu naw chu ka mi ni tlâk a ni nawh. 39 Tu khom mani nun hum tum chun chân a ta, keima leia nun chânhai chun hum an tih. 40 "Tu khom a lawmtu cheu chu keima mi lawm an nih; tu khom mi lawmtu chu mi tirtu lawm an nih. 41 Zawlnei chu zawlnei a nìna leia lawm taphot chun zawlnei lawmman hmûng an tih; mi fel chu mi fel a nìna leia lawm taphot chun mi fel lawmman hmûng an tih. 42 Thu dik tak ka hril cheu hi, hieng mi chîn tak laia mi tu khom ka zirtir a ni leia tuisik no khat lo petu chun a lawmman ding chu chân naw top a tih" a ta.

Matthew 11

1 Zirtir sawmpahnihai kuoma thu a pêk zoin Isu chu chu taka inthok chun a suok a, Galili ram khuoahai thu hril le inchûktir dingin a fe a. 2 Krista thilthawhai chanchin Johanin lung ina inthoka a lo hriet chun, 3 "A hung ding chu i ni am, annawleh mi dang kan la nghàk ding?" tia indon dingin a zirtirhai chu Isu kuomah a tir a. 4 Isun anni chu a lo don a, "Kîr nawk unla, in thil hriet le hmuhai hi Johan kuomah va hril ro. 5 Mitdelhai mit a var a, kebaihai ke a'n bài ta naw a, phârhai sukthiengin an um a, nasêthai na a var a, mithihai keithoin an um a, riengvaihai kuomah Chanchin Tha hril a ni bok. 6 Tu khom keima laka beidong lo chu a hamtha" a ta. 7 Johan zirtirhai an fe phing leh Isun mipuihai kuomah Johan chanchin a hril a. "Ieng en dingin am thlalèra khan in fe a? Thliin luong a mut hnìng maw? 8 An naw leh, ieng hmu dingin am in fe? Puon nêm sila inchei maw? Ni lo e, puon nêm sila incheihai chu lal inah annawm an um hlak. 9 Anleh ieng en dinga fe rêng rèng am in na? Zawlnei en dingin maw? A ni rèng, ka hril cheu hi, zawlnei nêka ropui lem tie! Ama chanchin hi annawm hienga an lo ziek: 10 'Ngai ta, ka tirko, I hmaah ka tir a; Ama chun i hmaah, I lampui buotsai a tih' tiin. 11 Thu dik ka hril cheu hi, nuhmei sûla inthoka insieng lai Baptistu Johan nêka ropui lem an la suok ngai nawh; nisienlakhom, vàn rama mi chîn tak khom ama nêkin an ropui lem. 12 Baptistu Johan a hunga inthok tu chen hin vàn ram chu an baw huoi huoi a, a nor hràthai chun an pawng lâk hrim a nih. 13 Johan a hung inlang chen khan Dàn thu le zawlnei po poin chu chu an lo hril lawk a ni kha. 14 In ring nuom a ni chun, ama hi zawlnei hung dinga hril tah Elija chu a nih. 15 Ngàithlàkna dinga na nei chun ngâithla ngun raw se. 16 "Tu lai ruoltharhai hi ieng le'm hrilkhîng ka ta? Dawr hmuna thung naupang ruol inkhêktuo a, 17 'Theihlê kan mùtpèk cheu a, In làm nuom si naw a; Lusûn hla kan sak hlakin, In tap nuom chuong bok si nawh'tihai ang hi in nih. 18 "Johan chu a hung a, fain a dawn naw a, 'Ramhuoi zawl a nih' in ti a. 19 Mihriem Naupa a hung a, fain a dawn a, "En ta u, mi virkawngpa, uoiin hè mi, siekhontu le mi suolhai ruolpa saw' in ti nawk si a. Nisienlakhom, Pathien varna chu a thilthawah a'n lang hlak" a ta. 20 Chun, thilmak a thaw tamna tak khuohai chu an sim chuong si naw leiin Isun a hal a. 21 "Nang Korazin, i chung a pik. Nang Bethsaida, i chung a pik. Nangni laia thilmak ka thawhai kha Tura le Sidona thaw ni sien chu saiip sila vuta inbuolin sim tàng an tih. 22 Chuleiin, ka hril cheu hi, rorêlna nia in tuor ding nèk chun Tura le Sidon tuor ding chu zie-um lem dai a tih. 23 Kapernaum, nang khom vàn chena chawi sàng i ni ding am a ni? Teu lo e! Mithi khaw chena tla thla ding i nih. Nangmaa thilmak thaw tahai po po kha Sodoma thaw ni sien chu, tu chen hin la um zing a tih. 24 Chuleiin ka hril che hi, rorêlna nia i tuor ding nêk chun Sodom tuor ding chu zie-um lem dai a tih" a ta. 25 Chu lai chun Isun hieng hin a hril a: "Aw Pa, hnuoi le vàna Lalpa, nangin mi var le mi thiemhai lakah hieng thu hi i thup a, naupangtehai kuomah i puong leiin ka'n pàk che. 26 A nih, Pa, chuong chu tha i tizawng tak a nih. 27 Ka Pain iengkim a mi'n koltir tah; Pa chauh naw chun tu khomin Naupa hi an hriet nawh; Pa khom Naupa le a kuoma Naupain a puong nuomnahai chauh naw chun tu khomin an hriet nawh. 28 "Nangni rimtong le rikphur po po hai, ka kuomah hung unla, keiin sawldamna pêng ka ti cheu. 29 Ka ringkol bât unla, ka kuomah inchûk ro; mi zàidam le lungrila inngaitlawm tak ka ni si a, chuongchun in thlarau ta dingin sawldamna hmung in tih. 30 Ka ringkol a hàdam a, ka phur khom a zâng a nih" a ta.

Matthew 12

1 Chuong lai chun Sabat niin Isun huit bil a hraw tlang a, a zirtirhai phingtâmin huit vùihai chu thliekin an fàk a. 2 Chu chu Farisaihaiin an hmuin, " En ta, i zirtirhaiin Sabat nia thaw thieng lo an thaw hih" an ta. 3 Ama ruok chun an kuomah, "A ruolhai leh an tâmsawl tuma Davida thilthaw kha in tiem naw'm a ni? 4 Pathien inah a lût a, ama le a ruolhai fàk thieng lo, thiempuhai chauh fàk thieng, hlànbei a fâk thu kha? 5 An leh, Sabat niin tempula thiempuhaiin sabat an sukporche a, sienkhom poi an tawk nawh ti thu khom kha Dàn buah in tiem naw maw? 6 Ka hril chêu hi, tempul nêka ropui lem hi taka hin a um. 7 'Inthawina nêkin lunginsietna ka thlang lem' ti thu umzie hi hrie ni unla chu, mi poi hril lohai hi thiem naw in inchangtir naw ding bah. 8 Mihriem Naupa hi Sabat Lalpa a ni si a" a ta. 9 Chu taka inthok chun a suok a, Sunagog-ah a lût a. 10 Chu hmuna chun mi pakhat kut zeng hi a lo um a. Isu an hêk theina remchang zongin, "Sabat nia sukdam a thieng am?" tiin an lo indon a. 11 Isu chun an kuomah, "Nangni lai tu khomin beram pakhat nei unla, Sabat niin khurah tla ta sien, tuin am la suok nawng in ta? 12 Beram nêk chun mihriem chu a va hlu lem de! Chuleiin, Sabat nia thil tha thaw a thieng" a ta. 13 Chuongchun, zeng kuoma chun, "I kut phar rawh" a ta, a hang phar a, a kut khing tieng angin a dam ta var a. 14 Chuongchun, Farisaihai chu an suok a, Isu sukhlum thei dàn ding phierin an inrawn khawm a. 15 Chuong thu chu a hrietin chu hmun chu Isun a suoksan a. Mi tam takin ama chu an zui a, an natnahai a lo sukdam tawl a. 16 Ama chu tu am ani ti hril lo dingin anni chu a ti tlat a, 17 zawlnei Isai hmanga a chanchin hrila um chu a hung tlung kim theina dingin: 18 "A hi a nih ka siehlaw thlang, Ka hmangai le ka lawm êm êm chu; A chungah ka Thlarau sieng ka ta, Jentêlhai chungah rorêlna puong a ta, 19 Kalin ràu khêk tawl naw ni a, Kotthlêrah tu khomin a rawl hre nawng an tih; 20 Hnèna changa ro a rèl hmâ khat chun, Luong por chu kei tan nawng a ta, Mise ûtq khom sukmit naw nih; 21 A hming chu Jentelhai beiseiInnghatna tak nîng a tih"ti hi. 22 Chuong lai chun ramhuoi man pasal pakhat, mit indel le tong thei bok lo chu Isu kuomah an hung thuoi a, a lo sukdam a, a hung tong suok a, a hmu thei ta nghal bok a. 23 Mipui chun mak an ti hle a, "Hi pa hi Davida Naupa a ni thei el naw maw?" an ti tawl a. 24 Farisaihaiin chu chu an hrietin, "Hi pa hin ramhuoihai lal Belzebub leiin ramhuoihai a hnot suok a nih" an ta. 25 Isun an ngaituona a lo hriet a, an kuomah, "Khaw lai ram khom mani le mani indo chu an ram hlak; khaw lai khuo le insûng khom mani le mani indo taphot chu an ngìr suok ngai nawh. 26 Setanin Setan bok a hnot suok chun anni le anni an indo nîng a ta, a ram chu ieng tin am ngîr suok a ta? 27 Belzebub leia ramhuoi ka hnot suok a ni chun, in mihair khan tu leiin am ramhuoi an hnot suok hlak a? Anni kha a'n sonnaw thiem naw inchangtirtu ding chêu chu. 28 Nisienlakhom, Pathien Thlarau leia ramhuoihai hnot suok ka ni si chun in kuomah Pathien ram chu a hung tah tìna a nih. 29 An naw leh, miin mi hrât chu a khuop hmasa zet naw chun, ieng tin am a inah hlù khumin a sumhai làkpêk thei a ta? A khuop hnung ruok chun a in chu rok thei tâng a tih. 30 Keima tienga thang naw taphot chun a mi do a na, a mi lakhawmpuitu naw chun a sukdar a nih. 31 "Chuleiin, ka hril cheu hi, mihai suolna po po le Pathien an hrilsietna po po chu ngaidam nîng an ta, Thlarau Thienghlim hrilsetu ruok chu ngaidam ni naw nih. 32 Tu khom Mihriem Naupa soiseltu chu ngaidam nîng a ta, Thlarau Thienghlim soiseltu ruok chu tuta dam sùnga khom, hun la hung dinga khom, ngaidam ni naw nih. 33 " 'Thing tha i phun chun a ra thàng a ta, thing sie i phun chun a ra sieng a tih; thing chu a raah a'n hriet' in ti hlak si a. 34 Rûl thlahai, nangnin suol nei zingin iengtin am thil tha in hril thei ding? Lungrila sip liem hi a nih bauin a sâk suok hlak. 35 Mi tha chun a lungril robawm thaa inthokin thil tha a phor suok hlak a; mi rilo ruok chun rîtlona a khawl khawmhai chu a phor suok hlak. 36 Ka hril cheu hi, thu hmang lo hril taphot chun rorêlna niah a maw an la phur ding a nih. 37 I bàu suok thuin thiem inchangtir a ti che a, i bàu suok thu bokin thiem naw inchangtir a ti che" a ta. 38 Chu zoah Dàn hretuhai le Farisaihai laia thenkhat chun a kuomah, "Zirtirtu, nangmaa inthokin inchikna thilmak hmu kan nuom" an ta. 39 Isun a don a, "Tu lai ruolthar, suol tak le uire hmang tak hai hin inchikna thilmak an zong a, nisienlakhom zawlnei Jona inchikna chauh naw kha chu inchikna thilmak hrim inentir ni naw ni hai. 40 Ni thum le zàn thum ngapui phìng sûngah Jona a um ang khan Mihriem Naupa khom hi ni thum le zàn thum hnuoi sùngah a um vè ding a nih. 41 Ninevi mihai chu rorêlna nia chun tu lai ruoltharhai leh hin ngîr tlâng an ta, thiem naw inchangtir an tih; Jona thu hril leiin an sim si a. Ngai ta, Jona nêka ropui lem hi taka hin a um. 42 Sim tieng lalnu kha rorêlna nia chun tu lai ruoltharhai ruol hin ngîr vèng a ta, thiem naw inchangtir a tih; Solomon varna ngaithla ding hmanin kawlkila inthokin a hung si a; ngai ta u, Solomon nèka ropui lem hi taka hin a um. 43 "Thlarau tirdakum chu mi sûnga inthoka a suokin chawl hadamna ding zongin ram tawla hai a'n vâk a'n vâk a, a hmu zo naw a. 44 Chuongchun, 'Ka in, ka suoksan ta hnunga khan kîr nawk el ka tih' a ta, a va tlung chun hluo lo, phît fai le hre fel diemin a va hmu a. 45 Chuongchun a fe a, ama nêka suol ngot thlarau dang pasari a hung thuoi a, an lût a, chu taka chun umhmun an khuor tah a. Chu pa ngîrhmun chu a hmaa nèkin a hung se ta lem dai a nih. Chuong ang bokin, tu lai ruolthar, mi suol takhai chunga hin la um a tih" a ta. 46 Mipuihai kuoma Isun thu a hril lai chun biek nuomin a nu le a unauhai chu tuolah an ngìr a. 47 Mi pakhatin a kuomah, "I nu le i unauhaiin biek an nuom che a, tuola son an nghàk che" tiin a va hril a. 48 Ama ruok chun, "Ka nu chu tu am a na? Ka unauhai chu tuhai am an na?" a ta. 49 A zirtirhai tieng chu kuta kawkin, "En ta u, ka nu le ka unauhai hi: tu khom ka Pa vàna mi ditzawng thawtu chu ka unau, ka farnu, ka nu an nih" a ta. 50 (A um nawh)

Matthew 13

1 Chu ní chun Isu chu ina inthokin a suok a, dîl kamah a thung a. 2 Mipui tam tak a kuomah an hung a; chuongchun longah a chuong a, a thung a, mipui chu tieuphoah an ngìr a. 3 Tekhinthu hmangin an kuomah thu tam tak a hril a: "Ngai ta u, bu chi thètu chu bu chi thè dingin a fe a. 4 A hang thè chun a then lampuiah a tla a, vatêin an tlàn zo a. 5 A then pielthlèng chung, hnuoi inphànah a tla a, pil a sà naw leiin a hung to nghal a. 6 Sienkhom nisa a hung insàng a, a em vuoi a, zung a thlâk naw leiin a hung rop a. 7 A then chu hling buk lai a tla a, hling an hung inthang a, an dîp hmang a. 8 A then ruok chu hnuoi thaah a tla a, a lêt za dâm, a lêt sawmruk dâm, a lêt sawmthum dâmin a hung ra a. 9 Ngaithlàkna dinga na nei chun ngaithla ngun raw se" a ta. 10 Zirtirhai chu a kuomah an hung a, "Ieng dinga mipuihai kuomah tekhinthu hmangin i hril hlak am a na?" an ta. 11 Ama chun, "Vàn ram thu ril chu nangni hriet dinga ti a na, anni hriet dinga ti a ni vè nawh. 12 Tu khom a nei chu pe belsàng an ta, hung hau nawk zuol a ta; a nei naw chu a nei sun khom làkpêk an tih. 13 Chuong lei chun an kuomah tekhinthuin ka hril a nih, hmu zing sia hmu ngai loa, ngaithla zing sia hre ngai loa an umna ding le an hriet thiem bok nawna dingin. 14 Isai hrillawkna kha anni chungah a hung tlung tah a ni hi: 15 Hi mihai lungril hi a chawlol zo tah a, An na an suksêt zo a, An mit an insîm bok a. Chuong ni naw sien chu, An mitin hmûng an ta, An nain hrieng an ta, An lungrila man fuin kîr an ta, Anni ka lo sukdam ding a ni si a'a lo ti ang khan. 16 "Nangni mit ruok chu a vàngnei ie, in hmu hlak leiin; in na khom a vàngnei ie, in ngaithlàk leiin. 17 Thu dik ka hril cheu hi, zawlneihai le mi fel tam tak khomin in thil hmuhai hi hmu ve an chàk hlak a, an hmu phâk si nawh; in thu hriethai khom hi hriet ve an inhawk a, an hriet phâk si nawh. 18 "Bu chi thètu tekhinthu umzie chu ngaithla ro. 19 Tu khomin Pathien ram thu chu a ngaithlàk a, a hriet thiem si naw chun, mi suol chu a hung a, a lungrila thè sa chu a hung làk hmangpèk hlak a. Chuong mihai chu lam laia tlahai ang chu an nih. 20 Chun, pielthlèng hmuna tla chu, thu ngaithla a, lawm taka pom nghaltu ang hi a nih. 21 Sienkhom zung a nei naw a, sawtnawte chauh a dai a, thu leia suknomnatna amanih a hung um pha leh a tlu nawk nghàl hlak. 22 Hling buk laia tla chu, thu chu ngaithla a, sienkhom a thu dong chu khawvel lungkhamna le hausakna tienga hìpnain an dîp ral leia ra insuo ta lo ang chu a nih. 23 Hnuoi thaa tla chu, thu chu ngaithlaa hre thiem mi chu a nih; ama chu a lêt za dâm, a lêt sawmruk dâm, a lêt sawmthum dâmin a rà hlak" a ta. 24 Tekhinthu dang an kuomah a hril nawk a. "Vàn ram chu mi, a loa chi tha thètu ang chu a nih. 25 Nisienlakhom, zànah mi an in vong laiin a hmêlma a hung a, bu lai chun bu tehlèm a the a, a fe hmang tah a. 26 Bu chu a hung mawng a, a hung vui chun bu tehlèm chu a hung inlang ve tah a. 27 Siehlawhai chu loneitu kuoma chun an hung a, 'Pu, i loah bu chi tha ngot i thè an naw maw? Bu tehlèm saw khaw laia inthoka hung suok am a na?' an ta. 28 Ama chun, 'Hmêlmain an lo thè a ni chu" a ta. Siehlawhai chun, "Chuong an leh, va phawi vong inlang tha i ti naw maw?' an ta 29 Ama ruok chun, 'Ti lo e, bu tehlèm in phawinaah bu tak phawi sa palh rawi in tih. 30 Bu sîk chenin um tlâng raw hai se. Bu sîk pha leh a sîktuhai kawlah: Bu tehlèmhais chu lawr khawm hmasa zet unla, raw dingin intêl ro; chu zoah bu tak chu ka bu inah sêk lùt ro, tiin hril ka tih' a ti a" a ta. 31 Tekhinthu dang a hril nawk a. "Vàn ram chu antam chi miin a lâk a, a loa a thè ang hi a nih. 32 Thlài chi laia chîn tak ni sienkhom a hung inthang lien chun thlài danghai nèkin a hung lien a, thing a hung ni a, chuongchun chunglèng vatehai an hung a, a zâra hai an riek hlak" a ta. 33 Tekhinthu dang a hril nawk a. "Vàn ram chu nuhmeiin chol a làk a, beiphit tekhawng thum, bei dinga a hmet hnâk chu a rênga chie tho vong dinga a phul ang hi a nih" a ta. 34 Chuong po po chu tekhinthu hmangin Isun mipui kuomah a hril a, tekhinthu hmang loin an kuomah ieng khom a hril nawh. 35 Zawlnei Isai hmanga hrila um chu a hung tlung kim tah a nih:" Tekhinthuin ka bàu phong ka ta, Leihnuoi insieng tira inthoka thu inthup chu, Puong suok ka tih". 36 Chuongchun, mipuihai chu a fesan a, inah a lût a, a zirtirhai a kuomah an hung a, "Loa bu tehlèm tekhinthu kha mi hrilfie rawh" an ta. 37 Ama chun a don a, "Chi tha thetu chu Mihriem Naupa hi a na; lo chu khawvel hi a nih. 38 Chi tha chu Ram nauhai an na, bu tehlèm ruok chu mi suol nauhai an nih. 39 Bu tehlèm thètu hmêlma chu Diebol a nih. Bu sîk chu khawvel tawp hunt ding a na, bu sîktuhai chu vàntirkohai an nih. 40 Bu tehlèmhai chu la khawm a, meia an raw angin khawvel tawp pha chun la um a tih. 41 Mihriem Naupa hin vàntirkohai tir suok a ta, suol inthawtirtu le thil suol thawtuhai po po chu a rama inthokin la suok vong an ta, 42 rawtuina meiah pei an ta, chu taka chun tapin hâ rawt an tih. 43 Chu huna chun mi felhai chu an Pa ramah nisa angin var tâng an tih. Ngaithlàkna dinga na nei chun ngaithla ngun raw se. 44 "Vàn ram chu loa ro phùm rûk, chu chu miin a hmu a, a vur nawk a, lawm takin a fe a, a nei po po a zor a, chu lo chu an chawk tah ang hi a nih. 45 "Chuong ang bokin, vàn ram chu sumdawngtuin tuikeplung hlu tak a zong a, 46 chu tuikeplung hlu tak chu a hmu phing leh a fe a, a nei po po a zor a, an chawk tah ang hi a nih. 47 "Vàn ram chu lèn khang, tuipuiah kei a, nga chi tinrêng an fun khawmna ang chu a ni bok. 48 Lèn chu a sip pha leh nga mantuhai chun va kamah an hnûk suok a, an inthung a, a tha po bawmah an sie khawm a, a sie ruok chu an pei a. 49 Khawvel tawp pha khom chuong ang bok chun la um a tih. Vàntirkohai hung an ta, mi fel laia inzep mi suolhai chu hung thlier an ta, 50 rawtuina meiah pei an ta, chu taka chun tapin hâ rawt an tih". 51 Isun an kuomah "Chuong po po chu in hriet thiem am?" a ta. Anni chun "Hre thiem e" an ta. 52 Ama chun, "Chuleiin, Dàn hretu le zirtirtu, vàn ram thu inchûktu taphot chu in neitu, a robawma inthoka rothil hlui le thar hung phor suoktu ang hi a nih" a ta. 53 Chuong tekhinthuhai chu Isun a hril zoin chu hmuna inthok chun a suok a. 54 An khuo a hung tlung a, sunagogah mihai a'n chûktir a, mak an ti hle a. "Hi pa hin varna le hieng thilmak thawtheina hi khaw laia inthoka a hmu am nîng a ta? 55 Hi pa hi mistiri naupa kha a ni naw maw? A nu khom Mari an ti kha a ni nawm a ni? A unauhai khom Jakob hai, Josefa hai, Simon hai, Juda hai kha an ni nawm a ni? 56 A farnuhai khom eini lai an um vong an nawm a ni? Hieng po po hi khaw laia inthoka a hriet am nîng a ta?" an ta. 57 Ama chu an hmu thiem ta naw a. Isun an kuomah, "Zawlnei chun ama khuo tieng le a sûnghai lai ti chauh naw chu hmun tinah chawimawi a hlaw hlak" a tìsan a. 58 An ring naw leiin chu taka chun thilmak a thaw tam nawh.

Matthew 14

1 Chuong lai chun lal Herodan Isu chanchin a lo hriet a, 2 a siehlawhai kuomah, "Ama chu Baptistu Johan kha a ni chu; mithi laia inthokin a tho nawk a ni chu tie! Chuleiin, chuong thilthawtheina chu amaah a thok a ni chu" a ta. 3 Heroda chun a unaupa Filip nuhmei Herodi leiin Johan chu a man a, a khuop a, lung inah a khum a; 4 a san chu Johanin, "Herodi i nei hi a thieng nawh" a tìpèk lei a nih. 5 Heroda chun Johan chu sukhlum a nuom a, sienkhom mipuiin ama chu zawlneia an ngai leiin mipui chu a ti si a. 6 Heroda piengcham lawmnaah Herodi naunu a hung làm a, Heroda chu a suklawm êm leiin, 7 a hnì taphot pe dingin thu a'n khâm a. 8 Ama chun a nu infui angin, "Thlèngah, tu hin Baptistu Johan lu mi pe rawh" a ta. 9 Heroda chu a lungzîng hle a, sienkhom a thu tiem lei le a ruoi kîlpuituhai lei chun Johan lu chu pe dingin thu a pêk a. 10 Chuongchun, mi a tir a, lung ina um Johan lu chu a va'n tantir a, 11 a lu chu thlèngin an hung dom a, nunghàk chu an pêk a, ama chun a nu kuomah a fepui a. 12 Chun, Johan zirtirhai chun a ruong chu an inhlawm a, an phûm a, Isu khom an hung hril a. 13 Isun a lo hrietin chutaka inthok chun longin hmun fienriel panin ama chauhin a'n tawl hmang a. Mipuiin an hriet chun an khuohaia inthok chun kein an zui a. 14 Longa inthoka va kam a kai chun mipui tam tak a hmu a, a lunginsiet tawl êm êm a, damnawhai chu a sukdam a. 15 Zàn tieng a hung ni chun a zirtirhai chu a kuomah an hung a, "Hi hi hmun thlalèr a na, khuo a'n hnu ta hlè si a, khuoa hai fea an fàk ding an inchawk theina dingin mipui hi infetir rawh" an ta. 16 Isu ruok chun, "An fe hmang a ngai nawh, nangnin fàk ding pe lem ro" a ta. 17 Anni chun, "Hi taka hin bei phêk nga le ngate pahni chauh naw chu ieng khom kan nei nawh" an ta. 18 Ama chun, "Ka kuomah hung chawi ro" a ta. 19 Hlobet chunga inthung dingin mipui chu thu a pêk a, bei phêk nga le ngate pahni chu a lâk a, vàn tieng nghain mal a sawm a, a khoi a, a zirtirhai a pèk a, zirtirhai chun mipui kuomah an sem a. 20 An rêngin an fàk a, an khop seng a, an fàk mahla nawi an rùt khawm chu bawm sawmpahni sip a nih. 21 A fatuhai chu, nuhmei le naupang tiem loin, patling ngot khom sângnga lai an nih. 22 Mipui a'n tìntir sûngin ràl khing tieng lo kai hmasa dingin a zirtirhai chu longin a'n fetir a. 23 Mipui an tîntir zo chun ama chu tongtai dingin tlângah a fe hrang a, zàn tieng a hung ni chun ama khât chauh a ni tah a. 24 Long chu va kama inthoka hla tak a tlung tah a, thliin a naw zawnga a nor leiin, tuifawnin a tawm lêng a tawm lêng a. 25 Khawfingchat tawmin dil chungah anni tieng panin a hung lawn a. 26 Zirtirhaiin dil chunga lawn an hmu chun "Phûng a ni saw" an ta, thlaphângin an khêk chûl a. 27 Nisienlakhom, Isun anni chu a biek nghal a, "Thlaphâng naw ro. Kei ka nih annawm. Ti naw ro" a ta. 28 Peter chun a don a, "Lalpa, nang i ni chun, tui chunga i kuoma hung thu mi pe rawh" a ta. 29 Isu chun, "Hung ta la" a ta. Peter chu longa inthokin a suok a, Isu panin tui chunga chun kein a lawn a. 30 Nisienlakhom, thli hrâng chu a hmuin a ti a, a pil tan ta a, "Lalpa, mi san rawh" tiin a khêk a. 31 Isun a hei ban nghal a, a chel a, a kuomah "Nang, ringna tlawm, ieng dinga i ringhlel am a na?" a ta. 32 Longa an lùt chun thli chu a rè tah a. 33 Longa umhai chun, "Pathien Naupa i lo ni takzet hi" tia bokkhupin an chawibiek a. 34 Dîl an kàn chun Genesaret ramah an kai a. 35 Chu hmuna mihaiin Isu a nih ti an hriet chun an sè vèl ram po poah mi an tir a, damnaw po po a kuomah an hung thuoi a; 36 a puon hmor chauh khom them an ngên a, a them taphot an dam pei a.

Matthew 15

1 Chuong lai chun Jerusalema inthokin Farisaihai le Dàn hretuhai chu Isu kuomah an hung a, 2 "Ieng leia i zirtirhaiin upahai thurosie an bawsiet hlak am a na? Bu an fàk hmain kut an sawp ngai nawh" an ta. 3 Isun a don a, "Nangni khomin in pipu thurosie leiin ieng dinga Pathien thupêk in bawsiet? 4 Pathien thupêk chun, 'I nû le pâ chawimawi rawh; mani nu le pa tong sie inphurtu chu sukhlum ngei ding a nih' a ta 5 Nangni ruok chun, 'Tu khom a nu amanih a pa amanih kuomah, ka thâ i sor ding po po chu Pathien ta dinga pèk a ni tah titu chun a nu le pa a chawimawi a ngai ta nawh' in ti hlak. 6 Chuongchun, in thurosie lei hin Pathien thu chu iengma loah in inchangtir a ni hi. 7 Lêmderhai, Isaiin in chungthu a lo hril indik ngot el: 8 'Hienghai rawi hin bàuin an mi'n pàk a, An lungril ruok chun an mi hlat hle si; 9 Thuring dingin mihriem thu an inchûktir a, An mi chawibiek khom hi a thlawn el a nih'ti hi" a ta. 10 Isun mipuihai chu a ko a, an kuomah, "Ngaithla unla, hre fie ro. 11 Bàua lûtin mihriem a sukporche naw a, bàua inthoka suokin, chu ngei chun a nih mihriem a sukporchè lem hlak" a ta. 12 Chuong lai chun a zirtirhai chu a kuomah an hung a, "I thu hril khan Farisaihai nàk a kal hle ti i hriet am?" an ta. 13 Isu ruok chun, "Ka Pa vàna miin a phun naw chu ieng kûng khom a zung puma phawi vong nîng a tih. 14 Anni rawi hi ûksak naw ro, thuoitu mitdel an nih. Mitdelin mitdel bok a thuoi chun khurah tla rêl an tih" a ta. 15 Peterin a kuomah, "Tekhinthu kha mi hrilfie tawl ta la" a ta. 16 Ama chun, "Nangni khom chuong khop chun in lo chawlol ve a ni maw? 17 Bàua lût taphot chu phìngah a lût thla a, inhnawm pha a suok nawk vong hlak an naw maw? 18 Bàua inthoka suok ruok chu lungrila inthoka hung suok a na, chu ngei chun mihriem a sukporchè a nih. 19 Lungrila inthoka suok chu ngaituona suol dâm, tuolthatna dâm, uirètna dâm, inngaina suol dâm, rûkrùkna dâm, khêla inhêkna dâm le Pathien hrilsietna dâm hi a nih. 20 Chuonghai chu mihriem sukporchètu an na, kut sawp loa bu fâk ruok hin chu mi a sukporchè nawh" a ta. 21 Chu hmun chu màksanin Isu chu Tura le Sidon bielah a fe a. 22 Chu lai ma chun a ram mi Kanan nuhmei pakhat hi a kuomah a hung a, "Lalpa, Davida Naupa, ramhuoiin ka naunu inrim takin a soisak a, mi lunginsiet hràm rawh" tiin a khêk a. 23 Isu ruok chun bàu khat khomin a don nawh. A zirtirhai chun, "Ei hnungah a khêk a khêk el si a, tir hmang el rawh" tiin an ngèn a. 24 Ama chun, "Israel hnam, beram inhmanghai laia chauh tir ka nih" a ta. 25 Sienkhom nuhmei chun a hung hnai a, a hmaah dingthathuonin, "Lalpa, mi thangpui rawh" tiin a ngèn a. 26 Isu chun, "Nauhai bei làkpêk a, uihai kuoma pèk chu thil awm a ni nawh" a ta. 27 Nuhmei chun, "Ni e, Lalpa, sienkhom uihai khomin an puhai dawkàna bei nawi tla chu an fàk hlak tho annawm" a ta. 28 Chu phing leh Isun, " Nuhmei, i ringna hi a nasa êm a, i dit ang takin i chungah tlung raw se" a ta. Chuongchun, a naunu chu, chu darkar lá là chun a hung dam ta a. 29 Chu taka inthoka Isu a suok chun Galili dil kam hrûtin a fe a; chun, tlângah a kai a, a'n thung a. 30 Mipui tam tak a kuomah an hung a, kebai hai, mitdel hai, piengsuol hai, tong thei naw hai le mi dang tam tak an hung thuoihai chu a ke bulah an sie a, ama chun a lo sukdam tawl a. 31 Tong thei nawhai tong thei a, piengsuolhai hung tha a, kebaihai lawn a, mitdelhai mit a varzie hmutu mipui chun mak an ti êm êm a, chuongchun Israel Pathien chu an inpàk a. 32 Isun a zirtirhai chu a ko a, "Mipuihai hi ka lunginsiet èm êm a, ka kuomah ni thum zet an um tah a, fàk ding ieng khom an nei si naw a, lampuiah tâmsawl el thei an ni leiin phingtâma inlawitir ka nuom nawh" a ta. 33 Zirtirhai chun, "Mipui hieng zozai hraina khop hieng ang hmun thlalèra hin khaw lai am bei hmu tâng ei ta?" an ta. 34 Isun, "Bei phèk ieng zât am in nei a?" a ta. Anni chun, "Phêk sari le ngate tlawmte leh" an ta. 35 Isun mipuihai chu hnuoia inthung dingin thu a pêk a, 36 bei phêk sari le ngate chu a lâk a, mal a sawm zoin a khoi a, zirtirhai a pêk a, zirtirhai chun mipui lai an sem a. 37 An rêngin tlai takin an fàk a, an fàk mahla zirtirhaiin an rùt khawm chu bawm sari sip a nih. 38 A fatuhai chu nuhmei le naupang tiem loin patling ngot khom sângli an nih. 39 Isun mipuihai a'n tîntir hnung chun longah a chuong a, Magadanu bielah a fe tah a.

Matthew 16

1 Farisaihai le Sadukaihai chu Isu kuomah an hung a, ama fiena dingin vàna inthoka inchikna inentir dingin an phùt a. 2 Ama ruok chun, "Zàn tieng a hung niin, 'Khuo a tha ding nîng a tih, kawl a sen êm el' in ti hlak a. 3 Chun, zîng tieng leh 'Kawl a sena chu vàn a'n tûr leiin voisun chu khuo a se ding nîng a tih' in ti bok hlak. Khuo umzie in hriet thiema chu hun inchiknahai in hriet dêr si nawh. v 4 Tu lai ruolthar, mi suol tak le uire hmang takhai hin inchikna thilmak an zong hlak a, sienkhom Jona inchikna chauh naw chu inchikna thilmak hrim inentir ni naw ni hai" a ta. Isun anni chu a fesan ta dai a. 5 Dîl ràl khing tieng an kai chun zirtirhaiin bei an lo chawi theinghil a. 6 Isun an kuomah, "Farisaihai le Sadukaihai chol laka chun invêng fimkhur ro" a ta. 7 Anni rawi chun, "Bei ei chawi theinghil leia a mi ti nîng a tih" an ta. 8 Isun chu chu a hrietin, "Ringna tlawmhai, ieng dinga bei in nei naw thu ringot in buoipui am a na? 9 Tu chen khom hin in la hriet thiem naw rop a ni maw? Mi sângnga ta dinga bei phèk nga le an fàk mahla in rût khawm zàt kha in la hriet zing naw maw? 10 Mi sângli ta dinga bei phek sari le fàk mahla in rût khawm zàt khom kha teh? 11 In kuomah bei thu ka hril nawh ti ieng dinga in hriet thei naw am a na? Farisaihai le Sadukaihai chol laka chun fimkhur ro" a ta. 12 Chu phing leh chola siem bei lakah ni loin Farisaihai le Sadukaihai zirtirna laka fimkhur dinga a hrilna lem a nih ti an hung hriet tah a. 13 Isun Filip Kaisari biel a hung tlung chun a zirtirhai kuomah, "Mihaiin Mihriem Naupa hi tu am a nih an ti a?" tiin a'n don tawl a. 14 Anni chun, "Baptistu Johan ti chê dâm, Elija ti chê dâm, Jeremi an naw leh zawlnei tu amanih ti chê dâm an um" an ta. 15 Ama chun an kuomah, "An leh nangnin tu am ka nih in mi ti a? a ta. 16 Simon Peter chun, "Pathien hring Naupa Krista chu i nih" a ta. 17 Isun a kuomah, "Peter, Jona naupa, i ham a tha, mihriem hril chè a ni naw a, ka Pa vàna mi inhriettir chê a ni lem. 18 Chun, nang hi Peterw i nih ti ka hril bok che; hi lungpui chunga hin ka kohran rem ka ta, thìna thilthawtheina khomin ngam naw nih. 19 Vàn ram chabihai pêng ka ti che a, hnuoia i phuor taphot chu vàna khom phuor nîng a ta, hnuoia i sùt taphot chu vàna khom sùt nîng a tih" a ta. 20 Chu zoa chun ama chu Krista chu a nih ti tu khom hril lo dingin a zirtirhai chu a ti tlat a. 21 Chu chena inthok chun Isun Jerusalema a fe ding thu dâm, upahai, thiempu lalhai le Dàn zirtirtuhai laka thil tam tak a tuor ding thu dâm, sukhluma a um ding thu le a ni thum nia kei thoa a um ding thu dâm chu a zirtirhai a hril tan tah a. 22 Peterin ama chu a thuoi hrang a, "Lalpa, chuong dâm chu Pathienin remti naw nih. Chuong thil chu i chungah hung tlung ngai naw top a tih" tiin a kawk a. 23 Isu chu a ngha kîr a, Peter kuomah, "Setan, ka hnungah fe rawh! Ka ta dingin dàlkham i nih. Pathien tieng ngaituo loin mihriem thilah i lâk a ni hih" a ta. 24 Isun a zirtirhai kuomah, "Tu khomin mi zui a nuom chun mani insie hmangin, x mani kraws putin mi zui raw se. 25 Tu khom mani hringna hum tum chun chân a ta, tu khom keima leia hringna chân ruok chun hum a tih. 26 Miin khawvel hi nei vong sien, a thlarau inhmang si sien, a ta dingin ieng am a sawt a? An naw leh, miin a hringna le inthleng dingin iem a pêk thei a? 27 Mihriem Naupa hi a Pa ropuina le a vàntirkohai leh a hung pha chun, mi tin an thilthaw ang peiin lawmman pêng a tih. 28 Thu dik ka hril cheu hi, hi taka ngîr thenkhat lai hin Mihriem Naupa hi ama rama a hung an hmu hma chu thìna intem lo ding an um" a ta.

Matthew 17

1 Ni ruk hnungy chun Peter le Jakob le a unaupa Johan hai chu Isun a thuoi a, tlâng sângah a fepui a. 2 An hmaa chun a'n lang dàn chu a hung danglam a, a hmêl chu nisa anga hung èngin, a silfènhai chu a hung vàr ta phût el a. 3 Chu zo char chun an hmaah Mosie le Elija an hung inlâr a, Isu leh an inbiek a. 4 Peter chun Isu kuomah, "Lalpa, hi taka ei um hi a tha. I remti chun bawkte pathum khawng ka ta, i ta ding pakhat, Mosie ta ding pakhat, Elija ta ding pakhat" a ta. 5 A hril lai chun sûm varin anni chu a hung tuom a, sûma inthok chun rawlin, "Hi hi ka Naupa, ka Dittak, ka lawm bêk bêk chu a nih; ama thû ngai ro" a hung ta. 6 Zirtirhaiin chu chu an hrietin an ti hle a, hnuoi sikin an bokkhup a. 7 Nisienlakhom Isu a hung a, anni chu a hung them a, "Tho ro, ti naw ro" a ta. 8 An hang en chun Isu chauh naw chu tu dang khom an hmu ta nawh. 9 Tlânga inthoka an hung tum lai chun Isun an kuomah, "Mihriem Naupa hi mithi laia inthoka a tho nawk hmâ khat chu in thil hmu kha tu khom hril naw ro" tiin thu a pêk a. 10 Zirtirhai chun a kuomah, "Dàn zirtirtuhaiin ieng leia 'Elija a hung hmasa zet ding a nih' an ti am nîng a ta?" tiin an indon a. 11 Isun an kuomah, "Elija chu a hung ding hrim a nih, iengkim siem thâng a tih. 12 Nisienlakhom, ka hril cheu hi, Elija chu a hung tah a, sienkhom ama chu an lo hriet naw a, a chungah an nuom nuomin an lo thaw kha. Chuong ang bokin Mihriem Naupa khom hin an kut a tuor ve ding a nih" a ta. 13 Chuongchun, zirtirhai chun Baptistu Johan thu an kuomah a hril a nih ti an hriet tah a. 14 Mipui an zuk paw nawk chun mi pakhat hin Isu a hung pan a, a hmaah a dingthathuon a. 15 "Lalpa, ka naupa saw lunginsiet rawh. Hringol invoi a na, a tuor nasa ta bêk bêk a; voi tam tak meiah a tlu tah a, voi tam tak tuiah a tla tah bok a. 16 I zirtirhai kuomah ka thuoi a, an sukdam thei si naw a" a ta. 17 Isun a don a, "Tu lai ruolthar, ringna tlasam le lungril lûtinlèhai, ieng chen am in kuomah um ka ta, ieng chen am ka ngai thei ding cheu a na? Naupang chu ka kuomah hung thuoi ro" a ta. 18 Isun ramhuoi chu a hal a, a sûnga inthokin a hung suok a; chu dârkâra inthok chun naupang chu a dam tah a. 19 Zirtirhai chu Isu kuomah a fâlin an hung a, "Ieng leia keinin kan hnot suok ve thei naw?" tiin an indon a. 20 Isu chun, "Ringna in nei tlawm lei a nih. Thu dik ka hril cheu hi, ringna antam mu tiet in nei chun, hi tlâng kuoma hin, 'Hi taka inthok hin saw takah son inson rawh' tîng in ta, inson el a tih. Thaw thei naw hrim nei naw ti niu. 21 Chun, hieng ang thil hi tongtai le bu nghei chauh naw chun hnot suok thei a ni nawh"z a ta. 22 Galili ram an fang laiin Isun a zirtirhai kuomah, "Mihriem Naupa hi mihriemhai kutah inmantirin um a ta, sukhlum an ta, 23 ni thum niah keithoin a um ding a nih" a ta. Zirtirhai chu an lungngai ta êm êm a. 24 Isu le a zirtirhaiin Kapernaum an hung tlung chun tempul sie, mi pakhat peiah drakma hni khontuhai chu Peter kuomah an hung a, "In zirtirtu hin tempul sie a chawi ve hlak am?" an ta. 25 Ama chun, "Chawi hlak e" a ta. Inah Peter a hung inlawi chun Isun a lo biek hmasa a, "Simon, ieng tin am i ngai? Hnuoia lalhai hin sie chi hrang hranghai hi an nauhaia inthokin am, an naw leh mi dang laka inthok lemin an khon hlak?" tiin a'n don a. 26 Peter chun, "Mi dang lakah" a ti phing leh Isun, "Chuong an leh, nauhai chun sie an awl a ni chu tie. 27 Nisienlakhom, nang chu dîlah va fe la, ngakuoi inchie la, nga i man hmasa tak bàu chu kei ka la, drakma li hù tangkaa hmûng i ta, chu chu hung la la, kei le nanga sie tlàkna dingin anni chu pe rawh, chuong naw chun suklungawi naw hlauh rawi ei tih" a ta.

Matthew 18

1 Chuong lai chun zirtirhai chu Isu kuomah an hung a, "Vàn ramah tu am ropui tak a ta?" tiin an indon a. 2 Ama chun naupang tè hi a ko a, an hmaah a'n ngìrtir a. 3 "Thu dik ka hril cheu hi, in inlamlèt a, naupang tè ang hi in ni naw chun Pathien ramah lût naw ti niu. 4 Chuleiin, tu khom hi naupang tè anga inngaitlawm chu vàn rama a ropui tak nîng a tih. 5 Tu khom ka hming leia hieng naupang tè pakhat khom lawmtu chun keima a mi lawm a nih. 6 "Amiruokchu, hieng ringtuhai laia chîn tak khom hi suol dinga zawr thlutu chu a rîngah bu rawtna lung lien tak inhlitirin tuifinriet li mongah thlâk ni sien, a ta dingin tha lem a tih. 7 Tlûknahai leiin khawvel chung hi a va rik de aw! Tlûk châng um ding hrim chu a nih, sienkhom tlûkna inumtirtu chung chu a rik. 8 I kutin amanih, i kein amanih a sukthlùk chê chun tan la, dè hawn dai rawh; kut khing hni amanih ke khing hni amanih neia kumkhuo hremhmuna peia um nêk chun kut le ke bùla hringnaa lût chu i ta dingin a tha lem. 9 I mitin a sukthlùk chê chun khel dok la, dè hawn dai rawh; mit khing hni neia hremhmun meia pei i ni nêk chun mit khing dela hringnaa lùt chu i ta dingin a tha lem. 10 "Hieng mi chînhai laia pakhat khom hi hmusit lo dingin fimkhur ro; vàna an vàntirkohaiin ka Pa vàna mi hmèl an hmu zing hlak a nih ti ka hril cheu hi. 11 Bohmanghai sandam dingin Mihriem Naupa hi a hung a ni si a. b 12 "Ieng tin am in ngai? Miin beram za nei sien, anni laia pakhat chu invâk hmang ta ang sien, sawmkuo le pakuohai chu tlângah màksanin a'n hmang chu a zong naw dim a ni? 13 Thu dik ka hril cheu hi, a hmu nawk hlauh chun sawmkuo le pakuo invâk hmang naw hai chunga nêkin chu beram pakhat chunga chun lawm lem a tih. 14 Chuong ang bokin, hieng mi chîn té tèhai laia pakhat khom an bohmang chu in Pa vàna mi ditzawng a ni nawh. 15 "I unauin i chungah thil suol a thaw chun, fe la, nangni pahni hrieta chauh a suolna thua chun zil rawh. A ngaithlàk che chun i unaupa lungril chu i'n hmin tìna a nih. 16 A ngaithlàk naw che ruok chun mi dang pakhat amanih pahni amanih thuoi la, chuongchun, in thu po po chu hrepuitu pahni pathum baua inthoka suknghet ni thei a tih. 17 Chun, anni chu a ngaithlàk nuom naw chun kohran kuomah intlun rawh; kohran chen khom a ngaithlàk nuom naw rop chun ama chu Jentêl le siekhontu hai angah sie rawh. 18 "Thu dik ka hril cheu hi, hnuoia ieng khom in phuor taphot chu vàna khom phuor nîng an ta, hnuoia ieng khom in sùt taphot chu vàna khom sùt nîng an tih. 19 Ka hril cheu hi, hnuoia hin nangni lai mi pahni inlungruola in hnì taphot chu in Pa vàna miin thawpêk a ti cheu. 20 Ka hminga mi pahni amanih pathum amanih an inkhawmna taphota chun anni lai ka um hlak si a" a ta. 21 Chuong lai chun Isu kuomah Peter a hung a, "Lalpa, ka unauin ka chungah thil suol thaw sien, voi ieng zât am ka ngaidam ding? Voi sari chen am a ni ding?" a ta. 22 Isun a kuomah "Voi sari chen ka ti naw che, voi sari voi sawmsari chenin ka ti lem che a nih. 23 "Chuleiin, vàn ram chu laltak tu amanih, a siehlawhai sum bat ching fel tum leh chun hrilkhi a nih. 24 An thu a ngaituo tan chun mi pakhat, talen sîngkhatc bat chu a kuomah an hung thuoi a. 25 A rulna ding a nei naw leiin ama le a nuhmei le a nauhai le a nei po po zor fai vonga rul dingin a pu chun thu a pêk a. 26 Chuongchun, siehlaw chun hnuoi sikin chibai a bûk a, "Mi la ngai hrâm la, a rêngin la rul vong ka ti che" a ta. 27 Chu siehlaw chu a pu chun a lunginsiet a, a bat chu a ngaidam a, a'n thla suok a. 28 Sienkhom chu siehlaw chu a suok a, a siehlaw chanpui laia pakhat denari zakhatd bat chu a va hmu a, a man a, a rînga a rêk a, 'I bat kha mi pe rawh' a ta. 29 A siehlaw chanpui chun a hmaah dingthathuonin, 'Mi la ngai hrâm la, la rul vong ka ti che' tiin a ngên a. 30 A ngaidam nuom naw leiin a bat chu a tlàk hmâ khat lung inah a khum el tah a. 31 A siehlaw chanpui danghaiin a thilthaw dàn an hmu chun an lung a khei hle a, a thaw dàn po po chu an pu kuomah an va hril a. 32 An pu chun siehlaw chu a ko a, "Nang siehlaw rilo, i ngên rak leiin i bat po po ka ngaidam che a. 33 Ka lunginsiet che ang khan nang khomin i siehlaw chanpuihai i lunginsiet ve ding an naw maw?" a ta. 34 A pu chu a lung a sen hle a, a bat po po a tlàk zo hmâ khat chu hrem dingin a pêk suok tah a. 35 Tu khomin lungril taka in unauhai in ngaidam naw chun ka Pa vàna mi khomin chuong ang bokin in chungah thaw vèng a tih" a ta.

Matthew 19

1 Chuong thu chu Isun a hril zoin Galili ram màksanin Jordan ràla Judai rama chun a fe a. 2 Mipui tam takin an zui a, chu taka chun a lo sukdam tawl a. 3 Farisai thenkhat a kuomah an hung a, ama fiena dingin, "Ieng lei khomin miin a nuhmei a màk a thieng am?" tiin an indon a. 4 Ama chun, "A tira inthokin Siemtu chun 'pasal le nuhmeiin a siem a, 5 chuleiin pasalin a nu le pa màksan a ta, a nuhmei leh inkop an ta, pum khat hung ni tàng an tih' ti kha in tiem ngai naw maw? 6 Chuongchun pahni ni ta loin taksa pum khat an hung ni ta lem a nih. Chuleiin, Pathienin a zom tah chu mihriemine thè naw raw se" a ta. 7 Anni chun a kuomah, "An leh, ieng dinga inmâkna lekha pèka màk theina thu Mosien a pêk am a na?" an ta. 8 Isun, "In lungril ngar lei chauin nuhmei mâk Mosien a phalpèk cheu a ni kha; nisienlakhom a tira inthokin chuong ang chu a ni nawh. 9 Kei chun ka hril cheu hi, tu khom uire lei ni loa nuhmei maa mi dang nei taphot chu a uire a nih" tiin a don a. 10 Zirtirhai chun, "Chuong chu nuhmei pasal inkâr thu a ni si chun, innei hi a tha naw ie" an ta. 11 Ama ruok chun, "Chu thu chu mi po poin an pom thei nawh, a pèkhai chauh naw chun. 12 Mi tilre hrima pieng an um a; a then ruok chu mihriemin tilrea an siem an um a; thenkhat ruok chu vàn ram leia tilrea insiem an um bok. Tu khom a zawm thei chun zawm raw se" a ta. 13 Chuong lai chun a kut innghata tongtaipèk dingin naupangtehai chu Isu kuomah an hung thuoi a. Zirtirhai chun a hung thuoituhai chu an lo hal a. 14 Isu ruok chun, "Naupangtehai kha ka kuomah inhungtir unla, khap naw ro; vàn ram chu hieng ang mihai ta hi a ni si a" a ta. 15 An chunga kut an nghat hnungin chu hmuna inthok chun a fe ta pei a. 16 Mi pakhat hi Isu kuomah a hung a, "Zirtirtu, chatuon hringna ka nei theina dingin ieng thil tha am thawng ka ta?" tiin an don a. 17 Isu chun, "Ieng dinga thil tha chu i mi'n don? Tha chu pakhat chauh a um. f Hringnaah lùt i nuom chun thupêkhai chu zawm rawh" a ta. 18 Ama chun, "A ieng tak am?" a ta. Isun, " 'Tuol that naw; uire naw; inru naw; khêlin mi hêk naw; 19 i nu le pa chawimawi rawh tihai le nangma i'n hmangai angin i vênghai hmangai rawh tihai hi" a ta. 20 Tlangvàl chun, "Chuong po chu ka zawm hlak, iem ka la bâk?" a ta. 21 Isun, "That famkim i nuom chun, fe la, i nei po po zor la, pasiehai pe rawh; chuongchun vànah ro nei i tih; chun, hung la, mi zui rawh" a ta. 22 Chu thu chu a hrietin tlangvàl chun beidong takin a fesan a, sum a hau hlè si leiin. 23 Isun a zirtirhai kuomah, "Thu dik ka hril cheu hi, mi hausa ta dingin Pathien rama lùt chu harsa tak a nih. 24 Ka hril non cheu hi, Pathien rama mi hausa an lùt nêkin thim naa sanghawngsei lùt thleng a ol lem" a ta. 25 Zirtirhaiin chu chu an hriet chun mak an ti hle a, " Chuong a ni chun tu am sandam ni thei tàng an ta?" an ta. 26 Isun anni chu en zingin, "Chu chu mihriem ta dingin thaw thei ruol a ni naw a, Pathien ta ding ruok chun iengkim thaw thei a nih" a ta. 27 Peter chun, "Ngai ta, keini hlakin iengkim màksanin kan zui ta si che a, kan dong ve ding chu iem nîng a ta?" tiin a'n don a. 28 Isun a kuomah, "Thu dik ka hril cheu hi, iengkim siem tharna hunah, Mihriem Naupa hi a ropuina lalthungphaa a'n thung pha leh, nangni mi zuituhai khom hi Israel hnam sawm le pahni chungah rorêlin lalthungpha sawm le pahniah la thung vêng in tih. 29 Tu khom ka hming leia in le lo dâm, unau hai, farnu hai, nu le pa hai, g le nau hai dàm màksantu chun a lêt tam tak hmûng an ta; chatuon hringna chang bok an tih. 30 Nisienlakhom, mi tam tak a hmasa taka umhai chu a nuhnung tak la nîng an ta, a nuhnung takhai khom a hmasa tak la nîng an tih" a ta.

Matthew 20

1 "Vàn ram chu huon neitu, a grêp huona ruoi ding inhlawfa zonga zîng inhma taka suok dok ang chu a nih. 2 Ni khatah denari khat mi pakhat hlaw dinga a'n rempui hnungin a grêp huonah sinthawtuhai chu a tir a. 3 Zîng dâr kuo vèlah a'n vàk suok nawk a, bazara ieng khom thaw loa ngîr mei mei mi dang a hmu a; 4 "Nangni khom ka grêp huonah sin va thaw ve unla, hlaw a awm tawk pêng ka ti cheu" a ta. . 5 Sûn chang lai le chawhnung dar thum vela khom chun a suok a, chuong ang bok chun a ti nawk a. 6 Zàn tieng dâr nga vèlah a va suok nawk a, mi dang ngîrhai kuoma chun, "Ieng dinga hi taka sùnnithlâka ieng thaw loa in ngìr mei mei am a na?" a ta. 7 Anni chun, "Tu khomin an mi ruoi ve lèm" an ta. Ama chun, "Nangni khom ka grêp huonah va thok ve ro" a ta. 8 "Zàn tieng a hung ni chun grêp huon neitu chun a huon enkoltu kuomah, 'Sinthawtuhai kha ko la, a nuhnung taka inthoka tanin a hmasa tak chenin hlaw pe rawh' a ta. 9 Zàn tieng dâr nga vêla a ruoihai chu an hung a, denari khat an dong seng a. 10 A hmasa takhai chu an hung a, hlaw tam lem hmu an inbeisei a, nisienlakhom denari khat bok an dong a. 11 Hlaw an hang làk chun huon neitupa chungah an chier ta a. 12 'Hieng a hung nuhnung takhai hin dârkâr khat chauh an thok hman a, keini nisa tuora sùnnithlâka thawhai leh intlukin i siem a' an ta. 13 "Ama ruok chun anni laia pakhat kuoma chun, 'Ruolpa, i chungah ieng khom thaw indik naw ka nei nawh. Denari khat hlaw dingin ei inrem an naw maw? 14 I hlaw kha la la, fe el rawh; nang ka pèk che ang bok kha hieng a thok nuhnung takhai khom hi ka pêk nuom a nih. 15 Keima sum a na, keiin ka nuom ang anga ka thaw a thieng naw am a ni? An naw leh, ka that leiin i lo thîk am a ni?" a ta. 16 Chuong ang bokin a nuhnung takhai chu a hmasa tak la nîng an ta, a hmasa tak khom a nuhnung tak la nîng an tih" a ta. 17 Isun Jerusalem a pan tung mèk lai chun a zirtir sawm le pahnihai chu a thuoi bing a, an kuomah, 18 "Ngai ta u, Jerusalemah ei hang fe ding a na, Mihriem Naupa hi thiempu lalhai le Dàn zirtirtuhai kutah an inmantir ding a nih. 19 Anni chun thi dingin a chungthu rêl an ta, nuizat siemnaa hmangin vuong an ta, hemde dingin Jentelhai kutah pe suok an ta, ni thum niah keitho nîng a tih" a ta. 20 Chuong lai chun Zebedai nuhmei chun a nauhai thuoiin Isu kuomah a hung a, dingthathuonin chibai a bûk a, ditsakna a hni a. 21 Isu chun, "Iem an leh i dit chu?" a ta. Ama chun, "Ka nau pasal pahnihai hi i ramah, i chang tieng pakhat, i voi tieng pakhat, an inthung theina dingin thu pe ta la" a ta. 22 Isun a don a, "In thil hni hi in hriet naw a nih. Ka no dawn ding chu in dawn thei ding am a ni?" a ta. Anni chun, "Thei e" an ta. 23 Isu chun, "Ka no chu dawn ngei in tih; nisienlakhom, ka chang tieng amani ka voi tieng amania inthungtir chu ka thu a ni naw a, ka Pa buotsaipèkhai ta ding a ni lem" a ta. 24 Zirtir sawmpahnihaiin chu thu an hriet chun unau pahnihai chunga chun an lung a sen hle a. 25 Isun an rêngin a ko a, "Jentêlhai chunga rorêltuhai chu an insuklal êm êm hlak a, an mi lienhai khomin an chungah lal an hrawt a. 26 Nangni lai ruok chu chuong ang chu a ni ding a ni nawh. Tu khom nangni laia mi lien ni nuom chu in rongbawltuah a um lem ding a nih. 27 Nangni laia ropui tak ni nuom chu in siehlawah a um ding a nih. 28 Mihriem Naupa khom hi rong bawlpêka um dingin a hung naw a, rong bawl ding le mi tam tak intlanna dinga a hringna pe dingin a hung lem a nih" a ta. 29 Jeriko khuoa inthoka Isu le a zirtirhai an suok laiin mipui tam takin an zui a. 30 Lam sira inthung mitdel pahni chun Isu a hung ti an hriet charin, "Lalpa, Davida Naupa, mi lunginsiet rawh" tiin an khêk a. 31 Mipui chun to dingin an hal a, sienkhom anni chun, "Lalpa, Davida Naupa, mi lunginsiet rawh" tiin an khêk zuol sau a. 32 Isu chu a ngîr a, anni chu a ko a, "Ieng am thawpêk lang chêu in nuom a?" a ta. 33 Anni chun, "Lalpa, mit varna kan dit" an ta. 34 Isun a lunginsiet tawl èm êm a, an mit a them a, an hmu. thei ta nghal a, ama chu an zui ve tah a.

Matthew 21

1 Jerusalem an hnai tah a, Oliv tlânga Bethfage khuo an tlung chun Isun a zirtirhai laia mi pahnih a tir a, an kuomah, 2 "In hma zawn khuoa son va fe unla, sabengtung le a bula a te tuoi inthlung chu hmung in ta; sût unla, ka kuomah hung kei ro. 3 Tu khomin ieng khom an hril chun, 'Lalpan a mamaw a nih' tî unla, inhungtir nghal el a ti cheu" a ta. 4 Zawlnei hmanga hrila lo um tah chu a hung tlung kimna dingin chuong chu a hung um a nih: 5 "Zaiawn naunu chu hril rawh, 'En ta, inngaitlawm takin, I lal i kuom tieng a hung, Sabengtung chungah chuongin, Sabengtung tuoi chunga ngei chun". h 6 Chuongchun, zirtirhai chu an va fe a, Isun thu a pèk angin an thaw a. 7 Sabengtung le a te chu an hung kei a, an chungah an puonhai an pha a, Isu chu a chuong a. 8 Mi tam takin lampuiah an puonhai an pha a, a thenin sawlhna an thliek a, lampuia chun an phâ bok a. 9 A hmaa fe le a hnunga zuitu mipui chun, "Davida Naupa kuomah Hosanna!Lalpa hminga hung chu a hamtha, Chunghnung taka khin Hosannai"tiin an khêk a. 10 Jerusalem a hung lût chun a khawnawtin, "Hi mi hi tu am a na?" tiin an inphu mur mur a. 11 Mipuihai chun, "Ama hi zawlnei Isu, Galili ram Nazaret khuoa mi a nih" tiin an don a. 12 Isu chu tempul huong sûngah a lût a, chu taka thil zortuhai le inchawtuhai chu a hnot suok vong a; tangka thlengtuhai dawkàn le parva zortuhai thungna chu a namthlùkpèk a; 13 an kuomah, "'Ka in chu tongtaina in ti'ng an tih' ti ziek a na, nangni ruok chun suomhmanghai pùkah in siem lem hi" a ta. 14 Tempula chun mitdel le kebaihai a kuomah an hung a, a lo sukdam tawl a. 15 Nisienlakhom, thiempu lalhai le Dàn zirtirtuhaiin thilmak a thawhai le naupang ruolin tempul sùnga, "Davida Naupa kuomah Hosanna" tia an khêk an hmu chun an lung a sen êm èm a. 16 "Naupang ruol hril chu i hriet?" tiin Isu an indon a. Ama chun, "Hre e. Hi thu ziek'Naupangtè le nene ne laihai bauah, Inpâkna kim chu i'n sam suoktir a' ti hi in tiem ngai naw a ni?" a ta. 17 Anni chu a màksan a, khawpuia inthokin a suok a, Bethaniah a fe a, chu taka chun a riek a. 18 Zîngkâr khawpui pana a fe lai chun a phìng a hung tâm tah a. 19 Lam sìrah theichang kung a hei hmu a, a va pan a, a hna chauh naw chu ieng khom a hmu naw a, " Rà ta naw kumkhuo rawh" a ta, theichang chu a thêm ta nghàl a. 20 Zirtirhaiin chu chu an hmuin mak an ti hle a, "Ieng tin am theichang hi a zuk thêm nghal el chu!" an ta. 21 Isun a don a, "Thu dik ka hril cheu hi, ringna neia in ringhlel naw phot chun, theichang chunga thaw ang chauh hi ni loin, hi tlâng kuoma khom hin, 'Inson la, tuifinrietah inpei hmang dai rawh' in ti chun in ti angin tlung el a tih. 22 In ring phot chun, tongtaia in hnì taphot chu hmûng in tih" a ta. 23 Isu chu tempulah a lût a, a'n chùktir lai chun thiempu lalhai le vàntlâng upahai chu a kuomah an hung a. "Ieng thuneinain am hieng thil hi i thaw a, tuin am thuneina a pêk che a?" tiin an indon a. 24 Isun, "Kei khomin thu indon vêng ka ti cheu, chu chu in mi hril thei chun tu thuin am hieng thil hi ka thaw ti hril vèng ka ti cheu. 25 Johan baptisma kha vàna mi thu am mihriem thu?"a ta. An inrawn khawm a, "Vàna mi thu ei ti chun 'Ieng dinga a thu inawi naw?' mi ti ding a na, 26 mihriem thu ei ti hlak chun ei ta dingin mipui an ti-um si a, mi po poin Johan chu zawlneiah an ngai si a" an ta. 27 Chuongchun, "Kan hriet nawh" an ta. Isu khomin an kuomah, "Kei khomin tu thuin am hieng thil hi ka thaw hril bîk naw ning cheu" a ta. 28 "Hi thu hi ieng tin am in ngai? Mi tuin amani nau pasal pahni a nei a. Pakhat kuoma chun, "Ka naupa, voisun chu grêp huonah sin va thaw rawh" a ti a. 29 Ama chun, "Ka nuom nawh" tiin a lo don a. Sienkhom, a hnungah a lungril a thlâk a, a fe tah a. 30 Pakhat kuoma khom chun a va fe a, chuong ang bok chun a va ti a. Ama chun, "Aw leh pa" a ta, sienkhom a fe naw a. j 31 Chu mi pahnihai lai chun a tu lemin am a pa ditzawng a thaw a?" a ta. Anni chun, "A hmasa lem chun" an ta. Isun an kuomah, "Thu dik ka hril cheu hi, siekhontu le nawchizorhaiin Pathien ram an lùt khal ta chêu a ni hi. 32 Johan chu felna lampui kawkhmu ding chêuin a hung a, ama chu in ring si naw a; siekhontu le nawchizorhai ruok chun ama chu an ring si a. Ama chu in hmu hnung khomin ring dingin in inlamlêt nuom si nawh. 33 "Tekhinthu dang ngaithla ro. Huon neitu pakhatin grêp huon a siem a, dâiin an huon a, grêp sawrna ding khur a cho a, vèngbûk insâng tak a bawl bok a, grêp huon chu loneitu thenkhat a'n sàntir a, ram hla takah a'n zin ta dai a. 34 A rà lo huna chun a chanpuol la dingin a siehlawhai chu huon sântuhai kawla chun a tir a. 35 Huon enkoltuhai chun a siehlawhai chu an lo man a, pakhat an vuok hrep a, pakhat an that a, pakhat lungin an dèng a. 36 Siehlaw dang, a hmasa nêka tam a tir nawk a, anni khom chu a hmaa ang bokin an lo soisak a. 37 Chu hnung chun, 'Ka naupa êm hi chu lo inzàng an tih" tiin a tawp takah a tir a. 38 Nisienlakhom, huon enkoltuhaiin a naupa an lo hmu chun, "Hi pa hi ro hluotu ding a na, thaw ro that ei ta, a ro hluo ding hi neipêk ei tih' an ti tawl a. 39 Chuongchun, ama chu an man a, grêp huona inthok chun an thè suok a, an sukhlum tah a. 40 Grêp huon neitu a hung pha chun, chuong huon enkoltuhai chu iem hung law tâng a ta?" a ta. 41 Anni chun, "Chuong mi suolhai chu sukboral a ta, grêp huon chu enkoltu dang, a lo hun taphota a rahai chu ama pe pei dinghai kuomah insàntir a tih" an ta. 42 Isun an kuomah, " Pathien Lekha thua, 'In bawltuhai lung hnawl ngei kha, A kil thut dotu tak a hung ni ta si; Chu chu Lalpa thilthaw a na, Ei hmuin ropui ei ti hle'ti dâm hi in tiem ngai naw a ni? 43 Chu lei chun ka hril cheu hi, Pathien ram chu làkpêk nîng in ta, rà insuotu dinghai kuomah pèk lem nîng a tih. 44 Ka hril cheu hi, tu khom chu lung chunga tlu chu koi dar a ta, a del lem chu rawt nawi a tih" a ta. 45 Thiempu lalhai le Farisaihaiin Isu tekhinthu hril an hriet chun anni chungthu a hrilna a nih ti an hriet a. 46 Chuongchun, a man dàn lampui an zong a, sienkhom mipui an ti a, ama chu zawlneia an ngâi tlat si leiin.

Matthew 22

1 Isun an kuomah tekhinthu dang a hril nawk a. 2 Vàn ram chu lal tu amanih, a naupa mo lawmna ding ruoi buotsaitu leh chun tekhin thei a nih. 3 Ruoi kîl dinga a fielhai chu ko khawm dingin a siehlawhai a tir a, sienkhom an hung nuom naw a. 4 Ama chun siehlaw danghai a tir nawk a, 'Ka fielhai kuoma khan, ka bawngchal le ka ran chawm thauhai ka that a, ruoi iengkim inpei fel a ni tah, ruoi kîl dingin hung ta ro' tiin hril ro' a ta. 5 Nisienlakhom, an lo ngaisak naw a, an fesan a, a then loah an fe a, a then sumdawngnaah. 6 A danghai chun siehlawhai chu an man a, inzakum takin an soisak a, an lo sukhlum tawl ta a. 7 Lal chu a lungsen a, a sipaihai a tir a, chuong tuolthattuhai chu a sukbohmang a, an khuo khom a rawpêk tah a. 8 "Chuongchun, a siehlawhai kuomah, 'Ruoi chu a'n pei ta a, ka fielhai kha chu thang vê tlàk an ni nawh. 9 Chuleiin, kotthlêr kilkhawra hai fe unla, mi in hmu taphot ruoi kîl dingin hung fiel ro' a ta. 10 Chuongchun, siehlawhai chu an suok a, lampuia mi an hmu taphot, mi suol le mi thahai khom, an hung thuoi khawm a, mo lawmna in chu ruoi kiltuhaiin a sip tah a. 11 "Lal chu ruoi kiltuhai en dingin a hung lùt a, inneina thuom inbel ve lo mi pakhat a hmu a; 12 'Ruolpa, iengtiziea inneina thuom inbel loa i hung lùt am?" a ta, ama chu a to zing a. 13 Lal chun rongbawltuhai kuomah, 'A kut le ke khuop unla, tuol thimah dêng dok ro, chu taka chun tapin hâ rawt raw se. 14 Fielhai chu tam tak an na, thlanghai ruok chu tlawmte an nih" a ta. 15 Chuong lai chun Farisaihai chu an suok a, Isu chu a tonga inthoka khal awk dàn ding thu an phier a. 16 An thuoihruoihai le Heroda pawla mihai chu a kuomah an tir a, anni chun, "Zirtirtu, mi indik tak i na, Pathien thu khom indik takin i zirtir hlak a, poisak bik tu khom i nei naw a, tu khom inza bîk i nei bok nawh ti kan hriet 17 Chuleiin, Kaisar kuoma sie chawi hi a'n dik am a'n dik naw ti i ngaidan mi hril rawh" an ta. 18 Isun an thiltum suolzie a hriet a, an kuomah, "Nangni lêmderhai, ieng leia mi'n tong awktir in tum? 19 Sie in chawina tangka chu mi hang inentir ta um" a ta, chuongchun denari khat an hung làk a. 20 Ama chun an kuomah, tu lim le tu hming am a chuong a?" tiin a'n don a. 21 Anni chun, "Kaisar" an ta. Chuongchun, Isun an kuomah, "Kaisar thil chu Kaisar pe unla, Pathien thil chu Pathien pe ro" a ta. 22 Chu chu an hrietin mak an ti hle a, ama chu an zàmsan a, an fe ta dai a. 23 Chu ní bok chun Sadukaihai, thonawkna a um nawh ti pawl chun thu indon dingin a kuomah an hung a. 24 "Zirtirtu, Mosien, 'Nau nei loin mi thi sien la, a nuhmei chu a unauin hluong a ta, chi a thlàpèk ding a nih' a ta. 25 Keini lai hin unau sal sari an um a, a upa takin nuhmei a nei a, chi thla loin a thi a, a nuhmei chu a sang hluo dingin a màksan a. 26 Chuong ang bok chun a pahnihna khom, a pathumna khom, a pasari chenin an hluo vong a. 27 A tawpah nuhmei khom chu a thi tah a. 28 An leh, thonawknaah unau sal sari laia a tu nuhmei tak am ni tâng a ta, an rêngin nuhmeiah an nei vong si a?" tiin an indon a. 29 Isun an kuomah, "Pathien thu le Pathien thilthawtheina in hriet naw leiin in fe suol hlak a nih. 30 Thonawknaa chun nuhmei pasal innei ta naw ni hai a, vàna vàntirkohai ang an ni ta lem ding a nih. 31 Mithi thonawkna thua ruok chu Pathienin, 'Kei hi Abraham Pathien, Isak Pathien, Jakob Pathien ka nih' tia in kuoma a hril kha in tiem ngai naw maw? 32 Ama chu mithi Pathien a ni naw a, mihring Pathien a ni lem" a ta. 33 Mipuiin chu chu an hrietin a thu inchûktir chu mak an ti hle a. 34 Sadukaihai a sêl dong dêr ti an hrietin Farisaihai chu an pung khawm a. 35 Anni laia dàn zirtirtu pakhatin Isu fiena dingin, 36 "Zirtirtu, Dàna hin ieng thupêk am a ropui tak a?" tiin an don a. 37 Isun, "Lalpa i Pathien chu i lungril po poin, i thlarau po poin, i ngaituona po poin i hmangai ding a nih. 38 Chu chu thupek laia poimaw tak le ropui tak chu a nih. 39 A dota chun, 'Nangma i'n hmangai angin i vênghai hmangai rawh' ti hi. 40 Hi thupêk pahni hin Dàn le Zawlneihai thu po po a fùn khawm vong a nih" a ta. 41 Farisaihai an inhawr khawm lai chun Isun, 42 "Krista chu ieng tin am in ngai a? Tu naupa am a na?" tiin a'n don tawl a. Anni chun, "Davida naupa" an ta. 43 Isun an kuomah, "Chuong a ni si chun iengti ziea Davidan, 44 'Lalpa chun ka Lalpak kuomah, Ka chang tieng inthung rawh, I hmêlmahai i kepha hnuoiaKa sie hma khat chu'tia thlarau inhriettirnaa ama chu 'Lalpa' a ti tlat si am a na? 45 Davidan ama chu 'Lalpa' a ti si chun ieng tin am a naupa ni thei a ta?" a ta. 46 Tu khomin bàu khat khomin an don thei naw a, chu nia inthok chun tu khomin zawna dang an indon ngam ta bok nawh.

Matthew 23

1 Chuongchun, mipui le a zirtirhai kuoma chun Isun, 2 "Dàn hretuhai le Farisaihai chu Mosie Dàn zirtirtua ruot an ni a; 3 chuleiin an thu awi unla, an hril chêu taphot chu thaw ro. Nisienlakhom, an thilthaw ang chu thaw ve naw ro, an hrilhai chu a takin an zawm ngai si nawh. 4 Phur rik tak tak an siem a, mi liengkoah an hnawk a, anni ruok chun kut hmawr khomin an tawk nuom nawh. 5 An thaw taphot chu mi hmu dinga an thaw a nih. An bàn le an bawka an hrèn de thubawml chu an suklien a, an tongtaina puonm hmawr inbawk khom an suksei bok a; 6 ruoi thèna hmunah thungna tha tak le sunagoga hai thungna langsâr dâm, bazar hmuna mi chibai bûk dâm le 7 mihaiin 'Rabbi' tia an ko dâm chu an thlâkhla hlak si a. 8 "Nangni ruok chu 'Rabbi' tiin inko naw ro, zirtirtu pakhat chauh in nei a, inrêngin unau in ni si a. 9 Chun, hnuoia mi tu khom 'pa' ti naw ro, 'Pa' pakhat in nei, vàna mi chu. 10 'Zirtirtu' inti naw ro, Zirtirtu pakhat chauh in nei a, chu chu Krista a nih. 11 Nangni laia a ropui tak chu in rongbawltu a ni ding a nih. 12 Tu khom inngaihlu chu tlawm an ta, inngaitlawm taphot chu chawimawi nîng an tih. 13 "Nangni Dàn zirtirtu le mi lêmdertu Farisaihai, in chung a rik ie! Mihai lùtna ding vàn ram kot in khàrpèk a, nangni hlak lût nuom si lo, a lût tumhai lùt hlak in phal bok si nawh. 14 Nangni lêmderhai, hmeithaihai in le lo in fàk tlaran a, mi hmuah sawt tak tak in tongtai a. Chuleiin, nasa nawk zuola hrem nîng in tih. 15 Nangni Dàn zirtirtuhai le mi lêmdertu Farisaihai, in chung a rik ie! Saphunn pakhat siem dingin khawmuol le tuipuiah in inzin kuol a, saphuna in siem hnungin nangni let hnia hremhmun nauin in siem hlak si. 16 "Nangni thuoitu mitdelhai, 'Tu khom tempul sâla a'n khâm chun ieng khom a ni naw a, tu khomin tempula rangkachak sâla a'n khâm chun a hlen ngei ding a nih' tituhai, in chung a rik ie! 17 Nangni mitdel invêthai, a ieng am a ropui lem, rangkachak am, annawleh rangkachak chu rangkachak thienghlima siemtu tempul chu? 18 Chun, 'Miin maichàm sâlin inkhâm sien ieng khom a ni nawh; maichàm chunga thilpêk sâla a'n khâm ruok chun a hlen ngei ding a nih' in ti bok a. 19 Nangni mitdel intlawhai, thilpêk am, an naw leh thilpêk sukthienghlimtu maichàm chu a ropui lem? 20 Chuleiin, maichàm sâla inkhâmtu chun maichàm le a chunga um po po sâlin a'n khàm a nih. 21 Tempul sâla inkhâmtu chun tempul le a hluotu sâlin a'n khàm a nih. 22 Vàn sâla inkhâmtu chun Pathien thungpha le a chunga inthung sâlin a'n khàm a nih. 23 "Nangni Dàn zirtirtuhai le Farisai lêmderhai, in chung a pik ie! Pudina dâm, lêngmasèr dâm le pardi dâm chenin sawma pakhat in pèk hlak a; Dàn thu poimaw lem indikna dâm, zangaina dâm le ringumna dâm hi in ngaithâ bok si a; nisienlakhom a nuhnung lem hi annawm in thaw tak lem ding chu, a danghai khom ngaithà chuong loin. 24 Thuoitu mitdelhai, thohmite dawn sa inlàuin in thlit fai a, sanghawngsei in dol lem si hlak! 25 Nangni Dàn zirtirtuhai le Farisai lêmderhai, in chung a rik ie! No le thlèng puo tieng in sawp fai hlak a, a sûng tieng ruok chu duâmna le insûmnawnain a sip si a. 26 Nang Farisai mitdel, no le thlèng sûng tieng chu sawp fai hmasa rawh, a puo tieng khom hung fâi el a tih. 27 Nangni Dàn zirtirtuhai le Farisai lêmderhai, in chung a rik ie! Thlàn nàl vâr, a puo tienga mawi taka inlang, a sûng ruok chu mithi rû le porchè tinrênga sip ang chu in nih. 28 Nangni khom chuong ang char chun a puo tieng chu mi hmuah mi indik angin in inlang a, in sûng tieng ruok chu vervêkna le rîtlonaa sip a ni si. 29 "Dàn zirtirtuhai le Farisai lêmderhai, in chung a pik ie! Zawlnei thlàn inhai in bawl a, mi felhai thlàn in cheimawi a. 30 'Ei pi le puhai huna khan lo um ve ni inla khom, zawlnei thisen insuonaa chu thang ve nawng ei tih' in ti hlak. 31 Chu chun zawlnei thattuhai thla in ni ngeizie in suklang hlak. 32 In pi le puhaiin suol an lo thaw ang chu hlen ve law law ro. 33 Rûlhai! Rûlngân thlahai! Thiemnaw changa hremhmuna in fe ding hi ieng tin am pumpel thei in ta? 34 Hi lei hin a nih in kuomah zawlnei hai, mi var hai le dàn zirtirtuhai ka hung tir ding chu. A then thatin hemdèng in ta; a then sunagogah vuong in ta, khaw tinah hnot zui in tih. 35 Chuongchun, Abel, mi fel tak thisen insuo a nia inthoka hmun thienghlim le maichàm inkâra Baraki naupa Zakari thisen in insuo ni chen khan, hnuoi chunga mi fel thisen suok po po maw chu nangni chungah tlâng a tih. 36 Thu dik ka hril cheu hi, chuong po po chu tuta ruoltharhai chunga hin tlung a tih. 37 "Aw Jerusalem, Jerusalem, zawlneihai thattu le i kuoma tirhai lo dèng hlumtu! Arpuiin a têhai a thla hnuoia a op khawm angin i nauhai voi ieng zât am op khawm ka tum ta a? Sienkhom i nuom si naw kha. 38 En ta, i in chu ram dèra màksan a ni ta hi. 39 Ka hril cheu hi, 'Lalpa hminga hung chu a hamtha' in ti hmâ khat chu mi hmu nawk ta ngai naw ti niu" a ta.

Matthew 24

1 Isu chu tempula inthokin a suok a, a fèsan ding laiin tempul an bawl dàn chu inentir dingin a kuomah a zirtirhai chu an hung a. 2 Ama ruok chun an kuomah, "Hieng po po hi in hmu maw? Thu dik ka hril cheu hi, lung intieng po po hi pakhat khom sukchim loa màksan um naw nih" a ta. 3 Oliv tlànga Isu a thung lai chun a zirtirhai chu a fâlin an hung a, "Chuong chu ieng tik am a hung tlung ding a na? I hung nawkna le khawvel tawp ding inchikna chu ieng am nîng a ta? Mi hril rawh" an ta. . 4 Isun an kuomah, "Tu khomin an hlêm nawna ding cheuin fimkhur ro. 5 Ka hming sâlin, 'Kei hi Krista chu ka nih' tiin mi tam tak hung suok an ta, mi tam tak hlèm hmang an tih. 6 Indo le indo thuthâng hrieng in ta, sienkhom thlaphang lo dingin fimkhur ro. Chuong thil chu a hung tlung ding hrim a na, hun tawp ruok chu la ni hri naw nih. 7 Hnam hrang le hnam hrang indo an ta, sorkar hrang le sorkar hrang indo bok an ta; hmun hrang hrangah tàm tlâng a ta, lir inhnîng bok a tih. 8 Chuong po po chu nauhase intanna a nih. 9 "Chun, soisak dingin inmantir an ti cheu a, keima leiin hnam tin theida nîng in tih. 10 Chu huna chun mi tam tak ringna inphet a ta, inphatsan tuong an ta, intheida ton an tih. 11 Zawlnei tehlèm tam tak hung suok an ta, mi tam tak hlèm an tih. 12 Rîtlona a pung nasa êm leiin mi tam tak hmangaina chu la dei a tih. 13 Nisienlakhom, a tawp chena ngîr nghettu chu sandamin um a tih. 14 Ram Chanchin Tha hi hnam po po hriet dingin khawvel pumpuiah hril nîng a ta, chu zoa chun tawpna chu hung tlung a tih. 15 "Chuongchun, sukramtu tirdakum, zawlnei Daniel hril kha hmun thienghlima ngîr in hmu huna chun (tiemtu chun a umzie hre raw se), 16 Judai rama umhai chu tlângramah tlân raw se. 17 In chunga um chu in sûnga thil inchù dingin tum thla naw raw se. 18 Loa fe khomin silfèn inchù dingin inah fe naw raw se. 19 Chuong hun laia inrâihai le naute pom lai neihai ta ding chun a va râpthlàk awm ngei de! 20 In tlânsiet ni ding chu thlasik lai amanih le Sabat ni amania a hung tlung nawna dingin tongtai ro 21 Chu huna chun rinumna nasa tak tlung a ta, chuong anga rinumna nasa chu khawvel hung uma inthok tu chen hin a la um ngai naw a, um nawk ta ngâi bok naw nih. 22 Chuong nihai chu suktawi ni naw sien chu, tu khom dam khawsuok um naw ni hai; sienkhom, thlanghai leiin chuong nihai chu suktawi nîng a tih. 23 "Chu huna chun tu khomin in kuomah, 'En ta u, Krista chu hi taka hin a um' amanih, 'Saw taka son a um' amanih an ti chun awi naw ro. 24 A san chu, Krista tehlèm le zawlnei tehlèm hung suok an ta, thlanghai chen khom an hlèm theina dingin inchikna thilmak ropui tak tak thawng an tih. 25 Ngai ta u, a hun a tlung hmain ka hril diem cheu a ni hi. 26 Chuongchun, in kuomah, 'Saw, thlalêrah a um' an ti chun fe suok naw ro. 'En ta u, pindan sûngrilah a um' an ti khomin awi bok naw ro. 27 Sak tienga inthoka kawl hung inlepin thlang tieng chen a dêt var angin Mihriem Naupa hung nawk ni khomin um a tih. 28 "Khaw lai khom saruong umna taphotah mulukolhai khom an fuon khawm hlak. 29 "Chun, chuong ang rinumna ni chu a liem charin nisa inthim a ta, thlain var insuo naw ni a, vàna inthokin arasihai til an ta, vàn thilthawtheina chu sukhnîng nîng a tih. 30 Chu huna chun Mihriem Naupa inchikna vànah hung inlang a ta, hnuoia hnam tinin sûn an ta, Mihriem Naupa hi thilthawtheina le ropuina nasa tak leh vàn sûm laia hung hmûng an tih. 31 Vàntirkohai chu tawtawrawt ri inring tak leh tir suok a ta, anni chun thlanghai chu hnuoi kil lia inthok le vàn tawpa inthoka vàn khing tieng tawp chenin lawr khawm an tih. 32 "Chuongchun, theichang kûng um dàna inthokin thil inchûk ro. A zîk a hung indawn a, a hna a hung inder chun nipui a'n tan ding ti in hriet hlak. 33 Chuong ang bokin, hieng thilhai hi in hmu pha chun ama hung chu a hnai ta a, kotkhàr bulah a um tah ti hre ro. 34 Thu dik ka hril cheu hi, chuong po po chu a tlung kim hma chun tu lai mihaio hi bo naw top an tih. 35 Hnuoi le vàn bo a ta, ka thu ruok chu bo naw nih. 36 "Nisienlakhom, chuong thil hung tlung hun ding ni le dâr chu Pa chauh naw chun tu khomin an hriet nawh, vàna vàntirkohai khomin, Naupa khomin an hriet nawh. 37 Nova dam laia thil tlung ang bok khan Mihriem Naupa hung nawk ni chun tlung a tih. 38 Tui lèt hma, longa Nova a lùt ni chenin fain an dawn a, nuhmei pasal an innei a. 39 Tui a hung lêt a, an rênga a làk hmang vong chen khan an chungah iem a hung tlung ding ti tu khomin an hriet nawh. Mihriem Naupa a hung nawk pha khom chuong ang bok chun nîng a tih. 40 Loah mi pahni um an ta, pakhat chu làk nîng a ta, pakhat chu màksan nîng a tih. 41 Nuhmei pahniin bu suk an ta, pakhat chu làk nîng a ta, pakhat chu màksan nîng a tih. 42 "Chuongchun, inring zingin um ro, ieng tik ni am in Lalpa a hung ding ti in hriet si nawh. 43 Nisienlakhom, hi hi hre ro: zàna rûkru hung ding hun inneituin hre lawk sien chu, lo inring a ta, a in inroktir naw nih. 44 Chuleiin, nangni khom inpei sa zingin um ro, in beisei naw lai takin Mihriem Naupa chu hung hlauh rawi a tih. 45 "A puin a insùnga siehlawhai chunga hotu le a hun taka an bu sempêktu dinga siehlaw ringum le var a sie chu tu am ni tâng a ta? 46 A pu a hung kîr nawk phaa chuong anga thawtu siehlaw a hung hmu chu a ta dingin a tha. 47 Thu dik ka hril cheu hi, a nei po po chunga hotuah siem a tih. 48 Amiruokchu, chu siehlaw chu mi suol ni ta sien, 49 'Ka pu hi hung vak naw nih' tia ngaiin a siehlawhai chu vawin, zuruihai leh fain dawn sien, 50 a pu chu a beisei naw ni le a'n ring naw hun dârkârah hung a ta, 51 bong tam insuongp a ta, lêmderhai chan inchangtir a ta, chu taka chun tapin hâ rawt a tih.

Matthew 25

1 "Vàn ram chu nunghàk thienglâm sawm, an khawnvar seng chawia moneitu hmuok dinga suokhai ang chu a nih. 2 Anni laia panga chu an intlaw a, panga chu an var a. 3 Intlawhai chun khawnvar an chawi ve senga chu a tui an chawi sa naw a. 4 A varhai ruok chun an khawnvar leh a bûrin a tui khom an chawi sa a. 5 Moneitu chu a hung intak leiin an rêngin imuin a zîm a, an in ta vong a. 6 "Zànrila chun rawlin, 'Ngai ta u, moneitu chu a hung ie, hmuok dingin hung suok ro khai' tiin a hung puong a. 7 Chu phing leh nunghàkhai chu an tho vong a, an khawnvarhai an buotsai a. 8 Intlawhai chun a varhai kuomah, 'In khawnvartui kha a then mi sem ve ro, kan khawnvarhai a thi ding an tah" an ta. 9 Nisienlakhom, a varhai chun, "Ni thei naw nih. Keini le nangni ta ding indai thei naw nih. A zortuhai kuomah fe unla, va'n chaw lem ro" an ta. 10 Inchaw dinga an fe kàrin moneitu chu a hung tlung a. Nunghàk thienglâm, inpei saa lo umhai chu ama ruolin mo lawmna ruoi kîl dingin an lût a, kot chu an khàr tah a. 11 Chu hnung chun nunghàk danghai khom chu an hung tlung ve a, 'Pu, pu, kot mi hongpêk rawh' an ta. 12 Ama ruok chun, 'Thu dik ka hril cheu hi, nangni ka hriet ngai naw cheu' a ta. 13 Chuleiin, inring zingin um ro, Mihriem Naupa hungna ding ni le dârkâr chu in hriet si nawh. 14 " Vàn ram chu mi pakhat, ram danga inzin dingin a siehlawhai ko khawm a, an kuomah a sumhai a'n koltir ang chu nîng a tih. 15 An tlin tawk ang peiin siehlaw pakhat chu talen nga, pakhat chu talen hni, pakhat dang chu talen khat, a pêk a, a'n zin ta dai a. 16 Talen nga dongtu chu a va sumdawng nghal a, talen nga dang a sukhlawk a. 17 Chuong ang bokin talen hni dongtu chun talen hni dang a sukhlawk a. 18 Talen khat dongtu ruok chun hnuoi a cho a, a pu tangka chu a phûm rùk ta lem a. 19 "Sawt tak hnungah an pu inzin chu a hung kîr a, an sum kolhai chu a sukfelpui a. 20 Talen nga dongtu chu a hung a, talen nga dang chu a hung chawi a, "Pu, nangin talen nga i mi'n koltir a, en ta, talen nga dang ka lo sukhlawk ie" a ta. 21 A pu chun, "Siehlaw tha le ringum, i thaw tha. Tlawmte chungah i ringum a, tam tak chungah inumtir ka ti che. Hung la, i pu lawmnaa hin hung thang ve rawh' a ta. 22 Talen hni dongtu khom chu a hung a, "Pu, talen hni i mi'n koltir kha, en ta, talen hni dang ka lo sukhlawk' a ta. 23 A pu chun, 'Siehlaw tha le ringum, i thaw tha. Thil chikteah i ringum leiin thil tam tak chungah inumtir ka ti che. Hung la, i pu lawmnaa hin hung thang ve rawh" a ta. 24 "Talen khat dongtu khom chu a hung a, 'Pu, mi tawk khir tak i nih ti ka hriet a, i tù nawnaa khom i sîk hlak a, chi i thè nawnaa khom a rà i lâk khawm hlak. 25 Chuleiin ka ti che a, i talen kha hnuoiah ka phûm rûk a, en ta, a ngai char kha i hmu nawk hi" a ta. 26 A pu chun, "Nang siehlaw suol le thabopa, ka tù naw khom ka sîk a, chi ka thè nawnaa khom rà ka sîk hlak ti i hriet maw? 27 Chuong a ni sà chun, ka tangka kha sumdawngtuhai kuomah a pung umin i lo sie ding annawm, ka hung kìrin a pung leh ka hmu theina dingin. 28 Talen khat kha làkpêk unla, talen sawm neitu kha pe ro. 29 A nei taphot pèk belsa nîng an ta, hung hau an tih. A nei naw chu, a nei sun khom làkpêk nîng an tih. 30 Siehlaw hmangna bo kha tuol inthimah pei suok ro, chu taka chun tapin hâ rawt raw se. 31 "Chun, Mihriem Naupa hi a ropuinaa vàntirko po po leh a hung huna chun a vàn lalthungpha ropuia chun inthung a ta, 32 a hmaa chun hnam tin hung inkhawm an ta, beram vêngtuin kêl le beram a thè angin annihai chu thêng a ta, 33 beramhai chu a chang tieng, kelhai chu a voi tieng sieng a tih. 34 "Chu huna chun Laltak chun a chang tienga mihai kuomah, 'Ka Pa vochuomhai, hung unla, khawvel siem tira inthoka in ta dinga ram buotsai chu chang ro. 35 Ka phing a tâmin nangnin fàk ding in mi pèk a; ka dang a chârin dawn ding in mi pèk a; mikhuol ka niin in mi'n tlungtir a; 36 saruoka ka umin puon in mi'n siltir a; ka damnawin in mi enkol a, lung ina ka'n tângin in mi hung kan hlak' la tîng a tih. 37 "Chuongchun, mi felhai chun, 'Ieng tik khan am phingtâmin kan hmu chea bu kan pêk che a, dangchârin i uma tui kan indawntir che? 38 Ieng tik khan am mikhuolin kan hmu che a, kan intlungtir che a, saruokin i uma puon kan insiltir che? 39 Ieng tik khan am damnawin amanih, lung ina intângin amanih kan hmu che a, kán kan che?' tiin la don an tih. 40 Laltak chun, 'Thu dik ka hril cheu hi, hieng ka unauhai laia chîn tak pakhat chunga in thaw chu ka chunga in thaw a nih' tiin la don a tih. 41 "Chu zoa chun, a voi tienga mihai kuoma khom chun, 'Tongsie phurhai, kumkhuo meidil, Diebol le a rawihai ta dinga buotsaia chun mi fesan ro. 42 Ka phîng a tâmin nangnin fàk ding ieng khom in mi pèk nawh, ka dang a chârin dawn ding in mi pêk bok nawh. 43 Mikhuol ka niin in mi'n tlungtir naw a; saruoka ka umin puon in mi'n siltir naw a, ka damnaw lai le lung ina ka'n tàng laiin in mi kan nawh' la tîng a tih. 44 "Anni khom chun, 'Lalpa, ieng tik lai khan am phingtâmin amanih, dangchârin amanih, mikhuolin amanih, saruokin amanih, damnawin amanih, lung ina intàngin amanih kan hmu che a, rong kan bawlpèk naw che?' tiin la don an tih. 45 Ama chun, 'Thu dik ka hril cheu hi, hieng mi chîn tak laia pakhat chunga in thaw naw chu ka chunga khom in thaw naw a nih' la tîng a tih. 46 "Chuongchun, anni rawi chu chatuon hremnaah fèng an ta, mi felhai ruok chu chatuon hringnaah lût an tih" a ta.

Matthew 26

1 Isun chuong thu po po a hril zo chun a zirtirhai kuomah, 2 "Ni hni hnungah Fekân Kùt a um ding ti in hriet a, Mihriem Naupa hi hemde dingin an pèk suok ding a nih" a ta. 3 Chuong lai chun Thiempu laltak Kaiafa an ti in huon sûng tuolah thiempu lalhai le vàntlâng upahai chu an inhawr khawm a, 4 Isu chu a rûk a ràla man le that dàn ding an phierrùk a. 5 "Sienkhom, Kût sûng chu ni naw sien, chuong naw chun mipui lai buoina suok hlauh rawi a tih" an ta. 6 Bethani khuoa phâr pakhat Simon ina Isun thlaithlèng a ot laiin, 7 alasbastar bùra hriek rimtui to tak chawiin nuhmei pakhat a kuomah a hung a, a luah hriek rimtui chu a buok a. 8 Zirtirhaiin chu chu an hmuin an lung a sen hle a, "Ieng dinga hienga rimtui a sukhmangthai mei mei am a na? 9 Hi hriek rimtui hi to taka zor a, mi retheihai pèk thei a ni vei leh" an ta. 10 Isun chu chu a hrietin an kuomah, "Hi nu hi ieng dinga in sukbuoi am? Thil tha tak ka chungah a thaw a ni hi. 11 Mi retheihai chu in kuomah ieng lai khomin an um a, kei ruok chu nangni lai um zing ding ka ni nawh. 12 Hi hriek rimtui, ka taksaa a bur hi, phûm dinga a mi buotsaina a nih. 13 Thu dik ka hril cheu hi, khawvel hmun tinah hi Chanchin Tha hi an hrilna taphotah hi nu thilthaw khom hi, ama hriet zingna dingin, hril ve pei an tih" a ta. 14 Chu hnung chun sawm le pahnihai laia pakhat, Juda Iskariot an ti chu thiempu lalhai kawlah a fe a, 15 "Ama chu inmantir ka ti cheu. Iem mi pêng in ta?" a ta. Chuongchun, tangka sawmthum pèk an tiem a, ama chu an pèk a. 16 Chu taka inthok chun a'n mantir dàn ding remchâng a zong ta zing a. 17 Chol thang lo bei kût ni hmasa taka chun zirtirhai chu Isu kuomah an hung a, "Khaw lai hmun am i ta dingin Fekân Kùt ruoi buotsai inlang i nuom a?" tiin an hung indon a. 18 Ama chun, "Khawpuia tu amanih inah va fe unla, a kuomah, 'Zirtirtuin ka hun a hnai tah a, ka zirtirhai leh i inah Fekân Kùt ruoi kan kîl ding a nih' a tih tiin va hril ro" a ta. 19 Isun a hril ang charin zirtirhai chun an va hril sawng a, Fekân Kût zànbu ding chu an buotsai a. 20 Zàn tieng chun zirtir sawm le pahnihai leh zànbu chu an kìl a. 21 An fàk lai chun Isun, "Thu dik ka hril cheu hi, nangni laia mi pakhatin mi'n mantir a tih" a ta. 22 Chuongchun an lungzing ta èm êm a, a hmatiemin Isu kuomah, "Lalpa, kei chu ni naw ning maw?" an ta. 23 Isun, " Ka ruola thlênga a kut phûmtu ngei chun mi'n mantir a tih. 24 Mihriem Naupa hi a chungthu an lo ziek ang takin a fe ding a nih; sienkhom Mihriem Naupa inmantirtu ding chung chu a rik ie; chu mihriem chu pieng naw law law sien a ta dingin a tha lem" a ta. 25 A'n mantirtu ding Juda Iskariot chun, "Rabbi, kei chu ni awm naw tak maw?" a ta. Ama chun, "Ni e, nang i nih" a ta. 26 An fâk lai mèk chun Isun bei chu a lâk a, lawmthu a hril zoin a khoi a, a zirtirhai kuoma chun a pêk a, "La unla, fa ro; hi hi ka taksa a nih" a ta. 27 Chuong ang bokin no khom chu a lâk a, lawmthu a hril zoin an kuomah a pêk a, 28 "In rêngin dawn ro; hi hi ka thisen, thuthlung thisen, suol ngaidamna dinga mi tam tak ta dinga suok ding chu a nih. 29 Ka hril cheu hi, ka Pa rama nangni leh a thara ka dawn hun a tlung hmâ khat chu grêp rà tui hi dawn nawk ta ngai naw ning" a ta. 30 Hla an sak zoin Oliv tlàng tieng panin an suok a. 31 Chun, Isun an kuomah, "Voizân hin in rêngin mi nghatsan vong in tih; 'Berampu chu vuong ka ta, beram ruol chu indar an tih' ti ziek a ni kha. 32 Nisienlakhom, keithoa ka um hnungin Galili ramah lo fe hmasang ka tih" a ta. 33 Peter ruok chun, "An rêngin nghatsan vong hai sien la che khom kei chun nghatsan naw ning cheng" a ta. 34 Isun a kuomah, "Thu dik ka hril che hi, ar a khuong hmain voizân hin voi thum mi'n phat i tih" a ta. 35 Peter chun, "Nang leh thi ding ni lang khom, inphat naw top ka ti che" a ta. Chuong ang chun zirtir danghai khomin an ti seng a. 36 Chu zo chun Isu le a zirtirhai chu hmun pakhat Getsemani an tia chun an fe a, an kuomah, "Saw laia ka va tongtai kârin hi taka hin lo inthung ro" a ta. 37 Peter le Zebedai nauhai pahni chu a thuoi a, thlaphângin a beidong hle a. 38 An kuomah, "Ka thlâ a phâng ngot el, thipui khop hiel a nih. Hi taka hin lo um inla, mi mengpui ve ro" a ta. 39 Hma tieng a va fe hret a, a bokkhup a, "Aw Pa, a thei chun hi no hin mi pêl hrâm raw se; nisienlakhom ka thu ni loin nangma thu ni lem raw se" a ta. 40 Zirtirhai kuoma chun a hung a, an inlusu chu a hung hmu a. Chuongchun, Peter kuomah, "E khai, dârkâr khat khom in mi mengpui thei naw a ni maw? 41 Thlêmnaa in lût nawna dingin invêngin tongtai ro. Thlarau chun a pei a, taksa ruok chu a hrât naw hlak a nih" a ta. 42 A va fe voi hninaa chun a tongtai nawk a, "Aw Pa, hi no hi ka dawn loa làk hmang thei a ni naw chun, nangma thu angin tlung raw se" a ta. 43 A hung nawk a, an inlusu a hung hmu nawk a, an meng zo hlol si naw a. 44 Chuongchun a màksan tawl nawk a, a voi thumnaah a thu hril ngai bok hrilin a tongtai nawk a. 45 Chu zoa chun a zirtirhai kuomah a hung a, "In la inlusu zing a ni maw? Ngai ta u, Mihriem Naupa hi mi suolhai kuta inhlàn a ni ding hun chu a hung tlung tah. 46 Tho unla, fèng ei tiu. En ta u, a mi'n mantirtu ding khom a hung tlung ta saw!" a ta. 47 A hril lai zingin Juda, sawm le pahni laia pakhat chu a hung tlung a, ama ruol chun thiempu lalhai le vàntlâng upahai hung tir mi tam tak, kawlhnâm le hmoltum chawiin an hung tlung bok a. 48 A'n mantirtu ding khan, "Ka fawp taphot chu ama nîng a tih" tia inchikna a lo hril sa vong a na. 49 Chuongchun, Isu a va pan ta nghal a, "Chibai Rabbi" tiin a fawp a. 50 Isu chun, "Ruola, i hung san chu thaw el rawh" a ta. Chu phing leh man mihai chun an hung hnai a, Isu chu an chel a, an man ta a. 51 Isu rawihai laia pakhat chun a kawlhnâm a phawi a, thiempu laltak siehlaw chu a sât a, a nakawr a fikpêk a. 52 Chu phing leh Isun, "I kawlhnâm kha a pâiah thun rawh; kawlhnâm ruoitu po po chu kawlhnâmin an thi ding a ni si a. 53 Vàntirko sîngsari nêka tam hung tir nghàl dingin ka Pa ka hni thei naw i ring am a ni? 54 Sienkhom, ngên ta lang, hieng ang thil hung tlung ding hrilna Pathien Lekha thuhai chu ieng tin am hlen ni thei a ta?" a ta. 55 Chuong lai chun Isun mipuihai kuomah, "Hel hmang man ding ang elin kawlhnâm le hmoltum chawiin in hung inthok a ni maw? Ni tin tempulah inthungin mi ka'n chûktir hlak a, in mi man si nawh. 56 Nisienlakhom, zawlneihai thuziek po po chu a hung tlung kimna dingin hieng thil hi a um a ni hi" a ta. Chuongchun, a zirtirhai chun an zàmsan a, an tlàn hmang ta rip a. 57 A mantuhai chun Isu chu thiempu laltak Kaiafa in, Dàn zirtirtuhai le khawtlâng hotuhai an lo inkhawmnaa chun, an thuoi a. 58 Peter chun hla feah thiempu laltak in huon sûng tuol lai chen a zui a; chun, a va lût a, a tawp chena thil tlung chu hmu tumin vêngtuhai lai a thung ve a. 59 Thiempu lalhai, Dàn zirtirtuhai le Sanhedrin mi po po chun thu khêla intumin, Isu an sukhlum thei dàn ding an dap khawm a. 60 Hrepuitu tehlèm tam tak an ngìra chu thu tling an hmu zo si nawh. 61 A tawpah mi pahni an hung ngìr a, "Hi pa hin, 'Hi Tempul hi thieka ni thuma bawl nawk thei ka nih' a tih" an ta. 62 Chuongchun, thiempu laltak chu a ngîr suok a, Isu kuomah, "Hienghai hèkna che hi i don thei naw maw? An hèkna che hi ieng thu am an ta a?" a ta. 63 Isu ruok chu a to zing a. Thiempu laltak chun, "Pathien hring sâlin thu ka kam che: Krista, Pathien Naupa i ni le ni naw mi hril tawl rawh" a ta. 64 Isu chun, "I ti annawm. Nisienlakhom, ka hril cheu hi, hun la tlung dingah Mihriem Naupa hi Ropuitak chang tienga thung le vàn sûm laia hung la hmûng in tih" a ta. 65 Chu phing leh Thiempu laltak chun a silfènhai a keithlèr a, "Pathien a hrilsiet a nih; thuhretu dang ei la ngai rop am a ni? Ngai ta u, Pathien a hrilsietzie chu tu el khan in hriet ta kha. 66 Ieng tin am in ngai a?" a ta. "Thi tlâk a nih" tiin an don a. 67 A hmâiah chil an sâk khum a, an lok a, 68 thenkhatin, "Nang, Krista, q tuin am a ben che, hril thei rawh" tiin an ben bok a. 69 Peter chu in inhuon sùng tuol lai a'n thung a, siehlaw nunghàk a kuomah a hung a, "Nang hi Galili mi Isu kuoma um kha i nih" a ta. 70 Peter ruok chun, "I thu hril umzie chu ka hriet map nawh" tiin an rênga hmaa chun a'n phat a. 71 In inhuonna kotpuia a va suok chun siehlaw nunghàk dangin a hmu a, chu taka umhai kuoma chun, "Hi pa hi Nazaret Isu kuoma um ve kha a ni hi" a ta. 72 Peter chun, "Chu mihriem chu ka hriet ngai nawh' tiin inkhâm hielin a'n phat nawk a. 73 Sawt naw te hnungah chu taka ngîrhai chun Peter kuomah, "Nang khom hi anni laia thang ni ngei i tih, i tong awphawia inthokin a'n hriet annawm" an ta. 74 Peter chun tongsie phur hiel dinga inkhâmin, "Chu mihriem chu ka hriet ngai nawh" a ta. 75 Ar a khuong ta nghal a. Isun, "Ar khuong hmain nangin voi thum mi'n phat i tih" a ti kha Peter chun a hriet suok a. Chuongchun, a suok a, lungna takin a tap zoi zoi a.

Matthew 27

1 Zîngkâr chun thiempu lalhai le vàntlâng upahaiin Isu chu sukhlum dingin a chungthu an rêl a. 2 Chuongchun ama chu khuopa keiin, Lârsâp Pilat hmaah an thuoi a. 3 A'n mantirtu Juda chun Isu chu thiem naw an inchangtir ti a hriet phing leh a'n sìr a, tangka sawmthum kha thiempu lalhai kawlah a va thak kìr a. 4 "Tu poi khom hril lo, thi dinga ka'n mantir kha ka lo thaw suol a nih" a ta. Anni ruok chun, "Chu chu kan ta dingin iem an leh? Nangin i chang chang changpui rawh" an tisan a. 5 Chuongchun, tangka chu tempul sûngah a dèng lùt a, a fe a, a va'n awk hlum a. 6 Thiempu lalhai chun tangka chu an làk a, "Hi hi tempul tangka bawma sie a thieng nawh, thisen man a ni si a" an ta. 7 Chuongchun, an inrawn khawm a, mikhuol thihai phûmna ding bêlhemtu hmun inchawknaa hmang dingin an rêl a. 8 Chu lei chu a nih chu hmun chu tu chena 'Thisen Hmun' tia an ko tâkna chu. 9 Zawlnei Jeremi hmanga "A luong man dinga Israel mihai sak, Tangka sawmthum chu an lâk a; 10 Lalpan thu a mi pèk angin, Bêlhemtu hmun manah an hmang a"tia hril chu a hung tlung tah a nih. 11 Isu chu Lârsap hmaah a ngîr a, Lârsap chun, "Judahai lal i ni maw?" tiin an don a. Isun, "I ti annawm" a ta. 12 Thiempu lalhai le upahai hêkna chu a ieng khom a don nawh. 13 Chuongchun Pilatin, "An hêkna zozài che hi i hriet naw maw?" a ta. 14 Nisienlakhom, Isun a don dêr naw a, an hêkna pakhat khom a don naw leiin Lârsap chun mak a ti hle a. 15 Lârsap chun kût nia insuo dinga mipuiin tâng an hni taphot chu a'n suopêk hlak a. 16 Chuong lai chun mi suola inthang pakhat Baraba an ti chu lung inah a'n tâng a. 17 Chuongchun, mipui hung pung khawmhai kuoma chun Pilatin, "Tu am insuopêk lang cheu in nuom- Baraba am Isu, Krista an ti lem hi?" a ta. 18 Thîkna leiin Isu chu a kutah an hung pèk suok a nih ti a hriet si a. 19 Rorêlna thungphaa Pilat a la'n thung zing laiin a nuhmeiin, "Kha mi fel tak chunga khan ieng khom thaw naw rawh, voisun hin ama leiin mangah nasa takin ka tuor a nih" tiin thu a hung incha a. 20 Nisienlakhom, thiempu lalhai le upahai chun Baraba insuoa Isu chu sukhlum dinga ngèn dingin mipui chu an thu hne a. 21 Lârsapin, "A tu lem am insuopêk lang chêu in nuom a?" a ti nawk a. 22 Anni chun "Baraba" an ta. Pilatin an kuomah, "Chuong an leh Krista an ti Isu hi ieng tin am thawng ka ta?" tiin a'n don a. An rêngin, "Kraws-ah hemde rawh" an ta. 23 Lârsap chun, "Ieng leiin am? Iem a thawsuol a?" a ta. Nisienlakhom, mipui chun inring nawk zuolin, "Kraws-ah hemde rawh" tiin an khêk tuor tuor a. 24 Pilat chun a khawk dèr ti a hmuin le buoina nasa lem suok el thei dinga a hriet leiin tui a lâk a, mipui hmaa chun a kut a sawp a, "Hi mi fel thisena hin ka'n thieng, nangnin in láw làw law ro" a ta. 25 Mipui chun an rêngin, "A thisen maw chu keini le kan nauhai chungah um raw se" tiin an don a. 26 Chuongchun, Baraba chu a'n suopèk a, Isu ruok chu a'n vuoktir a, hemde dingin a pêk suok ta a. 27 Chu zoah Lârsap sipaihai chun Isu chu Praitorian-ahr an thuoi a, anni rawi po chun an ngîr huol a. 28 A zakuo an hlìppèk a, kor fuol senduk an inhâktir a. 29 A lallukhum dingin hling an inkuol a, an inkhumtir a. A kut chang tieng luong hmol an inchawitir a, a hmaah an dingthathuon a, "Chibai, Judahai lal" tiin nuizat bûrin an hmang a. 30 Chun, chil an sàkkhum a, hmol chu an làkpèk a, a luah an vuok an vuok a. 31 Nuizat bûra an hmang zo chun a zakuo chu an hlîppèk a, ama zakuo pangngai chu an inhâktir nawk a, kraws-a hemde dingin an thuoi tah a. 32 An fe laiin lampuiah Kurini khaw mi, a hming Simon an hmu a, Isu kraws putpui dingin an man lui a. 33 Golgotha, 'Lu ru hmun' an ti chu an va tlung a; 34 chu taka chun dawn dingin uoiin, thil kha le pol an pêk a, a hang intem a, a dawn nuom naw a. 35 An hemde zo chun a silfènhai chu thum vawrin an insem a. 36 Chu taka chun inthungin ama chu an vêng a. 37 Ama an hêkna thu, 'Hi hi Isu, Judahai lal a nih' ti ziek chu a lu chungah an târ a. 38 Ama ruol chun suomhmang pahni an hemde ve a, a chang tieng pakhat, a voi tieng pakhat. 39 Mi inlon hut huthai chun an lu thinin an biek el a, 40 "Nang, tempul hi thieka ni thuma indin nawk theitu, insukdam rawh. Pathien Naupa i ni takzet chun kraws-a inthok khan hung tum ta la!" an ta. 41 Chuong ang bokin, thiempu lalhai chun Dàn zirtirtuhai le upahai leh nuizatin, 42 "Mi dang hman a sukdam hlak a, mani insukdam thei si lo! Israel lal a ni hi! Tuhin kraws-a inthokin hung tum sien, awi khom ei awi el rawi mawh! 43 Pathien a ring annawm, Pathienin a nuom chun sansuok raw se chu, 'Pathien Naupa ka nih' a ti kha" an ta. 44 Ama le an hemde suomhmanghai khomin chuong ang bok chun an ti-el a. 45 Sùn dar sawmpahnia inthoka chawhnung dâr thum chenin khawvel pumpui a hung inthim ta vong a. 46 Dâr thum vela chun Isu chu inring takin, "Eloi, Eloi, lama sabakthani" tiin a khêk suok a, chu chu "Ka Pathien, ka Pathien, ieng dinga i mi màksan am?" tìna a nih. 47 A bula ngîr thenkhatin chu chu an hrietin, "Elija a ko a ni chu" an ta. 48 Anni laia pakhat chu a tlân nghal a, sipon a lâk a, uoiin thûrah a'n chie a, hmolah a târ a, Isu chu indawntir a tum a. 49 Mi dang chun, "Ngaisak naw rawh. Ama san dingin Elija a hung hrim am, en ei tiu" an ta. 50 Isu chu inring takin a khêk nawk a, a thlarau an thla tah a. 51 Chu char chun tempul puonzàr chu a chung tienga inthoka a hnuoi tieng chenin a'n thlêr suok a, simkhawlei a hung inhnìng a, lungpuihaihai an koi dar a. 52 Thlànhai an hong a, mi thienghlim tam tak lo in tahai taksa khom keitho an ni tah a. 53 A tho nawk hnung chun chuonghai chu thlàna inthoka hung suokin khaw thienghlima chun an lùt a, mi tam tak kuomah an inlâr a. 54 Sipai za hotu le a rawihai, Isu vêngtuhaiin lirhnîng le thil hung tlunghai an hmu chun an ti èm êm a, " Hi pa hi Pathien Naupa a ni ngei el" an ta. 55 Chu taka chun nuhmei tam tak, a rong bawla Galilia inthoka Isu hung zuituhai chu an um bok a, hla taka inthokin an thlìr a. 56 Chuonghai lai chun Mari Magdalin hai, Jakob le Josefa nu Mari hai le Zebedai nuhmei khom an thang a. 57 Zàn tieng chun Arimathai khuoa mi hausa pakhat, a hming Josefa, Isu zirtir laia thang ve chu a hung a. 58 Ama chu Pilat kuomah a fe a, Isu ruong a hni a, 59 Pilat chun a lo phalpèk a. Chuongchun, Isu ruong chu Josefa chun a'n hlawm a, puon zâi inhmi fai takin a tuom a, 60 ama thlân thar, lung ker kuoka chun a'n zâl a, thlàn kotkhàr chu lung lien takin a khâr a, a fesan tah a. 61 Chu taka chun Mari Magdalin le Mari khom an um ve a, thlàn zawna chun an inthung a. 62 A zing, Sabat ni chun thiempu lalhai le Farisaihai chu a honin Pilat kuomah an fe a, 63 "Pu, Hlêmtu khan a dam laiin, 'Ni thum hnungah tho nawk ka tih' a ti kan hriet zing a. 64 Chuleiin, thlân chu ni thum ni chena vêng tha dingin thu pe rawh. Chuong naw chun a zirtirhaiin ama chu inru hmangin, vàntlâng kuomah mithi laia inthokin a tho nawk tah ti hlauh rawi an ta, hlêmna nuhnung lem chu a hmasa nêkin tha naw nawk zuol a tih" an ta. 65 Pilatin an kuomah, "Vêngtu sipaihai thuoi unla, thlân chu a him thei dàn taka in hriet angin invèngtir ro" a ta. 66 Chuongchun an fe a, thlàn lungkhàr chu an inchik a, vêngtuhai chu an invèngtir tlat a.

Matthew 28

1 Sabat zo, Pathienni tûk, khuo a var tawmin Mari Magdalin le Mari dang chu thlân en dingin an fe a. 2 Lir nasa takin a hung inhnìng a, Lalpa vàntirko vàna inthokin a hung tum a, lungkhàr chu a hung inhlum son a, a chungah chun a thung a. 3 A'n lang dàn chu kawlphe ang a na, a silfènhai chu vûr angin a vâr a. 4 Vêngtu sipaihaiin ama chu an ti êm leiin an inthin hawp a, an thidang a. 5 Vàntirko chun nuhmeihai chu a biek a, "Ti naw ro, Isu an hemde kha in zong a nih ti ka hriet. 6 Hi taka hin a um ta nawh, a hril tah ang khan a tho nawk tah. A zàlna hi hung en ta u 7 Chuleiin, fe nghal unla, a zirtirhai kuomah, 'Mithi laia inthokin keitho a ni tah a, Galili ramah a lo fe hmasa ding a na, chu taka chun ama chu hmûng in tih' ti ro. Ngai ta u, ka hril ta chêu hi" a ta. 8 Ti le lawm êm êm pumin thlàna inthok chun inhmaw takin an suok a, zirtirhai hril ding chun an tlàn kìr a. 9 Isun anni chu a'n tuokpui thut a, "Chibai" a ta. Chuongchun, an va hnai a, a ke chela kûnin an chawibiek a. 10 Chun, Isun an kuomah, "Ti naw ro. Fe unla, Galili rama fe dingin ka unauhai kha va hril ro, chu taka chun mi hmûng an tih" a ta. 11 Lampuiah nuhmeihai an la thang mèk lai chun vêngtu thenkhat chu khawpuiah an va lùt a, thil hung tlung po po chu thiempu lalhai kuomah an ripawt a. 12 Thiempu lalhai le upahai an inrawn zo hnung chun thaw dàn ding an phierrùk a. Vêngtu sipaihai chu tangka tam tak an pèk a. 13 Chun. an kuomah, "Zanah zirtirhai an hung a, kan in kârin an lo inrùk hmang a nih' tiin hril ro. 14 Chun, Lârsapin a lo hriet pal a ni khomin ama chu suklungawi kan ta, buoi sa ve lo dingin siem kan ti cheu" an ta. 15 Chuongchun, tangka chu an lâk a, an ti ang tak chun an hril thang a. Chu tienami chu tu chen hin Judahai lai an la hril dar tah pei a nih. 16 Chuongchun, zirtir sawm le pakhathai chu inhmùna dinga Isun a hril, Galili rama tlâng pakhat a chun an fe a. 17 Ama an hmu chun an chawibiek a; a then ruok chun an la ringhla deu a. 18 Isun anni chu a hung pan a, a biek a, "Hnuoi le vàna thuneina po po pêk ka ni tah. 19 Chuongchun fe unla, hnam tin zirtirah siem unla, Pa le Naupa le Thlarau Thienghlim hmingin baptis un la, thu ka pèk po po cheu hi zawm dingin zirtir ro 20 Chun, kei in kuomah kumkhuoin, hun tawp chen khomin, um zing ka tih" a ta.

Mark 1

1 Pathien Naupaa Isu Krista Chanchin Tha intanna chu, 2 Zawlnei Isai lekhabua, "Ngai ta, ka tirko i hmaah tir ka ta, Ama chun i lampui buotsai a tih. 3 Thlalêra mi khêk rawl chun, Lalpa lamlien ding siel unla, Lampui tlûn siempek ro"tia a ziek ang khan, 4 Baptistu Johan chu a hung a, suol ngaidamna thu hrilin, simna baptisma a'n changtir a. 5 Judai ram kil tina mi le Jerusalema mi po po chun an hung pan a, an suolhai an inpuong a, Jordan vadungah a lo baptis tawl a. 6 Johan chun sanghawngsei hmula siem zakuo a hâk a, savun kawngchùn a chûn a, a bu chu khauthikthi le ram khuoizu a nih. 7 Ama chun, 'Kei nêka ropui lem ka hnungah a hung a, kei hi chu kûna a pheikhok hrui sût tlàk khom ka ni nawh. 8 Kei chun tuiin ka baptis cheu a, ama ruok chun Thlarau Thienghlimin a baptis ding cheu a nih" tiin a hril a. 9 Chuong hun lai chun Galili ram Nazareta inthokin Isu a hung a, Jordan vadungah Johanin ama chu a lo baptis a. 10 Tuia inthoka Isu a hung suok charin vàn inhonga inthokin vathu anga Thlarau hung tum a hmu a, vàna inthok chun rawl a hung suok a, 11 "Nang hi ka Naupa, ka Dittak chu i nih, i chungah ka lawm èm êm a nih" a hung ta. 12 Thlarauin ama chu thlalèrah a tir suok nghal a, 13 chu taka chun ni sawmli zet Setanin a thlêm a, ramsahai lai a khawsa a, vàntirkohaiin a rong an bawlpèk a. 14 Lung inah Johan an khum hnungin Isu chu Galili ramah a fe a, Pathien Chanchin Tha hrilin, 15 "Hun chu a hung tlung tah. Pathien ram khom a hnâi tah. Sim unla, Chanchin Tha hi ring ro" a ta. 16 Galili dìl kama Isu a fe lai chun dîla Simon le a unaupa Andri lèn dèng lai chu a va hmu a, nga mantu an ni hrim a. 17 Isun an kuomah, "Hung unla mi zui ro, mihriem mantuah siem ka ti cheu" a ta. 18 Chuongchun, an lènhai màksanin an zui ta nghâl a. 19 Chu taka inthoka hnâi tea chun Jebedai naupa Jakob le a unau Johan a hmu a, an longah chuongin an lènhai an lo siem tha a. 20 Anni khom chu a ko nghâl a, an pa Zebedai le inhlawfa an mi sorhai chu longah màksanin an zui ve tah a. 21 Kapernaumah an fe a, Sabat ni chun Sunagogah Isu a lût a, a zirtir tan nghal a. 22 Dàn zirtirtuhai ang ni loa thu nei taka a zirtir lei chun mak an ti hle a. 23 Sunagoga chun thlarau tirdakum pai mi pakhat a lo um ve a, 24 "Nazaret Isu, iem a na kan chunga thaw i tum? Mi sukse dinga hung i ni? Tu am i nih ti ka hriet-Pathien Mi thienghlim chu i nih" tiin a khêk suok ta phut a. 25 Isun, "To la, a sûnga inthok khan hung suok rawh" tiin a hal a. 26 Ramhuoi tirdakum chun a soisak hrep a, inring taka hrângin a sûnga inthokin a hung suok a. 27 An rêngin, "Hi hi ieng thil am an ta leh? Zirtirna thar, thuneina le inkop a ni hi tie! Thlarau tirdakumhai khom thu a pêk a, an awi el hi" tiin mak an ti thu an inhril tuo a. 28 Galili ram hmun tinah a chanchin chu a'n thang tan ta nghâl a. 29 Sunagoga inthoka an suok chun Jakob le Johan hai leh Simon le Andri hai in tieng chu an pan nghal a. 30 Simon tarpi chu khawsikin a lo zâl a, a damnaw thu chu Isu an hril a. 31 Ama chun a va pan a, a kut a chel a, a kei tho a, a khawsik chu a rè tah nghâl a, an rong a bawlpèk a. 32 Chu zàn tieng, nisa tlâk hnung chun damnaw tinrêng, ramhuoi man dâm chenin, a kuomah an hung thuoi a. 33 A khaw nawtin kotkhàr bula chun an hung khawm a. 34 Chuongchun, natna chi hrang hranga na mi tam tak chu Isun a sukdam a, ramhuoi tam tak a hnot suok bok a, an tong ding ruok chu a khappèk a, ama chu tu am a nih ti an hriet si leiin. 35 Isu chu zîng khaw var hmain a tho a, a suok a, hmun fienrielah a fe a, chu taka chun a va tongtai a. 36 Simon le a ruolhai chun an zong a. 37 An va hmu chun, "Mi po poin an zong che" an ta. 38 Isu chun, "Hmun dang, a khaw sê vèla khom fêng ei tiu, chu hmuna hai khom chun thu ka hril theina dingin, chu chu ka hung san a ni si a" a ta. 39 Chuongchun, Galili ram po poa an Sunagoga hai chun lûtin thu a hril pei a, ramhuoihai a hnot suok a. 40 Chun, a kuomah phâr a hung a, a hmaah dingthathuonin, "I nuom chun i mi sukthieng thei" tiin sukdam a ngên a. 41 Isun ama chu a lunginsiet ëm êm a, a hei ban a, a them a, "Nuom e, lo inthieng ta rawh" a ta. 42 A phâr chu a dam ta nghal a, a hung inthieng ta a. 43 Khau taka thu pein, 44 "Tu kuoma khom ieng khom hril dêr naw rawh; amiruokchu thiempu va'n entir la, i dam ngei ti an hrietna dingin, Mosie thupèk ang khan inthienna thil va'n hlàn rawh" tiin a'n fetir nghâl a. 45 Ama chu a fe a, chu thu chu a hril a hril a, tlâng a'n sampui ta lem a. Chu lei chun Isu chu uolau takin khuoah a lût thei ta naw a, hmun fienrielah a um ta lem a. Chuong sà khom chun hmun tina inthokin mihaiin an hung pan a.

Mark 2

1 Ni iemani zàt hnunga Kapernaum a hung lùt nawk chun mihaiin inah a um ti an hung hriet tah a. 2 Chuongchun, in keng lo khopa tam an hung pung khawm a, kotkhàr bul chen khom an inhnaw sip vong a, an kuomah thu a hril a. 3 Mi paliin zeng an hung zawn a, a kuom tieng an hung panpui a. 4 Mipui an tam leiin Isu kuom an hung paw thei naw a, Isu umna zawn lai in chung chu an thiek a, zeng chu a khum pumin an zuk thlâk thla a. 5 An ringzie Isun a lo hmu chun zeng kuomah, " Ka naupa, i suolhai ngaidam a ni tah" a ta. 6 Chu taka inthung vehai lai chun Dàn zirtirtu thenkhat an um a. 7 An lungrilin, "Hi pa hin ieng leia hieng thu hi a hril am a na? Pathien a hrilsiet a nih. Pathien chauh naw chun tuin am suol a ngaidam thei a?" an ti a. 8 Chuong thil chu lungrilin an ngaituo ti Isun a hriet nghâl a, an kuomah, "Ieng dinga lungrilin chuong thil chu in ngaituo am a na? 9 Zeng kuomah, 'I suol ngaidam a ni tah' ti le 'Tho la, i puonpha chawi la, lawn ta rawh' ti hi a ieng am a olsam lem a? 10 Amiruokchu, hi khawvela hin Mihriem Naupain suol ngaidam theina a nei ti in hrietna dingin" a ta, 11 zeng kuoma chun, "Tho la, i puonpha la la, i inah fe rawh ka ti che" a ta. 12 Chuongchun, ama chu a tho a, a puonpha a lâk a, an mit hmua ngei chun a suok ta nghâl a. An rêng chun makti êm êmin, "Hieng ang hrim hrim hi ei la hmu ngai nawh" an ta, Pathien an inpàk a. 13 Chun, Isu chu Galili dìl kamah a lêng nawk a, mipui tam tak a kuomah an hung a, anni chu a lo inchûktir a. 14 A fe malamin Alfai naupa Levib chu sie chawina hmuna thung a hmu a, a kuomah, "Mi zui rawh" a ta, ama chu a tho a, a zui ta nghal a. 15 Levi ina zànbu a fàk laiin siekhontu le mi suol tam takin Isu le a zirtirhai chu thlaithlèng an otpui a, a zuitu chu an thahnem hle hrim a. 16 Siekhontu le mi suolhai zânbu a kilpui lai Farisaihai laia Dàn zirtirtuhaiin an hmu chun a zirtirhai kuomah, "Ieng dinga siekhontu le mi suolhai lai bu a fâk am a na?" an ta. 17 Isun chu chu a hrietin an kuomah, "Mi hriselin daktor an mamaw naw a, mi borsawmhaiin a nih an mamaw lem. Mi felhai lam dinga hung ka ni naw a, mi suolhai insimtir dinga hung ka ni lem" a ta. 18 Farisaihai le Johan zirtirhai bu nghei ni chun mi tuhai amanih an hung a, Isu kuomah, "Johan zirtirhai le Farisaihaiin bu an nghei a, ieng dinga i zirtirhaiin an nghei ve ngai naw?" tiin an hung indon a. 19 Isun an kuomah, "Anni lai moneitu a um sûngin mo thuoituhaiin bu an nghei hlak am a ni? Moneitu an umpui sùng chun bu an nghei ngai nawh. 20 Moneitu chu an kuoma inthoka thuoi hmang a ni hun la hung tlung a ta, chu pha ruok chun la nghei vêng an tih. 21 "Tu khomin puon thar la rin loin puon hlui an phawk ngai nawh, phawk tah ang sien, puon thar chun puon hlui chu kei tawm a ta, inek nasa zuol a tih. 22 Chun, tu khomin savun peng hluiah uoiin thar an thun ngai nawh, thun ta ang sien, uoiin thar chun savun peng hlui chu mor koi a ta, uoiin le a peng chu se vé vèng a tih; uoiin thar chu savun peng tharah an thun lem hlak" a ta. 23 Sabat tum khat chu Isu le a zirtirhaiin huit bu bil an hraw laiin a zirtirhaiin bu vui an thliek a. 24 Farisaihai chun Isu kuomah, "En rawh, ieng leia Sabat nia thaw thieng lo an thaw am a na?" an ta. 25 Ama chun, "Phingtâma Davida le a ruolhai an um laia an thil thaw kha in tiem ngai naw maw? 26 Thiempu laltaka Abiathar a thang lai a na, Davida chu Pathien inah a lût a, thiempuhai chauh fàk thieng hlânbeic chu a fâk a, a ruolhai khom a pêk ve a ni kha" a ta. 27 Ama bok chun an kuomah, "Sabat hi mihriem ta dinga siem a na, mihriem hi Sabat ta dinga siem a ni nawh. Chuleiin, Mihriem Naupa hi Sabat chunga chen khom Lalpa a nih" a ta. 28 (A um nawh)

Mark 3

1 Chun, Sunagogah a lût nawk a, chu taka chun mi pakhat kut zeng a lo um a. 2 An hêk theina dingin Sabat niin zeng chu a sukdam ding le ding naw an enthlàk a. 3 Kut zeng kuoma chun Isun, "Mipui hmaa hin hung ngìr raw leh" a ta. 4 An kuoma chun, "Sabat ni hin sukthat am suksiet, sukdam am sukhlum a thieng?" tiin a'n don a, sienkhom an to chip a. 5 An lungril ngarzie a hmuin poi a ti hle a, lungsen taka anni rawi chu a mel kuol hnungin zeng kuoma chun, "I kut phar suok rawh" a ta, a hei phar suok chun a dam ta nghâl a. 6 Chuongchun, Farisaihai chu an suok a, Isu an sukhlum thei dàn ding phierin Heroda pawlhai le chun an inrawn khawm tah nghâl a. 7 Isu chu a zirtirhai leh dil kam tieng an fe a, Galili rama inthoka hung mipui tam takin an zui a. 8 A thilthaw ropuizie an hrietin Judai ram dâm, Jerusalem dâm, Idumia ram dâm, Jordan râla inthok dâm le Sidon le Tura le an sè vêl khaw hrang hranga inthok dâmin mi tam tak an hung bok a. 9 Mipui an tam si a, an hung hneng chêp taluo pal thutah tiin a chuongna ding long lo buotsai lawk dingin a zirtirhai chu a hril a. 10 Mi tam tak a sukdam ta leiin natna nei taphot chun ama them tumin an baw huoi huoi el si a. 11 Thlarau tirdakumhai khomin ama an hmu pha bokkhupin, "Nang Pathien Naupa chu i nih" tiin an khêk hlak a. 12 Sienkhom, ama ruok chun a nìna tak chu puong lo dingin a khap tlat tawl a. 13 Isu chu tlângah a fe a, a mi ditzawnghai po chu a ko a, a kuomah an hung a. 14 A kuomah um a, a thu hrila a tir suok ding, 15 ramhuoi khom hnot suok thei mi sawmpahnih, 'tirko' tia a kohai chu a ruot a. 16 Sawmpahni a ruothai chu Simon (Peter an ti bok) hai, 17 Zebedai nau Jakob le a unau Johan, 'Bonergia' (Vàninrûm nau) an ti hai, 18 Andri hai, Filip hai, Bartholomai hai, Mathai hai, Thoma hai, Alfai naupa Jakob hai, Thadaid hai, Kanan mi Simon hai, 19 a'n mantirtu Juda Iskariot hai chu an nih. 20 Chun, Isu chu inah a lût a, mipui an hung pung khawm nawk a, a zirtirhai leh bu fâkna hun takngiel khom an nei hlei thei naw a. 21 A sûnghaiin chu chu an hrietin, "A thluok a buoi an ta chu!" an ta, ama thuoi dingin an hung inthok a. 22 Jerusalema inthoka hung thla Dàn zirtirtuhai khom chun, "Belzebub a zawl a ni hi. Ramhuoi lal leiin annawm ramhuoihai a hnot suok hlak" an ti bok a. 23 Anni chu Isun a ko a, tekhinthu hmangin an kuomah, "Setanin Setan bok iengtin am hnot suok thei a ta? 24 Ram khom ama le ama indo chu a ngîr thei nawh. 25 Mani le mani indo sûngkuo khom an ngìr suok thei bok nawh. 26 Setan khom ama le ama inkhinga a'n do si chun ngîr thei naw ni a, bohmang lem a tih. 27 Mi hrât chu an khuop de hmasa zet naw chun a inah hlukhumin a sum an làkpèk el thei nawh, an khuop de hnung ruok chun rok thei tàng an tih. 28 Thu dik ka hril cheu hi, mihai suolna po po le Pathien an hrilsietna po po chu ngaidam nîng a ta, 29 Thlarau Thienghlim hrilsetu ruok chu ngaidam ni ngai naw nih, a thilthaw chu chatuona thiem naw changna suol a ni si a" a ta. 30 "Thlarau tirdakum a zawl a nih" an ti lei khan chu chu a hril a nih. 31 Isu nu le a unauhai chu an hung tlung a, tuolah an ngìr a, ama ko dingin mi an tir a. 32 A bula mipui thunghai chun a kuomah, "En ta, tuola son i nu le i unauhaiin an zong che" an ta. 33 Ama chun, "Ka nu le ka unauhai chu tuhai am an na?" a ta. 34 A bula thunghai chu a hang en vel a, "En ta u, ka nu le ka unauhai hi. 35 Tu khom Pathien ditzawng thawtu chu, chu ngei chu ka unauhai, ka farnuhai, ka nuhai an nih" a ta.

Mark 4

1 Tum khat chu Galili dil kamah a'n chùktir nawk a. Mipui pung khawm chu an tam êm leiin dila longa chun a chuong a, a'n thung a, mipui chu dil kam hrûl khawmuola chun an um a. 2 Tekhinthu hmangin thil tam tak a'n chùktir tawl a. 3 An kuoma chun, "Ngai ro, loneitu hi bu chi thè dingin a fe a; 4 a hang thè chun a then lampuiah a tla a, vatehaiin an hung tlàn zo a. 5 A then pielthlèng, pil inphânnaah a tla a, a hung mawng nghâl a, 6 sienkhom hnuoi a sà naw leiin nisa a hung insàng a, a em vuoi a, zung a kei naw leiin a rop a. 7 A then hling buk lai a tla a, hling chu a hung inthang a, ra nei thei loin a dîp hmang a. 8 A then ruok chu pil thatna hmunah a tla a, a hung mawng a, a'n thang a, a let sawmthum dâm, a let sawmruk dâm le a let za dâmin rà a'n suo a" a ta. 9 Isun an kuomah, "Ngaithlâkna dinga na nei chun ngaithla ngun raw se" a ti bok a. 10 A fâla an um hnungin Sawmpahni le a thuoihruoi danghai chun tekhinthu umzie chu an indon chieng a. 11 Ama chun an kuomah, "Pathien ram thurûk chu in kuoma pèk a ni a, puo tieng mi ta ding ruok chun tekhinthu vonga hril a nih. 12 'En en siin hmu si nawng an ta, Ngaithla ngaithla siin hre si nawng an ta; Chuong chu ni naw sien ngha kîr an ta, Ngaidam an ni ta ding bah'ti ang khan" a ta. 13 Ama bokin, "Hi tekhinthu hi in hriet thiem naw chun ieng tin am tekhinthu dang lem chu hre thiem phâk hrim in ta? 14 Loneitu chi thè chu thu a nih. 15 Lampuia tlahai chu hieng ang hi an nih: thu an ngaithlàk a, sienkhom Setan a hung nghâl a, annia thu thea um chu a lâkpèk nawk nghâl hlak. 16 Chuong ang bokin pielthlèng chunga thè chu hieng ang hi a nih: thu chu an hriet a, lawm takin an pom nghal a, 17 sienkhom anniah zung a kei naw a, sawt naw te chauh a dai a, chu hnung chun thu leia rinumna amanih suknomnatna amanih a hung um pha an tlu nghâl hlak a nih. 18 Hling buk laia thè khom hieng mihai ang hi an nih: thu chu an hriet a, 19 sienkhom damsûng thil lungkhamna hai, hausak thlâkhlàna hai le thil dang châknahai chu an hung lùt a, thu chu an dîp hmang a, ra loin a um hlak a nih. 20 Hnuoi thaa thè ruok chu, thu chu hre a, pom a, a lêt sawmthum dâm, a lêt sawmruk dâm le a lêt za dâma rahai hi an nih" a ta. 21 Ama bokin an kuomah, "Khawnvar chu leikhawra khup khum dingin amanih, khum hnuoia sie dingin amanih in sit hlak am a ni? A sienaa sie ding a ni lem naw maw? 22 Puong lo dinga ip ieng khom a um naw a, inlang lo dinga thup ieng khom a um bok nawh. 23 Ngaithlâkna dinga na nei chun ngaithla ngun raw se" a ta. 24 Chun, ama bokin, "In thil ngaithlàk chu ngun takin ngaituo ro; in inkhìna hmang ngei chun inkhìpêk an ti cheu a, bel sa lem hman an tih. 25 A nei chu pèk belsa nîng an ta, a nei naw chu an nei sun khom lapêk an tih" a ta. 26 A hril pei a. "Pathien ram chu miin a loa thlài chî a thè ang hi a nih. 27 Zànah a in a, sùnah a tho a, a hriet naw karin chî chu toin sùn le zànin a'n thang zing a nih. 28 Hnuoi chun amain ra a hung insuotir hlak a, a hmasa takin a kûng, a dotah a vùi, chu zoah a vùia bu mal kim chu. 29 A rà chu a hung hmin a, bu sîk a hun tàk leiin kawiten a ât hlak a nih" a ta. 30 Chuongchun, a hril pei a. "Pathien ram chu ieng le'm hrilkhiin, ieng tekhinthu am hmangin hrilfie tâng ei ta? 31 Antam mu, chi ei thè hlak po po laia chîn tak ang hi a nih. 32 An hang thè chun thlài dang po po nêka lienin a hung inthang a, lien takin a hung inzâr a, chunglèng vatehaiin a buk chu riebûkah an hmang hlak" a ta. 33 Chuong ang tekhinthu hmang chun an hriet thiem thei zawng dingin thu chu an kuomah a hril hlak a; 34 tekhinthu naw chun an kuomah thu a hril ngai nawh. Ama zirtirhai kuoma ruok chu fienrielah iengkim a hrilfie hlak. 35 Chu ni zàn tieng chun a zirtirhai kuomah, "Ràl khing tieng son kâi ei tiu" a ta. 36 Mipuihai chu an màksan a, a chuongna long ma chun ama chu an fepui a, long dang khom an thang ve a. 37 Chun, thlipui na takin a hung hràng a, tuifawn chu longah a hung invor lùt a, long chu a pil vâng vâng el tah a. 38 Ama chu long mei tieng lukham khamin a lo in a. A zirtirhai chun an kei thoa, "Zirtirtu, kan bohmang el ding hi poi i ti naw maw?" an ta. 39 Ama chu a hung tho a, thli chu a hal a; tuifawn kuoma khom chun, "To la, um tok tok rawh" a ta. Thli chu a ma a, a hung rè ta thup el a. 40 A zirtirhai kuoma chun, "Ieng dinga chuong lawma in ti am a na? Ringna hrim in nei naw maw?" a ta. 41 Ti êm êmin, "Hi pa hi tu'm an ta le, thli le tuifawn chenin a thu an awi el hi?" an inti tuo a.

Mark 5

1 Galili dîl ràla Gerasinf mihai ram chu a tlung a. 2 Longa inthoka a hung suok chun thlarau tirdakum pài mi pakhat, thlàn hmuna inthoka hung chun a'n tuokpui a. 3 Chu pa chu thlàn hmunah a khawsa hlak a, tu khomin an thuhnè thei ta naw a, khaidiet khomin an thlung hnè ta nawh. 4 Khaidieta khit a, kol an inbuntir chang khomin khaidiet chu a kei tan a, thîr kolhai khom a suksiet pei a, tu khom a thunun zo an um nawh. 5 A sùn a zànin thlàn hmun le tlânga hai a khêk tuor tuor a, lung dàmin a'n àt thi neng nung hlak a. 6 Hla taka inthoka Isu hung a hei hmu chun a kuom tieng a tlân phei a, kûnin chibai a bûk a. 7 Rawl inring taka khêkin, "Isu, Pathien Chunghnungtak Naupa, ieng angin am mi law i tum a na? Mi soisa naw hràm dingin Pathien hmingin ka ngèn che" a ta. 8 Isun, "Nang ramhuoi porchê, mihriem sûnga inthok khan suok rawh" tia thu a pêk tah leiin chuong chu a hril a nih. 9 Chun, Isun, "I hming iem a na?" tiin an don a. Ama chun, "Ka hming chu Sângrukg a nih, tam tak kan nih" a ta. 10 Chu rama inthoka anni chu hnot suok lo dingin a ngên tâl a. 11 Chu tlâng panga chun vok ruol tam tak an tla khawm a. 12 Ramhuoihai chun, "Vok ruol lai son mi'n fetir la, an sûngah mi'n lûttir rawh" tiin an ngèn a. 13 Isun a phalpèk a. Chuongchun, thlarau porchehai chu an hung suok a, vok sûnga chun an lùt a. Vok ruol chu sânghni laia tam an na, dîl pang tênbarama chun an tlàn thla a, dîlah an tla hlum ta vong a. 14 Vok enkoltuhai chu khuo le a sè vèla mihai chu hril dingin an tlàn a, ieng thil am a tlung ti en dingin mihai chu an hung tlàn khawm a. 15 Isu kuom an hung tlung chun ramhuoi zawl Sângruk kha puon sil a, lungril pangngai puta inthung an hmu a, an tì èm êm a. 16 Ramhuoi zawl pa chunga thil hung tlung dàn le vok ruol chanchin chu mit ngeia hmutuhai chun an lo hril a. 17 Chuongchun, a ram mihai chun Isu chu an ram suoksan dingin an ngèn a. 18 Longa Isu a chuong ding lai chun ramhuoi zawl pa khan a kuoma um zing a ngên a; 19 sienkhom Isun a phal naw a, "I inah i sûnghai kuomah fe la, Lalpan i ta dinga thil a thawpèk chê le a lunginsietzie chê thu hi va hril lem rawh" a ta. 20 Ama chu a fe a, Dekapolih biela khuohaia chun Isun a ta dinga thil a thawpèk ropuizie chu a tlâng insampui a, mi po poin mak an ti hle a. 21 Longa ràl khing tieng Isu a hung kai nawk chun mipui tam tak an hung pung khawm a. 22 Sunagoga hotu pakhat, a hming Jaira chu a hung a, Isu a hmu chun a ke bulah a bokkhup a, 23 "Ka naunu nghàklakte a thi vâng vàng a. Hung hrâm la, a chungah kut innghat la, hung har a ta, dam nawk el a tih" tiin nasa takin a ngèn a. 24 Chuongchun, Isun a fepui a, mipui tam takin an zui a, an inhneng nuk nuk a. 25 Nuhmei pakhat, kum sawmpahni thi pûta damnaw a um a. 26 Daktor tam tak a pan tah a, a nei po po a sèng hnung khomin that tieng nêkin zuol tieng a pan deu deu lem a. 27 Chu nu chun Isu chanchin a lo hriet a, a hnung tieng mipui kâra chun a hung a, a puon chu a them a. 28 A lungril chun, "A puon chauh khom tawk lang, dam ka tih" a ta. 29 Chuongchun a thi pût chu a hung chàt a, a natna chu a dam tah ti a taksa chun a hriet nghàl a. 30 Isu khomin amaa inthokin thilthawtheina a suok ti a hriet nghal a, mipui lai chun a ngha vêl a, "Tu'm a na ka puon them kha?" a ta. 31 A zirtirhai chun, "Mipuiin an hneng sup sup che hi i hmu nghal a, iengtiziea a themtu che chu in don?" an ta. 32 Ama themtu chu hmu tumin a ngha vêl a. 33 A chunga thil hung tlung chu hrein nuhmei chu ti le inthin pumin a hung a, a hmaah a bokkhup a, iengkim indik takin a hril ta vong a. 34 Isu chun a kuomah. "Ka naunu, i ringna i dampui a nih, thlamuong takin fe ta la, i natna chu hung dam song ta raw se" a ta. 35 Isu a la tong zing laiin Sunagog hotu Jaira ina inthoka hunghai chun, "I naunu a thi tah. Zirtirtu hi suksawl ta da'l rawh" an hung ta. 36 Isu ruok chun an thu hril chu ngaisak loin Sunagog hotupa kuoma chun, "Ti naw la, ring el rawh" a ta. 37 Peter hai, Jakob hai, Jakob unaupa Johan hai ti chauh naw chun mi dangin an zui a phal naw a. 38 Sunagog hotupa in an va tlung a, buoi mur mura an lo tap khêk veng vung chu an hmu a. 39 A lût malam chun an kuomah, "Ieng dinga hienga buoia in tap khêk am a na? Naupang chu a thi nawh, a in a ni lem" a ta. 40 Anni chun an nuisan a. Chuongchun, an rêngin a hnot dok a, naupang nu le pa le ama zuituhai chauh chu a thuoi a, naupang zàlna pindana chun an lût a. 41 Naupang kut chu a chel a, a kuomah, "Talitha, kum" a ta, chu chu "Bawinu, tho rawh" tìna a nih. 42 Nuhmei naupang chu a hung tho a, a lawn ta nghàl a, ama chu kum sawmpahni mi a nih. Mak an ti takmeu a. 43 Ama ruok chun an kuomah, "Tu khom hril naw ro" a ti tlat a; fàk ding pe dingin a hril bok a.

Mark 6

1 Chu taka inthok chun a suok a, a khuo tieng a pan a, a zirtirhaiin an zui pei a. 2 Sabat ni a hung tlung chun sunagogah a zirtir a, a thu ngaithlatu mi tam tak chun mak an ti hle a. "Hieng hi khaw laia inthoka a hriet am nîng a ta? Thilmak thaw theina khop hiel varna pèka a um hi ieng varna am ni tâng a ta? 3 Hi pa hi Mari naupa, Jakob hai, Josefa hai, Juda hai, Simonhai unaupa mistiri kha a ni naw am a ni? A farnuhai khom eini lai an um zing an naw maw?" an ta, a chungah an lungni naw hle a. 4 Isu chun, "Zawlnei chu ama khuo tieng le a laichinhai le ama sûngkuohai lai chawimawiin a um ngai naw hrim a nih"i a tìsan a. 5 An chungah kut innghata damnaw tlawmte a sukdam ti chauh naw chu chu taka chun thilmak hrim a thaw thei nawh. 6 An ring nawna lei chun mak a ti hle a. 7 Chuongchun, inchûktir malam peiin khaw hrang hrang a fang a. Sawmpahnihai chu a ko a, a kop peiin a tir suok a, thlarau tirdakumhai chunga thuneina khom a pêk bok a. 8 An kuomah, "In inzin pha funghrol chauh naw chu bei dàm, mansa dâm chawi naw unla, kawngchûnah poisa ip khâi bok naw ro. 9 Pheikhok ruok chu bun un la, sienkhom zakuo inthlâkna ding khom chawi naw ro. 10 In khaw sir in suoksan hmâ khat in tlungna ngaiah tlung zing ro. 11 Tu khuo khomin an lawm naw cheu a, in thu an ngaithlàk naw chun, chu khuo chu in suoksan ding pha an thaw indik nawzie inhriettirna dingin in kephaa pilvut chu thin thla ro" tiin thu an chà tawl a. 12 Chuongchun an inzin suok a, suol sim dingin mihai an zirtir a. 13 Ramhuoi tam tak an hnot suok a, damnaw tam tak hriek an nâl a, an sukdam bok a. 14 Isu hming chu a'n thang ta êm leiin Lal Heroda khomin a lo hriet ve tah a. Mi thenkhat chun, "Baptistu Johan kha mithi laia inthokin a hung tho nawk a, chuleiin hieng thilmakhai thawtheina hi amaah a thok a nih" an ta. 15 A thenin, "Elija a nih" an ta; a then ruok chun, "Zawlnei, tien laia zawlnei pakhat ang kha a nih" an ti bok a. 16 Herodan a lo hriet ruok chun, "A lu ka tanpèk Johan kha a nih, a hung tho nawk tah a ni chu!" a ta. 17 Heroda ngei chu Johan man dinga thupetu le lung ina khumtu a nih. Ama hin a unaupa Filip nuhmei Herodi chu nuhmeiah a neipèk leiin hieng thil hi a thaw a nih. 18 A san chu Heroda kuomah Johanin, "I unaupa nuhmei i làkpèk hi a thieng nawh" tiin a hril a. 19 Chuleiin Herodi chun Johan chu a theida a, sukhlum a nuom a, sienkhom a thei naw a; 20 Herodan Johan chu mi fel le mi thienghlim a nih ti a hriet a, a ti a, a hum tlat a. Johan thuhril a ngaithlàk chàngin Heroda chu inngaituo buoi hle hlak sienkhom a ngaithlàk nuom tlat bok si. 21 A tawpa chun hun remchang a hung tlung a. Heroda piengcham ni chun ruoi ropui tak a buotsai a, chu taka chun sorkar mi lien, sipai hotu le Galilia mi challanghai chu a fiel khawm a. 22 Herodi naunu chu a hung lùt a, a lâm a, Heroda le a ruoi kîltuhai chu a suklawm hle a. Heroda chun, "Ieng khom i hni taphot chu pêng ka ti che" a ta. 23 Chun, inkhâm meuin, "I mi hni taphot chu pêng ka che, ka ram zâtve hiel khom" tiin thu a tiem a. 24 Ama chu a suok a, a nu kuomah, "Iem ka hni ding?" tiin a va'n don a. A nu chun, "Baptistu Johan lu" tiin a lo hril a. 25 Inhmaw takin lal kuoma chun a kîr nawk nghal a, "Tu ngei hin thlèngah Baptistu Johan lu mi pe rawh" a ta. 26 Lal chun nasa takin poi a ti a, sienkhom a thutiem le a ruoi kîlpuihai lei chun sêl a rin a. 27 Chuongchun, vêngtu sipai pakhat chu Johan lu la dingin a tir nghal a, lung ina um Johan lu chu a va lâk a, 28 a lu chu thlèngin a hung dom a, nunghàk kuoma chun a pêk a. 29 Johan zirtirhaiin chu chu an hriet phing leh a ruong chu an va làk a, thlànah an vui a. 30 Tirkohai inzin chu Isu kuomah an hung kîr nawk a, an thilthawhai le an thu inchûktir po po chu an ripawt a. 31 A kuoma hung le suok an inzi nuk nuk a, bu tak ngiel khom an fàk hman naw leiin Isun, "Nangni rawi chauh hung inla, fienriel hmunah fèng ei ta, ei chawl hadam ding a nih" a ta. 32 Chuongchun, hmun fienriel panin longin an suok a. 33 An suok chu mi tam takin an hmu a, anni an nih ti an hriet chun khaw tina inthoka hung tlàn khawmhai chun khawmuolah kein an lo tlàn khal a. 34 Longa inthoka an hung suok chun mipui tam tak a hmu a, vêngtu nei lo beram ang an ni leiin a lunginsiet tawl èm êm a, thu tam tak a zirtir a. 35 Khuo a hung inhnu ta hle a, a zirtirhai chu a kuomah an hung a, "Hi hi hmun kilkhawr a na, khuo khom an hnu tah a, 36 fàk ding iemani bèk an inchawk theina dingin ei kawl vèl lo le khuoa hai infetir tawl ta la" an hung ta. 37 Ama chun, "Nangnin fàk ding pe lem ro" tiin a lo don a. Anni chun, "Chuong zàt bei inchawkna ding chun patling thla riet hlaw hiel ngai a tih. Chuong zât zàt sènga va'n chawin kan pèk tawl dim a ni?" an ta. 38 Ama chun, "Bei ieng zât am in nei hang en ta u" a ta. An nei zàt an hriet phing leh, "Bei phêk nga le ngate pahnih" an ta. 39 An rêngin a pawl pawla hlobet chunga inthungtir dingin a zirtirhai chu thu a pèk a; 40 za dâm, sawmnga dâm peiin an inthung khawmtir a. 41 Ama chun bei phêk nga le ngate pahni chu a lâk a, vàn tieng nghaa lawmthu a hril zoin bei chu a khoi a, mipui kuoma sem dingin a zirtirhai chu a pêk a, nga khom chu a pêk seng bok a. 42 An rêng chun tlai takin an fàk a; 43 bei le nga an fàk bâng an rût khawm chu bawm sawmpahni sip a nih. 44 Bei fatuhai chu patling ngot khom sângnga an nih. 45 Isun mipui an tintir lai chun a zirtirhai chu ràl khing tieng Bethesaida khuo pana lo fe hmasa dingin longah an chuongtir nghal a. 46 Mipui a'n tintir hnung chun tongtai dingin tlângah a fe a. 47 Zàn tieng a hung ni chun long chu dil lailung a tlung tah a, Isu chu ama chauhin khawmuola chun a um a. 48 Long chu thliin a naw tienga inthokin a hung nam leiin an kar hràt thei naw a, an mangang ti a hmu a. Vartien lai velin dil chungah kea lawnin anni tieng a hung pan a, anni chu fe khêl a tum a. 49 Dîl chunga lawn an hmu chun phûng an sawn a. 50 An rêng chun an hmu a, thlabârin an khêk chùl a. Ama chun a biek nghal tawl a, "Lung muong takin um ro, kei ka ni annawm, Ti naw ro" a ta. 51 Chuongchun, longa chun a chuong ve a, thli chu a rè tah a. 52 Maktinain an sip a, a bei sukpung thu kha a ngaina an la hriet naw bok leh; an ngaituonain a la man phâk si nawh. 53 Dîl ràl khing tienga Genesaret ram an kài chun an long an thlung a. 54 Longa inthoka an hung suok chun mihaiin Isu a nih ti an lo hriet nghal a. 55 Chu biel po poa chun hril vêl dingin an tlàn sup sup a, a um ti an hrietna taphotah damnawhai chu an khum pumin an hung zawn a. 56 Khaw tê, khaw lien le loa hai, khaw lai khom a fèna taphotah damnawhai chu dawr hmunah an zâl khup a, a puon hmor bèk them phalna an hni a, a them taphot an dam pei bok a.

Mark 7

1 Farisaihai le Dàn zirtirtuhai laia mi thenkhat Jerusalema inthoka hunghai chu Isu kuomah an hung a, 2 a zirtirhai laia thenkhatin kut sawp loa bu an fàk chu an hmu a. 3 Farisaihai le Juda mi po po chun an upahai chìng dàn chel tlatin an dàn anga kut an sawp zet naw chun bu an fàk ngai nawh. 4 Bazar hmuna inthoka an hung kîr khomin an insawp zet naw chun thil an fàk ngai nawh. Chîng dàn tam tak an zawm laia thang sa ve chu no hai, tuibêl hai, ketli hai le bu fâkna dawkàn hai sawp a nih. 5 Chuongchun, Farisaihai le Dàn zirtirtuhai chun Isu kuomah, "Ieng dinga i zirtirhaiin upahai chìng dàn zawm ve loa kut sawp loa bu an fàk hlak am a na?" tiin an indon a. 6 Ama chun, "Isaiin nangni lêmderhai chungthu a ziek kha a lo indik ngot el:'Hienghai rawi hin bauin an mi'n pàk a, An lungril ruok chun an mi hlat hle si; 7 Thuringah mihriem thu an inchûktir a, An mi chawibiek khom hi a thlawn el a nih'ti hi" a ta. 8 Chun, ama bokin an kuomah, "Pathien dân thupêkhai hnawlin pipu chìng dàn in chel a. 9 In chìng dàn in vong theina dinga Pathien dân thupêkhai hnawl dàn chu in thiem khop hi! 10 Mosien, "I nu le pa chawimawi rawh, Tu khom a nu le pa hrilsetu chu sukhlum ngei ding a nih" a ta. 11 Nangni ruok chun in nu le pahai kuomah, 'Ka thâ i sor ding kha Korbanj a ni tah' in ti chun, 12 a nu le pain a thà an sor ding in phal ta ngai nawh. 13 Pipu chìng dàn in inhlàn sawng pei chun Pathien thu chu iengma loah in siem a, chuong ang thil tam tak chu in thaw hlak" a ta. 14 Chuongchun, mipuihai chu a ko khawm nawk a, "Mi tinin ka thu hi ngaithla seng unla, hre chieng ro. 15 Puo tienga inthoka mihriem sûnga lût chun ama a sukporchè thei nawh. Chuong nèk hmanin, mihriem sûnga inthoka suok hin a nih mi a sukporchè hlak chu. 16 Tu khom hrietna dinga na nei chun ngaithla ngun raw se" a ta. 17 Mipuihai chu a màksan a, inah a lùt hnungin a zirtirhaiin tekhinthu chu an indon chieng a. 18 Ama chun, "Nangni khom chuong lawm chun in lo mawl ve a ni maw? Ieng khom puo tienga inthoka mihriem sûnga lûtin ama a sukporchè thei nawh. 19 A san chu a lungrilah lût loin a phìngah a lût a, an hnawm suok nawk el a nih. (Hi hi iengkim fàk a thieng thu a hrilna a nih). 20 Sûnga inthoka suok hi a nih mihriem sukporchètu chu. 21 Sûnga inthok, mihriem lungrila inthoka suok chu ngaituona suol dàm, inngaina suol dàm, rûkrùkna dàm, tuolthatna dàm, uirèna dàm, 22 duàmna dâm, theidàna dâm, hlèmna dâm, hurna dâm, itsikna dàm, inhril sietna dàm, chapona dâm le intlawkna dàm a nih. 23 Chuong ang suol chu sûnga inthokin a hung suok a, mihriem a sukporchè hlak" a ta. 24 Chu hmun chu a suoksan a, Tura le Sidon bielah a fe a, in pakhatah a lût a, a hung thu tu hriet khom a nuom naw a, sienkhom a'n thup thei si nawh. 25 Nuhmei pakhat, a naunu ramhuoi tirdakum pai chun a chanchin a hriet charin a hung pan a, a ke bulah a bokkhup a. 26 Ama nu chu Grik mi, Suria Foinikiak pieng a na. A naunu sûnga inthoka ramhuoi hnot suokpèk dingin Isu a ngèn a. 27 Isu chun a kuomah. "Nauhaiin fa khop hmasa phot raw hai se. Nauhai bei làkpèka uihai kuoma pêk chu a'n dik nawh" a ta. 28 Ama nu chun, "Lalpa, ni chu ni e, sienkhom dawkàn hnuoia uihai khomin nauhai bei nawi tla chu an fâk hlak tho annawm" a ta. 29 Isun, "I thu hril lei tak chun kîr nawk ta la, ramhuoi chu i naunu sûnga inthokin a suok tah" a ta. 30 Chuongchun, inah a kîr a, ramhuoiin a suoksan, khuma zâl a naunu chu a hmu a. 31 Chu zoah Isu chun Tura biel a suoksan a, Sidon pal tlanga Galili dîlah tum thlain, Dekapoli biel a tlung a. 32 Mi pakhat, nasêt le tong fel thei lo hi a kuomah an hung thuoi a, a chungah kut innghat dingin an ngên a. 33 Isun ama chu mipui sìrah a kei bing a, a kutpârin a nakuo a khîkpèk a, chil a sâk a, a lei a thempek a. 34 Vàn tieng nghaa inthuok huoiin, 'Effata, a ta, chu chu "Lo inhong ta rawh" tìna a nih. 35 Chu phing leh a na a hung inhong a, a lei inkhuop khom chu a hung insùt a, fie takin a hung tong thei tah a. 36 Isun tu khom hril lo dingin thu a pêk a. Sienkhom a khap nasa po leh a chanchin chu an hril thang zuol sau a. 37 Mipuihai chu maktinaa sipin, "Iengkim tha takin a thaw a, nasêt dàm sukvarin tong thei naw khom an tongtir thei a nih" an ta.

Mark 8

1 Chuong lai vêl bok chun mipui tam tak an hung pung khawm nawk a. Fàk ding ieng khom an nei naw leiin Isun a zirtirhai chu a ko a, 2 "Mipuihai hi ka lunginsiet a nih; ni thum zet ka kuomah an um tah a, fàk ding hlak an nei si nawh; 3 phingtâma kan tîntir chun lam lakah tâmsawl rawi an tih, a then lem chu an hungna a hla si a" a ta. 4 A zirtirhai chun, "Tuin am hieng ang ram pilrilah mi hieng zozài hraina khop bei an hmu zo ding?" tiin an don a. 5 Ama chun, "Bei phèk ieng zât am in nei a?" a ta. Anni chun, "Phêk sarih" an ta. 6 Mipuihai chu hnuoiah inthung dingin thu a pêk a. Bei phêk sari chu a lâk a, lawmthu a hril zoin a khoi a, mipui lai sem dingin a zirtirhai chu a pêk a, an sem a. 7 Ngate tlawmte an nei bok a, chuonghai khom chu lawmthu a hril zoin a zirtirhai chu an semtir a. 8 Mipui chun an fàk a, an tlai ta seng a. An fàk bâng zirtirhaiin an rût khawm chu bawm sari sip a nih. 9 Anni rawi chu sângli lai an nih. 10 A'n tîntir zo chun ama khom a zirtirhai leh longin Dalmanuthal bielah an fe tah a. 11 A kuomah Farisaihai an hung a, an hung sêl a. Ama fiena dingin vàna inthoka inchikna thilmak inentir an phût a. 12 Lung intar taka inrûm suokin, "Ieng dinga tu lai ruoltharhai hin inchikna an zong am a na? Thu dik ka hril cheu hi, inchikna thilmak hrim hrim pèk ni naw ni hai" a ta. 13 Chuongchun, anni chu a mâksan a, longah a chuong a, ràl khing tieng panin a fe tah a. 14 Zirtirhai chun bei an lo chawi theinghil a, longa chun bei phêk khat chauh naw chu a dang hrim an nei nawh. 15 Isu chun, "Farisaihai chol le Heroda chol laka chun invêng unla, fimkhur hlè ro" tiin anni chu an fûi a. 16 Anni rawi chun, "Bei ei nei dêr naw leia a hril a nih" tiin an inhril tuo a. 17 Isun chu chu a lo hriet a, "Bei in nei naw thu ieng dinga in buoipui am a na? Tu chen khom hin hmu thei loin, in la man fûk thei naw zing a ni maw? Chuong lawm chun in lungril a lo chawlol a ni maw? 18 Mit nei siin in hmu thei naw a ni? Na nei siin in hriet thei naw rop maw? An leh, in theinghil hman el am an ta? 19 Bei phêk ngaa mi sângnga ka hrai tum khan fàk mahla bawm ieng zât am in rût sip a?" a ta. Anni chun, "Bawm sawmpahnih" an ta. 20 "An leh, bei phêk saria mi sângli ka hrai khan ieng zât am in rût a?" a ta. "Bawm sari" an ta. 21 Chuongchun, an kuomah, "Chuong sà khom chun a ngaina in la hriet naw rop maw?" a ta. 22 Bethsaida an hung tlung a, mi thenkhatin mitdel pakhat an hung thuoi a, ama chu them dingin Isu an ngèn a. 23 Isun mitdel chu a bânah a kei a, khaw puo tieng a thuoi suok a. A mitah chil a sâk a, a them zoin Isun, "Khuo i hmu thei am?" a ta. 24 Ama chu a hung dàk suok a, "Mi ka hmuh, thing lawn angin ka hmu tawl" a ta. 25 Isun a mit chu a hang thempèk nawk a. Chuongchun a mit a hung meng a, a hung dam fel a, iengkim chieng takin a hmu thei tah a. 26 Isun a kuomah "Khuoah lût ta loin in tieng fe nghâl rawh"m a ta. 27 Isu le a zirtirhai chun Filip Kaisari sè vêla khuohai chu an fang a. Lampuia chun a zirtirhai kuomah, "Mihaiin tum a nih an mi ti a?" tiin an don a. 28 Anni chun, "Baptistu Johan ti che an um a; Elija ti che an um bok a; a then ruok chun zawlnei tu amanih an ti che" an ta. 29 Ama chun, "An leh, nangnin tu am nia in mi hriet?" a ta. Peter chun, "Kristan chu i nih" tiin a don a. 30 Isu chun a nìna chu tu khom hril lo dingin a ti tlat a. 31 Chuongchun, Mihriem Naupan thil tam tak a tuor ngei ding thu dàm, upahai, thiempu lalhai le Dàn hretuhaiin an hnawl ding thu dàm, an sukhlum ding thu le a ni thumnaah a tho nawk ding thu dàm chu a zirtirhai a hril tan tah a. 32 Tlang takin chuong thuhai chu a hril tawl leiin Peter chun ama chu a thuoi hrang a, a kawk a. 33 Isu ruok chun naw tieng nghatsana a zirtir danghai tieng chu enin, "Setan, fe hmang dai rawh; Pathien thil ngaituo loin mihriem thil i ngaituo a ni hi" tiin Peter chu a kawk lêt a. 34 Mipuihai chu a zirtirhai le chun a ko khawm a, an kuomah, "Tu khomin a mi zui nuom chun mani insie hmangin, mani kraws putin mi zui raw se. 35 Tu khom mani hringna hum tum chun chân a ta, tu khom keima le Chanchin Tha leia hringna chân chun hum a tih. 36 Miin khawvel pumpui hi nei sien, a hringna chân si sien la, a ta dingin iem hlawkna a um a? 37 Miin a thlarau le inthleng dingin iem pêng a ta? 38 Tu lai ruolthar uire hmang le mi suolhai laia kei le ka thu inzàpui taphot chu, Mihriem Naupa hi a vàntirko thienghlimhai le a Pa ropuinaa inthuoma a hung pha chun ama chu inzàpui vêng a tih" a ta.

Mark 9

1 Chun, ama bokin, "Thu dik ka 2 Chun, ni ruk hnungin Isun Peter hai, Jakob hai le Johan hai chauh thuoiin tlâng insàngah a fepui a, anni chauha an um lai chun a hmêl a hung danglam ta a. 3 Hnuoia puon sawptu tu khomin an sukvâr thei naw khop hiela vârin a silfèn chu a hung vâr tle sur el a. 4 An kuoma chun Elija le Mosie an hung inlâr a, Isu leh an inbiek a. 5 Peter chun Isu kuomah, "Rabbi, hi taka um hi ei ta dingin a tha. Bawkte pathum khawng ei tiu, i ta dingin pakhat, Mosie ta dingin pakhat, Elija ta dingin pakhat" a ta. 6 An ti êm a, hril ding mumal khom a hriet nawh. 7 Chun, sûm a hung zìng a, anni chu a hung tuom a, sûma inthok chun rawl a hung suok a, "Hi hi ka Naupa, ka Dittak chu a nih, ama thu ngai ro" tiin. 8 Chuongchun, an ngha vêl ruoi a, anni lai chun Isu chauh naw chu tu dang khom an hmu ta nawh. 9 Tlânga inthoka an hung thlàk lai chun, mithi laia inthoka Mihriem Naupa a tho nawk hma chun an thil hmuhai chu tu khom hril dêr lo dingin Isun thu a pêk a. 10 Chu thu chu lungrilah an vong zing a, 'mithi laia inthoka tho nawk' ti umzie chu iem nîng a ta ti thu chu an hril tlâng hlak a. 11 Chun, anni chun, "Iengti ziea Dàn zirtirtuhaiin, 'Elija a hung hmasa zet ding a nih' an ti'm a na?" tiin Isu an indon a. 12 Ama chun, "Elija chu iengkim siem tha dingin a hung hmasa ding a ni hrim a nih. Chuong a ni si leh iengti ziea Mihriem Naupa hin thil tam tak tuor a ta, hnawlin a um bok ding a nih ti hi an ziek tlat am a na? 13 Sienkhom ka hril cheu hi, Elija chu a hung tah a, a chanchin an ziek ang ngei khan a chungah an nuom taphot an thaw ta kha" a ta. 14 Zirtir danghai kuom an zuk tlung chun an vêlah mipui tam tak an hmu a, Dàn zirtirtuhai leh an lo insêl a. 15 Isu hung an hmu chun an phawk hle a, a hmuok dingin an tlàn hum hum a. 16 An kuomah, "Hienghai le hin ieng thu am in lo insêl leh?" a ta. 17 Mipui laia pakhat chun a don a, "Zirtirtu, ka naupa, ramhuoi tong thei loin a man chu ka hung thuoi a. 18 A man pha leh a thè thlùk hlak a, a chil huom dàm a tla a, hâ a rawt a, a khong tlat hlak a. I zirtirhai hi hnot suok dingin ka ta, an thaw thei si naw a" a ta. 19 Ama chun, "Tu lai ruol thar, ringna tlasamhai, ieng chen am in kuomah um ka ta, ieng chen am ka ngai thei ding cheu a na? Naupang chu hung thuoi ro" a ta. 20 Chuongchun, an hung thuoi a. Ramhuoiin Isu a hmu char chun naupang chu a soisak nghàl a, hnuoiah a thè thlùk a, chil huom tla neng nungin an per chor chor a. 21 Isu chun a pa kuomah, "Hienga a umna hi ieng chen am an ta a?" tiin an don a. 22 A pa chun, "A naupang laia inthok a ni tah. Sukhlum tumin voi tam tak meia dàm, tuia dàm a pei ta hlak a. A thei hrâm chun mi lunginsiet la, mi thangpui lul rawh" tiin a ngên a. 23 Isun a kuomah, " I thei chun i ti maw? A ringtu ta ding chun iengkim hi thaw thei vong a nih" a ta. 24 Naupang pa chun, "Ka ring ie. Ka ringhlàna hi mi hnèpêk rawh" tiin a khêk suok ta nghal a. 25 Mipui an hung tlàn khawm hut hut Isun a hmu chun ramhuoi tirdakum chu a hal a, "Nang ramhuoi, tong thei lo le nasêt, thu ka pêk che, a sûnga inthok khan hung suok la, lût nawk ta ngai naw rawh" a ta. 26 Ramhuoi chu a khêk rak a, a soisak hrep hnungin a hung suok a. Naupang chu thi ang dêrin a um a, mi tam tak lem chun "A thi tah a nih" an ti hiel a. 27 Nisienlakhom, Isun a kut a chel a, a kei tho a, a hung ngìr suok el tah a. 28 Inah Isu a lût hnung chun a zirtirhaiin, "Iem a ta keinin kan hnot suok ve thei naw?" tiin a fâlin an indon a. 29 Ama chun, "Hieng thil hi chu tongtainao chauh naw chun hnot suok thei a ni nawh" a ta. 30 Chu taka inthok chun an fe suok a, Galili ram a fe thleng a, chu chu tu hriet khom Isun a nuom nawh, 31 a zirtirhai chu thil a zirtir lai a ni leiin. Chuongchun an kuomah, "Mihriem Naupa hi mihriemhai kuta inmantir nîng a ta, sukhlum an ta, a ni thum niah tho nawk a tih" a ta. 32 Amiruokchu, anni chun a thu hril umzie chu an hriet naw a, ama hlak an indon chieng ngam bok si nawh. 33 Kapernaum an hung tlung a. In an lùt chun, "Lampuia in insèlna kha ieng thu am an ta le?" tiin an don tawl a. 34 Lampuia chun "Eini lai tu am ropui tak a ta?" ti thua insêl an ni leiin an to ta chip a. 35 Isu chu a'n thung a, sawmpahnihai chu a ko khawm a, an kuomah, "Tu khom a hmasa tak ni nuom chu a nuhnung takah um a ta, mi po po rongbawltuah a um ding a nih" a ta. 36 Naupangte a hung kei a, anni lai a'n ngìrtir a, a kuo a, 37 "Tu khom ka hming leia hieng ang naupangte pakhat khom lawmtu chun kei a mi lawm a na, tu khom kei mi lawmtu chun kei a mi lawm ni loin a mi tirtu a lawm a ni lem" a ta. 38 Johan chun a kuomah, "Zirtirtu, tuin amanih i hmingin ramhuoihai a hnot suok kan hmu a, keini a zuitu che lai a thang ve si naw leiin thaw ta lo dingin kan hril el a nih" a ta. 39 Isu ruok chun, "Khap naw ro, tu khom ka hminga thilmak thaw sia mi hrilse zui nghal el thei an um nawh. 40 Tu khom a mi kaltu ni lo chu eini tienga thang a nih. 41 Thu dik ka hril cheu hi, Krista mi in ni leia dawn ding tuisik no khat khom ka hminga petu cheu taphot chun a lawmman ding chu chân naw top a tih. 42 "Tu khom a mi ringtu laia a chìn tak khom sukthlutu chu a rîngah bu rawtna lung lien tak inhlitirin tuifinrietah thlàk ni sien a ta dingin tha lem a tih. 43 I kutin suol a'n thawtir che chun tan el rawh, kut pahni neia Gehenna mei rêm thei loa fe nêkin kut khing bûla hringnaa lût chu i ta dingin a tha lem. 44 Chu taka chun pânna inlung a thi thei naw a, mei khom a rêm ngai bok nawh. 45 Chun, i kein suol a'n thawtir che chun tan el rawh, ke pahni neia Gehenna mei rêm thei loa lùt nêk chun ke khing bùla hringnaa lùt i ta dingin a tha lem. 46 Chu hmuna chun pânna inlung a thi ta ngai naw a, mei khom a rêm ta ngai bok nawh. 47 I mit khomin suol a'n thawtir che chun khel dok el rawh, mit khing hni neia Gehennaa peia um nêk chun mit khing khat neia Pathien rama lût i ta dingin a tha lem. 48 Chu hmuna chun pânna inlung a thi ta ngai naw a, mei khom a rêm ta ngai bok nawh. p 49 Mi tin chu meia raw thienghlimq an ni ding a ni si a; inthawina tinrêng khom chia saw thienghlim nîng a tih. 50 Machi hi a tha a, sienkhom a alna da ta sien, iengtin am suk-al nawk in ta? Nangniah machi nei un la, inngei diel dielin um ro" a ta.

Mark 10

1 Chu taka inthok chun Isu a suok a, Jordan vadung kaiin Judai ramah a fe a, mipuiin an lo bawr luoi luoi a; chuongchun, a thaw dàn pangngaiin a zirtir tawl a. 2 Farisai thenkhat a kuomah an hung a, ama fiena dingin, "Pasalin a nuhmei a màk a thieng am?" tiin an indon a. 3 Ama chun, "Mosien ieng thu am a pêk cheu?" a ta. 4 Anni chun, "Mosie chun inmâkna lekha zieka màk a phal" an ta. 5 Isu ruok chun, "In lungril ngar leiin Mosien hi dàn hi a ziekpêk chêu a nih. 6 Amiruokchu, thilsiem intan tira inthokin Pathienin anni chu pasal le nuhmeiah a siem a. 7 Chu lei tak chun pasalin a nu le pa màksan a ta, a nuhmei leh inkop an ta, r 8 an pahni chun pum khats ni tâng an tih. Pahni an ni ta naw a, kop khat an lo ni ta lem a nih. 9 Pathienin a zom tah chu mihriemin thè naw raw se" a ta. 10 Inah a zirtirhaiin chu thu bok chu an indon nawk a. 11 Ama chun, "Tu khomin a nuhmei thea mi dang a nei chun a nuhmei a uiresan a nih; 12 nuhmei khomin a pasal the a, mi dang a nei chun a uirê a nih" a ta. 13 A them dingin naupangte ruol an hung thuoi a, a zirtirhaiin an lo hal a. 14 Isun chu chu a hmuin a lung a khei a, an kuomah, "Naupanghai kha ka kuomah inhungtir unla, khap naw ro, Pathien ram chu hieng ang mihai ta hi a ni si a. 15 Thu dik ka hril cheu hi, naupang anga Pathien ram lawm naw taphot chu a sûngah lût naw top an tih" a ta. 16 Anni chu a pom a, mal a sawm tawl a. 17 Chu taka inthoka Isu an thok suok lai chun mi pakhat a hung tlàn a, a hmaah a dingthathuon a, "Zirtirtu Tha, chatuon hringna ka nei theina dingin iem thawng ka ta?" tiin an don a. 18 Isun a kuomah, "Ieng dinga Tha i mi ti? Tu khom tha an um nawh, Pathien chau naw chu. 19 Dàn thupêkhai chu i hriet annawm: tuol that naw, uire naw, inru naw, khêlin mi hêk naw, hlêpru naw, i nu le pa chawimawi rawh, tihai hi. " a ta. 20 Ama chun, "Zirtirtu, chuong po po chu ka tleirawl tîra inthokin ka zawm hlak" a ta. 21 Isun ama chu chieng takin a en a, a ngaina ta hle a, a kuomah, " Kong khat i la bâk ie. Fe la, i nei po po va zor la, pasiehai pe rawh, chuongchun vànah ro nei i tih. Chu zoah hung la, mi zui rawh" a ta. 22 Chu zet chun a hmêl a hung ngûi a, beidong takin a fe hmang a, mi hausa tak a ni si a. 23 Isu chu a ngha vêl a, a zirtirhai kuomah, "Mi hausa ta dingin Pathien rama lût a va'n tak awm de!" a ta. 24 Zirtirhai chun a thu hril chu mak an ti hle a. Isun a hril pei a, "Nauhai, Pathien rama lût chu a harsa rêng annawm! 25 Pathien rama mi hausa an lùt nêkin thim naa sanghawngsei a lùt thleng ol lem a tih" a ta. 26 A zirtirhai chun mak an tizuol a, "Chuong a ni chun tu am sandam ni thei an ta?" an ti sap sap a. 27 Isun anni chu a en a, "Chu chu mihriem ta ding chun thaw thei ruol a ni naw hrim a nih, Pathien ta ding ruok chun a ni nawh; Pathien ta dingin iengkim thaw thei a nih" a ta. 28 Peter chun a kuomah, "Ngai ta, keini hlakin iengkim màksanin kan zui ta si che a!" a ta. 29 Isun, "Thu dik tak ka hril cheu hi, tu khom keima lei le Chanchin Tha leia in le lo dàm, unauhai dàm, farnuhai dàm, nu dàm, pa dàm, nauhai dàm màksan chun, 30 tuta dam sûng lâ la hin in le lo hai, unau hai, farnu hai, nu le pa hai le nauhai a let za hmu ngei an tih, sukdudana hai le hun la hung tlung dinga chatuon hringna leh. 31 Nisienlakhom, mi tam tak a hmasa taka umhai chu a nuhnung tak la nîng an ta, a nuhnung taka um khom a hmasa tak la nîng an tih" a ta. 32 Jerusalem an pan tung lai chun Isun hma a thuoi a, a zirtirhai chun mak an ti hle a, a zuituhai chu an zâm hlè bok a. Sawmpahnihai chu Isun a ko bing a, a chunga thil hung tlung ding po po chu a hril tawl a. 33 "Ngai ta u, Jerusalemah ei hang fe nawk ding a nih. Mihriem Naupa hi thiempu lalhai le Dàn zirtirtuhai kuta inmantirin a um ding a nih. Anni chun thi dingin a chungthu rêl an ta, Jentelhai kutah pe suok an tih. 34 Ama chu nuizatbûrah hmang an ta, chil sâkkhum an ta, vuong an ta, sukhlum an tih; nisienlakhom ni thum niah tho nawk a tih" a ta. 35 Zebedai naupa Jakob le Johan chun ama chu an hung hnai a, "Zirtirtu, kan hni taphot che chu i mi thawpêk kan nuom" an ta. 36 Ama chun, "Iem thawpêk lang cheu in nuom a?" a ta. 37 Anni chun, "I ropuinaa chun i chang tieng pakhat, i voi tieng pakhat mi'n thungtir rawh" an ta. 38 Isu ruok chun, "In thil hni hi in hriet naw a nih. Ka no dawn ding chu in dawn ve thei dim a ni? Baptisma ka chang ding khom in chang ve thei dim a ni?" a ta. 39 Anni chun, "Thei kan tih" an ta. Isun, "Ka no dawn ding chu dawn in ta, baptisma ka chang ding khom chang vèng in tih. 40 Nisienlakhom ka chang tieng amanih voi tieng amania inthungtir chu ka thu a ni naw a, an buotsaipèkhai ta ding chauh a ni lem" a ta. 41 Zirtir dang sawmhaiin chu chu an lo hrietin Jakob le Johan chungah an lungni naw hle a. 42 An rêng chun Isun a ko khawm a, "Jentêlhai chunga rorêltua ruothai chu an chungah an insuklal êm êm hlak a, an mi lienhai khomin an chungah thu an nei hlè hlak. 43 Nangni lai ruok chu chuong ang chu a ni ve ding a ni nawh. Chu nêk hmanin, tu khom nangni laia a ropui tak ni nuom chu in rongbawltuah a um ding a nih. 44 Nangni laia a hmasa tak ni nuom khom mi po po siehlawah a um bok ding a nih. 45 Mihriem Naupa meuh khom a rong bawlpèka um dingin a hung naw a, rongbawl ding le mi tam tak intlannaa a hringna pe dingin a hung lem a nih" a ta. 46 Jeriko an hung tlung a, Isu chu a zirtirhai le mipui tam tak leh Jerikoa inthok chun an suok a, Timai naupa, mitdel Bartimai chu lam sìrah kutdawin a lo inthung a. 47 Nazaret Isu a nih ti a hriet chun, "Isu, Davida naupa, mi lunginsiet rawh" tiin a khêk a. 48 Mi tam takin an hal a, to dinga an hril khomin a hma nêka inringin, "Davida Naupa, mi lunginsiet rawh" tiin a khêk zuol sau a. 49 Isu chu a ngîr a, "Hung ko ta u" a ta. Mitdel chu an hung ko a, "Ngai sukngam la, tho rawh, a ko che" an ta. 50 A puon chu a thè thlàk a, an chawm tho a, Isu kuom tieng a pan a. 51 "Iem thawpêk lang che i nuom a?" tiin Isun an don a. Ama chun, "Rabbi, hmu thei ka nuom" a ta. 52 Isu chun, "Fe ta rawh, i ringna i dampui a nih" a ta. Khuo a hmu thei ta nghal a, lampuia chun Isu a zui ve ta a.

Mark 11

1 Jerusalem an tlung tawm, Oliv tlànga Bethfage le Bethani an hung tlung ding chun a zirtirhai pahni a tir a. 2 "In hma zawn khuoa son va fe unla, khuo in lût charin tu la chuongna ngai lo sabengtung tuoi inthlung hmung in ta, sût unla, hung kei ro. 3 Tu khomin, 'Ieng dinga sabengtung tuoi kha in sût am' an ti chun, 'Lalpan a mamaw a, hung thak kîr nawk vak kan tih' ti ro" a ta. 4 Chuongchun, an fe a, sabengtung tuoi, kotkhàr bienga inthlung, tuol tieng kotthlèra ngîr chu an va hmu a. 5 An sût lai chun chu taka ngîrhai chun, 'Sabengtung tuoi kha ieng dinga in sût am a na?" an ta. 6 Anni chun Isu hril ang tak khan an hril a, fe an phal tah a. 7 Sabengtung tuoi chu Isu kuomah an hung kei a, a chungah an puonhai an pha a, Isu chu a chuong a. 8 Mi tam takin lampuiah an puonhai an pha a, a thenin rama sawlhna an thliekhai chu an phâ bok a. 9 A hmaa fehai le a hnung zuituhai chun, "Hosanna!Lalpa hminga hung chu, A hamtha; 10 Ram hung tlung ding, Ei Pa Davida ram chu, A hamtha; Chunghnung taka khinHossana"ttiin an khêk a. 11 Isu chu Jerusalemah a lût a, tempulah a fe a. Iengkim a en vel hnung chun, khuo khom an hnu ta leiin, Bethani tieng zirtir sawmpahnihai leh an fe tah a. 12 A zingah Bethani an suoksan hnungin a phìng a hung tàm tah a. 13 Hla takah theichang, a hna inbuk hlup el a hmu a, a ra a um takduoiin tiin a va pan a. A tlung chun a hna chau naw chu a hmu naw a, theichang ra hun a ni naw hrim a. 14 Thing kuoma chun Isun, "Tuta inthok chu kumkhuoin i ra tu khomin fa ta naw raw hai se" a ta. A zirtirhai khomin a hril chu an hriet a. 15 Jerusalem an hung tlung chun tempul huongah a lùt a, chu taka thil zortuhai le inchawtuhai chu a hnot suok a, tangka thlengtuhai dawkàn le parva zortuhai inthungnahai chu a nam thlùk a. 16 Tempul inhuonna sùng chu tu khomin an thil zorhai chawia an hraw tlang a khap a. 17 Anni rawi chu inchûktirin, " 'Ka in chu hnam tin ta dinga tongtaina in tîng an tih' ti ziek a ni naw am a ni? Nangni rawi ruok chun suomhmanghai pùkah in siem ta lem a ni hi" a ta. 18 Thiempu lalhai le Dàn zirtirtuhaiin an lo hriet chun ama sukhlum dàn ding chu an zong zing a, sienkhom a zirtirna chu mipui po poin an ngaisàng leiin ama chu an ti si a. 19 Zàn tieng a hung ni chun Isu le a zirtirhai chu khawpuia inthokin an suok a. 20 Zîng tieng an fe malamin theichang kùng kha a zung chenin a thêm tah ti an hmu a. 21 Peter chun a hriet suok a, a kuomah, "Rabi, en ta, tongsie i'n phur theichang kha a lo thêm zo tah" a ta. 22 Isun a don a, "Pathienah ringna innghat ro. 23 Thu dik ka hril cheu hi, tu khomin hi tlâng kuoma hin, 'Inson la, tuifinrietah indehawn rawh' ti sien, a hril ang chun hung tlung ngei a tih ti lungrila a ringhla naw chun, a ti ang chun thawpêk nîng a tih. 24 Chuleiin ka hril cheu hi, in tongtaiin in thil hni taphot chu hmu taah inngai unla, thawpek nîng in tih. 25 Tongtai dinga in ngìr huna khom tu chunga khom thu poi in nei chun ngaidam hmasa zet ro, vàna in Pa khomin in bawsietnahai chu a ngaidam ve theina ding cheuin. 26 In ngaidam naw ruok chun vàna in Pa khomin in suolhai ngaidam bik naw ni cheu. " a ta. u 27 Jerusalem an hung tlung nawk a, tempul a fang vèl laiin thiempu lalhai, Dàn zirtirtuhai le upahai chu a kuomah an hung a. 28 Ieng thuneinain am hieng thil hi i thaw? Tuin am thu a pêk che a?" tiin an indon a. 29 Isun, " Zawna pakhat hang indon vèng ka ti cheu; mi don inla, kei khomin tu thuin am hieng thil hi ka thaw ti hril ka ti cheu. 30 Johan baptisma kha vàna mi thu a ni, an naw leh mihriem thu? Chu chu mi don ro leh" a ta. 31 Anni rawi chu an inrawn khawm a, "Vàna mi thu ei ti chun 'Ieng dinga a thu in awi naw?' a mi ti ding a ni si a; 32 mihriem thu ei ti el dim a nih?" an inti a. Mi po poin Johan chu zawlnei ni ngêiah an pom tlat leiin mipui chu an ti bok si a. 33 Chuongchun, "Kan hriet nawh" tiin Isu chu an don a. Isu khom chun, "Kei khomin tu thuin am hieng thil hi ka thaw ti hril bik naw ning cheu" a ta.

Mark 12

1 Tekhinthuin an kuomah thu a hril tan a: "Mi tuin amanih grêp huon a siem a, palin a'n huon a, uoiin sawrna khur a cho a, vèngbûk insâng tak a bawl a, chu zoah a grêp huon chu loneituhai a'n sântir a, a'n zinsan ta dai a. 2 A lo huna chun a chan-ai la dingin huon enkoltuhai kuoma chun a siehlaw pakhat a tir a. 3 Anni chun an lo man a, an vuok a, kut ruokin an infetir a. 4 Siehlaw dang a tir nawk a, chu khom chu a luah an lo vuok a, inzakum takin an lo soisak a. 5 Siehlaw dang a tir nawk a, chu pa lem chu an lo that a. Siehlaw dang tam tak a tirhai chu a then an lo vuok naw leh an then an lo that pei a. 6 "A naupa dittak chauh naw chu mi dang hang tir ding a nei ta naw a. 'Ka naupa hi chu lo inza êm awm tak' tiin a nuhnung takah a tir a. 7 Nisienlakhom, huon enkoltuhai chun, 'Hi pa hi ro hluotu ding chu a nih. Thaw ro, that ei tiu, a ro hluo ding chu ei ta a ni el ding a nih' an ta. 8 Chuongchun, an man a, an that a, grêp huona inthokin an pei suok a. 9 Huon neitu chun iengtin am hung thawng a ta? Hung a ta, huon enkoltuhai chu hung that a ta, a huon chu mi dang insàntir a tih. 10 Hi Pathien Lekha thu, 'In bawltuhai lung hnawl ngei chu, A kil thut dotu tak a hung ni ta si. 11 Chu chu LALPA thilthaw a na, Ei hmuin ropui ei ti hle, ti hi in tiem ngai naw a ni maw?" a ta. 12 A tekhinthu hril chu anni a demna a nih ti an hriet leiin inmantir dàn kong an dap a; amiruokchu mipui an ti si leiin ama chu an màksan a, an fe hmang tah a. 13 A thu hrila inthoka intong awktir dàn a um rawm tiin a kuomah Farisaihai le Heroda pawla mihai chu an tir a. 14 A kuom an hung tlung chun, "Zirtirtu, mi indik tak i na, tu khom poisak bik i nei naw leiin tu khomin an kei her thei naw che a, Pathien thu indik tak chu i zirtir hlak ti kan hriet. An leh, Kaisar kuoma sie chawi hi an dik am an dik naw? 15 Sie kan pêk ding, kan pêk naw ding?" an ta. Sienkhom, an vervèkzie Isun a hriet a, "Ieng dinga mi khal awk in tum? Denari tangka kha hung la ro, lo en ka tih" a ta. 16 Anni chun an hung làk a. Ama chun "Hi hi tu lim le tu hming am a na?" a ta. Anni chun, "Kaisar" an ta. 17 Isu chun, "Kaisar thil chu Kaisar pe unla, Pathien thil chu Pathien pe ro" tiin a don a. Ama chu mak an ti hle a. 18 Thonawkna a um nawh ti pawl Sadukaihai khom chu a kuomah thu indon dingin an hung ve a. 19 "Zirtirtu, Mosien, 'Tu khom nau nei loin a nuhmei thisan sien, a nuhmei chu a unaupain hluong a ta, a unaupa ta dingin chi thlàpêk a tih' tiin a mi ziekpèk a. 20 Aw leh, unau sal sari an um a, a upa takin nuhmei a nei a, suonmongin a thi a. 21 A dottu chun a nuhmei chu a hluo a, chi thla loin a thi nawk a; a pathumna khom chuong ang bok chun. 22 Unau pasarihai chun nuhmeiin an nei vong a, sienkhom tu khomin chi thla loin suonmongin an thi vong a. A tawpah nuhmei khom chu a thi a. 23 An pasari chun an inneipui vong si leiin, thonawknaah a tu nuhmei tak am nîng a ta?" tiin an indon a. 24 Isun an kuomah, "Pathien Lekha thu le Pathien thilthawtheina in hriet naw leia fe suol in ni hrim an naw maw? 25 Mithihai an tho nawk pha chun nuhmei pasal innei tuo ta naw ni hai a, vàna vàntirkohai ang ni ta lem an tih. 26 Mosie lekhabua chîmbuk chok chanchina khan mithihai an tho nawkzie thu in tiem ngai naw maw? Pathienin Mosie kuomah, 'Kei hi Abraham Pathien, Isak Pathien, Jakob Pathien chu ka nih' a ti kha. 27 Ama chu mithi Pathien ni loin, mihring Pathien a ni lem. In hriet suol nasa hlè a nih!" a ta. 28 Dàn zirtirtuhai laia pakhat a hung a, an thil hril chu a lo ngaithlâk zing a. Isun a don tha hle ti a hriet chun a kuomah, "Thupêk po po lai a ieng hi'm a poimaw tak a?" tiin a'n don ve a. 29 Isun, "Aw Israel, ngai ta, Lalpa ei Pathien chauh hi Lalpa chu a nih. 30 Lalpa i Pathien chu i lungril po poin, i thlarau po poin, i ngaituona po poin, i hràtna po poin i hmangai ding a nih' ti hi a poimaw tak a. 31 A pahnina chu, 'Nangma i'n hmangai angin i vênghai hmangai rawh' ti hi. Hienghai nêka thupêk ropui lem a um nawh" a ta. 32 Dàn zirtirtu chun, "Zirtirtu, a ni ngei. Lalpa chauh hi Pathien chu a ni a, ama naw chu Pathien dang an um naw a, 33 ama chauh chu lungril po po, hriet thiemna po po le hrâtna po poa hmangai ding a nizie le mani inhmangai anga vênghai hmangai hi pumraw thilhlân le inthawina po po nêkin a poimaw lem ti i hril hi i hril indik khop el" a ta. 34 Var takin a don ti Isun a hriet chun a kuomah, "Pathien ram chu i hlat naw hi tie" a ta. Chu hnung chun tu khomin ieng khom an indon ngam ta nawh. 35 Tempula a zirtir malamin Isun a hril pei a, "Dàn zirtirtuhaiin iengti ziea Krista chu Davida naupa nia an hril hlak am a na? 36 Davida ngeiin Thlarau Thienghlima hrilin, "LALPAN ka Lalpa kuomah, 'Ka chang tieng hin hung thung rawh, I hmêlmahai po po chuI ke sirsana ka siemHmàkhat chun' tiin a hril"a lo ti a. 37 David ngeiin 'Lalpa' a ti si chun ieng tin am a naupa ni thei a ta?" a ta. A ngaithlatu mipui tlim hmurhai chun an ngainuom hle a. 38 Chuonga a zirtir lai chun Isun, "Dàn zirtirtuhai laka chun fimkhur ro. Zakuo fuol hâka lêng vêl a, bazar hmuna hai mi chibai an thlàkhla a, 39 sunagogah thungna langsâr tak le ruoi thèna hmunah thungna poimaw tak an ngiet hlak. 40 Hienghai rawi, hmeithaihai insùng fa tlarantu le a sieli khaw mawia sawt tak tak tongtai chîngtuhai hin hrem tuor nasa zuol an tih" a ta. 41 Chun, thawlawm bawm zawna chun a'n thung a, mihaiin bawma thawlawm an thlàk lai chu a thlîr zing a. Mi hausa tak takhai chun an thlàk teu teu a. 42 Chun, hmeithai pase tak hi a hung ve a, dâr tangka pahniv a hung thlàk a, chu chu poisa khat hù a nih. 43 Isun a zirtirhai chu a ko a, an kuomah, "Thu dik ka hril cheu hi, bawma thawlawm thlâktu dang po nêkin hi hmeithai rethei hin a thaw rawn lem. 44 Mi danghai chun an nei chuong liem an thlàk a, ama hin chu tlasam hle sienkhom a nei po po, a hringna dinga a fàk sik chu a thlâk a nih" a ta.

Mark 13

1 Tempula inthoka an suok lai chun a zirtir laia pakhatin a kuomah, "Zirtirtu, en ta, an lung hmang dàm hi a hromhrawin an bawl ropui kher el!" a ta. 2 Isun a don a, "Hieng in ropui tak tak hi i hmu maw? Hieng lung inthuo po po hi pakhat khom sukchim loa màksan um naw nih" a ta. 3 Tempul ep, Oliv tlànga Isu a'n thung laiin Peter hai, Jakob hai, Johan hai le Andri hai chun a fâlin thu an indon a; 4 "Chuong thil chu iengtik am hung tlung a ta ? Chuong po po a hung tlung ding pha chun inchikna thilmak ieng am hung um a ta? Mi hril rawh" an ta. 5 Isun an kuomah, "Tu khomin an hlèm nawna ding cheuin fimkhur ro. 6 Ka hming sâlin, "Krista chu ka nih" tiin mi tam tak hung suok an ta, mi thuoi hmang teu an tih. 7 Indo ri hai, indo thuthang hai in hriet pha leh thlaphâng naw ro; chuong chu a hung tlung ding hrim a na, hun tawp ruok chu la ni hrî naw nih. 8 Hnam dang le hnam dang, ram dang le ram dang indo an ta, hmun hrang hrangah lir inhnîng a ta, tàm tlâng a tih. Chuong chu nau hase intanna ang nîng a tih. 9 "Nangni chu inring zingin um ro. Rorêltuhai kutah imantir an ti cheu a, sunagog-ah hai vuong an ti cheu a, keia leiin lârsap le lalhai hmaah, ka thu an hriet theina dingin, inngìrtir an ti cheu. 10 Chanchin Tha hi hnam po po kuomah hril hmasak ngei ding a ni si a. 11 An man cheu a, in chungthu rêl dinga an inhlàn hun cheu chun hril ding ngaituo lawkin lungkham naw ro; a hun taka hung inlang taphot chu hril el ro, a hriltu chu nangni in ni awm si nawh, Thlarau Thienghlim ni lem a tih. 12 Sukhlum dingin unau le unau inmantir an ta, pa khomin a naupa, nauhai khomin an nu le pahai do an ta, insukhlumtir bok an tih. 13 Ka hming leiin mi tinin theidàng an ti cheu a, nisienlakhom a tawp chena sel taka tuor taphot chu, chu ngêi chu sandam nîng a tih. 14 "Sukramtu tirdakum chu a ngir nawna ding hmuna ngîr in hmu pha chun (a tiem taphotin a umzie hre raw se), Judai rama umhai chu tlâng ramah tlân raw hai se. 15 In chunga um chu in sûnga thuomhnaw inchù dingin tum naw raw se. 16 Loa fe khom a thuomhnaw inchù dingin inah kîr nawk naw raw se. 17 Chu huna chun nau paihai le naute pom lai neihai chung chu rik a tih. 18 Chu chu phalbi lai a hung tlung nawna dingin tongtai ro. 19 Chuong nihai chu rimsikna ni a ni ding a ni si a; chuong anga rimsikna nasa hrim hrim chu Pathienin leilung a siema inthokin a la um ngai nawh; ieng tik khom um nawk ta ngai bok naw nih. 20 Lalpan chuong nihai chu suktawi naw sien chu, mihriem tu khom dam suok um naw ni hai; sienkhom a mi thlanghai leiin a suktawi a nih. 21 Chu huna chun tu khomin in kuomah, "En ta u, Krista chu hi taka hin a um" amanih, "En ta, saw va sawh" amanih an ti chun awi naw ro. 22 Krista tehlèm le zawlnei tehlèmhai an hung suok ding a ni si a, theihai sien la lem chu, thlanghai meuh khom thuoi hmang dingin inchikna thilmakhai thawng an tih. 23 Nangni ruok chu fimkhur ro, iengkim ka hril vong ta cheu hi. 24 "Chuong ang hun rinum a liem hnung chun nisa inthim a ta, thlà khom var bok naw nih; 25 vàna inthokin arasihai til an ta, vàna thilthawtheinahai chu sukhnîngin um a tih. 26 Chun, Mihriem Naupa hi thilthawtheina nasa tak leh ropui takin sûm laia hung hmûng an tih. 27 Chuongchun, a vàntirkohai chu tir suok a ta, a mi thlanghai chu kawlkil li, hnuoi tawpa inthoka vàn tawp chenin lawr khawm a tih. 28 "Chuongchun, theichang kunga inthokin thil umzie inchûk ro. A hung indawn a, a hna a hung inder chun nipui a ni ding an tah ti in hriet hlak. 29 Chuong ang bokin, nangni khomin chuong po po chu a hung tlung in hmu pha chun ama chu a hung hnâi tah a, kotkhàr bulah a um tah ti hre ro. 30 Thu dik ka hril cheu hi, chuong po po chu a hung tlung hma chun tu lai mihaiw hi bo naw ni hai. 31 Hnuoi le vàn bo a ta, ka thu ruok chu bo naw nih. 32 "Nisienlakhom, chu thil hung tlung hun ding ni le dârkâr chu Pa chauh naw chun tu khomin, vàntirkohai khomin, Naupa khomin, an hriet nawh. 33 Fimkhur unla, inring zinga umin tongtai ro, a hun chu in hriet si nawh. 34 Mi, ram danga inzin dingin a siehlawhai kuomah an sin puol seng maw inphurtir a, kotkhàr vêngtu khom inring zinga um dinga thu a pêk hieu hnunga a fe ta daih ang hi a nih. 35 Chuleiin, inring zingin um ro. In neitupa hung hun ding chu zàn tieng amanih zàn ril amanih, zîng arkhuon amanih, zîngkâr amanih ding in hriet si nawh; 36 a hung thut chun inin hung hmu hlauh rawi a ti cheu. 37 In kuoma ka hril hi mi po po ta dinga ka hril a nih: inring zingin um ro" a ta.

Mark 14

1 Chun, ni hni hnungah Fekan Kût le Cholthanglo Bei Kût a um ding a na, thiempu lalhai le Dàn zirtirtuhai chun Isu chu zawra man ding le sukhlum dingin an zong a. 2 "Kût lai chu ni naw sien, chuong naw chun vàntlâng lai buoina suok hlauh rawi a tih" an ta. 3 Bethani khuoa phâr pakhat Simon an ti inah dawkana Isun thlaithleng a ot laiin alabasta bûra nard hriek rimtui hlîr hlak, to tak el chawiin nuhmei pakhat a hung a, a bûr chu a tetkoi a, a luah a buok khum a. 4 Chu taka mi thenkhat chun an ngai thei naw a, "Ieng dinga hriek rimtui hi a sukral mei mei am a na? 5 Hi hriek hi puitling kum khat hlawx nêka tam hiela zor a, mi retheihai kuoma pèk lem awm annawm" an ta, chu nu chu na takin an hal a. 6 Isu ruok chun, "Tosan ro. Ieng dinga in sukbuoi am a na? Ka chungah thil ditum tak a thaw a ni hi. 7 Mi retheihai chu nangni lai an um zing a, in nuom hun hunah in somdawl thei annawm; kei ruok chu nangni lai um zing naw ning. 8 A thaw thei ang ang chu thawin, ka taksa hi phûm dingin hriek a lo nâl lawk a ni hi. 9 Thu dik ka hril cheu hi, khawvel pumpuia Chanchin Tha an hrilna taphotah, hi nu thilthaw hi ama hriet zingna dingin hril ve pei an tih" a ta. 10 Chun, Sawmpahnihai laia mi pakhat, Juda Iskariot chu Isu inmantir tumin thiempu lalhai kuomah a fe a. 11 Chu thu an lo hriet chun an lawm hle a, sum khom pèk an tiem a. Chuongchun, an mantir dàn remchâng a zong tah a. 12 Cholthanglo Bei Kùt ni hmasa tak, Fekân Kùt beramte an that hlak nia chun a zirtirhaiin Isu kuomah, "Fekân Kùt ruoi i kîl theina dingin khawlai am buotsai inlang i nuom a?" tiin an indon a. 13 Chuongchun, zirtirhai laia mi pahni a tir a, an kuomah, "Khawpuiah va lût unla, bêla tui chawi pa pakhat intuokpui in ta, ama chu zui ro. 14 A lûtna in neitu kuoma chun, 'Zirtirtuin, ka zirtirhai le Fekân Kùt ruoi kan kìlna ding pindan chu a khaw hi'm a na? a tih' va ti ro. 15 Ama ngei chun pindan chunghnung lien tak, hmangruo iengkim, inpei sa diem umna chu inentir a ti cheu a, chu taka chun ei ta dingin ruoi va buotsai ro" a ta. 16 Chuongchun, zirtirhai chu an suok a, khawpuia chun an fe a, an kuoma a hril ang ngei khan an va hmu a, Fekân Kùt ruoi chu an buotsai tah a. 17 Zàn tieng a hung ni chun Isu chu zirtir sawmpahnihai leh a hung tlung a. 18 Thlaithlèng an kîl lai chun Isun, "Thu dik ka hril cheu hi, nangni laia pakhat, mi kîlpuitu ngèi hin mi'n mantir a tih" a ta. 19 An lungzing ta hle a, a mal malin a kuomah, "Kei chu ni awm lo tak maw?" an ti seng a. 20 Ama chun, "Sawmpahnihai laia pakhat, kei le thlengkûma bei inchietuy chu nîng a tih. 21 Mihriem Naupa chu a chungthu hrila a um tah angin a fé ngei ding a nih. Nisienlakhom, Mihriem Naupa inmantirtu mihriem chung chu a rik ie. Chu mihriem chu pieng naw sien a ta dingin tha lem a tih" a ta. 22 Chuonga an fàk lai chun Isun bei a lâk a, lawmthu a hril a, a khoi a, a zirtirhai chu a pêk a, "La ro, hi hi ka taksa a nih" a ta. 23 No khom chu a lâk a, lawmthu a hril zoin anni chu a pêk a, an dawn seng a. 24 Ama chun an kuomah, "Hi hi ka thisen, thuthlungna, z mi tam tak ta dinga suok ding chu a nih. 25 Thu dik ka hril cheu hi, Pathien rama a thara ka dawn hun a tlung hmâ khat chu grêp ra tui hi dawn nawk ta ngai ning" a ta. 26 Hla an sak zo chun Oliv tlâng panin an suok tah a. 27 Isun an kuomah, "In rêngin mi zamsan vong in tih. 'Berampu chu vuong ka ta, beramhai chu indar an tih' ti ziek a ni kha. 28 Nisienlakhom, kei thoa ka um hnungin Galili ramah lo fe hmasàng ka tih" a ta. 29 Peter ruok chun, "An rêngin nghatsan vong hai sienla che khom kei chun nghatsan naw top ka ti che" a ta. 30 Isun a kuomah, "Thu dik ka hril che hi, voi zàn lá là hin, ar voi hnih a khuong hmain nangin voi thum mi'n phat i tih" a ta. 31 Ama ruok chun rorum takin, "I thìnaa chun thi ve ding ni lang khom, inphat naw top ka ti chê" a ta. Mi dang khomin a ti ang chun an hung ti ve tlier tlier a. 32 Hmun pakhat, Gethsemani an ti chu an tlung a, Isun a zirtirhai kuomah, "Ka tongtai sùng hi taka hin lo thung ro" a ta. 33 Peter hai, Jakob hai, Johan hai a thuoi a, nasa taka beidongin a lungzing a. 34 An kuomah, "Lungngaina thipui khop hielin ka thlarau hi a tlâkbuok a nih. Hi taka hin um inla, mi mengpui zing ro" a ta. 35 Hma tieng a va fe hret a, hnuoiah a bokkhup a, thei ni sien, chu dârkâr chun a fe khèl theina dingin a tongtai a. 36 "Abba, Pa, iengkim i thaw thei a, hi no hi mi la sonpèk rawh, sienkhom keima thu ni loin nangma thû thù ni lem raw se" a ta. 37 A hung kîr nawk a, anni chu inlusuin a hung hmu a. Peter kuomah, " Simon, i inlusu a ni maw? Dârkâr khat bèk khom in mi mengpui thei naw a ni maw? 38 Thlèmnaa in lùt nawna dingin mengin tongtai ro. Thlarau chun a pei a, taksa ruok chu a hrât naw a nih" a ta. 39 A fe nawk a, a hril ngai hrilin a va tongtai nawk a. 40 A hung kir nawk chun an inlusu chu a hung hmu nawk a, an imu a suok êm leiin hang don ngaina khom an hriet nawh. 41 A hung kîr voi thumnaa chun, "Inlusuin in la chawl zing a ni maw? A hun tah. A dârkâr chu a hung tlung tah. En ta u, Mihriem Naupa hi mi suolhai kuta inmantir a ni ding an ta hi. 42 Tho unla, fèng ei tiu. A mi'n mantirtu ding khom a hung ta saw!" a ta. 43 A hril lai zingin Juda, Sawmpahnihai laia pakhat kha a hung tlung a, ama ruol chun thiempu lalhai, Dàn zirtirtuhai le upahai tir mi tam tak, kawlhnâm le hmoltum chawiin an hung tlung ta rup a. 44 A'n mantirtu ding khan, "Ka fawp fawp chu ama nîng a tih; man unla, ngun taka vêngin thuoi hmang ro" tiin inchikna ding a lo hril sa diem tah a na. 45 A hung tlung charin Isu chu a hung pan a, "Rabbi" tiin a fawp a. 46 Isu chu an chel a, an man tah a. 47 A bula ngîrhai laia pakhat chun kawlhnâm a phawi a, thiempu laltak siehlaw chu a sât a, a nakawr a fikpèk a. 48 Isun an kuomah, "Suomhmang man ding ang elin kawlhnâm le hmoltum chawiin in hung inthok a ni maw? 49 Nangni lai tempulah ni tin ka zirtir hlak a, in mi man si nawh. Nisienlakhom, Pathien Lekha thu chu a hung tlung kim ngei ding a nih" a ta. 50 Chuongchun an rêngin an tlànsietsan a, an bo ta rip a. 51 Tlangvàl pakhat, a puon hlap chauh sil hin Isu chu a zui ve a, ama khom chu an man a, 52 sienkhom a'n tàl suok a, a puon tlànsanin saruokin a tlân hmang tah a. 53 Isu chu Thiempu laltak kuomah an thuoi a, thiempu lalhai, upahai le Dàn zirtirtuhai chu an hung pung khawm a. 54 Peter khomin an hnung hla feah Thiempu laltak in huon sûng tuollai chen a zui a; vêngtu pulishai lai chun mei lum awiin a thung ve a. 55 Thiempu laltak le Sanhedrina thang po po chun Isu an sukhlum theina ding san an zong a, an hmu si naw a. 56 Mi tam takin khêlin an hèk a, sienkhom an hèkna thuhai chu a'n mil tawl bok si nawh. 57 Chun, mi pakhat a hung ngìr a, khêlin a hêk a, 58 "Hi tempul kuta bawl hi thiek ka ta, tempul dang, kuta bawl lo ni thum sûngin indin nawk ka tih' a ta, chu chu a ti lai ngei kan hriet" a ta. 59 Chuong thila khom chun an hêkna thuhai chu a la'n hmu hlei thei nawh. 60 Thiempu laltak chu a lâiah a va ngìr a, "Hieng an hêkna zozài che hi i don thei naw a ni? " tiin Isu a'n don a. 61 Ama hlak chu a to zing a, ieng khomin a don nawh. Thiempu laltak chun, "Nang hi Krista, Hamtha Naupa chu i ni?" tiin a'n don nawk a. 62 Isu chun, "Ni e. Mihriem Naupa hi Iengkimthawthei chang tieng inthung a, vàn sumhai le hung la hmung in tih" a ta. 63 Chu phing leh Thiempu laltak chun a silfènhai chu a pot thlèr a, " Hrepuitu dang tu am ei la ngai? 64 Pathien poi a hril dàn chu in hriet tah a, ieng tin am in ngai?" a ta. An rêngin Isu chu sukhlum tlâkah an ngài a. 65 A thenin chil an sâkkhum tan a; a mit an tuompèk a, kuta lokin, "Tuin am a thaw che hril thei rawh" an ta. Vêngtu pulishai chun an thuoi a, an ben sok sok a. 66 In hnuoi tieng tuolzawla Peter a um lai chun thiempu laltak siehlawhai laia nuhmei pakhat a hung a, 67 Peter mei awi lai chu a hung hmu a, a hang en chieng a, "Nang khom hi Nazaret mi Isu kuoma um kha i ni hi" a ta. 68 Ama ruok chun, "I thu hril umzie chu ka hriet dèr nawh, a ngaina khom ka hriet nawh" tiin a'n phat a. 69 Nunghàk khan a en zui a, a bula ngîrhai kuoma chun, "Anni laia mi chu a ni hi tie!" a ti nawk a, ama chun a'n phat nawk a. 70 Chu hnung ela chun Peter kawla ngîrhai chun, "Anni laia mi a ni ngei hi, Galili mi a ni annawm" an ta. 71 Ama ruok chun tongsephur dong huoma inkhâmin, "Chu mihriem in hril chu ka hriet dêr nawh" a ta. 72 Chu zoah ar khuon hnìna chu a hung khuong ta nghal a. Isun a kuoma, "Ar voi hni a khuong hmain nangin voi thum mi'n phat i tih" a ti thu kha Peter chun a hriet suok a, insûm zo loin a tap a.

Mark 15

1 Zîngkâr inhma takin thiempu lal hai, upa hai, Dàn zirtirtuhai leh Sanhedrin po po chun ro an rêl a; Isu chu an khit a, an thuoi hmang a, Pilat kutah an inhlàn a. 2 Pilat chun, "Judahai lal i ni maw?" tiin a lo indon a. Ama chun, "Ni e, i ti annawm" a ta. 3 Thiempu lalhai chun kong tam takin an hèk a. 4 Chuongchun, Pilatin, "An hèkna zozai che hi i hriet naw maw? I don dèr naw ding maw?" tiin a'n don nawk a. 5 Nisienlakhom, Isun a don chuong naw leiin Pilat chun mak a ti hle a. 6 Kût niin tâng pakhat insuopêk dinga mipuiin an hni taphot chu Pilatin a'n suopêk hlak a. 7 Helna a suok tuma tuol that leia hel pawl an man le lung ina an khumhai lai chun mi pakhat a hming Barabas a um a. 8 Chuongchun, mipui chu an hung a, a thaw hlak anga thaw dingin an ngên a. 9 Ama chun, "Judahai lal hi insuopêk lang cheu in nuom am?" a lo ta. 10 Thîkna leiin Isu chu thiempu lalhaiin a kutah an hung inhlàn a nih ti Pilatin a hriet si a. 11 Amiruokchu, Barabas insuo hni lem dingin thiempu lalhai chun mipui an infui por a. 12 Pilat chun, "Chuong a ni si chun Judahai lal in ti hi ieng tia thaw dingin am in dit a?" tiin a'n don nawk a. 13 Anni chun, "Hemde rawh" tiin an khêk a. 14 Pilat chun, "Ieng leiin am ie? Iem a thaw suol a?" a ta. Nisienlakhom, anni chun inring nawk zuolin, "Kraws-ah hemde rawh" tiin an khêk a 15 Chuongchun, mipui chu suklawm nuomin Barabas chu a'n suopêk a; Isu ruok chu a'n vuoktir a, kraws-a hemde dingin an kutah a pêk suok ta a. 16 Sipaihai chun Isu chu lal in sùng, Praitorian an tia chun an thuoi a, an pawla mi po po chu an ko khawm a. 17 Ama chu korfuol senduk an inhàktir a, a lallukhum dingin hling an inkuol a, an inkhumtir a. 18 "Chibai, Judahai lal" tiin an inriem khum a. 19 Hmolin a luah an vuok an vuok a, chil an sâkkhum a, dingthathuonin chibai an bûk el huoi huoi a. 20 Chuonga nuizat siemnaa an hmang zo chun korfuol senduk chu an hlìppèk a, ama silfèn an inhâktir nawk a, kraws-a hemde dingin an thuoi suok tah a. 21 Mi pakhat Simon, Kurini khaw mi, Aleksandra le Rufa hai pa, thingtlânga inthoka hung chu Isu kraws putpui dingin an man lui a. 22 Golgotha, 'Lu ru hmun' an ti chu an thuoi tlung a, 23 murra pol uoiin an pèk a, nisienlakhom a dawn nuom naw a. 24 Chuongchun, kraws-ah an hemde a. A silfènhai chu insemin, an chan ding seng hrietna dingin thum an vawr a. 25 An hemde hun chu zing dar kuob vel a nih. 26 Ama an hèkna thu, "JUDAHAI LAL" ti chu an tàr a. 27 Ama ruol chun suomhmang pahni an hemde bok a, a chang tieng pakhat, a voi tieng pakhat. 28 Pathien Lekha thua, "Ama chu bawsetuhai lai tiem sain a um a" ti kha chuong ang chun a hung tlung indik tah a nih. c 29 Mi invêl nuk nuk hai chun an lu thinin, "E hei! Nang, tempul thieka ni thuma bawl nawk theitu, 30 insukdam la, kraws-a inthok khan hung tum ta la" tiin an biek el a. 31 Chuong ang bokin thiempu lalhai le Dàn zirtirtuhai chun, "Mi dang hman sukdam hlak si, mani insukdam thei si lo. 32 Ama ei ring theina dingin ei mit hmua ngei Krista, Israel lal chu tuhin kraws-a inthokin hung tum raw se chu" tiin an nuisaw a. Ama ruola an hemde pakhat khom chun a lo deusaw bok a. 33 Sùn dâr sawmpahnia inthoka chawhnung dâr thum chenin khawvel pumpui chu a'n thim ta vong a. 34 Chawhnung dâr thum vêla chun rawl inring takin, "Eloi. Eloi, lama sabakthani" tiin a khêk a (chu chu "Pathien, Pathien, ieng dinga i mi màksan am?" tìna a nih). 35 A bula ngîr thenkhatin chu chu an hrietin, "Ngai ta u, Elija a ko a ni chu" an ta. 36 Mi pakhat a tlân a, siponah uoiin thûr a'n chie a, hmolah a târ a, Isu chu indawntir a tum a, "Ama la thla dingin Elija a hung hrim am, en ei tiu" a ta. 37 Isu chu rawl inring takin a khêk a, a hnuk a chat tah a. 38 Chun, tempula puonzâr chu a chung tienga inthoka a hnuoi tieng chenin a'n thlêr vong a. 39 A hma zawna ngîr sipai zahotu, chuonga a khêk ri hrea a thi dàn hmutu chun, "Hi mi hi Pathien Naupa a lo ni ngêi hi tie!" a ta. 40 Nuhmei ruol khomin hla taka inthokin an thlìr a, chuonghai lai chun Mari Magdalin hai, Jakob chîn lem le Jose nu Mari hai le Salomi hai khom an thang a. 41 Hieng mihai hi Galili rama a um laia ama zuia a rong bawlpêk hlaktuhai an nih; chun, anni ruola Jerusalema hang fe ve nuhmei dang tam tak an thang sa bok a. 42 Judahai Inrinnid a ni a (chu chu Sabat dinga an inbuotsai ni a nih). 43 Zàn tieng a hung ni chun Josefa, Arimathai khuoa mi, Judahai Rorêlna Inpuia membar pakhat, mi inzaum tak, Pathien ram beisei mi chu huoi takin Pilat kuomah a fe a, Isu ruong a hni a. 44 Pilat chun a thi tah ti a hrietin mak a ti hle a, sipai zahotu chu a ko a, a thi hun a'n don a. 45 A thi ngei tah ti sipai zahotu bâua inthoka a hriet hnung chun Isu ruong chu Josefa a pêk a. 46 Chuongchun, ruong tuomna ding puon a'n chawk a, chu chun a tuom a, lung ker thlànah a'n zàl a, thlàn kotkhàr chu lungkhàrin a khàr a. 47 Mari Magdalin le Jose nu Mari khomin Isu an inzàltirna thlàn chu an hmu a.

Mark 16

1 Sabat ni a hung invoi chun Mari Magdalin hai, Jakob nu Mari hai le Salomi hai chun Isu ruonga nâl ding hriek rimtui an inchawk a. 2 Pathienni tûk inhma tak, ni suok hlimin thlànah an va fe a. 3 "Thlànkhàr tuin am mi'n hlum sonpek a ta?" an ta. 4 An hang en ruok chun thlànkhàr lung lien tak el chu inhlum son sain an hmu a. 5 Thlàna chun an lùt a, tlangvàl pakhat puon vâr sil, chang tienga inthung an hmu a, an ti hle a. 6 Ama chun, "Ti naw ro. Nazaret Isu, an hemde tah kha in zong a ni awm a, a tho nawk tah a, hi taka hin a um ta nawh; en ta u, a zàlna chu hi hi a nih. 7 Nisienlakhom fe unla, a zirtirhai le Peter kuomah, 'A hril cheu ang ngei khan Galiliah a lo fe hmasa ding a na, chu taka chun hmûng in tih' tiin va hril ro" a ta. 8 Anni chu ti le maktia inthin hawpin, thlàna inthok chun an tlàn suok a, an ti luotin tu kuoma khom ieng khom an hril nawh. 9 [Pathienni tûk inhma taka a thonawk chun a sûnga inthoka khawhri pasari a hnot suokpèk Mari Magdalin kuomah a'n lâr hmasa tak a. 10 Ama chu Isu ruolhai kuomah a fe a, mithi pûr doa an tap lai chun a va hril a. 11 A hring nawk thu le hmu khom a hmu ngei thu a hril chu hre hai sienkhom an awi chuong nawh. 12 Chu hnung chun anni laia mi pahnih, thingtlâng khuo tieng pana an fe laiin hmêl danglam putin an kuomah a'n làr a. 13 Anni khom chun an ruol danghai chu an hung hril ngei a, sienkhom an lo awi chuong bik nawh. 14 Chu hnung chun zirtir sawmpakhathaiin bu an fàk lai an kuomah a hung inlàr a, an ringna tlawm lei le a tho nawk hmutuhai thu an awi nuom tlat nawna thuah a kawk tawl a. 15 An kuomah, "Khawvel po poah fe unla, thilsiem po po kuomah Chanchin Tha hril ro. 16 Tu khom ring a, baptisma chang chu sandam nîng an ta, tu khom a ring naw chun thiem naw chang an tih. 17 Hieng inchikna thilmakhai hin a ringtuhai chu zui pei a tih: Ka hmingin ramhuoihai hnot suok an ta; tong tharin tong an ta; 18 kutin rûl man an ta; thìna tûr dawn hai sien khom ieng khom ti naw ni hai; damnawhai chungah kut innghat an ta, hung dam pei an tih" a ta. 19 An kuoma thu a hril zo chun Lalpa Isu chu vàna thuoi tungin a um a, Pathien chang tieng a hang inthung tah a. 20 Zirtirhai khom chu thu chu hrilin ram tinah an fe suok a, Lalpan anni chu a thawpui a, an thu khom a zuitu inchikna thilmakhaiin a suknghet pei a. Amen.

Luke 1

1 Eini laia thil hung tlung tahai chanchin, a tîra inthoka mit ngeia hmutuhai le a thu tlâng insampuituhaiin an mi hril sawng ang thlap khan mi tam takin ziek an tum ta hlak a. 2 Chuleiin Theofil inzaum tak, a bula inthokin iengkim kei khomin fimkhur takin ka sui ve a, 3 chanchin indot thlapin ziekpêk lang che thain ka hriet a, 4 kha hmaa thu an inchûktirhai che kha a'n dikzie i hriet theina dingin. 5 Judai rama Heroda a'n lal laiin Abija pawla mi thiempu pakhat, a hming Zakari a um a, a nuhmei Elizabet chu Aron thlaa mi bok a nih. 6 An nupa chun Pathien mit hmua mi fel, soisêlboa Lalpa thupèkhai le Dàn po po zawm hlak mi an nih. 7 Nisienlakhom, Elizabet chu a ching leiin nau an nei naw a, upa tak an ni vé vè tah a. 8 Anni pawl rongbawl huna Pathien hmaa thiempu sin Zakari-in a thaw lai chun, thiempuhai thaw dàn pangngai angin, 9 Pathien Tempul sûngah lût a, rimtui rawtu ding thum vawra an en hlak chu a chungah a tla a. 10 Rimtui raw hun a hung tlung chun inkhawmhai po po chu tuolah an tongtai a. 11 Chun, Lalpa vàntirko a hung inlàr a, rimtui rawna maichàm chang tieng a ngîr a. 12 Zakariin a hmu chun a'n ching zok a, a ti êm êm a. 13 Nisienlakhom vàntirko chun, "Zakari, ti naw, i tongtaina kha hriet a na, i nuhmei Elizabetin nau pasal neipêk a ti che a, a hmingah Johan i sak ding a nih, 14 Ama chu i hlimna le lawmna nîng a ta, a hung pieng leiin mi tam tak khom lawm bok an tih. 15 Lalpa ngaiah mi lien nîng a ta, uoiin le zu hrim hrim dawn ngai naw ni a, a pieng hmaa inthokin Thlarau Thienghlimin sip a tih. 16 Israel mihai laia tam tak chu an Lalpa Pathien kuom tieng hung thuoi kîr a tih. 17 Elija thlarau le thilthawtheina putin, Lalpa ta dinga mihai buotsai dingin Lalpa hma hung lawk a ta, pahai lungril chu an nauhai tieng innghattir a ta, mi kawmawhai chu mi fel varna inputtir a tih" a ta. 18 Zakari chun vàntirko kuomah, "Chuong chu thil ni thei am a nih? Kei hlak putar ka ni ta a, ka nuhmei khom a upa ta hle si" a ta. 19 Vàntirko chun, "Kei hi Gabriel, Pathien hmaa ngîr hlak ka na, be ding che le hi thu lawmum hi i kuoma intlun dinga tir ka nih. 20 Ngai ta, a hun taka thil hung tlung ding thu ka hril che hi i ringhlà leiin a hung tlung hma po chu to zingin um i ta, tong thei bok naw ti nih" a ta. 21 Chuong lai chun Zakari chu mipuiin an lo nghâk thup a, tempul sûnga chuong chen chen a um chu mak an ti hle a. 22 A hung suok chun an kuomah ieng khom hril thei loa kut zaizira a biek tawl leiin, Tempul sûngah inlàrna a hmu a nih ti an hriet a. 23 A rongbawl hun bituk a zo chun in tieng a'n lawi a. 24 Chu hnunga chun a nuhmei Elizabet chun nau a hung pai a, thla nga sûng tuol suok loin inah a'n khum a. 25 "Mi laia ka hming siet inkhumna dingin Lalpan ditsakna mi'n entirin ka chungah hieng hin a thaw a nih" a ta. 26 A thla ruknaa chun Galili rama khuo pakhat Nazaret an tia um nunghàk thienglâm pakhat kuomah Pathienin vàntirko Gabriel a tir a. 27 Chu nunghàk thienglâm chu a hming Mari a na, Davida thlaa mi Josefa nuhmei huol lai a nih. 28 Vàntirko chu Mari kuomah a fe a, "Chibai, vochuom, Lalpa i kuomah a um" a ta. 29 A thu hril chun Mari chu a suklungzing êm êm a, a chibai dong chu ieng lei tak am nîng a ta ti a ngaituo a. 30 Vàntirko chun, "Ti naw, Mari, Pathien ditsak i nih. 31 Ngai rawh, nau pâi i ta, nau pasal nei i ta, a hmingah Isu i sak ding a nih. 32 Ama chu mi ropui tak nîng a ta, Chunghnungtak Naupa tîng an tih. Lalpa Pathienin a thlatu Davida lalthungpha chu pêng a ta, 33 Jakob thlahai chungah chatuonin inlal a ta, a ramin kin ni nei naw nih" a ta. 34 Mari chun vàntirko kuomah, "Chuong chu iengtin am ni thei a ta? Nunghàk thienglâm ka la ni si a"a a ta. 35 Vàntirko chun a don a, "Thlarau Thienghlim i chungah hung tlung a ta, Chunghnungtak thilthawtheina chun hliekhûng a ti che. Chuleiin, nau hung pieng ding chu mi thienghlim Pathien Naupa tîng an tih. 36 Chun, ngai ta, i zuorpuinu Elizabet, a ching an ti hlak khomin tar hnungin nau pasal a pâi a, tu hi a thla rukna a ni tah. 37 Pathien ta dingin thaw thei naw ieng khom a um nawh" a ta. 38 Mari chun, "Ngai ta, Lalpa suoknu ka nih, i hril ang peiin ka chungah tlung raw se" a ta, chu phing leh vàntirko chun a màksan tah a. 39 Chu hun lai bok chun Mari chu a'n siem a, Judai rama thingtlâng khaw pakhat tieng inhmaw takin a pan ta vang vang a. 40 Zakari in a hang tlung a, Elizabet chu chibai a bûk a. 41 Mari chibai bûkna rawl a hriet char chun a phìnga naute chu a chàng a. Elizabet chu Thlarau Thienghlimin a sip a, inring takin, 42 "Nang hi nuhmei po po laia hamtha tak i nih; i rîla rà khom a hamtha. 43 Ka Lalpa nû meuh ka kuomah a hung el ta hi ieng ang lawma ditsakna ropui am an ta leh! 44 Ngai ta, i chibai bûkna rawl a hriet charin lawm leiin ka phing sûnga naute khom a'n châwm an son naw! 45 Lalpan a kuoma thu a hril tlung ngei dinga ringtu chu a hamtha" a ta. 46 , Mari chun, "Ka thlain Lalpa a chawimawi a, 47 Ka thlarau khom ka Sandamtu, Pathien chungah a hlim bêk bêk. 48 A bawinu tlawm tak a ngaisak leiin, Tuta le ruolthar peihai khomin, Hamthanu mi ti ngêi an tih. 49 Mi Ropuitak khan thil ropui tak, Ka ta dingin a mi thawpèk a, A hming khom a thienghlim a nih. 50 A lungsietna chu suon thar peiah, Ama tituhai chungah um zing a tih. 51 A bânin thil ropui tak a thaw a, Lungrila chapohai a vai dar a, 52 Lalthungphaa inthunghai chu, An thungphaa inthokin a pei a, Mi hnuoihnunghai a dom sâng a; 53 Phingtâmhai chu thil thaa hrai tlaiin, Hausahai chu kut ruokin a'n tîntir a, 54 A tiem zangaina chu vong zingin, A siehlaw Israel chu a thangpui a; 55 Chu chu ei thlatuhai kuoma a tiem, Abraham le a thlahai po po kuoma, A kumkhaw thu tiem a ni si a"a ta. 56 Mari chu thla thum lai Elizabet kuomah a châm hnungin a in tieng a kîr nawk tah a. 57 Elizabet nau nei chu a hun tah a, nau pasal a nei a. 58 A tuolbawmhai le a laichinhaiin Lalpan a lunginsietzie an hrietin an lawmpui hle a. 59 A ni riet ni chun naute ser tan dingin an hung inkhawm a, naute hmingah a pa hming Zakari sak an tum a; 60 sienkhom a nu chun, " Ni lo e. Johan ti sak lem ding a nih" a ta. 61 Anni chun, "In laichinhai lai tu khom hi hming put hi an um nawh" an ta. 62 A naupa hming dinga a dit chu kut zàizirin a pa chu an indon a 63 Ama chun lung lekha a hni a, chu taka chun "A hming chu Johan a nih" tiin a ziek a, an rêngin mak an ti hle a. 64 Chuongchun thawklekhatin a lei le bau a hung insùt a, a hung tong suok a, Pathien a'n pâk a. 65 An tuolbawmhai chu maktiin an sip a, chuong thilhai chu Judai ram thingtlàngah a'n thang suok a. 66 A hre taphot chun maktiin, "Chu naute chu iengtin takin am a la hung um ding maw?" an ti huoi huoi a. Lalpa kut chu a chungah a um a. 67 A pa Zakari chu Thlarau Thienghlimin a sip a, a hrillawk a: 68 "Lalpa, Israel Pathien chu inpâkin um raw se, A mihai ditsak taka a hung intlan leiin. 69 A siehlaw Davida sûngkuoa inthokin, Ei ta di'n Sandamtu ropui a'n din, 70 Tiena zawlnei thienghlimhai baua, A lo hril tah ang ngei khan, 71 Ei hmêlma le mi theidatu hai laka Mi sanhimtu ding chu. 72 Ei thlatuhai a lunginsietzie a suklang a, A thuthlung thienghlim chu a hriet zing a, 73 Ei pu Abraham kuoma a tiem angin, Ei hmêlmahai lakah mi san a, 74 Ti dêr loa ama rong bawl a, Ei dam sùng po thienghlim le fela, 75 A hmaah ei um theina dingin. 76 Nang chu Chunghnungtak zawlnei, Tiin an ko ding che a nih, Bawipu; Lalpa lampui chu buotsai dingin, A hmaah i fe hmasa ding a ni si a, 77 An suolnahai chu ngaidama A la sandam dingzie thu chu, A mihai kuoma inhriettir dingin. 78 Ei Pathien zangaina innêm tak leiin, Chunga ni suok chun mi hung sir a tih: 79 Thim hnuoia inthunghai le Thìna hlima chênghai sun var a, Thlamuongna lampuiah mi thuoi a, Muong taka kal mi'n chawitir dingin"a ta. 80 Naute chu a hung inthang lien pei a, thlarau tieng a hung puitling deu deu a; Israelhai lai tlâng hrieta a hung inlang hma chun thlalèrah a khawsa zing a.

Luke 2

1 Chuong lai chun Kaisar Awgasta chun Roman lalram po poah intiemna nei dingin thu a'n suo a. 2 Hi hi Suria ram lârsâpa Kuirini a thang sùnga intiemna hmasa tak chu a nih. 3 Chuongchun, mi tin chu mani tobul khuo sengah hming ziek dingin an fe a. 4 Josefa khom Davida sûngkuo le a thlaa mi a ni leiin, Galili ram Nazaret khuoa inthokin, 5 a nuhmei huol lai Mari, nau pai inhlà tak leh chun Judai rama Davida khuo Bethlehemah hming ziek dingin an fe a. 6 Chu taka an um lai chun a nau nei a hung hun ta a, nau lutìrah nau pasal a nei a. 7 Puonin a tuom a, khuolbûkah an inleng ve naw leiin ranthlêngah an inzâltir a. 8 Chu lai ram khaw dâia chun berampuhan an beramhai an vèng a, zànah an riek ngha a. 9 Chun, Lalpa vàntirko an kuomah a hung ngìr a, Lalpa ropuinain an vêl a hung sunvar phût a, an ti êm êm a. 10 Vàntirko chun, "Ti naw unla, ngai ro, mi tin ta ding chanchin tha lawmum bêk bêk ka hung intlun cheu a nih. 11 Voisun hin in ta dingin Davida khuoah Sandamtu a pieng tah, Lal Krista chu. 12 Hi hi in ta dinga inchikna nîng a tih: naute, puona tuom, ranthlènga zâl hmung in tih" a ta. 13 Thawklekhatah vàntirko bula chun vàn mipui tam tak an hung um ta huk a, Pathien an inpàk a: 14 "Chunghnungtaka Pathien ropui raw se, A ditsakna changtu hnuoia mihriemhaic kuomah, Inremna thu inlêng raw se"tiin. 15 Vàntirkohaiin vàn tieng an fesan phingleh berampuhai chun, "Thaw ro, Bethlehemah fêng ei ta, Lalpa thu mi hril hung tlung chu va en ei tiu" an ta. 16 Chuongchun, inhmaw takin an fe a, Mari le Josefa le ranthlênga naute zâl chu an va hmu a. 17 An va hmu chun an kuoma vàntirkoin naute chanchin an hriettir kha an hril a. 18 A hre taphotin berampuhai thu hril chu mak an ti hle a. 19 Mari chun chuong thu chu a lungrilah a khawl khawm a, a ngaituo neu neu a. 20 Vàntirko hril ang ngeia iengkim an hriet le an hmu lei chun berampuhai chu Pathien chawimawi le inpâk pei pumin an kìr nawk tah a. 21 A ni riet ni, a ser tan ni chun sûla a'n sieng hmá daia vàntirkoin a hming ding a lo hril tah angin a hmingah ISU an sak a. 22 Mosie Dàn anga an inthien ni ding a hung tlung chun naute chu Lalpa kuoma inhlàn dingin Mari le Josefa chun Jerusalemah an thuoi a. 23 Lalpa Dàn thuah "Nau lutîr pasal taphot chu Lalpa chanvo ding a nih" ti a ni si a. 24 Chun, Lalpa Dàn angin, vathu pahni amanih parva tuoi pahni amanih inthawina dingin an inhlàn ding a nih. 25 Jerusalema chun mi pakhat a hming Simeon a um a, ama chu mi fel le sakhaw mi tak a nih. Israel thlamuongtu ding chu a thlîr zing a; a chungah Thlarau Thienghlim a um a. 26 Lalpa Kristad chu a hmu hmâ khat thi lo dingin Thlarau Thienghlimin a lo inhriettir ta hrim a. 27 Thlarau thuoiin tempula chun a fe a, naute Isu chu a nu le pain Dànin a phût ang thawpêk dinga an hung thuoi lût lai chun 28 Simeon chun a lo pom a, Pathien a'n pàk a: 29 "Aw Laltak, tuhin chu i thu ang peiin, I siehlaw hi thlamuong takin i'n fetir ding an ta hi, 30 I sandamna mi tin hmua i buotsai chu, 31 Ka mit ngèiin a hmu tah: 32 Jentelhai kuoma i var suklangtu ding leI mi Israelhai ropuina ding chu"tiin. 33 Naute chungchàng a hril chu a nu le pa chun mak an ti hle a. 34 Simeon chun anni chu mal a sawm a, a nu Mari kuoma chun, "Ngai ta, Israel laia mi tam tak, Tlûkna ding le tungdingna dingin, Hi naute hi ruot a nih, Inchikna an kal hut hut ding chu. 35 Kawlhnâma sun tlang angin I lunglai la nâng a ta, Mi tam tak ngaituona rûk, Phor langin la um a tih"a ta. 36 Zawlnei nu pakhat Anna, Aser hnama mi Fanuel naunu a um a. Tar tak a ni tah a; a pasal leh kum sarih an um hmunkhat hman a, 37 chu hnung chun kum sawmriet pali a ni chenin a hmeithai tah a nih. Ama chun tempul màksan loin, bu ngheia tongtaiin sùn-zàn zomin Pathien a biek hlak a. 38 Chuong lai chun ama chu a hung a, Pathien kuomah lawmthu a hril a, Jerusaleme sansuokna beiseitu taphot kuomah naute chanchin chu a hril a. 39 Lalpa Dàn ang peia thil an thaw zo vong hnung chun Galili rama an khuo Nazareta chun an kîr nawk tah a. 40 Naute khom chu inthang peiin a hung chakvak a, varnain a sip a, Pathien lunginsietna a chungah a um zing a. 41 Kum tinin a nu le pahai chu Fekân Kût hmang dingin Jerusalemah an fe hlak a. 42 Ama chu kum sawm le pahnih a niin dàn pangngai anga kût hmang dingin an fepui a. 43 Kût tumtiek chun an kîr a, naupang Isu ruok chu a nu le pa hriet loin Jerusalemah a la châmbâng a. 44 An ruolhai lai a um an sawn a, ni khat an fe hnunga an laichin le hmêlhriethai lai an hang zong chun an hmu zo ta naw a. 45 Zong peiin Jerusalemah an kìr nawk a. 46 Ni thum ni chun tempula zirtirtuhai bula lo inthung chu an hang hmu tah a, an thu hril ngaithlain, thu dâm a lo indon a. 47 A thil hrietzie le mi a don thiemzie hmu taphot chun mak an ti hle a. 48 A nu le pahaiin an hmu chun mak an ti êm êm a. A nu chun, "Bawi, ieng dinga hienga i mi thaw? I pa leh thlaphang takin kan zong kan zong che an son naw" a ta. 49 Ama ruok chun, " Ieng dinga in mi zong? Ka Pa ina um ding ka nih ti in hriet naw maw?" a ta. 50 A hril umzie chu an hriet si nawh. 51 Anni le chun Nazaret tieng a kîr thlàk a, an thu awi takin a um a. A nu chun chuong thil po po chu a lungrilah a vong zing a. 52 Isu chu taksa le varna tieng a hung inthang lien a, Pathien le mihriemhai ditsak a hlaw pei a.

Luke 3

1 Kaisar Tiberi inlal kum sawm panganaa chun Pontia Pilat chu Judai rama Lârsap a na, Heroda chu Galili ram lal a na, a unaupa Filip chu Ituria le Trakonitis ram lal a na, Lusania chu Abilene ram lal a na; 2 Anna le Kaiafa chu Thiempu laltak an na, chuong lai chun thlalerah Zakari naupa Johan kuomah Pathien thu a hung tlung a. 3 Ama chun Jordan varuom le a sè vêla khuohai chu a fang a, suol ngaidamna dinga simna baptisma chang ding thu a hril pei a; 4 zawlnei Isaiin "Thlalera mi khêk rawl chun, Lalpa lamlien ding siel unla, A hraw ding lam zâl siem ro; 5 Ruom tin vur sip nîng a ta, Muol le tlâng tin rawt hnuoi nîng a ta, Lam kawihai suktlun nîng a ta, A khokroknahai hrût ruol nîng a ta, 6 Mi tinin Pathien sandamna hmûng an tih"tia ziek ang khan. 7 A kuta baptisma chang dinga hung mipuihai kuoma chun, "Rûl thlahai, lungsenna hung tlung ding hi tlânsan dingin tuin am a'n fûi cheu a? 8 In simzie thilthawin suklang lem ro. 'Abraham kan thlatu a nih annawm' tiin ngai suktha el naw ro. Ka hril cheu hi, Pathien chun hieng lunghai hi Abraham thlaah a'n din thei a nih. 9 Tuta inthok hin hreipui chu thing bul tinah an sie tah a, ra thaa ra naw thing taphot chu phûr a, meia ti el ding a nih" a lo ta. 10 Mipuihai chun, "Chuong a ni chun iem thaw tâng kan ta?" tiin an indon a. 11 Ama chun, "Tu khom, zakuo pahni nei chun a nei naw chu sem raw se; chuong ang bokin fâk ding nei chun a nei naw chu sem raw se" a ta. 12 Siekhontuhai khom baptisma chang dingin an hung a, "Zirtirtu, ieng am thawng kan ta?" an ta. 13 Ama chun, "Tu laka inthok khomin bituk nêka tam la naw ro" a ta. 14 Sipaihai khomin, "An leh, keini hi, iem kan thaw ve ding?" an ta. Ama chun "Thawluinain amanih khêla intumin amanih tu sum le pai khom lâkpêk naw unla, in hlawah lungawi ro" a ta. 15 Mipui chun lungrilin ama chu Krista ni el thei awma ngaiin beisei takin an thlîr thup a. 16 Johan chun an kuomah, "Kei chun tuiin ka baptis cheu a; nisienlakhom, keima nêka ropui lem a hung ding a na, kei chu a pheikhok hrui sût tlàk khom ka ni nawh. Ama chun Thlarau Thienghlim le meiin a baptis ding cheu a nih. 17 Ama chun hrizawla bu chu zâp fai hieu a, bupanga hlu el dingin a kutin sisêp a chawi a, a sihai po chu mei rêm thei loah raw hmang a tih" a ta. 18 Chuong ang chun infuina thu dang tam tak leh mihai kuomah Chanchin Tha chu a hril hlak a. 19 Lal Heroda khom chu a sangpa nuhmei Herodi le an chungchang thuah le thilsuol dang a thawhai leiin Johanin a kawk a. 20 A thilsuol thaw ta po po chu dit tawk loin Heroda chun Johan chu lung inah a khum a. 21 Chun, mi a hung po poin baptisma an chang hnungin Isu khomin baptisma a chang a, a tongtai laiin vàn a hung inhong a. 22 Thlarau Thienghlim chu taksa putin vathu angin a chungah a hung tum a, vàna inthok chun rawl a hung suok a, "Nang ka Naupa, ka Dittak chu i nih; i chungah ka lawm takzet" a hung ti a. Isu thlatuhai. 23 Rong a bawl tan chun Isu chu kum sawmthum laia upa a ni tah a, mi ngaia chu Josefa naupa a nih. Ama chu Heli nau a na, 24 ama chu Mathat nau a na; ama chu Levi nau a na; ama chu Melki nau a na; ama chu Jannai nau a na; ama chu Josefa nau a na; 25 ama chu Matathi nau a na; ama chu Amos nau a na; ama chu Nahum nau a na; ama chu Esli nau a na; ama chu Naggai nau a na; 26 ama chu Maatha nau a na; ama chu Matathi nau a na; ama chu Semei nau a na; ama chu Josek nau a na; ama chu Joda nau a na; 27 ama chu Joanan nau a na; ama chu Resa nau a ana; ama chu Zerubabel nau a na; ama chu Sealthielf nau a na; ama chu Neri nau a na; 28 ama chu Melki nau a na; ama chu Adi nau a na; ama chu Kosam nau a na; ama chu Elmadam nau a na; ama chu Era nau a na; 29 ama chu Josua nau a na, ama chu Eliezar nau a na; ama chu Jorim nau a na; ama chu Mathat nau a na, ama chu Levi nau a na; 30 ama chu Sumeon nau a na; ama chu Juda nau a na; ama chu Josefa nau a na; ama chu Jonam nau a na; ama chu Eliakim nau a na; 31 ama chu Melia nau a na; ama chu Mena nau a na; ama chu Matatha nau a na; ama chu Nathan nau a na; ama chu Davida nau a na; 32 ama chu Jesai nau a na; ama chu Obeda nau a na; ama chu Boaz nau a na; ama chu Salmong nau a na; ama chu Nason nau a na; 33 ama chu Aminadab nau a na; ama chu Aramh nau a na; ama chu Hezron nau a na; ama chu Perez nau a na; ama chu Juda nau a na; ama chu Jakob nau a na; 34 ama chu Isak nau a na; ama chu Abraham nau a na; ama chu Tera nau a na; ama chu Nahor nau a na; 35 ama chu Serug nau a na; ama chu Reuva nau a na; ama chu Pelek nau a na; ama chu Eber nau a na; ama chu Sela nau a na; 36 ama chu Kainan nau a na; ama chu Arfasad nau a na; ama chu Sema nau a na; ama chu Nova nau a na; ama chu Lamek nau a na; 37 ama chu Mathusel nau a na; ama chu Enok nau a na; ama chu Jared nau a na; ama chu Mahalalîl nau a na; ama chu Kenan nau a na; 38 ama chu Enos nau a na; ama chu Set nau a na; ama chu Adam nau a na; ama chu Pathien nau a nih.

Luke 4

1 Isu chu Thlarau Thienghlima sipin Jordan vadunga inthokin a kîr nawk a, Thlarauin thlalêrah a thuoi a, chu taka chun ni sawmli sûng Diebolin a thlêm a. 2 Chu hun sûng po po chun ieng khom a fâk naw a, a tawpah a phîng a hung tâm ta hle a. 3 Chuongchun Diebolin a kuomah, "Pathien Naupa i ni takzet chun hi lung hi beia inchang dingin thu pe rawh" a ta. 4 Isu ruok chun, " 'Mihriem hi bei chauin a hring nawh' ti ziek a nih" a ta. i 5 Chu zoa chun Diebolin hmun insâng takah a thuoi a, voi le khatah khawvela lalram po po a'n entir a. 6 Diebol chun a kuomah, "Hieng po po chunga thuneina le ropuina hi pêng ka ti che; ka kuoma pèk vong a ni tah a, ka nuom nuom ka pêk thei a nih. 7 Mi chawibiek la, i ta ni vong a tih" a ta. 8 Isu ruok chun, " 'Lalpa i Pathien chawibiek la, ama rong chauh bawl rawh' ti ziek a nih" a ta. j 9 Diebol chun Jerusalemah a thuoi a, tempul sîpzumah a'n ngîrtir a. "Pathien Naupa i ni takzet chun hi taka inthok hin inchawm thla rawh: 10 'Vàntirkohai thu pêng a ta, I lam tinah vêng an ti che; 11 An kutin chawi an ti che a, Lungah i ke sui naw ti nih' ti ziek ang khan" a ta. 12 Isu chun, " 'Lalpa i Pathien fie naw rawh' ti ziek a nih" tiin a don a. 13 Diebolin thlemna tinrênga a thlèm hnung chun remchang nawk huna dingin a fesan tah a. 14 Isu chu Thlarau thilthawtheina leh Galili ramah a kîr nawk tah a, a chanchin chu a ram phêkin a'n thang vèl a. 15 Sunagogah hai mi a zirtir a, mi tin inpâk a hlaw a. 16 A seilienna Nazaret khuo chu a hung tlung a, a thaw dàn pangngaiin Sabat ni chun Sunagog-ah a lût a, thu tiem dingin a ngîr a. k 17 Zawlnei Isai lekhabu chu an pèk a, lekhabu zuol chu a sût a, hi lai thu hi a hang phar a: 18 "Lalpa Thlarau chu ka chungah a um a, Riengvaihai kuomah Chanchin Tha, Hril dingin hriek a mi nàl a; Saltânghai zalenna ding thu dàm, Mitdelhai mit varna ding thu dàm, Nêksawra umhai sansuokna thu dàm, 19 Lalpa lungawi kum thu dàmPuong dingin a mi tir a nih. " 20 Lekhabu chu a zuol a, rongbawltu chu a pêk nawk a, a thung nawk a. Sunagoga inkhawm po po mit chu a chunga a fu thup a. 21 Ama chun an kuomah, "Hi Pathien Lekha thu hi voisun hin in hrietah a hung tlung tah" tiin a hril tan a. 22 An rêng chun an inpâk a, a bau thu suok ditum tak chu mak an ti hle a, "Hi mipa hi Josefa naupa kha a ni nawm a nih?" an ti tawl a. 23 Ama chun an kuomah, " 'Daktor, nang insukdam rawh' an ti hlak ang hin nangni khomin 'Kapernaum khuoa i thilthaw kan hriet ang kha i khuoa khom hin thaw ve ta la' in mi la ti ngei awm hi" a ta. 24 A hril pei a "Thu dik tak ka hril cheu hi, zawlnei tu khom ama khuo tieng mihaiin an lawm ngai nawh. 25 Diktak chun, Elija dam laia kum thum le thla ruk khuo a'n thâl a, khawvela tàm nasa tak a tlàk lai khan, Israel ramah hmeithai tam tak an uma chu an kuomah Elija kha tir a ni naw a, 26 Sidon biela Sarepta khuoa hmeithai pakhat kuoma chauh tir a ni lem kha. 27 Zawlnei Elisa dam lai khom khan, Israel ramah phâr tam tak an uma chu, anni lai Suria mi Naaman ti chauh naw chu tu khom sukthieng an ni naw kha" a ta. 28 Sunagoga inkhawmhaiin chuong thu an hriet chun an lung a khei êm êm a. 29 Chuongchun, an tho a, khuoa inthok chun an hnûk suok a, rawla nam thla dingin an khaw bul rawl koa chun an thuoi a. 30 Nisienlakhom, mipui chu a tan tlang a, a fesan tawl tah a. 31 Galili rama khaw pakhat Kapernaumah a zu fe a. Sabat ni chun mihai a zirtir a, 32 thu nei taka a'n chûktir lei chun a zirtirna chu mak an ti hle a. 33 Sunagoga chun ramhuoi zawl pakhat, thlarau tirdakum kol a um a, ama chu rawl inring taka khêkin, 34 "Eheu! Nazaret Isu, nangin ieng am mi law i tum a na? Mi sukse dingin i hung a ni maw? Tu'm i nih ti ka hriet- Pathien Mi Thienghlim chu i nih" a ta. 35 Isu chun a hal a, "To la, a sûnga inthok khan hung suok rawh" a ta. Ramhuoi chun hnuoiah a sukthlùk a, sukna loin a suoksan tah a. 36 An rêng chun mak an ti a, "Hi hi ieng thu am an ta leh? Thuneina le thilthawtheina hmangin thlarau tirdakumhai khom thu a pêk a, an suok el ta hi!" an ta. 37 Chuongchun, chu lai khaw sé vêla chun a chanchin chu a'n thang tah a. 38 Chun, a tho a, Sunagoga inthok chun Simon inah a lût a. Simon tarpi chu a khawsik a'n sàng leiin Isu thangpuina ama nu ta dingin an ngên a. 39 A khum bula chun a va ngîr a. khawsik chu a hal a, a rè tah a. Chuongchun, a tho thei ta nghal a, fàk rong a bawlpêk a. 40 Nisa tlâk vel lai chun damnaw, natna chi hrang hrang neihai chu Isu kuomah an hung thuoi a, an chungah kut a lo innghat a, a sukdam tawl a. 41 Ramhuoihai khomin, "Pathien Naupa i nih" tia khêkin mi tam tak sûnga inthokin an hung suok bok a; anni chu Isun a hal a, Krista a nih ti an hriet leiin an tong a phal nawh. 42 A zîng vartien chun hmun fienrielah a fe a, mipuiin an zong a, a kuomah an hung a, anni chu fesan lo dingin an thlo a. 43 Nisienlakhom, ama chun, "Khaw danga khom Pathien Chanchin Tha ka hril a tûl, chu dinga tir ka ni si a" a ta. 44 Chuongchun, Judail ram sunagoga hai a lût a, thu a hril zui ta pei a.

Luke 5

1 Ni khat chu Gennasaret Dîlm kamah Isu a ngîr a, Pathien thu ngaithla dingin mipuiin an hung bawr hut hut a. 2 Dîl kama long pahni um chu a hmu a, nga mantuhai chun an long chu suoksanin vakamah an lênhai an sawp a. 3 Long pakhat, Simon longa chun a chuong a, dîla intawl lût met dingin a hril a. Chuongchun, a thung a, mipuihai chu a zirtir tah a. 4 Thu a hril zo chun Simon kuomah, "Li inthûkna tieng pan unla, nga man dingin lên dêng ro" a ta. 5 Simon chun, "Hotupa, zànkhawvar inrim takin kan dènga chu kan hlawsam dèr a nih. Amiruokchu, i thuin lèn chu hang dêng nawk kan tih" a ta. 6 An hang dêng chun nga an inkhum teu a, an lênhai chun dier loin an tan têp a. 7 Chuongchun, thangpuitu dingin long danga an pawlhai chu an hei hûi a, an hung a, long pahni chu pil vâng vâng khopin an sung sip vê vè a. 8 Simon Peterin chuong chu a hmu chun Isu ke bulah a bokkhup a, "Lalpa, mi fesan rawh, misuol ka ni hi" a ta. 9 Ama le a ruolhai chun chuong zozài nga an man el chu mak an ti seng a 10 Simon pawla mi Zebedai naupa Jakob le Johan khom chun mak an ti ve hle a. Isu chun Simon kuomah, "Ti naw rawh, tuta inthok chu mihriem man tâng i tih" a ta. 11 Chuongchun, an longhai chu va kamah an hnûk kai a, iengkim màksanin ama chu an zui tah a. 12 Khuo pakhata Isu a um laiin pa pakhat, a puma inphâr hi a hung a, Isu a hmu phing leh a ke bula bokkhupin, "Lalpa, i nuom chun i mi sukthieng thei" tiin sukdam a ngên a. 13 Isun a hei ban a, phâr chu a them a, " Nuom e, lo inthieng ta rawh" a ta, a dam ta nghàl a. 14 A kuoma chun, "Tu khom hril naw rawh; amiruokchu, thiempu va'n entir la, i dam ngei ti mihaiin an hriet theina dingin Mosie thupèk angin inthienna thil va'n hlân rawh" a ta. 15 Nisienlakhom, a chanchin chu a'n thang zuol ta sau a; mi tam tak a thu hre châk le an natnahai a sukdampèk nuomin an hung hut hut a. 16 Isu ruok chu hmun reah tongtaiin a fienriel rop hlak. 17 Chuong lai chun ni khat chu a zirtir laiin, Galili ram le Judai ram khaw tina inthok le Jerusalema inthoka hung Farisaihai le Dàn zirtirtuhai chu a bulah an inthung a; mi sukdamna dinga Lalpa thilthawtheina chu amaa chun a thok a. 18 Chuong lai chun mi tuhaiin amani zeng pakhat, a zàlna khum leh Isu hma bula sie dingin zawn lût an tum a, 19 sienkhom mipui an tam lei chun zawn lût ngaina a um naw a. Chuongchun, in chungah an lawn a, in chung chu an hawk a, a awnga chun a khum pumin Isu hmá takah zeng chu hruiin an khai thlâk a. 20 An ringzie a hmuin a kuomah "Ruolpa, i suolhai ngaidam a ni tah" a ta. 21 Farisaihai le Dan zirtirtuhai chun, " Hi mihriem, Pathien hrilsetu hi tu rêng am a na? Pathien chauh naw chu tu am suol ngaidam thei an um a?" an ta. 22 An ngaituo chu Isun a hriet a, "In lungrilah iem in ngaituo a ? 23 'I suolhai ngaidam a ni tah' ti am a olsam, 'Tho la, lawn ta rawh' ti lem? 24 Khawvela hin Mihriem Naupa hin suol a ngaidam thei ti in hrietna dingin" a ta, zeng kuoma chun, "Tho la, i puonthuo la la, i inah fe rawh ka ti che" a ta. 25 An hmu ngeia chun a tho a, a puonthuo chu a lâk a, Pathien inpâk pei pumin a in tieng a'n lawi tah a. 26 An rêng chun mak an ti êm êm a, Pathien an inpâk a, "Voisun chu thilmak danglam tak ei hmu a nih" an ti a, maktinain an sip a. 27 Chu zo chun a suok a, sienkhontu pakhat a hming Levi, siechawina hmuna inthung a hmu a, a kuomah, "Mi zui rawh" a ta. 28 Ama chu a tho a, a iengkim màksanin a zui ta nghal a. 29 Levi chun a inah Isu ta dingin ruoi ropui tak a buotsai a, chuongchun siekhontu le mi dang tam takin ruoi chu an hung kîl tawl a. 30 Nisienlakhom, Farisaihai le Dàn zirtirtuhai chu a zirtirhai chungah an lo chier a, "Ieng dinga siekhontuhai le mi suolhai leh thlaithlèng an kîl hmunkhat am a na?" an ta. 31 Isun anni chu donin, "Mi hriselhaiin daktor an ngai naw a, hrivoi sehaiin a nih an ngai lem. 32 Mi felhai lam dinga hung ka ni naw a, mi suolhai insimtir dinga hung ka ni lem" a ta. 33 Anni chun Isu kuomah, "Johan zirtirhai chu bu ngheiin an tongtai rop a, chuong ang bokin Farisaihai khomin an thaw ve a, i zirtirhai hlak hin an fâkin an dawn bor bor el si a" an ta. 34 Isun an kuomah, "Anni lai moneitu a um sûng chun mo thuoituhai chu bu in ingheitir hlak am a ni? 35 Moneitu chu an kuoma inthoka thuoi hmang ni la um a ta, chu huna ruok chu la nghei an tih" a ta. 36 An kuomah tekhinthu khom a hril a. "Tu khomin puon thar kei thlêrin puon hlui phâwknain an hmang ngai nawh. Chuonga a thaw chun puon thar chu a kei thlêr ngai a ta, puon thar hlek le puon hlui chu inmil bok naw nih. 37 Tu khomin uoiin thar savun uoiin peng hluiah an thun ngai nawh, thun ta ang sien, uoiin thar chun savun peng hlui chu mor koi a ta, pût hmang vong a ta, uoiin peng khom chu se bok a tih. 38 Uoiin thar chu uoiin peng thara thun ding a nih. 39 Tu khom uoiin upa an dawn hnungin uoiin thar an lam ngai nawh, 'A upa po leh a'n hnik ngê ngè' an ti hlak" a ta.

Luke 6

1 Sabat voi khat chu huit bil an fe thleng a, a zirtirhaiin bu vuihai chu an thliek a, kutin a hawng an nuoi fai a, a tak chu an bâr a. 2 Farisai thenkhat chun "Ieng dinga Sabat nia thaw thieng lo in thaw am a na?" an ta. 3 Isun anni chu a don a, "Davida le a ruolhai an tâmsawl tuma an thilthaw kha in tiem naw a ni? 4 Pathien inah a lût a, thiempuhai chauh fâk thieng hlanbein chu a lâk a, a fâk a, a ruolhai khom a sem thu kha?" a ta. 5 Ama bokin, "Mihriem Naupa hi Sabat Lal a nih" a ta. 6 Sabat ni tum khat nawk chu sunagogah a lût a, a zirtir a, chu taka chun mi pakhat kut chang tieng zeng a um ve a. 7 Dàn zirtirtuhai le Farisaihai chun a hêkna ding an hmu theina dingin Sabat nia a sukdam ding le ding naw an bìthlak zing a. 8 An lungril chu a hrietin zeng kuoma chun, "Tho la, a laia hin ngîr suok rawh" a ta. Ama chu a tho a, a laia chun a ngîr suok a. 9 Isun an kuomah "Sabat nia sukthat am a thieng suksiet, sandam am a thieng sukhlum? ti kan don cheu a nih" a ta. 10 An rêng chun a en vèl a, zeng kuomah, "I kut phar rawh" a ta, a hang phar a, a kut chu a dam ta nghal a. 11 Anni rawi chu lungsenin an puok koi vâng vâng a, Isu chu ieng tia law di'm ti ngaituoin an inrawn khawm a. 12 Chuong hun lai bok chun zàn khat chu tongtai dingin tlângah a fe a, zànkhuoin Pathien kuomah a tongtai a. 13 Khuo a hung var chun a zirtirhai chu a ko a, anni laia inthokin sawm le pahni a thlang suok a, an hmingah tirko a'n bùk a; 14 Simon, Peter tia an ko bok dàm, a unau Andri hai, Jakob le Johan hai, Filip le Barthalomai hai, 15 Mathai le Thoma hai, Alfai naupa Jakob hai, Simon, Zealot an ti bok hai, 16 Jakob naupa Juda hai le Juda Iskariot, a'n mantirtu hai chu an nih. 17 Anni ruol chun a fe thla a, hmun zawlah a ngîr a. Chu taka chun a zirtirhai tam tak le Judai ram hmun tina inthok dâm, Jerusalema inthok dâm, Tura le Sidon vel tuifinriet kama inthok dâmin mipui tam tak, a thu ngaithla nuom le an natna sukdam beiseia hunghai chu an um a; 18 thlarau tirdakum soisak khom an hung dam tah a. 19 Amaa inthoka thilthawtheina suok leia mi tin an dam pei lei chun mipui po po chun them seng an tum a. 20 Chun a ngha vêl a, zirtirhai tieng chu enin:Nangni pasiehai, in hamtha, Pathien ram chu in ta a ni si a; 21 Tuta phingtâmhai, in hamtha, In la tlai ding a ni si a; Tuta taphai, in hamtha, In la'n nui ding a ni si a; 22 Mihriem Naupa leia mihaiin theida a, tuithlâr a, hal a, hming se dêra an hnawl phâ cheu chu in chan a va tha awm ngei! 23 Chu huna chun lawm unla, hlimin inchawm ro, vànah in lawmman a um rawn si a. Inthlatu zawlneihai chunga khom khan chuong ang chun an thaw hlak kha. 24 "Nangni tuta hausahai, in chung a rik ie, inhoi in chèn zo dêr ta si a. 25 Nangni tuta khophai, in chung a rik ie, in phìng a la tâm ding a ni si a. Nangni tuta innuihai, in chung a rik ie, lungngaiin in la tap ding a ni si a. 26 Mi po poin an inpàk pha cheu in chung la rik a tih, chuong ang bokin in thlatuhai khomin zawlnei tehlèmhai chungah an thaw hlak kha. 27 "Chuleiin, ka thu ngaithlatuhai, ka hril cheu hi, in hmêlmahai chu hmangai unla, a theidatu cheu chungah that insuo unla, 28 tong sie inphurtuhai cheu chu malsawmna hnipêk unla, sukdùdàtuhai cheu chu tongtaipêk ro. 29 I bieng khing tieng bentu chu khing tieng khom dawpêk la, i puon lapêktu che chu i zakuo a lâk khom sêl naw rawh. 30 A hnitu che taphot chu pe la, i thil nei lapêktu che chu thîn nawk ta naw rawh. 31 In chunga miin thaw sien in ti ang charin mi chunga khom thaw ve ro. 32 "Nangni hmangaituhai chauh in hmangai hin misuolhai nêka in chuong liemna bîk iem a um? Anni khomin anni hmangaitu chu an hmangai ve tho annawm. 33 In laka thahai chunga chauh that in insuo hin mi suolhai nêka in chuong liemna bîk iem a um a? Anni khomin chuong ang chun an thaw ve tho annawm. 34 Hmu kîr nawk in beisei theinahai kuoma chauh thil in inpûktir hin mi suolhai nêka in chuong liemna bîk iem a um? Anni khomin a ngai hmu kîr nawk ding chun misuolhai kuomah an inpûktir ve tho annawm. 35 In hmêlmahai chu hmangai lem ro; an chungah thil tha thaw unla, hmu kîr nawk beisei kher loin inpûktir ro, chuongchun lawmman tam tak hmûng in ta, Chunghnungtak nauhai nîng in tih. Ama chun lawm nachang hre lohai le mi suolhai khom a lunginsiet vong si a. 36 In pain a lunginsiet cheu ang bokin nangni khom inlunginsiet tuo hlak ro. 37 "Mi soisel naw ro, chuongchun soiselin um nawng in tih; tu khom thiem naw inchangtir el naw ro, chuongchun thiem naw inchangtir nawng an ti cheu; ngaidam ro, chuongchun ngaidamin um in tih. 38 Pe ro, chuongchun pêkin um in ta, inkhìna hlawka nam dèn, sawi muka liem zar zar chu in chungah vûrin um a tih. Inkhìna in hmang ngei khan an inkhìpêk ding cheu a ni si a" a ta. 39 Chun, an kuomah hi tekhinthu khom hi a hril a. "Mitdelin mitdel bok a thuoi thei ding am a ni? An pahniin khurah an tla el naw ding maw? 40 Inchûktu chu a zirtirtu chungah a um nawh, amiruokchu tu khom nasa taka inchûktu chu a zirtirtu tluk a hung ni thei. 41 Iengtiziea mani mita thingtum um chu ngaimaw si loa i unau mita hmunhnok hlek um chu i ngaimaw? 42 Mani mita thingtum hmu si loin i unau kuomah, 'Unau, i mita hmunhnok hlek kha mi'n lâk suoktir rawh' iengtin am i ti thei ding? Nang lêmdertu, i mita thingtum kha la suok hmasa zet rawh, chuongchun i unau mita hmunhnok hlek um chu fie takin hmu thei i tih. 43 "Thing tha chu a rà a se ngai nawh, thing sie hlak a rà a tha ngai bok nawh. Thing tin nìna chu a raa inthoka hriet thei a nih. 44 Tu khomin hling bukah theichang an lo ngai nawh; intûn buka inthokin grêp rà an lo ngai bok nawh. 45 Mi tha chun a lungril robawm thaa inthokin thil thahai a phor suok hlak a; mi suol chun a lungril suola thil suol a pàihai chu a phor suok hlak. Lungrila sip liem chu bàuin a hril suok hlak si a. 46 " Ka thu zawm si loin ieng dinga 'Lalpa, Lalpa' in mi ti hlak am? 47 Tu khom ka kuoma hung a, ka thu hre a, zawmtu chu tu ang am a na ti hril ka ti cheu. 48 Ama chu in bawltu, inthûk taka hnuoi cho a, lungpui chunga lungphùm remtu ang chu a nih. Tui a hung lien a, tuizâng khauin a hung hrût a, sienkhom a sukhnìng thei nawh, a bawl nghet êm leiin. 49 Amiruokchu, ka thu hrea zawm si lo chu lungphùm nei lo, hnuoi chung ela in bawltu ang chu a nih; chu in chu tuizàng khauin a hung hrùt a, a chim se nghàl a, a tlu hmât ta ruop el a nih" a ta.

Luke 7

1 Mihai hrieta chuong thu Isun a hril zo chun Kapernaumah a lût a. 2 Chu taka chun sipai zahotu siehlaw dit tak chu thi hmun suolin a damnaw a. 3 Isu chanchin a hriet charin a siehlaw sukdam dinga ngên hrâm dingin Juda upahai a kuomah a tir a. 4 Upahan Isu kuom an va tlung chun, "Ama hi thawpêk tlàk a nih, 5 ei hnam a hmangai a, sunagog chen a mi bawlpêk a nih" tiin thahnemngai takin an ngênpui a. 6 Chuongchun, Isu chu anni ruolin a fe ve a. In an tlung vàng tah ti chun sipai zahotu chun Isu kuoma thu hril dingin a ruolhai a tir a: "Lalpa, harsa sakin ka ina chu hung da'l rawh, ka insûnga ko lût tlàk che khom ka ni naw a, 7 chuleiin i kuoma hung tlàka khom ka'n ngai naw a nih; thu pe la, ka siehlaw chu dam el a tih. 8 Kei khom mi thuhnuoia um dinga sie ka na, ka hnuoiah sipai an um nawk sawng a, 'Fe rawh' ka ti chu a fe a, 'Hung rawh' ka ti chu a hung a, ka siehlaw khom 'Hi hi thaw rawh' ka ti chu a thaw el hlak" tiin. 9 Isun chu chu a hrietin chu pa chu mak a ti hle a, a hung zuitu mipui tieng chu nghain, "Ka hril cheu hi, hieng ang lawma ringna nasa hi Israelhai lai tu khom ka hmu nawh" a ta. 10 Mi tirhai chu in tieng an kîr a, an tlung chun siehlaw chu damin an hmu ta a. 11 Sawt naw te hnungah khaw pakhat Nain an tia chun Isu a fe a, a zirtirhai le mipui tam takin an zui a. 12 Khaw kul kotkhâr an tlung tawm chun mithi pakhat, hmeithai nau pasal nei sun chu an hung zawn suok a, a khaw mi tam takin an zui a. 13 Chu hmeithai chu Lalpan a hang hmu chun a lunginsiet êm êm a, "Tap naw" a ta. 14 A va hnai a, hlâng chu a chel a, a zawntuhai chu an ngìr a. "Tlangvàl, tho rawh ka ti che" a ta. 15 Mithi chu a tho a, a hung tong suok a, a nu kuoma chun a'n hlân a. 16 Mi po po a râp a, maktiin Pathien an inpâk a, "Eini lai zawlnei ropui tak a hung um tah a ni hi" an ta; chun, "Pathienin a mihai a hung kan tah a ni hi" an ti bok a. 17 Isu chanchin chu Judai ram le a sè vêl ram tinah a'n thang suok tah a. 18 Chuong thu po po chu Johan zirtirhai chun an pu chu an hril a. 19 Johan chun a zirtirhai pahni a ko a, Lalpa kuoma chun, "A hung ding chu i ni am, annawleh mi dang kan la nghâk ding?" tia indon dingin a tir a. 20 Chuonghai chun a kuom an hung tlung chun, "Baptistu Johanin, 'A hung ding chu i ni am, annawleh mi dang kan la nghâk ding?' ti indon dingin i kuomah a mi hung tir a nih" an ta. 21 Chuong lai chun hri chi hrang hrang invoi dâm, natna chi tum tuma na le thlarau tirdakum pai mi tam tak chu Isun a sukdam a, mitdel tam tak mit a sukvarpêk bok a. 22 Chuongchun, anni chu a don a, "Kîr nawk ta unla, in thil hmu le hriethai hi Johan va hril ro; mitdelhai mit a var a, kebaihai kein an lawn a, pharhai an inthieng a, nasêthai na a hung var a, mithihai keithoin an um a, pasiehai kuomah Chanchin Tha hril a ni tah. 23 Tu khom keima leia beidong lo chu an hamtha"o a ta. 24 Johan mi hung tirhai an liem hnung chun mipui kuomah Johan chungchang Isun a hril a. "Ieng en dingin am thlalèra khan in hang fe? Thliin luong a mût hnìng maw ? 25 An naw leh ieng en dingin am in fe? Puon nem sila inchei mi maw? Ni lo e, silfèn man tama incheihai le nun khawnuom tawl mihai chu lal inah an son naw an um hlak. 26 Ieng tak am en dingin in fe rêng rèng a? Zawlnei en dingin maw? A ni ngei tak kha; ka hril cheu hi, ama chu zawlnei nêka ropui lem a nih. Ama hi annawm, 27 'Ngai ta, ka tirko I hmaah tir ka ta, Ama chun i hma lo lawkin, I lampui ding buotsai a tih'tia a chanchin an ziek kha. 28 Ka hril cheu hi, nuhmei sûla insieng laiah Johan nèka ropui lem tu khom an um nawh; amiruokchu, Pathien rama mi chîn tak khom ama nêk chun a ropui lem" a ta. 29 Vàntlâng mipui le siekhontuhai chu Johan baptisma lo chang tah an ni tawl leiin, Isu thu hrilhai an hriet chun Pathien lampui chu an dik ngei a nih ti an pom nghet tah a. 30 Farisaihai le Dàn zirtirtuhai ruok chun Johan baptisma chu an chang nuom ve si nawh, anni ta dinga Pathien remruot chu an hnawl tlat leiin. 31 Isun, "Tu lai ruoltharhai hi ieng le am tekhin ka ta? Iem an ang tak aw? 32 Dawrpui hmuna naupang ruol inhnel, inkhêk tuo a, Theihlê kan mùtpêk cheu a, In làm nuom si naw a; Lusûn hla kan sakpêk cheu leh, In tap nuom bok si nawhintihai ang hi an nih. 33 Baptistu Johan chu a hung a, bei a fâk naw a, uoiin a dawn bok naw a, nangnin "Ramhuoi zawl a nih" in ta. 34 Mihriem Naupa a hung a, fain a dawn a, nangnin "En ta u, mi vir, uoiin hè mi, siekhontuhai le mi suolhai ruolpa saw' in mi ti nawk si a. 35 Nisienlakhom, varna indikzie chu a nauhaiah a'n lang chieng" a ta. 36 Farisaihai laia pakhatin Isu chu zànbu fa dingin a fiel a, Farisai inah chun a fe a, dawkanah thlaithlèng a kîl a. 37 Chu khuoa nuhmei pakhat, suola inhmang hlak chun Farisai inah Isun bu a fâk ti a hrietin alabasta bùrah hriek rimtui chawiin a hung a, 38 a hnungah a ke bula chun tap pumin a ngîr a; a mitthli chun a ke chu a far hu a, a sam chun a zuk hrùk a, a ke chu a fawp ngawi ngawi a, hriek rimtui chun a chûl a. 39 A fieltu Farisaiin a hmu chun, "Hi mi hi zawlnei ni tak tak sien chu a hung themtu nuhmei hi tu am a na, ieng ang mi am a na ti le nu suol a nih ti hre el ding a na" a ti lungril a. 40 Isun a kuomah, "Simon, i kuomah thu bàu khat hril ding che ka nei" a ta. Ama chun, "Hril ta la, Zirtirtu" a ta. 41 Isun, "Mi pahniin tangka inpûktirtu lakah sum an bat a, pakhatin duli zanga, pakhatin duli sawmnga. A rulna ding an nei naw leiin a ngaidam ve ve a. 42 A tu lem chun am ama chu hmangai lem a ta?" a ta. 43 Simon chun, "A bat a ngaidam rawn lem chun a ni ka ring" a ta. Isun, "I ring indik chie" a ta. 44 Nuhmei tieng chu a ngha a, Simon kuomah, "Hi nu hi i hmu am? I inah ka hung lùt a, nangin ka ke sawpna ding tui i mi pek nawh, ama ruok hin chu a mitthliin ka ke a far hu a, a samin a hrûk a. 45 Nangin i mi lo fawp nawh, ama ruok hin chu ka hung lûta inthok khan ka ke fawp a ma nawh. 46 Nangin ka luah hriek i mi nâl nawh, ama ruok hin chu hriek rimtuiin ka ke a chûl a ni hi. 47 Chuleiin, ka hril che hi, a suol po po ngaidam a ni tah, hmangaina a hau êm a. Ngaidamna dong tlawm chun a hmangai nêp hlak" a ta. 48 Chun, nuhmei kuoma chun, "I suolhai ngaidam a ni tah" a ta. 49 Thlaithlèng otpuituhai chun, "Suol chen khom ngaidam el ta hi, tu tak am an ta le?" an ta. 50 Ama chun nuhmei kuomah, "I ringnain a sandam che a nih, thlamuong takin fe ta rawh" a ta.

Luke 8

1 Chu hnunga chun Isu chu khaw lien le khaw chînhai fangin Pathien ram Chanchin Tha hrilin a puong pei a, sawm le pahnihai khom an thang hlak a. 2 Nuhmei thenkhat, thlarau tirdakum pai a sukthieng hai dàm, hrivoi sie a sukdam hai dàm chun an zui bok a. Chuong lai chun Mari Magdalin, a sûnga inthoka ramhuoi pasari a hnot suok nu dàm, 3 Heroda sum enkoltu Chuza nuhmei Joanna dàm, Susan dàm le mi dang tam tak an thang a, anni chun mani sum le pai hmangin a rong an bawlpêk a. 4 Chun, mipui tam tak, khaw hrang hranga inthoka ama pana hung fuon khawmhai kuoma chun tekhinthu a hril a. 5 "Bu chi thetu chu bu chi thein a fe a; chuonga bu chi a hang thè chun a then lamah a tla a, miin an sir hmàt a, chunglêng vatehaiin an tlàn zo a. 6 A then pielthlêngah a tla a, a mawnga chu a hnawng naw leiin a rop nawk el a. 7 A then chu hling buk lai a tla a, hlo hung inthang chun a dîp ral a. 8 A then ruok chu hnuoi thaah a tla a, a hung inthang lien a, a lêt zain a ra a" a ta. Chu chu a hril zo chun rawl inring taka khêkin, "Ngaithlâkna dinga na nei chun ngaithla ngun raw se" a ta. 9 A zirtirhai chun a tekhinthu hril umzie chu an indon a. 10 Ama chun, "Pathien ram thurûk chu nangni hriet dinga phal a na, mi dang kuoma ruok chu tekhinthu hmangin ka hril a nih, chuongchun, hmu zing sia an hmu fie thei nawna ding le ngâithla zing sia an hriet thiem nawna dingin. 11 "Tekhinthu umzie chu hi hi a nih: Bu chi chu Pathien thu a nih. 12 Lampuia tla chu thu ngâithlatu an na, an awi nawna ding le sandam an ni thei nawna dingin setan a hung a, an lungrila inthokin thu chu a lâk hmangpêk hlak. 13 Pielthlêng chunga tla chu, thu an hriet chara lawm taka pomhai hi an nih; nisienlakhom zung hrim an thlàk naw a, sawtnawte an hang awi dea chu, fiena an tuok pha an tlûksan nawk el hlak. 14 Hlingbuk laia tla chu thu an hriet a, sienkhom damsûng khawsak lungkhamna hai, hausaknahai le inhoitirna hai chun a dîp a, rà puitling an insuo thei ta naw a. 15 Hnuoi thaa tla chu thu hre a, lungril indik le tha put a, vong tlat a, tuorsel taka beia ra insuohai hi an nih. 16 "Tu khom khawnvar sitin bêlin an khup khum ngai naw a, khum hnuoiah an sie ngai bok nawh, a lût taphotin a var an hmu theina dingin a sienaah an sie lem hlak. 17 Ieng khom puong lo dinga thup le mi hriet lo ding le suklang lo dinga thuprûk a um nawh. 18 Chuleiin, in thu ngâithlâk dànah fimkhur hle ro. Tu khom a nei chu pe belsàng an ta, a nei naw chu neia an ngai sun khom làkpêk an tih" a ta. 19 Isu nu le a unauhai khom a kuomah an hung a, nisienlakhom mipui leiin an paw thei naw a. 20 "I nu le i unauhaiin hmu tum chein tuolah an nghàk che" tiin an hril a. 21 Ama chun, "Pathien thu hrea zawmtuhai hi ka nu le ka unauhai an nih" tiin a lo don a. 22 Ni khat chu a zirtirhai leh longah an chuong a, Isun an kuomah "Dil râl khing tieng son kai ei tiu" a ta, an suok tah a. 23 Chuonga an fe lai chun a lo in a. Dila chun thlipui a hung hrâng phut a, an long chu tuiin a chîm el ding an tah leiin an ngîrhmun chu a derthawng hle a. 24 Isu kuomah an fe a, an kei tho a, "Hotupa, Hotupa, ei pil el ding a ni hi!" an ta. Isu chu a tho a, thlipui le tuifawn hlup hlup chu a hal a, an chawl a, a rè ta thuop el a. 25 An kuomah, "Inringna khawlai am a um?" a ta. Ti bok, makti bok chun, "Hi pa hi tu'm an leh ? Thli le tui fawn chen khom thu a pêk a, an rè el hi!" an inti tawl a. 26 Galili ram epa um Gerasinp mihai ramah chun an va kai a. 27 Khawmuol an kai chun chu khuoa mi ramhuoi zawl chun a hung pan a. Ama chu hun sawt tak puon khom sil ta lo le ina khom riek ta loin thlana khawsa hlak a nih. 28 Isu a hang hmu chun rawl inring takin a khêk a, a hmaah a bokkhup a, "Isu, Pathien chunghnungtak Naupa, iem a na ka chungah thaw i tum rêng rèng? Mi soisa lul lo dingin ka ngên che" a ta. 29 Chu pa sûnga inthoka suok dingin thlarau tirdakum chu Isun thu a lo pêk ta si a. Chu pa chu ramhuoi chun voi tam a man ta hlak a, a kut le ke khaidieta khitin, kol dâm inbuntirin an vèng hlak a, sienkhom khaidiethai chu a suktan a, ramhuoi chun thlalèr hmun reah a fen hmang hlak a. 30 Chun, Isun, "Tu'm i hming?" a ta. Ama chun "Sângruk"q a ta, a sûnga ramhuoi lût chu an tam êm lei a nih. 31 Khuorkhurûma pei thla lo dingin Isu an ngên chùl a. 32 Chu tlânga chun vok ruol tam tak an tla khawm a. Chuong vok ruol sûnga lùt phalna pe dingin an ngên a, ama chun a phalpêk a. 33 Ramhuoihai chun chu pa chu an suoksan a, vok sûnga chun an lùt a, vok ruol chu rawla chun an tlan liem a, dîlah an tla hlum ta vong a. 34 Vok enkoltuhaiin thil hung tlung an hmuin khuoa mi le a se vêla mihai chu hril dingin an tlàn a. 35 Ieng thil am a tlung tah ti en dingin mihai chu an hung inthok suok a. Isu kuom an hung tlung chun ramhuoi suoksan kha puon sil a, lungril ngai puta Isu ke bula thung an hung hmu a, an ti hle a. 36 Thil chinchàng hretuhai chun ramhuoi man a hung dam dàn chu an lo hril tawl a. 37 Gerasin rama mi po po chu an thlabâr a, ama chu an kuoma inthoka fe hmang dingin an ngèn a, chuongchun longah a chuong a, a kîr nawk tah a. 38 Ramhuoi suoksan ruok khan chu Isu kuoma um zing a ngèn a. 39 Nisienlakhom Isun, "I in tieng inlawi la, Pathienin i ta dinga thil a thawpêk che ropuizie hi va hril rawh" a ta, a'n fetir tah a. Chuongchun a fe a, khawpui sûng po poa chun Isun thil a thawpèk chu a tlânginsampui tah a. 40 Beisei taka lo nghâktu mipui chun Isu hung kîr nawk chu an lo lawm hle a. 41 Ngai ta, mi pakhat a hming Jaira, sunagoga hotu chu a hung a, Isu ke bulah a bokkhup a, 42 a naunu nei sun kum sawm le pahni vêl mi chu thi hmun suola a nat leiin a ina hung dingin a ngên a. Jaira in pana a fe lai chun a zuitu mipui chun an bawr luoi luoi a. 43 Chun, nuhmei pakhat, kum sawm le pahni thi pût tah, a sum nei po po khom daktor ruoinaa sêng zo tah, sienkhom tu khomin an sukdam thei naw chu a hnungah a hung a, a puon hmawr chu a hung them a, 44 a thi pût chu a rè ta nghàl a. 45 Isun, "A mi themtu kha tum a na?" a ta. "Kei chu kan nawh" an ti seng a. Peter chun, "Hotupa, mipui an tam a, an hneng sup sup che annawm" a ta. 46 Isu chun, "Tuin amanih a mi them a, ka sûnga inthokin thilthawtheina a suok ti ka hriet" a ta. 47 Nuhmei chun inthup thei ruol an ta nawh ti a hrietin, a hmaa chun inthin dor dorin a hung a, a bokkhup a, a them san le chop le chila a dam el thu chu mi po po hmaa chun a hrilh a. 48 Ama chun, "Ka naunu, i ringna i dam pha a nih, thlamuong takin fe ta rawh" a ta. 49 A la tong lai zingin Jaira ina inthokin mi pakhat a hung a, "I naunu a thi tah, zirtirtu hi sukbuoi ta da'l rawh" a hung ta. 50 Isun a lo hriet a, Jaira kuomah, "Ti naw la, ring el rawh, dam nawk a tih" a ta. 51 In an tlung chun Peter hai, Johan hai, Jakob hai le naupang nu le pa chauh naw chu tu khom ina lùt ve a phal naw a. 52 An rêng chun awm inchumin an lo tap rak rak a. Nisienlakhom, ama chun, "Tap naw ro, a thi nawh, a in a ni lem" a ta. 53 A thi tah ti an hriet leiin an nuisan a. 54 Isun a kut a chel a, "Bawinu, tho rawh" a ta, a ko a. 55 A thlarau chu a hung kîr nawk a, a tho ta nghàl a. "Fâk ding iemani pe ro" a ta. 56 A nu le pa chun mak an ti êm êm a, nisienlakhom thil um dàn chu mi dang tu khom hril lo ding a ti tlat a.

Luke 9

1 Isun sawm le pahnihai chu a ko khawm a, ramhuoihai hnot suok theina le natnahai sukdam theina a pêk bok a; 2 Pathien ram thu hril ding le damnawhai sukdam dingin a tir suok tah a. 3 An kuoma chun, "In inzinnaah hmol dâm, mansa dâm, bei dàm le poisa hlek dâm khom chawi naw un la, zakuo inthlàkna ding khom chawi naw ro. 4 Khuo in sir taphotah in suoksan chenin in tlungna ngaiah tlung unla, chu taka inthok ngei chun suok nawk ro. 5 A lo lawm nawtu cheu chu an khuo in suoksan ding pha an thaw indik nawzie inhriettirna dingin in kephaa pilvut chu thin thla ro" a ta. 6 Chuongchun, an suok a, khaw tin an fang a, hmun tinah Chanchin Tha hrilin mihai an sukdam pei a. 7 Lal Herodan chuong thilhai chu a lo hriet ve a, a ngaina a hriet naw hle a, a san chu thenkhatin, Johan kha mithi laia inthokin a hung tho nawk tah niin an hril a; 8 a thenin Elija hung inlâr nawk niin an hril bok a; a then ruok chun tien laia zawlnei tu amanih hung tho nawk nia an hril lei a nih. 9 Chuleiin Heroda chun, "Johan chu a lu ka tanpêk ta kha! A chanchin hieng lawma an hril hi tum nîng a ta?" a ta, ama chu hmu a tum tah a. 10 Tirko sawmpahni inzinhai chu an hung kîr a, Isu kuomah an thilthawhai an ripawt a. Anni chu thuoiin Bethsaida an ti khuoa chun a fe hrangpui a. 11 Nisienlakhom, mipuiin an hrietin an zui ve tah a; anni chu a lo lawm a, Pathien ram thu lo hrilin, sukdam ngai taphot a lo sukdam a. 12 Chawhnung tieng khuo a hung inhnu chun sawm le pahnihai chu Isu kuomah an hung a, "Mipuihai hi ei kawl vèl khuoa hai le loa hai tlung in le fâk ding zongin infetir ta la, hmun thlalèra um ei ni si a" an ta. 13 Ama ruok chun, "Nangnin fâk ding pe ro" a ta. Anni chun, "Mi hieng zozai fâk ding hi ei va'n chawk a ni ngot naw chun eini chun bei phêk nga le nga pahni chauh ei nei a nih" an ta. 14 Patling ngot khom sângnga lai an nih. Ama chun zirtirhai kuomah, "A pawl pawlin inthungtir ro, sawmnga vêl peiin" a ta. 15 Chuong ang chun an thaw a, an inthungtir vong a. 16 Bei phêk nga le nga pahni chu a lâk a, vàn tieng nghain lawmthu a hril a, a khoi a, mipuihai laia sem dingin zirtirhai chu a pêk a. 17 An rêngin tlai takin an fâk a, an fâk mahla zirtirhaiin an rût khawm chu bawm sawmpahni sip a nih. 18 Tum khat chu Isu fienriel tongtainaah a zirtirhai khom an um ve a, an kuomah " Mihaiin tu am ka nih an mi ti a?" tiin a'n don a. 19 Anni chun, "Baptistu Johan ti che an um a, a thenin Elija an ti che a, a then ruok chun tien lai zawlnei tu amanih tho nawk ni awmin an hril che" an ta. 20 Ama chun, "An leh, nangnin tum a nih in mi ti a?" a ta. Peterin, "Pathien Krista chu i nih" tiin a don a. 21 Chu chu tu khom hril lo dingin thu a pêk tlat a. 22 "Mihriem Naupa hin thil tam tak a la tuor ding a nih; upa hai, thiempu lal hai le Dàn zirtirtuhaiin hnawl an ta, an sukhlum ding a nih; amiruokchu, ni thum niah tho nawk a tih" a ta. 23 Chun, mi po po kuomah, "Tu khomin a mi zui ding chun mani insie hmangin, r ni tin a kraws putin mi zui raw se. 24 Tu khom mani nun hum tum chun chân a ta, tu khom keima leia nun chân chun hum a tih. 25 Miin khawvel hi a pumin nei sien, ama inhmangin amani boral si sien la, iem a tangkai a? 26 Ka thu le kei mi'n zàpuitu taphot chu Mihriem Naupa khomin ropuina leh, Pa le vàntirko thienghlimhai ropuina leh a hung nawk hunah ama chu inzàpui vèng a tih. 27 Indik takin ka hril cheu hi, hieng laia ngîr thenkhat hi Pathien ram an hmu hmâ khat chu thi lo ding an um" a ta. 28 Chuong thu Isun a hrila inthoka ni riet vêla chun Peter le Johan le Jakob hai thuoiin tongtai dingin tlângah a fe a. 29 A tongtai lai chun a hmèl a hung danglam a, a silfènhai chu kawlinlep angin a hung var ta phût el a. 30 Ngai ta, Mosie le Elija hai pahni chun ropuinaa inthuomin an hung pawl a, 31 Jerusalema a thi tlingtlâkna ding chungchang thu an hril a. 32 Peter le a ruolhai ruok chu an inlusu a, sienkhom an hang har chun a ropuina le a bula mi pahni ngîrhai chu an hmu a. 33 Isu an màksan ding lai chun Peterin, "Hotupa, ei ta dingin hi taka um zing hi a tha, bawkte pathum khawng ei ta, i ta dingin pakhat, Mosie ta dingin pakhat, Elija ta dingin pakhat" a ta (Iem a hril ti khom a hriet mumal nawh). 34 A hril lai zing chun sûm a hung zîng a, anni rawi chu a hung tuom a; sûmin a hung tuom chun an ti hle a. 35 Sûma inthok chun rawl a hung suok a, "Hi hi ka mi thlang, ka Naupa chu a nih, ama thu hi ngai ro" a ta. 36 Rawl a hung suok hnung chun Isu chauh chu an hmu a. Chuong lai chun an thil hmu chu an topui tlat a, tu khom an hril nawh. 37 A zîngah tlânga inthoka an hung thlàk chun mipui tam takin an lo hmuok a. 38 Mipui laia pakhat chu a khêk suok a, "Zirtirtu, ka naupa nei sun hung en hrâm dingin ka ngèn che; 39 ramhuoiin a man rop a, a khêk tuor tuor a, a chil huom tla bor bor khopin a soisak a, an thla ta mang naw leiin a sukhlum têp a ni tah. 40 I zirtirhai hnot suok dingin ka ngêna chu an thaw thei si naw a" a ta. 41 Isun a don a, "Tu lai ruolthar, ringna tlasam le lungril lûtinlehai, ieng chen am in kuomah la umin ka ngai thei ding cheu a na? I naupa chu hung thuoi rawh" a ta. 42 A hung thuoi laiin ramhuoi chun a her thluk a, a soisak hrep a. Ramhuoi tirdakum chu Isun a hal a, naupang chu a sukdam a, a pa kuoma chun a'n hlân a. 43 Mi po poin Pathien ropuizie chu mak an ti hle a. 44 Mi po poin a thilthawhai maktia an ngaisàng êm êm lai chun a zirtirhai kuomah" Ka thil hril ding cheu hi fimkhur takin ngâithla ro. Mihriem Naupa hi mihriemhai kutah inmantirin a um ding a nih" a ta. 45 Nisienlakhom, a thu hril umzie chu an hriet thiem nawh. An man fùk thei nawna dingin an lakah thup a na, sienkhom ama an indon chieng ngam bok si nawh. 46 Anni lai tu am a ropui tak ding ti thuah zirtirhai chu an lo insêl a. 47 Isun an thil ngaituo chu a hrietin, naupang te hi a bânah a hung kei a, a bulah a'n ngirtir a, an kuomah 48 "Tu khom hi naupang hi ka hming leia lawm chu keima mi lawm a nih; kei mi lawmtu chun mi tirtu a lawm a nih; nangni laia chîn tak hi a nih a ropui tak chu" a ta. 49 Chu zoah Johanin, "Zirtirtu, mi pakhatin i hmingin ramhuoihai a hnot suok kan hmu a, keini laia mi a ni ve si naw leiin khap kan lo tum a" a ta. 50 Isun an kuomah, "Khap naw ro. Tu khom a dodal nawtu cheu chu eini tienga thang an ni si a" a ta. 51 Vàn tienga ama thuoi hmang hun a hung hnai chun Jerusalem panin Isu chu a'n thok lui tlat a. 52 Samari khuo a sir dinga chun a ta dinga iengkim lo buotsai dingin a hmaah mi a'n tlàntir a; 53 sienkhom Jerusalem pana fe pei a tum tlat leiin an lo ngaisak naw a. 54 A zirtir Jakob le Johanin chu chu an hmu ve chun "Lalpa, hienghai kàng hlum vong ding hin vàna inthokin Elija ang khans mei kan ko thlâk i remti naw maw?" an ta. 55 Ama chu a ngha kîr a, anni chu a bàu khat at, 56 ukhaw dangah an fe tah a. 57 Lama an thang mèk laiin mi pakhat a hung a, "I fèna taphotah zui ka ti che" a ta. 58 Isun a kuomah, "Sihalhan kuo an nei a, chunglèng vatehai khomin bu an nei a, Mihriem Naupa ruok hin chu lu nghatna hmun hrim a nei nawh" a ta. 59 Mi dang kuomah "Mi zui rawh" a ti ve thung a. Ama chun, "Lalpa, ka pa la va vui zet ka tih" a ta. 60 Isu ruok chun, "Mithiin anni mithi chu lo vui el raw se; nang ruok chun Pathien ram thu hi va hril dar lem rawh" a ta. 61 Mi dangin, "Lalpa zui ka ti che, amiruokchu, in tienga mihai la va chibai zet ka tih" a ta. 62 Isun a kuomah, "Tu khom leileta langkawn chel ta sia hnung tieng ngha chu Pathien rama sinthaw tlàk a ni nawh" a ta.

Luke 10

1 Chu zo chun Lalpan mi dang sawmsariv a ruot a, a fèna ding khuo le hmun taphotah hma lo lawk dingin a kop peiin a'n fetir a. 2 An kuomah, "Bu sîk ding tam tak a um, sienkhom sinthawtu an tlawm si. Chuleiin, a bu sîktu ding mi tir dingin lo neitu Lalpa hni ro. 3 "Fe suok unla, satene ruol laia beram khal lût ang elin ka tir suok cheu hi. 4 Tangka ip dâm, mansa dâm, pheikhok dâm chawi naw ro, lampuiah tu khom chibai bûk bok naw ro. 5 Chun, in lûtna taphotah a hmasa takin, "Hi ina hin thlamuongna tlung raw se" ti pei ro. 6 Chu ina chun thlamuongna ngaina mi an lo um chun in thlamuongna thu chu an chungah um sien, an um naw ruok chun in kuomah hung kîr nawk a tih. 7 In tlungna ngaiah tlung zing unla, an pêk taphot cheu chu fain dawn ro; sinthawtu chu hlaw hmu tlâk a ni si a. In dang dangah tlung lâwr naw ro. 8 "Chun, khuo in lûtna taphotah an lo lawm cheu chun, an pèk ang ang cheu chu fa unla, 9 damnaw umhai chu sukdam unla, 'Pathien ram chu in kuomah a hung tlung tah' ti pei ro. 10 In lûtna khuohaiin an lo lawm naw cheu chun an khawlaiah fe unla, 11 "In khaw pilvut kan kea kai khom kan kephaa inthokin nangni chungah kan thin fai; Pathien ram in kuomah a hung tlung tah ti ruok chu lo hre ro' in ti ding a nih. 12 Ka hril cheu hi, Rorêlna Nia chun chu khaw tuor ding nêk chun Sodom khaw tuor chu zie-um lem dai a tih. 13 "Nang Korazin, i chung a pik. Nang Bethsaida, i chung a pik. Nangni laia ka thilmak thaw kha Tura le Sidona thaw chu ni sien, saiip sila pilvut lai inbuolin an simzie suklang dai tâng an tih. 14 Rorêlnaa chun in tuor ding nêkin Tura le Sidon tuor ding chu zie-um lem dai a tih. 15 Kapernaum, nang khom, vàn chena chawi sâng i ni ding am a nih? Mithi khuo chena nam thlâk i ni lem ding a ni si a. 16 "In thu awituhai chun ka thu khom awi an ta, a hnawltu chun kei khom an mi hnawl a nih; chun, kei mi hnawltu chun a mi tirtu khom a hnawl a nih" a ta. 17 Sawmsarihai chu hlim takin an hung kîr a, "Lalpa, ramhuoihai khom i hming leiin kan thu thuin an um" an ta. 18 Ama chun, "Têk anga vàna inthoka Setan tlàk kha ka hmu hrim a nih. 19 Ngai ta u, rûl hai, ainuvêt hai, hmêlmapa hrâtna po po hai sirdè theina thu ka pêk cheu hi, ieng khomin sukna naw top a ti cheu. 20 Nisienlakhom, ramhuoihai in thu thua an um leiin lawm naw ro, vàna in hming ziek a ni leiin lawm lem ro" a ta. 21 Chuong lai tak chun Isu chu Thlarau Thienghlimah a lawm ta êm êm a, "Aw Pa, hnuoi le vàn Lalpa, nangin mi varhai le mi thiemhai lakah hieng thu hi i thup tlat a, mi mawlhai kuomah i puong leiin ka'n pâk che; a nih, Pa, chuong ang chu tha i ti zawng tak a nih. 22 Ka Pain iengkim a mi'n koltir tah; Pa chauh naw chun tu khomin Naupa hi tu am a nih ti an hriet nawh; Pa khom chu tu am a nih ti Naupa le a kuoma Naupain a puong nuomnahai chauh naw chun tu khomin an hriet bok nawh" a ta. 23 Chun, a fâla an um laiin a zirtirhai kuomah, "In thil hmu ang hmu ve chu a hamtha. 24 Ka hril cheu hi, zawlnei le lal tam tak khomin in thil hmuhai hi hmu ve an lo nuom hlak a, an hmu si nawh; in ngàithlâkhai hi ngàithlâk ve an nuom a, sienkhom an ngàithlâk si nawh" a ta. 25 Chun, tum khat chu Dàn zirtirtuhai laia pakhat a ngîr a, Isu fiena dingin "Zirtirtu, chatuon hringna nei dingin iem thawng ka ta?" tiin a'n don a. 26 Ama chun, "Dàn buah iem a'n ziek a? Iem in inkawktir hlak a?" a ta. 27 Ama chun, "Lalpa i Pathien chu i lungril po poin, i thlarau po poin, i hràtna po poin, i ngaituona po poin i hmangai ding a nih; nangma i'n hmangai angin i vênghai khom i hmangai ding a nih" a ta. 28 Isu chun, "I don indik, chuong ang chun thaw la, hring i tih" a ta. 29 Ama chun ama le ama thiem inchangtir nuomin Isu kuomah, "An leh ka vênghai chu tuhai am an na?" a ta. 30 Isun a don a, "Mi pakhat, Jerusalema inthoka Jeriko pana fe thla chu lampuiah suomhmang ruolin an lo suom a, a silfenhai an hlìppèk a, an vuok hrep a, thidangin an màksan a. 31 Chu lampui chu thiempu pakhat hin a hraw hlauh a, ama a hang hmu chun a hêl el tah a. 32 Chuong ang bokin Levi chia mi pakhat khomin chu hmun chu a hraw a, ama a hmu chun a hêl ve el tah a. 33 Samari mi pakhat inzinin a umna chu a hung tlung a, a hang hmu chun a lunginsiet êm êm a, 34 a va pan a, a hliemnahai chu hriek le uoiin nàlin a tuompêk a; ama sabengtunga chun an chuongtir a, khuolbûkah a fepui a, a enkol a. 35 A zîngah a màksan tawm chun duli pahni a phor a, khuolbûk enkoltu chu a pêk a, "Lo enkol la, hi bâk i sêng po po chu ka hung kìr nawk pha rul ka ti che" a ta. 36 "Aw leh, chuong mi pathumhai lai chun a tu tak am suomhmang tuoktu vênghai ni dingin i ring a?" a ta. 37 Ama chun, "A lunginsiettu chu" a ta. Isun, "Nang khom chuong ang chun va thaw ve rawh" a ta. 38 Isu le a zirtirhai chu lampuia khaw pakhatah an lût a, nuhmei pakhat Martha an ti chun a lo intlungtir a. 39 Ama chun zuorpui pakhat a hming Mari a nei a, ama chu Lalpa ke bulah thungin a thu a ngâithlàk a. 40 Martha ruok chu fâk rong bawlin a buoi hle a. Isu kuomah a hung a, "Lalpa, ka zuorpuinuin kei chauh rong bawl dinga a mi dande el hi tha i ti bîk am a nih? Mi hung thangpui dingin hril ta la" a ta. 41 Lalpa chun a don a, "Martha, Martha, ngaituo i hau a, i buoi hlè rèng a nih; sienkhom thil tûl pakhat chauh a um. 42 Mari chun chan tha a thlang a, chu chu lâkpêk ding a ni nawh" a ta.

Luke 11

1 Tum khat chu hmun pakhatah Isu a tongtai a. A tongtai zo chun a zirtirhai laia pakhat chun, "Lalpa, Johanin tongtai dàn a zirtirhai a'n chûktir ang bokin mi'n chûktir ve rawh" a ta. 2 Ama chun, "In tongtaiin hieng hin ti hlak ro:Pa, I hming inzaum sien, I ram hung tlung raw se; 3 Ni tin kan fâk khop bu mi pe la, 4 Kan chunga thil suol thawtuhai, Kan ngaidam hlak ang bokin, Kan suolnahai mi ngaidam la, Thlêmnaah mi thuoi lût naw rawh"wtiin. 5 Isun an kuomah, "Nangni lai tuin amani ruol nei sien, zàn rilah a inah fein, 'Ruolpa, bei phèk pathum mi'n pûktir rawh, 6 ka ruolpa inzinin a mi hung sir a, hang pêk ding ieng khom ka nei dêr nawh' va ti sien, 7 in sûnga mi chun, 'Mi hung sukbuoi naw rawh, tuhin chu kot khom kan kal vong tah a, ka nauhai leh khumah kan zâl tah a, thoin ka hung pêk thei naw che' tisan sien khom, 8 ka hril cheu hi, a ruolpa a ni leiin thoin va pe el naw sien khom, a hni tlut tlut leiin tho a ta, a mamaw zât zât pêng a tih. 9 "Chuongchun, ka hril cheu hi, hni ro, pêng an ti cheu; zong ro, hmûng in tih; kik ro, hongpêk an ti cheu. 10 Tu khom a hni phot chun a dong a; tu khom a zong chun a hmu a; tu khom a kik chu hongpêk nîng a tih. 11 Nangni pahai lai tu khom a naupan bei hni sien, tuin am lung pêng a ta? Nga hni sien, tuin am rûl a pêk ding? 12 Artui hni sien, tuin am ainuvèt a pêk ding? 13 Nangni mi suolhai hmanin in nauhai thil tha pêk nachâng in hriet si chun in Pa vàna mi chun a hnituhai chu tam nawk zuolin Thlarau Thienghlim a va pêk awm ngei cheu de!" a ta. 14 Ramhuoi man, tong thei lo mi pakhat sûnga inthokin Isun ramhuoi chu a hnot suok a, a hung suok hnung chun a hung tong suok el tah a, mipui chun mak an ti hle a. 15 Sienkhom, anni laia thenkhat chun, "Ramhuoi lal Belzebub lei annawm ramhuoi a hnot suok hi" an ta. 16 Mi thenkhat ruok chun ama fiena dingin vàna inthoka inchikna thilmak inentir dingin an phùt a. 17 Isun an ngaituohai a lo hriet a, an kuomah, "Khaw lai ram khom mani le mani indo taphot chu an ram hlak; insûng khom mani le mani indo chu an tlu hlak. 18 Setan khom ama le ama indo sien, iengtin am ram inngìr a ta? Nangnin Belzebub leia ramhuoihai hnot suok dàma in mi hril leiin hi thu hi ka hril a nih. 19 Kei hi Belzebub leia ramhuoihai hnot suok hlak ka ni chun, in mihaiin tu leiin am ramhuoi an hnot suok hlak a? Chuongchun, anni kha annawm in chungthu rêltu dinghai chu. 20 Amiruokchu, Pathien kut leia ramhuoi hnot suok ka ni si chun in kuomah Pathien ram chu a hung tlung tah tîna a nih. 21 "Mi hrât chun hriemhrei famkim leh in a vèng chun, a thil neihai chu a him hlak. 22 Nisienlakhom, a nêka hrât lemin a hung bei a, a hnè chun a ringsan tak râlthuom chu làkpêk a ta, a râllâkhai chu a nuom nuomin sem dar a tih. 23 Keima tienga thang naw taphot chu mi dotu a na, mi lakhawmpuitu naw chun a sukdar a nih", a ta. 24 Thlarau tirdakum a hnot suok chu mi sûnga inthoka a hung suok chun chawlna hmun zongin thlalèrah a'n vâk a'n vâk a, sienkhom umna ding hmun a hmu naw leiin 'Ka in suoksana khan kir nawk el ka tih' a ta. 25 Chun, a va tlung chun phit faia chei diemin a hmu a. 26 Chuongchun, a fe a, a nêka suol lem ngot thlarau pasari a va thuoi a, an hung lùt a, chu taka chun umhmun an khuor tah a. Chu mipa ngîrhmun chu a hmaa nêkin a hung se lem dai tah a nih" a ta. 27 Chuong thu chu Isun a hril lai mipui laia nuhmei pakhat chu a khêk suok a, "A hringtu che chu a hamtha, i nene nêk ngei khom" a ta. 28 Isu ruok chun, "Pathien thu hrea zawmtuhai hi an hamtha lem" a ta. 29 Mipui hung pung khawmhai kuoma chun Isun, "Tu lai ruoltharhai hi mi rilo tak an nih; inchikna thilmak an phût a, Jona inchikna chauh naw chu inchikna thilmak hrim inentir ni naw ni hai; 30 Jona chu Ninevi khaw mihai ta dinga inchikna a ni ang khan, Mihriem Naupa hi tu lai ruoltharhai ta dinga inchikna nîng a tih. 31 "Sim tieng lalnu kha Rorêlna nia chun tu lai ruoltharhai ruol hin ngîr vêng a ta, thiem naw inchangtir a tih; Solomon varna ngâithla dingin kawlkawdonga inthokin a hung si a; ngai ta u, Solomon nêka ropui lem chu hi taka hin a um. 32 Ninevi mihai chu Rorêlna nia chun tu lai ruoltharhai leh hin ngir tlâng an ta, thiem naw inchangtir an tih, Jona thu hril leiin an sim si a. Ngai ta u, hi taka hin Jona nêka ropui lem chu a um. 33 "Tu khomin khawnvar sitin kilkhawrah an sie ngai naw a, leikhawrin an khup khum ngai bok nawh, a hung luthaiin a var an hmu thei dingin a sienaah an sie lem hlak. 34 I mit hi i taksa ta dinga khawnvar a nih. I mit a tha chun i taksa pumin var a ta, a tha naw ruok chun i pumin inthim a tih. 35 Chuleiin, fimkhur rawh, nangmaa var um chu thim lo ni pal hlauh rawi a tih. 36 I taksa pum a'n thimna lai um loa a var suok vong chun, khawnvar varin a sun var ang chein i pumin var suok i tih" a ta. 37 Thu a hril zo chun Farisai pakhatin bu fa dingin a hung fiel a, ama chu a zui lùt a, dawkana thlaithlêng chu a ot nghal a. 38 Kut sawp loa thlaithlèng a ot hmutu Farisai chun mak a ti hle a. 39 Lalpa chun an kuomah, "Nangni Farisaihai hin no le thlèng puo tieng in sawp fai takluo a, in sûng tieng ruok chu duâmna le rîtlonain a sip si a. 40 Mi intlawhai, a puo tieng siemtu chun a sûng tieng khom a siem nawm a nih? 41 No le thlèng sûnga um chu mi retheihai pe unla, in ta dingin iengkim fai el a tih. 42 "Nangni Farisaihai, in chung a rik ie! Pudina dàm, lengmaser dàm le huona thlai hna tinrêng dàm sawmapakhat in pèk hlak a, sienkhom indikna le Pathien hmangaina tieng ruok chu in ngaithá si a; chu chu annawm in nuna in hmang hlak lem ding chu, a danghai khom ngaithà chuong loin. 43 Nangni Farisaihai, in chung a rik ie! Sunagogah thungna hmatawng le dawr hmuna hai mi chibai bûk in ngaina hlak si a. 44 In chung a rik ie! Thlàn hmun inchik lo, hre loa mi'n an hraw hlak ang chu in nih" a ta. 45 Dàn zirtirtu pakhat chun, "Zirtirtu, hieng thu i hril hin keini khom i mi khak sa ve a nih" tiin a suosal a. 46 Isun a don a, "Dàn zirtirtuhai, nangni khom in chung a pik ie! Phurrik tak tak mi liengkoah in innghat a, nangni hlak chun phur chu in kut hmawr khomin in tawk nuom si nawh. 47 In chung a rik ie! In thlatuhai that zawlneihai thlàn in dàm in bawl a; 48 in thlatuhai thilthaw chu in hrietpui a, in remtipui tìna a nih; annin a that an tum a, nangnin an thlân in bawl in bitum thung a. 49 Chu lei chu annawm Pathien varnain, "An kuomah zawlnei le tirkohai tir ka ta, a then that an ta, a then sukbohmang an tih" tia a lo hril rêng kha. 50 Chuongchun, leilung insieng tîra inthoka zawlnei that ta po po hai thisen maw chu tu lai ruoltharhai hin phur an tih; 51 a nih, ka hril cheu hi, Abel an thata inthoka maichâm le Hmun Thienghlim inkâra Zakari an that chena thisen phuba chu tu lai ruoltharhai chunga hin lâk nîng a tih. 52 "Nangni Dàn zirtirtuhai, in chung a rik ie, Varna chabi chu in chawi hmang dai a, nangni lût nuom si loin mi dang lût ding hlak in dang bok si" a ta. 53 Chu ina inthoka Isu a suok hnung chun Farisaihai le Dàn zirtirtuhai chun nasa takin an tai tan a, thu tam tak an indon sek a; 54 a tong suol palh man tumin an inchàn ta ràn a.

Luke 12

1 Chuong lai chun mipui sâng tam tak, kepha insir de nuk nuk khopa tam an hung pung khawm a. A zirtirhai kuoma chun thu a hril hmasa a, "Farisaihai chol, lêmderna laka inthok chun fîmkhur ro. 2 Puong lang lo dinga thup ieng khom a um naw a, hriet lo dinga ip hmang ieng khom a um bok nawh. 3 Zàn thima in hril chu zîng khaw varah la hrieng an ta, pindan sûngrila in inbiek rûk khom in chung sîpa inthokin tlânginsampui an tih. 4 "Ruolhai, ka hril cheu hi, taksa sukhluma chu hnunga ieng khom tawk poi thei ta lo chu ti naw ro. 5 Tu am in ti ding hril ka ti cheu: taksa a sukhlum hnung khoma hremhmuna pei theitu cheu chu ti ro; a nih, ka hril cheu hi, ama mol chu ti ro. 6 Chongzong panga poisax hniin an zor hlak an naw maw? Pathien ruok chun anni laia pakhat tê khom hi a theinghil ngai nawh. 7 In sam zai chen khom a tiem vong annawm! Chuleiin ti naw ro, chongzong tam tak nêkin in hlu lem si a. 8 "Ka hril cheu hi, mihai hmaa mi tantu taphot chu Pathien vàntirkohai hmaah Mihriem Naupa hin tan vèng a tih. 9 Sienkhom, mihai hmaa mi'n phattu chu Pathien vàntirkohai hmaah inphat vèng a tih. 10 Mihriem Naupa chu an soisel khomin an soiselna chu ngaidam nîng a ta, Thlarau Thienghlim hrilsetu ruok chu ngaidam ni naw nih. 11 Chun, Sunagog hotuhai le rorêltuhai le thuneituhai hmaa an thuoi phâ cheu chun in thiemna thu ieng tin am in hril ding ti thuah lungkham naw ro; 12 in hril ding chu a hun takah Thlarau Thienghlimin a hril ding cheu a ni si a" a ta. 13 Mipui laia mi pakhat chun, "Zirtirtu, ka unaupa kuomah ka pa ro mi sem ve dingin mi hrilpêk rawh" a ta. 14 Ama chun, "Mihriem, nangni unau kâra rorêltu le ro semtuah tuin am a mi ruot a?" a ta. 15 Chun, an kuoma bok chun, "Fîmkhur unla, duâmna tinrêng laka inthok chun invêng tha ro; mihriem hringna hi neinungnaa innghat a ni nawh"y a ta. 16 An kuomah tekhinthu a hril a: "Mi hausa pakhat lo tharsuok chu a hung hlawk tah èm êm a. 17 Chuongchun, "Iengtin am thaw tâng ka ta? Ka lohma suokhai ka bu inah a'n leng naw ding a ni si a' tiin a'n ngaituo a. 18 Ama bok chun, 'Hieng hin thawng ka tih. Ka bu in thiek ka ta, a lien lem bawl ka ta, chu taka chun ka bu le bâl le ka thil neihai sêk khawm ka ta. 19 Ka thlarau kuomah, 'Kum tam tak dai ding thil tha tam tak i khawl khawm tah hi. Tuhin chu chawl hadam la, fain dawn la, hlim takin chên ta rawh' tîng ka tih' a ta. 20 Nisienlakhom Pathienin a kuomah, 'Mi invêt! Voizàn hin i hringna an làkpèk ding che a nih. I ta dinga i thawsuokhai po po kha tuin am nei tâng a ta?'a ta. 21 Mani ta dinga sum le pai inkhawl hnûr a, Pathien tienga pasie si chu, chuong ang chu a nih"z a ta. 22 A zirtirhai kuomah, "Chuleiin ka hril cheu hi, in hringna ta dingin ieng am fain in bâr ding, in taksa ta dingin ieng am silin in bil ding ti lungkham naw ro. 23 Fâk ding nèkin hringna a poimaw lem a, silfèn nêkin taksa a poimaw lem bok. 24 Vaâkhai hi ngaituo ro, bu an tu naw a, an sìk naw a, bupang an nei naw a, bu in an nei bok nawh; nisienlakhom Pathienin a chawm tawl si a. Nangni chu vatehai nêkin in hlu lem dai si a! 25 Nangni lai lungkham leia mani hringna dârkàr khat suksei thei tu am in um?a 26 Chuong ang thil chauh hman thaw thei si loin ieng dinga thil dang lem chu in lungkham am a na? 27 "Lili pâr dâm hi ngaituo ro, an inthang dân chenin. Sin an thaw naw a, pat an kher bok nawh. Nisienlakhom, ka hril cheu hi, Solomon meuh khom a ropui thei ang tawpa a'n thuom khan hieng lili pâr pakhat tluk khom hin chei a ni nawh. 28 Hlo hna, voisun hringa a zînga meia raw hmang nawk el ding hman chuong ang lawma Pathienin a chei chun, aw nangni ringna tlawmhai, chuonghai nêk chun a va'n thuom nasa lem cheu awm de! 29 Nangni chu fâk le dawn ding ngaituoin buoi rak rak naw unla, chuong thil chu lungkham bok naw ro. 30 Hieng hi khawvel mi po po buoipui tak a na, in Pain hieng thil hi in mamaw ve ti a hriet. 31 A ram chu zong lem ro, chuong thil po po khom chu a pêk belsa ding chèu a nih. 32 Pawl tlawmhai, ti naw ro, a ram pèk cheu hi in Pa lawmzawng tak a nih. 33 In neihai zor unla, pasiehai kuomah pe ro, rûkru an lût thei nawna, hângthîmin an fâk siet thei nawna le tangka ip a phai thei nawna vàna chun in ro ding khawl khawm ro. 34 In ro umna taphotah in lungril khom a um hlak si a. 35 "Rongbawl dinga inchei sa diemin, in khawnvarhai sita inpei zingin um ro. 36 Inneina ruoi kîla fe an pu hung inlawiin kotkhâr a hung kik phaa hongpêk nghàl dinga lo nghâktu siehlawhai ang hin um ro. 37 An pu hung inlawiin ama lo nghâk zingtu siehlaw a hung hmuhai chu an hamtha ie. Thu dik tak ka hril cheu hi, ama chun rongbawl thuom inbel nghal a ta, anni chu dawkanah inthungtir a ta, bu thurpêk a tih. 38 Zàn ril amanih, khaw var tieng amanih a hung inlawi a, chuong ang siehlaw a hung hmu chu a hamtha. 39 Hi hi hre ro: inneituin rûkru hung hun ding a hriet chun a in chu vêng thâng a ta, rok thei naw nih. 40 Nangni khom inpei sa zingin um ro, Mihriem Naupa chu in beisei naw hunah hung palh rawi a tih"a ta. 41 Peter chun, "Lalpa, hi tekhinthu hi keini chauh amanih i mi hril, an naw leh mi po po?" tiin a'n don a. 42 Lalpa chun "Sum enkoltu ringum le var tak, a puin ama siehlawhai inrawitu le a hun taka an chan ding bu sempêktu dinga a ruot chu tù tak am nîng a ta? 43 A pu a hung phaa chuong anga thaw siehlaw a hung hmu chu a hamtha. 44 Thu dik ka hril cheu hi, a nei po po chungah hotuah siem a tih. 45 Amiruokchu, chu siehlaw chun, 'Ka pu hung vak naw nih' ti lungril putin a siehlawhai chu vaw sien, faa dawnin inrui buoi sien, 46 a pu chu a'n ring naw niah, a hriet naw kàr a hung chun, bong tam insuong a ta, mi ringum nawhai chan inchangtir a tih. 47 A pu ditzawng hre zing sia thaw lo le inpei loa um siehlaw chu na taka vuok nîng a tih. 48 Amiruokchu, hriet naw leia hremna khop thil thawtu chu nêp deua vuok nîng a tih. Tam tak pêka um taphot laka chun tam tak phût nîng a ta, tam tak an inkoltir taphot laka chun tam nawk zuol phût an tih. 49 "Hnuoia hin mei insuo dinga hung ka nih, tu khom hin chok tah sien ka va ti de! 50 Nisienlakhom, baptisma chang ding ka la nei a, chu chu ka hlen hma chun ka ning a va hang inîp ngei de! 51 Hnuoia hin remna inlêngtir dinga hung in mi sawn maw? Teu lo e! Ka hril cheu hi, indo inlèngtir dinga hung ka ni lem. 52 Tuta hnung chu sûng khata mi panga khom inthe phok an ta, pathumhai chun pahnihai, pahnihai chun pathumhai chu do an tih. 53 Pain a naupa do a ta, naupain a pa; nuin a naunu do a ta, naunuin a nu; nuin a mo do a ta, moin a tarpi" a ta. 54 Mipuihai kuoma khom chun, "Tlâk tienga inthoka sûm hung suok in hmù chângin, 'Ruo a sûr ding a nih' in ti nghàl a, a sûr ngei bok hlak. 55 Sim thli a hung hràng hlakin, 'Khuo a lum ding a nih' in ti a, a lum ngei bok hlak. 56 Nangni lêmderhai, hnuoi le vàn enin khawmuol um dàn ding in hril thei si chun ieng dinga tu lai hun um dàn hi in hriet fie thiem naw? 57 "Ieng dinga thil indik chu nangni khomin in man thiem el naw? 58 I khingpui leh rorêltu hmaa inhêk dinga in fe laiin ama chu lampuiah inrempui dàn zong hrâm hrâm rawh, chuong naw chun rorêltu hmaah kei lût a ti che a, rorêltu chun pulis kutah inhlàn a ti che a, pulis chun lung inah khum hlauh rawi a ti che. 59 Ka hril cheu hi, poisab hlek khom in tlâk zo hmakhat chu, chu taka inthok chun suok naw top in tih" a ta.

Luke 13

1 Chu lai chun, Galili rama mi, Pathien kuoma ran thisena an inthawi lai, an inthawina thisen leh inpol nuoia Pilatin a that tawl thu chu chu taka um mi thenkhat chun Isu an hung hril a. 2 Isun an kuomah, "Chuong Galili mihai chun chuong ang thil an tuor lei chun Galili mi dang po nêka suol bîk niin in ring am? 3 Suol bîk lo e! Ka hril cheu hi, nangni khom in sim naw chun chuong ang bok chun bohmang in tih. 4 An leh, Siloama in insâng chimin mi sawmpariet a del hlumhai khom kha Jerusalema chênghai po po nêka suol bîk dingin in ring a ni? 5 Suol bîk lo e! Ka hril cheu hi, nangni khom in sim naw chun chuong ang bok chun bohmang vèng in tih" a ta. 6 Chun, hi tekhinthu hi a hril a. "Mi pakhatin a grêp huonah theichang kûng khat a'n phuntir a, a ra a zong hlak a, pakhat khom a hmu ngai naw a. 7 Grêp huon enkoltu kuoma chun, 'En ta, kum thum zet hi theichang hi a ra ka zong tah a, ka hmu ngai naw a. Phûr el rawh. Hnuoi tha a fâk hek mei mei an naw maw?' a ta. 8 Ama chun, 'Pu, tu kum bèk hi chu la um sien, a bul vèl hi cho ka ta, hnuoi thain la hang vur phot ka tih. 9 Kum nawk ra a'n suo leh a tha nîng a ta, a'n suo naw ruok chun phûr chauh lem rawh' tiin" a ta. 10 Sabat ni voi khat chu Sunagog pakhatah Isun a zirtir a. 11 Nuhmei pakhat, kum sawmpariet zet thlarau suolin a kei kon tah a um a. A ruongzâng a sukmar thei naw leiin a kûl zing hlak a. 12 Isun a hmu chun a ko a, "Nuhmei, i natna chun a'n thlà ta che" a ta. 13 A chunga chun kut a'n nghat a, a hung ngîr tlûn ta nghal a, Pathien a'n pâk a. 14 Isun Sabat nia mi a sukdam lei chun Sunagog hotu chu a lung a sen hle a, mipuihai kuoma chun, "Sin thawna ding ni ruk sûng a um a, chu sûng chun hung inla, insukdam ta unla, Sabat ni kher kher ni loin" tiin a vìn thùr thûr tawl a. 15 Lalpa ruok chun an kuomah, "Nangni lêmderhai, Sabat ni khomin mani bawngchal amanih sabengtung amanih chu sûtin, a thlungna hmuna inthokin tui indawntir dingin in thuoi suok seng hlak an naw maw?" 16 Chuong a ni si chun hi nuhmei, Abraham naunu, kum sawmpariet zet Setanin a lo khuopna hi Sabat khom ni sien sûtpêk a ni naw ding am a ni?" a ta. 17 Chuong thu a hang hril chun a khingtuhai hmai chu a mawk hle a, mipui ruok chu a thilthaw ropui takhai lei chun an lawm hlè thung a. 18 Chu zoa chun Isun, "Pathien ram chu ieng ang am a na? Ieng le am hrilkhîng ka ta? 19 Antam mu khat mi pakhatin a lâk a, a huonah a thè a, a hung inthang a, thing a hung ni a, a zârah chunglêng vatehai an riek hlak ang hi a nih" a ta. 20 Ama bok chun, "Pathien ram chu ieng le am hrilkhîng ka ta? 21 Nuhmeiin chol a lâk a, beia hmet ding beiphit fongc thum chie tho vong dinga a phul ang chu a nih" a ti nawk a. 22 Jerusalem pana an fe lai chun khaw lien le khaw têhai sirin Isun a zirtir malam pei a. 23 Mi pakhat hin, "Lalpa, sandama um chu mi tlawmte chauh an ni ding a ni?" tiin a'n don a. 24 Ama chun, "Kotkhâr chîna chun lùt tum hrâm ro; ka hril cheu hi, mi tam takin lùt tum an ta, lût thei naw ni hai. 25 Inneitupa chu tho a, kot a kal ta hnung chun nangni tuola ngîrin, 'Pu, kot mi hung hongpêk rawh' tiin kik inla khom ama chun, 'Khaw lai mi am in nih ka hriet ngai naw cheu' tiin lo don a ti cheu. 26 Nangnin, 'I rawiin fain ei dawn hlak kha, kan kotthlèra hai khom i zirtir hlak kha' la tîng in ta, 27 ama ruok chun, 'Ka hril cheu hi, khaw lai mi am in nih ka hriet naw cheu; nangni thilsuol thawtu po pohai, ka kuoma inthokin fe hmang ro' la tîng a ti cheu. 28 Abraham hai, Isak hai, Jakob hai le zawlneihai po po Pathien ramah an um ti hmu a, nangni ruok chu tuola hnot suok in nih ti in hriet suok pha chun tapin hâ la rawt in tih. 29 Sak le thlang, sim le hmara inthokin mi hung an ta, an hmun ruot seng hluoin Pathien rama ruoi chu hung kîl an tih. 30 Ngai ta u, a nuhnung takhai khom a hmasa tak ni ding an um a, a hmasa tak khom a nuhnung tak ni ding an um" a ta. 31 Chuong lai tak chun Farisai thenkhat Isu kuomah an hung a, "Hi taka inthok hin suok la, fe hmang rawh. Herodan sukhlum a tum che a nih" tiin an hung hril a. 32 Ama chun an kuomah, "Fe unla, chu sihal chu hieng ang hin va hril ro, 'Ngai rawh, voisun le zinga hin ramhuoihai hnot suokin damnawhai sukdam ka ta, ni thum niah zo ka tih' a tih tiin. 33 Ieng khom ni sien, voisun le zînga le a zîng nawk chenin ka thaw pei ding a nih; indik tak chun, Jerusalem puo tieng zawlnei an thi ngai nawh. 34 Aw Jerusalem, Jerusalem, zawlneihai thattu, i kuoma an hung tirhai lunga lo dèng hlumtu! Arpuiin a têhai a thla hnuoia a op khawm angin i nauhai voi ieng zât am op khawm ka tum tah hlak a ? Sienkhom i nuom si naw kha. 35 En ta, i in le ram chu ràusanin a um tah hi! 'Lalpa hminga hung chu a hamtha' i ti hmâ khat chu mi hmu nawk ta naw ti nih ti ka hril che hi" a ta.

Luke 14

1 Sabat ni tum khat chu Farisaihai laia mi challang pakhat inah bu fa dingin Isu a fe a, an lo enthlâk nasa hle a. 2 Chun, ngai ta, a hmaa chun damnaw invûng pakhat a um a. 3 Isun Dàn hretuhai le Farisaihai chu a biek a, "Sabat nia sukdam a thieng am a thieng naw?" tiin a'n don tawl a. 4 Anni ruok chu an to zing a. Ama chun damnaw chu a chel a, a sukdam a, a'n fetir tah a. 5 Anni rawi chu a biek a, "Nangni lai in naupad amanih in bawngchal amanih Sabat niin tuikulah tla tah ang sien, in làk suok nghàl naw ding maw?" a ta. 6 Chu khom chu an don thei naw bok a. 7 Bu faa an fielhai chun thungna thá thà an inchû pei ti a hmuin an kuomah tekhinthu a hril a. 8 "Tuin amanih inneina ruoi kîl dinga a fiel che chun thungna tha taka thung inchù naw rawh, nangma nêka mi lien lem lo fiel pal hlauh rawi a tih. 9 A fieltu chein, 'Hi pa thungna ding hi inkien rawh' a hung ti el chun hmai mawk takin thungna tha naw takah i'n son a ngai ding a ni si a. 10 Chuleiin, an fiel châng che khom thungna tha naw tak inchu lem la, chuongchun a fieltu che chu hung a ta, 'Ruolpa, thungna tha lemah hung inson raw khai' hung ti lem a ta, thlaithlèng i kìlpuihai mithmuah chawimawiin um i tih. 11 Inngaihlu taphot chu tlawm an ta, inngaitlawm taphot chawimawiin um an tih" a ta. 12 Ama fieltu kuoma khom chun Isun, "Sùn amanih zàn amania ruoi i thè pha leh i ruol hai, i unau hai, i laibung hai le in vènga hausa hai chu fiel naw rawh; i fiel chun fiel vêng an ti che a, rul nawk hlauh an ti che. 13 Ruoi i thè chun pasie hai, piengsuol hai, kebai hai, mitdel hai fiel lem rawh. 14 Anni chun rulna ding che an nei naw leiin malsawmin um i ta, mifelhai thonawkna nia chun rulin i um ding a ni si a" a ta. 15 A thlaithlèng otpui laia mi pakhatin chu chu a hrietin, "Pathien rama ruoi kìltu ding chu a hamtha ie!" a ta. 16 Isu ruok chun, "Mi tuin amanih zànah ruoi ropui tak a buotsai a, mi tam tak a fiel a. 17 A fàk huna chun a mi fielhai kuomah, 'Hung ta ro leh, tuhin iengkim inpei a ni tah' tia hril dingin a siehlaw a tir a. 18 Sienkhom, an rênga inthuruol ang elin suonlam an lo siem seng a. 19 A hmasa tak chun, 'Lo ka'n chawk a, a ena fe a tûl a, lunginsiet takin mi hung inphapêk el rawh' a ta. 20 A dota mi chun, 'Bawngchal sor ding tuok nga ka'n chawk a, va sor sin dingin ka fe ding a na, lunginsiet takin mi hung inphapêk el rawh' a ta. Mi dang chun, 'Nuhmei nei hlim ka na, chuleiin ka hung thei naw a nih' a ti bok a. 21 Siehlaw chu a kîr a, chuong thu chu a pu a hril a. Inneitupa lung chu a sen hle a, a siehlaw kuoma chun, 'Suok nawk nghal la, kotthlêr le kawmkâra hai fe la, pasie hai, piengsuol hai, mitdel hai le kebai hai chu hi taka hin hung thuoi tawl rawh' a ta. 22 Siehlaw chun, 'Pu, i thupêk ang khan ka thaw a, sienkhom hmun ruok a la um ta rop' a ta. 23 A pu chun, 'Suok nawk la, lamliena hai, khawhnawma hai fe la, ka in sip ding mi hung thuoi khawm hrâm rawh. 24 Ka hril che hi, mi ka fielhai khan tu khomin ka ruoi kîl ve naw ni hai' tiin" a ta. 25 Isu ruolin mipui tam tak an fe ve a, a hang ngha kîr a, an kuomah, 26 "Ka kuoma hung taphot chun an pa hai, an nu hai, an nuhmei hai, an nau hai, an unau hai, an farnu hai, a nih, anni hringna chenin an theidae naw chun ka zirtir ni thei naw ni hai. 27 Mi zui nuom sia mani kraws put si lo chu ka zirtir ni thei bok naw nih. 28 "Nangni lai in sawngsâng bawl tumtu chun thung meua a sèng zàt ding le a bawl zona khop sum a nei le nei naw hisap hmasa phot lo tu am um an ta? 29 A lungphùm rem ta zet sia a bawl zo thei naw chun a hmu taphotin, 30 'Hi pa hin in a rel uoia chu a bawl zo thei si naw a' tiin nuisan an tih. 31 Chun, lal tu khom lal dang do dinga inthok ding ni sien, sipai sîng hni ama do dinga hung inthokhai chu sipai sîng khat le chauh a lo bei ngam ding le ding naw thung meua ngaituo hmasa zet lo tu am um an ta? 32 A bei ngam naw ding a ni chun hla fea an um laiin inremna thu hril dingin palai tir a tih. 33 Chuong ang bokin nangni khom nei po po màksan vong nawtu chu ka zirtir ni thei naw nih. 34 " Machi hi a tha a, sienkhom machi hi da ta sien, iengin am suk-al nawk a ta? 35 Hnuoi thatna dingin a tlâktlài naw leiin an dehawn el hlak. Ngàithlâkna dinga na nei chun ngâithla ngun raw se" a ta.

Luke 15

1 Tum khat chu a thu ngaithla dingin sienkhontuhai le mi suol tam takin Isu an hung pan a. 2 Farisaihai le Dàn zirtirtuhai ruok chun, "Hi pa hin mi suol a pawl a, bu dâm a fâkpui tawla" tiin a chungah an chier a. 3 Ama chun an kuomah hi tekhin thu hi a hril a: 4 " Nangni lai tuin amanih beram za neiin anni laia pakhat bo ta sien, sawmkuo pakuohai chu phûlah màksanin a'n hmang chu a hmu hmâ khat tuin am zong nawng a ta? 5 A hmu nawk chun lawm takin a liengkoah put a ta, 6 a in a tlung chun a ruolhai le a tuolbawmhai ko khawm a ta, 'Ka beram inhmang kha ka hmu nawk tah a, thaw ro, lawm ei tiu' tîng a tih. 7 Ka hril cheu hi, chuong ang chie chun sim ding chuong nei ta lo mi fel sawmkuo pakuohai chunga an lawmna nèka nasain mi suol pakhat sim chungah vànah lawmna nasa lem a tih. 8 "Chun, nuhmei tu khomin duli sawm neiin pakhat inhmang ta sien, khawnvar insita a in phîtin, a hmu nawk hmâ khata zong lo tu am an um ding? 9 A hmu nawk pha chun a ruolhai leh a tuolbawmhai ko khawm a ta, 'Ka duli inhmang kha ka hmu nawk tah a, thaw ro, lawm ei tu' tîng a tih. 10 Ka hril cheu hi, chuong ang bokin mi suol pakhat sim chungah Pathien vàntirkohai nasa takin an lawm a nih" a ta. 11 Isun a hril pei a. "Mi pakhat hin nau pasal pahni a nei a. 12 A naupang lem chun a pa kuomah, 'Pa, ka ro chan ding mi pe rawh' a ta, chuongchun ro chu an kuomah a sem tah a. 13 Chu hnung sawt naw teah a naupang lem chun a chanpuol po chu a lâk a, ram hla takah a fe a, chu taka chun inhoi chènin a sukriral ta vong a. 14 A nei po po a khawral vong hnungin chu rama chun tàmpui a tla a, fâk ding a nei ta naw a. 15 Chuongchun, chu rama mi pakhat chu a bèl a, ama chun vok bu pea sor dingin a lo tieng a tir a. 16 Vok bua an pèk fanghra chun insukkhop vè tak a nuom a, tu khomin fàk ding an pêk si nawh. 17 "Sienkhom a hung inhriet suok phing leh, 'Ka pa ina inhlawfahai lai khom khan fàk sèng lo nei an tam vei leh, kei hlak chu hi taka hin phingtâmin ka thi el ding a ni si a. 18 Tho ka ta, ka pa kuomah fèng ka ta, 'Pa, vàna mi chunga le nangma chungah thil suol ka lo thaw a nih. 19 I naupaa inbûk tlàk khom ka ni ta naw a, i ina inhlawfa pakhat angin mi sor ve el rawh' tîng ka tih, a ta. 20 "Chuongchun a tho a, a pa kuom tieng a pan tah a. Hla taka a la um laiin a pa chun a lo hmu a, a lunginsiet êm êm a, a tlân a, a kuo a, a fawp ngawi ngawi a. 21 A naupa chun, 'Pa, vàna mi chunga le i chungah thil suol ka lo thaw a nih, i naupaa inbûk tlàk khom ka ni ta nawh' a ta. 22 "A pa ruok chun a siehlawhai kuomah, 'Zakuo tha tak kha hung la vat unla, inhâktir unla, kutsebi inbuntir unla, pheikhok khom inbuntir bok ro; 23 bawng tuoi thâu tak kha hung kei unla, that ro. A lawmna dingin ruoi thèng ei tiu. 24 Ka naupa hi a thi a, a hung hring nawk tah a; a'n hmang a, ei hmu nawk tah a ni hi" a ta. Chuongchun an lawm tan tah a. 25 "Chuong lai chun a naupa upa lem chu loah a um a. A hung inlawi chun, in a tlung tawmin rimawi le làm ri a hriet a. 26 A siehlaw pakhat chu a koa, "Chu rî chu ieng rî am an ta leh?" tiin a'n don a. 27 Ama chun, 'I sang a hung kìr a, dam taka a hmu nawk leiin i pain bawng tuoi thâu a that a nih' a ta. 28 A naupa upa lem chu a lung a sen hle a, inah chun a lût nuom naw a. A pa chu a hung suok a, a va thlêm a. 29 A naupa chun, 'Ngai rawh, hieng chen hi suok sorin i mi sor a, i thupêk voi khat khom ka sêl ngai nawh. Sienkhom, ka ruolhai le kan insukhlimna ding kèlté takngiel khom i mi pêk ngai nawh. 30 Tuhin i naupa, nawchizorhai laia i sum thè ral vongtu hi a hung kìr a, bawng tuoi thâu tak el i lo thatpêk nawk nghal si hi' a ta. 31 "A pa chun, 'Ka naupa, nang chu ka kuoma um zing i na, ka nei po po hi i ta annawm. 32 Hi i sangpa ruok hi chu a thi tah kha a hung hring nawk a, an hmang ta kha ei hmu nawk tah a ni hi; hlim taka lawm ding ei ni hrim a nih'a ta" tiin.

Luke 16

1 Chun, a zirtirhai kuomah, "Mi hausa pakhatin sum enkoltu a nei a, chu pa chun a sum a sukriral mei mei a nih tiin an hêk a. 2 Mi hausa chun ama chu a ko a, "I chungchàng thu ka hriet hi iem an ta leh? I sum enkol ziekna bu chu hung la rawh; sum enkoltuah thang thei ta naw ti nih" a ta. 3 Sum enkoltu chun a lungrilin, "Ka puin ka sina inthoka a mi bân ta si chun iem thaw tâng ka ta? Hnuoi cho hlak chu ka thain a tlin si naw a, kut daw hlak chu ka'n zak bok si. 4 Ka sina inthoka a mi bân hnunga mihaiin an ina an mi'n umtirna dingin thaw dàn ka hriet tah' a ta. 5 Chuongchun, a pu sum battuhai chu pakhat khatin a ko tawl a, a hmasa tak kuoma chun, 'Ka pu sum ieng zât am i bat?' a ta. 6 Ama chun, 'Oliv hriek gallonf zariet' a ta. Sum enkoltu chun, 'I bat inchikna lekha hi la la, thung la, gallon zali tiin ziek nghal rawh' a ta. 7 A pahnina kuoma chun, 'Nang ieng zat am i bat?' a ta, ama chun 'Bu tîn sângkhat' a ta. Sum enkoltu chun, 'I bat inchikna lekha kha hung la la, tîn zariet tiin ziek rawh' a ta. 8 A pu chun sum enkoltu mi depde dawha thatzie chu tlipin, 'Var nauhai nêkin tu lai mihai hi khawvel thila chu anni thang le indawr ding chun an verther lem hrim a nih' a ta. 9 Ka hril cheu hi, khawvel hausakna hmangin in ta dingin ruol siem ro, sum a ral pha chatuon hmuna lawm lût in ni theina dingin. 10 "Tlawmte chunga ringum chu tam tak chunga khom a ringum hlak; tlawmte chunga ringum lo chu tam tak chunga khom a ringum ngai nawh. 11 Khawvel sum le pai chunga hman in ringum naw chun tuin am hausakna tak tak lem chu an inkoltir ngam ding cheu a na? 12 Mi dang ta chunga hman in ringum naw chun nangni ta ding lem chu tuin am pêng a ti cheu a? 13 Siehlaw tu khomin hotu pahni rong a bawl kop thei nawh; pakhat theidain a dang chu a dit amanih nîng a ta, an naw leh pakhat chu ngainain a dang chu a hnâm amanih nîng a tih. Pathien rong le sum rong in bawl kop thei nawh" a ta. 14 Sum ngainatu Farisaihaiin chu chu an hrietin Isu an nuisaw a. 15 Ama chun an kuomah, "Mihai mithmua mi fel anga intâr lang mei mei in na, in lungril sûng ruok chu Pathienin a hriet. Mihriemhai ngaisàng zawng hi Pathien mitah chu tirdakum a nih. 16 Johan a hung chen khan Dàn le zawlneihai thu kha hmang ding a na, a hunga inthok ruok chu Pathien ram Chanchin Tha hi hril dar a ni ta thung a, mi tinin chu taka chun lût tumin an baw huoi huoi a nih. 17 Nisienlakhom, Dàn thu sunhang chikte khom a bo nêk chun hnuoi le vàn bohmang ol lem a tih. 18 "Tu khom nuhmei maa nuhmei dang nei taphot chu a uire a na, mi nuhmei mâk nei taphot khom a uire a nih. 19 "Mi hausa pakhat, puon senduk le puon zâi inhmia inthuom, ni tin inhoi taka khawsa hlak a um a. 20 A kotkhâr bula chun kutdaw pakhat a hming Lazar, pânin a bawm sip chu a zâl a; 21 mi hausa dawkana inthoka a fâk nawi tla chu fâk a châk thei hle a. Uihaiin a pânna chu an hung liekpêk hlak a. 22 Kutdaw thi hun a hung tlung chun vàntirkohaiin an thuoi a, Abraham ângsûngah an sie a. Mi hausa khom chu a thi a, an phûm a. 23 Hremhmuna na tuora a'n rûm lai chun a hang en a, hla taka Abraham ângsûnga Lazar inthung chu a hang hmu a. 24 'Pa Abraham, mi lunginsiet la, Lazar kha hung tir rawh, a kutpàr hmawr tuiah inchie sien, ka lei hi hung dep dei raw se, hi mei choka hin ka na êm èm a nih' a ta. 25 "Abraham ruok chun, 'Ka naupa, nangin i dam laiin thil tha ngot i chang a, chuong ang bokin Lazarin thil tha naw ngot a chang kha hre zing ta la; tu ruok hin chu ama chu thlamuong takin hi taka hin a um a, nang chu i nâ a ni kha. 26 Chu bâkah, hi taka inthoka nangni kuoma hung tum le kha tienga inthoka keini kuoma hung tumhai an infe paw thei nawna dingin chadan inthûk tak ei inkârah a um a nih' a ta. 27 "Ama chun, 'Chuong an leh Pa, Lazar chu ka pa ina bèk infetir dingin ka ngèn che. 28 Piengpui pasal panga ka nei a, hi hremna hmuna hin an hung ve nawna dingin zu hril tawl raw se' a ta. 29 Abraham ruok chun, 'Mosie le zawlneihai an nei annawm, chuonghai thu chu ngai raw hai se' a ta. 30 Ama chun, 'Ni lo e, Pa Abraham, mithi laia mi meuh an kuomah fe sien chu sim an tih' a ta. 31 Abraham chun, 'Mosie le zawlneihai thu an bengkhon naw chun, mithi laia inthoka tho nawk thu khom awi chuong naw ni hai' a ta" tiin a hril a.

Luke 17

1 Isun a zirtirhai kuomah, "Mihai insuoltirtu thilhai hi hung um naw thei a ni nawh, sienkhom a'n umtirtu chung chu a rik. 2 Hieng mi chînhai laia pakhat khom intlûktir nêk chun bu rawtna lung a rîngah inhlìtirin, tuifinrietah thlàk ni sien, a ta dingin a tha lem. 3 "Chuleiin, fimkhur ro, i unauin i chungah thil suol a thaw chun zil la, a sim chun ngaidam rawh. 4 Ni khat sûngin i chungah voi sari thil a suksuol a, 'Ka sim' tia nangma tieng voi sari a hung ngha chun i ngaidam ding a nih" a ta. 5 Tirkohai chun Lalpa kuomah, "Kan ringna mi sukpungpêk rawh" an ta. 6 Lalpa chun, "Antam mu tiet ringna in nei chun, hi theihmi kuoma hin, 'Inphawi la, tuifinrietah inphun rawh' tîng in ta, in thu awi el a tih. 7 "Nangni lai hin tu am siehlaw nei a, a lo kei amanih a beram vèng hung inlawi chu, 'Hung la, bu hung fa nghal rawh' ti ding? 8 Chuong nèk chun, 'Ka fâk ding buotsai la, inthuom la, ka fâk le dawn sûng po ka rawng bawl la, chu zoah nangin fa ve rawh' in ti lem naw ding maw? 9 In thu anga a thaw leiin in siehlaw kuoma chun lawm thu in hril hlak am a ni? 10 Chuong ang bokin nangni khom thaw dinga thu an pèk po po cheu in thaw zo vong hnungin, 'Kan thaw dinga bituk chauh kan thaw leiin siehlaw tlâktlài lo tak kan nih' ti ro" a ta. 11 Jerusalem pana a fe tumin Galili le Samari ram inrìna tieng lam chu Isun a hraw a. 12 Khaw pakhat a lût tawmin phâr sawm a'n tuokpui a. 13 Anni chu hla deu hlekah an ngîr a, " Hotu Isu, mi lunginsiet rawh!" tiin inring takin an khêk a. 14 Anni a hmu chun, "Fe unla, thiempu kawlah va'n entir ro" a ta, chuonga an fe lai chun an hung inthieng tah a. 15 Anni laia pakhat chun a dam ti a hriet phing leh rawl inring taka Pathien inpâk pumin a kîr nawk a. 16 Isu ke bulah bokkhupin lawmthu a hril a, ama chu Samari mi a nih. 17 Isu chun a lo biek a, "Mi sawm kha in hung inthieng ta vong an naw maw? 18 Pakuohai kha khaw la'm an um ta a? Hi awze mig chauh naw hi Pathien inpàk dinga hung kìr an um naw a ni maw?" a ta. 19 Chuongchun a kuomah, "Tho la, fe ta rawh, i ringnain a sukdam che a nih" a ta. 20 Farisaihaiin Pathien ram hung tlung hun ding an indon leiin Isun an kuomah, " Pathien ram hung tlung chu mita hmu thei chi a ni nawh. 21 'En ta, hi taka hi, saw taka saw' ti bok naw ni hai. Ngai ta u, Pathien ram chu nangnia um a nih"h a ta. 22 A zirtirhai chun a kuomah, "Mihriem Naupa dam lai hun dâm hi ni khat bêk in hmu nuom nawk hun la tlung a ta, sienkhom hmu ta si naw ti niu. 23 In kuomah, 'En ta u, saw taka saw' amanih, 'En ta u, hi taka hi' amanih la tîng an ta; sienkhom fe suok naw unla, anni chu zui bok naw ro. 24 Kawl inlepin kawl kil a el var ton zok zok ang hin Mihriem Naupa hung nawkna nia chun um a tih. 25 Nisienlakhom, chu hma chun thil tam tak tuor hmasa phot a ta, tu lai ruoltharhai hin hnawl an tih. 26 "Nova hun laia thil um dàn ang khan, Mihriem Naupa hung nawk ni khomin um a tih. 27 Longa Nova a lût ni chen khan mihaiin fain an dawn a, nuhmei pasal an innei a. Chu zoah tui a hung lêt a, an rêngin sukbohmang an ni ta khah. 28 "Chuong ang bokin Lota dam lai khom khan thil a tlung khah; fàin an dawn a, inchawin an zor a, thil an phun a, in an bawl a; 29 nisienlakhom Sodom khuoa inthoka Lota a suok ni chun vàna inthokin mei le kât a sûr a, an rêngin a sukhlum vong a ni khah. 30 Mihriem Naupa a hung inlang nawk ni chun chuong ang bok chu la nîng a tih. 31 Chu huna chun in chunga um chu in sûnga sum inchù dingin tum naw raw se. Loa um chu inah hung bok naw raw se. 32 Lota nuhmei kha hre zing ro. 33 Tu khom mani hringna hum tum taphot chun chân a ta, tu khom mani hringna chân taphot chun hum a tih. 34 "Ka hril cheu hi, chu zân chun khum khata zâl mi pahni chu pakhat làk nîng a ta, pakhat chu màksan nîng a tih. 35 Suma nuhmei pahni bu suk lai chu pakhat làk nîng a ta, pakhat chu màksan nîng a tih. 36 Pasal pahni lo fe chu pakhat làk nîng a ta, pakhat chu màksan nîng a tih" a ta 37 A zirtirhai chun, "Lalpa, khaw la'm ie?" an ta. Ama chun, "Saruong umna taphotah mulukolhai khom an fuon khawm hlak" a ta.

Luke 18

1 A zirtirhai chu beidong loa tongtai fan fan ding an nizie inentirna dingin Isun tekhinthu a hril a: 2 Khaw pakhata hin rorêltu pakhat, Pathien tina nei lo, mihriem khom poisa bok lo a um a. 3 Chu khuoa chun hmeithai pakhat a um a, 'Ka khingpui le kan thubuoi mi rêl felpèk rawh' tiin a hung ngên sên a. 4 Ama chun iemani chen chu a thawpèk nuom naw a. 5 A tawpa chun, 'Pathien tì loin mihriem poisa bok naw lang khom, hi hmeithai hin a mi chokbuoi ngun êm a, sukfelpêk el ka tih; chuong naw chun a hung rop awm si a, nghok a um taluo ding a nih' tiin a'n ngaituo a. 6 Lalpa chun a hril pei a, "Rorêltu fel lo thu hril chu hre ro. 7 A mi thlang, a sùn a zàna ama kotuhai chungthu chu Pathienin a rêl fel naw ding am a ni? A la muongchâng dîm a ni? 8 Ka hril cheu hi, hung rêl fel vak a tih. Amiruokchu, Mihriem Naupa hin a hung pha leh khawvela hin ringna hmûng a ti'm?" a ta. 9 Mani fel inti, mi dang hmusit hlakhai kuoma khom Isun hi tekhinthu hi a hril a: 10 "Mi pahni hi tongtai dingin tempulah an fe a, pakhat chu Farisai a na, pakhat chu siekhontu a nih. 11 Farisai chu a ngîr a, ama chungthu hrilin, 'Aw Pathien, mi dang anga mi duâm, depdè le uire hmang le hi siekhontu ang khom hi ka ni ve naw leiin lawmthu ka hril che. 12 Kâr tin voi hnih bu ka nghei a, ka nei taphot sawmapakhat ka pêk hlak' a ta. 13 Siekhontu ruok chu ama hnung daiah a ngîr a, vàn tieng khom ngha ngam loin, 'Aw Pathien, kei mi suol hi mi lunginsiet rawh' tiin a awm a chum a chum ta lem a. 14 "Ka hril cheu hi, chu pa chu a pakhat lem nêkin thiem changin inah a'n lawi ta lem a nih. Inngaihlu taphot chu tlawm an ta, inngaitlawm taphot chu chawimawi nîng an tih" a ta. 15 Isu them dingin nautehai khom an hung thuoi a, zirtirhai chun an lo râu a. 16 Nisienlakhom, Isun anni chu a ko a, "Naupangtehai kha ka kuomah in hungtir unla, khap naw ro; Pathien ram chu hieng ang mihai ta hi a ni si a. 17 Thudik ka hril cheu hi, tu khom naupangte anga Pathien ram lawmtu an ni naw chun a sûngah lût naw top an tih" a ta. 18 Chun, hotu pakhatin a kuomah, "Zirtirtu Tha, chatuon hringna ka chang theina dingin ieng am thawng ka ta?" tiin a hung indon a. 19 Isun, "Ieng leia tha i mi ti? Tu khom tha an um nawh, Pathien chau naw chu. 20 Thupêkhai chu i hriet annawm – uire naw, tuol that naw, inru naw, khêlin mi hêk naw, i nu le pa chawimawi rawh-tihai hi" a ta. 21 Ama chun, "Chuong thil po po chu ka tleirawl laia inthokin ka zawm hlak" a ta. 22 Chu chu a hrietin Isun a kuomah "Kong khat i la bâk; i nei po po zor la, pasiehai sem rawh; chun, hung la, mi zui rawh" a ta. 23 Chu thu a hriet chun a lungngai ta hle a, mi hausa tak a ni si a. 24 Isun ama chu a en a, "Mi hausa ta dingin Pathien rama lùt a va harsa de aw! 25 Pathien rama mi hausa a lùt nêkin thim naa sanghawngsei lût thleng a ol lem si a" a ta. 26 A ngaithlatuhai chun, "Chuong a ni chun tu am sandam ni thei an ta?" an ta. 27 Ama chun, "Mihriem ta dinga thaw thei lo khom hi Pathien chun a thaw thei vong" a ta. 28 Peter chun, "Ngai ta, kan in le lo màksanin kan zui ta che a" a ta. 29 Isun, "Thu dik ka hril che hi, tu khom Pathien ram leia in dàm, nuhmei dâm, unau dâm, nu le pa dàm, nauhai dàm màksantu chun, 30 dam sûng huna ngei khom a nêka tam hmu ngei a tih, hun la hung tlung dinga chatuon hringna leh" a ta. 31 Sawm le pahnihai chu Isun a thuoi bing a, an kuomah, "Ngai ta u, Jerusalemah ei hang fe ding a nih; Mihriem Naupa chungchàng thu zawlneihai hmanga ziek po po kha a hung tlung kim ding a nih. 32 Jentêlhai kutah pêng an ta, nuisawng an ta, inzakum takin soisak an ta, chil sàkkhum an ta, vuong an ta, sukhlum an tih. 33 Chun, a ni thum niin tho nawk a tih" a ta. 34 A zirtirhai chun chu thil chu a ngaina hrim an hriet nawh. A umzie chu anni laka thup a na, a thil hril chu an man phàk nawh. 35 Jeriko khuo Isun a tlung tawmin mitdel pakhat hi lam sîrah kut dawin a lo inthung a. 36 Mipui fe ri a hriet chun iem a nih ti a'n don a. 37 "Nazaret Isu a hung a nih" tiin an hril a. 38 Ama chun, "Isu, Davida Naupa, mi lunginsiet rawh" tiin a khêk a. 39 A hmatawnga fehai chun an hal a, to dingin an hril a, sienkhom "David Naupa, mi lunginsiet rawh" tiin a khêk inring zuol sau a. 40 Isu chu a ngîr a, a kuoma hung thuoi dingin a hril a. 41 A kawl a hung tlung chun, "I chungah ieng am ka thawpèk che i nuom a?" a ta. Ama chun, "Lalpa, hmu thei ka nuom" a ta. 42 Isun a kuomah, "Hmu thei ta raw khai, i ringna hi i dampui a nih" a ta. 43 Chuongchun a hmu thei ta nghàl a, Pathien inpâk pei pumin Isu chu a zui ve tah a. Chu chu mipuiin an hmu chun Pathien an inpâk ve tah a.

Luke 19

1 Isu chun Jeriko khuo a lût a, a sùn pèl ding a na. 2 Chu khuoa chun mi pakhat a hming Zakai a um a, ama chu siekhon hotu, mi hausa tak a nih. 3 Isu chu mi ieng ang hrim am a nih ti hmu a nuom a, a dung a tawi si leiin mipui lai chun a hmu phàk naw a. 4 Chuongchun, Isu hungna ding lampuia chun a lo tlàn khal a, en dingin theichang kùngah a lawn a. 5 Chu hmun Isun a tlung chun a hang en a, "Zakai, hung tum vat rawh, voisun i inah ka tlung ding a nih" a ta. 6 Chuongchun a hung tum nghàl a, hlim takin ama chu a'n tlungtir a. 7 Chu chu mipuiin an hmu chun an rêngin, "Mi suol ina tlung dingin a lût ta saw!" tiin an chier a. 8 Zakai chu a ngîr a, Lalpa kuoma chun, "Ngai ta, Lalpa, tuta inthok chu ka sum zâtve pasiehai sem ka ta, tu thil khom indik lo taka ka lâkpêk chun a lêt liin rul ka tih" a ta. 9 Isun a kuomah, "Voisûn hi ina hin sandamna a hung tlung tah, ama khom Abraham naupa a ni si a. 10 Mihriem Naupa hi bohmanghai zonga sandam dinga hung a ni hrim a nih" a ta. 11 Chu thu chu an ngaithlàk laiin, Jerusalem an hnai ta lei le Pathien ram chu hung tlung nghal dinga mipuiin an ngai leiin hi tekhinthu hi a hril ta pei a. 12 "Muolkil mi tha pakhat chu a'n lal theina ding thu la ding le hung kîr nawk dingin ram hla takah a fe a. i 13 A fe tawmin a siehlaw sawmhai chu a ko a, rangkachak tangka sawmj seng a pêk a, an kuomah, 'Ka thang hmang sûngin hi hin lo sumdawng ro' a ta. 14 A khuo le tuihai chun ama chu an theida leiin, 'Hi pa hi kan lal dingin kan dit nawh' ti dingin palai an tir zui ve nghal a. 15 "Lalna thu chu laa a hung kîr nawkin a tangka pèk chu an sukpung zât indon dingin a siehlawhai chu a ko tawl a. 16 A hmasa tak chu a hung a, 'Pu, i rangkachak tangka kha a lèt sawmin a pung' a ta. 17 A pu chun, 'Ka siehlaw ditum, i thaw tha ie. Thil chîteah i ringum leiin khaw sawm chungah hotuah um rawh' a ta. 18 A dottu chun, 'Pu, i rangkachak tangka kha a lèt ngain a pung' a ta. 19 Ama chun, 'Nang khom khaw nga chungah hotuah um rawh' a ta. 20 "Siehlaw dang chu a hung a, 'Pu, hih, i rangkachak tangka kha, puona funin ka kol tha a. 21 Mi khir tak i ni leiin ka tì che a; i sie nawnaa khom i lâk hlak a, i tù nawnaa khom i sîk hlak si a" a ta. 22 "A pu chun, 'Siehlaw suol, i bau suok ngeiin thiem naw a'n chang che. Mi khir tak ka na, ka sie nawnaa khom ka lâk a, ka tù nawnaa khom ka sik hlak maw? 23 Chuong a ni sa chun ka tangka pèk che kha a pung leh ka'n khawm theina dingin ieng dinga sumdawngna hmunah siein i lo sukhlawk naw?' a ta. 24 Chun, a kawla ngîrhai kuoma chun, 'A rangkachak tangka kha lapêk unla, rangkachak tangka sawm neitu kuomah pe ro' a ta. 25 Anni chun, 'Pu, ama chun sawm a nei annawm' an ta]k. 26 Ka hril cheu hi, a nei taphot pe belsàng an ta, a nei naw chu a nei sun khom làkpêk nîng a tih. 27 Chun, hieng ka hmêlma, lal dinga mi dit nawtuhai hi hung thuoi unla, ka hma bula ngei that ro' a ta" tiin a hril tawl a. 28 Chuong thu a hril zo chun Jerusalem an pan tung a, hma a lo lawk a. 29 Oliv tlànga um Bethphage le Bethani khuo an tlung tawmin zirtirhai laia mi pahnih a tir a. 30 "Ei hma zawna khuoa son va fe unla, in va lût chun sabengtung tuoi inthlung, tu khom la chuongna ngai lo chu va hmung in ta, sût inla, hung kei ro. 31 Chun, tu khomin, 'Ieng dinga in sût?' an ti chun 'Lalpan a mamaw a nih' ti ro" a ta. 32 Chuongchun, a tirhai chu an fe a, an kuoma a hril ang ngeiin an va hmu a. 33 Sabengtung an sût lai chun a neituhaiin. "Sabengtung kha iem a ta in sût el a?" an ta. 34 Anni chun, "Lalpan a mamaw a nih" an ta. 35 Isu kuom an hung kei tlung chun sabengtung chunga chun an puonhai an pha a, Isu an inchuongtir a. 36 A fena lampuia chun an puonhai an pha pei a. 37 Jerusalem an tlung tawm hnai, Oliv tlàng an liem thlàk lai chun a thilmak thaw tam tak hmua zuitu mipui tam tak chun hlim tak le inring takin Pathien an inpàk a, 38 "Lalpa hminga lal hung chu A hamtha, 39 Mipui laia Farisai thenkhat chun Isu kuomah "Zirtirtu, i zirtirhai hi hal tawl rawh" an ta. 40 Ama chun, "Ka hril cheu hi, anni hi an to chun hieng lunghai bèk hi khêk suok an tih" a ta. 41 Jerusalem a tlung tawma khawpui a hmu chun a tâ khum a. 42 "Aw nang hin voisun dâm bêk hin muongna hung intluntu ding che hi hrie chu ni la aw! Nisienlakhom tuhin chu i hmu thei lo dinga thup a ni si. 43 I râlhaiin i vêla hnuoi kul siem a, sîr tina inthoka ruongchaiche thlàk khuma an dang chèp ni che chu a la hung tlung ding a nih. 44 I sûnga chêng i nauhai leh hnuoi dèngnain la hmang an ti cheu. I sûnga lung inthuo rêng rèng hlà nei naw ni hai; Pathienin a hung kan lai che i hriet naw leiin chuong chu i chungah a la hung tlung ding a nih" tiin. 45 Tempula chun a va lût a, thil zortuhai chu a hnot suok a, 46 an kuomah, " 'Ka in chu tongtaina in nîng a tih' ti ziek a na, nangni ruok chun suohmanghai pûkah in siem lem si a" a ta. 47 Ni tin Tempula chun a zirtir hlak a, thiempu lalhai, Dàn zirtirtuhai le vàntlâng hotuhai chun sukhlum dàn ding an zong zing a. 48 Nisienlakhom, mipuiin a thu an ngaithlàk nuom si leiin hang law ngaina rak an hriet si nawh.

Luke 20

1 Ni khat chu tempula Chanchin Tha hrila mihai a zirtir laiin thiempu lal hai, Dàn zirtirtu hai le upa hai chu an hung a, 2 "Tu thuin am hieng thil hi i thaw a na? Tuin am thu a pêk che, mi hril rawh" an ta. 3 Ama chun, "Kei khomin thu indon vèng ka ti cheu: 4 Johan baptisma kha vàna mi thu a ni mihriem thu? Mi hril ro" a ta. 5 Anni chu an inrawn a, "Vàna mi thu ei ti chun, 'Iem a ta a thu in awi nawh' mi tîng a ta, 6 hnuoia mi thu ei ti hlak chun mipuiin an inza leiin lungin an mi dêng el awm si a, Johan chu zawlnei ni ngeiah an pom tlat tawl si" an ta. 7 Chuongchun, "A tu thu am kan hriet nawh" an ta. 8 Isu khomin, "Kei khomin tu thuin am thil ka thaw hril bîk naw ning cheu" a ta. 9 Mipuihai chu tekhinthu a hril pei a: "Mi pakhatin grêp huon a siem a, huon enkoltuhai a'n sântir a, hun sawt tak ram danga thang dingin a fe a. 10 A lo huna chun a chan ai la dingin huon enkoltuhai kuomah a siehlaw a tir a. Nisienlakhom, huon enkoltuhai chun an lo vuok a, kut ruokin an inkìrtir a. 11 Siehlaw dang a tir nawk a, ama khom chu an lo vuok a, inzakum takin an soisak a, kut ruok bokin an inkìrtir a. 12 A siehlaw tir pathumna lem chu an lo inhliem a, huona inthokin an thè dok a. 13 "Grêp huon neitu chun, 'Ieng tin am thaw tâng ka ta? Ka naupa dit tak hi tir el ka tih; ama hi chu lo inzâ êm naw ni hai am' a ta. 14 Huon enkoltuhaiin an lo hmu chun, 'Hi pa hi ro hluotu ding chu a nih, that ei ta, a ro ei nei vong el ding a nih' an ta. 15 Chuongchun, grêp huona inthokin an hnuk suok a, an that a. 16 Grêp huon neitu chun anni rawi chu ieng tin am hung thaw tâng a ta? Hung a ta, huon enkoltu chu that a ta, grêp huon chu mi dang insàntir a tih" a ta. Ngâithlatuhai chun, "Chuong thil êm chu hung tlung lul naw raw se" an ta. 17 Amiruokchu, anni rawi chu a en a, "In bawltuhai lung hnawl kha, Chu ngei el chu a kil aLung tangkai tak a lo ni si"ti ziek hi ieng tina am a na? 18 Chu lung chunga tlu taphot chu koi dar vong an ta, a del ngat lem chu rawt nawi a tih" a ta. 19 Dàn zirtirtuhai le thiempu lalhai chun chu tekhinthu chu anni kawka a hril a nih ti an hriet leiin man nghal thei dàn kong an dap a, sienkhom vàntlâng mipui an ti si a. 20 Chuongchun, Lârsap rorêlna le thuneina hmaah an pèk theina ding remchâng an dap rân a, a tong suol pal man tumin enthlatu, mi indik anga inlang, an tir a. 21 Chuong enthlatuhai chun, "Zirtirtu, i thuhril le thu zirtir hi a'n dik ti kan hriet a, thlier bîk nei loin Pathien thu indik tak chu i zirtir hlak. 22 Kaisar kuomah sie kan chawi ding am kan chawi naw ding?"tiin an indon a. 23 An dâwp a nih ti a hriet leiin an kuomah, 24 "In tangkal chu mi hang inentir ro. Tu lim le tu hming am a chuong a?" a ta, anni chun "Kaisar" an ta. 25 Ama chun, "Kaisar thil chu Kaisar pe unla, Pathien thil chu Pathien pe ro" a ta. 26 Chuongchun, vàntlâng hmaa thu inhril awktir an tum chu an hlawsam a, a donna chu mak an ti hle a, an to ta chip a. 27 "Thonawkna a um nawh" ti pawl Sadukaihai laia thenkhat chu thu indon dingin Isu kuomah an hung a. 28 "Zirtirtu, Mosien, 'Tu khom nuhmei neiin nau nei si loin thi sien, a sang chun a nuhmei chu hluoin a u ta dingin chî a thlapèk ding a nih' ti a mi ziekpêk a. 29 Aw leh, unau pasal pasari an um a, a upa tak chun nuhmei a nei a, nau nei loin a thi a; 30 a pahnihna chun a nuhmei chu a hluo a, 31 pathumna khomin; chuong ang chun unau pasari chun an hluo seng a, nau nei loin an thi pei a. 32 Chu hnung chun nuhmei khom chu a thi ve ta a. 33 Unau pasari chun nuhmeiin an nei seng leiin thonawkna niah chu nu chu a tu tak nuhmei am ni tâng a ta?" tiin an indon a. 34 Isun an kuomah, "Tu lai mihai hi inneiin nuhmei pasalin an insiem hlak, 35 khawvel la hung um dinga thonawknaa thang tlâka ruothai ruok chu nuhmei pasal innei ta naw ni hai. 36 Thi khom thi thei ta nawng an tih, vàntirkohai ang an ni ding a ni leiin. Anni chu thonawk nau, Pathien nauhai an nih. 37 Mithi keithoa an um thu chu Mosie khomin chîmbuk thu a zieknaah a hril lang a, Lalpa chu "Abraham Pathien, Isak Pathien, Jakob Pathien" tiin a hril kha. 38 Ama chu mithihai Pathien a ni naw a, mihringhai Pathien a ni lem; ama ta ding chun mihring vong an nih" a ta. 39 Dàn zirtirtu thenkhat chun, "Zirtirtu, i hril indik khop el" an lo ti bok a. 40 Thu dang hrim an indon ngam ta nawh. 41 Chun, Isun an kuomah, "Krista chu Davida naupa ieng leia an ti am a na? 42 Inpâkna Hla buah Davida ngeiin, 43 'Lalpa chun ka Lalpa kuomah Ka chang tieng inthung rawh, I hmêlmahai i ke sirsanah, Ka siem hmakhat chun'a ti kha. 44 Davidan ama chu 'Lalpa' a ti si chun, ieng tin am a naupa ni thei a ta?" a ta. 45 Mipuiin an ngaithlâk zing lai chun a zirtirhai kuomah, "Dàn zirtirtuhai lakah fimkhur ro. 46 Anni chun korfuol hâka lèng an chìng a, bazaar hmuna mi chibai bûk an ngaina a, sunagogah thungna hmatawng le ruoi thènaah thungna tha tak an ngiet hlak. 47 Hmeithaihai nei fa tlarantu an na, a sieli khaw mawiah sawt tak tak an tongtai hlak. Hienghai hremna tuor ding hi sà zuol a tih" a ta.

Luke 21

1 A hang dàk a, thawlawm bawma mi hausahai thawlawm thlàk chu Isun a thlìr a. 2 Hmeithai rethei tak pakhatin dâr tangka pahnih a hung thlàk ve chu a hmu a. 3 Chuongchun, "Thu dik ka hril cheu hi, hi hmeithai rethei hin mi dang po nêk khan a thlâk rawn lem a nih. 4 Mi danghai chun an nei chuong liema mi thawlawmah an thlâk a, ama ruok chun rethei hlê siin a fâk sik Pathien ta dingin a thlâk vong a nih" a ta. 5 A zirtir thenkhatin lung mawi tak tak le Pathien kuoma an thilpekhaia tempul an chei mawizie thu an hril a. 6 Isu ruok chun, "Hieng lung rem inthuohai hi sukchim vonga màksan a ni hun a la tlung ding a nih" a ta. 7 Anni chun, "Zirtirtu, chuong thilhai chu ieng tik am hung tlung a ta? A hung tlung ding ti inchikna ieng am um a ta? " tiin an indon a. 8 Ama chun, "Hlêma in um nawna dingin fimkhur ro. Mi tam tak ka hming sâlin hung an ta, 'Keima hi ka nih' dàm, 'A hun a tlung ding a ni tah' dàm hung tîng an tih. An hnung lo zui naw ro. 9 Indo thu le buoi thuthang in hriet pha, thlaphâng naw ro; chuong thil chu a tlung hmasa zet ding a ni hrim a, tawpna ruok chu tlung nghàl naw nih. 10 Hnam hrang hrang indo an ta, ram hrang hrang indo bok an tih. 11 Lir nasa takin inhnîng a ta, hmun hrang hrangah tàm tlàng a ta, hripui inlêng a ta, vàna inthokin thil tium le inchikna mak tak tak inlang bok a tih. 12 Chuong thilhai chu a tlung hmain man an ti cheu a, sunagoga dàm thuoiin, lung inah dàm khumin, an sukdùdà ding cheu a nih. Ka hming leiin lalhai le lârsaphai hmaah thuoi an ti cheu. 13 Ka thu hretuhai in nizie tar langna remchang nîng in tih. 14 Donna ding in ngaituo lawk a ngai nawh ti hre hmasa ro; 15 in khingpuihai tluk lo ding le sêl thei lo ding varna le don thiemna keiin ka pêk ding cheu a nih. 16 In nu le pa hai, in unau hai, in laichin hai le ruol hai chen khomin inmantir an ti cheu a; a then lem chu sukhlum an ti cheu. 17 Ka hming leiin mi tin theida nîng in tih. 18 Nisienlakhom, in sam zâi khat khom bohmang naw nih. 19 Sel takin ngîr tlat unla, chuongchun him in tih. 20 "Sipaiin Jerusalem an inhuol inhmu pha chu a siet a hnai tah ti hre ro. 21 Chu huna chun Judai rama umhai chu tlângramah tlân raw hai se; khawpui sûnga umhai chun suoksan hai sien, thingtlânga umhai chu a sûngah lût naw raw hai se. 22 Chuong nihai chu hremna ni, hril lawka lo um tahai tlung kim ni a ni si a. 23 Chuong nihai chu nau pai inrik le pom lai naute neihai ta ding chun a va râpthlàk awm ngei de aw! A ram pumah mangangna râpthlàk le hi chi-hnamhai chunga hin lungsenna hung tlung a tih. 24 Kawlhnâma sâm thlûk nîng an ta, Jentêlhai ram hmun tinah sala thuoi darin um an ta; Jentêl hun a tawp hmâ khat Jerusalem chu Jentêlhai sir dein um a tih. 25 "Chun, nisa dàm, thla dàm le arasi haia dàm inchikna mak tak hung inlang a tih. Hnuoia khom tuifinriet infawn hlup hlup le inrûm hum hum an hrietin hnam tin chu thlaphângin chî-ài an tih. 26 Vàn thilthawtheinahai chu sukhnîngin um a ta, khawvela thil tium hung tlung ding chu suongtuoin, mihai chu thlabârin thidang an tih. 27 Chu huna chun Mihriem Naupa hi thilthawtheina le ropuina nasa tak leh sûma a hung hmûng in tih. 28 Chuong thil a hung tlung chun ngîr changin dâk suok ro, in intlanna ni chu a hung hnai ta si a" a ta. 29 An kuomah hi tekhinthu khom hi a hril a. "Theichang kùng le thing danghai khom hi en ro. 30 An hung inder inhmu chun nipui a hnai tah ti in hriet hlak. 31 Chuong ang bokin nangni khomin chuong thil po po hung tlung in hmu hun chun Pathien ram chu a hung hnai tah ti hre el ro. 32 Thu dik ka hril cheu hi, chuong thil po po a hung tlung kim hma chun tuta suonhaim hi bohmang naw top an tih. 33 Hnuoi le vàn bohmang an ta, ka thu ruok chu bohmang ngai naw nih. 34 "Nuom tawlna dâm, zu inruina dàm le damsûng khawsak lungkhamna dàma in lungril a hluo sip nawna ding le chânga awk anga a hung nang phut nawna ding cheuin fimkhur ro. 35 Hnuoia chênghai po po chungah chuong ang chun a hung tlung ding a ni si a. 36 Chuong thil hung tlung dinghai po po chu tuor muolsuo thei ding le Mihriem Naupa hmaa ngîr thei dingin ieng lai khom ngaivenin tongtai ro" a ta. 37 Ni tinin tempulah Isun a zirtir a, zàna ruok chu Oliv tlàng an tia chun a riek hlak. 38 A thu ngâithla dingin zîng hmângin tempulah mipui an fe khawm hlak.

Luke 22

1 Chol thang lo Bei Kùt, Fekan Kùt an ti chu a hung hnai tah a. 2 Thiempu lalhai le Dàn zirtirtuhai chun Isu an sukhlum dàn ding lampui an dap zing a, mipui an ti bok si a. 3 Sawmpahnihai laia tiem ve Juda, Iskariot an ti sûnga chun Setan a lût a, 4 chuongchun a va fe a, thiempu lalhai le vêngtu sipai hotuhai chu Isu an man dàn ding a va hrilpui a. 5 Anni chu an lawm hle a, poisa pêk an intiem a. 6 Ama khom chun a remti a, mipui um naw laia inmantir dàn ding remchang a zong ta ràn a. 7 Fekân Kùt nipui ni, beramte an that ni chu a hung tlung a. 8 Peter le Johan hai chu a tir a, "Fekân Kùt ruoi ei kîl ding va buotsai ro" a ta. 9 Anni chun, "Khaw lai am va buotsai inlang i nuom a?" tiin an indon a. 10 Ama chun, "Khawpuiah in va lùt pha leh pa pakhat, bêla tui chawi intuokpui in ta, zui un la, a lùtna inah zui lùt ro 11 In neitu kuoma chun, 'Zirtirtun, ka zirtirhai le Fekân Kùt ruoi kan kîlna ding mikhuol pindan chu a khaw hi'm a na?' a tih va ti ro. 12 Ama chun pindan chunghnung lien tak, hmangruo iengkim umna chu kawkhmûng a ti cheu a, chu taka chun ruoi chu buotsai ro" a ta. 13 Chuongchun an fe a, Isun a hril ang ngei chun an va hmu a, Fekân Kùt ruoi chu an buotsai a. 14 A fâk hun a hung tlung chun, Isu le a zirtirhai chun dawkàn an kîl thap a. 15 A zirtirhai kuoma chun, "Ka tuor hmain hi Fekân Kùt ruoi hi kìlpui cheu ka nuom takzet a nih. 16 Ka hril cheu hi, Pathien rama a tak ngeia a tlung hmâ khat chu kût ruoi hi fa nawk ta ngai naw ning" a ta. 17 Chun, no chu a lâk a, lawmthu a hril zoin, "Hi hi la unla, insem ro. 18 Ka hril cheu hi, Pathien rama a tak taka a hung tlung hmâ khat chu grêp rà tui hi dawn nawk ta ngai naw ning" a ta. 19 Chun, bei khom chu a lâk a, lawmthu a hril zoin a khoi a, an kuomah a pêk a, "Hi hi ka taksa, in ta dinga pèk chu a nih; in mi hriet zingna sikin hieng ang hin thaw hlak ro" a ta. 20 Zànbu an fâk khop chun chuong ang bokin no chu a lâk a, "Hi uoiin hi ka thisen thuthlung thar, in ta dinga pèk suok chu a nih. 21 A mi'n mantirtu ding chun hi dawkàn hi a kîl ve ta zing a nih. 22 Mihriem Naupa hi Pathien ruot angin a fè ding a na, sienkhom a'n mantirtu ding chung chu a rik ie!" a ta. 23 Anni lai chuong ang thaw ding chu a tu tak am nîng a ta tiin an indon kuol a. 24 Anni lai tu am ropui taka ngai nîng a ta ti thuah insêlna a hung suok a. 25 Isun an kuomah, "Jentêl lalhai chu an insukngêng êm êm a, an chunga thuneituhai chun 'Somdawltu' ti hming dâm an inpêk hiel a. 26 Nisienlakhom, nangni lai ruok chu chuong ang ding chu a ni nawh. Nangni laia ropui tak chu a chîn tak angin um sien, a hotu tak chu rongbawltu angin um lem raw se. 27 Tu am a ropui lem- buthlèng kîltu am rongbawltu? Buthlèng kîltu chu a ni naw am a nih? Nisienlakhom, kei ruok chu nangni laia rongbawltu angin ka um hi. 28 "Harsatna ka tuok sûng po nangnin in mi umpui a. 29 Ka Pain ram a mi ruotpêk ang bokin kei khomin ram ka ruotpêk chêu a, 30 chuongchun ka rama chun ka dawkànah fain la dawn vêng in ta, lalthungphaa thungin Israel hnam sawmpahnihai ro la rêlpêk in tih. 31 "Simon, Simon, Setanin a nuom nuoma bu rela rel ding cheuin a mi hni a, 32 sienkhom Simon, i ringna a'n phet nawna dingin ka tongtaipêk che. Chun, keima tieng i hung ngha kîr nawk pha leh i unauhai hi suknghet rawh" a ta. 33 Peter chun, "Lalpa, lung ina intâng le thìna tuok ding khom ni lang zui che ka'n huom" a ta. 34 Isun a kuomah, "Peter, ka hril che hi, voizan ar khuong hmain 'Ama chu ka hriet nawh' tiin nangin voi thum mi'n phat i tih" a ta. 35 Chun, "Tangka ip dâm, mansa dâm le pheikhok dâm chawi loa ka tir suok chêu khan tlàksam in nei hrim am?" tiin a'n don a. Anni chun, "Kan nei dêr nawh" an ta. 36 Ama chun, "Tu ruok hin chu tangka ip nei chun chawi sien la, mansa khom pai raw se; kawlhnâm nei naw chun a puon zor sien, inchaw raw se. 37 Ka hril cheu hi. 'Ama chu mi suolhai lai an tiem sa tah' ti ziek kha ka chungah a tlung ngei ding a nih. A nih, ka chungthu an ziek kha a tlung kim mèk a nih" a ta. 38 Anni chun, "Lalpa, en ta, kawlhnâm pahni chu a um hi" an ta. Ama chun, "A huntawk" a ta. 39 Chun, Isu chu a suok a, a thaw dàn pangngaiin Oliv tlânga chun a fe a, a zirtirhai chun an zui a. 40 A hmun a va tlung chun an kuomah, "Thlemnaa in lût nawna dingin tongtai ro" a ta. 41 Lunga dêng phâka hlaah a va fe a, dingthathuonin a tongtai a. 42 "Pa, rem i ti chun hi no hi mi la sonpêk rawh, sienkhom keima thu ni loin nangma thu ni lem raw se" a ta. 43 Vàna inthokin vàntirko pakhat a hung inlang a, ama chu a sukhràt a. 44 A thlâ a phâng leiin thahnem ngai nawk zuolin a tongtai a, a thlan chu hnuoia thisen far thluk thluk angin a far a. n 45 A tongtai zo chun a zirtirhai kuomah a hung a, lungngai châua lo inlusu chu a hung hmu a, an kuomah 46 "Ieng dinga in in zing am? Tho unla, thlemnaa in lût nawna dingin tongtai ro" a ta. 47 Chuonga a hril lai zing chun mipui an hung tlung a, Sawmpahnihai laia mi Juda an ti chun hma a hung thuoi a, fawp tumin Isu a hung pan a. 48 Nisienlakhom, Isun a kuomah, "Juda, Mihriem Naupa hi fawpin i'n mantir ding a ni maw?" a ta. 49 Isu zuituhaiin thil hung tlung ding an hmu chun, "Lalpa, kawlhnâm kan hmang el ta di'm a nih?" an ta. 50 Anni laia pakhat chun thiempu laltak suok chu a sât a, a chang tieng nakawr a fikpêk a. 51 Isun, " Khai, khai! A huntawk" a ta, chu pa nakawr chu a them a, a sukdam tah a. 52 A man dinga hung inthok thiempu lal hai, tempul pulis hotu hai le upa hai kuoma chun, "Hel hmang man ding ang elin kawlhnâm le hmoltum leh in hung inthok a ni maw? 53 Ni tin tempulah nangni lai ka um hlak a, in mi man bok si nawh. Sienkhom tu hi nangni chêt hun a nih, thim lal chêt hun chu" a ta. 54 Chuongchun an man a, Thiempu laltak inah an thuoi a. Peterin hla fea inthokin a zui a. 55 Chun, in inhuon sûng tuol lailunga chun mei sèmin an inthung khawm a, Peter khom chu anni lai inthungin mei chu a awi ve a. 56 Mei awia a'n thung lai chu siehlaw nunghàkin hnâi deuah a en vang vang a, "Hi pa hi a kuoma um ve kha a ni hi" a ta. 57 Peter chun, "Nuhmei, ama chu ka hriet ngai nawh" tiin a'n phat a. 58 Chu hnung ela chun mi dangin a hung hmu a, "Nang khom hi anni laia thang i nih" a ta. Peter ruok chun, "Mihriem, ka ni awzawng nawh" a ta. 59 Dârkâr khat vel hnunga chun mi dangin, "Hi pâ hi a kuoma thang vê kha a ni chieng el, Galili mi a ni si a" a ta. 60 Peter chun, "Mihriem i thu hril umzie chu ka hriet dèr nawh" a ta. A hril lai mèk chun âr a hung khuong a. 61 Lalpa chu a hung ngha a, Peter chu tlûn takin a hung en a. Peter chun, 'Voizàn âr khuong hmain voi thum mi'n phat i tih" Lalpan a kuoma a ti kha a hriet suok a. 62 Tuolah a suok a, a tap ta zawi zawi a. o 63 Isu vêngtuhai chun nuizat siemnan an hmang a, an vuok a. 64 A mit an tuompèk a, "Tuin am a vuok che, hril thei rawh" an ta. 65 Tong tha lo tinrêngin an biek a. 66 Zîng khuo a hung var chun vàntlâng upa hai, thiempu lal hai le Dàn zirtirtuhai chu an inrawn khawm a, Isu chu Sanhedrina chun an thuoi a. 67 "Krista chu i ni le ni naw mi hril rawh" an ta. Ama chun, "Hril lang cheu khom, awi chuong naw ti niu; 68 thu indon chèu lang khom mi hril naw ti niu. p 69 Nisienlakhom, tuta inthok chun Mihriem Naupa hi Pathien ropui chang tieng inthung tâng a tih" a ta. 70 An rêngin, "Chu, nang hi Pathien Naupa i ni maw?" an ta. Ama chun "Ka ni thu in hril hi in hril indik hrim a nih" a ta 71 Anni chun "Hrepuitu dang tu am ei la ngâi rop a? Eini ngeiin a bàu suok ei hriet tah annawm" an ta.

Luke 23

1 Chun, pungkhawmhai chu an rêngin an tho a, Isu chu Pilat kuomah an thuoi a. 2 "Hi pa hin kan chihai a thuoi khawlo ti kan hmu a, Kaisar kuoma siechawi a khap a, Lal Mesia chu niin a'n sâl bok ti kan hriet" tiin an hèk a. 3 Pilat chun, "Judahai lal i ni maw?" a ta. Ama chun, "I ti annawm" tiin a don a. 4 Pilat chun thiempu lalhai le mipuihai kuomah, "Hi pa hi a thiem nawna ka hmu nawh" a ta. 5 Nisienlakhom anni chun, "A zirtirnain Judai ram po poah mipui a chok tho a. Galili ramah a tan a, hieng lai chen khom a hung dèng phàk tah a ni hi" tiin an thang tlat a. 6 Chu thu chu Pilatin a hrietin Galili mi a ni le ni naw thu a'n don a. 7 Heroda biela mi a nih ti a hriet chun Heroda kuomah a thon a, ama chu Jerusalema a lo um lai a ni nghê nghe a. 8 Herodan Isu a hmu chun a lawm hle a, a chanchin a hriet rop hlak leiin a hmu chàkna a sawt ta rêng a; a thilmak thaw iemani bêk hmu a beisei bok a. 9 Thu tam tak a'n don a, sienkhom bàu khat khomin a sàng nawh. 10 Thiempu lalhai le Dàn zirtirtuhai chu an ngîr ve a, inzom zatin an hêk a. 11 Heroda le a vêngtu sipaihai chun hmusit taka soisakin, nuizat siemnan an hmang a, lal korfuol mawi tak inhâktirin, Pilat kuom tieng an thon kîr a. 12 Pilat le Heroda chu kha hma khan inhmêlma hle hai sien khom hi ni hin an inngei nawk tah a nih. 13 Pilat chun thiempu lalhai, Dàn zirtirtuhai le vàntlâng mipuihai chu a ko khawm a. 14 An kuoma chun, "Hi pa hi hel dinga mihai infuiportuah in hêk a, nangni hmaa ngei thu ka'n don chieng a, sienkhom in hêkna thuah thil poi ieng khom a tawk ka hmu nawh. 15 Heroda khomin a hmu naw leiin ka kuomah a hung thon nawk a ni hi. In hmu ang hrimin, thìna khop ieng khom a thaw nawh. 16 Chuleiin, invuoktir ka ta, insuo nawk el ka tih" a ta. 17 Chun, Fekân Kùt laiin tâng pakhat anni ta dingin a'n suopèk hlak a. q 18 Chuongchun a ruolin, "Hi pa hi sukbohmang la, Barabas kha mi'n suopêk rawh" tiin inring takin an khêk a. 19 Barabas chu khawpuia helna lei le tuolthat leia lung ina intâng a nih. 20 Pilat chun Isu chu insuo a nuom a, an kuomah thu a hril nawk a. 21 Sienkhom anni chun, "Hemde rawh, hemde rawh" tiin an khêk thuop thuop a. 22 Pilat chun a voi thumnaah "Ieng leiin am? Iem a thawsuol a? Thìna khop poi a tawk ka hmu nawh. Invuoktir ka ta, ka'n suo el ding a nih" a ti nawk a. 23 Anni chun inring taka khêkin, kraws-a hemde dingin an ngèn lui tlat a, an rawl chun a vauh zàm tah a. 24 An ngèn ang chun Pilatin thu a sukthlùk a. r 25 Helna le tuolthat leia lung ina intâng an hnì pa kha a'n suo a, Isu ruok chu an nuom nuoma thaw dingin a pèk suok tah a. 26 Chuonga an thuoi hmang lai chun Simon, Kurini khaw mi, tlângrama inthoka hung chu kraws putpui dingin an man a, Isu hnungah an inputtir a. 27 Mipui tam tak le nuhmei ruol, lungse taka tap taphai chun an zui dul dul a. 28 Isu chu anni tieng a ngha a, "Jerusalem nuhai, mi tà naw ro, nangni le in nauhai ta dingin tap lem ro. 29 Ngai ta u, 'Nuhmei ching, sûla nau pai ngai lo le nauin an nene an nèk ngai lo chu an hamtha' in ti hun a la hung tlung ding a nih. 30 Chu huna chun mihaiin tlâng kuomah 'Mi del rawh' tîng an ta, muol kuomah 'Mi'n khum rawh' ti bok an tih. 31 Thing hring lai hman chuonga an thaw si chun thing a tawl pha lem chu ieng tin topin am an la thaw ding maw!" a ta. 32 Sukhlum dingin mi dang, mi suol pahni ama ruolin an thuoi ve a. 33 'Lu Ru' an ti hmun an tlung a; chu taka chun kraws-ah an hemde a; mi suolhai khom chu a chang tieng pakhat, a voi tieng pakhat, an hemde bok a. 34 [Isun, "Pa, anni hi ngaidam rawh, an thilthaw hi an hriet naw a ni hi" a ta]s A silfènhai chu thum vawrin an insem a. 35 Mipui chun ngìrin an thlìr a. Juda hotuhai chun nuisawin, "Mi dang hman a sukdam hlak a, Pathien mi ruot, Krista chu a ni takzet chun ama khom insukdam raw se" tiin an esêl a. 36 Sipaihai khom chun an nuisaw a, a kuomah hungin uoiin thûr an pêk a, 37 "Judahai lal i ni takzet chun nang le nang insukdam ta la" an ta. 38 A chunga chun HI MI HI JUDAHAI LAL A NIH ti ziekt an târ a. 39 An hemde ve mi suol pakhat chun a hrâng khum a, "Krista chu i ni naw'm a ni? Insukdam la, keini khom mi sukdam ta la" a ta. 40 Nisienlakhom pakhat chun a hal a, " Pathien meu khom i ti naw maw, thuhmun zingin an hrem che hi? 41 Eini pahni hi chu hrem awm hrim ei na, ei thilthaw man ei hmu a ni hi; hi pa ruok hin chu ieng khom a suksuol nawh" a ta. 42 Chu zoah, "Isu, i ram i tlung pha mi hre zing rawh aw" a ta. 43 Isu chun a kuomah, "Voisun hin thu dik ka hril che hi, ka kuomah paradis-ah um vèng i tih" a ta. 44 Sùn dâr sawmpahni vela inthoka chawhnung dâr thum chenin khawvel a hung inthim ta vong a; 45 nisain var a'n suo naw a, tempul puonzàr chu a laiah a'n thlêr suok a. 46 Isu chu rawl inring takin a khêk a, "Pa, i kutah ka thlarau ka'n koltir" a ta. Chu chu a hril zoin a hnuk a chat tah a. 47 Sipai zahotuin thil umzie a hmu chun, "Hi pa hi matheiloin mi indik tak a ni phot el" a ta, Pathien a'n pâk a. 48 Chu thil chu thlïra mipui hung inkhawmhaiin thil hung tlung an hmu chun awm inchumin in tieng an inlawi tawl tah a. 49 A hmêlhriethai ruok chu hla feah an ngîr zing a, Galili rama inthoka ama zuitu nuhmeihai le chun chuong thil chu an thlîr a. 50 Chun, mi pakhat a hming Josefa, Sanhedrina Kansil member pakhat, mi tha tak le indik tak a um a. 51 Ama chun an rorêl le an thilthaw chu a remtipui naw hrim a. Judahai khuo Arimathaia um a na, Pathien ram beisei ve hlaktu a ni bok. 52 Ama chu Pilat kuomah a fe a, Isu ruong a va hni a. 53 Chun, a lâk thlàk a, puon zâi inhmiin a tuom a, tu khom la zàl ngai nawna lung ker thlànah chun a'n zâl a. 54 Chu ni chu Inbuotsaina ni a na, Judahai Sabat chu a'n tan vàng vâng ta si a. 55 Galili rama inthoka hung zuitu nuhmeihai khom chun an zui ve pei a, thlàn le a ruong an inzâl dàn chu an hmu a. 56 Chun, in tieng an kìr a, rimtui le hriek rimtuihai chu an buotsai a. Dàn thupêk chu zawmin Sabat ni chu an chawl a.

Luke 24

1 Chawlkâr ni hmasa taku zing hmângin nuhmeihai chun rimtui an buotsaihai chu chawiin thlàna chun an va fe a. 2 Thlàn khàr lung chu inhlum sonin an hmu a, 3 an zuk lût chun Lalpa Isu ruong chu an hmu ta naw a. 4 Chuonga hrilhai taka an um lai chun mi pahni, kawlphê anga tle puon vâr taka inthuom hi an bulah an hung ngìr a. 5 An ti èm leiin bawka hnuoi sikin an kûn tlat a. Chuonghai chun an kuomah, "Ieng dinga mithi lai a dam lai in zong am? 6 Hi taka hin a um ta nawh, a tho nawk tah. Galili rama a um laia in kuoma a hril kha in hriet zing naw a ni? 7 'Mihriem Naupa hi mi suolhai kuta inmantir nîng a ta, kraws-ah hemdèng an ta, ni thumnaah a tho nawk ding a nih' a ti hlak kha" an ta. 8 Chuongchun, a thu hril chu an hriet suok nawk tah a. 9 Thlàna inthoka an hung kîr chun zirtir sawmpakhat le mi danghai kuomah chuong thu chu an hril a. 10 Chuong ang thu, tirkohai kuoma hung hriltuhai chu Mari Magdalin hai, Joana hai, Jakob nu Mari le anni le fe ve nuhmei thenkhathai chu an nih. 11 Nisienlakhom, an thu chu barah an lo khonpêk naw a, an awipêk bok nawh. 12 Peter ruok chu a tho a, thlàn tieng chun a tlân a, thlàn chu kûnin a zuk bi a, puon zâi inhmi chauh chu a hmu a; chuongchun, thil umzie chu maktiin in tieng a kîr nawk tah a. v 13 Chu ni tak chun anni laia mi pahni chu Emmau khuo panin an suok a, chu khuo chu Jerusalema inthoka kilometer sawmpakhat vêla hlâ a nih. 14 Thil hung tlung po po chanchin chu hrilin an titi malam pei a. 15 Chuonga an titi lai chun ama Isu ngei chun a hung hnai a, a'n tlonpui a; 16 nisienlakhom, a hmêl an hriet thei nawna dingin an mit a sukvai a. 17 An kuoma chun, "Lawn puma in hril kha ieng thu am an ta leh?" a ta, anni chu ngui takin an ngìr a. 18 Chun, a hming Kleopa chun a don a, "Jerusalem sir sia tu lai chanchin hre naw chu nang chauh hi nîng i tih!" a ta. 19 Ama chun, "Ieng thu am ie?" a ta. Anni chun, "Nazaret Isu, Pathien le mi po po mithmua thua leh thilthawa zawlnei ropui tak chanchin, 20 thiempu lalhai le kan rorèltuhaiin sukhlum dinga an pêk, kraws-a an hemde tah thu kha tie. 21 Keini hlakin ama chu Israel intlantu ni dinga kan lo beisei kha a na. Chu el khom chu ni loin, voisun hi chuong thil a tlunga inthoka a ni thumna a ni dêr tah. 22 Chun, keini pawla nuhmei thenkhat khom voi tuk zingkâr khan thlànah an va fe a, a ruong an va hmu naw a; 23 Pathien vàntirko inlâr an hmu a, anni chun a hring nawk tah tih dâm an lo hril thu an hung hril a, lung an sukthawng rak a. 24 Keini laia thenkhat khom a thlànah an va fe a, nuhmeihai hril ang chie khan thil an va hmu a, sienkhom ama chu an hmu bìk chuong nawh" an ta. 25 Ama chun an kuomah, "Mi invêt ruolhai, zawlneihai thuhril tinrêng awi konga chawlolhai! 26 Kristan chuong thil chu tuorin a ropuinaah a lût ding a ni hrim an nawm a nih?" a ta. 27 Chuongchun, Mosiea inthoka tanin zawlnei po poin Pathien Lekha thua a chanchin an ziekhai chu a hrilfie tawl a. 28 An fèna ding khuo chu an tlung ding a ni ta a, Isu chu fe pei tum angin a um a. 29 Anni chun, "Kan kuomah riek ve el ta la, khuo khom an hnu ta a, nisa khom a tla ding an ta hi" tiin an thlo a. Chuongchun, an kuoma riek dingin a lût a. 30 Zànbu an hang ot tlàng a, bei chu a lâk a, lawmthu a hril a, a khoi a, an kuomah a sem a. 31 An mit chu a hung inhong a, a hmêl chu an hriet tah a, ama hlak chu an hmuhoiah a bo ta dai el a. 32 Anni chun, "Lampuia a mi biek laia Pathien Lekha thuhai a mi hrilfie khan ei lungril a har huoi huoi hrim a ni kha" an ta. 33 Chuongchun an tho a, Jerusalem tieng inhmaw takin an kîr nawk nghàl a, sawmpakhathai le an ruolhai um khawm chu an hang hmu a. 34 "Lalpa chu a tho nawk ta ngei a, Simon kuoma khom a'n lâr annawm" an lo ta. 35 Anni khom chun lampuia thil tlung le bei a khoi a, a hmêl an hung hriet takzie thu dàm chu an hril ve a. 36 Chuong thu chu an hril laiin Isu ngei chu anni lai a hung ngìr a, an kuomah "Thlamuongna in chungah um raw se" a ta. 37 An ti a, an mit a âr inta zâk el a, thlarau hmuah an inngai hiel a. 38 Ama chun, "Iem a ta chuong lawma in ti chu? Iem a ta in lungril a buoi ? 39 Ka kut hai, ka kepha hai hi en ro, keima ngei kha ka ni annawm. Mi them unla, en ro; kei in mi hmu ang hin thlarauin rù le châng le taksa a nei nawh" a ta. 40 Chu chu a hril zoin a kut hai, a kepha hai chu a'n entir tawl a. 41 Lawm taluo, sienkhom makti le hang awi el harsa an ti zing lai chun aman, "Hi taka hin fâk ding in nei am?" a ta. 42 Nga em hmin tlin khat an pêk a, 43 a lâk a, an hmaa chun a fâk a. 44 Chun, an kuomah, "Nangni kuoma ka chêng lai khan, Mosie Dànbua hai, Zawlnei lekhabua hai le Sam bua hai ka chanchin an ziek taphot chu a hung tlung kim ding thu ka hril hlak cheu kha" a ta. 45 Chuongchun, Pathien lekha thu hre thiem thei dingin an lungril a hongpêk a. 46 An kuoma chun, "Hieng hi a nih zieka um chu: Krista chun a tuor ngei ding a na, ni thum niin mithi laia inthokin tho nawk a ta, 47 simna le suol ngaidamna thu chu Jerusalema inthoka intanin hnam tin kuomah ama hminga hril dar nîng a tih, ti hi. 48 Hieng thilhai hi a hrepuituhai in nih. 49 Ngai ta u, Pa thil tiem chu in chungah ka hung tir ding a nih. 50 Chung tienga inthoka thilthawtheinaa inthuom in ni hmâ khat chu khawpuia hin um zing ro" a ta. 51 Chun, Bethani khawhnawm chen anni chu a thuoi a, bân a phar a, mal a sawm tawl a. 52 Chuonga mal a sawm lai chun anni chu a'n thla a, vàna thuoi tungin a um tah a. 53 Chuongchun an chawibiek a, lawm êm êmin Jerusalem tieng an kîr nawk a; tempula chun Pathien inpâkin an um rop hlak.

John 1

1 A tirin Thu chu a um, Thu chu Pathien kuomah a um, Thu chu Pathien a nih. 2 Ama chu a tîra inthokin Pathien kuomah a um. 3 Iengkim ama hmangaa siem a nih; thilsiem po po hi ama hmanga siem naw hrim a um nawh. 4 Amaa chun hringna a um; chu hringna chu mihriemhai var a nih. 5 Var chu inthim lai a hung var a, sienkhom inthimin a ngam nawh. b 6 Pathien mi tir pakhat a um a, a hming chu Johan a nih. 7 Ama chu var thu inhriettir dingin a hung a, ama hmanga mi po poin an ring theina dingin. 8 Ama chu var chu a ni nawh, var thu inhriettir dinga hung a ni lem. 9 Var tak tak, mi tin sukvartu chu khawvelah a hung ta zing a nih. 10 Ama chu khawvela um tah le ama hmanga khawvel hung um ni sienkhom khawvelin ama chu a hriet si nawh. 11 Ama rama ngei a hung a, a mihaiin an lo lawm si nawh. 12 Nisienlakhom, ama lawmtu le a hming ringtu taphot chu Pathien nau ni theina a pêk. 13 Chuonghai chu chi inthla dàn pangngaia insieng ni loin, tisa ditzawng le pasal ditzawnga insieng khom ni bok loin, Pathiena inthoka insieng an ni lem. 14 Thu chu taksainc a hung inchang a, eini lai a hung chèng a, a ropuizie khom ei hmuh, lunginsietna le thutaka sip, Pa Naupa nei sun ropuina chu. 15 A chanchin chu Johanin khèkpuiin, "Ka hnunga mi hung zuitu ding ka ti khan a mi lekhêl tah a, ka hmaah a um ta zing a nih tia ka hril kha ama hi a nih" tiin a'n hriettir a. 16 A famkimnaa inthoka ei dong seng chu lunginsietna ngot lunginsietna ngot a nih. 17 Dàn chu Mosie hmanga pèk a na, lunginsietna le thutak ruok chu Isu Krista zàra hung tlung a nih. 18 Tu khomin Pathien an hmu ngai nawh, Pa ângsûnga chêng Pathien Naupa nei sun chu a chanchin inhriettirtu a nih. 19 Ama chu tu am a nih ti indon dingin Jerusalema Judahai chun thiempuhai le Levi chia mihai chu Johan kuomah an tir a. 20 Johan chun tlang takin, "Krista chu ka ni nawh" tiin a lo inpuong a. 21 "An leh tu am i ni leh ? Elija i ni?" an ta. "Ka ni nawh" tiin a don a. "Zawlnei chu i ni?" an ti nawk a, "Ni lo e" a ta. 22 "Anleh tu am i ni hrim leh? A mi tirtuhai kan don theina dingin mi hril rawh. Tu'm i nih i'n ti rêng rêng a?" an ta. 23 Johan chun, "Zawlnei Isaiin a hril ang a, 'Lalpa lampui sukruol ro' tia thlalèra khêktu rawl chu ka nih" a ta. 24 Mi an hung tir laia Farisai thenkhat chun, "Krista amanih, Elija amanih, 25 Zawlnei amanih i'n ti si naw chun ieng leia i baptis am a na?" an ta. 26 Johan chun, "Keiin tuiin ka baptis a, sienkhom hi taka ngîr lai hin in hriet naw mi pakhat a um. 27 Ama chu ka hnunga hung ni sienkhom a pheikhok hrui sût tlàk khom ka ni nawh" tiin a don a. 28 Hieng thil hi Jordan ràl Bethani khuoa Johanin baptisma a'n changtirna hmuna tlung a nih. 29 A zinga chun Johanin ama tieng pana hung Isu chu a hmu a, "En ta u, Pathien Beramte, khawvel suol phur hmangtu ding saw! 30 Ama hi a nih ka hnunga hung, ami lekhêl tah tia ka hril cheu kha, a san chu ka hmaa lo um tah a ni leiin. 31 Ama chu lo hre naw lang khom, Israelhai kuoma tarlang a ni theina dinga tuia baptis dinga hung ka nih" a ta. 32 Chu zoah Johanin hieng hin a thil hmu a hril a: "Vàthu anga vàna inthoka Thlarau hung tum chu a chungah a fu zing ka hmu a. 33 Tuia baptis dinga mi tirtu khan, 'A chunga Thlarau tum le fu zing i hmu pa ngei chu Thlarau Thienghlima baptistu ding chu nîng a tih' ti mi lo hril naw sien chu Ama chu hre lo ding ka ni a. 34 Chu thil chu ka hmu tah a, ama hi Pathien Naupa a nih ti ka puong" tiin. 35 A zìnga chun Johan chu a zirtirhai pahni leh a ngìr a. 36 Isun anni a hung fe khêl lai chun, "En ta u, Pathien Beramte saw!" a ta. 37 A zirtir pahnihai chun a thu hril chu an hriet a, Isu an zui tah a. 38 Isu chu a ngha vêl a, an hung zui a hmu chun, "Ieng am in zong a?" a ta. Anni chun, "Rabbi (chu chu Zirtirtu tina a nih), khawlam i tlung a?" an ta. 39 "Hung unla, hmûng in tih" a ta. Chuongchun an zui a, a tlungna chu an hmu a, chu ni chun a kuomah an um a. Chawhnung dâr li vêl a nih. 40 Johan thu hril hrea Isu zuitu pahnihai laia pakhat chu Simon Peter unaupa Andri a nih. 41 Ama chun ahmasatakin a unaupa Simon a zong suok a, "Mesia (chu chu Krista tina a nih) kan hmu tah" tiin a hril a. 42 Simon chu Isu kuomah a hung thuoi a, Isun ama chu a en a, "Nang hi Johan naupa Simon i nih. Kifa ti tâng an ti che" a ta (Kifa chu Peter tìna a nih). 43 A zìnga chun Isu chu Galili ram tieng fe a tum a. Filip a hmu a, "Mi zui rawh" a ta. 44 Andri le Peter ang bokin Filip chu Bethesaida khaw mi a nih. 45 Filip chun Nathanael a hmu a, "Mosien Dàn lekhabua a chanchin a lo ziek le zawlneihaiin a chanchin an lo ziek, Nazaret Isu, Josefa naupa ngei chu kan hmu tah" tiin a hril a. 46 Nathanael chun, "Nazaret khuoah thil tha a suok thei am a ni?" a ta. Filip chun, "Hung la, hung hmu ve rawh" a ta. 47 Isun a kuom tienga hung Nathanael a hmu chun, "En ta u, Israel mi indik tak, hlèmna dawha hrim hrim pai lo saw" tiin a chanchin a lo hril a. 48 Nathanael chun, "Nangin ieng tin am i mi hriet a?" a ta. Isu chun, "Filipin a ko hma chea theichang kùng bula i um lai khan ka hmu che annawm" a ta. 49 Nathanael chun, "Zirtirtu, Pathien Naupa chu i nih; Israel Laltak chu i nih" tiin a puong a. 50 Isun, "Theichang bula i um lai ka hmu che ti ka hril lei elin i ring a ni maw? Hieng nêka thil ropui lem hi la hmûng i tih" a ta. 51 A hril zom pei a, "Thutak tak ka hril cheu hi. Vàn inhongah a suk a tunga Pathien vântirkohai Mihriem Naupa chunga inlon la hmûng in tih" tiin.

John 2

1 A ni thum ni chun Galili ram 2 Isu le a zirtirhai khom molawma chun an fiel a. 3 Uoiin an indai ta naw leiin Isu nu chun a kuomah, "Uoiin an tlasam tah ie" a ta. 4 Isu chun, "Nuhmei, chu chu nangma le keima lungkham ding am a ni? Ka hun a la tlung hrì nawh" a ta. 5 A nu chun rongbawltuhai kuomah, "A hril taphot ang chun thaw pei ro" a ta. 6 Chu hmuna chun Judahai inthien dàn anga insawpna ding lung tuibel paruk, litar sawmsari panga le za sawmpasari inkâr vêl keng seng, an intung a. 7 Isu chun, "Tuibêl po poa khan tui sung sip ro" a ta. Arêngin an sung sip hmar a. 8 Chuongchun an kuomah, "Thâl unla, tucha hotu kuomah chawi ro" a ta, a ti ang chun an thaw a. 9 Tui, uoiina inchang chu tucha hotu chun a hang intem a, khaw laia inthoka an hung lâk am ti a hriet naw a, tui thâltuhai ruok chun an hriet a. 10 Chuongchun, moneitu chu a ko a, "Mi tinin an uoiin nei tha an sem hmasa phot a, an dawn rawn deuh pha uoiin naran an sem hlak kha a na, nang ruok chun tu chen hin uoiin tha tak i la nei rop a!" a ta. 11 Hi inchikna thilmak, Isun a thaw hmasa tak hi Galili ram Kana khuoa a thaw a nih. Chuong ang chun a ropuizie a'n langtir a, a zirtirhai chun ama chu an ring tah a. 12 Chu hnung chun Isu chu a nu leh, a unauhai le a zirtirhai leh Kapernaum-ah an zu fe a, chu taka chun ni iemani zât an chàm a. 13 Judahai Fekân Kùt a hung hnai chun Isu chu Jerusalemah a hang fe a. 14 Tempul tuolzawla bawng dâm, beram dâm le parva dâm zortuhai le dawkan kîla inthung tangka thlengtuhai chu a hmu a. 15 Chuongchun, hruolin vuokna a siem a, beram le ranhai chu tempul huonga inthokin a hawl dok vong a; tangka thlengtuhai tangka thîr chu a thè dar a, an dawkanhai a nam thlûk a. 16 Parva zortuhai kuoma chun, "Hieng thilhai hi la suok ro, ka Pa in hi sumdawngna hmunah siem naw ro" a ta. 17 A zirtirhai chun, "I in ta dinga thahnem ka ngainan a mi lem zo" ti zieka lo um chu an hriet suok nawk tah a. 18 Chu phing leh Judahai chun, "Hieng thil hi thaw dingin thuneina i nei ti inchikna ieng am i mi'n entir thei a?" tiin an indon a. 19 Isun, "Hi tempul hi thiek unla, ni thum sûng indin nawk ka tih" tiin a don a. 20 Judahai chun, "Hi tempul bawlna hin kum sawmli paruk zet a lâk a, nangin ni thum sûngin i bawl ding maw?" an ta. 21 Aman tempul a hril chu a taksa a ni lem dai si a. 22 Thìnaa inthoka a tho nawk hnungin a zirtirhaiin a thu hril chu an hriet suok vong vong a, Pathien lekha thu le Isu thu hril chu an ring tah a. 23 Fekân Kùt hmanga Jerusalema a châm sûnga inchikna thilmak a thawhai hmutu mi tam takin ama chu an ring tah a. 24 Nisienlakhom, Isu chun anni rawi chu a nêl el nawh, mi po po a hriet chieng leiin. 25 Mi chanchin tu khomin an hril a ngai nawh, mihriem lungrila um chu a hriet vong si a.

John 3

1 Mi pakhat a hming Nikodem, Farisai pawla mi, Judahai Rorêlna Inpuia membar a um a. 2 Zànah Isu a hung pan a, a kuomah, "Zirtirtu, Pathiena inthoka hung Zirtirtu i nih ti kan hriet. Pathien umpuihai naw chun inchikna thilmak i thawhai ang hi tu khomin thaw thei naw ni hai" a ta. 3 Isun, "Thudik tak ka hril che hi, tu khom a piengthard naw chun Pathien ram hmu thei naw nih" a ta. 4 Nikodem chun, "Mi a upat hnungin ieng tin am pieng nawk thei a ta? Pieng nawk dingin a nu sùlah voi hni a lût thei awm top si naw a!" a ta. 5 Isun, "Thudik tak ka hril che hi, tu khom tui le Thlaraua pieng a ni naw chun Pathien rame lut thei naw nih. 6 Taksa chun taksa a hring a, Thlarau chun thlarau a hring. 7 I piengthar ding a nih ka ti hi makti naw rawh. 8 Thli chu a nuomna tieng tieng a hrâng a, a ri i hriet a, sienkhom khaw laia inthoka hung am ti le khaw lai am a fe ding ti ruok chu i hril thei nawh. Tu khom Thlaraua pieng taphot chu chuong ang chu an nih" a ta. 9 Nikodem chun, "Chu chu iengtin am ni thei a ta?" a ta. 10 Isun, "Israelhai zirtirtu i ni a, chuong chu i hriet nawa maw? 11 Thudik tak ka hril che hi, keinin kan hriet chu kan hril a, kan hmu chu kan inhriettir hlak a, sienkhom kan thu inhriettir chu in awi nuom si nawh. 12 Khawvel thil ka hril cheu hman in awi naw chun vàn thil hril lang cheu ieng tin am awi in ta? 13 Tu khom vànah an lawn ngai nawh, Mihriem Naupa vàna inthoka hung chauh naw hi chu. 14 "Mosien thlalèra rûl a khai kàng ang bok khan Mihriem Naupa khom hi khai kàngin a um ding a nih, 15 ama ring taphotin chatuon hringna an neina dingin. 16 "Pathienin khawvel a hmangai êm leiin a Naupa khat nei sun chu a pêk a, ama ring taphot chu bohmang loa chatuon hringna an nei lemna dingin. 17 "Khawvel thiem naw inchangtir dingin Pathienin a Naupa khawvelah a hung tir naw a, ama hmanga khawvel sandam dingin a hung tir lem a nih. 18 Tu khom ama ringtu chu thiem naw changin um naw ni a, a ring nawtu ruok chun thiem naw a chang zing a nih, Pathien Naupa nei sun hming chu a ring naw leiin. 19 Hi hi thiem naw changna chu a nih: var chu khawvelah a hung a, sienkhom mihaiin thil suol an thaw leiin var nêkin thim an thlang lem si. 20 Thil suol thaw taphotin var an theida a, an thilthaw inlang an inlau leiin varah an hung nawh. 21 Tu khom thil indik thawhai ruok chun an thilthaw chu Pathien leia an thaw a nih ti chieng taka inlangtir dingin varah an hung hlak" a ta. 22 Chu hnung chun Isu chu a zirtirhai leh Judai ram tlângramah a fe a, chu taka chun a zirtirhai chu iemani chen a umpui a, baptisma a'n changtir a. 23 Johan khomin Salim khaw kawl Ainona chun tui a tam leiin a baptis a, mi tam tak baptisma chang dingin an hung a. 24 Chuong lai chun Johan chu lung inah an la khum si nawh. 25 Chun, Johan zirtirhai laia pakhat le Juda mi pakhat chu tuia Judahai inthien dàn thuah an insêl a. 26 Johan kuomah an fe a, "Zirtirtu, Jordan râla i kuoma um, a chanchin i hril khan tuhin a baptis ve a, mipuiin an pan huoi huoi a nih" tiin an va hril a. 27 Johan chun a don a, "Vàna inthoka pêk a ni naw chun tu khomin ieng khom an dong thei nawh. 28 'Keima hi Krista chu ka ni nawh, a hmaa hung dinga tir chauh ka nih' ka ti kha nangni ngei ka thuhretu in ni kha. 29 Mo pasal chu moneitu a ni a, moneitu thien, a thu lo ngaiven zingtu chun moneitu rawl a hrietin a hlim hlê hlak. Chuong ang chun kei khom ka lawm a kim tah. 30 Ama chu ropui tuol tuol ding a na, kei ruok chu chîn tiel tiel ding ka nih. 31 "Chung tienga inthoka hung tum chu mi po po nêka chunghnungtak a nih; hnuoia inthoka hung chu hnuoi mi a na, hnuoi thil a hril hlak. Vàna inthoka hung chu iengkim chunga mi a nih. 32 A hmu le a hriethai a hril a, sienkhom a thu inhriettir chu tu khomin an pom si nawh. 33 A thu inhriettir pomtu chun Pathien chu a'n dik ngei ti suoi a nam nghet a nih. 34 Pathien tir chun Pathien thu a hril hlak, Pathienin Thlarau chu tiem chin um loa a pèk a ni si a. f 35 Pa chun Naupa a hmangai a, a kutah iengkim a sie tah. 36 Naupa ring taphot chun chatuon hringna a nei a; Naupa ring nawtu ruok chun hringna a nei naw a, Pathien lungsenna chu a chungah a fu zing a nih" a ta.

John 4

1 Johan nêkin Isun zirtir tam lem a siem ti le a baptis rawn lem ti Farisaihaiin an hriet ti Isun a hriet chun 2 (Ama Isu chun a baptis naw a, a zirtirhaiin an baptis lem a nih), 3 Judai ram suoksanin Galili tieng a kîr nawk a. 4 Samari ram a fe thleng a ngai a. 5 Samari rama khaw pakhat Sikar an ti chu a hung tlung a, chu chu Jakobin a naupa Josefa hmun a pêk kawla um a nih. 6 Jakob tuikul khom chu taka chun a um a. Isu chu an inzin sawl leiin tuikul sira chun a thung chot a, sùnbu fâk hun vèl a nih. 7 Tui chawi dingin Samari nu pakhat a hung a. Isun a kuomah, "Dawn ding mi pe rawh" a ta. 8 A zirtirhai hlak chu fâk ding inchaw dingin khuoah an fe ta si a. 9 Samari nu chun, "Nang Juda mi i na, kei Samari nu ka ni si a, iengtiziea dawn ding i mi hni am a na?" a ta. (Judahai le Samari mihai chun ieng khom an hmang intawm ngai si nawh). g 10 Isun a don a, "Pathien thilpêk le 'Dawn ding mi pe rawh' titu hi hre la chu, nangin a kuomah i hni lem ding bah; ama chun hringna tui a pêk ding che a nih" a ta. 11 Nuhmei chun, "Pu, tui khài suokna ding ieng khom i nei si naw a, tuikul hi a'n thûk vei leh, khaw laia inthokin am hringna tui chu i nei thei a? 12 Kan pu Jakob nêkin i ropui lem am a nih? Ama chun tuikul hi a mi pèk a, ama le a nauhai le a ran ruolhai khomin hi tui hi an dawn hlak" a ta. 13 Isu chun, "Tu khom hi tui dawntu chu a dang châr nawk a ta; 14 tu khom ka pêk tui dawn taphot chu a dang châr ta ngai naw nih. Tui ka pêk chu a sùngah chatuon chena kang thei lo hringna tuihnârin hung pût suok a tih" a ta. 15 Nuhmei chun, "Pu, chu tui chu mi pe rawh, ka dang a châr ta nawna ding le hi chen chena tui chawia ka hung ta nawna dingin" a ta. 16 Isun, "I pasal va ko la, hung nawk rawh" a ta. 17 Nuhmei chun, "Pasal ka nei lêm!" a ta. Isun " 'Pasal ka nei nawh' i ti hi i hril indik. 18 Pasal panga i nei tah a, tuta i kol lai hi i pasal a ni naw hrim a nih. I hril indik ngot el" a ta. 19 Nuhmei chun, "Pu, zawlnei i nih ti ka hriet tah. 20 Kan pi le puhai chun hi tlânga hin Pathien an chawibiek hlak a, nangni Judahai ruok chun 'Jerusalema ngei mihaiin Pathien an chawibiek ding a nih' in ti hlak" a ta. 21 Isu chun, "Nuhmei, ka hril hi awi rawh, hi tlânga kher naw khom, Jerusalema kher naw khom Pathien an chawibiek hun a tlung ding a ni tah. 22 Nangnin in hriet naw in chawibiek hlak a, keini chun kan hriet chu kan chawibiek hlak; sandamna chu Judahaia inthoka hung suok a ni si a. 23 Pathien chawibiektu tak tak haiin thlarau le thutaka Pa an chawibiek hun chu a tlung ding a ni tah, tu khom hin a tlung mèk zing. Chuong ang mi chu ama chawibiektu dingin Pain a zong hrim a nih. 24 Pathien chu Thlarau a na, ama chawibiektuhaiin thlarau le thutakin an chawibiek ding a nih" a ta. 25 Nuhmei chun, Mesia, Krista an ti chu a hung ding a nih ti ka hriet a, a hung pha iengkim mi la hril a tih" a ta. 26 Isun a kuomah, " Kei, a betu che hi ama chu ka nih" a ta. 27 Chuong lai tak chun a zirtirhai chu an hung tlung a, nuhmei a lo biek chu mak an ti hle a. Amiruokchu, tu khomin, "Ieng am i du?" amanih "Ieng dinga nuhmei i biek?" khom an ti chuong nawh. 28 Nuhmei chun a tuibêl a màksan a, khuo tieng a kîr a, mihai kuoma chun, 29 "Ka thilthaw taphot mi hril vong theitu mi pakhat a um a, hung unla, hung en hrim ta u, Krista a ni thei awm am?" a ta. 30 Anni chu khuoa inthok chun an suok a, a kuom tieng an pan tah a. 31 Chu kâr chun zirtirhaiin, "Zirtirtu, fa rawh" tiin an ngên a. 32 Ama hlak chun, "In hriet naw bu fâk ding ka nei" a ta. 33 Zirtirhai chun, "Tuhaiin am bu an hung pêk a ni ding aw?" tiin an indon tuo a. 34 Isun an kuomah, "A mi tirtu ditzawng thaw le a sin hlen hi ka bu a nih. 35 Nangni chun, 'Busìkna ding thla li a la um' in ti hlak an naw? Ngai ro, ka hril cheu hi, dâk suok unla, lohai thlir ro, buhai chu sìk el theiin a hmin tah hi. 36 Bu sîktu chun hlaw a hmu ta nghal a, chatuon hringna dingin a sîk khawm mêk a, a phuntu le a sîktu chu an hlim tlàng theina dingin. 37 'Mi pakhatin a tu a, mi dangin a sìk' ti thu hi a'n dik a nih. 38 In inrimpui ra ni lo sîk dingin ka tir cheu hi, mi dangin an inrimpui a, an inrimna ra chu nangnin in sìk a ni hi" a ta. 39 Nuhmeiin, "Ka thilthaw taphot a mi hril thei vong" a ti lei khan chu khuoa Samari mi tam tak chun an ring tah a. 40 Samari mihaiin Isu kuom an hung tlung chun an khuoa châm dingin an ngên a, ni hnî zet a châm a. 41 A thu an hang hriet chun mi dang tam tak khomin an ring ta a. 42 Anni chun nuhmei kuomah, "Tuhin chu i thu mi hril leia ring kan ni naw a, keini ngèiin a thu hril kan ngaithlàk a, ama hi khawvel Sandamtu ngèi chu a nih ti kan hriet tah" an ta. 43 Ni hni hnungah chu taka inthok chun Galili ramah a fe a. 44 Isu ngeiin, 'Zawlnei chu ama ramah chawimawiin a um ngai nawh" a lo ti ta hrim a. 45 Galili ram a zuk tlung chun Galili mihai, Jerusalema kût hmanga hang fe ve haiin a thilthaw iengkim an hmu tah leiin, an lo lawm hle a. 46 Isu chun tui, uoiin a'n changtirna Galili rama Kana khuo chu a hung tlung nawk a. Kapernauma sorkar mi lien pakhath naupa chu damnaw a um a. 47 Judai rama inthokin Galili ramah Isu a hung kîr nawk tah ti a hriet charin a hang fe a, Kapernaumah hung thla a, a naupa thi vâng vâng chu sukdam dingin a ngên a. 48 Isun a kuomah, "Nangni rawi hin inchikna le thilmak thaw in hmu naw chun in ring naw top ding a lo ni hi tie!" a ta. 49 Chu pa chun, "Pu, ka naupa a thi hman hmain hung thla hrâm rawh" a ta. 50 Isun, "Kîr ta rawh, i naupa chu a dam tah" a ta. Isu thu hril chu a ring a, a kîr tah a. 51 A kîr thlàk chu lampuiah a siehlawhaiin an lo tuok a, "I naupa a dam tah" tiin an hril a. 52 Ama chun a hung dam hun lai chu a'n don a. 53 Anni chun, "Zàni chawhnung dâr khat vèlah a khawsik a rè tah" an ta. Chu hun tak chu Isun "I naupa a dam tah" a ti lai kha a nih ti a pa chun a hriet suok a, chuongchun ama le a sungkuoin Isu an ring tah a. 54 Chu chu Judai rama inthoka Galili rama Isu a kîr nawk hnunga inchikna thilmak a thaw voi hnìna a nih.

John 5

1 Chu hnung chun Judahai kùt pakhat a um a, Isu khom Jerusalemah a hang fe a. 2 Jerusalema Beram Kotkhâr an ti bula chun dîl a um a, chu dîl chu Aramik tongin Bethesda an ta, tuolpûk panga a nei a. 3 Chu taka chun tui hung phul hun inchânin damnaw mitdel, kebai le zeng tam tak an zâl khup a. 4 A châng chângin Lalpa vantirko a hung tum a, dîl tui chu a chokphul a, damnaw tu khom tui phul laia dîla inchawm thla hmasa tak chu ieng ang natna nei khom an dam pei hlak a. i 5 Chu taka chun kum sawmthum pariet zet zeng tah mi pakhat a um a. 6 Isun a zàl lai a hmu a, chuong ang chun sawt tak a um tah ti a hriet a, "Dam i nuom am?" a ta. 7 Zeng chun, "Pu, tui a hung phul pha dîla mi sietu ding mi ka nei si naw a, lùt ka tum sûngin mi dangin an mi lùt khal nawk pei hlak annawm" a ta. 8 Isun a kuomah, "Tho la, i puonpha la la, lawn ta rawh" a ta. 9 Zeng chu a dam ta nghal a, a puonpha a lâk a, a lawn el tah a. Chu ni chu Sabat a nih. 10 A dampa kuoma chun Judahaiin, "Sabat a ni hi, i puonpha i chawi a thieng nawh" an ta. 11 Ama chun, "A mi sukdamtuin 'I puonpha la la, lawn ta rawh' a mi tih annawm" tiin a don tawl a. 12 Anni chun, " 'I puonpha la la, lawn ta rawh' titu che chu tu'm a na?" an ta. 13 Ama chun tu'm a nih ti a hriet dêr si nawh, Isu hlak mipui inzi nuoi nuoi lai chun a pil hmang ta dai si. 14 Chu hnung chun Isun ama chu tempulah a hmu a, a kuomah "Ngai rawh, i lo dam tah hi, suol nawk ta ngai naw rawh, chuong naw chun i chungah thil tha naw nawk zuol hung tlung rawi a tih" a ta. 15 Ama chu a fe a, a sukdamtu chu Isu a nih ti Judahai chu a va hril a. 16 Sabat nia chuong ang thil a thaw lei chun Judahaiin Isu chu an sukduda tah a. 17 Isu chun anni chu a don a, "Ka Pain tu chen hin sin a thaw zing a, kei khomin ka thaw a nih" a ta. 18 Chuleiin Judahaiin ama chu sukhlum an tum nawk zuol a, Sabat a bawsiet lei chauh khom ni loa Pathien a Paah inbûk a, Pathien tluka a'n sie leiin. 19 Isun anni chu a don a, "Thu dik tak ka hril cheu hi. Naupa hin Pain a thaw a hmu chauh naw chu ama khâtin ieng khom a thaw thei naw a, Pain a thaw ang ang chu Naupa khomin a thaw a nih. 20 Pain Naupa a hmangai a, a thilthaw iengkim a'n entir a, mak in tì dingin hieng nèka thil ropui lem khom hi la'n entir a tih. 21 Pain mithi keithoa a sukhring nawk angin, Naupa khomin a nuom nuom a sukhring el a nih. 22 Pain tu chungthu khom a rèlpêk naw a, Naupa kuomah rorêlna a pêk vong a nih; 23 mi po poin Pa an inza anga Naupa an inzàna dingin. Tu khom Naupa inza naw chun ama tirtu Pa an inza naw a nih. 24 "Thudik tak ka hril cheu hi, tu khom ka thu hrea a mi tirtu ring chun chatuon hringna a nei a, thiem naw a chang ta naw a, thinaa inthoka suokin hringnaah a lût ta lem a nih. 25 Thudik ka hril cheu hi, a hun a hung tlung ding a na, tu khom hin a tlung ta mêk a; mithihaiin Pathien Naupa rawl hrieng an ta, a hre taphot hring an tih. 26 Pa chu amaa hringna hnâr a ni angin Naupa khom amaa hringna hnâr nina a pêk. 27 Mihriem Naupa a ni leiin a kuomah rorêl theina thu a pêk bok. 28 "Hieng hi makti naw ro, mithi lo zâl ta po poin a rawl an hriet hun la tlung a ta, 29 thlàna inthokin hung suok vong an ta, thil tha thawtuhai chu hringna chang dingin tho nawk an ta, thil suol thawtuhai ruok chu thiem naw chang dingin tho nawk an tih. 30 Keima khâtin ieng khom ka thaw thei nawh, hrila ka um ang peiin ro ka rêl a, ka rorêl khom a'n dik a nih, keima ditzawnga thaw tum loa a mi tirtu ditzawng chauh thaw ka tum leiin. 31 "Mani chanchin inhriettir ni lang chu, ka thu inhriettir chu ringsan tlâk ni naw nih. 32 Amiruokchu, mi dang ka thu inhriettirtu a um a, ka thu a'n hriettir chu a'n dik ti ka hriet. 33 Johan kuomah mi in tir a, ama chun thutak a lo hril tah cheu kha. 34 Mihriem hrietpuina ka pom lei ni loin, sandama in um theina dingin chuong chu ka hril a ni lem. 35 Johan chu khawnvar var tak a na, a varah hlim taka chêng hri khom in nuom a. 36 Sienkhom, Johan thu hrietpuina nêka poimaw lem hrepuitu ka nei. Pain hlen dinga sin a mi pêkhai, tuta ka thaw lai mêk hin Pain kei a mi tir ngei a nih ti a'n hriettir a nih. 37 A mi tirtu Pa ngei chun ka thu a'n hriettir bok a nih. A rawl iengtik lai khom in hriet ngai naw a, a hmêl in hmu ngai bok nawh. 38 A thu khom lungrilah in pâi zing nawh, a tir hi in ring naw leiin. 39 Pathien lekha thuhai ngun takin in inchûk hlak, chuonghai chun chatuon hringna pe thei cheua in ngai leiin. Chuong lekha thuhai chu ka aia ka thu inhrietirtu an nih. 40 Chuong sà khom chun hringna nei dingin ka kuomah in hung nuom si nawh. 41 "Mihriem inpàk hlaw hi ka thil hnot a ni nawh. 42 Nangni ka hriet cheu. In lungrilin Pathien in hmangai nawh ti ka hriet. 43 Ka Pa hmingin ka hung a, in mi lo pom si nawh; mi dang mani hmingin hung sien, ama chu lo pom in tih. 44 Pathien tak um sun chawimawi hlaw tuma thang la si loa nangni inchawimawi ton ringot in lawm hin iengtin am ring thei in ta? 45 Pa kuomah keiin ka hêk chèu ring naw ro, nangni hêktu chu in beisei innghatna Mosie a nih. 46 Mosie in ring dàm chu ni sien, kei khom mi ring in tih, ama chun ka chanchin a nih a ziek. 47 A thu ziek in ring si naw chun iengtin am ka thu hril ring hrim in ta?" a ta.

John 6

1 Chu hnunga chun Isu chu Galili dîl (Tiberi dîl tia ko bok) râl tieng chun a kâi a, 2 damnaw chunga inchikna thilmak a thawhai an hmu leiin mipui tam takin an zui a. 3 Isu chu tlângah a kâi a, chu taka chun a zirtirhai leh an inthung a. 4 Judahai Fekân Kùt chu a hnâi tah a. 5 Isu chu a ngha vel a, mipui tam tak a kuom tieng pana hung a hmu chun Filip kuomah, "Hienghai fâk ding hi bei khaw lai am inchawng ei ta?" a ta. 6 Chu chu Filip fiena dinga a hril a nih, a thaw ding chu aman a hriet diem ta si a. 7 Filip chun, "Mi tinin tlawmtea an chang seng ding khom ni sien, puitling pakhat thla riet hlaw khomin dai naw nih" a ta. 8 A zirtir laia pakhat, Andri, Simon Peter unaupa chun, 9 "Hi taka hin naupang pakhat barli beipêr panga le ngate pahni chawi a um a, sienkhom mi hieng zozài lai hin chu chu ieng tham am nîng a ta?" a ta. 10 Isun, "Mipuihai hi inthungtir ro" a ta. Chu hmun chu hlobet hmun a na, patling ngot khom sângnga laia tam chu an inthungtir a. 11 Isun beipêr chu a lâk a, lawmthu a hril zoin mipui thunghai kuoma chun an semtir a, chuong ang chun nga khom chu an semtir bok a, an khop tawkin an chang seng a. 12 An fâk khop chun zirtirhai kuomah, "Fâk mahlahai kha ieng khom inchek ral lo dingin rût khawm vong ro" a ta. 13 Barli beipêr panga an fâk bàng an rût khawm chu bawm sawmpahni sip a nih. 14 Inchikna thilmak a thaw mipuiin an hmu chun, "Hi mipa hi Zawlnei, khawvela hung ding chu a ni ngèi hi" an ta. 15 Lala siem lui dingin an hung inthok tum ti Isun a hrietin tlângah ama chauin a fe hmang nawk tah a. 16 Khuo a hung inhnu chun a zirtirhai chun dîl tieng an pan thla a, 17 Kapernaum pan dingin longah an chuong a, an inthok suok a, khuo khom a hung inthim tah a, Isu ruok chu a la hung tlung nawh. 18 Thlî na taka a hrâng leiin tui chu a fawn hlup hlup a. 19 Kilometar ruk vêl an inkar hnung chun Isu chu dîl chunga kea lawna long tieng hung pan an hmu a, an ti hle a. 20 Nisienlakhom ama chun, "Ti naw ro, kei ka ni annawm" a ta. 21 Chu phing leh longa inchuongtir chu an nuom tah a, an pan khawmuol chu an tlung ta nghal a. 22 A zînga chun dîl rala mipui la umhai chun long pakhat chauh naw chu long dang an hmu naw a. Isu hlak chu a zirtirhai lai longah a chuong ve si nawh ti le a zirtirhai chauh an fe ti an hriet bok si a. 23 Isun lawmthu a hril zoa bei an fâkna bul el dîl kaia chun Tiberiaa inthokin long iemani zât a hung tlung a. 24 Isu le a zirtirhai chu chutaka chun an um ta nawh ti mipuiin an hmuin longahai chun an chuong a, Isu zongin Kapernaum tieng an pan a. 25 Dîl râl tieng Isu an va hmu chun, "Zirtirtu, ieng tik laiin am hi taka hin i lo tlung hman?" an ta. 26 Isun, "Thudik tak hril ka ti cheu, inchikna thilmak in hmu leia mi zong in ni nawh, bei in fâk khop leia mi zong in ni lem. 27 Bu bohmang nawk el hlak zongin inlap rak rak naw ro, chatuon hringna chen dai bu chu zong lem ro. Chu bu chu Mihriem Naupain pêng a ti cheu, chu dinga ama chu Pa Pathien namnghet a ni si a" a ta. 28 Chu phing leh anni chun, "Pathien dit dàn anga a rong kan bawl theina dingin ieng am thawng kan ta ?" tiin an indon a. 29 Isun, "Pathien rong in bawl dàn ding chu hi hi a nih: a tir hi ring ro" a ta. 30 "An leh, kan hmua kan ring theina ding chein inchikna thilmak ieng am thawng i ta? 31 Pathien lekha thua 'Vàna inthokin anni chu fâk ding a pêk' ti ang khan kan thlatuhaiin thlalèrah manna an fâk kha" an ta. 32 Isun, "Thudik tak ka hril cheu hi, vàna inthokin Mosien bei a pêk naw cheu, vàna inthoka bei tak tak petu cheu chu ka Pa a nih. 33 Pathien bei pêk chu vàna inthoka hung tum, khawvel ta dinga hringna petu hi a nih" a ta. 34 Anni chun, " Pu, chu bei chu mi pe rop rawh" an ta. 35 Isun, "Kei hi hringna bei chu ka nih; tu khom ka kuoma hung chu a phìng tâm ngai naw ni a, a mi ringtu chu a dang châr ngai bok naw nih. 36 Amiruokchu, ka hril ta cheu ang khan, in mi hmu taa chu in mi ring si nawh. 37 Pain a mi pêk po chu ka kuomah hung an ta, ka kuoma hung taphot chu hnot suok naw ning. 38 Mani ditzawng thaw dinga vàna inthoka hung ka ni naw a, a mi tirtu ditzawng thaw dinga hung tum ka ni lem. 39 A mi tirtu ditzawng chu hi hi a nih: Aman a mi pêk po po tu khom inhmang loa ni kin nia ka keitho nawk vong hi. 40 Ka Pa ditzawng chu hi hi a nih: tu khom Naupa hmua ama ring taphotin chatuon hringna neia, anni chu ni kin nia ka keitho nawk chu" a ta. 41 "Vàna inthoka bei hung tum chu ka nih" a ti leiin Judahai a chungah an chier a. 42 "Hi mipa hi Josefa naupa Isu kha a ni naw am a ni? A nu le pa khom ei hriet annawm. Ieng leia tuta 'Vàna inthoka hung tum ka nih' dâm a ti an lie?" an ta. 43 Isun a don a, "Chier chier naw ro. 44 Mi tirtu Pain ka kuom tieng a hîp naw chu tu khom ka kuomah an hung thei nawh; anni chu ni kin niah keitho ka tih. 45 Zawlneihaiin, 'An rêngin Pathienin zirtir a tih" ti an lo ziek kha. Mi tin, Pa thu hre a, a kuoma inthoka inchûk taphot chu ka kuomah an hung hlak. 46 Pa hmu tah an um tìna a ni nawh; Pathiena inthoka hung pa hi Pa hmutu um sun chu a nih. 47 Thudik tak ka hril cheu hi, a ringtu chun chatuon hringna a nei tah. 48 Kei hi hringna bei chu ka nih. 49 Inthlàtuhaiin thlalèrah manna an fâk a, sienkhom an thi a. 50 Vàna inthoka bei hung tum ruok hi chu a fa taphot thi naw ni hai. 51 Kei hi vàna inthoka hringna bei hung tum chu ka nih. Hi bei hi tu khomin a fâk chun kumkhuoin hring zing a tih. Khawvel hringna dinga ka pèk ding bei chu ka taksa hi a nih" a ta. 52 Chuongchun Judahai chu nasa takin an insêl a, "Hi pa hin ieng tin am a taksa fàk dingin mi pe thei a ta?" an ta. 53 Isun an kuomah, "Thu dik tak ka hril cheu hi; Mihriem Naupa taksa fa a, a thisen in dawn bok naw chun nangni khâtin hringna in nei si nawh. 54 Tu khom ka taksa fa a, ka thisen dawntu chun chatuon hringna a nei tah, keiin ni kin niah ama chu keitho bok ka tih. 55 Ka taksa hi bu tak tak a na, ka thisen hi dawn ding tak a nih. 56 Tu khom ka taksa fa a, ka thisen dawntu chu keimaah a um zing a, kei khom amaah ka um zing a nih. 57 Pa hring zing chun a mi tir a, Pa leiin kei khom ka hring a, chuong ang bokin tu khom mi fatu chu keia leiin hring vêng a tih. 58 Hi hi vàna inthoka bei hung tum chu a nih. Inthlatuhaiin manna an fâk a, an thi a, hi bei fatu ruok chu chatuonin hring a tih" a ta. 59 Kapernaum Sunagoga a zirtir laiin Isun hi thu hi a hril a nih. 60 A zirtir tam takin chuong thu chu an hrietin, "Hi hi thu khir tak a nih, tuin am awi thei an ta?" an ta. 61 Chu thua chun a zirtirhai an chier ti Isun a lungrilin a hriet a. "Hi thu hin a khei deu cheu am a ni? 62 Mihriem Naupa hi a umna ngaia a kîr tung hmu lem inla chu ieng tin hielin am in ngai ding maw! 63 Hringna petu chu thlarau a nih; taksa chu ieng khom a ni nawh. Thu ka hrilhai cheu hi thlarau le hringna a nih. 64 Nisienlakhom, nangni lai a ring naw in um" a ta. A ring nuom lo ding le ama inmantirtu ding chu a tira inthokin Isun a hriet zing si a. 65 "Chu lei tak chun a nih in kuoma 'Pain ka kuoma hung dinga a ti hai naw chu tu khom ka kuomah an hung thei nawh' ka ti kha" a ta. 66 Chu chena inthok chun a zuitu laia mi tam tak hnàr a kîr a, a kuomah an fe nawk ta naw a. 67 Chuongchun, sawm le pahnihai kuoma chun Isun, "Nangni khom fe hmang in nuom ve am?" a ta. 68 Simon Peterin a don a, "Lalpa, tu kuom dang am feng kan ta? Nangin chatuon hringna thu i nei annawm. 69 Pathien Mi Thienghlim Krista chu i nih ti kan ring a, hriet khom kan hriet" a ta. 70 Isun an kuomah, "Nangni sawm le pahnihai hi keima thlang in ni nawm a ni? Nangni laia pakhat hlak Diebol a ni nawk nghal bok leh!" a ta. 71 (Simon Iskariot naupa Juda chu sawm le pahnihai laia pakhat ni sien khom a hnunga ama inmantirtu ding a ni si thu a hrilna a nih).

John 7

1 Chu zoa chun Isun Galili ram a fang vel a; Judahaiin that tuma remchâng an zong leiin Judai ram ruok chu a fang nuom nawh. 2 Judahai Bawkte Kùtj chu a hnâi tah a. 3 Isu unauhai chun a kuomah, "Hi hmun hi suoksan la, Judai ramah fe rawh, i zirtirhaiin i thilthaw hi an hmu theina dingin. 4 Hmingthang nuom siin tu khomin a rûkin thil an thaw ngai nawh. Hieng thil hi i thaw rau rau si chun khawvel hrietah intar lang ta la" an ta. 5 A unauhai ngei khomin ama chu an ring si nawh. 6 Isu chun, "Ka hun a la tlung nawh, nangni hun ruok chu a tlung zing a nih. 7 Khawvelin nangni a theida thei naw cheu, kei ruok chu a mi theida a, a thil suol thaw kan hriettir hlak leiin. 8 Kûta chun hang fe unla, kei chu la hung hri naw phot ka tih, ka hun a la tlung naw leiin" a ta. 9 Chuong thu chu an kuomah a hril a, Galili ramah a la châm zing a. 10 Kût hmang dinga a unauhai an fe hnungin ama khom tlâng hriet loin a rûkin a hang fe a. 11 Kût lai chun ama chu Judahaiin an zong a, "Khaw lam a um?" tiin an indon a. 12 Mipui chun a chanchin an hril sup sup a. Thenkhatin "Mi tha a nih" an ta, a thenin "Teu lo e, mipui hlêmtu a nih" an ti bok a. 13 Judahai an ti leiin tu khomin a chungchàng thu uolâu takin an hril ngam nawh. 14 Kût vànglai takin Isu chu tempulah a hang fe a, a zirtir a. 15 Judahaiin, " Hi pa hin inchûkna nei si loin iengti lawm lawma hienga a hriet?" tiin makti takin an indon tuo a. 16 Isu chun, "Ka thu inchûktir hi keima awm thu suok el a ni naw a, a mi tirtu zirtirna a ni lem. 17 Tu khom Pathien ditzawng thaw nuomtu chun ka thu inchûktir hi Pathiena inthoka suok am ka phuokfawm ti hrieng an tih. 18 Tu khom mani phuokfawm thu hriltu chun mani ropuina a zong a nih. A tirtu ropuina zongtu ruok chu mi thutak a na, amaa chun indik nawna hrim a um nawh. 19 Mosien Dàn a pêk cheu an naw maw? Sienkhom tu khomin in zawm nuom bok si nawh. Ieng leia mi that in tum?" a ta. 20 Mipui chun, "Ramhuoi zawl i ni hi; tuin am that a tum rêng rèng che leh?" an ta. 21 Isu chun, "Thil mak pakhat ka thaw a, inrêngin mak in ti a. 22 Mosien sertan thu a pêk lei chêuin (Mosie thaw tan ni loin in thlatuhai chîng tan a ni lem kha), Sabat ni khomin ser in tan hlak. 23 Mosie Dàn bawsiet nawna dinga Sabat ni khoma naupang ser in tan hlak si chun, ieng dinga Sabat nia mi ka sukdam lei ela ka chungah in lung a sen bik? 24 Puo tieng inlang dàn ringot thlîr loin, indik takin thu rêl ro" a ta. 25 Jerusalema mi thenkhatin, "Hi pa hi that an tum kha a ni naw am a nih? 26 En ta u, tlâng hrietin thu a hril a, tu khomin an kal si naw hi! Ama hi hotuhaiin Krista chu ni ngeiin an hriet tah tìna am a ni ding? 27 Hi pa hi khaw lai mi am a nih ti ei hriet si a; Krista chu a hung pha chun a hungna chin tu khomin an hriet awm top si nawh" an ta. 28 Tempula a zirtir lai chun Isun rawl inring takin, "Nangnin in mi hriet, khaw lai mi am ka nih ti khom in hriet. Nisienlakhom, keima thua hung ka ni nawh. A mi tirtu hi mi indik tak a na, ama chu in hriet nawh. 29 Kei ruok chun ama chu ka hriet; a kuoma inthoka hung ka na, ama mi tir ka nih" a ta. 30 Chuongchun, ama chu man an tum a, sienkhom a hun a la tlung naw leiin tu khomin a chungah kut an thlàk hri nawh. 31 Mipui laia tam tak ruok chun ama chu an ring a. "Mesia khom hung sien la, ama nêk hin inchikna thil mak a thaw rawn bik chuong ding am a nih?" an ti tawl a. 32 A chungthua mipui titi rùk chu Farisaihaiin an hrietin, thiempu lalhai le Farisaihai chun Isu man dingin tempul pulis an tir a. 33 Isun an kuomah, "Sawtnawte in kuomah la um hrîng ka ta, chu zoah a mi tirtu kuomah fèng ka tih. 34 Nangnin mi zong in ta, mi hmu naw ti niu; ka umna dinga khom hung thei naw ti niu" a ta. 35 Judahai chun, "Ei hmu thei naw dingin hi pa hi khaw lai am fe a tum a ni ding aw? Grikhai laia eini mi inpêm darhai lai fein Grikhai chu zirtir a tum am a ni ding? 36 'Nangnin mi zong in ta, mi hmu si naw ti niu, ka umna dinga khom hung thei naw ti niu' a ti hi ieng tìna am nîng a ta?" an ti tawl a. 37 Kût tumtiek ni ding, a nipui nî tak chun Isu a ngîr a, inring takin a khêk a, "Tu khom dangchâr chu ka kuomah hung sien, dawn raw se. 38 Pathien lekha thuin a hril angin, tu khom kei mi ring chu a sûnga inthokin hringna tui hung luong suok a tih" a ta. 39 Chu chu ama ringtuhaiin Thlarau an la chang ding thu a hrilna a nih. Thlarau chu pêk a la ni hrì nawh, Isu chu chawimawia a la um si naw leiin. 40 Chuong thu chu an hrietin mipui lai thenkhatin, "Hi pa hi zawlnei chu a ni ngei hi" an ti a. 41 Mi dangin, "Hi pa hi Krista chu a nih" an ti bok a. Thenkhatin, "Krista chu Galili rama inthokin a hung suok ding maw? 42 Pathien thuin, 'Krista chu Davida thla, Davida khuo Bethlehema hung pieng ding a nih' a ti an naw maw?" an ta. 43 Chuongchun, ama leiin mipui lai inthèna a suok a. 44 Anni laia thenkhat chun man an nuom a, sienkhom tu khomin an tawk nawh. 45 Tempul pulishai chu thiempu lalhai le Farisaihai kuoma chun an kîr nawk a, anni chun, "Ieng dinga in hung thuoi naw?" an lo ti a. 46 Tempul pulishai chun, "Hi mipa ang hrim hin tu khomin thu an la hril ngai nawh" tiin an don a. 47 Farisaihai chun, "Nangni khom a lo hlêm hman ve cheu a ni maw? 48 Hotuhai le Farisaihai laia mi tu khom ama ring an um nawh ti in hriet naw maw? 49 Dàn hre lo mipuihai hi tongsephur an nih" tiin an khak a. 50 Anni laia pakhat Nikodem, kha hmaa Isu kuoma lêng tah khan, 51 "Ei Dàn ang chun, miin a thiem thu a hril ngaithlâk zet hma le iem a thaw ti hriet chieng zet hma chun thiem naw inchangtir thei a ni'm a ni?" a ta. 52 Anni chun, "Nang khom Galili mi i ni ve am an tah? Pathien lekha thu ngun takin bi la, Galili rama inthokin zawlnei an suok ngai nawh ti hmûng i tih" an ta. 53 Chuongchun, mi tin mani inah an inlawi ta seng a.

John 8

1 Isu ruok chu Oliv tlàngah a fe a. 2 A zîng vartienin tempulah a lût nawk a, chu taka mi um po po chun an hung bawr a, a thung a, anni chu a zirtir a. 3 Dàn zirtirtuhai le Farisaihai chun nuhmei, a uire laia man, k an hung thuoi a, a laiah an inngîrtir a. 4 Isu kuoma chun, "Zirtirtu, hi nu hi a uire lai taka man a ni a. 5 Mosie mi pèk Dàn ang chun hieng ang nuhmei hi lunga dêng hlum ding a na, nangin iengtin am i ngai a?" an ta. 6 Chu chu a hêkna ding an hmu theina dinga khal awk an tumna a nih. Sienkhom, Isu chu a kûn a, a kutpàrin hnuoiah thil a ziek a. 7 Chuonga an hnaw sek sek lei chun a hang dâk a, an kuomah, "Nangni lai suol nei lo in um chun dêng hmasa raw se" a ta. 8 A kûn a, hnuoi a ziek nawk a. l 9 A thu hril an hrietin, a upa taka inthoka tanin pakhat khatin an inrel hmang a, a tawpah Isu le nuhmei ngîr chauh chu an um tah a. 10 Isu chu a hang dâk a, "Nuhmei, khaw lai am an um zo ta a? Thiem naw inchangtir che tu khom an um naw a ni maw?" a ta. 11 Ama chun, "Pu, an um nawh" a ta. Isu chun, "Kei khomin thiem naw ka'n changtir naw che. Fe la, suol nawk ta ngai naw rawh" a ta. m 12 Isun an kuomah thu a hril nawk a. "Kei hi khawvel êntu ka nih, tu khom a mi zui chu inthimah lêng top naw ni a, hringna var nei lem a tih" a ta. 13 Farisaihai chun, " Mani thu a nih i hril hi, i thu hril a'n dik nawh" an ta. 14 Isun, "Keima thu inhriettir lang khom ka thu inhriettir chu thu dik a nih, ka hung suokna le ka fèna ding ka hriet si a; nangni chun ka hung suokna le ka fèna ding chin in hriet nawh. 15 Nangni chun mihriem dân hmangin thu in rêl a, kei ruok chun tu chung thu khom ka rêl nawh. 16 Lo rêl khom ni ta lang, ka thu rêl chu indik a tih, a rêltu chu keima el ni loin kei le mi tirtu Pa kan ni si a. 17 In Dàna ngei khom, hrepuitu mi pahni thu chu pom tlâk a nih ti ziek a um. 18 Keiin ka thu ka'n hriettir a, a mi hrepuitu chu mi tirtu Pa a nih" a ta. 19 Anni chun "Khaw lam i pa chu?" an ta. Isun, "Nangnin in mi hriet nawh, ka Pa khom in hriet nawh. Kei mi hrie ni unla chu, ka Pa khom in hriet ta ding bah" a ta. 20 Chuong thu chu tempul thawlawm bawm siena bula a zirtir laia a hril a nih. Tu khomin an la man chuong nawh, a hun a la tlung naw leiin. 21 Isun an kuomah, "Ka fe hmang ding a na, nangnin mi zong in ta, in suolna leh thi'ng in tih; ka fèna dingah nangni hung thei naw ti niu" a ti nawk a. 22 Judahai chun, " 'Ka fèna dingah nangni hung thei naw ti niu' a ti hi ama le ama inthat a tum nìng a ti?" tiin an indon tuo a. 23 Isu chun hril zom peiin, "Nangni chu hnuoi tienga inthoka hung suok in na, kei chu chung tienga inthoka hung thla ka nih; nangni chu hi khawvela mi in ni a, kei chu hi khawvela mi hi ka ni nawh. 24 Chu lei chu annawm, 'In suolna leh thîng in tih' ka ti kha; Keima chu ka nih ka ti hi in awi si naw chun in suolna leh thi hrim in tih" a ta. 25 Anni chun, "Tu'm i na ?" an ta. Isun, "A tirin ka hril ta cheu an naw maw? 26 In chungchang thua hin hril le rêl ding tam tak ka nei; ieng po khom ni sien, a mi tirtu chu mi indik tak a na, a kuoma inthoka ka hriet chauh khawvel kuomah ka hril hlak" a ta. 27 An kuomah Pa thu a hril a nih ti an hriet si nawh. 28 Isu bokin an kuomah, "Mihriem Naupa hi in khai kâng pha leh Keima chu ka nih ti le keima thuin thil ieng khom ka thaw naw a, Pain a mi hril ang peiin ka hril chauh a nih ti hung hre tâng in tih. 29 A mi tirtu chu ka kuomah a um a, màkhâta um dingin a mi thlàthlam ngai nawh, a lawmzawng ka thaw pei hlak leiin" a ta. 30 Chuong thu chu a hril lai zingin mi tam takin ama chu an ring tah a. 31 Ama ringtu Judahai kuoma chun Isun, "Ka thuah in um zing chun ka zirtirhai ni takzet in tih. 32 Thutak hrieng in ta, thutak chun inzalêntir a ti cheu" a ta. 33 Anni chun, "Abraham thlahai kan nih, tu bawia khom kan la um ngai nawh. Iengti leia 'Inzalêntir a ti cheu' dàm chu i ti am a na?" an ta. 34 Isun an kuomah, "Thu dik tak ka hril cheu hi, tu khom suol thawtu chu suol bawi a nih. 35 Bawi chu sûngkuoah a thang zing nawh, naupa ruok chu kumkhuoin nau a ni zing. 36 Chuleiin, Naupain a'n zalèntir cheu chun zalên tak tak tâng in tih. 37 Abraham thlahai in nih ti ka hriet. Amiruokchu, mi that in tum si, ka thuin nangniah hmun a chang naw leiin. 38 Keiin ka Pa kuoma thil ka hmu chu ka hril hlak; nangni ruok chun in paa inthoka in hriet chu in thaw hlak" a ta. 39 Anni chun, "Kan pa Abraham a nih" an ta. Isun, "Abraham nauhai in ni chun Abraham thaw ang thawng in tih. 40 Tu ruok hin chu, Pathien kuoma inthoka thutak hretu le hriltu cheu hi, mi that in tum si! Abrahamin hieng thil hi a thaw ngai nawh. 41 In pa thaw ang in thaw ve a ni hi" a ta. Anni chun, "Sawn kan ni nawh, pa pakhat chauh kan nei, Pathien ngei chu" tiin thang an khaw a. 42 Isu chun an kuomah, "In pa chu Pathien ni sien, mi hmangai in tih, Pathiena inthoka hung ka ni si a. Hi taka ka um hi ka thua hung ka ni naw a, amain a mi tir lei a nih. 43 Ka thu hril hi ieng leia in hriet thiem naw? Ka thu in man fùk thei naw lei a nih. 44 In pa Diebol nauhai in ni a, in pa lawmzawng thaw in nuom hlak. Ama chu a tira inthokin tuoltthattu a nih; thutakah a ngîr ngai naw a, amaah thutak a um bok nawh. Khêlhril hi a piengpui tong hrim a ni a, a khêlhlip a, khêl po po pa a nih. 45 Thutak ka hril lei cheuin in mi ring naw a ni hi. 46 Ka suolna hrie nangni lai tu'm in um? Thutak ka hril cheu hi, ieng leia in mi ring naw? 47 Pathien mi chun Pathien thu a ngàithlàk hlak; nangni ruok chun ka thu in ngàithlàk nawh, Pathiena inthoka suok in ni naw leiin" a ta. 48 Judahai chun, "Nang hi Samari mi, ramhuoi zawl kan ti che kha kan lo ti indik hle an naw maw?" an ta. 49 Isu chun, "Ramhuoi zawl ka ni nawh, ka Pa ka chawimawi a ni lem; nangni ruok chun in mi sukpawi si. 50 Mani ropuina ka zong nawh, sienkhom a zongtu pakhat a um a, ama chu rorêltu a nih. 51 Thudik ka hril cheu hi, tu khom ka thu vongtu chun kumkhuoin thìna intem ngai naw nih" a ta. 52 Chu zet chun Judahaiin, "Tuhin chu ramhuoi zawl i ni takzetzie kan hriet chieng tah. Abraham a thi tah a, zawlneihai khom an thi tah a, nang hlakin, 'Tu khom ka thu vongtu chun kumkhuoin thìna intem ngai naw nih' dâm i ti vêl a. 53 Kan thlàtu Abraham nèkin i ropui lem am a ni? Ama khom a thi tah, zawlneihai khom an thi tah. Nang, a tua inruot rêng rêng che?" an ta. 54 Isun a don a, "Mani inchawimawi ni lang, ka mawiin thu fûn naw nih. 'Kan Pathien' in ti ve, ka Pa chu mi chawimawitu a nih. 55 Nangnin ama chu in hriet si nawh, kei chun ama ka hriet. 'Ama chu ka hriet nawh' ti lang, nangni ang boka khêlhlip nîng ka tih. Ama ka hriet a, a thu ka vong hlak. 56 In thlatu Abraham kha ka nî hmu ding a ni leiin a hlim êm êm a, a hmu ta ngei a, a lawm hrim a nih" a ta. 57 Judahai chun, "Nang kum sawmnga khom la tling lo che, Abraham i hmua maw?" an ta. 58 Isun, "Thudik tak ka hril cheu hi, Abraham pieng hma khomin ka um tah" a ta. 59 Ama dêngna dingin lung an rût a, sienkhom Isu ân bi a, tempula inthok chun an rel suok tah a.

John 9

1 Isu chun a fe malamin mitdel saa pieng mi pakhat a hmu a. 2 A zirtirhai chun, "Zirtirtu, mit indel saa pieng hi ama suol lei a ni, a nu le pa suolna lei?" tiin an indon a. 3 Isun a don a, "Hi pa hin suol a thaw nawh, a nu le pa khomin an thaw bok nawh, amaah Pathien sinthaw a'n lang theina ding a ni lem. 4 Sùn a ni lai hin a mi tirtu sin ei thaw ding a nih. Tu khomin sin an thaw thei naw hun zàn a hung tlung ding a nih. 5 Khawvela ka châm sûngin khawvel êntu ka nih" a ta. 6 Chuonga a hril zo chun hnuoiah chil a sâk a, a chilin pilpok a siem a, mitdel mita chun a bel a, 7 "Siloam dîlah va sawp rawh" a ta. Siloam chu 'Tir' tìna a nih. Chuongchun a fe a, a va sawp a, mit varin a hung kîr tah a. 8 An tuolbawmhai le kha hmaa a kutdaw lo hmu hlak hai chun, "Hi pa hi kutdawa thung hlak kha a ni nawm a ni?" an ta. 9 Thenkhatin, "Kha pa kha ni e" an ta, mi dangin, "An nawh ie, a angpui a ni lem" an ti bok a. Ama chun, "Kha pa kha ka nih" a ta. 10 Anni chun, "Anleh, ieng tin am i mit a hung var leh?" an ta. 11 Ama chun, "Mi pakhat Isu an ti khan pilpok a siem a, ka mitah a bel a, 'Siloam dîlah va sawp rawh' a ta, ka va sawp a, ka hmu thei el a nih" a ta. 12 Anni chun, "Ama chu khaw la'm a um?" an ta. Ama chun, "Ka hriet nawh" a ta. 13 Chuongchun, mitdel ni hlak kha Farisaihai kuomah an thuoi a. 14 Isun pilpok siema a mit a sukvar ni kha Sabat a nih. 15 Farisaihai chun mit varna a hmu dàn chu an indon a. Ama chun, "Ka mitah pilpok a bel a, ka phì fai a, ka hmu thei el a nih" a ta. 16 Farisai thenkhat chun, "Chu pa chun Sabat an ser naw leiin Pathien kuoma inthoka suok ni naw nih" an ta. Thenkhat ruok chun, "Misuolin ieng tin am hieng ang thilmak hi thaw thei a ta?" an ti bok a, anni rawi inkârah inthèna a hung suok ta a. 17 "Ama chu ieng angin am i ngai, i mit a sukvarpèk si che a?" tiin mitdel chu an indon nawk a. Ama chun, "Zawlnei a nih" a ta. 18 A nu le pa an ko hma chun mitvarna changtu chu kha hmaa mitdel ngei a ni thu le mitvarna a hmu thu chu Judahai chun an awi nuom tlat naw a. 19 A nu le pa kuoma chun, "Hi pa hi in naupa, mitdel sa hrima pieng in ti kha a ni? Iengtin am tuhin a hung hmu thei ta a?" tiin an indon a. 20 Anni chun, "Hi pa hi kan naupa a nih ti kan hriet. Mitdel sain a pieng ti khom kan hriet. 21 Nisienlakhom, iengtin am tuhin a hung hmu thei tah ti kan hriet naw a, a mit sukvartu khom kan hriet bok nawh; ama kha indon ro, puitling a ni ve tah annawm, aman ama chungthu chu hril raw se" an ta. 22 Judahai an ti leiin a nu le pa chun chuong ang chun an ti a nih; Judahai chun, "Ama chu Krista a nih" tia pom taphot chu sunagoga inthoka hnawl ding tia thu an lo rêl ta sa a ni si a. 23 Chu lei chun a nih a nu le pain "ama kha indon ro, puitling a ni ve tah annawm" an ti chu ni. 24 Chuongchun, mitdel ni hlak chu an ko nawk a, "Pathien chawimawi rawh. n Hi mipa hi misuol a nih ti kan hriet" an ta. 25 Ama chun, "Misuol a ni le ni naw ka hriet nawh, thil pakhat ka hriet, mitdel ka ni hlak a, tuhin chu ka hmu thei tah" a ta. 26 Anni chun, "Iengtin am a thaw chea i mit a hung var el chu?" tiin an indon nawk a. 27 Ama chun, " Ka hril vong ta cheu annawm, in hriet nuom si nawh; Ieng dinga tuta in hriet nuom nawk tlat? Nangni khom a zirtir ni ve in nuom a ni?" a ta. 28 Anni chun an hal a, "Nanga phiengsen hi ama zirtir i na, keini chu Mosie zirtirhai kan nih. 29 Pathienin Mosie a biek ti kan hriet, hi pa ve hi khaw laia mi am a na ti kan hriet hrep nawh" an ta. 30 Ama chun a don a, "Chu tak chu a nih a makna chu! Khaw lai mi am a nih ti in hriet naw a, sienkhom ka mit a sukvar tlat si. 31 Pathienin mi suol thu a ngaithlâk ngai nawh ti ei hriet; Pathien ngaisaktu, a ditzawng thawtuhai thu ruok chu a ngaithlàk hlak. 32 Khawvel insieng tira inthokin mitdel saa pieng mit an sukvar nawk ti tu khomin an hriet ngai nawh. 33 Hi pa hi Pathien kuoma inthoka suok ni naw sien chu ieng khom thaw thei naw nih" a ta. 34 Anni chun, "Nang, suol letdèra piengin keini i mi hril vei maw!" an ta. Chuongchun, an hnot suok tah a. 35 An hnot suok ti Isun a lo hriet chun a zong suok a, "Pathien Naupa i ring am?" a ta. 36 Ama chun, "Pu, ama chu tu am a na? Ring ka tih" a ta. 37 Isun a kuomah, "Ama chu i hmu zing tah, a betu che hi a nih" a ta. 38 "Lalpa ka ring ie" tiin a chawibiek nghal a. 39 Isun a kuomah, "Rorêl dinga hi khawvela hung ka nih, mitdelhai mit a hung varna ding le mitvarhai mit a hung indelna dingin" a ta. 40 An bula um Farisaihaiin chu thu chu an hrietin, "Keini khom mitdel kan ni ve a ni?" an ta. 41 Isu chun, "Mitdel in ni chun suol leia inthiem nawna lungril nei naw ti niu; tuhin chu 'Kan hmu thei' in ti tlat leiin inthiem nawna suol chu nangniah a um zing a nih" a ta.

John 10

1 "Thu dik tak ka hril cheu hi, tu khom beram huong kotkhâra lût loa hmun danga inthoka lawn lût chu rûkru le suomhmang a nih. 2 Tu khom kotkhâra lût ruok chu berampu a nih. 3 Kotkhâr vêngtuin ama chu kot a lo hongpèk a, a beramhaiin a rawl an hriet a, a beramhai chu an hmingin a ko seng a, a thuoi suok hlak. 4 A beram po po a khal suok vong pha leh an hma a thuoi a, a beramhai chun an zui hlak, a rawl an hriet leiin. 5 Mi dang chu zui naw ni hai, tlàn hmangsan lem an tih, a rawl an hriet naw leiin" a ta. 6 Hi tekhinthu hi Isun an kuomah a hril a, sienkhom a umzie an hriet si nawh. 7 Chuleiin, an kuomah Isun a hril nawk a. "Thu dik tak ka hril cheu hi. 8 Kei hi beram kotkhâr chu ka nih. Ka hmaa hunghai po po kha rûkru le suomhmang vong an nih; sienkhom beramhaiin an rawl an ngaithlàk nawh. 9 "Kei hi kotkhâr chu ka nih; tu khom keimaa lût taphot chu him a ta, lûtin suok a ta, tlatna hmun tha hmu bok a tih. 10 Rûkru chu inru ding dàm, sukhlum ding dàm le sukse ding dâm chauin a hung a; kei ruok chu hringna an neina ding le tam tak an neina dinga hung ka nih. 11 "Kei hi berampu tha ka nih; berampu tha chun beramhai ta dingin a hringna a pêk hlak. 12 Inhlawfa, berampu tak ni lo, beram neitu ni bok lo chun satene hung a hmu pha beramhai chu a tlànsan a, satenein beramhai chu a se a, a sukdar hlak. 13 Inhlawfa a ni leiin a beramhai a ngaisak naw a, a tlànsan hlak. 14 Kei chu berampu tha ka nih; ka beramhai chu ka hriet a, ka beramhai khomin an mi hriet, 15 Pain a mi hriet ang le keiin Pa ka hriet ang hin; chun, an ta dingin ka hringna ka pêk bok. 16 Hi beram huonga mi naw khom hi beram dang ka nei. Anni khom la hung thuoi ngei ka tih. Ka rawl ngaithlàng an ta, vêngtu pakhat hnuoiah beram ruol khat ni tâng an tih. 17 Lak nawk dinga ka hringna ka pêk ding a ni lei hin Pain a mi hmangai a nih. 18 Tu khomin mi lapêk naw nih, keima nuom thuin ka pêk lem ding a nih. Pe thei ka na, la nawk thei khom ka nih; hi thupêk hi ka Pa kuoma inthoka ka hmu a nih" a ta. 19 Chuong thu lei chun Judahai lai inthèna a suok nawk a. 20 Anni laia mi tam takin, "Ama hi ramhuoi zawl, mi invêt letdèr a ni hi; ieng dinga a thu in ngaithlàk?" an ta. 21 Thenkhatin, "Hieng ang thu hi ramhuoi zawl thu ni thei naw nih. Ramhuoiin mitdel mit a sukvar thei am a ni?" an ta. 22 Thlasik lai, Jerusalemah Hlànthar Kûto an hmang laiin, 23 Isu chu tempula Solomon Tuolpùka chun a'n vàk vel a. 24 Judahai chun an hung bawr a, "Ieng chen am lungawpinkaiin i mi sie ding a na? Krista i ni chun chieng takin mi hril el rawh" an ta. 25 Isun a don a, " Ka hril ta cheu a, in awi si nawh. Ka Pa hminga thilmak ka thawhai khan ka chanchin a'n hriettir a nih. 26 Nisienlakhom, in awi si nawh, ka beram laia mi in ni naw leiin. 27 Ka beramhai chun ka rawl an hriet a, an mi zui hlak; 28 an kuomah chatuon hringna ka pêk a, kumkhuoin thi naw ni hai; tu khomin ka kuta inthokin inchù thla thei bok naw ni hai. 29 Anni mi petu ka Pa chu iengkim nèka ropui lem a nih; ka Pa kuta um chu tu khomin an lâk hmang thei bok nawh. 30 Kei le Pa chu pum khat kan ni si a" a ta. 31 Judahai chun ama dêngna dingin lung an rût nawk a. 32 Isun an kuomah, "Paa inthoka suok thilmak ropui tak tak ka'n entir cheu a, a ieng lei tak khan am mi dêng in tum a na?" a ta. 33 Judahai chun, "I thilmak thaw leiin lungin dèng chê kan tum nawh. Pathien i hrilsiet a, nang mihriem ve el bok si, Pathiena i'n sâl lei lem a nih" an ta. 34 Isun a don a, "In Dàn lekhabuah "Pathienhai in nih, ka tih" ti ziek a ni nawm a ni? 35 Pathien thu tlungnahai hman Pathienhai ti an ni chun (Pathien lekha thu chu hnawl thei a ni si naw a), 36 Pathienin a ser hrang, 'Pathien Naupa ka nih' ka ti leiin, khawvela Pathien mi tir kei hin 'Pathien a hrilsiet' in ti maw? 37 Ka Pa sin ka thaw naw a ni chun mi ring naw ro; 38 ka thaw ruok chun kei mi ring naw unla khom, ka sinthaw bèk chu ring ro; Pa chu Keimaah a um a, kei Paah ka um ti in hriet a, in chieng theina dingin" a ta. 39 Chuongchun, ama chu man an tum nawk a, sienkhom an man phàk lo dingin a'n rel hmang a, 40 Jordan râl, Johanin kha hmaa baptisma a'n changtirna hmuna khan a fe a, chu taka chun a um ta zing a. 41 Mi tam tak a kuomah an hung a, "Johanin inchikna thilmak ieng khom a thaw nawh, amiruokchu Johanin hi pa chungchang a hril taphot kha a lo indik vong a ni hi" an ta. 42 Chu hmuna chun mi tam takin ama chu an ring tah a.

John 11

1 Mari le a zuorpuinu Martha hai khuo Bethania um mi pakhat, a hming Lazar chu a damnaw a. 2 Mari chu damnaw Lazar farnu a na, hriek rimtuia Lalpa chûl a, a sama a ke hrutu kha a nih. 3 Chuongchun, a farnuhai chun Isu kuomah, "Lalpa, i hmangai kha a dam nawh" tiin thu an incha a. 4 Isun a lo hriet chun, "Hi natna hi thina ding a ni nawh, Pathien ropuina ding a ni lem. Hi lei hin Pathien Naupa hi chawimawiin a um ding a nih" a ta. 5 Martha le a a zuorpuinu le Lazar chu Isun a hmangai a, 6 sienkhom a damnaw ti a hriet hnung khomin a umna ngaiah ni hni zet a la châm a. 7 Chu hnung chun a zirtirhai kuomah, "Judai ramah fe nawk ei tiu" a ta. 8 Zirtirhai chun, "Zirtirtu, kha hma el khan Judahan lunga dêng che an tum a, chuong sa khom chun i fe nawk ding maw?" an ta. 9 Isun a don a, "Sùnah dârkâr sawmpahni a um naw am a ni? Sùnah mi a lêng chun, hi khawvel var hi hmanga a hmu fie thei leiin a'n sui ngai nawh. 10 Zànah a lêng ruok chun, var a nei naw leiin a'n sui hlak" a ta. 11 Chuong thu a hril zo chun Isun, "Ei ruolpa Lazar kha a in tah a, sienkhom kei har dingin ka fe ding a nih" a ta. 12 A zirtirhai chun, "A in chun tha nawk el a tih" an ta. 13 A thi thu Isun a hrilna a nia chu a zirtirhai chun in pangngaia in a ni thu a hril an sawn a. 14 Chuongchun, Isun fie taka hrilin, "Lazar a thi a nih. 15 Nangni tieng ngaituona leiin, chu taka ka um naw chu ka lawm, in ring theina dingin. Sienkhom, a kuomah fèng ei tiu" a ta. 16 Thoma, Didum (Phira) an ti bok chun zirtir danghai kawlah, "Ama leh thi ding khomin, fe vèng ei tiu" a ta. 17 Isu a hang tlung chun Lazar chu ni li thlànah a lo zal tah ti a hriet a. 18 Bethani chu Jerusalema inthoka kilometer thum vèla hla a nih. 19 Martha le Marin an tapä an sûn lei chun khawsawt lengpui Juda mi tam tak an hung a. 20 Martha chun Isu a hung tlung ti a hriet charin a va tuok a, Mari ruok chun in a lo nghâk a. 21 Martha chun Isu kuomah, "Lalpa, hi taka um ni la chu, ka tapä hi thi lo ding a na. 22 Tu khom hin Pathien kuoma i hni taphot chu pêng a ti che ti ka hriet" a ta. 23 Isun a kuomah, "I tapä chu tho nawk a tih" a ta. 24 Martha chun, "Ni kin nia thonawknaa chun tho nawk a tih ti ka hriet" a ta. 25 Isun, "Kei hi thonawkna le hringna chu ka nih; tu khom a mi ring chu thi sienkhom hring zing a tih. 26 Tu khom chuong anga hring, mi ringtu taphot chu kumkhuoin thi naw nih. Chu chu i ring am?" a ta. 27 Martha chun, " Ring e, Lalpa, Krista Pathien Naupa, khawvela hung ding chu i nih ti ka ring" a ta. 28 Chu chu a hril zoin Martha chu a fe a, a zuorpuinu Mari chu a rûkin a va ko a, "Zirtirtu hi taka hin a um a, a ko che" a ta. 29 Chu chu a hriet charin a tho vat a, Isu kuom tieng a pan ta nghal a. 30 Isu chun khuo la lût hman loin Marthain a va tuok laia a umna ngaiah a la um zing a. 31 Insûnga khawsawt lèngpui Judahaiin Mari a tho vat a, a suok an hmu phing leh, tap dinga thlàn tienga fe an sawn a, an zui a. 32 Marin Isu umna a tlung a, ama a hmu charin a ke bulah a bokkhup a, "Lalpa, hi taka um ni la chu ka tapä hi a thi naw ding bah" a ta. 33 Mari tap le a hung zuitu Judahai tap Isun a hmuin lungril na takin a'n rûm a, 34 "Khaw lam in phûm a?" a ta. Anni chun, "Lalpa hung la, en rawh" an ta. 35 Isu a tap tah a. 36 Judahai chun, "En ta u, Lazar hi a lo va hmangai ngei de aw!" an ta. 37 Anni laia thenkhat chun, "Midel mit sukvartu hin hi pa khom hi an thi nawtir thei naw maw?" an ti bok a. 38 Isu chu hnuk ulh teu pumin thlàn a tlung a. Chu thlân chu pûk a na, a kot chu lungin an khàr a. 39 Isun, "Lungkhàr hi dom son ro" a ta. Lazar farnu Martha chun, " Lalpa tuhin chu thu tâng a tih, a thìna ni li a ni ta si a" a ta. 40 Isun a kuomah, "I ring chun Pathien ropuizie hmûng i tih ka ti naw che am a ni?" a ta. 41 Chuongchun, lungkhàr chu an dom son a, Isu chun vàn tieng nghain, "Pa, i mi ngâithlàk leiin i chungah ka lawm. 42 I mi ngâithlàk rop hlak ti ka hriet a, chu chu hi taka ngîrhai hriet dinga ka hril a nih, nangin kei hi i mi tir a nih ti an ring theina dingin" a ta. 43 Chu chu a hril zoin rawl inring takin, "Lazar, hung suok rawh" a ta. 44 Mithi chu a kut le ke thlân puona inzem pumin a hung suok a, a hmai khom inhrûkna puona tuom a nih. Isun an kuomah "A tuomna kha sût unla, infètir ro" a ta. 45 Mari lengpuitu, Isu thilthaw hmutu Judahai laia mi tam tak chun Isu an ring tah a. 46 Thenkhat ruok chu Farisaihai kuomah fein, Isu thilthaw chu an va hril a. 47 Thiempu lalhai le Farisaihai chun Sanhedrin inkhawm an ko a, "Hi mi hin inchikna thilmak tam tak a thaw ta si a, iengtin am ei thaw ta ding a na? 48 Hienga ei inthla zal chun mi po poin ama ring an ta, Roman sorkar hung inrol an ta, ei hmun thienghlim le ei hnam hi an hung suksiet vong ding a nih" an ta. 49 Anni laia pakhat, a hming Kaiafa, chu kuma thiempu laltak chun a hril ve a, "Thil ieng khom in hriet nawh. 50 Ei hnam pum ei chimit nawna dinga mipui aia mi pakhat a thi chu ei ta dingin a tha lem a nih ti in hriet phâk teu nawh" a ta. 51 Chu chu ama lungril puok suoka a hril a ni nawh. Chu kum chun thiempu laltak a na, an hnam aia Isu thi ding a hril lawkna a ni lem. 52 An hnam ai chauh khom ni loin, khawvela indar tah Pathien nauhai chu thuoi khawm nawk a, pawl khata a'n din ding thu khom a hril a nih. 53 Chu nia inthok chun a sukhlum dàn ding an phierrûk ta a. 54 Chu chena inthok chun Isu chu Judahai lai a lêngvâk ta naw a, thlalèr dep ram khaw pakhat Efraim an tia chun a fe a, chu khuoa chun a zirtirhai leh an inkulh ta zing a. 55 Judahai Fekân Kùt a hnâi tah a, thingtlànga inthokin mi tam tak Fekân Kùt hmaa inthien dingin Jerusalemah an hang fe a. 56 Anni rawi chun Isu an zong a, tempul tuolzawlah ngîr bûmin, "Iengtin am i ngai ve? Kûtah a hung naw top el ding maw?" tiin an indon tuo a. 57 Ama an man theina dingin tu khomin a umna an hriet chun thuneituhai kuoma ripawt dingin Thiempu lalhai le Farisaihai chun thupêk an insuo ta si a.

John 12

1 Fekân Kùt hma ni ruka chun mithi a keitho Lazar umna khuo Bethaniah Isu a hung tlung a. 2 Chu taka chun ama hmingin zànbu an buotsai a, Marthain rong a bawl a, dawkàna thlàithlèng kìlpuituhai lai chun Lazar khom a thang a. 3 Mari chun Nard hriek hlang hlak rimtui, to tak el, bûr khatp a hung chawi a, hriek chun Isu ke chûlin, a samin a ke chu a hrûk a. Hriek rimtui rim chun in chu a sip rum rum a. 4 A zirtir laia pakhat, Juda Iskariot, ama inmantirtu ding chun, 5 "Hi hriek rimtui hi zor a, mi retheihai kuomah ieng dinga a pêk lem el naw? A man hlak puitling kum khat hlaw hû zet a ni si a!" tiin a lo soisel a. 6 Mi retheihai a'n voi leia chu chu a hril a ni nawh; rûkru a na, tangka ip koltu a na, chu ipa um chu a lâk hlak lei a nih. 7 Isu chun, "Tosan raw khai! Ka ruong vui nia dingin hi rimtui hi a lo khêk hrim a nih. 8 Mi retheihai chu ieng lai khom nangni lai an um zing an nawm, kei ruok chu in kuomah um zing naw nîng" a ta. 9 Bethani khuoah Isu a um ti Juda mipuiin an hriet chun hmu dingin an fe a; Isu chauh ni loin, mithi a keitho Lazar khom chu hmu an nuom bok a. 10 Chuleiin, thiempu lalhai chun Lazar khom sukhlum tumin an phierrûk a, 11 ama leia Juda tam takin Isu chu ringa a tieng an pakài tâk leiin. 12 A zînga chun kûta hung mipui tam takin Jerusalem panin Isu a hung ti an hriet a. 13 Tûm kâu chawiin ama hmuok dingin an hung inthok suok a, Hosana, Lalpa hminga hung chu, A ham a tha; Israel Lal hung chu, A ham a tha tiin an khèk thuop thuop a. 14 Isun sabengtung tuoi chu a hmu a, a chungah a chuong a, 15 Pathien lekha thua"Ti naw, aw Zion naunu, En ta, i Lal a hung, Sabengtung tuoi chunga chuongin"tia ziek ang khan. 16 Chuong thil chu a tîr chun a zirtirhan an hriet thiem nawh. Isu chawimawia a um hnungin a chungthu chuong ang chun ziek a ni leia an lo thaw a nih ti an hung hriet tah a. 17 Thlàna inthoka Lazar a ko suok le mithi lâia inthoka a keitho tuma um ve mipuihai khan chu thu chu an puong dar pei bok a. 18 Chu inchikna thilmak chu a thaw ti an hriet leiin mipui chun ama chu an lo hmuok a nih. 19 Farisaihai chun, "En ta u, ieng khom ei law thei naw chu a ni hi! En hman ro, khawvelin ama an zui tah hi" an inti tuo a. 20 Pathien be dinga kûta hang fehai lai chun Grik mi tuhai amanih an thang ve a. 21 Anni chu Galili rama Bethesaida khuoa mi Filip kuoma chun an hung a, "Pu, Isu kan hmu nuom" tiin an ngèn a. 22 Filip chun Andri a hril a, an pahni chun Isu an va hril a. 23 Isun an kuomah, "Mihriem Naupa hi chawimawia a um hun chu a tlung tah. 24 Thudik tak ka hril chêu hi, bu mal khom hnuoiah a tla a, a thi zet naw chun, bu chi mal chauin a um zing hlak a, a thi ruok chun rà tam tak a'n suo hlak. 25 Tu khom mani nun thlâkhlàtu chun a chân hlak a, tu khom hi khawvela mani nun theidàtu chun vong zing a ta, chatuon hringna nei bok a tih. 26 Tu khomin ka rong a bawl chun mi zui raw se, ka umnâ naah ka rongbawltu khom um a tih. Tu khom ka rong bawltu chu ka Pain chawimawi a tih. 27 "Tuhin ka lungril a lungzîng hle a, ieng am hril tâng ka ta? 'Pa, hi hun hi mi'n pumpeltir lul rawh' ka ti ding am a ni? Ti lo e! Hi lei taka hi hun hi hung tlung ka nih. 28 , Aw Pa, i hming chawimawi rawh" a ta. Chuongchun, vàna inthokin rawl a hung suok a, "Ka chawimawi tah, chawimawi pei ka tih" tiin. 29 Chu taka ngîr ve mipuiin rawl chu an hrietin, "Vàninrûm a nih" an ta, a thenin "Vàntirkoin a biek a nih" an ti bok a. 30 Isu chun an kuomah, "Chu rawl chu ka ta dinga suok a ni nawh, nangni ta ding a ni lem. 31 Tu hi khawvel chungthu rêl lai a na, tuhin hi khawvel lal hi hnot suok nîng a tih. 32 Hnuoia inthoka khai kânga ka um pha, mi po po keima tieng hîp ka tih" a ta. 33 Chu chu ieng angin am a thi ding ti inentirna dinga a hril a nih. 34 Mipui chun, "Krista chu kumkhuoa um zing ding a ni thu Dàn lekhabua inthokin kan hriet, ieng leia nangin, 'Mihriem Naupa chu khài kàngin um a tih' i ti am a na? Chu Mihriem Naupa chu tu'm a na?" tiin an indon a. 35 Isun an kuomah, "Var hi sawt naw tè nangni lai a la um hri ding a nih. Var in la nei sûng hin lêng ro, thimin a nang hma cheu hin; thima lêng chun a fèna chin a hriet si nawh. 36 Var in la nei sûng hin var hi ring ro, var nauhai in ni theina dingin" a ta. Chuong thu chu a hril zoin a fe hmang ta daih a, an hmu thei nawna dingin an bi hmang a. 37 An mit hmû ngèiah chuong ang inchikna thilmak chu thaw sienkhom ama chu an ring chuong si nawh. 38 Zawlnei Isaiin, "Lalpa, kan thucha tuin am a ring a?Lalpa kut khom tû kuom am a'n lang a?"tia a hril kha a hung tlung kimna ding a nih. 39 Hi lei hin an ring thei naw a nih. Isai bokin hieng hin a lo hril kha: 40 "Aman an mit a sukdel a, An lungril a sukchawlol a, An mitin an hmu nawna ding leLungrila an hriet thiem nawna dingin; Chuong naw chun ngha kîr an ta, Ka sukdam tawl el ding a ni si a. " 41 Isaiin a ropuizie a hmu chieng leiin chuong thu chu a hril a nih. 42 Chuong sà khom chun mi tam takin, hotuhai laia mi chen khomin, Isu an ring tah a; amiruokchu, Farisaihai leia sunagoga hnong an inlàu leiin, an hril lang ngam si nawh. 43 Pathien inpàk hlaw nêkin mihriem inpàk ni chu an hlut lem si a. 44 Isu chu inring takin a khêk a, "Tu khom a mi ring chu kei mi ring ni loin a mi tirtu ring a ni lem. 45 Tu khom a mi hmu chu a mi tirtu hmu a nih. 46 Êntu dingin khawvelah ka hung a nih, a mi ring taphot chu thima a'n lêng nawna dingin. 47 Tu khom ka thu hrea awi nawtu chu keiin thiem naw ka'n changtir nawh, khawvel thiem naw inchangtir dinga hung ka ni nawh, khawvel sandam dinga hung ka ni lem. 48 Tu khom mi hnawl a, ka thu hrilhai pom nawtu chun a chungthu rêlpèktu ding pakhat a nei. Ka thu hril ngei hi ni kin nia thiemnaw chang dinga a chungthu rêlpêktu ding chu nîng a tih. 49 Keima phuokfawm ka hril naw a, ka hril ding le ka tong dàn ding chu Pa ngèiin a mi pèk lem a nih. 50 A thupêk chu chatuon hringna intluntu a nih ti ka hriet. Chuleiin, ka Pain hril dinga a mi ti ang chu ka hril el a nih" a ta.

John 13

1 Fekân Kùt a tlung têp ta a, Isun hi khawvel suoksana Pa kuoma a kìr hun a tlung tah ti a hriet a. Khawvela um, ama mihai chu a hmangai rop hlak a, chu chu a tawp chenin a'n langtir a. 2 Zànbu an kîl mèk lai chun diebolin Simon naupa Juda Iskariot lungrilah Isu a'n mantir dàn ding a lo inphantir dêr tah a. 3 Pain a kutah thil iengkim a'n koltirzie le Pathien kuoma inthoka hung a na, Pathien kuoma bok a kîr nawk ding a nih ti chu Isun a hriet a. 4 Bu an fàk lai chun a tho a, a korfuol a hlîp a, inhrûkna puon a kawngah a vêt a. 5 Maihùnah tui a sung zo chun a zirtirhai ke a sawp tan a, a kawnga inhrûkna puon a vêt chun a hrûk hul a. 6 Simon Peter kuom a hung tlung chun Peterin, "Lalpa, nang êm chun ka ke i sawp dim a ni?" a ta. 7 Isun a kuomah, "Ka thilthaw hi tu hin i hriet nawh, sienkhom nakie chu la hung hrieng i tih" a ta. 8 Peter chun, "Nang meu chun ka ke sawp lul lo e" a ta. Isun, "Ka sawppêk naw che chun keima le nangin ieng khom intawm thei naw mei nih" a ta. 9 Simon Peter chun, "Chuong an leh, ka ke chauh sawp loin ka kut le ka lu khom tie!" a ta. 10 Isun a kuomah, "Insil ta hnung chu ke naw chu sawp a ngai nawh, a fai vong annawm; nangni in fai, in rêng ruok chun ni loin" a ta. 11 Ama inmantirtu ding chu Isun a hriet a, chuleiin "In rêng chun in fai nawh" a ti a nih. 12 An ke a sawp zo chun a kawrfuol a hâk a, a thungnaah a hung inthung nawk a, "In chunga ka thilthaw hi a umzie in hriet am? 13 Nangni chun Zirtirtu le Lalpa tiin in mi ko a, in ti dik hle, ka ni ngei hrim a. 14 Kei Lalpa le Zirtirtu hmanin in ke ka sawp chun, nangni khomin ke in insawppèk ding a nih. 15 In chunga ka thaw anga nangni khoma in thaw vèna dingin enton ding ka siempêk chêu a ni hi. 16 Thu dik tak ka hril chêu hi, bawi chu a pu nèkin a ropui nawh, tirko khom a tirtu nèkin a ropui bok nawh. 17 Chuong thil chu hre a, thaw ve nachâng in hriet chun lawm in tih. In rênga thu ka hril nawh; ka thlanghai chu ka hriet. 18 Amiruokchu, Ka bei fatuin a kekhong, qKa chungah a'n let tahti Pathien lekha thu kha a hung tlung kim theina dingin a nih. 19 Hieng thil hi a hung tlung hmâin ka hril cheu a ni hi, a hung tlung pha leh Keima chu ka nih ti in ring theina dingin. 20 Thu dik tak ka hril cheu hi, tu khom ka mi tir lo lawmtu chun a mi pom a nih; tu khom kei mi lawmtu chun a mi tirtu khom a pom a nih" a ta. 21 Isun chuong thuhai a hril zo chun namên loin a lungzîng a, "Thudik ka hril cheu hi, nangni laia mi pakhatin mi'n mantir a tih" a ta. 22 Tu tak am a ti bîk an hriet naw leiin an inen thap a. 23 Zirtir laia pakhat, Isun a hmangai chu a âwm hneng deuthawin a'n thung a. 24 Simon Peter chun, "Tu'm a na a kawk bìk indon rawh" tiin mitin a hei hril a. 25 Ama chu Isu âwm sikin a thle phei a, "Lalpa, a tu hi'm ie?" a ta. 26 Isun a don a, "Thlênga bei hlek ka'n chie, ka pèk chu nîng a tih" a ta. Chuongchun, bei hlek chu a'n chie a, Simon naupa Juda Iskariot chu a pêk a. 27 Bei hlek a pèk hnungin a sûngah Setan a lût nghàl a. Isun a kuomah, "I thaw ding chu thaw vat rawh" a ta. 28 Dawkan kîla thunghai lai tu khomin chu chu ieng leia a kuoma a hril am a na ti an hriet nawh. 29 Juda chu tangka ip koltu a ni leiin kût sûnga thil mamaw inchaw ding amanih, annawleh retheihai kuoma thil pe dinga Isun a hrilna ni dingin thenkhat chun an ngai a. 30 Juda chun bei hlek chu a lâk a, a suok ta nghal a, zàn a ni ta hrim a. 31 A suok hnung chun Isun, "Tuhin chu Mihriem Naupa chawimawiin a um tah a, amaah Pathien khom chawimawiin a um tah. 32 Amaah Pathien chawimawia a um chun Pathienin ama khom chawimawi a ta, chawimawi nghal a tih. r 33 Nauhai, sawt naw tè in kuomah la um ka tih. Nangnin mi zong in ta, Judahai kuoma ka hril tah ang khan, ka fèna dinga chun in hung ve thei nawh ti tuhin ka hril chêu a nih. 34 Thupêk thar ka pêk cheu; inhmangai tuo ro; keiin ka hmangai ang chêuin nangni khom inhmangai tuo ro 35 In inhmangai tuo chun mi po poin ka zirtirhai in nih ti chu taka inthok chun hrieng an tih" a ta. 36 Simon Peterin a kuomah, "Lalpa, khaw lai am i fe ding a na" a ta. Isun, "Tu hin chu ka fèna dingah mi zui thei naw ti niu, nakie pha ruok chu mi la zui in tih" a ta. 37 Peterin, "Lalpa, ieng leiin am tu khom hin ka zui thei naw ding che? I ta ding chun thi ka'n huom annawm" a ta. 38 Isun a don a, "Ka ta dingin thi i'n huom chie maw? Thu dik ka hril che hi, nangin âr khuong hmain voi thum mi'n phat i tih!" a ta.

John 14

1 "In lungril lungzing naw raw se. Pathien ring unla, kei khom mi ring ro. 2 Ka Pa inah chèngna hmun tam tak a um. Chuong chu ni naw sien, ka hril ta ding chèu an nawm. Chu taka chun in ta dinga hmun buotsai dingin ka fè ding a nih 3 In ta dinga hmun buotsaia ka fè chu hung kìr nawk ka ta, ka kuomah thuoi ka ti chêu, ka chèngnaah in chèng ve theina dingin. 4 Ka fèna ding lampui khom in hriet" a ta. 5 Thoman a kuomah, "Lalpa, i fèna ding chin kan hriet naw a, iengtin am a lampui lem chu hrieng kan ta?" a ta. 6 Isun a don a, "Kei hi lampui le thutak le hringna chu ka nih; keimaa fe naw chu tu khom Pa kuom an tlung ngai nawh. 7 Kei mi hrie ni unla chu ka Pa khom hrieng in tih. Tuhin chu in hriet tah a, ama khom in hmu ta bok" a ta. 8 Filip chun, "Lalpa, Pa chu mi'n hmutir la, kan ta dingin a hun" a ta. 9 Isun a don a, "Filip, hi chen rauh hi in kuomah ka um tah a, chuong sà khom chun tu'm ka nih ti i la hriet naw rop a ni maw? Tu khom a mi hmu chu Pa hmu a nih. Ieng leia 'Pa chu mi'n hmutir rawh' i la ti rop? 10 Kei Paah ka um a, Pa keimaah a um ti hi in ring naw a ni? In kuoma thu ka hrilhai hi keima phuokfawm a ni nawh. Keimaa um zing Pa chun ama sin a thaw a ni lem. 11 Kei Paah ka um a, Pa keimaah a um ka ti hi ring ro; annawleh ka thilthaw lei bêk hin mi ring ro. 12 Thu dik tak ka hril cheu hi, tu khom a mi ring chun thil ka thawhai hi ama khomin thaw vèng a tih, hieng nèka thil ropui lem khom hi la thawng a tih, Pa kuoma fè ding ka ni leiin. 13 Ka hminga in hnì taphot chu thaw pei ka tih, Pa chu Naupa leia chawimawia a um theina dingin. 14 Ka hminga inhnì taphot chu thaw pei ka tih. 15 "In mi hmangai chun ka thupêk zawm in tih. 16 Chun, keiin Pa hnîng ka ta, ama chun Thlamuongtu dang, kumkhuoa umpuitu ding pêng a ti cheu. 17 Chu chu Thlarau indik tak, khawvelin a hmu thei naw le hriet thei naw leia a chang thei naw chu a nih. Nangni ruok chun ama chu in hriet a, in kuomah a chêng a, nangniah hring zing a tih. 18 Fahrain màksan naw ning cheu, in kuomah hung nawk ka tih. 19 Sawt naw tè hnungah khawvelin mi hmu nawk ta naw nih. Nangni ruok chun mi hmûng in ta, kei ka hring leiin nangni khom hring vêng in tih. 20 Chu huna chun kei Paa ka um dâm, nangni keimaah in um dâm, kei nangniah ka um dâm la hrieng in tih. 21 Tu khom ka thupêk poma zawmtu chu mi hmangaitu a nih; mi hmangaitu chu ka Pain hmangai a ta, kei khomin hmangai ka ta, a kuomah inlâr bok kan tih" a ta. 22 Juda, Iskariot an ti naw lem chun a kuomah, "Lalpa, kan kuomah inlâr a, khawvel kuomah i'n lâr si naw ding chu iengti lei am a na?" tiin a'n don a. 23 Isun a don a, "Mi'n a mi hmangai chun ka thu zawm a tih, ka Pain ama chu hmangai a ta, a kuomah hung kan ta, a kuomah um zing kan tih. 24 A mi hmangai nawtu chun ka thu a zawm nawh. Thu in hriet hi keima thu a ni nawh, mi tirtu Pa thu a ni lem. 25 In kuoma ka la um sûng hin hieng thu hi ka hril chêu a nih. 26 Thlamuongtu Thlarau Thienghlim, ka hminga Pain a hung tir ding chun iengkim zirtir a ti chêu a, in kuoma ka hril ta po po hai kha inhriet suoktir nawk a ti cheu. 27 Thlamuongna ka màksanpêk cheu, keima thlamuongna ka pêk cheu, khawvelin a pêk ang ni lo ka pêk cheu hi. In lungril lungzing naw raw se; ti khom ti bok naw raw se. 28 Ka fe hmang ding a na, in kuomah hung kìr nawk ka tih ka ti kha in hriet. In mi hmangai chun Pa kuoma ka fe ding hi lawm in tih: Pa chu keia nêkin a ropui lem si a. 29 Chu chu a hung tlung pha in ring theina dingin, tuhin a hung tlung hmain ka hril chêu a nih. 30 In kuomah thu hril tam ta naw ning, hi khawvel lal hi a hung ding a ni leiin. Thu ruok chu ka chungah ieng khom a nei nawh. 31 Nisienlakhom, keiin Pa ka hmangai a, Pain thu a mi pèk ang peiin thil ka thaw lem hlak ti khawvelin an hriet theina ding a nih. Thaw ro, hi taka inthok hin suok ei tiu.

John 15

1 "Kei hi grêp kùngpui tak chu ka nih, huon neitu chu ka Pä a nih. 2 Ka zompui kâu a rà naw taphot chu a hlìm kàng a, s a rà taphot chu a rà tam zuolna dingin a'n thiel fai hlak. 3 In kuoma thu ka hrilhai lei hin in fài ta pang a nih. 4 Keimaah um zing ro, kei khom nangniah um zing ka tih. Kâu chun grêp kùngpui a zom zing naw chun a khâtin a rà thei naw ang bokin, nangni khom keimaah in um zing naw chun rà thei naw ti niu. 5 Kei hi grêp kungpui chu ka nih, nangni a kâuhai chu in nih. Tu khom keimaa um zing le kei khom amaa ka um zingna chu a rà teu hlak; ka thang loin ieng khom in thaw thei si nawh. 6 Tu khom keimaa um zing naw chu kâu sât thlàk angin an peihawn a, a hung vuoi a, an rût khawm a, meiah an pei a, a kàng hlak. 7 Keimaah in um zing a, ka thu nangniah a um zing bok chun in dit taphot hni unla, pèkin um in tih. 8 Ka zirtirhai ni a, rà tam tak in insuo hin ka Pa chu chawimawiin a um hlak. 9 Pain a mi hmangai leiin kei khomin ka hmangai cheu hi, ka hmangaiin um zing ro. 10 Ka thupêkhai in zawm chun ka hmangaiin um zing in tih, keiin ka Pa thupêkhai ka zawm a, a hmangaia ka um zing ang hin. 11 "Nangniah ka lawm zing theina ding le in lawmna chu a famkim theina dingin hieng thu hi ka hril chêu a nih. 12 Hi hi ka thupêk chu a nih; ka hmangai ang cheu hin nangni khom inhmangai tuo ro. 13 Mani ruolhai ta dinga hringna petu nèka hmangaina nasa lem nei mi an um nawh. 14 Ka thupêk in zawm chun ka ruolhai in nih. 15 Siehlaw ti nawk ta naw ning cheu. Siehlaw chun a pu thilthaw a hriet nawh. Ruolhai ka ti lem cheu a nih, ka Pa kuoma inthoka thil ka hriet po po in kuomah ka puong ta si a. 16 Nangnin in mi thlang naw a, keiin ka thlang lem chêu a, fe suoka rà insuo ding le insuo zom zing dingin ka thlang cheu a nih. Chuleiin, ka hminga in hnì taphot chu Pain pêng a ti cheu. 17 Hi hi ka thupêk chu a nih: Inhmangai tuo ro. 18 "Khawvelin a theida chêu chun, a theidà hmá chèuin kei a mi theidà tah ti hre ro. 19 Khawvel mi ni unla chu, a ta angin hmangai a ti cheu. Tu ruok hin chu, khawvel ta in ni tah naw a, khawvela inthokin ka thlang suok lem cheu a nih. Chuleiin, khawvelin a theidà chêu a nih. 20 'Siehlaw chu a pû nêkin a ropui nawh' ti ka hril tah chêu kha hre zing ro. Kei an mi suknomna chun nangni khom suknomnàng an ti cheu. Ka thu an zawm chun nangni thu khom zawm an tih. 21 Ka hming leiin hieng po po hi nangni chungah thawng an tih, a mi tirtu an hriet naw leiin. 22 Keima hungin an kuomah thu hril naw lang chu suol leia thiem naw changna an nei naw ding a na; tu ruok hin chu suonlam siem thei an ni ta nawh. 23 Tu khom keima mi theidàtu chun ka Pa khom a theidà a nih. 24 Mi thaw ngai lo thil anni lai hung thaw naw lang chu, suola thiem naw changna an nei naw ding a na; tu ruok hin chu thilmak ka thawhai an hmu tah a, chuong sà khom chun ka Pa le kei an mi theidà ta fan a. 25 Ieng khom ni sien, an Dàn lekhabua 'Annin a san boin an mi theidà' ti ziek kha a hung tlung kimna ding a nih. 26 "Chun, Thlamuongtu, Pa kuoma inthoka ka hung tir ding, Paa suok Thlarau indik tak chu a hung tlung pha leh ama chun ka thu inhriettir a tih. 27 Nangni khom a tìra inthoka ka kuoma um in ni leiin ka thu hretuhai in nih.

John 16

1 "Sukthlûka in um nawna dingin hieng thu hi in kuomah ka hril a nih. 2 Sunagogah inhnongtir an ti chêu a; a thattu chèu chun Pathien rongbawla an inngài hun la tlung a tih. 3 Pa le kei an mi hriet naw leiin chuong ang thil chu thawng an tih. 4 A hun a tlung pha leh ka lo hril vong ta chêu ti in hriet theina dingin hieng thu hi in kuomah ka hril a nih. In kuoma um ka la ni leiin hieng thil hi khä hmä khan ka hril naw chêu a nih. 5 "Tu ruok hin chu a mi tirtu kuomah ka kîr ding a ni tah a, amiruokchu tu khomin 'Khaw lam i fe ding?" ti in mi'n don si nawh. 6 Hieng thu hi in kuomah ka hril lei cheuin lungngaiin in sip nawk si a. 7 Nisienlakhom, thu dik tak ka hril cheu hi, ka fe hi in ta dingin a tha lem, ka fe naw chun Thlamuongtu chu in kuomah a hung naw ding a ni si a; ka fe ruok chun in kuomah hung tir ka tih. 8 Ama a hung tlung phä chun suol thua dàm, thiem changna thua dàm le rorêlna thua dàm khawvel hi a'n dik nawzie inhriettir a tih 9 Suol thua an indik nawna chu kei an mi ring nawna hi a nih. 10 Thiem inchangtirna thuah chun kei Pa kuoma fe ding ka ni a, an mi hmu thei ta naw ding lei hi a nih. 11 Rorêlna thua chun hi khawvel lal hi thiem naw changa ruot a ni ta zing lei a nih. 12 "In kuomah thu tam tak hril ding ka la nei ta rop a, amiruokchu tuhin chu la dawl zo hrì naw ti niu. 13 Thlarau indik tak a hung tlung pha ruok chu thutak po poah thuoi lût a ti cheu. A phuokfawm thu a hril awm si nawh; thu a donghai chu hril lem a ta, thil la hung tlung ding khom hril a ti cheu. 14 Ama chun kei mi chawimawi a ta, ka taa mi lâng a ta, chu chu inhriettir a ti chêu. 15 Pa thil nei po po ka ta a nih; chu lei chun annawm 'ka taa mi lâng a ta, chu chu inhriettir a ti chêu' ka ti nih. 16 "Sawt naw teah nangnin kei mi hmu ta naw ti niu a, sawt naw tea bok mi la hmu nawk in tih" a ta. 17 A zirtir laia thenkhat chun, "Sawt naw teah nangnin kei mi hmu ta naw ti niu a, sawt naw tea bok mi la hmu nawk in tih' a ti le 'Pa kuomah ka fe ding leiin' tia ei kuoma a hril hi ieng a ti na am nîng a ta?" tiin an indon tuo a. 18 Anni bok chun, " Sawt naw tè a ti hi iem nîng a ta? A hril umzie ei hriet map naw a nih" an ta. 19 Thu an indon nuom ti Isun a hriet a, an kuomah, " Sawt naw teah mi hmu ta naw ti niu a, sawt naw tea bok mi la hmu nawk in tih' ka ti kha in indon a ni maw? 20 Thu dik tak ka hril cheu hi, nangni mitthli tlain tap in ta, khawvel ruok chu hlim a tih; nangni lungngai in ta, sienkhom in lungngaina chu lawmnaah inchang a tih. 21 Nuhmei nau nei hun a hung tlung chun nau ha sè inrim takin a tuor hlak a; sienkhom a nau a hung pieng chun a tuorna chu a hriet zing ta nawh, khawvela mihriem hung pieng chu a lawm leiin. 22 Chuong ang bokin nangni khom tu hi in lungngai hun a na, sienkhom hmu nawk ka ti cheu a; chuongchun, in lungril hlim a ta, in hlimna chu tu khomin la hmangpèk nawng an ti cheu. 23 Chu nia chun nangnin ieng khom mi hni ta naw ti niu. Thu dik tak ka hril cheu hi, Pa kuoma ka hminga in hnì taphot chu pêng a ti cheu. 24 Tu chen hin ka hmingin ieng khom in la hni nawh; hni inla hmûng in tih, in lawm a kimna dingin. 25 "Tu chen hin chuong thu chu a thawi zawngin in kuomah ka hril hlak a; amiruokchu tlang taka ka Pa chanchin in kuoma ka hril hun ding a hung tlung mêk a nih. 26 Chu phä chun Pä kuomah hnipêk ka ti cheu ka ti naw a, ka hmingin thil hni lem in tih. 27 Nangnin in mi hmangai a, Paa inthoka hung ka nih ti in ring leiin Pa chun a hmangai chêu a nih. 28 Pa kuoma inthoka hung suokin khawvelah ka hung a, tuhin khawvel màksanin Pa kuom tieng ka kîr nawk ding a nih" a ta. 29 A zirtirhai chun a kuomah, "Tuhin chu a thawia thu hril loin chieng takin i mi hril tah hi. 30 Iengkim i hrietzie le tu indon buoi khom i ngai nawzie tuhin chu kan hriet tah. Hi lei hin Paa inthoka hung i nih ti kan ring" an ta. 31 Isun, "A tawp a tawpa chu in mi ring ta tawk ie! 32 Ngai ro, a hun a hung tlung ding a na, a tlung ta zing a, in in sengah tlân dar in ta, ka khât chauin mi màksan in tih. Sienkhom ka mal nawh, ka Pä ka kuomah a um leiin. 33 Keimaah thlamuongna in hmu theina dingin hieng thu hi ka hril cheu a nih. Hi khawvela hin buoina tuok hlak in tih. Nisienlakhom huoi takin um ro, keiin khawvel ka ngam tah" a ta.

John 17

1 Chuong thu Isun a hril zo chun vàn tieng nghain, "Pä, a hun a tlung tah, i Naupa hi chawimawi rawh, Naupa hin a chawimawi theina ding chein. 2 A kuoma i pèkhai po chu chatuon hringna a pêk theina dingin nangin mi po po chungah thuneina i pêk tah a. 3 Hi hi chatuon hringna chu a nih, nang Pathien tak chauh le i tir Isu Krista hriet hi. 4 Thil thaw ding i mi pèk kha ka thaw zo a, khawvela hin ka chawimawi tah che. 5 Aw Pä, khawvel siem hmaa i kuoma ropuina ka nei khan tuhin nangma hmaa ngei mi chawimawi rawh. 6 "Nangin hi khawvela mi i mi pèkhai kuomah i hming ka puong dar tah a, anni chu i ta an na, anni chu i mi pêk a, i thu khom an zâwm tah. 7 Tuhin chu i thil mi pèk po po hi nangmaa inthoka suok a nih ti an hriet tah. 8 Nangin thu i mi pèkhai kha an kuomah ka pêk a, an lo pom a; i kuoma inthoka hung ka ni ngei ti an hriet tah a, nangin kei i mi tir a nih ti khom an ring tah. 9 "Keiin an ta dinga ka ngènpèk hi khawvel tà ding ni loin, nangin i mi pèkhai tà ding lema ka ngènpèk a nih, i tä an ni si a. 10 Ka tä po po chu i tä a na, i tä chu ka tä a ni bok, anniah chawimawiin ka um tah. 11 Kei chu i kuoma hung ta ding ka na, khawvelah um ta naw ning, anni ruok chu la um an tih. Pa Thienghlim, nangin kei i mi pèkhai hi i hming thilthawtheinain hum rawh- hming i mi pêk ngèi khan, chuongchun eini ang boka pum khat an ni ve theina dingin. 12 "An kuoma ka um sûng po nangin i mi pêk hming hin ka hum hlak, anni chu ka vêng a, anni laia pakhat khom an bohmang nawh, hremhmun naupa ti chauh naw kha chu, Pathien Lekha thu a hung tlung kimna dingin. 13 "Tuhin chu i kuom tieng ka hung ding a ni ta a, sienkhom khawvela ka la châm sûng hin hieng thu hi ka hril tawl a nih, ka lawmna kim chu anniah an neina dingin. 14 I thu an kuomah ka pêk tah a, kei khawvel mi ka ni naw ang boka khawvel mi an ni ve naw leiin khawvelin anni chu a theidà a nih. 15 "Anni chu khawvela inthoka la suok dingin ka ngên naw che a, mi suol laka inthoka hum dingin ka ngên lem che a nih. 16 Khawvel mi an ni nawh, kei khawvel mi ka ni naw ang bok hin. 17 Anni chu thutakin sukthienghlim rawh; i thu chu thutak a ni si a. 18 Khawvela i mi tir ang khan kei khomin anni chu khawvelah ka tir a nih. 19 Anni leiin ka'n ser thienghlim a, anni khom thutaka an inser thienghlimna dingin. 20 "Hienghai ta ding chauh hin ka ngènpèk naw a, an thu leia kei mi la ring dinghai ta ding khomin ka ngènpèk a nih. 21 An rêngin inpumkhat hai sien; Pa, keimaah nang i um a, nangmaah kei ka um ang hin anni khom einiah um hai sien, nangin kei i mi tir ti khawvelin an ring theina dingin. 22 Ropuina i mi pèk kha keiin anni ka pêk tah, eini pum khat ei ni ang boka pum khat an ni ve theina ding le 23 kei anniah, nang keimaah i um ang boka anni khom pum khat ni a, an famkim theina ding le nangin i mi tir le i mi hmangai angin anni hi i hmangai ti khawvelin an hriet theina dingin. 24 Pa, nangin i mi pêkhai hi ka umnaah ka kuoma um dingin ka dit a nih, nangin i mi hmangai leia hnuoi insieng hmaa inthoka i mi pèk ropuina kha an hmû zing theina dingin. 25 Aw Felna Pa, khawvel chun a hriet naw che, kei ruok chun ka hriet che; hienghai khom hin nangin kei i mi tir ti an hriet. 26 An kuomah i hming ka'n hriettir a, inhriettir pei ka tih, nangin kei i mi hmangaina chu anniah um a, kei anniah ka um theina dingin" a ta.

John 18

1 Chuong thu chu Isun a hril zoin a zirtirhai leh an suok a, Kidron vadung an kàn a, va râla oliv huona chun a zirtirhai leh an lùt a. 2 Chu hmuna chun a zirtirhai leh Isu a lêng rop hlak leiin a'n mantirtu ding Juda khomin chu hmun chu a hriet a. 3 Chuongchun, sipai hon khat le thiempu lalhai le Farisaihai tir tempul vêngtuhai chu Juda chun a hung thuoi a, khawnvar dâm, meiser dâm le hriemhrei dâm an chawi a. 4 A chunga thil hung tlung ding po po chu Isun a hriet vong a; a va suok a, "Tu am in zong?" a ta. 5 Anni chun, "Nazaret Isu" an ta. 6 Isun, "Keima hi ka nih" a ta. An mantirtu Juda khom chu anni lai a ngîr a. "Keima hi ka nih" a ti charin hnung tieng an intawl a, hnuoiah an tlu phung a. 7 "Tu am in zong?" tiin a'n don nawk a, "Nazaret Isu" an ta. 8 "Kei ka ni thu ka hril ta cheu kha. Kei mi zong in ni chun mi dang po hi chu lo inkieng raw hai se" a ta. 9 A hmaa "Nangin i mi pêkhai kha pakhat khom ka'n hmang nawh" a ti kha a hung tlung kim theina dingin hi thu hi a hril a nih. 10 Simon Peter chun a kawlhnâm pai chu a phawi a, Thiempu laltak siehlaw chu a sât a, a nakawr chang tieng a fik thlàk a (Siehlaw hming chu Malka a nih). 11 Isu chun Peter kuomah, "I kawlhnâm kha a pâiah thun rawh. Pain dawn dinga no a mi pêk chu ka dawn naw ding maw?" a ta. 12 Chuongchun, sipai ruol le an hotu le tempul vêngtu Judahai chun Isu chu an man a, an khuop a, 13 Anna kuomah an thuoi hmasa phot a. Anna chu chu kuma thiempu laltak Kaiafa tarpu a nih. 14 Kaiafa hi a nih, "Mipui aia mi pakhat thi a tha lem" tia thurawn Judahai kuoma petu kha. 15 Simon Peter le zirtir dang pakhatin Isu chu an zui a. Chu zirtir chu Thiempu laltak hmèlhriet a na, thiempu laltak tuol zawla chun Isu leh a ruolin a lùt ve a. 16 Peter ruok chun tuolah a lo nghàk a. Thiempu hmèlhriet, zirtir kha a hung kîr nawk a, kotkhâr vêngtu nunghàk chu a biek a, Peter chu a thuoi lût a. 17 Kotkhâr vêngtu nunghàk chun Peter kuomah, "Nang khom hi pa zirtir laia mi i ni ve an naw maw?" a ta. Ama chun, "Ni lo e!" a ta. 18 Siehlawhai le sipaihai chu chu taka chun an ngìr a, a dei leiin mei an sêm a, an awi a, anni lai ngîr vein Peter khomin mei lum chu a awi ve a. 19 Thiempu laltak chun Isu chu a zirtirhai chanchin le a thu zirtir chungchang thu chîk takin a'n don a. 20 Isun, "A'n langin vàntlâng hmaah thu ka hril hlak. Sunagoga hai, tempula hai le Judahai pung khawmnaa hai ka zirtir rop hlak a, a rûkin ieng khom ka hril ngai nawh. 21 Ieng leia kei i mi'n don? Ka thu hril ngaithlatuhai kuomah ieng am ka hril indon lem ta la, iem ka hril ti an hriet annawm" a ta. 22 A hril zo chun vêngtu sipai ngîrhai laia pakhat chun, "Thiempu laltak chuongchun i don lèt ngam maw!" tiin Isu hmai a ben a. 23 Isun a kuomah, "Thu indik lo ka hril a ni chun hril suok la, ka hril si naw chun ieng dinga i mi ben am?" a ta. 24 Anna chun Isu chu khuop pumin Thiempu laltak Kaiafa kuoma chun a'n thuoitir a. 25 Ngîr puma Peterin mei a awi ve lai chun, "Nang khom a zirtirhai laia thang ve i ni maw?" an ta. Peter chun, "Ni lo e" tiin a'n phat a. 26 Thiempu laltak siehlawhai laia pakhat, Peterin a nakawr a sàtthlàk laibungpa chun, "Huona khan a kuomah ka hmu che an naw maw?" a ta. 27 Peter chun a'n phat nawk a, chu lai tak chun âr a hung khuong ta nghàl a. 28 Kaiafa ina inthok chun Isu chu Roman lârsap in Praitorianaht an thuoi a. Zîngkâr inhma tak a la ni a, Judahai chun inthieng nawna kai loa Fekân Kùt ruoi kîl thei an nuom leiin lal in sùnga chun an lùt nawh. 29 Chuongchun, Pilat chu a va suok a, "Hi mi hin ieng am a suksuol leia in hêk a na?" tiin a'n don a. 30 Anni chun, "Hi mi hin thil suol thaw naw sien i kuomah hung thuoi naw ning ungah" an ta. 31 Pilat chun, "Nangnin thuoi unla, in dàn angin a chungthu rêl ro" a ta. Judahai chun, "Keini chun mi sukhlum theina thu kan nei nawh" an ta. 32 Chu chu ieng anga thi ding am a na ti Isun a lo hril kha a hung tlungna dingin a nih. 33 Chuongchun, Pilat chu in sùngah a lût nawk a, Isu a koa, "Judahai lal i ni maw?" tiin a'n don a. 34 Isun, "Chu chu nanga lungril puok suoka i hril a ni, annawleh mi dangin ka chungchang an hril lei chea i mi'n don?" a ta. 35 Pilat chun, "Juda mi i mi sawn ve a ni? I chipuihai le thiempu lalhaiin ka kutah an hung pèk lùt chê a ni hi. Ieng poi am i thaw hrim leh?" a ta. 36 Isun a don a, "Ka ram chu hi khawvela mi hi a ni nawh; ni sien chu Judahai kuta inmantira ka um nawna dingin a mi zuituhaiin bei an tih, nisienlakhom ka ram chu hi taka mi hi a ni si nawh" a ta. 37 Pilat chun, "Chu, lal i ni chu tie maw?" a ta. Isun, "Lal ka ni thu i hril indik ngot el. Thutak inhriettir hi ka pieng san le khawvela ka hung san a ni hrim a nih. Tu khom thutaka um chun ka thu an ngâithlàk hlak" a ta. 38 Pilat chun, " Thutak chu iem a na?" a ta. Chu chu a hril zoin Judahai kuomah a va suok nawk a, "A chungah thu poi ieng khom ka hmu nawh. 39 Amiruokchu, in thaw dàn pangngaiin, Fekân Kùtah tâng pakhat ka'n suopèk ding cheu a na, Judahai lal hi insuopèk lang cheu in nuom am?" a ta. 40 Anni chun inring taka khëkin, "Hi pa hi ni loin Baraba kha ni lem raw se" an ta. Baraba chu suomhmang a nih.

John 19

1 Chun, Pilatin Isu chu a thuoi a, a'n vuoktir a. 2 Sipaihai chun lukhum dingin hling an inkuol a, an inkhumtir a, korfuol senduk an inhàktir bok a, 3 Inzûr zuta panin "Chibai, Judahai lal!" tiin a hmaiah an ben a. 4 Pilat chu tuolah a va suok nawk a, an kuomah, " En ta u, a chungah thu poi ieng khom ka hmu nawh ti hrietna dingin in kuomah ka hung thuoi suok a ni hi" a ta. 5 Hling lukhum khum le korfuol senduk hâka Isu a hung suok chun Pilatin, "En ta u, hi pa hi a ni hih" a ta. 6 Thiempu lalhai le an thuoihruoihaiin an hmu chun, "Kraws-ah hemde rawh, kraws-ah hemde rawh" tiin an khêk a. Pilat chun, "Nangnin thuoi unla, kraws-ah hemde ro chu, kei chun a chungah thil poi ka hmu nawh" a ta. 7 Judahai chun, "Dàn kan nei a, chu dàn ang chun a thi ding a nih, Pathien Naupaa a'n sâl leiin" an ta. 8 Pilatin chu thu a hriet chun a ti zuol a. 9 Insùngah a lût nawk a, Isu kuomah, "Khaw laia inthoka hung chê?" tiin a'n don a, sienkhom Isun a don nawh. 10 Pilat bokin, "I mi don nuom naw vei a ni maw? Insuo thei che ka na, kraws-a hemde thei che ka ni bok ti i hriet naw maw? a ta. 11 Isun a don a, "Chung tienga inthoka pêk i ni naw chun ka chungah ieng khom thaw thei nei naw ti nih. Chuleiin, i kuta kei mi hung pe suoktu khan suol a phur nasa lem a nih" a ta. 12 Chu taka inthok chun Pilatin ama chu insuo dàn kong a zong a, sienkhom Judahai chun, "Hi pa hi i'n suo vai chun Kaisar ruolpa ni naw ti nih. Tu khom lala insiem chu Kaisar khingtu a nih" tiin an khêk a. 13 Chuong thu chu Pilatin a hrietin Isu chu a hung thuoi suok a. Lungrem (Aramik tonga Gabbatha an ti) a chun a rorêlna thungphaah a thung a. 14 Fekân Kùt urlawk ni sùn chang vêl lai a na, Judahai kuoma chun, "En ta u, in lal hi" a ta. 15 Anni chun, "Sukbohmang rawh, sukbohmang rawh, kraws-ah hemdè rawh" tiin an khêk a. Pilat chun, "In lal hi hemdèng ka ti maw?" a ta. Thiempu lalhai chun, "Kaisar naw chu lal dang kan nei nawh" tiin an don a. 16 Chuongchun, hemdè dingin an kuomah Pilatin a pêk suok a, Isu chu sipaihaiin an thuoi tah a. 17 Mani kraws putin, 'Luru Hmun', Aramik tonga 'Golgotha' an ti chu panin a suok a. 18 Chu taka chun an hemde a, mi pahni dang leh, a sir tuokah pakhat ve ve, a laiah Isu. 19 Pilatin târ dinga a ziek, 'NAZARET ISU, JUDAHAI LAL' ti chu kraws lêra chun an târ a. 20 Thil târ chu Aramik, Latin le Grik tongin an ziek a, an hemdèna hmun chu khawpui bul a ni leiin Juda mi tam takin an tiem a, 21 Judahai thiempu lalhai chun Pilat kuomah, "Judahai lal' tiin ziek naw rawh. 'Judahai lal ka nih a tih' tiin ziek lem rawh" an ta. 22 Pilat chun, "Ka ziek kha ka ziek zo tah" a ta. 23 Kraws-a Isu an hemde chun sipaihaiin a silfèn an hlîp a, sipai pakhatin chan khat senga an chang theina dingin chan liin an insem a. A korfuol an lâk bok a, chu chu thui lo zakuo, a rînga inthoka a hmawr chena pum khawng a nih. 24 Anni chun, "Hi chu pot thlêr loin, a changtu ding enna dingin thum vawr ei tiu" an ta. Pathien thua Ka silfênhai an insem a, Ka zakuo dingin thum an vawrti kha a hung tlungna dingin a nih. Chu chu a nih sipaihaiin an thaw chu. 25 Isu kraws bula chun a nu le a nu zuorpuinu dàm, Klopa nuhmei Mari dàm, Mari Magdalin hai dàm chu an ngìr a. 26 Isun a nu le a bula ngîr zirtir a hmangai chu a hmuin a nu kuomah, "Nu, en ta, i naupa kha" a ta; 27 zirtir kuoma khom chun, "En ta, i nu kha" a ti bok a. Chu taka inthok chun chu zirtir chun ama inah a thuoi tah a. 28 Thil po po a tlung kim tah ti Isun a hriet chun Pathien Lekha thu a tlung kimna dingin, "Ka dang a châr" a ta. 29 Bêl, uoiin thûra sip a um a, chu taka chun sipon an inchie a, hmol lèrah an tàr a, a hmùr leh an hang chuktuo a. 30 Uoiin thùr an pèk zo chun, Isun "A kin tah"u a ta, a lu a kûn a, a thlarau an thlà tah a. 31 Judahai Sabat urlawk ni a na, a zîng chu Sabat an hmang ursun ni ding a nih. Sabat laia ruong kraws-a a um zing nawna dingin, an mi hemdehai ke chu vaw tliek a, an ruong làk phalna Pilat kuomah an hni a. 32 Chuongchun, sipaihai chu an hung a, Isu ruola an hemde pakhat ke chu an hang vuok tliek phot a, pakhat dang ke khom chu an vuok tliek nawk a. 33 Isu bul an tlung chun a thi tah ti an hriet a, a ke chu an vuok tliek ve nawh. 34 Amiruokchu, sipai laia pakhat chun a nâkah feiin a sun a, thisen le tui a hung inbaw ta huk a. 35 Hi hi mit ngeia hmutu hril a na, a hril chu a'n dik a nih. Thu dik a hril ti a hriet a, nangni khoma in ring theina dingin a hril a nih. 36 Pathien Lekha thua "A rù pakhat khom suktliek ni naw nih" ti kha a hung tlung kimna dinga hieng thil hi a hung tlung a nih. 37 Pathien Lekhabu danga chun "An sunpa ngèi chu la en an tih" a ti bok. 38 Chu hnung chun Arimathai khuoa mi Josefa, Judahai a ti leia a rûka Isu zuitu chun Isu ruong inhlawm phalna chu Pilat a hni a, a lo phalpèk a, a ruong chu a lâk a. 39 Nikodem, kha hmaa zàna Isu hung pantu khom kha rimtui murra le aloi chokpol, kilogram sawmthum le pali lai chawiin a hung ve a. 40 An pahni chun Isu ruong chu an làk a, Judahai inphum dàn angin a ruong chu rimtui leh puon zâi inhmiin an zem a. 41 An hemdèna hmuna hin huon a um a, chu taka chun tu khom la zâl ngai nawna thlàn thar a um a. 42 Judahai Sabat Urlawk ni a ni lei le thlàn chu a bul ela um a ni leiin, chu taka chun Isu chu an inzâl tah a.

John 20

1 Chawlkâr ni hmasa takahv, khuo a la'n thim laiin Mari Magdalin chu thlànah a fe a, thlàn lungkhàr chu làk sonin a hmu a. 2 Chuongchun, Simon Peter le zirtir dang, Isun a hmangai kuom tieng chun tlânin, "Thlàna inthokin Lalpa an làk hmang a, khaw lam an sie kan hriet nawh" tiin a va hril a. 3 Chuongchun, Peter le zirtir dang chu thlàn tieng panin an suok a. 4 An pahni chun an tlàn a, zirtir dang chu Peter nêkin a tlân hrat lem leiin thlân a tlung hmasa a. 5 Kûnin a zuk bi a, puon zâi inhmi chu a hmu a, a sûnga ruok chu a lût nawh. 6 A hnunga hung Simon Peter khom chu a hung tlung ve a, thlàn sûngah a zu lût a, tuonga puon zâi inhmi chu a hmu a, 7 a lu tuomna, inhrûkna puon khom chu inziel a, puon zâi inhmi lai um loa a hrana um chu a hmu bok a. 8 Zirtir dang, thlàn tlung hmasa khom chu a lût ve a, a hmu a, a ring a. 9 Mithi laia inthokin a tho nawk ding a nih ti Pathien Lekha thu kha an la hriet thiem phàk hri si nawh. 10 Chuongchun, zirtirhai chu mani in sengah an kìr nawk tah a. 11 Mari ruok chu thlàn puo tieng tap pumin a ngîr zing a, mitthli sûr hnuoiah a kûn a, thlan sûng a zuk bi a. 12 Isu ruong zàlna, a lu le ke bul ve vea chun thuom var inbel vàntirko pahnih thung a hmu a. 13 Anni chun, " Nuhmei, ieng dinga i tap am? an ta. Ama chun, "Ka Lalpa an làk hmang a, an siena chin hrim ka hriet naw lei a nih" a ta. 14 A hril zo chun a hang ngha kîr a, Isu ngîr chu a hmu a, Isu a nih ti ruok chu a hriet nawh. 15 Ama chun, "Nuhmei, iem a ta i tap? Tum i zong a?" a ta. Mari chun huon enkoltu amanih a sawn a, a kuomah, "Pu, ama hi i lâk hmang a ni chun i siena hmun mi hril ta la; chuongchun ka lâk ding annawm" a ta. 16 Isun, "Mari" a hei ta. Ama tieng chu a hung ngha a, Aramik tongin, "Rabboni" tiin a khêk suok ta phong a (Rabboni chu Zirtirtu tìna a nih). 17 Isun, "Mi chel naw rawh, Pä kuom tieng ka la kîr hri naw hi. Amiruokchu, i unauhai kuomah fe la, an kuomah, 'Ka Pä, in Pà, ka Pathien, in Pathien kuomah ka kîr ta ding a nih' a tih ti va hril rawh" a ta. 18 Mari Magdalin chu zirtirhai kuomah a fe a, Lalpa a hmu thu le a kuoma a hrilhai chu a hril tawl a. 19 Chu ni, Pathienni zàn tieng, Judahai an ti leia zirtirhaiin an umna in kotkhâr an khâr hnung chun an kuomah Isu a hung a, anni lai a hung ngìr a, "Thlamuongna in chungah um raw se"w a ta. 20 A hril zo chun a kut le a nâk a'n entir a, Lalpa an hmu chun a zirtirhai chu an lawm hle a. 21 An kuomah, "Thlamuongna in chungah um raw se. Pain a mi tir ang bokin kei khomin ka tir chêu hi" a ta. 22 Chu zoah anni chu a'n thuok khum a, "Thlarau Thienghlim nei ro. 23 Tu suol khom in ngaidam chun ngaidam nîng a ta, in ngaidam naw chun ngaidam ni naw nih" a ta. 24 Sawmpahnihai laia pakhat Thoma Didum (Phîra an ti chu), Isu a hung laiin anni lai a um ve naw a. 25 Zirtir danghai chun a kuomah, "Lalpa chu kan hmu tah" an ta. Ama chun, "A kut thîrkila an kil dêna ser hmu a, kutpârin a hliemna ser ngei tawk a, a nâk ka them ngèi naw chun ka awi thei nawh" a ta. 26 Ni riet hnunga chun a zirtirhai chu in sûngah an um khawm nawk a, Thoma khom a thang ve ta a. Kotkhârhai chu khâr vong ni sienkhom Isu a hung a, anni lai a hung ngîr a, "Thlamuongna in chungah um raw se" a ta. 27 Thoma kuoma chun, "I kutpâr khan mi hang them vêl la, ka kuthai hi en rawh, i kutin hang ban la, ka nâk them rawh; ringhla loin awi el rawh" a ta. 28 Thoma chun a kuomah, "Ka Lalpa le ka Pathien" a ta. 29 Isun a kuomah, "Nangin kei i mi hmu leiin i ring a; hmu bok si loa ringhai chu an hamtha" a ta. 30 Zirtirhai hmuah inchikna thilmak dang tamtak Isun a thaw a, chuonghai chu hi lekhabua hin ziek sa a ni nawh. 31 Hieng zieka umhai hi, Isu chu Krista, Pathien Naupa a nih ti in ringna ding le in ring leia ama hminga hringna in neina dinga ziek a nih.

John 21

1 Chu hnung chun Isu chu Tiberi dîlahx a zirtirhai lai a'n lâr nawk a, hieng ang hin a'n lâr a. 2 Simon Peter hai, Thoma, Phîra an ti bok hai, Galili ram Kana khuoa mi Nathanael hai, Zebedai nauhai pahni le zirtir dang pahni an um khawm a. 3 Simon Peter chun an kuomah, " Nga manin ka fe ding a nih" a ta. Anni chun, "Keini khom hung vêng kan tih" an ta. Chuongchun, an inthok suok a, longah an chuong a, sienkhom chu zân chun an man dêr nawh. 4 A zing vartien chun Isu chu va kamah a ngîr a, sienkhom Isu a nih ti zirtirhai chun an hriet nawh. 5 Ama chun, "Ruolhai, in man am?" a ta. Anni chun, "Kan man dêr nawh" an ta. 6 Isu chun, "Long sîr chang tieng khan dêng unla, man in tih" a ta. Chuongchun an hang dêng a, nga an inkhum rawn leiin an hnûk suok zo tah naw a. 7 Isun a hmangai zirtir khan Peter kuomah, "Lalpa a ni saw" a ta. Simon Peterin Lalpa a nih ti a hril a hriet charin, saruoka um a ni leiin zakuo a hâk sok sok a, dîla chun a'n chawm thla a. 8 Zirtir danghai ruok chu longa chuongin, lên sip pûr nga chu hnûkin va kam an hung panpui a, khawmuola inthoka hnâi te, tong zahni vêl chauha hlaa um an nih. 9 Khawmuol an kài chun meihola mei insêm, a chunga nga le beiphêk um chu an hmu a. 10 Isun an kuomah, "Tuhin in nga man kha a then hung la ro le" a ta. 11 Simon Peter chu longah a va fe a, lên chu va kamah an hnûk suok a, nga lien tak tak za le sawmnga pathum zet inhnaw bit hai sienkhom lên chu a'n ek dêr nawh. 12 Isun an kuomah, "Zîngbu hung fa ta ro" a ta. Zirtirhai laia tu khomin "Tu am i na?" ti an indon ngam nawh, Lalpa a nih ti an hriet si a. 13 Isu chu a hung a, bei chu a lâk a, a pêk tawl a, chuong ang bokin nga khom a pêk tawl a. 14 Mithi laia inthoka a tho nawk hnunga Isu a'n làr voi thumna a nih. 15 Zîngbu an fàk khop chun Isun Simon Peter kuomah, "Simon, Johan naupa, hienghai nêk hin nangin kei i mi hmangai lem am? a ta. Ama chun, "Aw Lalpa, ka ngaina che ti i hriet" a ta. Isun a kuomah, "Ka beramhai chawm rawh" a ta. 16 A voi hninaa chun Isun a kuomah, "Simon, Johan naupa, nangin i mi hmangai tak zet am?" a ti nawk a. Ama chun, "Aw Lalpa, ka ngaina che ti i hriet" a ti nawk a. Isun, "Ka beramtehai chawm rawh" a ta. 17 A voi thumnaa chun, "Simon, Johan naupa, nangin kei i mi ngaina am?" a ta. A voi thumnaah, "Nangin kei i mi ngaina am?" a ti lei chun Peter lungril a na hle a, "Lalpa, iengkim i hriet a, ka ngaina che ti i hriet annawm" a ta. Isun a kuomah, "Ka beramhai chawm rawh. 18 Thu dik tak ka hril che hi, i naupang lai chun i kawng i khit a, i nuomna tieng tieng i fe hlak a; i hung upat hnung chun i kut phar i ta, mi dangin i kawng hrênpêk an ti che a, i nuom nawna tieng tieng thuoi an ti che" a ta. 19 Ieng ang thìna am tuokin Pathien a la chawimawi ding ti kawk hmùna dingin chuong thu chu a hril a nih. Chu chu a hril zoin, "Mi zui rawh" a ta. 20 Peter chu a hang ngha kîr a, Isun zirtir a hmangai, zànbu fâk laia a awm hnenga hung thle a, "A'n mantirtu ding chè chu tu tak am nîng a ta?" titu khan a hung zui a hmu a. 21 Peterin a hmu chun Isu kuomah, "Lalpa, ama saw teh?" tiin a'n don a. 22 Isun a kuomah, "Ka hung nawk chena um dingin ka dit khom ni sien, chu chu nangma ta dingin iem a tangkai a? Mi zui el rawh" a ta. 23 Chuonga a ti lei chun chu zirtir chu thi lo dingin a unauhai lai a'n thang vèl a. Amiruokchu, a thi naw ding thu Isun ieng khom a kuomah a hril naw a, "Ka hung nawk chena um dingin ka dit khom ni sien, chu chu nanga dingin iem a tangkai a?" a ti a ni lem chauh. 24 Chu zirtir chu hieng thu hretu le ziektu hi a na, a thu inhriettir hi a'n dik a nih ti ei hriet. 25 Hieng naw khom hi thil dang tam tak Isun a thaw a. A kip a kawiin ziek vong ding ni inla, chu lekhabu chu khawvel khom hin a keng ka ring nawh.

Acts 1

1 Theofil, ka lekhabu hmasaa khan Isu rongbawl tana inthoka vàna làk tung a ni chena a thilthaw le a thu inchûktirhai po po chanchin ka ziek tah a; 2 Thlarau Thienghlim hmangin a tirko thlanghai kuomah thu a'n cha a; 3 a tuor le thi hnungin a hring nawk ngei ti sêl ruol loin hieng mihai kuoma hin voi tam tak ama ngeiin a'n entir a, ni sawmli sûng an kuomah Pathien ram thu hrilin a'n lâr a. 4 Tum khat chu, bu an fàk tlàng laiin an kuomah hi thu hi a pêk a, "Jerusalem suoksan naw ro, Pa thutiem ka hril cheu kha lo nghâk ro. 5 Johan khan tuiin a baptis hlak cheu a, sienkhom ni sawt naw te hnungah Thlarau Thienghlima baptis nîng in tih" tiin. 6 An intuok khawm chun Isu kuomah, "Lalpa, tuhin a ni Israel ram i tungding nawk ding chu?" tiin an indon a. 7 Ama chun, " Pain a hun le ni ama thuneinaa a ruot chu nangni lo hriet ding a ni nawh. 8 Nisienlakhom, in chungah Thlarau Thienghlim a hung tlung pha thilthawtheina la nei in ta, chuongchun, Jerusalema hai, Judai ram le Samari rama hai le hnuoi kil tawp chenin ka thu hretu nîng in tih" a ta. 9 Chuong thu chu a hril zoin, an hmu zing laiin sûm lai an hmu phak loa làk tungin a um a. 10 Chuonga vàn tieng a kai an thlîr zing lai chun, thawk le khatah puon var sil mi pahni an kuomah an hung ngìr a. 11 "Galili mihai, ieng dinga vàn tieng thlîra in ngîr zing am a na? Hi Isu, in kuoma inthoka vàna lâk tung ngei hi, vàna a fe in hmu ang tak hin a hung nawk ding a nih" an ta. 12 Chuongchun, Oliv tlànga inthokin Jerusalema bok an kîr nawk a, an inkâr hlatzie chu kilometer khat vela a nih. 13 Khuo an lùt chun an tlungna pindan chunghnungah an kai a, chuonghai chu Peter hai, Johan hai, Jakob hai, Andri hai, Filip hai, Thoma hai, Batholomai hai, Matthai hai, Alfai naupa Jakob hai, Zelot pawla mi Simon hai le Jakob naupa Juda hai an nih. 14 An rêngin, nuhmeihai le Isu nu Mari le Isu unauhai le chun ma loin an tongtai ruol hlak a. 15 Chuong hun laia ringtu za le sawmhni ruol um khawmhai lai chun Peter a ngîr a. 16 "Unauhai, Isu mantuhai hung thuoitu Juda chungchang thu chu Davida bàua Thlarau Thienghlimin a lo hril lawk Pathien Lekha thu ang khan a hung tlung ding a ni hrim a nih. 17 Ama chu eini lai a thang ve hlak a, ei rongbawlpui a ni hlak hrim kha. 18 (A rîtlona man intêl ngeia hmun pakhat an inchawka chun a khupin a tla hlum a, a rîl suok vong khopin a phìng a tet koi a. 19 Chu thu chu Jerusalema um po poin an hriet a, chu hmun chu anni tongin 'Akeldama' an ta, chu chu 'Thisen Hmun' tìna a nih). 20 Peter chun hril zom peiin, "Sam ziekah hieng hin a lo chuong a:'A in le lo sukramin um sien, A sûngah tu khom chêng naw raw se"ti le'A hotu nìna chuMi dangin chang raw se'ti hi. 21 Chuongchun, ei Lalpa Isu rawia ei khawsak laia eini laia thang ve, 22 Baptistu Johan huna inthoka vàna a mi kaisan ni chena eini laia thang hlak mi pakhat, a thonawkna mi hrepuitu ding ei thlang suok ding a nih" a ta. 23 Chuongchun, Josefa, (Barsaba amanih Justa an ti bok) le Mathia hai chu pakhat lem lem thlang an rot a. 24 "Lalpa, mi po po lungril i hriet a. 25 A tirko nìna le rongbawlna sin tlawmsantu Juda Iskariot hmun hluotu dingin hieng mi pahnihai lai hin a tu lem am i thlang mi hung inhriettir rawh" tia tongtaiin an hni a. 26 Chu zoah thum an vawr a, Mathia chungah a tla a, tirko sawm le pakhathai lai chun làk lût a lo ni tah a.

Acts 2

1 Pentikosb ni a hung tlung chun an rêngin hmun pakhatah an um khawm a. 2 Thawk le khatin vàn tienga inthokin thlipui na tak ri ang an hriet a, an thungkhawmna in chu a hung tuom ta mup el a. 3 Meichok, lei ang tak, insem dar an hmu a, mi tin chungah a fu a. 4 An rêngin Thlarau Thienghlimin an sip ta vong a, Thlarauin a'n tongtir ang peiin tong dang dangin an tong tawl a. 5 Khawvel hnam tin laia chêng, Pathien titu Judahai chu Jerusalema châmbâng an la um a. 6 Chu ri chu an hrietin mi tam tak an hung pung khawm a, an thu hrilhai chu mi tinin mani tong ang senga an hriet thei leiin mak an ti hle a. 7 Makti takin, "Hieng thuhriltuhai hi Galili mi an ni naw am a ni? 8 Ieng tin am ei rêngin mani tong ang ela an thu hril ei hriet thei am a na? 9 Thenkhat Parthi mi dâm, Medai mi dâm, Elimatai mi dâm ei na, a then Mesapotamia ram dâm, Judai ram dâm, Kapadokia ram dâm, Ponto ram le Asia ram dâm, 10 Frugia ram le Pamfulia ram dâm, Aigupta ram le Libia rama Kurini khaw se vêla um dâm, 11 thenkhat Rom khuoa inthoka hung inzin Juda mi le Juda saphunhai dâm, thenkhat Kret thlierkàra mi le Arab rama inthoka hung dâm ei nia chu Pathien ropuizie an puongna thuhai chu mani tong ang sengin ei hriet si hi!" an ta. 12 An rêngin makti le a ngaina hre loin, "Hi hi ieng thil am an ta a?" tiin an indon tuo a. 13 Thenkhat ruok chun an nuisan a, "Uoiin thar an inrui a ni hi" an ta. 14 Peter chu sawm le pakhathai leh a ngîr a, rawl inring takin, "Nangni Juda unauhai le Jerusalema umhai po po, hi thil hi hril fieng ka ti cheu, ka hril hi ngun takin lo ngaithla ro. 15 Hienghai hi in ring angin an inrui nawh. Zîng dâr kuoc chauh a la ni hi. 16 Hi thil hi zawlnei Joel hril kha a ni lem: 17 'Pathienin hieng hin a hril:Ni nuhnunga chun mi po po chungah, Ka Thlarau la buok ka ta, In naunu le naupahaiin, Ka thuhai la hril an ta, In tlangvàlhan inlârna hmung an ta, In upahan mangah mang an ta; 18 Suoknu le suokpa chungah, Chu ni chun ka thlarau buok ka ta, Ka thuhai la hril an tih. 19 Chung tieng vànah thilmakhai, Hnuoiah inchikna thisen le mei, Meikhu intûr ngul el hai chu, Ka hung inlangtir ding a nih; 20 Lalpa ni ropui tak inlang hmain, Nisa chu thimah inchang a ta, Thla khom thisenah inchang a tih; 21 Lalpa hming lam taphothai chu, Sandamin um an tih' 22 "Nangni Israel mihai, hi hi ngaithla ro. In hriet tah angin, Pathienin Nazaret Isu chu nangni lai a hung tir ngeizie suklangna dingin, ama hmangin thil ropui tak tak dâm le inchikna thilmakhai nangni lai a thaw a. 23 Ama chu Pathien tum lawk le rêl lawk angin in kuta pèk a na, nangnin mi rilohai kut hmangin kraws-ah hemdein in sukhlum a. 24 Amiruokchu, thìna chel tàng ruol a ni naw leiin, Pathien chun thìna bâua inthokin an suo a, a keitho a. 25 Davida khomin a chungchang thu hieng hin a lo hril kha:Ieng lai khomin ka hmaah, Lalpa ka sie zing hlak a, Ka chang tieng a um leiin, Inhnîng ngai hrim hrim naw ning. 26 Chuleiin ka lung a lawm, Ka thla a hlim êm êm bok, Ka taksa khom muong takin, A chawl hadam tah a nih. 27 Ka thlarau chu Seolah, Màksan phal ngai nawng i ta, I Mi Thienghlim chun hmon hmêl, A hmu ding phal naw ti nih. 28 Hringna lam i mi kawkhmu a, I bulah lawmna a kim, I chang tieng chun inhoina, Chatuonin a um si a. d 29 "Unauhai, thlatu Davida thu chu huoi takin ka hril cheu hi, ama chu a thi tah a, an phùm a, a thlàn khom ei kawl hnai elah a la um zing annawm. 30 Nisienlakhom ama chu zawlnei a na, a thlahai laia pakhatin a lalthungpha a la hluo ding thu inkhâm meua Pathienin a kuoma a tiem chu a hriet a. 31 Thil hung tlung ding chu a hmu lawk leiin, thlànah màksan a ni naw ding thu le a ruong khom hmon a phal naw ding thu a hril hin Krista thonawkna thu a lo hril a nih. 32 Hi Isu ngei hi Pathienin a keitho nawk tah a, ei rêngin chu thudik hrepuitu chu ei nih. 33 Ama chu Pathien kut chang tieng chawimawiin a um tah a, Pain a tiem Thlarau Thienghlim chu a dong a, tuta in hmu le hriet hi a thilpêk a hung buok chu a ni hih. 34 Davida chu vànah a hang lawn naw a, sienkhom ama ngeiin, LALPAN ka Lalpa kuomah, "Ka chang tieng hin hung thung rawh, 35 I hmêlmahai po po chu I ke sirsana ka siemHmakhat chun"e tiin a hril lem a ni kha. 36 Chuongchun, in hemde tah Isu ngei kha Pathienin Lalpa le Kristaah a siem tah ti Israel mi po poin chieng takin hre raw hai se" a ta. 37 Chu thu chu mipuiin an hrietin an lungril a tawk hle a, Peter le zirtir danghai kuomah, "Unauhai, iem thaw tâng kan ta?" an ta. 38 Peter chun, "In suolhai ngaidam a ni theina dingin inrêngin sim unla, Isu Krista hmingin baptisma chang ro. Chuongchun, hi thilpêk Thlarau Thienghlim hi dong in tih. 39 Thutiem hi nangni ta ding a na, in nauhai ta ding khom a na, ram tina mi, ei Lalpa Pathienin a ko taphothai ta ding khom a nih" a ta. 40 Fimkhur dinga infuina thu dang tam tak hrilin, "Tu lai ruolthar suol takhai laka hin inthier fihlim ro" a ta. 41 A hril chu mi tam takin an awi a, baptisma an chang a; chu ni chun mi sângthum laiin an hung pung sa tah a nih. 42 Tirkohai inchûktirna chu ngâithlain, bei khoiaf fa tlângin, tongtaiin an inpawl khawm hlak a. 43 Tirkohai chun inchikna thilmak tam tak an thaw a, mi tinin mak an ti a, an inza hle a. 44 Ringtu po po chu an chêng khawm a, iengkim an intawm a. 45 An in le lo le an thil neihai an zor a, an mamaw ang peiin an insem tlàng a. 46 Ni tin lungruol takin tempulah an inkhawm a, an inah hai bei khoiin, lungril hlim tak le inphal takin bu an fâk tlàng a, 47 Pathien an inpâk a, mi po po ditsak an hlaw a, Lalpan a sandamhai chun ni tin an hung belsa pei a.

Acts 3

1 Chawhnung dâr thum tongtai hun pangngaiah Peter le Johan chu tempulah an hang fe a. 2 Pa pakhat, a pieng tîra inthoka kebai hi an hung zawn a, ama chu tempula fehai kuoma kut lo daw dingin kotkhâr 'Mawi' an ti bula chun ni tin an sie hlak a. 3 Ama chun Peter le Johan, tempula an lût tawm têp chu a hmu a, kut a lo daw a. 4 Peter le Johan chun ama chu chieng takin an en a. Peter chun a kuomah, "Mi hang en ta" a ta. 5 Ama chun iemani dong beiseiin a hang en a. 6 Peter chun, "Tangka le rangkachak ka nei nawh. Nisienlakhom, ka nei vè chu pêng ka ti che: Nazaret Isu hmingin lawn ta rawh" a ta. 7 A kut chang tienga chelin a keitho a, a ke le a kemithai chu an hung hràt ta nghàl a. 8 Chuongchun, ama chu a'n chawm tho a, kein a ngîr a, a lawn tah a. Lawn le inchawm pei puma Pathien inpâkin tempula chun anni ruolin a lût ve tah a. 9 Mipui po poin kea a lawn le Pathien a'n pâk an hmu chun, 10 tempul kotkhâr Mawi bula kutdaw thung hlak kha a nih ti an hriet si a, a chunga thil tlung chu maktiin a ngaina hrim an hriet nawh. 11 Chun, ama chun Peter le Johan a la chel zing laiin mipui makti chu Solomon tuolpûk an tia chun an hung tlàn khawm a. 12 Chu chu Peterin a hmu chun an kuomah, " Israel mihai, hi hi ieng leia mak in ti? Hi pa hi kan lunginsiet leia kan thilthawtheinaa kan inlawntir anga ngai ni awm hiela ieng dinga in mi en am a na? 13 Abraham Pathien, Isak Pathien, Jakob Pathien, ei thlatuhai Pathien chun a siehlaw Isu a chawimawi tah a ni hi. Ama chu sukhlum dingin in pèk suok a, Pilatin insuo dinga a rêl khomin in hnawl tlat a ni kha. 14 Mi thienghlim le fel tak kha in hnawl a, suomhmang insuopêk lem dingin in ngên a. 15 Hringna petu chu in that a, nisienlakhom Pathienin ama chu mithi laia inthokin a keitho nawk tah a, chu thu hrepuituhai chu kan nih. 16 Hi pä, in hmu le hriet hlak hi Isu hming ringna leiin, chu hming lei tak chun sukhrâtin a um a, Isu ringna lei chun, hi pä hi in hmu ngeiah, a hung dam ta var a ni hih. 17 "Tuhin unauhai, nangni le in hotuhai thilthaw kha thil in hriet naw lei a nih ti ka hriet. 18 Kristan a tuor ding thu Pathienin zawlnei po po hmanga a lo hril lawk kha hieng ang hi a lo intlungtir dàn chu a nih. 19 Chuleiin, in suolhai sim unla, Pathien tieng ngha kîr unla, chuongchun in suolhai chu hru fâi a ta, 20 Lalpa kuoma inthoka har tharna hun chu hung tlung a ta, in ta dinga Mesia a ruot, Isu ngei chu, hung tir a tih. 21 Amiruokchu, Pathienin a zawlnei thienghlimhai hmanga tiena inthoka iengkim siem tharna hun hung tlung ding a lo tiem chu a tlung hma chun ama chu vànah a um hrì ding a nih. 22 Mosie khomin, 'Lalpa in Pathien chun keima ang in unauhai laia inthokin zawlnei pakhat in ta dingin hung indin suok a ta, a hril taphot chêu chu zawm ro. 23 Tu khom ama thu ngai nawtu taphot chu a mihai laia inthoka sàt thlâk nîng a tih'g a ti kha. 24 Samuel le a hnunga zawlnei po po khom khan tu lai chanchin hi a nih an lo hril lawk chu. 25 "Nangni hi zawlneihai le in thlatuhai kuoma Pathienin thu a lo thlung tahai po po rochungtu chu in nih. Abraham kuomah, 'I thlaa chun khawvel hnam tinin hamthatna dong an tih' a ti kha. 26 Chuongchun, Pathienin a siehlaw a kei tho phing leh, rîtlona lampuia inthoka thuoi kîr ding chêu le malsawm ding chèuin in kuomah a hung tir hmasa a nih" a ta.

Acts 4

1 Peter le Johanin mipui kuoma thu an hril lai chun Thiempu laltak chu tempul pulis hotu le Sadukaihai thuoiin an kuomah a hung a. 2 Tirkohaiin Isu thonawkna leia mithi thonawkna thu mipui an inchûktir lei chun an lungni naw hle a. 3 Peter le Johan chu an man a, zàn tieng a ni ta leiin a tûk zîngkâr chen lung inah an khum a. 4 Nisienlakhom, an thu ngâithlatu laia mi tam tak chun an ring a, sângnga lai an tling hman tah a nih. 5 A zînga chun Juda hotu hai, upa hai le Dàn zirtirtu hai chu Jerusalemah an inkhawm a. 6 Chuonghai laia thang chu thiempu laltak Anna hai, Kaiafa hai, Johanh hai, Aleksandar hai, thiempu laltak sûngkuoa mihai dàm an nih. 7 Peter le Johan hai chu an hmaah an inngìrtir a, "Ieng thuneina le tu hmingin am hieng thil hi in thaw a na?" tiin an suosal a. 8 Peter chu Thlarau Thienghlimin a sip a, an kuomah, "Rorêltuhai le vàntlâng upahai, 9 voisun hin kebai chungah lunginsietna thilthaw inentir a ni lei le iengtia hung dam am a na ti thu hril dinga in mi ko a ni chun, 10 nangni po po le Israel mi po poin hre ro: in hemde tah, Pathienin mithi laia inthoka a keitho nawk tah Nazaret Isu Krista hmingin hi pa hi sukdam a na; tu hin in hmaah dam varin a ngîr tah hi. 11 Ama chu a nih, nangni in bawltuhai lung hnawl, a kila lungphum poimaw tak chu. 12 Tu dang kuoma khom sandamna a um nawh; vàn khup hnuoia mihriem hming sak lai mi sandam thei hming dang hrim hrim a um nawh" a ta. 13 Peter le Johan huoisenzie an hmu chun, lekha inchûk lo le mi mawl satlie el an nih ti an hriet si leiin, mak an ti hle a; Isu kuoma um hlak an nih ti an hriet tah a. 14 Chun, an sukdam, anni bula ngîr an en hlak chun hang soisel ding ieng khom an hmu si nawh. 15 Chuongchun, Sanhedrina inthokin an insuoktir a, anni rawi chu an inrawn khawm a. 16 "Hienghai hi iem ei law ding a na? Thilmak ropui tak an thaw ti Jerusalema mi po poin an hriet ta bok si a; eini khomin ei sêl thei ta naw a ni hi. 17 Nisienlakhom, miin an hriet dar nawk zuol nawna dingin tu kuoma khom hi hminga thu hril ta lo ding hin vau ei tiu" an ta. 18 Chuongchun, anni chu an ko nawk a, Isu hminga thu hril ta lo ding le inchûktir ta dêr lo dingin thu an pêk a. 19 Nisienlakhom, Peter le Johan chun an kuomah, "Pathien mithmuah nangni thu zawm am Pathien thu zawm a'n dik lem ti nangni inngaituo ro. 20 Keini chun thil kan hmu le hriethai hi hril loin kan um thei nawh" an ta. 21 Chun, anni chun nasa nawk zuola an vauh hnungin an insuo tah a. An thilthaw leia mi po poin Pathien an inpâk si leiin anni hrem dàn ding thu chu an rèl thlùk thei naw a nih. 22 Mak taka an sukdam chu kum sawmli chuong hiela upa a ni ta bok si a. 23 Peter le Johan an insuo hnung chun an ruolhai kuomah an fe a, thiempu lalhai le upahaiin an kuoma an hrilhai chu an ripawt vong a. 24 Chu chu an hrietin, an rêngin inring takin Pathien kuomah an tongtai a, "Aw Laltak, nang vàn hai, hnuoi hai, tuifinriet le a sûnga thil um po po hai siemtu, 25 Thlarau Thienghlimin kan thlatu, i siehlaw Davida bàu hmangin hieng thu hi a lo hril a:"Ieng leia hnamhan phier a, Hel dinga insingsa a, Mipuihan tep lo mei mei, An phan rûk hlak am a na? 26 Ieng ti leia LALPA le A hriek nâl chu khing hron a, Hnuoi lalhai inhawr khawm a, Rorêltuhan an phan rûk?i tiin. 27 Chuong ang tak chun hi khuoa hin i siehlaw thienghlim Isu, i hriek nâl chunga chun Heroda le Pontia Pilat hai chu Jentelhai le Judahai leh an inthuruol ta ngei a. 28 Nangin i thilthawtheina le dit dàna i ruot lawk anga intlungtir i tum chu, sukhlawtling dingin an pung khawm a lo nih. 29 Lalpa, tuhin an mi vauh dàn hi ngai ta, i thu hril ngam dingin i siehlawhai hi huoisenna pe rawh. 30 Mihai sukdam dingin i thilthawtheina kut suklang la, i siehlaw thienghlim Isu hmingin inchikna thilmakhai inthawtir bok rawh" an ta. 31 Chuonga an tongtai zo chun an um khawmna in chu a hung inhnìng a, an rêngin Thlarau Thienghlimin an sip a, huoi takin Pathien thu an hril tah a. 32 Ringtuhai chu lungril hmun khat le ngaituona hmun khatin an um a, an ni lai tu khomin an thil neihai chu 'Ka ta bìk a nih' an ti naw a, thil iengkim an intlâng a. 33 Tirkohai chun thilthawtheina nasa tak neiin Lalpa Isu thonawkna thu an hril hlak a, an rêngin malsawmna nasa tak an dong a. 34 Anni lai tu khom tlasam an um bok nawh. In amanih ram amanih an nei taphot an zor a, a man an hung chawi a, 35 tirkohai kuomah an inhlân a, an mamaw ang peiin an insem hlak. 36 Chun, Josefa, tirkohaiin 'Barnaba' (Thlamuongna naupa) an ti, Levi chia mi, Kupra thlierkàra um khomin 37 a ram a zor a, a man a hung chawi a, tirkohai kutah a'n hlàn a.

Acts 5

1 Mi pakhat Anania le a nuhmei Safira khomin an ram an zor ve a, 2 a nuhmei hrietpuiin Anania chun anni ta dingin an ram man iemani zât chu a sie tha a, a dang po chu tirkohai kuomah a hung inhlàn a. 3 Nisienlakhom Peterin, "Anania, Thlarau Thienghlim hlêm ding le ram man a then ip dingin ieng leia Setanin i lungril a hluo am a na? 4 I zor hma khan i ta a na, i zor hnung khomin a man chu i thu thua i thaw ding a ni naw maw? Iengti dàna hieng ang thil thaw dinga lungril i put am a na? Mihriem hlêm i ni naw a, Pathien hlêm i ni lem" a ta. 5 Anania-in chuong thil a hriet chun a tlu a, a thi ta nghàl a. A hre taphotin an ti tah êm êm a. 6 Tlangvàlhai an hung a, an tuom a, an zawn suok a, an phûm tah a. 7 Dârkâr thum vêl hnungah a nuhmei chu thil umzie hre dêr loin a hung lût ve a. 8 Peter chun a kuomah, "Mi hril rawh, ram man chu hieng zât char hi maw in làk?" a ta. Ama chun, "Ni e, hieng zât char hi" a ta. 9 Peterin, "Iem a ta Lalpa thlarau fie tuma in inthuruol? En rawh, i pasal phûmtuhai khomin kotkhâr bul an hung tlung ta saw; nang khom zawn suok vêng an ti che" a ta. 10 Chu char chun a ke bulah a tlu a, a thi ve ta nghàl a. Tlangvàlhai chu an hung lût a, ama chu thiin an hung hmu a, an zawn suok a, a pasal bula chun an phûm ve tah a. 11 Kohran po po le chuong thu hre taphot chu namên loin an ti a. 12 Tirkohai chun mipui lai inchikna thilmak tam tak an thaw pei a. Anni rawi chu lungruol takin Solomon tuolpûka chun an inkhawm hlak a. 13 Mihaiin an ngàisâng hlea chu tu khom anni lai an thang ngam hri nawh. 14 Chuong sà khom chun, anni hung belsatu Lalpa ringtu chu a nuhmei a pasalin an hung pung tuol tuol a. 15 Chuongchun, Peter inlon vèl hlim bèkin a hlie beiseiin mihai chun an damnawhai chu kotthlêrah an zawn suok a, khum le zàmpherah an inzàl thlek thluk a. 16 Jerusalem sè vêla inthok khomin mi an hung a, damnawhai le ramhuoi tirdakum manhai chu an hung thuoi a, chuonghai po po chu an hung dam ta vong a. 17 Chun, thiempu laltak le a thawpuihai po po, Sadukai pawla mihai chun an thîk êm êm a. 18 Chuongchun an man a, vàntlâng lung inah an khum a. 19 Nisienlakhom, zànah Lalpa vântirko pakhatin lung in korkhâr chu a hung hong a, a thuoi suok a. 20 "Fe unla, tempulah va ngîr unla, mipuihai kuomah hringna thu le a umzie po po hi va hril ta ro" a ta. 21 Hrila an um ang chun an fe a, vartienah tempulah an lùt a, mi an inchûktir a. Thiempu laltak le a thawpuihai an hung tlung chun Israelhai rorêlna inpui Sanhedrin inkhawm an ko nghàl a, tirkohai chu lung ina inthoka va thuoi dingin mi an tir a. 22 An mi tirhai chu an fe a, sienkhom lung inah anni chu an hmu si nawh. 23 An hung kîr nawk a, "Lung in chu him taka inkhârin, a vêngtuhai khom kotkhâr bula ngîr kan hmu a, nisienlakhom kan hang hong a, a sûngah tu khom kan hmu nawh" tiin an hung ripawt a. 24 Tempul pulis hotu le thiempu lalhaiin an hriet chun, "Ieng ti lei am nîng a ta aw?" tiin an buoi hle a. 25 Chuong lai chun mi pakhat a hung a, "Ngai ta u, lung ina in mi khumhai khan tempula son mi an zirtir zing annawm" a hung ta. 26 Tempul pulis hotu chu a rawihai leh an va fe a, tirkohai chu thawluina thang loin an hung thuoi a, an man lui chun mipuiin lungin an dèng an ti si a. 27 An hung thuoi tlung chun Sanhedrin hmaah an inngìrtir a. 28 Thiempu laltak chun an kuomah, "Hi hminga inchûktir ta dêr lo dingin thu khauh takin kan pèk cheu a. Sienkhom, in thu zirtirin Jerusalem a sip tah a, hi pä thisen maw hi kan chungah intlâktir tèp tép in tum a ni hi" tiin an suosal a. 29 Peter chun, "Mihriem thu nèkin Pathien thu kan zawm lem ding a nih. 30 Thinga khai kànga in sukhlum tah Isu kha ei thlatuhai Pathien chun a keitho nawk tah a. 31 Israelhai chu an suol insimtira a ngaidam theina dingin ama ngei kha Pathienin lal le sandamtu ni dingin a chang tieng a chawimawi tah a. 32 Chuong thilhai hrepuitu chu keini le a thu zawmtuhai kuoma Pathienin a pèk Thlarau Thienghlim chu kan nih" tiin a don a. 33 Chuong chu an hrietin an lung a khei hle a, tirkohai chu sukhlum an tum a. 34 Nisienlakhom, Farisai pakhat, a hming Gamaliel, Dàn zirtirtu, mi po po ngàisàng chu Sanhedrina chun a ngîr a, tirkohai chu insuoktir vak dingin anni vêngtuhai chu a hril a. 35 Rorêltuhai kuoma chun, "Israel mihai, hieng mihai chunga in thilthaw tuma hin fimkhur ro. 36 Kha hma deu khan Theuda chu mi ropui tak nia insâlin a hung a, mi zali vêlin an zui a. Ama chu an that a, a zuituhai khom an indar vong a, ieng khom an ni ta nawh. 37 Chu hnung chun, intiempui lai khan Galili rama mi Juda kha a hung nawk a, ama khomin mi a hîp hle a. Nisienlakhom, ama khom an that a, a zuituhai po po khom an indar nawk vong a. 38 Chuleiin, tuhin ka hril cheu hi, hieng mihai hi tawk naw ro, inumtir mei mei ro. Hieng an thil thaw tum le an thilthawhai hi mihriema inthoka suok a ni chun bo nawk el a tih. 39 Pathiena inthoka suok a ni ruok chun dang thei naw ti niu; Pathien dodal ni lem hlauh rawi in tih" a ta. 40 Chuongchun, a thu chu an zawm a, tirkohai chu an ko a, an vuok a, Isu hminga thu hril ta dêr lo dingin thu an pèk a, an insuo tah a. 41 Zirtirhai chu Sanhedrina inthok chun an suok a, Hming leia muolphona tuor tlâka ruot an ni leiin an lawm hle a. 42 Isu chu Krista a nizie thu ni tinin tempul le in tieng inchûktir le puong dar an ma chuong nawh.

Acts 6

1 Chuonga zirtirhai an hung pung pei hnung chun an ni tin fak le dawn sem thuah hmeithaihai an ngaithà bik tiin Grik tong hmang Judahai chu Aramikj tong hmang Judahai chungah chun an chier a. 2 Sawm le pahnihai chun zirtirhai chu an ko khawm vong a, "Pathien thua rongbawlna thlàthlama ni tin fâk rongbawl kan buoipui hi thil indik a ni nawh. 3 Chuleiin, unauhai, nangni laia Thlarau Thienghlim le varnaa sip mi nia in ngai mi pasari thlang suok unla, an kutah hieng sin hi inhlân kan ta, 4 keini ruok chu tongtai le thu rongbawlah inpumpêk tlat kan tih" an ta. 5 Chu rotna chu tha an ti tlâng seng a. Chuongchun, Stefan, ringna le Thlarau Thienghlima sip hai, Filip hai, Prokora hai, Nikanor hai, Timon hai, Parmena hai, Antiokei mi le Juda saphun Nikola hai chu an thlang a. 6 Chuonghai chu tirkohai hmaah an inngìrtir a, tirkohai chun an lu chungah kut innghatin an tongtaipêk a. 7 Pathien thu chu a hung indar pei a, Jerusalemah zirtir an hung pung hrat êm êm a, thiempu laia mi tam tak khomin Ringna chu an pom ve tah a. 8 Stefan chu Pathien lunginsietna le thilthawtheinain a sip a, mihai lai inchikna thilmak ropui tak tak a thaw hlak a. 9 Nisienlakhom, Kurini khuo le Aleksandria khuoa inthoka hung Juda mi thenkhat, 'Salsuok Sunagog'k inti pawla thang ve hlakhai le Kiliki ram le Asia rama Judahai chu an hung inthok a, Stefan chu an insêlpui a, 10 sienkhom var taka a hril lei le a hrilpuitu Thlarau Thienghlim lei chun an sêl hnê teuh naw a. 11 Chuongchun. "Mosie le Pathien a hril siet kan hriet" tia intumtu ding a rûkin mi an thuhne a. 12 Mipui le upahai le Dàn zirtirtuhai chu an infuipor a, Stefan chu an man a, Sanhedrin hmaah an thuoi a. 13 Hrepuitu tehlem an insiem a, chuonghai chun, "Hi pa hin ei tempul thienghlim le ei Dàn soisel a ma nawh. 14 'Nazaret Isun ei tempul hi thiek a ta, Mosie mi pèk ei hnam dànhai po po hi a thlâk danglam vong ding a nih' a ti kan hriet" an ta. 15 Sanhedrina thunghai chun Stefan chu an en thup a, a hmêl chu vàntirko hmêl angin an hmu a.

Acts 7

1 Chun, thiempu laltak chun, "An hêkna che hi a'n dik am?" tiin a'n don a. 2 Stefan chun, "Unauhai le pahai, lo ngaithla ro. Ei pu Abraham chu Haran khuoa a um hmaa Mesopotamia rama a chèng lai khan, ropuina Pathien chu a kuomah a hung inlàr a. 3 'I ram le i mihai màksan la, ram ka la'n entir ding che tieng chu pan rawh' tiin a hril a. 4 Chuongchun, Kaldai rama inthokin a suok a, Haranah umhmun a khuor a. A pa thi hnungin chu taka inthok chun tuta ei chèngna rama hin Pathienin a thuoi lùt a. 5 Pathien chun ram hluo ding kepha bok tiet khom a pêk nawh. Amiruokchu, Abraham chu nau nei lo a la ni zing laiin, ama le a thlahai kuomah hi ram hi pèk a tiem a. 6 Pathienin hieng ang hin a hril a nih: 'I thlahai chu mi ramah la mikhuol an ta, kum zali lai mi bawiah umin, sukdudain um an tih. 7 Bawia siemtu ding hnam chu keima ngeiin la ngaituong ka ta; chu hnunga chun suok an ta, hi hmuna hin ka rong la bawl an tih' a ta. 8 Pathienin Abraham kuomah sertan thu kha a thlung a. Chuong ang tak chun nau pasal Isak a nei khan ni riet niah a ser a tanpèk a. Isak chun nau pasal Jakob a nei a, Jakobin nau pasal sawmpahni, ei thlatuhai kha, a nei a. 9 "Thlàtuhai khan Josefa chu an thîk leiin Aigupta ram tieng salin an zor a; nisienlakhom Pathien a kuomah a um a, 10 a rinum tuor po poa inthokin a san suok pei a. Josefa chu varnain a'n thuom a, Faraw ditsakna hlaw theiin a siem a, Aigupta ram le lal insûnga hotuah a siem a. 11 Chun, Aigupta le Kanan ram pumah tâm a hung tla a, an tuor nasa hle a, ei thlatuhai chun fàk ding hrim an nei ta naw a. 12 Aigupta ramah fàk ding a um ti Jakobin a hriet chun ei thlatuhai chu a tir suok a, chu chu an fe hmasakna tak a nih. 13 An fe voi hninaa chun Josefa chu a unauhai kuomah an puong suok a, Faraw khomin Josefa sûnghai chu a hriet ve tah a. 14 Chuongchun, Josefa chun a pa Jakob le a unauhai po po chu a'n kotir a, an rêngin sawmsari panga vêl an nih. 15 Jakob chu Aigupta ramah a zu fe a, chu taka chun ama le ei thlatuhai chu an thi a, 16 an ruong chu Sekem khuo chen an zawn tlung a, Abrahamin Sekem khuoa Hamor nauhaia inthoka tangka suma an chawk thlâna chun an phûm a. 17 "Abraham kuoma Pathien thutiem kha a tlung ding lai chun eini mihai chu Aigupta ramah an pung hrât êm êm a, an tam ta hle a. 18 Aigupta rama chun lal dang, Josefa hre lo, a hung inlal a. 19 Ama chun ei chipuihai chu dawhain a thaw a, a sukdùda a, thawluinain an nautehai chu thi dingin a'n peitir pei a. 20 Chuong lai chun Mosie a hung pieng a, Pathien mithmuah naute ditum tak a na, anni inah thla thum sùng chu an umpui a; 21 an ina inthoka an sie suok hnungin Faraw naunuin a lâk a, ama nau dingin a nei tah a. 22 Mosie chu Aigupta ram varna po po a'n chûktir a, thu le hla thiem le mi thilthaw thei tak a hung ni tah a. 23 "Mosie chu kum sawmli a niin a unau Israel nauhai chu kan tûlin a hriet a. 24 A va kan chun Aigupta miin anni laia pakhat a lo sukdùdà lai a hmu a, a san a, phuba a lâkpèk a, a sukdùdàtu chu a that tah a. 25 Mosie chun Pathienin ama kut hmangin a unauhai chu a san suok ding ti chu a mihaiin an hriet amani a sawn a, sienkhom an lo hriet si naw a. 26 "A zînga chun Israel mi pahni insuol lai chu Mosien a hmu a, thel tumin, "Puhai, unau in ni kha, ieng leia insuknat in tum am a na?" a ta. 27 A soisatu lem chun Mosie chu a nam lêng a, "Kan chungah hotu le rorêltuah tuin am a sie che? 28 Zani ta Aigupta mi i sukhlum ang khan mi sukhlum ve i tum a ni maw?" a ta. 29 Chu thu lei chun Mosie chu a tlân hmang a, Midian ramah sawt tak a va thang a, chu taka chun nau pasal pahni a nei a. 30 "Chun, kum sawmli an voi hnungin thlalèr hmun Sinai tlàng bulah chîmbuk chok hmangin a kuomah vàntirko a'n lâr a. 31 Mosien a thil hmu chu mak a ti êm êm a. En chieng tuma a va pan hnai chun Lalpa rawlin, 32 "Kei hi i thlatuhai Pathien, Abraham hai, Isak hai, Jakob hai Pathien chu ka nih' a hung ti a. Mosie chu tiin an thin a, a en ngam ta naw a. 33 Lalpa chun a kuomah, 'I pheikhok kha hlîp rawh, i ngìrna kha hmun thienghlim a nih. 34 Aigupta rama ka mihai an sukrimsikzie ka hmu zing a, an inrûm ri khom ka hriet zing a, anni thuoi suok dingin ka hung tum a nih. Hung ta, Aigupta ramah tir kîr ka ti che' a ta. 35 "Chu Mosie, 'hotu le rorêltuah tuin am a siem che' tia an hnawl ngèi chu, Pathienin hotu le sansuoktu dingin, chîmbuka a kuoma inlâr vàntirko hmangin a hung tir tah a nih. 36 Ama chun anni chu a thuoi suok a, Aigupta rama dàm, Tuipui Sena dàm, thlalera dâm kum sawmli sûng thilmak le inchiknahai thawin a thuoi a. 37 Chu Mosie chu annawm Israel nauhai kawla, 'Pathienin keima ang in unauhai laia mi zawlnei la siempek a ti cheu' titu kha. 38 Ama chu a nih ei thlatuhai, thlalèra pung khawmhai laia thang ve le Sinai tlànga a betu vàntirko kuoma inthoka einihai kuoma inhlàn sawng pei ding thu hringhai dongtu kha. 39 Ei thlatuhai chun a thu an zawm nuom naw a, an hnawl a, Aigupta tieng kîr nawk an nuom a. 40 Aron kuomah, 'Aiguptaa inthoka mi thuoi suoktu Mosie hlak hi iem a chang tah ti khom kan hriet si nawh, kan hma thuoitu dingin pathienhai mi siempèk rawh" an ta. 41 Chuongchun, bawngte lem an siem a, milem kuoma chun inthawina an inhlàn a, anni kuta siem chawimawina dingin lawmna an siem a. 42 "Chuongchun, Pathienin anni chu a nghatsan a, vàna arasihai be dingin a pêk suok tah a; zawlnei lekhabua, 'Aw, Israel, thlalèra khan kum sawmli sûng, Inthawina ran in mi'n hlàn hlak am? 43 Molok puon in le in pathien Refan lim Arasi chu zawnin chibai in bùk kha; Chuleiin, Babulon khêl ramah, Intàngtir ka ti cheu'lti ziek ang khan. 44 "Ei thlatuhai chun thlalèra khan Pathien chêngna puon in an nei a, chu chu Mosie kuoma Pathienin siem dàn ding a hril le a lim a'n entir anga siem a nih. 45 Chu Pathien bâwkte ngèi chu ei thlatuhaiin an som pei a, Pathienin Jentêlhai a hnotsuokpèk hnunga Josua rawia Kanan ram an hung hluo khan an somlut pei a, Davida hun chen khan a um ta zing a. 46 "Davida chun Pathien ditsakna a dong a, Jakob Pathien ta dingin in bawl phalna a hni a, 47 sienkhom Solomonin a bawlpêk ta lem a. 48 Amiruokchu, Chunghnungtak ruok chu kuta bawl inah a um ngai nawh; zawlneiin, 49 Lalpan, 'Vàn ka lalthungpha a na, Hnuoi ka ke innghatna a na, In ieng am mi bawlpêk in ta ?Ka chawlna hmun ding khom khaw lam? 50 Hieng po po hi ka kuta siem An ni vong an naw am a ni?'m a tih tia a hril ang khan. 51 Mi kawmaw, lungril le naa sertan ve lohai, in thlatuhai ang bokin nangni khomin Thlarau Thienghlim chu in kal rop hlak. 52 In pi le puhaiin zawlnei suknomnat lo hrim tu am an nei a? Mi Fel Tak hung ding hrillawktuhai kha an that a; nangni hi tuta Ama inmantirtu le thattuhai chu in nih. 53 Vàntirkohai hmanga pèk Dàn dongtu in na, sienkhom in zawm nuom si nawh" a ta. 54 Chuong thu chu an hrietin an lung a khei hle a, lungsenin hâ an rawt a. 55 Nisienlakhom, Stefan chu Thlarau Thienghlimin a sip a, vàn tieng a thlîr zing a, Pathien ropuina le a chang tienga Isu ngîr a hmu a. 56 "Ngai ta u, vàn inhong ka hmu a, Pathien chang tienga Mihriem Naupa ngîr khom ka hmuh" a ta. 57 Anni chun na hupin, inring taka khêkin, Stefan chu an bei hron a, 58 khuoa inthokin an hnûk suok a, lungin an dèng a. Thuhretuhai chun an puon chu tlangvàl pakhat Saula an ti ke bula chun an dèng khawm a. 59 Lunga an dèng mur mur lai chun Stefanin "Lalpa Isu, ka thlarau la rawh" tiin a tongtai a. 60 Chuongchun, a dingthathuon a, "Lalpa, an thil suol thaw maw hi an chungah intlâktir naw hràm rawh" a ta. Chu chu a hril zoin a in innghil tah a.

Acts 8

1 Saula chu Stefan an that thua remtina petu laia pakhat a nih. Chu nia inthok chun Jerusalema kohran chu nasa takin an sukdùdà a, chuongchun tirkohai chauh naw chu Judai ram le Samari ram khaw tinah an tlàn dar a. 2 Pathien ngaisaktuhai chun Stefan chu an phùm a, nasa takin an sùn a. 3 Saula ruok chun kohran nuoi bo tumin in tinah a lût a, a nuhmei a pasalin a hnûk suok a, lung inah a khum tawl a. 4 Tlân darhai chun an fèna taphotah Pathien thu an hril pei a. 5 Filip chu Samari khawpuiah a zu fe a, an kuomah Pathien thu a hril a. 6 Mipuiin Filip thu hril hre a, a thilmak thawhai an hmu chun an lung a lût èm êm a. 7 Ramhuoi tirdakum tam tak khom inring taka khêkin mi tam tak sûnga inthokin an hung suok a, zeng le kebai tam tak sukdamin an um bok a. 8 Chuongchun, chu khuo chu an lawm hle a. 9 Chu khuoa chun dawithiem pakhat, a hming Simon a um a, a dawithiemzie hun iemani chen a lo inentir ta hlak a. Ama chun mi ropui tak niin an hril a, mihaiin a dawi thiem dàn chu mak an ti a. 10 A chîn a lienin ama chu an bengkhon a, "Hi mi hi Pathien thilthawtheina, 'Ropui' an ti kha a ni hi" an ta. 11 A mitvaidawi thiem chu hun sawt tak mak an lo ti ta leiin a thu khom an ngai a. 12 Sienkhom, Pathien ram Chanchin Tha le Isu Krista hming Filipin a hril an ring hnung chun a nuhmei a pasalin baptisma an chang tawl tah a. 13 Simon meuh khomin a ring ve tah a, baptisma a chang a, Filip chu a fèna taphotah a zui a, inchikna le thilmak ropui tak tak a thawhai chu a hmu a, mak a ti hle a. 14 Jerusalema tirko umhai chun Samari khaw mihaiin Pathien thu an awi tah ti an hrietin an kuomah Peter le Johan an tir a. 15 Anni chu an zu fe a, Thlarau Thienghlim an dong theina dingin an tongtaipèk a. 16 Lalpa Isu hminga baptisma chang hlim chauh an la ni leiin anni lai tu khomin Thlarau Thienghlim an lo la dong hri naw a. 17 Chuongchun, Peter le Johan chun an luah kut a'n innghat a, Thlarau Thienghlim an dong tah a. 18 Tirkohaiin an chungah kut an inghat a, Thlarau Thienghlim pèk an nih ti Simonin a hmu chun tangka pèk a tum a; 19 "Hieng thilthawtheina hi mi pe ve ro, an chunga kut kan nghatna poin Thlarau Thienghlim an dong ve theina dingin" a ta. 20 Nisienlakhom, Peterin a kuomah, "Pathien thilthlawnpêk tangka suma inchawk i tum leiin i tangka le hin bohmang ro. 21 I lungril put hmang hi Pathien mit hmuah an dik naw a, hieng thila hin thang vèna le chanvo hrim i nei ve nawh. 22 Amiruokchu, suol i thaw hi simin Lalpa kuomah tongtai la, i ngaituona suol hi a ngaidam che rawi mawh. 23 Inhnarna kha tak i put a, suolin a khuop dê tlat che ti ka hmuh" a ta. 24 Simon chun, "I thil hrilhai chu ka chungah a hung tlung nawna dingin nangnin Lalpa kuomah mi hnipêk ro" a ta. 25 Chuongchun, Lalpa thu chu inhriettira an puong dar hnung chun Peter le Johan chu Jerusalem tieng an kìr nawk ta a. An kîr malam chun Samari ram khaw tam takah Chanchin Tha an hril pei a. 26 Lalpa tirh vàntirkoin Filip chu a biek a, "Tho la, Jerusalema inthoka sim tieng thlalèra Gaza panna lampuiah zu fe rawh" a ta. 27 Chuongchun a tho a, a fe tah a. Chun, Ethiopia lalnu Kandaki sum po po enkoltu mi tilrè pakhat, Jerusalema Pathien bea hang fe hi a um a; 28 a hung kìr tieng chun tawlailirah chuongin zawlnei Isai lekhabu a tiem a. 29 Thlarauin Filip kuomah, "Tawlailir saw va pan la, va hnai rawh" a ta. 30 Chuongchun, Filip chu a tlân phei a, mi tilrèin zawlnei lekhabu a tiem chu a ngaithlàk a, "I lekha tiem umzie chu i hriet am?" tiin a'n don a. 31 Ama chun, "A mi hrilfietu um loin ieng tin am ka hriet ding?" a ta. Filip chu tawlailira hung chuong a, a bula thung dingin a fiel a. 32 Pathien Lekha thu chàng a tiem lai chu hi hi a nih:That ding beram angin ama chu an thuoi a, A hmul vawtu hmaa beramte a to zing angin, Ama khomin a bàu a ka nawh; 33 Muolphona phurin, a thiem thu an hnawl a; A thlahai chanchin tuin am hril tâng an ta?A hnuoi hringnun an làk hmang ta si a. n 34 Mi tilrè chun Filip kuomah, "Zawlnei hin tu thu am a hril, ama thu am mi dang thu a hril ti lunginsiet takin mi hril rawh" a ta. 35 Filip chun Lekha thua inthoka hril tanin Isu Chanchin Tha chu a hril tah a. 36 Chuonga an fe lai chun tui umna hmun an tlung a, mi tilrè chun, "En ta, hi taka hin tui a um a, baptisma ka chang iengin am a dâl a?" a ta. 37 Filip chun, "I lungril po poa i ring chun baptisma chang chu a thei annawm" a ta. Ama chun, "Ring e, Isu Krista chu Pathien Naupa a nih ti ka ring ie"o a ta. 38 Chuongchun, tawlailir chu an sukchawl a, Filip le mi tilrè chu an pahniin tuia chun an lùt a, Filip chun a baptis tah a. 39 Tuia inthoka an hung suok chun Lalpa thlarauin Filip chu a lâk hmang ta dai a, mi tilrèchun a hmu ta naw a, nisienlakhom hlim takin a fe ta pei a. 40 Filip chu Azota khuoah an hmu a, Kaisari khuo a tlung hma chun khaw tin a sir a, Chanchin Tha a hril pei a.

Acts 9

1 Saula ruok chun Lalpa zirtirhai chu that dingin a vauh zui pei a. 2 'Lampui' zuitu taphot chu a nuhmei a pasalin mana, Jerusalema a hung thuoi theina dingin Damaska khuoa sunagog hotuhai lekha ding thiempu laltak a va hni a. 3 Damaska pana a fe laiin, a tlung tawm têpin thawk le khatah êngin vàna inthokin a vêlin a hung khaw var ta phût a. 4 Ama chu hnuoiah a tla a, p rawlin, "Saula, Saula, nangin ieng dinga i mi sukdùdà am a na?" a hung ti a hriet a. 5 Ama chun "Lalpa, tu am i na?" a ta. Rawl chun, "I sukdùdà Isu ka nih. 6 Tuhin tho la, khawpuiah lût rawh, i thaw ding lo hril an ti che" a ta. 7 A fepuihai chu hrilhai takin an ngìr a, rawl chu an hriet a, sienkhom tu khom an hmu bok si nawh. 8 Saula chu a hung tho a, a hang meng a, ieng khom a hmu thei ta naw a. Chuongchun, kuta keiin Damaska khuoa chun an thuoi lût a. 9 Ni thum sùng khuo a hmu thei naw a, ieng khom fain a dawn bok nawh. 10 Damaska khuoa chun zirtir pakhat a hming Anania a um a. Lalpa a kuomah a'n lâr a, "Anania" a ta. Ama chun, "Lalpa, hi taka hin ka um" a ta. 11 Lalpa chun, "Kotthlêr Tlùna um Juda inah fe la, chu taka chun Tarsa mi a hming Saula va'n don suok rawh. 12 Ama chun mi pakhat Anania hung a, a chungah kut innghat a, a mit sukvar dingin a mitthla a, chu ding chun a tongtai zing a nih" a ta. 13 Anania chun, "Lalpa, hi pa hin Jerusalema i mi thienghlimhai chunga poi a tawk nasatzie ripawt tam tak ka dong tah a. 14 Hi taka khom hin i hming lamtu taphot man dingin thiempu lalhaia inthoka thu hmuin a hung a nih" a ta. 15 Lalpa chun, "Fe el rawh. Hi pa hi Jentêlhai le an lalhai le Israel mipuihai kuoma ka hming phur lùttu dinga ka hmangruo thlang a nih. 16 Ka hming leiin rinum ieng ang am a la tuor ding ama la'n hriettir ka tih" a ta. 17 Chuongchun, Anania chu a suok a, ina chun a va lût a, a chungah kut innghatin, "Unaupa Saula, i mit varna ding le Thlarau Thienghlima i sip theina dingin, i hungna lampuia i kuoma inlâr Lalpa Isu khan i kuomah a mi hung tir a nih" a ta. 18 Kar loin a mita inthokin phuhlip ang a tla ta nghal a, a mit a hung var nawk tah a. Chuongchun a tho a, baptisma a chang a. 19 Bu a fâk hnungin Saula chun a tha ngai a hung put nawk tah a. Damaskaa zirtirhai kuomah ni iemani zât a châm a. 20 Sunagoga hai chun Isu chu Pathien Naupa a nih ti a hril tan ta nghal a. 21 A thu hril hre taphot chun maktiin, "Hi pa hi Jerusalema Hming lamtuhai sukdùdàtu kha a ni naw am a ni? Hming lamtuhai chu mana thiempu lalhai kuoma thuoi tumin hi taka khom hin a hung an naw maw?" an ta. 22 Nisienlakhom Saula thu hril chun mi a hung hnè deu deu a, Isu chu Mesia ngei a nih ti chieng taka hrilfiein Damaskaa Judahai chu a sêl dong hlak a, a sukkahàk tawl a. 23 Ni iemani zât hnunga chun Saula chu that tumin Judahaiin an phierrûk a, 24 sienkhom an thiltum chu Saulan a lo hriet a. That tumin khawpui inhuonna kul kotkhâra chun sùn le zànin an inchàn a. 25 Nisielakhom, zirtirhaiin ama chu an thuoi a, zàna chun bawmin kul bang puo tieng chun an thlàk thla a. 26 Saulan Jerusalem a hung tlung chun zirtirhai laia thang ve a tum a, anni ruok chun zirtir a ni ve an ring thei naw a, an rêngin an tî hle a. 27 Nisienlakhom, Barnaba chun ama chu tirkohai kuomah a fepui a, lampuiah Lalpa a hmu a, Lalpan ama a biek thu le Damaskaah Isu hming huoi taka a hril thuhai dàm chu a hril tawl a. 28 Chuongchun, Saula chu anni lai chêngin, Lalpa hming chu huoi taka hrilin Jerusalema chun zalen takin a'n vâk vêl a. 29 Grik tong hmang Judahai kuomah thu a hril a, a'n sêlpui a, anni chun that an tum a. 30 Unauhaiin chu chu an hrietin Kaisari khuoah an thuoi thlak a, Tarsa khuo tieng an infetir tah dai a. 31 Chuongchun, Judai ram, Galili ram le Samari ram pumah kohran mihai chu muong takin an khawsa a, Thlarau Thienghlim chun sukhrâtin a sukphùr tawl a, Lalpa chu ti dêka umin, an hung pung tah deu deu a. 32 Peter inzin vêl chun Lida khuoa mi thienghlimhai a zu sir a. 33 Chu taka chun mi pakhat Ainia, a zeng leia kum riet lai khuma zâl tah chu a hmu a. 34 Peter chun a kuomah, "Ainia, Isu Krista chun a sukdam ta che, tho la, i khum kha siem fel rawh" a ta. Chuongchun, a tho tah nghàl a. 35 Lida le Saron phaia um po po chun Ainia chu an hmu a, Lalpa tieng an ngha tawl tah a. 36 Chun, Jopa khuoah zirtir pakhat Tabithaq a um a, a Grik hming chu Dorka a na, a umzie chu "sazuk la tuoi' tìna a nih. Chu nu chu thil tha thawa inhmang mi le retheihai thangpui hlaktu a nih. 37 Chuong lai chun ama chu a damnaw a, a thi el tah a, an insil fai a, pindan chunghnungah an inzâl a. 38 Lida chu Jopa khaw bul ela um a na, Lida khuoah Peter a um ti zirtirhaiin an hriet chun lunginsiet taka hung nghàl dinga ngên dingin mi pahnih an tir a. 39 Peter chun anni chu a zui a, in a tlung chun pindan chunghnungah an thuoi a, hmeithai po po chu a bulah an ngìr a, an tap a, a dam laia Dorkain zakuo le thuomhnaw a siemhai chu an inentir a. 40 Peter chun an rêngin a'n suoktir a, dingthathuonin a tongtai a, a ruong tieng chu nghain, "Tabitha, tho rawh" a ta. Chuongchun, Tabitha chu a hung meng a, Peter chu a hmu a, a hung thung suok a. 41 Peter chun a bânah a chel a, a kei tho a, ringtuhai le hmeithaihai chu a ko a, damin an kuomah a hung thuoi a. 42 Chu chu Jopa khuoa mi po poin an hriet a, mi tam takin Pathien an ring a. 43 Peter chu Jopa khuoa chun savun siemtu Simon inah a tlung a, ni tam tak a châm a.

Acts 10

1 Chun, Kaisari khuoah mi pakhat Korneli, Italy Regiment an tia sipai zahotu a um a. 2 Ama chu Pathien ngaisak mi, a sûnghai po po leh Pathien ti mi, inphal taka retheihai somdawl mi le Pathien kuoma tongtai rop mi a nih. 3 Ni khat chu chawhnung dâr thum vêlah chieng takin inlârna a hmu a. Pathien vântirko a kuomah a hung a, "Korneli" a hung ta. 4 Korneli chun mit âr intaa ama chu enin, "Iem a na, Lalpa?" a ta. Vàntirko chun, "I tongtainahai le mi pasiehai kuoma i thilpêkhai kha Pathienin a hriet zing a. 5 Tuhin Jopa khuoah mi tir la, mi pakhat Simon Peter chu inkotir rawh. 6 Ama chu tuipui kama savun siemtu Simon ina tlung a nih" a ta. 7 A betu vàntirko chu a liem charin Korneli chun a siehlawhai laia mi pahni le sipai pakhat, Pathien ngaisak mi tak chu a ko a. 8 Anni chu thil umzie iengkim a hril zo chun Jopa khuoah a tir a. 9 A zîng sùn chang lai, khuo an tlung tawm chun Peter chu tongtai dingin in chungah a lawn tung a. 10 A phîng a tâm ta hle a, bu fàk a nuom a, sienkhom fâk rong an bawl lai chun zêlin a um a. 11 Vàn inhong a hmu a, bawm, puon hlap kil lia khit, puom pûr el ang chu hnuoi tienga hung inkhài thla a hmu a. 12 Chu bawm sùnga chun ran ke pali nei chi hai, r bokvâka intawl le intel chi hai le chunglêng vate chi tinrêng an um a. 13 Rawlin, "Tho la, that la, fa rawh" a hung ta. 14 Peter ruok chun, "Ni lo e, Lalpa, thil inthieng lo ka fâk ngai nawh" a ta. 15 Rawl chun, "Pathienin a sukthieng tah chu thieng naw ti naw rawh" a hung ti nawk a. 16 Chuong ang chun voi thum a hung ti a, bawm chu vàn tienga khai tungin a um nawk tah a. 17 Chuonga Peterin a thil hmu maktia a ngaituo lai chun Korneli mi tirhai khan Simon in zong suokin a kotkhâr bulah an lo ngîr a. 18 "Hi taka hin Simon Peter a tlung am?" tiin an hung indon a. 19 Peterin a thil hmu a ngaituo lai chun Thlarauin a kuomah, "Mi pathumin an zong che. 20 Tho la, tum thla la, ieng khom ringhlel loin anni chu zui rawh; anni chu ka hung tir an nih" tiin a hril a. 21 Chuongchun, Peter chu a tum thla a, an kuomah, "In zong pa chu kei hi ka nih. Iem a na in hungna san?" a ta. 22 Anni chun, " Sipai zahotu Korneli mi tir kan nih. Ama hi mi fel, Pathien tì mi, Judahai po po inzà kai a na, vàntirko thienghlimin ama chu a biek a, i thuhril a ngàithlàk theina dingin, a ina nangma fiel ding chein a hril a nih" an ta. 23 Peter chun anni chu a ko lût a, a'n riektir a. A zînga chun anni chu Peter leh an suok a, Jopa khuoa unau thenkhatin an zui bok a. 24 A zîng nawk chun Kaisari chu an tlung a. Korneli chun a laibunghai le a ruol thahai fiel khawmin Peter chu a lo nghâk zing a. 25 Peter-in in a hung thlung chun Korneli'n a lo hmuok a, a ke bulah bokkhupin chibai a bûk a. 26 Peterin ama chu a kei tho a, "Tho rawh, kei khom mihriem el ka ni ve hi" a ta. 27 Ama le inbe zing pumin Peter chu inah a lût a, mi tam tak lo um khawm chu a hmu a. 28 An kuoma chun, " Judahai ta dingin Jentêlhai le insir paw le anni kan a thieng nawzie chu nangni ngeiin in hriet a. Nisienlakhom, tu khom thieng naw le porchè ka ti ding a ni nawzie Pathienin a mi'n hmutir a. 29 Chuleiin, in mi fielna ka hriet charin sêl dêr loin ka hung a nih. In mi hung fielna san iem an ta le?" a ta. 30 Korneli chun, "Voisun hi ni lìna a ni tah a, tu ang hun chawhnung dâr thumah ka tongtai laiin, ngai ta, mi pakhat puon var sil ka bulah a hung ngîr thut a. 31 'Korneli, i tongtaina le i thilpêkhai Pathienin a hriet zing. 32 Jopa khuoah mi tir la, Simon, Peter an ti chu inkotir rawh. Tuipui kama savun siemtu Simon inah a tlung a nih' a ta. 33 Chuleiin, i kuomah mi ka hung tir nghal a nih; i hung thei hi a tha ngot el. Tu hin Lalpan thu a pèk taphot che chu ngàithla dingin Pathien hmaah kan rêng hin kan lo um khawm a nih" a ta. 34 Peter chun, "Pathienin mi ditsak bik a nei nawzie ka hriet chieng tah. 35 Hnam tin lai tu khom ama tia thil indik thaw taphot chu a lawmzawng mi an nih. 36 Israel nauhai kuomah Pathien chun thu a hung intlun a, remna Chanchin Tha chu Isu Krista hmangin a hung puong ngei a, sienkhom Isu chu mi po po Lalpa a nih. 37 Johanin baptisma thu a hril hnunga Galili rama inthoka intana Judai ram puma thil hung tlung kha lo hre tah ngèi in ta. 38 Nazaret Isu chu Pathienin Thlarau Thienghlim le thilthawtheinain a'n thuom a, Pathien chun a umpui zing a, thil tha thawa inzin vêlin Diebolin a soisak po po a sukdam pei a. 39 Judai ram le Jerusalema a thilthaw po po hretu kan nih; ama chu kraws-ah hemdein an sukhlum a ni kha. 40 Nisienlakhom, Pathienin ni thum niah a kei tho a, hmu theiin a'n lârtir a. 41 Mi tin hmua ruok chu a'n lâr nawh, Pathienin hretu dinga a lo ruot lawk keinihai chauh hin kan hmu a; a tho nawk hnung khan fain kan dawn tlâng si a. 42 Chu chu tlâng insampui ding le Ama chu mihring le mithi chunga rorêltua Pathien ruot chu a nih ti mihai inhriettir dingin thu a mi pèk a nih. 43 Zawlnei po po khomin ama ring taphot chu a hming leiin an suol ngaidam nîng a tih ti an lo hril hlak a ni kha" a ta. 44 Chuong thu chu Peterin a hril lai zingin a ngàithlatuhai po po chungah chun Thlarau Thienghlim a hung tlung a. 45 Sertanhai laia ringtu Peter hung zuituhaiin Thlarau Thienghlim thilpèk Jentêlhai chunga khom buok a ni ve chu mak an ti hle a; 46 tong hriet lo dâma thu hrila Pathien an inpâk chu an hriet si a. 47 Peterin, "Hieng mihai hin eini ang bokin Thlarau Thienghlim an dong si a, tuia baptisma an chang tuin am a khap thei a?" a ta. 48 Chuongchun, Isu Krista hminga baptisma inchang dingin thu a pêk a. Chuong thil hnunga chun ni iemani zât bêk la châm dingin an thlo a.

Acts 11

1 Jentêlhai khomin Pathien thu an lo awi ve tah ti Judai ram khaw tina tirkohai le unau umhaiin an lo hriet tah a. 2 Jerusalemah Peter a hang fe chun ringtu sertanhaiin an lo soisel a, 3 "Sertannawhai inah i fe a, anni lai bu i fâk el a" an ta. 4 Peter chun thil hung tlung dànhai chu a ni ang takin a hrilfie a: 5 "Jopa khuoah ka um a, ka tongtai laiin zêlin ka um a, bawm, puon hlap lien tak ang, kil lia khit, vàna inthoka ka umna bula hung inkhai thla ka hmu a. 6 Ka en zing a, hnuoia mi ran ke pali nei hai, bokvâka intawl le intel chi hai le chunglêng vate hai a sûnga chun ka hmu a. 7 "Chun, rawlin, 'Peter, tho la, that la, fa rawh' a mi tiin ka hriet bok a. 8 Kei chun, 'Ni lo e, Lalpa, thil inthieng naw le tirdakum ieng khom ka bauah a lût ngai nawh' ka ta. 9 Vàna inthoka rawl chun, "Pathienin a sukthienghlim tah chu nangin thieng naw ti naw rawh' a mi ti nawk a. 10 Chuong ang chun voi thum a um a, vàn tieng khai tung a ni nawk tah a. 11 Chuong lai chun mi pathum, Kaisaria inthoka an hung tirhai chu ka tlungna in kotkhâr bulah an lo ngîr ta zing a. 12 Rin dèr loa anni zui nghal dingin Thlarain a mi hril a. Hieng unau parukhai khom hin an mi zui ve a, Korneli inah kan lût a. 13 Ama chun a inah vàntirko a hmu thu le a kuomah, 'Jopa khuoah mi tir la, Simon Peter inkotir rawh, 14 ama chun thu hril a ti che a, a thu hril lei chun nang le i sûnghai po po sandamin um in tih' a ti thuhai a mi lo hril a. 15 Thu chu ka hang hril tan a, Thlarau Thienghlim chu, a tira ei kuoma a hung tlung ang bok khan, an chungah a hung tlung a. 16 Lalpan, 'Johanin tuiin a baptis hlak a, nangni ruok chu Thlarau Thienghlima baptis nîng in tih' a tihai dàm kha ka hriet suok nawk a. 17 Lalpa Isu Krista ei ringa inthoka Thlarau Thienghlim ei dong ang kha Pathienin a pêk ve si chun, kei telul hin Pathien chu ka kal thei ding am a ni?" a ta. 18 Chuong thu an hriet chun soiselna ding an hriet tah naw a, "Chuong a ni chun Pathienin Jentêlhai khom sima hring dingin a phalpèk ve an tah chu" tiin Pathien an inpâk a. 19 Stefan leia sukdùdàna tuokhai chu Foiniki rama dàm, Kupra thlierkara dàm, Antiokei khuo chen dàm an tlàn dar a, Judahai kuoma chauh Pathien thu an hril a. 20 Anni laia thenkhat chu Kupra thlierkâra mi le Kurini khuoa mi an na, chuonghai chun Antiokei an tlung chun Grik mihais kuoma khom Lalpa Isu Chanchin Tha chu an hril ve tah a. 21 Lalpan anni chu a thangpui a, mi tam takin an ring a, Lalpa tieng an ngha tah a. 22 Jerusalem kohranin an chanchin an lo hriet chun Barnaba chu Antiokei-ah an tir a. 23 A zuk tlung chun Pathien lunginsietna sinthaw chu a zu hmu a, a lawm hle a, anni chu ringum taka Lalpa chel tlat dingin a'n fui tawl a. 24 Barnaba chu mi tha tak, Thlarau Thienghlim le ringnaa sip a na, mi tam tak chu Pathien kuoma thuoi lût an hung ni tah a. 25 Chun, Barnaba chu Saula zong dingin Tarsa tieng a fe nawk ta a. 26 A hmu chun Antiokeiah a hung thuoi a, kum khat zet kohran mihai kuomah an pahni chun an khawsa a, mi tam tak an zirtir hlak a. Antiokei khuoa hin a nih zirtirhai chu 'Kristien' an ti hmasa takna chu. 27 Chuong lai chun Jerusalema inthokin zawlnei thenkhat Antiokei-ah an zu fe a. 28 Anni laia pakhat Agaba chu a ngîr suok a, Thlarau inhriettirin Roman lalram sûnga tâmpui mitsim tlâk ding thu a hril lawk a (Klaudiat inlal laiin tâm chu a tla ta ngei a). 29 Zirtirhai chun an thei ang tawk senga thaw khawmin Judai rama unau umhai chu thangpuina thon an tum a. 30 An tum ang chun an thaw khawm a, upahai kuomah Barnaba le Saula kutah an thon a.

Acts 12

1 Chuong lai chun lal Herodanu kohran mi thenkhat chu hrem dingin a man khawm a. 2 Johan unaupa Jakob chu kawlhnâmin a'n sâthlumtir a. 3 Chu chun Judahai a suklawm ti a hrietin Peter khom man a tum ta pei a. Hi hi chol thang lo bei kùt hun lai a nih. 4 Peter chu a man a, lung inah a khum a, sipai pawl li, pali peia insawkin, a'n vèngtir a. Fekân Kùt zo pha vàntlângin a chungthu an rèl dinga thuoi dok a tum a nih. 5 Lung ina Peter intàng sûng chun kohran mihaiin thahnemngai takin Pathien kuomah an tongtaipêk a. 6 Herodan a chungthu rêl dinga thuoi suok a tum ni hma zàn chun Peter chu a kut khing hnia thîr khaidiet bunin, sipai pahni inkârah a in a, vêngtu dang pahni chun kotkhâr bulah ngîrin an vêng tlat bok a. 7 Ngai ta, thawk le khatah Lalpa vàntirko pakhat a hung inlang a, rip sûng chu a var ta phût el a, Peter chu a nâkah a khîk har a, "Tho vat rawh" a ta. A kuta inthok chun khaidiet chu a'n sùt thla a. 8 Vàntirko chun, "Insiem la, pheikhok bun rawh" a ta. Chuong ang chun a thaw a. Vàntirko chun, "I zakuo fuol khan inzem la, mi zui rawh" a ti nawk a. 9 Peter chun a zui a, sienkhom vàntirko thilthaw chu a tak ngei a nih ti a hriet nawh, zêla um anga a'n ngai leiin. 10 Vêngtu hmasa le a dottu an fe khêl a, khawpui tienga fe suokna thîr kotkhâr chu an va tlung a, kotkhâr chu amain a hung inhong a, an suok a, kotthlêr pakhata an fe laiin vàntirko chun a màksan ta thut a. 11 A hung har chieng chun Peterin, "Lalpan vàntirko a hung tir a, Heroda kuta inthok le Judahaiin ka chunga tlung ngei dinga an ngaia inthokin a mi san suok a nih ti tuhin ka hriet chieng tah" a ta. 12 Thil umzie a hriet fie hnung chun, Johan, 'Marka' tia an ko bok nu Mari ina chun a fe a, chu taka chun mi tam tak an um khawm a, an lo tongtai a. 13 Peter chun kotkhâr a kik a, siehlaw nunghak pakhat Rodi chu kot hong dingin a va fe a, 14 Peter rawl a hriet chun lawm taluoin, kot khom hong loin, a tlân kîr nawk a, kotkhâr bulah Peter a ngîr ti a va hril a. 15 Anni chun, "In vêt an ta hi!" an lo ta. Ama chu a thang tlat a, sienkhom anni chun, "Ama vêngtu vàntirko a ni chu" an ti nawk pei a. 16 Peter chun kot chu a kik a kik a, an hang hong chun ama chu an hmu tah a, mak an ti êm êm a. 17 Anni rawi chu to dingin kutin a zâp a, Pathienin lung ina inthoka a thuoi suok dàn chu a hril tawl a. "Hieng thu hi Jakob le unauhai va hril ro" a ta, a suok a, hmun dangah a fe tah a. 18 Khuo a hung var chun vêngtu sipaihai chu Peter chunga thil tlung thuah namên loin an buoi sie a. 19 Heroda chun a zong a, a hmu si naw a; vêngtu sipaihai chu thil umzie an don chieng hnungin an rênga sukhlum dingin thu a pêk a. Heroda chu Judai rama inthokin Kaisari-ah a fe thlàk a, chu taka chun a châm ta zing a. 20 Heroda chu Tura le Sidon mihai chungah a lungsen hle a, chuleiin anni chu inthuruolin ama be dingin an hung a. A khawnbawl upa, a ringzo êm êm Blasta chu thangpuitu dinga ruola an siem hnung chun, an ramin Heroda rama inthoka pûr an inchawk hlak leiin inrem dingin an ngên a. 21 Inbiekna ni ding chun Heroda chu lal thuom inbelin lalthungphaah a thung a, an kuomah thu a hril a. 22 Mipui chun, "Pathien rawl a nih, mihriem rawl a ni nawh" tiin an khêk a. 23 Heroda chun Pathien kuomah chawimawina a pêk naw leiin Lalpa vàntirkoin chop le chilin a hem thlûk a, rûlrukûtin an fâk hlumtir a. 24 Pathien thu ruok chu a'n dar a, ringtu an hung pung pei a. 25 Barnaba le Saulan an rongbawl sin an zo chun Johan (Marka) chu thuoiin Jerusalemav inthokin an kìr nawk tah a.

Acts 13

1 Antiokei kohran lai chun zawlnei le zirtirtu an um a, chuonghai chu Barnaba hai, Simeon, Nigerw an ti bok hai, Kurini khaw mi Lukia hai, lal Herodan unaua a nei Manainax hai le Saula hai dam an nih. 2 Bu ngheia Lalpa an chawibiek laiin Thlarau Thienghlimin, "Barnaba le Saula hi anni ka ko san rongbawl sin thaw dingin mi siehrangpêk ro" a ta. 3 Chuongchun, bu an nghei a, an chungah kut inghatin an tongtai a, an tir suok tah a. 4 Thlarau Thienghlim tir suokin Selukia khuoah an fe thla a, chu taka inthok chun longin Kupra thlierkàrah an fe a. 5 Salami khuo an tlung chun Judahai sunagog-ah Pathien thu an hril a, Johan khom anni thangpuitu dingin an thuoi bok a. 6 Chu thlierkâr chu an fang suok vong hnungin Pafos-ah an tlung a, chu taka chun Juda mi dawithiem le zawlnei tehlêm, a hming Bar-Isu an ti chu an hmu a. 7 Chu pa chu a ram optuy Sergia Paula meitehèma thang a nih. Ram optu chu mi var tak a na, Pathien thu ngaithlak a nuom leiin Barnaba le Saula hai chu a ina lêng dingin a fiel a. 8 Dawithiem Elima (chu chu a hming umzie tak chu a nih) chun Ram optu chu ringna thu inawitir naw tumin, Barnaba le Saula chu a lo kal a. 9 Saula, Paula an ti bok chu Thlarau Thienghlimin a sip a, Elima chu a hmaiah inchang takin a en a, 10 "Nang hlêmna tinrêng le dawhaa sip, diebol naupa, thil indik taphot hmêlma pa, Lalpa lampui indika inthoka mi thuoi suol i ma naw ding maw? 11 Hre rawh, tu hin Lalpa kut i tuor ding a ni hih, i mit indel a ta, khaw var hrim hmu ta ngai naw ti nih" a ta. Chu phing leh sûm le thimin a hung baw a, a keitu ding zongin an mai vêl ta ruoi a. 12 Ram optuin chu chu a hmu chun a ring tah a, Lalpa thu an inchûktir chun a lungril a tawk hle a. 13 Paula le a ruolhai chu Pafos-a inthokin longin an suok a, Pamfulia ram Perga khuo an tlung a, Johanin anni chu a màksan a, Jerusalem tieng a kîr nawk a. 14 Pergaa inthokin Pisidi rama Antiokei khuoah an fe pei a. Sabat ni chun sunagog inkhawmah an fe a, an inthung a. 15 Dàn bu le Zawlnei Lekhabu an tiem zoin sunagog hotuhai chun mi an tir a, "Unauhai, infuina ding thu iemani dâm hril ding in nei chun hril ro" an va ti a. 16 Chuongchun, Paula chu a ngîr a, kutin a zâp a, a hril tah a. "Nangni Israel mihai le Pathien betu Jentêlhai, lo ngaithla ro. 17 Israelhai Pathien khan ei thlatuhai kha a thlang a, an mikhuolna Aigupta ramah an um sùng khan hnam ropui takin a'n ngìr a, chu taka inthok chun thilthawtheina ropui tak hmangin a thuoi suok a. 18 Kum sawmli sûng lai thlalèrah dawthei taka enkolin a thuoi a. 19 Kanan ramah hnam sari a suktlawm hnungin an ram chu a'n hluotir a. 20 Chu chun kum zali le sawmnga lai a aw a. Chu zoah rorêltuhai a pêk hlak a, zawlnei Samuel chen khan. 21 Chu hnunga chun lal an hni a, Pathienin Benjamin chia mi, Kisa naupa Saula chu kum sawmli sûnga dingin a pêk nawk a. 22 A lalna a suktawp hnungah Pathienin Davida a'n laltir a, 'Ka lungril ang put mi Davida, Jesai naupa ka hmu suok tah, ama chun ka ditzawng taphot chu thawng a tih' a ta. 23 Chu thlaa inthok chun, Pathienin thu a tiem angin, Israelhai kuomah Sandamtu Isu a hung pêk a. 24 Isun rong a bawl tan hmain Johanin simna baptisma chang ding a ni thu Israel mihai po po kuomah a hung hril hmasa a. 25 Johan chun a rongbawlna a hlen ding lai khan, 'Nangnin tu am ni dingin in mi ruot? Ama chu ka ni nawh. Ngai ta u, ka hnungah a hung mèk a nih, a pheikhok hrui sût tlàk khom ka ni nawh' a ta. 26 "Ka unau, Abraham thlahai le nangni Pathien ti mi Jentêlhai, chu sandamna thu chu ei rênga kuomah a hung tlung tah a nih. 27 Jerusalema umhai le an rorêltuhaiin ama chu an hriet naw a, thiemnaw an inchangtirna chun Sabat ni taphota an tiem hlak zawlneihai thu hril chu an intlung kimtir tah a nih. 28 Thìna khop meuh a chungah ieng khom an hmu naw sà khomin sukhlum dingin Pilat kuomah an ngèn a. 29 A chungthu zieka lo umhai kha an hlen zo hnung in kraws-a inthokin an làk thlàk a, thlânah an vûi a. 30 Nisienlakhom, Pathienin ama chu mithi laia inthokin a keitho nawk tah a nih. 31 Jerusalema ama ruola hang fe vehai kuomah ni sawt tak sùng a'n lâr hlak a; chuong mihai chu tuhin Israel mihai laia a thu hrepuituhai chu an nih. 32 Chu Chanchin Tha, Pathienin ei thlatuhai kuoma a lo tiem chu hril ding cheuin kan hung a nih. 33 Chu chu eini an thlahai kuomah Isu keithoa a um khan a hung hlen tah a nih. Sam nambar pahninaa, 'Nang hi ka Naupa i nih, Voisun hin i Pa ka ni tah'ztia ziek a ni ang khan. 34 A ruong khom hmon loa keitho a ni ding thu hrilin, 'Davida kuoma ka thutiem thienghlim, Inkhêl lo ding chu pêng ka ti che'atiin a lo hril kha. 35 Chuleiin, hmun danga khom, 'I Mi thienghlim chun hmon hmêl, A hmù ding phal naw ti nih'b a lo ti bok a nih. 36 "Davida ruok chu a dam sûnga Pathien ditzawng a thaw zo hnungin a in innghil a, a thlatuhai bulah an phûm a, a hmon hmang vong tah. 37 Pathienin a keitho ruok kha chu a hmon hmang ve nawh. 38 Chuleiin unauhai, hre ro, ama Isu lei chun suol ngaidamna thu in kuomah ka hung hril a ni hi. 39 Mosie Dàna thiem in chang thei nawna po poa khan Isu ringtu taphot thiem inchangtir an ni tah. 40 Chuleiin, fimkhur ro, chuong naw chun zawlneihai lekhabua a hril kha in chungah hung tlung hlauh rawi a tih: 41 'Deusawtuhai enin la, Maktiin bohmang ro; In hun lai ngei thil thawng ka ta, Chu chu mi'n hrilhai sien cheu khom, Ring chuong ngai naw ti niu'cti hi" a ta. 42 Inkhawm tîn an suok lai chun Sabat nawk phaa chuong thuhai chu hril nawk dingin mihai chun an ngên a. 43 Mipui an tîn vong hnung chun Juda tam tak le Juda saphun, Pathien ngaisak mi tam takin Paula le Barnaba chu an zui a, an titipui a, Pathien lunginsietnaa chêng zing dingin an infui a. 44 Sabat nawk chun Lalpa thu chu ngaithla nawk dingin a khaw nawt deuthawin an hung inkhawm a. 45 Nisienlakhom, Judahaiin mipui an hmu chun an thîk ta êm êm a. Paula thu hril taphot chu an selkal a, an hrilsiet bor bor a. 46 Paula le Barnaba chun huoisen takin an don a, "Pathien thu hi nangni kuoma hril hmasak ding a ni hrim a; nisienlakhom in hnawl a, chatuon hringna nei tlâk loa in inngai a ni ruok chun, hre ro aw, Jentêlhai tieng ngha tâng kan tih. 47 Chuonga thaw dingin Lalpan thu a mi pêk a nih:'Jentelhai var ni dingin ka ruot che, Kawlkawdong chen sandamna thu, A tlung theina dingin'dtia ziek ang khan" a ta. 48 Jentêlhaiin chu thu an hriet chun an lawm a, Lalpa thu chu an chawimawi a; chatuon hringna nei dinga ruot taphot chun an ring tah a. 49 Lalpa thu chu chu ram puma chun a'n dar pei a. 50 Nisienlakhom, Judahai chun mi lien nuhmei ruol, Pathien ti mi leh a khuoa mi challang deuhai chu an infuipor a, Paula le Barnaba chu soisa dingin mi an cho phawk a, a biela inthok chun an hnot suok tah a. 51 An thilthaw chu demin tirkohai chun an kea pilvut kai chu an thin thlak a, Ikoniam khuoah an fe tah a. 52 Zirtirhai chu Thlarau Thienghlimin an sip a, an hlim èm êm a.

Acts 14

1 Ikoniam khuoa khom Paula le Barnaba chun an thaw dân pangngaiin Judahai sunagog-ah an inkhawm a. Chu taka chun an thuhrilin a hnè tawl êm leiin Juda le Jentêl mi tam takin an ring a. 2 Nisienlakhom, ring nuom ve lo Judahai chun Jentêlhai chu an infuipor a, unauhai chu an intheidàtir a. 3 Sienkhom Paula le Barnaba chu sawt fe an châm a, Lalpa thu chu huoi takin an hril a. A lunginsietna thu an hril hlak chu namnghetin Lalpan anni hmangin inchikna le thilmak tam tak a thaw a. 4 A khaw mihai chu an hung inthe a, a thenin Judahai an tan a, a thenin tirkohai an tan a. 5 Jentêlhai le Judahai le an hotuhai chun anni chu soisak hrep a, lunga dêng an tum ti tirkohan an lo hrietin, 6 Lukaoni rama Lustra khuoa hai, Derbe khuoa hai le a sè vèl rama hai an tlànsan ta lem a. 7 Chuong hmuna hai khom chun Chanchin Tha an hril pei a. 8 Lustra khuoa chun mi pakhat a pienga inthoka ke zeng, la lawn ngai dêr lo a um a. 9 Ama chun Paula thuhril a ngaithlàk ve a. Paulan ama chu a en zing a, damna dingin ringna a nei ti a hriet a, 10 inring takin, "I kein ngir suok rawh" a ta. Ama chu a'n chawm tho a, kein a fe thei el tah a. 11 Mipuiin Paula thilthaw an hmu chun, Lukaoni tongin inring takin "Pathienhai chu keini lai mihriem angin an hung tum tah a ni hi" an ta. 12 Barnaba chu Zeuse an ta, Paula chu thu hriltu tak a ni leiin Hermesf an ti thung a. 13 An Pathien Zeus tempul chu kotsuoah a um a, chu taka thiempuhai chun mipuihai leh tirkohai hmaa inthawina inhlàn tumin bawngchal le par thi an hung làk a. 14 Tirko Barnaba le Paulan chu thu an hriet chun an puonhai an kei thlèr a, mipui lai chun an inchawm lût a, inring taka khêkin, 15 "Puhai, hieng thil hi ieng dinga in thaw am a na? Keini khom nangni ang boka mihriem ve el kan ni hi. Hieng thil hmang lo hi nghatsan a, vàn hai, hnuoi hai le tuifinriet le a sûnga um po po hai siemtu Pathien Hring tieng in nghat theina dingin Chanchin Tha kan hung hril chêu a ni hih. 16 Tuta hma khan hnam tin anni dàn ang peia um a phal a. 17 Chuong sa khom chun sui suok thei lo dingin ama a'n thup ngai nawh; a thil tha thawin ama a'n hriettir a, vàna inthokin ruotui a pêk chèu a, a hun takah in thlaihai a'n ràtir a, fâk ding tam tak a pêk cheu a, in lungril a sukhlim êm êm hlak a nih" an ta. 18 Chuong thu chu hrilin mipuihai chu an kuoma inthawina inhlàn lo dingin an khap thei ta hrâm a. g 19 Nisienlakhom, Antiokei le Ikoniama inthokin Juda thenkhat an hung a, mipui chu an hung inhmin a, Paula chu lungin an dèng a, a thi tah sawnin khuoa inthokin an hnûk suok a. 20 Sienkhom, zirtirhaiin an ngîr huol laiin ama chu a hung tho a, khuoa chun a lût nawk a. A zinga chun Barnaba leh Derbe-ah an fe a. 21 Derbe-a chun Chanchin Tha an hril a, zirtirah mi tam tak an siem hnungin Lustra-ah an kìr a, chu taka inthokin Ikoniama hai, Antiokeia hai an fe pei a. 22 "Rinum tam tak tuorin Pathien ram ei lût ding a ni hrim a nih" tiin zirtirhai lungril chu an suknghet a, ringna chu chel tlat dingin an infùi a. 23 Kohran tinah upa dinghai an thlangpui a, bu ngheiin an tongtai a, an ring Lalpa kuomah an inkoltir pei a. 24 Pisidi ram chu an fang suok a, Pamfulia ram an hung tlung nawk a. 25 Perga-ah thu an hril a, Atali khuoah an zu fe a, 26 chu taka inthok chun longin an suok a, Antiokei an tlung nawk tah a. Antiokeia inthok hin a nih an rongbawlna sin tak thaw dinga unauhaiin Pathien lunginsietnaah inkoltir a, an inzin suok tan chu ni. 27 An tlung chun kohran mihai an ko khawm a, Pathienin anni hmanga thil a thaw po po le Jentêlhai ta ding khoma Isu ringna lampui an hong thuhai chu an hril a. 28 Ringtuhai kuoma chun sawt fe an chàm a.

Acts 15

1 Judai rama inthokin mi thenkhat an hung thla a, "Mosie Dàn anga ser in tan kher naw chun sandam ni thei naw ti niu" tiin unauhai chu an hung inchûktir a. 2 Paula le Barnaba hai leh chun nasa taka an inkal tlat leiin Paula le Barnaba le anni laia mi thenkhat chu Jerusalemah hang fe a, chu chungchàng thua tirkohai le upahai hang inhmupui dingin an ruot a. 3 Chuongchun, kohranhai chun an inthla a, lampuiah Foiniki ram le Samari ram an fang suok a, unau umhai kuoma chun Jentêlhai khomin Pathien thu an lo awi ve tah ti thu chu an hril pei a, chu chun a suklawm tawl hle a. 4 Jerusalem an hang tlung chun kohran mi hai, tirko hai le upa hai chun an lo lawm a; Pathienin anni hmanga thil a thaw po po chu an kuomah an hril a. 5 Farisai pawla mi, ringtu thenkhat ruok chu an ngìr a, "Jentêlhaiin ser an tan ding a na, Mosie Dàn khom zawm dinga phût tlat ding a nih" an ta. 6 Chu thu chu ngaituo dingin tirkohai le upahai an inkhawm a. 7 Sawt tak an hril tlàng hnungin Peter a ngîr a, an kuomah, "Unauhai, Jentêlhaiin keima bâua inthoka Chanchin Tha an hrieta an ring theina dingin Pathienin nangni laia inthoka kha hmaa a mi thlang suok thu kha in hriet a. 8 Lungril hretu Pathien chun eini a mi pêk ang bokin an kuoma khom Thlarau Thienghlim pein, Jentêlhai chu a dit a nih ti a suklang kha. 9 Eini le anni a thlier bìk naw a, ringna leiin an lungril a sukthienghlim a. 10 Chuleiin, ei thlatuhai le eini ngei khoma ei phur zo ta lo ringkol kha tu hin ringtuhai liengkoah inbât luitir tumin ieng dinga Pathien fie in tum am a na? 11 Anni ang bokin eini khom Lalpa Isu lunginsietna leia sandam ni dingin ei inring si a" a ta. 12 Chuongchun, mipui chu an to a, Barnaba le Paulan anni hmanga Jentêlhai laia inchikna le thilmak Pathienin a thaw dàn chanchin an hril chu an ngaithlâk thup a. 13 An hril zo chun Jakobin a hril ve a, "Unauhai, ka thu hi ngaithla ro. 14 Simeonh khan Pathienin Jentêlhai ngaisakin ama hming phurtu dingin anni laia mi a lâk suok tan thu a hril a. 15 Chu thu le hi zawlnei thu ziek hi an inmil char a nih: 16 Chu hnungah kîr nawk ka ta, Davida in chim ta chu tungding ka ta; A tlu sophai chu bawl thâng ka ta, Indin thar nawk vong ka tih; 17 Hlaa la umhai khomin Lalpa zong an ta, Jentêlhaiin ka hming phur an tih; 18 Tiena inthoka hieng thu inhriettirtu Lalpa chun a tih. 19 "Chuleiin, hieng hin thaw inla ka ti a nih: Jentêlhai laia Pathien thu awihai chu sukbuoi naw inla; 20 mi lem biekna thil tirdakum fâk lakah inthier fihlim ding dàm, inngai bansan ding dàm, sa rêkhlum sa le sa thisen fa lo ding dàmin lekha thon lem ei tiu. 21 Mosie Dàn chu tiena tlânga inthok khan khaw tinah an puong a, sunagoga hai le Sabat ni taphotin an tiem hlak" a ta. 22 Chuongchun, tirkohai le upahai chun kohran mi po po leh anni laia mi thlang suok a, Paula le Barnaba ruola Antiokeia tir dingin thu an sukthluk a, unauhai laia an thuoitu Juda, Barsaba an ti le Sila chu an thlang a. 23 Anni kuta chun hi lekha hi an thon a: "Tirkohai le upahai le unauhai hin:Antiokei mihai, Suria rama mihai le Kiliki rama Jentel unau umhai chibai kan bûk cheu. 24 Keini laia mi thenkhat in kuomah hungin, kan thu hmu si loin an sukbuoi hrep cheu ti le in lunginzîng rak tì kan lo hriet a. 25 Nangni kuoma hung ding kan aiaw lunginruol takin kan thlang a, 26 anni chu kan dittak le ei Lalpa Isu Krista hming leia thi huom Barnaba le Paula ruol hin hung tir thain kan hriet a. 27 Chuleiin, Juda le Sila hi kan hung tir a nih; anni khomin hi thu bok hi bàu ngêiin hril an ti cheu. 28 Hieng a hnuoia thil poimaw zuol ti nawhai chu in chungah phurrik ieng khom innghat naw inla ti Thlarau Thienghlim le keini ngèiin tha dingin kan hriet: 29 Milem biekna sa dàm, sa thisen dâm le sa rêk hlum sa dàm fa naw unla; inngai bansan ro; hieng thil laka hin in fihlim thei chun in ta dingin thang a tih. i Dam takin" tiin 30 Chuongchun, anni chu an fe thlàk a, Antiokei an tlung chun mipui an ko khawma, lekha chu an pêk a. 31 Anni chun an hang tiem a, an infuina thu lei chun an lawm tlâng hle a. 32 Juda le Sila chu zawlnei an ni bok a, unauhai chu infuina thu tam tak hrilin an suknghet a. 33 Chu taka iemani chen an châm hnungin, anni tirtuhai kuomah thlamuong taka kîr nawk dingin unauhai chun an inthla a. 34 Sila ruok chu chu taka chun a châm ta zing a. j 35 Paula le Barnaba khom Antiokeia chun an um zing a, mi dang tam tak leh Lalpa thu hrilin mi an inchùktir hlak a. 36 Ni iemani zât hnunga chun Paulan Barnaba kuomah, "Kîr nawk inla, Lalpa thu ei hrilna khaw tina unau umhai kha kan inla, iem an chang pei va en ei tiu" a ta. 37 Barnaba chun Johan, Marka an tî bok chu thuoi nawk a nuom a. 38 Paula ruok chun, Pamfuli-a inthoka anni kìrsan a, an rongbawlnaah a thang ve pei ta naw lei khan ama chu thuoi nawk chì niin a ngai naw a. 39 Nasa taka an insêl hnung chun an inthe a, Barnaba chun Marka a thuoi a, Kupra thlierkar tieng longin an suok a. 40 Paula ruok chun Sila a thlang a, unauhaiin Pathien lunginsietnaa an inkoltir hnung chun an suok ve tah a. 41 Paula chun Suria ram le Kiliki ram hai chu a fang suok a, kohranhai chu a suknghet pei a.

Acts 16

1 Derbe khuo an sir hnungin Lustra an tlung a, chu taka chun zirtir pakhat Timothe a um a, a nu chu ringtu Juda a na, a pa ruok chu Grik mi a nih. 2 Lustra le Ikoniama unauhai chun Timothe chu an inpâk hle a. 3 Paula chun inzinpui dingin a dit leiin a ser a tanpèk a. Chu chu chuong laia um Judahai leia a thaw a nih, Timothe pa chu Grik mi a nih ti an hriet vong si a. 4 Khaw tin an sir malamin Jerusalema tirkohai le upahai thu rêl kha zawm dingin an hril pei a. 5 Chuongchun, kohranhai chu ringnaa suknghetin ni tinin an hung pung ta pei a. 6 Asia rama thu hril lo dinga Thlarau Thienghlimin a ti leiin Paula le a'n zinpuihai chun Frugia le Galati ram po po chu an fang suok a. 7 Maisia ramri an va tlung a, Bithunia ramah lùt an tum a, chu khom chu Isu Thlarauin a phal naw a. 8 Chuongchun, Maisia ram chu an fe thleng a, Troas khuo an tlung thla a. 9 Paulan zànah inlàrna a hmu a, Makedonia rama mi pakhat ngîrin, "Makedonia ramah hung kai la, mi hung san rawh" tiin a lo ngèn a. 10 Inlàrna a hmu zo chun an kuomah Chanchin Tha hril dingin Pathienin a mi ko niin kank hriet a, Makedonia rama fe kan tum tah nghàl a. 11 Troas khuoa inthokin longin kan suok a, tluong takin Samotraki khuo kan tlung a, a zîngah Neapoli khuo kan tlung nawk a. 12 Chu taka inthok chun Filipi khuoah kan fe a, chu khuo chu Makedonia biela khaw poimaw tak, l Rom sorkar khuo a nih. Chu taka chun ni iemani zàt kan chàm a. 13 Sabat ni chun kul kotkhâr puo tieng va kamah tongtaina hmun remchang zongin kan fe a, chu taka chun inthungin nuhmei hung inkhawmhai kuoma chun thu kan hril a. 14 Thuatir khaw mi, nu pakhat Ludi, Pathien ti mi, puon senduk zortu chun kan thu hril a hung ngàithlàk ve a. Paula thu hrilhai zawm dingin Lalpan a lungril a hongpêk a. 15 A sûnghai leh baptisma an chang a, "Lalpa ring takzeta in mi ruot chun ka inah hung tlung ro" tiin a mi ngèn a, a mi thlo tàng tah a. 16 Ni khat chu tongtaina hmun pana kan fe laiin bawi nunghàk pakhat, ramhuoi zawl, aisân thiem hin a mi'n tuokpui a. A aisân thiemna chu a puhai chun an hlawkpui hle a. 17 Chu nu chun Paula le keini chu a mi zui a, "Hieng mihai hi Pathien Chunghnungtak siehlawhai an na, sandamna lampui an hril chêu a ni hi" tiin a khêk a khêk a. 18 Chuong ang chun ni tam tak a thaw a, Paula chun a ngai thei ta naw a, a ngha kîr a, ramhuoi kawla chun, "Isu Krista hmingin thu ka pêk che; a sûnga inthok khan hung suok rawh" a ta. Chu char chun ramhuoi chun a suoksan ta nghàl a. 19 Suok neituhai chun an sum hnàr a chât dèr tah tih an hrietin Paula le Sila chu an man a, bazar hmun, mi pungkhawmnaa chun an hnùk lùt a, 20 rorêltuhai hmaah an thuoi a, "Hieng mihai hi Juda mi an na, ei khuo an sukbuoi a nih. 21 Eini Rom mihai zawm le thaw ve thieng lo dàn dang an inchûktir a nih" an ta. 22 Chuongchun, mipuihai khom chu tirkohai bei ding chun an hung inthok ve a. Rorêltuhai chun an zakuo hlippêk a, hmola vaw dingin thu an pèk a. 23 An vuok hrep hnung chun lung inah an khum a, vêngtuhai kuomah anni chu him taka vêng dingin thu an pêk a. 24 Chuong ang khopa thu an pèk khauh lei chun anni chu rip sûngrilah an khum a, an keah thîr kol an inbuntir a. 25 Zàn rila chun Paula le Sila chu Pathien kuomah an tongtai a, hla an sak a, tâng danghaiin an ngaithlàk a. 26 Thawk le khatah lir nasa tak, lung in thut lungphum chen inhnîng dur dur khopa nasain a hung inhnìng a, lung in kotkhâr po po chu a'n hong a, tânghai kol bun khom a'n sût vong a. 27 Lung in vèngtu a hung har chun tânghai chu an tlàn suok vong tah sawnin, a kawlhnâm a phawi a, insun hlum a tum a. 28 Paula chun inring takin, "Ieng khom inlaw naw rawh, kan rêngin hi taka hin kan la um vong annawm!" a ta. 29 Chu phing leh khawnvar a lam a, a'n chawm lût a, tia inthin pumin Paula le Sila ke bula chun a bokkhup a. 30 Anni chu tuolah a thuoi suok a, "Puhai, sandam ka ni theina dingin ieng am thawng ka ta?" a ta. 31 Anni chun, "Lalpa Isu ring la, chuongchun sandam nîng i tih, nang le i sûnghai leh" an ta. 32 Ama le a ina um po pohai kuoma chun Lalpa thu an hril a. 33 Chu zân chun, chu dârkâr lá là chun anni chu a thuoi a, an vuokna hliemhai chu a sawppèk a, an sûngin baptisma an chang nghal a. 34 Chun, a inah a thuoi a, fàk ding a pêk a, Pathien an ring tah leiin an sûngkuo chun an hlim tah èm êm a. 35 A tûk zîngkâr chun rorêltuhaiin, "Kha mihai kha insuo rawh" tia lung in vèngtu hril dingin pulis an tir a. 36 Lung in vèngtu chun an thu chu Paula a hril a, "Rorêltuhai chun insuo ding chèuin mi an hung tir a, tu hin suok unla, thlamuong takin fe ta ro" a ta. 37 Nisienlakhom Paula chun pulishai kuomah, "Rom mi kan ni si a, thiem naw chang khom kan ni naw a, vàntlâng hmaah an mi vuok a, lung inah an mi khum a. Tu hin dei zota mi'n suo el an tum rok a ni? Ni top naw nih; anni ngei hungin mi hung thuoi suok raw hai se" a ta. 38 Pulishaiin chuong thu chu rorêltuhai an va hril a, Rom mi an nih ti an hriet chun an ti ta hle a. 39 Suklawm tumin an hung a, thuphâ an chawi a, an thuoi suok a, an khuoa inthoka suok dingin an ngèn a. 40 Chuongchun, lung ina inthok chun an suok a, Ludi inah an fe a, unauhai an hmu chun an thlamuong a, chu zoah an suok tah a.

Acts 17

1 Amfipoli le Apolonia an sir hnungin Thesalonika khuo an tlung a, chu taka chun Judahai sunagog a um a. 2 Paula chu a thaw dàn pangngaiin Sunagoga chun a'n khawm ve a, Sabat voi thum zet Pathien Lekha thua inthoka suipuiin, 3 Krista chu thìna tuor ding a ni thû le mithi laia inthoka tho nawk ding hrim a ni thû chu a hrilpui a, "Hi Isu, a chanchin kan hril cheu hi Krista chu a nih" a ta. 4 Chuongchun, anni laia thenkhat chun an ring a, Paula le Sila chu an zui a, chuonghai lai chun Pathien ngaisak Grik mi tam tak le khawtlânga nu challang thahnem tawk tak an thang ve a. 5 Nisienlakhom, Judahaiin an thîk a, khawlaia mi suol invâk khaw hrawl mei mei hai chu an inpun khawm a, a khaw phêkin an chawk buoi a. Paula le Sila chu mipui hmaa thuoi suok tumin an zong a, Jason in an va thawng a. 6 Anni chu an hmu zo naw phing leh Jason le a unau thenkhathai chu khawtlâng hotuhai hmaah an hung hnùk lùt a, "Khawvel chok buoituhai kha hi taka khom hin an hung a, 7 Jason hin a lo intlungtir vei a. Hienghai hin an rêngin, 'Lal dang a um, Isu an ti chu' tiin Kaisar thu kalin thil an thaw hlak a nih" tiin an khèk a. 8 Chuong thu chu an hrietin mipui le khaw hotuhai chu an chì-âi hle a. 9 Jason le ama ruola an hung thuoi mi danghai chu an aia hrên ding dakham an insietir hnungin an insuo tawl tah a. 10 Unauhai chun Paula le Sila chu a zân a zànin Beroi khuoah an infetir a. An tlung chun Judahai sunagog-ah an inkhawm a. 11 Anni chu Thesalonika mihai nèk chun an lo inhong lem a, Paula thu hrilhai chu phûr takin an dong a, a'n dik le indik naw chiengna dingin Pathien Lekha thu ni tin an tiem hlak a. 12 Juda mi tam takin an ring tah a, Grik mi challang tam tak khomin, a nuhmei a pasalin, an ring bok a. 13 Nisienlakhom, Thesalonikaa Judahaiin Beroi khuoa khom Paulan Pathien thu a hril ti an hriet chun an hung a, mipui an infuipor a, an sukbuoi nawk tah a. 14 Chuongchun, Paula chu longa infètir dingin tuipui kam tieng unauhai chun an fèpui ta nghàl a. Sila le Timothe ruok chu Beroia chun an la châm pei a. 15 Paula thuoituhai chun Athens khuo chen an va'n thla a, Beroi tieng an kìr nawk chun Sila le Timothe hai chu a'n rang thei ang taka hung dinga hril dingin Paula chun thu a'n cha a. 16 Paulan Athens-a a lo nghàk lai chun chu khuo chu pathien lima sip a nih ti a hmuin a'n voi tawl hle a. 17 Chuongchun, sunagog-ah Judahai le Grik mi, Pathien ngaisak mihai chu Pathien thu a suipui hlak a, vântlâng pung khawmnaa hunghai khom a hmu taphot chu ni tin thu a hrilpui bok hlak a. 18 Chun, Epikurianm pawla mi thenkhat le Stoikn pawla mi var thenkhathai leh khom an insêl a. Thenkhatin, "Hi nasêtumpa hin iem a hril lie?" an ta. Isu thu le thonawkna thu a hril leiin a then chun, "Hnam dang pathien thu hriltu a ni awm ie" an ta. 19 Chuongchun, an thuoi a, Areopagi-aho an fepui a, "Hi zirtirna thar i hril hi iem a na, ngaithla thei kan ti? 20 Kan hrieta ngei thu dangdai tak i hung hril a, chuong thil umzie chu hriet kan nuom" an ta. 21 Athens mihai le ram dang mi, a khuoa chênghai chun thil dang thlu lêk loa thil thar hril le ngaithlâk an chìng hlak hrim a nih. 22 Paula chu Areopagia hunghai hmaa chun a ngîr a, a hril a, "Nangni Athens khaw mihai, iengkimah sakhaw mi tak in nih ti ka hriet. 23 Ka lêng malama chibai inbûk ka en laiin maichàm pakhat chungah, "Hriet lo Pathien ta ding" ti inziek ka hmu a. Hre loa chibai inbùk hlak thu chu keiin ka hung hril chêu a ni hi. 24 Pathien, khawvel le a sûnga umhai po po siemtu chu, hnuoi le vàn lal a ni leiin, kuta siem tempula hai a chêng ve naw a. 25 Thil tlasam hlak, mihriemhai kuta rong bawlpêk ngai khom a ni bok nawh; ama ngei chu iengkim kuoma hringna hai, inthuokna hai le thil po po petu a ni lem si a. 26 Hnuoi chung hmun tina chêng dingin thlatu pakhatap inthokin hnam tin a'n din a, an ta dingin hun bihai a thliekpèk a, an umna ding ramrihai a khangpèk a. 27 Pathien an zonga an dap an dap a, an dap fûk hlauh theina dingin a thaw a nih; ama chun a mi hlat naw seng si a. 28 Ama leiin ei hring a, ei chàng a, ei um a ni si a. Nangni laia hlaphuoktu thenkhat khomin 'Eini khom a thlàhai ei nih' tia a hril ang kha a nih. 29 Chuongchun, Pathien thlahai ei ni si chun, Pathien chu rangkachak amanih, tangkaruo amanih, lung amanih, mihriem themthiemna le remhrietnaa ser suok ang hi ni dingin ei ngai ding a ni nawh. 30 Khang anga mihriem ei mawl lai khan Pathien chun a mi en khùm hlak a, tu ruok hin chu hmun tina chêng mi po po hi sim ta dingin thû a mi pèk a nih. 31 Ama mi ruot ngèiin khawvel pumpui indik taka ro a rèlpèk hun ding ni chu a ruot fel tah a; a ruot ngèi ti mi tin kuoma sukchiengna dingin ama chu mithi laia inthokin a keitho tah a nih" a ta. 32 Mithi laia inthoka tho nawkna thu an hriet chun a thenin an nuisan a, a then ruok chun, "Hi thu hi ngaithlâk nawk kan nuom" an ta. 33 Chuongchun, Paula chu anni laia inthokin a suok a. 34 Thenkhatin Paula chu an zui pei a, an ring tah a. Chuonghai lai chun Areopagi-a rorêltuhai laia mi Dionisia hai, nuhmei pakhat Damari hai le mi dang tam tak an thang ve a.

Acts 18

1 Iemani chen hnungah Paulan Athens khuo a suoksan a, Korinth khuoah a fe a. 2 Chu taka chun Juda mi pakhat Akuila a hmu a, ama chu Ponto rama pieng a nih. Rom lal Klaudia-in Juda mi po po Rom khuo suoksan dinga thu a pêk leia a nuhmei Prisilla leh Italy rama inthoka hung tlung hlim an nih. 3 Paula chun anni chu a va sir a, ama ang boka puon in siemtu an ni ve leiin a tlung chil a, sin a thawpui hlak a. 4 Sabat ni po leh Sunagog-ah thu a hril a, Judahai le Grikhai chu inringtir tumin thang a lâk a. 5 Makedoniaa inthoka Sila le Timothe an hung tlung thlâk chinah Paula chu thuhril rongbawlna tieng a'n pumpèk a, Isu kha Krista chu a nizie Judahai a'n hriettir hlak a. 6 Nisienlakhom, Judahaiin ama chu nasa taka kala an biek sisaw leiin Paulan a puon a thin a, "In thisen maw chu in lu chungah tla raw se. Chu mawphurna laka inthok chun kei chu ka'n thieng. Tuta inthok chu Jentêlhai tieng ngha tâng ka tih" a ta. 7 Chu taka inthok chun a fe suok a, sunagog bul ela um Tita Justa, Pathien ngaisak mi ina chun a lût a. 8 Sunagog hotu Krispa le a sûnghai po poin Lalpa an ring a, a thu hril ngaithlatu Korinth khuoa mi tam tak khomin an ring bok a, baptisma an chang tah a. 9 Zàn khat chu Paulan inlàrna a hmu a, Lalpa chun a kuomah, " Ti naw rawh, ma loin thu hril pei rawh. 10 Kei i kuomah ka um leiin, sukna ding chein i chungah tu khomin kut thlâk naw ni hai, hi khuoa hin mi tam tak ka nei si a" a ta. 11 Paula chu anni lai chun Pathien thu hrilin kum khat le thla ruk a châm a. 12 Gallio chu Akaia ram optu a ni laiin Judahai inthuruolin Paula chu an bei hron a, rorêltu hmaah an thuoi a. 13 "Hi pa hin kan Dàn kal zawnga Pathien be dingin mi a thlêm hlak a nih" an ta. 14 Paula chun hang don a tum a, sienkhom Gallio chun Judahai kuomah, "Aw Judahai, hi thil hi thil indik lo amanih le dàn bawsietna thil chu ni sien, in thu ka ngaithlàk ding a na. 15 Nisienlakhom, thu le hming le nangni Dân chungchànga in buoina thu el a ni chun nangnin ngaituo ro, kei chuong thila chun inrol naw ning" a ta. 16 Rorêlna ina inthok chun a'n suoktir a. 17 Sienkhom mi dang po po chu sunagog hotu Sosthen chunga chun an tuong a, an man a, rorêlna ina chun an vuok a. Chu khom chu Gallio chun ienga khom a ûksak chuong nawh. 18 Paula chu Korinth khuoah sawt tak a chàm hnungin unauhai màksanin Suria ram panin longin a suok a, Prisila le Akuila hai pahniin an zui a. Longa an chuong hma chun, a hmaa thu a lo tiem tah angin Paula chun Kenkriei-ah a lu a'n vawtir a. 19 Efesi khuo an tlung a, chu taka chun Prisila le Akuila chu a màksan a. Ama ruok chu sunagog-ah a lût a, Judahai chu Pathien thu a suipui a. 20 Anni chun la châm hri dingin an thlo a, sienkhom a remti naw a. 21 "Pathienin rem a ti chun in kuomah ka la hung nawk ding annawm"q tiin tha takin a'n thla tawl a, Efesi-a inthok chun longin a suok nawk a. 22 Kaisari a tlung a, chu zoah kohranhai chibai bûk dingin Jerusalemah a hang fe a, Antiokei tieng a kîr nawk a. 23 Antiokeia iemani chen a chawl hnungin a suok nawk a, Galati ram le Frugia ram a fang suok a, ringtuhai chu a suknghet pei a. 24 Chun, Juda mi pakhat, Apolo, Alexandria khuoa pieng chu Efesi khuoah a hung a. Ama chu lekha thiem, Pathien Lekha thu hre tak a na. 25 Lalpa lampui thuah inchûktirna tha tak dong tah a ni leiin Isu chanchin chu thahnem ngai tak le chieng taka hrilin mi a'n chûktir hlak a; nisienlakhom, Johan baptisma chauh a la hriet a. 26 Sunagoga khom thu huoi takin a hril a, Prisila le Akuilan a thu hril an hriet chun an inah an thuoi a, Pathien lampui chu ngun takin an hril fie a. 27 Akaia ramah a fe tum ti an hriet chun unauhaiin an thangpui a, ama an lo lawm lût theina dingin zirtirhai kuomah lekha an ziekpèk a. A zuk tlung chun ringtuhai chu Pathien lunginsietna zarin nasa takin a thangpui a. 28 Isu chu Krista a nizie Pathien Lekha thu hmangin mi a'n chûktir a, vàntlâng hmaah Judahai chu a sêl dong hlak.

Acts 19

1 Korinth khuoa Apolo a um kârin Paula chun tlângram biel hraw tlangin Efesi khuo a hung tlung a. 2 Chu taka chun zirtir thenkhat a hmu a, "Ringtu in ni hlim khan Thlarau Thienghlim in chang am?" tiin an don a. Anni chun, "Chang lo e, Thlarau Thienghlim a um ti khom kan hriet nawh" an ta. 3 Paula chun, "Chuong a ni chun, ieng baptisma am in chang leh?" tiin a'n don a, anni chun "Johan baptisma kha" an ta. 4 Paula chun, "Johan khan sim inentirna dingin baptisma a'n changtir hlak a, a hnunga hung ding Isu chu lo ring dingin Israel mihai a hril hlak a ni kha" a ta. 5 Chu chu an hrietin Lalpa Isu hmingin baptisma an chang a. 6 Chuonga Paulan an chunga kut an nghat lai chun Thlarau Thienghlim an chungah a hung tlung a, tong hriet loin an tong a, Pathien thu an hril a. 7 An rêngin patling sawm le pahni lai an nih. 8 Paula chu sunagog-ah a'n khawm hlak a, thla thum zet huoi takin thu a hril a; mi lungril tawk zawng takin Pathien ram thu chu a hrilpui hlak a. 9 Sienkhom anni laia thenkhatin lulul taka an ring nuom tlat naw lei le Lampui thu chu vàntlâng hmaah an hrilsiet leiin, Paula chun a zirtirhai chu thuoiin a'n sonsan a, thuhrilna bûk Turanna an tia chun ni tin Pathien thu a hrilpui ta lem hlak a. 10 Chuong ang chun kum hni lai a thaw a, chuleiin Asia biela um, Judahai le Grikhai po po chun Lalpa thu chu an hriet pha tah a nih. 11 Pathienin Paula kut hmangin thilmak chungchuong tam tak a thaw hlak a. 12 A rawmol hmang le a puon bât lai chen khom damnawhai kuomah an chawi a, an hung dam a, ramhuoi tirdakumhai khom an suok a. 13 Juda mi thenkhat, thlarau tha naw hnot suok thiem, ram tina invâkhai chun, "Paula hril hlak Isu hminga suok dingin thu ka pêk che" tiin ramhuoi paihai chungah Lalpa Isu hming an lam hlak a. 14 Juda thiempu lal pakhat Skeva khomin chuong anga thaw ve hlak nau pasal pasari a nei a. 15 Ramhuoi tirdakum chun an kuomah, "Isu ka hriet, Paula khom ka hriet, nangni hi tu hrim am in na?" a ta. 16 Ramhuoi tirdakum paitu chun anni chu a baw a, an rêngin a hne a, a sop hrep tawl a, chu ina inthok chun saruok le hliemin, thisen kai hnuongin an tlàn suok a. 17 Efesi khuoa Judahai le Grik mihai po poin chu thu an lo hriet chun an rêngin an ti a, Lalpa Isu hmingin ngaisàng a hlaw phá hle a. 18 Ringtu tam tak chu hungin an thil suol thawhai tlâng hrietah an inpuong a. 19 Dawithiem tam takin an dawi lekhabuhai an hung chawi khawm a, vantlâng hmaah an raw a. Dawi bu ziel an raw hmang po hlutzie an sùt chun drakma sîngnga hûr vel a nih. 20 Chuong ang khop chun Lalpa thu chu indarin, a hung hràt deu deu pei a nih. 21 Chuong thil hnunga chun Paulan Makedonia ram le Akaia ram fang suok zeta Jerusalema fe dingin lungril a siem a. "Chu taka ka fe zo pha Rom khawpui ka sir bok ding a nih" a ta. 22 Chuongchun, ama thangpuitu pahni, Timothe le Erasta hai chu Makedonia tieng a lo infetir hmasa a, ama chu Asia ramah iemani chen a la um hri a. 23 Chuong lai chun Lampuis leiin buoina a suok nasa hle a. 24 Tangkaruo ser mi, mi themthiem tam tak ruoia tangkaruoa pathien nu Artemi tempul lem siemtu Dimetri a um a, a hlawk èm êm a. 25 Ama chun chuong tienga sumdawnghai po po chu a ko khawm a, an kuomah, "Puhai, hi sin hi ei sum hnâr tak a nih ti in hriet a. 26 Efesi khuoa chauh ni loin Asia ram po po deuthawah, hi Paula hin kuta siem pathienhai chu Pathien an ni nawh tiin mi tam tak a hne a, a thuoi kawi zo tah ti nangni ngeiin in hmu a, in hriet a. 27 Ei sumdawngna hi a sukpawi el chauh khom ni loin, pathien ropui tak Artemi tempul hi mihaiin hung ngainêp an ta, Asia ram pum le khawvelin an biek hlak hi, a ropui èm êm vei leh, tlawm a tih ti inlâu a um bok a nih" a ta. 28 Chuong thu an hriet chun namên loin an lung a sen a, "Efesi mihai, Artemi hi a ropui" tiin an khèk a. 29 Chuongchun, a khuoin an buoi ta vong a. Mipui chun Makedonia-a inthoka Paula hung zuitu Gaia le Aristarka hai chu an man a, inthuruolin ennuom siemna inah an kei lût a. 30 Paula chun mipui hma son a nuom a, sienkhom zirtirhaiin an dang a. 31 Asia ram hotu lienhai laia thenkhat chu Paula ruol tha an na, anni khom chun mi an hung tir a, ennuom siemna ina chun fe ve naw hrâm dingin an ngên bok a. 32 Mipui hlak chu an pung khawmna san khom hre mumal loin an pawng buoi a, a then thu khatin an khêk a, a then thu dangin an khêk bok a. 33 Judahai chun Aleksandar chu hma tieng an nor phei a, mipui thenkhatin a thiemna thu hril dinga an hei khêk khum leiin to dingin a kutin mipui chu a zâp a, a thiem thu hang hril a tum a. 34 Nisienlakhom, ama chu Juda mi a nih ti an hriet phing leh, dârkâr hni ding lai "Efesi mihai, Artemi hi a ropui" ti ngotin an khêk nawk ta thuop thuop el a. 35 Efesi khuoa Ziektut chun mipui chu a khap dei a, an kuomah. "Efesi mihai, Artemi ropui tak le a lim thienghlim, vàna inthoka hung tla tempul enkoltu chu Efesi khaw mihai hi in nih ti hi khawvelah tu am a hre naw an um? 36 Chuleiin, hieng thil hi thu dik, sêl ruol lo a nih ti in hriet hnung chun to unla, thu hnung ding dawn loin ieng khom thaw naw ro. 37 Hieng in mi hung thuoihai hi tempul rok hmang an ni naw a, ei pathien hming hrilsetu khom an ni bok nawh. 38 Chun, Demetri le a ruolhaiin tu laka khom thu poi an nei a ni chun thubuoi hrilna ding a'n hong zing a, ram optuhai khom an um a, an thubuoi chu anni kuomah hung intlun raw hai se. 39 Chu bâk hril ding an nei chun vantlâng inkhawm pangngaia hril fel ding a nih. 40 Voisuna thil tlung hi hel tumna leia buoina siemah mi'n tum an tih ti khom inlâu um tak a nih, ei pung khawmna san hril ding mumal khom ei nei bok si naw a" a ta. Chuong thu a hril zo chun pung khawmhai chu a'n tîntir tah a nih. 41 (A um nawh)

Acts 20

1 Buoi a rè chun Paulan zirtirhai a ko khawm a, a'n fùi phùr a, chibai bûka a'n thla tawl hnungin Makedonia ram panin a suok a. 2 Chu ram chu a fang suok a, zirtirhai chu thu tam tak hrila nasa taka a chokphùr zo chun Grik ram a tlung a. 3 Chu taka thla thum a châm hnung chun, Suria ram pana longa a suok tawmin Judahaiin that tumin thu an phierrûk ti a hriet leiin Makedonia ram sir kuola kìr a tum ta lem a. 4 Beroi khaw mi Pura naupa Sopater hai, Thesolonika khaw mi Aristarka le Sekunda hai, Derbe khaw mi Gaia hai, Timothe hai, Asia biela mi Tukik le Trofim haiin an zui a. 5 Chuonghai chun hma an lo lawk a. Troas khuoah an mi lo nghàk a. 6 Keini ruok chu chol thang lo bei kùt zo hnungin Filipi khuoa inthokin longin kan suok a, ni nga hnungah Troas kan tlung a, chu taka chun ni sari kan chàm a. 7 Pathiennia zàn bu fa tlâng dinga kan inkhawmin, a zînga suok a tum leiin an kuomah zàn ril chenin Paulan thu a hril a. 8 In sawng, kan inkhawmna pindana chun khawnvar tam tak a um a. 9 Tlangval pakhat, Eutuka an ti hi tukver bulah a thung a, Paulan thu a hril sawt êm leiin a imu a suok a, a lo inlusu a, in sawng thumnaa inthok chun hnuoiah a tla thla a, thiin an làk a. 10 Paula chu a tlân thla a, a baw a, a pom a, "Thlaphâng naw ro, a la dam ie" a ta. 11 A kai tung nawk a, bei a khoi a, a fâk a, zîng khawvar zakin thu a hril a, a fe suok tah a. 12 Tlangvàl chu damin in tieng an thuoi a, nasa takin an thla a muong a. 13 Keini ruok chu Aso khuo tieng panin longin kan lo fe hmasa a, Paula chun kea hung a, Aso-a inthoka longa chuong chauh dingin rem a mi ruotpui a. 14 Aso-a kan intuok nawk chun longah a hung chuong ve tah a, Mituleni khuo kan tlung a. 15 Chu taka inthok chun longin kan suok nawk a, a zîngah Kio thlierkar zawn kan tlung a, a zîng nawk chun Samo thlierkâr kan fe pèl a, a zîngah Mileto khuo kan tlung a. 16 Asia rama hun a hmang sawt nawna dingin Paula chun Efesi khuo chu sun pêl a tum a, a thei phot chun Jerusalemah Pentikos Kût hmang hman dinga tlung a tum leiin a'n hmaw a nih. 17 Miletoa inthok chun Efesi kohran upahai chu hung dingin a'n cha a. 18 An hung tlung chun an kuomah, "Asia ram ka hung sir hmasa tak nia inthoka in kuoma ka um sùng poa ka um dàn kha in hriet a. 19 Judahai phierrûkna leia fiena rik tak phur zingin, thuhnuoirol tak le mitthli pumin Lalpa rong ka bawl hlak a ni kha. 20 In ta dinga tangkai dinga ka hriet rêng rèng chu ieng khom intîm loin, vàntlâng lai le in tina hai ka zirtir hlak chêu kha. 21 Judahai le Jentêlhai kuoma khom sima Pathien tieng ngha ding le ei Lalpa Isu ring dingin ka'n hriettir hlak chêu kha. 22 Tuhin, Thlarau Thienghlimin a mi tir tlat leiin Jerusalemah ka fe ding a na, chu taka chun ka chungah iem a hung tlung ding ka hriet nawh. 23 Lung in le harsatnahai chauhin khaw tinah an mi hmuok ding thu Thlarau Thienghlimin a mi hril hlak ruok chu ka hriet. 24 Intlànsiekna chu zo a, Lalpan rongbawlna sin a mi pêk, Pathien lunginsietna thu puongdarna sin chu ka hlen phot chun, ka hringna chu thlàkthlà tlâkah ka ruot nawh. 25 "Tuhin hre ro, nangni rawi, Pathien ram thu hrila ka'n vâk ka'n vâk hlakna hai hin ka hmêl hmu nawk ta naw ti niu ti ka hriet. 26 Chuleiin, in rênga thisenah ka'n thiengu ti voisun hin ka'n hriettir cheu. 27 Pathien remruot dàn po po ip loin ka hril vong ta chêu kha. 28 Pathien kohran, a thisena ama ta dinga a'n chawk chu chawm dingin nangni le in beramhai ta dingin fîmkhur ro; Thlarau Thienghlimin an chunga hotu dingin a sie chêu a ni hi. 29 Ka fe hnungin satene kol tak tak nangni lai hung lùt an ta, beramhai hlà naw ni hai ti ka hriet. 30 Nangni laia mi ngèi khomin zirtirhai chu anni tieng inpakaitir dingin thu kawi la hung rol an tih. 31 Chuleiin, invêng fîmkhur ro; kum thum rauh sùn-zàn zomin mitthli le zil chêu ka ma nawh ti kha hre zing ro. 32 Tu hin, Pathien kuta le a lunginsietna thu-ah ka'n hlàn cheu a, chu thu chun a siem puitling thei chêu a, mi thienghlimhai lai rochan a'n neitir thei bok chêu a nih. 33 Tangkaruo le rangkachak le silfèn tu tâ khom ka'n hnar ngai naw kha. 34 Ka kut ngei hin kei le ka ruolhai mamaw ka phuhrùk hlak ti in hriet. 35 Chuong anga inrima thawin mi hrât nawhai ei thangpui ding a nih ti kong iengkimah ka sukhmù hlak cheu kha; ei Lalpa ngeiin, 'Làk nêkin pêkin lukhawng a nei lem' a ti kha hre zing ro" a ta. 36 Chuong thu a hril zo chun an rêngin an dingthathuon a, an tongtai a. 37 An rêngin an tap a, Paula rîngah an kuo a, an fawp ngawi ngawi a. 38 An thlasietna tak chu a hmêl an hmu ta naw ding thu a hril chu a nih. Chuongchun, long chenin ama chu an inthla a.

Acts 21

1 Kan inthè thei hrâm hnung chun longin kan suok a, Kaws thlierkâr kan ban a, a zîngah Rodi thlierkâr kan tlung a, chu taka inthokin Patar kan tlung a. 2 Foiniki rama fe ding long pakhat kan hmu a, kan chuong a, kan fe nawk pei a. 3 Kupra thlierkâr kan hmu a, voi tieng pangah kan fe pèl a, Suria ram panin Tura khuo kan tlung a, chu taka chun longa an thuomhnaw phurhai chu an làk thlàk ding a na. 4 Zirtir umhai kan zong suok a, an kuomah ni sari kan chàm a; anni chun Thlarau hrilin Paula chu Jerusalema fe lo dingin an ngèn a. 5 Chu zoah kan suok nawk a, zirtirhai chun an rêngin, an nuhmei le nauhai leh, kotsuo chenin an mi'n thla a, tuipui kama chun dingthathuonin kan tongtai a. 6 Chuongchun, chibai kan inbùk a, anni chu in tieng an kîr nawk tah a. 7 Turaa inthok chun longin Tolemai khuo kan tlung a, unauhai chibai malamin an kuomah ni khat kan chàm a. 8 A zîngah kan suok nawk a, Kaisari khuo kan tlung a, Chanchin Tha hriltu Filip inah kan innghat a; ama chu upa pasarihai laia mi kha a nih. 9 Nau nunghak pali a nei a, Pathien thu an hril hlak a. 10 Ni sawt naw tè kan chàm a, kan chàm sùngin Judai rama inthokin zawlnei pakhat Agaba a hung thla a. 11 Kan kuomah a hung a, Paula kawngchùn chu a lâk a, ama kut le ke a zem a, "Jerusalema Judahaiin hieng ang hin hi kawngchùn neitu hi khuop an ta, Jentêlhai kutah pêng an tih, Thlarau Thienghlimin a tih" a ta. 12 Chuong thu kan hrietin keini le chu khuoa mihai chun Paula chu Jerusalema fe lo dingin kan ngên rak a. 13 Paula chun, "Ieng dinga ka thla sukse dinga in tap in tap am a na? Lalpa Isu hming lei chun khuop chauh ni loin thi chen khom ka huom annawm" a ta. 14 Kei her ruol a ni naw phing chun, "Lalpa thú thù ni raw se" tiin kan ma tah a. 15 Chu hnung chun kan insiem a, Jerusalemah kan hang fe a. 16 Kaisari khuoa zirtir thenkhatin an mi zui a, kan tlungna ding Nason inah an mi thuoi a; ama chu Kupra thlierkâra zirtir hmasahai laia mi a nih. 17 Jerusalem kan tlung chun unauhaiin hlim takin an mi lo lawm a. 18 A zînga chun Paula rawiin Jakob inah kan lèng a, Kohran upa po po khom an lo um a. 19 Paulan anni chu chibai a bûk zoin a rongbawlna hmanga Jentêlhai laia Pathienin thil a thaw dànhai chu kim takin a ripawt a. 20 Unauhaiin chuong thu an hriet chun Pathien an inpàk a. Paula kuoma chun, "Unaupa, Judahai laia ringtu an tam tàkzie i hmu a, ei Dàn ngaina tak vong an ni si a. 21 Nangin Jentêlhai laia Juda um po po chu Mosie Dàn bànsan a, an nauhai ser tan lo ding le Judahai dàn zawm lo dingin i zirtir hlak ti mi hril kan hriet a. 22 I hung tlung ti an hriet ngei ding a ni si a, ieng tin am thaw tang ei ta? 23 Chuleiin, kan hril ang che hin thaw rawh. Keini lai hin thutiem neiv lai pasal pali an um a. 24 Chuonghai chu thuoi la, anni ruol chun inthien ve la, an sèngso po po tumpêk rawh, an lu an vaw theina dingin. Chuonga i thaw chun mi po poin i chanchin an hriet hi khêl a na, nang ngèi khomin Dàn zawmin Dàn ang takin i la khawsa pei a nih ti hrieng an tih. 25 Jentêlhai laia ringtuhai chungthu ruok chu, milem biekna sa fàk lo ding, sa thisen fàk lo ding, sa rêk hlum sa fàk lo ding ti le inngai bànsan ding ti thu kan rêlhai chu kan hung thon ta kha" an ta. 26 Chuongchun, a zînga chun chuonghai chu Paulan a thuoi a, anni ruol chun a'n thien ve tah a. Chun, tempulah a lût a, an inthien zo ni ding le an hming kipa inthawina an hlànpèk hun ding ni chu thiempu a'n hriettir a. 27 Ni sari a tling ding têpin Asia rama Judahaiin Paula chu tempulah an hmu a. Mipui po po chu an infui por a, an man a. 28 "Israel mihai, mi thangpui ro! Hi pa hi ei chipuihai, ei Dànhai le hi hmun hi dodal zawnga hmun tina mihai inchûktir hlaktu a na; tu khom hin tempulah Grik mihai a lùtpui a, hi hmun thienghlim hi a sukporchè a nih" an ta. Efesi khaw mi Trofim chu a hmain khawpuiah Paula leh an hmu a, ama chu tempulah Paulan a hung thuoi amanih an tì a nih. 29 A khuoin an phêk buoi a, kil tina inthokin mi an hung tlàn khawm a, 30 Paula chu tempula inthokin an hnûk suok a, kothai an khâr ta nghàl a. 31 That an tum lai chun Jerusalem an phêk buoi ti Roman sipai kawmandarin a lo hriet a. 32 Chuongchun, ofisar le sipai iemani zat thuoiin a tlân thla nghàl a, mipuiin kawmandar le sipaihai an hmu chun Paula vuok chu an ma tah a. 33 Kawmandar chun a hung hnai a, Paula chu a man a, khaidiet pahni inbuntir dingin thu a pêk a, tu'm a ni le iem a thaw ti a'n don bok a. 34 Mipui chu a then thu khatin an khèk a, a then thu dangin an khêk bok a. Buoina sosâng lei chun an thu chinchang a hriet thei naw a, kulbingah thuoi lût dingin thu a pêk a. 35 Kailawn an tlung chun mipuiin an baw nasat èm leiin Paula chu sipaihaiin an chawi tung a. 36 Mipui po po chun, "Sukhlum ro" tiin an khèk dur dur a. 37 Kulbînga an thuoi lût tawm chun Paulan kawmandar kuomah, "I kuomah thu bàu khat chauh hril thei ka ti?" a ta. Ama chun, "Grik tong i thiem a ni maw? 38 Chuong a ni chun, Aigupta mi pakhat, kha hma deua helna chok suok a, firfiek sâng li ruol thlalèra thuoitu kha i ni naw maw?" a ta. 39 Paula chun, "Kei chu Juda mi, Kiliki ram Tarsa khaw mi ka na, khaw narana mi ka ni nawh. Lunginsiet takin mipui kuomah thu mi'n hriltir rawh" a ta. 40 A remti phing leh Paula chu kailawna chun a ngîr a, mipui chu to dingin a kutin a zâp a, an to ta thup a, Aramik tongin thu a hril ta a.

Acts 22

1 "Unauhai le pahai, tuta in kuoma ka thiemna thu ka hril ding hi ngaithla ro" a ta. 2 Aramik tongin a hril an hriet chun an to nawk zuol a. 3 Ama chun, "Juda mi, Kiliki ram Tarsa khuoa pieng ka na, amiruokchu, hi khawpuia seilien ka nih. Gamaliel zirtirna hnuoiah ei thlatuhai Dàn a ngiel a ngana inchûk tah le voisuna nangni ang boka Pathien ta dinga a kûl a tâia thahnem ngai ve hlak ka ni a. 4 Hi Lampui mihai hi sukhlum hiel khopa sukdùdàtu ka ni a, a nuhmei a pasalin ka man khawm a, lung inah ka'n khumtir hlak a. 5 Thiempu lal le Kansilw membar po pohai hi chu thu mi hrepuituhai chu an nih. An kuoma inthokin Damaskaa unauhai pèk ding lekha ka lâk a, chu taka umhai chu khuop a, hrem dinga Jerusalema hung thuoi dingin ka'n thok suok a. 6 "Chuonga ka fe chu, Damaska ka tlung tawm, sùn chang lai hin vàna inthokin var nasa takin ka vêlin a hung khaw a. 7 Hnuoiah ka tla thla a, rawl ka hriet a, ka kuomah, 'Saula, Saula, nangin ieng dinga i mi sukdùdà am a na?' a mi ti a. 8 Kei chun, 'Lalpa, tu am i na?' ka ta. Ama chun, 'Nazaret Isu, i sukdùdà hi ka nih' a ta. 9 Ka ruolhai chun var chu an hmu vea chu mi betu rawl ruok chu an hriet nawh. 10 Chun, keiin, 'Lalpa, ieng am thawng ka ta?' ka ta. Lalpa chun, 'Tho la, Damaska khuoah lût la, chu taka chun thil iengkim i thaw dinga ruothai chu hril an ti che' a ta. 11 Chu var ropui tak lei chun khuo hrim ka hmu thei ta naw a, ka ruolhaiin an mi keibât a, Damaska ka lût a. 12 Mi pakhat Anania, Dàn ang taka Pathien be hlak mi le chu khuoa um Judahai po poin an inza le ngaisàng mi chu ka kuomah a hung a. 13 Ka bulah a hung ngìr a, 'Unau Saula, i mit hung var ta raw se' a ta. Chu phing leh ama chu ka hmu thei ta nghàl a. 14 "Ama chun, 'Ei thlàtuhai Pathienin ama ditzawng hretu Mi Feltak a hmu a, chu rawl ngèi chu hre dingin a thlang ta che. 15 I thil hmu le hriet thua khan mi po po hmaa a thu hrepuitu nîng i tih. 16 Tu hin ieng dinga i la muongchang? Tho la, a hming lamin baptisma chang la, i suolhai sawp fai rawh' a mi ti a. 17 "Chun, Jerusalemah ka kîr nawk a, tempula ka tongtai laiin zêlin ka um a. 18 Lalpa ka hmu a, ama chun, 'Inhmaw la, Jerusalem hi suoksan rawh; ka chanchin i hril hi pom chuong naw ni hai' tiin a mi hril a. 19 Kei chun, 'Lalpa, sunagog tinah lût a, nangma ringtuhai vaw a, lung ina inkhumtir hlaktu kha ka nizie anni ngeiin an hriet si a. 20 I thu hretu Stefan thisen an insuo lai khan anni lai ka ngîr a, ka remtipui a, a thattuhai puon lo vèngpêktu khom ka ni kha' ka ta. 21 Ama chun, 'Fe el rawh, hla takah Jentêlhai kuomah ka tir ding che a nih' a mi ti a" a ta. 22 Chu thu a hril chen chun an ngâithlàk a, inring takin, "Hieng ang mi hrep hi, hnuoia inthoka sie hre dai ding a nih, dam tlâk an nawh" tiin an khèk a, 23 an khèk ruol chun an puonhai an hlîp a, pilvut an vàn vawr a. 24 Kawmandar chun Paula chu kulbîngah a'n thuoi lûttir a, a chunga chuong ang khopa an khêkna san chu a hmu suok theina dingin vuokna hruola vaw a, dawp suok dingin thu a pêk a. 25 Vaw dinga savun hrui an phier zoin Paulan a kawla ngîr sipai zahotu kuomah, "Roman lalram khuo le tui, thiem naw inchangtir khom ni si loa vuok a thieng am a ni?" a ta. 26 Sipai zahotuin chu chu a hrietin kawmandar kuomah a fe a, "Ieng tin am i thaw ding a na? Hi mi hi Roman khuo le tui a lo ni zing el!" a ta. 27 Kawmandar chu a hung a, "Roman khuo le tui i ni maw? Mi hril rawh" a ta. Ama chun, "Ni e" a ta. 28 Kawmandar chun, "Kei chun Roman khuo le tui nìna ding hin sum tam tak ka sèng a nih" a ta. Paula ruok chun, "Kei chu Roman khuo le tui hrima pieng ka nih" a ta. 29 Chuongchun, soisa a, thu dawp suoktu dinghai chun ama chu an màksan a, kawmandar khomin Roman khuo le tui a lo khuop ti a hriet chun a ti thawng hle a. 30 A zinga chun Judahan Paula chungah thupoi ieng ieng am an nei ti hriet chiengna dingin thiempu lalhai le Sanhedrinhai chu inkhawm dingin thu a pêk a. Paula chu a sût a, a thuoi suok a, an hmaah a'n ngìrtir a.

Acts 23

1 Paula chun Sanhedrina rorêltuhai chu chieng kala enin, "Unauhai, voisun ni chen hin Pathien laka ka um dàn ding ang takin ka um ti chu ka sie le tha hrietnain chieng takin a hriet" a ta. 2 Thiempu laltak Anani chun Paula bula ngirhai kuomah, "A hmûrah benpèk ro"x a ta. 3 Paula chun, "Nang, bang nâl vâr pa, Pathienin ben lem a ti che. Dàn anga ka chungthu ngaituo dingin i thung a, dàn lo anga maw mi ben ding i ti chu?" a ta. 4 A bula ngîrhai chun, "Pathien Thiempu laltak khom i suosal ngam maw!" an ta. 5 Paula chun, "Unauhai, thiempu laltak a nih ti ka hriet naw a nih. 'In hnam rorêltuhai chungah thu tha lo sâk suok naw rawh' ti ziek a ni kha" a ta. 6 Sanhedrina thunghai chu a then Sadukai, a then Farisai an nih ti Paulan a hriet leiin inring takin, "Unauhai, kei khom hi Farisai mi, Farisai naupa ka na, mithi thonawk ka beiseina thuah rorêltu hmaah ka ngîr a ni hi" a ta. 7 Chu thu a hril zo chun Farisaihai le Sadukaihai chu an insêl buoi a, Sanhedrin chu an inthè tah a. 8 Sadukaihai chu thonawkna dàm, vantirko dàm le thlarau dàm a um ring naw pawl an na, Farisaihai ruok chun chuong po po chu a um an ring bok si a. 9 Chuongchun, an rì a se ta hle a, Farisaihai tienga mi Dàn zirtirtu thenkhat chu an ngîr a, "Hi pa chunga hin thil indik lo ieng khom kan hmu nawh, Thlarauin amanih vàntirkoin amani an inbiekpui khom lo ni ta rèng sien, chu chu iem a na?" tiin an thang a. 10 An insêl buoi deu deu leiin sipai kawmandar chun Paula an kei nawi neng an làu a, anni laia inthoka zu la suok a, kulbinga thuoi dingin sipaihai thu a pèk a. 11 Chu zàn chun Lalpa chu Paula bulah a hung ngìr a, "Huoi takin um rawh; Jerusalema ka thu i hril ang bok hin Rom khawpuia khom i hril ding a nih" tiin a hril a. 12 Zîngkâr chun Paula that dàn ding phierin Judahai a rûkin an inkhawm a, an that hmâ khat chu ieng khom faa dawn lo dingin an inkhàm a. 13 Chuonga phierrutu chu mi sawmli nêka tam hiel an nih. 14 Thiempu laltak le upahai kuomah an fe a, "Paula kan that hma chun ieng khom faa dawn lo dingin khùn takin kan inkhâm a nih. 15 Chuleiin, nangni le Sanhedrinin a chungthu chieng nawk zuola indon fel in nuom thu suonlama hmangin, Paula chu in kuoma hung thuoi thla dingin kawmandar kuomah hang hni ro, a hung tlung thlàk hmaa that dingin kan inpei zing a nih" an ta. 16 Nisienlakhom, Paula farnu naupain that tuma an lo inchân rûk thu chu a lo hriet rùk a, a hang fe a, kulbing sûngah a lût a, Paula chu a hril a. 17 Paula chun sipai zahotu laia pakhat a ko a, "Hi tlangvàl hin kawmandar kuoma hril ding iemani a nei" a ta. 18 Chuongchun, kawmandar kuoma chun an thuoi a, "Tâng pakhat Paula khan a mi ko a, hi tlangvàl hi i kuoma hung thuoi dingin a ngên a, thu iemani hril ding chè a nei a ni awm" a ta. 19 Kawmandar chun a kutah chelin a thuoi bing a, a rûkin, "Mi hril ding i nei chu iem a na?" a ta. 20 Ama chun "Paula chungchàng thu chieng nawk zuola indon an nuom thu suonlama hmangin zîngah Sanhedrin hmaa hung thuoi thla dingin Judahaiin hung ngên che an remti tlàng a. 21 Nisienlakhom, an thu lo awi naw rawh; anni lai mi sawmli nêka tamin an inchân zing a nih. Paula an that hma khat chu faa dawn lo dingin an inkhâm a. Tu hin i thu nghâkin, inpei sa zingin an um a nih" a ta. 22 Kawmandar chun, "Hi thu hi i mi hril ti tu kuoma khom hril dêr naw rawh" a ta, tlangvàl chu a'n fetir tah a. 23 Sipai zahotu pahni a ko a, "Voi zàn dar kuoa Kaisari-ay fe dingin sipai zahni le sakor chung chuong mi sawmsari le fei chawi mi zahni buotsai ro. 24 Chun, Paula chuongna ding sakor buotsai bok unla, him takin Lârsap Felik kuomah in tlungpui ding a nih" a ta. 25 Hieng hin lekha a ziek a: 26 Klaudia Lusia-in:Lârsap inzaum tak FelikChibai a bûk. 27 Hi pa hi Judahaiin an man a, an that hman têp laiin sipai thuoiin ka zu fe a, ka san suok a. 28 That an tum san hriet ka nuom leiin an Sanhedrin hmaah ka thuoi a. 29 An Dàn iemani thua an hêk a nih ti ka hmu suok a, sienkhom thìna khop amanih lung in intàngna khop amanih thil suol a thaw ka hmu naw a. 30 Judahaiin that tumin an phierrûk ti miin an mi hril charin i kuomah ka hung tir thlâk nghàl a nih. A hêktuhai khom a chunga thu poi an nei taphot chu i hmaa hril dingin ka'n hriettir tawl bok" tiin. 31 Chuongchun, sipaihai chun a thupêk angin a zân a zânin Paula chu an thuoi a, Antipatri khuo an tlungpui a. 32 A zîngah sakor chung chuong mihai chun Paula chu an thuoi pei a, sipai danghai ruok chu an kulbing tieng panin an kìr nawk a. 33 Kaisari an tlung chun Lârsap kawlah lekha chu an pêk a, Paula chu a hmaah an thuoi a. 34 Lârsap chun a tiem zoin khaw laia inthoka hung am ti a'n don a, Kiliki rama mi a ni thu a hriet tah a. 35 "A hêktuhai che an hung tlung pha i thu chu ngaituong ka tih" a ta, Heroda praitorianahz sie a, vêng dingin thu a pêk a.

Acts 24

1 Ni nga hnunga chun thiempu laltak Anani le a upahai thenkhat chu an ukil Tertulla thuoiin an hung thla a, Paula chu Lârsâp hmaah an khing a. 2 Paula an ko lùt hnungin Tertulla chun an khingna thu chu Lârsâp Felik hmaah a hang intlun a: "Felik inzaum tak, nangma zârin hun sawt tak keini lai muongna a'n lêng tah a, hmathlîr i nei that leiin kan ram khomin nasa takin a that pha a. 3 Felik inzaum tak, hmun tinrêngah kong tinrêngin i chungah kan lawm takzet a nih. 4 I ta dinga nghokum ni ka nuom naw a, sienkhom thu tlawmte ka hril ding hi lunginsiet taka mi ngaithlapêk hrâm dingin ka ngèn che. 5 "Hi pa hi mi hnoksap tawp el, hmun tina Judahai laia buoina chok suoktu le Nazaret pawla an thuoitu lu tak a nih ti kan hriet a, 6 tempul khom sukporchè a tum leiin kan man a nih. 7 Kan dàn angin a chungthu rêl kan tum a, sienkhom sipai kawmandar Lusia a hung a, a mi lâkluipêk a, a hêktuhai chu i hmaa hung dingin thu a mi pêk bok a. a 8 Nangma ngeiin indon chìk la, kan hèkna san thudik chu amaa inthokin hre chieng thei i tih" a ta. 9 Judahai khomin a hèknahai chu a'n dik vong tia thangin an lo thlop a. 10 Lârsâpin thu hril dinga Paula a hei mitmei charin, "Hi chihai rorêltuah kum tam tak i thang tah leiin lawm takin ka thiem thu ka hril ding a nih. 11 Jerusalema Pathien chawibiek dinga ka hang fèna hi ni sawmpahni bàk a la ni nawh ti olsam takin indon chieng thei i tih. 12 Tempul amanih, sunagog amanih le khawpui khaw lai hmuna khom mi ka'n sêlpui thu le buoina siem dinga mi ka'n fui por tu khomin an hriet nawh. 13 Tuta an mi hèkna khom hi a san bulbàl i kuomah hril ding hre naw ni hai. 14 Thil pakhat ka thaw ruok chu hi hi a nih: kan thlatuhai Pathien chu anni rawiin pawl hranga an ngai 'Lampui' zuitu ka nìna angin ka chawibiek hlak. Dàn thu le zawlneihai lekhabua ziek po po le inmilhai chu ka ring vong bok. 15 Anni ang bokin Pathienah beiseina ka nei a, mi fel le fel lohai an thonawk khom ka ring. 16 Chuleiin, ieng lai khomin Pathien le mihriem hmaa soisèl kai lo sie le tha hrietna inthieng put ka tum hrâm hrâm hlak a nih. 17 "Kum tam tak ka thang hmang hnungin ka chipuihai ta dinga somdawlna thilpêk chawiin inthawina inhlàn dingin Jerusalemah ka hang fe a. 18 Chuonga inthienna ser le sàng ka thaw zo hnung chun tempulah an mi hmu a, sienkhom pung khawm an um naw a, ieng buoinaa khom ka thang bok nawh. 19 Asia rama Juda thenkhat an um ve a, chuonghai chun ka chungah thu poi an nei a ni chun hi taka hin hungin i hmaah hril raw hai se. 20 Chuong an naw leh, hi taka hunghai hin Sanhedrin hmaa ka ngìr lai khan iem ka thawsuol hril raw hai se; 21 an hmaa ka ngìr laia, 'Mithi thonawkna thuah voisun hin in hmaah hêkin ka um a ni hi' ka ti kha a ni nghal si naw chun" a ta. 22 Felik chun Lampui thu chu a lo hriet ta hle a, "Sipai kawmandar Lusia a hung thlàk phâ i thû ngaituong ka tih" a ta, a thû chu a sie hri a. 23 Paula chu zalen takin a'n umtir a, a ruolhaiin a rong an bawlpèk khom khap lo dingin sipai zahotu chu thu a pêk a. 24 Ni iemani zât hnungah Felik chu a nuhmei Drusila, Juda mi chu thuoiin a hung a, Paula chu a'n kotir a, Krista Isu ringna thu a hril chu a ngaithlàk a. 25 Thiem inchangtirna thu dàm, insûm theina thu dàm, rorêlna a la um ding thu dàm Paulan a hril lai chun Felik chun pangzatum a ti hle a. "Fe nawk ta la, hun remchang ka nei nawk hunah la hung inkotir ka ti che" a ta. 26 Paulan thamna a pèk a beisei sâ bok leiin a ko rop a, a biek hlak a. 27 Kum hni a'n voi hnungin Felik chu Porkia Festa-in a hung thlàk a. Felik chun Judahai suklawm a nuom leiin Paula chu lung inah siein a fesan tah a nih.

Acts 25

1 A biel a hung tlunga inthok ni thum hnungah Festa chu Kaisari-a inthokin Jerusalemah a hang inzin a. 2 Thiempu laltak le Judahai chun Paula le an thubuoi chu an lo hril a. 3 Paula chu Jerusalema hung inthuoitir dingin a ditsakna an lo ngèn a, lampuiah lo lambuna that an tum a nih. 4 Festa chun, "Paula chu Kaisari lung inah a um zing a, kei khom ka fe thlàk nawk el ding a na, 5 thil suol a thaw a ni chun in hotuhai laia mi a thenin mi zui thla hai sien, hêk raw hai se" a ta. 6 Anni lai ni riet amani ni sawm amani a châm hnung chun Kaisari-ah a kîr thla nawk a. A zinga chun rorêlna thungphaah a thung a, Paula chu hung thuoi dingin thu a pêk a. 7 A hung tlung chun Jerusalema inthoka hung Judahai chun an ngìr huol a, thu rik tak takin an hèk a, sienkhom an hèkna chu a'n dik ti an hril chieng thei si nawh. 8 Paula chun a thiemthu a hril ve a, "Judahai Dàn ka bawsiet naw a, tempul ka sukporchè naw a, Kaisar poi ieng khom ka hril bok nawh" a ta. 9 Festa chun Judahai lakah tlàktlum a nuom a, Paula kuoma chun, "Jerusalemah hang fe a, ka hmaa an hèknahai che hi rèlpêk i nuom am?" a ta. 10 Paula chun, "Tu hin Kaisar rorêlna thungpha hmaah ka ngîr a, hi taka ngei hin rèlpèk ka ni ding a nih. Judahai chungah ieng khom ka thaw suol nawh ti nangma ngeiin chieng takin i hriet. 11 Thil suol ka thaw a, thìna khop meuh thil ka thaw a ni chun thi khom ka sêl nawh. Amiruokchu, Judahai mi hèkna hi ieng khom lo a ni chun anni kuta mi'n hlan theina tu khomin an nei nawh. Ka thu hi Kaisar kuoma intlun ka ngên" a ta. 12 Festa chun a rorêlpuituhai a rawn hnungin, "Kaisar kuoma intlun i ngèn a, Kaisar kuomah fe mol i tih" a ta. 13 Ni iemani zat hnunga chun Lal Agripab le Berniki chu Festa lawmlûtna chibai bûk dingin Kaisari-ah an hung a, ni tam tak an chàm a. 14 Festa chun Paula chungchang thu chu Lal Agripa a hril a, "Felik khan tâng pakhat a màksan a, 15 Jerusalema ka hang inzinin thiempu lalhai le upahaiin a chungchàng thu an lo hril a, thiem naw inchangtir dingin an ngèn a. 16 Kei chun an kuomah, 'Mi tu khom ama hêktuhai leh inhmatona an insâl hmaa thiem naw inchangtir el chu Rom sorkar dàn a ni nawh' ka ta. 17 Anni rawi chu hi taka hin an hung thlàk a, a zînga chun rorêlna ka tan nghal a, ama chu hung thuoi dingin thu ka pêk a. 18 Ka ring ang hrimin a hêktuhai chun thu poia lâk tlâk ieng khom an hril ta mang si naw a. 19 Anni sakhaw thu le mi pakhat thi tah, Paulan a hring nawk nia a hril, Isu chungthua buoi mei mei an lo ni chau a. 20 Chuong ang thil sui suok chu ka thiem zawng khom niin ka hriet naw a. Chuleiin, Jerusalemah hang fe a, an thu chu rêlpêk a nuom le nuom naw ka'n don a. 21 Paulan an thu chu Kaisar hmaa intlun a ngên leiin Kaisar kuoma ka thon hma po hi taka kol dingin thu ka pêk a nih" a ta. 22 Agripa chun Festa kuomah, "Kei khom chu pä thu hril chu ngaithlâk ka nuom a nih" a ta. Festa chun, "Zîngah i ngaithlàk ding annawm" a ta. 23 A zînga chun Agripa le Berniki chu ropui takin an hung a, thu hrilna inah an lùt a, sipai lalhai le a khuoa mi poimawhai khom an thang ve a. Festa thupèkin Paula chu an hung thuoi lût a. 24 Festa chun, "Lal Agripa le hi taka hung po po hai, en ro, Jerusalem le Kaisaria um Juda mipui po poin hêk a, 'Ama hi dam tlâk a ni nawh' tia an khêk khum pa chu ama hi a nih! 25 Thìna khop suol a thaw ka hmu naw a, sienkhom Kaisar hmaa a thu intlun a ngèn leiin Rom tieng thon dingin ka sukthlùk tah a. 26 Amiruokchu, Laltak kuom meua hang intlun ding thu mumal ziek ding ieng khom ka hriet si naw a, chuleiin in hmaah ka hung thuoi suok a ni hih. Lal Agrippa, i hmaa ka hung thuoi a ni bîk deuh tak a, thu ei indon hnunga iemani bèk ziek ding ka nei thei tâkduoiin. 27 An hêkna chieng taka ziek si loa Laltak kuoma tâng thon rikngot chu thil awmin ka hriet si naw a" a ta.

Acts 26

1 Agripa chun Paula kuomah, "I thiemthu hril thei i tih" a ta. Chu phing leh Paula chun kut a phar a, a thiemthu a hril tan a. 2 "Lal Agripa, voisun hin i hmaah Judahai mi hêkna po poa ka thiemthu hril ding ka ni leiin vàngnei ka'n ti hle. 3 Abîkin, Judahai khawsak dàn le an inkhing hlak dànhai hre chiengtu i ni leiin vàngnei ka'n ti zuol. Chuleiin, dawthei taka ka thu hi mi ngaithlapêk dingin ka ngèn che. 4 "Tlanglakte ka nia inthoka kan ram tieng le Jerusalema ka khawsak dàn chu Judahai po poin an hriet a. 5 An mi hrietna a sawt tah a, an hril nuom lem chun, kan sakhaw pawla khermei tak Farisai pawla mi ka ni thu khom hril thei an ti che. 6 Kan thlatuhai kuoma Pathien thutiem chu hlen a ni ngei beiseitu ka nìna chungthuah tu hin rorêlna hmaah ka ngîr a ni hi. 7 Chu thutiem chu hlen a ni beiseiin kan hnam sawm le pahnihai chun thahnemngai takin sùn le zànin Pathien rong an bawl hlak a. Aw lal inzaum tak, chuong ang beiseina lei chun Judahaiin an mi hêk a nih. 8 "Pathienin mithi a keitho thei ti hi thil ni thei loah ieng dinga in ngai am a na? 9 Kei ngei khomin Nazaret Isu hming dodàl zawnga thei tawp suoa thang dingin ka lo inngai hlak a. 10 Chuong ang chun Jerusalemah ka thaw hlak a, thiempu lalhaia inthoka thu lain, mi thienghlim laia mi tam tak lung inah ka khum a, sukhlum dinga an rêl khomin ka remtipui hlak a. 11 Sunagog tinah anni rawi chu hrem dingin ka fe a, Pathien hming inhrilsiettir dingin ka nor lui hlak a, anni rawi do chu ka'n vêt chilh leiin ram dang khuo chen chenah fein ka sukdùdà tawl hlak. 12 "Chuong anga thaw ding chun thiempu lalhaia inthoka thu hmu le an lekha chawiin Damaska ka pan a. 13 Chuongchun, Lal Inzaum tak, sùn chang lai hi a na, lampuia kan fe lai chun vàna inthokin var, nisa nêka var lem, ka hmu a, chu chun kei le ka fepuihai chu a mi hung kàp a. 14 Hnuoiah kan tla thla vong a, rawlin Aramik tongin, 'Saula, Saula, ieng dinga i mi sukdùdà am a na? Hawlna hmol zum khèng hi i ta dingin a na thlawn chauh a nih' mi hung ti hin ka hriet a. 15 "Kei chun 'Lalpa, tu am i na?' ka ta. Lalpa chun, "Isu, i suknomnat hi ka nih. 16 Tuhin tho la, ngîr rawh. Ka rongbawltu le hrepuitua ruot ding chein i kuomah ka hung inlàr a nih. I mi hmu thu le thil ka la'n entir ding che chu mihai i hril ding a nih. 17 I mihai le Jentêlhai lakah san suok ka ti che a, an kuomah tir ka ti che, 18 kei an mi ring leia an mithai sukvara um a, thima inthoka var tieng innghattirtu ding le an suolhai ngaidama um a, sukthienga um tahai lai hmun chang ve thei dinga Setan thuhnuoia inthoka Pathien tieng innghattirtu ding chu i nih' a mi ti a. 19 "Aw Lal Agrippa, chu taka inthok chun vàna inthoka hung inlâr thu chu ka sêl thei ta naw a nih. 20 Chuongchun, Damaska mihai kuomah hril tanin Jerusalema mihai kuoma dàm, Judai rama mi po po le Jentel mihai kuoma dàm sima Pathien tieng ngha ding le an sim takzet ti thilthawa inlangtir dingin ka zirtir a. 21 Chu lei chun tempula ka um laiin Judahan an mi man a, mi that an tum a. 22 Nisienlakhom, Pathienin a mi thangpui leiin voisun chen hin mi lien le mi chînhai hmaah thu hrilin ka la ngîr thei a ni hi. Zawlneihai le Mosien thil hung tlung ding an hrilhai bàk ieng khom ka hril nawh. 23 'Krista chun tuor a ta, mithi laia tho hmathuoitu nîng a ta, Judahai le Jentêlhai kuomah var thu inhriettir a tih' tia an hril bàk chu ieng khom ka hril nawh" a ta. 24 Chuonga a thiemna thu a hril lai chun Festan rawl inring takin, "Paula, lungril pàngngai i put ta naw a ni hi! I thil inchûk tamin a sukvêt ta che a nih" a ta. 25 Paula ruok chun, "Festa inzaum tak, ka'n vêt nawh. Ka thu hril hi a'n dikin pom tlak a nih. 26 Hieng thil hi Lal Agrippa khomin a hriet a, a kuomah intîm dêr loin ka hril a ni hi. Hieng thilhai hi a ieng khom hriet hmai a nei dêr nawh ti ka hriet, a rûka thaw ieng khom a um si naw a. 27 Lal Agrippa, zawlneihai thu i ring am? I ring ti ka hriet" a ta. 28 Agrippa chun Paula kuomah, "Sawt naw te sûnga Kristiena mi'n hmin thei in ring a ni maw?" a ta. 29 Paula chun, "Sawtin sawt naw sien, nang chauh ni loin, voisuna ka thu hretuhai po po khom hi keima anga um dingin Pathien kuomah ka hnì a nih, kol ruok hi chu bun ve loin" a ta. 30 Lal Agrippa le Larsap Festa le Berniki hai chu an thungpuihai leh an tho a. 31 An suok lai chun inbe tuoin, "Hi pa hin thìna khop le intângna khop ieng khom thil a lo thaw naw takluo ngei hi tie!" an ta. 32 Agrippa chun Festa kuomah, "Hi mi hin Kaisar kuoma a thû intlun lo ngên naw chu ni sien, insuo el thei a ni rêng a nih" a ta.

Acts 27

1 Italy ram tieng longa fe dànding an rêl fel charin Paula le tâng danghai chu Awgasta Sipai Pawl an tia sipai zahotu Julio kutah an sie a. 2 Adramitimaa inthokin tuifinriet kam Asia rama long chawlna khuo umhai sira inzin ding longa chun kan chuong a, kan fe tah a; Makedonia rama Thesalonika khaw mi Aristarka chun a mi zui a. 3 A zînga chun Sidon kan tlung a, Julio chu Paula chungah ngil a nei hle a, a ruolhai kuomah lêng a, a châkkhài khom lam a phalpèk a. 4 Chu taka inthoka longa fe peiin, thliin naw tieng a mi baw leiin Kupra thlierkar phên, thli inupna tieng kan pan a. 5 Kiliki ram le Pamfuli ram dep tuipui kan khêl hnungin Lukia rama Mura khuo kan tlung a. 6 Chu taka chun Aleksandra khaw long, Italy pana fe ding chu sipai zahotun a hmu a, chu longa chun a mi'n chuongtir a. 7 Ni tam tak damten kan intawl a, harsa takin Nido khaw zawn kan tlung hrâm a. Thliin a mi dangkìr leiin Kret thlierkar phèn, thli inupna tieng kan hêl kuol a, Kret thlierkar hmor zum Salmoni an ti chu kan pèl a. 8 Harsa takin va kam hrùl kan hrût a, hmun pakhat Chawlna Mawi an ti chu kan tlung a, chu chu Lasai khaw bula um a nih. 9 Hun kan khawral rawn tah a, Bunghei Hunc a pèl tah hiel a, tuipuia inzin a ti-um tàk leiin Paulan thurawn a pêk a, 10 an kuomah, "Puhai, tuta ei fe pei chun sietna râpthlâk tak ei tuok ding a nih ti ka hriet a; long le a thuomhnaw phur chauh ni loin longa chuonghai ta ding khoma bohmangna tlung a tih" a ta. 11 Nisienlakhom, sipai zahotu chun Paula thu hril nèk chun longpu le long neitu thu chu a lâk lem a. 12 Thlasik tuorna dingin chu long chawlna chu a remchang naw leiin, fe suok a, Foiniki khuo tlung hrâm a, chu taka thlasik tuor chu mi tam lemin an nuom a. Foiniki khuo hi Kret thlierkâra long chawlna pakhat, sim thlang le hmar thlang ngha zawnga um a nih. 13 Sim thli damten a hung hrang hieu hieu a, an dit ang tak hmuah an inngài a, an thîrchakaihai chu an khài suok a, Kret thlierkâr kam dep chu hrûtin kan suok a. 14 Nisienlakhom, sawt naw teah, khawmuol tienga inthokin thlipui na tak a hung hràng ta phut el a, chu thlipui chu Eurokuilod an tih. 15 Thlipui chun long chu a hung nuoi vir nok a, thli tieng nor dinga long lu hang kar her ruol a ni naw leiin kan inthla a, a mi fen a mi fen el ta a. 16 Thlierkâr chîte, Klauda an ti phèn, thli inupna tieng chun a mi fen lût a, harsa takin longlêng chu kan hum thei hrâm a. 17 Longa chun longlêng chu an khài lùt a, a koi dar nawna dingin hruiin an vêt bur a. Libya ram tieng kam, Sirti tieudupa lên lût an inlàu leiin long puonzârhai chu an kei hnuoi a. chuongchun a mi fen a mi fen nawk tah a. 18 Thli le tui fawn chun a vor zing leiin a zînga chun long thuomhnaw phurhai chu an pei suok tan a. 19 Ni thum ni chun anni kut ngeiin long hmangruohai khom an pei suok nawk tah a. 20 Ni sawt tak chu nisa le arasihai a'n lang naw a, thli chun nasa takin a mi nuoi zing a, dam hrim kan inbeisei ta nawh. 21 Bu fa loa ni tam tak kan um hnung chun anni lai Paula chu a ngîr a, "Puhai, ka thu kha awiin Kret thlierkâra inthok khan suok naw inla chu hieng ang sietna le inhmangna hi ei tuok naw ding a ni bah. 22 Nisienlakhom, tuhin thlamuong taka um dingin ka ngèn cheu a nih. Nangni lai tu khom thi naw ti niu; long ruok hi chu a se ding a nih. 23 A tâ ka ni a, a rong ka bawl hlak Pathien chun vàntirko pakhat voizàn khan a hung tir a, ka bulah a hung ngìr a, 24 'Paula, ti naw, Kaisar hmaah i ngìr ding a nih. Ngai ta, longa i'n zinpuihai kha nangma leiin Pathienin a hum ding a nih' a hung ti a. 25 Chuleiin, uauhai, thlamuong takin um ro. Pathien ka ring a, a mi hril ang chun tlung ngei a tih. 26 Thlierkâr khaw lai amanih a mi len suok ding a nih" a ta. 27 Zàn sawm le zàn lìna, thliin Adriatic Tuipuiae a mi lên phei zing lai chun longpuhaiin khawmuol khaw lai amanih tlung dingin an inhriet a. 28 Tui inthûk dàn an hang inkhi chun hlam sawmhnia inthûk niin an hriet a, sawt naw te hnunga an hang inkhi nawk chun hlam sawmpangaa inthûk a ni tah a. 29 Lung kawhrot hmuna lên lût an inlàu leiin long mei tieng chun thirchakai pali an thlàk a, khaw var kàr an nghâkhlâ hle a. 30 Long mihai chun an long chu tlânsan an tum rûk leiin long lu tieng chun thirchakai thlàk tum ni awm takin longlèng chu tuipuia chun an thlàk thla a. 31 Chu phing leh Paula chun sipai zahotu le sipaihai kuoma chun, "Hienghai hi longa an um zing naw chun him thei naw ni hai" a ta. 32 Chuongchun, sipaihai chun longlèng hrui chu an sât tan a, an inlèn hmangtir tah a. 33 Khaw var ding têpin Paula chun longa chuong po po chu bu fa dingin a ngên a, "Voisun hi ieng khom fa loa in umna ni sawm le ni lìna a ni tah a. 34 Chuleiin, bu fa dingin ka ngên cheu a nih, in damna dingin; nangni lai tu khom sam zai pakhat khom inhmang naw ti niu" a ta. 35 Chuong thu chu a hril zoin bei a lâk a, an rênga hmaa chun Pathien kuomah lawmthu a hril zoin a khoi a, an fâk tan tah a. 36 Chuongchun, an rêngin thlamuong takin an fàk a. 37 Longa chuong chu kan rêngin zahni sawmsari parukf kan nih. 38 An fàk khop vong hnung chun long sukzàngna dingin an bu phurhai chu tuipuiah an pei suok nawk tah a. 39 Khuo a hung var chun an hriet ngai lo khawmuol an hmu a, chu taka litengsawla chun khal lût a, tieuphoa chun long chu innghat an tum a. 40 Chuongchun, thirchakai hruihai chu an sât tan a, tuipuiah an màksan a; chu ruol chun a kar herna khuopnahai chu an sùt a, hma tieng puonzâr chu thli mût ding zawngin an khai sâng a, tieupho chu an pan tah a. 41 Nisienlakhom, tui zâng khauh pahni infinnaah kan lùt a, long chu tieudûpah a vor lùt a, long hnår tieng chu sukchang ruol lo khopin an tauh lùt bur a, a'n tâng tlat a. Long mei tieng chu tuifawnin a a vawr nasat leiin a koi tan a. 42 Sipaihai chun tânghai chu that vong an rot a, inhlieu kai dàm um an ta, tlân hmang an tih ti an inlàu lei a nih. 43 Sipai zahotu chun Paula sanhim a nuom leiin an thil rot chu a khap a, tui inhlieu thiem taphot chu tuipuiah inchawm thla a, khawmuola lo kai hmasa ding le 44 mi dang po po chu thingphèk chung amani long koi hàr phèk chung amani chuonga kai dingin thu a pêk a. Chuong ang chun kan rêngin khawmuolah him takin kan kai ta vong a.

Acts 28

1 Him taka kan kai hnung chun chu thlierkâr hming chu Malta a nih ti kan hriet tah a. 2 A ram mihai chun an mi lo lunginsiet êm êm a. Ruo a sûr lei le a dei êm leiin meipui an sêm a, kan rêngin an mi lo lawm a. 3 Paulan thing têl khat an khawm a, meiah chun a buk a, a sat leia rûl hung suok chun a kutah a zem a. 4 Chu taka mihaiin a kut rûlin a zem an hmu chun, "Hi pa hi thuolthat a ni phot el, tuipuia inthokin tlân suok sien khom, indik taka Rorêltu chun a dam a phal naw a ni hi" an ta. 5 Nisienlakhom, Paula chun rûl chu meiah a thin thlàk a, ieng khom a ti naw a. 6 Anni chun a'n vûng nghal an naw leh kâr loah tlu a, a thi nghal an ring a. Sawt fe an nghàk a, ieng khom a ti nawh ti an hmu chun an lungril an thlàk a, "Pathien a ni hi" an ti nawk thung a. 7 Chu hmun kawl ela chun thlierkâr lal Publia hmun le ram a um a. Ama chun a mi lo lawm a, ni thum zet lawm takin a mi'n tlungtir a. 8 Publia pa chu khawsik le santen invoia khumbet a lo ni a. Paulan a va en a, a luah kut a'n nghat a, a tongtai a, a sukdam tah a. 9 Chu hnung chun chu thlierkâra mi dang natna nei taphot chu an hung a, an dam tah a. 10 Anni chun nasa takin an mi chawimawi a, kan inzin peina dinga kan mamaw taphot khom longah an sie a. 11 Chu thlierkàra thlasik sûng po châm tah Aleksandria khaw longa chun chuongin thla thum hnungah kan inthok suok nawk a. Chu long hming chu 'Pathien Phîr'g a na, an pathien Kastor le Polluka lim a chuong a. 12 Surakus khuo kan tlung a, ni thum kan châm a. 13 Chu taka inthok chun Rhegium kan tlung a. Ni khat hnungah sim thli a hung hràng a, a zîngah Puteoli khuo kan tlung a. h 14 Chu taka chun unauhai kan hmu a, an kuomah kâr khat châm dingin an mi thlo a. Chuong ang peia inzinin Rom khuo chu kan tlung tah a nih. 15 Rom khuoa unauhai chun kan chanchin an hriet charin 'Appia Dawr' le 'Khuolbûk Pathum' chen mi tuok dingin an hung a. Paulan anni a hmu chun lawmthu a hril a, a thla a muong phá sot a. 16 Rom khuoa kan lût chun Paula chu vêngtu sipai pakhat leh in hrana a um an phalpèk a. 17 Ni thum hnunga chun Paulan chu taka Juda hotuhai chu a ko khawm a, an hung chun an kuomah, "Unauhai, ei mihai chung amanih le ei thlatuhai Dàn kalin amanih ieng khom thawsuol ka nei naw sà khomin Jerusalemah an mi man a, Rom sorkar kutah an mi pèk a. 18 Anni chun an mi dawp a, thìna khop ieng khom ka thaw an hmu naw leiin mi'n suo an tum a. 19 Nisienlakhom, Judahaiin an kal tlat leiin Kaisar hmaa intlun lo thei loin an mi siem a; sienkhom hi hi ka chipuihai hêkna dinga ka thaw a ni nawh. 20 Chuleiin, hmu le biek cheu nuomin ka ko khawm cheu a nih; Israelhai lo beisei hlak Mesia lei khan khaidiet ka bun a ni hi" a ta. 21 Anni chun, "Judai rama inthokin i chanchin hrilna lekha ieng khom kan hmu naw a, unauhai lai i chanchin a tha tieng amanih a se tieng amanih hril dingin tu khom an hung bok nawh. 22 Hi pawl hi hmun tinah mi hrilsiet kan hriet a, i ngaidan khom hriet kan nuom" an ta. 23 Chuongchun, ni an ruot a, chu ni chun a umna inah mi tam takin an hung pan a, zîngkâra inthoka zàn chenin Pathien ram thu a hril a, Mosie Dàn bu le zawlneihai lekhabua inthokin anni chu Isu chungchang thu inawitir tumin an lungril inhmin a tum a. 24 A thenin a thu hril chu an ring a, a thenin an ring naw a. 25 An thu a khuongruol ta naw leiin Paulan hi thu hi a hril a, an tîn ta diel a. A thu hril chu, "Thlarau Thienghlimin zawlnei Isai baua ei thlatuhai kuoma a hril, 26 'Hi chihai lai hin fein hril rawh: Ngaithla rop in ta, a ngaina hre si loin, Hmu rop in ta, hmu fu si loin; 27 Hi chihai lungril hi a chawlol tah a, An na an suksêt a, n mit a'n insîm bok a; Ni naw sien chu mitin hmûng an ta, Nain ngaithlâng an ta, Lungrila manin ngha kîr an ta, Ka lo sukdam tawl awm si'iti kha a lo hril indik ngot el. 28 Chuongchun, Pathien sandamna chu Jentêlhai kuomah pèk a nih ti hi lo hre ro. Anni chun ngai khom ngaithlâng an tih" a ta. 29 Hi hi a hril zoin Judahai chu nasa taka insêlin an suok tawl tah a. j 30 Paula chu kum hni pum hlûm ama in hluoa chun a um a, a kuoma hung lèng taphot a lo lawm a. 31 Pathien ram thu a hril a, Lalpa Isu Krista thu chu huoi takin an chùktir hlak a, tu khomin an khap si nawh.

Romans 1

1 Kei Paula, Isu Krista siehlaw, tirko ni dinga ko, Pathien Chanchin Tha hriltu dinga ser hran bîk chun: 2 Chu Chanchin Tha chu, kha hmaa inthok khan Pathienin zawlneihai hmangin a Lekha Thienghlimah a lo tiem tah a; 3 a Naupa, ei Lalpa Isu Krista chu, taksa tiengah Davida thlaa inthoka pieng, 4 thienghlimna thlarau tienga ruok chu thìnaa inthoka thilthawtheinaa keithoa Pathien Naupa a nizie puonga um chu a nih; 5 ama zâr le a hming leiin hnam tina mihai chu ringa inawitir dingin Pathien lunginsietna le tirko nìna kan chang a, 6 nangni khom chuong anga a mihai ni dinga Isu Krista kohai chu in nih. 7 Pathienin a hmangai le ama mi thienghlim ni dinga a ko, Rom khuoa mihai chibai ka bûk cheu. Pathien ei Pa le Lal Krista Isu kuoma inthoka lunginsietna le inremna chu in kuomah um raw se. 8 A hmasatakin, in ringzie thu khawvel po poah hril dara a um leiin in rênga ta dingin Isu Krista hmingin ka Pathien kuomah lawmthu ka hril hmasa phot a nih. 9 Ka tongtainaah ka hriet zing hlak cheu ti chu theitawpa a Naupa Chanchin Tha rong ka bawl, ka Pathien chu mi hrepuitu a nih. 10 Pathienin rem a ti chun tuta tum bèk hin chu ka hung kan theina ding chêuin Ama ka hni zing a. 11 In hràt zuol theina dinga Thlarau tieng thilpêk iemani bèk hung hawnpêk chèu ka'n hawk hlè a nih, 12 ringna tienga kei le nangni inchawm tuoa ei insukhrât tuo theina dingin. 13 Unauhai, Jentêl danghai laia rà ka sîk hlak ang boka nangni lai khom ra sîk ding ka hmu ve beiseiin voi tam tak in kuomah hung ka tum taa chu remchang nawnain tu chen hin a mi la dang zing leiin ka la hung thei hrì naw a nih ti in hriet ka nuom. 14 Grik mihai, awze mihaia le mi var le mi mawlhai laka khom bat ka nei a; 15 chu lei tak chun a nih nangni Rom mihai kuoma khom Chanchin Tha hril ka'n hawk èm êm chu nih. 16 ChanchinTha chu ka'n zàpui si nawh, a ringtu taphothai sandamna dinga Pathien thilthawtheina a ni si a. A hmasain Judahai ta ding a ni phot a, a dotah Jentêlhai ta ding a hung ni nawk a. 17 Chu taka chun Pathien felna chu ringnaa inthoka ringnaah suklangin a um pei a, "Ringna leia mi fel chu hring a tih" ti ziek ang khan. b 18 Pathien ngaisaknawtuhai le mi rilohai, rîtlona leia thutak dodâltuhai chunga chun Pathien lungsenna chu vàna inthokin a hung inlang a. 19 Pathien chanchin an hriet theina dingin Pathien ngei chun tlang takin an kuomah a'n langtir a. 20 A nìna, mita hmu thei lo, a chatuon thilthawtheina le a Pathienzie chu leilung siem tîra inthokin a thilsiemah chieng taka hmu le hriet theiin a'n langtir leiin mi tu khomin suonlam ding hrim an nei nawh. 21 Pathien chu an hriet a, Pathien ang ruok chun an chawimawi naw a, lawmthu khom an hril bok nawh; teplo mei mei an ngaituo lem leiin an lungril mumal naw tak chu a hung inthim zo tah a nih. 22 Vara inngai si, mi invêt an hung ni zo tah. 23 Thi thei lo Pathien ropui chu thi thei mihriem dâm, vate dàm, sapheimanlic dâm le bokvâka lawn thilhring dàm lim ang chauin an inchangtir si. 24 Chuleiin an lungril chàk zawng thil porchè thaw ding le an taksa chu muolpho taka chêt phalin Pathienin a nghatsan tah a nih. 25 Pathien thu nêkin khêl an thlang lem a, Siemtu chawibiek nêkin a thilsiemhai chu bein an rong an bawl ta lem si a. Siemtu chu chatuona inpâk tlâk a nih. Amen 26 Chuong lei chun an tìsa chàk zawng tirdakum tak chu thaw dingin Pathienin a nghatsan tah a nih. An nuhmeihai chen khom nuhmei le pasal indit dàn phung pangngai khêlah nun letling an hraw a. 27 Chuong ang bokin, pasalhai khom an nuhmeihai le khawsak dàn pangngai bànsanin, anni le anni inchâkin an inhnar tuo a, pasal le pasal khom mawi naw takin an khawsa a, an suol rà chu an taksa ngei chun a tuor tah a nih. 28 Chu bakah, Pathien tieng hrietna indik chu an thlàthlam tâk leiin ngaituona hmang tlàk lo put ding le mawi naw taka khawsa dingin Pathien chun a pêk suok tah a nih. 29 Chuongchun, rîtlona tinrêng thawin, suolna dâm, inhnarna dàm, intheidana dâm, thîkna dàm, tuolthatna dâm, inerna dàm, inhlêmna dâm le inhrilsietna dàmin an hung sip a. 30 An indem a, Pathien an theida ad, an intivei a, an chapo a, an uongthuong a, thil suol thar chìng suok an insukhmu a, nu le pa poisak lo an chìng a, 31 an intlaw a, an depde a, lunginsietna an piengpui naw a, an tawrot bok a nih. 32 Chuong ang thaw chîng mihai chu Pathien ruot anga thi tlâk an nih ti hre zing siin anni thaw khom dittawk loin mi dang a thawtuhai chu an la ngaisàng letling nawk nghal a!

Romans 2

1 Chuleiin aw mihriem, tu khom soisèl thei bik ding i ni nawh, mi dang i soisèlna ngèi chun nang khom thiemnaw inchangtir a ti chê, chuong ang thil chu a soisèltu ngèiin i thaw ve hlak si a. 2 Chuong ang thil thaw hlaktuhai chu Pathienin thiem naw a'n changtir chun a thaw indik a nih ti ei hriet. 3 Aw mihriem, chuong ang thil thaw hlaktuhai soisèltu, nangin chuong ang thil chu i thaw ve hlak si leiin Pathien rorêlna chu pumpel în ring bik am a nih? 4 Annawleh, i simna dingin Pathienin thatnan a thuoi hlak chê ti hre fu loin, thatnaa a hauzie dâm le a entheizie le dawtheizie dàm chu ngâiah i lo nei el am an ta? 5 I lulul le lungril ngar leiin lungsenna ni le Pathien rorêlna nia dingin i chungah hremna i khawl khawm chauh lem a nih. 6 Pathien chun mi tin an thilthaw ang peiin a rêlpêk ding a ni si a. 7 Bohmang thei lo ropuina le chawimawina zonga thil tha thaw fan fanhai chu chatuon hringna pêng a tih. 8 Amiruokchu, mani hma chauh siel mi, thutak hnawltu, thil indik naw zawm lemtuhai chunga chun Pathienin a lungsenna le theidàna chu la bun thlàng a tih. 9 Thilsuol thaw taphothai chungah rinumna le lungngaina tlung a ta, a hmasa'n Juda mihai chungah, chu zoah Jentêlhai chungah tlung a tih; 10 sienkhom thil tha thawtuhai ruok chu ropuina dàm, chawimawina dâm le lungmuongna dàm pèk nîng an tih, a hmasa'n Judahai kuomah, chu zoah Jentêlhai kuomah. 11 Pathienin mi ditsak bîk a nei si nawh. 12 Dàn boa suol thawtuhai chu Dàn boin bohmang an ta; Dàn nei zinga suol thawtuhai ruok chu Dàn hmanga an chungthu rèl nîng a tih. 13 Dàn hretuhai ni loin a zawma zawm lemtuhai chun Pathien hmaah thiem chang an tih. 14 Dàn nei ve lo Jentêlhaiin an piengpui lungvar hmanga dànin a phùt ang an thaw chun, Dàn nei naw hai sienkhom Dàn neiah an insiem a nih. 15 Danin a phùthai chu an lungrilah an ziek ti nungchangah an suklang a, chu chu an sie le tha hrietnain a hrietpui a; lungrila mani inthiem le inthiem nawna an nei dàn angin, 16 Isu Krista hmanga mihriemhai thurùk Pathienin a ngaituo ni chun ka Chanchin Tha hril ang hin rêl a tih. 17 Nisienlakhom, nang chu Juda mi i'n ti a, Dàn i ringsan a, Pathien i uongpui a, 18 a ditzawng khom i hriet a, Dàn i hriet leiin a sie le tha khom i hriet a; 19 mitdelhai keithuoitu, thima umhai êntu, 20 mi invêthai thuoi vartu, naupangtehai zirtirtu tak niin i'n ngai a; Dàn thuah chun hrietna le thutak a'n phûm ti i hriet chieng leiin. 21 Mi danghai zirtirtu inti siin ieng dinga nang le nang i'n chûktir nawm a na? Inru lo dinga mi hriltu, nangin i'n rûk hlak si maw? 22 Uire lo dingin mi i hril a, nang chu i uire hlak si maw? Milem theidatu ni siin milem biekna ina thilhai chu i rok hlak si maw? 23 Dàn uongpuitu, nangin Dàn i bawsiet leiin Pathien i sukhmingsiet hlak an naw maw? 24 "Pathien hming chu nangni leiin Jentêlhai lai sukpawiin a um tah" ti ziek ang khan. 25 Dàn zawm la chu sertan hi a tangkai takzet a nih. Dàn bawsetu i ni ruok chun i sertan chu tan naw ang chie a nih. 26 Chuleiin, sertan lo khomin Dàn thupêkhai a vong tha chun sertan anga ngai a ni naw ding maw? 27 Sertan nawtuin Dàn thu a zawm kim chun nang, dàn bû le sertan dàn nei sia Dàn bawsetu chu thiem naw inchangtir a ti che. 28 A'n lang chaua Juda mi ni chu Juda mi tak tak nìna a ni naw a; taksa chaua sertan chu sertan tak tak nìna a ni chuong bok nawh. 29 Sûngrila Juda mi ruok chu Juda tak tak a nih; sertan tak tak chu lungril tienga tan hi a nih, lekha thu elah ni loin, Thlarau tiengah a ni lem. Chuong ang mi chu mihriemin chawimawi nawhai sien khom Pathienin chawimawi a tih.

Romans 3

1 An leh Juda mi ni chu a tangkai bikna iem a um a? Sertan khom chu a hlutna iem a um a? 2 Kong tinrêngah a hlawk hle. A hlawkna tak chu Pathien thuhai inkoltir an nìna tak hi a nih. 3 An leh, thenkhatin lo ring ta nawhai sienla iem ni tâng a ta? Anni ringnawna chun Pathien ringumna chu ieng khom loin a siem chuong am a nih? 4 Siem lo e! Mi tin khêlhlip vong nihai sien khom Pathien ruok chu indik zing a tih:"Ka chungthu i rèl indik ie, Thiemnaw ka'n changtir naw che"eti ziek ang khan. 5 Sienkhom, ei fel nawna chu Pathien felzie suklang chieng zuoltu a ni si chun ieng am hril tâng ei ta? Mihriem thukhawchâng taka hrilin, Pathienin a lungsenna ei chunga a'n langtir hi a sukdik nawh ei ti ding am a nih? 6 Ti lo e! Chuong chu lo ni ta sien, Pathienin iengtin am khawvel ro rêl thei a ta? 7 Annawleh, ka khêlhrilin Pathien indikzie a suklang zuol a, a sukropui zuol si chun, ieng dinga mi suola ngai ka la ni rop am a na? 8 Mi'n an mi hêk tuma, "Thil tha a hung tlung theina dingin thil suol thawng ei tiu" tia ka hril lo hrim hrim hrila an mi'n tum ang khan ei ti ve el dim a ni? Chuong mihai chun thiem naw chang awm hrim an nih. 9 Annawleh eini Judahai hi ei tha chuong bîk am a ni? Teu lo e! Judahai le Grikhai chu suol bawia um vong ei nih ti tuta hma khom khan ka hril ta cheu kha: 10 Tu khom mi fel tak hrim an um nawh, Pakhat bêk khom an um nawh; 11 Tu khom a hre thiem hrim an um nawh, Tu khom Pathien zong hrim an um nawh, 12 Naw tieng an pèt hmang vong a, An lo khawhlo zo tah a; Tu khom thil tha thaw hrim an um nawh, Pakhat bêk khom an um nawh; f 13 An hnuk chu thlàn inhong a na, An leiin hlêmna thu a hril a, gAn hmûrin rûl tûr a pâi a, h 14 An bâu tongsie le thu khain a sip a. i 15 Thisen insuo di'n an ngal a zâng a, 16 An fèna photah sietna le rinumna a tlung a, 17 Remna lampui an hriet naw a, j 18 An mit mengah Pathien tîna, An nei naw hrim hrim a nih"kti ziek ang khan. 19 Dàn thu chu Dàn hnuoia umhai chunga hmang dinga hril a nih ti ei hriet; tu khomin suonlam an siem thei nawna ding le khawvel pumpui hi Pathien rorêlna hnuoia sie a ni vong theina dingin. 20 Chuleiin, Dàn zawm that leia Pathien hmaa thiem chang phâk tu khom an um nawh; chu nêk hmanin, Dàn chu ei suol thaw mi'n hriettirtu a nih. 21 Tu ruok hin chu Dàn le zawlneihai lo inhriettir tah angin, Dàn hmang ngai loin Pathien felna chu suklangin a um tah a, 22 chu chu Isu Krista ei ringna leia a ringtu taphot kuoma Pathien felna suklanga um chu a nih. Tu ta ding khomin a danglam nawh. 23 Mi po poin thilsuol an thaw a, Pathien ropuina an chang thei ta si nawh. 24 Nisienlakhom, Pathien chun Isu Krista intlanna zàrah a lunginsietna lei chauin mi a thlawnin thiem a'n changtir a, 25 Krista ngei chu a thisen ringtuhai ta dinga suol thupha chawina dingin a hung pèk a. Hi hi Pathienin thiem a mi'n changtir dàn suklangna chu a nih. 26 A dawtheina leiin tuta hmaa an thil suol thawhai chu hriet naw sak sak a thawpèk a. Ama chu mi indik a na, Isu ringtu chu thiem a'n changtir ngeizie sukchieng dingin tu lai huna hin thiem a mi'n changtir dàn chu a hung suklang tah a nih. 27 Chuong an leh ieng am ei uongpui ding a um? Um lo e! Ieng leiin am? Dàn zawm leiin maw? Ni lo e! Ringna leiin a ni lem. 28 Dàn zawm lei chauh ni loin, ringna leiin mi'n thiem a chang ti thu chu ei pom tlat lem a nih. 29 Pathien chu Judahai Pathien chauh a ni? Jentêlhai Pathien khom a ni ve naw'm a nih? 30 Ni ve e! Pathien chu pakhat a na, sertanhai chu an ringna leiin thiem inchangtir a ta, sertan nawhai khom an ringna lei bokin thiem inchangtir a tih. 31 Anleh, ringna a poimaw ti lei ringotin Dàn chu ieng khom ni loah ei siem el ding a ni? Teu lo e! Dàn chu ei suknghet lem hman a nih.

Romans 4

1 Anleh, taksa tienga ei thlatu Abraham thu kha ieng tin am hril tâng ei ta? 2 Abraham kha thilthaw leia thiemchang chu lo ni sien, uongpui ding a nei a nih, Pathien hmaa ruok chu ni loin. 3 Pathien lekhathuin iem a hril a? "Abraham chun Pathien a ring a, chu ringna lei chun thiemchanga ruot a nih" tiin a hril a nih. 4 Miin sin a thaw chun a hlaw chu thilpêka ngai a ni naw a, bat anga ngai a nih 5 Amiruokchu, miin misuolhai thiem inchangtirtu a ring a, a thilthaw lei ni loa thiem inchangtira a um hin a ringna leiin thiem a chang a nih ei ti hlak. 6 Thilthaw lei ni loa, Pathienin thiem a'n changtirhai hamthatzie chu Davida khomin hieng hin a hril kha : 7 "An bawsietnahai ngaidama um a, An suolhai thai boa um chuAn va hang hamtha lawm lawm de! 8 Lalpan suol nei loa a ngaihai chu, An va hang hamtha lawm lawm de!"ltiin. 9 Anleh, chu hamthatna chu sertanhai ta ding chauh a ni, an naw leh sertan nawhai ta ding khom? Abraham ringna chu a felnaa ruot a nih tiin ei hril rop hlak kha. 10 Chu chu ieng ti kongin am ruot a ni thei a? Ser a tan hmain a ni, ser a tan hnungin? A sertan hnung ni loin, a sertan hmain a ni lem. 11 A sertan hmain sertan inchikna a dong a, chu ringna lei chun Pathienin thiem a'n changtir a nih ti namnghetna dingin ser a tan chauh a ni lem. Sertan nawhai khom ringna leia Pathienin thiem a'n changtirhai ta ding chun Abraham chu thlarau tienga pä a nih. 12 Chuong ang bokin, sertanhai pa khom a na, sertan a ni lei el khom ni loin, ama ei pa Abrahamin ser a tan hmaa ringna a nei ang bok kha ringna an nei ve lei a nih. 13 Dàn zawm lei ni loin, ringna leia thiem inchangtir an nina lei lemin, Pathien chun Abraham kuomah ama le a thlahaiin khawvel hi an la rochung ding thu chu a tiem a nih. 14 Dàn zawm hi rohluotu nìna ni sien chu, ringna chu a thlawn el nîng a ta, thutiem khom chu ieng khom ni naw nih. 15 Dàn chun lungsenna a cho suok a; Dàn a um nawnaah chun bawsietna khom a um nawh. 16 Chuleiin, Dàn zawmtuhai ta ding chauh ni lo a, Abraham thla po po, ama ring anga ringtuhai ta dinga Pathien thilthlawnpêk a nizie suklang dingin Abraham kuoma a thutiem kha ringnaah a'n nghat a nih. 17 "Hnam tam tak pa-ah siem ka ti che" ti ziek ang khan, a ring Pathien, mithihai sukhring nawktu le thil um lo khom inumtirtu hmaah chun Abraham chu ei rênga pa a nih. 18 "Khi ang zàt khi i thlahai la nîng an tih" tia hnam tam tak pa ni dinga thutiem chu beisei ding a um naw lai khomin beisei takin a ring tlat a. 19 Kum za ding hiela upa le a taksa en chun mithi ang el a ni tah ti le Sari ngei khom chu a ching a nih tihai ngaituona chun a ringna chu a sukchàu ngai nawh. 20 Ringhlàna chun Pathien thutiem lakah a sukhnìng ngai naw a, chu nêk hmanin a ringnaa chun sukhràta umin, Pathien a chawimawi lem a, 21 a thutiem chu hlen dingin Pathienin thilthawtheina a nei ti a ring tlat a. 22 Chu lei chun, "a ringna chu a felnaa ruot a nih". 23 A ringna chu a felnaa ruot a nih ti chu ama ta ding chaua ziek a ni naw a, 24 mithi laia inthoka ei Lalpa Isu keithotu ringtuhai, ringna leia thiemchang, ei nihai ta ding khoma ziek a nih. 25 Isu chu ei bawsietnahai leiin sukhlumin a um a, thiem ei changna dingin keithoin a um a nih.

Romans 5

1 Chuleiin, ringna leia thiem ei chang tah leiin, ei Lalpa Isu Krista zàrah Pathien leh inremin ei um a nih. 2 Ama zâr bok chun tuta ei ngirna lunginsietna hnuoia hin ringnain ei lùt a, ei la'n tawmpui ding Pathien ropuina chu beiseiin ei lawm bok a nih. 3 Chubâkah, ei rinumnaah khom ei lawm pei a nih: rimsikna chun tuorselna a siem a, 4 tuorselna chun nungchang nghet a siem a, nungchang nghet chun beiseina a siem ti ei hriet si a. 5 Chu beiseina chun lunghnuolin a mi siem ngai nawh, Thlarau Thienghlim a mi pèk hmangin ei lungrilah Pathien chun a hmangaina chu a hung buok ta si a. 6 Thaw thei ieng khom ei nei naw lai khan a hun takah Krista chu misuolhai ta dingin a lo thi tah a nih. 7 Mi fel ta dinga thi nuom an vâng hle el thei a, mi tha ta dinga thi ngam ruok chu mi an lo um khiet el rawi mawh. 8 Pathienin a mi hmangaizie a suklang dàn ruok chu, mi suol ei la ni zing laia ei ta dinga Krista a hung thi el kha a nih! 9 Chuongchun, a thisena thiem inchangtira ei um ta hnung lem hin chu, ama zâr bokin Pathien lungsennaa inthokin sandam ei va hang ni chieng awm ngei de! 10 Hmêlma ei ni lai hmana a Naupa thìna zàra Pathien leh lo inrem tah ei ni chun, inrema ei um ta hnung lem hin chu a hringna zàrin sandam ni nawk zuol ngei ei tih. 11 Chu chauh khom chu ni loin, Pathien le mi'n remtir nawktu ei Lalpa Isu Krista lei chun Pathienah ei lawm bok a nih. 12 Chuleiin, mi pakhat leia khawvelah suol a lût ang khan, suol leiin thìna khom a hung lùt a, chuonga mi po po an lo suol tàk lei chun thìna khom mi po po chungah a tlung a nih. 13 Dàn thu pêk a ni hma khomin khawvelah suol a um tah a; amiruokchu dàn a um si naw chun suol chu suola ngài a ni nawh. 14 Nisienlakhom, Adam huna inthoka Mosie hun chen khan, Adamin a bawsiet anga suol ve lohai chunga khom, thìna chun thu a nei a nih. Adam chu la hung ding hlimthla chu a nih. 15 Pathien thilthlawnpèk le Adam bawsietna ruok chu an inang nawh. Kha mi pakhat bawsietna lei khan mi tam tak an thi a; Pathien lunginsietna le mi pakhat, Isu Krista lunginsietna leia thilthlawnpêk ruok chu mi tam tak chungah a liema vùrin a um ve thung a nih 16 Chu Pathien thilthlawnpèk chu mi pakhat suolna leia thil hung um leh chun an inang bok nawh: thiem naw inchangtirna rorêlna chu mi pakhat bawsietna leiin a hung um a, thiem inchangtirna thilthlawnpêk ruok chu bawsietna tam tak leiin a hung um a nih. 17 Chu mi pakhat bawsietna lei hmana thìnain ro a rèl chun, mi pakhat Isu Krista leia Pathien lunginsietna nasa tak le a thilthlawnpèk thiemchangna dongtuhai chun hringna changin ropui takin ro an va hang rèl nasa nawkzuol awm ngei de! 18 Chuongchun, mi pakhat bawsietna leia mi po poin thiemnaw an chang angin, mi pakhat thil indik thaw leiin mi po po thiemchangin an hring phà tah a nih. 19 Mi pakhat thu awi nawna leia mi tam tak mi suol an hung ni tah ang khan, mi pakhat thu awina leiin mi tam tak mi fel la hung nìng an tih. 20 Bawsietna chu a pung zuolna dingin Dàn a hung pung a. Nisienlakhom suol a pungna taphotah lunginsietna khom a pung zuol sauh hlak, 21 suol leia thinain ro a rêl angin, ei Lalpa Isu Krista zàra chatuon hringna ei nei theina dinga Pathien lunginsietna chun thiem inchangtirna hmanga ro a hung rêl theina dingin.

Romans 6

1 Ieng am hril tâng ei ta? Lunginsietna chu a pung nawk zuolna dingin ei suol zui pei di'm a nih? 2 Teu lo e! Eini suol thìsan tahai chu ieng tin am suolah la'n hnel zing ei ta? 3 Eini Krista Isua baptisma chang tahai po chu a thìnaah baptis-in ei um tah ti in hriet naw am a ni? 4 Chuleiin, Pain mithi laia inthoka ropui taka Krista a keitho anga eini khom hringna thara ei lèng ve theina dingin, a thìnaa baptisma changin, a kuomah phùmin ei um ve tah a nih. 5 A thìnaah eini khom ama leh inzoma ei thi chun ama a tho nawk ang bokin ama leh inzomin eini khom keithoin um vé ngèi ei tih 6 Suol bawia ei um ta nawna dingin suol put taksa hi sukhlum dingin ei mihriem hlui chu a kuomah hemdein a um tah ti ei hriet. 7 Tu khom a thi tah chu suola inthokin a zalèn ta si a. 8 Krista leh ei thi ve tah chun a kuomah chêng vèng ei tih ti ei ring a nih. 9 Krista chu mithi laia inthokin keithoin a um a, a thi nawk ta naw ding a nih ti ei hriet si a; thìna chun a chungah thu a nei ta nawh. 10 A thìna chu voi khat thil thua suol tieng konga thì songna a na, a hringna ruok chu Pathien kuoma hring songna a nih 11 Chuong ang bokin, nangni khom suol tieng pangah thi taah inngai unla, Pathien tieng ruok chu Krista Isu-a chun hringah inngâi ro. 12 Chuleiin, in taksa nuom zawng thil suolhai zawm dingin in taksa thi theia chun suolnain ro rêl ta naw raw se. 13 In taksa pènghai khom suol hmangruo dingin suol kuomah pe phal bok naw ro; chuong nêk hmanin, mithi laia inthoka hung hring nawk angin Pathien kuomah inhlàn lem unla, in taksa pènghai khom felna hmangruo dingin Pathien kuomah pe lem ta ro. 14 Suolin in chungah thu a nei ta naw ding a ni si a; dàn hnuoia um in ni ta naw a, lunginsietna hnuoia um in ni ta lem. 15 Ieng tin am ni tâng a ta? Dàn thu hnuoia um ni loa lunginsietna hnuoia um ei ni lem lei hin ei la suol pei ding am a nih? Teu lo e! 16 Tu kuoma khom an thu awi dinga an bawia in lùt chun an thu in awi bawi chu nîng in tih. Suol bawi a ni chun thìna, thu awina bawi a ni chun thiemchangna a nih ti in hriet nawm a nih? 17 Amiruokchu, suol bawi lo ni tah inla khom, Chanchin Tha zirtirna thu in dong chu lungril takzeta chela in zawm leiin, 18 suol bawia inthoka insuoin in um a, felna bawihai in hung ni tah lem a nih. Chuleiin, Pathien kuomah lawmthu um raw se. 19 In taksa hràt nawzie hrein, mihriem thuphungin ka hril a nih. Kha hma khan chu suol bawi, bawsietna tirdakum le rîtlonaa hluor zuol pei kuomah in taksa pênghai chu in inhlàn hlak a, tu ruok hin chu felna bawi kuomah thienghlim taka khawsa ta dingin inhlàn ve thung ta ro. 20 Suol bawia in um lai khan felna thu hnuoiah in um ngai nawh. 21 Tuta in inzàpui tah, khang laia thil in lo thaw hlak hai khan ra tangkai ieng am an insuo a? Chuong thil po po tawpna chu thìna a nih. 22 Tu ruok hin chu suola inthoka insuo in ni ta a, Pathien bawihai in hung ni ta lem a, chatuon hringna chang dinga sukthienghlim in ni tah. 23 Suol man chu thìna a ni si a; Pathien thilthlawnpêk ruok chu ei Lalpa Isu Krista zàrah chatuon hringna a nih.

Romans 7

1 Unauhai, dàn chun mi a dam sung po chauh a chungah thu a nei hlak ti in hriet naw am a nih? Hi hi Dàn hrehai hriet ding bìka ka hril a nih. 2 Entirna dingin, nuhmeiin pasal a nei chun a pasal dam sûng po chu inneina dânin a pasalah a phuor bet a, a pasal thi hnung ruok chun a pasal lakah chu dân chun a khit ta nawh. 3 A pasal dam sûng mi dang a nei chun 'uire nu' tìng an tih; a pasal a thì hnung ruok chun chu dân phuornaa inthok chun sùtin a um a, mi dang nei sienkhom uirè ti a ni ta nawh. 4 Chuong ang bokin unauhai, Krista taksa pèng in ni tah leiin Dàn chu in thìsan tah a, Pathien ta dinga rà ei insuo theina dingin tu hin chu mi dang tà, mithi laia inthoka keithoa um tah tâ chu ei ni tah lem. 5 Suol khuop dè mihriem hlui ei la put lai khan chu ei chàkna suol, Dànin a chok tho khan, ei taksaah sin a thaw a, ei rà suok chu thìna a nih. 6 Tu ruok hin chu mi khuop hlaktu chu thisanin, dàn khuopnaa inthoka insuoin ei um tah a; chuleiin, Dàn thu ziek hlui chu zui ta loin, Thlarau dàn thar hnuoiah rong ei bawl tah lem a nih. 7 Ieng am hril tâng ei ta? Dàn chu suol a ni? Teu lo e! Dànin mi hril naw sien chu suol hi hre naw ning. Dànin "Inhnar naw" lo ti naw sien chu inhnar hi iem a nih ti hre naw bok ka tih. 8 Sienkhom, suol chun dàn thupêk chu remchânga hmangin, inhnarna tinrêng ka sûngah a'n umtir a. Dàn um naw sien chu suol hi thil thi el a nih. 9 Kha hma khan Dàn thang loin ka lo hring hlak a; nisienlakhom, dàn thupêk a hung um phingleh suolna chu a hung har a, kei chu ka thi a. 10 Hringna dinga dàn thupêk chu thìna ding lem a lo nih ti ka hung hmu suok a. 11 Suolna chun dàn thupêk chu remchânga hmangin a mi hlèm a, thupêk chu hmangin a mi sukhlum tah a nih. 12 Chuong chu a ni leiin, Dàn chu a thienghlim a, thupêk khom a thienghlim a, a fel a, a thà a nih. 13 Anleh, thil thâ chu ka ta dingin thìna intluntu a lo ni maw? Teu lo e! Suolna chu ka ta dingin thìna a hung ni ta lem a nih: suol chu suol a nih ti a'n lang theina dingin thil thâ chu hmangin a mi sukhlum a, chu dàn thupêk chun suolin taluo a nei nawzie a hung suklang tah a nih. 14 Dàn chu thlarau tieng thil a nih ti ei hriet; kei ruok chu taksaa um, suol bawia zor hmang tahnung ka nih. 15 Ka khawsak dàn hi a ngaina tak khom ka hriet nawh. Ka thaw nuom zawng thaw loin, ka theidà zawng ka thaw lem hlak. 16 Ka thaw nuom naw zawng ka thaw hin dàn chu tha ka tipui tìnâ a nih. 17 Tuta ka ngìrhmun chu, thil ka thawhai hi keima thaw ni loin, keimaa chêng suol chun a thaw lem a nih. 18 Suol kop keima mihriema hin thil tha hrim a chêng nawh ti ka hriet; thil tha thaw nuomna nei lang khom ka phur suok zo si nawh. 19 Thil tha ka thaw nuom chu thaw loin ka thaw nuom naw thil suol chu ka thaw lem si. 20 Ka nuom naw zawng ka thaw si chun, a thawtu chu kei ni loin, keimaa chêng suol chu a ni lem. 21 Chuongchun, hieng hi thil um dàn a nih ti ka hung hriet suok tah: thil tha thaw ka nuoma chu suolin a mi chèng chil zing si. 22 Ka lungril sûngril tak chun Pathien dân a lawm a; 23 sienkhom ka taksaa sinthaw, ka lungril tha tizawng dàn dotu chu a um ti ka hmu a, chu ka taksa bunghaia sinthaw hlak suol dàn chun salah a mi siem hlak a nih. 24 Mi rimsi ka va ni ngei! Hi thîna taksaa inthok hin tuin am mi san suok a ta? Pathienin tie! Ka Lalpa Isu Krista zàrah ama chu inpâkin um raw se. Chuongchun, keima lungril tak chun Pathien dân rong ka bawl a, keimaa suol kop ruok chun suol dàn rong a bawl a nih. 25 (A um nawh)

Romans 8

1 Chuongchun, tuhin chu tisa dàn hraw loa thlarau dàn hraw lemtu, Krista Isua umhai ta ding chun thiemnaw inchangtirna hrim a um ta nawh. 2 Krista Isua hringna Thlarau dàn chun suolna le thìna dâna inthok chun a mi san suok ta si a. 3 Tisa hràt nawna leia Dànin a thaw thei dèr naw chu Pathienin a hung thaw a; suol kài mihriem taksa ang putin, suol thawina dingin a Naupa ngei chu a hung tir a, tisaa suol um chu thiemnaw a'n changtir ta a; 4 chu chu tisa dàna um ta loa thlarau dàn hraw tah lemtu einiah hin Dànin a phût chu a hlen theina ding a nih. 5 Tisa dàna umhai chun tisa tieng thilhai an dit hlak. Thlarau dàna umhai ruok chun thlarau tieng thilhai an dit bok. 6 Tisa tieng thil dit chu thìna a na; Thlarau tieng thil dit ruok chu hringna le thlamuongna a nih. 7 Tisa ditzawng ngaituona chun Pathien a do a, Pathien dân a zawm naw a, zawm khom a zawm thei bok nawh. 8 Chuleiin, tisa dit zawnga umhai chun Pathien an suklawm thei nawh. 9 Pathien Thlarau nangniah a chêng chun tisa mi ni ta loin Thlarau mi in ni ta lem. Tu khom Krista Thlarau nei lo chu ama mi a ni nawh. 10 Krista chu nangniah a um si chun, in taksa chu suol leia thi ni sienkhom thiem inchangtir in ni tâk leiin in thlarau ruok chu a hring a nih. 11 Mithi laia inthoka Isu keithotu Thlarau kha nangniah a um chun, mithi laia inthoka Krista Isu keithotu chun nangnia um Thlarau zàrah, in taksa thi theihai chu sukhring bok a tih. 12 Chuleiin unauhai, bat ei nei a, chu chu tisa nuomzawnga tisâ taka khawsa ding tìna ruok chu a ni nawh. 13 Tisa dit zawnga in um chun thi ngei in tih; sienkhom tisa nuom zawng in thaw hlakhai chu Thlaraua in sukhlum ruok chun hring in tih. 14 Pathien Thlarau thuoia umhai po chu Pathien nauhai an ni si a. 15 Titna bawia intâng nawk dingin bawi nìna thlarau pèk in ni naw a; nau nîna thlarau in chang lem a nih; chu thlarau zara chun, "Abba, Pa!" tiin ei insèk hlak a nih. 16 Chu Thlarau ngei chun eini thlarauah Pathien nauhai ei nizie a mi'n hriettir hlak. 17 Pathien nauhai ei ni chun rohluotu, Pathien rohluotu, Krista ro hluopuituhai ei nih; Krista tuorna ei intawmpui si chun a ropuina khom intawmpui vê ngèi ei tih. 18 Tuta ei tuornahai hi ei ta dinga ropuina suklanga la um ding le chun hrilkhi tlàkah ka ngai nawh. 19 Pathienin a nauhai a suklang hun ding chu thilsiem po poin nghâkhlâ takin an thlìr a nih. 20 Thilsiemhai chu anni ditthlangna ni loa a Siemtu thu leia iengma lo la ni vong dinga tì an nih. Amiruokchu, beisei ding a la um: 21 thilsiem po pohai chu hmon theina bawia inthoka insuoa umin, Pathien nauhai zalènna ropuia chun an la lùt ding a nih ti beiseina chu. 22 Thilsiem po pohai chu tu chen hin nauha sè tuor inrûm angin an inrûm tawl ti ei hriet si a. 23 Chu chauh khom chu ni loin, eini Thlarau rà hmasa dongtuhai ngei khom hin nau nîna ei hluo hun ding le ei taksa intlanna ni ding chu lungrila nghâkhlâ takin ei inrûm a nih. 24 Chu beiseina lei chun sandam ei ni a; nisienlakhom, hmu tah zing beisei chu beiseina a ni nawh. Hmu tah zing chu tuin am a la beisei rop ding? 25 Ei la hmu naw ei beisei chun ei nghàk fan fan hlak a nih. 26 Chuong ang bokin, Thlarau chun ei hràt nawnaah a mi thangpui hlak a; tongtai dàn ding ei hriet naw lai khomin Thlarau chun hril ruol loa inrûmin a mi tongtaipek lem hlak a nih. 27 Lungril enfietu Pathien chun Thlarau ditzawng chu ieng am a nih ti a hriet a; Thlarau chun Pathien ditzawng ang peiin mi thienghlimhai ta dingin a mi tongtaipèk hlak. 28 Pathien hmangaituhai, aman a ruot anga a kohai ta ding chun iengkimah an thatna dingin a thawpèk hlak ti ei hriet; 29 A hriet lawkhai chu a Naupa ang taka um dingin a ruot lawk si a, a Naupa chu unau tam tak laia nau lutîr a hung ni theina dingin. 30 Chun, a ruot lawkhai chu a ko a; a kohai chu thiem a'n changtir a; thiem a'n changtirhai chu a chawimawi bok a nih. 31 Chuong thua chun ieng am hril tâng ei ta? Pathien eini tieng a thang chun tuin am mi khing ngam a ta? 32 Ama Naupa ngei khom hlà loa ei rênga ta dinga petu chun thil dang khom a thlawnin a mi pêk sa naw dim a nih? 33 Pathien mi thlanghai chu tuin am hêk ngam an ta? Thiem inchangtirtu chu Pathien a ni si a. 34 Tuin am thiem naw inchangtir a ta? Krista Isu chu ei ta dinga thi le mithi laia inthoka tho nawk chauh khom ni loin, Pathien chang tieng inthung a, eini mi hrilpuitu a ni si a. 35 Krista hmangainaa inthok chun iengin am mi thè thei a ta? Rinumna dàm, harsatna dàm, suknomnatna dàm, tâmna dâm, saruokna dàm, titna dâm, kawlhnâm dàmin maw a mi thè thei ding? 36 Nangma leiin ni tin elin, Thìna ko tlângah kan ngìr a; That ding beram anga ngaiKan lo ni tawl vong ta si a. m ti ziek ang khan. 37 Thè thei teu lo e! Chuong po poa chun a mi hmangaitu zàrin hnetuhai chunga lêng ei nih. 38 Thil ieng khomin, thìna hai, hringna hai, vàntirko hai, boruoka thuneitu hai, thil tlung zing le la tlung ding hai, thilthawtheina hai, 39 thil insâng le inthûk hai le thilsiem dang hrim hrim khomin ei Lalpa Krista Isua um Pathien hmangainaa inthok chun mi thè thei naw nih ti chieng takin ka hriet.

Romans 9

1 Kristaa chun thudik ka hril a nih; thukhêl ka hril nawzie Thlarau Thienghlim zàrin ka sie le tha hrietna khomin a hriet chieng. 2 Ka lungrilah rinumna nasa tak le lungngaina rè thei dêr lo ka pâi a. 3 Ka unauhai, taksa thila ka chipuihai ai hin keiin tongsie phurin Krista kuoma inthoka sàt thlâk ni lem lang ka ti hiel hlak. 4 Israel mi an ni si a, nau nîna hai, ropuina hai, thuthlung hai, Dàn thu hai, rongbawlna sin hai le thutiem hai po po changtu an nih. 5 Thlatuhai chu an pùhai an ni a, mihriem tienga sui chun Krista chu an chipui ngei a nih; iengkim chunga um Pathien chu chatuona inpâkin um raw se, Amen. 6 Pathien thu chu a thlawn elin a'n chang ka tìna a ni nawh. Israel thlahai po po chu Israel mi an ni vong chuong nawh. 7 Abraham thlahai po po khom a nauhai an ni vong chuong nawh; 'Isaka hin i thlàhai sui an tih' ti a ni lem. 8 Chu umzie chu, taksa tienga nauhai chu Pathien nauhai an ni vong chuong naw a, thutiem leia Abraham nauhai chu a thlà indik taka ngai an ni lem, tìna a nih. 9 "Tuta hun anga hin hung ka ta, Sari chun nau pasal nei a tih" tiin a tiem a ni kha. 10 Chu chauh khom chu ni loin, Rebek khomin ei thlatu Isaka inthoka nau inphîr a von lai khan, 11 an pieng thlàk hma, sie le tha an la hriet hmain, thilthaw lei ni loa a kotu dit ang lei lemin, pakhat lem chu thlang a nih ti a'n lang. 12 Pathien thu ruot chu namnghetna dingin Rebek kuomah, "A upa lemin a naupang lem rong bawl a tih" a tì a ni kha. 13 "Jakob chu ka hmangai a, Esau chu ka theida" ti ziek a ni bok. 14 Ieng am hril tâng ei ta? Pathien chu a thu an lài nawh ei ti dim a nih? 15 Teu lo e! Ama chun, "Ka lunginsiethai po lunginsiet ka ta, za ka ngainahai po chungah zà ngai ka tih" tiin Mosie kuomah a hril a nih. 16 Chuleiin, mihriem dit dàn le an thaw rakna lei ni loin Pathien lunginsietnaa innghat a ni lem. 17 Pathien Lekha thuin Faraw kuomah, "Hi lei ngot hin ka tungding chê a nih, nangmaa chun ka thilthawtheina ka'n entir theina ding le khawvel po poah ka hming puong dar a ni theina dingin" a ti si a 18 Chuongchun, Pathien chun a lunginsiet nuom po a lunginsiet a, a suklulul nuom po a suklulul el a nih. 19 Chuong a ni si chun Pathienin ieng dinga mi a la mawsiet rop am a na? A ditzawng tuin am a kal thei a?" in ti khom a ni thei. 20 Aw mihriem, Pathien sêl ngamtu chu tu'm i na? Thilsiem chun a siemtu kuomah, "Ieng dinga hieng anga i mi siem am a na?" a ti thei am a ni? 21 Bepil tlang khata inthokin bêl hlu tak le bêl naran siem dingin bêlhemtu chun bêl chungah thu a nei naw am a nih? 22 Pathien chun a lungsenna le a thilthawtheizie suklang nuom hlak sien khom, sukbohmang ela um ding a lungsenna bêl dongtu dinghai chunga chun zâi a daw hràm hrâm a, 23 a lunginsietna bêl, a ropuina changtu dinga a lo buotsai lawk, einihai kuomah a ropuina nasatzie chu a hung suklang tah thung a nih. 24 Chu lunginsietna bêlhai chu Judahai laia inthok chauh ni loin Jentêlhai laia inthoka kohai khom ei nih. 25 Hosea lekhabua, "Ka mi ni ngai lohai chu, Ka mihai tîng ka ta; Hmangai ngai naw nu chu, Hmangai nu tîng ka tih; 26 'Ka mihai in ni nawh' A tîna hmun ngeia chun, 'Pathien hring nauhaia Inbûkin um an tih"ntia a hril ang bok khan. 27 Isai khoma Israelhai thu chu khêkpuiin, "Isreal mihai chu tuifinrieta phaiphin angin tamhai sien khom, tlawmte chauh sandamin um an tih. 28 Lalpan hnuoi chunga a rorêlna chu khauh tak le inrang takin a hlen ding a ni si a" a ti kha. 29 Isai bokin, "Iengkim Lalpa chun chi thlatu Mi lo hlàpêk naw sien chu, Sodom khuo angin um tâng ei ta, Gomora khuo ang ni tâng ei tih"otiin a lo hrillawk bok kha. 30 Ieng am hril tâng ei ta? Thiemchang tuma bei ve nawtu Jentêlhai chu ringna leia thiem inchangtir an lo ni tah. 31 Dàn zawm leia thiem chang tum Israelhai ruok chun Dànah thiemchangna an hmu zo ta nawh. 32 Ieng leiin am? Ringna thang loa thilthawa thiemchang an tum lei a nih. Tlûkna lungah chun an insui thlu ta si a. 33 "Ngai ta, Zaiawnah lungpui ka'n zâl, A'n sui taphot tlûkna ding lung chu; Tu khom ama ringtu chu, Muolpho ngai hrim hrim naw nih"pti ziek ang khan.

Romans 10

1 Unauhai, ka chipui Israelhai chu sandamin um hai sien ti hi ka duthusam le Pathien kuoma ka hnî rop chu a nih. 2 Pathien ta dinga thahnem an ngaizie ka hriet a, sienkhom an hriet dàn a mumal si nawh. 3 Pathienin thiem mi a'n changtir dàn chu an hriet thiem naw a, anni lampui an hraw tlat a, Pathienin thiem a'n changtir dàn hnuoia chun an tlu lùt nuom nawh. 4 Ama ringtu taphotin thiem an chang theina dinga Dàn sukfamkimtuq chu Krista a nih. 5 Dàn zawm leia thiemchang dàn thu chu Mosien hieng ang hin a lo ziek a, "Dàn zawmtu chu dànin hring a tih" tiin. 6 Ringna leia thiemchang dàn thua ruok chun, "Tu'm vànah lawn a ta?" (Vàna inthokin tuin am Krista hung thuoi thlâng a ta?) amanih, 7 "Tu am khurpuiah zu tum a ta?" (Mithi khuoa inthokin tuin am Krista zu thuoi suok a ta?) amanih in lungrilin ti naw ro" tiin a hril bâkah, 8 "Thu chun a hnai che, I bàu le i lungrilah a um"r a ti lem a ni kha. Chu thu chu ringna thu kan hril hlak hi a nih. 9 I bàuin Isu chu Lalpa a nih ti i tan a, mithi laia inthokin Pathienin a keitho ti i lungrila i ring chun sandamin um i tih. 10 Lungrila ringtuhai chu thiem inchangtirin an um a, bàua tantuhai chu sandamin an um bok. 11 Pathien Lekha thuin, "Tu khom ama ring taphot chu muolpho ngai hrim hrim naw nih"a ti a nih. 12 Juda mi le Grik mi ieng khom a danglam chuong nawh. Lalpa pakhat chu an rênga Lalpa a na; ama kotuhai chungah chun a hausakna a vùr hlak. 13 "Tu khom Lalpa hming lam taphot chu sandamin um an tih" a ti a nih. 14 Anleh, an ring naw chu ieng tin am ko an ta? Thu an hriet naw chu ieng tin am ring thei an ta? Thuhriltu um loin iengtin am hrieng an ta? 15 Tir an ni si naw chun ieng tin am thu hril an ta? "Thil tha chanchin lawmum intluntuhai kè chu a va mawi de!" ti ziek a ni kha. 16 Sienkhom, Chanchin Tha chu an rêngin an ring vong chuong nawh. Isai bokin, "Lalpa kan thu hril tuin am a ring a?" a ti si a. 17 Chuongchun, ringna chu thu an ngaithlàka inthoka hung um a na, thû hrila um chu Isu Krista thù a nih. 18 Anleh, thu chu an nain an hriet ngai naw'm a nih? Hre ngai e a! "Sienkhom an rawlin hnuoi a fang suok a, An thuin kawl kil a dèng suok"sti a ni kha. 19 Anleh, hang ti nawk ta pei inla, Israel mihaiin an hriet naw am a ni ding? "Hnama hril khop lohai chu Inthîktir ka ti chêu a, Hnam invêthai chu hmangin, Suklungsen ka ti cheu"ttiin Mosien a hril hmasa tak a. 20 Isai chun huoi takin, "A mi zong nawtuhai chun An mi hmu a; A mi ko nawtuhai kuomahKeima ka'n hriettir a"ua ti nawk a. 21 Amiruokchu, Israelhai chung thua ruok chun, "Mi kawmaw le helhmang ta dingin, Sùnnithlâkin bân ka phar hlak"va ti kha.

Romans 11

1 Anleh, Pathienin a mihai chu a hnawl am a ni? Hnawl lo e! Kei ngei khom hi Israel mi, Abraham thla, Benjamin hnama mi ka ni si a. 2 A hriet lawk, a mihai chu Pathienin a hnawl nawh. Pathien Lekha thua chuong Elija chanchin kha in hriet naw am a ni? Ama chun Israel mihai chungthu Pathien kuomah a'n tlun a: 3 "Lalpa, i zawlneihai an sukhlum a, I maichàmhai an sukchim a; Ka khât chauh ka ni ta a, Kei khom mi sukhlum an tum a nih"wtiin. 4 Pathienin ieng tin am a don a? "Baal hmaa la kûn ngai lo, mi sangsari keima ta dingin ka la hlâ zing a nih" tiin a don a ni kha. 5 Tu khom hin chuong ang bok chun Pathienin a lunginsietna leia a thlang suok tlawma zawng an um. 6 A lunginsietna leia thlang suok an ni chun, an thilthaw lei a ni thei nawh; chuong naw chun lunginsietna chu lunginsietna ni thei naw nih. 7 Ieng tin am ni tâng a ta le? Israelhaiin an zong chu an hmu naw a, Pathien thlang mi tlawmte chauin an hmu a, mi dang po po chu an chawlol zo tah a nih. 8 "Pathienin voisun chen hin inlusùkna thlarau a pêk a, mita hmu thei nawna le naa hriet thei nawna leh" ti ziek ang khan. 9 Lal Davida chun, An ruoi chu châng inchang sien, Inremna ruoi an kîl khom, Bilah inchangpèk raw se. 10 An mithai sukdelpèk la, Khuo hrim hmu thei naw hai sien, An zâng inkûl song raw sey a lo ti bok a. 11 Anleh, an insui thlùk chu an tlu song dim a ni? Tlu song lo e! An tlùkna leiin Jentêlhai kuomah sandamna a hung tlung a, Israelhai inhnar dingin. 12 Chuongchun, an tlùkna hman khawvel sukhausakna a ni a, an tlâk hnuoina hman Jentêlhai hausakna a ni bok si chun, an hung thang kim pha chun hausakna ropui lem an va'n tlun nasa awm de! 13 Nangni Jentêlhai kuomah thu ka hril a ni hi. Kei hi Jentêlhai ta dinga tirko ka ni leiin ka rongbawl sin hi ka ngaihlu a nih; 14 ka chipuihai ka'n thîktir cheu a nih, a then bêk ka sandam theina dingin. 15 Anni hnawla an umna hman khawvel hi Pathien le inremtirna a ni si chun, anni lawm lût nawkna chu thìnaa inthoka hring nawkna a ni naw di'm a ni? 16 Bei tlang hmet laia a hlek sik thlàk hmasa tak chu inser thienghlim a ni chun a tlang hlawm po chu inser thienghlim a ni hlak a; chuong ang bokin thing khom a zung a thienghlim chun a kâuhai khom an thienghlim hlak. 17 Oliv kàu zâr thenkhat a tliek leiin nangni oliv puopa chu oliv kungah zom in ni a; zung hrisel chu in intawmpui ve tah a. 18 Chuleiin, zâr danghai lakah uong tum in ni khoma uong thei in ni nawh, a zung chawmtu in ni naw a, a zungin a chawm lem chêu a nih. 19 Chun, nangin, "Zoma ka um theina dingin zâr thenkhat chu sàt thlàk a ni annawm" i ti a ni thei. 20 I hril indik ie; an ring naw leiin sàt thlàk an ni hrim a, nang chu i ring leiin zom i nih. Chapo el naw la, ti hlé lem rawh. 21 Pathienin zâr takhai hman a hlá si naw chun nang khom hlà bik naw ni che. 22 Pathien ngilneizie le khauhzie ngaituo hlak rawh; a tluhai chungah a khauh hle a, a ngilneinaah i um zing ruok chun i chungah ngilnei zing a ta, i um zing naw chun nang khom sàt thlâk ni vêng i tih. 23 Chun, anni khom ring loa an um zing naw chun zomin la um nawk an tih, Pathienin anni chu a zom nawk thei si a. 24 Nang oliv puopaa inthoka sàt thlâk hman, pienphung pangngai ang loa oliv thing thaa zom i ni si chun, oliv indik tak zâr chu oliv thing indika zom chu a va olsam awm ngei de! 25 Unauhai, hi thurûk hi in hriet naw ka nuom nawh, chuong naw chun var bikah lo inngai pal hlauh rawi in tih. Jentêlhai an lùt kim hma chun Israel mi thenkhathai lungrilah ngongna a la tlung hrî phot a ni hi. 26 Chuongchun, Israelhai chu sandamin la um vong an tih ti chu Pathien Lekha thuin a lo ziek ta kha:Ziona inthokin Sandamtu hung a ta, Jakob thlahai rîtlona po po chu, La la hmang vong a tih; 27 Chu chu ka thuthlung ding chu a nih, An suolhai ka lâk hmang pha chun. y 28 Chanchin Tha chungthua chun, in chan thatna dingin hmêlmaah an inchang a; sienkhom Pathien thlang an ni leiin, an thlatuhai zàrin, a dittakhai an ni zing tho. 29 Pathienin mi mal a sawm tah le a thlang tahai chu sût nawk thei a ni nawh. 30 Kha hma khan Pathien thu in awi naw a, tu ruok hin chu annin an awi naw leiin a lunginsietna in dong tah a. 31 Chuong ang bokin, tu hin nangnin lunginsietna in dong leiin anni khoma lunginsietna an dong ve theina dingin an awi hrì naw a ni hi. 32 Pathien chun mi po po chungah a lunginsietna a'n langtir theina dingin awi nawnaah a khum khawm tawl vong a nih. 33 Pathien hausakzie, varzie, hrietzie, Aw a va'n thûk ngei de!A rorêl dàn hriet phâk ruol lo, A lampuihai khom sui suok ruol lo, A lo va ni ngei de aw! 34 Tu am Lalpa lungril hre a, A remruotpêktua thang ta hlak? 35 Pathien rul nawk beisei a, A kuoma thil pe tu'm an um hlak a? 36 Thil po po hi amaa inthoka um, Ama lei le ama ta dinga um, An lo ni vong tlat si a; A kuoma chun chatuonin, Ropuina um raw se, Amen.

Romans 12

1 Chuleiin unauhai, Pathien lawm tlàk inthawina hring le thienghlima in taksa chu inhlàn dingin Pathien lunginsietna zàrin ka ngên cheu; chu chu thlaraua in chawibiek dàn ding tak chu a nih. 2 Hi khawvel um dàn hi zawm ta loin, lungril thar putin inthlâkthleng unla; chuongchun, Pathien ditzawnga tha, lawm tlâk le famkim chu hung hre fie thei tâng in tih. 3 Nangni lai tu khom mani nìna bâka inngai sâng lo a, lungril fîm puta mani inbi chieng a, Pathien mi pèk ei ringna phù tawk ang peia insie lem dingin Pathienin lunginsietna a mi pèk zârin ka ngên cheu a nih. 4 Taksa pum khatah bung hrang tam tak ei nei a, bung hrang hrang sinthaw a dang seng a. 5 Chuong ang bokin, tam tak ni inla khom Kristaa chun taksa pum khat ei na, ei rêng hin taksa bung anga inpêng tuo vong ei nih. 6 Lunginsietna a mi pèk ang peiin thilpêk tum tum ei nei a, chuong ang tak chun hmang ei tiu. Thuhriltu ei ni chun ei ringna le inphù tawkin hril ei tiu. 7 Rongbawltu ei ni chun thahnemngai takin bawl ei tiu. Zirtirtu ei ni chun zirtir ei tiu. 8 Infuitu ei ni chun mi chokphûr ei tiu. Somdawltu ei ni chun phal takin pêng ei tiu. Thuoitu ei ni chun taima takin thuoi ei tiu. Lunginsiettu chun hlim takin lunginsiet ei tiu. 9 Hmangaina chu a takin ni raw se. Suol chu theidà unla, a thà chu pom tlat ro. 10 Unau an inlainat angin inlainat tuo unla, mani nêkin mi dang chawimawi uor lem ro. 11 Inthlàdà ngai naw unla, lungril phûr takin Lalpa rong chu bawl ro. 12 Beiseina chun suklawm sien la cheu, sukdùdàna chu sel takin tuor unla, ieng lai khomin tongtai ro. 13 Pathien mihai tlâksamna chu somdawl unla, mikhuol lawm hlak ro. 14 A suknomnatuhai chèu chu malsawm unla, tongsie inphur naw ro. 15 Lawmhai chu lawmpui unla, taphai chu tappui ro. 16 Mi leh inrem takin um diel diel unla, chapo naw unla, mi hnuoihnunghai chu inpawlpui lem hlak unla, indù ngai naw ro. 17 Suol chu suolin thungrul naw unla, mi po po ngaia mawi chu ngaituo lem ro. 18 A thei phot chun, nangni tienga bek mi po po leh inrem tum ro. 19 Dittakhai, phuba la naw unla, Pathien lungsennaa rul dingin khêk lem ro; "Phuba lâk chu ka chan a nih, keiman thungrul ka tih" Lalpan a tih, ti ziek a ni si a. 20 Chuong nèk hmanin, "I hmêlma a phing a tâm chun bu pe la, A dang a châr chun dawn ding pe rawh. I pêk chun a luah meiling i sie khawl nîng a ta, LALPAN lawmman pêng a ti che. " 21 Suol hnèin um naw la, suol chu thatnain hnè lem rawh.

Romans 13

1 Mi tinin an chunga rorêltuhai thu awi raw hai se. Pathien ruot loin rorêltu an um thei nawh. Tuta rorêltuhai khom hi Pathien ruot an nih. 2 Chuleiin, rorêltu dodàltu taphot chun Pathien ruot a dodàl a na, a dodàltu chun a chungah hremna intlungtir a tih. 3 Rorêltuhai chu thil tha thawtuhai ta dingin an tium naw a, thil tha naw thawtuhai ta ding ruok chun an tium a nih. Rorêltu ti loa um i nuom am? Thil tha thaw la, inpâk hlawng i tih. 4 Rorêltu chu i thatna dinga Pathien rongbawltu a ni si a. Thil suol i thaw ruok chun tì hlê rawh, nuoma kawlhnâm chawi mei mei a ni nawh! Pathien rongbawltu a ni a, thil suol thawtuhai hremtu a nih. 5 Chuleiin, hrem tì lei ni loin, i sie le tha hrietna lei khomin thuneituhai thu chu i zawm ding a nih. 6 Chuong chu a ni leiin sie khom in chawi hlak. Thuneituhai chu Pathien rongbawltu an na, an hun po po rorêlna sina inhmang an nih. 7 Tu chunga khom bat in nei chun tlâk unla, leiman in bat chun pe unla, sie chawi ding a ni leh chawi unla, inzà ding chu inzà unla, chawimawi ding chu chawimawi ro. 8 Inhmangai tuona ngot naw chu tu thil khom bat naw ro. Mani mihriempui hmangaitu chun Dàn a hraw kim tah a nih. 9 Hieng 'uire naw, tuol that naw, inru naw, inhnar naw' ti le thupêk dang hrim hrim hi 'Nangma i'n hmangai angin i vênghai hmangai rawh" ti hin a fùn khawm vong a nih. 10 Hmangainain khuo le vênghai poi a tawk ngai nawh. Chuleiin, hmangaina hi Dàn hraw kimna a nih. 11 Chu bâkah, tu lai thil umzie hi in hriet a, inhai ta dingin thang har a hun tah takzet a nih, ei ring tìr lai nêk khan tuhin ei sandamna chu a hnai lem ta si a. 12 Zàn hi a bo váng vàng tah a, khuo a var ding a ni tah. Chuleiin, thim thilthawhai chu bànsanin var thuom inbel ei tiu. 13 Nuom chèna inrui chiri loin, zâuthâu le indit hmanga um loin, innghirngho le inthîk tuo bok loin, sùn vara umhai angin inzaum takin um ei tiu. 14 Lalpa Isu Kristaa chun inthuom lem unla, in tisa châknahai chu sukpuitling tum hrim hrim naw ro.

Romans 14

1 Ringnaa mi hrât naw chu, a ngaidan insêlpui kher loin, lawm lût el ro. 2 Mi pakhatin iengkim fàk thiengin a ring a, mi hrât naw ruok chun thlài chauh a fâk a. 3 Iengkim fatu chun a fa ve nawtu chu hmusit naw sien, a fa nawtu chun a fatu chu soisel bok naw raw se, Pathienin ama chu a pom ve tho si leiin. 4 Mi dang siehlaw lo soiseltu chu tu am i ni leh? A ngìr amanih a tlùk amanih chu a pu thu annawm. Ngîr a tih, Lalpa chun a'n ngìrtir thei si a. 5 Mi pakhatin ni khat hi ni dang nêkin a ngaihlu bìk a, mi dangin ni po po inang vongin a ngài thung a. Mi tinin mani ngaidàn chiengkuong tak nei ding a nih. 6 Ni pakhat inser bîktu chun Lalpa chawimawina dingin a'n ser a nih; iengkim fatu chun Pathien kuoma lawmthu hrila fa a ni leiin Pathien chu a chawimawi a nih. Fâk tienga insûm mi khom chun Pathien kuomah lawmthu a hril tho leiin Lalpa chawimawina dinga a thaw a nih. 7 Tu khom mani ta dinga hring ei ni naw a, tu khom mani ta dinga thi ei ni bok nawh. 8 Ei hring leh Lalpa ta dinga hring ei na, ei thi khomin Lalpa ta dinga thi ei nih. Chuleiin, ei hring khomin, ei thi khomin, Lalpa ta ei nih. 9 Hi lei tak hin, a dam lai le a thi tahai Lalpa a ni theina dingin Krista chu a thi a, a hring nawk tah a nih. 10 Chuong a ni si chun, ieng dinga nangin i unaupa chu i soisèl am a na? Ieng leia i unaupa chu i hmusit? Pathien rorêlna lalthungpha hmaah ei la ngîr vong ding a ni si a. 11 " 'Hring zing chu ka ni leiin, Mi tin ka hmaah kûn an ta, Lei tinrêng Pathien hmaah inpuong an tih'Lalpan a tih"z ti ziek ang khan. 12 Chuongchun, ei rêngin Pathien hmaah mani chungthu seng ei la hril ding a nih. 13 Chuleiin, insoisel tuo hi bânsan ei ta, mani unau tlùkna le lampui dàltua thang tum ta naw seng lem bok ei tiu. 14 Lalpa Isua chun thil hrim hrim ama ngota inthieng lo ieng khom a um nawh ti ka hriet chieng. Amiruokchu, thil thenkhat thieng loa ngaitu ta ding chun thil thieng lo a ni el a nih. 15 I thil fâk leia i unau lungril a na chun hmangaina lampui i hraw ta nawh tìna a nih. I thil fâkin i unau sietna intlun naw raw se, a ta dingin Krista a thi si a. 16 Tha in tizawng chu suol anga an hril hnawm phal naw ro. 17 Pathien ram chu fàk le dawn thil a ni si nawh; Thlarau Thienghlim zâra thiemchangna dàm, inremna dàm le lawmna dâm a ni lem. 18 Chuong anga Krista rongbawltu taphot chu Pathien lawmzawng mi a na, mihriem inpàk khom a hlaw hlak. 19 Chuongchun, inremna le insuksawt tuona thilhai chu theitawpin hnot ei tiu. 20 I thil fâkin Pathien sinthaw sukse naw raw se. Thil iengkim fâk a thieng a, sienkhom mi dang tlùk theina fàk ruok chu a tha nawh. 21 Sa fâk hai, uoiin dawn hai, i unau tlûk theina thil hrim hrim chu chîng lo a tha. 22 Hieng thila i ring dàn chu Pathien le in inkâr thuah sie rawh. Mani ring dàn ang zawng thawa lungrila inthiem nawna nei lo mi chu a hamtha. 23 Sienkhom, ringhla puma fatu chun thiem naw a chang zing tah a nih, a ring dàn naw anga a thaw leiin. Iengkim hi ringnaa inthoka suok a ni naw chun suol a nih.

Romans 15

1 Eini a hrât lemhai hin mani lawmna zong loin a hrât naw lemhai hràt nawna chu phuhrûk lem ei tiu. 2 Mani tuolbawmhai thatna ding zonga suklawmin, dom sàng tum seng ei tiu. 3 Krista khomin mani lawmna a zong si nawh. "Nangma deusawtuhai cheksolna chu ka chungah a tla tah" tia ziek ang khan a tuor ta lem a ni kha. 4 Kha hmaa inthoka Pathien Lekha Thua zieka lo um ta hrim hrim hai kha inchûktir nei vong an na, tuorselna le phùrna nei a, beiseina ei nei theina dinga ziek an nih. 5 Selna le phùrna petu cheu Pathien chun, Krista Isu in zuinaah, thlarau hmun khat inputtir sien la chêu, 6 chuongchun, lungril hmun khat puta zài khata luongin, ei Lalpa Isu Krista Pa le Pathien chu inpâk tlàng thei in tih. 7 Pathien ropuina dinga Krista'n a lawm chêu ang bok khan inlawm tuo ro. 8 Ka hril chêu hi, Pathien ringumzie sukchiengna dingin, thlatuhai kuoma a thutiemhai chu hlenin, Krista chu sertan Judahai rongbawltuah a hung um a. 9 Chu chu Jentêlhai khomin a lunginsietna leia Pathien an chawimawi theina ding a nih, "Hi lei hin Jentêlhai laiInpâk ka ti che a; I hming inpakin hla sak ka tih"a tia ziek ang khan. 10 Chun, hieng ang hin a lo ti bok:"Aw Jentêlhai, Ama mihai le chun lawm ro. " 11 Hieng ang khom hin a lo ti a:"Jentêl po po hai, Lalpa chu inpâk ro; Ama mihai po po khomin, Inpâk raw hai se. "b 12 Isai khomin hieng hin a lo hril a:"Jesai zungzàm inchor suok a ta, Jentêlhai chungah inlal a ta, Jentêlhai chun amaah, Beiseina la'n nghat an tih. "c 13 Thlarau Thienghlim thilthawtheina zàra beiseinaa in sip liem theina dingin, beiseina hnâr Pathien chun in ringna leiin lawmna le thlamuongna tinrêngin vûr raw se cheu. 14 Ka unauhai, nangni rawi hi thatnaa sip, kong tinrênga varna hau le inzirtir tuo thei ding in nih ti ka ring tlat a nih. 15 Amiruokchu, thil thenkhat inhriet nontir ding cheuin ka hung ziek a, Pathienin lunginsietna a mi pèk zârin thil thenkhat lem chu ka ziek huoi hlè a nih. 16 Jentèlhai chu Thlarau Thienghlim sukthienghlima um a, Pathien lawm tlàka an inhlàn theina dingin, anni laia Chanchin Tha hril hi Krista Isuaa ka thiempu sin a nih. 17 Chuleiin, Krista Isua chun hienga Pathien rong ka bawl hi ka suong hlè a nih. 18 Pathien thu Jentêlhai inawitir dinga Thlarau thangpuina zàra thu le thilthawhai, inchikna le thilmak thaw theinahai hmanga Kristan keimaa thil a thawhai chauh naw chu ieng khom hril ka tum nawh. 19 Jerusalema inthoka Ilurikon le a sè vêl chen hmun tinah Krista Chanchin Tha ka hril vong tah. 20 Mi dang lungphùm rem ta sa chunga ka rem nawna dingin, Krista hming an la lam ngai nawna hmun taphota Chanchin Tha puong dar hi ka thil tum a ni si a. 21 "A chanchin hrilna ngai lo mihai chun, Ama chu la hmûng an ta; La hre ngai nawtuhai chun, La hung hrieng an tih"d ti ziek ang khan. 22 Chu lei chun a nih, in kuoma ka hung ding ka thul rop hlak chu. 23 Tu ruok hin chu hieng lai biela hin ka ta dingin rongbawlna hmun a um ta naw bàkah nangni hung kan cheu ka'n hawkna hi kum tam a ni tah a; 24 Spain ram ka sir malamin hung sir cheu ka beisei a, nangni leh hun iemani chen ei inpawl hlim zet hnungah ka'n zin peinaa khom in mi thangpui ka beisei bok a. 25 Tu ruok hin chu mi thienghlimhai rong bawl dingin Jerusalemah ka la fe phot ding a nih. 26 Makedonia le Akaia rama mihai chun phal takin Jerusalema mi thienghlimhai laia retheihai ta dingin thawlawm an thaw a. 27 Phal taka thaw an nia chu anni lakah bat an nei ve hrim a nih, Jentêlhaiin an thlarau tieng thil an intawmpui chun, khawvel tieng thila anni an somdawl ve thung chu an thaw awm hrim a nih. 28 Chu chu thaw a, anni kuomah thawlawm kan hlàn fel zet hnungin Spain ram ka pan malamin hung sir ka ti cheu. 29 In kuoma ka hung pha chun Krista malsawmna famkim leh ka hung ding a nih ti ka hriet. 30 Unauhai, ei Lalpa Isu Krista le Thlarau Thienghlima in mi hmangaina chun Pathien kuomah mi tongtaipêk ngat ngat dingin ka ngên chêu a nih. 31 Judai rama ring nawtuhai laka ka him theina ding dàm, ka rongbawlna hi Jerusalema mi thienghlimhai ta dinga thil lawmum tak a ni theina ding dàm, 32 Pathien remtia lungril hlim taka ka hung theina ding dàm le ei insukhar tuo theina ding dàmin mi tongtaipêk ro. 33 Remna Pathien chu in rênga kuomah um raw se. Amen.

Romans 16

1 Ei farnu Foibi, Kenkiriei kohrana rongbawltu hi inhmèlhriettir chêu ka nuom a. 2 Ama hi mi thienghlimhai thaw hlak ang hrima Lalpa hminga lo lawm ding le thangpui a ngaina taphota thangpui dingin ka ngèn chêu a nih. Ama hi mi tam tak thangpui hlaktu a ni a, kei ngei khom a mi thangpui a nih. 3 Prisila le Akuila, Krista Isua ka rongbawlpuihai kha chibai ka bûk. 4 Ka ta dingin thi an inhuom a; kei chauh ni loin Jentêl kohranhai po po khom an chungah an lawm a nih. 5 An ina kohran inkhawmhai kha chibai ka bûk. Ka dit tak Epaineta, Asia biela ringtu hmasa tak kha chibai ka bûk. 6 Mari, in ta dinga inrim taka thok hlak kha, chibai ka bûk. 7 Andronika le Junia, ka chipui le lung ina ka'n tângpuihai kha, chibai ka bûk. Anni kha tirkohai laia hmingthang tak an na, keia nêk khoma Krista ring hmasatu an nih. 8 Ampliata, Lalpaa ka dit tak kha chibai ka bûk. 9 Kristaa ka rongbawlpui Urbana le ka ruol dittak Staki hai kha chibai ka bûk. 10 Kristaa mi tak, Apelia kha chibai ka bûk. Aristobul sûnghai kha chibai ka bûk bok. 11 Ka chipui Herodian kha chibai ka bûk. Narkisa sûnghai laia mi Lalpaa umhai kha chibai ka bûk. 12 Trifeni le Trifosi, Lalpa sin inrim taka thawtu nupuihai kha chibai ka bûk. Dittak Persi, Lalpa ta dinga inrim taka thoktu kha chibai ka bûk. 13 Lalpa rongbawlna sina mi langsar Rufa le a nu, ka nu ve tho hai kha, chibai ka bûk. 14 Asunkrita hai, Flegona hai, Hermia hai, Patroba hai, Herma hai le an kuoma um unauhai le khan chibai ka bûk. 15 Filologo le Juli leh, Nire le a farnu Olimpi le an kuoma mi thienghlim um po po hai chibai ka bûk. 16 Fawp thienghlimin in chibai tuo unla, Krista kohranhai hin chibai kan bûk bok cheu a nih. 17 Unauhai, zirtirna thu in dong tahai kal zawnga nangni laia innghirnghona le intheidàna siemtuhai laka chun invêng fîmkhur ding le anni chu nghatsan dingin ka ngèn chêu a nih. 18 Chuong mihai chun ei Lalpa Krista rong bawl nêkin mani phingpui chauh an ngaituo hlak. An dang innàlna le mi inpâk der an thiemna chun mi mawlhai an hlêm hlak. 19 Chanchin Thaa in nghetzie mi tin hriet a na, chuleiin kei khom in chungah ka lawm a nih. Thil tha tieng var a, suol tienga in mawl ka dit a nih. 20 Remna Pathien chun Setan chu in ke hnuoiah insir dètir vak a ti chêu. 21 Ka rongbawlpui Timothe le ka chipui Lukia hai, Jason hai, Sosipater hai hin chibai an bûk chêu. 22 Kei Tertia, hi lekha ziektu hin Lalpa hmingin chibai ka bûk chèu. 23 Ka tlungna pa, kohran inkhawmna lo dongtu Gaia hin chibai a bûk chèu. Khaw sûnga sum enkoltu Erasta le ei unaupa Kuarta khomin chibai an bûk chêu. 24 Ei Lalpa Isu Krista lunginsietna chu in kuomah um raw se. 25 Tuhin, tiena inthoka thu ril inthup puonga um, Isu Krista thu, ka Chanchin Tha hrila suknghet theitu chêu Pathien chu chawimawi ei tiu. 26 Chu thu inthup hlak chu, ziek ngeia zawlneihai lo hril lawk angin, puong suokin a hung um tah a, tu khomin ringa an awi theina dingin, chatuon Pathien thupêk angin hnam tin lai inhriettir a ni tah. 27 Ama chauh Pathien var um sun kuoma chun Isu Krista leiin chatuonin ropuina um raw se. Amen.

1 Corinthians 1

1 Paula, Isu Krista tirko ni dinga Pathien ditzawng anga ko le ei unaupa Sosthen chun: 2 Korinth khuoa Pathien Kohran, Krista Isua sukthienghlim, mi thienghlim ni dinga ko le Lalpa Isu Krista, anni le keini Lalpa hming lamtuhai po po chibai kan bûk chêu. 3 Pathien ei Pa le Lalpa Isu Kristaa inthoka lunginsietna le inremna chu in kuomah um raw se. 4 Pathienin Krista Isua lunginsietna a pèk chêu leiin in ta dingin ka Pathien kuomah lawmthu ka hril rop hlak. 5 Amaa chun kong tinrêngah, thuhrilna tieng le hrietna tinrêngah, sukhausakin in um a, 6 in kuoma Krista thu kan hung hril khan nangniah zung a kei nghet tah a. 7 Chuleiin, ei Lalpa Krista hung inlang ding phûr taka in nghâk sùng hin thlarau thilpèk ieng khom in tlasam naw hi. 8 Ei Lalpa Isu Krista nia soisel boa in um theina dingin a tawp chenin sukhrât a ti chêu. 9 A Naupa, ei Lalpa Isu Krista le inpawlnaa ko lûttu chêu Pathien chu a ringum a nih. 10 Unauhai, nangni lai inthèna um loa, lungril le ngaituona hmun khat put dingin ei Lalpa Isu Krista hmingin ka ngèn chêu a nih. 11 Ka unauhai, nangni lai insêl inhalna a um ti Kloi sùnghaiin an mi hril a. 12 Ka hril chu, 'Kei Paula pawl, kei Apollo pawl, kei Kifa pawl, kei Krista pawl' in inti thîm thêm tawl hi a nih. 13 Krista chu thèin a um am a ni?a In ta dingin Paula chu hemde a ni maw? Paula hmingin baptisma in chang am a ni? 14 Krispa le Gaia naw chu nangni lai tu khom ka baptis naw leiin ka lawm. 15 Chuong naw chun tuhaiin amanih ka hminga baptisma chang angin lo inhril pal rawi an tih. 16 Stefan sûnghai khom ka baptis takluo kha. Chuonghai ti naw chu tu khom ka baptis ka hriet nawh. 17 Krista chun baptis dingin a mi tir naw a, Chanchin Tha hril dingin a mi tir lem a nih. Mihriem varna hmanga hril dingin a mi tir nawh, Krista kraws thilthawtheina chu ieng khom loa an ngai pal nawna dingin. 18 Kraws thu chu bohmang mèkhai ta ding chun thu invêtthlàk a na, eini sandama um mèkhai ta ding ruok chun Pathien thilthawtheina a nih. 19 Mi var varna chu sukbohmang ka ta, Mi thiem thiemna chu hnawl ka tih'b ti ziek a nih. 20 Khaw la'm in tu lai mi varhai, mi thiemhai le dawnrilhai chu an um a? Hi khawvel varna hi Pathienin invêtthlàkah a siem tah annawm a ni? 21 Pathien var dàn le a lawmzawng chu, khawvelin a varna hmanga Pathien an hriet thei ta naw hnunga keini thu hril invêtthlàk hmanga a ringtuhai sandam hi a nih. 22 Judahai chun inchikna thilmak an phût kher hlak a, Grikhai hlak chun varna ngot an zong a, 23 keini ruok chun hemde Krista thu chu kan hril lem hlak a nih; chu chu Judahai ta dingin dâltu a na, Jentêlhai ta dingin thil invêtthlàk a ni bok. 24 Amiruokchu, Juda mi khom ni sien, Grik mi khom ni sien, Pathienin a kohai ta ding chun Krista chu Pathien thilthawtheina le Pathien varna a nih. 25 Pathien invètna chu mihriem varna nêkin a var lem a, Pathien hrât nawna khom mihriem hrâtna nêkin a hrât lem. 26 Unauhai, ko in ni laia in ngîrhmun kha ngaituo ro, nangni laia mi tam tak hi mihriem inkhìnaa chu mi var in ni naw a, mi thilthawthei tak khom in ni naw a, sûngkuo thaa inthoka hung khom in ni bok nawh. 27 Nisienlakhom, Pathienin khawvel ngaia thil invêtthlàkhai chu mi varhai sulmuolphona dingin a thlang a; khawvel ngaia thil ongrophai chu thil hrâthai sukmuolphotu dingin a thlang bok a. 28 Thil um ta sahai chu ieng khom loa a siemna dingin hi khawvela thil hnuoihnung le hmusitum le thil um lohai chenin a thlang bok a nih, 29 Pathien hmaah tu khom an uong thei nawna dingin. 30 Nangni ruok chu Ama zârin Krista Isua chun in um tah a, ama chu Pathiena inthoka ei varna, ei felna, ei thienghlimna le ei intlanna a hung ni tah. 31 Chuleiin, 'A uong nuom taphot chun Lalpa uongpui raw se' ti ziek khom a ni kha.

1 Corinthians 2

1 Unauhai, Pathien thu ril inhriettir dinga in kuoma ka hung khan bâu themthiem bik le var bik angin ka hung naw kha. 2 In kuoma ka châm sûng khan Isu Krista le ama ngei kraws-a hemde a ni thu chauh naw chu ieng dang hriet ni ka tum bok nawh. 3 In kuomah hrât naw tak le ti le inthin dor dorin ka hung a, 4 ka thucha le thuhril iengkimah varna le tongkam tlor ka hmang naw a, Thlarau thilthawtheina suklang zawngin ka hril hlak kha; 5 in ringna chu mihriem varnaa innghat ni loa Pathien thilthawtheinaa innghat a ni lemna dingin. 6 Puitling lai ruok chu varna thu kan hril hlak kha, chu chu tu lai mihai varna thu le tlawm el ding an hotuhai varna thu a ni nawh. 7 Pathien varna inthup le inril chu kan hril a, chu chu ei ropuina dinga khawvel siem hmaa inthoka Pathienin a lo ruot lawk tah chu a nih. 8 Chu chu hi khawvel rorêltu tu khomin an hriet nawh, hrie ni hai sien ropuina Lalpa chu hemde naw ni hai. 9 Pathien Lekha thuin, 'Mita hmu ngai lo, naa hriet ngai lo, Lungrila an la phan phàk lo, Ama hmangaituhai ta dingaPathienin a buotsaipêk chu'c a ti thu chu kan hril lem a nih. 10 Chuong thu chu kan kuomah Pathienin Thlarauin a hung puong a nih. Thlarau chun iengkim, Pathien inrilna khom a dap suok hlak. 11 Mihriem ngaituona chu amaa um thlarau chau naw chun tuin am a hriet a? Chuong ang bokin, Pathien ngaituona khom Pathien Thlarau chauh naw chun tu khomin an hriet nawh. 12 Khawvel thlarau ei dong naw a, Pathiena inthoka suok Thlarau chu ei dong lem a nih, Pathien thilthlawnpêkhai ei hriet thiem theina dingin. 13 Mihriem varnaa thu kan inchûkhai chu hmang loin, Thlaraua thu kan inchûkhai chu hmanga thu hril lemin, thlarau mihai kuomah thlarau tieng thil kan hril fie hlak. 14 Tisa mi chun Pathien Thlarau thil ieng khom a lawm naw a, a ta ding chun thil invêtthlàk a na, thlarau chauha hriet thei a ni leiin a hriet thei bok nawh. 15 Thlarau mi ruok chun iengkim a bûk thiem a, ama chu mihriem tu khom soisel ruol a ni si nawh. 16 Tuin am Lalpa lungril hre a, Ama chu zirtir thei ding?d Eini ruok chun Krista lungril ei put a nih.

1 Corinthians 3

1 Unauhai, thlarau mihai kuoma ka hril angin in kuomah thu ka hril thei naw a; tisa mi, Kristaa nautehai kuoma hril angin ka hril hlak chêu a ni kha. 2 Bu changrum in la fàk phàk naw leiin nenetuiin ka chawm hlak chêu a; tu chen khom hin in la fâk thei naw hi. 3 In la tisa mi êm lei a nih. Nangni lai inthîkna le inhalna a um zing sûng chun tisa mi, khawvel mi taka la khawsa in nih tìna a ni naw am a ni? 4 Nangni lai "Kei Paula pawl ka nih, kei Appolo pawl ka nih" ti dâm in la um sung chun in la tisa mi hlè tìna a ni naw maw? 5 An leh Appolo chu iem a na? Paula khom chu iem a ni bik leh? In ring theina dinga rongbawltu chau an nih; chu khom chu Lalpan thaw ding chan a pêk ang peia thok an nih. 6 Keiin ka phun a, Appoloin tuiin a chawm a, sienkhom Pathienin a'n thanglientir a nih. 7 A'n thangtirtu Pathien chauh naw chu a phuntu le a chawmtu chu ieng khom an ni nawh. 8 A phuntu le a chawmtu thil tum chu thuhmun a na, an sin inrim ang hû peiin lawmman hmu vé vèng an tih. 9 Pathien ta dinga thaw tlâng kan ni si a, nangni hi Pathien lohma le Pathien in bawl chu in nih. 10 Pathienin lunginsietna a mi pèk ang peiin, in bawltu themthiem tak angin keiin a lungphùm ka phùm a, chu lungphùm chunga chun mi dangin an hung bawl a; sienkhom an bawl dàn thuah fimkhur seng raw hai se. 11 Lungphùm rem ta sa naw chu tu khomin lungphùm dang an phùm thei nawh, chu lungphùm chu Isu Krista a nih. 12 Chu chunga chun miin rangkachakin amanih, tangkaruoin amanih, lungmantamin amanih, thingin amanih, sawlhnain amanih, bupawlin amanih a bawl a ni chun, 13 mi tin sinthaw that le that naw dàn chu la'n lang fieng a tih; Krista Ni-ah sukchieng a la ni ding a ni si a, meiin a'n lâr ding a ni leiin. Mei chun mi tin sinthaw chu fie seng a tih. 14 Tu in bawl khom a kàng naw chun, chu mi chun lawmman hmûng a ta; 15 tu in bawl khom a kàng chun chu mi chun chân a ta, ama tak ruok chu sanhim ni hrâm a tih, mei pal tlang ang elin. 16 Pathien chêngna tempul in ni le Pathien Thlarau nangniah a chêng ti in hriet naw am a ni? 17 Mi tu khomin Pathien tempul chu a sukkhawlo chun Pathienin ama khom sukkhawlo vèng a tih, Pathien chêngna tempul chu a thienghlim si a; chu tempul chu nangni in nih. 18 Tu khomin mani inhlèm naw ro. Nangni lai tu khomin hi khawvel ngaia var nia a'n hriet chun a hung var tak tak theina dingin invêt hmasa phot raw se; 19 hi khawvel varna hi Pathien mita chu thil invètthlàk a nih. "Ama chun mi varhai chu an var vervèknain a awk hlak" ti ziek a ni si a. 20 "Lalpa chun mi varhai ngaituona chu iengma lo el a nih ti a hriet" ti a ni bok a. 21 Chuleiin, tu khomin mihriem chu uongpui ta naw raw hai se. Iengkim hi in ta vong a nih. 22 Paula amanih, Appolo amanih, Kifa amanih, khawvel amanih hringna amanih, thïna amanih, tu hi amanih, la hung tlung ding amanih, a rêngin in ta vong a nih. 23 Nangni hi Krista ta in na, Krista chu Pathien ta a nih.

1 Corinthians 4

1 Keini hi mihaiin Krista rongbawltu le Pathien thurûk enkoltuah mi ngai raw hai se. 2 Chun, enkoltua ruothai chu an ringum phot ding a nih. 3 Nangni amanih, mihriem rorêltuhaiin amanih in mi lo inkhìna hi ieng rakah ka ngai nawh, keima ngei khom ka'n khì ngai bok nawh. 4 Ka sie le tha hrietnain inthiem nawna ieng khom ka nei naw a, sienkhom soisel bo ka nih tìna chu a ni chuong nawh; a mi'n khìtu chu Lalpa a ni lem. 5 Chuleiin, Lalpa hung hma, a hun ruot a tlung hma chun inkhì el naw ro. Ama chun thima thup rûkhai le mihriem lungrila tum rûkhai po po chu varah hung phor lang a ta, mi tinin mani phû tawk ang sengin Pathien inpàk hlawng an tih. 6 Unauhai, "Thu zieka um bâk chu thaw naw ro" ti kha in inchùk theina dingin kei le Appolo hi in enton dingin ka hung inlàk a nih, tu khomin pakhat suong a, pakhat lem in hnuoisie nawna dingin. 7 Mi dang nèka chunghnung bikin tuin am an en cheu a? In dong naw iem nei in nei a? In dong a ni si chun ieng dinga dong lo anga in uong am a na? 8 In burip tah ie maw! In hausa tah hi tie maw! Keini thang lo khomin in inlal ta khop el! Inlal tak tak chu ni unla kan va ti dê, in zâra hang inlal ve ding chu! 9 Keini tirkohai ruok hi chu thi dinga ruothai hnung dâla Pathienin a nuhnung taka a mi sie amanih ka ti hiel hlak, a san chu khawvel le vàntirkohai le mi po po ennuom kan inchang tah hi. 10 Keini chu Krista leiin mi invêt kan na, nangni ruok chu Krista leiin mi var in nih. Keini kan hràt naw a, nangni in hràt thung a. Keini chu mi hmusit kan ni a, nangni chu mi ngaisàng in nih. 11 Tu chen khom hin phingtâm le dangchârin, silfèn tiek inbelin, mi kut thak nùlnaa thangin kan invakvai a. 12 Kuta inrim taka sinthawin fàk kan zong a, miin tong sie an mi'n phur leh mal kan sawm thung a, an mi suknomna leh sel takin kan tuor a, 13 an mi biek sìsaw leh zaidam takin kan don a. Tu chen khom hin hnuoi hmunhnok, khawvel hnawmtinphur ang chaua mi ngâi kan nih. 14 Hieng thil hi sukzak ding chèua ka ziek a ni naw a, ka nau dittakhai anga zilna ding chèua ka ziek a nih. 15 Krista tienga keihruoitu ding chêu a sîng têlin nei inla khom, pa ruok chu tam tak in nei nawh: kei hi Kristaa in pä, Isu Chanchin Thaa hringtu cheu chu ka nih. 16 Chuleiin, mi enton dingin ka ngèn chêu a nih. 17 Hi lei hin ka nau dittak, Lalpaa mi ringum Timothe chu in kuomah ka hung tir a nih; ama chun Kristaa ka nun dàn ang char hmun tina kohranhai ka'n chûktir hlak chu, inhriettir nawk a ti chêu. 18 In kuoma kei hung nawk ta naw ding ang elin thenkhat chu in insukngêng hle a. 19 Lalpan rem a ti chun ka hung kan nawk vak ding chèu a na, chu huna chun hieng mi uongthuonghai hin iem an hril ti le ieng thilthawtheina am an nei ti la hung hmu suok ka tih. 20 Pathien ram chu thua a hrila hril ringota innghat a ni naw a, thilthawtheinaa innghat a ni lem. 21 A ieng am in thlang lem a? Hmol chawiin am ka hung inthok ding, an naw leh hmangaina le thuhnuoirolna lungril putin?

1 Corinthians 5

1 Ringnawhai lai hmana thil um ngai lo inditna porchè nangni lai a um thu le pa pakhatin a pa thaikême a zâlpui ti thu dàm an hril thang a. 2 Chu chu poiti ta nêkin in la uongpui ta deu deu a ni awm a! Chuong ang mi chu nangni pawl laia inthoka hnot suok ding a ni naw am a ni? 3 Taksain nangni lai um naw lang khom thlarauah ka um a, chuong ang thawtu chungchâng chu nangni laia um angin Lalpa Isu hmingin ka lo rêl fel dêr tah. 4 In inkhawm pha leh kei khom nangni lai thlaraua hung thang ve anga mi ngaiin, Lalpa Isu thuneina hmangin, 5 Lalpa Ni-a a thlarau sandama a um theina dingin, chu pa taksa chu sukbohmang dingin Setan kuomah pe suok ro. 6 In uong dàn hi a tha nawh. Chol tlawmtein bei tlang hlûm a chie tho vong hlak ti in hriet naw maw? 7 Chol thang lo bei in ni ang hrimin bei hlûm tharlâm hlak in hung ni theina dingin chol hlui chu zen fai ro. Krista, ei Fekân kùtna ding Beramte chu inhlànin a um ta si a. 8 Suolna le rîtlona chol hluia inchie tho bei ni loin, chol thang lo, thienghlimna le thutaka inchie tho beiin kût hmang lem ei tiu. 9 Ka lekhathona khan inngai hmanghai leh inpol sop lo dingin ka hril ta chêu kha. 10 Chu chun hi khawvel mi, inngai hmang hai, duâm hai, hlêm hmang hai le milem be hai hi pawlser ro ka tìna a ni dêr nawh. In pawlser ding a ni chun khawvel hi in suoksan hlol ngai a tih. 11 Ringtu unau inti si, sienkhom inngai hmang, mi duâm, milem betu, mi dem hmang, zu rui hmang le mi hlèm hmanghai leh inpol sop lo ding le anni lai a fàk khom fa lo dingin ka ti lem chêu a ni kha. 12 Kohran puo tienga umhai chungthu chu keia rêl ding am a ni? A sûnga umhai thu chauh ei rêl ding an naw maw? 13 Puo tieng mihai chungthu chu Pathienin rêl a tih. Chuong ang mi suol chu nangni laia inthokin hnot suok ro.

1 Corinthians 6

1 Nangni lai tu khomin a unau dang leh thubuoi nei sien, mi thienghlimhai kuomah intlun loin ringnawtu kuomah a'n tlun lem ding am a ni? 2 Pathien mihai hi khawvel chungthu rêlpêktu ding an nih ti in hriet naw maw? Khawvel chungthu rêlpêktu ding in ni si chun thil chîn tham rêltu ding lem chun in tlâk hle naw ding maw? 3 Dam sûng thil chu hril lo, vàntirkohai chungthu chen khom ei la rêl ding a nih ti in hriet naw maw? 4 Chuleiin, dam sûng thil rêl ding in neiin Kohranin ienga khoma a ngai naw hai in inrèltir ding am a ni? 5 Inzak a va hang um de! Unau lai thu rem thei mi var pakhat khom in um nawh tìna a ni? 6 Ringtuin ringnawtu rêl dinga a unau a khing tlat hi ieng am an ta le? 7 Nangni kârah thubuoi in nei hin in tlawm dèr tìna a nih. Ieng leia tlawm lem ni in rin am a na? A dawng lem ni khom iem a poi a? 8 Chuong nêk hmanin mani unauhai poi tawktu le sukdawngtu in ni lem si a. 9 Mi rilohai chun Pathien ram hluo naw ni hai ti in hriet naw maw? Hlèmin um naw ro. Inngai hmang hai, milem be hai, uire hai, mongkawhur hai le an chîngpui hai, 10 rûkru hai, mi duâm hai, zu rui hmang hai, mi dem le hril siet hmang hai le hlêm hmang haiin Pathien ram hluo naw ni hai. 11 Nangni laia thenkhat chu chuong ang mi chu in ni hlak a, nisienlakhom Lalpa Isu Krista hming le ei Pathien Thlaraua sawp fai le sukthieng le thiem inchangtir in ni tah. 12 "Ka ta dingin iengkim a thieng", sienkhom a tangkai vong chuong nawh. "Ka ta dingin iengkim a thieng, " sienkhom ieng bawia khom um ka'n phal nawh. 13 Bu hi phing ta ding a na, phing khom bu ta ding a nih, sienkhom Pathienin sukbohmang vé vèng a tih. Taksa hi inngaina ding a ni naw a, Lalpa ta ding a ni lem, Lalpa khom taksa ta ding a nih. 14 Pathienin Lalpa chu a keitho a, eini khom a thilthawtheina chun mi keitho vèng a tih. 15 In taksa chu Krista taksa pèng a nih ti in hriet naw am a ni? Krista taksa pèng chu lain nawchizor pêngah in siem ding am a ni? Siem lul lo e! 16 Miin nawchizor a'n zompui chun taksa pum khat an ni tah ti in hriet naw am a ni? 'An pahni chun taksa pum khat hung ni tâng an tih' ti ziek a ni kha. 17 Lalpa inzompuitu ruok chu ama leh thlarauah pum khat an nih. 18 Inngaina suol hi bànsan ro. Thil suol dang ieng khom miin a thaw chun a taksa puo tieng thil a na, inngaina suol ruok chu mani taksa chunga a thaw a nih. 19 Pathien pêk cheu, nangnia um, Thlarau Thienghlim chèngna tempul chu in taksa hi a nih ti in hriet naw am a ni? Nangni ta in ni ta nawh; 20 mana inchawk in ni tah. Chuleiin, in taksain Pathien chawimawi ro.

1 Corinthians 7

1 In thu hung ziek chungchànga khan chu, pasalin nuhmei tawk lo a tha. f 2 Amiruokchu, inngaina a um rawn si leiin pasalin nuhmei bîk nei seng hai sien, nuhmei khomin pasal bìk nei seng raw hai se. 3 Pasalin a nuhmei laka a thaw ding chu thaw sien la, nuhmei khomin a pasal laka a thaw ding chu thaw raw se. 4 Nuhmei chun a taksa chungah ama chauhin thu a nei naw a, a pasal khomin a nei ve a nih. Chuong ang bokin pasal khomin a taksa chungah ama chauhin thu a nei naw a, a nuhmei khomin a nei ve a nih. 5 In remti tlângnaa tongtai hun in hmang sùng ti chauh naw chu a tu khom insukdawng naw ro; chu zoah inkop nawk unla, chuong naw chun in insùm zo nawna chu hmangin Setanin thlêm hlauh rawi a ti cheu. 6 Hieng hi thupêk ni loin phalna inpêkna anga ka hril a ni lem. 7 Mi po po keima ang hin um vong thei sien ka nuom a, sienkhom mi tinin Pathiena inthoka thilpêk bik ei dong seng si a, pakhatin kong khatin, pakhatin kong dangin. 8 Nuhmei pasal la nei naw hai le hmeithaihai ruok chu keima ang tak hin um hai sien a tha. 9 An insûm thei naw a ni ruok chun innei raw hai se, châkna sahàla hlieua um nêkin innei a tha lem. 10 Innei tahai chu, ka thu ni loin Lalpa thupèk ka hril cheu hi: nuhmeiin a pasal thè naw raw se. 11 A thé ruok chun pasal dang nei ta loin um sien la, chuong an naw chun a pasal leh inrem nawk raw se. Pasal khomin a nuhmei ma naw raw se. 12 Mi danghai kuoma chu Lalpa thu ni loin keima awm suok thu ka hril chêu a nih. Ringtuin ringnawtu nuhmeiah a nei a, a nuhmeiin a kuoma um zing a nuom phot chun thè naw raw se. 13 Ringtu nuhmeiin ringnawtu a nei a, a kuoma um zing a pasalin a nuom chun, thè naw raw se. 14 Ringnawtu pasal chu a nuhmei zârah sukthieng a na, ringnawtu nuhmei khom ringtu a pasal zârah sukthieng a ni bok. Chuong chu ni naw sien, in nauhai inthieng naw ni hai, tu ruok hin chu an inthieng a nih. 15 Nisienlakhom, ringnawtu lemin thè a nuom chun inthè el raw se; chuong ang thila chun ringtuhai chu a nuhmei a pasalin phuor in ni nawh; Pathien ruok chun inrem dingin a mi ko a nih. 16 Aw nuhmei, i pasal i sandam ding le ding naw ieng tin am i hriet thei? Chuong ang bokin aw pasal, i nuhmei i sandam ding le ding naw ieng tin am i hriet thei? 17 Ieng khom ni sien, Lalpan mi tin kuoma a bituk seng le Pathienin a ko dàn angin um pei ro; chuong anga um dingin kohran po po ka hril hlak a ni kha. 18 Ser tan tah ko an ni chun sukbo tum chuong naw hai sien; ser la tan lo ko anni chun tan chuong bok naw raw hai se. 19 Sertan hi ieng khom a ni naw a, sertan lo khom ieng khom a ni chuong bok nawh. A poimaw tak chu Pathien thupêk zawm a nih. 20 Mi tin chu ko an ni laia an ngîrhmun pangngaiah um raw se. 21 Bawi i ni laia ko i ni am? Chu chun sukbuoi naw sien che, zalen theina remchâng i hmu ruok chun suok rawh. 22 Tu khom bawi a ni laia Lalpa ko chu Lalpa bawisuok a na; chuong ang bokin tu khom bawi ni lo koa um khom chu Krista bawi a nih. 23 Mana inchawk in ni tah a, mihriem bawiah um ta naw ro. 24 Unauhai, ieng ngîrhmuna khom in um laia ko in ninaa chun Pathienah um zing ro. 25 Thienglâmhai chungchang thua ruok chu Lalpa thupek ieng khom ka nei nawh. Amiruokchu, Lalpa lunginsietna leia mi ringum ka nìna zàrah ka ngaidan ka hril a nih. 26 Hun harsain a mi nang tàk leiin mani ngîrhmun pangngaia um el tha takin ka ngai. 27 Nuhmei nei ta chun thè tum naw sien, a nei lo chun zong bok naw raw se. 28 I nei tah khomin thil suol i thaw naw a, nunghak thienglâm khomin pasal a nei chun thil suol a thaw bok nawh. Amiruokchu, nuhmei pasal neihaiin hi dam sûng huna hin harsatna tam tak tuok an tih, kei chun chuong laka inthok chun infihlîmtir chêu ka nuom a nih. 29 Unauhai, hun a tawi tah êm leiin hieng hi ka ti a nih. Tuta inthok chu nuhmei neihai khom nei lo angin, 30 lusûnhai khom sûn lo angin, lawmhai chu lawm naw angin, thil inchawtuhai chun an ni kol ding ni lo angin, 31 hi khawvel thila inhmanghai chun inhmang naw angin um hai sien ka nuom a nih. Hi khawvel um dàn pangngai hi a bohmang mèk a nih. 32 Lungkham nei loa in um ka nuompui chêu a nih. Nuhmei la nei naw chun Lalpa suklawm dingin Lalpa thilhai a'n voipui a. 33 Nuhmei nei ruok chun a nuhmei suklawmna dingin hi khawvel thil hi a'n voipui a, 34 a lungril a'n phîr hlak. Pasal nei lo nuhmei le nunghàk thienglâm chun an taksa le thlarau vong thienghlim dingin Lalpa sin chauh an invoipui a; pasal nei chun a pasal suklawmna dingin khawvel thil a'n voipui hlak. 35 Chuong chu nangni thatna dinga ka hril a na, khuokhir ka tum naw cheu a, mawi taka in um theina ding le Lalpa rong bawl dinga in inpumpèk theina dinga ka hril a nih. 36 Mi tu khomin nunghàk thienglâm a'n huolpuina chungthuah thaw indik loa inhre a, chu nunghàk chu lêngtûl el ding a ni ta bok si a, innei ngêi tûla a hriet chun a nuom ang chun thaw sien la, inneipui el raw se, thil suol a ni nawh. 37 Amiruokchu, nuhmei nei lo dinga nor lui lei ni loa ama nuom thua nei naw tum tlat thei a ni ruok chun a nuom anga a thaw chu a tha a, a nuhmei huol a nei naw chu a tha. 38 Chuongchun, a nuhmei huol neitu chun a thaw tha a, a nei nawtu chun a thaw tha nawk zuol a nih. g 39 Nuhmei chu a pasal dam sûng chun phuor a na; a pasal a thi pha ruok chu a nuom taphot nei thei a tih, amiruokchu, Lalpaa um mi a ni ding a nih. 40 Nei loa a um pangngaia a um chun a hlim lem ka ring. Kei khom hi Pathien Thlarau neiah kan ngai a nih.

1 Corinthians 8

1 Milem biekna sa fâk chungchàng thua khan, "ei rêngin hrietna ei kol seng" in ti kha a'n dik. Sienkhom chuong ang hrietna chun mi a sukchapo hlak a, hmangaina ruok chun mi a siem tha hlak. 2 Tu khom thil hrie nia inngai chun a hriet ding ang takin a la hriet tawk naw a nih. 3 Miin Pathien a hmangai ruok chun ama chu Pathien mi hriet a nih. 4 Chuongchun, milem bieknaa an sa inhlàn fàk thua chun, khawvela hin milem hi ieng khom a ni nawzie le Pathien pakhat chauh naw chu a dang hrim hrim an um nawh ti ei hriet. 5 Vàn amanih, hnuoi amaniah pathien anga ngai tam tak an um thei a, chuong angin pathien tam tak le lalpa tam tak khom an um hrim a. 6 Nisienlakhom, eini ta ding ruok chun Pathien pakhat chauh, Pä chu a um a, thil iengkim ama leiin a um a, eini khom ama ta dinga um ei nih; chun, Lalpa pakhat chauh, Krista Isu chu, a um bok a; thil iengkim hi ama hmanga siem a na, eini khom ama leia um ei nih. h 7 Nisienlakhom, hi hi mi po poin an hriet vong nawh. Thenkhat chu milem be thang an ni leiin, sâ an fàk phâ leh milem kuoma inthawina sa anga ngaiin an fàk hlak a, an sie le tha hrietna a hrât si naw leiin inthieng naw angin an inngai hlak. 8 Ieng khom ni sien, ei thil fàk hin Pathien a mi'n hnaitir naw a, fa naw inla khom a mi'n hlattir naw a, fa inla khom a mi'n hnaitir chuong bok nawh. 9 Amiruokchu, fimkhur ro, in zalenna chu ringnaa hrât nawhai tlùkna lo ni pal hlauh rawi a tih. 10 Nang, chu hrietna nei ta sa chun milem biekna ina bu i fàk lai chu sie le tha hrietnaa hrât loin hmu sien, milem kuoma thil inhlànhai a fâk ngam phâ ve el naw ding maw? 11 Chuong a ni si chun i unau, mi hrât naw, a thi aia Krista thi chu, i hrietthiemna chun a suksiet a nih. 12 Chuong anga i unau chunga thil suol thaw a, a sie le tha hrietna hrât naw tak i sukhliem chun Krista chungah thil suol i thaw a nih. 13 Chuleiin, ka thil fâkin suolah ka unau a'n tlùktir si chun, ka unau ka sukthlùk nawna dingin sa hrim hrim nghei dêr tàng ka tih.

1 Corinthians 9

1 Zalên ka ni naw maw? Tirko ka ni naw maw? Ei Lalpa Isu Krista hmu tah ka ni naw maw? Lalpaa ka sinthaw ra chu nangni hi in ni naw maw? 2 Mi danghai ta dingin tirko ka ni naw a lo ni khomin, nangni ta ding chun ka ni chieng khop el. Lalpaa tirko ka nizie namnghettu suoi chu nangni hi in ni si a. 3 Hi hi mi soisèltuhai ka donna hlak chu a nih. 4 Fàk le dawn dong theina chanvo kan nei naw bik am a ni? 5 Tirko danghai, Lalpa unauhai le Kifa hai angin inzinnaah ringtu nuhmeihai kan thuoi ve thei naw bìk am a ni? 6 Kei le Barnaba chauh hi kut sinthawa mani inchawm bîk ding kan ni am a ni? 7 Mani inchawm fawma sipaia thang tu am an um hlak a? A ra fa si loin tuin am grêp huon a siem hlak a? A nenetui dawn si loin tuin am ran a vâi hlak? 8 Hieng ka hrilhai hi mihriem thlîr dàn mei mei am a ni? Dàn thu khomin hieng hi a hril a ni naw maw? 9 Mosie Dàna chun, "Bawngchalin bu a chìl laiin a hmùr khuop naw rawh" ti a nih. Pathienin bawngchal ta ding chauhin am a nih a ngaituo? 10 Keini ta ding tak lem hin a ni naw maw a lo hril? Ni e, keini ta dinga ziek a nih. Hnuoi inlettu chun beisei neiin inlet sien, bu chîltu khomin chan nei ve beiseiin chîl raw se. 11 Nangni lai thlarau thlai chi kan tu a, in kuoma inthokin taksa tieng thila khom ra sîk ding lo ni inlang, inthlahrungna ding ieng am a um a? 12 Mi dang hmanin in lakah chuong ang thil an phùt ngam chun keini lem chun kan phùt ngam nawk zuol naw di'm a ni? Sienkhom ieng khom kan phùt ngai nawh. Phût nêk hmanin, Krista Chanchin Tha dâltu kan ni nawna dingin iengkim kan tuor hràm hrâm lem hlak. 13 Tempula rongbawltuhai chun tempula mi thil an fàk a, maichàma inthawina inhlàntuhai khomin an thil inhlàna inthokin chan an nei ve ti in hriet naw'm a ni? 14 Chuong ang bokin, Chanchin Tha hi Chanchin Tha hriltuhai fàk hmuna dinga Lalpan a ruot a nih. 15 Kei chun hieng hamthatnahai hi ka sor ve hrim hrim nawh. Hieng thil hi ka chunga in thaw beisei leia ka ziek a ni nawh. Ka uongpui hi ieng khom loa in mi ngaipêk nêk chun thi khom ka thlang lem. 16 Chanchin Tha ka hril leia uong ka ni nawh, hril lo thei lo ka nih. Chanchin Tha hi hril ta naw lang chu ka chung a va rik awm de aw! 17 Mani nuom thua hril ni lang, hlaw khom nei ka tih. Mani nuom thua hril ka ni si nawh, Chanchin Tha enkol sin chu inkoltira ka um lei a nih. 18 An leh ka lawmman chu iem ni tâng a ta? Chanchin Tha hriltu ka ni leia ka phùt thei phût loa a thlawna Chanchin Tha ka hril theina hi ka lawmman chu a nih. 19 Tû bawi ni naw lang khom a tam thei ang tak mi ka lâk theina dingin mi tin bawiah ka'n siem hlak. 20 Judahai ka lâk theina dingin Judahai lai Juda mi angin ka um a; Dàn hnuoia um ni naw lang khom Dàn hnuoia mihai ka lâk theina dingin Dàn hnuoia um angin ka khawsa hlak. 21 Dàn nei nawhai ka lâk theina dingin Dàn nei lo angin ka um hlak, Pathien dân zawm naw ni si loin, Krista dàn zawm tlat siin. 22 Mi hrât nawhai ka làk theina dingin anni lai hrât naw angin ka um hlak. Chuong ang chun ieng ti kong zawng amanih bèkin mi thenkhat ka sandam theina dingin mi tin lai kong hrang hrangin ka khawsa hlak. 23 Chanchin Tha leiin chuong thilhai chu ka thaw hlak, a malsawmna ka dong theina dingin. 24 Intlânsiekhai chu an tlân senga chu pakhat chauhin lawmman a dong hlak ti in hriet naw'm a ni? Chuong ang chun lawmman dong dingin tlân ro. 25 Intlânsieka thanghai chu kong iengkimah inthununna khauh tak hnuoiah an inbuotsai hlak. Anni chun chawimawina lukhum se thei hmu dingin an bei a; eini ruok chun chatuon dai lallukhum hmu dingin ei bei a nih. 26 Chuleiin, pan chieng tak neiin ka tlân a, boruok hnektu ang mei meiin ka hnek ngai nawh; 27 ka taksa ka hnek chor chor a, ka bawiah ka siem a; chuong naw chun mihai kuoma Chanchin Tha hriltu ni ta siin lawmman dong phâk loa hnawl ni hlauh rawi ka tih.

1 Corinthians 10

1 Unauhai, ei thlatuhai chunga thil tlunghai, sûmin a thuoi dàn le an rênga tuipui an kàn dànhai kha, in hriet naw ka nuom nawh. 2 Mosie hnuoiah an rêngin sûma le tuipuia baptis an ni kha. 3 An rêngin thlarau tieng bu thuhmun an fàk a, 4 thlarau tieng tui thuhmun, anni somtu thlarau lungpuia inthoka tui chu an dawn seng kha; chu lungpui chu Krista hi a nih. 5 Chuong sà khom chun anni laia mi tam tak chungah Pathien a lungni ta naw a, thlalèrah an ruong a'n dar phung el kha. 6 Thil suol thaw an châk anga ei châk ve nawna dingin khâng thilhai kha eini mi kawkhmuna dinga tlung a lo nih. 7 Anni laia thenkhatin milem an biek ang khan be ve naw ro; Pathien Thu khomin, "Fa le dawn dingin mipui an inthung a, hlimhlop chèn dingin an tho nawk" a lo ti kha. 8 Anni laia thenkhat inngaina suola an tlûk ang khan tlu ve naw ro, ni khat sùngin mi sînghni le sângthum zetin an thi phâ hiel a ni kha. 9 Anni laia thenkhatin Lalpa an fie ang khan fie ve naw ro, rûlin a chuk hlum teuh a ni kha. 10 Anni laia thenkhat an chier ang khan chier ve naw ro, sukramtu vàntirkoin a subohmang tawl a ni kha. 11 Hieng ang thil an lo tuokhai hi mi dang kawkhmuna ding a na; hun tawpa chêng einihai invèng theina dinga ziek a ni bok. 12 Chuongchun, ngîr ngheta in inngai a ni khomin fimkhur ro, in tlùk nawna dingin. 13 Fienai in tuok hlak hi mi tuor bàk a ni chuong nawh. Pathien chu a ringum a, in tuor thei bàka nasa fiena in tuok phal naw nih, in do zo theina dingin fiena in tuor phâ leh tlàn suokna lampui siempêk lem a ti cheu. 14 Chuleiin, ka dittakhai, milem biek hi nghatsan ro. 15 Ningkhong hre chinhai hrilin ka hril chêu hi, ka hrilhai chèu hi chîk takin ngaituo ro. 16 Malsawmna no la a, malsawmna ei hril hlak hi Krista thisen ei intawmpuina a ni nawm a ni? Bei ei khoi hlak hi Krista taksa ei intawmpuina a ni nawm a ni? 17 Bei chu tlang khat a ni angin eini hi tam tak ni inla khom taksa pumkhat ei nih, bei tlang khata mi ei chang seng si a. 18 Israelhai kha ngaituo ro: inthawina sa fatuhai chun maichâm rongbawlna leh inzomna an nei naw am a ni? 19 Hi thua hin iem hril ka tum a na? Milem kuoma thil an inhlàn chun hlutna a nei ti le milem khom chun tlâktlàina a nei ka tìna a ni? 20 Ni teu lo e, ringnawtuhai inthawina chu Pathien kuomah ni loin ramhuoi kuomah a ni lem ti thu ka hril a nih. Nangni ruok chu ramhuoi leh inzawlna in nei ka dit nawh. 21 Lalpa no le ramhuoi no chel kop thei naw ti niu; Lalpa zànbu le ramhuoi zânbu kîl kop thei bok naw ti niu. 22 Lalpa thìkthu choktho ei tum am a ni? Ama nêkin ei hrât lem am a ni? 23 "Iengkim thaw a thieng" an ti hlak a, sienkhom iengkim thaw hi a tha kher nawh. "Iengkim thaw a thieng" an ta, sienkhom iengkim thawin mi a siem tha kher nawh. 24 Tu khomin mani thatna ding nêkin mi dang thatna ding zong lem raw se. 25 Sa dawra an zor a ni phot chun indon buoi loin fa el ro, 26 hnuoi le a sûnga um po po hi Lalpa ta a ni si a. 27 Ringnawtuin bu fa dinga an fiel chêua in fe nuom si chun an pèk taphot chêu chu indon buoi sésè loin fa el ro. 28 Amiruokchu, tuin amani, "Hi chu inthawina thil a nih" tia an hril chêu ruok chun a hriltu chèu lei le sie le tha hrietna leiin fa naw ro. 29 Chu chun in sie le tha hrietna thu ka hril naw a, a hriltu chèu sie le tha hrietna thu ka hril lem a nih. An leh, ka zalenna chu mi dang ngaidànin a khuokhir ding am a ni? 30 Lawm taka ka fâk a, Pathien kuomah lawmthu ka hrilna thuah ieng leiin am hrilsiet ka hlaw ding? 31 Chuongchun, in fâk khomin in dawn khomin, iengkim in thaw taphot chu Pathien ropuina ding chauhin thaw vong ro. 32 Juda hai, Grik hai, Pathien kohran hai tu el khom tlùk phàna dingin um naw ro. 33 Kei khomin mani hlawkna nêkin mi tam tak thatna ding ka zong lem a, sandam an ni theina dingin kong tinrêngah mi tin suklawm ka tum hlak hi.

1 Corinthians 11

1 Keiin Krista ka enton ang hin nangni khomin mi enton ve ro. 2 Iengkimah in mi hriet zing hlak lei le thucha ka'n hlàn sawng cheu ang taka in vong tlat leiin ka'n pàk cheu. 3 Hi hi in hriet ka nuom: Pasal taphot lu chu Krista a na, nuhmei lu chu pasal a na, Krista lu chu Pathien a nih. 4 Pasal tu khom lukhum khuma tongtai amanih le thuhril amanih chun a lu a sukmuolpho a nih. 5 Chun, nuhmei tu khom lukhum khum loa tongtai amanih le thu hril taphot chun a lu a sukmuolpho a nih, chuong ang chu mêt kol leh angkhat zing a nih. 6 Nuhmeiin lukhum a khum si naw chun a lu mêt kol law law raw se. Amiruokchu, nuhmei ta dingin lu vaw amanih le met kol amanih chu thil inzakum a ni si leiin lukhum khum raw se. 7 Pasal chu Pathien angpui le a ropuina a ni leiin lukhum a khum ding a ni nawh; nuhmei ruok chu pasal ropuina a nih. 8 Pasal chu nuhmeia inthoka siem a ni naw a, nuhmei ruok chu pasala inthoka siem a nih. 9 Pasal hi nuhmei ta dinga siem a ni naw a, nuhmei ruok chu pasal ta dinga siem a nih. 10 Hi lei le vàntirkohai leiin nuhmei chun thuneitu hnuoia um a nizie inchikna a lu-ah a khum ding a nih. 11 Nisienlakhom, Lalpaa ruok chu nuhmei hi pasal thang loin a um thei naw a, pasal khom nuhmei thang loin a um thei bok nawh. 12 Nuhmei hi pasala inthoka siem a ni ang bokin pasal hi nuhmeia inthoka pieng a ni si a; nisienlakhom iengkim hi Pathiena inthoka suok vong a nih. 13 Hang ngaituo hman ta u, nuhmeiin lukhum khum loa Pathien kuoma a tongtai chu a awm hrim am? 14 Pasalin sam sei a put chun a ta dingin thil inzakum a nih ti in piengpui lungril puoksuok khomin in hriet el naw? 15 Nuhmeiin sam sei a put ruok chun a mawipui hle, sam sei chu ama inkhumna dinga pèk a ni si a. 16 Ieng khom ni sien, hi hi tu khomin in sêlkal chun chuong thila chun keinin chìng dàn kan nei naw a, Pathien kohranhai khomin ei nei bok nawh. 17 Sakramen kìl dàn thua inchûktirna in zawm dàn konga ruok chu ka'n pâk thei naw cheu; in inkhawm hi thatpui nêkin in sietpui lem a nih. 18 A hmasa takin, kohran inkhawmah nangni lai inthèna a um hlak ti ka lo hriet a, iemani chenah ka ring deu hrim a nih. 19 Nangni lai ngàidàn inang lo a suok ding a ni hrim a, chu chun nangni laia mi takhai chu suklang chieng a tih. 20 In inkhawm dàn hi Lalpa zànbu kîl dinga inkhawm khom in ni chie nawh. 21 Fàk a hun pha tu khom nghâk loin mani bu chawi seng in fàk a, a then phingtâma an la um laiin a then chu in lo inrui hman dèr ta hlak. 22 Hi hi ieng thil am an ta leh! Chuong anga fâk le dawnna ding chu mani in in nei seng an naw am a ni? An naw leh, Pathien kohran chu hmusitin, a nei nawhai chu sukzak in tum am a ni? Ieng am hril tâng ka ta? Ka'n pâk ding cheu am a ni? Hi thua hin chu ka'n pâk thei lul naw chêu. 23 Ka thu hril sawng chêu hi Lalpaa inthoka ka dong a nih. Khânga inmantira a um zàn khan Lalpa Isun bei chu lâk a, lawmthu a hril zoin a khoi a, 24 "Hi hi ka taksa, in ta ding chu a nih, in mi hriet zingna sikin hieng ang hin thaw hlak ro" a ti kha. 25 Chuong ang bokin, bu an fàk khopin no chu a lâk a, "Hi no hi ka thisena thuthlung thar chu a nih, in dawn po leh in mi hriet zingna sikin thaw hlak ro, " a ti kha. 26 Chu bei chu fa a, no chu in dawn zâtin Lalpa hung nawk hma khat a thìna chu in puong a nih. 27 Chuleiin, tu khomin mawi naw taka Lalpa bei hi fa a, no hi a dawn chun Lalpa taksa le thisen lakah maw a phur a nih. 28 Mi tinin mani inbi chieng seng unla, chu hnungah bei chu fain no chu dawn chauh ro. 29 A fatu le dawntu chun Lalpa taksa a nih ti a pom si naw chun mani chungah rorêlna intlun dingin a fâkin a dawn a nih. 30 Hi lei hin nangni laia tam tak chu hrât loin in hrivoi a sie a, a then chu an thi ta bok. 31 Mani inbi chieng hmasa ni inla chu, ro rêlpêkin ei um naw ding bah. 32 Ro rêlpêka ei um khomin khawvel mihai anga thiem naw changa ei um ve nawna dingin Lalpan a mi thunun hlak a nih. 33 Chuleiin, ka unauhai, Lalpa zànbu kîl dinga in inkhawmin innghâk tlàng hlak ro. 34 In inkhawm chu thiem naw chang phàna a hung ni nawna dingin, phingtâm an um chun inah fa hmasa el raw hai se. Thil dang ruok chu ka hung pha la kawkhmûng ka ti cheu.

1 Corinthians 12

1 Unauhai, thlarau thilpêkhai chu hre loa in um ka dit nawh. 2 Ringnawtu in ni lai khan ieng kong kongin amanih tong thei lo milem tienga zawr le thuoi hmangin in um ti in hriet kha. 3 Chuleiin, hi hi in hriet ka nuom: Pathien Thlaraua inthok chun tu khomin 'Isu chu tongsephurin um raw se' an ti ngai naw a, Thlarau Thienghlima inthok chauh naw chun tu khomin 'Isu chu Lalpa a nih' an ti thei bok nawh. 4 Thilpêk chi tum tum a um a, sienkhom Thlarau chu pakhat a nih. 5 Rongbawlna chi tum tum a um a, sienkhom Lalpa chu pakhat a nih. 6 Thil thaw thei dan chi tum tum a um a, mi tin kuoma thawtheina petu Pathien ruok chu pakhat a nih. 7 Ei rênga that tlângna dingin mi tinin Thlarau thuomna ei dong a. 8 Thenkhat kuomah Thlarau zàra var taka thu hril theina a pêk a; chu Thlarau bok chun mi dang kuomah thu hre taka hril theina a pêk a; 9 a then kuomah chu Thlarau bok chun ringna a pêk a; chu Thlarau thuhmun vêk chun mi dang kuomah sukdam theina a pêk a; 10 a then kuomah thilmak thawtheina a pêk a; mi dang kuomah thu hril theina a pêk a; mi dang kuomah thlarau indik le indik naw hriet theina a pêk a; a then kuomah tong hriet lo chi tum tum a pêk a, mi dang kuomah tong hriet lohai hrilfie theina a pêk bok. 11 Hieng po po hi Thlarau pakhat sinthaw vong a na, a dit ang takin mi tin kuomah thilpêk chi tum tum a pêk a nih. 12 Taksa hi pum khat ni sienkhom bung tum tuma inthoka siem a na; bung hrang hrang inpêngtuoin taksa pum khat an siem ang hin Kristaa chun pum khat ei nih. 13 Juda mi ei ni amanih, Grik mi ei ni amanih, bawi ei ni amanih ei ni naw amanih, ei rêngin pum khata um dinga Thlarau pakhata baptis ei ni a, ei dawn dingin Thlarau pakhat pêkin ei um bok a nih. 14 Taksa hi bung khat chauh ni loin bung tam taka siem a ni lem a. 15 Ke hin "Kut ka ni naw leiin taksaah ka thang nawh" ti ta sien, chu a ti lei chun taksaa thang lo a ni chuong nawh. 16 Nakawr hin, "Kei chu mit ka ni naw leiin taksaah ka thang nawh" ti sien, a ti lei chun taksaa thang lo a ni chuong nawh. 17 Taksa pumpui hi mit ni ta vong sien, ieng tin am ri hre thei ei ta? Nakawr ni ta vong sien, ieng tin am rim ei hriet thei ding? 18 Pathienin taksaa bung tum tum hi tûl a tìna taphotah a sie a nih. 19 An rêngin bung khat chauh ni ta sien, taksa a um thei ding am a ni? 20 Bung tum tum um sienkhom taksa chu pum khat a nih. 21 Chuleiin, mit hin kut kuomah, "Ka mamaw naw che" a ti thei nawh; lu khomin ke kuomah "Ka mamaw naw che" a ti thei bok nawh. 22 Chuong nêk hmanin, taksa bung hrât naw lema inlanghai khom hi makmawin an poimaw a nih. 23 Ei taksa bunga hmusitum deua ei ngaihai chu ei chei nasa lem hlak a, ei bunga inzapuium deua inlanghai khom inzaum lemin ei cheibawl hlak. 24 Ei bung mawi lemhai chu chei khom a ngai nawh. Pathienin taksa hi a rem khawm a, hmusitum deuhai chu a chawimawi lem a, 25 chuongchun, taksaa hin inlâk hranna um loa bung tum tumhai hi lungruol taka an inngaituo tlâng theina dingin a chuktuo a nih. 26 Bung pakhatin a tuor chun bung dang po poin an tuor vong a, bung pakhat chawimawia a um chun bung dang po poin an lawm ve vong a nih. 27 Tuhin nangni hi Krista taksa chu in ni a, a bunghai in ni bok. 28 Pathienin a kohranah hieng mihai hi a sie a, pakhatnaah tirkohai, pahninaah zawlneihai, pathumnaah zirtirtuhai, a dotah thil mak thaw theihai, a nawkah sukdam theina neihai, mi thangpui theituhai, rorêl thiemhai le tong hriet lo chi tum tum neihai. 29 An rêngin tirko an ni vong am a ni? An rêngin zawlnei an ni vong am a ni? An rêngin zirtirtu an ni vong am a ni? An rêngin thil mak an thaw thei vong am a ni? 30 Sukdam theina thilpêk an dong vong naw a, tong hriet loin an tong vong naw a, hrilfie theina an dong vong bok nawh. 31 Thlarau thilpêk poimaw lemhai chu dong châk hle ro. Tu hin lampui tha tak chu hang kawkhmûng ka ti cheu.

1 Corinthians 13

1 Mihriem tong le vàntirko tonghaiin thu hril thei lang khom, hmangaina ka nei si naw chun dâr rî amanih, dârbenthek rì amanih ang chauh nîng a tih. 2 Thuhril theina thilpêk neiin, thu inthup po po le hriet ding po po hre vong lang, tlâng son theina khop hiel ringna nei lang khom, hmangaina ka nei si naw chun ieng khom ni naw ning. 3 Ka nei po po pasiehai ta dingin pe vong lang, uongpui dingin ka taksa meiah inhlàn lang khom, hmangaina ka nei si naw chun ka ta dingin ieng khom a tlâktlài nawh. 4 Hmangaina chu a dawthei a, hmangaina chu a ngilnei. Hmangaina chun a thîk naw a, mani inpàk a thaw ngai nawh. Hmangaina chu a chapo naw a, 5 mawi naw takin a chang ngai naw a, mani hma a siel naw a, a lung a sen mei mei nawh. Hmangaina chun mi thaw suol a'n chik zing naw a, 6 suol a lawm naw a, thutak ruok chu a hlimpui hlak. 7 Hmangaina chun a hliekhu tlat a, a ringzo tlat a, a beisei tlat a, iengkim a tuor muolsuo hlak. 8 Hmangaina chu chatuon dai a nih. Thuhrilnahai ruok chu suktawp la nîng a ta, tong hriet lohai khomin rè hun la nei a ta, hrietnahai khom la tawp a tih. 9 Tu hin a then chauh ei hriet a, a then chauh ei hril hri a. 10 Famkimna a hung tlung pha chun famkim lona hi bo tâng a tih. 11 Ka naupang lai khan naupang tongin ka tong a, naupang lungril ka put a, naupang ngaituo dàn angin thil ka ngaituo hlak; ka hung puitling hnung ruok hin chu naupang thaw dàn chu ka bànsan tah. 12 Tu hin chu dârthlalanga phe ruoia ei inhmu ang hin ei hmu hri a; chu pha ruok chun inhmatonin hmu tâng ei tih. Tu hin chu a then chauh ei hriet hri a, chu pha ruok chun Pathienin a mi hriet chieng angin la hre chieng ei tih. 13 Chuongchun, hieng thil pathum ringna, beiseina le hmangaina hai hi um zing a ta, chuhai po laia ropui tak chu hmangaina a nih.

1 Corinthians 14

1 Hmangaina hi hnot pei unla, thlarau thilpèkhai chu châk hle unla, abikin thuhril theina lem chu châk zuol ro. 2 Tong hriet loa thu hriltu chun a thlaraua thurûk Pathien kuoma a hril a ni leiin mi dang tu khomin an hriet thei nawh. 3 Thuhriltu ruok chun mihai sukhrât ding dàm, chokphûr ding dàm le thlamuong ding dàmin an kuomah thu a hril lem hlak. 4 Tong hriet loa hriltu chun ama a'n dom sàng a, thuhriltu ruok chun kohran a dom sàng hlak. 5 Tong hriet lo nei vong inla ka ti hle a, thu hril theina lem chu nei vong inla ka ti nawkzuol. Kohran hlawkpui dinga hril fiepèktu an um si naw chun tong hriet lo neihai nêk chun thuhril theina neihai chu an tangkai lem. 6 Unauhai, tuhin in kuomah hungin tong hriet loin hung tong ta lang, in kuomah thu puong a, hrietna inbà cheu a, thu hrila ka'n chùktir chêu amanih a ni sì naw chun ieng tin am mi hlawkpui thei tàng in ta? 7 Hringna nei lo thil inri thei tingtang keiin amanih theihle mût ta hai sien, a ri bi ding anga a'n ri suok si naw chun ieng hla am an tum ti tuin am hre thei a ta? 8 Tawtawrawt khom mumal uma an mût naw chun tu am râl do dingin insiem an ta? 9 Chuong ang bokin, tong hriet theia in hril a ni si naw chun tuin am in thu hril chu hre thei tàng an ta? Boruoka tong mei mei ang chauh nîng in tih. 10 Sêl ruol loin khawvela hin tong chi hrang hrang a tam hle a, umzie nei lo pakhat khom a um nawh. 11 Amiruokchu a thu hril umzie ka hriet si naw chun kei chu a ta dingin ram dang mi nîng ka ta, ama chu ka ta dingin ram dang mi ni bok a tih. 12 Chuong ang char chu nangni lai khom a ni ve. Thlarau thilpèk dong in châk hle lai hin, kohran tungdingna dinga tha thlarau thilpèk chu hlut tak ro. 13 Chuleiin, tong hriet lo neihai chun a hrilfie theina hni raw se. 14 Tong hriet loa ka tongtai chun ka thlarau chu a tongtai ngèi a, ka ngaituona ruok chu ka hmang hlawk nawh. 15 Ieng tin am ni tâng a ti le? Thlarauin tongtai ka ta, ngaituona hmangin tongtai bok ka tih; thlarauin inpâkna hla sak ka ta, ngaituona hmangin sak bok ka tih. 16 I thlarauin Pathien inpâkin lawmthu hril la, i thu ngaithlatuhai khan i hril umzie an hriet si naw chun ieng tin am 'Amen' ti thei an ta? 17 I lawmthu hril tongtai chu a tha hle khom a ni thei, mi dang ruok chu a sukhlawk chuong nawh. 18 Nangni nêka tong hriet lo ka hmang rawn lem leiin Pathien chungah ka lawm hle a; 19 sienkhom kohran inkhawmah mi dang inchûktirna ding chun tong hriet loa thu mal sîngkhat hril nêkin ngaituona hmanga an hriet thiem thei zawng thu mal panga chauh hril ka nuom lem. 20 Unauhai, naupang lungril puta thil in ngaituo hlak kha bànsan ro; suol kongah nautesen ang ni unla, ngaituonaa ruok chu puitling takin um ro. 21 Dàn thua khom, "Tong dang hmangtuhai hmangin, Ram dang mihai hmûr hmangin, Hi mihai kuomah hin hril ka ta, Chuong sà khom chun mi ngaithla naw ni hai"j 22 Chuongchun, tong hriet lo hi ringnawtuhai ta dingin inchikna a na, ringtuhai ta ding chun a ni chuong nawh; chuong ang bokin thuhril hi ringtuhai ta dingin inchikna a na, ringnawtuhai ta ding ruok chun a ni nawh. 23 Kohran pumpui inkhawmah inrêngin tong hriet loin thu hril ta mur mur unla, la hre ngai lo amanih le ringnawtu amanih hung lùt hai sien, in invêt ta'm a nih an ti naw ding maw? 24 Inrêngin thu lo hril ni unla ruok chu, ringnawtu amanih la hre ngai lo amanih hung lùt ve lungril chu in thu hril chun tawk a ta, in hril hron a nih ti hrieng a ta, a suolzie inhriet suoktir a ta, 25 chuongchun, a lungril rûkhai chu phor langin, bokkhupin Pathien chawibiek a ta, "Nangni lai Pathien a lo um takzet a ni hi" ti lem a tih. 26 Unauhai, in inkhawm pha hla thlang nei dâm, thucha hril nuom dàm, puong ding nei dàm, tong hriet loa thu hril nuom dàm le hrilfie ding nei dàm in um si chun ieng tin am ni tâng a ta? Hieng po po hi kohran sukhrâtna dingin thaw ro. 27 Tong hriet loa thu in hrilin mi pahni, a tam tawpah pathum bâkin hril naw un la, an dot peiin hril unla, pakhatin hrilfie pei raw se. 28 Hrilfietu an um naw chun inkhawmnaa chun to el sien, ama hriet chauhin Pathien kuomah hril lem raw se. 29 Thuhril khom mi pahni pathum chauhin hril sien, mi dangin chîk takin lo ngaithla raw se. 30 Amiruokchu a ngaithlaa inthunghai lai thucha dong an um chun a hril hmasatu chu to phot raw se. 31 A'n dotin thu hril hlak unla, chuongchun mi tinin inchûk ding nei thei in ta, insukphûr tlàng thei in tih. 32 Thuhriltu thlarau chang chu a koltu thununna hnuoiah a um ding a nih. 33 Pathien chu buoina Pathien ni loin, remna Pathien a ni lem si a. 34 Kohran tina mi thienghlimhai thaw dàn angin, kohran inkhawmah nuhmei chu to zingin um raw hai se, thu an hril ve phal a ni si nawh. Dàn bua a hril angin, an intuklùt lem ding a nih. 35 Thil hriet fie an nuom chun in tieng an pasalhai indon lem raw se; nuhmei ta dingin kohran inkhawma thu hril hi thil inzapuium a nih. 36 Pathien thu hi nangnia inthoka suok a ni? In kuoma chauh a tlung a ni? 37 Tu khom zawlnei amanih thlarau mi amanih nia inngai chun in kuoma ka lekha hung ziek hi Lalpa thupèk a nih ti lo hre raw se. 38 Mêna thlâktu chu ama khom mena thlâkk nîng a tih. 39 Chuleiin ka unauhai, thuhril hi châk hle unla, tong hriet loa thu hril khom khap naw ro. 40 Amiruokchu, iengkim hi fel tak le mumal nei thlapa thaw ding a nih.

1 Corinthians 15

1 Unauhai, in kuoma Chanchin Tha ka hung hril, in pom tah le innghatnaa in hmang tah kha ka hung inhriettir nawk chêu a nih. 2 Hi Chanchin Tha, ka hung hril cheu kha in pom nghet tlat chun sandamin um in ta, in pom zing naw chun in ringna chu a thlawn nîng a tih. 3 Hieng hi thu poimaw tak ka dong ka hril sawng ta chêu kha a nih: Krista chu Pathien lekha thu ang peiin ei suolhai leiin a thi a, 4 phùmin a um a, Pathien Lekha thu angin a ni thum ni-ah keitho a ni a, 5 Peter kuomah a'n lâr a, sawm le pahnihai kuoma khom a'n lâr a, 6 chu hnunga chun unau za nga nêka tam hmaah a'n lâr a, chuong laia a tam lem chu an la dam a, a then ruok chu an lo in tah. 7 Chu zoah Jakob kuomah a'n lâr a, tirko po po kuomah a'n lâr nawk bok a. 8 A tawp taka chun kei, a thla kim loa pieng ang el kuoma khom hin a hung inlâr a. 9 Kei chu tirkohai laia chîn tak ka ni a, Pathien kohranhai ka suknomnat leiin tirkoa inbûk tlàk khom ka ni nawh. 10 Sienkhom, Pathien lunginsietna leiin ka ni ang hi ka hung ni a, ka chunga a lunginsietna chu a thlawn nawh. Tirko danghai nêkin sin ka thaw nasa lem a; amiruokchu, keima thaw a ni naw a, ka kuoma um Pathien lunginsietna khan a thaw a ni lem. 11 Keiin amanih anniin amania thu kan hril hlak ngèi kha a nih nangni khoma in lo ring tah hih. 12 Mithi laia inthoka Isu Krista keitho a ni thu kan hril hlak si chun ieng ti dana nangni laia thenkhatin mithi thonawkna a um nawh in ti am a na? 13 Mithi thonawkna a um si naw chun Krista khom kha keitho ni naw nih. 14 Krista kha keitho a ni si naw chun kan thu hung hril hi thu hmang lo nîng a ta, in ringna khom hmangna bo nîng a tih. 15 Chu chauh chu a ni nawh. Pathienin mithi laia inthoka Krista a keitho thu kan hril hlak a, mithi thonawkna a um si naw chun Krista khom keitho ni naw ni a, Pathien chungthua hrepuitu khêlhlip ni bok kan tih. 16 Mithihai keitho an ni si naw chun Krista khom kha keitho ni naw nih. 17 Krista kha keitho a ni si naw chun, in ringna chu a thlawn el nîng a ta; in suolnaah in la um zing nîng a tih. 18 Chuong a ni chun Kristaa lo in tahai khom kha an bohmang tah nîng a tih. 19 Kristaa beiseina ei nei hi tuta dam sûnga ding chauh lo ni sien chu, mi po po laia mi lungsietum tak nîng ei tih. 20 Nisienlakhom, Krista chu mithi laia inthokin keitho a ni takzet a, mithi thonawkhai hmathuoitu a nih. 21 Mihriem pakhat leiin thìna a hung um a, mihriem pakhat lei bokin mithi thonawkna khom a um a nih. 22 Adamah mi po po an thi ang khan, Kristaah mi po po sukhring nîng an tih. 23 Amiruokchu, mani hun sengah nîng a tih. Thonawkna hmathuoitu Krista chu a tho hmasa a, a dotah, a hung nawk pha ama mihai chu tho an tih. 24 Chu zoah tawpna chu hung tlung a tih. Lalram hai, thuneina hai le thilthawtheina po pohai a sukbo hnungah Pa, Pathien kuomah ram chu inhlàn a tih. 25 Pathienin a hmêlmahai po po hnè a, a ke hnuoiah a sie vong hma khat chu Krista chun ro a rêl ding a ni si a. 26 Hmêlma nuhnung tak sukboa um ding chu thîna hi a nih. 27 Pathienin, "Iengkim a ke hnuoiah a sie"l ti a ni a. Hi taka "iengkim" tia hin Krista hnuoia iengkim sietu Pathien chu a thang ve nawh ti a'n lang chieng a. 28 A hnuoia iengkim sie a ni hnungah, ama, Naupa ngei chu, a hnuoia iengkim sietu Pathien hnuoiah sie ni tâng a ta, Pathien chu iengkima chunghnung tak ni tâng a tih. 29 An leh, thonawkna a um si naw chun, mithi puola baptismam inchangtuhai khan iem a na an thaw hrim? Mithihai keitho an ni si naw ding chun ieng leia mithi puola baptisma an inchang hlak am a na? 30 Ieng leiin am keini khomin dârkâr tin kan hringna kan thâp am a na? 31 Unauhai, ei Lalpa Isu Kristaah ka suong êm chêu leiin ni tina thìna ka hmasuon hlak thu ka hril chêu a ni hi. 32 Mihriem beiseina mei mei chauh hmangin, Efesi khuoa hin sahrâng insuolpui ni ta lang, ka ta dingin iem a tangkai a? Mithihai keitho an ni si naw ding chun, 'Fain dawn ei tiu khai, Zîngah ei thi el ding a ni si a'nan ti ang hin ti ve inla tie! 33 Thuoi hmangin um naw ro, "Ruol suolin nungchang tha an sukkhawlo hlak"o ti a ni kha. 34 Har fîm unla, suol thaw ta naw ro. Thenkhat chun Pathien hrietna hrim in nei nawh; chu chu in inzakna dinga ka hril a nih. 35 Ieng tin am mithihai chu keitho nîng an ta? Ieng taksa am put an ta? tiin in indon a ni thei. 36 Chu chu zawna invêtthlâk tak a nih. Hnuoia thlai chi in tu hi a thi zet naw chun a to ngai nawh. 37 Bu chi amanih thil dang chi amanih in tu hin a kûng la hung um ding chu in tù naw a, a chi mal chauh a la nih. 38 Nisienlakhom, Pathienin a nuom dàn angin a kûng a hung siem a, thlai chi hrang hrangin kûng chi hrang hrang an nei hlak. 39 Taksa po po hi a'n ang vong nawh: mihriem taksa a dang a, ran taksa a dang a, vate taksa a dang a, nga taksa a dang. 40 Vàn taksa a um a, hnuoi taksa a um a, vàn taksa ropui dàn le hnuoi taksa ropui dàn khom a'n ang nawh. 41 Nisa hin ama ropuina a nei a, thlain ama ropuina hran a nei a, arasihai khomin ropuina an nei a, arasi hrang hrang ropuina khom a'n ang nawh. 42 Mithi thonawkna khom chuong ang bok chu nîng a tih. Taksa chu hmon theia tuin a um a, hmon thei loa keithoin a um a; 43 chawimawi loa tuin a um a, ropui taka keithoin a um a; hrât naw taka phûmin a um a, thilthawtheia keithoin um a tih. 44 Ei phûm kha mihriem taksa a ni a, keithoa um chu thlarau tieng taksa a nih. Mihriem tieng taksa a um chun thlarau tieng taksa khom um a tih. 45 Pathien Lekha thu chun, "Mihriem hmasa tak Adam chu mi hring a hung ni tah a" a ta; Adam nuhnung tak chu hringna petu Thlarau a nih. 46 Thlarau tieng um hmasa loin taksa tieng a um hmasa a, chu hnungah thlarau tieng a um chauh a nih. 47 Mihriem hmasa chu pila siem, hnuoi mi a na, mihriem pahnina chu vàn mi a nih. 48 Hnuoia mihriemhai chu hnuoia mi ang an na, vàna mihai ruok chu vàna mi ang an nih. 49 Hnuoia mi angna ei put ang hin vàna mi angna khom la put ngei ei tih. 50 Unauhai, taksa le thisen hin Pathien ram a hluo thei naw a, hmon thei hin hmon thei lo chu hluo bok naw nih ti ka hril a nih. 51 Thurûk ka hril cheu hi, ngaithla ngun ro. Ei rêngin ei in vong naw ding a na, sienkhom tawtawrawt nuhnung tak a'n ri pha chun thawk le khat, mit khap kâr loin sukdanglam ni vong ei tih. 52 Tawtawrawt a hung inrîk pha chun mithihai chu hmon thei loa keitho nîng an ta, eini khom sukdanglam nîng ei tih. 53 Hmon thei hi hmon thei loah inchang a ta, thi thei hi thi thei loah inchang a tih. 54 Chuong anga hmon thei hi hmon thei loa a'n chang huna chun hi Pathien Lekha thu, "Thìna chu hnènain a lem zo tah, p 55 Aw thîna, khaw lam i hnèna chu?Aw thîna, khaw lam i tûr chu?"q ti hi la hung tlung kim a tih. 56 Thîna tûr chu suol hi a na, suol thilthawtheina chu Dàn hi a nih. 57 Sienkhom, ei Lalpa Isu Krista zara hnèna mi petu Pathien kuoma chun lawmthu um raw se. 58 Chuleiin, ka unau dittakhai, sukchâng ruol loin ngîr nghet unla, Lalpaa chun in sin inrimna a thlawn naw dingzie hre zingin, Lalpa rongbawlna sina chun inpe fai thak ro.

1 Corinthians 16

1 Mi thienghlimhai ta dinga thawlawm thaw thua chun, Galati kohranhai ka hril ang khan thaw ve ro. 2 Pathienni zâtin nangni lai tu khomin malsawmna in dong dàn ang peiin sie khawl ro, ka hung phaa dawl a ngai nawna dingin. 3 Ka hung pha leh in thilpêkhai chu Jerusalema fepui dingin mi in ring zawnghai chu ka lekha inchawitirin tir ka tih. 4 Ka fe ve a tûl a ni lem chun ka ruolin hung vèng an ta. 5 Makedonia ram ka sir hnungin in kuomah hung ka tih; Makedonia ram fang a tûl tlat si a. 6 In kuomah sawt fe ka châm el thei, thlasik sûng po khom a ni el thei a; kan zin nawk peina dinga khom in mi thangpui ding annawm. 7 Tuta tum chu fe malama hung sir vuoi cheu ringot ka nuom naw a, Lalpan rem a ti chun iemani chen in kuoma châm ka beisei a nih. 8 Efesi-a hin Pentikos ni chen châm ka tih. 9 Hlawk taka rong bawl theina lampui ka ta dingin a'n hong a, dodâltu ruok chu an tam êm êm. 10 Timothe a hung chun nangni lai inphalam dêr lo dingin lo inumtir ro, keima ang boka Lalpa rongbawltu a ni kha. 11 Chuleiin, tu khomin lo ngainêp naw ro. Ka kuoma a hung kîr vak theina dingin thlamuong takin hung inthla ro; unau danghai ruola a hung tlung ka beisei. 12 Unaupa Appolo ruok chu unau danghai ruola in kuoma hung dingin ka ngên rak a, sienkhom tu hri hin chu a nuom tlat naw a, hun remchàngah la hung ngei a tih. 13 Inring zingin um ro; ringnaah ngîr nghet unla; huoi tak le hrât takin um ro. 14 In thaw taphot chu hmangainain thaw pei ro. 15 Stefan hai sûng kha Akai biela ringtu hmasa an na, mi thienghlimhai rongbawlna sinah an inpêk zo ti in hriet a; 16 chuong ang mihai le an thawpui le rongbawlpuihai thu chu zawm pei ro. 17 Chun, Stefan hai, Forchunata hai, Akaika hai an hung hin an mi suklawm hle a; anni hin in um naw inlang lo khopin an mi siem a, 18 in lungril an sukhar ang bok khan ka thlarau khom an sukhar ve a nih. Hieng ang mi hi ngaisâng ro. 19 Asia rama kohranhai hin chibai an bûk cheu. Akuila le Prisila le an ina kohran inkhawmhai hin Lalpa hmingin chibai vochuom an bûk chèu. 20 Unau dang po po khomin chibai an bûk chêu a; fawp thienghlimin in chibai tuo ro. 21 Hi chibai bûkna lekha hi kei Paula hin kut ngeia ka hung ziek a ni hi. 22 Tu khom Lalpa hmangai nawtu chu tongsephurin um raw se. Lalpa chu a hung ie!r 23 Ei Lalpa Isu lunginsietna chu in kuomah um raw se. 24 Krista Isua ka hmangaina cheu chu in rênga kuomah um raw se.

2 Corinthians 1

1 Paula, Pathien dit zawnga Krista tirko le ei unaupa Timothe chun Korinth khuoa Pathien kohran le Akaia biel pumpuia mi thienghlim po pohai chibai kan bùk. 2 Pathien, ei Pa le Lalpa Isu Krista kuoma inthoka lunginsietna le inremna chu in kuomah um raw se. 3 Ei Lalpa Isu Krista Pa le Pathien, lunginsietnaa sip Pä, thlamuongna petu Pathien chu inpâkin um raw se. 4 Pathiena inthoka thlamuongna ei dong chu hmanga harsatna tinrêng tuortuhai ei thlamuong ve theina dingin Ama chun ei harsatna po poa chun a mi thlamuong hlak. 5 Krista tuornahai chu ei nunah ei tuor rawn po leh ei thlamuongna khom Krista zärin a pung hlak. 6 Rinum kan tuor chun in thlamuongna le in sandamna ding a na; thlamuonga kan um chun nangni thlamuongna ding bok a nih, rinum kan lo tuor tah ang chu sel tak le thlamuong taka in tuor ve theina dingin. 7 Rinum mi tuorpuitu in ni angin thlamuongna mi'n tawmpuitu ding in nih ti kan hriet leiin in chungah beiseina nghet tak kan nei. 8 Unauhai, Asia rama harsatna kan tuokhai kha in hriet naw kan nuom nawh; khäng ang khopa tuor zo ruol lo phur rikin mi del a, dam hrim khom kan inbeisei ta naw hiel thuhai kha. 9 Kan lungril tak chun thi ngêi dingin kan inngai a. Sienkhom chu thil chu keiniah ni loin mithi keithotu Pathiena mi'n nghattirtu a lo ni tah lem hlauh a nih. 10 Chuong ang thi el theina ti-um laka inthok chun a mi san suok a; ama chun mi la san suok nawk pei a tih ti hi kan beisei innghatna a nih. 11 Tongtainan mi san unla, mi tam tak in tongtaina zàrin lunginsietna dong kan ta, keini leiin mi tam takin Pathien kuomah lawmthu hril thei an tih. 12 Kan uongpui chu hi hi a nih: khawvel varna ang ni loin Pathien lunginsietna lei chauh lemin Pathiena inthoka suok nun thienghlim le tlang tak chu putin mihai lai kan khawsa hlak a, chu chu nangni lai hin a ni nawkzuol ti mi hrepuitu chu kan sie le tha hrietna hi a nih. 13 Kan lekhathona khan in tiema in hriet thiem naw ding ieng khom kan ziek naw kha. 14 Tu hin in la hriet thiem vong nawa chu, Lalpa Isu Ni-a kan uongpui ding in ni ang bokin in uongpui ding kan nizie hi a kimin in la hung hriet chieng pei ka beisei. 15 Chu chu ka ring tlat leiin hlawkna tum hni in chang theina dingin sir hmasak phot chêu ka tum a. 16 Makedonia ka fe malamin sir chêu a, Makedonia rama inthoka ka hung kìr tieng sir nawk chèu ka tum a, chu taka inthok chun Judai ram tienga ka'n zin peina dinga khom in mi san ka beisei. 17 Hi hi ka remruot lai hin tum mumal nei lo ka hoi am a nih? An naw leh rem ka ruot lai hin khawvel mihai thaw dàn hmangin, a châng leh "A nih, a nih" ti a, a nawkah "A ni nawh, a ni nawh" ti mei mei am ka nih? 18 Pathien chu a ringum leiin in kuoma kan thucha khom a chângin "A nih" ti le a chângin "A ni nawh" ti ang hi a ni nawh. 19 Kei le Silvan le Timothe haiin in kuoma a chanchin kan hril, Isu Krista, Pathien Naupa chu "A nih" le "A ni nawh" a ni kop ve si nawh; amaa chun "A nih" ti chauh a um. 20 Pathien thu tiem chu ieng zât khom ni sien, Kristaa chun "A nih" ti vong a nih. Chuleiin, Pathien ropuina dingin Isu Krista zàrah "Amen" ei ti hlak a nih. 21 Keini le nangni mi siemtu, Kristaa mi suknghettu le hriek mi nàltu chu Pathien a nih. 22 Ama tâ ei nizie suoi nama mi'n chiktu le ei lungrila zakhamna thlarau mi petu a nih. 23 Nangni hlà ding cheuin Korinth khuo ka hung sir nawk ta naw a nih ti mi hrepuitu chu Pathien a nih. 24 In ringna chungah insuklal kan tum naw a, in lawmna dinga nangni le thok tlâng ei ni lem, ringnaa chun in ngìr nghet si a.

2 Corinthians 2

1 Chuleiin, in lungril sukna ding chun in kuomah hung ta naw el lang tiin lungril ka siem a. 2 In lungril ka sukna chun, nangni ka suknathai bok naw chu mi suklawmtu ding tu dang am an um a? 3 Ka hung phaa mi suklawmtu ding haiin ka lung in suknat nawna dingin khä lekha khah ka hung thon chêu a ni khah. Ka lawmna chu nangni khomin in mi lawmpui seng ka ring tlat a nih. 4 Mitthli tam tak sêngin, lungril beidong le rinum tì pumin, in lung suknatna ding ni loin, ka hmangaina chêu inthùkzie in hriet theina dingin, ka hung ziek a ni khah. 5 Lungngaina intluntu chun kei chauh a mi suklungngai naw a, iemani chenah in rêngin a suklungngai chêu a nih ti inla ka uor taluo ni kher naw nih. 6 Mi tam lemin hienga ama in hrem hi a huntawk. 7 Tu hin chu lunginsietin thlamuong ta lem ro, chuong naw chun lungngaina tuor ruol loin tlâkbuok hlauh rawi a tih. 8 Chuleiin, ama chu in hmangai takzetzie inlangtir dingin ka ngèn cheu. 9 Kong tinrêngah thu awiin fie in dawl am ti hrietna dingin lekha khah ka hung thon chêu a ni khah. 10 Tu khom in ngaidam taphot chu kei khomin ka ngaidam ve. Ngaidamna ding a um a, ka lo ngaidam tah chu nangni leia Krista mit hmua ka ngaidam a nih, 11 chuong naw chun Setanin mi tlâkkhal rawi a tih, a dawha thiem dàn ei inhmai si naw a. 12 Krista Chanchin Tha hril dinga Troas ka tlung khan Lalpan rongbawlna lampui a mi hongpèk a. 13 Sienkhom ka unaupa Tita ka hmu naw leiin ka bei a dong hle a. Chuongchun anni chu chibai ka bûk a, Makedonia ramah ka fesan tah a nih. 14 Nisienlakhom, Kristaa a hnèna lampuia mi thuoi roptu le keini hmanga ama hrietna rimtui hmun tina thèdartu Pathien kuoma chun lawmthu um raw se. 15 Keini hi bohmang mèkhai le sandam mèkhai laia Pathien ta dinga Krista rimtui chu kan nih. 16 Bohmang mèkhai ta ding ruok chun thìna rimsie kan na, sandam mèkhai ta ding chun hringna rimtui kan nih. Chu sin chu tuin am tlin zo a ta? 17 Mi tam takin Pathien thu sumdawngnaa an hmang ang hin kan hmang ve nawh. Chu nêk hmanin, Pathien mi tir angin, Pathien mit hmuah Kristaa chun titakzetin thu kan hril lem hlak.

2 Corinthians 3

1 Mani inhril mawi ei thaw nawk an ta maw? An naw leh, mi danghai ang bokin rikawmenna lekha kan hung chawi amanih, nangnia inthokin chu chu kan lâk amanih a ngai ta hiel a ni maw? 2 Nangni hi kan lekha, mi tin hriet le tiem dinga kan lungril phèka ziek chu in nih. 3 Nangni hi Krista lekha, keini a mi'n ziektir, lekhatuia ziek ni lo, Pathien hring thlaraua ziek, lung phèka ziek ni lo, mihriem lungril phêka ziek chu in nih ti a chieng. 4 Chuong ang khop chun Krista zàrin Pathien hmaah kan inring zo a nih. 5 Keini ngot chun kan tlin naw a, keini thaw anga hang hril ding ieng khom a um bok nawh; kan tlinna chu Pathiena inthok a ni lem. 6 Ama chun Thuthlung Thar rongbawltu ni tlâkah a mi siem a, chu chu Dàn, hawropa ziek ang kha ni loin Thuthlung Thar, Thlaraua ziek chu a ni lem. Dàn, hawropa ziek chun thìna a'n tlungtir a, Thlarau ruok chun hringna a pêk. 7 Mosie hmel êng, chuoi nawk el ding hman Israel nauhaiin an en zing ngam naw hiel khopin a ropui a, lunga hawropa ziek, thìna intluntu rongbawlna hman khâng khopa ropui a ni chun, 8 Thlarau rongbawlna lem chu nasa takin a ropui zuol naw di'm a ni? 9 Thiemnaw inchangtirna rongbawlna hman a ropui chun, thiem inchangtirna rongbawlna lem chu a va hang ropui ding ngei de! 10 Chu konga chun, ropui tak kha a nêka ropui lem daih a lo um tah leiin a ropui zing ta nawh. 11 Chuoi nawk el hman chuong ang khopa ropui a ni chun chuoi ta lo ding ropuina chu a va nasa awm ngei de! 12 Chuong ang beiseina chu kan nei leiin kan huoi a nih. 13 Mosie hmèl êng a chuoi chena Israel nauhaiin an en zing nawna dinga a hmai a'n khum ang khan keini chun kan thaw ve nawh. 14 An lungril sukchololin a um a, voisun ni chen khom hin Thuthlung Hlui bu an tiem châng po leh chu hmâi inkhumna chun an lungril a la'n khum zing a nih. Hawkpêk an la ni hrì nawh; chu inkhumna hawk thei chu Kristaa chauh a ni si a. 15 Tu chen khom hin Mosie lekhabu an tiem chàngin chu inkhumna chun an lungril a la'n khum zing a nih. 16 Nisienlakhom, Lalpa tieng tu khom a ngha pha, chu inkhumna chu hawkpêk a ni chauh hlak. 17 Lalpa chu Thlarau a na, Lalpa Thlarau umna taphotah zalènna a um hlak. 18 Chuongchun, eini hmai inkhum ve lohai hi Lalpa ropuizie tàr langna dàrthlalang chu ei ni a, ropuinaa inthoka ropui zuol pei dinga ama angpuia siem danglam pei ei nih. Chu chu Lalpaa inthoka hung um a na, ama chu Thlarau a nih.

2 Corinthians 4

1 Chuleiin, hi rongbawlna sin hi Pathien lunginsietna zàra dànde kan ni leiin kan zàm nawh. 2 Zàm nêk hmanin thil inzapuium, a rûka an thaw hlakhai chu kan hnawl a; dawha hmanga, Pathien thu a'n dik naw zawnga hril kan chîng bok nawh. Tlang takin thutak kan tàr lang a, Pathien hmaah mi tin sie le tha hrietna mit tlunga um kan tum lem hlak. 3 Chun, kan Chanchin Tha hril hi a chieng naw a ni khomin bohmang mèkhai ta ding chauha chieng naw nìng a tih. 4 Krista chu Pathien angpui ngei a na, sienkhom Krista ropuina Chanchin Tha êng chu an hmù thei nawna dingin tu lai khawvel pathien chun ringnawtuhai lungril mit a sukdel si a. 5 Keini chanchin hril loin, Isu Krista chu Lalpa a ni thu le keini hi Isu zàra in siehlawhai kan ni thu kan hril lem hlak. 6 Pathien ropuina, Isu Krista hmèla hung inlang chu kan hriet chieng theina dingin, "Thimah var hung êng raw se" titu Pathien chun kan lungrilhai hi a sunvar ta si a. 7 Nisienlakhom, hi thilthawtheina nasa tak hi keinia inthoka suok ni loin Pathiena inthoka suok a nizie a'n lang chiengna dingin chu ro chu pil bêlaha kan kol a nih. 8 Sîr tinah hnaw chêpin kan um a, sienkhom hneng ter kan ni nawh; chanhaiin kan um a, sienkhom kan beidong nawh; 9 suknomnatin kan um a, sienkhom màksanin kan um nawh; vuok thlûkin kan um a, sienkhom sukhlum kan ni nawh. 10 Lalpa Isua hringna chu kan taksaa hin a'n lang theina dingin Isu thìna khom kan taksaa hin kan put zing a nih. 11 Isu hringna chu ei taksa thi theia hin a'n lang theina dingin eini hring le dama la umhai khom hi Isu leia thi dinga ti ei ni rop a nih. 12 Chuongchun, thinain keiniah sin a thaw laiin nangnia ruok chu hringnain sin a thaw thung a nih. 13 "Ka ring a, chuleiin ka hril a nih" ti ziek ang khan, chuong ang ringna lungril chu putin keini khomin kan ring a, thu kan hril hlak a nih. 14 Chuleiin, mithi laia inthoka Lalpa Isu keithotu chun keini khom Isu leh mi keitho vèng a ta, nangnihai leh a kuomah mi'n umtir a tih ti kan hriet. 15 Hieng po po hi in thatna ding a na; chuongchun, Pathien lunginsietna chu mi tam tak lai sukpunga a um pei ruolin, Pathien ropuina dingin lawmthu hrilna khom nasa takin luong liem a tih. 16 Chuleiin, kan zàm nawh. Puo tieng taksa hi zûr tiel tiel sienkhom kan sùng tieng nun ruok chu a ni têlin siem tharin a um pei lem a nih. 17 Sawt naw te sùnga kan rinum tuor nêp tak hin bûk khi ruol lo chatuon ropuina chang dingin a mi buotsai a. 18 Chuleiin, hmu thei thil thlîr loin, hmu thei lo thil chu kan thlìr lem a nih. Hmu thei thil chu bo el ding a na, hmu thei lo thil ruok chu chatuona ding a nih.

2 Corinthians 5

1 Ei chèngna hnuoi in hi tiek sien khom, kuta bawl lo chatuon in hlun, Pathien buotsai chu vànah ei nei ti ei hriet. 2 Tuhin vàn thuom ei inbel hun ding nghâkhlain ei inrùm takzet a, 3 ei inbel pha chun saruokin lêng ta nawng ei tih. 4 Hi taksa ina ei la chêng sùng hin thawpikin ei inrùm a, ei sil lai hlip thlâk ei nuom lei ni loin, vàn thuom sil thuo vat vat ei chàk lei a nih; chu pha chun thi thei hi hringnain lem zo tàng a tih. 5 Chu dinga mi buotsaitu chu Pathien a ni a, thil la hung tlung ngei dinga a tiem zakhamna dingin Thlarau a mi pèk a nih. 6 Chuongchun, taksa ina chêng ei la ni lei chauha Lalpa kuoma la um hrì lo ei nih ti hrein ngai muong takin ei um rop hlak. 7 Hmu thei hin a mi thuoi naw a, ringnain a mi thuoi lem a nih. 8 A nih, ei ngai a muong a, hi taksa hi màksana Lalpa kuoma um chu ei thlang lem hrim a nih. 9 Chuleiin, taksa ina chêng ei la ni amanih ei ni ta naw amanih khomin ama chu suklawm ei tum tlat a nih. 10 Hi dam sûnga ei thil thaw man a sie a tha hmu dingin, ei rêngin Krista rorêlna hmaah ei la inlang vong ding a ni si a. 11 Chuongchun, Lalpa tiumzie hrein, ti nachâng hre dingin mihai hnè kan tum hlak a nih. Pathienin a mi hriet fai vong a, nangni khomin in lungril tak chun in mi hriet chieng ka ring. 12 In kuomah hung inhril mawi kan tum naw a, lungril tieng ni loa puo tieng inlang dàn ringot suongtuhai chu remchâng taka in don lêt theina dingin, keinia suong ding tha chu kan hung hril chêu a ni lem. 13 Kan invèt a lo ni khomin Pathien ta ding a na, kan var a ni chun nangni ta ding a nih. 14 Mi po po ta dingin mi pakhat a thi a, chuleiin mi po po khom an thi a nih ti hin a mi hné êm leiin, chu Krista hmangaina chun thaw dingin a mi tur a nih. 15 A hringhai chu anni ta dinga hring ni ta loa, an ta dinga thia thonawk ta dinga hring an ni theina dingin, mi po po ta dingin a thî a nih. 16 Chuleiin, tuta inthok hin chu mihriem thlîr dànin tu khom kan en ta nawh. Chuong ang chun kha hma khan Krista chu lo hre hlak inlang khom, tu hin chu chuong ang chun kan ngai ta nawh. 17 Mi tu khom Kristaa um chu thilsiem thar a hung ni ta a, a mihriem hlui chu a bo a, ngai ta, mi thar a hung ni tah! 18 Hieng po po hi Pathiena inthok vong a nih; ama chun Isu Krista zàrah ama leh a mi'n remtir a, inremna rongbawl sin a mi pèk a. 19 Pathienin Kristaah khawvel hi ama leh a'n remtir a, an bawsietnahai chu bawsietnaah a tiem ta naw a, chu inrem nawkna thucha chu a mi'n koltir a nih. 20 Chuleiin, Krista ta dinga palai kan ni a, Pathienin keini hmanga a ngèn chêu angin, "Pathien leh inrem ro" tiin Krista aiawin kan ngèn chêu a nih. 21 Ama zàra Pathien felna ei lo chang ve theina dingin, suol hrim hrim nei lo chu, eini leiin Pathienin suol thawinaah a siem tah a nih.

2 Corinthians 6

1 Ama rong kan bawlpuihai in ni leiin, Pathien lunginsietna chu tangkaipui loa in dong nawna dingin kan ngên cheu a nih. 2 Ama chun, 'Ka lungawi hunah ka ngaithlàk che a, Sandamna niah ka thangpui che'b a ti si a. Ngai ta u, tu hi Pathien lungawi hun chu a na, ngai ta u, tu hi sandamna ni chu a nih. 3 Kan rongbawlna hi mihaiin an hril siet nawna dingin tu lampuia khom dâlna kan siem ngai nawh. 4 Siem nêk hmanin, kan thaw taphotah Pathien rongbawltu kan nizie suklangin, sukdùdàna hai, rinumna hai le hnawchêpna hai sel takin kan tuor a. 5 Vuok kan tuor a, lung inah kan intàng a, tlâng chîl kan tuok a, imu khom hmu loin sin kan inrim a, phingtâm kan tuor a; 6 thienghlimnaa dàm, hriet thiemnaa dàm, dawtheinaa dàm, ngilneinaa dàm, Thlarau Thienghlima dàm, hmangaina tak taka dàm, 7 thudik hril konga dàm, Pathien thilthawtheina hmang konga dàm Pathien rongbawltuhai ni awm hrimin kan um a; voi le changah felna râlthuom kan chawi hlak. 8 Chawimawi kan hlaw a, ngainêp kan hlaw bok a; inpâk kan hlaw a, dem kan kâi bok a; thudik kan hril a, hlemtuah an mi ngai a; 9 mi hriet hlaw vieu sia tu hriet hlaw loa ngai; thi vâng vâng, sienkhom hring bok si; vuok hrep tuok, sienkhom thi si lo; 10 lungngaina tuok hlak, sienkhom lawm rop si; rethei hle sia mi tam tak sukhausatu le ieng khom nei loa iengkim hau bok si kan nih. 11 Aw Korinth khuoa mihai, lungril inhong takin in kuomah thu tlang takin kan hril hi. 12 Keini chun kan ngaina zing cheu a, nangni ruok chu keini lakah in inhong si nawh. 13 Mani nauhai angin ka hril chêu hi, keini ang bokin lungrilah inhong ve ro. 14 Ringnawhai leh rîngkol bât hmunkhat naw ro. Felna le rîtlonain iem inzawlna an nei a? Var le inthim an inkop thei am a ni? 15 Krista le Belialc khom an inrem thei am a nih? Ringtu le ringnawtuhai khomin iem inthuhmunna an nei a? 16 Pathien tempul le milemhai khomin iem inthuhmunna an nei? Eini ruok chu Pathien hring tempul ei ni si a. Pathienin, "Anni leh chêngin intlon kan ta, An Pathien nîng ka ta, Anni chu ka mihai nîng an tih"da ti ang khan. 17 Chuleiin, LALPAN hieng hin a tih:"Anni laia inthokin hung suok unla, A tumin um ro; Thil thieng lo tawk naw ro. Chuongchun, lawm ka ti chêu a, e 18 In ta dingin Pa nîng ka ta, Nangni khom ka ta dingin, Naunu le naupa nîng in tih'Iengkim Lalpa chun a tih"f

2 Corinthians 7

1 Dittakhai, chu thutiem chu ei nei leiin ei taksa le thlarau sukporchè thei taphot lakah invong thienghlimin, Pathien tìna tieng thienghlim famkim ni tum ei tiu. 2 In lungrilah hmun mi'n kien ro. Tu poi khom kan tawk naw a, tu khom kan thuoi suol naw a, mani chan thatna dingin tu khom kan hmang ngai bok nawh. 3 Thiem naw inchangtir ding chèuin chu chu ka hril naw a, ka hril tah ang chêu khan kan lungrilah in um tlat a, nangni le chuh thi leh thi tlàng, dam leh dam tlàng kan inhuom a nih. 4 Ka ring zo èm êm cheu a, ka suong bok chêu a nih. Nasa takin in mi sukphùr a, rinum tinrêng kan tuornaah khom lawmin ka sip liem hlak. 5 Makedonia kan hung tlung khom khan kan sawl a la dam chuong nawh, sîr tinah mi beiin, puo tienga inthoka mi do pawl le a sûng tienga inthoka mi'n thi pawl an um bok a. 6 Sienkhom, mi chanhai-hai thlamuongtu Pathien chun Tita a hung khan a mi thlamuong tah a nih. 7 A hung tlung lei chauh khom ni loin, nangni leia a thlamuongna lei khomin a mi sukthlamuong bok a; in mi ngaizie dàm, nasa taka in insìrzie dàm, kan ta dinga thahnem in ngaizie dàm a mi hril a, chu chun a mi suklawm zuol a nih. 8 Ka lekha khan in lung a sukna ti ka lo hrietin ka'n sìr hman vâng a, sienkhom ka lekha khan sawt naw te chauh a sukna cheu ti ka lo hriet nawk nghàl leiin ka'n sìr nawk ta nawh. 9 Tu hin chu ka lawm tah, in lung ka suknat lei ni loin, poitia in sim ta leiin. Pathien ditzawnga lungngai in ni leiin keini suknat in ni nawh. 10 Pathien tienga lungngaina chun sandamna dinga simna insìrum lo a'n tlungtir a; khawvel thil taka lungngaina ruok chun thìna a'n tlungtir hlak. 11 Ngai ta u, Pathien ditzawnga in lungngai hin thahnem a va'n ngaitir nasa chêu de aw! In indikzie suklang nuomna hai, mi suol theidàna le suol thaw inlâunahai in hung nei a; mi ngainat nachâng dâm, mi invoi nachang dàm le mi suol hrem nuomna dàm in hung nei thar ta hi! Hieng thil po poa hin in lo inkei zap ve dêr nawh ti nangni ngeiin in suklang chieng tah a. 12 In kuoma ka lekhathon kha thil suol thawtu amani le a thaw suolna tuortu lei amania ka ziek a ni naw a, Pathien mithmua kan ta dinga thahnem in ngaizie nangni ngeiin in hmu suok theina dinga ka hung ziek a ni lem. 13 Hi lei hin kan thla a muong tah a, chu el bàkah, in rênga Tita lungril in sukhar leia a lawm hmêl kan hmuin kan hlim nawk zuol a nih. 14 Tita kuoma hin ka suong hle hlak chêu a, in mi sukhmaimawk naw hrim a. In kuoma thu kan lo hrilhai po po kha a'n dik ang bokin, Tita bula kan lo suongna chèu khom chu a'n dik ngeizie a hung inlang chieng tah a ni hih. 15 Chun, in rênga a thu in awizie dàm, ti le inthin puma in lo lawmzie dàm hre zingin a ngaina nawk zuol chêu a nih. 16 Kong tinrêngah ka ring ngam chêu leiin ka lawm a nih.

2 Corinthians 8

1 Unauhai, Makedonia rama kohranhai lungrila Pathienin lunginsietna a'n neitir dàn hi kan hril nuom chêu a nih. 2 Rinumna nasa taka fie an ni zing pum khomin an lawmna a luong liem a, rethei mong tol ni siin an tik a tlâi êm èm a. 3 Anni lungril puok suok ngatin, nei thinglung khawngin an pèk a, an tlin baka tam daih an pèk ti khom ka hrietpui. 4 Mi thienghlimhai somdawlna ding rongbawlnaa hin thang ve an hni rak a. 5 Kan lo beisei phàk lo zawng daiin, anni ngei chu Lalpa kuomah an inhlân phot a, chu hnungah Pathien dit dàn angin kan kuomah an hung inpêk a. 6 Chuongchun, nangni laia somdawlna thilpêk lâk khawmna, khâ hmaa in lo tan tah kha hung thaw zopui nghal dingin Tita kan ngèn a. 7 Ringnaa dàm, thuhrila dàm, hrietnaa dàm, thahnemngai tûlna tinrênga dàm le in mi hmangainaa dàm mi in khûm hlak ang khan, somdawlna thilpêka khom hin mi khûm ngèi dingin thahnem ngai ro. 8 Hieng hi thupêk anga ka hung hril a ni nawh, in hmangaina chu a tak ngèi a nizie fiena dinga thilpêk tienga mi danghai thahnemngaizie thu ka hung hril a nih. 9 Ei Lalpa Isu Krista lunginsietna hauzie chu in hriet a; a retheina leia in hung hausak theina dingin, hausa hle sien khom nangni leiin a hung rethei tah a ni kha. 10 Hi thua hin in ta dinga thaa ka hriet chu hi hi a nih: ni kum khan a thaw hmasa tak chauh khom ni loin a thaw nuom hmasa tak in nih. 11 A tira in inhuom ang khan, in nei dàn le inphû tawk ang peia pein, tu hin thahnemngai takin hlen suok ro. 12 Miin a nei naw sà ni loin, a thil neia inthoka phal taka pèk nuomna lungril neia a pèk a ni chun lawm a um. 13 Nangnin mi dang rimsi takin sawk zàngkhai inla kan ti a ni naw a, insawk tuo a tûl thu kan hril a nih. 14 Tu hin nangnin in nei laiin an tlàksamna in phuhrùkpèk a, anni khomin an nei ve hunah in tlàksamna la phuhrùkpèk an ti chêu; chuong ang chun in insawk tuo ding annawm. 15 'A rût tamtu chun a nei tam chuong naw a, a rût tlawmtu chun a tlasam bok nawh' ti ziek ang khan. 16 In ta dinga thahnem ka ngaina ang Tita lungrila sietu Pathien kuomah lawmthu um raw se. 17 Ama chun ka ngènna a pom el chauh khom ni loin, thahnem a ngàina lei lemin in kuoma hung a tum a. 18 Ama ruolin unau pakhat ka hung tir sa ve a, ama hi Chanchin Tha hril thuah kohranhai po poin an inpâk hle a. 19 Chu chauh khom chu ni loin, Lalpa ropuina dinga thahnemngai taka hi somdawl rongbawlna sin kan thawnaa kan inzinpui dinga kohranhaiin an thlang suok a nih. 20 Mihaiin phal taka tam tham tak an pêk khawm hi kan buoipuinaah dem kai naw hràm hrâm kan tum a nih. 21 Lalpa hmua mawi chauh ni loin mihriem hmua mawi khom ei ngaituo bok ding a nih. 22 Chun, kan unaupa khom hi anni ruolin ka hung tir bok a nih. Ama khom hin thahnem a ngaizie kong tam takah a suklang rop tah a, tu lem hin chu a ring èm chêu leiin hung a châk nawkzuol a. 23 Tita hi ka ruolpa, nangni laia rong mi bawlpuitu a na, unau danghai khom hi kohranhai palai, Krista ropuina an ni hi. 24 Kohranhaiin hmangaina in hauzie an hmu a, kan inpàkna chèu hi a'n dikzie an hriet theina dingin, an chungah in hmangaina lo inlangtir ro.

2 Corinthians 9

1 Mi thienghlimhai somdawlna sin hi in kuoma ziek a ngaiin ka hriet nawh. 2 Thangpui in inpei zing ti ka hriet a, Makedonia mihai kuoma khom suong takin, "Ni kuma inthok tah khan Akaia ramg chu an inpuocha tah" tiin ka hril hlak a, in thahnemngaina chun mi tam tak a chokhar a. 3 Hi thila hin ka'n pâk thlawn nawna ding chèuin le ka hril ang ngeia in lo inbuotsai fel theina dingin unauhai hi ka hung tir a nih. 4 Makedonia rama mihai hi keini ruolin hung ve ta hai sien, in la'n pei fel nawh ti an hung hmu chun, kan ring êm êm vei chêu leh, in ta ding chauh ni loin, kan ta ding khomin inzak a um hlè ding a nih. 5 Thawlawm thaw dinga in intiem ta sahai kha lo sukfel diem dingin unauhai hi hung tir hmasak tûlin ka hriet a; in lo inpei hman tah chun in thilpèkhai chu làk lui ang ni loa nangni thu ngèia in pèk a nih ti inlang chieng a tih. 6 Tu khom a tù tlawm chun sîk tlawm a ta, a tù tam chun sîk tam a tih ti hi hre zing ro. 7 Mi tinin mani lungrila tum ang chu inro lo le thawluina ang ni loin pe seng raw se; Pathien chun lawm taka petu a nih a hmangai hlak. 8 Thil tha tinrêng thawna dinga iengkima in burip zingna dingin Pathien chun malsawmna tinrêng hnienghnâr takin a vûr thei chêu a nih: 9 "A sem dar a, pasiehai a pêk a, A tiktlàina chu kumkhuoin A pangngai zing a nih"hti ziek ang khan. 10 Tù dinga thlai chi petu le fàk dinga bu petu chèu chun thlai chi pe teuh a ti chêu a, inthangtir a ta, in felna ra chu sukpung bok a tih. 11 Kong tinrênga tiktlâi hle dingin sukhausâng a ti chêu a, chun, keini hmanga in thilpèk lei hin Pathien kuomah lawmthu hril an tih. 12 In somdawlna thilpèk hin mi thienglimhai mamaw a phuhrûkpêk chauh ni loin, Pathien kuoma lawmthu hrilna khom nasa takin sukpung bok a tih. 13 Hi in rongbawlna hin in pom tah Krista Chanchin Tha ta dinga in ringumzie le thu in awizie hai le an ta ding le mi dang po po ta dinga in tiktlàiziehai a suklang a, chu chun Pathien inchawimawitir ngèi a tih. 14 Anni khomin Pathien lunginsietna in dong nasa êm lei hin ditsak takin in ta dingin tongtai ngèi bok an tih. 15 A thilpêk hril sèng ruol lo leiin Pathien kuomah lawmthu um raw se.

2 Corinthians 10

1 Kei Paula, 'hmai sana chu pa awm nêm tak, ral kânga chu pa awm khauh tak' in ti ngei hin Krista thuhnuoirolna le nunnèmna sâlin ka ngên cheu. 2 Tisa mi tak anga khawsaa mi hriltuhai lakah ka khauh ngam dingzie ka hriet si a, ka hung phaa chuong anga ka um a tûl nawna dingin ka ngên cheu a nih. 3 Khawvela khawsa ni inla khom khawvel do dàn angin râl kan do ve nawh. 4 Indona hriemhrei kan hmanghai hi khawvel râlthuom a ni naw a, kulpui thiek theina Pathien râlthuom thilthawthei chu a ni lem. 5 An thang hmun kan thiekpêk pei a, Pathien hrietna lampui chapo taka dodàltu taphot kan tukdol a, ngaituona tinrêng Krista salah kan man bok a nih. 6 Thu in awi zân pha leh a la awi nawhai chu hrem dingin kan inpei zing a nih. 7 Puo tieng inlang dàn ringotin thil in thlîr a. Tu khom Krista ta ni bîka insie dâm an um chun inngaituo non raw se; Krista ta a ni ang bokin keini khom kan ni ve. 8 . In sietna ding ni lo, nangni tungdingna dinga Lalpan thuneina a mi pèk hi ka lo uongpui taluo khom a ni thei a, sienkhom ka'n zapui nawh. 9 Lekhathona nangni inthi tum angah mi ngai naw ro. 10 "A lekha thuhai chu a rikin a khauh vei leh, ama ei hmu hlak chun pa awm nêm, a thuhril hlak insitum tak a ni bok si" ti tawk dàm in um a. 11 Chuong anga ngâituhai chun hi hi hre raw hai se: in kuoma kan hung hmaa lekhathona ka hung hril ang tak khan ka hung pha chu thawng ka tih. 12 Mani inhril mawi hlakhai lai kan intiem sà ve ngam naw a, anni le inhrilkhi kan nuom bok nawh. Mani inkhìna dinga bi an thliek fawm chun mani le mani an inkhi a, a va'n vêtthlàk de aw! 13 Keini chun kan biel huom sung bâka mi chu uongpui naw ning ungah, Pathienin rî a mi khampêk sûnga mi chauh uongpui vêng kan tih; chu chun nangni khom a huom sà chêu a nih. 14 Kan biel sûnga mi in ni leiin Krista Chanchin Tha in kuoma kan hung intlun khan a khêl tieng kan fe naw khah. 15 Kan biel puo tienga mi dang thaw inrimna kan uongpui nawh. In ringna hung inthanglien a ta, thil ropui lem nangni lai thaw la nîng a ta, kan biel khom lien zuol pei a tih ti ruok chu kan beisei. 16 Chuongchun, in ram puo tieng Chanchin Tha chu la hril pei kan tih; nisienlakhom, mi thaw sà chu uongpui nawng kan tih. 17 'A uong taphot chun Lalpa uongpui raw se'. 18 Mani inhril mawihai ni loin, Lalpan a chawimawihai chauh pom an ni hlak.

2 Corinthians 11

1 Ka'n vêt deu a ni khomin in mi dom thiem ka beisei a, chu chu in thaw ta zing hrim a nih. 2 Pasal pakhat, Krista chu ka huolpèk tah chêu a, a kuoma nunghàk thienglâm anga ka'n hlàn theina ding chèuin, Pathien thîkthu a siet leiin, in lakah keikhom ka thîkthu a sie a nih. 3 Rûlin Evi dawhaa a zawr thlùk ang khan Krista tienga in lungril thienghlim le mawi tak kha iemani tiin sukkhawhlopèk an ti chêu ti ka'n làu a nih. 4 Kan hril hlak ni lo Isu dang chanchin hrila hung chu lawm a, Thlarau in lo chang tah ang kha ni lo chu pom a, in pom tah ang ni lo Chanchin Tha dang khom in lo pom el a ni chun in dol zor inhma taluo nîng a tih. 5 'Tirko lien' intihai chu ieng konga khom ka tluk tawl nawna a um ka ring nawh. 6 Thuhril thiem ve naw lang khom hrietna tienga chu ka duoi bik nawh ti in kuomah kong tinrêngin, ieng huna khom suklangin a um ta hlak kha. 7 An naw leh, Pathien Chanchin Tha a thlawna hril a, nangni chawisânga in um theina dinga ka'n phà hnuoi khan thil suol ka lo thaw am a ni? 8 Nangni laia rong ka bawl theina dingin kohran dang ka pur a, anni laka inthokin thangpuina ka lâk hlak kha. 9 In kuoma ka um lai khan ka tlâksamna thuah tu khom ka sukkhawk ngai naw a, ka mamawhai chu Makedonia rama inthoka hung unauhaiin an mi hung phuhrùkpèk a ni kha. Tu laka khom phurrik ni ka tum ngai naw a, ni tum ngai bok naw ning. 10 Krista thutak chu keimaah a um leiin, hi ka thil uongpui hi Akaia ram sûngah tu khomin mi khap thei naw ni hai. 11 Ieng leiin am ie? Ka hmangai naw lei chêuin maw? Ka hmangaizie chêu chu Pathienin a hriet. 12 Ka thaw ang char thaw ve anga inhril sathàuhaiin uongpui ding remchâng ieng khom an nei nawna dingin, ka thaw hlak ang char hin thaw zom pei ka tih. 13 Chuong mihai chu tirko tehlêm, mi hlêm tuma ramtang, Krista tirko anga mani insiem fawm an nih. 14 Chu chu a mak nawh, Setan meuh khom var tirkoah a'n siem fawm hlak si a. 15 Chuleiin, Setan rongbawltuhai chu felna rongbawltu anga insiem fawm a harsa nawh, an tawpna ding ruok chu an thilthawin hril a tih. 16 Hang hril nawk pei ka tih. Tu khomin invêtah mi lo ngai naw unla, in mi ngai a ni khomin invêt angin mi sie unla, hang uong ve met ka tih. 17 Ka thil hril hi Lalpa mi'n hriltir a ni naw a, inring zo taka ka thil uongpui hi invêt angin ka hril a nih. 18 Mi tam takin khawvel thil an uongpui hlak a, kei khomin hang uongpui vêng ka tih. 19 Nangni chu in var a, mi invêthai khom in daw thiem a. 20 A'n dik tak chun, bawia siemtuhai chêu dàm, mani hlawkna ding le invor sàngna dinga hmangruoa hmangtuhai chêu dàm, hmusita uongkhumtuhai chêu le hmâia bentuhai chêu khom in daw thei pei hlak. 21 Chuong ang chu thaw ve dingin kan awm an nêm taluo ti hi inzakum hle sienkhom ka pom a nih. Amiruokchu, invêt takin hang hril nawk pei lang, tu khomin uongpui ngam an nei chun kei khomin ka ngam ve. 22 Hebrai mi an ni maw? Kei khom ka nih. Israel mi an ni maw? Kei khom ka nih. Abraham thlahai an ni maw? Kei khom ka nih. 23 Krista rongbawltuhai an ni maw? Invêt takin hang hril lang, - kei lem hi chu ka ni nawkzuol. Ka thok inrim lem dai a, lung inah ka'n tâng rawn lem a, na taka vuok ka tuok rawn lem dai a, thi el theina ngîrhmun khom ka tuok zing zing a nih. 24 Judahai thaw dàn angin voi sawmli vuoka voi khat pei tling loi vuok tum nga ka tuok a, 25 tum thum hmolin an mi vuok a, tum khat lungin an mi dêng a, tum thum long siet ka tuok a, ni khat le zàn khat tuifinrietah ka'n làng a. 26 Sienkhom inzin ka thul chuong nawh. Lampuiah tium tam tak vadunga dàm, suomhmang laka dàm, ka chipuihai laka dàm, Jentêlhai laka dàm, khawpuia dàm, ram hnuoia dàm, tuinfinrieta dàm le unau tehlêmhai laka dàm ka tuok rop a. 27 Imu hmu lo khopa thokin, sin inrimin ka buoi a; fàk ding tlasamin phingtâm le dangchârin ka um a; sil ding nei loin, saruokin khaw dei ka tuor a. 28 Hieng bàka hin Kohranhai po po ka ngaituona chun a mi hnaw zing a nih. 29 Mi hrât nawhai ka tuorpui naw hlak am a ni? Suola tlu mi ka hmuin ka'n voi ngai naw hlak am a ni? 30 Uong ding ka ni rau rau chun ka hràt nawzie suklangtu thilhai hi a nih ka uongpui lem ding. 31 Ei Lalpa Isu Pä le Pathien chun khêl ka hril nawzie a hriet. Ama chu chatuonin inpâkin um raw se. 32 Damaska khuoa ruok khan chu Lal Areta hnuoia rorêltu chun mi man tumin Damaska khuo chu a'n vêngtir a; 33 sienkhom kul bang tukvera inthokin bawmin an mi thlâk thla a, a kuta inthokin ka suok tah a nih.

2 Corinthians 12

1 A hlawkna a um nawa chu hang uong zui pei ka tih. Ka kuoma Lalpa inlàrna le a thupuong hang hril ka tih. 2 Kum sawmpali liem tah khan, Kristaa um mi pakhat ka hriet chu vàn thumnaah thuoi tungin a um a, a hringhrànin amani ruok chu ka hriet nawh, Pathienin a hriet. 3 Chu mi ngèi chu Paradis-a làk tungin a um a, a takin am an naw leh zèlin a um ti khom ka hriet nawh, Pathienin a hriet. 4 Chu mi chun thil hril thei ruol lo le mihriemhai hril thieng lo a hriet. 5 Chuong ang mi chu uongpui ka tih; keimaa ruok chu uongpui ding ka hriet nawh, ka hràt nawna chauh naw chu. 6 Uong nuom khom lo ni hrim lang, thutak ka hril ding a ni leiin thil invètthlàk ni naw nih. Nisienlakhom, insûm ka tih, chuong naw chun miin ka thilthaw an hmu le ka hril an hriet nêka nasain kei mi ngai ropui lem hlauh rawi an tih. 7 Thil inhriettira ka um chu a ropui êm leia ka'n ngaihlu taluo nawna dingin ka taksaa hin hling pèkin ka um a, chu chu Setan tirtawn, mi sun zingtu chu a nih. 8 Chu chu mi la hmangpêk dingin voi thum Lalpa ka hni a. 9 Ama chun, "Ka lunginsietna hi i ta dingin a huntawk; ka thilthawtheina hi hràt nawnaa inthokin annawm sukfamkima a um hlak chu" a mi ti a. Chuleiin, Krista thilthawtheina chu keimaah a chêng theina dingin ka hràt nawna hi lawm takin ka uongpui ta lem a nih. 10 Krista leiin hràt nawnaa hai, chêksolnaa hai, harsatnaa hai, sukdùdànaa hai le sietnaa hai ka lawm hlak. Ka hrât naw pha leh ka hrât chauh hlak a nih. 11 Ka'n vêt zo an ta hi, nangnin lo thei loah in mi siem si a. Nangni hi mi hril mawitu lem ding ni awm tak in na. Ieng ni naw lang khom, 'tirko lien' intihai hi ieng konga khom ka tluk naw bik nawh. 12 Nangni lai kong iengkimah dawthei takin inchikna thilmakhai le entirna danghai thawin tirko ka nizie ka'n langtir hlak a. 13 Ieng konga khom ka sukkhawk ngai naw chêu ti ngot naw chu kohran dang nèka ka ngainêp lemna chêu iem a um a? Ka lo thaw dik naw a ni chun mi ngaidam ro. 14 Ngai ta u, tu hi in kuoma hung dinga ka'n siem voi thumna a ni tah. Nangni ta dinga phurrik ni ka tum naw a, in thil nei ka ngiet naw a, nangni a nih ka dit chu. Nauhaiin nu le pa ta dingin an inkhawlpèk ngai naw a, nu le pahaiin nauhai ta dingin an inkhawlpèk lem hlak. 15 Kei chu in thlarau ta dingin lawm takin inhmang zo ka ta, inpe zo thak ka tih. A chuongliema ka hmangai chêu leiin in mi hmangai nêp sot di'm a ni? 16 In mi'n khawkpui naw chu thukhat ni ta sien, dawha vervêk hmanga ka simbu dawi chêu anga lo hril thang pawl dàm maw in um chu? 17 Nangni laia ka hung tirhai amani bèk hmangin nangnia inthokin hlawkna ka hmu am a ni? 18 In kuoma hung dingin Tita ka ngèn a, ama ruolin unau pakhat ka hung tir bok a, Tita chun hlawk phànain a hmang chêu am a ni? Thlarau hmun khat puta rongbawl le lampui thuhmun hrawa kal chawi tlâng kan ni naw am a ni? 19 Kha hma po po kha mani inhril mawiah in mi lo ngai zing a ni maw? Pathien mit hmuin Kristan hril dinga a ti thu chu kan hril hlak. Dittakhai, iengkim hi nangni sukhràtna dinga kan thaw a nih. 20 Ka hung pha leh ka tum angin hmu nawng ka ti cheu a, nangni khomin in tum angin mi hmu nawng in tih ti hi ka thil inlàu a nih. Inhalna dàm, inthîkna dàm, lungsen inhrawtna dàm, pawla inthèna dàm, inhrilsietna dàm, indemna dàm, chapona dâm le buoina dâm hung hmu ka'n làu bàkah, 21 ka hung nawk phâ leh, tuta hmaa thil suol le tirdakum in thaw hlak inngainahai le in chêt pornahaia inthoka la sim si lo mi tam tak leiin tap pal ka ta, ka Pathienin in hmaah mi sukmuolpho hlauh rawi a tih ti ka'n lâu bok a nih.

2 Corinthians 13

1 Tu hi in kuoma ka hung voi thumna ding a nih. 'Thuhretu pahni amanih pathum amanih bàua inthok chauhin thubuoi hrim hrim chu sukfel chauh ding a nih' ti a na. 2 In kuoma ka hung voi hninaa khan thilsuol thawtuhai le mi dang po po kuomah ka hril tah a, tu hin nangni lai um hrì naw lang khom ka hril nawk chêu a nih: ka hung pha chu thilsuol thawtuhai chu hlà naw ning. 3 Keima ngei mi hmangin Kristan thu a hril ti fie in tum chu la hmûng in tih. Nangni lai chàu taka thil thaw loin, thil nasa tak a thaw lem hlak kha. 4 Ama chu hràtnawna leia hemdein a um a, sienkhom Pathien thilthawtheina leiin a hring tah a nih. Keini khom amaa chun hrât naw inlang khom, in ta dinga rong kan bawlnaah Pathien thilthawtheina leiin amaa chun kan hring a nih. 5 Ringnaah in um le um naw inen chiengin, mani ngei infie hlak ro. Krista Isu chu nangniah a um ti hrietna in nei naw am a ni? Inhrietna in la nei naw a ni chun a lem el in la nih. 6 Keini ruok chu ringnaah kan um ngei a nih ti in hung hriet chieng pei ka beisei. 7 Thil in thaw suol nawna dingin Pathien kuomah kan tongtaipêk hlak chêu a, chu chu kan hlawtlingzie tàr langna ding ni loin, hlawsam anga kan inlang khoma nangni bêkin thil tha in thaw theina dinga kan hnipèk chêu a nih. 8 Thutak do zawngin ieng khom kan thaw thei naw a, thutak ta ding chauin a nih kan thaw thei. 9 Keini kan hràt naw chàng khoma nangni in hrât phot chun kan lawm. In that famkimna dingin kan hni rop hlak. 10 Sukse ding chèu ni loa siem tha ding chêuin Lalpan thuneina a mi pèk a, in kuoma ka hung pha leh chu thuneina chu ka vilik rak a tûl nawna dingin ka hung hmain hieng thu hi ka hung ziek a nih. 11 A tawp taka chun unauhai, dam takin um ro. Famkimna hnot unla, ka ngènna chèu hi poisa unla, lungril hmun khat put unla, inrem takin um ro; chuongchun, hmangaina le inremna Pathien chun umpui a ti chêu. 12 Fawp thienghlimin chibai inbûk ro. 13 Mi thienghlimhai po po hin chibai an bùk cheu. 14 Lalpa Isu Krista lunginsietna hai, Pathien hmangaina hai, Thlarau Thienghlim pawlna hai chu in rênga kuomah um raw se.

Galatians 1

1 Kei Paula, mihriem tir ni lo, mihriem zâr khom ni lo, Isu Krista le mithi laia inthoka ama keithotu Pä Pathien ruot hin, 2 kan kuoma unau umhai po po leh hin Galati rama kohranhai chibai kan bùk cheu. 3 Pathien ei Pa le Lalpa Isu Krista kuoma inthoka lunginsietna le inremna chu in kuomah um raw se. 4 Ei Pa Pathien ditzawng chu zawmin tu lai hun tha naw taka inthoka mi san suok ding le ei suolhai mi sawp faipèk dingin ama Krista ngèi chu an pe ta si a. 5 Pathien kuomah ropuina chatuonin um raw se. Amen 6 Krista lunginsietnaa kotu chèu kha màksana 'chanchin tha' chi dang tieng in pakai thut el hi mak ka ti a nih! 7 Chanchin Tha chi dang a um naw a, nangni sukbuoi tumtuhaiin Krista Chanchin Tha an her kawi lei chauh a nih ti a chieng. 8 Keini khom ni inlang, vàna inthoka hung tum vàntirko khom ni hai sien, kan hril ta sa ni lo Chanchin Tha dang hrim hrim hung hriltu chu tongsephurin um raw se. 9 Ka hril ta chêu ang khan tu hin ka hril nawk chêu a nih: tu khomin Chanchin Tha in pom tah ti lo a dang an hril chêu chun chatuonin tongsephurin um mol raw se. 10 Mihriem tlon lungawi am ka tum Pathien lem? An naw leh, mihriem lawm zawng hril tumin ka'n lang hrim hrim am a ni? Mihriem suklawm tum ni lang chu Krista siehlaw ni naw ning. 11 Unauhai, Chanchin Tha ka hril chêu kha mihriem thu phuokfawm a ni nawh ti in hriet ka nuom. 12 Mihriem kuoma inthoka ka dong a ni naw a, tu khomin an mi'n chuktir bok nawh; Isu Krista ngeiin ka kuoma a puong a ni lem. 13 Juda mi fîr ka ni laia ka um dàn kha in hriet, khânga rawng taka Pathien kohran suknomnaa rawt chimit ka tum hlakzie hai kha. 14 Kan thlatuhai thurosie vong chungchàngah ka ruolpui Judahai lai chu a kûl a tâia thahnem ngai bîk le chu konga Judahai laia a turû tak ka ni hlak a. 15 Nisienlakhom, Pathien chun ka nu sula ka um laia inthokin a mi'n ser hrang a, a lunginsietnain a mi ko a. 16 Jentêlhai lai a Chanchin Tha ka hril theina dinga a Naupa ka kuoma a hung inlârtir lai khan mi dang tu khom ka'n rawnpui nawh. 17 Tirko ka ni hmaa tirko lo ni tah, Jerusalema umhai kuomah ka hang fe bok nawh. Arabia ramah ka fe nghal a, chu taka inthok chun Damaskaah ka hung kîr nawk chauh lem a nih. 18 Chun, kum thum a'n voi hnungin Petera inhmelhrietpui dingin Jerusalemah ka hang fe a, a kuomah ni sawmpanga ka châm a. 19 Lalpa unau Jakob ti chauh naw chu tirko dang tu khom ka'n hmupui nawh. 20 Ka thu ziekhai hi a'n dik, Pathien hmaah khêl ka hril nawh. 21 Chu hnung chun Suria ram le Kiliki ram ka sir a. 22 Judai rama Kristaa kohranhai lem chun mi mal takin an mi la hmèl hriet tawl nawh. 23 "Kha hmaa mi suknomnatu khan nuoi chimit a tum ringna thu a hril ve tah" ti mi hril ruok chu an lo hriet a. 24 Keima leiin Pathien an inpâk a.

Galatians 2

1 Kum sawmpali a'n voi hnungin Barnaba leh Jerusalemah ka hang fe nawk a, Tita ka thuoi bok a. 2 Pathien mi'n hriettirna leia hang fe ka ni a, Jentêlhai laia Chanchin Tha ka hril hlak thu chu an hmaa hang târ lang dingin. Ka rongbawlna chu ka sawl thlawnpui el nawna dingin hotu lien deua an hrilhai chu a fâlin ka'n hmupui tawl a. 3 Ka mi thuoi Tita chu Grik mi ni sienkhom ser intan luitir an tum chuong nawh. 4 Isu Kristaa zalènna ei nei enthla dinga an ni laia mi enthlatu inzep rûkhai ruok chun an suokah mi hrèn an tum a. 5 Amiruokchu, Chanchin Tha thutak chu in ta dinga hum a ni tlat theina dingin mit khap kar tè khom ngîrhmun kan intawl hrim hrim nawh. 6 Mi challang deua inlang (a tu khom ni hai sien ka ta dingin a danglam chuong nawh, Pathienin tu khom a en dang naw leiin), chuong mi poimawhai chun ka thuah ieng khom hril sap ding chuong an nei nawh. 7 Nei nêk hmanin Peter chu Judahai laia Chanchin Tha hril sin inkoltir a ni ang bokin Jentêlhai kuoma Chanchin Tha hril sin chu ka kuoma inkoltir a nih ti an hmu a. 8 Juda sertanhai laia tirko ni dinga Peter dàndetu chun sertan lo Jentêlhai laia tirko ni dingin a mi dànde a nih. 9 Chuongchun, kohran bana an ngai tak Jakob hai, Peter hai le Johan hai khomin lunginsietna ka dongzie an hmuin, keinin Jentelhai lai rong bawl a, annin sertanhai lai rong bawl dingin Barnaba le kei chu inpawlna kut chang tieng an mi'n hlàn ta lem a nih. 10 Anni laia mi retheihai ruok chu hre zing dingin thu an mi'n cha a, chu chu thaw kan lo tum sa hrim a ni si a. 11 Chun, Peter chu Antiokeia a hung khan a thaw indik naw leiin hmaisanah ka kal a. 12 Jentêlhai ser intantir tuma Jakob kuoma inthoka mi thenkhat an hung hma chun Jentêlhai lai bu a fâk hlak a. An hung tlung phing leh sertan pawlhai chu a ti leiin a'n kei tìm a, Jentelhai laka chun a'n thier fihlim ta dai a. 13 Juda danghai khom chun a lêmderna chu an lo thlop a, Barnaba chen khom an lo thuoi kawi hman hiel a. 14 An thil thaw dàn chu Chanchin Tha thutak leh a'n hmè nawh ti ka hmuin, an rênga hmaah hieng hin Peter chu ka hril a: "Nang Juda i na, Juda anga um loin Jentêlhai angin i hang khawsa a, chuong sà khom chun ieng leia Jentêlhai chu Juda mi anga inumtir i tum? 15 Eini chu Juda mi hrima pieng ei na, 'Jentêl mi suol' an ti hlak hai ang ei ni nawh. 16 Amiruokchu, miin Dàn a zawm lei ni loin Isu Krista a ring lei lemin Pathien hmaah thiem a chang thei chauh a nih ti ei hriet; Dàn zawm lei ni loa Krista ring leia Pathien hmaa thiem ei chang theina dingin eini ngei khomin Kristaa chun ringna ei innghat a nih. Dàn zawm leiin tu khom Pathien hmaah thiem an chang thei si nawh. 17 Nisienlakhom, Krista ei ring leia Pathien hmaa thiem chang tum einihai hi 'Jentel mi suolhai' ang chiea ngai ei ni si chun, Kristan suol rong a bawl tìna am a ni ding? Teu lo e! 18 Ka lo thiek tah Dàn bok inngîr thar nawk ka tum si chun a bawsetu ka nih ti a chieng. 19 Kei chun Pathien tieng ka hring theina dingin, Dàn fe thlengin Dàn chu ka thisan tah. 20 Kei chu Krista kuomah kraws-a hemde ka ni tah a, ka hring zing ta naw a, Krista chu keimaah a hring ta lem a nih. Tuta taksaa ka hring hi mi hmangai a, ka ta dinga hringna petu Pathien Naupa ringa hring ka nih. 21 Pathien lunginsietna hi hnawl ka tum nawh. Dàn zawm leia thiem chang thei a ni chun Krista thìna hi a thlawn el nîng a tih" tiin.

Galatians 3

1 Aw, Galati mi invêthai, tuin am a dawi vêt chêu a na? Mita in hmu ve ang khopa chiengin Isu Krista an hemde thu chu in kuomah târ lang a ni kha! 2 Nangnia inthokin thil pakhat char hriet ka nuom: Thlarau in dong kha Dàn in zawm lei am Chanchin Tha in hrieta in ring tâk lei? 3 Hieng lawm hin in lo invêt el a ni maw? Thlaraua tan ta siin tisa thilah in tawp el ding a ni? 4 In thil tuor zozai kha iengmalo angin in tuor thlawn el ding a ni? 5 Pathienin Thlarau a pèk chêu le nangni laia thil mak a thawhai kha Dàn in zawm leia a thaw a ni, an naw leh in thu hriet chu in ring tâk lei? 6 Abraham chun Pathien a ring a, thiemchanga pom a ni tah ti ang kha a ni lem. 7 Abraham nau indik takhai chu ringtuhai hi an nih ti hre ro. 8 Lekha Thu chun Jentêlhai khom ringna leiin Pathienin thiem a la'n changtir ding a hmu lawk a, chuongchun Abraham kuomah, "Nangmaah hnam tin malsawmin um an tih" tiin Chanchin Tha chu a lo hril dai tah a nih. 9 Chuongchun, ringtu Abrahamin a ring anga ring ve taphotin malsawmna chu an dong tah a nih. 10 Dàn zawm ringota innghathai chu tongsephur hnuoia um vong an nih; "Dàn lekhabua chuong po po zawma an thaw vong naw chun tongsephur an nih" ti ziek a ni si a. 11 "Ringna leia thiem chang chu hring a tih" ti a ni si leiin, Dàn zawm leiin tu khom Pathien hmaah thiem chang zo an um nawh ti a chieng. 12 Dàn chun, "Thupêk zawm kimtu chu hring a tih" a ti a, ringna a hril sa ve nawh. 13 'Thinga hemde chu tongsephur a nih" tia ziek a ni ang khan Krista chun ei ta dingin tongsie chu phurin Dàn tongsiea inthok chun a mi san suok tah a. 14 Chuongchun, Pathienin Abraham mal a sawmna chu Jentêlhai kuomah Kristaa chun a hung tlung tah a, eini hin Thlarau pêk a tiem chu ringna leiin ei lo dong tah a nih. 15 Unauhai, ni tina mihriem khawsak dàn entirnaa hmangin hang hril inla. Mihriemin thuthlung ei namnghet tah chu thlàk amanih belsa thei a ni nawh. 16 Abraham le a chi thla kuoma chauh a nih Pathienin thu a tiem kha. Pathien Lekha thuin "chi thlahai" ti loin "i chi thla" a ti lem a ni kha, chu a chi thla chu Krista hi a nih. 17 Ka hril tum chu hi hi a nih: Kum zali le sawmthum hnunga Dàn a hung um khan Pathien thuthlung chu a thiek chuong nawh, a thutiem khom a sukdanglam chuong bok nawh. 18 Dàn leia rohluotu nìna chang thei a ni chun Pathien thutiema inthlung ni thei naw nih; Pathienin rohluotu nìna chu Abraham kuomah thu tiemin a pêk a ni kha. 19 Chuong a ni si chun Dàn a pèkna san chu iem ni tâng a ta? Bawsietna hi ieng ang char am a nih ti suklangna dinga Abraham kuoma Chi Thlab a tiem kha a hung inlang hma poa dinga vàntirkohai hmanga palaic kuoma a pêk a nih. 20 Sienkhom, palai chu mi pakhat nêka tam inkârah a ni hlak a, Pathien hlak chu pakhat chauh a ni si a. 21 An leh, Dàn chun Pathien thutiem a kal am a ni? Kal lo e! Mi sukhring thei Dàn chu pêk ni sien, thiemchangna chu Dàn zawm lei ni ngei a tih. 22 Nisienlakhom, Isu Krista ringna leia thutiem chu a ringtu taphot kuoma pèk a ni theina dingin, khawvel pumpui hi suol thuhnuoia intâng a ni thu Pathien Lekha thuin a hril a nih. 23 Ringna thu a hung tlung hma khan chu Dàn hnuoiah ei intàng a; ringna thu puong suoka a um hma chun a mi kal khum tlat hlak. 24 Ringna leia thiemchang ei ni theina dinga Krista tienga mi kei thuoitu chu Dàn a nih. 25 Tu ruok hin chu ringna thu a hung tlung tàk leiin Dàn thu hnuoia kûn ei ni ta nawh. 26 Krista Isu in ringna leiin in rêngin Pathien nauhai in ni tah. 27 Kristaa baptisma chang taphot chu Krista chun in inthuom tah a nih. 28 Juda le Jentêl, bawi le bawi lo, pasal le nuhmei a um chuong ta naw a, Isu Kristaa chun in rêngin thutiem anga rohluotu, Abraham thlahai vong in nih. 29 (A um nawh)

Galatians 4

1 Ka hril chu hang sunzom pei lang. Rohluotu naupang chu ro po po khawmtu ding ni sienkhom naupang a la ni sùng chu bawi ang ela chei a ni hlak a, 2 a pa hun tiem a tlung hma chu enkoltu hnuoiah a um hlak. 3 Eini khom chuong ang chu ei ni ve. Naupang ei ni lai khan khawvel le thilsiemhai umphung inchûktirna pipu thurachid hnuoiah ei intàng a. 4 Sienkhom, a hun bituk a hung kim meu chun Pathienin a Naupa a hung tir a, nuhmei sùla inthokin Dàn hnuoiah a hung pieng a, 5 nau nîna kima a mi hlàngkai theina dingin Dàn hnuoia umhai chu a mi'n tlan suok a. 6 Chuongchun, nau in ni tah leiin Pathienin a Naupa Thlarau chu ei lungrilah a hung inchèngtir a, chu Thlarau chun "Abba, Pa" tiin a ko hlak a nih. 7 Chuongchun, Pathien zârin bawi ni ta loin nau in ni tah a, nau in ni leiin rohluotu in nih. 8 Kha hma khan Pathien in la hriet ngai naw a, chuleiin an pienphung hrima khom pathien ni dêr lohai bawiah in intâng hlak kha. 9 Tuhin chu Pathien in hung hriet tah a, an naw leh Pathien hriet in hung ni tah a, ieng leia zirtirna châu le hmangna bo tienga kìr nawk in tum hrim hrim am a na? Chuong thilhai bawia intàng nawk chu in nuom a ni? 10 Ni poimaw bìk, thla poimaw bìk, hun poimaw bìk le kum poimaw bìk neiin in inser nawk ta hi! 11 In ta dingin thá sèng thlawn ka'n làu a nih. 12 Unauhai, keima anga um dingin ka ngèn cheu a, kei khom nangni angin ka um a, ka poi ieng khom in tawk nawh. 13 In kuoma Chanchin Tha ka hung hril hmasa tak khan ka damnaw lei a nih ti in hriet a. 14 Khang khop khan ka taksa buoipui ngaiin um sien khom, mi hmusit le mi chêksol loin, Pathien vàntirko le Isu Krista hung ang elin in mi lo lawm a. 15 Thei ni sien chu in mithai khel suoka mi pêk hiel khom in inhuom ti ka hriet. Khang khopa mi lawm chêu kha, tu hin iem inchang an ta le? 16 In kuoma thu dik ka hril leiin hmêlmaah in mi en am an ta? 17 Mi dodâltuhai hin a tha tieng zawnga hung ngaisak chêu an ni naw a, anni tieng thahnem in ngai an nuom leia lâk hran an tum chêu a nih. 18 A san tha uma thahnemngai hi a tha èm êm a, chu chu in kuoma ka um lai chauh khom ni loa in thaw rop dingin ka ditpui chêu. 19 Ka nau dittakhai, Krista angna in nei hmâ khat chu nau hase invoiin ka'n voi nawk chêu a ni hi. 20 Nangni lai uma ka rawl kí hang thlâk danglam met ka nuom ngei, ka lu in sukhâi hle si a. 21 Dàn hnuoia um nuomhai, dànin iem a hril ti in hriet naw maw? 22 'Abraham chun nau pasal pahni a nei a, pakhat chu bawinu nau a na, pakhat chu thaipui nau a nih' ti a'n ziek kha. 23 Bawinu nau chu mihriem pieng dàn pangngaia hung pieng a na; thaipui nau ruok chu thutiem leia hung pieng a nih. 24 Hieng hi tekhinna anga ei hril a nih; chuong nu pahnihai chu thuthlung pahni inentirna an ni a, pakhat chu Sinai tlànga inthoka suok Hagar a na, a nauhai chu bawi an nih. 25 Hagar chu Arabia rama Sinai tlànge inentirna a na, tu lai Jerusalem leh ang khat an nih, a sûnga chênghai leh bawi an ni tawl si a. 26 Chung tieng Jerusalem ruok chu bawi a ni ve naw a, chu chu eini thlatu nu hi a nih: 27 Nang ching, nau nei lo, hlim la, Nang nauhase tuor ngai lo nu, Hlim takin khêk suok rawh; Pasal nei nêkin nu ching chun, Nau a hau lem si a'f ti ziek a ni si a. 28 Chuongchun, unauhai, Isak ang boka thutiem nauhai in nih. 29 Mihriem pieng dàn pangngai anga piengin Thlarau thilthawtheinaa pieng chu a sukdùdà ang bok khan, tu khom hin a la ni ta pei a nih. 30 Lekha Thuah ieng tin am a'n ziek kha? "Bawinu chu a naupa leh hnot suok rawh, bawinu naupa chun thaipui naupa ro chu a hluopui ding a ni nawh"g ti a ni kha. 31 Chuongchun, unauhai, bawinu nau ei ni naw a, thaipui nauhai ei ni lem.

Galatians 5

1 Zalèn dingin Krista chun a mi'n suoktir tah a, chuleiin ngîr nghet unla, bawi ringkol bât nawk ta naw ro. 2 Ngai ta u, kei Paula ngei hin ka hril cheu hi, ser in intantir chun Krista chu in hlawkpui dêr nawh tìna a nih. 3 Sertan taphot kuomah hi hi ka hril nuom: an tan a ni chun Dànin a phût taphot khom thaw ve law law raw hai se. 4 Dàn zawm leia thiemchang tumtuhai, Krista kuoma inthokin in intan fithla tah a, lunginsietna chu in tlùksan tah a nih. 5 Keini ruok chun Thlarau zàra ringna leia thiemchangna chu beiseiin kan nghâk si a. 6 Isu Kristaah ei um phot chun sertan amanih tan lo amanih a dang chuong nawh; hmangainaa inlang suok ringna hi a nih a poimaw tak. 7 Hma in sawn that vei leh a tuin am thutak tlùksan dingin a lo zawr hmang chêu a na? 8 Hi zawr hmangna hi a kotu chèua inthok a ni nawh. 9 Chol tlawmtein bei hlûm tlang lien tak khom a fang suok thei ti a ni kha. 10 Lalpa pakhata um tlàng ei ni leiin lungril dang in put hi kei chun ka la ring thei nawh. A chawkbuoitu chèu chun, tu khom ni sien, hrem la tuor a tih. 11 Unauhai, kei hin sertan a tûl thu zirtir chêu dàm chu ni lang, ieng leiin am mi sukdùdà zing hlak an ta? Chuong chu zirtir ni lang, kraws thu kan hril khom hi dodal dêr naw ni hai. 12 A chokbuoituhai chêu chun tan fithla law lawin mi tilreah insiem hai sien ka va ti de! 13 Unauhai, nangni chu zalèn dinga ko in ni a, in zalenna chu tisa châkna suol thawna remchângah hmang naw unla, inhmangai tuoin rong inbawl tuo lem ro. 14 'Nangma i'n hmangai angin i vênghai khom hmangai rawh" ti thu kam khat hi in zawm chun Dàn po po in zawm vong nîng a nih. 15 Ran ang ela insèchilh le inhliem ton lo dingin fimkhur ro, chuong naw chun insukram tuo hlauh rawi in tih. 16 Chuleiin, ka hril chêu hi, thlarauah um unla, tisa chàkna suol chu suklawm da'l in tih. 17 Tisa nuomzawng chun thlarau tieng thil a kal tlat a, Thlarau hlakin tisa tieng thil a kal tlat bok a, an inkal ton tlat leiin in thaw nuom khom in thaw thei naw hlak a nih. 18 Thlarau thuoia in um ruok chun Dàn hnuoia um in ni nawh. 19 Tisa mihai thaw hlak chu chieng takin inngaina suol hai, inthieng nawna hai, pawr taka chêtna hai, 20 mi lem biekna hai, dawithiemna hai, innghirnghona hai, inthîkna hai, lungturûk insuona hai, mani hmasielna hai, inngei nawna hai, pawl hranga inkei bingna hai, 21 inhnarna hai, zu rui chìng hai, risiea inrui pawr chîng hai le chuong ang thil thaw hlak mihai chu an nih. Chuong ang mihai chun Pathien ram hluo top naw ni hai ti ka hril tah chêu ang khan ka hril non nawk chêu a nih. 22 Thlarau râ ruok chu hmangaina dàm, lawmna dâm, inremna dàm, dawtheina dâm, ngilneina dàm, thatna dâm, ringumna dàm, 23 zaidamna dàm le insûm theina hai dàm hi a nih. Chuong ang kal zawng chu Dàn a um nawh. 24 Isu Kristaa umhai chun tisa châkna le nuomna hai an hemde tah a nih. 25 Thlaraua hring ei ni ta chun Thlarau thuoi ang peiin um ei tiu. 26 Inngaihlu loin, incho tuo loin, inthîk tuo bok nawng ei tiu.

Galatians 6

1 Unauhai, miin suol a thaw lai in phawk pal chun, nangni thlarau mihai chun chu mi chu indoi takin tungding nawk tum hlak ro. Nangni khom invêng tha seng ro, thlèmna tuok ve hlauh rawi in tih. 2 In phurrikhai insawk tuo hlak ro, chuongchun Krista dàn in zawm nîng a tih. 3 Ieng khom ni bar si loa mi lien tak nia inngai chun ama a'n hlêm fawm a nih. 4 Mi tinin mani thilthaw inen fie lem sien, mi dang leh inkhì naw sien, in thaw tawk peiah lawmna ding nei thei in tih. 5 Mi tinin mani phur seng ei phur ding a nih. 6 Zirtirna thu dongtu chun a zirtirtu chu thil tha a nei ang ang pe ve raw se. 7 Hlêmin um naw ro. Pathien chu nuisaw chî a ni nawh. Mi tinin a tù ang char a sîk hlak. 8 Mani tisa châkna suklawmna dinga suol tùtú chun sietna sîk a ta; Thlarau lawmna tieng chi tùtú ruok chun Thlarau tienga chatuon hringna sîk a tih. 9 Thil tha thaw hi nghok nawng ei tiu, ei inthlàdà naw chun a hun takah ei la sìk ding a ni si a. 10 Chuongchun, remchang ei hmu taphotah mi tin kuomah thil tha thaw inla, ringnaa ei sùnghai chunga lem chu uor nawkzuolin thawng ei tiu. 11 En ta u, hawrop inhrol phura ziek hi keia kut ziek ngei a ni hi. 12 Tisa tienga a langa insukmawi tumhai chun Krista kraws leia sukdùdàna an tuor ding chu pumpelna dingin ser intan luitir chêu an tum a. 13 Sertanhai khom hin Dàn chu an zawm kim bìk chuong nawh. In taksaa inchikna um chu an uongpui theina dingin ser intantir chêu an tum a ni kha. 14 Kei ruok chun ei Lalpa Isu Krista kraws chauh naw chu uongpui ding hrim ka nei nawh. Chu kraws-ah chun ka lakah khawvel hi hemde a ni tah a, kei khom khawvel lakah hemde ka ni tah. 15 Miin ser a tan le tan nawin thû a phur nawh, siemtharna hi a poimaw tak chu a nih. 16 Hi thu zawmtu po po chungah inremna le zangaina tlung raw se, Pathien mi Israelhai chunga khom. 17 A tawp taka chun, ka taksaa hin Krista inchikna ka put ta si leiin tuta inthok chu tu khomin mi sukbuoi ta naw raw hai se. 18 Unauhai, ei Lalpa Isu Krista lungsietna chu in kuomah um raw se. Amen.

Ephesians 1

1 Paula, Pathien ditzawnga Krista Isu tirko chun Efesi khuoa um mi thienghlimhai le Krista Isua mi ring umhai chibai ka bûk. 2 Pathien, ei Pa le Lalpa Isu Krista kuoma inthoka lunginsietna le inremna chu in kuomah um raw se. 3 Ei Lalpa Isu Krista Pathien le Pä chu inpâkin um raw se. Ama chun vàn hmuna thlarau malsawmna tinrêngin Kristaah mal a mi sawm a. 4 Thienghlim le soisel boa a hmaah ei um theina dingin leilung insieng hma khan Kristaah a mi lo thlang a. 5 A ditzawng le tum dàn ang takin Krista Isu zàra a nau ni dingin hmangainain a mi lo ruot lawk bok a. 6 A hmangai le a Dittak zàra a lunginsietna ropui a thlawna a mi pèk leiin inpâk ei tiu. 7 Lunginsietnaa a hausak ang hrimin, Krista thisen chun a mi'n tlan a, ei suolhai a ngaidam a, 8 chu lunginsietna chu var tak le rem hre takin ei chungah a vûr teu a. 9 Kristaa a lo ruot lawk ang taka ama ditzawng anga thaw a tum thurûk chu a mi'n hriettir a. 10 Hun a kim phaa Kristaa hlen dinga a thil rêl lawk chu vàn le hnuoia thil iengkim hi lu pakhat, Krista hnuoia hui khawm vong a nih. 11 Ama remruot dàn le dit dàn ang taka thil iengkim hlentuin a mi lo ruot lawk angin, Krista zàrah rohluotu nìna ei chang a. 12 Eini Kristaa beiseina innghat hmasatuhai hi a ropuina chawimawitu ding ei nih. 13 Amaa chun thutak, in sandamna Chanchin Tha chu in lo hriet ve a, in lo ring tah a, a tiem Thlarau Thienghlim chun nangni khom a'n chik tah chêu a nih. 14 Chu chu Pathien mi ni dinga a mi'n tlan leia ei rochan ding zakhamna chu a nih. A ropuina chu inpâkin um raw se. 15 Lalpa Isu in ringzie le mi thienghlimhai po po in hmangaizie kei khomin ka lo hrietin, 16 ka tongtainaah ka hriet zing hlak cheu a, in ta dingin lawmthu hril ka ma nawh. 17 Ama in hung hriet chieng zuol theina dingin ei Lalpa Isu Krista Pathien, ropuina Pä chun varna le hrietthiemna thlarau pe raw se cheu. 18 Chuongchun, in lungril mithai sunvara um a, ieng am beisei dingin a ko chêu ti hai, 19 mi thienghlimhai rochan ropuizie le hnienghnàrzie hai, a hràtna thahrui thilthawtheina tawp chin nei lo chun eini ringtuhaia a thaw nasatzie dàm in hung hriet theina dingin ka tongtai hlak. 20 Chu hrâtna chun Krista chu mithi laia inthokin a keitho a, vàn hmunahai khin a chang tieng a'n thungtir a; 21 lalna hai, thuneina hai, thilthawtheina hai, rorêlna po pohai chunga le tu lai le hun la hung tlung dinga nìna hming po po chung daiah a sie tah a nih. 22 A ke hnuoiah iengkim Pathienin a sie a, kohran ta dinga iengkima Lû takah a ruot a. 23 Kohran chu Krista taksa a nih, iengkim kong tinrênga sungsiptu famkimna chu.

Ephesians 2

1 Kha hma khan chu in bawsietnahai le in suolhai leia thi in ni kha. 2 Chuong lai chun hi khawvel zie ang hin in khawsa a, boruoka thuneitu lal, awinawtuhai chunga tu chena thok mêk thlarau thu thuin in um hlak. 3 Anni lai chun eini khom ei lo thang ve vong a, ei tisa châk zawng inhoitirna hnotin, ei tisa nuom zawng le ngaituo zawng ei thaw hlak a, mi danghai ang bokin Pathien lungsenna tuor ding hrima pieng ei nih. 4 Nisienlakhom, zangainaa sip Pathien chun lunginsietna a hau êm leiin, 5 ei bawsietna leia thi ei ni lai khan Kristaah a mi sukhring a; a lunginsietna zàra sandam in nih. 6 Pathien chun Krista leh a mi keitho a, vàn hmunahai khin ama leh a mi'n thungtir a. 7 Ei chunga a zangaina Krista Isua a'n langtir hin hun la hung tlung pei dinga khom lunginsietna hril sèng ruol lo a hauzie a hung suklang a nih. 8 Lunginsietna zàra ringnaa sandam in nih, chu chu nangni thaw suok a ni naw a, Pathien thilthlawnpêk a nih. a 9 Thilthaw lei a ni nawh, ni sien chu miin uongpui an tih. 10 Ei um dàn dinga Pathienin a buotsai lawk anga, thil tha thaw dinga Krista Isua siem, Pathien kutsuok ei nih. 11 Chuleiin, nangni piengnaa Jentêlhai, mihriem kut hmanga sertanhaiin 'Sertan nawhai' an ti hlak chêu kha hre zing ro; 12 khâng lai khan Krista in la nei naw a, Israel sûngkuo lakah hnam hrang in ni a, Pathien thutiem thuthlung puoah in um a, hi khawvela hin beiseina hrim nei lo le Pathien khom nei lo in ni hlak kha hre zing bok ro. 13 Tu ruok hin chu nangni, kha hmaa hla taka um hlakhai kha Krista thisen leiin Krista Isua chun sukhnaiin in um tah. 14 Krista chu ei inremna a nih. Ama taksa ngei chun Jentelhai le eini Judahai hi pum khatah a mi siem a, ei indaidanna le intaina bang chu a thiek a. 15 Dân thupêkhai le a bebawmhai chu a hung sukbo a, keini le nangnihai chu amaa chun mihriem thar, pum khatah a mi siem a, inremna a hung intlun a. 16 Kraws-a chun intaina chu a sukbo a, Jentêlhai le Judahai chu pum khata hung umin Pathien leh ei lo inrem tah a. 17 A hung khan hla lema um nangnihai kuomah remna Chanchin Tha a hril a, a hnai lema um keinihai kuoma khom remna Chanchin Tha bok chu a hril a. 18 Ama zàrah Thlarau hmun khatin Pa kuom ei tlung tlàng thei tah a nih. 19 Chuongchun, tu hin chu ram dang mi le mikhuol châmbâng el in ni ta naw a, mi thienghlimhai leh tuolkhat, Pathien sûngkuo ei ni ta lem. 20 Tirkohai le zawlneihai lungphûm rem chunga bawl in na, chu lungphûma a kila lung poimaw tak chu Krista Isu a nih. 21 Chu in pumpui chu ama chunga chun rem khawm a ni a, Lalpa ta dingin tempul thienghlim a hung ni tah. 22 Nangni khom amaa chun Thlaraua Pathien chengna in dinga mi danghai le rem khawm in nih.

Ephesians 3

1 Hi thil lei hin kei Paula, nangni Jentêlhai ta dinga Krista Isua mi intâng hin ka tongtaipêk chêu a nih. 2 A lungsietna leia Pathienin nangni enkoltu nìna sin thaw dinga a mi ruot thu kha lo hre ta ngèi in ta. 3 Khanga inlârnaa Krista thurùk inhriettira ka um thu chu khâ hmâ khan tawite ka hung ziek tah a. 4 Ka thu ziek kha in tiem ngun chun, chu Krista thu hril chu ka hriet chiengzie khom hre thei in tih. 5 Pathien tirko le zawlnei thienghlimhai kuoma Thlarauin tuta a'n hriettir ang tluk hin khâ hmâ khan hi thu ril hi mihriemhai kuomah a la'n hriettir ngai nawh. 6 Chu thurûk chu, Chanchin Tha leiin Krista Isua chun Jentêlhai le Israelhai hi ro hluo tlâng ding dàm, pum khat le sûng khata um ding dàm le thutiem dawng tlâng ding dàm ei ni thu a nih. 7 A thilthawtheina hmangin Pathienin a lunginsietna thilpêk a mi'n dongtir a, chu Chanchin Tha rongbawltua chun a mi siem a. 8 Kei hi mi thienghlim po po laia chîn tak ni lang khom, Jentêlhai kuoma Krista hausakna sui suok ruol lo chu puong dingin a lunginsietnan a mi ruot a; 9 Isu Kristaa iengkim siemtu Pathien kuoma chatuona inthoka thurûk um, a remruot lawk chu, mi po po kuoma suklang ding le, 10 kohran hmanga Pathien varna inthùkzie vàn hmuna lalhai le thuneituhai inhriettir dinga ruot ka nih. 11 Chatuona inthoka rem a lo ruot ngei chu ei Lalpa Isu Kristaah a hung hlen suok a. 12 Krista ei ringna leiin nêl tak le ngam takin Pathien ei hnai thei tah a nih. 13 Chuleiin, a ta dinga ka tuornahai leia zâm lo dingin ka ngèn cheu, in ropuina ding vong a ni si a. 14 Hi lei hin ei Lalpa Isu Krista Pä hmaah dingthathuonin ka kûn hlak. 15 Ama chu hnuoi le vàna ringtu sûngkuo tinrêng hming làkna a nih. 16 A thlarau zàrah in sùngril tieng thà sukhrâtna dingin a ropuina nasa taka inthoka thilthawtheina chu pe sien la chêu, 17 ringna leiin Krista chu in lungrilah chêng raw se. Hmangainaah zung keia in hung nghet theina dingin ka tongtaipêk chêu. 18 Chun, mi thienghlim po pohai leh Krista hmangaina lienzie dâm, seizie dâm, insângzie dâm le inthûkzie dàm in hung hriet theina ding le 19 chu hmangaina, hrietna po po khoma a hriet seng ruol lo chu hrie a, Pathien famkimna tinrênga sungsip in hung ni theina dingin ka tongtaipêk bok cheu. 20 Chuongchun, einia thok hlak thilthawtheina hmanga ei hni le ei ngaituo phàk nêka nasa lema iengkim thaw theitu kuoma ngei chun 21 ieng lai khomin, Kohrana le Krista Isu kuomah ropuina chatuonin um raw se.

Ephesians 4

1 A kona chêu phua khawsa dingin kei, Lalpa ta dinga tâng hin ka ngèn cheu. 2 Kong tinrêngah inngaitlawm le thuhnuoirol takin hmangainain zâi indaw tuo ro. 3 Inrem taka insuikhawmin, Thlaraua inpumkhatna chu vong zing dingin iengkimah thang la ro. 4 Beisei hmun khat nei dinga ko in ni angin taksa pum khat le Thlarau pakhat chauh a um. 5 Lalpa pakhat, ringna hmun khat, baptisma hmun khat, mi po po Pa, Pathien pakhat chauh a um. 6 Ama chu iengkim chungah a um a, iengkim a fang suok a, iengkimah a um bok a nih. 7 Lunginsietna thilthlawnpêk chu Kristan hun a ti ang peiin a mi pêk seng a. 8 Chu lei chu annawm Pathien Lekha thuin hienga a lo hril kha:"Chung tieng a hang fe khanSala manhai chu a thuoi a, Mihai chu thilpêk a sem a. " 9 'Chung tieng a hang fe' ti hi ieng ti na'm a na? Leihnuoi hmun inhnuoiah a hung thla hmasa zet tìna a nih. 10 Iengkim a hluo vong theina dingin, hnuoia hung thla ngei kha, vàn po po laia insâng takah a hang fe nawk tah a nih. 11 Ama chu a nih thenkhat tirko ni ding dàm, thenkhat zawlnei ni ding dàm, thenkhat evanzelis ni ding dàm, thenkhat pastor le zirtirtu ni ding dàma ruottu chu. 12 Chuong ang chun Krista taksab sukpuitlingna dinga rong an bawl theina dingin Pathienin a mi thienghlimhai chu a hung inthuom a nih, 13 ringna le Pathien Naupa hrietna kongah zai khata luong a, hung puitling a, Krista a famkim anga ei hung famkim ve theina dingin. 14 Chuongchun, mi vervêkhaiin dawhaa hlêm kawi a, zirtirna hrang hrang fawn velin khing tieng khing tieng a tawm lèng thei naupang sie ang ni ta nawng ei tiu. 15 Chuong nèk hmanin, hmangainaa thutak hrilin, iengkimah ama ei Lû tak, Kristaa chun inthanglien lem ei tiu. 16 Amaa chun taksa bung tinrêng chu inchuktuoin, thâ le zungin a phuor khawm a, taksa bung tin chun an thaw ding ang seng thawin an inthang tlâng a, hmangainain an inchawm lien tuo hlak a nih. 17 Chun, Lalpa hmingin hi hi hrilin ka ngên tlat cheu: Lungril mumal bo Jentêlhai angin um ta ngai naw ro. 18 Hrietna tieng an inthim a, an mawlna chun an lungril a sukngar leiin Pathiena hringna leh inzom thei ta loin an um a. 19 Inzak nachâng khom an hriet ta naw a, zâuthàuna nunah an intàl lùt a, thil tirdakum tinrêng an thaw a, an tisa châkna hlak a zuolkai tul tul bok. 20 Nangnin Krista in hung hriet dân ruok chu chuong ang chu a ni vè nawh. 21 Chieng takin a chanchin in hriet a, ama Kristaa thutak um chu inchûktir in ni tah khah. 22 Tisa châknain a sukkhawlo tah, in nun dàn hmasa, mihriem hlui kha hlîp thlain, 23 in lungril put dànhai siem thar unla, 24 felna le thienghlimna indika Pathien anga siem, nìna thar chun inthuom ro. 25 Chuongchun, khêlhril bânin, mani vènghai thudik hril seng ro, inpêng tuo vong ei ni si a. 26 In lung a sen khomin thil suol thaw pha naw ro; nisa tlâk chen chen lungsen naw ro. c 27 Diebol chu hmun remchang inkien naw ro. 28 Rûkru hmang chun bànsan sien la, mi tlasamhai kuoma pêk ding a nei theina dingin mani kut ngeia thil tha thawin thok inrim lem raw se. 29 Tong mawi lo in bàua inthokin suok naw sien, mi siem tha thei ding chauh suok lem raw se, chuongchun a ngaithlatuhai khomin hlawkpui an tih. 30 Pathien Thlarau Thienghlim chu sukbeidong naw ro, tlanna nia dinga ama tâ ngei in nizie Pathienin a'n chikna chêu a nih. 31 Khâkna dàm, lungsatna le lungsenna dàm, inhal buoi dàm, inhril siet dàm le mi siet ditna po po dàm bànsan ro. 32 Inlungsietin inlainat tuo unla, Pathienin Kristaa a ngaidam ang chêu khan inngaidam tuo ro.

Ephesians 5

1 Chuongchun, Pathien nau dittakhai in ni leiin a um dàn latu ni ro. 2 Kristan a mi hmangai a, Pathien lawmzawnga rim inhnik thilpêk le thilhlân ni dinga ei ta dinga a'n pèk ang khan, hmangaina nun nei ve ro. 3 Pathien mi thienghlimhai khawsak dàn dinga mawi lo inngaina suol dàm, porchêna dàm le duâmna dâm hi nangni lai a sàmin sâm sin naw hrim hrim ro. 4 Zawlro hril hai, tong mawi naw thaw le fiemthu bawraw hrilhai in ta dingin a mawi nawh; lawmthu hril chîng lem ro. 5 Inngai chînghai, mi tirdakum hai, mi duâm, (chuong ang mi lem betu) hai chun Krista le Pathien ramah chan hrim an nei nawh ti hre chieng ro. 6 Tu khomin thu tep lo mei meiin hlêm naw raw hai se chêu; chuong thilhai lei chun Pathien lungsenna chu thu awinawhai chungah a tlung hlak si a. 7 Chuleiin, anni chu inpawlpui naw ro. 8 Kha hma khan in inthim a, tu ruok hin chu Lalpaa chun in hung var tah. Chuleiin, var nauhai angin um ro. 9 Var chu thatna dâm, felna dâm le thutak tinrêngin a rà suok hlak. 10 Lalpa lawmzawng hriet fie tum lem ro. 11 Rà nei lo thim thilthawa chun thang ve naw unla, an indik nawzie suklang lem hlak ro. 12 A rûka an thilthaw hlakhai chu a hril khom inzak a um si a. 13 Ieng khom varin a sun chu a'n lang chieng hlak; var chu iengkim sukvartu a ni si a. 14 Chuleiin Pathien Lekha thua khom, "Nang in innghil, har la, Mithi laia inthokin tho rawh, Kristan el var a ti che"ti a ni kha. 15 Chuongchun, in khawsak dànah fimkhur ro, mi invêthai anga um loin mi varhai angin um lem ro. 16 Hun tha naw taka um ei ni leiin in hun hmang tha ro. 17 Chuleiin, invêt taka um loin Lalpa ditzawng chu hriet fie tum lem ro. 18 Uoiin inrui chîng naw ro, chu taka chun zuolkaina a um si a. Chuong nêkin, thlaraua sipin um lem ro. 19 Inpâkna hla hai, Pathien hla hai le thlarau tieng hla hai chu inzawt tlàngin, lungril taka hla sakin Lalpa chu rimawi rempêk ro. 20 Ei Lalpa Isu Krista hmingin ieng lai khomin iengkimah Pa Pathien kuomah lawmthu hril rop ro. 21 Krista in inzà ang bokin inzà tuo ro. 22 Nuhai, Lalpa thu in awi angin in pasalhai thu khom awi ro. 23 Krista chu ama taksa kohran sandamtu le kohran lû a ni ang hin, pasal chu nuhmei lû a nih. 24 Krista kuoma kohran a'n tuklùt ang bokin, nuhmeihai khom kong iengkimah an pasalhai kuomah an intuklùt ding a nih. 25 Pahai, Kristan kohran a hmangai ang hin in nuhmeihai hmangai ve ro. 26 Thu chu tuia hmanga Kohran sawp fai ding le sukthienghlim dingin ama Krista ngei chu a hung inpêk a. 27 Kohran ropui tak, bal kai lo, zûr lo le hmêl hemna hrim hrim nei lo chu ama ta dinga indin dingin a'n pêk a nih. 28 Chuong ang bokin, pasalhai chun mani taksa an hmangai angin an nuhmeihai khom an hmangai ve ding a nih. Mani nuhmei hmangaitu chun ama a'n hmangai a nih. 29 Tu khomin mani taksa an theida ngai nawh, Kristan kohran a enkol angin, chawmin an enkol lem hlak; 30 eini khom a taksa pênghai ei ni si a. 31 Pathien Lekha thua chun, "Chu lei chun pasalin a nu le pa màksan a ta, a nuhmei leh inkop an ta, chuongchun an pahni chun taksa pum khat lo ni tàng an tih" ti a ni a. 32 Hi hi thu inril le inthûk tak a na, kei chun Krista le a kohran thu a hrilna niin ka hriet. 33 Ieng khom ni sien, nangni lai tu khomin mani a'n hmangai angin a nuhmei khom hmangai raw se; nuhmei khomin a pasal a'n za ding a nih

Ephesians 6

1 Naupanghai, Lalpaa chun in nu le pa thu awi ro, chu chu thil indik a ni si a. 2 "I nu le pa chawimawi rawh" ti hi thupêk laia thil tiem sa nei hmasa tak a nih. 3 " Chuongchun i ta dingin thang a ta, hnuoiah dam sawt bok i tih" a ti a ni kha. 4 Nangni pahai, in nauhai suklungsen naw ro, Lalpa thu zawm dinga thununin inchûktir lem ro. 5 Bawihai, Krista thu in zawm angin lungril indik putin, ti le inthin pumin hnuoia in puhai thu zawm ro. 6 Mihriem suklawm tumtu ang ela an hmu lai chaua thaw loin, Krista bawi ni awm hrimin lungril takin Pathien ditzawng thaw unla, 7 mihriem rongbawl el ni loa Lalpa rongbawl in ni lem leiin hlim takin thaw hlak ro. 8 Bawi khom, bawi naw khom, mi tinin an thilthaw that lawmman chu Lalpa kuoma inthokin an dong seng ding a nih ti in hriet si a. 9 Chun, nangni hotuhai, chuong ang bokin in bawihai chungah thaw ve ro. In bawihai le in intawm hotu, thlier bîk nei lo chu vànah a um ti hre zingin, in bawihai inthi le vauh chîng ta naw ro. 10 A tawp taka chun Lalpa le a hrâtnaa inthokin thilthawtheina la pei ro. 11 Diebol zawrna chu in do zo theina dingin Pathien râlthuom kimin inthuom ro. 12 Ei dohai hi mihriem râld ni loin, lalna hai, thuneina hai, hi khawvel inthim chunga rorêltuhai le vàn hmuna thlarau suol umhai chu an ni lem si a. 13 Chuleiin, ni tha lo a tlung hunah hmêlma in dang theina ding le in dang hnunga khom in dingchang theina dingin, Pathien râlthuom kim chun inthuom ro. 14 Chuongchun, nghet taka ngìrin, thutaka in kawng hrënin, felna awmphaw chu hâk ro. 15 Remna Chanchin Tha chu pheikhokah bunin, sirsan nghetah hmang unla, 16 misuolpa meithalhlawnhai chu in sukmit theina dingin ringna awmphaw hâk bok ro. 17 Sandamna chu lukhumah hmang unla; Thlarau kawlhnàm, Pathien thu chu, pâi zing ro. 18 Ieng huna khom thlaraua tongtaiin in mamaw taphot chu hni hlak ro. Hi hi hre zingin, in tongtaiin mi thienghlim po po ta dingin ma loin hni ro. 19 Thu ka hril chânga Chanchin Tha thu ril huoi taka puong ding thu ka dong theina dingin kei khom mi hnipêk bok ro. 20 Chanchin Tha palai, lung ina intâng ka na, ka hril dàn ding ang taka huoi taka ka hril theina dingin mi hnipêk ro. 21 Lalpaa unau dittak le rongbawltu ringum tak Tukik hin ka chanchin in hriet theina dingin iengkim hril a ti cheu. 22 Ka chanchin hril ding cheu le thlamuong ding cheuin ama hi ka hung tir a nih. 23 Pa, Pathien le Lalpa Isu Krista kuoma inthoka inremna hai, hmangaina hai le ringna hai chu unauhai kuomah um raw se. 24 Ei Lalpa Isu Krista, chuoi loa hmangaituhai po po kuomah lunginsietna um raw se.

Philippians 1

1 Paula le Timothe, Krista Isu siehlawhai chun Krista Isua mi thienghlim Filipi khuoa um po po le Kohran thuoituhai le rongbawltuhai chibai kan bûk 2 Pathien ei Pa le Lalpa Isu Krista kuoma inthoka lunginsietna le inremna chu in kuomah um raw se. 3 Ka hriet suok po chêu leh ka Pathien kuomah lawmthu ka hril hlak. 4 Ieng huna khom in rênga ta dinga ka tongtai chângin hlim takin ka tongtai hlak, 5 Chanchin Tha hril rongbawlna ei tana inthoka tu chena mi thawpuitu in ni si a. 6 Nangni laia hi thil tha thaw tantu chun Krista Isu Ni-a a hlen suok chenin thaw pei a tih ti ka ring tlat a nih. 7 Chanchin Tha ta dinga thang ka lâkna le suknghet sin ka thawna amanih le kol ka bun chânga Lalpa lunginsietna mi'n tlângpuitu in ni leiin ka ngaituonaah in châm zing a, hieng ang lungril in rênga chunga ka put khom hi thil awm tak a ni hrim a nih. 8 Krista Isu lungril ang putin ka ngai êm êm cheu a nih ti Pathienin a hriet. 9 In hmangaina chu hrietnaa dàm le thil tinrêng fie tak le inril taka hmu theinaa dàm inthang liena a hung pung deu deu theina dingin ka tongtai hlak. 10 Chuongchun, thil tha bîkhai chu thlang thiemin, Krista Ni-a chun thienghlim le soisel bo hung ni thei in ta, 11 Pathien ropuina ding le inpâkna dingin Krista Isu zàrah felna râ chun sungsipin um in tih. 12 Unauhai, ka chunga thil hung tlunghai kha Chanchin Tha sukdarna ding a lo ni ta lem hlauh ti in hriet ka nuom. 13 Ka kol bunhai hi Krista lei a nih ti lal in vêngtuhaia le mi dang po po khomin an hriet tah. 14 Unau tam lem khomin ka kol bun leiin Lalpa an ring nghet sauh a, ti lo le huoisen takin thu an hril ngam tah. 15 Thenkhat chun thîkna le elrelna leiin Krista thu an hril ve hlak a; thenkhat ruok chun ditsakna lungril putin an hril bok a. 16 A nuhnung pawl hin Chanchin Tha ka tan leia hung ka nih ti hrein, hmangaina leiin an hril a; 17 a hmasa pawl ruok hin chu mani tânghma kei zawngin, thaw tak tak loin, kol ka bun lai hin ka chungthu a rik zuol theina dinga buoina chok suok tumin, thu an hril thung a nih. 18 Sienkhom iem a poi a? A lem amanih a tak amania an hril khom ni sien, Krista thu hrila a um hrim hrim hi poimaw ka ti le ka lawm tak chu a nih, lawm pei bok ka tih. 19 In mi tongtaipèkna lei le Isu Krista Thlarau thangpuina leiin ka chunga thil tlunghai hi a mi sansuoktuah hung inchang lem a tih ti ka hriet. 20 Ka duhthusam tak le ka beisei tlat chu, ienga khom sukmuolphoa um lo a, ieng huna khom, tuta tum ngei khom hin, ka dam amanih ka thi amanih khomin huoi taka um a, ka taksaa Krista ka chawimawi hi a nih. 21 Ka ta ding chun hring hi Krista a na, thi khom hlawkna a nih. 22 Dam pei lang tangkaina ka la nei ding a ni si leiin, a ieng lem am thlang ding bìk ka hriet nawh. 23 Chamlakin ka um a, fe suoka Krista kuoma um châkna ka nei a, chu chu a tha lem hle a; 24 amiruokchu, nangnihai leiin ka la dam zing a tûl bok si. 25 Ringnaa in rênga in inthanglienna ding le in lawmna sukpunga a umna dingin ka la dam pei hi a tha lemin ka hriet tah. 26 Ka hung nawk pha chu keima leiin Krista Isua in lawmna luong liem a tih. 27 Ieng khom ni sien la, in um dàn chu Krista Chanchin Tha leh inmawi phot raw se. Ka hung amanih ka hung naw amanih khoma thlarau hmun khata ngîr nghetin, ringna hmun khat put unla, chuongchun, Chanchin Tha thuah in thang tlàng ti le 28 a dotuhai chêu chu iengti kong khomin in tì nawh ti lo hre thei ka tih. Chu chu an la tlawm dingzie le san suok in la ni dingzie inchikna chieng tak nîng a tih. Chu thawtu chu Pathien a nih. 29 Krista ring el chauh khom ni loa a ta dinga tuor dinga rongbawlna sin inhlàn in nih. 30 Chu inbeina, ka tuok in hmu ta hlak le tuta ka la tuok zing in hriet hi, nangni khomin in tuok ve tah a ni hi.

Philippians 2

1 Krista le in inzomnaa inthokin nangniah phùrna dâm, a hmangainaa inthokin thlamuongna dàm, Thlarau hmun khata inpawlna dàm, inlainatna le inlunginsietna dàm in nei am? 2 In nei chun lungril hmun khat puta inhmangai tuoin, thlarau le thiltum hmun khat nei unla, ka lawmna sukkim ro. 3 Mani tânghma siel tak le inngaihlu taka ieng khom thaw loin, tu khomin inngaitlawm takin mani nêkin mi dang tha lemah ngai raw se. 4 Mani hmakhuo chauh ngai loin mi dang thatna ding khom zong ro. 5 Krista Isu lungril ang put ro. 6 Ama chu niphung hrimah Pathien ni sien khom, Pathien tluka um chu tum tlat dingah a ngai naw a, 7 iengmalo anga insiein, siehlaw angin a'n siem a, mihriema hung piengin mihriem angin a hung um a, 8 a'n ngaitlawm a, thi chena thu zawmin, kraws-ah a hung thi a. 9 Chuleiin, Pathienin ama chu hmun chunghnung takah a chawi sâng a, hming po poa hming chunghnung tak a pêk a. 10 Chuongchun, Isu chawimawiin mi tin, vàna mi hai, hnuoia mi hai, hnuoi hnuoia mihai a hmaah dingthathuon an ta, 11 Pa Pathien ropuina dingin mi tinrêngin. 'Isu Krista chu Lal a nih' tiin puong an tih. 12 Chuongchun, ka dittakhai, ka um laia ka thu in awi ang khan tuta ka um naw kàr khom hin in awi nawkzuol a tûl a nih. Ti le inzà tak pumin in sandamna chu thaw suok ro. 13 Ama ditzawng thaw tumna leh thaw theina nei dinga nangnia sinthawtu chu Pathien a ni si a. 14 Chier lo le sêl loin iengkim thaw ro, 15 chuongchun tu lai ruolthar mi kawi le lungril piengsuolhai lai hin Pathien nau, dem kai lo, soisèl bo le thienghlim le khawvel elvartu hung ni thei in tih. 16 Hringna thu chu inhlànb pei unla, chuongchun Krista Ni-a ka suong dinghai chu nîng in ta, ka tlân thlawn nawzie le ka sawl thlawn bok nawzie suklangtu nîng in tih. 17 Ringnaa in rongbawlna le in inthawinaa chun ka thisen hiel hi uoiin anga bun thlâka um ding ni sien khom, lawm ka ta, nangni khom lawmpui bok ka ti chêu. 18 Chuong ang bokin nangni khomin lawm unla, mi lawmpui bok ro. 19 In chanchin hre a, ka hlim theina dingin Lalpa Isun a remti chun in kuomah Timothe ka hung tir vak thei ka beisei. 20 Lungril taka keima anga in thatna ding zongtu chu ama chauh hi a nih. 21 Mi dang chu Isu Krista ta ding ngaituo loa mani tânghma zong vong an nih. 22 Timothe ruok chu a tangkaizie in hriet tah a, pafa ang topin Chanchin Tha rong kan bawl tlâng hlak kha. 23 Chuleiin, ka chanchin ding ka hriet charin ama hi ka hung tir nghal ka beisei. 24 Lalpan rem a ti chun kei ngei khom ka hung vak ka ring. 25 Chun, ka unaupa, ka sipaipui le rongbawlpui, ka mamaw phuhrûktu dinga in hung tir Epafrodita hi in kuoma hung tir kîr tûlin ka hriet. 26 In rêngin a ngai êm êm cheu a, a nat thu in lo hriet khom kha poi a ti hlè a nih. 27 Thihmun suola nä a ni hrim a, nisienlakhom Pathienin a lunginsiet a, ama chauh ni loin kei khom a mi lunginsiet a, lungngaina chunga lungngai nawkzuolna tuok loin a mi siem a. 28 Chuleiin, ama hi inhmu nawk phaa in lawmna ding le ka lungkhamna hi a rè theina dingin ama hi ka hung tir inhawk zuol a nih. 29 Lalpa hmingin ama hi hlim takin lo lawm unla, hieng ang mi hi ngaihlu ro. 30 Nangniin kut ngeia in mi hung thangpui phâk si naw leiin thi huomin Krista sin a thaw a, a thì phá vàng nghé nghè a nih.

Philippians 3

1 A tawp taka chun unauhai, Lalpaah lawm ro. Thu pangngai bok in kuoma ziek hi ka ta dingin thil nghokum a ni nawh, nangni invèngna dingin a tha bok si a. 2 Thil tha naw thawtu uicho ruol, sertan uorhai laka chun invêng fimkhur ro. 3 Pathien Thlarau zàra Pathien chawibiektu le Krista Isu suonga puo tieng thila innghat ve nawtu einihai hi sertan indik tak chu ei ni lem. 4 Nuom lang chu kei khomin puo tieng thil chu ka suong ve thei tho annawm. Miin puo tieng thil suong theia an inngai chun kei lem chun inngai nawkzuol ka tih. 5 Ni riet nia sertan, Israel thlaa mi, Benjamin chia mi, Hebrai nu le pa kâra inthoka pieng, Dàn zawm tieng chu Farisai, 6 thahnemngaina tieng hlak kohranhai suknomnatu ka na; Dànin a phût ang felna tienga khom soisel bo ka nih. 7 Nisienlakhom, tu hin chu chuong ang thil, ka ta dinga hlawkna taphot chu Krista leiin kiemnaah ka tiem ta vong a nih. 8 Chu chauh chu a ni lèm, iengkim nèka hlu lem ka Lalpa Isu Krista hrietna le bùkkhì chun iengkim hi hnephnawlah ka ngai a; Krista chu ka nei theina ding le ama leh pum khat kan ni theina dingin, ama leiin iengkim ka chân tah a; 9 Dàn zawm lei ni loin Krista ka ring leiin thiem ka chang tah a, chu chu ringna leia Pathien hmaa thiemchangna chu a nih. 10 Ka thil hlut sun chu Krista hriet dàm, a thonawkna thilthawtheina chang dàm, a tuorna ang tuor ve dâm le a thìna intawmpui dàm hi a nih. 11 Chuongchun, mithi thonawkna nia chun keitho ni vé ngèi ka tih. 12 Hieng thilhai hi chang tah le siem famkima um tah intî ka ni nawh; Krista Isu mi man san chu hlen ngei tumin hma tieng ka nor pei a ni lem. 13 Unauhai, thangsuo taah ka'n ngâi dèr nawh. Amiruokchu, thil pakhat ka thaw hlak chu hi hi a nih: Hnung tieng thilhai chu theinghilin hma tieng thilhai chu ka hnot tàng tâng a, 14 Isu Krista zàra lawmman hmu dinga chung tienga Pathien mi kona chu chang ve ngei dingin, tum ram tieng chu ka pan ngat ngat a nih. 15 Eini puitling chin tahai lem chun chuong ang lungril chu put ei tiu. Chun, kong thenkhatah in ngaidàn a danglam a ni khomin, chu chu Pathienin chieng takin la'n hriettir a ti cheu. 16 Ieng khom ni sien, tuta ei phâk chin po bèk hi ei nunah la sukdik phot ei tiu. 17 Unauhai, ka um dàn inchûktuhai ni pei ro; um dàn ding kan hril chêu anga khawsahai chu enton takah hmang ro. 18 An khawsak dànah Krista kraws hmèlma tam tak an um ti ka hril rop tah chêu kha, tu khom hin mitthli pumin ka hril non nawk chêu a nih. 19 Chuonghai tawpna ding chu sietna a nih. An pathien chu an phîngpui a na, an ropuina chu an inzakna bùr a na, khawvel thil ringot an buoipui hlak. 20 Eini ruok chu vàn khuo-le-tui ei na, vàna inthoka ei sandamtu Lalpa Isu Krista hung nawkna ding chu nghâkhlâ takin ei thlìr a nih. 21 Iengkim a thu hnuoia sie theitu chun ei taksa tlawm tak hi ama taksa ropui anga um dingin a thilthawtheina chun a sukdanglam ding a nih.

Philippians 4

1 Chuleiin, ka unau dittak le ka ngai êm êm, ka lawmna le ka lallukhumhai, chuong ang chun Lalpaah ngîr nghet ro aw, ka ruol dittakhai! 2 Lalpaa chun lungril hmun khat put dingin Eudi le Suntuki khom ka ngên. 3 A nih, nang, ka rîngkol bâtpui ringum tak, c khâng nuhmeihai kha thangpui dingin ka ngèn che; anni khan Klemen le Hringna Bua hming chuong danghai leh, Chanchin Tha rongbawlnaah an mi thawpui nasa hle a nih. 4 Lalpaa chun lawm rop ro, ti non ka tih, lawm ro. 5 In dawtheizie mi po poin hre raw hai se. Lalpa chu a hnâi zing. 6 Ienga khom lungzing naw unla, iengkimah lawmthu hrila tongtaiin in mamawhai chu Pathien kuomah intlun ro. 7 Chuongchun, Pathien thlamuongna, mihriem hriet sèng ruol lo chun in lungril le ngaituonahai chu Krista Isua chun vêngpêk a ti chêu. 8 A tawp taka chun unauhai, thil indik le inzaum taphot dàm, a fel le inthieng taphot dàm, ditum le inthangmawi taphot dàm, thil tha chungchuong le inpâk tlâk thil taphot dàm chu ngaituo hlak ro. 9 Ka kuoma inthoka thil in inchûk le donghai, in thil hriet le hmuhai kha thaw pei ro. Chuongchun, thlamuongna Lalpa chun umpui a ti chêu. 10 In mi ngaituozie tu lai hnâi elah in hung inlangtir nawk thei leiin Lalpaa chun ka lawm takzet a nih. In mi'n voi hle ti ka hriet a, chu chu remchâng in la hmu hri el naw leiin a hma khan in la'n entir naw mei mei a nih. 11 Hi thu hi ka tlàksam leia hril ka ni nawh; ieng ang khomin um lang, lungawi taka um dan ka'n chûk ta si a. 12 Rethei taka um dàn ka thiem a, hausa taka um dàn khom ka thiem bok a; iengkimah khop le tâma um dàn, hausa le retheia um dàn thurûk ka'n chùk tah. 13 Mi sukhrâttu Krista zàrin iengkim ka thaw thei. 14 Ieng khom ni sienla, ka harsatnahai in mi lo phurpui hi in thaw tha ngot el. 15 Chun, Chanchin Tha ka hril tan laia Makedonia ka suoksan hnung khan nangni Filipi kohran chauh naw chu kohran dang tu khom thilpêk le dong thuah mi ngaituopui an um nawh ti in hriet tah kha. 16 Thesalonika khuoa ka um lai khom khan ka tlàksamna phuhrûk dingin thilpêk in mi hung thon rop hlak kha. 17 Thilpêk ka zong naw a, in chan sukvawngna ding ka zong lem a nih. 18 In thilpèk po po ka lo hmu kim bâkah Epafrodita kuta in thil hung thonhai khom ka lo hmu leiin ka burip ta khop el. Hieng hi rimtui thilhlân, Pathien lawmzawng le pom tlâk chu a nih. 19 Ka Pathien chun Krista Isua a hausakna ropui taka inthokin in mamaw tinrêng pêng a ti chêu. 20 Ei Pathien le ei Pa chu chatuonin ropui raw se. Amen. 21 Mi thienghlim po po Krista Isu hmingin chibai ka bûk chèu. Ka kuoma unau umhai hin chibai an bûk chêu. 22 Mi thienghlim po poin chibai an bûk chêu a, Kaisar ina umhai hin an bùk deuh bik chêu. Ei Lalpa Isu Krista lunginsietna chu in thlarau kuomah um raw se. 23 (A um nawh)

Colossians 1

1 Paula, Pathien ditzawnga Krista Isu tirko le ei unaupa Timothe chun, 2 Kolosa khuoa mi thienghlimhai le Kristaa unau ringumhai chibai kan bûk. Pathien, ei Pa kuoma inthoka lunginsietna le inremna chu in kuomah um raw se. 3 In ta dinga kan tongtai zâtin Pathien, ei Lalpa Isu Krista Pä kuoma chun lawmthu kan hril hlak. 4 Krista Isu in ringzie le mi thienghlimhai in hmangaizie thu dàm kan lo hriet a. 5 Chu chu Chanchin Tha thutak in lo hrieta inthoka beiseina in lo nei tah lei a nih; chu in beisei chu in ta dingin vànah sie khawl a nih. 6 In kuomah Chanchin Tha thutak a hung tlung a, Pathien lunginsietna chu in hriet chieng nia inthoka nangni laia thil um ang khan khawvel ram tinah Chanchin Tha chun ra insuoin a'n dar tah a. 7 Kan taa dinga Krista rongbawltu ringum Epafra, kan rongbawlpui dittak, Chanchin Tha hung hriltu chèu khan, 8 Thlarau zàra hmangaina in nei thu dàm a mi hril a nih. 9 Chu lei chun thlarau tieng varna le hriet thiemna tinrênga a ditzawng in hriet theina dingin, in chanchin kan hriet nia inthokin Pathien kuomah tongtaia hnipêk chêu kan ma nawh. 10 Lalpa mi ni tlâk a, kong iengkimah ama suklawmtu ni a, thil tha tinrênga ra insuo a, Pathien hrietnaa in hung inthanglien pei theina dingin kan hni bok hlak. 11 A thilthawtheina ropui taka inthoka suok hràtna chun kong tinrêngah tuorselna le dawtheina nei dingin sukhrât raw se cheu. 12 A ram ênga mi thienghlimhai le rochan nei ve tlâka siemtu chèu Pathien kuoma chun hlim takin lawmthu kan hril bok hlak. 13 Ama chun thim thuneinaa inthoka mi san suokin, a hmangai tak, a Naupa rama chun a mi thuoi lùt tah a. 14 A Naupa chu ei intlanna le ei suolhai ngaidamna a nih. 15 Krista chu hmu thei lo Pathien angpui, thilsiem po po hmathuoitu a nih. 16 Amaa chun iengkim vàna um hai, hnuoia um hai, hmu thei le hmu thei nawhai, lalthungpha hai, rorêlna hai, lalna hai, thuneina hai chu siem a ni a; iengkim hi ama lei le ama ta dinga siem a nih. 17 Ama chu iengkim um hmain a um a, amaa chun iengkim an inthlung khawm vong bok a nih. 18 Ama chu kohran lû a na, kohran hi a taksa a ni bok. Ama chu iengkim bul a na, iengkima chunghnung tak a ni theina dingin mithi laia inthoka thonawkna hmathuoitu a nih. 19 Amaa Pathien nîna famkim a chèng chu Pathien ditzawng a nih. 20 Krista leiin iengkim Ama leh a'n remtir nawk a, kraws-a a Naupa thisen chun inremna a siem a, Krista lei chun hnuoia umhai le vàna umhai chu Ama leh inremin a siem tah a nih. 21 Nangni khom kha hma khan chu Pathien lakah mikhuol niin, thil suol in thaw hlak leiin a hmêlma in nih. 22 Tu ruok hin chu, taksa ngei puta Krista a hung thìna zârah, a hmaah mi thienghlim, hmêlhem lo le soisel boa in um theina dingin, Pathienin Ama leh a'n remtir ta chêu a nih. 23 Chuongchun, ringnaah um zingin, nghet takin ngîr unla, Chanchin Tha in hriet leia beiseina in hung nei tah kha intawl hmangsan naw ro. Chanchin Tha chu vàn hnuoia thilsiem tinrêng kuoma puong a ni tah a, kei Paula hi chu rongbawltu chu ka nih. 24 Nangni leia ka tuornaa hin tu hin ka lawm a nih. Kohran ta dinga Kristan a taksaa a tuor bâk kha ka taksain ka la sunzom pei a nih. 25 Pathien thu le a remruot in kuoma kim taka puong dingin Pathienin sin a mi pèk a, kohran rongbawltuah a mi siem a. 26 Suon po po laka a lo thup kumkhuo hlak thurûk kha, tu hin chu a mi thienghlimhai kuomah a puong tah a. 27 Chuong mihai kuoma chun hnam tin ta dinga a thurûk ropui le hlu tak chu Pathienin Jentêlhai kuomah inhriettir a nuom hrim a; chu thurûk chu nangnia um Krista, ropuina in beisei san chu a nih. 28 Ama thu chu kan tlânginsampui a, mi tin el chu Kristaa kan sukpuitling theina dingin kan varna po po hmangin kan keihruoi a, kan inchùktir hlak a nih. 29 Chu sin chu ka hlen suok theina dingin keimaa nasa taka thok Krista hràtna chu hmangin, inrim takin ka pu tâng tàng a nih.

Colossians 2

1 Nangni le Laodikei khuoa mi le ka hmêl la hmu ngai nawhai khomin ieng ang hiela inrimin am in ta dingin sin ka thaw hlak ti hi in hriet ka nuom. 2 An lungril chokphûr a, hmangainaah sui khawm a, kong tinrênga lungrila hriet thiem theina hau a, Pathien thurûk, Krista chu an hung hriet chieng hi ka thil tum chu a nih. 3 Kristaa chun varna le hriet thiemna ro hlû po po chu a'n phûm si a. 4 Tu khomin bàu themthiema an hlêm kawi nawna ding chèuin hi hi ka hril a nih. 5 Taksain in kuomah um naw lang khom thlarau chun ka um a, in invong felzie le Krista ringnaa in nghetzie ka hrietin ka lawm a nih. 6 Chuongchun, Krista Isu chu Lalpaa in pom tàk leiin amaah um ro. 7 Amaa chun zung keia insuknghet tung peiin, inchûktir in ni dàn ang tak khan, ringnaa chun ngîr nghet unla, lawmthu hril uor ro. 8 Fimkhur ro, Kristaa inthoka suok ni lo, zirtirna indik lo, khawvel le thilsiemhai umphung inchûktirna thu dawrawmb chun tuhaiin amanih hlêm pal hlauh rawi an ti chêu. 9 Krista taksaa chun Pathien nîna famkim chu a um si a. 10 Ama chu lalna le thuneina po po lu a na, amaa chun nangni khom sukfamkim in nih. 11 Mihriem kuta sertan ni loin, Krista sertannaa chun in mihriem phunga tisa suol chu in tan thlâk tah leiin amaa chun sertan in nih. 12 Baptismaa chun ama leh phûm ve in ni ta a, mithi laia inthoka ama keithotu Pathien thilthawtheina chu in ring leiin amaa chun keitho in ni ve tah. 13 In bawsietnahai le suol put in tisaa sertan lo in ni leia thi in ni lai khan Pathien chun Kristaah a sukhring ta cheu a; 14 in bawsietna po po ngaidamin, zieka um thupêk le a bebawm dànhai, mi khinga mi kal zing hlaktu chu kraws-ah hemdein a thâi bo a, a lâk hmang ta vong a. 15 Kraws-a chun inlalna le thuneinac po po chu a hne a, chuonghai chu thuoi dul dulin a hne tawlzie vàntlâng hmua ngei a'n entir tah a nih. 16 Chuleiin, fàk le dawn thu amanih, sakhaw kût hmang thu amanih, thla thar dêt lawm thu amanih le sabat inser thu amaniah tu khomin in chungah thu hung nei ta naw raw hai se. 17 Hienghai hi thil la hung tlung ding hlimthla chauh an ni a, a tak ruok chu Kristaa chauh a um. 18 Inngaitlawm tehlèm inhoiti pawl le vàntirkohai be pawlin lawmman dong tlâk loa an siem chêu inphal naw ro. Chuong ang mi chun inlàrna a hmu thu a kip a kawiin uor mangkhèngin a hril hlak a, a tisa lungril chu ngaidan châu le dawrawm takin a pam puom hlak. 19 Chuong ang mi chu Lû, Krista leh an inzom ta nawh. Lu-a chun thâ le zungzâma phan khawm taksa pum chu a'n nghat a, Pathien ditzawng angin taksa pum chu a'n thang hlak a nih. 20 Khawvel umphung inchûktirna indik lohai chu Kristaa in thisan ta si chun, iengtiziea khawvel dàn hnuoiah in la tlu lût rop am a na? 21 'Tawk naw, intem naw, them naw' tihai dàm hi ieng dinga in la ti rop? 22 Hieng thilhai hi mihriem thupêk le zirtirnaa innghat an ni a, hmang zoa bo nawk el thil an nih. 23 Hieng phuokfawm vàntirko biek dàm, inngaitlawm tehlêm dàm le taksa nasa taka soisak tihai dàm hi zirtirna tha fû awmin inlang sien khom, tisa châkna khuokhirna ding chun ienga khom a tangkai nawh.

Colossians 3

1 Krista kuoma keitho in ni ta si leiin Pathien chang tienga inthung Krista umnaa chung tieng thilhai chu zong ro. 2 Hnuoi tieng thilah in lungril sie loin chung tieng thilah innghat lem ro. 3 In thi tah a, in hringna chu tu hin Pathien kuomah Kristaa chun thupin a um ta si a. 4 Ei hringna bul Krista chu a hung inlang pha leh nangni khom a kuomah ropui takin inlang vêng in tih. 5 Chuleiin, in khawvel nun suol inngaina hai, tirdakumna hai, hurna hai, châkna suolhai, duâmna (milem biekna) hai hi sukhlum ro. 6 Chuong thilhai lei chun Pathien lungsenna a hung tlung ding a nih. 7 Khä hma khan nangni khom chuong ang chun in um ve hlak a ni khah. 8 Tu ruok hin chu lungsenna hai, lung inlingna hai le intheidanahai bânsan unla, inhrilsietna le tong porchèhai in bàua inthokin suok ta naw raw se. 9 In mihriem hlui chu a thil chîng hlakhai leh in hlìp thlâk tah leiin, inhlèm tuo ta naw ro. 10 Tuhin chu mihriem tharin in inthuom tah a, chu chu Siemtu hrietna hau ding le ama angna nei dinga siem tharin a um pei a nih. 11 Chu nun thara chun Grik le Juda, ser tan le tan lo, hnamchom le awze mi, bawi le bawi lo a um ta naw a, Krista chu iengkim a na, iengkimah a um bok. 12 Chuongchun, Pathien mi thlang, a mi thienghlim le a dittakhai in ni leiin lungril takah inlàinatna hai, ngilneina hai, inngàitlawmna hai, thuhnuoirolna hai le dawtheina hai chun inthuom ro. 13 Indaw tuo unla, mi dang laka lungawi nawna in nei khomin inngaidam tuo ro. Lalpan a ngaidam chêu angin inngaidam tuo ve hlak ro. 14 Chuong po po chunga chun hmangainain inthuom unla, chu chun iengkim duthusama inremin a châr khawm hlak a nih. 15 Kristaa inremna chun in lungrilah ro rêl raw se, taksa pum khata um dinga ko in ni si a. Lawm nachâng hre bok ro. 16 Krista thu chu, a hausakna po po leh, nangniah um raw se. Inpâkna hla hai, Pathien hla hai, Thlarau tieng hla hai le chun varna tinrêngin inzirtir unla, infui tuo hlak ro. Lungril taka Pathien chawimawiin hlim takin hla sak ro. 17 Krista zàra Pä Pathien kuoma lawmthu hril zing pumin in thaw taphot, thuhril amanih thilthaw amanih chu Lalpa Isu hmingin thaw vong ro. 18 Nuhai, in pasalhai thu awi ro, chu chu Lalpa mihai thaw awm hrim a nih. 19 Pahai, in nuhmeihai hmangai unla, an lakah rawng naw ro. 20 Naupanghai, iengkimah in nu le pahai thu awi ro, chu chu Lalpa lawmzawng a ni si a. 21 Pahai, in nauhai suklungsen naw ro, beidong pal hlauh rawi an tih. 22 Bawihai, iengkimah in puhai thu zawm unla, mihriem suklawm tumtuhai anga an hmu lai chaua thaw loin lungril takin Lalpa ti pumin an hmu naw lai khomin thaw ro. 23 In thaw taphot chu mihriem rongbawl ang ni loin Lalpa rongbawl ang lemin titakzetin thaw ro. 24 Ro hluotu nìna lawmman chu Lalpa kuoma inthokin in hmu ding a nih ti in hriet kha. Lalpa Krista rong a nih in bawl hi. Thil indik lo thawtuhai chun thil indik lo an thaw man hmûng an tih, Pathienin tu khom ditsak bîk a nei si naw a. 25 (A um nawh)

Colossians 4

1 Hotuhai, nangni khom vànah Hotu in nei ti hrein in bawihai chungah indik tak le tha takin iengkim thaw hlak ro. 2 Tongtai fan fan unla, invêng zing unla, lawmthu hril rop ro. 3 Kol ka bunna san, Krista thurùk kan tlàng insampuinaah Pathienin a thu kan hrilna ding kot a mi hongpêk theina dingin mi tongtaipêk bok ro. 4 Ka hril tum ang tak ka hril theina dingin mi tongtaipêk bok ro. 5 Ringnawtuhai lakah var takin um unla, anni lakah in hun a hlawk thei ang takin hmang ro. 6 Ieng lai khomin tlâi tak le hawihawm taka tong chîng unla, chuongchun mi tin an mamaw ang peia don dàn thiem thei in tih. 7 Lalpaa ka siehlaw chanpui, rongbawltu ringum tak le ka unau dit tak Tukik hin ka chanchin po po hril a ti chêu. 8 Kan chanchin in hriet a, lungril hlim taka in um theina dingin ka hung tir a nih. 9 Ama ruol hin nangni mi, unau dit tak Onesima, ringtu nghet tak hi ka hung tir ve a, hieng tieng chanchin hi hung hril vong an ti chêu. 10 Ka'n tângpui Aristarka hin chibai a bûk chèu. Barnaba tupa Marka khomin chibai a bûk chèu. Ama hi in kuoma a hung pha lo lawm lût dingin ka hril ta chêu kha. 11 Isu, Justa an ti hin chibai a bûk chèu. Juda Kristienhai lai chu anni chauh hi Pathien ram ta dinga mi thawpuitu an ni a, an mi thlamuong hlè a nih. 12 Epafra, nangni mi, Krista Isu siehlaw hin chibai a bûk chèu. Nghet taka in ngìr a, in hung puitling a, Pathien ditzawng anga ringtu indik tak in ni theina dingin thahnemngai takin a tongtaipêk hlak chêu a nih. 13 Nangni rawi ta ding dàm, Laodikei khuoa mihai le Hairopolis khuoa mihai ta ding dàmin ama hi a thok nasa êm êm ti ka hriet bok 14 Luka, daktor dit tak le Dema hin chibai an bûk chêu. 15 Laodikei khuoa unau umhai le Numfa le a ina kohran inkhawmhai kha chibai mi hung bûk ro. 16 Ka lekha hi nangni lai in tiem zo pha Laodikei kohran khom intiemtir ve ro, chuong ang bokin Laodikei kohran lekha hi lo tiem ve ro. 17 Chun, Arkhipa kuoma khan, "Rongbawl sin Lalpa kuoma inthoka i dong kha hlen dingin thang la rawh" ti hi mi hung hrilpêk ro. 18 Kei Paula hin keima kut ngeia chibai ka hung bùkna chèu a ni hi. Ka kol bun hi hung theinghil ngai naw ro. Lunginsietna in kuomah um raw se.

1 Thessalonians 1

1 Paula, Silvan le Timothe chun Thesalonika khuoa Pä Pathien le Lalpa Isu Krista kohran chibai kan bùk. Lunginsietna le inremna in kuomah um raw se. 2 Nangni leiin Pathien kuomah lawmthu ka hril rop hlak. 3 Ei Pä Pathien hmaa kan tongtai chângin in hming ma loin kan lam hlak a, ringna leia in thaw suok hai, hmangaina leia sin in thaw inrimzie hai le ei Lalpa Isu Kristaa beiseina in nei nghetzie hai kan hriet zing hlak. 4 Unauhai, Pathienin a hmangai chêu a, ama ta dingin a thlang suok chêu ti kan hriet. 5 In kuoma Chanchin Tha kan hung intlun lai khan thu el ni loin, thilthawtheina leh Thlarau Thienghlim ring nghet tlatin kan hung hril a, nangni lai kan chàm sùnga in ta dinga kan khawsak dàn khom in hriet kha. 6 Kan um dàn le Lalpa um dàn latuhai in ni tah a, rinumna nasa tak tuor pumin kan thu in lo pom a Thlarau Thienghlimin lawmna a pêk cheu a. 7 Chuongchun, Makedonia le Akaia rama ringtu po po ta dinga enton tak in hung ni a; 8 an ramah Lalpa thu nangni leiin a'n dar el chauh bâkah hmun tinah Pathien in ring thu a'n thang a; chuleiin, keinin ieng khom kan hril a tûl tah nawh. 9 Kan hung kan chêu tûma in mi lo lawm dàn hai, milem biek bânsana Pathien hring le indik tak rong bawl dinga Pathien tieng in hung nghat tâk thu hai, 10 a Naupa Isu, mithi laia inthoka a keitho, lungsenna hung tlung ding laka mi san suoktu chu vàna inthoka a hung ding in lo nghâk thu dàm an hril huoi huoi a nih.

1 Thessalonians 2

1 Unauhai, in kuoma kan hung inzin kha a thlawn nawh ti nangni ngeiin in hriet. 2 In hriet tah angin Filipi khuoah inzakum taka soisak tuor inlang khom, dodàlna tam tak kàrah in kuoma Chanchin Tha hril dingin Pathienin a mi sukhuoi ta lem hlauh a ni kha. 3 Kan thu hril chêu hi thu indik lo amanih, tum rûk tirdakum neia inhlêm tumna thu amanih a ni nawh. 4 Chanchin Tha inkoltir tlàka Pathienin a mi ruot ang ngeiin, mihriem suklawm tum ni loin, kan lungril fietu Pathien suklawm dingin thu kan hril lem hlak a nih. 5 Ieng lai khomin mi kan inpâk der ngai naw a, duâmna thup dingin hmaithinghawng kan inbel ngai nawh ti in hriet a, a mi hrepuitu chu Pathien a nih. 6 Mihai inpâk kan phût naw a, nangni amanih mi dang amanih inpâk kan ngiet bok nawh. 7 Krista tirko kan ni leiin in ta dinga phurrik inchang thei kan na, sienkhom nuin a nauhai a duot angin kan duot lem chêu a ni kha. 8 Chuong ang khopa ngainaa kan hmangai êm chêu leiin, Pathien Chanchin Tha chauh ni loin kan hringna chen khom hlim taka pèk hiel chêu khom kan inhuom a ni kha. 9 Unauhai, sin kan thaw inrimzie le thaw nasatzie kha in hriet a, nangni lai tu khom kan sukharsat nawna dingin, a sùn a zàna sin inrim taka thaw pumin Chanchin Tha kan hril hlak chêu a ni kha. 10 Thienghlim le fel le dem kai loin ringtu nangnihai lai kan um hlak ti hretu chu nangni in ni a, Pathien khom a nih. 11 Pain a nauhai chunga a thaw angin nangni chunga khom kan thaw hlak ti in hriet. 12 A ram le a ropuina chang ve dinga kotu chèu Pathien mi ni tlâka um dinga sukphûr le thlamuongin, kan infui mol mol hlak chêu a ni kha. 13 Kan thu hung hril in lo pom lai khan, mihriem thu anga pom loa Pathien thutak a nìna ang taka in pom lem lei khan ma loin Pathien kuomah lawmthu kan hril bok hlak. Chu chu nangni ringtuhaia thok hlak, Pathien thutak ngei chu a ni hrim a nih. 14 Unauhai, nangni khom Judai rama Isu Kristaa um Pathien kohranhai ang in lo ni ve tah; annin Judahai lakah an tuor angin nangni khom in mihai lakah in tuor kha. 15 Chuong Judahai chun Lalpa Isu le anni zawlneihai ngei an that a, keini khom an mi hnot suok a, Pathien an suklawm naw a, mi dang hrim hrim an dodâl vong a nih. 16 Jentêlhai sandam an ni vèna dinga Chanchin Tha an kuoma kan hril chen khom an khap a, an suol vawr tawp an tong a, a tawpah Pathien lungsenna chu an chungah a hung tlung tah a nih. 17 Sienkhom, unauhai, lungril tieng ni loin taksa tieng hun iemani chen ei lo inthè tah a, chuleiin in hmèl hmu nawk kan chàk a, hmu chêu tumin kan thang nasa a nih. 18 Hung sir chêu kan tum hlak a, kei Paula ngei khom hin ka tum rop a, sienkhom Setanin a mi dâl hlak a. 19 Ei Lalpa Isu hung nawk phaa thil kan beisei, kan hlimna ding le chawimawina suongum a hmaa kan khum ding chu nangni naw tu dang am nîng an ta? 20 Nangni hi kan ropuina ding le kan hlimna ding chu in nih.

1 Thessalonians 3

1 Chuongchun, kan nghàk zo ta uoi naw leiin, keini chauh Athen khuoah la châmbâng inlang tha tak dingin kan ngai a. 2 Chuleiin, kan unaupa Timothe, Krista Chanchin Tha hrila Pathien rong kan bawlpui hi in ringna suknghet le sukphûr ding le hieng ang fiena leia nangni lai tu khom an inhnìng nawna dingin kan hung tir a nih. 3 Nangni khomin hieng thil hi ei tuor ngei ding a nih ti in hriet ta sa a ni kha. 4 In kuoma kan um laia sukdùdàna ei la tuor ding thu kan hril rop tah chêu ang tak khan a hung tlung tah a nih ti in hriet. 5 Hi lei hin, ringnaa in nghet pei le pei naw hre loa ka um thei tâk naw leiin le ieng kong zawngin amanih thlemtu chun thlêm hnè cheu a, kan sinthaw a thlawn el pal kan inlàu leiin Timothe hi ka hung tir a nih. 6 Timothe chu in kuoma inthokin a hung kîr nawk tah a, chanchin lawmum tak, in ring nghetzie dàm, hmangaina in hauzie dàm, keinin hmu chêu kan chàk èm êm ang boka mi hmu in chàk vezie thu hai dàm, ieng lai khomin in mi hriet zing ti thuhai dàm a mi hril a. 7 Chuleiin, unauhai, in ringna a nghet leiin kan lungzingna le rinumna po poah lung muong takin kan um thei tah a nih. 8 Lalpaa in nghet pei lei hin kan ta dingin dam man a um. 9 Nangni zâra Pathien hmaa kan hlimna po po lei hin Pathien kuomah lawmthu hril kan va bat nasa de aw! 10 In hmêl kan hmu theina ding le ringnaa in tlàksam kan phuhrûk theina ding chêuin Pathien kuomah sùn le zànin thahnemngai takin kan hni hlak. 11 Tu hin ei Pa Pathien le ei Lalpa Isu chun nangni kan hung kan theina ding chèuin lampui mi siempêk raw se. 12 Keinin kan hmangai ang chèua nasaa in inhmangai theina dingin, in hmangaina chu Lalpan sukthangin sukpungpêk cheu raw se. 13 Chuongchun, a mi thienghlim po po le ei Lalpa Isu a hung phaa Pathien, ei Pathien hmaah thienghlim le soisel boa in um theina dingin in lungril suknghet bok raw se.

1 Thessalonians 4

1 A tawp taka chun unauhai, Pathien lawmzawnga um dàn ding kan inchûktir hlak chêu ang khan tu hin in um a, chuong anga um zuol pei dingin Lalpa Isu hminga ngènin kan infui bok chêu a nih. 2 Lalpa Isu thuneina hmanga kan thu inchûktirhai chèu kha in hriet. 3 Pathien ditzawng chu hi hi a nih- in thienghlim hi. Chuleiin, inngaihai bânsan ro. 4 Mi tinin mani taksaa seng thienghlim le inzaum taka thunun dàn inchûk raw se. 5 Pathien hre lo Jentêlhai angin tisa châknaah tlu lût naw ro. 6 Hi thila hin tu khomin a unau hlêmin a lakah thil tha naw thaw naw raw se; chuong ang thawtuhai chunga chun Lalpan phuba lâng a tih ti hrilin kan inhriettir tah cheu kha. 7 Pathien chun thienghlim lo dingin a mi ko naw a, thienghlim taka khawsa dingin a mi ko lem a nih. 8 Chuleiin, hi thu poisa nawtu chun mihriem a poisa naw ni loin Thlarau Thienghlim petu cheu Pathien a poisa naw a ni lem. 9 Pathienin nangni ngei inhmangai tuo dàn a'n chûktir ta chêu leiin unau in inhmangai dàn ding thu chu in kuomah ziek hran a ngai nawh. 10 Chuong ang chun Makedonia rama unau po po khom in hmangai hlak kha. Unauhai, chu chu thaw zuol pei dingin ka ngèn cheu. 11 Kan infui tah chêu ang khan, dei dapa khawsain mani sin sengah inbûr unla, mani kut ngeia sinthaw uor ro. 12 Chuongchun, in ni tin khawsaka chun puo tieng mi inzà phur in ta, tu chunga khom innghat naw bok in tih. 13 Unauhai, beiseina hrim nei lo mi danghai anga in lungngai nawna dingin, lo in tahai chanchin chu in hriet naw ka nuom nawh. 14 Isu a thi a, a tho nawk ti ei ring a, amaa in tahai chu Pathienin Isu leh hung thuoi a tih ti ei ring bok a. 15 Lalpa thuin hi hi kan hril chêu a nih: eini Lalpa hung chena dama la um zinghai hin a lo in tahai chu lekhal naw top ei tih. 16 Lalpa ngei chu, thupêk inring tak le vàntirko ropui tak rawl le Pathien kona tawtawrawt ri leh, vàna inthokin hung tum a ta, Kristaa thi tahai chu tho hmasàng an tih. 17 Chu hnunga chun eini dama la um zinghai hi boruokah Lalpa hmuok dingin anni ruolin sûm lai khin làk tungin um ei ta, Lalpa kuomah um kumkhuo tàng ei tih. 18 Chuongchun, hieng thuhai hin inthlamuong tuo hlak ro.

1 Thessalonians 5

1 Amiruokchu, unauhai, a hun le ni thu chu in kuoma ziek a ngai nawh. 2 Lalpa ni chu zàna rûkru a hung angin a hung tlung ding a nih ti in hriet si a. 3 Mihaiin, "A him, a muong" an ti laiin nuhmei nauha se angin sietna an chungah hung tlung thut a ta, pumpel top naw ni hai. 4 Unauhai, nangni chu thima um in ni naw leiin chu ni chun rûkru angin nang nawng a ti chêu. 5 In rêngin var nauhai le ni nauhai in ni vong si a. Zàna mi ei ni naw a, thima mi ei ni bok nawh. 6 Chuleiin, mi danghai anga in ve loin, meng zingin ngaiven lem ei tiu. 7 Inhai chu zànah a nih an in hlak; zuruihai khom zànah a nih an inrui hlak. 8 Eini chu sùna mi ei ni leiin ringna le hmangaina awmphaw hâkin, sandam beiseina chu lukhuma hmangin, har fîm takin um lem ei tiu. 9 Pathien lungsenna tuor ding ni loin ei Lalpa Isu Krista zàra sandam ni dingin a mi ruot lem a nih. 10 Ei dam khoma ei thi khoma ama leh ei hring theina dingin ama chu ei ta dingin a thi ta si a. 11 Chuleiin, in thaw hlak ang hrimin, inthlamuong tuoin insukhrât tuo ro. 12 Unauhai, in ta dinga inrim taka sinthawtuhai, Lalpaa nangni enkoltuhai le kawktuhai chèu chu hre zing dingin ka ngèn cheu a nih. 13 Anni chu an sinthaw leiin hmangainain ngai chunghnung tak unla, inngei diel dielin um ro. 14 Chun, unauhai, ka ngèn cheu hi, mi thabohai chu kawk unla, zaksiehai chu sukphûr unla, mi hrât nawhai chu thangpui unla, mi tin chungah dawthei ro. 15 Tu khomin tu suol khom suola thungrul lo dingin fîmkhur unla, ieng lai khoma thil tha inthawpêk tuoin, mi po po chungah thil tha thaw pei ro. 16 Lawm rop unla, 17 ma loin tongtai unla, 18 iengkimah lawmthu hril rop ro. Hi hi Krista Isua chun in ta dinga Pathien ditzawng a nih. 19 Thlarau mei chu sukmit naw ro. 20 Thuhriltuhai hmusit naw ro. 21 Iengkim fie unla, a tha taphot chu chel nghet ro. 22 Suol taphot laka chun inthier fihlim ro. 23 Remna Pathien ngei chun in pumin sukthienghlim sien cheu, ei Lalpa Isu Krista hung pha in thlarau le in lungril le in taksa a rêngin soisèl boin inumtir raw se. 24 A kotu chèu chu a ringum a, thaw khom thaw ngei a tih. 25 Unauhai, mi tongtaipêk ro. 26 Unau po pohai kha fawp inthiengin mi hung chibai vong ro. 27 Hi lekha hi unau po po hrieta tiem dingin Lalpa hmingin ka ngèn chêu a nih. 28 Ei Lalpa Isu Krista lunginsietna chu in kuomah um raw se.

2 Thessalonians 1

1 Paula, Silvan le Timothe hai chun Thesalonika khuoa Pa Pathien le Lalpa Isu Krista kohranhai chibai kan bùk. 2 Pa Pathien le ei Lalpa Isu Kristaa inthoka lunginsietna le inremna chu in kuomah um raw se. 3 Unauhai, ringna tieng le inhmangai tuona tienga in inthanglien pei leiin Pathien kuomah lawmthu kan hril hlak a, chu chu kan thaw ding tak hrim a nih. 4 Suknomnatnahai le fienahai sel tak le ringna nghet taka in tuorhai hi Pathien kohranhai hmaah kan uongpui hlè hlak. 5 Pathien ram leia tuor in ni a, chu taka lût tlàk ni dinga Pathien thil rêl hang indikzie sukchiengna chu in nih. 6 Pathien chu a'n dik a, nangni sukrinumtu chèu chu rinumnain thungrul vêng a tih. 7 Lalpa Isu chu vàna inthoka ama vântirko thilthawthei takhai leh meichoka a hung inlang huna chun, nangni rinum tuorhai hi hung inchawltir a ti chêu a, keini khom mi'n chawltir bok a tih. 8 Pathien hre lo le ei Lalpa Isu Chanchin Tha ring nuom nawhai chungah phuba hung lâng a tih. 9 Kumkhaw sietnaah chun pei hawn nîng an ta, Lalpa le a thuneina ropui tak hmaah khàr khipin um an tih. 10 Chu ni chu a mi thienghlimhaiin an chawimawi ni ding le ama ringtuhaiin mak ropui an ti nî ding chu a nih. Nangni khom in kuoma kan thu hril in lo pom leiin ringtuhai lai chun thang vêng in tih. 11 Chuong ang lei chun, Pathienin a kona chèu phûa in um theina ding le that in nuomna po po le ringnaa in thilthaw tinrêng chu a hràtnaa a sukfamkimpêk theina ding chèuin ma loin kan tongtaipèk hlak chêu a nih. 12 Chuongchun, ei Pathien le Lalpa Isu Krista lunginsietna zàrah ei Lalpa Isu hming chu chawimawiin um thei a ta, nangni khom ama zârah chawimawiin um thei bok in tih.

2 Thessalonians 2

1 Unauhai, ei Lalpa Isu Krista hung nawkna ding le a kuoma ei intuokkhawmna ding thua chun, 2 keinin thlaraua kan hril ni awm tak anga an hril sawng le kan lekhathona kan ziek ni awm taka an hrilhai thangsana, "Lalpa ni chu a hung tlung zing tah" ti thu an hril thang hin in lungril sukchâng lo le sukthlaphâng lo dingin ka ngèn cheu. 3 Tu khomin ieng konga khom thuoi hmang naw raw se chêu. Sukbohmanga um ding Dânbawsepa chu hung a, helna a siem hmâ khat chun chu Ni chu hung tlung naw nih. 4 Ama chun, 'pathien' tia an ko le biek taphothai chu doin an chungah um tum a ta, Pathien tempula meuh thungin Pathienah insâl a tih. 5 In kuoma ka um lai khan hieng thil hi ka hril tah hlak chêu kha in hriet zing am? 6 A hun takah a hung inlang theina dingin tu hin iengin am a dang hrì ti in hriet. 7 Dânbawsepa chun tu khom hin a rûkin sin a thaw zing a, sienkhom a dangtu chu lâk hmang a ni hmâ khat chun la dang hri'ng a tih. 8 A hung inlang pha leh Lalpa Isu chun a thuokin mût hlum a ta, a hung nawkna ropui taka chun sukbohmang a tih. 9 Dânbawsepa chu Setan hràtna leh hung a ta, a thilthawtheina tinrêngin thilmak le inchikna tehlêm thawng a tih. 10 Bohmang dinghai chu suolna tinrênga hlêmin um an ta, sandama an um theina ding thutak chu dit loa an hnawl leiin bohmang an tih. 11 Hieng lei hin, khêl an ring theina dingin Pathienin ngai suolna hri nasa takin a'n lêngtir a nih. 12 Thutak ring loa rîtlona lawm lemtuhai po po chun thiem naw an chang vong ding a nih. 13 Unau, Lalpa dittakhai, a tira inthoka Pathienin Thlaraua sukthienghlim a, thutak ring ding le ra hmasa ni dinga a thlang chêu leiin Pathien kuomah lawmthu hril rop ding kan ni hrim a nih. 14 Chu chu ni ding le ei Lalpa Isu Krista ropuina chu chang dingin kan Chanchin Tha hril hmangin a ko chêu a ni kha. 15 Chuongchun, unauhai, ngîr nghet unla, kan thuhril le lekhathona zirtirna kan inhlàn sawng po po chêu kha pom tlat ro. 16 Chuongchun, ei Lalpa Isu Krista ngei le Pathien ei Pa, mi hmangaitu, a lunginsietna leia kumkhuo thlamuongna le beiseina ei phù naw saa mi petu chun, 17 thil tha tinrêng in thawna le hrilna taphotah chokphûrin sukhrât pei chêu raw se.

2 Thessalonians 3

1 A tawp taka chun unauhai, Lalpa thu chu nangni laia ropui tak le hrât taka a'n dar ang khan a'n dar pei theina ding le 2 mi indik naw le mi suolhai laka kan him theina dingin mi tongtaipui ro, a ring naw an la um si a. 3 Lalpa ruok chu a ringum a, ama chun sukhrâtin mi suol lakah veng him raw se chêu. 4 Thu kan pèk chêu kha in thaw a, in thaw zom pei khom Lalpaa chun kan ring tlat a nih. 5 Pathien hmangaina hre nawk zuol pei ding le Krista tuorselna nei dingin Lalpan in lungrilhai chu keihruoi raw se. 6 Unauhai, kan kuoma inthoka thurosie in dong anga um loa zomthawa taka khawsa mei mei hai laka inthok chun inthier fihlim dingin ei Lalpa Isu Krista hmingin kan hril chêu a nih. 7 Kan thaw dàn inchûk ding in nih ti nangni ngeiin in hriet a, nangni lai dawngda takin kan um ngai naw kha. 8 Tû bû khom a thlawnin kan fàk ngai naw a, nangni lai tu khom kan sukrik nawna dingin sùn le zàn inrim takin sin kan thaw hlak a ni kha. 9 In mi chawm kan phùt thei naw lei a ni naw a, in mi enton dingin kan thaw lem hlak a ni kha. 10 In kuoma kan um lai khan, "Sin thaw pei naw chun a fàk khom fa naw raw se" tiin kan hril hlak chêu kha. 11 Nangni laia thenkhat in zomthaw a, mani sin thaw si loa mi sinthawnaa inrol in chîng ti kan lo hriet a nih. 12 Chuong ang mihai chu sin thaw mol mol a, mani thaw suok ngei ring dingin Lalpa Isu Krista hminga thu pein kan infùi a nih. 13 Unauhai, nangni ruok chun thil tha thaw nghok ngai naw ro. 14 Tu khom hi lekhathona kan thu hung hril zawm nuom nawtuhai chu inchik bîk unla, pawl ser ro, an inzà theina ding chêuin. 15 Amiruokchu, hmêlma ang chun ngai naw unla, unau angin zil lem ro. 16 Remna Lalpa ngei chun kumkhuoin kong tinrêngah inremna pe sien la cheu, Lalpa chu in rênga kuomah um raw se. 17 Kei Paulan keima kut ngeia chibai ka bùkna chêu a ni hi. Hienga ka ziek hi ka lekhathon taphot inchikna a nih. 18 Ei Lalpa Isu Krista lunginsietna in rênga kuomah um raw se.

1 Timothy 1

1 Kei Paula, a mi sandamtu Pathien le ei beisei innghatna Isu Krista thupêk anga Krista Isu tirko hin, 2 ringnaa ka naupa indik tak Timothe chibai ka bûk che. Pa Pathien le Isu Krista ei Lalpaa inthoka lunginsietna dàm, zangaina dâm le inremna dàm i kuomah um raw se. 3 Makedonia rama ka fe ding laia ka ngèn che ang khan Efesi khuoa um zing dingin ka ngèn nawk che a nih, thuring indik lo inchûktir hlak mi thenkhathai kha i khap theina ding le 4 pipu thusim le thlatuhai tobul sui rak rak kha i'n bânsantir theina dingin; chuong ang thilhai chun ringnaa inthoka Pathien thiltum hrietna intlun nêkin zêldin thua insêlna a suktam mei mei a nih. 5 Hi ka thupêk thiltum chu lungril thienghlim, sie le tha hrietna indik le ringna tak taka inthoka suok hmangaina nei a nih. 6 Mi thenkhat chu, chu taka inthok chun an pêt hmang a, hmangna bo insêlna tieng an lùt a. 7 Dàn inchûktirtu inti nuom bok siin, an thu hril umzie le indik anga ngam taka an hrilhai khom chu an hriet tak tak bok si nawh. 8 Dàn hi a hmangna ding taka hmang chun a tha ti ei hriet. 9 Dàn hi mi thahai chunga hmang dinga siem ni loin dàn bawsetu le mi hel hai, sakhaw poisa lo le thil suol thawtu hai, mani nu le pa thattu le tuolthat hai, 10 uire le mongkawhur hai, mihriema sumdawng mi le khêla inkhâm hmanghai le 11 Pathienin puong dinga a mi'n koltir Chanchin Tha ropui kal zawnga zirtir chînghai chunga hmang dinga siem a nih. 12 Mi sukhrâttu, ring tlàka mi ngaia a rongbawlna sin thaw dinga mi ruottu Krista Isu, ei Lalpa kuomah lawmthu ka hril hlak. 13 Khä hma khan a hrilsetu, sukdùdàtu le rawng taka soisatu lo ni lang khom, ringtu ka ni hmaa hre loa thaw hlak ka ni leiin ka chungah zà a ngài a, 14 ei Lalpa lunginsietna chu Krista Isua ringna le hmangaina leh ka chungah a vur ta teuh lem a nih. 15 Krista Isu chu mi suolhai sandam dingin khawvelah a hung ti hi a'n dikin pom tlâk a lo va ni de aw! Chuong lai chun kei hi a suol lor lak ka nih. 16 Nisienlakhom, chu lei tak chun, ama ringtuhai chungah Krista Isun dawtheina tawp lo a neizie le chatuon hringna a pêk dingzie inentirna dingin kei mi suol tak chungah hin zangaina a hung inlangtir a lo nih. 17 Laltak, chatuon mi, thi thei lo, mita hmu thei lo, Pathien pakhat chauh kuoma chun chawimawina le ropuina chatuon chatuonin um raw se. Amen. 18 Ka naupa Timothe, hieng thupêkhai hi ka'n koltir che: zawlneihaiin i chungchang an hril lawk kha hre zing la, chuong thu chu zuiin indona tha chu bei la, 19 ringna le sie le tha hrietna fîm tak vong tlat rawh; mi thenkhatin an sie le tha hrietna an poisa naw leiin an ringna long a koi dar tah a nih. 20 Chuonghai lai chun Humenai le Aleksandra khom an thang ve a, Pathien poi hril an simna dingin thunun an ngai a, Setan kutah ka pêk suok tawl tah a nih.

1 Timothy 2

1 Ka thu inchà nuom hmasa tak chê chu thil hnìna dàm, tongtaina dàm, hnìpêkna dàm le lawmthu hrilna dàm mi po po ta dingin nei unla, 2 Pathien ngaisak a, thienghlim taka um a, muong taka ei khawsak diel diel theina dingin lalhai le rorêltuhai ta dingin hnipêk bok ro; 3 chu chu a tha a, ei Sandamtu Pathien lawmzawng a nih. 4 Ama chun mi po po sandama um a, thutak an hung hriet chu a dit si a. 5 Pathien pakhat chauh a um a, Pathien le mihriem inkàrah palai pakhat chauh a um bok, mihriem Isu Krista chu. 6 Mi po po intlannain ama chu a'n pèk a, sandamna thu chu hun a tî takah a hung puong a. 7 Kei hi Jentêlhai laia chu ringna thu chu puong ding le thutak zirtirtu le tirko ni dinga ruot ka nih. Chu chu thudik a ni a, khêl ka hril nawh. 8 Chuongchun, in inkhawmna taphotah pasalhai chun titak zetin, lungsen le insêl puma thaw loin, an kut thienghlim pharin, tongtai raw hai se. 9 Nuhmeihai khom a mawi tawk le inchawi tawkin inchei hai sien la, sam siem lèr hai, rangkachak thuoma inchei hai, tuikeplung thi hli hai, puon man tam inbel hai chîng naw raw hai se. 10 Nuhmei, Pathien ngaisak mihai thaw dàn awm hrimin, thilthaw thatin inthuom lem raw hai se. 11 Nuhmei chun to inchuin, thu awi takin thil inchûk raw se. 12 Nuhmeiin mi a zirtir amanih le pasal chunga thu a nei amanih ka phal nawh; to an inchù ding a nih. 13 Adam chu siem hmasak a ni a, chu zoah Evi siem a nih. 14 Hlêma um kha Adam a ni nawh; nuhmei kha a nih hlêma um le bawsetu lem chu. 15 Amiruokchu ringnaa dâm, hmangainaa dâm le thienghlimnaa dâm mawi taka a um zing phot chun nau a nei leiin nuhmei chu sandam nîng a tih. a

1 Timothy 3

1 "Tu khom kohrana thuoitu sin thaw nuomtu chun sin inzaum thaw a nuom a nih" ti hi thil indik a nih. 2 Chuongchun, kohran thuoitu ding chu dem kai lo, nuhmei pakhat nei, b insûm thei, lungril tluong, mi inzaum, mi thilphal le zirtir thiem, 3 uoin hè mi ni lo, kut thlâk hmang ni lo mi zaidam, inhal hmang mi ni lo, sum ngaina mi ni lo, 4 mani insùng khawsak rêl fel mi le nauhaiin inzaa a thu an zawm mi a ni ding a nih. 5 Mani insùng khawsak khom rêl fel thiem si lo chun ieng tin am Pathien kohran a enkol thei ding? 6 Ring thar hlim ni naw raw se, a ni chun chapo rawi a ta, Diebol angin thiem naw chang ve hlauh rawi a tih. 7 Puo tieng mihai ngaisâng mi a ni bok ding a nih, hmingsiet hlawa Diebol chânga a awk nawna dingin. 8 Chuong ang bokin kohrana rongbawltuhai khom mi inzaum, zum le zuor intuo chîng mi ni lo, uoiin hè mi ni lo, indik lo taka hlawkna hmu tuma hnot mi ni lo, 9 sie le tha hrietna fîma ringna thu ril chel tlat mi an ni ding a nih. 10 En chieng hmasak phot ding an nih, an tlin chun rong an bawl chauh ding a nih. 11 An nuhmeihai khom chuong ang boka mi inzaum, mi dem chîng lo, insûm thei, kong iengkima mi ringum an ni ding a nih. 12 Rongbawltuhai chu nuhmei pakhat nei, nauhai le sûngkuo enkol thiem mi an ni ding a nih. 13 Rong bawl thahai chu an chan tha tiel tiel a ta, Krista Isu an ringnaa khom nasa takin huoi deu deu an tih. 14 Hi lekha ka ziek lai hin ka hmu vak che ka beisei zing a, 15 sienkhom ka hung inhnu tâkah tiin Pathien sùngkuo, Pathien hring kohran, thutak ban le kengkawtuhai chu, ieng anga um ding am an ni a ti i hriet theina dingin ka hung ziek a ni hi. 16 Sèl ruol loin, ei sakhaw thurùk inrilzie hi hril loa hmâng a nih:Ama chu taksa puta hung inlang, Thlarauin a'n dikzie a puong lang, Vàntirkohai khomin an hmu, Hnam tin lai a thu puong dara um, Khawvel mihaiin an hung ring, Ropui taka lâk tung chu a nih.

1 Timothy 4

1 Hun nuhnunga hai chun mihaiin ringna thu hi bànsanin, hlèmtu thlarau le ramhuoia inthoka suok zirtirna indik naw chu la zui an tih ti chieng takin Thlarauin a hril a. 2 Chuong ang zirtirna thu thè dartuhai chu khêla mi lêmder thiem an ni a, an sie le tha hrietna khom thîr linga dep angin a kàng chàr tah. 3 Mi innei ding dâm an khap a; mihriem fâk dinga Pathien siem thil thenkhat, thutak hrea pomtuhaiin lawmthu hril puma fâk el ding a nih ti an hriet chu, fàk an khap bok a. 4 Pathien thilsiem taphot hi a tha vong a, ieng khom hnawl ding a ni nawh. 5 Pathien thu le tongtainaa inhlàn thienghlim ta chu lawmthu hril puma dong el ding a nih. 6 Hieng thuhai hi unauhai kuomah hril la, Krista Isu rongbawltu tha nîng i tih; ringna thu le inzirtirna tha i zawm hlakhai khan thlarau tieng inthang lientir pei bok a ti che. 7 Pathien thu le inzom lo thusim le pitarhai tienami mei mei chu nghatsan la, Pathien mi ni dingin insawizoi rawh. 8 Taksa sawizoi hi iemani chenah a tangkai ngèi a, sienkhom Pathien ngaisak mi ni hi iengkimah a hlu lem a, hi dam sûng nun le la hung um dinga thil tangkai a nih. 9 Hi thu hi a'n dik a, pom tlak a nih. 10 Pathien hring chu ei beisei innghatna a ni tàk leiin sin ei thaw inrimin hma ei nor nasa a nih. Ama chu mi po po ta dinga sandamtu a na, a ringtuhai ta dingin a ni nawkzuol. 11 Hieng thuhai hi pein inchûktir pei rawh. 12 I naupang leiin tu khomin ngainêp naw raw hai se che. Thuhril konga dàm, chetziea dàm, hmangainaa dàm, ringnaa dàm, thienghlimnaa dàm ringtuhai enton tlàk ni ngêi rawh. 13 Ka hung hmâ po chu vàntlâng laia Pathien thu tiem tienga dàm, thuhril tienga dàm le zirtir tienga dàm inhmang rawh. 14 Upahaiin i chungah kut an innghat tuma zawlneihaiin an puong, thlarau tienga i thilpêk donghai kha ngaithà naw rawh. 15 Chuong tienga chun taima takin inhmang la, i pumin inpe la, mi tinin i hmasawnzie hmu thei an tih. 16 I khawsak le i thil inchùktirah invêng fîmkhur la, chuonga i thaw fan fan chun nang le i thu hretuhai chu san himin um in tih.

1 Timothy 5

1 Upa lemhai chu hal loin, mani pä anga enin, a ngènin ngèn lem la, naupang lemhai chu sang angin en rawh. 2 Pitarhai chu nu angin en la, nunghakhai chu thienghlim takin farnu angin en rawh. 3 Màkhât chaua khawsa hmeithai indik takhai chu inzà rawh. 4 Nau amanih, tu le te amanih nei hmeithai a ni ruok chun a nau le tuhai chun sakhuoin a phùt, mani sûngkuo enkolna thua an mawphurna chu hlen suok inchûk hai sien, an nu le pa le an pi le pu hai laka an bat chu tlâk raw hai se, chu chu Pathien lawmzawng a ni si a. 5 Chawmtu nei lo, màkhât chaua hmeithai chun Pathien chauh ringsan ding a nei a, sùn le zànin thangpuina hniin Pathien kuomah a tongtai hlak. 6 Hawithawa khawsa hmeithai ruok chu a dam lai khomin mithi a nih. 7 Hieng inkeihruoina thuhai hi mihai hril la, dem kai loin khawsa raw hai se. 8 Mani sùnghai, in khata umpui ngei khom chawm nuom lo an um chun, ringna hi an inphatsan tah tìna a ni a, ringnawtu nêkin an suol lem a nih. 9 Mani pasalhai chunga ringum, kum sawmruk chuong tah hmeithaihai chauh chu hmeithai lai ziek sa rawh. 10 Thil tha thaw konga inpâk hlaw hai, nauhai enkol tlei tah, mikhuol chunga tha, mi thienghlimhai ke sawppèk hlak, mi harsahai thangpui pei le thil tha thaw tienga inpe zo mi an ni ding a nih. 11 Hmeithai la nunghàk deuhai chu inthang sàtir naw rawh, an tisa châkna leiin Krista nghatsanin, pasal nei an nuom nawk hlak a, 12 an thu lo intiem tah an bawsiet leiin soisèl an kai hlak. 13 Chu bâkah, mi inah lêng lawrin, thabo an inchùk a, an dawngda chauh khom ni loin mi dem an chìng a, thil hril thang an hràt a, an hril naw ding ding an hril hlak. 14 Chuleiin, hmêlmahai mi hrilsietna remchângah an inchang nawna dingin hmeithai la nunghàk deuhai chun pasal nei nawk hai sien, nau neiin sûngkuo enkol hai sien ka ti a nih. 15 A then lem chu pêt hmangin Setan an zui dêr tah a nih. 16 Ringtu nuhmeiin a sûngkuohai lai hmeithai a nei chun a chawm ding a nih; somdawl ngai hmeithaihai chauh kohranin a enkol theina dingin kohran phur sukrikpêk naw raw hai se. 17 Kohran upa, mi thuoi thiem, abikin thuhril le inchûktir tienga taimahai chu a lêt hnia chawimawi tlâk an nih. 18 Pathien Lekha thu khomin, "Bawngchalin bu a chìl laiin a hmùr khuop naw rawh; sinthawtu chu hlaw hmu tlâk a nih" a ti a nih. 19 Upa an hèkna chu thuhretu pahni amanih pathum amanih bèk an um naw chun pom naw rawh. 20 Thilsuol thawtuhai chu vàntlâng hrieta ngei kawk ding an nih, mi danghai an intìm theina dingin. 21 Pathien le Krista Isu le a vàntirko thlanghai mit hmuah thu ka pêk che: ditsak bîk le thlei bik nei bok loin, hieng thuhai hi kengkaw tlat rawh. 22 Rongbawltu ding kut innghata namdet thuah inhmaw taluo naw la, mihai suolnaah thang ve naw la, mani invong thienghlim rawh. 23 Tui chauh dawn ta naw la, i phìngpui hràt naw lei le a'n khâttawka i nat rop hlak leiin uoiin tlawma zawng dawn ta hlak rawh. 24 Mi thenkhat suolna chu a langsâr a, annin an hril suok hma khomin rorêltuhai na a tlung hman dêr ta hlak a; thenkhat suolna ruok chu a hnung daiah a hung inlang chauh hlak. 25 Chuong ang bokin thilthaw that chu a langsar a, a langsar naw hai khom thup song zing thei a ni bìk nawh.

1 Timothy 6

1 Bawi ringkol bâttuhai chun an puhai chu kong iengkimah an inzà ding a nih, chuong naw chun Pathien hming le ei thu inchûktir hi hrilse hlauh rawi an tih. 2 Bawi tu khomin a pu chu kristien a ni lei le ringnaa unau a ni lei sekin a ngaithà ding a ni naw a, tha nawk zuolin rong a bawlpêk lem ding a nih; a rongbawlpêkhai leh ringna le hmangainaah sûng khat an ni si a. Hieng thuhai hi inchûktirin infùi tawl rawh. 3 Tu khom ei Lalpa Isu Krista thucha le sakhaw zirtirna thu kal zawnga thuring indik lo inchûktirtu chu, 4 ama chu mi uongthuong tak, ieng khom hre si lo, insêl inhalna ding thu se tak tak chok suok thiem mi a nih. Chu chun inhnarna hai, innghirnghona hai, inhrilsietna hai le inringhlelna tha lo hai chok suok thei thila insêl inhal zing zingna ding thu se tak tak a hung intlun bàkah, 5 lungril se tâwng tah, thutak man phâk ta lo hrim hrim le sakhuo hi sumdawngnaa hmang tumtuhai lai inhalna a hung intlun bok a nih. 6 Lungawina neituhai ta ding ruok chun sakhaw mi ni hi hlawkna ropui tak a nih. 7 Khawvela hin ieng khom ei lûtpui naw a, ieng khom ei suokpui thei bok nawh. 8 Chuleiin, fâk le dawn le sil le bil ding ei nei phot chun lungawi ei tiu. 9 Hausak nuomtuhai ruok chu thlêmnaah an lût a, châkna invêtthlàk le tiumah an inawk a, sietna le bohmangna khurah an tlu lùt hlak. 10 Tangka sum ngainat hi suol tinrêng bul a nih. Sum hau tumna luotah thenkhat chun ringna hi an nghatsan a, lungngaina tam takin an lung a sun tlang hlak. 11 Sienkhom nang, Pathien mi, chuonghai chu tlànsan rawh. Felna dâm, Pathien ngaisakna dàm, ringna dàm, hmangaina dàm, dawtheina dàm le zainemna dàm nei tum tlat lem rawh. 12 Ringnaa intlânsiekna tha chu bei tàng táng rawh. Chatuon hringna chu chel tlat rawh; chu chu chang dinga ko i ni thu khom hretu tam tak hmaah i puong ta kha. 13 Iengkim hringna hnâr, Pathien le Krista Isu, Pontia Pilat hmaa ti hlek loa thudik tan tlattu mit hmuah chun hi thu hi ka pêk che: 14 Ei Lalpa Isu Krista a hung inlang nawk hmâ khat chu ka thupêk hi soisèl le dem kai loin vong tlat rawh. 15 Inpâk phu Pathien, iengkim chunga thuneitu um sun, laltakhai Laltak, lalhai Lal chun a hun takah Krista chu a hung inlangtir ding a ni si a. 16 Ama chauh hi thi thei lo, hnai ruol lo vara chêng, tu khom la hmu lo le hmu thei ni bok lo chu a nih. A kuomah chawimawina le thilthawtheina chu chatuonin um raw se. Amen. 17 Khawvel mi hausahai chu chapo lo dingin hril la, ring tlâk lo sumah innghat lo a, ei chèn dinga iengkim hnienghnâr taka mi petu Pathienah innghat lem dingin infùi tawl rawh. 18 Thil tha thaw ding dàm, thil tha thawa hausa ding dàm, phal taka mi danghai sem ve chîng ding dàmin infui bok rawh. 19 Chuongchun, nakie phaa an innghatna ding ro hlu tam tak an inkhawl khawm nîng a ta, hringna tak tak chu chang thei an tih. 20 Aw Timothe, mawphurna dàndea i um kha vong tha rawh. Sakhaw mi lohaiin indik lo taka 'Hrietna' tia an ko chu hmanga insêlkalna laka inthok chun inthier fihlim rawh; 21 thenkhatin anni thu chu an khùkpui a, ringna lampuia inthokin an pèt hmang tah a nih. Pathien lunginsietna i kuomah um raw se.

2 Timothy 1

1 Kei Paula, Kristaa hringna thutiem puongtu dinga Pathien ditzawnga Krista Isu tirko hin ka naupa dittak Timothe, chibai ka bûk che. 2 Pä Pathien le ei Lalpa Krista Isu kuoma inthoka lunginsietna le inremna chu i kuomah um raw se. 3 Ei thlatuhai thaw dàn anga sie le tha hrietna fîm taka a rong ka bawl Pathien kuomah lawmthu ka hril. Sùn le zàna ka tongtainaah ka hriet zing hlak che. 4 I mitthli tlàk dàm kha ka hang suikir a, hlima ka sipna dingin inhmu nawk ka châk ngot el. 5 I ringna takzie thu khom ka lo hriet zui pei a, chu chu i pi Loisiin a nei a, i nu Euniki khomin a nei bok a, nang khomin i nei ve ta pei a nih ti ka hriet. 6 Chu lei chun i chunga kut ka'n nghat laia Pathien thilpêk i dong kha mût chok zing dingin ka hril non che. 7 Pathien chun dawina thlarau a mi pèk naw a, hràtna le hmangaina le mani inthunun theina thlarau a mi pêk lem a nih. 8 Chuleiin, ei Lalpa Isu thu hi puong inzak naw la, ama leia lung ina intâng kei khom hi mi'n zàpui bok naw rawh. Pathien hrâtna ringin, Chanchin Tha leia rinum tuor ve inhuom pei lem rawh. 9 Ei thilthaw lei ni loin, ama tum dàn le a lunginsietna zàr lemin a mi sandam a, thienghlim taka hring dingin a mi ko a nih. Chu lunginsietna chu leilung insieng hmâ daih khan Krista Isuah a mi lo pèk tah a; 10 chu chu tu hin Isu Krista a hung inlang khan, suklang a ni chauh a nih. Ama chun thina a hnè a, Chanchin Thaa hin hringna le thi thei nawna chu a hung suklang tah a nih. 11 Kei hi chu thu chu tlâng insampui dinga a tirko le zirtirtua ruot ka nih. 12 Chu lei chu annawm hienga ka tuor hi. Sienkhom ka'n zak nawh. Ka ring chu ka hriet a, chu Nia dinga ka'n koltir khom chu vong him tlat a tih ti ka hriet chieng. 13 Ka kuoma inthoka thu i hriet hlak hai kha zirtirna indikah pom tlat la, ringna le hmangainain Krista Isua chun chêng tlat rawh. 14 Nangmaa ro hlu sie le inkoltira um kha einia chêng Thlarau Thienghlim thangpuinain vong tlat rawh. 15 Asia biela mihai khan, Fugel le Hermogen chenin, an mi zâmsan vong tah ti i hriet. 16 Lalpa chun Onesifora hai sûng lunginsiet raw se. Ama khan a mi sukhlim êm êm a, lung in intàng ka ni hi a mi'n zàpui nawh. 17 Rom a hung tlung charin a mi hung zong suok ngat ngat a nih. 18 Efesi khuoa khom a mi thangpui nasatzie i hriet kha. Lalpa chun chu Nia chun a lungsietna indongtir raw se.

2 Timothy 2

1 Ka naupa, Krista Isu lunginsietna chun sukhrât che raw se. 2 Mi tam tak hrieta ka zirtirna i ngàithlàkhai kha inchûktir sawng pei thei ding awma mi i ring tawkhai kuomah inbà sawng pei rawh. 3 Krista Isu sipai ringum angin rinum mi tuorpui ve rawh. 4 Sipai chu a hotu suklawm dingin khawvel thil dangah a'n kei buoi ngai nawh. 5 Inruolsieknaa thang khom dàn ang taka a thaw naw chun lawmman a hmu thei nawh. 6 Lohma tieng khom, sin inrimtu chun ra hmasa chu a chang ding a nih. 7 Ka hrilhai che hi ngaituo chîk la, Lalpan kong iengkimah hriet thiemna inril pêng a ti che. 8 Chanchin Tha ka hril hlak, Isu Krista, Davida thlaa mi, mithi laia inthoka tho nawk tah thú kha hre zing rawh. 9 Chu Chanchin Tha lei chun rinum ka tuor a, tuolthattu ang ela khaidieta khit ka ni hi. Pathien thu ruok chu khuop ruol a ni nawh. 10 Krista Isua um sandamna chu chatuon ropuina leh an chang theina dingin thlanghai leiin hieng po po hi ka tuor a nih. 11 Hi thu hi a'n dik a nih:Ama leh ei thi chun, Ama leh hring ei ta, 12 Ei tuor ve a ni chun, Ama leh ro rêl ei ta; Ei hnawl a ni chun, Mi hnawl vèng a tih; 13 Ringum naw inla khom, Ama chu a ringum zing, Ama le ama a'n hnawl thei si nawh. 14 Hieng thu hi inhriettirin, Pathien hmingin hril la, thu inchua insêl hi bânsan rawh, a tangkaina a um naw a, ngàithlatuhai a sukkhawlo mei mei a nih. 15 Nang chun Pathien lawmzawng mi, mani sina inzapuium lo, thutak indik taka thedartu ni inchûk rawh. 16 Tep lo hrila khawvel mihai titi sep chu nghatsan rawh, chuong ang thil chun Pathien ngàisak nawna tieng mi a thuoi deu deu hlak a nih. 17 An thu inchùktir chu pân sie angin a'n dar a; anni laia mi chu Humenai le Filet kha an nih. 18 Thutak an nghatsan a, 'thonawkna chu a um dai tah' an ta, mi thenkhat ringna khom an sukphet tah a nih. 19 Pathien thutak lungphum nghet ruok chu a chàng ve naw a, "Lalpan a mihai a hriet" ti le "Lalpa hming lamtu taphothai chun rîtlona an nghatsan ding a nih" ti ziek a chuong. 20 In ropui taka bûr le bêlhai khom rangkachak le tangkaruoa siem vong a ni naw a, thinga siem dâm, pila siem dâm khom a um a, a then thil poimawa hmang ding, a then ruok chu hmang pawlawt ding a nih. 21 Hieng thil tha naw ka hrilhai laka inthoka inthier fihlîm mi chu hmangraw hlù, in Neitupa ta dinga hmang tlâk, sawp fai sa diem, thil tha tinrêng thawnaa hmang el thei dinga inpei zing ang chu hung nîng a tih. 22 Tleirawl chàkna suol chu nghatsan la, lungril thienghlim taka Lalpa lamtuhai leh felna dâm, ringna dàm, hmangaina dàm le inremna dàm hnot lem rawh. 23 Hieng insêlna tangkai lo le invêtthlàk hi nghatsan rawh, innghirnghona a chok suok mei mei a nih. 24 Lalpa siehlaw chun inhal a chîng ding a ni nawh; tu khom laina mi, thiem tak le dawthei taka zirtir lem mi a ni ding a nih. 25 Ama kaltuhai khom thutak hre thei dingin Pathienin an lungril a'n lamlèttir thei ti beiseiin, zainêm takin zirtir raw se. 26 Chuonga a thaw chun, Diebolin a nuom zawng inthawtir dinga a chânga a awk an nih ti hung inman suok an ta, intâl suok thei an tih.

2 Timothy 3

1 Ni nuhnunga hai chun hun khir tak a hung tlung ding a nih ti hre rawh. 2 Mani chauh inhmangai hai, tangka sum ngaina hai, mi uongthuong hai, intivei hai, tong tlahol hai, nu le pa thu awinaw hai, lawmna chang hre lo hai, mi porchè hai, 3 lunginsietna piengpui lo hai, ngaidamna nei lo hai, mi hril siet chîng hai, insûm thei lo hai, mi tawrothai, thil tha hrim hrim dit lo hai, 4 inphatsan hmang hai, poisak nei lo hai, chapo hai, Pathien hmangai nêka mani inhoitirna lawm mi hai, 5 a langa insuksakhaw mi vieu sia a thilthawtheina hnawl tlat si hai chu an hung suok ding a na, chuong mihai laka chun inthier fihlîm dai rawh. 6 Chuong ang mihai chu tlàktlum tumin mi inah an lèng lawr a, nuhmei hrât lo, suolin a bùk thlùk le an châkna suol ang peia thle mihai chu an zawr thlùk hlak. 7 Chuong ang nuhmeihai chu thil inchûk pei vieua inlang, sienkhom thutak hre thei bok si lohai chu an nih. 8 Jannia le Jambria-in Mosie an dodal ang khan hieng ngaituona porchè le ringna tehlèm neituhai hin thutak an dodal a. 9 Sienkhom, ieng rak tlung naw ni hai, Jannia le Jambria ang bok khan an invêtzie mihaiin an inhmai teuh awm si nawh. 10 Nang ruok chun ka zirtirna hai, ka um dàn hai, ka thiltum hai, ka ringna hai, ka dawtheizie hai le ka selzie hai i hriet a. 11 Antiokeia dâm, Ikoniama dâm le Lustra khuoa dâm sukdùdàna le harsatna tam tak ka chunga tlunghai ka tuor nasatzie le chuonga inthoka Lalpan a mi san suok dàn hai chu i hriet a. 12 Tu khomin Krista Isu ang taka khawsak a tum phot chun sukdùdàna tuok ngei a tih. 13 Mi suolhai le hlèm hmanghai ruok chu an chan chàu deu deu a ta, mi dang an hlèm ang bokin hlêmin um vèng an tih. 14 Nang ruok chu i thil inchûk tah le i pom nghet tah kha chel tlat rawh, a zirtirtu che i hriet si a. 15 I naupang laia inthokin Isu Krista ringna leia sandam ni dinga kawkhmutu che Pathien Lekha thuhai chu i hriet ta hlak kha. 16 Lekha Thu po po hi Pathien inthuok khum a na; felna konga inzirtirna ding dàm, inkawkna ding dàm le insiem thatna ding dàmin a tangkai èm èm. 17 Pathien mi taphot chun hre bel hai sien, thil tha tinrêng thaw thei dinga inthuom an ni theina dingin.

2 Timothy 4

1 Pathien le Krista Isu, mihring le mithihai ro rêltu ding hmaah, a hung nawkna le a ram sâlin thu ka pêk che: 2 Thu chu hril rawh; a huna khom, a hun nawa khom hril dingin inpei zing rawh; dawthei taka zirtirin, an indik nawnaah kawkhmu la, zil la, infùi rawh. 3 Zirtirna indik an ngaithlàk pei naw hun a la hung tlung ding a nih. An nuom zawng ngaithla ding le an na ver zawnga hriltu ding zirtirtu tam tak an fiel khawm hun la tlung a tih. 4 Thutak hre dingin an na suksêt an ta, pipu thusim tieng na daw lem an tih. 5 Nang ruok chu iengkimah thluok fîm takin um la, harsatna tuor fán fàn la, tirko sinah inbûr la, i rongbawlna sin po po kha hlen rawh. 6 Kei chu inhlàn dinga bun suokina ka um mèk tah a, ka fe suok hun a tlung tah. 7 Intlànsiekna tha chu ka zo tah a, ka tlàn chen ding khom ka suo tah a, ringna chu ka vong zing a nih. 8 Tuta ka hmabâk chu felna lallukhum dong chauh a ni tah a, chu chu rorêltu indik Lalpa chun, chu Ni-a chun mi pêng a tih, keima chauh ni loin, a hung nawkna nghâkhlàtu po po khom pêng a tih. 9 Ka kuomah hung nawk vak tum hram raw khai. 10 Dema chun tu lai khawvel a ngainat leiin Thesalonika tieng a mi fesan tah a, Kreska chu Galati ramah a fe a, Tita khom Dalmatia ramah a fe bok a. 11 Luka chauin tuhin a mi umpui a nih. Marka kha rongbawl konga mi thangpuitu tha tak a na, hung thuoi ve rawh. 12 Tukik chu Efesi khuoah ka tir tah. 13 I hung pha leh Troas khuoa Karpa kawla korfuol ka màksan kha hang la lá, ka lekhabu leh, abîkin savun lekhahai lem kha chu hung chawi ngéi ngèi rawh. 14 Dâr sung thiem Aleksandra khan ka poi a tawk nasa hle a, a thilthaw ang peiin Lalpan la thungrul a tih. 15 Nang khom ama laka khan fîmkhur rawh, ei thu a kal nasa hle a nih. 16 Ka thiemna thu ka hril hmasa tak tum chun ka tienga thang tu khom an um naw a, an mi thlàthlam vong a nih. A maw chu phur naw hràm raw hai se. 17 Sienkhom Lalpa ruok chun a mi ngìrpui a, keima hmanga Jentêlhai po po hrieta Chanchin Tha chu puong dar vong a ni theina dingin a mi sukhràt a. Sakeibaknei bàua inthokin san suokin ka um a. 18 Lalpa chun thil tha naw laka inthokin mi san suok pei a ta, him takin a vàn ram chu mi'n tlun a tih. Chatuon chatuonin ropuina chu a kuomah um raw se. Amen. 19 Priskilab le Akuila hai kha Onisefora sûnghai leh chibai ka bûk. 20 Erasta chu Korinth khuoah a um zing a, Trofim ruok chu Mileti khuoah damloin ka màksan. 21 Thlasik hma ngeia hung tlung tum hràm rawh. Eubul hai, Puden hai, Lina hai, Klaudia hai le unau po poin chibai an bùk che. 22 Lalpa chu i thlarau kuomah um raw se. Lunginsietna i kuomah um raw se. Amen.

Titus 1

1 Pathien siehlaw kei Paula hi, sakhaw mi ni dinga thutak hrietna tieng Pathien mi thlanghai ringnaa keihruoitu dinga Isu Krista tirko le 2 khêl hril ngai lo Pathienin leilung insieng hmaa a lo tiem tah, chatuon hringna beiseina thu chu hriltu dinga ruot ka ni a, 3 ei Sandamtu Pathien thupêka Chanchin Tha puong darna sin a mi'n koltir angin, amain tha a ti hun takah a thu chu a hung suklang tah a nih. 4 Ringna ka'n tlângpuia ka naupa indik tak Tita, chibai ka bûk che. Pä Pathien le ei Sandamtu Krista Isua inthoka lunginsietna le inremna chu i kuomah um raw se. 5 Thil ei sukfel hman bàk sukfel dingin Kret thlierkârah ka màksan che a, thurawn ka pek ang che khan khaw tinah an upa dinghai ruotpèk rawh. 6 Upa chu dem kai lo, nuhmei pakhat nei a ni ding a na, a nauhai khom ringtu, nuomchènna tienga soisèl kai lo le mi lulul lo an ni ding a nih. 7 Kohran hotu chu Pathien sin enkoltu a ni leiin, dem kai lo mi ni sien, mani thu du, lung inrom, uoiin hè mi, kutthlâk hmang le indik lo taka hlawkna zong mi a ni ding a ni nawh. 8 Chuong nêk hmanin upa chu mi lawm thiem le tiktlai, thil tha dit mi, insûm thei, mi ngîl, mi thienghlim le mani inthunun thei mi ni raw se. 9 Kan thu zirtir ringum tak hi kan inchûktir ang chara nghet taka cheltu a ni bok ding a nih; chuongchun thuring indik inchûktir thei a ta, a kaltuhai khom sêl dong thei bok a tih. 10 Hel hmang, nuoma inpawt mei mei le mi hlêm chîng an um teu kha, chuonghai chu sertanhai laia mi an ni deu tak. 11 An bâu khàrpêk ding a nih; a sûng sùngin an chok buoi a, indik lo taka sum hmu inbeiseiin zirtir naw ding ding an zirtir a. 12 Kret mi ngei, anni zawlnei pakhatin, "Kret thlierkàr mihai hi mi khêlhlip, ramsa anga kol le thabo virkawng ruol an nih" a lo ti hi thu indik a nih. 13 Chuleiin, ringna hrisel tak an nei theina dingin na takin zil tawl la, 14 Judahai pipu thusim khûkpui mei mei hlaktu le thutak hnawltuhai thu chu awi ta naw raw hai se. 15 Mi thienghlim ta ding chun iengkim hi a thienghlim a, mi porche le ringna nei nawhai ta ding ruok chun ieng khom hi a thienghlim khur a um nawh- an lungril le an sie le tha hrietna chenin a porchè a nih. 16 Pathien hretuah an inngai a, sienkhom an thilthawhaiah an hnawl bok si a. Anni rawi hi mi lulul le hnâmum tak an ni a, thil tha ieng khom thaw dingin hmang tlâk an ni nawh.

Titus 2

1 Nang ruok chun thuring indik chu inchûktir pei rawh. 2 Putarhai chu insûm thei, inzàum, inthunun thei, ringna indik chel, hmangaina nei mi le mi dawthei ni dingin infùi rawh. 3 Chuong ang bokin pitarhai khom an chêt danah mi inzàum ni ding dàm, mi hrilsiet chîng lo ding dàm, uoiin hè mi ni lo ding dàm le thil tha inchûktir chîng ding dàmin infui rawh. 4 Pitarhai chun nupui tebophai chu an pasalhai le an nauhai hmangai dàm, 5 insûm thei dâm, invong thienghlim dàm, insûng khawsaka inhmang rim dàm, ngilnei dàm le mani pasal thu awi dàm inchûktir hai sien; chuongchun Pathien thu hi hrilsietin a um naw ding a nih. 6 Chuong ang bokin tlangvàlhai khom mani inthunun dingin infùi tawl rawh. 7 Thil iengkimah an enton dingin thil tha thaw sukhmù la, i zirtirnaah i ringumzie le titakzie inentir rawh. 8 Tongkam mawi, soisel bo hmang hlak la, chuongchun a khingtuhai che chun demna ding che hre nawng an ta, inzak letling lem hiel an tih. 9 Bawihai chu kong iengkimah an puhai thu hnuoiah intuklût a, an lawmzawnga um tum a, don lèt ve lo ding dàm le 10 an thil inrupêk loa kong iengkimah ring tlâka um lem ding dàmin inchûktir la, chuongchun mi sandamtu ei Pathien zirtirna hi a hlutzie iengkimah an suklang ding a nih. 11 Mi po po sandama an um theina dingin Pathien lunginsietna a hung inlang tah a. 12 Chu chun Pathien ngaisak nawna le khawvel tieng thil ngainatna bânsan a, tu lai huna hin mani invong fel a, indik taka khawsa a, Pathien ngaisaka um dingin a mi'n chùktir a. 13 Ei beisei, Pathien le Sandamtu Isu Krista ropui taka a hung inlang ni ding chu ei nghàk a nih. 14 Ama ngei chu ei ta dingin a'n pêk a, bawsietna tinrêng laka inthokin a mi'n tlan suok a, ama mi ni dingin a mi sukthienghlim a, thil tha thaw chàkna a mi'n neitir bok a nih. 15 Hieng thuhai hi puong la, infui tawl la, thu nei takin zil rawh. Tu khomin ngainêp naw raw hai se che.

Titus 3

1 Mihai chu rorêltuhai le thuneituhai thu awi ding le thil tha tinrêng thaw inpei zing dingin hril non rawh. 2 Tu poi khom hril lo a, mi leh inrema an hmakhuo ngâi ding le mi po po lakah inngaitlawmna indik tak inentir dingin zirtir rawh. 3 Kha hma khan eini khom invêt tak, lûlul tak, thuoi hmanga um, châkna le nuomchènna tinrêng bawia intâng ei ni a, mi thîka an sietna zong hlak, theidaum tak le intheida tuo chîng mi ei ni hlak. 4 Amiruokchu, ei sandamtu Pathien ngilneizie le a mi hmangaizie a hung inlang khan, 5 einin thil ei thaw that lei ni loin, a lunginsietna lei chauhin a mi sandam tah a, siem tharna tuiah mi phûmin Thlarau Thienghlimin a mi'n cher thar a. 6 A mi sandamtu Isu Krista zàrah ei chunga hin siemtharna thlarau chu tiktlâi takin a hung buok ta teuh a, 7 chuongchun, chatuon hringna beiseitu le rohluotua mi siem dingin a lunginsietna leiin thiem a mi'n changtir tah a nih. 8 Hi thu hi a'n dik a nih. Pathien ring tahai chun thil tha thaw nuomna lungril an put pei theina dingin hieng thu hi hril uor dingin ka dit che. Chu chu thil tha tawp a ni a, tu ta ding khomin a tangkai. 9 Insêlna invêtthlàk hai, thlatuhai tobul sui rak dàm, Dàn thua insêl luoi luoi dâm nghatsan rawh; tangkaina a nei naw a, tu khomin an sawtpui bok nawh. 10 Inthe darna suksuoktu chu voi khat zil la, a sim naw leh zil nawk la, chu hnunga ruok chu ngaisak zui nuom ta naw rawh; 11 chuong ang mi chu mi suol tak le lungril kawi tak put mi a nih ti hre rawh; ama le ama thiem naw inchangtirtu a ni si a. 12 Artema amanih le Tukik amanih i kuomah ka hung tir charin Nikapoli khuoah hung nghâl tum rawh, chu taka chun thlasik sûng po um ka tum a nih. 13 Ukîl Zena le Appolo hai kha an inzinna lampuiah ieng khom an tlàksam nawna dingin i theitawpin lo thangpui rawh. 14 Ei mihai kha thil tha thawin inhmang hlak raw hai se, hmang loa um mei mei loin, an ni tin mamaw inphuhrûk raw hai se. 15 Ka kuoma um po po hin chibai an bùk chêu. Ringnaa ei ruolhai kha chibai ka bûk. In rênga kuomah lunginsietna um raw se.

Philemon 1

1 Paula, Krista Isua mi tâng le ei unaupa Timothe chun kan thawpui le ruol dit tak Filemon hai, 2 kan farnu Afi hai, sipaipui Arkipa hai le i ina inkhawm kohran mihai chibai kan bùk. 3 Ei Pa Pathien le Lalpa Isu Krista kuoma inthoka lunginsietna le inremna chu in kuomah um raw se. 4 Ka tongtainaah ka hriet zing hlak che a, 5 Lalpa Isu i ringna thu le mi thienghlimhai i hmangaizie thu hrein ka Pathien kuomah lawmthu ka hril hlak. 6 Krista ta dinga thil tha ei thaw dinghai chu hmu chieng a, i ringna tangkai taka mihai ta dinga i hmang theina dingin ka tongtai bok hlak. a 7 Unaupa, i hmangaina thu ka hrietin ka lawm hle a, mi thienghlimhai lungril khom i chok har leiin thla i sukmuong nasa èm èm. 8 Hi lei tak hin annawm, Kristaa unau ei ninaah i thaw ding awm chu thaw dingin thu pe ngam lang che khom, 9 hmangaina sirsana hmangin kei putarb tah Paula, tuta Krista Isu leia intâng hin, a ngènin ka ngèn lem che a nih. 10 Ka naupa Onesima, kol bun puma nâua ka nei, ta ding hin ka ngèn chê a nih. 11 Tuta hma khan i ta dingin mi hmangna bo ni hlak sienkhom tuhin ka ta dingin a tangkaic a, i ta ding khomin tangkai tàng a tih. 12 Tu hin lungrilin inro hlê lang khom, i kuomah ka hung tirkìr a nih. 13 Chanchin Tha leia ka'n tâng sûng hin i aia mi thangpuitu dingin mi umpui pei sien ka nuom hle a; 14 amiruokchu, i remti naw zawng ieng khom thaw ka nuom nawh, i mi hmangaina chu thaw luina lei ni loa nangma puoksuok ngeia inthok a ni theina dingin. 15 Iemani chen a tlànsan che hi i kuoma a ngam song theina ding lem nîng a tih. 16 Tu hin chu bawi ang ni ta loin, bawi nèka hlu lem, unau dittak a ni tah a, ka ta dingin a ditum êm êm a, i ta ding khomin taksa tieng thil le Lalpaa unau a nìnaah ditum zuol ngei a tih. 17 Chuleiin, i thawpui nia i mi ngai takzet chun keima ang elin ama hi lo lawm rawh. 18 I lakah thaw indik naw amanih le bat dâm amanih a nei chun ka rul dingin lo sie la, 19 kei, Paula hin keima kut ngeiin ka rul ding thu ka ziek a ni hi. Ka lakah nangma ngeiin i bat ve thu ruok chu ziek ka tum nawh. 20 Unaupa, Lalpa leiin hi thil hi mi thawpêk la, Kristaah ka lungril suklawm rawh. 21 Ka ngènna che hi a hlawtling ngei beisei tlatin ka ziek a ni hi, ka beisei nêk hmana nasa lemin i thaw ka ring nghé nghè. 22 In tongtainahai dona um a, in kuoma ka hung suok ka beisei leiin tlungna ding in mi lo ngaituopèk ro. 23 Epafra, Krista Isua ka'n tângpui hin chibai a bûk che. Ka thawpui Marka hai, Aristarka hai, Dema hai le Luka hai hin chibai an bùk che. Ei Lalpa Isu Krista lunginsietna chu in rênga kuomah um raw se. 24 (A um nawh) 25 (A um nawh)

Hebrews 1

1 Pathienin kha hma khan zawlneihai hmangin kong hrang hrangin ei pi le puhai kuomah thu voi tam tak a hril hlak a. 2 Tuta hun nuhnunga ruok hin chu eini kuomah Naupain thu a hung hril ta thung a. Ama chu iengkim chunga rohluotuah a ruot a, ama hmangin hnuoi le vàn a siem a. 3 Ama chu Pathien ropuina var mawi le a zepui puttu a ni a, iengkim hi a thu thilthawtheina chun a tungding a, suol faina lampui a siem hnungin Chunghnungtak chang tieng khin a hang inthung tah a. 4 Vàntirkohai nêka hming chunghnung lem daih hluotu a ni leiin anni nêk daiin a ropui lem a nih. 5 Vàntirkohai lai tu kuom am, "Nang chu ka Naupa i nih, Voisun hin i Pä ka ni tah" ti amanih, "A ta dingin Pä nîng ka ta, Ka ta dingin Naupä nîng a tih"amanih a ti hlak a? 6 Naulutir ruok chu khawvela a hung tir khan, "Pathien vântirko po poinAma chu chawibiek raw hai se"a tì a ni kha. Vàntirkohai chungchang thu a hrilnaa chun, 7 "Thlî hi i tir palai an na, Vàn meichok i siehlaw an nih"a ta. 8 Naupa thu a hril ruok chun hieng ang hin a ti thung a:"Aw Pathien, i lalthungpha chuKumkhuoin um zing a tih; Indikna lal hmol ngei chu. I ram lal hmol a ni si a; 9 Felna chu i ngaina a, Suol tieng i theida leiin, Pathien, i Pathien ngei chunI ruolhai nêka nasain, Hlimna hriek a nàl ta chê". 10 Chun, hieng ang hin a ti nawk bok a:"A tìrin hnuoi thut i phùm a, Vànhai khom i kutsuok an nih. 11 Sienkhom la thamral vong an ta, Nang ruok chu um kumkhuong i tih; Puon angin la chul an ta, Silfèn angin la hnawl i ta, An rêngin la bohmang an tih. 12 Nang ruok chu i pangngai zing a, I kumin kin ni nei naw nih. " 13 Vàntirkohai lai tu kuom am, "Ka chang tieng hin inthung rawh, I hmêlmahai i ke sirsan a, Ka siem hmâ khat chun"a ti hlak a? 14 Vàntirko po pohai chu sandamna changtu dinghai rongbawltu dinga tir suok thlarau an ni naw am a ni?

Hebrews 2

1 Chuleiin, ei thu hriethai kha ei poisa nawk zuol ding a nih, chuong naw chun intol hmang hlauh rawi ei tih. 2 Vàntirkohai hmanga thu a hrilhai hman a nghet a, a bawsetu le poisa nawtu taphot chu an phù anga hrem an ni pei si chun, 3 hieng ang lawma sandamna ropui hi ei ngaithàa vai chun ieng tin am hrem chu pumpel lul ei ta? Chu sandamna chu Lalpa ngeiin a hung puong hmasa a, a thu hretuhaiin an mi namnghetpèk a. 4 Pathien ngei chun inchikna thilmak le thilmak hrang hranghai chu thawin, Thlarau Thienghlim thilpêk chu tûl a ti ang peia semin a hung namnghet bok a. 5 Khawvel la hung um ding chu vàntirkohai thu hnuoiah a sie nawzie thu ei hril a ni hi. 6 Chuong nêk hmanin tuin amanih hieng hin a lo hril kha:"Hringmi hi iem a ni hrim a, I hriet fùk lop lop el ni?Hriem nauhai khom iem an na, I ngaisak èm ém el ni? 7 Angelb hnuoi thetah siein, Ropuina le chawimawina, Tonlairang i'n tontir a, 8 A ke hnuoiah i sie vong"tiin. A ke hnuoiah iengkim Pathienin a sie leiin ama hnuoia sie naw thil ieng khom a um nawh. Tu ruok hin chu iengkim ama hnuoia um angin ei la hmu hri nawh. 9 Amiruokchu, "vàntirko hnuoi theta sie" Isu ruok chun thìna a tuor leiin ropuina le chawimawina inkhumtir a ni tah ti ei hmu a, Pathien lunginsietna zàrin mi tin ta dingin thìna a'n temtir tah a nih. 10 Ama zâra iengkim um le ama ta dinga iengkim um bok, a ropuina chang ve dinga nau tam tak thuoi lûttu Pathien chun tuorna hmanga sandamna siemtu sukfamkim chu awm a ti hlè si a. 11 Mihriemhai sukthienghlimtu le sukthienga umhai chu Pä thuhmuna inthoka suok an ni leiin, Isun anni rawi chu "Unauhai" tia ko a'n zak nawh. 12 "Ka unauhai kuomah i hming lam ka ta, Kohranhai lai i'n pàkna hla sak ka tih. "a ti a nih. 13 Chun, "Amaah ka ringna innghat ka tih" 14 "Naupang" a tihai hi taksa le thisen put an na, ama khom chuong ang bok chu a hung ni ve tah a nih. 15 Chuongchun, thìna chunga thuneitu Diebol chu a thìna leiin a suktlawm a, dam sûnga thì inlâu rêng rènga um hlak, titna bawia intânghai chu a'n suo tah a nih. 16 A hung ngaisakhai hi vàntirkohai ni loin Abraham thlàhai an ni lem. 17 Chuleiin, a mi lainattu Pathien ta dinga Thiempu Laltak, ringum tak, mi po po suol thupha chawina inhlàntu ni ding chu, kong iengkimah a unauhai anga a hung um chu a tûl hrim a nih. 18 Ama ngei chu fiena tuor muolsuo tah a ni leiin thlèmna tuorhai khom a thangpui thei a nih.

Hebrews 3

1 Chu lei chun unau thienghlim, vàn kona chang vetuhai, ei thuringa Tirko le Thiempu Laltak Isu chu, ngaituo ro. 2 Pathien sûngkuo po po ta dinga Mosie a ringum ang bok khan ama chu a ruottu ta dingin a ringum a nih. 3 In bawltu chun a in nèka chawimawi a hlaw lem hlak angin, Isu khom Mosie nèka ropuina nasa lem hmu tlâk a nih. 4 In tin hi tuin amanih an indin a na, iengkim indintu ruok chu Pathien a nih. 5 Mosie chu siehlaw niin, Pathien sûngkuo pumpui ta dingin a ringum a, Pathienin thu a hril dinghai puong sawngtu a nih. 6 Krista ruok chu Naupa niin, Pathien sûngkuo ta dingin a ringum a nih. Eini hi a sûngkuohai chu ei nih, ei suong rop beiseina hi ringzo taka ei chel zing phot chun. 7 Chuongchun, Thlarau Thienghlim chun hieng hin a hril a:"Voisun hin a rawl in hriet chun, 8 Thlalèra fiena in tuok lai le In hel lai nihai ang khan, In lungril sukngar naw ro. 9 Kum sawmli sûng in pi la puhan, Ka thilthawhai hmu zingin, Ensinin an mi fie a; 10 Chu suon po po chunga chun, Ka lung a sen êm êm a, 'An lungril a fe suol zo tah, Ka lampui an hriet ta nawh; 11 Lungsena ka'n khâm angin, Ka chawlnaah lût naw ni hai'Tiin ka puong a ni kha"tiin. 12 Unauhai, fîmkhur ro, chuong naw chun Pathien hring tlùksan dingin tû lungril amaniah ring nawna suol lût pal hlauh rawi a tih. 13 'Voisun' ti a ni sùng hin nangni laia tu khom suol hlèm thlùka um a, lungril an sukngar nawna dingin ni tinin infui tuo lem hlak ro. 14 A tira ei ringzona kha a tawp chena ei vong tlat phot chun Krista intawmpuituhai nîng ei tih. 15 "Voisun hin a rawl in hriet chun, In hel lai nihai ang khan, In lungril sukngar naw ro"ti a ni kha. 16 An leh tuhai am an na hre zing sia hel kha? Aiguptaa inthoka Mosie thuoi suokhai po kha an ni naw am a nih? 17 Tuhai chung am a na kum sawmli zet a lungni naw kha? Thilsuol thawtuhai, thlalèra tlu hlum tahai chunga khan a ni naw am a ni? 18 Thu awi nawhai chunga chauh naw chu tu kuom am a chawlnaa lût lo dingin thu a'n khâm a? 19 Chuongchun, an ring nawna leiin an lùt ve thei ta nawh ti ei hriet.

Hebrews 4

1 Chuleiin, a chawlnaa lût theina thutiem a la ngîr zing sùng hin nangni laia mi tu khom lût dinga inhnu taluoa inngai in um pal nawna dingin fîmkhur ro. 2 An kuoma Chanchin Tha hril a ni ang bok khan eini kuoma khom hril a ni ve a, sienkhom an thu hriet chu ringa an zawm si naw leiin an sawtpui dèr nawh. 3 Eini ringtuhai hi a chawlnaa lût tahai chu ei nih. Pathienin hnuoi le vàn a siem zo khan a sin a chawlsana chu, "Lungsena ka'n khâm ang khan, Ka chawlnaah lût naw ni hai"a la ti zing a nih. 4 Ni sari ni thua chun, "Pathienin a sinthaw po po ni sari niin a chawlsan tah a" tiin khaw lai amanih ziek a ni kha. 5 A chunga thu ei tarlanga khan "Ka chawlnaah lût naw ni hai" ti thu a hril bok a. 6 Chanchin Tha dong hmasatuhai khan an ring naw leiin lût thei naw hai sien khom thenkhat ta ding ruok chun a chawlnaa lût theina a'n hong zing a nih. 7 Ei hril tah, 'Voisun hin a rawl in hriet chun in lungril sukngar naw ro' ti Davida hmanga hril kha kum tam tak hnungah Pathien chun ni dang, 'Voisun' a ti chu a hung ruot nawk tah a nih. 8 Josua khan, 'chawlnaa' chun thuoi lût ni sien, Pathienin hun dang ruot nawk ta naw nih. 9 Chuleiin, Pathien mihai ta dingin 'chawlna' hun dang a la um nawk ding a nih. 10 Pathienin a sinthaw a chawlsan ang bokin Pathien tiem chawlna changtuhai chu an sininrimnaa inthokin an la chawl ding a nih. 11 Ringnawna leia an tlùk ang khan tu khom ei tlùk ve nawna dingin, chu chawlnaa lût ding chun theitawp suo seng ei tiu. 12 Pathien thu chu a hring a, thil a thaw thei a, c kawlhnâm ngei ton ieng ang nèk khomin a ngei lem a, hringna le thlarau inzomna lai tak le rù le châng le thlin inchuktuona lai khom a sun tlang thei a, lungrila ngaituona le tumhai khom a hriet nghal thei a nih. 13 Pathien mita inthoka thup thei thilsiem ieng khom a um nawh. Ei chungthu ei hrilna ding mit hmua chu iengkim hi saruok le inhong sa vong a ni lem. 14 Chuongchun, vànahai khom fe thleng tah thiempu laltak le ropuitak Isu, Pathien Naupa chu ei nei leiin ei thuring hi chel tlat ei tiu. 15 Ei hràtnawnahai mi hrepui phàk lo thiempu laltak nei ei ni naw a, eini ang boka kong tinrênga thlèmna tuok tah, suol ruok chu suol lo nei ei ni lem. 16 Chuongchun, thangpui ei ngai hun takah zàngaina le lunginsietna ei hmu theina dingin, lunginsietna lalthungpha chu nêl takin hnai ei tiu.

Hebrews 5

1 Thiempu laltakhai chu mihriem laia inthoka thlang suok an ni hlak a, mihriemhai aiawa Pathien tienga rongbawlna sin thaw ding le thilpêkhai le suol ta dinga inthawina inhlàntu dinga ruot an ni hlak. 2 Hràtnawna tlâk buok ve tho an ni leiin mi mawlhai le lam inhmanghai dawthei taka dom dàn an thiem hlak a. 3 Chuleiin, mi dang ta dinga suol thawina an inhlàn ang bokin anni suol thawina khom an inhlàn vé ngèi ding a nih. 4 Hi ngîrhmun inzaum tak hi mani an inpêk el ngai naw a, Aron hai anga Pathien kohai chauin an chel hlak. 5 Chuong ang bokin Krista khomin thiempu laltak nìna ropui tak chu ama le ama a'n pêk el nawh. "Nang chu ka Naupa i na, Voisun hin i Pä ka ni tah"titu khan a ruot lem a nih. 6 Hmun danga khom"Nang chu Melkisedek thiempùna angaChatuon thiempu i ni ie"a ti bok a. 7 Isun hnuoi taksa a put lai nihai khan thìnaa inthoka sansuok theitu chu inring taka koin a kuomah mitthli tla pumin a tongtai a. Inzà taka Pathien thu a awi leiin a hnìna chu ngaithlâkin a um a. 8 Naupa meuh khom ni sien, a thil tuora inthok chun thu awi a'n chùk a, 9 sukfamkim a hung ni chun ama thu awituhai po po ta dinga chatuon sandamna hnârpui a hung ni a, 10 Melkisedek anga Thiempu Laltakah Pathienin a ruot tah a nih. 11 Hi chungchanga hin hril ding tam tak kan nei a, sienkhom thil in la man hràt naw êm leiin hang hrilfie khom a harsa a nih. 12 A hun ngaituo chun zirtirtu ni ta hiel awm in nia chu, Pathien thu a bul rêta inthoka inchûktir in ngai nawk tah a, buchangrum nêkin nenetui in mamaw a ni hi. 13 Nene ne lai chu naute an la ni leiin bu rum, felna thu chu an la fàk thei nawh. 14 Buchangrum ruok chu mi puitling, a sie a tha thlier thiem dinga lungril sawizoi tahai fàk chí a nih.

Hebrews 6

1 Chuongchun, Krista chungchanga inzirtirna thu mawl tak tak hril zing ta loin puitling tieng pan ei tiu. Intanna bulthuta hmang dinga ei inchûktir hlak- thilthaw tangkai lo bânsan a tùl thud dàm, Pathien ring thu dàm, 2 baptisma thu dàm, kut innghat thu dàm, mithi tho nawkna thu dàm le rorêlna nuhnung tak thu hai dàm khom hi hril non hril non ta nawng ei tiu. 3 Pathienin a remti chun chuong ang chun ei thaw ngei ding a nih. 4 Lungril sun vara um tah, vàn thilpêkhai intem tah, Thlarau Thienghlim khom chang ve tah, 5 Pathien thu inhnikna le hun la hung um dinga thilthawtheina hai khom intem ta zeta, 6 tlùksan nawk sihai chu sim dinga thuoi kîr nawk ruol an ni nawh; anni ngeiin Pathien Naupa chu hemde nonin vàntlâng hmaah an sukmuolpho si a. 7 Ruotui tla dong hlaktu ram, loa neitu ta dinga thlai hmang tlàk insuotu chun Pathien malsawmna a dong a nih. 8 Amiruokchu, hlo le hling buk ringot insuo hlaktu ram chun tlâktlàina hrim a nei naw a, tongsie inphur chauh a hmabâk a, a tawpah raw a tuok hlak. 9 Dittakhai, chuong thu chu hril inlang khom, nangni laka chu thil tha lem kan beisei a, sandam in ni ngei khom kan ring tlat a nih. 10 In thilthaw hlak, tu chen khoma in la thaw zing hlak, a hming leia hmangaina in insuo hlak le mi thienghlimhai rong in bawlpèk hlak hi Pathienin hre zing a tih, ama chu mi indik a ni si a. 11 In beisei a tlung kim chenin taimak in insuo tàng tâng kan ditpui chêu. 12 Inthlàdà loa ring tlat le dawthei taka nghâk fan fan hlak, Pathien thutiem rochungtuhai anga in um kan dit a nih. 13 Pathienin Abraham kuoma thu a tiem lai khan a nêka ropui lem sàl ding a um naw leiin ama le ama insâlin, 14 "Mathei loin mal sawm ka ti che a, sukpung ngei ngei ka ti che" tiin thu a tiem a. 15 Chuongchun, Abraham chun a nghâk fan fan a, Pathien thutiem chu a dong tah a. 16 Mihriemhai chun anni nêka ropui lem sâlin an inkhàm hlak a, chuonga inkhàmna chun an thutiem chu a namnghet a, an thu inchu khom a suktawp hlak. 17 Pathien khomin a thutiem a sût naw dingzie chu thutiem dongtuhai kuomah mani insâl meuin a namnghet a. 18 Sût nawk el thei lo chi hieng thil pahnih-thutiem le mani insâlna- lei hin Pathien thu chu inkhêl ruol a ni nawh. Chuleiin, himna dinga a kuoma tlânhai hin ei hmaa beiseina chu phûr takin ei chel thei a nih. 19 Chu beiseina chu ei thlarau thîrchakai nghet le him chu a nih. Chu chu Hmun Thienghlimtakah a'n thlung lùt a, 20 chu taka chun eini aiawin ei hmathuoitu Isu a lût tah a, thiempu Melkisedek anga ei chatuon Thiempu Laltak a hung ni tah.

Hebrews 7

1 Chu Melkisedek chu Salem khawpuia lal a na, Pathien Chunghnungtak thiempu a ni bok. Lalhai tukdol zoa Abraham a hung kìr tieng ama chun a lo hmuok a, mal a sawm a. 2 Abraham chun ama chu a râllâk sum po poa inthoka sawma pakhat a pêk a. A hming umzie chu 'Felna lal' ti a ni hmasa phot a, chu zoah 'Salem lal' ti a ni nawk a, chu chu 'Remna lal' tìna a nih. 3 Ama chu pa le nu nei lo, thlatu sui ding um lo, a um tan ni le a nun tawp ni hril ding um bok lo, Pathien Naupa ang el a na, thiempu a ni zing a nih. 4 Melkisedek ropuizie chu hang ngaituo ta u, thlatu bul Abraham meuin a râllâk sum sawma pakhat a pêk a ni chu! 5 Thiempu sin cheltu Levi thlahai chun Dàn thu angin an unau Israel mi, Abraham thlahai laka inthokin sawma pakhat an làk ding thu an hmu a. 6 Melkisedek ruok chu Levi thlahai laia thang ve ni naw sien khom Abraham kuoma inthokin sawma pakhat a dong a, thutiem dongtu Abraham chu mal a sawm a. 7 Sêl ruol loin, a chîn lem chu a lien lemin mal a sawm hlak a nih. 8 Hi taka hin, a chîn lem, sawma pakhat dongtu Levi thlahai chu thi thei mihriem an ni a, Melkisedek chungthua ruok chu hring zinga hril chun sawma pakhat a dong tlat a nih. 9 Chun, sawma pakhat dongtu Levi ngei khom khan Abraham kut hmangin Melkisedek kuomah sawma pakhat a lo pêk tah ti thei a nih. 10 Melkisedekin Abraham a lo hmuok lai khan Levi chu a thlatu thalbea khom a la um si naw a. 11 Levi thlahai thiempu sin le inzomin Israel mipuihai kuomah Dàn pêkin a um a. Chuong ang leia famkimna chu chang thei lo ni sien, Aron thiempu nìna ang ni lo, Melkisedek thiempu nìna anga thiempu dang an hung a la ngai rop dim a ni? 12 Chun, thiempu sin kalhmang inthlâk zàtin Dàn khom thlàk danglam a ngai a. 13 A chanchin ei hril ruok hi chu maichâm rongbawlna tawk ve ngai lo hnama mi a nih. 14 Ei Lalpa chu Mosien thiempu chungthu a hril laia a hril sa ve ngai lo Juda pahnama mi a ni thu chieng taka hriet a nih. 15 Thiempu chi dang, Melkisedek ang chi, mihriem inthla sawng dàn zuia thiempu ni ve satlie ringot ni lo, 16 suksiet thei ruol lo hringna thilthawtheinaa thiempua ruot a hung um tah hin ei thu chu a sukchieng zuol a nih. 17 Lekha thu chun, "Nang chu Melkisedek ang a, Chatuon thiempu i nih"a lo ti a. 18 Thupêk hmasa chu a hrât naw lei le hmang tlâk a ni naw leiin hnawl hmang a ni tah 19 Dàn chun ieng khom a sukfamkim thei naw leiin, beiseina tha lem, Pathien mi'n hnaitir theitu chun a hung thlàk tah a nih. 20 Chu chu thu intiemkamna nei hiela a hung thlàk a nih. Thiempu danghai chu intiemkamna neia ruot an ni ve nawh. 21 Ama ruok chu intiemkamna nei meua ruot a na, a ruottu chun a kuomah, " 'Chatuon Thiempu i nih" tiinLalpa chun thu a'n tiemkam a, A lungril thlâk ngai naw nih"a ti kha. 22 Hi thu intiemkamna lei hin Isu chu thuthlung tha lem zakhamna a hung ni tah a nih. 23 Chun, thìna leiin thiempuhai chun an thiempu sin chu an sunzom zing thei naw a, chuleiin mi tam tak thiempua siem an ni hrim a. 24 Isu ruok chu a hring zing leiin thiempu hlun a nih. 25 Chu lei tak chun, ama zâra Pathien hung pantuhai chu ieng lai khomin a sandam thei zing a, an ta dinga Pathien kuoma hrilpuitu ni zing dingin a hring zing a nih. 26 Chuong ang Thiempu Laltak chun ei mamaw po po a phuhrùk zo a; ama chu mi thienghlim, hmêlhemna nei lo le fai inthieng, mi suolhai laka fihlim a na, vànhai chunga insângah chawimawi a ni tah. 27 Thiempu laltak chun ni tin mani suol inthawina a'n hlàn hlak a, chu zoah mipuihai suol inthawina dingin a'n hlàn nawk hlak. Ama ruok chun chuong ang chun thaw ve loin ama le ama a'n hlàn a, mi po po ta dinga inthawina chu kumkhuoa dingin tum khatah a'n hlàn tlingtla ta vong a nih. 28 Dàn chun Thiempu laltak ni dingin mihriem ve el, hrât naw tak tak hai chu, a ruot hlak a, Dàn um hnunga thu intiemkamna ruok chun Naupa, chatuona dinga sukfamkima um ta chu, Thiempu Laltakah a hung ruot tah a nih.

Hebrews 8

1 Kan thu hril tum tak chu hi hi a nih: chuong ang Thiempu laltak, vàna Ropuina lalthungpha chang tienga inthung chu ei nei tah, ti hi a nih. 2 Ama chun hmun thienghlim, biekbûk tak tak, mihriem kuta bawl lo, Pathien bawl lema chun rong a hang bawl tah a nih. 3 Thiempu laltakhai chu thilpêkhai le inthawinahai inhlàntu dinga ruot an ni a. Chuleiin, Ama khomin iemani bèk chu inhlàn ding a nei a ngai a nih. 4 Hnuoia hin la um zing sien chu, thiempu sin hrim thaw naw nih, Dàn anga thil inhlàntu dinghai an um zing si a. 5 Mosien biekbûk a bawl ding lai khan a bawl dàn ding Pathienin a hril a, "Tlânga a lem ka'n entir che ang chie khan i bawl ding a nih ti hre zing rawh" a ti ang khan, hmun thienghlima rongbawlna hi vàn thil lem le a hlimthla el a nih. 6 Tuta rongbawlna, Isu chang ruok hi chu thuthlung ropui lem, ama ngeiin hrilpuitu ngîrhmun a changna le beiseina tha lema innghat a ni leiin thiempuhai rongbawlna nêk chun a ropui lem dai a nih. 7 Thuthlung hmasa kha soisel bo lo ni ta sien chu, a dang thlung non ngai ta naw nih. 8 Nisienlakhom a mihai indik nawzie hieng hin a lo hril lem a ni kha:" A hun a tlung ding a ni tah, Israel sûngkuo le Juda sûngkuohai, Thu ka thlung tharpui ding hun chu. 9 Aiguptaa inthoka an thlatuhai, Bâna keia ka thuoi suok laia, Thu ka thlungpui ang kha ni naw nih. Ka thuthlungah an ringum naw leiin, Ka nghatsan tawl tah a nih, Ti chu Lalpa thu suok a nih. 10 Chu phaa Israel sûngkuo kuoma Thu ka thlung ding chu hi a nih:Ka dànhai an lungrilah sieng ka ta, An lungrilah ziek bok ka ta, An Pathien nìng ka ta, Ka mihai ni bok an tih, Ti hi Lalpa thu suok a nih. 11 Tuolbawm le unauhai kuomah 'Lalpa chu lo hre ro' tiin, Tu khomin an ti ngâi ta naw nih; A chîn tak le a lien tak chenin, An rêngin mi hre tâng an tih; 12 An rîtlonahai ngaidam ka ta, An suolhai hre zing ta naw ning"tiin. 13 Thuthlung thar thu a hril leiin thuthlung hmasa kha thu hluiah a'n changtir a, thil hlui ta le upa tah chu an bo vak ding a nih.

Hebrews 9

1 Thuthlung hmasaa khom khan rongbawl dàn ding le rongbawlna ding Hmun Thienghlim, hnuoia mi chu ruot a na. 2 Biekbûk an bawl a, a tontîra chun khawnvar siena dâm, bei siena dawkan dâm a um a, chu chu Hmun Thienghlim an tih. 3 Puonzâr pahnina khêla chun biekbûka Hmun Thienghlim tak an ti chu a um a. 4 Chu taka chun rimtui rawna rangkachak maichâm le rangkachak tuia inluon thuthlung bawm a um a. Thuthlung bawm sùnga chun manna siena rangkachak bêl dâm, Aron funghrol inder dàm le thuthlung ziekna lung phek dàm a um a. 5 Thuthlung bawm chunga Ropuina cherub umhai chun zàngaina lalthungpha chu thla an zàr khum a. Chuong thilhai chu tu hin a kip a kawiin ei hril hman nawh. 6 Hienga iengkim rem fel a ni hnung hin thiempuhai chu biekbûk tontìra chun an thiempu sin thawin ni tin an lùt hlak a. 7 A dottua ruok chu thiempu laltak chauh, kum khatah voi khat, thisen chawiin a lût hlak a, chu chu ama ta ding le mipuihaiin hre loa thil suol an thawhai thawina dingin a'n hlàn hlak. 8 Hieng an thil rem dàna inthok hin biekbûk tontîr hi a la um sûng chun Hmun Thienghlimtaka lût theina lampui chu a la'n hong hri nawh ti Thlarau Thienghlim chun a kawkhmu a nih. 9 Hieng thil hi tuta hun inentirna chauh a na, thilpêk le inthawina an inhlànhai chun a'n hlàntu mipuihai sie le tha hrietna a sukfamkim thei nawh; 10 chuonghai chu fâk le dawn thil dàm, tui hmanga inthien dàn dâm le taksa vong dàn ding dàm a ni a, siemtharna hun a tlung hma poa hmang dinga ti a ni chauh a nih. 11 Krista ruok chu thil tha tlung tah le la tlung mèk dinga Thiempu laltak a hung ni khan, biekbûk ropui lem le thienghlim lem, mihriem kuta bawl ni lo, khawvela thilsiem ang khom ni lo chu a lût thleng a. 12 A thisen inhlàn khom chu kèlchal le bawng tuoi thisen ni loin, ama thisen ngei a ni a, hmun thienghlima chun voi khat chauh lûtin chatuona dingin tlanna chu a siem tah a nih. 13 Kèlchal le bawngchal thisen le bawng la tuoi vâp thè hmana dàn bawsietna leia taksa puo tienga inthieng nawna chu a sukthienghlim thei si chun, 14 Krista thisen lem chun a va sukthienghlim zo nasa ding de aw! Chatuon Thlarau zàrah ama ngei chu Pathien kuoma hmêlhem lo thilhlàna dingin a'n pèk a, Pathien hring rong ei bawl theina dingin a thisen chun thìna chauh intlun thei thilthaw tangkai lo laka inthokin ei sie le tha hrietna chu a sukthienghlim tah a nih. 15 Hi lei hin Krista chu thuthlung thar palai a na; thuthlung hmasa bawsietna laka inthoka mihai a'n tlan suok theina dingin a lo thi tah a, kohai chun chatuon ro hluo dinga tiem chu an chang tah a nih. 16 Thurosie khom hi a sietu a thi le thi naw fie hmasak a tûl hlak a; 17 a sietu a dam sûng chun hmang thei a ni hrì naw a, a thi hnung chauha hmang ding a nih. 18 Chuleiin, thuthlung hmasa khom kha thisena suknghet a ni kha. 19 Dàn thupêk tinrêng Mosien mipui a hril lai khan, bawngchal tuoi thisen chu tui leh, sâpsen leh husawpe leh a lâk a, lekhabu ziel le mipui po po chu a the a, 20 "Hi hi in zawm dinga Pathienin in kuoma a pèk thuthlung suknghetna thisen a ni hi" tiin a'n sam a. 21 Chun, biekbûk le rongbawlna hmangruo po po khom chuong ang bokin thisen chun a the a. 22 Dàn thu ang chun iengkim deuthaw hi thisena sukthieng ding a nih; thisen insuo naw chun ngaidamna a um thei si nawh. 23 Chuongchun, vàn thil angpui chauh hman chuonga sukthienghlim a tûl chun vàn thil tak takhai lem chu chuong nèka inthawina tha lema sukthienghlim ding a ni hrim a nih. 24 Kuta bawl, hmun thienghlim, a tak angpuia chun Krista chu a lût naw a, vàna khin a hang lùt lem a, tu hin ei aiawin Pathien hmaah a hang ngìr tah a nih. 25 Thiempu laltak chu mani thisen ni lo, ran thisen chawia kum tin Hmun Thienghlima a lùt hlak angin, ama chu mani inhlàn nawn rop dingin a lût ve nawh. 26 Chuong ni naw sien, leilung insieng tira inthok khan voi tam tak tuor tâng a tih. Nisienlakhom, hun tawpa hin ama ngei inhlàna voi khat thilthua suol la hmang dingin a hung inlang tah a nih. 27 Mihriem ta dingin voi khat thi ruot a na, chu zoah a chungthu rèlpêkna um a tih. 28 Chuong ang bokin Krista khom mi tam tak suolhai la hmang dingin tum khat inhlàn a ni tah. Suol la hmang ding ni loin, ama lo nghâktuhai chu sandamnaa thuoi lût dingin a hung nawk ding a nih.

Hebrews 10

1 Dàn hi thil tha la hung um dinghai hlimthla a ni a, a tak tak chu a la ni nawh. Chu lei chun annawm chawl loa inthawina pangngai kum tina an inhlân rophai hin inhlànna nei dinga hung pantuhai chu ieng kong khomin a sukfamkim thei naw chu nih. 2 Sukfamkim thei chu ni sien, inthawina inhlàntuhai hi sukthienghlim ni vong tàng an ta, suola inhrietna nei ta naw ni hai a, inthawina hi an bânsan dai tah naw ding maw? 3 Chuong nèk hmanin hi inthawina hin an suolzie kum tinin a'n hriet nontir hlak a nih. 4 Kèlchal le bawngchal thisena suol hi sukbo ruol a ni nawh. 5 Chuleiin, khawvela Krista a hung lai khan hieng hin a lo hril chu:"Inthawina le thilhlân i dit naw a, Ka ta di'n taksa i mi buotsaipek lem a; 6 Pumraw inthawina thilhlânhai le Suol thawinaa thilhlânhai chu, I lawm bok nawh. 7 Chu phing leh hieng hin ka ti a:"Lalpa, hi taka hin ka um, Lekhaa ka chanchin an ziek ang khan, I ditzawng thaw dingin ka hung"tiin. 8 A hmasaa 'Inthawina hai, thilhlân hai, pumraw inthawina le suol ta dinga inthawina hai i dit naw a, i lawm bok nawh" ti hi Dàn thupêk ang taka inthawina inhlàn hlak kha a nih. 9 "Chu phing leh, i ditzawng thaw dingin ka hung" a ti hi inthawina hmasa kha bànin Ama thisena inthawina chun a hung thlàk tah tìna a nih. 10 Isu Krista chun Pathien ditzawng angin kumkhuoa dinga tum khat a taksa inhlànin a mi sukthienghlim tah a nih. 11 Thiempu tinin kawla nisa suok zuia rong bawlin, ngìr pumin inthawina pangngai an inhlàn rop hlak a, sienkhom chuong inthawinahai chun suol ieng tin khom a sukbo thei nawh. 12 Krista ruok chun chatuona dinga suol thawina voi khat a'n hlàn hnungin, Pathien chang tieng a hang inthung tah a. 13 Chu taka inthok chun a hmêlmahai ke sirsana a hmang hun ding chu a nghâk ta zing a. 14 Voi khat a'n hlànna khan a sukthienghlimhai chu chatuona dingin a sukfamkim tah a nih. 15 Thlarau Thienghlim khomin hieng ang hin a mi'n hriettir bok: 16 "Chu hnunga an kuoma thuthlung Ka thlung ding chu hi a nih, Lalpa chun a tih:An lungrilah ka dànhai sieng ka ta, An ngaituonaah ziek bok ka tih"tiin. Chu baka chun, 17 "An suolna le bawsietnahai, Hre zing ta naw ningah"a ti bok a. 18 Chuongchun, suolhai ngaidam a ni ta si chun, suol thawina thilhlàn a ngai ta nawh. 19 Chuongchun, unauhai, Isu thisenin Hmun Thienghlimtaka ngam taka lût theina lampui thar le hring, 20 indaidanna puonzar fe thlengna lampui chu, a mi hongpèk tah a, chu puonzar chu a taksa kha a nih. 21 Chuongchun, Pathien sûngkuohai chun Thiempu Ropuitak ei nei leiin, 22 suol inthiem nawna lungril sawpfaipèka um a, ei taksa khom tui thienghlima sawp fai a, lungril thienghlim tak le ringnaa inhriet chiengna nghet tak neiin Pathien chu hnai ei tiu. 23 Beiseina thuring ei pom hi nghet takin chel tlat ei tiu. Thu mi tiemtu chu a ringum si a. 24 Hmangaina hau ding le thil tha thaw dingin inchokphûr dàn ngaituong ei tiu. 25 Thenkhatin inkhawm thlàdà an chïng angin chîng ve naw inla, inkhawm taima dingin infui tuo lem inla; Ni chu a hung hnai tah ti in hriet leiin infui tuo uor zuol sauh ei tiu. 26 Thutak hrietna ei nei ta hnung khoma ei suol lui pei chun suolhai la hmang thei inthawina dang a um ta naw a, 27 rorêlna le ama dodàltuhai kâng hmang vong dinga Pathien lungsenna mei chok a hung thlâk ding hun thlaphâng taka nghâk ringot naw chu hma bâk dang ei nei nawh. 28 Mosie Dàn bawsetuhai chu thuhretu pahni pathum thuin zangaina thang dêr loa sukhlum an ni hlak a. 29 Pathien Naupa sir de a, ama sukthiengtu thuthlung thisen chu thienghlim loa ngai a, lunginsietna Thlarau cheksoltu chu ieng anga nasa nawk zuola hrem am nìng a ta? 30 Phuba lâk chu ka chan a nih, Keiman thungrul ka tih"ti le"Lalpan a mihai ngaituong a tih"titu hi ei hriet si a. 31 Pathien hring kut thlàkna ni hi thil pangzatum tawp a nih. 32 Kha hma sunvara in um hnunga ngor taka inbeinaah thang khaw a, rinumna nasa tak in tuor lai nihai kha hre zing hlak ro. 33 A chângin vàntlâng ennuoma siemin, hmusit le suknomnat in tuor a, a chângin chuong ang tuortuhai chu tan tlatin in tuorpui hlak a. 34 Kol buna intânghai chu in lainat a, in thil nei an lâkpèk chêu khomin lawm takin in tuor a, thil tha lem le hlun lem chu in nei ti in hriet si a. 35 Chuongchun, in huoisenna kha inhmang naw unla, lukhawng ropui tak la nei a tih. 36 Pathien ditzawng thaw zo hnunga a thil tiem dong ding chun teirei pei a ngai. 37 "A hung ding chu hung vak a tih, Muongchâng naw nih; 38 Ka mi fel chu ringnan hring a tih; A hnungtol ruok chun, A chungah lawm naw ning. " 39 Eini ruok chu bohmang dinga intol kîrhai laia mi ei ni naw a, ringtu le sandam ni tahai laia mi ei ni lem si a.

Hebrews 11

1 Ringna chu thil beiseia chiengnaf le la hmu lo thil hriet chiengna a nih. 2 Chu thua chun tien lai mihai kha inpâk an um hle. 3 Ringnain khawvel hi Pathien thupêka hung um le hmu theihai hi hmu thei loa inthoka hung um a nih ti ei hriet. 4 Ringnain Abel chun Kaina inthawina nèka pom tlâk lem Pathien kuomah inthawina a'n hlàn a, Pathienin a thil inhlàn chu a pom a, mi fela a ruot thu a'n hriettir a. Ama chu thi tah sien khom ringna leiin thu a la hril zing a nih. 5 Ringnain Enok chu thìna intem loa làk tung a na, Pathienin a lâk tung leiin hmu ding a um ta nawh. Làk tung a ni hmâ khan Pathien a suklawm ti Lekha thuin a ziek. 6 Ringna naw chun Pathien suklawm ruol a ni si nawh. Tu khom Pathien hung pantu chun Ama chu a um ngei a, lungril taka Ama zongtuhai chu lawmman a pêk hlak ti a ring ding a nih. 7 Ringnain Nova chun thil hung tlung ding chungchang hrillawkna a dong chu Pathien tìna thienghlim tak neiin a sûngkuo himna dingin long a tuk a. A ringna chun khawvel thiem naw a'n changtir a, ringna leia thiem inchangtirna rochungtu a lo ni tah. 8 Ringnain Abraham chun a la rochung ding ram pan dinga Pathien kona chu a awi a, panna ding tieng khom hre loin a'n thok suok a. 9 Ram tiema chun, mi rama mikhuol châmbâng ang elin, ringnain a châm ta zing a, thutiem thuhmun a dongpui Isak le Jakob hai angin puon inah a khawsa a. 10 Pathien rel le indin khawpui, lungphùm nghet tak nei chu, Abraham chun a nghâk ta zing a. 11 Ringnain Abraham chu tar ta hlein le Sari khom chu ching sienkhom chi thla theina a dong a, thutiemtu chu a ring tlat a. 12 Chuongchun, thi ang deuthaw ni tah sien khom, hi mi pakhata inthok hin chi thla, vàna arasi anga tam le tuipui kama tiem seng lo phaiphin anga tam an hung suok tah a nih. 13 Hienghai po po hi an thi khan ringnaah an la um zing a, thil tiem chu la chang hri naw hai sien khom an hmu tah a, hla taka inthokin an lo lawm a nih. Hnuoia hin mikhuol le khuolzin châm el an nih ti an inhriet a. 14 Chuong ang chauh chu an nih ti hretuhai chun mani ram hlun ding an zong lem hlak ti an suklang. 15 An suoksan ram kha lungkham ni hai sien chu, kîr nawkna ding hun remchàng hmu ngei an tih. 16 Sienkhom, ram tha nawk zuol, vàna um chu, an ngài lem a nih. Chuongchun, Pathien khomin an Pathien ni a'n zak naw a, an ta dingin khawpui a lo buotsai tah a nih. 17 Ringnain Abraham chu fiea a um lai khan a naupa nei sun Isak chu inthawina dingin a'n hlàn a. 18 Thutiem dongtu a na, "Isaka hin i thlàhai sui nîng an tih" ti ni sien khom, 19 Pathien chun mithi khom keitho thei a tih ti ringin a'n hlàn a, thi hnung hung dam nawk ang elin a hmu kìr nawk ta ngèi hrim a nih. 20 Ringnain Isak chun thil la hung um dinghai thuah Jakob le Esau mal a sawm a. 21 Ringnain Jakob chun a thi tawm khan Josefa nauhai chu mal a sawm vé vè a, a funghrol ringsana kûnin Pathien a chawibiek a. 22 Ringnain Josefa chun a thi a hung hnai khan Aigupta rama inthoka Israel thlahai an suok ding thu hrilin a ruong phûm dàn ding thu a'n chä bok a. 23 Ringnain Mosie a hung pieng khan nau pangngai a ni nawh ti hmuin a nu le pahai chun thla thum sûng an thup a, lal thupêk khom an ti nawh. 24 Ringnain Mosie a hung puitling hnung khan Faraw naunu naupaa inbûk a nuom naw a, 25 sawt naw te sùnga dinga suol inhoitirna chèn nêk chun Pathien mihai le suknomnat tuor chu a thlang tah lem a. 26 Aigupta ram hausakna po po nêk chun Krista an hmusitna chu ro hlu lemah a ngài a, lawmman a dong ding chu a thlîr tlat a. 27 Lal lungsen khom ti loin Aigupta ram chu ringnain a suoksan a, Hmutheilo chu a hmu leiin sel takin a tuor a. 28 Ringnain Fekân kût chu a tan a, Sukbohmangtuin Israel nau lutirhai a tawk nawna dingin an kotkhâr biengah thisen a'n thètir a. 29 Ringnain Tuipui Sen kha hnuoi hula fe ang elin an fe kai a, Aigupta mihaiin kai ve an tum a, an tla hlum ta vong a. 30 Ringnain Jeriko kul chu ni sari an inhuol a, a chim tah a. 31 Ringnain nawchizor Rahabi chun enthlatuhai kha lawm takin a lo intlungtir a, ringnawtuhai lai a bohmang ve ta nawh. 32 Ei la hril pei di'm a ni? Gideon hai, Barak hai, Samson hai, Jeftha hai, Davida hai, Samuel hai le zawlneihai chanchin hril ding ni inla, hunin a mi dai awm si nawh. 33 Chuonghai chun ringnain ramhai an làk a, indik takin ro an rèl a, thu tiem chu an dong a, sakeibaknei bàuhai an sukchìp a; 34 meichok inhlap puot puot an sukmit a, kawlhnâma that an pumpel a, ongrophai sien khom sukhrâtin an um a, indonaah an hràt a, ram dang sipaihai an tukdol a. 35 Nuhmeihaiin an sûnghai thi tah hung hring nawkhai chu an lo lawm a. A thenin suknomnatna an tuor a, thonawkna tha lem an chang theina dingin san suok khom an nuom nawh. 36 Thenkhatin sukdùdàna le vuok an tuor a, thenkhat khaidiet inbuntirin lung inah an khum a. 37 Thenkhat lungin an dêng hlum a, thenkhat thing àtnain an àt bong a, thenkhat kawlhnâmin an sàt hlum a, thenkhat beram le kèl vun silin an vàkvài a, sukdùdaa umin, rethei takin an tuor tlok tlok a. 38 Chuong mihai ta ding chun khawvel hi umna tlâk a ni naw a, thlalèra hai, tlânga hai, pûka hai, hnuoi khura hai an vàkvài hlak. 39 Chuonghai po po chun an ringna leiin inpâk hlawhai sien khom, thu tiem ruok chu an la chang hri nawh. 40 Pathien chun thil tha nawk zuol ei ta dingin a lo buotsai a, eini le anni a ruola sukfamkima ei um theina dingin a lo rèl a nih.

Hebrews 12

1 Chuongchun, chuong ang lawma tam thlirtuhaiin sumpui anga an mi'n huol khup lei chun, mi sukriktu taphot le mi khuoptu suol chu thè thlain, ei hmaa intlânsieknaa hin sel takin tlân ei tiu. 2 Ei ringna bulpui le sukfamkimtu Isu chu en tlat ei tiu. Ama chun a hmaa hlimna lo hmuoktu ding lei chun, muolpho khom poiti phal loin, kraws-ah sel takin a tuor a, Pathien lalthungpha chang tieng a hang inthung tah a nih. 3 Chàua in beidong nawna dingin, chuonga mi suolhai dodàlna po po lo tuor muolsuotu chu ngaituo hlak ro. 4 Suol doin thisen suok khopin in la thang nawh. 5 Nauhai anga an infuina chèu kha in lo theinghil tah a ni hi:"Ka naupa, Lalpa thununna chu ngainêp naw la, Kawka i umin i lung sukhnuol bok naw rawh; 6 Lalpan a hmangai chu a thunun hlak a, Naua a pom taphot chu a hrem hlak" 7 Harsatna hi thununnaa ngaiin tuor hrâm hràm ro, nauhai chunga thaw angin Pathienin in chunga khom a thaw ve a ni hi. Pä thunun lo näu tu am an um hlak a? 8 Nauhaiin an hlaw hlak Pä thununna in hlaw ve naw chun, nau tak ni loin sawn nîng in tih. 9 Mi thununtu pa ei nei seng a, ei inzà èm êm bok. Ei hringna dingin thlarau tienga Pä thununna hnuoiah ei kûn lem naw ding maw? 10 Ei pahan tha an ti angin sawt naw te an mi thunun hlak a, ama ruok chun a thienghlimna ei chang ve theina dingin, ei thatna dingin a mi thunun lem hlak a nih. 11 Thununna hrim hrim hi tuor lai chun a rinum èm leiin thil lawmumin a'n lang ngai nawh; sienkhom mi a sawizoi hnung ruok chun felna le inremnain a ra suok a, mi a siem tha hlak. 12 Chuleiin, in kut zoi thla tahai kha phar suokin, in khùp tlep tahai kha sukhrât unla, 13 kebai chu a ke inpelsol loa a hung dam theina dingin in lampuihai siem ruol ro. 14 Mi po po leh inrem tum hrâm hrâm unla, thienghlimna hnot ro; thienghlimna naw chun tu khomin Lalpa hmu thei naw ni hai. 15 Pathien lunginsietna chu tu khomin an chàn nawna ding le sukbuoi le sukporchè theitu khâkna zung dàm nangni lai a hung inder suok nawna dingin fimkhur ro. 16 Tu khom inngai chîng dàm le Esau anga sakhuo poisa lo dàm in um nawna dingin fimkhur bok ro. Esau chun a nau lutîr nìna chu bu voi khat fâk chauin a zor a ni kha. 17 Chu hnung chun a malsawmna dong ding chu chang nuom ieng ang sien khom hnawlin a um a, mitthli leh a ngèn ngiela chu thlàk danglam thei a ni ta nawh ti in hriet kha. 18 In tlungna tlâng hi Sinai tlàng ang a ni nawh ti hre ro. Sinai tlàng chu tawk thei a na, chu tlâng chu mei chok zur zur suokna, thim sa mupin a bawm, thlipui a hràngna, 19 tawtawrawt an rîk ruoi ruoina, ri nasa tak hung suokna a nih. Chu rawl hretuhai chun thu dang hril zom pei lo dingin an ngèn a. 20 Sa khomin tlâng chu a tawk chun lunga dèng hlum ding a nih ti thupêk chu an dawl zo nawh. 21 A ti-um èm leiin Mosie khomin, "Tiin ka'n thin" a ti hiel kha. 22 Zaiawn tlàng, Pathien hring khawpui, vàn Jerusalemah, vàntirko sâng tam tak hai, 23 nau lutîr kohran, vàna hming chuong hai, mi tin ro rêlpêktu Pathien le sukfamkim tah mi fel thlarau hai inkhawmpuina hmaah in ngìr tah a, 24 Abel thisen nêka tha lema thu hril thei thisen thètu Isu, thuthlung thar palai kuom in tlung tah a ni hi. 25 Thu hung hriltu hi lo hnawl hlauh rawi in tih, fîmkhur ro. Hi hnuoia an kuoma thuhriltu lo hnawltuhai hman khan hrem an pumpel si naw chun, vàna inthoka thu hung hriltu ei lo nghatsan vai chun hrem pumpel naw nawkzuol ei tih. 26 Chuong lai chun rawl khan hnuoi a nghor hnìng a, tu hin 'voi khat chu hnuoi chauh khom ni lo, vàn khom la nghor hnìng nawk ka tih' tiin thu a tiem a nih. 27 'Voi khat chu' ti hin thilsiemhai chu sukhnînga son bo an ni ding thu le sukhnîng thei lohai chauh an um zing ding thu a kawk. 28 Chuongchun, ram sukhnîng thei ruol lo ei nei leiin lawm ei tiu, inzà tak le ti tak pumin a lawmzawngin Pathien rong chu bawl ei tiu. 29 Ei Pathien hi mi kàng hmang thei mei a ni takzet si a.

Hebrews 13

1 Unauhai, inhmangai tuo hi uor pei ro. 2 Mikhuol chungah that inchu unla, chuonga thawin thenkhatin vàntirkohai an intlungtir hlak kha. 3 Lung ina intânghai chu tâng ni ve angin hre zing unla, rinum tuorhai khom, taksaa tuor ve ang elin, hre zing ro. 4 Innei hi mi po poin chawimawi unla, nupa khum khom inthieng takin vong ro. g Inngaihai le uirehai chu Pathienin an chungthu a ngaituo ding a ni si a. 5 Sum ngainatna lakah inthier fihlîm unla, in thil nei tawk sengah lungawi ro. Pathien ngeiin, "Thlàthlam ngai nawng ka ti che a, Zàmsan ngai bok nawng ka ti che"a ti si a. 6 Chuleiin, "Mi thangpuitu chu Lalpa a nih, Ti ngai naw ningah; Mihriemin iem mi law thei an ta?"ei ti ngam a nih. 7 In hotuhai, Pathien thu lo hriltuhai chêu kha hre zing unla, an nuna ra an insuo dàn ngaituo unla, an ring dàn enton ro. 8 Isu Krista chu zàni, voisun le kumkhuoin a pängngäi zing a nih. 9 Zirtirna chi dang dang le mak tak taka thuoi hmangin um naw ro. Fak le dawn konga khermeina nèkin Pathien lunginsietnaa sûng tieng hringnun chawm hrât a tha lem; fâk le dawn thila khermeihai hin sawtpuina an nei chuong si nawh. 10 Biekbûka rongbawltuhai chun eini maichàmah an fàk ve a thieng nawh. 11 Thiempu laltakin ran thisen chu suol thawinaa inhlàn dingin Hmun Thienghlimtakah a lûtpui a, sienkhom ran ruong chu kul puo tieng an raw hlak. 12 Chuleiin, Isu khomin ama thisen ngeia mihai a sukthienghlim theina dingin khawpui puo tieng a lo tuor tah a nih. 13 Chuongchun, ama an hmusitna chu phurin a kuomah kul puo tieng fe suok vèng ei tiu. 14 Hnuoia hin ei ta dingin khaw hmun hlun a um naw a, khuo la hung um ding chu ei zong lem a nih. 15 Chuongchun, ama zâra inpâkna inthawina chu Pathien kuomah inhlàn rop ei tiu, a hming ei tan zàtin ei hmùr ra suok chu ei inhlàn a nih. 16 Thil tha thaw le inthangpui tuo hi bânsan naw ro; chu chu Pathien lawmzawng inthawina a ni si a. 17 In hotuhai thu awi unla, an thú thùin um ro, imu intuo hman lo khopin in thlarau nun vêngpêk an ti cheu. Pathien kuoma in chungchang thua mawphurtu ding an nih. An thu in awi chun hlim takin thok an ta, in awi naw chun rinum ti takin thok an ta, chu chu in ta dingin a sawtna a um nawh. 18 Mi tongtaipêk rop ro; ieng lai khomin thil tha thaw kan nuom leiin sie le tha hrietna fîm tak kan put a nih ti kan hriet chieng. 19 In kuomah Pathienin a mi hung tir kìr nawk vak theina dingin mi tongtaipêk dingin ka ngên cheu. 20 Remna Pathien, chatuona a thuthlungna thisen leia ei Lalpa Isu, Berampu ropui tak, mithi laia inthoka hung thuoi kîrtu chun, 21 a ditzawng thaw thei dingin thil tha tinrêngin inthuom famkim sien la cheu, Isu Krista zàra a lawmzawng ang taka um dingin mi siem sien, Krista kuoma chun chatuonin ropuina um raw se. Amen. 22 Unauhai, hi infuina thu hi ngai thei hràm hrám dingin ka ngèn chêu a, ka lekha thon chêu hi tawite chauh a ni hi. 23 Ei unaupa Timothe kha lung ina inthokin an insuo tah ti lo hre ro, a hung tlung hman chun ka ruolin hung thuoi ka tih. 24 In hotu po po le mi thienghlim po po kha chibai mi hung bûkpèk ro. Italy rama mihai hin chibai an bùk chêu. 25 In rênga kuomah lunginsietna um raw se.

James 1

1 Pathien le Lalpa Isu Krista siehlaw Jakob chun hnam sawm le pahnih khawvela inpêm darhai chu chibai ka bûk. 2 Ka unauhai, fiena tinrêng in tuok pha leh lawmum vongah ngai ro, 3 in ringna fiena chun nangniah tuorselna a siem ti in hriet si a. 4 In tuorselna chun matheiloa sukpuitling le sukfamkimin, ieng khom bàksam nei loin siem a ti cheu. 5 Nangni lai tu khomin varna a tlasam chun hal lo le inro loa mi po po kuoma pe hlaktu Pathien kuomah hni sien, pèkin um a tih. 6 Amiruokchu, ringna neiin, ringhlá dèr loin hni raw se; ringhlàtu chu thliin tuipui a mût fawn le tawm lèng ang hi a ni si a. 7 Chuong ang mi chun Lalpaa inthokin ieng khom hmu inring naw raw se; 8 ama chu lungril phîr nei a na, a thilthaw taphota mi nghet lo a nih. 9 Unau rethei tak chu ngirhmun insânga hlängkäi a ni leiin lawm raw se. 10 Mi hausa khom suktlawma a um leiin lawm bok raw se, ama chu hlo pâr anga ral el ding a ni si a. 11 Nisa intal ruiin a hung suok a, hlo chu a em vuoi a, a pâr chu a til a, a mawina a chuoi el hlak. Chuong ang bokin mi hausa khom sum a buoipui zing laiin bohmang a tih. 12 Fiena tuoka ngîr nghet tlattu chu a hamtha, fiena a tuor muolsuo pha Lalpan ama hmangaituhai pèk a tiem, hringna lallukhum chu a chang ding a ni si a. 13 Tu khomin thlêmna a tuokin, "Pathienin a mi thlêm" ti naw raw se. Pathien chu suol thlêm ruol a ni nawh, ama khomin mi a thlêm ngai bok nawh. 14 Mi tin hi mani chàkna suola thlèm an ni seng lem a, chu châkna suol chun mi a hîp a, a zawr hmang hlak. 15 Chu châkna chun tê a pâi a, suol a hring a, suol chu a puitling pha thìna a'n tlun hlak. 16 Ka unau dittakhai, hlèmin um naw ro. 17 Thilpêk tha le famkim taphot chu chung tienga var po po Paa inthoka suok vong a ni a, ama chu hlimthla anga danglam thei a ni nawh. 18 A tum chu sukpuitling dingin, a thilsiemhai laia ra hmasa ni dingin thutakah a mi hring a nih. 19 Ka unau dittakhai, hieng hi hre ro. Mi tinin a hril tieng inchù loin ngaithlâk tieng uor inla, lung suk-uoi raw se; 20 mihriem lungsenna hin Pathienin nun fel nei dinga a mi ditna chu a dâl hlak si a. 21 Chuleiin, nangni laia tuollêng nun tirdakum chi tin le suol tinrêng chu pei hmangin, nangnia tua um thû kha thuhnuoirol takin pom ro, chu chun a sandam thei chêu a nih. 22 Thu ngàithlâk ringot thawa mani inhlèm loin, a taka thilthawa zawmtu ni tum seng ro. 23 Tu khom, thu ngaithlatu nia zawm si lo chu, darthlalanga mani hmèl inentu ang a nih. 24 Ngun takin a'n en a, a fe hmang a, ieng ang hmèl am a put ti a theinghil nawk nghàl el si. 25 Amiruokchu, tu khom dàn famkim, a mi sukzalentu chu bi ngun a, chuong anga thaw rop a, a thu hriethai chu theinghil el loa thilthaw ngèia zawmtu chu, a thilthaw taphotah hmûingìl a tih. 26 Tu khom sakhaw mi tak nia inngaia a lei vêng hnê si lo chu, mani inhlèmtu a ni a, a sakhuo chu hmangna bo a nih. 27 Pathien mit hmua sakhaw biek dàn thienghlim le suol thang lo chu hi hi a nih: fahra le hmeithaihai an beidong lai kan a, khawvel tirdakum kai loa invong that hi.

James 2

1 Ka unauhai, ei Lalpa ropui tak Isu Krista ringtu ei ni leiin thlei bîk nei naw ro. 2 In inkhawmah rangkachak kutsebi bun, thuom mawi taka inchei hung lût sien la, chun, mi rethei, zakuo top tak hàk hung lût bok sien la, 3 zakuo tha hàk chu lo ngaisaka, "Nang chu thungna thaa hin inthung rawh" ti a, mi rethei kuoma chun, "Nang chu saw taka son ngîr rawh" amanih, "Ka ke bul tuonga hin inthung rawh" amanih in ti si chun, 4 thlei bîk nei a, ngaituona suol putin ro in rêl an naw ding maw? 5 Ka unau dittakhai, ngaithla ro, khawvel ngaia mi retheihai hi ringnaa hausa ding le ama hmangaituhai kuoma a ram tiem chang dinga Pathienin a thlang an ni naw maw? 6 Nangni ruok chun mi retheihai hi in hmusit si a. Mi hausahai hi nangni hnuoisietu le rorêlna ina hnûk lùt hlaktu chêu an ni naw maw? 7 Ama hming ditum tak in put chu hrilsetu an ni naw maw? 8 "Nangma i'n hmangai angin i vênghai i hmangai ding a nih" ti Lekha Thua chuong, Dân poimaw tak hi in zawm chun in thaw tha; 9 thlei bik in nei ruok chun suol in thaw a na, Dàn bawsetu in nih. 10 Tu khomin dàn po po laia pakhat chauh khom a bawsiet chun a rêngin a bawsiet a nih. 11 "Ui re naw rawh" titu chun " Tuol that naw rawh" a ti bok si a; uire naw la khom tuol i that si chun Dàn i bawsiet tho tho a nih. 12 Chuongchun mi sukzalentu Dàn chu hmanga rèlpêk ding ei nizie chu hre zingin thu hril hlak unla, thil thaw bok ro. 13 Zangaina thang loa thil thawtu chu zangaina thang loa a chungthu rèlpêk nîng a tih. Zangaina chu rorêlna chunga lëng a nih. 14 Ka unauhai, miin "Ringna ka nei" ti sien la, a thilthawah suklang bok si naw sien, iem a tangkai a? Chuong ang ringna chun sandam thei a tim? 15 Unaupa amanih farnu amanih saruok le phingtâmin um sien la, 16 nangni laia tuin amanih "Thlamuong takin fe la, lum tak le khop takin um rawh" ti sien la, a taksa ta dinga mamaw a pêk si naw chun ieng am a tangkai a? 17 Chuong ang bokin, thilthaw thang lo chun ringna ringot chu thil thi a nih. 18 "A thenin an ring a, a thenin thil an thaw a ni el annawm" tia thang an um el thei. An leh, thilthawa suklang si loa ringna i nei thei dàn chu mi'n entir la, keiin ringna ka nei a nih ti ka thilthawin inentir ka ti che. 19 Pathien pakhat chauh a um ti i ring maw? I thaw tha ie, ramhuoihai khomin chu chu an ring a, an inthin hlak an sonnaw. 20 Mi invêt, ringna hi thilthaw thang lo chun ieng khom a ni nawh ti i hriet fie nuom maw? 21 Ei thlatu Abrahamin maichàma a naupa Isak a'n hlân khan, a thilthaw leia mi fela ngai a ni naw am a ni? 22 A ringna le a thilthaw chu an thang kop a, a thilthaw chun a ringna chu a sukfamkim tah ti i hriet. 23 Pathien Lekha thu, "Abrahamin Pathien a ring a, a ringna chu a felnaa ruot a nih" ti chu a hung tlung kim a, Pathien ruolpaa inbûk a hung ni tah a nih. 24 A ringna lei chauh ni loin, a thilthaw leiin miin thiem a chang ti in hriet tah. 25 Chuong ang chun nawchizor Rahabi khom khan enthlatuhai kha a lo lawm a, lampui dangah a'n kîrtir a, a thilthaw lei khan thiem a chang a ni naw am a ni? 26 Taksa hi thlarau thang naw chun mithi a ni angin, ringna khom thilthaw thang lo chun thil thi a nih.

James 3

1 Ka unauhai, nangni lai mi tam rak lo chauh zirtirtu hung ni ro, zirtirtuhai hi mi danghai nèka khir lem daia ro rèlpêk kan la ni ding ti in hriet si a. 2 Ei rêngin thaw suol chàng ei nei seng. Tu khom thu hril suol ngai dèr lo chu mi puitling a na, chuong ang mi chun a taksa pum khom a thunun hlak. 3 Sakor bauah thîrbar ei inbùk chun an taksa pum khom nuom nuomin ei kei her thei a. 4 Thli na takin long lien a nuoi lèng lai khom, a long herna chikte chun a khaltuin a nuomna tieng tieng a'n fètir thei a nih. 5 Chuong ang bokin, lei hi taksaa pêng chikte a nia chu uong thei tak a nih. Mei si hlekin rampui a kàng dur dur thei dàn dàm hi ngaituo ro. 6 Lei khom hi mei a na, taksa pêng laia thang, rîtlona hlawm a na, taksa pumpui a sukporche a, hremhmun meia hringnun tawlailir hlieu zingtu a nih. 7 Sa tinrêng, va tinrêng, boka invak chi tinrêng, tuipuia chêng thilhring tinrêng hai hi vài ngam thei an ni a, mihriemin an vài ngam hlak. 8 Lei ruok hi chu tu khomin an khawi ngam thei nawh; suol um tok tok thei lo le thina tûra sip a nih. 9 Leiin ei Pa, Lalpa chu ei inpàk a, ei mihriempui, Pathien angpuia siemhai chu tongsie ei inphur bok a. 10 Bàu pakhata inthokin inpâkna le tongsie ei phù suok hlak. Ka unauhai, chuong ang ding chu a ni nawh. 11 Tui hnâr pakhata inthokin tui inhnik le inhnik lo a suok hlak am a ni? 12 Ka unauhai, theichang kungah oliv a ra hlak am a ni? Grêp kùngah theichang a ra hlak am ? Chuong ang bokin chi khura inthokin fiertui thieng a suok ngai nawh. 13 Nangni lai varna le hriet thiemna nei an um am? Chèt dàn mawi le varnaa inthoka suok thuhnuoirolna neiin, thil tha thawin inlangtir raw se. 14 In lungrilah thîkna kha tak le mani hmasielna in nei chun, chu chu uongpui naw unla, thutak hnawl naw ro. 15 Chuong ang 'varna' chu chung tienga inthoka suok ni loin ramhuoia inthoka suok a ni lem a, a khawvel a, a thlarau bok nawh. 16 Thîkna le mani hmasielna a umna hmuna chun buoina le suolna chi tinrêng a um hlak. 17 Chung tienga inthoka varna hung suok chu a hmasa takin a fîm inthieng a, a dotah inremna a zong a, mi hmákhuo a ngài a, thu a awi a, zangaina le ra thain a sip a, thlier bîk a nei naw a, a lêmder bok nawh. 18 Remna siemtuhaiin inremna chi an tù chu felnain a pâr suok hlak.

James 4

1 Nangni laia insêl inhalna hi khaw laia inthoka hung suok am a na? Nangni sûnga châkna thil insuol zinga inthoka hung suok an naw maw ? 2 Thil dit in nei a, in nei thei si naw a, tuol in that pha a. Thil in inhnar a, in nei thei si naw a, inhalin in indo pha a. In nei nawna san chu Pathien in hni naw lei a nih. 3 In hni khomin in hmu nawh, in hnìna san a'n dik naw a, mani inhoitirnaa hmang dingin in hni hlak. 4 Uirehai, khawvel ruol tha ni hi Pathien hmêlma nìna a nih ti in hriet naw am a ni? Khawvel ruol tha ni nuom taphot chun Pathien hmêlmaah an insiem a nih. 5 Einia a thlarau a sie hi a thîkthu a sie ti Pathien lekha thua a hril hi a hril mei mei in sawn am a ni? 6 Sienkhom, zangaina nasa lema vùr ei ni hi. Pathien Lekha thuah, "Pathienin mi chapohai a dodàl a, Inngaitlawmhai a lunginsiet hlak"ti a ni kha. 7 Chuleiin, Pathien kutah intuklût unla, Diebol ruok chu dodâl ro, chuongchun tlânsan a ti chêu. 8 Pathien hnai ro, ama khomin hnai a ti chêu. Mi suolhai, in kut sawp fai unla; lêmderhai, in lungril sukthienghlim ro. 9 Beidong unla, lungngai unla, tap ro; in innui ri chu lungngainain inchang sien la, in hlimna chu ngûinaah inchang raw se. 10 Lalpa hmaah inngaitlawm unla, chuongchun chawisâng a ti cheu. 11 Unauhai, inhrilse tuo naw ro. Tu khom a unau soisel amanih dem amanih chun Dàn a hrilsiet a, a soisel a nih. Dân i soisel chun Dân zawmtu i ni naw a, rorêltu i ni lem. 12 Dàn petu le Rorêltu pakhat chauh a um- sandam theia sukboral theitu chu. Sienkhom, nang tu am i ni a mani khuo le vênghai chungthu rêltu chu? 13 Ngaithla ro, nangni, "Voisun amanih zîng amanih, chu khuoa chun fèng ei ta, chu taka chun kum khat va sumdawng ei ta, sum tam tak lam ei tih" tituhai, 14 zînga chun in hringna ieng tin am a um ding ti in hriet si nawh. In hringna chu iem a na? Sûm sawt naw te hung inlanga bo nawk el ang chauh a ni si a. 15 "Lalpan rem a ti chun dam ei ta, chu chu kha kha thawng ei tih" in ti lem ding a nih. 16 Tu hin chu chapo takin in uong a. Chuong anga chapo chu suol a nih. 17 Tu khomin thil tha thaw dinga a hriet a thaw si naw chun suol a thaw a nih.

James 5

1 Nangni mi hausahai, ngaithla ro, in chunga rinumna nasa tak hung tlung ding lei hin tap unla, khêk rong rong ro. 2 In hausaknahai chu a rêm zo tah a, in puonhai khom hângthîmin an fâk siet zo tah. 3 In rangkachak le tangkaruo hai khom an nghar-èk zo tah a, a nghar-èk chu in thiem nawzie suklangtu a na, meiin thil a kàng hmang angin, in taksa la fa zo a tih. Ni hnuhnunga hin ro in khawl khawm hnûr a. 4 Ngai ta u, in loa sinthawtuhai hlaw in hrènpêkhai chu an khêk suok a, bu siktuhai beidong khêk ri chun Iengkim Lalpa na a tlung tah. 5 Hnuoia hin inhoi ti tak le nuomtawlin in um a, inthat rûnpui niaa dinga inchawm thâu mei mei in ni tawl hih. 6 Mi Indik chu thiem naw in inchangtir a, in that a, ama hlak chun a dodal si naw cheu. b 7 Chuongchun, unauhai, Lalpa hung hmâ khat sel takin um ro. Lo neituin a lo tharsuok a nghàk dàn hi ngaituo hlak ro; thar hmasa le thar hnuhnungc a nghâk fan fan hlak hi. 8 Nangni khom sel takin um unla, lungril nghet tak put ro, Lalpa hung nawkna ding a hnai ta si a. 9 Unauhai, thiem naw changa in um nawna dingin inchier khum naw ro. Ngai ta u, rorêltu chu kotkhâr bulah a um ta zing a nih. 10 Unauhai, Lalpa hminga thuhriltu zawlneihaiin sel taka an tuor dàn kha entonah hmang ro. 11 Sel taka tuortu chu mi hamthaa kan ngai a nih. Joba tuorselzie le Lalpan a tawpa a thaw dàn khom in hriet. Lalpa chu zangaina le lunginsietnaa sip a ni si a. 12 Chuong po po bâka chun ka unauhai, inkhâm ngai naw ro, vàn amanih hnuoi amanih, thil dang amanih sâlin inkhâm naw ro. "A nih" in ti chu "A nih" ni sien, "A ni nawh" in ti chu "A ni nawh" ni el raw se, chuong naw chun thiem naw chang hlauh rawi in tih. 13 Nangni lai vângduoina tuok an um am? Tongtai raw se. Hlim an um am ? Inpâkna hla sak raw se. 14 Nangni lai damnaw an um am? Kohran upa inkotir sien la, Lalpa hminga hriek nàlin tongtaipèk raw se; 15 ring tlata tongtaina chun damnaw chu sukdam a ta, Lalpan keitho a ta, thil suol a lo thaw tah khom ngaidam a tih. 16 Chuongchun, in suolhai thupha inchawi tuo unla, intongtaipêk tuo unla, sukdamin um in tih. Thahnemngai taka mi indik tongtaina chun thil ropui tak a thaw thei a nih. 17 Elija chu eini anga mihriem ve el a nia chu, ruo sùr nawna dingin thahnemngai takin a tongtai a, kum thum le thla ruk sûng hnuoi chungah ruo hrim a sûr nawh. 18 A tongtai nawk a, vànin ruo a'n sùrtir a, hnuoiin thlai thar a'n suo nawk tah a nih. 19 Ka unauhai, nangni lai thutaka inthoka pêt hmang in um chun tuin amanih thuoi kîr raw se. 20 Hi hi hre zing ro, mi suol an indik nawnaa inthoka hung thuoi kîr nawktu chun thinaa inthokin a thlarau a sandam bakah a suol tam tak a'n khumpèk nìng a tih.

1 Peter 1

1 Kei Peter, Isu Krista tirko hin Ponto ram dàm, Galati ram dàm, Kapadokia ram dàm, Asia ram dàm le Bithunia rama dàm Pathien mi thlang um darhai chu chibai ka bûk. 2 Pa Pathien hriet lawk anga thlang, Isu Krista thu awi ding le a thisena tlêng fai dinga Thlarau sukthienghlimhai chu in nih. In chungah lunginsietna le inremna sukpungin um raw se. 3 Ei Lalpa Isu Krista Pathien le Pä chu inpâkin um raw se. Ama chun a zangaina ropui tak leia mithi laia inthoka Isu Krista a keithona zàra chun beiseina hring nei dingin nun thar a mi pêk a. 4 Ro se thei lo, hmêl hem lo le chuoi thei lo hluotu ding ei lo ni tah a, chu chu in ta dingin vànah sie diem a ni tah. 5 In sandamna buotsaia um tah chu hun nuhnunga suklanga a um ni chenin, ama in ringna leiin Pathien thilthawtheina chun hum zing a tih. 6 Hi sawt naw te sûng hin fiena le lungngaina tinrêng in tuok a ni khomin, hlim takin um ro. 7 Chuong thil chu in ringna a tak ngeizie fiena ding a nih. Se thei rangkachak hman meia fie a ni chun, a nêka hlu lem in ringna chu fie ding a ni hrim a nih, Isu Krista hung inlang phaa a hlîr ni a, inpâkna dàm, ropuina dàm le chawimawna dâm in dong theina dingin. 8 Ama hmu lo khomin in hmangai a, tu hin ama in la hmu hrì nawa chu in ring a, hlimna hril seng lo khopa nasain in sip a ni hi, 9 in ringna ra, in thlarau sandamna chu in hmu mèk leiin. 10 Hi sandamna chungchang hi zawlneihaiin fimkhur taka zongin an sui a, in chunga Pathien thilpêk, lunginsietna hung tlung ding chu an lo puong a nih. 11 Annia Krista thlarau um chun Krista tuorna le a hnunga chawimawia a um ding thu chu a'n hriettir lawk a, a hung ding le a hung dàn ding chu hriet an tum hlak a nih. 12 Anni ta ding ni loin nangni ta dinga rongbawl an nih ti inhriettir an ni a, vàna inthoka tirh Thlarau Thienghlim hmanga in kuoma Chanchin Tha hriltuhai khan chu thu chu an hril ta chêu kha. Chuong thil chu vàntirkohai chen khomin hmù vè an chàk ngawi ngawi a nih. 13 Chuleiin, in lungril chu thilthaw dinga inpei diemin, mani inthunun unla, Isu Krista hung inlang huna lunginsietna vùra in um ding chu beisei tlat ro. 14 Nau thu awi thei anga umin, kha hmaa in mawl laia châkna suol in zui ang khan zui ta naw ro. 15 A kotu cheu a thienghlim angin nangni khom in chèt dàn iengkimah lo thienghlim lem ta ro. 16 Pathien Lekha thuin, "Kei ka thienghlim a, nangni khom in thienghlim ding a nih" a ti si a. 17 Paa in ko hi thlier bik nei lo, mi tin an thilthaw ang peia rêlpêktu a ni leiin, hi khawvela in châm sùng hin ama chu inzà le tì dêkin khawsa ro. 18 In thlatuhaia inthoka in dong sawng, nun dàn invêtthlâk taka inthoka thil se thei tangkaruo le rangkachaka intlan in ni naw a, 19 beramte hmêl hem lo le soisèl bo, Krista thisen hlua intlan in ni lem ti in hriet si a. 20 Ama chu leilung insieng hmaa ruot lawk a ni a, tuta hun nuhnunga hin in ta dingin a hung inlang tah a nih. 21 Mithi laia inthoka keithotu le ropuina petu Pathien chu ama leiin in ring tah a, chuongchun Pathien chu in ringna le beiseina innghatna tak a hung ni tah a nih. 22 Thutak zawma in insukthieng tah leiin unauhai khom titak zetin in hmangai tah a, chuleiin lungril po poin inhmangai tuo ro. 23 Chi hmon thei ni loin, chi hmon thei lo Pathien thu hring le tloa inthoka pieng thar in nih. 24 "Mi po po hi ram hlo ang an na, An ropuina khom hlo pâr ang a nih; Hlo chu a hung vuoi a, A pâr chu a til a; 25 Lalpa thu ruok chu, Chatuonin a um zing"ti a ni si a. Chu ngêi chu a nih Chanchin Tha an hril chêu kha.

1 Peter 2

1 Chuongchun, suol tinrêng bânsan unla, inhlêm le inlêmder hai, inthîk le inhril siethai po po bânsan ro. 2 In sandamnaah in inthanglien pei theina dingin, naute pieng hlim angin thlarau tieng nenetui, tui pol lo chu châk hle ro. 3 "Lalpa thatna chu hang intem ve hrim ta u" ti ziek a ni kha. 4 Ama chu pan ro, Hringna Lung, mihriemhai hnawl, Pathien thlang hlu tak chu a ni si a. 5 Chuongchun, nangni khom hringna lung anga thlarau in dinga rem khawm le thiempu thienghlim hung ni vein, Isu Krista zàra Pathien pom tlàk, thlarau tienga inthawina chu inhlàn ro. 6 Pathien Lekha thuin, "En ta, lungphum hlu tak ka thlang chu, Zaiawn thutah ka phûm a; Tu khom ama ring zotu chu, Muolpho ngai naw nih" a ti si a. 7 Nangni ringtuhai ta ding chun lung hlu tak a na, ring nawtuhai ta ding ruok chun "In bawltuhai lung hnawl ngei kha, A kila lung tangkai tak a hung ni tah" a ti bàkah ziek danga chun, 8 "Mi insui thlûkna ding lung, An intol thlûkna ding lung ngei chu" tiin a chuong ve thung a. Thu an awi naw leiin an tlu a, chuong anga um ding rènga ruot chu an nih. 9 Nangni ruok chu hnam thlang, Lalpa thiempu, hnam thienghlim, Pathien ta bik, ama var ropui taka chêng dinga thima inthoka ko suoktu chêu inpâkumzie chu puongtu ding in nih. 10 Kha hma khan Pathien mi in ni ngai naw a, tu ruok hin chu in ni tah; zangaina hlaw ve ngai lo khan tu hin chu zangaina in lo chang tah a nih. 11 Unauhai, hi khawvela hin ram dang mi le mikhuol el in ni leiin, in thlarau kala do hlaktu châkna suolhai laka chun inthier fihlîm dingin ka ngèn chêu a nih. 12 Ringnawtuhai lai mawi takin khawsa unla, thil suol thawa an intum chêu a lo ni khomin in thil thaw thathai an mit ngeiin hmûng an ta, Pathienin a mi hung kan ni pha leh ama chawimawi thei an tih. 13 Lalpa leiin mihriem ruot thuneituhai kuoma chun intuklût ro. Thuneina insâng tak neitu lal tak kuoma dàm le 14 thil suol thawtuhai hrem ding le thil tha thawtuhai chawimawi dinga lalin a tir sawng lârsaphai thu chu awi ro. 15 Ieng khom hre lohai thu hril invêtthlàkhai chu thil tha thawa sêl dong dingin Pathienin a dit chêu a nih. 16 Pathien bawihai in ni ang hrimin, zalèn unla, sien khom in zalènna chu suol thawna dinga suonlam remchângah hmang naw ro. 17 Mi po po inzà thiem unla, unauhai hmangai unla, Pathien ti unla, laltak chu chawimawi ro. 18 Nangni siehlawhai, in puhai thupèk awi unla, a tha le ngilneihai chauh ni loin, a khauhhai khom inzà ro. 19 Miin Pathien lawmzawng nia a hriet tlat leia a tuor kher naw ding khom a tuor chun, chu chu Pathien lawmzawng a nih. 20 In suol leia in tuor chun sel takin tuor inla khom in ta dingin hming thatna ding iem um a ta? Thil tha in thaw sà khoma kut in tuor ruok chun Pathien lawmzawng a nih. 21 Hieng anga um dinga ko in ni a, Krista khomin in ta dingin a tuor a, a hniekhnung in zui theina dingin enton ding a màksanpêk chêu a ni kha. 22 Ama chun thil suol a thaw ngai naw a, a bàuah hlêmna thu a suok ngai bok nawh. 23 Miin an biek el khomin a thungrul ve naw a, a tuor laiin a vau lèt ve naw a, indik taka rorêltu kuoma chun a'n koltir lem hlak a nih. 24 Suol thisana felna tieng ei hring theina dingin, ama taksa ngeiin thinga khan ei suolhai a phur a, a hliemna behai chun sukdam ei ni tah. 25 Beram angin lam in inhmang tah a, tu ruok hin chu in thlarau Vêngtu le Hotu kuoma chun in hung kîr nawk tah a nih.

1 Peter 3

1 Chuong ang bokin nangni nuhai, in pasalhai thu awi ro; chuongchun anni lai ringnawtu an lo um a ni khomin thu hril kher ngai loin in nungchang chun hnè el a tih, 2 anni ngeiin thienghlim tak le inza taka in khawsakzie chu an hmu ding a ni si a. 3 In hmèl thatna chu puo tieng incheina sam chei lêr dàm, incheina hmangruo rangkachak dâm le silfèn to inbel dàma innghat ni naw raw se. 4 Chuong nêk hmanin, sûng tieng hmêl thatna, nunnêmna le zâidawna thlarau, mawina chuoi thei loa inthuom ni lem raw se. Chu chu Pathien mit hmuah a hlu hlie hlie a nih. 5 Chuong ang chun tiena tlânga nuhmei thienghlim, Pathiena beiseina innghattuhai kha, an pasalhai thu awinain an lo inthuom mawi a nih; 6 Sarin Abraham thu a awi a, "Ka lalpa" tia a ko ang khan. Indik taka in thaw chun Sari nauhai nîng in ta, titna ding hrim nei naw ti niu. 7 Nangni pähai, chuong ang bokin nupa in nìnaah in nuhmeihai lakah zâi daw unla, derdêp lema siem an ni lei le Pathien lunginsietna thilpêk hringna chu hluopuitu chèu an ni leiin, inzà takin cheibawl ro. Chuongchun, in tongtaina hluotu ieng khom a um naw ding a nih. 8 A tawp taka chun, in rênga lungril hmun khat putin, inlainata unau anga inhmangai tuoin, inlunginsietin thuhnuoirol takin um ro. 9 Suol chu suolin thungrul naw unla, tongsie khom tongsiea thungrul loin malsawmpêk lem ro; malsawmna dong dingin annawm Pathienin a ko chêu chu. 10 Pathien lekha thuin, "Tu khom mani nun thlâkhla a, Ni tha hmua dam sawt nuom chun, Suol lakah a lei vêng tha sien, A hmùrin khêl hril naw raw se. 11 Suol nghatsanin thil tha thaw ro, Inremna zongin hnot pei ro. 12 LALPAN mi felhai a hmu zing, An ko pha a ngaithlâk var hlak. Suol thawtuhai laka ruok chu, LALPA hmèl a'n tùr zing hlak"a ta. 13 Thil tha thaw tieng thahnem in ngai chun tuin am in chungah thil tha naw a thaw ding? 14 Thil indik in thaw leia tuor in ni chun hamthaah inngai ro. An thil tìhai chu ti ve naw unla, sukthlaphangin um naw ro. 15 In lungrilah Krista chu inzain Lalah sie ro. In beisei san indontu taphot chêu chu hril fie nghal dinga inpei sa zingin um ro. 16 Nisienlakhom, thuhnuoirol le hawihawm takin, sie le tha hrietna fîm tak neiin thaw hlak unla, chuongchun, Kristaa in um dàn tha hril hnawmtuhai chu sukzakin um an tih. 17 Pathien remtia tuor in ni rau rau si chun thil suol thaw leia tuor nêkin thil tha thaw leia tuor chu a tha lem. 18 Krista khom ei suolhai leiin voi khat a thi a, Pathien kuoma a mi thuoi theina dingin, mi fel chu mi fel naw ta dingin a thi a nih. Taksaa sukhlum a na, thlaraua ruok chu sukhringin a um a. 19 Ama chun lung ina intâng thlarauhai kuoma khom thu a zu hril a. 20 Chuonghai chu Nova long tuk sûnga Pathienin dawthei taka a nghâk laia awi nuom nawtuhai thlarau kha an nih. Longa chun mi tlawm te, pariet chauh sanhim an nih. 21 Chu angpui, baptisma hin, Isu Krista thonawkna leiin tu hin a sandam tah chêu a nih; baptisma chu taksa tirdakum sawpfaina chauh a ni naw a, sie le tha hrietna fîm taka Pathien kuoma thu tiemna hi a ni lem. 22 Isu Krista chu vànah fein Pathien chang tieng a um a, vàntirkohai le lalna le thuneina po po chu a thuhnuoiah an um ta vong a nih.

1 Peter 4

1 Chuongchun, ei ta dinga Kristan taksaa a tuor angin nangni khomin chuong ang lungril chu put ve ro; taksa ngeia tuortu chun suol a bànsan ta hlak a; 2 taksa puta a dam sûng chun mihriem châknahaia hring ta loin Pathien ditzawngin a hring ta lem hlak a nih. 3 Ringnawtuhai nuomzawnga porchè taka khawsa a, tisa châknaa inhmang a, uoiin inrui a, hlimhlop le zu hmun hlimna chèn a, mi lem biekna tirdakum taka kha hmaa hun inkhaw ral zozai kha a huntawk tah. 4 Tu hin an nuomtawlnaa in intawl ve ta naw leiin mak an ti a, an hril siet chêu a ni hi. 5 A la dam laihai le thi tahai ngaituo dinga inpei zing sa kuoma chun an chungthu anni ngeiin la hril an tih. 6 Hi lei hin annawm lo thi tahai kuoma khom khan Chanchin Tha hril a ni chu, mi danghai ang boka an mihriem taksa chungthu rêl a ni phaa Pathien hmaa thlaraua an hring theina dingin. 7 Thil po po tawp hun chu a hnai ta a, chuleiin in tongtai theina dingin lungril fîm tak putin mani inthunun ro. 8 Thil dang po nêkin lungril taka inhmangai tuo uor ro, inhmangaina chun suol tam tak a'n khum si a. 9 Chier loin inmikhuol tuo ro. 10 Mi tinin thlarau thilpèk in dong seng chu mi danghai rongbawlpèkna dingin hmang unla, kong hrang hrangin Pathien lunginsietna chu sem dar ro. 11 Tu khomin thu a hril chun Pathien thu ngei hril raw se. Rongbawltu khomin Pathienin hràtna a pèk angin bawl raw se; chuongchun, Isu Krista leiin Pathien chu iengkimah chawimawiin um thei a tih, ropuina le thilthawtheina chatuonin ama ta a ni si a. Amen. 12 Dittakhai, fiena rinum tak in tuok hi thilmak tak hung tlung angah ngai naw ro. 13 Krista tuorna intawmpuitu in ni leiin lawm lem unla, ropui taka a hung inlang pha chun lawm le hlimin in la sip ding a nih. 14 Krista hming leia hal in tuok chun in vangnei ie, nangniah thlarau ropui, Pathien thlarau chu a chêng tìna a nih. 15 Nangni lai tu khomin tuolthat lei amanih, rûkrùk lei amanih, thil suol thaw lei amanih, mi sukbuoi leiin amaniin tuor naw raw se. 16 Kristien in ni leia tuor in ni ruok chun inzak naw unla, Krista hming in put leiin Pathien chawimawi lem ro. 17 Pathien sûngkuohai lai hin rorêlna tan a hun tah khop el. Lo tan ni tah inla, Pathien Chanchin Tha awinawtuhai ngìrhmun chu iem ni tâng a ta? 18 Pathien Lekha thuin, "Mi indikhai hman sandam a harsa chun, mi suolhai le sakhaw mi lohai chan lem chu ieng top am ni tâng a ta? 19 Chuong lei chun, Pathien remti anga tuortuhai chun thil tha thaw peiin, an thlarau chu Siemtu ringum tak kuomah inkoltir raw hai se.

1 Peter 5

1 Nangni laia kohran upahai chu kei, upa ve bok, Krista tuornahai hmutu le ropuina hung inlang ding chang ve beiseitu hin ka'n fui a ni. 2 Nangni laia Pathien beramhai chu enkol tha ro. Thaw dinga ti in ni lei ni loin, Pathien dit dàn anga nangnia thaw inhawkna leiin thaw unla, sum tienga in inhawmthaw lei ni loin, rongbawl nuomna lungril putin enkol ro. 3 In enkolhai chungah insuklal naw unla, an enton tlâkin um lem ro. 4 Chuongchun, Beram Vêngtu Laltak a hung pha chun ropuina lallukhum chul thei lo chu chang in tih. 5 Chuong ang bokin nangni thalaihai, upahai thu awi ro. In rêngin thuhnuoirolnaa inthuomin rong inbawlpêk ro. "Pathienin chapohai a dodàl a, inngaitlawmhai ruok chu a lunginsiet hlak" ti a ni si a. 6 Chuleiin, a hun takah chawimawia in um theina dingin Pathien kut hrât tak hnuoia chun inphàhnuoi ro. 7 In lungzingna po po ama chungah innghat vong ro, a ngaisak èm êm chêu a nih. 8 Ngaiven unla, fimkhur ro; in hmelma Diebol chun sakeibaknei inrùm angin sè ding zongin a vê zing chêu a nih. 9 Ringnaah ngîr nghet unla, ama chu do ro. Khawvel hmun danga in unauhai khomin chuong ang bok chu an tuor ti in hriet si a. 10 Sawt naw te in tuor hnungin, Kristaa a chatuon ropuina chang dinga kotu chèu, lunginsietnaa sip Pathien chun hung tungding a ti chêu a, siem thaa sukhrâtin, suknghet a ti chêu. 11 Ama kuoma chun thilthawtheina kumkhuoin um raw se. Amen. 12 Unaupa, mi ringum a nih ti ka hriet Sila kuta hin hi lekha tawite hi ka hung thon chêu a nih. Hi hi Pathien lunginsietna chu a nih ti inhriettir ding chêu le chu taka chun ngîr nghet tlat dinga ka'n fùina chêu a nih. 13 Babulon kohran, nangni ang boka thlanghai hin chibai an bùk chê; ka naupa Marka khomin a bûk chèu. 14 Krista hmangainaa kut inchelin, chibai inbûk ro. Nangni Kristaa umhai po po kuomah inremna um raw se.

2 Peter 1

1 Isu Krista siehlaw le tirko Simon Peter chun, mi sandamtu Isu Krista zàr le ei Pathien felna zàra ringna hlu tak ei nei ang nei vehai chu chibai ka bûk chêu. 2 Pathien le ei Lalpa Isu in hrietnaah lunginsietna le inremna in chungah sukpungin um raw se. 3 A ropuina le thatna chang ve dinga mi kotu ei hrietna zàra chun Pathien tîna tienga ei hring theina dingin Pathien thilthawtheina chun ei mamaw iengkim a mi pêk a. 4 Chuongchun, thilpêk ropui tak le hlu tak a tiem chu a mi pèk tah leiin, khawvel suol châkna, mi sukse thei laka inthok chun suokin, Pathien zie in intawmpui thei tah a nih. 5 Hi lei hin theitawp suo unla, in ringnaa chun thatna thang sa sien, in thatnaa chun hrietna, 6 in hrietnaa chun mani inthununna, mani inthununnaa chun selna, 7 in selnaa chun Pathien ngaisakna, Pathien in ngaisaknaa chun unauhai làinatna, unauhai in làinatnaa chun hmangaina thang sa raw se. 8 Chuong chu in nei a, a pung pei chun ei Lalpa Isu Krista hrietnaah mi taima tak le tangkai takah siem a ti chêu. 9 Chuong thil nei nawtuhai chu mitdel, khaw hmu tawi, kha hmaa an suolhai kha sawp faipêk vong an ni tah ti theinghil tahai chu an nih. 10 Chuongchun, unauhai, a kona le a thlangna chèu hi suklang dingin theitawpin thang la zuol sauh ro; chuong anga thawtuhai chu ieng lai khomin tlu se naw ni hai. 11 Chuongchun, ei Lalpa le Sandamtu Isu Krista chatuon ramah chun lawm takin inlûttir a ti chêu. 12 Chuleiin, thutak in hrieta khan nghet takin um tah ni inla khom hieng thu hi inhriet nontir rop chêu ka nuom a nih 13 Hi taksa puon ina ka chèng sûng hin, chu thutak inhriet nontir rop cheu chu ka thaw dingah ka ngai tlat a. 14 Ei Lalpa Isu Kristan chieng taka a mi hril angin, hi ka taksa in hi ka suoksan vak ding a ni tah ti ka hriet. 15 Ka suoksan hnunga khom, ieng lai khoma hieng thuhai hi in hriet zing theina dingin theitawp ka suo a nih. 16 Thilthawtheina le ei Lalpa Isu Krista a hung nawk ding thu kan hril lai cheu khan tienami phuok fawm el hril chêu kan ni naw a, mit ngeia a ropuina hmutu kan nih. 17 Pa Pathiena inthoka chawimawina le ropuina a dong lai khan, Ropuina Insângtaka inthokin rawl a hung suok a, " Hi hi ka Naupa, ka Dittak chu a nih, a chungah ka lawm bèk bêk a nih" a hung ti a. 18 Chu rawl, vàna inthoka hung suok chu, keini khomin tlâng thienghlima a kuoma kan um laiin kan hriet ve a. 19 Zawlneihai thu lo puong ta kha a'n dik ngei ti keini khomin kan pom nghet zuol a, nangni khom in lungrila Sikhawvar a hung inlang hma chun zàn inthim, khaw var hmaa khawnvar êng angin, chu thu chu in lungril êntuah hmang inla thâng a tih. 20 Pathien Lekha thua hrillawkna thuhai hi zawlneiin ama ngaidàna a hril fie anga hung tlung a ni ngai nawh ti hre hmasa phot ro. 21 Hrillawkna hrim hrim hi mihriem thu suok a ni ngai naw a, mihriemin Thlarau Thienghlim thuoia Pathiena inthoka thu suok an puong a ni chauh lem.

2 Peter 2

1 Nisienlakhom, keini mihai lai zawlnei tehlêm an um hlak ang khan nangni lai khom zirtirtu indik lo an hung suok ding a na, mi sukse thei, zirtirna indik lo a rûkin hung put lût an ta, an Laltak, anni intlantu chu phatsan an ta, anni ngei chungah sietna inrang takin intlungtir an tih. 2 An um dàn inzapuium tak chu mi tam takin zui vèng an ta, thutak lampui hi sukpawi an tih. 3 Sum an hmu theina dingin huomhap taka thu phuok fawm hmangin, sumdawngnain hmang an ti chêu. An chungthu rêlna, thiemnaw an changna thu chu an lu chungah a um ta zing a, sietna chun in loin a'n chân ràn tawl a nih. 4 Vàntirkohaiin thil suol an thaw lai khan Pathienin a hlà tawl naw a, hremhmunah a pei a, Rorêlna Ni nghâk dingin khuorkhurûm inthimah a thlâk tawl a ni kha. 5 Tien lai khawvel khom a hlà bik nawh; khawvel suol tak chungah tui a'n lêttir a, felna thu puongtu Nova le mi dang pasari chauh san suok an ni kha. 6 Sodom le Gomora khuohai khom thiemnaw inchangtirin mei vâmah a'n changtir a, Pathien ngaisak nawtuhai a hrem dàn ding inentirna dingin a hmang a ni kha. 7 Mi fel Lota, mi suolhai um dàn porchè tak el poiti êm êm hlaktu ruok chu a san suok a, 8 chu mi tha tak chu anni laia khawsa ve hlak a na, an thilsuol thaw a hmu le a hrietin a lung a na êm êm hlak a nih. 9 Lalpa chun ama tituhai chu tuorna laka inthoka san suok dàn le Rorêl Ni a hung tlung hma khoma mi suolhai hrem dàn a hriet a, 10 an tisa châkna tirdakum anga umhai le Pathien thuneina hmusittuhai ngat lem chu hrem dàn ding a hriet nawkzuol. Hieng zirtirtu indik nawhai hi an invèt huoi a, an chapo a, vàn mi ropuihai khom khi hril siet an tì nawh. 11 Anni nêka hrât lem le thil thaw thei lem vàntirkohai hmanin, Lalpa hmaah hieng mi ropuihai chungchang hi an hril chàngin tong sie an hmang ngai nawh. 12 Sienkhom, hienghai ruok hin chu an hriet thiem phâk naw taphot hril siet an chìng a. Ramsa kol, mani pienvar chauh hmang thei, mana that el dinga hung pienghai ang hi an nih. 13 Poi an tawk ang char chu an suol man la tuor an tih. Inhoi an tizawng chu sùnnithlâk thlàka nuomchèn hi a nih. Nangni le hmangaina ruoi thè hi inhoi an tizawng a na, mi tirdakum le mi khawlo, nangni laia inzep an ni si a. 14 An mitin uirepui ding zongin an melkai zing a, suol thaw an nghok thei nawh. Mi lungril nghet nawhai an zawl thlùk a, duâm hi an chemkalna zawng a na, tongsephur nauhai an nih. 15 Lampui indik chu an pêtsan a, lam an inhmang a, rîtlona ra lawmtu Bosora naupa Balaam lampui chu an hraw a, 16 sienkhom Balaam chu a bawsietnaah zilhauin a um a, sabengtung tong thei lo chu mihriem anga hung tong suokin, zawlnei invêt thil thaw tum chu a khappèk a ni kha. 17 Hieng mihai hi tuikhur hnàr kang châr tah le sûm leivàk, thliin a lên vèl ang mei mei chauh hi an ni a, thima khom thim sa tak chu an umna dinga ruot a nih. 18 Umzie nei lo thu invêtthlak tak takhai chu uong takin an inpawtpui a, mihriem tisa châkna suol tieng chok tho thei thilhai chun mi, an nun suol laka inthoka intâl suok hlimhai chu, an zawr a, 19 zalènna pèk an tiem a, anni hlak chu an thil chîng tha lo bawia intâng an ni zing bok si. Tu el khom hi ama thuhnêtu bawia intâng a nih. 20 Ei Lalpa le Sandamtu Isu Krista hrietna leia khawvel suol nghatsantuhai chu suola an inawk nawk chun a tira an um dàn nêkin a nuhnunga an um dàn chu a se lem dai hlak. 21 Thupêk thienghlim dong ta zeta nghatsan nawktuhai chun felna lampui hi lo hre naw law law hai sien, an ta dingin tha lem a tih. 22 An um dàna inthokin hieng thuvarhai indikzie hi a'n lang chieng hle: "Ui chu a luoka bok a kîr nawk hlak" ti le "Vokpui insiltir chu chirhaka bok a'n buol nawk hlak" tihai hi.

2 Peter 3

1 Dittakhai, hi lekha hi in kuoma ka lekhathon voi hnina a nih. In hriet tah sa inhriettir non nawk ding cheu le in lungrilhai ngaituona thienghlima chok har dingin voi hnih zet ka hung thon chêu a ni hi. 2 Zawlnei thienghlimhai thu hril lawk le Lalpa le Sandamtu thupèk, in tirkohaiin kha hmaa an hril tah chêu kha, hre zing ro. 3 Ni nuhnunga chun hmusittu, mani chàkzawng ang peia khawsahai chu hung suok an tih ti hre hmasa ro. 4 Hmusit èm êmin, "A hung nawkna ding thutiem kha iem an ta le? Ei thlatuhai an thi zo tah a, thilsiem tan tira inthokin iengkim a la pangngai zing an naw maw?" tiin la cheksol an tih. 5 Vànhai khi tiena tlânga Pathien thua inumtir a nizie dàm, hnuoi hi tuia inthoka tui hmanga inumtir a nizie dàm, 6 tui bok chu lêtin khawvel hlui a chîm a, a suksiet thu hai dàm kha an theinghil lui a. 7 Pathien ngaisak nawtuhai chungthu rêl hun le sukbohmanga an um nia meia raw fai dingin tuta vànhai le hnuoi khom hi Pathien thu bokin a la hlà a nih. 8 Ka ruol dittakhai, hi thil pakhat hi theinghil naw ro: Lalpa ngaiah ni khat hi kum sângkhat ang a na, kum sângkhat khom hi ni khat ang a nih. 9 Lalpa chu a thutiem hlen kongah muongchâng anga mi thenkhatin an ring angin a muongchâng nawh. Tu khom bohmang lo a, mi po poin an suol sim a, a kuoma an kìr a dit leiin nangni lakah a dawthei a ni chauh lem. 10 Lalpa Ni chu rûkru angin hung tlung a tih. Chu ni chun ri râpthlâk tak leh vàn khi bohmang a ta, a sûnga um po po kàng hmang a ta, hnuoi khom a sûnga um po po leh kàng fâi a tih. 11 Hienghai hi chuong anga se vong ding an ni si chun, nangni rawi kha ieng am ni in tum a? 12 Pathien ni tiem nghâkhlâ taka in Tlumte thlîr zing lai hin mi thienghlim le Pathien tienga inhmang mi in ni ding a nih. Chu ni chun vàn khi meia raw hmang nîng a ta, a sûnga um po po khom intui ral vong a tih. 13 Nisienlakhom, eini nghâk ruok hi chu Pathien thutiem, hnuoi thar le vàn thar, felna in chu a nih. 14 Chuongchun, dittakhai, hieng thil in nghâk lai hin Pathien hmaa thienghlim le soisel boa um dingin theitawp insuo unla, ama leh inrem ro. 15 Lalpa dawtheina hi sandam in ni theina hun remchàngah ngai ro. Pathienin varna a pêk angin ka unaupa dittak Paula khomin hieng thu hi a ziek hlak a. 16 A thu ziek thenkhat chu hriet thiem el a'n tak a, ieng khom inchûk lo le mi nghet nawhaiin Pathien Lekha thu dang an ngai kawi ang bokin an ngai kawi a, anni le anni chungah sietna an intlungtir pha hlak a ni kha. 17 Dittakhai, nangni chun in hriet tah leiin fimkhur ro, chuong naw chun bawsetuhai suolnain thuoi hmang vèng a ti chêu a, in nghet that lai hi tlu pal hlauh rawi in tih. 18 Ei Lalpa le Sandamtu Isu Krista hrietnaa dàm, lunginsietnaa dàm inthang lien pei ro. A kuoma chun ropuina tuta le chatuon chenin um raw se. Amen.

1 John 1

1 Atira inthoka um, naa kan hriet, mita kan hmu, kan thlîr zing le kut ngeia kan tawk Hringna Thu chu a nih kan ziek hi. 2 Chu hringna chu a hung inlang a, kan hmu a, hrepuituah kan thang a; chu chatuon hringna, Pa kuoma um, kan kuoma hung inlang chu a nih in kuoma kan inhriettir hi. 3 Nangnin in mi pawl ve theina dingin kan hmu le kan hriethai chu kan hril chêu a; ei inpawlna chu Pä le a Naupa Isu Kristaah a nih. 4 Kan lawm a kim theina dingin hieng thu hi kan ziek a nih. 5 Thucha, a kuoma inthoka kan hriet, kan hril sawng chêu chu hi hi a nih: Pathien chu var a ni a, amaa chun thim hrim a um nawh. 6 Ama leh kan inpawl ti sia thimah ei um si chun khêl ei hril a ni a, thutakah ei um nawh. 7 Amiruokchu, vara ama a um anga eini khom varah ei um chun ei inpawl tlâng a nih; chun, a Naupa Isu thisenin ei suol po po a mi sawpfaipèk hlak. 8 Suol nei loa ei inhril chun mani ei inhlèm a ni a, thutak einiah a um nawh. 9 Ei suolhai thupha ei chawi chun ei suolhai ngaidamin, ei fel nawna po po tlêng fai a tih, ama chu ring a umin a fel si a. 10 Suol thaw loa ei inhril chun ama chu khêlhlipah ei siem a ni a, a thu khom ei nunah a um nawh.

1 John 2

1 Ka nau dittakhai, suol in thaw nawna dingin hieng thu hi ka ziek a nih. Tu khomin suol a thaw ruok chun Pa kuoma hrilpuitu Mi fel, Isu Krista chu ei nei. 2 Ama chu ei suol thawina dinga thilhlân a nih; eini suol chauh ni loin, khawvel pumpui suol ta ding khomin a nih. 3 A thupêkhai ei zawm chun ama ei hriet ti a chieng. 4 A thupêkhai zawm si loa "Ama ka hriet" titu chu mi khêlhlip a ni a, thutak amaah a um nawh. 5 Tu khomin a thu a zawm chun Pathienin a hmangaina chu amaah sukfamkimin a um takzet a nih. Chu chu amaah ei um zing ti ei hriet chiengna a nih. 6 "Amaah ka um zing" titu chun Krista nun lampui a hraw vê ngèi ding a nih. 7 Dittakhai, thupêk thar in kuomah ka ziek naw a; thupêk hlui, atîra inthoka in nei tah kha a nih ka ziek lem. Thupêk hlui chu in hriet tah sa vong a nih. 8 Sienkhom, in kuoma thupêk ka ziek hi kong khata chu a thar a nìna a um; chu chu ama le nangniah a'n dikzie a'n lang a, thim chu a'n kieng mêk a, var tak tak chu a hung êng dêr tah a nih. 9 Tu khom vara um inti a, mani unau theida si chu tu chen khom hin thimah a la um zing a nih. 10 Mani unau hmangaitu chu varah a um zing a, ama ta dingin ieng khom insui thlûkna ding a um nawh. 11 Mani unau theidatu ruok chu thimah a um a, thimah a'n vàk a, thimin a mit a sukdel leiin a fèna chin khom a hriet nawh. 12 Nauhai, ama hming leia in suolhai ngaidam a ni tàk leiin ka ziek a nih. 13 Pähai, a tîra inthoka um zing chu in hriet tah leiin in kuomah ka ziek a nih. Tlangvàlhai, mi suol chu in ngam tàk leiin in kuomah ka ziek a nih. Naupanghai, Pä chu in hriet tah leiin in kuomah ka ziek a nih. 14 Pähai, a tîra inthoka um chu in hriet tah leiin ka ziek a nih. Tlangvàlhai, in hràt a, Pathien thu nangniah a um leia mi suol chu in ngam tàk leiin, in kuomah ka ziek a nih. 15 Khawvel le a sûnga umhai hi hmangai naw ro. Tu khomin khawvel hi a hmangai chun Pa chu a hmangai naw a nih. 16 Khawvela thil um po po-tisa châkna hai, mit châkna hai, mani thil nei le thil thaw uongpuina- hai hi Paa inthoka suok a ni naw a, khawvela inthoka suok a ni lem 17 Khawvel hi a chàkna pumin a bohmang mèk a, Pathien ditzawng thawtu ruok chu kumkhuoin hring zing a tih. 18 Nau dittakhai, hun nuhnung tak a ni tah a, Krista dodàltu an hung suok ding ti in hriet tah ang khan, tu hin Krista dodàltu tam tak an hung suok tah a; chu lei chun hun nuhnung a ni tah ti ei hriet. 19 Anni chu eini laia inthokin an suok a, ei mi le sa tak tak an ni naw hrim a, ni hai sien chu eini lai um zing an tih. An mi suoksan khan eini mi le sahai an lo ni vong tak tak nawzie a suklang. 20 Nangni ruok chu Mi Thienghlim chun hriek a nâl tah chêu leiin in rêngin thutak chu in hriet. 21 Thutak chu in hriet naw leia ziek ka ni naw a, in hriet lei le thutaka inthokin khêl a suok ngai naw leia ziek ka ni lem. 22 Isu chu Krista a nih ti pom nawtu nêka khêlhlip tu am a um a? Pä le Naupa pom nawtu chu Krista dodältu a nih. 23 Tu khom Naupa pom nawtu chun Pa khom a pom naw a; Naupa pomtu ruok chun Pa khom a pom a nih. 24 Nangni ruok chun a tira inthoka in hriet kha nangniah vong zing ro; chuonga in um zing chun Paah le Naupaah chun um zing in tih. 25 Hi hi a nih a thutiem, ama ngeiin ei kuoma a tiem kha: chatuon hringna chu. 26 Nangni thuoi hmang tumtuhai chungthu ka ziek a ni hih. 27 Nangni chu hriek nàl sa in ni tah a, chu chu nangniah a um zing a, tu dang inchûktir khom in ngai nawh. A hriek nâlna cheu chun thil tinrêng a'n chûktir lem chêu a, chu chu a'n dik a, khêl a ni nawh. Chuongchun, a zirtir chêu ang tak khan amaah um zing ro. 28 Tuhin Nau dittakhai, ama a hung inlang phaa lung ngam tak le inzak loa ei um theina dingin, amaah um zing ro. 29 Ama chu mi indik tak a nih ti in hriet chun indik taka thawtu taphot chu a nauhai an nih ti hrieng in tih.

1 John 3

1 Ngai ta u, Pain a mi lo va hmangai lawm lawm de! Pathien nauhai a min bûk hiel tah hi! Chu chu ei ni tlat si a! Khawvelin a mi hriet nawna san chu ama a hriet naw lei a nih. 2 Dittakhai, tuhin Pathien nauhai ei ni tah a, iengtin am ei la um ding ruok chu a la'n lang hri nawh. Ama a hung inlang pha chun ama angin ei la um ding a nih ti ruok chu ei hriet, ama ngei chu ei la hmu nawk ding a ni si a. 3 Chuleiin, Amaa beiseina nei taphot chun ama a thienghlim angin an insukthienghlim hlak. 4 Tu khom thil suol thaw chun dàn a bawsiet a nih; suol chu dàn bawsietna a ni si a. 5 Ama ruok chu suol la hmang dingin a hung inlang ti in hriet. Amaa chun suol a um nawh. 6 Tu khom amaa um chun thil suol a thaw zing ta nawh; tu khom thil suol thaw zingtu chun ama chu a la hmu naw a, hriet khom a la hriet bok nawh. 7 Nau dittakhai, tu hlêm kawi khomin um naw ro; ama chu mi indik tak a ni angin, thil indik thawtu chu mi indik a nih. 8 Thil suol thawtu chu Diebola inthoka suok a nih; a tira inthok hrimin Diebol chun thil suol a thaw si a. Pathien Naupa hung inlang san chu, Diebol thilthawhai sukboral a nih. 9 Tu khom Pathiena pieng chun Pathien chî a pâi tlat tah leiin thil suol a thaw zui zing nawh; Pathiena pieng tah a ni leiin suol a thaw zing thei ta nawh. 10 Pathien nauhai le Diebol nauhai hriet theina chu hi hi a nih: tu khom thil indik lo thaw le a unau hmangai lo chu Pathiena suok a ni nawh. 11 Atira inthoka thucha in hriet kha hi hi a nih: ei inhmangai tuo seng ding a nih, ti hi. 12 Misuola inthoka suok Kaina, a unau thattu ang kha ei ni ding a ni nawh. Ieng leiin am a that a? Ama thilthaw a suol a, a sang thilthaw a'n dik lei a nih. 13 Unauhai, khawvelin a theida chêu khomin mak ti naw ro. 14 Eini chun unauhai ei hmangai leiin thìnaa inthokin ei suok a, hringnaah ei lût tah ti ei hriet: unau hmangaina nei naw chu thìnaah a la um zing a nih. 15 Tu khom mani unau theida chu tuolthat a nih, tu khom tuolthattu chun amaah chatuon hringna a nei nawh ti in hriet. 16 Aman ei ta dinga hringna a pèka inthok hin hmangaina chu iem a na ti ei hriet tah. Eini khomin unauhai ta dingin hringna ei pêk ve ding a nih. 17 Tuin amanih khawvel hausakna neiin a unau tlasam hmu sien, ama chu làinat si naw sien, Pathien hmangaina chu ieng tin am amaah um thei a ta? 18 Nau dittakhai, tongbau le thû chaua inhmangai loin, thilthaw le a takin ni lem raw se. 19 Ei lungrilin thiem naw a mi'n changtir chàng khomin, thutakah ei um ti inhrieng ei ta, Pathien hmaa khom ngampa takin um thei ei tih; 20 Pathien chu ei lungril nêkin a ropui lem a, iengkim a hriet vong ti ei hriet si a. 21 Dittakhai, ei lungrilin thiem naw a mi'n changtir naw chun Pathien ei nèl ngam a nih, 22 a thupêkhai zawm a, a lawmzawng ei thaw leiin, a kuoma ei hni taphot ei hmu pei hlak. 23 A thupêk chu hi hi a nih: A Naupa Isu hming ring a, a thupêk anga ei inhmangai tuo hi. 24 Pathien thupêk zawmtu chu Pathienah a um zing a, Pathien khom amaah a um zing a nih. Chun, einiah Pathien a chêng zing ti ei hrietna chu hi hi a nih: Thlarau a mi pèka hin.

1 John 4

1 Dittakhai, thlarau nazong ring naw ro, zawlnei tehlêm tam tak khawvelah an hung suok tah leiin thlarau chu Pathiena inthoka suok a ni le ni naw fie hlak ro; . 2 Hi hi Pathien Thlarau in hriet theina ding chu a nih: Isu Krista chu taksa ngêiin a hung ti tantu taphot Thlarau chang chu Pathiena inthoka suok a nih. 3 Isu Krista chu taksaah a hung inchang ti tan nawtu thlarau chang chu Pathiena inthoka suok a ni nawh. Chu chu Krista dodâltu thlarau, a hung ding ti in hriet lawk tah kha a ni a, tu khom hin khawvelah a um tah zing a nih. 4 Nau dittakhai, nangni ruok chu Pathiena inthoka suok in nih; nangnia um chu khawvela uma inthoka suok nèkin a ropui lem leiin zawlnei tehlêmhai chu in ngam tah. 5 Anni chu khawvela mi an ni a, khawvel thlìr dàn angin thu an hril a, chuleiin khawvelin an thu an ngaithlàk hlak a nih. 6 Eini ruok chu Pathiena inthoka suok ei ni a, Pathien hretuhai chun ei thu an ngaithlàk hlak; sienkhom Pathiena inthoka suokhai naw chun ei thu an ngaithlâk nawh. Chuonga inthok chun Thlarau indik tak le thlarau tehlêm ei hriet thei a nih. 7 Dittakhai, inhmangai tuo seng ei tiu; hmangaina chu Pathiena inthoka suok a ni si a. Tu khom hmangaina nei chu Pathiena pieng a nih; Pathien a hriet bok. 8 Hmangaina nei naw chun Pathien a hriet nawh, Pathien chu hmangaina a ni si a. 9 Pathienin a hmangaina ei kuoma a hung suklang dàn chu hi hi a nih: ama zâra hringna ei nei theina dinga a Naupa nei sun khawvela a hung tira hin. 10 Hi ngei hi a nih hmangaina chu: einin Pathien ei hmangai lei ni loin, aman a mi hmangai leia ei suol thawina thilhlâna a Naupa a hung tir hi. 11 Dittakhai, Pathienin chuong lawma a mi hmangai chun, eini khom ei inhmangai tuo seng ding a nih. 12 Tu khomin Pathien an hmu ngai nawa chu, ei inhmangai tuo chun einiah Pathien a chêng zing a, a hmangaina chu einiah hin sukfamkimin a um a nih. 13 Amaah ei um le einiah Ama a um ti ei hrietna chu a Thlarau mi pèka hin a nih. 14 Pain Naupa chu khawvel sandamtu dingin a hung tir ti ei hmu tah a, ei inhriettir ta bok a. 15 Tu khom Isu hi Pathien Naupa a nih ti tantu chu amaah Pathien a um zing a, ama khom Pathienah a um zing a nih. 16 Pathien mi hmangaina chu eini ngeiin ei hriet a, chutaka chun ei innghat a nih. Pathien chu hmangaina a nih. Hmangainaa um zingtu chu Pathienah a um zing a, Pathien khom amaah a um zing a nih. 17 Rorêlna nia ti dêr loa ei um theina dingin einiah hmangaina chu sukfamkim a ni tah a; hi khawvela khom hin ama ang takin ei um hrim a nih. 18 Hmangainaa chun titna hrim a um naw a, hmangaina famkim chun titna po po a hnot hmang hlak. Titna le hremna hi an inzom leiin, tia umtu chu hmangainaah a la famkim naw a nih. 19 Aman a mi hmangai hmasak leiin eini khomin ei hmangai a nih. 20 Miin, "Pathien ka hmangai" ti sien, a unau theida si sien, ama chu mi khêlhlip a nih. Unau a hmu zing hman hmangai si lo chun Pathien a hmu ngai lo chu iengtin am hmangai thei a ta? 21 Hi thupêk hi a nih a mi pêk chu: Pathien hmangaitu chun a unau khom a hmangai ding a nih, ti hi.

1 John 5

1 Tu khom Isu hi Krista a nih ti ring taphot chu Pathiena pieng a ni a, tu khom a hringtu hmangaitu chun a hring nau khom a hmangai hlak. 2 Pathien nauhai ei hmangai ti ei hrietna chu, Pathien ei hmangai a, a thupêkhai ei zawm hi a nih. 3 Pathien ei hmangai vèna chu hi hi a nih: a thupêkhai ei zawm hi; a thupêkhai chu a khir si nawh. 4 Pathiena pieng taphot chun khawvel hi a ngam hlak. Khawvel hnea ngamna chu ei ringna hi a nih. 5 Isu hi Pathien Naupa a nih ti ringtu chauh naw chun tuin am khawvel a ngam hlak a? 6 Isu Krista hi a nih tui le thisena hung chu, tuia chauh ni loin tui le thlarauah a ni lem. A hrepuitu chu Thlarau a nih; Thlarau chu thutak a ni si a. 7 Hrepuitu pathum an um, 8 Thlarau le tui le thisen; chu pathumhai chu an inthuruol a nih. 9 Mihriem hrietpuina hman ei pom chun Pathien hrietpuina chu a ropui lem si a; Pathien hrietpuina chu, a Naupa chanchin a hung hriettir tàkna hi a nih. 10 Pathien Naupa ringtu chun amaah hi hrietna hi a nei a; Pathien ring nawtu chun Pathienin a Naupa chanchin an hriettir chu a ring naw leiin ama chu khêlhlipah a siem a nih. 11 Hi hi a thu inhriettir chu a nih- Pathien chun chatuon hringna a mi pêk a, chu hringna chu a Naupaah a um, ti hi. 12 Naupa neitu taphotin hringna a nei a, Naupa nei nawtu chun hringna a nei nawh. 13 Chatuon hringna in nei ti in hriet theina dingin nangni Pathien Naupa hming ringtuhai kuomah hieng thu hi ka ziek a nih. 14 Ama ditzawng anga ei hnì taphot chu a ngaithlàk hlak a, chu chu a hmaa ei tlangnêl ngamna san chu a nih. 15 Ei hni taphot a ngàithlâk ti ei hriet leiin, ei hni ang chu a mi pêk hlak ti khom ei hriet. 16 Tu khomin thìna khop ni lo suol a unauin a thaw hmu sien, tongtaiin hnipêk a ta, Pathienin hringna pêng a tih. Hi hi thìna intlung thei khop suol ni lo thawtuhai ta ding a nih. Thìna intlun thei khop suol a um a, chuong ang mi ta ding chun hnipêk ro ka ti nawh. 17 Thil indik lo thaw hrim hrim hi suol a ni vong a, amiruokchu suol taphot hi thìna khop suol a ni nawh. 18 Tu khom Pathiena pieng chun thil suol a thaw zui zing nawh ti ei hriet; Pathiena a piengna khan a vèng him a, misuol chun a tawk thei nawh. 19 Khawvel pumpui hi Misuolpa thuhnuoia um ni sien khom, Pathien nauhai ei nih ti ei hriet. 20 Pathien Naupa chu a hung a, Pathien tak chu hre thei dingin hriet thiemna a mi pêk ti ei hriet bok. Chu Pathien indik taka chun ei um- a Naupa Isu Kristaa chun. Ama chu Pathien indik tak, chatuon hringna chu a nih. 21 Nauhai, milem laka chun inthier fihlim ro.

2 John 1

1 Upa chun, Nuhmei inzaum, Pathien thlang le a nauhai, thutaka ka hmangaihai, keima chauh khom ni loin thutak hretu dang po po khoma an hmangaihai chu chibai ka bûk chêu; 2 chu thutak, einia chêng chu kumkhuoin ei kuomah um a tih. 3 Chu thutak le hmangainaa chun Pa Pathien le a Naupa Isu Krista kuoma inthoka lunginsietna dàm, zangaina dâm le inremna dàm in kuomah um raw se. 4 Pain thu a mi pêk anga i nauhai thenkhatin thutaka kal an chawi ti ka hmu leiin ka lawm takzet a nih. 5 Nuhmei inzaum, thupêk thar ni loin a tira inthoka ei dong kha hril ding chein ka ziek a nih; inhmangai tuo dingin ka ngèn cheu a nih. 6 A thupêk ang peia ei um hi hmangaina chu a nih; hi hi a thupêk, a tira inthoka in hriet kha a nih, 'hmangainaah in um zing ding a nih' ti hi. 7 Hlèmtu tam tak, Isu Krista chu taksa putin a hung ti pom nawtuhai chu khawvelah an hung suok tah a, chuonghai chu hlèmtu le Krista dodâltuhai an nih. 8 In inrimnahai thlawn loa in thaw ra kim taka in hmu theina dingin, mani invêng tha ro. 9 Tu khom Krista zirtirna anga khawsa loa a zirtirna khêla khawsatu chun Pathien a nei nawh. A zirtirna thua um zingtu chun Pä le Naupa a nei kop a nih. 10 Chu zirtirna fepui lo, in kuoma hung tu khom in inah intlungtir naw unla, tongbàu tha khomin inthlà naw ro. 11 Tongbàu thaa betu chu a thil suol thawa chun a thang ve a nih. 12 In kuomah thu tam tak hril ding nei lang khom lekha le lekhatuia ziek ka tum nawh; ei lawm a kim tlâng theina dingin in kuomah hung a, inhmatona inbiek ka beisei lem a nih. 13 Thlang laia mi ni ve, i zuorpui nauhaiin chibai an bùk che.

3 John 1

1 Upa chun, dittak Gaia, thutaka ka hmangai chu, chibai ka bûk. 2 Ruol dit tak, iengkimah i hmûingìla, thlarau tieng le taksa tienga i dam le hrisel theina dingin ka tongtaipêk hlak che. 3 Unauhai an hung a, thutaka i ringumzie le i um tlatzie thu an mi hril a, ka lawm takzet a nih. 4 Thutaka ka nauhai an um ti ka hriet nêka lawmna nasa lem hrim ka nei nawh. 5 Ruol dit tak, hieng unauhai hi mikhuol khom ni hai sien an chungah i lo tha èm êm a, 6 Kohran hmaa khom i thatzie an hril a. An inzinna lamah anni hi Pathien mihai thaw dàn awm hrima i lo thangpui thei chun tha hlêng a tih. 7 Hming leia inthok suok an ni a, Jentêlhai kuoma inthokin ieng khom an làk nuom nawh. 8 Chuongchun, thutak ta dinga thaw tlâng ei nih ti ei hriet theina dingin eini chun hieng mihai hi ei thangpui ding a nih. 9 Kohranhai kuoma khan lekhathon ka ziek tah a, nisienlakhom Diotrefa, anni laia hotu taka um thlâkhlàtu khan ka thu a poisa nawh. 10 Chuleiin, ka hung pha chu a chêt dàn, thil râpthlâk tak tak thawa a mi hril thang dànhai chu hril vong ka ti chêu. Chu chauh khom chu ni loin, unauhai a lo lawm naw a, a lawm nuomhai khom a khap a, kohrana inthokin a hnotsuok tawl a nih. 11 Ruol dittak, a tha naw chu enton nuom naw la, a tha chu enton lem rawh. Thil tha thawtu chu Pathiena suok a na, thil tha naw thawtu chun Pathien a hmu ngai nawh. 12 Demetri hi mi tinin an inpàk a, thutaka khom inpâk a hlaw hrim a, keini khomin kan inpàk a, kan inpàkna chu a'n dik ti i hriet. 13 I kuomah thu tam tak hril ding ka neia chu lekha le lekhatuia ziek ka nuom nawh. 14 Hmu vak che ka beisei a, inhmatonin ei la hril ding annawm. Thlamuongna i kuomah um raw se. Hi taka ei ruolhai hin chibai an bùk che. Ei ruolhai kha an hming lam sengin chibai mi hung bûkpèk rawh.

Jude 1

1 Isu Krista siehlaw le Jakob unaupa Juda chun, Pa Pathien lunginsietna le Isu Krista vèng himnaa um, kohai chu chibai ka bûk chèu. 2 Lunginsietna dàm, inremna dàm, hmangaina dàm in chungah tam tak vûrin um raw se. 3 Sandamna ei dong tlàng chungchang thu hi in kuoma hung ziek châk êm êm hlak lang khom, Pathienin a mi thienghlimhai kuoma ringna thu tum khata a lo inkol nghettir tah kha tan tlat dinga infuina thu chu mâkmawa ngaiin in kuomah ka hung ziek ta lem a nih. 4 Nangni lai hin mi thenkhat, kha hmaa thiem naw chang dinga ruot an ni thu zieka lo um tahai kha, an inzep rûk a. Anni hi Pathien ngaisak lo mi an ni a, lunginsietna chu an hurnaa inhmang dinga phalna petu angin an inlet hlauh a, ei Hotu tak le Lalpa nei sun Isu Krista chu an hnawl bok a nih. 5 Hieng thil hi in hriet tah sa vong ni sienkhom, inhriettir non chêu ka nuom a nih. Lalpan Aigupta rama inthoka Israel mihai a san suok khan, anni laia ringnawtuhai chu a hnungin a sukbohmang a. 6 Vàntirkohai khom an umna suoksana an sin zàmsanhai chu an chung thu Rorêlna Ni ropuia ngaituo dingin, chatuon thîr khaidieta khitin thim hnuoiah a sie a. 7 Chuong ang bokin Sodom le Gomora khuohai khom, an sè vel khuohai leh, hurna tirdakuma an inhmang hnung khan, chuong ang thawtuhai chu kumkhaw hremhmuna hrem an ni ding thu vauh lawkna dinga hmangin, meia hrem an ni kha. 8 Chuong ang char chun, hieng zêla um anga inhrilhai hin an taksa an sukporchè a, thuneituhai an poisa naw a, vàn mihai an hrilsiet a. 9 Mikael, vàntirko chunghnung tak hmanin, Diebol le Mosie ruong chungchanga an insêl buoi lai khan, tongsie hmanga hal a nuom naw a, "Lalpan hal lem raw se che" a ti el lem a ni kha. 10 Hieng mihai ruok hin chu an hriet thiem naw taphot an hril siet a; ngaituona nei lo, ramsahai anga pienvar zui lemtu an ni leiin, mani an insuksiet hlak. 11 Lungsiet chu an va um de aw! Kaina lampui an hraw a, tangka hnotin Balaam suolna lampuia chun an tlân a, Kora angin an hel a, an bohmang ve tah! 12 Chuong mihai chu hmangaina ruoi sukhmêlhemtu an ni a, inzakna hmu phak dêr loin nangni lai ruoi an kîl ve a, an fâk tuom tuom a, berampu, mani chauh insukkhoptuhai ang an nih. Sûm tui pai lo le favâng thing, ra nei lo, a zung puma tlu kar tah, voi hni thi non ta ang chu an nih. 13 Inhuom bût bûta tuipui a'n sok anga mani muolphona dinga phul bût bûta insok hlak mi le arasi vâkvaihai, kumkhuoa an chèngna dinga thima khom thim sa tak an huolpêkhai ang chu an ni bok. 14 Adam thla fe peia a pasarina Enok chun hieng mihai chungchang thu hi a lo hril lawk a, "En ta u, Lalpa chu a mi thienghlim sâng tam tak leh a hung ie. 15 Pathien ngaisak nawhai po poin Pathien ti loa Pathien ti naw zawnga thil an thaw po po le Pathien kal zawnga thu na tak tak an hrilhai po po chungthu chu rêl dingin a hung a nih. " tiin. 16 Chuong mihai chun chierna ding le soisèlna ding chauh an zong a, an châkna suol chauh an hnot a, mani an inhril sathâu a, an chan hlawkna dinga chu a derin mi an inpâk luom hlak. 17 Dittakhai, nangni ruok chun ei Lalpa Isu Krista tirkohai thu hril lawk kha hre zing ro. 18 "Hun nuhnunga chun cheksoltuhai, Pathien ngaisak loa mani chàkna ang peia khawsa hlak mi la hung um an tih" ti an hril tah chêu kha. 19 Chuonghai chu inthèna suksuoktu, tisa mi, Thlarau nei nawhai an nih. 20 Dittakhai, nangni ruok chu in ringna thienghlim taka chun inrem nghet unla, Thlarau Thienghlimin tongtai ro. 21 Pathien hmangainaa chun chêng zing unla, chatuon hringnaa thuoi lûttu ding chèu ei Lalpa Isu Krista lunginsietna chu nghâk ro. 22 Ringduophai chu lunginsiet unla, 23 meia inthoka san suok ngaihai chu hnûk suok nghal ro. Thenkhat ruok chu tì pumin lunginsiet unla, an pang tirdakumin a tawk an silfèn chen khom chu ten hle ro. 24 Tlu lo dinga vêng theitu chêu, a ropuina hmaa soisèl bo le hlim êm èma inngirtir theitu chêu, 25 Pathien um sun, a mi sandamtu kuoma chun, ei Lalpa Isu Krista zàrah, ropuina hai, inlalna hai, thilthawtheina hai, thuneina hai, hun fe tah po poa inthoka tuta le chatuon chenin um pei raw se. Amen.

Revelation 1

1 Isu Krista thu puong suok hi Pathienin thil hung tlung vak ding thu a siehlawhai hriet dinga a pèk le vàntirko tira a siehlaw Johan kuoma a hung inhriettir chu a nih. 2 Johan chun Pathien thu le Isu Krista inhriettirna a hmu le dong po po chu a puong a nih. 3 Hi hrillawkna thuhai hi tiem a, ngaithla a, thu zieka umhai lungrila zawmtuhai chu an ham a tha ie, a hun a tlung têp ta si a. 4 Johan chun Asia rama kohran pasarihai chibai a bûk chèu. Um zing le um tah le la um ding le a lalthungpha hmaa thlarau pasari le 5 Isu Krista, thuhretu ringum, mithi laia inthoka tho hmasa tak, hnuoia lalhai chunga rorêltu kuoma inthoka lunginsietna le inremna chu in kuomah um raw se. 6 Mi hmangai a, a thisena ei suolhaia inthoka mi'n tlan suok a, a lalram le Pa Pathien rong bawl dinga thiempu hnama mi siemtu kuomah, ama kuoma ngei chun, ropuina le lalna chatuonin um raw se. Amen. 7 En ta u, sûm lai khin a hung mêk a nih, mit tinin hmûng an tih, ama suntuhai ngei khomin. Chun, khawvela hnam tinin ama tà bok an tih. A nih, chuong ang tak chu ni raw se! Amen. 8 " Kei hi Alfa le Omega, um zing le um tah le la um ding, Iengkimthawthei chu ka nih" Lalpa Pathien chun a tih. 9 Kei Johan, in unau, Isu leia sukdùdàna sel taka tuorpuitu chêu le a lalna intawmpuitu chêu hi Pathien thu lei le Isu thu inhriettir ka hril leiin Patmosa an ti thlierkârah siein ka um a. 10 Lalpa nia chun thlarauin ka lo um a, ka hnung tienga inthokin rawl inring tak el, tawtawrawt ri ang ka hriet a. 11 "I thil hmu hi lekhaah ziek thla la, kohran pasari- Efesi kohran, Smurna kohran, Pergamos kohran, Thuatira kohran, Sardis kohran, Filadelfia kohran le Laodikei kohran -hai kuomah thon rawh" a ti ka hriet a. 12 Rawla mi betu chu hmu tumin ka hei ngha kìr a, rangkachak khawnvar siena pasari ka hmu a, 13 khawnvar siena lai chun 'mihriem naupa ang', b kepha huopa korfuol hâk, a âwma rangkachak hrèncheia inhrêng ka hmu bok a; 14 a lu le a sam chu sahmul vàr ang le vûr anga vâr a na, a mit chu meichok inhlap ang a na; 15 a kepha chu dâr tle chi, rawtuina meia raw thieng tah ang el a na; a rawl chu tuipui insok ri hum hum ang a nih. 16 A kut chang tieng arasi pasari a chawi a; a bàua inthok chun kawlhnâm ngei ton, ngei tak el a hung suok a, a hmêl chu nisa var vanglai ang a nih. 17 Chun, ama ka hmu phing leh a ke bulah thidangin ka tlu a. A kut chang tieng ka chungah a hung innghat a, 18 "Ti naw rawh, kei hi a Hmasatak le Nuhnungtak, Mihring chu ka nih; ka thi a, sienkhom ngai ta, chatuona dingin ka hring nawk tah. Thìna le Mithi khaw chabihai neitu ka nih. 19 "Chuleiin, i thil hmu tahai, thil um zing le thil la tlung dinghai chu ziek thla rawh. 20 Ka kut chang tienga arasi pasari le rangkachak khawnvar siena pasari i hmuhai umzie inthup chu hi hi a nih: arasi pasarihai chu kohran pasari vàntirkohai an na, khawnvar siena pasari chu kohran pasarihai chu an nih" a ta.

Revelation 2

1 "Efesi kohran vàntirko kuoma chun hieng hin ziek rawh: A kut chang tienga arasi pasari chawi, rangkachak khawnvar siena pasari laia inlon inlon khan hieng thu hi a hril a nih: 2 I thilthawhai ka hriet, i sin inrimzie dàm, i selzie dàm, mi rilohai i ngai thei nawzie dàm, tirko ni si lo tirkoa insâlhai chu fie a, a tehlêm an nih ti i man suok thuhai dàm ka hriet a. 3 Ka hming leiin sel takin, harsatnahai beidong loin i tuor tihai khom ka hriet. 4 "Amiruokchu, inthiem nawna che ka nei: i mi hmangai tìr ang khan i mi hmangai ta nawh. 5 I mi tlùksan nasatzie hi ngaituo la, sim la, a tira i thaw ang khan thaw nawk rawh. I sim naw chun i kuomah hung ka ta, i khawnvar siena kha a hmuna inthokin son hmang ka tih. 6 Ka theida zawng, Nikolahaic thilthaw i theida ruok hi chu i thaw tha. 7 Thlarauin kohranhai kuoma thu a hril hi hriet theina dinga na nei chun ngaithla ngun raw se. A hnètu taphot chun Pathien paradis-a hringna thing ra fa thei an tih" tiin. 8 "Smurna kohran vàntirko kuoma chun hieng hin ziek rawh: A Hmasatak le Nuhnungtak, thia hring nawk ta khan hieng hin a tih: 9 I tuornahai le i pasietziehai ka hriet, sienkhom i hausa si. Juda mi ni lo, Juda inti, Setan Sunagoga mihaiin an hril siet dàn che khom ka hriet. 10 I thil tuor ding hi ti naw. Ngai ta, nangni laia mi thenkhat chu lung inah khumin Diebol chun a fie ding chèu a na, ni sawm sûng suknomnatna tuor in tih. Thi chenin ringum takin um pei la, hringna lallukhum pêng ka ti che. 11 Thlarauin kohranhai kuoma thu a hril hi hriet theina dinga na nei chun ngaithla ngun raw se. A hnètu taphot chu thì hnìna chun ieng khom law thei naw nih. 12 "Pergamos kohran vàntirko kuoma chun hieng hin ziek rawh: 13 Kawlhnâm ngei ton, ngei tak neitu khan hieng hin a tih: Setan lalthungpha innghatna hmunah i um ti ka hriet; sienkhom ka hming i chel tlat a, ka thu hretu mi ringum Antipa kha, in khuo Setan hmuna an that lai khom khan, i mi ringna i'n phatsan chuong nawh. 14 Amiruokchu, demna met che ka nei, Balaam zirtirna thu pomtu nangni lai in kol leiin. Ama chun Balak chu Israel nauhai thuoi suol dàn a'n chûktir a, Israel nauhai chu milem biekna sa fa ding le inditna suola lût dingin a thuoi suol a. 15 Chuong ang bokin, nangni lai Nikola zirtirna chel tlat in um a. 16 Chuleiin sim ro, chuong naw chun in kuomah hung nghàl ka ta, ka bàua kawlhnâm hin ka hung bei tawl ding chèu a nih. 17 Thlarauin kohranhai kuoma thu a hril hi hriet theina dinga na nei chun ngaithla ngun raw se. A hnètu taphot kuoma chun manna inthup thenkhat chu pêng ka ta; chun lung vàr pe bok ka ta, chu lunga chun a dongtu chauin a hriet hming thar a chuong" tiin. 18 "Thuatira kohran vàntirko kuoma chun hieng hin ziek rawh: Pathien Naupa, meichok inhlap ang mit nei le dâr tle chi ang ke nei chun hieng thu hi a hril a nih: 19 I thilthawhai ka hriet, i mi hmangaizie dàm, i ringumzie dàm, i rongbawl dàn dàm, i tuorselzie dàm, i tan hlim nêka tuta thil i thaw nasat lemzie dàm. 20 Amiruokchu, demna che ka nei; nuhmei Jezebel, zawlnei inti kha i ngài thei leiin; ama chun ka siehlawhai chu indit chîng ding le milem biekna sa fa dingin a zirtir a, a thuoi suol a. 21 A simna dingin hun ka pêk a, sienkhom indit chîng a bànsan chuong nawh. 22 Chuleiin, natna khumah thè thlung ka ta, a uirepuihai khomin an thil chìng an sim naw chun nasa takin tuor an tih. 23 A nauhai chu khawng hlum ka ta, chuongchun lungril le ngaituona po po hre vongtu ka nizie kohranhaiin hrieng an tih. In thilthaw ang peiin rul seng ka ti cheu. 24 "Thuatira khuoa mi danghai chun hi zirtirna hi zawm ve lo a, 'Setan thurùk ril' an tihai khom in pom ve naw leiin in chungrikna belsa nawng ka tih. 25 Ka hung nawk hmâ khat in thil nei kha vong tlat ro. 26 A tawp chena ka ditzawng thawtu le hnètu chu, ka Pa kuoma inthoka thuneina ka hmu ang bokin, hnam tin chunga thuneina pêng ka ta, 27 ama chun thîr hmol hmangin an chungah ro rêl a ta, pil bêl angin dêng dar a tih. 28 Chun, sikhawvar khom pe bok ka tih. 29 Thlarauin kohranhai kuoma thu a hril hi hrietna dinga na nei chun ngaithla ngun raw se" tiin.

Revelation 3

1 "Sardis kohran vàntirko kuoma khom hieng hin ziek rawh: Pathien Thlarau pasari le arasi pasari neitu chun hieng hin a tih: I thilthawhai ka hriet; dam vur anga inlang ni si, i thi tlat bok si; 2 insukhar la, i thil la nei sun, thi vâng vàng hai kha sukhring nawk rawh. I thilthawhai ka Pathien mit tlung zo hrim ka hmu nawh. 3 An zirtir chê le i thu donghai kha hre zingin zawm la, i suol sim rawh. I har naw chun rûkru angin hung ka ta, ka hung hun hre naw pal i tih. 4 "Sardis khuoa mi tlawmte ruok chu an silfènhai sukporchè lo an um a, chuonghai chun an phu ang hrimin, thuom vâr hâkin ka kuomah lêng vèng an tih. 5 Anni ang boka hnètu chun thuom vâr hâk a ta, hringna bua inthokin a hming thâi bo ngai naw ning. Ka Pa le vàntirkohai hmaah ama chu tan ka tih. 6 Thlarauin kohranhai kuoma thu a hril hi hrietna dinga na nei chun ngaithla ngun raw se. 7 "Filadelfia kohran vàntirko kuomah hieng hin ziek rawh: Mi Thienghlim, Mi Indik, Davida chabi neitu, a hong tah chu tu khomin khàr thei lo, a khàr tah chu tu khomin hong thei lo chun, hieng hin a tih: 8 I thilthawhai ka hriet. En ta, tu khom khâr thei lo kotkhâr hong sa i hmaah ka'n nghat hi. Hràtna tlawmte chauh i nei ti ka hriet a, sienkhom ka thu i vong tlat a, ka hming i'n phat ngai nawh. 9 Setan sunagoga mi khêlhlip ruol, Juda ni si loa Judaa insâlhai chu hung thuoiin i ke bulah inkûntir ka ta, nang hi ka hmangai chu i nih ti hre tâng an tih. 10 Sel taka tuor dinga thu ka pèk che chu i vong leiin, hnuoia chêng po po fiena dinga khawvel pumpuia hremna a hung tlung hunah kei khomin humhim ka ti che. 11 "Ka hung vak ding a nih. Lallukhum i chang ding chu tu khomin an inchùpêk nawna ding chein i thil nei sa kha vong tlat rawh. 12 A hnètu taphot chu ka Pathien tempul banah phun ka ta, chu taka inthok chun son ni ta ngai naw ni hai. Pa Pathien hming anniah chuong a ta, Pathien khawpui Jerusalem thar, ka Pathien kuoma inthoka hung tum hming le ka hming thar chu anniah ziek bok ka tih. 13 Thlarauin kohranhai kuoma thu a hril hi hrietna dinga na nei chun ngaithla ngun raw se. 14 "Laodikei kohran vàntirko kuoma chun hieng hin ziek rawh: Amen, Thuhretu Ringum le Mi Indik, Pathien thilsiem po po bul chun hieng hin a tih: 15 I thilthawhai ka hriet, i dei naw a, i lum bok nawh; i dei amanih i lum amanih ka dit a nih. 16 Dei si lo, lum si loa i lum puot chauh leiin ka baua inthokin peisâk ka ti che. 17 'Ka hausa, iengkim ka hau, tlàksam ka nei nawh' i ti vei a; sienkhom mi rimsi, lungsietum, pasie, mitdel le saruok el i nih ti i hriet si nawh. 18 Chuongchun, i hung hausak theina dingin, meia rangkachak raw thieng hnung chu ka kuoma inthoka inchaw dingin thurawn ka pêk che. I saruokna inzapuium tak inkhumna dingin hâk ding zakaw vâr le i mita i hmu theina dingin mitna damdawi inchaw rawh. 19 Ka hmangai chu zilin ka thunun hlak. Chuleiin, ka thu ngai la, sim rawh. 20 Ngai ta, kotkhâr bula ngîrin ka kik hi; tu khom ka rawl hrea kot mi hongpêktu kuoma chun lûtin a kuomah zânbu kîl ka ta, ama khomin ka kuomah kîl bok a tih. 21 A hnètu taphot chu ka lalthungphaah inthungtir vêng ka tih, kei khomin ka hnè a, lalthungphaa ka Pä bula ka'n thung ve ang hin. 22 Thlarauin kohranhai kuoma thu a hril hi hrietna dinga na nei chun ngaithla ngun raw se. " tiin.

Revelation 4

1 Chuong thil hnunga chun ka hang en a, ngai ta, vàna kotkhâr inhong ka hmu a. Tawtawrawt ri ang mi betu rawl ka hriet hmasak khan, "Hi taka hin hung rawh, tuta hnunga thil tlung dinghai chu inentir ka ti che" a ta. 2 Thlarauin ka um ta nghâl a. Ngai ta, vàna chun lalthungpha a um a, chu taka chun mi pakhat a thung a. 3 A hmêl chu jaspi le karnelian lung ang elin a'n lang a. Lalthungpha vela chun lunghlu rong hring nghiel ang sumrisàng a'n zâm chiei a. 4 Lalthungpha huol vela chun lalthungpha dang sawmhni pali a um a, chu taka chun upa sawmhni pali an inthung a, thuom vâr an hàk a, rangkachak lallukhum an khum seng bok a. 5 Lalthungphaa inthok chun kawl a hung inlep a, vàninrûm ri dur dur a hung suok a. Lalthungpha hmaa chun meiser pasari a chok puot puot a, chuonghai chu Pathien thlarau pasarihai chu an nih. 6 Lalthungpha hmaa chun dârthlalang ang el tuifinriet, krustal lung anga fîm a um a, a laia lalthungpha sîr tuoka chun hnung tieng le hma tieng mita sip thilhring pali an um a. 7 Thilhring pakhatna chu sakeibaknei ang a na, thilhring pahnina chu bawngchal ang a na, thilhring pathumna chun mihriem hmêl a put a, thilhring palina chu mupui vuong lai ang a nih. 8 Thilhring palihai chun thla paruk an nei seng a, an thla puo le sùng tieng chu mitin a sip a. Sùn le zàn chawl loa chawibiekin, "Lalpa, Iengkim Pathien, Um tah, um zing le hung um ding chu, A thienghlim, a thienghlim, a thienghlim"tiin an khèk a. 9 Thilhring palihai chun lalthungphaa thung, chatuona hring zing chu chawimawi le inpâka lawmthu an hril po leh, 10 lalthungphaa inthung hmaa chun upa sawmhni palihai chu an bokkhup a, chatuona hring zing chu an chawibiek hlak a. 11 Lalthungpha hmaa chun an lallukhum chu siein, "Nang kan Lalpa le kan Pathien, Ropuina hai, chawimawina hai, Thilthawtheina hai dong tlàk i nih; Nangin iengkim i siem a, I thua siem le um vong an ni si a"tiin an rem a.

Revelation 5

1 Lalthungphaa inthungpa kut chang tieng chun lekhabu ziel, a sûng le puoa ziek, inchikna suoi pasaria nam le chàr tlat ka hmu a. 2 Vàntirko thilthawthei tak ka hmu a, ama chun rawl inring takin, "Tu am inchikna suoia chàr hi hong a, lekhabu ziel hi sût tlàk um an ta?" tiin a khêk a. 3 Lekhabu ziel chu sût a, a sûng en thei vànah tu khom an um naw a, hnuoia le hnuoi sùnga khom an um bok nawh. 4 Lekhabu ziel chu hong a, a sûng en thei tu khom an um naw leiin ka tap ka tap a. 5 Upa laia pakhat chun, "Tap naw rawh, ngai ta, Juda hnama sakeibaknei, Davida Tobul khan inchikna suoi pasari chu hong a, lekhabu ziel chu sût dingin a hnè tah" a ta. 6 Thilhring pali le upahai thung huol, a lai taka lalthungphaa chun Beramte that tah ni awm tak ngîr ka hmu a. Beramte chun ki pasari le mit pasari a nei a, chuonghai chu hnuoi hmun tina Pathienin a tir suok thlarau pasarihai chu an nih. 7 Lalthungphaa inthung chang tienga lekhabu ziel chu a lâk a. 8 A hang làk chun thilhring palihai le upa sawmhni palihai chu Beramte hmaa chun an bokkhup a. Tingtang le rangkachak berbu, mi thienghlimhai tongtaina rimtuia sip chu, an chawi seng a. 9 Anni chun, Nang lekhabu ziel chu la a, A'n chiknahai chu sût tlàk i nih, Thatin i um tah leiin; Chi tin, tong tin, mi tin, Hnam tina mihai chu, Pathien ta dingin, I thisenin i'n chawk a; 10 Kan Pathien rong bawl dingin, A lalram le thiempuah i siem tah a, Hnuoi chungah ro rêl an tih"tiin hla thar an sak a. 11 Chun, ka hang en a, lalthungpha le thilhringhai le upahai huol vela chun vàntirko ruol, a sânga sâng le a sînga sîng tam tak rawl ri chu ka hriet a. 12 "Beramte that ta hnung chunThilthawtheina hai, hausakna hai, Varna hai, hràtna hai, Chawimawina hai, ropuina hai, Inpâkna hai hmu tlâk a nih"tiin an sak a. 13 Thilhring tinrêng, vàna mi dàm, hnuoia mi dàm, hnuoi sûnga mi dàm, tuifinrieta mi dàm le a sûnga um po po rawl ka hriet a. "Lalthungphaa inthung leBeramte kuoma chun, Inpâkna hai, chawimawina hai, Ropuina le thilthawtheina hai, Chatuonin um raw se"tiin hla an sak a. 14 Thilhring palihai chun, "Amen" an lo ti a, upahai khom chun bokkhupin an chawibiek a.

Revelation 6

1 Beramtein inchikna suoi pasari laia pakhat a hong lai chu ka hmu a; thilhring pali laia pakhat chun vàninrum anga inringin, "Hung suok rawh" a ti ka hriet a. 2 Ka hang en a, ka hmaa chun sakor vàr ka hmu a, a chunga chuong chun thal ngul a chawi a, lallukhum an pèk a, hnètu anga hnè pei dingin a suok tah a. 3 Inchikna suoi pahnina chu a hang hong a, thilhring pahnihna chun, "Hung rawh" a ti ka hriet a. 4 Ka hang en a, sakor sen lâr, a hung suok a. Hnuoiah inphêk sàmna a tlung theina dingin sakora chuong kuoma chun hnuoia inthoka inremna lâk hmang theina thu pèk a na, kawlhnâm lien tak pèk a ni bok a. 5 Inchikna suoi pathumna chu a hang hong a, thilhring pathumna chun, "Hung rawh" a ti ka hriet a. Chuongchun, ka hang en a, ka hmaa chun sakor dum ka hmu a. A chunga chuong chun phahlà a chawi a. 6 Thilhring palihai laia inthoka hung suok ni awm tak rawl ka hriet a, "Ni khat hlawin huit ni khat tlà, ni khat hlawin barli ni thum tlâ; uoiin le sahriek ruok chu tawkpoi naw" a ti ka hriet a. 7 Beramtein inchikna suoi palina a hang hong chun, thilhring palinain, "Hung rawh" a ti ka hriet a. 8 Ka hang en a, sakor dâng tak el ka hmu a, a chunga chuong hming chu Thìna a na, Mithi khuoin inhnai takin a hung zui a. Kawlhnâm dàm, tâm dâm, hri dàm, ram sakol dàm hmanga sukhlum dingin hnuoi hmun lia hmun khat chungah thuneina pèk an ni a. 9 Inchikna pangana chu a hang hong a, Pathien thu lei le an thu hril leia that, mi thienghlimhai thlarau chu, maichàm hnuoiah ka hmu a. 10 Anni chun rawl inring takin "Aw, Lalpa ropui, mi thienghlim le mi indik tak, iengtik am hnuoi mihai chunga hin ro rêlin kan thisen phuba chu mi lapêk i ta?" tiin an khèk a. 11 Anni chu korfuol vàr a pêk seng a, an siehlaw chanpuihai le an unauhai chu anni ang boka that kim an ni hmâ khat chu lo la nghâk hrì dinga hril an ni a. 12 Inchikna suoi parukna a hong lai chu ka en zing a. Lir nasa takin a hung inhnìng a. Nisa chu kèl hmula siem saiip dum ang elin a hung inthim a, thla chu thisen angin a hung sen bok a. 13 Thlipuiin theichang sel a nuoi til ang elin arasihai chu hnuoiah an tla chum chum a. 14 Vàn chu lekhabu anga ziel hmangin a um a, tlâng le thlierkâr po po khom an umna hmuna inthoka son hmang an ni tah vong a. 15 Chuongchun, hnuoia lal hai, rorêltu hai, sipai lal hai, mi hausa hai, mi ropui hai, suok hai le suok naw hai khom pûk le tlânga lungpuihai chu phènin an inbi a. 16 Tlâng le lungpui hai kuoma chun, "Mi del ro, lalthungphaa thung mit hmua le Beramte lungsennaa inthok chun mi del khum ro. 17 An lungsenna ni räpthlâk tak chu a hung tlung ta si a, tuin am tuor zo an ta?" an ta.

Revelation 7

1 Chu hnunga chun vàntirko pali, khawmuol le tuifinriet le thing chungah hai thli a hrâng nawna dinga kawl kil lia thli kuo hruk tlat dinga ngîr ka hmu a. 2 Vàntirko dang, Pathien hring inchikna suoi chawia sak tienga inthoka hung suok ka hmu bok a. Hnuoi le tuifinriet suksiet theina thu an pèk vàntirko palihai kuoma chun inring taka khêkin, 3 "Ei Pathien siehlawhai chala inchikna suoi kan nam hmâ khat chu khawmuol le tuifinriet le thinghai hi tawk poi naw ro" tiin. 4 Chun, Israel thlahai hnam tina mi an inchik zàt ka hriet chu mi nuoikhat le singli le sangli, hieng ang hin: 5 Juda hnama mi sîngkhat le sânghnih, Reuben hnama mi sîngkhat le sânghnih, Gad hnama mi sîngkhat le sânghnih, 6 Aser hnama mi sîngkhat le sânghnih, Nafthalia hnama mi sîngkhat le sânghnih, Manase hnama mi sîngkhat le sânghnih, 7 Simeon hnama mi sîngkhat le sânghnih, Levi hnama mi sîngkhat le sânghnih, Isakar hnama mi sîngkhat le sânghnih, 8 Zebulon hnama mi sîngkhat le sânghnih, Josefa hnama mi sîngkhat le sânghnih, Benjamin hnama mi sîngkhat le sânghnih. 9 Chu hnunga chun ka hang en a, ngai ta, tu tiem sêng loa tam mipui, hnam tin, chi tin, mi tin le tong tina mi, korfuol vàr hâka tûmkâu chawiin, lalthungpha le Beramte hmaa ngîr ka hmu a. 10 Rawl inring takin, "Sandamna chuLalthungphaa inthung, Ei Pathien le Beramte Kuoma inthok a nih"tiin an khèk a. 11 Vàntirko po po chun lalthungpha le upahai le thilhringhai chu an ngìr huol a. Lalthungpha hmaa chun an bokkhup a, Pathien chawibiekin, 12 "Amen, Inpâkna hai, ropuina hai, varna hai, Lawmthu hai, chawimawina hai, Thilthawtheina le hràtna hai, Chatuonin ei Pathien ta a nih, Amen"tiin an insam a. 13 Upa laia pakhat chun, "Hieng korfuol vàra inthuomhai hi tuhai am an na, khaw laia inthoka hung am an na?" tiin a mi'n don a. 14 Kei chun, "Pu, nangin i hriet lem annawm" ka ta. Ama chun, "Hienghai hi rinumna râpthlâk taka inthoka hung suok, Beramte thisena an silfènhai vâr taka sawpfaituhai chu an ni hi. 15 Chuleiin, Pathien lalthungpha hmaah, A tempulah sùn le zàn umin, A rong an bawl tah a ni hi. Lalthungphaa inthung chun, An chungah puon in zàrpêk a tih. 16 An phìng tâm ta naw ni a, An dang châr ta bok naw nih. Ni intêngin em naw ni a, Lum sahâl tuor ta naw ni hai. 17 Lalthungpha lai taka inthung, Beramte chu an vêngtu nîng a ta, Hringna tuikhurah thuoi a ta, Pathien chun an mita inthokin, Mitthli po po chu hru hul a tih" a ta.

Revelation 8

1 Inchikna suoi pasarina a hang hong chun dâr chenve lai vàn a ré thup a. 2 Pathien hmaa ngîr vàntirko pasari ka hmu a, tawtawrawt pasari an pèk a. 3 Lalthungpha hmaa rangkachak maichàm bula chun vàntirko dang, rangkachak berbu chawi a hung ngìr a, mi thienghlim po po tongtaina le maichàma inhlàn ding rimtui an pêk teu a. 4 Vàntirko kuta inthoka rimtui raw khu chu mi thienghlimhai tongtaina le chun Pathien hmaah a'n zäm tung a. 5 Chu zoah, vàntirko chun rimtui rawna berbu chu a lâk a, maichàma meiling chu berbu sipin a luok a, hnuoiah a bun thlâk a. Chuongchun, vàn a hung inrûm dur dur a, rawl nasa tak a hung suok a, kawl a'n lep zuk zuk a, lir a hung inhnìng a. 6 Chun, vàntirko pasarihai chun tawtawrawt an chawi seng chu mût dingin an inring a. 7 A hmasa tak chun a hang mût a, riel le mei, thisen le inpol chu hnuoiah an pei thlàk a; hnuoi hmun thuma thea hmun khat le thing hmun thuma thea hmun khat a kàng hmang a, hlohna hring po po khom a kàng hmang vong bok a. 8 Vàntirko pahnina chun a hang mût a, tlâng lien tak ang, kâng puot puot chu tuifinrietah an pei thlàk a. 9 Tuifinriet hmun thuma thea hmun khat chu thisenah a hung inchang a; tuifinrieta chêng thilhring po po hmun thuma thea hmun khat chu an thi a, long khom hmun thuma thea hmun khat chu a se vong bok a. 10 Vàntirko pathumna chun a hang mùt a, arasi lien tak, meiser anga chok hlut hlut hi vàna inthokin vadungpui le vadungted hmun thuma thea hmun khat chunga chun a hung tla a. 11 Chu arasi hming chu 'Khâkna' a nih. Chu chun tui hmun thuma thea hmun khat chu a sukkha a, a kha taluo leiin tui a khâkna hmuna mi tam tak chu an thi a. 12 Vàntirko palina chun a hang mùt a, nisa hmun thuma thea hmun khat, thla hmun thuma thea hmun khat le arasi hmun thuma thea hmun khat chu a dèng a, hmun thuma thea hmun khat seng chu a'n thim ta vong a, hnuoi hmun thuma thea hmun khatin ni var a hmu ta naw a, zàn khomin chuong ang bokin. 13 Ka hang en a, vànlaizawlah mupui a hung vuong a, "Vàntirko dang pathumin an tawtawrawt an mût pha chun hnuoia chênghai ta dingin a va râpthlàk awm de! a va râpthlàk awm de! a va râpthlàk awm de!" tiin a'n hràm tuor tuor a.

Revelation 9

1 Vàntirko pangana chun a hang mùt a, vàna inthoka hnuoia arasi tla ka hmu a. Arasi kuoma chun khuorkhurûme chabi chu an pêk a. 2 Khuorkhurûm chu a hang hong a, a kuoa inthok chun rawtuina thuk lien tak ang elin mei khu a hung suok hlut hlut a, meikhu hung suok lei chun nisa le vàn a hung inthim zo tah a. 3 Mei khua inthok chun khàu ruol an hung suok a, khawmuol ainuvêt thilthawtheina ang thilthawtheina an pèk a. 4 An chala Pathien inchikna suoi nei naw mihriemhai chauh chu soisak an phal a; hnuoia hlo hna hring hrim hrim, thlaihai le thinghai ruok chu sukse lo dingin an hril a. 5 Inchikna suoi nam ve lo mihriemhai chu sukhlum êm loa thla nga sûng suknat an phalpèk a; an suknat thei dän chu ainuvet mi se anga nâ a nih. 6 Chuong nia chun mihaiin thina zong an ta, hmu dêr si naw ni hai; thi inhawk an ta, sienkhom thina chun tlânsan sìng a tih. 7 Khàuhai hmèl put dàn chu indo dinga sakor an inthuom ang hi a nih; rangkachak lallukhum ang an khum a, mihriem hmêl ang an put a, 8 nuhmei sam ang sam an nei a, an ha chu sakeibaknei ha ang a na, 9 thîr awmphaw ang awmphaw an nei a, an thla zäp ri chu indonaa sakor tawlailir tam tak tlân ri dur dur ang hi a nih. 10 Ainuvèt ang mei an nei a, an mei chun mi an sè thei a, an sèna chu thla nga sûng a na a. 11 Khuorkhurûm vêngtu vàntirko chu an lal a ni a, a hming chu Hebrai tongin Abaddon, Grik tong chun Apollion an ti a, chu chu 'Sukbohmangtu' tìna a nih. 12 Chungrikna pakhat chu a liem tah a, chungrikna dang pahni a la hung tlung ding a nih. 13 Vàntirko parukna chun a hang mùt a, Pathien hmaa rangkachak maichàm ki palia inthok chun rawl a hung suok a; 14 tawtawrawt chawi vàntirko parukna kuoma chun, "Eufretis vadungpuia vàntirko thlunghai kha hung insuo ro" a ta. 15 Chuongchun, hi kum le thla, hi ni le dârkâra mihriem hmun thuma thea hmun khat thattu dinga an lo buotsai vàntirko pali chu an insuo a. 16 Sakor chungchuong sipai ringot khom maktaduoi zahni an nih ti mi hril ka hriet a. 17 Inlàrnaa sakor le a chunga chuonghai ka hmu dàn chu hieng ang hi a nih: mei anga sen, safir lung anga dumpawl le kât anga eng awmphaw an nei a; an sakor lu chu sakeibaknei lu ang a na, an bâua inthokin mei le meikhu le kât an phu suok puot puot a. 18 An bàua inthoka suok mei le meikhu le kât, hremna pathum chu hmangin mihriem hmun thuma thea hmun khat chu an sukhlum a. 19 Chuong sakorhai thithawtheina chu an bàu le an meiah a um a; an mei chu rûl ang a na, lu a nei a, chu chun mi an inhliem hlak a nih. 20 Hieng hripuia sukhlum mahla mihriemhai hin anni thil siem biek chu an sim chuong naw a, rangkachak dâm, tangkaruo dâm, dâr dâm, lung dàm le thing dàma milem an siem, ieng khom hmu thei lo, hre thei lo le lawn thei bok lo hai biek chu an bàn chuong nawh. 21 Tuolthat an chìng dàm, mi dawi an hmang dàm, inditna suola an inhmang dàm le rûkrùk an chìng dàm khom an sim chuong bok nawh.

Revelation 10

1 Vàntirko dang, thilthawthei tak, vàna inthoka hung tum ka hmu a. Ama chu sûmin a'n thuom a, a lua chun sumrisâng a'n zâm a, a hmêl chu nisa ang a na, a ke chu mei ban ang a nih. 2 A kuta chun lekhabu ziel, phar sa, chîte hi a chawi a. A ke chang tieng chun tuifinriet a sir a, a voi tieng chun khawmuol a sir a, 3 sakeibaknei inhûk anga inringin a'n hùk a, chuonga a hang inhùk chun vàninrûm pasarihai chun rawl an insuo a. 4 Vàninrûm pasarihai. thu hril ziek thlâk ka tum lai chun vàna inthoka rawlin, "Vàninrûm pasarihai thu hril chu ip tlat la, ziek thla naw rawh" tiin a mi hung hril a. 5 Tuifinriet le khawmuol sira ngîr vàntirko ka hmu chun a kut chang tieng chu vàn tieng a phar a. 6 Chatuona hring zing, vàn le a sùnga um hai, hnuoi le a chunga um hai, tuifinriet le a sùnga um hai siemtu hming chu sâlin, "Sawt riel ta naw nih! 7 Vàntirko pasarinain kona tawtawrawt a mût pha chun, Pathien thurûk, a siehlaw zawlneihai kuoma a hril ang khan, hung tlung kim tàng a tih" a ta. 8 Chun, vàna inthoka rawl ka hriet khan a mi biek nawk a, "Tuifinriet le khawmuol sira ngîr vàntirko kuta lekhabu ziel inphar saw va la rawh" a ti ka hriet a. 9 Vàntirko kuoma chun ka fe a, "Lekhabu ziel chîte kha mi pe rawh" ka ta. Ama chun, "La la, fa rawh. I phìngpui chun thûrf ti hlêng a ta, i bàua ruok chu khuoizu angin thlum a tih" a ta. 10 Vàntirko kuta lekhabu ziel chîte chu ka lâk a, ka beng ta vong a, ka bàua chun khuoizu angin a thlum a, ka hang lem ruok chun ka phìnga chun a thûr ta èm êm a. 11 Ama chun ka kuomah, "Mi hai, hnam hai, tong tum tum hai le lal hai chungchâng thu i puong nawk ding a nih" tiin a mi hril a.

Revelation 11

1 Chun, inkhìna, luong hmol ang an mi pèk a. "Fe la, Pathien tempul le maichàm va'n khi la, a sûnga chawibiektuhai chu tiem rawh. 2 Tempul inhuonna huong sùng tuollai ruok chu Jentêlhai kuoma pèk a ni tah leiin inkhì sà naw rawh. Jentêlhaiin khawpui thienghlim chu thla sawmli pahni sûng sir dèng an tih. 3 Nisienlakhom, ka thu hretu pahnihai chu saiip sila thu puong theina pêng ka ta, ni sângkhat zahni sawmruk sûng hril an tih" tiin a mi hril a. 4 Hieng mihai hi oliv thing pahni le khawnvar pahnih, hnuoi Lalpa hmaa ngîr hlak chu an nih. 5 Anni chu tu khomin suknat an tum chun an bàua inthoka mei hung suok chun an hmèlmahai chu a kàng hmang hlak. Chuong ang chun anni suknat tumtuhai chu thi ngêi an tih. 6 Chuonghai chun thu an hril sûng po chu ruo sûr lo dinga vàn khàr theina thu an nei a; tui khom thisenin an inchangtir thei a, an nuom hun hunah hnuoiah hripui tinrêng an inlèngtir thei bok a. 7 Thu an hril zo pha leh khuorkhurûma inthoka hung suok sahrâng chun anni chu do a ta, hnèng a ta, that a tih. 8 An ruong chu khaw ropui kotthlèra chun zâl a ta; chu khawpui chu an Lalpa an hemdena khuo a na, hming lemah Sodom le Aigupta tia ko a ni hlak. 9 Mi tin, chi tin, tong tin le hnam tina mihai chun an ruong chu ni thum le a chenve en huoi huoi an ta, phûm phal naw ni hai. 10 Hieng zawlnei pahnihai leia an tuor nasat êm leiin an thi chu hnuoia chênghai chun lawm an ta, insukhlimna siem an ta, thilpêk inhlàn tuo bok an tih. 11 Amiruokchu, ni thum le a chenve hnung chun Pathiena inthoka hringna thuok chu an sûngah a hung lût a, an ngîr suok el tah a, a hmutuhai pang chu a'n za hle a. 12 Chu zoah, vàna inthokin rawl inring takin, "Hitaka hin hung tung ro" a hung ti a, chuongchun sûmin vàn tieng an kài a, an hmèlmahai chun an thlîr thup a. 13 Chuong lai chun lir nasa takin a hung inhnìng a, khawpui hmun sawma thea hmun khat chu a chim a, mi sângsarih an thi a, a la damhai chun ti le thlabârin vàna Pathien chu an chawimawi a. 14 Chungrikna pahnina chu a liem ta a, chungrikna pathumna chu a hung tlung vak ding a nih. 15 Vàntirko pasarina chun a hang mùt a, vàna inthoka rawl hung suok chun, "Khawvel ram chu ei Lalpa le Krista ram a hung ni tah, Ama chun chatuonin ro rêl a tih" tiin an khèk dur dur a. 16 Upa sawmhni palihai, Pathien hmaa an lalthungphaa inthunghai chu Pathien hmaa bokkhupin, 17 "Lalpa, Iengkim Pathien, Um zing, um tah le la um ding, I theina ropui tak hmang a, Ro i hung rèl tàk leiin, Lawmin kan inpàk che. 18 Hnamhaig chu an lungsen a, Chu chun i lung an suksen a; Mithihai ro i rèlpèk ding ni, I siehlaw zawlnei le mi thienghlim hai, I hming inzàtu a chin a lien, Lawmman i pèk ding hun leHnuoi suksetuhai i suksiet hun chu, Tu hin a hung tlung tah hi"tiin an chawibiek a. 19 Chun, vàna Pathien tempul chu an hong a, a sùnga thuthlung bawm chu a hung inlang a, kawl a hung inlep zuk zuk a, rawl râpum tak a hung suok a, vàn a hung inrûm dur dur a, riel a tla chur chur a.

Revelation 12

1 Vànah inchikna mak tak a hung inlang a. Nisaa inthuom nuhmei, a kepha hnuoia thlapä um le arasi sawmpahni chuong lallukhum khum chu a hung inlang a. 2 Ama chun nau a von a, nauhase tuorin a'n rùm a. 3 Vànah inchikna dang, dragon sen lien tak, lu sari le ki sawm nei, lallukhum pasari khum, a hung inlang nawk a. 4 A mei chun arasi hmun thuma thea hmun khat chu vàna inthokin a vai thlâk a, hnuoiah a thè thlâk vong a. Nau a nei phaa lo dol el dingin nuhmei nauhase hmaa chun a'n chân rùn a. 5 Hnamhaih chunga thîrtieng hmanga rorêltu ding nau pasal a nei a, a nau chu Pathien le a lalthungpha hmaa chun lâk tungin a um ta dai a. 6 Nuhmei chu Pathienin thlalèra hmun a buotsaia chun ni sângkhat zahni sawmruk sûng chawma um dingin a tlàn hmang a. 7 Vàna chun indona a hung um a, Mikael le a rawi vàntirkohai chun dragon chu an do a, dragon le a rawihai chun an do lèt ve a. 8 Dragon chun a hnè naw a, vàna a hmun chu an chân tah a nih. 9 Dragon lien tak, rûlpui hreu, Diebol le Setan an ti, khawvel pumpui hlèmtu chu an pei suok a, a rawihai leh hnuoiah an pei thlak a. 10 Chun, vàna inthokin rawl inring takin, "Tu zet hin chu ei Pathienin, A mi lo sansuok tah a nih. A thilthawtheizie, inlalzie, Kristain thu a neizie chuA hung inlang tah a nih. Ei Pathien hmaa sùn-zàna Ei unauhai hêk hlaktu chu, Pei thlâkin a lo um tah. 11 Beramte thisen lei leA thu an puong dar leiin, Hnèna chu an chang ta a; An nun chen khom chàn huomin, Thi hrim hrim an tî si nawh. 12 Vàn le a sùnga chênghai, Chu lei chun hlimin lawm ro; Hnuoi le tuifinriet ruok chu, In chung a va hang pik ngei!Diebol ngei chu in kuomahPei thlâkin a um ta si a; Hun tawite a nei ti hrein, Lungsenin a sip a nih"tia an sak ri chu ka hriet a. 13 Hnuoia pei thlâk a nih ti Dragon-in a hriet chun nau pasal neitu nuhmei chu a hnot thlùr a. 14 Nuhmei chu Rûlpui tawk phàk loa a umna dinga buotsai thlalèra chun a vuong lût theina dingin mupui lien tak thla khing hnih an pèk a, chu taka chun kum thum le a chenve sûng chu chawm an tih. 15 Nuhmei chu lên hmang dingin rûlpui chun vadungpui tui anga tam a bàua inthokin tui a phù suok puot puot a. 16 Sienkhom, nuhmei chu hnuoiin a lo san a, a bàu a ka a, dragonin a bàua a phu suok tui chu a lo dawt kang vong a. 17 Nuhmei chunga chun dragon chu a lungsen hle a, a thla la umhai, Pathien thupêk zawm a, Isu thu ringum taka puong hlaktuhai chu do dingin a'n thok suok a. (18) Dragon chu tuifinriet kama chun a ngîr rùn a.

Revelation 13

1 Chun, sahrâng, ki sawm le lu sari nei, tuifinrieta inthoka hung suok ka hmu a, a kia chun lallukhum sawm a um a, a lu kipa chun Pathien hrilsietna hming a chuong a. 2 Ka sahrâng hmu chun keite ang sien khom a ke chu savom ke ang le a bàu chu sakeibaknei bàu ang a ni thung. Dragon chun a thilthawtheina hai, a lalthungpha hai le a thuneina insâng tak hai chu sahrâng a pêk a. 3 Sahrâng lu pakhat chu thipui thei hiel khopin a hliem a, sienkhom a hliem chu a hung dam nawk a. Khawvel mi po poin mak an ti hle a, sahrâng chu an zui huoi huoi a. 4 Sahrâng kuoma thuneina a pêk lei chun dragon chu mi tinin chibai an bùk a, sahrâng khom chu bein, "Sahrâng ang hi tu am an um a? Tuin am do thei a ta?" an ta. 5 Thla sawmli le pahni sûng uongthuong taka Pathien hrilsiea bâu phong theina le dutawka a thuneina chelek theina chu sahrâng kuomah an pèk a. 6 Chuongchun, Pathien hrilsein bàu a phong a, a hming, a chêngna hmun le vàna chênghai po po chu a a hrilsiet a. 7 Mi thienghlimhai a do le a hnè chu phal a na, chi tin, mi tin, tong tin le hnam tin chunga thu nei theina pèk a ni bok a. 8 Khawvel siem laia that tah Beramte Hringna Lekhabua hming chuonghai chauh naw chun khawvel mi po poin ama chu chibai bûk an tih. 9 Tu khom hriet theina dinga na nei chun ngàithla ngun raw se. 10 Sala intâng ding chu salah intâng an ta, kawlhnàma thi ding chu kawlhnàma thatin um an tih; chu chun, mi thienghlimhai chu sel tak le ringum taka an um a tulzie a suklang. 11 Chun, sahrâng dang, beram ki ang ki pahni nei, dragon anga tong si, hnuoia inthoka hung suok ka hmu a, 12 sahrâng hmasa thuneina po po chu a chelek a, thipui khop hiel hliem nei sahrâng dam nawk chu hnuoi le a sûnga um po po a'n biektir a. 13 Chu sahrâng chun thilmak a thaw teua, mihai mithmuah vàna inthokin hnuoiah mei a ko thlàk a, 14 sahrâng hmasa hminga thil mak tam tak a thaw phalpêk a ni lei chun mi po po a hlèm a, kawlhnâm be tuor sahrâng dam nawk chawimawina dingin a lim chu a'n siemtir a. 15 Sahrâng lim chu a hung tong theina ding le sahrâng lim be nuom naw taphot chu a sukhlum theina dingin sahrâng lim chu sukhring theina thu pèk a na. 16 Sahrâng chun mi po po, mi lien le mi chin, mi hausa le mi rethei, bawi le bawi naw hai khom an kut chang tieng amanih an bawk amaniah inchikna suoi a nampèk a; 17 chuleiin, sahrâng hming amanih, a hming nambar amanih inchikna put ve naw tu khomin thil inchawin zor thei naw ni hai. 18 Hi taka hin lungvar inthat a tûl hle. A sût thiem chun sût sien la, a nambar chu mihriem nambar a ni si a. A nambar zât chu zaruk sawmruk paruk a nih.

Revelation 14

1 Chun, ka hang en a, ngai ta, Zion Tlânga Beramte ngîr ka hmu a, a bula chun a hming le a Pa hming an bawka inziek mi nuoikhat sîngli le sângli an ngìr a. 2 Vàna inthok chun tuipui insok ri hum hum le vàninrûm dur dur ri ang ka hriet a. Ka ri hriet chu tingtang tumtuhaiin an tingtang an tum rì ang a na. 3 Lalthungpha hmaa le thilhring pali le upahai hmaa chun hla thar an sak a, chu hla chu hnuoia inthoka intlan tah mi nuoikhat sîngli le sânglihai chauh naw chun tu khomin an zawm ve thei nawh. 4 Chuong mihai chu nuhmei laka insukporchè ve lo, mi invong thienghlim, Beramte fèna taphota zuituhai, mihriem laia inthoka intlan suok, Beramte le Pathien ta dinga ra hmasa tak inhlàna umhai chu an nih. 5 Khêl an hril ngai naw a, hmêlhemna an nei bok nawh. 6 Chun, hnuoia chêng po po, hnam tin, chi tin, tong tin le mi tin kuoma chatuon Chanchin Tha tlânginsampui dinga vàn laizawla vàntirko dang vuong ka hmu a. 7 Ama chun rawl inring takin, "Pathien ti unla, chawimawi ro, a rorêl hun chu a hung tlung ta si a; vàn hai, hnuoi hai, tuifinriet hai le tuihnâr hai siemtu chu chawibiek ro" a ta. 8 Vàntirko pahnihna chun a hung zui a, "A tlawm tah! Babulon khaw ropui, a mi dit chîngna uoiin hrât tak, hnam tin indawntira dawi vêt hlaktu chu, a tlawm tah, a tlawm tah" a ta. 9 Vàntirko pathumna chun anni chu a hung zui a, inring takin, "Tu khom sahrâng le a lim chu bie a, an bawk amanih an kut amania inchikna suoi chuong taphot chun, 10 Pathien lungsenna uoiin fìr, a lungsenna noa sung sip chu dawn an ta, Beramte le vàntirko thienghlimhai mithmua ngei kâta chok meiah hremin um an tih. 11 Anni hremna mei chu chatuonin khu tung a ta; sahrâng le a lim betuhai le a hming inchikna puttuhai hremna chun tawpintâi hrim nei naw nih" tiin a khèk a. 12 Hi taka hin mi thienghlim, Pathien thupèk leia Isu ring tlattuhai ta dingin tuorsel a tûlzie a suklang. 13 Chun, vàna inthoka rawlin, "Hieng hin ziek rawh: Tuta inthoka Lalpaa thihai chu an hamtha" a ti ka hriet a. Thlarau chun, "A ni ngei, an sin inrimnahai chu chawlsan tàng an ta, an thilthawhai chun a zui ding a ni si a" a lo ti a. 14 Ka hang en a, ngai ta, sûm vàr ka hmu a, a chunga chun mihriem naupa ang hi a thung a, rangkachak lallukhum a khum a, kawite ngei tak a chawi bok a. 15 Tempula inthok chun vàntirko dang a hung suok a, sum chunga inthung kuoma chun rawl inring takin, "I kawite kha phor la, ât rawh, bu lâk a hun ta a, hnuoia bu a ngûi zo tah" a ta. 16 Chuongchun, sûm chunga thung chun a kawite chu hnuoi chungah a vai a, hnuoia bu chu sìk a ni tah a. 17 Vàna tempula inthok chun vàntirko dang a hung suok a, ama khom chun kawite ngei tak a chawi a. 18 Vàntirko dang, mei chunga thuneitu, maichàma inthokin a hung suok bok a, kawite ngei tak chawitu kuoma chun rawl inring takin, "I kawite ngei tak kha phor la, hnuoia grêp bawrhai khu a hmin tuo ta a, zu lo rawh" a ta. 19 Chuongchun, vàntirko chun a kawite chu hnuoi chungah a vai a, grêp ra bawrhai chu a ât khawm a, Pathien lungsenna khurpuia sawr dingin a dèng lùt a. 20 Khawpui puo tienga grêp sawrna khura chun grêp chu a sir sawr a, grêp sawrna khura inthok chun thisen, rîng chena inthûk, kilometar zathum vel dâpin a hung luong suok ta nguoi nguoi a.

Revelation 15

1 Chun, vànah inchikna dang ropui tak le mak tak ka hmu a: vàntirko pasariin hremna nuhnung pasari an hung chawi a, chuong hremnaa chun Pathien lungsenna chu a tlung kim tah a nih. 2 Darthlalang ang tuifinriet, mei le inpol chu ka hmu a, sahrâng le a lim le a hming nambar hnêtuhai chu ka hmu bok a, Pathien pêk tingtang chu chawiin darthlalang ang tuifinriet kama chun an ngîr a. 3 Anni chun Pathien siehlaw Mosie hla le Beramte hla chu an sak a:"Lalpa, Iengkim Pathien, I thilthawhai a ropuiin a va mak de!Aw, chatuon hnam tin Laltak, I lampuihai chu a'n dik fel ngei! 4 Aw Lalpa, tu am nangma ti loa, I hming chawimawi lo ding um?Nangma chauh i thienghlim a, Hnam tin i hmaah hungin, Hung chawibiek an ti che a, I thilthaw indikzie hai chuTâr lang a ni ta si a"tiin. 5 Chu hnung chun ka hang en a, vàna tempul hmun thienghlim tak chu a lo inhong a, 6 hremna pasari chawi vàntirko pasarihai chu tempula inthok chun an hung suok a, puon zâi inhmi fai tak, tle sur elin an inthuom a, rangkachak hruolin an awm an hrên bok a. 7 Chatuona hring zing Pathien lungsennaa sip rangkachak berbu pasari chu thilhring palihai laia pakhat chun vàntirko pasarihai chu a pêk a. 8 Tempul chu Pathien ropuina le a thilthawtheina khu chun a'n zâm sip ta mup a, vàntirko pasarihai chawi hremna pasari chu zo a ni hmàkhat tu khom tempula chun an lût thei nawh.

Revelation 16

1 Tempul sûnga inthoka hung suok rawl inring tak chun vàntirko pasarihai kuomah, "Fe unla, Pathien lungsenna berbu pasarihai chu hnuoiah bun thla ro" a ti ka hriet a. 2 Vàntirko hmasa tak chu a fe a, a berbu chu hnuoiah a bun thlàk a; chuongchun sahrâng le a'n chikna puttuhai le a lim betuhai chungah pân hri, rimsie le na tak a'n lêng ta nghàl a. 3 Vàntirko pahnina chun a berbu chu tuifinrietah a bun thlàk a; chuongchun, mithi thisen ang elin a hung inchang a, tuifinrieta thilhring chêng po po chu an thi vong a. 4 Vàntirko pathumna chun a berbu chu vadung le tuikhura hai a bun thlàk a, thisenin an hung inchang a. 5 Tui enkoltu vàntirko chun, "Um zing le Um tah, Nang mi Thienghlim, Ro chu i rèl ta ngei a, I rorêl chu a va'n dik ngei! 6 I mi thienghlim le zawlneihai thisen, Insuotuhai chu an phu ang hrimin, Thisen bok i'n dawntir ve ta hi"a ti ka hriet a. 7 Maichàm chun "Ni e, Lalpa, Iengkim Pathien, I rorêl chu indikin, A fel a nih"a ti ri ka hriet bok a. 8 Vàntirko palina chun a berbu chawi chu nisaah a bun thlâk a, nisa chu mihriemhai em ût vong theina thu pêk a ni a. 9 Chuongchun mei sa takin mihai chu a em ût a; sienkhom, hremna chunga thuneitu Pathien hming chu an hrilsiet a, an sim chuong naw a, ama an chawimawi nuom chuong bok nawh. 10 Vàntirko pangana chun a berbu chu sahrâng lalthungphaah a bun thlàk a, chuongchun a ram chu a hung inthim ta vong a. Na tuorin mihai chun hâ an rawt a. 11 An pänna natin a khei lei le an nat tuor lei chun vàn Pathien an hrilsiet a, an thilthawhai an sim chuong naw a, Pathien an chawimawi nuom chuong bok nawh. 12 Vàntirko parukna chun a berbu chu Eufretis vadungpuiah a bun thlàk a, vadung tui chu a kang chat a, sak tienga inthoka lalhaii hungna ding lam chu a hong tah a. 13 Chun, dragon bàua inthok dâm, sahrâng baua inthok dâm, zawlnei tehlêm baua inthok dâma hung suok thlarau tirdakum pathum, utok ang deu, ka hmu bok a. 14 Chuonghai chu ramhuoi thlarau an ni a, thil mak khom an thaw hlak a. Iengkim Pathien ni ropuia indonaa hung thuoi khawm dingin khawvel lalhai po po kuomah an fe a. 15 "Ngai ta u, rûkrù angin ka hung ie, inringa inzo diema inchei chu a hamtha, mihaiin saruoka phâwka an inzak nawna dingin" 16 Chuongchun, lalhai chu Hebrai tonga Armagedonj an ti hmuna chun an hung thuoi khawm a. 17 Vàntirko pasarina chun a berbu chu boruokah a bun thlàk a, tempula lalthungphaa inthok chun rawl inring tak a hung suok a, "Zo a ni tah" a ta. 18 Chu zoah, kawl a hung inlep zuk zuk a, rawl a hung suok a, vàn a'n rûm dur dur a, lir nasa takin a'n hnìng a, mihriem um chinah chuong anga lir inhning nasa chu a la um ngai nawh. 19 Khaw ropui chu hmun thumah a koi phel a, Jentêl khawpuihai chu a chim a. Babulon khaw ropui chu Pathienin a'n hmai naw a, berbua a lungsenna uoiin sung sip chu a'n dawntir tah a nih. 20 Thlierkâr po po an tlàn hmang a, tlânghai khom hmu ding an um ta nawh. 21 Vàna inthokin riel lien tak tak, kilogram sawmnga laia rik, mihriem chungah a tla a. Riela hremna lei chun Pathien chu mihaiin an hrilsiet a, hremna chu a râpthlâk hlè hrim a.

Revelation 17

1 Berbu pasari chawi vàntirko pasari laia pakhat chu a hung a, a mi hung biek a. "Hung ta, tui tam tak chunga thung nawchizor hmingthang tak chunga hremna chu inhmutir ka ti che. 2 Hnuoia lalhai chun an zâlpui a, hnuoia chênghai khom inngai a chîngna uoiin chun a hrâi rui hlak" a ta. 3 Vàntirko chun Thlarauin thlalèrah a mi thuoi a, chun sahrâng sen lâr chunga chuong nuhmei ka hmu a. Sahrâng chun lu sari le ki sawm a nei a, a pum chun Pathien hrilsietna hming a râng buoi a. 4 Nuhmei chu rong sen duk le sen lârin a'n thuom a, a'n cheina rangkachak le lung man tam le tuikeplung chu a pâr chuoi a. A kutin rangkachak no, thil tirdakum le inngaina porchea sung sip, a chawi a. 5 A bawka chun hieng ang hin a hming a chuong a:NU MAKBABULON KHAW ROPUINAWCHIZORHAI NUKHAWVEL SUKPORCHÉTU. 6 Chu nu chu mi thienghlimhai thisen le Isu thu an inhriettir leia màrtar changhai thisena inruiin ka hmu a. Ama ka hmu chun mak ka ti takzet a. 7 Vàntirko chun, "Ieng leia mak i ti? Hi nu le a phurtu sahrâng ki sari le lu sawm nei thurûk chu hril ka ti che. 8 Sahrâng i hmu kha a um ta zet a, a um nawk ta naw a; khuorkhurûma inthokin hung suok nawk a ta, bohmangnaah lût a tih. Hnuoi le vàn siema inthok Hringna Bua hming chuong lo, hnuoia chênghai chun sahrâng chu a um ta zet a, a um nawk ta naw a, a hung um nawk an hmu pha chun mak tîng an tih. 9 Hi thu umzie hi man fu ding chun lungvar nei a ngai. Lu sari chu nuhmei thungna tlâng pasari a ni a, lal pasari a ni bok. 10 Panga chu an thi tah a, pakhat chu a la um a, a dang chu a la um hri naw a, a hung um pha khom sawt naw te chauh um a tih. 11 Sahrâng um ta zeta um nawk ta lo chu lal parietna a nih, pasarihai laia mi kha a ni bok; sienkhom sukbohmang nîng a tih. 12 Ki sawm i hmu hai kha lal sawm, lalna la chang hrì lohai an na, dârkâr khat sûng chauh sahrâng leh lal thuneina nei an tih. 13 Inthukopin, an thuneina le thilthawtheina chu sahrâng kuomah pêng an tih. 14 Anni chun Beramte chu do an ta, sienkhom Beramte chun hnêng a tih. A hnung zuitu, a ko le a thlang, mi ringumhai leh anni chu hnêng a tih, ama chu lalhai Lal, laltakhai Laltak a ni si a" a ta. 15 Ama bok chun ka kuomah, "Nawchizor inthungna tui tam tak i hmu kha mi hai, mipui hai, hnam hai le tong hrang hrang hai chu an nih. 16 I sahràng hmu le a ki sawmhai chun nawchizor chu theidâng an ta, a nei po po suktlaran an ta, saruokin siem an ta, a sa fâng an ta, meiah raw hmang an tih. 17 Pathienin a thaw tum a hlenna dingin an lungril a hne a, Pathien thu a tlung kim hmâkhat chu sahrâng kuomah an thuneina pèk a'n remtitir a nih. 18 I nuhmei hmu kha khawpui ropui, hnuoia lalhai chunga rorêltu chu a nih" a ta.

Revelation 18

1 Chu hnunga chun vàntirko dang, vàna inthoka hung thla ka hmu a. Thuneina insâng tak a nei a, a ropuina chun hnuoi pumpui a el var a. 2 Inring taka khêkin, Babulon khaw ropui chu"A tlawm tah! A tlawm tah!Ramhuoihai an chêngna hmun, Thlarau tirdakum hràngna, Vate porche intom khawmnaA lo inchang ta si a; 3 A mi dit chìngna uoiin, Hnam po po a'n dawntir a, Hnuoia lalhan an zâlpui a, A nuomsip bawlna chu Hnuoia sumdawnghan an hausakpui"a ta. 4 Chun, vàna inthokin rawl dang ka hriet nawk a:"Ka mihai, hung suoksan ro, A suolnaah thang ve naw ro, Hremna tuor ve hlauh rawi in tih; 5 A suolna chun vàn a tong a, A suol thawhai Pathienin a hriet. 6 In chunga a thaw ang chu, A chungah thaw ve unla, A thaw lêta thungrulin, Dawn ding khom a lêta tak, A noa chun sungpèk ro; 7 A'n sukropuizie le hoithawzie phûin, Tuorna le lungngainain rul ro. 'Lalnuah ka thung, hmeithai ka ni nawh, Lu sûn ngai naw ning' a ti lungril vei a. 8 Chuleiin, ni khat sûngin, Thina, lusunna le tàmna, Hrihai chun tlàkbuok a ta, Meiin lem hmang vong a tih; Thiem naw inchangtirtu chu, Lalpa Pathien Hrât a nih"tiin. 9 Hnuoia lal, ama uirepuitu le nuomsip bawlpui hlaktuhai chun a kâng khu an hmu chun sûnin tàng an tih. 10 A hrem tuor lai chu pangzatin hla takah thlîr an ta, "A va râpthlâk ngei de aw!Aw, Babulon khaw ropui, Dârkâr khat sûng chauh el a, I hang tlu se ruop el chu!"tiin tàng an tih. 11 Hnuoia sumdawnghai khomin tapin sûn an tih, tu khomin an thil zorhai an inchawk ta naw leiin. 12 Rangkachak dâm, tangkaruo dâm, lung man tam dàm, tuikeplung dàm, puon zâi inhmi dàm, puon sen duk le silk sen lâr dàm, thing rimtui dàm, saiha dâm, dâr dâm, thîr dâm le sailungvara siem thil chi hrang hrang dâm, 13 thingzungthak dàm, mawsawla dâm, beraw dâm, murra dâm, rimtui raw chi dâm, uoiin le oliv hriek dàm, beiphit le huit hûm dàm, bawng le beram dâm, sakor le tawlailir dàm, bawi le mihriem hringna an zor hlak chu tu khomin an inchawkpèk ta nawh. 14 Anni chun, "I thil thlâkhlà hlak hai kha, Hmu ding hrim an um ta nawh; I ropui le mawina hai, Hmu nawk um ta lo dingin, An bohmang vong ta si a"tîng an tih. 15 Chuong ang thil chu zora amaa inthoka insukhausa sumdawngtuhai chun a hrem tuor chu pangzatin hla takah ngir an ta, mitthli tla puma sûnin, 16 A va râpthlak ngei de maw!Puon sen duk le puon sen lâr, Rangkachak le lung man tam, Tuikeplung leh pâr chuoi aInchei hlak khaw ropui chu, 17 Dârkâr khat sûng chauin, A hausakna po po leh, A tlu se ta ruop el hi!tiin tap hla insam an tih. Long hotu le a sûnga chuong khuolzinhai, long khaltuhai le tuifinrieta fâk zongtuhai chu hla takah ngîr an ta. 18 A kàng khu an hmu chun, "Hi khuo ang hi khawpui ropui dang a um ding am a ni?" tiin khêk an tih. 19 An luah pilvut phulin, nasa taka taa sûnin, "A va hang râpthlâk ngei de!Aw khaw ropui, a râpthlâk! Tuipuia long nei po po, I zâra hausa an nih; Dârkâr khat sûng chauh el a, I hang ram el hi chu aw! 20 Aw vàn le mithienghlimhai, Tirkohai le zawlneihai, A siet tâk leiin lawm ro; In chunga a thaw angin, Pathienin a hrem tah hi" tiin khêk an tih. 21 Chun, vàntirko hrât tak hin bu rawtna lung tieta lien lung a lâk a, tuifinrietah a pei thlàk a, hi thu hi a'n sam a:"Babulon khaw ropui chu, Rawng taka pei nìng a ta; Hmu nawk ni ta ngai naw nih. 22 A sûngah rimawi hrim hrim, Tingtang, theihle, tawtawrawt, An tum hriet ni ta naw nih. A sûnga thil siem thiem hrim, Hmu ding um ta naw ni a, u her ri hrim hrim hai khom, Hriet ni ta ngai bok naw nih. 23 A sûnga chun khawnvar hrim, Var nawk ta ngai naw ni a, Moneitu le mo ri hrim, Hriet ni ta ngai bok naw nih. I sumdawng hausahai chu. Khawvel mi lien an kai a; I zawlaidi chun hnam tin, I dawi vèt tawl hlak si a; 24 Mi thienghlim hai, zawlnei hai, Hnuoia that tahai thisen, I kutah a kâi rawn si a"tiin.

Revelation 19

1 Chu hnunga chun vànah mipui tam tak khêk thuop thuop ri ang ka hriet a:"Halleluia!Sandamna le ropuina hai, Thilthawtheina po po chu, Ei Pathien tä vong a na, 2 A rorêl indikin a fel. Nawchizor hmingthang tak el, Mi zawl thlûk a thiem leiaKhawvel sukporchètu chu, Thiem naw hung inchangtirin, A siehlawhai thisen phuba, A chungah a lâk tah a nih"an ta. 3 "Halleluia! A kâng khu chu, Chatuonin khu tung a tih" an ti nawk a. 4 Upa sawmhni pali le thilhring palihai chu an bokkhup a, "Amen, Halleluia!" tiin lalthungphaa thung Pathien chu an chawibiek a. 5 Chun, lalthungphaa inthoka rawl hung suok chun, "Nangni a siehlaw po pohai, A lien, a chîn, ama tîtuhai, Ei Pathien hi inpâk ro"a hung ta. 6 Chun, mipui tam tak rawl ang, tuifinriet insok ri hum hum ang le vàninrum ri dur dur ang ri ka hriet a, "Halleluia!Ei Lalpa Iengkim Pathienin ro a rèl ie, 7 Hlima lawmin chawimawi ei tiu, Beramte nuhmei nei a hun tah a, A mo ding khom a'n pei tah a, 8 Puon zai inhmi, vâr inthieng, Inbel dingin a'n pèk tah"tiin. (Puon zâi inhmi chu mi thienghlimhai thil fel thaw aiawa ngîr a nih. ) 9 Chun, vàntirko chun ka kuomah, "Ziek rawh. Beramte inneina ruoi kîl dinga fielhai chu an hamtha" a ta. "Hieng thu hi Pathien thudik a nih" a ti bok a. 10 Chu phing leh chawibiek dingin a ke bulah ka bokkhup a, ama chun, "Khâng khan thaw naw rawh. Kei chu nang le i unauhai ang boka Isu pomtu, in unau le siehlaw chanpui ka ni hih. Pathien chawibiek lem rawh. Isu thu hung inhriettir hi thu hriltu thlarau dong chu a nih" a ta. 11 Chun, vàn a hung inhong a, sakor vàr ka hmu a, a chunga chuong chu Ringum le Indik tiin an koa, ama chun indiknain ro a rèl a, râl a do bok a. 12 A mit chu meichok inhlap ang a ni a, a lua chun lallukhum tam tak a khum a, tu khom hriet lo, ama chauin a hriet hming ziek a put a. 13 Thisena inchie tah zakaw fuol a hâk a, a hming chu 'Pathien Thu' a nih. 14 Vàn sipai ruol, puon zâi inhmi vâr inthieng taka inthuomhai chun sakor chunga chuongin a hnung an zui a. 15 A bàua inthok chun kawlhnâm ngei tak a hung suok a, chu chun hnamhai tukdol a ta, thirhmolin an chungah ro rêl a ta, Iengkim Pathien lungsenna nasa tak sawrna khura chun sir sawr tawl a tih. 16 A korfuol le a malpuia chun, "Lalhai Lal le hotuhai Hotu" ti a'n ziek a. 17 Chun, vàntirko pakhat, nisaa ngîr ka hmu a. Ama chun vànlaizawla vate vuong hlak po po kuoma chun rawl inring takin, "Pathien ruoi ropui kîl dingin hung inkhawm ro. 18 Lalhai sa dàm, sipai hotuhai sa dàm, mi ropuihai sa dàm, sakor le a chunga chuonghai sa dàm, mi chi tinrêng bawi le bawi lo, a chîn a lien sa dàm in fàk ding annawm" tiin a khêk a. 19 Sahrâng le hnuoi lalhai chu an sipaihai leh sakor vâr chunga chuong le a sipaihai chu bei dingin an inhawr khawm ka hmu a. 20 Sahrâng chu an man a, ama aia thil mak thaw hlaktu zawlnei tehlêm khom chu an man bok a. Chu zawlnei chun thil mak thawin sahrâng nambar puttuhai le a lim betuhai chu a hlêm hlak a nih. An pahni chun a hringin kâta chok meidîla chun an pei a. 21 Sakor chunga chuong bâua inthoka kawlhnâm hung suok chun mi danghai chu an that a; vatehai chun tlai takin an sa chu an tlàn a.

Revelation 20

1 Chun, vàna inthoka vàntirko pakhat hung tum ka hmu a, khuorkhurûm chabi le khaidiet lien tak a chawi a. 2 Dragon, Rûlpui Hreu, Diebol le Setan chu a man a, kum sâng intâng dingin a khuop a, 3 kum sâng a'n voi hma chu hnamhai a hlêm ta nawna dingin khuorkhurûma chun a thlâk a, a kal a, a chàr khum a. Chu hnunga chun sawtnawte insuo ni nawk a tih. 4 Lalthungphahai ka hmu a, a chunga thunghai khom, anni chu rorêl theina an pèk a. Isu thu an hril lei le Pathien thu leia lu an tanpekhai thlarau ka hmu a. Sahrâng le a lim be ve lo, an bawk amanih an kut amania inchikna um ve lohai thlarau ka hmu bok a. Chuonghai chu an hung hring nawk a, Krista rawiin kum sâng ro an rèl a. 5 Mithi danghai ruok chu kum sâng a'n voi hma chun an la hring hri nawh. Hi hi thonawkna hmasa chu a nih. 6 Thonawkna hmasa taka thanghai chu an thienghlimin an hamtha, thi hnina chun an chungah thu hrim a nei ta naw a, Pathien le Krista ta dingin thiempu nîng an ta, ama leh kum sâng ro rêl an tih. 7 Kum sâng khat an voi hnungin Setan chu a'n tângnaa inthokin insuo nîng a ta, 8 hnuoi kil lia Jentêlhai, Gog le Mogog hai chu hung hlêm tawl a ta, indo dingin thuoi khawm a ta, an tamzie chu tuifinriet kama tieuvut ang el a nih. 9 Hnuoi khang dâpin an hung a, Pathien mihai kul le a khawpui dit tak chu an inhuol a, sienkhom vàna inthokin mei a hung tla a, anni chu a lem zo tah a. 10 Anni hlêmtu Diebol chu sahrâng le zawlnei tehlêm an thlàkna, kâta chok meidilah chun an pei a, chu taka chun a sùn a zànin hremna chatuonin tuor tâng an tih. 11 Chun, lalthungpha vâr ropui tak le a chunga thung ka hmu a, a hmaa inthokin hnuoi le vàn an tlàn hmang a, hmu ding an um ta nawh. 12 Mithihai, a chîn a lien, lalthungpha hmaa ngîr ka hmu a, lekhabu ziel an phar a. Chun, lekhabu ziel dang an phar ka hmu bok a, chu chu hringna lekhabu a nih. Chu lekhabua an thilthaw inziek ang pei chun mithihai chungthu chu an rèl a. 13 Tuifinriet chun a sûnga mithihai chu a'n suo a, Thina le Mithi Khuo khomin mithi an kolhai chu a'n insuo bok a, mi tin chu an thilthaw ang peiin an chungthu an rêl a. 14 Thina le Mithi Khuo chu meidilah an pei a. Hi meidil hi thi hnina chu a nih. 15 Tu khom hringna bua hming chuong naw chu meidilah an pei a.

Revelation 21

1 Chun, vàn thar le hnuoi thar ka hmu a, vàn hmasa le hnuoi hmasa chu an bohmang tah a, tuifinriet khom a um ta nawh. 2 Pasal nei ding mo, mawi taka inchei diema inpei tah angin, khaw thienghlim, Jerusalem thar chu, vàna Pathien kuoma inthoka hung tum lai chu ka hmu a. 3 Lalthungphaa inthokin rawl inring tak ka hriet a, "Ngai ta, Pathien chêngna chu, Mihriem lai a hung um tah; Ama chu anni leh chêng a ta, Anni chu a mihai nîng an ta, Pathien ngei chun umpui a ta, An Pathien ni bok a tih. 4 An mitthli po po hru hul a ta, Thìna hrim um ta naw ni a, Lu sûn hai, tap hai, natna haiÛm nawk ta ngai bok naw nih; Thil hluihai chu an liem ta si a"tiin a hung hril a. 5 Lalthungphaa thung chun, "Ngai ta, iengkim ka siem thar ie" a ta. "Ziek rawh, hieng ka thuhai hi a ringumin a'n dik a nih" a ti nawk a. 6 Chun, ka kuoma bok, "A tlung kim tah, kei Alfa le Omega, a bul le a tawp chu ka nih. Dangchâr taphot kuoma chun dawn ding hringna tuikhura inthokin a thlawnin pêng ka tih. 7 Hnètu taphot chun hieng hi rochung a ta, a Pathien nîng ka ta, ama khom ka nau nîng a tih. 8 Mi dawikawlok dàm, ring nawtu dàm, tirdakum dàm, tuolthattu dàm, inngai chîng dàm, dawithiem dàm, milem be dâm le khêlhlip po po chan ding chu kâta chok meidil a nih. Hi hi thi hnina chu a nih" a ta. 9 Chun, vàntirko pasarihai laia pakhat, hremna pasarihai laia a nuhnung taka sung sip, berbu pasarina chawitu chu ka kuomah a hung a. Ama chun, "Hung ta, Beramte nuhmei, a mo chu inentir ka ti chê" a ta. 10 Thlarauin tlâng lien tak le insâng takah a mi thuoi a, Jerusalem, khawpui thienghlim, Pathien kuoma inthoka hung tum chu a mi'n entir a. 11 Pathien ropuina chun a sun êng phùt a, a êng mawi dàn chu lung man tam jaspar ang le krustal lung anga fîm a nih. 12 A'n huonna bang chu insâng tak a na, kotkhârpui sawmpahni a nei a, kotkhârhai chu vàntirko sawmpahniin an vèng a; chuong kotkhâra chun Israel hnam sawmpahni hming a'n ziek a. 13 Sak tieng kotkhâr pathum, hmar tieng kotkhâr pathum, sim tieng kotkhâr pathum, thlang tieng kotkhâr pathum a um seng a. 14 Khawpui inhuonna bang chun innghatna lungphum sawmpahni a nei a, chu taka chun Beramte tirko sawm pahnihai hming a chuong bok a. 15 Mi betu vàntirko chun khawpui le a kotkhârhai le a'n huonna bang hai inkhi dingin rangkachaka siem inkhìna hmol a chawi a. 16 Khawpui chu a hang inkhi a, kilometar sânghni le zali vêla sei a na. A dung le a khang le a'n sâng dàn chu a'n chen vong a. 17 A'n huonna bang chu mihriem inkhìna hmangin vàntirko chun a hang inkhi a, metar sawmruk vêla sà a nih. 18 A'n huonna bang dingin jaspar lung an hmang a, khawpui chu dârthlalang anga fîm rangkachak hlîra siem a nih. 19 Khawpui inhuonna lungphumhai chu lung man tam chi hrang hranga siem a na, lungphum pakhatna chu jaspar lung a na, a pahnina chu safir lung a na, a pathumna chu kalkidon lung a na, a palina chu emeral lung a na, 20 a pangana chu sardonik lung a na, a parukna chu karnelian lung a na, a pasarina chu kruso lung a na, a parietna chu beril lung a na, a pakuona chu topaz lung a na, a sawmna chu krusopras lung a na, a sawmpakhatna chu huakintho lung a na, a sawmpahnina chu amethi lung a nih. 21 Kotkhâr sawmpahni chu tuikeplung sawmpahni, tlang khat senga siem a nih. Khawpui kotthlèr chu rangkachak hlîr, dârthlalang anga fîm a nih. 22 Khawpuia chun tempul hrim ka hmu nawh, Lalpa, Iengkim Pathien le Beramte chu an tempul an ni si a. 23 Khawpui êntu dingin ni le thla var hrim a ngai ta nawh, Lalpa ropuina chun a èn a, Beramte chu an khawnvar a nih. 24 Hnam tin chu a ênga chun lêng an ta, hnuoia lalhai khomin an ropuina hung som lùt an tih. 25 A kothai chu sùnah khàr ni ngai naw ni a, zàn a um ta bok nawh. 26 Hnam tinin an ropuina le chawimawina hung som lùt an tih. 27 Thil porchè ieng khom a lût thei naw a, thil tirdakum thawtuhai le khêl hril hmanghai chu lût thei bok naw ni hai; Beramte hringna bua hming chuonghai chauh lût thei an tih.

Revelation 22

1 Chun, hringna tui vadung, krustal lung anga fîm, Pathien le Beramte lalthungphaa inthoka hung luong suok, khawpui kotthlèr lailung taka luong chu a mi'n entir a. 2 Vadung kam tuoka chun Hringna Thing chi hrang hrang sawmpahnih, thla kipa ra a um a, a hnahai chu hnam tin damna a nih. 3 Tongsephur hrim um nawk ta naw ni a, chu taka chun Pathien le Beramte lalthungpha innghat lem a ta, a siehlawhai chun a rong bawl an ta, 4 a hmêl hmu zing tàng an ta, a hming chu an bawkah chuong a tih. 5 Zàn um nawk ta naw ni a, khawnvar var le nisa var ngai ta naw ni hai a, Lalpa Pathien chun anni chu a ên ding a ni si a. chatuon chatuonin inlal an tih. 6 Vàntirko chun, "Hieng thu hi a ringumin a'n dik a nih. Lalpa Pathien, a thlaraua zawlneihai inthuoma thu hriltu chun thil hung tlung vak dinghai chu a siehlaw kuomah inentir dingin a vàntirko a hung tir a nih. 7 Ngai ta, ka hung vak ding a nih. Hi lekhabua hrillawkna thu zawmtu chu a hamtha" tiin a mi hril a. 8 Kei Johan hi hieng thilhai hretu le hmutu chu ka nih. Chuong thilhai hrie a, ka hmu phing leh a mi'n entirtu vàntirko ke bula chun chawibiek dingin ka bokkhup a. 9 Ama chun, "Khâng khan thaw naw rawh, kei chu i siehlaw chanpui, zawlneihai le lekhabu thu zawmtuhai siehlaw chanpui ve el ka ni hi. Pathien chawibiek lem rawh" a ta. 10 Ama chun ka kuomah "Hi lekhabua hrillawknahai hi ip naw rawh, a hun chu a hung tlung têp ta si a. 11 Suol thawtu chu suol zom pei sien, mi tirdakum chu tirdakumin um pei sien, thil indik thawtu chun thaw pei sien, mi thienghlim chu thienghlim pei raw se. 12 Ngai ta, ka hung vak ding a nih; mi tin an thilthaw ang peia pèk ding lawmman ka kuomah a um. 13 Kei hi Alfa le Omega, a hmasa tak le a nuhnung tak, a bul le a tawp chu ka nih. 14 Mani thuom sawpfaihai chu an hamtha ie, khawpui sûngah lûtin hringna thing chu an tlàn thei ding a ni si a. 15 Uik hai, dawithiem hai, inngai chîng hai, tuol that hai, milem be hai, khêl hril inhoi ti le chîng hai po po chu tuolah um an tih. 16 "Kei Isu hin hieng thu hi kohranhai inhriettir dingin ka vàntirko ka hung tir a ni hih; Davida Tobul le a Thla, Sikhawvar var tak chu ka nih" a ta. 17 Thlarau le mo chun, "Hung rawh" an ta. A hre taphot chun "Hung rawh" ti raw se. Dangchâr taphot chu hung sien, a dawn nuom taphotin a thlawnin hringna tui hung dawn raw se. 18 Hi lekhabua hrillawkna thu hre taphot chun hieng thuhai hi poisa dingin ka'n hriettir: Tu khomin hieng thu hi a belsa chun hi lekhabua hremna ziekhai hi a chungah Pathienin belsa vèng a tih. 19 Tu khomin hi lekhabua hrillawkna thuhai hi a lâk hmang chun hi lekhabua ziek hringna thinga mi le khaw thienghlima a chan chu Pathienin la hmang vèng a tih. 20 Hieng thu puongtu hin, "A nih, ka hung vak ding an tah" a ta. Amen. Hung el ta la, Lalpa Isu. 21 Lalpa Isu lunginsietna chu Pathien mihai kuomah um raw se. Amen.